رحاب : ديك الساعة شغلك هادتك ..بغيت نهضر اوديو نهضر اوديو تعرف بعدا باللي انا بنت
واءل : بيزار !
رحاب : شنو اللي عجب فهادشي؟
واءل : اول مرة نهضر مع بنت وتبدا تأكد ليا باللي هي بنت .. نوغمالمون البنات كاع مكيتسوقو لهادشي ... كيبقا الولد هو اللي تابعهم يتعرف عليهم ماشي هما اللي تابعينو
رحاب : بغيتي تقول تابعاك وكنبرهن ليك باللي بنت وكدا ياك
سدات عليه فخطرة وسوبريماتو من ليزامي . بقا مصدوم وراسو ضارو . رجع كيقرا المساجات من اللول كيحاول يستنتج . فآخر المطاف قال كاين بنات هما كيجبدو الولد . كمل غداه وناض نسا الموضوع ورجع يكمل على شغالاتو .
لبسات فاتي قفطان راءع احمر موبرا ، اخيرا شافت وجهها فالمراية وطلقات شعرها وقادات المكياج ولبسات الطالون .. هادو طبعا حوايجها اللي ديما مخبييين مكيبانو غير من مناسبة لمناسبة . هي ماشي خايبة زوينة .. وزوينة بزاف .. وغير مسحة للوجه كتبان كتبري . لاكت مع الاسف مهملة لنفسها ومهملة بزاف ، ولو لا السبوع اللي معروضة ليه مكانتش غادي تقاد حالتها ولا تشوف فالمراية . دقو عليها الجيران وخرجات لقاتهم كاملات مجموعات .. ها اللي لابسة الاصفر ها الاخضر ها الموف والتكاحل و الروايح كتشاير ، طلعو كاملين بيهم جملة عند المرا لللي ولدات وتجمعو فالصالة لقا مرت الكوميسير سبقاتهم وجالسة لابسة قفطان كلاص وصاك فيديها وطالقة شعرها كاري زعر وكتبتاسم بالادب مكتجمع مع تاوحدة .. مكتتفيا تفرج فالعيالات اللي محزمات مع اللعبات وعاطيينها لتدوار لحريرة ... وحدة تنسيك فالاخرى تقول مكيجلسوش عليهم . انا فاتي غير كتفرج وضحك .
دخل واءل معشي .. مشا نيشان لبيتو وسد عليه . مامولفاش ليه يدخل معطل ..مازنلفاش ليه يجلس فالقهوى حتى ترشق ليه عاد يرجع .. لاكن مؤخرا ولا كيدخل معطل وحتى لعشا كياكلو فالزنقة . سمع الشطيح والرديح فوق منو عرف باللي فاتي تما مع العيالات خوا عليه الما شلل من العيا وتكا عريان بالشورط كيتفرج فالتيلي .. طاحت ليه فبالو رحاب وهوا يجبد تيلي و سيفط ليها مسج
رحاب : ولو ... فاش نجي غانحي عند لاجونص نيشان .. وعلى هاظ العناد اللي فيك مغنسيفطش ليك صورتي حتى نجي عندك نيشان
واءل : قويصحة مع راسك!
هضرة تجبد هضرة .. بقاو مجمعين مرة اوديو مرة كتابيا حتى نسا الوقت شحال داز وختمها وقال
واءل : غنخليك دابا جا وقت النعاس .. غدا ونكملو الهضرة واخا الحديث معاك شيق ومحسيتش بالملل .. سيفطي ليا الةصف ديالك قربيني من الصورة
رحاب : هخهه واخا.. نزوقها ليك ولا بلاش
واءل : ههه لا بلاش بلا زواق ... ياك فاش ترجعي من السفر غاتجي ونشوفك مباشرة .. بلا متزوقي الصورة خليها طبيعية . مهم غدا نقرا الوصف حيت دابا عياان وعيني كيتسدو
رحاب :اوك ان شاء الله.
سلا الهضرة ودار الكود للتيلي باش ماشي اللي جا يدخل وحطو عند راسو وتقلب على كرشو نعس .
دخلات من بعد ماسلا السبوع فاتي لبيت النعاس لقاتو ناعس كل رجل لايحها فجهة .. بدلات حوايجها ومسحات وجهها ولبسات بيحانة عادية بحال ديما نعسات فيها .
داز اسبوع كامل وفاتي كما هي وحتى واءل مابقاش كيضغط عليها بحال اللول بلعكس حتى صوتو مابقاتش كتسمعو . وحتى النكير ديالو عليها مشا .. رجع كيخرج الصباح وميدخل حتى لليل .. حتى كيلقاها نعسات وحقو دالعشت مغطي ومحطوط فوق الطبلة . باقا غضبانة كتسنى من ويحزرها ... قاطعة معاه الهضرة .. لاكن واجباتها كزوجة كديرهم ،سيمانة و هضرتها مكطيحش على هضرتو ... ومكيتلاقاوش اصلا باش تيح ليهم فرصة ويهضرو .
الويكاند ... صابح واءل ناعس بحال ديما .. وصابحة فاتي كتخمل الكوزينة وتستف .. دايرة ليكات فيديها و كتنضف ملهية مع ماعنها . ضربات 12 دازت للطاجين ديال الحوت تبدا فيه باش تجيبو مع الغدا قد قد .
حل واءل عينو وتقلب على ضهرو كيستوعب ... اول حاجة دار هز تيليفونو ودخل واتساب بالتسامة
واءل : صباحو
رحاب: لغدا هادا ونتا عاد فايق ههه بايت قصار بان ليا ؟
خرج من الببت وهوا يرجع فالبلاصة هز معاه تيليفون ديالو اللي كان حداها فوق الناموسية دخلو معاه للحمام .
خرج من الحمام ومشا لبس حوايجو وقاد راسو .. جبد فلوس اوراق زورق من جيبو حطهم فوق الطبلة كمسروف لفاتي الى حتاجت شي حاجة ومشا خارج حتى كتوقفو من الباب دالكوزينة
فاتي: وااءل
تلفت : شنو؟
فاتي: راه ماما عارضة علينا للغدا ليوم
واءل:: غير سيري انا عندي الخدمة ليوم .. خليها حتى لمرة اخرى
فاتي: وشنو غنقول ليها دابا؟
واءل: قولي ليها خدام
فاتي: وشنو ؟ تلحق علينا ؟ حشومة راه دايرة بحسابنا
واءل : نتي فيك الخير والبراكة .
سد الباب ومشا خلاها واقفة .. كملات طاجينها اللي كانت ناوية تاخد معاها عند مها وجمعاتو .. لبسات جلابتها وجمعات شعرها ونزلات هازة الطاجين فيديها مغلفاه وهبطاتو حطاتو فالطوموبيل وزادت نيشان عند مها . تجمعو على الغدا والحوار كامل داير غير على الهضرة الخاوية .
الام : وانوووضي ديري شي بزقول ولا بزقولة .. راه الرجال مافيهم تيقة
الام : الناس والدين البنات وانا والدة خطيات .. الراجل عندك باااقي صغييير وعاطي للعين وعزيز عليه يعيييش.. الى متميتيش عليه بالولاد غيهزك ويطلقك ويطييير مع شي وحدة اخرى
سكتاتها فاتي لعصبية وناضت :رااسي ضاارني والزمر من الصباح بااغا غا فين نرتاااح .. نحي هنا تبركي عليا بالنكير والعضرة .. نمشي بحالي اختي مالي اش جابني هنا كاع
ناضت كتسوط هزات طجينها هبطاتو حطاتو فالكوفر وحلات الباب بغات تركب حتى كتوقفخا بنت حومتها كتسلم عليها وضحك ، لابسة دجين وطالون عالي وقميجة بيضاء محلولة من الصدر ... الشعر مطلوق والمكياج والدفار مصبوغين والصاك فاليد
-فاتي! غبرتي ! شخال هادي ماشفناك مالك مريضة؟
شافت فيها فاتي باستغراب : لا اختي مامريضاش مالي باينة مريضة؟
-بنتي ليا فشي شكل .. قلت يمكن مريضة
-فاتي الحمد لله ماعندي حتى حاجة ...لقيتيني زربانة احبيبة سمحي ليا
طلعات فاتي فسيارتها وديمارت رجعات بحالها . دخلات لدارها وزدحات عليها بابها ومشات نيشان وقفات قدام مرايتها فالحمام وبدات كتشوف راسها .. ماشي هادي فاتي .. ماشي هي اللي شاف واءل النهار الاول .. هادي وخدة اخرى دات وجابت فالزمان وعندها 4 دالاولاد والراجل متقاعد وهي اللي خدامة عليهم . ماشي هادي فاتي اللي مغرقها راجلها حوايج وشراوط .. ماشي هادي اللي فين ما يدخل يجيب معاه شي حاجة ليها وعمرو دخل عليها بيديه خاويين .. ماشي هادي اللي كان يضل يلعب فشعرها ودفرو ويفسخو بلا مايعيا ولا يمل .. ماشي هادي فاتي اللي كان يتسطى عليها واءل وماينعس حتى يسمع صوتها .. يبدا النهار بصورتها وكان يتمنى امتى تولي حلالو ويجيبها لدارو .
من بعد السهوة فالمراية نترات ديك الجلابة ومشات لاحتها فالزبل . . طلقات الرشاشة ودخلات تحتها كتغسل وتذكر اياماتها مع واءل ، خرجات وجلسات حدا المراية ملوية على راسها فوطة .. دوزات يدها على خدودها الوردية و جبدات كريم كدهن بيه .. سرحات شعرها وتبالات براسها . دارت عكر خفيف وحاولات تتزين شوية . واخا هوا اللي غالط فحقها وشرك ليها حلابتها مافيها باس تصالح معاه هي وتصلح الوضع ... دير مبادرة واخا من المفروض هوا اللي يطلب منها السماحة ، لاكن مللي ماجاش يعتاذر فمابقاتش قادرة على الجو اللي ولات فيه .
رجع متأخر بالليل بحال القاعدة . حل الباب ودخل مشا نيشان لبيتو حط الصاك ديال لاصال ودخل للدوش دوش .. كيسمع التقرقيب فالكوزينة ومامشاش كاع يطل . دوش ولبس شورط خفيف وتكا شاد تيليفون فيدو . دخل مباشرة للواتساب بعت مسج
واءل : هادي هي غنوضل نعيط ليك؟ اونيلن ولاسلام لا كلام!
رحاب : ديزولي واءل راه عاد دابا دخلت .. وراك فبالي ماتقلقش مني
واءل: تقلقت الصراحة .. حيت كنشوفك اونلين و ماباغا حتى تسلمي
رحاب: يالاه وصلت .. مابقاش ليا الوقت ويالاه دابا خرجت من الدوش ..قلت غنتكا ونعيط ليك
واءل: بالصحة الاللة
رحاب: الله يعطيك الصحة ههه اش كدير؟
واءل: والو ..يالاه دخلت تا انا .. بوحدك ؟
رحاب : بوووحدي ياكما تجي تونسني
واءل: بابتسامة ) ماكرهتش.. مي نونس وحدة مزال مشايفها ! ماشي عادي! ... دابا يلا طلعتي وحدة عكس داكشي اللي راسم فبالي اش غندير معاك؟ والمشكيلة ولفتك
رحاب: ههه عندك الحق .. دابا نتا كتشري الحوت فالماء
رحاب : ههه والله فيا مايسيفط ليك صورتي وتشوفني ونهضرو اوديو ... مي احسن حاجة فهاد اللقاء اللي غيوقع بيناتنا هوا انك عمرك شفتي بنت حومتك كما كتقول ليا ومطلوق معتها فالهضرة وعاد غتشوفها فوجهها .. ماعليش نوصف ليك راسي مزيان ونتا رسمني فبالك
واءل: واخا يالاه وصفي بالتفصيل الملل
رحاب:مهم انا طويلة .. عامرة ماشي ضعيفة ... عندي حقي من داكشي هههه
واءل: ههه داكشي داكشي 😉 مزيان هادي نقطة مهمة زيدي كملي
رحاب : الكرش ابسونت .. من جهة لاطاي بلا منحتاج نشكر ليك .. وحتى بشرتي صافية ماشي زرقة ههه ... شعري طويل زعر وعيني كبار فالقهوي .. وجهي مدور وفمي صغيور
واءل: بابتسامة ) اممم ...كملي
رحاب: صافي راني وصفت ليك راسي
واءل: شنو لابسة دابا ؟
رحاب: هههخ ... ضاروري تعرف؟
واءل: باش نلبسك فدماغي ماشي نتصورك😉 ههه مهم راكي فهماني
رحاب: مع السهد لابسة غير واحد لاشوميز خفيفة فالكحل
واءل: وا السههههههد نيييت .
تحل عليه الباب وهي دخل فاتي بسوميج دونوي بنية فاتحة مايلة للسومو عبارة على شورط ناعم قصير بزاف وديباردو بارد من الفوق .. طالقة شعرها الاشقر نازل حتى لخصرها ومقادة الحالة ... مع دخلات هز عينو شاف فيها باستغراب سد التيليفون .. تكات حداه وريحة البارفان كتعطي منها وهوا مربع يديه مافاهم والو .. مال هادي اشنو جاها فهاد الليل .. مالها على هاد الحالة وعلاش دايرة هادشي فراسها؟
هز تيليفونو وناض لبس بانطوفتها المزغبة هي اللي كانت كدور حداها ومشا للكوزينة خلاها فالبيت .
ايه استغرب .. استغرب حيت هي اللي ولفات ليه يشوفها بيجامة والشعر مشنتف .. ودابا مللي تقادات خلعاتو ماعرف مالها .. بانت بحال الى غير هي اللي مزوقة ومقادة فوق فالعيالات كاملين .. بكترة ما ولفات عينو تشوفها مكمطة وملمطة .. جاتو هاد المرة بحال الى دايرة شي حاجة غريبة .
عمر كاس دالقهوى كحلة وخرج سد على راسو فالبالكون وتكا بيديه على الحديدة شعل كارو وحط حداه كاس دالقهوى . دخل للواتساب كيصوني على ريحاب وهي تقطع وسيفطات ليه مسج
قطع ونزل من السيارة .. حيد النضاضر ودخل للقهوة طلع لاطيراس جلس داير رجل على رجل شاعل كارو كيتسناها .
نص ساعة بالضبط ... دخلات كتقرقب بطالونها .. صندالة فرجلها وصبعانها مصبغين بالاحمر نازل عليه سروال توب واسع كيلعب مع كل خلفة .. كتحط رجليها بكل تقة فكل درجة وهي طالعة ومن مشيتها بايتة متشوقة لهاد اللقاء .
دور وجهو جيهت الباب والطالون كيقرقب فودونو وهوا يطلع حجبانو ووقف كيشوف فيها جايا جيهتو .. ومن صدمتو وقف كيطلع ويهبط فيها بعينيه
مدات يدها سلمات عليه وهوا غير كيشوف فيها ..
واءل : هه!!! الوقت كامل وانا نتخيلك بشعرك زعر شوية كيطلع ليا كحل ! كي درتي ليها!!
جلسات معاه فالطلبة دايرة رجل على رجل ... كتقاد حوايجها و واءل ساهي كيطلع فيها ويهبط حتى قالت
رحاب : ههه مالك مصدوم؟!
دوز يدو على لحيتو كيتنهد وقال : طلعتي عكس توقعاتي كاااملة .
دارت يدها حنكها متكية على الطبلة وقالت : ايوا هاد توقعاتك سلبية ولا ايجابية؟
واءل : عاادية ... مي ماشي المواصفات نفسها ... قلتي شعر زعر طويل! وشعرك كحل قصير.... حروفك كوحل .. وعامرة على لاطاي اللي تخيلت فبالي .. مي زوينة تبارك الله الله يحجبك
رحاب : ايوا ضاروري شوية من التغيير .
واءل : كنتي تبقاي كما نتي اوموان بعدا حتى نتشاوفو .. دابا انا تخيلت وحدا اخراااا ودابا قدامي وحدة اخرا
رحاب : هي دابا كتعايرني !
واءل : حاشا .. غير انا كنقول داكشي اللي كاين ... تخيلي معايا نجي نعطيك وصف ونقول ليك انا زعر وطويل وكدا .. فاللخر نخرج سمر وشعري كحل ... غادي تحسي براسك جالسة مع واحد غريب اولا لا ... وانا مكنحسش بيك غريبة فالتيليفون .
رحاب : دابا نرجع شعري كي كان ... غير قلت نبدل طلع ليا راسي فراسي واحد شوية وصافي ...ايوا نتا لاباس عليك؟
رجع اللور كيشوف فيها بابتسامة مزال ماتستوعب وقال : حمد لله ... والله لعجب ! (هز حاجبو) من بقيتي نتي كما نتي كان يكون حسن ... حاس براسي جتلس مع شي وحدة عمرني شفتها!
واءل تصرف مع رحاب هاد المرة ببرودة ماشي بحال اللي كان كيدير معاه فالتيلي .. شنو اللي تبدل وشنو اللي تغير .. وحتى اللي داز بيناتهم كان كيتصرف معاها عادي ومتدخلش فخصوصياتها ولا سول شي اسءلة بعيدة على اطار الصداقة بحال اللي كان كيدير فالتيليفون من قبل .
قلب الطريق واءل عند صحابو للقهوة ومادخل للدار حتى أدن العشى ، دخل لقا الدار مضلمة .. شعل الضور واستغرب
بنت الحومة الجزء الثاني
محتوى القصة
التنقل بين الأجزاء