حياتها روتينية بكاء في بكاء ...!من نهار دار ولدها ست شهور وجلسات فالدار هي تتحس براسها راجعة للور...تحت عينيها كحل و النفسية مدمرة ..شعرها تتمشط النص و تخلي النص...! لابسة بيجامة دوزات بيها يوماين ...! ناضت من ناموسيتها شعرها طويييل ماشي طولة عادية هابط لتحت مؤخرتها و مشعكك شوية...تليفون فيد و يد فنصها تتصوني لحميدة بصوت باكي و باهت...
_ ماااما بغيت نرجع ..ماشي شغلي بغيت نرجع بحالي ...مانبقاش معاه حتى دقيقة .....
حميدة ( بغات تغوت بالفقصة ) و نعلة الله عليك يابنتي ..يا ناقصة العقل اجي نيت نوجد ليك شي تييو نحمر ليك لحمك بيها حتى يىجع ليك عقلك ..انا صافي غنحماق معاك ...عاملة دراما من والو واش باغي. تخرج على حياتك بيديك ابنتي ...واش مكتفكريش شكون هذا لي يديك على عقلك ..كتبكي و تشهق علاش المسكينة قالك حلمتي راجلك كيخونك...والله يابنتي الا عندك الزهر بعيدة ياحتى نطيح عليك شوية....
نسيم رموشها تيقطرو بالدموع هدرتها حانية و ماتتغوتش وخا تكون معصبة وواصلة بيها لفين ...و الحاجة لي كطيح فراسها ماتحيدهاش بسهولة....مسحات دموعها وهي تتقول...
_ ضربني ولا شويني ..انا عارفة شنو كنقول...راجلي كيبغي خدمتو عليا اماما و ماعمرو مايكمل معايا شهر مكمول ...و انا حلمتو عرفتي شنو حلمتو يعني راه بصح دايما تتوقعلي ....انا عارفة لي حلمتو تيكون وقع و مجرباهاااا.....
حميدة ( بصرامة ) نسييم يلا شغل تبرهيش ابنتي...جمع ولادك و رد عقلك بلاصتو وصيييتي ليك دير عقلك راه الشك لي فيك غيخرج على داك العشرة لي بيناتكم انسيم سمع مني ...كنعيا نقولك نقص الغيرة الغيرة نقص منها ...خنقتي راجلك عطيه شوية راحة فين يتنفس ..ماتبقاش تشك فيه و تقولها ليه فوجهو ..راه عندك الزهر طحتي فيه شارب عقلو ....
قطعات عليها مخلية حميدة قلبها واكلها عليها تتضرب فخضها و تولول و تشوف فبنتها خلود الجالسة حداها تتسمع كرشها حتى هي واصلة لفمها قربات تولد ...
_ مالا نسيم ؟ تخاصمو ؟
حميدة ( بهم ) دابا نعيط لعبد الله يجيبلي بنتي لعندي...نسيم من نهار شدات الجلوس فالدار و كنشوف عقلا مزعزع ...اابنت تشيرات عندي ...دابا تكون بنتي عندي ....
خلود ( تتسوط ) و خصها تجي باش نجر لبها ودنيها شوية...تنقص من الغيرة المريضة ديالها....واش مكتشوفش راجلا شحال كيبغيها دايما خارجة عليه بالغوات و المشاكيل و جابدة ليه الخيانة...انا و تخنقت بلاصتو تخنقت....قول لبابا يجيبها لهنا على مايجي يحيى من دبي ...راه باينة اخيرتها دخل فاكتئاب وهي كي ولات ..كبر من عمرها ماشي نسيم ختي لي كنعرف لاا...
حميدة ( تتنهد وتهز فراسها ) لالا....تبدلات تبدلات...وجهها كان كي البلار صافي و حالتها عمرها تكون موسخة ...شعرها كان حرير وهي مربية السالف فيكم ...و دمعتها ماطيحش و صوتها مايتسمعش....بنتي تبدلات ...غتمشي تموتلي بالوسواس و الشك.......( ناضت واقفة تتصوني على عبد الله و تولول ) دابا نعيط لعبد الله يجيبلي بنتي لعندي....دابا......و صوني على ديك الدايعة حلا ابيل فييديو نشوفا بعيني فاين هي.....عجباتا تركيا مابغاتش تهبط الفرفارة الاخرى داكشي لي كان ناقصها...التزيار مابقاش تما...تلاقات مع سلمى و مشااات عجبها الحال....صوني علىيها دابا ...حتى داك خطيبها دايرة ليه كي الخاتم فيديها مافيهش حس الغيرة....
خلود ( تتضحك ) مايقدرش يهدر تيخاف تقلب عليه ....
خلود ( فاتحة انستا تتطلع ) بشاااخ على تصييورات ضاربة ليك بالايفون فالشميسة....هي لي جات معاها تقول ماتابعها لا حمد لا محمد ...مامخطوبة ماداخلة للزواج ....
حميدة بحزم و غوباشة قطعات على عبد الله و شافت فخلود ...
_ ارا نشوف ديك الفرفارة شنو لابسة ....
خلود : الزواق لابد منو ماتتعرفيش حلا....
حميدة ( تتشوف بعين مدققة فالتصاور ) بنت الهم جنابها تيسخنو عليها...عارفة راسا عاطية العين و كتزيد تزوق و تحكل و تجبد دوك العينين و تزير على ديك ال*رمة و الصدر....و داك الشعر مابغى يطوال ليها حلفات حتى تلصق باباه ...حاضية غا الزواق و اللباس و الخروج ...كانت غطيحلي كوما كون مامخلاهاش عبد الله تمشي لتركيا...كلاتلو دماغو بجوج هدرات و طارت كي الدبااانة.......الخوف ديالي يانا هو يمشي يلصق فيها شي ولد الحرام مايعرف لا مزوجة ولا مخطوبة...كنقولا تنقص من هاد الزواق راه غطيح مع شي كارثة مقطع يدو من رحمة الله ....والو ..شكون يسمعك يا حميدة....( تتطلع فالتصاور و تنكر مكتيعاااش ) شوف شوف زعما الساعة و الطويكين و الحالة ...انا واعرة...سيدة اعمال انا....دابا نصوني عليها تجمع هاد التصاور لا يمشيو يضربوها بالعين .....
خلود ( حيدات ليها التليفون ) خليها شمن عين حتى هاديك بعدا تتشد فيها شي عين ......
هدرو معاها ابيل فيديو ...جاوباتهم متكية لابسة كسيوة معرية من الكتاف و قالبة شعرها لجهة وحدة تتفرنس....
_ هاي ماميتا ...تنا توحشتك والله العظيم كنتخايلك حدايا فين مامشيييت....
حميدة ( تتضيق عينيها ) و نقص ابنتي من دوك التصاور عرفناك فتركيا كلشي عرفك غا نزلي للارض بركة من الفوحااان ....انا بغيت نعرف داك الراجل عندك مكيقولك والو ...
حلا ( ضحكات حتى تغمضو عينبها ) علاش تنقولك مابغيتوش ريفي اماما ...بغيت واحد عقليتو كي عقليتي....عادي شنو فيها حتى هو طالقها دوران في دبي شكون هدر معاه ؟
حميدة : و زواج زييين هذاا ...والله مشى المعقول مع مواليييه والو مابانش ليا فهادشي ديالكم.......وا اش نديرو معاك ذوقك هو هذا صافي قنعتي بيه حد مابززو عليك...الله يعاونكم......حبيتيه و حبك الله يجعل البركة ...
حلا ( تترمش ) اه حبيتو اماما حبيتو...
خلود ( بمكر ) : حباتو كيف حبات لي قبلو ....تقول متافقين بجوج تغبرو كمامركم من تطوان.....
حلا ( جمعات الضحكة وفهمات على من تتهدر قلبات وجهها تسيفات ) بسلامة اماما.....
جمعات شعرها الاسود ربطة مهملة ...! هزات نظاظر الشمس مغطية عينيها المنفخوين...! حضنات ولدها عندها و عبد الله تيشوف فيها بحسرة هاز البنت...
_ ماغدوزيش عند ناسك قبل ؟
نسيم : لا ماعندي غرض بيهم الرياض خاوي بعد العصر .....خصني غا نغبر وجهي من هاد الدار جابتلي الخنقة مابقيتش حاملاها....بفف...
عبد الله : اري سورات الاوطو ديالك ندخلا للݣاراج و عدل كرسي ركب ولادك ....
بعد ساعة بالضبط ...جهزات ولادها و ركباتهم كل واحد منين تييجر فيها شعرها كان محموع ريشوها....! جلسات القدام سخفانة ...
_ عرقوني....
عبد الله : وسع خاطرك معاهم ماتغوتش عليهم باقي صغار....( شافها ساهية ساكتة جبد معاها الهدرة ) شنو عندك عاود مع يحيى ...
نسيم ( تتهرب عينيها ) ماعندي والو ابابا غا قنطت و تخنقت و تخاصمت مع مراة خوه عصباتني و تجمع شي مع شي و عطيتا للبكاء.....
عبد الله ( بمزاح ) و فين السالف الحرير كيقلب المجاج فايح منو القرنفل و الضحكة الزينة مكنشوف والو انا ....
عبد الله ( مسايرها مزال تيشوفها الصغيرة ديالو و غتبقى صغيرة فعينو ) هادشي عندك قصيرر...واه واه على قصير... عطي شوية لخلود و شوية لحلا مايكسابوش النص من ديالك......
نسيم ( ضحكات من فوق قلبها )حلا مزال مارجعات ؟
عبد الله : غترجع هاد الايام .....مشات غا سياحة ماشي اقامة هههه....
شدوها كلام مع بعضهم...حتى وصلو لتطوان مهلوكين بالطريق...! نعسات ولادها عاد جراتها حميدة لعندها و خلود واقفة عليها معصبة...
خلود جات تزايد معاها فالهدرة غمزاتها حميدة و قلباتها محنة تتسرح يديها على شعرها ..
_ صافي جلس معانا حسن من الجلاس بوحدك ...حتى يجي راجلك ...عارفاك ماولفتيش الجلاس فالدار و مولفة القراية و الحركة والخدمة الخروج ولايني ولدك صغير حسن من اي حاجة اخرى ....بقى فيك الخدمة ديالك و الماستر ؟
نسيم ( زيرات على فمها ) كون ماكنتش والدة كون دابا كنقرا الماستر ديالي على برا ...المخيرة تتحلم بيه و انا جاتني و ماقدرتش ؟
حميدة ( تتواسيها ) و نتي ابنتي كتشوفي بعيد بجوج ولاد و باغية تقراي برا كي غديري ليها...الله يجعل البركة عندك جوج إجازات و خدمتي جربتي الخدمة صافي قنعي بيهم و حمدي الله و تهلاي فدارك و فوليداتك و ماتبردشي غدايدك فراجلك ....انا عارفاك كتغير منو يابنتي واش كاينة شي وحدة كتغير من راجلها....واش كتعاند معاه ..صافي هو عندو شحال من ديبلوم و شواهد حتى نتي بغيتي كثر منو ...هذا زواج عندك ؟
خلود ( دايرة كي السوسة فوسطهم ) كتغير عليه و منو ...البنت عندك خصها اعادة الهيكلة.....و نتينا لي لصقتي فبابا فالصغر و دار ليك الوراق و طلعلك معاه..و قريتي تما حتى العربية تلفات عليك ماتعرف حتى تكتب جملة بالعربية و ملي جيتي لهنا عاودات ليك حميدة الثامنة و صدقتي ساقطة فالتاسعة و ضيعتي عاماين فحياتك....ملي قلت ليهم خليوها هنا حسن ليها من تما حد ماسمع ليا ...
حميدة ( خنزرات فيها ) ماعندك عقل لا نتينا لا هي لا ديك التالفة الاخرى ماعرفت حسكم لمن خارجين بغيت غا نعرف فين عقلكم متلف فييين ....
عيشة ياعيشة...! حارة و السم تيمشي فيها عمرو يوقف....! نهار عرفات عبد الصمد تفارق على حلا دارت عراضة ...فرحات و طارت صغارت بسنين على عمرها بالفرحة....ولايني ماكملاتش فرحتها ملي ولدها قطع الطريق للدار....! ست شهور ماشافتوش تتهدر معاه غغ ابيل فيديو ...توحشاتو و توحشات الدار تعمار بيه.....! طاح عليها الضيم و حاقدة على حلا ...! و دابا واكلاها دودة اخرى ماهي و مالونها....!
جالسة جلسة سلطانة نعام يالالة....تتهدر مع ختها عاقدة حواجبها...
_ سمعت الصوت بودني يانا نسمع الحيوط شنو كيقولو لبعضوم ...و نفلت صويت العايلة ؟ كنهدر معاه عادي حتى كنسمع صوت عايلة معاه فالبيت......فالبييييت اسعدية فالبيت
الاخت ( تتضحك ) ويلي اعيشة و يبقى بلاش زعما ....عنداك غا تكون سقسيتيه تما نشلل يدي ....
عيشة ( ضيقات عينيها مركزة ) يدير لي بغا غا مايكونشي مزوج بيها بلا خبار حد والله لا سمحتلو عليها لا دنيا لا اخرة ....غا يموت نيشان لجهنم يموت ساخطة عليه.....
الاخت : و هاديك حلا مابقات بانت حتى هي....
عيشة ( تتغزز سنانها ) ان شاء الله تكون غارقة فشي بير غارق ماتخرج منو ....اشنو غندير انا بالشوفة فيها و فكمارة ديالا ....غي يجي والله لا فلت غنزوجو بيدي وخا نعرف نلصقا فيه صحة مابقات تنفع معاك لا سخط لا رضى.....
حلا ! الدنيا ماقدتهاش بالفرحة...! عايشة اللحضة مع راسها ...جمعات الفلوس لي تشبعها و تحيد الشوق ...! و شحال عزاز عليها الفلوس الساهليين .. ! و شكون يعطيهم ليها...عبد الله حتى اذا عطاها يعطيه قد الجهد و هي لا باغية فوق الجهد حتى تتصدمو و يجمع ليها الحساب...! خدمات مع واحد النصرانية من عاىلة زوج خلود ...كارولينا مراة مسنة واحد الزهوانية كثرمن حلا ..تلاقاو بجوج نييت لصقاتها تعلمها الدرجة ...حيت طاحت في غرام تطواني مغربي شاب صغر منها قد حفيدها و رابطة راسها معاه...هو معاها على الفلوس وهي باغية الشباب و الزين...السيدة كتموت على المغاربة الرجال و الدرجة تتحمقها و مابغات تدخل ليها للراس ..جات زيارة لحميدة و شافت حلا ...! تلاقاو زوهانيات بجوح عطاوها للخروج و الدوران....حلا الامر متعلق بمصلحتها ولات لسان حلو تيقطر ..! قالت ليها تعلمني و لي طلباتو يتنفد ....اذا مانفعات هي تاخد اساتذة خصيصا حتى يعلموها لكن حتى تجرب من عندها ....! خلود دايما تتهرب منها تتصدعها فراسها ...عكس حلا لي جات معاها و قالت والله حتى تجرب...
ااش غدير حتى تعلمها وهي كثر من ثلاث سنين وهي تتجي لتطوان ..بزز عارفة لباس و كنبغيك...معلوم كنبغيك هي اللولى بيها باش تتبغي تعيش الحب مع الشاب المغربي لي مصاحبة معاه ...!! قتلات معاها حلا و فقصاتها...وو مع ذلك بقات صابرة لقصوحية راسها...حيت مخيرة مع راساتها...الرونج و المسارية و الدوران في طنجة حتى غبرات كمارتها من تطوان فخطرة ....و بقات مع كارولينا....! حتى تعلم الدرجة...اش دير حلا حتى تدخلها ليها لراسها...! حطات ورقة و ستيلو بعييد و طفات ليها المسلسلات المغربية و دخلاتها لبحار و لعمق المدينة ...! للسوق السعبي و الحمام و التحمعات و خلقات ليها معارف ...ها سي حمد بياع الثوب و ها الخضار و ها الجزار ...بياع ملابس التقليدية و الدرجة و اللهجة الشمالية تتشير ...! جاها داكشي بحال شي موسم او مهرجات حمقها....! ولات تتجي يوميا و خلقات معارف ...بواحد الشعر حمر مقرط و السروال ملون كلو بالوان قوس قزح و المؤخرة مهبطة و ممحية بحال المطربة ....! قصيرة و تتمشى كي البطريق ...عجبها الحال و حاضية غا التصاور ...! و مشحفة معاها حلا...حتى ولات تتهرب ليها و تمشي دور فالاماكن لي تيعجبوها و تتستغرب من هاد الناس لي عندهم الفلوس شنو تيعجبهم فداكشي....!
و هاهي عمرات الجييب من ورا تمارتها مع كارولينا و الخدمة مع عبد الله...! طارت طيرة وحدة لتركيا....! شبعات دوران و زهو و تصاور ..!
ها الملاهي المائية و ضاربة تصيورات فميناتورك الشميسة و الازهار ملونة و الخضورية و المعالم مصغرة فديك البلاصة ...! تتصور و تنشركلشي تيصيفط ليها " حلا تفكرينا بشي كادو من تركيا عنداك تنياينا..."
تتجاوب بمرواغة و ريحة كذوب ضروري منها " علاش انا كرهت اختي تفكرتك و خاطري بغا ياخد ليك شي حاجة و لايني مانقدرش نتقل الفاليزة ممنوع ماخصنيش نفوت واحد الوزن محدد عرفتي راه غنخلص عليها الضوبل ثمن الكادو ......"
شدات كاع داك الانستا و جمعات حويجاتها رامية يديها و رجليها قوق الناموسية تتنهد فرحانة فوجات و بردات غدايدها ...!!
حتى النهار لي غترجع فيه للمغرب.. !
حميدة فرحانة تتحط الضيافة لوحدة من العائلة بعيدة شوية...
_ مرحبا احتي اسية والله الا نورتيني....
اسية ( بابتسامة ) شحال ماجيت ياختي....غا فمدينة وحدة و كلها فاينو غارق ...درتب الخطيبة لحلا حسي مسي ياختي....
حميدة ( دارت رحل على رجل تتبسم ) والله الا الجيران و مادخلت حد و ماعلمت حد كتشوف الجيران القراب و مافخبارهمش...درت كلشي بالساكوتي....ماجبت لا دقايقية لا والو ...حلفت ماندير حتى حاجة حتى للحفلة د العقد اذا ط
كتاب...دايما كنديرلا الحفلة على حقا و طريقا و كتشوف ياختي حتى وحدة ماكتكمل...واش قالو ليها عليا خدامة فالحشبش ...كل خطبة بالملاين خاسرة عليها فاللخير تتقولك لا والو قلبي مابقاش باغيه....صافي حتى دير العقد و نكريلا القصر ندير لبنتي شي عرس كلشي يهدر عليه و نعرض كاع الحباب ولاهيلا هادشي لي كاين ماغرضي نخبع على حد .....
اسية : والله يكمل عليها بالخير ...و يجيب ليها التيسير ...قلتي اايوما راجعة من تركيا ؟
حميدى ( بفرحة تتضرب على صدرها و تفرنس ) نكذب ماكاين لي كيفقصني قد ديك الطيارة ولايني توحشتا ...قلبي هيدا كيغلي باغا غي نشوفا...كتغبر عليا غي سيمانة كنوحشا بنت الهم.....من الصباح و انا فالكوزينة كنعملا الماكلة لي كتحملق عليها ...
أسية ( تتضحك ) و حلا عزيزة علينا كاملين اختي شكون مايتوحشهاش....صافي دابا غتزوجا للفاسي تبعد عليك شحال ...كيف عاملين عاىلتو مزيانين ؟ كنسمع الفواسا الله الله يابنتي كثرة الهدرة و التحنزير .....
حميدة ( تتجيها النفس على نسابها تتكمش حواجبها و تهز راسها بالنفي ) لاااااا...لاااااا ابدا ...زوجت بنتي نسيم من تما و دابا حلا خطيبها من تما....بالعكس ناس ذواقين و متولييين...عرفتي دوك الفواسا القدااام الاصليين ...التاويل يااسية مانعاولكش التاويل و الهدرة حلوة و مرزنة و التقلدي و الاصالة ناس الله يعمرهم دار ....و خطيب حلا سميتو أسامة خدام فطنجة نيت ماشب بعيد غي عائلتو من فاس...حتى هو ولد غزال زوين و باقي صغير فالدار ديالو و مقاااول.......
نسيم و خلود فالكوزينة تيسمعوها و يوشوشو ...
نسيم : سمع ليك حميدة كيف كتهدر على نسيبها ماتقولش هذا ليكظل تعيب فيه ماحملاتو ماقبلاتو ...
خلود ( تتضحك ) تعيب فيه و ماتخلي اي يهدر فيه ...مع من نتي مع حميدة حاجتها تبغيها كي اابلار و تخرج نقية و يعاودو عليها الخير من فم البراني.....اما واحد مو بعدا ياربي تسمحلي ماحملتاش...باينة فيها مسمومة و حاكمة فولدها ....
نسيم تتستف الحلوى فالبلاطو ...جامعة شعرها بمقبض فضي لابسة جلابة قصيرة حد الركاب ...تتنهد و تعاود ..
_ يكون لي يكون ماتكون بحال زهري انا...الناس ماتفكو مع وحدة اما عندي جوح عجوزات جووج يهودية انا ...حتى عندي هاد الزهر معكس....
خلود ( حبسات الضحكة ) شيخك هو لي عبر و نوع مع راسو ...المصرية ولدات و الفاسية ربات ...شكون لي كتحكم فيحيى كثر ؟
نسيم ( غوبشات ) هذاك الفرفار مكيحكمو حد ...عند بالهم سارقة ليهم ولدهم ماكيشبعو منو لا انا لا هوما....( بغيرة ) انا ماهمنيش هوو ...هامني ولادي ماشادين حتى اتجاه ...ملي كنت خدامة كانو كيبقاو بزاف عند زينة المصرية ولات ليك يلالة أزهار على فمها غا سدي بوزك ...سدي بوزك مع السين عندها شين كملاتت هادشي لي شدات الفهايمية ....ملي تلصق فيهم الفاسية هاذيك كتبغي تاكلهم كتسطى عليهم....كيتلفو مع لهجتها ...تولي تهدرليا بحالها....اجي نئولك ماتئولي مانئولك....للقاف تولي الف ...كنشوف بنتي ضاعت ...تنهدر معاها بالدرجة كتبقى تشوف فيها بحال كنهدر بالشنوية ....وهي كثرة اللهحات تخلطو عليها و عقلها صغير اختي خفت على بنتي ...
خلود ( تتضحك ) همك بوحدو ..ضحكتيني ...والله الا النشاط عندكم فديك العائلة...اول مرة نشوفها فالتاريخ الشريكات مفاهمات....
جات العشية ! و حطات لالة حلا رحالها فدارهم....!
رتاحت من تعب السفر و لبسات بيجامة بلا سروال مربعة ليهم فالصالة تتفرق الهدايا على خلود و نسيم و حمبدة و حنان و ووئام و خالتها القريبة تتضحك و تعاود ليهم...جاية منورة و السر طايح عليها ...باين فيها الراحة و الفلوس...!
أسامة ( شافها فيها بحب ) التصاور شفتهم عاودي ليا نتي كي خليتي الاجواء عحبك ااحال ؟
حلا ( هزات عينيها فيه تتهدر بعفوية و براحة ) : واعرة بعد الزواج نمشيو ليها بجوج...( شافت رشيشة فلحيتو مدات يديها حيداتها بعفوية و كملات كلامها ) و نتا ساليتي خدمتك مع سيهم فيصل....
اسامة ( ضحك ) جاتك الالة حلا.....سالينا الخدمة و جيت هبطت لفاس جبت ماما لطنجة ...
حلا ( تترمش ) : بصاح ماماك هنا ؟ تفكرتها بواحد الكادو على الله يعجبها....غنعرض عليها غدا اذا بغات تجي ...! ختك حتى هي كاينة هنا ...
اسامة ( تيشوف فيها فرحان مسحور بيها ) و هيااا...نقصي شوية من هاد الحلاوة فيك...غتسطيني احلا ...غتحمقيني....!
حلا ( بدلال تترمش دايرة راسها تتحشم ) و أسامة صافي كتحشمني مكنعرف باش نجاوبك ....
اسامة : وشنو ندير انا نحماق ؟ ماعرفت شمن خير داير حتى حنيتي فينا و عطيتينا رضاك....
حلا ( حانية رموشها تتفرنس ) ماجاوبتبتش ختك حتى هي هنا ...
اسامة : وي راها هنا حتى هي ....
حلا : صافي غنهدر معاها هي و ماماك يجيو عندنا غدا.......!
دوزو العشية مع بعض ...! جاو مع بعضياتهم تيحمقو ...دايرة عقلها و عولات على المعقول هاد المرة ...صافي قالت غتجرب هاد الزواج لي كيهدرو عليه....مكتبغيه ماوالو ...و الحب عند حلا ماشي ضروري ...المهم الراجل يكون زوين فعينيها و مقنعها و حاجة اساسية عندها هي ماشي موسخ و نقي....!دابا تشوف عليه غي شي حاجة عيفاتها تقلب بدون تفكير ...!
جلسو تغداو و يد اسامة ماتحيداتش من على يديها فرحان بيها و بزينها و حلاوتها....! سالاو و ركبات معاه فالاوطو....
حانية راسها تتشوف تليفونها جات تهز راسها وهي تلقا وجهو قريب منها و يديه فشعرها...
أسامة ( عويناتو معسلين ) بوسة وحدة ...راك خطيبتي احلا.....
حلا ( تتنفخ و تسوط ماعجبهاش الحال عاطياه للكذوب صلية ) قلت لا ...عمر شي ولد المراة باسني ولا قاس فيا شعرة وحدة ..مكنبغيش الضسارة ااسامة.....
هز راسو بتفهم مكتافي بقبلة على يديها...مخليها مكمشة فراسها تتدور فعبنيها و تتفرفر فديك الرموش كي مونيكة متفكرة القبلة المسروقة ديال عبد الصمد...و يديه ماكانو كيعرفو غي طريق لوجهها هي تضرب وهو يعاود حتى ولفات لمساتو لبشرتها ... تقلبات فثانية و تسيفات ملي تفكراتو ولات غا تتسوط و تنفخ....!!
خسرات على خوتها فلوسها فالهدايا و التفكيرة ...و كع ذلك مابقاش فيخا الحال ! حيت بحال خسراتهم على راسها عارفة ..طبعا اذا جات و دخلات عند نسبم او عند خلود و قالت عطيوني هاد اللبسة ولا هاد الصاك يحشمو يقولو لبها لا ...! و دايما تتشد هاد النقطة و تستغلها و كثار تيتعداو هي و خلود على نسيم.....معروفة وسطهم الحاجة المخيرة عندها و صاليغ ديالها كاع تيمشي فالشراوط و اللباس و الصبابط و الصيكان و المكياج و الروايح ...و زائد من النوع اذا دار ليها شي واحد شي معروف و عطاها شي كادو ماكتنساش و تتحشم تقول ليه لا اذا عاود طلب منها سي حاجة...و هادشي عارفينو و كلشي كيستغلها ....
خرجات حلا من الكوزينة تتدور فعينيها...نيشان لبيت نسيم. بدات بيها هي الاولى...مع كلشي ناعس تيدير القيلولة ديالو ...السكات ماكاينش الحس كلشي مخشي فبيتو...طلات على نسبم لقاتها متكية فوق فراشها غا دخلات طلعات معاها ريحة نسبم عطرها معروف....شادة رواية اسبانية تتقرا فيها مخشعة معاها تتحاول تحسن نفسيتها المزفتة و تنسى مشاكيلها ...دورات حلا عينيها و نطقات...
خدات حلا لي بغات و قربات من نسيم تتفرنس و تبوس فيها...
_ القطيوطة ديالي ...شكرااااا...
نسيم ( ردات ليها البوسة ) كتبوسيني غي على حاجتك...
حلا ( تتلعب لبها فشعرها ) منيتك...ختي الصغيرة نتي انا لي ربيتك و كنت تنهزك فظهري لاتنكريني....حتى هزك بابا و خداك معاه لاسبانيا بقيت غنموت لاابكاء.....عرفتي غي دوز العراضة د غدا ونضربو شي دورة لحمام توركان فتطوان ندورو بالحالة و نتي رجعي لعقلك شوية و خرحي من هاد الحالة واه شوف شعرك كي ولا....الراجل داير كي السبع ماهاز حتى هم و نتي معصبة راسك معاه ..خوديها منين خفافت و قولي الحمد لله تيغيب عليك يهنيك من نݣيرو مرة مرة راه الرجال تيطلعو فالراس ....ضربي كلشي بركلة و فوج مع راسك و تهلاي فهاد السالف راه كلشي كيتمناه و نتي سامحة فيه.....
بقات معاها تتهاود معاها و يهدرو مع بعضهم بالعقل ...شافتهم حميدة هكاك هزات راسها و زادت تتضحك تتعرف بناتها وخا يتناتفو و يتغاوتو و يسبو بعضهم دغيا كينساو واش مخاصمين مع بعص ...تتلقاهم تصالحو بلا مايحسو و تيصحكو مع بعضهم...! و نهار تتخاصم شي وحدة مع راجلها تتجي تشكي للاخرى...خلود عندها اتجاه و حلا اتجاه و نسبم اتجاه...اذا جات نسبم شكات لخلود و حلا...خلود تتقوليها نتي السباب و نتي مولات المشكل حتى يرجع ليها عقلها و ماتزيدتش تكرهها فيه و تشعل العافية ....اما لالة حلا تتقول لااا هو السباب هو ولد الحمقة هو لي مكيسواش وخا ماتكونش عارفة القصة دايما عندها ااراجل هو الغالط حتى تتشدها حميدة و طيب ليها ودنيها بالهدرة و الغوات علاش تتحرضي المراة على راجلها و هادشي حرام....!! ووالو لي فراسها فراسها..
غد ليه تحزمات حلا مع حميدة و تعاونات معاهم نسيم ..! خلود مشات تشوف تجهيزات دارها فين وصلات باغية تسكن فيها مع بنتها تجيها نيشان نع الولادة...!
لالة حميدة بقميص الدار فاابيج و بالعقيق و شعرها صبغاتو بالقهوي و قطعاتو ولا قصير حد عنقها...سنسلة ذهب عليضة فعنقها و سرتلة فيديها و العوينات مكحلين لي يشوفها يعرف زين بناتها منين جاي ...!
_ نسيم ابنتي تكلف بالعصائر فالكوزينة التحت باش تخوا البلاصة هنا.....( تتغوت ) حلاااااا اجي المتلوفة اجيييي عارضة على الناس و هاربة ...حيد داك الزواق من عبنبك و اجي لهنا راه قربو يوصلو ....!
جاو ضياف حلا ! استقبلتهم حميدة بالابتسامة و الهدرة متولة و مرزنة ...دخلات أم أسامة بواحد الفولار تيزهق بالرطوبية دايرة لنص شعرها و النص القدامي كلو معري مبينة الشعر مصبوغ مزعراه بزز...هازة فيديها الورد و الوجبة ضروري منها و معاها بنتها فوطوكوبي عليها...! جلساتهم حميدة فأفخم صالون عندها ..و أم اسامة غا تتشوف و تدوز لعبنبها ثالث مرة تجي لهنا و كل مرة تتجي تتشوف صالون فشكل و كل صالون ياصالون ...! هزات حجبانها للسماء دايرة رجل على رجل و هدرتها ثفيلة...
_ الله يبارك فيك الالة حميدة ..من ديما تتعجبنا الشمال و ناسها ...الجو زوين بزاف دايما كنئول لسيدي أسامة سعداتو لي عايش فالشمال ....
حميدة ( بابتسامة ) و يبارك فيك احبيبة ديالي ...
جات حلا تتسلم لابسة جلابة بلا قب قصيرة حد الركاب و اليدين قصار و الخلخال فالرجل و الشعر فايح منو ريحة فاليينتينو و العوينات مجبدين و البشرة تتبان كي البلار مغطية العيوب الخفيفة لي تتكون عند أي وحدة فبشرتها...!
حلا جلسات حداها تتضحك و تدير منين يدوز الماء بيناتهم ....عايقة بيها ماعندهاش معاها و مزال مارتاحت ليها....حيت أسامة صدمها الولد الوحيد لي عندها كانت باغية تزوجو هي من بنت خالتو حتى هي كنيتها الادريسي بنت يي الادريسي و مها الادريسي المهم النسب و الفاسي يتزوج بفاسبة مابغات الغريب ....!
الجلسة كاملة و الهدرة بالحساب لا من طرف نعيمة ولا حميدة ..و البقية غا تيشوف...! بحال جالسين فعزو...حميدة شافتها منفخة نفخات حتى هي و تكبرات و قطعات الهدرة فمرة ...نعيمة تتشوف الاثاث و التاويل و النقاء و الفخامة و الذهوبات و تحضي عروستها و حركاتها معتارفة بلي الزين و االاناقة و حلاوة اللسان كاينة ولايني هي مابغاتهاش...بغات ليه بنت خالتو ...!
غا خرجات من عندهم ركبات مع بنتها شادين الطريق لطنجة طالقينها للهدرة قريبة طرطق و تنفاجر ...
_ انا كنئولو مابغيتهاش برانية ....وهو شنو دار ؟ جابها ليا شمالية الناس ناس الخير مانكذوبش الدار عندهم ئصر و متولين ولايني انا شهوتي ياخد بنت خالتو ....
بنتها : ماما براسكي مع سيدي أسامة بلاش تحمقي ليا راسي أنا يتزوج ولا يطلق پو امبوغط بوغ موا ....
أسامة ( تزير ) ماما حلا ماشي برانية حلا كانت مون أمي وهي بنت خالة سلمى علاش مابغيتيهاش ؟
نعيمة ( بغضب ) انا مائلتش العيب فيها حلا بنت زوينة و مأصلة بنت العز نبغيلها الخير مي مع غيرك ماشي معاك ...و شوف نتايا شكون تختار كلام ماماك ولا حلا ....و اذا حبيتي تبع كلامي انا كنئول لا ماغتزوج بيها شوف شي سبة فكها منك...
هزات جلابتها و دخلات لبيتها غضبانة باغا تموت و تسطى علاش ولدها غيتزوج بشمالية ماتقدرش تصبر و تكمل عادي كلشي غضبان على اسامة جداتو معصبة عليه كلشي ماحاملش الخطبة و حتى حد ماهدر من غير نعيمة هي لي حالفة توقفو على هاد الزيجة قبل العقد ...! مانفع معاه الخاطر ينفع بالزز ...عارفة اسامة مايطيحش كلمتها و اذا قالت ليه لا يعني لا ...بلا مايزيد معاها و يحاول ..و دابا قطعات ليه الشك...! خلاتو داخل بيتو شاد راسو معصب كان يحساب ليه قنعات و عجباتها ملي شافتها فالخطبة ...حتى صدماتو دابا برفضها قطعا....!
نعس معصب و فاق معصب حتى قربات منو تتدوي بالهداوة...
_ أسامة الحبيب ديالي سمع مني أنا تنبغي مصلحتك ....
اسامة ( قلب وجهو منفخ و ساكت )
ناضت نعيمة تتجرجر جلابتها تتحلف...
_ والله لا تزوجات بيه وخا نعرف ندير فضيحة ....
تجهيزات لحفلة العقد بدات...! و حلا طالعة هابطة لطنجة تتشري حويجاتها من تما ...باغية كلشي كي بغات غا تتجي تخمم من ب الزواج تتنفض من راسها ...عكس كي كانت مع عبد الصمد غي تتخايل غيشد عليها بيت واحد تتشدها الخلعة وخا تتضربها بنكرة..
عبد الصمد شابع زهو و نشاط و الزدحة و الاسبانية تتشير و الشيخات و الزوعرية عاطية للعين...! دايرين حفلة فاليخت في الشمال
الريح تيحرك كيو الشوميز لي لابس معري صدرو مخلي الشوميز مفتوحة و سنسلة فعنقو و النظاظر كحلين و السنينات بيضيين و لحية كحلة كثيفة تيضحك هاز الشراب منغم و راسو ثقيل عليه....! و زورقية البحر و الرييييح التفواج عندهم هو هذاك ...محمع مع صحابو ...كريم و معاهم حتى علي و واحد الاسباني و شي ثلاثة شيخات وحدة سمراء لابسة دوبياس معري لحمها تتبري و الخيرات تتهز و جوج زعرات لحمهم بيضة و المؤخرة حلاص ....؛
كريم مجنن عليهم تيكب عليهم الماء وهو تيضحكو و الغوات و الضحك الحيحة عندهم ...
_ هيييلي مي روبياااااا....( الزعرة ديالي ) ....
علي ( كي الفروج شعرو فازك تيميل و يغوت بالجهد ) هيييلي هييلي روبيا ديالي ابورو....
( الزعرة ديالي الحمار )
كريم تيشير لعبد الصمد لي شاد فالحديدة الريح هز ليه الشومبز بيضة و شورط بيض لحمو سمراء بالشمس ...تيشوف فيهم غالباه الضحكة الشراب غالب عليه و هدر
_ شد شد غلبك الريح ..دفلة طيحاتك ....
كريم ( سخفان بالضحك ) تنصلييو من رمضان لرمضان و ندعيو نموتو قبل مانتوبو ...( هز راسو دايخ ) نتوبو قبل مانموتو....
علي تيشطح و كاس الشراب فيديه عينيه حمراء تيتمايل...و الروبيا قربات لعبد الصمد تتلعب ليه فصدرو قالبينها شرقي ...وهو تيقيس شعرها عايف و يسول لسانو ثقيل ...
_ شحال فعمرك ...
الراقصة ( تتضحك و تحلون ) 23 ....
كب عليها علي الماء حتى غوتات تتضحك و تقلبات لعندو تتشطح ليه و يصفرو ....و عبد الصمد جلس شاد بلاصة جوج د الناس دبك الجلسة عندو .....! رمى الكاس من يديه مخسر وجهو ...تيقول مايضربش و تيلقى راسو تيشرب ..هكا داير حتى مع الݣارو ...باغي يحافظ على الصحة زعما و يحافظ على سنانو ماباغيش يبان فيه الكبر و السنان يصفارو و عظامو يرشاو....!! حتى منظر علي وهو كيبوس فيها نفس البلاصة فين كان صاحبو الاخر تيبوس فيها ...عيفو المنظر ! مايقدرش يحط فمو ولا يديه عليها بلا تيبوس صاحبو ....! مكتافي غا بالشوفان و يحضي الصدر و المؤخرة تتهز ....
دفل جوج دفلات طلعات ليه القردة غا بوحدو بدون سبب...حتى جا لعندو علي تيسول..
_ خاي عبد الصمد كي تي پاصا ..؟( مالك )
عبد الصمد ( جامع حجبانو لسانو ثقيل ) جايبين لي الفلالس ....
علي : طلقتيها دغيا ....
كريم ( جر علي تيضحكو عليه هو و صاحبهم الاسباني ) هذا شابع لهيه كيتكرع علينا....
عبد الصمد ( راسو ثقيل عليه ) فهم هادي اسي كريم .....أكوا كي نو هاس دي بيبير ديخالا كوريير ...( لسانو ثقييل تيعاود فيها عينيه معسلين ) ديخالا كورييير.....
( الماء لي ماغتشربوش ...خليه يجري ...)
أماا اسامة مرتاحة و مستعدة تجرب معاه الزواج و لي مابعد الزواج...حيت كان صديقها قبل من خطيبها و دايما واقف معاها و عاطيها الوقت و الخاطر ...!
خرحات من الاوطو دايرة نظاظر الشمس هازة صاكها فيه مستلزمات الحمام ...ومعاها نسيم شادين رونديڤو في حمام توركان حمام الملكة مخلصاه نسيم فرحانة بختها...! حمام كبير جامع بين التقليدي و العصري فيه مساحة للاسترخاء و الرفاهية و التفواج ..! دخلو لغرفة البخار معطرة بالروايح و العطور الشرقية اجواءزوينة و ريحة تتحمق تتجيب ليك الاسترخاء و الراحة أجواء ملكية ...و السيرفيس روعة..! غالب الطابع التركي غي غرفة الاستحمام ...!
حلا ( تتسول نسيم ) شنو درتي فهاد التبريمة ! عطينا اختي الوصفات و السر شنو فيها مالك مسمومة....
نسيم :كنت ملهية بالوصفات و داكشي دابا ماعنديش الكانة ...كون مافكرتنيش ماما بيها ننساها....تما يالالة الحناء مطحون فيها الورد و الصابون البلدي و الحامض معصر و الخرقوم و شوية ديال النشا و زدت العكر الفاسي ديريه دابا قبل الحكان تيصفي الجسم خطييرررر.....
تهلاو فراسهم مزيان خرجو بنفسية اخرى و راحة غييير...!!
زربات عليهم حميدة يجيو دغيا جايبين العدول للدار ...! و عاىلة العريس قربات توصل...!
حلا مثقلة حتى تتجيب ليهم الجلطة...ختارت تلبس غي جلابة عامرة عقيق و انيقة و سندالة عالي و الشعر مطلوق عادي و الوجه منور ...!هازة مروحة مصنوعة من الدانتيل الابيض تتحركها قدام وجهها و الدار عامرة غي بالمقربين جات عائلة العريس بالزغاريت و الحالة نايضة. .سمعات عيشة الزغاريت فتحات عينيها على وسعهم و شافت في صفاء حتى هي مستغربة ..
_ شنو وقع فدار ااريفي
صفاء : غتكون خلود ولدات ....!
عيشة ( هزات حجبانها ) بسباب ديك الخلقة حرمت نطل لديك الجهة ...على الله تكون هي لي تزوجات تغبر وجها....
صفاء ( تتطل و تتشوف مصدومة ) و باين تزوجات اخالتي عيشة ...العريس داخل بالورد و الشكلاط....( بعفوية ففمها مفتوح ) العريس غزال ...ماعرفت خطابة ولا شنو مابقيناش كنهدرو شحال ماعرفت خبارها.....
انتشر الخبر فالحومة...! لي اصلا من نهار عرفو عبد الصمد عينو عليها مابقا حد كيدور بيها ...حتى بعد فراقهم حد ماهز فيها العين ...!
الدار كبيرة و الخير موجود و حميدة ولفات هاد الاجواء مابقات تدهش ...! منفخة و ماعاحبها حال ماحاملاش العريس و ماحاملاش عائلتو و ماعندها مادير ...! تتشوف فنعيمة هاد المرة مخنزرة نيشان حيدات القناع....فمها مكمش تتسوط و تزفر ...بقاو تيقولو حلا ماعندها زهر مع العجيزات....! باينة للعمى بلي ماحاملاش حلا ...!
جا العدول وتجمعات حلا قدام عريسها...! و قبل مايوقعو بداو تيخطبو الناس الكبار و الفقيه تيهدر على أسس الزواج و الواجبات. شي ساااعة وهو كيهدر و حلا مادخلات لراسها والو ..تبعات معاه فالاخير جاها القنط ...! اما أسامة كثر من حلا غا تيهز فراسو ..باين فيه مغير و معصب و عينيه تتمشي لمو تيهربها بحال المدنب وخايف من عقوبة مو...!
عطاوهم يوقعو بعد اخد و رد ..عطاها 3 مليون فالصداق ...! حتى ولات حلا رسميا متزوجة من أسامة و ضاربة معاه العقد و بالشهود ... !!
حميدة عينيها دمعو بالفرحة تتشوف بنتها تزوجات و اخيرا و وصلات لهاد المرحلة ! اما حلا طلعات معاها السخانة و الدهشة غا تترمش و تشوف..و تنيش بديك المروحة على وجهها و تمسح العرق من جبهتها ....!
اسامة تيفتح ازرار قميصو و مو مقنصة عليه بشي شوفات ديال العقارب...! طلقو الزغاريت و الحيحة و الفرحة و الصلاة و السلام و حطو الضيافة و الخير شايط ...كثرة الشيكي و االتعواج...عائلة اسامة تلاقات مع عاىلة حلا و خلاص...ها التطوانيين مع الفواسا تلاقاو و كملات ااباهية ...!! هذا تيبان على هذااا...ها اللهجة الفاسية تتشير و الشمالية قنت اخر ...القفاطن فصالة مخزانية و الذهوبات و السوالف ...! الحاصول الدنيا مخلطة بالمعقول...!
بعد العصر كانت الدار خوات...! عائلة اسامة كل واحد فين مشى ها لي نازل فالاوطيل ها لي عندو دار تما و ها لي طلع لطنجة...! بقا غا اسامة تيتسنى حلا برا قدام الاوطو ديالو و معاه مو لاصقة واحل معاها...
_ و بحال 3 مليون بحال 2 مكنشوفش حتى فرق انا...
نعيمة ( تتهدر بشوية حفاظا على البريستيج ديالها ) ئلتي غتعطيها جوح علاش كذبتي و عطيتيها ثلاثة علاش هكايا....مع من تشاورتي ...
أسامة ( حك لحيتو الكحلة تيساوي معاها ) و صافي اماما مرة اخرى نتشاور معاك ...( وراها واحد البراصلي رقيق ديال الذهب و الساعة مذهبة جايبهم لحلا ) خديت ليها هذا زوين عجبك ؟
نعييمة خدات الساعة خلات غا البراصلي تتدوي بااثقالة واحلة مع داك الشال رطب تيهزق ليها فوق الراس...
_ عطيها غي هذاك ..الساعة اريها لهنا.....هادشي تستاهلو بنت خالتك خير من برانية ....و عنداك تنسى شنو ئلتي ليا....
أسامة جامع فمو مازادتش معاها فالهدرة ...! طلات عليهم ختو تتسول...
_ ماما تمشي معايا ....
نعيمة : لااا غنبئى هنا ...
أسامة ( بغا ينتف راسو تقلب اعندها تيبوس ليها فراسها ) و ماما الله يعطيك الجنة لما سيري معاها....
نعيمة رمات الشال على راسها تتنفخ تحلفات فيه بعينيها حتى جمعهم و خرحات مكرهة من عندو...راكبة مع بنتها ...! غي مشات زفر و تنهد بالجهد ..تيستنى حلا تهبط لعندو يخرجو بجوح....
حلا مثقلة مع راساتها...حيدات ديك الجلابة و لبسات سروال ثوب كلاسيكي لونو كريمي و شوميز قصيرة و مزيرة على صدرها فالقهوي الغامق...مع سندالة عالية و ااشعر مطلوق سامبل و الساعة و الخاتم د الزواج فاايد و صاك ديور و حلقات فضية صغار فودنيها...! ووعيون حميدة عليها تتحذرها غي بعبنيها...توصلات لرسالتها و سلتات من هدرة رضا ...!
خرج اسامة من الاطو فاتح ليها الباب مبسم تيبان فرحان...
حلا : تعطلت عليك...كون بقيتي فالدار علاش هبطتي ؟
أسامة : لا ماتعطليش ..و تعطلي كاع اش فيها الدنيا هانية عندي ههه....
تحركو فاتجاه طنجة...شادين الهدرة و الكلام بيناتهم مكيتسالاش ...
أسامة تيشوف فيها بشهوة و يرجع يشوف قدامو مركز ...هدرة تجيب هدرة حتى وقف الاوطو حدا دارو في طنجة و شاف فحلا تيحيد السانتيغ....
_ نزلي تشوفي دارنا .....
حلا خرجات من الاطو تتشوف فالدار من برا مسايراه و راسمة واحد الابتسامة هبلاء على شفايفها...! متتبغبش تبين راسها عايقة و قافزة قدامو...دايرة كي القطيطة اذا قال شي هدرة رومانسية تدير راسها حشمات و اذا قال شي نكتة تتضحك ليه وخا ماتتضحكش ...دايرة راسها هبيلة و مسالمة و السلام.....!
حلا ( باعجاب ) طلعتيها من الساس ؟ والله هكا حسن تيبقى ليك السطح ديالك و تعاود تطلع حتى الطبقة الثانية و الثالثة ...و تنفع من وراها......اما تشري برطمة مابلانش وخا لي فخي ماشي بحال بحال طبعا....
أسامة ( تيفتح الباب جراه من يديها ضاحك ) : كلشي ديالك دابا نتي مولات الدار...غا قبلي علينا. ...
غا حطات رجليها الداخل مزال تتشوف فالدار ...شد الباب و شدها هي عندو مزير عليها...
أسامة ( حرجاتو...) وااايلي ! شكون قاليك ماغاسلش فمي ..غسلتو يهديك الله الالة حلا ...( قلبها ضحك )....هانا غادي نغسلو على عينيك غا تهناي ليا مع راسك....بسلامتك...
ابتسمت معاه بدون جدال...غا غبر من قدامها خسرات ملامح وجهها و حاولات تنسى ..؛ تتشوف الدارو اااثاث و ااديكور.....حتى حسات بيه ضمها من اللور مزيرها عندو غاطس فمو في عنقها كيبوس بلهفة...
_ شنو هاد الريحة فيك كتسطيني....
حلا طلعات معا نيفها ريحة معحون الاسنان وصابون معطر ..عاد رخفات على حواجبها و كمشات عنقها من قبلاتو ...طالعة معاها السخانة
_ أسامة لااااا.....
اسامة قلبها لعندو بلهفة وحط شفايفو على ديالها ...!...حلا ساكتة و مسايراه..تتجرب عاجبها الحال و ماضاربة حساب لحد ..ياك حلال و حد مايحاسبها...الحب عارفة راسها مكتبغيهش و لكن تيعجبها السيد نقي و ريحة الفلايو عاطية منو ...مامعيفها حتى حاجة...دورات يديها ورى عنقو و هزها عندو متكيها فوق الفوتوي طالع فوقها كي الحمق هيجاتو.....جالس تياكل ليها دماغها زعما بجوج كليمات حلويين باش ياخد لي باغي قبل العرس ماباغيش من بعد العرس ....
مزال ماتيعرف وجهها الحقيقي تتبان كي القطيطة و ساهل ياكل ليها دماغها ...
_ حلا جو پو با ...مانقدرش نصبر ...نتي مراتي دابا مزوجين نطلعو لبيتنا ....
حلا فاتحة عينيها فيه وهو محني عليها...شعرها مرون بيديه و صدرها مهزو تحت صدرو ...لعابو على عنقها و شفايفها تتبوهل عليه ...
جرها من يديها حتى تضربات مع صدرو تيبوس فراسها و يديها و يسايس ...تينهج بالجرا و مصدوم من هاد القلبة لي تقلبات عليه و كي دار حتى سلت ديك الهدرة من فمو قدامها ....
حلا ( بعدات ابه يديه من عليها قالبة وججها ) وصلني دابا للدار ..ولا غنشد طاكسي....
الظلام طاح و العشاء قربات...عاد دخلات حلا للدار مع أسامة...!
دخلات عكس كي خرحات...شعرها باين مرون تتغطي رقبتها و تتشطح فرموشها ..قالبة وجهها على أسامة...لي داير كي المصدوم منها...ماعارفش وجهها الحقيقي غيبدا يبان شوية ورا شوية...و غيتصدم فيها مزيان...من الماستر لي كادبة عليه للهداوة و الضرافات لي تتبان عليها...و مزال الخير القدام....!
جلسو تعشاو. و عبد الله و حميدة دايرين الواجب معاه على اكمل وجه...! حتى سالا و مشا بحالو و دخلات حلا لبيتها عيااات...و تابعها حميدة تتشوف فيها بفضول...
حميدة ( بهم ) بنتي ماشي هي هاذيك ..بحال المشيرة بنتي تبدلات عليا من نهار جات من الغربة مابقاتشي نسيم بنتي لي كنعرف ...قلت غي حيت زمان ماجات وحاسا براسا فشكل معانا....حتى طلعات هكاك سكوتية و كلاما قليل ...و ملي تزوجات و انا بالي معاها كثار من قبل....عينيها طفاااو انا كنشوووف ماشي عورة. غي كنميك و نرمي من راسي....
حلا ( باستغراب ) منيتك اماما ..السيدة مزوجة هادي اربع سنين و بولادها ...كون كانت شي حاجة كون بانت ...
حميدة ( بعناد ) انا كنقولك بنتي و عارفاها....شوف تصاور ديالا ملي كانو مخطوبين مع تصاورهم دابا ...عينا غارقين و هازة هم انا قلبي قالالي و عارفة متأكدة كاينة سي خاحة ...سنين و انا كنحفر عليها و مكتعاودلي وااالو ...والو تقول ماشي يماها......حتى تتكون عيات جتى عيات تتجي تبكي و تشهق دايرة جنازة مالك العايلة مالك يحيى حلمتو كيخوني..حتى مانكونش كنعرف بنتي.....نموت و نعرف شنو واقع ...
حلا ( دخل ليها الشك و مابيناتش ) و صافي اماما نتينا عارفة ديك المتلوفة كتموت على راجلها تكون تتوحشو مسكينة.....( هزات فوطة ديالها نايضة ) انا نمشي عندها نشوفها شنو كدير...ناخد من عندا زيت الورد اذا بغات تعطيهلي ديالي تقاضا.....
خرجات من بيتها لابسة بيجامة قصيرة ..داخلة لبيت نسيم بلا مادق غا مدرمة ...لقاتها متكية على جنبها تتبكي و كتافها كيتهازو بالشهيق...غا شافت الباب عليها تفتح قفزات و جلسات جالسة و ااسالف كحل تقلب معاها...تترمش و تهمس تتلف...
_ غتفيقيهم عاد نعسو مالك على هاد الدخلة.....
حلا ( دخلات شادة الباب تتشوف فيها بشك ) شعندك كنتي كتبكي بحال مات ليك شي واحد....
نسيم ( تتهرب عينيها ) ماعندي والو ....
حلا تزاد معاها الشك و الخلعة على حالتها قربات لعندها و جلسات حداها معلية حاجبها ناطقة بهمس....
_ عندك شي حاجة مثقلاك انا عارفة شنو هي....
نسيم ( بخوف ) شكون قالها ليك.....
حلا ( بصرامة ) عاودي شنو كاين ماعاودلي حد غا جربتك يالمكلخة..خبز ربي فطبقو نتي...حكز لهيه و خوي شنو عندك والله ماخرجت من هما حنى نعرف مالك هيدا لسانك مسروط و بحال الهبيلة غا فداك التليفون متلفة وقتك و عينبك.....
نسيم غلبوها الدموع و الرعدة قلبها عامر و خازنة هم كبيير و ماعمرها قدرات تخرحو على فمها لحتى حد حتى تفرش لراسو قدام راجلها....هم خرج ليها على حياتها و قتلها حرفيا ...ماقدرات تقول الدموع سبقوها و شفايفها ترعدو ماقادرة تخرج حرف واحد ...زادت خلعات حلا لي شدات ليها راسها عندها عاقدة حجبانها ...
ناضت كطير كبات ليها تشرب و شربااتها حتى طاحت نسيم فشلانة على صدر ختها تتزير عليها و تبكي بهمس على قبل ولادها مايغيقوش ..تتبكي و تزير تقول عمرها مابكات ....
_ انا قلبي مشوي اختي...قلبي كيتشوا ....
حلا ( الخلعة عندها تتبان بالاعصاب) هدر انسيم نيشان...ختي مالك قولي اقسم بالله مانقولا لشي واحد خوي قلبك عليا ...ياك انا لي كتيقي فيا و ماعمرني فرشتك...و ماعاوديش ليا شنو كيضرك ...
نسيم ( بحرقة ) ماكرهتش كون موت احلا...ولا ماعمرني نكون عايشة فهاد الدنيا ...راجلي ماتيهزش حتى عينو فيا يحيى كارهني احلا و انا السبااب.....
حلا ( تعصبات ) بلا بكاء الزمر و قولا مالو هاد ال*را شنو عملك عاود والله ياحسو حتى نعاودلو بالخثانة.....
نسيم ( خبات وجهها بين يديها تتبكي بصمت ) كاملين حساب ليكم انا فرحانة معاه و عايشة كي الاميرة و كلشي حاسدني على عيشتي....شنو غندير انا بهاد العيشة و راجلي مكيطولش معايا حتى شهر ...ماكيهز فيا حتى نص عين الهدرة تنسمعا من عندو بالحساب ...
نسيم ( حركات راسها باكية) فاسبانيا ماشي هنا ..( بزز تتدوي الشوفة مضببة ليها ) ماكنتش عارفة شنو وقع لي... كان تيسكن حدانا شدني بزز اقسم بالله الا بزز احلا ...ماقدرتش نهدر ماعرفت والو بحال طحت فوق سي مسمار دخل معايا...ماشفت والو ماشفتش الدم و الحريق تحتي تنعرف اذا خرج الدم صافي راك مراة و الدم ماخرجش بقيت عايشة فالشك و خاطري مهني حيت الدم ماكانش هكا كنت كنصبر راسي ( خبات وجهها تتبكي ) كان بابا فمدريد تخبيت منو و تخبيت من كلشي حفت و سكت و ماقلتها لحتى واحد حتى سمعت دار كسيدة و مات خفت والله حتى خفت ..كنخاف من رضا حيت كان يذبحني ماقدرتش نهدر.....رضا غيذبحني وخا مادرت والو احلا ننينا عارفاه كيفاش عامل ...و انا كنت كنخاف منو الرعب ديالي هو رضا ...
نسيم ( تتبكي ) : انا كنموت على يحيى احلا كنموت عليه ماقدرتش نهرب منو و نخليه ..مانقدرش نتخايلو مزوج بوحدة اخرى ...حاولت مرة و تفارقت معاه مرضت و ماقدرتش نصبر ...انا كان عندي امل مانكونش ضعت فمرة و نكون تزيرت و كلشي رجع كي كان ...حيت ماشفتش الدم كنت كندعي يكون ماضيعنيش ماكانش الدم والله ماكان....انا عاقلة ماكنتش متأكدة من والو و خفت نشوف طبيبة الهدرة تتجي لبنادم ساهلة لكن التطبيقي صعب ملي كتصوري ماقدرت نقولا لحتى واحد... لي كنت كنعرف هو يحيى عييت نهرب منو و ندير السبة ماقدرتش بحال الموس كيتخشى فيا و تزوجت بيه...و بيدي كتبت لبابا فورقة ثلاث مرات اه باغية نتزوج حيت تصدم ....قلت غنقولها ليحيى قبل العرس و حاولت و حاولت و ماقدرتش ماعرفتش كيفاش نخرجها...ليلة العرس تعقلي كنت غنهرب حتى سوليتيني فاين غادية و بديت كنتلف....تما تزيرت و ندمت وليت كنتخايل الشوهة و الفضيحة عقلي كان صغير و ماكنفكرش كون كنت بحال دابا ماندير ديك الغلطة...تبعت قلبي على عقلي...يذبحوني ماعليش...
حلا ( مسحات دمعتها مغوبشة ) و شنو دار ملي عرف ؟
نسيم ( سكتات من البكاء و سهات تتفكر ) عقلو كان غيخرج حلفت ليه بلي ماشي لخاطري و قلت ليه شنو وقع معايا....قطع معايا الهدرة و تقلب فمرة هزيتي راجل و حطيتي راجل مابقاش كي كان...ساكت و ماتيهدر مع حد و قالب عليا ...تافقنا على الطلاق و كنا غنطلقو ( غلباتها الضحكة مع البكية ) صدقت حاملة بأزهار....( مسحات عينيها ) ولدتها و فرح بها بعد ماكانش باغيها لا انا لا هو كنا عوالين على الطلاق طلعت حاملة ...ولى كيموت عليها و يحط عينيه عليها....دار ليها عرس ماشي سبوع بغى يطير بالفرحة مبرعها هي و انا ماكنتش كنحس بديك الكادويات بحال مربية لبنتو كيخلصني...حتى ولينا تنهدرو على قبل و شحال من مرة تينعس معايا و فالصباح تيصبح قالب وجهو بحال كيبغي ينسى و كيتفكر بلي خبعت عليه ماكتبعيش تبلع ليه.....
حلا ( بصدمة ) و طلعتي حاملة عاود بأمير ....
نسيم جمعات شعرها رجعات لهدوئها....
_ كون ماكانتش أزهار غنكونو مطلقين و ماكانش غيكون أمير كاع....كنت دايرة احتياطات وحتى هو كان تيحضي و كتاب حملت بيه....دابا بحال مربية ليه الولاد يحيى يدير كلشي على قبل ولادو حتى الطنوبيل جابها ليا على حساب ولادو ماشي عشقا فيا انا ....ولفتو مرة ساكت مرة قاطع الكلام ...مرة تينعس معايا مرة تيقلب عليا وجهو بلا ماتقولي الطلاق ما الطلاق...جربنا و ماقدرناش...أزهار كتموت على باها و أمير مزال صغير ...ربطونا بجوج ماكتاب الطلاق دابا من هنا للقدام مانعرف شنو يوقع....! يحيى كنحسو باغي ينسى و مكيقدرش....حيت كيتفكر اول مرة عرفني شافني مع صاحبو الصيدلاني داك النصراني كان لاصقني و انا مابغيتوش...وهو قاليه انا اونكوبل معاه...كتى كلشي لى يقول كان مصاحبة مع واحد و تزوجات صاحبو خليتها هكاك و كملت عليها....جا سولني قبل مانتزوجو قلت ليه الحقيقة بلي متنعرفو ماوالو و تيق مامصاحباش معاه...حتى لدابا بدا تيدخل شي فشي مع عقلو و يفهم من راسو ولى كي الحمق ..( تنهدات تتضحك بهدوء )مابقيتش كنحمق راسي معاه....ولفت و انا متأكدة غتكون عندو وحدة اخرى في حياتو من غيري و عادي....نهار نحس ولادي كبرو نوقفو هادشي ....شحال من مرة كنبغي نشكي لماما كنرجع للور و ندير السبة بكيخوني ....داكشي لي كتشوفي فيه كذوب...اذا خرجنا بجوج تنهدرو على الولاد و الوضع بعيد عليهم مايسمعوش صداعنا ولا مشاكيلنا....
حلا بقات غا تتشوف و تترمش...عارفة ختها كتبغيه حب جنوني و تتغير عليه غيرة مرضية كلشي عارفها...و عندها الجراة تدخل مع السيد للزواج وهي ماعارفة والو فراسها....ضيعات راسها معاه و ضيعاتو هو ...ماجاتش تقول ليها مكلخة غادية للشوهة برجليك...و ماجاتش تلومها دابا علاش سكتات ...راسها داخ و طلعات ليها السخانة...مستغربة اصلا ماكانتش كتظن نسيم تكون خازنة هادشي كلو عندها....تتبان ليهم هادية و فرحانة ...و مراة تتبان منعزلة و شادة الركنة ماتتهدر مع حد ...نسيم ختها تتعرفها رومانسية و حنينة و الواحد تتمشي معاه بالخاطر و ظريفة مع كلشي و تتحسها نية و خبز ربي فطبقو ...لكن دابا ولا تتشوفها فشكل... قدرات تخبي هاد الكارثة اربع سنين !! متظاهرة قداهم بالسعادة و الكادويات و الحياة المثالية ...سفر لتركبا لدبي كان لولادو فقط ... كل مرة كانت تتقوليها تبقى ليها مع ولادها خارحة مع يحيى...كانت كظن السيدة خارجة معاه فموعد غرامي...و الموضوع كلو كان تيدور في نقاش و حوار ...!! تنهدات حلا راسها دايخ...تتشوف نسيم تقلبات عاد كانت تتبكي دابا ساكتة هادية بحال كانت غي تتعاود شي قصة د الجيران ....ماقدرات تقول والو ...و تصدمات كثر من ردة فعل يحيى...حلا عارفة تفكير الرجل الشرقي كثر من نسيم حيت نسيم ماعاشتش فالمغرب من صغرها....حلا لي تتعرف و الوسط لي عايشة فيه راجل بلاصة يحيى يذبحها و يمشي عليها للحبس...وبلا مايسول علاش و كيفاش وقع...نيشان يفضحها و يحطها بوجهها قدام عائلتها ...! كانت شاهدة على قصة حبهم قبل الزواج....و شافتو حتى كان تيموت عليها و عشقو ليها باين....و حتى هي كانت تتبغيه كثر منو كاع....ماعرفات تسمي تصرف نسيم جراة ولا كلخ و قلة تفكير ...لكن تعدرها الحب اعمى و العقل كان صغير و الغيرة اصعب ...!!
تبكمات و ماعرفات ماتقول...ماعندها هدرة تزيدها ولا تواسيها...وهي السيدة دوات جروحها براسها سنين حتى لدابا عاد جاية تواسي ؟
حميدة و عبد الله تيخافو على بناتهم و شرف بناتهم كثر من اي حاجة....! و اكثر وحدة كانو مزيرين عليها هي حلا هي معروفة طيارة و خوفهم عليها كبيير ...حاضينها غا هي و تيشكو فيها غا هي ...و راخفين لنسيم و لخلود....!! حاضيين غا حلا لا تغراق فشي بيير و تطلع موحلة فالغيس....! مارادين بال لبنتهم لي كلاوها الدياب و ساكتة....حاطين الحضية على الطيارة فيهم و منقصين على الهادية فيهم....! علاش هي ختارت ! كانت تتعرف غا قرايتها فقط ناقصها داك التخربيق....!!
حلا عيونها بقاو غا مفتوحين شدوها الغدايد و الاعصاب...
_ و علااششس باقية معاه واش غتخرجلي عقلي...واش غي هو لي راجل طلق و عيش حياتك ....
نسيم بهمس : شش غيفيقو لاش تتغوتي.....
حلا ( مجننة ) و يفيقو ولا ي*راو ... غتهز راسك و تسمح دوك الدموع و طلب طلاقك جلس فدار والديك معززة مكرمة...ماتفكري لا فالناس ولا فديك ال*ىاي ديال رضا ...بلا مايخلعك هذا مافجهدو مايدير.....والو فيه غي الهدرة تفو هذاك يخافو منو الناس شوهتي راسك بسبابو.
نسيم ( بهدوء ) الطلاق عندك ساهل حيت ماعندك ولاد و مامجرباش...عيت نبكي و نشكي على الحبالة لي كنت كنحبل وانا دايرة احتياط واحد ورا الثاني و بالحضية و صدقت حاملة و ولدتهم مكتاب نولدهم و ماقلتش لا و لا علاش ..صافي بكيت قبل مانولدهم ملي شفتهم نسييت الحلوف و اابكاء ..! انا قلت ليك مابقيتش كنحمق راسي معاه ..نهار غنشوف ولادي كبرو غنشوف الطلاق وهو براسو يعيش حياتو كيف بغا...
حلا : نتي دايرة السبة بالولاد ..الولاد يفتحو عينيهم على والديهم مطلقين خير ليهم ملي يكبرو و يعرفو و يفهمو و يشوفو كل واحد عايش فقنت.....لواه دوز عليا انا ديك اللعيبة ديال ولادي ماولادي...عارفة داك القلب عندك مسروق و السيد مخزون تما....و نتي تعرفي لي يناسبك..! انا ماعزيزش عليا الواحد يقولي دير ماديريش...سرك فبيير والله لا عاودت شي حرف شي حد حتى نموت....لي نوصيك هو تلفي وقتك و تحاولي تنساي داك السيد ماتبقايش تتبكي و تنخنخ عليه بغا ينعس معاك قولو الشريف فهمني حتى نعرف راسي من رجلي ماشي نتا قالب عليا وجهك و دابا جاي باغي تنعس معايا...! نوضي خرجي و فوجي مع ولادك و دوري بحالتك ماتخليهش يشوفك ضعيفة مهلوكة مريضة يقولو هادي مقتولة بسبابي...صافي رغبتيه و حاولتي معاه و درتي جهدك حتى عبتي ماتبدل والو ..قلبي عليه شوية ..و ديها فراسك و عيشي لراسك....( ضربات جبتها مصدومة ) و انا كنقول مال هادي مقتولة على القراية واحلة فروحها و همها فقرايتها...كاع هذا حب للقراية....احسن حاجة درتيها...دابا عندك تجربة و السيفي عندك عامر ...خبرة فالتجارة و التسيير ...! شكون بقا يديها فشي يحيى...ملي تفطمي ولدك رجعي شوفي الخدمة تلفي وقتك ...!
بقات غا تتهدر وهي الصدمة قالباها مصدومة و ماعارفة حتى شنو تقول و كيف تصرف كما يجب ...ماعندها مع النصائح و الخوف ديالها تترجمو عصبية و غوات و يديها طوال...غا دابا ماعرفات كيفاش جمعات فمها و ربطات راسها...
خرجات بهدوء من البيت و دخلات لبيتها النعاس
طار من عينيها مصدومة بالجهد ...! عيات تحاول تنعس ماقدراتش... و لسانها سرطاتو مابقات عارفة ماتقول...و شنو تزيد الهدرة مابغاتش تخرح ....! بقات شي ساعة هكاك....ووالو ...حتى ناضت و مشات عاود لبيت نسيم تطل عليها...تدهشات كثار ملي لقاتها غارقة نعاس مزيرة على ولدها الصغير لصدرها..تتسول فراسها كيف كدير تنعس و تضحك عادي ..و كيفاش صابرة لديك العيشة ...!
رجعات لبيتها تتقلب بوحدها تتفكر في حالة ختها.....هزات تليفونها لقاتو غيطرطق بلي زابيل ديال أسامة...!
رجعات طفاتو و نعسات بعد مجهود كبيير....!!
فاقت فالصباح معطلة...!
لقات كلشي فاق تيفطر ...حتى من نسيم تتسخر مع حميدة شادة شعرها الكحل عالي تيلعب ورى ظهرها لابسة بيجامة ثوبها حرير ..عينبها منفخين تتفطر بهدوء و تضحك مع خلود و عبد الله عادي كيف موالفينها...
عبد الله ( جمع حجبانو)كيجيك العجز احلا ...الخدمة عندك بالرشوق...
حلا : و صافي اعبد االه بلا مادير علينا باطرون.....( شافت فنسيم تتصرف عادي ) فين هي أزهار ....
نسيم : مزال ناعسة تتفيق فالصباح و ترجع تنعس...دابا تلقاها فايقة فارعة دنيا غوات ....
باقي يلاه كملات هدرتها...خرجات ازهار هازة تليفون نسيم تتبكي بواحد الشعر مشنتف طالع للسماءو الكرش خارحة مطبزة كي البالونة وججها مدورة منفخة و خدودها عامرين جايبة العين ...
_ مامي....پاااپييييي...پااااابييييي.....
نسيم ( هزاتها عندها تتشوف ) فينو بابي...وريني نشوف ( أزهار تتوريها التليفون زعما بغات تهدر مع باباها و تخربق فالهدرة النطق عندها ثقيل ) يلاه اجي نفطرو و ندوشو و نديرو آلو لبابي....صافي....
أزهار مدلية شفايفها قد القميلة مخشية فحضن نسيم تتشوف فالحضور مغوبشة طالعة ليها القردة...تيضحكو عليها مدوزين بها الفطور..
حميدة : ياربي السلام على تغوبيشة غا حلا ثانية ....
حلا : و عندها الزهر تطلع تشبه ليا مالي تنا كيجيتك.....
عبد الله : ماجيتينا والو ..فطر دغيا نوض شوف شغلك بركة من العجز....!
ناضت حلا لخدمتها...باقي غالبة عليها صدمة ختها...ماراشقاش ليها و مامرتاحااش...كانو تيقولو على نسيم هي الهشبشة و المفششة ديالهم ماتصبر لا على تمارة لا على شقاء صدقات صابرة على ماهو كفس و مر ...!
جلسات فاابيرو ديالها بادية خدمتها بجدية ...! حتى عيااات وجلسات تتسوط عيات و شحفات...! شرباات عصيرها البارد و فتحات الانستا كدور فيه و تشوف الجديد ...حتى تتطلع ليها صورتها مع عبد الصمد ليلة الخطبة مزال تتدور في صفحات الاعراس المغربية ...! طلعاتها بالزربة بلا ماتركز فيها كثر ..و تشغلات مع خدمتها..تتنوض واقفة تتلبس الصاك و السندال و شال مع عنقها تيجيو انسومبل مع ساعة ذهبية فخمة تتصور اابياسات الواعرين و تحط مامحتاجة عارضة هي قاضية لراسها الغراض...!
جات صوفيا داخلة لعندها تتدوي بعملية...
_ ختي حلا ياسين جا...
حلا خرجات لعندو تتبسم سلمات عليه و بدا تياخد ليها صور بدقة عالية...للسلعة و البياسات تيصور ااذهب و الخواتم على بديها و السنسلة فعنقها و الحلقاات فودنيها تتبان غي السلعة و الموديل على بشرتها البيضاء...!
حتى سالا و خرجات تغدا بوحدها...! تمات راجعة للكحل وهو يوقف عليها علي حتى قفزها و كمشات حواجبها محنزرة فيه ...
_ و نوض اصباح الخير....ضرب عندي شي دورة ماعيتيش تطوان توحشاتك اصحبتي كاين الزين هنا مخييير....زهقات العين على وحدة شوفها و عطينا اشنو بانلك كاين شي ولا والو ....وخا مزوجة اهانية عندي الخاوة ديالي......
أسامة : عارف والله حتى عارف....انا ندمان و ماكنتش بعقلي ملي قلتها...صافي حاولي تنساي هاد الغلطة...عاد قلنا بسم الله فزواحنا وبديناها بمخاصمة ! مم عجبك الحال ....
حلا مابغاتس تبلع ليها مارضاتش...بقات ساكتة قالبة وجهها عليه حتى جرها تيدرع فيها و يبوس ليها راسها و عنقها و يديها تيسايس...
_ والله ماكتجي معاك تغوبيشة...كتسيفي...نخرجو نتعشاو اليوم مم !
طول العشاء وهوما كيهدرو فاي موضوع جا فالطريق دخلو فيه...! لابسة البراصلي لي جاب ليها رجعات لهداوتها و رقتها معاه بالكشايف....حتى بغا يتسطى معاها...وهي ماناسية والو مزال واحلة ليها فالحلق...تتعلم تغطي العيوب لي تتشوف و تتعلم تصبر عليها...مابغاتش ترجع باللور وهي وصلات معاه للزواج و العرس ماباقي ليه والو ....!
تعشاو فجو رومانسي حيوي و ناضو تيدىو شادين يد فيد ...و أسامة سخن عليه راسو عليها...غا دخلو لاطو جرها لعندو متكيها على صدرو تيشوف فيها هايم يقيس شعرها مرة رقبتها مرة عينيها ماوصل لديك المرحلة حتى سحفاتو ففترة الخطوبة لي دامت اربع شهور...!
قرب باغي يبوسها بغات تهرب شدها متبثها تيبوس فيها و يديه كيفتحو ليها الشوميز و يعبرو صدرها ...حتى قفز ملي سمع رنة خاصة باتصال ماماه....!
رد عليها بالزربة تيمسح فمو تينهج و حلا تتدور فعينيها و تمسح لعابو من شفايفها و تشد الشوميز لي فتحها..تتسمعو و تسجل و تحضي كيف تيهدر معا مو...
_ نعام اماما ..وي لااا غنجي دابا ...وخا هي الاولى ...لا ( تلبك ) مع ..مع صاحبي سهران ....( شافها خرجات فيه عينبها شدها من يديها حابسها عندو وهو مكمل فالهدرة مع مو كيتفتف.. .)
_ صاحبي عمر لا ماشي حسام عمر اماما...وخا انا غنجي.....
حلا ( غوتات تتدفع ليه يديه حتى قطع ) انا عمر !! رجعتيني عمر ااسامة عوومااار.. ....
حلا حجبانو تلاقاو جراتو من كيو الشوميز مارضاتش ...
_ علاش ماتقولش ليها معايا ..شنو هادشي أسامة...واش ترضى نهدر ماما تسولني مع من نتي نقوليها مع صحبتي و نسميها كااع ...واش تنبان ليه انا بالقرون....ماعندي نفس تسيميني عمر ....عماااار يا ( جات تسبو جمعاتت مفقوصة ...) وخا انا لي حمارة مكنسواش خارحة معاك و نسيت لي درتي اابارح....
حلا : انا بغيت نفهم ..فهمني اسيدي دابا ...فهمني علاش ماقلتيش ليها كاين معايا ...فهمني و نسكت و نسمع ليك حتى للصباح ....
عيااا معاها كيدخل و يخرج فالهدرة شنو يقول...فضل انه يهني راسو من صداع مو على حساب حلا غيقفرها معاها بالمعقول وهي ولاات تتصدمو بحال عاد بدا يعرفها...كان تتبان هادية و هبيلة.....عيا يسايس معاها ديك اليلة ووالو رجعات للدار ثاني مخاصمين...! دوزات ليه سيمانة مخاصمة غي تيخرجو تيتخاصمو و حلا بدا يطلع ليها هادشي فراسها....تتمشي و تجي فبيتها تتهدر مع خوتها مفقوصة...
_ صدق ولد مو البنات ...ولد مووو....انا نتزرف بواحد ولد مو...كاع ماكانت تتبان عليه...فين كان هادشي فالخطوبة ماشفت والو تزرفت.....كنعيا نقول ويلي احلا راه تزوجو ماشي مزال مخطوبين ترجعي اللور ماجاتش...زيدي صبري . .زيدي الزواج صبر...ولايني مابقا صبر مع ولد موو.....
خلود ( بخوف ) ماتقوليشي غطلقو قبل العرس !؟!
نسيم ( بصدمة ) رضا غيقتلك ....
حلا قربات لعمد نسبم تتزطم فجلايلها معصبة ...
_ يا هاد الهبيلة كنقولك هذاك مكيخلعنيش...مكيخلعنيش تيبان لي كي سراق الزيت تزطمي عليه يدوخ....
خلود ( بصرامة الاخت الكبرى ) تأكدي قبل و عطي فرصة اخيرة ساعة شوفي اابلان شنو فيه.....
فعلا سمعات حلا نصيحة ختها و ليشهد التاريخ اول مرة حلا تصبر على فعايل دشي راجل ....و ياريتها دارت لي فراسها و ماسمعاتش كلام خلود ....
خرجات من الدوش ! شعرها فازك تيقطر تتزرب عليه تنشفو طويل واخد ليها الوقت.... وولادها تيغوتو فالبيت و ينقزو صوتهم تيتسنع و غواتهم رقيق تيزوي كي الفلالس صغار تيتخاصمو و يتغاوتو و كل واحد واحل فراسو مصاب غا يشد راسو ...غا غوات امير و التوغويغ ديالو و ازهار خدامة عليه بالهدرة تقول تتهدر بالشنيوية الهدرة مسروطة مامفهوماش ..تتقرب حتى لعندو تحيد ليه اللهاية من فمو و تنقز كي القطة لبعيد تتقلب فعينيها و تشطح قزيبتها....
شداتها تتدير فيها البزيقات ديالها و ترميها عليه ...منفخة....
أمير تيبقى غا تيرمش ويدلي شفايفو حابس البكية تيحس بالحكرة و ماععدو جهد ليها و هي كطير كي الزواق....بقا تيشوف حابسها حتى طلقها بغوتة و ناض لعندها شاد التوازن غا بزز تيفتح يديه و يطلقها مجنن.....قفزات نسيم لغواتو و حطات من يديها مخلية شعرها هكاك نص ناشف و نص فازك...! تتقرب لعندهم بالزربة شعرها تيشطح معاها لابسة سىوال جينز لاصق عليها و حمالات الصدر فقط جات عامرة من التحت و ضعيفة من الفوق..عندها شوية الكرش باقية ليها من الولادة ....يلاه كانت باغية تلبس خارجة مع حلا و خلود و شكون خلاها بعض المرات تتكون تتدوش...تتسمع غواتهم تتخرج هكاك بالرغوة ...
علاات فيهم حواجبها تتشوف فيهم ناطقة بهدوء
_ شنو كاين ؟ مخاصمين ثاني...
أمير ( تيبكي و يدمع و ينعت لأزهار بيديه تيشكي ) مامي لولويا....
أزهار تتشوف فيها تترمش و تخرج لسانها و دور فعينيها ...شافت راسها غالطة طلقاتها للبكاء حتى هي تتدلي شفايفها و تبكي تقول قتلوها و ماخلاو فيها والو و ظلموها !بوحاطية و مفششة شابغة دلال و خنات و من يد ليد ...الحفيدة الاولى عند عبد الله و لالة حميدة و حتى عند والدين يحيى ...!! ملي تزادت و ففمها معلقة ذهب...باقية لاصقة فالارض و الذهوبات كل مرة موديل على قد سنها....
بقات نسيم من هنا لهيه تسكت أمير تبكي ازهار....تهز ازهار يجرها أمير.....تمشي تكمل تنشاف شعرها تتلقاهم تيغوتوو و يدافنو و يتسابو بالهدرة وخا ماهي هدرة غا الحروف مشيرين طالبين السلامة و علم الله شنو تيقولو هوما تيفهمو على بعضهم....طجات و تعصبااات و تقهرات....! دارو ليها الشقيقة و الصبر ولا عندها قليل القهرة و النفسية مزفتة ...مع ذلك الغوات قليل فين تتغوت عليهم .....! تتخدم معاهم اسلوب التهديد...و اكثرية على ازهار حيت هي الكبيرة تتفهم كثر. ..
_ والله وتعاودو تخاصمو غنقول لباباك مايعاودش يصوني عليكم... ازهار مغنعطيكش تهدري مع باباك ..صافي قررت....يلاه مكتسمعيش مني كتديري لي فراسك وخا اماما ..ممنوع تهدري مع باباك...
ازهار ( تتتدمع و ترمش عينيها كباار تيشبهو لنسيم تتبكي و تهدر لشوية تترغها و الهدرة عندها محربقة ) نو مامي.....مانبكاواش ....( الدموع تيقطرو من عينيها حابسة الشهقة ) نو مامي ...نووووووو.....نكولو لپابي ....( ماصبرات و طلقتتها بالغوات و البكاء و الشهيق كلشي الا ماتهدرش مع باباها )
نسيم قلبات عينيها تتنهد غمضات عينيها و فتحاتهم و تحنات هزاتها تتمسح لبها عينيها و تبوس فيها...
_ و علاش تتعصبيني امامي...تبغي تعصبيني غي انا و ماتسمعيش كلامي.....صافي هانا نشوفو باباك...بغيتي باباك.......
العيون دغيا فرحات و نشفات من الدموع عاد كانو تيبكيو دابا تقول عندهم عيد .. مجمعين فوق الناموسية قراب ينقزو بالفرحة...ازهار جالسة بعقلها زعما ..بواحد الشعر عمرو يتجمع...ملولب داير كي الخاتم...جالسة بعقلها تترمش و تستنى تشوف باباها فالكاميرا..و امير واقف بزز شاد اللهاية ديالو تيرمش و يشوفو فالكاميرا كيستنى بحال شي واحد كبير بعقلو ...شاداه نسيم و هو شاد يديه فشعر ازهار حتى تتغوت و تغوبش..
_ نوو..ليش موا....
عاودات نسيم صونات على يحيى عرفاتو ماشادش التليفون حيت اتصالها ضروري يجاوب عليه وخا يكون غارق فالخدمة...تيسبق اتصالها على الخدمة عارف ماتصونيش تعاشق معاه و إنما على الولاد ....
سكتات ملي فتح يحيى الخط و بان وجهو فالكاميرا....ضحكو الولاد و القلوبة خارحين من عينيهم ...طارو للكاميرا تيبوسو فيه و يضحكو و يصفقو ..هكا تيديرو ملي تيشوفوه فكل مرة وخا يكونو يلاه قطعو معاه الهدرة....هاد العام ولى تيغبر عليهم كثرات عندو الخدمة على برا ...مرة تياخدهم معاه مرة ماتيصلاحش على قبلهم الجو مامناسبش ليهم....
نسيم تيبانو غي يديها عريانين و شعرها لي تيجرو أمير بيديه كي الجفاف.....تتسمعو تيهدر معاهم ضاحك مصغر عقلو معاهم تيصرد ليهم البوسات .....
_ هادي لازهار و هادي لامير....وصلات ولا باقي وصلات ابابا ديالي ...ازهار كتسمعيني ابابا....
ازهار فين هي... غطات عليهم بداك الشعكوكة ...ناعسة على كرشها و يديها تحت ذقنها تتشوف فيه بحال تتفرج فالرسوم تتضحك غتموت بالفرحة و عينيها تيصحكو ...غاتتسمع ليه و ترجع تبوس الكاميرا تتخايلو قدامها
جلساتو نسيم مكالياه بالمخدة و ناضت من تما مخلياهم بجوج معاه مابانتش قبالتو بمرة وخا شاف شعرها و يديها ماهدرش ملي شافها ماهدراتش ....
خلاتهم معاه الجنة ديالهم هي هاديك ...تيحماقو عليه و يتسطاو ...وهي تتحس براسها قيمتها عندهم اقل من باباهم ...تيبقى فيها الحال بالجهد وخا ماتتبينش....!
لبسات عليها بالخاطر هاد المرة و بالرشوق الولاد ملهين مع باباهم...! تتسمع ازهار تتعاود ليه وهو مسايرها عاطيه وقتهم شعرها خلاتو ينشف لراسو تيبقى طليعي زوين ...! طالقاه مغطي جسمها ...! لبسات شوميز فالعسلي و حيدات داك السروال بدلاتو بالاخر سروال ثوب ابيض واسع ...توحشات دور بحالتها و ترجع كي كانت...تتحاول و لكن تتوقف فالنص ماتيكون عندها كانة....! رشات ريحة فالينتينو لشعرها و جبدات عينيها بالماسكارا و الايلاينر ..لبسات خاتم الزواج و ساعة فضية انيقة و صاك مربع بالسنسلة من ديور...لايق مع اللبسة....! الصدر عامر بالحليب و جسد ناضج تتبان عليها مراة ...طويلة و ملامحها هاديبن و زوينين...عندهت ملاحة فوججها ..و سرها بوحدو ...!!
سالات و دورات وججها لقااتهم بداو يدوخهم النعاس كي الفلالس...حيدات ليهم التليفون ناطقة بلل ماتشوف فالكاميرا ...
_ غنقطع الولاد نعسو ...
قطعات عليه بلا ماتستنى رد و صاوبات ليهم البلاصة مغطياهم تتشوف فيه و تنهد ...حتى تينعسو عاد تتندم علاش تتعصب عليهم و تزل تبوس و تبكي عليهم تيقطعو ليها قفقلبها...!
وصات عليهم حميدة و خرجات من الدار تتمشى بداك الطالون عالي مخلية حميدة تتنكر ..
_ ابنتي غتخرج على راسك بداك المسمار لي واقفة عليه...و اجي شكي عليا ظهري كبحرقني.....
تعيا تهدر و تعيا تنكر عليهم و شكون بسمعك ياحميدة ..! خرجات بوحدها ...تتخلف بالزربة ماتتهدر مع حد ...تلاقات باخ يحيى صفوان عطاها الاوطو دياالها تيضحك ...
نسيم : لباس عليهم اخويا ...ناشطين ماناقصهم خير ...دوز عندنا للعشاء تعشى معانا ...
صفوان : لا مانقدرش اليوما..يحيى راك عارفة حا المغرب ا فطنجة قالي نطلع لعندو محتاجني فشي شغل ...غارق خدمة مرون مع الوراق و التخربيق يدالو ...غيهبط يشوفكم و انا غنطلع....
حلا : نتي لي شفتيه غوز خوديه ...و هادي ماغتلبسها حتى تولي عندها ثلاث شهور عاد تجيها....و ملي تجي دير ثلاث شهور حتى تكون مطمرة حويحات تيحمقو ...خود ليها هاذي واعرة ..و هاد المونو ..شنو بان ليك انسيم...
حلا : صبرو شوية...نتعشاو برا عاد ندخلو ياربي شحال تتمرضو الواحد نهار و انا غادية معاهم من بوتيك لبوتيك و ماعندي حتى فايدة فهاد التخربيقات ديال دراري الصغار و صابرة على نكير ديالكم و فالاخير شادين طريق الطريق نيشان ..اختي انا بغيت نتعشا برا ...ماغادياش للدار دابا.....
خلود : و ردي على تليفونك راه جابلي الشقيقة و الاعصاب...طفيه و هنينا...
حلا : هذا اسامة...ياربي شحال طلعلي فراسي ...عمرني تصدمت فشي حد قدو ...ولد مو مقطر...اذا صبرت ليه مزال ها وجهي....مانقدرش نكمل مع هذا حياتي ....( زمات شفايفها ) واحد التزريفة نعاودها لعدياني يفرحو و يشدوها للزغاريت ...كنت عارفة غتخرج فيا شي دعوة ...
خلود ( الحرقة قتلاتها ) و شدي اختي سرك نتي لي عيتي تختاري و تعزلي وحلت فهاذا ....زيدو ناكلو جاني الجوع ...حقا واحد الفوطو عندك مع عبد الصمد فالخطبة باقية لدابا تتطلعلي فانستاغرام ماعمرو هدر ليك عليها أسامة ؟
حلا ( دارت راسها ماسمعات والو ) تنا فيا الجوع ....( جرات نسيم من يديها مفقوصة منها ) و فيق من القلبة و تحاور معانا مالك ساكتة كي الصنمة....
تعشاو و عمرو الكريشة نييت...! جالسين بثلاثة تيبانو قراب فالعمر ...خلود طالعة ل33 و حلا 27 و نسيم 25 ...دم واحد تيجري فيهم و الشبه واضح عليهم...لي شافهم يعرفهم خوت ...هاهوما مناكرين هاهوما مصالحين...و خلود مع الماكلة غا طلبي و حد و هوما تنفعو من وراها وحلات هي فالخلاص ...!! ناضت خلود تغسل يديها بقات حلا مع نسيم تتدير فيها شوفاات حادة...
_ عارفة ماشي شغلي ولايني بلا ماتفقصيني انسيم....كون لقيت نشدك عندي فالبيت مايقيس فيك شعرة تنعرفك تابعة غا داك القلب ....
نسيم ( قلبات وجهها ) بلا ماتندمينا ثاني....
حلا ( ميقات فيها ) سري نيييت..حميدة عندها الحق تتعيا تقولي ابنتي دخلي سوق راسك وماعمرك تدخل بين راجل و مرا يتخاصمو اليوم غدا يصبحو معانقين و تباني نتي لي ماتسوا ماتصلاح...هانا شادة فمي...حتى تجي عندنا تتبكي و تشكي ...انا حاملة.....
نسيم ( بخوف ) الله يستر ....
حلا ( رمات شعرها اللور عاقدة حجبانها ) و تحلي ليه و قولي الله يستر....
جات تكمل توقفات ملي قشعات علي حاضيهم...بلعات ريقها معصبة و ناضت واقفة زاربة عليهم يمشيو ...! ركبو مع نسيم و وصلو للدار ورى العشاء...! قلب نسيم قفز ملي شافت الاوطو ديال يحيى ...!! توحشاتو وخا تنكر و تكدب على راسها من هنا للعام الجاي...طلعات هي الاخيرة فيهم...! حلا شافتو تسالمات معاه بابتسامة صفراء...
_ على سلامتك ...
يحيى ( ابتسم معاها عاطيها صوابها ) الله يسلمك مبروك عليك الله يتمم على خير ....
جلسات حلا بعد ماقالت ليه امين ..بقاات جالسة فالصالون حاضياه و حاضية نسيم لي داخلة تقول تتخلف على البيض....تتشوف يحيى عينيه فالتين عند نسيم و يرجع يكمل الهدرة مع عبد الله و عينيه معاها و مع عبد الله....
دخلات نسيم للصالة تتصرف عادي قدام عبد الله و حميدة. .
_ سلام عليكم ....
سلمات على يحيى و سلم عليها عادي ...و جلسات حداه تتشوف فكلشي الا فيه ...
عبد الله : فيها خير ...فيها خير ...الوراق طاحو يتعوضو ...المهم هي الصحة....
يحيى داير يديه ورى مخدة نسيم ...عاطي الصواب لنسابو وخا كلامو قليل معاهم و ماشي غي معاهم حتى مع عائلتو تبدل ..بحال هزيتي راجل و حطيتي راجل مابقاش يحيى الضحوكي و الناشط و تلقاه داير الخاطر للصغير و الكبير ..بحال كبر بعشرين عام تبدل فخطرة و كلشي لاحظها و قالو دار الولاد و تعقل....! راجل عادي ماشي وسامة مفرطة ...عندو كاريزما الرجل الشرقي...بشرتو سمراء بالشمس و ملامحو سوداء ...داير تحسينة عادية و لحية خفيفة و جسمو رياضي بسباب خدمتو ...متخصص فسيكولوجيا الخيول ...اغلب المسابقات العربية لملكات الجمال ديال الخيول او سباق الخيول تيكون حاضر تفاديا لاي مشكل يوقع لنفسية الفرس او اي خيل عربي عندو عقدة من الماء تيخاف من الماء ولا ماتيقدرش يهبط راسو ..و شحال من واحد تيعيط ليه على قبل خيل خصو يشارك بيه فمسابقة عالمية ولكن عندو مشكل فالثقة فالنفس ...غالبا مشاكل نفسية للخيول و كذلك عندو رخصة تاجر سيارات ...!!
حميدة حطات العشاء على حقو و طريقو فرحانة بنسيبها....!! تعشاو و تجمعات الطبلة و حلا معاونها عاقدة حجبانها معصبة ...!!
عبد الله ( شاد هدرة مع نسيبو ) و الحرفة صعيية ...نايضة العدازة ها لي كيقولك التحار ماشادين حرفة غا تحار ماشي ءهايبية الذهايبية هاذوك لي ضاربين تمارة تيصنعو الذهب ....
يحيى (نزل يديه على يد نسبم بعفوية حيداتها من تحت يديه و ناضت من حداه تتعاون حلا و حميدة حتى هو حمع يديه عندو مزير على فكو ) و اعمي التجار حاجة و صحااب الصنعة حاحة هادشي معروف ..غا هو كلها و رزقو ....
عبد الله ( راسو يابس ) و لااا...علاه التحارة ساهلة....كي التجارة بالذهب كي الحديد نتا تاجر طموبيلات و قولي واش التجارة ساهلة ؟!
يحيى ( ضحك تيهز فراسو ) اسيدي مانزيدش معاك ...مالنا حمق نزيد مع ريفي فالهدرة !
عبد الله ( ضحك ضحكة ثقيلة ) وقيلة ناسي باك دمو رييفي....راك حتى نتا هاز العناد ديالنا غا ناكر ....
حميدة ( مع حلا فالكوزينة ) مالك على هاد التغوبيشة ؟
حلا ( تتدور فعينيها ) تخاصمت مع أسامة اماما....اذا قلت ليك بديت كنتصدم فيه....تخايلي كيدير معايا شي تصرفات ماحملتهمش.و صابرة غي بلا ماتقولو فالاخر قلبات على السيد بلا سبة ...
حميدة ( بخوف ) شنو كاين...
حلا ( تترمش ) غدا و نقولك ..غي باش نعلمك انا مستحيل نزيد نصبر عليه كثر من هكا ...و هاد المرة مازدت فيه ماوالو ....!!
دخل كل واحد لبيتو...! و نسيم كون ماحميدة كون سلتات تنعس مع حلا ...!! دخلات لبيتها لقات يحيى ناعس داير يديه على عينيه رجل طاويها و رجل مطلوقة....الولاد ناعسين فالكونا ديالهم محهزة من طرف حميدة...!
دخلات بدلات عليها و طرفات حالتها و تكات ناعسة عاطية بالظهر النعاس طاير من عليها...بحال الغريب ماشي راجلها والدة معاه حوج ...بعض المرات تتحسو باغي يهدر وينسى لي داز ..تيدير خطوة و تيطمعها حتى تتفرح و تيرجع باللور و يمحي البسمة من على شفايفها....!! تتحسو تيدير محاولة و تيرجع للور دغيا .... مسحات دموعها تتبكي بالحس ...!! شعرها محموع حداها و الدموع فعينيها مفزكين المخدة ...!! زيرات على عينيها ملي حساتوو بيديه دارو على كرشها ببطىء خاشي نيفو فعنقها تيبوس ناطق من صوتو عرفاتو شنو باغي ...
_ علاش كتبكي....
نسيم ( غمضات عينيها ليه باستسلام ) : مكنبكيش ...
يحيى : علاش ماجاوبتيش على تليفونك البارح ....
نسيم ( حيدات شعرها من على وجهها مستقبلة قبلاتو و لمساتو ) حيت الولاد كانو نعسو ...علاش غننجاوب ..! كنتي تخسر ميساح واحد تقولي جيتي للمغرب ماشي نعرف من صفوان ....!
انقطع الكلام و كان لي كان ...!! كيف كل مرة استسلمات ليه و فداخلها راحة مايعرف تفسيرها حد غيرها....رتاحت من الشك لي كان عندها ولو نسبيا ...ماشي مكلخة او ماتتفهمش حتى ماتعرفش راجلها واش عندو بديل اخر...ساهل المراة تعرف.... عايقة و فاهمة و من النتيجة فرحات ولو بعض المرات تيدخل ليها الشك....لكن هاد المرة رتاحت ...!
فاق أمير تيبكي بالنص د اليل ...رمات عليها البينوار و شعلات ظوء خفيف ...يحيى ناعس على كرشو ماكاينش هنا عيااان بالسفر و الطريق ....طرفات حالتها من العرق ليفرزو جسمها بعد العلاقة و عطاتو يرضع حتى رجع ينعس و دخلات دوشات و تكات ناعسة فايقة مع بونبر تتوجد الفطور مع حميدة...!!
و الغريب حلا فاقت معاهم صابحة خاسرة حاضية نسيم بنص عين...تتشوف عنقها و رقبتها و شعرها ...حاضية اي علامة...! زمات شفايفها خاسرة و صبحات تتفطر ساكتة جامعة فمها...مرة تفكر فختها مرة فحريرتها مع أسامة...!! طلع ليها فراسها باغية تصدرو ...عيات تصبر و تلاقي الخيوط ...تزوحات بيه و لي عطا الله عطاه كانت مترددة فالاول لكن دابا لا...اش فيها اذا طلقات قبل العرس...مخيرة كاااع حد مادارها فالعائلة ديرها هي اش فيها....!!
خرجات لخدمتها بكري مافيها ماتزيد تفقص مع نسيم ...شحال ماهزات العين فدار لالة عيشة و شحال ماحات عينيها عليها...مابقات تتديها فيها ولا ترمي العين لناحيتها .. ...! اما واحد عبد الصمد الهدرة عليه تيجبدوها دايما ماعرفات غا ضد فيها ولا كاع صدف هادي و عبد الصمد غرس خيوطو في حياتها بلا ماتحس....!!
غيرك ما يحلالي الجزء 13
محتوى القصة
حياتها روتينية بكاء في بكاء ...!من نهار دار ولدها ست شهور وجلسات فالدار هي تتحس براسها راجعة للور...تحت عينيها كحل و النفسية مدمرة ..شعرها تتمشط النص و تخلي النص...! لابسة بيجامة دوزات بيها يوماين ...! ناضت من ناموسيتها شعرها طويييل ماشي طولة عادية هابط لتحت مؤخرتها و مشعكك شوية...تليفون فيد و يد فنصها تتصوني لحميدة بصوت باكي و باهت...
_ ماااما بغيت نرجع ..ماشي شغلي بغيت نرجع بحالي ...مانبقاش معاه حتى دقيقة .....
حميدة ( شهقات ) نسيييم ! مالك ..شنو عندك ...
نسيم ( شادة راسها بغات تفركع ) حلمت بيه كيخوني ...حلمتو اماما مابقيتش باغية نبقى معاه ...
حميدة ( بغات تغوت بالفقصة ) و نعلة الله عليك يابنتي ..يا ناقصة العقل اجي نيت نوجد ليك شي تييو نحمر ليك لحمك بيها حتى يىجع ليك عقلك ..انا صافي غنحماق معاك ...عاملة دراما من والو واش باغي. تخرج على حياتك بيديك ابنتي ...واش مكتفكريش شكون هذا لي يديك على عقلك ..كتبكي و تشهق علاش المسكينة قالك حلمتي راجلك كيخونك...والله يابنتي الا عندك الزهر بعيدة ياحتى نطيح عليك شوية....
نسيم رموشها تيقطرو بالدموع هدرتها حانية و ماتتغوتش وخا تكون معصبة وواصلة بيها لفين ...و الحاجة لي كطيح فراسها ماتحيدهاش بسهولة....مسحات دموعها وهي تتقول...
_ ضربني ولا شويني ..انا عارفة شنو كنقول...راجلي كيبغي خدمتو عليا اماما و ماعمرو مايكمل معايا شهر مكمول ...و انا حلمتو عرفتي شنو حلمتو يعني راه بصح دايما تتوقعلي ....انا عارفة لي حلمتو تيكون وقع و مجرباهاااا.....
حميدة ( بصرامة ) نسييم يلا شغل تبرهيش ابنتي...جمع ولادك و رد عقلك بلاصتو وصيييتي ليك دير عقلك راه الشك لي فيك غيخرج على داك العشرة لي بيناتكم انسيم سمع مني ...كنعيا نقولك نقص الغيرة الغيرة نقص منها ...خنقتي راجلك عطيه شوية راحة فين يتنفس ..ماتبقاش تشك فيه و تقولها ليه فوجهو ..راه عندك الزهر طحتي فيه شارب عقلو ....
نسيم عينيها مدمعين تعغزز شفايفها : اوك اماما بسلامة...شكرا....
قطعات عليها مخلية حميدة قلبها واكلها عليها تتضرب فخضها و تولول و تشوف فبنتها خلود الجالسة حداها تتسمع كرشها حتى هي واصلة لفمها قربات تولد ...
_ مالا نسيم ؟ تخاصمو ؟
حميدة ( بهم ) دابا نعيط لعبد الله يجيبلي بنتي لعندي...نسيم من نهار شدات الجلوس فالدار و كنشوف عقلا مزعزع ...اابنت تشيرات عندي ...دابا تكون بنتي عندي ....
خلود ( تتسوط ) و خصها تجي باش نجر لبها ودنيها شوية...تنقص من الغيرة المريضة ديالها....واش مكتشوفش راجلا شحال كيبغيها دايما خارجة عليه بالغوات و المشاكيل و جابدة ليه الخيانة...انا و تخنقت بلاصتو تخنقت....قول لبابا يجيبها لهنا على مايجي يحيى من دبي ...راه باينة اخيرتها دخل فاكتئاب وهي كي ولات ..كبر من عمرها ماشي نسيم ختي لي كنعرف لاا...
حميدة ( تتنهد وتهز فراسها ) لالا....تبدلات تبدلات...وجهها كان كي البلار صافي و حالتها عمرها تكون موسخة ...شعرها كان حرير وهي مربية السالف فيكم ...و دمعتها ماطيحش و صوتها مايتسمعش....بنتي تبدلات ...غتمشي تموتلي بالوسواس و الشك.......( ناضت واقفة تتصوني على عبد الله و تولول ) دابا نعيط لعبد الله يجيبلي بنتي لعندي....دابا......و صوني على ديك الدايعة حلا ابيل فييديو نشوفا بعيني فاين هي.....عجباتا تركيا مابغاتش تهبط الفرفارة الاخرى داكشي لي كان ناقصها...التزيار مابقاش تما...تلاقات مع سلمى و مشااات عجبها الحال....صوني علىيها دابا ...حتى داك خطيبها دايرة ليه كي الخاتم فيديها مافيهش حس الغيرة....
خلود ( تتضحك ) مايقدرش يهدر تيخاف تقلب عليه ....
خلود ( فاتحة انستا تتطلع ) بشاااخ على تصييورات ضاربة ليك بالايفون فالشميسة....هي لي جات معاها تقول ماتابعها لا حمد لا محمد ...مامخطوبة ماداخلة للزواج ....
حميدة بحزم و غوباشة قطعات على عبد الله و شافت فخلود ...
_ ارا نشوف ديك الفرفارة شنو لابسة ....
خلود : الزواق لابد منو ماتتعرفيش حلا....
حميدة ( تتشوف بعين مدققة فالتصاور ) بنت الهم جنابها تيسخنو عليها...عارفة راسا عاطية العين و كتزيد تزوق و تحكل و تجبد دوك العينين و تزير على ديك ال*رمة و الصدر....و داك الشعر مابغى يطوال ليها حلفات حتى تلصق باباه ...حاضية غا الزواق و اللباس و الخروج ...كانت غطيحلي كوما كون مامخلاهاش عبد الله تمشي لتركيا...كلاتلو دماغو بجوج هدرات و طارت كي الدبااانة.......الخوف ديالي يانا هو يمشي يلصق فيها شي ولد الحرام مايعرف لا مزوجة ولا مخطوبة...كنقولا تنقص من هاد الزواق راه غطيح مع شي كارثة مقطع يدو من رحمة الله ....والو ..شكون يسمعك يا حميدة....( تتطلع فالتصاور و تنكر مكتيعاااش ) شوف شوف زعما الساعة و الطويكين و الحالة ...انا واعرة...سيدة اعمال انا....دابا نصوني عليها تجمع هاد التصاور لا يمشيو يضربوها بالعين .....
خلود ( حيدات ليها التليفون ) خليها شمن عين حتى هاديك بعدا تتشد فيها شي عين ......
هدرو معاها ابيل فيديو ...جاوباتهم متكية لابسة كسيوة معرية من الكتاف و قالبة شعرها لجهة وحدة تتفرنس....
_ هاي ماميتا ...تنا توحشتك والله العظيم كنتخايلك حدايا فين مامشيييت....
حميدة ( تتضيق عينيها ) و نقص ابنتي من دوك التصاور عرفناك فتركيا كلشي عرفك غا نزلي للارض بركة من الفوحااان ....انا بغيت نعرف داك الراجل عندك مكيقولك والو ...
حلا ( ضحكات حتى تغمضو عينبها ) علاش تنقولك مابغيتوش ريفي اماما ...بغيت واحد عقليتو كي عقليتي....عادي شنو فيها حتى هو طالقها دوران في دبي شكون هدر معاه ؟
حميدة : و زواج زييين هذاا ...والله مشى المعقول مع مواليييه والو مابانش ليا فهادشي ديالكم.......وا اش نديرو معاك ذوقك هو هذا صافي قنعتي بيه حد مابززو عليك...الله يعاونكم......حبيتيه و حبك الله يجعل البركة ...
حلا ( تترمش ) اه حبيتو اماما حبيتو...
خلود ( بمكر ) : حباتو كيف حبات لي قبلو ....تقول متافقين بجوج تغبرو كمامركم من تطوان.....
حلا ( جمعات الضحكة وفهمات على من تتهدر قلبات وجهها تسيفات ) بسلامة اماما.....
جمعات شعرها الاسود ربطة مهملة ...! هزات نظاظر الشمس مغطية عينيها المنفخوين...! حضنات ولدها عندها و عبد الله تيشوف فيها بحسرة هاز البنت...
_ ماغدوزيش عند ناسك قبل ؟
نسيم : لا ماعندي غرض بيهم الرياض خاوي بعد العصر .....خصني غا نغبر وجهي من هاد الدار جابتلي الخنقة مابقيتش حاملاها....بفف...
عبد الله : اري سورات الاوطو ديالك ندخلا للݣاراج و عدل كرسي ركب ولادك ....
بعد ساعة بالضبط ...جهزات ولادها و ركباتهم كل واحد منين تييجر فيها شعرها كان محموع ريشوها....! جلسات القدام سخفانة ...
_ عرقوني....
عبد الله : وسع خاطرك معاهم ماتغوتش عليهم باقي صغار....( شافها ساهية ساكتة جبد معاها الهدرة ) شنو عندك عاود مع يحيى ...
نسيم ( تتهرب عينيها ) ماعندي والو ابابا غا قنطت و تخنقت و تخاصمت مع مراة خوه عصباتني و تجمع شي مع شي و عطيتا للبكاء.....
عبد الله ( بمزاح ) و فين السالف الحرير كيقلب المجاج فايح منو القرنفل و الضحكة الزينة مكنشوف والو انا ....
نسيم ( ابتسمت بزز تتطلق شعرها هدرتها ثقيلة حتى تتجيب النعاس ) ها السالف قطعت منو شوية ....
عبد الله ( مسايرها مزال تيشوفها الصغيرة ديالو و غتبقى صغيرة فعينو ) هادشي عندك قصيرر...واه واه على قصير... عطي شوية لخلود و شوية لحلا مايكسابوش النص من ديالك......
نسيم ( ضحكات من فوق قلبها )حلا مزال مارجعات ؟
عبد الله : غترجع هاد الايام .....مشات غا سياحة ماشي اقامة هههه....
شدوها كلام مع بعضهم...حتى وصلو لتطوان مهلوكين بالطريق...! نعسات ولادها عاد جراتها حميدة لعندها و خلود واقفة عليها معصبة...
_ كيفاش كيخوني ماكيخوني عارفة شنو هاد التهمة عندك....
نسيم ( ببرود ) فوقاش قلت انا شي خيانة ؟ شكون كذب عليك....
خلود جات تزايد معاها فالهدرة غمزاتها حميدة و قلباتها محنة تتسرح يديها على شعرها ..
_ صافي جلس معانا حسن من الجلاس بوحدك ...حتى يجي راجلك ...عارفاك ماولفتيش الجلاس فالدار و مولفة القراية و الحركة والخدمة الخروج ولايني ولدك صغير حسن من اي حاجة اخرى ....بقى فيك الخدمة ديالك و الماستر ؟
نسيم ( زيرات على فمها ) كون ماكنتش والدة كون دابا كنقرا الماستر ديالي على برا ...المخيرة تتحلم بيه و انا جاتني و ماقدرتش ؟
حميدة ( تتواسيها ) و نتي ابنتي كتشوفي بعيد بجوج ولاد و باغية تقراي برا كي غديري ليها...الله يجعل البركة عندك جوج إجازات و خدمتي جربتي الخدمة صافي قنعي بيهم و حمدي الله و تهلاي فدارك و فوليداتك و ماتبردشي غدايدك فراجلك ....انا عارفاك كتغير منو يابنتي واش كاينة شي وحدة كتغير من راجلها....واش كتعاند معاه ..صافي هو عندو شحال من ديبلوم و شواهد حتى نتي بغيتي كثر منو ...هذا زواج عندك ؟
خلود ( دايرة كي السوسة فوسطهم ) كتغير عليه و منو ...البنت عندك خصها اعادة الهيكلة.....و نتينا لي لصقتي فبابا فالصغر و دار ليك الوراق و طلعلك معاه..و قريتي تما حتى العربية تلفات عليك ماتعرف حتى تكتب جملة بالعربية و ملي جيتي لهنا عاودات ليك حميدة الثامنة و صدقتي ساقطة فالتاسعة و ضيعتي عاماين فحياتك....ملي قلت ليهم خليوها هنا حسن ليها من تما حد ماسمع ليا ...
حميدة ( خنزرات فيها ) ماعندك عقل لا نتينا لا هي لا ديك التالفة الاخرى ماعرفت حسكم لمن خارجين بغيت غا نعرف فين عقلكم متلف فييين ....
عيشة ياعيشة...! حارة و السم تيمشي فيها عمرو يوقف....! نهار عرفات عبد الصمد تفارق على حلا دارت عراضة ...فرحات و طارت صغارت بسنين على عمرها بالفرحة....ولايني ماكملاتش فرحتها ملي ولدها قطع الطريق للدار....! ست شهور ماشافتوش تتهدر معاه غغ ابيل فيديو ...توحشاتو و توحشات الدار تعمار بيه.....! طاح عليها الضيم و حاقدة على حلا ...! و دابا واكلاها دودة اخرى ماهي و مالونها....!
جالسة جلسة سلطانة نعام يالالة....تتهدر مع ختها عاقدة حواجبها...
_ سمعت الصوت بودني يانا نسمع الحيوط شنو كيقولو لبعضوم ...و نفلت صويت العايلة ؟ كنهدر معاه عادي حتى كنسمع صوت عايلة معاه فالبيت......فالبييييت اسعدية فالبيت
الاخت ( تتضحك ) ويلي اعيشة و يبقى بلاش زعما ....عنداك غا تكون سقسيتيه تما نشلل يدي ....
عيشة ( ضيقات عينيها مركزة ) يدير لي بغا غا مايكونشي مزوج بيها بلا خبار حد والله لا سمحتلو عليها لا دنيا لا اخرة ....غا يموت نيشان لجهنم يموت ساخطة عليه.....
الاخت : و هاديك حلا مابقات بانت حتى هي....
عيشة ( تتغزز سنانها ) ان شاء الله تكون غارقة فشي بير غارق ماتخرج منو ....اشنو غندير انا بالشوفة فيها و فكمارة ديالا ....غي يجي والله لا فلت غنزوجو بيدي وخا نعرف نلصقا فيه صحة مابقات تنفع معاك لا سخط لا رضى.....
حلا ! الدنيا ماقدتهاش بالفرحة...! عايشة اللحضة مع راسها ...جمعات الفلوس لي تشبعها و تحيد الشوق ...! و شحال عزاز عليها الفلوس الساهليين .. ! و شكون يعطيهم ليها...عبد الله حتى اذا عطاها يعطيه قد الجهد و هي لا باغية فوق الجهد حتى تتصدمو و يجمع ليها الحساب...! خدمات مع واحد النصرانية من عاىلة زوج خلود ...كارولينا مراة مسنة واحد الزهوانية كثرمن حلا ..تلاقاو بجوج نييت لصقاتها تعلمها الدرجة ...حيت طاحت في غرام تطواني مغربي شاب صغر منها قد حفيدها و رابطة راسها معاه...هو معاها على الفلوس وهي باغية الشباب و الزين...السيدة كتموت على المغاربة الرجال و الدرجة تتحمقها و مابغات تدخل ليها للراس ..جات زيارة لحميدة و شافت حلا ...! تلاقاو زوهانيات بجوح عطاوها للخروج و الدوران....حلا الامر متعلق بمصلحتها ولات لسان حلو تيقطر ..! قالت ليها تعلمني و لي طلباتو يتنفد ....اذا مانفعات هي تاخد اساتذة خصيصا حتى يعلموها لكن حتى تجرب من عندها ....! خلود دايما تتهرب منها تتصدعها فراسها ...عكس حلا لي جات معاها و قالت والله حتى تجرب...
ااش غدير حتى تعلمها وهي كثر من ثلاث سنين وهي تتجي لتطوان ..بزز عارفة لباس و كنبغيك...معلوم كنبغيك هي اللولى بيها باش تتبغي تعيش الحب مع الشاب المغربي لي مصاحبة معاه ...!! قتلات معاها حلا و فقصاتها...وو مع ذلك بقات صابرة لقصوحية راسها...حيت مخيرة مع راساتها...الرونج و المسارية و الدوران في طنجة حتى غبرات كمارتها من تطوان فخطرة ....و بقات مع كارولينا....! حتى تعلم الدرجة...اش دير حلا حتى تدخلها ليها لراسها...! حطات ورقة و ستيلو بعييد و طفات ليها المسلسلات المغربية و دخلاتها لبحار و لعمق المدينة ...! للسوق السعبي و الحمام و التحمعات و خلقات ليها معارف ...ها سي حمد بياع الثوب و ها الخضار و ها الجزار ...بياع ملابس التقليدية و الدرجة و اللهجة الشمالية تتشير ...! جاها داكشي بحال شي موسم او مهرجات حمقها....! ولات تتجي يوميا و خلقات معارف ...بواحد الشعر حمر مقرط و السروال ملون كلو بالوان قوس قزح و المؤخرة مهبطة و ممحية بحال المطربة ....! قصيرة و تتمشى كي البطريق ...عجبها الحال و حاضية غا التصاور ...! و مشحفة معاها حلا...حتى ولات تتهرب ليها و تمشي دور فالاماكن لي تيعجبوها و تتستغرب من هاد الناس لي عندهم الفلوس شنو تيعجبهم فداكشي....!
و هاهي عمرات الجييب من ورا تمارتها مع كارولينا و الخدمة مع عبد الله...! طارت طيرة وحدة لتركيا....! شبعات دوران و زهو و تصاور ..!
ها الملاهي المائية و ضاربة تصيورات فميناتورك الشميسة و الازهار ملونة و الخضورية و المعالم مصغرة فديك البلاصة ...! تتصور و تنشركلشي تيصيفط ليها " حلا تفكرينا بشي كادو من تركيا عنداك تنياينا..."
تتجاوب بمرواغة و ريحة كذوب ضروري منها " علاش انا كرهت اختي تفكرتك و خاطري بغا ياخد ليك شي حاجة و لايني مانقدرش نتقل الفاليزة ممنوع ماخصنيش نفوت واحد الوزن محدد عرفتي راه غنخلص عليها الضوبل ثمن الكادو ......"
شدات كاع داك الانستا و جمعات حويجاتها رامية يديها و رجليها قوق الناموسية تتنهد فرحانة فوجات و بردات غدايدها ...!!
حتى النهار لي غترجع فيه للمغرب.. !
حميدة فرحانة تتحط الضيافة لوحدة من العائلة بعيدة شوية...
_ مرحبا احتي اسية والله الا نورتيني....
اسية ( بابتسامة ) شحال ماجيت ياختي....غا فمدينة وحدة و كلها فاينو غارق ...درتب الخطيبة لحلا حسي مسي ياختي....
حميدة ( دارت رحل على رجل تتبسم ) والله الا الجيران و مادخلت حد و ماعلمت حد كتشوف الجيران القراب و مافخبارهمش...درت كلشي بالساكوتي....ماجبت لا دقايقية لا والو ...حلفت ماندير حتى حاجة حتى للحفلة د العقد اذا ط
كتاب...دايما كنديرلا الحفلة على حقا و طريقا و كتشوف ياختي حتى وحدة ماكتكمل...واش قالو ليها عليا خدامة فالحشبش ...كل خطبة بالملاين خاسرة عليها فاللخير تتقولك لا والو قلبي مابقاش باغيه....صافي حتى دير العقد و نكريلا القصر ندير لبنتي شي عرس كلشي يهدر عليه و نعرض كاع الحباب ولاهيلا هادشي لي كاين ماغرضي نخبع على حد .....
اسية : والله يكمل عليها بالخير ...و يجيب ليها التيسير ...قلتي اايوما راجعة من تركيا ؟
حميدى ( بفرحة تتضرب على صدرها و تفرنس ) نكذب ماكاين لي كيفقصني قد ديك الطيارة ولايني توحشتا ...قلبي هيدا كيغلي باغا غي نشوفا...كتغبر عليا غي سيمانة كنوحشا بنت الهم.....من الصباح و انا فالكوزينة كنعملا الماكلة لي كتحملق عليها ...
أسية ( تتضحك ) و حلا عزيزة علينا كاملين اختي شكون مايتوحشهاش....صافي دابا غتزوجا للفاسي تبعد عليك شحال ...كيف عاملين عاىلتو مزيانين ؟ كنسمع الفواسا الله الله يابنتي كثرة الهدرة و التحنزير .....
حميدة ( تتجيها النفس على نسابها تتكمش حواجبها و تهز راسها بالنفي ) لاااااا...لاااااا ابدا ...زوجت بنتي نسيم من تما و دابا حلا خطيبها من تما....بالعكس ناس ذواقين و متولييين...عرفتي دوك الفواسا القدااام الاصليين ...التاويل يااسية مانعاولكش التاويل و الهدرة حلوة و مرزنة و التقلدي و الاصالة ناس الله يعمرهم دار ....و خطيب حلا سميتو أسامة خدام فطنجة نيت ماشب بعيد غي عائلتو من فاس...حتى هو ولد غزال زوين و باقي صغير فالدار ديالو و مقاااول.......
نسيم و خلود فالكوزينة تيسمعوها و يوشوشو ...
نسيم : سمع ليك حميدة كيف كتهدر على نسيبها ماتقولش هذا ليكظل تعيب فيه ماحملاتو ماقبلاتو ...
خلود ( تتضحك ) تعيب فيه و ماتخلي اي يهدر فيه ...مع من نتي مع حميدة حاجتها تبغيها كي اابلار و تخرج نقية و يعاودو عليها الخير من فم البراني.....اما واحد مو بعدا ياربي تسمحلي ماحملتاش...باينة فيها مسمومة و حاكمة فولدها ....
نسيم تتستف الحلوى فالبلاطو ...جامعة شعرها بمقبض فضي لابسة جلابة قصيرة حد الركاب ...تتنهد و تعاود ..
_ يكون لي يكون ماتكون بحال زهري انا...الناس ماتفكو مع وحدة اما عندي جوح عجوزات جووج يهودية انا ...حتى عندي هاد الزهر معكس....
خلود ( حبسات الضحكة ) شيخك هو لي عبر و نوع مع راسو ...المصرية ولدات و الفاسية ربات ...شكون لي كتحكم فيحيى كثر ؟
نسيم ( غوبشات ) هذاك الفرفار مكيحكمو حد ...عند بالهم سارقة ليهم ولدهم ماكيشبعو منو لا انا لا هوما....( بغيرة ) انا ماهمنيش هوو ...هامني ولادي ماشادين حتى اتجاه ...ملي كنت خدامة كانو كيبقاو بزاف عند زينة المصرية ولات ليك يلالة أزهار على فمها غا سدي بوزك ...سدي بوزك مع السين عندها شين كملاتت هادشي لي شدات الفهايمية ....ملي تلصق فيهم الفاسية هاذيك كتبغي تاكلهم كتسطى عليهم....كيتلفو مع لهجتها ...تولي تهدرليا بحالها....اجي نئولك ماتئولي مانئولك....للقاف تولي الف ...كنشوف بنتي ضاعت ...تنهدر معاها بالدرجة كتبقى تشوف فيها بحال كنهدر بالشنوية ....وهي كثرة اللهحات تخلطو عليها و عقلها صغير اختي خفت على بنتي ...
خلود ( تتضحك ) همك بوحدو ..ضحكتيني ...والله الا النشاط عندكم فديك العائلة...اول مرة نشوفها فالتاريخ الشريكات مفاهمات....
جات العشية ! و حطات لالة حلا رحالها فدارهم....!
رتاحت من تعب السفر و لبسات بيجامة بلا سروال مربعة ليهم فالصالة تتفرق الهدايا على خلود و نسيم و حمبدة و حنان و ووئام و خالتها القريبة تتضحك و تعاود ليهم...جاية منورة و السر طايح عليها ...باين فيها الراحة و الفلوس...!
حلا ( تتشوف فخلود ): الفلوس مشاو ليا غا فحوايج ديك اابرهوشة ديالك....
خلود ( تتضحك ) ماعليش اختي حتى يخلفهم ربي ...نهار كبير هذا غي ملي تفكرتيما ...دخل معانا العجب....
حلا : انا كنقوالكم غي كظلموني.....العام لي فات نسبم كانت فتركيا عيت نرغبا تجيبلي واحد الصباط حمقني خلاتلي vuعمىني ننساها....
نسيم ( ضحكات ) سبحان الاه كتنسى الزوين و كتفكر غي الخايب....!
بسندال عالي و سروال ثوب اسود شوميز عسلي ! طالقة شعرها الاسود ...غادية مع اسامة خطيبها فشوارع تطوان...شادة ليه فيديه ضاحكين ...وهو فرحان موحشها....
_ و حق ربي الا توحشتك ...
حلا ( بدلال )يتوحشك الخير اسيدي ....عرفتي فيا الجوع مانقدرش نزيد يلاه نجلسو ناكلو و نوريك التصاور ....
أسامة ( شافها فيها بحب ) التصاور شفتهم عاودي ليا نتي كي خليتي الاجواء عحبك ااحال ؟
حلا ( هزات عينيها فيه تتهدر بعفوية و براحة ) : واعرة بعد الزواج نمشيو ليها بجوج...( شافت رشيشة فلحيتو مدات يديها حيداتها بعفوية و كملات كلامها ) و نتا ساليتي خدمتك مع سيهم فيصل....
اسامة ( ضحك ) جاتك الالة حلا.....سالينا الخدمة و جيت هبطت لفاس جبت ماما لطنجة ...
حلا ( تترمش ) : بصاح ماماك هنا ؟ تفكرتها بواحد الكادو على الله يعجبها....غنعرض عليها غدا اذا بغات تجي ...! ختك حتى هي كاينة هنا ...
اسامة ( تيشوف فيها فرحان مسحور بيها ) و هيااا...نقصي شوية من هاد الحلاوة فيك...غتسطيني احلا ...غتحمقيني....!
حلا ( بدلال تترمش دايرة راسها تتحشم ) و أسامة صافي كتحشمني مكنعرف باش نجاوبك ....
اسامة : وشنو ندير انا نحماق ؟ ماعرفت شمن خير داير حتى حنيتي فينا و عطيتينا رضاك....
حلا ( حانية رموشها تتفرنس ) ماجاوبتبتش ختك حتى هي هنا ...
اسامة : وي راها هنا حتى هي ....
حلا : صافي غنهدر معاها هي و ماماك يجيو عندنا غدا.......!
دوزو العشية مع بعض ...! جاو مع بعضياتهم تيحمقو ...دايرة عقلها و عولات على المعقول هاد المرة ...صافي قالت غتجرب هاد الزواج لي كيهدرو عليه....مكتبغيه ماوالو ...و الحب عند حلا ماشي ضروري ...المهم الراجل يكون زوين فعينيها و مقنعها و حاجة اساسية عندها هي ماشي موسخ و نقي....!دابا تشوف عليه غي شي حاجة عيفاتها تقلب بدون تفكير ...!
جلسو تغداو و يد اسامة ماتحيداتش من على يديها فرحان بيها و بزينها و حلاوتها....! سالاو و ركبات معاه فالاوطو....
حانية راسها تتشوف تليفونها جات تهز راسها وهي تلقا وجهو قريب منها و يديه فشعرها...
_ كتحمقيني احلا....نتي بزاف....
حلا جمعات ليه يديه من شعرها مبعدة وجهها منو تترمش بصرامة...
_ أسامة ماتفكرش حتى فيها....
أسامة ( عويناتو معسلين ) بوسة وحدة ...راك خطيبتي احلا.....
حلا ( تتنفخ و تسوط ماعجبهاش الحال عاطياه للكذوب صلية ) قلت لا ...عمر شي ولد المراة باسني ولا قاس فيا شعرة وحدة ..مكنبغيش الضسارة ااسامة.....
هز راسو بتفهم مكتافي بقبلة على يديها...مخليها مكمشة فراسها تتدور فعبنيها و تتفرفر فديك الرموش كي مونيكة متفكرة القبلة المسروقة ديال عبد الصمد...و يديه ماكانو كيعرفو غي طريق لوجهها هي تضرب وهو يعاود حتى ولفات لمساتو لبشرتها ... تقلبات فثانية و تسيفات ملي تفكراتو ولات غا تتسوط و تنفخ....!!
خسرات على خوتها فلوسها فالهدايا و التفكيرة ...و كع ذلك مابقاش فيخا الحال ! حيت بحال خسراتهم على راسها عارفة ..طبعا اذا جات و دخلات عند نسبم او عند خلود و قالت عطيوني هاد اللبسة ولا هاد الصاك يحشمو يقولو لبها لا ...! و دايما تتشد هاد النقطة و تستغلها و كثار تيتعداو هي و خلود على نسيم.....معروفة وسطهم الحاجة المخيرة عندها و صاليغ ديالها كاع تيمشي فالشراوط و اللباس و الصبابط و الصيكان و المكياج و الروايح ...و زائد من النوع اذا دار ليها شي واحد شي معروف و عطاها شي كادو ماكتنساش و تتحشم تقول ليه لا اذا عاود طلب منها سي حاجة...و هادشي عارفينو و كلشي كيستغلها ....
خرجات حلا من الكوزينة تتدور فعينيها...نيشان لبيت نسيم. بدات بيها هي الاولى...مع كلشي ناعس تيدير القيلولة ديالو ...السكات ماكاينش الحس كلشي مخشي فبيتو...طلات على نسبم لقاتها متكية فوق فراشها غا دخلات طلعات معاها ريحة نسبم عطرها معروف....شادة رواية اسبانية تتقرا فيها مخشعة معاها تتحاول تحسن نفسيتها المزفتة و تنسى مشاكيلها ...دورات حلا عينيها و نطقات...
_ نسيم ديك سندال ايزابيل د الكوير جبتيه معاك ؟ اذا جبتيه عطيه ليا خارجة دابا بغيت نلبسو ....
..هزات كتافها بلا ماتعلي عينيها و ردات...
_ سي جبتو خوديه ....
حلا : و ديك الساعة لي كنتي لابساها فخطابة لوستك عندك هنا...؟
نسيم ( هزات عبنيها بهدوء ) لا ماجبتهاش عندي الاخرى تما اذا عجباتك خوديها...
خدات حلا لي بغات و قربات من نسيم تتفرنس و تبوس فيها...
_ القطيوطة ديالي ...شكرااااا...
نسيم ( ردات ليها البوسة ) كتبوسيني غي على حاجتك...
حلا ( تتلعب لبها فشعرها ) منيتك...ختي الصغيرة نتي انا لي ربيتك و كنت تنهزك فظهري لاتنكريني....حتى هزك بابا و خداك معاه لاسبانيا بقيت غنموت لاابكاء.....عرفتي غي دوز العراضة د غدا ونضربو شي دورة لحمام توركان فتطوان ندورو بالحالة و نتي رجعي لعقلك شوية و خرحي من هاد الحالة واه شوف شعرك كي ولا....الراجل داير كي السبع ماهاز حتى هم و نتي معصبة راسك معاه ..خوديها منين خفافت و قولي الحمد لله تيغيب عليك يهنيك من نݣيرو مرة مرة راه الرجال تيطلعو فالراس ....ضربي كلشي بركلة و فوج مع راسك و تهلاي فهاد السالف راه كلشي كيتمناه و نتي سامحة فيه.....
بقات معاها تتهاود معاها و يهدرو مع بعضهم بالعقل ...شافتهم حميدة هكاك هزات راسها و زادت تتضحك تتعرف بناتها وخا يتناتفو و يتغاوتو و يسبو بعضهم دغيا كينساو واش مخاصمين مع بعص ...تتلقاهم تصالحو بلا مايحسو و تيصحكو مع بعضهم...! و نهار تتخاصم شي وحدة مع راجلها تتجي تشكي للاخرى...خلود عندها اتجاه و حلا اتجاه و نسبم اتجاه...اذا جات نسبم شكات لخلود و حلا...خلود تتقوليها نتي السباب و نتي مولات المشكل حتى يرجع ليها عقلها و ماتزيدتش تكرهها فيه و تشعل العافية ....اما لالة حلا تتقول لااا هو السباب هو ولد الحمقة هو لي مكيسواش وخا ماتكونش عارفة القصة دايما عندها ااراجل هو الغالط حتى تتشدها حميدة و طيب ليها ودنيها بالهدرة و الغوات علاش تتحرضي المراة على راجلها و هادشي حرام....!! ووالو لي فراسها فراسها..
غد ليه تحزمات حلا مع حميدة و تعاونات معاهم نسيم ..! خلود مشات تشوف تجهيزات دارها فين وصلات باغية تسكن فيها مع بنتها تجيها نيشان نع الولادة...!
لالة حميدة بقميص الدار فاابيج و بالعقيق و شعرها صبغاتو بالقهوي و قطعاتو ولا قصير حد عنقها...سنسلة ذهب عليضة فعنقها و سرتلة فيديها و العوينات مكحلين لي يشوفها يعرف زين بناتها منين جاي ...!
_ نسيم ابنتي تكلف بالعصائر فالكوزينة التحت باش تخوا البلاصة هنا.....( تتغوت ) حلاااااا اجي المتلوفة اجيييي عارضة على الناس و هاربة ...حيد داك الزواق من عبنبك و اجي لهنا راه قربو يوصلو ....!
جاو ضياف حلا ! استقبلتهم حميدة بالابتسامة و الهدرة متولة و مرزنة ...دخلات أم أسامة بواحد الفولار تيزهق بالرطوبية دايرة لنص شعرها و النص القدامي كلو معري مبينة الشعر مصبوغ مزعراه بزز...هازة فيديها الورد و الوجبة ضروري منها و معاها بنتها فوطوكوبي عليها...! جلساتهم حميدة فأفخم صالون عندها ..و أم اسامة غا تتشوف و تدوز لعبنبها ثالث مرة تجي لهنا و كل مرة تتجي تتشوف صالون فشكل و كل صالون ياصالون ...! هزات حجبانها للسماء دايرة رجل على رجل و هدرتها ثفيلة...
_ الله يبارك فيك الالة حميدة ..من ديما تتعجبنا الشمال و ناسها ...الجو زوين بزاف دايما كنئول لسيدي أسامة سعداتو لي عايش فالشمال ....
حميدة ( بابتسامة ) و يبارك فيك احبيبة ديالي ...
جات حلا تتسلم لابسة جلابة بلا قب قصيرة حد الركاب و اليدين قصار و الخلخال فالرجل و الشعر فايح منو ريحة فاليينتينو و العوينات مجبدين و البشرة تتبان كي البلار مغطية العيوب الخفيفة لي تتكون عند أي وحدة فبشرتها...!
_ خالتي نعيمة مرحبا بيك و على سلامتك....
نعيمة ( بابتسامة صفراء ) ترحب بيك الجنة الفنة ....الله يكبر بيكم و يكثر خيركم ....
حلا جلسات حداها تتضحك و تدير منين يدوز الماء بيناتهم ....عايقة بيها ماعندهاش معاها و مزال مارتاحت ليها....حيت أسامة صدمها الولد الوحيد لي عندها كانت باغية تزوجو هي من بنت خالتو حتى هي كنيتها الادريسي بنت يي الادريسي و مها الادريسي المهم النسب و الفاسي يتزوج بفاسبة مابغات الغريب ....!
الجلسة كاملة و الهدرة بالحساب لا من طرف نعيمة ولا حميدة ..و البقية غا تيشوف...! بحال جالسين فعزو...حميدة شافتها منفخة نفخات حتى هي و تكبرات و قطعات الهدرة فمرة ...نعيمة تتشوف الاثاث و التاويل و النقاء و الفخامة و الذهوبات و تحضي عروستها و حركاتها معتارفة بلي الزين و االاناقة و حلاوة اللسان كاينة ولايني هي مابغاتهاش...بغات ليه بنت خالتو ...!
غا خرجات من عندهم ركبات مع بنتها شادين الطريق لطنجة طالقينها للهدرة قريبة طرطق و تنفاجر ...
_ انا كنئولو مابغيتهاش برانية ....وهو شنو دار ؟ جابها ليا شمالية الناس ناس الخير مانكذوبش الدار عندهم ئصر و متولين ولايني انا شهوتي ياخد بنت خالتو ....
بنتها : ماما براسكي مع سيدي أسامة بلاش تحمقي ليا راسي أنا يتزوج ولا يطلق پو امبوغط بوغ موا ....
وصلو للطنجة تلاقاهم أسامة كيفرنس ..
_ على السلامة اماما....
نعيمة ( نعصبة ) ماتعاودش تئول ليا ماما و نتا مزال باغي هاديك البرانية ...مانئدرش نفتح داري للبراني علينا ....
أسامة ( تزير ) ماما حلا ماشي برانية حلا كانت مون أمي وهي بنت خالة سلمى علاش مابغيتيهاش ؟
نعيمة ( بغضب ) انا مائلتش العيب فيها حلا بنت زوينة و مأصلة بنت العز نبغيلها الخير مي مع غيرك ماشي معاك ...و شوف نتايا شكون تختار كلام ماماك ولا حلا ....و اذا حبيتي تبع كلامي انا كنئول لا ماغتزوج بيها شوف شي سبة فكها منك...
هزات جلابتها و دخلات لبيتها غضبانة باغا تموت و تسطى علاش ولدها غيتزوج بشمالية ماتقدرش تصبر و تكمل عادي كلشي غضبان على اسامة جداتو معصبة عليه كلشي ماحاملش الخطبة و حتى حد ماهدر من غير نعيمة هي لي حالفة توقفو على هاد الزيجة قبل العقد ...! مانفع معاه الخاطر ينفع بالزز ...عارفة اسامة مايطيحش كلمتها و اذا قالت ليه لا يعني لا ...بلا مايزيد معاها و يحاول ..و دابا قطعات ليه الشك...! خلاتو داخل بيتو شاد راسو معصب كان يحساب ليه قنعات و عجباتها ملي شافتها فالخطبة ...حتى صدماتو دابا برفضها قطعا....!
نعس معصب و فاق معصب حتى قربات منو تتدوي بالهداوة...
_ أسامة الحبيب ديالي سمع مني أنا تنبغي مصلحتك ....
اسامة ( قلب وجهو منفخ و ساكت )
ناضت نعيمة تتجرجر جلابتها تتحلف...
_ والله لا تزوجات بيه وخا نعرف ندير فضيحة ....
تجهيزات لحفلة العقد بدات...! و حلا طالعة هابطة لطنجة تتشري حويجاتها من تما ...باغية كلشي كي بغات غا تتجي تخمم من ب الزواج تتنفض من راسها ...عكس كي كانت مع عبد الصمد غي تتخايل غيشد عليها بيت واحد تتشدها الخلعة وخا تتضربها بنكرة..
عبد الصمد شابع زهو و نشاط و الزدحة و الاسبانية تتشير و الشيخات و الزوعرية عاطية للعين...! دايرين حفلة فاليخت في الشمال
الريح تيحرك كيو الشوميز لي لابس معري صدرو مخلي الشوميز مفتوحة و سنسلة فعنقو و النظاظر كحلين و السنينات بيضيين و لحية كحلة كثيفة تيضحك هاز الشراب منغم و راسو ثقيل عليه....! و زورقية البحر و الرييييح التفواج عندهم هو هذاك ...محمع مع صحابو ...كريم و معاهم حتى علي و واحد الاسباني و شي ثلاثة شيخات وحدة سمراء لابسة دوبياس معري لحمها تتبري و الخيرات تتهز و جوج زعرات لحمهم بيضة و المؤخرة حلاص ....؛
كريم مجنن عليهم تيكب عليهم الماء وهو تيضحكو و الغوات و الضحك الحيحة عندهم ...
_ هيييلي مي روبياااااا....( الزعرة ديالي ) ....
علي ( كي الفروج شعرو فازك تيميل و يغوت بالجهد ) هيييلي هييلي روبيا ديالي ابورو....
( الزعرة ديالي الحمار )
كريم تيشير لعبد الصمد لي شاد فالحديدة الريح هز ليه الشومبز بيضة و شورط بيض لحمو سمراء بالشمس ...تيشوف فيهم غالباه الضحكة الشراب غالب عليه و هدر
_ شد شد غلبك الريح ..دفلة طيحاتك ....
كريم ( سخفان بالضحك ) تنصلييو من رمضان لرمضان و ندعيو نموتو قبل مانتوبو ...( هز راسو دايخ ) نتوبو قبل مانموتو....
علي تيشطح و كاس الشراب فيديه عينيه حمراء تيتمايل...و الروبيا قربات لعبد الصمد تتلعب ليه فصدرو قالبينها شرقي ...وهو تيقيس شعرها عايف و يسول لسانو ثقيل ...
_ شحال فعمرك ...
الراقصة ( تتضحك و تحلون ) 23 ....
كب عليها علي الماء حتى غوتات تتضحك و تقلبات لعندو تتشطح ليه و يصفرو ....و عبد الصمد جلس شاد بلاصة جوج د الناس دبك الجلسة عندو .....! رمى الكاس من يديه مخسر وجهو ...تيقول مايضربش و تيلقى راسو تيشرب ..هكا داير حتى مع الݣارو ...باغي يحافظ على الصحة زعما و يحافظ على سنانو ماباغيش يبان فيه الكبر و السنان يصفارو و عظامو يرشاو....!! حتى منظر علي وهو كيبوس فيها نفس البلاصة فين كان صاحبو الاخر تيبوس فيها ...عيفو المنظر ! مايقدرش يحط فمو ولا يديه عليها بلا تيبوس صاحبو ....! مكتافي غا بالشوفان و يحضي الصدر و المؤخرة تتهز ....
دفل جوج دفلات طلعات ليه القردة غا بوحدو بدون سبب...حتى جا لعندو علي تيسول..
_ خاي عبد الصمد كي تي پاصا ..؟( مالك )
عبد الصمد ( جامع حجبانو لسانو ثقيل ) جايبين لي الفلالس ....
علي : طلقتيها دغيا ....
كريم ( جر علي تيضحكو عليه هو و صاحبهم الاسباني ) هذا شابع لهيه كيتكرع علينا....
عبد الصمد ( راسو ثقيل عليه ) فهم هادي اسي كريم .....أكوا كي نو هاس دي بيبير ديخالا كوريير ...( لسانو ثقييل تيعاود فيها عينيه معسلين ) ديخالا كورييير.....
( الماء لي ماغتشربوش ...خليه يجري ...)
أماا اسامة مرتاحة و مستعدة تجرب معاه الزواج و لي مابعد الزواج...حيت كان صديقها قبل من خطيبها و دايما واقف معاها و عاطيها الوقت و الخاطر ...!
خرحات من الاوطو دايرة نظاظر الشمس هازة صاكها فيه مستلزمات الحمام ...ومعاها نسيم شادين رونديڤو في حمام توركان حمام الملكة مخلصاه نسيم فرحانة بختها...! حمام كبير جامع بين التقليدي و العصري فيه مساحة للاسترخاء و الرفاهية و التفواج ..! دخلو لغرفة البخار معطرة بالروايح و العطور الشرقية اجواءزوينة و ريحة تتحمق تتجيب ليك الاسترخاء و الراحة أجواء ملكية ...و السيرفيس روعة..! غالب الطابع التركي غي غرفة الاستحمام ...!
حلا ( تتسول نسيم ) شنو درتي فهاد التبريمة ! عطينا اختي الوصفات و السر شنو فيها مالك مسمومة....
نسيم :كنت ملهية بالوصفات و داكشي دابا ماعنديش الكانة ...كون مافكرتنيش ماما بيها ننساها....تما يالالة الحناء مطحون فيها الورد و الصابون البلدي و الحامض معصر و الخرقوم و شوية ديال النشا و زدت العكر الفاسي ديريه دابا قبل الحكان تيصفي الجسم خطييرررر.....
تهلاو فراسهم مزيان خرجو بنفسية اخرى و راحة غييير...!!
زربات عليهم حميدة يجيو دغيا جايبين العدول للدار ...! و عاىلة العريس قربات توصل...!
حلا مثقلة حتى تتجيب ليهم الجلطة...ختارت تلبس غي جلابة عامرة عقيق و انيقة و سندالة عالي و الشعر مطلوق عادي و الوجه منور ...!هازة مروحة مصنوعة من الدانتيل الابيض تتحركها قدام وجهها و الدار عامرة غي بالمقربين جات عائلة العريس بالزغاريت و الحالة نايضة. .سمعات عيشة الزغاريت فتحات عينيها على وسعهم و شافت في صفاء حتى هي مستغربة ..
_ شنو وقع فدار ااريفي
صفاء : غتكون خلود ولدات ....!
عيشة ( هزات حجبانها ) بسباب ديك الخلقة حرمت نطل لديك الجهة ...على الله تكون هي لي تزوجات تغبر وجها....
صفاء ( تتطل و تتشوف مصدومة ) و باين تزوجات اخالتي عيشة ...العريس داخل بالورد و الشكلاط....( بعفوية ففمها مفتوح ) العريس غزال ...ماعرفت خطابة ولا شنو مابقيناش كنهدرو شحال ماعرفت خبارها.....
انتشر الخبر فالحومة...! لي اصلا من نهار عرفو عبد الصمد عينو عليها مابقا حد كيدور بيها ...حتى بعد فراقهم حد ماهز فيها العين ...!
الدار كبيرة و الخير موجود و حميدة ولفات هاد الاجواء مابقات تدهش ...! منفخة و ماعاحبها حال ماحاملاش العريس و ماحاملاش عائلتو و ماعندها مادير ...! تتشوف فنعيمة هاد المرة مخنزرة نيشان حيدات القناع....فمها مكمش تتسوط و تزفر ...بقاو تيقولو حلا ماعندها زهر مع العجيزات....! باينة للعمى بلي ماحاملاش حلا ...!
جا العدول وتجمعات حلا قدام عريسها...! و قبل مايوقعو بداو تيخطبو الناس الكبار و الفقيه تيهدر على أسس الزواج و الواجبات. شي ساااعة وهو كيهدر و حلا مادخلات لراسها والو ..تبعات معاه فالاخير جاها القنط ...! اما أسامة كثر من حلا غا تيهز فراسو ..باين فيه مغير و معصب و عينيه تتمشي لمو تيهربها بحال المدنب وخايف من عقوبة مو...!
عطاوهم يوقعو بعد اخد و رد ..عطاها 3 مليون فالصداق ...! حتى ولات حلا رسميا متزوجة من أسامة و ضاربة معاه العقد و بالشهود ... !!
حميدة عينيها دمعو بالفرحة تتشوف بنتها تزوجات و اخيرا و وصلات لهاد المرحلة ! اما حلا طلعات معاها السخانة و الدهشة غا تترمش و تشوف..و تنيش بديك المروحة على وجهها و تمسح العرق من جبهتها ....!
اسامة تيفتح ازرار قميصو و مو مقنصة عليه بشي شوفات ديال العقارب...! طلقو الزغاريت و الحيحة و الفرحة و الصلاة و السلام و حطو الضيافة و الخير شايط ...كثرة الشيكي و االتعواج...عائلة اسامة تلاقات مع عاىلة حلا و خلاص...ها التطوانيين مع الفواسا تلاقاو و كملات ااباهية ...!! هذا تيبان على هذااا...ها اللهجة الفاسية تتشير و الشمالية قنت اخر ...القفاطن فصالة مخزانية و الذهوبات و السوالف ...! الحاصول الدنيا مخلطة بالمعقول...!
بعد العصر كانت الدار خوات...! عائلة اسامة كل واحد فين مشى ها لي نازل فالاوطيل ها لي عندو دار تما و ها لي طلع لطنجة...! بقا غا اسامة تيتسنى حلا برا قدام الاوطو ديالو و معاه مو لاصقة واحل معاها...
_ و بحال 3 مليون بحال 2 مكنشوفش حتى فرق انا...
نعيمة ( تتهدر بشوية حفاظا على البريستيج ديالها ) ئلتي غتعطيها جوح علاش كذبتي و عطيتيها ثلاثة علاش هكايا....مع من تشاورتي ...
أسامة ( حك لحيتو الكحلة تيساوي معاها ) و صافي اماما مرة اخرى نتشاور معاك ...( وراها واحد البراصلي رقيق ديال الذهب و الساعة مذهبة جايبهم لحلا ) خديت ليها هذا زوين عجبك ؟
نعييمة خدات الساعة خلات غا البراصلي تتدوي بااثقالة واحلة مع داك الشال رطب تيهزق ليها فوق الراس...
_ عطيها غي هذاك ..الساعة اريها لهنا.....هادشي تستاهلو بنت خالتك خير من برانية ....و عنداك تنسى شنو ئلتي ليا....
أسامة جامع فمو مازادتش معاها فالهدرة ...! طلات عليهم ختو تتسول...
_ ماما تمشي معايا ....
نعيمة : لااا غنبئى هنا ...
أسامة ( بغا ينتف راسو تقلب اعندها تيبوس ليها فراسها ) و ماما الله يعطيك الجنة لما سيري معاها....
نعيمة رمات الشال على راسها تتنفخ تحلفات فيه بعينيها حتى جمعهم و خرحات مكرهة من عندو...راكبة مع بنتها ...! غي مشات زفر و تنهد بالجهد ..تيستنى حلا تهبط لعندو يخرجو بجوح....
حلا مثقلة مع راساتها...حيدات ديك الجلابة و لبسات سروال ثوب كلاسيكي لونو كريمي و شوميز قصيرة و مزيرة على صدرها فالقهوي الغامق...مع سندالة عالية و ااشعر مطلوق سامبل و الساعة و الخاتم د الزواج فاايد و صاك ديور و حلقات فضية صغار فودنيها...! ووعيون حميدة عليها تتحذرها غي بعبنيها...توصلات لرسالتها و سلتات من هدرة رضا ...!
خرج اسامة من الاطو فاتح ليها الباب مبسم تيبان فرحان...
حلا : تعطلت عليك...كون بقيتي فالدار علاش هبطتي ؟
أسامة : لا ماتعطليش ..و تعطلي كاع اش فيها الدنيا هانية عندي ههه....
تحركو فاتجاه طنجة...شادين الهدرة و الكلام بيناتهم مكيتسالاش ...
_حلا( بهدوء ) : فين غادين بعدا ؟
أسامة ( غمزها ) غادي ناكلك....مستعدة ؟
حلا ( تتضحك ) بصحتك اسيدي...غي هو خصنا نرجعو بكري ماما عارضانا للعشاء.....
أسامة تيشوف فيها بشهوة و يرجع يشوف قدامو مركز ...هدرة تجيب هدرة حتى وقف الاوطو حدا دارو في طنجة و شاف فحلا تيحيد السانتيغ....
_ نزلي تشوفي دارنا .....
حلا خرجات من الاطو تتشوف فالدار من برا مسايراه و راسمة واحد الابتسامة هبلاء على شفايفها...! متتبغبش تبين راسها عايقة و قافزة قدامو...دايرة كي القطيطة اذا قال شي هدرة رومانسية تدير راسها حشمات و اذا قال شي نكتة تتضحك ليه وخا ماتتضحكش ...دايرة راسها هبيلة و مسالمة و السلام.....!
حلا ( باعجاب ) طلعتيها من الساس ؟ والله هكا حسن تيبقى ليك السطح ديالك و تعاود تطلع حتى الطبقة الثانية و الثالثة ...و تنفع من وراها......اما تشري برطمة مابلانش وخا لي فخي ماشي بحال بحال طبعا....
أسامة ( تيفتح الباب جراه من يديها ضاحك ) : كلشي ديالك دابا نتي مولات الدار...غا قبلي علينا. ...
غا حطات رجليها الداخل مزال تتشوف فالدار ...شد الباب و شدها هي عندو مزير عليها...
_ مابغيتيش ديك المرة هاد المرة ماتهربيش بوستي غناخدها....
قرب يبوسها هربات وجهها تترمش و ترد كي القطيطة
_ ماغسلتيش فمك ملي تغديتي معانا أاسامة....
أسامة ( حرجاتو...) وااايلي ! شكون قاليك ماغاسلش فمي ..غسلتو يهديك الله الالة حلا ...( قلبها ضحك )....هانا غادي نغسلو على عينيك غا تهناي ليا مع راسك....بسلامتك...
ابتسمت معاه بدون جدال...غا غبر من قدامها خسرات ملامح وجهها و حاولات تنسى ..؛ تتشوف الدارو اااثاث و ااديكور.....حتى حسات بيه ضمها من اللور مزيرها عندو غاطس فمو في عنقها كيبوس بلهفة...
_ شنو هاد الريحة فيك كتسطيني....
حلا طلعات معا نيفها ريحة معحون الاسنان وصابون معطر ..عاد رخفات على حواجبها و كمشات عنقها من قبلاتو ...طالعة معاها السخانة
_ أسامة لااااا.....
اسامة قلبها لعندو بلهفة وحط شفايفو على ديالها ...!...حلا ساكتة و مسايراه..تتجرب عاجبها الحال و ماضاربة حساب لحد ..ياك حلال و حد مايحاسبها...الحب عارفة راسها مكتبغيهش و لكن تيعجبها السيد نقي و ريحة الفلايو عاطية منو ...مامعيفها حتى حاجة...دورات يديها ورى عنقو و هزها عندو متكيها فوق الفوتوي طالع فوقها كي الحمق هيجاتو.....جالس تياكل ليها دماغها زعما بجوج كليمات حلويين باش ياخد لي باغي قبل العرس ماباغيش من بعد العرس ....
مزال ماتيعرف وجهها الحقيقي تتبان كي القطيطة و ساهل ياكل ليها دماغها ...
_ حلا جو پو با ...مانقدرش نصبر ...نتي مراتي دابا مزوجين نطلعو لبيتنا ....
حلا فاتحة عينيها فيه وهو محني عليها...شعرها مرون بيديه و صدرها مهزو تحت صدرو ...لعابو على عنقها و شفايفها تتبوهل عليه ...
_ شنو غنطلعو ندير فالبيت ....
أسامة تيفتح ليها صدايف الشوميز هايج على صدرها...
_ نكملو زواجنا...شنو غنديرو...صافي تزوجنا و انا راحلك دابا و نتي مراتي .و انا باغي حقي منك دابا...من حقي احلا !!! ...
جمعات ليه يديه معلية واحد الحاجب مابغاتش تزرب
_ حقك تاخدو ملي تبغي نتا و نبغي تنا ..نكونو بجوج باغيين انا مابغيتش دابا ...
جمع ليها يديها تيبوس فعنقها ناطق بنفاد صبر...
_ و علاش بسلامتك ؟ ههه خفتي السكرة ديالي...انا و ياك ماشي صغار نتي 27 و انا 30 قراب لبعضنا فلاج و عارفين شنو كنديرو ..و اونبليس دو صا ماشي حرام...حنا مزوجين امدام مزوجين....ماتخافيش مني ترخاي و غيعجبك الحال...
حلا ( مابغاتس تزرب و ماشي مستعدة دابا ) العقد عندي انا كي الخطبة ااسامة مسالة ثقافات و عقلية ...نتا عندك عادي انا لا ...
أسامة : أنا راحلك احلا...شنو غيوقع مثلا...نخليك حتى للعرس و نهرب مثلا...تتفكري هكا....
حلا ( تترمش و دور فعينبها كي الذيبة ) لا أنا خايفة بزاف أسامة...حاسة براسي غتشدني الخلعة و ندير شي حاجة ماهياش...خفت و حشمت منك....
أسامة قبل شفايفها كي المجعور تيهمس فودنيها و يحاول يرخيها...و يحيد ليها الخلعة عند بالو بصح حشمانة و مخلوعة.....
_ علاش تحشمي مني انا...! هانتي وعد غا سطحي يلاه ندير ليك خاطرك ...ماتقصحيش...
حلا ( مضيقة غينبها فيه تتجر ليه لسانو ) : حلف بالله غدير غي سطحي و اذا وقعات شي حاجة و دخلتي ؟
أسامة ( ناسي راسو ) مالي ماتنعرفش ؟ تنلعبو هنا انا عارف و فاهم شنو كندير ...وعد وعد الرجال صافي ...
دفعاتو من عليها حتى تصدم و تدهش تيشوف فيها جامع حجبانو...
_ يعني راك مجرب ؟ كيفاش فاهم و عارف ..يعني نتا خبرة و شحال من بنت دوزتي معاها هادشي...و تتقولها ليا بوجهك حمر....بوحهك حمر تتقولها ...مييينتك....لا واعرة هادي....
أسامة ( تيرمش مصدوم ) فوقاش قلتها انا....ماقصدتش داكشي لي فهمتي..احلا.....( دفعات ليه يديه جاعرة و ناضت واقفة تتنهج و تسوط) بعد مني قلتيها...قلتيها على لسانك ...الا هادي الا هادي مانحملهاش....كون خليتيها مخبعة لاش تتقولي هاد الهدرة لاش تتقول راك
مجرب فكمارتي تتقولها ليا.....
تحنات هازة صاكها معصبة و هو ناض طاير لابس الشوميز ديالو تابغها تيجري ..
_ حلاااا ...فين غادية ...حلااااا....اجي اهنا....( غوت ) حلاااا دويت معاك سمعي.....
جرها من يديها حتى تضربات مع صدرو تيبوس فراسها و يديها و يسايس ...تينهج بالجرا و مصدوم من هاد القلبة لي تقلبات عليه و كي دار حتى سلت ديك الهدرة من فمو قدامها ....
_ حقك عليا...شوفي تهدني...انا كنبغيك غي نتي...و حق الله العظيم....حلا نساي ديك الهدرة ماكنتش فوعي نتي ماخليتيش ليا العقل...غي تهدني .....
حلا ( بعدات ابه يديه من عليها قالبة وججها ) وصلني دابا للدار ..ولا غنشد طاكسي....
الظلام طاح و العشاء قربات...عاد دخلات حلا للدار مع أسامة...!
دخلات عكس كي خرحات...شعرها باين مرون تتغطي رقبتها و تتشطح فرموشها ..قالبة وجهها على أسامة...لي داير كي المصدوم منها...ماعارفش وجهها الحقيقي غيبدا يبان شوية ورا شوية...و غيتصدم فيها مزيان...من الماستر لي كادبة عليه للهداوة و الضرافات لي تتبان عليها...و مزال الخير القدام....!
جلسو تعشاو. و عبد الله و حميدة دايرين الواجب معاه على اكمل وجه...! حتى سالا و مشا بحالو و دخلات حلا لبيتها عيااات...و تابعها حميدة تتشوف فيها بفضول...
_ فين مشيتو ؟ شنو درتو ؟ شنو دبك الفضيحة فعنقك.....
حلا ( زامة شفايفها طالعة ليها القردة ) مشينا لطنجة ..و درنا لي درنا متبقيتس بنت وليت مراة تهنيت من هاد البكرة لي كانت مثقلاني....
حميدة ( شهقات ) الدودة يابنتي الدوودة تتغلي فيك...علاش هاد اازربة ....
حلا ( جلسات تتمسح الماكياح من وجهها عاقدة حواجبها تتكدب عليها ) ماعجبنبس احميدة فالنعاس...ماقنعنيش والو مافيهش البنة.....
حميدة ( وجهها صفار و خضار ) نعلة الله على شيطانك بالكلبة...قلبي غتسكتولي غي نتينا ....قولي هادشي كذوب وخا نسوف بعيني مانتيقشي...تربيتي و انا عارفاك ماعزيزش عليك الزربة......
حلا ( تتنفخ ) و هانتي عرفتي علاش تتسولي مشيت لدارو و شفتها ...و وصلني صافي.....
حميدة ( تتهز راسها ) احياني...اجي نقولك نسيم مكتعاود ليك والو ؟
حلا : لا شنو غتعاودلي ؟
حميدة ( بهم ) بنتي ماشي هي هاذيك ..بحال المشيرة بنتي تبدلات عليا من نهار جات من الغربة مابقاتشي نسيم بنتي لي كنعرف ...قلت غي حيت زمان ماجات وحاسا براسا فشكل معانا....حتى طلعات هكاك سكوتية و كلاما قليل ...و ملي تزوجات و انا بالي معاها كثار من قبل....عينيها طفاااو انا كنشوووف ماشي عورة. غي كنميك و نرمي من راسي....
حلا ( باستغراب ) منيتك اماما ..السيدة مزوجة هادي اربع سنين و بولادها ...كون كانت شي حاجة كون بانت ...
حميدة ( بعناد ) انا كنقولك بنتي و عارفاها....شوف تصاور ديالا ملي كانو مخطوبين مع تصاورهم دابا ...عينا غارقين و هازة هم انا قلبي قالالي و عارفة متأكدة كاينة سي خاحة ...سنين و انا كنحفر عليها و مكتعاودلي وااالو ...والو تقول ماشي يماها......حتى تتكون عيات جتى عيات تتجي تبكي و تشهق دايرة جنازة مالك العايلة مالك يحيى حلمتو كيخوني..حتى مانكونش كنعرف بنتي.....نموت و نعرف شنو واقع ...
حلا ( دخل ليها الشك و مابيناتش ) و صافي اماما نتينا عارفة ديك المتلوفة كتموت على راجلها تكون تتوحشو مسكينة.....( هزات فوطة ديالها نايضة ) انا نمشي عندها نشوفها شنو كدير...ناخد من عندا زيت الورد اذا بغات تعطيهلي ديالي تقاضا.....
خرجات من بيتها لابسة بيجامة قصيرة ..داخلة لبيت نسيم بلا مادق غا مدرمة ...لقاتها متكية على جنبها تتبكي و كتافها كيتهازو بالشهيق...غا شافت الباب عليها تفتح قفزات و جلسات جالسة و ااسالف كحل تقلب معاها...تترمش و تهمس تتلف...
_ غتفيقيهم عاد نعسو مالك على هاد الدخلة.....
حلا ( دخلات شادة الباب تتشوف فيها بشك ) شعندك كنتي كتبكي بحال مات ليك شي واحد....
نسيم ( تتهرب عينيها ) ماعندي والو ....
حلا تزاد معاها الشك و الخلعة على حالتها قربات لعندها و جلسات حداها معلية حاجبها ناطقة بهمس....
_ عندك شي حاجة مثقلاك انا عارفة شنو هي....
نسيم ( بخوف ) شكون قالها ليك.....
حلا ( بصرامة ) عاودي شنو كاين ماعاودلي حد غا جربتك يالمكلخة..خبز ربي فطبقو نتي...حكز لهيه و خوي شنو عندك والله ماخرجت من هما حنى نعرف مالك هيدا لسانك مسروط و بحال الهبيلة غا فداك التليفون متلفة وقتك و عينبك.....
نسيم غلبوها الدموع و الرعدة قلبها عامر و خازنة هم كبيير و ماعمرها قدرات تخرحو على فمها لحتى حد حتى تفرش لراسو قدام راجلها....هم خرج ليها على حياتها و قتلها حرفيا ...ماقدرات تقول الدموع سبقوها و شفايفها ترعدو ماقادرة تخرج حرف واحد ...زادت خلعات حلا لي شدات ليها راسها عندها عاقدة حجبانها ...
_ نسيم شنو عندك اختيي....مالك خلعتيني.....نسييم اويلي مالك.....
ناضت كطير كبات ليها تشرب و شربااتها حتى طاحت نسيم فشلانة على صدر ختها تتزير عليها و تبكي بهمس على قبل ولادها مايغيقوش ..تتبكي و تزير تقول عمرها مابكات ....
_ انا قلبي مشوي اختي...قلبي كيتشوا ....
حلا ( الخلعة عندها تتبان بالاعصاب) هدر انسيم نيشان...ختي مالك قولي اقسم بالله مانقولا لشي واحد خوي قلبك عليا ...ياك انا لي كتيقي فيا و ماعمرني فرشتك...و ماعاوديش ليا شنو كيضرك ...
نسيم ( بحرقة ) ماكرهتش كون موت احلا...ولا ماعمرني نكون عايشة فهاد الدنيا ...راجلي ماتيهزش حتى عينو فيا يحيى كارهني احلا و انا السبااب.....
حلا ( تعصبات ) بلا بكاء الزمر و قولا مالو هاد ال*را شنو عملك عاود والله ياحسو حتى نعاودلو بالخثانة.....
نسيم ( خبات وجهها بين يديها تتبكي بصمت ) كاملين حساب ليكم انا فرحانة معاه و عايشة كي الاميرة و كلشي حاسدني على عيشتي....شنو غندير انا بهاد العيشة و راجلي مكيطولش معايا حتى شهر ...ماكيهز فيا حتى نص عين الهدرة تنسمعا من عندو بالحساب ...
حلا : و علاااش علاششش شنو درتي بالسلامى. ...
نسيم ( خرحاتها مخبية وجهها ماقادراش تشوف فيها ) حيت فليلة العرس لقاني ماشي بنت......
حلا الدم غبر من وجهها فتحات فم و عين مصدومة....
_ شنو كتخربق كيفاش ماشي بنت ؟
نسيم ( دموعها نشفو و شفايفها ترعدو ) ماشي لخاطري والله مالخاطري كانت عندي 13 عام ....
حلا راسها داخ و يديها ولاو كيترعدو شداتها الدوحة و قلبها غيوقف حسات بحالا هي لي وقع معاها هادشي......
_ ككيفاش انسيم...مافهمت والو عاود الزمر فهمني....تعدا عليك شي واحد..ويلي قلبي غيوقف...مالك هدر.....
نسيم ( حركات راسها باكية) فاسبانيا ماشي هنا ..( بزز تتدوي الشوفة مضببة ليها ) ماكنتش عارفة شنو وقع لي... كان تيسكن حدانا شدني بزز اقسم بالله الا بزز احلا ...ماقدرتش نهدر ماعرفت والو بحال طحت فوق سي مسمار دخل معايا...ماشفت والو ماشفتش الدم و الحريق تحتي تنعرف اذا خرج الدم صافي راك مراة و الدم ماخرجش بقيت عايشة فالشك و خاطري مهني حيت الدم ماكانش هكا كنت كنصبر راسي ( خبات وجهها تتبكي ) كان بابا فمدريد تخبيت منو و تخبيت من كلشي حفت و سكت و ماقلتها لحتى واحد حتى سمعت دار كسيدة و مات خفت والله حتى خفت ..كنخاف من رضا حيت كان يذبحني ماقدرتش نهدر.....رضا غيذبحني وخا مادرت والو احلا ننينا عارفاه كيفاش عامل ...و انا كنت كنخاف منو الرعب ديالي هو رضا ...
حلا ( الدموع فعينيها تترمش مصدومة ) مافهمت والو دخت دخت...جوج ولاد كيفاش درتو ليها...و كيفاش وصلتي مع ااسيد للزواج مافخبارو والو....
نسيم ( تتبكي ) : انا كنموت على يحيى احلا كنموت عليه ماقدرتش نهرب منو و نخليه ..مانقدرش نتخايلو مزوج بوحدة اخرى ...حاولت مرة و تفارقت معاه مرضت و ماقدرتش نصبر ...انا كان عندي امل مانكونش ضعت فمرة و نكون تزيرت و كلشي رجع كي كان ...حيت ماشفتش الدم كنت كندعي يكون ماضيعنيش ماكانش الدم والله ماكان....انا عاقلة ماكنتش متأكدة من والو و خفت نشوف طبيبة الهدرة تتجي لبنادم ساهلة لكن التطبيقي صعب ملي كتصوري ماقدرت نقولا لحتى واحد... لي كنت كنعرف هو يحيى عييت نهرب منو و ندير السبة ماقدرتش بحال الموس كيتخشى فيا و تزوجت بيه...و بيدي كتبت لبابا فورقة ثلاث مرات اه باغية نتزوج حيت تصدم ....قلت غنقولها ليحيى قبل العرس و حاولت و حاولت و ماقدرتش ماعرفتش كيفاش نخرجها...ليلة العرس تعقلي كنت غنهرب حتى سوليتيني فاين غادية و بديت كنتلف....تما تزيرت و ندمت وليت كنتخايل الشوهة و الفضيحة عقلي كان صغير و ماكنفكرش كون كنت بحال دابا ماندير ديك الغلطة...تبعت قلبي على عقلي...يذبحوني ماعليش...
حلا ( مسحات دمعتها مغوبشة ) و شنو دار ملي عرف ؟
نسيم ( سكتات من البكاء و سهات تتفكر ) عقلو كان غيخرج حلفت ليه بلي ماشي لخاطري و قلت ليه شنو وقع معايا....قطع معايا الهدرة و تقلب فمرة هزيتي راجل و حطيتي راجل مابقاش كي كان...ساكت و ماتيهدر مع حد و قالب عليا ...تافقنا على الطلاق و كنا غنطلقو ( غلباتها الضحكة مع البكية ) صدقت حاملة بأزهار....( مسحات عينيها ) ولدتها و فرح بها بعد ماكانش باغيها لا انا لا هو كنا عوالين على الطلاق طلعت حاملة ...ولى كيموت عليها و يحط عينيه عليها....دار ليها عرس ماشي سبوع بغى يطير بالفرحة مبرعها هي و انا ماكنتش كنحس بديك الكادويات بحال مربية لبنتو كيخلصني...حتى ولينا تنهدرو على قبل و شحال من مرة تينعس معايا و فالصباح تيصبح قالب وجهو بحال كيبغي ينسى و كيتفكر بلي خبعت عليه ماكتبعيش تبلع ليه.....
حلا ( بصدمة ) و طلعتي حاملة عاود بأمير ....
نسيم جمعات شعرها رجعات لهدوئها....
_ كون ماكانتش أزهار غنكونو مطلقين و ماكانش غيكون أمير كاع....كنت دايرة احتياطات وحتى هو كان تيحضي و كتاب حملت بيه....دابا بحال مربية ليه الولاد يحيى يدير كلشي على قبل ولادو حتى الطنوبيل جابها ليا على حساب ولادو ماشي عشقا فيا انا ....ولفتو مرة ساكت مرة قاطع الكلام ...مرة تينعس معايا مرة تيقلب عليا وجهو بلا ماتقولي الطلاق ما الطلاق...جربنا و ماقدرناش...أزهار كتموت على باها و أمير مزال صغير ...ربطونا بجوج ماكتاب الطلاق دابا من هنا للقدام مانعرف شنو يوقع....! يحيى كنحسو باغي ينسى و مكيقدرش....حيت كيتفكر اول مرة عرفني شافني مع صاحبو الصيدلاني داك النصراني كان لاصقني و انا مابغيتوش...وهو قاليه انا اونكوبل معاه...كتى كلشي لى يقول كان مصاحبة مع واحد و تزوجات صاحبو خليتها هكاك و كملت عليها....جا سولني قبل مانتزوجو قلت ليه الحقيقة بلي متنعرفو ماوالو و تيق مامصاحباش معاه...حتى لدابا بدا تيدخل شي فشي مع عقلو و يفهم من راسو ولى كي الحمق ..( تنهدات تتضحك بهدوء )مابقيتش كنحمق راسي معاه....ولفت و انا متأكدة غتكون عندو وحدة اخرى في حياتو من غيري و عادي....نهار نحس ولادي كبرو نوقفو هادشي ....شحال من مرة كنبغي نشكي لماما كنرجع للور و ندير السبة بكيخوني ....داكشي لي كتشوفي فيه كذوب...اذا خرجنا بجوج تنهدرو على الولاد و الوضع بعيد عليهم مايسمعوش صداعنا ولا مشاكيلنا....
حلا بقات غا تتشوف و تترمش...عارفة ختها كتبغيه حب جنوني و تتغير عليه غيرة مرضية كلشي عارفها...و عندها الجراة تدخل مع السيد للزواج وهي ماعارفة والو فراسها....ضيعات راسها معاه و ضيعاتو هو ...ماجاتش تقول ليها مكلخة غادية للشوهة برجليك...و ماجاتش تلومها دابا علاش سكتات ...راسها داخ و طلعات ليها السخانة...مستغربة اصلا ماكانتش كتظن نسيم تكون خازنة هادشي كلو عندها....تتبان ليهم هادية و فرحانة ...و مراة تتبان منعزلة و شادة الركنة ماتتهدر مع حد ...نسيم ختها تتعرفها رومانسية و حنينة و الواحد تتمشي معاه بالخاطر و ظريفة مع كلشي و تتحسها نية و خبز ربي فطبقو ...لكن دابا ولا تتشوفها فشكل... قدرات تخبي هاد الكارثة اربع سنين !! متظاهرة قداهم بالسعادة و الكادويات و الحياة المثالية ...سفر لتركبا لدبي كان لولادو فقط ... كل مرة كانت تتقوليها تبقى ليها مع ولادها خارحة مع يحيى...كانت كظن السيدة خارجة معاه فموعد غرامي...و الموضوع كلو كان تيدور في نقاش و حوار ...!! تنهدات حلا راسها دايخ...تتشوف نسيم تقلبات عاد كانت تتبكي دابا ساكتة هادية بحال كانت غي تتعاود شي قصة د الجيران ....ماقدرات تقول والو ...و تصدمات كثر من ردة فعل يحيى...حلا عارفة تفكير الرجل الشرقي كثر من نسيم حيت نسيم ماعاشتش فالمغرب من صغرها....حلا لي تتعرف و الوسط لي عايشة فيه راجل بلاصة يحيى يذبحها و يمشي عليها للحبس...وبلا مايسول علاش و كيفاش وقع...نيشان يفضحها و يحطها بوجهها قدام عائلتها ...! كانت شاهدة على قصة حبهم قبل الزواج....و شافتو حتى كان تيموت عليها و عشقو ليها باين....و حتى هي كانت تتبغيه كثر منو كاع....ماعرفات تسمي تصرف نسيم جراة ولا كلخ و قلة تفكير ...لكن تعدرها الحب اعمى و العقل كان صغير و الغيرة اصعب ...!!
تبكمات و ماعرفات ماتقول...ماعندها هدرة تزيدها ولا تواسيها...وهي السيدة دوات جروحها براسها سنين حتى لدابا عاد جاية تواسي ؟
حميدة و عبد الله تيخافو على بناتهم و شرف بناتهم كثر من اي حاجة....! و اكثر وحدة كانو مزيرين عليها هي حلا هي معروفة طيارة و خوفهم عليها كبيير ...حاضينها غا هي و تيشكو فيها غا هي ...و راخفين لنسيم و لخلود....!! حاضيين غا حلا لا تغراق فشي بيير و تطلع موحلة فالغيس....! مارادين بال لبنتهم لي كلاوها الدياب و ساكتة....حاطين الحضية على الطيارة فيهم و منقصين على الهادية فيهم....! علاش هي ختارت ! كانت تتعرف غا قرايتها فقط ناقصها داك التخربيق....!!
حلا عيونها بقاو غا مفتوحين شدوها الغدايد و الاعصاب...
_ و علااششس باقية معاه واش غتخرجلي عقلي...واش غي هو لي راجل طلق و عيش حياتك ....
نسيم بهمس : شش غيفيقو لاش تتغوتي.....
حلا ( مجننة ) و يفيقو ولا ي*راو ... غتهز راسك و تسمح دوك الدموع و طلب طلاقك جلس فدار والديك معززة مكرمة...ماتفكري لا فالناس ولا فديك ال*ىاي ديال رضا ...بلا مايخلعك هذا مافجهدو مايدير.....والو فيه غي الهدرة تفو هذاك يخافو منو الناس شوهتي راسك بسبابو.
نسيم ( بهدوء ) الطلاق عندك ساهل حيت ماعندك ولاد و مامجرباش...عيت نبكي و نشكي على الحبالة لي كنت كنحبل وانا دايرة احتياط واحد ورا الثاني و بالحضية و صدقت حاملة و ولدتهم مكتاب نولدهم و ماقلتش لا و لا علاش ..صافي بكيت قبل مانولدهم ملي شفتهم نسييت الحلوف و اابكاء ..! انا قلت ليك مابقيتش كنحمق راسي معاه ..نهار غنشوف ولادي كبرو غنشوف الطلاق وهو براسو يعيش حياتو كيف بغا...
حلا : نتي دايرة السبة بالولاد ..الولاد يفتحو عينيهم على والديهم مطلقين خير ليهم ملي يكبرو و يعرفو و يفهمو و يشوفو كل واحد عايش فقنت.....لواه دوز عليا انا ديك اللعيبة ديال ولادي ماولادي...عارفة داك القلب عندك مسروق و السيد مخزون تما....و نتي تعرفي لي يناسبك..! انا ماعزيزش عليا الواحد يقولي دير ماديريش...سرك فبيير والله لا عاودت شي حرف شي حد حتى نموت....لي نوصيك هو تلفي وقتك و تحاولي تنساي داك السيد ماتبقايش تتبكي و تنخنخ عليه بغا ينعس معاك قولو الشريف فهمني حتى نعرف راسي من رجلي ماشي نتا قالب عليا وجهك و دابا جاي باغي تنعس معايا...! نوضي خرجي و فوجي مع ولادك و دوري بحالتك ماتخليهش يشوفك ضعيفة مهلوكة مريضة يقولو هادي مقتولة بسبابي...صافي رغبتيه و حاولتي معاه و درتي جهدك حتى عبتي ماتبدل والو ..قلبي عليه شوية ..و ديها فراسك و عيشي لراسك....( ضربات جبتها مصدومة ) و انا كنقول مال هادي مقتولة على القراية واحلة فروحها و همها فقرايتها...كاع هذا حب للقراية....احسن حاجة درتيها...دابا عندك تجربة و السيفي عندك عامر ...خبرة فالتجارة و التسيير ...! شكون بقا يديها فشي يحيى...ملي تفطمي ولدك رجعي شوفي الخدمة تلفي وقتك ...!
بقات غا تتهدر وهي الصدمة قالباها مصدومة و ماعارفة حتى شنو تقول و كيف تصرف كما يجب ...ماعندها مع النصائح و الخوف ديالها تترجمو عصبية و غوات و يديها طوال...غا دابا ماعرفات كيفاش جمعات فمها و ربطات راسها...
خرجات بهدوء من البيت و دخلات لبيتها النعاس
طار من عينيها مصدومة بالجهد ...! عيات تحاول تنعس ماقدراتش... و لسانها سرطاتو مابقات عارفة ماتقول...و شنو تزيد الهدرة مابغاتش تخرح ....! بقات شي ساعة هكاك....ووالو ...حتى ناضت و مشات عاود لبيت نسيم تطل عليها...تدهشات كثار ملي لقاتها غارقة نعاس مزيرة على ولدها الصغير لصدرها..تتسول فراسها كيف كدير تنعس و تضحك عادي ..و كيفاش صابرة لديك العيشة ...!
رجعات لبيتها تتقلب بوحدها تتفكر في حالة ختها.....هزات تليفونها لقاتو غيطرطق بلي زابيل ديال أسامة...!
رجعات طفاتو و نعسات بعد مجهود كبيير....!!
فاقت فالصباح معطلة...!
لقات كلشي فاق تيفطر ...حتى من نسيم تتسخر مع حميدة شادة شعرها الكحل عالي تيلعب ورى ظهرها لابسة بيجامة ثوبها حرير ..عينبها منفخين تتفطر بهدوء و تضحك مع خلود و عبد الله عادي كيف موالفينها...
نسيم ( مدات يديها لامير تتضحك و تلحن صوتها ) اجي مامي...مابغيتيش.....اجي عندي
أمير ( تيتخبى فحميدة ضاحك و يغرغر اللعاب مع فمو و سنينات للقدام تيعرف غي ما ماما....)
حميدة ( تتشوف فحلا ) على سلامتك...صباح الخير عاد فقتي....
خلا ( عينيها مجبدين بالنعاس ) ماشبعتش النعاس....غنفطر و نرجع ننعس مافيا مانخدم اليوما....
عبد الله ( جمع حجبانو)كيجيك العجز احلا ...الخدمة عندك بالرشوق...
حلا : و صافي اعبد االه بلا مادير علينا باطرون.....( شافت فنسيم تتصرف عادي ) فين هي أزهار ....
نسيم : مزال ناعسة تتفيق فالصباح و ترجع تنعس...دابا تلقاها فايقة فارعة دنيا غوات ....
باقي يلاه كملات هدرتها...خرجات ازهار هازة تليفون نسيم تتبكي بواحد الشعر مشنتف طالع للسماءو الكرش خارحة مطبزة كي البالونة وججها مدورة منفخة و خدودها عامرين جايبة العين ...
_ مامي....پاااپييييي...پااااابييييي.....
نسيم ( هزاتها عندها تتشوف ) فينو بابي...وريني نشوف ( أزهار تتوريها التليفون زعما بغات تهدر مع باباها و تخربق فالهدرة النطق عندها ثقيل ) يلاه اجي نفطرو و ندوشو و نديرو آلو لبابي....صافي....
أزهار مدلية شفايفها قد القميلة مخشية فحضن نسيم تتشوف فالحضور مغوبشة طالعة ليها القردة...تيضحكو عليها مدوزين بها الفطور..
حميدة : ياربي السلام على تغوبيشة غا حلا ثانية ....
حلا : و عندها الزهر تطلع تشبه ليا مالي تنا كيجيتك.....
عبد الله : ماجيتينا والو ..فطر دغيا نوض شوف شغلك بركة من العجز....!
ناضت حلا لخدمتها...باقي غالبة عليها صدمة ختها...ماراشقاش ليها و مامرتاحااش...كانو تيقولو على نسيم هي الهشبشة و المفششة ديالهم ماتصبر لا على تمارة لا على شقاء صدقات صابرة على ماهو كفس و مر ...!
جلسات فاابيرو ديالها بادية خدمتها بجدية ...! حتى عيااات وجلسات تتسوط عيات و شحفات...! شرباات عصيرها البارد و فتحات الانستا كدور فيه و تشوف الجديد ...حتى تتطلع ليها صورتها مع عبد الصمد ليلة الخطبة مزال تتدور في صفحات الاعراس المغربية ...! طلعاتها بالزربة بلا ماتركز فيها كثر ..و تشغلات مع خدمتها..تتنوض واقفة تتلبس الصاك و السندال و شال مع عنقها تيجيو انسومبل مع ساعة ذهبية فخمة تتصور اابياسات الواعرين و تحط مامحتاجة عارضة هي قاضية لراسها الغراض...!
جات صوفيا داخلة لعندها تتدوي بعملية...
_ ختي حلا ياسين جا...
حلا خرجات لعندو تتبسم سلمات عليه و بدا تياخد ليها صور بدقة عالية...للسلعة و البياسات تيصور ااذهب و الخواتم على بديها و السنسلة فعنقها و الحلقاات فودنيها تتبان غي السلعة و الموديل على بشرتها البيضاء...!
حتى سالا و خرجات تغدا بوحدها...! تمات راجعة للكحل وهو يوقف عليها علي حتى قفزها و كمشات حواجبها محنزرة فيه ...
_ متلف طريقك اخويا ؟
علي منغم مع رساتو مقرب لعندها كيهدر بابتسامة ...
_ ماخوكش انا العايلة ديالي توحشتك ..ماتوحشتينش تقولي لا نخسروها ....
حلا تجاهلات و تمات غادية بحالها حتى شدها من يديها و جرها لعندو تما طلقاتها للغوات تتضرب فيه...
_ و الزبل ...و تفووو...طلق مني انا مزوجة مزوجة واش متفهمش متا ولا مالك ناقصة ليك شي بياسة فعقلك تفوو....طلق مني ....
علي تيشوف الناس جمع يديه ..و قلبو ولا عامر عليها....زير سنانو تيحك رقبتو ضاحك ضحكة مخسرة...
_ عيني عليك نوريك علي شنو غيدير ....
حلا ماستنانوش كاع يكمل كلامو غي طلقها دفلاات و دفعاتو غادية بحالها تتسب معصبة....!!
تبعها بعنيه بشوفات خاسرة جبد تليفونو و دوز الابيل لعبد الصمد ...
_ و نوض اصباح الخير....ضرب عندي شي دورة ماعيتيش تطوان توحشاتك اصحبتي كاين الزين هنا مخييير....زهقات العين على وحدة شوفها و عطينا اشنو بانلك كاين شي ولا والو ....وخا مزوجة اهانية عندي الخاوة ديالي......
دخلات للمحل لقات اسامة تما كيستناها....! جمعات حواجبها و بجدية نطقات...
_ مرحبا جلس ...كاين شي مانقضيو !
أسامة ( عاقد حجبانو) علاس مكتحاوبيش احلا.....
حلا ( بهدوء ) نعست بكري البارح ...
اسامة ( ناض لعندها تيسوط معصب و ماباغيش تفهمو غلط شاد لبها يديها تيدوي و يعبر ) والله حتى كنبغيك غي نتي تنا عارف راسي غلطت و بزاف...ماعرفتش كيفاش خرجت ديك الهدرة ماقصدت فيها والو ...
حلا : عارف شحال خايب تقولي فنص وجهي بلي راك مجرب و فرحان ببها تتبان عليا زعما انا واعر مجرب ..عوض تحشمو عليها تتقولو فخورين براسكم....تجرب حتى مية لابغيتي ولايني تقولها ليا نص وجهي فرحان بيها داير انجاز هادي مابغاتش تدخلي لعقلي...
أسامة : عارف والله حتى عارف....انا ندمان و ماكنتش بعقلي ملي قلتها...صافي حاولي تنساي هاد الغلطة...عاد قلنا بسم الله فزواحنا وبديناها بمخاصمة ! مم عجبك الحال ....
حلا مابغاتس تبلع ليها مارضاتش...بقات ساكتة قالبة وجهها عليه حتى جرها تيدرع فيها و يبوس ليها راسها و عنقها و يديها تيسايس...
_ والله ماكتجي معاك تغوبيشة...كتسيفي...نخرجو نتعشاو اليوم مم !
طول العشاء وهوما كيهدرو فاي موضوع جا فالطريق دخلو فيه...! لابسة البراصلي لي جاب ليها رجعات لهداوتها و رقتها معاه بالكشايف....حتى بغا يتسطى معاها...وهي ماناسية والو مزال واحلة ليها فالحلق...تتعلم تغطي العيوب لي تتشوف و تتعلم تصبر عليها...مابغاتش ترجع باللور وهي وصلات معاه للزواج و العرس ماباقي ليه والو ....!
تعشاو فجو رومانسي حيوي و ناضو تيدىو شادين يد فيد ...و أسامة سخن عليه راسو عليها...غا دخلو لاطو جرها لعندو متكيها على صدرو تيشوف فيها هايم يقيس شعرها مرة رقبتها مرة عينيها ماوصل لديك المرحلة حتى سحفاتو ففترة الخطوبة لي دامت اربع شهور...!
قرب باغي يبوسها بغات تهرب شدها متبثها تيبوس فيها و يديه كيفتحو ليها الشوميز و يعبرو صدرها ...حتى قفز ملي سمع رنة خاصة باتصال ماماه....!
رد عليها بالزربة تيمسح فمو تينهج و حلا تتدور فعينيها و تمسح لعابو من شفايفها و تشد الشوميز لي فتحها..تتسمعو و تسجل و تحضي كيف تيهدر معا مو...
_ نعام اماما ..وي لااا غنجي دابا ...وخا هي الاولى ...لا ( تلبك ) مع ..مع صاحبي سهران ....( شافها خرجات فيه عينبها شدها من يديها حابسها عندو وهو مكمل فالهدرة مع مو كيتفتف.. .)
_ صاحبي عمر لا ماشي حسام عمر اماما...وخا انا غنجي.....
حلا ( غوتات تتدفع ليه يديه حتى قطع ) انا عمر !! رجعتيني عمر ااسامة عوومااار.. ....
أسامة ( تيحك راسو عارف مقفرها ) و سمعيني حلا سيلتوبلي سمعي مني ....
حلا حجبانو تلاقاو جراتو من كيو الشوميز مارضاتش ...
_ علاش ماتقولش ليها معايا ..شنو هادشي أسامة...واش ترضى نهدر ماما تسولني مع من نتي نقوليها مع صحبتي و نسميها كااع ...واش تنبان ليه انا بالقرون....ماعندي نفس تسيميني عمر ....عماااار يا ( جات تسبو جمعاتت مفقوصة ...) وخا انا لي حمارة مكنسواش خارحة معاك و نسيت لي درتي اابارح....
أسامة ( زيرها عندو تيرغب ولات تتصدمو) حلااا ..و حلااا ...سمعيني....يرحم باك....
حلا : انا بغيت نفهم ..فهمني اسيدي دابا ...فهمني علاش ماقلتيش ليها كاين معايا ...فهمني و نسكت و نسمع ليك حتى للصباح ....
عيااا معاها كيدخل و يخرج فالهدرة شنو يقول...فضل انه يهني راسو من صداع مو على حساب حلا غيقفرها معاها بالمعقول وهي ولاات تتصدمو بحال عاد بدا يعرفها...كان تتبان هادية و هبيلة.....عيا يسايس معاها ديك اليلة ووالو رجعات للدار ثاني مخاصمين...! دوزات ليه سيمانة مخاصمة غي تيخرجو تيتخاصمو و حلا بدا يطلع ليها هادشي فراسها....تتمشي و تجي فبيتها تتهدر مع خوتها مفقوصة...
_ صدق ولد مو البنات ...ولد مووو....انا نتزرف بواحد ولد مو...كاع ماكانت تتبان عليه...فين كان هادشي فالخطوبة ماشفت والو تزرفت.....كنعيا نقول ويلي احلا راه تزوجو ماشي مزال مخطوبين ترجعي اللور ماجاتش...زيدي صبري . .زيدي الزواج صبر...ولايني مابقا صبر مع ولد موو.....
خلود ( بخوف ) ماتقوليشي غطلقو قبل العرس !؟!
نسيم ( بصدمة ) رضا غيقتلك ....
حلا قربات لعمد نسبم تتزطم فجلايلها معصبة ...
_ يا هاد الهبيلة كنقولك هذاك مكيخلعنيش...مكيخلعنيش تيبان لي كي سراق الزيت تزطمي عليه يدوخ....
خلود ( بصرامة الاخت الكبرى ) تأكدي قبل و عطي فرصة اخيرة ساعة شوفي اابلان شنو فيه.....
فعلا سمعات حلا نصيحة ختها و ليشهد التاريخ اول مرة حلا تصبر على فعايل دشي راجل ....و ياريتها دارت لي فراسها و ماسمعاتش كلام خلود ....
خرجات من الدوش ! شعرها فازك تيقطر تتزرب عليه تنشفو طويل واخد ليها الوقت.... وولادها تيغوتو فالبيت و ينقزو صوتهم تيتسنع و غواتهم رقيق تيزوي كي الفلالس صغار تيتخاصمو و يتغاوتو و كل واحد واحل فراسو مصاب غا يشد راسو ...غا غوات امير و التوغويغ ديالو و ازهار خدامة عليه بالهدرة تقول تتهدر بالشنيوية الهدرة مسروطة مامفهوماش ..تتقرب حتى لعندو تحيد ليه اللهاية من فمو و تنقز كي القطة لبعيد تتقلب فعينيها و تشطح قزيبتها....
_ لولولو....انكولك خنيني ..خنييني يلاه شد بوجك ...( سد بوزك )
شداتها تتدير فيها البزيقات ديالها و ترميها عليه ...منفخة....
أمير تيبقى غا تيرمش ويدلي شفايفو حابس البكية تيحس بالحكرة و ماععدو جهد ليها و هي كطير كي الزواق....بقا تيشوف حابسها حتى طلقها بغوتة و ناض لعندها شاد التوازن غا بزز تيفتح يديه و يطلقها مجنن.....قفزات نسيم لغواتو و حطات من يديها مخلية شعرها هكاك نص ناشف و نص فازك...! تتقرب لعندهم بالزربة شعرها تيشطح معاها لابسة سىوال جينز لاصق عليها و حمالات الصدر فقط جات عامرة من التحت و ضعيفة من الفوق..عندها شوية الكرش باقية ليها من الولادة ....يلاه كانت باغية تلبس خارجة مع حلا و خلود و شكون خلاها بعض المرات تتكون تتدوش...تتسمع غواتهم تتخرج هكاك بالرغوة ...
علاات فيهم حواجبها تتشوف فيهم ناطقة بهدوء
_ شنو كاين ؟ مخاصمين ثاني...
أمير ( تيبكي و يدمع و ينعت لأزهار بيديه تيشكي ) مامي لولويا....
نسيم ( تتشوف فأزهار بنظرة صارمة ) علاش اماما كتحكري عليه ...وهو صغييور مسكين كيبغيك ...فهميني علاش نسمعك ...
أزهار تتشوف فيها تترمش و تخرج لسانها و دور فعينيها ...شافت راسها غالطة طلقاتها للبكاء حتى هي تتدلي شفايفها و تبكي تقول قتلوها و ماخلاو فيها والو و ظلموها !بوحاطية و مفششة شابغة دلال و خنات و من يد ليد ...الحفيدة الاولى عند عبد الله و لالة حميدة و حتى عند والدين يحيى ...!! ملي تزادت و ففمها معلقة ذهب...باقية لاصقة فالارض و الذهوبات كل مرة موديل على قد سنها....
بقات نسيم من هنا لهيه تسكت أمير تبكي ازهار....تهز ازهار يجرها أمير.....تمشي تكمل تنشاف شعرها تتلقاهم تيغوتوو و يدافنو و يتسابو بالهدرة وخا ماهي هدرة غا الحروف مشيرين طالبين السلامة و علم الله شنو تيقولو هوما تيفهمو على بعضهم....طجات و تعصبااات و تقهرات....! دارو ليها الشقيقة و الصبر ولا عندها قليل القهرة و النفسية مزفتة ...مع ذلك الغوات قليل فين تتغوت عليهم .....! تتخدم معاهم اسلوب التهديد...و اكثرية على ازهار حيت هي الكبيرة تتفهم كثر. ..
_ والله وتعاودو تخاصمو غنقول لباباك مايعاودش يصوني عليكم... ازهار مغنعطيكش تهدري مع باباك ..صافي قررت....يلاه مكتسمعيش مني كتديري لي فراسك وخا اماما ..ممنوع تهدري مع باباك...
ازهار ( تتتدمع و ترمش عينيها كباار تيشبهو لنسيم تتبكي و تهدر لشوية تترغها و الهدرة عندها محربقة ) نو مامي.....مانبكاواش ....( الدموع تيقطرو من عينيها حابسة الشهقة ) نو مامي ...نووووووو.....نكولو لپابي ....( ماصبرات و طلقتتها بالغوات و البكاء و الشهيق كلشي الا ماتهدرش مع باباها )
نسيم قلبات عينيها تتنهد غمضات عينيها و فتحاتهم و تحنات هزاتها تتمسح لبها عينيها و تبوس فيها...
_ و علاش تتعصبيني امامي...تبغي تعصبيني غي انا و ماتسمعيش كلامي.....صافي هانا نشوفو باباك...بغيتي باباك.......
العيون دغيا فرحات و نشفات من الدموع عاد كانو تيبكيو دابا تقول عندهم عيد .. مجمعين فوق الناموسية قراب ينقزو بالفرحة...ازهار جالسة بعقلها زعما ..بواحد الشعر عمرو يتجمع...ملولب داير كي الخاتم...جالسة بعقلها تترمش و تستنى تشوف باباها فالكاميرا..و امير واقف بزز شاد اللهاية ديالو تيرمش و يشوفو فالكاميرا كيستنى بحال شي واحد كبير بعقلو ...شاداه نسيم و هو شاد يديه فشعر ازهار حتى تتغوت و تغوبش..
_ نوو..ليش موا....
عاودات نسيم صونات على يحيى عرفاتو ماشادش التليفون حيت اتصالها ضروري يجاوب عليه وخا يكون غارق فالخدمة...تيسبق اتصالها على الخدمة عارف ماتصونيش تعاشق معاه و إنما على الولاد ....
سكتات ملي فتح يحيى الخط و بان وجهو فالكاميرا....ضحكو الولاد و القلوبة خارحين من عينيهم ...طارو للكاميرا تيبوسو فيه و يضحكو و يصفقو ..هكا تيديرو ملي تيشوفوه فكل مرة وخا يكونو يلاه قطعو معاه الهدرة....هاد العام ولى تيغبر عليهم كثرات عندو الخدمة على برا ...مرة تياخدهم معاه مرة ماتيصلاحش على قبلهم الجو مامناسبش ليهم....
نسيم تيبانو غي يديها عريانين و شعرها لي تيجرو أمير بيديه كي الجفاف.....تتسمعو تيهدر معاهم ضاحك مصغر عقلو معاهم تيصرد ليهم البوسات .....
_ هادي لازهار و هادي لامير....وصلات ولا باقي وصلات ابابا ديالي ...ازهار كتسمعيني ابابا....
ازهار فين هي... غطات عليهم بداك الشعكوكة ...ناعسة على كرشها و يديها تحت ذقنها تتشوف فيه بحال تتفرج فالرسوم تتضحك غتموت بالفرحة و عينيها تيصحكو ...غاتتسمع ليه و ترجع تبوس الكاميرا تتخايلو قدامها
امير جلس حالس مجرجر شعر نسبم معاه تيخشي يديخ ففمو ضاحك ...
_ بببب...ببب.....
يحيى : فين اصاحبي ....هيي أميير....
جلساتو نسيم مكالياه بالمخدة و ناضت من تما مخلياهم بجوج معاه مابانتش قبالتو بمرة وخا شاف شعرها و يديها ماهدرش ملي شافها ماهدراتش ....
خلاتهم معاه الجنة ديالهم هي هاديك ...تيحماقو عليه و يتسطاو ...وهي تتحس براسها قيمتها عندهم اقل من باباهم ...تيبقى فيها الحال بالجهد وخا ماتتبينش....!
لبسات عليها بالخاطر هاد المرة و بالرشوق الولاد ملهين مع باباهم...! تتسمع ازهار تتعاود ليه وهو مسايرها عاطيه وقتهم شعرها خلاتو ينشف لراسو تيبقى طليعي زوين ...! طالقاه مغطي جسمها ...! لبسات شوميز فالعسلي و حيدات داك السروال بدلاتو بالاخر سروال ثوب ابيض واسع ...توحشات دور بحالتها و ترجع كي كانت...تتحاول و لكن تتوقف فالنص ماتيكون عندها كانة....! رشات ريحة فالينتينو لشعرها و جبدات عينيها بالماسكارا و الايلاينر ..لبسات خاتم الزواج و ساعة فضية انيقة و صاك مربع بالسنسلة من ديور...لايق مع اللبسة....! الصدر عامر بالحليب و جسد ناضج تتبان عليها مراة ...طويلة و ملامحها هاديبن و زوينين...عندهت ملاحة فوججها ..و سرها بوحدو ...!!
سالات و دورات وججها لقااتهم بداو يدوخهم النعاس كي الفلالس...حيدات ليهم التليفون ناطقة بلل ماتشوف فالكاميرا ...
_ غنقطع الولاد نعسو ...
قطعات عليه بلا ماتستنى رد و صاوبات ليهم البلاصة مغطياهم تتشوف فيه و تنهد ...حتى تينعسو عاد تتندم علاش تتعصب عليهم و تزل تبوس و تبكي عليهم تيقطعو ليها قفقلبها...!
وصات عليهم حميدة و خرجات من الدار تتمشى بداك الطالون عالي مخلية حميدة تتنكر ..
_ ابنتي غتخرج على راسك بداك المسمار لي واقفة عليه...و اجي شكي عليا ظهري كبحرقني.....
تعيا تهدر و تعيا تنكر عليهم و شكون بسمعك ياحميدة ..! خرجات بوحدها ...تتخلف بالزربة ماتتهدر مع حد ...تلاقات باخ يحيى صفوان عطاها الاوطو دياالها تيضحك ...
_ ماقدرتيش تصبري حتى سيمانة بلا بيها
نسيم : ولاهيلا شكرا بزاف ماتقدرش نتحرك بلا طموبيل بالولاد صعيب الحال....
صفوان : توشحتهم واااه....شنو كيديرو بعدا عاحبهم الحاال....الحاحة توحشاتهم...
نسيم : لباس عليهم اخويا ...ناشطين ماناقصهم خير ...دوز عندنا للعشاء تعشى معانا ...
صفوان : لا مانقدرش اليوما..يحيى راك عارفة حا المغرب ا فطنجة قالي نطلع لعندو محتاجني فشي شغل ...غارق خدمة مرون مع الوراق و التخربيق يدالو ...غيهبط يشوفكم و انا غنطلع....
نسيم بحال ضربتيها بضربة على غفلة..بلعات المرار والدبحة سرات معاها قاصحة..مارضاتش...ومباغاتش تتبين بلي مافخبارهاش...
_ وييه صافي الله يعاونك نتا تعرف..نمشي دابا طالعة لتطوان .نلحق على خلود و حلا منها نجي دغيا ....
علمات حميدة بلي يحيى جاي...؛ مابينات والو تتصرف حداهم عادي...! عاد شدات هي طموبيلتها لاحقة على حلا و خلود لدار خلود الجديدة....!!
دوزات العشية معاهم فرحانين مع بعضهم...! دخلو لبوتيك الحوايج ...! خلود كرشها قدامها تتشد فنصها تتشوف حويجات البنيتلت الصغار ...تتسول فنسيم و حلا....
_ عجباتني غناخدها....
حلا : نتي لي شفتيه غوز خوديه ...و هادي ماغتلبسها حتى تولي عندها ثلاث شهور عاد تجيها....و ملي تجي دير ثلاث شهور حتى تكون مطمرة حويحات تيحمقو ...خود ليها هاذي واعرة ..و هاد المونو ..شنو بان ليك انسيم...
نسيم ساهية تتشوف فاللهاية بدون اهتمام غا جات عينيها تما بقات ...حتى قفزاتها خلود
_ عولنا عليك نتي زعما خبرة ...فين ساهية ...( تتضحك ) توحشتي سي السيد ماكرهتي تكوني دابا فالدار كتستنايه يوصل....
حلا ( زمات شفايفها و قلبات عينيها ) نسيم غتبات معايا اليوما....
خلود ( تتضحك) والله لا خديتيها اليلة عروسة ...بغيتي السيد يدعيك ....
نسيم ( تتلف الهدرة ) اجي خديتي ستيغليزاسيون دي بيوبغون ؟ راه ماباقي ليك والو و ناقصك شلا حوايج ....
خلود : سكوت ماتفكرنيش ...تلفت كنقول ساليت كنلقى راسي ماساليت والو ...يلاه الظلام طاح نمشيو ...
حلا : صبرو شوية...نتعشاو برا عاد ندخلو ياربي شحال تتمرضو الواحد نهار و انا غادية معاهم من بوتيك لبوتيك و ماعندي حتى فايدة فهاد التخربيقات ديال دراري الصغار و صابرة على نكير ديالكم و فالاخير شادين طريق الطريق نيشان ..اختي انا بغيت نتعشا برا ...ماغادياش للدار دابا.....
خلود : و ردي على تليفونك راه جابلي الشقيقة و الاعصاب...طفيه و هنينا...
حلا : هذا اسامة...ياربي شحال طلعلي فراسي ...عمرني تصدمت فشي حد قدو ...ولد مو مقطر...اذا صبرت ليه مزال ها وجهي....مانقدرش نكمل مع هذا حياتي ....( زمات شفايفها ) واحد التزريفة نعاودها لعدياني يفرحو و يشدوها للزغاريت ...كنت عارفة غتخرج فيا شي دعوة ...
خلود ( الحرقة قتلاتها ) و شدي اختي سرك نتي لي عيتي تختاري و تعزلي وحلت فهاذا ....زيدو ناكلو جاني الجوع ...حقا واحد الفوطو عندك مع عبد الصمد فالخطبة باقية لدابا تتطلعلي فانستاغرام ماعمرو هدر ليك عليها أسامة ؟
حلا ( دارت راسها ماسمعات والو ) تنا فيا الجوع ....( جرات نسيم من يديها مفقوصة منها ) و فيق من القلبة و تحاور معانا مالك ساكتة كي الصنمة....
تعشاو و عمرو الكريشة نييت...! جالسين بثلاثة تيبانو قراب فالعمر ...خلود طالعة ل33 و حلا 27 و نسيم 25 ...دم واحد تيجري فيهم و الشبه واضح عليهم...لي شافهم يعرفهم خوت ...هاهوما مناكرين هاهوما مصالحين...و خلود مع الماكلة غا طلبي و حد و هوما تنفعو من وراها وحلات هي فالخلاص ...!! ناضت خلود تغسل يديها بقات حلا مع نسيم تتدير فيها شوفاات حادة...
_ عارفة ماشي شغلي ولايني بلا ماتفقصيني انسيم....كون لقيت نشدك عندي فالبيت مايقيس فيك شعرة تنعرفك تابعة غا داك القلب ....
نسيم ( قلبات وجهها ) بلا ماتندمينا ثاني....
حلا ( ميقات فيها ) سري نيييت..حميدة عندها الحق تتعيا تقولي ابنتي دخلي سوق راسك وماعمرك تدخل بين راجل و مرا يتخاصمو اليوم غدا يصبحو معانقين و تباني نتي لي ماتسوا ماتصلاح...هانا شادة فمي...حتى تجي عندنا تتبكي و تشكي ...انا حاملة.....
نسيم ( بخوف ) الله يستر ....
حلا ( رمات شعرها اللور عاقدة حجبانها ) و تحلي ليه و قولي الله يستر....
جات تكمل توقفات ملي قشعات علي حاضيهم...بلعات ريقها معصبة و ناضت واقفة زاربة عليهم يمشيو ...! ركبو مع نسيم و وصلو للدار ورى العشاء...! قلب نسيم قفز ملي شافت الاوطو ديال يحيى ...!! توحشاتو وخا تنكر و تكدب على راسها من هنا للعام الجاي...طلعات هي الاخيرة فيهم...! حلا شافتو تسالمات معاه بابتسامة صفراء...
_ على سلامتك ...
يحيى ( ابتسم معاها عاطيها صوابها ) الله يسلمك مبروك عليك الله يتمم على خير ....
جلسات حلا بعد ماقالت ليه امين ..بقاات جالسة فالصالون حاضياه و حاضية نسيم لي داخلة تقول تتخلف على البيض....تتشوف يحيى عينيه فالتين عند نسيم و يرجع يكمل الهدرة مع عبد الله و عينيه معاها و مع عبد الله....
دخلات نسيم للصالة تتصرف عادي قدام عبد الله و حميدة. .
_ سلام عليكم ....
سلمات على يحيى و سلم عليها عادي ...و جلسات حداه تتشوف فكلشي الا فيه ...
عبد الله : فيها خير ...فيها خير ...الوراق طاحو يتعوضو ...المهم هي الصحة....
يحيى داير يديه ورى مخدة نسيم ...عاطي الصواب لنسابو وخا كلامو قليل معاهم و ماشي غي معاهم حتى مع عائلتو تبدل ..بحال هزيتي راجل و حطيتي راجل مابقاش يحيى الضحوكي و الناشط و تلقاه داير الخاطر للصغير و الكبير ..بحال كبر بعشرين عام تبدل فخطرة و كلشي لاحظها و قالو دار الولاد و تعقل....! راجل عادي ماشي وسامة مفرطة ...عندو كاريزما الرجل الشرقي...بشرتو سمراء بالشمس و ملامحو سوداء ...داير تحسينة عادية و لحية خفيفة و جسمو رياضي بسباب خدمتو ...متخصص فسيكولوجيا الخيول ...اغلب المسابقات العربية لملكات الجمال ديال الخيول او سباق الخيول تيكون حاضر تفاديا لاي مشكل يوقع لنفسية الفرس او اي خيل عربي عندو عقدة من الماء تيخاف من الماء ولا ماتيقدرش يهبط راسو ..و شحال من واحد تيعيط ليه على قبل خيل خصو يشارك بيه فمسابقة عالمية ولكن عندو مشكل فالثقة فالنفس ...غالبا مشاكل نفسية للخيول و كذلك عندو رخصة تاجر سيارات ...!!
حميدة حطات العشاء على حقو و طريقو فرحانة بنسيبها....!! تعشاو و تجمعات الطبلة و حلا معاونها عاقدة حجبانها معصبة ...!!
عبد الله ( شاد هدرة مع نسيبو ) و الحرفة صعيية ...نايضة العدازة ها لي كيقولك التحار ماشادين حرفة غا تحار ماشي ءهايبية الذهايبية هاذوك لي ضاربين تمارة تيصنعو الذهب ....
يحيى (نزل يديه على يد نسبم بعفوية حيداتها من تحت يديه و ناضت من حداه تتعاون حلا و حميدة حتى هو حمع يديه عندو مزير على فكو ) و اعمي التجار حاجة و صحااب الصنعة حاحة هادشي معروف ..غا هو كلها و رزقو ....
عبد الله ( راسو يابس ) و لااا...علاه التحارة ساهلة....كي التجارة بالذهب كي الحديد نتا تاجر طموبيلات و قولي واش التجارة ساهلة ؟!
يحيى ( ضحك تيهز فراسو ) اسيدي مانزيدش معاك ...مالنا حمق نزيد مع ريفي فالهدرة !
عبد الله ( ضحك ضحكة ثقيلة ) وقيلة ناسي باك دمو رييفي....راك حتى نتا هاز العناد ديالنا غا ناكر ....
حميدة ( مع حلا فالكوزينة ) مالك على هاد التغوبيشة ؟
حلا ( تتدور فعينيها ) تخاصمت مع أسامة اماما....اذا قلت ليك بديت كنتصدم فيه....تخايلي كيدير معايا شي تصرفات ماحملتهمش.و صابرة غي بلا ماتقولو فالاخر قلبات على السيد بلا سبة ...
حميدة ( بخوف ) شنو كاين...
حلا ( تترمش ) غدا و نقولك ..غي باش نعلمك انا مستحيل نزيد نصبر عليه كثر من هكا ...و هاد المرة مازدت فيه ماوالو ....!!
حميدة ( بخوف ) وغي الله يستر معاك....!! ابنتي ....اذا ماقتلتي خوك بالاعصاب ماتهنايش....
دخل كل واحد لبيتو...! و نسيم كون ماحميدة كون سلتات تنعس مع حلا ...!! دخلات لبيتها لقات يحيى ناعس داير يديه على عينيه رجل طاويها و رجل مطلوقة....الولاد ناعسين فالكونا ديالهم محهزة من طرف حميدة...!
دخلات بدلات عليها و طرفات حالتها و تكات ناعسة عاطية بالظهر النعاس طاير من عليها...بحال الغريب ماشي راجلها والدة معاه حوج ...بعض المرات تتحسو باغي يهدر وينسى لي داز ..تيدير خطوة و تيطمعها حتى تتفرح و تيرجع باللور و يمحي البسمة من على شفايفها....!! تتحسو تيدير محاولة و تيرجع للور دغيا .... مسحات دموعها تتبكي بالحس ...!! شعرها محموع حداها و الدموع فعينيها مفزكين المخدة ...!! زيرات على عينيها ملي حساتوو بيديه دارو على كرشها ببطىء خاشي نيفو فعنقها تيبوس ناطق من صوتو عرفاتو شنو باغي ...
_ علاش كتبكي....
نسيم ( غمضات عينيها ليه باستسلام ) : مكنبكيش ...
يحيى : علاش ماجاوبتيش على تليفونك البارح ....
نسيم ( حيدات شعرها من على وجهها مستقبلة قبلاتو و لمساتو ) حيت الولاد كانو نعسو ...علاش غننجاوب ..! كنتي تخسر ميساح واحد تقولي جيتي للمغرب ماشي نعرف من صفوان ....!
انقطع الكلام و كان لي كان ...!! كيف كل مرة استسلمات ليه و فداخلها راحة مايعرف تفسيرها حد غيرها....رتاحت من الشك لي كان عندها ولو نسبيا ...ماشي مكلخة او ماتتفهمش حتى ماتعرفش راجلها واش عندو بديل اخر...ساهل المراة تعرف.... عايقة و فاهمة و من النتيجة فرحات ولو بعض المرات تيدخل ليها الشك....لكن هاد المرة رتاحت ...!
فاق أمير تيبكي بالنص د اليل ...رمات عليها البينوار و شعلات ظوء خفيف ...يحيى ناعس على كرشو ماكاينش هنا عيااان بالسفر و الطريق ....طرفات حالتها من العرق ليفرزو جسمها بعد العلاقة و عطاتو يرضع حتى رجع ينعس و دخلات دوشات و تكات ناعسة فايقة مع بونبر تتوجد الفطور مع حميدة...!!
و الغريب حلا فاقت معاهم صابحة خاسرة حاضية نسيم بنص عين...تتشوف عنقها و رقبتها و شعرها ...حاضية اي علامة...! زمات شفايفها خاسرة و صبحات تتفطر ساكتة جامعة فمها...مرة تفكر فختها مرة فحريرتها مع أسامة...!! طلع ليها فراسها باغية تصدرو ...عيات تصبر و تلاقي الخيوط ...تزوحات بيه و لي عطا الله عطاه كانت مترددة فالاول لكن دابا لا...اش فيها اذا طلقات قبل العرس...مخيرة كاااع حد مادارها فالعائلة ديرها هي اش فيها....!!
خرجات لخدمتها بكري مافيها ماتزيد تفقص مع نسيم ...شحال ماهزات العين فدار لالة عيشة و شحال ماحات عينيها عليها...مابقات تتديها فيها ولا ترمي العين لناحيتها .. ...! اما واحد عبد الصمد الهدرة عليه تيجبدوها دايما ماعرفات غا ضد فيها ولا كاع صدف هادي و عبد الصمد غرس خيوطو في حياتها بلا ماتحس....!!
يتبع...
التنقل بين الأجزاء