غيرك ما يحلالي الجزء الثاني

خلود بقات فيها....: ريح راسك احلا عملتيها بيديك...

حلا ناضت جالسة تتغوت : و جبليييييي مغنديييهشييي ....انااا ماشي برغوتة صغيييرة يتحكمو فيا ...و عندي ستة و عشريييين عام اعيبااد الله ...

حميدة قربات منها تتسكتها بقلق : سكت احلا سكت ...خاك كيستناك غي تفيق حلفان فيك....جمع حلوقك عيييت معاكم ...

قفزو ملي سمعو رضا داخل تيغوت : فااااقت ....

حلا تكمشات ورى مها تتغوت : قوووولو يبعد مني ....پابا و ماضربنيشييي ...عععع بعد منييي....

جرها رضا من شعرها و حميدة تتفارق ...جمع مع حلا بطرشة حتى غمضات عينيها مقصحة.....و حميدة فوسطهم...تتبكي...

_رضا نعل الشيطان اولدي....رضاااا....

حلا زعزاتهت ديك الطرشة بقات تتشد عينبها و تفتحها....و هو كيزعزر فيها و يسب....!! عطاها تصرفيق. اخرى حتى حمر ليها وجهها .....! تما طاحت حميدة تتبكي و ترغب...

_ رضاا ...ها السخط هاالرضى ...والله حتا نسخط عليك و تعاود تمد يديك عليها....

رضا شاف فيها محمر عينيه : خلييييني نربيبها...

حميدة خبات حلا في حضنها تتغوت على رضا : حتى تولدا نتينا و ربييها....عطي لبنتي التيساااع....خلي ختك ...غتخرجو علياااا....

خرجاتو خلود من تما بزز...مخنزر و كيسووط ....!! و حلا مرخية فحضن حميدة....تتنهج و تكمش فمها بحقد و عينيها عامرين دموع....طلقاتهم سخااان من عينيها ...تتبكي حتى كيتهازو كتافها.....!! و حميدة تتبكي معاها....

_ كنقوليك عمل عقلك ...كنبهك احلا ...و هانتينا باك لي مفششك شوفة مابقى يديرا فيك و خاك بالو غي يقتلك.....( تنهدات من قلبها ) الله يزرقنا الصبر و يهديكم.....

حلا عينيها حمرييين تيخللعو : مغنزوجشي بيه اماما....

حميدة تنهدات من قلبها : و باك هدر و سالى ...نتينا لي درتيها لراسك ...و شعندو الولد مسرار و غزال و خدام خدمة د الحلال ...

حلا الدموع سيقو وجهها تتبكي مقهورة : الراجل لي بغيتو من قلبي حلفتو عليا مانتزوج بيه و دابا كتلصقو فيا الجبلي دالخلا....

حميدة : قلبي مارتاحلوشي احلا و باك مابغاشي تزوج بنصراني...

حلا بصوت باكي : و علاااش خلود تزوجات نصرانيي ماقلتلو والو.....كتعرفو غي حلا تحكمو فيها....

حميدة بضيق : عييب احلا ...راجل ختك سلم ...هذاك الزمر كان نصراني و بقى نصراني ...مابغاشي يسلم....و باك حلف ماتزوجو.....و نتينا كنتي عاد بريهيشة صغيرة عندك 16 عام و بغيتي نسخى بيك لنصراني....كنتي بلا عقل و نتبعوك....

خلود كدوز يديها على راسها بحزن : السيد دابا تزوج و دار ولادو ...و نتينا باقا كتجبدو ...

نسيم غلباتها الضحكة : شفت تصاورديالو بقيت غي كنشوف فين كان عقلك ملي تزعطتي فيه.....

حلا ضحكات وسط دموعها : مانعرف فين كان.....ترمتو كانت كبر من ديالي....

باها قالب عليها وجهو ...و ؤضا كيشوف فيها بغضب...! وهي جالسة وسط مها و خواتاتها....تتاكل و ساكتة....! تعجبو من سكوتها لي ماكانو ضاربين ليه حساب....! تيجبدو ليها الزواج مكتغوت ماكتقول جملتها المعتادة " كتحلمو والله لا تزوجت بيه ..."

بالعكس صبحات هادية كدور فدوك العييون عرااض و مجبدين سبحان لي خلقهم....!

الاب فطر و ناض مع ولدو خارجين....! ...و كلها ناض لشغلو ....!

ناضت حميدة مع خلود تيجمعو ...مستغربين...

_ ساكتة على شي مصييببة ...

خلود تتضحك : شوف غي عينا كي كيغلييو ...والله حتى فراسها شي بلان....

حميدة تنهدات بهم و شافت فخلود : فين وصل راجلك ؟

خلود : فطنجة مع شي معارف عندو تما ...عاد غيجيو لهنا....حقا دويتي مع ماماه د إياد ؟

حميدة تتهز راسها مقندشة : لا لا ماندوي معاها و ماعندي الوجه ...براسها هي و باها......

خلود : حتى يجي بابا و سولو ..

حميدة بالها مع كلام حلا : خوفي غي تكون الكارثة باقي بالا مع داك النصراني...

خلود ضحكات بصوت عالي : اذن ماكتعرفي والو فحلا.....هذاك دابا والله ماتشوف فيه....هو إياد و تبارك الله مسرار و كرهاتو ...عاد ملي داك النصراني تزوج....و زيدون كانت مزااال صغييرة و عقلللها صغيير و طايشششة و كان اول واحد فتحات عينا عليه ...غا طيش المراهقة....!

حميدة طلات على حلا من باب الكوزينة : شوف كيف جالسة كي الدرويششة ...نحلف عليها حتى ساكتة على كارثة.....

وقت الغذاء....!

تجمعو العائلة في دار عبد الله....كيتغداو محموعين....؛ كلشي توسوس من سكات حلا جاهم غريب....!

تغداو و سالاو و ناض عبد الله يغسل يديه كيدوي مع حميدة بالهمس ..

_ شعندا هاذيك ساكتة....

حميدة تتسوط : غوتاات عندكم مغاها مشكل ...سكتات مشكل....خليوها اعبد الله ...

عبد الله مقصح منها : كانت معزتها بوحدها و خسراتها ....( سكت مبدل الموضوع ) دويت مع ولد الحاج مفضل و قلتلو يجيو نتفاهمو ...

حميدة بحزن : ماعطانيش خاطري نزوج بنتي بزز منا ...

عبد الله قصح الشوفة فيها : حمييييدة.....!

خرجات حميدة تتسوط ...جلسات قدام عمة حلا ...كتشكي : شفتي اختي شفتي ديك البنت فاين وصلاتنا....

العمة تنهدات : حلا صعييبة الصبر و صافي...( شافت حلا خارجة من بيتها و نادات ليها ) حلا...اجي الغزالة ديالي اجي...

حلا جات لعندها داخلة مع باب الصالة كتعوج ...مبسمة...: عمتييي..

العمة كطبطب عليها : الحلاوة دياليييي....كتزيد غي تزيااان ....

جات خلود كتجري لعندهم هاتفة بهمس : ماما مرات الحاج المفضل جاات...

لالة حميدة ناضت واقفة : نوووض نوض عطر عطر الصاااالة ...الجبالة مايدييو عييبناااا...

عطرت الصالة و رحبو بها ...ابدا ماشي مستغربين من مجيتها حيت الهدرة بدات توصل...

جلسوها فالصالة و تجمعو كاملين ...حاطين الضياافة مكبرين بيها وهي منغووزة غي بوحدها ....كتشوف الفراش ليتبدل ....!

مرات الحاج : شحال ماتجمعنا الالة حميدة زمااااان ....

حميدة : اييه هاحنا فهاد الدنيا ...كنعيشو ليمكتب الله علينا....

مرات الحاج شافت فحلا و تبسمات معاها : كيف عاملة ابنتي لباس بخيير...

حلا كتجاوب مبسمة : يسول فيك الخير اخالتي...

خلود و حميدة كيشوفو و يدورو فعينيهم.....!!

مرات الحاج فمها كياكلها : من عذرو ولدي شافك و بغاك مشاء الله عليك ...كتعرف ولدي جلال ياك ؟

حلا بنظرة الافعى : كنعرفو ؟ علاش...

مرات الحاج هزات تليفونها تتوريها صورتو ضاحكة : اواعدي على علاش...قرب ابنتي تشوفو و عطيني نمرة ديالك نعطيهالو ...نتوما دهاذ الوقت عارفين لي كاين...بلا ماتحشم ...

حلا علات حجبانها حتى للسماء تتشوف فمها بنص عين : اويييلي اخالتي انا مخطوووبة....

حميدة خرجات عيينيها : حلاااا...

مرات الحاج عقدات دوك الحجبان : و قالو لي مابقيتيشي مخطووبة ...و الواليد ديالك هدر مع الحااج ...كيفاش عاود كتلعبو بينا...

تدخلت العمة تتضحك ضحكة صفراء : و كانت مخطووبة مابقاااتشييي...

حلا شافت فعمتها بنص عين : اعمتي لا يجوز خطبة مسلم على اخيه واش نتوما مكتقراوشي شوية ...هادشي فساااد اسمو.....انا صدمتوني....

حميدة صفارت بقات غي كتشوف مافهمات والو ....!

مرات الحاج ناضت واقفة زامة دوك الشفايف : لالة حميدة تقيلو على خير اختي....نتلاقاو في ساعة د الخير ...

خرجات من تما ماعاجبها حال ...و لالة حميدة و العمة تيودعوها محشميين ....حتى خرجات و نقزات حميدة لحلا جاراها من ودنييها وهي تتغوت...: ياك قلتي تفارقتو ..حلا واش باغية تشوهنا...

حلا تتأوه مقصحة : و ماما ...مالنا كنا مصاحبين غي اجي و تفارق راه كنا مخطوووبين و الفاتحة تقرات و دواو على الصداق....و ملي قلت نتفارفو ...راه بابا مادوا مع باباه ماتفاهم معاه.....و نتي مادويتي مع مو...اولا ؟

العمة تتشوف مافاهمة والو : فين الذهب لي عطاك..و الخاتم ؟رجعتيه ؟

حلا عوحات فمها مطاكية بيديها شبعات ضرب هاد الايام...

_ لاااا...اصلا حنا غي مخاصمين ماشي مفارقيين........هادشيي حرااام هادشييي...والله حتى حرااام......باش نتزوج انا بداك المسرول د جلال خص حتى يقولا لإياد و يبغي إياد عاد يقدر يخطبني.....( كملات تترمش و دور عينيها ) لايجوز خطبة المسلم على اخيه .....فين عاشيين نتوما ...متبعين داك الجاهل د رضا....

تتشوف فيهم كي ساكتين مصدومين وجههم

صفراء...عباات و قنطات من السكات و ملاااات....شافت فمها تترمش و تدروش عليها : عطيني تليفونييي....

حميدة مخنزرة فيها : لا ...نسى عليك التلييفون....

حلا معلية حاجبها : و بغيت نهدر مع خطيبببي ....

حميدة تتضرب حنكها : دابا على ولى خطيببك....ايما غدايدي يايما....خطيببك قلتي مابغيتيهش ...قلتي وااله لا تزوجتي بيه و لا بقيتي معاه....و مصاحبة مع شحال من واحد من وراه .....

حلا كتشطح رموشها : و علم االه شخال من وحدة عندو حتى هو ...حساب ليك عندو غي حلا و كيعرف غي حلا ..تجبرو كيودع الصاحبة ديالو حيت مو قالت ليه تزوج بحلا و نسى عليك هاذيك مابغيتاليكشي...( كدور عينيها كي المشة ) و غي شافني مزوينة هكا قال انا مرضي الوالديين نسمع كلام ماما....

حميدو كتضحك مفقوصة : لاحولا ولاقوة الا بالله الله يهديك هادشي لي غنقول....

حلا : و دابا عطيني التليفون اماما ...

حميدة برفض : لا باك مايبغيشي...

حلا تتحاول ماتعصبش : و ماميييتا مايعرفش غا عطيني و ملي يجي نرجعو ليك....

خلود : عطيها اماما ...مالكم كتعاملو معاها بحال سي برهوشة ...باقي ليها اربع سنين و تدخل للثلاتين و باقيين كديرو ليها بحال المراهقة.....

العمة تتنهد : عطيها احميدة عطيها ...

ناضت حميدة تتسوط و تنهد....عطاتها التليفون و رفعات صبعها بتحذير : قبل مايجي باك نجبرو فالماااريو ...

حلا هزات تلبفونها مغوبشة : الحمار هرسو ...يعطيه هرسة لديك اليديين.....

حميدة : وحمد الله ماهرسكش نتينا....

دخلات حلا للواتسااب تتفقد الاحوال....لقاااات كااع النوامر ممسوحيين غير إياد وبنات عائلتها ...! حتى من كاغط سييم محييدة ..... دعات فرضا حتى شبعااات ....

شعلات الويفي و سافرات فعالمها الافتراضي ...قبل مايجي باباها و رضا....!!

لحضة صمت و تسمعات شهقة خافتة من حلا ...لي مخرجة عينيها فالتليفون تتدوي بصدمة...

_ الحزاق د إياد مبلووووكيني....

خلود قربات نتها تتضحك : بسم الله عليك...

حلا تترمش مامصدقاش : بلووووكااااانيي....

عبد الله عقد حجبانو و نطق بضيق : مالها مزروبة !

حميدة بغضب : و شوووف نتينا شنو قلتي للراجل.....جات مراتو لعندنا ماجبرت فاين نعدل وجهي....كانت غي هدرة....و خرجات لنا حلا بهدرة اخرى .....انا مخرجة راسي من هادشي نتا و بنتك شوفو شنو كتصنعو....!

عبد الله تنهد و جلس شاد راسو جاتو الشقيقة اما رضا تيغزز في سنانو على حلا معصب : واش كتفلا علينا الكلبة ؟

حميدة حمرات فيه عنيها : رضااااا مابقيتي كتحتارم حد ...اخر مرة ...تقول على ختك كلبة و تسبها قدامي.....والله حتى نغضب عليك....

رضا سكت تيبركم بينو بين نفسو ...

عبد الله هز راسو فيها : عيط لحلا ...

حميدة بقلق : عبد الله البنت ماشي صغييرة عندك تمد يدك عليها....

عبد الله بغضب : عيييط لحلاااا احميبيدة....

ناصت حميدة تتسوط و تنذب ...نادات احلا و طلعو للطبقة الثالثة ..فين جالسين....شاف فيها عبد الله و نطق مخنزر

_ واش باغية إياد و لالاء....؟

حلا بلعات ريقها كدور عينيها : بابا....

عبد الله بالغوااات : حلاااا...

حلا شافت فمها بنص عين تتغمزها تدوي ...رجعات شافت فرضا لي مخنزر فيها ماكره يغزز فيها سنانو ....حنات راسها و نطقات بزز منها...

_ مابغيتش ولد الحاج....

عبد الله بصرامة : هدرتي مع إياد قلتي لو شي حاجة ؟

حلا بكذب : لااا....

عبد الله شد راسو معصب : مشااااكيييل...( رفع راسو فيها مخنزر ) غبر. احلا من قدام وجهي غببر ...

ماعاوداتس معاه الهدرة طاارت هابطة تتجري فالدروج ...دخلات لييت خلود و نطقات تتضرب حنكها....

_ و ماااابغيييت لا جلال لا إياااد و فكوووني اعباااد الله....مالهم لاصقيين فيا كاينة غي حلا ...

الفوق حميدة تتدوي بقلق ...

_ و علااش سبقتي هدرتي مع الحاج و حنا باقي مافكينا اابنت...

رضا نطق مخنزر : وبنتك لي كتخروض علينا...

عبد الله بعصببة : ماعطييت الكلمة للحاج ...قلت هدرة وحدة ..نتلاقاو و نتجمعو و نتفاهمو....نكونو فكيينا حلا من إياد ..ماكنت حاسب مراتو غتجي لهنا من دابااا...

حميدة : و دابا صافي زوجوها لاياد و طلب السماحة من الحاج....تحاشمنا مع الناااس ..

عبد الله ترون مابغى فاهم والو ...تنهد و استغفر الاه و نطق

_اري احميدة داك التلييفون...

ناضت مداتو ليه و سكتو كيشوفو مدوز اتصال لايااد....لي عيييا يصووني يصوووني ...عاد رد علييه بصوت خشن..

_ آلو ..

عبد الله محشم : الو السلام عليكم....ولدي إياد ...

إياد باحترام : عمي عبد الله لباس شوية ...

عبد الله : الحمد الله على كل حال....عيطت نقوليك اولدي جيب والديك اليلة عارضينكم للعشاء اذا بقينا فالحياة.....

تنحنح إياد و بدا كيدخل و يخرج فالهدرة حتى خرجها بصريح العبارة ...

_ انا و حلا ساليينا كلشي اعمي....الله يكتب ليها ماحسن...

عبد الله تصمر الهدرة وحلات ليه ...بقى غي كيتمتم : الشيطااان لازم علينا نلعنوه ما نتبعوه اولدي...

إياد بجدية : عمي عبد الله بنتك مابقيتش باغييها ..و السلام عليكم ....

حط عبد الله التليفون عينيه حمراء عاقد حجباانو ملتزم الصمت...

رضا ( مغوبش ) : شنو قال ...

عبد الله ( الصمت ) ....

حميدة بقلق : عبد الله اشنو قال ....

عبد الله ظل سااكت ...شاد راسو و حاجبو مطللع....! بقى هكاك جهد نص ساااعة تيخمم و يفكر ......

حتى على رااسو باين فيه التعب و نطق بصوت عااالي : حلاااااااا

طلعات حلا تتجري لعندهم...تترمش تقول ملاك

_ بابا.....

عبد الله عاقد حجبامو حتى قربو يتلاقاو ..ناطق باختصار ..

_ إياااد مابقى ليه عليك حكام و لا شواار .....ومن ولد الحاج المفضل ماغتفكي....

حلا خرجااات عينييها مصعوقة : كيفااااش....

عبد الله بصرامة : حميييدة جمعي ذهب السيد ....

جالسة تتسوط ...شعرهت القصير مطلووق حد.كتافها ...معوجة فمها ..تتقلى مارضااتش تتردد مفقوصة ....

_ شوطني ...شوطني.....

خلود غلباتها الضحكة : اويلي مالك كي المصدووومة.....

حلا شادة حنكهت تترمش : الحزاق كركبني ....

انفجرت نسييم ضاااحكة ...: عبر عليييك....

خلود حبسات ضحكتها : و بابا دوا وكمل ...من ولد الحاج المفضل ماغتفكي ....

حلا خنزرات فيهم ناااطقة بغضضب : كتعررفو حلا و لا غي كتسمعو بيها.......والله لا دييتو ....

______

بعد اربع ايام...

داخل المحل....

سي عبد الله واقف قدام المتعلم ديالو كيوريه و يعلمو ...مخشع معاه....و الكليان داخلين خارحين لي ماشرا تيشوف و يخضر عنيه و يسول على الاثمنة وويخرج....!

سمع ضوت الحاج المفضل داخل بديك الكريشة تتبوطر : سي عبد الله ...هاواحد السلام عليكم...

عبد الله شافو تبسم : كي بقيتي الحاج شوية...سمعناك كريض....

الحاج كيتلف : ااه وييه كنت مريض واحد شويش الحمد الله هاد الساعة....

عبد الله رحب بيه يجلس ...: جلس ريح...

الحاج برفض : لا لا اا انا خارج دابا...

عبد الله بحرج : مهم الحاج ...حلا مابقات مخطوبة و لا مربوطة....كانت هدرة مع الولد لي كان خاطبا و ماتفاهموشي و تفارقو .... و دابا نقول مرحبا بيكم و بولدك جلال فأي وقت .....

الحاج تنحنح كيدور عنيه على الذهب : العايل ديالي جلاال خطباتلو المراة بنت عمو نجية اسي عبد الله.......قالت عندكم العايلة مخطوبة ماعندكم بنت الزواج....جات من عندكم مريضة و حتى جلال تعصب ....

عبد الله بلع ريقو و فرنس بزز منو : و اذا على هكا ... الله يكمل عليه بالخير الحاح.....و علييه كلشي مع المكتااب .....

تيضحكو و يعااودو شادييين على كرششهم...تيشوفو فحلا لي واقفة فوسطهم تتسوط مخننزرة.....

_ ايما كرشييي خصهم يدخلو للتاريخ رفضو حلا بنت الريفي....دقة وحدة....

نسييم تتمسح الدموع من عينبها لكن غي تتشوف سكل حلا تتبغي تموت بالضحك....

_شوف وجهها ...

خلود قربات منها تتحبس ضحتكها : دابا مالك معصبة ياك بغيتي تهنى منهم...

نسيم : بغات هي تهنى منهم ماشي تجي من عندهم ...

حلا حجبانها قراب يطلو على ااسماء تتدوي مغوبشة : شي حاجة كااينة.....كاملين تقلبو عليا دقة وحدة.....دارو لي السحووور....

دخلات لعندهم حميدة تتنهد ....: باك معصب مارضاشي و نتينا عارفة النفس لي فيه كيف عاملة....

حلا قلبها نغزها على باها خسراتها معاه....ولكن تترجع تقول ماشي هي لي قالت ليه زوجها ....لا إياد و لا ولد الحاج ...! إياد مها لي بززات عليها و رغباتها تقبل ...و ولد الحاج اصلا كانت مجبوورة عليه....!!

خرجاات من بيتها كدور دوك العينين....طلات بنص عين لبيت باها ...لقاتو جالس شاد راسو جاتو الشقيقة....دقات فالباب و نطقات تتمسكن...

_ بابا....

هز راسو فيه و رجع حناه : حلا غبر من قدامي...

حلا بعناد دخلات لعندو جالسة حداه ...حنات باست ليه يديه تتدوي بصوت حنين ...

_ سمحي ليا ابابا ...عارفك معصب مني و بزاف ...

بعد يديه عاقد حجبانو : خرج فحالك احلا....

حلا (عينيها حمرين ) : كون كان رضا كون سمحتي ليه ..حيت العزري ديالك و انا تقلب عليا وجهك....

عبد الله مقصح : قلب عليا احلا ....

خرجات من اابيت منغوزة ...ماكيعجبهاش تخسرها مع باباها.....!

شافتها حميدة و نطقات بحسرة : وحمد الله ملي باك قلبو حنين عليكم واحد اخر كان يقتلك ...والله و كان بحال باباك بحال جدك والله يابنتي حتى تكوني مقتولة دابا ....و انا غارفاهم كيف عاملين....جاب الله باك مكيشبه ليهم....

دخلات لبيتها و شدات الركنة....ساكتة طايح عليها الضيم....!!! دوزات نهارها كلو تما......! حتى جات خالتها و بناتها ...ماخرجات تجلس معاهم غي بزز...!!

و كثر ملي تجمعات معاهم جارتهم لالة فطييمة ...هازة خببيرااات سخااان....كيدوزو بيها كويس اتااي بالعمارة الهمااوية لي سكنو مواليها....

لالة فطييمة : اوا الله يجعلهم خيير جورة لالة حميدة....

حميدة رمات عينيها لعفوية ناحية السرجم تتشوف فالعمارة : و على الله ...مامولفينشي هكا السرجم قدام السرجم ...و على الله يكونو مزياانين و صافي....

فطيمة : حليمة مراة الاستاذ البارح دخلات لعندهم...كدير معاهم اامعرفة ..و نتينا كتعرفا تبارك الله حلاوة اللسان لي فيها ....

حميدو بفضول : اوى و كيف عامليين...انا ماحسابليش سكنو .. كنا ملهيين بالمشاكل ...

فطيمة هزات حاجبها : صدقو من الكتامة....الدار من السفلي للفوقي هيداك كاملة كتبا ليماه....واحد الكتاامية ياختي حميدة قاصحة من الشوفة.....عندا ثلاثة د عريساات ولادا كاملين مزوجاهم من غير الكبير .....

حلا غي سمعات كتامة خسرات ملامح وجهها : من كتامة الجهلاء عايشين غي بالحشيش و باقيين كيشطحو بالدم فالسروال....

حميدة تتغمزها تسكت ...قشعاتها لالة فطيمة و ضحكات : خلييها احميدة مالي غنوصل الهدرة .....

_____

جالسة كي الملكة ...! يد فوق يد الحناء و الذهوبات كيرنو فور ماتهز يديها....مغطسة بالذهب....! الشوفة قااصحة و الحجبان غي معقووديين....! تتشوف فعروستها لي جاية هازة صنية تتقدمها للضيااف ...نطقات بنبرة قاصحة ..

_ فاينو الفقاااااص....

صفاء تتشوف فيها نص شوفة تتخاف منها : نسيتو اخالتي عيشة انا نجيبو ...

عيشة طمرات و سكتات و رجعات تتكمل الهدرة مع ضياافها....!

لالة عيششة كتااامية حررة ...قاصحة و ماااكرة ...بنادم كتحركو بصباع يدييها الصغير ...!

عريساتها كاملين دوزاتهم من العافية حتى سرحاااتهم....كانو قباااح و كل وحدة باغية تصنع من جهة....و مع من جااو مع عيشة الكتاامية.....! القافزة د عريساتها و حنااات الراس قدامها تتقول ليها لالة لالة ......و لي طلبات عيشة الكتامية يتنفد ....!!

عريساتها جالسين فالكوزينة ...القافزة ديالهم سكينة....واحد الزعراء و السم باين فيها ..

_ بغيتلا تموت و نتهنى منها....

العروسة الكبيرة تتذوق الكيكة لاتصدق خاسرة المذاق : من نهار تزوجت و انا كنقول دابا يجي لي يقد عليها...دابا يتزوج حميد بشي عفريتة توغل ليها فالحلق...ساعة صفاء ماقضات بوالو ....و تزوج ابراهييم و حاب عروستو كنا كنسمعو عليها حاارة و شاونية مقطررة ...ساعة حطاتها يمة عيشة تحت رجليها....

عروسة ابراهيم مارضاتش : ماطفرتيه حتى نتينا عاد نطفرو أنا.....صحتها كثر من دياالي تنفخ عليا نموت ......

صفاء تتنهد : و الصبر و صافي و كثر دابا ملي الصمدي عطاها هاد العمارة ابراهيم و حميد مايقدرو يقولو والو معاها وخا ظلمك سكت و دوز معاها كويس اتاي ......

سكينة : الصمدي لي كانت سخطات عليه دابا خدا الرضى ديالا بالذهب و الديور و كيدير لي قالتلو ..حتى لو تزوج مراتو غتحكما عيشة ...

قفزو بثلاثة ملي سمعو صوتها القاصح تيركب فيهم الرعب....! خرحو الضيافة داكشي متول و نقي و زوييين.....!!

صبحات الشميسة ...! الشتاءتوقفااات و الجو سخن شوية....! مابقاش البرد لي كان....!

واقفة حلا فالكوزينة شادة داك الشعر معلية حاجبها مخشعة مع العجينة دالرغايف تتحاول تطلقها...و السرجم مفتوح فيها داخل ريح تيحرك القصة من على وجهها....!

علات عينيها ناحية العمارة قدامها ...قشعات عيشة تتشوف فيها ...شوفة قاصحة ...!

غوبشات فيها حلا و تمتمات : صبحاتو لله...

هزات عينبها فيها مرة اخرى لقاتها مزال تتطل حاضية عليها بنيتها....تقول واش حيدات عينيها...!تتطول عنقها باغية تنقز حتى تشوف مزياان...

ضيقات حلا عينيها فيها وطيحات الريدو بالزعفة ...: ناقصيني غي الكتاميين نصبح على وجههم....

ظلات تتعجن و تلوي فديك الرغيفة...مغوبشة ماراشقاش ليها....!

دخلات لعندها حميدة تتدوي معاها بالزعفة : مزال ماكملتي ؟

حلا شافت فيها بنص عين : مزال ...

حميدة معلية حاجب : كيف طرا حتى نزلتي يديك فالعجينة...

حلا : قنطت ..

حميدة : و الله يستر من القنطة ليكتجيك...

حلا كتدروش : انا متأكدة غنمرض بالاكتئاب.....

حميدة خنزرات فيها : الخروج بوحدك ماكاينشي قنطتي ها السطح تمرغ فيه...( رفعات صوتها عاقدة حواجبها الخفاف ) نسيييييييم....نسيييم....

غوبشات تتسوط : فين هاذي عاود....تجي تعلم لي ينفعا حتى وحدة فيكم مكتحمر الوجه.....البهلة مزوجة حتى الرغيفة مكتعرف تعجنها....

حلا تتجبد فديك العجينة و تكمش شفايفها : كنقولكم هاذيك بهلة و عايشة في عالم بوحدو ....تلقاها فالسطح كترسم بديك الرملة كي الحمقة....و لا فالبيت التحت شاعلة الشموع ...

سمعوها جاية كتطقطق بالطالون لابسة كسيوة سخونة طالقة شعرها تتدوي مهدنة : ماما...

حميدة شدات راسها تتولول : يااااربي الصبر والدة غي الحمقة لختها....يااانسيم واش مكتعيااش من داك الزمر فرجليك شققتي لي راسي بالطقطييق ديالو ....

نسيم تبسمات : لا مولفة كيعجبني....

حلا يديها فنصها معوجة قزيبتها العرييضة : خلي ليا صاك ديور لي عاد خديتي المسمومة....

نسيم فتحات يديها مبسمة : حط الف و خمسمية درهم ...نعطيه ليك...

حلا تتشطح رموشها و تتعاود الهدرة المشهورة ديالها : ماعنديش...ماخداماااش و مافجيبي حتى سنتيييم....

خلود تتضحك من وراهم : تيقوها...نحلف عليها حتى جامعة لي ماتخيالوه.......

حميدة على نيتها : وااه لواه منين غتجيب الفلوس مالها خدامة ...

حلا تترمش و تذبل فعويناتها تيحمقو: قوليها ليهم اماما .....

( غسلات يدييها و تمات خارجة تتعوج ) انا طالعة نشم الهواء دسيدي ربي....

حميدة بضيق : طلع النشييير نشر فيدك ...

غوبشات ودخلات لبيت التصبيين هزات النشير و طلعات ماوصلات للسطح حتى قربات تسخف ...!

تتهز قطعة بقطعة و تنشرها ...شعرها مطلوق و القصة مع وجهها ...! عينيها تيتشدو مع الشميسة ....!

الدار عالية وهي كانت اكبر عمارة تما ...حتى جات عمارة عيشة الكتامية و حجبات عليهم منظر البحر لي كان تيبان ليهم....! دورات عينيها ناحية العمارة و قشعات نفس المراة فالسطح....! الذهب الوازن صفر فيديها و السبنية الجبلية ملوية على راسها ....! تتشوف فيها و تحنزر ....!!

قلبات حلا عينيها منها تمتم : قول اعود بربي الفلق....

عيشة واقفة على كرسيي باش تلحق و طل ...جات قصيييرة و عريييضة ...عيات تشوف و تبحصص و تجسس و مكتجي عينيها غي على حلا ...تتركز معاها و مع زيينها و حداكتها....! عجباتها ....

زمات دوك الشفايف المكمشيين و نطقاات بصوت قاااصح ...

_ العاااايلة هيي العايلة....

حلا سمعات الصوت و شافت فيها مكمشة عينيها من الشمس....

_معايااااا ؟

عيشة مضيقة عينيها فيها. : واه معاك معاك ...

حلا قربات لعندها تتعوج و عينيها المرمشين كيبريرو مزنكة بالشمس : اوا اخالتي العايلة سميتها حلا.....

عيشة حجبانها غي معقودين : شارية و لا كارية ...

حلا قشعات الذهب فيديها سبعة من يد الشمال و سبعة فاليمين و خوااتم فيدييها كباار ...السيدة هازة ثروة غي فيديها.....عوجات حلا الوقفة و تكات على الصور فين الورد و المحابق تترد

_ انا مولات الدار ...

عيشة قريبة تنقز من فوق السطح : بنت من نتينا ؟

حلا دارت نص تبسيمة : بنت الدار الكبيرة ...

عيشة قندشات : اصلك ماينو ؟

حلا علات فيها حاجب مبرزطة بالشمس : علاش كتسول اخالتي....

عيشة مولفة بالشمس : و جاااوب بلا فهامة ماكره عندي من البنت المجوابة ....

حلا طلعات حاجبها : المقدم غي فالدورة سوليه

عيشة طولات عنقها ماسمعاتهاش : شنوووو قلتي ...

حلا رمات شعرها لوراها تترمش : قلت ليييك تقيييل على خيير اخالتي ..هبط هبط عندك يدور بيك راسك و طيح ...و حضي من الشميشة .....

عطاتها بالظهر و كملات تنشاارها تترمش و دوز عينيها عليها بنص عين تتلقاها مزال واقفة تتشوف فيها شوفات ثابتيين بحال تتقنص عليها....!حتى كملات و هبطات حلا تتمتم و دندن مع راسها

_الدار قدام الدار..... و التاقة قدام التاقة ..و القلوب تواقة و ياعيباد الله ماحلى القلوب كي تلاقى... لحبيبي راني مشتاقة.....

لبسات لالة حميدة جلابتها و حجابها ...متولة حتى فلباسها....!

رمات الشوفة فحلا و نطقات : غادة لمرجان مع خلود ...نجي نلقاك واجدة نمشيو عند الجيران....

حلا جالسة قدام التلفازة تتاكل فالفريز مبردة مع راسها ..

_الجيران شفتهم و شافوني....

حميدة عقدات حواجبها : فين شفتيهم ؟

حلا هزات كتافها : فالسطح ...

حميدة بتنبيه : حلااا رد بالك ...الدار باين فيها العزارا ...يشوف رضا شي حاجة غي صغيرة والله حتى يشد السرجم د البيت ديالك ...

حلا ببرود : هانا جالسة مرتاحة مكنأدي حد هوما كيجبدوني....

حميدة هزات راسها بلاحولا ولاقوة الا بالله و خرجات ..ركبات فطنوبيل خلود و زادو لمرجان......!! خلود مهلية فيها و حتى لالة حميدة فرحانة بيها و تتعزها...هي الكبيرة و القريبة ليها...ماكاين لي خرج عليها قد حلا و رضا......حتى نسيم كانت كطيير لكن غي تزوجات تهدااات....

بعد العصر ...!

خرجات حلا مع حميدة بزز منها ...تلاقاو مع جارتهم فطيمة...و زادو لعند جيرانهم الجداد ...! محملين بالحلاوي د الرفيع و السكر و الفقاص....!

و حلا تتبركم حداها...

_ علاش هادشي غنمشيو نخطبو ولا !

حميدة شافت فيها و نطقات بين سنانها : فمك شدو ...حلي لسانك مع الناس يالكارثة....عندك تزهق ليك شي هدرة على الكتاميبن قدامها نشويك يابنتي نشويك....ماتبقايش تعوجي و اذا عطاوك تشرب اتاي شىرب و سكت ماتقولشي مكنشربشي اتاي....

حلا بنص عين : و انا مكنشربشي اتاي نبلعو بزز و لا ؟

حميدة غوبشات فيها و دارفيها شوفة تتهددها بيها....!

صونات لالة فطيمة فالباب ..! بقاات شوية و تحلات الباب اتوماتيك....

هبطات تتستقبلهم عروسة لالة عيشة الكبيرة ...لابسة بيحامة مستورة و فولارها تتبسم ....

_ مرحبا بيكم....

حميدة تتجاوب و حلا عينيها خدامين : ترحب بيك الجنة ابنتي...

طلعاتهم لطبقة الثانية ....! طالعين وراها تيدورو فعينيهم ساكتين......!جلساتهم فالصالة واسسسعة و كبيرة تقول صالة افراح.....!

الفراش باين غالي لكن الذوق مكاينش ...!

عوجات حلا فمها و تمتمات تتعيب

_ اويلي شنو هاذ الذوق....

نغزاتها حميدة و دارت ضحكة صفراء تتسلم على بنات عيشة ...و عريسااتها....! عاد خرجات لالة عيشة....صوت ذهوباتها سابقها...

_ مرحباااا الشرفة ....

حميدة مبتسمة تتستقبل سلامها : الله يبارك فيك اختي ...كيف عاملين الصحة مزيانة و الوليدات....

عيشة قشعات حلا و ترخات ...: مم يسقسي فيك الخير الحبيبة ...

لالة فطيمة : مرحبا بيكم فالحومة الله يجعلها خير جورة الالة عيشة ...

عيشة هزات راسها : اميين اميين

شافت فحلا لي ساكتة و نطقات مضيقة عينيها : هلااا هاااذي....

حلا تبسمات معاها تبسيمة صفراء : حلاااا ماشي هلاا...

عيشة مضيقة عينيها : مم حلاااا ...

العريسات تيشوفو فبعضهم و يوشوشو....: حلا و شمن حلا ...يمة عيشة خزناتها عندها......

صفاء بهمس : كتحمق ...

سكينة بغيرة : عندا العينين د القطوط....

صفاء : باينة فيها درويشة....

حلا شافت فيهم بنص عين طلعاتهم و هبطاتهم ....ضحكو معاها و ردات عليهم بضحيكة صفراء....!

حطو ليهم الضيافة و عمرو الطبلة ...! العريسات تيجيبو و يحطو و عيشة تتسيرهم غي بعينيها تتقول ليهم شنو يحطو و شنو لا ...! و ترجع تشوف في حلا ...

_ شرب اهلا اتاي ...

حلا تتشطح رموشها : حلااا اخالتي....مكنشربشي اتاي ...ربي يخليك و يكثر خيرك

حميدة تتشوف فحلا و تضحك بزز منها : واه والو ماعنداشي مع اتاي...

عيشة عينيها على شعر حلا القصير ...هزات حاجب و ردات : و القهوة كتشربا ؟

حلا تتشوف فحميدة بنص عين : لا ...

حمييدة راسها سخن ...ظلات غي تتفرنس و يديها كياكلوها على حلا....حتى عيشة رفعات داك الحاجب و دارت يد على يد ناطقة...

_ فيك فقر الدم ؟

حلا ردات شعرها ورى ودنيها حتى حركات عيون عيشة للحلقات ذهبية فودنيها و الخوااتم لي فصعابها...عندها خاتم فالسبابة و خاتم و الابهام ...كلهم مذهبيين ! قشعات شوفاتها و فرنسات ...

_ لا غي مكنشربوشي و صافي....

عيشة شافت فعروستها سكينة و نطقات بنبرة قاصحة : نزلا العصير.....

سكينة ناضت بالزربة وقفاتها حلا

_ اواعدي لا بلا ماتعذب راسك ....

سكينة تتبسم بزز منها : لا ازين ديالي غي قولي شنو كتشرب عصير اللتيش و لا الفريسة ( البرتقال او الفريز )

حميدة بحرج : لا ابنتي بلا ماتحشمو راسكم ...

عيشة ساكتة و حاضية حتى دوات : سكيييينة !

سكينة رمشات و زربات للكوزينة....تتعصر على قلبها و تبركم ...حاقدة على عيشة و مكتحملهاش....!

لحقات عليها مراة لوسها تتعاونها : شفتيها كيفاش كتعملا....نحلف عليها حتى عملات عينا عليها صافي ....

سكينة دارت شافت فيها تدوي و تخوي قلبها و قشعات ظل عيشو جاي...غمزاتها تسكت و سكتو...ملي دخلات تتميل و الذهب كيرن فيديها...

_ فاينو العصير التالفة ...

سكينة تتشوف فيها بحقد : هاهو اخالتي ساليت ...

عيشة هزات الصنية من عندها بالزعفة و كبات العصير فكاس د الزاج كبيير....حتى عمر الكاس و هزاتو لعندها تتمتم حد مكيعرفها شنو تتقول ...سالات و دفلات فوسط الكاس د العصير حركاتو بالمعقلة و حطاتو بهدوء ... دارت شافت فيهم كيف مخرجين عينيهم فيها....و نطقات

_ عطيوها تشرب ...طلق راسك الشاونية....

خرجات من الكوزينة كي القايدة و جلسات ...! مخلية سكينة و صفاء مخرجين عينهم ...

_ اواعدي بزقات فالكاس...

سكينة مصدومة : طلعات لي قلبي...

صفاء طارت للكاس تبدلو ..لكن ملي سمعو غواتها...قفزو بجوج و حطو الكاس بلاصتو ...!

خرجات صفاء الصنيبة يديها كيقفقفو ...! حطاتو قدام حلا و تبسمات معاها بزز...

_ بصحتك الغزالة....

حلا بضحكة صفراء : عينيك الغزالين....

حميدة قربات لحلا تتدوي بين سنانها : حتى للدار و نتفاهمو.....

حلا تبسمات و نطقات بلا ماتعيق : ماقدرتشي ناكل حتى حاجة عيفتني الحناء فيديها...

حميدة من بين سنانها : دير نية و كول بركة من التعفار الله يشويك....عيب احلا عيب...

عيشة قربات لطبسيل د البغرير تتعزل منو و تاكل و حلا قلبها طلع بديك الحناء ..! خسرات ملامح وجهها و شافت فمها ...تتدوي معاها بالعينين....!

عيشة نظرة حارة كديرها فحلا : كول البغرير مالك كتحشم ...عاود مكيعجبكشي ....

حميدة قبل ماتدوي حلا طولات يديها غي من التحت التحت و قرفصاتها حتى حمار وجه حلا و طولات يديها بزز منها للبغرير....دهناتو بالتقالة ماكرهات تحطو و تكركب برا ...ملي شافتها قاست البغرير بيديها فديك الحناء مطلسة قربات ترد....!

عيشة : العايلة مكتاكل عندك والو ...

حميدة تتفرنس بزز منها : كتحشم ...

عيشة تتشوف فحلا : كول كول و شرب العصير ...

حلا تتبتاسم و دور عينيها : هادشي غزاال ...الله

يعطيكم الصحة....

نطق بريهيش صغير كينقز حدا حلا....

_ ماما بغيت بغريرة ....

حلا مدات ليه البغرير لي كانت تتدهنو : هاك الغزيول كول....

شدو من عندها كيفرنس...و حلا تتدوز يديها على ظهرو تتشوف فحميدة بنص عين...

_ شحال حليولو تبارك الله...

سكينة تتبسم : العايل ديالي هذاك....

حلا تتبسم معاها تقول هاذي تتحماق على الداري الصغار : الله يكبرو فعزكم ....

عيشة حاضية مع حلا : شرب العصير ماشربتي ماكليتي....

حلا بشك : نشربو غي انا و نتوما ماخصكمشي ؟

عيشة : حنا شربنا اتاي....

سمعو الصوني فالباب...ناضت سكينة تشوف شكون....لقات الضياف...! استقبلتهم و ناضت حتى عيشة تتسلم و البقية تيسلمو ...!

حميدة كانت مزيرة غي غبرو حمرات العين في حلا....

_ شنو هاد قلة الترابي لي فيك....

حلا بهمس : عيفت اماما ...

فطيمة بصوت خافت : دير النية و كول ابنتي

حميدة بقهر : ماكلة الزنقة كتاكلها كي البقرة غي كتعلف هنا دايرة حالة ...

فطيمة تتضحك : مشكاكة..مرة كانت صغيرة عاد سكنت هنا عطيتا خبيز سخون مابغاتشي تشدو ..

حميدة : هاذي كتفتش على من تبوهل ...

حلا تتشوفوفي الكيسان د اتاي بشك : عندهم مرشومين بلعاني عطاوكم نتوما ليفيهم زواقة فالخضر دارو فيها شي حاجة....

حميدة شافت راجل داخل مع الباب غي شافهم رجع باللور بحرج....نطقات بين سنانها : شد داك الفم....

حلا( هزات العصير تتشمشم فيه شربات منو شريبة و نطقات بشك ) : و علاش عطاوني غي انا نشربو و جابوه معمر كون كبولي فيه الحشيش... مع هوما عندهم دايع فالكتامة...و لا ينعوسا و يدخلو علينا العزارة يغتاصبونا و يصورونا عريانين و يبقاو يطلبو الفلوس ولا يشوهونا ....بيها باش كيديرو الديور ولاد الحرام....

حميدة زيرات على سنانها وغرسات صبعانها في دراع حلا مجننة....: دير خير فراسك و شد فمك بقى غيساكتة ها العار لابقى ساكتة تبان بعقلك ...

حلا فلتات يديها تترمش...: شربو معايا حتى نتوما ....

حميدة جات تدوي سكات ملي سمعو صفاء خارجة من الكوزينة وجلسات حداهم تتدير اداب و الصواب ...

_ خالتي عيشة ماجة دابا ...زيد لالة فطيمة اتاي...

فطيمة لصقات فيها حلا الوسواس : لا ابنتي الله يكثر خيرك ....

شافت حلا فداك الولد لي كياكل فمو عامر ...و مدات ليه كاس العصير تتشوف في صفاء بنص عين...

_ عطيواه مسكين يشرب العصير ..... قريتو الغزال فالمدرسة عصير البرتقال مفيد للصحة.....

صفاء عينيها خرجو ...ناضت بالزربة تتلف....

_ لا مايشربشي كيبول باليل كثر السوائل ....نوض اصابر نوض....

نيضاتو من تما و دخلاتو للطواليط عصراتو يرد تتسول مشوشة : شربتي منو واش شربتي ؟

صابر تيبكي و يعيط لمو : عععع مااامااا ....

خرجاتو كي الشرويطة صيفطاتو للبيت و طارت للصالة حيدات داك الكاس من فوق البطلة تتبسم معاهم...

_ شرب منو العايل د سكينة ..انكوب ليك العصير ...

حلا برفض : لالا والله ماتكب...صافي شبعت الله يكثر الخير...

صفاء : و ماشربتي والو ..

حلا بنظرة شك : لا شربت اويلي ..الله يجعل البركة....

صفاء طارت بالكاس للكوزنية هرقاتو عاد تهناات ....!

دخلات عيشة تتلوي معلية صوتها....: صفاء سمع الراجل ديالك....

ناضت حميدة تتصاوب جلايلها تتبسم ....: لالة عيشة هذا الجهد الله يعاون....

عيشة : لواه عاد جيتو ...

حلا تتفرنس : لا اخالتي جايين عندنا الضياف ....

حميدة تتسلم : نتلاقاو في ساعة د الخير اختي الله يدخلها عليكم بالخير ....

خرجو من دار عيشة الكتامية محمرين و مزنكين...ضارب فيهم البرد....!

تكركبو لديورهم وحميدة تتنكر و تشكي لخلود....

_ قتلاتني بالفشوش...معيافة و مشكاكة و قليلة الصواب....عيب ترد الماكلة تحط الماكلة قول بسم الله كول...واش باقا صغيرة ياقشور البنان.....

خلود : اويلي اش كاين تتغاوتو بحال الضريرات.....

حلا : اخر مرة نمشي معاها لشي بلاصة....

حميدة بالغوات : و ماغتمشي لا معايا لا مع غيري ثبت فالدار و غمل هنايا....باك حلف والله ماتخرج و تعتب باب برا حتى نكون معاك انا....

حلا دخلات لبيتها تتبركم : قتلوني نتوما حسن....

دازت ايام....! دار لالة حميدة تتسمع منها الضحك و المهاودة...معلوم كاين حمزة زوج خلود الاسباني ...! وعائلتو....!

عبد الله الضحكة مشرعة ....عاجبو نسيبو و فرحان بيه....! علماتو خلود الدرجة و بزز منو كيدوي بيها ....! فين مايجي تيفرحو ولاد الجيران ...تيعيطو ليه براهش الحومة ب" كوكاكو " تعيا خلود تغوت و تنبه ماكترضاش...و لايني ولفو ...كيتلاقاوه و يسلمو عليه و يجبد الفلوس و يعطي لي يعرف و لي مايعرف....تتبقى خلود غي تفقص و تقلى ...يديه مثقوبة....!!

خرج حمزة مع رضا و عبد الله و بقات حلا مقنتة تتسمع خلود تتدوي بالسبنيولية مع خوت زوجها ...! تتفقص حيت زرقة فاللغة ...لا فرنسية و لا انجليزية و لا اسبانية ...! عطيها كلشي الا القراية....!!

خلود عينيها تيبريرو فرحانة : ماما غنمشيو لسونطر بيوتي ...! فين نسيم ؟

حميدة : نسيم تترضع ولدها...

خلود : تمشي معانا حلا !

حلا قرمات تتسنى جواب حميدة...لي ردات برفض قاطع : لا باها حلف ....

دازت جوج سيمانات دوزاتهم حلا غي فالدار...القهرة لي تقراتها هاد المرة عمرها عاشتها.....تتشوف خلود عايشة الحياة كل مرة فين ...منشطة مع راجلها تيساريها و يشري ليها لي طلبات و تحط فالستوريات ....و نسيم من حهة ....راجلها دايرها اميرة....عايشين الحياة في تركيا و مبرعها كاوديات والورد و الفوحان فالستوريات خداام تتفقص بيه عائلة راجلها.....!

الا حلا غي فالدار...الخروج مع مها فقط و حميدة ماتتخرج غي من الاحد الاحد....! قنطات و تقهرات و ولات غي مخشية فبيتها وخا رجعو ليها التليفون....باغية تخرج و تضحك و تطلع لمحل الذهب و توانس و تشوف الدنيا....! توحشات عبيير و الزهو و النشااط....!

دخلات لعندها خالتها هازة سطولة د الحمام : حلا تمشي معانا للحمام....

حلا بكآبة : لا ...

الخالة : نجي نمشيو للصالون ...

حلا بكسل : مابغيتش...

خرجات الخالة من البيت تتنهد : احميدة البنت خرجتو عليها فالدار...

حميدة تتنهد : شنو غندير باها هاز فقلبو لدابا.....

الخالة : حلا ماشي بحالك ...حلا مولفة الخروج راه بلا مايقول عقلكم دابا كتفشش عليكم ! راه غتمرض ...حلا من النوع لي تتأزم فالدار.....شوف تحت عينا شحال كحال ....

حميدة بأسف : اشنو فيدي ندير ؟ عبد الله قال و ماعندي مانزيد بعد هدرة ديالو

خرجات الخالة تتسوط و تنكر على حالة حلا....! و مرااة رضا جالسة كي الامانة...درويشة و سكوتية....زعرة و زوينة و قلبها بيض....!

_ انا كيبقاو فيا ملي كنشوف رضا و حلا هيدا اخالتي والله...

حميدة جلسات حداها مهمومة : دايما هيدا شنو غنديرو ...دابا تزوج حلا و يرجعو يتقابلو ...قولي مرات عمك ولدات....فوقاش غتمشي ...

حنان : علاش نتوما مغتمشيوشي ؟

حميدة : لا ابنتي مانصيبشي ...غي مشي نتينا و تلاقا عائلتك و فرح معاهم توحشتيهم دابا....

حنان بابتسامة : و شنو غنديرو الدنيا هي هاءي...غنتلاقاو تما حتى ماما و بابا غيمشيو ..و عمامي توحشتهم....

حميدة ضحكات : و سعداتك....

حنان : علاش ماتمشيشي معايا حلا ؟ يجي معاها داك الجو و يعجبها الحال...و حتى عمي و رضا ماعندهم مايقولو اذا مشات معايا .....

حميدة خفضات صوتها لا تسمعهم حلا : هاذيك ابنتي الكوارث كينقزو عليها وخا مكدير والو ...نخاف تمشي معاك توقع معاها شي مصيبة...بنتي و عارفاها....

حنان ضحكات : شنو غيوقع زعما....رخفو عليها ...جو البادية غيعجبا...و تحسن نفسية ديالا رجعات مهومة و قنطانة....ماعندا فين تفلت و لا طير عيني غتبقى غي عليها....

حميدة تنهدات : اوا هاهي و قولها ليها و يجي عمك قولها ليه انا مخرجة راسي ....

سعيد كيتمتم ...: ايمة عبد الصمد مايكذبش....

عيشة بنظرة حارة : كتذكبو عليا ...عبد الصمد فالشاون و كتقولولي فاسبانيا ....جا و ماشافني و ماطل علينا و ماعيط على قلة التليفونات ...

سعيد تيراضيها : الصمدي مشغول هاد الايام ...( خفض صوتو ) داك خونا ضيع السلعة..و ناضو مشاكل ...مامساليش....

عيشة قندشات : و علاه مايصوني عليا....

سعيد : يمكن ماعندوش الريزو ...كيتقطع....

طمرات عيشة و سكتات ...سلت سعيد منها غي بالفن ...! ظلات عيشة تتشوف في بلاصة وحدة....! و عريساتها شادين الحديث على حلا ....

_ ماشرباتوشي انا هرقتو ...

سكينة : والله الا حاسبة شرباتو ...تفو كنت غنرد ديك المرة...

سميرة : خالتي عيشة باين حمقاتا البنت و بغاتا لعبد الصمد و لايني لقات لسانا طويل و بغات تمشيها كي بغات....جاهلة لاحولا ولاقوة الا بالله....

سكينة بهمس : و ختي سميرة خالتي غيشة اذا زوجات الصمدي بحلا محال واش يعقل عليها...البنت غزااالة الزين كيقطر منها....غتقولب غي خالتي عيشة و تلف عقل ولدا ...

صفاء باستهزاء : و حتى دوز ليها خالتي عيشة سكانير مزيان عاد نشوفو واش غدوز ...

سميرة ضحكات : حتى تشوفا عريانة و ماتشوف فيها عيب فلحما و تعجبا عاد تزوجا لولدا ....نسيتي شنو دارت معايا و حتى مع سكينة فالحمام ..و الشوفة لي كانت كتشوف فينا ...كون عرفت غتكون عجوزة ديالي كون غبرت كمارتي ماعاودت مشيت لشي حمام.....

سكينة بسخرية : تقول ولدا كامل مكمول هو الشعر و ماعندو ....

سميرة تتضحك : ولفناه هيداك قرع ...فين مايطلعلو الشعر كيدوز عليه...

_____

ناضت فالنص د الليل....! تتشالي بدون الذهوبات....! خرجات كدور حفيانة ...! معرية شعرها حمر مصبوغ بالحناء !

قشعات ظوء بيت ولدها سعيد مشعول و غوبشات....!

زمات دوك الشفايف ...و دقات حتى قربات تفرع الباب....

_ طفييبو الظوء ...مالكم على الضيوع....!

سعيد ناض من فوق مراتو مفزوع.....ماعرف باش تبلى ...! : الظوء ...طفي الظوء اصفاء ...

صفاء جلسات مقندشة تتدعي فعيشة بهمس...: يعطيها الموت....!

طفاو الظوء بزز منهم و قضاو بالظلام....! معلوم ....

بزز منهم....عيشة السخط عندها على طرف لسانها....! باغية ولادها يسكنو معاها فين مامشات...اذا عزل عليها تسخط عليه عليها كيديرو ليها خاطرها بزز منهم.....!!

دخلات حنان لبيت حلا تتشوف فيها مبسمة...

_ حلا مرات عمي سولات فيك....قالت والو قول لحلا تجي معاك توحشاتك....

حلا علات عينيها فيها تتدوي ببرود : يتوحشها الخير.....

حنان : قلت لخالتي حميدة تمشي معايا اذا بغيتي نتينا تمشي....

حلا تتفوه : ماعندي كانة احنان....

حنان : يلاه معايا ...مرات عمي غتفرح بيك بزاف ...

حلا شافت فيها بنص عين : مغيبغيوشي ....

حنان : ماقالت والو ...قال نقولها لعمي شنو غيقول....

حلا : مافيا كانة احنان....!!

خرجات حنان من عندها و بقات حلا فالبيت عينيها فالتليفون حاضية غي عيباد الله كي عايشين....! شافت ستوري ختها نسيم صورها في تركيا و فمها مشرع بااضحك....! هزات داك النيف و سجلات ليها اوديو ...

_ نتوما كطوطحو مع راسكم و انا هنا غننتاحر بالقنطة.....عندك تنسى كادو ديالي ....

صرداتو طلعات ليها vu و ماجاوباتهاش ...؛ تغددات عليها حلا ودخلات على خلود حتى هي تبرزطها بالهدرة....

_ انا غي بطالية ماعندي حتى ريال فجيبي جيب لختك صاك شانيل و escarpin roberto botella ...حماقت عليه و مالقيتو هنا ....

خلود طلعات ليها vu حتى هي ...! شي لي خلى حلا تقندش....و ترمي التليفون مغوبشة ..

_ شنو هاد العيشة ....!!

ناضت من فوق الناموسية و خرجات من بيتها شعرها طالع للسماء...!

_ و انا غنمووووت بالقنط و بغيت نمشي لتركيا حتى انا......

بنت عمتها : اوا كون تزوجتي كون راك كدوز شهر العسل فتركيا ...

حلا مغوبشة : اوا الزواج كيكون بالقبول و انا عيني ماقبلاتوشي ....

بنت عمتها : غتمشي مع حنان ؟

حميدة : لا رضا كيخاف تحشمو مع عائلة مراتو ....

حلا طلعات معاها الهدرة و دوراتها فراسها مزيان .بقات ساكتة شحاال عاد نطقات ...

_ رضا غيمشي حتى هو ؟

حميدة : لا رضا غيوصل مراتو و يرجع ...خصو يقابل شغلو....

حلا هزات نيفها و نطقات : اذا بغى بابا غنمشي....

حميدة علات فيها حاجب : معشوقة فالجبالة ! كي طرا ليك...حط قزيبتك للارض و ريح...

حلا تتلوي فمها : و علاش ...حنان قالت ليا عمتها توحشاتني و حشومة الناس يتوحشوني و مانمشيش....

حميدة حطات من يديها و عقدات حواجبها : والله ماندير راسي معاك ...نتي و باك براسك معاه شنو يقول...تعمل شي مصيبة ماشي شغلي ...

بعد ماحصلت على اذن عبد الله لي وافق بعد محاولتين من حلا ....! و غلى دم رضا ملي عرف تمشي مع حنان ...و بعد توصياااات و تهديدات حميدة ....ركبات في سيارة رضا مع حنان و شدو الطريق ....!! لمنطقة من اقليم شفشاون....!!

الطريق كاملة ساكتة ...غي رضا و حنان طالقين موسيقى حب و تيشوف فيها و يرجع يشوف يشوف قدامو....قشعاتو حلا و لوات فمها ضاحكة بسخرية ...!!

نزلات من الطنوبيل ...! لابسة بنطلون و شوميز فالنيلي ...! الجو بدا يسخن ...! شعرها قصيور كيحوم مع عنقها....! تابعة حنان....! لي عائلتها استقبلوها بالفرحة و التبسيمة ....!

غي شافو حلا كحلو بالعمى ....تيعرفوها تتيعب و لي حطيتي ليها مايقنعها وخا ماتتقولهاش فوجههم....! درقو بتبسيمة مزورة....! و رحبو بيها.....!

رضا جر حنان للقنت تيدوي بخفوت...

_ حنان حلا عينيك عليها....ماتغفلش تغمض عينيك تلقاها فطنجة طيارة و كنعرفها.....

حنان ببرائة : غي كظلما ارضا والله ..هي الكراكتير ديالا هيدا كومبليكي شوية ....

رضا تلمس حنكها : انا وصيتك...غنرجع وراك دير عقلك ....

ودعها بابتسامة و تحرك من تما ...! الناس شافوه و عرفوه هذا تيعرف الاخر منطقة غي صغيرة و الغريب معروف....تيهز راسو و يرد السلام ...! وقف قدام المقدم ...راجل كبير بالقشابة ديالو ...تيعرف رضا مزيان و عندو معاه ....خرج ثلاثة د الزرقات و مدها ليه....

_ سي محمد حلا تعتب القنطرة هز تليفونك و صوني عليا ...عندك عينيك تغفل....

سي محمد عينيه حوالو : سير على الله الله يبلغك على خير ....كون هاني ...

دخلات حنان جلسات مع عاىلتها ...تتسلم و تبسم مع هذا و هذا ...

حنان تزادت و كبرات في تطوان بنت المدينة....! لكن اصولها و جدودها و اعمامها من هاد المنطقة صغيرة ناسها يفرشو ليك لي عندهم محبيين و قلبهم كبير ...! فالصيف تتعمر و تزهى ....مقصد اغلب السياح ....!!

عمة حنان جراتها للبيت تتوشوش ليها ...

_ شوف ديك اللوسة عندك ماعنديشي معاها ...انا مانطيبلا مانزلا نتينا براسك معاها....

حنان بحرج : عمتي نتينا غي ريح راسك ....

العمة : و مانعرف...فينو الراجل ديالك ؟

حنان : مشى لسبتة ...

العمة بنص عين : كيف عاملة مع عجوزة ديالك و اللويسات ..باقين مزيانين معاك كيقولو روافا صعاب عندك تكذب عليا....

حنان : عمتي غي هدرة الناس طوب و حجر....كون معاهم مزيان يكونو معاك كثر من مزيان.....

العمة : و دخل ترتاح شوية دخل ...

جلسو فصالون كبيير ...مجهز على حقو و طريقو ...! النساء نصهم بقات عينيهن على حلا ...كلشي تيسول بنت من ...! و شكون ! ...وهي تتسمع و ساكتة تقول بصح درويشة....و حشومية....!! كتخدع بنادم بسهولة ...!

و عائلة تيوشوشو عليها...

_ هي لي عندوم باقا بلا زواج الزين كيقطر منا و قربات تدخل للثلاثين و باقا بلا زواج ..

_ و سبحان الله دوك لي كيكونو كيحمقو بالزين كلشي عندوم معكس ...

_ و لا هاذيك كتشرط بزاف مايعجبا العجب...

نطقات أم حنان : حيت هي بنت ذواقة متولة و غزالة و ماجبرات حد بحالا ..عيب تهدرو على البنت بالخايب ......

نطقات واحد الزعرة : واش بصح جابت لنزيهة الذهب ولا غي هدرة ...

ام حنان تتدوي بفخر على ناس بنتها : ايه بصح هاذوك ناس الخير كيكبرو بيك و يفرحو معاك

داز السبوع على حقو و طريقو الولد اللول يحطو لي عندهم ...و يفرحو بيه.....!

داروه بالغيطة و الحيحة....! القفاطن و الشعر مسبسب ها الزعر و ها الكحل ...! الزين الجبلي حاااضر ...! السر طايح و الزين مفرق و مشتت....! مادايرين نقطة وحدة د المكياج....حتى الكحول كاين لي عندهم عيبب و لي تتكحل غي المزوحة كيخافو يشوفها العزري مكحلة و يقول هاذي مزوجة و تبقى بايرة فدار باها.....! الحواجب طبيعين وخا يكونو كثاف عيييب تقيسسهم و لا تمد يديك عليهم....غير بعض البنات المراهقات الطيارات دارو التليفون و دخلات معاهم الدودة و لاو ليشافوه يديروه.....لكن كاين المتشبتيين و المتشديين فها د الامور و مااكثرهم....!

دخلات مراهقة للدار عينيها كينقزو بالفرحة....

_ البنات يلاهو لدار نجية نتفرجو جاو الغياطة ...

حنان عينيها لمعو : شدوني الهوايش ...

حلا باستغراب : كاين شي عرس هنا ؟

المراهقة : عرفتي هاذوك كيديىو داكشي فشكال ...كيغنيو الولاد والبنات كيردو عليهم بالغناوي ....و يديرو حلقة بيناتوم و يشطحو بالكتاف .....

حلا هزات جلايل قفطانها و شافت فحنان : غنمشي نصور ...

حنان هزات قفطانها تابعاها : ماكتعرف نتينا حتى واحد تما ستنى نمشي معاك....

حلا : وخا يدخلو بلا عراضة زعما ؟

حنان تابعاها : حنا معروضين غي حات مع ااسبوع وصافي....و اصلا لي جا كيدخل و بتفرج ....( نعتات ليها لواحد الطنوبيل واقفة و مولاها تيصور ) شوف هذاك كيصور حتى هو.....باين ماشي من هنا غي داز و وقف ...

فراس السطح ...واقفة حلا مع البنات ....دايرة يديها فوق الصور ضحيكة مسرارة و زينها قتال...! تتشوف فالشباب محمعين حدا الدار لباس رجالي جبلي... .بالغيطة و الطقطوقة الجبلية مسموعة....! و الرجال الطول و العرض زينهم حرش و سميمرين بالشمس ....كيغنييو و يحيحو ...الزهو و النشاط و نغمة الجبليية ...عجبات حلا وخا مابغات تبين.....

اابنات تيشطحو قدامها و هي تتهز خصرها و تدندن معاهم

_ و هيا يمة القلب معذب يايمة ...شوفيلي الزين ...راه القلب معذب ماعندو عوين يلالة يمة ......

توقفات مرسيديس جنب الدار ...! و خرج منها كريم كيحيح و يشطح و الصمدي الداخل منغم بواحد الكارو..حاضي الاجواء غي من داخل طنوبيلتو ....كيدندن ...!

طل عليه كريم كيدندن و يغني بالجهد سخن عليه راسو :

_ على فراق غزالي نبكي بالدموع يالالة يمة ....شوفيلي الزين الالة يمة ....

عبد الصمد رمى الكارو وكمل كيدندن معاه ...: الزين الظريف يلالة يمة ...قولو يستنا غنجي فالخريف يلالة يمة ....

كريم انفجر بالضحك و على عينيه فالسطح : شميت ريحة الزين ....اخاي الصمدي...فيك ماتنستنى للخريف ....

هز عينيه للسطح....! الظواو د الزنقة شعلو ملي بدا يطيح الظلام....! كيشوف بنات فالسطح ...واحليين مع فولارهم كيهربهم الريح ...!

هبط عينيه و شاف فالصمدي كيفرنس ...: نجبدو عليها بقصارة ....

عبد الصمد ( خرج من الطنوبيل و الساعة الذهبية فيديه تتبري لابس حوايج الصيف فاابرد ...) : سپيرا غندوز نشوف عبد الحق ...

كريم حاضي مع الزين...: وخا نستناك هنا مع الدراري...

دخل عبد الصمد لدار العرس ...! و كريم منشط و محيح مع الفرقة....تيغني و يرمي غميزة تالفة لاي وحدة شافتها عينيه....!

حتى ثبتهم على حلا لي هبطات معفرة على الناس...! فتح عينيه فيها و خرح من وسط الناس غادي لعندها كيفرنس...حتى وقف حداها شافتو قلبات وجهها عليه ....

كريم عجباتو : شفتي على صدفة ...كيقولو صدفة خير من الف لقاء...

حلا شطحات رموشها و شافت فيه كطلعو و تهبطو ....ماعجبهاش...عليها مغتجاوبوش....!

قلبات كمارتها و التليفون فيديها خلاتو كيفرنس كي الراس المشوط ..

_ سقينا بالزين ديالك العايلة دور شوف فيا يرحم يماك ....

حلا شافت فيه بنص عين : مغتحشمش على وجهك و تبعد من حدايا....

كريم ضحك : ايمة على صويت و على عوينات ماين مصنوعة نتينا ...عطينا النوارة نمرة ديالك...

حلا علات حاجبها و نطقات معفرة : نتينا من هنا ؟

كريم مبسم : انا شاوني ...

غوبشات ملي عرفاتو شاوني قلبات عينيها عليه و ردات : و هي اذا عطيتيني شبر التيساع ....

كريم كضحكو هدرتها : و علاش ...مابغيتش رقمي ينور تليفون ديالك ....

حلا قندشات : دابا واش مغتحشمشي على وجهك و تبعد مني مكتعرف الوحدة مزوجة و لا مخطوبة واقف كتزلل عليا هنايا....نمرة ديالي شايطة نعطيها لشاوني مصعور.....

كريم حك رقبتو مبسم...: ولايني لسانك حراااايقي ....

يتبع...

‎