الاسعاف كتجري وواءل وبابها تابعينها كيطيرو .. باها كيرجف وواءل عقلو غيخرج من بلاصتو . كانت كسيدة خايبة خلعات كاع الناس اللي دايرين من ديك الطريق .
وصلات لومبيلونص للكلينيك ونزلو منها فاطمة الزهراء كلها دمايات وججها مكيبانش . الاكسيجين على نيفها ومغطية بغطاء ابيض وكتخل عينيها وتسدهم وتأنأن بصعوبة بحال الى كتموت .. عينيها مقلوبين وكتحرك راسها يمين وشمال بزز .. الفرملي حاط يدو على راسها وكيطلبها متحركوش . باعا داخل موراها كيفيبري بالخلعة ويتمتم ويديه كيرجفو ميطلب غير الله وفي فمو كلمة الله .. انا واءل لاسق حداها مخلوع وكيعيط بسيميتها ويشوف فيها كتحل فعينيها وتسدهم .
دخلوها فحالة خطر وسدو الباب خلاو باها وراجلها واقفين والخلعة كتسري معاهم كل واحد فين واقف حامية فيه البيضة.
عمر الكلينيك بالعاءلة دواءل والعاءلة دشيماء .. كلشي كيسول كفاش وقع وشنو طرا وحتى واحد من باها وواءل مقاظر يهضر ولا ينطق . لسانهم تقال وغاديين جايين غيتسطاو .. المنضر ديالها وهي كتجبد من الطموبيل كاملة مدكدكة والبوليس والحيحة والروينة نايضة مزال قدام عينيهم مابغاش يتمحى .
ماخرج عندهم الطبيب حتى غفر ليهم ربي الدنوب .. مها كتلاوح من جهة لجهة بغات تسطا خايفة بنتها تموت وباها جاه الشلل ماقدرش يوقف وكولو كيترعد
داز عليهم نهار كحل عمرهم ينساوه .
نجات منها فاطمة الزهراء وتبعتات من جديد .. حتى قالو موحال تعيش لاكن ربي كبير كتب ليها عمر جديد .
خرجات من الانعاش مغيبة كلها مدكدة من يدها ورجليها وعنقها والفاصمات على وجهها .. تقاس ليها حمكها وتجرح جرحة خايبة بالزاج وجبتها تقاست دارو ليها فيها 4 دالغرزات . حولوها لبيت اخر معلقين ليها السيروم والاكسيجين على نيفها وخلاوها فوق بياص فبيت مهوي . دخلتت عندها عاءلتها طلات عليها شوية وخرجهم الطبيب خلاوها ترتاح مغطية .
تقلب باها على واءل ونوض معاه الصدع قدام العاءلة كاملة . .مسح فيه كلشي حتى ساق كلشي لخبار للمشاكل اللي واقعة بيناتهم . حتى من واءل لام راسو وسكت ماقدرش يرد عليه .. باش غيرد عليه؟ اش غايقول ليه؟ يكفي هادشي اللي وصل ليه وصلها ليه حتى هي ، تدخلو خواتاتو بخيط ابيض يسكتو باها لاكن نتض ليهم كاملين ماعقل على تا واحد فيهم لا لكبير لا الصغير ومخلاش ليهم من المنقي خيارهم حتى خرجو من الكلينيك ماراضيينش . بقات غير ام واءل ساعة تا هيا دار فيها وقال
الاب : الاااللة مابقينا منكم ما بقيتو مناااا .. على زين ترابيكم بسبب ولدكم شوف شنو وقع لبنتي الله ياخد فيكم الحق . سيري عليا بحالك خرجي عطيني تيساع الموصيبة اش مزالة كديري هنا .. سيري تبعي ولدك الله يخليها عاءلة عندكم
الاب: خرجي عليا نتي وبناتك من هنا عطيونا التيساع وغدا نوقف باباه فباب المحكمة .. عاطيه البنت يتهلا فيها ولا يضحك عليها وفقصها .. كن ماتت اش عندكم ماديرو ليا ديك الساعة ...
دخل واءل سمعو كيغوت على مو الوحيدة اللي عندو وهوا يتسيف عليه وجر مو موراه
واءل : قدر الله وماشء فعل .. باش تجي تسب فمي بحال الى ماعندها رجال ماعندها تا واحد يحامي عليها راه ما نسمحش ليك السي عبد الله ... عرف اش كتخرج على فمك راه كاع لسانا خاسر .. جريتي على خوتي قلتا هااانيا الراجل معصب الله يكون فلعوان . جريتي عليا قلت ماشي مشكل نستاهل .. ولاكن باش تبدا تسب ليا فمي وتجري عليها حتا يكون لكلينيك ديال بااك عاد اجي دوي معاها .. والطلاااق ما مطلقش واسطح راسك مع الحيط
شنق عليه عبد الله " الاب " وبدا يسب فيه ويلعن وهوا فيه غير كمشة ورقيوق وقصير ومعلق فواءل اللي بحال هرقل يهزو بيد وحدة يلوحو مع الباب .
ام فاتي : حشووومااا! حشووما اللي دار فيها هواا ... الرجال ميغدروش وهوا غذر بيها ... خرجي ولدك الله يرحم الواليدين علينا من هنا .. وميعادنا فالمحكمة .
تدخل السيكريتي فك بيناتهم وبعد السي عبد الله وهوا كيرجف و واءل كيترعد عليه وضهرو كامل عرقان .. كان يتمنى لو كان خوها ولا شي واحد من غير باها كان يخوي فيه بركان الغضب اللي كيحرق فيه كامل . كمدها فصدرو وجر مو وهي كتساب مع ام فاتي خرجها لبرى عند عاءلتو اللي واقفين ماعرفو يمشيو ماعرفو يجلسو . خرج كينهج ومو كدعي وهازة كفوفها للسماء برى حدا الطوموبيلات اللي مسطاسيونيين
الام : الله ياااربي تاخد فيهم الحق... الله ياربي بهدلهم كتر من هاد التبهديلة اللي دارو لينا (كتبكي)
واءل : صاااافي امي براااكة من الدعاوي واش فتيهم مطفرينو دابا لاحنا لا هما ... صافي برااكة الله يحفضك . ماعنديش فين تزيد شي نقشة
فايزة : الاخت) وباااقي كتجي منهم يا خويا باااز ! مادير هير مايطرا باس .. كتشوفيهم كيفاش جراو علينا قدام عينيك وخرجنا كنزطمو فجلايلنا ومزال كدافع عليهم !
واءل : بنرفزة ) مدافعت على حد ... وسكتونا برااكة من الهضرة .. كتشوفو بنادم كيغلي طالع ليه الخرا (ضرب طوبيل بيدو) وكتزيدو تشعلو فيه .
الام : يالاه ابنتي نمشي بحالنا
خوه الكبير: يالاه تمشي بحالك ماعندك مادير هنا
واءل : بغضب كيشير بيدو) راه مرتي هاديك اللي مرمية لداااخل كفاش ماعندي ماندير هنا !
الام: ايوا خليك مع مرتك الله يطليك بيها ... سكتنا ليهم حتى عيينا ومسحو فينا رجليهم .. هادا لله مالنا حنا اللي دفعناها !.... فااايزة يالاخ تمشي بحالك .. يالاه انسرين تمشي .. فؤاد يالاه خليه يبقا حداها مافيه نفس
واءل : بالون انا مافيا نفس! اففف (تقلب كيسوط )
فؤاد : غير سيرو غنبقا معاه شوية ونجي
طلعات الام وبناتها كيسوطو فالطوموبيل داتهم فايزة وبقا واءل متكي على كوفر طموبيلتو وحاط يدو على جبهتو ... هز راسو وطير الكاسكيطة زدحها مع الارض وخوه واثف مابغاش يخليه بوحدو فديك لحالة .. ماتعرف يتصادف مع عبد الله ويبقا يسب فيه ويصدق واءل مفوت فيه شي دقة وهوا على سبة .
فؤاد : مالك اصاحبي اش وقع بينك وبينها عاود ليا
واءل : خليني الله يحفضك افؤاد هاد الساعة مافيا اللي يهضر اففففف
وقف داير يده على جنابو وهاز راسو فالسماء كينفخ .. صونا ليه تيليفون وجبدو لقا مريم اللي كتصوني وجاوبها مغزف عليها
واءل : نعام اختي!!؟؟؟؟
مريم: لاباس عليك؟ بغيت غير نسولك على فاتي واش معاك حيت دارت معايا نتلاقاو ماعرفتش فاش بغاتني وكنصوني بيها مكتجاوبنيش؟!
فؤاد : واسيري ت***** الى عندك شي دار ق****** راه انا منصلاحش ليك .. سيري شوفي شي شيباني يصرف عليك فوتيني وفوتي مراتي عليك وسيري ديريها على شي دمدومة وضربي على نمرتي ولا غنجي لداركم نفرع ز""""" بوك تما كتسمعي(قطع)
دخل للكلينيك وخوه كيجر فيه ويساوي معاه حتى خرج السي عبد الله ومرتو بعد انتهاء الزيارة عاد مشا واءل هضر معاهم فالاستقبال وسمحو ليه يدخل .. دخل عندها لقاها مكاونسيا فبلاصتها حاللة عينيها مكتحركش وترمش بزز .. دخل عندها يائس كيشوف فيها وهي باغا تبكي .. دورات وجهها وهوا جالس حداها شاد ليها فيدها مدكوكة فيها لبرى وكيبوس فيها
واءل: سمحي ليا الحبيبة ديالي.. انا السبب فكلشي .. انا اللي وصلت لهاد ... لهادشي وماكنتش ناوي ولا فبالي نوصلو ليه
جرات يدها كتأنان متبغاتش تهضر معاه ولا تسمع ليه .. بقا ساكت تا هوا حادر راسو مكيهضرش ومالقا مايقول ليها .. حتى عيا وخرج خلاها ترتاح .
بعد مرور 3 اشهر...
دوزاتو فاتي فدراهم و واليديها دايرين ليها كي الماء لقليل ... مابقاتش كتشوف واءل وحتى نمرتها بدلاتها ... مشاكليهم بقاو متوقفين هاد المدة اللي كانت فيها مريضة ودايرة الجبص . قطعات معاه الهضرة وحتى هوا مكيقدرش يجي لدارهم وماعندو فين يشوفها حيت مكتخرجش .. باها مقابل ليها قضية لاصورناص اللي خرجات ليها فيها 18 لمليون تعويض ليها . وللطوموبيل ديالها اللي مشات كفتة وساوية كتر من داك الثمن اللي عطاوها ، كان واءل هوا اللي كيخلص لكلينيك من جيبو لوقيتة اللي دوزات فيه كاملة وحتى دوايات على بيدمن تشد فلوس باصيرونص ديالها واخا مكانش طامع فيها ولا فباها يرجعو ليه شي ريال .. من ديك الوقيتة ما عاود تصادف هوا وباها . كان يخليه حتى يخرج عاد يدخل عليها يطل عليها وهي ناعسة ويخرج .
رفع ليها باها دعوة ديال الطلاق ووصلات لواءل .. سيفط بيهم الناس كل مرة يسيفط شي واحد كبير يتوسطو ليه باش يرجع مرتو .. لاكن باها شد الضدد وحالف لا رجعها ليه . . . اما هي نفستها مدمرة ..غير ساهية وداخلة سوق راسها مكتهضر مع تا واحد ومكتجدب حتى موضوع ، لا ديال الكسيدة لا ديال الطلاق . براكا عليها غير الجيران اللي كل مرة يجي يطل عليها شي واحد فيهم ويفقصها بهضرتو.
متكية فوق واحد السداري دايرة بومامة دسيكاتريس لوجها باش يتمحاو الطبايع ديال الجرح على نية تشد الفلوس دلاصورانص و دير بيهم عملية تمحي طبايع لغراز اللي فجبهتها . دخل عندها لابس جيلي رمادي عامر جياب مع سروال توب وصباط هاز ميلف فيدو وقال
الاب : عاد جيت من عند المحامي .. غدا ان شاء الله الجلسة ... الى عندك شي ماتقوليه غير قوليه وماتنازليش ليه على حقك . راه سولتو على الدار واش تاخدي فيها النص قالك مايمكنش حيت ماعندك ولاد معاه وزايدون راهم بولادهم وكيخرجو بيهم يكريو.
السي عبد الله : ماعندها ماتقول الحاجة ... البنت صافي بغات براتها يعطيها ليها ... مايبقاشاي كل مرة يسيفط ليها شي واحد
الحاج: لا حولى ولاقوة الا بالله .. ان ابغض الحلال عند الله الطلاق... الولد كيبغيها السي عبد الله واه ... هاحنا ولينا نهضرو بلغة المراهقين عاوتاني! مرتو هاديك وراه مريض عندو داك غدا ديال المحكمة بحال المأبد . . . راه باغي مرتو ومهانش عليه يطلقها .
الحاجة : خليها تخرج عندو تهضر هيا وياه ... يتفاهمو ويرجعو لدارهم علاش نوقفو فطريقهم .. خزيو الشيطان و خلينا نهضرو مع البنت ونرجعو ليها عقلها و ترجع عند راجلها
عبد الله : نقول اللي كاين السي الحاج ... العيب ... خرجنااااا ليه ... مابقا لبنتي و ولدكم فين يرجعو . . . صافي هادا لله .
سكت الحاج كيستاعد بالله واخا عيا هوا والحاجة فعبد الله يرطبو الامور ساعة والو ... شافو حتى عياو وناضو حتى كاس د اتاي مابغاو يشربون . خرجو من لدار وهبطو لتحت طلعو فطموبيلت واءل اللي جالس كيتسناهم لتحك .. ركب حداه الحاج وقالت بغير حيلة
الحاج: ماعندنا ما نديرو ليك اولدي... جهدنا درناه معاك .... مابغاوش هادشي اللي نقول ليك .. الله يعوضك خير منها
شاف فيه واءل وكاسكيطة على شعرو بعيون ياءسة وقال
واءل: هضرتو معاها هيا؟
جاوباتو الحاجة من اللور : مابغاتش تخرج عندنا اولدي .. عيطنا ليها ... اللي فجهدنا ديرنا وحتى دوك القوالب دالسكر خليناهم ليهم تما ... باها مابغاش اولدي بلا ما تزيد تصدع راسك ... اللي خلاتك خليها وربي عوين اوليدي احبيبي
هبط واءل راسو ياءس كيتنهد وجدو كيطبط عليه فكتفو
الحاج: الله يعةضك خير منها ... فيها خير اوليدي فيها خير واللي فالمكتاب تجيك ... ستاعد بالله ويالاه ترتاح بحالك .
هز راسو وقال : اعوذ بالله من الشيطان الرجيم ... استغفر الله العلي العضيم
ديمارا الطوموبيل ومشا بحالو .
الهضرة على هاد الموضوع تقطعات فدار فاطمة الزهراء .. حتى واحد مكيبغي يجبدها . اما هي مخشية فواحد البيت غير كتخمم وتفكر وتنهد بحال الى هازة جبل على كتافها . مانعسات ماشافتو الليل كامل حتى دخلات عندها للبيت لقاتها باقا فايقة
الام : نوضي لبسي حوايجك باك كيتسناك برا تمشي للمحكمة راه ليوم عندكم الجلسة . . . نوضي ابنتي نوضي وبلا متبقاي تحمقي فراسك راك مزال بواليديك حيين مسخنين كتافك ... صافي دابا سالينا مع دوك الناس وليوم نفضيو ونضيو .. 3 شهور هادي وحنا أجل أجل أجل فالمحكمة وباك طالع هابط
ناضت فاطمة الزهراء مهدودة غسلات وجهها ولبسات جلابة من جلابها ولاحت عليها فولار و بلغة وخرجات عند باها وجها صفر لقاتو واجد هاز ملف فيدو . خرجات معاه ركبات فواحد الخرشاشة ديالو ومشاو نيشان للمحكمة ودخلو لقاو واءل وواقف لابس دجين وتيشورط بيضاء داير كاسكيطة ومهبط راسو للارض .. حس بيها وقفات قدامو لاكن مهزش راسو فيها واها وقافة وكتشوف فيه بنص عين . جات نوبتهم دخلو جلسو قدام القاضي فالبيرو وعرضو مشكلهم . اتاهماتو فاطنة الزهراء بالخيانة وهي ماقدراش دور تشوف فيه
فاطمة الزهراء : خاني
القاضي : كفاش خانك ؟ واش حصلتي متلبس ؟ حصلتيه مع شي وحدة ؟
فاطمة الزهراء : حصلتو كيهضر فالتيليفون ووقفت عليه فالقهوى ... وانا مانقدرش نرجع ليه وكما خاني دابا غايخوني من بعد
القاضي: كاين هادشي ولا مكاينش؟
واءل: باسى) كاين ... ولاكن ماشي خيانة ... هضرت مع غيرها شفويا وصافي و اول مرة واخر مرة .
دخلو للدار وبدا عبد الله من الباب كيغوت : مامطلقش واخا نسطح راسي مع الحيط .. واخا ها حنا غنشوفو واش غطلق ولا لا ... مزيااان تبارك الله ... تابعها عاين باين قدام عيني ما حشم ما ستحيا .... بلحق المرة الجايا الى سميتو راجل وتعرض ليا غادي نديكلاري بيه .
فاتي ماهضرات مانطقات .. مشات لواحد البيت وعطاتها للبكا ومها جالسة حداها . بدات تعاود ليها اش وقع فالمحكمة مع واءل . بردات قلبها فالبكى على مها حتى شبعات ومشات طاحت نعسات.
الصباح صبحات الضرسة كتزدح ليها ففمها ... عيات تصبر ليها وماقداتش وناضت عند مها للكوزينة
فاتي: مي يالاه معايا نشوف هاد الضرسة شعرات عليا ... بيتاتني بلا نعاس اللي كامل
عبد الله : عاين تمشي معاك مك ... ما عندك فين تمشي بوحدك .. يمشي يتعرض ليك داك ولد لحرام
سكتات مجاوباتوش وجلسات كتستى مها تلبس جلابتها ، خرجات هي وياها مشات نقات الدرسة ورجعو للدار كيتجمعو بجوج مع الشارع حتى كتجرها يد من الور وهي تلفت لقات واءل جارها
واءل : اجي نهضر معاك
دفعاتو كتغوت ونص فمها مبنج بزز باش كتهضر
فاتي : بعد مني ابنااادم اويييلي واش مريض؟
مها بارتباك : وييلي وييييلي ويييلي على ولد لحرام .. طلق من بنتي سير عطينا شبر التيساع
واءل: سمعي.. غاتجي معايا نهضرو ولا غنخصر لمك وجهك .
مها : هييييه! سير طلق من البنت ولا ندير صبعي فودني ونجمع ليك الناس
واءل لسق على يد فاتي لسقة وحدة مابغاش يطلق منها .. شمات فيه ريحة الشراب وعينيه حومر عرفاتو مكيقشع تا حاجة وهي دور عند مها كتغمزها باش متكبرش الامور حيت اصلا راه يقدر يدير شي حاجة ماشي تا لهيه وهوا مساحيش
فاتي: بعينها ) شاارب .. شاارب ..صافي سكتي انا نساوي معاه (تلفتات عندو) وا غير طلق ليا من يدي ضرتيني وانا غنمشي معاك .. طلقةليا من يدي
فاتي: وصافي اماما واش مالي معارفاهش عاد غنعرفو! صافي راه راجلي وعارفة كي ندير معاه بلا متخافي . حسن مايصدق داير لينا شي شوهة تاني قدام الناس ولا ضاربني ولا يضربك ... صافي انا كنعرف ليه تسنايني انا غنوقف معاه غير هنا نشوف اش بغا ونرجع
خلات فاتي مها واقفة مخلوعة فبلاصتها كتسرط فالبيض ودارت عند واءل اللي واقف داير كتسكيط ورقاء مهبطها على وجهو وتيشورط زرقاء ودجين وسبادري . مابايناش عليه شارب .. مكيتمايل ما والو غير عينيه اللي مزيرين وناعسين مكيبانوش تحت الكاسكيطة . شدها من دراها ومها موراها غتبول فسوارها ومشا
مشات وقفات هي وياه مور واحد الدار فزنيقة ودارت دايرة يديها على جنبها
فاتي: شدات ليه يديه عندو : ما خليتي معامن شوهتيني ... مشيتي عند ختك كتعاود ليها عليا وجايا كتسمعني فالهضرة ... طيحتي ليا وجههي فالتراب اواءل ووليتي كتعاملني خايب . كملتيها وجملتيها ناوي تبدا علاقة مع وحدة اخرة ههه ... شتي واخا تموت مغنرجعش ليك ومتبقاش تعرض ليا الله يرحم والديك ولا غنمشي نديكلاري بيك عند البوليس
بعد عليها وبدا يغوت ويكشكش : سييييري عند البوليس وجد البوليس وفوتي وكيل الملك لهييه .. سيري نتي حتى لميريكان قولي ليهم كيتعرض ليا وييوقف عليا ... ااااش غيوقع كاااع ! الحبس؟ ندوزو ونخرج عندك نحش ليك العصابي ديال رجليك ديك الساعة ونبقا موراك تا تموتي نتي ولا نموت انا .. باغا البوليس يااالاه داااابا عند البوليس .. زيدي ... (جرها ) تخلعيني بالبوليس يالاه رجلي برجلك تا لعندهم
جرها من يديها غادي بيها وهي كدفع وتنتر حتى لباب لكوميساريا كتبكي وهي تفلت يدها وهربات كتجري .. تبعها كيجري لاكن فلتات منو ورجعات عند مها كتلهت جرات من يديها
جرات مها ورجعات للدار غتسخف بالخلعة هي ومها وتخشاو فبيت كتعاود ليها شنو وقع معاه
فاتي قطعات رجليها من الزنقة متبقاتش كتفوت باب الدار .. الرعب ركبها هي ومها واخا خباو على باها باش مايزيدوش يغرقو الامور ، تكمشات لا تيليفون لا حتى حاجة باش يوصل ليها واءل .
وصلات الجلسة للخرة ديالها اللي ستأنف فيها واءل . لبسات حوايجها وخرجات مع باها وعمها للمحكمة . دخلو جلسو قدام القاضي وجلس واءل قدامها رافض تماما فكرة الطلاق .. حاول يقنع القاضي لاكن القاضي كان راجل كبير بزاااف اثرات فيه فاطمة الزهراء وبكاها وحكم لصالحها بالطلاق.
طلق القاضي فاطمة الزهراء . وطاحو جبال الحزن على واءل غطاوه كامل .. خرجات من عند القاضي كتبكي .. حسات بأحساس الطلاق اللي مكانتش حاسة بثه من قبل .. احساس مؤلم .. كتشوف نهاية الحياة و أنها غتبدا من جديد والقطار فاتها .. كتشوف سنين من عمرها مشات فوالو وصلات لسن اللي كان خاصها تكون خرجات فيه بنتيجة ماشي ترجع للزيرو واخا كاينين بنات كتار مزالين يالاه قالو بسم الله فحياتهم وكبر منها فالسن .. لاكن هي هاكا كتحس... كانت فدار مع راجل .. كانت مزوجة .. كانت كتبني دار فين دير وليدات ... كانت تمشي لعراسات براسها مرفوع وكلشي يحتارمها .. كانت مزوجة .... لاكن دابا ولات كتنتمي لفئة المطلقات اللي عمرها فحياتها تخيلات تكون منهم ، فين كاين العيب الى كانت مطلقة؟ مافيها حتى عيب والمسالة عادية . لاكن العيب فالمجتمع اللي جعل من المرأة المطلقة معيوبة واخا هي مدارت حتى حاجة حرام . خرجات فاتي مع باها منهارة .. قلبها غيسكت وخلات موراها الشخص اللي شركاتو حياتها وبغاتو من قلبها وتمنات تبقا جنبو حتى لأخر نهار فحياتها .. قلبها محطم ومزال ماقادراش تستوعب انها صافي طلقات.. انه مابقات حتى حاجة تربطها هي و واءل .. انها مابقاش عندها زوج كما كان عندها ، احساس صعيب وصعيب يتوصف . مسألة ماشي ساهلة كما كيشوفوها الناس .. عمر شي مرة مطلقة فرحات بطلاقها واها يكون راجلها مشربها لمرار .. مكتفرحش حيت مرار المجتمع اللي عايشة فيه مابحالو مرار .
خرجات وداز هوا حداها حادر راسو مغطي بكسكيطة .. نزلي مع دروج المكمة مكيشوف لا يمين لا شمال .. نيشان لطموبيلتو طلع سد عليه ومشا متلفتش مواره ومشافش جيهتها .. هي اللي بقات متبعاه بعينيها ويديها كيترعدو .
ركبات حدا باها فالطموبيل قاطهة البكية فنفسها واخا دموعها كيشرشو بلهلا يطريه ليها . تلفت باها شاف فيها وقال
الاب: بلا متبكي دابا .. بغيتي الطلاق ها نتي طلقتي ... ماعندك علاش تبكي ... كن صبرتي بحال العيالات و درتي عقلك كااع ما كنتي توصلي لهاد الماصل... دابا اللي قالك شي كلمة غير سمعيها وسكتي .. نتي درتيها بيديك ... واش حساب ليك حتا فرحانين بهاد الطلاق؟ واخا وقفنا معاك و جرينا وتجارينا ولاكن راه ماعجبناش الحال وحتى حد مكيبغي بنتو ترجع ليه مطلقة ... كن دابا مك دارت لي درتي كن راه طلقات حتى هيا ومشات بحالها وماكنتيش كاع غتزادي نتي.
شحال من مرة كلات العصى وعاظ هي كانت ساكنة مع العكوزة داز عليها المرار وبقات صابرة وها هيا دابا بدارها ماخصها حتى خير
فاتي: سولتيها شي مرة شنو خاصك ؟
الاب : مالها اش خاصها ؟ واكلة شاربة مستورة ... مالها باغا طير بحالك ؟ على الاقل هي بعدا حسن منك .. فدارها مستورة .. اما نتي دابا راه مطلقة وماعمر شي مرى طلقات عندنا فالعاءلة .. اللي مشات كتلسق واخا يقتلوها تصبر باش ماتخليش الناس يهضرو فيها .. نتي ماصبرتيش تحملي مسؤوليتك انا معندي مندي ليك ... كنا نسافرو عند شي واحد مايخلي اللي مايسول عليك ... كي دايرة فاطمة الزهراء كي داير واءل .. كلشي كيسول وكاع ماكرهوش يزوجو بناتهم لواحد بحال واءل .. نتي ماحمدتيش الله خرجو عليك المسلسالات ونضتي جمعتي حوايجك يحساب ليك المسلسل هوا الواقع! خرجتينا للعيب وخرجتيهم للعيب .. وكل واحد بعيبو الى حكيتس عليه راه يخرجو فيك مكاينش شي واحد على وجه الارض ماشي بخبيزتو ... كن ماهزيتي الرحيل وقع ليك اللي وقع كوراه دابا فدارك وحنا مهنيين وكلشي هوا هاداك .. مالك على حالك .. كنتي غتموتي وتقالينا معاك ....
بلا بلا بلا بلا بلا بلا
مابغاش يسكت طول الطريق وهي قالبة وجهها جيهت الزاج ويدها على فمها كتبكي وتشهق . وصلات للدار ودخلات نيشان مابغات تهضر مع تا واحد .. طاحت بدا تبكي وتبرد حتى سخفات ونعسات . مشات الشهية .. مشا النعاس . مشا كلشي ...
مرضات فاطمة الزهراء .. ولات كلمة جوج كطيح بالاعصاب .. متبقات لا كتهضر ولا تجمع .. تبدلات 180 درجة وحتى العراسات ديال اقرب الاقارب مكتمشيش ليهم .. باها ميك عليها مابقاش كاع كيجبد ليها حس الطلاق ولا سمية دواءل . دازت السيمانة وفاطمة الزهراء تقيلة .. كتكتر من النعاس كتر من الفياق . التيلفون مكيبغيش يسكت كل مرة تعيط وحدة من صحاباتها و لاوحدة من عاءلتها تسول على حالها وتدي خبارها .
فاقت امها بحال العادة كتجمع وتوجد الفطور ودور بالدار .. دارت الجفاف فالماء وبدات دوز على الارض ، وصلات حتى لباب يالاه دوزاتو بيديها وهي تشوف جوا ابيض مرمي تحت الباب . مسحات يديها فالفواطة وهزاتو على اساس ورقة ديال الضوء والماء .. حلاتها وهي تلقا تصويرة فيها واءل كيضحك وحداه مريم جالسة دايرة خاتم المارياج فيديها وناقشة الحنة . تفافتات الام فاش الصورة وزادت تخلعات فاش شافت فاتطمة الزهراء خارجة من بيتها مسكينة باينة عليها حالة المرض ، خبات الصورة حتى دازت فاتي وشداتهت شركاتها وهزات سطلها داتو للكوزينة .. لبسات جلابتها وقالت لفاتي
الام : طفي على الغدا هانا جايا دابا
خرجات شدات طاكسي ومشات نيشان لدار واءل .. طلعات وبدات تزدح عليه فالباب ودق بالجهد حتى خرجات ليها واحد الجارة من جيران فاطمة الزهراء . عقلاتها وسلمات عليها
لاللة عيشة : اااختي ماعرفت هاااد الناس اش بغاااو عندنا ... اش كيتسااالونا .. مالهم مابغاو يتفرقو علينا يخليونا نعيشو حيااتنا .. الله ياخد فيهم الحق .. الله ياااااربي تاخد فيهم الحق
تحلات باب الدار وخرجات عندها مرى طويلة اول مرة تشوفها لاللة عيشة .. الشعر مطلوق والحالة والزين ..
لاللة عيشة : تحل ليك الفم .. هادي هي مريم!!!!!! الى بغيتي تزوجي تزوجي علاااش مزااااة تابعة ليا بنتي ... ايوا شغانقول ليك .. انا بغيت ربي يدوقك من هادشي اللي دوقتينا منو نتي وداك ولد لحرام (مشات كتسب) الله ياخد فيك الحق ... الله ياربي تاخد فيهم الحق ... الله يا ربي عمرهم يشوفو النهار الزوين .
شوهاتها ورجعات بحالها كتنهج ووجها حمر ... مشات نيشان عند فاطمة الزهراء نوضاتها من النعاس
لاللة عيشة : نوضي .. نوضي جمعي حوايجك تمشي لأكادير عند خالتك سميرة ... ماعندك ماتبقاي ديري هنا غير غتزيدي تمرضي... الصيف هادا وكلشي مسافر وكلشي خارج ونتي باغا تموتي ليا ... نوضي جمعي حوايجك انا نعيط لخالتك نقوليها راه جايا عندك .. راه ديما تقول ليا سيفطيها ليا قنطات بوحدها ... تما بعدا مكاينش وجوه الويل ومكاين اللي يوصلك ولا يندكها عليك ... برااكة عليك من النكد بغيتيني نبقا مربعة يدي حتى تموتي ليا ونبرك نندب ... نوضي خرجي من هاد الدار الى بقيتي هنا غير غتزيدي تمرضي اللهم تمشي عند خالتك سميرة بعدا هي بوحدها والدار كبيرة عندها رجالها فالسعودية مكيجي من لعام لعام .. تفوجي نتي وياها متنكر عليك ما تقوليك حتى كلمة .
نوضاتها بزز منها بدات تجمع بيها فحوايجها بالفقصة والغدايد ومشات هزات تيليفون عيطات على ختها علماتها باللي غتسيفط ليها فاطمة الزهراء عندها ، دخل الاب لقاها كتهضؤ على السفر وهوا يخرج عينيه
عبد الله : تجلس فدار باها ماعندها فين تمشي .. تنشي لتما يقولو الناس صاافي طلقاااات وراه دايرة مابغات ... اللي كطلق كترجع للدار باها يسترها حتى يجيب الله اللي يسترها .
بنت الحومة الجزء الرابع
محتوى القصة
التنقل بين الأجزاء