غيرك ما يحلالي الجزء 12

حلا : و مزيان ملي عارفاني ...ديك السيدة نصبر ليها على انها كليانة ديالي حيت غتحط فلوسها ولايني تقولي نصبر عليها عجوتي هي لي ماتكونش...الصباغة تتسالا و تتطلع ليا فراسي ...

حميدة ( بتوصية ) كون بنت الناس ماتخافي من حتى حاجة...فين مامشيتي خليهم يقولو عليك بنت الاصل الله يرضى عليك عندك تغضبني منك كنعرفك بعض المرات تيخرج فيك شي عرق نصراني الله يحفظ... شي فهايم الي....

.ه....ود.......ي مايديرهمش...

حلا ( تترمش ) اوا ها هي بدات....

طاح اليل ! و جات وقيتة العراضة ... حميدة تتستقبل الضياف و عيشة جنب صفاء طالعة فالدروج بجلابة العرايس...خلود و حنان تيشوفو و يحبسو الضحكة...!

عبد الصمد طالع مع عبد الله تقول نفس السن و صحاب من زمان عبد الله رتاح ليه و عجبو النسيب....!

حميدة ( حشمانة ) عبد الصمد كيف عامل اولدي لباس عليك بخيير ...

عبد الصمد ( بالثقالة و بضحكة مجنبة رد ) اللهم لك الحمد بارك الله فيك.....

عبد الله ( تيرحب ) يلاه الشرفة مرحبا بيكم دخلو ....رضا فين احميدة ؟

حميدة : رضا ماكاينش اليوم جات غي حنان...

عبد الله : وخا مزيان.....

جلسو كاملين في صالة وحدة...عبد الله علم الصمدي بلي العقد الشهر الجاي و حلا عندها شروط...حاول يتاصل بيها لكن ماتتردش عليه هاد اليوماين ...و ماشي اول مرة تتديرها ولفها كل مرة فين حاطة التليفون و بعض المرات تتطلع ليها القردة تتطفيه كاااع...ولف تقلباتها مرة حنينة مرة خشينة ....!!

صفاء جالسة بادب جنب عيشة لي مانطقات حرف واحد زامة دوك الشفايف و تتشوف فالسبع مذهب محطوط فالقنت و تغوبش ..

_ بسم الله الرحمان الرحيم ...حنا فالدار ولا فالغابة ....

صفاء بهمس : خالتي عيشة دابا يسمعك عبد الصمد و يقلب عليك عاود ...

عيشة خنزرات فبها : يقلب عليا انا ! انا يماه يقلب عليا...سكت عندي ندعي فيك عمرك لا كانت منك سكت خليني متاقية فيك ربي....

صفاء رسمات ضحكة مع خلود بزز و شدات تيقارها تتدور عينبها.....!!حتى شافت حلا داخلة بقندورة خفيفة عادية و صدرها تيلعب من تحتها مغطيه شعرها الباين سوادو طوال ليها على قبل و جاي معاها فن...! محبدة دوك العوينات كيف ديما بالايلاينر و الماسكارا ...هزو فيها العين كاملين...من عبد الله و جبد...!

رمات السلام ببحة انثوية...: سلام عليكم مرحبا بيكم.....( تتسلم على عيشة بالوجه تقول حبيبتها و معشوقة فيها ) خالتي عيشة كتغبر حتى تغبر و تزيان علينا شنو هادشي ثاني...بالصحة الجلابة الجديدة فنةة....

عيشة ( فمها مبكوم قدام عبد الصمد تتهز فراسها و تهمهم و حاجبها تيشطح ) هممم ...سلام الله عليك....

دازت حلا تتسلم على صفاء و وصلات لعبد الصمد شافت فيه بنص عين كي الدويبة و مدات ليه يديها ...شاف فيها شوفة مسروقة قدام عبد الله حتى حسها خطفات يديها من يديه و مشات جلسات قدام عيشة لاصقة فيها كي العلقة...عيشة تتسوط و تنفخ و تكحز و حلا تتلصق فيها و دور يديها على كتافها تتفرنس ...

_ الجلابة شريتيها ولا خيطتيها...

عيشة ( بين سنانها ) شريتا ...

حلا : فنة ...ماين من تطوان !

عيشة ( تتنفخ و يعجبها الحال ) لا ...

حلا : واعرة بصحتك جيتي فيها كي شي عروسة ..

صفاء و خلود حابسين الضحكة غي بزز صبرات خلود حتى عيات و ماقدراتش ناضت تتفلت فالتة ليها الضحكة...طالعة عند حنان لي وصاها رضا ماتجلس قدام عبد الصمد وهو باقي ماشي عاقد على حلا ....

حميدة جالسة تتهز فراسها و تطلب السلامة تتبادل الشوفة مع عبد الله لي عارف عوايد بنتو مولفها حتى مع عدوها تتعطيه من لسانها مالذ و طاب ..اما عبد الصمد موسع يديه على المخاد واخد راحتو فدار النسيب ...ودنيه معاها و مرة مرة تيرمي الشوفة فيها....لسانها تيقطر بالحلاوة مع كلشي الا معااه هو....!! مريكلة كثر منو و تتساير الحمق حتى تلقى باب خروجها ....!!

دازت نص ساعة سخن الجو فالهدرة والضحك ...!! صفاء و حلا تلاقاو مع بعضهم ...خدامين على الهدرة و الضحك و عيشة مرة مرة تخنزر فصفاءتحمع راسها ...!! ناضت حلا مع حميدة للكوزينة....تتحط ليهم العشاء على الطبلة ..حميدة جلسات تتهدر مع عيشة خلات غي حلا تتسخر ...حتى خلود خلاص طالقة عليهم فشوشها مع الوحم...!! ماكاين غي حلا تتدور تما داخلة خارحة سارقة عين عبد الصمد ...تتبان كي مراة د الدار متولة و حلوانية مع راسها ....!!

تجمعو على العشاء تياكلو ...!! و عبد الله دايما مكبر بطياب حلا قدام شكون ماكان....

_ الله يعطيك الصحة ابنتي .....

حلا ( تتفرنس ) بصحتكم....خالتي عيشة الفورشيط حداك اذا حتاجيتيها ..بغيتي خبز الدار ولا ديال پنادريا ...

عيشة ( تتشوف فعبد الصمد و ترجع تشوف فحلا ) لي جاب الله هاد الساعة مرحبا .....

جلسات حلا حداهم جايبة المناديل عليهم خط مطروز بالذهبي من يد حميدة بحال اكسسوارات الطبلة.. طواتهم بلاصتهم اذا تحتاجو ...الدار عندهم عاطية فيها غي الذهبي وخا ماشي مشعشع داكشي عاطي للعين و فخم....!! كلاو حتى شبعو و عيشة عاجبها الطياب و عاجبها التاويل ماخرجات حتى كلمة حلوة كي الناس...يديها مابغات تحيدهم غي كتعلف و لايني كلمة شكر ماخرحاتها....!!

تعشااو و نحمعات الطبلة و تجمعو للموضوع الخير....!! تقدم عبد الله بنبرة جدية داخل للموضوع ...

_ اوا اسيادنا ...ندخلو فطريق الخير ان شاء الله....صريب الصداق قلنا بعد شهر اذا بغى ربي و كتاب....ولايني البنت عندي قالت عندها شروط قبل ....

عيشة طولات ودنييها و النعمة لي كلات قربات تزهق ليها ...بنبرة قاصحة نطقات ..

_ فالصداق ؟؟؟

عبد الله ( هز حاحبو ) زوجت جوج بنات و عمرني تشرطت فصداقهم ...ولا هدرت فيه مع الجماعة...

حلا دايرة رجل على رجل رافعة حجبانها تتمتم : هاد الشارفة مالها كطير ....

عبد الصمد شاف فمو شوفة فهماتها..تدخل ناطق بجدية : من حقها اسي اعبد الله ...تقول شروطها نسمعو ....

شافو كاملين فحلا ...كل العيون عليها...و كل عين و نظرتها فشكل...حميدة بعويناتها العسلين تتوصي و تهز حاجبها بتهديد ...خلود و صفاء نظارتهم نظرة فضولية...عبد الله مترقب و عيشة تقول الموت غتدخل ليها دابا طالقة عينيها وودنيها تتسمع..اما عبد الصمد تيشوف فيها بعمق مستني بجدية يسمع شروطها....!

بصوت هادي و بثبات نطقات لالة حلا و عينيها زاهقة لعيشة تتشوف فيها غي نص عين ...

_مانشرط عليك المستحيل....انا ماكابراش فالجوع الحمد لله و بابا معيشنا و مكبرنا فالخير و فالحلال.....شرطي الاول هو ممنوع التعدد بغيتها تكتب و توثق ...

صفاء وسعات عينيها تتدورهم لعبد الصمد ليجمع حواجبو ولكن مزال محافظ على الجدية ديالو ......

_ جاتك ...

حلا ( هزات حجبانها ) عمرك تدخل فالخدمة ديالي و نتا عارف ظروف الخدمة و ديجا هدرنا فيها محل بابا غنبقى انا مكلفة بيه و شرطي الاخر بغيت سكن مستقل ....

عيشة ( كمشات حجبانها ناطقة بالجهد ناسية راسها ) كيفاش هاد سكن مستاااقييل شرحوولي....

عبد الصمد جا يدوي سبقاتو حلا : يعني نسكت. يوحدنا بلا مانخمقوك و نزاحموك فدارك اخالتي عيشة ...فهمتي دابا...

حميدة ( بالرغم من تهديدات عبد الله نطقات لسانها تيحرقها ) و هذا ماشي شرطها هي و صافي حتى انا اولدي ..عاطياك بنتي وحدة لي باقيا عندي بقيتا تسكن فدارها بوحدها ....مانعطيش بنتي تسكن مع العجوزة وخا لالة عيشة و ربي شاهد ماشفت منها العيب و خير جورة ولكن التيقار و العزلة خيير .....تيبقا. مزيانين مع بعضهم....

عبد الصمد ( كان متوقعها ) ماعنديش مشكل فهاد الناحية المدينة لي حب خاطرها تسكن فيها ندير ليها دارفيها الالة حميدة...

عيشة عينيها بداو يتقلبو و شداتها الفواقة ..تتقفز غي بوحدها : ااا...كييفاااش....( خنزرات في صفاء ناسية راسها و الكلام تيتقطع ليها بالفواقة ) جييببلي نشررررب مالك كاشوووف فيااا...حت..ى ..نموتت...

نقزات حلا حابسة الضحمة : انا نمد ليها غي خليك....

كيات ليها الماء و عطاتها شداتو عيشة تتجبد فعينيها تقول داخلة ليها الموت...تتشرب و تفوق مابغات تبلع ليها.....لحنها تزير عليها بالاعصاب..و رجليها تنملو ..؛

عبد الصمد : شوية دابا ؟

عيشة ( حاطة يديها على صدرها مكمشة حجبانها ) ضياقت ضياقت عليا...

عبد الصمد ( بهدوء ): تمشي للدار ترتاحي ؟

عيشة ( تتهز فراسها ) لالا ....

حلا ( تتدور فعينبها ) اذا ماكتتيش مرتاحة اخالتي تدخلي لبتي ترتاحي شوية ؟ شنو قلتي....

عبد الله تيغوبش فحميدة و يهمس :اش داك تهدر ديك الهدرة...

حميدة ( بين سنانها ) عبد الله سكت ماتهدرش نتا سكت ...والله لا سكتات بنتي مع العحوزة....

عبد الله : و حنا قلنا العكس نتي طمستيها احميدة .....الهدرة كتكون بالمهل نتي هجهمتي....

بقات حلا مع عيشة حاضية معاها كل مرة تتسولها واش بخير و عبد الصمد جالس حداها من جهة اخرى..حتى تنفسااات و بدات تتنفس مزيان و تعرف راسها من رجليها و بدات ترخى ليهم تما...و عقلها يخدم...وخا عقل عيشة غي على قدو و فهايمها على قدهم حتى هوما و باغية ترجع الصرف ...

خلود :شوية اخالتي عيشة ؟

عيشة ( بنبرة قاصحة ):مم نحمدوه و نشكروه.....نزيدو نسمعو لالة هالة شنو غتشرط ....

حلا ( تترمش و تفرنس ) لي عجبك بغيتي حلا قوليها ..عجبتتك هالة ماعنديش مشكل.....

عيشة ( السم باين من عينيها ) كتاب الخير ان شاء الله.....و كيفك كيف عريساتي شرطتي و ساليتي تنا بغيت ديرلي خاطري و انا راضية عليك...( كلشي تيسمع بترقب لكن عيشة كحلات الشوفة و كملات ) الهدرة نخليوها بين النساء ....

الصمدي حجبانو تلاقاو و عينيه على مو مابغى يحيدهم....!! ناض عبد الله كيتلف و تحرك معاه حتى عبد الصمد....!!

و بقاو النساء بوحدهم....!!

حلا( هازة حجبانها ) : يلاه اخالتي عيشة شنو حب خاطرك....

عيشة ( عينيها مكحلين كحل غليض كتتدوي بنبرة قاصحة ) جبلي ورقة عند الطبيبة فيها بلي مقدرة تهز ولاد ولدي كتولد و ماشي عاقرة حنا غي فالدنيا و ماعرفنا شنو مخبعلنا...بنادم يعرف راسو من رجلو ...بحالك بحال صفاء و سكينة و شيماء ...

كلشي وسع عينيه بصدمة من غير صفاء...! حميدة الهدرة تلفات ليها و حلا مارضاتش....تنفخات و هزات دوك الحجبان للسماء...و الهدرة سلتات ....

_ والله اخالتي ماقلتي عيب ...انا ندير شهادة و هو يدير ..حنا غي فالدنيا و ماعرفنا شنو مكتب لينا...الواحد يدير احتياطاتو...وولدك يدير شهادة كتبين بلي مافيه حتى مرض يلصقو فيا و تيقدر يولد و ندير ليك انا عشرين شهادة ماشي غي وحدة والله لاخسرت ليك خاطرك..شحال من خالتي عبشة عندي انا.....

قالتها و هزات جلايلها خاوية ليهم الصالة و سالتة لبيتها كتاكل جنابها و تمشي و تجي مابقات راشقة ليها...

_ البسالة هاذي ياك ما غنتزوج بالوزير و انا ماسايقة خبار.....بالناقص كاااع...

بقات فبيتها ماخرجاتش كاااع...حمبدة عياات معاها تخرج تودعهم و تسلت مابغاتش...تكمشات فبيتها و خلاتهم ...شادين الهدرة حد ماعجبو الحال....!

حميدة : باين عبد الصمد ماعجبوش الحال علاش تهدر قدامنا شفتيه معصب ..

خلود : عادي بحال بينها و بينو بحال قدام العاىلة غي قدام مو و نتوما شكون غريب زعما ....

تكات حلا تنعس مفقوصى حتى صونا عليها....فتحات الكاميرة و جلسات حالسة معلية حاحبها...سبقها هو ناطق بنبرة خشنة باين ماعجبوش الحال...

_ هاد الشروط احلا كان خصها تكون بيني و بينك لا !!

حلا ( تتشطح فرموشها معصبة متحكمة فراسها بزز ) لا ماكان حد غريب ماماك و والديا ...ماقلت عيب ولا شي شرط ماشي مغقول كي دارت ماماك......باش تجي تقول ليا ديري شهادة حقا عندك تكوني عاقرة بغيتك تهز ولاد والدي و حنا مزال مادرنا فالطاجين مايتحرق ...!! هذا الحماق ......درت عقلي و مابغيت نتبرهش و نظل نشرط فالتخربيق ساعة شكون خلاااك.....

عبد الصمد ( ملاقي حجبانو و كلامو مثقل و الخاطر ناقص تيوصل ليه صوتها مخرشش ) مكنسمعكش احلا ..شوفي المشكل من اش.....

حلا قلبات عينيها تتسوط واصلة للطوب و ماراشقاش ليها...قطعات و طفات تليفونها في خطرة و تقلبات ناعسة ...!!

اما عيشة كي حطات رجلييها فالدار طارت لبيتها دايرة راسها طايحة بالنعاس...تفاديا يسولها عبد الصمد شنو قالت ...!! بقات تتقلب غي بوحدها حتى صبح الصباح و هي تصدم فعبد الصمد سابقها لطبلة الفطور تيستناو فيها...دايما هو الن

المعطل ولايني دابا مبكر...شاف فيه و جمعات دوك الحواحب و دخلات تتنكر ..

_ عظامي طاحو ..رشااو يخليها ليلة دازت ...مانبغيها تعاود لشي مسلم.....

صفاء ( تتدور فعينيها و تشوف فسعيد لي عاودات ليه كلشي ) صباح الخير اخالتي عيشة ...

عيشة : ماين غيجي هاد الخير و البراني غيدخل علينا....

عبد الصمد ساكت جامع لسانو ماشارك معاهم هدرة و ماسول عيشة...سالا الفطور جمع راسو و ناض خارج تابعو سعيد تيوصل ليه كلشي ماكايناش شي خاجة توقف و مايقولها ليه...الصغيرة و الكبيرة و كاااع كلام عيشة لي قالتو ليه صفاء وصل لعبد الصمد....زاد لاقا دوك الحجبان و ركب طنوبيلتو منييرفي و مبرزط....

بقات غي عيشة و عروستها صفاء...تتشوف فيها و تهرب عينيها حتى خرج صوت عيشة القاصح ..

_ شنو عاجبو فيها ممم غي قولي شنو عشق فديك المصيبة ...صاب ربي جامعة دقمي شوف كمايهديه الله و يبعد من طريق ديك اللفعة منو لراسو ..جاب الله وصاني كون فضحتو و وريتو عيشة شنو فيدا بالحق لاااا خليييه حتى نشوفو فهايم ديالو و شنو عندا هي مادير ...الشمتة ليتشمت ملي تعرف ماهي الاولى عند عبد الصمد و سبقوها جوج قبلاا و جوج بدلهم بحال كيبدل حوايجو.....حاسبة راسا وصلات و شدات عليه بلاتي على والديها تشلط مزيانة فبهااا....

صفاء ( عينيها حوالو و دنيها سخنو ) علاش مافخباراشي هي ؟ هييي قول والله اخالتي عيشة ...

عيشة ( خنزرات فيها ) كتحلفني السامة.....

صفاء ( تشلطات ) و علاش ماقالا والو ..غتعرف غتعرف وراق الزواج فيهم كلشي ...( شهقات ) بالحق نسيييت فلوس تعملك الطريق وسط البحر و كلشي هنا كبعرفو عازب.....

عيشة ( مالت شفايفها بضحكة مسمومة ) خليها القفة تقلب عليها نشوفو هاد المونيكة شنو فيدا ماتصنع ...

صفاء تبكمات و تصدمات ..بقا راسها تيضرها النهار كلو و بقات فيها حلا ..نهار كلو وهي دايخة و لسانها تياكلها و قلبها تيحكها ماتبغيش سي حد يتخور هاد التخويرة....!! عياااات تنعل و تشد على داك اللسان يتكمش لكن يديها و رجليها و فمها واكليينها و جاتها الحكة ماتقدىش... ! غي طلع صباح نهار اخر ...طااارت لبيتها لبسات جلابتها الانيقة مع بوط عالي فالاسود و طلقات شعرها القصير و صاك صغيور فيديها.....خطفات المفاتيح من جيب سعيد و تما سالتة لكن عاق بيها...جلس جالس مغوبش بالنعاس .

_ فاين اصفاء ؟

صفاء ( تتلف ) غنمشي لتطوان نشوف الجلابة واش وجدات و ندوز نشوف الخااتم لي قلت ليك من عند حلا ..ندي الطنوبيل ياك ؟ ماماشيشي لشي بلاصة اليوما ؟

سعيد ( رجع تقلب غلى كرسو ) لا غنبقى هنا...ماتعطلشي زيد غيبكي عليك....

صفاء : لا غنرجع قبل العصر. صافي...هانا مشيت ...

سلتات من سعيد و زهقات لعيشة مابغات تشوفها هبطات تتكركب فالدروح لا تلصق فيها و شدات الطريق لتطوان....!!

وقفات قدام محل حلا ..و خرجات تتجري من الطنوبيل لا يتفزك شعرها بنقيطات الشتاء و يمشي ليها البروشينغ......دخلات للمحل تتدور فعينيها تلاقا ليها مهدي بابتسامة بشوشة..

_ خاي صفاء اهلا ...

صفاء : مهدي كاينة حلا هنا ...

مهدي : لا والو باقي ماجات شوية تكون هنا ..جلس دخل على. ماتجي ( عيط لصوفيا ) صوفياااا شوف مع صفاااء.....

رحبات بيها صفاء و جلساتها الداخل عاطياها الضيافة تعليمات حلا مبززة عليهم التعامل مع الكليان يكون فوق المخير وخا مايشري والو .....

اما حلا ناضت كي السكرانة...دوشات و جلسات تفطر بيحامة سخونة و شعرها مجموع ...تتبركم و تاكل و حميدة تتهز فراسها...

_ بسم الله عليك ماليك عاقدا دوك الحجبان ...

حلا ( هزات كتافها ) ماعندي والو ....انا باقي هدرة ديك الجلبانة لاوية واحلة ليا فحلقي ...( كمشات عينيها فواحد النقطة شحال عاد كملات ) عرفتي اماما والله مايصلاح مع البشر المزيان...عرفتي شنو كنت كنفكر نقوليه قبل العقد....يدير شهادة طبيبة حقيقة يفحص راسو ماشي المزورة زعما باش يدخلهم مع وراق الزواج كي كيديروالاغليية...نتي عارفاني كنعيف و كنخاف و يانا هاد الراجل غندخل معاه للمعقول و القضية فيها زواج ينعس معايا و يصدق هاز شي كارثة ولا عندو شي مرض تيلصق ...قلت لا احلا بلا بهلان صافي السيد كتشوفيه نقي و ظفرانو نقيين و ماشي معفون..حتى جات ديك عيشة قالك ( تتعيبها ) لااا دير و دير دير ..انا باغية نهز ولاد ولادي......

حميدة ( بجدية ) اي حاجة دارا هو ديرا حتى نتينا...ماشي نتينا ملاك ....و ثقل و عمل عقلك حد ماتزوج غيرك نتينا......كاملين تزوجنا و حد ماعمل ليقلتيه الطبيب مكيقيسك مايفخصك يعطيك شهادة و يجمع مع وراق العقد و المخير عمل هيدا ...هدر مع شي راجل قولو حقا ماحقا يقولك شنو كتخور....

حلا ( عقدات حجبانها ) تنا ماقلتلو والو ...و باين ماعارفش حتى مو شنو قالت....و براسو يعرف ولا لاء......مو هدرات و انا عطيتا شنو بغات ....

حميدة : و تمشي تلعببلو فعقلو تقولو ها حلا شنو قالت و شنو عملات....

حلا ( هزات حاحب ) تيعرف مو كثر مني و منك اصلا ديك عيشة مفروشة كتخاف ولدها يغضب عليها ...ماتقدرشي تقولو هادشي قدامو حتى اذا وصلاتلو غتبقى تكذب غليه و تلف وخا يكونو ميات شهود وهو عارف مو كيف عاملة هو و عقلو ديك الساعة.....انا غنوض نبدل عليا نمشي للخدمة....

بعد ساعة خرجات من البيت لابسة كسيوة سخونة قصيرة فالݣرونة مع بوسط طويل فالاسود شعرها مطلوق مسخنها و مكحلة العويناات و مجبداهم كثى ماخو مجبدين عاطيين للعين...حميدة تتطلع و تهبط...

_ كي الشنوية مسح شوية من دوك العينين مالك على ديك التجبيدة....

حلا ( تترمش ) : مالك ماتقولشي جيت مزوينة....

حميدة : و الله يستر...الزين زينة خصك غي العقل...باقي ماهداك الله تعطي التيقار لديك الشعر مرة طويل مرة قصر. مرة كحل مرة زعر مرة مسرح كي الحرير مرة مبلبل كي الهداوية يابنتي ديك الزغبة. لي عندك غتمشي ليك....

حلا : هانا مشيت احميدة غي مرة قولها فيا زوينة......

شدات طريقها لتطوان ...!! يلاه غتم داخلة للمحل وقفها عبد الصمد فاتح باب االاوطو تركب...!! قلبات عينبها منفخة و طلعات حداه محرك من تما غادي لكاستي ياخو ...!ماردش البال لطنوبيل سعيد ...

عبد الصمد ( بالثقالة ) ديك الخيط لي لابسة مابانش ليك قصير ؟

حلا ( ردات شعرها ورى ظهرها مجاوباه بثقة ) لا نتا بان ليك قصير ؟

عبد الصمد ( قلب وجهو تيبلل شفايفو متمتم ) حلااااا.....

حلا ( تقلبات لعندو طاوية رجليها واخدة راحتها ولفاتو ) حلاااا...كلشي حلااا طالعة نازلة حلا تتعجبكم سميتي ولا تتجيكم ساهلة تنطقوها.....

عبد الصمد ( ميل شفايفو بتبسيمة ثقيلة موقف الاوطو ) قربي نقولك ....

حلا ( قلبات عينبها منو تترمش و تلف ) ماتقول ليا مانقولك....فين غاديين ؟

عبد الصمد : كاستي ياخو....

حلا ( هزات حاحبها ) خالتي عبشة كي بقات....

عبد الصمد ( مطمر ) لباس عليها...شنو قالت البارح ملي خرجنا ؟

حلا ( شطحات رموشها ) والو خالتي عيشة مسكينة لي على قلبها على لسانها مكتعرف تجامل ولا تخبي عادي عادي ....

طول يديه شد ليها يديها كمش علبهم تيجننوه....تاوهات بالم ناطقة بانوثة : صبعاني اعبد الصمد .....

عبد الصمد (طول يديه لذقنها و عينيه شبه مبسمين ) غا كنزيرو شوية تتقصحي مالك رطبة هكا.....

حلا ( تتدور فعينيها ) زعما خالتي عيشة ماقالتش ليك اش قالت ؟

عبد الصمد دور يديه ورى الكوسان ولات قريبة لييه تيقيس ذقنها بظهر يديه و يتأمل تفاصيلها تتعجبو بالجهد....

_ هي ماقالتش ... و لكن كلامها وصل ...

حلا ( حيدات ليه يديه من وجهها تتشطح فرموشها ) عندك مصادر صحيحة قالتها ليك صفاء ؟

عبد الصمد ( هدرتو ثقيلة ) لااا ...

حلا ( ضيقات عينيها ) خلينا فشكون وصلها ليك...شنو بان ليك نتا فكلامها...ياك ماعند بالك غنقول اوك وخا و نحني راسي...حتى واحد ماعجبو الحال.....

عبد الصمد ( سرح يديه مع رموشها تيجاوب بمكر ) انا لي بان ليا هو درتي عقلك معايا التحف

حلا ( ضربات ليه يديه حتى بعدهم و عقلها معاك التحف ليقال تجاهلاتها و زمات شفايفها و علات حاجبها الايسر.....

_ شنو تنقولك انا شهر دابا....راني دايرة معاك عقلي و شادة الطريق ...لو بغيت نتبرهش نتبرهش والله ماعندي شي مشكل

ضحك بالثقالة وعينيه مبسمين..بصوت مدعدع و باك القرب نطق : قولي والله ......

فلتات ليها ضحيكة زوينة ناطقة : والله ....

والو عيا يشد يدو مايقدس...بشرتها ولات ادمان و جنة لاصابعو ...تلمس حنكها برفق و رد بصوت حرش

_ منين طحتي عليا نتي ! كي دارو خلاوك ليا ....

حلا حنات رموشها تتدور فعينيها تتبغي دير راسها حشمانة ماتتقدش...عايشة الدور و مسلكة ...!!

تيعجبها كلامو تيرضي انوثتها و الرومانسية عندو حرشة مرة التحف ديالي مرة حلي حلاوة ...و دابا كملها بهاد الاعتراف لي فلت ليه...و اغلب اللحضات الرومانسية عندو عبارة عن هدايا غالية.....ذووقو خطيير بمعنى الكلمة.....

دوزات معاه نص نهار ..مهدي تيصوني عليها تتقطع ...!! ماوصلها لتطوان حتى كان العصر قرب ...!! خرجات من الاوطو هازة صاكها تتدوز يديها على شعرها و ساعة جديدة تتبان فيديها عاد عطاها ليها ...!! دخلات للمحل تلاقات ليها صوفيا...

_ ختي حلا اهلا...

حلا : اهلين صوفيا صافا ...كاين شي ؟

صوفيا : كانت هنا صفاء مرات لوسك من قبيلة وهي تستنى فيك مشات تجيب شي سخرة من المدينة و ترحع....

غي سالات كلامها دخلات صفاء تتبسم ..

_ هانا لقيتك الهرابة....

حلا دارت شافت فيها تتضحك : حصليتيني....( تتسلم عليها) فين لباس...بخيير ...الوليدات صافا.....جلسي اختي جلسي شحال ماهدرنا على خاطرنا....

جلسو الداخل مكملين الصواب...!! حلا هكا مع كلشي...بنات العاىلة و الكليانات تتحسسهم انها صاحبتهم و تيعاودو ليها كلشي الا هي تتعاود غا ليبغات ....ولكن اسرارهم تيبقاو مخبيين ماتتفرش حد....!

بعد اخد و رد دخلات صفاء فالموضوع و هي شاداها الرعادة خايفة تندم....

_ المهم انا جيت على موضوع اخر ...ماشي غي على الخاتم احلا....شوف انا ...

حلا ( شافتها متوترة استغربت ) غي بشوية عليك اصفاء...شكون كاين....

صفاء :قبل حلف بالله ماتقول انا ليقلت ليك ...

حلا ( بفضول ) والله مانقولا غي قول شنو عندك....

صفاء : شوف ربي شاهد نتي عزيزة عليا و كتعجبني و حتى خويا عبد الصمد تنعزو بحال خاي والله العظيم...غي انا مانقدرشي نسكت حيت لو كانت ختي مانرضاهاش ليها....( تتبلع فريقها ) نهدر هنا هانية ؟

حلا ( مبرزطة ) دوي غي دوي ماعندك مناش تخاف....

صفاء : المهم...خاي عبد الصمد مزوج قبل منك بجوج و انا كنت حاسبة في خباارك حتى لهاد الايام تنسمع من خالتي عيشة بلي راك ماعارفاشي ...تصدمت ....

حلا راسها مشا و جا بيها طلعات معاها الصهدة اما رموشها ولاو تيفرفرو و دماغها تيخدم بالزربة.....ماعارفة شنو تقول و مابغات تقول و مافهمات اش تقول...بالخفة لي عهاها الله نطقاات..

_ مطلق ...ماشي مزوج بجوج و انا الرابعة زعما انا الثالثة.....

صفاء ( تترمش ) لااا طلقهم طلقهم .

حلا بزز نطقاات حابسة راسها و كاتمة صدمتها

_ خالتي عيشة شكون قاليها مافخباريشي ؟ عند بالها مقلوبة عليا القفة ...اما فخباري كلشي ...خلعتيني ياصاحبتي حاسبة مزوج بجوح و باغي يدخلني ضرة

صفاء ( بصدمة ) فخبارك مطلق...ولكن انا سمعت من خالتي عبشة بلي مافخباركش و خاصا تقولبك و تشفى فيك ملي تعرف راسك تخورتي ....هييي ( بغباء ) مافهت والو شكون لي مقلوب عليه القفة انا ولا نتي ولا هي ..

حلا ( تتسوط و تنيش على وجهها تعرقات و صهدات و شي حاحة واحلة ليها فحلقها مابغات تبلع ليها قريبة تنفاجر ماباقي لبها والو )لا فخباري فخباري ........جاني الصهد مافيكش الصهد.....

صفاء ( شداتها الدوخة ناضت واقفة هازة صاكها ) لساني لي خصو يتحرق و يتعطى للعافية...انا ماشا اختي و حلفتك بالله ماتقول لشي حد جبدت معاك هاد الهدر. غيقولوا باغية نشعل العافية بيناتكم وانا والله ماهيداك...ماحسابش ليا فخبارك....

حلا ( سنانها مزيرن و ودنيها حمراااء كي الماطيشة ) لااااا والله مانقولا لشي واحد كون هانية.....عادي احبيبتي عادي

خرجات صفاء بحال ضربها الحمق ركبات فالاوطو مزيرة على الفولا تترمش و تهدر بينها و بين راسها...

_ دقمك كياكلك اصفاء .......

غي غبرات صفاء....الضحكة على وجه حلا تمحااات و رموشها قربو يطير....سنانها مزيرين و حاحبها طالع للسماء ... باين صاعرة و واحلة ليها الشمتة ...جلسات فالبيرو ديالها و رجعات راسها االور تترمش و تفكر ...

دخل عندها مهدي تيصفر ...شافها هكاك بلع لسانو و رجع باللور ماعاودش شاف وراه....!!

مخليها تما بوحدها .....تتدوي مع راسها

_ باغي يشمتني انا !! يقولبني ...كنت عارفاه مافيه ثقة....حتى بديت نولفو و ندير عقلي معاه خرح منو هادشي......خلاني ولد الكلبة حتى دخلتو لعقلي ...باغيي يقولبني ...

جمعات حجبانها تتحك سنانها تتسب فراسها ..مارضاتش و ماعمرها ترضاها...و حتى قدام صفاء مابغاتش تبين مافخبارها والو ...وهي لي دايرة راسها القافزة و تتطلع كلشي و سايقة الخبار لكلشي تجي صفاء تقوليها افلانة عندك راه غتخوري.....!! غا تتفكر الموضوع تتبغي تجنن...!!

ناضت هازة صاكها خارجة ..

شدات طريقها لدارها ...طلعات تتجري لقات مها و باها فالتحت تيهدرو و خلود حاضية غي الماكلة و التلفازة....!!

دازت من حداها كي الاعصار مخلية خلود تتغوبش...

_ بسم الله عليك خلعتيني...مالك على هاد الدخلة...

حلا ( تقلبات سيفتها و علات صوتها عليها معرعرة ) ديها فراااسك بعد منيييي....الزبلة حد ماحمل غيرك....

خلود ( صبعات ليها معصبة ) ها فعينيك الحمارة...

حلا رمات الصاك و وقفات ليها وسط الصالة تتصبع ليها بجوح يدين منظرها تيحيب الضحكة...

_ ها اخوووور ...واحد من القظام واحد من اللور.....اذا بغيتي مزال دخل عندي للبيت نوريك....

خلود ( تتخسر سبقتها ) ويلي على شمكارة....شنو هاد النيفو....

حلا : حمد الله شفعلك داك لي فكرشك والله حتى موريك النبفو حتى لاين هابط ....بقرة د هولندا كي عاملة تفوو...

خلود ( ويعات عينيها ) انا بفرة دهولندا ....كتعايرني.....

حلا ( لوحات يديها باستخفاف داخلة لبيتها ) لا حاشا ...سير طلق فشوشك على لي حملك ....

دخلات لبيتها تتحيد من علبها و ترمي بالزعفة ...معرقة و مصهدة و السخانة طالعة ليها سااخطة نييت...

عبد الله و حميدة فالصالة التحت تيهدرو غا سمعو غوات حلا و خلود حميدة شدات راسها تتنكر...

_ وحدة 32 عام والاخرى 27 و العقل ناااقص ماعرفت ماندير مع هاد الكارثة لي والدة...والو حتى وحدة فيهم ماتكسب العقل....

عبد الله ( بجدية ) و كون بقات هنا احميدة...

حميدة ( بقلق ) ياك لباس اعبد الله...

عبد الله : هدر معايا عبد الصمد بعد العصر وصل حلا للمحل و هدر لي قالي اذا كنت فتطوان نشربو شي قهوة نهدرو ..

حميدة : و شنو قال هدر شي حاحة كاينة...

عبد الله ( بجدية ) عبد الصمد مطلق جوج مرات احميدة و هادشي مافخبارش حلا ...

حميدة ( شهقاااات ) مطللللق.....علاش ماقالاشي قبل....

عبد الله ( بهدوء ) الغلط ديالنا سولناه ؟ لا ؟ و حتى دابا باقي الحال ...السيد كون بغا يخبي يخبي حتى للعقد و يبان كلشي ساعة الواحد مايقدر يرجع للور فديك الساعة...ولايني هو جاني على بكري و قالي ها شنو كاين......انا مكنشوفشي فيه شي مشكل ...مطلق مافيه عيب ...

حميدة ( تتولول ) واش كتعرف بنتك ولا غي سامع بيها والله مشات عرفاتو مطلق حتى تشوط فهادشي كامل ....ويلي مشات. هاد التزوجية عاااود ....

عبد الله ( هز حاجبو ) ماشي من المعقول على هادشي تفرتك كلشي خصا تحضر شوية العقل...جوج تزويجات صافي غيصحح اغلاطو ...قال سباب الطلاق هي مو كانت عاملة مشاكل فزواجو و غيصحح الغلط هاد المرة و يخلي حلا بعيدة على عيشة كل وحدة فدارها.....

حميدة ( تتفكر و تهز فراسها ) تتت ...والله لا كملات بنتي و انا عارفاها.....

عبد الله : قولها ليها نتي اليوم قبل غذا ....

حميدة ( برفض ) لااا براسك مع بنتك قولها ليها نتااااا....كتحشم منك و تسمعلك انا غطير و تنزل ماتبغي تكمل فهاد التزويجة....

عبد الله ( بجدية ) ماشي نديرو لعب دراري الصغار العقد تحدد و بدينا نوجدو فالوراق ماشي باقا صغيرة حتى تفسخ كلشييي.....

حميدة : اوا بنتك هدر معاها نتا و قولا هاد الهدر. يانا ماشي شووغلي .....

ظلو تيتناقشو و يهدرو ...فالاخير همات حميدة و طلعات لعندها...لقات السكات و خلود تتمضغ ...قربات لعندها تتعاود ليها...

_ و كون تسمع ابنتي شنو سمعت اليوما طاحولي الماء فالركابي....

خلود : شنو وقع...

حميدة : عبد الصمد مطلق ...و حلا مافخبارا والو و مشي نتينا فكر كيفاش غتقولا.....

خلود : و شنو فيها مطلق ...

حميدة : مافيها والو بقات فختك عقلا فشكاااال ..كتعيييف ..

خلود : هاذيك مضروبة على راسها قالك كتعيف على اساس زعما اذا كان عازب عمرو نكح شي مراة اخرى ...و حتى هي عارفة شنو كاين غي كتبغي تبوهل.....

حميدة : غدوز العشاء و ملي نجييو نعسو نهدر معاها حتى تعشا بعدا لا تنعس بالجوع....

وصل وقت العشاء...محمع رضا و مراتو و خلود و راجلها و نسيم و راجلها و لادها ...و حلا جالسة وسطهم مزنكة و ودنيها حمراء تتاكل قارمة و حجبانها ملاقيين ..ماتتشوف فحد ...

رضا تيشوف فيها مغوبش و يرجع يشوف فبنت نسيم هازة تليفون حلا تتلعب فيه ...تلفها و خداه لبها و عطاها ديالو ..خشى تليفون حلا فجيبو خاصي لا يتطفى و يحتاج الكود و ناض تيميل فكتافو طالع الفوق...دخل للواتساب تيشوف ميساجاتها مع عبد الصمد لقى ميساحات قلال اغلبية تيهدرو ابيل فيديو...مشا جهة التصاور و جلس تيتفرج فتصاورهم ...شي تصاور خلاو دمو تيغلي....و خاصة صورة جاتهم حميمية...مدور يديه ورى كتافها وشعرها طاير بالريح مغطي وجه الصمدي...!! و صورة اخرى حاط يديه على خاصرها بحال ضامها من اللور...دمو سخن و حجبانو طلعو زير على التليفون و كمل التجوال ديالو ..حتى سالا و رجع التليفون لازهار....جالس بحال جالس على الشوك...!

سالاو العشاء و سالات حميدة شغلها ...دخلات لعند حلا هي و خلود ..جالسين حداها على الناموسية باغي يدخلو معاها فالموضوع...

حميدة ( تتطبطب على حلا ) قبل ماتنعس بلاتي نهدرو ...

حلا ( ربعات يديها زامة شفايفها تتمتم ) انا لي خصني نقولك مابغيتش بغيت عبد الصمد...

حميدة و خلود وسعو عينيهم ..

خلود : ها لي قلنا...

حميدة ( تتصرب صدرها ): استغفر الله ...علاااش شنو كاااين ياربي شحال عيتيني معاك ابنتي ...علاش شنو عندو عاود...

حلا ( تتدوي بزز مفقوصة ) مطلق و مخبي عليا. ...

حميدة ( فتحات عينيها ) هاااا !! صافي على هادشي.....

حلا ( طلعات ليها قنديشة تتجبد فعينبها ) اناااا يبغي يقولبني ...شنو زعما خصو حتى يخليني نبغيه باش يشدني عاد نعرف و نقول اه وخا ماشي مشكل وخا خبا عليه اما كنبغيه مانقدرش نعيش بلا بيه...اما مابغيتوش مابقيش بغيتو صااافي ( فلتات ليها دمعة صدماتهم و تصدمات حتى هي فيها مسحاتها و زادت صعرراات مارضاتش ) خليييوني بوحديي بعدووو منيييي....

حميدى ( تتهدن فيها ) اسمع اديك الهبيلة سمع...راه ماغراضوشي يخبع راه اليوما قالا لباك كون كان بغى يقولبك كون سكت و طمر حد مايعيييق...

حلا ( بقات غا تتدور فعينيها ) قالها لبابا ماشي لياا...نهار و انا معاه ماقالي ووالو ..شهراين و حنا مع بعصنا ماقالي والو...شهراين و انا مقلوبة غليا للقفة كي الحمقة...دابا مو و تاصيلتو كيتشفاو فيا. .....( تتنفخ ) لي بقااات هو انا عطييتو شهراين من حياتي و انا معااه...شهراااين فين مانشوف شي زرق العينين تنجمع عيني تنقول حشومة احلا غتزوج نتينا مخطوبة.....دير عقلك مع السيد بركة من التبرهيش كبر عقلك...صبر على الشارفة ديال مو ...فالاخير يطلع مطللق .. شنو ناقصني انا نتزوج بواحد مطلق...

حميدة ( بصوت حاني لا يسمعوها ) و شنوووو فيها مطلق شنو. فيها مافيها والو...

حلا ( تتقلى بلاصتها و بالجهد قالت ) وحميدة راه فيهاااا بزااااف

**بو فيه ريحة جوج *بابن ....جوووج....

طارت خلود كاتمة ليها فمها حابسة الضحكة لكن ماقدراتش طلقاتها تتضحك بالدموع ....

وحميدة صافي وجهها صفااار خايفة يكون سمعوها وهي تتموت بالحشمة من رجال بناتها....

عبد الله و رضا كانو داخلين سمعو اش قالت كل واحد فين عطا راسو ..عبد الله تزنك و حششم بالجهد تيشوف فنسابو و يحرك راسو و يشوف فالسقف ....هبط نسابو التحت مكملين القصارة و نسبم لي بقات واحلة تتشوف فرضا و تحرك فعينيها حتى هزات راسها و هبطات التحت ...!

لقات عبد الله مزنك كي حبة طماطم ...شافها زاد حشم ...!!

_ بابا غنمشيو ..

عبد الله : مغتباتوش ؟ باتو اليلة و غدا يحين الله...

نسيم : لا يحيى مسافر غذا ...خصو يجمع حوايجو.....

عبد الله ( تنهد ) وخا الله يوصلو على خير ...قلت تبقا تشوف مع حلا تردولا عقلها...جعرات ....

نسيم ( طبطيات عليه ) ريح راسك ابابا...و لي مكتابة غتكون مابغاتوش صافي خليوها ماشي صغيرة هي تعرف لراسها....يلاه انا نطلع نجيب الصاك ديالي....تصبح على خير.....!

طلعات الفوق لقات رضا جالس فالصالون برا مزيرو و حجبانو مطلغين شوية يخرجو ليه القرون...! تجاهلاتو و مشات نيشان لبيت خلا...لقات خلود شادة عقلها مع حلا تتحاول تفهمها بالتي هي احسن...

_ واش كاين شي راجل فهاد الوقت عمرو نعس مع شي وحدة انا مانتيقش واخا يحلف باش مابغى.... راه داز على شحال من وحدة هاذي غي دخلا لعقلك....غتبقى شادة نتينا غي على مطلق...

حلا ( زمات شفايفها ) اوا يستناني حتى نجرب انا جوج مرات و نطلق جوح مرات و نجيو نتزوجو.....نكون تنا خبرة مانبانش قل منو.....

حميدة ( روحا بغات تخرح مع حلا ) ياربي على فال ..تف تف استغفر الله.....هانا تزوجت باك مطلق شنو فيها ؟ شنو وقع ماوقع والو غي ولدت الكارثة على ختها....دابا نتي تعاشر مع السيد و تولفو و تولد ولادك معاك و تنسا واش مطلق ...الطلاق عادي بحال البنت بحال الراجل ...

حلا ( تتشطح رموشها ) لاا المراة مطلقة تيعيبو فيها اذا تزوجاات واحد عمرو تزوج و الراجل مطلق عادي شنو فيها من حقو يتزوج عزبة...انا ماناقصني والو نتزوج بيه مطلق.....باقي عزبة و و عندي حقي من الزين و باقية صغيرة ماهجالة مامطلقة ماعندي ولاد ماضحك عليا ولد مراة ....شنو ناقصني ناخدو هو ....و اصلا مانقدرش نتخايل راسي ناعسة معاه غتشبرني الردة......

نسيم ( مابغاتش تدخل ) انا غنمشي...تصبحو على خير.....

حميدة : وخا ابنتي الله يرضى عليك...

نسيم : هدرو بشوية رضا جالس برا كيسمع كلشي...

حلا ( علات صوتها ) خليه يسمع نخاف منو انا

رضا دار حتى دار و دخل عليها للبيت مخنزر...

_ شنو كاين ! شنو هاد التخوار فالهدرة....

حلا ( ضحكات باستهزاء ) والو غي فرحانين حيت مابغيتش غنتزوج بعبد الصمد ..فرح معانا حتى نتا...

رضا ( حمارو عينيه و سخن دمو ) حتى نكون ديووثي الكلبة....( تيشير بيديه مجنن ) وصلتي معاه للتعناق و البوسان الكلبة و جاية دابا تقطع كلشي...والله لا كانت غتزوج بيه بزز على حسك و بربي. لا فلتيها.....

حلا ( بالغوات ) و سيير بحالك احمار طاحونة بعد مني تفووو....

رضا ( تم عادي ليها وقفاتو حميدة تتولول ) صافي ...دير عقلكم اويلي رضاااا خلي ختك.....

رضا ( ولى حمر معصب ) غتزوج بيه بزز ....وبربي مادوز علينا شي سبة ...العقد مع العرس نيشان تكركب بحالك عند راجلك ماكاين لا من هنا للصيف لا للربيع....

حلا ( تعصبات ) تتحلم مغنتزوجش بزز....

حميدة : اوا ابنتي شنو ! ختى وصلتو و ترجعو باللور ! دوز هاذي الله يرضي عليك و حاول تنساها ....

حلا ( ملي تيبزز عليها شي حاجة تتكرهها وخا تكون حامقة عليها ) والله مزيان...والله حتى مزيااان شفتو يانا كنت نقدر نميك و ننسى ولايني هاد بوخريرو دولدك باغي يبزز عليا الزواج و تيحلف خليه يوريني واش قد حلوفو ولا تيخور....يانا يا نتا يلاه وريني اش عندك....ولا فيك غي الهدرة....

رضا ( طالع ليه الدم ) من هنا لشهر غتكون فدار راجلك مزوجة....و ها حنا غنشوفو الكلبة...

حلا ( ضحكات مفقوصة ) ها حنا غنشوفو ... دير قيام الله و دعي في صلاتك على الله ....

عبد الله طلع معصب تيسمع الغوات...

_ شنووو كاين ؟ مالنا على هاد الصداع و الحيحة ضسرتو ...

حلا ( جات تهدر وقفها نعصب منها و من الكلام لي قالتو ) سكوووت احلا سكوووت قبل مانخسر معاااك....صافي السيد علم ها لي كاين و ها لي كاين و الصلاة على النبي صافي شدييبنا مابقات هدرة اليل هذااا ...( معرعر ) يلااااه كل واحد يتقلللع لبيتوو....يلااااه.....

نسيم و خلود سلتو بحالهم ...و تبعهم رضا خارح معصب تيشعط فالبيبااان....!

خلاو حلا بوخدها جالسة فبيتها ..و على ناموسية مربعة..!! تتنفخ و تسوط و تحمع شعرها و طلقو مبرزطة و مامرتاحاش في خاطرها..غا تتبركم و تدوي بين سنانها و تحلف حلفانة فكلشييي .....!!

تقلبات تنعس و فين ماتغمض عينيها تتخايل شلااا حوااايج......كانت تتحاول تتجاهل داك الشيطان لي تيوسوس ليها و يفكرها انه راجل عاش على برا و غيكون دوز البنات و سهرااات تتقول هذا تيبقى غا شك و تناسااات كاااع مابقاتش دخلها لعقلها لكن غي سمعات القضية فيها الزواج طلعات ليها القردة للراس و ولات الحقيقة باينة وخا تعيا تناسا ... ولات تتخايل شلا مناظر ها الصمدي تيبوس و يتلمس فوحدة و ها هو تيبوس فقنت ماشي حتى لهيه و شلا تصااور جاو لعقلها ...و كملاتها ملي تفكرات اابوسة لي باسها ...طلعو ليها القلب و ناااضت تترد فنص الليل. .كاع العشاءليتعشااتو رداااتو.....!!

خرجات خلود مخلوعة تتشوف فيها...

_ حلا مالك ..

حلا جراتها عندها للبيت عقلها مرفوع و الحاحة لي فكرات فيها قالتها تيهدرة بالتوشيوش حيت كلشي ناعس...

_ واش عادي اخلود ولا انا فيا سي مرض ومخورة فعقلي مابغاتشي تبلعلي....

خلود ( شدات بينوار النعاس صدرها باين و شعرها مرون حالة وحدة عاد ناضت من فراش الزوجية...جلسات و جراتها تجلس تتفهمها )

_ شدها منين خفافت اذا بقيتي كتفكر هيدا عمرك تزوج في حيااتك...شوف حمزة قبل متيسلم شنو فنظرك غيكون دوز ...وخا هكاك عرفتو سلم صافي وليت كنشوفو صفحة بيضاء و ماعاودتش كاع فكرت فالماضي ديالو....ماكنخليش دوك الفهايم يدخلولي لعقلي...دابا غي بيني و بينك و كنعرفك ماعندك وجه تحشم عليه شنو لي مخليك هيدا عاولدي شنو عندك فراسك...

حلا ( قالتها بصريح العبارة ) : مانقدرش نخليه يبوسني و انا كيجي فبالي كيلحس و يبوس **بون مراتتو ..و علم الله شنو اخووور ....

خلود ( ضربات حنكها مصدومة ) و ييييلي فين مشاااا عقلك....سير تنعس اختي لي فيك كافيييك.....

خرجات بحالها مخلية حلا تترمش ...!! كانت 12 د اليل ...مابغاش يجيها النعاس هزات التليفون وخا قليل فين تتهزو باليل تتخاف يبانو الهالات السوداء ...و مؤخرا بسباب عبد الصمد تتسهر تتدوي معاه ولات تتبان ليها الكحولية تحت عينيها تتغطيها غي بالمكياااج ...!!

فتحاتو لقات عبد الصمد متاصل بيها...تجاهلاتو و كملات تجوالها حتى عاود صونا ...!

فتحات الخط وسترات صدرها الباين من صدايف البيجامة ...بان ليها جالس فبييتو ...تيشوف فيها نظرات تتحسهم عامرة بالمكر...باقي ماعرفش واش عبد االله علمها ولا باقي ...

_ مال حواجبك ضاربين السلام ؟

حلا ( تتشوف فيه ساكتة...)

عبد الصمد : حلاا

حلا ( غا تتشوف و تكمش عينيها ) علاش طلقتيهم ؟؟؟

عبد الصمد ( بلل شفايفو تيدوي مثقل و دماغو خدام مابينش ردة فعلو ) ولات العيشة حاارة و توخرنا فالطلاق !!

حلا ( سكتات شحال و نطقات معلية حاجبها) و تنا قبل ماتحر العيشة بيني و بينك انا غنفكها....و نسبق الفراق قبل من والو ...نتا غشيتيني اعبد الصمد و عرفتي كبفاش تدخل لبابا و تلوي ليا يدي زعما....لو كانت نيتك صافية ماتوصيش ماماك تكذب علينا و تقول لالا ولدي عمرو تزوج....

عبد الصمد ( جمع حواجبو برودو مستفز ) ماوصيت حد و ماخبيت على حد و ماسولني حد و اخيرا سميتك مربوطة بسميتي ...الفراق سخون على لسانك حضي لا تشوطييه.....

حلا ( ضحكات مفقوصة ) عرفتي شنو ! ماكرهتش دابا نغرس فيك نيابي بالاعصاب لي فياا.....

عبد الصمد ( بهدوء ) كلشي ديالك.....

حلا ( زمات شفايفها تترمش و تسوط ) غنقطع ...و اذا عاودتي صو نيتي على هاد النمرة غنبلوكيك....خاتمك و ذهبك غيوصل ليك و حتى الطنوبيل ..سير صدقها ولا عطيهم لوحدة اخرى انا مغنكون الثالثة فحياتك......مانرضاهاش لراسي....

قطعات عليه و رمات التلييفون...و تقلبات تنعس بقات من هنا لهيه حتى عاودات هزات داك الايفون و دخلات لتصاورهم...مسحات كااع تصاورهم الا وحدة عحبها راسها فيها....!! عاد تقلبات تتنفخ كي الثنين تحت غطاها...!

اما عبد الصمد مقصر تيكمي ...وحجبانو ملاقيين معتارف فنفسو بلي اول مرة فحياااتو يدير الخاطر لشي وحدة بعد مو عيشة ..و اول بنت المراة تتجيه صعيبة حتى تيقول صافي شدها تتزهق ليه من يديه ...!! ماعارفاش بلي هو صافي رشمها و دار عليها علامة ولات ديالو ...و الفراق منو ماتحلمش بيه....!!

و حتى عبد الله و رضا قالو نفس الكلام....!

كانت حلا فالكوزينة تتوجد فالوصفة لي تتحطها لوجهها ..شحال ماتهلات فيه و هلكاتو بالسهير...!!

طحنات الفريز و زادت العسل و ياغورت و كبسولة ڤيتامين E حطاتو لوجهها عشرين دقيقة و مسحاتو ....!

حتى جلس عبد الله يتغدا عازم و مقرر ...رضا دار شغلو و حتى هو دغيا يتقلب و ماعندو كلمة كل مرة و شنو كيقول...و رضا هاد الايام لصق فيه و مابقاش تيفارقو ....! حتى عمر لبه راسو مزيان و شاف ان رضا عندوالحق.....مايمكنش بعد مابداو يوجدو لوراق العقد غتصرب فكلشي...و دايما تيسايروها...!

جمع الوقفة و عيط بصوت عالي.

_حمييدة عيط لحلاااا....

حميدة ( دخلتت لبيت حلا تتعيط لبها ) حلاااا....

حلا حسات شنو كاين و فهمات رضا دار خدمتو .. خرجات تتزطم فسروالها و شعرها مرون ...غا وججها ليصافية كي البلار....

_ شنو كاين ابابا ؟

رضا ( دخل ديك ااساعة ) جلس و هدر بشوية مالك رافعة صوتك....

حلا جمعات لسانها بزز قدام عبد الله و جلسات حداهم تتستنى كلام باها لي سكات شحال و نطق...

_ هاد الزواج باذن الله غيكمل....سايرناك شحال من مرة و قلنا حياتك و حرة فيها ...ثلاث خطبات و نتي تفسخ فيها...ثلاثة....و كل خطبة فلوس خاسرين علييها...ولايني توصلو للعقد و تجي تقولي لا نرجع اللور لاااا..هاذي مانقبل بيها....عليها احلا الله يرضى عليك...نوض كمل توجاد وريقاتك و وجد راسك....العقد فوقتو كيف حددناه و العرس بعد العقد نيشااان......

حلا ( كمشات فمها ..خلاتو حتى كمل و بلعات كلامو ماعندها كانة تناقش و لا تزيد معاه فالهدرة...شافت فرضا شوفة حمراء و صبرات جالسة حتى ناض عبد الله و ناضت هي تتسوط حابسة البكية....

دخلات عليها حميدة تتسكت فيها...

_ و لواه لواه ابنتي صافي دير بكلام بااك....

حلا ( تتنفس بزز ) وخا نكون باغياه دابا غنكرهو....الزواج بزز مابغيتوش...ماشافش بابا بلي ظلمني...انا شنو ذنبي لو عرفتو مزوج قبل الخطبة كون غنقولو لا نيشان حتى قرب الزواج عاد باغي يبان فيها عندو ضمير...( مسحات دمعتها تترعد ) بالحق بلاتي....انا مغنخسرش هدرة بابا....( بصراحة كملات ) و حتى اذا قلت لا غيعمل عليا اغنان جدي و يصعر...و يشد عليا الخدمة فالمحل....و تما رضا غيفرح و يعجبو الحال والله لا كانت ليه.......

حميدة ( تتطبطب عليها ) باك باغي غي المصلحة ديالك...الهدرة عليك كتارت و عبد الله وخا كتشوفو هيدا ..كيسمع الهدرى عليك كيتصعب...مشكلة هو شحال من واحد ساليتي معاه و حتى لهذا صافي مابقا باك غيصبر ليك....

حلا ( تتنفس بزز معصبة ) ماتلومونيش شنو يوقع من بعد احميدة......!! عبد الصمد شمتني و هاذي عمرني ننسهالو..........

يوم الجمعة...!

خرجات من المحل لابسة جلابة كحلة و بوط د الجلد قصير ...صاك شانيل بالسنسلة فيديها ! شدات طاكسي للقهوة فين دايرة غتلاقى بيه...!

خرجات من الطاكسي و الريح تنفخ ..يديها خاوي من خاتم الخطوبة....دخلات لقاتو شاد طبلة تيستناها...! قربات منو بابتسامة زوينة و عينيها تتلمع ...تتلعب على عينيها بالزايد حتى تتزيد تزينهم و يبانو فشيشكل ...!

شافها اسامة داخلة فرنس و ناض واقف تيسلم عليها..

_ عاش من شافك احلا ....و اخيرا عطيتينا شوية من وقتك...

حلا ( جلسات تتضحك ) ياك زعما ..دايما شادين هدرة فالواتساب...اوا شنو كتعاود فين وصلتي مع شي خدمة ...

أسامة ( تنهد ) هاحنا غادين راجع لفاس هاد لاسومين ...باغي نحيد شي شغال جيت لهنا فلت والو نتلاقا بيك ...شنو اخبارك ! شنو درتي فالارض ...

حلا ( شبكات يديها و دخلات معاه نيشان تتسول و تاخد من تجاربو ) والو شنو غندير ..عاد ساليت معاها و ساويتها يد المعلم و طراكس جاتني مليون و نص ..دابا نسولك شحال اذا بغيت نبنيها تقدير مثلا ..شحال كيخصني ؟

اسامة ( بجدية ) و هنا هدا عليا على حسن الخدمة كي بغيتيها .. بعدا قبل بلا فينيسيون على حسب التجهيز كفاش واش عاليا او شويا والفونداسيو السوميلات روكارات مزيان والحديد والفصيل وزيد يد المعلم 3.5 تقريبا ....مانقدرش نحدد ليك الطوطال قبل و شحال خصك يكون عندك فالجيب بالضبط قلت ليك على حساب نتي اش باغية و الحديد راه زايد نغزة....اشنو غدير فيها وش سفلي اول R1 اولR2 وش دوفاص اولا فاص وحدة...

حلا ( حكات حجبانها تتسمع حوايج جداد عليها ) لا بعدا نبدا غي بالسفلي ...هادشي بلا فينيسيون !

اسامة ( حط يديه على يديها مبسم ) دختي ! غا بشوية علي دابا طلعيها ان شاء الله دقة بدقة....اوا قولي سمعناك تزوجتي ؟ بصح ...

حلا ( هربات يديها تتضحك ) لا بالله ! غدا تسمع طلقت...اودي العفو دايما هكا مخرحين عليها الهدرة.....ماتخطبت ماتزوجش ديال راسي هاد الساعة....

اسامة ( بجدية قال ) هادشي لي بغينا احلا....( رجع شد يديها و دخل نيشان فالموضوع ) زعما مالاحظتي حتى حاجة فيا ..ماعارفاش راسك كتعجبني ؟

حلا ( تترمش و تسكانيه غا من التحت التحت ) قالو ليك عليا تنقرا العيون ...!

اسامة : مابقيتش قادر نبقى ساكت...ديري معايا شي حل انا عارف بلي نتي عارفة لاياش تنلمح...عرفتك فهاد المدة و عجبتيني ( ابتسم حتى ضحكو عينيه ) فوق عجبتيني لهيه....خلينا نعطيو فرصة لراسنا نوصلو للزواج...؟

حلا ( هربات يديها تتقلب فعينيها ) انا متنفكرش فالزواج ...

اسامة : انا نستناك حتى تفكري الالة و ديريه فعقلك ...والله لا خليتك تفلتي من يديا ....

حلا ( ابتسمت بلباقة ) كتحلف كااع...خلينا اصدقاء و من هنا للقدام يحين الله.....دابا خصني نمشي عندي الخدمة....

ناضت واقف و وقف حتى هو بادب و باحترام ...

_ ماسخيناش....

حلا ( مامرتاحاش ) تنا والله ...سلم على عاىلتك ملي توصل و طريق السلامة...

اسامة ستناي نوصلك بعدا...ماخلاهاش تكمل...حط الخلاص و خرجو بجوح من القهوة...! دازو من قدام شباب جالسين محموعين ترمات العين على حلا...قشع اسامة البلان و طلعات معاه السخانة ..و الغيرة بدات تدخل معاه...عرف راسو راه معاه مراة تتسرق العين وخا هو بطولتو قدامها....!!

خرجو لبرا فين حاط الاوطو ديالو فتح ليها الباب تركب ...يلاه جات ترفض و تسلت ..!

قفزات حتى خرجات منها شهقة خفيفة على صوت عبد الصمد من وراااهااا ..صوتو مدمع و قوي مسموع بالجهد..

_ حلااااا....

كمشات حواجبها ..ناطقة بلا ماتحس

_ بسم الله الرحمان الرحيم

اسامة : شكون ؟ تتعرفيه ؟

حلا ( باغية تسلت ) بسلامة اتا غادية تعطلت ....

شافتو قاطع الطريق حاي لجيهتهم من حجبانو عرفتتو لاعبة عليه بالمعقول ...تدخل اسامة ناطق و عينيه فعين عبد الصمد ..

_ كاين شي مشكل اخويا

عبد الصمد قرب و ضحك ضحكة مافيهاش حس المرح و نطق مزير و طالعة ليه السخانة...

_ و الو الحياة هانية اخاي ديالي....( بسلام و هدوء مزيف كمل تيشوف فحلا و عينيه فعينيها تيحذرها و قرات نظاراتو مزيان ) تفاوبري معانا و زيدي قدامي يرحم جد بااك ....

حلا ( بلعات ريقها تتدور فعينيها ) أسامة بسلامة عليك عندي الخدمة دابا تعطلت...

جات تبعد متجاهلة عبد الصمد تتدور فعينيها وخا تنكر تتخاف منو جربات حماقو ... شدها عبد الصمد من يديها ناطق بهدوء تيخلع...حافظة هدوىو و عرفاتو راه نار حامية

_ بربي ماباغي نرونوها هنا ...

حلا ( خنزرات فيه ) طلق يدي بعد مني...

تدخل اسامة مخنزر دفع الصمدي : طلق منها اصديقي الله يهديك .شنو كاين ؟! السيبة فالبلاد ولا شنو ؟

عبد الصمد داكشي لي كان ناقصو...سمع سمية اسامة لي شافها فتليفونها مرة و قشع البلان و كملها بديك الدفعة...جمع معاه للنيف براسو حتى رجع راس اسامة للور شاد نيفو مكمش عينيه طالع لبه الحريق للراس....!و مع ذلك رجعها ليه فالبلاصة ...

تحمعات الحيحة و الناس تيشوفو و يتفرجو و يشهقو ...بجوجهم تيبانو ماشي ديال المخاصمة و الفوضى فالزنقة...لباس محترم و الساعة فيد عبد الصمد تتبان من بعييد....!غا تيبان خاسر نيت و مامعاه هدرة من داك الحاجب ...! شوميز كحلة انيقة مابقات انيقة تقطعو ليه الصدايف و خرجات من فوق السمطة واسامة كي الشرويطة حالتهم بجوحهم..

حلا شافتهم هكا خافت على راسها ولات غا تترمش و تولول...خلاتهم مقاتلين و سلتات من حداهم هاربة من الشوهة و الناس ولات مبلية بالتصاور خافت على راسها و طلقات رجلييها...

شافها عبد الصمد هاربة دفل تيسب من السمطة التحت و دفع الراجل ليدخل يفارقهم...هز صبعو فأسامة بتهديد و هدرتو ثقيييلة تتجيب الخلعة ...

_ علقها فودنيك و عندك تنساها....

مسح فمو و هز تليفونو بالزربة و طار للاوطو

حك الروايض فالارض و زاد طاحن الطرييق ....

بانت ليه دخلات لمحل الاحدية من طابقين ...ضرب الدورة بالزربة ملاقي دوك الحجبااان ..معتارف راه عندها الزهر بلي ماشي حداه دابا ...يكون برد يعرف يدير عقلو معاها قبل مايخون العهد و يدير شي مصيبة....

حط الاوطو بعييد على البلاصة و سول واحد واقف تما...

_ كاين باب من اللور نو؟

_ لا ماكاينش !

هز راسو بدون كلام.. .وقف فالباب مكروازي رجلييه و مربع يدييه و شوفاتو كي شوفات الصقررر ..!

اما حلا ..الداخل جالسة دخلات غي تسلت لقات راسها غاطسة تتقيس و تشاور راسها. .و تليفونها بغا يطرطق بالصوني...تتلقاه غي اسامة تتولول و تضرب حناكها ...

_ ويلي تشوهتي احلا تشوهتي مع السيد تفو على حالة....

من بعد تترجع تلهى مع الاحذية ...كأن حتى حاجة ماوقعات ...

البنت لي تما تتحاول تحببها فالبوط لي تتقيس و تتدير خدمتها معاها مطبقة عليها لباقة الكلام وماعارفاش حلا عايقة بدوك الحركات حيت حتى هي مولاتهم...

_ جاتك كتحمق فرجليك ...مانيفيك ...لي كيختار هاد اللون تيكون ذواااق ....

حلا ( ميلات شفايفها ) ميغسي ماشيغي مي جو بخيفيغ النواغ ....عطيني النواغ ...

حمقات البنت معاها فالاخير شرات البوط و الصاك و تماات خارجة تتصوني على خلود..

_ آلو خلود...

هزات عينيها فااباب مبتسمة غا شافتو واقف ليها بديك الضخامة و البرود تمحات الضحكة و لاو رموشها غا تيشطحو كي المونيكة...!

خلود ( فالتليفون ) حلااا شنو باغي. عاود شي حاجة تما....

حلا : قطع قطع من بعد صوني عليا...

قطعات عليها و هزات حجبانها خارحة...حسباتو ماكاينش تما لكن مع من هي...شدها من يدييها و نطق ..

_ عند بالك تهربي !

حلا ( تتقلبها تخنزير ) واش نتا مريض ويلي مالك...طلق مني ...

قصحها فيديها و جرها من وراها ...طلعها فالاوطو بزز و طلع حداها مانطق حتى هدرة غي هي تتدوي و تسوط...حاضية جنابها

_ و معاك كنهدر هاد التصرفات مكنحملهاش ....مافهمت شنو هاد الشوهة درتي...شنو هاد التصرفات الجاهلة ...مكتعرفش تسول و تفهم قبل ماتحكم ....تفووو تفووو....وقف نخرج بحالي ...الله يخليها نهااار ....

عبد الصمد ( نطق بالغوات حتى قفزها ) سكتيييي قبل مانفرع جدك ....

حلا ( كمشات عيميها صدمها ) مالك تتغوت شعندك ؟ ضربني نتينا حسن....علاش ضربتي السيد ...شنو هاد الشوهة شوهتيني سول نتا قبل ما تفهم.....جالسة مع على الخدمة المورو على الخدمة و راه صاحب بنت خالتي واش نلاقي من جيهة و نتينا تخور من جهة.....

عبدالصمد ( جمع معاها بظهر بديه لفمها معصب عيا يحبس فراسو ولكن يديه فلتو الغيرة قتلاتو عصباتو ) قلت ليك قطع الحس...شدي فمك علياااا و الا بربي حتى نقلب الكارا ....

شهقات و عينيها حماارو بالزربة ...مارضاتش يمد يدو...طلعات فيها و نزلات و طااارت تتحيد البوط من رجلييها كي الحمقة تتدوي بالزربة و د تتدمع و مجننة...

_ كضربني الحمااار....كتمد يديك علياااا....انا نوريييك.... والله اذا ماخورتلك عينيك اليوما مانتسماشي انا حلا بنت عبد الله...كضربني....

ضرباتو لراسو و غواتها مسموع تتحلف فيه... صدماتو و هيجاتو....ولى غا تيدفع ليها يديها و يشد مع الطريق معصب تيغوت وهي تتغوت و تضرب..

_ والله لا كانت ليك ...كضربنيي الحمااار....باابا و عمرو مد يدو عليااا......شوهتيني مع السيد كانت عندي معاه الخدمة و جلستي كضرب فيه شوهتيني.....و دايا جالس كتسب و تضرب...ضربتيني ...

عبد الصمد ( حاضي معاها لا تعور ليه عينيه تيقلب فين يوقف ) محعورة....ريحي عندي نقلب جدك هنااا.....حلااااااا.....

دار السينيال كاطخ و وقف الاوطو فطريق كاپو نيكرو ...شد ليها يدييهااا جاعر كثر منها ..

_ كنبان لييك عندي القرون ....عند بالك ناسي داك ميخي ديالك لي سماتو مو اسامة ....شنو عندك معاه شمن غرض عندك مع داك مييخي بلا ماتجعرينا نت** دو هناااا.....

حلا ( تتدمع و تنفخ تتبغي تفك يديها منو ) مابيني و بينو والو غا تتخور نتا و عقلك ...هذاك صاحب بنت خالتي البوهالي فهم عاد حكم...كنا تنهدرو على اللارض سولتو على البني ...تفو مالك مكتفهمش....

عبد الصمد ( عض فكو مزبر على ذقنها بالاعصاب لي تجمعو فيه ) انا البوهالي المجعورة ؟؟ البوهالي الحمار و تفوو....شنو ندير معاك غي فهمتي ..ديك اللسان شنو المعمول معاه ........

حلا ضربات ليه يديه : بعد مني اصلا انا ساليت معاك ...ماشي سوقك فياا....

طار لصبعانها مزير عليهم : فين الخاااتم ...!!

حلا ( محمرة فيه عينيها ) باغي تقولبني و صدقتي مطلق و انا ماسايقة خبار حتى يقرب العقد عاد قالك طنطون دعقلك نوض قولاا انا مطلق و زيد عليها ضاربني لفمي و باقي عندك الكمارة قاااصحة تقولي فاينو الخاتم....الخاتم يانا غنمريه قدام عينيك ...ها ..

بالجعرة فتحات الصاك خرجاااتو جات ترمييه شد ليها يديها مزيرها لعندو حاكمها من خصرها ...مابغاتش تسرط ليها ...!!

هو يغوت وهي تغوت الحيحة داك الاوطو....و الزاج فيمي متيبان والو لبرا....!!! عرقاتو و صهدااتو ولا تيفتح صدايف الشوميز بلا هاذوك ليتقطعو تيسوط مخززر و راسو تيضرو من ديك الضربة لي عطااتو ...

_ الفراق حيدو من عقلك كتسمعي !!!

حلا ( سخفات بالجرا و الغوات قلبات وجهها عليه مربعة يديها منفخة ) مابقات عندي معاك هدرة ...انا مغنتزوجش بواحد مد يدو عليا....

عبد الصمد قلب وجهو تيستغقر الله جمع قبضة يديه مكمشها عند فمو ..و الصداع ولى سكااات و هدوء ...بقات قالبة عليه وجهها الضربة كاع ماحسات بيها و ماخلات فيها حتى طابع غا مارضاتش يمد يدو ومع ذلك مزال مابردات ليها....جالسة حداه لابسة فردة وحدة و الاخررى ترمات برااا.....سكت حتى عيا و نطق منييرفي ..

_ شكون هاد بنت خالتك ؟

حلا ( تتدور فعينيها تتكذب ) سميتها سلمى كتكون فطنحة و هذاك صاحبها...شفتيني بنت الحرام نشوف فصاحب صحبتي حاسب كاع الناس بحالك عزيزعليها الغش و ااكذوب و التقولييب.....( تتضحك باستهزاء ) ولاهيلا واعرة جالسة طخونكيل مع السيد تنسولو على البني و الحديد و نتشاور معاه حتى هااد شنو وقع ..هجم سي السيد قالك حقا ماحقا صاحبك القديييم......

عبد الصمد ماتيقهاش و مابغاتش تدخل ليه لمخو ...قلب كمارتو عليها حتى هو ...و بقاو ساكتيين...!!

حتى هزات هي البوط الجديد لي شراات و لبساتو ..و هزات صاكها باغية تخرج شدها هو و قربها منو تيهدر منفخ...وهي قالبة وجهها عليه ..

_ و علاش غادية تسوليه هو ؟ مالك محمقة راسك ...نتي طلبي و الدار غتطلع بلا ماضربي ليها حساب...

حلا تتشطح رموشها و دور فعبنبها شافها سكتات ...قال راها هدات ..تلمس خدها بظهر يديه و غادي لشعرها....

_ غي نتي مصعبة على راسك كلشي ...قسما بالله و تمشي معايا ديريكت...لي فتحات عليها فمك تحضر عندك ....

ميلات عنقها تترمش و هزات يديها تتبعد ليه يديه

_ هاد الاسلوب ماديروشي معايا ...بلا ماتعذب راسك ...حيت انا مغنمشيش معاك نيشان عرفتي علاش ؟ حيت دازت فيا مرة و عطيتك عقلي و مشيت معاك فالطريق ساعة طلعتي ماتستاهلش....انا مغنتزوجشي بيك بخاطري ...و ماعمرني ننسى ليك هاد الشمتة ...تفرق علياا واااه بعد منيييي عطيني تيساااع....

عبد الصمد قلب وجهو معصب كثر منها بقات تتغلي فيه و مخها مقلوب منييرفي صوت حؤش و مدعدع ... قليل فين تيتعصب ولايني ملي تيتعصب تيتسرع و يرونها نييت حتى تيقلب كمارتو طالع ليه الدم ماكاينش لي تيعرفو قد عيشة ...!! عصباتو و النفس فيه تتغلي حتى رد مخنزر ...

_ الله ينعل جد بو هذا لي يخسر ليك خاطرك ...بغيتي الفراق جاك الفراااق.....

حلا تهزو حجبانو و برقو عينيها ..دارت فيه شي شوفااات عمرو ينساهم .....!! هزات صاكها و نطقات بجدية غير عادتها...

_ مزيان هادشي لي بغيت..الله يسهل عليك ..مانصلاحوش لبعضنا ها لي كيشرث و كا لي كيغرب...درت معاك جهدي و ماخرجنا بوالو ....رزقك غيوصل ليك مع بابا ....

قلبات عينيها منو و فتحات الباب خارجة...ماجاوبهاش و ماشافش فيها ولا ماخبط حجبانو كااع.ظ.قلب وجهو مخنزر و خلاها حتى شدات الطاكسي عاد تحرك من تما باغي ياكل الطريق بديك العملاقة بديك الرونج.....! منييرفي و مبرزط طالعة لبه السخانة و رايو بغى يتفكرع....!!

اما هي ...بقات تتطلع و تنزل فيها مامتيقاش شنو سمعات ...داكشي لي كامت باغية ولكن واقع كلامو جاها فشكل...! رجعات للدار وجهها مبدل و حجبانها ملاقيين...! طلعات لبيتها نيشان ...بدلات عليها و خرجات تتدور عقلها مرفوع و غا تتقلب فدوك العيون....!! جلسات معاهم للعشاء شادة فمها ماقالت والو و ماجبداتش كاع شنو وقع ليها هاد النهار ...! خلات ليه الهدرة و خرجات راسها...!

سالات و سلتات لبيتها ثاني...ربعات فوق فراشها مدرعة المخدة ديالها تتشاور مع مخها...

_ والله لا رجعت ليه التليفون ..هاذوك دياولي ليخدا ليا ...الطنوبيل يربح بيها مادرتهاش فعقلي ..عرفت غنفاريها معاه.....

دخلات عندها خلود معلية حاجبها فيها ..

_ مالك كتهدر مع راسك...علاش صونيتي عليا قبيلة شنو كاين ؟

حلا ( هزات كتافها ) ماكاين والو ....فخبارك انا و داك خييينا صافي ساليينا ...

خلود ( فتحات عيينيها ) اويلي ..صافي بهاد السهولة ...داكشي عندكم شن طن ...

حلا ( ضحكات بزز ) اه شن طن...سالينا و المخيرة جات من عندو هو ..مايقولوشي انا لي مكنسواش هاد المرة ....( كمشات حجبامها تتضجك مفقوصة عقلها مرفوع هاد العشية و لسانها غي سالت ) كنتفكر كنت دايرة عقلي معاه و لاول مرة شادة الطريق مع شي ولد المراة ..تتشدتي الضحكة على راسي ...صدق مطلق و مخبع عليا كنت نقدر نميك اذا قالها لب مخي و اقتنعت على خاطري ساعة خرجو لي الزواج بالزز.....هاد الناس وخا دير معاهم فوق المزيان غيشوفوك ماكتسواش ..عليها دايما خليك ماكتسواش باش نهار دير فيه حاجة مزيانة طلسي يسفقط ليك و يشكرفيه و يرجعو يعطيو ابن الخير....!

خلود ( تترمش ) و كيفاس الفراش ...من عند من ؟؟ جات منو ؟؟؟

حلا ( تتزير على سنانها ) تاصيلة الكتامة غا لي يحرقهم عظم بعظم ...فيها عرق واحد كاملين بيهم ...قالها بحال غنبقى نرغبو و نبوسلو يدو عفاك لاا ...عفاك لااا .....بحال غا هو لي كاين ...

خلود : و ياك نتي لي بغيتي الفراق الاولى شنو بغيتيه بدير ؟

حلا ( كمشات حجبانها ) كان يقدر يقولا بطريقة خير من هاذيك ....هدرت معاه كي الناس قلتلو صافي هذا هو المطلوب ماغنتفاهموش و شلا هدرة خلاني بلاكة و قلب عليا وجهو ...بحال فهم راسك و خرج من الطنوبيل ديالي.....

خلود : والله مانتيق كنعرفك نتينا زايدة نغزة و كذابة و الحاجة كتفهما كي بغيتي.......دابا واش صافي صافي ساليتو....

حلا فلتات لبها البكية تتبركم و تزير على الفراش بيديها و تفركل كي الحمقة ...

_ كون غير تربيات ليه ديك الدار قبل مايسكن فيها ..و ماعمرني شفت كمارتو في حيااتي....

_ خلود ( مصدومة ) و علاش كتبكي....

-حلا ( بعصبية ) خرررج بحالك بعد منييي ....تلصق فيا الباطل فوقاش بكيت انا ..يبكيو عدياااني ان شاء الله ياااربي......!

صباح اخر...!

جالس سي عبد الله فكافي...ملامحو جدية و نبرتو كذلك تيشوف فعبد الصمد الجالس حداه معصب و مخبي عصبيتو عندو ...ماتتحيد ديك العصبية عندو حتى يفوتو الشهورة و هاذي من عيوب شخصيتو تيبقى ساكت و مبرد نهار كيتعصب كيرونها مع كلشي و يقلب فخطرة ....!

عبد الله فكر مزيان مع مخو و قرر يهدر مع عبد الصمد فالموضوع بصراحة ....

_ انا عمرني نعطي بنتي لشي حد بزز منها ...حلا شخصية ديالا صعيبة حتى كتزير عاد كدير عقلا فالحاجة....خبيتي علينا الطلاق حتى قرب العقد و حاولنا نسلكوه مع ذلك حيت الطلاق شرع الله ماشي حرام و حد مايعرف شنو مزال مخبي ليه فالراس...و بنتي النوارة باقية عندي هي هاذيك و كان صعيب عليا نعطيها ليك ...قلت والو دابا تعمل عقلا و تقنع على خاطرها ولايني مابغاتش و ماكرهات هاد الزواج .....

عبد الصمد مخربق فعقلو و مرون باغي غا يغبر كمارتو من المغرب و يحيد ديك الجنية من حياتو ...طلعات ليه فصحتو ... من كلامو عرف بلي ماقالت ليه والو ...

_ اوا ملي مابغاتش يعني الفراق اسي عبد الله ؟؟

عبد الله : بجوجكم كبار تبارك الله و بعقلكم ...هدرو بيناتكن بلا وسيط حيت هكا ماكاين تفاهم نبقى نوصب انا الكلام ..هي ماضي صغيرة و نتا كذلك....! تناقشو و حطو النقط على الحروف ...بغات هو هذاك مابغاتش شغلها هذاك ......

عبد الصمد ( عقد حجبانو ) انا مسافر خرجات ليا الخدمة هاد الشهر ...عطيها وقت تفكر على خاطرها و العقد يتأجل ...و لتما هدرة اخرى ...كلشي مع المكتاب...

عبد الله ( هز راسو ) و نعم بالله اولدي....حد ماعرف شنو باقي تابعو فالدنيا ...اذا كانت مكتابة فنصيبك هاهي ديالك وخا طيرو و تنزلو كيحكم المكتاب و الله يسهل عليكم بجوح .....

حلا ناعسة فبيتها قالبة وجهها عليهم تتسمعهم تينكرو عليها وهي راسها غيتفركع...

_ صافي حتى هذا تبع الاخر...انا حاسة ببنتي دايرين ليها شي حاجة...بنتي دايرين ليها السحووور ....الراجل لي بغيها يقلب عليها و الخاطب لي يخطب يدير كسيدة ...هادشي ماشي طبييعي ...ياربي اذا كان من عندك راه حنا قابلين و راضين بيه ولا كانت من العبد الله ياخد فيييه الحق ......

حلا ( تقلبات عندهم صاعرة ) و لي يسمعكم تقول كنت غنتزوج بوزير و طار من يدي ....صافي مشا و هاذي الثوبة اذا بقيييت درت عقلي فشي ولد المراة يانا **حبة.....الحمار ولد الحمقة عند بالو غا هو لي كااييين....اذا درتا فبالي نجيب سيد سيدو ..غا انا ماخصني لا هو لا سيدو ....

خلود ( بهمس ) كذابة شفتها البارح تتبكي معصبة ....!

دخل عبد الله و طارت لعندو حميدة معصبة ...

_ شنو قال عبد الصمد ؟

عبد الله : السيد مسافر عطا وعد الزواج و غيمشي ...قلت ليه حلا مابغاتش قال عطيها وقتها حتى يرجع ...

حميدة : ياك قال الفراق ما الفراق ؟

عبد الله : ياهاد المراة كون قالي الفراق كون وصلتو ليك ...مشي ديرنا ماناكلو ...

حلا سمعات الهدرة جلسات جالسة مكمشة حجبانها.....خرجات لعندو تتقلب فعبنيها...

_ بلا مايضيع معايا وقتو ..انا مابغيتوش...و خاتمو حيدتو من يدي.....مانبقاش نستنى انا حتى يجي باش نرد عليه باش يبقى راشمني هاد الفترة كاملة و نظل معلقة ....

عبد الله ( بجدية ) حلا هذااا الزوااااج احلااا...ماشي لعب...جوح عاىلاات هنا و حتى اذا كان الفراق تيكون بشوية ورى بشوية ة بالعقل و بالنقاش ماشي فيق فتح عينيك صافي نتفارقو ..قاريين الفاتحة و تعطى وعد الزواج و حط رزقو عندك و وصلتو للعقد ...هذا ماشي لعببب.....

داز شهر على داك النهار...!

عبد الصمد و حلا تقريبا مفارقين غا وعد الزواج دايز بيناتهم ...لا هو هدرها ولا هي هدراتو بحال الى رشمها و علقها ماتقدر تهدر مع غيرو ولا تخرج مع غيرو ..ماعندها داك الحق ...! تفقصات و تعصبات داك السيمانة الاولى ...تتخايلو هو عايش الحياة مع شلا بنات تما وهي هنا تتفقص فراسها بسباب العلقة لي دايريها....و حساتو بلعاني مطول...! صافي مابقات تسوقات ليه ...وتشغلاااات في حياااتها... ولات ماتتعقلش...كانت بالسالف زعر رجعات بسالف كحل طوييل ... كلات راس عبد الله حتى فتح محل اخر قدام الفرع الرابع د الذهب لي مسيراه حلا...! محل كبييير فيه بياسات قلال لكن كل بياسة يا بياسة ...كل مايخص المراة....احدية كعب عالي و الحقائب و اكسسورات النقرة و الجلالب و الفولار ديال الحرير و ديال الماركة فوق 700 درهم ....! عاد تتعمر فيه و تتوصي على السلعة من فرنساا و عبد الله مسايرها ...وصاتو هاد المرة يعطي غا الفلوس والخدمة و تمارة و ضريب الحساب عليها ولايني النص بالنص ...! شادة محل الذهب و البوتيك الجديد عاد تتكمل تجهيزو ...! و بلا الخدمة دخلات ليها البلية ديال تعلم اللغات ...و لصقات باغية تعلم الالمانية ...!!! من الخدمة للقراية ...للدوران مع البنات لي خدامين عندها...!!

مابقاتش غي صوفيا.....لمياء و سارة و لبنى و خولة ماختارتهم حتى عرفات علاش و عرفات أنها ماتتدمش...خبرة فالتجارة و حلاوة اللسان و اللباقة و ذواقات و هادشي لي بغات......!

جالسة فالبيرو تتخطط فالورقة رافعة السالف بالمقبط الفوق تيبري كي الحرير تيزهق بوحدو ...! زيانت و كلشي تيقول ليها تتزيدي تقربي للثلاثين تتزيدي تزياني ....و عبد الله جالس حداها تتشرح ليه بلسان مسرح و عقل خدااام....

_ شوف ابابا يهديك الله هادشي انا قريتو وخا هاد الموديل جيب فيه نو فاليدي ولايني فاليديت باباه العام لي وراه.....هانا علاش ختاريت هاد المحل و شحفت باش سبقت الكراء من ولاه....عرفتي راه خصنا نديرو صدقة علىيه...جا فالسونطر و قدام محل الذهب يعني الكليانات ديالنا تيعرفونا ..غيشوفو البوتيك تابع لينا غيدخلو بعينيهم مغمضين...و انا قسمت الكليانات ....ها المرفحين ها الدرواش و ها لي الوسط ... جايبة سلعة لصحاب الفلوس نييت و السلعة ديال الدرواش ...و عندنا نسبة من الرجال هاذوك غيتكلف مهدي و لمياء بداكشي د النقرة ...!! حنا تمارة الكبيرة ضربناها صافي ..الكليان تيعرفنا ...غنديرو اشهار عند رضا و عند الاخر فالمدينة و فاارنكون ....و هانتا غتشوف كيفاش الرباح غيبااان دغياااا.....

عبد الله ( اقتنع ) اوا نطلبو الله...انا مابقالي شغل قلتي مقدة و ريني علاش قادة......

حلا ( شافت فالساعة فيديها ) يلاه العصر اسي عبد الله جبد الطريق توصل فالوقت ...غنمشي نتغدا ....

عبد الله : مع من ؟

حلا ( هزات صاكها و تليفونها وشعرها تيزهق معاها ) مع البنات ...نسالي و نرجع لشغلي ...يلاه هانا مشييت...

خرجات من البيرو تتشوف فساعتها ..

_ صوفيا غادية يلاه ؟

خرجات مع صوفيا و لمياء و دخلو لريسطورانتي فوسط المدينة .... حلا صديقة الكل ولايني هي ماعندها حتى صديقة ...كانت وحدة ماعاودات عطات نيتها لشي حد ...تتعاود ليهم غي لي بغات.....!!

ضاربة لبسة وااعرة بالنواغ و طالون فرجليها ...شعرها كحل محطوط ورى ظهرها و ساعة انيقة في معصمها ...تتحرك بشوية و تهدر بشوية لي يشوفها تيتخدع فيها و يقول عندها عقلاين ماشي غا عقل واحد ...تتبان مرزنة و مراة ديال المعقول ...!

من فترة لفترة تيجيو يجلسو تما يتغداو ..مطعم معروف و مولاه من نواحي الحسيمة ..! بزناز و بالطابع مافيهاش شك ...شاب مقبول و متول و باقي صغير...فين ماتجي حلا تبقى حاط عينيه عليها...كان قليل فين تيجي ...غا شافها اول نهار صافي ولى تيجي يطل على قبلها ماحدو مسالي....كلاها بشوفاتو عينيه خضرين الزهو باين منهم ....

حلا ( تتدور فعينيها طلعات شوفاتو ) وقت الغداء تسالا يلاه نمشيو ...الخدمة ...

ناضت بعد ماسالاو ...و دازت من حداه حلا دايرة راسها ماشافتوش ...!! غا غبرو شوية لحق عليها بمرسيديس ديالو حتى شافها دخلات للمحل قريب من المطعم جا ...قرا سميتو و شاف الشارع مزيااانو خرح من الطنوبيل ...! تلاقى مع بائع الاثاث و جلس تيسول فيه عليها ....

_ ريفية ؟

البائع : بنت سي عبد الله معروف فالمدينة الذهايبي ..هاذيك شادة لو جوج محلات و راه كبيرة فعمر تكون بنت 26 و لا 27....

هز راسو تيحك فلحيتو ..: هاد المحل نييت ياك ؟؟

البائع : ايبه هذا و الاخر فالمدينة....

سول و خدا الاجابة لي بغا و تحرك من تما تيرد التحية على الناس لي تيعرفوه....حتى رن تليفونو جبدو مجاوب بابتسامة ...

_ اهلا سي عبد الصمد ......

النشاط و الحيوية و الاناقة و التاويل و الهدرة مرزنة و الحلوة معروفة بيهم و باقية ...!! فاتحة لايف تتبان الخلفية وراها عامرة ذهوبااات و الاثاث مذهب فخم....كلشي تيبري...! لابسة بودي خفيف حتى تيبان عنقها و جامعة شعرها الاسود كسواد الغراب شاداه بمقبض ذهبي ...لابسة جوج سنسلات ذهب فعنقها تتوريهم للكليانات فالايف و جوج خواتم تتبين الشكيلات الجداد ...! بابتسامة و لباقة تترد ..

_ بارك الله فيك حبيبة ديالي تنا توحشتكم و بزاف كنت غابرة هاد الايام موجدة لبهم واحد المفاجاة غتعجبكم......

كملات خدمتها تتقرا التعليقات و القلوبة مشريين فالايف ...

_ تتحمقي ..

_ جاك نيو لوك تيحمق ...

_ واش شعرك هذا اختي ....

حلا ( تتفرنس ) اه شعري اختي ...

تشغلات و تخشعات و مشاااات صافي الصح الصحيح عندها بدا....شحفاات بالهدرة و الصبر و القضية ماشي ساهلة فيها تمارة و خصك تكون باردة الدم و ماتتعصبيش و توسعي خاطرك خيت الاف الناس تما كل وحدة و عقليتها و طريقة هدرتها و كيفاش تتفكر و ها المعقولة باغية غي الخدمة تكون معقولة بحالها و ها المعفرة و ماالمعصبة غي مع حوايجها و ها المحسادة و نا لي جاية من طرف منافس فالسوق تتدخل توسوس و تخسر السمعة و تخرج بحالها. .هادشي ماشي ساهل و صعيب و حلا ولفات و البيع و الشرا تتولي وحدة اخرا مهم عندها تبيع باي طريقة كانت. ...!!

جمعات و طوات و ناضت تتكمل شغلها ...! هازة تليفونها تتوصي البنات بجدية ...

_ صوفيا لايف غدا و لمياء بعدو و حسنية نهار السبت ...عرفتو و نسمع الشكاوي من شي وحدة غتخسروها معايا والله ....

صوفيا : و ختي حلا راه شي وحدينات ديال القتيلة مراض مايصبر ليهم حد ...عا جات تتكذب على الاخرى كتقولك شرينا ذهب و صدق جالوق تيتقشر و جات عند وجدة كتقولا عندك تيق راه قضية كادويات غي كذوب اذا عطاوك يعطيو غي عكر عشرةد ريال.....

حلا ( بحزم ) دير عين ميكة ماتبرر لحد و ماتعايرش معاها...ماشي على غيمشي كلشي على وحدة مريضة. فمخا ...عندك تعاير معاها خليها تنبح بوحدها الكليانات لي خداو من عندنا وعارفين اش كاين هوما ليغيهدرو و يشهدو بالحق شنو كاين ...هاذيك الفتنة دزنا منها و طاحو قبلنا فالفخ ....صافي انا غادية دابا تهلاي.....

خرجات من تما تتخلف بالزربة على قبل نقيطات الشتاء لي طايحة ....ركبات فالاوطو و دازت لباتيسري خدات شي لعيبات حطاتهم اللور و تمات غادية تركب دغيا من الشتاء هو يوقف عليها صاحب المطعم بابتسامة جميلة...

_ سلام الله عليك....

حلا دورات راسها لعندو شادة باب الاوطو بيديها ....دور عينيه بالزربة عليهم مالقاش الخاتم ...حتى سمع صوتها و طريقة هدرتها حمقاتو ...

_ و عليكم السلام اخويا ..كاين شي مشكل ؟

ابتسم و نطق

_ انا علي جديد على منطقة كنقلب على سي عيسى كبيع كوادرويات عرفتيه ...

حلا تحركو صبعانها لشعرها بعفوية و حاجبا

ها تهز ...

_ متشرفين سي علي....و مرحبا بيك ماكاينش هنا شي حد تيبيع كوادروس ...( تتنعت ليه ) هنا الذهب و لهيه حوايج النساء و تما الاثاث كلشي على عينيك....

علي ( حاضيها ) سي كلشي على عيني ...شنو سميتك ؟

حلا ( خدمات مود التعفار ) فاش محتاج سميتي اخويا...عفاك مشغولة باغية نمشي...

حمارو عينيه و شد ليها يديها قبل مادخل تيدوي بقوة...

_ عطينا نمرتك احلا.....

حلا ( تخلعات ) طلق مني الشريف ...( ضرباتو لصدرو مهربة يديه ) واش منيتك....

علي ( عندو نيشان نيشان حمقاتو صافي بغاها وخا تلاقا السماء مع الارض ) مالنا اشنو قولنا ..بغيت نميرو ديالك....عحبتيني و باغيك الغزالة ديالي....

حلا ( طلعات معاها الخلعة و مابيناتش ) نتا شوية حمق...نخرج من واحد يحرج ليا واجد حمق منو ...سير بعد مني ...

زير على يديها معصب ..

_ كيفاش بعد مني....قلنا ليك النمرة علاش مابغيتيش تعطيها....( تينفخ و شوفاتو ليها مخلطة باعجاب و عصبية حمقاتو و عصباتو ) مخطوبة ؟ مزوجة ؟!

حلا ( مابغاتش ااشوهة و الخلعة منو ركابتها ) غتعملي المشاكل اخويا...طلقني خصني نجيب ولدي من المدرسة ...والله حتى نغوت نجمع عليك الناس ....

علي : نجيبوه بجوج ...ولدك هو ولدي.....

حلا (دفعاتو معصبة تتغوت ) و بعد منييي.......

تحمعات الاعين عليهم و علي لصقة صعيية ماتزعزعش ... كيعرف حاجة وحدة حلا بغاها عجباتو صافي بغاها ...حتى حلا من النوع لي تتعجب الرجال و كثر من نوع علي ...الزين و الفورمة و الصويت الحلو تكون حتى مزوجة ماسوقوش ..ماشي حبا فيها يزها معاها شي شهورة حنى يقنط و يرضي غرورو و يشوف نوع اخر.......

تدخل واحد تيفكها منو ووالو و

نطق واحد فيهم راجل كبير تيجر فحلا

_ اجي ابنتي ..اجي لاحولا ولاقوة الا بالله ...سير اولدي خلي عليك بنت الناس ...

علي غا فلتات من يدو جمع الدفلة و دفل فالارض تيحك رقبتو و يلعب بلسانو شوفاتو تتخلع.....شاف فيهاا شحال تيهز فراسو و تقلب بحالوو......!

تفكات الجقلة و مشاو الرجال بحالهم ركبات بالزربة قلبها تيضرب تحركات من تما و تلاقات بخلود ركباتها معاها شافتها هكاك تتنيش على وجهها تتسوط ولات حمراء و مخنوقة...استغربت...

_ ويلي مالك ..

حلا ( شادة راسها ) لصقني واحد عملي الشوهة اخلود...الشوهة.....و انا متأكدة والله لا تفك مني....

خلود ( بصدمة ) شكون شي صاحبك القديم...

حلا ( خنزرات ) شمن صاحبي واش انا حمقة نتصاحب مع بزناز ...و نبصم عليها حتى بزناز عندو ريسطورانتي هنا فتطوان ...سمعتهم كيهدرو عليه البنات ديك المرة ...و كان كيشوف فيا ...حتى طاح عليا قبيلة ...لاصقني بغا النمرة ...قتلو خصني نمشي نجيب ولدي من المدرسة تصور شنو قالي قالي ولدي هو ولدك...

خلود ( بقلق ) هادشي لي كان ناقص ...ديكلاري بيه ..واش السيبة زعما هذا تياكل فهذا....شنو غديري مع عبد الصمد ؟سمع مني اختي و تزوج حسن لك ...

حلا ( جمعات حواجبها ملي جبدات ليها سيرتو ) ماغندير معاه والو ...و مغاديش نحمق راسي معاه...غيجي على خاطر خاطرو نحط ليه رزقو و الله يعاونو....

خلود : و نتينا تعرف....قلت زعما راكم تتهدرو و تفاهمتو ...

حلا ( ضحكات بدون مرح ) ماهدرش معايا من نهار مشى و ماهدرتش معاه تنا...شابع بنات تما و يجي يبقى يطول يدو على شعري ووجهي و يديه موسخين بالشيخات ....

وصل النهار لي يجي فيه عبد الصمد !

عيشة عرفاتو جاي قربات دير العرس بالفرحة..توحشاتو ...! تتوجد ليه شهيوات لي تيعجبوه و توجد ليه بيتو...! الفرحة باينة من عينيها ...

_ العزري ديالي ماجي اليوما الحبيب ديالي المرضي قالي غيجي اليوما...صفاء فاينك اللفعة فاينك ...اجي لهنا....فين هو سعيد فين سكينة ...شنو هاد الروينة...

زعزعاتهم و عصباتهم مزيان ديك النهار...! ماجلساتش غادية جاية و شوقها لولدها كبيير...!

و حلا داك النهار طلعات مع عبد الله لتطوان ....الخدمة مزيرة و السلعة غتوصل اليوم و العمال كثار فالبوتيك ....! حتى جات وقيتة الغداء جلس عبد الله فالبيرو تيرتاح ...و تيشوف فحلا ...

_ عبد الصمد غيجي اليوم غنشوفو شي سويعة نهدرو فيها كي الناس ..و نشوفو حل لهاد الروينة...

حلا غا سمعات سميتو رمشات تتشوف فتليفونها ...حتى عصباتو و غوت

_ معاك احلااا....

حلا ( تترمش ) علاش كتغوت ابابا....

عبد الله : معاك كنهدر و نتي عقلك فاينو ؟ حضرو معانا و سمع مني...الروينة خصا تسالي يا إما تكملو كي الناس ولا توقف صافي ....

حلا ( تتدرو فعينيها ) لي بغيتي ابابا غا بلا ماتغوت....

سالاو شغلهم و تم عبد الله خارج و من وراه حلا تتسمعو تيهدر مع عبد الصمد فالتليفون ....! دارو يتلاقاو فكافي تما يهدرو...! ركبات حدا عبد الله وتحرك للبلاصة المعلومة....! خرج عبد الله وهي من وراه داخلين للمقهى....لابسة سروال ثوب اسود كلاسيكي و حداء عالي رامية شال فيه علامة لويس فيتون على كتافها من البرد و صاك بالسنسلة فيديها ...شعرها كحل مسرح فيه اللمعة...! حنات عنيها ماعلاتهم فحد تتمشى و تتسرق العين وخا بلا جهد ...تابعة غي عبد الله حتى وقف قدام طبلة عبد الصمد و سمعات صوتو الحرش ( اهلا سي عبد الله ) تيتسالم مع عبد الله.....هزاات راسها تتشوف فيه بنص عين لقات عينيه عليها ...مد ليها يديه ببحة قال

_ حلا لباس...

مدات ليه يديها معلية حاجبها

_ الحمد لله نتا لباس ...

عبد الصمد ( جلس جلسة ملكية كي عادتو تيرد عليها بهدوء و عينيه تيهربو ليها ) الحمد لله ....

جلسات حاطة صاكها قدامها ...! و عبد الله بدا الهدرة بجدية...

_ طال غيابك اعبد الصمد حتى قلنا الطريق محال تردك ...

عبد الصمد : الخدمة اسي عبد الله....و ها حنا جينا باغي هدرة بنتك ...عطيتها وقتها تفكر على خاطرها ....

حلا ( شافت فيه بعويناتها المجبدين ناطقة بهدوء ) انا عندي 27 عام ماشي 17 الهدرة غتسمعها مني فحضور بابا ...خليتيني كثر من شهر معلقة فسميتك ...و قبل ماتمشي قلتي غا فترة قصيرة و ترجع...و ماغنزيدش نعلق على هاد الموضوع حيت تنا تشغلت بالخدمة و ماحسيتش كيف دازت هاد الفترة....

عبد الله ( بجدية ) من التالي احلا....

حلا ( بجدية ) من الاخر كنشوف انو هادشي خصو يوقف ....انا مابغيتش نكمل فهاد الزواج من غدا غيوصلك رزقك كلو و نساليو هادشي ..

عبد الصمد ( لعب بلسانو في شفايفو جامع حجبانو ملتزم الصمت )

عبد الله ( ماعاحبو حال ومافديه والو ) و نتا اسي عبد الصمد ...

عبد الصمد ( جامع حجبانو تيشوف فحلا ) مابقات هدرة بعد هدرتها اسي عبد الله .....

عبد الله ( هز راسو ) كلشي مع المكتاب ....مافيها باس...مانقدرو نديرو والو مع المكتاب....الله يسهل عليك و عليها.....

قالت كلامها و جمعو و طواو ...عبد الصمد من نهار عرف هاد المخلوقة لي جالسة قدامو ولا مبرزط...عجباتو صافي بغاها مراتو نيشان ...حاول و عاود معاها حتى عصباتو و قلب عليها و رجع ليها ثاني و عاود تعصب و قلب عليها ...حتى تيلقى راسو راجع ليها.....طلع ليه هادشي فراسو و طلعات ليه هي فراسو ...مالها كاينة غي هي ...خير منها شاف و عاشر و انوثة عليها و الزين فايتينها...غا تيشوف فيها تيتفكر اسامة دمو كيسخن عليه و كيزيد يكفر عليها مارضاتش و ماعمرها تبلع ليه....صافي بغى يريح راسو من الجنية المدعوة حلا...قبل ماتخلط ليه مع دمو كي السم ....!! بقى حالس معاهم غا بزز ...تيسمع لعبد الله تيهدر وهو حجبانو ملاقيين تيشوف فكلشي الا فحلا...! و حلا ماحاساش براسها مزيان و ماعاحبهاش الحال...خاطرها مزير و بغات هي ترتاح من داك الشعور...!

صافي جمعو و طواو و كلها فين ناض و شاف جهة غير على جهة الاخر...! عبد الصمد مقصح راسو و معفر كثر منها ...لوح يديه لعبد الله و ركب مرسيدس جديدة ديالو ...! خدا جهة و حلا تبعات طريقة جهة اخرى ....!! بحال عمرو كانة بحوح ولا كانو فطريق الزواج...داك الخيط تقطع وتفك على بعضو ...! هاذي هي حياة حلا ...بنت حميدة و عبد الله....من راجل لراجل ...بلا حساب و كلهم باغينها و داخلين معاها نية الزواج ....من قبل إياد و الرجال في حياتها كثاااار....النصراني ها السعودي ها الفاسي ها كازاوي ها ريفي ...مشاو و تبعهم إياد و تبعهم جوح بعدو و اخيرهم عبد الصمد ....! اول واحد توصل معاه لعقد الزواج ..كانت على شوية و تشد ليه و تقنع بيه و كانت غتولي امراة متزوحة....و كانت حاجة اخرى.....!

ماعرفات واش غيبقى هو اخيرهم ولا جاي الخير بعدو ...! عينيهم تلاقاو دار فيها شوفة قاصحة و زاد طاحن الطريق بالروايض حتى غبر..... بحال غي كانت تتحلم و في حلمة عامرة اكشن و جرا و خوف و ضحك و زهو ...من نهار المقبرة لنهار الجبل ...و ايامات و لقطات جمعتهم....شبعات خلعة معاه و شبعات تلفة و شبعات ضحك ....و اليوم فاقت من ديك الحلكة ماعرفات تنفس و تنهد براحة ولا تحس بفراغ ...! شعورها مخلط و مافهماتش راسها...! قالت السخانة طالعة لبها ..تاخد شي سيمانة ترتاح فيها و تفيق حلا على راسها ...و كيف مشى عاد الصمد جاي بعدو غيرو ...!! لا هي ولا غيرها عارفين اش باقي مكتب ليها....!!!

يتبع...

‎