لا ماكلة كلات فخاطرها ولا راحة ارتاحت ..كل مرة تبدل البلاصة وتشوف فالساعة الحائطية وتتسنا مجيئو باش تلوح ليه موضوع الطلاق لوجهو نيشان ..تشوف ردة فعلو وشنو رأيو وحتا اللي مخبي يبان
ساعة دازت ..جوج تلاتة وربعة حتا ظلام الحال والليل بدا يتناص.. نفخات بغضب وراسها بالاعصااب بغا يتشق دخلات لبيتها كاتغدد جبدات تيليفونها وتكات على السرير تتصوني لعزيزة .. طمنات على عمر وحالتو ودوات معاه واخا غير هي اللي تتهضر حسن من والو وعلى الأقل عرفاتو فامان واخا ماشي حداها وفحظنها
شافت فالتيليفون موسعة عينيها ودماغها غادي جاي يفصل ويخيط ..حتا دارت ليها طن فالراس وتفكرات داكشي اللي صيفطات من تليفونو، ممكن يكون مخبي فيه شي حاجة على خدمتو ولا دليل يخليها لا بغا يلعب معاها تلوي ليه الدراع وتهرس ليه الراس ..دخلات بسرعة لبلاصة الملفات تتقلب بين آخر الصور والفيديوهات اللي وصلوها
دخلات التصاور هوما اللولين ..شي منهم عادي ..شي ملفت للانتباه حدو متكي عريان ومصور نصو الفوقاني ..والاكترية بوضعيات متيرة كتر من اللي كادير هي.. مرة مماطي شفايفو وعاضهم بنظرة شهوة ولا فالحمام مخشي وسط الرغوة والورد الحمر
بدات الصدمة على وجهها كاترسم مافاهمة لاعلاش ولا كيفاش
زغبوها صبعانها ودخلات للڤيديوهات تتفرج فيهم واحد واحد.. تما الما شل ليها الركابي ولجم ليها اللسان.. عراق جبينها وقلبها بوترات سريعة كايخبط حتا من عينيها جمدو
ممصدقاش الشي اللي تتشوفو بعينيها ..ورغم عدم معرفتها بجنس ادومة ولا بهاد النوع ديال متليي الجنس ..جا فبالها حاجة وحدة "قوم لوط"
سمعات حكايتهم وسمعات بعض الأقاويل بين العيالات على فلان ماشي راجل فلان خرج ليها طاي طاي وولا مرا، لكن باش تشوف نمودج حي قدامها ويطلع ولد عمها اللي فواحد النهار كان تايبان ليها ونعم الرجل ..كانت صدمة بطعم مر مابغاش تتسرط ولا تتقبلها بسهولة
تحل باب الدار تحت صدمتها بداكشي اللي تتشوف و بلا ماتحس ولا تفطن بيه ايمتا دخل وايمتا وقف وراها تايشوف فالتليفون وباغي غير يعرف مال وجهها مخطوف منو اللون
رجع خطوات بطيئة وراه.. حطات يدها على فمها تترعد بالخلعة فاش شافت ڤيديو آخر فضيع مقزز لمحمد مع جوج رجال، جاتها التبويعة بقوة اشمئزازها من المنظر وعاد غاترد حسات بدقة قاصحة فراسها نيشان..
رجعات تتشوف كلشي كايدور والضبابة على عينيها، حتا طاحت على الفوطوي مغيبة وهو بهدوء هزها غادي بيها للبيت وعلى السرير حطها ..حيد ليها التليفون و فالاه كلو، شاف آخر المكالمات والميساجات اللي سيفطات ودخل للواطساب كايسمع للاوديوات
.. تأكد باللي غير هي اللي عرفات الموضوع عاد لاحو فالارض وعفس عليه حتا تفرتت ومشات ليه لافيشور
ضلام الحال وتناص الليل عاد قدرات تفتح عينيها بصعوبة وتستعيد وعيها ..كمشات حجبانها تتخنر حواليها مدة قصيرة عاد ناضت قافزة والحريق كاينهش راسها بعنف..
حيدات الغطا وحطات رجليها على الأرض باش تنوض حسات بوخز على راحة اقدامها بعداتهم وشافت تليفونها مخرشش كامل مابقا ليه من التليفون غير السمية .. قلبها بخوف مشا وجا هزاتو تتشوف فيه بهلع وناضت خارجة من البيت تاضور راسها فكل مكان وتقلب
محمد: صباح الخير
ضارت بالزربة مخلوعة وهو ببسمة خفيفة خرج من بيتو وبرك على الفوطوي بهدوء ..نظراتو الباردة فعفعاتها من لداخل ولات غير تتدور فعينيها وتشوف ناحية الباب حتا نطق
محمد: سديتو بالساروت.. بلا ماتحلمي تخرجي
زيرات يدها وبغل خنزرات فيه ولات قارفاه من ساسو لراسو والشوفة فيه تتجيب ليها القيء: نتا شنووو طييينتك.. واااش بنااادم نتا مسلم ؟؟ عااارف هااادشي اللي تادير حرااام
ببرود قال: مكانش خاصك تشوفي دوك التصاور.. كنا غانديرو انا وياك نقاش زوين بلا مايحتاج تشوفيهم ولكن نتي كاطيري ابنت عمي
خنزرات وقربات ليه: ضبرررر لمخك اعيييفة الرجااال واخا هاااد الكلمة بزاااف علييييك الشييخة.. انا المهم عندي هو طلقني وتبعد على سااحتي حسن ليك
ضحك باستهزاء: نبعد؟ هاكة بلا فائدة بلا جوج ؟ تؤ تؤ انسيمة.. هادشي مازال غايطول.. والى خدمتي معايا دماغك غانخرجو منو مستافدين بجوج انا ونتي فنفس الوقت
ردت كاترعد بالاعصااب وجنونها عليه كايغليو: ماغاانحطش ايدي مع وااحد فحاالك واخا ماعرت شنو يكووون.. كنت نسحاابك ولد الناس وبااغي بصح تعاونني ساعة جلاخة وبزاف عليه أولد فاطيمة
رد: كترتي الهضرة بلا فايدة .. كون خدمتي عقلك من اللول غاتعرفي باللي تاواحد مكايعاون هاكاك ولله.. نتي كنتي بحال شي "قلب شفايفو ورجع قال ببرود" بحال ديك الورقة الغابرة والتمينة.. كاتحطها فالجنب وتحافظ عليها حتا يجي الوقت المناسب و اللي خاصك تجبدها فيه.. ديك الساعة عاد كايبدا اللعب ديال الصح
ضحك وقال: بالعكس هههه من اللول جيتك صريح نتي اللي سمعتي حس الحرية ومابقيتي كاتفكري فوالو .. گلت ليك باللي فاش تتكون مصلاحتنا فشي حاجة.. كانديرو أي حاجة باش نوصلو ليها ومصلحتي فيك كبيرة بزاف.. وجا وقتها داابة
ناض وقف تحت نظراتها الكارهة وحمورية عينيها.. ماكرهاتش تقتلو فهاد اللحظة وتغزز فيه سنانها عل وعسى تبرد، جبد تليفونو وقف قبالتها وقال بهدوء: عمر فين ديتيه
بجنب فمها بسمات وقالت مخنزرة: عمر خليتو عند ماما تشوفو وگلت ليهم باللي العشية غانرجع ليه.. دابة فاش مامشيتش عاد غايشكو باللي شي حاجة واقعة وغايتفضحو فعايلك طال الزمان ولا قصاار
بدا كايدوز رقم عزيزة وقال: فاش كانكونو باغين نفضحو شي حد خاصنا دليل ابنت عمي "دار اوط باغلوغ وقال" غاتگولي ليها اليوم مشغولة ونسيتي تجيبيه.. وباللي غدا غاندوز ليه انا ..تخربقي الهضرة ولا نحس بشي حاجة ماهياش وجهك غانرونو ليك.. متافقين ياك
تحل الخط فورما سالا كلامو وردت عزيزة: الو نعام اسي محمد
أشار ليها تهضر وبقات ساكتة كادورها فدماغها حتا بان ليها خنزر وبدا الدم يطلع ليه
عاد بهدوء قالت: عزيزة هادي أنا
عزيزة: لالة نسيمة ؟؟؟
ردت: آه احبيبة.. كيدايرة ماما لاباس عليها
عزيزة: لاباس الالة وحتا سي عمر بيخير
نسيمة: ايوا مزيان.. صونيت باش نعلمك باللي اليوم مغانقدرش نجي لعمر.. تشغلت بالخدمة اللي گلت ليك، غدا وغانسيفط محمد يجيبو واخا؟
ردت تالفة ومعارفة شنو تفهم : ء ء ء؟
حيد اوط پاغلوغ وقال بشك: مالها تلفاات
طلعات حاجب بحدة: راه گلت ليييك باللي كنت ناوية نرجع لعمر.. زايدون فين عمر خويا بات برا الدار وبلا حوايجو من الفوق معلوم غاتشك
بقا مدة كايشوف فيها والشك كياكل فيه: نحصلك تتلعبي ورا ضهري قسما بالله حتا ندير فك اللي عمرك شفتيه
زير فمو وهي بدات تتقادهم مرة خرا..هزات الفوطة اللي جاب وقبل مادخلها لاحت التليفون وسط الساك وحطات عليه الفوطة بالزربة وسداتو
نسيمة: هاك.. دي معاك الكرات تاعو راهم حدا الباب
خنزر فيها وخرج من البيت.. عاد غاتتبعو هو يسدو عليها وخلاها حاصلة تما بوحدها بين ربعة الحيوط وحتا السرجم عاالي، ضربات فالحيط مغددة والشمتة وااحلة ليها فالحلق، بقات غادة جاية تتعض شفايفها ومية تخميمة وتخميمة فبالها كادور
رجعات تاني هي وراسها .. مكاين علامن تعول ولا شكون يشد بيدها أو تهرب عندو باش يفكرها.. لا عائلة توقف معاك.. لاصحابات دارتهم.. وحتا الشيف ديالها ماتقدرش تخلها لهاد المشاكل وهي عارفة جدها مزيان شنو كايسوا
تمنات للحظة كون فتحات التليفون البارح وعرفات شنو فيه .. كون غير ماتشغلاتش بموضوع عمر وغفلات على داك الدليل المهم كون راها مطلقة دابة ومخها هاني
تمنات كون كان داك الورت فسميتها هي، كون باتت ماصبحات دير ليهم من هنا مرت وتحليهم عالضس لهلا يقلب ..لكن مع الاسف باها عند ظنو حماها من جدها وكتب كلشي فسميت حفيدو اللي باقي حتا ماتزاد
گلسات على السرير دايخة بسير وأجي وهاد المرة تتفكر فشنو غايكون باغي منها ..علاش حاطها احتياط عندو؟ زعما داك البار اللي سمعات عليه مانجحش وبغا منها الفلوس؟ يكون باغي شي دهب تاني ولا ياكما غايديها تخدم تما ؟ ضحكات بالفقصة آخر ياامها ورا هاد الدمير كلها تولي ق**** عند ولد عمها.. زيرات ايدها حتا تجرحات وراسها ضرها بالتفكير ..تبلوكات حتا مابقا ليها فين تزيد وولا أملها الوحيد هو دوك الڤيديوهات للي باينة فعينيه خالعينو
ساعات طويلة وهي على حالها كاتفكر ..حتا تسدو عينيها من العيا وحطات راسها على مخدتها
★★★*★
صبح الصباح ..تسمع فودنيها الحس وسط الدار والسوارت فباب بيتها كايدورو ..قفزات فالبلاصة وناضت وااقفة تترمش بحدر ..دخل عندها محمد مبدل حوايجو وببسمة عريضة قال
سبقها وهي شافت جنابها كاتقلب.. بان ليها مبرض حدا عكوراتها هزاتو بالزربة وخشاتو فكمها على الأقل يكون معاها شي سلاح الى حتاجت تستعملو
تبعاتو من اللور بتردد وتنفسها كايضيق ..فورما خرجات من البيت بان ليها شي واحد بارك فالصالون مع محمد.. قرنات حجبانها مخلوعة وتوجهات عندهم.. كيف شافتو وسعات عينيها على جهدهم اللون من وجهها مشا فحين نزار بسم ببرود ورد ضهرو اللور كايشوف فيها
مباشرة قال: بغيت منك ولد انسيمة.. محتاج النص من داك الورت اللي خلا ليك باك.. بلا ماتزربي حيتت حنا بتلاتة غانستافدو من هادشي.. انا غانخلص الكريديات اللي عليا.. نزار اصلا كايبغيك وباغي يدوز معاك واخا غير ليلة وحدة ..ونتي باغة باش ديري پىوجي ديالك وتبعدي من الطمع ديال عبد الكبير.. يااك ؟
وساعو عينيها وتشوكاو فيه بصدمة ..مابقا ليها ماتگول ولا تزيد سالا معاها وحتال هادي مضربات ليها حساب
عصرات ايدها وقالت: حتا أنا مكانتيقش فك وتاحاجة مضامنة ليا واحد غدار بحالك.. ولكن غانزعم حيت محتاجة دوك الفلووس لمستقبلي ومادام كل وااحد فينا مصلاحتو عند لااخر غير تحمل
خنزرات فيه وضارت راجعة الكوزينة كاترعد ..تأكدات باللي دخل للصالون وگلس كايعاود الخطة لنزار عاد حطات ايدها على فمها تتبكي وتردد قدام عزيزة اللي عينيها خاارجين بالخلعة
نسيمة: مشييت فيها اعزييزة مشييت فيها هءهءهء هادي هي اللخرة ليا ءهءهءه
بهستيرية خوف قالت: انا اللي درتها لرااسي اناا.. واش هاد العائلة يتيقو فيها النااس؟ انااا اللي لحت راسي للعافية وكايسحابلي لقيت اللي يعاونني بصح ويخرجني من ديك الدار هءهؤهء الله ينعل النهاار اللي فكرت فيه نتزوج كون غير مت حسن ليا هءهء
ردت كاتبكي معاها: لا الالة غير فكري غانلقاو شي حل هءهءهء
ناضت كلها تترعد مسحات وجهها بالزربة وقالت: التليفون صيبتيه
بارتباك ردت: د ديتو للمعلم باش يخرج ليا داكشي اللي فيه.. وواخة عطيتو الفلوس بزز باش گاليا رجعي غدا اما فاللول گال ليا سيمانة؟
خرجات عينيها: اوويلي على غدا؟ هاااد الليلة الى مالقيتش حل غانموت فيها صاافي
قالت بدون تفكير: نعيطو للبوليس
بقات غادة جاية تتفكر وترعد: شنو غاتگولي ليهم عندك شي دلييل؟ لا لا لا بالعكس عاد غانزيد نورط راسي ونعرض حياة عمر للخطر اللهم بلاش.. حتا الشيبة العاصية هادشي اللي باغي ولد الحرام ومستحيل يعاونني "حكات شعرها بسرعة تتفكر" خااصني نعطلهم هااد الليلة حتا نرجع الڤيديواات ونشد الدليل فيدي .. ولكن كيفاااش.. كيفااش اربي كيفالش
سكتات عزيزة كاترعد وتحاول تفكر ليها فشي حل
حتا طلعات فيها عينيها فجأة وقالت ساهية: خاصو يدير كسيدة.. هاكة غانربح الوقت ؟اه نزار خاصو يدير كسيدة باش مايرجعش هاد الليلة
خرجات عينيها: گلت لييك سيري.. طلقي رااسك قبل ماينوض فيهم شي حد
مشات تتجري ونسيمة بالحس تابعاها.. كيف دخلات عندهم وهي حلات الباب بالحس ووقفات حداه كاتسناها وتترعد حتا خرجات من الصالون هازة الكيسان فيدها وكاتقفقف ..جابت ليها الساروت بالزربة ونسيمة شداتها جرية وحدة بالحفا للتحت..
لحسن الحظ مالقاتش العساس فالباب وخرجات تتقلب على طموبيلتو حتا لقاتها بعيدة بخطوات قليلة على العمارة.. مشات جيهتها وعينيها كايلتافتو فجنابها تتأكد ياكما شافها شي حد .. بقات تاضور عليها وتفكر شنو دير بالضبط..الروايض الى فشاتهم غادي يلقاها سبة وماغايمشيش ..ادن شنو تقطع وشنو السبب فالحوادت.. وقفات مبلوكية كاتفكر وتعاود حتا حلاتها وبقات كاتشوف فالازرار ماعارفة شنو دير.. وركات هنا وهنا حلات الكوفر وتحل حتا الكوفر القدامي.. تما حبسات من الحركة والفكرة وصلاتها ..خرجات من الطموبيل كاتزرب زادت حلاتو وبقات كاتشوف قوة والسلوكة والپريزات.. دارتها على الله وخدات واحد فيهم بعشوائية تادوز عليه المبرض بصعوبة وبسرعة حتا تقطع أخيرا ..سدات الطموبيل وقلبها كايرجف بالخلعة.. شافت حواليها اخر مرة ورجات داخلة كاتزرب وتنهج وضهرها كامل عراق
تجمع الغدا اللي ماعرفاتو منين داز غير تتسرط بلا مديغ وتاتحاول تبين راسها عادي وكلشي هو هاداك ..غسلو الماعن ووحدة تشوف فلخرة بنص عين ..عمر باقي فالبالكو شاد الكاميرا وأصحاب دعوتها باركين تايضورو عينيهم بمكر يوقع اللي بغا يوقع الليلة ناوين ضربتهم تضرب
سمعات تحنحين ونزار ناض هز سوارت طموبيلتيو وكايتسالم مع محمد .. تسناتو حتا خرج وتسد الباب عاد طارت للبالكو عند عمر وعزيزة وراها تتشوف لتحت وعينيها على باب العمارة.. بان ليها خرج بشوية عليه .. خدم طموبيلتيو وركب سد الباب وبقا بلاصتو، مازاد مارجع اللور وتاحاجة من داخل السيارة متاتبان ليها.. عقدات حجبانها بخوف فاش شافتو برك مابقا زاد واللي خلعها كتر هو كلام عزيزة وشكها
لبسات جلابتها وخرجات بزز مشطون بالها بلا قياس على نسيمة.. هاد الأخيرة اللي دخلات عندها خوها وتمات غادة لبيتها بعدما قالت
نسيمة: الى رجع علمني
رد كايضحك: كوني هاانية.. عنداك غير تنعسي
خبطات الباب فوجهو ودات عمر ياخد قيلولة.. بقات واقفة تطل على السرجم وتسمع من ورا الباب ..غادية من قنت لقنت متوترة كل التوتر قدام رهان حياتها وغاضربة غاتحكم واش ليلتهاا غايطلع فيها ضو ولا غاضلام لآخر يوم فحياتها
سوايع دازو حتا تشغل محمد براسو والوسواس بداه.. ماقدراتش تزيد تسنا وخرجات عندو للصالون مربعة ايديها وتتعوج فمها
نسيمة: نزل الليل وباقي مارجع.. هادة فين مشا؟
طلع فيها شوفات مخنزرين وقال: يااكما عندك يد فهاادشي.. رااوالله لافلتتي من يدي لاحصلتك تتلعبي عليا
ضحكات باستهزاء: وانا مالي ..عوض تبدا توسوس غير بوحدك نوض قلب عليه وشوفو فين زااد
صونا تليفونو قبل مايجاوب هزو مخنزر ورد امام مسامعها: الو الحاج ...شنو "تغيرو ملامحو للصدمة فجأة وطلع عينيه ببطء فنسيمة" نزار.. نزار مات !
فرمشة وبلا حد مايحسب حساب.. مات
الموضوع كان أكبر صدمة للعائلة كاملة..
تاواحد ماتوقعها ولا جات على بالو وحتا من نسيمة تشوكات ولسانها تسرط
دار الوراقي اللي عاد البارح كانت تتبان للناس هانية وماخاصها حتا خير .. تحلو بيبانها اليوم بعد الدفن لاستقبال العزاء وولا شي داخل شي خارج
..صوت القرآن مطلوق بالبيفان واصوات البكاء يدمي القلب .. فريعان شبابو مات ..مشا ضحية افعالو غرورو ونرجسيتو.. مشا صغير ماتحب ماتزوج مادار حتا حاجة تنفعو ولا تشفع ليه عند الله.. ماخدم لآخرتو ولا دنيتو.. عاد كان كايفكر يخطف عدرية إنسانة بريئة ويعيشها عداب يشفي بيه حقدو وغرورو.. فجأة وبلا مايضرب حساب، جات الموت وخطفاتو
واللي جاتو الضربة قاصحة بلا قياس.. هي الأم ديالو، مشا ولدها اللي على قبلو ماخلات مادارت ..دفناتو ولبسات عليه حداد بعدما ظنات انو هو اللي غايدفنها، الواليدين قدما كان قلبهم حجر أسود.. عند ولادهم كايرجع زبدة بيضاء ومكاين اللي يبغي ليك الخير قد واليديك.. مقولة كتنطابق على فاطمة
اللي مربعة على الزربية تبكي وتگول مابكيت.. حالتها تقطع القلب وگاع حناكها جرحاتهم بالقميش مابقا فوجهها مايتشاف.. تغوت وتندب وتردد بأاالم "كون عرفتو غايموت مانخليييييهش يخرج ءهءهءه نبيتو حدايا ونشدو بسناني وماااايخرجش" بحالا الموت مغاتقرش توصل عندها.. اولا غاتستحي تاخد إبن من حظن امو
اللي دخل كايجي يواسيها ويحاول يصبرها ماأمكن وهي حر الوجع ممخليها تسمع والو من غير صوت نزار اللي باقي بين ودنيها كايدور .. حتا من حورية بكات عليه لا هي لا لايطو لاعزيزة، ونسيمة حتا هي
گالسة حدا العيالات تتشوف ففاطمة وتبكي معاها عشرة للعين.. تبكي على زهرها ومكتابها ..تبكي على اللي وقع واللي كان غايوقع ..تبكي وتشهق وتخنق، واخا كلشي ماتمناتش ليه يموت ديك الموتة، محروق والطموبيلة تفرگعات حتا مالقاو مايجمعو فيه، ولا يمكن يستاهل؟
وسط عزاه والناس تتبكي عليه وتتحصر إلا هي، تبكي على راسها فقط وتتتسول واش ربي اللي خدا انتقامها منو ولا هي اللي دارت شرع ايديها، واش كان مكتاب عليه يموت موتة شنيعة و ربي نجاها من فعايلو ولا كان خاص تعيش عداب من نوع آخر ديك الليلة وتخلي اللي بغا يوقع يوقع . غصة فقلبها تتعصر صدرها وتخلي دموعها غير مازادو نازلين .. حتا ماقدات تبقا تما وناضت تتجر رجليها لبيتها وعزيزة بدموعها ناضت تابعاها بالما
حلات عليها الباب لقاتها على طبلة مرايتها باركة وساهية تتشوف راسها وعينيها نايمين
تقبط قلب عزيزة كتر ماهو ممقبوط وحطات ليها كاس الما حداها ..شافت فيه ببرود بسمات بجنب فمها وطلعات فيها الشوفة ناطقة بنبرة باردة
نسيمة: هادة ماعندو مايقضي ليا اعزيزة.. واخا نشرب اللي شربت الحرقة اللي عندي لداخل عمرها طفا "شافت قدامها تتتنهد من أعماقها ونطقات" دعيتهم الله ياخد فيهم الحق
شدات فيدها والدموع فعينيها: نتي الالة ماليك دنب واش كنتي قاصدة يموت؟ هءهءربي فكك منو أما اللي كان غايوقع فيك كتر من الموت براسها هءهء
ليلة طوييلة و صعيبة دازت، ووراها جا صباح مغيم كايزمت النفس ويطيح المود .. مع دلك فايقة لايطو هي وعزيزة الصباح بكري كايوجدو للفطور وفم عزيزة من الشكاوي مابغا يسكت
عزيزة: واخا يكون قلبو حجر.. تصوري مانزل عليه دمعة وحدة بحالا ماشي جدو ! لا لا بزاف على قصوحية القلب
تنهدات لايطو وقالت: اللي ماخرج من هاد الدنيا باقي العجب يدوز بين عينيه، كحولية القلب ابنتي مكايداويها إلا القرب من الله سبحانه.. تتخاف تاكل من مال المسكين ولا ظلم خوك المسلم وضميرك ديما واقف حداك ينبهك بعداب الله ويفكرك كل مرة ..ولكن اللي ظل طريق الحق ومتابش، ربي غير مكايزيد يظلو ويكحلها عليه حتا تايجي نهار يخلص فيه كلشي
عزيزة: يااربي تحفظنا من شر الخلق يااربي.. حتا خوه حدو جا حضر مع الناس ومشا بحالو، سي عتمان هو اللي بقا فيا مسكين شبع بكا.، كبدتو تشوات
لايطو : الله يصبرهم.. واخا الكبدة صعييبة
تنهدات بضيق: اميين، غانمشي نفيق لالة نسيمة
لايطو: سيري طلي عليها مسكينة ولاماقداتش تنزل طلعي ليها فطورها
نسيمة: فاش .. فاش سمعتك متي، تيق بيا الدنيا دارت فعينيا انزار.. نتا كرهتيني فحياتي وكنتي غاتقتلي شحال من مرة.. ولكن عمري دعيت عليك من قلبي، عمري كنت متمنية انك تموت موتة بحال هادي ..عمري تمنيتك تحرق فالدنيا قبل الآخرة هءهءهء
واخا هاكاك كرهتك من كل قلبي، كرهتك انزاار ودعيت الله ياخد فيك الحق "مسحات الدموع اللي نزلوا ليها وبصوت مغنن كملات"
بغيت غير نفهم، حنا علاش ولينا هاكة؟ ايمتا حقدتي عليا لهاد الدرجة وشنو درت ليك؟ شنوو ءهءهءه يااريت كون بقينا صغار ..ياريتك بقيتي داك الولد اللي عزيز عليه كلشي وكايضحك مع كلشي هءهء داك الحب بقا مقابل هو اللي كنت محتاجة.. ماشي اللي كنتي نتا باغي
.. انا عمري كنت ليك وعمري نكون..واخا هاكاك عمري فكرت نآديك ولا نجرحك ..نتا ضطريتيني هءهءهء نتا السباب فموتك هءهء اما تغتاصبني ونموت من وراها ..ولا ندافع على راسي منك، وانا اختاريت رااسي هءهءهء
واحد النهار غانوقفو انا وياك قدام الله..ديك الساعة هو اللي غايقرر شكون فينا ظلم لاخر.. شكون قتل لاخر، واش انا ولا نتا؟ بلا مايبقا فك الحال..انا ماجيتش هنا باش نحاسبك ولا نزيد نحرقك ..جيت غير نگولك باللي انا مسامحاك على كلشي، كلشي .."سكتات مدة ووسط دموعها كملات" إلا حتا نتا سمحتي ليا
"شمرات بنيفها كاترعد ونطقات برجفة" الله يرحمك.. وياربي تصبرني
جمعات الوقفة تتمسح عينيها بالزيف اللي لابسة وراجعة ادراجها للدار ..وسط لخبطة الأحاسيس اللي فقلبها كاتصارع مكاينش حس الندم ..ماندماتش بتاتا على اللي دارت ولوكان رجع الزمن للور دير نفس الحاجة باش تعتق راسها ..من صغرها وهي مربية وسط دياب ولفاعي، من صغرها وهي تتصارع ودافع على راسها منهم واحد واحد وحتا اللي وقع كان عندها نفس الشيء، ولو بيديها تقتلو ودمو يلطخ ايديها مافارقاش
الحاجة اللي زيرات صدرها هي الطريقة باش مات ..ولو يكون متاتعرفيهش غير تسمعي على فلان مات محروق خاطرك تتروع ولسانك بلا ماتحسي كاينطق ياااربي السلامة
صعيب الحال، والأصعب هو تتعايش معاه.. ولكن الندم.. أبدا
دخلات للدار حيدات زيفها وبدات تتقلب على خوها وتزفر
نسيمة: عمر ..عمر
عاد غاطلع لبيتها تجرا من طرف عزيزة وتتشير ليها تسكت ..تبعاتها باستغراب لمكتب جدها كمشات حجبانها وقبل ماتسول سمعات حوار داير بين البوليس وبينو
الحاج: هادشي مأكدين منو
رد الشرطي: آه الحاج وكلشي عندك فملف التشريح، حتا أنو داز من حدا كاميرات واحد السطاسيون وبينو باللي كان كايسوق فحالة سرعة حتا خرج ليه رموك من الجنب، تما انحارفات السيارة على الطريق ودخلات فپوطو ديال الضو "تنهد بأسف وقال" وانفاجرات مع الأسف
زاد عقد حجبانو ونطق بغضب: ياااربي السلاامة ..بقا كايطير يطير يطييير حتا جابها فرااسو، كون كان يسمع الهضرة كوراه عايش مخير ولكن دارت صگوعية الراس
رد: الله يرحمو الحاج.. دعيو ليه بالمغفرة
حرك راسو متنهد: الله يكتر خيرك اسي الكوميسير عدبناك معانا
رد: الله أودي مرحبا .. الله يعاون
دارت مع الكولوار هي وعزيزة حتا خرج وهبط لتحت عاد تنهدات براحة وشافت فيها: حفظني الله
ردت: گلتها لك الالة.. ربي بغا يهنيك منو وهاهو بيك ولا بلا بيك مشا فيها دقة وحدة، ااودي الله يغفر ليه وصافي
شافت بحدر جيهة المكتب وصغرات عينيها فاش بان ليها سي عبد الكبير كايقاد سلهامو ونازل للصالون لتحت.. طلعات حاجب بحدة وطلات فالدروج لقات عمامها بجوج باركين تم عتمان عينيه دابلين وغضبو على وجهو كااره كلشي ومنهم راسو.. زاد الحاج برك وسطهم كايحك لحيتو بغضب وينهظ فيهم معااجبو حال
تصرفو البارد خلاها نطقات بغل وكره: الشيبة العاصية.. هادو ماعرفت شنو كايزندو تاني "شافت فعزيزة" الحاج دوا مع محمد؟
ردت: الحشمة بزاااف على شيييبة عاصية بحااالك الكااافر بالله، اللله يااخد فيك الحق..اللله يااخد فيكم الحق كااااملين هءهءهء
حمااار وعمامها بغضب مزيرين ايديهم كون لقاو يقتلوها فبلاصها
غوت الجد وايديه على تسبيحو مزيرين: حووورياااااا..اااجي دي بنتك من قدااامي قبل ماااانحد ليهاااا العمررر
وقف عتمان بعينين حمرين: غاااتسدي فمك تهبطي داااك الراس وتخرجي ولا أقسم بالله حتاااا نقطع لك اللساان ونرميه لكلاااب الزنننقة
بكات بحرقة وضيق فقلبها: بغييتكم غيير تبعدوووو مني هءهءعؤ وااابعدو مني وااااش باااغين تحمقوووني اعبااااد الله بااغين تقتلوني هءهء عطيوني التيسااااع انا مابغيت بو زوااااج هءهء مابغيييت زوااااج اعبااد الله وااااش انا شفت الموووت مع داااك الحيواان وباغين تردوووني لييييه ، بنتكم ولا لااااقينا فالزنقة هءهءهء
الحاج هز يدو وعطاها بظهرها للحنك حتا طاحت كاترجف ومها على داك المنظر دخلات كاتترعد وقفات بلاصتها بقلبها المعصوور لكن ماعندها جهد والا جرأة باش تتدخل
سي عبد الكبير: اناااا اللي كاگوووول ونقرر فهااااد الداار يااقليلة الترااابي وهاااادشي اللي غايكووون .. السيمانة جااية غاااترجعي لراااجلك بززز من وااالديك ونتي حااااانية الرااااس "هز عينيه بغضب فأمها ناطق وهي مرعودة منو ومفااهمة والو فالموضوع" غبربييي عليااا هااد الموصييبة من هناااا و ممنوووع تخررج من بييتها ولااا أقسم بالله حتااا حساابي غايكون عسييير معااكم كااااملين كاتسمعي..
قربات حورية تتبكي باش توقفها نتراات منها بحقد ووقفات راسها تاتشوف فيه بكره الدنيا ومافيه
نسيمة: هاد قليلة الترابي اللي قدامك .. هي اللي غاتمسح فسميتك الارض اجدي.. عقل على شنو كانگول مزياان
زير فكو بغصب وهي خرجات من الصالون كاتنفخ، أشارت لعزيزة تبعها وطلعات الفوق دخلات لبيتها ونيشان حلات الپلاكاار تتقلب بين صنادقها تحل وتسد حتا لقات سلسلة مدهبة وحوالقها، آخر حاجة بقات من الدهب اللي دا ليها محمد
خشاتهم فصدرها مزيان قادات الجلابة ودارت زيف على راسها هي دخل عزيزة كاتتقفقف
عزيزة: نعام الالة
ردت: جبتيه؟
حلات جيب طابليتها وجبدات منو طارط ميموار صغيرة: گال ليا راجمع كلشي هنا أما التليفون باقي خاصو شحال
زفرات: غايسحابهم خرجتي تسخري.. زگي معايا اعزيزة هاد الحفرة خاصني نخرج منها وباللي كان ماتخوييش بياا هنا
عنقاتها: الله معاك الالة
نسيمة: يااربي تتحل هاد المرة ياربي.. بقاي هنا حتا نرجع
خرجات كاتسلت شوية بشوية حتا وصلات للكوزينة ونقزات من شرجمها للزنقة ..قادات زيفها وزربات المشية للشاريع الكبير، أول طاكسي جا فطريقها شيرات ليه ركبات وقالت بتساؤل: عافاك الشريف واش كاتعرف شي مكتب المحاماة ؟
رد: اه ابنتي كاين واحد حدا هاد الشارع
بسمات فوجهو: ديني ليه عافاك
بعينيها عزم وإصرار ..نظراتها خليط بين الكره والحقد، كارهة البلاصة فين وصلات وحااقدة على جميع أفراد عائلتها من جدها لمها إلا باها هو الوحيد اللي كان ليها ظهر وسند تتكا عليه..
باعت الدهب وجاب ليها فلوس صحيحة خلصات بيهم المحامي ورفعات دعوة طلاق قبل البناء.. غرقات ليه الضوسي مزيان وتم تم عيط ليه المحامي بلغو باللي كاين صدمو صدمة العمر و بالدليل اللي محطوط فيدها ماعندو كيف يدير يرفض ولا يتفنفن أو يحل فمو لشي حد ويزيد شوهة على شووهة
نسيمة: شنو گال؟؟
رد المحامي بعدما حط التليفون من يدو: معلوم ماعندو مايگول، نكر فالاول لكن مللي سيفطت ليه جزء من دوك الڤيديوات سد فمو وبزز منو قبل الطلاق كوني هانية
ناض سلم عليها ببسمة وقال: غاتكون قريبة حيت هادا طلاق قبل البناء.. فهاد اليوماين وجدي راسك
نسيمة: موجودة من زمان
ودعاتو ببسمة فوق النفس وخرجات من تما بأمل كبير وهم تحيد من كتافها
رجعات للدار بنفس الطريقة اللي خرجات بيها وتاواحد ماحس.. طلعات لبيتها لقات عزيزة داها النعاس مع عمر والماكلة فپلاطو محطوطة.. بدلات حوايجها اولا غسلات ايديها ووجهها عاد كلات باش ترد الروح وتلقا الجهد علاش توقف
★..كونما هو كون من شحال هادي تهرسات .. كونما الشوفة فوجهو البريء وعزيمتها أنها تخرجو من سواد شر عائلتو كون من شحال هادي رفعات راية الاستسلام وعلنات على خسارتها
نسيمة كانت ليه بطلة منقدة وبفضلها كايتعالج ويشوف الدنيا بألوانها ..وعمر فحياتها بحال الفولاد اللي كايدفعها تزيد للقدام يحفزها وببسمة وحدة منو تنسيها گاع همومها واحزانها★
صباح آخر بعت شمسو على شباك غرفتها ..دازت يوماين بالتدقيق حسبات فيهم الدقايق والسوايع باش يجي هاد النهار ..نهار وتيقة حريتها ..
لبسات أجمل جلابة عندها طلقات شعرها وكحلات عينيها مزيان وكل مرة ضرب طليلة على عزيزة اللي بتوتر غادة جاية وراها مرتابكة وتترعد بالخلعة
نسيمة: ااودي يااودي وعلاامن عولنا
ردت كااتمتم: الالة هادشي خالعني بلا قيااس جمعتيهم ليا دقة وحدة وعارفااني كانخااف
ضارت ليها مطلعة حاجب: ياالمكلخة هو راه غايكون معايا فالمحكمة.. هاالساروت عندك والعساس راه كايعرفك مغايگول واالو.. دخلي جيبي ليا اللي گلت ليه وماتنسايش الصندوقة وسااكي فين جامعة وراقيا.. صاافي ورجعي عاادي حتا شراوطي وشراوط عمر خليهم لييه يبخر بييهم
مارتاحت وماهنا بالها من الخلعة حتا ركبات فالطاكسي وزاد مع الطريق عاد بدات تاخد نفس وتهدأ من روعها وللمحكة متوجهة
وصلات وجهتها خلصات الي عليها وزادتو من الفوق طالبة منو يدعي معاها بالفرج ..نزلات تتبسم مزيرة ساكهة وداخلة تتوزع نظراتها بين أرجاء المحكمة حتا بان ليها المحامي تاعها غادي جااي ويشوف فسااعتو وكيف بانت ليه جااية قال: تعلطتي بزاف امدام الوراق
ردت: عاد قدرت نخرج من الداار.. واش وصل؟
رد: وصلو وراهم لداخل زيدي خلاص
حل الباب دخل وهي وراه تتنفس بسرعة وعينيها على محمد اللي جا بوحدو بلا محامي ولا جوج .. كايشوف فيها حااقد ومكره اللي هو فيه، بنا حتا بنا وخطط حتا عيا فالاخير هدمات ليه كلشي وحضراتو للمحكمة بزز ملوي الدراع وخمسة على فمو
تكلم المحامي تاعها والقاضي حاضي نظراتهم لبعض، قرا الوثائق اللي قدامو وعلى اساسها طلع فيها عينيه قائل بتبات: نسيمة الوراقي.. متأكدة ابنتي باغة هاد الطلاق ومكاينة حتا شي محاولة صلح
حولات انظارها الشامخة والحادة لمحمد، بدورو مخنزر مراضيش بهادشي وكون صاب يغززها بين سنانو ويتلاح عليها وسط الجلسة.. بسمات كتر باستفزاز وقالت بنبرة واتقة
بسمات كتر مستعدة لأكتر كلمة غاتسرها فهاد النهار .. كيف تنطقات بكره من فمو رفرف قلبها وطاح الغم اللي كان على كتافها مححطوط
محمد: نتي مطلقة
هو جنون الغضب راكبين فوق راسو وهي البسمة واصلة ليها فين وفين
هاكا خرجو من المحكمة هازة لقب مطلقة بكل فخر وسرور وهو هاز دقة وحلات ليه فالحلق وحلفات لادازت ..تحلف عليها بعينيه وردت بضحكة مستفزة كبات ليه الملحة على الجرح وكونما الدليل القوي اللي شادة عليه كون قتلها بلاصتها بلا مايتردد
رمات عليه آخر نظرة مودعاه بيها وضارت ادراجها خارجة هي والمحامي لبرا.. هو كايدوي وهي ودن عندو وودن فعلقها تتسمع لشيطانها شنو كايوسوس ويزند حتا نطقات متساءلة: كاين شي سيبير هنا
رد: آه ورا هاد الشارع مباشرة
ضحكات فوجهو: شكرا بزاف ونهارك مبروك
سلم عليها مبسم والإعجاب فعينيه واضح: احم.. دوزي عندنا شي مرة إلى مازال حتاجيتي شي حاجة
ببسمة ردت: آه معلوم.. نهارك مبروك
زادت من حداه بضحيكة خفيفة سهاتو بيها وضار متبع ليها العين حتا غابت عن انظارو عاد ركب سيارتو كايتنهد وزاد
دخلات وسط هاراج السيبير وجوج بنات بالحساب اللي تما اما الباقي كلهم رجال شي كايلعب شي تايتفرج وشي بلغاه تايلغي
....: نعام اختي بغيتي شي حاجة
ضارت عند اللي مكلف.. ولد مراهق من ولاد هاد الجيل التقاطع والتزيار والطانگة فالودن ..قربات ليه مبسمة حلات ساكها جبدات منو 400 درهم والكارط ميموار
نسيمة: بغيت الصراحة.. نتا واش باغي هاد الفلوس ولا لا؟
★★★*★★★
طلعات من بيتها لابسة جلابتها وهازة ساك حوايجها فيدها، حطاتو حدا الباب جنب الساك اللي جمعات لنسيمة ووقفات قدام الصالون تترعد وتشوف فالحاج وولادو وفاطمة على طبلة الغدا ناعسين ولايطو فالكوزينة حتاا هي غارقة فيه وتتشخر..
كل دقيقة طل على الباب مرتابكة وگاع صباعها عراقو بالخلعة ..قلبها بغا يخرج وركابيها التقفقيفة شاداهم ماتدق داك الباب حتا بغات طيح بالعظام عاد رجعاات
مشات للباب تتجري حلات عليها حتا دخلات وبدات تهضر مرعودة: الله ياالالة مالك على هاد التعطييلة كنتي غاتسكتي ليا القلب
شاافتها بالجلابة وساك آخر حدا ساكها محطوط هي طلع حاجب: علاش لاابسة نتي؟
رمشات بارتباك: ب بغيت نمشي معااك الالة.. مانقدش نبقاا فهاد المدينة بلا بيك مانقدرش
بعصبية ردت: عزييزة واش انا غادة نفووج؟؟؟ لايطو براسها كدبت عليها باش تاواحد مايهز فيها العيين مااما وماغانديهااش نتي فين باغة تمشي فيين؟؟
عزيزة: فينما كاان الالة مابغييتش نبقا هنا واخا ناخدو غيير بيت صغير المهم هانيين فبالنا
ردت برجاء: عافااك الالة ماتخلينيش هنا معااهم والله مانقد على فرااقك ..نتي الوحيدة اللي من صغرك تتحني فيا فهاد الداار تتكسيني وتسبطيني وديما اللي عندك قاسماه معايااا وعمر الكلمة الناقصة سمعتها من فمك هءهءهء ماغانصبرش على فراقك الالة والله مانصبر
تنهدات بحييرة وضارت تتفكر بتردد.. محتارة وسط هاد القرار وعزيزة تتبكي عليها ودمع حتا قالت بنرڤسة: صاافي سكتينا.. سيري هبطي عمر وخرجي شدي طاكسي كورسا انا شوية ونلحق عليكم
ضحكات بفرحة وبسرعة مسحات دموعها: هي اللولة الالة ههههه
طلعات تهبطو ونسيمة حطات ساكها وهزات اللي جامعة فيه عزيزة وراقها ومسائلها ولبيت سي عبد الكبير توجهات ..حلات الپلاكار ديال حوايجو ووزعات عليه عينيها مزياان ولصنادق دهب لاحادة مرتو صوباتهم.. بسمات باستهزاء وبدون تردد بدات تهز منهم الدهب وتحط فالساك نيشان وبغل تتردد
نسيمة: ماستافدنا منك فحياتك.. ادن نستافدو ونتي تحت التراب الشاارفة
كشطااتو كلو وخرجات دااخلة لبيت فاطمة، نفس الشيء دهبها كااامل دخلاتو للساك وولو حلقة هي اللخرة مخلاتهاش ليها
نزلات لتحت بعدما ساست ليهم السااس وردات حقها فربعة المرات.. حطات ساك الحوايج وهزات من ساكها التاني سيدي (قرص دائري)، دخلات للصالون وعيونها كاتشمت على منظرهم والضعف اللي هوما فيه، خدمات التلفازة والڤيسيدي .. دخلات ليه داك القرص الي جابت شعلاتو وريگلاتو يبقا يعاود راسو كلما سالا يعاود من الأول..
ولات شوهة عائلة الوراق كاتبارطاجا بحال البرد وفساعة طلعات لطوندونس المغرب بعنوان"عائلة غنية بفاس تلد متليي الجنس فقط حتا اصبح رجالها يمارسون مع بعضهم البعض"
من غير هاد الخبر ودوخة النعاس الاإرادي كايتفرجو قدامهم ومباشرة فيلم بورنو حارق و من نوع خاص ختارتو بعيانة واللي جامع بين عتمان ومحمد اللي يسحابوه ولدو شاد الكاميرا وكايفيلمي راسو ڤيديو متير معاه .. بسمات برااحة تامة وخلاتهم فداك المنظر يغرقو ..هزات سيكانها بجوج وخرجات سادة وراها الباب وفطريقها غادة
هاد المرة مشافتش وراها .. مامسندة على حد بلا مساعدة حد وماعلا دمة أي أحد.. هاد المرة كاينة هي.. وعزيمتها ..وقوتها
كاينة نسيمة جديدة فقط
⚡ نهاية الموسم الاول ⚡
❌التتمة عبارة عن قصة جديدة بعنوان "أحييني بشوقك" غايبداو أول الأجزاء غدا بإذن الله. كونو في الموعد❌
تصنيف القصة
يرجى إختيار التصنيفات اللي يمكن يوصفو هاد القصة، التصنيفات كاتساعد بشكل كبير فتقسيم القصص وحتى لي كايقلب على قصة من نوع معين كايلقاها بسرعة.. (يمكن اختيار أكثر من تصنيف)
عبق الوجد الجزء 12 والأخير
محتوى القصة
التنقل بين الأجزاء