غيرك ما يحلالي الجزء التاسع

شدها امير من رجلييها تيبكي وهي تتغوت على أزهار مبرزطة بيناتهم....!

تحنات تتفك الربطة لي ربطات بها امير و ازهار طارت كتجري لبيت خلود تترون فالتليفون بصبعانها و تغوت و تنقز....

_ طاطا خلوود....طاااطااا ....

حلا (تتغوت من برا هازة امير تيجرها من شعرهابغات تحماق معاهم ) : أجييي لهنا ينعل

يماك البرهوشة...نفرق راسي انا. .خليها ناعسة تنوص ترش علينا ثاني......أزهاااااار ....

دخلات للبيت مغددة تتحك سنانها مع بعضهم و حالتها حالة ...تتبان كي دوك ليوالدين اربعة ورى بعضهم و كانت تترضع بزولتها خارجة و شعرها مشنتف و عينيها خارجين فازهار لي طارت ورى الناموسية مخبية ....!؛ جراتها حلا من يديها مخرجة فيها عينيها ...

_ والله يابنت الفاسي انوريك خالتك حلا شنو كتسوا.....زيد خرج من البيت و نتفاهمو. ( جرها امير من شعرها غوتات عليه حتى تكمش ) شد يديك نتااا...تفووو جنون جنووون.....ماشي الولاد......و كيقولو ليك تزوج دير ولادك.....بغاوني نتسطى .....

رجعات ربطات امير و خلاتو كيتكور كي بغا...وجلسات ازهار لي شادة فمها تتدمع و تسمع غوات حلا....

_ فين درتي التليفون ؟

ازهار ( خوفانة ) : ماعرفتش...

حلا ( شدات راسها قربات تحماق معاهم ...حاولات تبرد ) و قولي اخالتو ديالي ...فاين درتيه...اجي معايا وريني فاين..الغزالة ديال خالتو...الحلاوة نتينا.. ازهار ديالي غنبقى خالتو غي ديالا صافي....

.( استدرجتها بحلاوة اللسان و الهداوة و مشات معاها تتوريها فاين خبعاتتو. ...جبداتو من تحت ناموسية خلود و عطاتو ليها فرحانة ..)

_ هاهو اطاطا.....

خطفاتو ليها حلا من عندها و دخلات بالزربة تشوف شنو كانت كدير فيه.....لقاتها روناها فجهة الكالوري و شلا تصاور و فيدوات دايرة ليها....!

قلبات الواتساب لقاتها مادخلاتش ليه كاع ......!

رن تليفونها فديد اللحضة و كان مهدي ...عوجات داك النص و طلعات حجبانها قاطعة عليه...

_ ناقصني غا هو. ...

خبات التليفون بين صدرها تتحلف فأزهار.

_ اوا اذا تتقول يماك هي ختي اجي خوديه ...

ازهار : غنقول لزيزا حميدة...

تجاهلاتها حلا و دخلات تتطيب ليهم ماياكلو...تتنكر و تبركم و تدوي بين سنانها تجننات و حماقت معاهم ...

حتى هوما مولفينها مرة تغوت عليهم مرة تعطيهم وقت و تلعب معاهم و تبرهش معاهم...

حلا الوحيدة لتحط عقلها فعقلهم و تلعب معاهم كاااع ....!

فين ماحطيتيها تعرف تبرمج عقلها ....مع مراة كبيرة تتحول حتى هي لمراة كبيرة و تدوي بنفس الطريقة تشبعها حتى حلاوة اللسان و العسل تيقطر منها...كانت برهوشة تمشي قد عقلها و تجيد سيرة و مواضيعهم ... تتساير مختلف العقليات و تمشي معاهم على قد عقلهم ....!

واقفة فالكوزينة بنص معوح القندورة مخشي فجناب السليب و شعرها مرفوع للسماء ...!

حواجبها تلاقاو و مرة يتفارقو و يطلعو للسماء..

سفايفها مزموين...مخشعة مع الطياب و تليفونها وسط صدرها داير حالة بالصوني....! جبداتو تتسوط لقات مهدي و وئام. فرعوها بلي زابيل....

مسحات يديها و صونات لمهدي ..حتى رد بالزربة....

_ و ختي حلا فينك وخا تكون تحت التراب ترد عليا....دخل مسح الستوريات لي دايرة فالانستا عرفتك غتكون درتيهم بالغلط و لا سي لعيبة واقفة.....

حلا ( وجهها صفارت ) : شمن ستوريات ...( خرحات عينيها و شهقات حتى كان النفس غيوقف ) بنت الحرااااام.....

قطعات عليه بالزربة دخلات تتشوف فالانستا...قلبها طاح بين رجليها و بلالطها خرحو ملي شافت تصاورها...! جوج تصاور بالحساب...!

وحدة عاطية بالظهر تيبان غي ديك القندورة معلية حتى للفخاض ووحدة مضببة ....

مسحاتهم حلا بالزربة بلا ماتشوف شكون شاف و شكون باقي علاه عي فكرات جوج مراات يديها طارو نيشان لسيبريمي ! هي تتمسح و ودنيبها سخنو عليها.... شادات فراسها تلولول كي المصدومة....

_بنت الكلببببة.....

الواتساب تفرع بالمبساجات من وئام ....؛ تتقراهم حلا و عقلها غايب وجهها مزنكة مزال ماتبلعات ليها....و مارضاتش كاع على حالتها ...

وئام ( تتموت بالضحك ) : والله الا عيت نصوني عليك ...داخلة خارحة عند رضا جالس مع خويا كنحصي عليهم واش شاد التليفون ولا باقي والله الا عندك الزهر تصور يكون شافها رضا...اويلي و ترمتك معرضة تما و فخاضك باينين ....كانت اليوما طيح الروح....

قرات حلا ميساجها و تنفسات بارتياح....! رجعات راسها اللور مفقوصة....! حتى تفكرات الصمدي معاها فانستا فتحات عينبها للسماء تتدي بين سنانها...

_ علاه مالي ماعارفة زهري عاطيني ب**رو ...يكون شافها ولد الكلبة و حتى مو تكون شافتها و تاصيلتو كاع شافتها ويوصلوها ختى لرضا و لبابا و يصنعو ليا قصة و نبدا نرقع انا من وراهم...........

دازت عليها ديك اليلة كحلة ! غا جات نسيم و حميدة ! طارت لبيتها ماعاودات وراتهم وجهها ولا بينات ليهم الضحكة....! عرفوها طالع ليها الدم و الحمق هو لي يدوي معاها....!

ظلات تتقلب في نعاسها و النعاس طار ...! عقلها عامر غا تتنهد...! تتفكر شنو مزال خصها دير...وهي الصبر عندها قليل ماكرهات من غدا توصل لحلمها و بأسهل الطرق....! من الحلم تفكرات الارض و من الارض زهق الصمدي لعقلها....و تما خشات راسها المخدة تتسب فراسها و فبه ..

_ حتى ولد الجلبانة يتفكروه الناس قبل ماينعسو .....

قلبات كاع اتجاه التفكير ...مابغات تفكر شي خاجة و يطيح ليها هو فالبال... حيت تتخاف تحلم براسها ناعسة معاها ثاني ..وهي ادابا مانسات ديك الحلمة....!

دوزات الصباح على ديك السيرة...!

بنظرة قاصحة تتشوف فنسيم : دابا غا تخايل توصل لرضا وخا يشوفا بعينو مايتقيش يقول انا لي نشرتها بلعاني ...مريض داك الزبل تفوو...

نسيم بهدوء : و فين غتوصلو احلا ! صافي مسحتي للتصاور و من برا اليوم ماسمعنا سيرة غي منك يعني حتى حد من المقربين ماسمع....

حلا ( هزات صاكها خارجة مأنقة ضاربة الفريع من حوايج نسيم ) : غنتعطل اليوم عندي امتحان فالاسبانية....

حميدة : و الله يوفقك ...الله يرضى عليك ابنتي ماتعطلشي باليل اليوما غيجي رضا و مراتو يتعشاو معانا بلا صداع احلا....

خرجات حلا من الدار ضاربة الطريق على رجلها و غتجرجر ثاني فالطاكسبات حيت الاوطو خداها عبد الله....!!من نفس الطريق لي مولفة تمشي منها الاختلاف هو ملي تتدوز من هاد الشارع مابقى حد تيهز فيها عينيه و هادشي لاحظاتو و دارت عين ميكة....!!

دوزات سويعات الخدمة تشطنات و غطسات مخشعة مع خدمتها....! شافت فالمهدي بنظرة د بارطونة صارمة نييت...

_ بابا قالي غيجيب شي بنات ..وحدة تشد الادارة وحدة تعاونك هنا ...جاو و لا باقي ! ماعيطوش ؟

مهدي : لا اختي حلا باقي ماجاو ...وحدة عيطات غتبدا الاثنين ان شاء الله و الاخرى مزال ماقالي سي عبد الله عليها والو ...( شافها سكتات تتشوف فشي وراق حتى ناطق بفضول )

_ ختي حلا كيف وقعلك مع دوك التصاور البارح....

حلا ( عقدات حجبانها تتجاوب بلا ماتشوف فيه ) : بنت نسيم حطاتهم ..شحال وهوما منزلين ؟

مهدي : 10 دقائق هكاك ماشي بزاف......( تحلات ليه ) شحال ماحات ختي نسبم لهنا توحشناها ....

حلا ( هزات فيه العين ) : و علاش غتجي نسيم لهنا ؟ شمن شغل عندها هنا...ولدااتك و نساتك ؟

مهدي ( جمع التفرنيسة ) : غي سولنا عليعا اختي حلا شوو فيها .....اصلا المحل مايقد عليه حد من غيرك ...خدمت شوية مع رضا ماخديت من عندو والو و بيني و بينك مكيعرفش يتصرف مع الكليانات دغيا كيتعصب و شحال من مرة جرا على الكليان .....

حلا ( بنص عين ) : همم كيبان لي خديتي من عندي حرفة الصباغة و لحيس الدماغ اسي مهدي.....هادشي ديرو مع الكليان ماشي معايا انا....( هزات تليفونها و كملات ) جيللي نمرة ديك ياسمين.....

مهدي نفد طلبها و حط ليها نمرتها ...دوزات ليها حلا الاتصال مرة اولى و ثانية ماتتحاوبش....حتى قندشات و حطات التليفون...

_ ماعندها ريال و جاية تشوف الذهب مايفقصوكش هاذو ...تنقولها و نعاودهالي ماعندو فلوس الذهب بلا مايقرب ليه ....

سالات خدمتها و هزات صاكها خارجة...! حتى رن تليفونها و خرجاتو من صاكها تترد بهدوء صوتها مكيتسمعش فالزنقة...

_ آلو وي شكون معايا ؟

عوجات فمها ملي سمعات صوتو ولات تتميزو و تعرفو مايخفاش عليها...

_ نص ساعة من نهارك سنيورا....! نتي ختاري تزيدي قدامي و لا تبعيني.....

هزات العين تتشوف فين هو و هازة معاها حتى داك النيف ...حتى شافتو واقف على مقربة من قصر الملك ...قطعات عليه و قلبات الطريق كاع ...داوية بين شفايفها....

_ اذا كانت مو ولداتو بلا حريق يوقفني دابا.....

دخلات من دروبة اخرين ...فين كاين بياعين النقرة وصحاب الحرفة الحقيقين....! المراة لي تتدخل من تما تيشوفو فبها و يطلعو و يهبطو بحال عمرهم شافو شي مراة فحياتهم....تيجيبو ليك الشك بحال هاد الطريق ممنوعة على المراة غا ديال الرجال....!

تخطاتهم مزيرة على صاكها داخلة بين دروبة المدينة القديمة....دايرة كي المتاهة وخا تكون فايت دزتي من ديك الدروبة ضيع و تخربق....! هادي كدخل لهنا و الاخرى كتخرح من لهيه ...! و حلا حافظة الطريق كي طريق دارهم...ماهي صغرها كلو دوزاتو هنا ....!

حتى شافت رايها قربات تخرج للدروج كان درب خاوي تيخلع غا الزعيم تيدخل من تما ..صاوبات شعرها و مسحات العرق من وجهها و رشات الريحة و زادت تتعوج بداك الطالون....ماجات تخرج حتى تلاقات نيشان مع الصمدي تيشوف فيها مبرد بحال كان كيستناها ....قرب منها حتى رجعو رجليها اللور تتشوف فيه معلية حاحبها...

_ كيف درتي ليها ؟

الصمدي ( تلمس ذقنها كيمشط ملامحها بعينبه....) ماشي غي بنت تطوان تعرف دروبها .... طيحت هنا دمي قبل ماتزادي اسنيورا....مشيتي يمين نمشي شمال فالاخر غتخرحي فيا ....

حلا ( بعدات وجهها تترجع برجليها اللور خالقة مسافة بيناتهم ) : و دابا شنو بغيتي ؟

الصمدي : باغيك نتي ...الصبر تسالا و الخاطر مابقى ينفع.....

حلا ( تتشوف فيه بنص عين ...) : علاش باغي تبيع ليا الارض؟

الصمدي فتح ليها الطريق بلباقة ...

_ البيع و الشرا خصو وقتو سينيورا....على بالي نتي تعرفي كثر مني ....!!

حلا ( بنظرة الذويبة ) : على بالي التجارة تتبقى التجارة سوى كنتي تتبيع الحشيش سوا الذهب....يعني مانعرفش حسن منك ؟

الصمدي ( ضحك حتى بانو سنيناتو تيسرقو العين...مبرد و مستمتع ) : و عليه....! كاين سوق الرجال و كاين سوق النساء....كلها و شطارتو ....و كل سوق و كليانو....

ردات شعرها ورا ظهرها عاطياه ابتسامة غير صافية تتشوف فااساعة الذهب لي فيديه ....

_ مشى داك الزمان لي كان الذهب تيلبسوه غا النساء...تخلط شي مع شي ....مابقينا نعرفوه واش سوق الرجال ولا سوق العيالات ...

عض فكو و عبنيه مبسمة.....ماعطاها جواب بفمو... يديه لي تحركو و جرها من نصها خاشيها في صدرو شعرها لصق فلحيتو تيدوي مثقل ...

_ حسابك ثقال ...و ربي عليا شاهد.. موصي عليك يدي ......

كمشات حجبانها تتدفعو من صدرو حابسة العطسة....

_ كيبان لي يديك خانو الوصية ....! مرة اخرى وصي عينيك...يديك مابقا ليك عليهم شوار....!

فك خصرها و بعد خطوة للور خالق مسافة بيناتهم متمتم بين سنانو ماسمعات منها والو ...

_ الله يرحم لي سماك......

داخل المقهى...!

جالسة حلا تتشرب من المشروب البارد ليطلباتو ...داخلة في حوار مع الصمدي ...

_ دابا بلا مادوخني و تقولي نيتك صافية ! الارض كنتي تقدر تبيعها غا من هنا لصيف العام الجاي تربح منها الضوبل الثمن ديالها....! و باغي تبيعها ليا هكاك و بغيتي نتيق !

الصمدي ( يديه مكيعرفش يحطها حداه ضروري يوسعها و ياخد راحتو فالجلسة تقول غا الوزير...ملامحو جدية )

_ اوا هنا هداي علينا ! عطيناك عهد و قلنا ليك مغتشوفي مني عيب و عليك الامان....! ماعندي علاش ندير شي بلان يضرك فيه...حيدي الشك من راسك احلا .....

حلا ( زهقات ليها الحلمة لعقلها فديك اللحضة ...قلبات عينيها منو مبرزطة و تلفات بمشروبها تتجاوب بلا ماتشوف فيه ) نكذب عليك اذا قلت ليك ساهل نتيق بيك ! تخايلت شلا حوايج...تقدر تكون الطريق غتدخل فالارض ! ولا فيها شي بلان ماهواش.......

الصمدي ( مطول بالو معاها ...جبد تليفونو تيوريها التصميم ....قرب منها تيوريها بجدية وهي محافظة على هدوئها )

_ ماشفتيش التصميم قبل !

حلا ( هزات فيه العين ) : لا حتى الارض ماشفتهاش كانت هاذيك اول مرة ...

الصمدي ( تيشرح ليها باصبعو السبابة ) : هنا مية و هنا ميتين مترو...هاد الجهة و الاخرى ديال السيد ...و الطريق من هنا غدوز ...( تيزومي بيديه ) هنا طريق البحر ....

هز فيها العين تيشوفها مركزة باهتمام ...جا يطول بديه لشعرها قلبات هي وجهها تترمش حتى جمع يديه حداه....

الصمدي ( ملاقي حجبانو ) : شكون شاد ليك أنستا ؟

حلا ( تفتحو ودنيها و عينيها تقرصات بانت عليها ) : علاش تتسول ؟

الصمدي ماجاوبهاش...تيشوف فيها شحال حتى اهتز تليفون حلا تيصوني باسم اسامة...قشعو الصمدي قبل من حلا...لي شافتو و قطعات ببرود ....

الصمدي ( عاقد حجبانو مبدل الموضوع ) : قولي مابغيتيش الارض !

حلا : انا الارض باغياها بغيتي تبيع غنشري منك.....ماقلتيش شحال طالب فيها ؟

الصمدي ( حجبانو ملاقين ) : شحال باغية ؟

حلا ( تتشوف فيه بين رموشها و عقلها غي فديك الارض نسات هو شكون اعتابرات راسها مع بياع عادي ) : نتا بياع و انا غنشري...! و على حسب تجربتي هاد السؤال صعيب تسول بيه الكليان ديالك...حيت الكليان تيقلب غي على الثمن الطايح......اذا طلب الطايح البياع ماجاتش يقوليه لا ....

الصمدي ( عينيه فتليفونها و حجبانو ماتفارقوش ) : الثمن لي حطيتي مقبول ( حك لحيتو تيهز فرجليه )

جا يكمل برزطو داك اسامة لي عاود صونا خطف التليفون من حلا و خشاه فجيبو و رجع تيشرب فالكافي ديالو....

حلا عاقدة حجبانها : عطيني التليفون بلا شوهة....

الصمدي ( مكيشوفش فيها ) : شكون اسامة ؟ولد عمك ولا ولد خالتك ؟

حلا ( بين سنانها ) : و نتا مالك عطيني تليفوني ....( متيشوفش فيها كاع و مكيجاوبش ..باين مبرزط ..) عبد الصمد تليفوني ......

عبد الصمد ( مكرر سؤالو بهدوء ) : شكون اسامة !

حلا ( قندشات ) : مون بيبي داموغ ...عرفتيه شكون دابا ...عطيني تليفوني اذا فهمتي على راسك ....

سمع جوابها و قلب الشوفة منها ضارب الطم تيشرب القهوة تاعو ...مخلي حلا تتشوف فالناس و تشطح دوك الرموش تتسوط غا بوحدها ....قربات منو تتدوي بين سنانها معصبة هاد التصرفات مكتحملهمش تيفكروها غا برضا ....

_ نتا منين كدخل ليك الهدرة ! منين كتفهم......شمن حق عندك تاخد ليا تليفوني زدتي فبه...شفتي نتا والله ماخص الواحد يتصرف معاك عادي و لا يشارك معاك شي قهوة.......

عبد الصمد ( عض فكو من الداخل ماراشقاش ليه ..) فين كنا ؟

حلا ( وصلات لحد ديالها صابرة غا بزز ) : شنو زعما غتزيد حتى هذا على الاخرين و يولي الثالت !!!

عبد الصمد ( تيقتل غا بالبارد ) : بردي شوية ! فوقاش عندك اختبار ! نوصلك ؟

حلا صعرات نييت بحال الى شعل فبها العافية ..يديها تيغليو بالفقصة نيشان طارو لكاس الماء محطوط جتبها و كباتو نيشان على كمارتو حتى ناض واقف تيقطر بالماء فالتة ليه شتيمة ..

ي**ل ب**

هزات صاكها بالزربة و تمات هاربة تتدوي بين سنانها : و دابا نبردو بجوج اسي عبد الصمد.....

هبطات فالدروج بالزربة ...! واحلة مع شعرها تيحركو الريح الجو شوية بارد و العشية قربات ...! متحاهلة كلام و شهيق الناس فالقهوة....كل واحد و شنو كيقول و شنو فهم....

_ عبرات عليه غتكون غي حصلاتو ميخونها ولد الحرام...

_ اويلي على شوهة دارت ليه.....

_ مسخوطة على زعامة فيها مكتخافش....

خرج من القهوة طالع ليه الدم داير نظاظر الشمس ...! لابس شوميز فالشيبي عنقها كلو فازك ....مابقات بانت ليه طارت و غبرات كاع تقول بلعتها الارض ....طلع الاوطو ديالو تيمسح و يسب بين سنانو ...

_ مجعورة....!

حط تليفونها مع ديالو ساخط...! و زاد سخط ملي صونا اسامة...طفى التليفون و رماه حدا ديالو محرك السبارة و بين عينيه صورة حلا....!!

حطات راسها على المخدة تغزز فشفايفها تتفكر و تبلاني....

_ مشات الارض ...محال يبغي يبيعها ليا...؛ خصني نحط فلوسي فشي ارض اخرى غي نمحي هاذيك من بالي....!

عيطات لبها حميدة تعشى و خرجات لعندها بوجه مزنك و عينيها غا تيديور...

_ حميدة تسرق ليا التليفون ثاني ....

حميدة ( شهقااات ) عااااود...كيفاش تسرق......ياربي يلطف...مالك التالفة هكا دايما....واش عاااام اعيباد باربعة تليفونااات ......

حلا ( تترمش ) : المكتاب احميدة.....!!

احتاج ليوماين باش قد يبلع الشوهة لي دارت ليه....! يوماين وهي تتغلي ليع فالدماغ مابغاتش تنسى ليه....! نهار و ليلة و نهار و ليلة و ليلة بوم الثالث....! قشعها خارحة من الاوطو د عبد الله....غا شافتو قلبات عينيها بالزربة و طارت للدار....مخلي غي عبد الله تيرد السلام على عبد الصمد....! حتى سالا و طلع حتى هو لدارو ...!

جلس فالصالة فين مولف يجلس و عيط لحلا...! قفز ات من بلاصتها و دخلات تتدور عينبها...

_ هانا بابا شنو ..عيطيتيلي...

عبد الله : ايه عيطت ليك ...غذا نوض بكري نمشيو عند النوطييغ....

حلا ( بلعات ريقها ) : علاش !!

عبد الله ( باستغراب ) : على حساب الارض ياك ما مابقيتيش باغياها !!

حلا ( هزات حاجبها ) : لالا باقية باغية نشري غا قلت محال يكون باغي يبيع و نسيتا من بالي....

عبد الله : و يلاه الله يرضى عليك....غذا فيق بكري ووجد وريقاتك....

نفس الجلسة و نفسالحركة و الكلام خدام بيناتهم...! مولفين تيتحمع. و يشدو الهدرة فاش ماكان و ليجا فالطريق....!

صفاء ( تتدور عينيها) : سعيد قاليا عبد الصمد غيبيع الارض لحلا.....

سكينة ( بدهشة ) : هاي هاي هادشي دخل بيناتهم بيع و شرا ! تخايلي تعرف خالتي عيشة! تما تحماق....

صفاء ( تتضحك ) خصك اذا شافت حلا و عبد الصمد قدام مكتب العدول تما قلب خالتي عبشة يتكركب بين رجليها .....

طلات عليهم عيشة مخرجة فيهم عينيها كي السحارة .....

_ ينعل اصل يماكم ....

صفاء ( قلبها وقف ) خالتي طيرتيها مني خلعة ...من فوقاش و نتينا هنايا....

عيشة بتهديد : والله ونسمع شي واحد فيكم كيلصق سمية عبد الصمد مع ديك الجنية ...ياحتى نخليه يعض فالتراب.......

صفاء : خالتي ماشي هي....

عيشة ( قربات كير عليها بالغدايد ) : سكت يقطع حسك ...اشنو غيوصل حلا لعبد الصمد ! هدر...شنو عندك لاصقلك تحت اللسان اللفعة !

صفاء تترمش : والو اخالتي ماعارفة والو ...

_______

خرجات من بيتها بكري ...! الشعر مسرح نازل مع ظهرها و القصة تتحاك مع ذقنها...! مونطو طويل فالاسود و بنطلون ضيق الساقين ...الفخامة و الاناقة و ريحتها عاطية على الصباح....شافتها حميدة تعجبات ...

_ صباح الخير !

حلا ( تترد شعرها ورى ودنيها و الساعة تتسرق العين فيديها ) : صبتح النور ماميتا....خلود جات !

حميدة : لا باقي مع راجلها ...خليها ترتاح تما تشم الهواء نقي هلكها الوحم...

عبد الله خارج من البيت

_ حميدة وجد الفطور !

حميدة : زجد وحد جلس تفطر.....

جلسات حلا تتفطر مع عبد الله و حميدة تتسول معلية حاجبها...

_ شمن شعل عندكم بجوج....مافهمت فيكم والو....فين ماشين ....

عبد الله ضحك : ماشين عند العدول ...غنزوج تما حلا و نريح مخي منها.....وحدة باقية لي قهراتني احميدة شنو بان ليك ...نعطيهالو بلا عرس غا يهزا من علينا تسخى بها ؟

حميدة ضحكات بالثقالة و شافت فحلا لي هزات حاجب حتى للسماء...

_ صباح لله ابابا ....

حميدة تتضحك : و يعبر اذا دارها الزواج بالخاطر ماباغيهاش...تزوحي على حساب باك ....الزواج سترة ...

حلا ( عوحات فمها ) علاش شفتيني عريانة احميدة....

عبد الله شاد فيها : و اذا عولت عليك نزوجك شكون يمنعي...؟ صافي نعطيك لولد عمك إبراهيم ماتخرجيش من العائلة ...كاين ماحسن من ولد عمك...

حلا ( شافت فيه بنص عين ) : بابا كتيركل عليا على الصباح ....

عبد الله تبسم راشقة ليه : اوا احمبدة بنتك المصون قالت بغاا تشري أرض نمشيو مغاها نشوفو اخيرتها...

حميدة( تشلطات ) : شمن أرض ؟

عبد الله : ههههه بسم الله عليك....اييه أرض ماقد عليها رضا قدام عليها هي....البوم نشوفو مع الموثق و نديرو عقد البيع....

حميدة ( غا تاشوف مصدومة ) و علاه غي احي و شري أرض كتضحكو عليا ....كوم بقيتي فالزواح نتيقك حتى للارض لواه...

حلا ( زمات شفايفها ) : كون غا بقيتي ساكت ابابا....

حميدة ( تتنكر ماتيقاتش ) : واش التالفة كل مرة مضيعة تليفون بحالها يديرو الارض و الاملاك....تشد غا تليفون عندها كي الناس....

عبد مسح فمو نايض : الله يجعل اابركة و الله يخلف...يلاه احلا تبعيني....

ناضت حلا من وراه متجاهلة كلام حميدة...! رمات ليها بيزو فالهواء و هبطات تتقلب نظاراتها الشمسية فالصاك...

_ تشاو حميدة....نتلاقاو مع العصر اذا مازوجنيش عبد الله....

خرجات لبرا تتستنى عبد الله يخرج الاوطو من الݣراج و فنفس الوقت خرج عبد الصمد من الدار...! لابس الكحل نايك فرجليه و كاسكيط في راسو ...و ساعة تتبان من بعيد ! حرك راسو لعبد الله و صبح عليه...

_ سي عبد الله صباح الخير....

عبد الله : صباح النور اولدي....!

عيشة عينيها ماغمضاتهم ولا ذاقت النعاس كي الناس...! مزال كلمة العدول تترن ليها فودنيها...! غا طلع الصباح و سمعات حس الصمدي خارح...بقات قارمة متبعة ليه الحس و مامشات حتى ناضت واقفة تتطل من سرجم بيتها ملي سمغات الاوطو خارحة من گراح عبد الله ...!

ناضت بلا عجز لابسة المقزب و شعرها حمر قصير حد عنقها عينيها مدورين بالكحل و الذهب فعنقها و يديها... ! قندشات و كمشات حاحبها كثر ماهو مكمش ملي صبحات على وجه حلا ...!

تتشوفها تتقلب في صاكها واحلة مع سالفها....! غا شافت ولدها مقرب ناحية عبد الله تيسلم عليه....تفتخو عينيها مقندشة...

_ الله يخليها سلعة....صبحااتو لله...

زادت كملات الباهية ملي شافت حلا راكبة اللور و الصمدي طلع ركب مع عبد الله القدام...! تما بلالطها خرجو و صوتها خرج بلا ماتحس...

_ عبد الصممممد.....

خرجات تتميل من البيت تتدق على سعيد ... : سعييد ...سعييييد ...طلع الصباح بقى وقت النعاس دابا....سغييد ...

باب بيتو هرساتها عاد خرح لعندها فاتح عينيه بزز.....

_ ايمة والله الا حراااام هادشي حراام...صباح لله ايمة....

عيشة ( عينيها كيغليو ) عبد الصمد شمن شغل عندو مع بنت عبد الله عند العدول...؟؟؟ والله حتى نرمي عليك السخط دابا و تكذب عليا.....

سعيد ( غا تيتلف ) : شنو كتقول ايمة.....رجع تنعس رجع ريح راسك....

عيشة ( حمرات فيه عينيها ) : والله بالله و تكذب عليا اسعيييد....

سعيد ( سكت ماحاوبش )

عيشة صعررات غوتااات حتى قفزات صفاء من الناموسبة مخلوعة ...

_ بسم الله الرحمان الرحيم....

عيشة طارت لبيتها تتلبس عليها و تحك سنانها مع بعضهم تقول غا حمقة....

_ دابا صوني عليه قولو فاينو نمشي لعندو...داااابا....يللاااه تحرك ديني لعندو......والدة المساخط ...كتغطيو على بعضكم.....مشى يتزوج بها بالساكوتي ...يعقد عليها انا نوريه الفضيحة كيف كتكون....تعلمتو تكذبو على يماكم عليها ربي سلط عليكم بنات الحرااام....

صفاء ( من بين سنانها ) : يعطيك الموت....

جالسة اللور مربعة يديها و حاضية قدامها...! تتشوف فالصمدي و فعبد الله شادين الهدرة مخشعين ماكاينينش هنا...! ماخلاو ماجبدو ها الهجرة ها البطالة دخلو حتى للسياسية ...تفاهمو دغيا تقول صحاب ومعارف من سنين ..!

تنهدات حلا بخفوت ضاربة اليد لصاكها ..حتى نسات انها مامعاهاش التليفون...!

سبات الصمدي فنفسها حتى عيات و علات صوتها ناطقة...

_ بابا مد ليا تليفونك ...

عبد الله ( مدو ليها ) : هاهو الكود نفسو عارفاه ؟

حلا ( شداتو فاتحة الكلافي تتكتب ) : اه عارفاه صافي حليتو...

كمل عبد الله السوكان و عبد الصمد مادوا مع حلا ماهز فيها العين ساكت و حاسبها بحال ماكايناش كاع... اما حلا واكلها لسانها تتكتب لعبد الله شنو بغاات تقول ..

_ قوليه يوريك الملكية لاش ماوراهاش...و حضي التاريخ حتى هو ..! و علاش هو لي يختار النوطيغ ...حنا لي خصنا نختارو هو غي غيبيع حنا لي غنشريو و الخلاص ديال النوطيع حنا نخلصو وهو يختار واعرة هاذي....هدر معاه قولو واش جبتي الاكسبيغ للارض واش صالحة للبني وشحال تقدر تبني عليها ولا غا حبس و شرا ...

خوات لي فبالها كلو و عطات التليفون لعبد الله ...

_ بابا شوف هاد البروغرام تبلوكا....

عبد الله عين مع الطريق و عين فتليفونو قرا و سكت ماجاوبهاش ...!

عبد الصمد ( بصوت غليض ) : كتعرف سي ابراهيم !

عبد الله : لي تحت القنطرة لا !اذا هذاك راه بيناتنا سنيين معرفة....

عبد الصمد : سي هو لي دويت معاه.....( شاف فالساعة ) مزال ساعة تقريبا يكون تما....مزال الوقت....

حلا ( تتشوف فعبد الله معلية حاجبها شافتو سكت مادواش دوات هي ) : سي عبد الصمد تأكدتي قبل ماتشري الارض واش مرخصة للبني و الاساسات ؟

عبد الصمد حيد نظاظر الشمس و دور عنقو تيشوف فيها بالثقالة .... حاجبو الاسود كثييف مهزوز ملامحو دايما تتشوفها هي ماكرة و ديك شبح ابتسامة تتخلعها ....تيجيها مافيه ثقة و جامع ليها مصايبها كاملين كيستنى غا يرد الصرف....!

_ سي جبنا الاكسبيغ ...و تاكدنا من المسائل الارض واجدة محفضة و مرخصة ....خاص غا لي يسمي الله و يزعم....

شطحات رموشها قالبة عينيها من عليه ناطقة : تقدر توريني الملكية....!

عبد الصمد هاز حاجبو : معلوم ...

مد ليها الملف و شداتو من عندو منفخة تتقرا فيه مامفلتة حتى حاجة...حتى اسم البلاصة بالضبط فين جات الارض تتأكد واش هي هاذيك....

عبد الله ( تيهز فراسو و يتمتم بين شفايفو ) لاحولا ولاقوة الا بالله......

حلا ( تتدور فعينيها ) اوا دابا مزيان...الواحد هو يعرف فين يحط رجليه و مع من عاد يسمي الله و يزعم.....!!

رجل على رجل ! و شعرها محطوط للجنب...تتتشوف فالصمدي و عبد الله تيهدرو مع الموثق و راجل اخر الشيب غطى راسو و كرشو خارجة تتبوطر...! هاد الاجواء زعجوها و بلا الخلعة و الفرحة الداخل خلاتها مافاهمة ولو فراسها والو ...لي عارفة هو اول مرة في حياتها غتحط فلوس صحيحة مقابل ملك فاسمها...!

ستنات حتى عيااات و تم المهني داخل مهبط نظاظر على ارنبة انفو ...تيشوف فحلا و يشوف فعبد الصمد ...!! شد بلاصتو و جلس تيفك صدايف قميجتو دغيا تيحمار و يتزنك ..!

_ بسم الله.......

بدا تيتأكد من الوثائق الثبوتية و يجمع شي مع شي ...! هبط نظارو تيشوف فحلا...

_ البطاقة الوطنية ابنتي....

عطاتو حلا لي طلب و حتى عبد الصمد ...! خدا وقفتو تيتأكد من الهوية و من وضعية الارض ...! شلا ساعات دازو و حلا طفجات ...!! حيدات المونوطو حطاه جنبها تتنكر ...

_ هاد السيد مصاب غا يهز كرشو كي مدلية ...

عبد الله ( حمر فبها عينيه حتى سكتات )

المهنى ( شاف فالصمدي ) : العقد يتحرر باللغة العربية ولا بلغة اخرى اسي عبد الصمد...

حلا ( نقزات ناطقة معلية حاحبها ) : و سولنا حتى حنا مالنا ماعلينا الله......

عبد الصمد ( حك لحيتو بالثقالة ) : شنو بان ليك ! ختاري نتي ....

المهنى ( تيضحك ) نديرو العربية ديالنا .....بسم الله....الثمن عطيتيه ؟

حلا : لا مزال...

المهنى : تعطيه دابا باش نكتبها فالعقد ولا تعطيني ثمن البيع دابا و غنعطيها ليه ملي تكمل الاجراءات القانونية ! تخلصي شيك و لا تحطي الثمن في صندوق الايداع و التدبير.......

حلا شاف فعبد الله تتشاور معاه.....سلماتو المهمة هو و تم ابرام عقد البيع.....!!

خرجات حلا مزنكة و مصهدة ...شادة فيد عبد الله تتشكي...

_ يعني مزال الوقت فين نشد الملكية !!

عبد الله : واش غتشديها فنهار ؟ لااا احلا .....

عبد الصمد ( تيحرك تليفونو فيديه تيقطع على سعيد و يشوف فحلا ) : مبروك ...الله يجعلها خيير ...( ماستناهاش تجاوبو شاف فعبد الله ) سي عيد الله عندك شي شغل دابا ! باغي ندوي معاك ؟

عيشة راكبة مع سعيد تيدور بها تطوان كاملة تيتلفها كل مرة موقفها قدام مؤسسة او مكتب محامي تيكذب عليها ..تيخرج و يرجع يطل عليها من باب الاوطو...

_ والو ماكاينش...ايمة سمع مني صفاء غا كتهدر بلا فران ...غا كترون....ماكاين والو ....

عيشة ( مخرجة راسها تتطل من السرجم و تجبد تتشوف شنو مكتوب قدام المكتب زعما تتعرف تقرا ) كتكذب عليا...هذا ماشي العدول ....

سعيد ( قرب يتنتف راسو تيدير دورة مع الاوطو و يدخل ليها راسها من السرحم شوهاتو ) : شمن عدول شكون قالك مشى عند شي عدول .ايمة الله يهديك...

عيش. (طارت فيه ) حيد يدبك...حيد المسخوط....فتح الباب نشوف كتكذب عليا الهايش....

فتح ليهت الباب بزز ..تيحك فرقبتو و يسب فالصمدي و صفاء ...هو لي دايما تيحصل و اش جاب يسكتها دابا و يهدنها غتشوهو تما ...!

تبعها تيجري ...وهي تتميل مقدة و مزال شادة فراسها ...تلاقات بنت خارجة من العمارة وقفاتها بالزعفة حتى رعبات البنت...

_اجي قرتلي هاذي...قرا قرا....شنو مكتوب تما ...

البنت ( تتشوف فيها باستغراب ) عيادة الفحصي اخالتي.....

سعيد عض فشفايفو و حط يديه على كتف مو تيتلفها...قبل ماتغوت ليه تما...

_ الغوات لا ايمة...حتى نبعدو من هنا و غوت حتى تشبع و نصوني على الصمد غوت عليه ختى هو و سخط عليه....! غا بردي ...نقوليك....!

دخلها بزز لااوطو ...تتشوف فيه بنظرة قاصحة مغددة عليه...

_ كاذب عليا ياك المسهوط...عيط لعبد الصمددابا....دابا ولا بالله حتى نقطع عليك ....

تزير سعيد و تعصب ..تحلف فصفاء و صونا للصمدي و الصمدي ماتيجاوبش...صيفط ليه ميساج و تبع كلام مو...

_ الواليدة غضباات اعبد الصمد.....غنتحرك عند ابراهيم ماكتتيش تما مزيان كنتي تما ماعندي ماندير ليك زهرك هذاك....شوف كي دير تسكت الزواية اذا شعلات ....!

عبد الصمد ( تيحرك تليفونو فيديه تيقطع على سعيد و يشوف فحلا ) : مبروك ...الله يجعلها خيير ...( ماستناهاش تجاوبو شاف فعبد الله ) سي عيد الله عندك شي شغل دابا ! باغي ندوي معاك ؟

عبد الله : ايه مرحبا اولدي ...

علد الصمد ( بجدية ) : نمشيو لشي بلاصة اخرى نهدرو اذا جات على خاطرك اسي عبد الله....

حلا ( زربات ناطقة) : بابا مشي انا عنشد طاكسي عييت اليوم...

عبد الصمد (ماهزش فيها العبن و بلا مقدمات دخل نيشان فالموضوع ) : شي عبد الله باغي بنتك على سنة الله و رسوله و هاذي ماشي اول مرة نفتح معاك هاد الموضوع....

عبد الله ( تيشوف فحلا الواقفة حداه مخرجة عينيها كي المصدومة و يرجع يشوف فيه ناطق بحرج ) : و عليه الصلاة و السلام....ماقلتي عيب اولدي...نهدرو اييه علاش لا .....

عبد الصمد ( تيدوي مثقل و على فمو شبح ابتسامة ) : كنت فتحت الموضوع مع بنتك و عطاتني جوابها....

حلا ( لسانها سرطاتو غا تتشوف و دور عينيها بيناتهم شنو تيقولو و يخربقو قدامها )

عبد الله ( شاف فحلا و نطق ) : سبقيني للدار احلا....!

حلا ( تترمش و تدوي ببن سنانها ) و بابا ...انقولك....

عبد الله حنى تقدوي معاها بخفوت : للدار احلا......

حلا ( جمعات صاكها تترمش بالزربة ) : بابا شنو كيقول هذا....و سمعني ابابا.....

عبد الله ( اكتفى بنظرة صارمة خلاتها تحمع فمها و تسمع الكلام )

خرجات عيشة من الاوطو كي الدجاجة مريشة....شافت عبد الله واقف مع عبد الصمد و حلا غادية بحالها من اتحاه اخر ...! صعرات نيت وعينيها توسعو....!!

شافها الصمدي هز حاجبو و غمز لسعيد بمعنى شنو وقع....! قرب منها بالزربة قبل ماتحي هي محني لعندها تيديو بين سنانو...

_ الواليدة بلا ماتروني لينا مخنا ..خلينا مرضييين و زيدي للدار....

عيشة ( تتشوف حلا و تشوف فعبد الله باغية تحماق ) شنو درتو ! كنتو كتزوجو....كترونو عليا واش اخيرتك تزوج بالساكوتي طرطق لي المرارة. اعبد الصمد...عدوتك انا ....

عبد الصمد ( خنزر فسعيد ) حتى للدار ...ساعة نلحق عليك اسعيد ...عندي شي شغل دابا.....

عبشة ( غوتات حتى شاف فيهم عبد الله مستغرب....) لاااااا داابا قولي شنو كاين...

عبد الصكد ( حك لحيتو السوداء تيعض ففكو تيبرد فراسو ) : لالة يمة خلينا مرضين و مزيانبن ....نقولها ليك مرة اخرى ،! نرغبوك ؛! ( قصح الشوفة فسعيد ناطق بصرامة ) سعيد شد الطريق....يلاه اعيشة ركبي.....

قلب عبد الصمد وجهو على عيشة عاقد حجبانو ماخلا ليها فين تزيد ...! ركبات صاعرة و ركب حداها سعيد تيسوك ...! طيبات ليه ودنيه بالغوات و النكيررر....!!

تقدم الصمدي عمد عبد الله ناطق باعتذار : تعطلت عليك اسي عبد الله...

عبد الله ( تيشوف فساعتو ) لا خود راحتك....غا هو العصر مابقالو والو نصلييو و داك ساعة تما هدرة طوييلة اذا بغى الله ...

تشاركو الطريق للجامع صلاو العصىر و جلسو فالقهوة....عبد الله عجبو الصمدي و جاه على الكانة تيبان ليه بعقلو و ماهو معقد ماهو متفتح على الجهد...تيشوف فيه اصلا غا راجل بنتو ! و ماكرهوش لحلا......! عطاه الوقت و سمع لبه ...

عبد الله : شوف اولدي ...هاذبك البنت لي باقي عندي ...و نتا ولد الناس ولد الدار الكبيرة و سبحان الله خلوق و ما سمعت منك العيب....من عندي انا مانزيد غي الصلاة على النبي لكن هذا الزواج خصا هي تقول اه و ترضى .....

عبد الصمد ( شبك يديه تيدوي بتحايل ) : بنتك نعمة التربية اسي عبد الله....من جوابها قيمتها و وزنتها و حطيتها فمرتبة عالية .....دخلت معاها بنية الزواج و مابغاتش تكمل الكلام ...قالت الري ريك نتا و الشوار شوراك و اذا كنت باغي الحلال نجي للدار ......وحتى انا ماباغييش شي حاجة اخرى من غير الحلال...و بحال هاد الجواب هذا من بنت فهاد الوقت راه حالة ناذرة و كنز ...

عبد الله ( عجبو الحال ) : بارك الله فيك ....حلا بنتي كنعول عليها فكلشي تايق فيها و عارف شنو ربييت و عارفها ماشي وحدة نية ...مدام جاوباتك هكا راه كاين للخير ان شاء الله.......

جوج عافيات شاعلين....!

حلا فبيتها تتمشي و تجي و تزطم فجلايل سروال البيجامة تتنكر...

_ عندو يلعبلو فعقلو و يحي يقولي نتزوج بيه بزز اماما....

حميدة مافهمات وااو : فين كنتو نتوما بعدا ! و السيد مالو قال العيب ...

حلا ( قطبت جبينها ) صوني لبابا يجي قولو يجي دابا ...هذاك امااما غياكل عقل بابا بجوج هدرات...و عبد الله مابقى كيشوف حد من غير داك ولد الجلبانة.....حرك ليه المجامر .هذاك كابر بين الحناش ...غداار مامعاه معاشرة.....

حميدة غوبشات : حلا اختارم راسك ابنتي و حشمي شوية عيب تدوي على الناس هكا ...مالك كتعلم الغيب مابغيتي تحشم مامخلية حد ماعيبتي عليه.....

اما العافية الاخرى ...عييات تشرب الماء باغية تبرد و شي مابرداتو....!! شادة فراسها قاتلاهم بالنكير...و الغوات.....!!

سعيد : و يمة وااله ماغيتزوجو ...راه باع ليها غي الارض....

عيشة ( راسها زاد زند عياها شداتو فيه تتغوت لربي لي خلقها ) ااااييييي راااسييي راسييي مشااا علياا. رااااااسييسس.....وقف وقف ...راسي كيدق ....

مرضات عيشة ديك العشية و ماكانت تتكذب و لا تتزيد فيه....! راسها ضرها حتى تخلعو و خداها الصمدي طاير للطبيب...!! تفقصات عيشة مزيااان حتى كانت غتخرح على صحتها...! لمحها تتغلي و عدوتها الوحيدة لي عندها دابا هي حلا...! سنانها قد خيزو عليها....كل مرة تيكحال قلبها على حلا و تتزيد تكره تسمع سيرتها....!!

حلا فين هي ! حلا مربعة رجليها تتاكل فواحد التفاحة و عقلها غايب ...! تتسنى فعبد الله و خلود و نسيم ولادها دايرين حيحة فالدار....!! وهي تتدوي مع راسها و تفكر مع راسها مامشاركة حد فمصايبها....

حتى حا عبد الله و غمز لحميدة ناضت لعندو و دخلو للبيت تيسرسب ليها و حلا واقفة ليهم عند الباب تتسمع ...

_ عبد الصمد بغى حلا ...و الولد باين داير بالو فيها بزاف....

حميدة : و دوي مع حلا تقبل حتى تسمع الهدرة على الزواج ...

عبد الله : قال جبد الهدرة معاها و قالت ليه اذا باغي الحلال قصد الدار ....

حميدة بصدمة : بنتي حلا جاوباتو هكا !!

عبد الله : و هادشي لي قال ....و مانظنش كذوب جواب حلا هو لي زعمو يهدر.....

حلا وسعات عينيها و جبداتهم حتى التفاح فيديها بدا تيحمار كي حمارو ودنييهااا ...

دخلات لبيتها تتلعب بسالفها و ترمش و تميل دوك الشفايف ....سمعات و دخلات لودنيها اش قال الصمدي و فهمات الخط لي ماشي فيه...!

رمات ديك الكلام كيف مارمات ديك التفاحة من يديها و طلعات لناموسبتها و ربعات دوك الرجلين كي مولفة....!! فرشات ذهبها قدامها كي الشوافة ملي تتفرش الكارطة ...! تتهز وحدة بوحدة و تشوف فلونها المذهب و تلبس فيهم و تضربها بتصويرة فاعلة تاركة.... مبردة و هادية و واحد التنزكية فوجهها تقول غا غروسة ليلة عرسها تيلبسو ليها فالذهب....!!

دخلات عندها نسيم دافعة الباب مدرمة...غا شافتها فديك الجلسة هادية ماغوتات عليها ماوالو دخل معاها العجب...

_ حلااا !! مالك نضتي ماعاودتي رجعتي .....

حلا ( هزات براصلي رقيق زوين عطاتو ليها بهدوء ) هاكي ...خوديه نتيا ولا لبسو لبنتك....

نسيم ( بدهشة ) : بسم الله عليك ابنتي ..بديتي تفرقي رزقك من دابا....

حلا : واش غتديه ولا نرجعو !

خداتو نسيم من عندها بالزربة لا ترجع فكلامها و خرحات من عندها مستغربة ..تتعاود لخلود...

_ شوف شنو عطاتني حلا ...صدماتني هي لي ماتعطيك حتى اللقاط باش تتقطع ظفرانها ....عاد براصلي !!

خلود ( شافت فيها تتنهد و تهز فراسها ) : والله ياختي يانسيم الا نتيا النية فينا هنا ..واش كاين شي واحد فالعائلة باقي تيعطي نيتو لديك اللفعة.....تكون تترد ليك شي حاجة سرقاتها ليك شحال هاذي و خايفة يخرحو فيها ذنوبك.... غا تفكري اذا مالقيتي شي حاجة ناقصة فيهم ماسميتيش خلود....انا لي سميتها وطلعتا على يدي و عارفاها شنو كتسوا.......

دخلات لعندهم حميدة تتفرنس طالع ليها المورال حاسية بصح حلا باغية تزوج...

_ مالكم ...فين حلا !

خلود تتضحك : حلا تتفرق حوايجها لي طل عليها يخرج هاز فيديه.....شوف شنو غطات للنسيم....

حميدة ( جلسات تهز فرايها ) : احيااااني....( بدات تتضحك ) تلقاه غا ديال نسيم طيراتو ليها شي عام و هي ناسية مع نسيم غا متلفة حوايجها لي جا يسلت ليها...لاحولا ولا قوة الا بالله ....و فين هي تخرج تجلس معانا مالها على هاد العزلة مابقينا نشوفوها....رضا لي كتقيل تناكر معاه مكاينش ...( رفعات صوتها ) حلااااا....احلاااااا....

ماكاين منها رد...! ناضت حميدة لعندها فاتحة عليها الباب....! لقاتها مزال جالسة و ااذهب مفرش حداها تقول تتبيع فيهم....!! هزات حاجب و نطقات...

_ زيد جلس معانا ...مالك قارمة هنايا ...ياكما عاوتاني باغية تصدقي ...!! غا جمعي داكشي نصو مسروق مامحسوباش الصدقة.....زيدي يلاه جمع داكشي و نوض

حلا ( هزات رموشها ناطقة بهدوء ) : وخا ....

جمعات ذهبها و شعرها بمقبض و خرجات سامعة الكلام....! جالسة وسطهم كي الامانة اذا ماسولوها ماتدوي ...! كلشي تعجب تيكونو تيهدرو حتى تيشوفوها تتنهد و ساهية تتلعب فشعرها ...! وهي عينيها تيضربو غي من التحت التحت ...!! تتهز بنت نسيم تشبعها بوسان و تحطها تتفرنس و ترجع تنهد....!!

خلود ( برزطاتها و مع الوحم خصها غي مع من ) نو ض من قدامي تتنهد عليا بحال المعشوقة....

جمعات حلا لسانها و ماجاوباتش ...خلاتها على خاطرها ...دوزات معاهم القصارة و عبد الله نعس ماعاود فتح عينيه...دخلات لبيتها و تبعاتها حميدة...بعد مادات معاها عينيها...! جلسات و طبطبات على فخاضها تتفنرس...

_ اجي الحبيبة ديالي الحلاوة ...شحال مانعستي فحجري و تهاودنا...

حلا نعسات فحجرها مرخية تتقلب فعينيها و تنهد : لعبلي فشعري اماما ...حرقاتني الشمس الصباح....

حميدة ( طالقة حلاوة لسانها حتى هي ) : و مالك غي كتنهد ....عاودلي شنو كاين ! خلود و نسيم كيعاودو ليا كلشي نتينا حتى كنعيا نشوف كي ندير نسلت ليك لسانك واش عدوتك انا....

حلا ( فتحات فيها عينيها بتعب ) : عيييت ...كون كنتي كتشد فمك اماما كون تنعاودلك كلشي ...

حميدة ( تتبسم ) : و يالالة نحلف ليك بالله سرك فبير غا قولي شنو عندك فداك القلب مابان ليا فيك هاد الايام ....

حلا : زعما نتيق !!

حميدة ( ضرباتها لراسها ) : كتكذب يماك ...فين الترابي !؛

حلا ( رسمات شبح ابتسامة ماكرة و غمضات دوك العوينات ) : انا كنبغي واحد الراجل ....اذا ماتزوجتشي بيه غنحماق.....

حميدة ( سخن عليها راسها و فتحات ودنيها و عينيها ) : شكون ؟ كنعرفو ! و مالو مايتزوج بيك هو المسعود فين يجبر بحالك....

حلا ( تتشوف فيها بنص عين ) : هو مزوين و كيف كنبغي انا ...طويل و كيعرف يلبس و كيهتم براسو عندو خدمتو و طنوبيلتو و السيد دماغ و مصواب تيعرف فالمعقول....

حميدة ( ولات غا تتسايس حامعة فمها خايفة لا تقلب عليها حلا و تشد فمها...غا سمعات المواصفات نطقات معلية حاجبها ) : صافي عرفتو ..عرفتو ...ولد عيشة عبد الصمد !؟

حلا ضحكات ضحكة ملونة مخبية اعصابها تتمتم بين سنانها ماسمعتهاش حميدة

_ يعطي لمو الزلط ...

حميدة ( تتطل عليها ) مالك سكتي ! قولي بعدا غا شكون ....

حلا شدات عينيها ماعاودات حلاتهم دايرة راسها غلبها النعاس...خلات حميدة غا تتشوف و تلعب ليها فراسها تتفكر و ساهية شكون هذا...! عارفة بنتها صعيب يعجبها شي واحد و مشراطة حتى فاتت القياس....! و الراجل ماتقول عليه عجبني حتى كان فات الزين و الاناقة لهيه....! و لكن باش تقولها ليها بدون اي مجهود كبير فالاقناع دخل معاها العجب ...! علاه بنتها وصلات للحب و تحماق اذا ماتزوجات بيه.....!

صاوبات ليها راسها مزيان و خرجات معلية حواجبها تتفكر....!! دازت عندها ليلة طوييلة ...!! عكس حلا لي صابحة فاتحة يديها و رجليها واخدة راحتها فالنعاس......ماعندها خدمة و لا قراية داك الصباح....و حتى عبد الله تيكون مسافر داك النهار.....حط ليها تليفون جديد و شد طريقو لطنجة ! و بيه تلهات حلا داك النهار...! طلبات سلمى تصيفط ليها نمرة اسامة و دخلات عليه فالواتساب تتسجل ليه اوديو وهي داخل ليها الشك يكون الصمدي رونها معاه ....

_ بونسواغ أسامة هاذي نمرتي الجديدة ...تليفوني الاخر تسرق ....

دارت ارسال وجاوبها بعد نص ساعة عاد فتح...!

_ اهلا و سهلا حلا كي دايرة ..ياك لباس بعدا كي طرا تسرق ليك ؟

شداتها حلا هدرة معاه ...طلب منها يتلاقاو ماحدو فتطوان....! و قبلاات بعد الحاح منو ...!!

الوقت هو الوقت عندها...! دخلات للكافي لابسة مونوطو فالاسود جاي مع بشرتها .....

_ بونسواغ....

اسامة ( شافها ناض واقف مد ليها يديه تيفرنس ) اهليين حلااا...الوقت هو الوقت عندك....نورتينا

حلا جلسات حاطة صاكها فالفوتوي جنبها مبتسمة ثقيلة و رزينة غا عينيها تيدورو بوحدهم...

_ميغسي بارك الله فيك...اوا كيف داير مع الوقت صافا....

اسامة ( دوخوه عينيها ) : مزيان الخدمة الدار و هكا غاديين....! ( تبسم و كمل بلطافة )شنو كديري في حياتك احلا ....

حلا ( هاد السؤال تيعصبها تبسمات ابتسامة عير صافية و ردت ) والو ...تنقرا اللغات و شادة تجارة بابا هذا ماكان .....

اسامة ( زادت عجباتو ) : برافو ...قارية الجيستيون ؟

حلا ( حاجبها تعلى ) : ههه عندي الماستر فالفينونس مانفعني بوالو وجربت مرة وحدة دفعت لكونكور المالية و مادزتش ...صاايي قلبت الاتجاه ....

اسامة ( وسع ابتسامتو الجدابة ....غي مكتزيد تعجبو ...قارية و زوينة و ثقيلة ) عندك واحد اللكنة فشكل ....( ضحك ) ماعرفتش واش كاع الريفيات طريقة هدرتهم هكا .....

حلا ( اكتفت بابتسامة )

دوزات معاه ديك العشية هادية و خفيفة ! شافتو شاب عادي مافيهش البسالة و الهدرة بزاف...شخص عملي و تيعجبو فالمراة تكون قارية و مثقفة و خلاص اذا كانت زوينة كي حلا يشد فيها بيديه و سنانو ...! ماعارفش انا الكمال لله سبحانه و تعالى....!

وصلات للدار صيفطات ميساح لسلمى تقوليه على داك المؤتمر باغي. تحضر تشوف غا بعوينااتها و تقيد ماينفعها....!!

_____

حميدة فرعات لخلود راسها ..دغيا سرسبات ليها و خوات اش عندها ...!

_ غتكون مصاحبة !! اللفعة مصاحبة باغية خاها يخرج عليها ....

خلود ( راسها ضرها ) :و شنو كيحساب ليك وحدة 27 سنة و ماتكونش دايرة باش دوز الوقت ...حلا زهوانية تتمل من الوحدانية و تتقلبها مصاحبة حتى تتمل و تقلب وجهها ....

حميدة : البنت بوجها حمر تتقوليك كنبيغه و محمقة نتزوج بيه.......

خلود ببرود : كذوب مانفكرش جوج مرات....هذا ماشي كلام حلا....

حميدة جلسات حداها تتعاود ليها...

_ انا راسي داخ عليا...عبد الصمد عاود هدر على حلا و قالك هي قالت ليه بغيتي للحلال قصد الدار....و دابا كنسمع منها كتبغي شي راجل واش ماتخرجش ليك عقلك هاد المصيبة ....

خلود ( بدهشة ) : حلا قالت ليه هاد الهدرة ! واش كتهدري على حلا ختي ولا شي وحدة اخرى...شوف من الاخر....هادشي مادخلش ليا لمخي....و ديك الجنية تتخور عليك و تكذب باش تكركب عبد الصمد......قولها ليها فكمارتها ( هزات حاجب بذكاء ) اذا شفتيها تتشطح رموشها عرفها حصلات تتطلب الكذوب يطيحو ليها عند اللسان ....هاذيك نهار يزهق ليها شي حد لداك القلب غتمشي تقتل راسها ولا يفلت ليها العقل ماشي غتجي تنهد عليك و تعاود ليك.....حلا اذا عمر ليها القلب يفلت ليها العقل ....

حميدة بشك : و سكت قطع الحس ماتقولا والو عندا ماتبقاش تعاودلي ...هاذيك على سبة عندك تقولا عاودت ليك شي حاجة...حتى عبد الصمد ماتهدرشي عليه.....حتى يهدر معاها باها بنفسو ...

حلا ( هبطات جالسة حداهم تتشوف فيهم بشك ) كتهدرو عليا ؟

خلود ( تجاهلات كلام حميدة و حطاتها بوجهها ) سمعت القليب عندك مسروق....سبحان الله تسرح ليك اللسان و رجعتي كتعرف تعبر ...

حلا ( شافت فمها نيشان مكمشة فمها ) : شغلك بان احميدة....

حميدة ( عقدات حجبانها ضاربة الطم )

خلود : ماحشمتيشي كتكذب على ماما....؟ غي قولي واش ماخفتيشي توصل لرضا ! عرفتي شنو غيوقع ولا !

حلا بين سنانها : طزز فيه...شكون يكون هذا حتى نخاف منو ! يمشي ينقز من عليا...

حميدة : اوا الرضى يابنتي ! على نيتي كنسمعلك حاسبة كتهدر بصح ساعة كاذبة عليا بوجهك حمر ...

حلا ( شطحات رموشها ) شنو قلت ؟ فاش كذبت ؟انا ملي تيدوخني النعاس مكنعرف شنو خرجت من فمي ...

حميدة ( ضربات يد على يد و شافت فخلود ) و هانتينا ياالالة....واالله الا مخيرة هاذي ...

ضربات حلا الطم دايرة هبل تربح...! غا تتجي عينيها فعين خلود تتخنزر فيها و خلود تتهز عليها راسها....!! خلود و رضا هوما ليسماو حلا و فرحو بها ملي تزادت و حلفو حتى يسميوها هوما ...و مامشاو حتى سماوها حلا ...كانو فرحانين بها و دايرينها اميرة غابدات تكبر و يبان شيطانها ولات بيناتهم حروووب هوما...!!

جا عبد الله ديك العشية ! سمعاتو حلا حاي غوبشات.... واقفة قدام مراية بيتها معصبة خلود ضربات ليها كلشي فالزيرو ...!! غززات طراف شفايفها و غوبشات ملي سمعات باها كيعيط ليها ...عرفات بلي غيفتح معاها الموضوع ...!!

خرجات لعندو و جلسات كي الدرويشة : بابا ...

عبد الله طبطب عليها فرحان بيها : الله يرضى عليك ....( ضربها لراسها كيستلطفها و يتمازح معاها ) مصيفطة الخطاب للدار وضارباها بقرمة....

حلا ( بلعات ريقها تتبسم بزز ) شكون ؟

عبد الله : عبد الصمد ! قالي دوا معاك شي مرة قلتي ليه الدار كيعرفها اذا بغى الحلال يقصدها....

حلا تعرقات و طلعات معاها الصهدة ...كون غي ماكانتش معروف بالكذوب كان لي قالتو غيتيقوها ..لكن كلامها كلو مشكوك فيه حتى اذا جات تالف قصص من راسها....مابغاتش تعيب فيه من دابا و تعطي تبريرات وهوما عند بالهم عمرها دوات معاه و مكتعرف عليه والو ....لقات لسانها و ردات ...

_ اوا شنو غنقوليه ابابا ...نوقف معاه ندي و نجيب معاه فالهدرة هاد الامور راها باينة....بغاني للحلال يقصد للدار تما كيهدرو الناس ....

عبد الله ( ابتسم ) : اوا دابا ماجاتش تقولو يقصد الدار و باب الدار ماتفتفح فوجهو...كاينة ولا لاء احلا !!

حلا ( عقلها مشتت حلفانة فخلود و فالصمدي و كارهة كلشي فديك الدقيقة ...محتاجة شي ساعة استرخاء بحال البارح قدام ذهيباتها ماتفكر فوالو ساعة شكون خلاها.....بقات تتدور فعينها و ساكتة....حتى نطق عبد الله كيفنرس...

_ اوا كيف يكقولو السكوت علامة الرضى ....

عينيها كيغليو تتفكر بالزربة تشوف فرجلييها عقلها ماشي هنا ....حتى طبطب عليها عاد هزات فيه العين ناطقة ...

_ اوا ابابا نتا عارفني رضايا مانعطيه على واحد مكنعرفوش...انا مكنعرف عليه والو من غير سميتو عبد الصمد ...فين خدام و شنو كيديرو و شحال فعمرو و منين هو ....انا اصلا عمرني ماطولت حتى الشوفة فكمارتوو.......

عبد الله ( شاف فيها شحال و حمع الوقفة ) ماقلتي عيب ...نديرو شي جلسة ..يجيب مو و يجي بعدا نهدرو....

حلا تعرقات و تزيرات بقات غا تترمش تتحس كلشي ماشي بواحد السرعة خطيرة و عبد الصمد شوية ورى شوية تيدخل في خياتها...كل مرة فين لاقياه و سميتو غا تتطيح فودنيها و الكارثة هو عبد الله معجب بشخصية عب. الصمد و تيشوفو زوج بنتو المناسب ....! عبد الله ماكانش تيسولها عبد الله قرر يفتح الباب و يقرب العائلتين اكثر .....و بعد الجلسة و الجواب على أسىلة حلا لي باغية تعرف غيسمعو رأيها واش قابلة ولا رافضة ....!!

وصل الكلام لحميدة ! لي طلعات معاها السخانة و التفعفيعة...

_ انا مغندير حلفت مابقيت ندير شي حاجة حنى توصل لضريب الضداق ....شفتي مع داك إياد الملاين خاسرة ياعيباد الله حتى قالت ليك مابغاتوش.....

عبد الله بجدية : حميدة حنا ماقلناش لبك عندنا الخطابة ....غايجيو يهدرو و نديرو شي جلسة بعقلها ....حلا ماقالتش ليك مواقفة ...قالت مكتعرف عليه والو من غير سميتو ...و ماقالت كلام العيب...!

نعسات حلا فاتحة عينيها للسقف بعد ساعات تفكير و التخمام...غمضات العين ناطقة بين شفايفها...

_ اذا ماخليتوش هو لي يندم على النهار لي فكر يعتب بابا دارنا مانكونش حلا.....

ببيجامة الدار مقزبة ومؤخرتها مشوهة بقوة بالجلوس باينة من السروال المزير عليها...عندها الكرش و يديها عامرين ...عندها الفخاض و البزول و وججها مدور و عامر ...!! تهنات من تمارة ملي مات راجلها و كبر عبد الصمد تما عطاتها ليك غا للحوايج و الذهوبات و الراحة و السفر ....! لي فتحات فمها يحضروها ليها ولادها الرجال تيعزوها وخا بنكيرها و تيقولو ليها غي لالة يمة...اما البنات كلها فين زوجاتها و لكن ...ماكاين غا صحاب الفلوس و الديور ماتعطيش بناتها لمن كان ...! بقات عساسة غي على. الرحال و حاضية نسيواتهم و معكسة ليهم واقفة ليهم كي العلقة فحلقهم ...!!

يوماين دوزاتها مريضة طايحة بالاعصاب ....حتى بدات تتصح و دور فالدار بستيلو حمر واقفة ليهم عند راسهم.....!!

_ صفاء صفااااااء هز التربية بدلا مالك متلفة البنت ...شنو كتعمل نهار كامل بدل للبنت الله يعطيك مصيبة.....

صفاء ( خرجات من انستاغرام رامية التليفون ) : خالتي بشوية عليك...جلس ترتاحليك شوية مزال مريضة....

عيشة ( تتشالي بيديها ) : يمرض عدويا ياربي ...كتشفاو فيا فرحتو. ملي مرضت و هانا نضت ليماكم من دابا فوق ماكاين لي يتزيزح ...تترونو من ورايا و عيشة الحمقة ماكتعرف والو ...وخا على حسكم....

سكينة ( تترمش ) خالتي عيشة شربتي دواك...

عيشة : مامريضاشاااي انا باش نشرب داك السم ....

جلسات ليهم تما معرية فخاضها عليهم...و شعرها حمر محموع بقبض ذهبي ...!!

شافو فيها البنات حتى عياو و سلتو من قدامها....!

حتى قرب وقت الغداء و سمعات عبد الصمد جاي....ناضت طايرة للبيت دايرة راسها مريضة ماتتهز فراسها....!! غا تيدخل تتمرض ..يخرج تتنوض سالمة مافيها والو ...تتبقى صفاءغي تتشوف و تهز فراسها...

_ ياربي الصبر مع هاد المخلوقة....

____

رحبات حميدة بلالة فاطمة تتكب ليها اتاي و تقرب ليها الحلاوي ...

_ على سلامتك غبرتي علينا و خليتي القنط والله العظيم...

لالة فاطمة ( تتضحك ) اوا ياحميدة مامشينا لفين ها حنا جينا ...مشيتي طليتي على عيشة ؟ سمعت من مليكة كانت مريضة و طايحة فالفراش ....

حميدة ( بدهشة) قول والله مافخباري ...ماين غنعرفا مسكيينة كيف وقعلا ..شنو عندا !

لالة فاطمة : قالو طاحت بالاعصاب...خصني غا ندوز نطل عليها ....

حميدة ( بملامح مشوشة ) نمشيو كاملين غا ستناني فالعشية ندوزو عندا ....اوا ها ياختي الدار قبالة الدار و ماعرفتا مريضة الله ينعل الشيطان....

ناضت حميدة معلية حاجبها مشوشة....! هبطات التحت تتعيط لحلا...

_ حلاااا...حلااااا

حلا ( طلات عليها تتنكر ): شنووو اماما كرهتوني فسميتي مكتعرفو غي حلا كتجيكم ساهلة ففمكم....

حميدة ( عقدات حجبانها بصرامة ) بدل عليك نمشيو عند عيشة مريضة....يلاه طلق راسك خصنا نعلموك على نهار باش غي ترمي عليك جلابة و تمشط داك الشعر...مقولبة عباد الله بيه لي يشوفو يقول عندك السوالف.....

حلا ( عوحات نصها ناطقة ببرود ) عيشة غتدخل فغيبوبة اذا شافتني احمبدة خليني جالسة مهنية السيدة لا تصدق فالقبر على بكري و ناخدو ذنوبها .....

حميدة ( بنبرة قاصحة ) دفل من فمك ...و جمع لسانك....

خلود ( تتضحك ) والله ماكذبات فاطمة الزهراء ملي قالت على حلا منحوسة الراجل لي هدر فيها للزواج كيمرض ولا يموت ليه شي حد من تاصيلتو.....

حميدة ( خنزرات فيها ناطقة بصو ت خافت لا تسمع فاطمة ) ششش يعطيك الفضيحة يابنتي.....

بعد نكير و كلام حميدة عليها ...خرجات حلا لابسة عليها و طالقة شعرها تقول ماشية معرفت فين وهي خلفة الطرق...! زادو حميدة و فاطمة للقدام و حلا من وراهم تتدعي ماتشوف كمارة عبد الصمد ....!!

جلسو فالصالة بعد احسن استقبال دارتو ليهم صفاء ...! عاد طلعات تتجري فالدروح داخلة لبيت عيشة فين كانت تتكحل عويناتها و فاتحة فمها....

_ خالتي عيشة ..

عيشة ( غوبشات فيها ) شنيياااا.....

صفاء : جاو الضياف...لالة حميدة و لالة فاطمة و حلا ....

عيشة ( حاجبها طلع للسماء ملي سمعات سمية حلا ) حتى ديك الجنية تما ...ماجا تشفا فيا بنت الحرام....

ناضت بلا عجز لبسات عليها و هبطات لعندهم صحة سلام....تتسلم عليهم...غا شافوها تدهشو منها ...هاذي لي مريضة ...!!

حميدة : سمعناك مريضة اختي عيشة ياك لباس..

عيشة : و شويش كنا مراضين شي أيامات و صافي ....

حلا ( تتفرنس ليها عارفاها تتفقص منها ) : منورة تبارك الله اخالتي ....

عيشة علات حجبانها و جيوب نيفها تيفرفرو ماجاوباتهاش....و ماجبدات معاها الكلام غا تتدوي حلا تتجاهلها عيشة حاسباها ماكايناش...و ختى حلا ماتتهز فقلبها ماتتفقص منها تتغلبها غي الضحكة ...كون ماحميدة تتهددها بشوفاتها كون راه ضحكات فوسط كمارتها. ...!!

عيشة : اوا لالة حميدة ماعولانشاي تعملولنا الزردة د الارض .....

حميدة ( تبسمات تتشوف فحلا بنص عين ماتسوقات لبلان الارض كثر من الزواج ) : اوا الزردة ديرها مولات الارض ماشي حنا....

فاطمة ( تبسمات بفرحة ) شكون حلا شرات الارض ماكانت فخباري.....

حلا ( ضحكات بزز كانت باغية تبقى مخبية ) : باقي ماشديت الملكية اخالتي...ساعة ندير ليكن الزردة و شي حفلة مضخمة غا ستناو عليا ننساكم انا اويلي.....

عيشة ( تتعوج فمها ) : عبد الصمد قالي خصو يبيعا لشي وحدة ماقاليشاي غيبيعا ليلك ساعة صدقتي ديك الوحدة نتينا .....

فاطمة هزات حجبانها و سكتات مافهمات والو ...شمات شي ريحة بيناتهم و ماسولات !

دارو الواجب مع عيشة و تحركات كل وحدة لدارها....!! حتى لليل جلسات حميدة تتسول عبد الله مستغربة...

_ كاع ماجبداتلي الهدرة على حساب عبد الصمد و حلا اعبد الله ....قلت دابا تجبدلي الهدرى ساعة والو ...يمكن حيت كانت معانا لالة فاطمة....

بعد أسبوع !

دخلات حلا للدار مع عبد الله طالعة طايرة و الفرحة تتنقز من عينيها......شافت خلود و رضا و مراتو مجمعين و حميدة تتحط الغداء....

_ واحد السلام عليكم....

خلود ( وجهها صفراء ولات ضعيفة ) : و عليكم السلام ...

رضا ( عاقد حجبانو فيها ) : فين كنتي ؟

حلا ( رمات شعرها للور تتقلب فعينيها تتلعب بالملف فيديها ) : كنت مشغولة اسي رضا.....ماشي غي اجي و شري الارض...خصك العقل و العقل و العقل عاد تيحيو الفلوس.......

خلود و رضا كمشو حجبانهم باستغراب...

_ شمن ارض !

حميدة ( تتهز فراسها و تضحك ) زيد اعبد الله تغدا فاين مشيتي....بسم الله عليكم نتوما.....

حلا ( تتشوف فرضا شوفاات انتصار و تشفي ) : ارض ...ماتعرفوش شنو الارض...ماشي لي تيفلحو فيها لا...لي تيبينو عليها الديور عرفتوها !

خلود ( الصدمة لجمات ليها اللسان ) : حلف بالله شريتي الارض !!!

رضا ( حمر و تزير تيشوف فعبد الله ) شنو كتقول هاذي ...

عبد الله ( بدا تياكل مامسوقش ) لي قالتو سمعتيه....شرات الارض بفلوسها...خلود قالت عاد شرات و نتا قلتي ماعندكش وهي عندها و بغاتها و هاهي شراتها ....

رضا ( عرق فراسو قرب يطرطق ) : ماين جابت هاذي الفلوس حتى شرات الارض ؟

حلا ( قرمات مخلية عبد الله يدوي )

عبد الله : شغلك ماين جابت الفلوس....( بمزاح كمل ) دير النفس حتى نتا و جمع الفلوس ديردارك ...بنت شبع الشهور كانت كيف البولة فيديكم دازت فيكم و شرات ميى مترو ....

رضا وقف الماكلة تيبلع كلام باه غي بزز ...عينيه فحلا حمراء....!! تيسمع فحنان تتبارك لحلا...

_ مبروك احلا والله الا فرحت ليك....

حلا ( تتفرنس ) بارك الله فيك احنونة....عقبال لعندكم حتة نتوما...الكراء صعابت فهاد الزمان ...الصراحة الواحد هو لي يحمع راسو و يدير دارو وخا يحيد من لحمو .....

خلود بقات غي مضيقة عييها فيها بدهشة كانت عارفة تتحمع لكن عمرها تصورتها تشري ارض ... شافتها حلا و تلقات شوفاتها بتبسيمة و بوسة فالهواء....! قاطعة الشهية لرضا و خسرات ليه الحالة.....!! مارضاش....!و مابغاتش تبلع ليه منين جابت فلوس ارض....!

سالاو الغداء و شدو عبد الله تيهدر معاه على جنب...

_ عبد الصمد غيجي يهدر فحلا ليلة الخميس ....

رضا ( ملاقي حجبانو ) : هي بغات !

عبد الله : باقي ماقالت والو حتى تعرف الولد كي داير.....!

اما فدار عيشة ! كانت حيحة اخرى...! عبد الصمد غرق عيشة كادويات و حوايج طمرها ليهم بالمعنى الحرفي....ناموسيتها مابقات عليها بلاصة خاوية....!! جلس حداها فالفوتوي تيلبس ليها الذهب فيديها داير شبح ابتسامة...

_ هانية دابا اعيشة مرتاحة !

عيشة ( تتشالي بذهبها ) مالي مانكون مرتاحة مخيرة ....

عبد الصمد : اوا تبغي نكون انا مرتاح !

عيشة ( عقدات حواجبها عاقت ) : رتاح اولدي شكون قالك ماترتاح ولايني بعيد على ديك الحية.....كون تسمع مني و تزوج ياسمين عمرك تندم....

عبد الصمد ( تيبوس ليها يديها داوي بالثقالة مهدن )

_ لالة يمة بالي مايرتاح حتى تولي بنت عبد الله ديالي.....

عيشة ( تتسوط و تزفر معصبة تتدوي من نيتها )

_ و علاش اعيد الصمد مكتسمعشي مني علاش....هاذيك اولدي غتعييك و غتخرج عليك....قلب عليها اعبد الصمد قبل ماتعط فالتراب ....بعد ديك الحية منا مابغيتاشي ....

عبد الصمد ( تيضحك بالثقالة و صوتو حرش )

_ صافي خايفة غا نندم....ماعارفاش لالة يمة عمرني ندمت على شي خاحة....مكتعرفيش عبد الصمد !! ليلة الخميس تمشي معايا نهدرو مع الواليد ديالها....

عيشة ( تتغوت ) غي قولي مالك معاها....شنو جاك عليها ..شنو فبها مايتعجب و هي عاملة كي المونيكة....مخيرة فالبنات تتمناك و غزالات كيحمقو......

عبد الصمد ( تلمس حكنها بظهر يديه مبرد ) نوجد ليك لباسك لليلة للخميس الالة يمة ! ولا غتقلبي علينا وجهك و نمشي طويل !

عيشة ( ضربات ليه يديه معبسة ماجاوباتوش تتغلي غي بوحدها....)

عبد الصمد ( كرر كلامو ببرود ) اشنو قلتي الالة يمة....

عيشة ( قلباتها حلوف ) والله لا مشيييتها.....

حلفات و عاودات ودوزات داك النهار تتحلف....!! و مع ذلك غي طاح اليل قلبها تحرك ...شدات عليها فالبيت و جلسات تتنهد و تعاود و غي تتجي صورة حلا قدامها تتصعر غي بوحدها و تنوض تسب و تدعي ...تقول غا مسحورة ...! من حهة عبد الصمد العزيز عليها ماباغية تخسرليه خاطرو و من حهة كرهها لخلا تيخليه حالسة كي المقروصة ...مغغدة و سنانها قد خيزو عليها....!!

قالبها سهير مع كريم... منغم و مرخي تيكمي و يشوف فكريم حداه تيدوي غا بوحدو مرة يجاوبو مرة يقلب عليه....حال و احوال...

كريم ( تينعت لواحد الزعرة ) : و زين هو كاين هنا ... شوف الزعورية اخاي الصمدي متع عينيك..

عبد الصمد ( شاف فيها و قلب عينيه ) : بنت 18 كنقوليها بنتي اخاي كريم....بدل الصنف شوية....

كريم : الكتاكيت اصاحبي طرييين....

عبد الصمد ( ماجاوبوش )

كريم : رجعتي مريض ...! بانلي دوخاتك الريفية بعوينات القطة....

عبد الصمد ( ملامحو تقلبات بسرعة البرق خنزر فيه و نطق بتحذير ) كريييم تجمع اخاي ديالي و قلب الله يرحم يماك .....

كريم ( تيضحك مستغرب ) وياي ! مالك...اصاحبي غا كنضحكو...

عبد الصمد ( ماضحكش ) : قلب لسانك عليك ماتجبدهاش على فمك ..بلا مانت**ارو ....

كريم ( بصدمة ) : وخا المسامحة مابغيناشي نجبدوها....ولكن غي بيني و بينك قولي شنو ناوي للبنت....

عبد الصمد ( قلب راسو تيضحك بالثقالة مع هوليود سمايل ضحكتو قتالة ...)

كريم :واييلي ! هدر معانا المورو مالك.....

عبد الصمد ( بصوت حرش منخوية ): دوخك ازين البراني اكريم...ومابقى فعقلك بلاصة دخل كلامي....!!! بنت عبد الله دير عليها كروا عقلك مايمشي ليها و لسانك مايحبدهاش.....( عقد حجبانو )كتعرف المعقول !! هو لي ناوي معاها يلاه دير القفل....

كريم هز حاجبو مامتيقش...لكن ماعاود هدر ولا جبدها....! رد ليه البال مابقى تيحمل حد يشوف فيها ولا يجبد ليه السيرة و حتى كريم مابقى تيدوي ليه عليها هاذي شهور....!! عطاه الانذار الاول ملي قالييه لي ديالي خليه و لي ديالك خودو ...! لكن قال عندو معاها حساب حيت عارف شنو دارت ليه....!

و الانذار الثاني كان ليه و لعمال الورشة.......لاحظو كيف تقلب على قبل ! و زاد كلامو دابا أكد ليه بلي عبد الصمد بصح طايح على راسو و بنت عيد الله سكنات ليه فعقلو و دار ليها بلاصة حتى فقلبو غي هو ماعرف واش دايما ولا غي كاري ليها تما....!!!

____

ليلة الخميس !

حميدة مامقصراش ! هكا دايرة ...التاويل و الاناقة و الفراش المخير عندها ! كيف كل مرة فرشات الزربية الحمراء فالدروج من السطح حتى لباب الكبيرة....! معطرة الدار و كلشي عندها كيشعل....!! خلود لابسة و مأنقة بقندورة زوينة و نسيم كذلك.... المعنية بالامر ناعسة خاشية راسها تحت المخدة ماكايناش هنا...!كل مرة داخلة عندها وحدة من البناات تيفيقو فيها وهي تقول ميتة...! مكتفيقش ...!

دخلات حميدة معصبة عليها جرات المخدة من فوق راسها تتغوت عليها...

_ فيق ينعل والديك......

حلا ( بزز فاتحة عينيها لسانها ثقيل بالنعاس )

_ خليني احميدة ...

حميدة (جعرات بغات تاكل جنابها ) حلااااا....اويلي على الكلبة بغات تشوهني...نوووض اليل طاااح....

حلا عطاتها بالظهر ناعسة مامسوقاش....مخلية حميدة غتبكي بالفقصة....!! خرجات لعندهم تتشكي و هذا تيقولها لهذا و شدوها عليها تيموتو بالضحك......!! كلام ليلة الخميس عليها و هي ضارباها بنعسة....!!

يتبع...

‎