غيرك ما يحلالي الجزء الثامن

في فيلا باحدى احياء طنجة ...واقفة حلا لابسة فستان بالأزرق الملكي فخامة...و زاد فخامة عليها....! وقفة ثابتة و واثقة من راسها....! ظهر منتصب و حركات مدروسة....من شوفاتها و ضحكتها تتبان عليها ذيبة و شويطينة...! تتضحك بهدوء...ماتتسمعش ضحكتها...! تتعبر بعينيها الاجواء و الشباب و الموسيقى ...شباب و بنات....! كل مجموعة بوحدها...! وهي واقفة ضمن مجموعة فيها جوج شباب و خمسة بنات....محتافلين بعيد ميلاد سلمى بنت خالتها....!

دارت حفلة شبابية و عرضات على اصحابها و معارفها ...!

سلمى عايشة عكس حلا...! كابرة وسط عائلة راخفين ليها...و باها خانز فلوس مفششها.....! دور دور و تشد فحلا تتعرفها على صحابها...

_ بلا تعفار ديالك احلا....راكي تتقهري حق الله...

حلا تتدوي بين سنانها : وريني ليماك فين هاد المقاول ليقلتي غيجي....ماعنديش الوقت خصني نرجع دابا عندي الخدمة....

سلمى كدور عينيها على الحضور ..: بلاتي راني شفتو قبيلة و سلمت عليه....غيكون فالجردة يمكن......

حلا تتحرك حداها بأناقة....سارقة العين من صاحبة الحفلة ...وخا ملابساش شي حاجة مشعشعة او معرية ...بالعكس...فستان أزرق ملكي اكماكو طويلة....جاي معاها تيحمق...و حتى اللون الملكي تيليق عليها....؛ شعرها مموج و مزعر ...هابط مع ثدييها ...زادت فالون و كثر منطقة الصدر ...! كانت مقررة تولي كي العود الفرنسي....رشيقة مابغات لا ترمة لا بزول...و كلشي معكس ليها...! تتزيد غا تعمار و مفاتينها يبرزو....!

عرفاتها سلمى على صديقها المقاول....شاب اواخر العشرينات....واقف مع شلة بنات و ولاد...! تقدمات لعندهم سلمى و حداها حلا .....! هاد الاخيرة عينيها غي على داك المقاول لي عاودات ليها عليه....! باغية دير معارف ..و كون ماشافاش عندها مصلحة فهاد الحفلة متجيش..من الاصل...!

بعد ربع ساعة ...حديث ورى حديث....! و حلا تتشوف فصديق سلمى بنص عين....! تتلقاه مشطها بعينيه....تتزيد هي تهز نيفها و تعفر...داكشي فيها عفوي...بلا ماتحس...مولفة هكاك...غي تحس بجنس رجل تبشوف فيها...تتدفع كبير و تقلب عينيها...بحركة عندها تتسلب ...!

انسحب من الجماعة و قرب من حلا بابتسامة رجولية...

_ مالك ساكتة الالة حلا...ماعاجبكش الحال معانا....

حلا ابتسمت معاه تتجاوب بهدوء...

_ جاني الملل.....

أسامة ( عجباتو ) : نتي من طنجة لا ...اول مرة نشوفك مع سلمى...

حلا هزات فيه عينيها بالثقالة ..

_ لا من تطوان....

أسامة ضحك : مرحبا بيك فطنجة على هاد الحساب....

حلا ضحكات برقة : و مرحبا بيك نتا فطنجة....ماشي انا...! من هدرتك بنتي ليا ماشي شمالي !

اسامة حك رقبتو بحرج : لا من فاس....

رن تليفونها و انسحبت تتجاوب....غي سالات جرات سلمى للفنت تتدوي بين سنانها ...

_ ديك الندوة خصني نحضر ليها....انا طلبتك تعرفني بيه على قبل الندوة اسلمى ماشي حبني نحبو ....

سلمى هزاات فيها حاحب : ياللفعة نتينا عاحبك الحال ..حتى نتينا باينة بلي عحبك مالك كتعفر علينا هنا.....عطي الوقت للسيد...فخبارك راه كاع صحابات لافاك كانو مزعوطين فيه....

حلا زمات شفايفها مكمشة حجباها : ماعندي الوقت للتصاحيب الكلبة......الزين زين ولد الحرام ولايني ماغرضيش بيه دابا.......خصني ندير معارف بحال هاذو.....و حميدة فرعاتلي مخي بالصوني....خصني نمشي....

سلمى : و صافي دابا ...انا نشوف كيف ندير...غذا نصيفطلك النمرة ديالو باغ واتساب...ولا عرفتي شنو راه باينة غيسولني على نمرتك....نعطيها ليه و نتينا تكلف....

على طبلة الفطور....!

خرجات حلا من بيتها تتفوه و تجر فسندالتها...! جالسة معاهم و النعاس قالبها...!

حميدة : و هالي ينعس معطل....تشرب قهوة !

رضا مغوبش فيها : تعطلتي البارح فالرجعة فين بقيتي ؟

حلا غا تتبركم بين سنانها و تمتم ...حد ماعرفها شنو تتقول

__ ماعندو دار يمشي ليها...غا نفتح عيني نشوف كمارتو....

عبد الله تنحنح وشاف فخلود و رضى ..و تجاهل حلا كاع...

_ شكون غرضو يشري ارض ...كاينة واحد الهمزة مكتعوضش....

حلا حطات الكاس ففمها تتشرب غا سمعات كلام عبد الله حطات الكاس و فتحات العين و طولات الودنين....

خلود باسف : والو ابابا...كنصلح فالدار و نفرش ماعنديش جهدا....و حتى حمزة مايبغيش عاد شرا ...

رضى جامع حجبانو : و ماكرهناشي....ولايني فلوسا ماعنديش الواليد...

عبد الله جاه نيشان : عندك يلاه نشدو الطربق تشوف الارض....ماعندكش ماغنعطيكش......

حلا طار منها النعاس....تتدوي و عينيها كيدورو ..

_ فين جات ابابا ...

عبد الله : فالخرجة تطوان....شي ورثة كيبيعو فيها.....باغين غي يبيعو الثمن طايح ..

حلا ودنيها سخنات : بشحال كيبيع.....

عبد الله ضحك : اشنو غرضك نتينا بشحال....خصك تشري ؟

خلود و رضا ضحكو عليها...نطقات حميدة...

_ باقا مقلوبة بالنعاس.....!! فطر فطر ...

حلا زمات شفايفها و شطحات رموشها...! فطرات و سالات و ناضت لبيتها عقلها مشغول مع الارض....! لبسات سروال الكوير فالنواغ و شوميز فالبيض و سندالة عالية....! هزات صاكها ومونطو ديالها حمر فيديها....و خرجات كتقرقرب...شافتها حميدة غوبشات....

_ يابنتي و هاد اللباس ديالك غيجيلك غي المشاكيل.....نقص من الزواق شوية نقص....

خلود : رضى مزال هنا يشوفك هيدا والله لا خرجتيها.....

حلا قلبات عينبها : يولدها هو و يحكم فيها.... نسيت مارشيت الريحة ...!

دخلات رشات ريحتها و خرجات تتقلب بعينيها على عبد الله....! مخلية خلود تتشوف فيها و تعلق ...

_ بنت الهم جاتها اللبسة كتحمق....

دخلات حلا للصالة عند عبد الله تتفرنس و دور عينيها....شافها و ضحك ..

_ ديك الشوفة ابنتي كنعرفها...شنو تما....

حلا بدون مقدمات ..تتدوي بحماس : خصني نشري الارض...هدر مع مولاها بغيت نشري....

عبد الله ضحك : عندك فلوسها ...؟ حطهم...

حلا رمشات : و سولناك ابابا شحال كيبيع ماحاوبتيناش....

عبد الله حس بيها تتدوي بجدية...: باغية تشري بصح ؟ عندك الفلوس...

حلا جلسات حداه جات دير رجل على رجل حشمات منو ..و حمعات رجليها للجنب...

_ اه ..عندي و كندوي بصح خصني نفلت شي ارض بسميتي....

عبد الله بصدمة : شحال باغية ؟خمسين مترو !

حلا شلطاتو : لا مية مترو ...خمسين والو ماصالحاش...بغيت نشري اليوم قبل غذا....اذا كنتي مسالي دوز معايا نشوف الارض بعدا ...

عبد الله تكوانسا : شحال جامعة؟

حلا تترمش : شحال الثمن ؟

عبد الله : الثمن ديال الارض طايح...حيت مولاها باغي غي يبيع و الموقع مزال مادخليه الصليح.....مية مترو تجيك 8 مليون...مولاها تنعرفو ....

حلا تترمش و تطلق عليه فالكذوب : عندي غي ستة ....اوا صافي ابابا....انا نعطي ستة و كمل لي نتينا ...و نتوكلو على الله....و حتى ديك البركة عندي مبلوكية صعيب ندير ليهم الغوطخي خصني نخلص بيناليتي ....( تتدور عنيها ) اذا عندك واجدة ابابا كمل ليا ...حيت نص المبلغ عندي مبلوكي ...

عبد الله مافهم والو : و نتي ابنتي ماين جاوك هاد الفلوس ...

حلا (خافت يشك فيها ): و بابا من قبل ايام لافاك و انا تنجمع سنيتم ورا سنتيم.....كنحيد من راسي و نخبي ..و ماشي كنضيع هاهوما نهار حتاجيتهم لقيتهم...و ماما عارفاني كي دايرة من صغري وانا الدرهم كنحمع فيه....

عبد الله باستغراب : و كتقولا خلود و حد مكيتقها....و ماعندي مايتسالك مطورة مع راسك ...!

حلا ( مامرتاحاش ) : بابا هادشي مابغيتش تقولو لرضا و لا لخلود....حتى نشري الارض و عاد ندير الزردة....كنبغي الحاجة ديالي نديرا بالسكوتي ...و رضا رضا هو لي مابغيتوشي يعرف ....انا كنتيق فيك غي نتينا ابابا.....

ناض عبد الله واقف مزاال مدهوش من بنتو...

_ نصلي العصر و نزور سي عبد السلام و نمشيو نشوفوها ...

حلا تتمسكن :وخا ابابا لي بغيتي ...( تبعاتو خارح وهي من وراه تترمش و دور فعينيها تابعاه بالهدرة ) سلم على عمي عبد السلام و مرتو و ولادو و قولوم حلا غي تشالي تدوز لعندكم توحشاتكم شحال ماجلست معاهم مساكن...ولاهيلا.....صافي بابا ! غندي طنوبيلتك اليوما وخا....! صافي !

خرج عبد الله تيهز راسو يمين شمال ...مستسلم لطلبها....؛

غا شافتو خرح....زفرات حتى طارت القصة من فوق ذقنها... و دخلات للصالة هزات صاكها و نظاظرها و غمزات خلود و خميدة خارحة تتعوج...

_ و عليكم السلام ياحريم عبد الله.....

حميدة تتشوف فديك السروال تتعوج فمها...

_ زيد يشوفك رضا فالطريق يشوه يماك و يرجعك منين حيتي....

حلا بتجاهل

_ غندي طنوبيل بابا....طلبتها منو ...تهلاو ليا فراسكم....!

رمات ليهم السلام...و هبطات بحالها...فاتحة الݣراج خارجة بالطموبيل....!

دخلات داك الرونج فالشارع صافي الناس عرفوها ديال من ولات معروفة...!

دار تحية بعينيه لعمال الورشة و زاد .....خرج من الاوطو لابس ملابش شبابية مصيف و شعرو كحل حالك ملامحو كحلة و حرشة ....! عيتيه فتليفونو شد باب الاوطو و حواسو انتبهت للگراج في دار عبد الله ..! عند بالو عبد الله ..!

بنظرة غير مبالية تحطات على مكان الصوت...! و النظرة المبالية سرعان ماتحولات لنظرة غير ملي شاف يد أنثى انيقة بساعة راقية فالمصعم ديالها ...! و شعر مزعر محطوط بعناية على كتافها.. زاجة السيارة فاتحاها للنص ...! حركات عجلات السيارة و دازت من حداه بعد ماجاو عينيها المجبدين فعينيه الكحلية ...و سرقات ليه عينيه بلا مايحس...! غبرات من حداه مخلية غي العجاح ...و حواجبو تلاقاو و طلعو للمساء....

قلب عينيه تيحك حاجبو منيرفي...! جمع و طوا و تم طالع بحالو كيبركم بدون صوت شنو تيقول ماعرف حد...ضرب حمش درجات و رجع باللور قالب الدروة بالزربة.... ركب الاوطو ديالو و زاد تابعها....!!

شافتو من المراية ..! رونج نواغ فخمة ....جمعات حواجبها طلعات الزاجة و زيرات بيديها على الفولون تتنكر

_ مرة قالب غلينا كمارتو و مرة كي خيالي .....

تجاهلاتو وكملات طريقها ..! عمال الورشة ..شافوها دايزة وعاودو شافو سيارة عبد الصمد حتى هي وراها....! ميكو و شدو فمهم ..دارو عين ماشافت....!

هبطات من شارع جا هابط كي العقبة تتخلع ...! السواگة المخايرين و مكيزعموش يدوزو منها....! و كملات ملي تلاقاتها كاميون عملاقة طالعة. ..!

حلا شداتها القفقافة و الرهبة .....شافت سيارة الصمدي وراها شاد الييمين....!

شدات هي اليسار متخطية رهبتها من الكاميون...! سلتات مع درب ضيق بزز دوزات الاوطو تما.....و غبرات ...! من تما شدات طريقها لتطوان و مابقات شافتو وراها...!

دخلات للمحل منفخة تترمي شعرها ورى ظهرها بدلال ...

_ مهدي جمع داك التليفون...اخر انذار...

مهدي خلى تليفونو: و ختي حلا غا تنشوفو الميمة واش باغية شي حاجة...

حلا ( تنجبها ديك الحالة د النݣير ) : هنا الخدمة الشريف....الخدمة صافي رخفت ليك شوية رجعتي كتامر فيا ...تحمع الحاح ..عندي نطويك على اربعة....تيوصلني خبارك مع وئام...( هزات صبعها بتهديد ) والله بالله ماتفك منها و تعطيها شبر التيساع...ياحتى نخرح قروني ..

مهدي (تصدم بقى غي كيتفتف ): و ختي حلا...هو لا...دابا كيف غنقولك...كنبغيها

حلا ( بنظرة صارمة ) : وئام تفرق عليها و تصاحب ليا نتا مع عشرين ماشي غا وحدة.....سير لعب مع ليقدك خلي عليك البنت تشوف قرايتها....تقضاو البنات !بان ليك غا بنت خالتي...بغيتي خوتها يخرحو عليك....واش نتا قدك خوتها....واش تتقلب على اخيرتك البعلوك...

شبعاتهم ليه و فرشاتهم ليه كاملين خلات ودنيه مشوطة....خوات قلبها مزيان و دخلات تتنكر...

_ تفو بنادم كيتعلق فين يتفلق.......

فتحات تليفونها ماحدها شاعلة شاعلة ...و دوزات الاتصال لوئام....غا ردات علات دوك الحواحب للسماء و عطاتها حتى هي.

_ جوج هدرات اللفعة....غا تحنع راسك و تديها فقرايتك والا بالله حتى نحط بوجهك قداك تاصيلتك....و انا حلفت.....وااله لا عقلت عليك ولا عليه...

وئام ( تخلعات حيت عرفاتها ديرها ضرباتها بنكرة ) : شكون هو ! شنو درت ! مالك ...و دابا مالك مالك تتغوت عليا...بالحق رجع الكتاب سرقتيه مارجعتيه العايلة حمقتني عليه...

حلا( تتدوى فعبنبها تتلفها ) : شمن كتاب ..! داكشي باقي ناقصني انا نشد شي كتاب..القراية ساليت معاها انا هادي سبع سنين.....و نتينا دابا شوف قرايتك و االا بالله حتى نخرج عليك...يلاه قطع...تفو براهش تيطلعو القلب ...

كركابتها و رجعات راسها اللور...! تتشوف ظفرانها....فتحات داك الواتساب و شافت فميساج أسامة....؛ خلاتو شحال و حطاتو حتى تكون مسالية عاد تحاوبو....و تفرغ ليه ..!

كملات نص نهارها هكاك ...النكير ماسكتاتش كاع...! مهدي داز نص نهارو كحل ...صداعها و نكيرها تتغوت على ابسط الحوايج....! وماتيعرفها هاد الحالة غا لي معاشرها...! نهار لي تتعرف فيه غتحط فلوس صحيحة على شيحاحة وخا تكون لمنفعتها..و فرحانة بها المهم فلوسها غا يخرحو ..... تتنكر و تغوت و تعصب على الكبير و الصغير و نهارها تيدوز غا هكاك...و لي معاها تيدوزو كحل...غي بلا ماتقرب منها ديك اللحضة.....!! عليها كذبات على عبد الله حيت مابغات لي تكساب تحطو ...تتحس بحال الا غتبقى عريانة اذا حطات فلوسها كلهم و مافيها شك تشدها شي نوبة اعصاب و الغدايد وهي لي حضانة عليهم وهي بنت 18 سنة...كي تتحضن الدجاجة على بيضها.....!

خرج مهدي لبرا تيسوط كان راشقة ليه حتى خسراتها ليه حلا....تلاقاه صاحبو و ضحك عليه....

_ الخدمة الخدمة امهدي...

مهدي تيزفر : البطرونة شاعلة البولة العافيا شاعلة غا نخويو قبل ماتخوينا هي....

صاحبو كيضحك عليه : الصبر و صافي العيالات كاملين واحد الفترة فالشهر كيدوزوها نكير و فهامات خاوية ...

مهدي قلب وجهو عاقدهم غا شاف عيشة حاية تتميل حاضنة على صاكها و مجرجرة ثوب الجلابة وراها .... و معاها ياسمين سارقة العين فالشارع واحلة غا مع سالفها تتخلف مي النعامة....

تصاوب فالوقفة و ضرب كتف صاحبو قالبها تفرنيس....

_ هاذيك كتبرد ملي كتشوف الفلوس و شي بيعة صحيحة.....نمشي نشوف شغلي....كنا كنخممو كيفاش ندوز معاها النهار ...حتى جات لتبرد لينا البطرونة.....

دخل مهدي لعند حلا تيفرنس...

_ ختي حلا هاذيك الكليانة العزيزة عليك جاية تنزل بركتها عندنا.....

حلا( هزات فيه العين بصرامة ): شكون هاذي ! سمي شكون......واش عام و نتا خدام معانا ماتتعرف سمية الكليانات لاش صالح شنو عندك فالراس.....

مهدي عاطيها غا للسياسة كثر منها...

_ سميتها عيشة اختي حلا و معاها واحد الزعرة روسية اختي خلا بشااااخ كيف دايرة........

حلا سمعات سمية عيشة جمعات الوقفة و رسمات ضحيكة مزورة و مزوقة على ثغرها...عاد خرجات تتلوى و تعوج فداك الطالون......تتحول و تبدل....! شلا وجوه عندها و لي تتقنو وهو وجه التاجرة المبتسمة اللبقة مولات اللسان الحلو وخا مع عديانها ... رغبتها هو تلبي طلبات الكليان ديالها ...و الكليان دايما عندها هو الملك....هادشي لي عقلات من سنوات الدراسة الفاشلة فلافاك و بالضبط فلوماغكوتينغ le client est le roi ....

تلاقاو عويناتها بعوينات عيشة لي داخلة كي الملكة نيت....الفلوس باينين من الصباط لي لابسة ...! بلا ماتطلع عينيك للثروة لي هازة فيديها ...مغطياهم بكم الجلابة . لا يسرقوها .غي دخلات للمحل عرات عليهم ..و نطقات بالنفخة. .

_ هاواحد السلام عليكم ابنت الريفي.....ندخلو و لا نرجعو....

حلا ضحكات حتى بانو سنانها...تتسلم عليها و عينيها تيدورو ...

_ خالتي عيشششة غبورك اخالتي علينا....توحشناك و ربي شاهد قداش.....دخل مرحبا و الف مرخبا....مجيتك تتفرح القلب اخالتي ....

عيشة تتشوف فيها زامة شفايفها و تتهز راسها و تمههم....شافت فياسمين و نطقاات ..

_ من هنا كنشري انا عمرك جيتي لهنا....

ياسمين تتبسم و تشوف فحلا بغيرة...

_ لا اول مرة ...شكراتكم خالتي عاىشة بزاف ..قلت صافي من اليوما انا كليانة ديالكم ....

حلا تترحب بيهم و تضحك ضحكة منافقة ..

_ الله ياودي....من جهة خالتي عيشة يعني راك من العائلة....مرحبا...جلسو....الصهد برا تبارك الله...تشربو شي حاجة....خالتي نتينا كيف دايما دايما كاس عصير ليمون....

عيشة تتعبر صدر حلا بعينيها و تعوج فمها...

_هممم...

حلا ( تتشوف فياسمين ) : و نتينا الغزالة....

ياسمين : انا باغية شي كاس الماء بارد اختي شكرا.....

حلا : وخا هي لولة.....( جلسات حداهم بلباقة و علات صوتها شوية تتدوي بادب مخلية مهدي غا تيشوف ) مهدي اجي اخويا جيب شنو بغاو ....المحل اليوما تنور والله العظيم....كان طايح عليا الضيم حتى شفتكم ...

ياسمين ( مشطات حلا بعينيها عجباتها ) : حتى انا رتاحيتلك الحبيية ....عينيك غزالين مشاء الله....

حلا ضحكات و ردات شعرها يتسرسب ورى ظهرها ...

_ نتينا لي فنة ربي يخليك.....

عيشة غا تتشوف و تعصر و دور عينيها بين ياسمين و حلا ....تتشوف كل وحدة تتشكر فالاخرى و فرحانين مع بعض ماناقصهم خير.....مارتاحت و ماعحبها حال...باغية غا تفقص خلا. و هادشي ماعحبهاش......! زمات دوك الشفايف و هزات يديها تتأمر فحلا...و تغوبش فياسمين لي ماعرفات راسها شنو دايرة....

_ ورينا شنو عندك ....بركة من الهدرة الزايدة....

نفدات حلا طلب عيشة و ناضت تتجمع الموديلات الجداد باش تحطهم ليهم....! استغلت عيشة الفرصة و غوبشات فياسمين ..

_ عرفتي هاذي شكون ؟

ياسمين بغباء : حلا اخالتي عائشة ...زوينة تبارك الله ...

عيشة بين سنانها ماتتعرفش تنافق بزاف دغيا تتبان عليها...

_ هاذيك واحد العلقة كانت لاصقة فعبد الصمد....لفعة و جنية كانت ساحرالو....هو كيهرب منا وهي كتلصق فيه .....

ياسمين بحال شكاتها بالابرة...تقلبات ووجها تغبرات...كمشات حواجبها الرقاق وخبات غيرتها بزز...

_ باز هاد المدلولات ...مابايناش فيها....( من بين سنانها ) مازويناش اصلا ...عندها بزولة كبيرة على الاخرى....عاملا عدسات نحلف عليها.....

سكتو ملي جات حلا و حطات ليهم الموديلات الجداد ....و خلات عينيهم غا تتبري ...؛ ياسمين كانت غي كاذبة على عيشة قالت ليها غتشري اما هي غا تتشوف و تلف ماجايبة معاها فرنك واحد.....! اما عيشة غرضها تفقص حلا كثر من تشري الذهب ...!

حلا تتوري لياسمين و تبسم معاها و ياسمين غا تتعوج فمها و تقلب عينيها....

_ شوف هاد اونسومبل سامبل كتحمق اياسمين...عرفتي غتجيك خطيرة....

ياسمين ( غا تتعفر و تجرب وهي مغتشري والو ) انشوف ....!

لبساتها و شافت راسها فالمراية ...عوحات فمها و ساطت...

_ماعجبنيش...شي حاجة اخرى والو...

بقات لي تتجرب تتقول ماعجبنيش و عيشة تتنكر من جهة : ماعجبتنيشاي هاذي....جيب حاجة اخرى.....هادشي قديم....

حلا شعرها طلع للسماء...و تعرقات معاهم و مع ذلك محافظة على ابتسامتها....تتحط ليهم غا الرفيع ....هزات دمليج ثقيل و نطقات...

_ خالتي عيشة هذا شفتو منزل غي فيديك غيجيك واااعر.....

عيشة مدات ليها يديها تلبسو...: لبس نشوف ...

حلا مسايراها : ماقلتيشي اخالتي عيشة شكون هاد الغزالة من العائلة ؟

عيشة تتشوف بنص عين فياسمين ...: قريب تكون من العائلة اذا بغى الله.....

حلا فهماات و عرفات شنو كاين ...رمات العين لياسمين تتشوف فيها غي من التحت التحت و بابتسامة مزيفة واسعة ردت ...

_ ماتكون غا عروسة عبد الصمد..كاينة ولا لاء اخالتي عيشة ؟ كتحمق مشاء الله عليها ...يجيو مع بعضهم كيحمقو ....

ياسمين دارت راسها حشمانة و نظرة مسمومة كديرها فحلا....اما عيشة هزات حاجب و ردات معفرة ...

_ اذا بغى الله و بعدو منا العقارب ....

حلا حسات بيها تتمعن عليها....حتى هي ردات شعرها ورى ودنيها و فرنسات ليها ببرائة ...

_ و العقارب بعد من بلاصتهم و حضي فين تحط رجليك تهناي منهم ..واش كاين شي ناقص عقل تيحط رجليه بلاصة العقارب و تتقول هالعار غا يبعدو مني...! ( تتبوهل ) دابا الله يستر كل مرة نسمعو واحد مات بعضة عقرب....الله بستر و صافي....

ياسمين تتشوف فعينين حلا جاوها غراب و تحركات الغيرة فيها وخا عارفة راسها زوينة...

_ عفاك عاوني نشد هاد السلسلة .....

حلا ناضت تتعاونها و تفرنس...

_ زوينة هادي جاتك مع رفبتك فنة ....

ياسمين حات تعيبها ردات عبشة....

_ رقبة بيضة كي الحليب يجي معاها كلشي ....

ياسمين دوات بزز : عجباتني بزاف...

عيشة بنظرة قاصحة : صافي غتشري ..

ياسمين تزيرات : بلاتي نشوف ...باقي ماقررت....

حلا : مالها ...ناقصها شي حاجة ؟ جربي و نتينا رافعة شعرك...هكاك....و شوف دابا ...عرفتي خطيرة خطيرة....( قلباتها مزاح ) ياختي صباح و نتينا تجرب كلشي جا معاك غا نتينا وقيلة ماعولاشي تشري......

ياسمين هزات حاجب : لا و علاش انا معذبة راسي و ماجا نتفرج فيك ولا ؟ ( تتعوج قدام المراية ) عجباتني هاذي....

حلا عوجات نصها و حركات يديها لمهدي ناطقة بمكر...

_ مهدي اجي وزن قدام عينيها و قطع الثمن....عروسة خالتي عيشة اخيرا عجباتها شي حاجة....

هوما هكاك .....تسمع صوت خشن و غليض تيدوي مع مهدي....صوت زهق مع ودنين حلا وطلعو حواجبها...اما عيشة فتحات عين و زيرات فمها مغددة....شنو كيعمل الصمدي هنا.....!!

تقدمات حلا لعندو برسمية مخلية عيشة تتشوف فالصمدي مغددة و الدم حار فيها و الصمدي تيشوف فعيشة و ياسمين بملامح باردة ...ماكانش عارفهم هنا ...غا رجلين خداوه للمحل ...!

حلا( بلكنة جميلة و حركات أنثوية طلعهم الصمدي بنص شوفة ) : مرحبا ....خالتي عيشة اليوم متافقين تفرحوني بالمجية ديالكم ..الله نهار شحال زويين......

عيشة زمات شفايفها : همم جينا نشريو شوية ذهب سمعت طاح .....جابك الله اعبد الصمد ...

حلا تتشوف فيه من بين رموشها و تدوي بلطافة....

_ جلس...تشرب شي حاحة...

جلس كي الوزير....مفرش يديه ورى الكنابي ...!و دايررجل على رجل تيشوف فيها بشبح ابتسامة لي تتعصبها ...

_ اذا بغات خاطرك نشربو علاش لا ! ( شاف فياسمين نص شوفة ماكملهاش و دوا مع مو عادي بحال عارفها جاية لهنا ماحشمهاش....) شنو خديتي الالة يمة ..عطينا نشوفو...

ياسمين قلبها ضرب و تفعفعات و تزاد معاها الزايد ..صدمها ماكانتش متوقعة تلاقى معاه اليوم ...تترفع يديها و تسرح شعرها و مرة ترجعو للقدام مرو اللور..مرة دير رجل على رحل مرة تجمعهم للحنب واحلة مع جلايلها و تتفرنس و خودها تزنكو....و هدرتو كملات عليها.....تيعجبها و صوتو سمعاتو غي مرة وحدة صافي تغرمات بيه....! ديك الثقالة ديالو و الشوفات لي ماتتعرفهم علاياش مطويين....تتجبد ..! و كثر دوك السنان بيضين فايتين بياض الحليب ملي كيدوي العين تتمشي نيشان لتما....!!

عيشة تتوري للصمدي مخنزرة فيه وهو مبرد مامسوقش كاع : شوف هاذو قدام ماعجبونيش....و فيهم هاد النقشة قديمة....

حلا تدخلت بلطافة : و علاش ماقلتيهاشي اويلي...انا شنو كنعمل هنايا.....ماعجباتكشي نعاود نجيبلاك حاجة اخرى مخيرة....( ناضت تتدور فداك الطالون و المحل كلو زاج ...تتبان وجهها و حركاتها فين مامشات....!

دارت حلا شافت فياسمين : ياسمين نوريك انسومبل د العريسات واعرين ...

ياسمين غا تترمش : وخا وريني...( رمات شعرها للور تتنفخ و تشوف فالصمدي بنص عين ) صهدت ..الصمد عندكم هنا.....

حتى حد ماجاوبها...الكليما شاعلة... و الجو شوية مبرد....!! ماشي الصهد ...!

جاب المهدي المشروبات و حلا جابت الجديد و جلسات فكرسي ملكي مذهب و عاطي العين...جابتو غي حلا اما عبد الله مكيتسوقش لدوك الاثاث و الزواق ...عندو غا ااذهب المهم....!

حلا( تتشوف فعيشة و تسايس معاها باغية غا تبيع ) : و هاذو اخالتي عيشة انا نحلف عليها غيعجبوك.....غا بلاتي اري ديك اليد لهنا انا غنلبسهم ليك....كتجي هي و هاد السنسلة ديالها...شوف ثقيلة تبارك الله هاذو جداد...( شافت عين عيشة حوالو مع القطعة لي جابت ليها زادت تخشعات معاها و تحمسات ناسية الصمدي و ياسمين...تتشوف غا عيشة و الزرقات داخلين صافي ) عرفتي تيلبسوه غا صحاب الثلاثين سنة ...و نتينا اخالتي قلتها ليك و نعاودها.......مشاء الله مشاء الله....تتبان صغيرة ...

عيشة تتعري رقبتها و تنفخ : لبسني حتى هاذي نشوف.....

حلا ( وقفات وراها تتعلي ليها الفولار منحية عليها تتشد ليها السنسلة. و سالفها المزعر محني معاها و رموشها ماشين فخط متساوي....)

_ هاهي ...نوض معايا لهاد المراية ...تبان ليك واعرة....

عيشة ( تتشوف فالمراية و شفايفها غا محموعبن ) : همم و هاذو عندكم بعدا كيعمرو العين شوية....واه نص نهار داز و بالزز جبرت هاذي عجباتني....

حلا ( بابتسامة ) : نتينا ذواقة تبارك الله ....عينيك كيختارو غا الرفيع فين ماتوصلني شي حاحة مضخمة تنقول والو هاذي غي ديال خالتي عيشة.....

الصمدي حك حاحبو وظهرت شبح ابتسامة مترقبة على وجهو ...الواحد مايعرفو واش بصح تبسم ولا غا كيتوهم...

خلات حلا عيشة تتشوف راسها فالمراية و جرات مهدي للجنب ...مزنكة و عينيها تيغلييو جمعات شعرها بحماس تتدوي بالزربة...

_ يابيا يابيهم اليوما....وقف حدايا نتينا غا نغمزك بقى تحي لعندي و تجبلي هاذوما القدام مزال ماتباعو ...و تقولي حلا هاذو عاد جاو جداد نوريهم ليم...و ندير راسي انا نسيتهم...فهمتي ولا نعاود....( بصرامة ) واش كتفهم عليا و لاكنهدر بالشنوية.....طلق راسك معايا....

مهدي طالب غي السلاك : وخا اختي حلا ....

ياسمين تطفات شمعتها....! حاصلة بين الخلاص و معصبة من برود الصمدي.....!كان تيشوف فيها و مولفة شوفاتو ليها و عارفة راسها زوينة و أكيد تتعجبو ...لكن في حظور حلا حسات براسها بحال ماكايناش كاع ماعرفاتش السبب و ماحملاتش البلان..عاقت بيه تيسرق من حلا الشوفات و يرجع يشوف فتليفونو عاقد حجبانو...... و هي غي جالسة و تتشوف و مزيرة كي دير تفلت ! لكن هيهات...حلا حاطة عليها و حالفة مايخرجو من لهنا حتى تبيع بيعة صحيحة. ..!!

حلا ( غمزات مهدي بعينيها ) مهدي جيب الموديلات د العريساات الجداد ....( قربات من ياسمين تتوريها نمادج الخوااتم ) ياسمين مابغيتيش بحال هاد الشكيلات...هاذو هوما لي خرجو ..تيعجبك الذهب البيض ؟

ياسمين الهدرة واحلة ليها : مم ماعرفتش....زوين ....

حلا هزات العين لاول مرة فالصمدي تتشوف بين رومشها كي الذيبة : شوف مع خطيبتك عاونها تختار ...! قلنا ليها جاتها السنيسلة زوينة...والو ماتيقات ...دوي نتينا تسمع منك....

الصمدي هز حاحبو الكثيف و شاف فمو نيشان جامع الكلام غا بزز و شلا كلام ..مخلي عيشة عينيها المدورين بالكحل خرجو و جوج رموش لي تكساب طارو....ناطقة بلا ماتحس و الحروف سلتات بهمس ...

_ اللقوى ان شاء الله ...

ياسمين ( شافتو سكت تحلات ليها و تنفخات ) لا ماشي هيداك....عجبوني انا قلت زعما حتى تسالي خالتي عائشة و تشوف هي معايا واش مزوينين ولا عيانين...هي تعرف حسن مني....

عبد الصمد ملاقي حواحبو وحط رجل على رجل...يد موسعها و يد فتليفونو...اما عينيه محطوطين على مو ماحيدهمش......! حتى عيشة بقات غا تتدور فعينيها و تهرب من شوفاتو.....و تنفر و تسوط على حلا...تبرزطات...

_ سكت من الهدرة...صافي اري هادشي جمع غنشري هذا....و حتى هذا.....( خنزرات فياسمين صاعرة ) و حتى نتينا نهار و حنا كنقولو لك واعر واعر غا هزو حيد و نتينا هنا ماعجبنيشاي ماعجبناشاي ...شنو عجبك....؟

ياسمين ( تتشوف مزنكة مصدومة منها...مامولفاش طبيعتها...كل مرة تتعطيها وجه ضربات خمسة على فمها و سكتات...)

حلا ( حافظة طبيعتها و عارفاها كي دايرة ) : و يمكن كانت كتستنى فولدك يختار معاها...برد اخالتي عيشة ...برد ...

عيشة غوبشات( ماقالت حمد لله ماعلقش حتى تتخرج حلا بشي هدرة : حبس من الهدرة الزايدة.....

عبد الصمد ( منيرفي وغا تيشوف شوفاتو قاصحة و صوتو حرش غليض ...هز العين فحلا تينعت للخواتم )

_ مد ليا هاذوك نشوف ....

حلا ( بحركات مدروسة مدات ليه تتشوف فيه غا من التحت التحت ) : هاك ختار على خاطر خاطرك ...بعض المرات ري الرجال تيصدق حسن من النساء.....( حسات بيه تيمشطها بعينيه هزات حاحب و كملات ) تزيد تشرب شي حاحة....؟

الصمدي ( حاجب مرفوع ) : اذا بغات خاطرك....

تكلف مهدي بالطلب و عبد الصمد تيختار ...يهز كل خاتم بصبعو السبابة و يشوف فيها شحال بحال تيوزنو غا بعينيه و يقيس العبار.....؛ ياسمين الفرحة ماسايعاهاش...تتحيد الخواتم من يديها بلا ماتعيق و تخبي فصاكها باس تخوي صبيعاتها و تستقبل الجديد..اما لالهم عيشة ضاربة السواد في السواد...؛ تتطل براسها كي الزرافة مطولة عنقها تتحضي على عبد الصمد و تتخنزر فحلا و دور تحضي ياسمين و تقطب جبينها....!

عيشة : غزاال هذاك....واعر....

عبد الصمد شاف فيها بنظرة غير لينة : مزال باغية شي حاجة الالة يمة ؟

عيشة : و صافي نهز كلشي انا حتى مرة اخرى اذا بغى الله ...

عبد الصمد حط عينيه على خاتم هاز الخير و البركة و شاف فحلا بنظرة الذيب : ماتجربيش لينا هاد الخاتم واش يجي على قياسك....؟

حلا كدور عينيها بيناتهم شافت كلشي تيشوف فيها حرقوها بشوفاتهم و الدم حار فيهم ....ياسمين ولا حمرا كي ماطيشة و عينيها مقهورين فيهم الدموع.....!

رجعات حلاشافت فيه بنص عين زربات عليه و هزات الخاتم من عندو مسايراه تتقيسو ورموشها تيشطحو لقاتو على قياسها نيشان ...بلعات ريقها و حيداتو دغيا تتفرنس ليهم بزز طالقة لسانها...

_ شفتو كيجي مزوين فاللبس...و حتى الخاتم كيعمر العين ...شنو باغي تفكر حتى النسيبة ديالك اسي عبد الصمد ؟خود ليها شي شرتلة تبان ليا انا حسن .....

عبد الصمد عينيه شبه مبسمين تيدوي ثقيل و متهمل ...

_ ماقلتي عيب خلي الخاتم و ختاري لينا للنسيبة على ذوقك....علاش نعرفو حسن منك !

عيشة فديك اللحضة تقول شعلتي تحتها العافية ناضت واقفة تتغلي : عبد الصمد نمشيوو دابا....

عبد الصمد ( ناض واقف تيدوز رقم كريم ): صافي قنعتي ؟ غنصوني لكريم يجي وراك.....

عيشة حجابها تلاقاو مافيديها ماتقول : العافية هنا...صافي جمع الحساب نمشيو بحالنا ...هاد النهار مافيهشاي اابركة يالطييف....

حلا نقزات واقفة تتبسم...

_ انا بعدا محال يتعاود ليا بحال هاد النهار...صافي الالة عيشة فرحي لينا بالذهيبات الجداد و نساي عليك هم الدنيا....( تتجمع القطع و هزات حتى سنسلة ياسمين بوحدها حطاتها فبواطة ديالها داكشي متول عاطي العين....)

_ ياسمين عطيني نمرتك نسجلك عندي اذا بغيتي طبعا....

ياسمين مزيرة حاضية غي ديك السنسلة : وخا قيدي....

قيدات حلا نمرة ياسمين و كملات اجراءات البيع....!

حتى ناضت ليهم لالة ياسمين بالدراما و البكاء ...تتقلب فصاكها و تطيح دميعات و تولول...

_ طاح لي البزطام ديالي....اواعدي يانا فيها كلشي لاكارط ديالي وكلشي و حتى الفلوس....ياربي شنوغنعمل .....

عيشة قندشات : فاين كانو عينيك ...و فهايم هاذ. عاود الله الله ....

حلا (عايقة بيها من الصباح : بشوية عليك الحبيبة ديالي....كتوقع انا دايما مطيحة التليفون بعدا ....تقدر تكون مادرتيهشي كاع فالصاك و باقي عندك فالدار دايما كتوقعلي هيدا ....( تتعيط لهدي ) مهدي جيبلا شي حاجة تشربا مسكينة.....

ياسمين تتشهق و تنوح تزيرات و بغات غا تخرح من تما...

_ صافي بلاش....حتى مرة اخرى و نرجع مورا السنسلة ....

الصمدي يد فالجيب و يد فتليفونو مطول ودنيه و حاني عينيه فالتليفون....!

حطات حلا السنلسة مقهورة ...كانت حاسبة صافي باعتها....! عوجات فمها و كملات الاجراءات ....والصمدي خرج شوية يخرح الفلوس و حط خلاص مو كاش...زرقة تابعة زرقة. ....! و ياسمين تتخنزر و تقلى غا بوحدها.....!

حتى خرجات عيشة و ياسمين مع كريم ...! تتنكر طلعات لكريم الدم ....

_ علاش بقى تما و علاش قيسلا الخاتم علاش هذا بغى يسخطني عليه.....علاش كيغددني علاااش...

كريم ( مافاهم والو ) : برد اخالتي عيشة ...

ياسمين ( شادة الجنب ساكتة و تتسمع ...داز عليها نهار كحل كرهات فيه راسها و كرهات عيشة و كرهات حلا....)

عيشة مجننة : يبردو فيك الماء ان شاء الله.....نتا عارف شنو تحت راسو و شنو كيرون تما....غا قارم و مخبع عليه .....

____

فالمحل...! حلا محاصرة بشوفات

الصمدي....تتحط ليه الشكيلات وهو كيختار....و مهدي حداهم جالس حلفات فيه حلا و هدداتو اذا غبر من قدامهم تخرج عليه...

حلا (مجنبة رحليها متتشوفش فيه كاع ) : كاين هاذو فيه هاد النقيشات هكا ...و هاذو كيجيو مع كورميط ....

الصمدي خلاها حتى كملات و نطق : ختاري نتي ....

حلا ختارت الاغلى و حطاتو ليه....حتى هو مازادتش معاها....هز الخاتم لي قيسات و الذهب لي ختارت ...جمع و طوا و ثبت عليها العين ناطف ببحة سمعها حتى مهدي لي ظل مخرح فيه عينبه....

_ فات شعبان و رمضان و ورى رمضان و هاد الشهر يا بيا و يا بيك ابنت الذهايبي.....!!

حلا ( تزيرات قدام مهدي تتدوي بين سنانها و صوت شبه خافت....)

_ مانكونش اصلا بنت الذهايبي اذا تربطت بيك......

( حولات عينبها امهدي لي سمع كلسي و قلباتها تفرنيس ) مزال خاطرك حب حاحة اخرى اسي عبد الصمد...

دخل عبد الله بديك اللحضة و تجمعات حلا سالتة....!

عبد الله غي شاف عبد الصمد ضحك حتى بانو ضروسو ...! دخلو للبيرو تيهدرو شحال ...! و الصمدي ماعاودتش هز فحلا العين كاااع قدام عبد الله....!

جلسات حلا تتسوط و تشرب فالماء شحفات ....تتضرب بصبعانها فوق الزاجة و ترمش و تمتم زامة شفايفها ...

_ شهر لصقة و شهراين قالب علينا كمارتو.....اذا فهمت فيه شي حاجة انا **بة ....

وصل وقت العصر ...!

كانو حلا و عبدالصمد غيشدو طريق لديك الارض يشوفوها لكن اتصل بيهم العم الاكبر و علمهم بلي خو عبد الله تزاد عليه الحال...! مشى عبد الله لزيارتو ...و دخلات حلا للدار....تتنهد و تعاود عيانة و شحفانة....! دوشات و طاحت كاااو ناعسة.... !!

اما فدار عيشة....! قايمة القيامة...! عيشة غا دخل الصمدي طارت لعندو تتدوي بين سنانها...

_ ياك قلتي مابقيتي باغيها ...واش كتفتش على السخط بيديك....

عبد الصمد كيدوز يديه على حناكها بحنية...

_ عيشة بردي......

عيشة ضربات لبه يدبه : يبردو فيد ان شاء الله....انا بغيتلا تشتت ديك الحنية.....ياك قلتي مابقيتيشاي باغيها سنو عملات عاود ...حركات المجامر...

عبد الصمد حك رقبتو تيحاوب مثقل : هذاك وقت و دابا وقت...تما هدرة و دابا هدرة اخرى.....!

عيشة عقلعا غيخرح : وعلاش هي علاش...! شنو فيها هاذي...كاين ماحسن منا و كيفتنو عليها ....الزمر صفراء نقطة الدم مافيهاس....عطا الله العزبات بحالا ...علاش هاذيك اللفعة....

عبد الصمد ( ماجاوبهاش )

فالصباح الموالي...! خرجات حلا مع عبد الله و عيط ليهم السمسار ..جاوب عبد الله و حلا قدامو تتسمع...

_ سي عبد الله مول ديك الارض والو قال باع و كمل .....

عبد الله عقد حاجبو...

_ اواااه ! صافي شد البيع و تبارك الله كان عندو اراضي هوما ...

السمسار : و شلا ورث ...غا هو كان باغي يبيع باش يصلح و يحيو و يقسم و شد البيع ملي خرج واحد 200 مترو....

عبد الله تيشوف فحلا : و شكون شرا كنعرفوه...زعما لا والو ضروري نشوفو معاه شي جلسة ....

السمسار : وخا اسي عبد الله قطع نسول و يجيك الرد.....

عبد الله قطع الاتصال و شاف فحلا ...

_ ديك الارض بلانها خاوي احلا....

حلا ( قلبها طاح ) : كيفاش خاوي...! زعما تشرات ...

عبد الله تنهد : و شراها شي حد عندو سماسرية صحاح.....حيت هاذي همزة حد مايفلتا ...

حلا ( حبسات البكية ) : اوا انا ماقلتها لحد باش يتبعني عليها بالعين..و علاش هادشي معكسلي هيدا.....حتى درتا فبالي و بايتة كنخطط و نشرط و نصمم....و الله ينعلو زهر هذا..........

رن تليفون عبد الله و رد مرة اخرى....

السمسار : الو سي عبد الله....لي شرا نيت من حومة المقاطعة شادها المقدم عيسى ....شي واحد سميتو عبد الصمد .....!

عبد الله : اه صافي عرفتو ..بارك الله فيك اسي عيسى وخا يالاه نخليك على خير....

قطع معاه و شاف فحلا...

_ ماكتابش و صافي ...فيها خير ...يلاه نركبو ..

ركبات حلا فالاوطو تتنكر و تعاود..

_ شكون شراها...كنعرفوه...و حتى قلت صافي غنزعم و نشري...و مالو مابغى يزيد يبيع....

عبد الله : و حلا و نعل الشيطان ابنتي الله يرضى عليك...حرقتيني فراسي.....

حلا كمشات حجبانها حابسة اابكية ....

_ الشيطان هو بنادم...! كاع هذا زهر عندي فاين غنجبر دابا مية مترو قل من عشر دمليون....شنو هذا لي شراها سقسيتي عليه السمسار...

عبد الله ( شغل السيارة ) : مم عبد الصمد جيراننا كااع...

حلا تقول كبيتي عليها زيت من المقلة تتشوي ....حجبانها تعلاو و عينيها ولاو تيخلعو ....

_ شكوووون !! ولد عيششششة. ....

عبد الله : هو ...و على ماسمعت عندو اراضي حتى فجوايه بوز اغلال و كابو نيكرو .....هذا وصلها ليه سخونة....

حلا حبسات البكية و دورات عبنيها تتفكر بالزربة و الشمتة تتطلع و تنزل فيها.....

_ عاود هدر مع مول الارض....عندو بزاف قلتي ...اوا شوف واش يبيع شي مية !

عبد الله باسف : مابغاش صافي تقلب...باع ميتين و جمع......

حلا ( عينيها مجبدين كثر ماهو محبدين اصلا ) : و عاود هدر معاه ابابا....شنو غنخسرو ..ولا عطيني نهدر معاه.....شوف ديك السمسار ياكلو عقلو ...مالو هاد المعكس حتى هو....! شنو غيخسر ....ياك قال خصو غا يبيع و يتهنى ....

عبد الله (تييفكر ): و دابا نشوفو الارض و نديرو دورية تما و ساعة نشوفو بلان مولاها شنو باغي ....

حلا ( قلبها تيحكها ) : لااا والله لا نزلت رجلي تما حتى تهدر مع مولاها و يقوليك اجي...ماشي نمشي انا و نتشوا بالغدايد و بتعكس كاع مايعطيك حتى فرصة و يقطع ليك الامل .....

عبد الله صونا على صاحب الاراضي دار معاه موعد و علمو انه اصلا تما ...؛ جهد نص ساعة كانو تما....!وقف عبد الله الطنوبيل و خرج تابعاه حلا تترمش بعوينات القطة و تخلف بداك الطالون شادة فعبد الله و عبد الله قلبها نكير ...

_ و شنو ديك الصباط عاود احلا و ها حنا غنسخر ها عاود.....

حلا ( تتشوف بالاراضي و الارض مامصلوحاش عاد فتحو الطربق و عزلو ...مزال الدنيا خاوية ...)

_ فين الارض ...!

عبد الله : باقي خمسة دقائق على اارجل ماداخلاش الطنوبيل من هنا.....

كملو طريقهم على الرجل ..و حلا شادة فعبدالله تتعواج بداك الطالون...! حتى هزات العين من بعيد على الصمدي واقف مع راجل لابس فوقية بلدية كبير فالغمر....! زمات حلا شفايفها و حنات عينبها بالزربة ملي شافهم عبد الصمد و الاستغراب باين فعينيه....

عبد الله : هاهي الارض ...و راه هو مولاها واقف تما مع عبد الصمد وقيلة هذاك ....

مشى عبد الله لعندهم مخلي حلا واقفة بعيد شوية عليهم...عاطبة المهمة لباها ..! مربعة يديها و مكمشة عينيها من الشمس...مزنكة و عويناتها تيلمعو ...!

عبد الصمد دار شبه ابتسامة و حيد نظاظر الشمس ناطق

_ سي عبد الله.....

تسالمو سلام رجولي و عبد الله عاطيها على التفرنيس ...تيخلي حلا عا تتشوف و تخنزر غا من التخت التحت...

_ سي عبد الصمد....حتى نتا كاين هنا....

عبد الصمد : صدفة زوينة هاذي....!

البائع ( بلكنة جبلية ) سي عبد الله هذا لقولتك صافي بيعلتو الارض ....

عبد الله طبطب على كتف الصمدي : الله يجلعها خير....قالها لي سي عيسى ...! و عرفتو هو شراها....قلت نجي نهدر معاك على حساب شي مئة اخرى ...بنتي باغية تشىري شي بركى...و كانت عوالة على هاذيك قبل مايشريها سي عبد الصمد....

عبد الصمد ( بجدية ) : ماكنت عارف بنتك عينيها عليها اسي عبد الله....

عبد الله : ماعليش اولدي....فيها خير ! غا هي كانت دارتا فبالا و شحال وهي باغية تشوفها و تعرفها فيين جات بعدا عاد تشوف الشراء ...ساعة كلشي مع المكتاب ....( ضحك مع البائع ) نشوفو سي محمد مايبعيش لينا شي مية...

سي محمد ( ضحك ) و زيد بعدا تشربو شي حاحة القايلة حرقاتنا....

عبد الله ضحك : وعطينا غا ابشارة بعدا كاين شي ظوء ولا والو.....را مانشاركو معاك ملح ولا ماء قبل مايكون شي بركة باذن الله....

سي محمد تيحك لحيتو : و شنو غنقولك اسي عبد الله....البيع شديتو...كان خصني غا شي بركة نقسم بها و نعزل بها أرضي ....و ملي بعت ديك 200 مترو قلت صافي هذا الجهد ...حتى اذا حتاجيت شي بركة نصوني عليك....

(رن هاتف سي محمد و بعد منهم تيجاوب...)

عبد الصمد ( مربع بديه كتاافو عاض من تحت ديك الشوميز و عينيه شبه مكمشين بالشمس تتحرق ناطق بحدية و عملية ) : و على هاد الحساب ان شاء الله نشد الملكية و اجي نبيع ليك 100 اسي عبد الله.....

عبد الله ( الشمس قهراتو ) : و هاذي خصها حلسة بعقلها اولدي.......!!

تسالمو مع البائع و زاد عبد الصمد حنب عبد الله....تيبان عبد الله قليول قدام عيظ الصظد...داير منو جوح فالطول ...!

شافتهم حلا جايين جمعات الوقفة و استقلبت شوفات الصمدي بنظرة ناربة.....

عبد الصمد ( حياها غا بغينيه و نطق ) السلام عليكم......

حلا ( ابتسمت معاه بزز مستقبلة. التحية ديالو و ردت السلام بصوت شبه خافت ) و عليكم السلام

عبد الله ( مد المفاتيح لحلا ) هاك ابنتي سبقني للدار......

شداتها من عندو و لسانا تياكلها على حساب الارض ...ماصبرت وسولاتو قدام الصمدي...

_ شنو درتي ؟ بغى ؟

عبد الله ( دار فيها شوفة دات معنى ) : للدار ابنتي و نهدرو......

ركبات سبارة عبد الله و تحركات من تما سمعا و طاعة و عبد الله و الصمدي شدو طريق اخرى....!!

وصلات للدار ! لقاتها عامرة ببنات عائلتها....ابتسمت معاهم و سلمات و جلسات بخدود مزنكة....

حميدة يشك : فاين كنتي هيدا مزنكة باالقايلة ...

حلا : كنت مع بابا...تلاقا مع شي صاحبو و مشى ..قال ماغيجيشي للغذاء...غيتغدا معاه....

خالتها ( تتضحك ) : نوض بدل عليك و اجي جلس معانا توحشناك ...

حلا ضحكات حتى طلعو خدودها و نطقات بمزاح

_ و عرفتكم توحشتوني...اصلا ماكاينش هذا لييجلس معايا و ما يتوحشنيش....!

بنت الخالة : الله يزيدك تواضعا....كارثة مثقلة هاذي....

دخلات لبيتها. بدلات عليها و خرجات لعندهم جامعة القندورة ختى لفوق الفخاض و مربعة وسطهم....عاطياها للضحك و التكركير مع خالاتها و بناتهم....!! غا المسطية عند ختها ...حتى جبدو ليها الزواج و من الزواج نقزات خلود تتعاود ليهم على الصمدي....! و كان رد الخالة ...

_ و علاش مبغاتوشي عاود ؟ ياكما قصير !

حلا ( بدات تقندش ) : لا طويل من خالي حسام كاع....و خا هكاك مابغيتوش و من عند الله....

خلود : مابغاتوش ااسيدة صافي ...! وخا مسرار طول و عرض تبارك الله و الصواب يالالة و هوليود سمايل و مهلي فراسو بالماركةو الحديد الرفيع.....و مو دايرها ملكة ...! غا هي مابغاتوش ....

حلا ناضت من وسط الجماعة شعرها مجموع للسماء و القندورة عندها فاضحة فخيضاتها البيضين...معلية حاحبها تتعرعر عليهم...

_ صاااافي كتجريررو عليا....هي قولوها بالعلالي ...شوف الله يرحم يماكم...توحشتو حلا هاهي حلا حالسة معاكم ...تجبدولي داك المخلوق ....ماغنبقاش جالسة معاكم......و يانا مغنتزوج حتى نقنع و يقولالي عقلي....! الرجال عطاهم الله مغنبقاشي بلاش غا بلا ماتخافو.......

الخالة ياستغراب : وصافي غي جلس اواعدي على محعورة....

حلا ( تتبغي تبرد والو فقصوها ) : راني حامع. الاعصاب د سيمانة ....جيتو نتوما طلعلتو ليا الدم ( هزات جلايلها و تجبد فعويناتها ) كتشوفو داك ولد عيشة.... نختار نتزوج براجل مطلق جوج مرات و مانتزوجش بيه هو ...

خلود ( ضحكاتها ) : حتى الرجل مطلق مسكسن عندها ماصالحش للزواج...حكارة هاد حلا...

حلا ربعات رجليها تترمش : ماقلتشي ا

ماصالحش ولكن انا كنعيف مانقدرش نتزوج براجل مستعمل.....

حميدة حطات المشروبات فوق الطبلة و ضرباتها ليها بتخنزير ة ..

_ ....مالو المطلق ..هانا تزوجت بباك و مطلق .

. داكشي غا مكاتيب والله ماندمت علاش تزوج بيه كنحمد الله باليل و النهار حيت سمعت كلام يما.....

حلا علات حاجب : و هذاك بابا غا درويش د الله....عزيزة الله يهديها هي لي ماكانت تتحمل حتى وحدة و دخلات كي السوسة بيناتهم....و عندك الزهر تزوجتي بابا حتى كانت عزبزة ماتت الله يغفر ليها فهاد النهار ( تتشطح رموشها ) وخا احميدة ماعرفتش كيفاش رضيتي بيها .....

حميدة تتضحك : والله الا باباك شفتو مرة وحدة ...كنت خارجة من المدرسة وهو واقف برا...شافني تبعني للدار ...و ماطلعش النهار حتى كان هدر مع بٓا و حتى انا مانزيدش الهدرة فوق كلامو ...قالي واش تزوج بيه قلتلو لي كتشوفو ديرو ...اوا يابنتي والله ماندمت ليومنا هذا ....

_____

طاح اليل و جا عبد الله تعشى و دخل للصالة تيجمع شي وراق مشغول...! سلتات حلا و دخلات لعندو تتمسكن...

_ بابا مشغول...من قبيلة و انا كنستناك شنو درتي مع داك الراجل...

عبد الله( حط من يديه و تفرغ ليها ) : الراجل مابغاشي يبيع....ولايني عبد الصمد قال غيبيعلك 100 مترو لي بغيتيها و بالثمن باش كنتي معولة و ينقص كاع غا يشد الملكية....

حلا ( تشلطات ) : حلف...هو قالها ؟

عبد الله ( دارفيها شوفة قاصحة ماتيحملش ديك خلف بحال تيكذب ) : حلاااا ديك حلف حيدا من فمك كنلعبو حنا هنا ولا ....

حلا ( تلفات ) : لااا ابابا و ياناا غا تنقول و مكنعرفش شنو كنقول....و غي قلت الصراحة و صافي سمحلي والله مانعاودا.....دابا قولي واش كيهدر بصح زعما....

عبد الله : ايه بصح و الراجل معقول عندو الكلمة ...شي 15 يوم يعاود فيها البيع و يبيع ليك مية مترو.......

حلا ( بلعات ريقها تتدور فعينيها بدهشة ) : و علاش شنو مصلحتو......

عبد الله ( قصح فيها الشوفة) : و علاش كاع ابشر كيجريو ورا مصلحتهم حسابليك مابقاو ولاد الناس فهاد الدنيا...هو براسو تصدم ملي عرفك كنتي غنشري ...ماكانش كاع يدير عينو فيها.....يلاه نوض الله يرضى عليك ابنتي عملي شي كأس اتاي بالنعاع مشحر.....

دارت ليه ليطلب ! و تكات على يمينها تتقلب فبلاصتها و تبلاني ..الظوء طافي و راسها عامر بشلا بلاناات......!و فبالها غا الصمدي شنو ناوي ليها و لاياش كيخطط ...!

غارقة فبحر الشوهة و المتعة...تتضحك بصوت رنان و دور يديها على عنقو و تزير عليه عاجبها الحال و طالبة عليها متلذذة و مستمعة حتى الدموع هبطو ليها مع جناب عينيها...تتحس براسها طايرة فالسماء.....! حتى تتسمع الزغاريت و الصداع وهي تفتح عينيها ...و تقلب في فراشها ...حتى ثبتاههم فالسقف دورات عينيها بمين شمال و جلسات طافجة حاجبها مرفوع...ناضت تتسوط ماحاملاش راسها...

_ هادشي لي ناقصك ال**بة غي الاستحلام و مع من مع ولد الجلبانة.....

دوشات وقفات قدام المراية حجبانها ملاقين مزنكة تقول نعسات معاه بصح ماشي حلم....! رمات شعرها اللور و خرجات تنشر نكيرها و اعصابها على موالين الدم ..غا تتفكر الحلمة تتغزز سنها على شفايفها حتى تتبغي تخرج الدم ....

ماتلاقات غي مع خبر حمل خلود ... ناعسة فحضن حميدة تتبكي بالفرحة....و حميدة تترضي و تعاود...

_ الحمد لله و شفتي ربي ماخيبكش...الله يثبت حملك و يفكك على خير....

حلا : شنو كاين....مالكم على هاد ااصداع.....حتى نهار الاحد ماتخليونا نعسو عىى راحتنا.....

حميدة ( تتدوي بفرحة ) خلود صدقات حاملة....كان قلبي واكلني عليها مسكينة.....

حلا ( فتحات عينيها بفرحة ) : اوا على السلامة و هذا نهار زين بعدا...

طارت لبيت خلود لقاتها جالسة تتبكي بالفرحة....و حميدة خلاص ...

حلا وقفات ليها عند راسها : قلتيها لحمزة...غيفرح المسخوط....

خلود ( وجها صفر ) لا باقي ختى يرجع و نقولالو.....

حلا تتضحك : خصناا خالتو حفصة تتزغرت....والله كون صبت كون درتها........دابا صافي شد الركنة و تهلا فصحتك الحبيبة ديالي...مابفيتيشي بوحدك هازة روح فكرشك...

( كدور فالبيت و دور عينيها فاتحة لبها الماريو تتسلت ليها فالحوايح و الطالون ) و خصك حوايج جداد ...و حتى الطالون ممنوع....لبس الارضي و رجليك اصلا غينتفحو و حتى السروال والو ميبقاوشي صالحين...عليها غنديهم انا حتى تولد و اجي وراهم....

خرجات محملة بالحوايج و خلود تتغوت من البيت و حميدة تتضرب يد على يد صاعرة...

_ واش كابرة فالجوع اللفعة....رد حوايج ختك...اديك قشور البنان ...الحية اجي لهنا.....ياربي لييشوفها تقول معديين عليها مكيشريوليها شرواطة....

حلا : و الفابور زوين احميدة ....

وصل الخبر لنسيم لي والو فرعات راس راجلها و جابها و فرحات مع ختها ....!! و جا حتى راجل خلود فرحان ماقداتو الدنيا ...ماكيعرف غا جبد و عطي ...و شلا كادويات جايب ليها ..و الشكلاط الفرنسي و شلا حوايح... خلود ماعجباتها حتى خاجة من تما...خداتهم غي حلا..! راجل خلود يجيب و حلا تااكل و تغمس فالشكلاط....و تدعي معاهم...

_ الله يثبت الحمل ...الله يجعل ايامكم كاع فرح و مسرات........

دوزاات خلود سيمانة فبيتها ناعسة....ماتتنوضش كاع الدوخة و الترويعة و لاصقة فحلا ....!!

حميدة تتغوت من الدروج ...

_ حلااااا انا خارحة ابنتي شوف خلود ابنتي واش خصا شي خاجة....

حلا ( تهلكات فالكوزينة...غسلات يديها و خرحات تتطل على خلود و تنكر ) : خلود خصك شي خاحة.....

خلود الدموع فعينيها و الدوخة هلكاتها ماتقدرش تهز راسها...

_ عاوني نجلس....الدنيا دايرة بيا....ياربي العداب العذاب....

حسات بالردة و طارت حلا تتمد ليها السطيلة فين ترد....خلود ترد و حلا تترد معاها معيافة روحها بغات تخرج تقول غا جوح موحمات ماشي غي خلود...

حلا ( فشلانة تترد و تسب ) : و الله ياخد فيكم الحق....ماهزيت رجلي ماقلت احح ...خرجتو عليا....تقول حد ماحمل ....

دخلات نسيم هي وولادها تتدوي بالزربة. .

_ حلا انا خارحة مع يحيى....خودي من حوايجي ليبغيتي و حضي معاك ازهار و امير....غي اليوما و طلب ليبغيتي....

حلا جلسات فالصالة شحفانة تتخنزر فيها ...

_ ولادك اختي مايجلس معاك الجن الكحل.....

نسبم ( كتسايس معاها ) غي اليوما ...شحال ماخرجت انا و بحيى بوحدنا....حضيهم و لي حليتي عليها فمك ديالك ...

حلا ( بنظرة نارية ) و كون قد الكلمة ...بلا ماتعمل معايا شعل دراري الثغار ..ولادك اختي كيخرحو العقل .....( ناضت واقفة ) و نوض داابا فتحلي البيت نوريك شنو بغيت انا مانتيقش....

دخلتت لبيت نسيم تتهز غا الغالي و تعمر حجرها ....كاع مكياجها خداتو ...و عارفة نسبم ذواقة. تتلبس حوايح الرفيع....ختارت داكشي الغالي مخلية نسيم غا تتشهق ....

_ المكياج كامل خديتبه....

حلا : و هادشي و قليل ...ولاهيلا جا فالوقت نيت كنفكر فواحد 3000 درهم كنت كنخسرها هلى هاد النخربيق كامل...و صافي حتى نتينا ساعة قوليها لراجلك يشري ليك حسن من هادشي ....( هزات فبها حاحب ) و حمل حتى نتينا ديرو السبوع نتي و خلود فنفس العام نفرخو جوح مرات.....

نسيم غوبشات : الله يستر....مالك كتفايلي....

حلا ( يديها تتعرف غا تهز تتدور عينيها على أحدية نسيم ) : اوا شكون بحالك....حملتي فالاول كتب ليك الدار فسميتك و الثاني شرا ليك طنوبيل ...حملي بالثالث يكتب ليك قلا**يه فسميتك.....!

خرجات نسيم و خلات حلا مع ولادها....! تقسمات على ثلاثة...!

خلود من جهة و ولاد نسيم من جهة....!كلها منين تيعيط ليها....و تليفون خلود ماسكتس...راجلها بالو معاها...و راس حلا غيتفركع....!

دخلتت ازهار تتحري عند حلا للكوزينة مخلوعة...

_ طاطا خلود كتگيا....

خرجات حلا من الكوزينة تتجري....و تكررت نفس العملية....خلود تقيا و خلا تتقوليها ماتعرفي لوالو حيد نرد انا بلاصتك....! وسخات الدنيا و طاحت ليها خلود سخفانة بالدوخة....حتى طلقاها حلا بالغوات و النكير....نيضاتها تتفيقها و تفكدها و دخلاتها للحمام بزز ...دوش ليها....!

و ولاد نسبم من جهة تيرونو و يغوتو ....! امير تيحبو كيعرف غا جر و هرس....تتسمع حلا الهرس...تتخلي خلود و تجي تتطل ....ترجعو لبلاصتو و يعاود يحبو و يهرس ...!

حتى قندشات و دخلات للصالة مخرحة عينبها فبهم...

_ شنو كايين...مالكم....اقسم بالله يدوك المشاش و ماتجلسو بلاصة وحدة حتى نتحول للثنين و نطير بيكم للغولة.....( غوتات ختى تفزعو ) ياااااه و هانا حلفت....( هزات امير تتربطو مع الطبلة بحبل طويل ) و يلاه نتا تحرك دابا نشوف.....( حولات عينبها لأزهار ) و نتينا مانعاودش كاع ندوي معاه....غتتخاصم معاك. .مانبقاش خالتك ...

خلاتهم قارمين خوفانين ماعاودو هدرو و لا تحركو و دخلات لعند خلود محزمة معاها و مقصحة قلبها....دوشات ليها و نقاتها رجعاتها تتشعل و دخلتتها ابيتها منظفة ليها البنت و منقياه.....وقفات معاها وقفة صحيحة....وخا تتنكر و تقندش ملي يحتاجوها تيلقاوها ...و تتشدها النفس على خوتها .....

حطات المشطة بعد ماشمطات ليها راسها و نطقات مقندشة...

_ ملي تبغي تنوض عيطلي...كتسمعني....

خلود ( لا رد )

حلا ( بقات فيها ) مشهية شي خاحة....غا قول....

خلود ( حركات غا صبعها بالنفي ...)

خرحات حلا من عندها مهدودة...كاع عامرة بالماءو شعرها مرون و بزولتها اليمية تتبان....!!

هزات العين فأزهار لقاتها هازة تليفونها تتصور فيها ....

حلا صعرات : اري نتينا داك التليفون......ممنوع التليفون شنو قلت انا بغيتي نتحول للتينين...نديك للغولة تاكلك ....

أزهار خافت و دمعات صبعانها غا تيتحركو على التليفون : نووو.....

يتبع...

‎