غيرك ما يحلالي الجزء الثالث

هزات جلايلها و جمعات تليفونها لي كانت تتصور بيه و دخلات للدار تتسوط و تنفخ....! حاضية جلايلها ...و فاطنة مع رساتها مشكاكة و شكها بعض المرات تينفعها....؛ حميدة مكتخافش عليها فهادشي تتخاف غي تزهق بيها رجليها فالزبايل و المصايب لي كيطيحو عليها....! اما الفطنة هي المطورة د خواتاتها...! الماكلة عند الغريب حتى ياكلو هوما عاد تاكل هي ...! حتى شعرها ملي تتمشطو تتجمع زغبة بزغبة و ماتخلي حاجتها مرمية عند الغريب....!!

طلعات جراات حنان و تكركبو لدار عمتها ...!!

عطاوه بيت نقي و مفرش ماناقصو حتى حاجة....كيعرفو حلا معيافة و شافو دار لالة حميدة كي دايرة....مكيبغيو يبانو ناقضين منها....!

كيف اي مناسبة ...! وخا يظلو عياانين نهار كلو فتمارة كطيح الليل كيتحمعو كلشي فبيت واحد ...الضحك و الهدرة....!

و هكا كان....! العمة تتدور دورو تشوف فحلا بنص عين....! حتى قربات منها حلا تتدور فدوك العيون و تبسم ليها تتحلون عليها...

_ عمتي شحال فعمرك تينا ؟

العمة مغوبشة : 45 علاه....

حلا فتحات عينيها دايرة راسها مصدومة : سبحان الله كاع ماباينة فيك نعطيك 30 هيداك....عينيك غزييولين....

العمة عجبها الحال واحد الضحكة باغية تفلت ليها : مم ...حنا هيدا مكنشيبو مكنشرفو ...

حلا تتبسم : داكشي عندكم وراثي....

العمة تتفخات و عجبها الحال...كدور دور و تشوف فحلا ...! و حلا تتبسم و تعري سنيناتها ....! بقات شوية ورى شوية....حلاوة اللسان خدامة....تتاكل راس بنادم غي بالهدرة حلوة.....!

حنان خرحات من الدوش مزروبة...بالها مع حلا لي خلاتها بوحدها وسط عائلتها....!

وقفات فباب الصالة و تصمرات ملي شافتها وسط بنات عمامها ...تيضحكو محمعين علييها....!!

رمشات شحال عاد دخلات تتطل عليهم....

_ شنو كتعملو ...

حلا فوسطهم جالسة مربعة رجليها فالارض و جامعة شعرها للسماء....فاتحة الفايس تتكتب و تشوف فوحدة من عائلة حنان ...

_ شنو اسمو الكامل ازين ديالي ...قولي هيدا حمزة شنو ؟

المراة : و مانعرفشي اختي هو كيخبع عليا التليفون ديالو ....

حنان بعدم فهم : شنو غتعملو ....

بنت عمها : راجل جميلة دار الفايسبوك و حلا كتفتش عليه...

حلا مخشعة : اجي تشوف اجي جبرت هذا عامل حمزة الشاوني....اواعدي عندو النصرانيات فالكوزط ديااو ....سبحان الله غي شوفة الاولى عرفتو كيخونك.....كنعرف بنادم و نطلعو من شوفة الاولى...

المراة قلبها وقفن...جرات ليها التليفون تتشوف مرعوبة : اواعدي ايمة الحبيبة فينو ..فين هوما هاد النصرانيات....

حلت تتجر ليها التليفون خايفة : و اري الزين تليفون ديالي و تصدم على خاطرك....عاد جديد باقي مافرحت بيه.....

المراة تتندب : شوف راجل لوسة ديالي حتى هو ...

حلا بكذب : و صافي دابا ماعنديشي الرزيو ...حتى لغذا و نشوف ....انا بعدا الراجل غي اذا فكر يخوني كنعرفو ...

العمة بنص عين : و ماعرفت كيف .

حلا كالقة سلوكيتها : كنحلم بيه....الواحد اذا هدر عليا فاليل كنحلم بيه كيهدر فيا ....

العمة اهتز حواجبها و شافت فحنان بنص عين ...: سبحان الله ...

حلا تترمش : و شنو انا هيدا من صغري ....و تعرفو شحال من واحد كيهدر فيا بالعيب و مكيحملنيشي ..( تتمعن عليهم ) وحا هيداك انا عارفة راسي شنو كنسوا و كنقو مزيان يمسحولي شوية د الذنوب...

شافتهم كيشوفو فيها شي متيق شي لا...! فرنسات ليهم و شافت فديك المراة لي كانت تتقلب على فايس راجلها : و نتينا اختي تهلا فراسك شوية ...عمل شوية ماكياج و سرح داك السالف ..فين تبان شي نصرانية حداك....خصني نعطيك شلا درووس و نصايح عمرو يخونك والله....نوض نوض دابا ندور بيك و تشوف كيفاش غترجع كتحمق...

حنام دايرة يد على حنكها تتسمع فحلاو ساكتة ....!

جرات حلا ديك المراة لبيت اخر و تحمعو عليها البنات....! جابت ماليطة ديالها و خرجات ماطيغيال....! سرحات ليها شعرها و الدراري الصغار يطلو من الشقة ...! و المراة تتغوت و تقفز غي بوحدا...

_ العافية العافية _

حلا قندشات : وصافي وقف واحد الشوية ...خليني نعرف شنو شغلي من الناقص كاع....

قرمات المراة و جلسات صابرة.....عطات كمارتها لحلا ...حيدات ليها الموسطاج و رطبات ليها شفايفها و ريحة الكرميات عطات فالبيت....!

جات تقاد ليها حجبانها امتنعت : لا لا حواجبي لا....

حلا : علاش اويلي ...

المراة : ااراجل غيطلقني ..

حلا : علاش غيطلقك غي خليني نعدلك غتجي واعرة ...

حنان خرجات عينبهت : حلا لا ...

حلا : و علااش هي حواجبا مشروكين كيف الراجل ماشي عيب ...غنحيد غي الشرك ماشي حرام ..

بقات على المراة من هنا و لهيه حتى دوزات ليها على حواجبها و صاوباتهم ليها....! بدلاتها و بانت النتيجة....بقات غي تتشوف فوجهها فالمراية و تعلب في شعرها عحبها راسها...

_ هاي هاي عليا ....

حلا تتفرنس : و شفتي بعدا.....

دقات عليهم بنت صغيرة تتنادي لمها : ماما يلاه با جا ...

قفزات المراة ...و لوات الفولار على شعرها....مفعفعة....

_ اويلي شنو غيقول اذا شافني حيدت الشرك ...غيبهدلني....

حلا بنص عين : اوا اذا قال شي حاجة جبدلو نتينا ديك النصرانيات لي عندو فالفايس...

المراة : و اذا قالي ماين عرفتا...

حلا هزات كتفها : قولو حلمتك ...هاء ماكتعرفوش تزوقو شوية فالهدرة و تكذبو كذيبات صغار ...

حنان مبرزطة معاها عيات وتهدات و خلا مابغات تتركن بلاصة وحدة...

_ حلا صافي يلاه نعسو ...مشى الوقت غذا طالعين للجبل نفرقو صدقة و نشوفو جدي ....

حلا باستفهام : شمن جبل ؟

حنان : فوق هذا عالي وجد راسك غذا مع الستة د الصباح غنمشيو....

حلا كطنز : من جبل لجبل هي نديرو شي فيلم وثائقي نزلو فاليوتوب ...

الشمس تتحرق ...كانت العشرة د الصباح !

غادية حلا تتنكر ...شادة فحنان

_ و علاش ماتوصلنا الطنوبيل حتى للدار...

حنان : الطنوبيل مكتوصلش لهنا ماكاينش الطريق...باقي مادخلو الاصلاحات لهنا....

حلا زيرات عليها : ايمة هادشي عالي بزاف تخايل تمشي بيا رجلي و نتكركب من هاد الجبل....

كان جبل عالي و فيه ديور باينين ماكاملينش حتى عشرة د الديور... ! جا معزول ...و السكات ...الواحد يقتل و يصلخ و مايسمعو حد ...! اما الطريق كلها حجر ...الناس مزال كيسقيو من العين باش يشربو و يشربو حتى الكسيبة ديالهم....!خصهم تكون متمرس و متعود باش تقدر تمشي فديك الطريق....! لا حلا و لا حنان قادرين يمشيو ...تما....يميلو غي شوية يجيو مركبين فالريبة....! و عمة حلا من وراهم تتسرحهم و توريهم الطريق...و الرجال سابقينهم بالهدايا و الصدقة الماكلة و الحلوى يفرحو بيها المساكن.....!!

دازو من حدا العين ...وقفات حلا تتنهج و تعوج ملامح وجهها....

_ اويلي غنشربو من هنا....

العمة هزات سطيلة عامرة بالماء تتشرب ...و حنان و حلا كيعيفو ...محروقين بالعطش....!!

شافت فيهم العمة و ضحكات : زيدو شربو ...قرب احلا شرب ....

حلا غوبشات : نبقى بالعطش مانشربشي من تما ...تخايلو يكون بال شي واحد تما....

ضحكات عليها العمة حتى شبعات و شافت فحنان ...: زيد شرب نتينا ...

زعمات حنان و شربات....بقات غي حلا مشوطة من العطش....! كملو على طريقهم و دخلو مع الديور و الحجر مكركب فالارض الخلفة معوحة....!!

حتى وصلو لدار الجد ...فرح بيهم حتى دمعو عينيه....حد مكيجي لعندو و قليل ...حيت ولادو كاملين...فالمدينة و دارو نساواتهم و ولادهم...مكيقدرو يجيو لعندو و حتى حفايدو صعيبة عليهم الطريق وهوما مولفين بجو المدينة كلشي موفر....!

نشط و ضحك و ماسخى بيهم....! كيرضي على حنان و يعاود....فرحان ليهم بالجهد ....!

تغداو تما و دارو القيلولة ...من غير حلا لي هازة تليفونها للسماء تتقلب على الريزو...خرجات لبرا....تتشوف فالدجاج حدا الدار....! و صوت البقار و المعز ...واحد الهدوء و السكينة...ماكاين صوت طنوبيلات و لا مواطر...لا حداد و لا نجار....!

بعدات من حدا الدار ...تتمشى بشوية و تميل فالمشية خايفة طيح....! تابعة الريزو....!!

سمعات صوت مراة كينادي عليها....

_ العايلة ...

دارت شافت فيها مطلعة حاجب و منزلة الاخر : معايا ...

المراة بنبرة قاصحة : فاين ماشا ....

حلا : و نتيينا شغلك....

عطاتها بالظهر و كملات طريقها....! و المراة واقفة فبلاصتها تتنكر....

_ المسخوطة مشات......( هزات جلايلها و طارت عند راجلها ) حميد نوض واحد البرانية هبطات التحت للدار عند الواد فاين مخبعة الكيف ...

حميد ناعس كيشخر ...ماشي فهاد الدنيا....!

حلا كملات طريقها....وقفات ورى دار معزولة ....! تتصور و تبوزا.....! تتقرب وهي ملهية مع تليفونها....!! ماعارفة راها واقفة جنب دار الحضانة كي تيقولو ليها...الدار لي تيخزنو فيها الكيف و كيتجمعو فيها السماسرية و البزنانة.....! تليفون بالكاميرا تما ممنوع و حد مايكسابو تما....!

غي قربات حلا للدار ...طار فيها الكلب تينبج ...! شهقاات مفزوعة و رجعو رجليها للور ....جات طايحة فوق حجرة تتشوف فالكلب قربات تفتح الباب للبول تحتها....

الرجال الداخل ..!

كيتسمع غي صوت عبد للصمد معرعر ..: و انا مالي ...يت*ودو كاملين....

كريم تدخل كيساوي الامور...: الصمدي ريح اصاحبي...

الصمدي كيعلي فيديه حواجبو ملاقيين طالع ليه الدم....: اشمن ريح ثمانين مليون هاذي....شكون ليكان مريكل معاه نتو ! ...ديريكتامينتا تجبدو الصمدي....

تقطع الحس فجأة ملي سمعو صوت شي حد كيصور....جنب سرجم البيت المعلوم .....و بعدها مباشرة سمعو نباح الكلب....!

كريم صفار ووجهو مشات منها الدم....!بقى غي كيشوف مصمر .... الصمدي خرج الموس....خرج هو نيت طالع ليه الدم ...مكيشوفش حداه ساخط و ماراشقاش ليه على بنادم.....!!

_ شكون هذا ليزهق من **ون يماه و طاح عليا هاد النهار ....

سمعات صوتو القاصح ...! رجعات باللور.هازة تليفونها مرعوبة من الكلب كثر من الموس ليفيديه......! تتشوف فيه مغوبشة و عاقدة حجبانها عقلات علييه ...

_ الله يقطع هاد الطريق لي لاقاتني بيك.....جمع الكلب ديالك خلينا ندوزو....

الصمدي حجبانو قراب يتلاقاو...خبا الموس و نطق : هي اذا قلبتي الروايض سنيوريتا.....

حلا مارضاتش : مالها الطريق د جدك ...

الصمدي هاز حاجبو : بنت شكون نتا ؟

حلا تترجع باللور ..خلعها داك الكلب : بنت بابا و ماما ...اش دخلك نتا بنت شكون انا...

قرب منها الصمدي جرها من يديها حتى غوتااات كي الفروج كيدوي بصوت مدعدع. ...

_ قبل ماتقلب الروايض فتح داك التليفون نشوف....

حلا تتغوت و تدفع فيه....: طلق من يدي ..اويلي حماق نتا و لا شنو ......

الصمدي خطف التليفون من يديها مخنزر فيها : الكود ...!

حلا تعصبات : السيبة عندكم هنا طلق التليفون ديالي...

الصمدي كيشوف فعينيها عجبوه ...: سنيورا خليني طرونكيلو ...

حلا جعرات : الحماااق هذا ...طلق التليفون ديالي .....

الصمدي عض فكو من الداخل و رمى الشوفة لكريم الواقف وراهم ....!

_ عندنا الضيوف.....

كريم كيحك حاجبو : الصمدي اخليها صافي ...

رجع شاف فحلا لي طلعات الخلعة و بدات تخاف على راسها....تترطب الهدرة

_ طلق اخاي من يدي و نهدرو بالهداوة ....

الصمدي مغنان و راسو قصح مم الحجرة كيشد الضد من على والو ....: الكود الكورية ديالنا......

حلا قلبها كيضرب بالخلعة....كدور عينيها كي المشة ...منو لكريم ...للكلب ...! بقات تتشوف و ساكتة حتى طلقاتها بغوتة تتزوي......

_ عععععععععع حنااااااااان.....

الصمدي جرها من شعرها جعراتو : بوتاااا....

حلا تتركل باغية تفك يديها : هي يماك الحماااار....مشي فتش فاين تلفتي نص حاجبك .....انا بزاف عليك ....اولد اابوتا.....

كريم وسع عينيه مصدوم....عرف اخيرتها اليوم...!

أما الصمدي طلعات ليه السخانة للراس....! دار فيها شوفة قاصحة محمر فيها عينيه ... زير على يديها حتى غوتااات لربي لي خلقها .....!

جرها وراه وهي تتكركب فديك الحجر ...مخلوعة و يديها حساتها غتقطع بالحريق

_ طلق مني ...فك يدي شعندك المرض....

كريم بقات فيه : الصمدي رفقا بالحرير اصاحبي....

الصمدي كيعض فكو من الداخل مبرد : غندير شي باسيو مع السنيورا ....

حلا قلبها قرب يطيح مع رجلييها...جارها وراه تتزطم فالحجر و خلفتو كدير من ديالها عشريين.....تتعافر معاه تتغوت و تركل ..وهو جارها كي المعزة...تيبان مبرد ....

_ طلق من يدي...فاين ماشي....طلق مني.....اي رجلييييي...طلق مني.....

وجهها حمار و الدموع نقزو من عينبها....تتضرب و تعض و تلوى يفك من يديها.......تتغوت بحر جهدها..و تسب غتسطى بالخلعة....

_ طلق مني....تفوووو الكلب...الحماااار....والله حتى نجرجك فالحباسات....ماعارفش مع من طحتي.....طلللق منييي ....

طارت بعضة مجنونة لكتاافو ...مغرسة سناانها فييه ... تتزير على اللحم حتى كمش حاجبو مقصح....و جمع معاها بظهر يديه

_ تاصيلة الكلاب ...

شافت فيه تتبكي....وجحها ولات حمراء كي ماطيشة مخلوعة منو ...قلبات الحيلة...

مانفع معاها سبان تنفع التمسكين....

_ خليني نمشي اخاي....وااله ماتعاود تشوف وجهي....يرحم جدك ...انا فيا القلب ...اي قلبيي حرقني....غنموووت...ياربي قلبييي وقف....صافي غنموت دابا.....

شاف فيها بنص عين و نطق....: قلنا ليك خلينا طرونكيلو....

طاااحت ليه فالارض تتلوى فالتراب ...شادة فواحد الحجرة شدة العمى فالظلمة....الطريق ضيقة و الجبل عالي ...غي تطل تشدك الدوخة...

_ و صافي قلنا ليك سمحلي ...يرحم يماك....بعد مني....ماتسمعش للشيطان...دابا نتينا كتبع غي الشيطان....ماتخليش الشيطان يغلبك....

تحنى لعندها كيدوي معاها مبرد و يدوز عينيه لرجلييها عجبوه....

_ يمة انا بوتا ؟

حلا تتغوت و تبكي : لا اااا

الصمدي خرج تليفونها من جيبو ...معلي حاجبو : لا قلتي يمة انا بوتااا......

شافت فيه برموش مبللة تتهز راسها بالنفي..مزيرة بيديها على الحجرة

_ لااااااا......ماقلت والو ...

الصمدي كرر كلامو مبرد : بلا نكران سنيوريتا... نوض واقفة نشوف ....

غمضات عينيها حتى تعصر الدموع من عينيها ...ناضت واقفة برموش مبللة......حاضية جنابها...

_ صافي سمحلي و نسمحلك ...ماتشوف كمارتي مانشوف كمارتك....عطيني تليفوني وماشفتك ماريتك.....

دورها بخفة تحت غواتها حتى جا ظهرها في صدرو ...ودور يديها على خصرها من اللور ....مقربها من حافة التحت فيها الريبة و الحجار و الشوك....لي متعود و بزز يقدر يمشي فيها......شافت التحت رجليها كيترعدو تتغوت و تبكي...يديه مزيرين على بطنها شعرها تيحركو ااريح كيجي على كمارتو....تترحع باللور مرعوبة....

_ لاااااااا....لااااا غنموووووت....الله يخلي ليك يماك و مرتك و ختك و جدك و مرات جدك.....بعد منيييي ..طلق منيبييي....

الصمدي حلا ليه اللعب : الواد مسكووون...ال*بة

قلبها طاح بين رجليييها ...عاطياها للببكاء....والغوااات.....و الركيل..!

حتى فلتو ليها رجلييها مع الحجار ...و شدات في سمطة سروالو ...

سندالتها طاااحت فالطريق...رجليها حفيانين عامرين بالتراب و ااشوك حالتها مبدهلة و الغوات على الجهد........!

شبطااات في سمطة سروااالو و فيها زيرات و منها حلفات لا طلقات ....

_ والله لا فكيت يدي من هنا...ترميني نجرك معايا....

الصمدي مغوبش : قلت ليك عطينا الكود ...شادة معايا العناد.....

حلا عصرات عينيها من الدموع و البول قربو يزهقو ليها....عطاتو الكود بالدموع و الرغيب و المزاوكة يطلق منها....!

دخل تيشوف فالتصاور لقى فعلا مامصورة والو كانت باغي يتأكد و يشد الضد ...كيدوز تصاورها وحدة بوحدة و كل مرة بوز فشكل....وهي عقلها قرب يخرج....!! تتقول غي يغتاصبها و يرميها من تما....هادشي من اش خايفة حسات براسها طاحت هاد المرة و مايفكها حد اذا خرجات عينيها...

الصمدي طلع ليه فالراس غواتها : بوزات الحمار عندك ......

رجليهم بجوح كيتفلتو مع الحجر غي اذا فقد هو التوازن يطيحو بجوج ...

_ عطيتك الكود و طلبت منك السماحة...خليني نمشي ........

الصمدي كيشم في شعرها و يزير على جنابها ...: اولى دفلتي و الثانية سبيتي....الثالثة ثابتة...اذا لاقاتنا الطريق غنديرك فبالي احلي حلاوة .....

حلا تترعد بالخلعة : لاااا والله مانعتب طريقك ....ماتشوفني مانشوفك....وااله ماتعاود تشوف كماارتي.....غي خليني ...انا فيا القلب...غنموت دبا...انا حاسة بالموت....

فك يديه من على خصرها...جاتو على كانتو و عجبو اللعب معاها ...منها يتلف راسو من المشاكل لي غاطس فيها... ...رجليهم بجوج كيزهقو ..غي فكها ...طلعات على ركاببييها تتحبو و ترعد....باغية غي تفلت و تهرب...تتزرب الدبانة اذا دازت من حداها تترعب و تقفز ...جا يحط يديو عليها عقدات حجبانها و دفعاتو من عليها بحر جهدها حتى فقد التواازن ...و تكركب كي الكورة....راسو طاح على حجرة ....طاح طيحة خايبة و قاصحة خلاتو يغوت بصوت عالي....

دمعو عينيها و تفافات طلعات تتحبو و تترعد ....جلسات فالطريق تتغوت و تبكي كي الحمقة ردات النفس تتهدن راسها

... ناضت تتجري ماعاودات شافت فيه و لا سولات فيه.......! باغية غي تفلت و تهرب من تما.....

_ انا *بة ...انا يماهم د الق**بات.......قتلتيه احلا....مااات.....ياربي ياربي نكون كنحلم....

الخوف و الرعب و عقلها كيفكر في شلا حاجات...وقفات فنص الطريق....مشوطة بالعطش....و رجليها بالشوك عامرين.....طاح فبالها تليفونها و خرجو عينبها و عقلها كيفتي عليها...

_ غنمشي للحبس....غندخل للحبس...غيجبرو تليفون ديالي عندو يقولو انا دفعتو ...ماعرفتو مات ولا تهرس....

طاحت فالارض تتغوت ...و تبكي...! ترجع و لا تكمل طريقها....! تتوصل للنص الطريق و ترجع...

حتى لقات راسها راجعة فين كانو....طلات عليه بين الشوك و الحجار كيبان غي هو مطيح ضحم الجثة....صوتو مقطوع ... كون ماكانت الحجرة كون طاح فالواد....!

_ ...ماشي انا دفعتك...والله ماانا......ماقلت ليك قرب مني ولا قيسني...قلت ليك بعد مني....قلت غتندم.....و دابا مااتعاود تلاقينا الطريق ....

مسحات عينيها من الدموع ماعمرات غي وجهها بالغبرة...الشوفة مضببة ليها بالدموع....مسحات وعاودات...كتقلب فين تليفونها...!

حتى قشعاتو ....هزات الحجر و بدات تتضرب عليه باغياه يطيح فالواد....! تضرب و تعاود......حتى طيحات تليفونها فالواد.....! عاد رجعات بالور ...تتجري و تكركب بالحجر و تعاود تنوض....

الغبرة و العطش و الشمس ....حالتها كي الحمقة فعلا.....!! لا منظر و لاعقل.....!! كي الحوتة مدغملة فالطحين قبل ماتقلى .....

بقات تتجري تتجري ...حتى وقفات حدا العين نفسو ...! مافكرات جوج مرات شرباتو حتى بردات و غسلات وجهها ...عاد رجعات فيها الروح ..!

جلسات تما طالقة رجلييها تتسوط و تنهج....حتى بردات و قلبها مابقاش يدق بالجهد....!

عاد ناضت متبعة الطريق الضيقة ...الديور تشابهو ليها....! قشعات فوطة حمراء منشورة حدا الباب ..عرفاتها هي....! الباب تتبقى محلولة حبسات و دخلات....! شافتها حنان عينيها خرجو....

_ حلاا فين كنتي...مالك...

حلا يديها مزال كيترعدو : طحت غنموت بالخلعة....ماحاملة نبقى هنا دقيقة...يلاه نمشيو بحالنا دابا....كرهت هاد البلاصة....!

حنان تخلعات : جلس جلس ...جبتي الحوايج تبدل...

حلا شوية و تسخف : لا ماجبت والو ...

حنان : انعطيك جلابة ديالي غسل و بدل عليك غنمشيو بعد العصر ....

غسلات و نظفات و بدلات بلا ماتعيب و لا تنكر....! باغية غي تخرج و تبعد من تما....! داز عليها نهار أسود....!

بعد العصر ...هزو حوايجهم و خرجو...!

شدو الطريق على الرجل حتى وصلو فين حاطين الطنوبيل ....! قدام جوح طنوبيلات اخرىن ...وحدة مغبرة مركونة تما قرن وحدة مريسدييس بابها مفتوح ...فيها الصمدي مرجع راسو اللور مقصح مكيحركش راسو ..و قرعة د الماء باردة فدييه....!

كريم واقف قدامو كيشوف فيه حابس الضحكة كيحرك يديه قدام وجهو : شحال هنا....حسب شحال...

الصمدي مبرد : أولى فالتة و الثانية هانية و الثالثة ثابتة....

كريم : نتينا جبدتيها

الصمدي كيردد حملة وحدة فقط جاتو الدوخة : درتا فبالي ...

___

ركبات حلا اللور مربعة يديها و مركنة....ساكتة و صوتها مقطوع.....دوزات الطريق كاملة ساكتة....! حتى رتاحو فدار عائلة حنان...حمعو حوايجهم و جا وراهم رضا...ركبات فنفس السكات و الهدوء....!

وصلو لدارهم مع 12 د اليل ...! دايخة بالنعاس...طاحت فوق ناموسيتها مكملة نعاسها....!

ليلة و نص نهار...فاقت على صداع و ضحك خلود و خالتها....!

جلسات مقندشة خارجة من البيت شعرها طالع فالسماء....

_ صبحاتو لله....

حميدة خارجة من الكوزينة تتنكر : زيد غسل وجهك تغدا ...

حلا كملات طريقها للحمام...ماعندها خاطر...! دوشات و بدلات و جلسات معاهم تتاكل لقيمة ورى لقيمة و عينيها تيدورو باين للعمى تتفكر و بالها مامعاهاش....

حميدة غمزات حنان : شنو مالها جاتني ماشي هي هاذيك...عندك تغطي عليها..؟

حنان على نيتها : والو الخالتي مادارت والو ...

حلا شافت فحميدة بنص عين : طاحلي التليفون ....

حميدة : اوا الله يخلف ....دايما مضيعة تليفونك...

حلا تنهدات و قطعات الحس...! تترمش و تتسهى و ساعة ساعة تنهد ...تتبان درويشة غي لي مايعرفها....! حتى ناضت واقفة وقفة وحدة خلعاتهم.....! دخلات لبيت الصلاة صلات و شدات القرأن تتقرا سورة البقرة ...و تتدعي ...

_ ياربي مانعاود نشوفو و لا يبان في طريقي ...ياربي ماتعاود تلاقينا الطريق....ياربي تسمحلي و تغفرلي...

شدات القرآن و بدات تتجود بصوت جمييل كلشي تيشكرو ...! سمعو عبد الله و استغرب...

_ الله أكبر حلا هاذي ؟

حميدة باستغراب : مولفها كتهز القرآن من رمضان لرمضان ...

عبد الله عجبو الحال ...: الله يهديها.....

ظلات تتجود وهوما تيسمعو عليها ساكتين ...! حتى سالات و خرجات من بيت الصلاة ...شافت فيهم و نطقات...

_ غنصوم هاذ السيمانة كاملة ان شاء الله و غنصدق من حوايح ديالي العزاز عليا للمساكين....انا نويت ...

حميدة بشك : الله يقبل ابنتي حتى انا نصوم معاك....

حلا كدور عينبها تتفتف : اميييين ....

عبد الله عجبو الحال...: اوا الله يرضى عليك ...

سلتات حلا من قدامهم و ربعات فوق ناموسيتها رافعة يديها للسماء كدعي و تعاود غي ماتعاود تلاقا كمارتو ....

_ ياربي مايكونش مات و ياربي ينسى كمارتي و مايعقل عليا و تبعد طريقو من طريقي ....مايعرف لا حلا لا طريقها.....

بقات شادة بيتها ثلاث ايام....الصلاة و الصيام و القرآن....! مابقاو يسمعو صوتهاو لا نكيرها....مع مولفينها تتقنط تتجبد الهدرة على بنادم و تعيب فيه....! صوتها تقطع....!

عبد الله كيعجبو يشوفها هكاك ...مركنة وكتصلي فالوقت و داخلة سوق راسها ....منظرها هكاك خلاه يرضي عليها و ينسى شنو حصل عليها.....!

شاف فحميدة و تمتم : حلا دارت عقلا و استغفرت الله شكون انا مانغفر ليها.....

حميدة بفرحة : الحمد لله ...فكر اعبد الله حلا ماشي صغيرة يضحكو علينا الناس ملي يعرفو شادين عليا الخروج وهي فهاد العمر ....

عبد الله تنهد : رضا تزوج و غادي مزيان فخدمتو ...خلود دارت دارها و خدمتها مخيرة مع راسها ...نسيم دارت دارها و وليداتها حتى هي ...حلا هاز لها الهم لا قراية و لا زواج و لا مستقبل ...الجلسة فالدار لا صنعة و لا حرفة....

حميدة علات حواجبها : لا لالا ...هاذيك خليها فالدار...حتى يجي رزقا ....حلا و المشاكل خووت اعبد الله ...عندك يقول عقلك دخلا معاكم فالمحل ....

شاف فحميدة بنص عين :

_ حلا ماشي وحدة بهلة و نية احميدة ...غندخلا غي خدامة بحلا بحال البراني ... نشوف و نحكم بينها و بين رضا و خلصتا غنعطيها ليها بحال كنخلص الخدامين اخرين ...وهي شطارتها لحقات لخوها و شفتها تستاهل المحل ديالها .....

حميدة لوات فمها ماعاجبها حال : نسيم تسمع عطيتيه ليها تجعر اعبد الله ...

عبد الله : نسيم كيعجبا تشد الضد هي ماعيناشي فالتجارة و ماعندا شطارتها ..و هي بعيدة كيف غدير ؟ مغنظلم حد احميدة كون هانية ولادي كاملين هاذوك....عندي كيف الولد كيف البنت ....و الخير موجود الحمد الله ....

حميدة مامرتاحاش : او نتينا تعرف اعبد الله....!

دخلات حميدة لبيت حلا لقاتها هازة تليفون جديد عاد خداه ليها عبد الله....علات فيها حاجب و نطقات....

_ باك غفر ليك هاد المرة و عندك تبع شيطانك الزلايلية.....

حلا هزات عينيها فيها كتدوي بالسكات و بالثقالة ...

_ هاد المصطلح خايب اماما ماتبقاوش تعاودو انا ماشي زلايلية ....

حميدة بعجب : مضروبة بمغرفة يابنتي ولا شنو....سمع نقولك....باك غيخدمك معاه مغتبقاشي جالسة بلا شغل ..تحرك و خدم على راسك و شد لسانك شوية.....

حلا عينيها تيخرجو القلوبة....ثبتات راسها بزز وحبسات بتسيمة فالتة ليها ....

_ حتى نسالي صيامي عاد غنبدا ...حتى العمل عبادة ...لكن انا نويت و خصني نكمل ....

حميدة ميلات شفايفها بشك : اوا الله يقبل ....

غوات رضا خلى عبد الله يعقد حجبانو و يرد عليه بصرامة...

_ حتى تولدهم نتا عاد تحكم فيهم....

رضا مغدد : اشمن شطارة و لا فطنة كتهدر عليها الوالسد....كتقارني بحلا و لا شنو ؟ جمع بنتك فالتة ...

عبد الله بالغوات : رضااااا ماترفعش عليا صوتك و حتااااارم راسك ...

شهقات حنيدة و تدخلت مرعوبة تتتهظن السوق...حنان جرات رضا من يديه تتهدن فيه...

_ رضا نعل ااشيطان كتغوت على باك....

جراتو لبيتهم....تتسايس نعاها ..هادية و حنينة....! هو كي الديناصور كينفخ و يسوط معصب....مارضاش علاش يحطو بمقارنة مع حلا...كيهز رحليه بالزربةو يضحك بالغدايد .....

_ تغلبني بنت سبع شهور......

حنان بقلق...: رضا بركة من الاعصاب....

حميدة جلسات حدا عبد الله تتهدن فيه...

_ رضا عصبي هيدا عمرو غوت و لا رفع صوتو نفسو حارة و مغياار كتعرفو .....

عبد الله جانع قبضة يديه مقكب جبينو و ساكت....! و حلا قاطعة الحس كطل من الشقة د ااباب ...تتسنع و تشوف و دور عينيها دايرة تبسبمى مسميمية....

_ كتحكرو بنت سبع شهور ...وخا على حسك ياولد ميمتي.....

بعد أسبوع....!!

صابحة ناشطة...منورة فوجهها ...و الضحكة فالتة ليها....! حيوية و راشقة ليها...! ضاربة الكلاس و رولكس فييديها و اسكاغبان ماغون..شعرها مسرح قصيصر و رطب كي ابنات كوريا ...! كلشي تيشبهوها ليهم...! دارت بحالتها و تأنقات ...! و خرجات تتلوى عليهم و تفرنس ...دايرة راسها سبدة اعمال...

_ صباح الخير ماميتا....غنفطر دغيا دغيا و نطلع لتطوان عندي الخدمة....

خلود شافتها ميقات فيها...: سارقة الساعة لنسيم......

حلا تتشطح رموشها و تعوج : هي صدقاتها عليا...شافت ختها مسكينة ماعندها ريال و دارت فيا الخير ...

حميدة شادة راسها حرقها : كون غا صمتي حتى اليوما يهدا داك اللسان شوية....عمل عقلك و تركن و ماتحشمشي باك...

حلا جلسات دايرة رجل على رجل ..تتدوي بتعقل : لا ماميتا....انا تبدلت...مغندوي فحد و مانتعاير مع حد...عييب عليا اذا عيبت شي حد و لا دويت عليه...حتى الحاج مفضل بيناتنا الاحترام...كيبقى راجل كبير ..و انا مامربياش اذا تعايرت معاه....

خلود مغوبشة ماراشقـاش ليها : تيقو هاد الحية ....

حميدة : شش راجلك و رضا و عبد الله ماجيين يفطرو سكتو و حشمو ...

شدات خلود فمها و سكتات...! انضمو ليهم البقية و جلسو تيفطرو كـأي عـائلة مغربيـة....!

حلا كدور عينيها و تفرنس ...شربات من العصير ديالها و شافت فعبد الله تتدوي بالهداوة...

_ بابا كان خصني نقولك ..بغيت تكون عندي الادارة د پاج انستاغرام ...

عبد الله : و شغنقولك ...خاك رضا ليمكلف بيه...براسك معاه...

حلا وسعات بسمتها حتى بانت ليها ضرسة العقل... شـافت فرضا تترمش...

_ خويا عطيني انا نتكلف بيه....

رضا مخنزر : لا ...

حلا تمحات بسمتها تتدور فعينيها : و علاش ! ثلاث سنين و نتا فاتحو و ماجمعتي حتى 50k كي الناس...

رضا بين سنانو : باغيا طير ولا مالك...الپاج ماعندك دخل فيها....

بشوفة مسمومة قالت ..: غندير كونط اخر ...

رضا بعناد : كتخوري...

عبد الله عقد حجبانو : مابقات حشمة هنا !

حلا هزات صاكها و ناضت معلية حاجبها : غنسبقك أنا ابابا ....بسلامة و بصحة فطوركم....

حميدة : بسلامة...

حلا : اه اماما ملي تجي نعيمة تعاونكم فالشقاء ..عطيها الحوايج ديالي لي قلت غنصدقهم....مطويين و معطرين على ناموسية ديالي...قولا باقين جداد و عزاز عليا لبستهم غي مرة وحدة....

____

بكل أناقة و جمال....خرجات من الدار...بنفس جديد و عينيها تلمعو بتحدي....!

غادية فالشارع ...تتجلب العين كي المغناطيس..

و عاد اليوم منتأنقة بانت ناضجة و رزينة....!

دازت من قدام ورشة النجارة ماعرفات مولاها شكون عاد تتجهز ...شاف فيها واحد و رمى ليها الهدرة...

_ المشة....

شافت فيه بنص عين و ردات بلا ماتحس جوابها المعتاد

_ هي يماك....

قالتها طلعات معاها الندامة ملي تذكرات اش وقع لبها....!زربات فخلفتها و دارت نظارات شمسية تتمتم...

_ استغفر الله...شنو دارت لي يماه مسكينة ....لا احلا لسانك جمعيه....جمعي لسانك.......

ناصت خلود تتجمع مع مها بعد ماخرجو الرجال ...

_ فين الحوايج لي قالت حلا غتعطيهم لنعيمة ...

حميدة تتمسح يديه : واه فكرتيني نشوف سنو عاطية ديك المصببة....

دخلو لبيت حلا شافو الحوايج مطويين على حقهم و طريقهم محطوين حنب الناموسية....!

جلسات خلود و هزاتهم تتشوف....عقدات حواجبها و غوتاات حتى قفزات حميدة...

_ بسم الله عليك مالك...

خلود مجننة : الكلبببة د حلا هي لي طلعات سارقة ليا شوميز وردي دياااالييي...( تتهز فالحوايج مصدومة ) هاذي ديالي و هاذي و هاذي د نسيم عاد شراتااا....القردة باغية تصدق بحوايج مسروقين....

حميدة راسها ضرها بالصداع...: الناس والدين البنات و انا والدة المساعر...

خلود مغوبشة : و هاذيك حية كان خصكم تسمووها الحية ماشي حلا ...حلا بزاف عليها ......ماشة تصدق بحوايج ماشي ديالها....و انا كنقول مال هاد التالفة مشعوطة و لا شنو وفع ليها....

دخلات لعندهم حنان حتى هي تتجمع الحوايج : صافي دابا و هي حات نعيمة..عطيهم ليها مسكينة......

حميدة تعصبات حتى عيات جاتها الضحك : وهي مسكينة ماخدامة ماردامة غا سمح ليها هاد المرة....

خلود تجننات : و هاذيك دابا تصدمكم ماكاين لي يعرفا قدي و شحال بخيلة على الفلوس....و هاذيك جامعة ثروة ...غا تتبوهل عليكم.....

حميدة تتضحك : و بحال والو ..! ملي كنتو صغار ...فالعيد عبد الله كيعطي ليكم خمسين درهم لواحد....نتينا كنتي تصرفيها فالحانوت غا حلوة و شكلاط و نسيم شي كيطيح ليها و شي صرفاتو ...و هي كتخبعهم فجيب واحد السليب كانت تتلبسو عندو الجيب كتحماق عليه ..كتخبع فلوسا تما ...! و تخشى وسطكم و تسرق منك و من نسيم و تحمع كثر منكم...و فلوسا هي مخبعين....! حتى نسات ديك خمسين درهم تما و فزك ليها السليب بالماء....صرعاتنا بالغوات ...فلوس ديالي فلوس ديالي فزكو ....

خلود غلباتها الضحكة : و هاذيك بخييلة على فلوسها...و قولو خلود قالتها ...

حيدات الفيسط و بقاات بشوميز فالزهري ...! تتحرك بعملية و برشاقة...! عطرات المحل و حطات عطر غبار الذهب على الجنب و الاكسسوارت ديالو ..داكشي مذهب و متول ...! حتى سالات و جلسات فاابيرو ديالها دايرة رجل على رجل...! و عينيها فالتليفون....فتحات كونط استااغرام اخر باسم الفرع ...! معلية داك الحاجب مخشعة....

_ دابا نشوفو اسي رضا....

تكات على الكرسي تتفرنس...: و دابا تمسكن حتى تمكن....

داكشي لي دارت....بلوكات عائلتها من الفايس و بدلات سمية الفايس ديالها و دخلات للقروبات تتنشر ليان الاستغرام....! من قروب لقروب...ماترضاش تنشر و تسعى ابوني بسميتها...!

من قروب لقروب...شي بلوكاها و شي سايرها....! وهي مخشة تتنفخ ..عقلها خدام كيفتي عليها فالتحرميات ...! بلا عجز ...دخلات لعضوات القروب وحدة بوحدة تتصيفط ليها بريفي ليان كونط انستا ...! الهدرة حلوة و التحلوين على الجهد ...! يديها عياو و شيطانها مابغى يهدا......!

ضيقات عينيها فالتليفون تتختارع القصص من راسها...و تحط للبنات...

" عرفتو البنات اليوم دخلت مع خطيبي عند هاد المحل تيبيع ااذهب ...فيه واحد التيتيز خرجلي العقل....بقيت كنمشي غي نسول و مرة كنشري من عندو ...هو كيحمق و داكشي لي كيبيع فن ذهب 18 كارا ...و كيتعامل و هدرتو فنة حرش....حرش...بصراحة تزعطت فيه دخلت صيفطت فباج انستاغرام و جاوبني ناري اابنات حسيت بقلبي غيوقف و انا مخطوبة ....ماعرفتش شنو ندير...."

نشراتو فالقروب و حطات التليفون تتسوط

_ يدي عياااو ......حاني الجوع ..!

هزات عينيها فالمتعلم بنظرة شك

_ اجي نتا ...اجي...

مهدي : شنو اختي حلا...دك ااشوقة عندك كتخلع...

حلا تتحرك صبعها معفرة : دابا انا الباطرونة عليك .....ماتبقاش تزنزن عليا بسي رضا ما سي رضاا....من دابا الفوق....مادموزيل حلا و غيرها ماكاينش.....فهمتي اسي مهدي...و لي سمعتيه خزنو عندك....

مهدي معلي فيها حاجبو : و اري شي اربعمية درهم....

حلا ميقات فيه : سير سير جبلي ماناكل ....دير علاش و نعطيك اربعمية درهم....!

سكتو ملي دخلات الكليانة ....! ناضت حلا استقبلتها ...دايرة ابتسامة روينة...كانت مراة انيقة و زوينة...شافت اناقة حلا و عجباتها ...جاتها ذواقة و زوينة ...!

المراة : السلام عليكم...

حلا : و عليكم السلام احبيبة ..تفضل جلس....

المراة : لا لا الحلاوة خصني غي نسقسيك ...و نشوف شي سرتلة ذهب ...

حلا عينيها تيبريو ...: اااه ..ليك نتينا ياك

المراة بابتسامة : اه ....

حلا جبدات ليها واحد الموديل : اوا شنو غنقوليك داك اليد عندها يجيو معاها هاذو فيها ثلاثة ...18 كارا ....خداتو صاحبتي حمقاتها و عاىلتها حتى هوما بقاو كيسولوها منين و بشحال .....

المراة عجباتها هزاتها بيديها تتسوف : كتحمق ....و الثمن شحال ؟

حلا تتفرنس : اوا شنو غنقوليك ....12500 درهم .والله الا كانت 13500 ....

المراة بحسرة : حمقاتني الصراحة...

حلا مابغات تخليها تخرج خاوية قرات ملامحها ...: بالحق بلاتي....والله مانخلي داك الوجه يعبس....( هزات واحد البراصلي همااوي تعشقو من الشوفة...) عندك العرق زرق هذا تخلق غي ليديك سبحان الله.......

المراة عجبها : و هذا عاود بشحال صدمني....كيحمق...

حلا : هذا غي 4500 درهم ....ليك نتينا 4300 درهم....

المراة تتشوف فيه بعيون متفصحة ...: حتى 18 كارا ...

حلا : اييه حتى هو ....

المراة حطاتو و عينيها تيخرجو القلوبة : وخا الغزالة نمشي نتشاور مع مول الدار و ندوز لعندك ....

حلا تترمش : وخا الغزالة ديالي ...اجي نقوليك عندك انستاغرام....دخل لعندي لانستا مرحبا بيك تما سولني وشوف موديلات و كنحاوب على ميساجات كاملين....وري لمول الدار التصاور و تشاور معاه ...و وري لعائلتك حتى هي ...لي ماشرا يتنزه...

المراة ضحكات عجباتها حلا : وخا هي لي ماتعاودتش....

دارت ليها ابوني وهي تتشوف....و مامشات حتى شماتها حلا من عطر عبار الذهب...و خرجات من المحل تتفرنس....!!

عاد ساطت حلا و ترمات على الكرسي تتسوط...

_ شحفت .....

دار عيشة الكتامية تنورات ...ملي طل عليهم الصمدي بديك الطولة تتجيب الخلعة كثر من الاعجاب .....!داير القب على راسو سيمانة و مزال كيحس بالضربة فراسو ...! ملامحو حرشة

استقبلاتو عيشة الكتامية تتضحك : تعال المرضي...تعال....فاين غابر و فاين غاطس علينا ....

الصمدي داير ليها الخاطر...باس ليها راسها ...و جلس مفرش يديه و رجليه ..كيدوي مبسم

_ و كييف الصحة اعيشة ...عاجبك الحال راضية قانعة ...تعاود تجبد السخط ؟

عيشة الضحكة فالتة توحشاتو و ماتهنات حتى جابتو لعندها ...

_ عاد رتاحيت و مانرتاح مزيان حتى تسمع مني و تزوج هاد المرة و الخيار خياري...

الصمدي حك حاجبو الكثيف عاطيها ابتسامة...

_ عولتي ...

عيشة بصرامة : تزوجتي مرة اولى على ذوقك و طلقتي و الثانية طلقتي الثالتة ثابتة ..اذا ماعجباتك يالمرضي ديالي مانيش عيشة الكتامية ....

الصمدي هز بنت خوه صغيرة كيتلف فيها ..كيبوس و يعجن فيها حتى بكاها و طلقاتها بغوتة عاد طلق ليها تمشي صدعاتو فراسو ...

_ غواتك كبر منك...

عيشة عاقت بيه كيتلف...: عبد الصمد انا يماك كنهدر معاك ...( بصرامة ) حيد داك القب ...

عبد الصمد حك لحيتو الخفيفة تيعض فكو من الداخل ...بزز منو حيد القب و دار فيها شوفة تحدي...

_ بغيتي نتزوج ؟

عيشة : و شنو كنخبر عليك من الصباح...كيفاش بغيتيها نتا غا قولي المرضي و نجيباليك كيما هي ...

عبد الصمد معلي حاجبو فيها مريض مع راسو ماراشقاش ليه ..ماشي قد عقلها و صافي ..جات حلا بين عينيه

_ بيضة ...شعرا كحل قصير ..عيننين المش ..نيميرو 37 فرجليها ...و شامة الزين بين جبل و جبل ....

شافها تتشوف فيه موسعة عيينبها ...هاز حاحبو و نطق...

_ قلب معايا عليها و لي بغيتي ديرا ....

ناض واقف سالت ...و هز بنت خوه كيبوس فيها و يعصبها غي كتبكي كيغوبش و يحطها ماعندو ماغوات دراري الصغار......

مخلي عيشة قارمة كدور فعبنبها....: كيفاش شامة الزين بين جبل و جبل ....

علات براد اتاي حتى للسماء كباتو سخون مشحر و هزات الكاس حطاتو قدام ختها رحيمو ..

_ هاك أتاي بالرزة ...الفقصة دعبد الصمد نبردا بأتاي ...

رحيمو عاقدة حجبانها بتفكير : انا ديك شامة الزين بين جبل و جبل مابغاتشي تفهملي ...

عيشة قارنة حواجبها : عبد الصمد دار هيدا باش يسكتني و نقلب عليه ..

رحيمو تتلوي فمها : اوا قلنالك زوجو لنجوى العايلة ديااي قلتي متقنعوشي ....

عيشة يد فوق يد زامة شفايفها مكمشاهم كثر ماهو مكمشين..

_ عبد الصمد معشوق فالعزبة فايتة ثلاثين ..مراتو اولى كان عندا واحد و ثلاثين و الثانية خمسة و ثلاثين شنو كيعشق فيهم الله اعلم ....ماسمع مني ملي قلتلو تزوج بنجوى صغيرة و غزالة و بنت خالتك ...

رحيمو معلية حاجبها : و هو ماقالكشي فااشروط تكون فايتة ثلاثين اولا .....

عيشة حجبانها قراب يطلو على السماء : عبد الصمد انا عاجناه بيدي ارحيمو خصو نقلب عليه و تلفني بهاد الهدرة ..مانكونش عيشة الكتامية اذا ماجبتلوشي هاذ مكرجة الشعر ...

رحيمو تتشوف فاافراش بنظرة مسمومة : فاين غتجبرا اختي عيشة فاين ...

عيشة ضيقات فيها عينبها مغوبشة : فبالي وحدة الزبن زينة و حاااادكة....وهي لي باقا ليماها....

صفاء جالسة تتوكل بنتها و ودنيها معاهم غي سمعاتها اش قالت...رمات عين لسكينة تتغمزها ...تغامزو بالاعين و حبسو الضحكة حيت عاد كانو كيهدرو عليها ...

رحيمو بغيرة : و شكون هاذي ماقلتلي والو ...

عيشة نعتات ليها للدار حداهم ...: الباب قدام الباب ...

رحيمو عينيها غلاو بالفضول : عندك صورة ديالا ..وريوها لي فين هي ...دابا بغيت نشوفا ...ياك اختي عوالة و ماقلتلي والو ختى لدابا ..كون ماجيت مانسمع والو ...

عيشة حواجبها تلاقاو : كانت جالسة فاين جالسة دابا نتينا ...تمااا....

صفاء لسانها فلت ليها : و تشوفها اخالتي رحيمو غزالة غزالة ...( كدور عبنبها لعيشة تتسمع ) شعرا كحل مقطع و بيضة و عينبها ملونين بقات ناقصة غا شحال كتلبس ف حلا و شامة الزين بين الجبل و الجبل...غا حشم يقول ليمة عيشة شامة الزين بين بزولها .....

رحيمو لوات فمها : شلا زين هذا ....ياك هو كان كيعجبوه الزعرات و سالف العودة شنو عشق فالشعر مكرج و كحل ....و سحال فعمرا هاذي !قارية ! خدامة....

صفاء جات تدوي وقفتتها شوفة عبشة ..رجعات اللور و حنات الراس ...

عيشة حتى هي كتعرف ولدها كيعجبو السوالف و النساءلي تزوجو بيهم بجوج زعرات ....عليها كانت تتغوبش ملي تتشوف شعر كحل ...حيت كلشي فيها زين و متأكدة غتعجب ولدها حتى لداك الشعل قصير و كحل ...!

شافت فرحيمو و نطقات ..

_ سمعنا من يماها عندا 26 سنة ...خدامة و لا باقا كتقرا مافراسي انا ...

عاد المرة سكينة لي نطقات : سمعت ايمة عيشة خدامة مع باها عندهم محلات الذهب فتطوان و رنكون و كاستي ياخو و عاد قبيلة شفتا خارجة من الدار ...و شبرتا هدرة مع حليمة الموظفة قالت شادة محل تطوان ...

عيشة سمعات الذهب عينيها برقو عشقها الذهب ماتشبع منو ..دوراتها فراسها و سكتات معلية دوك الحجبان و يد فوق بد فحجرها......بقات شحال حد ماعرفها فاش تتفكر و لا علاياش عوالة ...حتى نطقات و عينيها فااسرحم المفتوح على داره سي عبد الله

_ اذا كان عندا شعر كحل قصير و بيضة و عينين المش شنو بغا بشامة الزين بين بزول ...هاذيك هالة نزلتا فبالي و مانكونش عيشة اذا ماكانت عروسة عبد الصمد ...

سكينة بتردد : حلا اخالتي ماشي هالة ...

عطاتها عيشة شوفة قاصحة خلات لسانها يتجمع و تركت حدا صفاء ساكتة....! فوجهها هاديين مساكن و في ظهرها كيساايوها غي بالدعاوي فيها باغينها غي تموت و يرتاحو مع رجالاتهم....!

ناضت عيشة تتهز داك القاع عريض و مزال شادة فراسها ...و صحيحة ..نظرتها تتقتب و لسانها كيذبح كثر من الموس....!

خلات رحيمو جالسة تتشوف فالدار و الغيرة غتاكلها و تخرح عليها....السم تيجرب فبها حتى هي فات سم عيشة....!

نقزات عندها سكينة كتدوي بهمس...

_ عرفتي اخالتي رحيمو اذا مشى الصمدي تزوج بهاذيك حلا ماغيبقالو عقل بزين لي فيها ...خالتي عبشة ماعارفاشي هيدا كتعطي ولدا لحلا بالبارد ...

قفزات مخلوووعة ملي سمعات غووتة عيشة وراهم واقفة فباب الصالون تتنفخ حجبانها معليين معصبة ...

_ عبد الصمد ماكتحكموشي المراة ....عبد الصمد رااااجل ...انا والدة راااجل العزري العزري ماشي العويلة ...و هاذيك هالة غنسرحا بيدي بحال عجبنة المسمن .....( خنزرات في صفاء ) فاينو الخمار ديالي....نوض جيبوولي ...

صفاء نقزات واقفة جابتو ليها: يمة عيشة هاهو هاهو ...فاين ماشة ....

عيشة باقية مغددة من هدرة سكينة...تتدوي بالجهد. و حجبانها ملاقين ملامحها تيجيبو النفور...

_ عيط لسعيد ....

جالسة منشطة مع راسها....! تغدات و نظفات و عطرات المحل مرة اخرى ...!

جلسات دايرة رجل على رجل ...و هزات تليفونها تتشوف المنشور لي حطات فاين وصل...! لقات اابوسط عامر باغضبني ..و تعاليق كثيرة

..شي سبها ...و شي سولها شحال فعمرك و شي كسسول فاين جا المحل ...فاينو الليان ؟ ماخدمليش الليان ؟ ..فاين نتي ؟ ..كاين الفرع فكاازا ...!

استحملاات داك الهجوم و بلعاتو ...غوحات دوك الشفايف و تكات على الكرسي تتصرد اليان لي طلبوه....!

الانستا من عشرة الصباح للعصر وصل 300 ابوني ....!

هزات براصلي انيق و زوين لبساتو فيديها جاوها فن مع يديها بيضين و مصبوغين نقيين....صوراتو و دوزاتها فليزابليكاسيون صاوبات الفوطو مزيان كاليطي واعرة و نشراتها ...تتصور و تنشر و تعمر الكونط بالموديلات.....!!

دخل عندها المهدي تيتحايل عليها ...: ختي حلا محتاج فميتين درهم الواليدة هابطة لمرجان خصني ندور معاها....

حلا مخشعة مع التليفون...تتجاوب بلا ماتعليى عينبها فيه : مادموزيل حلا ....

المهدي تيشوف فيها مغوبش من دايما مكيحملهاش....نهار كتكون هنا نهارو كيدوز كحل ....

قرد حداها كيسايس : و ختي حلا والله العظيم محتاج ميتين درهم يرجم جدك ....

شافت فيه كطلعو و تهبطو ...لوات فمها وردات...

_ مصاحب امهيدو ...

مهدي فرنس و حك رقبتو : وااه....

حلا تتضحك : اويلي على البرهوش....كيحشم....

مهدي تطلق لسانو : والله اختي حلا كنبغيها و ساكنة فالقلب ديالي....

حلا علات فيه حاجب : دابا غي بيني و بينك وبلا دوران....باغي الفلوس لصاحبتك دوخها بزعزعر عشر ديال و لا ليماك....

مهدي حصلاتو بقى غي كيتلف : و نص للواليدة و نص للصاحيبة....

حلا ميقات فيه و هزات صاكها مخرجة بزطامها : و مالك ماتقولا نيشان البرهوش ...فاين هي الرجولة ...و لايني فكر رضى يماك فات رضى الصاحيبة ...( جبدات ميتين درهم و عطاتها ليه ) هاذي انا عطيتالك مامحسوباشي من الخلاص...

مهدي فرح و كمش داك الزرقة قبل مايتنادم معاها الحال : سيىر اختي حلا الله يفرحك ...الله يزوجك ...

حلا تتعيب فيه : و سير البرهوش شري سمطة لسروالك ....و شري الريحة و دور بالحالة....شكون هاذ الهبيلة لي مصاحبة معاك....مكتقنع حتى للشوفة....

مهدي كيضحك : لسناك كيحرق ....هاهو ماشي ....

حنات عينيها لتليفونها تتكمل شغلها ...جهد عشر دقائق ...حتى علات راسها و قشعات لالة عيشة الكتامية داخلة و وراها ولدها سعيد....! برقو عينبها و فرنسات حتى ضهرات ضرسة العقل....عرفات القضية فيها بيعة صحيحة....!

ناضت لعندها تتصاوب شعرها و تفرنس....طالقة عليها حلاوة لسانها...

_ لالة عيشة ...مرحبا الظوء تجهد و الذهب قيم ملي دخلتي ياسبحان الله ....مرحبا

عيشة هزات حاجب كدور عبنبها عليها...حناتهم لرجل حلا دارت شوفة مسروقة و هزاتهم....

_ همم ترحب بيك الجنة ابنتي ...

حلا ابتسمت مع سعيد : مرحبا بيكم جلسو ...تشربو شي حاجة ...

سعيد جا يرفض...سبقاتو لالة عيشة ...تتمشى كي البطريق جالسة و مفرشة خيراتها و مقصحة كمارتها

_ عيييت......

حلا شافت فسعيد و ابتسامة ماكرة على وجهها. : حكمات المحكة ...جلس....

جلس سعيد قدام عيشة...كيشوف فحلا بنص عين و يجمع عينيه....! و عيشة تتعبر رجلييها و تضيق عينيها فيها....حتى نطقات حلا ...

_ شي كاس العصبر بارد اخالتي عيشة ؟

عيشة تفكرات العصير لي حاسبة شرباتو ...: لا مابغيتشاااي....جيت نشري الذهب و نشوف بعيني ...

حلا عينيها لمعو : مرحبا بيك لي حبات خاطرك موجود عندنا...

سعيد بدا يدوي وقفاتو عيشة : بغيت ثلاثة دمالج لعريساتي بثلاثة كل واحد بغيتو يوزن 43 غرام...

حلا ودنيها سخنو و عينيها تفتحو : بغيتيهم دابا اخالتي عيشة ؟

عيشة بنبرة قاصحة : مانخرج من هنا يكونو عندي.....

ناضت حلا بالزرية تتفرنس...: انوريك شكيلات و نتينا ختار و تعزل مع راسك.....

ناضت جابت ليها الذهب فرشاتو ليها فوق الطبلة...داكشي مأنتك و متول ...و عيشة عينيها ماشي على الذهب...على رجلين حلا....! بقات ساكتة و نطقات بدون مقدمات...

_ شحال كتلبس فرجلك اهالة....

حلا استغرابها مامحاش بسمتها ...: حلا اخالتي حلا....انا كنلبس 37 ( كملات بمزاح ) و مرة مرة 38 حتى لابغيتي تفكرينا بشي سندالة .....

ضحك سعيد عاجبو الحال و عيشة عينيها لمعو و توسعو ....! نيشان شافت فسعيد و نطقات بصرامة...

_ عيط لعبد الصمد يجي لعندي و يجيب قياس صفاء ......

سعيد تنحنح و تلف الشوفة...: قياش صفاء مراتي عارفو ايمة...علاش عبد الصمد ...

عيشة زمات الشفايف و دوات بين سنانها عاقت بيه : عبد الصمدي قلع ؟

سعيد تزير : و يمة و ...

عيشة بصوت خافت و نظرة تتخرج النار : سعيييد عبد الصمد فاين هو ....

سعيد شاف فحلا لي تتبسم و تشوف فيهم و حنى صوتو حاصل ...

_ الواليدة عبد الصمد دابا فطنجة عندو الطيارة لاسبانيا....

تحمر وجه عيشة و حواجبها تسلقو السنطيحة مكمشة و زادت تكمشات....زيرات على سنانها و تحكااات مزيااان.....غرسات صبعانها فيد سعيد مبردة فيه غدايدها...و شافت فحلا تتبرد بزز منها...

_ هادشي لي عندك جيب شكال اخرين......

حلا تتفرنس ...ناضت واقفة سمعا و طاعة...

_ ماعجبوكشي هاذوك اخالتي عيشة ..كاين الخير ...لي عشقاتو عينيك حلا تحطو ليك....

حلا تتهز و تحط ليها ...و عيشة مابانش ليها العين على الذهب...عينيها على صدر حلا ...عندها صدايف مفتوحيين و لايني صدرها متيبان منو والو ...! غا سنسلة رقيقة ذهبية تتبري مع رقبتها بيضة ...! عوجات فمها و تحكااات و سعيد حداها معصب...

_ يديرا الصمدي و يحصال سعيد ...

عيشة سنانها تنحكم و تتتزير ...معصبة و باغية غي مع من....! نفخات و تكات على الكرسي د الجلد تتسوط...

_ هالة جيبلي كاس ماء بارد مالك ماعطيتينا نشربو والو هاذي الضيافة عندك....

حلا ( راسمة تبسيمة مزيفة...)

_ وخا الخالتي....لالة عيشة بكمالا باغية تبرد و مانجيب ليها والو ....

حافظات على نفس الضحكة و التبسيمة و اللباقة غي غبرات من حداهم و خرحات لباب المحل جمعات الضحكة ....شافت فواحد البوليسي جالس فوق كريسي محمع مع راجل مسن طلعها و هبطها ..خنزرات فيه و شافت فمهدي

واقف مع الحاج المفضل...طلعات حواجبها و غوتااات معصبة ....

_ مهدييبيي....

مهدي شافها معصبة بلع ربقو ...جا لعندها تيجري....

_ هانا اختي حلا شكاين ..مالك شكون عصبك ...

حلا علات فيه حاجب تتدوي بين سنانها : عندك يقولك داك المبوهل دعقلك يفلتو رجليك مرة اخرى لداك الجبلي ....الجبالة غذارين امهدي سمع مني ...

مهدي بعدم فهم : شنو درت اختي حلا ...

حلا مضيقة عينيها : مانعاودشي نشوفك معاه....جيب لديك الشارفة ماتشرب....

مهدي معصب : هاهو غادي...

ساطت و بردات راسها عاد تمات داخلة راسمة تبسيمة حلوانية تتمشى باناقة و عينين المش لي عندها على ذهب عيشة لي هازة فيديها ...

تمتمات بين سنانها ...

_ كيشفعو ليها غي دوك حبايب قلبي لي هازة فيديها ....حاساهم كيتعذبو فيديها....

عيون حلا ولاو تيخرجو القلوبة...!

و السخانة و اللهبة طلعات معاها وهي تتحسب فالفلوس ...جوج د المليون و نص بين يديها....!

البيعة حضر فيها عبد الله بنفسو ...! تيفرنس و يدي و يجيب فالهدرة مع سعيد ...! و حلا خباات الفلوس و تلوات على عيشة كي الحية....

_ لواه اخالتي عيشة تفكرتي عريساتك و ماتفكرتي راسك تتينا....يديك تخلقو غا يتزينو بالذهب سبحان الخالق .....( كدور فعينيها و تطلق حلاوة لسانها و عيشة تتشوف فيها و ساكتة ) دوك لي دايرة فيديك قداامو ..مابقى حد تيديرهم...ها الجديد دابا....بدلي و تهلاي فراسك...راه اذا ما فكرتي نتي فراسك حد مايفكر ليك...فرحتي عريساتك فرحي يديداتك.....

عيشة غي تتشوف و تعبرها ...: مرة اخرى اذا بغى الله....

حلا تتضحك و ترمش : وخا ان شاء الله ....فرحت و فوج قلبي معاك اخالتي عيشة ....

عيشة هزات ذهبها و نطقات معلية حواجبها : مم حتى الفلوس كيفرحو ...

حلا تقول لي قالت تتفرنس ليها و تزيد ..: بلاتي دخلتي حتى لعندنا و ماعطرتي راسك ...بلاتي ندير ليك شوية...

عيشة مغوبشة : شنو هذا...

حلا تترش ليها و تبسم : غبار الذهب ....

عيشة معلية حاجب : همم .......

خرجات عيشة مع سعيد تتميل معصبة و مقندشة....! وصلات للدار ...تتنكر و تعلق على ابسط الحوايج...و عريساتها تيطلو عليها من الكوزينة...تيسبو فيها فقلبهم....!

حتى جلسات و بردات و فرشات خيراتها و تسرحاات....رفعات داك ااصوت تتعيط على صفاء و لي فراسها مافراس حد...

_ صفاااااء...

قفزات صفاء ملي سمعات صوتها ...تتشوف فسكينة و العروسة الكبيرة تتنكر ..

_ علاش انا علاش...مشي اسكينة نتينا غي هاد المرة...

سكينة ميقات فيها : لا اختي ديااي سيىر نتينا....ياك يماك سماتك صفاء و انا سكينة علاش نمشي انا...

مشات صفاء لعندها بزز منها....: نعام اخالتي بغيتي شي حاجة...

عيشة بنظرة قاصحة : جيب ماء سخون فيه الملح غسل لي رجلي ...عييت ...

صفاء تترمش : دابا ؟ حيت دابا مشغولة ...كنعدل لحفضة ماتاكل..كتفرع الدنيا بالغوات ملي كتجوع اخالتي....

عيشة شافت فيها شحال و علات داك الصوت مرة اخرى تتنادي على عروستها الكبيرة ...حتى هي جات تتنكر و تسوط و طلبات منها نفس الطلب...و حتي هي سلتات راسها بولدها....! بقات ليها غي سكينة.....علات داك الصوت مرة ثالثة و ففزات سكينة و خرجات تتجري من الكوزينة...

_ هانا اخالتي هانا....

عيشة تتشوف فيها بنظرة غريبة : جيب ماء سخون فيه الملح غسلي ىجلي ...

سكينة...ذبلات ملامح وجهها و حنات كتافها و بزز منها قالت ...: وخا اخالتي عيشة....

مشات و كتافها محنيين ..قربات تدمع...و صفاء تتضحك عليها بالحس و تشفى فيها....! حيت غي سكينة لي حصالت...! مشات جابت ليها لي طلبات و غسلات ليها رجلييها و نشفاتهم ليها ...و هزات اابانيو مدلية شفايفها...

_ بغيتي سي حاحة اخرى اخالتي...

عيشة علات رجليها فوق المخدة وبنبرة حارة ردات...

_ سير فتح مجر ماريو الوسطي دي الدمليج ديالك ....

تفتحو عيون سكينة و رموشها فرفرو ...: ديالييي...!

عيشة غوبشات فيها : سيييرر...

طارت سكينة تتجري فتحات الماريو و خدات دمليجها ...حمقهت قربات تسطى....ركباتو فيديها و خرجات كدور بيه و تضحك...

_ طلعتي مزهارة اسكينة....

صفاء قشعات لي وقع ..دموع غلبوها بالشمتة دخلات لبيتها و حنات راسها للمخدة تتعض و تغوووت...

_ عععع بلعاني الشارفة دارتا...بلعاااني.....يعطيها الموت....

خاشية رجليها فالماء سخون...شادة راسها تتنكر مرخية ...

_ عييت عييت ...انا بغيت الربح بالنص....كون ماكانت حلا مايكون والو ...

خلود تتصبغ ظفرانها : كون ماكانت حلا نتهناو من السراقين ....باز لوجهك اختي...

حلا شافت فيها تتشطح رموشها : عارفاكم تتغارو مني ....

خلود ضحكات : علاياش على قلة اازهر لي عندك......

حلا عوحات فمها : غا حيت ختي الكبيرة ماجاتش نصبع لبك....

نعيمة دخلتت لعندهم تتنشف يديها مبسمة ..: ختي حلا الله يكثر خيرك على الحوايج لي عطيتيني...حمقوني...

حلا( فرنسات تتشوف بنص عين فخلود) : اواعدي يانا ...ماتقولشي هيدا ...بصحتك الزين ديالي ...فاين ماتحتاح شي خاجة اجي عندي نعطيها ليك نانسمحلكش و تكون باغية سي حاجة و ماتجيشي عندي...

نعيمة حشمات : الله يفرحك ياربي...

حلا تتضحك : اميين...الله شبعنا دعيوات هاد النهااار...

غي غبرات نعيمة...غوبشات فيها خلود ..

_ والله يعطيني من قصوحية كمارتك....سارقة حوايج و مصدقاهم على البنت....بركاتك الشيخة ...

حلا تتعوج : كاع ما غتقدري تعصبيني.....اجي كوكاكو ديالك تعاشر مع رضا ...

خلود صعرات ملي جبدات ليها راجلها : حمزة حمزة سميتو ....

حلا تتشوف في ظفرانها مبردة : مالك تعصبتي .....

___

صبح الصباح ...و طلات عليهم حلا منورة و أنيقة ...! خرجات من الدار ....سالبة العين...! تلاقات مع عبيير و شدوها هدرة ...!

حلا : غندوز للصالون ...غندير بلاياج....

عبير وسعات عينيها : زعمتيي و رضا شنو غيقول...

حلا قندشات : و مالو رضا شكون يكون....شعري و انا حرة فيه.....

عبير : بشوية عليك يالطيبف....هاد الكره لي تتكره رضا غيجيليك ربي راجل بحالو ...

حلا ميقات فيها : حتى نكون عورة....انا الريفي و الجبلي والله لا ديتو ...غا نشم فيه ريحة جبليي و لارييفي نقلب على يماه.....الريفي نبلعو وخا مر و الجبلي مايتسرطليشي.....نهرب من الخنقة و نطيح فمصعور مغيار اخر مال جدي ماعندي عقل....

عبير تتهدنها : و صافي ريح ماعرفتك هاد ااراجل كيفاش باغاه...و نتينا عايشة وسط روافا و جبالة....( شافت الطريق خاوية ووقفات حلا مخلوعة) الطريق خاوية من هنا...يلاه ندوز من قدام المقبرة ...

حلا سمعات المقبرة طلعات معاهت السخانة و الرعبة تفكرات اول مرة تلاقات الصمدي ...: لا اختيي لاااا ضربت على ديك الطريق....

كملو طريقهم....! حتى وصلو للصالون ...

دخلات حلا الصالون....و دارو ليها بلاياج تهلاو فيا و تهلات فيهم حتى هي....! و خرجات من تما بلوك شعر جديد.......! مشات كحولية الشعر ......! جاها غزال مع عويناتها الملونين مكتعقلش ...!

عبيير باعجاب : كتحمق....

حلا فرحانة : صورني صورني ....

صوراتها عبير و نزلتها فالستوري....! كلشي بدا تيشركها ...! وهي فرحانة بشعرها حيت ضربات هدرة رضا فالحيط....!

نزلها الطاكسي قدام باب دارهم...نزلات تتميل فداك الشعر ...قشعاتها عيشة من السرجم....شهقااااات حتى قرب يوقف ليها النفس.....و عينيها على شعر حلا مخرحيبن...

_ اليهودية شنو داااارت.....

يوماين وهي تتسمع الهدرة و النكير من مها...رضا غا تيشوفها تينكر و يقلب وجهو ...وهي على فمها غي ..." انا بابا لي حاكمني ماشي خويا"

نشطات و فرحات و ضحكات ...! سلتات من الجماعة وخلتت لبيتها شادة عليها الباب...ترمات فوق ناموسيتها لابسة واحد القندورة د الدار و الشعر مصبوغ شاداه بمقبض...و زغيبات رطبين طايحين مع وجهها ..ديك العوينات كيلمعو و يديها بيضين مصبوغين و نقيين....مهلية فراسها ..!

هزات تليفونها و دارت سطوري فانستا...تتبسم و تدوي بلباقة و بالثقالة ...

_ كوكو حبيباتي نتمنى تكومو بخير و احوالكم بخيير ....من هنا ساعة و نص غندير لايف ان ساء الله....غنوريكم موديلات جداد و خفاف ...العريسات خصيصا لي باغية تشري الذهب......نتلاقاو بعد ساعة و نصف...بييزو....

صورات الفيديو و حطاتو عاجبها راسها و فرحانة .بلي زابوني لي جمعات ....! و مزال تتجمع ...!

غي سالات ...! فرنسات و ناضت فاتحة الماريو ديالها...مخرجة صنديقة تتفتح بالكود...! كدور دوك العوينات و تفرنس....

_ نشوفو فاين وصلو .....

نقزات فوق ناموسيتها و ربعات رجليها ...و خرجات الفلوس من الصنديقة ....ستفاتهم حداها كي السردين و خوات صاكها حتى هو ماخلات فيه ريال ...درهم واحد تتحسبو....! هزات تليفونها تتحسب و تضيق عينيها تتفكر مخشعة...

_ ميتين درهم عطيتا لمهدي...و ميتين اخرى شريت كادو لعبير و مية د المركوب و ثلثمية دالصالون.......هي 800 درهم ...

فتحات عينبها مرعوبة....: اويلي انا كنت هازة الف درهم فاين هي ميتين درهم ديالي...!

ناضت واقفة بالزربة تتقلب و عينيها كيغلييو ...حتى قشعاتها تحت الغطاء....تنهدات و جلسات تتعاود الحساب. ...

_ طيرتيها مني خلعة....( ساطت مغوبشة ) دابا ها الف درهم مشات....مالهم هاد الفلوس كيطيرو ....خصني نريكل هادشي ..صافي بركة عليا من الصدقة ....حمع الفلوس...جمع و صدههم احلا بشي طنوبيل د الفريع ......

هزات جهد نص مليون و جمعاتهم للجنب....معلية حاجب و ملامحها جدية ...

_ هاذو غنزيدهم فالكونط ديالي مانصرفهمش باش نكمل ثمانية مليون ....

قفزات مخلوعة ملي سمعات الدقان و غوات بنت خالتها الصغيرة....

_ حلا فتحلي الباب....

عقدات دوك الحواجب و غوتات بلا ماتفتح ليها الباب...

_ سير اخالتو ديالي سير ...دابا نخرج لعندك....

مشات بنت خالتها عاد تهنات حلا و كملات حسابها....ورقة و ستيلو مايخطاوها الحساب فالتليفون...لي صرفات و لي مشا و شحال باقي ليها. ....

عزلات الف درهم و شافت فيها محسرة ...: و هاذيك غندير بيها تانينو لشعري....و باقي خصني الزايد باش ندير هوليود سمايل ...( قطبات جبينها بحيرة ) بلاش من هوليود سمايل طبيعين حسن و لكن تانينو غنديرو غنديرو ......

غرسات سنانها فشفايفها تتفكر و تشوف فديك الف الدرهم شحال....! حتى غوبشات و خبات داك الفلوس ...شادة عليهم...

_ ولكن الطنوبيل حسن ...و لا نشري شي أرض فيها مية مترو .....نفقص داك رضا ...نوريه بنت سبع شهور شنو كدير ....

خبات فلوسها حتى تزيدهم على اخرين ...! و خرجات تترمش و تلوى على حميدة....

_ ماميتا شي الف درهم تصدقوها على هاد المسكينة ندير تانينو لشعري ماعندي حتى ريال...

حميدة معلية فيها حاجب : شنو هاد تانينو عاود ..الف درهم كاملة على دوك جوج زغبات ....

حلا دورات يديها على كتاف حميدة تتفرنس و تاكل ليها دماغها...

_ بلا قميع ...انا منعطيشي شعري لشي وحدة ماشي بروفيسيونيل.....و خصني ندور معاها ...و ماعندي لمن نطلب ...بابا باقي ماعطاني حتى ريال....واش بغيتي نسعى من خلود تندمني عليهم حياتي كاملة....

حميدة بنص عين : همم و بغيتي الف درهم !! ديرلنا شي بسطيلة هماااوية مامنقوصة من والو و غدا ديرلنا مسمن و البغرير ....و هاك الف درهم....

حلا ماشبة بمبدأ تمسكن حتى تمكن...فرنسات و ردات ...

_ طلبتيها ساهلة اماميتا....كاينة الورقة ؟

حميدة : واه كاينة ...و يلاه بدا دابا حتى نشوفا بعيني و تعجبني.......

شمرات على دراعها و لوات داك الشعر

بالبانضة ...! و دخلات للكوزينة تتلوى...! كدير ليهم البسيطلية لي طلبات....! و حميدة واقفة عليها تتقيم شغلها....باغية غي بناتها يخرجو حادكات و يحمرو ليها وجها وهي حتى واحدة فيهم ماكتعشق الكوزينة...لا خلود و لا نسيم و لا حلا.....!

دوزات حلا العشية غي فالكوزينة....! حتى سمعو الصوني فالباب ...

حميدة خارجة من الكوزينة : شكون اخلود ...

خلود طلعات لعندها تتجري : عيشة الكتامية اماما.....

خرجو عيون حميدة من هاد المجية ...؛ و طارت تتعطر الصالة ....و تتوصي حلا ...

_ جمع داك اللسان و حلييه بلا ماتحشمنا ابنتي ..

حلا مشغولة مع اللوز كطحنو محنية و صدرها باين بديك القندورة عنقها واسع ...: كرهت داك المراة...مابقاتليشي الصباغة لي نصبغا بيها...سالاتها ليا داك النهار.....

حميدى تتغددها : بقى ساكتة خير ليك اقشور البنان....

ضحكات حلا على اللقب و تخشعات مكملة شغلها ...

دخلات عيشة للصالة ...عينيها فالتين مع الفراش عشقاتو و حسدات...و قالت فعقلها ...دابا تمشي دير خير منو ...!

جلسات مفرشة خيرها....تتشوف فخلود و حميدة و تبسم...

_ فاين هي هالة مكايناشي...

حميدة دايرة الصواب بابتسامة لبقة : حلا مشغولة فالكوزينة قالت والو تشهات البسطلية غديرا ....( رفعات صوتها تتعيط ليها ) حلاااا....حلااااا...

خرجات حلا من الكوزينة مزنكة هازة ااصنية مذهبة داكشي متول و هماوي تعشقو فالشوفة ....

حطات الصنيلة و تبسمات مع عيشة تتسبم عليها .

_ خالتي عيشة لباس عليك بخير ...نورتينا ...

عبشة ضربات العين على حداكتها و لكن ملي تتشقع داك الشعر مصبوغ تتعصب : نحموده و نشكروه ....جلس جلس جدايا...

حلا تتمسكن : وخا نجيب البسطيلة ونجي حداك ...الهدرة معاك مايسخاها حد ...

جابت الحلويات و اابسطيلة و الخير فايض ...!تحنات على الطبلة و بان صدرها معري و عيون عيشة على الشامة وسط صدر حلا ثبتات ..! حسات بعينيها غيخرجو و سطل ماء بارد تكب عليها.....رموشها فرفرو ...تفاجات و فرنسات....

جلسات حلا جنب عيشة ...تتكب ليها و تمد ليها....

_ هاكي اخالتي عيشة ...بغيتي حلوة اللوز و لا الشكلاط...

عيشة مزال مامتيقاش : لي كان ..الضيف مايتشرط....

حلا ضحكات : و مول الدار مايفرط ....بالصحة و ااراحة ...

حميدة : والله الا فرحنا ملي جيتي ...الله يجي عندكم الخير و الربح اختي....

عيشة عينيها برقو : اللهم امين اختي حميدة....السيمانة لي ماجا اذا بقينا فالحياة عندنا قصارة عارضين الجيران و العائلة حيت صافي سكننا قلنا نديرو شي صدقة ...

خلود تتبسم : فكرة زويبنة اخالتي....مرحبا بيكم و نتوما باين عليكم ناس الخير و عيبكم عمرو يخرج....

عيشة حاضية غي مع حلا ...: و على الله....انا مكنعرفشيي شي حد .غي نتو و مراة الاستاذ و لالة فطيمة......

حميدة على نيتها : الله يجعلها خير المعرفة اختي ..

عيشة : امين...( شافت فحلا ) و نتينا ماجة ....

حلا برزانة : و اذا جبرت الوقت اخالتي....

عيشة غوبشات : و لا هيدا والو ...شي يجي و شي لا ...ماجاتشي ....

حلا شافتها غوبشات و ضحكات بزز منها : صافي ان شاء الله ....مع المكتاب ...

خرجات عيشة من عندهم....عقلها تيملي عليها شلا فهايم....تتفكر و تعاود....و تعجب....البنت كيف ماوصفها عبد الصمد...مابمكنش كاع هاذي صدفة.....زعما يكون عبد الصمد كيعرف حلا....!

صباح النشاط عند حلا....! دخلات للدار ...تتشطح شعرها قدام وجه خلود حرير و رطب مرخي بتانينو لي دارت لشعرها....كيحمق و يسرق العين....

حميدة باعجاب : كيفاش هاد تانينو هيدا كيعمل للشعر ...حرير حرير تبارك الله...

حلا : و شنوو كنقولك اماما حسابلك غالي فالصو ولا ! انا شعري قصير و حمقني كون دريه نتينا اماما تفرح بشعرك عاود و تفرح سي عبد الله...

حميدة تتضحك : الله يرزقك العقل ....كتجيب لراسك غي العين احلا ...

حلا( جلسات دايرة رجل على رجل ): ماكنتش ماشية عند عيشة الكتامية...ولايني ملي باقا فرحانة بشعري...غنمشيي.....

حميدة بتوصية : مشي و لا جلس ولايني تعيب و لا تعوج على الماكلة نقص ليك لسانك ...

حلا تتعوج : ماشي هي لي غطيب ...الطيابة خدوج على ماسمعت....و شكون مايعشقش طياب خدوج اماميتا النقاوة و التاوييل ...ناكل و عيني مغمضين.....

طاح الليل....

خلود و لالة حميدة جالسة فالصالة كيستناو حلا ...! وهي خارجة بشوية عليها ..ضاربة الكلاص كيبينها بعقلها و كيجي معاها ...شعرها كيزهق غا بوحدو و عويناتها مجبدين بالايلاينر ...صاك ديور و رولكس فيديها ....!

خلود طلعاتها و هبطاتها باعجاب : كتبانلي راشقة ليا مع راسك....

حلا تتضحك : و علاش ماترشقليشي اختي...ماتابعني بروكابي و لا ولاد....ننشط و نفرنس مع راسي ....

عيشة شادة الركنة و التليفون فيديها ...كتدوي معصبة ...

_ كتكذب عليا اعبد الصمد ...ياك انا يماك و كتكذب عليا وجهك حمر ...

سعيد حيد ليها التليفون من يديها كيهدن السوق...

_ و يمة شوف النمرة و كاع ماتيق ...جا للمغرب هاهو فتطوان ....عشر دقاىق يكون هنا....

عيشة مقندسة : و شكون بقى يتيق فيكم....كتغطيو على بعضكم ...وهو ماتلحقوشي كل مرة فاين ...غي يثبت بلاصة وحدة ....

سعيد ضحك : خصو المراة و يثبت ايمة....

عيشة زمات شفايفها : حيد من حدايا نشوف الضياف......

هبطات عيشة التحت تتلوى فطرافها....! نلاقات بحميدة و بناتها داخلين...قشعات غي حلا وسطهم...هازة الورد و عينيها قتاليين....رحبات بيهم و جلسو مع الضياف....ناشطين و عاجبهم الحال ...كبعشقو المناسبات و يتجمعو ...!

صفاء و سكينة كيوشوشو ...

_ كتحمق ....

سكينة بهمس : فخبارك عندا الشامة بين بزولها ...شافتا يمة عيشة ...

صفاء باستغراب و شك : ياك مايكون عبد الصمد كيعرفا....

سكينة : الله و اعلم ...ولايني بزاف على هاد الصدف....

صفاء مضيقة عينيها فحلا بغيرة : دارت تانينو لشعرا باين ...شوف كيفاش كيلمع كيف الحرير ....

حلا قشعاتهم شوفاتهم و فرنسات...تتلعب بشعرها و تشطح رموشها....تتزيد تفرش زينها ....

شافتها جارتهم الاخرى و جبداتها ضاحكة....

_ حلا صافي مابقيتيشي مربوطة نجيب خويا و نجي نخطب ...

حلا ضحكات و ردات : خوك وخا و نتينا علاش.....جيب يماك و نتينا رجع اللور ..

الجارة موالفة بمزاحها : حيت حارة عليك الشويطينة....

حلا تتفرنس : بصح دوز لعندي غذا ان شاء الله ...نوريك الموديلات و نهدرو تما....صافي غدوز ...

الجارة طلقاتها بضحكة : الخوف من داك اللسان عندك اختي .....

حلا فرنسات ليها و قلبات وجهها باغية تنوض تشوف الدار و تبحصص على خاطر خاطرها و ترضي فضولها غا حشمات....

عيشة جالسة ساكتة و كتشوف غي من بين رموشها ...! حاضنة على تليفونها و مركنة....! حتى ناضت و جلسات قدام حلا ...عطاتها تليفونها و نطقات بنبرة صارمة. .

_ اهالة شوف نمرة عبد الصمد عيطلو تلفاتلي ....

حلا هزات من عندها كتقلب : عبد الصمد عربية و لا فرنسية اخالتي.....

عيشة مغوبشة : ماعرفت....

حلا :وخا نقلبو على هاد عبد الصمد ......ها هاهو جبرتو نصوني ؟

عيشة : صوني صوني.......

قبل ماتصوني ...تسمع صوت بكاء حفيدتها محهد ....تما فرنسات و تهنات ...عرفااات عبد الصمد مولاها .....!

هزات جلايلها بالزربة مخلية تليفونها فيد حلا....عيشة غبرات و تليفونها هتز فيد حلا تيصوني...شافت فيه لقات عبد الصمد كيصوني....! ناضت وسط الجماعة...فرحات ملي لقات الفرصة تنوض ...تتسول صفاء لي تتمشي و تجي كي النحلة ...

_ صفاء ختي تليفون خالتي عيشة ...

صفاء مزروبة : عفاك اختي هبطيه ليها الطبقة التحتية ....هاهي تما ...

حلا هزات حاحبها و خرجات تتمشى بداك الطالون فالدروج و عينيها على الزليج و الثرية و الزينة د الدار...باين فيها فلوس صحيحة ...! شافت غا برهوش كطير ...عيطات ليه معفرة...

_ مد التليفون لعيشة....

الولد خنزر فيها : شكون نتينا....

حلا قندشات : و انا مالي لاصقة نعطيها تليفونها ......( نزلات ليها التليفون فالدروج و زادت بحالها تتمتم و تقيم الزليج بعينيها ) هادشي باين غالي.....فلوس الحشيش كتبان ....

عيشة خرحات من باب الطبقة الثانية ...قشعات حلا طالعة و لمعو عينبها....نادات ليها بواحد النبرة مامعاها نقاش....

_ هالة اجي اجي ابنتي....

حلا دارت شافت فيها هابطة تتفرنس ...: اويلي عطيت التليفون لواحد العايل نزلو ليك هنايا ..

قربات منها تتمد ليها التليفون و عينيها كيدورو ..:

كنت كنفتش عليك التليفون ديالك خلتيه عندي و عبد الصمد كان كيصوني عليك....

عيشة هزات عينيها فالدروج قشعات عبد الصمد هابط ..: هاهو عبد الصمد جا هو كيصوني ...

دورات حلا وجهها تتشوف فين كتشوف عيشة ...دايرة تبسيمة حلوة و خدودها مزنكين ..غي جاو عويناتها فعينيه...تجمعات الضحكة و تمحات و تيبسات ورموشها طارو بالصدمة....!

تخطى الدهشة و كمل طريقو هابط.... العين على حلا شوفات الذيب مافيه امان.... ...! الشوفة لي ركبات فحلا الرعب كثر ... خلاتها تترمش و ترعد كي المصدومة و كتدخل و تخرج فالهدرة...مزيرة على يد عيشة بحال طرشها شي حد ..كتفتفت

_ ججبل....جا يرميني رميتو

كمشات عنقها كي الفلوس متبعاه بعينيها هابط ...صفارت و الدم مشى من وجهها.....عينيها غابو و رجليها فشلو ...و على كتاف عيشة سخفاااات.....!

شهقات عيشة و ضربات حنكها : العايلة سخفااات....العايلة اعبد الصمد.....

دار نص تبسيمة و رجع و حاجبو المضرب مطلع للسماء ... هزها من على عيشة ..كي الريشة ...

_ فين !

عيشة مغوبشة : مال الزمر سخفات .....زيد بها للصالة نعيط ليماها...

دخل بيها للدار و رد الباب برجليه ...! حطها فوق الكنابي راسها ملوي كي الفلوس مذبوح....! ضربها لوجهها كيفيقها بخشونة...

_ مي بوتااا ....هييي سنيورااا....

سمع صوت النساء جايين....و رجع اللور ...!

دخلات حميدة تتجري ..و وراها خلود شافوها سخفانة ..و طارو لعندها مخلوعين....

_ مالها ...حلا....حلااا...

عيشة : سخفات حدى رجلي .....

خلود بقلق تتهز ليها راسها...: الماء اخالتي .....

مشات عيشة تتعوج فمها...جابت ليها الماء و رشوه عليها...مرة اولى و ثانية ..عاد فاقت مفزوعة....تتنهج .....جلسات وججها صفراء...و حميدة تتسول فيها مخلوعة...

_ شنو وقع ليك.....

خلود بعفوية : ديك المرة حصلها رضا سخفات ..مالا رجعات غي كتسخف...

حلا جالسة كدور عينيها بحال التلفانة...شافت فحميدة و رحعات شافت فخلود و عيشة ...

خلود : حلا واش لباس هدر مالك ساكتة ..

حلا شافت حتى عيات ميلات شفايفها مرخية و طلقاتها للضحك كتضحك و تكركر.......

شاوفو فيها بحال كيشوفو فحمقة ...حميدة قلبها غيوقف...

_ بسم الله عليك...حلا...

حلا راسها ميل كي الفلوس ....كتضحك بصوت عاااالي....و حميدة شادة ليها راسها مخلوعة....

_ غيصوك بيا جلال لي كيسوك بالموتى ....

يتبع...

‎