صوفيا: سالينا اياسين نتا عارفني مزيان فين ناخد خطأ واحد على الإنسان ما نبقاش نسامحو حيت صافي خسر تقتي
ياسين: حشومة عليك هدشي الي كديري فيا انا راه كنبغيك
صوفيا: و باز ليك كتكدب بوجهك أحمر ههه
ياسين: و الله يا ما كنكدب عليك بصح انا كنبغيك
صوفيا: حياتي عارفة بلي هدشي غير كدوب نتوما الدراري معمركم تبغو شي وحدة بصح غير تفليات براكة عليا من نفس الكسيط راه حماض
ياسين: بغيتي تسمعي حاجة أخرى وخا، انا الالة بغيت نكمل نص ديني
صوفيا ضحكة باستهزاء: ههه سير حتى تطبق النص الآخر عاد اجي كمل هدا
ياسين: صوفيا انا كنهدر معك بصح
صوفيا: هههه فراسك كضحكني بزاف، انا مكنفكرش فالزواج دبا باغية نعيش ma vie مزال صغيرة و شحال من حاجة ما درتها en plus انا مكنصلحش للزواج عطا الله الي غدي تجلس ليك فالدار و تربي ليك المخلفات ديالك، انا خليني يلاه نتكافا مع رأسي اوك شيغي
ياسين: و هدشي كامل الي دوزنا كان غير تفليات ياك؟
صوفيا: نتا غير محطة عابرة فحياتي بحالك بحال اللولين و القطار مكيوقفش فمحطة وحدة أو لا؟ 😉
ياسين كيشوف فيها بتساؤل، حط 100 درهم و مشا بلاما يهدر صوفيا حتى هي ناضت بلامبالاة و ركبت اللوطو ديالها
البطلة ديالنا سميتها صوفيا بنت عندها 23اية فالجمال سمرة طويلة شعرها واصل كتافها فالبني و عينيها فالعسلي كبار، لاطاي هو هداك صدر مشدود مؤخرة بارزة كلشي فبلاصتو من عائلة غنية الأب ديالها مدير ديال مجموعة مدارس خاصة عندها أخ واحد سميتو مروان متزوج مهندس و ساكن مع والديه فالفيلا ديالهم، شخصية صوفيا مزيج من الجرأة التكبر و الغرور و طيبة القلب مي شيطانة بمعنى الكلمة
صوفيا: الو سارة عرفتي مركز التجميل الي كنمشو ليه نلقاك تماك بغيت نصبغ شعري
سارة: وي بيب مي قوليلي شبغاك هداك ياسين؟
صوفيا: من بعد احبيبة انا دبا كنسوق
سارة: ok a tout à l'heure
صوفيا: الو إحسان فينك؟
احسان: وي بيب انا فالاصال مالك؟
صوفيا: نلقاك فسونتر الي موالفين نمشو ليه اوك؟
احسان: اوك ساعة و نكون عندكم
سارة و إحسان هو الصديقات المقربات لصوفيا؛ سارة متوسطة الطول رقيقة و زعرة عندها غمازات كتقرا فالافاك أصغر من صوفيا بعام من عائلة بوكو عاقة و لكن عكس شخصية صوفيا، إحسان قد صوفيا فالطول و العمر و نفس الشخصية تقريبا زوينة بيضة شعرها كحل و ذكية فالقراية و التحرميات، ماماها مصممة ديكور و باها دكتور تجميل
صوفيا: ههه كريت واحد البنت و قلت ليها تمشي تقرب منو و فين نجي انا يبان ليا هو واقف معاها و ندير راسي مصدومة و نغوت عليه قدام الناس من بعد غدي يجي يطلب السماح و حيت انا قلبي حنين مغديش نسامحو هههه ايوا سالات القصة
احسان: ههه خطار حلفتي يا حتا نفارقي معاه
صوفيا: وراه طلع ليا فراسي أوف و زوينة كاع فين قالي نتزوجك مسكين كيصحابليه قاتلة راسي باش نتزوجو ههه
احسان: ولكن انا مقلقة منكم حيت ما شاركتوني فالخطة 😑
سارة: ياك قلتي هاد السيمانة ما تهدرونيش عندي امتحانات ايوا هدشي الي درنا
صوفيا: وي حبيبة ما بغيناش نديرونجوك
احسان: ماشي مشكل حبيباتي
المهم كملو و خلصت صوفيا من الكريديت كارد ديالها و ركبو معاها اللوطو
صوفيا: اوك بنات موعدنا مع 12 كونو واجدات و عندكم يعيق بيكم شي واحد
سارة: انا ماما ما عندها مشكل
صوفيا: حتى انا مي ماما ولات متشددة شوية مؤخرا المهم باي هاد الساعة
احسان و سارة: باي بيب
رجعت صوفيا للفيلا لقات ماماها سعاد عندها 48 عام كتشبه ليها صوفيا ما عدا لاطاي ربة بيت من عائلة غنية و معروفة، جالسة مع مرت خوها إيناس زوينة عندها 25 عام، هي و صوفيا ممتفاهمينش بزاف، اصلا صوفيا هي الي أسلوبها شوي قاصح مع الناس و مكتحترم حد
سعاد: على السلامة
صوفيا: ماما come on يلاه 9 زعمة
سعاد: ما قلنا والو
صوفيا: ماما شوفي شنو شريتلك، واحد المكانة من دكشي الي كيعجبك
سعاد: امم و شنو سبب هاد الكادو شي طلب من وراه ياك؟ باينة
صوفيا عنقتها: علاش انا ما منحقيش نشري ليك كادو خاص ضروري من المقابل؟
سعاد: ههه غير ضحكت معك ابنتي الله يرضي زوينة بزاف
صوفيا: مح عليك الفنون يلاه انا نطلع لبيتي
سعاد: جلسي معانا شوية، اصلا العشا قرب يوجد و باباك ها هو جاي فالطريق
صوفيا: اوك بلاتي ندوش و نجي
سعاد: سيري ابنتي
نمشو عند صوفيا خلوها تعاود
طلعت دوشت لبست بيجامة و هبطت لقيت بابا و مروان جاو سلمت عليهم و جلسنا كنتعشاو، انا علاقتي مع بابا زوينة بزاف هو كيفهني و الي بغيتها كيعطيها ليا بدون تردد ندير لي بغيت ندخل فالوقت الي بغيت حيت داير فيا الثقة و عارف بلي ما عمري غدي نشوهو، أما ماما شوية مزيراني و بابا ديما كيقولها تخليني ندير الي بغيت، خويا مروان حتى هو بغا يحكم فيا مي ماشي صوفيا الي كتخضع لشي حد بسهولة، ديما انا و وياه مضادين و حتى مرتو ما عنديش معاها كتجيني تافهة و بغا دير فيها بنت دارهم و هي أعلم الله شمدوزة، انا كملت القراية و جلست كنت دايرة les classes rèperatoire،
كملت العشا و جلست كنهدر مع بابا كل مرة كيجبد ليا سيرة القراية فالخاريج مي انا ما بقيتش باغة نقرأ بغيت نعيش حياتي نستمتع بوقتي، وصلت ديك 11 طلعت لبيتي، تأكدت بلي كلشي نعس و طفا الضو، لبست ميني فالكحل كتبري و طالون كحل مع بوشيط فالكحل و الأبيض، درت مكياج سموكي و ركزت على عينيا مع كبار جاو هوما هدوك، رشيت البارفان، و خرجت بشوية كنتسلت، هاد المرة ما ديتش اللوطو حيت غدي نتفرش، سارة هي الي وصلتني، لابسة حتى هي ميني فالحمر و طالقة الشعر، طرقنا احسان الي لابسة كسوة فالموف و جامعة شعرها، جينا بوكوصات الي طايح أكثر من النايض هاد الليلة، توجهنا للclub الي لقيناه عامر كيليميني و الهاي كلاس
دخلنا الموسيقى على الجهد ها الي يشطح ها الي جالس مع حبيبتو يفلورتي معاها، شدينا انا و البنات بلاصتنا و سارة غير كتحنقز حيت اول مرة كتجي هنا تحمست بزاف، شوية جا السيرفور: وي انسات شنو تشربو
سارة: شنو كاين؟
غمزتها: كيفاش شنو كاين حنا جينا غير نشطو ماشي نشربو
احسان: صوفيا حبيبتي عفاك خلينا نجربو شي حاجة ديما كنجو و مكنشربو والو بغيت نجرب الشامبانيا و لا الفودكا
صوفيا: واش تسطيتي ولا شنو؟!! لا بغيتي تخرجي علينا ولا شنو
احسان: وايلي فين مشات صوفيا الي ما مسوقة لحد دير الي بغات
صوفيا: نتي قلتيها ندير الي بغيت، ايوا انا ما بغيت نشرب و معمري غدي نشربو
احسان: ايوا انا بغيت نجربو شحال غدي نعيشو كاع؟
سارة: وي انا مع احسان
صوفيا شافت حتى عيات و هي تقول: دبرو رأسكم شغلكم هداك
احسان: اوك بيب، relax كلشي غدي يكون مزيان عيشي اللحظة
صوفيا: انا نوض نرقص شكون غادي معايا
سارة: انا، إحسان طلبيلي فودكا معك
احسان: اوك متعطلوش
مشينا انا و سارة حدا الديدجي و بقينا كنشطحو حتى سخفنا
سارة: يلاه نرجعو
رجعنا لقينا لالاهم احسان سكرانة و كضحك مع واحد خينا و هو باغي يستغلها، مشيت عندهم: شنو واقع هنا؟
صوفيا: جلسي للأرض قالك نتي غير من الريحة غدي تسكري خلي إلا شربتيه
سارة: عفاك غير كويس واحد بليز
صوفيا: سارة شوفي حالة احسان واش باغية تولي بحالها؟
احسان: أوف براكة مليت يلاه نشطحو ههه
ناضت كتمايل لبلاصة الرقص و صوفيا تبعاتها
احسان: ههه و هو وووو وي سي لا في لا لا يوبي يلاه اصوفيا حركي هداك الزك هههههه
صوفيا: إحسان يلاه صافي شوهتينا الزمر
احسان ما داتهاش فيها و بقات كتشطح و تغوت و ضحك، أما صوفيا غير واقفة كتشوف فيها، شوية حست بشي حد نغزها من اللور: ايوا ها القلا**!!!! تلفت لقات واحد البرهوش: ههه لاطاي عندك صاروخ
ما جا يكملها حتى صرفقاتو و بقات كتصرفق و تقمش و تسب و كلشي مجموع عليهم، بردت غدايدها فيه مزيان و ناضت مشات عند احسان جراتها بزز و رجعو عند سارة الي لقاوها دايرة منافسة مع وحدين شكون الي يشرب 10 كيسان فدقيقة، سارة يلاه شربت الكأس الرابع و هي تغيب
الشاف: و دبا غدي تعاود ليا على العملية كاملة و بلا كدوب هاد المرة حيت إلا كدبتي غدي غير تجيبها فراسك
الشخص: وخا وخا اهئ اهئ اهئ
بعد نص ساعة، خرج الشاف من عند المتهم و مشا لبيروه
كوميسير عطاه التحية: سيدي المعلومات الي عطانا سعيد صحيحة كاملة و العملية غدي تنفذ غدا مع 1 ديال الليل
الشاف دار ابتسامة جانبية: مزيان، ما بقا والو و ندخلك للحبس اعويطة، جيب ليا قهوة و عيط ليا على حميد قولو يجي دبا
الكوميسير: علم سيدي، عطا التحية و خرج
هادا هو البطل ديالنا صلاح الدين مي كيعطو ليه غير بصلاح، عندو تلاتين عام ظابط ممتاز ففرقة مكافحة المخدرات، بوكوص حروفو زعرين جسمو رياضي و طويل عايش بوحدو؛ عائلتو المكونة من باه و مو و خواتاتو جوج ساكنين فمدينة أخرى، شخصيتو قوية و صارمة جدي فخدمتو و كلشي كيخاف منو
دق دق دق
صلاح: دخل
حميد عطا التحية: سيدي
صلاح: حميد تفضل
حميد: قالو طلبتي وجودي
صلاح: وي خديت المعلومات على عملية غدا بغيتك توجد الفرقة الي غدي تمشي معايا و بغيت كلشي يكون فسرية تامة
حميد: كون هاني سيدي، سيدي لاش داير النظارة يا كما عينيك كيضروك
صلاح: ما حاملش الضوء، 4 سوايع و انا كنحقق مع هداك المجرم ضروني عينيا من الضو، باقي كاينة حاجة أخرى ما سولتيها؟
حميد: سمحلي سيدي، انا نمشي نخدم على خطة غدا
صلاح: فين تساليها اجي وريها ليا نشوف
حميد: سيدي هادي دبا 2 ديال الليل انا كنقترح عليك ترجع للدار حتى لغدا
صلاح: لا انا عارف مصلحتي فين شكرا
قاطعهم صوت الصداع على برة، خرجو يشوفو شنو واقع، لقاو ثلاثة البنات محيحات مع واحد السيد
السيد: الالة ما سوقيش والله لا خرجتو منها
صوفيا: وا الشريف راه قلت ليك مقصدناش واش ضروري من هاد الفضيحة، عطيتك الفلوس صافي خلينا نمشو
السيد: نتي مهدرتيش معايا بالأدب و بغيتيني نسامحك؟ كون هدرتي معايا مزيان كاع منوصلو لهاد المواصيل، قليلة الأدب
صوفيا: ايييي نتا جمع رأسك لنتفاهم معك
الحيوان الآخر
صلاح: شنو واقع هنا؟!!
السيد: سيدي هاد البنت ضربت ليا اللوطو ديالي و زادتها بقلة الأدب
صوفيا: راه غتجمع فمك عندك لنوريك قلة الأدب ديال بصح 😡
صلاح: سكتي نتي انا هو الي نهدر، حميد دخلهم عندي نشوفو هاد الحريرة
دخلو عندو و وقفو قدامو و هو جلس فبيروه: غدي تعاودو ليا شنو وقع و بلا صداع و كلها يحترم الآخر
السيد: انا أسيدي كنت غدي ما بيا ما عليا حتى ضربتني اللوطو ديال هدي من اللوطو هرستها ليا من اللور و بقات كتخاصم و تعاير فيا بحال إلا انا الي ضربتها عيطت للبوليس و جينا هنا
صلاح: شنو سميتك بعدا؟
السيد: نبيل نعم أسيدي
صوفيا بضحكة استهزاء: هه قالك نبيل اسم على مسمى مشاء الله
صلاح شاف فيها: فين كنتي نتي و صحاباتك؟ باينة فشي بار ريحة الشراب عاطية
صوفيا: يمكن ماشي هدا هو موضوعنا اسعادة الكوميسير؟ كاينة الشميسة ياك؟😉
احسان و سارة: ههههه
صلاح ضرب البيرو: سكتو، مزيان تبارك الله و نتي كيصحابلك رأسك شنو باش تهدري معايا بهاد الطريقة؟ انا هو الي نسول هنا فهمتي؟
صوفيا: حتى انا غير سولتك مالك كترتعد بوحدك، غير تكايس على رأسك لا طرطق شي عرق
صلاح زاد تعصب: واش عارفة الالة رأسك فين كاينة و ما من كتهدري؟
صوفيا: اه فكوميسارية و كنهدر مع كوميسير شنو الجديد فهاد الشي؟
حميد: ايه الالة حترمي رأسك !!
صلاح: صافي احميد؛ و نتي هدري فين كنتي و من منين جايين و شنو وقع حتى ضربتي السيد
نبيل: باينة فيهم جايين من شي دعارة
صوفيا تعصبت و نسات راسها عطاتو واحد التصرفيقة عمرو ينساها: حنا أشرف منك الحيوان
نبيل ناض بغا يضربها شدو صلاح: واش من نيتك باغي تضربها و قدامي!!!
نبيل: سيدي ما شفتيهاش شنو دارت ليا؟
صلاح: و لو نتا الي جبدتيها، شاف فصوفيا: مي هدشي مكيبررش أفعالكم بجوج، و دبا هدري انا كنسمع
صوفيا: إحسان جلسي عفاك خلي الباقي من هاد الليلة يدوز على خير
احسان ما سمعات ليها و شعلت السجالة و ناضت كتحيح هي و سارة و صوفيا مدابزة معاهم حتى ضربو اللوطو الي قدامهم: ها الي ما بغينا تفو يخخ
جا نبيل عندهم دق فالزجاج: هبطي
صوفيا: سمحلنا اخويا عفاك راه ما شفتكش؟
نبيل: هبطي بعدا شوفي شنو درتي ديك الساعة نهدرو
صوفيا: شوف اخويا راه تعطل الوقت، قولي غير شحال بغيتي و انا نعطيه ليك
نبيل: لا اختي هبطي و شوفي الخسارة الي درت ليا بسبب تهورك !!!
صوفيا: وصافي عارفة و طلبت منك السماح دبا انا إلا هبطت شغدي تستافد غدي نرجعها كيما كانت متلا؟
نبيل فتح باب اللوطو: هبطي دبا
صوفيا: ايه نتا شهاد الزعامة؟!! ما هبطاش هي ما هبطاش
نبيل جبد تلفونو: ما بغيتيش وخا، نشوفو فين غنوصلو على هاد القبل البوليس هوما الي غدي يفكو لينا هدشي
صوفيا: و هذا ما وقع، انا ما قصدتش و عرضت عليه الفلوس باش يعوض خسارتو مي هو بغا يعقد الأمور و صافي
صلاح: اممم دبا نتي اعترفتي بجريمتك؟ و لاش كتسبي فالسيد و تعايريه؟
صوفيا: حيت هو زاد فيه و بقا كيدخل و يخرج فالهدرة
صلاح: نبيل دبا نتا علاش ما خديتي الفلوس منها و صلحت اللوطو ديالك بلا اشكال؟
نبيل: حيت أولا محترماتنيش و هدرت معايا بقلة أدب و تانيا انا ما محتاجش فلوسها عندي خيري
صلاح: وخا عندك هي غير بغات تصلح الخطأ ديالها، و بنسبة لهدرتها عذرها اصاحبي راه دوزت اكفس ليلة فحياتها مسكينة و نتا زدتي على ما فيها و دبا صوفيا بغيتك طلبي منو السماحة و حتى نتا انبيل و كلها يرجع فحالو
نبيل: مغديش تمشو حتى تعتذر ليا هدي، أشار بصبعو لصوفيا
مروان: علاش مالها شنو دارت؟
نبيل: هي الي كانت سايقة فين وقع الحادث
و ما تعاملتش معايا باحترام
صوفيا: انا معنديش علاش نعتذر
مروان: و مزال عندك الوجه تهدري، اعتذري للسيد خلينا نمشو
صلاح: انسة صوفيا مغديش نباتو هنا، هو ما طلب منك شي حاجة مستحيلة يلاه اعتذري
صوفيا شافت فخوها و فصلاح؛ بعد صمت طويل: سمحلي انا كنعتذر على تصرفي قبيلة معك
نبيل: و انا قابل اعتذارك
صوفيا كتشوف فيه شوفة شريرة مكرهتش تقتلو، حست بكبريائها ضاع، قاطع تفكيرها مروان: يلاه حسابنا حتى للدار
توادعت مع البنات و مشات معاه هي مخايفاش من ردة فعل عائلتها حيت عارفة بلي باباها غدي يسامحها دغية
رجعو للفيلا لقاو باباها و ماماها و إيناس كيتسناو بفارغ الصبر
باباها: بنتي على سلامتك شنو وقع، فين مشيتي فهاد الوقت بلا ما تخبريني
سعاد: صوفيا ياك ابنتي وليتي تسلتي من الدار و على آخر أيامي نشوفك جاية من الكوميسارية هادي هي تربيتي؟ و لكن هدشي منا حيت حنا الي ضسرناك!!!
مروان: مزيان تبارك الله كتسلتي من الدار بحال الشفار تشطحي و تشربي فالبيران و ختمتيها بالكوميسارية عندنا السيبة هنا؟!!!
صوفيا: انا ما شربتش اه كنعترف بلي مشيت للبار و لكن مشربت
مروان: براكة من الكدوب، ريحة الشراب عاطية فيك!!
صوفيا قربت ليه: شم فمي شوف إلا كنت شاربة
مروان دفعها: حترمي راسك، شوهتينا و شوهت رأسك و دايرة فيها محترمة
صوفيا بالغوات: انا ما شوهت حد!!و انت ما سوقكش فيا هدي حياتي نسيرها كيف بغيت
سعاد: صوفيا!!!!
مروان: ها شوفي اماما نتيجة دلعكم خاصها شوية و ضربني كاع و بحال والو نوبتك نتي و بابا جاية
سي يوسف( أب صوفيا): صافي سكتونا الليل هدا غدا غدي نهدرو فهدشي، دبا الله يخليكم ما قاد على صداع، خلاهم و طلع
مروان جر مرتو و طلع لبيتو، شوية و هي تهدر سعاد: الله يسلط عليك ابنتي الي يربيك من أول و جديد هدشي الي بغيت ليك و الله يهديك، طلعت و خلات صوفيا مفقوصة
صبح الصباح نهار جديد و احداث جديدة عند صوفيا
فقت مع 2 ديال النهار، دوشت لبست شورط دجين و تيشرت فالشيبي هبطت لقيتهم كيتغداو حتى حد ما هدر معايا و حتى انا ما ديتهاش فيهم عنقت بابا و جلست حداه، هو اكتفى بالابتسامة، كملنا الغدا و انا طلعت لبيتي نشوف هدوك الحلوفات شنو دارو: الو إحسان كي صبحتي السكرانة؟
احسان: أوف راسي كيضرني و زايدها نكير بابا و ماما، كلشي منك اصوفيا
صوفيا: ياك انا قلت ليكم بعدو على الشراب،دبا ولا اللافوت مني ياك؟
احسان: و نتي الي ديتينا لتماك من الديبار؛ المهم ما علينا نتي شنو دارو معك داركم
عاودت ليها شنو وقع و حتى هي عاودت ليا شنو دارو ليها والديها ضحكتني فين قالت دايرين ليها عقوبة ههه ولات بيبي، هدرت مع سارة حتى هي القضية عندها ما مسلكاش، قطعت معاهم لبست كسوة صيفية حد الركبة سميطات فالغوز و الأبيض و صندالة صبع، رشيت بارفان و هزيت صاكي ديال شانيل و نظاظر شمس ، هبطت لقيت ماما فالصالون غير شافتني و هي تنوض: فين غادية بالسلامة؟
صوفيا: خارجة ندور شوية قنطت
سعاد: ايه مزيان تحركي رجعي لبيتك و الله لا خرجتي مكافتكش فضيحة البارح تزيديها وحدة اخرى
صوفيا: ماما رولاكس، أنا غدي غير نخرج ماشي نقتل و لا نشفر، en plus البارح مدرت شي حاجة خايبة باش نتعاقب هكا
سعاد: صوفيا مغديش نزيد معك كلمة أخرى رجعي لبيتك عندك عقوبة!!!
صوفيا: ماما انا ماشي بنت عندها 6 سنين باش تعاقبيني، أنا عندي 23 عام و مسؤولة على أفعالي و قراراتي اوك؟
ايناس: صوفيا حشومة سمعي لماماك راه بغات غير مصلحتك
صوفيا: نتي ما دخليش بيناتنا
سعاد: تكلمي بأدب مع مرات خوك، هي أكبر منك و خاصك تحترميها
صوفيا كنتفخ و تقلب عينيها
سعاد: ها السخط ها الرضا، خرجت السخط و بقيتي الرضا و دبا اختاري
صوفيا: اااااااافففففف، طلعت لبيتها و بقات كتغوت و تضرب الديكور، بعد ما تهدنت بدلت لباسها و فتحات البيسي تلهي رأسها فيه
وجد العشا و جات عندها الخدامة: لالة صوفيا العشا واجد راه كيتسناوك
صوفيا بالغوات: ما بغيتش نأكل و ما تصدعينيش!!!!
هبطت الخدامة عندهم قالت ليهم شنو قالت صوفيا و خلاوها على راحتها
الخدامة: ايه اخالتي شحال قبيحة هاد صوفيا
دادا حورية: وخا قبيحة و لكن قلبها بيض، وجدي ليا عشاها فصينية، أنا نديه ليها
الخدامة: وخا
وجدت ليها الصينية و طلعت عند صوفيا دق دق: بنتي صفصف هدي انا داداك فتحي الباب الكبيدة ديالي
صوفيا: دادا عفاك خليني ما بغيت نهدر مع حد و ما فياش الجوع
دادا حورية: وايلي بنتي حشومة عليك على خاطري فتحي
صوفيا متقدرش تخسر الخاطر ليها، فتحت ليها الباب و دخلت: مال الأميرة ديالنا مقلقة
صوفيا: دادا واش الواحد حرام يتمتع بحياتو؟
دادا حورية: لا ابنتي ولكن فحدود ماشي توصل بيه القضية للكوميساريا و المحاكم
صوفيا: ههه و ناري زدتو فيه راه عادي غير حادثة عادية
دادا حورية: هي عادية و لكن ابنتي الشوهة هديك، غتولي دبا مشبوهة نتي و صحاباتك و فداك الوقت ديال الليل راه المجتمع ما كيرحم، الي شافكم غدي يقول خارجات الطريق
صوفيا: كي شفتيني انا مسوقة للمجتمع؛ كلها يديها فراسو و يخلي عليه عباد الله فتيقار، تقول هوما ملائكة
دادا حورية: بنتي هدا المغرب ماشي اوروبا؛ كلي و نعسي بكري براكة من السهير
صوفيا: اوك تصبحي على خير
صلاح: واش كلشي شاد بلاصتو احميد؟
حميد: وي سي صلاح كلشي هو هداك، حنا رهن إشارتك
صلاح: مزيان، و دبا غدي نتسناو
بقاو كيتسناو شي ساعة عاد باش بداو كيجو المهربين و تجار المخدرات متراسهم عويطة كيتسناو الباطو المحمل بالمخدرات و الحشيش؛ البوليس متخبيين يتسناو إشارة صلاح، واحد الشوية جا الباطو، خرج منو رجالة لابسين كلشي كحل و واحد فيهم هو الي كيهدر مع عويطة، شوية بداو كيهبطو المخدرات من الباطو، هنا هجمت البوليس،ها الي هرب ها الي شد فرديه و بقا كيطلق الرصاص، صلاح خلا المواجهة بين البوليس و المافيا و تبع عويطة الي هرب مع رجالو، طلع صلاح فاللوطو و بقا تابعهم، واحد فيهم كيضرب اللوطو ديالو بالرصاص، هرس ليه الجاج ديال اللوطو كامل و مع ذلك مزال تابعهم، جبد فرديه و ضرب الرويضة و ما بقاوش قدرو يتحكمو فاللوطو، حتا ضربت مع بوطو ديال الضو، خرج صلاح كيجري عندهم، لقا عويطة كيحاول يهرب: حصلتي اعويطة، أيام العز سالاو أوجه الحبس
صلاح شدو دار ليه المينوط: كون اكيد هاد المرة مغديش تخرج منها بسهولة
جات البوليس شدو المهربين قلال الي هربو، مي المهم بالنسبة لصلاح هو فين شد عويطة، داوهم للكوميساريا و جراو معاهم التحقيق ما كملو حتى شي 4 ديال صباح، رجع صلاح لدارو دوش و نعس
سي يوسف: صوفيا بنتي فيقي بركة من النعاس
صوفيا: بابا صباح الخير
سي يوسف: صباح النور أميرتي سمعت بلي مقلقة، البارح مجيتش للعشا
صوفيا: علاش؟
سي يوسف: عرض عليا واحد صاحبي نتعشا معاه، بنتي بغيتك تعرفي بلي انا فعلا أول البارح معجبنيش شنو درتي مي وخا هكاك سامحتك و لكن بغيتك تواعديني ابنتي تكون هدي آخر مرة
صوفيا: كنواعدك
سي يوسف: الله يرضي عليك ابنتي يلاه نوضي دبا نفطرو انا و نتي على خاطرنا راه من 9 و انا كنتسناك
صوفيا عنقت باباها: كنبغيك بزاف ابابا بغيت الله ما يحرمنيش منك
قصة الظابط الصارم و الجريئة
محتوى القصة
التنقل بين الأجزاء