أمير في عصرنا الجزء الثالث والأخير

من تأليف Victoria Kaelin
2021

محتوى القصة

رواية أمير في عصرنا
 
مشا بيجاد كلا ليه شي حويجات لقاهوم فالثلاجة و هبط يمشي للخدمة ديجا ولا حافظ الطريق دابا...
فالخدمة...
كان بيجاد بزي العمل ديالو هو و ياقوت لي كانو واقفين فالكونتوار...
ياقوت:بلاصة هاجر شحال كبيرة فالمخبزة
بيجاد:غترجع فاش تبرا
ياقوت:اه راني عارفة الله يشافيها
بيجاد:امين
جا الوقت لي تيفطر فيه حاتم و هو يتم داخل غير شافو بيجاد و هو يخنزر ضور عينيه فالمخبزة مابانتش ليه هاجر و استغرب اوطوماتيكمون قال غتكون فالداخل..مشا شد ليه طاولتو المعتادة و جلس تيتسنا فيها و منها نيت يتناقش معاها على ديك التسرسيبة لي دارت ليه البارح فالحفل...فنفس الوقت كان بيجاد مزيير على يديه بعصبية و تيشوف فيه بحقد كبير هدا مالو ديما جاي لهنا و فوقت واحد اكيد تيتسنا فهاجر!!...
ياقوت مشات لعندو حيت عرفاتو تيتسنا فهاجر:سلام موسيو
حاتم
طلع فيها راسو كان تيتسنا فهاجر ولكن بانت ليه هاد الأخت و هو يفقد الأمل:واش مكايناش مادموزيل هاجر؟
ياقوت:مجاتش ليوم حيت مريضة
حاتم بدهشة:مريضة؟شنو عندها؟
ياقوت:معرفتش بالضبط ولكن عيانة
حاتم ناض:ممكن تقولي ليا فين جات دارهوم؟
ياقوت:ولكن ا موسيو راها غير بوحدها تما
حاتم:بغيت غير نطمأن عليها و صافي
ياقوت يالاه غتجاوب و هو يوقف عليهوم بيجاد معصب...
حاتم طلع فيه راسو و عقد حجبانو:اش بغيتي تاني؟؟
بيجاد:نتا لي اش باغي؟؟
حاتم:كليان منفطرش ولا؟
بيجاد:راني عارف اينا فطور تتقلب عليه و راه مكاينش!
حاتم حنحن حيت حشا ليه الهضرة نيشان:المهم بسلامة
خرج حاتم ماعاجبوش الحال و بيجاد شاف فياقوت...
بيجاد:سولك عليها ياك؟؟؟
ياقوت بتوتر:ا ااه
بيجاد رجع لبلاصتو مخنزر و غير معصب بوحدو غير تيشوف داك المخلوق د حاتم تيغلي دمو بوحدو حيت تيبقا يتفكر كيف كان حاط يدو على هاجر...
عند هاجر لي كانت باقة متكية و ملوية فكاشتها حيداتها على وجهها و ناضت حتى شربات كاس د الما و رجعات تكات فبلاصتها...
هاجر تتعيط بشوية:مولات الصوت..مولات الصوت
تقلبات على جنبها ليسر:وا مولات الصوت غتكوني تتسمعيني و منخلاني..قولي ليا غير شنو تيدير بيجاد دابا فالمخبزة راني تنفكر فيه لايدير شي موصيبة
الصوت دوا فراسها:واحد الحاجة بغيت نسولك عليها واش سمو الأمير بيجاد تيبان ليك بحال ولدك ولا شنو؟
هاجر بدهشة:ش شهاد الهضرة!
الصوت:تنعرف الأمهات لي تيسولو بحال هكا ولا شي وحدة تتبغي شي واحد
هاجر:جاوبيني على كلامي!
الصوت:كان حاتم فالمخبزة و تناقشو هو وياه تاني
هاجر خرجات عينيها:وايلي!!!!
الصوت:متخافيش مدابزوش
هاجر:و مقالش ليه والو على الحفل د البارح؟
الصوت:لا
هاجر عاد رتاحت:واخا
الصوت:حسيت بحالا مابقيتيش مهتمة بحاتم من البارح و حتى تدفق احاسيسك و مشاعرك من جيهتو نقص على قبل
هاجر:هادشي خصوصي سولتك على بيجاد لا غير خليني نعس دابا
الصوت:فرحة كبيرة غتدخل لحياة سمو الأمير بيجاد فهاد الأيام كوني على استعداد لهادشي...
هاجر:اشمن فرحة؟؟(تسناتها تجاوب)اوووف منك تتسكتي غير فبحال هادشي...


من بعد الوقت لي داز فالمخبزة و الخدمة ديال بيجاد فيها تمات داخلة واحد البنت لابسة زي غريب لباس بحال شي بهلوان ولكن وجهها عادي مافيهش داك المايكاب لي تيدير شاف فيها بيجاد باستغراب و هي تكمل مشيتها حتال عندو و وقفات مطلعة فيه راسها هنا زاد استغراب بيجاد فاش شاف عينيها الجامدين لي متيرمشوش و وجهها لي خالي من التعابير حتى حس بيديها تحطات فوق الكونتوار و جمعاتها دغيا لعندها...
البنت:نتا و هاجر مدعويين لزيارة أكبر سيرك سنوي تيتقام فالمغرب و فهاد المدينة بالضبط جميع المعلومات كاينين فالتذاكر
ضارت عاطياه بالضهر و خرجات بلا متلفت مخلية بيجاد تيشوف فجوج تذاكر لي حطاتهوم فوق الكونتوار...
بيجاد: Big Circus؟ شنو هو السيركس؟؟
ياقوت رجعات لبلاصتها و لفت انتباهها بيجاد لي ساهي فشي حاجة شادها بين يديه و هي تقرب ترضي فضولها حتى خرجات عينيها...
ياقوت:السيرك الكبير!!!
بيجاد شاف فيها بتعجب:شنو هو السيرك؟؟
ياقوت:أوييليييي هدا راه تيتقام كل عام و التذاكر تيساليو فنهارهوووم فيه اي حاااجة تخطر ليك على البااااال!!!
بيجاد:جابتهوم ليا واحد البنت و قالت انا و هاجر مدعويين
ياقوت باستغراب:لعجب التذاكر ديالو متيتعطاوش و انما تيتشراو
بيجاد:حتى نشوف شغتقول هي
ياقوت بتاسمات:ههه غتفرح بزاف انا متأكدة
بيجاد:فاش نرجع نوريهوم ليها
دار بيجاد التذاكر فالجيب ديال الطابلية ديالو و كمل عملو لليوم...
فالدار كانت هاجر حسات بشوية د التحسن و قدرات تخرج حتى شرات باش تصوب لغدا ديال اليوم دخل بيجاد من الخدمة لقاها فالكوزينة جالسة تتسنا فالغدا يطيب...
هاجر تفاجآت فاش دخل عليها نسات بلي وراتو كيفاش يحل الباب بالساروت:اووف خلعتينيي عاد كنت غنهز الشطابة
بيجاد سد الباب:كيف بقيتي؟
هاجر: شوية الحمد الله كيف دازت الخدمة بلا بيا؟
بيجاد:عادي
هاجر:متترضاش ياربي السلامة!
بيجاد:اجي بغيت ندوي معاك
هاجر ناضت و وقفات حداه مربعة يديها تتبان صغيرة مقارنة بيه:نعام؟
بيجاد جبد التذاكر من جيبو:شوفي هادشي
هاجر شداتهوم من عندو و هي تخرج فعينيها:السيييييرك الكبيييييييرررررر(لمعو عينيها) فين لقيتييييهوووم؟؟؟؟؟كنت عاررفة بلي عزيييزة عليك وحق الله حتى كنت عاااارفة ههههه
بيجاد استغرب من هاد السعادة الغامرة بسبب هاد جوج ورقات لي مد ليها:شنو هادشي بعدا؟
هاجر تدوي و عينيها على التذاكر:وا قول أوا فين لقيتيهوم بعدا راه تيتشراو فنهارهوووم!!!
بيجاد:جات عندي واحد البنت و عطاتهوم ليا
هاجر:ايوا العجب هههه ولكن فرحت بزاااف
بيجاد بتاسم بشوية تيحس بالفرحة حتى هو فاش شافها فرحانة هاكا...
هاجر شافت فيه و تطل على وجهو من لتحت:مالك ساهي مبتسم؟
بيجاد جمعها فالبلاصة بتخنزيرة:والو المهم امتى غنمشيو لهادشي؟
هاجر:يااااس يااااااس غنمشيييو
بيجاد شاف فيها ب لا حول:غنمشي نغسل يدي
هاجر:واخا دابا غايطيب الغدا اصلا
مشات تتنقز للكوزينة و ماقاداها فرحة راه شي حاجة عندها هاد السيركات ولا اي حاجة ممتعة اما هو غسل يديه و جلس فالصالون حطات هاجر الغدا و تغداو مجموعين...

🌞فالغد ليه🌞

فاقت هاجر دغيا اصلا كاعما داها النعاس بسبب كترة الفرحة ناضت بالزربة و مشات وجدات راسها لخدمتها و فييقات معاها بيجاد لي لاحظ مزاجها المقاد على الصباح صوبات الفطور و حطاتو وجد راسو حتى هو و فطرو مجموعين مشاو مع ياقوت للخدمة و هاهوما واجدين بزيهوم فالكونتوار...
تم داخل احمد هاد ليامات كاملين ياقوت بوحدها لي لاحظات انه تيغبر بشي طريقة عجيبة ولكن حتافظات بهادشي لراسها حيت الى دوات غادي تبان داخلة فشي حاجة ماشي سوقها اصلا..وقف احمد فلاكيس بلا ميدوي معاهوم كلشي ملاهي مع خدمتو حتى دخل تاني سي حاتم لي بانت ليه هاجر تما و بتاسم حيت عرفها انها بيخير و مشا وقف عندها متجاهل كاع لي كاينين تما بما فيهم بيجاد لي غير شاف هاد التصرف جر هاجر موراه و و تقابل مع حاتم بغضب:مزال ماباغي تفهم راسك؟؟؟
حاتم:هاد الكلام موجه ليك نتا حييد من قدامي!
بيجاد هز عليه صبعو:انا لي تنآمر هنا و تنآمرك تغبر من قدامي!
حاتم:اسلوب كبير على واحد صغير!
هاجر جرات بيجاد ليكان غيشعل معاه و جات وسط منهوم...
هاجر :انا بيخير ا حاتم شكرا يمكن ليك ترتاح من جيهتي دابا
حاتم:بخصوص الحفل....
هاجر قاطعاتو:مابغيتش ندوي على هادشي و الى سمحتي هدا لي واقف قدامك راه ولد عمي و بهاد الحركات غتجبد ليا الصداع معاه و مع عائلتي تنتمنى مايبقاش هادشي
حاتم:ولد عمك!
هاجر:ااه نخليك دابا عندي خدمة
حاتم بقا متبع ليها العين حتى دخلات للداخل و بيجاد واقف قدامو بشموخ فهاد اللحظة حس بيها كبرات بيه قدام هاد اللصقة العورة لي مارضاش و خرج دغيا من المخبزة...
بيجاد ضحك بانتصار:هه لا غير وقف هنا مزال
ياقوت كانت تتشوف ف احمد لي غبر تاني من قدامها غير دخل حاتم و هو يدخل للداخل تاني علاش ديما فاش تيطرا شي نقاش هو و بيجاد متيحضرش هي ماشي بغات ليه المشاكل ولكن من حقها تعرف اش تيوقع حيت هادشي ولا غريب و بزاف!...
رجع بيجاد لخدمتو ممديهاش فياقوت لي افكار كتيرة تيضورو فراسها ولكن ماعندها ماتدير من غير تنفضهوم عليها و تكمل شغلها....
🌞فالغد ليه🌞
هاجر تتغوت:وا بيجااااد واش لبستييييي؟؟؟
بيجاد لابس القاميجة لي كانت شرات ليه من شحال هادي مع سروال دجين و مدوش و مقاد حالتو:راك نتي لي مزال ما واجدة!
هاجر لابسة حوايجها و مضاربة مع شعرها:هاني تنقااد فشعررري
بيجاد تيشوف فالساعة:غنتعطلو
هاجر كورات شفنجة فوق راسها و الباقي خلاتو مطلوق هزات صاكها و خرجات لعندو:صافي هانييي
بيجاد:شديك الحالة فشعرك؟
هاجر جراتو:وا صافي خفت نتعطلو
بيجاد ناض دار يدو فجيابو و هي باقة معلقة فدراعو:عاد تتقوليها نتي اصلا لي معطلانا اما انا تنوجد دغيا
هاجر شافت فالمرايا دغيا كلشي هو هاداك و خرجو هابطين فالدروج بقاو غاديين حتى بداو يتمشاو فوق التروطوار باش تبان ليهوم الطاكسي و يشدوها حتى بانت ليهوم وحدة جاية يالاه غتشيير ليها هاجر و هي توقف عند رجليهوم طلعو بجوج و ديمارا بلا مينطق بحتاشي كلمة...
بيجاد:مغيسولناش فين غاديين؟
هاجر شافت قدامها بابتسامة:غير خليه راه عارف...

بقات الطاكسي غادية بيهوم مدة ديال الطريق حتى خرجو على المدينة و بقات غادية حتى دخلات لمنطقة كبيييرة و هنا بدا تيبان السيرك من بعييييد لهاجر لي حلات فمها على قدوووو من شكلو و ضخامتو من بعيد ماحساك من القريب...
هاجر بعينين تيلمعو و بإعجاب كبير:واااااااااو
بيجاد:شنو شفتي؟؟
هاجر:طل طل من الزاج تنسمع بالسيرك الكبير ولكن عمرني تخييلتو غيكون بهاد الحجم بالفعل يستاهل اللقب اسم على مسمى
بيجاد طل من الزاج جاه عادي و غير مكبرة الموضوع حرك كتافو بعدم اكتراث و رجع شاف قدامو اما هي بقات معلقة مع الزاج حتى حطهوم الطاكسي فالبارك لي مبلاصيين فيه الطونوبيلات...
هبطو و مشا مول الطاكسي بلا مينطق بحتاشي كلمة تماما كيفما وقع لهاجر أول مرة فاش تعتقات فالكوميسارية...بقاو تيتمشاو بين الحديد لي كان الغالي و تيبيين على مكانة مولاه المرموقة و كاين لي عادي بحال اي حديدة مبينة على وجود الطبقة المتوسطة بحالهوم..بقاو غاديين حتى شدو واحد الصف فالبلاصة لي تيتحطو فيها التذاكر بقاو شحال تيتسناو تما و يالاه ما وصلاتهوم النوبة وقفات هاجر قدام البنت لي كانت تما و مدات ليها التذاكر لي خداتهوم و هي تهز واحد الشريط ورقي تيلصق فالصفر المشعشع مكتوب فيه سمية السيرك و جميع المعلومات ضوراتو على يديها باش اي واحد من العملاء لي خدامين فداخل السيرك اينفوا يشوفو يديها يعرفوها ديجا مخلصة على الدخلة و ميدويوش معاها الى بغات تشوف ولا تلعب فشي حاجة...
هاجر حييدات من تما و جات مورا بيجاد لي دفعاتو بشوية باش يجي فين كانت:مد ليها يديك تقاد ليك بحال هدا لي فيدي
بيجاد مستغرب من هادشي ولكن معندو مايدير مد يدو و ضورات عليها الشريط و بتاسمات فوجههوم تتمنى ليهوم نهار سعيد...دازو من البوابة وهنا عااااالم اخوووور الدنياااا صدااااااع و مقسسسسمة بواحد الشكل بزاااااف الناس دايزين هازين الأكلات السريعة فيديهوم ولا الگلية..التفاح المعسل ولا المثلجات المهم كلما تشهاتها النفس من المأكولات..المهرجين بلباسهوم و مايكابهوم تينفخو فالبالونات للدراري الصغار ولا للبنات على الأشكال لي بغاو..بنايااات كبيييرة على أشكال عجيييبة و بعباارااات كبيييرة مثل...منزل الرعب...عروض الحيوانات..بوابة الملاهي....
هاجر نقزات و جرات بيجاد من يديه:الملاااااااهييييييي
بيجاد غادي معاها بالريتم المثقل د المشية ديالو و هي تتجر فيه بحال بنتو حتى دخلو مع داك المدخل و تاني كان عالم اخور الألعاب في كل مكان ها السيارات الإصطدامية..الأفعوانية فجميع الأشكال و الأحجام..قارب رفع..دولاب الهواء و الكثييير....
هاجر قلبها غيسكت بالفرحة:لا لا انا واخا نعرف نبااات هناااا
بيجاد:شتديري؟؟؟
هاجر:اجي معايا اليوم نفرغ الحرمان ديالي بسبب الفقر لي تنعيشو ههههه
جراتو و هو غادي غير معاها حتى دازو بين الناس و دخلو للمكان لي تيكونو الناس تيتسناو فالأفعوانية ترجع و توقف معلنة على انتهاء دور الناس لي كانو راكبينها من قبل و داكشي لي وقع وقفات و هبطو..تسناوهوم الناس لي تيتسناو بما فيهم هاجر و بيجاد حتى خرجو كاملين و مشاو جلسو و قادو أحزمة الأمان و قبل متخدم الأفعوانية دازت عليهوم لي خدامة تما و تأكدات من أحزمة الأمان واش هوما هادوك و واش كلشي مشدود فبلاصتو عاد تنحات و دقيقة بالحساب بدات تتحرك الأفعوانية بشوية حتى بدات تطلع عاد هبطات بالجهد مع التحت مخلية شي تيغوت و شي خايف و شي متحمس و شي مخلوقات مخلطين هاد الأحاسيس دقة وحدة بحال هاجر اما بيجاد مفهم حتى حاجة فين المتعة فهادشي و مال هاد الزمر كاملو تيغوت؟؟؟...بقاو غاديين و الأفعوانية تتلوي و تضور فيهوم و تطلع و تهبط بقوة حتى سالا الدور و هبطو..هاجر غير وقفات بدات تشدها الدوخة عاد حسات بيها فاش تحطو رجليها على الأرض...
بيجاد شاف فيها بلا حول:صافي تهنيتي؟؟
هاجر:صبر صبر و الله حتى نطيح صبررر
بيجاد ربع يديه و طلع راسو:شنو؟؟
هاجر بتاسمات:شد فيا حتى نرجع توازني
بيجاد خنزر فيها:واش من نيتك!!
هاجر:نهار على نهار تنزيد نتأكد انه مافقلبك رحمة!
بيجاد:مشعوذة مافيها نفع! زيدي قدامي(مد دراعو)
هاجر شدات فيه بفرحة و تمو غاديين تيكملو استكشاف الألعاب الأخرى...

كاع الألعاب واش دازت عليهوم هاجر شي جرات ليه بيجاد و لعب معاها و شي مابغاش و طلعات غير هي..بقاو غاديين حتى خرجو من مكان الألعاب لمكان اخور مختالف تماما حتى بان ليها واحد الصف ديال العربات لي تيبيعو الماكلة...
هاجر جبدات لبسيطيم ديالها من صاكها:صبر دابا نرجع
بيجاد:فين غادية؟؟
هاجر:غير هنا نشري ماناكلو
بيجاد:واخا متعطليش
هاجر:متخافش
مشات هاجر تتنقز اليوم غتفرقع الخزينة ديالها فهادشي اما هو بقا واقف تيتسنا فيها ترجع ولكن لالة هاجر فاش شافت العربات كتار و حاجة تنسيك فلوخرا صدقات ناسية حتى راسها معاهوم و مشات تتعزل و تخيير فكل عربة فاش ضار بيجاد ملقاهاش فين خلاها و هنا فين عقد حجبانو يالاه غيمشي يجبدها فين كاينة حتى سمع شي غوات ديال الناس و الصداع طلع راسو و هو يبان ليه من بعيد خيل من الخيول تيجري مامديور ليه لا سرج لا والو تصدم فاش شافو فهاد اللحظة مشاعرو تخلطو عليه تيبان ليه حصان هارب و خايف من شي حاجة و حتى واحد مافاهمش هادشي باغي يخلي ليهوم هاد المكان و يجري حتى مايبقا يبان ليه حد و فالوقت ليكان بيجاد ساهي فالخيل الناس بداو تيغووتو و يحذرو فيه و يقولوو ليه يبعد من الطريييق ولكن مكانش راد ليهوم البال و ل اش تيقولو الخيل غادي تيجري بالزربة حتى بانت فجأة شي حاجة فطريقو خلاتو يتعكل و يطيح فالأرض بيجاد مشا لعندو بالجرا و تحنا فالأرض حط يدو على راس الحصان و بدا تيدوزها بحنان و ابتسامة على وجهو كأنه تيقيص فدري صغير..الحصان فاش حس بلمسات بشري حنونة ليه رغم انه غريب الا انه بشي طريقة ربانية رتاح لبيجاد و بقا هادئ فمكانو مستسلم ل لمساتو على راسو..و فوسط هاد الجو لي بين بيجاد و الحصان تسمع غوات جاي من اللور كان واحد الراجل أربعيني و تابعينو بزاف د الرجال تيلهثو نصهوم مغبر و النص لاخور عاد لحق عليهوم حتى بان ليهوم الحصان مع بيجاد و مشاو تيجريو لعندو...
الرجل لي سبقهوم تلاح حدا الحصان تيقيص فيه و باينة فيه مخلووووع عليه بزااف بحالا ولدو لي هرب ليه جاو الرجال لخرين حتى جروه و نوضوه من على الأرض و الرجل لي كان تيقيص فالحصان ضار شاف فبيجاد لي ناض من على الأرض تيسوس فحوايجو...
الرجل شاف فيه بابتسامة و بلكنة مغربية مبجغة و طاغية عليها الفرنسية:شكرا بزااف موسيووو انا مذهووول و ممصدقش انك قدرتي تهدن سبيد!
بيجاد لاحظ اللكنة المخربقة عند الرجل:ندويو بالمغريبية ولا الفرنسية؟
الرجل بتاسم و ضحك من نيتو:فرنسية احسن
هاجر رجعات معمرة يديها و فمها كاع الفلوس لي عندها واش فرگعاتهوم فالماكلة لقات بيجاد عاطيها بالضهر و واقف مع شي ناس شوية بدات تتسمع للفرونسي تتشاير و هنا صدمة عمرها فاش سمعات بيجاد لي عاطيها قتلة تحلفي عليه گاوري ماشي أمير مغربي قديم قربات منو بتعابيرها المصدومة لقاتو تيدوي مع واحد الراجل كبير شوية فالعمر ولكن شاد فراسو باينة عليه گاوري ماشي مغربي...
الرجل بالفرنسية:انا سميتي شارل و هدا الحصان ديالي المفضل سبيد تيبان ليا تقلق مني اليوم حيت معطيتوش اهتمامو اليومي بسبب انشغالي بالسباق ليكاين و المسابقة
بيجاد بالفرنسية:خيلك من الخيول البرية؟
شارل:اه ههه تيبان ليا عندك عيون ثاقبة فمجال الخيول
بيجاد:تزاديت فوسط عامر بيهوم و كبرت معاهوم و من كترة ما تخالطت و تعايشت معاهوم وليت نفهمهوم
شارل:تيعجبوك الخيول لهاد الدرجة؟
بيجاد:الخيول مخلوقات حيوية و مزيانة بزاااف الخيل بمتابة الصديق لي مكانش عندي
شارل:و واش عندك شي خيل دابا؟؟
بيجاد:لا مابقاوش عندي
شارل:انا متأسف لهادشي شنو بان ليك تفضل معايا تفرج فالسباق لي منضمين؟
بيجاد:تنتسنا واحد..(ضار لقاها حداه)
هاجر حالة فمها فيه:تدوي بالفروووووونسييييييييي!!!!
بيجاد:دوي بشوية الراجل غتخلعيه! و شنو يتصحابليك ماقاريش ولا؟
هاجر:فالحقيقة تخييلتك بحال دوك صحاب العروبية الأميين فاش زعمة راك أمير قديم
بيحاد:راك غالطة الأغلبية من شعبي كان قاري و واعي
هاجر شدات فدراعو و شافت فالرجل و دوات حتى هي بالفرونسي:فين قلتي ا موسيو غنمشيو نتفرجو فيه؟
شارل ضحك من تصرفها تتبان ليه بنت كيوت و باينة بحالا صاحبة الرجل لي دوا معاه:فهاد الطريق كاينة المسابقة

داهوم الراجل لمكان المسابقة لي كان عبارة على مساحة كبييييييرة فيها مكان لي جالسين فيه المشجعين و فالوسط كاينين الأحصنة و لي راكبين عليهوم تيجريو فسباق..كاين لي لابس ملابس تتعبر على التشجيع ديالو لواحد من المشاركين و كاين لي لا..الدنيا كلها هتااف و غواات عالي كلشي متحمس الا هاجر لي جاها هادشي ممل...
شارل:تفضلو معايا لهاد المكان(شاف فرجالو) قدمو ليهوم لي بغاو
بيجاد:من لطفك
شارل بتاسم:تنتمنا يعجبكوم السباق انا بلاصتي عند لجنة التحكيم خليت مكاني فاش وصلو ليا عمالي انه سبيد هرب ليهوم فاش كانو بغاو يوكلوه
بيجاد:ااه حصان مدلل ههه
هاجر تتاكل و مصدومة ويلي واش عاد شافت بيجاد ضحك لا ميمكنش...
شارل:نخليكوم ستمتعو بوقتكوم
مشا شارل و تبعوه شي رجالو و لخرين بقاو مع هاجر و بيجاد سولوهوم ياكما بغاو شي حاجة...
هاجر:واخا تجيب ليا عافاك ا خويا شي موناضة ندوز بيها هاد البوكاديوس نسيت ما شريتها
الرجل حرك ليها راسو و مشا..فاش مشاو لخرين و بقاو غير بوحدهوم شافت هاجر فبيجاد لقاتو ساهي و ابتسامة خفيفة على وجهو خلاتها تسرح و تسها فيه شحال تيبان زويين و مبدل فاش تيبتاسم هادشي لي خلاها تسائل مع راسها علاش هاد المدة كاملها لي دوز معاها حرمها من هاد الإبتسامة و الضحكة رغم معاملتها الطيبة معاه...
هاجر:بيجاد
بيجاد بلا ميشوف فيها:شنو؟
هاجر:شوف فيا
بيجاد شاف فيها:شنو؟
هاجر بتاسمات:ابتسامتك زوينة
بيجاد تصدم من كلامها هادشي خلا احساس غريب يتسلل مرة خرى لقلبو مخليه يتحرك و يسها فملامح مشعوذتو لي لا طال ما كاتم نفسو يغتر بيهوم و لا يطيح فشباك جاذبيتهوم...
هاجر:مالك مصدوم؟
بيجاد رجع لوعيو:لا والو شكرا
هاجر:هاي هاي على مولاي السلطان تيشكرني ايوا كون عرفت بلي ضحكتك زوينة كون قلتها ليك من شحال هادي نسمعو غير هاد شكرا تخرج من فمك حيت ماقلتيها ليا حتى فاش دخلتك لداري فقدت الأمل فصوابك و ادبك معايا هههه
بيجاد تيشوف فيها كيفاش تدوي و تتحرك بحالا تتكبح نفسها على شي حاجة حاول مايجاوبهاش و كمل المشاهدة ديالو في حين هاجر ماباغياش تبيين انه قلبها عامر من جيهتو حيت ممقدرش خيرها ولا لي تاديرو على قبلو...
سالا السباق و تختارو الفائزين الثلاثة فرقو عليهوم الورود و علقو ليهوم الميداليات و خدا الفائز الأول امتيازو عليهوم لي هو الكأس لي كان على شكل حصان و رجل راكب عليه...من بعد هاد الفوز المتفرجين و الجمهور بداو تينساحبو و يخرجو يكملو نهارهوم فأماكن اخرى من السيرك نفس الشيء مع هاجر لي كلات حتى شبعات و ناضت هي و بيجاد غاديين يخرجو مع الناس حتى سمعو شي تعيااط..ضارو بجوج كان شارل و رجالو معاه...وقفو و تسناوهوم حتى جاو...
شارل:كيف جاكوم السباق؟
بيجاد:فالحقيقة عجبني و حتى المشاركين بيينو واحد الروح قتالية
شارل:عندك الحق الى سمحتي شنو سميتك؟
بيجاد:سميتي بيجاد
شارل:موسيو بيجاد(جبد كارط من قاميجتو)هادي كارت فيزيت ديالي و فيها عنوان مكان عملي
بيجاد شدها من عندو بابتسامة:شكرا
شارل واحد اللحظة عينيه مابقاوش تيرمشو:تأكد انه هدا هو المكان المناسب ليك يومك سعيد
عطاه بضهرو و تم غادي مع رجالو عاد بداو تاني عينيه تيرمشو كأي انسان عادي...
هاجر:زعمة هاد الگاوري ماعرفتش اش شاف فيك ولكن عندي احساس انه شي شخصية مهمة
بيجاد دار لكارط فجيبو و شاف فيها:فين بغيتي نمشيو تاني؟
هاجر جراتو:اجي اجي كلشي كلشي....

هاجر:ماكليتي والو واش مافيكش الجوع؟
بيجاد:معجباتنيش الماكلة لي جبتي
هاجر:ولاهيلا زعمة ذوقك معرفتش من اينا كوكب
بيجاد:واش ساليتي نرجعو لدار؟؟
هاجر:اويلي على نرجعو لدار اجي بانو ليا ديك الساعة دوك البالونات امم ااه تيقولو ليهوم المنطاد
بيجاد:معرفتوش
هاجر:اجييي اجيي دابا غتعرفوو
بقاو غاديين نيشان حتى دخلو من واحد البوابة فوقها بلاكة مكتوب فيها "سماء المنطادات" كانت أرضية عشبية بحال شي حقل كبير و عااامر بالمنطادات شي طاير فالسما و شي مشدود فالأرض لمعو عينين هاجر فالألوان و الأشكال ديالهوم و عجبها الحال مشات تتجري لعند واحد فيهوم حتى وقفات على لي مكلف بيه...
بيجاد تبعها بتعب هاد البنت متتقاداش..وقف موراها و هي تدوي مع هاداك...
هاجر:غنطلعو غير انا و صاحبي(قصدات صديق)
الرجل:تفضلو
طلعات هاجر فديك البلاصة لي تيوقفو فيها الناس و لي كانت بحال شي سلة كبيرة طلع بيجاد حتى هو و طلع معاهوم الراجل لي قاد العافية فالمنطاد و حييد الثقل حتى بدا تيطفو فالسما...
هاجر:وااو بدينا تنتهزو على الأرض
بيجاد تيشوف فهاد الإختراع العجيب لي خلاه يتهز من على الأرض بهاد الشكل فعلا غريب! اما هاجر شادة فواحد من حبال المنطاد المتينة و عينيها محلولين تيبان ليها السيرك و لي فيه غاديين و تيصغارو...الرجل عطاهوم بالضهر محتارم خصوصيتهوم في حين انه كل واحد فقنت...
هاجر:اجيي تشوف الأفعوانية قداش تتبان من هنا ههه
بيجاد قرب و وقف حداها:تتبان صغيرة
هاجر:وايه ههه و الناس ولاو بحال النقط
بيجاد:غير تنفكر انه هادشي لي راكبين فيه تيخدم بالعافية و فاش تنتفكر انه تقدر طفا تنترون
هاجر:ويلي حتى نتا علاه مال كاع الناس لي ركبو فيه و هبطو بحالا ماوقع والو
بيجاد:غريب
هاجر:متقدرش تستمتع بشي لحظة زعمة؟
بيجاد:تنعطيك غير ملاحظاتي
هاجر شافت فيه:علاش تتحرم راسك من عيش لحظات جميلة؟
بيجاد:اكيد ماشي هكدا!
هاجر:و شنو؟ااه غتكون تتقول اففف امتى غير نرجع لزماني ياك؟
بيجاد بقا ساكت و هي معجبهاش الحال...
طلعات راسها فيه عاقدة حجبانها: شوف فيا
بيجاد:بدينا فالأوامر! راني قلت ليك انا لي تنآمر!
هاجر:تنآمرك تقول ليا علاش لحد الآن متتحملنيش!
بيجاد بدهشة:متقلدينيش!
هاجر:لا بصاح معاك جاوبني
بيجاد سكت حيت بالفعل هو براسو ماعارفش علاش...
هاجر:جاوبني بصراحة واش تتكرهني؟؟
بيجاد حس بشوية د التوتر من هاد السؤال حيت جوابو تيعني بزاف د الحوايج...
هاجر بتاسمات بحزن:كنت عارفة واش تتكرهني!
بيجاد خنزر فيها و حاول مايبيينش انه بدا يتأثر بيها...
هاجر:قولها ليا يالاه قول ليا متنحملكش قول ليا تنكرهك
بيجاد:شهاد الهضرة تتقولي!!!
هاجر بداو دموعها تيهبطو على سبة اصلا ديجا قلبها عامر و دابا حالفة تخويه عليه مالو اش يكون بالسلامة:زدتيي فيييه و بزااف حراام عليييك داكشي لي تنديروو على قبببلكك كاملوو و عمرك عاملتيني مزيان!!!
بيجاد خرج فيها عينيه:واخا تديري لي درتي نتي تتبقاي بالنسبة ليا بنت المشعوذة لي دمرات حياتي!!!
هاجر تصدمات متوقعاتش هاد ردة الفعل القوية و لي ضرب بيها أحاسيسها مع الحيط بداو عينيها تيتكمشو شوية بشوية و شهقاتها بداو تيطلعو و دموعها تزادو كلامو جرحها بزااف...
هاجر تتبكي:ماتستااااهلنيييششش ماتستاااهلنيييش نتا مافقلبك رحمة!!!مااا تحجرررتي حتى نييت رااك متحجرر اصلا عدييم الأحاااسيسسس تتعااامل مع ياااقووت حسنننن منييي و حفصة حسنننن منيييي اناااا انااا لي دخلتك لداااريييي و شركتتت معاااك حياااتيييي و نتااا شنوووو فااااش حااادگ نتي مشعووذة نتيي حفييدة مشعووذة و كلااام جاارح لي تنحااول نسااه و منااخدوووش على محمل الجد ولكن حتال هناا و حبسسس لصبر حدود و انا صبري فااات الحدود معاااك!!

بيجاد:شتتقولي نتي!!شحال و انا معاك عاد تتقولي هكا!!
هاجر:حيت انا لي مسطية كنت تنقول غيدير عقلو غير غيولف غيدير عقلو(تتبكي) نتااا شنوو يتصحااب ليييك وااش حيت خايفة منك ولا حيت كنتي أمير ولا حيت جدة مولات الفعلة داكشي علاش خليتك تعيش معايا و تخدم معايا و حاولت نبيين ليك لي زوين فالزمن ديالي باش نتا تأقلم و ترتاح بينما رجعتي لديالك حاوولت حتى عييت و صبرررت حتى فشلت ولكن والا بغيتي تفهمنيي ولا غير تحس بيااا اناا انسانة وحييدة لي عايشة بووحدها و عائلتها بعييدة عليهاا جيتي نتا عمرتي واحدد الفرااغ كبيير فحياااتي ولكن نتاا معارفش بحق هااادشي من حقك نباان ليك خايبة و حفيدة المشعوذة كيف تتقول ليا ولكن رااه شهووورااا هادي دااازووو شهووورااا و معرفتش شحال غيدووز و نتااا باقي متتكملش فيااا الشووفة و من الفوووق تتعاامل مع ياقوت و حفصة بحال الأميرااات و انا بحاال الخداامة تنحس براااسي بحاااالا من دوك الجواااري لي غتكوون موولف فزماانك نديير لي قلتييي و نسكت على لي تدييييروو علاااش معااطينييشش قيييمة بغييت غيرر تعطييني قييمة و تعاملنييي مزياااان ولو غير شوييية من داك التعاامل لي تديرووو مع لعيالاات لخريييين اهئ اهئ
بيجاد مصدوم من كلامها نفاجرات عليه دقة وحدة معرف باش تبلا بزاف د الهضرة لاحتها عليه و مابقا عارف اش يشد...
بيجاد:واش نتي حمقة! اشمن جواري!!
هاجر تتمسح فدموعها و شهقاتها مسموعة:عييقتي و الله حتى عييقتي الى مابااغيشش تكوون معايااا قوولها من الأول ديك الساعة غنشوف ليك شي بلاصة تسكن فيهااا ولكن تكوون معاياا فدار وحددة و متعااملش معايا مزيان راه مابقيتش قادة نستحملها ولا حتى نحس بيها صافي صافيي انااا ساليييت
بيجاد شدها من كتافها و حرك فيها بشوية:واش نتييي بعقلللك انااا من الأووول تنحااول نتجنبببك باش متولفينييش حيت باااغي نرجع لزمني و نتي متعلقة بيا هاكا!!!
هاجر زاد بكاها:شنوو تتقوول نتاا شد فهضرررة وحدددة!!!
بيجاد مستغرررب:انااا انااا....افففففف اش واااقع معااياااا!!!
هاجر:مابقيت فاهمة فيك والو!!
بيجاد تحركو يديه بلا هواهوم و تحطو على يدين هاجر لي طلعات فيه راسها بدهشة...
بيجاد:انا مابغيتكش تعلقي بيا حيت ناوي نرجع لزمني داكشي علاش تنعاملك هكاك(اش تيوقع!!كيفاش حتى قلت هكاك!مخصهاش تعرف!!)
هاجر تتشوف فيه و عينيها تيحاولو يتفحصو تحركاتو مع كلامو:و شنو داك الكلام الاول لي قلتي؟
بيجاد:لحظة غضب
هاجر:تتقول ليا دابا بلي تتعاملني هكاك حيت باغيني زعمة منولفكش(هبطو دموعها تاني) و رااني ولفتك
بيجاد تصدم:كيفاش؟؟
هاجر زييرات على يديه و طلقات منهوم و عنقاتو:مابغيتكش ترجع لزمنك
بيجاد حس بيديها محاوطينو و تحطو على ضهرو و راسها تحت صدرو بدا تيحس بواحد الدفئ نتيجة لقرب هاجر منو و هو يضور عليها بدورو يديه معنقها حتى هو قاوم قربها و جاذبيتها حتى عيا ولكن مغيقدرش يقاوم مبادرتها و حضنها...
هاجر:مترجعش لزمنك بقا معايا
بيجاد تيشوف نيشان و هي تتزير عليه باغياه يجاوب و يقول ليها غيبقا معاها...
بيجاد:علاش باغياني نبقا معاك؟
هاجر:معرفتش ولكن وليتي جزء مهم فحياتي و الى فقدتو غنحس بفراغ كبير
بيجاد:يعني رغم كاع محاولاتي باش ميوقعش هادشي وقع(ضحك باستخفاف)اش هاد القدر!
هاجر حييدات من حضنو و تقابلات مع وجهو مسحات دموعها بيديها و بتاسمات:الى تعاملتي معايا مزيان غنبداو صفحة جديدة
بيجاد ساهي فعينيها المسحوبين بشكل طبيعي من عند الله و فلمعتهوم لي خلاوها الدموع فيهوم...
هاجر:صااافي؟؟نبداو صفحة جديدة؟؟
بيجاد زاد قرب منها و تحنا لعندها حتى تقابل وجهو مع وجهها اكتر بدا التوتر تيتسلل لقلبها من هاد القرب الكبير حتى حسات بيديه تحطو على وجهها و جرها لعندو بشوية ساد عينيه مستسلم لأحاسيسو المخلطة اتجاهها حتى تلاصقو شفاههوم مشكلين قبلة الأمير للمشعوذة....

بينما هاجر لي كانت مصدومة بدات تسد فعينيها حتى هي بشوية مستسلمة ليه و لقبلتو لي خلات قلبها يتزعزع من بلاصتو احاسيس مختلطة و مشاعر دفينة بدات تتبان بين هاد الجوج لي دوزو بزاف د الحوايج بيناتهوم و اليوم تخلدات أول قبلة ليهوم...
بدات تتحس هاجر بيديه تيترخاو على وجهها و غاديين و تيبعدو حل عينيه و لقاها سادة عينيها مستسلمة ليه عاد بدا يستوعب شنو دار حييد فمو على فمها بشوية و هي تحل عويناتها فيه كأنه فييقها من شي حلم كانت عايشاه..طلعات فيه راسها تتستفسر بملامحها بحالا اش واقع بينما هو باقي مصدوم و فنفس الوقت بدا تيستوعب اش دار ولكن بالمقابل هي ماغوتات ما خاصمات ما غضبات يعني بيينات على رضاهاا بقا ساكت تيحاول يقنع نفسو انه ماتهورش و بزز عليها شي حاجة حتى حس بيديها تحطات على يدو و شداتو..شاف فيها لقاها حادرة راسها بخجل و صباعها تيلعبو فصباعو بتوتر باغية تقول شي حاجة ولكن حشمانة منو...
بيجاد:فالحقيقة..انا....
هاجر:ا ا أول قبلة ليا ه هادي
بيجاد:بصاح؟؟؟
هاجر:ا ااه
بيجاد:مازعجكش هادشي؟؟
هاجر حركات ليه راسها بالنفي حشمانة..استغرب حيت توقع العكس ولكن هادشي رييحو حيت على الأقل مابززش عليها راسو..قرب منها و جا موراها و هي قدامو...
بيجاد:الغروب بدا
هاجر شافت فالسما بانت ليها الشمس بدات تتغرب و واحد المنضر زوين بزاف...
هاجر:شحال زويين
بيجاد: بحال جمال عينيك فأشعة الشمس
هاجر تصدمات لا واش غير دابا مدح بيجاد شي حاجة فيها!!
هاجر:تضحك عليا ياك؟
بيجاد:كنت ديما باغي نقول هادشي ولكن مابغيتش نقول كلام لي يعلقك بيا
هاجر شافت فيه:بيجاد حاول تحييد فكرة ترجع لزمنك حيت مكاينة حتاشي وسيلة خرى صافي راك تأقلمتي معايا
بيجاد بقا ساكت تيفكر...الرجل لي كان معاهوم فالمنطاد ضار لعندهوم نساو كاع واش كاين بكترة سكوتو و عدم حركتو...
الرجل:غنهبطو دابا تسالات المدة القانونية
هاجر:واخا
هبطهوم شوية بشوية حتى وقف المنطاد و رسا على الأرض..هبطو منو و بقاو تيتمشاو فوق داك العشب حتى بان لهاجر واحد الكرسي خشبي ديال الجرادي مشات جلسات فيه و جلس بيجاد حداها...
هاجر:كان نهار زوين بزاف عمرني غنساه فحياتي
بيجاد:حتى انا
هاجر:بصاح؟؟؟
بيجاد:معرفتش ولكن تنحس براسي رتاحيت من واحد الناحية فاش عرفتي انه متنكرهكش
هاجر شافت فيه:حتى انا رييحتيني بكلامك
بيجاد:تنعتاذر
هاجر:وايليييي مولاي السلطان تيعتااااذر منيييي؟
بيجاد خنزر فيها و هي تضحك:ههههه صافي صافي اجي(جبدات تيليفونها)نديرو تصويرة انا وياك
بيجاد:تصويرة؟
هاجر:غير قرب و تشوف
بيجاد قرب حداها و هي تهز تيلي و صوراتهوم سيلفي...
هاجر تتشوف فالتصويرة بابتسامة:زوييينة
بيجاد:واش هاد العجب تيدير حتى هكا!!
هاجر:ااه اي حاجة بغيتيها تيصورها و يحطها فيه تضغط عليها من هنا و صافي
بيجاد:اه مزيان
هاجر:تيبان ليا نمشيو دابا
بيجاد ناض:و اخيراا عييت
هاجر ناضت و تمشات بجنبو:نطرگو معانا العشا فداك السناك
بقاو تيتمشاو حتى خرجو من السيرك لقاو نص الطونوبيلات لي لقاو فاش عاد جاو مابقاوش بانت ليهوم طاكسي حمرة واقفة بوحدها و هي تمشي عندو هاجر و ركبات و تبعها بيجاد ركب حتى هو..تحركات الطاكسي تاني كيف بلان الطاكسي لي جابتهوم بلا ميدوي بلا ميتلفت...
هاجر:هه كنت حاسة انه تيتسنانا
بيجاد بقا تيشوف باستغراب و فضل يسكت حيت بالنسبة ليه هادشي شعوذة فقط...

من بعد مدة ديال الطريق حطاتهوم الطاكسي فالشارع لي كاينة فيه العمارة لي ساكنة فيها هاجر..هبطو و الطاكسي مشات..بقاو غاديين تيتمشاو جنب بعضياتهوم فوق التروطوار ماحاسينش بواحد الطونوبيلة بيضة جاية موراهوم فالشانطي..طلع مولاها راسو بانت ليه البنت لي حاط عليها عينيه عام هادي و ماخلا مادار باش يتقرب منها رغم انه عاطياه بضهرها الا انه مشيتها و حركاتها مايخفاوش عليه و حداها الرجل لي منكدها عليه هاد الأواخر! الطريقة باش قراب لبعضياتهوم مابايناش غير ديال ولاد العم اكيد شي حاجة واقعة بين هاد الجوج و ميمكنش ليه يشوف هادشي قدامو و يسمح ليه يدوز غير هكاك!!وقف الطونوبيل جنب التروطوار و هبط بخطواتو المتسارعة غادي جيهتهوم حتى عييط على هاجر لي ضارت باستغراب...
هاجر:حاتم؟؟؟
بيجاد غير سمع سميتو ضار دغيا مخنزر اش بغا هدا تاني!!
حاتم وقف قدامهوم:مادموزيل صافا؟؟
هاجر تتشوف فبيجاد لي غير على سبة و رجعات شافت فيه:وي بيخير علاش؟
حاتم:بغيت نعرف منك واش بصااح هدا ولد عمك ولاا اكتر؟؟؟
هاجر بدهشة:كيفاش اش تتقول نتا؟؟
حاتم:واش بينااتكووم شي حاجةةة؟؟؟؟
بيجاد جر هاجر موراه و تقابل مع حاتم هاز عليه صبعو:واااش شغلك؟؟؟؟
حاتم:اكيييد شغلييي انا تيهمنييي هادشي!!!
بيجاد:اييه بيناتنااا شي حاجة!
حاتم تصدم:ك كيفاش؟؟(تيشوف فهاجر لي مصدومة حتى هي) واش بصاح هادشي؟؟؟
بيجاد:و اخررررر مرة تقرررب منهاا و دييك المخبزة منبقااش نشووفك فيهاااا تنآمرك فهمتيي!!
حاتم طلع ليه الدم كيفاااش كاع وقتوو لي ضييعو باش يتقرب منهاا ضااع و داباا جاا هدا غير داك نهااار و ولات معاااه:كيفاااش غتخليييي وااحد بحااالي خداام فشرركة و عندووو الفلووس و تدييهااا فواحد بحاالك خدااام معاهااا غير فالمخبززززة!!!!!
بيجاد هنا زاد تعصب شنو يتصحااب ليه راسووو هدا فات حدوودوو الا قييمتووو و كرامتووو..و بدون مقدمات شدو من الكول ديال حوايجو و عطاه بواحد البونية نيشان لوجهو جا مليوح على الأرض هاجر قفزات مخلوعة ممصدقاش اش واقع و حاتم شد فحنكو مصدوم..قرب منو بيجاد حتى هزو من الكول و عطاااه الثانية:اناااااا الأميييير بيييجااااد الإسلاااام الفاااارسي لي كااان كلشيييي يضرب لييييه الحساااب تهييين فيااااا ااااا
حاتم تيغطي وجهو بيدييه و لكماات بيجااد تشتتات فكتافو ولا صدرو:طلللق منييي طلللق مجرررم غندعييييك
بيجاد:دوييي جاااوبنييي انااا غنفضيييي معااااك
هاجر بلغوات:صااافي ا بيجاااد غتقتلوووو
بيجاد:سمعتيييه شنووو قال لياااا واش سمعتييييه؟؟؟
هاجر:صاافي ا بيجاااد راك ضربتيييه صااافي متخلييش نهااارنا يكمل هكااا!!!
بيجاد لاحظ الخوف لي فعينيها:ياكمااا خايفة عليييه؟؟؟؟
هاجر:وااا خاايفة عليييك نتاااا الى دعااااك
بيجاد طلق من حاتم لي ولا وجهو مخلط بالدم و سخفان بسبب الضرب:انا مخايف من حد حتال كرامتي خط احمر!
هاجر قربات و طلات على حاتم:ناااري ياكما قتلتيييه؟؟؟
بيجاد:باقي تيتنفس زيدي نرجعو لدار
هاجر:و نخليوه هنا هكا؟؟؟
بيجاد:هاجر زيدي لدار
هاجر تصدمات:واش غير عييطتي عليا دابا بسمييتي؟؟
بيجاد:و علاه اول مرة؟
هاجر:وايييه عمرك سميتيني هههه
بيجاد جرها و زادو مخليين حاتم سخفان تما:قلتي نطرگو العشا؟
هاجر:اااه داكشي لي قلت من قبل
بيجاد:ايوا زيدي
مشاو طرگو العشا و رجعو لدار بدلو حوايجهوم و كلاو و من الماكلة لنعاس بجوجهوم عيانين من هاد اليوم الطويل المحمل بالأحداث الكتيرة..فوسط الظلام و فالصالون كان بيجاد تيحاول ينعس ولكن مقادرش يجيه كلما تتجي لقطة القبلة و كلام هاجر فعقلو تيزيد يتقلب و يخمم هاد التطور الغريب لي بيناتهوم معرفش واش يوصفو بالمزيان ولا الخايب ولكن حاجة وحدة لي ولا عارفها و متأكد منها انه هاجر انسانة مزيانة و وجودها بجنبو و فحياتو عندو قيمة كبييرة...بينما بيجاد تيفكر هاجر حتى هي ماجاهاش النعاس لنفس الأسباب عمرها تصورات قبلتها الأولى تخاد من طرف بيجاد ولكن مغتنكرش شحال فرحات فاش علاقتهوم تصلحات..بتاسمات بشوية و عينيها فيهوم واحد اللمعة كلها إعجاب و سعادة و حاولات تنعس....

🌞فالغد ليه🌞
فاق بيجاد بكري قبل من هاجر و مشا وجد راسو عاد فاقت هاجر و مشات لطواليت وجدات راسها فاش بغات تمشي للبيت تبدل حوايجها سمعات لتعياط...
بيجاد:هاجر
هاجر مشات لعندو لقاتو لابس و مقاد:صباح الخير امتى فقتي؟؟
بيجاد:ديك الساعة جيبي ليا هداك لي تيدويو فيه الناس
هاجر:التيليفون؟
بيجاد:ايه هاداك
هاجر:و علاش؟
بيجاد:ولا عرفتي شنو (جبد لكارط من جيبو)عرفتي فين غيكون هاد العنوان؟؟
هاجر جلسات حداه و شدات الكارط:شارع الشرعاوي بحالا سمعت بيه من قبل واش باغي تشوف داك الگاوري؟؟
بيجاد:انا فكرت مزيان فهاد الليل الخدمة فالمخبزة ممسلكاش و مادايماش بغيت نشوف معاه فمكان عملو
هاجر:لي بغيتي
بيجاد ناض:غنمشي دابا
هاجر:اويلي فين غادي! علاه عارف منين تسلك؟؟
بيجاد:غنشد طاكسي و نقول ليه هاد العنوان ولا لا؟
هاجر:ايه ولكن و الهضرة و كدا واش نسيتي انك معندك حتى ورقة و سي احمد لدابا معرفتو كيفاش حتى نسا هادشي
بيجاد:بغيت نجرب حظي انا حاس انه غيدوز كلشي بيخير
هاجر تنهدات:صبر نلبس حوايجي و نفطرو و نمشي معاك
بيجاد:مغتمشيش للمخبزة؟؟
هاجر:لا غنخلي لياقوت ميساج باش متسنانيش الى مشيتي بوحدك غيبقا بالي معاك
بيجاد:تتفكري فيا لهاد الدرجة؟
هاجر بخجل:ا ااه المهم خليني نلبس
مشات بخطوات متسارعة حتى بدلات حوايجها و جمعات شعرها فطرو دغيا و خرجو...
هاجر:انا حاسة انه شي طاكسي غتسنا فينا تاني
بيجاد طلع راسو بانت ليه الدنيا خاوية تتصفر الا واحد الطاكسي لي مبلاصية على جنب التروطوار...
بيجاد:هادشي بزاااف!واش نتي متأكدة ماورثتيش شي شعوذة من اجدادك؟؟
هاجر:واصافي عاد قلنا ولينا بيخير تجبد الشعوذة تاني
بيجاد:واراه هادشي معندو حتاشي تفسير منطقي
هاجر:واخا زيد نركبو
ركبات هاجر و ركب حتى بيجاد شاف فمول الطاكسي من الزاجة و والو السييد متيتململش غير سمع بيبان الطاكسي تسدو اوطوماتيكمون ديمارا بيهوم...
هاجر مبتسمة:ولفت قضية هاد الطاكسيات دابا ههه
بيجاد:و انا هادشي جاني مريب
هاجر:اكيد مريب ولكن تعايشت معاه
بيجاد بقا غير تيشوف فيها حاس بحالا مخبية عليه شي حاجة ولكن اش غتخبي؟كون كانت بحال ال سعدان لي فزمانو كون دارت العجب بالقدرات لي تيتميزو بيها ولكن هي مجرد بنت عادية تتقرا و تتخدم كمل فسكاتو و حتى هي ساكتة حتى حطاتهوم الطاكسي قدام واحد الشركة كبيييييرة..هبطو منها و مشات كيف العادة..تقابلو مع الشركة و هزو فيها راسهوم كلها زاج تيشعل...
هاجر:شي شركة هادي
بيجاد:هادشي لي مكتوب هنا "شركة فخونسوا للخيول"
هاجر:اجي ندخلو
دخلو لداخل كانت الدنيا خاوية و منظمة كلشي محطوط فبلاصتو و باينة بلي اثاث غالي غير من شكلو..بان ليهوم فمكان الإستقبال كاينة بنت بزيها الرسمي ديال الشركة و هي تمشي عندها هاجر و بيجاد تابعها...
هاجر مبتسمة:السلام ختي
البنت بتاسمات:فاش نقدر نعاونك مادموزيل؟؟
بيجاد جبد الكارط و وراها ليها:فين ممكن نلقا موسيو شارل؟
البنت جمدو عينيها و مابقاوش تيرمشو هزات سماعة الفيكس بلا متشوف فيهوم و طلقات الفرونسي ديالها على المستمع فاش سالات ضارت عندهوم بداك التعبير البارد على وجهها:موسيو شارل تيتسنا فيك فالطابق 8
بيجاد:شكرا انسة
عطاوها بالضهر و تمو غاديين عاد رجعو عينيها تيرمشو بشكل طبيعي مرة اخرى...

هاجر:اجي نطلعو فالسانسور
بيجاد:السانسور؟؟
هاجر:ايه قالت الطبقة 8 عرفتي فين كاينة السانسور غيوصلنا دغيا هو عبارة على باب تيتحل تتدخل ليه و تضغط على زر الطابق لي بغيتي تيتسد و يطلعك ولا يهبطك لأي طابق بغيتي
بيجاد:واخا
قلبات هاجر على سانسور حتى بان ليها..ضغطات عليه و دخلو...
هاجر:هانتا قالت لينا الطابق 8 هاني غنضغط على رقم 8 (ضغطات عليه) و هانتا دابا غيتسد الباب
الباب تسد و بيجاد استغرب من هاد الغرفة الصغيرة المسدودة ما هي الا ثواني معدودة هاهوما فالطابق 8..تحل السانسور و خرجو تيستكشفو الطابق حتى بان ليهوم مكتب السكريتيرة...
هاجر:هادي لي غتقول لينا فين كاين
مشاو لعندها دوات ليها هاجر على لي قالتو للبنت لي فالإستقبال و هي تهز سماعتها و دوات مع شارل لي كان فالبيرو ديالو...
السكريتيرة حطات السماعة:قال ليكوم تفضلو
بتاسمات هاجر و شافت فبيجاد:سير دخل
بيجاد:مغتدخليش حتى نتي؟
هاجر:انا غنبقا على برا حتى تسالي تنتمنا ليك حظ سعيد
بيجاد:واخا شكرا
مشا بيجاد حتى دق فالباب سمع تفضل و دخل اما هاجر جلسات فمكان الإنتظار تتسناه يخرج...
شارل طلع راسو بابتسامة:موسيو بيجاد ياك؟
بيجاد:وي موسيو
شارل:تفضل جلس
بيجاد جلس فكرسي قدام بيرو و شارل قاد شي وراق فيديه:كنت عارف انك غادي تجي لشركتي فالقريب العاجل
بيجاد:فكرت مزيان فهادشي بليل مزال و الى غنكون خدام مع الخيول فا هدا هو العمل الأنسب ليا
شارل:اكيد عرفتي ا موسيو بيجاد شنو لي خلاني نمد ليك الكارط؟
بيجاد:لا
شارل:حيت انا وياك عندنا نفس الحب لهاد المخلوقات نفس التفاهم نفس العشق و استكشاف شنو تيضور فراسهوم طول حياتي المهنية فهاد المجال ماقابلتش شخص بحال هكدا من غير الأب ديالي لي هو فالأصل لي بنا هاد الشركة و انا ورثتها و كملت عليها
بيجاد:هادشي مزيان انا كانو عندي خيول لا تعد ولا تحصى و تعايشت معاها و كلشي ولكن دابا مابقاوش
شارل:هادشي متيشكل حتاشي مشكل المهم هي الخبرة و الحاسة لي تتمتاز بيها
بيجاد:و لكن قبل منزيدو نتعمقو فهاد الهضرة بغيتك تعرف انه معندي حتاشي وثيقة لي تقدر تبدا بيها إجراءات العمل
شارل توقفو عينيه على الرمش للحظات:ماشي مشكل موسيو هادشي غيتحل دغيا معارفي غيوجدو ليك وراقك في ساع
بيجاد تصدم:واش بصاح؟؟؟
شارل:أكيد متخافش كلشي غيدوز بيخير الأهم واش نتا باغي هاد العمل؟
بيجاد:انا باغيه و محتاجو ميمكنش ليا نخلي بنت تصرف عليا
شارل جبد ستيلو و ورقة من دوك الوراق لي كان تيقاد فيديه:خود وقتك فالقراءة و الى نتا موافق على لي مكتوب سني هنا
بيجاد خدا من عندو الوراق لي كانو مكتوبين بالفرنسية خدا وقتو فالقراءة و كل سطر تيضرب ليه الحساب هادي راها خدمة و خصو يعرف مزيان فين غيحط رجليه...بعدما سالا من القراءة و بانو ليه الأمور هوما هادوك هز الستيلو و سينا فالمكان لي قال ليه شارل هاد الأخير لي بتاسم فاش شاف ردة فعل بيجاد...
شارل:مبروك عليك موسيو الخدمة معانا
بيجاد:تنتمنا يكون كلشي بيخير
شارل:اكيد تنتمنى تستافد من المدربين و حتى هوما يستافدو منك
بيجاد:ان شاء الله
شارل:جدول مواعيد العمل و أماكن العمل و كلشي مكتوب فهاد الوراق يمكن ليك من غدا تبدا معانا و اي حاجة ممفهوماش كاينة السكريتيرة نسيمة
بيجاد:واخا شكرا
شارل:يمكن ليك تفضل
خرج بيجاد هاز معاه الوراق و رجع عند هاجر لي كانت تتسنا فيه غير شافتو خرج مشات عندو بعلامات التساؤل...
هاجر:شنو درتي معاهوم؟؟
بيجاد بتاسم بشوية:قبلوني
هاجر نقزات بفرحة:بصااااح؟؟؟ و بلاا وراااق؟؟؟
بيجاد:قال ليا غيتكلفو العجب
هاجر:هههه ولا هي لي غتكلف
بيجاد:شكون؟؟
هاجر:والووو ههه ايوااا هي مبروووك الخدمة الجديدة
بيجاد:الله يبارك فيك
هاجر جراتو:هادي خصها شي احتفاال صغييييور هههه

بيجاد شدها من دراعها:خلي الإحتفال لمن بعد ماشي دابا
هاجر:و علاش؟
بيجاد:بغيت نقول ليك شي حاجة
هاجر قلبها بدا تيضرب ويلي شغيقول ليها تفكرات البوسة و هي تفكر اش تيجي من موراها ياكماا ياكماا باغي يتصاحب معاها حشمات فبلاصتها و هي تتخيل هادشي حتى فييقها صوتو...
بيجاد:سمعتيني؟
هاجر:لا غير قول تنسمعك
بيجاد:فاش وليت دابا خدام هنا بغيتك متبقايش خدامة و اي حاجة بغيتيها غنحاول نوفرها ليك بشرط ماتخدميش
هاجر بدهشة:ويلييي على مانخدمش؟؟؟
بيجاد:الى غنبقاو مع بعضياتنا مابغيتكش تخدمي
هاجر حشمات و قالت بشوية:ويلي على بعضياتنا
بيجاد:واش موافقة؟ و انا تنواعدك متنقصك حتى حاجة معايا
هاجر:الى هكا واخا غنحبس الخدمة ولكن القرايا لا
بيجاد:القرايا امرك الشخصي و مغنتدخلش فيه غير الخدمة مابقيتش باغي نشوفك خدامة تما و بداك اللباس
هاجر بخجل:و علاش؟
بيجاد:مابغيتش بحال امثال داك حاتم يبانو زائد مانبغيكش تخدمي اي حاجة تبغيها نخدم عليها هدا هو الرجل مع مراتو
هاجر خرجات فيه عينيها:مع مراتو؟؟؟؟
بيجاد عاد عاق اش قال:احمم مع المرأة قصدي المهم غنرجعو دابا و نمشيو للمخبزة نحبسو هاد الخدمة
هاجر:واخا...
بعدما خرجو من الشركة لقاو تاني طاكسي تتسنا فيهوم داتهوم لعند المخبزة و هبطو يدويو مع احمد هاد الأخير لي كان بحالا واجد يسني على وراق الإستقالة و بحالا فراسو من قبل سالاو معاه الخدمة تحت انضار ياقوت لي مستغربة و غير تتسول فهاجر اش واقع فهماتها انه بيجاد طبر على خدمة لي من خلالها غيوفر ليهوم كلشي و منها نيت ترتاح شوية و تفرغ لقرايتها اكتر تفهمات ياقوت هادشي و حتارمات رغبة صاحبتها و ولد عمها....
⏳بــــــعــــــــد شـــــــــهــــــــر⏳
داز شهر على قدو كانت هاجر فيه مستريسية غير مع الإمتحانات و بيجاد مكونسونطري غير مع خدمتو و داير جهدو ينجح فيها..دازو ايام و الحالة المعيشية ديال بيجاد و هاجر تحسنات و ترقات بفضل العمل ديالو و الصالير لي تيشد و اليوم قدر يوفر اول حاجة دارها هدف قدامو و لي هي مسكن جديد ليهوم...
فشقة هاجر....
بيجاد:وااش مزاال ماسااليتيي؟؟
هاجر:صبرر راني تنقاد فصااكيي
هزات راسها تتشوف فركاني بيتها لي خوات ولات غير حيوطا و شرجم قادات صاكها دغيا و خرجات عند بيجاد لي كان لابس مزيان و مزييز ولا باين انه مهتم بلباسو دابا...
هاجر قربات منو تتشوف فالركاني و الحيوطا الدار ولات خاوية تتصفر كلشي ترحل ولا تلاح...
بيجاد:صافي ساليتي؟
هاجر شداتها البكية حيت غتخلي الشقة لي كانت المأوى ديالها فأول مرة جات فيها لهاد المدينة و عاشت فيها الحلوة و الزوينة و من بين هاد الحوايج لي عاشتهوم السكنة ديال بيجاد معاها بداو تيهبطو دموعها و زييرات على صاكها كأنها غتخلي جزء منها..قرب منها بيجاد و تحنا حتى عنقها ضامها لحضنو عاد قدرات تبكي كأنها كانت تتسنا غير هاد الحضن باش تفرغ احاسيسها...
هاجر:غنتوحشش هااد البلااااصة
بيجاد تيربت على ضهرها بشوية:اه ولكن غتسكني دابا فماحسن
هاجر تتبكي:عندك الحق ولكن لي دوزتو هنا مع راسي مع ياقوت معاك نتااا راه صعيب يتنسااا
بيجاد شدها من كتافها و جابها قدامو حتى تقابل مع وجهها و دوز صباعو تحت عينيها ماسح دموعها بيهوم:واش غتبقاي هكا راه الشيفور تيتسنا زعمة
هاجر حاولات تبتاسم:واخا صافي هاني مغنبكيش
بيجاد قرب منها و باسها فراسها:هكا نبغيك
بعدات منو بحشمة و شافت فيه بابتسامة:صافي نقدرو نمشيو دابا
خرجو من الشقة و مشات دقات على ياقوت حتى هي غير شافتها طلقاتها بلبكاوات من العتبة د الباب بقاو يتعانقو و يتباكاو حتى تفشو عاد قدرو يتوادعو و يطلقو بعضياتهوم..تسناهوم بيجاد حتى سالاو و هبطو هو و هاجر كانت واحد الطونوبيلة كحلة تتسنا فيهوم بشيفورها لي دارو ليه شارل بحكم انه بيجاد متيعرفش يصوگ و مزال متيفكر انه يتعلم لسياقة حتى يقاد أمورو المهمة الأخرى...طلعو بجوج و ديمارا بيهوم لدارهوم الجديدة....

بقا غادي بيهوم الشيفور حتى وقفو قدام عمارة كبيييرة فحي رااقييي مختلف تماااما على لي كانت فيه هاجر..هبط حتى حل ليهوم الباب و خرجو...
بيجاد:هادي هي العمارة لي فيها دارنا الجديدة
هاجر بتاسمات فاش سمعات دارنا حسات انه نسبها معاه فممتلكاتو:الحي باين زوين بزاف و نقيي
بيجاد:وراني موسيو شارل كيفاش نقلب عليهوم اونلاين لقيت هادي لي مناسبة
هاجر:بعدا غير من برا و الحي باين العربون
بيجاد بتاسم بشوية:متأكد غتعجبك من الداخل
شدها من دراعها و بقا غادي بيها حتى دخلو للعمارة و طلعو فالسانسور حتال فين كاينة الشقة...
جبد بيجاد الساروت و حلها..دخلات هاجر حالة عينيها شوية تبعاتهوم فمها متصوراتش الشقة تكون بهاد الجماال و الترتيييب كانت عبارة على كوزينة بمواعنها و ماكيناتها الصالون نص بلدي و نص بالفوتويات الديكورات زويينين بزااف و مواتيين كلشي كان مقاد فبلاصتو..ضارت شافت فبيجاد لي واقف تيتسنا فردة فعلها حتى طارت عليه بتعنيقة كبيرة...
هاجر:واناااااري شحااال زويييينة انا متشوووقة نشوووف بيتي
بيجاد:بيتك؟
هاجر بعدات منو هازة حجبانها بتساؤل:ايه بيتي
بيجاد تمشا حتى حل واحد الباب و هاجر قربات حتى طلات غير طلات حلات فمها على قدو فاش شافت ناموسية ديال جوج د الناس شافت دغيا فبيجاد مخرجة فيه عينيها...
هاجر:اش هادشي؟؟؟؟؟؟؟
بيجاد تنهد و شاف فيها بجدية:مغنبقاوش نعسو مفرقين غنعسو فغرفة وحدة و فديك الناموسية
هاجر: بدهشة علاششش واش تسطيتيييي؟؟؟؟
بيجاد خدا نفس عميق و حنحن:تنآمرك تزوجي بيا
هاجر بصدمة:عاودها؟؟؟
بيجاد خنزر:شغنعاود فيها متتسمعيش؟؟؟
هاجر شادة وجهها بالصدمة:واش قلتي دابا الزواج؟؟؟
بيجاد:و شنو فرأيك؟؟؟
هاجر:باغي تزوج بيا؟؟؟
بيجاد:واش تتسطاي عليا؟؟
هاجر عينيها غرغرو:واش بصاح باغي تزوج بيا ولا غير شاد فيا؟؟
بيجاد:واش انا ديال الضحك؟
هاجر:فالحقيقة لا لا
بيجاد حنحن:غنقولها مرة خرى...تنآمرك تزوجي بيا
هاجر:قول واش تقبلي تزوجي بيا و نتا تنآمرك دخلتيها حتى فالزواج
بيجاد:مهم فهمتيني ولا لا؟
هاجر عنقاتو بحب:انا قاابلةةةةة
بيجاد بادلها العناق مبتسم:هاجر
هاجر بعدات منو و تقابلات معاه:مالك؟
بيجاد حط ليها سوارت فيديها:دابا يمكن ليا نقول ليك شكرا على اي حاجة درتيها معايا
هاجر شافت فالسوارت و رجعات شافت فيه:مفهمتش شنو قصدك؟؟
بيجاد:هاد الدار شريتها ليك نتي اما انا البلاصة لي حاط عليها عينيا ليوم بلعشية غنمشي نشوفها
هاجر بصدمة:كيفاش شريتيها ليا؟؟؟؟
بيجاد:كيفما سمعتي هدا هو الشكر ديالي على لي درتيه معايا فهاد المدة كاملها
هاجر غرغرو عينيها تاني ممصدقاش اش تتسمع:ياك قلتي دارنا بجوج؟؟
بيجاد:ايوا الى قلت ليك دارك من الأول مغتبقاش مفاجأة
هاجر تتمسح دموعها:متصورتكش حنين لهاد الدرجة
بيجاد:تاني؟مزال مبغيتي تنساي؟
هاجر:صافي صافي هي دابا قلتي باغي تزوج بيا و انا قبلت؟
بيجاد:اه
هاجر غوتات بفرحة:نااااارييييييي ههههه اربي علاش بغيتي تزوج بيا؟
بيجاد بان التوتر على وجهو...
هاجر:قول ليا عفاك علاش كان تيتصحاب ليا باغي تزوج بياقوت
بيجاد:من نيتك؟ انا نتي لي تتباني ليا بوحدك
هاجر هزات عليه صبعها تضحك:وا تتعتارف بهادشي هههه
بيجاد قرب منها حتى ولا نيفو عند نيفها هزات فيه عينيها بتوتر و بدات تبلع فريقها هاد الحركة ديال شي بوسة ناوي عليها..لثواني من النظرات المتبادلة حط بيجاد يديه بجوج على خدودها و قال:طلبت منك الزواج حيت تنبغيك
و بلا ميتسنا ردة فعلها جر وجهها لعندو حتى نغامسو فقبلة مطولة تيروي فيها عطش اشتياقو لشفاهها من اخر مرة ذاقهوم اما هي صدمتها تخلطات مع ذوبانها من قبلاتو و لمساتو قلبها بدا تيضرب بزاف حتى حسات بيه بدا يحييد فحوايجها عاد فاقت و دفعاتو يحبس...
هاجر بعدات منو:اويلي صاافي خلينااك تبوس و تلمس و باغي تدوز لداكشي لاخوور
بيجاد عاد عاق براسو كان مخلي شهوتو مسيطرة عليه:افففففف
هاجر:مورا الزواج ا حبيبي دابا خليني نقولها للواليدة و تعلم معاها الواليد

بيجاد:شوفي انا غنرجع للخدمة دابا من بعد و ندويو
هاجر:ديتي تيليفونك؟
بيجاد:هاهوا فجيبي
هاجر:اه خصني ديما نفكرك حيت ديما تتنساه
بيجاد:واخا المهم بقاي هنا حتى نرجع
هاجر:واخا
خرج بيجاد و هبط لعند الشيفور لي وصلو لخدمتو مخلي هاجر تتنقز بالفرحة ممصدقاش انه شرا ليها شقة و من الفوق طالب منها الزواااج بالفعل حياتهوم تبدلاات و ولات كلهاا فرحة من نهاار لي مشاو فيه لداك السيرك تفكرات مولات الصوت لي قالت ليها على الفرحة و بقات تتسائل مع راسها دازت مدة و من داك النهار مادواتش معاها زعمة غيكون غير خيال و اختفى؟ ولا صافي مابقاش ليها وجود؟؟..جبدات تيليفونها و دورات النمرة لمها...فالمدينة المجاورة و فواحد السطاح فدار شعبية كانت ام هاجر تتنشر فالحوايج و تشدهوم بالمقابط حتى سمعات تيليفونها تيصوني جبداتو من صدرها لقات سمية بنتها و هي تكليكي بالبصمة...
خدوج:الوووو
هاجر:الواليدة واا الوااليدة
خدوج مكمشة عينيها بالشمس لي ضاربة و تتشوف هنا و لهيه:اش كاين؟لبااس علييك؟؟
هاجر:لباااس ا ميي لبااااس وا فرحييي و نشطييي
خدوج:علاش؟ ياكما نجحتي؟؟
هاجر:مزال معرفت ولكن سمعيني
خدوج:هالووو راني تنسمعك اش وااقع دوييي و نتي بحااال عماااتك ماتلووحو ليا الخباار حتى تلوحو مني النص
هاجر بفرحة:جاااو فيا الخطاااب ا الواااليدة
خدوج حطات يديها على صدرها تضرب فيه:الله يا بنييتييي الله خطاااب الله الله شكوون هادو؟؟؟
هاجر:واحد الراجل الله يعمرها سلعة هاد السيمانة ان شاء الله غيجي يخطبني من عندكوم
خدوج طلقاتها بتزغريتة حتى صمكات وذن هاجر:لولولووووووووووووي ا سمعيييي ا فااااطنة واااا فاطنة
فاطنة طلات من السطاح لي حداهوم تضور فعنقها بزيف حاياتي معگود بطروفا د الحامض:اش كاين ا خدوج؟؟
خدوج:يااو فرحييي و قولييي للبناات بلي بنتي هاااجر دواااو فيهاااا
فاطنة زغرتات:لولوووووووي يااااو مبرووووك ياووو الدرية كبراااات
خدوج:هالووو هااجررر
هاجر سادة ودنها صمكوها:الواليدة قوليها للواليد هاد السيمانة غنجي و غيتبعني يخطب
خدوج:صافي ا بنيتي كلشي غوجدو فاطنة هبطي هبطي سربي
لاحت فاطنة السلوم و نقزات هابطة منو عند جارتها و صحييبتها خدوج:زيدي زيدي نمشيو عند الحلاوية فركوسة يالاه توجد لينا الحلوة
خدوج:بسلامة ا بنتي بسلامة(قطعات)
هاجر:ماااماا..مااماا قطعات واناري غيشوهوني فالدرب

فشركة فخونسوا للخيول..كان بيجاد جالس فالبيرو ديالو مقابل خدمتو فمكتبو لي غير من شكلو تيبيين مكانتو فهاد الشركة كيف دايرة حتى جاه اتصال من الفيكس...
بيجاد جاوب:الو؟
الشخص:موسيو بيجاد الإسلام الفارسي؟
بيجاد:ايه شكون معايا؟
الشخص:بخصوص الطلب لي قدمتي لينا السيمانة لي فاتت لقينا الشخص لي تتقلب عليه
بيجاد بلهفة:بصااااح؟؟؟؟
الشخص:وي موسيو سميتو يونس الفارسي
بيجاد:واش باقي عند كلمتو كيفما كاتب؟؟
الشخص:وي باقي و باقي غيتلاقا بيك فالعنوان لي سيفط
بيجاد:واخا باقي الوقت شوية على موعدنا
الشخص:اوكي موسيو
بيجاد:شكرا ليك بسلامة
قطع بيجاد و حط السماعة..سها قدامو و فراسو تيضور غير كيفاش غادي يكون هاد الموعد مع اخر واحد من السلالة ديالو...

فالعشية بعدما سالا بيجاد خدمتو هبط لمكان السيارة كان الشيفور تيتسناه تما ركب و وصلو لدار فين كانت هاجر تتسنا فيه...
هاجر مبتسمة:على سلامتك
بيجاد:الله يسلمك لبسي حوايجك و اجي معايا
هاجر:لفين؟
بيجاد:لديك البلاصة لي قلت ليك غنشوفها هاد العشية
هاجر:واخا غنلوح عليا جلابتي دغيا و نجي
مشات هاجر طايرة لبسات جلابتها هزات صاكها الصغير و خرجو هو وياها..طلعو فالطونوبيل و ديماراو...
الشيفور كان غادي صايگ بيهوم مركز مع الطريق لي غادية و تتجبد و غادي و تيخرج بيهوم على المدينة حتى تيبانو غير الأشجار و القحط...
هاجر تتشوف فالزاج:تيبان ليا هاد البلاصة بعيدة
بيجاد:فينما غتكون فيها غنمشي ليها الأمر تيهمني بزاف
هاجر حطات يديها على يدو:لهاد الدرجة؟
بيجاد طلع فيها راسو:ااه
هاجر بتاسمات:اذن حتى انا مهمة بالنسبة ليا ههه
بيجاد بتاسم:شكرا هاجري
هاجر حشمات:هانية هه
بعد مدة طويلة ديال الطريق و أخيرا وصلو للمكان المعلوم..هبط الشيفور حتى حل ليهوم و هبطو تيشوفو لفين جابهوم...كان المكان عبارة على أرض رملية شوية و فيها شوية ديال الخضورية مشتتة هنا و لهيه و فوسط من هادشي كان قصر كبيييييير نصو تهدم بسبب العوامل الطبيعية و النص لاخور باقي شاد فراسو و رغم هادشي تيبقا مجرد اثار خلفتها العصور...
قلبات هاجر بعينيها فالمكان حتى تيبان ليها راجل كبير فالعمر من بعيد واقف قدام داك القصر القديم..هزات راسها فبيجاد لقاتو مبلوكي فالقصر و عينيه مابقاوش تيرمشو من كترة الصدمة لمعة غريبة بدات تتكون فيهوم و احاسيسو تضارب بسرعة...
هاجر باستغراب حطات يديها عليه:بيجااد؟؟؟؟
بيجاد مقادرش يدوي خلاها و مشا بخطوات متسارعة غادي جيهة القصر تبعاتو هاجر مستغربة حتى وقفو قدام الراجل لي كان هاز مخطوطة فيديه....
يونس:السلام عليكم انا هو يونس الفارسي
بيجاد شاف فيه و رجع شاف فحيوط القصر:وااش بصاح هدا هو قصر سلالة الفارسي؟؟؟
يونس:اه هو و هاد الوثيقة تتبين كلشي
بيجاد:شكون عطاك هاد الوثيقة؟
يونس:هاد الوثيقة تورثات من جدودي تتبين ملكية هاد القصر للعائلة ديالي
بيجاد ممصدقش اش تيسمع هدا بالفعل واحد من السلالة ديالو ولكن ولد من فيها؟؟...
خلاه و دخل للقصر بغا يشووف كيف ولا فيين غرفتووو فيين القاااعاات فيين الممرااات النص تهدددم هاجر شافتو دخل تبعاتو و غير حطات رجليها فالداخل ديالو تكوانساو فبلاصتهوم...
هاجر تضور فعينيها مستغربة:بيجاااد اش وااقع؟؟
بيجاد:معررفتش تنحس بجسمي متيتحررركش
المخطوطة ليكانت فيد يونس لي ولا مجمد فبلاصتو تهزات فالسما و دخلات للقصر حتى ولات تطفو فالهواء قدام عينين بيجاد و هاجر لي مندهشين..فجأة تسمع صوت ملأ ارجاء القصر...
مرحبا بسمو الأمير بيجاد الإسلام الفارسي و النصف مشعوذة هاجر سعدان....
بيجاد خرج فعينيه بعصبية هاد الصوت ماشي غريييب عليييه اما هااجر وسعات عينيها بالدهشة...
هاجر:مووولااات الصوووت
المخطوطة تحلات و تحولات الكتبة لي فيها لرموز و دوائر سحرية و هي تخرج منها واحد المرأة أربعينية لابسة رداء كحل شعرها قهوي طويل و عينيها قهويين مسحووبين مكحلين...
بيجاد خرج عينيه بصدمة و هاجر حداه مندهشة رغم انه المرأة باينة فيها كبيرة الا انها زويينة و فيها واحد الشباب فوجهها...
بيجاد غووت بعصبية:البااااااااااتووووووووووووووولللللللللل
هاجر تصدمات:كيفااش؟؟؟؟؟؟
بيجاد تيحاول يتحرررك يمشي لعندهاا ولكن ماقاادرش باقي مفيكسي و جسمو مخدر ماتيستاجبش للحركة ديالو...
هاجر تتشوف فالمرأة:وااش نتي الباااتول؟؟؟
المرأة سدات عينيها و ضحكات:ههه زعمة مكنتيش عارفة طول هاد المدة؟؟؟
هاجر:كان عندي احساس ولكن قلت ميمكنش!!
بيجاد غوت:غنقتلاااااك طلقيييينيييييي غندمرررررك كيفمااااا دمرتينييييييي
الباتول هزات يديها و حركاتهوم ب لا حول:اشمن دمار يا سمو الأمير؟ (بتاسمات) انا خلاصك ماشي دمارك
هاجر:علااااش درتييي داكشي؟؟؟بيجاااد تيكرهككك بزااف نتي خرجتييي على مستقبلو كأمير علاااش؟؟؟
الباتول:عارفة هادشي و انا جبتكوم ليوم لهنا حيت المحطة ديالي الأخيرة غتوقف هنا فأنقاض قصر عائلة الفارسي الملكية....

الباتول حركات يديها:دابا عاد غادي تبدا الحكاية من بعدما وليتي ا سمو الأمير تمثال...
ضرب واحد الضو قوي فعينين بيجاد و هاجر مخليهوم يسدوهوم حتى اختفى و حلوهوم تاني...الباتول اختفت و المكان مابقاش القصر كأنه رجعاتهوم لداك العهد حتى بانت ليهوم الباتول كيفما هي نيت و معاها واحد الرجل شاب طوييل و صحيح بحال بيجااد حتى من الشبه كاين شوية و لابس ملابس الأمراء...
صوت الباتول:بالكاد نتا عارف شكون هدا ولكن هي لا هدا هو الأخ الكبير لسمو الأمير بيجاد و سميتو حسن الفارسي هدا هو النهار لي جا عندي فيه باش يطلب مني نتخلص منك بشي طريقة حيت لاحظ ميول الشعب ليك نتا و خاف يكون انقلاب و تستالم العرش...
تحييدو الباتول و حسن من قدامهوم و بانت الباتول بوحدها فغرفتها تتخمم و تضبر كيفاش غتدير هادشي...
الباتول:حاولت نفكر فشي طريقة متكونش مؤذية لدرجة يوماين و انا تنفكر حتى من النعاس مشفتوش حتى قررت انه نرفض
💫💫💫
حسن:كيفاش عاودي شنو قلتي!!!
الباتول حانية راسها:منقدرش ا سمو الأمير الأمراء كاملين عزاز عليا و متنفضل واحد على لاخور ولكن خوك الأصغر منقدرش
حسن بغضب:نتييي و عااائلتك كاينييين فهاد القصر بااش تلبييو طلباات العائلة الملكية و انا تنآمرررك تديري لي قلتوو ليك ولاا غنحرقكووم كاااملين حتااال الموووت متنساااوش عائلة الفارسي لي دارت منكوم بنااادم و عطاتكووم امتيازااات و لي متحلمووش بيهوم!!!!
💫💫💫
الباتول:من بعد داك الكلام مابقاش عندي الحق فالرفض و الا غادي نجر معايا حتى عائلتي للهلاك و بعد اسبوع من البحث فالكتب و المجلدات السحرية قدرت نلقا واحد الطريقة...عيواض نقتل الأمير بشي طريقة مابايناش قررت انني نوقف تدفق الزمن و نوقف حياتو..طريقة وحدة لي صدقات ليا هي نحجرو حتى يولي تمثال داكشي لي درت ولكن قبل مانحجرك قلت ليك انه فالقرن 21 و عن طريق وحدة من سليلاتي غادي تحرر و هادشي لي وقع نيت ولكن لي معارفينوش بجوجكوم و معارفو حتى واحد انه داك النهار بالضبط لي تحرر فيه الأمير فالمتحف هو بداية تدفق القدر المرسوم من قرون هادي...توقف الكاميرات لي مصوراتش حواركوم...الطاكسيات..البوليس..السيرك..احمد..شارل حتى من حاتم كلشي كلشي كان مخطط ليه من طرفي انا
هاجر و بيجاد مصدومين:كييفااااش؟؟؟؟
الباتول:غتقولو كيفاش؟ فاش حجرتك ا سمو الأمير بيجاد و تحولتي لتمثال خبيتك فمكان لي يقدرو يكتاشفوك فيه علماء الآثار فالسنوات الجاية من داك الوقت باش تحط فالمتحف..الحفيدة ديالي هاجر تختارت حيت مواصفاتها لي حسيت بيهوم غيليقو بيك ضروفها و كلشي كان مدبر من طرفي باش مخططي يدوز بسلاسة حيت ميمكنش تكون معاها و هي مع عائلتها داكشي علاش فرقتها عليهوم و جبتها لهاد المدينة تكمل فيها قرايتها حتى توصل اللحظة الحاسمة لي غتلاقاو فيها
هاجر:ولكن علاش هادشييي كاملووو علاااش؟؟؟ياااك نتي لي حجرتي بيجااد الى نتي موراا هادشي كاملووو علاش تتعاونيه؟؟؟
المكان رجع كيفما كان و رجعو للقصر القديم و بانت قدامهوم...
الباتول بتاسمات:هادشي باش نكفر على الذنب ديالي
بيجاد مخنزر:يتصحااب ليييك الى بنيتييي ليااا حياااة زوييينة فهاد القرن غنسمححح ليكككك؟؟؟؟
الباتول:شكون هاد الرجل لي مغيكرهش حياة مرفهة..زوجة جميلة و طيبة و خدمة تيبغيها؟
هاجر شافت فبيجاد لي سكت مزيير على يديه بعصبية و رجعات شافت فالباتول:و شنو وقع من بعد ما ولا بيجاد تمثال؟؟
الباتول:فاش فعلت التعويذة ديالي على تمثال الأمير مشيت لمكان المستندات و الوثائق فالقصر و هزيت الوثيقة لي تتبث الملكية ديال هاد القصر للعائلة الملكية لي هي الفارسي خبيتها عندي للإحتياط و من بعد ايام من اختفاء الأمير بيجاد الشعب لاحظ هادشي و حتى الأمراء الخرين و منهوم الأخ المتوسط ديالو الأمير محمد
بيجاد بدهشة:خويااا محمد؟؟؟؟
الباتول:الأمير محمد قدر يكتاشف المخطط ديالنا و جمع جيشو و الشعب ضد الأمير حسن لي استسلم و تنفى
بيجاد:يعني خويا محمد لي شد الحكم ماشي حسن؟؟؟
الباتول:تماما فاش ستالم الحكم ديك الساعة رتاحيت من جهة الزمن ديالنا انا وياك و قررت نشق طريقي معاك و مع حفيدتي فالزمن القادم بعدما غبرت على انضار الأمير محمد لي كان تيقلب عليا ختمت راسي فهاد الوثيقة و رجعات لمكانها..بقات متوارثة و متوراثة بين الأجيال حتى ولات عند اخر وارث لي هو يونس الفارسي
بيجاد:يونس من سلالة خويا محمد؟؟؟
الباتول:تماما
بيجاد ممصدقش اش تيسمع لا لا ودنيه صماااكووو....
هاجر شادة راسها بصدمة:ك كيفاااش هادشي ولا متراابط هاكااا لااا انااا هزيت يدي صااافي واش هادشي كاااملووو خططتي ليه؟؟؟
الباتول:من البداية و القدر تحفرات فيه سمية الأمير بيجاد و حفيدتي هاجر انا كنت مجرد سبب نتوما مكتابين لبعضياتكوم
هاجر:علاش مادويتيش مع بيجاد فراسو و كنتي تدوي معايا انا؟
الباتول:حيت سمو الأمير عارف صوتي و مغيسمعش مني ابدا و يقدر مخططي يتخرب الى عرف بوجودي فهاد الزمن
بيجاد مابقا فاهم حتى حاجة صافي تبلوكا:مبقيت عارف مانقوول

الباتول بتاسمات:ماتقول حتى حاجة عيش حياتك و نسا الماضي نسا لي وقع الزمن ديالك لي كنتي هاز ليه الهم تحكم من طرف الأمير محمد و نتا عارف شتيعني هادشي
بيجاد:انه الشعب ديالي تحكم من طرف ملك عادل
الباتول:تماما
هاجر:علاش قلتي ليا ديك الساعة انه انا نصف المشعوذة؟؟
الباتول:حيت ال سعدان تزاوجو من بعد من ناس عاديين داكشي علاش تتبقاي نصف مشعوذة ولكن هاد النصف كان كافي يخليني بجنبك
هاجر سكتات و شافت فبيجاد لي ساكت حتى هو...
الباتول شافت فبيجاد:يونس الفارسي غيعطيك هاد الوثيقة و ابتداءا من دابا غيعتابرك من العائلة..قول الحقيقة للأمير و الحفيدة..هادشي لي بقا ليا راه درتو رحلتي هنا تتسالي(بابتسامة شافت فهاجر) دوزت وقت زوين معاك و تأكدت فيه انه نتي المناسبة لسمو الأمير طهلاي فيه و انا متأكدة غتعوضيه على كلشي
بيجاد:وقفييييييييييي
الباتول:تنسمعك سموك
بيجاد بتردد:شكرا
الباتول بتاسمات و حدرات راسها فجسمها لي بدا تيتلاشا:هدا واجبي الوداع محطتي الأخيرة من رحلتي غتختم هنا....
هاجر بصوت عالي:شكرااا على كلشيييي شكراااا
الباتول هزات يدها تتحرك فيها مبتسمة و هي تلاشا قدامهوم بالكامل مخلية الوثيقة طايحة فالأرض....

الحركة ديال جسم كل من بيجاد و هاجر رجعات و اختفى داك التجمد لي وقع ليهوم مع اختفاء و تلاشي الباتول قدام عينيهوم...شافو فبعضياتهوم باستغراب و رجعو شافو فالوثيقة لي مليوحة فالأرض..تحنا بيجاد حتى هزها لقا دوك الرموز و الدوائر مابقاوش و رجعات الكتبة عادية...
بيجاد:قالت يونس غيعتابرني من العائلة
هاجر:خليناه على برااا
لوا بيجاد الوثيقة و خرج هو و هاجر من القصر بان ليهوم يونس فين خلاوه واقف تيتسنا فيهوم...
يونس بتاسم:كيف جاك القصر ا خويا؟؟
بيجاد شاف فيه باستغراب:خوك؟
يونس:مالك ا بيجاد راني خوك يونس هه؟
بيجاد شاف فهاجر لي شافت فيه...
هاجر:خلاتو يعتابرك اخ
بيجاد تنهد:وي شفتو
يونس:الوثيقة دابا تندوزها ليك نتا و هاد القصر غيولي فسميتك ان شاء الله
بيجاد:ولكن انا كنت باغي نشريه!!
يونس:هدا حقك و الحق متيتشراش
بيجاد:على الأقل قول ليا فين كاينة العائلة؟
يونس:كاينين غير انا و مراتي دابا عائلتنا كل واحد فين تشتت حتى من ولادنا تزوجو و كل واحد لحق لهمو
بيجاد:واخا اجي معانا
تمشاو حتى طلعو فالطونوبيل و طلع معاهوم حتى هو...
بيجاد:قول لشيفور فين جات دارك
يونس:فشارع حميصة توصل تما غنوريك فين
ديمارا بيهوم الشيفور من تما حتى وصل لداك الشارع ورا ليه يونس فين جات الدار حتى بلاصاو قدامها و هبطو...
يونس:هادي هي داري(تيدق) شرييفة حليي
شريفة:هاانا جااية
حلات ليهوم امرأة أربعينية الباب كانت لابسة بيجامة صفرة و عاقدة زيف حاياتي:على سلامتك
بيجاد و هاجر تصدمو:الباااااتووول
يونس:الباتول؟؟ هادي مراتي شريفة
هاجر:تتشبه لواحد المرأة هيهي
بيجاد تيوشوش ليها:واش هادي مزال مابغات تسالي مشات وخلات وحدة تتشبه ليها!!
هاجر:صافي غير نسا
شريفة:ايوا تبقاو ففم الباب؟
يونس:دخلو مرحبا بيكوم
دخلو للداخل كانت دار عادية بديكورات مغربية دخلوهوم لصالون و شريفة مشات تعمر اتاي و تحط لي قسم الله..من بعد ما تحطات الصينية و الفاكية و شي حليوات...
يونس:هدا هو خويا بيجاد لي كنا تنقلبو عليه
شريفة:ويليييي ماقلتي ليا والو
يونس:وصية المرحوم با درت بيها و دابا الى بغات تجي الموت مرحبا بيها
شريفة هزات البراد تتكب فالكيسان:ويلي الله ينجيك ليا
بيجاد و هاجر حداهوم فوسط من واحد الجو مشحون بالتوتر و الارتباك من لي تيسمعوه...
هاجر بشوية:يونس ولا خوك دابا واش تقبلتي هادشي؟
بيجاد:تيبقا من سلالة خويا محمد يعني بحال خويا ديك الباتول عارفة اش تدير!
هاجر ضحكات:ماطييرني غير مرتو لي تتشبه ليها هههه
شريفة حطات كيسان اتاي قدامهوم:كولو متحشمووش راه حنا عائلة وحدة دابا
هاجر هزات كاس اتاي تتبتاسم ليها:ربي خليك
يونس:مقلتيش ليا شكون هاد البنت واش مرتك؟
هاجر شوية متخوي اتاي و بيجاد هز فيه راسو:ان شاء الله غتوليها
شريفة:مبارك و مسعود تبارك الله زويينة سبحان الله لايقين لبعضياتكوم
بيجاد بشوية:عشت حتى شفت الباتول تتقول سبحان الله
هاجر:و مالك ههههه
يونس:بسم الله....
⏳بــــعـــــد أســـــــبــــــــــوع⏳
فدار عائلة هاجر كانت هاد الأخيرة فبيتها فدارهوم لابسة قفيطين و طالقة شعرها واقفة عليها ياقوت لي مزييزة فقفيطين حتى هي تتقاد ليها فالمكياج...
ياقوت:هدا هو ولد عمك اا هادي هي صاحبتك اا هادي هي لي قالت تيعجبها حاتم اا
هاجر:واصافي راني قلت ليك ليكاين و سكتي ليسمعك شي واحد اش جاب حاتم للهضرة
ياقوت شداتها الضحكة:ويلي داك النهار بان ليا مع واحد المنتوفة صابغة شعرها بالصفر تلاقاو ببعضياتهوم
هاجر:هههه ناري راه من نهار كلا قتلة العصى غبر
ياقوت:اشمن قتلة د العصى؟؟
هاجر:ا لا والو والو...

سالات ليها ياقوت المكياج و رشات ليها الريحة...
ياقوت:تبارك الله على صحيبتي
هاجر تتشوف فلمرايا بتوتر:بصاح جيت زوينة؟
ياقوت:اكيييد اصاحبتييي
فالصالون كانو واليدين هاجر لي هوما خدوج و عبد القادر و بيجاد و يونس و مرتو شريفة جالسين على طبيلة مزوقة بالشهيوات و الحلويات المغربية من يدين خدوج لي كبرات بيهوم رغم وضعيتهوم المادية العادية...
يونس:ايوا كيفما راكوم عارفين اليوم جينا نخطبو لخويا بيجاد بنتكوم هاجر على سنة الله و رسوله
عبد القادر:مقلتو عيييب مرحبا مرحبا فين الدرية ا خدوج؟
خدوج:ضروك نجيبها
ناضت خدوج تتجرجر فتكشيطتها و تخرخش بدبالجها حتى وقفات قدام بيت بنتها و دقات:هااجرر خرجي ا بنييتي
هاجر قلبها تيضرب:هاني ا ماما
خرجات هاجر عندها و بجنبها ياقوت...
خدوج:بسم الله ما شاء الله على بنييتي ليوم يقولوو خدووج لي والدة الزيين
هاجر حشمانة:لهلا يخطيك ا مي
خدوج:زيدي بغاو يشوفوك
شدات فيها خدوج و جراتها لعندهوم و ياقوت غادية بجنبهوم حتى دخلو لصالون شافها بيجاد بداك اللباس التقليدي شحال طالعة زوينة بتاسم فوجهها و هي حادرة راسها حشمانة و معارفاش علاش مكبرة الموضوع لهاد الدرجة واش حيت الأمور ولات قدام واليديها لي تتحتارمهوم ولا حيت صافي غادي تولي العلاقة جدية و مخلدة على الوراق...
عبد القادر:ايوا شنو قلتي ابنييتي باغية هاد الزواج؟
هاجر حركات ليه راسها ب اه و راسها تعوج من كترة ما حدراتو بالحشمة..شاف عبد القادر فيونس و بيجاد و هز يديه:نقراو الفاتحة
قراو الفاتحة و دوزو ديك العشية من بعدها دازو اياام هاجر فدارهوم و بيجاد غادي جاي هاهوا فالخدمة هاهوا فالمدينة لي فيها عائلة هاجر حتى تم العرس ديالهوم و ولاو دابا زوج و زوجة...

⏳بـــــعـــــد أشـــــــهـــــــــر⏳

فمتحف اللوفر الموجود بباريس....
كانت هاجر غادية حالة فمها فاللوحات و بيجاد تابعها من اللور خاشي يديه فجيوبو...
هاجر:شووف شووف شحال زوينة هاد اللوحة اش بان ليك فشي وحدة بحالها نزوقها فالصالة ديال القصر ديالنا؟
بيجاد:واش مزال ماساليتي ا هاجر؟؟
هاجر:وا مالك على هاد الزربة هادي يالاه ساعة و حنا هنايا
بيجاد تيشوف فساعة يدو:قصدك ساعتاين
هاجر شداتو من دراعو و جراتو:اجييي نشوفوو هنااا
تنهد و بقا غادي معاها فهبالها تضورو من هنا و من لهيه حتى وصلات للقسم الخاص بالتماثيل و هنا ضارت دغيا شافت فيه...
بيجاد طلع راسو فالتماثيل و مشا شدها:حتااال هادوو و بعدييي منهوووم
هاجر تضحك:ههههه ياكما خفتي نقيص شي واحد و يفيق؟
بيجاد:بحال والو راك نصف مشعوذة
هاجر:هههه انا المشعوذة ديالك نتا فقط مشعوذة الأمير
بيجاد بتاسم و هزها حتى قرب وجهها لعند وجهو:تنبغيك ا مشعوذتي
هاجر بتاسمات:حتى أناااا يااا أميرييي هههه

💜💜النــــــــــــــــــهايــــــــــــــة💜💜

قصة بدأت بلمسة حفيدة مشعوذة لتمثال أمير لتنتهي بقصة حب نسجت خيوطها منذ مئات السنين قدره معها و قدرها معه لأن أسمائهما محفورة بجانب بعضها.

تصنيف القصة
يرجى إختيار التصنيفات اللي يمكن يوصفو هاد القصة، التصنيفات كاتساعد بشكل كبير فتقسيم القصص وحتى لي كايقلب على قصة من نوع معين كايلقاها بسرعة.. (يمكن اختيار أكثر من تصنيف)
  • كوميدية
  • رومانسية
  • رعب
  • سفالة
  • أكشن
  • خيال
  • بوليسية
  • حزينة
  • تشويق
  • غموض
  • واقعية
  • دراما
السفالة في القصة
كيفاش يمكن نصنفو هاد القصة؟
  • بدون سفالة
  • القليل من السفالة
  • سفالة مفرطة

التنقل بين الأجزاء

صفحة القصة
سيتم تشغيل صندوق التعليقات بعد لحظات
معظم التعليقات تم إخفاءها بواسطة الفيسبوك، نحاول بكل الوسائل المتاحة إستعادتها في أقرب وقت ممكن.