سمماتها ديك الهدرة و تلفاتها مزيان قلبها صرب بالزربة بقات غي تترمش بحال مونيكة ..تزنكات و حمارت و بانت فوجهها العمى و يقشع التغير لي بان فيها...ماهدرات حتى هدرة و مازادت حتى حرف ...بقات ياسمين تتبسم و قلبات وجهها منها تتشرب اتاي لي قدماتو ليها السرباية تتجاوبها بميوعة...
_ شكرا ...
بلعات حلا ريقها بصعوبة تتهز رجليها و تشوف هنا و لهيه و تترمش و تعاود و عينيها حمرين بحال الى جالسة فالشوك ...
النساء لي تما كل مرة وحدة باغية تخلق صداقة معاها و طالبة ليها نمرتها و تتعطيها ليهم و عقلها مرفوع....الابتسامة تترعد على شفايفها...
ناضت فاتن تتعوج و تبكي تتحاك فوق رجلين حلا باغية تحطها فالارض و حلا شادة فيها مزيرة عليها حتى تجننات فاتن و حطات يديها على فمها و طلقاتها بغوتة كلشي تيشوف فيها ...ابتسمت حلا بزز و حركاتها غير مدروسة وجهها مغير و باينة ماشي طبيعة...
مارداتش عليها حلا و ماعاوداتش شافت فيها خلاتها هكاك بحال ماكايناش و ماهدراتش ماعندها ماتقول ليها اصلا...مايمكنش تجاوبها شنو عرفها واش تتدوي بصح...صافي اي وحدة جات عندها قالت ليها انا طليقة راجلك تيقها ...تعصبات مع غوات فااتن والصعر لي شدها...هزاتها و تمات خارجة و الحاجة شافتها ناضت جات بالزربة...
الحاجة : و اجي اجي ندخلك للبيت ترضعها كلشي ديالك ابنتي ...
حلا : بارك الله فيك...
مشات معاها لبيت الضياف و خلاتها بوحدها جابدة البزولة تترضع فاتن و عقلها غايب مارادة البال ليديها لي تيترعدو ...
_ ياربي تكون كتكدب ياربي مايكونش بصح ...غنقلتو غنقتلوووو....
مارضاتش و ماعمرها تبلع ليها الا كانت بصح ماعمرها تخايلات اصلا تحط فهاد الموقف...هزات تليفونها تتلهى فيه دايرة تصويرتها مع عبد الصمد على الشاشة...شافت فيها شحال و قلبات بالزربة تتطلع و تهبط فانستاغرام حتى دخلات عليها نمرة جديدة فالواتساب مابقاتش ليها النمرة القديمة و بدلات كلشي و الواتساب مابقاش ليها عامر بنماري الكليانات ...! و هادي كانت نمرة اسبانيا و البروفيل فيه البياض ...دخلات تشوف شنو مصردة و شكون! ....تتلقى تصويرة ياسمين مع عبد الصمد فاسبانيا جالسين فكافي وهي متكية على كتافو وهو تيشوف جهة اخرى...باين الصورة تشدات بالزربة وهو مامسوقش ماكلفش راسو حتى يشوفو فالكاميرا.....
زادو ترعدو عليها يديها تتهز فرجليها بالزربة و رمات التليفون تتغلي ..
_ السلكوط السلكوووط تفووو تفووو....
عضات يديها مبردة غدايها بالجهد حتى تصورو سنانها فلحمها و عينيها كي الجمرة...ماحملاتش هاد الموقف تشوات فالنار باغية طرطق و تسطى و الدموع فعينيها هابطين كيجريو....حسات بالاستنقاص و بحال شي حمارة بوهالية...!
سالات الرضاعة لبنتها و خرجات من البيت بوجه حمر و عينيها تيدورو بالزربة....هزات صاكها من عند خولة و خرجات من الفيلاا و الحاجة وراها مستغربة...
حلا ( بزز تتهدر ) تخنقت الداخل و صافي نشم شوية الهواء ماقدرتش نتنفس الداخل ....
الحاجة : وخا نتينا تعرف...
بقات حلا برا فالجردة تتشم الهوا و تزير على راسها و فاتن فيديها تتغوت و تخشي يديها ففمها تتنغنغ ...
_ ببب..ببب.....
ماصونات ليه ولا عيطات ليه...باغية تبلع لي وقع و حلف لا تبلع ليها الموقف....هدنات راسها براسها حتى مابقاوش يديها تيترعدو...عاد خرج عبد الصمد مغوبش فيها....
عبد الصمد ( بحدة ) حلااااا هدرة وحدة قلتها دخلي الداخل ماتخرجيييش.....
شافت فيه بنظرة كره تتشوفو تتفكره الصورة و ياسمين....
_ قلت ليك مابغيتش ...مابغيتش ماداخلااااشي والله و دخلتيني بزز حتى نعملك الشوهة ....
بقاو تما شد ليا نقطع ليك ...و فااتن تتجبد باغية تمشي عند عبد الصمد هزها لعندو معصب و بعد شوية جابد تليفونو تيهدر مع شي واحد عاقد حجبانو حتى سالا و نفد طلبها راجعين بحالهم للدار....!
غي وصلها رجع خرج كانت 12 د اليل ....! بقات بوحدها فالدار مع فااتن... تتمشي و تجي تتغلي غي بوحدها ...
_ انا نوريه الكلب ...رجع لعندها لعند ديك الكلبة عارفها تما شافها و توحشها السلكوووط.... انا شافني مع اسامة واقفة كان غيقلتني....
مشات بالزربة هزات تليفونها و صدرها طالع هابط باغية تبكي بالفقصة ...صونات لصفاء عارفة سعيد مسافر مامعاهاش....صونات و عاودات ماحاوباتش....تعصبات و جلسات مغددة...
_ نهار نحتاجك مانلقاكش تفوووو تفوووووو...
شدات راسها غتسطى و عاودات صونات ليها حتى ردات ...
_ الو حلا...
حلا ( بين سنانها معصبة ) عارفة شحال وقفت معاك و شحال كنخبي ليك زبايلك عارفة ولا لاء...
صفاء ( مدوخة بالنعاس ) بالتي نغسل وجهي ...
مشات طايرة غسلات وجهها وجلسات مستغربة عاودات ليها الاتصال و قالت ..
_ شنو كاين احلا مالك !
حلا ( بالغوات ) وخا تشوفني كنغوت و لكن انا عادية مكتغوتش....عادية الا ماطرطقتش هاد ليلة....عندك شي تصويرة للنسا د عبد الصمد لولين ولا شنو سميتهم ...
صفاء ( بفضول ) علاش علاش قولي شنو وقع ..
حلا : جاوبني اصفااااااء....
صفاء : اويلي بسم الله عليك....انا نعطيك انستاغرام ديالهم كاااع متبعاهم بفوكونط حيت بلوكاوني من صفاء بنات الحرام....
حلا : صيفطلي فالواتساب....
صفاء : و قولي مالك ..صوتك بحال تتبكي شنو وقع ! تلاقيتي مع شي وحدة فيهم...
قطعات عليها حلا ماجاوباتها على حتى شي سؤال.... صيفطات ليها انستاغرامهم بجوح و دخلات بالزربة تتشوف تصاورهم كانت متأملة تكون شي وحدة فيهم هي ياسمين حيت عمرها سولات لا على اسمهم ولا فين كاينين ولاعلاش طلقهم مكترضاش حتى طاحت عليها هاد ياسمين بحال براز الطوير فوق راسها....!
شلا مطارق تيضربو ليها فراسها ...فوقاش تزوجو ؟ و فوقاش طلقها ! واش فعلا هي الثالثة ولا دوز بنات اخرين بعدها راسها غيفاجر بالتفكير ...ولات متخوفة غي تخرج ليها شي وحدة اخرى و تقوليها انا طليقة راحلك السادسة. لا العاشرة ولات توقع كلشي ...و توقع كاع تزوجها ملي كانت مسافرة....! حسات براسها تكوانسات و مابقى ليها عقل تفكر....مرة تتقول غتنوض ترونها عليه فديك الفيلا و ترجع ليه الشوهة لي دار ليها و مرة تتقول لاااا نفسها ماتترضاش تبين راسها مغلوب على امرها و كانت مقلوبة عليها القفة و تصدق مشوهة راسها قبل منو هو.....
هدنات راسها بزز و جلسات تتفكر و تعاود ...ليل كلو مانعساتش تكات حدا بنتها و غي سمعاتو طالع دارت راسها ناعسة....حسات بيه دخل للبيت تيبدل حوايجو و بقى تيحوم تما تحنى عند راس بنتو تيبوس فيها وهي ناعسة يبوس و يعاود حتى فاقت تتبكي هزها لعندو كي القميلة شعرها كحل رطب خاشية يديها ففمها و اليد الاخرى قابضة ليه فالسنسلة فعنقو تتبكي ...
_ ببب عععععع....
دخل للكوزينة يشرب وهي فيديه معصبة تتجرو من السنسلة ...باسها تيقيس حنوكها الناعمين تيشهيو ...
هزات عينيها لباب حاضية واش يدخل مادخلش و السكات طاح على البيت...فااتن نعسات و حلا النعاس ماعاودتش زارها....ناضت خارجة شادة البينوار على الدوبياس ...لقاتو ناعس فالصالون طاوي رجل و رجل حاطها فوق المخاد ناعس بحال الا شهر مانعس ...رجعات بالزربة لبيت النعاس و هزات حوايجو لي عاد بدلهم تتشمم فيهم و تعاود و فتحات تليفونو مافيه والو و خاوي من الاصل ...و التليفون لي تيهزو بزاف محطوط فوق صدرو.....! رمات داك التليفون و جلسات كي الجنية فالظلام بقات حابساها شحال حتى ناضت تتبكي في صمت ...ماقادرة تقولها لحتى واحد يسمعوها يتشفاو فيها و يشبعو ضحك حتى خوتها لي تتبان قدامهم واعرة و مايديرها بيها حد ماقادرة تقولها ليهم ماتترضاش قدام راسها و كارهة السيرة و ماحاملاش راسها.....! بقات تتفكر و تعاود شنو غدير ! مستحيل ترضى ...و المصيبة عندها مابقاتش هنا....الا سولاتو واش عاشر وحدة غيرها ملي كانو مخاصمين و لا كانت مسافرة يقدر يصدمها بشي جواب يقتلها عليها عمرها سولاتو و لا مرضات راسها بالتفكير ....و بلا الشكوك لي عندها بلي متزوج بيها وهي مزوجة بيه ماشي قبل.....! راسها قرب يتفركع و تنهيدة ورى الثانية ...غي تتخايل يكونو لي فداك المجلس كاملين عارفين وهي مقلوبة عليها القفة و ضحكو عليها و عاودو تتبغي تموووت....شنو زعما حتى واحد ماعارفها ؛ يكون تزوج فالسر ..فاسبانيا ...هي الزوجة الونيسة فالغربة ! و شحال من وحدة عندو فالسر ...الا كانت هاديك مافخبار بيها حد شحال من وحدة غيرها كاينة...هنا دخلات معاها الخلعة و خاطرها نفر كلشي و قلبها ناض عليها....! خسرات ملامح وجهها معيفة و مانعسات حتى طلع الصباح و مالقاتوش فالدار.....!صونات لخوولة و الكلام تيدور فعقلها...حتى حاها ردها...
_الو حلا....
حلا ( تتبرد راسها ) خولة كي صبحتي مزيان...الوليدات...
_ الكلبة عايشة فسبانيا عليها طالع هابط ...و الصالون !!! يكون هو السلكوط عملو ليها قلبو ....غندمو على هاد التبهديلة لي عملي ...غندمو....علم الله شحال مزوج من وحدة.....يلصق فيا شي مرض الحيوااان.... ياربي مع من طيحت راسي ....
كل مابقات تتفكر تتزيد تمرض و زادها هم اخر على البقية....ولات خايفة يكون نقل ليها شي مرض ...تخلعات بالجهد و عقلها تيغيب و يرجع ....!!
_ الله يحفظ..
رجعات موسوسة مع راسها و بنتها....خافت و الا نكرات غتسمى كدابة...ماعارفة شنو دير شنو تعمل عقلها مبلوكي و مدوخة مشاكل الناس تتحلهم طايرة و ديالها تتكلخ و عقلها تيوقف....!
بدلات عليها و هزات بنتها و مشات تلف جلسات فقهوة على البحر تتشم الهواء و تفكر وجهها صفر بحال مهمومة و كتفكر....االاناقة و الزين و الفلوس فايحين منها هي و بنتها ...و هي فديك اللحضة مابقات مسوقة لحتى حاحة...صافي الخوف من شي مرض لصق فيها ....! و الفايسبوك بحال الا رجع تيقرا افكارها...تتلقى مشاكل البنات ...ها وحدة راجلها تيخونها و نقل ليها المرض و اكتشفت انها مريضة حتى فات الفوووت....بوجه اصفر خرجات من البوسط مخلوعة ...
_ الله يستر الله يستر.....
مابغاتش تمشي للدار ...مشات لبوتيك الجلالب ديال عبد الله كانت المسيرة هي صوفيا...رحبات بيها تتبسم بتوتر
_ اهلاااا ...
حلا ( بابتسامة صفراء ) صوفيا كي غادية مع الخدمة...
صوفيا ( مرتبكة تتقاد من هندامها ) كلشي هو هذاك لهلا يحشمنا...البنوتة كبرات مشاء الله ...
فاتن ( توغوغ ) غررىى....
حلا : شفتي عرفاتك تتدوي عليها....غي شوفي شغلك انا نشوف الجديد الا عجباتني شي حاحة.....
صوفيا : الجديد عاد دخل هاد الصباح واااعر تيبهر....
تلفات حلا الوقت مع الحوايج و الكانة ماعندهاش بمرة.....دخلات واحد الكليانة شعرها زعر و طويل استقبلاتها صوفيا و بقات تتشوف فحلا تتطلعها و تهبطها حتى دخلات ليها الشك ولات محسوسة من دوك الشوفات.....كانت غتشك فيها حتى دخل راجلها تيختار معاها....خرجات كاع من البوتيك تتنهد مولفة بالبنات تيشوفو فبها و فشكلها و حوايجها و كان تيجيها عادي دابا...فين ماتشوف فيها شي وحدة تتخنزر فيها و يدخل ليها الشك....
بقات صابرة صابرة حتى تفركعات على وحدة فالصالون ....
_ مالك اختي كتشوف فيا كتعرفني !!
المراة ( بتبعكيك مستغربة ) وييلي بسم الله عليك شكون شاف فيك ولا هدر معاك....
حلا ( تنفخات ) و نتي اختي كتشوف فيا بحال بيناتنا شي حساب كتعرفني قولا !
رجعات للدار معصبة غي مع حوايجها جلسات فوق الكنابي تتفرج و تنهد و فااتن ناعسة....دخل للدار مع العشية و لقاها تتنفخ مغوبشة فالتلفازة...حط المفاتيح و التليفون و هز فيها حاجبو مقرب عندها....
_ مالها التحف ديالي ...
حلا ( عقدات حجبانها ) فين كنتي ؟
حط راسو على رجليهاا مغمض عينيه عيان...
_ مشغووول و بربي الااا مشغووول التحف...حركي الصبيعات ...
غززات سنانها فشفايفها و يديها غلبوها تيتحركو فوسط شعرو الاسود و تترجع تهزها من فوق راسو معصبة و مزيرة ... باين فيه عيان و مهدود و الكماش عندو مع عينيه ماشي حالة واحد كان تيزهى و ينشط من وحدة لوحدة....
حلا : و سكوووت سكوووت كتغددني كتعصبني...سكوووت والله مانتيق بيبك قلتي سيي فلول قلتي سييي والله لا تقت بيك...طلقني مانبقاش معااك السلكووط طلقني....
تعصبات لدرحة ماكانتش تتوصل ليها حتى مع رضا....عينيها تعماو و يديها تيترعدو ...قرب منها مغوبش شادها عندو ....
_ شش حلا ناعسة.....
حلا ( تتدفع فيه ) بعد منيي بعد مني اعبد الصمد اتفوو عليك الله ياخد فيك الحق والله مانتيق بيك طلقني بغيت الطلاق مابغيت والو....طلقني ....
عبد الصمد ( حط ليها راسها على صدرو مزيرها عندو وهي مجننة تتغوت ) نديرو ليك خاطرك...فين عمر د***و الصمدي خسر ليك الخاطر ...
غوتااات بالفقصة تيخرح عليها بهاد الاحوبة الباردة...
_ سكوووت شد فمك شد فمك ...
مالقات غي ودنيه تبرد فيه غدايدها و طاارت عليه بعضة خطيرة مغرسة النياب و القوااطع وهو صابر تيعض فكو و تيغرس صبعانو فخصرها ...حتى قطعات ليه اللحم وتأوه بالم و صدمة مبعدها منووو و الدم سايل من ودنيبه....
غي شافت الدم هربات من حداه طاايرة تتسمعو تيسب و يشتم و حلفان و الدم سايل من ودنيه بحريق لا يحتمل دفع الكرسي حتى تكركب و غوتات حلا مخلوعة حساب ليها جاي عندها بدير فيها شي مصيبة ساعة طار خارج بحالو من الدار مخنزر شاعط الباب حتى ناضت فااتن فايقة تتبكي ..نقزات عندها حلا تتجري حمر و عينيها كيغليو ...
حلا ( تتمسح دموعها و تجمع شعرها بالزربة ) مااااماااا ..ماما...ماشي بابا....قولي ماما....نبدلو علينا نمشيو بحالنا من هنا اماما ديالي ....
بالتلفة و البكية تتفلت لبها و تتحمع...مشات طايرة جمعات تتلبس عليها و عقلها دايخ مصدومة و مخلوعة منو و كثار ملي شافت الدم خافت على راسها ...تتمشي و تجي تالفة فين غتمشي باليل ! و مع البنت ...كون كانت بوحدها ماتخممش و لكن مع البنت خافت و تقطعو ليها الجناوح و شدات الارص تتغلي و تبكي بحرقة....
_ حضري عقلك عقلك فين احلا...مالك معصبة مالك مرونة فين مشى عقلك....مادرت ليه والو نتي مادرتي والو جايزة فيه القتيلة....الخاين السلكوط الزلايلي...انا ولد المراة يفقصني و يطرطقلي المرارة...غيشارك معايا الدواء د السكر....نمرض راسي مع سلكوط و نطيح فالفراش وهو بحال السبع مامسوقش....( كدير شهيق زفير تتبرد راسها و تمسح دموعها و يديها باقين تيترعدو ) انا لي درتها لراسي .....
رفعات شعرها الفوق و مشات غسلات وجهها تتهدن راسها ...شدات الباب عليها من الداخل و دخلات لبيتها تتحاول تنعس و تتقلب كل شوية و صبحات مريضة ماقادرة تهز راسها جات عندها المساعدة هي لي قابلات الدار و بقات مع فاتن و تتجي طل على حلا تتلقاها شبه ناعسة مزيرة على الفراش بيديها تيترعدو....
_ اختي حلاا ياك لباس صبحتي مريضة!
حلا ( السخانة فيها تتشوي ) ماعندي والو مامريضاش حتى واحد مايستاهل نطيح فالفراش على قبلو ....
المساعدة ( بقلق ) راك مريضة اختي ...نصوني على لالة عيشة تجي ؟ نصوني على راجلك ؟
حلا ( فتحات عينيها نص فتحة راسها غينفاجر تتدخل و تخرح فالهدرة ) مامريضااش مامريضااش ماتصوني لحتى واحد.. عندك تصوني عليه ماباغياش نشوفو فداري ..انا لدرتها لراسي ...
تخلعات عليها المساعدة وبقات مقابلاها و مقابلة البنت بقات فيها حيت ماشافت منها غي الخير قطعات ليها فالقلب وخا ماعارفاش شنو مشكلتها ....!
نطقات حلا بصوت ثقييل ...
_ خصني ندوش وجدلي الدوش ....
المساعدة ( باسف ) وخا اختي ....
تهز تليفونها على اتصال حميدة شافتو المساعدة و هزاتو ليها...
_ لالة حميدة كتصوني ...
حلا ( بزز تتدوي ) عطيني التليفون ...
شداتو من عندها خلاتها حتى قطعات و دخلات عندها للواتساب تتكتب ليها وخا ماعندها جهد...
_ كندوش لفاتن اماما من بعد نعاودلك....
مشات ثورية وجدات ليها الحمام و عاوناتها فالدوش لا تسخف تما ...بقاو عينيها معلقين غي على بشرة حلا و جمال قوامها و نعومتها....خلاتها تكمل الدوش لراسها حتى سالات ووخرجات لاوية عليها فوطة و شعرها فازك تيقطر مزنكة ....
ثورية ( بابتسامة ) بالصحة....
حلا ( بتعب ) الله يعطيك الصحة....
مشات ثورية تتوجد ليها الماكلة وتعمر الطبلة و حلا جلسات فاشلة تتشوف راسها فالمراية مصدومة من حالتها....! علاش هكا ؟ علاش غنمرض راسي ! واش الا تعصبت غنبرد على راسي ؟ غنتقهر و نضيع صحتي وهو بحال الثور ! الا مرضت بالسكر غيتشارك معاها الدواء و يهز عليا المرض !
تنهداات بعمق و نشفات شعرها الناعم بشوية عليها...صافي يستاهل نهار واحد مرضات بسبابو تجمع و طوي...هكا تتفكر فعقلها و تتبزز على راسها ...حطات ميكاب و زينات الوجه مزياان و الشعر مسبب تيغطي نص وجهها بداك لاكوب ...! اختارت اجمل لبسة عندها و لبسات لبنتها كسيوة وردية مفرفرة و جاكيط و صبيبط صغغيور فرجليها وهي تتضحك و تغرغر راشقة ليها و تتخربق فالهدرة و تحك السنينات فيديها صوبات ليها الشعيور كحل رطب هابط مع جبهتها...هزاتها و خرجات من البيت سابقاها ريحتها و الطالون تيقرقب فوسط الدار ..
_ ثورية كاين مايتكال....
ثورية ( تتشوف باعجاب ) الخير موجود كلشي واحد اختي... صحيتي شوية ؟
جلسات ثورية بالفرحات عليها تتاكل و تشوف فحلا بنص عين ...تتقول فخاطرها...
_ الزين كتحمق تفتن العور فالظلمة ؛ خسارة هاد الزين يدبل بالاعصاب و الفقصة د الرجال ....
وخا ماعاوداتش ليها حلا شنو كاين فهمات سباب حالتها عبد الصمد من الحالة لي لقات فالدار و الكراسا مقلوبين...!
تهزات حلا واقفة و شعرها تيتهز معاها...
_ انا غنخرج مع فاتن ...كانت شي حاجة صوني عليا...
ثورية : وخا هي لي ماتعاودش...
هزات حلا حقيبتها اليدوية ماكانتش غالية الثمن عادية مالابساش مجوهراتها ... خرجات ليها ثورية بوسيط فاتن باغية تمشى على رجليها ...غي خرجات حلا من الباب الكبيرة ضرب فيها الهواء البارد و الشميسة لمحات سيارة بالية و لاعلاقة بالحديد الواقف فداك الشارع فيها راجل تتعرفو تيكون بزاف مع عبد الصمد حاضي عليها....تبسمات باستهزاء و هبطات النظارت الشمسية على عينيها دافعة البوسيط تتجول بين شارع تطوان الباردة غي هي و فاتن و لي داز تيشوف فالبنت و يتبسم معاها لحركاتها الحلوة و الشغب ديالها...حلا تتغطي ليها راسها من البرد وهي تتجر و ترمي فالارض....!!
دخلات لبوتيك خاص بالاطفال من طابقين تتجول بين الرفوف و اللون الزهري غالب ...تتختار لفاتن العاب جداد و حويجات شتويين رطبين تيشهيو كانت عوالة غي تشوف حيت ماجايباش طموبيل صدقات واخدة ليها شوية العاب و حويجات خفاف و كل مرة واحلة معاها تتهز ليها البياسات من بلاصتهم و طيحهم مرة بيديها مرة برجليها حتى تتجي العاملة تتهزهم و تبسم معاها ...
كملات حلا تجوالها ماسخاتش تخرج ...حتى قربات من لاكيس وهي تلاقا عينيها مع عيون إياد خطيبها السابق شافها و طول الشوفة مزيان تيشوف فيها باعجاب ماعقلهاش فلول حاتو تبدلات شاف حتى فاتن و من الشبه واضح انها بنتها.... رجع قلب عينيه لمراتو حداه فتاة فالعشرينات شعرها اشقر و كرشها سابقاها باينة حامل فالاشهر الأخيرة حاضي معاها بحال عينيه و حاط يديه على كتافها وهي تتبسم عاجبها الحال... عبراتها حلا غي بنص عين و رجعات قلبات وجهها منهم ....
جات نوبتها خلصات و سلكات طريقة اخرى على حسب البوسيت و فالخرجة لمحاتهم ثاني فاتح ليها باب الطموبيل داير ليها معاملة الاميرة حسات بنغزة نغزاتها واحساس الغيرة زارها فديك اللحضة.....! تتشوف جميع الازواج حياتهم حسن من حياتها مع زوجها ...على الاقل سيرة البنات عندهم محرمة ماشي بحال ضخم الجثة لي مزوجة بيه فقدات فيه الثقة ...! زيرات على سنانها ملي تفكراتو و سباتو مزيان فخاطرها....!
حلا ( ضحكات فوق خاطرها ) بغيتي نبقاو بلا عشاء ولا ناكل شي عجب و انا كنرضع ....
نسيم ( ضحكات ) نو تعلمت شوية...خلود جاية و نتي الا ماعندكش ديزونݣاجمو اجي ونسينا يحيى ففاس سافر ليوما غيجي حتى لغذا....
حلا : داكووغ نص ساعة و انا معاك....
وصلات للدار هزات الطموبيل و تحركات لدار نسيم تحت المراقبة ...! مابقاتش تتسوق تتصرف على راحتها و طبيعتها دخلات لدار نسيم لي ضحكتها تتضوي الدفىء و الراحة فدارها عجيب الورد فكل بلاصة و الروايح الزوينة و الولاد نقيين و مهدنين بعد ماقصح معاهم يحيى الهدرة فين مايغوتو ولا يتصرفو تصرف غير لائق تيدير ليهم حلسة توبيخ تيخرحو منها تيشهقو بالبكاء...ولاو مهدنين شوية و تيتبسمو مع الضيف حيت ولفو بكثرة معارف يحيى والضيوف الكثار يكونو معصبين و مخاصمين ولا مارشقاش ليهم فوجه الضيف يتبسمو و يتصرفو بالادب هكا علماتهم نسيم و يحيى... غي سلمو مشاو جلسو فبيتهم تيرسمو و نسيم تتدور ببيجامة انيقة و شعرها مطلوق وجهها خالي من المكياج نقي بحال البلار و الراحة باينة عليها....
_ دابا انا حايرة واش غرام ولا اسراء ولا فاتن ههه وحدة فيهم غتكون عروسة ديالي ...
خلود ( محيدة الحجاب واخدة راحتها ) : ختاري وحدة من بناتي من دابا ولدك حنين و بناتي حنان هذا مايتكرفس على هذا...
خلود : شاد حسابليا مسافرة ولا شي حاجة ...حتى الكونط فانستاغرام ماكاينش ليه اثر غابر....
حلا ( بشك ) كي دايرة هاد ياسمين تنعرفها انا...
خلود : محال ...نتي مولفة تتمشي عند مدام مروة ...جات سمراء و طويلة وشعرها طويل و هدرتها غالبة عليها الاسبانية ( بشك ) كنتي ديجا شفتيها و قلتي هاد البنت زوينة و زينها فشكل....
حلا ( مزيرة على سنانها ) و فين غتكون غبرات زعما ....واش مصاحبة نتي و ياها...
خلود : نو نو نهائيا عادي ...هي مطلقة على ماسمعت و حتى عائلتها فشكل...عندهم عادي البنت تعيش بوحدها و تصاحب قدام خوتها و ماماها و باباها و تعرفهم عليه ...تخايلت وجه عبد الله و رضا و انا تنعرفهم على صاحبي يقتلوني فبلاصتي ههههه.....
دوزات الليلة مع نسيم و خلود قصارين تيهدرو ...نعسات حلا قبل منهم و فالصباح مشات لدارها كان يوم الجمعه...صونات عليها عيشة بنكيرها المعتاد...
_ ماعلموك لاصواب لا مجي بكري ماتسقسي ماتصوني نجي عندك انا الكبيرة هاذو الاصول ابنت الاصل....
حلا ( تتقاد شعرها ) كنت غنجي عندك اليوم اخالتي عيشة ...
عيشة :و طلق راسك الغداء غينزل دابا شويش.
قطعات معاها وكملات حلا لباسها ماتتفكر فوالو يمرضها هزات بنتها و خرجات لقات نفس الكمارة قبالتها تعصبات و قربات منو هازة حجبانها شافها حاية خرج لعندها و حنى عينيه باحترام....
حلا ( بحدة ) واش نتا ماعندك شغل ماعندك مايدار حاضيني فالصباح و العشية غنطير غندير جناح ...سير صلي ليك الجمعة مع قرانك تبع داك ( كانت غتقول عليه السلكوط و جمعات لسانها ) تبع داك لي مخدمك تبقى لا دنيا لااخرة.
الراجل ماهزش عينيه و ماردش كاع . حتى مشات تتنفخ و ركبات طموبيلتها غادية لقاتو تابعها تاني.... تخنقات و تعكر مزاجها ...!
___________
جالسة فدارها شعرها مقطع لحد الودنين مخسر كامل السالف كلو ضاع تتبكي و تشهق غتسطى تتشكي على صحبتها...
_ واش حمقة نديكلاري بيه؟ غيخرج راسو براسو و يقلب عليا كلشي و يلصق فيا مصيبة نولي انا لي داخلالو. ...( تتبكي مقهورة ) صدمني ملي شفتو حسيت بيه توحشني اسارة حتى صدمني .
سارة ( بغضب ) و شنو غترجع بحالك لاسبانيا حيت خفتي منو منيتك ...ضيعلك شعرك وزاد التهديد بالقتل و ساكتة بحال ماكاين قانون فالبلاد.
ياسمين ( بحرقة )ماباغية والو مابغيت والو صافي . عرفتي شنو كان غيدير ؟ كانت غيلبقلي مصيبة ندخل عليها عاماين د الحبس . و هادشي بسباب زبالة مراتو ..خصك تشوفا كيفاش عاملة اويلي لاعلاقة و خايبة جابا من الجبل مكتعرفشي حتا تلبس ولا تهدر و الصوت ديالا بحال العايل ماشي صوت المراة .
سارة ( تتنهد ) باينة يماه ختارتها ليه تولد ليه تزوجها مراة د الدار و ديال الولاد .
ياسمين ( شادة راسها غتسطى بالبكاء ) و خايبة خايبة مافيها مايتشاف شعرا محروق و عندها الموسطاج و كتاكل مهيفة بحال الى عمرا شافت الماكلة انا تصدمت فيها خايبة ماقدرتش نكمل فيها الشوفة .
ياسمين ( تتمسح خناينها تتشهق ) قبل مانخرج من المغرب غنمشي نعطي مراتو قتلة العصا نخسرلا داك الوجه المعفون لي عندا و عاد غنبرد و نعيش حياتي هانية نمشي عند بابا لباغي .
سارة ( تخلعات ) مينتك ! ياسمين خلعتيني...
ياسمين : نتينا ماحاساشي بيا اسارة شوف شعري شوف شنو عملي ..غنغبر على المغرب بالحق حتى نبرد فقصة ديالي فمراتو .
سارة ( رجعات للور تترمش ) مابقيتش كنعرفك اياسمين عندك تعملي شي مصيبة توحلي فيها....بنات جبل غيشدوك اختي و يطيحوك من شدة لولة ماتقديش عليها باينة شي وحدة شرشوحة و نتي فيك غي اللسان ..الشوهة غديرها ليك نتي .
ياسمين ( بحقد ) و دابا تشوفي.....
كانت جالسة مع عيشة و طالقة لفاتن تتلعب فالارض مغرقة بالالعاب و فمها غي ببب ولات تتنطق احرف مرونة حلوة النطق ...
عيشة : حلا اجي اجي عندي المحضية اجي عندي...
فاتن تتسمع حلا تتهز عينيها الكبار فيها ببرائة تتضحك و تمد ليها العابها ...تتبغي حلا تاكلها بالبوسان....
مدات ليها حلا التليفون خلاتها تتصوني و رجعات تحنات عند بنتها فرحانة بيها و الحنان منها فايض قطعة منها تعطيها عينيها وهي فرحانة ....؛
عيشة : و اهااه الفقصة صوني و مايجاوبشيي هااه....
عاودات الاتصال و ماجاوبش حتى للمرة الخامسة عاد رد عليها و صاحت عيشة تتنكر...
_ فين نتينا المرضي ...اجي تعشا معانا....و علاش ؟ و نتينا تعرف ماكرهتشي تجي و تعملي خاطري اعبد الصمد ...
غي قالت سميتو صاحت فاتن تتضحك و تتجبد...
_ بببب غغغ...
عيشة ( تتضحك و حلا ملامحها باردة ) ها هي العايلة ديالك كتعيطلك ...اجي احلا سمع باك سمع ...
حطات ليها التليفون فودنييها و فاتن فاتحة فممها تترمش و لعاب سايل مع شفايفها تتسمع صوت عبد الصمد تيهدر معاها وهي تترمش و تشوف فالتليفون و ترجع تشوف فعيشة و رجعات تخبات فحضن حلا تتضحك...!
قطعات عليه عيشة بلا مايعطيها اخر كلام واش جاي ولالاء....بقات معاها حلا فالصالة لي تحولات صالة العاب مع فاتن حتى ولاد صفاء و سكينة تيلعبو الفوق حيت تيتعداو على فاتن و تتنوض عيشة تغوت و تحيح ....!
طلعات المساعدة تتبسم فاتن ..
_ خالتي عيشة سي عبد الصمد جا ..
حلا سمعات كلامها عقدات حجبانها و جلسات جالسة اما عيشة فرحات و تبسمات كثار ملي طل عليهم بطولتو الغير العادية كانت تتقوليه حلا نتا باين فيك جوج مترو ...لابس السبور تيشرت نواغ مزيرة على كتافو و كاسكيط نواغ حيدو ملي دخل حجبانو مجموعين و ودنيه باينة مجروحة فيها الاثار واضح ....شاف فحلا و فعيشة لي سلمات عليه فرحانة وحلا بقات جالسة بلاصتها ماناضتش....هز بنتو الفوق تيعليها للسماء حتى تتبغي تسطى بالضحك...
_ غغغغغ بببب.......
عبد الصمد (حط جبهتو على جبهتها مكمش حجبانو ) هذا جهدك جوج حروف اسينيوريتا ...هييي حلااا ....
فاتن ضرباتو لفمو بحركاتها الطفولية ...تكى على المخاد و جلسها فوق كرشو تيقيس فييديها و رجليها و شعرها الاسود الناعم حتى هزات ليه يديه و خشاتهم ففمها تتعض فيهم و تمص ... نطقات حلا بزز منها معصبة...
_ جاي من برا يديك فيها جراثيم ......
ماردش عليها جمع خدود فاتن بحال القميلة فوق صدرو ...عطاها بوسات الغدايد بغا ياكلها تيبوس و يعاود ..ماطلقها حتى ناضت تتبكي معصبة و شدااتها عيشة تتسكت فيها...
_ شش ششش صافي صافي ....( شافت فعبد الصمد لي متكي على مرفقو تيتبع فاتن بعينيه حتى قشعات اثار الخياطة فلمحة ودنييه ) شنو عندك ودنيك شنو وقعلك ...
عبد الصمد ( ببرود ) كاينة العشاء !
عيشة : دايا يتحط ....نورة فاينو العشاء ...
تعشاو على هاد الحال و حلا ملامحها باردة و هدرتها تقطعات ماتيهدر لا هو لا هي غي فاتن بلاصتهم.....تعشاو و باتو تما....سبقاات حلا دخلات للبيت خدات الناموسية كاملة هي و فاتن مامخلية ليه بلاصة...دخل لقاها ناعسة هي و فاتن مالقى فين ينعس تكى فالكنابي شاعل تليفونو كيهدر كل خمس دقاىق باسبانية تيهدر بالزربة شي لقطاتو حلا شي مافهمت فيه والو واضح كيهدر مع شي راجل ....رجعات فتحات عينيها باقية عاد تتفكر فحالتها و تتخمم و ناوية ماتاخد قرار حتى تاخد وقتها فالتفكير ...لي عارفة هو ثقتها فيه مابقاتش و مستحيل تقدر تخليه يعاشرها جسديا ولا ترجع معاه بحال قبل...فكرة الخيانة باقية تتطلع و تنزل فيها....و الطلاق هو لي تيبان ليها الحل حاليا.....!
غمضات عينيها بالزربة ملي هز عينيه فيها ...طفى ظوء التليفون و ناض تيميل بدوك الكتاف فالظلام....تلمس خدود فاتن الناعمة باصابعو الخشنة وهز عينيه فحلا بنظرة مظلمة غاضبة...قلب عينيه و رجع خرح لابس حوايجو و هاز مفاتيحو و تليفونو فعز البرد و الظلام و الكلاب و الريح القاسية ...شغلو مكيعرف لا صباح لا عشية لا نص اليل ......
رجعات لدارها فالصباح كملات نعاسها حتى فاقت مع الظهر تغدات و رجعات خرجات البوسيت تتخرج مع فاتن بلا طموبيل....!
صونا عليها عبد الصمد شافت اتصالو ماجاوباتش....
من بعيد كانت ياسمين لابسة النقاب مخبية وجهها و سارة فراس الشارع تتشوف مخلوعة...
_ ياسمين غتندمي...
ياسمين : بعد مني اسارة...
سارة ( تتشوف فحلا محنية على البوسيت تتقاد شعر فاتن ) و فين هي ؟ خرجات ! الدنيا خاوية هنا هاد الديور ماساكنينش...
ياسمين ( بغيرة ) محنية على البنت ...
تبعات سارة نظرات ياسمين لحلا لي هزات راسها تتقاد شعرها الناعم لابسة الكلاس و الاناقة تتبان من بعيد....تعجبات سارة و نطقات ..
_ فين هي ؟ مراة وحدة لي كتبان فهاد الشارع اياسمين...واش هي هاديك !
ياسمين زادت طلعات اللثام حاقدة و تقدمات عند حلا مخلية سارة واقفة بعيد تتشوف فحلا و تتعبرها و طلعها مصدومة حيت توقعات شي وحدة غليضة و لابسة جلابة فالخضر حالتها و لابسة جوج كيلو ذهب و فولار احمر و الحناء مطلسة فاليد ...
عينيها تينقطو بالغيرة و الحسد و خطواتها بداك الثوب الكحل ملمطها كاملة مخسرة حرمة و مكانة النقاب...النقاب تدار لستر فتن النساء و البعض رجع تيلبسو لغرض مضر حتى ولاو الناس تيخافو من داك اللباس جامعين معاهم حتى المنقبات العفيفات ...! كانت مقربة منها وهي مخبية الزيزوار من العين ...عقلها خدام و عينيها تيغليو و يديها تيترعدو عمرها وصلات لهاد المواصيل من الحقد و الجرم...خايفة و مامولفاش رجليها غادين عند حلا و ضميرها تيرجعها اللور تحبس و تمشي بحالها...لكن هي تتقرب و تتزيد توضاح صورة حلا و ابتسامتها تتزيد يكبر الحسد فيها و الشيطان داير شغلو ...!
هبطات ثورية من الدار بالزربة هازة تليفونها ...
_ ختي حلا سي عبد الصمد معايا فالتليفون خصو يهدر معاك ....
مرت ريح غاضبة هزات شعر حلا للقدام و تعلااا النقاب من على وجه ياسمين رداتو بالزربة .....شدات حلا صاكها عاقدة حجبانها و هزات من عندها التليفون ببرود...
_ وي ؟
عبد الصمد ( بحدة ) دخلي للدار....
حلا ( بهدوء ) لااااا ...
عبد الصمد ( بالغوات ) ينعل ابليس لي ساكنك غنجي نفرع يماااك دخلي للدار ....
حلا ( بعناد ) اوك بسلامة....
قطعات عليه و حطات التليفون لثورية ...
_ دخلي اثورية صافي....غنضرب شي دورية و نرجع....
دخلات ثورية بحالها سمعا و طاعة و كملات حلا طريقها و ياسمين من وراها معصبة ...تبعاتها و سارة من وراهم خايفة تتطلب الله ياسمين ترجع لعقلها....!
دخلات حلا مع شارع ساكت فيه ديور كبار لكن نصهم ماكاينش مولاهم ساكنين فاسبانيا و كاينة مكتبة كبيرة شادة ...ناضت فاتن تتبكي هزاتها لعندها ...شافتها ياسمين وقفات و زربات خرجات الزيزوار قربات من حلا ..حطات يديها على كتافها ...حتى قفزات حلا و دارت بالزربة تتشوف فيها خبات بنتها فحضنها بخوف و شك و نطقات ...
_ نعام اختي ؟
هزات ياسمين يديها و طرشات حلا حتى دار وجهها ماجات تستوعب حتى عاودت ليها طرشة اخرى بالزربة دفعاتها حتى طاحت فالارض هي و البنت و الغوات فارع الدنياو حلا مزيرة على بنتها تتغوت و تسب مخلوعة...
_ بعد منييببي غتندم...غتندم والله حتى ندمك الكلبة.... عرفتك السلكوووطة شكووون غي من عينيك اللفعة غنربيك ....
ضحكات ياسمين و خرجات الريزوار هازة شعر حلااا وهي تتفركل وتغووت ...
_ بعد منيي....طلق منيي.......ركلاتها برجليها لركابيها مجننة و عقلها غيخرج و البنت فرعات الدنيا غواات حتى طاح ليها الريزوار و تعصبات و عطاتها قتلة العصا بيديها ماخلات طروش و عضااان و حلا عاطية حلوقها للغوات حاضية غي مع بنتها.....!! ياسمين غي سمعات الطموبيل وقفات فالدرب و الباب تفتح خرج منها واحد عندو كاسكيط خبات وجهها و طلقات من حلا وعطاتها بالجري ....! الطموبيل تبعاتها و مول الكاسكيط وقف بعيد حاضي حلااا لي هزات راسها تتبكي مخلوعة رجليها فشلانين بغات تنوض و رجعو رجليها فشلو عليها....و البنت تتبكي و تغوت ! جااات طموبيل سعيد و معاه صفااء باين علمو عبد الصمد هبطو لعندها كيجريو شافتهم عاد رتاحت و ركبات معاهم شادة قلبها تتبكي و شعرها مرون ووحهها حمر ..
_ غندمها عندها الزهر كانت معايا البنت ...
صفاء ( على نيتها ) و عرفتيها شكون ؟
حلا ( تتسكت فاتن و تبوس فيها ) عرفتها ...شكون قالكم بلاصتي ؟
صفاء : عبد الصمد فطنجة علم سعيد و جينا لعندك انا ماعارفة والو حتى جرني سعيد بالزربة و جينا لقيناك طايحة فالارض ....
هزات ياسمين باليزة ديالها ماعاودات فتحاتها ولا قلباتها هزات وراقيها و خرجات من الدار بالزربة باغية تغبر من المغرب فخطرة ....! و كانت اخر لحضة تعيشها وهي تتنعم بنعمة الحرية بعدها تشدات فالمطار ملي لقاو الحشيش بين حوايجها....!
رجع عبد الصمد للدار ! لابس جاكيط د الجلد فالنواغ تيلعب بالمفاتيح ...لقى السكات فالدار فاتن ناعسة و حلا جالسة فالصالون فالظلام و عينيها المغرقين بالدموع ...صوت الشتاء و الرعد و البرد تيقطع المسكين على برا ...حس بانفاسها و شعل فيها الظوء بنظرة سوداء مظلمة كثار من ظلام اليل ...هزات عينيها بنظرة بعتاب نيفها حميمر و رموشها فازكين بالدموع لابسة بيجامة وردية ناعمة و شعرها محموع...نطقات بصوت مبحوح و هادي ....
_ طلقني اعبد الصمد ...
عضلة فكو اهتزت و حجبانو زادو تلاقاو...حط المفاتيح بهدوء عطاها بالظهر مقرب للسرجم حاط يديه على الحافة و اليد الاخرى خاشيها فالجيب ...عضلات وجهو القاسية مازادت الا قسوة و البرود غلفو من راسو لرجليه النعاس ماشافوش هادي اربع ايام راسو تيضربو فيه المطارق بالمعنى الحرفي قرب ينفاجر بالحريق و خاصة فوق عينيه الالم تيزيد و حجبانو تيزيدو يتكمشو و ظلام عينيه تيزيد....!ياسمين جاتو بحال الغبيرة الطايلة نفخ عليها و زاد مايعطيش وقتو ليها و ماحمقش راسو معاها تابعو مشاكل كبر و اهم....
شافتو ساكت ماجاوبهاش غلبوها الدموع كثار و خبات وجهها بين يديها تتبكي...كانت هادية اليلة و حتى بكاها صامت
_ مستحيل نبقى معاك مزال ، نفسي ماترضاش ، ياسمين و من بعد زواحنا كانو وحدين اخرين وخا تقولي لا باينة من عينيك كتكدب اعبد الصمد . انا مانقدرش نعيش مع واحد قلبو يهز مية دقة وحدة ولا نعاشر واحد مزوج بيا و ناعس مع وحدة اخرى ...مانتعايرو مانلومك ماتلومني طلقني و تزوج مية وحدة ماحابسك حد بحال عمرك عرفتيني كلشي ساهل عندك ..بيناتنا بنت تشوفها وقت لي بغيتي بلا مشاكل و صداع انا عييت .....
ماجاوبهاش ! تزاد بكاها و ناضت عندو حفيانة ...
_ معاك كنهدر انا مابقيتش باغية نكمل معاك باغية الطلاق طلقني بلا مشاكل ماما و بابا ماكنعاود ليهم والو على هادشي حيت انا لي درتها لراسي .....( جراتو من كتافو يشوف فيها ) معاك كنهدر شوف فيا جاوبني اعبد الصمد ....
قاس خدها بيديه الباردة بعدات ليه يديه و رجع تيقيس شعرها ببرود ضربات ليه يديه ورجع لشفايفها عصبها و حمرات فيه عينيها المغرغرين بالدموع....
_ عرفتي شنو...ندمت علاش عرفتك ندمت علاش مشيت لديك المقبرة و تلاقيت بكمارتك و ندمت علااش حطيت رجلي فداك الجبل و الطريق لاقاتنا .....
عبد الصمد ( بنظرة مظلمة ) : فين الجديد ؟
حلا ( تبسمات باستهزاء ) : عندك الحق دايما كنقول نفس الهدرة و كنندم علاش سمحت ليك و عرفتي شنو ( شافت فعينيه بنظرة مكسورة ) حرمت عليك راسي بيناتنا المحكمة نتا مامعاك هدرة.....
حك لحيتو كيضحك بلا نية ضحك ضحك اللاعصاب و الفقصة و المشاكل و المطارق لي تيضربو فراسو ...
_ ماديريش معانا المزيان و تخلي لعب الشهر الجاي نكون مسالي ليك مي تيسيرو ....
ضحكات بالفقصة و الدموع من عينيها كبار...
_ انا قلت لي عندي ....
تحركات من قدامو بهدوء مخلية ريحتها كدور حداه ...دخلات لبيتهم و شدات عليها الباب من الداخل مخلياه واقف فالظلام و البرد قاسي لايرحم ...شد راسو لي غينفاجر و تكى فوق الكنابي بصباطو و حوايجو مغمض عينيه و الحجبان ملاقين من الحريق لي تياكل فراسو ...!
صباح ناعس ماخرجش على غير العادة...لقاتو تما مبدلة عليها و جامعة حوايجها و حوايج بنتها حطات البنت فبلاصتها و هزات كاسكيط ديالها و تليفون وقفات على عبد الصمد بنظرة باردة تتفيقو ...
_ عبد الصمد....
فتح فيها عينيه و جرها لعندو طايحة فوق صدرو حاكمها بيديه...
_ فين ؟
حلا ( بنظرة غضب ) طلق منيي....بعد يدك منييي ...
حيد ليها شعرها من على وجهها تيشوف فملامحها بنظرة اعجاب و نظرة اخرى مفشكلة سرح يديه على وجهها وهي تتجبد معافرة معاه ...
_ حيد يديك طلق منييي ...انا عفتك و عفت نشوف فكمارتك نعرف نحرق راسي و ماننعسش مع واحد بحالك خلاااط مزوج بيا و معاشر سلكوطاات اخرين ...لحمي ماشي شايط عليا....بالخاطر والله لاخديتي مني شي حاحة....
فك حصارها و ناضت بالزربة هزاات صاكها تتشوف فيه شنو تيصنع....دخل للحمام و خرج بعد نص ساعة هز سوارتو و فااتن فيديه تتبوس فيه و تبعاتو مخلوعة...
_ فاين غادي بيهااا...! عبد الصمد بنتييي لاااا.....
خرح لبرا و الهواء بارد ...شاف يمين يسار و فتح باب الطموبيل الخلفية و قصح الشوفة فحلا...
_ ركبييي....
حيدات ليه البنت و ضمااتها لعندها كانت غتموت بالخلعة...ركبات بلا هدرة بلا جوج دخل حوايجها للطموبيل و شد الطريق لشفشاون....وصلو للرياض و طلعو لجناحهم ...
ظلت حلا اسبوع فالرياض....حاولات تنسى الهم و الفقصة و عاشت الواقع دارت صحاب و معارف من الادارة تتعرف على نظام العمل كي داير المداخيل و المخاسر ....كل نهار تتهدر معاها حميدة و ماقالت ليها والو حتى تكون معاها حيت الطلاق هو لي ماتحيدوش من دماغها....!
جا وراها عبد الصمد بعد اسبوع و تفرغ ليها خداها لمراكش بقات ثلاث ايام ....هدرتها معاه مختصرة حتى يديها محرمة عليه يقيسها حتى هو قالب عليها معفر تيضحك غي مع بنتو و يفششها و يغرقها في الدلال ...مابقات جبدات ليه حس الطلاق ساكتة و هادية و دايرة عقلها لسانها مقطوع ...حتى جاو لتطوان و خلاتو حتى طلع لطنجة وعيطات لعبد الله قالت ليه باغية تمشي و الطموبيل مخسرة و مايمكنش تشد طاكسي ولات تتخاف على حسب البنت....حا وراها حتى الباب و خداها معاه للفيلا و تما تفكرعااات عليهم و خرحات شنو عندها ...
_ بغيت نطلللق ....! باغية الطلاااق مانبقاش معاه ابابا حيت مابقيتش قادرة نصبر صافي انا و داك الراجل سالينا....
عبد الله و حميدة تصدمو....ردت حميدة مخرحة عينيها....
_ ماين جبتي هاد الطلاق عاود...ياك عاد كنتو فشاون فرحانة و ملي جا مشيتو لمراكش ...حلا واش ماغاديريش عقلك واش الزواج هذا و لا اللعب....
حميدى ( شادة راسها ) وكاين شي مسخوط كيخون و يبرح بيها ابنتي نعل الشيطان واش طلع ليك الراجل فراسك قلتي ارا نشوف الطلاق و عندك معاك بنت واش كتفكر بالعقل ولا غي كتخور....
حلا : واش انا كنكدب ...ماما بلا ماتصدمني....فخبارك راه مزوج كثار من جوج قبل مني و وحدة فيهم جات تهجمات عليا و ضرباتني كانت غتخسرلي وجهي ....
شهقت حميدة و ضربات فخدها و عبد الله تصدم...
_ شنو هادشي احلا علاش ماقلتيهاش....
حلا ( بغضب ) اقسم بالله....مابغيت نقولها لحتى واحد سكت عليها و لكن دابا الطلاق انا مع هذاك ماغاديش نبقى صافي ماغاديش نرجع ليه ....
مصيبة و طاحت على راس عبد الله و حميدة ...الخيانة ماتاقوش بيها حيت حتى واحد مكيعتارف بالخيانة علنا و معروف على حلا تتكدب و تزيد فيه و لكن موضوع طلاقو و ضرب ياسمين تاقو و تعصبو و مع ذلك ماشافوش موضوعها يستاهل الطلاق...ايه عبد الصمد غلط لكن هوما كيشوفو الموضوع ليه حلا الطلاق ببنت بسبب هادشي لا يمكن.....! عيطو لعبد الصمد حتى هو مسالي لمخو هاد الايامات....داخل تيلعب بالسوارت و يتبسم مع عبد الله تيتمختر فالمشية و اللحية محسنة و الشعر كحل قوي و الريحة سابقاه و ابتسامة ابليس نصب فيها خيمة....
_ سي عبد الله.....جمعة مباركة....
عبد الله ( تيتنهد ) علينا و عليك و على جميع المسلمين تفضل اسي عبد الصمد....
دخل معاه للصالون البلدي فين جالسين...حلا غي شافتو من بعيد جاي تيتبسم ماناقصو خير و داير كي السبع في كامل اناقتو هاز فاتن لعندو تيضحك معاها و يبوس فيها وهي تتفركل و تضحك فرحانة بيه و حلا مفقوصة تتقلى و تعصب راسها ! بدات تتسول مع نفسها....علاش وليت هكا كنتعصب علاش مانكونش بحالو شكون هو شكون يكون ! هو بحال السبع صحيح فصيح و انا شوية بشوية غندبل و نشرف ... التجاعيد بانو فيها غي هاد الايامات بكثرة التغوبيشة و الاعصاب كانت باغية تسطى ...! تنفسااات بعمق و دارت رجل على رجل هازة نيفها للسماء ماعاودات شافت فيه حتى نص شوفة...مخلية غي عبد الله كيهدر و يلبق فالكلااام ...
_ هادشي ماهواش اسي عبد الصمد ...درتو الولاد و ثبتو الغرس عاد بانلكم الفراق !!
عبد الصمد : اعود بالله اسي عبد الله ماباغي فراق ...
عبد الله : و نتا ماباغيش بنتي باغية و قالت مابقات عيشة معاك . و مادرتي فيها مايصلاح باش نكون معاك صريح ...هادي ماهي عيشة جالسة ماعليك مابيك و تنقز عليك طليقة راجلك تعنفك و نتي ماسايقة ليها خبار واش كاينة....
عبد الصمد موسع يديه و رجليه مجلس فاتن فوق رجليه تترضع صباعها...هز عينيه مبتسمة فحلا لقاها حانية عينيها تتسمع و حامعة لسانها ....
_ الموضوع كان يتحل بيني و بينها اسي عبد الله ...بصراحة ماعزيزش عليا نحط اسرار داري قدام شي حد مابقيناش صغار ...ولايني ملي المراة عندي دارت شنو فتى عليها عقلها و تكرمتي و قررتي تدخل فالصلح باذن الله غندوي و نقول شنو عندي......
هزات فيه حلا عينيها بابتسامة استهزاء ..السيد ولى فصيح اللسان و ماكاين غي ان شاء الله بادن الله تقول بصح كان تيسمع لخطبة الجمعة وهو ماحط جبهتو الارض من رمضان لي فات.....! ربعات يديها و سكتات مخلية عبد الله يرد عليه....
_ و هذا هو المطلوب ! البنت ترجع لدار والديها كانت مظلومة ناخد حقها كانت زايدة فيه نجبدو ليها ودنيها....و من هادشي كامل ؛ علاش ماحطيتيش نيتك لبنتي نهار لول اسي عبد الصمد....
عبد الصمد عمرو تحط هكا فهاد الموقف تيرطب فالهدرة مع عبد الله و يرقع لي تقطع حتى نهار تزوج بحلا.....حيت عائلتها كبيرة و حارة مولف مع اباء زوجاتو لي سبقو تيبغيو يبوسو ليه يديه و ماتيكلفش راسو و يعطي من وقتو ليهم مامسوقش.....! حط يديه على راس بنتو الناعسة على صدرو تترمش بعويناتها الكبار و رد على سؤال عبد الله...
_ نيتي واضحة و باينة...كانت خطيبتي و كتااب الفراق حيت طلقت جوج مرات قبلها وهي ماعارفة والو ...اوكييي ، و ملي كتاب الرجوع من بعد الفراق اسي عبد الله قدامنا كاملين تجاوب واش سولاتني شنو درتي فهاد العام و النص لي تفارقنا فيها ...( هز حاجبو )الا سولاتني و كدبت عليها تما سطوريا اخرى ثاني ...
عبد الله ( شاف فحلا ) هدر احلا تكلم ابنتي واش سولتيه و كدب عليك....
حلا ( بكدب ) سي سولتو ماجبدش ليا لا ياسمين لاختها حتى لدابا عاد ظهرت حاقدة عليا تقول خديت الوزير و غيرانة عليه.....
عبد الله ( بنظرة توبيخ شاك فيها تتكدب ) حلااا و مابقيتبش صغيرة نتي عندك بنت خصك تربيها ! و التربية كي غتكون و نتي كطيحي من قيمة راجلك قدام بنتك ؟! خصك تحيدي منك الكدوب الا بغيتي تربي ولادك تربية معقولة....
مارضاتش حلا و طلعو حواجبها للسماء نطق غي عبد الصمد لي تيحك لحيتو بالمهل...
_ عادي هذا هو الزواج لازم واحد ياكل الدق و يصبر و يدير عين ميكة على شي حوايج ....
حلا ( شافت فيه بنظرة شيطانية ) هدرة وحدة قلتها هاد السيد مافيه لامان ابابا ...كادب عليا قبل الزواج وندوزها و لكن الخيانة ماعمرني ندوزها ليه....
عبد الله : الخيانة عندها الشهود و الدليل ماكاين شهود ولا دليل ماتنزليش الباطل ..الباطل صعيب....
حلا ( هزات حاجبها ) الاعتراف سيد الادلة ابابا عارفها هادي ! فنص وجهي سولتو قالي سي خنتك...و الا سميتو عبد الصمد ولد احمد البحري ينكر ....
عبد الصمد ( بنظرة ماكرة ) عبد الصمد ولد حميد البحري الله يرحمو و يغفر ليه كيقول ماخنتهاش اسي عبد الله ...
حلا ( صعرات ) و هاا شفتيه ابابا....حسيتي بيه كيفاش كيهدر نكر كلشي حيت ماشي ولد احمد ولد حميد ......
عبد الله : لاحولا ولاقوة الا بالله ....ابنتي هادي ماعمرها كانت ولا تكون الله يرضي عليك عمل عقلك كاين راجل يعتارف بالخيانة بالعلالي الله يهديك و صافي....
حكات حلا سنانها مع بعضهم تتغلي جابت نعيمة مشروبات هزات كاس الماء بارد شرباتو معصبة تتبرد بيه العافية....عيات تنعل الشيطان و تعاود تتشوف عبد الله تيكدبها و حميدة تتكدبها من جهة ومتيقين عبد الصمد لي لاعب دور الزوج المثالي باتقان.....عينيها تيدورو بالزربة و رموشها تيتهزو و يعاودو تتفكر و تعاود هي متأكدة خانها ملي جلسات مع راسها عاد بدات تتفكر فهاديك ثلاث شهور لي غابت عليه مستحيل يبقى بلاش مستحيل دابا عاد فكرات بيها بجدية ...حطات الكاس حتى تسمع الصوت و كمشات حجبانها محولة النظرة للتمرد للحزن...
_ وخا ابابا انا كنزيد فيه و كدابة ! ولكن انا باغية الطلاق ...
حميدة ( بغضب ) و علاااش علااشسس غي فهمنا نفهموك...
حلا ( بتردد و عينيها تيهربو لعبد الصمد ) زعما عمركم سولتو راسكم علاش طلق هاد النساء قبل مني ! دايما المشكل منهم زعما هو الحياة معاه هانية....
حميدة ( بصرامة )قالها و عاودها بسباب لالة عيشة ...و لايني نتينا و هي سمن على عسل ولا حتى هادشي كدوب....
حلا ( بلعات ريقها ) ماشي هي السبب ...و مانقدرش نقول السبب نيشان حيت مانقدرش بيني و بينو وهو عارف علاياش كندوي مانقدرش نخرج اسراري الزوجية......
هنا عبد الصمد هاز واحد الحاحب للسماء و حميدة و عبد الله بقاو غي كيدورو فعينيهم و عقلهم طااار لبين الرجلين ...
عبد الصمد مازاد حتى هدرة...سكت جامع حجبانو...تكلم غي عبد الله ...
_ الا بينك و بينو مابقات لينا هدرة....الله ينعل الشيطان و يهديكم هذا لي فجهدي مانقول...لاحولا ولاقوة الا بالله....
سكتو عن الكلام ...حلا من جهة تتدور فعينيها و عبد الصمد ماعاود شاف فيها حتى نص شوفة قلب وجهو عليها فخطرة ...! و كن بقات بيناتهم لباس حتى من نعيمة لي سمعات الهدرة صدفة و جلسات تحلل فيها هي و البنت لي جات تعاونها فالتنظيف ...
_ قدو قداشناهو و مامرتاحاشي معاه باينة قضية فيها الفراش اهيا العجب...زعما شنو ماكينوضشي و كيفاش حملات منو ...
البنت : و هاذوك قدهم قداش هوما لي تيصدقو ناقصين ...
شلا اقاويل و احاديث و تحليلات و لكن حدهم باب الكوزينة...اسرار لي تتسمع تتشد عليها بالسوارت و ماتتبقاش تبرح بيهم قدام البراني خارج اراضي الفيلا ...! دوزو داك العشية غي بزز ...الوضع مكرهب و مرون بيناتهم.....! حتى جات الوقيتة ليمشيو فيها...تهزات حميدة تتغمز فحلا تنوض تمشي معاه....و حلا مابغاتش حتى خنزرات فيها تخنزيرة صحيحة عاد تهزات واقفة هازة صاكها تابعة عبد الصمد المغير كليا ودعات اهلها و توصيات حميدة دير عقلها و توزن الامور دقة دقة...مع من هي ...حلا صافي الطلاق هو لي مايحيدو ليها حد و حدس المراة داخلها فايق و تتحلف بلي عاشر وحدة اخرى غيرها وهو مزوج بيها خصها غي الدليل تبينو ليهم انها مازادش فيه اما بينها و بين راسها راها متأكدة و مقتنعة.....!
مشات معاه للدار حطات البنت تنعس و جلسات حداها حتى خرج عبد الصمد من الدوش و نطقات بين سنانها...
_ مافهمتش مالك ؟ مافيك نفس مابقيتش باغاك طلقنيييي و عيباد الله باغية الطلاق واش صعيب عليك لهاد الدرجة تفهمها...و طلقنييييي نقولها ليك بالشنوية و باغية نتفك منك و مشي عند الف وحدة مادوا معاك حد( بغضب مخبية بيه غيرتها ) واش تقضاو النساء فهاد الدنيا طلقني و تزوج شكون تولد ليك ولد وجوج و ثلاثة دير حضانة نتا ماشي شغلي و مابقيتش مسوقة حيت مكتستاهلش.....
هز جاكيط ديالو و مفاتيحو و خرج من الدار غابر كمارتو مخليها مصدومة دارها ليها قد كلامها.....
رجعات حلا للفيلا صادماهم بخبر الطلاق و عيشة عرفات حتى هي و تاصيلتهم كاملة عرفات و جلسو تيحللو و يعاودو مصدومين...كيفاش و علاش و حتى ولدو ! ويلي صافي كركباتو بحالو بحال لي قبلو هاذوم من عائلة حلا انا عاىلة الصمدي تيقولو صافي هو لي طلعات ليه فالراس و قنط منهابحالها بحال النساء ديالو لي خداهم قبل ..عبد الصمد و حلا ولاو حديث الاسبوع العاىلة قدها قدهاش كل واحد فين تيصوني و يسول و يعاود و يقلب خاشي كرموستو فالموضوع....! نسيم و خلود ماكانوش قل من البقية....تصدمو حتى هوما و بقات هادي تتشوف فهادي....و حلا وسطهم تتستنى ثورية تجيب ليها اختبار الحمل....
_ خلود ( بضيق ) علاش باغي يطلقك انا مافهمتش مافهمت والو كيفاش وقع عاد كنتو مزيانين ...
حلا ( بين سنانها ) انا طلقتو ماشي هو طلقني ....
نسيم ( بقلق ) نتينا تعرف حياتك هادي ...تأكد بعدا واش حاملة ولا نو و من بعدها عاد شوفي شنو ديري...
خلود ( بغضب ) الله يستر و صافي...ياك شادة ليك الرضاعة و على الله مايكون بو حمل...و خليه هو يرفع دعوة الطلاق علااش نتي غضيعي فحقوقك كاملة و تبقاي على الضس لا تعويض لا جوج....
نسيم :واش نتي كتشوفي غي الفلوس اخلود...
خلود : انا واقعية نتي لي ماعرفت فين عايشة ...هاذوك من حقها ماشي تتسعاهم ياك باغية دير مشروعها و كل شهر تجيها فلوس القهوة و الرياض و تزيد ديك الحصيصة لي تخرج ليها و تدير مشروعها تلهى معاه قبل ماطرطق حيت اوهووو باااح شي حاجة سميتها زواج و راجل بعد الطلاق مع داك ولد عيشة حيت غي تنسى البنت ماتحلم بيها و تبرد الدودة لي تتشدها كل مرة قالك محتاجة حب و غزل و حنان و شدي الحنان دابااا....
نسيم : و ماعرفتش مالك معصبة نتي ! بسم الله عليك ....
خلود ( غمزاتها ) و شنو قلت كدبت !!! والله لا تزوجاااات عاد هو يدير عشرة و من حقو جات معاه السيد خمسة من جهة و خمسة من جهة اخرى كيشعلو و يفتنو بالزين وهي الحضية و التزيار من بابا و رضا و التزيار من عندو يشوفها واقفة غي مع واحد بالصدفة يلبق ليها ضوسي صحيح و يحيد ليها البنت .....نتينا ماسمعتيش صحبتي مسكينة شنو وقع ليها خدا ليها البنت و شرا الشهود شوه ليها السمعة بتهمة الفساد و بقات لا بنت لا سمعة.....
خلود تتدوي و حلا شادة راسها غيطرطق ...! جابت ثورية اختبار الحمل و صبرات حلا حتى الغد ليه عاد دارتو و صدق سلبي ماكاين بو حمل...رمات هاد الهم ورا كتافها و تهنات و خرجات من الحمام مدوشة...هزات حوايجها و حوايج بنتها و جلسات حدا عبد الله وجهها صفر...
_ باغية نبعد شس ايامات نرتاح فيها...حيت ماحاساش براسي مزيان عقلي مشتت و مامرتاحش والو الراحة مابقيتش كنشوفها...باغية الطبيعة ماباغية لا بنادم لا صداع لا حريق الراس.....
عبد الله ( بصرامة ) دار جدك فالريف خاوية خوي داك الدماغ و كبري عقلك عاد رجعي شوفي روينتك.....
و داكشي لي كان مشات هي و حميدة للريف و ظلات تما خمس ايام كانت محتاجة راحة و نفسية تقاد حسات براسها تبدلات بعض الولادة مابقاتش كي قبل دغيا تتبكي و حساسة بلا قياس و قلبها دغيا كيقفز و مشوشة و بالها كلو مع البنت التربية و اول تجربة ماكانتش ساهلة....حسات بالاحداث غادية فحياتها بالزربة و مشوشة لدرجة عمرها عاشتها قبل....خوات عقلها و تهدنات و رتبات كلشي فحياتها من الاولويات للحاجات الثانوية و اولهم صحتها الا مشات مايرجعها حد لا ولاد لا راجل ...الهدوء و الراحة جابو نتيجة.
بدلاات الجو و رجعات بحالها لتطوان بنفسية جديدة ....
قصارة و شمن قصارة....الاكل و المشروبات و الاحاديث الرجالية....جالس تيشارك فرحة صديقو باول مولود عندو....فمنطقة غير معروفة باقليم شفشاون.....! ناض خارج من الجماعة لابس جاكيط الجلد جاياه عبار نيفو مهزوز و تيمشي بتمختر غير مقصود او متصنع مشيتو هكاك من دايما حتى شوفاتو ماشي ديال الامان مازوينش داك الزين تيطيحو عليه البنات من شوفة لولة و لكن كاريزما و حروشية حاضرة الوحدة ماتتزعط فيه حتى تشوفو للمرة الثانية حيت مرة لولة يقدر مايعجبش الوحدة تتعجب من طولتو فقط و تقلب وجهها و لكن الا رجعات شافت فيه للمرة الثانية و الثالثة وزاد هدر و تكلم طاحت فالفخ و حيراتها نظرة عيونو الحرشة....اما الى حرك جيبو غيولي الحبيب ولد الحبيب ....!
كان خارج من المجلس تيشوف يمينو و يسارو بين رموشو حاضي جنابو و موسوس من دايما....و خاصة معاشر مع الفقهة لي حشومة و عيب يتسماو بالفقهة تيصادف حالات السحور و الشعودة و تيخاف على راسو الغدر قريب يا من بعيد براني ولا من قريب حبيب....؛ كان تيشوف جهة يمينو و قشع سالف زعر تيبان من الرواق الشفاف ...دارت تتحمع فشعرها تتضحك و جات عينيها فعينيه كانت تتقطر بالزين شاف فيها بنظرة ذكورية عشاقة الزين.....و حتى هي خرجات تتبين زينها و تضحك بلعاني بالجهد ...
قلب عينيه عايق و فاطن ...دوز نهارو و ليلو بين الغناوي و الرجال و الغيطة الجبلية ...عيشة شافت داك الزعرة لي حطات العين على عبد الصمد و جمعات حجبانها كاتمة غضبها تتنفخ و تعاود....
_ قلالين الحياء و الصواب هادشي ماكاينشي فاصولنا....
نطقات مراة متسوطة العمر تتسايرها وخا مافاهمة على من تتمعن...
_ و قلة العقل والافلام خرجو على العيال ...
عيشة ( بغضب ) الراجل مزوج و عندو العايلة و لاصقة فيه بحال العليقة ...
المراة : شكووون هادي احبابي عيشة....
عيشة هزات كتافها و ماحاوباتش عليها تتدور عينيها يمين يسار....الزين زينين ولايني الخاطر مابقى قادر يشد حتى وحدة مزال....بزز بلعات حلا و مابقى ليها كانة لوحدة اخرى ولفات عليها عروستها و مراة ولدها و ام حفيدها و ولفات حكاويها و هدرتها و ماعجبهاش الحال ملي سمعات الطلاق مشاات شبعات لحلا الهدرة مرة تغوت عليها مرة تحاول تردها لعقلها خايفة على حفيدتها ساعة مالقات نتيجة....! دخلات ديك الزعرة تتطير بحال الطيارة لابسة كسوة زوينة تتشريها من سوق الاسبوعي مخططة بالابيض والكحل و السالف مرخوف بزز ساتراه بداك الفولار تتمشي و تجي قدام اعين عيشة و تتفرنس و تتلقط الهدرة من هنا و لهيه باغية طير بالمعنى الحرفي....سمعات بلي عبد الصمد طلع السطح مع باها ...كانت غتطلع وهي تجرها الام ديالها و خشاتها معاها فمحلس النساء و البنات و جات فجماعة عاطين للنميمة دقة...ماخلاو حد فالتيساع حتى من عبد الصمد جبدوه و كلهم وصفوه بهدرة وحدة...خانز فلوس عايش فسبانيا و مزوج عندو بنت ...! الشقرا لسانها مشوط باغية تسول و تعاود ولايني بركاكة كثار ...خلات حتى هبط باها و كان الظلام و طاارت للسطح شافتو واقف عاطيها بالظهر خاشي يديه فالجياب السماء مضوية بنجومها و الريح حنينة و هادية.... تصنعات العفوية و نطقات...
_ با ..با فاين نتينا ....
دار عبد الصمد شاف فيها بنص عين باقية صغيرة و زوينة ...
_ ماكاينش هبط ...
رققات صوتها كثار ماهو رقيق و ردت...
_ اوووف غنبقا هيدا طالبة هابطة كنفتش عليه شكرا اخاي و مرحبا بيك فدار عمي الوزاني....
هز راسو و زينها في ساع تبخر ...مشات بحالها مقموعة عقلها صغير و طيارة باغية غي تزوج دغيا قبل من خوتها الكبار ... قلب عينيه و شاف حداه الدار اصوارها عالية و الشجر و الخضورية مظلمة بالظلام ....فين مايشوف الزين تيسرح عويناتو و هي تتكلم تيتمناها تسكت ..تيتلاقى مع وحدة زوينة تتفتن و لكن هدرتها ماتتعجبوش ماتتجيهش على كانتو وخا تعجب مية وحدة غيرو هو ماتتعجبوش ماتتنغموش... يدوز معاها ليلة ثانية و يعاشرها جسدياا فارغ مكبوتاتو لكن ماشي ديال العشرة و الدوام و الولاد غيبقى من وحدة لوحدة وماعمرو يحس بالمتعة الكاملة بالرغبات الجسدية و القلب فرحان....و هاد الحالة جاتو من نهار تعرف على حلا عن قرب ولى ذوقو صعيب بحال لي مولف ياكل و يلبس غي الغالي و الثمين و نهار مشاو ليه الفلوس مابقاش تيقنعو ياكل و يلبس من الرخيص ....!
لكن حلا و هو طريقهم تشدات و الحساب عندو ثقااال و مابقات ليه رضى لا عليها ولا على راسو ...كان يموت و مايطلقهاش وخا ترفع عليه دعوة طلاق يعرف يحبسها فشي قصبة منفية و يحط عليها مية عساس حتى يتلغى الملف و يترمى فالارشيف و يقدرها يديرها قبل ماتعتب رجليها باب المحكمة و تفكر تحول خصامهم للمحاكم .....!! كمى واحد الجوان وشعل تليفونو صبعانو تيدورو على رقمها ...قلة الشغل جاتو مصيبة مسالي هاد الايام ماعندو شغل مهم ماعندو خدمة غا الدوران و العراسات و القصاير و الفراغ خلق الوحش و الوحدة مشاعرو خصها فيلسوف عميق و محلل نفسي شاطر و مترجم افعال عاد يفهمها.....!
خشى داك التليفون فجيبو و وقف مصمر تيشوف و يفكر توحش بنتو و توحش يحط عليها الراس....شكون قال الرجال ماكيتوحش دارو و ولادو شحال ماطار و زهى و شاف و عاشر تيبقى الحنين لزوجة و بنت و لمنزل اسري ...!
جبد تليفونو للمرة الثانية و دوز ليها الاتصال ...وعلى غير المتوقع ردت عليه بهدوء و نبرة رزينة...
_ الو عبد الصمد ...
عبد الصمد ( ملامحو مرخية) فين حلا ؟
حلا( بخفوت لذيذ ) ناعسة غدا فالصباح ملي تفيق نعاود ليك تدوي معاها ابيل فيديو ...تصبح على خير ..
عبد الصمد ( لعب بلسانو داخل فمو ) اوك........
قطعات هي الاتصال و بقى داك التليفون تيدور بين يديه و الحجان مرة يتلاقاو مرة واحد يطلع للسماء مرة ينزل....دور عينيه حداه سامع الصوت من وراه لقى نفس الشقراء ..
_ سحبلي ابا ماعرفشي فاين هو ؟
عبد الصمد ( لقاتو معصب ) سيري ت**دي ابابا...
طارت من حداه مخلوعة و هبطات تتبكي ...و جلس بحال العفريت فالظلام مافيه نعاس....! و ييديه كلاوه للتليفون رجع دوز ليها الاتصال و مارداتش عليه عض فكو و ماعاودش لاتصال مرة اخرى حتى غدرو الحنين فاليلة الموالية كان الجو سخون و صوت الكلاب مسموع صونا عليها و ردت عليه بجدية...
_ نقدر نفهم شنو باغي ؟ علاش تتصوني عليا باليل و البنت لي جامعانا تتكون ناعسة ....
سكتات وحتى هو سكت شحال راسو غيفاجر و السخانة فيه تتشوي ...
_ عقلك مزال مالقى عقلو.....
كانت ناعسة غي سمعات نبرتو الحميمة جلسات جالسة مقصحة قلبها و شادة عليه بمية قفل...
_ مابقى لنا طريق اعبد الصمد نتا باغي الفراق و تنا هادشي لي باغية....
عبد الصمد : نسيبريمي لي داز !! ماباغي فراق وخا نولي ماساوي حتى بصلة مطعونة فسوق الرجال ...ينعل القلب لي شدك عندو.....
وصلها ردها بصوت باكي...
_ ممم الهدرة جاتك غي باليل ...تقدر ناعس مع وحدة اخرى و تتدوي معايا انا....عمرني نتيق بهدرتك ...
عبد الصمد ( السخانة لاعبة عليه تيخرج المدفون اعترافات بالجملة و بسخاوة )حتى وحدة ماتحلالي غيرك نوشم سميتك فيه و نجمد جد بوه ... الا كانت هاد البلية من عند الله زاهية كانت من يد العبد برب الكعبة غنحرك احلااا ....
عبد الصمد ( حريق فراسو لايرحم ) الراس محموم و القلب شاداه الحزقة... شنو باغية احلا حبينا معاك الخاطر شغل التبزنيز و الدراع ملايقش ليك ...
حلا : نتاا شنو باغي اعبد الصمد ..علاش جاي تتعرض عليا هاد الهدرة شنو باغي ! انا نادمة نادمة حتى عضيت فالتراب علاش تزوجت بيك و بغيتك من قلبي كنحس براسي حمقة حيت تقت بيك و الخاطر معايا اقسم بالله ماتشوفو ...اه سولتي شنو باغية...باغية نعرف شحال من مرة ...شحال مرة خنتيني اعبد الصمد و بلا ماتنكر والله لاتقت بيك.....( بامل ) جاوبني اعبد الصمد ....
عبد الصمد ( شد راسو تيدلك فيه و هدرتو ثقييلة ) جوج مرات....
تخلطات ليها الضحكة مع البكية و الدموع حارين و سخان ...
_ ههههه مزيان بصحتك ههههه من حقك بلا مانسولك فوقاش عرفت من راسي هههه ملي عنفيتيني و غبرتي و ملي كنت كنتقطع باش نولد ياك ؟ ( سكت ماردش كملات هي تتبكي و تضحك بحرقة ) مزيان مزيان اوك بصحتك والله بصحتك ليىبقى فيا هو انا كنت كنبغيك و درت شي حوايح مادرتهم مع حد...درت عين ميكة على الضرب لي ضربتيني و قلت ندوزها حيت كنبغيك هههه و باغي ندوز ليك هادي ؟! صايي عبد الصمد الله يسامح و الله يعاون ....
حلا : اخر هدرة هي هادي ...( تتهدر وسط بكاها ) ماعندك لاش ماتلقاش راحتك نتا ماعندكش ضمير و نتا عمرك بغيتيني الرجال بحالك عمرهم كيبغييو انا لي كنت عورة....كنت نقدر نبلع الخيانة لولة ملي كنا مخاصمين لكن ملي كنت كنولد اعبد الصمد ! كنت كنشوف الموت باش نولد كنتي معاها.....هادي حرقاتني شوطاتني نتحرق بالعافية و مانحسش هيدا.....عمرني ننساها ليك فحياتي .....
عبد الصمد ( عض فكو مزير ) ماكنتش مرتاح و دابا مامرتاحش الراحة هربات احلا ....
قطعات عليه منهين الحديث و البكاء لي شدها ديك اليلة ماقدرات تنساه عمرها كلو ....بكات و شهقااات بحرقة ...حميدة دخلات لعندها مخلوعة و حلا غتموت بالبكاء....
_ اقسم بالله قلبي كيحرقني اماما اقسم بالله العلي العظيم حتى قلبي حسيت بيه تشتت......
بكاااات و عاودااات و مالقات الراحة لا فالنعاس لا فالبكاء ....!
تم الطلاق بيناتهم ووفى بوعدو و عينيه تلاقات بعينيها فاخر جلسة ملي رمى عليها الطلاق.....ماعاود شافها ولا تلاقاو.... الراحة هربات منهم بجوج لاهو ولا هي مرتاحين في حياتهم لاراحة القرب ولا البعد....! حلا تبدلات هدرتها قلالت و البكاء بكاتو شهر لول ونشفو عينيها....جاتها صعيبة و حارة حيت القلب ملي تيبغي تيتكسر دغيا و تصعب يتصلح و حبها طاح فيه هو ...العيش مع بعض حرارت ولات شبه مستحيلة.....سميتو ماقادرة تعاود تسمعها تحطمات و بانت فيها ماوقف فيها غي عائلتها خوتها و حميدة و عبد الله لي شاف بنتو مريضة شهر لول و مبدلة و مغيرة عليه كليا....! دارها لي عطاها كارية جوج طبقات 5000 درهم فالشهر لكل طبقة بفراشها الغالي.... الطموبيل لي عطاها باعتها و شرات وحدة اخرى و نفقة البنت تعطيها فوق الجهد ...لاهو لا عمامها لا عيشة مهلين فيها كثار من القياس.....دخلات معاها كاورية صديقة عبد الله و تتعرفها خلود نفسها لي كانت شحال هادي تتعلمها العربية...الكاورية عطات النص و حلا عليها النص الثاني و تكلفو الخبراء بالمشروع حتى تحط فارض الواقع كما هو مرسوم فالوراق....! اسباس كبيير ها جناح الاطفال جناح الجمال الطبخ الاتيكيت الرقص الخياطة...! جاتها صعيبة فالاول و تخلعات حيت الفلوس تحطو صحاح و ضروري فالاول مايكونش داك الربح المتوقع.....حسات براسها غامرات و عيااات ماكانتش تتنعس خدامة تتاصل بكلياناتها و تكلف بالاعلان و الاشهار وتتعمل صداقات مع المغنيات و الفنانات تتخلص عليهم المطاعم الفخمة و تعرض عليهم العشاء بزبالة الفلوس حتى يديرو اشهار و من تما للحفلات الخيرية و الصحافة ...حتى نهار الافتتاح جاو فنانات معروفات و مغنيات و الكاميرا تتصور و الصحافة لاصقين فالفنانات تيصورو و يعاودو.....!
كانت حلا لابسة غوب نواغ كلاس و شعرها مخلياه كحل تيلمع....بابتسامة جميلة رزينة تتجاوب على اسئلة الصحافة و خاصة صحافة جهة طنجة تطوان لي خدامين معاها على الجهد و كل مرة دايىرين ليها فيديو و اشهار و تيكبرو بيها ....
_ قصر الملكة ههه وخا هو ماشي قصر بمعنى الكلمة ههه ( الصحفي تيضحك ) و لكن لي تتدخل ليه تتولي ملكة و الملكة ماتتعيش الا فقصر دونك من هنا جا الاسم ....بصفتي مراة و ام حاسة بالامهات و النساء الموظفات او غير الموظفات تتبغي هكا تريحي راسك و تتعلمي حوايج جداد و مع الوليدات تيصعاب الحال انا فكرت ليهم باغية ليهم هو يكونو ملكات سيدات راسهم عطي وقت لراسك و وليداتك معاك.....
داز الحفل رائع بين احبابها و اخواتها و بنتها فاتن تتمشى على رجليها تتضحك زوينة و نسخة طبق الاصل على حلا حلوة و حنينة تتشبه ليها من برا فقط اما طباعها غير ....تصورات معاها و حطاتها فانستاغرام....كاتبة عليها...
"كنزي" ....
عاماين بالضبط داز على الفراق !
كانت جالسة فالبيرو ديالها من شوفة لولة تتحس بيها مالكة المكان و مايليق ليها غي داك البلاصة....!!
دخلات عندها المساعدة ديالها تتبلع فريقها لابسة الابيض و الزهري لون مفروض على جميع العاملات لي هنا....
تبعاتها حلاا بالزربة تتخلف بداك الطالون العالي لقات جوج مربيات قدام طواليط في جناح الاطفال مرايشين و غواتهم مسموع مدابزين على باج انستاغرام عندهم مشروكة فايتة 100 الف تيحطو فيها الوصفات و يدخلو الربح و دابا طلعات ليهم القرينة وسط الخدمة غي شافو حلا شدو فمهم و بداو كيتفتفو....
حلا ( بعصبية ) الهدرة مع الكونطابل شوفو حسابكم.....
نقزات وحدة تتبكي...
_ سمحليا امدام حلا راه ماعالم بيا غي الله والله لا بقات تعاودات اخر مرة....
حلا ( بصرامة ) الكونطرا باقي ليها دو موا و تسالي ماغاديش تعاود ...مانخاطرش بسمعة الدار و تمارة عااام على تبرهيشكم و قلة وعيكم واش حاسبين راسكم فالحمام....مافهمتش تنا شنو هاد قلة الادب و الاستهتار...و تنقيص مني و ليسباس لي خدامين فيها.....الا سمعات كليانة وحدة غواااتكم وحدة صافي غيهربو جوج و ربعة و خمسة و يتبعوهم عشرين و لمن نبقاو هنا ؟نجلسو انا و نتوما و نتعاودو و نغزلو الكلام الحديييث.....
بغاو يهدرو قاطعاتهم بصرامة...
_ اخر انداااار ....
خلاتهم تيرمشو و يشوفو فبعضهم و خرجات بالزربة ...
_مريم تبعيني لاصال دو كومينيكاسيو مدام لطيفة كاينة ؟
مريم ( غادية وراها ) وي مدام حلااا و كوتش لمياء حتى هي و الكونطرا واجدة ...مدام حلااا نسييت...
حلا : شنو ؟؟
مريم ( وجهها صفارت بالخلعة ) اتصلت مدام مريم ...
حلا ( باستفسار ) شكون هادي ؟
مريم ( تتقلب فالوراق كثرة الاسماء تنساو ليها ) اه اخت المغنية **** عندها 390 الف متابع فانستا و قناة فاليوتوب و متابعينبها كثار من مدينة طنجة.....هادشي لي لقيت....
حلا ( بتفكير ) ...تتبغي تنقص ليها خمسين فالمية باش تكتب بزيقة وحدة فالسطوري اما فيديو تتطلب ليك الفابور السينيورا.....قوليها ماكاينش كلشي عامر و الاشتراك حتى الشهر الجاي....
مريم : و الا ناضت تتدوي وتخرج العيب فالستوريات ....
حلا : نبقى مسالية انا لوحدة حمقة.....دوزناها ليها مرة وخا جوج اوك ماتيعيقش و تتاخد ديبخودوي بالزز ... حمام او شوكولا 1000 درهم هي دارتو بااااطل و كملات سارقة ليا عاين باين....شوفي غيرها نبدلو شوية ....
داز نص نهار د الخدمة من بلاصة لبلاصة ترخي الطرح للكليان و تزير مع العاملات مرة مرة....ولات معاشرة مع طبقة الفنانين و المغنيات و تتحضر لحفالاتهمو مناسباتهم و اليوم كانت معروضة لعرس اخت مغنية معروفة تزوجات من رجل اعمال مغربي حضرات و دغيا دارت بلاصتها وسطهم و داز صحاب و كليانات اخرين ...و حصلت على اعجاب سياسي كان بين الحاضرين و مالقى منها حتى استجابة و قلب وجهو معفر ... سيرة الرجال كرهاتهم و ماعندها حتى نية لا فالزواج لا فالتصاحيب طلعو ليها فالراس و ماعندها كانة ولا خاطر ليهم....!
دخلات للفيلا و فاتن شادة فيديها تتضحك و تخربق فالهدرة ...
_ اكوولنوووو عععع...مااامي ...
طيحات ليها الصاك و تهنات هزاتو تتضحك...
_ شنووو والله مافهمتك امامي...
خشات صبعها ففمها صاعرة ...
_ ععع كوللااو....
حلا ( حبسات ضحكتها ) مالك شنو ...
عاودات و عاودات و حلا مافهمت منها والو كل مرة معوجة ليها الهدرة و لسانها مامسرحش....! جلسات فالصالون البلدي لابسة البلدي حتى هي و ملبسة بنتها بحالها بالبلغية صغيورة و جلابة قد سنها و الشعيورات كحلين شعرها تيطوال تيشبهوه لشعر نسيم ....تحط كسكسو ديال حميدة تيشهيو و تجمعو عليه كاملين ....
_ حلا : الله يعطيك الصحة الالة حميدة....
حميدة : بصحتكم و راحتكم....!
نسيم حتى هي الراحة باينة فوجهها و معاهم خلود و حنان و رضا هاد الاخير لي مخشي مع شغلو عندو قهوة و باتيسري قاضي بيها الغرض من داك النهار ماعاود تخاصم هو و حلا بحال البرانين هذا ماتيهدر مع لاخر....!! تغداو و تكلفتت المساعدة جمعات الطبلة و تهزو الرجال بحالهم خارجين حتى نقزات خلود ناطقة
_ غدا هابط للمغرب ياك غدا ستة فالشهر ؟ غياخد البنت من الفيلا و لا غتلاقاو فشي بلاصة ؟
حلا ملي رمى عليها الطلاق ماعاوداتش شافت كمارتو ولا شافها تيجي ياخد البنت من الفيلا....هزاات حاجب فخلود و ردت...
نسيم : نهار تيجي ياخدها هي تتخوي الفيلا كاع و تتقولي يتلاقاو ...
خلود : الله يستر و صافي ماكاين لي بقى فيا قد البنت مسكينة طالعة كتموت على باباها و ماشابعة فيه الشوفة.... والله حتى كتبقى فيا غي هي...شحال مابقى غنسمعوه تزوج و بنتك غتولي عندها مراة باها و تولد ليه ولاد اخرين و ينسى بنتو لولة.....
نسيم عينيها تيتغرغرو بالدموع ملي تتشوف فاتن اما حلا مقصحة قلبها و شادة عليه بمية قفل ماتتدمع ليها العين حتى تيجبدو ليها سيرة بنتها و تعلقها بعبد الصمد ....! شحال من مرة حاولو يدخلو بيناتهم حتى من بعد الطلاق على قبل البنت كبار العائلة و شحال من فقيه حاول الصلح ورفضات تلاقى بيه ولا تجلس فبلاصة جالس فيها هو ...وخا داز عاماين على الطلاق مزال تيحاولو يجمعو بيناتهم لكن الجرج في قلب حلا مزال طري و عمرها تنساه.....!!
عبد الصمد باين عايش الحياة سفر و خدمة و حرية و دخل وقت مابغى و يعاشر شكون مابغى و الراحة مالقاها مع حتى وحدة هربات عليه الراحة بالمعنى الحرفي ....قرب يطل للاربعين و كانت عندو مراة بلارة و بنت تفتن كثار من مها بالزين و الحلاوة و ضيع كلشي مابقات لا مراة لا بنت تحت جناحو دايمة.....لاهو ولا هي مرتاحين وخا كل واحد مغرق راسو فعالمو الخاص الراحة هرباااات عليهم بجوج محفورة ليه فالدماااغ و مشات ليه مع الدم بقات بحال الحسرة فقلبو تتشوي من وحدة لوحدة و مالقاش راحتو ...و هي الشمتة مطبوعة ليها فالقلب و الخيانة ماقدراتش تبرد وخا عاماين فراق....!!
رجال الدولة بشلاغهم و هلكهم الفراق و الحنين ...تيقولك مشاكل الحب و الغرام غي حكاوي النساء.....و السلاطين حطو سيوفهم لارض مستسلمين والدبحة نازفة من صدورهم بسباب الغرام و فراق الحبيب....!! ماتيستخف بالحب غا المحروم عمرو جرب ولا قاس ولا غمس و غطس فبحرو.....غا بني ادم عندو قلب و مشاعر يكون حجرة وقاصح تيهزو الحب و يسكنو الغرام ....! وقيتة الخدمة و مشاكل الخدمة هاهو غارق فيها ماعندو عقل لشي حاجة اخرى ملي تيحط الراس بالليل تيطوال عليه يموووت و ينساها و ماقدرش ماعرف شمن تعويدة ولا سحر سحراتو بيه ولا تيسمي حالتو سحر....!
طاوي يديه فوق راسو ناعس فالصالون و التلفاز مشعول....مغمض عينيه وودنيه مع الغادي و الجاي....حتى جلسات فوق راسو عيشة...
_ طالعة ليك السخانة اعبد الصمد...خصك شي حاجة نجيبالك المرضي....
عبد الصمد ( بحرقة و لاول غيخرجها على فمو طيلة هاد السنين ) باغي الراحة....و مالقيتهاش مع بنت المراة اخرى من غيرها ... ولدك الالة يمة سكناتو بنت عبد الله ....
عيشة ( بدهشة ) حلفات و عاودات ماراجعاشي مابغاتشي عينا معاها كل مناسبة ها حنايا معاها و انا صافي مابقيتشي نزيد معاها هدرة اخرى مابغاتشي لهلا عطا الله بنات ناس حسن منا....
عبد الصمد ( طاوي يديه فوق عيينيه مدكدك ) البلية اعيشة مالقينا لراسنا خاطر....مابغيت حسن منها باغيها هي بنت عبد الله....
عيشة ( عقدات حجبانها بعجب ) لاحولا ولاقوة الا بالله.....
صفاء كانت فالكوزينة سلتات خارجة بحالها مصدومة كثار من عيشة....! عبد الصمد حاط الراس هلكو الفراق ......
كل نهار سيرة الزواج تتجبد ليها من طرف حميدة و عبد الله.....كل فرصة تتجيهم تينغزوها و ينكدو عليها راحتها...
حميدة ( باصرار) و علاااش تزوج شنو ناقصك شنو....البنت هاهي معايا مرة معاك مرة مع باها...
حلا ( نقطة ضعفها بنتها ) و علاااش اماما ...ماحرامش نضيع بنتي هاد الضيعة بنت صغيرة كل مرة فين ناعسة و فين متلفة....! ترضاي لبنتي هاد العيشة....وخا نعرف نموت وحدي و مانتزوج نسمح فبنتي و ماباغيا حتى راجل يدخل لحياتي فيها بنتي ....
حميدة ( بحرقة ) انا كنخمم ليك ...راجلك حلفتي ماترجعلو وخا ...و هذاك الرجل لي ميت يتزوج بيك احلا سيد كيبغيك ...بنتك غتكبر و نهار يخيروها تقدر تختار باها عليك نتينا...و عرفتي كيفاش غتكون ديك الوقيتة....فعمرك 47 سنة ولا كثار تختار باها و نتينا شد الحيوط لا ولاد لا راجل حتى انا و باك مانبقاو لك ماضامنين نعيشو حتى لغدا ... كلشي غيتلهى فحياتو و غتبقى بوحدك حتى بنتك غتكبر تزوج و الا كانت مرضية غتجي تشوفك جوج مرات فالسيمانة....
حلا ( خرجو الدموع كيجريو من عينيها ) انا ماباغياش نتزوج والله لا تزوجت كرهت رجاااال كاملين و ماحاملة حتى واحد فيهم كرهتهم و كرهت الزواج ...انا ماعايشة لحد غير فاتن تقطعت عليها و نعاود نتقطع و هانية عندي.....الرجال و الحب ولاد الحرام ماعندي ماندير بيهم ماباغياااااااااش.....
قالت لي عندها و طلعات لبيتها شادة الباب بالجهد مخلية حميدة هازة ليها الهم و تتدعي معاها فكل صلاة....! شوية لقاتها مهبطة بنتها و موجدة ليها حوايجها و عينينها باينين باكين...
_ غيجي باها يديها...انا خارجة...
خلاتها ليها و خرجات لخدمتها....! بقات فاتن مع حميدة تتملي عينيها بيها ...
هزات راسها بالايجاب فرحانة و غي جا عبد الصمد خرجاتها ليه و طارت لعندو طايرة تتضحك بالجهد ملي هزها للسماء و نزلها تيبوس فيها...وهي تتغوت...
_ باللااا...بااااباااا....
باسها فخدها بخشونة ...
_ خوافة مع راسك .... نشوفو لالة عيشة توحشتيها البحرية ...
فاتن ( تتلعب فالسنسلة فعقلو و تبسم نفس حركات حلا ) ايسة ابابا....
عبد الصمد( مكمش حجبانو و عينيه مبسمين فيها ( : عيشة احلا عيشة....
فاتن : ايشة....و ميدا ...( عيشة و حميدة )
دوز معاها نص نهار برعها و فششها مزيان وهي تتموت على الفشوش ديالو داير ليها خاطرها تتضحك حتى تيتغمضو عينيها مبتسمة ابتسامة حلوة مع كل الفشوش و الدلال و فرحتها معاه ناضت تتبكي ليه مابغات تحرك شادة فدبدوبها مزيرة عليه و مدلية شفايفها تتبكي باغية ماماها ..
_ مااااامي.....!
مد ليها يديه مستغرب من حركاتها العنيدة ..
_ يلاه نمشيوو....
والو واش بغات تعطيه الخاطر ظلات مزيرة على دبدوبها تتبكي و فمها غي مامي...
هزها عندو بلا خاطرها حتى ناضت تتجبد و تغوت باغية ينزلها حيت هزها وهي ماباغياش تتمشي غي بالخاطر و الفشوش و الدلال رجع حطها عاد سكتات و الدمعة فالتة ليها من رموشها مدلية شفايفها...ربع يديه حاضي معاها بعينيه المظلمة غادية بديك المشية و قزيبتها تتعوج جارة دبدبوبها وراها مجرجر فالارض باغية تمشي لراسها و مايشد فيها حد غضبانة عليه حيت هزها بزز.....
مسح وجهو بيديه و تبعها فين مايقرب منها تتغوت و تصعر...
_ عععع ...
عبد الصمد ( معلي حاجبو ) و الله يسامح صايي مانعاودوش....
والو واش بغات ترضى ليه...حتى هزها بزز و طلقاتها لغوتة تتبكي و تشهق و تجرو من السنسلة ليىفعقنو....شد صبيعاتها الصغار تيبوس فيهم حتى ضرباتو بالغفلة لفمو و هرب وجهو مغوبش...
_ مجعورة بحال يماك....
مرة هاهي ناعسة على صدرو تتمخشش فيه بحال المشة و تفرنس معرية دوك السنان و غي يعصبها ولا يدير شي حاجة بلا خاطرها تتقلب عليه و تخسر ليها الكانة تتبكي و تصعر و تغوت حتى كلشي تيسمعها تقلبات عليه قلبة وحدة....!غي جلسو ياكلو فطمعم ايطالي ناضت تاني تتقلب على ماماها مدلية شفايفها بحزن....
كانت حلا فالبيرو ديالها محيدة فيسطا و لابسة شوميز درعانها عريانين قصيرة و بنطلون مزير على فخاضها رافعة شعرها بتسريحة مهدبة انيقة و حلقات ذهبية صغيرة فودنيها...
رن التليفون حداها وهزاتو ..
_ وي ....
مريم ( تتضحك ) فاتن داخلة لعندك امدام حلا....
تبسمات حلا ابتسامة واسعة و هزات عينيها فالباب حساب ليها عبد الصمد حط فاتن فالفيلا و جابتها حميدة.....حتى طل عليها عبد الصمد بنفسو ماكانتش متوقعة عينيها غتلاقاا مع عينيه القاسية في لقاء غير متوقع صدمها ماكانتش مجهزة راسها لي لقاء بلا موعد ...شافت فبنتها بالزربة تتفليها بعينيها كانت بخير و سلامة عاد هبطات عينيها المصدومة منو و لبسات عليها ساترة مفاتينها البارزة لبساتها بالزربة عاد ناضت ببرود مغلف ملامحها باتقان و صوتها خرج بصعوبة....
_ وقع شي حاجة مع فاتن ؟
عبد الصمد ( تيشوف فيها بنظرات مظلمو ) لا....
نقزات فاتن لعندها تتعلق فيها حتى هزاتها عندها تتضحك و رجعات شافت فعبد الصمد تتعاملو كانه رجل غريب تعامل رسمي ...جات تقوليه جلس ..لقاات سي السيد جالس بلا اذن او طلب رجل مايليقش ليه التعامل الحضاري و اللبق و ماستناهاش تعرض عليه ...
تجاهلاتو حلا و تصرفات عادي ماشي من مصلحتها تنوض العداوة بينااتهم .. باست خدود فاتن بحنية و رقة وهي تتزيد تلوى و تفشش عليها بحال المشة حافظة بنتها و فاهماها تتشبه ليها فهاد الصفة و عارفة ليها الكود ديالها ...تكات فاتن على صدر حلا تتشوف فعبد الصمد و ترجع تخبى فمها...و عين عبد الصمد على حلا تبسيمة استهزاء مخلطة مع الفقصة فالتة منو من اللحضة لي سترات مفاتينها من عينيه.... خرج صوتها هادي بارد...
_ واش كانت تتبكي ؟
عبد الصمد : نوو بغاتك ...
حلا ( بحدية ) ماباغياش تطلع مجننة و معصبة ملي تتعاند معاها على شي حاجة هي ماباغياهاش تتعصب ...الضد معاها ماينفع بوالو ...
تيسرح بيديه على البيرو و يدور عينيه على المكان ناطق بالثقالة....
_ شكون ياسين ؟
نظرة خوف و قلق فعينيها ولو تتغلفها بالثقة المهتزة...ياسين هو السيد لي بغى يتزوج و صديق عبد الله و ختو كليانة عندها ....ماتتخافش منو على راسها تتخاف يخدم تخلويضو و يشوه ليها السمعة و البنت طير من يديها تتخاف يخدم معاها القوة و الضد و عارفة راسها ماتغلبوش الا دارها فعقلو حيت عاشراات ناس و سمعات قصص كثااار ....حافظات على هدوئها و ردت...
_ مكنعرفوش ...
عبد الصمد ( هز راسو ببطىء) مم...ردي بالك ماباغي حتى ولد المراة يحط يديه على البحرية ديالي...
حلا ( الصبر تسالى ليها معاه ) هاديك بنتي غنفكر ليها و ندير لي فيه مصلحتها مني لراسي .....
شاف فيها بنظرة نارية و قابلاتو بنظرة حارة كثار من ديالو ...مادواش ماجاوبهاش و حتى هي حافظات على هدوئها فحضورو كثار من الجهد ماعندها رغبة ضربو ولا تعضو ولا تلومو ...باغياه غي يحيد من قدامها و تنفس براحتها حاسة براسها مزيرة و عينيها سخنو عليها....
_ الا ساليتي هدرتك يمكن ليك تخرج مامسالياش للنقاش موسيو البحري....
تهز واقف يد خاشيها فالجيب و اليد الاخرى تيدورها على البيرو حتى قرب تيطل من السرجم حداها على الجردة حاجب الشمس ..
تحنى باس وجه فاتن فحضنها و ريحتها طلعات ليه مع جيوب نيفو هز عينيه فحلا فداك القرب ...قلبات وجهها منو بغضب والصبر تسالا ملي نزلات فاتن من فوق رجليها و سمحت لعبد الصمد يحاصر حلا مع الكرسي تيشوف فيها بالثقالة و عينيها كيغليو بالفقصة....
_ باغي تخرح بحالك الشوهة ؟ ماعندكش الكلمة و فين عمرها كانت عندك قلت ليك ماباغياش نشوف وجهك وجهك ماحاملاش نشوفو ...قلت راه عندك الكلمة و وفيتي بيها ....لاااش جاييي دابا شنو باغي من عندي ...
نيفو شوية و يتحط على بشرة وجهها الصافية و يديه غلبوه و تحطو على خصرها بقبضة متملكة خلاتها غتحماااق ماباغياش الشوهة وحلات و عقلها تيضرب الحساب للقدام كانت مرتاحة شوية ملي كان غابر تهنات من مواجهتو قالت عطاها التيساع و ريحها وخا الراحة عمرها عرفاتها تتفكر غوتات و خرجوه السكيريتي و دار ليها شي شوهة هنا سمعة القصر و سمعتها هي غتهز و يتحلف فيها و يعاود يديرها فعقلو و يمرصها وماعندها جهد ليه.....نيفو تيتسارا على بشرتها تتدفع فيه ونظرتها فعينيه حارة بحال العافية...
_ اخر مرة غنسولك شنو باغي ...
عبد الصمد : باغيك نتي ..
حلا ( بحسرة ) شنو عندك فداك العقل كيفاش كتفكر ! مافهمت والو ...تتقول هدرة و تتغبر و ترجع شنو باغي افلان باغيك نتي ...
فتناتو بخط الايلاينر الاسود مرسوم باتقان ...
_ سي باغيك نتي ...
حلا : على حسب نتا شنو باغي ؟ بالخاطر ولا بزز....بخاطري ما تحلم بيها حتى ليلة ....
عبد الصمد ( حط جبهتو على ديالها حاط سلاحو ) حلمنا بيها جوج ليالي ...
حلا ( ماتيقات كلمة وحدة منو ) بغيتي نعاود نحلف ؟ عمرني نرجع ليك بخاطري و ماعمرني نتيق بيك ...حيت نتا عايش وسط الدياب و انا هادي فهمهتا معطلة...الواحد من خدمتو تعرف شخصيتو كي دايرة....نتا ماعندك ضمير ضميرك مانقولش ميت فيك شوية النور على خوتك فالحرفة ( بحرقة ) ضميرك سخفان ....
فاتن واقفة حدا البيرو هازة الستيلو تترسم فيديها و مرة تتهز عينيها فيهم ببرائة....!
تيشوف فيها شوفات مظلمة محاصرها بالعين و باليد بحال الى داخلين فحرب العيون و كانت هي الخاسرة ملي هربات عينيها بغضب وصبيعاتها الناعمين تحطو على يديه فوق خصرها تتبعدو منها ...
_ بعد منييي....
عبد الصمد ( حك نيفو فخدودها ببطىء ) راسك حجرة....
تتهرب وجهها منو خايفة يتمادا كثار ...فالاخير تيبقى واحد ماتيفرق بين الحلال و الحرام ...كانت مراتو وخا طلقها تيحسبها من حقو يبوسها ولا ينعسها تما و ملي شافها تسترات منو جاتو ضحكة حبلى بالاستتهزاء ،
عبد الصمد ( تيحوم على شفايفها ) بغيتي نبعد غنبعد ... عيني معاك دايزة بالله و نشوف شي ولد النملة زهقو عليه رجليه حداك غنخدمو معاك شي حوايج وبربي ماباغي نخدمهم التحف ....
حلا ( صعرات ) ماكرهتش ندفل وسط كمارتك ....
ضحك ضحكة ثقيلة بلا مرح و زاد قرب منها هامس ليها فودنيها بكلام سافل تتعرفو غي هي وهو ...بعد منها بعد ماخلى وجهها احمر بالغضب شوية و طرطق و عينيها كي الجمرة ....هز فاتن تيبوس فيها حتى بكاها ...
_ شعند يماك حتى نتي ...
فاتن ( مدلية شفايفها )كولات بابا....
عبد الصمد تيمسح ليها الدميعات و يشوف فحلا لي قالبة وجهها غتنفاجر ... رجع شاف فبنتو مبسم...
_ شوكولاااتا ! بنت البحري باغية شوكولاتا و الدنيا هانية و ساكتة نووو ....
دقات مريم الباب عاد تقادات حلا و صاوبات شعرها سمحات ليها بالدخول و دخلات تتشوف فعبد الصمد بنص عين ...مدات لحلا الملف المطلوب و نطقات
_ الا كانت ناقصة شي حاجة قولها لي.....
حلا ( عقلها مشتت ) غنشوفو من بعد من بعد امريم ...
مريم عينيها كيدورو معلوم شحال وهي غتموت بالفضول تشوف طليقها كي داير كانو تيخرجو عليها شلا اشاعات و هدرة ها مزوحة سعودي ها قطري ها واحد الشارف اسباني و ها لي تتقول بكل ثقة مزوجة بواحد من عائلة تجار كبار حيت باها تاجر و تيعطي بناتو للتجار.....
تحرك عبد الصمد من بلاصتو تيدور بحرية فالمكان ..حلا حاضية معاه غي يدير ليها شي فرشة حدا مريم زربات عليها تخرج دغيا ...
مريم ( بعفوية ) فلول جاني عادي الصراحة مقبول و صافي من بعد حسيت بيه عندو كاريزما فشكل و من الساعة لي لابس باين السيد تيشتت فالفلوس عرفتي حرش حرش ولكن هي زوينة عليه انا كتحمقني و حتى البنت تتشبه ليها ماخدات منو والو...
المربية : فين شفتيه !
مريم : كنت عندها فالبيرو و كان معاها و ملي كان خارج رمى جوج بوسات وحدة لبنتو ووحدة ليها...و تعصبات و جرات عليا خرجت كنطير....اجي بعدا فين تتعرف باها انا ماتنعرفش عاىلتها تنعرف غي خوتها و ماماها....
المربية : باها دهايبي طلعو هاد سنين الاخيرة طلعة وحدة العرايش كاستي ياخو مرتيل مضيق تطوان قولي غي عبد الله دهايبي تعرفو ....و معاشر مع التجار الكباااار لي فالمغرب عليها حسابلي مزوجة بشي تاجر من معارف باها زواج مصالح .... كنت تنسمع متشديين شوية و الخمار و النقاب و التعدد ملي شفت بناتو بانتلي غي وحدة محجبة صافي....اما جوج اخرين لا و بنتو صغيرة مزوجة بيه تاجر طموبيلات و عندو ولد واحد داير بحال شي اخواني و مراتو محجبة و تتلبس الواسع و الطويل....!
______
حياة التجار تتوسع مع كثرة المعارف و المناسبات و المعارض كل ماكانو عندك معارف فوق المتوقع كون ماكنتي تاجر معروف....الادب و التعامل اللطيف و حسن الكلام و السمعة الطيبة صفات التاجر المثاالي ...قبل مايديرو بلاصتهم فالسوق بالمنتوج الجيد تيسبقو اسمهم و سمعتهم باش فلان ملي يسول على التاجر فلان يقولها فيك مزيانة باش هذا يقولها لهذا حتى تيكبر المجمع ....! و عبد الله حياتو كلها مناسبات تعارف بالكلام الطيب و السمعة الحسنة و تيخلق معارف مع التجار الكبار داكشي تيكون بالتدريج من الصغير للمتوسط للكبار.....و كملات فرحة عبد الله ملي خلق صداقة و عشرة مع عائلة العراقي عائلة تجار كبييرة معروفين بتنوع الثقافات ...حيت ماتتلقاش فيها غي المغربي ! معروفة فديك العائلة كاين الروافا لي هاجرو الريف و خرجو برا المغرب اما شدو طريق تجارة السيارات او الاثاث او العطور و الاعشاب تيجيبهم من الهند و الخليج ....و كل واحد و بمن متزوج... عائلة العراقي تيشمو فيها ريحة الخليج و العراق ...ها لي مزوج بيها من العراق ها لي جايبها من الهند و ها لي مزوجة بتاجر قطري و كاين لي مزوج بيها هولندية و اسبانية و فرنسية مرحب باي ثقافة و اي جنسية عندهم فالعائلة بشرط تكون مسلم بالفطرة او دخلتي للاسلام ...اي ديانة اخرى ممنوع تدخل لعائلتهم ولا تحلم بيها.....العاىلة لي كلشي تيحلم يزوج بناتو ليها ...حيت تتكرم المراة و رجالها حرشين و مثقفين وخا كل واحد و كي كيدوي و غالبة عليهم اللهجة و الثقافة الخليجية....
لالة حميدة كدور بواحد العباية عراقية و الحجاب اسود والساعة فاليد واقفة على الخدم بيديها....
_ ثورية بنتي فين ازهار و فااتن ...
ثورية : فالجردة الالة حميدة.....
حميدة ( بارتباك ) و حلا حلا فين هي ؟بغيت حلا انا تحضر قبل مايوصلو الضياف....
ثورية : راها جات قبيلة مع نسيم و رجعات خرجات هي و ياها ....
تعصبات حميدة و طلع لبها الدم...
_ و شوف الضد مابقى عندي حكام عليها ....
مشات بخطوات رشيقة بداك العباية الراقية تتصوني على حلا مغوبشة...
_ فاين نتينا ! دابا تكون هنايا .. الضياف غيجيو دابا و باك شوية و يدخل ....
حلا : انا فطنجة اماما مشغولة مامسالياش...
حميدة ( تتعوج فمها ) وخا بينك و بين باك ....
قطعات مخلية ليها عبد الله فرصة فودنيها ...و فعلا بعد ساعة ونصف كانت داخلة للفيلا هي و نسيم لابسين البلدي بجوج ....
حلا ( تتضحك ) مالك احميدة غادية جاية مخلوعة.....
حميدة ( تتقاد الشال ) علاه ضياف العراقي ساهلين ؟ سمعت تيهدرو بحال صحاب الخليج ماعرفنا باش نتحاورو معاهم....
حلا ( مامسوقاش ) و انا فاش محتاجاني ؟؟ انا خرحت داك السوق هادي كثار من عاماين و مابقى عندي غرض بيهم ....و هوما تجارتهم بعيدة على الذهب ؟ و نصهم على برا شنو غرضو بيهم بابا....
حميدة ( تتهز كتافها ) و نتينا ماتعرفشي باك كل مرة عارض على صحابو ...هذا فلان ولد فلان و هذا ماعرفت شكون....خصني الكارني نقيد فيه العائلات و الاسماء و الولاد. باش نعقل عليهم مرة المراة سميتها نجلاء تنعيط ليها نجوى كل مرة مرة محشمة مع شي حد.....مشي لبس عليك بدل هاد الجلابة ....
حلا ( بتعب ) والله مافيا مانشرك الكلام مع شي حد و كانة بنادم مابقاتش عندي طلعو ليا فراسي ....
مشات بزز عليها لبسات عباية نواغ راقية و انيقة و شعرها الاسود مقطع ديكرادي ايفيلي مغدياه و مهلية فيه ساعة يد سامبل و الظفران مصاوبين شادة ففاتن حتى هي بكسوة غوز و الشعر كحل رطب ...تحمعو فاكبر و افخم صالون عند لالة حميدة بالتريتور و الحالة و الخدم لابسين و مقادين ....كانت عائلة محترمة و مثقفة كاين المحجبات و كاينة العكس و كاين لي مابين و بين رامية غي الشال تيزهق فوق الشعر و العباية مفتوحة ...ها السورية لابسة جلابة مغربية ديال الفريع تتحمق بالزين و الصحراوية لابسة ملحفة فخمة و ساعة يد ماركة و معاهم حتى واحد الهندية ماعرفوها هندية حتى قالتها المراة الكبيرة مسرارة تتضحك بلباقة....
_ عروسة ولدي الثاني هندية ...
حميدة ( بكلام لبق حتى هي ) اللهم بارك ، مسلمة ؟
الام : طبعا مسلمة ، نحن مانخالطوش من ديانة ثانية كنتي مسلم او تنوي الاسلام هلا و مرحب بيك....
خلود حتى هي طالقة الكلام تتبسم بمجاملة و تدوز عينيها عليهم.... ماكاينش عندهم الزين بزاف لكن الراس عامر و الثقافه تتقطر منهم تيحكمو على الواحد من عقلو اكثر من شكلو و اصلو....!
حلا ( تتدوي معاها بين سنانها ) اللهم بارك....ناقصهم شي سينغالية مسلمة و تكمل العائلة الشاملة ....
خلود ( حبسات الضحكة ) زوين هكا...غادين بمبدأ خالط قوم غير قومك و انتفع ....
الخدم و رئيستهم ثورية تتجي تلبي الطلبات و تسرق الخبيرات تيجلسو ينممو فالكوزينة....
_ و مازوينيش بزاف ...عندهم الزين ناقص فالعائلة.....
الخادمة : دوك النوع تيشوفو شنو فعقلك ماشي فزينك ...
ثورية ( بفضول ) عندهم الرجال غالبين النساء فالزين شفتوم ملي دخلو مع عبد الله مشاء الله لاحولا ولاقوة الا بالله .شوف الحديد لي كانو راكبين فيه كيفاش عامل .
الخادمة : شفت الله يزيد من خيرهم ، بحال والو عين شي راجل فيهم تلقط زين حلا والله لافلتها .و تمنيت يكون شي راجل فيهم من نصيبها.....
غيرك ما يحلالي الجزء 26
محتوى القصة
سمماتها ديك الهدرة و تلفاتها مزيان قلبها صرب بالزربة بقات غي تترمش بحال مونيكة ..تزنكات و حمارت و بانت فوجهها العمى و يقشع التغير لي بان فيها...ماهدرات حتى هدرة و مازادت حتى حرف ...بقات ياسمين تتبسم و قلبات وجهها منها تتشرب اتاي لي قدماتو ليها السرباية تتجاوبها بميوعة...
_ شكرا ...
بلعات حلا ريقها بصعوبة تتهز رجليها و تشوف هنا و لهيه و تترمش و تعاود و عينيها حمرين بحال الى جالسة فالشوك ...
شافتها خولة واستغربت...
_ حلا مالك اختي ؟
حلا ( تتنفس بزز و تتبسم ابتسامة صفراء ) والو والو ...
النساء لي تما كل مرة وحدة باغية تخلق صداقة معاها و طالبة ليها نمرتها و تتعطيها ليهم و عقلها مرفوع....الابتسامة تترعد على شفايفها...
ناضت فاتن تتعوج و تبكي تتحاك فوق رجلين حلا باغية تحطها فالارض و حلا شادة فيها مزيرة عليها حتى تجننات فاتن و حطات يديها على فمها و طلقاتها بغوتة كلشي تيشوف فيها ...ابتسمت حلا بزز و حركاتها غير مدروسة وجهها مغير و باينة ماشي طبيعة...
_ صافي امامي ..صافي شش ....
فاتن ( تتغوت و تجبد مجننة ) عععع بببب ..ببب...
ياسمين ( تتبسم بسم ) باغية باها مسكينة عزيز عليها ...
مارداتش عليها حلا و ماعاوداتش شافت فيها خلاتها هكاك بحال ماكايناش و ماهدراتش ماعندها ماتقول ليها اصلا...مايمكنش تجاوبها شنو عرفها واش تتدوي بصح...صافي اي وحدة جات عندها قالت ليها انا طليقة راجلك تيقها ...تعصبات مع غوات فااتن والصعر لي شدها...هزاتها و تمات خارجة و الحاجة شافتها ناضت جات بالزربة...
_ فاين ماشة احلا ...
حلا ( عينيه حمرين و معكرين ) مابغاتش تسكت ...باغية نرضعها !
الحاجة : و اجي اجي ندخلك للبيت ترضعها كلشي ديالك ابنتي ...
حلا : بارك الله فيك...
مشات معاها لبيت الضياف و خلاتها بوحدها جابدة البزولة تترضع فاتن و عقلها غايب مارادة البال ليديها لي تيترعدو ...
_ ياربي تكون كتكدب ياربي مايكونش بصح ...غنقلتو غنقتلوووو....
مارضاتش و ماعمرها تبلع ليها الا كانت بصح ماعمرها تخايلات اصلا تحط فهاد الموقف...هزات تليفونها تتلهى فيه دايرة تصويرتها مع عبد الصمد على الشاشة...شافت فيها شحال و قلبات بالزربة تتطلع و تهبط فانستاغرام حتى دخلات عليها نمرة جديدة فالواتساب مابقاتش ليها النمرة القديمة و بدلات كلشي و الواتساب مابقاش ليها عامر بنماري الكليانات ...! و هادي كانت نمرة اسبانيا و البروفيل فيه البياض ...دخلات تشوف شنو مصردة و شكون! ....تتلقى تصويرة ياسمين مع عبد الصمد فاسبانيا جالسين فكافي وهي متكية على كتافو وهو تيشوف جهة اخرى...باين الصورة تشدات بالزربة وهو مامسوقش ماكلفش راسو حتى يشوفو فالكاميرا.....
زادو ترعدو عليها يديها تتهز فرجليها بالزربة و رمات التليفون تتغلي ..
_ السلكوط السلكوووط تفووو تفووو....
عضات يديها مبردة غدايها بالجهد حتى تصورو سنانها فلحمها و عينيها كي الجمرة...ماحملاتش هاد الموقف تشوات فالنار باغية طرطق و تسطى و الدموع فعينيها هابطين كيجريو....حسات بالاستنقاص و بحال شي حمارة بوهالية...!
سالات الرضاعة لبنتها و خرجات من البيت بوجه حمر و عينيها تيدورو بالزربة....هزات صاكها من عند خولة و خرجات من الفيلاا و الحاجة وراها مستغربة...
_ غتمشي بوحدك ؟ ستنى الراجل ديالك ابنتي اليل هذا...
حلا ( بزز تتهدر ) تخنقت الداخل و صافي نشم شوية الهواء ماقدرتش نتنفس الداخل ....
الحاجة : وخا نتينا تعرف...
بقات حلا برا فالجردة تتشم الهوا و تزير على راسها و فاتن فيديها تتغوت و تخشي يديها ففمها تتنغنغ ...
_ ببب..ببب.....
ماصونات ليه ولا عيطات ليه...باغية تبلع لي وقع و حلف لا تبلع ليها الموقف....هدنات راسها براسها حتى مابقاوش يديها تيترعدو...عاد خرج عبد الصمد مغوبش فيها....
_ علاش خرجتي دخلي ....
حلا ( ماتتشوفش فيه ) خصني نمشي للدار ديني بحالي دابا ...
عبد الصمد ( بحدة ) حلااااا هدرة وحدة قلتها دخلي الداخل ماتخرجيييش.....
شافت فيه بنظرة كره تتشوفو تتفكره الصورة و ياسمين....
_ قلت ليك مابغيتش ...مابغيتش ماداخلااااشي والله و دخلتيني بزز حتى نعملك الشوهة ....
بقاو تما شد ليا نقطع ليك ...و فااتن تتجبد باغية تمشي عند عبد الصمد هزها لعندو معصب و بعد شوية جابد تليفونو تيهدر مع شي واحد عاقد حجبانو حتى سالا و نفد طلبها راجعين بحالهم للدار....!
غي وصلها رجع خرج كانت 12 د اليل ....! بقات بوحدها فالدار مع فااتن... تتمشي و تجي تتغلي غي بوحدها ...
_ انا نوريه الكلب ...رجع لعندها لعند ديك الكلبة عارفها تما شافها و توحشها السلكوووط.... انا شافني مع اسامة واقفة كان غيقلتني....
مشات بالزربة هزات تليفونها و صدرها طالع هابط باغية تبكي بالفقصة ...صونات لصفاء عارفة سعيد مسافر مامعاهاش....صونات و عاودات ماحاوباتش....تعصبات و جلسات مغددة...
_ نهار نحتاجك مانلقاكش تفوووو تفوووووو...
شدات راسها غتسطى و عاودات صونات ليها حتى ردات ...
_ الو حلا...
حلا ( بين سنانها معصبة ) عارفة شحال وقفت معاك و شحال كنخبي ليك زبايلك عارفة ولا لاء...
صفاء ( مدوخة بالنعاس ) بالتي نغسل وجهي ...
مشات طايرة غسلات وجهها وجلسات مستغربة عاودات ليها الاتصال و قالت ..
_ شنو كاين احلا مالك !
حلا ( بالغوات ) وخا تشوفني كنغوت و لكن انا عادية مكتغوتش....عادية الا ماطرطقتش هاد ليلة....عندك شي تصويرة للنسا د عبد الصمد لولين ولا شنو سميتهم ...
صفاء ( بفضول ) علاش علاش قولي شنو وقع ..
حلا : جاوبني اصفااااااء....
صفاء : اويلي بسم الله عليك....انا نعطيك انستاغرام ديالهم كاااع متبعاهم بفوكونط حيت بلوكاوني من صفاء بنات الحرام....
حلا : صيفطلي فالواتساب....
صفاء : و قولي مالك ..صوتك بحال تتبكي شنو وقع ! تلاقيتي مع شي وحدة فيهم...
قطعات عليها حلا ماجاوباتها على حتى شي سؤال.... صيفطات ليها انستاغرامهم بجوح و دخلات بالزربة تتشوف تصاورهم كانت متأملة تكون شي وحدة فيهم هي ياسمين حيت عمرها سولات لا على اسمهم ولا فين كاينين ولاعلاش طلقهم مكترضاش حتى طاحت عليها هاد ياسمين بحال براز الطوير فوق راسها....!
رمات داك التليفون و شدات راسها تتبكي بحرقة ...
_ الحمار ... الكلب الزلايلي المكبوووث كدب عليااااا الكدااااب السلكوووط....
شلا مطارق تيضربو ليها فراسها ...فوقاش تزوجو ؟ و فوقاش طلقها ! واش فعلا هي الثالثة ولا دوز بنات اخرين بعدها راسها غيفاجر بالتفكير ...ولات متخوفة غي تخرج ليها شي وحدة اخرى و تقوليها انا طليقة راحلك السادسة. لا العاشرة ولات توقع كلشي ...و توقع كاع تزوجها ملي كانت مسافرة....! حسات براسها تكوانسات و مابقى ليها عقل تفكر....مرة تتقول غتنوض ترونها عليه فديك الفيلا و ترجع ليه الشوهة لي دار ليها و مرة تتقول لاااا نفسها ماتترضاش تبين راسها مغلوب على امرها و كانت مقلوبة عليها القفة و تصدق مشوهة راسها قبل منو هو.....
هدنات راسها بزز و جلسات تتفكر و تعاود ...ليل كلو مانعساتش تكات حدا بنتها و غي سمعاتو طالع دارت راسها ناعسة....حسات بيه دخل للبيت تيبدل حوايجو و بقى تيحوم تما تحنى عند راس بنتو تيبوس فيها وهي ناعسة يبوس و يعاود حتى فاقت تتبكي هزها لعندو كي القميلة شعرها كحل رطب خاشية يديها ففمها و اليد الاخرى قابضة ليه فالسنسلة فعنقو تتبكي ...
_ ببب عععععع....
دخل للكوزينة يشرب وهي فيديه معصبة تتجرو من السنسلة ...باسها تيقيس حنوكها الناعمين تيشهيو ...
_ مال يماك ؟ بوبو بو ...كليناك !
خشات يديها كلووو ففمها تتبكي ..
_ ببب...
حلا عيات صابرة وخرجات ليه معصبة ..
_ كنقولك ملي تكون ناعسة ماتفيقاشي علاش غيقتيها علاااش دايما كنقولك ماتخسرلاشي النعاس ديالها كتجنن......
عبد الصمد ( هز فيها حاجبو ) كي باصا ؟
حلا ( حيدات ليه البنت و قبل ماتمشي قالت ليه ) تنعس ماتنوض.....
نعسات حداها بنتها تترضعها ...
_ هاك امامي...صافي صافي فيقك من النعاس ...مالقى شكون يونسو ولف السهرة باليل السلكوووط.....!
هزات عينيها لباب حاضية واش يدخل مادخلش و السكات طاح على البيت...فااتن نعسات و حلا النعاس ماعاودتش زارها....ناضت خارجة شادة البينوار على الدوبياس ...لقاتو ناعس فالصالون طاوي رجل و رجل حاطها فوق المخاد ناعس بحال الا شهر مانعس ...رجعات بالزربة لبيت النعاس و هزات حوايجو لي عاد بدلهم تتشمم فيهم و تعاود و فتحات تليفونو مافيه والو و خاوي من الاصل ...و التليفون لي تيهزو بزاف محطوط فوق صدرو.....! رمات داك التليفون و جلسات كي الجنية فالظلام بقات حابساها شحال حتى ناضت تتبكي في صمت ...ماقادرة تقولها لحتى واحد يسمعوها يتشفاو فيها و يشبعو ضحك حتى خوتها لي تتبان قدامهم واعرة و مايديرها بيها حد ماقادرة تقولها ليهم ماتترضاش قدام راسها و كارهة السيرة و ماحاملاش راسها.....! بقات تتفكر و تعاود شنو غدير ! مستحيل ترضى ...و المصيبة عندها مابقاتش هنا....الا سولاتو واش عاشر وحدة غيرها ملي كانو مخاصمين و لا كانت مسافرة يقدر يصدمها بشي جواب يقتلها عليها عمرها سولاتو و لا مرضات راسها بالتفكير ....و بلا الشكوك لي عندها بلي متزوج بيها وهي مزوجة بيه ماشي قبل.....! راسها قرب يتفركع و تنهيدة ورى الثانية ...غي تتخايل يكونو لي فداك المجلس كاملين عارفين وهي مقلوبة عليها القفة و ضحكو عليها و عاودو تتبغي تموووت....شنو زعما حتى واحد ماعارفها ؛ يكون تزوج فالسر ..فاسبانيا ...هي الزوجة الونيسة فالغربة ! و شحال من وحدة عندو فالسر ...الا كانت هاديك مافخبار بيها حد شحال من وحدة غيرها كاينة...هنا دخلات معاها الخلعة و خاطرها نفر كلشي و قلبها ناض عليها....! خسرات ملامح وجهها معيفة و مانعسات حتى طلع الصباح و مالقاتوش فالدار.....!صونات لخوولة و الكلام تيدور فعقلها...حتى حاها ردها...
_الو حلا....
حلا ( تتبرد راسها ) خولة كي صبحتي مزيان...الوليدات...
خولة : الحمد لله البارح مشيتي بكري....
حلا : ياختي رزطاتني داك الزمرة...بغيت غي نعرفها شكون زعما والو ! ماتقدرشي تعرفلي شكون هاديك و فاين كتكون واش فالمغرب ولا برا....
خولة ( على نيتها ) اه ماعندك علاش تخاف ..ملي مشيتي نتينا هدرات معايا البارح و تبادلنا النوامر....العايلة عادية كانت عايشة فسبانيا الواليدين ديالا مطلقين حتى عملات الصالون ديالاا هنايا فتطوان ....
حلا ( هزات حاجب للسماء ) صالون !! اهاه و مزوجة ؟
خولة : لا كتقول مطلقة ...
حلا ( عينيها حمرين ) وخا اخولة شكرا ..عرفتي بقى بالي معاها حيت خلعاتني الشوفات ديالها....يلاه بسلامة....
قطعات و زادها هم اخر...
_ الكلبة عايشة فسبانيا عليها طالع هابط ...و الصالون !!! يكون هو السلكوط عملو ليها قلبو ....غندمو على هاد التبهديلة لي عملي ...غندمو....علم الله شحال مزوج من وحدة.....يلصق فيا شي مرض الحيوااان.... ياربي مع من طيحت راسي ....
كل مابقات تتفكر تتزيد تمرض و زادها هم اخر على البقية....ولات خايفة يكون نقل ليها شي مرض ...تخلعات بالجهد و عقلها تيغيب و يرجع ....!!
_ الله يحفظ..
رجعات موسوسة مع راسها و بنتها....خافت و الا نكرات غتسمى كدابة...ماعارفة شنو دير شنو تعمل عقلها مبلوكي و مدوخة مشاكل الناس تتحلهم طايرة و ديالها تتكلخ و عقلها تيوقف....!
بدلات عليها و هزات بنتها و مشات تلف جلسات فقهوة على البحر تتشم الهواء و تفكر وجهها صفر بحال مهمومة و كتفكر....االاناقة و الزين و الفلوس فايحين منها هي و بنتها ...و هي فديك اللحضة مابقات مسوقة لحتى حاحة...صافي الخوف من شي مرض لصق فيها ....! و الفايسبوك بحال الا رجع تيقرا افكارها...تتلقى مشاكل البنات ...ها وحدة راجلها تيخونها و نقل ليها المرض و اكتشفت انها مريضة حتى فات الفوووت....بوجه اصفر خرجات من البوسط مخلوعة ...
_ الله يستر الله يستر.....
مابغاتش تمشي للدار ...مشات لبوتيك الجلالب ديال عبد الله كانت المسيرة هي صوفيا...رحبات بيها تتبسم بتوتر
_ اهلاااا ...
حلا ( بابتسامة صفراء ) صوفيا كي غادية مع الخدمة...
صوفيا ( مرتبكة تتقاد من هندامها ) كلشي هو هذاك لهلا يحشمنا...البنوتة كبرات مشاء الله ...
فاتن ( توغوغ ) غررىى....
حلا : شفتي عرفاتك تتدوي عليها....غي شوفي شغلك انا نشوف الجديد الا عجباتني شي حاحة.....
صوفيا : الجديد عاد دخل هاد الصباح واااعر تيبهر....
تلفات حلا الوقت مع الحوايج و الكانة ماعندهاش بمرة.....دخلات واحد الكليانة شعرها زعر و طويل استقبلاتها صوفيا و بقات تتشوف فحلا تتطلعها و تهبطها حتى دخلات ليها الشك ولات محسوسة من دوك الشوفات.....كانت غتشك فيها حتى دخل راجلها تيختار معاها....خرجات كاع من البوتيك تتنهد مولفة بالبنات تيشوفو فبها و فشكلها و حوايجها و كان تيجيها عادي دابا...فين ماتشوف فيها شي وحدة تتخنزر فيها و يدخل ليها الشك....
بقات صابرة صابرة حتى تفركعات على وحدة فالصالون ....
_ مالك اختي كتشوف فيا كتعرفني !!
المراة ( بتبعكيك مستغربة ) وييلي بسم الله عليك شكون شاف فيك ولا هدر معاك....
حلا ( تنفخات ) و نتي اختي كتشوف فيا بحال بيناتنا شي حساب كتعرفني قولا !
المراة ( تهزات معفرة ) ياااه مابقيتش مرتاحة هنا.....
رجعات للدار معصبة غي مع حوايجها جلسات فوق الكنابي تتفرج و تنهد و فااتن ناعسة....دخل للدار مع العشية و لقاها تتنفخ مغوبشة فالتلفازة...حط المفاتيح و التليفون و هز فيها حاجبو مقرب عندها....
_ مالها التحف ديالي ...
حلا ( عقدات حجبانها ) فين كنتي ؟
حط راسو على رجليهاا مغمض عينيه عيان...
_ مشغووول و بربي الااا مشغووول التحف...حركي الصبيعات ...
قطبات جبينها حابسة البكية الراحة هربات عليها....
_ فين مشغول ! عمرك كتقولي فاين كتكون....
تقلب على كتفو و خشى راسو فكرشها مقتول بالنعاس...
_ حااار و قاصح عليك ماتعمريش راسك بيه تهلاي فالبحرية ديالي....
غززات سنانها فشفايفها و يديها غلبوها تيتحركو فوسط شعرو الاسود و تترجع تهزها من فوق راسو معصبة و مزيرة ... باين فيه عيان و مهدود و الكماش عندو مع عينيه ماشي حالة واحد كان تيزهى و ينشط من وحدة لوحدة....
_ عبد الصمد....
همهم مغمض عينيه...
_ ممم....
حلا ( بنظرة قاسية) نسولك و تجاوبني ! شحال طلقتي د المرات حياتك كاملة....
عبد الصمد ( بدون اهتمام او تركيز غاطس فكرشها مهدود ) ستة....
حلا ( عينيها كي الجمرة تتدوي ببرود حيت ثلاث ايام وهي تتفكر فالموضوع ) شحاااال ؟
عبد الصمد : اربعة....
تزير عليها خاطرها...
_ عبد الصمد سولتك نيشان جاوبني كنهدر معاك بلا غوات و بالعقل ...شحال من وحدة طلقتي ؟؟؟
عبد الصمد ( دور يديه مع خصرها سكت شحال عاد رد ببحة خشنة )
_ سبعة....
حلا ( قلبها بدا تيضرب بالزربة و عينيها كيدورو ) كيفاش سبعة ؟ ماشي جوج و ماشي ثلاثة...؟ ياسمين فوقاش تزوجتي بيها ؟
عبد الصمد ( هز عينيه فيها بحدة ) منين كتعرفي ياسمين نتي ؟؟؟
حلا ( بالغوات ) منين كنعرفا ؟ سير الله ياخد فيك الحق....كانت فالسبوع جالسة حدايا بوجها حمر كتقولي انا طليقة راجلك و انا بقيت كنشوف بحال الحمارة....و نخلتها ومشات صيفطاتلي التصويرة ديالك مع ديالها....الله ياخد فيك الحق على داك الحرقة لي حرقااتني بيها.....رجعتيني حمارة....
جلس جالس مخنزر...
_ شكون عطاها نمررتك ؟؟
حلا ( شدات راسها مجننة ) انا فين و نتينا فين.....دابا من لاخر جاوبني و حلف بالله ماتكدب عليا اعبد الصمد....
عبد الصمد (هز حاجبو ) شنووو !!
حلا ( بنظرة خوف ) كنتي مزوج بيها ملي تزوجنا ؟
عبد الصمد : لااا...
حلا ( تتقلب فعينيه باغية تسطى ) نعستي مع شي وحدة من غيري و حنا مزوجين ؟ تزوجتي عليا اعبد الصمد ....
عبد الصمد ( ببرود ) سيي....
وسعات عينيها المحجرين بالدموع مصدومة ...
_ شنوو ؟
عبد الصمد ( حك رقبتو عينيه معسلين بالنعاس ) هادشي لي باغية تسمعي ؟ طرباتك نغماتك ؟ سيري تنعسي احلا كتقلبي على الصداع....
كمشات حجبانها تتشوف فيه ببلاهة الدمامع سخان تيجريو من عينيها ...
_ مافهمتش...مافهمت والو ...واش خنتيني اعبد الصمد باغية جواب واحد ....
عبد الصمد ( هز حاجبو بنظرة مظلمة ) لااا...
بدات تتبكي و ترعد صعرااات عليه عصبها....
_ واااش سي ولاا نووو....عبد الصمد غطرطقلي المرارة خرجتي علياااااا و مرضيتيني فحياااتي....السلكوووط...
عبد الصمد ( عقد حجبانو خاشي يديه فالجياب ) نووو...
بغات تحماق و تغددو بسنانها فقصها باجوبتو المختصرة مرة سي مرة نو كل مرة خارج ليها بهدرة......
_ خرررج عليااااا خرررج بحااالك.....ماخصنيشي نشوفك حدايا....خرح بحااالك طلقنييييي.....طلقنييييي....
عبد الصمد ( صعراتو ) ماتخليناش نريحو مخنا هاد ليلة....! ماعجباتكش نوو...نردوها سيي !!!
حلا : و سكوووت سكوووت كتغددني كتعصبني...سكوووت والله مانتيق بيبك قلتي سيي فلول قلتي سييي والله لا تقت بيك...طلقني مانبقاش معااك السلكووط طلقني....
تعصبات لدرحة ماكانتش تتوصل ليها حتى مع رضا....عينيها تعماو و يديها تيترعدو ...قرب منها مغوبش شادها عندو ....
_ شش حلا ناعسة.....
حلا ( تتدفع فيه ) بعد منيي بعد مني اعبد الصمد اتفوو عليك الله ياخد فيك الحق والله مانتيق بيك طلقني بغيت الطلاق مابغيت والو....طلقني ....
عبد الصمد ( حط ليها راسها على صدرو مزيرها عندو وهي مجننة تتغوت ) نديرو ليك خاطرك...فين عمر د***و الصمدي خسر ليك الخاطر ...
غوتااات بالفقصة تيخرح عليها بهاد الاحوبة الباردة...
_ سكوووت شد فمك شد فمك ...
مالقات غي ودنيه تبرد فيه غدايدها و طاارت عليه بعضة خطيرة مغرسة النياب و القوااطع وهو صابر تيعض فكو و تيغرس صبعانو فخصرها ...حتى قطعات ليه اللحم وتأوه بالم و صدمة مبعدها منووو و الدم سايل من ودنيبه....
غي شافت الدم هربات من حداه طاايرة تتسمعو تيسب و يشتم و حلفان و الدم سايل من ودنيه بحريق لا يحتمل دفع الكرسي حتى تكركب و غوتات حلا مخلوعة حساب ليها جاي عندها بدير فيها شي مصيبة ساعة طار خارج بحالو من الدار مخنزر شاعط الباب حتى ناضت فااتن فايقة تتبكي ..نقزات عندها حلا تتجري حمر و عينيها كيغليو ...
_ شس هانا اماما...هانا....ششش....
هزاتها عندها تتسكت فيها مصدومة و مخلوعة ....
_ نمششيو بحالنا اماما ...غيجي يذبحني عضيتو طيرت ليماه الودنينة الزايغ ....
فاتن ( تتضحك عاجبها الحال ) غغغ...بب....
حلا ( تتمسح دموعها و تجمع شعرها بالزربة ) مااااماااا ..ماما...ماشي بابا....قولي ماما....نبدلو علينا نمشيو بحالنا من هنا اماما ديالي ....
بالتلفة و البكية تتفلت لبها و تتحمع...مشات طايرة جمعات تتلبس عليها و عقلها دايخ مصدومة و مخلوعة منو و كثار ملي شافت الدم خافت على راسها ...تتمشي و تجي تالفة فين غتمشي باليل ! و مع البنت ...كون كانت بوحدها ماتخممش و لكن مع البنت خافت و تقطعو ليها الجناوح و شدات الارص تتغلي و تبكي بحرقة....
_ حضري عقلك عقلك فين احلا...مالك معصبة مالك مرونة فين مشى عقلك....مادرت ليه والو نتي مادرتي والو جايزة فيه القتيلة....الخاين السلكوط الزلايلي...انا ولد المراة يفقصني و يطرطقلي المرارة...غيشارك معايا الدواء د السكر....نمرض راسي مع سلكوط و نطيح فالفراش وهو بحال السبع مامسوقش....( كدير شهيق زفير تتبرد راسها و تمسح دموعها و يديها باقين تيترعدو ) انا لي درتها لراسي .....
رفعات شعرها الفوق و مشات غسلات وجهها تتهدن راسها ...شدات الباب عليها من الداخل و دخلات لبيتها تتحاول تنعس و تتقلب كل شوية و صبحات مريضة ماقادرة تهز راسها جات عندها المساعدة هي لي قابلات الدار و بقات مع فاتن و تتجي طل على حلا تتلقاها شبه ناعسة مزيرة على الفراش بيديها تيترعدو....
_ اختي حلاا ياك لباس صبحتي مريضة!
حلا ( السخانة فيها تتشوي ) ماعندي والو مامريضاش حتى واحد مايستاهل نطيح فالفراش على قبلو ....
المساعدة ( بقلق ) راك مريضة اختي ...نصوني على لالة عيشة تجي ؟ نصوني على راجلك ؟
حلا ( فتحات عينيها نص فتحة راسها غينفاجر تتدخل و تخرح فالهدرة ) مامريضااش مامريضااش ماتصوني لحتى واحد.. عندك تصوني عليه ماباغياش نشوفو فداري ..انا لدرتها لراسي ...
تخلعات عليها المساعدة وبقات مقابلاها و مقابلة البنت بقات فيها حيت ماشافت منها غي الخير قطعات ليها فالقلب وخا ماعارفاش شنو مشكلتها ....!
نطقات حلا بصوت ثقييل ...
_ خصني ندوش وجدلي الدوش ....
المساعدة ( باسف ) وخا اختي ....
تهز تليفونها على اتصال حميدة شافتو المساعدة و هزاتو ليها...
_ لالة حميدة كتصوني ...
حلا ( بزز تتدوي ) عطيني التليفون ...
شداتو من عندها خلاتها حتى قطعات و دخلات عندها للواتساب تتكتب ليها وخا ماعندها جهد...
_ كندوش لفاتن اماما من بعد نعاودلك....
مشات ثورية وجدات ليها الحمام و عاوناتها فالدوش لا تسخف تما ...بقاو عينيها معلقين غي على بشرة حلا و جمال قوامها و نعومتها....خلاتها تكمل الدوش لراسها حتى سالات ووخرجات لاوية عليها فوطة و شعرها فازك تيقطر مزنكة ....
ثورية ( بابتسامة ) بالصحة....
حلا ( بتعب ) الله يعطيك الصحة....
مشات ثورية تتوجد ليها الماكلة وتعمر الطبلة و حلا جلسات فاشلة تتشوف راسها فالمراية مصدومة من حالتها....! علاش هكا ؟ علاش غنمرض راسي ! واش الا تعصبت غنبرد على راسي ؟ غنتقهر و نضيع صحتي وهو بحال الثور ! الا مرضت بالسكر غيتشارك معاها الدواء و يهز عليا المرض !
تنهداات بعمق و نشفات شعرها الناعم بشوية عليها...صافي يستاهل نهار واحد مرضات بسبابو تجمع و طوي...هكا تتفكر فعقلها و تتبزز على راسها ...حطات ميكاب و زينات الوجه مزياان و الشعر مسبب تيغطي نص وجهها بداك لاكوب ...! اختارت اجمل لبسة عندها و لبسات لبنتها كسيوة وردية مفرفرة و جاكيط و صبيبط صغغيور فرجليها وهي تتضحك و تغرغر راشقة ليها و تتخربق فالهدرة و تحك السنينات فيديها صوبات ليها الشعيور كحل رطب هابط مع جبهتها...هزاتها و خرجات من البيت سابقاها ريحتها و الطالون تيقرقب فوسط الدار ..
_ ثورية كاين مايتكال....
ثورية ( تتشوف باعجاب ) الخير موجود كلشي واحد اختي... صحيتي شوية ؟
حلا ( تقدمات للطبلة حاطة البنت فوق رجليها ) شوية الحمد لله جلس تاكل ...
جلسات ثورية بالفرحات عليها تتاكل و تشوف فحلا بنص عين ...تتقول فخاطرها...
_ الزين كتحمق تفتن العور فالظلمة ؛ خسارة هاد الزين يدبل بالاعصاب و الفقصة د الرجال ....
وخا ماعاوداتش ليها حلا شنو كاين فهمات سباب حالتها عبد الصمد من الحالة لي لقات فالدار و الكراسا مقلوبين...!
تهزات حلا واقفة و شعرها تيتهز معاها...
_ انا غنخرج مع فاتن ...كانت شي حاجة صوني عليا...
ثورية : وخا هي لي ماتعاودش...
هزات حلا حقيبتها اليدوية ماكانتش غالية الثمن عادية مالابساش مجوهراتها ... خرجات ليها ثورية بوسيط فاتن باغية تمشى على رجليها ...غي خرجات حلا من الباب الكبيرة ضرب فيها الهواء البارد و الشميسة لمحات سيارة بالية و لاعلاقة بالحديد الواقف فداك الشارع فيها راجل تتعرفو تيكون بزاف مع عبد الصمد حاضي عليها....تبسمات باستهزاء و هبطات النظارت الشمسية على عينيها دافعة البوسيط تتجول بين شارع تطوان الباردة غي هي و فاتن و لي داز تيشوف فالبنت و يتبسم معاها لحركاتها الحلوة و الشغب ديالها...حلا تتغطي ليها راسها من البرد وهي تتجر و ترمي فالارض....!!
دخلات لبوتيك خاص بالاطفال من طابقين تتجول بين الرفوف و اللون الزهري غالب ...تتختار لفاتن العاب جداد و حويجات شتويين رطبين تيشهيو كانت عوالة غي تشوف حيت ماجايباش طموبيل صدقات واخدة ليها شوية العاب و حويجات خفاف و كل مرة واحلة معاها تتهز ليها البياسات من بلاصتهم و طيحهم مرة بيديها مرة برجليها حتى تتجي العاملة تتهزهم و تبسم معاها ...
_ المشاغبة....
حلا ( تبسمات لضحكة بنتها ) باغية تاخد كلشي ههه ديزولي حبيبة....
العاملة : ماكاين حتى مشكل اختي مرحبا....
كملات حلا تجوالها ماسخاتش تخرج ...حتى قربات من لاكيس وهي تلاقا عينيها مع عيون إياد خطيبها السابق شافها و طول الشوفة مزيان تيشوف فيها باعجاب ماعقلهاش فلول حاتو تبدلات شاف حتى فاتن و من الشبه واضح انها بنتها.... رجع قلب عينيه لمراتو حداه فتاة فالعشرينات شعرها اشقر و كرشها سابقاها باينة حامل فالاشهر الأخيرة حاضي معاها بحال عينيه و حاط يديه على كتافها وهي تتبسم عاجبها الحال... عبراتها حلا غي بنص عين و رجعات قلبات وجهها منهم ....
جات نوبتها خلصات و سلكات طريقة اخرى على حسب البوسيت و فالخرجة لمحاتهم ثاني فاتح ليها باب الطموبيل داير ليها معاملة الاميرة حسات بنغزة نغزاتها واحساس الغيرة زارها فديك اللحضة.....! تتشوف جميع الازواج حياتهم حسن من حياتها مع زوجها ...على الاقل سيرة البنات عندهم محرمة ماشي بحال ضخم الجثة لي مزوجة بيه فقدات فيه الثقة ...! زيرات على سنانها ملي تفكراتو و سباتو مزيان فخاطرها....!
صونات عليها نسيم و ردات عليها ...
_ الو نسيم...
نسيم : فينك ! مسالية ليوما...
حلا ( تننهد) مسالية مسالية ماعندي والو ...
نسيم : سوبير....؛ عارضة عليك اليوما نتي و خلود تعشاو معايا ...
حلا ( ضحكات فوق خاطرها ) بغيتي نبقاو بلا عشاء ولا ناكل شي عجب و انا كنرضع ....
نسيم ( ضحكات ) نو تعلمت شوية...خلود جاية و نتي الا ماعندكش ديزونݣاجمو اجي ونسينا يحيى ففاس سافر ليوما غيجي حتى لغذا....
حلا : داكووغ نص ساعة و انا معاك....
وصلات للدار هزات الطموبيل و تحركات لدار نسيم تحت المراقبة ...! مابقاتش تتسوق تتصرف على راحتها و طبيعتها دخلات لدار نسيم لي ضحكتها تتضوي الدفىء و الراحة فدارها عجيب الورد فكل بلاصة و الروايح الزوينة و الولاد نقيين و مهدنين بعد ماقصح معاهم يحيى الهدرة فين مايغوتو ولا يتصرفو تصرف غير لائق تيدير ليهم حلسة توبيخ تيخرحو منها تيشهقو بالبكاء...ولاو مهدنين شوية و تيتبسمو مع الضيف حيت ولفو بكثرة معارف يحيى والضيوف الكثار يكونو معصبين و مخاصمين ولا مارشقاش ليهم فوجه الضيف يتبسمو و يتصرفو بالادب هكا علماتهم نسيم و يحيى... غي سلمو مشاو جلسو فبيتهم تيرسمو و نسيم تتدور ببيجامة انيقة و شعرها مطلوق وجهها خالي من المكياج نقي بحال البلار و الراحة باينة عليها....
_ دابا انا حايرة واش غرام ولا اسراء ولا فاتن ههه وحدة فيهم غتكون عروسة ديالي ...
خلود ( محيدة الحجاب واخدة راحتها ) : ختاري وحدة من بناتي من دابا ولدك حنين و بناتي حنان هذا مايتكرفس على هذا...
حلا : حنين فالصغر دابا يدخلو ليه تحرميات و يولي طياارة ...
نسيم ( ناضت تتبسم ) غنحط العشاء و عطيوني رايكم واش وليت شوية ولا مفضية...واحد ماما صونيت عليها لقيتها فطونجي مع بابا ...
خلود ( تتضحك ) كل ويكاند تيسافرو لبلاصة هي وياه الراس فالراس و لالة حميدة تاني تتفشش عليه سعداتها ...
حلا ( بعبوس ) فيا الموت د الجوع مابغيت ناكل والو حتى ناكل من عندك ...
خلود متكية واخدة راحتها هي و بناتها بحال الى فدارها ..
_ سبحان الله فدارك نتي احلا و فدار نسيم كنحس بحال الدار ديالي ملي كنمشي لدار رضا تنحس بحال جالسة مع الضياف ...فين ساهية معاك كنهدر
حلا : معاك معاك ....
خلود ( تتقلب فانستاغرام باستغراب شافت فحلا و دوات بعفوية ) العجب...
حلا ( تتشم ريحة فاتن و تتبوس فيها بحب ) مالك...
خلود : الصالون لي مولفة تنمشي ليه عرفتيه...
حلا : اي واحد فيهم ؟ لي تنمشي ليه تنا ؟ ديال مدام مروة ؟
خلود : نو لاخر لي قريب لداري ..مولاتو سميتها ياسمين ...
حلا ( سمعات السمية ودنيها سخنو عليها )مالو !
خلود : شاد حسابليا مسافرة ولا شي حاجة ...حتى الكونط فانستاغرام ماكاينش ليه اثر غابر....
حلا ( بشك ) كي دايرة هاد ياسمين تنعرفها انا...
خلود : محال ...نتي مولفة تتمشي عند مدام مروة ...جات سمراء و طويلة وشعرها طويل و هدرتها غالبة عليها الاسبانية ( بشك ) كنتي ديجا شفتيها و قلتي هاد البنت زوينة و زينها فشكل....
حلا ( بصدمة ) انااا!!!
خلود : لاا لاا بالحق نسيم ماشي نتي ...مهم هاديك ....
حلا ( مزيرة على سنانها ) و فين غتكون غبرات زعما ....واش مصاحبة نتي و ياها...
خلود : نو نو نهائيا عادي ...هي مطلقة على ماسمعت و حتى عائلتها فشكل...عندهم عادي البنت تعيش بوحدها و تصاحب قدام خوتها و ماماها و باباها و تعرفهم عليه ...تخايلت وجه عبد الله و رضا و انا تنعرفهم على صاحبي يقتلوني فبلاصتي ههههه.....
دوزات الليلة مع نسيم و خلود قصارين تيهدرو ...نعسات حلا قبل منهم و فالصباح مشات لدارها كان يوم الجمعه...صونات عليها عيشة بنكيرها المعتاد...
_ ماعلموك لاصواب لا مجي بكري ماتسقسي ماتصوني نجي عندك انا الكبيرة هاذو الاصول ابنت الاصل....
حلا ( تتقاد شعرها ) كنت غنجي عندك اليوم اخالتي عيشة ...
عيشة :و طلق راسك الغداء غينزل دابا شويش.
قطعات معاها وكملات حلا لباسها ماتتفكر فوالو يمرضها هزات بنتها و خرجات لقات نفس الكمارة قبالتها تعصبات و قربات منو هازة حجبانها شافها حاية خرج لعندها و حنى عينيه باحترام....
حلا ( بحدة ) واش نتا ماعندك شغل ماعندك مايدار حاضيني فالصباح و العشية غنطير غندير جناح ...سير صلي ليك الجمعة مع قرانك تبع داك ( كانت غتقول عليه السلكوط و جمعات لسانها ) تبع داك لي مخدمك تبقى لا دنيا لااخرة.
الراجل ماهزش عينيه و ماردش كاع . حتى مشات تتنفخ و ركبات طموبيلتها غادية لقاتو تابعها تاني.... تخنقات و تعكر مزاجها ...!
___________
جالسة فدارها شعرها مقطع لحد الودنين مخسر كامل السالف كلو ضاع تتبكي و تشهق غتسطى تتشكي على صحبتها...
_ واش حمقة نديكلاري بيه؟ غيخرج راسو براسو و يقلب عليا كلشي و يلصق فيا مصيبة نولي انا لي داخلالو. ...( تتبكي مقهورة ) صدمني ملي شفتو حسيت بيه توحشني اسارة حتى صدمني .
سارة ( بغضب ) و شنو غترجع بحالك لاسبانيا حيت خفتي منو منيتك ...ضيعلك شعرك وزاد التهديد بالقتل و ساكتة بحال ماكاين قانون فالبلاد.
ياسمين ( بحرقة )ماباغية والو مابغيت والو صافي . عرفتي شنو كان غيدير ؟ كانت غيلبقلي مصيبة ندخل عليها عاماين د الحبس . و هادشي بسباب زبالة مراتو ..خصك تشوفا كيفاش عاملة اويلي لاعلاقة و خايبة جابا من الجبل مكتعرفشي حتا تلبس ولا تهدر و الصوت ديالا بحال العايل ماشي صوت المراة .
سارة ( تتنهد ) باينة يماه ختارتها ليه تولد ليه تزوجها مراة د الدار و ديال الولاد .
ياسمين ( شادة راسها غتسطى بالبكاء ) و خايبة خايبة مافيها مايتشاف شعرا محروق و عندها الموسطاج و كتاكل مهيفة بحال الى عمرا شافت الماكلة انا تصدمت فيها خايبة ماقدرتش نكمل فيها الشوفة .
سارة( خسرات ملامح وجهها بقرف ) نوو سكتي عفاك طلعتي ليا قلبي . ماتبقاش تفكر فيها ...
ياسمين ( تتمسح خناينها تتشهق ) قبل مانخرج من المغرب غنمشي نعطي مراتو قتلة العصا نخسرلا داك الوجه المعفون لي عندا و عاد غنبرد و نعيش حياتي هانية نمشي عند بابا لباغي .
سارة ( تخلعات ) مينتك ! ياسمين خلعتيني...
ياسمين : نتينا ماحاساشي بيا اسارة شوف شعري شوف شنو عملي ..غنغبر على المغرب بالحق حتى نبرد فقصة ديالي فمراتو .
سارة ( رجعات للور تترمش ) مابقيتش كنعرفك اياسمين عندك تعملي شي مصيبة توحلي فيها....بنات جبل غيشدوك اختي و يطيحوك من شدة لولة ماتقديش عليها باينة شي وحدة شرشوحة و نتي فيك غي اللسان ..الشوهة غديرها ليك نتي .
ياسمين ( بحقد ) و دابا تشوفي.....
كانت جالسة مع عيشة و طالقة لفاتن تتلعب فالارض مغرقة بالالعاب و فمها غي ببب ولات تتنطق احرف مرونة حلوة النطق ...
عيشة : حلا اجي اجي عندي المحضية اجي عندي...
فاتن تتسمع حلا تتهز عينيها الكبار فيها ببرائة تتضحك و تمد ليها العابها ...تتبغي حلا تاكلها بالبوسان....
_ حبيبة ديالي حنينة تيعجبها تعطي العابها ههه سيري عند عزيزة امامي....
عيشة ( بصرامة ) وقفا على رجلا تعلم تخلف وهي بنان رجلا مقروطين الترابي فعمرا كيوقفو ...
حلا : لااا لااا مزال الحال بشوية عليها اخالتي ....
عيشة ( حطات يد على يد مكمشة فمها ) و خيااار ! و ممم و عبد الصمد فاينو علاش ماجاشي ....
حلا ( اختفت الابتسامة من على وجهها ) عندك تليفونك و سوليه...
عيشة ( خنزرات ) و نصوني علاش مانصونيشي....ارالي التليفون .ديالي حداك...
مدات ليها حلا التليفون خلاتها تتصوني و رجعات تحنات عند بنتها فرحانة بيها و الحنان منها فايض قطعة منها تعطيها عينيها وهي فرحانة ....؛
عيشة : و اهااه الفقصة صوني و مايجاوبشيي هااه....
عاودات الاتصال و ماجاوبش حتى للمرة الخامسة عاد رد عليها و صاحت عيشة تتنكر...
_ فين نتينا المرضي ...اجي تعشا معانا....و علاش ؟ و نتينا تعرف ماكرهتشي تجي و تعملي خاطري اعبد الصمد ...
غي قالت سميتو صاحت فاتن تتضحك و تتجبد...
_ بببب غغغ...
عيشة ( تتضحك و حلا ملامحها باردة ) ها هي العايلة ديالك كتعيطلك ...اجي احلا سمع باك سمع ...
حطات ليها التليفون فودنييها و فاتن فاتحة فممها تترمش و لعاب سايل مع شفايفها تتسمع صوت عبد الصمد تيهدر معاها وهي تترمش و تشوف فالتليفون و ترجع تشوف فعيشة و رجعات تخبات فحضن حلا تتضحك...!
قطعات عليه عيشة بلا مايعطيها اخر كلام واش جاي ولالاء....بقات معاها حلا فالصالة لي تحولات صالة العاب مع فاتن حتى ولاد صفاء و سكينة تيلعبو الفوق حيت تيتعداو على فاتن و تتنوض عيشة تغوت و تحيح ....!
طلعات المساعدة تتبسم فاتن ..
_ خالتي عيشة سي عبد الصمد جا ..
حلا سمعات كلامها عقدات حجبانها و جلسات جالسة اما عيشة فرحات و تبسمات كثار ملي طل عليهم بطولتو الغير العادية كانت تتقوليه حلا نتا باين فيك جوج مترو ...لابس السبور تيشرت نواغ مزيرة على كتافو و كاسكيط نواغ حيدو ملي دخل حجبانو مجموعين و ودنيه باينة مجروحة فيها الاثار واضح ....شاف فحلا و فعيشة لي سلمات عليه فرحانة وحلا بقات جالسة بلاصتها ماناضتش....هز بنتو الفوق تيعليها للسماء حتى تتبغي تسطى بالضحك...
_ غغغغغ بببب.......
عبد الصمد (حط جبهتو على جبهتها مكمش حجبانو ) هذا جهدك جوج حروف اسينيوريتا ...هييي حلااا ....
فاتن ضرباتو لفمو بحركاتها الطفولية ...تكى على المخاد و جلسها فوق كرشو تيقيس فييديها و رجليها و شعرها الاسود الناعم حتى هزات ليه يديه و خشاتهم ففمها تتعض فيهم و تمص ... نطقات حلا بزز منها معصبة...
_ جاي من برا يديك فيها جراثيم ......
ماردش عليها جمع خدود فاتن بحال القميلة فوق صدرو ...عطاها بوسات الغدايد بغا ياكلها تيبوس و يعاود ..ماطلقها حتى ناضت تتبكي معصبة و شدااتها عيشة تتسكت فيها...
_ شش ششش صافي صافي ....( شافت فعبد الصمد لي متكي على مرفقو تيتبع فاتن بعينيه حتى قشعات اثار الخياطة فلمحة ودنييه ) شنو عندك ودنيك شنو وقعلك ...
عبد الصمد ( ببرود ) كاينة العشاء !
عيشة : دايا يتحط ....نورة فاينو العشاء ...
تعشاو على هاد الحال و حلا ملامحها باردة و هدرتها تقطعات ماتيهدر لا هو لا هي غي فاتن بلاصتهم.....تعشاو و باتو تما....سبقاات حلا دخلات للبيت خدات الناموسية كاملة هي و فاتن مامخلية ليه بلاصة...دخل لقاها ناعسة هي و فاتن مالقى فين ينعس تكى فالكنابي شاعل تليفونو كيهدر كل خمس دقاىق باسبانية تيهدر بالزربة شي لقطاتو حلا شي مافهمت فيه والو واضح كيهدر مع شي راجل ....رجعات فتحات عينيها باقية عاد تتفكر فحالتها و تتخمم و ناوية ماتاخد قرار حتى تاخد وقتها فالتفكير ...لي عارفة هو ثقتها فيه مابقاتش و مستحيل تقدر تخليه يعاشرها جسديا ولا ترجع معاه بحال قبل...فكرة الخيانة باقية تتطلع و تنزل فيها....و الطلاق هو لي تيبان ليها الحل حاليا.....!
غمضات عينيها بالزربة ملي هز عينيه فيها ...طفى ظوء التليفون و ناض تيميل بدوك الكتاف فالظلام....تلمس خدود فاتن الناعمة باصابعو الخشنة وهز عينيه فحلا بنظرة مظلمة غاضبة...قلب عينيه و رجع خرح لابس حوايجو و هاز مفاتيحو و تليفونو فعز البرد و الظلام و الكلاب و الريح القاسية ...شغلو مكيعرف لا صباح لا عشية لا نص اليل ......
رجعات لدارها فالصباح كملات نعاسها حتى فاقت مع الظهر تغدات و رجعات خرجات البوسيت تتخرج مع فاتن بلا طموبيل....!
صونا عليها عبد الصمد شافت اتصالو ماجاوباتش....
من بعيد كانت ياسمين لابسة النقاب مخبية وجهها و سارة فراس الشارع تتشوف مخلوعة...
_ ياسمين غتندمي...
ياسمين : بعد مني اسارة...
سارة ( تتشوف فحلا محنية على البوسيت تتقاد شعر فاتن ) و فين هي ؟ خرجات ! الدنيا خاوية هنا هاد الديور ماساكنينش...
ياسمين ( بغيرة ) محنية على البنت ...
تبعات سارة نظرات ياسمين لحلا لي هزات راسها تتقاد شعرها الناعم لابسة الكلاس و الاناقة تتبان من بعيد....تعجبات سارة و نطقات ..
_ فين هي ؟ مراة وحدة لي كتبان فهاد الشارع اياسمين...واش هي هاديك !
ياسمين قلبات عينيها معصبة...
_ سيي...
سارة ( بصدمة ) و تعرفي كيفاش تخيلتها ...هادي مراتو.....؟؟ مولات صاك لوي فيتون ؟؟ كتحمق ...
ياسمين زادت طلعات اللثام حاقدة و تقدمات عند حلا مخلية سارة واقفة بعيد تتشوف فحلا و تتعبرها و طلعها مصدومة حيت توقعات شي وحدة غليضة و لابسة جلابة فالخضر حالتها و لابسة جوج كيلو ذهب و فولار احمر و الحناء مطلسة فاليد ...
عينيها تينقطو بالغيرة و الحسد و خطواتها بداك الثوب الكحل ملمطها كاملة مخسرة حرمة و مكانة النقاب...النقاب تدار لستر فتن النساء و البعض رجع تيلبسو لغرض مضر حتى ولاو الناس تيخافو من داك اللباس جامعين معاهم حتى المنقبات العفيفات ...! كانت مقربة منها وهي مخبية الزيزوار من العين ...عقلها خدام و عينيها تيغليو و يديها تيترعدو عمرها وصلات لهاد المواصيل من الحقد و الجرم...خايفة و مامولفاش رجليها غادين عند حلا و ضميرها تيرجعها اللور تحبس و تمشي بحالها...لكن هي تتقرب و تتزيد توضاح صورة حلا و ابتسامتها تتزيد يكبر الحسد فيها و الشيطان داير شغلو ...!
هبطات ثورية من الدار بالزربة هازة تليفونها ...
_ ختي حلا سي عبد الصمد معايا فالتليفون خصو يهدر معاك ....
مرت ريح غاضبة هزات شعر حلا للقدام و تعلااا النقاب من على وجه ياسمين رداتو بالزربة .....شدات حلا صاكها عاقدة حجبانها و هزات من عندها التليفون ببرود...
_ وي ؟
عبد الصمد ( بحدة ) دخلي للدار....
حلا ( بهدوء ) لااااا ...
عبد الصمد ( بالغوات ) ينعل ابليس لي ساكنك غنجي نفرع يماااك دخلي للدار ....
حلا ( بعناد ) اوك بسلامة....
قطعات عليه و حطات التليفون لثورية ...
_ دخلي اثورية صافي....غنضرب شي دورية و نرجع....
دخلات ثورية بحالها سمعا و طاعة و كملات حلا طريقها و ياسمين من وراها معصبة ...تبعاتها و سارة من وراهم خايفة تتطلب الله ياسمين ترجع لعقلها....!
دخلات حلا مع شارع ساكت فيه ديور كبار لكن نصهم ماكاينش مولاهم ساكنين فاسبانيا و كاينة مكتبة كبيرة شادة ...ناضت فاتن تتبكي هزاتها لعندها ...شافتها ياسمين وقفات و زربات خرجات الزيزوار قربات من حلا ..حطات يديها على كتافها ...حتى قفزات حلا و دارت بالزربة تتشوف فيها خبات بنتها فحضنها بخوف و شك و نطقات ...
_ نعام اختي ؟
هزات ياسمين يديها و طرشات حلا حتى دار وجهها ماجات تستوعب حتى عاودت ليها طرشة اخرى بالزربة دفعاتها حتى طاحت فالارض هي و البنت و الغوات فارع الدنياو حلا مزيرة على بنتها تتغوت و تسب مخلوعة...
_ بعد منييببي غتندم...غتندم والله حتى ندمك الكلبة.... عرفتك السلكوووطة شكووون غي من عينيك اللفعة غنربيك ....
ضحكات ياسمين و خرجات الريزوار هازة شعر حلااا وهي تتفركل وتغووت ...
_ بعد منيي....طلق منيي.......ركلاتها برجليها لركابيها مجننة و عقلها غيخرج و البنت فرعات الدنيا غواات حتى طاح ليها الريزوار و تعصبات و عطاتها قتلة العصا بيديها ماخلات طروش و عضااان و حلا عاطية حلوقها للغوات حاضية غي مع بنتها.....!! ياسمين غي سمعات الطموبيل وقفات فالدرب و الباب تفتح خرج منها واحد عندو كاسكيط خبات وجهها و طلقات من حلا وعطاتها بالجري ....! الطموبيل تبعاتها و مول الكاسكيط وقف بعيد حاضي حلااا لي هزات راسها تتبكي مخلوعة رجليها فشلانين بغات تنوض و رجعو رجليها فشلو عليها....و البنت تتبكي و تغوت ! جااات طموبيل سعيد و معاه صفااء باين علمو عبد الصمد هبطو لعندها كيجريو شافتهم عاد رتاحت و ركبات معاهم شادة قلبها تتبكي و شعرها مرون ووحهها حمر ..
_ غندمها عندها الزهر كانت معايا البنت ...
صفاء ( على نيتها ) و عرفتيها شكون ؟
حلا ( تتسكت فاتن و تبوس فيها ) عرفتها ...شكون قالكم بلاصتي ؟
صفاء : عبد الصمد فطنجة علم سعيد و جينا لعندك انا ماعارفة والو حتى جرني سعيد بالزربة و جينا لقيناك طايحة فالارض ....
حلا ( تكات بتعب ) دايما حاضيني حنى حتاجيتو مالقيت حد ...
وصلها سعيد لدارها و خرجات معاها حتى صفاء ...و نطق سعيد بحدة...
_ عبد الصمد قالك ماتخرجيش.....
وصل ليها الرسالة ..حرك الروايض و مشى ...!!
خرجات حلا من الدوش الخلعة مزال باينة على وجهها شدات الباب على فاتن ناعسة و جلسات حدا صفاء ضامة ركابيها لعندها تننهد...
_ قالي ماتخرجيش و انا خرجت عييت من هاد العيشة و تخنقت ...
صفاء ( بفضول ) شكون هاديك ؟سولت سعيد مابغى يقولي والو...
حلا ( هزات كتافها ساهية ) شفتا فواحد السبوع و عقلت على وجهها ماعرفتش ماين كتعرفني و شنو عندا معايا....!
نعسات حلا ديك اليلة و معاها صفاء ...و فالصباح جات عندها حميدة زيارة ماعارفة والو لاحظات وجهها حمر تلفات ليها حلا الهدرة و لصقات ليها فكدبة....!
ياسمين باتت مع سارة مخلوعة دوزاتها معاها نهار كلو النعاس هرب عليها تتقول دابا البوليس يجي يدق بابها....!
سارة : و حمد لله ماسال لا دم لا والو كنتي غتغرق راسك....
ياسمين : خليت الخدامة تجمعلي الدار و حوايجي غنهز وراقي و نخوي المغرب و الا جبرني نسميه راجل....
سارة ( هازة ليها الهم ) تخايل تخرح وطيرك شي طموبيل ولا يقطع ليك الفران ويصرد شي جوج شماكرية يغتاصبوك بقرعة د الزاج تخلعت اياسمين ...
ياسمين ( مخبية الخلعة ) انا كنت مراتو مايقدرشي يعملي هيدا علاش كتخلعني علاش....
سارة ( بضيق ) تيقتي راسك حتى هذاك كتسميه زواج ....
ياسمين : غنمشي بحالي محال نعس هاد اليلة...
مشات ياسمين لدارها وهي حاضية جنابها مخلوعة ...لقات الخدامة فالدار عينيها كيدورو ...
_ جمعتيلي حوايجي ؟
الخدامة : كلشي محموع وواجد ...
هزات ياسمين باليزة ديالها ماعاودات فتحاتها ولا قلباتها هزات وراقيها و خرجات من الدار بالزربة باغية تغبر من المغرب فخطرة ....! و كانت اخر لحضة تعيشها وهي تتنعم بنعمة الحرية بعدها تشدات فالمطار ملي لقاو الحشيش بين حوايجها....!
رجع عبد الصمد للدار ! لابس جاكيط د الجلد فالنواغ تيلعب بالمفاتيح ...لقى السكات فالدار فاتن ناعسة و حلا جالسة فالصالون فالظلام و عينيها المغرقين بالدموع ...صوت الشتاء و الرعد و البرد تيقطع المسكين على برا ...حس بانفاسها و شعل فيها الظوء بنظرة سوداء مظلمة كثار من ظلام اليل ...هزات عينيها بنظرة بعتاب نيفها حميمر و رموشها فازكين بالدموع لابسة بيجامة وردية ناعمة و شعرها محموع...نطقات بصوت مبحوح و هادي ....
_ طلقني اعبد الصمد ...
عضلة فكو اهتزت و حجبانو زادو تلاقاو...حط المفاتيح بهدوء عطاها بالظهر مقرب للسرجم حاط يديه على الحافة و اليد الاخرى خاشيها فالجيب ...عضلات وجهو القاسية مازادت الا قسوة و البرود غلفو من راسو لرجليه النعاس ماشافوش هادي اربع ايام راسو تيضربو فيه المطارق بالمعنى الحرفي قرب ينفاجر بالحريق و خاصة فوق عينيه الالم تيزيد و حجبانو تيزيدو يتكمشو و ظلام عينيه تيزيد....!ياسمين جاتو بحال الغبيرة الطايلة نفخ عليها و زاد مايعطيش وقتو ليها و ماحمقش راسو معاها تابعو مشاكل كبر و اهم....
شافتو ساكت ماجاوبهاش غلبوها الدموع كثار و خبات وجهها بين يديها تتبكي...كانت هادية اليلة و حتى بكاها صامت
_ مستحيل نبقى معاك مزال ، نفسي ماترضاش ، ياسمين و من بعد زواحنا كانو وحدين اخرين وخا تقولي لا باينة من عينيك كتكدب اعبد الصمد . انا مانقدرش نعيش مع واحد قلبو يهز مية دقة وحدة ولا نعاشر واحد مزوج بيا و ناعس مع وحدة اخرى ...مانتعايرو مانلومك ماتلومني طلقني و تزوج مية وحدة ماحابسك حد بحال عمرك عرفتيني كلشي ساهل عندك ..بيناتنا بنت تشوفها وقت لي بغيتي بلا مشاكل و صداع انا عييت .....
ماجاوبهاش ! تزاد بكاها و ناضت عندو حفيانة ...
_ معاك كنهدر انا مابقيتش باغية نكمل معاك باغية الطلاق طلقني بلا مشاكل ماما و بابا ماكنعاود ليهم والو على هادشي حيت انا لي درتها لراسي .....( جراتو من كتافو يشوف فيها ) معاك كنهدر شوف فيا جاوبني اعبد الصمد ....
قاس خدها بيديه الباردة بعدات ليه يديه و رجع تيقيس شعرها ببرود ضربات ليه يديه ورجع لشفايفها عصبها و حمرات فيه عينيها المغرغرين بالدموع....
_ عرفتي شنو...ندمت علاش عرفتك ندمت علاش مشيت لديك المقبرة و تلاقيت بكمارتك و ندمت علااش حطيت رجلي فداك الجبل و الطريق لاقاتنا .....
عبد الصمد ( بنظرة مظلمة ) : فين الجديد ؟
حلا ( تبسمات باستهزاء ) : عندك الحق دايما كنقول نفس الهدرة و كنندم علاش سمحت ليك و عرفتي شنو ( شافت فعينيه بنظرة مكسورة ) حرمت عليك راسي بيناتنا المحكمة نتا مامعاك هدرة.....
حك لحيتو كيضحك بلا نية ضحك ضحك اللاعصاب و الفقصة و المشاكل و المطارق لي تيضربو فراسو ...
_ ماديريش معانا المزيان و تخلي لعب الشهر الجاي نكون مسالي ليك مي تيسيرو ....
ضحكات بالفقصة و الدموع من عينيها كبار...
_ انا قلت لي عندي ....
تحركات من قدامو بهدوء مخلية ريحتها كدور حداه ...دخلات لبيتهم و شدات عليها الباب من الداخل مخلياه واقف فالظلام و البرد قاسي لايرحم ...شد راسو لي غينفاجر و تكى فوق الكنابي بصباطو و حوايجو مغمض عينيه و الحجبان ملاقين من الحريق لي تياكل فراسو ...!
صباح ناعس ماخرجش على غير العادة...لقاتو تما مبدلة عليها و جامعة حوايجها و حوايج بنتها حطات البنت فبلاصتها و هزات كاسكيط ديالها و تليفون وقفات على عبد الصمد بنظرة باردة تتفيقو ...
_ عبد الصمد....
فتح فيها عينيه و جرها لعندو طايحة فوق صدرو حاكمها بيديه...
_ فين ؟
حلا ( بنظرة غضب ) طلق منيي....بعد يدك منييي ...
حيد ليها شعرها من على وجهها تيشوف فملامحها بنظرة اعجاب و نظرة اخرى مفشكلة سرح يديه على وجهها وهي تتجبد معافرة معاه ...
_ حيد يديك طلق منييي ...انا عفتك و عفت نشوف فكمارتك نعرف نحرق راسي و ماننعسش مع واحد بحالك خلاااط مزوج بيا و معاشر سلكوطاات اخرين ...لحمي ماشي شايط عليا....بالخاطر والله لاخديتي مني شي حاحة....
هو حاجبو بنظرة ثقيلة...و زير على ذقنها بتحدي ...
_ ماكانبغيش نبكي التحف ديالي ... ولايني الحساب ثقااال ....
حلا ( هزات فيه حاجبها مستنياه ينكر يقول لا ماخنتكش ومانكرش بلعاتها و اصرت على موقفها ) خلي الحساب يفيض ! ماعندي خلاص ...حرمت عليك راسي اعبد الصمد بخاطري ماتحلمش بيها....
شعرها تيتحط على لحيتو رطب و ريحتو زوينة طلعات مع جيوب نيفها وو عينيها حمرين كي الجمرة حابسة دموعها بمهارة ....شاف فيها متبعها بعينيه بنظرة طوييلة تيعبر وجهها قنت بقنت بنظرة فشكل مافهماتش تفسرها ولا تفهمها....حيدات ليه يديه من عليها تتدفع فيه...
_ غنمشي عند ماما ...و غنرفع الدعوة ماباغية منك والو سامحة فحقوقي كاملين خصني غي نطلق ....
عبد الصمد ( تيشوف فيها بنفس الشوفة ) بوين سويرتي ....
حلا : سويرتي ؟؟؟ تنلعبو القمار ! اوك ها نتا غتشوف....
فك حصارها و ناضت بالزربة هزاات صاكها تتشوف فيه شنو تيصنع....دخل للحمام و خرج بعد نص ساعة هز سوارتو و فااتن فيديه تتبوس فيه و تبعاتو مخلوعة...
_ فاين غادي بيهااا...! عبد الصمد بنتييي لاااا.....
خرح لبرا و الهواء بارد ...شاف يمين يسار و فتح باب الطموبيل الخلفية و قصح الشوفة فحلا...
_ ركبييي....
حيدات ليه البنت و ضمااتها لعندها كانت غتموت بالخلعة...ركبات بلا هدرة بلا جوج دخل حوايجها للطموبيل و شد الطريق لشفشاون....وصلو للرياض و طلعو لجناحهم ...
حلا ( بتعب ) فين جايبني لهنا ؟ شنو باغي اعبد الصمد واش باغي تخرح عليا عاد ترتاح.....
عبد الصمد ( بجدية ) غتبقاي هنا سيمانة عندي شي شغل نساليه و نريح مخي نتسوعب شنو كتقولي ...ها ولا هاه خبارك سابقاك احلااااا.....
فاتن سمعات سمية حلا دارت تتشوف فعبد الصمد و تفرنس ....
_ بببب...
ظلت حلا اسبوع فالرياض....حاولات تنسى الهم و الفقصة و عاشت الواقع دارت صحاب و معارف من الادارة تتعرف على نظام العمل كي داير المداخيل و المخاسر ....كل نهار تتهدر معاها حميدة و ماقالت ليها والو حتى تكون معاها حيت الطلاق هو لي ماتحيدوش من دماغها....!
جا وراها عبد الصمد بعد اسبوع و تفرغ ليها خداها لمراكش بقات ثلاث ايام ....هدرتها معاه مختصرة حتى يديها محرمة عليه يقيسها حتى هو قالب عليها معفر تيضحك غي مع بنتو و يفششها و يغرقها في الدلال ...مابقات جبدات ليه حس الطلاق ساكتة و هادية و دايرة عقلها لسانها مقطوع ...حتى جاو لتطوان و خلاتو حتى طلع لطنجة وعيطات لعبد الله قالت ليه باغية تمشي و الطموبيل مخسرة و مايمكنش تشد طاكسي ولات تتخاف على حسب البنت....حا وراها حتى الباب و خداها معاه للفيلا و تما تفكرعااات عليهم و خرحات شنو عندها ...
_ بغيت نطلللق ....! باغية الطلاااق مانبقاش معاه ابابا حيت مابقيتش قادرة نصبر صافي انا و داك الراجل سالينا....
عبد الله و حميدة تصدمو....ردت حميدة مخرحة عينيها....
_ ماين جبتي هاد الطلاق عاود...ياك عاد كنتو فشاون فرحانة و ملي جا مشيتو لمراكش ...حلا واش ماغاديريش عقلك واش الزواج هذا و لا اللعب....
حلا ( بغيرة ) نتي ماعارفة والو اماما.....عبد الصمد كيخوووني الخيانة اماما....
عبد الله ( بصدمة ) لاحولا ولاقوة الا بالله.....ماكدة احلا شفتيه بعينك ابنتي نعل الشيطان....
حلا ( بغضب ) قالها بفمو اعتارف بيها بنفسو ابابا كثار من هاد الدليل....
حميدى ( شادة راسها ) وكاين شي مسخوط كيخون و يبرح بيها ابنتي نعل الشيطان واش طلع ليك الراجل فراسك قلتي ارا نشوف الطلاق و عندك معاك بنت واش كتفكر بالعقل ولا غي كتخور....
حلا : واش انا كنكدب ...ماما بلا ماتصدمني....فخبارك راه مزوج كثار من جوج قبل مني و وحدة فيهم جات تهجمات عليا و ضرباتني كانت غتخسرلي وجهي ....
شهقت حميدة و ضربات فخدها و عبد الله تصدم...
_ شنو هادشي احلا علاش ماقلتيهاش....
حلا ( بغضب ) اقسم بالله....مابغيت نقولها لحتى واحد سكت عليها و لكن دابا الطلاق انا مع هذاك ماغاديش نبقى صافي ماغاديش نرجع ليه ....
مصيبة و طاحت على راس عبد الله و حميدة ...الخيانة ماتاقوش بيها حيت حتى واحد مكيعتارف بالخيانة علنا و معروف على حلا تتكدب و تزيد فيه و لكن موضوع طلاقو و ضرب ياسمين تاقو و تعصبو و مع ذلك ماشافوش موضوعها يستاهل الطلاق...ايه عبد الصمد غلط لكن هوما كيشوفو الموضوع ليه حلا الطلاق ببنت بسبب هادشي لا يمكن.....! عيطو لعبد الصمد حتى هو مسالي لمخو هاد الايامات....داخل تيلعب بالسوارت و يتبسم مع عبد الله تيتمختر فالمشية و اللحية محسنة و الشعر كحل قوي و الريحة سابقاه و ابتسامة ابليس نصب فيها خيمة....
_ سي عبد الله.....جمعة مباركة....
عبد الله ( تيتنهد ) علينا و عليك و على جميع المسلمين تفضل اسي عبد الصمد....
دخل معاه للصالون البلدي فين جالسين...حلا غي شافتو من بعيد جاي تيتبسم ماناقصو خير و داير كي السبع في كامل اناقتو هاز فاتن لعندو تيضحك معاها و يبوس فيها وهي تتفركل و تضحك فرحانة بيه و حلا مفقوصة تتقلى و تعصب راسها ! بدات تتسول مع نفسها....علاش وليت هكا كنتعصب علاش مانكونش بحالو شكون هو شكون يكون ! هو بحال السبع صحيح فصيح و انا شوية بشوية غندبل و نشرف ... التجاعيد بانو فيها غي هاد الايامات بكثرة التغوبيشة و الاعصاب كانت باغية تسطى ...! تنفسااات بعمق و دارت رجل على رجل هازة نيفها للسماء ماعاودات شافت فيه حتى نص شوفة...مخلية غي عبد الله كيهدر و يلبق فالكلااام ...
_ هادشي ماهواش اسي عبد الصمد ...درتو الولاد و ثبتو الغرس عاد بانلكم الفراق !!
عبد الصمد : اعود بالله اسي عبد الله ماباغي فراق ...
عبد الله : و نتا ماباغيش بنتي باغية و قالت مابقات عيشة معاك . و مادرتي فيها مايصلاح باش نكون معاك صريح ...هادي ماهي عيشة جالسة ماعليك مابيك و تنقز عليك طليقة راجلك تعنفك و نتي ماسايقة ليها خبار واش كاينة....
عبد الصمد موسع يديه و رجليه مجلس فاتن فوق رجليه تترضع صباعها...هز عينيه مبتسمة فحلا لقاها حانية عينيها تتسمع و حامعة لسانها ....
_ الموضوع كان يتحل بيني و بينها اسي عبد الله ...بصراحة ماعزيزش عليا نحط اسرار داري قدام شي حد مابقيناش صغار ...ولايني ملي المراة عندي دارت شنو فتى عليها عقلها و تكرمتي و قررتي تدخل فالصلح باذن الله غندوي و نقول شنو عندي......
هزات فيه حلا عينيها بابتسامة استهزاء ..السيد ولى فصيح اللسان و ماكاين غي ان شاء الله بادن الله تقول بصح كان تيسمع لخطبة الجمعة وهو ماحط جبهتو الارض من رمضان لي فات.....! ربعات يديها و سكتات مخلية عبد الله يرد عليه....
_ و هذا هو المطلوب ! البنت ترجع لدار والديها كانت مظلومة ناخد حقها كانت زايدة فيه نجبدو ليها ودنيها....و من هادشي كامل ؛ علاش ماحطيتيش نيتك لبنتي نهار لول اسي عبد الصمد....
عبد الصمد عمرو تحط هكا فهاد الموقف تيرطب فالهدرة مع عبد الله و يرقع لي تقطع حتى نهار تزوج بحلا.....حيت عائلتها كبيرة و حارة مولف مع اباء زوجاتو لي سبقو تيبغيو يبوسو ليه يديه و ماتيكلفش راسو و يعطي من وقتو ليهم مامسوقش.....! حط يديه على راس بنتو الناعسة على صدرو تترمش بعويناتها الكبار و رد على سؤال عبد الله...
_ نيتي واضحة و باينة...كانت خطيبتي و كتااب الفراق حيت طلقت جوج مرات قبلها وهي ماعارفة والو ...اوكييي ، و ملي كتاب الرجوع من بعد الفراق اسي عبد الله قدامنا كاملين تجاوب واش سولاتني شنو درتي فهاد العام و النص لي تفارقنا فيها ...( هز حاجبو )الا سولاتني و كدبت عليها تما سطوريا اخرى ثاني ...
عبد الله ( شاف فحلا ) هدر احلا تكلم ابنتي واش سولتيه و كدب عليك....
حلا ( بكدب ) سي سولتو ماجبدش ليا لا ياسمين لاختها حتى لدابا عاد ظهرت حاقدة عليا تقول خديت الوزير و غيرانة عليه.....
عبد الله ( بنظرة توبيخ شاك فيها تتكدب ) حلااا و مابقيتبش صغيرة نتي عندك بنت خصك تربيها ! و التربية كي غتكون و نتي كطيحي من قيمة راجلك قدام بنتك ؟! خصك تحيدي منك الكدوب الا بغيتي تربي ولادك تربية معقولة....
مارضاتش حلا و طلعو حواجبها للسماء نطق غي عبد الصمد لي تيحك لحيتو بالمهل...
_ عادي هذا هو الزواج لازم واحد ياكل الدق و يصبر و يدير عين ميكة على شي حوايج ....
حلا ( شافت فيه بنظرة شيطانية ) هدرة وحدة قلتها هاد السيد مافيه لامان ابابا ...كادب عليا قبل الزواج وندوزها و لكن الخيانة ماعمرني ندوزها ليه....
عبد الله : الخيانة عندها الشهود و الدليل ماكاين شهود ولا دليل ماتنزليش الباطل ..الباطل صعيب....
حلا ( هزات حاجبها ) الاعتراف سيد الادلة ابابا عارفها هادي ! فنص وجهي سولتو قالي سي خنتك...و الا سميتو عبد الصمد ولد احمد البحري ينكر ....
عبد الصمد ( بنظرة ماكرة ) عبد الصمد ولد حميد البحري الله يرحمو و يغفر ليه كيقول ماخنتهاش اسي عبد الله ...
حلا ( صعرات ) و هاا شفتيه ابابا....حسيتي بيه كيفاش كيهدر نكر كلشي حيت ماشي ولد احمد ولد حميد ......
عبد الله : لاحولا ولاقوة الا بالله ....ابنتي هادي ماعمرها كانت ولا تكون الله يرضي عليك عمل عقلك كاين راجل يعتارف بالخيانة بالعلالي الله يهديك و صافي....
حكات حلا سنانها مع بعضهم تتغلي جابت نعيمة مشروبات هزات كاس الماء بارد شرباتو معصبة تتبرد بيه العافية....عيات تنعل الشيطان و تعاود تتشوف عبد الله تيكدبها و حميدة تتكدبها من جهة ومتيقين عبد الصمد لي لاعب دور الزوج المثالي باتقان.....عينيها تيدورو بالزربة و رموشها تيتهزو و يعاودو تتفكر و تعاود هي متأكدة خانها ملي جلسات مع راسها عاد بدات تتفكر فهاديك ثلاث شهور لي غابت عليه مستحيل يبقى بلاش مستحيل دابا عاد فكرات بيها بجدية ...حطات الكاس حتى تسمع الصوت و كمشات حجبانها محولة النظرة للتمرد للحزن...
_ وخا ابابا انا كنزيد فيه و كدابة ! ولكن انا باغية الطلاق ...
حميدة ( بغضب ) و علاااش علااشسس غي فهمنا نفهموك...
حلا ( بتردد و عينيها تيهربو لعبد الصمد ) زعما عمركم سولتو راسكم علاش طلق هاد النساء قبل مني ! دايما المشكل منهم زعما هو الحياة معاه هانية....
حميدة ( بصرامة )قالها و عاودها بسباب لالة عيشة ...و لايني نتينا و هي سمن على عسل ولا حتى هادشي كدوب....
حلا ( بلعات ريقها ) ماشي هي السبب ...و مانقدرش نقول السبب نيشان حيت مانقدرش بيني و بينو وهو عارف علاياش كندوي مانقدرش نخرج اسراري الزوجية......
هنا عبد الصمد هاز واحد الحاحب للسماء و حميدة و عبد الله بقاو غي كيدورو فعينيهم و عقلهم طااار لبين الرجلين ...
عبد الصمد مازاد حتى هدرة...سكت جامع حجبانو...تكلم غي عبد الله ...
_ الا بينك و بينو مابقات لينا هدرة....الله ينعل الشيطان و يهديكم هذا لي فجهدي مانقول...لاحولا ولاقوة الا بالله....
سكتو عن الكلام ...حلا من جهة تتدور فعينيها و عبد الصمد ماعاود شاف فيها حتى نص شوفة قلب وجهو عليها فخطرة ...! و كن بقات بيناتهم لباس حتى من نعيمة لي سمعات الهدرة صدفة و جلسات تحلل فيها هي و البنت لي جات تعاونها فالتنظيف ...
_ قدو قداشناهو و مامرتاحاشي معاه باينة قضية فيها الفراش اهيا العجب...زعما شنو ماكينوضشي و كيفاش حملات منو ...
البنت : و هاذوك قدهم قداش هوما لي تيصدقو ناقصين ...
شلا اقاويل و احاديث و تحليلات و لكن حدهم باب الكوزينة...اسرار لي تتسمع تتشد عليها بالسوارت و ماتتبقاش تبرح بيهم قدام البراني خارج اراضي الفيلا ...! دوزو داك العشية غي بزز ...الوضع مكرهب و مرون بيناتهم.....! حتى جات الوقيتة ليمشيو فيها...تهزات حميدة تتغمز فحلا تنوض تمشي معاه....و حلا مابغاتش حتى خنزرات فيها تخنزيرة صحيحة عاد تهزات واقفة هازة صاكها تابعة عبد الصمد المغير كليا ودعات اهلها و توصيات حميدة دير عقلها و توزن الامور دقة دقة...مع من هي ...حلا صافي الطلاق هو لي مايحيدو ليها حد و حدس المراة داخلها فايق و تتحلف بلي عاشر وحدة اخرى غيرها وهو مزوج بيها خصها غي الدليل تبينو ليهم انها مازادش فيه اما بينها و بين راسها راها متأكدة و مقتنعة.....!
مشات معاه للدار حطات البنت تنعس و جلسات حداها حتى خرج عبد الصمد من الدوش و نطقات بين سنانها...
_ مافهمتش مالك ؟ مافيك نفس مابقيتش باغاك طلقنيييي و عيباد الله باغية الطلاق واش صعيب عليك لهاد الدرجة تفهمها...و طلقنييييي نقولها ليك بالشنوية و باغية نتفك منك و مشي عند الف وحدة مادوا معاك حد( بغضب مخبية بيه غيرتها ) واش تقضاو النساء فهاد الدنيا طلقني و تزوج شكون تولد ليك ولد وجوج و ثلاثة دير حضانة نتا ماشي شغلي و مابقيتش مسوقة حيت مكتستاهلش.....
عبد الصمد ( بعصبية): قطعي الحس لسانك بلعييه ...بغيتي الطلاق الالة جاك .....
هز جاكيط ديالو و مفاتيحو و خرج من الدار غابر كمارتو مخليها مصدومة دارها ليها قد كلامها.....
رجعات حلا للفيلا صادماهم بخبر الطلاق و عيشة عرفات حتى هي و تاصيلتهم كاملة عرفات و جلسو تيحللو و يعاودو مصدومين...كيفاش و علاش و حتى ولدو ! ويلي صافي كركباتو بحالو بحال لي قبلو هاذوم من عائلة حلا انا عاىلة الصمدي تيقولو صافي هو لي طلعات ليه فالراس و قنط منهابحالها بحال النساء ديالو لي خداهم قبل ..عبد الصمد و حلا ولاو حديث الاسبوع العاىلة قدها قدهاش كل واحد فين تيصوني و يسول و يعاود و يقلب خاشي كرموستو فالموضوع....! نسيم و خلود ماكانوش قل من البقية....تصدمو حتى هوما و بقات هادي تتشوف فهادي....و حلا وسطهم تتستنى ثورية تجيب ليها اختبار الحمل....
_ خلود ( بضيق ) علاش باغي يطلقك انا مافهمتش مافهمت والو كيفاش وقع عاد كنتو مزيانين ...
حلا ( بين سنانها ) انا طلقتو ماشي هو طلقني ....
نسيم ( بقلق ) نتينا تعرف حياتك هادي ...تأكد بعدا واش حاملة ولا نو و من بعدها عاد شوفي شنو ديري...
خلود ( بغضب ) الله يستر و صافي...ياك شادة ليك الرضاعة و على الله مايكون بو حمل...و خليه هو يرفع دعوة الطلاق علااش نتي غضيعي فحقوقك كاملة و تبقاي على الضس لا تعويض لا جوج....
نسيم :واش نتي كتشوفي غي الفلوس اخلود...
خلود : انا واقعية نتي لي ماعرفت فين عايشة ...هاذوك من حقها ماشي تتسعاهم ياك باغية دير مشروعها و كل شهر تجيها فلوس القهوة و الرياض و تزيد ديك الحصيصة لي تخرج ليها و تدير مشروعها تلهى معاه قبل ماطرطق حيت اوهووو باااح شي حاجة سميتها زواج و راجل بعد الطلاق مع داك ولد عيشة حيت غي تنسى البنت ماتحلم بيها و تبرد الدودة لي تتشدها كل مرة قالك محتاجة حب و غزل و حنان و شدي الحنان دابااا....
نسيم : و ماعرفتش مالك معصبة نتي ! بسم الله عليك ....
خلود ( غمزاتها ) و شنو قلت كدبت !!! والله لا تزوجاااات عاد هو يدير عشرة و من حقو جات معاه السيد خمسة من جهة و خمسة من جهة اخرى كيشعلو و يفتنو بالزين وهي الحضية و التزيار من بابا و رضا و التزيار من عندو يشوفها واقفة غي مع واحد بالصدفة يلبق ليها ضوسي صحيح و يحيد ليها البنت .....نتينا ماسمعتيش صحبتي مسكينة شنو وقع ليها خدا ليها البنت و شرا الشهود شوه ليها السمعة بتهمة الفساد و بقات لا بنت لا سمعة.....
خلود تتدوي و حلا شادة راسها غيطرطق ...! جابت ثورية اختبار الحمل و صبرات حلا حتى الغد ليه عاد دارتو و صدق سلبي ماكاين بو حمل...رمات هاد الهم ورا كتافها و تهنات و خرجات من الحمام مدوشة...هزات حوايجها و حوايج بنتها و جلسات حدا عبد الله وجهها صفر...
_ باغية نبعد شس ايامات نرتاح فيها...حيت ماحاساش براسي مزيان عقلي مشتت و مامرتاحش والو الراحة مابقيتش كنشوفها...باغية الطبيعة ماباغية لا بنادم لا صداع لا حريق الراس.....
عبد الله ( بصرامة ) دار جدك فالريف خاوية خوي داك الدماغ و كبري عقلك عاد رجعي شوفي روينتك.....
و داكشي لي كان مشات هي و حميدة للريف و ظلات تما خمس ايام كانت محتاجة راحة و نفسية تقاد حسات براسها تبدلات بعض الولادة مابقاتش كي قبل دغيا تتبكي و حساسة بلا قياس و قلبها دغيا كيقفز و مشوشة و بالها كلو مع البنت التربية و اول تجربة ماكانتش ساهلة....حسات بالاحداث غادية فحياتها بالزربة و مشوشة لدرجة عمرها عاشتها قبل....خوات عقلها و تهدنات و رتبات كلشي فحياتها من الاولويات للحاجات الثانوية و اولهم صحتها الا مشات مايرجعها حد لا ولاد لا راجل ...الهدوء و الراحة جابو نتيجة.
بدلاات الجو و رجعات بحالها لتطوان بنفسية جديدة ....
قصارة و شمن قصارة....الاكل و المشروبات و الاحاديث الرجالية....جالس تيشارك فرحة صديقو باول مولود عندو....فمنطقة غير معروفة باقليم شفشاون.....! ناض خارج من الجماعة لابس جاكيط الجلد جاياه عبار نيفو مهزوز و تيمشي بتمختر غير مقصود او متصنع مشيتو هكاك من دايما حتى شوفاتو ماشي ديال الامان مازوينش داك الزين تيطيحو عليه البنات من شوفة لولة و لكن كاريزما و حروشية حاضرة الوحدة ماتتزعط فيه حتى تشوفو للمرة الثانية حيت مرة لولة يقدر مايعجبش الوحدة تتعجب من طولتو فقط و تقلب وجهها و لكن الا رجعات شافت فيه للمرة الثانية و الثالثة وزاد هدر و تكلم طاحت فالفخ و حيراتها نظرة عيونو الحرشة....اما الى حرك جيبو غيولي الحبيب ولد الحبيب ....!
كان خارج من المجلس تيشوف يمينو و يسارو بين رموشو حاضي جنابو و موسوس من دايما....و خاصة معاشر مع الفقهة لي حشومة و عيب يتسماو بالفقهة تيصادف حالات السحور و الشعودة و تيخاف على راسو الغدر قريب يا من بعيد براني ولا من قريب حبيب....؛ كان تيشوف جهة يمينو و قشع سالف زعر تيبان من الرواق الشفاف ...دارت تتحمع فشعرها تتضحك و جات عينيها فعينيه كانت تتقطر بالزين شاف فيها بنظرة ذكورية عشاقة الزين.....و حتى هي خرجات تتبين زينها و تضحك بلعاني بالجهد ...
_ اواعدي يانا نسيت السبينة فدوى السبينة شعري عريان ....
قلب عينيه عايق و فاطن ...دوز نهارو و ليلو بين الغناوي و الرجال و الغيطة الجبلية ...عيشة شافت داك الزعرة لي حطات العين على عبد الصمد و جمعات حجبانها كاتمة غضبها تتنفخ و تعاود....
_ قلالين الحياء و الصواب هادشي ماكاينشي فاصولنا....
نطقات مراة متسوطة العمر تتسايرها وخا مافاهمة على من تتمعن...
_ و قلة العقل والافلام خرجو على العيال ...
عيشة ( بغضب ) الراجل مزوج و عندو العايلة و لاصقة فيه بحال العليقة ...
المراة : شكووون هادي احبابي عيشة....
عيشة هزات كتافها و ماحاوباتش عليها تتدور عينيها يمين يسار....الزين زينين ولايني الخاطر مابقى قادر يشد حتى وحدة مزال....بزز بلعات حلا و مابقى ليها كانة لوحدة اخرى ولفات عليها عروستها و مراة ولدها و ام حفيدها و ولفات حكاويها و هدرتها و ماعجبهاش الحال ملي سمعات الطلاق مشاات شبعات لحلا الهدرة مرة تغوت عليها مرة تحاول تردها لعقلها خايفة على حفيدتها ساعة مالقات نتيجة....! دخلات ديك الزعرة تتطير بحال الطيارة لابسة كسوة زوينة تتشريها من سوق الاسبوعي مخططة بالابيض والكحل و السالف مرخوف بزز ساتراه بداك الفولار تتمشي و تجي قدام اعين عيشة و تتفرنس و تتلقط الهدرة من هنا و لهيه باغية طير بالمعنى الحرفي....سمعات بلي عبد الصمد طلع السطح مع باها ...كانت غتطلع وهي تجرها الام ديالها و خشاتها معاها فمحلس النساء و البنات و جات فجماعة عاطين للنميمة دقة...ماخلاو حد فالتيساع حتى من عبد الصمد جبدوه و كلهم وصفوه بهدرة وحدة...خانز فلوس عايش فسبانيا و مزوج عندو بنت ...! الشقرا لسانها مشوط باغية تسول و تعاود ولايني بركاكة كثار ...خلات حتى هبط باها و كان الظلام و طاارت للسطح شافتو واقف عاطيها بالظهر خاشي يديه فالجياب السماء مضوية بنجومها و الريح حنينة و هادية.... تصنعات العفوية و نطقات...
_ با ..با فاين نتينا ....
دار عبد الصمد شاف فيها بنص عين باقية صغيرة و زوينة ...
_ ماكاينش هبط ...
رققات صوتها كثار ماهو رقيق و ردت...
_ اوووف غنبقا هيدا طالبة هابطة كنفتش عليه شكرا اخاي و مرحبا بيك فدار عمي الوزاني....
هز راسو و زينها في ساع تبخر ...مشات بحالها مقموعة عقلها صغير و طيارة باغية غي تزوج دغيا قبل من خوتها الكبار ... قلب عينيه و شاف حداه الدار اصوارها عالية و الشجر و الخضورية مظلمة بالظلام ....فين مايشوف الزين تيسرح عويناتو و هي تتكلم تيتمناها تسكت ..تيتلاقى مع وحدة زوينة تتفتن و لكن هدرتها ماتتعجبوش ماتتجيهش على كانتو وخا تعجب مية وحدة غيرو هو ماتتعجبوش ماتتنغموش... يدوز معاها ليلة ثانية و يعاشرها جسدياا فارغ مكبوتاتو لكن ماشي ديال العشرة و الدوام و الولاد غيبقى من وحدة لوحدة وماعمرو يحس بالمتعة الكاملة بالرغبات الجسدية و القلب فرحان....و هاد الحالة جاتو من نهار تعرف على حلا عن قرب ولى ذوقو صعيب بحال لي مولف ياكل و يلبس غي الغالي و الثمين و نهار مشاو ليه الفلوس مابقاش تيقنعو ياكل و يلبس من الرخيص ....!
لكن حلا و هو طريقهم تشدات و الحساب عندو ثقااال و مابقات ليه رضى لا عليها ولا على راسو ...كان يموت و مايطلقهاش وخا ترفع عليه دعوة طلاق يعرف يحبسها فشي قصبة منفية و يحط عليها مية عساس حتى يتلغى الملف و يترمى فالارشيف و يقدرها يديرها قبل ماتعتب رجليها باب المحكمة و تفكر تحول خصامهم للمحاكم .....!! كمى واحد الجوان وشعل تليفونو صبعانو تيدورو على رقمها ...قلة الشغل جاتو مصيبة مسالي هاد الايام ماعندو شغل مهم ماعندو خدمة غا الدوران و العراسات و القصاير و الفراغ خلق الوحش و الوحدة مشاعرو خصها فيلسوف عميق و محلل نفسي شاطر و مترجم افعال عاد يفهمها.....!
خشى داك التليفون فجيبو و وقف مصمر تيشوف و يفكر توحش بنتو و توحش يحط عليها الراس....شكون قال الرجال ماكيتوحش دارو و ولادو شحال ماطار و زهى و شاف و عاشر تيبقى الحنين لزوجة و بنت و لمنزل اسري ...!
جبد تليفونو للمرة الثانية و دوز ليها الاتصال ...وعلى غير المتوقع ردت عليه بهدوء و نبرة رزينة...
_ الو عبد الصمد ...
عبد الصمد ( ملامحو مرخية) فين حلا ؟
حلا( بخفوت لذيذ ) ناعسة غدا فالصباح ملي تفيق نعاود ليك تدوي معاها ابيل فيديو ...تصبح على خير ..
عبد الصمد ( لعب بلسانو داخل فمو ) اوك........
قطعات هي الاتصال و بقى داك التليفون تيدور بين يديه و الحجان مرة يتلاقاو مرة واحد يطلع للسماء مرة ينزل....دور عينيه حداه سامع الصوت من وراه لقى نفس الشقراء ..
_ سحبلي ابا ماعرفشي فاين هو ؟
عبد الصمد ( لقاتو معصب ) سيري ت**دي ابابا...
طارت من حداه مخلوعة و هبطات تتبكي ...و جلس بحال العفريت فالظلام مافيه نعاس....! و ييديه كلاوه للتليفون رجع دوز ليها الاتصال و مارداتش عليه عض فكو و ماعاودش لاتصال مرة اخرى حتى غدرو الحنين فاليلة الموالية كان الجو سخون و صوت الكلاب مسموع صونا عليها و ردت عليه بجدية...
_ نقدر نفهم شنو باغي ؟ علاش تتصوني عليا باليل و البنت لي جامعانا تتكون ناعسة ....
عبد الصمد ( طالعة ليه السخانة ) : الخصام حرام ....
سكتات وحتى هو سكت شحال راسو غيفاجر و السخانة فيه تتشوي ...
_ عقلك مزال مالقى عقلو.....
كانت ناعسة غي سمعات نبرتو الحميمة جلسات جالسة مقصحة قلبها و شادة عليه بمية قفل...
_ مابقى لنا طريق اعبد الصمد نتا باغي الفراق و تنا هادشي لي باغية....
عبد الصمد : نسيبريمي لي داز !! ماباغي فراق وخا نولي ماساوي حتى بصلة مطعونة فسوق الرجال ...ينعل القلب لي شدك عندو.....
وصلها ردها بصوت باكي...
_ ممم الهدرة جاتك غي باليل ...تقدر ناعس مع وحدة اخرى و تتدوي معايا انا....عمرني نتيق بهدرتك ...
عبد الصمد ( السخانة لاعبة عليه تيخرج المدفون اعترافات بالجملة و بسخاوة )حتى وحدة ماتحلالي غيرك نوشم سميتك فيه و نجمد جد بوه ... الا كانت هاد البلية من عند الله زاهية كانت من يد العبد برب الكعبة غنحرك احلااا ....
حلا ( تتدوي وسط دموعها ) نتا مريض ، تتشك فيا تنسحر ليك ؟ حياتي ضيعتها معاك بقالي غي لاخرة نخسرها بسبابك....نتا جاتك السخانة عليها تتدوي هكا غذا فالصباح و نهدرو اعبد الصمد....
عبد الصمد ( حريق فراسو لايرحم ) الراس محموم و القلب شاداه الحزقة... شنو باغية احلا حبينا معاك الخاطر شغل التبزنيز و الدراع ملايقش ليك ...
حلا : نتاا شنو باغي اعبد الصمد ..علاش جاي تتعرض عليا هاد الهدرة شنو باغي ! انا نادمة نادمة حتى عضيت فالتراب علاش تزوجت بيك و بغيتك من قلبي كنحس براسي حمقة حيت تقت بيك و الخاطر معايا اقسم بالله ماتشوفو ...اه سولتي شنو باغية...باغية نعرف شحال من مرة ...شحال مرة خنتيني اعبد الصمد و بلا ماتنكر والله لاتقت بيك.....( بامل ) جاوبني اعبد الصمد ....
عبد الصمد ( شد راسو تيدلك فيه و هدرتو ثقييلة ) جوج مرات....
تخلطات ليها الضحكة مع البكية و الدموع حارين و سخان ...
_ ههههه مزيان بصحتك ههههه من حقك بلا مانسولك فوقاش عرفت من راسي هههه ملي عنفيتيني و غبرتي و ملي كنت كنتقطع باش نولد ياك ؟ ( سكت ماردش كملات هي تتبكي و تضحك بحرقة ) مزيان مزيان اوك بصحتك والله بصحتك ليىبقى فيا هو انا كنت كنبغيك و درت شي حوايح مادرتهم مع حد...درت عين ميكة على الضرب لي ضربتيني و قلت ندوزها حيت كنبغيك هههه و باغي ندوز ليك هادي ؟! صايي عبد الصمد الله يسامح و الله يعاون ....
عبد الصمد ( بحدة ) اقسم بالله مالاقي الراحة احلا ، رجعي ليا ....
حلا ( تتبكي بحرقة ) نعطي راسي للموت و مانرجعش ليك.....
عبد الصمد : هدرة وحدة ؟
حلا : اخر هدرة هي هادي ...( تتهدر وسط بكاها ) ماعندك لاش ماتلقاش راحتك نتا ماعندكش ضمير و نتا عمرك بغيتيني الرجال بحالك عمرهم كيبغييو انا لي كنت عورة....كنت نقدر نبلع الخيانة لولة ملي كنا مخاصمين لكن ملي كنت كنولد اعبد الصمد ! كنت كنشوف الموت باش نولد كنتي معاها.....هادي حرقاتني شوطاتني نتحرق بالعافية و مانحسش هيدا.....عمرني ننساها ليك فحياتي .....
عبد الصمد ( عض فكو مزير ) ماكنتش مرتاح و دابا مامرتاحش الراحة هربات احلا ....
حلا ( كتمات بكاها كتافها تيتهزو بحرقة ) يرحم يماك نساني عليك الله يعطيك ماتمنيتي مادير والو من التخرويض ديالك خلي الطلاق يدوز....الا كنتي فواحد تتعزي غي شوية ماتخلينيش نشوف وجهك .....
عبد الصمد : اخر كلام احلا ....!
حلا ( تتبكي بالجهد ) اخر هدرة.....
قطعات عليه منهين الحديث و البكاء لي شدها ديك اليلة ماقدرات تنساه عمرها كلو ....بكات و شهقااات بحرقة ...حميدة دخلات لعندها مخلوعة و حلا غتموت بالبكاء....
_ اقسم بالله قلبي كيحرقني اماما اقسم بالله العلي العظيم حتى قلبي حسيت بيه تشتت......
بكاااات و عاودااات و مالقات الراحة لا فالنعاس لا فالبكاء ....!
تم الطلاق بيناتهم ووفى بوعدو و عينيه تلاقات بعينيها فاخر جلسة ملي رمى عليها الطلاق.....ماعاود شافها ولا تلاقاو.... الراحة هربات منهم بجوج لاهو ولا هي مرتاحين في حياتهم لاراحة القرب ولا البعد....! حلا تبدلات هدرتها قلالت و البكاء بكاتو شهر لول ونشفو عينيها....جاتها صعيبة و حارة حيت القلب ملي تيبغي تيتكسر دغيا و تصعب يتصلح و حبها طاح فيه هو ...العيش مع بعض حرارت ولات شبه مستحيلة.....سميتو ماقادرة تعاود تسمعها تحطمات و بانت فيها ماوقف فيها غي عائلتها خوتها و حميدة و عبد الله لي شاف بنتو مريضة شهر لول و مبدلة و مغيرة عليه كليا....! دارها لي عطاها كارية جوج طبقات 5000 درهم فالشهر لكل طبقة بفراشها الغالي.... الطموبيل لي عطاها باعتها و شرات وحدة اخرى و نفقة البنت تعطيها فوق الجهد ...لاهو لا عمامها لا عيشة مهلين فيها كثار من القياس.....دخلات معاها كاورية صديقة عبد الله و تتعرفها خلود نفسها لي كانت شحال هادي تتعلمها العربية...الكاورية عطات النص و حلا عليها النص الثاني و تكلفو الخبراء بالمشروع حتى تحط فارض الواقع كما هو مرسوم فالوراق....! اسباس كبيير ها جناح الاطفال جناح الجمال الطبخ الاتيكيت الرقص الخياطة...! جاتها صعيبة فالاول و تخلعات حيت الفلوس تحطو صحاح و ضروري فالاول مايكونش داك الربح المتوقع.....حسات براسها غامرات و عيااات ماكانتش تتنعس خدامة تتاصل بكلياناتها و تكلف بالاعلان و الاشهار وتتعمل صداقات مع المغنيات و الفنانات تتخلص عليهم المطاعم الفخمة و تعرض عليهم العشاء بزبالة الفلوس حتى يديرو اشهار و من تما للحفلات الخيرية و الصحافة ...حتى نهار الافتتاح جاو فنانات معروفات و مغنيات و الكاميرا تتصور و الصحافة لاصقين فالفنانات تيصورو و يعاودو.....!
كانت حلا لابسة غوب نواغ كلاس و شعرها مخلياه كحل تيلمع....بابتسامة جميلة رزينة تتجاوب على اسئلة الصحافة و خاصة صحافة جهة طنجة تطوان لي خدامين معاها على الجهد و كل مرة دايىرين ليها فيديو و اشهار و تيكبرو بيها ....
_ قصر الملكة ههه وخا هو ماشي قصر بمعنى الكلمة ههه ( الصحفي تيضحك ) و لكن لي تتدخل ليه تتولي ملكة و الملكة ماتتعيش الا فقصر دونك من هنا جا الاسم ....بصفتي مراة و ام حاسة بالامهات و النساء الموظفات او غير الموظفات تتبغي هكا تريحي راسك و تتعلمي حوايج جداد و مع الوليدات تيصعاب الحال انا فكرت ليهم باغية ليهم هو يكونو ملكات سيدات راسهم عطي وقت لراسك و وليداتك معاك.....
داز الحفل رائع بين احبابها و اخواتها و بنتها فاتن تتمشى على رجليها تتضحك زوينة و نسخة طبق الاصل على حلا حلوة و حنينة تتشبه ليها من برا فقط اما طباعها غير ....تصورات معاها و حطاتها فانستاغرام....كاتبة عليها...
"كنزي" ....
عاماين بالضبط داز على الفراق !
كانت جالسة فالبيرو ديالها من شوفة لولة تتحس بيها مالكة المكان و مايليق ليها غي داك البلاصة....!!
دخلات عندها المساعدة ديالها تتبلع فريقها لابسة الابيض و الزهري لون مفروض على جميع العاملات لي هنا....
_ مدام حلا المربيات مدابزين عتقي عفاك ماعرفتش كيفاش نتصرف....
تبعاتها حلاا بالزربة تتخلف بداك الطالون العالي لقات جوج مربيات قدام طواليط في جناح الاطفال مرايشين و غواتهم مسموع مدابزين على باج انستاغرام عندهم مشروكة فايتة 100 الف تيحطو فيها الوصفات و يدخلو الربح و دابا طلعات ليهم القرينة وسط الخدمة غي شافو حلا شدو فمهم و بداو كيتفتفو....
حلا ( بعصبية ) الهدرة مع الكونطابل شوفو حسابكم.....
نقزات وحدة تتبكي...
_ سمحليا امدام حلا راه ماعالم بيا غي الله والله لا بقات تعاودات اخر مرة....
حلا ( بصرامة ) الكونطرا باقي ليها دو موا و تسالي ماغاديش تعاود ...مانخاطرش بسمعة الدار و تمارة عااام على تبرهيشكم و قلة وعيكم واش حاسبين راسكم فالحمام....مافهمتش تنا شنو هاد قلة الادب و الاستهتار...و تنقيص مني و ليسباس لي خدامين فيها.....الا سمعات كليانة وحدة غواااتكم وحدة صافي غيهربو جوج و ربعة و خمسة و يتبعوهم عشرين و لمن نبقاو هنا ؟نجلسو انا و نتوما و نتعاودو و نغزلو الكلام الحديييث.....
بغاو يهدرو قاطعاتهم بصرامة...
_ اخر انداااار ....
خلاتهم تيرمشو و يشوفو فبعضهم و خرجات بالزربة ...
_مريم تبعيني لاصال دو كومينيكاسيو مدام لطيفة كاينة ؟
مريم ( غادية وراها ) وي مدام حلااا و كوتش لمياء حتى هي و الكونطرا واجدة ...مدام حلااا نسييت...
حلا : شنو ؟؟
مريم ( وجهها صفارت بالخلعة ) اتصلت مدام مريم ...
حلا ( باستفسار ) شكون هادي ؟
مريم ( تتقلب فالوراق كثرة الاسماء تنساو ليها ) اه اخت المغنية **** عندها 390 الف متابع فانستا و قناة فاليوتوب و متابعينبها كثار من مدينة طنجة.....هادشي لي لقيت....
حلا ( بتفكير ) ...تتبغي تنقص ليها خمسين فالمية باش تكتب بزيقة وحدة فالسطوري اما فيديو تتطلب ليك الفابور السينيورا.....قوليها ماكاينش كلشي عامر و الاشتراك حتى الشهر الجاي....
مريم : و الا ناضت تتدوي وتخرج العيب فالستوريات ....
حلا : نبقى مسالية انا لوحدة حمقة.....دوزناها ليها مرة وخا جوج اوك ماتيعيقش و تتاخد ديبخودوي بالزز ... حمام او شوكولا 1000 درهم هي دارتو بااااطل و كملات سارقة ليا عاين باين....شوفي غيرها نبدلو شوية ....
داز نص نهار د الخدمة من بلاصة لبلاصة ترخي الطرح للكليان و تزير مع العاملات مرة مرة....ولات معاشرة مع طبقة الفنانين و المغنيات و تتحضر لحفالاتهمو مناسباتهم و اليوم كانت معروضة لعرس اخت مغنية معروفة تزوجات من رجل اعمال مغربي حضرات و دغيا دارت بلاصتها وسطهم و داز صحاب و كليانات اخرين ...و حصلت على اعجاب سياسي كان بين الحاضرين و مالقى منها حتى استجابة و قلب وجهو معفر ... سيرة الرجال كرهاتهم و ماعندها حتى نية لا فالزواج لا فالتصاحيب طلعو ليها فالراس و ماعندها كانة ولا خاطر ليهم....!
دخلات للفيلا و فاتن شادة فيديها تتضحك و تخربق فالهدرة ...
_ اكوولنوووو عععع...مااامي ...
طيحات ليها الصاك و تهنات هزاتو تتضحك...
_ شنووو والله مافهمتك امامي...
خشات صبعها ففمها صاعرة ...
_ ععع كوللااو....
حلا ( حبسات ضحكتها ) مالك شنو ...
عاودات و عاودات و حلا مافهمت منها والو كل مرة معوجة ليها الهدرة و لسانها مامسرحش....! جلسات فالصالون البلدي لابسة البلدي حتى هي و ملبسة بنتها بحالها بالبلغية صغيورة و جلابة قد سنها و الشعيورات كحلين شعرها تيطوال تيشبهوه لشعر نسيم ....تحط كسكسو ديال حميدة تيشهيو و تجمعو عليه كاملين ....
_ حلا : الله يعطيك الصحة الالة حميدة....
حميدة : بصحتكم و راحتكم....!
نسيم حتى هي الراحة باينة فوجهها و معاهم خلود و حنان و رضا هاد الاخير لي مخشي مع شغلو عندو قهوة و باتيسري قاضي بيها الغرض من داك النهار ماعاود تخاصم هو و حلا بحال البرانين هذا ماتيهدر مع لاخر....!! تغداو و تكلفتت المساعدة جمعات الطبلة و تهزو الرجال بحالهم خارجين حتى نقزات خلود ناطقة
_ غدا هابط للمغرب ياك غدا ستة فالشهر ؟ غياخد البنت من الفيلا و لا غتلاقاو فشي بلاصة ؟
حلا ملي رمى عليها الطلاق ماعاوداتش شافت كمارتو ولا شافها تيجي ياخد البنت من الفيلا....هزاات حاجب فخلود و ردت...
_ علاش مولفة نتلاقا معاه انا ؟ بنتو تيعرف فين يلقاها....
نسيم : نهار تيجي ياخدها هي تتخوي الفيلا كاع و تتقولي يتلاقاو ...
خلود : الله يستر و صافي ماكاين لي بقى فيا قد البنت مسكينة طالعة كتموت على باباها و ماشابعة فيه الشوفة.... والله حتى كتبقى فيا غي هي...شحال مابقى غنسمعوه تزوج و بنتك غتولي عندها مراة باها و تولد ليه ولاد اخرين و ينسى بنتو لولة.....
نسيم عينيها تيتغرغرو بالدموع ملي تتشوف فاتن اما حلا مقصحة قلبها و شادة عليه بمية قفل ماتتدمع ليها العين حتى تيجبدو ليها سيرة بنتها و تعلقها بعبد الصمد ....! شحال من مرة حاولو يدخلو بيناتهم حتى من بعد الطلاق على قبل البنت كبار العائلة و شحال من فقيه حاول الصلح ورفضات تلاقى بيه ولا تجلس فبلاصة جالس فيها هو ...وخا داز عاماين على الطلاق مزال تيحاولو يجمعو بيناتهم لكن الجرج في قلب حلا مزال طري و عمرها تنساه.....!!
عبد الصمد باين عايش الحياة سفر و خدمة و حرية و دخل وقت مابغى و يعاشر شكون مابغى و الراحة مالقاها مع حتى وحدة هربات عليه الراحة بالمعنى الحرفي ....قرب يطل للاربعين و كانت عندو مراة بلارة و بنت تفتن كثار من مها بالزين و الحلاوة و ضيع كلشي مابقات لا مراة لا بنت تحت جناحو دايمة.....لاهو ولا هي مرتاحين وخا كل واحد مغرق راسو فعالمو الخاص الراحة هرباااات عليهم بجوج محفورة ليه فالدماااغ و مشات ليه مع الدم بقات بحال الحسرة فقلبو تتشوي من وحدة لوحدة و مالقاش راحتو ...و هي الشمتة مطبوعة ليها فالقلب و الخيانة ماقدراتش تبرد وخا عاماين فراق....!!
رجال الدولة بشلاغهم و هلكهم الفراق و الحنين ...تيقولك مشاكل الحب و الغرام غي حكاوي النساء.....و السلاطين حطو سيوفهم لارض مستسلمين والدبحة نازفة من صدورهم بسباب الغرام و فراق الحبيب....!! ماتيستخف بالحب غا المحروم عمرو جرب ولا قاس ولا غمس و غطس فبحرو.....غا بني ادم عندو قلب و مشاعر يكون حجرة وقاصح تيهزو الحب و يسكنو الغرام ....! وقيتة الخدمة و مشاكل الخدمة هاهو غارق فيها ماعندو عقل لشي حاجة اخرى ملي تيحط الراس بالليل تيطوال عليه يموووت و ينساها و ماقدرش ماعرف شمن تعويدة ولا سحر سحراتو بيه ولا تيسمي حالتو سحر....!
طاوي يديه فوق راسو ناعس فالصالون و التلفاز مشعول....مغمض عينيه وودنيه مع الغادي و الجاي....حتى جلسات فوق راسو عيشة...
_ طالعة ليك السخانة اعبد الصمد...خصك شي حاجة نجيبالك المرضي....
عبد الصمد ( بحرقة و لاول غيخرجها على فمو طيلة هاد السنين ) باغي الراحة....و مالقيتهاش مع بنت المراة اخرى من غيرها ... ولدك الالة يمة سكناتو بنت عبد الله ....
عيشة ( بدهشة ) حلفات و عاودات ماراجعاشي مابغاتشي عينا معاها كل مناسبة ها حنايا معاها و انا صافي مابقيتشي نزيد معاها هدرة اخرى مابغاتشي لهلا عطا الله بنات ناس حسن منا....
عبد الصمد ( طاوي يديه فوق عيينيه مدكدك ) البلية اعيشة مالقينا لراسنا خاطر....مابغيت حسن منها باغيها هي بنت عبد الله....
عيشة ( عقدات حجبانها بعجب ) لاحولا ولاقوة الا بالله.....
صفاء كانت فالكوزينة سلتات خارجة بحالها مصدومة كثار من عيشة....! عبد الصمد حاط الراس هلكو الفراق ......
كل نهار سيرة الزواج تتجبد ليها من طرف حميدة و عبد الله.....كل فرصة تتجيهم تينغزوها و ينكدو عليها راحتها...
حميدة ( باصرار) و علاااش تزوج شنو ناقصك شنو....البنت هاهي معايا مرة معاك مرة مع باها...
حلا ( نقطة ضعفها بنتها ) و علاااش اماما ...ماحرامش نضيع بنتي هاد الضيعة بنت صغيرة كل مرة فين ناعسة و فين متلفة....! ترضاي لبنتي هاد العيشة....وخا نعرف نموت وحدي و مانتزوج نسمح فبنتي و ماباغيا حتى راجل يدخل لحياتي فيها بنتي ....
حميدة ( بحرقة ) انا كنخمم ليك ...راجلك حلفتي ماترجعلو وخا ...و هذاك الرجل لي ميت يتزوج بيك احلا سيد كيبغيك ...بنتك غتكبر و نهار يخيروها تقدر تختار باها عليك نتينا...و عرفتي كيفاش غتكون ديك الوقيتة....فعمرك 47 سنة ولا كثار تختار باها و نتينا شد الحيوط لا ولاد لا راجل حتى انا و باك مانبقاو لك ماضامنين نعيشو حتى لغدا ... كلشي غيتلهى فحياتو و غتبقى بوحدك حتى بنتك غتكبر تزوج و الا كانت مرضية غتجي تشوفك جوج مرات فالسيمانة....
حلا ( خرجو الدموع كيجريو من عينيها ) انا ماباغياش نتزوج والله لا تزوجت كرهت رجاااال كاملين و ماحاملة حتى واحد فيهم كرهتهم و كرهت الزواج ...انا ماعايشة لحد غير فاتن تقطعت عليها و نعاود نتقطع و هانية عندي.....الرجال و الحب ولاد الحرام ماعندي ماندير بيهم ماباغياااااااااش.....
قالت لي عندها و طلعات لبيتها شادة الباب بالجهد مخلية حميدة هازة ليها الهم و تتدعي معاها فكل صلاة....! شوية لقاتها مهبطة بنتها و موجدة ليها حوايجها و عينينها باينين باكين...
_ غيجي باها يديها...انا خارجة...
خلاتها ليها و خرجات لخدمتها....! بقات فاتن مع حميدة تتملي عينيها بيها ...
_ سبحان الله غي حلا منزلة....
فاتن ( تتبوس فيها بشقاوة) لالة نونو بابي....
حميدة : يخلي ليا لالة شحال حلوة....تشوفي بابي توحشتيه....
هزات راسها بالايجاب فرحانة و غي جا عبد الصمد خرجاتها ليه و طارت لعندو طايرة تتضحك بالجهد ملي هزها للسماء و نزلها تيبوس فيها...وهي تتغوت...
_ باللااا...بااااباااا....
باسها فخدها بخشونة ...
_ خوافة مع راسك .... نشوفو لالة عيشة توحشتيها البحرية ...
فاتن ( تتلعب فالسنسلة فعقلو و تبسم نفس حركات حلا ) ايسة ابابا....
عبد الصمد( مكمش حجبانو و عينيه مبسمين فيها ( : عيشة احلا عيشة....
فاتن : ايشة....و ميدا ...( عيشة و حميدة )
دوز معاها نص نهار برعها و فششها مزيان وهي تتموت على الفشوش ديالو داير ليها خاطرها تتضحك حتى تيتغمضو عينيها مبتسمة ابتسامة حلوة مع كل الفشوش و الدلال و فرحتها معاه ناضت تتبكي ليه مابغات تحرك شادة فدبدوبها مزيرة عليه و مدلية شفايفها تتبكي باغية ماماها ..
_ مااااامي.....!
مد ليها يديه مستغرب من حركاتها العنيدة ..
_ يلاه نمشيوو....
والو واش بغات تعطيه الخاطر ظلات مزيرة على دبدوبها تتبكي و فمها غي مامي...
هزها عندو بلا خاطرها حتى ناضت تتجبد و تغوت باغية ينزلها حيت هزها وهي ماباغياش تتمشي غي بالخاطر و الفشوش و الدلال رجع حطها عاد سكتات و الدمعة فالتة ليها من رموشها مدلية شفايفها...ربع يديه حاضي معاها بعينيه المظلمة غادية بديك المشية و قزيبتها تتعوج جارة دبدبوبها وراها مجرجر فالارض باغية تمشي لراسها و مايشد فيها حد غضبانة عليه حيت هزها بزز.....
مسح وجهو بيديه و تبعها فين مايقرب منها تتغوت و تصعر...
_ عععع ...
عبد الصمد ( معلي حاجبو ) و الله يسامح صايي مانعاودوش....
والو واش بغات ترضى ليه...حتى هزها بزز و طلقاتها لغوتة تتبكي و تشهق و تجرو من السنسلة ليىفعقنو....شد صبيعاتها الصغار تيبوس فيهم حتى ضرباتو بالغفلة لفمو و هرب وجهو مغوبش...
_ مجعورة بحال يماك....
مرة هاهي ناعسة على صدرو تتمخشش فيه بحال المشة و تفرنس معرية دوك السنان و غي يعصبها ولا يدير شي حاجة بلا خاطرها تتقلب عليه و تخسر ليها الكانة تتبكي و تصعر و تغوت حتى كلشي تيسمعها تقلبات عليه قلبة وحدة....!غي جلسو ياكلو فطمعم ايطالي ناضت تاني تتقلب على ماماها مدلية شفايفها بحزن....
كانت حلا فالبيرو ديالها محيدة فيسطا و لابسة شوميز درعانها عريانين قصيرة و بنطلون مزير على فخاضها رافعة شعرها بتسريحة مهدبة انيقة و حلقات ذهبية صغيرة فودنيها...
رن التليفون حداها وهزاتو ..
_ وي ....
مريم ( تتضحك ) فاتن داخلة لعندك امدام حلا....
تبسمات حلا ابتسامة واسعة و هزات عينيها فالباب حساب ليها عبد الصمد حط فاتن فالفيلا و جابتها حميدة.....حتى طل عليها عبد الصمد بنفسو ماكانتش متوقعة عينيها غتلاقاا مع عينيه القاسية في لقاء غير متوقع صدمها ماكانتش مجهزة راسها لي لقاء بلا موعد ...شافت فبنتها بالزربة تتفليها بعينيها كانت بخير و سلامة عاد هبطات عينيها المصدومة منو و لبسات عليها ساترة مفاتينها البارزة لبساتها بالزربة عاد ناضت ببرود مغلف ملامحها باتقان و صوتها خرج بصعوبة....
_ وقع شي حاجة مع فاتن ؟
عبد الصمد ( تيشوف فيها بنظرات مظلمو ) لا....
نقزات فاتن لعندها تتعلق فيها حتى هزاتها عندها تتضحك و رجعات شافت فعبد الصمد تتعاملو كانه رجل غريب تعامل رسمي ...جات تقوليه جلس ..لقاات سي السيد جالس بلا اذن او طلب رجل مايليقش ليه التعامل الحضاري و اللبق و ماستناهاش تعرض عليه ...
تجاهلاتو حلا و تصرفات عادي ماشي من مصلحتها تنوض العداوة بينااتهم .. باست خدود فاتن بحنية و رقة وهي تتزيد تلوى و تفشش عليها بحال المشة حافظة بنتها و فاهماها تتشبه ليها فهاد الصفة و عارفة ليها الكود ديالها ...تكات فاتن على صدر حلا تتشوف فعبد الصمد و ترجع تخبى فمها...و عين عبد الصمد على حلا تبسيمة استهزاء مخلطة مع الفقصة فالتة منو من اللحضة لي سترات مفاتينها من عينيه.... خرج صوتها هادي بارد...
_ واش كانت تتبكي ؟
عبد الصمد : نوو بغاتك ...
حلا ( بحدية ) ماباغياش تطلع مجننة و معصبة ملي تتعاند معاها على شي حاجة هي ماباغياهاش تتعصب ...الضد معاها ماينفع بوالو ...
تيسرح بيديه على البيرو و يدور عينيه على المكان ناطق بالثقالة....
_ شكون ياسين ؟
نظرة خوف و قلق فعينيها ولو تتغلفها بالثقة المهتزة...ياسين هو السيد لي بغى يتزوج و صديق عبد الله و ختو كليانة عندها ....ماتتخافش منو على راسها تتخاف يخدم تخلويضو و يشوه ليها السمعة و البنت طير من يديها تتخاف يخدم معاها القوة و الضد و عارفة راسها ماتغلبوش الا دارها فعقلو حيت عاشراات ناس و سمعات قصص كثااار ....حافظات على هدوئها و ردت...
_ مكنعرفوش ...
عبد الصمد ( هز راسو ببطىء) مم...ردي بالك ماباغي حتى ولد المراة يحط يديه على البحرية ديالي...
حلا ( الصبر تسالى ليها معاه ) هاديك بنتي غنفكر ليها و ندير لي فيه مصلحتها مني لراسي .....
شاف فيها بنظرة نارية و قابلاتو بنظرة حارة كثار من ديالو ...مادواش ماجاوبهاش و حتى هي حافظات على هدوئها فحضورو كثار من الجهد ماعندها رغبة ضربو ولا تعضو ولا تلومو ...باغياه غي يحيد من قدامها و تنفس براحتها حاسة براسها مزيرة و عينيها سخنو عليها....
_ الا ساليتي هدرتك يمكن ليك تخرج مامسالياش للنقاش موسيو البحري....
تهز واقف يد خاشيها فالجيب و اليد الاخرى تيدورها على البيرو حتى قرب تيطل من السرجم حداها على الجردة حاجب الشمس ..
_ هدرتي ماليها نهاية سينيورا....
حلا ( شدات راسها تعصبات ) خرج بحالك اعبد الصمد ....
تحرك من بلاصتو عند بالها تهنات و غيشد طريق الباب....لكن كان العكس...قرب منها مطول يديه لشعرها تزيرات و بعدات وجهها غطرطق...
_ شنو باغي لاش جاي ؟ فهمني شنو كتستنى مني شنو باغي ...
فاتن ( تتجر شعر شعر تتضحك ) كيولا مامي....
تحنى باس وجه فاتن فحضنها و ريحتها طلعات ليه مع جيوب نيفو هز عينيه فحلا فداك القرب ...قلبات وجهها منو بغضب والصبر تسالا ملي نزلات فاتن من فوق رجليها و سمحت لعبد الصمد يحاصر حلا مع الكرسي تيشوف فيها بالثقالة و عينيها كيغليو بالفقصة....
_ باغي تخرح بحالك الشوهة ؟ ماعندكش الكلمة و فين عمرها كانت عندك قلت ليك ماباغياش نشوف وجهك وجهك ماحاملاش نشوفو ...قلت راه عندك الكلمة و وفيتي بيها ....لاااش جاييي دابا شنو باغي من عندي ...
نيفو شوية و يتحط على بشرة وجهها الصافية و يديه غلبوه و تحطو على خصرها بقبضة متملكة خلاتها غتحماااق ماباغياش الشوهة وحلات و عقلها تيضرب الحساب للقدام كانت مرتاحة شوية ملي كان غابر تهنات من مواجهتو قالت عطاها التيساع و ريحها وخا الراحة عمرها عرفاتها تتفكر غوتات و خرجوه السكيريتي و دار ليها شي شوهة هنا سمعة القصر و سمعتها هي غتهز و يتحلف فيها و يعاود يديرها فعقلو و يمرصها وماعندها جهد ليه.....نيفو تيتسارا على بشرتها تتدفع فيه ونظرتها فعينيه حارة بحال العافية...
_ اخر مرة غنسولك شنو باغي ...
عبد الصمد : باغيك نتي ..
حلا ( بحسرة ) شنو عندك فداك العقل كيفاش كتفكر ! مافهمت والو ...تتقول هدرة و تتغبر و ترجع شنو باغي افلان باغيك نتي ...
فتناتو بخط الايلاينر الاسود مرسوم باتقان ...
_ سي باغيك نتي ...
حلا : على حسب نتا شنو باغي ؟ بالخاطر ولا بزز....بخاطري ما تحلم بيها حتى ليلة ....
عبد الصمد ( حط جبهتو على ديالها حاط سلاحو ) حلمنا بيها جوج ليالي ...
حلا ( ماتيقات كلمة وحدة منو ) بغيتي نعاود نحلف ؟ عمرني نرجع ليك بخاطري و ماعمرني نتيق بيك ...حيت نتا عايش وسط الدياب و انا هادي فهمهتا معطلة...الواحد من خدمتو تعرف شخصيتو كي دايرة....نتا ماعندك ضمير ضميرك مانقولش ميت فيك شوية النور على خوتك فالحرفة ( بحرقة ) ضميرك سخفان ....
فاتن واقفة حدا البيرو هازة الستيلو تترسم فيديها و مرة تتهز عينيها فيهم ببرائة....!
تيشوف فيها شوفات مظلمة محاصرها بالعين و باليد بحال الى داخلين فحرب العيون و كانت هي الخاسرة ملي هربات عينيها بغضب وصبيعاتها الناعمين تحطو على يديه فوق خصرها تتبعدو منها ...
_ بعد منييي....
عبد الصمد ( حك نيفو فخدودها ببطىء ) راسك حجرة....
تتهرب وجهها منو خايفة يتمادا كثار ...فالاخير تيبقى واحد ماتيفرق بين الحلال و الحرام ...كانت مراتو وخا طلقها تيحسبها من حقو يبوسها ولا ينعسها تما و ملي شافها تسترات منو جاتو ضحكة حبلى بالاستتهزاء ،
_ حلا ( بغضب ) لقيتي جوابي ؟ شنو مزال تتستنى مني ....بعد منيييبي راسي حجرة ولا جمرة عبد الصمد واش عندك عقل ! تتفهم عندك ودنين تتسمع....نتهجى ليك؟ بعد مني.....
عبد الصمد ( تيحوم على شفايفها ) بغيتي نبعد غنبعد ... عيني معاك دايزة بالله و نشوف شي ولد النملة زهقو عليه رجليه حداك غنخدمو معاك شي حوايج وبربي ماباغي نخدمهم التحف ....
حلا ( صعرات ) ماكرهتش ندفل وسط كمارتك ....
ضحك ضحكة ثقيلة بلا مرح و زاد قرب منها هامس ليها فودنيها بكلام سافل تتعرفو غي هي وهو ...بعد منها بعد ماخلى وجهها احمر بالغضب شوية و طرطق و عينيها كي الجمرة ....هز فاتن تيبوس فيها حتى بكاها ...
_ شعند يماك حتى نتي ...
فاتن ( مدلية شفايفها )كولات بابا....
عبد الصمد تيمسح ليها الدميعات و يشوف فحلا لي قالبة وجهها غتنفاجر ... رجع شاف فبنتو مبسم...
_ شوكولاااتا ! بنت البحري باغية شوكولاتا و الدنيا هانية و ساكتة نووو ....
دقات مريم الباب عاد تقادات حلا و صاوبات شعرها سمحات ليها بالدخول و دخلات تتشوف فعبد الصمد بنص عين ...مدات لحلا الملف المطلوب و نطقات
_ الا كانت ناقصة شي حاجة قولها لي.....
حلا ( عقلها مشتت ) غنشوفو من بعد من بعد امريم ...
مريم عينيها كيدورو معلوم شحال وهي غتموت بالفضول تشوف طليقها كي داير كانو تيخرجو عليها شلا اشاعات و هدرة ها مزوحة سعودي ها قطري ها واحد الشارف اسباني و ها لي تتقول بكل ثقة مزوجة بواحد من عائلة تجار كبار حيت باها تاجر و تيعطي بناتو للتجار.....
تحرك عبد الصمد من بلاصتو تيدور بحرية فالمكان ..حلا حاضية معاه غي يدير ليها شي فرشة حدا مريم زربات عليها تخرج دغيا ...
_ من بعد امريم ....
مريم ( تتدور فعينيها ) اه داكوغ....نتاصل بمدام حجي اليوم ؟
تحرك عبد الصمد من مكانو ببطىء هز تليفونوو خشاه فالجيب داير لحلا تحية بيديه متغطرسة ....
_. آديوس كارينيا .....
فاتن ( عتقات الموقف ) اديوو بابيتو ....
رمات ليه بوسة فالهوا تتضحك حتى هو باس جوج صبعان و صيفطهم ليها مريكل ...
_ليك ولحداك ...سلااام
عيون مريم شبه موسعة و وجه حلا محقون بالحمر غا تتدور فعينبها معصبة غوتات على مريم ..
_ مرييييم قلت ليييك من بعد !!! من بعد !!!! يعني خرجييي.....
مريم : وخا وخا....
خرجات بالزربة تترمش و شدات بلاصتها جالسةو من تما فين ماتحمع مع العاملات و المربيات تيشدو هدرة على حلا و الفضول قتلهم...
_ مريم ( تتقاد العكار فالمراية ) : ماسعودي ماقطري ماشارف شفتو باقي صغير و طويييييل واحد الطولة عمرني شفتها.....وقيلة رجعو لبعضهم ....
المربية ( تتصاوب شدة الفولار مخشعة بالحديث ) و زوين بعدا ؟ باين شي تاجر تيلعب فلوس باها مايزوجش بنتو بواحد عادي....
مريم ( بعفوية ) فلول جاني عادي الصراحة مقبول و صافي من بعد حسيت بيه عندو كاريزما فشكل و من الساعة لي لابس باين السيد تيشتت فالفلوس عرفتي حرش حرش ولكن هي زوينة عليه انا كتحمقني و حتى البنت تتشبه ليها ماخدات منو والو...
المربية : فين شفتيه !
مريم : كنت عندها فالبيرو و كان معاها و ملي كان خارج رمى جوج بوسات وحدة لبنتو ووحدة ليها...و تعصبات و جرات عليا خرجت كنطير....اجي بعدا فين تتعرف باها انا ماتنعرفش عاىلتها تنعرف غي خوتها و ماماها....
المربية : باها دهايبي طلعو هاد سنين الاخيرة طلعة وحدة العرايش كاستي ياخو مرتيل مضيق تطوان قولي غي عبد الله دهايبي تعرفو ....و معاشر مع التجار الكباااار لي فالمغرب عليها حسابلي مزوجة بشي تاجر من معارف باها زواج مصالح .... كنت تنسمع متشديين شوية و الخمار و النقاب و التعدد ملي شفت بناتو بانتلي غي وحدة محجبة صافي....اما جوج اخرين لا و بنتو صغيرة مزوجة بيه تاجر طموبيلات و عندو ولد واحد داير بحال شي اخواني و مراتو محجبة و تتلبس الواسع و الطويل....!
______
حياة التجار تتوسع مع كثرة المعارف و المناسبات و المعارض كل ماكانو عندك معارف فوق المتوقع كون ماكنتي تاجر معروف....الادب و التعامل اللطيف و حسن الكلام و السمعة الطيبة صفات التاجر المثاالي ...قبل مايديرو بلاصتهم فالسوق بالمنتوج الجيد تيسبقو اسمهم و سمعتهم باش فلان ملي يسول على التاجر فلان يقولها فيك مزيانة باش هذا يقولها لهذا حتى تيكبر المجمع ....! و عبد الله حياتو كلها مناسبات تعارف بالكلام الطيب و السمعة الحسنة و تيخلق معارف مع التجار الكبار داكشي تيكون بالتدريج من الصغير للمتوسط للكبار.....و كملات فرحة عبد الله ملي خلق صداقة و عشرة مع عائلة العراقي عائلة تجار كبييرة معروفين بتنوع الثقافات ...حيت ماتتلقاش فيها غي المغربي ! معروفة فديك العائلة كاين الروافا لي هاجرو الريف و خرجو برا المغرب اما شدو طريق تجارة السيارات او الاثاث او العطور و الاعشاب تيجيبهم من الهند و الخليج ....و كل واحد و بمن متزوج... عائلة العراقي تيشمو فيها ريحة الخليج و العراق ...ها لي مزوج بيها من العراق ها لي جايبها من الهند و ها لي مزوجة بتاجر قطري و كاين لي مزوج بيها هولندية و اسبانية و فرنسية مرحب باي ثقافة و اي جنسية عندهم فالعائلة بشرط تكون مسلم بالفطرة او دخلتي للاسلام ...اي ديانة اخرى ممنوع تدخل لعائلتهم ولا تحلم بيها.....العاىلة لي كلشي تيحلم يزوج بناتو ليها ...حيت تتكرم المراة و رجالها حرشين و مثقفين وخا كل واحد و كي كيدوي و غالبة عليهم اللهجة و الثقافة الخليجية....
لالة حميدة كدور بواحد العباية عراقية و الحجاب اسود والساعة فاليد واقفة على الخدم بيديها....
_ ثورية بنتي فين ازهار و فااتن ...
ثورية : فالجردة الالة حميدة.....
حميدة ( بارتباك ) و حلا حلا فين هي ؟بغيت حلا انا تحضر قبل مايوصلو الضياف....
ثورية : راها جات قبيلة مع نسيم و رجعات خرجات هي و ياها ....
تعصبات حميدة و طلع لبها الدم...
_ و شوف الضد مابقى عندي حكام عليها ....
مشات بخطوات رشيقة بداك العباية الراقية تتصوني على حلا مغوبشة...
_ فاين نتينا ! دابا تكون هنايا .. الضياف غيجيو دابا و باك شوية و يدخل ....
حلا : انا فطنجة اماما مشغولة مامسالياش...
حميدة ( تتعوج فمها ) وخا بينك و بين باك ....
قطعات مخلية ليها عبد الله فرصة فودنيها ...و فعلا بعد ساعة ونصف كانت داخلة للفيلا هي و نسيم لابسين البلدي بجوج ....
حلا ( تتضحك ) مالك احميدة غادية جاية مخلوعة.....
حميدة ( تتقاد الشال ) علاه ضياف العراقي ساهلين ؟ سمعت تيهدرو بحال صحاب الخليج ماعرفنا باش نتحاورو معاهم....
نسيم ( ابتسامة منورة وجهها ) شكون هاذو تيعرفهم بابا ولا شنو...
حلا ( مامسوقاش ) و انا فاش محتاجاني ؟؟ انا خرحت داك السوق هادي كثار من عاماين و مابقى عندي غرض بيهم ....و هوما تجارتهم بعيدة على الذهب ؟ و نصهم على برا شنو غرضو بيهم بابا....
حميدة ( تتهز كتافها ) و نتينا ماتعرفشي باك كل مرة عارض على صحابو ...هذا فلان ولد فلان و هذا ماعرفت شكون....خصني الكارني نقيد فيه العائلات و الاسماء و الولاد. باش نعقل عليهم مرة المراة سميتها نجلاء تنعيط ليها نجوى كل مرة مرة محشمة مع شي حد.....مشي لبس عليك بدل هاد الجلابة ....
حلا ( بتعب ) والله مافيا مانشرك الكلام مع شي حد و كانة بنادم مابقاتش عندي طلعو ليا فراسي ....
مشات بزز عليها لبسات عباية نواغ راقية و انيقة و شعرها الاسود مقطع ديكرادي ايفيلي مغدياه و مهلية فيه ساعة يد سامبل و الظفران مصاوبين شادة ففاتن حتى هي بكسوة غوز و الشعر كحل رطب ...تحمعو فاكبر و افخم صالون عند لالة حميدة بالتريتور و الحالة و الخدم لابسين و مقادين ....كانت عائلة محترمة و مثقفة كاين المحجبات و كاينة العكس و كاين لي مابين و بين رامية غي الشال تيزهق فوق الشعر و العباية مفتوحة ...ها السورية لابسة جلابة مغربية ديال الفريع تتحمق بالزين و الصحراوية لابسة ملحفة فخمة و ساعة يد ماركة و معاهم حتى واحد الهندية ماعرفوها هندية حتى قالتها المراة الكبيرة مسرارة تتضحك بلباقة....
_ عروسة ولدي الثاني هندية ...
حميدة ( بكلام لبق حتى هي ) اللهم بارك ، مسلمة ؟
الام : طبعا مسلمة ، نحن مانخالطوش من ديانة ثانية كنتي مسلم او تنوي الاسلام هلا و مرحب بيك....
خلود حتى هي طالقة الكلام تتبسم بمجاملة و تدوز عينيها عليهم.... ماكاينش عندهم الزين بزاف لكن الراس عامر و الثقافه تتقطر منهم تيحكمو على الواحد من عقلو اكثر من شكلو و اصلو....!
حلا ( تتدوي معاها بين سنانها ) اللهم بارك....ناقصهم شي سينغالية مسلمة و تكمل العائلة الشاملة ....
خلود ( حبسات الضحكة ) زوين هكا...غادين بمبدأ خالط قوم غير قومك و انتفع ....
الخدم و رئيستهم ثورية تتجي تلبي الطلبات و تسرق الخبيرات تيجلسو ينممو فالكوزينة....
_ و مازوينيش بزاف ...عندهم الزين ناقص فالعائلة.....
الخادمة : دوك النوع تيشوفو شنو فعقلك ماشي فزينك ...
ثورية ( بفضول ) عندهم الرجال غالبين النساء فالزين شفتوم ملي دخلو مع عبد الله مشاء الله لاحولا ولاقوة الا بالله .شوف الحديد لي كانو راكبين فيه كيفاش عامل .
الخادمة : شفت الله يزيد من خيرهم ، بحال والو عين شي راجل فيهم تلقط زين حلا والله لافلتها .و تمنيت يكون شي راجل فيهم من نصيبها.....
ثورية ( بجهل ) نساواتهم ناقصهم الزين بزاف خصوم يحسنو النسل .
يتبع...
التنقل بين الأجزاء