غيرك ما يحلالي الجزء 11

خشى يديه وسط شعرها و لصق فمو مع فمها تيبوس و يزير على شعرها بيديه رونو و خربقو كلو ....وهي مكمشة على يديه ليشاد بيها راسها...تتقمش و تحبد معاه...!! ثبتها و مابغى يفكها تيبوس بلهفة و يهبط يديه مع ظهرها موقفها مع نصها مزير عليها...!! تيبوس ذقنها و عنقها و يرجع لفمها راسها معلي تينهحو بجوج....رخف ليها التكشيطة و طاح الحزام مع رجليها ..!! تشعلات العافية بيناتهم و سخنو بجوج.....هزات رجلييها زاطمة على رجليه بالطالون و طرطقات لي صدايف الشوميز و قمشاتو فعنقو حتى سال الدم ...! عا طلق منها تينهج ولى حمر ....!! مسحات فمها وجهها مشوطة شادة صدرها وشفايفها فازكين بريقو هازة جلايلها تتسب و تدوي بالزربة

_ اوا شنو نقوليك دابا بالصحة !! ..ولد الحمقة خلاني ليك باك فالورث ...والله لابقات فيك...

مسحات فمها بعصبية و قلبات سالفها على ظهرها تتلبس سندالتها...وهو تيشوف فيها داير يديه على حنابو تيسوط...جاا يشد يديها سلتات ليه و طارت خارجة مزنكة...تقول كانت فحرب ...!!

الحق يتقال عجباتها البوسة و جات مع نقاوة عبد الصمد ماعافتوش...!! سخنات و سخنو عليها ودنييها هادشي لي من دايما تتعبد منو وهي بنت 27 عام مزال عمرها شبعات رغبتها الجنسية ....حتي هي بشر و عندها رغبة و شهوة دايما ماتتحاول تخلي مسافة بينها و بين الرجال وخا تتصاحب و تخرح يقرب منها تتطلع ليها قنديشة تتخاف يغرها الشيطان و تهزق بيها رجلييها .....!!

خرحات للدروج الدنيا عامرة..ماعرفات تهبط و لا تطلع ..جات تهبط دارت بالناقص و علات جلايلها طالعة...تسب فالبعالك و تدفع فيهم.

_ حطو قزازبكم فبلاصة وحدة تفووو...تفوو...يععع ( تتدفل ) حيد نتينا...بعد ...اي رجلي طلق التكشيييطة....حيد يديك .....غدفعني البرهوش...اييي

دفعها واحد البعلوك حتى طاحت فالغمرة د الدروووج رجليها معليين فالسماء و ظهرها تقسم و شعرها طاح على وجهها شادة الغوات غا بزز تتاوه و توحوح.....و البعالك كيضحكو عليها.....

_ ايي ظهري...زهري تهرست..تهرست.....اييي....

المساعدة هابطة فالدروح تتحمع فالبعالك و تحضي فيهم غا شافت حلا خرحات عينيها و طارت لعندها تتوقفها وهي مقوسة حالتها حالة...!! دخلاتها لبيت خلود لي حا مغطي العيون و حلا تتشكي و تاوه مقسحة...عرات التكشيطة تتشوف رجليها....

_ ففف رجلي تحردات....

المساعدة : الله الله شي عينينة هاذي والله الا ماتكون غي هي....رضا التحت فارع راس مو معصب...

_ مالهم تعطلو ! كاع هاذي هدرة ! مشي هبط عندهم ...صرد يعيطولا تكمش فاابيت....

حميدة ( عصبها ) رضا بعد مني طبختي لي راسي....باها و ماقال والو برد اولدي برد....

نسيم ( دخلات لعندهم ) حلا فبيت خلود اماما طاحت فالدروج جالسة تتبكي و تشكي مقصحة....

حميدة ( خرجات عينبها ) اويلي كيفاش وقعلا....بنتي مالها....

حاحة بحال هاذي وخا يعياو يسترو تتوصل...كاع الحظور عرفو العروسة طاحت فالدروح...هذا قالها لهذا حتى وصلات لكلشي منهم عيشة لي شدات فمها تتشفى .....!!عريساتها طلعو يطلو عليها وهي بقات حالسة مامسوقاش...حتى سالات القصارة و مشا كل واحد لدارو...!! و صفاء وصلات لعبد الصمد الخبيرة طايرة....

_ حلا تبارك الله حات كتحمق حتى شدات العين و جات طايحة .....

عبد الصمد ( هز فيها عينبه ) طاحت !!فين !

صفاء ( خايفة من عيشة ) ماعرفناش ...سمعنا غي العروسة طاحت مشيت طليت عليها لقيتا جالسة فبيتها و رجليها محردة مقصحة قالك طاحت فالدروج. ....

ناض عبد الصمد من قدامهم و دخل لبيتو...و رجع خرج...!! غفل عيشة و دخل لبيتها هاز حاجبو تيشوف فسرجم بيت حلا بثقل ..الظوء كان شاعل و الريدو مطلع الرويقة شفافين تيبينو....!! تيشوف غا خيال بنت بشعر قد شعر حلا تيدور فالبيت...صدر مدفوع للقدام تتعلي يديها و تجمع فشعرها....عرفها هي !! جات تهبط الريدو قشعاتو هربات عينيها و طيحات ديك الريدو بالجهد ....

حتى صبح الصباح ! مابغات تنوض و عينيها ماقادراش تفتحهم....! البقية ناضو و نظفو و جمعو الروينة د البارح...! حتى تيشوفو رضا طالع مخنزر شاد فيديه حزام التكشيطة مكشكش و معصب....

_ شنو هذا ! ديال حلا ! علاش حيداتو ملي كانت معا البارح.....

حميدة ( خرحات عيمبها ) اويلي نعل الشيطان ارضا شنو كتقول ..اري الحزام...

رضا ( مخنزر ) علاش تحيدو ..شنو كانت كدير !! فين هي ( غوت بالجهد ) حلاااااا....

وففاتو حميدة مخرجة فيه عينيها تترغب فيه و تهدن السوق خايفة من الشوهة ...

_ رضا اوييلي..رضا الله يرضى عليك صافي..بلا شوهة.....واش بغيتي تشوهنا هنا مع العائلة عييب عيبب...

رضا ( ولى زرق بالاعصاب ) : تخطبو من هنا شهر ضريب الصداق و الا بالله ماكاين خروج و دخول معاه بلا عقد.....

حميدة ( تتولول ) وخا غا سكت غا سكت بلا غوات ...

سكتاتو حميدة بالكشايف و كركباتو بهبط بحالو يقضي شغالو .....! مامشاش لدارو طلع لمحل باه و جلس حداه فاابيرو تيضرب على البيرو بيديه معصب ...

_ دوي مع الناس و تفاهم معاهم الواليد مايمكنش يطولو الخطبة بزاف ماعندناش حنا هادشي ...

عبد الله ( عقد حجبانو ) : ختك مابغاتش دير العرس دابا قالت بغاتو فالصيف ...

رضا : ضرب معاه الصداق و لهلا دير العرس....و الا بالله الواليد اذا شفتتها خارجة داخلة معاه بالزايد و بلا قواعد حتى نقطعليها رجليها....اليوم راكبة معاه فالاوطو غدا تقول لك لا مابغيتوش صافي...انا بلان إياد مابغاش يتبلعلي والله لا تعاود.....

جلسات حميدة تتندب و تضرب على صدرها مفقوصة...

_ عقلي معاهم غيخرح...كانو صغار هلكوني كبرو غيسطيوني عمرني نرتاح انا ولدتهم باش يعذبوني ....!!( ناضت تتعجز و تشوف فنسيم ) ماشفتيشي فاين هي خلود ! هي لي خبعات الهدية دحلا ! و خبعات ااساروت...

خلود ( خارحة من بيتها مغوبشة ) شمن سااروت داتو حلا و خبعاتو عندها...كمشات على داك الذهب و ساروت الطنوبيل عندها عاد نعسات الزيت مايزهق مع ديك الخطية لي والدة...تقول غناكلو ليها رزقها.....

حميدة (تتضحك ) اوا اذا عندها خلاص....نعول عليها خير منكم...هي اذا خبعات حاجتها الجن الزرق ماطيح فبالو و حاجتها مطمرة يالطييف يالطيف وااله لا لقيتي حاجتها مرمية فشي قنت....!!

خولة : و حتى دوك التليفونات خداتهم بثلاثة...( بطنز ) زعما جاب واحد ليها واحد ليا و الاخر انسيم جات هي هاذيك....

فاقت حلا مع الظهر...!! مقلوبة على كرشها و ايفون لي جاب ليها الصمدي طايح تحت راسها !! الناموسية مقلوبة وشعرها طالع للسماء. مرون و مشعكك و راسها كيزدح تتبركم وتهمهم بين سنانها خاسرة...خشات رجليها فالسندالة تتطلع الشورط فوق السليب لي لابسة و مشات تتهز للحمام...!!

صحات على راسها مدوشة و شدات علبها الباب بالساروت .... فتحات الماريو جابدة الخزنة ديالها...!

فتحاتها و فرشات الذهب لي تكساب كلو و الذهب لي جاب ليها عبد الصمد .... بالزربة جابت صاك صغير تيتطوى خشات فيه جوج براصليات و واحد الكولي مذهب ثقييل كانت عطاتو ليها واحد النصرانية من عائلة راجل خلود تتحماق على حلا ملي تتجي حلا تتولي مبرعة كادويات معاها....!!و حد ماعارف بيه و ماسايق ليها الخبار ...!

جمعات ليحمعات و قسمات و هزات داك الصاك و خشاتو في صاكها الكبير لي غتخرج بيه...!! بحواحب مطلعة للسسماء..و ملامح عازمة طلعات الجينز عليها مزير و قميجة طوييلة فالبيض !! هزات صاكها خاشية فيه واحد من التليفونات لي جاب ليها عبد الصمد...! عاد خرحات مصبحة عليهم و الذهب مثقل ليها فالصاك و خاتم الخطبة فيديها تيبري ...

_ صباحووو.....

حميدة : بقى شي صباح دابا...مشي تفطر فين ماشية ...

حلا تتلبس فرجليها و شعرها محموع كعكة مهملة. القصة رطبة تتقيس نيفها و ترجعها ورى ودنيها...

_ وقيلة عندي القراية اماما....تعطلتت كااع...!!( شافت فخلود ) خلود طالعة لتطوان اري نشري ليك التليفون لي شفتيه و عجبك.....

خلود : وخا انا نجيب الفلوس مزيان لي فكرتيني ...! عرفتي بحال التليفون لي جاب ليك عبد الصمد البارح داك الرمادي....

حلا ( تتدور فعينيها ) اه عرفتو صافي انا نجيبو ليك رمادي و عطيني الفلوس باش نركب فطاكسي...و نشد طاكسي صغير....

خلود ( هزات حاجبها ) واش مكتعياش نتينا بعطيني عطيني...راك تخطبتي دابا وراجلك تبارك الله لا ماتخرجش من فمو...

حلا ( غا جبدوه ليها تفكرات البوسة قندشات و قلبات عينبها ) مزال ماولى راجلي خطيبي ....و دابا اذا بغيتي تشري عطيني مابغيتيش مشي شريه لراسك و لا نتينا ولفتي الفشوش ماترضاشي تركب فالطاكسيات اذا ماكان راجلك ماتحرك حتى بلاصة...زعما غي نتي لي حاملة...

بقات تبلبل عليهم تما حتى عطاتها خلود الفلوس...خشاتهم حلا فجيب سروالها و خرجات غادية فالحومة تيتلاقاو النساء تيباركو ليها وهي عاطياهم الصواب و الواجب....!! الصاك مزيرة عليه و تتزرب فالمشية ماتهنات حتى طلعات فطاكسي و حطها فكاستي ياخو باعت داك الذهب و خرجات من عند الذهايبي مزيرة على الفلوس...شدات طاكسي اخر للبانك حطات فلوسها تما و زادت عليهم حتى فلوس خلود لي عطاتها تشري التليفون....!! غا خوات الصاك تنهدات واحد تنهيدة طالعة من القلب ..!

جلسات في كافي الشمس ضاربة فيها و خاتم الزواج فصبعها عاطي العين ...جبدات التليفون لي جاب ليها عبد الصمد بالكارطونة ديالو و اكسسورات ديالو بكلشي غتعطيه لخلود بحال شراتو ليها....عاد هزات تليفونها هي تتحسب مخشعة ...

_ اربعة مليون باقا عندي غنخرجا و نزيد عليها جوج مليون هي ستة ...و الارض الاخرى ساوية عشرة باقي اربعة مليون و نكمل و نشريها نصدم بيها البشري و نطرطق ليهم المرارة.....

صونات لبنت خالتها سلمى و تحل لسانها تتصبغ و تنقط بالعسل...

_ سلووووم حبيبتي...صافا توحشتك....انا بخير ماشي مشكل احبيبة ديالي حتى للعقد اذا كتاب هانية...اجي نقولك محتاجة واحد اربعة مليون تسلفيها ليا ملي ترجعي من مراكش !! صافي نعول عليك...عندك واجدة كاملة !! صافي وخا بصحتك السكاكر...ولا هانتينا بيني و بينك ماتقولا لحتى واحد لا لماماك لا لماما عندك نعول عليك...يلاه بيزو ....

تهنات من ناحية الفلوس و طرقات داك المسمار...! وصلات للحومة صونا ليها عبد الصمد هزاتو تتشوف النمرة مسجلاه عندها بعلاقة تعجب ! غا تتشوف سميتو ولا تيجبدوه ليها تتخايل غا ديك البوسة و تتقندش...

قطعات و عاود صونا ...هزات حاحبها و ردات

_ آلو....

عبد الصمد : حلا....

حلا ( تتبعد التليفون من ودنيها تتقلب فعينيها) الو...الو....ماكنسمع والو ....آلووو....

قطعات عليه و خشات تليفونها فالصاك....!!

_ مالنا على القرع نمشطو ليه راسو ...!!

شدات الصاك و هزات العين قدامها...و ماتجي غا فعين الصمدي داير يديه فالجيب تيشوف فيها جامع حجبانو تيهز عليها راسو بحال تيقول ليها قيدي ...كان واقف حدا خوه و شي رجال...!!

بلعات ريقها و سلتات الطريق لدارهم نيشان بلا ماتعلي الراس ...قربات للدار لقات كاط كاط نواغ قدام باب دارهم....شافت فيها و القلوبة فعينيها و دخلات للدار تترمش....لقات باها تما و حميدة تتفرنس...

_ جيتي شفتي الطنوبيل برا ...

حلا ( هزات حاحب ) شفتها جابها عبد الصمد !

عبد الله : سي جابها ...غيسافر لاسبانيا سي 15 يوم و يرجع ؛ دابا يكون شد طريق لطنجة ماقالهاش ليك !

حلا ( حكات رقبتها تتفرنس ) لا صونا عليا عاد دابا قالها ليا.....

حميدة ( حطات الديسير ) تبارك الله بلا عقد بلا والو حط فلوس صحيحة و كبر بيك خلى عيينين العائلة مفتوحة....

حلا ( جلسات حداهم تترمش و دور فعينيها ) و كارط كريز باقية بسميتو ...

حمييدة : و شنوو بين يوم و ليلة يقلب وراق الطنوبيل !! ستناي حتى تزوجو بعدا ...

عبد الله ( عمر ليه رضا راسو ) : اوا ابنتي خصنا نهدرو مع عبد الصمد نشوفو العقد فوقاش ...

حلا ( تزيرات ) و علاش ! انا هدرت معاه البارح قلت ليه العقد حتى للصيف نديرو مع العرس نيشان قالي وخا....

عبد الله ( سكت مادواش ماقال لا اه لا لاء...خلى حلا غا تتشوف و تسب فرضا )

حميدة : جبتي تليفون خلود...

حلا ( جبداتو من الصاك ) اه هاهو واعر كيحمق....

حميدة : اري نشوف....تأ تيشبه لتليفون لي جاب ليك عبد الصمد كان رمادي هيدا....

حلا ( حيداتو ليها من يديها تتفرنس ) اه جاب ثلاثة اماما....بقيتي عاقلة غا على هذاك....المهم بالصحة غندخل نتكى شوية عييت....!

تكات تنعس و غمضات عينيها حتى للعشاء عاد فاقت مقلوبة....!! لقاات الواتساب عندها غيتفركع بالميساجات....هزاتو تتقرا بعيون شبه مفتوحة !

وئام : شوف تشهرتي...صور ديالك مع عبد الصمد فالخطبة ولاو منشورين فلالة المغربية ....

دخلات حلا لليان بفضول تتشوف صورتها مع عبد الصمد تيركب ليها الخاتم والهدايا د الرفيع و الفخامة و الديكور داكشي بان غزال تيحمق خلى البنات تيتفاعلو باعجاب دارت بوووم فقروبات البنات و فالانستا تحت هاشتاغ العروس المغربية....

_سعداتها ...الله يكمل عليهم لالخير...

_ دعيو معايا البنات تنا يسهل عليا الله و نتزوج ...

_ اوا هاذي هي الهدية ولا بلاش....جيت نقول ماقل و دل مالقيت القليل ..االلهم بارك...

_ عفاكم البنات انستا دهاد البنت ....

_ انستا ديالها...عفاكم ...

_ و عطوينا انستا ديالها...

كلشي تيسول على الانستا و صورة ولات تتهز و تحط بعنوان مرافق في قروبات البنات

_ فال اليوم البنات ..الله يسهل على كل وحدة قالت امين فالتعاليق....!!

عجبها راسها و تزاد معاها الزايد....دخلات لعند وئام مسجلة ليها اوديو...

_ صيفطي ليهم انستا ديالي ..ماشي ديالي لا د الخدمة نطلعو باباه فرصة و مناسبة ...

وئام : وشنو غيديرو هوما بهذاك بغاو يتابعوك نتي ماشي الذهب...

حلا ( ناضت تترفع شعرها تتسجل ليها اديو ) واش انا بنت ليك انفليونسر اختي ...تبقى كل وحدة داخلة عندي منين خديتي منين هذا...شنو هذا الزمر هذا....ماعندي كانة ليهم بزز متحملاهم فالاخر شي وحدين غا ديال الذيحة الحسد و الغيرة كون ماكانو كليان كون خسرتها معاهم.....حطي ليهم د الخدمة و هنيني....الاخر بغيتو يبقى بريفي .....

دازت يوماين ! عبد الصمد غابر فاسبانيا وسبلة التواصل عندو مع خلا هي التليفون...تيصوني عليها ماتتحاوب ميساج ماتتردش وحتى هي ماتتفتحس.....مشعووولة و غارقة فالتفكير جالسة مع موالين الدار غايبة و عقلها مرفوع تتحلم و تخطط عايشة فعالم وردي غا بوحدها....!! حتى تتفيقها حميدة بشي تقرفيصة و تفيق من الگلبة...!!

الغد ليه !فاقت على بونبر...لابسة شوميز فلوغي بالسانتيغ و سروال بيض و سندالة عالية ...!! شعرها سامبل مسرح عاد دارت ليه السوان فيه البغيونس ....هزات الكونطاكط و خرحات الطنوبيل من الݣراج فرحانة بيها ...! خرجات وسط الشارع و الجيران تيشوفو و يعبرو فالطنوبيل و يقولو بنت حميدة عطاتها الايام....!

شدات الطريق لتطوان خدات الفلوس من بنت خالتها و تلاقات مع واحد السمسار وسيط بينها و بين صاحب الارض لي عوالة تشري...

اييه الارض الثانية ولات تتفكر تخزن فلوسها فالاراضي و العقار و تنساهم حتى تبيع بالزايد ....!! دخلات معاها هاد البلية و عجبها البلان ضربات فديك ملاين لي جمعات و حطاتها فالارض حيت هاد الهمزات ماتيجيوش دايما...قليل فالقليل و ماشي كلشي تيعرف بيها....!! دخلها اسامة لقروبات خاصة بالسماسرية و العقارات و خا تما مايعطيوكش بحال دوك الهميزات ماخبرها غي أسامة و حطها ليها فالبال ..و حلفات عليها حتى تشريها...! ارض هنا و ارض الهيه ..شراتها دابا بعشرة بعد سنين تولي ليها بخمسين ولا الزايد....! السكان تيتزادو و البني تيطلع و الارض تتغلى ...!! اليوم كانت رخصية غدا تولي عافية ماتقدر تخلص فيها حتى مترو...!!

من المرة الاولى تعلمات كي تشري الارض و شنو خصها تعرف و المخير مايدوزها عليها تتسول و تشوف و تشك فراسها مابقى غا بنادم تيق فيه....!! الاوراق تتفليهم و الخبير جابتو لا يكون داير يد مع مول الارض....!! وخا مول الارض غا فلاح بلدي باغي يبيع و يهز الفلوس ماضارب حساب انه عندو كنز و غيزرب عليها اذا باع دابا.....!!

تكاتبات مع السيد و خرجات من المكتب همة و شان بديك المشية و الشعر رطيطب مع خصرها...الصاك بالسنسلة فيديها و الظفار نقيقين مصاوبين.....و السندال خفيف فرجليها النظاظر د الشمس والكونطاكط فيديها....!! طلعات فالطنوبيل و السمسار تيدور حداها كي الكلب....

_ الله يخلف عليك اختي...الله يعاون....الله يسر...

حلا ( هبطات زاج الطنوبيل مخرجة يديها من السرجم مزينة بساعة ذهبية تتحمق ) اللهم امين اسي ادريس ...سلم ليا على المدام و الداري ...انقولك عندك شي بنات !!

ادريس حط يديه على السرجم تيطل عليها ...

_ ايه عندي ثلاثة ماشي غي وحدة....

حلا ( ضحكات ) و تهلا فيك و شري لبناتك الذهب اسي ادريس الفلوس مادايمينش تيمشيو و يجيو اذا مافرحتي ليهم بناتك لهلا يكونهم....

ادريس ( تيضحك ) اوا يجيو عندك من طنجة لتطوان اذا درتي معاهم المزيان ..الله ياودي....

حلا ( شغلات الطنوبيل تتضحك معاه بلباقة و ادب ) اسيدي غا يجيو فلوس الطريق انا نخلصهم ليهم....يلاه كثر من هكا.....

ادريس ) : ان شاء ان شاء الله سلمي على مول الدار و الله معاك طريق السلامة ....

حلا( عرفاتو شاف الخاتم ) يلاه الله يعاون...نمرتي هاهي عندك....

شدات الفولون و تحركات من حداه ...! ضربات نص الطريق صونات ليها خلود...شغلات البلوتوت و جاوبات ....

_ وي خلود...

خلود : في غابرة اليوم...ماما تتسول فيك....

حلا : عندي القراية فين غنكون...

خلود : اوا الله اعلم هادشي ديالك مابغاش يدخلي لراسي....شديتي الطنوبيل بغيتي طيري....

حلا ضوبلها واحد كان غيدخل فيها تيعرعر عليها عصباتو

_ كنمرضو غا مع النساء تفوو...

حلا ( مخرجة يدبها من السرجم تتسب محال حتى واش سمعها ): تفو على كمارتك الحمار...دخل فيا نتا نيييت...باغي طيير كيقتلوك هاد الرحال غي بالعياقة ...زعما شوف راني خطااار تناكل النساء فالطريق ...النساء فالسوكان قدامي والو تفوو...

خلود : الو حلا كتسمعني....مالك ثاني...

حلا : تفو تيعصبو هذا مايكون غا شي عروبي من الداخل هوما لي كي الهجيج فالسوكان ...

خلود : والله و يسمعك شي داخلي تتقولي عليه عروبي حتى يجرليك ديك اللسان ...واش مكتبوبيش نتي....و نسيتيني حتى شنو كنت غنقول...اه سمعت يالحبيبة رضا تيقول لحميدة باغي يشري من عندك الارض....كييستناك غا تحي...

حلا ( شدات الفولون بيديها حوح تتضحك ) : اواااه ....شكون قاليه انا باغية نببع علاش شريت انا باش نبيع !

خلود : طلبي فيها الزايد و بيعيها...

حلا : يمشي ي*ود عليا ...هذا شاف العمارة طالعة تما و البني و المدرسة حتى هي ..سخن عليه راسو ...والله لا بعتها ليه...شفتوو دار الفلوس حتى هو و لى يقلب على يشري ...دخلات معاه النفس و تحركات الغيرة احييه....حلا بزاف غليه و زايدة عليه والله لا وصل ليها..غي تسع شهور ملي بديت مع بابا و شريت ارض مية تنطح مية والله لا طفرها ...تيتعاند معايا خليه يتعاند ....و الارض خليه يجي يرغبني نبيع حتى ندخل ليه الشك و نقوليه سير احنيني انا متنبيعش....

قطعات عليها و ركزات مع الطريق...! وقفات الاوطو قدام المحل...!!

خرجات منورة و المهدي تيصفر قدام باب المحل....

_ بشاااخ واش البنات كاملين ملي كيتخطبو كيزيانو هكا...

حلا : كتزيد غا تحماض دخل بركة من الشوهة...دوز عندي دوك البنات نشوف كي دايرين....

مهدي ( تابعها ) : سكينة و نسرين عندهم الباك ...سي عبد الله قال ثقة ..

حلا ( جلسات فالبيرو باينة فيها مرتاحة تجاوزات مرحلة الاعصاب ولفات تحط الفلوس هاد المرة )

_ الثقة ماكايناش...هذا الذهب ماشي البطاطا غي يجييو دير عينيك معاهم...وحدة الادارة و تشد الواتساب و الاخرى الاشهار ....اما المحل انا قادة بيه ....

دوزات تما شي ساعة و هزات صاكها خارجة...خلات الاوطو حتى ترجع و طلعات للمدينة القديمة وصاتها خلود على الحلوى من تما...! شراتها ليها و زادت ...حتى دخل فيها واحد مغوفل. بالجلابة و طير ليها السنسلة من عنقها.....غوتاااات تقول قلع ليها لحمها

_ ععععع سرااااق....سرااااق سنلسة ديالي...

جرات وراه تتدفع من الناس و تغوت وهو كيتكركب بحال الكورة و و ينوض و يدفس فالناس حتى غببر ...خلا حلا طايحة تتبكي عرقانة و صاكها مزيرة عليه تتغوووت و الناس تيشوفو فيها و يسكتو فيها وهي مصدومة تترعد...

_ سرقني....سرقني..و سنسلة ذهب مشات ليا ....5000 درهم تماااا و 5000 درهمممم....مشااات مشااات ياربي قلبي غيوقف غنموووت ....عمرا وقعاتلي...تسرقت.....

المراة بقات فيها : صافي ابنتي الله يرضى عليك اوا الحبيبة كيفاش كترعد ..صافي عطيوها تشرب الشرفة....

حلا تتبكي و يديها تيترعدو الشمتة خلاتها تترعد صونا تليفونها و هزاتو المراة تتعطبها تحاوب...

_ جاوب ابنتي شكون حاوب...

بدون عقل جاوبات حلا و ماعارفة شكون...غا سمعات صوت الصمدي زادت تتبكي و تشكي مصدومة...

_ تسرقت اعبد الصمد ..سرق ليا السنسلة ديالي...قلبي غيوقف غنموت دابا...تشمتت ....

عبد الصمد ( بانفعال )فينك نتي ! حلا كتسمعيني....وقعت ليك شي حاجة !

حلا ( تتبكي و تشهق ) اه كنسمعك....لااا سرقلي السنلسة من عنقي و هرب فالمدينة....

عبد الصمد : بلا بكاء جاوبيني فينك بالضبط حلا ...آلووو...( بعصبية ) ينعل ز**ك الشيطان آلووو .....

حلا ( وسط دموعها ) و ينعلك نتا لاش تسبب تفوو...

عبد الصمد ( بنبرة قوية ) وخا...قيد عندك انوريك تفو.....وعطيني فين نتي !

عطاتو فين هي تتمسح دموعها و تشهق حتى تطفى ليها التليفون ..!! ناضت من تما واقفة بزز مزال مصدومة اول مرة يوقع ليها هكا....!! بقاو معاها دوك النساء تيهدنو فيها حتى جا سعيد اخ الصمدي طاااير بعد اتصال عبد الصمد ...!! تحنى لعندها بقلق..

_ ختي حلا ياك لباس....سمحليا اختي بعدو شوية ....

جا يشد فحلا بلا مايحس جمع يديه عارف خوه كي داير....بقى واقف عليها حتى ناضت تتمسح دموعها وعبد الصمد تيصوني عليه حمقو بالصوني ...تليفونو بغى يتفركع...!!حتى بعدو على الحيحة و عطاها تشرب مزال رموشها مسقين بدموعها و طالغة مع الشهقة تتسمعو كيهدر معاه فالتليفون و سعيد تيرد و بالو مع حلا....

_ و صافي والله ماوقع ليها شي حاجة...خطف السنسلة وسط المدينة و طاار دابا نشوف مع داك البلان كون هاني....( شاف فحلا ) هاهي حدايا ....( مد ليها التليفون ) هاكي اختي....

حلا ( نيفها ولى حمر و راسها تيزدح تتدوي فاشلة ) مافياش....!!

رجع سعيد التليفون عندو ...! و وصلها حتى لطنوبيلتها....تحركات للدار عكس كي رجعات الدمعة واقفة ليها طرف رمشها...! قالتها لحميدة و خواتها و بكات عليهم حتى شبعات و حميدة غا تولول و تندب....

_ ياويلي على غدايدي كنقولك الذهب عندو وقتو ...سنسلة ذهب غادية بيها للمدينة...و حمد للله ماقطع ليك عنقك و خداه معاه....ياقشور البنان يهديك الله عمل عقلك اليوما نقولا و غدا نعاودا ......المخير تسرق مالها اخر الدنيا.....

حلا ( تكات على كتف خلود مفشولة ) طالعا ليا السخانة فيا السخفة...

خلود ( تتقيس ليها جبتها بقلق ) ويلي طايبة اماما.....

دوزات ديك الليلة مريضة حريق ااراس و الفشلة مابغاتش تسرط ليها و ماتقبلتهاش...!! عبد الصمد ماصوناش عليها و لا هدرها و حتى هي ماعندها اليد ليتهز التليفون....!! غايبة و فشلانة بالدواءليخدات تتدوي بصوت هامس و تدعي فالسراق فشلانة...

_ الله يعطيه الموت...الحمار يسرقني انا ...انا يسرقني حمار....

حميدة فوق راسها تتنهد : ماتدعيش ماتدعيش المصيبة الدعوة ترجع ليك....هاشنو كنقوليك كنقوليك احلا ابنتي ماتعملشي الفلوس و الذهب فقلبك ...و رخف على حاجتك شوية...نهار ضيع ليك شي حاحة تحماق....ها نسيم كل مرة مصيعة حاجة و شحال من مرة تسرقات واش دار لي درتيه...حيت ماكديرش الحاحة فقلبها و عندها زايدة ناقصة...واش تخرحي على صحتك على قبل سنسلة باك يجيبلك خير منها ......علاش عندك غي ديك السنسلة صافي فيها خير..الله يعوضك حسن منها.....

بقات تتبوس فيها و طبطب عليها و ظلات اليل فايقة معاها تتهلوس و تغيب و ترجع تفيق...حتى طلع الصباح البيت حالتو و حلا حتى هي حالتها حالة العرق و شفايفها ناشفين و تحت عينيها كحلين المرض بان فيها....!! دوزات داك النهار غي فالدار قاطعة الكلام...حتى ولات تتاكل و تحلس معاهم و تيضحكو عليها خلود و حميدة ولاو شادين غي فيها و بلا عبد الله تيسايس معاها حتى تتغلبو الضحكة بلا وقتها عارفينها تتمرض و تموت على حاجتها ....

_ شمتك شفار ! على سنسلة قاتلة راسك ( ضرب لرقبتهت برفق كيستطلفعا ) اري نشوف شحال فيك د الفعايل....اري هادشي غااارق عندك....

حلا ( تتضحك بزز ) غرق من حميدة مانكونش شوف عندها تما بيير....

حميدة ( طلقات سالفها الزعر تتوريه رقبتها ضاحكة ) فين ..فين هاد الغروقية ...

دازت على حلا ثلاث ايام فالدار...! حتى تبلعات ليها وتقبلات شوية الشمتة...!

محمعة فالدار مع خلود و وئام تتاكل فالزبيب و اللوز و الكركاع و تقلب فالتلفازة شادة الهدرة مع اابنات...

_ مغنفتحس الواتساب خليه كيستناني انا نبداه زعما...

وئام : و الغلط ديالك مالك معفرة هكا احلا نقص شوية ...عرفتي غيعحبو الحال اذا صونيتي عليه نتي....و يجي مبرعك كادويات و يعوض ديك السنسلة بعشرة....

حلا ( هزات كتفها تتطحن فالوز ) مابغيتش كادويات ديالو ...تتجيني ثقيلة نشبر من عندو شي حاجة ....

خلود : شكون كيهدر ! نتينا لي كتحلب فينا واحد بواحد ياللفعة عندك هانية...

حلا : علاش نتوما هو هذاك ! شنو بيني و بينو....

وئام : و الطنوبيل هااا !

حلا : شنو الطنوبيل ! مالي انا قلتيه عطيني اصلا حتى ديك الطنوبيل مادايراهاش فقلبي بحال غي كارياها....حتى يكون هنا و نخليها منشورة حدا باب الدار و نشد طاكسي قدام عبنبه...

خلود ( حافظة حلا و خابرزاها ) تيق هاذيك تيق ...تلقاها ماكرهات تبيعها غا مالقات كيفاش....!

خلاتهم حلا تيهدرو عليها وهي عين فالتلفازة زامة سفايفها...بدات تسرط ليها شمتة السرقة و مابغات تنسى ملي بدات تبكي و تشكي عليه...بقاا غا تهمهم و تدفل كل دقيقة تفو ...تفوو....

خلود و وئام تيشوفو و يشوفو فالتلفازة مافهمو فيها والو ...قالو السيدة حماقت....!

نهار جديد ! خرجات حلا من المحل ...! غا تتشوف الذهب تتنهد و تحسر على سنسلتها....! عبد الله فرحان و مابحالو حد راضي على خدمة حلا و فرحان بالربح ليتيدخلو المحل....! من نهار تكلفات بيه هي ولى تيدخل الربح كثر من محل رضا لي حا زعما فالسونطر...!

ديال حلا ولا الكليان داخل خارج و مكيخرحو غير فرحانين دايرة ليهم خاطر خاكرهم تيدخلو تيحسو براسهم ملوك بصح....حسن الكلام و المعاملة وكل مرة كدير بوغومو و من فترة لفترة كتعطي لكل وحدة خدات من عندها كادو فابور على حساب المحل...اما فولار حرير او صاك او جلابة على حسب قيمة المشتريات ...و مرة تقلبها ماكياج ....المهم مبرعة الكليانات عندها.....الربح طلع و المنافسين فالسوق دخلهم النفس و الخلعة...غطات عليهم ...المهم سي عبد الله راضي تمام الرضى و فرخان حيت غيفتح فرع اخر فتطوان....!!

عبد الله واقف حدا حلا تيحسب الفلوس عكاها 5000 درهم صاليغ فيكس عندها كل شهر ...

_ ها رزقك بسم الله....

حلا شداتهم بدون نقاش او كلام...!! من نهار دخلات وهي تتاخد داك المبلغ بلا زيادة. و لا نقصان ...وخا عارفة رضا تيتخلص الزايد و عندو الربح مقسوم على جوج نص تبعطيه لعبد الله و نص هو ...وهي عندها خلاص ثابت شدات بلا هدرة و بلا حساب....!! و هبطات بحالها...! يلاه جات تدخل لدارها وقفاتها صفاء مع هي فيها الهدرة ماتلقاتش من حلا...

_ دخل جلس معانا لا والله ختى تدخل ياختي غبرتي مابقيناشي نشوفوك...

حلا ( تتبسم معاها بمجاملة ) مرة اخرى ....

صفاء : ماكاين حد زعما اذا كتخاف باك ولا خاك يهدر عبد الصمد نتينا عارفاه مسافر ...قولي دخلتو موديلات جداد ....

حلا : اوا صافي ...ستنا نبدل عليا و ندوز حتى خالتي عيشة مابقاتش تتبانليا....

دخلات لدار بدلات عليها و علمات حميدة خدات الحلوى فيديها و دخلات ...!! سلمات على عيشة و عيشة تتقلب فعينيها و تسوط ...!!

بقاات حلا محمعة مع صفاء لي عارضة عليها ...ناضت تحط الضيافة...تبعاتها عيشة تتدور حداها كي النحلة....!! خرحات صفاء هازة الحلوى مخلية عيشة فالكوزينة...هازة لامپا العصير و عاودات دفلات فيها بالغدايد لي عليها تتدفل و تعاود ....حطات الامپا فبلاصتها و خرجات جالسة حداهم كي الامانة....!!

جابت صفاءالعصير كبات ليهم كاملين و شربو منو بثلاثة ...حلا و صفاء و سكينة و عيشة فوسطهم تتهز فحاجبها و تضم يديها عند حجرها و دابا بدات الجمرة تتطفى ...جمعات عريساتها كاملين فلتات غا الكبيرة ...!!و هاد المرة حلا شربات و دفال عيشة تسرسب مع دمها....!

حلا ( حطات الكاس ) ولاهيلا شحفت مع الطريق العصير بارد حا فوقتو....

عيشة بجلسة ملكية ! مبدلة الفراش و براد اتاي عرييق بكيسان تيشعشعو و الحلاوي مشكلين و منوعين ..حاضية بعينيها البنت لي جات تعاونها هاد الشهر كل شهر بوحدة و ماتتحمل حتى وحدة فيهم مكتقنعها ...! فرحانة و مافحالها حد برجوع عبد الصمد و بالكادويات لي جايب ليها ...!!

هزات حليوة تتاكل منها و القصة هابطة مع ودنيها عاد صبغات شعرها...! غي شافت عبد الصمد نازل عاد فايق دخل نيشان للكوزينة...غوبشات في صفاء و نطقات بين سنانها بالزربة ..

_ شد باب البيت بالساروت و ارا الساروت لهنا ...

نفدت صفاءطلبها طايرة و عطاتها الساروت كمشات عيشة عليهم و خباتهم مع صدرها بغيرة عاقت بيه مرة ملي دخل طل على حلا من بيتها و من تما و هي تتشد داك الباب بالساروت.....!!

ملي جا ما جلس معاها و طول معاها الجلسة ...! اكيد شبعها هدايا و مع ذلك مزال منغوزة غا بوحدها....! تبعاتو بعينيها وهو كياكل و هو جالس حداهم ماسولها لا على حلا ولا على تاصيلتها... !!

و هي الحريقة لي فيها غا تعرف اشنو جاب ليها و شحال من فرانك غيكون خاسر عليها مزال وهي ماولات حتى مراتو و ماحط يديه فيها....

سكتات و فمها محمعاتو مايعطيها باش تنقي سنانها و حتى بيتو ولا تيشدو كيف تتشدو هي ...! تيشوف فيها بنص عين و حواجبو الكحلين كثاااف عاطيه نظرة حرشة من كلامو لشوفاتو لصوتو كلو حرش و مريكل مع رساتو ماتعرفو علاياش مطوي و الثقلة الدنيا تجمعات فيه....

داز نص تبسيمة و نطق : طلقيه الالة يمة كمشتي لسانك ...

عيشة ( تنفخات و قلبات عينبها ) : مانطلق لساني معاك 15 يوم غايب و ملي جيتي ماتشبعنا حتى هدرة....

مسح يديه و تجبد للور معلية فبها الحاحب..

_ مالك معصبة ! ناقصاك شي حاجة ...اش خبار العروسة ...

عيشة ( حمرات فيه عينيها ) عندي ثلاثة عرايس صافي هاذيك مانقبلا ...حتى تكون بعدا تصح تسمي عايها مراة ااراجل كتخرح مع ستة صباح و تدخل ورى المغرب و اللباس الله بارك الصلاة و السلام على رسول الله ...

تقول واش سكتات تدوي و تعاود ميك و عاود ميك....!! حتى دخل لبيتو ! و تكى مريح على ظهرو و السرجم مفتوح داخل الهواء منو و الفلوس صحيحة مخسورة فالبيت باينة غا من الشوفة الاولى...!!

جبد التليفون بيد تيحركو بمهارة و حجبانو مكمشين عليه طابع الجدية و الساعة ذهبية جديدة تتلمع فيديه ...دوز نمرتها تيصوني شحال و ماكاين رد ...!!

رمى التليفون مطلع حاجبو : الهبال....

حلا واقفة فبيتها معلية حواجبها للسماء و نسيم واقفة حداها مخنزرة...

_ هدر اصحبتي مالك هكا راك تتمرضي الواحد....

ردت حلا بهمس : و النص د اليل ينعل والديك الفاهمة ...

نسبم ( ضربات راسها معصبة ) و راه ماشي استاذك الحاجة شنو فيها ...خطيبك احلا ! واش من جد عقلك السيد مامشبعاه حتى هدرة 15 يوم وهو مسااافر و ماعمرك سولتي فيه وخا يكون تيموت عليك راك غتطلعي ليه فراسو...

حلا : غنصوني باش ماتبقاش حميدة دابا و ساعة تتندب عليا ..على بالك انا يكرهني ولا يجلس ماسوقيش ....

دارت يديها فنصها و الجناب عندها عامرين باين من داك السپيدو لي لابسة و تريكو الصوف فالزهري شعرها حرير مطلوق مسخنها مابقاش مزعر كي كان بدا تمشي الصباغة. .!!

دوزات الاتصال و ستنات حتى كانت غتقطع و رد رد عليها بصوت مبيبح ...

_ آلوو ...

حلا : آلو ...عبد الصمد ...

عبد الصمد ( بصوت ثقيل مدعدع و عينبه معسلين بالنعاس ) قطع غنعاود ليك....

قطعات كيف قال وعاود صونا ليها هو ...ردت بصوت انثوي جميل بعد ماقال ..

_ كنتي طافية التيلي !! علاش ....

حلا ( تتجبد فعينيها ) سي كنت طافياه و اليوم شعلتو عرفت بلي وصلتي اليوم...و بغينا نديرو الصواب و نقولو على سلامتك ...

عبد الصمد ( تيدور كلامها فراسو ): الله يسلمك ابنت الخير ...كي بقا الخاطر مع السنسلة !

حلا تتمشي و تجي فالبيت و تلعب فشعرها ماتتردش البال لحركاتها غا جبد السنسلة كمشات خواجبها متفقو صة و زاد فقصها ملي تفكرات البكاء لي بكاتو عليه تتشكي و تعاود...طال سكاتها و وصل ليها صوتو الحرش مدعدع و اليل هذا و ريحة الحميمية عطات بيناتهم ...

_ صوتك ابنت الخير...جبديه جبدي داك اللسان ....

حلا ( تتشطح رموشها ) : الو....تتسمعني...

عبد الصمد ( سرح يديه على شعرو الفاحم داير شبح ابتسامة ) كتعجبك الطريق الساهلة ! لاعبة على المكشوف ..دوزنا الاولى ندوزو الثانية !!.

حلا ( قالبة عبنبها ) آلووو....

عبد الصمد ( بصوت ثقييل باين مهلوك بالنعاس ).: عليه الفوق ....

حلا عقلها مشا شمال من جوابو خلات التليفون محطوط على الناموسية بدون رد ...حتى نطق هو قبل مايقطع الخط...

_ غدا اذا كتاب نشوفو بلان هاد آلووو...بويناس نوتشز .....

قطع الخط و ناضت حلا واقفة حجباها طلعو للسماء...

_ كيفاش عليه الفوق ! شنو غنعلي ! قلت ليك الهدرة فاليل تتطلع السخانة.....

نسيم ( بشك) حلا علاش رضيتي تزوجي و تقلبتي قلبة وحدةياك منتي كتحلف ماتزوج بيه و تصرفات ديالك ماشي ديال وحدة باغية و كتموت على خطيبها و غطيح معاه فالفراش بالوراق و بالصلاة و السلام و تربكي معاه....

حلا مشكات شعرها ظفراتو و تخشات في فراشها تتهرب...

_ كنموت على راسي انا مكنموت على حد ...

نسيم ( بعناد و فضول تتربط شي مع شي ) : انا متأكدة كاينة شي حاجة ! بيناتكم شي حاجة ! كنني مصاحبة معاه قبل مايجي يسكن هنا ! ديجا تعارفتو ..هادشي مابغاش يدخل لراسي...

حلا ( تتدور عينيها ) : دخليه ل*كك اذا مابغاش يدخل لراسك....

نسيم ( جلسات حدى راسها ) نحلف حتى كاينة شي حاجة غي ملي تتبقاي تجاوبي هكا تنعرفك ...عاودي ليا والله لاقلتها لشي حد ....

حلا ( تتفوه ): شنو غتستافدي اذا عرفتي ! غتزيدك فالعمر ...

نسيم ( تبسمات تتلعب فشعرها تترخيها ناطفة بوصت هادي ) : كيعحبني نعرف بحاال هادشي ...قولي فوقاش تلاقيتو كيفاش تعارفتو ...غا خوي انا حلفت ليك مانقول لشي حد ...

حلا ( استحلات يديها حنان غمضات عنيها تتفوه ) : متنخاف تقولي لشي حد حيت شادة عليه شلا حوايح حسابليك حد ماعايق بيك...

نسيم : و بلا هدرة زايدة دخل فالموضوع نيشان و قولنا اصحبتي ...

حلا ( ترخات ) زيدي طلعي يديك الفوق تما ..اله بديك حنان ..

نسيم : و هانا يلاه بدا...

حلا ( تتقول غي لي بغات ) : شفتو اول مرة حدا المقابر....

نسيم ( ضحمات ) باش تعرفي راه والله لاتفك منك حتى توخرو فالقبر ..زيد كملي شنو كان كيدير تما شي حد ميت ليه هنا...

حلا : لااا كانت مع صاحبو فالطنوبيل تيكمي كي الشماكرية مخرج يديه من الزاجة لابس ساعة ذهب بقا تيشوف فيا تقول واكلة ليه الورث....دزت من حداه قلت تفو تعصبت من الكارو لي تنشم خنقاتني خرج لعندي صاحبو تينقز بلا سليب باغي يتعبن و ياحد النمرة و عبد الصمد تيشوف فالطنوبيل ...قمعتو و تكمش بحالو....

نسيم ( بصدمة ) قلتي تفووو...دفلتي عليه....

حلا ( ضحكات ) و غي تفو مادفلتش مالك...صافي اصلا عاودت تلاقيتو فالمحل شرا من عندي قالي ختار خاتم قلت ليه القياس قالي قياسك تنا فهمت شنو باغي ..ماعطيتوش وقت و ظل لاصقني وصلت لواحد المرحلة تنقول هاد السيد بحال مصاحبة معاه ...فين مايتلاقاني تيقول ليا يابيا يا بيك و راني درتك فبالي...قلت ليه غا تتحلم ..حتى بقى لاصقني خرج عليا فين مامشيت نشوفو قدامي و المشكلة مصنطح و مريكل مع مخو ثقييل تقول عمرو يتعصب تيعصبك نتي نيييت بحال تيتوهبل عليا...صونا عليا واحد فالتليفون قدامو فالاول شاف السمية مانطقش فهم بلي ماعندو حتى دخلة غا عاود صونا خطف ليا التليفون و خشاه فحيبو و مشا التليفون ...

نسيم ( متبعة التفاصيل ) : هادشي كامل !! عرفت داك النوع لي بلا ماتحسي تتلقاي راسك مصاحبة معاه ...وباين عليه مغياار و دمو سخون وخا تيبان بارد غا اصلو يعطيك الخبار رجال كتامة كاااع هكاك....

حلا ( عقدات حجبانها ) و هذا بزااف ...من قبل رمضان وهو عقلو فيا فين مامشيت كنتلاقاه عرفتي شنو فين مامشيت هي هاذيك...حتى قلت مالي على حالتي ! السيد محال يحيدي من عقلو صافي دارني فبالو نبقى انا غا سالتة درت معاه حميع المحاولات و مانفعات بوالو ....و تنا ماعندي حتى شي ولد المراة في حياتي نشوفو مع هذا شنو خاسرة نقبل نشوف شنو تحت راسو حتى هو.....

نسيم : و لكن راك تخطبتو احلا يعني شوية توصلو للزواج ...

خلا ( غالبها النعاس ) و من بعد ! مالو الزواج كيف طاين الزواح كاين ااطلاق و حتى نوصل. بعدت لديك الزواج ساعة تما كلام....

نسيم ( سرحات صبعها على رموش حلا مبسمة ) الطلاق ! اذا ذاق حلاوتك يموت مايطلقكش....عويناتك كيحمقو نتي بوحدك شبيتي لعزيزة رحمة ...السيد باغيك للحلال نيشان غرضو باين عجبتيه و باغيك مراتو شنو مافهمتيش فيه.....

حلا ( مسكرة بالنعاس ) نتي مافاهمة والو ...

نسيم ( تبسمات ) شنو غنفهم...عطي فرصة للسيد خطيبك 15 يوم ماشفتيه و رضا غارق فالخدمة عاطيك التبساع...سيري غدا للصالون تهلاي فهاد الشعييور و خليه قصير هكا حد كتافك كيجيك كيحمق....و ضربي شي لبسة الفخامة تتفطر منها و خرجي معاه....هو ماناقصو وللو الطولة يامشاء الله و مهلي فراسو و حرش و السمورية غا خوي دوك الفهايم من عقلك و عطيه نيتك و توكلي على الله....

حلا ( تتضحك بالجهد و النعاس غالبها) : و النية هي لي متبغاتش تمشي لعندو ماشي انا لي مابغيتش نعطيها ليه....وخا نبغي ماتبغيش هي...خليني ماضحكينيش...سيري تنعسي خليني ننعس....

خرجات من الصالون ! الشعر مطلوق واصل لنص ظهرها لون سعرها الاصلي شبه باين..لابسة مونكو اسود طوييل و بوط د الجلد قصير صاك بالنسلة فمعصمها...! دوزات جوج ساعات د الخدمة فالفرع الجديد ...واقفة على خدمتها بنفسها و عبد الله تايق فيها و فرحان بيها عارفها شطايرية من صغرها وهي وسط التجار و معارف عبد الله كاع كابرة على يديهم تتخرج من المدرسة تتشد كرسي حدا باباها تيجروها من تما غا بزز ...؛ و كاع كانو تيقولو "" هاذ البنت عندك اسي عقد الله عينيها خبييرة "

و الخبيرة راه خبيييرة جيها للذهب و للرجال عينيها تتسافر عليهم و تدقق و تطلع العيوب و ناسية هي عيوبها ماتتشوف راسها ... ذواقة و عزيز عليها الزين...!

حطات الكاطالوغ على الڤيترينة ..تتشوف فالمحل تيلمع كلشي جديد مخشعة بالهدرة مع عبد الله فالتليفون...

_ و الفلوس غتعوض ...سمع مني ابابا وصي على دوك الكراسي مذهبيين و فيهم. الاخضر ملكي و شي طبلة د الزاج و داك السبع مذهب بحال لي كان عندنا و تسرق ...صافي يلاه انا غنكمل شوية و غنخرج...غنوصي مهدي و صوفيا ....

قطعات و حطات التليفون في صاكها ...شعرها محموع كعكعة خفيفة و تريكو فالاسود عنقو واسع مبين رقبتها ...! تتحرك بخفة و رشاقة و مهدي لاحقها كي ظلها...

_ سمعت شديتي اللغات مزيانة...ساليتي !

حلا ( يديها على خصرها تتشوف فالرخام ساهية ) مم ماكذبوش عليك....مزال خصني نشد الانجليزية مزيان و غنزيد حتى الالمانية ..غنشوف بروف ݣاوري دغيا تتشد من عندو...

مهدي ( تيصفر ): بشااااخ اربعة لغات ....(بتردد ) فين كنتي زصلتي فالقراية كملتي الكلية اختي حلا !

حلا ( شافت فيه شوفة قاصحة ) bac +2 و فرحانة بيها و لي عندو شي مشكل يمشي يدعيني....تيبان ليك الواحد أمي اذا ماشدتش كارطونة ليصونس ولا شنو !!

مهدي ( تبسايس ) و انا غي سولت حاشة ! مالك تعصبتي...

حلا ( تتسوط ) و شوف نتا فين كنا و فين وليتي...قالك كملتي الكلية ! هنا كنا فاللغات نقزتي للكلية شنو زعما تتمعن عليا ولا شنو ...انا لي مابغيتش نكمل و ديك لافاك كرهتها و ماعندي ماندير بيها ..ماشي كاع البشر كملو فرايتهم و راهم عايشين بخيير تيتنفسو فمجال اخر مرتاحين فيه ....و انا الحمد لله ماشي امية و تنعرف نقرا و نكتب ....

مهدي ( ندماتو ) : اييه عندك الحق عندك الحق كلامك هو الكبير...

حلا ( هزات فيه حاجب ) شفتك وليتي تتسرق ليا كلامي و تتحلون هنا مي الولية ...و رد بالك عندك ( غمزاتو ) ترجل اولدي....

شبعاتهم ليه عاد تحركات من قدامو غا غبرات نقزات عندو صوفيا تتهمس...

_ واش من نيتك كتهدر معاها هكاك ...انا مكنقدرشي نطول معاها فالهدرة تتقمع و صعيبة.....

مهدي ( تيخبي واحد 300 درهم عطاتها ايه حلا اليوم فرخان بيها ) بربي حتى غالطين فيها انا لي كنعرفها...دابا تولف عليها حتى نتيا وخا نݣارة و بلا كذوب نݣارة اوس اربعين و نهار لي تخسر فيه الفلوس غا غبري من قدامها اختي صوفيا و النهار الكببر عندها هو ملي تتجي واحد الكليانة عزيزة عندها سميتها عيشة عقلي على السمية هاذيك تتخرج من هنا تتخلي الباطرونة الضرسة العقل تتبان ليها بكثرة ماتتفرنس و تضحك و فهاد المومينتو تعطيك من مية درهم حتى لميتين ...بلا خلاص الشهر ...

صوفيا : انا عاطيتها التيقار و ماقادراشي على النݣير ديالا ...الخدمة مع رضا كانت واعرةمايهدرك مايكلمك مايقوولك علاش ولا كيفاش حنى جابوني مع هادي الزيت مايزهق.....

مهدي ( ضحك ) و مشي الله يجيبك على خير ..داك رضا تخدم مع حجرة و ماتخدمش معاه....ثقيل و مغوبش غي بوحدو. الكليان قلال عندو ...و الحركة ثقيلة شوف مع حلا النشاط و الفلوس داخلة خارجة....سير كمل شغلك سير بلا كثرة هدرة خاوية....صافي تسلا وقت الضحك الخدمة....

صزفيا ( مشات تتنكر ) هاهي مشات...الله يدوز هاد الشهر على خير ...باز لراجل ديالا كيف غيصبر على نݣيرا...

مهدي ( قشع طنوبيل عبد الصمد فراس الشارع تتبان من المراية ضحك و تحرك هند حلا لداخل ) جبدتيه وهو يبان ...ختي حلا ( دخل للبيرو تيطل عليها ) ختي حلاااا سي عبد الصمد جا ...

حلا ( هزات العين فبه مستغربة ) جا لهنا ! ولا للمحل الاخر...

مهدي : لا هنا شفت الرانج ديالو ....

حلا ( شافت فيه بنص عين ) وخا سير انا خارحة...

ناضت هازة صاكها و فكات شعرها حتى تطلق و لبسات المونطو ديالها و تمات خارجة دايرة شوفة قاصحة في صوفيا...

_ صوفيا الوقت كضيعيه فالهدرة كثر ما كضيعيه فالخدمة ...هكا لا

صوفيا ( تترمش ) ختي حلا والله ختى خدامة منيتي...

حلا عطات المفتاح لمهدي وصاتو و خرجات ضارب فيها الهواء و البرد فتطوان تيقطع ...شافتو واقف مربع يدبه متكي على الطنوبيل مصيف فعز البرد ...حولات عينيها منو للصوفيا لي واقفة تتشوف فعبد الصمد ميتة بالفضول تعرفو كي دابر...! غا شافت حلا تتشوف فيها تكمشات و دخلات بحالها مكملة الخدمة نتنكر..و تدوي مع مهدي تلاقاو بجوج عزبز عليهم الهدرة..

-" طويييل عليها بزاف ..فاش خدام ؟ "

مهدي : فالمافيا...

صوفيا ( شهقات ) حلف...

مهدي ( خنزر فبها ) و نتي كتسوليني انا ..بنت ليك من عائلتو ...

قربات حلا لعندو واحلة مع الشعر تيديه الريح ...عاقت بشوفاتو تيطلعوها و يهبطوها و على فمو شبح ابتسامة...!

غا وصلات لعندو نطقات تتشوف فين نص عين : سلام ...

جرها بالثقالة من خصرها مقبل خدها

_ و عليكم السلام

هربات وجهها بلباقة تترمش و تشوف بين رموشها...

_ نقول زارتنا البركة !

فتح ليها الباب بلباقة و ركبات وهو تيرد

_ الله يبارك فيها.....

ركب قدامها و شافت فيه ناطقة...

_ خالتي عيشة لباس عليها ! شحال ماشفتها بانت ليا غابرة !

عبد الصمد ( حرك السيارة مبسم ) : و لله الحمد لباس عليها و ياسبحان الله حتى هي سولات فيك ...

حلا ( قلبات عينيها ) : يسول فيها الخير ..دايما كتقولها زوينة فيا عارفة خالتي عيشة مامنهاش جوج....

عبد الصمد ( شاف فيها و رجع شاف قدامو تيبلل شفايفو ) : شنو بلان داك التليفون عندك !

حلا (هزات فيه حاجب ) شنو مالو !

عبد الصمد ( بجدية ) : دايما آلو الو ...قاطعة الكلام و دايرة السبة بالريزو مجاورة مع بيت الجنون ....

حلا ( خنزرات فيه ) بسم الله الرحيم مالنا على هاد السيرة....

عبد الصمد ( هز حاجبو ) و شوفي نتي !!

حلا ( قلبات وججها منو شحال عاد نطقات تتدور فعينيها ) كنت طافية التليفون و ماكتتش حالاه يعني ماشي غا عليك نتا صافي ! كنت مشغولة و ماعنديش الكانة هذا ماكان ...

عبد الصمد : علاش ! مزال بالك مع السنسلة ...

حلا ( مارضاتش ) شمن سنسلة حتى نتينا ! نسبت البلان اصلا ...و من غير هاذيك عندي عشرين وحدة ....

وقف الاوطو للجنب وجبد بواطة فالنواغ فتحها وعينين حلا على يديه المشعرين شعيرات خفاف و على البواطة لي تتفتح قدامها...غا شافت البراصلي و لابروش على شكل ورقة شجر فيها حجرين تيلمعو فخم و تيحمق هزات حجبانها مخبية اعجابها هز يديها رطبين تيعجبوه صبيعاتها لبس ليها البراصلي من الذهب الابيض ناطف بالثقالة ...

_ ماتقبليش حتى هاذو معاك يتواسنو مع لي عندك ...

حلا ( تتشوف فالبراصلي معلية حاحبها ) قلت ليك شايطين عليك فلوسك ...

عبد الصمد ( زعم و طول يديه لشعرها تيردو ورى ودنيبها ) : الفلوس فالجيب ماشي فالقلب حتى لابغاو يمشيو ماتهز فيا شعرا اسنيوريتا ...

حلا ( شطحات رموشها ) و اذا تهزات ديك الشعرة شنو غيبقى ليك فراسك ...ديك الشعرة لي تكساب

ضحك متلمس ذقنها : لا شوفي و كان ! حيدنا بلية الزيرو زعما...

ضرباتو ليديه مبعدة وجهها تتعلي فبه حاجبها : غالبينك يديك الضسارة لا ...

جمع يديه مبسم و حرك الاوطو ...شد الطريق لطنجة و عطاها تليفونو

_ طلقي لينا معاك نتنغمو شوية.....

حلا ( شدات التلي لقاتو بلا كود دورات عبنبها و نطقات : زعما حياتك صافيو لهاد الدرجة تيلي بلا كود ولا عندك هذا غا للاحتياط....

عبد الصمد ( خرج يديه من الزاجة تيهز فراسو ضاحك ) و شنو بان ليك نتي ...

حلا ( هزات كتافها ناطقة بأنوثة ) : شفتي كناكل التبن اولد عيشو ! زعما نتيق عندك تليفون واحد و عاطيني تليفونك بلا كود بلا والو ..ماعندك الاخر فيه الصواسا الكحلين.....

عبد الصمد (ببخة ) ظالماني اسنيوريتا ...

حلا ( شعرها تيطيرو الريح شوية و عينيها ضارب فيهم الشمس تيحمقو ) : تتعرف شوية فالريفية ! نطلق هاذي زوينة....

عبد الصمد : شنو سميتها....

قربات لعندو تتوريه التليفون و تحمع شعرها للجنب ..

_بلاتي ندير اكتيفي....

طلقات اغنية ريفية zin errifi و شدات تليفونها تتصور راسها و تسجل فيديوهات و تحط فالستوريات على الانستا و الواتساب ...

عبد الصمد ( بالو معاها ) : علمينا شوية ريفية ...

حلا ( بشك ) : علاش ماكتعرفهاش ! ياك نتوما قراب و معاشرين و الناس عندكم مخلطة

عبد الصمد ( بنص تبسيمة ) سي ماختالفناش ...ماكبرتش في كتامة و ماعرفتش بنادم بزاف تما....نتي تزاديتي فالحسيمة !

حلا : لا تزاديت فتطوان خلود و رضا تزادو فالحسيمة ...كنت حاسباك تتعرف شوية ...والو ماتتعرف حتى كلمة !

عبد الصمد ( كيتريكل عليها) جربينا نشوف.....

حلا ( تتدور فعينبها ) اربان تنيفيل !

عبد الصمد ( هز حاجبو و شاف فيها رامي ليها نظرة تهديد و بالهداوة رد)

_ ...ولد كتامة ماباغيش يخرج العيب لا تقولو ناس كتامة صعاب ....

سكتات و قلبات وجهها ...حنات عينيها لتليفوونها تترد على ميساجات البنات كلشي رد البال للبراصلي و الخاتم و خلود مصيفطة لبها علامة استفهام...

_ مع من خارجة !

خلا ( تتكتب ) مع عبد الصمد ...

خلود : هاي هاي شوف الناس ...براصلي جديد !

حلا : لا قديم ماعرفتيهش شريتو شحال هاذي....

جلسو فمطعم ايطالي ....ماشي كيف جوج مخطوبين ! ريفية تلاقاات مع كتامي مريكل و مطمر على شلا حاجة تيشوفهم ...!! شاد تيقارو هاد الساعة غا مرة مرة يديه تياكلوه و يطولهم عليها تتقفز و تحمر عينبها فيه حتى تيرجعها حداه....

حتى قربات المغرب عاد وصلها للدار و قبل ماتخرج نطق بعد فترة صمت منتظر جوابها تيجربها ...

_ السبت عندك شي وقيتة لينا ..طالع لشفشاون تمشي !

حيدات السانتيغ هازة صاكها خرجات شعرها من تحت المونطو وهي تترد...

_ و حتى هذا سؤال ؟ نو طبعا...

عبد الصمد ( هز حاجبو مثقل ) پور كي ؟ ( علاش )

حلا ( بجدية) پور دي نادا ( على والو )...مانقدرش نسافر معاك للشاون بجوج و لي بغيتي تفهم فهم ...اصلا عيب تسولني علاش ! عندك عادي ختك تسافر مع واحد مابيناتهم حتى ورقة شحال من ساعة الطريق !! قلت صافي ندير اخفاءلي وقع شحال هاذي ااسيد باغي المعقول ساعة غا تتخربق عليا...( جات تفتح الباب خارجة زير على يديها مقربها منو وهي تتعافر معاه معصبة ) و ها حنا فيها راك قدام الدار الشريف ..احتارم راسك و بعد مني....

عبد الصمد ( عبنيه مبسمين ) دابا مالك مجعورة ...

حلا ( قاس شعرها بعدات ليه يديه ) حيت راك تتبوهل عليا...انا نسولك نتا عندك عادي ختك تسافر مع واحد شحال من ساعة د الطريق شنو معاودين ليك عليا...زعما راك غا ولد كتامة والداك عيشة ماشي ولد تيريزا و اليخاردو ...

ضحك ضحكة ثقيلة حرشة و تلمس ذقنها يديه ماكيتحكمش فيهم عليها....

_ قلت ليك غا كظلميني...غادية الواليدة معانا و صفاء !

حلا لمسة يديها على يديه تتبعدهم : و حيد يديك من وجهي ...

كمش على صبعانها البيضين تيعجبوه و شبكهم مع صباعو و خواتم د الخطبة فصبعانهم بجوج ..

_ غنصوني عليك باليل غتردي اوك !؟

حلا ( زمات شفايفها تتشوف فيديهم المشابكة ) انا كننعس بكري ...و نتا تتصوني معطل تنكون ناعسة

عبد الصمد ( تلمس عرق النابض فيديها بصبعو ) غنصوني قبل 12 و غتردي

سحبات يديها بلباقة و لبسات صاكها : طولنا هنا...غنخرج سلم ليا على خالتي عيشة...

عبد الصمد ( نطق مع تبسيمة ) مبلغ غنقول ليها دوز عندك للمحل ...

قال نفس الجملة لي مولفة تقولها للكليانات ديالها و الجيران عارفها و حفظها ...حبسات ضحكتها لكن غلباتها خرجات غي ضحكة خفيفة و تمات خارجة ..

_ مرحبا بيها فالدار و فالمحل كلشي ديالها....

تبعها خارج وهي مخرجة المفتاح من صاكها..خرج الهدايا و المشتريات لي جايب ليها و مدهم ليها ناطق بعفوية..

_ حلا..هزي معاك هاذو ...

شداتهم من عندو تتدور فعينيها و نطقات حابسة الضحكة : عندك ماتقولش لخالتي عبشة انا لي ختاريت ليها الجلابة على ذوقي...ساعة رد عليا واش عجباتها...

عبد الصمد ( شد الاوطو تيهز فراسو ) ولا عليك مبلغ....( شاف سليمان وقف الاوطو حدا الدار نطق بلا مايحس )يلاه دخلي....

دخلات للدار عامرة هدايا و مشتريات ماتتقول ليه بغيت و ماتتقولبه شري ليا ...غا هو من عقلو شاف شي حاجة عجباتو تيتخايلها عليها تيبغي يشريها و يشوفها عليها...و عينه تميشيو غي على الحاحة الغالية و مولف يشري غا من الغالي و عندو عادي....داكشي الرخيص متيعبجوش ...

دخلات للدار رامية السلام...شافتها حميدة هزات حجبانها...

_ على السلامة ..كنتي مع عبد الصمد...

حلا : سي ..

حميدة : حلا رضا ماكيعجبوش هاد كثرة الدخول و الخروج معاه و حتى باك وخا تشوفو ساكت نتوما غي مخطوبين ماشي مزوجين ...

حلا ( تتيسايرها ) اوكي...ماميتا

خلود ( بفضول ) الناس محملة...ورينا شنو جاب ليك...

حلا ( قلبات عينيها ) تنخاف من العين متنوريش...

خلود : ماسولكش على الطنوبيل !

حلا : لا ماجبدش سيرتها من الاصل....غندخل نبدل عليا...

دخلات بدلات عليها حاطة التليفون فوق ناموسيتها ماشي من النوع المبلي بيه تتحطو تتنساه ...؛

جلسات مع خوتها شوية ناضت خلود تترد ...!! بقات حلا معاها و جلساات تتعطر لبها شعرها مربعة ليها عند راسها...

_دابا اذا شميتي الليمون صافي غتمشي الدوخة زعما....

خلود( تتلدد) : خاطر عشق غي ريحة الليمون ولات تععجبني...ماكرهت كاملة نولي كنعطط بالليمون و ديك الحموضية الصفورية ديالو قشورو مشهياهم ناكلهم و نغزز فيه سناني و مانبردش ....

حلا : اوا العجب....

نسبم جلسات حداهم شادة معاهم الحديث تتمسكن على حلا...

_ حلا دلكي ليا راسي يعطيك الخير غينفاحر. .

حلا ناضت وتقفة تتزطم فسروالها حتى تيبان و السليب تتعوج فنصها ملي تتمشى ....دلكات ليها راسها بالنكير ماتعملش الحاجة بلا ماتكرههم علاش طلبوها....! كل وحدة منين تتجر فيها خلود تتطلب منها حاجة. نسيم حاجة ..حتى عصبوها و خلات ليهم البيت ودخلات لبيتها ...!

تكات على ظهرها و هزات تليفونها جات مع الصوني ديالو نيشان ..و الغريب هاد المرة صونا عليها ابيل فيديو...!

سرحات شعرها بيديها خلاتو على طبيعتو مطلوق و حر و فتحات الاتصال...بانت ليه كي البلارة ببيجامة زهرية ووجهها نقية ماسحة المكياج و عينيها مولف يشوفهم بالماسكارا و الايلاينر دابا طبيعين مرمشين و لونهم مرمدين حاطة التليفون بعيد على وجهها شوية تيبان نصها العلوي .....

خطف ليها صور وهو ساكت حتى نطقات

_ عندك مشكل فالصوت ماتنسمع والو غنقطع ...

عبد الصمد ( داير يديه تحت رقبتو ) مابقاش عندك مشكل فالريزو...

حلا ( هزات حجبانها تتشوف فيها ...حتى تكات على ظهرها هازة التليفون تتسكريني فيه ) بلاتي ندير ليك سكرين باش نكونو متساويين دير شي حاجة بتصاوري نحط تصاورك فقروبات دوز حتى نتا شي اسبوع فالجحيم....

ضحك بالثقالة و رد : زعما نتي بوحدك ..

حلا ( كمشات عينيها ) ممم ...

عبد الصمد ( عينيه ناعسين ) هاد حلاوة اللسان طالقاها على كلشي و خاطياني انا...عندك ديك الخاصية مبرمحة على كلشي الا عبد الصمد ولد عيشة ماكتخدمش ...

حلا ( هزات كتفها دوات بلا ماتحس ) نتا حرش....حلاوة اللسان غا للجنس للطيف و الكليان ديالي....

بقى ساكت حتى رد

_ نديرو العقد الشهر جاي !

حلا ( تترمش و تهرب ) لا حتى للصيف انا مزال متنعرفك مزيان ...

عبد الصمد : دابا هدرة جوج مزال ماكنعرفك مزيان !

سمعات صوت رضا برا عقدات حجبانها و نطقات...،

_ غنقطع دابا تصبح على خير...

قطعات و رمات التليفون خارجة مغوبشة..

_ جرات عليك حنان طالب العشاء فدار باك....

رضا ( مختزر فبها ) دخووول بحالك عندي نعور يماك....

حلا صبعات ليه و شدات الباب عليها بالساروت و تكات ناعسة تتقلب كي المشة...جبدات التليفون تتشوف فالتصاور لي خدات ليه...و زومات الفوطو على لحيتو و حجبانو ...عوجات فمها و رمات التليفون و ضرباتها بنعسة حتى للصباح....

حتى فاقت مع الظهر ..شافت الدار خاوية و الحس مقطوع استغربات...

_ فين البنات !

حنيدى. : صباح الخير ...مشاو لشاون يفوجو شوية ماقتلوهاش ليك...

حلا ( كمشات فمها ) للشاون ! ماقالو لي والو مع من مشاو ...

حميدة : مشات معاهم فاطمة الزهراء قالو غيدوزو شي وقيت El cortijo ...حاسبة قالوها ليك و مامشيتيش...

حلا ( رفرلت برموشها مارضاتش و بقا فيها الحال هزات كتافها و دخلات لبيتها تتبلع الغصة ) اصلا عادي ..خلود ماشي اول مرة كديرها كتخليني انا و تمشي مع فاطمة الزهراء و دابا تبعاتها حتى نسيم عادي عادي....

بقات تتحاك و تقلى حتى ناضت واقفة و دخلات عند حميدة تاكل ليها دماغها حتى قنعاتها...و شدو الطريق حتى هوما للشفشاون ..!

حميدة جالسة قدام حلا شادة فقلبها مخلوعة...

_ حلفت و عاودت مانبقى نركب معاك...عندك عندددك حيد من تما الطنوبيل غتدخل فبها...

حلا ( تتضحك ) و مالك حاكرانا...خلود و نسيم مكديرشي معاهم هيدا ...باقي ربي مطول ليك فالعمر غا رخف عل راسك احميدة...ها خنا قربنا ...

وصلو للشاون ...الشينوا و النصارا تما مخلطين مع ناس المنطقة عز البرد و زوار المدينة كثار ...!! رضات راسها و رغبتها وشبعات تصيورات و ستوريات....شافتهن نسبم و خلود تصدمو و حتى عبد الصمد لي وصل تي تاح فالرياض ديالو فاتح الباج ديالها تيشوف فالستوريات لي تتحط غا قشع صورتها فالشاون هز حاجبو و كتب ليها...

_ نتي فالشاون !

طلعات لبهم vu و كملات المسارية ديالها و حميدة عاجبها الحال تتشري فالكادويات

_ رد بالك احلا مع الحماق هنا كثااار...!

نسيم تتصوني عليها و خلود و عبد الصمد طفات التليفون و شدات فيد مها مكملين التجوال و جلسو فمطمع تقليدي ضاربين الشواء ....! حتى داز النهار فرحانة و شدو طريق الرجعة ...لقااو غا عبد الله تيقضي باش ماعطا الله تتخطاه حميدة تيولي بحال بلا راس....!

بعد شهر !

قطعات عليه معصبة تتشوف فخلود تتسوط...

_ شوف انا ديك الغيرة المريضة هربت منها و طحت مع هذا ..زهري غا فيهم ولا شنو...

خلود : شنو تخاصمتو !

حلا ( قلبات عينيها) ماكانشي هيدا كيتقلب بوحدو....فالاول والله ماكان هكا عادي لي لبست مكيقول والو مبرد تيبان ماشي مزير ..دابا عينو كيبغو يخرجو و غا شهر باس تخطبنا بان على حقيقتو...قريب يقطع عليا الانستا تيقولك ماديريش لايف ....و يلاه مع هذا كيفاش غنخدم انا....

خلود : و من ناحية من حقو الزمرة...راه غيكون دمدومة اذا سكت على دوك الزلالة لي تيبانو فالايف ..و السيد كتامي عرفتي شنو كتامي ! راه يموتو على دمهم و حاررين فديك الناحية ...و لباس ملي وصل غا للايف ماقطعش حاجة اخرى....قبل ماكنتي عندو والو دابا العكس الصبف غتزوجو شكون هذا غيرضى يسمع على مراتو بحال داك الكلام....

حلا : و انا مالي على القرغ نمشط ليه راسو ...انا هاذوك كتبلوكيهم مكنطولش معاهم فالهدرة و هادشي هو عارفو غا تيبغي يخشي زنطيطو فالموضوع ..

نسبم ( تتضحك ) والله حتى صدمني ماكانش حسابلي مغيااار و كنقول سبحان الله هاد السيد عقليتو فشكل ....دابا يلصق ليك الفولار حتى هو...

حلا ( جمعات شعرها تتسوط ) يمشي ينقز عليا ناقصني غي هو....انا الحاحة كنديرها بخاطري و تنعرف لي صالح ليا و لا لا و تنعرف لي غليا و ليخصني ندير عندي 27 عام ماشي صغيرة باش يقولي دير ماديرش ....

دخلات لبيتها ! مخلياهم شادين الهدرة عليها...

خلود : هاذي باغياه ديوثي....

حميدة جلسات حداهم تتهز فراسها...

_ احياني على هاذيك الفلفلة ...تعلقات فين تفلقات شفتوها ولا غا عبني لي شافت...

خلود ( تتضحك ) شفتها...معصبة قريبة طرطق البنت بدات تميل ليه مرة يعصبها مرة يضحكها ماشي هاذي ديال قبل شهر ...عجبها الزهوانية و ولات دير بالها معاه....

نسيم : مانتيقش غا ولفات ...حلا معروفة تتولف و صافي ...!! ( حبسات الضحكة ) عندو غا يصدمها و يولي يبان ليها رضا الرحمة عليه....

خلود : علاش هي ساهلة ليه ...كيف ركبات فرضا سكر تركبو فيه و فتاصيلتو ...

ااريح و الجو رمادي و نقيطات شتاء خفيفة غادية حداه حاط يديه على كتافها وهي حداه كي المشيشة تتبان فيها دوك العوينات محكلين و المونطو الفيرور ناعم ...! ساكتة و قالبة وجهها عليه...حتى نطقاات

_ انا ديك الغيرة المريضة ماعندي ماندير بها تنسميها مرض ...

عبد الصمد ( عاقد حجبانو ) جبدتي الموضوع ! نكملو فيه سميها مرض ولا حمو رابي باغية نسكت على داك البلان حتى مانكونش عبد الصمد....( بجدية و حجبانو ملاقيين ) ندوز كلشي احلا الا هاذالبلانات ..نشوف واحد عاد زهق البارح عاد بادي يتعلم يكتب سميتو يدخل لايف مخلي غبارو كيخنق و نبقى ساكت ! سميها حتى اسمهان ينعل بو هذا ليقولك علاش !

حلا ( وقفات مربعة يديها دايرة بيها هالة من الفخامة و النعومة من ديك الفيرور ) شنو كيقولك عقلك تندخل نجاوبهم بريفي اصلا علاش كنمرض راسي معاك...فهم ليبغيتي و لايف غنعاود نديرو و البلان ليبان ديرو حتى نتا ...ماشدك حد ...

دور يديه على راسها جرها لعندو حتى تضرب راسها في صدرو فوسط فالكورنيش و الريح تيهز بنادم ماشي غي الحوايج وهي قالبة وجهها عليه...ماطولش فالنقاش...عاقدهم للسماء حتى هو منفخ و ضامها لعندو من الفوق ...النفخة ديالو مفشكلة ...!! جرباتها فهاد الشهر جوح مرات....!!

بعدات راسها من صدرو تترمش : كنقولك ماتزعمش بزاف ...تنفخ سير تنفخ فالتيساع

عبد الصمد ( زير على رقبتها حتى كمشاتها تتغوت ) اييي عبد الصمد بلا هاد اللعب الباسل يديك باردة....

عبد الصمد ( مغوبش مافكش حجبانو حتى دقيقة )

حلا ( غوبشات فيه حتى هي ) معصب راه تنا معصبة متنحملش لي يتدخل في خدمتي هاذيك التجارة اعبد الصمد التجارة راه اذا ميكتي غا شهر طاح كلشييي...و انا مغنخليش تمارة ديالي تضرب فاازيرو ...الايف راه تيزيد النص فخدمتي و الفرع الجديد راه شاداه انا بوحدي ...

عبد الصمد ( دوز يديه على ذقنها عاقد حجبانو معصب و منيرفي ومع ذلك كلامو فيه نوع من الحميمية بصوت مبيبح رد ) منين جايبة هاد تحرميات كاملة مم... غا قولي ليا نسمع ....

قلبات عينيها منو ماجاوباتوش...لمسة يديه حرشة تتدوز مع ذقنها مولفاه تيشدها من تما تتعيا تضربو تبعد ليه يديه..صافي يديه ولفو الطريق تما....دور يديه ورى كتافها.. و رجع ضمها عندو شعرها علق فلحيتو ....دورات عينيها يمين شمال و هزات يديها دوراتهم مور ظهرو حتى هي لاول مرة ... عجبو الحال .

حنى عينيه ليها زير عليها مكمشها فيه ناطق ببحة...مكرر الطلب فاي فرصة سمحات ليه

_ نديرو العقد قبل الصيف...

هزات كتافها تتجاوب كيف ديما ..

_ حتى نتعارفو مزيان....

عبد الصمد ( معلي حجبانو ): ينعل هذا لي يقولك لا....

حلا ( تتدور عينيها كي المشة ) مكنعرفك واش معصب ولا مهدن شد طريق وحدة....

عبد الصمد : الطريق شادها غا شديها معانا نتي ...

حلا ( قلبات عينيها ) و حنا بدينا ثاني شفتيني متلفة الطريق....

عبد الصمد ( بجدية ) راني ولد الحلال معاك ماحدك مخيرة ...تزهق بيك رجليك لقنت اخر نقلبو الكارا ( الوجه )...

حلا ( بعدات يديها من ورا ظهرو معلبة فيه حاجبها ) شنو تنبان ليك انا ؟ انا فوق مخيرة معاك و نتا عارف ...( تتزيد فخيرات ) عندي نيشان نيشان و الكذوب متنكذبش ..غي المعقول ماعندي مع تفلية الحاجة درتها نقولك درتها مادرتهاش مادرتهاش بلا غيرة ديالك بلا هدرة زايدة ..

عبد الصمد ( عقدهم و كمش ليها راسها تحت كتافو ناطق تحت نكيرها ) طلقتي علينا الشوك ثاني...شدي فمك و حسابك بوحدو ....

قرمات تتدور فعينيها كي الذويبة ؛ الكورنيش خاوي بمقارنة مع فترة الصيف ..مافيه لا نقاشات د الحناء ولا رسامين.....غا الناس مخشين فحوايجهم سخان غاديين جاييين تيشمو الهواء و يسمعو مواج البحر العالية و الجو بارد...و الريح ماهي خفيفة....!

ملي تيكون بوحدوكلشي تيعلق على الطولة لي عطاه الله و تيجيب العين ....

لكن ملي تيتجمعو العين تتسرقها هي كثر منو عاطية للعين و زينها باين و واضح...و هادشي راد ليه هو البال فكل مرة تيخرجو بجوج ...شحال من مرة تيكحل النظرة فشي واحد ملي تيطول الشوفة فيها و مرة دخل فمدابزة سخونة مع واحد بسبابها....!!

حتى تنفخ عليها و تنفخات عليه قطع عليها الهدرة مستنيها هي تبادر ساعة مالقى منها والو و بزز منو هدرها ....ولفات ليه هاد القاعدة فكل مخاصمة خصو هو يبدا و الا بقى تما حتى للشهر حاي و ماتواضعش تبداه ولا تسول فيه.... تيميك و يوسع معاها خاطرو تتعصبو تيشد فمو ... يديه حلف ليها عمرو يمدهم عليها و عاطيها وعد و قاليها عليك الامان....!

.....و لاول مرة تيكذب على شي وحدة ويخبي عليها انه مزوج قبل و مامعاود ليها والو كانت عندو عادي ولكن مع حلا جاتو صعيبة و مابغاتش تشاد ليه ...

بقات تتدور فعينيها حتى قشعات عبير مع خطبيها دايزين...قلباتها عينيها منها متجاهلاها .عكس عبير ليشافتها فتحات عينيها مصدومة تتشوف فحلا و تشوف فعبد الصمد عقلاتو وخا تبدل على كيف شافتو اول مرة.....!

قربات لعندهم تترمش و تشير لحلا...: حلاااا...

حلا ( دارت راسها ماسمعاتهاش ) غبد الصمد ندخلو للمعرض باغية شي حاجة تما...

عبد الصمد ( شاف كلشي و ميك )

قلبو الطريق خلات عبير بلاكة تتضرب حنكها كي المصدومة ...

_ كنحلممممم....حلا

قرب منها خطيبها باستغراب..

_ عبير ! شنو كاين ...شكون هاذيك

عبير : والو غي تشابهات ليا مع واحد صاحبتي حسابلي هي....!

خدات حلا لي بغات و دخلات لسوبير ماركت خدات لي بغات تما وخدا ليها هو الشكلاط و شبيس حط زرقة على السقاطة ديالها و خرجو من تما ...!!

حط السخرة اللور ...! و ركب حداها تيدوي فالتليفون مع كريم

_ آلو .. نو انا فمارتيل ...مامساليش ...

صاوبات العكر ديالها و طلقات شعرها شافتو سالا الهدرة نطقات مكملة الحديث...

_ كريم كيجيكم من العائلة ؟

عبد الصمد لا ماشي من العائلة صاحبي ...( تيحرك يديه على شعرو ) نضربو الزيرو !

حلا ( غوبشات ) حتى ناض ليك الشعر كي عباد الله بغيتي تقرع بحال قطاع الطرق...

شاف فيها جا يجاوب وقفاتو بنت زعرة مراهقة من بنات المبلين بالتصاور هازة التليفون تتفرنس حشمانة...

_ عفاك اخاي واحد الطليبة خيلااه....

عبد الصمد ( هبط زاجة الاوطو ناطق ) نعاام...!

حلا ( عينيها و ودنيها معاهم )

البنت : بغيت نتصور بالرانج ديالك نعطي لصاحبتي تصورني هانية عندك ؟ اذا بغيتي ؟

حلا هزات حجبانها حاطة العين على البنت...اما الصمدي خرج من الاوطو عطاها تركب ناطق بالثقالة...

_ فين صحبتك...

البنت ( فرحات ) هاهي حاسة ...شكرا بزاف...

هز ليها راسو مانطقش ...و البنت جلسات تتصور و تحط يديها على الفولا و كتابة رونج رافر باينة فالصورة ...من المدمنات بالتصاور البوزات....!! نخلات كاع حلا و مادواتش معاها وحتى حلا رمات العين و قرمات ...!!

حتى سالات اابنت التصاور و خرجات فرحانة ..

_ شكرا سمحلي اواعدي حشمانة منك....

عبد الصمد ( هز حاجبو ) ولا عليك اعمو ديالي ....يلاه سلااام....

الضحكة على وجه البنت تمحات غا غبرات الاوطو من قدامها شافت فصحبتها مغوبشة...

_ سمعتيه ...شافني بنت 10 عشربن...عندي 18 سنة قالي عمووو ديالي....

صحبتها : تصورتي صافي زيد دغيا تشبرو الويفي نشرو الفوطو فانستا تفو كون غي تصورت تنا ولكن خفت مراتو تنبح علينا هو ظريف عليها...

حلا ( كمشات عينيها فيه ) قلبك كبيير !

عبد الصمد ( شاف فيه و رجع شاف قدامو ) قالو ....

حلا ( زمات شفايفها تتهز فشفارها ) لي جات عندك قالت ليك خليني نتصور بطنوبيلتك تفتح ليها الباب....اذا بقيتي تتركب معاك لييسوا و مالييسواش مانبقاش نحط رجلي فهاد الطنوبيل ...

عبد الصمد ( ماجاوبهاش )

___

وصلها للدار مع المغرب !

لقات رضا جالس معاهم هو و مراتو ...غا شافتو قلبات عينيها

_ سلااام...

حنان : و عليكم السلام كيف نتينا لباس عليك توحشتك....

حلا ( فرنسات ليها تتحيد المونطو من عليها ))

احح عليك نتي ..دقيقة نبدل عليك و نجي ....

بدلات و جلسات حداهم غا حطات قزيبتها للارض نقز رضا ماعاحبو حال. .

_ غيجي الواليد غنشوفو قضية هاد الدوران. الخروج مع واحد بلا كاغيط....

حلا : و نتا مالك ديها فالجهة لي ضاراك رخف عليا قبل ماتموت بكري...

رضا : دابا يجي و نوريك مالي....و الا بالله حتى نخشي يماك فشي حفرة و نرد عليك التراب ....العقد الشهر الجاي هدرة اخرى نرونها مع حسك اليوما....

حلا (شافت فيها شحال و نطقات ببرود تتزيد تقتلو ) وخا ان شاء الله ....

جا عبد الله باليل...! لصق فيه رضا و جلس معاه الراس فالراس بلا حلا ساهل ياكل ليه دماغو و يقنعو ...عبد الله ماعندو كلمة و كل مرة كيف تيقول....

رضا ( بجدية ) شهر الوليد داز و حلا مخيرة و قانعة بيه ..شنو كتستنى ؟ غي فهمني نفهم عييت نفكر مالها علاش كتستنى...السيد نفس المدينة و نفس الحومة كل مرة خارجة معاه عاجبك هاد الحالة ؟؟؟

عبد الله : اوا هي قالك مابغاتش بغات بحال خلود و نسيم بقاو عام عاد دارو العقد ..

رضا ( بغا ياكل راسو بالفقصة ) اشمن نسيم و خلود ...علاش نسيم هي حلا...نسيم راجلها كان بعيد مكتشوفوش غي مرة فالشهر و كيجي و يرجع ...ماكتبقى داخل. خارحة معاه و ماكاينش مشكل فديك الناحية.... خلود حتى هي ! غبد الصمد دارو حدا دارنا ...دايما كيتلاقاو ( خرج ليها نيشان ) و الشيطان غداااار الواليد والله حتى نطيح الروح و نشم غي شي ريحة عاطيية.....

عبد الله عقد حجبانو تيشوف فواحد النقطة و رضا تيعمر ليه راسو و يزيد فخيرات بقاو شي جوج ساعات تيهدرو مابغاو يخرحو و حلا واقفة ليهم عند باب الصالة تتمشي و تجي و تحلف فيه...

_ باغيين تزوجوني تهناو مني ولا شنو...انا متنعرفش السيد مزيان حتى نتزوج بيه الشهر الجاي اوييلي منيتتكم....

حميدة : شهر فيه الكفاية الله يجعل البركة ...عمل عقلك مع ولد الناس مكبر بيك و شاريك....!

خرج عبد الله من البيت و من وراه رضا حواجبين تفكة...

_ باقي مانعستي احلا ..

حلا ( تترمس ) كنت داخلة جيت نعمر الماء...

عبد الله : و الله يرضى سير تنعس...غدا ان شاء الله نهدر مع عبد الصمد على ضريب الصداق نشوفو واش نديرو الشهر الجاي ياك ؟

حلا ( شلطها ) هااا !

عبد الله ( ماخلاهاش تكمل ) ان شاء الله يااه كخب تنعس تغطى مزيان من البرد الله يرضى عليك....

دخل لبيتو مخلي حلا واقفة كي الجنية فوسط الدار تتمرش و تشوف .....

نعسات مفقوصة و فاقت مقندشة كثر من البارح مابغاتش تسرط ليها كدور فالدار و تنكر عليهم ...

_ غندير بالناقص مالنا حنا على هاد الزربة كاملة...

حميدة ( خنزرات فيها ) شنو هذا عاود غيتبع إياد ولا شنو...حلا والله يا يماك و ماتعمل عقلك و تشد طريق نيشان وبلا تفلية ديالك يا حتى نغضب عليك غضبة ماعمرني درتا...و هاهي فبالك و حتى باك ماغدوزش عليه هادشي ديالك نبقاو حنا متبعين هبالك...

حلا ( جلسات حداها تتعلي ححبانها و تسوط معصبة ) و نتوما لهاد الدرجة باغيين تهناو مني شنو هاد الحكرة....

حميدة ( بعصلية ) دير العقد مع السيد و بقا هنا حتى عشر سنين لا حبيتي ...حد ماجرا عليك ...شنو غيقولو ناسو ؟ هاد الناس مطولين بالخطبة هادشي كلووو ماعندهم اصول ....

حلا ( تتضرب فخاضها مجننة ) انا غننااحر انا....قلتو احلا تزوج بالسيد قبل وخا ..نسمع هاد المرة ولكن العقد حتى نعرف السيد مزيان درتولي تقوليبة جدي اماما.....انا مزال مكنعرفو...

حميدة ( ضرباتها لفخاضها حتى غوتات حلا بالم مهربة رجليها ) شد فمك عليا....مزال مكتعرفيه حسابليك ماكنشوف تصاورك معاه اللفعة ....و دايما خارجة معاه شنو الفرق دير العقد ابنتي و تعراي عليه نتي كااااع حد مادوا معاك....

حلا بعدات رجليها و شداا راسها زامة شفايفها مقندشة تقيسيها طير فيك.....بقات نهار كلو قالبة وحهها من بيتها للكوزينة و غي يجي عبد الله تتخرج تتسنط تشوف واش يغير كلامو ساعة ماكاين تغيير سي عبد الله قرر و سالا....!

تليفونها ماشعلاتوش ديك اليلة و حتى الغد ليه...فاقت منفخة عليهم...! مشاات لخدمتها و جلسات فالبيرو تتشرب فالقهوة كحلة شافها مهدي عطاها بالتيساع و جر معاه صوفيا شادين تيقارهم و حاضيين معاها ...! تيديرو خدمتهم مزيان و منقصين من الهدرة عارفين غدور فيهم شي دورة عالمية ...!!

حلا من البيرو ماخرحاات...جالسة فكرسيها داية رجل على رجل حجبانها مطلعين و تركيزها مشتت مرة تسهى فواحد الاتجاه مرة اتجاه اخر....! يوماين تفكير و حريق الراس....!

مهدي ( تيوشوش مع صوفيا ) سيري عندها قوليها رضا جاي...

صوفيا ( شهقات ) هييي شنو شنوو والله مانمشي انا مشي نتينا مولف نكير ديالا هي معصبة و نزيد انا نقولا رضا ماجي تشير عليا بشي ستيلو نزدق معورة...سير بعد مني اصلا انا مساعدة بالادارة سير نتينا ....

دخل مهدي تيطل على حلا ناطق بهدوء...

_ ختي حلا...

حلا ( فيقها من سهوتها ) شنو كاين !

مهدي : عيط رضا قال جاي دابا...

حلا ( عقدات حجبانها ) علاش جاي ؟ شمن دخلة عندو هنا....

مهدي : الله اعلم انا وصلت غي شنو قال..

حلا ناضت معصبة هازة صاكها لبسات مونطو ديالها و شال سخون مع عنقها ...

_ انا خارجة اذا تلاقيت مع ديك الكمارة غنشعلو هنا العافية تفووو على نهاررر....

خرجات من المحل طالع ليها الدم ...شعرها تيديه الريح و المونطو تيطير و الشال تيتقلب على كمارتها حتى تتردو معصبة...!! دخلات لكافي كالم شدات طبلة بوحدها و جلسات مخشعة مع مخها مامصدعها حد....! جهد ساعة دازت....رخفات راسها و ربعات يديها تتشوف فلي غادي و لي جاس من الواجهة الزحاجية...حتى كمشات عينيها و بدات فالتحليلات مع مخها و تتشاور و تفكر تفكيير عميييق...! عبد الصمد شداتو غا لعب و تفلية ماكانش غرضها بيه جدي...عرفاتو ماغيخليهاش فالتيقار و عمرو يبعد من طريقها و قالت انشوف هاد السيد لاياش غيوصل ..عاشراتو تقريبا شهراين من حفل الخطبة ...داير ليها الخاطر فوق الجهد نظرتها ليه بدات تتغير ولات تتشوف كرجل المهم ماشي موسخ وبخييل و هاد جوج مواصفات فالراجل تعايش معاهم ...!

تنهدات من الاعماق و هزات تليفوزها تتدوي مع راسها...

_ شنو زعما احلا طحتي فالحفرة و صافي زعما ندير عقلي فالزواج ....شنو غيوقع اذا تزوجت بيه ! اخر الدنيا...كيف كاين الزواج كاين الطلاق نكونو بعدا جربنا هاد الزواج كي داير.....

دخلات للانستا و بنظرات عازمة و ملامح جدية دخلاج لباج مستشار قانوني تتعرفو عبر الانستا تيقدم خدمات و اجوبة قانونية للناس سواء حول الزواج او العمل ..طرحات عليه سؤال بكل جدية....

_سلام محمد عندي سؤال تقدر تعطيني اجابة عليه ؟

ستنات نص ساعة عاد رد عليها...

_ اهلا حلا لباس عليك وي سولي...

حلا : شنو الشروط الممكن توثيقها في عقد الزواج ؟

الرد : عندك عدم التعدد و بيت زوجية مستقل و اكمال الدراسة و استمرار فالعمل و تدبير الاموال خلال فترة الزواج.....و من الاحسن تكون وثيقة مستقلة ...

قرات جوابو بتمعن معلية حواجبها و تتدوز عينيها على الشروط ..دارت ليهم حفظ فعقلها و فتليفونها و ناضت خارجة بحالها راجعة للمحل....!!

لقات رضا مشى و تهنات من الشوفة فكمارتو...كملات خدمتها و وصلات للدار !

لقات عبد الله كاين...!جلسات حداه و نطقات..

_ مسا الخير...

عبد الله : اهلاااا...البرد اليوما كان فتطوان...

حلا ( بهدوء ) كنتي تما اليوم...

عبد الله : كنت مع رضا عندنا شي شغل.....( تنحنح ) غنهدر مع عبد الصمد نشوف تاريخ العقد فوقاش...

حلا ( بهدوء جواباتو ) علاش هو سولك ؟

عبد الله : كان قالي شوفو ليناسبكم و نردو عليه فوقاش...ماعندوش مشكل فوقاش مابغينا حنا...و كلشي برضاك نتي....

حلا : اوا صافي دير ليبغتيه نتا ابابا ماغنزيد حتى هدرة ولكن انا عندي شروط ...

عبد الله ( بتركيز ) لي هوما ؟

حلا ( برزانة ) غندير غذا عراضة لخالتي عيشة و لعبد الصمد و تما نهدرو على العقد و غنقول شروطي و على ودنيكم تسمعو....

عبد الله ( رتاح ) ماقلتي عييب ...( على صوتو ) حمييدة اوا جيب لينا ناكلووو..

حمبدة ( من الكوزبنة ) وخا انا ماجاا...

نهار جديد ...!! فاقت حلا على بونبر هي و حميدة جمعو الدار كي العادة لي يعرف لالة حميدة يعرف دارها كيف نقية و متولة و تتزيد ملي تيجي شي ضيف ولا تتكون شي عراضة ...الارض تشوف فيها وجهك....!!

شدات حلا شعرها بمقبض و ببيجامة سخونة مزيرة حد الركاب لابسة التقاشر بيضين قصار و بنطوفة فالزهري و القصيصة مع عينيها داخلة للكوزينة تتشمر على يديها ...و حميدة تتعلق ..

_ عمرني شفت شي واحد مدفي الفوق و معري الفخاض فعز البرد ...سلت كلشي و هني راسك علاش لابسة السخون و فخاضك معريين هنا....و بتقاشر و البنطوفة عاد....

حلا ( هزات كتافها تتفتح الثلاجة حاطة المقادير قدامها ) فخاضي مكيبردوش......شنو ندير اللحم ولا الحوت ؟

حميدة : لا دير اللحم الحوت درنا ليهم فالخطبة حوتة معمرة بلاش...دير اللحم و حمر لي وجهي عنداااك ...

حلا ( تتغسل يديها ) و ماما نتي عارفاني تنتقن الحوت شي الاخر غا كنقضي....

حميدة : لا لا غي كيجيب ليك الله... يديك فيهم البنة لي درتيها كطلع لذيذة خف يديك ابنتي ....!! و دخل دوش و بدل عليك دغيا ( هزات خاحب ) الله يعدي هاد اليلة على خير علم الله شمن فيهم غتخرج لينا هاد الليلة....

حلا ( تترمش ) شنو عاود مانشرطش ؟ ماحاتش معايا....

حميدة : شنو هاد الشروط خصك تقولي انا قبل انا يماك....

حلا ( تتدور فعينيها ) شنو بان ليك نتينا...

حميدة : اول حاجة هي قولو السكنة بوحدكم انا مانعطيش بنتي تسكن مع العحوزة وخا تكون قلب الحليب ....و شي الاخر براسك غا يكون داكشي بعقلو و ماشي تخربيق ....

حلا ( تتشطح رموشها كطنز) علاش خالتي عيشة مسكينة مخيرة مع راساتها ماتتقيس حد غنخليها تكرهني اذا قلت ليه نسكنو بوحدنا وهي كاع عريساتها ساكنين بدار وحدة.....انا مانقدرش نخلي عحوزتي تكرهني مانديرش العداوة من الاول ....

يتبع...

‎