صبحات شميسة و وجه نسيم تيظوي و منور كثار من ظو النهار....لابسة بيجامة أنيقة مستورة شوية وزوينة...شافت راسها فالمراية و تفكرات هدرة خلود هادي شحال...
_ بيجامة زوينة و كتحمق و انيقة اه و لكن هاذوك خلييهم لبراني عاد لبسيهم دوري بيهم قدامهم ...قدام راجلك زيري و عري ....
مشات تتقلب على بيجامة اخرى عندها مستفين فبلاصو وجدة و نقين و حدا لعضهم اشكال انواع و الوان ....ختارت وحدة فالابيض و النواغ شورط و الفوقي ديالو لبساتها و زيرات ليها على الفخاض و الصدر و درعانها عريانين طلقات شعرها و خرجات كدور فالدار مبتسمة...يحيى خرج لخدمتو فالصباح...ناضت دارت ليه الفطور و رجعات تنعس ...حتى فاقت دابا و جمعات الدار و الروينة و مشات فيقات الولاد فطراتهم و دوشات ليهم و لبساتهم حويجات الدار طالقة ليهم فين يلعبو و مفرشة ليهم العابهم حاضية معاهم....حتى تهز تليفونها على اتصال يحيى ...هزاتو مبتسمة و ردت عليه...
_ الو يحيى....
يحيى : الو فقتي ...
نسيم : سي قبيلة....الا كنتي غتعطل نهز الولاد و نمشي نجلس مع ماما شوية...
يحيى : داكوغ وي غنتعطل شوية نقدر نكون مع العشاء و نقدر نو....سينو بقاي مع ماماك ....
نسيم ( بدفىء ) الله يعاونك بسلامة...
حطات التليفون تتلعب مع ولادها ضاحكة و المورال طالع للسماء....حتى مع العصر اتصل بيها يحيى علمها تفتح لصفوان ...سترات راسها و فتحات ليه مبتسمة...سول على الاحوال و شاف ولاد خوه فرحان محمل بالتقدية و الالعاب و الحوايج ....و عطى لنسيم كرطونة فالاصفر فيها علامة لوي فيتون و بواطة اخرى صغيرة فالنواغ ...
مابغاش يجلس حتى دقيقة حيت معروض لعرس غي خرج ...جلسات نسيم مبتسمة تتفتح الكرطونة لقات فيها صاك من لوي فيتون أنيق و متسوط الحجم و فيها منديل ديال الحرير عليه علامة الماركة...و معاهم اوراق و بطاقات خاصة بالحقيبة....فتحات البواطة لقات فيها مكانة د اليد نقرية صافية فيها الحجيرات تيلمعو زوينة و تتجي انيقة فاليد .....لبساتها فرحانة بيها و خلاتها فيديها خدودها طالعين بابتسامة منورة و عينيها ضاحكين....
صورات الساعة فيديها و صرداتها ليه فالواتساب حايرة شنو تكتب ليه ....بغات تكتب ليه شكرا و حيداتها ...حتى زعمات كثار و كتبات ليه...
_ كيف جاتني.....
بقات جوج دقايق حايرة تصيفط ولا لاء و اذا خلى ليها في شنو غدير....! و الا قمعها.....ضغطات على راسها و صيفطاتها ليه و حطات التليفون ...
لبسات عليها و دارت بحالتها مزيان عندها الخاطر و تتشوف راسها زوينة وطايح عليها السر ...لبسات ولادها و مشات خرجات الطموبيل من الگراج لقاتها عامرة بالبلاستيكات و الشكلاط ...
شافتها أزهار عازة غرام رمات المونيكو من يديها ووجات لعندها تتجري تتغوت ووتبكي ووتقيم الحيحة حتى طلقات ليها نسيم عاد رضات لالة أزهار....
جات حلا وصلها عبد الصمد حتى دخلات عاد مشى...جاية تتعوج ففمها كارهة تشوف كمارة رضا و اول مرة تحط رجليها هنا...داحلة هازة نيفها للسماء و الزين كانت زينة و مع الحبالة دازت زيانت كثار بالاهتمام براسها و عشقها لوجهها ...تلاقات مع وئام تسالمات معاها عادي و جلسات ماعاودات تدخلات فيها ولا سولاتها ولا قالت ليها شنو عندك شداات فمها عندها ساكتة لي سولها تتجاوبو حلفات لابقات تدخلات فحياة شي حد ....حتى مشاو بحالهم العائلة و بقاو غي الاخوات و حميدة و حنان ...و حلا قلبها حكها كثار ملي عرفات رضا شرا الدار و بدل الطموبيل ثاني ...بقات غطرطق و عينيها وساعو و حمارو تخنقات....و كملات كثار ملي شافتو داخل تبدل و زاد عمار و صحاح و ساعة فيديه تتقوليها ها انا من بعيد تيلعب فالسوارت.....غا شافها عقد حجبانو و قلب وجهو طالع لبيتو حتى نطقات هي بغيرة نفس الجملة لي ولات على فمها تتمعن عليه و تقلب فعينيها....
_ أوونكي لا مونا سي فيسطا دي سيدا ..مونا سي كييدا.....
هزات نسيم عينيها فيها بالزربة هي و خلود و رضا كان طالع غي سمعها شنو قالت طار لعندها مجعوور...
_ عاودي شنو قلتي !
ناضت حميدة مخلوعة تتجرو و حلا مخرجة فيه عينيها...
_ قلت اسيدي تيقولو لامونا وخا تلبس الحرير غتبقي قردة سمعتو و عجبني و عاودتو ...مالك مخرج فيا عينيك تندوي على مونا ؟ نتا مونا..تتشوف راسك تتشبه ليها ..
رضا ( استفزاتو ) هبطي عينيك ...جمع عينيك و حكم لسانك احلاااااا....ماشي مدوخ و ماعارفش شنو تحت راسك و تبوهيل ديالك محفوظ عندي....
حلا ( ببرود ) كول البنان فرح راسك شوية....
شهقو البقية و حميدة طارت داخلة وسطهم تتفك و رضا بغى يطرطق حالف حتى يضربها مابقى تيفكر فوالو ...
_ حيدي الوليدة نربي الكلبة....نضرب الكلبة حتى تشوف نجوم النهار.....
غفل حميدة جرها من شعرها جمع معاها بتصرفيقة حتى دار وجهها و غوتات مصدومة ...و حميدة تتغوت و تبعد فيه و نسيم و خلود و حنان كيدرقو حلا و يسكتو فيها وهي تتسب و تدفل عليه تتخرج ليه عقلو ...حتى دخل عبد الله مع عبد الصمد و سمعو الغوات ونعيمة استقبلاتو مرعوبة...
_ سي عبد الله عتق عتق سي رضا كيضرب حلا....
دخل عبد الصمد بالزربة تابعو عبد الله تيجري... شافو رضا تيجر شعر حلا وهي تتغوت و تحامي بيدها و تتزيد فاابكاء و الغوات كثار من القياس .. عبد الله جر حلا لعندو مخلوع و عبد الصمد طار على رضا جرووو بغضب من القميجة تيدوي بين سنانو و صوتو مجهد ....
رضا تخلخل و الاعصاب عماو ليه عينيه جمع مع عبد الصمد ببونية تيغوت و كلشي فاتح فمو مصدوم من الكارثة و عبد الله حس براسو غيسخف ...
_ ختي كنربي والديها مامربياااش....ختي هاديك بعد يديييك....
الضربة لي عطاه هاديك لي كانت ناقصة وجات مع عبد الصمد نييت ظهر فبه الجانب الهمجي البربري ناسي الاصول فدار النسيب اخر همو جمع مع رضا بضربة من راسو حتى رجع رضا اللور تيغوت خلى نيفو كيزرور بالدمايات شداتو الدوخة....عبد الله بقلب ضعيف تيجر و يفارق و حميدة و حنان جراو عند رضا تيبكيو ..قامت القيامة للمرة الالف فداك الفيلا و غوات عبد الصمد مسموع وهو و رضا باغي ياكل الدنيا و عبد الله وجهو ولات صفراء عار و مصيبة جاتو هبطات ليه الراس...ولدو ضرب بنتو لي حاملة و مزوجة و راجلها شهد على كلشي قمة العنف و الجهل مشات التربية و مشو الاصول لي تيحاول يكبر ولادو عليهم....تهز عبد الصمد تينهج معصب و جر حلا من يديها تتبكي باغين يخرجو و عبد الله واقف ليه فالباب راسو تقسم على جوج تيشوف نسيبو و ولدو مدابزين فوسط دارو غراق بلاصتو و تعصب ...عبد الصمد جاتو من الجنةو الناس داك الضربة بحال عطاه الظو و عبر بالطريقة لي تيعرف ليها و ينعل بو اصول و فصول ...! مابغاش يسمع لعبد الله خرج من الفيلا و معاه حلا و مشى عبد الله تيغوت على رضا وجهو حمراء و عينيه مخرجين غيطرطق بالاعصاب و الشوهة ...جر رضا لعندو تيغوت و الفيلا تزلزلات بغواتو ...
_ قلت ليك قبل ختك ماعندكش الحق تضربها ماتضربش ختك مزوجة فين عقلك فين عقلك خرجتو عليا ماعرفت نربي الله ينعلها تربية الله يقطع ولاد بحالكم علااش هادشي قولي علاش ( عينيه كيغلييو كيدوي بلا عقل ) تضرب ختك قدام راجلها و حاملة...شحاال هدرت معاكم احتارمو راسكم و حتارموني و حتارمو يماكم الكلاب الهجيج تفووو ينعلها تربية ينعلها تربية ماربيت والو....علاش على قبل التجارة و الاملاك ! و اسيادي ماعندي ولد انا و ماعندي بنت سميتها حلا....من دابا فوق عندي جوج بنات خلود و نسيم نتوما مكنعرفكمش رزقي كامل غنكتبو عليهم ماتورثو مني حتى بسيطا وحدة.....اتفووو...
طلع بحالو تينهج حس بالموت و وجهو رجعات حمرا تخنق و تعصب ...مخلي العيون مفتوحة التحت و رضا بغى يحفر تحت الارض و يطمر راسو فيها.....
الاخبار داعت و العموم و اخوات عبد الله و كبار العائلة تدخلو يفكو الخلاف ..رضا صعر و مارضاش و بقى فيه الحال هدرة جوج تيجبد الورث مالورث و حلا وصلات ليها الخبار معوجة فهمات بلي باها سخط عليهم هي و رضا ...سخفات بالبكاء و الغوااات و عبد الصمد حلف فيها تعتب لتما ... تتدوي مع خلود فالتليفون تترعد و تشهق باغية تسطى بالبكاء...
خلود ( بالغوات ) وبابا معصب غضبان بلا ماتهدر معاه دابا حتى يبرد و نتينا كتعرفو بابا غي كيهدر و يخبز فالهدرة ملي كيكون معصب حتى كيبرد كيندم راه بابا قلبو حنين نتينا شحاال كان كيحلف فيك و كان غيزوجك بزز و حلف عليها و فالاخير صام ثلاث ايام و ماسخاشي بيك ...واش مكتعرفوش ولا شنو...
حلا ( تتمسح عينيها من الدموع ) وقولي شنو قال كيفاش قال واش قال ساخط عليا ولا شنو....ماشي شغلي وخا حلف فيا عبد الصمد غنمشي الراجل يمشي و يجي الف واحد غيرو و بابا عمرو يتعوض....
خلود ( بغضب ) و تكمش فدارك و بركة من البكاء فاهمة كلشي مقلوب ماسخط عليك ما والو غي معصب و قال ماغتورثو من وراه حتى سنتيم و غيكتب كلشي ليا انا و نسيم ...شوف شوف سمعني احلا...بابا ماباغي يهدر مع حتى واحد دابا و غي سمعني خليه حتى يبرد و هدر مع عبد الصمد فهمو شنو كاين و ديك الساعة اجي هدر مع باك غيكون برد طلب منو السماحة راه بابا عندو نتينا عزيزة مايشدش عليك بزاف....و عندك تبقى تخبز فالهدرة قدام عبد الصمد غتبقى لا باك لا راجلك خدم عقلك و باركة من البكاء غندوز عندك فالعشية تهلى فراسك....
قطعات عليها و بقات حلا جالسة يديها تحت حنكها تتبكي و تمسح فخناينها قلبها تيحكها كانت غتحماق حساب ليها سخط عليها...لو خيروها بينو و بين الاملاك غتختارو هو باباها على اي حاجة فهاد الدنيا وخا تتموت على الفلوس و التجارة و الاملاك داك اللحضة مافكرات فوالو من غير غضب عبد الله يكون غالط فحقها و لا ماغالطش ماشغلهاش تيبقى الاب ديالها و كان تيحن عليها كثار من حميدة نفسها.....
صبرات ديك العشية تتنهد و تسهى البكاء ولات على سبة و كلشي تيضرها فقلبها و تيبقى فيها الحال بالجهد و لي تيوقع ففترة الحمل عمرو يتنسى ليك من بالك و تيبقى محفور فعقلك كا مزيان ولا عيان كلشي تيبقى مرسخ ...جات عندها خلود بقات تتوانسها و تواسيها شوية و صاتها تهدر مع عبد الصمد دوزات نهار و ليلة تيتناقشو و يتغاوتو فهاد الموضوع حتى وصلها بيديه و دخلات للفيلا عند حميدة لي شادة راسها غيطرطق بالحريق...
حلا : فين بابا...
حميدة ( معصبة ) بقيتو حتى طيحتوه فالفراش باغين تقتلوه و تهناو فخطرة...
طلعات حلا فالدروج بوجه مصفر ...دقات فباب فبيت عيد الله جوج دقات حتى لحقات عليها حميدة تتنهد...
_ ماكاينش تما ...جالس فالمكتبة.....
حلا ( تعصبات ) و قولها لي من الاول علاش نطلع حتى لهنا اماما بلعاني ولا شنو....
رجعات هبطات حاضية مع الدروج و مشات للمكتبة لقاتو جالس تما فالبيرو تيشوف فشي وراق ....غي شافها عقد حجبانو. ..
_ باغية شي حاجة نسيتيها هنا ؟
دخلات حلا لعندو حابسة البكية...
_ علاش غضبان مني ابابا شنو درت ليك انا ....
ماجاوبهاش و رجع تيقرا فالوراق حتى غلبوها الدموع و طارت لعندو مدرعاه تتبكي و تبوس فراسو و فيديه تترغب...
_ سمحلي ابابا سمحلي غي هاد المرة ماتبقاشي غضبان عليا مانقدرش نعيش مرتاحة مانقدرش نصبر سمحلي انا مابغيت لا فلوس لا دار لا املاك انا بغيتك غي تسمحلي و ترجع تهدر معايا بحال قبل مابغيت والو...
عبد الله ( عينيه مدمعين ) نتوما ماترباتو حتى نتغطى بالتراب...ماعينيكم لا فبالكم لا فيماكم ماتحتارمو حد شحال نغوت و شحال نحيح و نبه عليكم و شكون سمعني فيكم....باغين تقتلوني عاد ترتاحو ماربيت والو لا نتينا ولا رضا مامربينش....
حلا ( درعاتو تتبوس فراسو تتبكي بالجهد ) الله يستر انا بغيت نموت قبل مانشوفك ميت ...مانقدرش نعيش الا مشيتي نتينا شكون غيبقالي الله يزول من عمري و يزيد فعمرك نتينا ابابا ....سمحلي الله يعطيك ماتمنى سمحلي و رجع معايا بحال قبل انا النعاس مابقيتش كنشوفو نصبر على كلشي الا تغضب عليا و تكرهني ماكيحن عليا حتى واحد من غيرك.......
طاحو دموعو صحاح وهي تتبوس فيديه و فراسو وتتبكي بحرقة تحنات تبوس ليه رجليه و ماهمها حد هرب رجليه و دمامع هابطين من عينيه و هي بغات تسطى حتى طبطب عليها و جرها لصدرو تيبكيو بجوج وهي تتبوس فيديه....
_ ماتبقاش تغضب مني انا مانصبرش الا مشيتي نتينا و ماما غيضربوني الحيوط...رضي عليا ابابا يرحم باباك رضي عليا....
عبد الله : الله يرضىى عليك الله يسامح دنيا و اخرة نوض من الارض نوض الله يرضى عليك الله يرضى عليك....
رضى عليها و عاود و عاد حلى ليها تبكي على صدرو ... عبد الله رجل عاطفي و تتغلبو العاطفة بزاف و قرارتو متسرعة كل مرة فهدرة و دغيا كيتقلب على الواحد ...رضى عليها و برد ليها الحرقة فقلبها ...عاد تهنات و ضحكو عينيها مرتاحة.....من داك النهار عبد الله سامح ولادو بعد ماطلب رضى منو السماحة و حنى راسو ...من ديك اللحضة حلف لا بقى تدخل شي حد من ولادو فالتجارة ديالو ...كلف مسيرين جداد بعيد على العائلة و ثقة و مهدي حتى هو طلع درجة الفوق و زاد حتى صوفيا تيعرفهم سنين و ثقة ...و رضا قاليه باغي تخدم غنحطك بحال الغريب و غندير معاك كونطرا بحالك بحال مهدي و صوفيا و باقي العاملين.....رضا مارضاش و تزادو فيه جوج طلع ليه الدم و قاليه مابغيت خدمة معاك.....و مشى خرح داك الديبلوم ديال جيستيون لي عندو مغبر و حالتو حالة وخا يخدمو مايلقى خدمة و صالير و المستوى لي كان عايش بيه من تجارة باباه و ماشي من النوع لي تيرضى شي حد يأمر فيه و يحني راسو ....تعصب مزيان و تمرمد و طاح تيبيع فالطموبيل ديالو و تكلف ليه بيها يحيى حتى جاب ثمن مخير و مشى تسلف من عمو باغي يدير باتيسري .....
فكر حتى فقهوة أو فمطعم و كانو عندو بزاف د الاختيارات و راسو باقي داير و حاير و تيسول المهم الفلوس ضبرهم خصو غي يزعم....!
كانو جالسين تيتغداو فالريسطو ..خلود و نسيم و حلا أما حميدة و عبد الله دارو الراس فالراس و مشاو لطنجة يترومانساو مع راسهم ....
خلود كرشها باينة و حلا والو واش تقول عليها حاملة ...من الشوفة تعرفهم خواتات و بثلاثة بيهم زوينات و مسرارات و ذواقات بحال لالة حميدة....
حلا حاطة يديها على كرشها تتختار شنو تاكل و الثمن ماتضرب عليه حتى طليلة وحدة غا تتشهى عليهم تما .....
_ لاحظت فراسي رجعت كناكل بزاف و الشهية تفتحات ...
نسيم ( تتبسم مع التليفون تتدوي مع يحيى و مرة مرة تتجاوب ) عادي..دابا تجربي ملي ترضعي ان شاء الله كان تيجيني الجوع مع النص د الليل كنفيق كناكل....
خلود ( تتشوف فيها بنص عين مبسمة ) زوين هاد الصاك عندك جديد نوو...
نسيم ( بعفوية ) سي جابو ليا يحيى كادو تنا عجبني....
حلا ( تتشوف فنسيم ) و شوف فينا هدر معانا و نتينا كتفرنس مع التليفون مع من تتدوي !
خلود ( ضحكات ) وسعداتك الالة الله يدومها ياربي باين مع من تتفرنس.....فخباركم رضا تيقول غادي يفتح شي قهوة ولا شي باتيسري و لا ماعرفت شنو ..سمعت شي تخربيقة هكا....
حلا جات تدوي و فاخر لحضة جمعات لسانها عندها ضاربة الطم مابقات تجبدو ولا تسوق ليه...نطقات غي نسيم لي وصل ليها الميساح معطل تتجاوب و عينيها على التليفون تتكتب ...
خلود : الله يعاونك احبيبة ديالي ...انا مافبالي والو دابا باغية غي نولد بخير و على خير و ولادي مزال صغار حتى يكبرو شوية و من هنا لتما خير ان شاء الله.....
نسيم : الله يفكك على خير و نفرحو معاك نتي و حلا ان شاء الله...انا تهنيت الولاد بداو يكبرو و يحيى مابقى سنى حتى كونطرا لبرا صايي دخل المغرب معاوني فيهم...نقابل حياتي و قرايتي شوية.....
حلا مربعة يديها تتنهد ساهية...لابسة تيشرت نواغ فيها كتبة فالبيض و بنطلون دجينز و رامية جاكيط على كتافها مالابساهاش ...تتشوف كل واحد فين تيبني و يخطط و المشاريع و البروجيات تيفتحو ليها الشهية ....الوقيتة كاملة وهي ساكتة حتى تحطات الماكلة و كلاو كل وحدة خلصات على راسها
مولفين كل مرة و شكون تيكون عارض لاخر و لي تيعرض تيخلص و مرة تيتافقو بثلاثة و كل وحدة تتخلص على راسها... دارو شوبينغ تصورو تصيورات دوزو وقيت مع بعضهم و حلا حاضية غي المغرب مزير عليها عبد الصمد و داير ليها قوانين جديدة الليل ماينزلش عليها برا...و الا ماغادي تخرج الا مع ماماه دوزات معاه يوماين غوات على هاد الخرجة مع خوتها باش خلاها....وصلاتها نسيم حتى لدارها و رجعات كل وحدة لحالها......و حلا غادية جاية فالدار ماعاجبهاش هادشي ماحاملاش الوجه لي عاطيها عبد الصمد و القلبة لي تقلب عليها...مايمكنش هاد التغير كامل ماعجبهاش الوقت كيدوز و ماباغياش تكمل اربع شهور وهي مادايرة والو باغية تحمع وراقيها دغيا ....تحلفات فيه مزيان و دخلات للبيت بعزم ...حيدات من عليها و لبسات شوميز دونوي فالݣرونة حيدات باباهم دوك الملابس الداخلية بقات بلاش ....تعطرات مزيان و تزينات و طلعات جالسة وسط الناموسية دايرة رجل فوق رجل تتلعب بالوردة فيديها كتستناه يدخل ..داخلة فتحدي مع راسها الا ماكلاتش ليه الدماغ ماتكونش حلا بنت حميدة...مابقاتش عاجباها هاد العيشة هكا و البرود من جيهتو واش مابقاتش تتأثر عليه ! مابقاتش تتبان ليه ..مولف يتنفخ عليها و دافع كبييير و معفر ....
دخل طالعة ليه القردة و حجبانو معلين ...رمى السوارت و دخل نيشان للبيت تيخرج تليفونو من الجيب....حتى لقاها جالسة ليه وسط الناموسية معرية السيقان تتشوف فيه بمكر و تلعب بالوردة فيديها...
_ ماحشوماش تخليني نستناك هاد الوقت كلو ...طلعات معايا البرودة و انا ملابسة و الو....
طلعها و هبطها ومشى للدوش تيتمختر فالمشية بدون تصنع خلاها تتعوج فمها ..
_ ولد الحمقة....
رجعات رسمات داك النظرة الماكرة فيه وهو خارج من الدوش ...هز تليفونو و تحى حداها بلا هدرة بلا جوج طاوي يديه تحت رقبتو و اليد الاخرى تيلعب فتليفونو ...شواها بالمهل و فرفرات بدوك الرموش بحال مونيكة....و رجعات رسمات ابتسامة و تقلبات لعندو تتهمس عند ودنيه بهمس انثوي حاطة جبينها على لحيتو يديها تيلعبو فشعرو و يدورو مع صدرو ....
_ شنو عندك اعبد الصمد بالك مشغول و غايب و مهموم حاسة بيك واش مشاكل فخدمتك ..عاودلي بالي تيبقى مشوش معاك...
ماردتش عليها زاد هز داك الحاجب تيشوف فتليفونو ..غرسات سنانها فشفايفها وتقدمات اكثر بدون استسلام....علات فخاضها على رجليه قالبة ليه وجهو لعندها بزز تتمسكن ...
_ شوف فيا كاره تشوف فوجهي حتى...لهاد الدرجة عرفتي ماباغياش ندوي على لي فات حيت ماباغياش نبكي ....وخا ظلمتيني و غنبقى نعاودها و نعاودها و ماعمرني ننسى شنو درتي فيا و لكن غنبرر ليك انا مستحيل نفكر فراجل اخور من غيرك كتفهم مانقدرش نديرها حيت اولا انا مربية و حيت مزوجة بيك عاد نشوف انا مع فداك المونيكو ماحاملاش نذكر سميتو ...( شدات وجهو بزز تتهمس عند شفايفو بمكر ) شوف فعيني اعبد الصمد شوف فعيني ...هذاك مايسوى حتى بصلة معفنة فسوق الرجال.....
شاف فيها جامع حجبانو ....
_ شنو باغية احلا.....
حلا ( باستو فجنب شفايفو بجراة و يديها على كرشو و ردت بهمس ) باغياك نتا ....ملي كنتي مسافر و سمعت درتي كسيدة عقلي بغى يخرج و ماكنتش كننعس و انا ماعارفاش شنو وقع ليك ماكانش حسابلي مربوطة بيك هكا....جاني الوحم عليك و مالقيتكش و ماقادرة ندير والو ..حيت قلبي كان مقهور منك و مقهورة على راسي علاش ماقدرتش نكرهك....
حرك شفايفو على شفايفها عضها فيهم و حجبانو معقودين...بعدات شفايفها حاضنة وجهو تتشوف فعينيه باغية تبكي و الدموع حلفو لابغاو يهبطو ملي حتاجتهم هربو ...
_ ضربوني الحيوط فغيابك مابقى تيهمني حتى واحد من غيرك نتينا و بنتنا ...داك المرة ملي قلتي داك الهدرة قلبي تفرتت اعبد الصمد...نقتلك و مانخلي مراة اخرى تشاركني فيك...( تلمسات شفايفو بصبعانها و مرة مرة تتفك العقدة بين حجبانو مكملة بهمس ) نتا ديالي ولدات يماك باش تكون لحلا ..ماكاينة حتى شي زبلاوية تجي بلاصتي.....
حط يديه على فخاضها العريانين مزير عليهم غمزها تيسول ببرود
_ دابا من لاخر علاياش كتقلبي ؟
الخبير لي كانت تتخبر عليه حساتو تبخر من داك البرود ...عصبها و جننها و قلباتها بالزربة تتبسم و عينيها فعينيه هبطات عند ودنيه و يديها هبطو التحت و حطاتها ليه بلا زواق و بصريح العبارة و بجراة عينيه تهزو و بانت فيه ...تما تأكدت هاد ولد الحمقة كيف ماسماتو ماتيجيش معاه المشاعر و العواطف...زير على يديها التحت مثبتهم بلاصتهم ....جا يهدر سكتاتو ...
_ ششش خليني نهدر انا ...
سالتة يديها و هزات ليه يديه دوزاتهم من عنقها حتى حطاتها على كرشها ....
_ خوي بالك من كلشي اعبد الصمد رديت ليك البال مريض و مهموم...رد البال لراسك على قبلي انا و بنتك مابقيناش ديال راسنا واش مافرحانش بيها...( تبسمات ) انا غنموت بالفرحة وكنستنى فوقاش نولدها ...
عبد الصمد ( هبط عينيه لكرشها بدفىء )بنتي مايبغيها حتى مخلوق كثر مني ..دم عبد الصمد البحري
ترخفو حجبانو و ملامحو ترخات تيشوفها تتضحك ناشرة عليه زينها...تأمل فملامحها مزيان تيعجبو زينها وواكلة ليه العقل نيت ....جر ليها وجهها تيبوس فشفايفها بالجهد و يديه تحيدو ليها حوايجها ...دفعاتو حتى رجع تكى على ظهرو و رمات البينوار من عليها و طاح فالارض طلعات فوق منو مبتسمة من شوفاتو المفروشة تترقص باصابعها و مفاتينها على جسدو محنية عند ودنيه هامسة...
_فخبارك توحشتو و توحشو و توحشوك ...
زادت طلعات ليه السخانة للراس و هدرتها طلعات ليه المجاج و توكض و رخف دوك الحجان تيقيس و يشوف فمفاتينها و يعض شفايفها ملصقها فيه و تتزيد هي تحاك معاه و جلسات فحجرو مدورة يديه ورى عنقو جاراه لعندها فجراة كبيرة فوق المتوقع لا فكلامها و لا فحركاتها تتقولها ليه هكا بلا زواق ولا تلميحات هدرة مقزدة منو و عشرين منها و حركاتها كانو حاجة اخرى صدماتو وخا مابينش و تزادو فيه عشرة ...فين ماتيبغي يغطس تتجرو و تتضحك بصوت عالي ...
_ قولي شحال كان عندك ملي فطماتك ماماك...فوقاش قطعتي البزولة عام عاماين ثلاثة سنين....
لصقها فيه و كمشها عندو بحال الورقة مهيف عليها قال...
_ ماقسناش د***ها كي دايرة.....
سلتات ليه تتضحك و تدلل و تفشش عليه ...وخا صدرها كيضرها خرجاتو و خشاتو ليه ففمو يرضع.....سالات معاه و جهل عليها مزيان حتى ندمات و رجعات صدرها عندها تيحرقها ..ماخلاش ليها فرصة تسلت منو رجع ليها من جديد طايحة معاه في فراش الزوجية بجراة عمرها شافها منها حاولات تحيد داك الغوات و تشد فمها ووالو تتغوت بالجهد و تزير على شعرو و تقمش فيه و تعض رداتو حالتو و ردها حالتها يبقى يبقى و يرجع يغوت بسميتها و شي كلام تيخرح من اللسان بلا وعي و الحمل دايرين ليه حساب بجوج ممنوع يتماداو لديك الدرجة...كانت باغية تاكل ليه دماغو صدقات هي لي عقلها تتشتت ...نعسات على صدرو تتمرغ فيه وجهها بحرية عرقانة تتنهج وهو حاط يديه على فخاضها شحفان هزات راسها ثا تتبوس فيه و يرجع يبوس فيها حتى هو مفتون...
تيتسارا بنيفو على وجهها فين ماقاس تيلقى الرطوبة و النعومة....حتى تيلقى راسو تيبوس فيها من جديد و تتعطيه حتى هي جالسة فحضنو بحال القطة فعرين الاسد هدرة جوج تتجبد ليه كندا و باغية نولد فكندا تيهز فراسو و يسايرها و تيقول وخا وخا كأنه بدا تيفكر فالموضوع بجدية و تيرجع يقوليها نتي باغية الجناح باش طيري تتحلف ليه بلي على قبل بنتهم اول بنت عندهم باغية تجي لهاد الدنيا و كلشي عندها موفر حتى الجنسية لتيحلم بيها اي واحد ...هز فراسو مخدر فيها و هي براسها عاجبها هكا و كانت طالبة عليها تتحس بانوثثها تحت يديه تتزيد تفشش و تبسم و تبوس فيه حتى هي عاجبها الحال ...رجع ليها مرة اخرى ناسي همو و مشاكلو معاها و رجعات ثاني للغوات ...طلقها سخفانة تيبوس فشفايفها و رقبتها وهي تتنهج تحتو تتحس براسها ولات دغيا تتعيى و دغيا تتسخف و تتعرق بلا قياس ...ضماتو لعندها سخفانة ..
_ عييت بزاف....( تصنعت الخجل و كملات ) كنستنى نولد طبيعي باش نقدر نقد عليه بلا حريق ...كنبغي نمووت باقي مامولفتوش اجي شحال كتوزن نتينا .....
تيحك لحيتو مع بشرتها ببطىء و
هدرتها طلعات ليه المجاج ....
_ الدجاجة ملي كتبغي تموت شنو كدير المشيشة ...؟
ضحكات سخفانة تتكمش عنقها.....
_ تتنقب هاديك هاديك ديال الكلب ....
متكى على كتافو محاصرها بيد وحدة راشقة ليه و منغم...
_ هاديك ؟! ...
حلا ( حطات راسها على صدرو تتبسم و ترجع تهز راسها تتبوسو فلحيتو و ترجع تكى عليه ) تتشوفني تنحشم...؟ انا ماباغياش نخسر الهدرة صافي خصني ندير عقلي غتولي عندي بنت فرحانة بيها بزاف ...و نتا ؟
خشى راسو فعنقها عينيه معسلين بالنعاس...
_ ياتشوفي لينا شي حل من دوك اليديدات لهاد الراس و يا سكتينا نريحو الدماغ.....
هزات ليها راسو تتبسم ..
_ غندلك ليك راسك غترتاح ...
تكى على ظهرو ...مشات حداه عريانة لبسات بينوار منو للحم و بدات تتقلب فالبلاكار ديالها على اداة تدليك الراس لقاتها و رجعات لعندو تتدلك بيه فورة راسو حتى ترخى و عجبو الحال مغمض عينيه ...تيبغي ينعس تتفيقو ..
حلا ( تتفتح ليه عينيه بزز ) شمن بلية ؟ و فتح عينيك احبيب ديالي عفاااك بقى سهران معايا مافياش النعاس ....( حنات عندو تتدوي بمكر ) فتح عينيك نقولك واحد الحاجة...غتفيق و يطير عليك النعاس....
فتح فيها عينيه و كمشها ليها راسها عند صدرو تتغوت و تجبد معاه...
_ و طلق نقولك ...
لصقها معاه مابغا يطلق منها و خشى ليها وجهها فصدرو تيسكتها بزز باغي ينعس وهي حلفات لاسكتات حتى تقلب على كرشو خاشي راسو بين المخاد و مخليها تتشوف فيه تتقلب فعينيها....
خلاتو و ناضت دوشات وبقات كدور فالكوزينة فيها الجوع ...عمرات الطبلة مزيان و الشم ولى عندها قوي بزاف غي تتشمشم فالحاجة....جلسات دايرة رجل على رجل و سيقانها عريانين كتاكل بشهية مفتوحة و تشوف فالتليفون تتطلع و تهبط فانستاغرام راشقة ليها.....كلات حتى شبعات مزيان غسلات فمها و مشات تكات على ظهرها ناعسة نعسات شوية و فاقت فنص د اليل كترد و قلبها طالع....تغيلفات و خرجات مقندشة ناعسة حداه فتح عينيه فيها بغى يحط يديه على كرشها بعدات منو معوحة فمها مابقات ليها كانة مغيلفة غي مع راسها....كل مرة فحال مرة المورال الطالع و الضحكة فالتة ليها بدون سبب و مرة معصبة و باغية غي تبكي.....!
فاقت على الصباح لقات الدار خاوية غي هي مقلوبة بالنعاس ...جابت المراة دير ليها الميناج و بقات هي جالسة فالبيت هازة تليفونها تتصوني على عبد الصمد جاوبها ببحة عجباتها...
_ وي المشة....
حلا ( طايح عليها الضيم ) تخنقت فالدار اعبد الصمد خصني نخرج معاك بلا ماتقولي ماماك ولا خواتي توحشت نخرج معاك ( بدات كتبكي ) ماعرفتش هاد البنت كيفاش غتخرج و انا قتلت راسي بالبكاء .....
حلا : باغية ندوز عند خالتي عيشة تمشي معايا للصالون تونسني توحشتها شحال ماخرجت انا و ياها....
انهت الاتصال حاطة يديها على كرشها تتنهد بعد ماقاليها غيخرج ليها الطموبيل ....حنات راسها لكرشها تتهدر معاها...
_ فوقاش غتكبر باقي مابغات هاد الكرش تبان و تنفخ .....
تنهدات و ناضت نافضة عليها الهم صونات على صاحبة الصالون لي مولفة تمشي ليه و كليانة ديالها....
_ لا صافي غادي نجي توحشت الهدرة معاك غادي تكوني تما ...ماكرهتش نصبغ شعري و خفت يضر البيبي طايح عليها الضيم ....
بقاو تيتعاودو حتى قطعات و ناضت جبدات احسن ماعندها فالحوايج و اغلاهم تتختار و تعزل...ناسقات الالوان مع بعض مع حقيبة يد بالسنسلة و خرجات من البيت المنظفة كانت تتاكل بالتخبية فالكوزينة غي سمعاتها خرجات قفزات من بلاصتها و طاح ليها الفروماج الهولندي من يديها حشمانة...
_ خصك شي حاجة اختي حلا.....
حلا ( دارت راسها ماشافت والو ) نتي هنا ماشفتكش....انا خارجة الا جا شي حد من غير راجلي ماتفتحيش ليه....
عطاتها التعليمات و خرجات من الدار عطاها سعيد الطموبيل من نوع رونو ميغان صغيرة و باقية جديدة ...تحسرات على طموبيلتها الفخمة السابقة حتى عيات و رضات بهادي وخا حتى هي شبابية و زوينة ...دازت عند عيشة و مشات هي و ياها للصالون دوزو وقيت زوين تما و كلاو برا و ملي كانو خارجين وقفها الحاج محمد تيشوف فعيشة و يفرنس و يسول فحلا....
_ نهار كبير هذا ...
حلا ( شافتو هو تفكرات الحاج مفضل التزمت حدودها ) الحاج كي داير مزيان و صحيحة شوية.....
الحاج : نحمدوه و نشكروه....
عيشة بقات تتشوف فيه من تحت نضاراتها الشمسية لابسة صاية طويلة انيقة و قميص مخطط بالابيض و الاسود زوين طايح فوق الصاية و خمار فالاسود و حقيبة جلدية فالابيض تتبان صغيرة بزاف على عمرها ...شدات فيد حلا و نطقات بين سنانها...
_ زيد اهالة نمشيو هادي ماشي وقفة هنا....مامسالينشي....
حلا ( بابتسامة ) يلاه الحاج نخليك على خير تهلى فراسك...
توادعات معاه مخلية عيون الحاج على عيشة وهي عايقة بيه و منفخة تتفتح باب الطموبيل و تبركم...
_ الوقفة مع الرجال البرانين ماهو من الصواب و لا من الاصول ..وخا يكون قد جدك كتسمع ولا كطنش عاود الفهايمية.....
حلا شعرها عاد مصايب ووجهها نقية دارت سينيال حاضية مع الطريق لاتقيس شي طموبيل حتى خرجات للطريق عاد جوباتها ...
_ لواه لواه اخالتي عيشة نطنشوك كااع عيب و عار عليا....شنو بقيتي درتي ! ولفتي السبور و الجري مع البحر ؟
عيشة ( حاضنة على صاكها فحجرها و ساعة دهبية قد السخط فيديها ) قلة الشغول هي هاديك نجري بحال البوهالية و الهداوي قدام البحر مانعاود نعملا....
حلا ( ضحكات ) عادي خصك تولفي باش تشغلي راسك و تحيدي الطاقة السلبية و ماتبقايش بلا شغول و غي معصبة ...قولي لصفاء تفيق معاك حتى هي جريو بجوج....
عيشة شافت الحانوت ولصقاتها توقف حتى خدات السقاطة و الزريعة و اللوز و الزبيب و اابيسطاج تتدوز بيهم الطريق و حلا دور دور و تقوليها ماتوسخيش الطموبيل عاد جديدة و عيشة كديرها بلعاني و ترمي تحت الكوسان و مع رجليها و كل مرة تتوقفها و قالت باغية تاكل زعزع و مرة باغية خبزة تطوانية حتى تعصبات حلا و رجعات حمراء بالفقصة و تيصدقو مناكرين و مغاوتين وسط الطموبيل ماسكتات عيشة حتى شافت حلا تتبكي و تشهق و تمسح دموعها بالمنديل عاد سكتات عيشة و حمعات فمها تتنفخ بحال الديناصور......دازت عندها للدار و جا عبد الصمد حتى هو لدار عيشة محمعين مع بعض و رد البال لعلاقة عيشة و حلا كي ولات كل مرة خارجة معاها وفالواتساب تتقيل عيشة تصرد ليها فالحمام و الورد و صباح الخير صباح النور و تحمقها بالرسائل و الميساجات ......
تكات براسها على كتف عبد الصمد تتفوه دور يديه على كتافها تيسولها ...
_ فيك النعاس ...
عيشة شافتهم هكاك عقدات حجبانها و بدات تنفخ و تقلب فعينيها....اما حلا زادت تخشات فيه عاجبها الحال تتموت فالدلال و الفشوش و خاصة من عبد الصمد ...
_ فيا الموت د النعاس بلا قياس باغية غي نحط راسي و ننعس عيت اليوما....
عبد الصمد : و العشاء ؟
حلا ( هزات كتافها ) نو كليت فيا غي النعاس...
نعسات حلا فدار عيشة و عبد الصمد مارجع حتى للصباح تكى حداها ناعس و فاق قبل منها و خرج وهي تتفيق تاكل و ترجع تنعس حتى علمها غيجي وراها بعد العصر ...و فعلا بعد العصر مشاو لدارهم وقاليها تجمع حوايجها و خداها لسوفيتيل تاموداباي و حجز ليها جناح أوبرا فيه 190 متر مربع تيطل على البحر
اليلة ريحها كان هادي و السماء كحلة و القمرة كاملة مظوية و النجوم فسماها شاعلة....! خرجات يحيى مع نسيم لاول مرة الراس فالراس بلا ولاد نعسو و بقاو مع حميدة فالفيلا....غادية خداه مبتسمة بدون سبب غي حيت حداها و معاها خارجين بنية الاستمتاع و يقضيو وقت بجوج غرريب و ممتع ...مولفة يخرجو على قبل الولاد يتسخرو للولاد يشري ليهم حويجات و العاب ماعاقلاش فوقاش خرجات هي و ياه هكا .....غادين فالكورنيش جنب بعضهم تيتمشاو و الدنيا عامرة و مزال غتعمار يحيى بقى تيدور فعينيه و يهز فحجبانو تيحوم حتى شبك يديه مع يديها تقول غي مصاحبين و حشمانين ..جايين مع بعضياتهم و ماعندهمش فرق فالعمر كبير ولا فرق فالطول تيجيب الدهشة بالعكس بالطالون و اصلة عند عنقو تيبانو مواتين و حلوين للشوفة ماتقولش عندهم جوج ولاد و مزوجين خمس سنين ملامحهم بجوج كحلة و بعضهم تيشوفهم تيتشابهو فالملامح وخا هي بيضة وهو سميمر تيقول عقلهم تيجيها ولا من العائلة و شحال من مرة تتوقع تيكونو جوج مزوجين تيبغيو بعضياتهم تتحس بيهم تيتشابهو ...كان كان باقي بحوايج الخدمة بنطلون اسود كلاس و شوميز فالاسود حتى هي و السمطة رجالية جلدية و صباط تيبري و الساعة وهي دارت بحالتها مزيان لابسة غوب كلاص فالنواغ ستايل انيق و راقي و سندال عالي و شعرها مقطع ديكرادي ايفيلي مطلوق بحرية على كتافها كانت جايبة العين باناقتها و ستايلها كثار منو هو..حيت داك النوع د اللباس و الاناقة قلال فين تشوفهم تتلقى وحدة خانزة فلوس ماتتعرف لاتلبس لا تلبق و حوايجها غالين تيشويو و الاناقة منعدمة.....!
حركات الريح شعرها لوجهها و رجعاتها بيديها المزينين بخاتم الزواج و ساعة لي شراى ليها تتبسم فرحانة....
_ تحرك الريح ....فين غادين ؟
شاف فيها عينيه شبه مبتسمين و رجع شاف قدامو يد مشبكة مع يديها و يد خاشيها فالجيب...
_ نتي بنت المدينة نسولوك نتي ؟
حنات عينيها مبتسمة...
_ انا بنت المدينة و نتا حافظها كثار مني ...شنو درتي باقي فالكونطرا ؟
يحيى : لاا لا مابلانش ...مامساليش هاد الشهر نخرج من المغرب نبقى مرون فمخي ست شهور دخل خرج ....
نسيم ( تبسمات براحة ) هكا حسن ..بصح عندك تستنى كوفر فور ناقصني غي هو درنا الكونتوارو الكاميرات و المطبعة و السكانير ماعرفتش فوقاش هادشي غادي يسالي عييت...
يحيى ( بتفكير ) هذاك حالو ساهل ...
نسيم : و مزال مليون و نص تقريبا على حسب " مرحبا بيكم " يتكلفو بالصباغة و الاشهارات شركة ويسرنيويور ومونيغرام ....
ظلو تيهدرو و يجبدو موضوع بموضوع وهي غي تابعاه تتشوف فيديهم المتشابكين مع بعض تتبسم بلا هواها وهو عادي ماباين فيه والو ...تيبانو كوبل بعقلو و مرزن ماكاين لا داك الضحك العالي ولا الهدرة المسموعة بالجهد ...هدرتهم تتبقى بيناتهم بجوج شاف يحيى فالساعة شحال و رجعو للطموبيل كانت حاسبة غيمشيو للدار صدق غادي بيها لطريق سبتة مريزيرفي طبلة للعشاء...
جلسات تتشوف فالاجواء و الاستقبال و السرفيس عجبها و البلاصة كالم و راقية ..شافت فالبلا لي تحط ليها باين لحم ديالاش ماعرفاتش هو لي طلب و حسب ماعرفات اليوم كاين شاف معروف مخصص باللحوم لي باغي ياكل اللحم من تحت يديه تيحجز طبلة مسبقا ....
هزات الموس و الفورشيط تتشوف فالطبق تتبسم ...
_ علاش مابغيتيش تقول شنو هذا ؟ نزعم و ناكل ..؟
يحيى ( من عينيه باين مرتاح ) حلال غي كوليه و من بعد حكمي....
بظهر منتصب و حركات راقية انثوية كلات منو و عجبها كان اللحم مع كاغوط كلاصي و الصوص ....شافها تتاكل عاجبها المذاق ...هز فيها حاجبو و نطق...
_ عجبك ؟
نسيم ( على نيتها ) زوين و مزال ماعرفتو ديالاش ؟ حاولت و ماعرفتش...
يحيى : لو كاناغ ....
وقفات الموس و فتحات فيه عينيها مخسرة ملامح وجهها...
_ ماتقولهاش حتى بالضحك ايحيى....
غلباتو الضحكة جمعها حشم يطلقها قدام بنادم مسح فمو هاز فيها حاجبو عيى ينعل الشيطان و تيشوف ملامحها تيبغي يتهز بالضحك مرة مرة تترجع ليه داك البسالة ديالو تيصغار تقول شاب ديال عشرين سنة ....
_ قلتي زوين ؟ كدبنا عليك !
نسيم ( بلعات لي فمها بزز و طلع ليها قلبها ) نتا عارفني كنعيفو ماقدرتش ماقدرتش ....
ناضت بالزربة للحمام مخسرة ملامح وجهها و رجعات كارهة مذاق فمها و مغيلفة تتشوف فيه حابسة الضحكة و ضحكات بخفوت ملي قال...
نسيم : درتيها بيا ماتوقعتهاش .....هو زوين المذاق و لكن لوكاناغ لاااا .... غندوزها كاغوط كلاصي هههه .
يحيى ( مبسم ) نتي شبعتي فين غتزيديها ؟
نسيم ( ضحكات ) كون غي خليتيني حتى كملتو عاد قلتيها ....
دوزات حلا اسبوع فالدلع و الفشوش و الخناث .. من جناح أوبرا لفيلا سيان ...الشاطىء الخاص والفطور باريزيان و كل مرة طبق من شاف متخصص يا السمك و ياللحوم و شاف باتيسري ...و جسدها تتهلى فيه و تحيد الطاقة السلبية والسموم بحمام الشوكولا نسات همها لي داز و لي عاشتو فالايام لي دازت نسات كلشي و استمتعت باللحضة مزيان...و التصاور على الجهد و دلع عبد الصمد مغرقة بيه حتى للودنين ...لقات لي بغات ...حلا من النوع لي ماتقدرش تعيش بلا دلع و فشوش تقدر تصبر شهر شهراين و بزز تتولي غي معصبة و مبرزطة و ماحاملاش راسها ...قبل الزواج فين ماتبغي تسمع كلام حلو و تحس بانوثثها وتغرق فبحر الغزل و المديح تتمشي تصاحب و غي تتمل تتقطع العلاقة ...شحال من واحد كان تيموت عليها لكن هي ماعندهاش الغرض بيه...و المزهار هو لي تيجيها ففترة محتاجة غزل الرجال....! و لقات الفشوش و الخاطر لي كانت تتقلب عليه فعبد الصمد و ولات مدمنة عليه حتى فاتت الحد ...ماشي غي هدرة تيبرعها بالافعال و بالفلوس عايشة حياة فالظاهر تتبان حياة مثالية و الوحدة تمنى عيشتها و تتحلم بيها ليل و نهار....زوينة و عندها راجل لاباس عليه و باقي صغير و خا زوينة عليه لكن تيبقى عندو جادبية و حرش و من الفوق حاملة و تتستنى مولدوها الاول تيشوفو انها ماعندها حتى عائق فحياتها و حتى خلل و عايشة فوق السلك و مخيرة و عائلتها لباس عليهم و ماعندهم مشاكل ماعندهم هم و لا غم ...!
وراقيها بداو تيتجمعو مع اتصال بشركات السياحة ...الامر ماكانش ساهل و لكن هي ماحساتش بشي صعوبة كلشي من عبد الصمد لي تيسرح ليها الطريق و يتاصل بختو فكندا حيت ماغاديش يمشي معاها وحتى هي ماعاوداتش رغباتو ولا حكرات فالموضوع وخا اي زوجة بلاصتها غتبقى تفكر و تخمم لزوجها شنو غيدير ففترة غيابها خاوية ليه فراشو ..مابغاتش تفكر و لا تخمم الاهم عندها هو بنتها ...قاليها هدرة حارة و حطها ليها حلقة فودنيها...
" وخا ديري جناح د الدياموند مني وبربي لا طرتي "
علقها ليها فشحمة ودنيها و خلات داك الهدرة تتدور فمخها لايام تترجع تنسى و تطلب الامور تيسر و تمشي على خير و تحط رجليها فكندا قبل ماتبرز كرشها للاعين ...تتقرا تعليقات النساء فالقروبات شحال من وحدة حاولات و ماخرجاتش ليها الاقامة ...تتخرج من تما معصبة و تيخرجو تعليقات اخرين على الولادة و الغربة حتى لقات قروب فيه نساء عربيات مسمين القروب سياحة الولادة فكندا .... دخلات ليه و كل واحد كيعاود تجربة ديالو و كلهم تيتشكاو من المصاريف الغالية بزاف و الا ماعندكش الفلوس ماتفكريش تولدي تما ...الفلوس اخر حاحة تتفكر فيها حلا و مامسوقاش كااع ....! بقات ايام و ايام تتمر خرجو وراقيها وضحكات حتى دمعااات عينيها....
الصمدي سخووون و اعتدر على هاد الكلمة...انا ماتنلمح لا على ضرة لا على والو غي تنقربكم كثار من عبد الصمد تتشوفو نوع عبد الصمد الا ماطاحش فشي بلية و تشغل فشي مصيبة غيقلبها نساء غي هو واش يصبر شهر.. شهرين...ثلاث شهور....ست شهور ! ماعرفنا ليه ! واش يتزوج ولا يخون ولا يصبر و يصوم.....ماشي كاع الرجال تابعين بين رجليهم و ديجا كتبت على محمد اديب مهم ماعلينا ...الراجل ملي تيكون بعيد على الله و حياتو حرام في حرام و الايمان قليل راه والله مايفكر جوج مرات بقات فعقلية الراجل شنو فيه ......و الرجال ماشي هو النساء الرجال ناعسين مع وحدة و قلبهم فيهم وحدة اخرى ...!
و غي قبل مايتزوج بحلا ! حساب ليكم كان صايم داك السنين كاملة....! كاين نوع ولد الحرام عندو النساء بحال اللعب...غي لا كان مشغول ولا مامساليش ماعندو فين و كيفاش يهز الراس و لا غاطس فشي مصيبة ...اما الا كان جالس ماعندو شغل و مراتو بعيدة يجيب حتى عشرة و هانية عندو.....
عليها الوحدة لي تبعي تزوج تشوف الرجل لاخلاقو و لحياتو واش داخلة فيها الحلال و الحرام كاول شرط .....
حميدة تتندب و تعاود ...خلود مشات لاسبانيا حتى تولد عاد ترجع و حلا خرجات ليها بالولادة فكندا ...ماباغياش ليها تمشي و عيات تخلع فيها و تنبهها الولادة الاولى صعيبة و قاصحة و نتي بوحدك و شكون يكون بيك و يوقف معاك و غتموتي غي بالقهرة ...هي تتقوليها غي هدرة وحدة...حتى نحط رجلي تما عاد نهدرو فهاد شي.....! شحفاات حميدة بالهدرة و فالاخير تنهدات و قالت...
_ انا مانزيدك غي رضايا بالي غيبقى معاك كثار من خلود ....خلود معاها راجلها و ماشي الولدة لولة ديالا و نتينا شنو....غتولد بوحدك بحال ماعندك عائلة ....
حلا ( بهدوء ) عندي 30 عام ماشي 18 ...الحريق غيدوز نفسو سوا تما سوا هنا....حتى واحد فيكم مايتقاسم معايا الحريق والوجع كنصبر عليه بوحدي ...باغية غي رضاك شي حاجة اخرى مانفكرش فيها حتى يجي وقتها نبقى نحمق راسي بشي حاجة باقي ليها شهور....
حميدة ( بغضب ) و راجلك سامحة فيه و همك فكندا شمن فايدة فيها...شنوو...واش باغية تشتتي الشمل احلا....
حلا ( تتحاول ماتفتحش داك الباب و ماتفكرش ) راجلي مشغول ماعندوش الوقت يهز راسو ..وهو لي واقف نولد تما و ختو تما و سمعت من صفاء هاديك عزيزة على عبد الصمد يعني تيتيق فيها .....
حميدة تدوي من جهة و حلا تترقع ليها من جهة اخرى....والو واش بغات تقتانع ...ودعات مها و باها و نسيم و حبابها و حميدة تتبكي و حلا والو واش بكات حتى دمعة مانزلات وخا قلبها مزير ماباغياش تطيح حتى دمعة حتى وصلها عبد الصمد للمطار و تكرفساات فالطريق ...ملي جا ودعها عاد نزلو دموعها تيجربو و ظلات تتبكي و تشهق فصدرو شداتها الخلعة و تزيرات.....! و وصاها و عاود بنتي امانة عندك حجبانو كانو معقودين باين ماراشقاش ليه و تليفونو كيصوني و يعاود ....ودعاتو تتمسح دموعها و عطاتو بالظهر تابعة المسار و قلبها تيضرب كانت لابسة النواغ و تتمشى عادي بالطالون و بخفة بحال ماحاملاش كاع.... ماكملت الاجراءات حتى تعرقات و شحفات مزيان و التحقت بالمسافرين .....!
ماشي اول مرة تسافر بوحدها خارح المغرب و ولفات اجواء الطيارات و المطار و سافرات لاكثر من خمس دول مع عبد الصمد و ماشي شي وحدة منطوية و منعزلة بالعكس اجتماعية و دافعة الجبهة زعيمة....! السفر داز طويييل و عيااات نعسات و فاقت و عاودات نعسات ...و غي وصلات حسات بالسخفة و التلفة و شداتها الدوخة دوزات الاجراءات المطلوبة و خرجات من المطار البرد تيقطع مامولفاش بيه .... كانت فاطمة الزهراء اخت عبد الصمد فاستقبالها بنت فالثلاثينات محجبة و معاها راجلها محامي هجرة....ضماتها لعندها تتضحك و تعبرها بعينيها بفضول و اعجاب تتشوفها غي فالتصاور وابيل فيديو ...
ركبات اللور حاطة راسها مقلوبة بالنعاس و راسها تيضرها مشاو للدار وزوج فاطمة الزهراء خرح لخدمتو راجل باين عليع الوقار و الاحترام و فاطمة الزهراء فرحانة بيها توحشات خوها و توحشات عائلتها اي واحد جاي من النغرب تتفرح بيه ...حلا مابقات عقلاات على راسها فوقاش حطات روحها و نعسات تترتاح .....
الايام مرت على حلا و لاجديد عندها يذكر ...البرد تيقطع و الملل و القنط والجو كئيب و الوحدة والخنقة ...كل نهار تتدوي مع عبد الصمد ومرة يجاوبها ومرة ماتتلقاش الجواب....حميدة و عيشة كل نهار تيتاصلو بيها و يسولو و عيشة طالع ليها الدم معصبة على حلا و ماعاجبها حال .. جبدات ودنين بنتها و زيرات عليها تهلى فيها حتى تولد ....تيخرجو يدورو هي و فاطمة الزهراء و بنتها و تتساريها و توريها الاماكن و المطاعم و شنو تاكل و شنو لا ...و عرفاتها على صحاباتها وولاو تيخرجو مع بعض ...و حلا دارت بخوميغ فيزيت على حسب الحمل و نهار على نهار كرشها تتكبر وخا مابايناش بزاف و تيزيدو يخلعو فيها تيقولو ليها بنتك غتزاد ضعيفة بزاف ...تتحيد هاد الهدرة من مخها و تتهلى فراسها و تتشوف و تقيس غي الحاجة المخيرة و الزوينة ...الورود و الاكل الصحي و الجمال ....ومرة مرة كدير فاطمة الزهراء شي تصرف عفوي ماكيعجبش حلا و تتقلبها بكاء فبيتها و تشهق تقول قتلاتها....كتحسس من ابسط الحوايج كل ماتزاد شهر على حمالتها كل ماحلا تتزيد تهز الهم و تخمم و تبكي ...جو كندا ماجاش معاها الكآبة و الحزن و الغم بدون سبب....مزيرة و مخنوقة بقات على هاد الحال حتى دخلات لسبع شهور ..كانت فبيتها حاطة يديها على كرشها متكية تتأمل و الدمعة فطرف عينيها....ماعارفاتش مالها و علاش تتبكي....حسات براسها باغية تهدر مع حميدة...وبلا ماتفكر لا في فارق الوقت لا والو...صونات عليها كانت ناعسة ..جاوباتها بقلق...
_ الو حلا...
حلا ( غرسات سنانها فشفايفها و دموعها هابطين بدون سبب ) كنخاف اماما.....وحدة البارح ولدات و ماتت كنخاف نموت ملي نكون كنولد....ندمت علاش جيت مخنوقة و مامرتاحاش كنشم ريحة الموت....
حميدة ( بخوف ) سير ابنتي قراي شوية قرآن و نعلي الشيطان...شحال من وحدة ولدات و عاودات ماتت ؟ مشات منها شي حاجة.....سير ريح بالك سير...هدرنا معاك و نصحناك و والو نتي باغية كندا و صبري ابنتي حتى تولد بنتك على خير....
قطعات الاتصال و بقات حلا ساهية رعشة غريبة سرات مع اطرافها و ااسكات و الوحدة و سيرة الموت كدور....خايفة على بنتها كثار من على راسها....ماكانتش هكا قبل الحمل و ماكانتش كتظن غتولي تفكر هكا....غمضات عينيها تتحاول تطرد دوك الافكار لكن السكوت و الهدوء كهدوء المقابر ....تتنعس تتحلم راسها تحت التراب و مخنوقة ...ناضت تتصلي و تتبكي قلبها مزير ماعمرها حسات هكا....ماكتزيدش فيه ماعندها علامن تفشش ولا تبوحط هنا....مخنوقة و السكات لي عايشة فيه تيخلعها و تتقول تتشم ريحة الموت و تتسمع صوت المقابر......! دوزات اسوء ايام حياتها و خطر الولادة المكبرة ملاحقها بعد كلام الدكتور ...تتخرج تمشى مع فاطمة الزهراء و مرة مرة تشري شي حاجة باغياها ...شادة كرشها بالم...
سايراتها حلا تتهز و فعلا الحريق مشى و رجع و اختفى لفترة و رجع بحال كيلعب عليها و ملي كيمشي تتحس بالراحة و السكينة و ملي كيرجع تيفيقها من داك الراحة....حتى شدها مابغى يمشي. وتما فعلااا حسااات براسها غتولد.....! الغوااات و الخلعة و البكاء.....زيرات على يد فاطمة الزهراء تتبكي...
_ الولادة لولة هكا كتكون ..غتولي تفيقي بالوجع و يقول عقلك صافي هذاك وحع الولادة....
حلا ( طالقة شعرها ولى قوي و مهلي و مع الهرمونات طالعة ) ماعرفتش ..باغية غي نولد دغيا و نرتاح ...
ضحكات فاطمة حتى عيات...
_ و تفكري هاد الهدرة ملي تولدي عندك تنسايها غتولي نتي ضحكي على راسك ملي تفكريها...حيت الراحة بعد الولادة ماكايناش....شبعي راحة و نعاس دابا حتى تشرفنا لالة فاتن....
حلا ناضت بهدوء تتنهد نظرة عينيها تبدلات ولات قليلة كلام و عينيها مابغاوش تيبرقو بحيوية و حماس ...فاشلة و مابقات تتفكر لا فلباس ولا زواق ...قد ماتتفكر فالولادة الغربة شعور تيقطع الواحد و خاصة و نتي حاملة ...كانت تتضحك على خلود ملي كانت تتعاود على معاناتها فاسبانيا و الولادة تتقوليها نتي حمقة واش مع والديك غينقص الحريق ياك حريق حريق...و دابا عاد حسات بداك الجو لي كانت فيه...ندمات علاش بعدات على حبابها و على دارها و راجلها....تفكراتو و هزات تليفونها تتصوني عليه ...جاوبها بصوتو الخشن...
_ الو ..
حلا : فينك كنصوني عليك مكتحاوبش و انا ولدت ...
عبد الصمد ( بحدة ) ولدتي من نيفك ...!
حلا ( تتبسم ) زعما مانديرها بيك حتى مرة ...فوقاش غتجي ؟
تيجيها صوتو بعيد و الصداع حداه...حتى جاها ردو...
_ شهر نكون معاك ...
ضحكات فرحانة...
_ حلف و علاش ماتجيش دابا ...فينك ماشي فالدار...
بقات تتدوي معاه شحال و الراحة بدات تتنزل عليها ...سالات معاه الهدرة و دخلات تتفرج فتصاور خلود مع بنتها الثانية خارجة زعرة تاني و تتشبه لغرام ...ابتسمت فرحانة و متشوقة تهز بنتها عندها....! نعسات و فاقت على الوجع ...ناضت من بلاصتها تتطوي حوايجها و توجدهم من دابا .....شافتها فاطمه الزهراء ضحكت....
_ ستناي بعدا حتى دخلي شهرك ...
حلا : باغية نجمعهم دابا ...شوف شحال صغااار و زونين....
فاطمة الزهراء : هاذو ديال ثلاث شهور غيجيوها كبار ...خودي هادي ديال الخلوق و دافية ...
بقات حلا تتجمع حويجات بنتها و حوايجها هي و مستلزمات حمامها نزل عليها واحد النشاط غريب تتطوي و تعاود بحال تتجهز راسها للولادة وهي ماعارفاش....مشات دوشات و تنقات و نشفات شعرها و غي صلات صبغات دفرانها فالغوز بارد فرحانة بيهم والحريق فيها رجع تيطعن تيجي كل عشرة دقايق و يمشي ...دخلات ليها الخلعة ثاني و حطات يديها على كرشها و قلبها تيضرب....دازت ساعة و الحريق تزاد فوق المتوقع ظهرها من جهة و كرشها من جهة و حركة الجنين مابقاتش تتحس بيها قلبها تيضرب بالزربة غوتاات لفاطمة الزهراء و جات عندها طايرة مخلوعة تتخاف توقع شي حاجة و تسمى فيها هي لي مقصرة و تسمع الهدرة من عيشة و عبد الصمد ...
_ حاسة غنولد ...ايي ظهري ظهري تقسم ....
فاطمة : بشوية بلا ماتغوتي غضري غي راسك ....
طلقات حلا غوتة مجهدة ...و الحريق فيها تيقسم جاها الم المخاض بالاسهال و التقية و افرازات تحتها ماحسات بيها مع الحريق و البكاء و الغوات....طاارو بيها لوبيطال و وقت الولادة قاد حان فعلاااا البنت زربانة تخرج للدنيا ...راسها مقلوب التحت و الحريق فمنطقة الحوض تيفشل...فحصوها تيشوفو واش تولد طبيعي ولا قيصري ...كان اوضاعها طبيعية و البنت راسها خارج....و ماخرجات للدنيا حتى شافت حلا الموت ماتتفكر فوالو غي تتدعي الله يطول فعمرها و تشوف بنتها غي تشوفها و داك الساعة تموت ..و غي شافتها صغيييرة بزااف قد الكمشة ووزنها ضعيف و طولها قصير بزاف زرقة و عامرة بالدم طاحت حلا تتنهج سخفانة خايفة يبدلوها لبها ولا يسرقوها و وساويس فعقلها كثيرة مامعاها حد لا أم ولا اخت وولا زوج من غير لوستها ... خداو البنت لي تسمات فاتن ينظفوها و يفحصوها بعناية كبيرة و اهتمام و حطوها فالحضانة تحت المراقبة لقات حلا الاهتمام و العناية فوق المتوقع ....! خدات غرفة خاصة ناعسة تترتاح ماكايناش هنا واحد النعسة حلوة بعد التعب و الوجع و تجربة غريبة دازت منها بحال كانت تتحلم .....!
انتشر الخبر فالمغرب ...عيشة تتنكر و تغوت معصبة ...
_ شفتووو ها الزربانة خرجات بحالا بحال يماها ....
حميدة و عبد الله عرفوها ولدات تشغل بالهم عليها و ترونو و تشوشو عليها تيهدرو مع فاطمة الزهراء تيسولو و يعاودو و ماشي غي هوما تليفون فاطمة كان غيتفركع باتصال عيشة و صفاء و عبد الصمد معصب غي مع حوايجو غيطرطق وواعصابو خرجهم مع الخدامين عندو دوز عليهم دكاكة بالغوات ...و نسيم و خلود تيصونيو على حميدة مشوشين تيسولو وحميدة براسها باغية شكون تسول...دازت عليهم كاملين داك الليلة...
اخدت البنت العناية الكاملة و حلا حتى هي...ولكن تبدلات الف درجة مابقاتش مسوقة لراسها روحها و عقلها مع بنتها فقط ...هي عادة تتموت على حاجتها و كيف دابا بنتها قطعة منها تموت و تقتل على ودها....مابقى همها داك الساعة لا وجهها و لا شعرها...حتى طمنونها على بنتها و فاطمة الزهراء واقفة معاها وقفة صحيحة....هي لي تتدخل تدوش ليها و تعاونها و تنصحها بلا نصائح حميدة الكثيرة على البرد و الحوايح و التربية و الماكلة و حلا تتسجل وتلقط اي معلومة جات فالطريق......
تعطات لحلا ارشادات من وكالة الصحة الكندية العامة و المختصين بالاطفال...حول الرضاعة الطبيعية وكيفاش تشدها و كيفاش تجلسها و كيفاش دير ليها بعد الرضاعة و مقعد د السيارة و المهد و الالعاب و معدات الرعاية و التحصين الخاصة بالاطفال....! و حسب الاقليم لازم الطفل يتسجل خلال اول ثلاثين يوم بعد الولادة ...اتصلو بالسلطات المحلية على حساب شهادة الميلاد وخا حلا فبلاد غريبة و جديدة عليها لقات الدعم من زوج فاطمة كونو محامي....و تسجلات البنت و حصلات على شهادة الميلاد و بداو تيقدمو الطلب الحصول على جواز السفر الكندي و الإجراءات تتاخد وقت وخاصة مع صحة فاتن ...ماخرجاتها من لوبيطال حتى سمحو ليها هوما و وضعها صبح افضل و هزاتها حلا لحضنها حامياها من العيون.....!!
عبد الصمد دبح فالمغرب و دار الزردة مابحالها زردة و بنتو مسمية عندو فعقلو دبح على سمية مها....كلشي تيقول حشومة على هادي حرماتو يشوف حنى بنتو ملي تزادت و عقلية النساء فشكل على الرجال....النساء تتغلبهم العاطفة و الدراما والرحال تيغلبهم عقلهم و عبد الصمد مافكرش هكاك المهم عندو البنت بصحة جيدة و لباس عليها .... و عبد الله من جهة دبح و دار صدقة على حساب بنت خلود و بنت حلا....وخا بعاد تيهدرو معاهم ابيل فيديو.....!
تجمعو الاحباب ففيلا حميدة دايرة ليهم عراضة و كاين عاد فاق من القلبة و جاتو يسول على حلا...
_ و انا كنقول واحد حلا فين غابرة و مالها مابقات تتبان....
حميدة ( تتنهد ) حلااا مشات ولدات فكندا و خلود فاسبانيا ...و عقلي هنا معاهم غيخرج...
_ سمعت الولادة فكندا غالية ...
حميدة : ايه شوية....
لالة فاطمة : عبد الصمد مغرقها مكفي و موفي ...و مبروك الالة حميدة تبارك الله فعام واحد جوج حفيدات الله يخليهم ليك...
لالة حميدة : بارك الله فيك الالة فاطمة....بالي باقي مع حلا و نتينا كتعرفيها ماعرفتش هاد الشهر و نص كيفاش داز عليها ....
نطقات نسيم لي كانت جالسة تتسمع ...
_ صعيبة مع النفاس و بنتها مريضة ...البارح عاد خرجاتها دابا عاد غتجرب التربية و النعاس غيطير ....
حميدة ( تتنهد ) مابقاش بزاف ...الراجل ديالا مشى لاسبانيا و من اسبانيا غيمشي لكندا يلحق عليها و مابقاليها والو تما ...تشد وراق بنتها و ترجع هي و خلود ندير لبناتي سبوع مطرطق.....
دخلت المعرض باطلالة هادية انيقة...صاك صغير بالنسلسة فيديها شعرها مقاد فالصالون و مصاوبة الدفيرات و الطالون فالرجل و يحيى معاها لابس الكلاس حوايح الخدمة و محسن اللحية و الشعر داير تحسينة وحدة عادية خلاها واقفة مع نجوى تيهدرو و دخل هو للبيرو ديالو تيهدر فالتليفون.....
نجوى ( ناضت تتبسم و تسلم عليها ) ...غبرتي ياختي عاد جيتي طلي علينا خليتي بلاصتك...
نسيم ( جلسات دايرة رجل على رجل ) ماعنديش الوقت ...جيت مع ماما وقلت نجي نطل عليك...
نجوى : الله يكون فالعون....كي غادية مع لاجونس ...
نسيم : الحمد لله غادية مزيان شوية ...! جيت نشوفك و غنمشي دابا ندوز ورا ماما نشدو الطريق لتطوان....الويكاند نتلاقاو الا كنتي مسالية ....
نجوى : ان شاء الله فاي وقت ....الله يوصلكم على خير....
ودعاتها نسيم و دخلات عند يحيى للبيرو علماتو انها غادية ... خرجات من المعرض و ركبات سيارتها الجديدة دازت ورى حميدة والولاد و رجعو لتطوان ....!
دازت لاجونس و دخلات مبتسمة فوجه الكليان لي شادين النوبة و خا قلال و لكن شوية ورى شوية تيتزادو ....! ابتسمت مع العاملة و جلسات مكانها تترفع اكمام الشوميز و ساعة فضية فمعصمها و شعرها كيتسرسب بوحدو....
_ صافي انا هنا سيري تغداي ....
سلمى : وخا .....
مشات سلمى و بقات نسيم فالواجهة مسيرة شغلها...تقدمو الكليان واحد ورى واحد دايرة اربعة كراسا د الجلد شي جالس و شي واقف و شي تيستنى برا ....!
وقعات الحاجة تنفخ دارت ليها جوج خطوط تما شي توقيع ماهو ....عطاتها نسيم ورقة اخرى و عاودات صعرات الحاجة...
_ و شني عاود غنوقع على هادي ..
نسيم ( بهدوء ) لاا هادي خوديها خليها عندك....
شداتها الحاحة شافت فيها لقاتها كاملة فرنسية حسات بالورقة مهمة خزناتها فصدرها مع الفلوس و خرجات تتولي ...مخلية الكليان لي كان واقف وراها كيضحك...
_ و الصبر و صافي اختي...
نسيم هزات فيه عينيها بابتسامة رسمية...
_ ضروري....
كان غيفرنس ليها وعينيه تيعبرو فيها...غي شاف الخاتم جمع عينيه و دار عقلو...قضات ليه نسيم غرضو و مشى بحالو و تبعوه البقية....! سالات خدمتها و مشات لفيلا جابت الولاد و رجعات للدار عيانة....والولاد تيبوسو فيها جاتهم عليها ديك العشية....
_ ايمة على القطقوطة ديالي توحشتوني....
امير ضمها من رقبتها ملصق خدودو مع وجهها تيفرنس ...
_ اي لافيو مامي ...
ضحكات نسيم و جراتهم عندها تتبوس فيهم و تعاود وهوما تيتسطاو بالضحك...
_ الحلاوة ديالي الحلاوة..ياختي يانا على ايلافيو مامي....السكاكر ديالي ....
جلسات معاهم ماسخات تنوض توحشاتهم و توحشوها حتى هوما تيدوزو نهارهم فليكول و تيكبرو مابقات تابعها لارضاعة لاوالو ...كل واحد منين تيشدها و يعاود ليها شنو دارو و شكون دوا معاهم وامير تيبركك بازهار و يحط ليها ضوسي ديالها كامل وهي تتعصب و تنوض تغوت و تنكر كلشي....حتى تيقلبوها غوااات و تتنوض تدفل عليه ....و نسيم وسطهم تتغوت و تحمر فعينيها مادارو عقلهم حتى دخل يحيى مع سبان أزهار و بكاء امير حمر فيهم عينيه و مقصح الشوفة مزيان لاول مرة فحياتهم تيشوفوه هكا....
_ أزهااار !!! عاودي ابابا شنو قلتي !
عينيه و الشوفة لي داير فيهم بجوج خلعاتهم و غلباتهم البكية و تكمشو فبعضهم تيرمشو حابسين البكية ...حط المفاتيح و قرب عندهم مغوبش فيهم مزيان...
_ معاك أزهار...سولت جاوبي ! هدرتي ليك ....
نسيم ( تغوت عليهم عندها هانية و لكن ملي شافتو تيغوت عليهم هو تحرك قلبها و تدخلات ) يحيى انا غندوي معاها....
يحيى ( شاف فيها عاقد هم ) ماتدخليش نتي خليني بيني و بينهم.....
نسيم وجها ولى صفر و يحيى مصدوم...جر ازهار لعندو و فتح النقاش بهدوء....
_ و اذا قالها شنو فيها ؟ شنو كتعني ...عارفة انسيم شنو كتعني ؟
نسيم ( مصدومة ) لا انا ماعارفاش....
يحيى : امير نتا عارف شنو كتعني ؟
امير : كاحبة ابابا....
يحيى (هز حاجبو فيه ) اييه ايه شنو كتعني لي عرف شنو كتعني نعطيه شوكولا الويكاند كلو ....
ازهار ( نقزات لعندو تتجرو من وجهو باش يشوف فيه تتزرب عندو يسبقها امير ) موا ...موا......ايكوت موا ابابي....الكاحبة هي عندا زكيكة عريانة ......
يحيى ( جمع ليها يديها تيشوف فيها بنظرة توبيخ ) و عارفة كلمة مامزياناش ماخصهاش تقال وي او نو ؟؟
ازهار كمشات عنقها مدلية شفايفها و امير تيشوف فنسيم حاصل باغيها تفكو غي مظلوم و تيسمع فالتوبيخ وهو ماداير والو ... ازهار لصقات فيه كلشي ...
يحيى : جاوبي أزهار....! سولتك جاوبي ماتخافيش....
ازهار : نو ابابي...
يحيى : دونك ماعارفاش ! و هانتي ديريها فعقلك دابا....هاد الكلمة ممنوع تعاودي تنطقيها داكوغ ؟؟!!!
هزو راسهم بالايجاب و زاد حفر عليهم تيسول ...
_ شكون كيعلمكم بحال هاد الكلام ؟
ازهار ( سكتات حابسة البكية...)
امير ( تيشوف فيه بنص عين ) لينا ابابي...
يحيى ( هز راسو مفقوص ) موسييقى مع هاد لينا ثاني.....!
بقى ساكت عاقد حجبانو تيشوف فيهم مكمشين فبعضهم زاد حمر عينبه و نطق بحدة خلعاتهم بالجهد....
_ ازهار....! بحال هاد الكلام ممنوع تنطقيه و ماتبقايش دفلي على خوك و ماتمديش يديك عليه و نتا ( شاف فامير ) نفس الهدرة....تفو و اوف و كلام بحال هذا ممنوع عليك و عليها.... نعاود نشوفكم مخاصمين غنعاقبكم بجوج.....فاهمين شنو كنقول !
خافو و تكمشو فبعضهم حابسين البكية هزو راسهم بالزربة سمعا و طاعة....ماطلق منهم حتى جبرهم يعتادرو لبعض و ضمو بعض بزز حابسين البكية ...خلاهم و ناض مغوبش يبدل عليه غي مشى طلقوها لبكية عالمية الدمامع و الشهيق تقول ضربهم.....مامولفينش يغوت عليهم هكا و ملي دارها عمرو ينساوها و كلام ترسخ ليهم فعقلهم خايفين يرجع يغوت عليهم ثاني...بقاو ضامين بعضهم بحال الفلالس تيبانو كي التوام ....!
خداتهم نسيم للدوش دوشات ليهم وهوما ساكتين بزز وقفو البكاء و باينة وجههم مطبوع و نيفهم حمر ...لبساتهم و حطات ليهم يتعشاو تياكلو ساكتين و تنخصيصة د البكاء طالعة معاهم كل شوية....و يحيى غضبان عليهم ماوراهمش وجهو داك اليلة....خداتهم يغسلو سنانهم...خلاتهم نسيم واقفين حدا المراية غي غبرات رجعو للخصام ثاني تيتخاصمو بالحس و بصوت خافت كان امير غيضربها بالفرشاة لعينيها و تكمش ملي تفكر كلام باه....سمعو نسيم جاية و قطعو الحس ....
نعساتهم عاد خرجات و عطات وقت لراسها...دوشات و بدلات عليها ملابس مريحة طلات على يحيى لقاتو ناعس....! فرحات و جلسات فالصالون شاعلة التلفازة و موجدة البيسطاج و الكركاع تتاكل و تقرا فالقصص بالدرجة فهاد الاواخر ولات مبلية بيهم و تتسرق الوقت باش تقراهم و تتفرح ملي تينعس يحيى باش تقررى على راحتها....ظلات جالسة تتقرى مخشعة و تتبسم بلا شعور مع القصة و الحوار....و ملي تقرا شي حوار ضحكها تتكتم الصوت ...فاق يحيى و لقاها جالسة تتشوف فالتليفون و تتبسم ...هز حاجبو فيها و نطق حتى خلعها و قفزات ...
_ شنو كديري ؟
نسيم ( طفات التليفون تتلف ) كنقرا واحد الرواية ...ماجانيش النعاس....
هز راسو و دخل للكوزينة عمر الماء و دخلهم للبيت و تكى تيستناها تدخل و مافهماتش راسها....تخشعات تاني مع الرواية و خلاتو فايق مطيرة عليه النعاس وهي غاطسة فالرواية ساعة و ساعتين و يحيى سخن عليه راسو و خرج لعندها تيحك رقبتو مقطب جبينو...حيد ليها التليفون متصنع المزاح ...
_ عطينا نقراو معاك.....
قفزاات مخلوعة باغية تحيد ليه التليفون ...شدها من خصرها وهي تتلوى حداه...
_ عندك ضيعلي فين وصلت ...
يحيى ( هز التليفون الفوق تيشوف فيها شنو تتحاول دير ) مالي غادي نسرطو ! هداي حتى انا باغي نقرا شنو كتقراي.....
نسيم : قصة عادية بالدرجة مغاديش تعجبك....
دورها و جابها قدامو شاد خصرها و فتح التليفون وهي تتشوف حشمانة....جلس تيقرا و ماجا غي فبارت السفالة عاد كانت واصلة ليه ...قرا مصدوم و هبط تيزيد يقرا الوصف ديال القضيب واصفاه الكاتبة بوصف فضييع و تتوصف حتى الفرج ديال المراة قالك غوز ماغوز ... قرات حتى هي بعينيها و حشمات حتى دمعو عويناتهاو نطقات بزز...
_ ماقريتش هادشي ماشفتوش.....
يحيى ( الهدرة تلفات ليه بالصدمة ) : كيفاش ماشفتيش ...هادي القصة لي كتقراي نسيم معاك داوي....
نسيم ( خبات وجهها بين يديها غرقانة بلاصتها ) ماشي القصة كاملة فيها هادشي ماتشوفش فيا هكاك ايحيى......
رفع صوتو معصب...
_ ماقريتش نتي هادشي ؟
ماجاوباتوش مهبطة راسها مزنكة ... عاود شعل التليفون تيطلع و يهبط شي خمسة وواحد ورى الثاني عامر سفالة و وصف مقرف فشل هو و فشلات حتى هي طاحت تتبكي و تهز فراسها...وهو كيغوت معصب و مصدوم فيها....
_ نسيم راك بعقلك زعما ...شنو كتقراي فهادشي..معاك داااوي جاوبي من فوقاش و نتي كتقرايهم ؟؟
_ كملااات من هنا لافلام الاباحية...! ( قرب منها تيسول و عينيه كيغلييو ) كتحسي بالراحة ملي كتقراي على هادشي مم ! جاوبي تيعجبك الحال ( صعر ) كتكفتي انسيم ولا شنو.....؟
شدات راسها بين يديها تتبكي...
_ كيفاش كنكفت مافهمتش مافهمت والو ...
يحيى ( بالغوات ) ماعارفاش ! ماعلموهاش ليك فالقصص....و راه بزاف انسيم بزاااف باغية تصعرينا و السلاام هادشي لاش تتقلبي....الجوح د اليل و نتي غايقة كتقراي فهادشي !!! محتاجة حتى نتي ؟ محرووومة....( بشك ) تتفرجي البورنو ؟؟
هزات راسها بالزربة ...
_ واش كتشوفني مامربياش ! واش نوصل انا لداك المستوى....واش تتشوفني برهوشة ...انا عندي جوج ولاد ايحيى جوج و ماشي صغيرة و عارفة لي خصني نقرا و لي مانقراش ...ماعمرني فكرت نتفرح و لا نقرا داكشي هكاك ...
جرها من يديها معصب و هي تتبكي دخلها للبيت و شد الباب بالزعفة ...جلسات فوق الناموسية شادة راسها تتبكي متمنية الموت فداك اللحضة وهو واقف عليها تيغلي غي بوحدو معصب مارضاش مراتو تقرا داكشي و تيتخايل صورة قضيب موصوف كما هو بطريقة خرافية و زايدين نغزة ...و بلا وصف عن جمال ووسامة البطل وسامة مفرطة و الفحولة و القضيب فايت عشرين مترو و تينعس معاها حتى تيطلع الصباح شي حاجة زايدة و بعيدة عن الواقع دليل على غباء الكاتبة و عقلها الصغير تتكتب و هي ماعارفة والو غا تتنقل داكشي لي تتشوف فالافلام الاباحية.....
ضرباتو ليديه يطلق منها و زيرها عندو معافر معاها تتبكي و ترون فالهدرة ...
_ بعد مني لاش غنكدب انا ! و نتا لي كتهدر كتشوفك كتقرا فواحد الكتااب فيه كثار من هادشي و لا نتا وخا و انا لااااا....
يحيى ( جبد بيها ودنيها بالغواات ) اش جاب داك المسخ و القرف للثقافة الجنسية.......
نسيم ( تتغوت ) و حتى هادي سميها ثقافة جنسية غي هاديك بالفصحى و هادي بالدرجة...طلق مني ايحيى ماتصرفش معايا هكااا انا ماشي صغيرة تتربي فيا.....
دفعها فوق الناموسية تيحيد فحوايجو معصب ..
_ انوريك الثقافة الجنسية بالبراتيك ....
جلسات تتمسح دموعها خايفة تحصل حيت فازكة من التحت....بغات تنوض و حبسها تحت منو تتفركل ....
_ ماباغياش بعد مني ... مافياش مابغيتش خصني ندوش لول بعد مني ....
ركلاتو لوجهو مصدومة وهو كثار منها قلبوها غوات و ركيل فوق الناموسية هاربة منو وهو عايق لاش هاربة و مغدد مزيان مارضاش....شد ليها يديها فوق راسها حتى بغى عقلها يخرج متتحملش العنف و يديها يبقاو محكومين....
_ يحيى بعد منييي فك يدي ...يديييي....
فك ليها يديها عاد تهنات و قلبها لعندو تيبوس فيها و عاشرها هاد المرة معاشرة جريئة فوق المتوقع و حركات لاول مرة غيديرهم معاها طيلة حياتهم الزوجية.....!
فاقت فالصباح لقاتو مشى للخدمة....مارداتش ليه البال ..جلسات بملامح مشوشة و تفاصيل البارحة مرونة ليها عقلها نهار كلو....غي تتجي عينيها فالمراية و تتشوف ثديها تتفكر ديك الحركة تتقلب وجهها ......!
حلا هازة بنتها فحجرها تترضعها صغيورة و زوينة لي شافها مايحيدش عينيه منها...ملبساها مزيان و حاضية عليعا بحال عينيها...ماتتبغيش طلق ليها فرحانة بيها بلا قياس....تتحضيها ملي تتنعس و تفيق و حاضية معاها لاتخنق و توقع ليها شي حاحة تموت و تبعها....! تترضع من صدرها و تحرك يديها صغار حدا وجهها بحركات تيخليو حلا تتبسم بهدوء وهي تتبعها كي كدير....دخلات عندها فاطمة الزهراء مبتسمة تتدوي بهمس...
_ نعسات ؟
حلا ( وجهها باين فيه التعب و شعرها مشطاتو غي بالزربة ) مم نعسات باليل فايقة و النهار ناعسة ...
فاطمة : عادي دابا يتعاوط ليها النعاس حيت صغيرة و صافي...دابا تولي تنعس باليل و تفيق بالنهار....انهزها ليك حتى دوشي ؟عبد الصمد اليوما يكون هنايا ان شاء الله.....
حلا نساتو من بالها....
_ الايام طارت دغيا....!
حطاتها بشوية فبلاصتها تتحرك بهدوء و بالحس باش ماتفيقهاش...هزات لاتخوس ديالها و حوايجها و همسات لفاطمة...
_ غندوش دغيا و نخرج ردي بالك معاها ....
وصات عليها فاطمة الزهراء و دخلات دوشات و الفرق كبير كي كانت قبل ماتولد و من بعد ..قبل كانت تتجلس بالسوايع و تعطي كل حاجة فيها حقها دابا باغية غي تزرب باش تخرج عندها...تتقرا عن موت الرضع المفاجىء تتخاف على بنتها موسوسة و مبرزطة ...دوشات مع دايرة لايزر مهنية من الزغب تهلات شوية فراسها و خرجات لابسة كسيوة زوينة فالغوز و شعرها نشفاتو بالسيشوار و عطراتو مزيان دارت الميكاب و جبدات عينيها ...الصدر عامر بالحليب و الشهية مفتوحة و لكن تتوقف الماكلة فالنص و طير عند بنتها تجلس معاها سامحة فماكلتها.....!
خرجات منورة و مزينة حمقات فاطمة تتعجبها ...
_ جيتي زوينة بزاف مانعطيكش ثلاثين سنة...جيتي بحال بنت عشرين سنة بديك الكسوة....
_ الزين ديالي فايق فتووون كووكو مااامي ...ندوشو و نبدلو حويجات زونين نشوفو بابي نخرجو مع بابي الزين ديالي ....
هزاتها بشوية و فاطمة تتعونها و تقرب ليها الحوايج دوشو ليها تما فالبانيو ديالها وهي تتبكي و تغوت ماسكتات حتى لبسو ليها لبسية دياال الرضع فالغوز رطبة و غطات ليها يديها و راسها و هزاتها تتشم فيها ...
_ شميت فالروايح حتى عيت ماوصلوش لهاد الريحة شحال زوينة....
فاطمة : اوا صافي ! زعما غريبة عليا مراة عبد الصمد خويا بحال ختي و بنتك بحال بنتي فرحانة بيك و بيها ...الغربة صعيبة وملي تتلقاي مع حبابك فيها الجنة و مافيها....
حلا ( تبسمات مخلية فاطمة تتشوف فيها باعجاب ) انا مولفة هكا تنسافر غي سياحة و تنقول سعداتهم لي عايشين برا ...و لكن كندا ماحملتهاش الجو خايب و مقناط...( حنات راسها لبنتها تتبوس فيديها و غي شافت فاطمة ساكتة هزات راسها فيها لقاتها تتشوف فيها..) ها عمتو الزوينة....عمتو الفنة....
فاطمة ( بعفوية ) شكون سماك ؟ سبحان الله لي سماك عارفك غتخرج حلوة هيدا....انا كنت تنشوفك غي بالتصاور و حمقتيني فالواقع زوينة كثار...
حلا ( تترمش و تدور فعينيها ) ربي يخليك عينيك ليكيشوفو كلشي زوين....سماتني ختي الكبيرة ههه حتى عبد الصمد تيقولي الله يرحم لي سماك تتعجبو سميتي وخا مكيقولهاش نيشان ....
فاطمة ( تتضحك ) و فين عمرو قال شي حاجة نيشان انا ختو زعما و مكنعرفوش كيفاش كيفكر....و باينة بلي تتعجبو غي ملي سمى بنتو حلا.....
حلا ( غي تفكرات ضحكات و عجبها الحال ) انا صدمني ...حيت قبل مانولد تنعيى معاه عبد الصمد فرحان ؟ عبد الصمد عجباتك سمية فاتن ! فبالك شي سمية اخرى ؟ مكيقول والو وخا من بعد عرفت ماعجباتوش سمية فاتن و حلف مايدبح عليها و سماها حلا السيد عاجباه سميتي و ساكت .....
فاطمة : ههههه و الا جينا نشوفو بحال حلا بحال فاتن ...
ظلو تيهدرو شحال توالفو ...حتى خرجات فاطمة عند بنتها و راجلها خرج يستقبل عبد الصمد ... بقات حلا مع بنتها هزاتها عندها و لبسات حلا سندالة عالية مع ديك الكسيوة و الشعر مسبسب جات معاها الامومة الانوثة والجمال و والدة الزين تيشبه ليها وخا مابانو ملامحها مزيان تتقوليهم تتشبه ليها و تتوريهم تصاورها و لي قال العكس تتشبه لعبد الصمد تتعصب و تصعر....!
جلسات و بنتها فيديها مالحقات تصاوب الجلسة حتى جا زوج فاطمة و معاه عبد الصمد ...ناضت واقفة و قلبها قفز و عينيها ضحكو ...دخل تيسمع غوات بنتو و فاطمة استقبلاتو حشمانة سلمات عليه...
_ مرحبا بيك على السلامة ديالك...
عبد الصمد : الله يسلمك...!
تقدم عند حلا عينيه دافية و شوفاتو ولات عطوفة....ضحكاات و حنات عينيها لبنتها طايح عليها السر ...باسها فراسها فرحان باينة من عينيه....
_ على سلامتك .....
هز بنتو بيد وحدة تيحاول يلين حركاتو معاها و حلا قلبها تيقفز بلاصتو تتعرفو كي داير ....
شاف فيها و عينيه دافين و فاطمة و راجلها تيضحكو بلا هدرة بلا جوج صاوبها فحضنو مزيان و باسها فراسها رطبة بلا قياس و كي الكميشة فيديه و حلوة للشوفة تتبكي و تعنزز تيهز فحجبانو عاجبو الحال و مضخم مع رساتو اول بنت عندو فرحان بيها قبل مايشوفها و غي شافها كملااات تلمس حنكها بظهر يديه الخشنة تيسكتها....
_ ششش....
زادت فالبكاء تتفركل بيديها و رجلييها و عبد الصمد تيشوف فيها و يبوس فراسها فرحان بيها ماقال حتى هدرة ملامح وجهو كافية و موفية ... بقات حلا تتبسم عاجبها الحال و فاطمة فرحانة ليهم....
_ فرحانة بيك مسيكنة....
عبد الصمد ( مدها لحلا بعد ماعمر عينيه بشوفتها و بجدية قال ) ماكيضرها والو ! كلشي هو هذاك...!
حلا ( هزاتها منو تتبوس فيها بحنية ) لااا ماعندها والو رضعتها و بدلت ليها و عاد فايقة ماناقصها والو ...
جلسو كاملين مع بعض داك اليلة و فاطمة الزهراء غطير بالفرحة...وجدات الطبلة على حقها و طريقها و تجمعو كياكلو و غوات فاتن داير حالة و فتناتهم مزيان ... ناضت حلا واقفة هازاها عندها قاطعة الاكل فالنص...دخلات للبيت و تكات على جنبها منعساها حداها تترضعها حتى لحق عليها عبد الصمد شافها مخرجة البزولة و رادة شعرها ورى ظهرها....سول بصوت غليض مجهد
حيد الشوميز بقى عريان من الفوق خوا جيابو كلهم و وراقيه و تكى حداه بنتو من الجهة لاخرى تيحضيها بعينيه و يشوف بزولة حلا في فم فااتن و مرة مرة تيتلمس شعر بنتو بيديه و يدوز بصبعانو على حنكها و حلا حاضية معاه برزطها ....
_ بشرتها حساسة ماتبوسهاش بزاف و ماتبقاش تقيسها بيديك حتى تعقمهم....
_ عبد الصمد ( هز حاجبو و طول يديه لشفايفها مثقل الهدرة ) كملي ليها الرضاعة و خلي ليا حقي منها ....
عرفاتو شنو باغي و فكرات فيها و عاودات... مرت على الولادة تقريبا شهراين متخوفة من اول ليلة بعد الولادة و مزال حاسة براسها مابراتش و خايفة تتحس براسها مضرورة تحتها وماقادراش على اي علاقة جنسية معاه...و بعد الولادة جاها البرود ماجاتهاش الرغبة طيلة هاد الشهراين بالعكس ماعندها الكانة ليها ولا الخاطر تتحس الا عاشرها غيفرعها و باردة من ديك الناحية......
دوز يديه مع ثديبها برغبة حتى زير على وحدة و طار الحليب كمشات حجبانها مقصحة تتبعد ليه يديه و البنت وسطهم ناعسة....
_ مالك هكا مالك ...صدري كيضرني حشومة عليك بففف....( قلباتها تفرنيس ) كيف حاتك فاتن ! فرحان بيها اعبد الصمد عاودلي مكتقول والو كتبقى غي ساكت ؟
عبد الصمد ( بحدة ) خرجي البزولة لوخرى و اجي لعندي نتقاشعو ....
قلبات عينيها تترمش ناضت تتمسح حالتها و تتدور فعينيها ماباغياش و مافيهاش ... حتى ناض لعندها تيتمايل باكتافو و قنتها مع الحيط تيبوس فيها جننها و برزطها.....
_ صبرنا ليك حتى تولدي كلتي تقدي عليه... باقية عند كلمتك ولا وليتي من قبيلة الغشاش.....
قلب ليها وجهها لعندو بصبعو تيشم فرقبتها معلي حاجبو ...
_ رضعيه ....
تتبوهل عليه هو تيقصد حاحة وهي بلعاني تتجاوب على حاجة اخرى...
_ رضع لابغيتي و عند غي تقصحني....صدري كيضرني.....
زيرها فالقنت تيدوز بنيفو على وجهها و باسها من شفايفها دفعاتو و عاودات مرعوبة و خايفة الحالة لي شدااتها مايحس بيها غي لي مجرب حاسة غطرطق فيها شي حاجة وغيفرعها و غتموو بلاصتها.....تملك جسدها بيديه و تعانقات شفايفها مع ديالو وهي مزيرة مامرتاحاش....جلسها فوق رجليها مباشر فطقوسو البربرية وهي تتعوح و تبكي عليه تما خايفة ....
_ خفت خفت اعبد الصمد خليني شي ثلاث ايام ...يوماين غي نهار نهار صافي والله ماقادرة مخلوعة كثار من ليلتنا لولة....
بعد ليها شعرها من على وجهها تيشوف فيها باعجاب تتبكي و تفشش عليه بحال القطة مخلوعة....زينها و صوتها و جسدها تيعجبوه حك لحيتو مع وجهها تيلعب فشعرها ....
_ راشقة لينا و طالعة لينا التنغيمة بلا مانقلبو الكارا.....
هي تتبكي وهو تيلعب فمفاتينها تيفيق فيها الرغبة عاجبها البوسان و الدلع و لكن الوجبة الكبرى تتهرب منو و تنوض تبكي عليه خايفة دوخها و رخاها جاها لنقطة ضعفها فالفراش كاتمة غواتها لاتفيق فااتن و يسمعو البقية ...و فعلا ناضت فاتن تتبكي ناضت عندها طايرة نظفات صدرها و عطاتها تعرض شحال حتى نعسات عاد رجعات عند عبد الصمد تتزعم راسها وخا ماكرهات يخليها حتى تقنع هي و تبرى ...دارت ليه خاطرو و هلكها مزيان و غواتها برداتو بعضة فكتافو حتى حفرات سنانها فيه غتموت بالبكاء و تقصحات مع شوية تبوحيط كملتت لي بقى......!
_ كنت غنموت ..والله مازدت فيه فرعتيني انا باقي مابريت ...
باسها فراسها و باش يديها بخشونة...
_ هاد اليدين مالايقش ليهم الفراغ....لازم يفيضو ذهب و دياموند .....
حلا ( تكات على صدرو و شفارها فازكين بالدموع تتفشش عليه ) تعدبت بزاف فالولادة كنت غنموت اعبد الصمد ...خفت نموت و مانشوفش بنتي و ملي شفتها خفت نموت و نخليها....النعاس مابقيتش كنشوفو و مابقيتش مسوقة....فرحانة غي بيها ....
عبد الصمد تيسمع ليها و يلعب فمفاتينها ساكت.... معزة حلا عندو تزادت اضعاف تتسخطو حتى تيكرهها و تيرحع يدوز ليها مصايبها وحدة بوحدة ونفسو ماتترضاش عليه علاش تيسامحها....و دابا مكانتها عندو طلعات الفوق حيت ولدات ليه اول بنت و اول فرحة عندو و حلاوتها باقية غيعطيها ليها حيت ولدات ليه...و ماشي اي حلاوة....! القهوة المخيرة تتدخل زبالة الفلوس غتولي فسميتها و الدار لي ساكنة من ثلاث طبقاات بفراشها لي ساوي الملاين غيعطيها ليها و نسبة من ارباح رياض شفشاون غتكون من نصيبها...!
دوزو ايام فكندا ...حتى انهاو اجراءات فااتن و جمعو حوايجهم راجعين للمغرب ...! العائلة عرفاتهم جايين كل واحد و فين تيوجد و عيشة تتسابق و تعاند مع حميدة....غادية جاية فوسط دارها معرية الشعر ولابسة قميص خفيف ضعافت شوية و شفايفها قشراتهم بسنانها معصبة...
_ غيصدقو لهنا... الاصول هي هادي اولا ؟ كامش تمشي لدار يماها...الحفيدة ديالي نشوفا انا لولة و تجلس عندي و لالاهم حميدة لابغات تشوفا تجي هي لعندي ...
عيشة ( بغضب ) عطيني داك التليفون نشوف سعيد واش وصل للمطار.
عطاتها صفاء التليفون و سلتات من قدامها تتسوط عصباتها....مشاات للكوزينة حاضية مع المساعدات تينظفو و الطباخة تتطبخ العشاء ....و صفاء فوق راسهم حاضية الشغل لابسة بيجامة أنيقة و شعرها زعر مجموع بمقبض ...
_ ملي تكمل احبيبة زيد عدل بلاطو د المالح هذاك الكبير والصنادق د الفروتا غيجيو دابا شوية.....ديري شي سلاد منوعة هازة الفواكه كاملة ...
الطباخة : وخا اختي صفاء كون هانية لهلا يحشمنا ...
الاستعدادات خدامة على قدم و ساق ...عيشة ماقداتها فرحة بحفيدتها وولدها و حميدة تتوجد الدقايقية و الدقة المراكشية باش تستقبل بنتها و حفيدتها ملي توصل ...شادة التليفون غادية جاية فالفيلا مع التحضيرات ...و خلود سبقات حلا و جات للمغرب هازة بنتها الزعرة حتى هي سماتها إسراء ولدات قبل من حلا بشهور ...!
_ و ماما غي بشوية عليك ...اولا راه غيوصلو لدار عيشة ماشي لهنا ! المراة تتبع راجلها حسابليك غيسبق النسيبة على ماماه....
حميدة ( جلسات تتنهد ) و عرفنا هادي مافيها شك و لايني غدا غتجي لهنا...و كلشي خصني نديرو على بكري....تريتور و الدقة المراكشية و وصيت نسيم تجيب الورد ....
خلود ( تتراري ببنتها فيديها تتضحك ) كاع مادرتو ليا انا هادشي ملي ولدت غرام شفتي دابا الفرزيات ...فرحتو بنسيم و بحلا و انا والو ...
حميدة ( غوبشات ) نسيتي شنو درت ليك فالسبوع و فسبع شعور ؟؟ هوما شفتهم بعدا ملي كانو فسبع شهور د الحبالة... شد فمك شد ...
خلود ( ضحكات ) هاهي شاداه ....
وصلو عبد الصمد و حلا لدار عيشة....خرجات من المقعد الخلفي هازة البنت فيديها مغطياها من البرد و الابتسامة فالتة ليها و مزينة ثغرها....دخلات للدار و عبد الصمد وراها شاد ليها الصاك بطريقة بربرية بحال شاد ميكة د الحوت ماتتلقيش بجمالية الصاك و ثمنو الغالي....تلاقاو التهاني و سعيد و خوتو فرحان ببنت خوهم و عيشة بغات تنقز من الدروج ...كانت هابطة تتزرب و هي تقشع صاك حلا فيد عبد الصمد خنزرات و قلبات عينيها بالزربة للبنت عند حلا ...مشات طايرة حيداتها ليها تتسمي الله...
_ ابسم الله بسم الله مشاء الله .....
حلا ( ردات شعرها وراها ظهرها حاضية معاها ) و هانتينا اخالتي عيشة ها الحفيدة ...فرحي مع رساتك دابا...
باست عيشة راس حفيدتها عاد باس ليها عبد الصمد راسها تيهز فيها حاحبو و ينطق بنبرة معروفة عندها ....
_ عيشااااا هانية ...
عيشة ( تتهز نيفها و تراري بالبنت ) ماهانيااشي على قلة السميات قالك حلا.... مصيبة ماشي سمية هادي د البريكيتوس و د المونيكات...و حتى فاتن سمية مافيهاش مايتقال....كون غي سميتوها عيشة على هاد الحساب....غنبقى نقولها عيشة لا فااتن سمية ولا حلا ....
طلعو الفوق تيتسمع ضحك حلا و سعيد على تعليق عيشة و عبد الصمد وراهم تليفونو تيصوني و يعاود .....باركات ليهم صفاء و سكينة و زوج سكينة و عيشة جالسة فوسط الصالة هازة فااتن فرحانة بيها...و حلا حداها دايرة رجل على رجل لابسة غوب فالنواغ كلاسيك الكرش ماشي ممحية لكن ماعندهاش معيقة حيت اصلا كرشها كانت صغيرة و ماكبراتش بزاف و زاد الاسود خبى العيوب ... شعرها دايرة ليه بوب كاري طويل تيلمع بلمعة الاسود و المكانة فاليد عاطية العين بقات صفاء و سكينة غا تيشوفو فيها شحال زوينة و ذواقة فالباس وكل مرة بتسريحة فشكل فداك الشعر تتدير فيهم النفس حتى هوما يكونو بحالها و يغيرو من شكلهم شوية....!
الهدرة و الضحك بين الاخوة و المساعدات غادين جاين تيحطو و يعمرو الطبلة ...هزات وحدة عينيها فحلا تتعبرها بفضول و نطقات عاطية الصواب...
_ مبروك عليكم الله يخليها ليكم و يكبرها فعزكم...
كانت حلا مناكرة مع عيشة تيقاد لبنتها غطاء راسها غي سمعاتها هزات راسها فيها مبتسمة داك الابتسامة الحلوة المبالغ فيها...
_ الله يبارك فيك احبيبة ديالي لهلا يخطيك.....
ابتسمت المساعدة و عجبها الحال و خرجات تتعوج على صحبتها...
_ خمس سنين و انا خدامة حتى شي قمقومة من القمقومات لي كنت خدامة معاهم ماقالتي حبيبة ديالي ....
ردت صديقتها...
_ حلا هكاك عاملة كنعرفا ملي عاد تخطبو كتهدر معاك بحال الى صحبتها و كيعجبها تشد الجموع وتضحك وخا كتبان عليها منفخة و مكبرة تهدر معاها العكس ...كتجيني دغيا كدخل القلب ماشي بحال صفاء قبيحة و غي كتغوت دايما كتبغي تبين انها هي فوق منك و حسن منك ...
جلسو تيشدو الهدرة متلفين الوقت ...
_ بصاح ! انا ماعمرني شفتا حتى لدابا....جاني سي عبد الصمد قبيبح و صعيب على سعيد و باينة عبد الصمد حاكم فيها و سعيد حاكماه مراتو.. حرايمية ديك صفاء....
المساعدة ( ضحكات ) الله اعلم اختي المظاهر خداعة....قبيح معاها و صعيب و هاز ليها الصاك و قريب ياكلها بعينيه ؟ انا كنعرف القبيح و الصعيب موت نتينا حداه و شكون داها فيك وكاين شي معقدين والله لا هز ليك الصاك تتهزيه نتي و احلة فيه و مع الترابي مايرضاش و عاد قدام يماه و خوتو الرجال كاع ماتسوق ماتقولش عليه كتامي والله ... كنت كنقول فيه عرق ݣاوري و رديت ليه البال فشكل حتى من بعد عاد عرفتو نص حياتو دوزها فسبانيا....
قفزو بجوج على غوات صفاء ....
_ ثورية فين السلاد ؟ ..
ثورية : وخا وخا انا غنجيبو ....
مشاو طايرين خارجين بيها هي و صحبتها ثقيييلة و مستوووكية دخلو للصالة لي هرسات ليهم فاتن داك السكات بغواتها ماسكتات حتى هزاتها حلا و عبد الصمد غا تتبكي تيغوبش و يسول باهتمام تيقول عقلو غا مريضة ولا ضراتها شي حاجة....
ناضت للبيت بدلات ليها و رضعاتها حتى نعسات نقات راسها و يديها عاد رجعات دخلات للصالة و جلسات حدا عبد الصمد تتبسم مع صفاء و عيشة تتسول و تعاود باغية تعرف كلشي بالتفاصيل ....تعشاو و عمرو الكريشة و جلسو مكملين الهدرة... حلا كانت تتضحك مع صفاء و حطات يديها على فخض عبد الصمد و بتلقائية نزل يديه على يديها تيلعب بالخاتم فصبعها....و عيشة الغيرة رجعات ليها من جديد ...بقات غطرطق ! حبساتها عندها و شافت فسكينة....
_ سكينة فتح الماريو جيب داك الخير ....
فهمات سكينة شنو المطلوب و ناضت تنفد....فتحات ماريو عيشة و جبدات كولي ذهب ثقييل و غالي و لكن مازوينش ! عطاتو لعيشة و صفاء و حلا متبعين العين....
عيشة ( هزات نيفها تتشوف فحلا ) ها ديالك اهالة ...عطيت بحالو لمراة ابراهيم و مراة سعيد و مراة عيسى ومراة عبد الصمد ديالي تا هي ماشي من الاصول نخليها بلاشيي....
حلا ( شداتو من عندها من عندها تتبسم غي فتحاتو و شافت الكولي وخا ماعجبهاش و ماشي ذوقها تصنعت الاعجاب بمهارة...)اواعدي شحال كيحمق ...شكرا بزاف اخالتي عيشة والله احسن كادو جاني شوف اعبد الصمد شحال زوين...
عبد الصمد ( هز حاجبو )ممم ذوايقية الالة عيشة .....
عيشة ( عاجبها الحال ) بزز يعحبا مالو مايعجبا وهو الدهاب كاين ماكيعجبوشي الدهاب ؟
ضحكو على كلامها كاملين و مانعسو داك اليلة حتى قرب يطلع الفجر و لالة فاتن فايقة معاهم قاتلاهم غوات و بكاء حتى تتهزها عاد تتسكت ....! غي طلع الصباح مشات حلا لدارها مع عبد الصمد و جايبة المساعدة تنظف الدار ...مشى عبد الصمد لشغلو و طلعات حلا مع ثورية لي فاتحة فمها حتى لودنيها فالفراش الفخم و الذوق العالي الكريستال و الرخام و الاثاث الكلاسيكي تيسرق العين....
_ حلا : بداي من البيت لي حدا الصالون عفاك باش نحط فيها البنت ...
ثورية : وخا هي لولة....
مشات ثورية تقضي شغلها و حلا بقات تتقلب فدارها واش دخل ليها شي حد فغيابها ... دخلات لبيتها تتدور فعينيها عليه بنظرة تفحصية مشككة...الفراش باقي مصاوب بحال مانعس عليه حد.. قبل ماتسافر قلبات المخاد و حطات رسمة المخاد لي تتكون الفوق رجعاتها التحت و حطات سندالة الحمام مخالفين و خلات السليب ديالها تحت غطاء الناموسية ...هزات الغطاء بيد وحدة تتاكد واش باقي تما لقاتو باقي تما و معاه ملابس عبد الصمد الداخلية حطو على ديالها بحركة مقصودة....! هزات حجبانها غالباها الضحكة.....
_ ولد الحمقة.....
اتصلت بيها حميدة علماتها عبد الله غيجي عندها... فرحات و وجدات راسها لاستقبالو ...تلاقاها بالضحكة و الفرحة باسها فراسها تيرضي عليها هاز حفيدتو...
_ مشاء الله على لالة فاتن بنت البحري ....
حلا ( فرحانة و عاجبها الحال حيت فرح بيها وخا ماشي اول حفيدة ) تتشبه ليا ياك ابابا.....
عبد الله ( تيسايرها ) غي حلا محطوطة سبحان الله ....
حلا : و شفتي قولها لالة حميدة التصاور حاحة و الواقع حاجة....
ضحك تيهز فراسو ...
_ يلاه نمشيو يماك كتستنى فيك.....
حلا : غادي نقولها لعبد الصمد و نمشيو...
اتصلت بعبد الصمد تتسول فين هو تيقول غي مشغول ماتيقولش بلاصتو فين بالضبط ...علماتو بلي غتخرج مع عبد الله ...و مشات تبدل عليها عندها دي غوب زوينين و لكن كلشي خصو يتبدل مع البنت ملي تبغي ترضها تيخصها تحيد و تيصعاب عليها ترضع بغوب سامبل و جاية مشدودة من القدام ...اختارت بنطلون كلاسيك واسع فالبيض و شوميز بالصدايف من القدام ديال الحرير فلون العسل...شعرها مطلوق مسبب بديك لاكوب تيبقى يغطي ليها النص من وجهها ....لبسات لفاتن الابيض و الغوز و جهزات صاك البيبي فيه حوايجها و البيبرون و لي كوش ولي بخودوي ديالها والمناديل المعطرة و المعقم...و عاد هزات صاكها هي مواتي مع اللبسة و عبد الله تيغوت برا...
_ حلااا و حلا ينعلها قاعدة فيك ابنتي....
زربات حلا و خرجات لعندو معافرة مع الصاك...
_ و هانا هانا....هز معاك صاك فااتن ابابا.....
هز ليها الصاك و هبطات معاه التحت ركبات اللور على حساب البنت و شد الطريق للفيلا كان استقبال بالحليب و التمر و الورد و الدقة المراكشية تصدمات حلا و عينيها تبسمو ضماتها حميدة تتبوس فيها و تبوس فحفديتها فرحانة.....
هزاتها من عند حلا و دخلو الداخل لقات نسيم و خلود و جلسو تيضمو بعضهم موحشينها ....! عمارت الفيلا عند حميدة لي ماتتحس بيها عامرة حتى تتكون حلا فيها وخا يكون معاها ولادها كاملين و حلا ماكايناش صافي الفيلا خاوية عندها ..... فرحات حلا بين حبابها و المباركات و صداع الداري الصغار و كلشي تيقول حميدة تبارك الله عندها اربعة حفايد بنات و حفيد واحد ولد و مابايناش فيها ومن هاد السيرة جبدو رضا و مراتو و بداو يتسولو علاش ماتتولدش و النميمة عاطينها قتلة ....!
جلسات معاهم نهار كلو و عبد الله فرحان ببناتوو ...عطى الكادو الولادة لخلود و لحلا....اونسومبل ديال الذهب ليهم بجوج داكشي ديال الرفيع اربعة مليون لوحدة فين ماتولد شي وحدة من بناتو تبعطيها كادو ...نسيم عطاها جوج مرات و لكن ديالها كانو ناقصين على اربعة مليون اما خلود و حلا جاوه فوقيتة الفلوس موجودة برعهم ...و حلا تقول عمرها شافت الدهب فرحات بيها و لبساتتهم تتضحك...
_ اول مرة ابابا تعطيني شي كادو غالي هكا ....
عبد الله ( ضحك ) شوف نكارة الخير ....فيزا لتركيا و لاسبانيا جبتيها من جيبك ....
حلا ( الضحكة مضوية وجهها ) و سبحان لي ماينسى ...خصكم تهلاو فيا جيت من الموت داز عليا صعيبة بزاف.....
نسيم :ههههه و لي تلاقيتيه قولها ليه كتبيها نتي فوجه بنتك حسن لي يشوفها يعرف. ماماها تعدبات باش ولداتها ..انا بابا خصني نتقلق هوما عطيوهم غلى من ديالي الفرزيات زعما.....
ضحكو و الدنيا عندهم منورة....دارت حلا و خلود سبوع مشروك فقصر الافراح بالعمارية عرس مغربي على حقو و طريقو و حلا اول مرة تطلع على العمارية و كتاب تطلع هي و بنتها لابسين بحال بعضهم و التاج و الضحكة من الطرف للطرف و الهدايا لي جاوها من معارفها و كلياناتها و معارف عبد الصمد بلا حساب ..بنية قد القميلة و جمعات صندوقة ديال الدهب و الهدايا الفخمة...نسيم جابت ليها كتاب عن الامومة و النصائح و غوب ليها و لفاتن بنفس اللون و الشكل و رضا حتى هو جامع الحجبان و منفخ عطى الكادو لخلود و لحلا....! و عاد جات حلاوة عبد الصمد و عطى لحلا الدار و القهوة و نسبة من الرياض بعقد بيع تصدمات و ماتوقعاتهاش فرحاات حتى بغات الفرحة تخرج ليها من ودنيها ....!
جالسين فالجردة هي و نسيم و خلود و حميدة ...جلسات بنتها فحجرها حاضية معاها مبرزطة...
_ ماعرفتش شنو عندها مع شعري...
حميدة : و حطي البنت حطيها احلا غتولفيها الهزان غتوحلي معاها و غتندمي ..
حلا ( تتلعب فشعر بنتها و تتشم فيها بحب ) خليني الا ماهزيتهاش انا شكون يهزها....تيعجبني نهزها...حبيبة ديالي انا ....
حلا ( فرحات ) معلوم تشبه ليا ؟ انا لي والداها لمن بغيتي تشبه لعيشة ؟؟
نسيم : سعداتك مزال عندك الخاطر....ردي بالك لا تحملي بحالي و البنت صغيرة ! كديري الاحتياط ...
خلود : خليها اختي تولد ...تحمع ثروة مع راسها غا بنت وحدة ولات تتضرب ليك الحطة بزبابل الفلوس ...
حلا ( عينيها تيبان لونهم زوين مع الظوء ) وخا يعطيني 100 مليون مانزيدش نولد دابا بحال القنية نبقى غي كنولد و نضيع صحتي و مايبقى عندي الخاطر لحتى واحد فيهم...اللهم وحدة نعطيها من جهدي و نلقى وقت لراسي ....
حلا ( حيدات الشعر من على وجهها مبسمة ) ماسولتونيش و ماقلتها لحد من غير ماما....قلت حتى تسولوني و نقول ليكم نتوما....
نسيم( ابتسمت ) : شي مازيراتي زعما ؟
حلا ( ضحكات )لا ...عطاني الدار و القهوة فطنجة و كل شهر غيبقى يوصلني حقي من رباح الرياض ديال شفشاون ...( هزات حجبانها ) بعقد البيع نبيع ولا نكري ولابغيت نعطيها كاع تنتصرف فيهم كي بغيت....
خلود ( باستغراب ) هاي هاي عندك غا تقلبي على السيد ويطلع ليك فالراس ...
حلا ( تتبوس بنتها كل شوية تتضحك ) و حتى لا بغيت زعما نطلقو تيبقاو ديالي ماعندو حق فيهم....اصلا مابقى تيقعني حتى واحد من غيرو ياك اماامي ...بابي زوين....
حميدة ( ضربات يد على يد تتضحك ) و سبحان الله مبدل الاحوال.....
نسيم : و دابا شنو ! غادي تبقاي جالسة فالدار ! ماعندكش شي فكرة على شنو غديري ؟
حلا ( هزات حاجب ) الفكرة كاينة و شلا افكار ...باغية ندير معرض القفاطن و التكاشط و الجلالب يكون كبير و عاطي العين و لكن انا باغية مدرسة ولا سميها حسن محمع نسوي ...شي ارض كبيييرة ديال شي فيلا ندير حمام و سبا و اي حاجة متعلقة بالمراة ...و ندير جناح خاص بالاطفال مع المربيات باش الوحدة ملي تجي ماتبقاش تخمم لولادها مع من يبقاو و كدا ...تجي تبرع راسها وولادها محضيين غندير فيها بزاف د الانشطة و لي سرفيس....لي بغى يتعلم الخياطة والطبخ و الاتيكيت و البريستيج و الرقص الشرقي و الزومبا....
خلود ( بدهشة ) زوييين و لكن خصك فلوس صحيحة احبيبة ديالي....
حلا ( تتضحك ) و عارفة والله ماكرهت نديرها.....و زيد راني فكرت و عاودت مانقدر ندير والو هاد الفترة ماغاديش تعوض و مانقدرش نخلي بنتي وهي صغيرة و نفكر فمشروع بالي مغيكونش معايا....حاليا وقتي كلو لبنتي حتى تكبر شوية.....
حميدة ( بنظرة رضى ) هكاك الله يرضى عليك تهلى فبنتك و شي لاخور عندو وقتو....
فاتن تحيدات ليها اللهاية و طلقاتها للغوات فارعة الدنيا ...رجعاتها ليها حلا تتضحك و تلعب فشعرها وتقاد ليها البونضو ديال ديور مرخوف شوية على راسها و لي تيجي يبوسها ولا يهزها تيعقم يديه هو لول تتقولك بشرتها حساسة تتخاف عليها.....عبد الصمد و دايراه ليه كثار من هكا بعض المرات تتشوفو تيدير صبعو ففمها تتمصو تيبغي عقلها يخرج ....!
حلا ( متكية حداها تتضحك ) و هاهي معاك تهلاي فيها نتي....الحمد لله مانفراتش ليا الرضاعة....
عيشة ( تتهز نيفها بفخر ) سبعة د العيال و حتى واحد فيهم مانفر رطاعة ديالي كاملين رطعو...
حلا ( هزات حجبانها ) سبحان الله ...عبد الصمد حتى هو ؟
عيشة ( تنفخات ) و شنووو! عبد الصمد كان يسمح فلعب و يشوفني يجي كيجري لعندي باش يرطع وخا كان عندو ثلاث سنين لاصق فيها بحال العلقة و خا مابقى حليب من ليل ليل كيجي يخشي يدو فصدري و يطبطب عليها عاد ينعس قاعدة فيه مابدلا حتى عمل سبع سنين.....
حلا ( بدهشة ) اوييلي ! سبع سنين كان كبير....
عيشة ( غوبشات ) و عشقو على من جاه.... مالو كيفاش شفتيه دابا ! راجل و سيد الرجال نقص منو شي يد و لا رجل ....
حلا ( تفكرات كلامو ملي قال عمرو داق رضاعة مو كي دايرة حبسات الضحكة و ردات ) لاا لا عادي انا غي كنهدر و صافي.....
عيشة : غدباتو معانا !
حلا ( شاف فالمكانة فيديها ) نوو شي واحد من معارف عبد الصمد عندو سبوع لبنتو و معروضين ...خصني نمشي نوجد راسي على بكري ...
عيشة ( بقلق ) و حضي معاها عنداك الفرفارة تلهى مع المهاودة و الحضية و تنعسى العايلة ! حضي معاها من عين بنادم كيبقاو يشوفو فيها فحال عمروم شافو العايلة صغيرة.....
حلا ( هزات صاكها وصاك فاتن و سوارت الطموبيل ) كوني هانية غي هني بالك....غدا نديرو شي دويرة فطنجة نشوفو الجديد ...شحال ماخرجنا انا و ياك....
عيشة ( هزات نيفها ) ممم دابا نشوفو ...
مشات حلا لدارها و جلسات تتقاد وجهها و شعرها...لبسات جلابة د الحضور شيك و معمرة العين...لبسات ساعة ذهبية رفيعة و خاتم الدياموند و صاك أنيق مع الجلابة ...! لبسات لبنتها و هزات الكادو وركبات مع عبد الصمد ...! وصلها للفيلا فين كاين السبوع كانو النساء بوحدهم و الرجال بوحدهم....تبعات حلا المراة لي استقبلاتها بابتسامة واسعة تترحب بيها و تعاود قربات تزغرت...
_ مرحبا و الف مرحبا بمراة عبد الصمد ....
حلا : بارك الله فيك شرف ليا الحاجة.... مبروك الحفيد الله يكبرو فعز باباها و ماماه....
الحاجة بقات تتبسم معاها و تكبر بيها فرحانة حيت جات ...رافقاتها للمجلس و غمزات لبنتها تكلف و ناضت البنت عندها تترحب و تعاود...و غي قشعات خولة حتى هي كاينة فرحو بجوح و جلسو حدا بعضهم تيضحكو...
_ ماقلتش غتجي .... حسن ماتنعرف حتى واحد هنا...
خولة ضاربة جلابة د الفريع و حجاب عادي ساترة بيه شعرها ماكاينش الرجال معرية وجهها ...
_ حتى انا كنعرف غي شي وحدين قلال و صافي ...كيفاش جاتك التربية شوية ؟
طالت الجلسة و هذا تيفوح على الاخر بزينو و بذهبو ....كانو تما نساء تيقطرو بالزين و اغلبهم نساء البزنازة شي زين عمرك تشوفهم فشي بلاصة ....العين تتنقل من وحدة لوحدة...و حتى خولة و حلا خداو حقهم ...خولة لي يشوفها مايعقلش عليها...زيانت كثار من قبل ولات تتلبس غي الغالي و الرفيع ...قدام الرجال ساترة راسها ماتيبانو فيها غي العينين و قدام النساء معرية زينها و تتلبس حتى هي على شهوتها دايرة معارف مع بزاف د النساء و صحابات ...و حلا اول مرة تحضر لشي حد من معارف عبد الصمد تتحس كلشي تيشوف فيها و يحضي فيها و فالبنت و تيهدرو فيها....و حتى هي تتزيد تبسم حتى تيتعلاو خدودها و شعرها تيتحرك معاها بديك لاكوب مادايراها حتى وحدة بحالها تما ...كاملين ها السالف مطلوق زعر ولا كحل و لا ساترة شعرها بالحجاب....!
و من دوك العيون لي كان تيحضيو حلا كانو عيون فلون القهوة تيتحركو مع تحركات حلا وتتعبرها من راسها لطراف رجليها كانت صديقة العائلة شعرها بلون الفحم و سميمرا فوجهها و زوينة لابسة جلابة فالنواغ انيقة دايرة رجل على رجل و سيقانها تيبانو من فتحة الجلابة....! عاقت حلا بشوفاتها ليها و تصرفات عادي تتبسم معاها و تقلب وجهها...تتهدر مع خولة بين سنانها....
طيلة الجلسة و بال حلا معاها ...غي تتحصلها تنشوف فيها تتقلب عينيها و تضحك مع لي حداها....بقاو هكاك حتى خوات البلاصة جنب حلا و عمراتها مولات عينين القهوة...غي جلسات جنبها دخلات مع نيوف حلا ريحة شعرها زوينة. .
شافت فيها حلا بنص عين حاضياها كي واحلة مع داك السالف و السيقان بيضين وخا بشرتها قمحية و الدفار مصاوبين و الاناقة تتقلب العينين....رسمات ابتسامة واسعة تتحاول تجبدها...
_ ريحة شعرك زوينة ....
شافت فيها البنت كانها ماتوقعاتش تهدرها...و ردت...
_ شكرا نتي لي زويينة....
حلا ( بكدب ) سبحان الله ديجا شفتك فشي بلاصة و ماعقلاش...بحال تنعرفك...
البنت : بصح ؟ انا ياسمين و نتينا حلا ياك تنعرفك و لكن نتينا محال واش كتعرفني ...
حلا ( هزات حاجبها بنظرة جميلة ) و شفتي صدقتي تتعرفيني و انا لا...عرفيني بيك الالة ياسمين سبحان الله كاع صحاب هاد السمية عندي عزاز و تنتفاهم معاهم بزاف...
ياسمين ( بنظرة باردة مرت من عينيها ) انا طليقة راجلك عبد الصمد ....
العافية طلعات مع حلا شواتها مزيان اخر حاجة توقعاتها كتمات ديك العافية وحافظات على ابتسامتها المزيفة و حاجبها مرفوع بحال الموضوع عادي مولفة بيه ...
غيرك ما يحلالي الجزء 25
محتوى القصة
صبحات شميسة و وجه نسيم تيظوي و منور كثار من ظو النهار....لابسة بيجامة أنيقة مستورة شوية وزوينة...شافت راسها فالمراية و تفكرات هدرة خلود هادي شحال...
_ بيجامة زوينة و كتحمق و انيقة اه و لكن هاذوك خلييهم لبراني عاد لبسيهم دوري بيهم قدامهم ...قدام راجلك زيري و عري ....
مشات تتقلب على بيجامة اخرى عندها مستفين فبلاصو وجدة و نقين و حدا لعضهم اشكال انواع و الوان ....ختارت وحدة فالابيض و النواغ شورط و الفوقي ديالو لبساتها و زيرات ليها على الفخاض و الصدر و درعانها عريانين طلقات شعرها و خرجات كدور فالدار مبتسمة...يحيى خرج لخدمتو فالصباح...ناضت دارت ليه الفطور و رجعات تنعس ...حتى فاقت دابا و جمعات الدار و الروينة و مشات فيقات الولاد فطراتهم و دوشات ليهم و لبساتهم حويجات الدار طالقة ليهم فين يلعبو و مفرشة ليهم العابهم حاضية معاهم....حتى تهز تليفونها على اتصال يحيى ...هزاتو مبتسمة و ردت عليه...
_ الو يحيى....
يحيى : الو فقتي ...
نسيم : سي قبيلة....الا كنتي غتعطل نهز الولاد و نمشي نجلس مع ماما شوية...
يحيى : داكوغ وي غنتعطل شوية نقدر نكون مع العشاء و نقدر نو....سينو بقاي مع ماماك ....
نسيم ( بدفىء ) الله يعاونك بسلامة...
حطات التليفون تتلعب مع ولادها ضاحكة و المورال طالع للسماء....حتى مع العصر اتصل بيها يحيى علمها تفتح لصفوان ...سترات راسها و فتحات ليه مبتسمة...سول على الاحوال و شاف ولاد خوه فرحان محمل بالتقدية و الالعاب و الحوايج ....و عطى لنسيم كرطونة فالاصفر فيها علامة لوي فيتون و بواطة اخرى صغيرة فالنواغ ...
_ هاذو ديال يحيى....صردهم ليك معايا ....
نسيم ( بابتسامة ) دزتي على طنجة ههه شكرا....جلس تغدا معانا ...
مابغاش يجلس حتى دقيقة حيت معروض لعرس غي خرج ...جلسات نسيم مبتسمة تتفتح الكرطونة لقات فيها صاك من لوي فيتون أنيق و متسوط الحجم و فيها منديل ديال الحرير عليه علامة الماركة...و معاهم اوراق و بطاقات خاصة بالحقيبة....فتحات البواطة لقات فيها مكانة د اليد نقرية صافية فيها الحجيرات تيلمعو زوينة و تتجي انيقة فاليد .....لبساتها فرحانة بيها و خلاتها فيديها خدودها طالعين بابتسامة منورة و عينيها ضاحكين....
صورات الساعة فيديها و صرداتها ليه فالواتساب حايرة شنو تكتب ليه ....بغات تكتب ليه شكرا و حيداتها ...حتى زعمات كثار و كتبات ليه...
_ كيف جاتني.....
بقات جوج دقايق حايرة تصيفط ولا لاء و اذا خلى ليها في شنو غدير....! و الا قمعها.....ضغطات على راسها و صيفطاتها ليه و حطات التليفون ...
لبسات عليها و دارت بحالتها مزيان عندها الخاطر و تتشوف راسها زوينة وطايح عليها السر ...لبسات ولادها و مشات خرجات الطموبيل من الگراج لقاتها عامرة بالبلاستيكات و الشكلاط ...
_ شفتي أزهار...كنقولك اماما ماترميش داخل الطموبيل عطيني ليدي اماما ليدي انا نرمي ...عمرتيها بالزبل دابا ....خودي مونيكة ديالك نسيتيها هنا ...
أزهار ( تتطل براسها ) ماسي انا ماسي انا أمير امامي ...
نسيم : وي وي امير عرفتو امير.....يلاه طلعي ( حمرات فيهم عينيها ) ممنوع ترميو الزبل داخل طموبيل ممنوع كتسمعو عطيوني ليديا ....
أزهار عوحات فمها تترمش و أمير حنى راسو سمعا و طاعة تيخاف منها ملي تتحمر عينيها...
_ اوك مامي....
مشات عند حميدة لقات عندها الدار عامرة بالعائلة ووئام العروسة جالسة مدلية شفايفها تتبكي...
_ نسيم : ويلي مالها وئام ...
حميدة ( تتهز فراسها ) زواج البريكيتوس خلاها عبد الله....كتبكي قالك ندمات علاش تزوجات مابقاش عاجبها زواج تخاصمات مع يماه...
خلود ( تتهز فراسها ) و لحقتي تكرهي الزواج ابنتي من دابا ...كملي غا عام جات معاك....و قالتها ليك حلا و مكتسمعيش و كمديها عندك دابا و سكتينا.....
قربات نسبم من وئام ضماتها لعندها وهي زادت فالبكاء و الشهيق ...بقات فنسيم
_ وعلاش كتكبي تخاصمتي مع ماماه نضتي تبكي ! عاودلي شنو وقع....
وئام تتعاود و تشكي و شي حوايج تافهين وهي تتبكي و تشهق عليهم...سولات نسيم بشك..
_ ياكما حاملة....
الخالة ( ضربات وجهها تتولول ) ها لي كان ناقص ...انا خصني الحبس لي نضت زوجتها حصني الدبيحة البرهوشة بغات تموت الا ماتزوجاتش قالتلك.....
خلود : نسيم شدي غرام حداك عندها طيح ....
شداتها نسبم عندها تتبوس فيها و تضحك راشقة ليها...و داك الساعة تتبري فيديها غا تتشوفها تتزيد تبسم و تفرح...
_ خالتو ....تكوني عروسة ولدي نزوحك لأمير ديالي اخالتو....
شافتها أزهار عازة غرام رمات المونيكو من يديها ووجات لعندها تتجري تتغوت ووتبكي ووتقيم الحيحة حتى طلقات ليها نسيم عاد رضات لالة أزهار....
جات حلا وصلها عبد الصمد حتى دخلات عاد مشى...جاية تتعوج ففمها كارهة تشوف كمارة رضا و اول مرة تحط رجليها هنا...داحلة هازة نيفها للسماء و الزين كانت زينة و مع الحبالة دازت زيانت كثار بالاهتمام براسها و عشقها لوجهها ...تلاقات مع وئام تسالمات معاها عادي و جلسات ماعاودات تدخلات فيها ولا سولاتها ولا قالت ليها شنو عندك شداات فمها عندها ساكتة لي سولها تتجاوبو حلفات لابقات تدخلات فحياة شي حد ....حتى مشاو بحالهم العائلة و بقاو غي الاخوات و حميدة و حنان ...و حلا قلبها حكها كثار ملي عرفات رضا شرا الدار و بدل الطموبيل ثاني ...بقات غطرطق و عينيها وساعو و حمارو تخنقات....و كملات كثار ملي شافتو داخل تبدل و زاد عمار و صحاح و ساعة فيديه تتقوليها ها انا من بعيد تيلعب فالسوارت.....غا شافها عقد حجبانو و قلب وجهو طالع لبيتو حتى نطقات هي بغيرة نفس الجملة لي ولات على فمها تتمعن عليه و تقلب فعينيها....
_ أوونكي لا مونا سي فيسطا دي سيدا ..مونا سي كييدا.....
هزات نسيم عينيها فيها بالزربة هي و خلود و رضا كان طالع غي سمعها شنو قالت طار لعندها مجعوور...
_ عاودي شنو قلتي !
ناضت حميدة مخلوعة تتجرو و حلا مخرجة فيه عينيها...
_ قلت اسيدي تيقولو لامونا وخا تلبس الحرير غتبقي قردة سمعتو و عجبني و عاودتو ...مالك مخرج فيا عينيك تندوي على مونا ؟ نتا مونا..تتشوف راسك تتشبه ليها ..
رضا ( استفزاتو ) هبطي عينيك ...جمع عينيك و حكم لسانك احلاااااا....ماشي مدوخ و ماعارفش شنو تحت راسك و تبوهيل ديالك محفوظ عندي....
حلا ( ببرود ) كول البنان فرح راسك شوية....
شهقو البقية و حميدة طارت داخلة وسطهم تتفك و رضا بغى يطرطق حالف حتى يضربها مابقى تيفكر فوالو ...
_ حيدي الوليدة نربي الكلبة....نضرب الكلبة حتى تشوف نجوم النهار.....
حلا ( حاضنة كرشها ودافعة الجبهة ) كاين شي كلب قدك ...
غفل حميدة جرها من شعرها جمع معاها بتصرفيقة حتى دار وجهها و غوتات مصدومة ...و حميدة تتغوت و تبعد فيه و نسيم و خلود و حنان كيدرقو حلا و يسكتو فيها وهي تتسب و تدفل عليه تتخرج ليه عقلو ...حتى دخل عبد الله مع عبد الصمد و سمعو الغوات ونعيمة استقبلاتو مرعوبة...
_ سي عبد الله عتق عتق سي رضا كيضرب حلا....
دخل عبد الصمد بالزربة تابعو عبد الله تيجري... شافو رضا تيجر شعر حلا وهي تتغوت و تحامي بيدها و تتزيد فاابكاء و الغوات كثار من القياس .. عبد الله جر حلا لعندو مخلوع و عبد الصمد طار على رضا جرووو بغضب من القميجة تيدوي بين سنانو و صوتو مجهد ....
_ علاش ماد يديك عليها...شكون عطاك الحق جبتها ليك لهنا تضربها....
رضا تخلخل و الاعصاب عماو ليه عينيه جمع مع عبد الصمد ببونية تيغوت و كلشي فاتح فمو مصدوم من الكارثة و عبد الله حس براسو غيسخف ...
_ ختي كنربي والديها مامربياااش....ختي هاديك بعد يديييك....
الضربة لي عطاه هاديك لي كانت ناقصة وجات مع عبد الصمد نييت ظهر فبه الجانب الهمجي البربري ناسي الاصول فدار النسيب اخر همو جمع مع رضا بضربة من راسو حتى رجع رضا اللور تيغوت خلى نيفو كيزرور بالدمايات شداتو الدوخة....عبد الله بقلب ضعيف تيجر و يفارق و حميدة و حنان جراو عند رضا تيبكيو ..قامت القيامة للمرة الالف فداك الفيلا و غوات عبد الصمد مسموع وهو و رضا باغي ياكل الدنيا و عبد الله وجهو ولات صفراء عار و مصيبة جاتو هبطات ليه الراس...ولدو ضرب بنتو لي حاملة و مزوجة و راجلها شهد على كلشي قمة العنف و الجهل مشات التربية و مشو الاصول لي تيحاول يكبر ولادو عليهم....تهز عبد الصمد تينهج معصب و جر حلا من يديها تتبكي باغين يخرجو و عبد الله واقف ليه فالباب راسو تقسم على جوج تيشوف نسيبو و ولدو مدابزين فوسط دارو غراق بلاصتو و تعصب ...عبد الصمد جاتو من الجنةو الناس داك الضربة بحال عطاه الظو و عبر بالطريقة لي تيعرف ليها و ينعل بو اصول و فصول ...! مابغاش يسمع لعبد الله خرج من الفيلا و معاه حلا و مشى عبد الله تيغوت على رضا وجهو حمراء و عينيه مخرجين غيطرطق بالاعصاب و الشوهة ...جر رضا لعندو تيغوت و الفيلا تزلزلات بغواتو ...
_ قلت ليك قبل ختك ماعندكش الحق تضربها ماتضربش ختك مزوجة فين عقلك فين عقلك خرجتو عليا ماعرفت نربي الله ينعلها تربية الله يقطع ولاد بحالكم علااش هادشي قولي علاش ( عينيه كيغلييو كيدوي بلا عقل ) تضرب ختك قدام راجلها و حاملة...شحاال هدرت معاكم احتارمو راسكم و حتارموني و حتارمو يماكم الكلاب الهجيج تفووو ينعلها تربية ينعلها تربية ماربيت والو....علاش على قبل التجارة و الاملاك ! و اسيادي ماعندي ولد انا و ماعندي بنت سميتها حلا....من دابا فوق عندي جوج بنات خلود و نسيم نتوما مكنعرفكمش رزقي كامل غنكتبو عليهم ماتورثو مني حتى بسيطا وحدة.....اتفووو...
طلع بحالو تينهج حس بالموت و وجهو رجعات حمرا تخنق و تعصب ...مخلي العيون مفتوحة التحت و رضا بغى يحفر تحت الارض و يطمر راسو فيها.....
الاخبار داعت و العموم و اخوات عبد الله و كبار العائلة تدخلو يفكو الخلاف ..رضا صعر و مارضاش و بقى فيه الحال هدرة جوج تيجبد الورث مالورث و حلا وصلات ليها الخبار معوجة فهمات بلي باها سخط عليهم هي و رضا ...سخفات بالبكاء و الغوااات و عبد الصمد حلف فيها تعتب لتما ... تتدوي مع خلود فالتليفون تترعد و تشهق باغية تسطى بالبكاء...
_ سمعني...سمعني فينو بابا. ..قولو يهدر معايا اخلود ..قولو يجاوبني انا مابغيت والو ماخصني لا درهم لاجوج انا بغيت بابا يسمحلي مايعضبشي عليا قلبي حرقني غتسطى....
خلود ( بالغوات ) وبابا معصب غضبان بلا ماتهدر معاه دابا حتى يبرد و نتينا كتعرفو بابا غي كيهدر و يخبز فالهدرة ملي كيكون معصب حتى كيبرد كيندم راه بابا قلبو حنين نتينا شحاال كان كيحلف فيك و كان غيزوجك بزز و حلف عليها و فالاخير صام ثلاث ايام و ماسخاشي بيك ...واش مكتعرفوش ولا شنو...
حلا ( تتمسح عينيها من الدموع ) وقولي شنو قال كيفاش قال واش قال ساخط عليا ولا شنو....ماشي شغلي وخا حلف فيا عبد الصمد غنمشي الراجل يمشي و يجي الف واحد غيرو و بابا عمرو يتعوض....
خلود ( بغضب ) و تكمش فدارك و بركة من البكاء فاهمة كلشي مقلوب ماسخط عليك ما والو غي معصب و قال ماغتورثو من وراه حتى سنتيم و غيكتب كلشي ليا انا و نسيم ...شوف شوف سمعني احلا...بابا ماباغي يهدر مع حتى واحد دابا و غي سمعني خليه حتى يبرد و هدر مع عبد الصمد فهمو شنو كاين و ديك الساعة اجي هدر مع باك غيكون برد طلب منو السماحة راه بابا عندو نتينا عزيزة مايشدش عليك بزاف....و عندك تبقى تخبز فالهدرة قدام عبد الصمد غتبقى لا باك لا راجلك خدم عقلك و باركة من البكاء غندوز عندك فالعشية تهلى فراسك....
قطعات عليها و بقات حلا جالسة يديها تحت حنكها تتبكي و تمسح فخناينها قلبها تيحكها كانت غتحماق حساب ليها سخط عليها...لو خيروها بينو و بين الاملاك غتختارو هو باباها على اي حاجة فهاد الدنيا وخا تتموت على الفلوس و التجارة و الاملاك داك اللحضة مافكرات فوالو من غير غضب عبد الله يكون غالط فحقها و لا ماغالطش ماشغلهاش تيبقى الاب ديالها و كان تيحن عليها كثار من حميدة نفسها.....
صبرات ديك العشية تتنهد و تسهى البكاء ولات على سبة و كلشي تيضرها فقلبها و تيبقى فيها الحال بالجهد و لي تيوقع ففترة الحمل عمرو يتنسى ليك من بالك و تيبقى محفور فعقلك كا مزيان ولا عيان كلشي تيبقى مرسخ ...جات عندها خلود بقات تتوانسها و تواسيها شوية و صاتها تهدر مع عبد الصمد دوزات نهار و ليلة تيتناقشو و يتغاوتو فهاد الموضوع حتى وصلها بيديه و دخلات للفيلا عند حميدة لي شادة راسها غيطرطق بالحريق...
حلا : فين بابا...
حميدة ( معصبة ) بقيتو حتى طيحتوه فالفراش باغين تقتلوه و تهناو فخطرة...
طلعات حلا فالدروج بوجه مصفر ...دقات فباب فبيت عيد الله جوج دقات حتى لحقات عليها حميدة تتنهد...
_ ماكاينش تما ...جالس فالمكتبة.....
حلا ( تعصبات ) و قولها لي من الاول علاش نطلع حتى لهنا اماما بلعاني ولا شنو....
رجعات هبطات حاضية مع الدروج و مشات للمكتبة لقاتو جالس تما فالبيرو تيشوف فشي وراق ....غي شافها عقد حجبانو. ..
_ باغية شي حاجة نسيتيها هنا ؟
دخلات حلا لعندو حابسة البكية...
_ علاش غضبان مني ابابا شنو درت ليك انا ....
ماجاوبهاش و رجع تيقرا فالوراق حتى غلبوها الدموع و طارت لعندو مدرعاه تتبكي و تبوس فراسو و فيديه تترغب...
_ سمحلي ابابا سمحلي غي هاد المرة ماتبقاشي غضبان عليا مانقدرش نعيش مرتاحة مانقدرش نصبر سمحلي انا مابغيت لا فلوس لا دار لا املاك انا بغيتك غي تسمحلي و ترجع تهدر معايا بحال قبل مابغيت والو...
عبد الله ( عينيه مدمعين ) نتوما ماترباتو حتى نتغطى بالتراب...ماعينيكم لا فبالكم لا فيماكم ماتحتارمو حد شحال نغوت و شحال نحيح و نبه عليكم و شكون سمعني فيكم....باغين تقتلوني عاد ترتاحو ماربيت والو لا نتينا ولا رضا مامربينش....
حلا ( درعاتو تتبوس فراسو تتبكي بالجهد ) الله يستر انا بغيت نموت قبل مانشوفك ميت ...مانقدرش نعيش الا مشيتي نتينا شكون غيبقالي الله يزول من عمري و يزيد فعمرك نتينا ابابا ....سمحلي الله يعطيك ماتمنى سمحلي و رجع معايا بحال قبل انا النعاس مابقيتش كنشوفو نصبر على كلشي الا تغضب عليا و تكرهني ماكيحن عليا حتى واحد من غيرك.......
طاحو دموعو صحاح وهي تتبوس فيديه و فراسو وتتبكي بحرقة تحنات تبوس ليه رجليه و ماهمها حد هرب رجليه و دمامع هابطين من عينيه و هي بغات تسطى حتى طبطب عليها و جرها لصدرو تيبكيو بجوج وهي تتبوس فيديه....
_ ماتبقاش تغضب مني انا مانصبرش الا مشيتي نتينا و ماما غيضربوني الحيوط...رضي عليا ابابا يرحم باباك رضي عليا....
عبد الله : الله يرضىى عليك الله يسامح دنيا و اخرة نوض من الارض نوض الله يرضى عليك الله يرضى عليك....
رضى عليها و عاود و عاد حلى ليها تبكي على صدرو ... عبد الله رجل عاطفي و تتغلبو العاطفة بزاف و قرارتو متسرعة كل مرة فهدرة و دغيا كيتقلب على الواحد ...رضى عليها و برد ليها الحرقة فقلبها ...عاد تهنات و ضحكو عينيها مرتاحة.....من داك النهار عبد الله سامح ولادو بعد ماطلب رضى منو السماحة و حنى راسو ...من ديك اللحضة حلف لا بقى تدخل شي حد من ولادو فالتجارة ديالو ...كلف مسيرين جداد بعيد على العائلة و ثقة و مهدي حتى هو طلع درجة الفوق و زاد حتى صوفيا تيعرفهم سنين و ثقة ...و رضا قاليه باغي تخدم غنحطك بحال الغريب و غندير معاك كونطرا بحالك بحال مهدي و صوفيا و باقي العاملين.....رضا مارضاش و تزادو فيه جوج طلع ليه الدم و قاليه مابغيت خدمة معاك.....و مشى خرح داك الديبلوم ديال جيستيون لي عندو مغبر و حالتو حالة وخا يخدمو مايلقى خدمة و صالير و المستوى لي كان عايش بيه من تجارة باباه و ماشي من النوع لي تيرضى شي حد يأمر فيه و يحني راسو ....تعصب مزيان و تمرمد و طاح تيبيع فالطموبيل ديالو و تكلف ليه بيها يحيى حتى جاب ثمن مخير و مشى تسلف من عمو باغي يدير باتيسري .....
فكر حتى فقهوة أو فمطعم و كانو عندو بزاف د الاختيارات و راسو باقي داير و حاير و تيسول المهم الفلوس ضبرهم خصو غي يزعم....!
كانو جالسين تيتغداو فالريسطو ..خلود و نسيم و حلا أما حميدة و عبد الله دارو الراس فالراس و مشاو لطنجة يترومانساو مع راسهم ....
خلود كرشها باينة و حلا والو واش تقول عليها حاملة ...من الشوفة تعرفهم خواتات و بثلاثة بيهم زوينات و مسرارات و ذواقات بحال لالة حميدة....
حلا حاطة يديها على كرشها تتختار شنو تاكل و الثمن ماتضرب عليه حتى طليلة وحدة غا تتشهى عليهم تما .....
_ لاحظت فراسي رجعت كناكل بزاف و الشهية تفتحات ...
نسيم ( تتبسم مع التليفون تتدوي مع يحيى و مرة مرة تتجاوب ) عادي..دابا تجربي ملي ترضعي ان شاء الله كان تيجيني الجوع مع النص د الليل كنفيق كناكل....
خلود ( تتشوف فيها بنص عين مبسمة ) زوين هاد الصاك عندك جديد نوو...
نسيم ( بعفوية ) سي جابو ليا يحيى كادو تنا عجبني....
حلا ( تتشوف فنسيم ) و شوف فينا هدر معانا و نتينا كتفرنس مع التليفون مع من تتدوي !
نسيم تتكتب مبتسمة و السر نازل عليها ....
_ والو ..والو ...شنو طلبتو شنو غنطلب انا...فيا الجوع ....
خلود ( ضحكات ) وسعداتك الالة الله يدومها ياربي باين مع من تتفرنس.....فخباركم رضا تيقول غادي يفتح شي قهوة ولا شي باتيسري و لا ماعرفت شنو ..سمعت شي تخربيقة هكا....
حلا جات تدوي و فاخر لحضة جمعات لسانها عندها ضاربة الطم مابقات تجبدو ولا تسوق ليه...نطقات غي نسيم لي وصل ليها الميساح معطل تتجاوب و عينيها على التليفون تتكتب ...
_ مزيان الله يعاونو ...تنا قربت نفتح ديالي كلشي تيسر الحمد لله....
خلود : الله يعاونك احبيبة ديالي ...انا مافبالي والو دابا باغية غي نولد بخير و على خير و ولادي مزال صغار حتى يكبرو شوية و من هنا لتما خير ان شاء الله.....
نسيم : الله يفكك على خير و نفرحو معاك نتي و حلا ان شاء الله...انا تهنيت الولاد بداو يكبرو و يحيى مابقى سنى حتى كونطرا لبرا صايي دخل المغرب معاوني فيهم...نقابل حياتي و قرايتي شوية.....
حلا مربعة يديها تتنهد ساهية...لابسة تيشرت نواغ فيها كتبة فالبيض و بنطلون دجينز و رامية جاكيط على كتافها مالابساهاش ...تتشوف كل واحد فين تيبني و يخطط و المشاريع و البروجيات تيفتحو ليها الشهية ....الوقيتة كاملة وهي ساكتة حتى تحطات الماكلة و كلاو كل وحدة خلصات على راسها
مولفين كل مرة و شكون تيكون عارض لاخر و لي تيعرض تيخلص و مرة تيتافقو بثلاثة و كل وحدة تتخلص على راسها... دارو شوبينغ تصورو تصيورات دوزو وقيت مع بعضهم و حلا حاضية غي المغرب مزير عليها عبد الصمد و داير ليها قوانين جديدة الليل ماينزلش عليها برا...و الا ماغادي تخرج الا مع ماماه دوزات معاه يوماين غوات على هاد الخرجة مع خوتها باش خلاها....وصلاتها نسيم حتى لدارها و رجعات كل وحدة لحالها......و حلا غادية جاية فالدار ماعاجبهاش هادشي ماحاملاش الوجه لي عاطيها عبد الصمد و القلبة لي تقلب عليها...مايمكنش هاد التغير كامل ماعجبهاش الوقت كيدوز و ماباغياش تكمل اربع شهور وهي مادايرة والو باغية تحمع وراقيها دغيا ....تحلفات فيه مزيان و دخلات للبيت بعزم ...حيدات من عليها و لبسات شوميز دونوي فالݣرونة حيدات باباهم دوك الملابس الداخلية بقات بلاش ....تعطرات مزيان و تزينات و طلعات جالسة وسط الناموسية دايرة رجل فوق رجل تتلعب بالوردة فيديها كتستناه يدخل ..داخلة فتحدي مع راسها الا ماكلاتش ليه الدماغ ماتكونش حلا بنت حميدة...مابقاتش عاجباها هاد العيشة هكا و البرود من جيهتو واش مابقاتش تتأثر عليه ! مابقاتش تتبان ليه ..مولف يتنفخ عليها و دافع كبييير و معفر ....
دخل طالعة ليه القردة و حجبانو معلين ...رمى السوارت و دخل نيشان للبيت تيخرج تليفونو من الجيب....حتى لقاها جالسة ليه وسط الناموسية معرية السيقان تتشوف فيه بمكر و تلعب بالوردة فيديها...
_ ماحشوماش تخليني نستناك هاد الوقت كلو ...طلعات معايا البرودة و انا ملابسة و الو....
طلعها و هبطها ومشى للدوش تيتمختر فالمشية بدون تصنع خلاها تتعوج فمها ..
_ ولد الحمقة....
رجعات رسمات داك النظرة الماكرة فيه وهو خارج من الدوش ...هز تليفونو و تحى حداها بلا هدرة بلا جوج طاوي يديه تحت رقبتو و اليد الاخرى تيلعب فتليفونو ...شواها بالمهل و فرفرات بدوك الرموش بحال مونيكة....و رجعات رسمات ابتسامة و تقلبات لعندو تتهمس عند ودنيه بهمس انثوي حاطة جبينها على لحيتو يديها تيلعبو فشعرو و يدورو مع صدرو ....
_ شنو عندك اعبد الصمد بالك مشغول و غايب و مهموم حاسة بيك واش مشاكل فخدمتك ..عاودلي بالي تيبقى مشوش معاك...
ماردتش عليها زاد هز داك الحاجب تيشوف فتليفونو ..غرسات سنانها فشفايفها وتقدمات اكثر بدون استسلام....علات فخاضها على رجليه قالبة ليه وجهو لعندها بزز تتمسكن ...
_ شوف فيا كاره تشوف فوجهي حتى...لهاد الدرجة عرفتي ماباغياش ندوي على لي فات حيت ماباغياش نبكي ....وخا ظلمتيني و غنبقى نعاودها و نعاودها و ماعمرني ننسى شنو درتي فيا و لكن غنبرر ليك انا مستحيل نفكر فراجل اخور من غيرك كتفهم مانقدرش نديرها حيت اولا انا مربية و حيت مزوجة بيك عاد نشوف انا مع فداك المونيكو ماحاملاش نذكر سميتو ...( شدات وجهو بزز تتهمس عند شفايفو بمكر ) شوف فعيني اعبد الصمد شوف فعيني ...هذاك مايسوى حتى بصلة معفنة فسوق الرجال.....
شاف فيها جامع حجبانو ....
_ شنو باغية احلا.....
حلا ( باستو فجنب شفايفو بجراة و يديها على كرشو و ردت بهمس ) باغياك نتا ....ملي كنتي مسافر و سمعت درتي كسيدة عقلي بغى يخرج و ماكنتش كننعس و انا ماعارفاش شنو وقع ليك ماكانش حسابلي مربوطة بيك هكا....جاني الوحم عليك و مالقيتكش و ماقادرة ندير والو ..حيت قلبي كان مقهور منك و مقهورة على راسي علاش ماقدرتش نكرهك....
حرك شفايفو على شفايفها عضها فيهم و حجبانو معقودين...بعدات شفايفها حاضنة وجهو تتشوف فعينيه باغية تبكي و الدموع حلفو لابغاو يهبطو ملي حتاجتهم هربو ...
_ ضربوني الحيوط فغيابك مابقى تيهمني حتى واحد من غيرك نتينا و بنتنا ...داك المرة ملي قلتي داك الهدرة قلبي تفرتت اعبد الصمد...نقتلك و مانخلي مراة اخرى تشاركني فيك...( تلمسات شفايفو بصبعانها و مرة مرة تتفك العقدة بين حجبانو مكملة بهمس ) نتا ديالي ولدات يماك باش تكون لحلا ..ماكاينة حتى شي زبلاوية تجي بلاصتي.....
حط يديه على فخاضها العريانين مزير عليهم غمزها تيسول ببرود
_ دابا من لاخر علاياش كتقلبي ؟
الخبير لي كانت تتخبر عليه حساتو تبخر من داك البرود ...عصبها و جننها و قلباتها بالزربة تتبسم و عينيها فعينيه هبطات عند ودنيه و يديها هبطو التحت و حطاتها ليه بلا زواق و بصريح العبارة و بجراة عينيه تهزو و بانت فيه ...تما تأكدت هاد ولد الحمقة كيف ماسماتو ماتيجيش معاه المشاعر و العواطف...زير على يديها التحت مثبتهم بلاصتهم ....جا يهدر سكتاتو ...
_ ششش خليني نهدر انا ...
سالتة يديها و هزات ليه يديه دوزاتهم من عنقها حتى حطاتها على كرشها ....
_ خوي بالك من كلشي اعبد الصمد رديت ليك البال مريض و مهموم...رد البال لراسك على قبلي انا و بنتك مابقيناش ديال راسنا واش مافرحانش بيها...( تبسمات ) انا غنموت بالفرحة وكنستنى فوقاش نولدها ...
عبد الصمد ( هبط عينيه لكرشها بدفىء )بنتي مايبغيها حتى مخلوق كثر مني ..دم عبد الصمد البحري
تبسمات و عينيها كيبرقو فرحانة...
_ و كثار مني انا زعما ! شوف غي كنهدرو عليها و عيني دمعو ... نتا معايا قلبي كيضرب نتا ساكن فقلبي ( حطات ليه يديه فالجهة اليمينة ) قيس قيس قلبي اواعدي شحال كيضرب ...
عبد الصمد ( كمش على صدرها معلي حاحبو )قلبك زهق لليمين....
قلباتها ضحك مايلة عليه و عينيها كيبرقو ...
_ لااا اولد البحري ...هاذوك غي رجليك ماتساعوش فقلبي و ضربو تما .....
ترخفو حجبانو و ملامحو ترخات تيشوفها تتضحك ناشرة عليه زينها...تأمل فملامحها مزيان تيعجبو زينها وواكلة ليه العقل نيت ....جر ليها وجهها تيبوس فشفايفها بالجهد و يديه تحيدو ليها حوايجها ...دفعاتو حتى رجع تكى على ظهرو و رمات البينوار من عليها و طاح فالارض طلعات فوق منو مبتسمة من شوفاتو المفروشة تترقص باصابعها و مفاتينها على جسدو محنية عند ودنيه هامسة...
_فخبارك توحشتو و توحشو و توحشوك ...
زادت طلعات ليه السخانة للراس و هدرتها طلعات ليه المجاج و توكض و رخف دوك الحجان تيقيس و يشوف فمفاتينها و يعض شفايفها ملصقها فيه و تتزيد هي تحاك معاه و جلسات فحجرو مدورة يديه ورى عنقو جاراه لعندها فجراة كبيرة فوق المتوقع لا فكلامها و لا فحركاتها تتقولها ليه هكا بلا زواق ولا تلميحات هدرة مقزدة منو و عشرين منها و حركاتها كانو حاجة اخرى صدماتو وخا مابينش و تزادو فيه عشرة ...فين ماتيبغي يغطس تتجرو و تتضحك بصوت عالي ...
_ قولي شحال كان عندك ملي فطماتك ماماك...فوقاش قطعتي البزولة عام عاماين ثلاثة سنين....
لصقها فيه و كمشها عندو بحال الورقة مهيف عليها قال...
_ ماقسناش د***ها كي دايرة.....
سلتات ليه تتضحك و تدلل و تفشش عليه ...وخا صدرها كيضرها خرجاتو و خشاتو ليه ففمو يرضع.....سالات معاه و جهل عليها مزيان حتى ندمات و رجعات صدرها عندها تيحرقها ..ماخلاش ليها فرصة تسلت منو رجع ليها من جديد طايحة معاه في فراش الزوجية بجراة عمرها شافها منها حاولات تحيد داك الغوات و تشد فمها ووالو تتغوت بالجهد و تزير على شعرو و تقمش فيه و تعض رداتو حالتو و ردها حالتها يبقى يبقى و يرجع يغوت بسميتها و شي كلام تيخرح من اللسان بلا وعي و الحمل دايرين ليه حساب بجوج ممنوع يتماداو لديك الدرجة...كانت باغية تاكل ليه دماغو صدقات هي لي عقلها تتشتت ...نعسات على صدرو تتمرغ فيه وجهها بحرية عرقانة تتنهج وهو حاط يديه على فخاضها شحفان هزات راسها ثا تتبوس فيه و يرجع يبوس فيها حتى هو مفتون...
_ التحف ديالي ....
حلا (حنات عينيها بدلال تتقيس زغب صدرو بيديها تتفشش ) مابقيتيشي كتقولها لي ..توحشت نسمعها منك الحبيب ديالي....
تيتسارا بنيفو على وجهها فين ماقاس تيلقى الرطوبة و النعومة....حتى تيلقى راسو تيبوس فيها من جديد و تتعطيه حتى هي جالسة فحضنو بحال القطة فعرين الاسد هدرة جوج تتجبد ليه كندا و باغية نولد فكندا تيهز فراسو و يسايرها و تيقول وخا وخا كأنه بدا تيفكر فالموضوع بجدية و تيرجع يقوليها نتي باغية الجناح باش طيري تتحلف ليه بلي على قبل بنتهم اول بنت عندهم باغية تجي لهاد الدنيا و كلشي عندها موفر حتى الجنسية لتيحلم بيها اي واحد ...هز فراسو مخدر فيها و هي براسها عاجبها هكا و كانت طالبة عليها تتحس بانوثثها تحت يديه تتزيد تفشش و تبسم و تبوس فيه حتى هي عاجبها الحال ...رجع ليها مرة اخرى ناسي همو و مشاكلو معاها و رجعات ثاني للغوات ...طلقها سخفانة تيبوس فشفايفها و رقبتها وهي تتنهج تحتو تتحس براسها ولات دغيا تتعيى و دغيا تتسخف و تتعرق بلا قياس ...ضماتو لعندها سخفانة ..
_ عييت بزاف....( تصنعت الخجل و كملات ) كنستنى نولد طبيعي باش نقدر نقد عليه بلا حريق ...كنبغي نمووت باقي مامولفتوش اجي شحال كتوزن نتينا .....
تيحك لحيتو مع بشرتها ببطىء و
هدرتها طلعات ليه المجاج ....
_ الدجاجة ملي كتبغي تموت شنو كدير المشيشة ...؟
ضحكات سخفانة تتكمش عنقها.....
_ تتنقب هاديك هاديك ديال الكلب ....
متكى على كتافو محاصرها بيد وحدة راشقة ليه و منغم...
_ هاديك ؟! ...
حلا ( حطات راسها على صدرو تتبسم و ترجع تهز راسها تتبوسو فلحيتو و ترجع تكى عليه ) تتشوفني تنحشم...؟ انا ماباغياش نخسر الهدرة صافي خصني ندير عقلي غتولي عندي بنت فرحانة بيها بزاف ...و نتا ؟
خشى راسو فعنقها عينيه معسلين بالنعاس...
_ ياتشوفي لينا شي حل من دوك اليديدات لهاد الراس و يا سكتينا نريحو الدماغ.....
هزات ليها راسو تتبسم ..
_ غندلك ليك راسك غترتاح ...
تكى على ظهرو ...مشات حداه عريانة لبسات بينوار منو للحم و بدات تتقلب فالبلاكار ديالها على اداة تدليك الراس لقاتها و رجعات لعندو تتدلك بيه فورة راسو حتى ترخى و عجبو الحال مغمض عينيه ...تيبغي ينعس تتفيقو ..
_ لاااا ماتنعسش اعبد الصمد بقى فايق غنبقى بوحدي مافياش النعاس...
فتح فيها عينيه معسلين و رجع سدهم مخسر ...
_ ينعلها بلية ....
حلا ( تتفتح ليه عينيه بزز ) شمن بلية ؟ و فتح عينيك احبيب ديالي عفاااك بقى سهران معايا مافياش النعاس ....( حنات عندو تتدوي بمكر ) فتح عينيك نقولك واحد الحاجة...غتفيق و يطير عليك النعاس....
فتح فيها عينيه و كمشها ليها راسها عند صدرو تتغوت و تجبد معاه...
_ و طلق نقولك ...
لصقها معاه مابغا يطلق منها و خشى ليها وجهها فصدرو تيسكتها بزز باغي ينعس وهي حلفات لاسكتات حتى تقلب على كرشو خاشي راسو بين المخاد و مخليها تتشوف فيه تتقلب فعينيها....
خلاتو و ناضت دوشات وبقات كدور فالكوزينة فيها الجوع ...عمرات الطبلة مزيان و الشم ولى عندها قوي بزاف غي تتشمشم فالحاجة....جلسات دايرة رجل على رجل و سيقانها عريانين كتاكل بشهية مفتوحة و تشوف فالتليفون تتطلع و تهبط فانستاغرام راشقة ليها.....كلات حتى شبعات مزيان غسلات فمها و مشات تكات على ظهرها ناعسة نعسات شوية و فاقت فنص د اليل كترد و قلبها طالع....تغيلفات و خرجات مقندشة ناعسة حداه فتح عينيه فيها بغى يحط يديه على كرشها بعدات منو معوحة فمها مابقات ليها كانة مغيلفة غي مع راسها....كل مرة فحال مرة المورال الطالع و الضحكة فالتة ليها بدون سبب و مرة معصبة و باغية غي تبكي.....!
فاقت على الصباح لقات الدار خاوية غي هي مقلوبة بالنعاس ...جابت المراة دير ليها الميناج و بقات هي جالسة فالبيت هازة تليفونها تتصوني على عبد الصمد جاوبها ببحة عجباتها...
_ وي المشة....
حلا ( طايح عليها الضيم ) تخنقت فالدار اعبد الصمد خصني نخرج معاك بلا ماتقولي ماماك ولا خواتي توحشت نخرج معاك ( بدات كتبكي ) ماعرفتش هاد البنت كيفاش غتخرج و انا قتلت راسي بالبكاء .....
عبد الصمد :انا فطننجة احلا مامساليش ....
حلا ( حنات رموشها بهدوء ) وخا ...باغية الطموبيل مانقدرش نتحرك بلا بيها ...
عبد الصمد ( بحدة ) فين غتمشي ؟
حلا : باغية ندوز عند خالتي عيشة تمشي معايا للصالون تونسني توحشتها شحال ماخرجت انا و ياها....
انهت الاتصال حاطة يديها على كرشها تتنهد بعد ماقاليها غيخرج ليها الطموبيل ....حنات راسها لكرشها تتهدر معاها...
_ فوقاش غتكبر باقي مابغات هاد الكرش تبان و تنفخ .....
تنهدات و ناضت نافضة عليها الهم صونات على صاحبة الصالون لي مولفة تمشي ليه و كليانة ديالها....
_ لا صافي غادي نجي توحشت الهدرة معاك غادي تكوني تما ...ماكرهتش نصبغ شعري و خفت يضر البيبي طايح عليها الضيم ....
بقاو تيتعاودو حتى قطعات و ناضت جبدات احسن ماعندها فالحوايج و اغلاهم تتختار و تعزل...ناسقات الالوان مع بعض مع حقيبة يد بالسنسلة و خرجات من البيت المنظفة كانت تتاكل بالتخبية فالكوزينة غي سمعاتها خرجات قفزات من بلاصتها و طاح ليها الفروماج الهولندي من يديها حشمانة...
_ خصك شي حاجة اختي حلا.....
حلا ( دارت راسها ماشافت والو ) نتي هنا ماشفتكش....انا خارجة الا جا شي حد من غير راجلي ماتفتحيش ليه....
عطاتها التعليمات و خرجات من الدار عطاها سعيد الطموبيل من نوع رونو ميغان صغيرة و باقية جديدة ...تحسرات على طموبيلتها الفخمة السابقة حتى عيات و رضات بهادي وخا حتى هي شبابية و زوينة ...دازت عند عيشة و مشات هي و ياها للصالون دوزو وقيت زوين تما و كلاو برا و ملي كانو خارجين وقفها الحاج محمد تيشوف فعيشة و يفرنس و يسول فحلا....
_ نهار كبير هذا ...
حلا ( شافتو هو تفكرات الحاج مفضل التزمت حدودها ) الحاج كي داير مزيان و صحيحة شوية.....
الحاج : نحمدوه و نشكروه....
عيشة بقات تتشوف فيه من تحت نضاراتها الشمسية لابسة صاية طويلة انيقة و قميص مخطط بالابيض و الاسود زوين طايح فوق الصاية و خمار فالاسود و حقيبة جلدية فالابيض تتبان صغيرة بزاف على عمرها ...شدات فيد حلا و نطقات بين سنانها...
_ زيد اهالة نمشيو هادي ماشي وقفة هنا....مامسالينشي....
حلا ( بابتسامة ) يلاه الحاج نخليك على خير تهلى فراسك...
توادعات معاه مخلية عيون الحاج على عيشة وهي عايقة بيه و منفخة تتفتح باب الطموبيل و تبركم...
_ الوقفة مع الرجال البرانين ماهو من الصواب و لا من الاصول ..وخا يكون قد جدك كتسمع ولا كطنش عاود الفهايمية.....
حلا شعرها عاد مصايب ووجهها نقية دارت سينيال حاضية مع الطريق لاتقيس شي طموبيل حتى خرجات للطريق عاد جوباتها ...
_ لواه لواه اخالتي عيشة نطنشوك كااع عيب و عار عليا....شنو بقيتي درتي ! ولفتي السبور و الجري مع البحر ؟
عيشة ( حاضنة على صاكها فحجرها و ساعة دهبية قد السخط فيديها ) قلة الشغول هي هاديك نجري بحال البوهالية و الهداوي قدام البحر مانعاود نعملا....
حلا ( ضحكات ) عادي خصك تولفي باش تشغلي راسك و تحيدي الطاقة السلبية و ماتبقايش بلا شغول و غي معصبة ...قولي لصفاء تفيق معاك حتى هي جريو بجوج....
عيشة شافت الحانوت ولصقاتها توقف حتى خدات السقاطة و الزريعة و اللوز و الزبيب و اابيسطاج تتدوز بيهم الطريق و حلا دور دور و تقوليها ماتوسخيش الطموبيل عاد جديدة و عيشة كديرها بلعاني و ترمي تحت الكوسان و مع رجليها و كل مرة تتوقفها و قالت باغية تاكل زعزع و مرة باغية خبزة تطوانية حتى تعصبات حلا و رجعات حمراء بالفقصة و تيصدقو مناكرين و مغاوتين وسط الطموبيل ماسكتات عيشة حتى شافت حلا تتبكي و تشهق و تمسح دموعها بالمنديل عاد سكتات عيشة و حمعات فمها تتنفخ بحال الديناصور......دازت عندها للدار و جا عبد الصمد حتى هو لدار عيشة محمعين مع بعض و رد البال لعلاقة عيشة و حلا كي ولات كل مرة خارجة معاها وفالواتساب تتقيل عيشة تصرد ليها فالحمام و الورد و صباح الخير صباح النور و تحمقها بالرسائل و الميساجات ......
تكات براسها على كتف عبد الصمد تتفوه دور يديه على كتافها تيسولها ...
_ فيك النعاس ...
عيشة شافتهم هكاك عقدات حجبانها و بدات تنفخ و تقلب فعينيها....اما حلا زادت تخشات فيه عاجبها الحال تتموت فالدلال و الفشوش و خاصة من عبد الصمد ...
_ فيا الموت د النعاس بلا قياس باغية غي نحط راسي و ننعس عيت اليوما....
عبد الصمد : و العشاء ؟
حلا ( هزات كتافها ) نو كليت فيا غي النعاس...
نعسات حلا فدار عيشة و عبد الصمد مارجع حتى للصباح تكى حداها ناعس و فاق قبل منها و خرج وهي تتفيق تاكل و ترجع تنعس حتى علمها غيجي وراها بعد العصر ...و فعلا بعد العصر مشاو لدارهم وقاليها تجمع حوايجها و خداها لسوفيتيل تاموداباي و حجز ليها جناح أوبرا فيه 190 متر مربع تيطل على البحر
اليلة ريحها كان هادي و السماء كحلة و القمرة كاملة مظوية و النجوم فسماها شاعلة....! خرجات يحيى مع نسيم لاول مرة الراس فالراس بلا ولاد نعسو و بقاو مع حميدة فالفيلا....غادية خداه مبتسمة بدون سبب غي حيت حداها و معاها خارجين بنية الاستمتاع و يقضيو وقت بجوج غرريب و ممتع ...مولفة يخرجو على قبل الولاد يتسخرو للولاد يشري ليهم حويجات و العاب ماعاقلاش فوقاش خرجات هي و ياه هكا .....غادين فالكورنيش جنب بعضهم تيتمشاو و الدنيا عامرة و مزال غتعمار يحيى بقى تيدور فعينيه و يهز فحجبانو تيحوم حتى شبك يديه مع يديها تقول غي مصاحبين و حشمانين ..جايين مع بعضياتهم و ماعندهمش فرق فالعمر كبير ولا فرق فالطول تيجيب الدهشة بالعكس بالطالون و اصلة عند عنقو تيبانو مواتين و حلوين للشوفة ماتقولش عندهم جوج ولاد و مزوجين خمس سنين ملامحهم بجوج كحلة و بعضهم تيشوفهم تيتشابهو فالملامح وخا هي بيضة وهو سميمر تيقول عقلهم تيجيها ولا من العائلة و شحال من مرة تتوقع تيكونو جوج مزوجين تيبغيو بعضياتهم تتحس بيهم تيتشابهو ...كان كان باقي بحوايج الخدمة بنطلون اسود كلاس و شوميز فالاسود حتى هي و السمطة رجالية جلدية و صباط تيبري و الساعة وهي دارت بحالتها مزيان لابسة غوب كلاص فالنواغ ستايل انيق و راقي و سندال عالي و شعرها مقطع ديكرادي ايفيلي مطلوق بحرية على كتافها كانت جايبة العين باناقتها و ستايلها كثار منو هو..حيت داك النوع د اللباس و الاناقة قلال فين تشوفهم تتلقى وحدة خانزة فلوس ماتتعرف لاتلبس لا تلبق و حوايجها غالين تيشويو و الاناقة منعدمة.....!
حركات الريح شعرها لوجهها و رجعاتها بيديها المزينين بخاتم الزواج و ساعة لي شراى ليها تتبسم فرحانة....
_ تحرك الريح ....فين غادين ؟
شاف فيها عينيه شبه مبتسمين و رجع شاف قدامو يد مشبكة مع يديها و يد خاشيها فالجيب...
_ نتي بنت المدينة نسولوك نتي ؟
حنات عينيها مبتسمة...
_ انا بنت المدينة و نتا حافظها كثار مني ...شنو درتي باقي فالكونطرا ؟
يحيى : لاا لا مابلانش ...مامساليش هاد الشهر نخرج من المغرب نبقى مرون فمخي ست شهور دخل خرج ....
نسيم ( تبسمات براحة ) هكا حسن ..بصح عندك تستنى كوفر فور ناقصني غي هو درنا الكونتوارو الكاميرات و المطبعة و السكانير ماعرفتش فوقاش هادشي غادي يسالي عييت...
يحيى ( بتفكير ) هذاك حالو ساهل ...
نسيم : و مزال مليون و نص تقريبا على حسب " مرحبا بيكم " يتكلفو بالصباغة و الاشهارات شركة ويسرنيويور ومونيغرام ....
ظلو تيهدرو و يجبدو موضوع بموضوع وهي غي تابعاه تتشوف فيديهم المتشابكين مع بعض تتبسم بلا هواها وهو عادي ماباين فيه والو ...تيبانو كوبل بعقلو و مرزن ماكاين لا داك الضحك العالي ولا الهدرة المسموعة بالجهد ...هدرتهم تتبقى بيناتهم بجوج شاف يحيى فالساعة شحال و رجعو للطموبيل كانت حاسبة غيمشيو للدار صدق غادي بيها لطريق سبتة مريزيرفي طبلة للعشاء...
جلسات تتشوف فالاجواء و الاستقبال و السرفيس عجبها و البلاصة كالم و راقية ..شافت فالبلا لي تحط ليها باين لحم ديالاش ماعرفاتش هو لي طلب و حسب ماعرفات اليوم كاين شاف معروف مخصص باللحوم لي باغي ياكل اللحم من تحت يديه تيحجز طبلة مسبقا ....
هزات الموس و الفورشيط تتشوف فالطبق تتبسم ...
_ علاش مابغيتيش تقول شنو هذا ؟ نزعم و ناكل ..؟
يحيى ( من عينيه باين مرتاح ) حلال غي كوليه و من بعد حكمي....
بظهر منتصب و حركات راقية انثوية كلات منو و عجبها كان اللحم مع كاغوط كلاصي و الصوص ....شافها تتاكل عاجبها المذاق ...هز فيها حاجبو و نطق...
_ عجبك ؟
نسيم ( على نيتها ) زوين و مزال ماعرفتو ديالاش ؟ حاولت و ماعرفتش...
يحيى : لو كاناغ ....
وقفات الموس و فتحات فيه عينيها مخسرة ملامح وجهها...
_ ماتقولهاش حتى بالضحك ايحيى....
غلباتو الضحكة جمعها حشم يطلقها قدام بنادم مسح فمو هاز فيها حاجبو عيى ينعل الشيطان و تيشوف ملامحها تيبغي يتهز بالضحك مرة مرة تترجع ليه داك البسالة ديالو تيصغار تقول شاب ديال عشرين سنة ....
_ قلتي زوين ؟ كدبنا عليك !
نسيم ( بلعات لي فمها بزز و طلع ليها قلبها ) نتا عارفني كنعيفو ماقدرتش ماقدرتش ....
ناضت بالزربة للحمام مخسرة ملامح وجهها و رجعات كارهة مذاق فمها و مغيلفة تتشوف فيه حابسة الضحكة و ضحكات بخفوت ملي قال...
_ قلت ليك غنخليك تجربيه بلا ماتعيقي براسك...! عجبك دابا ؟
نسيم : درتيها بيا ماتوقعتهاش .....هو زوين المذاق و لكن لوكاناغ لاااا .... غندوزها كاغوط كلاصي هههه .
يحيى ( مبسم ) نتي شبعتي فين غتزيديها ؟
نسيم ( ضحكات ) كون غي خليتيني حتى كملتو عاد قلتيها ....
دوزات حلا اسبوع فالدلع و الفشوش و الخناث .. من جناح أوبرا لفيلا سيان ...الشاطىء الخاص والفطور باريزيان و كل مرة طبق من شاف متخصص يا السمك و ياللحوم و شاف باتيسري ...و جسدها تتهلى فيه و تحيد الطاقة السلبية والسموم بحمام الشوكولا نسات همها لي داز و لي عاشتو فالايام لي دازت نسات كلشي و استمتعت باللحضة مزيان...و التصاور على الجهد و دلع عبد الصمد مغرقة بيه حتى للودنين ...لقات لي بغات ...حلا من النوع لي ماتقدرش تعيش بلا دلع و فشوش تقدر تصبر شهر شهراين و بزز تتولي غي معصبة و مبرزطة و ماحاملاش راسها ...قبل الزواج فين ماتبغي تسمع كلام حلو و تحس بانوثثها وتغرق فبحر الغزل و المديح تتمشي تصاحب و غي تتمل تتقطع العلاقة ...شحال من واحد كان تيموت عليها لكن هي ماعندهاش الغرض بيه...و المزهار هو لي تيجيها ففترة محتاجة غزل الرجال....! و لقات الفشوش و الخاطر لي كانت تتقلب عليه فعبد الصمد و ولات مدمنة عليه حتى فاتت الحد ...ماشي غي هدرة تيبرعها بالافعال و بالفلوس عايشة حياة فالظاهر تتبان حياة مثالية و الوحدة تمنى عيشتها و تتحلم بيها ليل و نهار....زوينة و عندها راجل لاباس عليه و باقي صغير و خا زوينة عليه لكن تيبقى عندو جادبية و حرش و من الفوق حاملة و تتستنى مولدوها الاول تيشوفو انها ماعندها حتى عائق فحياتها و حتى خلل و عايشة فوق السلك و مخيرة و عائلتها لباس عليهم و ماعندهم مشاكل ماعندهم هم و لا غم ...!
وراقيها بداو تيتجمعو مع اتصال بشركات السياحة ...الامر ماكانش ساهل و لكن هي ماحساتش بشي صعوبة كلشي من عبد الصمد لي تيسرح ليها الطريق و يتاصل بختو فكندا حيت ماغاديش يمشي معاها وحتى هي ماعاوداتش رغباتو ولا حكرات فالموضوع وخا اي زوجة بلاصتها غتبقى تفكر و تخمم لزوجها شنو غيدير ففترة غيابها خاوية ليه فراشو ..مابغاتش تفكر و لا تخمم الاهم عندها هو بنتها ...قاليها هدرة حارة و حطها ليها حلقة فودنيها...
" وخا ديري جناح د الدياموند مني وبربي لا طرتي "
علقها ليها فشحمة ودنيها و خلات داك الهدرة تتدور فمخها لايام تترجع تنسى و تطلب الامور تيسر و تمشي على خير و تحط رجليها فكندا قبل ماتبرز كرشها للاعين ...تتقرا تعليقات النساء فالقروبات شحال من وحدة حاولات و ماخرجاتش ليها الاقامة ...تتخرج من تما معصبة و تيخرجو تعليقات اخرين على الولادة و الغربة حتى لقات قروب فيه نساء عربيات مسمين القروب سياحة الولادة فكندا .... دخلات ليه و كل واحد كيعاود تجربة ديالو و كلهم تيتشكاو من المصاريف الغالية بزاف و الا ماعندكش الفلوس ماتفكريش تولدي تما ...الفلوس اخر حاحة تتفكر فيها حلا و مامسوقاش كااع ....! بقات ايام و ايام تتمر خرجو وراقيها وضحكات حتى دمعااات عينيها....
الصمدي سخووون و اعتدر على هاد الكلمة...انا ماتنلمح لا على ضرة لا على والو غي تنقربكم كثار من عبد الصمد تتشوفو نوع عبد الصمد الا ماطاحش فشي بلية و تشغل فشي مصيبة غيقلبها نساء غي هو واش يصبر شهر.. شهرين...ثلاث شهور....ست شهور ! ماعرفنا ليه ! واش يتزوج ولا يخون ولا يصبر و يصوم.....ماشي كاع الرجال تابعين بين رجليهم و ديجا كتبت على محمد اديب مهم ماعلينا ...الراجل ملي تيكون بعيد على الله و حياتو حرام في حرام و الايمان قليل راه والله مايفكر جوج مرات بقات فعقلية الراجل شنو فيه ......و الرجال ماشي هو النساء الرجال ناعسين مع وحدة و قلبهم فيهم وحدة اخرى ...!
و غي قبل مايتزوج بحلا ! حساب ليكم كان صايم داك السنين كاملة....! كاين نوع ولد الحرام عندو النساء بحال اللعب...غي لا كان مشغول ولا مامساليش ماعندو فين و كيفاش يهز الراس و لا غاطس فشي مصيبة ...اما الا كان جالس ماعندو شغل و مراتو بعيدة يجيب حتى عشرة و هانية عندو.....
عليها الوحدة لي تبعي تزوج تشوف الرجل لاخلاقو و لحياتو واش داخلة فيها الحلال و الحرام كاول شرط .....
حميدة تتندب و تعاود ...خلود مشات لاسبانيا حتى تولد عاد ترجع و حلا خرجات ليها بالولادة فكندا ...ماباغياش ليها تمشي و عيات تخلع فيها و تنبهها الولادة الاولى صعيبة و قاصحة و نتي بوحدك و شكون يكون بيك و يوقف معاك و غتموتي غي بالقهرة ...هي تتقوليها غي هدرة وحدة...حتى نحط رجلي تما عاد نهدرو فهاد شي.....! شحفاات حميدة بالهدرة و فالاخير تنهدات و قالت...
_ انا مانزيدك غي رضايا بالي غيبقى معاك كثار من خلود ....خلود معاها راجلها و ماشي الولدة لولة ديالا و نتينا شنو....غتولد بوحدك بحال ماعندك عائلة ....
حلا ( بهدوء ) عندي 30 عام ماشي 18 ...الحريق غيدوز نفسو سوا تما سوا هنا....حتى واحد فيكم مايتقاسم معايا الحريق والوجع كنصبر عليه بوحدي ...باغية غي رضاك شي حاجة اخرى مانفكرش فيها حتى يجي وقتها نبقى نحمق راسي بشي حاجة باقي ليها شهور....
حميدة ( بغضب ) و راجلك سامحة فيه و همك فكندا شمن فايدة فيها...شنوو...واش باغية تشتتي الشمل احلا....
حلا ( تتحاول ماتفتحش داك الباب و ماتفكرش ) راجلي مشغول ماعندوش الوقت يهز راسو ..وهو لي واقف نولد تما و ختو تما و سمعت من صفاء هاديك عزيزة على عبد الصمد يعني تيتيق فيها .....
حميدة تدوي من جهة و حلا تترقع ليها من جهة اخرى....والو واش بغات تقتانع ...ودعات مها و باها و نسيم و حبابها و حميدة تتبكي و حلا والو واش بكات حتى دمعة مانزلات وخا قلبها مزير ماباغياش تطيح حتى دمعة حتى وصلها عبد الصمد للمطار و تكرفساات فالطريق ...ملي جا ودعها عاد نزلو دموعها تيجربو و ظلات تتبكي و تشهق فصدرو شداتها الخلعة و تزيرات.....! و وصاها و عاود بنتي امانة عندك حجبانو كانو معقودين باين ماراشقاش ليه و تليفونو كيصوني و يعاود ....ودعاتو تتمسح دموعها و عطاتو بالظهر تابعة المسار و قلبها تيضرب كانت لابسة النواغ و تتمشى عادي بالطالون و بخفة بحال ماحاملاش كاع.... ماكملت الاجراءات حتى تعرقات و شحفات مزيان و التحقت بالمسافرين .....!
ماشي اول مرة تسافر بوحدها خارح المغرب و ولفات اجواء الطيارات و المطار و سافرات لاكثر من خمس دول مع عبد الصمد و ماشي شي وحدة منطوية و منعزلة بالعكس اجتماعية و دافعة الجبهة زعيمة....! السفر داز طويييل و عيااات نعسات و فاقت و عاودات نعسات ...و غي وصلات حسات بالسخفة و التلفة و شداتها الدوخة دوزات الاجراءات المطلوبة و خرجات من المطار البرد تيقطع مامولفاش بيه .... كانت فاطمة الزهراء اخت عبد الصمد فاستقبالها بنت فالثلاثينات محجبة و معاها راجلها محامي هجرة....ضماتها لعندها تتضحك و تعبرها بعينيها بفضول و اعجاب تتشوفها غي فالتصاور وابيل فيديو ...
_ الحمد لله على سلامتك ...باينة فيك عيتي
حلا ( وجهها صفراء و قلبها طالع مرخية ) ماقادراش ندوي غنسخف ...عيييت
ركبات اللور حاطة راسها مقلوبة بالنعاس و راسها تيضرها مشاو للدار وزوج فاطمة الزهراء خرح لخدمتو راجل باين عليع الوقار و الاحترام و فاطمة الزهراء فرحانة بيها توحشات خوها و توحشات عائلتها اي واحد جاي من النغرب تتفرح بيه ...حلا مابقات عقلاات على راسها فوقاش حطات روحها و نعسات تترتاح .....
الايام مرت على حلا و لاجديد عندها يذكر ...البرد تيقطع و الملل و القنط والجو كئيب و الوحدة والخنقة ...كل نهار تتدوي مع عبد الصمد ومرة يجاوبها ومرة ماتتلقاش الجواب....حميدة و عيشة كل نهار تيتاصلو بيها و يسولو و عيشة طالع ليها الدم معصبة على حلا و ماعاجبها حال .. جبدات ودنين بنتها و زيرات عليها تهلى فيها حتى تولد ....تيخرجو يدورو هي و فاطمة الزهراء و بنتها و تتساريها و توريها الاماكن و المطاعم و شنو تاكل و شنو لا ...و عرفاتها على صحاباتها وولاو تيخرجو مع بعض ...و حلا دارت بخوميغ فيزيت على حسب الحمل و نهار على نهار كرشها تتكبر وخا مابايناش بزاف و تيزيدو يخلعو فيها تيقولو ليها بنتك غتزاد ضعيفة بزاف ...تتحيد هاد الهدرة من مخها و تتهلى فراسها و تتشوف و تقيس غي الحاجة المخيرة و الزوينة ...الورود و الاكل الصحي و الجمال ....ومرة مرة كدير فاطمة الزهراء شي تصرف عفوي ماكيعجبش حلا و تتقلبها بكاء فبيتها و تشهق تقول قتلاتها....كتحسس من ابسط الحوايج كل ماتزاد شهر على حمالتها كل ماحلا تتزيد تهز الهم و تخمم و تبكي ...جو كندا ماجاش معاها الكآبة و الحزن و الغم بدون سبب....مزيرة و مخنوقة بقات على هاد الحال حتى دخلات لسبع شهور ..كانت فبيتها حاطة يديها على كرشها متكية تتأمل و الدمعة فطرف عينيها....ماعارفاتش مالها و علاش تتبكي....حسات براسها باغية تهدر مع حميدة...وبلا ماتفكر لا في فارق الوقت لا والو...صونات عليها كانت ناعسة ..جاوباتها بقلق...
_ الو حلا...
حلا ( غرسات سنانها فشفايفها و دموعها هابطين بدون سبب ) كنخاف اماما.....وحدة البارح ولدات و ماتت كنخاف نموت ملي نكون كنولد....ندمت علاش جيت مخنوقة و مامرتاحاش كنشم ريحة الموت....
حميدة ( بخوف ) سير ابنتي قراي شوية قرآن و نعلي الشيطان...شحال من وحدة ولدات و عاودات ماتت ؟ مشات منها شي حاجة.....سير ريح بالك سير...هدرنا معاك و نصحناك و والو نتي باغية كندا و صبري ابنتي حتى تولد بنتك على خير....
قطعات الاتصال و بقات حلا ساهية رعشة غريبة سرات مع اطرافها و ااسكات و الوحدة و سيرة الموت كدور....خايفة على بنتها كثار من على راسها....ماكانتش هكا قبل الحمل و ماكانتش كتظن غتولي تفكر هكا....غمضات عينيها تتحاول تطرد دوك الافكار لكن السكوت و الهدوء كهدوء المقابر ....تتنعس تتحلم راسها تحت التراب و مخنوقة ...ناضت تتصلي و تتبكي قلبها مزير ماعمرها حسات هكا....ماكتزيدش فيه ماعندها علامن تفشش ولا تبوحط هنا....مخنوقة و السكات لي عايشة فيه تيخلعها و تتقول تتشم ريحة الموت و تتسمع صوت المقابر......! دوزات اسوء ايام حياتها و خطر الولادة المكبرة ملاحقها بعد كلام الدكتور ...تتخرج تمشى مع فاطمة الزهراء و مرة مرة تشري شي حاجة باغياها ...شادة كرشها بالم...
_ تنحس بظهري تيتقطع و فخاضي كثار ...و قدامي مابقيتش نقدر نوقف عليهم...
فاطمة الزهراء : عادي الحريق غيجي و يمشي ماعندك مناش تخافي....
سايراتها حلا تتهز و فعلا الحريق مشى و رجع و اختفى لفترة و رجع بحال كيلعب عليها و ملي كيمشي تتحس بالراحة و السكينة و ملي كيرجع تيفيقها من داك الراحة....حتى شدها مابغى يمشي. وتما فعلااا حسااات براسها غتولد.....! الغوااات و الخلعة و البكاء.....زيرات على يد فاطمة الزهراء تتبكي...
_ غنووولد...اوووووف مابغاش يمشي مابغاش يمشييي غنووولد.......
تخلعات فاطمة الزهراء و تلبكات صونات لراجلها يجيب السجلات الطبية و مشاو لوبيطال و صدق غي مخاض زائف و شكون يفهم حلا بهادشي ففمها لا غي غادي نولد دابا حسيت بيه....!
رجعات للدار و عطات الراحة لراسها ..دخلات عندها فاطمة الزهراء تتحاول توانسها ...
_ الولادة لولة هكا كتكون ..غتولي تفيقي بالوجع و يقول عقلك صافي هذاك وحع الولادة....
حلا ( طالقة شعرها ولى قوي و مهلي و مع الهرمونات طالعة ) ماعرفتش ..باغية غي نولد دغيا و نرتاح ...
ضحكات فاطمة حتى عيات...
_ و تفكري هاد الهدرة ملي تولدي عندك تنسايها غتولي نتي ضحكي على راسك ملي تفكريها...حيت الراحة بعد الولادة ماكايناش....شبعي راحة و نعاس دابا حتى تشرفنا لالة فاتن....
حلا ناضت بهدوء تتنهد نظرة عينيها تبدلات ولات قليلة كلام و عينيها مابغاوش تيبرقو بحيوية و حماس ...فاشلة و مابقات تتفكر لا فلباس ولا زواق ...قد ماتتفكر فالولادة الغربة شعور تيقطع الواحد و خاصة و نتي حاملة ...كانت تتضحك على خلود ملي كانت تتعاود على معاناتها فاسبانيا و الولادة تتقوليها نتي حمقة واش مع والديك غينقص الحريق ياك حريق حريق...و دابا عاد حسات بداك الجو لي كانت فيه...ندمات علاش بعدات على حبابها و على دارها و راجلها....تفكراتو و هزات تليفونها تتصوني عليه ...جاوبها بصوتو الخشن...
_ الو ..
حلا : فينك كنصوني عليك مكتحاوبش و انا ولدت ...
عبد الصمد ( بحدة ) ولدتي من نيفك ...!
حلا ( تتبسم ) زعما مانديرها بيك حتى مرة ...فوقاش غتجي ؟
تيجيها صوتو بعيد و الصداع حداه...حتى جاها ردو...
_ شهر نكون معاك ...
ضحكات فرحانة...
_ حلف و علاش ماتجيش دابا ...فينك ماشي فالدار...
بقات تتدوي معاه شحال و الراحة بدات تتنزل عليها ...سالات معاه الهدرة و دخلات تتفرج فتصاور خلود مع بنتها الثانية خارجة زعرة تاني و تتشبه لغرام ...ابتسمت فرحانة و متشوقة تهز بنتها عندها....! نعسات و فاقت على الوجع ...ناضت من بلاصتها تتطوي حوايجها و توجدهم من دابا .....شافتها فاطمه الزهراء ضحكت....
_ ستناي بعدا حتى دخلي شهرك ...
حلا : باغية نجمعهم دابا ...شوف شحال صغااار و زونين....
فاطمة الزهراء : هاذو ديال ثلاث شهور غيجيوها كبار ...خودي هادي ديال الخلوق و دافية ...
بقات حلا تتجمع حويجات بنتها و حوايجها هي و مستلزمات حمامها نزل عليها واحد النشاط غريب تتطوي و تعاود بحال تتجهز راسها للولادة وهي ماعارفاش....مشات دوشات و تنقات و نشفات شعرها و غي صلات صبغات دفرانها فالغوز بارد فرحانة بيهم والحريق فيها رجع تيطعن تيجي كل عشرة دقايق و يمشي ...دخلات ليها الخلعة ثاني و حطات يديها على كرشها و قلبها تيضرب....دازت ساعة و الحريق تزاد فوق المتوقع ظهرها من جهة و كرشها من جهة و حركة الجنين مابقاتش تتحس بيها قلبها تيضرب بالزربة غوتاات لفاطمة الزهراء و جات عندها طايرة مخلوعة تتخاف توقع شي حاجة و تسمى فيها هي لي مقصرة و تسمع الهدرة من عيشة و عبد الصمد ...
_ حاسة غنولد ...ايي ظهري ظهري تقسم ....
فاطمة : بشوية بلا ماتغوتي غضري غي راسك ....
طلقات حلا غوتة مجهدة ...و الحريق فيها تيقسم جاها الم المخاض بالاسهال و التقية و افرازات تحتها ماحسات بيها مع الحريق و البكاء و الغوات....طاارو بيها لوبيطال و وقت الولادة قاد حان فعلاااا البنت زربانة تخرج للدنيا ...راسها مقلوب التحت و الحريق فمنطقة الحوض تيفشل...فحصوها تيشوفو واش تولد طبيعي ولا قيصري ...كان اوضاعها طبيعية و البنت راسها خارج....و ماخرجات للدنيا حتى شافت حلا الموت ماتتفكر فوالو غي تتدعي الله يطول فعمرها و تشوف بنتها غي تشوفها و داك الساعة تموت ..و غي شافتها صغيييرة بزااف قد الكمشة ووزنها ضعيف و طولها قصير بزاف زرقة و عامرة بالدم طاحت حلا تتنهج سخفانة خايفة يبدلوها لبها ولا يسرقوها و وساويس فعقلها كثيرة مامعاها حد لا أم ولا اخت وولا زوج من غير لوستها ... خداو البنت لي تسمات فاتن ينظفوها و يفحصوها بعناية كبيرة و اهتمام و حطوها فالحضانة تحت المراقبة لقات حلا الاهتمام و العناية فوق المتوقع ....! خدات غرفة خاصة ناعسة تترتاح ماكايناش هنا واحد النعسة حلوة بعد التعب و الوجع و تجربة غريبة دازت منها بحال كانت تتحلم .....!
انتشر الخبر فالمغرب ...عيشة تتنكر و تغوت معصبة ...
_ شفتووو ها الزربانة خرجات بحالا بحال يماها ....
حميدة و عبد الله عرفوها ولدات تشغل بالهم عليها و ترونو و تشوشو عليها تيهدرو مع فاطمة الزهراء تيسولو و يعاودو و ماشي غي هوما تليفون فاطمة كان غيتفركع باتصال عيشة و صفاء و عبد الصمد معصب غي مع حوايجو غيطرطق وواعصابو خرجهم مع الخدامين عندو دوز عليهم دكاكة بالغوات ...و نسيم و خلود تيصونيو على حميدة مشوشين تيسولو وحميدة براسها باغية شكون تسول...دازت عليهم كاملين داك الليلة...
اخدت البنت العناية الكاملة و حلا حتى هي...ولكن تبدلات الف درجة مابقاتش مسوقة لراسها روحها و عقلها مع بنتها فقط ...هي عادة تتموت على حاجتها و كيف دابا بنتها قطعة منها تموت و تقتل على ودها....مابقى همها داك الساعة لا وجهها و لا شعرها...حتى طمنونها على بنتها و فاطمة الزهراء واقفة معاها وقفة صحيحة....هي لي تتدخل تدوش ليها و تعاونها و تنصحها بلا نصائح حميدة الكثيرة على البرد و الحوايح و التربية و الماكلة و حلا تتسجل وتلقط اي معلومة جات فالطريق......
تعطات لحلا ارشادات من وكالة الصحة الكندية العامة و المختصين بالاطفال...حول الرضاعة الطبيعية وكيفاش تشدها و كيفاش تجلسها و كيفاش دير ليها بعد الرضاعة و مقعد د السيارة و المهد و الالعاب و معدات الرعاية و التحصين الخاصة بالاطفال....! و حسب الاقليم لازم الطفل يتسجل خلال اول ثلاثين يوم بعد الولادة ...اتصلو بالسلطات المحلية على حساب شهادة الميلاد وخا حلا فبلاد غريبة و جديدة عليها لقات الدعم من زوج فاطمة كونو محامي....و تسجلات البنت و حصلات على شهادة الميلاد و بداو تيقدمو الطلب الحصول على جواز السفر الكندي و الإجراءات تتاخد وقت وخاصة مع صحة فاتن ...ماخرجاتها من لوبيطال حتى سمحو ليها هوما و وضعها صبح افضل و هزاتها حلا لحضنها حامياها من العيون.....!!
عبد الصمد دبح فالمغرب و دار الزردة مابحالها زردة و بنتو مسمية عندو فعقلو دبح على سمية مها....كلشي تيقول حشومة على هادي حرماتو يشوف حنى بنتو ملي تزادت و عقلية النساء فشكل على الرجال....النساء تتغلبهم العاطفة و الدراما والرحال تيغلبهم عقلهم و عبد الصمد مافكرش هكاك المهم عندو البنت بصحة جيدة و لباس عليها .... و عبد الله من جهة دبح و دار صدقة على حساب بنت خلود و بنت حلا....وخا بعاد تيهدرو معاهم ابيل فيديو.....!
تجمعو الاحباب ففيلا حميدة دايرة ليهم عراضة و كاين عاد فاق من القلبة و جاتو يسول على حلا...
_ و انا كنقول واحد حلا فين غابرة و مالها مابقات تتبان....
حميدة ( تتنهد ) حلااا مشات ولدات فكندا و خلود فاسبانيا ...و عقلي هنا معاهم غيخرج...
_ سمعت الولادة فكندا غالية ...
حميدة : ايه شوية....
لالة فاطمة : عبد الصمد مغرقها مكفي و موفي ...و مبروك الالة حميدة تبارك الله فعام واحد جوج حفيدات الله يخليهم ليك...
لالة حميدة : بارك الله فيك الالة فاطمة....بالي باقي مع حلا و نتينا كتعرفيها ماعرفتش هاد الشهر و نص كيفاش داز عليها ....
نطقات نسيم لي كانت جالسة تتسمع ...
_ صعيبة مع النفاس و بنتها مريضة ...البارح عاد خرجاتها دابا عاد غتجرب التربية و النعاس غيطير ....
حميدة ( تتنهد ) مابقاش بزاف ...الراجل ديالا مشى لاسبانيا و من اسبانيا غيمشي لكندا يلحق عليها و مابقاليها والو تما ...تشد وراق بنتها و ترجع هي و خلود ندير لبناتي سبوع مطرطق.....
دخلت المعرض باطلالة هادية انيقة...صاك صغير بالنسلسة فيديها شعرها مقاد فالصالون و مصاوبة الدفيرات و الطالون فالرجل و يحيى معاها لابس الكلاس حوايح الخدمة و محسن اللحية و الشعر داير تحسينة وحدة عادية خلاها واقفة مع نجوى تيهدرو و دخل هو للبيرو ديالو تيهدر فالتليفون.....
نجوى ( ناضت تتبسم و تسلم عليها ) ...غبرتي ياختي عاد جيتي طلي علينا خليتي بلاصتك...
نسيم ( جلسات دايرة رجل على رجل ) ماعنديش الوقت ...جيت مع ماما وقلت نجي نطل عليك...
نجوى : الله يكون فالعون....كي غادية مع لاجونس ...
نسيم : الحمد لله غادية مزيان شوية ...! جيت نشوفك و غنمشي دابا ندوز ورا ماما نشدو الطريق لتطوان....الويكاند نتلاقاو الا كنتي مسالية ....
نجوى : ان شاء الله فاي وقت ....الله يوصلكم على خير....
ودعاتها نسيم و دخلات عند يحيى للبيرو علماتو انها غادية ... خرجات من المعرض و ركبات سيارتها الجديدة دازت ورى حميدة والولاد و رجعو لتطوان ....!
دازت لاجونس و دخلات مبتسمة فوجه الكليان لي شادين النوبة و خا قلال و لكن شوية ورى شوية تيتزادو ....! ابتسمت مع العاملة و جلسات مكانها تترفع اكمام الشوميز و ساعة فضية فمعصمها و شعرها كيتسرسب بوحدو....
_ صافي انا هنا سيري تغداي ....
سلمى : وخا .....
مشات سلمى و بقات نسيم فالواجهة مسيرة شغلها...تقدمو الكليان واحد ورى واحد دايرة اربعة كراسا د الجلد شي جالس و شي واقف و شي تيستنى برا ....!
هزات راسها مبتسمة فواحد المراة كبيرة فالعمر ...
_ ا العايل ديالي صردلي الفلوس من سبانيا كانجبروم هنايا...كاوالو ؟
نسيم : تلقايهم الحاجة علاش لا... عطيني لاكارط ناسيونال ديالك و الكود....
الحاجة ( بصوت عالي ) كيفاااش....
نسيم ( عرفات سمعها ناقص علات صوتها ) البطاقة البطاقة الحاجة ...و صردلك ولدك شي ورقة فالواتساب ولا لاء ؟
راس الحاج قاصح و مافهمات والو ...حتى عاودات شرحات ليها عاد فهمات و عطاتها المطلوب و نسيم تتسجل عندها....
_ عطيني الحاجة رقم تليفونك....
عطاتو ليها بعد صعوبة و خرجات ليها الفلوس كانو 1400 درهم حسباتهم الحاحة و عاودات ..
مدات ليها نسيم الستيلو ...
_ هاك الحاجة وقع هنا ...التحت التحت....
الحاجة ( بتدمر ) مرتوني علاش هيدا اوا ...فاين غنوقع كا هنايا ...وعلاش ماشي هنايا....و علاش غنوقع ....
نسيم ( بصبر ): فين ما بغيتي غي وقعي ...
وقعات الحاجة تنفخ دارت ليها جوج خطوط تما شي توقيع ماهو ....عطاتها نسيم ورقة اخرى و عاودات صعرات الحاجة...
_ و شني عاود غنوقع على هادي ..
نسيم ( بهدوء ) لاا هادي خوديها خليها عندك....
شداتها الحاحة شافت فيها لقاتها كاملة فرنسية حسات بالورقة مهمة خزناتها فصدرها مع الفلوس و خرجات تتولي ...مخلية الكليان لي كان واقف وراها كيضحك...
_ و الصبر و صافي اختي...
نسيم هزات فيه عينيها بابتسامة رسمية...
_ ضروري....
كان غيفرنس ليها وعينيه تيعبرو فيها...غي شاف الخاتم جمع عينيه و دار عقلو...قضات ليه نسيم غرضو و مشى بحالو و تبعوه البقية....! سالات خدمتها و مشات لفيلا جابت الولاد و رجعات للدار عيانة....والولاد تيبوسو فيها جاتهم عليها ديك العشية....
_ ايمة على القطقوطة ديالي توحشتوني....
امير ضمها من رقبتها ملصق خدودو مع وجهها تيفرنس ...
_ اي لافيو مامي ...
ضحكات نسيم و جراتهم عندها تتبوس فيهم و تعاود وهوما تيتسطاو بالضحك...
_ الحلاوة ديالي الحلاوة..ياختي يانا على ايلافيو مامي....السكاكر ديالي ....
جلسات معاهم ماسخات تنوض توحشاتهم و توحشوها حتى هوما تيدوزو نهارهم فليكول و تيكبرو مابقات تابعها لارضاعة لاوالو ...كل واحد منين تيشدها و يعاود ليها شنو دارو و شكون دوا معاهم وامير تيبركك بازهار و يحط ليها ضوسي ديالها كامل وهي تتعصب و تنوض تغوت و تنكر كلشي....حتى تيقلبوها غوااات و تتنوض تدفل عليه ....و نسيم وسطهم تتغوت و تحمر فعينيها مادارو عقلهم حتى دخل يحيى مع سبان أزهار و بكاء امير حمر فيهم عينيه و مقصح الشوفة مزيان لاول مرة فحياتهم تيشوفوه هكا....
_ أزهااار !!! عاودي ابابا شنو قلتي !
عينيه و الشوفة لي داير فيهم بجوج خلعاتهم و غلباتهم البكية و تكمشو فبعضهم تيرمشو حابسين البكية ...حط المفاتيح و قرب عندهم مغوبش فيهم مزيان...
_ معاك أزهار...سولت جاوبي ! هدرتي ليك ....
نسيم ( تغوت عليهم عندها هانية و لكن ملي شافتو تيغوت عليهم هو تحرك قلبها و تدخلات ) يحيى انا غندوي معاها....
يحيى ( شاف فيها عاقد هم ) ماتدخليش نتي خليني بيني و بينهم.....
ازهار ( شفايفها تيترعدو مصدومة ) بببب ماسي انا ...هو امير كالي كحبة ....
شهقت نسيم و تكمش امير فازهار مخلوع تيرمش و يحيى بغى ياكل جنابو ...
_ منين سمعتي هاد الهدرة ابابا ؟ عاودي ليا ....
أمير( تيرمش و يشوف فيه بنص عين ) ماسي انا...
أزهار ( غوتات ) هو هو...ابابا ماسي انا كالي كحبة .....
نسيم وجها ولى صفر و يحيى مصدوم...جر ازهار لعندو و فتح النقاش بهدوء....
_ و اذا قالها شنو فيها ؟ شنو كتعني ...عارفة انسيم شنو كتعني ؟
نسيم ( مصدومة ) لا انا ماعارفاش....
يحيى : امير نتا عارف شنو كتعني ؟
امير : كاحبة ابابا....
يحيى (هز حاجبو فيه ) اييه ايه شنو كتعني لي عرف شنو كتعني نعطيه شوكولا الويكاند كلو ....
ازهار ( نقزات لعندو تتجرو من وجهو باش يشوف فيه تتزرب عندو يسبقها امير ) موا ...موا......ايكوت موا ابابي....الكاحبة هي عندا زكيكة عريانة ......
يحيى ( جمع ليها يديها تيشوف فيها بنظرة توبيخ ) و عارفة كلمة مامزياناش ماخصهاش تقال وي او نو ؟؟
ازهار كمشات عنقها مدلية شفايفها و امير تيشوف فنسيم حاصل باغيها تفكو غي مظلوم و تيسمع فالتوبيخ وهو ماداير والو ... ازهار لصقات فيه كلشي ...
يحيى : جاوبي أزهار....! سولتك جاوبي ماتخافيش....
ازهار : نو ابابي...
يحيى : دونك ماعارفاش ! و هانتي ديريها فعقلك دابا....هاد الكلمة ممنوع تعاودي تنطقيها داكوغ ؟؟!!!
هزو راسهم بالايجاب و زاد حفر عليهم تيسول ...
_ شكون كيعلمكم بحال هاد الكلام ؟
ازهار ( سكتات حابسة البكية...)
امير ( تيشوف فيه بنص عين ) لينا ابابي...
يحيى ( هز راسو مفقوص ) موسييقى مع هاد لينا ثاني.....!
بقى ساكت عاقد حجبانو تيشوف فيهم مكمشين فبعضهم زاد حمر عينبه و نطق بحدة خلعاتهم بالجهد....
_ ازهار....! بحال هاد الكلام ممنوع تنطقيه و ماتبقايش دفلي على خوك و ماتمديش يديك عليه و نتا ( شاف فامير ) نفس الهدرة....تفو و اوف و كلام بحال هذا ممنوع عليك و عليها.... نعاود نشوفكم مخاصمين غنعاقبكم بجوج.....فاهمين شنو كنقول !
خافو و تكمشو فبعضهم حابسين البكية هزو راسهم بالزربة سمعا و طاعة....ماطلق منهم حتى جبرهم يعتادرو لبعض و ضمو بعض بزز حابسين البكية ...خلاهم و ناض مغوبش يبدل عليه غي مشى طلقوها لبكية عالمية الدمامع و الشهيق تقول ضربهم.....مامولفينش يغوت عليهم هكا و ملي دارها عمرو ينساوها و كلام ترسخ ليهم فعقلهم خايفين يرجع يغوت عليهم ثاني...بقاو ضامين بعضهم بحال الفلالس تيبانو كي التوام ....!
خداتهم نسيم للدوش دوشات ليهم وهوما ساكتين بزز وقفو البكاء و باينة وجههم مطبوع و نيفهم حمر ...لبساتهم و حطات ليهم يتعشاو تياكلو ساكتين و تنخصيصة د البكاء طالعة معاهم كل شوية....و يحيى غضبان عليهم ماوراهمش وجهو داك اليلة....خداتهم يغسلو سنانهم...خلاتهم نسيم واقفين حدا المراية غي غبرات رجعو للخصام ثاني تيتخاصمو بالحس و بصوت خافت كان امير غيضربها بالفرشاة لعينيها و تكمش ملي تفكر كلام باه....سمعو نسيم جاية و قطعو الحس ....
نعساتهم عاد خرجات و عطات وقت لراسها...دوشات و بدلات عليها ملابس مريحة طلات على يحيى لقاتو ناعس....! فرحات و جلسات فالصالون شاعلة التلفازة و موجدة البيسطاج و الكركاع تتاكل و تقرا فالقصص بالدرجة فهاد الاواخر ولات مبلية بيهم و تتسرق الوقت باش تقراهم و تتفرح ملي تينعس يحيى باش تقررى على راحتها....ظلات جالسة تتقرى مخشعة و تتبسم بلا شعور مع القصة و الحوار....و ملي تقرا شي حوار ضحكها تتكتم الصوت ...فاق يحيى و لقاها جالسة تتشوف فالتليفون و تتبسم ...هز حاجبو فيها و نطق حتى خلعها و قفزات ...
_ شنو كديري ؟
نسيم ( طفات التليفون تتلف ) كنقرا واحد الرواية ...ماجانيش النعاس....
هز راسو و دخل للكوزينة عمر الماء و دخلهم للبيت و تكى تيستناها تدخل و مافهماتش راسها....تخشعات تاني مع الرواية و خلاتو فايق مطيرة عليه النعاس وهي غاطسة فالرواية ساعة و ساعتين و يحيى سخن عليه راسو و خرج لعندها تيحك رقبتو مقطب جبينو...حيد ليها التليفون متصنع المزاح ...
_ عطينا نقراو معاك.....
قفزاات مخلوعة باغية تحيد ليه التليفون ...شدها من خصرها وهي تتلوى حداه...
_ عندك ضيعلي فين وصلت ...
يحيى ( هز التليفون الفوق تيشوف فيها شنو تتحاول دير ) مالي غادي نسرطو ! هداي حتى انا باغي نقرا شنو كتقراي.....
نسيم : قصة عادية بالدرجة مغاديش تعجبك....
دورها و جابها قدامو شاد خصرها و فتح التليفون وهي تتشوف حشمانة....جلس تيقرا و ماجا غي فبارت السفالة عاد كانت واصلة ليه ...قرا مصدوم و هبط تيزيد يقرا الوصف ديال القضيب واصفاه الكاتبة بوصف فضييع و تتوصف حتى الفرج ديال المراة قالك غوز ماغوز ... قرات حتى هي بعينيها و حشمات حتى دمعو عويناتهاو نطقات بزز...
_ ماقريتش هادشي ماشفتوش.....
يحيى ( الهدرة تلفات ليه بالصدمة ) : كيفاش ماشفتيش ...هادي القصة لي كتقراي نسيم معاك داوي....
نسيم ( خبات وجهها بين يديها غرقانة بلاصتها ) ماشي القصة كاملة فيها هادشي ماتشوفش فيا هكاك ايحيى......
رفع صوتو معصب...
_ ماقريتش نتي هادشي ؟
ماجاوباتوش مهبطة راسها مزنكة ... عاود شعل التليفون تيطلع و يهبط شي خمسة وواحد ورى الثاني عامر سفالة و وصف مقرف فشل هو و فشلات حتى هي طاحت تتبكي و تهز فراسها...وهو كيغوت معصب و مصدوم فيها....
_ نسيم راك بعقلك زعما ...شنو كتقراي فهادشي..معاك داااوي جاوبي من فوقاش و نتي كتقرايهم ؟؟
نسيم ( غرسات سنانها فشفايفها مزنكة مارضاتش ) ماقريتش داكشي ماقريتش علاش مكتيقش تنشوف السفالة تنقزها....
زير على التليفون معصب ...
_ كملااات من هنا لافلام الاباحية...! ( قرب منها تيسول و عينيه كيغلييو ) كتحسي بالراحة ملي كتقراي على هادشي مم ! جاوبي تيعجبك الحال ( صعر ) كتكفتي انسيم ولا شنو.....؟
شدات راسها بين يديها تتبكي...
_ كيفاش كنكفت مافهمتش مافهمت والو ...
يحيى ( بالغوات ) ماعارفاش ! ماعلموهاش ليك فالقصص....و راه بزاف انسيم بزاااف باغية تصعرينا و السلاام هادشي لاش تتقلبي....الجوح د اليل و نتي غايقة كتقراي فهادشي !!! محتاجة حتى نتي ؟ محرووومة....( بشك ) تتفرجي البورنو ؟؟
هزات راسها بالزربة ...
_ واش كتشوفني مامربياش ! واش نوصل انا لداك المستوى....واش تتشوفني برهوشة ...انا عندي جوج ولاد ايحيى جوج و ماشي صغيرة و عارفة لي خصني نقرا و لي مانقراش ...ماعمرني فكرت نتفرح و لا نقرا داكشي هكاك ...
جرها من يديها معصب و هي تتبكي دخلها للبيت و شد الباب بالزعفة ...جلسات فوق الناموسية شادة راسها تتبكي متمنية الموت فداك اللحضة وهو واقف عليها تيغلي غي بوحدو معصب مارضاش مراتو تقرا داكشي و تيتخايل صورة قضيب موصوف كما هو بطريقة خرافية و زايدين نغزة ...و بلا وصف عن جمال ووسامة البطل وسامة مفرطة و الفحولة و القضيب فايت عشرين مترو و تينعس معاها حتى تيطلع الصباح شي حاجة زايدة و بعيدة عن الواقع دليل على غباء الكاتبة و عقلها الصغير تتكتب و هي ماعارفة والو غا تتنقل داكشي لي تتشوف فالافلام الاباحية.....
حك سنانو مع بعض معصب و مغدد عليها مزيان....
_ ماعرفتش والله مابقيت عارف فيك شي حاجة...
نسيم : سمعني ايحيى غي سمعني مابقيتش غنقرا داكشي ( بكدب ) اصلا ماقريتوش ماقريت والو ...
خرج فيها عينيه صاعر...
_ الكدوب نقزو من عينيك انسييم....عليا انا ؟!
قلباتها بكاء و غوات حتى هي تتكدب....صحيح ماقراتش داك الجزء لكن قرات فالبداية وصف مشابه......
_ نوو نو...حشومة نتا كتقرا الافكار نتا خطااار....كنقولك ماقريتش ماقريتش داكشي كتيق ولا ماتيقش ماعندي ماندير ليك.....
بغات تخطاه هاربة جرها من يديها معصب...
_ ريحة رجليك تبدليها نعرفها...و عند بالك ماكنعيقش بيك و نتي كادبة ! تتشوفني حمااار مكلخ عليا انا ؟؟؟ بهاد الكدوب ديالك كتزيدي تصعريني علاش كتكدبي.....
ضرباتو ليديه يطلق منها و زيرها عندو معافر معاها تتبكي و ترون فالهدرة ...
_ بعد مني لاش غنكدب انا ! و نتا لي كتهدر كتشوفك كتقرا فواحد الكتااب فيه كثار من هادشي و لا نتا وخا و انا لااااا....
يحيى ( جبد بيها ودنيها بالغواات ) اش جاب داك المسخ و القرف للثقافة الجنسية.......
نسيم ( تتغوت ) و حتى هادي سميها ثقافة جنسية غي هاديك بالفصحى و هادي بالدرجة...طلق مني ايحيى ماتصرفش معايا هكااا انا ماشي صغيرة تتربي فيا.....
دفعها فوق الناموسية تيحيد فحوايجو معصب ..
_ انوريك الثقافة الجنسية بالبراتيك ....
جلسات تتمسح دموعها خايفة تحصل حيت فازكة من التحت....بغات تنوض و حبسها تحت منو تتفركل ....
_ ماباغياش بعد مني ... مافياش مابغيتش خصني ندوش لول بعد مني ....
ركلاتو لوجهو مصدومة وهو كثار منها قلبوها غوات و ركيل فوق الناموسية هاربة منو وهو عايق لاش هاربة و مغدد مزيان مارضاش....شد ليها يديها فوق راسها حتى بغى عقلها يخرج متتحملش العنف و يديها يبقاو محكومين....
_ يحيى بعد منييي فك يدي ...يديييي....
فك ليها يديها عاد تهنات و قلبها لعندو تيبوس فيها و عاشرها هاد المرة معاشرة جريئة فوق المتوقع و حركات لاول مرة غيديرهم معاها طيلة حياتهم الزوجية.....!
فاقت فالصباح لقاتو مشى للخدمة....مارداتش ليه البال ..جلسات بملامح مشوشة و تفاصيل البارحة مرونة ليها عقلها نهار كلو....غي تتجي عينيها فالمراية و تتشوف ثديها تتفكر ديك الحركة تتقلب وجهها ......!
حلا هازة بنتها فحجرها تترضعها صغيورة و زوينة لي شافها مايحيدش عينيه منها...ملبساها مزيان و حاضية عليعا بحال عينيها...ماتتبغيش طلق ليها فرحانة بيها بلا قياس....تتحضيها ملي تتنعس و تفيق و حاضية معاها لاتخنق و توقع ليها شي حاحة تموت و تبعها....! تترضع من صدرها و تحرك يديها صغار حدا وجهها بحركات تيخليو حلا تتبسم بهدوء وهي تتبعها كي كدير....دخلات عندها فاطمة الزهراء مبتسمة تتدوي بهمس...
_ نعسات ؟
حلا ( وجهها باين فيه التعب و شعرها مشطاتو غي بالزربة ) مم نعسات باليل فايقة و النهار ناعسة ...
فاطمة : عادي دابا يتعاوط ليها النعاس حيت صغيرة و صافي...دابا تولي تنعس باليل و تفيق بالنهار....انهزها ليك حتى دوشي ؟عبد الصمد اليوما يكون هنايا ان شاء الله.....
حلا نساتو من بالها....
_ الايام طارت دغيا....!
حطاتها بشوية فبلاصتها تتحرك بهدوء و بالحس باش ماتفيقهاش...هزات لاتخوس ديالها و حوايجها و همسات لفاطمة...
_ غندوش دغيا و نخرج ردي بالك معاها ....
وصات عليها فاطمة الزهراء و دخلات دوشات و الفرق كبير كي كانت قبل ماتولد و من بعد ..قبل كانت تتجلس بالسوايع و تعطي كل حاجة فيها حقها دابا باغية غي تزرب باش تخرج عندها...تتقرا عن موت الرضع المفاجىء تتخاف على بنتها موسوسة و مبرزطة ...دوشات مع دايرة لايزر مهنية من الزغب تهلات شوية فراسها و خرجات لابسة كسيوة زوينة فالغوز و شعرها نشفاتو بالسيشوار و عطراتو مزيان دارت الميكاب و جبدات عينيها ...الصدر عامر بالحليب و الشهية مفتوحة و لكن تتوقف الماكلة فالنص و طير عند بنتها تجلس معاها سامحة فماكلتها.....!
خرجات منورة و مزينة حمقات فاطمة تتعجبها ...
_ جيتي زوينة بزاف مانعطيكش ثلاثين سنة...جيتي بحال بنت عشرين سنة بديك الكسوة....
حلا ( تتبسم عاجبها الحال ) شكرا حبيبة ديالي عويناتك المزونين...
قربات تتطل على بنتها تتضحك معاها لقاتها فايقة...
_ الزين ديالي فايق فتووون كووكو مااامي ...ندوشو و نبدلو حويجات زونين نشوفو بابي نخرجو مع بابي الزين ديالي ....
هزاتها بشوية و فاطمة تتعونها و تقرب ليها الحوايج دوشو ليها تما فالبانيو ديالها وهي تتبكي و تغوت ماسكتات حتى لبسو ليها لبسية دياال الرضع فالغوز رطبة و غطات ليها يديها و راسها و هزاتها تتشم فيها ...
_ شميت فالروايح حتى عيت ماوصلوش لهاد الريحة شحال زوينة....
فاطمة : ريحة دراري الصغار تتكون زوينة بزاف....
حلا : هادي بنتك وقيلة تتعيط ليك لا ؟ سيري عندها لابغيتي عدبتك معايا بزاف الخير ديالك عمرني ننساه....
فاطمة : اوا صافي ! زعما غريبة عليا مراة عبد الصمد خويا بحال ختي و بنتك بحال بنتي فرحانة بيك و بيها ...الغربة صعيبة وملي تتلقاي مع حبابك فيها الجنة و مافيها....
حلا ( تبسمات مخلية فاطمة تتشوف فيها باعجاب ) انا مولفة هكا تنسافر غي سياحة و تنقول سعداتهم لي عايشين برا ...و لكن كندا ماحملتهاش الجو خايب و مقناط...( حنات راسها لبنتها تتبوس فيديها و غي شافت فاطمة ساكتة هزات راسها فيها لقاتها تتشوف فيها..) ها عمتو الزوينة....عمتو الفنة....
فاطمة ( بعفوية ) شكون سماك ؟ سبحان الله لي سماك عارفك غتخرج حلوة هيدا....انا كنت تنشوفك غي بالتصاور و حمقتيني فالواقع زوينة كثار...
حلا ( تترمش و تدور فعينيها ) ربي يخليك عينيك ليكيشوفو كلشي زوين....سماتني ختي الكبيرة ههه حتى عبد الصمد تيقولي الله يرحم لي سماك تتعجبو سميتي وخا مكيقولهاش نيشان ....
فاطمة ( تتضحك ) و فين عمرو قال شي حاجة نيشان انا ختو زعما و مكنعرفوش كيفاش كيفكر....و باينة بلي تتعجبو غي ملي سمى بنتو حلا.....
حلا ( غي تفكرات ضحكات و عجبها الحال ) انا صدمني ...حيت قبل مانولد تنعيى معاه عبد الصمد فرحان ؟ عبد الصمد عجباتك سمية فاتن ! فبالك شي سمية اخرى ؟ مكيقول والو وخا من بعد عرفت ماعجباتوش سمية فاتن و حلف مايدبح عليها و سماها حلا السيد عاجباه سميتي و ساكت .....
فاطمة : ههههه و الا جينا نشوفو بحال حلا بحال فاتن ...
حلا : لااا بنتي مسمية فااتن لي يعيط ليها حلا نتفاهم معاه.....
ظلو تيهدرو شحال توالفو ...حتى خرجات فاطمة عند بنتها و راجلها خرج يستقبل عبد الصمد ... بقات حلا مع بنتها هزاتها عندها و لبسات حلا سندالة عالية مع ديك الكسيوة و الشعر مسبسب جات معاها الامومة الانوثة والجمال و والدة الزين تيشبه ليها وخا مابانو ملامحها مزيان تتقوليهم تتشبه ليها و تتوريهم تصاورها و لي قال العكس تتشبه لعبد الصمد تتعصب و تصعر....!
جلسات و بنتها فيديها مالحقات تصاوب الجلسة حتى جا زوج فاطمة و معاه عبد الصمد ...ناضت واقفة و قلبها قفز و عينيها ضحكو ...دخل تيسمع غوات بنتو و فاطمة استقبلاتو حشمانة سلمات عليه...
_ مرحبا بيك على السلامة ديالك...
عبد الصمد : الله يسلمك...!
تقدم عند حلا عينيه دافية و شوفاتو ولات عطوفة....ضحكاات و حنات عينيها لبنتها طايح عليها السر ...باسها فراسها فرحان باينة من عينيه....
_ على سلامتك .....
هز بنتو بيد وحدة تيحاول يلين حركاتو معاها و حلا قلبها تيقفز بلاصتو تتعرفو كي داير ....
_ اعبد الصمد لااا عطييهالي....راسها ديرو هكا بشوية عليها...راسها بحال البيض ماتقصحش عليها.....
شاف فيها و عينيه دافين و فاطمة و راجلها تيضحكو بلا هدرة بلا جوج صاوبها فحضنو مزيان و باسها فراسها رطبة بلا قياس و كي الكميشة فيديه و حلوة للشوفة تتبكي و تعنزز تيهز فحجبانو عاجبو الحال و مضخم مع رساتو اول بنت عندو فرحان بيها قبل مايشوفها و غي شافها كملااات تلمس حنكها بظهر يديه الخشنة تيسكتها....
_ ششش....
زادت فالبكاء تتفركل بيديها و رجلييها و عبد الصمد تيشوف فيها و يبوس فراسها فرحان بيها ماقال حتى هدرة ملامح وجهو كافية و موفية ... بقات حلا تتبسم عاجبها الحال و فاطمة فرحانة ليهم....
_ فرحانة بيك مسيكنة....
عبد الصمد ( مدها لحلا بعد ماعمر عينيه بشوفتها و بجدية قال ) ماكيضرها والو ! كلشي هو هذاك...!
حلا ( هزاتها منو تتبوس فيها بحنية ) لااا ماعندها والو رضعتها و بدلت ليها و عاد فايقة ماناقصها والو ...
جلسو كاملين مع بعض داك اليلة و فاطمة الزهراء غطير بالفرحة...وجدات الطبلة على حقها و طريقها و تجمعو كياكلو و غوات فاتن داير حالة و فتناتهم مزيان ... ناضت حلا واقفة هازاها عندها قاطعة الاكل فالنص...دخلات للبيت و تكات على جنبها منعساها حداها تترضعها حتى لحق عليها عبد الصمد شافها مخرجة البزولة و رادة شعرها ورى ظهرها....سول بصوت غليض مجهد
_ مالها ؟
حلا ( بهمس ) شش هدر بشوية....كتبكي و صافي ماعندها والو ...
حيد الشوميز بقى عريان من الفوق خوا جيابو كلهم و وراقيه و تكى حداه بنتو من الجهة لاخرى تيحضيها بعينيه و يشوف بزولة حلا في فم فااتن و مرة مرة تيتلمس شعر بنتو بيديه و يدوز بصبعانو على حنكها و حلا حاضية معاه برزطها ....
_ بشرتها حساسة ماتبوسهاش بزاف و ماتبقاش تقيسها بيديك حتى تعقمهم....
_ عبد الصمد ( هز حاجبو و طول يديه لشفايفها مثقل الهدرة ) كملي ليها الرضاعة و خلي ليا حقي منها ....
عرفاتو شنو باغي و فكرات فيها و عاودات... مرت على الولادة تقريبا شهراين متخوفة من اول ليلة بعد الولادة و مزال حاسة براسها مابراتش و خايفة تتحس براسها مضرورة تحتها وماقادراش على اي علاقة جنسية معاه...و بعد الولادة جاها البرود ماجاتهاش الرغبة طيلة هاد الشهراين بالعكس ماعندها الكانة ليها ولا الخاطر تتحس الا عاشرها غيفرعها و باردة من ديك الناحية......
دوز يديه مع ثديبها برغبة حتى زير على وحدة و طار الحليب كمشات حجبانها مقصحة تتبعد ليه يديه و البنت وسطهم ناعسة....
_ مالك هكا مالك ...صدري كيضرني حشومة عليك بففف....( قلباتها تفرنيس ) كيف حاتك فاتن ! فرحان بيها اعبد الصمد عاودلي مكتقول والو كتبقى غي ساكت ؟
عبد الصمد ( بحدة ) خرجي البزولة لوخرى و اجي لعندي نتقاشعو ....
قلبات عينيها تترمش ناضت تتمسح حالتها و تتدور فعينيها ماباغياش و مافيهاش ... حتى ناض لعندها تيتمايل باكتافو و قنتها مع الحيط تيبوس فيها جننها و برزطها.....
_ صبرنا ليك حتى تولدي كلتي تقدي عليه... باقية عند كلمتك ولا وليتي من قبيلة الغشاش.....
حلا ( تترمش و تهرب عنقها منو ) ماشي داباااا....باقي مابريت اعبد الصمد باقية لحمي فشكل مانعرف نوصف لك.....
قلب ليها وجهها لعندو بصبعو تيشم فرقبتها معلي حاجبو ...
_ رضعيه ....
تتبوهل عليه هو تيقصد حاحة وهي بلعاني تتجاوب على حاجة اخرى...
_ رضع لابغيتي و عند غي تقصحني....صدري كيضرني.....
زيرها فالقنت تيدوز بنيفو على وجهها و باسها من شفايفها دفعاتو و عاودات مرعوبة و خايفة الحالة لي شدااتها مايحس بيها غي لي مجرب حاسة غطرطق فيها شي حاجة وغيفرعها و غتموو بلاصتها.....تملك جسدها بيديه و تعانقات شفايفها مع ديالو وهي مزيرة مامرتاحاش....جلسها فوق رجليها مباشر فطقوسو البربرية وهي تتعوح و تبكي عليه تما خايفة ....
_ خفت خفت اعبد الصمد خليني شي ثلاث ايام ...يوماين غي نهار نهار صافي والله ماقادرة مخلوعة كثار من ليلتنا لولة....
بعد ليها شعرها من على وجهها تيشوف فيها باعجاب تتبكي و تفشش عليه بحال القطة مخلوعة....زينها و صوتها و جسدها تيعجبوه حك لحيتو مع وجهها تيلعب فشعرها ....
_ راشقة لينا و طالعة لينا التنغيمة بلا مانقلبو الكارا.....
حلا ( تتبكي ) حسابليك كنكدب والله مازدت فيه.... بحال ملي تهرستي يديك مابقيتي تتقدر دير ييها والو وخا برات تتحس براسك ماقادرش تفورصي بيها و هكاك انا ......حتى نرجعو للمغرب عفااااك.....
هي تتبكي وهو تيلعب فمفاتينها تيفيق فيها الرغبة عاجبها البوسان و الدلع و لكن الوجبة الكبرى تتهرب منو و تنوض تبكي عليه خايفة دوخها و رخاها جاها لنقطة ضعفها فالفراش كاتمة غواتها لاتفيق فااتن و يسمعو البقية ...و فعلا ناضت فاتن تتبكي ناضت عندها طايرة نظفات صدرها و عطاتها تعرض شحال حتى نعسات عاد رجعات عند عبد الصمد تتزعم راسها وخا ماكرهات يخليها حتى تقنع هي و تبرى ...دارت ليه خاطرو و هلكها مزيان و غواتها برداتو بعضة فكتافو حتى حفرات سنانها فيه غتموت بالبكاء و تقصحات مع شوية تبوحيط كملتت لي بقى......!
_ كنت غنموت ..والله مازدت فيه فرعتيني انا باقي مابريت ...
باسها فراسها و باش يديها بخشونة...
_ هاد اليدين مالايقش ليهم الفراغ....لازم يفيضو ذهب و دياموند .....
حلا ( تكات على صدرو و شفارها فازكين بالدموع تتفشش عليه ) تعدبت بزاف فالولادة كنت غنموت اعبد الصمد ...خفت نموت و مانشوفش بنتي و ملي شفتها خفت نموت و نخليها....النعاس مابقيتش كنشوفو و مابقيتش مسوقة....فرحانة غي بيها ....
عبد الصمد تيسمع ليها و يلعب فمفاتينها ساكت.... معزة حلا عندو تزادت اضعاف تتسخطو حتى تيكرهها و تيرحع يدوز ليها مصايبها وحدة بوحدة ونفسو ماتترضاش عليه علاش تيسامحها....و دابا مكانتها عندو طلعات الفوق حيت ولدات ليه اول بنت و اول فرحة عندو و حلاوتها باقية غيعطيها ليها حيت ولدات ليه...و ماشي اي حلاوة....! القهوة المخيرة تتدخل زبالة الفلوس غتولي فسميتها و الدار لي ساكنة من ثلاث طبقاات بفراشها لي ساوي الملاين غيعطيها ليها و نسبة من ارباح رياض شفشاون غتكون من نصيبها...!
دوزو ايام فكندا ...حتى انهاو اجراءات فااتن و جمعو حوايجهم راجعين للمغرب ...! العائلة عرفاتهم جايين كل واحد و فين تيوجد و عيشة تتسابق و تعاند مع حميدة....غادية جاية فوسط دارها معرية الشعر ولابسة قميص خفيف ضعافت شوية و شفايفها قشراتهم بسنانها معصبة...
_ غيصدقو لهنا... الاصول هي هادي اولا ؟ كامش تمشي لدار يماها...الحفيدة ديالي نشوفا انا لولة و تجلس عندي و لالاهم حميدة لابغات تشوفا تجي هي لعندي ...
صفاء ( مبرزطة بنفيخ عيشة ) و غيصدقو لهنا غي هني بالك اخالتي عيشة ...
عيشة ( بغضب ) عطيني داك التليفون نشوف سعيد واش وصل للمطار.
عطاتها صفاء التليفون و سلتات من قدامها تتسوط عصباتها....مشاات للكوزينة حاضية مع المساعدات تينظفو و الطباخة تتطبخ العشاء ....و صفاء فوق راسهم حاضية الشغل لابسة بيجامة أنيقة و شعرها زعر مجموع بمقبض ...
_ ملي تكمل احبيبة زيد عدل بلاطو د المالح هذاك الكبير والصنادق د الفروتا غيجيو دابا شوية.....ديري شي سلاد منوعة هازة الفواكه كاملة ...
الطباخة : وخا اختي صفاء كون هانية لهلا يحشمنا ...
الاستعدادات خدامة على قدم و ساق ...عيشة ماقداتها فرحة بحفيدتها وولدها و حميدة تتوجد الدقايقية و الدقة المراكشية باش تستقبل بنتها و حفيدتها ملي توصل ...شادة التليفون غادية جاية فالفيلا مع التحضيرات ...و خلود سبقات حلا و جات للمغرب هازة بنتها الزعرة حتى هي سماتها إسراء ولدات قبل من حلا بشهور ...!
_ و ماما غي بشوية عليك ...اولا راه غيوصلو لدار عيشة ماشي لهنا ! المراة تتبع راجلها حسابليك غيسبق النسيبة على ماماه....
حميدة ( جلسات تتنهد ) و عرفنا هادي مافيها شك و لايني غدا غتجي لهنا...و كلشي خصني نديرو على بكري....تريتور و الدقة المراكشية و وصيت نسيم تجيب الورد ....
خلود ( تتراري ببنتها فيديها تتضحك ) كاع مادرتو ليا انا هادشي ملي ولدت غرام شفتي دابا الفرزيات ...فرحتو بنسيم و بحلا و انا والو ...
حميدة ( غوبشات ) نسيتي شنو درت ليك فالسبوع و فسبع شعور ؟؟ هوما شفتهم بعدا ملي كانو فسبع شهور د الحبالة... شد فمك شد ...
خلود ( ضحكات ) هاهي شاداه ....
وصلو عبد الصمد و حلا لدار عيشة....خرجات من المقعد الخلفي هازة البنت فيديها مغطياها من البرد و الابتسامة فالتة ليها و مزينة ثغرها....دخلات للدار و عبد الصمد وراها شاد ليها الصاك بطريقة بربرية بحال شاد ميكة د الحوت ماتتلقيش بجمالية الصاك و ثمنو الغالي....تلاقاو التهاني و سعيد و خوتو فرحان ببنت خوهم و عيشة بغات تنقز من الدروج ...كانت هابطة تتزرب و هي تقشع صاك حلا فيد عبد الصمد خنزرات و قلبات عينيها بالزربة للبنت عند حلا ...مشات طايرة حيداتها ليها تتسمي الله...
_ ابسم الله بسم الله مشاء الله .....
حلا ( ردات شعرها وراها ظهرها حاضية معاها ) و هانتينا اخالتي عيشة ها الحفيدة ...فرحي مع رساتك دابا...
باست عيشة راس حفيدتها عاد باس ليها عبد الصمد راسها تيهز فيها حاحبو و ينطق بنبرة معروفة عندها ....
_ عيشااااا هانية ...
عيشة ( تتهز نيفها و تراري بالبنت ) ماهانيااشي على قلة السميات قالك حلا.... مصيبة ماشي سمية هادي د البريكيتوس و د المونيكات...و حتى فاتن سمية مافيهاش مايتقال....كون غي سميتوها عيشة على هاد الحساب....غنبقى نقولها عيشة لا فااتن سمية ولا حلا ....
طلعو الفوق تيتسمع ضحك حلا و سعيد على تعليق عيشة و عبد الصمد وراهم تليفونو تيصوني و يعاود .....باركات ليهم صفاء و سكينة و زوج سكينة و عيشة جالسة فوسط الصالة هازة فااتن فرحانة بيها...و حلا حداها دايرة رجل على رجل لابسة غوب فالنواغ كلاسيك الكرش ماشي ممحية لكن ماعندهاش معيقة حيت اصلا كرشها كانت صغيرة و ماكبراتش بزاف و زاد الاسود خبى العيوب ... شعرها دايرة ليه بوب كاري طويل تيلمع بلمعة الاسود و المكانة فاليد عاطية العين بقات صفاء و سكينة غا تيشوفو فيها شحال زوينة و ذواقة فالباس وكل مرة بتسريحة فشكل فداك الشعر تتدير فيهم النفس حتى هوما يكونو بحالها و يغيرو من شكلهم شوية....!
الهدرة و الضحك بين الاخوة و المساعدات غادين جاين تيحطو و يعمرو الطبلة ...هزات وحدة عينيها فحلا تتعبرها بفضول و نطقات عاطية الصواب...
_ مبروك عليكم الله يخليها ليكم و يكبرها فعزكم...
كانت حلا مناكرة مع عيشة تيقاد لبنتها غطاء راسها غي سمعاتها هزات راسها فيها مبتسمة داك الابتسامة الحلوة المبالغ فيها...
_ الله يبارك فيك احبيبة ديالي لهلا يخطيك.....
ابتسمت المساعدة و عجبها الحال و خرجات تتعوج على صحبتها...
_ خمس سنين و انا خدامة حتى شي قمقومة من القمقومات لي كنت خدامة معاهم ماقالتي حبيبة ديالي ....
ردت صديقتها...
_ حلا هكاك عاملة كنعرفا ملي عاد تخطبو كتهدر معاك بحال الى صحبتها و كيعجبها تشد الجموع وتضحك وخا كتبان عليها منفخة و مكبرة تهدر معاها العكس ...كتجيني دغيا كدخل القلب ماشي بحال صفاء قبيحة و غي كتغوت دايما كتبغي تبين انها هي فوق منك و حسن منك ...
جلسو تيشدو الهدرة متلفين الوقت ...
_ بصاح ! انا ماعمرني شفتا حتى لدابا....جاني سي عبد الصمد قبيبح و صعيب على سعيد و باينة عبد الصمد حاكم فيها و سعيد حاكماه مراتو.. حرايمية ديك صفاء....
المساعدة ( ضحكات ) الله اعلم اختي المظاهر خداعة....قبيح معاها و صعيب و هاز ليها الصاك و قريب ياكلها بعينيه ؟ انا كنعرف القبيح و الصعيب موت نتينا حداه و شكون داها فيك وكاين شي معقدين والله لا هز ليك الصاك تتهزيه نتي و احلة فيه و مع الترابي مايرضاش و عاد قدام يماه و خوتو الرجال كاع ماتسوق ماتقولش عليه كتامي والله ... كنت كنقول فيه عرق ݣاوري و رديت ليه البال فشكل حتى من بعد عاد عرفتو نص حياتو دوزها فسبانيا....
قفزو بجوج على غوات صفاء ....
_ ثورية فين السلاد ؟ ..
ثورية : وخا وخا انا غنجيبو ....
مشاو طايرين خارجين بيها هي و صحبتها ثقيييلة و مستوووكية دخلو للصالة لي هرسات ليهم فاتن داك السكات بغواتها ماسكتات حتى هزاتها حلا و عبد الصمد غا تتبكي تيغوبش و يسول باهتمام تيقول عقلو غا مريضة ولا ضراتها شي حاجة....
_ مالها غي كتبكي احلا....
حلا ( تتبوس فيها بحنية موسعة خاطرها معاها ) ماعندها والو اعبد الصمد ...عادي كاع الدراري الصغار كيبكيو ...
ناضت للبيت بدلات ليها و رضعاتها حتى نعسات نقات راسها و يديها عاد رجعات دخلات للصالة و جلسات حدا عبد الصمد تتبسم مع صفاء و عيشة تتسول و تعاود باغية تعرف كلشي بالتفاصيل ....تعشاو و عمرو الكريشة و جلسو مكملين الهدرة... حلا كانت تتضحك مع صفاء و حطات يديها على فخض عبد الصمد و بتلقائية نزل يديه على يديها تيلعب بالخاتم فصبعها....و عيشة الغيرة رجعات ليها من جديد ...بقات غطرطق ! حبساتها عندها و شافت فسكينة....
_ سكينة فتح الماريو جيب داك الخير ....
فهمات سكينة شنو المطلوب و ناضت تنفد....فتحات ماريو عيشة و جبدات كولي ذهب ثقييل و غالي و لكن مازوينش ! عطاتو لعيشة و صفاء و حلا متبعين العين....
عيشة ( هزات نيفها تتشوف فحلا ) ها ديالك اهالة ...عطيت بحالو لمراة ابراهيم و مراة سعيد و مراة عيسى ومراة عبد الصمد ديالي تا هي ماشي من الاصول نخليها بلاشيي....
حلا ( شداتو من عندها من عندها تتبسم غي فتحاتو و شافت الكولي وخا ماعجبهاش و ماشي ذوقها تصنعت الاعجاب بمهارة...)اواعدي شحال كيحمق ...شكرا بزاف اخالتي عيشة والله احسن كادو جاني شوف اعبد الصمد شحال زوين...
عبد الصمد ( هز حاجبو )ممم ذوايقية الالة عيشة .....
عيشة ( عاجبها الحال ) بزز يعحبا مالو مايعجبا وهو الدهاب كاين ماكيعجبوشي الدهاب ؟
ضحكو على كلامها كاملين و مانعسو داك اليلة حتى قرب يطلع الفجر و لالة فاتن فايقة معاهم قاتلاهم غوات و بكاء حتى تتهزها عاد تتسكت ....! غي طلع الصباح مشات حلا لدارها مع عبد الصمد و جايبة المساعدة تنظف الدار ...مشى عبد الصمد لشغلو و طلعات حلا مع ثورية لي فاتحة فمها حتى لودنيها فالفراش الفخم و الذوق العالي الكريستال و الرخام و الاثاث الكلاسيكي تيسرق العين....
_ حلا : بداي من البيت لي حدا الصالون عفاك باش نحط فيها البنت ...
ثورية : وخا هي لولة....
مشات ثورية تقضي شغلها و حلا بقات تتقلب فدارها واش دخل ليها شي حد فغيابها ... دخلات لبيتها تتدور فعينيها عليه بنظرة تفحصية مشككة...الفراش باقي مصاوب بحال مانعس عليه حد.. قبل ماتسافر قلبات المخاد و حطات رسمة المخاد لي تتكون الفوق رجعاتها التحت و حطات سندالة الحمام مخالفين و خلات السليب ديالها تحت غطاء الناموسية ...هزات الغطاء بيد وحدة تتاكد واش باقي تما لقاتو باقي تما و معاه ملابس عبد الصمد الداخلية حطو على ديالها بحركة مقصودة....! هزات حجبانها غالباها الضحكة.....
_ ولد الحمقة.....
اتصلت بيها حميدة علماتها عبد الله غيجي عندها... فرحات و وجدات راسها لاستقبالو ...تلاقاها بالضحكة و الفرحة باسها فراسها تيرضي عليها هاز حفيدتو...
_ مشاء الله على لالة فاتن بنت البحري ....
حلا ( فرحانة و عاجبها الحال حيت فرح بيها وخا ماشي اول حفيدة ) تتشبه ليا ياك ابابا.....
عبد الله ( تيسايرها ) غي حلا محطوطة سبحان الله ....
حلا : و شفتي قولها لالة حميدة التصاور حاحة و الواقع حاجة....
ضحك تيهز فراسو ...
_ يلاه نمشيو يماك كتستنى فيك.....
حلا : غادي نقولها لعبد الصمد و نمشيو...
اتصلت بعبد الصمد تتسول فين هو تيقول غي مشغول ماتيقولش بلاصتو فين بالضبط ...علماتو بلي غتخرج مع عبد الله ...و مشات تبدل عليها عندها دي غوب زوينين و لكن كلشي خصو يتبدل مع البنت ملي تبغي ترضها تيخصها تحيد و تيصعاب عليها ترضع بغوب سامبل و جاية مشدودة من القدام ...اختارت بنطلون كلاسيك واسع فالبيض و شوميز بالصدايف من القدام ديال الحرير فلون العسل...شعرها مطلوق مسبب بديك لاكوب تيبقى يغطي ليها النص من وجهها ....لبسات لفاتن الابيض و الغوز و جهزات صاك البيبي فيه حوايجها و البيبرون و لي كوش ولي بخودوي ديالها والمناديل المعطرة و المعقم...و عاد هزات صاكها هي مواتي مع اللبسة و عبد الله تيغوت برا...
_ حلااا و حلا ينعلها قاعدة فيك ابنتي....
زربات حلا و خرجات لعندو معافرة مع الصاك...
_ و هانا هانا....هز معاك صاك فااتن ابابا.....
هز ليها الصاك و هبطات معاه التحت ركبات اللور على حساب البنت و شد الطريق للفيلا كان استقبال بالحليب و التمر و الورد و الدقة المراكشية تصدمات حلا و عينيها تبسمو ضماتها حميدة تتبوس فيها و تبوس فحفديتها فرحانة.....
_ ها الكندية ديالي جاااات ...القطيطة ديالي مشاء الله مشاء الله....
هزاتها من عند حلا و دخلو الداخل لقات نسيم و خلود و جلسو تيضمو بعضهم موحشينها ....! عمارت الفيلا عند حميدة لي ماتتحس بيها عامرة حتى تتكون حلا فيها وخا يكون معاها ولادها كاملين و حلا ماكايناش صافي الفيلا خاوية عندها ..... فرحات حلا بين حبابها و المباركات و صداع الداري الصغار و كلشي تيقول حميدة تبارك الله عندها اربعة حفايد بنات و حفيد واحد ولد و مابايناش فيها ومن هاد السيرة جبدو رضا و مراتو و بداو يتسولو علاش ماتتولدش و النميمة عاطينها قتلة ....!
جلسات معاهم نهار كلو و عبد الله فرحان ببناتوو ...عطى الكادو الولادة لخلود و لحلا....اونسومبل ديال الذهب ليهم بجوج داكشي ديال الرفيع اربعة مليون لوحدة فين ماتولد شي وحدة من بناتو تبعطيها كادو ...نسيم عطاها جوج مرات و لكن ديالها كانو ناقصين على اربعة مليون اما خلود و حلا جاوه فوقيتة الفلوس موجودة برعهم ...و حلا تقول عمرها شافت الدهب فرحات بيها و لبساتتهم تتضحك...
_ اول مرة ابابا تعطيني شي كادو غالي هكا ....
عبد الله ( ضحك ) شوف نكارة الخير ....فيزا لتركيا و لاسبانيا جبتيها من جيبك ....
حلا ( الضحكة مضوية وجهها ) و سبحان لي ماينسى ...خصكم تهلاو فيا جيت من الموت داز عليا صعيبة بزاف.....
نسيم :ههههه و لي تلاقيتيه قولها ليه كتبيها نتي فوجه بنتك حسن لي يشوفها يعرف. ماماها تعدبات باش ولداتها ..انا بابا خصني نتقلق هوما عطيوهم غلى من ديالي الفرزيات زعما.....
ضحكو و الدنيا عندهم منورة....دارت حلا و خلود سبوع مشروك فقصر الافراح بالعمارية عرس مغربي على حقو و طريقو و حلا اول مرة تطلع على العمارية و كتاب تطلع هي و بنتها لابسين بحال بعضهم و التاج و الضحكة من الطرف للطرف و الهدايا لي جاوها من معارفها و كلياناتها و معارف عبد الصمد بلا حساب ..بنية قد القميلة و جمعات صندوقة ديال الدهب و الهدايا الفخمة...نسيم جابت ليها كتاب عن الامومة و النصائح و غوب ليها و لفاتن بنفس اللون و الشكل و رضا حتى هو جامع الحجبان و منفخ عطى الكادو لخلود و لحلا....! و عاد جات حلاوة عبد الصمد و عطى لحلا الدار و القهوة و نسبة من الرياض بعقد بيع تصدمات و ماتوقعاتهاش فرحاات حتى بغات الفرحة تخرج ليها من ودنيها ....!
جالسين فالجردة هي و نسيم و خلود و حميدة ...جلسات بنتها فحجرها حاضية معاها مبرزطة...
_ ماعرفتش شنو عندها مع شعري...
حميدة : و حطي البنت حطيها احلا غتولفيها الهزان غتوحلي معاها و غتندمي ..
حلا ( تتلعب فشعر بنتها و تتشم فيها بحب ) خليني الا ماهزيتهاش انا شكون يهزها....تيعجبني نهزها...حبيبة ديالي انا ....
خلود ( تتبسم معاها ) سبحان الله شحال تتشبه ليك ....
حلا ( فرحات ) معلوم تشبه ليا ؟ انا لي والداها لمن بغيتي تشبه لعيشة ؟؟
نسيم : سعداتك مزال عندك الخاطر....ردي بالك لا تحملي بحالي و البنت صغيرة ! كديري الاحتياط ...
خلود : خليها اختي تولد ...تحمع ثروة مع راسها غا بنت وحدة ولات تتضرب ليك الحطة بزبابل الفلوس ...
حلا ( عينيها تيبان لونهم زوين مع الظوء ) وخا يعطيني 100 مليون مانزيدش نولد دابا بحال القنية نبقى غي كنولد و نضيع صحتي و مايبقى عندي الخاطر لحتى واحد فيهم...اللهم وحدة نعطيها من جهدي و نلقى وقت لراسي ....
خلود : نسيت ماقلتيش لينا شنو عطاك عبد الصمد كادو الولادة....
حلا ( حيدات الشعر من على وجهها مبسمة ) ماسولتونيش و ماقلتها لحد من غير ماما....قلت حتى تسولوني و نقول ليكم نتوما....
نسيم( ابتسمت ) : شي مازيراتي زعما ؟
حلا ( ضحكات )لا ...عطاني الدار و القهوة فطنجة و كل شهر غيبقى يوصلني حقي من رباح الرياض ديال شفشاون ...( هزات حجبانها ) بعقد البيع نبيع ولا نكري ولابغيت نعطيها كاع تنتصرف فيهم كي بغيت....
خلود ( باستغراب ) هاي هاي عندك غا تقلبي على السيد ويطلع ليك فالراس ...
حلا ( تتبوس بنتها كل شوية تتضحك ) و حتى لا بغيت زعما نطلقو تيبقاو ديالي ماعندو حق فيهم....اصلا مابقى تيقعني حتى واحد من غيرو ياك اماامي ...بابي زوين....
حميدة ( ضربات يد على يد تتضحك ) و سبحان الله مبدل الاحوال.....
نسيم : و دابا شنو ! غادي تبقاي جالسة فالدار ! ماعندكش شي فكرة على شنو غديري ؟
حلا ( هزات حاجب ) الفكرة كاينة و شلا افكار ...باغية ندير معرض القفاطن و التكاشط و الجلالب يكون كبير و عاطي العين و لكن انا باغية مدرسة ولا سميها حسن محمع نسوي ...شي ارض كبيييرة ديال شي فيلا ندير حمام و سبا و اي حاجة متعلقة بالمراة ...و ندير جناح خاص بالاطفال مع المربيات باش الوحدة ملي تجي ماتبقاش تخمم لولادها مع من يبقاو و كدا ...تجي تبرع راسها وولادها محضيين غندير فيها بزاف د الانشطة و لي سرفيس....لي بغى يتعلم الخياطة والطبخ و الاتيكيت و البريستيج و الرقص الشرقي و الزومبا....
خلود ( بدهشة ) زوييين و لكن خصك فلوس صحيحة احبيبة ديالي....
حلا ( تتضحك ) و عارفة والله ماكرهت نديرها.....و زيد راني فكرت و عاودت مانقدر ندير والو هاد الفترة ماغاديش تعوض و مانقدرش نخلي بنتي وهي صغيرة و نفكر فمشروع بالي مغيكونش معايا....حاليا وقتي كلو لبنتي حتى تكبر شوية.....
حميدة ( بنظرة رضى ) هكاك الله يرضى عليك تهلى فبنتك و شي لاخور عندو وقتو....
فاتن تحيدات ليها اللهاية و طلقاتها للغوات فارعة الدنيا ...رجعاتها ليها حلا تتضحك و تلعب فشعرها وتقاد ليها البونضو ديال ديور مرخوف شوية على راسها و لي تيجي يبوسها ولا يهزها تيعقم يديه هو لول تتقولك بشرتها حساسة تتخاف عليها.....عبد الصمد و دايراه ليه كثار من هكا بعض المرات تتشوفو تيدير صبعو ففمها تتمصو تيبغي عقلها يخرج ....!
من فيلا حميدة لدار عيشة تتلف وقتها معاهم....عيشة هازة فاتن تتفليها بعينيها فلي ...
_ ضعافت كتخليها بالجوع ...
حلا ( متكية حداها تتضحك ) و هاهي معاك تهلاي فيها نتي....الحمد لله مانفراتش ليا الرضاعة....
عيشة ( تتهز نيفها بفخر ) سبعة د العيال و حتى واحد فيهم مانفر رطاعة ديالي كاملين رطعو...
حلا ( هزات حجبانها ) سبحان الله ...عبد الصمد حتى هو ؟
عيشة ( تنفخات ) و شنووو! عبد الصمد كان يسمح فلعب و يشوفني يجي كيجري لعندي باش يرطع وخا كان عندو ثلاث سنين لاصق فيها بحال العلقة و خا مابقى حليب من ليل ليل كيجي يخشي يدو فصدري و يطبطب عليها عاد ينعس قاعدة فيه مابدلا حتى عمل سبع سنين.....
حلا ( بدهشة ) اوييلي ! سبع سنين كان كبير....
عيشة ( غوبشات ) و عشقو على من جاه.... مالو كيفاش شفتيه دابا ! راجل و سيد الرجال نقص منو شي يد و لا رجل ....
حلا ( تفكرات كلامو ملي قال عمرو داق رضاعة مو كي دايرة حبسات الضحكة و ردات ) لاا لا عادي انا غي كنهدر و صافي.....
عيشة : غدباتو معانا !
حلا ( شاف فالمكانة فيديها ) نوو شي واحد من معارف عبد الصمد عندو سبوع لبنتو و معروضين ...خصني نمشي نوجد راسي على بكري ...
عيشة ( غوبشات ) ممم و حلا غتديها معاك ولا !
حلا : فاتن اخالتي فاتن ...انا لي سميتي حلا تتعيط ليا هالة ....سي ضروري راها باقية تترضع ماتجلس بلا بيا غنديها معايا.....
عيشة ( بقلق ) و حضي معاها عنداك الفرفارة تلهى مع المهاودة و الحضية و تنعسى العايلة ! حضي معاها من عين بنادم كيبقاو يشوفو فيها فحال عمروم شافو العايلة صغيرة.....
حلا ( هزات صاكها وصاك فاتن و سوارت الطموبيل ) كوني هانية غي هني بالك....غدا نديرو شي دويرة فطنجة نشوفو الجديد ...شحال ماخرجنا انا و ياك....
عيشة ( هزات نيفها ) ممم دابا نشوفو ...
مشات حلا لدارها و جلسات تتقاد وجهها و شعرها...لبسات جلابة د الحضور شيك و معمرة العين...لبسات ساعة ذهبية رفيعة و خاتم الدياموند و صاك أنيق مع الجلابة ...! لبسات لبنتها و هزات الكادو وركبات مع عبد الصمد ...! وصلها للفيلا فين كاين السبوع كانو النساء بوحدهم و الرجال بوحدهم....تبعات حلا المراة لي استقبلاتها بابتسامة واسعة تترحب بيها و تعاود قربات تزغرت...
_ مرحبا و الف مرحبا بمراة عبد الصمد ....
حلا : بارك الله فيك شرف ليا الحاجة.... مبروك الحفيد الله يكبرو فعز باباها و ماماه....
الحاجة بقات تتبسم معاها و تكبر بيها فرحانة حيت جات ...رافقاتها للمجلس و غمزات لبنتها تكلف و ناضت البنت عندها تترحب و تعاود...و غي قشعات خولة حتى هي كاينة فرحو بجوح و جلسو حدا بعضهم تيضحكو...
_ ماقلتش غتجي .... حسن ماتنعرف حتى واحد هنا...
خولة ضاربة جلابة د الفريع و حجاب عادي ساترة بيه شعرها ماكاينش الرجال معرية وجهها ...
_ حتى انا كنعرف غي شي وحدين قلال و صافي ...كيفاش جاتك التربية شوية ؟
حلا ( ضمات بنتها لحضنها تتبسم ) ماساهلة ماصعيبة الحمد لله كلشي غيدوز ...
طالت الجلسة و هذا تيفوح على الاخر بزينو و بذهبو ....كانو تما نساء تيقطرو بالزين و اغلبهم نساء البزنازة شي زين عمرك تشوفهم فشي بلاصة ....العين تتنقل من وحدة لوحدة...و حتى خولة و حلا خداو حقهم ...خولة لي يشوفها مايعقلش عليها...زيانت كثار من قبل ولات تتلبس غي الغالي و الرفيع ...قدام الرجال ساترة راسها ماتيبانو فيها غي العينين و قدام النساء معرية زينها و تتلبس حتى هي على شهوتها دايرة معارف مع بزاف د النساء و صحابات ...و حلا اول مرة تحضر لشي حد من معارف عبد الصمد تتحس كلشي تيشوف فيها و يحضي فيها و فالبنت و تيهدرو فيها....و حتى هي تتزيد تبسم حتى تيتعلاو خدودها و شعرها تيتحرك معاها بديك لاكوب مادايراها حتى وحدة بحالها تما ...كاملين ها السالف مطلوق زعر ولا كحل و لا ساترة شعرها بالحجاب....!
و من دوك العيون لي كان تيحضيو حلا كانو عيون فلون القهوة تيتحركو مع تحركات حلا وتتعبرها من راسها لطراف رجليها كانت صديقة العائلة شعرها بلون الفحم و سميمرا فوجهها و زوينة لابسة جلابة فالنواغ انيقة دايرة رجل على رجل و سيقانها تيبانو من فتحة الجلابة....! عاقت حلا بشوفاتها ليها و تصرفات عادي تتبسم معاها و تقلب وجهها...تتهدر مع خولة بين سنانها....
_ كلاتني بعينيها....شوفاات ديالها معيقين بحال واكلة ليها رزقها....
خولة ( تتشوف فصاحبة عيون القهوة بلا ماتعيق ) قلبات وجهها حسات براسا وقيلة....
حلا ( ردات شعرها من ورا ودنيها تتبين الحلقات جالسة بفخامة...) حسيت بيها بحال تتعرفني لا ؟
خولة ( بتفكير ) انا عمرني شوفتا زعما يقدار تكون كتعرفك بصاح....
طيلة الجلسة و بال حلا معاها ...غي تتحصلها تنشوف فيها تتقلب عينيها و تضحك مع لي حداها....بقاو هكاك حتى خوات البلاصة جنب حلا و عمراتها مولات عينين القهوة...غي جلسات جنبها دخلات مع نيوف حلا ريحة شعرها زوينة. .
شافت فيها حلا بنص عين حاضياها كي واحلة مع داك السالف و السيقان بيضين وخا بشرتها قمحية و الدفار مصاوبين و الاناقة تتقلب العينين....رسمات ابتسامة واسعة تتحاول تجبدها...
_ ريحة شعرك زوينة ....
شافت فيها البنت كانها ماتوقعاتش تهدرها...و ردت...
_ شكرا نتي لي زويينة....
حلا ( بكدب ) سبحان الله ديجا شفتك فشي بلاصة و ماعقلاش...بحال تنعرفك...
البنت : بصح ؟ انا ياسمين و نتينا حلا ياك تنعرفك و لكن نتينا محال واش كتعرفني ...
حلا ( هزات حاجبها بنظرة جميلة ) و شفتي صدقتي تتعرفيني و انا لا...عرفيني بيك الالة ياسمين سبحان الله كاع صحاب هاد السمية عندي عزاز و تنتفاهم معاهم بزاف...
ياسمين ( بنظرة باردة مرت من عينيها ) انا طليقة راجلك عبد الصمد ....
العافية طلعات مع حلا شواتها مزيان اخر حاجة توقعاتها كتمات ديك العافية وحافظات على ابتسامتها المزيفة و حاجبها مرفوع بحال الموضوع عادي مولفة بيه ...
_ممم طليقتو الاولى و لا ثانية ....
ياسمين ( بنص ابتسامة ) الثالثة.....
يتبع..
التنقل بين الأجزاء