مشات عيشة جمعات مع فاتي لحوايج ودخلات عندها للدوش حكات ليها ضهرها . جمعات فاتي حوايجها وهزات صنيديقة ديالها ديال الذهب اللي شرا ليها واءل .. هزات سنسلة دارتها فعنقها وساعة فيديها وهي تشوف خاتم زواجها .. هزاتو بقات تشووف فيها وعينيها كيبكيو . تذكرات نهار خطوبتها الكبيرة .. النهار لكبير فاش جا واءل هوا واعاءلتو خطبوها .. كانت فرحانة غطير بالفرحة لابسة تكشيطة ديال الفريع وطالقة الشعر ودايرة التاج وناقشة لحناني . . . جالسة حداه حشمانة وهوا شاد ليها فيديها فرحان وغير كيضحك وكل شوية يدور عندها ويبقا يشوووف فيها . هز لخاتم لبسو ليها فيديها وباسها وهمس فودنيها وهي كضحك حشمانة
واءل : كنواعد ندير فعينيا لحبيبة ديالي .
شهقات وبدات تبكي تبكي تبكي وتشد فصدرها .. الهضرة دواءل كتعاود فودنيها و كتفكر نضراتو بيها وشحال كان فرحان وكيتسنى امتى يديها لدارو . شبعات بكا محنية على الخاتم شاداع فيديها حتى سخفات ونشفو عينيها وهي ترجعو لبلاصتو مع ذهبها وخباتو فالمرايو دمها و مشات حطات راسها على لمخدة نعسات كتنخصص .
فاقت الصباح بكري لبسات جلابتها وجمعات شعرها .. ماحطات حنى نقطة دالمكياج فوجهها .. جرات باليزتها وخرجات مع باها غادي وكيوصي فيها وخايف دير ليه شي فضيحة وتشوهو قدام العادي والبادي. ركبها فالكار ومشات متكية على الزاج ساعية وتخمم و واءل مكيتحيدش من بالها حتى دقيقة .
من ساعات ديال الطريق طويلة وصلات لاكادير ونزلات لقات لقات لقات خالتها سميرة واقغة كتسناها .. طويلة وشعرها كحل كبير تكون فسن الثلاتينات . مهلية فراسها وباينة عليها من حوايجها والبارفان اللي دايرة . عنقاتها وسلمات عليها ومشات جارة معاه الباليزة . وصلات لكاط كاط حكلة وحلات الكوفر حطات فيها البليزة وطلعو فالطوموبيل غادين طالقين خاليجي
سميرة : درتيها زوييينة جيتي .. حسن ليك خرجي من ديك القنطة وداك المرض ... حتى نتوما حرام واش عندكم حس الضحك والتقشاب فديك الدار بالسيف ما تمرضي .... طلقيها تسرح ماشي نتي اللولة ولا للخرى راه من عداااااد دااابا يجي اللي ينسيك فيه ويولي فخبر كان
دارت فاتي والدموع فعينيها وقالت : تزوج بصاحبتي تصوري !!!
سميرة : سدرةها ويفوتوها .. عمرك تربي الكبدة على الرجال ... شحاال من وحدة كانت مزوجة وجات صاحبتها خدات ليها الراجل وسكنات فدارها ونعسات ففراشها ... شحال من واحد واعد وعدة بالزواج فاللخر تزوج صاحبتها وهي فدرا غفلون ماتجيب خبار حتى لهنار لعرس ... اودي اللي خلاتك خليها .
فاطمة الزهراء : كتشهق وفمها كيترعد) عمرني كان يحساب لي يخوني ... ولا يتزوج بصاحبتي ... عمرني تصورتها فحياتي
سميرة: كوووولشي ممكن الحبيبة .. هادي دير ليك الراس عمرك تيقي فشي ولد لمرى ... انا براسي دابا شكون قال ليا طحنون راه شاد الطريق غير معايا انا ... متوقعة منو اي حاجة ورادة بالي معاه باش نهار نخصل عليه شي حاجة منتصدمش... مهم درت من وعلاش نرجع حتى الى جا الطلاق يمشي هوا ويجي غيرو ... عمرك تربي الكبدة هانا نوصيك
وصلو لعمارة عالية بالاسانسور وطلعو لشقة كبيرة مفوهة بالسراجم والبالكونات والاتات عصري .. فكرات فاطمة الزهراء فدارها والجو اللي كانت عايشة فيه .. ماشي بحال دار باها بلدية وفيها النكير .
حجو البالز وجلسات كترتاح من السفر وخالتها غاظية جاية . بدلات لبسات كولون مزير وديباردور وطلقات الشعر وبدات تحرك
سميرة : حيدي عليك ديك الجلاة تنفسي راه الصهد .. نشعل لا كليم ؟ بلاتي نشعلها ... بدلي عليك وسيري راه الدوش الى بغيتي دوشي ... الدار دارك بلا منعرض عليك .. راه شريت كينتاكي للعشا قبل ما نجي نتعرض ليك .. ندير غير شي سلاد خفيفة ونخرجو نجلسو فالبالكون ...كيبان المنضر واعر منو بالليل .. ها الضواو بداو يشعلو والضلام بدا يطيح وتشوفي الشارع كيفاش كيعمر ماتقنطيش كاع
تنهدات فاتي ومشات دوشات وخرجات لابسة شورط قصير وديباردور لقات الطبلة فالبالكون عامرة بكينتاكي والموناظا وشلادة وجلسات هي وسميرة كيطلو على الشارع الكبير والبحر مقابل معاهم .. منضر راءع كيفوج على القلب . بدات فاتي تتعشى وتعاود القصة من اللول حتى لاخر على سميرة وتبكي عليها . قصرو الليلة كيتجمعو ويتعاوظو وبزز منها كضحكها سميرة بهضرتها .. ضاربة الدنيا بركلة وشاداها منين رخافت . بقاو قولها وضحك عليها مع سميرة سبيطار قتقتل بالضحك وتعاود على راجلها وزبايلهم حتى قرب الفرج وناضو دخلات معاها لبيت النعاس تخشاو بجوج فناموسية وحدة كيتجمعو حتى نعسو .
الجو مع سميرة رخف الازمة على فاطمة الزهراء ، الصباح مع حليو عينيهم خرجاتها سميرة بزز منها يتسراو والزدوح فالطموبيل و سميرة اصلا خاصها غا معامن وجاب ليها ربي معامن ضل دور وتخيط الشوارع بالطوموبيل . بالنهار مبحريين كيتبرونزاو وبالليل فالقهاوي عاصرين .. ها هما فالصالون هامهما فليبوتيك دالحوايج . كل مرة فين كيرجعو معطلين للدار ويطيحو ينعسو حتى لجوج عاد يفيقو .
دازت سيمانة وبدا الاب كل شوية يصوني عليهم فالتيليفونات . جاوباتو سميرة كتنفخ وقالت كضحك بزز
سميرة : الووو . لاباس بخير ....
عبد الله : دوزي ليا فاطمة الزهراء تجي بحالها .. قالت سيمانة وترجع وشي سيمانة مارجعات
سميرة : علاه مقالو ليك والو ؟
عبد الله : اااااش عندهم مايقولو ااااش ؟ اش كاااين؟
سميرة : فاطمة الزهراء راه خدمات ماعندها كي دير ترجع دابا
عبد الله: بالغوات : ااااشمن خدمة ولا باكور معامن تشاورات تخدم قوليها يا تجي بحالها تجلس للرض قدامي ولا نجي نوريها الخدمة ... واش بغات تحمقني هادي ولا شنو ؟ واش واحد تفك منها وجابها ليا انا تحشم بيا
سميرة بعصبية: راك واااقيلا خرج ليك لعقل ولا ماعرفت مالك ! لبنت مسؤولة على راسها متبقاتش صغيرة واللي بغا يقول شي حاجة خليه يقولها
عبد الله : واش بغيتي ترجعي سلكوطة بحالك ولااا!
سميرة: حاشااااك !!!! ويييلي هادشي نيت اللي بقا مالي كي جيتك انا واش غير اللي شفتوها عايشة حياتها لابسة زوين ومفطحة ومبرعة وقالبة على كمامركم المنكدة كتردوها سلكوطة !!!! خاصكم المرى تبقا ديما مريضة ومقابلة السبيطارات والدوايات وحالتها حالة عاد ديك الساعة تقولو عليها مسكيييينة بنت الناس ! اسيدي انا مامسكيناااش ومابغيتش اللي يقول عليا مسكينة واللي ماحملني راه واخلة ليه فحلقو شكون قالكم انا صلا منكم ولانتوما مني باش نحشم بيكم هه! ايوا صااافي .. شوف عيط ليها والى بغات تجي تجي وعمرك تعيط ليا فهاظ النمرة ولا توصلي داري ... منك لبنتك الى بغات تجي تجي وسد عليا فمك شكون نتونا اصلا باس تحاسبوني يخخ
قطعات ليه فوجهو مخيخة وماحات فين دور حتى صونا التيليفون تلني وهزات تجاوب لقات عيشة ختها
عيشة: الو سميرة
سميرة : يا ختي واش هاداك راجل عند ولا واد الحار! مالو هاز عليا هاد الحقد كامل وبارك يسب فيا واقفة عليه انا ولا كيصرف عليا!
عيشة : اختي راه محررها فينا قهرنا ماعرفنا فين نصدو معاه ... فاطمة الزهراء لاباس عليها ؟
سميرة : لاااباس وبيييخيرررر رتاحت شوية هاد السيمانة وراها ناعسة .. اويييلي البنت حات صفرا قطرة ديال الدم مافيها مالها على خالتها على قلة جد باباهم الكلب الله يقطعهم الكلاب فين ما كانو
عيشة : شوفي راه بارك ينوض ويجلس باغيها ترجع ... جات مو بركت عليه بالهضرة . سايبا ماسايبا وراها دايرة الزبايل و جابو ليها واحد الشارف مزوج بولادو كبار فيه الزهيمر باغي اللي تهزو .. ولادو مزوجين ومالقا اللي يهزو ومابانت ليهم غا فاطمة الزهراء جابوه بيها عماتها باش يسترها قالك ... وراه باغيها تجي باش يزوجها
سميرة: اااويييييلي مالو هادا تسطا ولا شنو غير كيرمي فولادو ولا !!! اصلا قلت ليه خدمات غا باش تلقا السبة تبقا هنا....اوييييلي على يزوجها لواحد كبر من باها راه والله تا تشعل فيه العافية تسحابيها فاطمة الزهراء ساهلة ولا ! راه غا مصدومة والله تا تنوض تحرق الخرا كامل
سميرة : يا الله لا جات تي مالك حمقة والله لا زوجها .. هي تا العدة مزال مكملتها بقا ليه غا يزوجها ! والل لا كانت ليه لا نسميع راجل يجي عتب عندي تي نالم متعرفينش ولا ! خليها ترتاح تاااا تسالي عدتها وتقلب ليها على خدمة ولا سونطر دابيل فين كانت تخدم وراه ماخاصها تا خير هنايا ولامشيت للسعودية ها الدار تبرك فيها مكااااينش اللي يخرجها ولا يهضر معاه ... شدي اختي راجلك عندك راه والله و وصلني ولا عتب عندي تا رميه من هنا نجيبو لك تما .
عيشة : المهم هانا وصيتك .. راه نوضتها صباط مع عماتها و باركين يدفعو فيه ... شايفين هما غا الزواج مشايفينش بيمن يزوجوها .. خايفين لا متزوج وتبقا هوكاك شدو هاد الشارف ولسقو عليه وهوا تا سميتو مامسكدها . مهم غا تهناي يطير ولا ينزل مغترجعش .
سميرة : اش بغينا بعينيه ...خليه يدور فيهم تا يعيا .. هوا هوكاك داير مع كلشي عينيه فالتين . مهم يشوفك باك عندو تما ومن بعد ماتعاوديش تمشي . نفضيو حريرتك باك هي اللولة .. يالاه نجلس فشي قهوة
مشاو جلسو فقهوى مجمعين حتى ل 1h دلليل عاد دخلو للدار .. الصباح فاقت فاتي لبسات حوايجها ووصلاتها سميرة حتى للريسطو و جلسات تنا فطرات عندهم على خاطرها وشبعات جلاس هي وفاطمة الزهراء عاد رجعات بحالها .. يلاه وصلات طلعات فالعمارة وهي تلقا عبد الله واقف فالباب كان كيتسناها . شافتو وهي تعبس وخرجات عينيها فيه .. كانت لابسة سورفيت كحلة مزيرة عليها وهي طويلة وغليضة شوية بقا يشوف فيها بنص عين محاملهاش وقال
عبد الله : عيطي ليا على فاطمة الزهراء تمشي بحالها راه زربان
عبد الله : زيدي وريني فين خدامة .. جاي من كازا باش تلعبي عليا نتي وياها هه .. الخدمة هه... ديرو اللي بغيتو بلا شواري .. زيدي وريني فين هي
سميرة : طلعات حاجبها )شوف راه نديك عندها وراه الى مشيتي تا بديتي تغوت عليها تما مايعجبك حال ... ريسطو ديال الناس مايبغيو فضايح ولا شوهة هانا نعلمك من هنا
عبد الله : فتح السمطة بالزعفة) غندخل عندها برجلي حيدي عليا
نزل مع سميرة وني داخلة كتسوط وحاضيا معاه لا يدر شي فضيحة .. شاف فاطمة الزهراء وتقفة لابسة كوستيم مع القميجة والبادج فلاكيس وهوا يوقف عليها بلا سلام لا كلام قفزها من بلاصتها تا بدات تقفقف
عبد الله : حيدي عليا دوك الحوايج زيدي تمشي فحالك
سميرة : راه قلتا ليك البنت خدامة ما عندها كي دير ... ونجيك من اللخر باش تهنى ... فاطمة الزهراء مابغاش تزوج وداك الشارف غا سير قوليه يشوف ليه وحدة اخرى
تعصب باهت وبدا يغوت وسط الريسطو حتى تجمعو عليه الدراري اللي خدامين تما خرجوه لبرا بالسياسة وخرجات فاطمة الزرهاء تا هيا .. ناض الصدع وحلفات لا مشات معاه فاللهر خسر عليها كلمة وحدة
عبد الله : عمممممرك تجي تعتبي عندي ما نتي بنتي ما انا باااك .. تابعة هاد السلكوطة هادي باغا تولي بحالها ... سيري الله يلقيها ليك نتي وياها ... عمرك ترجعي عندي الله يخليها سلعة ااتفوووووو
دفل عليها ومشا خلاها واقفة .. جلسات فوق الطروطراو كتبكي وسميرة حداها كطبطب عليها
سميرة : واش باعا ترجعي معاه؟ تبغي يحبسك فالدار ويزوجك براجل تخدمي عند رجليه حياتك كاملة . تبغي بنات العاءلة كاملات يضحكو عليك ... فاخر يامك تزوحي واحد مساااالي تغصبي شباباك معاه ؟ راه بااغيين يخرجو علييك افاطمة الزهراء ... شي مرات الوليدين مكيكونوش عارفين مصلاحت ولادهم فين كاينة ... كيبغيو يسكتو الفام د الناس بأي طريقة
بكات فاطمة الزهراء تا عيات فاللخر سمعات لكلام خالتها وشافت مصلاحتها فأنها تبعد على باها وتبقى على اتصال مع امها وخوتها فالسر .
رجعات لخدمتها كملاتها واستقرات فيها .. سافرات سميرة وخلات ليها الدار جالسة فيها ومشات عند راجلها 6 شهور تجلس عندو .. الخدمة لهات فاطمة الزهراء ولات تجي مهدودة واخا من الليل كتجلس تبكي .. الجرح فقلبها مزال كيدبرها ومزال ماقدراتش ترجع
نفسيتها بحال اللي كانت فالاول.
داز عام ونص على طلاق فاطمة الزهراء... النص الاول دوزاتو مع باها ومشاكلهم .. والعام دوزاتو فأكادير خدامة فالريسطو محاسبة . واخا مول الريسطو كل شوية يبسل عليها وعينو زايغة يدور يدور ويجس يلوح ليها كلمة ، واخا هاكاك كيرجع لعقلو فاش كدور فيه وتصبنو ويمشي يميك عليها تا يتوحش يسمع خل ودنيه وكيرجع .
رجعات واحد الليلة معطلة حتى ا 2 دالليل على حسب الخدمة دالريسطو ودخلات تكات فالبيت مسرحة رجليها ... هزات تيليفونها كتخربق فيه من كروب لكروب ومن باج لباج بفايسبوكها الجديد باسم " fleuria" دايرة صورة ليها بالجنب مبتاسمة ، لقات بوسط محطوط فكروب مخلط دراري وبنات حاطاه بنت كنبكي وطلب الكل يستغفر معاها بنية الفرج حيت طلقات من راجلها وقلبها مزير ومقبوط عليها ،خلات فاتي كتبات " استغرف الله العلي العضيم ، الله يرفج كربتك اختي ويكون معاك . راه كاملين كلاب مايستاهلوش نبكيو عليهم "
كتبات التعليق و بدات تبكي وتنخصص وهي كتقرى التعاليق . شوية رد عليها شاب بأسم " i sfrioui" كاتب ليها " مالك اختي حاقدة على الوضعية حشومة تنعتينا بكلاب "
شافتو وهي ترد عليه معصبة " هضرت معاك نتا مالك كطير من المقلة؟ "
دخل عندها للخاص سيفط ليها مسج
" مالك اختي على ديك الهضرة كتسبي وتعايري المقلة ما المقلة؟ ياك لاباس؟
فاتي : " ونتا مالك بوحدك اللي تقرصتي من غير دالدراري كاملين ؟! مول الفز كيقفز "
- إ صفريوي : " طلي شوفي شحال من واحد كيسب ويلعن فيك فليكوم عاد اجي دوي ! الى مريضة سيري تعالجي ولا تعلمي تهضري "
فاتي : " وشكون غيعلمني بسلامتك نتا ؟ "
إ صفريوي : " نعلمك علاش لا ؟ منين نبدا معاك ؟ اجي بنت زوينة وباينة فيها مأدبة بحالك ماشي ديالها هاد الهضرة ! "
-فاتي " لا ماما ! ونتا مالك نكون انا ولا ماشي انا ؟ "
إ صفريوي : بنتي على سبة وباغا دابزي مالكي على حالتك واش دار بيك شي واحد ؟
-فاتي : لهلا يحيي الزمان تا يديرها بيا ونتا مالك داخل شبوقات ماعندك سوق دخليه؟"
صفريوي : هه! لالا نتي بنتي ليا تقولبتي شي تقوليبة وكتبردي فقصتك فالرجال ! غير باش نقول ليك اختي واحد الكلمة راه ماشي كلشي بحال بحال كما حنا كنقولو نتوما بنات الحرام مافيكمش التيقة حتى نتوما كتقولو نفس الشيىء مي تيقي بيا والله ما كلشي بحال بحال وحتى الى وقع ليك شي مشكل تعلمي منو ماتخليهش يأثر فيك . نصيحة مني حيت بنتي ليا عندك شي حاجة !
صفريوي كيهضر و فاتي كتبكي تنخصص .. كان خاصها غير اللي يجبد معاها الهضرة وتجلس تبكي وتبرد على قلبها
فاتي : " كتكونو فالاول مزيانين وفاللخر كتقلبو كيهمكم غير راسكم مكيهمكم حتى واحد اخر
صفريوي : " ماتعمميش اختي راه اللي عندو خواتاتو مكيقدرش يتعدى على بنات الناس واخا كاينين بخوتاتهم وكيتعداو عليهم . مهم متبقايش تعممي كما كاينين ولاد الحرام كاينين ولاد لحلال
فاتي : " ولاد لحلال كيكونو فالاول اما من بعد كيرجعو ولاد لحرام
- صفريوي : اجي شحال عندك فعمرك؟
فاتي : 25
صفريوي : وكتهضري بحال شي وحدة عندها 40 عام دات وجابت فالزمان !
فاتي : ماشي العمر اللي كيعلمك .. راه الايام اللي كتعلمك نقدر نكون عشت شي حوايج ودوزت شي حوايج وتجارب اللي نتا كبير مجربتيهمش ومدوزتيهمش واللي مرى كبيرة فسن الربعين تحتاجني انا نصحها اللي صغر منها ..الحياة تجارب ماشي قضية كبير وصغير.. نتا شحال فعمرك ؟
الصفريوي : 29 وعندك الحق العقل كيكبر مع التجارب ماشي بالسن
نسات راسها فاطمة الزهراء كتجمع ودخلات فركن التعارف مع الصفريوي وبدات تناقش هي وياه مواضيع ، سيفط ليها انفيت فالفايس قبلاتها وبدات تجمع معاه .. موضوع يجبد موضوع وخبات موضوع طلاقها مادكراتوش . ليوم وغدا كل نهار يهضرو شوية وكل نهار يجبدو موضوع فأطار الاحترام . لقاتو كينافش ويحلل معاها ولقات اللي يفهمها ويهضر معاها ويعطيها وقت يحلل معاه وبدات كل ليلة تجلس تشد التيليفون بالليل وتجمع هي وياه حتى قلبوها واتساب وسيفطات ليه اوديو كضحك فيه
فاتي : غبرك الصهد ولا شنو ههه
رد عليها اوديو صوتو غليض مدعدع ومجروح وقال : مريييض كنمووت ههه الرواح ديال السيف اخيب رواح سيمانة وهوا شاد فيا
فاتي : "اوديو " بااااينة فيه غبرك ... ايوا كي كدير تمشي للخدمة ؟
صفريوي : " اوديو " حاط ليهم شهادة طبية فالشركة .. ماعنديش الركابي اللي يمشيو تا لتما .. تسخسيييخة والله "
فاتي: عام ونص دازت .. شوية دابا غير الشمتة مزالة فيا ماقدرتش نساها
صفريوي: الوقت غتنسيك .. كلنا طحنا ونضنا .. حتى انا كنت كنبغي واحد البنت متصوريش قداش .. مي ماكتابش وشاءت الاقدرا وفرقاتنا ... وهادا مكيعنيش غانسد عليا ونعيش على ذكراها حتى نموت . نن عايش حياتي بيخير والايام كتلهيك حتى تلقا البنت اللي تستاهل تكمل معاها حياتك
فاتي: ايوا الله يجيب ليك شي بنت الناس
صفريوي : جابها الله خاصها غير هي تفهم راسها ... فين ما نبغي نجي عندها نشوفها كتبدا تهرب عليا مافهمتش علاش؟
فاتي تزيرات واحد اللحضة عرفاتو كيهضر عليها ... ماكرهاتش تلاقا بيه حتى هي لاكن موضوع الطلاق ديالها خالعها ومجاتش حتى لدابا عاد تصارحو .. كفاش غدير ؟ شحال وهي تهضر معاه يوميا وماهمرها جبدات موضوع طلاقها .. اشنو غيوقع الى صارحاتو ؟ اكيد غتصدمو ويهرب ويسمح فيه وتولي الكية كيتين ! حتا ولفاتو ونساها همومها وحزانها وعمر الفراغ اللي كان فقلبها و ولات تسنى يوميا اتصالاتو عاد تجي دابا من بعد ما ولات تفكر فيه ورجهات شوية للحياة وتقول ليه اه حقا مطلقة ؟!!!
صفريوي : مالك سكتي ... شفتي ! فين ما نبغي نجي نشوفك زعما كتبداي تهربي . واخا لاللة ماعليش على خاطرك
فاتي: ماشي كنتهرب .. غير مزال مكنعرفو بعضياتنا وضافي
صفريوي: ونتشاوفو وديك الساعة نعرفو بعضياتنا .. علاه كي بغيتي نعرفو بعضياتنا ؟!
سدات تيلي وتكات على ضهرها كتفكر وتخمم ... شنو دابا؟ العلاقة تطورات راسها ومكانتش ضاربة ليها حسبة .. شهور وهي كتهضر معاه . ولابد يجي النهار اللي يتلاقاو فيه وإلا تجمع وطوي هاد وتسد هاد الصفحة اللي بدات معاه . حسن ماتصارحو وطلع غدارة وكدابة وهي طول الوقت كتعاود ليه على الغدر والكدوب وفاللخر طلع نامبر وان .
نعسات كتخمم وتبلاني وتهدم وصبحات كتخمم ثاني .
باقي الحال هوا الحال .. فاطمة الزهراء من الخدمة للدار واللي كامل تبات مجمعة هيا وياه فواتساب .. مرة يسيفط ليها فيلم مرة نكتة مرة يتجمعو فالسياسة مرة فالحب كل مرة فاش . . . وكل مرة يجبد ليها موضوع اللقاء كتقلب ليه الهضرة .
دازت 5 شهور على هضرتهم فواتساب .. يوميا ضاحكين ومرة غضبانين.. مرة تصوني مايجاوبهاش وتغضب ويرجع كيسيفط ليها ويحزرها ويبقا عليها حتى ترطاب . مرة يغضب عليها وتبقا عليه بالميساجات حتى تصالحو . والايام غادية .. حتى لواحد النهار واقفة فلاكيس وخوا يصوني ليها ج
صفريوي: الزين ... صافا؟
فاتي : حمد لله ههه لقيتيني خدامة كي داير لاباس عليك
صفريوي: بيييس الى خرجتي نشوفك ... حطي داكشي اللي فيديك وخرجي انا جيت على قبلك نشوفك
تصدمات فاطمة الزهراء وبقات مصمرة شوية حتى استوعبات وخرجات عندو كتقلب عليه بعينيها ، بان ليها واقف بالجنب لابس سروال قهوي وقميجة ونضاضر على عينيه .. شعرو كحل وطويل رقيق شوية . عقلاتو من خلال التصاور ديالو اللي شافت فالفايس بوك عرفاتو ومشات عندو لابتسامة خجولة وقفات عليه
فاطمة الزهراء: السلام
كمال : اهلاااان هههه
حيد النضاضر وتحنا عندها سلم عليها بالوجه .. ايه هوا كمال صاحب واءل .. كمال اللي كان جالس معاه فالقهوى وشافها وتلف .. لاكن فديك الوقيتة كانت فاطمة الزهراء معمية ليها البصيرة مكتقشعش قدامها ومعاقلة على تا واحد .. الغضب والنار غشاو ليها عينيها حتى مابقاتش عقلات عليه زاءد العام ونصف اللي داز على حادث نسات وجهو اللي فالاصل ماركزاتش عليه باش تحفضو و تعقلو .
كمال : ومالكي هاربة .. اش وقع دابا؟ ههه
فاتي: والو هه.. غير صدمتيني جيتي من كازا لأكادير ههه بزاااف عليك الطريق
كمال : اللي كيعرف بحال هاد الوجه يجي عندو من النرويج .
فاتي: دخل .. جلس انا شوية نسالي الخدمة ونجي نجلس معاك
كمال : ماشي مشكل نخليك تا تسالي ونرجع عندك... نمشي نشوف شي اوتيل قريب من هنا
فاتي : واخا
عاود سلم عليها من الوجه ومشا .. دخلات لخدمتها تكملها وهي كضحك وتفكر كلامو المعسول ليها اللي مكانش واءل كيقولو ليها . كتبقى خدامة حتى كتسهى فشي كلمة من كلامو وتبدا ضحك . كملات خدمتها وخرجات تلاقاتو ، مشاو لقهوى جلسو فيها وهي كضحك حشمانة منو وهوا كيشوف فيها بنضرات اعجاب حتى كيحمار وجهها . مد يدو فوق الطبلة شد ليها فيديها وقال
كمال: نقول ليك واحد الحاجة ؟
قالت بارتباك وخجل كبير : و .. واخا .. قول
شاف فيها وقال : ليوم هوا النهار الكبير .عندي .. عرفتي جاي و كتخيل اللقطة اللي غنشوفك فيها .. ماعرفتش شنو درتي ليا .. سحرتيني وليت ديما كنفكر فيك
هبطات عينيها فرحانة وعاجبها الحال .. بقات ساكتة شوية صونا ليه تيلي وجبدو شاف فيه وقال
كمال : واحد الدقيقة .. كيعيطو ليا من الخدمة .
حركات ليه راسها وهي كترد الشعر كو ودنها فخجل كبير . ناض خرج لبرا وفتح الخط
كمال : الو ؟.
- كي وصلتي مزيان ؟
كمال : عاد كي وصلت
- قلتي غتوصل تعيط مالك معيطتيش؟
كمال : غير وصلت عيطو ليا الخدمة وتشغلت . . . الدراري لاباس عليهم ؟
- لاباس حمد لله .. شحال غتبقا تما ؟ غتعطل؟
-كمال : لا غير واحد اليوماين نسالي الخدمة ونرجع .. يالاه تهلاي فراسك بالليل فاش نسالي نعيط ..... بسلامة
قطع التيليفون ورجع طلع عند فاتي بابتسامة
كمال: تعطلت عليك الزين ديالي
جلس حداها كيتجمع هوا وياها تا مشا الحال وناضت وصلها بطموبيلتها حتى للدار . سلمات عليه ونزلات طلعات فحالها ؛ اللقاء زاد قربهم من بعض وزادو تطلقو مع بعض اكثر ، عاود تاصل بيها بالليل وشد معاها الحديث .. شوية ..شوية شوية بدا كيفوتو الحدود الحدود ديالو ..
قطعات معاه .. لاكن حسات براسها كتجاوبو بزز .. يمكن حيت رجع كيهضر معاها بطريقة مارتاحتش ليها هي ماشي بحال من قبل ، حطات راسها على المخدة نعسات وماهي غير ساعة الا ربع وبدا الصونيط كيصوني فالباب .. ناضت دايخة من النعاس... يالاه طاب ليها النعاس وهوا يصوني الباب ، هزات بينوار طويل لبساتو وخرجات خايفة لوسط الدار وقفات حدا الباب وقالت
فاتي: شكووو؟؟!
كمال : انا كمال غير حلي
تصدمات وحلات ليه الباب بالزربة شافت فيه مصدومة وقالت
فاتي: كمال!!! علاش جيتي ياك لاباس؟
كمال: غتخليني واقف فالباب؟
بقات كتشوف مالقات ماتقول وخافت شي حد من الجيران يشوفها وهي تقول ليه
فاتي : منقدرش ندخلك الدار فيها الكامرات وماشي ديالي ... سير دابا عفاك قبل مايحل شي حد الباب يقول عليا شي كلمة خايبة ... سير عفاك
كمال : ياك نتي قلتي اجي؟ كتجري عليا دابا؟
فاتي : حاشا ولاكن غير ضحت معاك .. سير عفاك سير حتى لغدا
دفعاتو مخلوعة وسدات الباب وقلبها غيسكت ... ماحملاتش راسها وللحضة كرهاتو وكرهات التصرف ديالو ، مشا رجعات لبلاصتها نعسات وكتعاود السنيتة مخلوعة حتى داها النعاس . الصباح فيقها التيليفون كيصوني وفتحات الخط جاوبات
فاتي: الو ماما لاباس عليك ؟ كيدايرة كي داير با وخوتي كلشي مزيان؟
عيشة : كووولشي بيخير نتي مزيانة ؟
فاتي: الحمد لله مزيانة
عيشة : المهم راه فلوس لاصورانص خرجو على سلامتك ... شحال وهما كيجرجرو فينا . وباك راه مابغاش يقولها ليك ودار معاهم نهار الاثنين يدوزوهم ليه للبنكة و مع 10 دالصباح نهار الاثنين قالو ليه تجي تسنيي الوراق باش يدوزو ليه الفلوس .
عيشة : هاني علمتك .. وماتقولي بيه والو راه مافراسوش عارفة راه غير حصلتو وصافي اما راه مابغاش كاع يسييق لينا لخبار ..
فاتي: ولاهيلا زوينة هادي !!! ولي امري غير فلفلوس ! وفاش نسول على فلوس لاصورانص يقول ليك باقا حتى لعام الجاي حتى لعام اللي موراه !
قطعات مع امها وناضت مشات للخدمة .. ماعيطاتش لكمال ولا طاح ليها فالبال .. قضية لاصورانص ربجاتها وخافت باها يسرط ليها فلوسها وخيليها الله كريم وهي شحاال كتسنا فيهم يخرجو ليها . داز النهار وحتى كمال مسولش فيها ، حتى قربات تخرج باليل وهوا يسيفط ليها مسج وهي خارجة من الباب
كمال : راني مقلق عليك .. ومع ذلك ماسولتيش فيا . نازال منسيت داكشي ديال لبارح .
عيشة : قالك فوقاااش جات وفين جالسة ... راه بغا يطرطق محشابش ليه كاع يخرج منك هادشي كامل ... بغا يحكمك ماعرف مي يدير ليك وانا قلت ليه مافراسيييش .. المهم فلوسك شديتيهم .. اسوا متعرفينس منعرفك حيت عارفة كن شدهم مكنا نشوفو منهم تا ريال ويقول باقي مشدهم ... بقا يغوت وقالينا تبيعني على بصلة ههه
فاتي: مانبيعو ما يبيعني يعطيني شبر التيساع نكون بيخير ... مافهمتش باغيني وماباغينيش؟ الى باغيني غير باش يدير فيا اللي بغا وينكدها عليا غير خليني هاكا حسن ليا .
دازت ليها دوزيام ابيل وقطعات تيليفون مع امها وجاوبات كمال
فاتي: الو كمال
كمال : سيفط ليك مسج لبارح مجاوبتيش وعيطت ليك مجاوبتيش .. مافهمتش مالكي؟ انا جيت عندك من كازا باش نشوفك ونتي كديري معايا بحال هاكا؟! واش ماباغانيش نجي
شدات جبهتها كتنهد وقال : اففف كمال ..كمال سمعني انا عندي شي مشاكل عاءلية ولبارح كنت مشطونة ناشي ماشي متبغيتكش ولا درتها ليك بلعاني ... شي حاجة خرجات ليا من الجنب شديت الكار بالليل وجيت لكازا .. راه عقلي عامر
كمال : كفااااش!!!!! وايلي على مشيييييتي لكازا!!!
فاطمة : الزهراء : اه حيت عندي شي حاجة ضرورية داكشي علاش جيت وغنبقا واحد السيمانة نشوف مي وخوتي شحال ماشفتهم ونقاد شي مساءل مع البنكة عاد ديك الساعة نجي .. غير سمح ليا اخويا والله
بنت الحومة الجزء الخامس
محتوى القصة
التنقل بين الأجزاء