صفحة القصةقصة زواجي التالي
مؤلف القصةقصص Iman Ouss
فكلوب .. كان گالس بوحدو فبلاصة vip راخي يديه على الفوتوي وحداه شيشة كل مرة كيجي النادل يبدل ليها الجمر .. تلفونو كان كيصوني ويطفا ويرجع يصوني وهو عينيه مفيكسيين فنقطة وحدة وفيديه كاس شراب سيك
صلاح : ( هز تلفون من فوق طبلة كيشوف فميساجات وحواجبو معقودين غزز سنانو فشفايفو ولاح تلفون ) ينعل مكم مكتعرفو ديرو والو
دار راس دشيشة ففمو وخدا منها نفس طويل وفنفس الوقت دوز نمرة دري لي واقف على خدمة فاش مكيكونش هو
صلاح : ( تشد الخط و شير بعينيه لنادل يبدل ليه لكاس لي خوا ونطق بنبرة حادة ) رد لبال لدوك البراهش فرعو لي كري بالميساجات واش انا معنديش شغل نبقا غا حاضي مهم
حنحن طرف تاني ونطق : واخا اشاف غا بغاو يوصلو ليك خبار سلعة لي وصلات بيخير
صلاح : ( رشف من كاسو وحك لحيتو بصبعو الإبهام ) حسب الفلوس مزيان ورد لبال لصغيرة ولكبيرة حضي مع دراري ولا كانت شي حاجة تفاهم معاهم نتا وميصونيش عليا شي قو**واد راسي مفروع يزيدوني هما
قطع عليه بسخط وزگف نص من كاسو ورجع راسو لوراء كيحس براسو كيتكالما تدريجيا .. دوز صباعو على جبهتو ورجع تلفونو كيصوني خلاه كيصوني ويقطع حتى رشقات ليه وهزو غير شاف المتصل عقد حواجبو بالستغراب ودوز ليه الخط
صلاح : ( حط كاس من يديه وتكا بكتفو على فوتوي ) افيين اصاحبي هانيا الوقت
فريد : ( بنبرة مازحة ) ههه ولاهيلا حمد الله وعيطلنا ليك زعما تلاقانا فالمطار كنصوني ليك وماكتجاوبش تلفون صافي حطيتيني فلاليست لاطونط
صلاح : ( ضيق عيونو بشك كيسمع عندو ضجيج وصداع ) مسالي كرك ( وصلو صوتو كيضحك )
فريد : ( بنبرة رجولية ) ههه والله ماشاد فيك
صلاح : وعلم اصاحبي منيمتا نجي عندك
فريد : گلنا نديرو لك مفاجئة زعما ساعة نتا ماشي وجه المفاجئات ياك والو باس بعدا؟ قضية مكالمية ؟
صلاح : ( ناض كيقاد فسروالو وهز كونطاكط فيديه وشير لنادل حط لي فلوس بلا ميحسبهم وخرج كيقهقه بصوت عالي ) وا عواجت من كل جهة مهم لمخزن بعيد عليا هاد ساعة
صلاح : ( تنهد ) وافينك نتا بعدا ؟
صلاح : ( حل طموبيل وديمارا ) شاد واحد القهيوة نتسناك دوز عندي ف**
وقف طموبيل حدا مقهى جنب البحر خرج كيقاد فتيشورت لي لابس ودوز على عنقو بتعب .. دخل وتاجه لطابلة معزولة ومقابلة مع لبحر نيشان كيبان منضر زوين غروب شمس مع الجو لي كان رائع تحرك البرد شوية والهواء كان خفيف حد كونطاكط دطموبيل وطلب قهوة كحلة وبقا شاد تلفون متلف بيه الوقت حتى بان ليه خارج من طموبيل كيدو فعينيه حتى باليه وتاجه عندو نيشان ضاحك ناض صلاح وتصافحو وطبطب ليه فريد على ضهرو
فريد : ( جر كرسي وگلس مفرق رجليه وشاد على مؤخرة راسو بتعب ضاهر ) بربي تا توحشناك و توحشنا لجلسة معاك
صلاح : ( قهقه بخشونة ورشف من كاسو ) هههه نتا لي گالس فسبانيا اصاحبي بحال كاتبها ليك باك !
فريد : ( بتاسم حتى بانو سنانو مرتبين وبيضين ) زعما المغرب لي كاتبو ليا جدي ! اااودي راك صاحبي من صغر عارف القضية مافيها ، تانا هاد ساعة سطت فكولشي ودخلت عييييت اصاحبي
صلاح : ( ضيق فيه عينيه وجبد گارو ) هادي هضرة ناضية ! بلادات الناس تتبقى ديال الناس مهم هو لكرمومة
فريد : ( حرك ليه راسو بالإيجاب و شير لنادل يجيب ليه قرعة لما باردة ) صافي نستاقر إن شاء الله هنا عيينا بالغربة وتوحشنا لبلاد ( هز فيه عينيه بنضرة فشكل ) وناسها
صلاح : حسن ليك ستاقر فالمغرب مكاين ما حسن من بلادك
فريد : ( تكا على لكرسي وشد قرعة لما من نادل شرب نصها وحطها ) كيدايرة بعد واحد الواليدة شوية كي بقات ليها رجليها ويديها
صلاح : ( دوز يديه على لحيتو كيمشطها بيديه ) حمد الله ماشي فحال لول راها مع دوايات وكتجي عندها لبنت لي كادير لها ترويض وكل مرة كنديها عند طبيبة شوية بعدا ماشي فحال لول
فريد : إوا حمد الله.. الله يشافيها ياربي ويطول ليها فالعمر ! ياك قضية هانية
صلاح : ( عقد حجبانو) اش بغيتي يوقع ؟ راه هانية ومعوجة ماتفهم والو فالدنيا..وانا بديت نعيا و الواليدة مروناني صحتها غادة و تتقلال و اختي لي ربيت على يدي كبرت ماعاجبها حال
فريد : ( سرط ريقو بصعوبة ) مالها هدى ؟
صلاح : باغيها واحد فالمخزن
_دام صمت للحظات !! صلاح غير تيتنهد و صاحبو تيلعب فيديه فتلفون فللحظة تقاد فالجلسة و خاطبو
فريد : ( شابك صباعو وشاف فيه بجدية واضحة على ملامحو ) نجيك أودا صلاح نيشان نتا خويا وصاحبي وفيك كولشي ماشي عشرة عام ولا عامين كتعرفني مزيان مابيتش نغضرك ( هز حاجبو ) متربيناش على هادشي ( سكت لثواني ) بغيت ندير تا أنا عائلة وجاي على هادشي نتهنا من داك لوسخ لي كنت خدام فيه وندير شي حاجة تنفعني ومنكدبش عليك ! ( عقد حواجبو وتنهد ) حاط لعين على هدى فاش كانت كتقرا فسانكيام وقلنا حتى تكبر شوية وحتى لاكانت غاتزوج غانسيق لخبار و نسبق وبغيت حتى نْكَون راسي ونحيد من داك زبل لي كنت خدام فيه وتما نطلبها من عندك وحكم عليا باش بغيتي وبشروطك و بشروطها ، و طعام لي مشاركين و صحبة لي جامعانا ماشفت فيها شوفة ورا ظهرك ولا قدامك وقلت تايوصل الوقت وهاهو وصل ! انا باغي هدى آخويا صلاح على سنة الله و رسوله
فصباح بكري كيف عادتو خرج من دار نيشان لبنكة فاش خدام بقا غادي فشانطي دتيزنيت حتى وقف قدام " البنك شعبي " دخل وداز من حدا لكيسيي لول وتاني وتالث حرك ليهم راسو كان حداهم بيرو بابو مفتوح تاع لغيصبونسابل وحداه مكتب دلمودير ..
وقف فبلاصتو فلكيسيي كيقاد لكراڤاط ديالو وأزرار قاميجة گلس فوق لكورسي وبدا خدمتو .. دخلات مراة معروفة عندهم فلابونك من صحاب الجالية مولفة كتجي تخرج ودخل الفلوس تاجهات عند عماد بجلابة بالخزي وكلاكيطة وخلخال فرجليها وداير فيديها صاك صغير او شال على راسها خفيف مبين شعرها كامل ونضاضر فعينيها وجنبها مها
حنان : ( حيدات نضاضر من عينيها ) سلام عماد كيداير صڤا ؟
عماد : ( حيد عينو من لحاسوب ونتابه ليها ) ولاهيلا حمد لله ونتي بيخير
حنان : هانيا هاد ساعة شكرا بزاف على داك شيك لي عيطتي لي كنت غانخلص عليه الخطية نتا عارف لكريدي تاع دار ( تأفأفات ) لمشاكل غا تابعيني ( شيرات جيهة مها ) جبت معايا مي تفتح حساب وكل شهر راه غاتولي تجي تعطيك شيك انا غانسنيه ليها ونتا تعمر لها شنو نخرج لها
عماد : اهاه هي لولة سيرو گلسو رتاحو نحل ليك حساب ونقولها ليك
گلسو حتى فتح ليهم لحساب ورجعات عندو حنان كتأكد على هضرتها
حنان : لواليدة راه مقارياش رد لبال عفاك ولا كاينة شي حاجة علمني
عماد : لا كوني هانية
شكراتو وهو رجع مكمل خدمتو حتى سالا وخرج فرحان مشا تقدا شي خضرة وشي تخربيق من لحانوت ورجع لدار وفيديه ميكات حل لباب ومشا نيشان لكوزينة وحطهم .. لقاها عند بوطاجي كتغسل لماعن
عماد : ( حيد كراڤاط عيان ) هاهي شي خضرة نصبي شي طاجين وراه جبت 10 دراهم دجاج ديريها
حركات ليه راسها بالإيجاب كتشوف فديك التقضية فرحات فداخلها .. داخل فرحان على غير عادتو وجايب معاه تقضية فيديه مداخلش خاوي بدات تنقي فالخضرة وتقطعها وحطات كولشي فثلاجة ولباقي تحت بوطاجير ستفاتو وهو مشا بدل حوايجو وگلص فصالة كيتفرج مابين متسالي وتحط ليهم يتعشاو .. وهي بقات فلكوزينة مقابلة طاجين وقلات لفريت وصايبات عصير دليمون وحطات كولشي فوق لميدة وگلسات حداه كيتعشاو
عماد : ( كيتبنن ) بصحتك بنين
بسمة : ( بصوت هادئ كتشرب من العاصير ) الله يعطيك صحة ( شافت جيهة تلفازة ) لبارابور خسر مابقاش مزيان كيف لول
عماد : ( قطع الخبز وحط جيهتها نص خبزة ) إن شاء الله نجيب واحد جديد راه الأمور بدات كتقاد وكنقص عليا الكريديات إن شاء الله نقرب نساليهم راه رجعو لشي برطمة فحال لولة لي كنا فيها
بسمة : ( حركات ليه راسها بنفي ) معنديش مشكل نسكن حتى فدار فيها بيت وكوزينة المهم الهنا وراحة البال ميجي يدق عليا حد ونعيش بيخير فحال ناس حتى فاش كدخل معصب مكتقوليش مالك ولا شنو بيك
عماد : كنت معصب مع الكريديات كل مرة خارج لي بلان من جيه
بسمة : وعلاش متقوليش لي ضرك كريديات كتشدهم ومتقولها لي
عماد : ( هز عينو فيها كيضحك ) وهانا قلتها ليك گاع مالك غاتخلصيهم معايا حيدي داكشي من بالك لمهم دابا حمد الله ماشي فحال قبل أمور غاديا وكتقاد
بسمة : حمد الله مزيان الله يسهل عليك دير دار نسكنو فيها ونتهناو گاع حنا من الكرا
عماد : ( طبطب على كتفها ) إن شاء الله علاش لا الله يسهل ياربي
بسمة : أمين
دخل لدار وفيديه تقضية كتيرة مشا حتى لكوزينة لقا رقية كتنصب لعشا ومقابلة لخبز لا يتحرق
صلاح : ( شاف فيها بالستغراب ) السلام عليكم
رقية : عليكم السلام اولدي سير گلس حدا مك نسالي لعشا ونحطو ليكم ونمشي لداري
صلاح : ( دار يديه على لبوطاجي دلكوزينة ونطق بهدوء ) هدى زعما مطيبش هاد لعشا لي شاداك حتى نصاصة ليل
رقية : ( نزلات راسها طالبة سلاك مابغاش تجبد ليهم شي صداع ) إوا لاواه اولدي مسكينة كتقرا يلاه مكافية مع داكشي لي عندها وأصلا بقيت مع مك بالهضرة مجمعين
صلاح : ( حرك راسو بالإيجاب مدايزاش عليه ديك كتقرا عارفها سادة عليها فلبيت ) واخا راني جبت شي تقضية ستفيهم معاك ( شير ليها لواحد جوج ميكات مطرطقين بتقضية ) هادوك ليك ديهم لدارك
رقية : ( شافت فيهم بفرحة ديما مفكرها بتقضية مكاين غير شي كتف دلحاولي ولحوت مشكل ولخضرة نقية وزوينة وديسير .. ) الله يسهل عليك ياربي عدبتي راسك خيرك سابق
حرك ليها راسو بمعنى مكاين حتى عداب عارفها الله يعمرها دار كتهلا فمو وتنقي وتجمع دار من نيتها فحال دارها .. خلاها طفات على لعشا وهو زاد لصالة لقا مو شادة تسبيح فيديها وكتفرج ف فيلم بشلحة فالأمازيغية
صلاح : ( حيد سبرديلة وقرب ليها باس راسها وگلس مدرعها بيد ) بيخير ؟
مبيريكة : ( حطات تسبيح من يديها وطبطات على فخضو ) حمد الله اولدي اللهم لك الحمد نحمدوه ونشكروه
صلاح : ( دوز بيديه على دراعها بحنية ) خاصك شي حاجة نجيبها ليك
مبيريكة : لا اولدي مخاصني والو غاتكون مرتاح نتا وختك الله يجعل البركة
صلاح : ( نزل راسو كيشوف فيديها ) وصل فريد الواليدة ليوم
مبيريكة : كتهضر بصح ؟ ومعلمتينيش قبل نوجدو ليه شي غديوة زوينة ولا يتعشا معانا راه فحال ولدي هداك
صلاح : ( دوز يديه على جبهتو بعياء ) تانا مفراسي والو مصونا ليا حتى نزل من طيارة طلاقينا شربنا قهيوة وزاد فحالو
مبيريكة: ( قدات زيف حياتي على راسها ) ماشي مشكل خليه يرتاح حتى توكان يجي على خاطرو
صلاح : ( شاف فمو و سرح يديه على لمخدة ويد حطها على رجلو ) طلب يد هدى من عندي
مبيريكة : ( رمقاتوو بذهوول ودارت يد على يد ) سبحان الله الخطاب دقة وحدة
دخلات رقية وحطات ليهم لعشا لي كان عبارة على لحوت مشوي او فجهة خرا لحوت مقلي وعواصر ....
رقية : يلاه الله يعان بصحتكم
مبيريكة : لا والله ماتمشي بلا عشا ريحي تعشاي وسيري
رقية : لا غا بصحتكم والله مقادة عليه انا نعيط على هدى تعشا ونمشي
مبيريكة : واخا الله يسهل عليك
مشات دقات على هدى فلبيت وخلاتها كتمشط شعرها تسالي وتخرج ...
صلاح : (كب ليه كاس دلما كيشرب وكيسمع هضرة مو) راك عارفاه مزيان ماشي عاد غانعرفوه دري الله يعمرها دار والأهم غايستاقر فالمغرب ويحيد من الخدمة لي كان فيها غايبني حياتو من جديد صاحبي وكنعرفو
مبيريكة : وصراحة تقال دري الله يعمرها دار ماشفت فيه لعيب سخي وحاجتو مديالوش
صلاح : ( عز عينو فهدى لي دخلات وگلسات مقابلة معاه ) هي نتوكلو على الله
مبيريكة : ( شيرات ليه بعينيها جيهة هدى لي كانت كدور عينيها بيناتهم معارفاش علاياش كيدويو ) الله يدير لي فيها الخير
صلاح : ( كينقي فالحوت وكيشوف فيها بنص عين مبرررررد ) جاو فيك الخطاب الالة هدى
هدى : ( رمقاتو بشوفة ديال منيتك ؟ ونطقات بهدوء ) إنا خطاب
صلاح : ( بلا مقدمات ) فريد بغاك طلب يديك من عندي او وافقت متعاود غا صلاة على نبي
هدى : ( رجعات بلور بصدمة عارفة لهضرة لي خرج من فمو هي لي كاينة معندوش مع المزاح ) مابغيتش نتزوج
صلاح : ( رما الحوت ففمو كيتبنن وشافيها عاقد حجبانو حتى تكمشات جبهتو ) ياك غا لبارح فارعة لينا راسنا بزواج صافي دغيا تقلبتي كي زمان
هدى : ( تسدات ليها شهية من الهضرة لي گال ) عارفني شكون بغيت فريد هو لي منتزوجش بيه
صلاح : ( حراك ليها راسو بواخا ونطق بنبرة مستفزة ) إن شاء الله راه غاتزوجي بيه بقاي تحلمي تماك مقادة فيلم على قدو فدماغك
هدى : ( تغرغرو عينيها بدموع ) مغانتزوجش بشي واحد مابغيتوش راه انا لي غانتزوج انا لي غانعيش معاه ( خرجات ليها شهقة بلا متحس وبدا صوتها كيترعد ) حسو بي ا
صلاح : ( ساس يديه ) بلا منعاود الهضرة لقانون باين لا مخرجة شي قانون من عندك الله وعلم
هدى : ( غطات وجهها بيديها وجها حمر وصدرها كيتهز بالبكية ) ماشي غلطي كون قدرت نبدل لقانون كون بدلتو
صلاح : ( طولها ) كوووون دابا مسحي عليا خناينك وكولشي وتگعدي تنعسي خرجو عليك افلام تركية تضلي مطرطقة عينيك فيهم
هدى : ( بدات تجبد فشعرها بفقصة ) ومغانتزوجش بيه ومغانتزوجش بيه والله مانتزوج
صلاح : ( بنرفزة دغيا تقلب ناض كيشوف فالحالة لي دايرة فراسها ) طيري تنزلي هو لي جا فنصيبك
هدى : ( شدات على قلبها كتبكي ربي لي خلقها ) وما بيتوش مااا بيتووووووووووش وامي ديري شي حاجة وامي بغاو يزوجوني بزز ( ندبات حناكها ) مابيتوش
لقا عليها نضرة اخيرة مخسر سيفتو على لحالة لي دايرة وشاف جيهة مو لي كانت شادة فراسها ملقات متقول عندو صح فكولشي شنو غاتگول باقي ؟ حرك ليها راسو جيهة هدى بمعنى ردي معاها لبال وهدنيها ومشا غسل يديه وطلع نيشان لبيتو
طفات على لبوطة وحطات براد دأتاي وگلسات تفطر دايرة أومليط عليه الفرماج وحكات عليه الكاشير بقات تاكل حتى ضربات المقلة ورجعات لور تگرعات ومسحات فمها غسلات داكشي فاش كلات كتعجبها تبقا لكوزينة نقية غير تشوف شي كاس موسخ تعقد حجبانها وتمشي تغسلو دغيا .. نشفات يديها من لما ناوية تشوف شادير لغدا حتى سمعات صوت طرقات على لباب .. حيدات لگصيصة على عينيها وفتحاتو
بسمة : ( لقاتها سعدية لي داتها تخدم فلڤيلا آخر مرة سلمات عليها بالوجه ورجعات لور ) خبار الخير
سعدية : ( داير يد على جنبها واليد تانية كتنقي بيها سنانها وكتشوف فلغادي وجاي ) كل خير إوا ياختي عقلتي على مول لڤيلا لي خدمنا عندو
بسمة : ( عقدات حجبانها عايفة من سيرتو ) مالو ؟
سعدية : ( تكات على لحيط ) راك شفتي لڤيلا لاااااباس عليه مخاصو حتى خير ولكن عينيه فاالتين كون تشوفي واحد البلارة واخد تحلي فمك فيها ( دورات عينيها وحطات يديها على وجهها ) واخدها قد بنتو باقي صغيرة ولكن لي فيه شي فيه
بسمة : الله يخلصو حلفت باقي دار لي فيها راجل منعتبها واخا يكون مشلل ولا كيديرو لو ليكوش شاد الفراش تيقار مكايناش تيقة فبنادم
سعدية : واخا هكاك راك شديتي 500 درهم درت معاك لمزيان وضبرت ليك فخدمة سيري شوفي لي كيديرو لميناج 50 درهم لا شدوها ميقولوها لحد
بسمة : ( هزات حاجبها فيها ) تادابا لابيتيها ندخل نجيبها ليك باقي مصرفتها لاهم 50 درهم حلال ولا 500 درهم ويطمع فيا شارف
سعدية : نساي عليا هادشي جبت ليك خدمة فواحد لڤيلة ( قاطعاتها قبل ماتكمل )
بسمة : شوفي نگوليك نتي ماشي برانية على خالتي زهرة وهي عارفة كولشي راه فيها مي وبا انا قلة شي لي دارتها ليا وراجل باقي مابغا يهديه الله مقادة اختي على خدمة فشي ڤيلا هادي وتوبة !
سعدية : ( دارت لها حركة بيديها بمعنى غا سمعي ) وفيها غا مراة نجمعو دار دغيا ونجيو
بسمة : ( حركات ليها راسها بلا ) الله ينجيني منوصلش شي ڤيلا باقي واخا نلقا غا مراة فدار فيها بيت او كوزينة وتقولي غسلي لي زربية نعطيك 20 درهم نزطم معاها ونخدم فراحتي ماشي نبقا حاضية مع جنابي لا يجي لي شي واحد ولا يتعدا عليا قابلة اختي بلقليل عيني مكبيراش
سعدية : ( هزات حاجبها فيها ) نتي تعرفي ! يلاه الله يعاون
سدات لباب ودخلات تنصب طاجين حتى تفكرات ديك 500 درهم لي باقي مقاستش .. غطات دغيا على طاجين ونقصات ليه ومشات لاحت عليها جلابة وجمعات شعرها شفنجة مهملة وخشات فصدرها ديك عشرالاف ريال وفبالها دوز لسوق تشري شي سليبات او سوتيامات ليها .. سدات وراها لباب وزادت قطعات شانطي وبقات غادة نيشان غطات وجهها من شمس وسمعات وراها شي حد كيبسبس عقدات حجبانها وزادت فسرعة خطواتها وفنفس الوقت لي وراها زاد فسرعة خطواتو وهو يقرب ليها بقوة الخلعة دارت رجعة لدار مكتشوفش وراها وهو يصحاب ليه فحال الى قالت ليه تبعني ! ولا عجبتيني .. بقا تابعها وكيتبسل عليها حتى شدها فواحد زنيقة مزير على يديها
خنزر فيها فاش شافها كترطا وزاد زير عليها حتى غمضات عينيها بألم .. ونطق بحدة : وغا رصاي تقولي غا ناكلوك بغينا غا نمرة ونتي دايرة لنا فيها معرت شنو رجلين هادوك ولا روايض طموبيل
بسمة : ( نفضات يديها منو راجعة لور ) بعد مني مزوجة
ضحك بإستهزاء وبنبرة مستفزة نطق : ايه معليش طلقي نتزوجوك
بسمة : ( خنزرات فيه عارفاه من نوع لي معندو مايدار لي بانت ليه يوقف عليها عطيني نمرة وببدا يطنز دارت مع طريق ورجع تبعها ) سير شوف ليك ماتقضي
ضحك كيهز فسروالو ولي دازت يغمزها : هاد ساعة عندي غانتي طلقي نمرة بلا زكاير وهضرة مزوجة ونقلب دورة ...
بسمة : ( بخوف ) طلللق مني لانجمع عليك الناس قلى احترام
_وقفها بسيف وملامح لة تبشر بالخير على وجهو من شباب الواي لواي هز يديه بتهديد
: آتزيدي معاياااا وربي كبيييير
لايحة راسها على لمخدة وقدامها طابليط شادة مسلسل تركي وكتبكي معاه وفيديها قرعة زاج عامرة حلويات وكل مرة تهز منها وتخرج عصبيتها فيهم كتجرهم بسنانها حتى يتقطعو و تهز كنينيكس من الباكية تمسح دموعها وتلوحو حدا خووتو الناموسية عامرة سقاطة ومشوارات وهي وسطهم باقي بحوايج لي لبساات ل لافاك مقهورة وكتبكي بحرقة وتلفون فيديها كتشوف شحال ساعة وكتفكر آخر محادثة بينها وبين يوسف .. صونات ليه لبارح وهي كتبكي غير تشد الخط مسحات دموعها وطلباتو يتلاقاو غدا حيت عندها هضرة بغات تقولها ليه عيا معاها تقولو شكاين ولا ينوض يجي عندها ديك ساع .. كتافات انها تقول ليه هضرة ماشي تاع تلفون وغدا ويحن الله...
ناضت حيدات عليها داك البرقع وغسلات وجهها حتى تنفسات مشات لماريوها هزات كسيوة ديال الخيط خفيفة نازلة حتى لتحت بالغوز بيبي وعباية عريضة فنفس لون وفيها عقيق كيبري فليدين لي كانو عراض جهة صدر وختارات معاهم زيف بلون بارد .. لبساتهم ودوزات على وجهها واقي شمس وگلوص خفيف وشوية ماسكارا .. ختارات صبيبيط أنيق بالبيض ولبسات معاه ليبة فنفس لون جلد .. وهزات صاك بيض
حطات تلفون وفلوس فساكها وخرجات من الدار مع أذان العصر علمات مها انها غاتشري شي حاجة خاصاها وترجع .. شدات طاكسي حتى لكافي فين دارو يتلاقاو ونزلات وهي كتنفس بتوتر وتفرك فيديها .. تمشات بخطوات مترددة دورات عينيها فالمكان وبان ليها گالس فطابلة مقابلة مع شانطي توجهات لعندو ولقات سلام من بعيد وگلسات
يوسف : ( حيد نضاضر من عينيه وبتاسم ) هانيا ؟ شوشتيني لبارح ( شير لنادل حتى جا عندهم ) شنو تاخدي
هدى : ( بابتسامة صفرة ) كاس دلما صافي
يوسف : ( شاف فيها بالستغراب وشار لنادل بعينيه يجيب لها لي بغات ) مالك ؟ بنتي ليا صفرة
هدى : لا والو حمد لله ( حط ليها نادل كاس دلما ونزلات عليه حاسة بشحفة وحلقها دارها ) بغيت ندوي معاك فموضوع لخطوبة
يوسف : ( بالبتسامة مازحة ) صااااافي ؟ خلعتيني قلت الله وعلم شنو طاري هادي مالها ياك ماغاتفسخ كولشي قبل منبداو
هدى : ( بالبتسامة مريرة ) يوسف حنا مامكتابينش لبعضياتنا
يوسف : ( هز عينو فيها بتفاجئ ونطق بصوت متقطع ) ك يفاس مف همتش !!!
هدى : ( حطات يديها فوق طبلة وشابكاتهم ونطقات بجدية ) ميمكنش نتزوجو نتا خدام فجوندارم ( بحرقة ) وخويا مدوز الحبس غايتدفع ضوسي ويترفض فلبلاصة
يوسف : ( دوز يديه على شعرو بتفكير ) ضروري غايكون شي حل غانشوفو شنو نديرو حتى يتقبل ضوسي
هدى : ( حركات راسها بلا وبصوت منغنغ بلبكا نطقات ) معدنا منديرو هادشي لي عطا الله الله يسهل عليك اخويا ( خرج عينو فيها ) والله يسهل عليك بشي بنت ناس حسن مني
يوسف : ( رمقها بحزن ) دغيا وليت خوك ؟ الالة انا مابغيتش شي بنت ناس بغيتك نتي ( حط يدو على يدها مزير عليهم ) نتي معامن باغي نكمل حياتي نتي لبنت لي شفتها مراة ليا ودخلات لهاد القلب ( ضرب على صدرو بحرقة )
هدى : ( كتحاول تسلت يديها منو وهو مزير عليهم ونزلات راسها ودموع كيطيحو على فخاضها ) تقبل هضرتي كيما تقبلتها انا تا انا فحالك كنت مراضياش ! نتيق ولكن شحال قدني نكدب الواقع معندي منزيد نقول ليك من غير الله يسهل عليك بشي بنت ناس ( زير على يديها فمحاولة انو يوقفها متكملش وهي غير مزادت كتبكي وتهزات بتنخصيصة خرجات من القلب ) يوسف الله يرحم ليك الواليدين مديرش فيا هكا صافي انا غانمشي ( دورات عينيها فلكافي مكانتش عامرة بزاف وطبالي مباااعدين لكالم وبنادم واخد راحتو وغير ليكوبل لي فيه )
يوسف : ( دوز بصبعو الإبهام على يديها بحنان ونطق بنبرة متفائلة ) مسحي دموعك راه مغانتفارقوش غاتهناي وخا نعرف نهزك ونهرب بيك ( بنبرة مازحة كيحاول يلطف الجو ) نشفرك من داركم فنصاصة ليل
هدى : ( خرجات ليها ضحكة وشافت فيه بحزن وحركات راسها بلا ونطقات بحرقة وكلامها كتحس بيه كيجرحها هي لولة ) نساني ايوسف فحال عمري كنت ( ترعدو شفايفها وعيونها حمرين ) وعيش حياتك
يلاه كان باغي ينطق او وقف عليهم شخص مكيعرفوش فارق ليهم يديهم بجهد ورمقو بنضرة حادة زعزعاتو عينيه كتبان فيهم كمية غضب كبيييرة ويديه مزير عليهم حتى تطراساو فيها العروق و تيحس بقلبو مخطوف و صوتو هارب
: هادي هي ديالك اهدى؟!
بلعات ريقها من صوت لي سمعات وهزات فيه عينيها المدمعين بذعر حضنات يديها ونزلات راسها .. وهو بقاو عينيه تابتين عليها كيشوف الحالة لي فيها او وجهها لي رجع حمر او ماسكارا لي ساحت عض لسانو لداخل ودور عينيه فيوسف
فريد : ( بلا كلمة بلا جوج شنق عليه تا تهز من فوق لكرسي وهدى شهقات من شدة لي دار ليه ) شكون نتا بسلامة حتى تخليها تبكي آش بينك وبينها
يوسف : ( حط يديه على يدو كيحاول يفكها ونطق بهدوء كيصحابو خوها ) متفهمش غلط عارفك خوها ومتبغيش تشوف ختك مع شي واحد گالسين تا أنا راجل ومنبغيش هاد المنضر ولكن راه داوي فيها وجيت تالدارهم وناوي المعقول
فريد : ( غزز سنانو فشفايفو كيحس بعرق كيضرب فراسو محملش يشوفهم فديك الوضعية حس بحال لا طعناتو فقلبو .. زاد زير على تيشورت لي كان لابس حتى قطعو ليه من جهة وهي تنوض هدى كتفك فيهم وتبكي .. حطات يديها على دراعو ودور وجهو ليها رامقها بنضرة زعزعاتها وحيدات دغيا يديها وفلبلاصة دخل فيوسف براسو خلا دم كيشرشر من نيفو ) هادي تاع تحط يديك على مراتي ( جرو بيد وحدة وخشا ليه وجهو فطبلة .. ناس تخلعو وبداو يغوتو أغلبية خرج ولي مسؤولين على لكافي تدخلو كيحاولو يفكوهم ) وهادي تاع دموع لي نزلو من عينيها ( دفع واحد جا كيجر فيه ودار عندهم صاعر ) يمسني شي ق*واد غانخلط لخرا كامل
يوسف : ( نطق بإنكسار وهو شاد فنيفو كيحاول يحبس دم ونضراتو على هدى بصدمة نسا دق لي عطاه كتبان ليه غير هي ديك ساع ) جايا كتكذبي عليا وطلقي فدموع ( شاف فيها بخيبة أمل نضرة فشلاتها ورجعات غير كتبكي وتحرك ليه راسها بلا ) اجي عندي وقولي ليا مابغيتكش بعد مني لقيت ماحسن منك ماشي طلقي عليا فدموع تماسيح هادشي لي نستاهل عندك كون غير كنت شي ولد ( غوت صاعر ) القح*بة لي نضحك عليك ونخليك ماشي جاي تا لداركم مع مي وختي ( ضرب فصدرو بجهد وشاداه شمتة حاس بيها شمتاتو وكتلعب ورا ضهرو ومهامهاش ) ولكن نستاهل انا لي داير معاك نية وها باش جازيتيني كون غير تجي تصارحيني ميبقاش فيا الحال
هدى : ( شادة فقلبها لي كيضرب بقوة ونطقات بصوت ضعيف ) والله مادرت شي حاجة متفهمنيش غلط ( غطات وجهها بيديها ) بغاو يزوجوني بزز انا مابغيتش
يوسف : ( صفق بيدو كيشوف فيها منباهر ) بغاڤو تستاحقي الأوسكار على هاد تمثيل ( خسر سيفتو فيها مابقاش حامل يشوف فوجهها ) سيري الله يطليك بيه سلعة وحدة نتي وياه
دور فريد وجهو بالعرض البطيء جيهتو كان حاضي فيلم من بدايتو خلاه يهضر على خاطرو ويفش قلبو باش متبقاش تهضر معاه هدى وحتى الا بغات هو ميرضاش يهضر معاها
فريد : ( شير ليه جيهة لباب ونطق بالستفزاز ) يلاه ضرب الباب سالا الفيلم الله يطليني بيها والله يطليها بيا شي حاجة خرا مشغلكش فيها جمع قشاوشك نشوف كمارتك كدور بيها نفرع ليك كمارتك
يوسف : ( تلاح عليه ببونية صاعر شمتة واحلة ليه مطلعات مانزلات وفريد جمع ليه يديه وخبطو مع لارض عاقد حجبانو تاواحد متجرؤ يدخل بيناتهم حدهم رجعو لور كيتفرجو او واحد فيهم صونا البوليس ) طلق مني الله ينعل طوا**سل مك ( زاد زير عليه فريد حتى تقج او وجهو حمار ولا غادي لون زروقية .. فديك لحضة ناضت هدى بجهد لي بقا عندها كتجر فدراع فريد وتبكي وبدون جدوى فحال الى كتجر فحيط )
فريد : ( ضرب ليه على حنكو وزدح ليه راسو مع لارض ) عاود شنو گلتي
هدى : طلق منو واطلااااااااااق ( غوتات بجهد ) طلااق منو طلااااق
فريد : ( شاف فيها بحدة مكرهش يخلطها معاه زاد زير على يوسف هي كتقول ليه طلق منو وضربو فكتافو وهو كيزيد يزير عليه وعينيه فعينيها ) سيرري تركني
هدى : ( كتغوت وتبكي بهيستيريا كتشوفو تحتو مقجوج وجهو زراق ونفس كطلع فيه غير بزز .. ( شدات فدراعو وشافت فعينيه برجاء ) الله يرحم ليك الواليدين طلق منو غايمووت فيديك مابقاش قاد يتنفس طلق منو
فريد : ( بإستهزاء ) خايفة عليه ؟
هدى : ( رمقاتو بنضرة تحدي ) اه
طلق منو وخلاه فلارض كيحاول يتنفس وعينيه خارجين وهدى جرات عندو هزات راسو وحطاتو على رجليها كتشوف فيه بأسف وكتلوم راسها فداخلها انا سباب هادشي كامل .. كون غير متلاقيتش معاك نبلوكيك ونقطع هضرة معاك ولا هاد الحالة ( طاحت دمعة من عينيها على وجهو وهو ناض خدا تلفونو فوق طبلة ولقا عليها نضرة أخيرة .. نضرتو ليها كأنو كيعاتبها على كذبها عليه على خيانتها ليه على ثقة لي دار فيها وفلخر طعناتو بلا رحمة خلاتو تابعها فحال الحمق كيتخايل حياتو معاها او لولاد لي غايدير ويعيشو بيخير جات فقل من دقيقة ريبات كولشي .. كانت تشوف فعينيه بوقاحة عارفة راسها مخطوبة لواحد آخر ومصارحاتوش بقات غادة فكذبها ومستمتعة باللعب على جوج جوايه
فريد : ( تقدم لعندها وهو خاشي يديه فجيابو ببرود ) سالا الفيلم نوضي تگعدي
شاد ستيلو فيديه ومركز مع شاشة الحاسوب كيسربي لناس لي واقفين شادين صف كل واحد علاياش جاي .. طرطق عنقو ورجع راسو لور عيان وجاه جوع .. سالا ناس لي كانو واقفين قدامو وبانت ليه أم حنان داخلة وكدور فعينيها عليه .. هز يديه كيشير لها مبتاسم وفعينيه كيبانو غير لفلوس جايين
أم حنان : ( قبطات ساكها كطل على لوراق لي فيه معارفة منين تبدا ) اوليدي عقلتي عليا انا هي لي وصاتك عليا بنتي تعمر لي شيك وتخرج لي لفلوس
عماد : ( وقف من على لكرسي كيقاد فكراڤاط ديالو وخدا من عندها شيك وعينيه فيهم دغل ) الله أودي شكون مايعقل عليك شحال بيتي نعمر ليك ؟
أم حنان : 2000 درهم اولدي الله يسهل عليك
عماد : ( ضحك بجنب فمو ودوز لسانو على شفايفو وعمر 4000 درهم ) اهاه هي لولة
خرج لها ربعين ألف ريال وهو كيشوف فيها بنص عين كتشوف فيه بثقة وكتسنا يعطيها فلوسها معلابالهاش انو خرج ثمن مضوبل نص عطاه ليها ونص ثاني ضربو فجيبو ضاحك ودنيا مساعياهش .. كيقول فعقلو وهوتة هادي جات تالبين يدي ونفلتها !
عماد : ( خرج ليها لفلوس من زاج وشداتهم مبتاسمة وخشاتهم فساكها ) هاهما الحاجة مرحبا بيك فأي وقت
أم حنان : ( شافت فيه بامتنان ) الله يسهل عليك اوليدي والله ينور ليك طريقك
عماد : ( حط يدو على صدرو بمعنى الله أودي مادرت شاي .. تاقن دور بدقة كأنو شخص آخر ماشي هو لي شفر ليها فلوسها وستاغل انها مقارياش ) أمين الحاجة أمين
خرجات بخطوات بطيئة محاولة على رجليها لي كدرها وهو گلس على كرسيه متبع ليها لعين ..
بداو الموضفين كيخرجو وهو كان واحد منهم تاجه لسوبر مارشي تقدا زيت لعود ولوسيور و لعطرية .. وخرج فرحان بميكة عامرة شوية .. داز نيشان لدار حل لباب لقاها يلاه خارجة من طواليط كتمسح وجهها من لما يلاه توضات
عماد : ( مد ليها لميكة وباقي ضحكة متجمعات ليه ) شدي شدي دخلي هادشي لكوزينة وسيري لبسي حوايجك
بسمة : ( شداتها عندو وهي كترمقو بإستغراب جاها فشكل ) علاش غالبس حوايجي
عماد : ( تكا بكتفو على لحيط كيطلع وينزل فيها ) باغا تخرجي يلاه مابيتيش سيري تنعسي
مشات حطات ديك لميكة فوق لبوطاجي وتاجهات لبيتهم واخدة جلابتها تلوحها عليها وهي كتقول فراسها مال هدا ؟ آش جاه عليا ؟ فين عمرو قال ليا نوضي تخرجي .. ( طلات عليه من لبيت لقاتو باقي واقف مقابل معاها وحرك ليها راسو بمعنى سربي ) لاحت عليها جلابة دغيا ودوزات لمشطة على شعرها وصلات صلاتها عاد ناضت خرجات معاه وهي معارفة فين .. لمهم تشم شوية لهوا حسن ليها من دار مابين ربعة لحيوط من لكوزينة لصالة من لصالة لطواليط فحاال لحباسة !
بسمة : ( غمضات عينيها كتستنشق الهواء باستمتاع ) فين غاديين
عماد : ( حك نيفو ودور عينيه لجيهتها ) فين باغا تمشي ؟
بسمة : ( دارت فيه ديك شوفة دمنيتك معرفاتوو كيهضر بصح ولا كيطنز ) لي باليك !
بقاو غاديين فشانطي دتيزنيت ولي داز من حداهم يغمزها وتحدر راسها واخا راجل حداها ! ولكن لكلاب مايقيلو لا لي مزوجة ولا لي مطلقة ولا لي بولادها .. كرزات على يديها وما يجي فبالها غير آخر مرة فاش وقف عليها برهوش ومابغا يطلقها بقات تجر وهو يجر تاتجمعو عليهم ناس وفكوها !
عماد : ( نزل عينو جيهتها لقاها ساهية وشير ليها على سناك معامرش بناس بزاف ) ندخلو لهداك ؟
بسمة : ( تبعات صبعو فين مشير وحركات ليه راسها بالإيجاب ) واخا ندخلو ليه
على آخر جملة قالها ليها ناضت طافجة من لارض هزات صاكها وتلفونها وخرجات كتجري طااايرة وكتشير بيديها لطاكسي كان جاي غير وقف حداها ركبات بلا عقل غير مبالية بفريد لي كان كيعيط عليها بغضب وتبعها تاهو بجرا ركب فطموبيل تابع طاكسي كيكلاكصوني بجهد معصب وكيشير بيديه لطاكسي باش يوقف .. وهدى كانت كتمسح دموعها وكتقول لمول لطاكسي يزيد فسرعة ومايوقفش ليه .. تقاد معاهم فشانطي ولات طموبيلتو حدا طاكسي كتبان ليه قالبة وجهها ومخنزرة
فريد : ( يد سايق بيها ويد مخرجها كيشير لها توقف وعلى ملامحه تعابير لغضب ) هدددددددى نزززززلي
متسوقاتش ليه ! مكلفاتش راسها دور لجيهتو ولا تشوف فيه ! فعينيها غير يوسف لي كان كيلومها على غلط هي بريئة منو .. طلعات غالطة فعينيه وكتلعب من وراه عارفة راسها خطآت فاش مصارحاتوش من لول مكانتش عارفة هادشي كامل غايوقع ! عضات فشفايفها بحقد كتلومو فداخلها على كولشي كون مادخلش لحياتها كون راها باقي مع يوسف كون راه لقاو شي حل وتزوجو كون راه عايشة بيخير دابا ! تنفسات كتحاول تاخد أكبر قدر من الأوكسجين حاسة بقلبها كيدرها ونفس مابقاتش قادرة طلعها .. زيرات على صاكها باغا غير بصيص أمل تشبت بيه ولكن مكاينش ! تخبطات بالواقع حتى مقدراتش تزيد تهضر ولا تكذب على راسها وتيق لكذبة كتقول واخا خدام فجوندارم غايكون شي حل غا نديرو شي حاجة ويتقبل ضوسي ! غانتجمعو فلخر ! فلخر لقات كولشي من خيالها شنو غادير تحط فردي على عنقهم ويقبلو ضوسي بزز ! زمات شفايفها كتحاول تحبس لبكية وشيرات لمول طاكسي يوقف .. خشات يديها فبسطامها أول ورقة نقدية قاصتها مداتها ليه بلا متسنا يرد ليها صرف .. نزلات وخلاتو كيعيط ليها يعطيها لباقي وهي فعالم تاني رجليها فاشلين عليها وقفات قدام دار وسمعات صوت وراها كيعيط عليها عرفاتو فريد دارت عندو بعيون حمراء باين فيهم الحزن
فريد : ( كان عاقد حواجبو غير شافها بداك المنضر ضرو قلبو مكرهش يخشيها فصدرو ولكن غير كيتفكر علامن كتبكي بلا مايحس كيتزير قلبو وكيبان ليه فعينيه غا يوسف قاتلو ! ) هدى ريحي بلا تبرهيش غير نهضر معاك !
هدى : ( بعيون باين فيهم الحقد نطقات بغضب ) متهضرش معايا بعد مني ( غوتات صاعرة ) تفرق عليا
فريد : ( عقد حواجبو مكيحملش لي يتهز عليه ) هضري غابشوية لازدتي فيه غاتوصل خبار لخوك راك ساكنة فحومة بنادم حاط ودنيه
هدى : ( بإنفعال محاساش براسها شنو كادير كلها كترعد ) ونتا مالك بقيت فيك ؟
فريد : ( قرب بغا يحط يدو على دراعها وهرباتها بجهد ) هداي بنادم كيتفاهم غا بالمعقل راك معصبة
هدى : ( رفعات صبعها فوجهو وزيف مخسر ليها وتحت عينيها كحل بماسكارا ) تحط يديك عليا ندير صبعي فودني ونجمع عليك أمة سيدنا محمد
فريد : ( تراجع لوراء بسخط وشاف فيها ببرود ) غوتي نشوف
دارت فتحات لباب وفنفس لوقت وقفات طموبيل دصلاح حدا دار .. نزل عاقد حجبانو وكيطرطق فعنقو ومتبع لعين لباب لي تزدح
صلاح : ( نطق بصوت غليض باين فيه الغضب و دوز يديه لحيتو لكتيفة وعينيه كي القرطاس على صاحبو ) تابعها فطريق افريد !
فريد : ( غمض عينيه بسخط عارفو غايفهمو غلط ) متفهمش غلط اصاحبي صبر غا نشرح ليك
صلاح : ( ضحك بسخرية ) باغي تبيدقني ولا شنو تابع ختي يا زام**ل
فريد : ( خرج نفس سخون من نيفو عارفو تعصب ) طلع طموبيل نشرح ليك بنادم كيتفرج اصاحبي !
صلاح : ( هز يدو بسخط ممسوقش للبشار ) ودور تقو**د نتا وياهم كضحك عليا دابا كنبان ليك حمار انا
فريد : ( داير يدو مابين جبهتو وحنكو وكيشوف فيه وهو كيعرق ليه مخلا ليه لا جد لا طاسيلة جامع يديه عليه غا بزز .. سكت عارفو جعر وخا ضالمو بقا مهدن تاوكان يبرد ) نغدرك أنا ؟ فين عمري شفت فيها شوفة ناقصة باش نتبرهش ونتبعها كي لكلب يهديك الله اصاحبي تهدن
صلاح : ( بنبرة ساخرة ) شكنتي كدير دابا كتصلي ؟ راني شفتك من بعيد نتا وياها مغاوتين
فريد : ( ضحك شاد فراسو ) كنت دايزة بصدفة حدا واحد لكافي وبانت ليا مع داك لخطيب لي قلتي لي جا خطبها
صلاح : ( ضيف فيه عينيه وعض لسانو من لداخل ) متأكد من هاد الهضرة
فريد : غانكذب عليك ؟
ناض كيتفوه وكيجبد فكتافو كيحس براسو عياان وعنقو دارو .. تمشا حفيان حتى لكوزينة غسل وجهو بلما وعقد حجبانو فاش سمع تلفون كيصوني .. تمشا بخطوات تقيلة حتى هزو من بلاصتو وشاف جيهة بسمة لي فيقها تاهيا تلفون ورجعات نعسات عاطاه بضهر .. تاجه لصالة وطاح مفرش على لبونج مرجع راسو لور
عماد : ( عقد حجبانو مستغرب بعد ما هز عينو فتلفون ولقا شَّافْ دلاجونس كيصوني ) ألو !
شاف دلاجونس : ( بنبرة حادة وجدية ) عماد هانيا
عماد : ( دوز يديه على راسو وكيتسناه يقول علاش مصوني ) حمد الله
شاف دلاجونس : ( بدون مقدمات دخل لموضوع وباينة فيه منرفز ) سيدة لي جات عندك لبارح تخرج ليها 40 ألف جات بنتها كتشكا وكتقول مخرج لسيدة 80 ألف وعاطيها غير 40
عماد : ( حنحن وبلع ريقو بصعوبة ) واش ديك لكليانة حنان لي وصاتني على مها ؟
شاف دلاجونس : ( بنبرة جافة ) هي
عماد : گالت لي خرج ليا 80 ألف وخرجناها ليها وعطيتها فلوسها وكولشي فشيك راه فيه تمانين ألف ولفلوس مديتهم ليها فيديها
ش . ج : ( ضحك بسخرية أصلا عماد مكيتسرطش ليه كيضسر على لكليان وكل مرة شي حد جاي عندو مشكي .. فلان راه مابغاش يقاد لي وراقي .. فلان راه معاطيش وقت لبنادم دغيا يتعصب ويبدا يتغاوت ) وزعما غاطيح عليك باطل ؟ عمر شي حد جا تشكا من هاد لبلان تا ليك نتا وسيدة راه مقارياش ( بتهكم ) دغيا يتضحك عليها ولكن راه عندها بنتها قارية غاتشوف شحال خرجتي ليها وشحال عطيتيها
عماد : هي أنا شفار دابا الباطل ساهل طيحوه على بنادم شوفو واش تشفرو لها لفلوس وملقات متقول لبنتها جات تلصقها فيا ( بنرفزة ) خدمتي درتها قالت لي خرج لي لقد ولقد خرجناه ليها
ش . ج : عماد ( لقاه ديمارا فلهضرة مسكتش كيحاول يبرر فعلتو ) عمااااد دابا تحضر عندي نشوفو شكون منو الغلط
قطع عليه وخلاه كياكل فشفايفو بالفقصة ناض بجرا لبس حوايجو وخرج وفطريق صونا ليه تلفون بإسم حنان
عماد : ( ساط بجهد ) ألو !
حنان : ( بنبرة حادة وصوت مرتفع ) مصايفت ليك مي ودايرة فيك تيقة وفلخر تنصب عليها ياك اعماد
عماد : نعلي الشيطان اختي إنا نصب قالت لي مك خرج ليا 4000 درهم خرجناها ليها ! ( قطع شانطي بخطوات سريعة ) سوليها آش دارت بنص فلوس
حنان : ( خرجات عينيها ونطقات بإنفعال ) أسمع شانقول ليك اشريف تحضر ليا فلوسي هي هاديك متحضرهمش بيناتنا محاكم ( بنبرة متوعدة ) والله ومتحطهم الى مصايفتكش الحبس راني كلبة
عماد : ( بإنفعال دافع تاهو جبهة ) اسبحان الله اشريفة تردينا شفار جري طوالك باغا غير المحاكم سيري ليهم مدرتش علاياش نخاف سولي مك يا مشفرها شي حد وجايا تغوتي عليا أنا
حنان : ( بنبرة ساخرة نطقات وصوت دبالج دذهب فيديها كيتسمع ) بلا متبدا دور عليا فلهضرة جوج كلمات قلتهم ليك لقيتي مي مسكينة مقارياش وقوة الوراقي لي جايبة معاها فساك دغيا تغمق عليها .. مقلتي عندها بنت لي غاتشوف شحال خرجتي سحابليك قطعتي الواد ونشفو رجليك ( ضربات على بيديها على طبلة قدامها ) والله تارجعك ليه ونغرق بوك
عماد : ( كيحاول يرطب معاها الهضرة ) حسبي الفلوس مزيان احنان ودوي مع مك ياك متلفو ليها هلي دوي وحيدي عليا من ديك الهضرة حمد الله عمر كليت فلوس لحرام ولا نرضى ندخلهم لداري
حنان : ( بإستهزاء ) هاحنا غانشوفو ( رخات كتافها على الفوطوي بإرتياح وطلعات حاجبها ) واش نصاب وشلاهبي ولا معندك علاش تحشم وقاعد تكذب على بنادم فكمارتو ديك جبهة لي دافعها سير ديرها فشي حاجة تنفعك
قطعات عليه وخلاتو كيتنفس بزز صدرو كايطلع وينزل ومزير على يدو
فاقت بكري بعيون ذابلين حاسة براسها مسخسخة وتحت عينيها كحل ذاتها كلها مبنجة وشاداها دوخة واقفة غا بزز .. غسلات وجهها بلا مدير روتينها الصباحي معندها خاطر لوالو خرجات ب بيجامتها باش نعسات وشعرها مخربق طالع لسما وعينيها منفوخين فحال لا كضرب جوانات ! .. تاجهات نيشات لكوزينة لقات رقية كتوجد لفطور لقات عليها سلام ورجعات بخطوات مرخية وبطيئة حتى لبيت مها لقاتها كدير ترويض گلسات حداها حتى سالات لها لبنت وتمنات لها شفاء
هدى : نبدل ليك حوايجك ؟
مبيريكة : ( على فرجليها عيات من ترويض ) حلي لماريو عطيني شي بيجامة سخونة وكولون دلقطن
حركات ليها راسها بالإيجاب وعاوناتها حتى تلبس وعيطات على رقية تعاونو حتى خداوها لصالة ودارو لها كاشة على رجليها مغطية من لبرد .. حطو الفطور وگلسو مجموعين عليه ب تلاتة .. حالين جوج شراجم فصالة كيدخل هوا نقي والجو كان مغيم ومع ذلك زوين منتعش
رقية : ( دفعات لخبز لهدى ) كولي ابنتي وجهك صفر غايشدك فقر دم
هدى : ( دفعات لخبز بيديها وكتعض فكرواصة ) والله مافيا لي ياكل شاهية مسدودة على صباح
مبيريكة : ( شربات شوية من كاس الحليب ) علاش مامشيتيش لافاك
هدى : ( بنبرة باردة نطقت بخفوت ) معندي خاطر
تنهدات مبيريكة كدعي فخاطرها ربي يسهل عليها وتخرج من حالتها وضحك كيف كانت فلول ويحن قلبها شوية على فريد عارفة متلقاش حسن منو كابر معاهم من صغر وعارف خدمة خوها مغايجيش نهار لي يعايرها بيه عكس شي حد خر .. واخا يكون بنادم ملاك كيجي نهار لي يخرج لعيب
مبيريكة : ردي لبال مع قرايتك
هدى : ( بدون متشعر نطقات ) بغيت نخرج من هاد ونكري فشي بلاصة خرا
مبيريكة : ( حطات كاس فيديها بندهاش ) شنو قلتي !
هدى : ( هزات راسها بجمود ) علاش منخرجوش من هاد دار ياك خلصة لي كان شدو دتقاعد دبابا كافينا حمد الله نعيشو بيه
مبيريكة : ( رمقاتها بسخط ) كضحكي على راسك ابنتي فين باغا تخرجي مالها كيجاتك هاد دار ممقنعاكش ولا شنو باغا تعيشي فقصر ؟
هدى : ( تنهدات ) باغا نعيش غا فجوج بيوت وكوزينة وبيخير بفلوس حلال
مبيريكة : ( خنزرات فيها محملاتش هضرتها وعارفة علاياش كتلمح ) لا مابغاش ديري عقلك نعيط عليه يديرو ليك منها نيت يعرف هاد دار لي باغا تمشي منها ( عقدات حجبانها حتى تكمش وجهها ) شبعتي الخبز ؟
هدى : باغا نخويلو دارو يعيش فيها كيما بغا مابقيتش باغا ناكل ماكلتو مابقيتش باغا نعيش بفلوسو ( لاحت كرواصة من يديها ) خليه يسكن بوحدو
مبيريكة : ( نهضات فيها بسخط كتحس بطونسيون طالع ليها ) حيت مكيهزش عليك يدو دايرة هاد لحالة كون كنتي كتاكليها كون راه مكمشة فبيتك وزامة فمك
هدى : ماشي أي حاجة كتحل بالعنف ( بنبرة ضعيفة ) كتحسي براسك كيف لكلب معندك حتى دور فهاد دار من غير تبعي كلمة لكبير فيها ولي قاليك متقوليش لا ( ضيقات عينيها بحزن فمها ) تا زواج ولاو يفرضوه عليك تمثال أنا ماشي بنادم
مبيريكة : كون كنتي كتفكري بعقلك كون راه عايشة بيخير ومتگوليش هاد الهضرة متخلينيش نتغاوت معاك على صباح خلينا هانيين نعرفو هاد الفطور منين داز
رقية : ( شادة كاس اتاي فيديها وصاقلة مخلياهم يهضرو فراحتهم ) نعلي شيطان ابنتي وفطري راك كضري غا راسك !
دخل لابونك بخطوات مترردة وداز نيشان لمكتبو ... دق فلباب وگلس فكرسي قدامو
المدير : ( رخا ضهرو على لكرسي وجامع يديه عند كرشو ) غاترد لسيدة فلوسها ولا شغادير
عماد : ( حط يديه على لمكتب ونطق بثقة فنفس ) غانعطيها فلوس مسرقتهمش ؟ شكون هيا بسلامة باش تربح على ضهري
المدير : ( ضحك بجنب وحك راسو الأصلع وقاد نضاضرو ) اسمع نقوليك اعماد لفلوس هزيتيهم متعاودش معايا الهضرة باش بلا متوصلو لمحاكم وعارف سيدة مهامهاش فلوس هامها شمتة لي شمتي مها ورديتها حمارة مكتفهم والو ( هز فيه حاجب ) عارفها كليانة وكتحط فلوس صحاح فلبانكة على آخر يامنا يولي بنادم يتشكا فين باغي الهضرة توصل ؟ راه كتهرب علينا ناس أشريف
عماد : ( حك ودنو ونطق بإرتباك ) معنديش فلوس لي نعطيها
المدير : حتى خلصتك بقات فيها جوج دريال .. كتقلب على طرد ؟
عماد : ماباغيش نخسر خدمتي !
المدير : ( بتاسم بمكر وستيلو فيديه كيلعب بيه أصلا محاملوش وبغا غايتهنا منو ) ندير فيك خير و نسلفوك هاد 2000 درهم ( دار ليه حركة بيدو على شكل رقم إثنان ) شهراين بلحساب تردهم ليا
عماد : ( ناض فرحان كيقول فخاطرو سلكت ) الله يحفضك شكرا بزاف منساش ليك خيرك أنا ندبر على لفلوس وردهم ليك كون هاني
حرك ليه راسو بالإيجاب ودار ليه حركة براسو بمعنى خرج .. ناض لخدمتو وكمل نهار هاني كيف كل يوم خدام على راحتو وكل مرة كليان كيتشكا من تعامل ديالو معاهم .. هز ڤيست ديالو فيديه وخرج هاز راسو لسما وضحكة من ضرسة حتى لختها خدا تلفون ڤيديه ودوز نمرة مو كان باغي يدوز عندها ولكن معندوش وقت حيت غايدوز حتى عند خالتو
عماد : ( سمع الخط داز ) ألو مي لاباس ؟
مو : حمد الله ونتا بيخير ؟ مابقيتي تسول تلفون متهزو على سيمانة عاد تفكرني
عماد : ( بنبرة حزينة كيحاول يستعطفها ) معنديش امي فلوس تعبئة راني مقاتل مع الوقت والمصايب تابعيني من كل جيهة
مو : ( بان الخوف فصوتها ) ياربي سلامة آش كاين تاني ؟ أولدي ماتگلس سيمانة بلا مشاكيل
عماد : طيحو عليا باطل أمي فالخدمة طيحو عليا باطل لقاوني الله يعمرها دار ودرويش قالو لصقو فين مونتيف
مو : ( تسمعات ضربة لي ضربات على صدرها مخلوعة ) اولدي غايطيح ليا سكار گول نيشان آش كاين شنو لصقو فيك
عماد : لاحو عليا باطل شافر لمرا ألفين درهم خرجت ليها فلوس ندماتني كتجي غا فولاد ناس اما ولاد الحرام يديروها ويرجعو لور
مو : شغادير دابا غاتخلصها ليها ولا لا ؟ هضرات معاك سيدة ولا مهضراتش ؟ ياك كاينين كامرات
عماد : ( قلب عينيه بغا واينتا يقطع وبدل ليها لموضوع ) أمي واش عندك واحد ألف درهم راه تحنسرت مالقيت مناكل ودابا مشكل دلمراة خاص نفكو وحشومة نخلي لمراة بجوع فدار ولكرا تاهو على ضهري غير نتخلص امي ونفك موشكيل نردها ليك
مو : معندي اولدي والو راه يلاه مكافية مع راسي كبرتي ولاو كتافك كبر من ديالي قلنا غاتهزنا فاش كبرنا ساعة كتسناني انا نهزك يلاه مكافية مع دوايات وكل مرة سبيطارات رجاف الله يدي فوق راسي
عماد : ( وقف قدام دار خالتو كيتنهد ) صافي صافي أمي كرهنا حنايا نعاونوك راه مافحالناش تانا هاز راسي ومرتي وكل مرة خاصها حوايج كل مرة بغات شي حاجة فلوسي كاملين داتهم هي ودار انا مابقيت نخسر على راسي والو
قطع عليها فوجهها كيسوط ودق فباب دار خالتو زهرة بجهد حتى طلات فشرجم مخنزرة من هاد دقان دلبوليس غير بان ليها وهي تكحل بالعما .. صايفتات بنتها تحل ليه وطلع كيجري فدروج لقاها گالسة بوحدها كتفرج فالأخبار
عماد : ( حنحن ودخل گالس حداها وباس راسها ) كيدايرة اخالتي لاباس عليك لبناات كي غاديين مع قرايتهم
زهرة : ( نقصات صوت تلفازة وشافت فيه حاطة يد على حنكها عارفة مكيجي عندها إلا على غراضو ) حمد الله دايينها فقرايتهم الله يرضي عليهم
عماد : ( حك نيفو بشرود كيحاول يجمع كلمات المناسبة باش يدخل فالموضوع ) كي غادة مع الخدمة محركة عندكم القضية ولا والو سوايع ناقصين ولا طالعين
زهرة : ( طلعات حاجبها فيه ) سوايع على قد لحال ماشي شي خدمة نيت كتزير لوقت فشهر 2 _ 3 كيوليو سوايع قلال نخدمو نص نهار ونخرجو
عماد : إوا الله يعاونك بغيت نقوليك واحد الحاجة ومترديهاش فوجهي راه جيت عندك نيشان نتي لي تعاونيني
زهرة : ( تكات على لمخدة كتسناه يطلق لهضرة علاياش جاي ) إوا لاقدرت
عماد : لا تقدري إن شاء ( حنحن ) طرا ليا مشكل فلبانكة ( سكت لثواني كيشوف فيها هازة حاجبها كتسناه يكمل ) طيحو عليا باطل جات واحد المراة تخرج عندي فلوس تمانين ألف لي خرجات وجات كتشكا وقالت ليهم نصب عليا عطاني ربعين ودار ربعين فجيبو وبأنها قالت ليا خرج غير ربعين ( دوز يديه على وجهو وتنهد ) أودي قالو ليا دابا والو تحط ليها فلوسها واخا مدرت لابيدي ولا برجلي
زهرة : ( كمشات عينيها فيه عارفة ينصب على لمراة ويفوتها ) شغاندير ليك أنا ؟
عماد : ( تقاد فجلستو ) سلفيني واحد ألف درهم غير دوز ليا خلصة رجعها ليك معندي حتى ريال دابا باش نعطيهم يلاه غانصوني لواحد صاحبي يعتقني بشي ألف درهم تاهو
زهرة : ( دارت يديها على راسها شداتها ضحكة عارفة غير تحط لفلوس فيديه والله لا شماتهم يبقا عليها ليوم غدا شهر جاي لعام جاي ولد ختها وعارفاه علاش مطوي ) إوا نكذب عليك ؟ هانتا كتشوف شحال كنتخلص بسلامة فداك لوزين ؟ راك كتخلص حسن مني ونا غير على قد لحال ولبنات يجبدو ومصروفهم يجبد ولما وضو انا المراة وراجل ديال الدار فيا كولشي عاد راه شحال من نهار غيبت صحة مابقات عندي ركابي خواو لكانزة مغاطلع ليا فيها والو
عماد : وغا شوفي وكان عتقينا بلي كاين مدايراش قُرْعات مع لعيالات فلوزين ؟ راه عطاهم الله ها لي كدير قرعة 20 ألف فشهر ولا كتر يدوز لعام تجمع 2 مليون ولا كتر ( شد فيديها باسهم ليها ) والله منسا ليك خيرك نحيد عليا كريديات رجعها ليك بضوبل
زهرة : ( جمعات يديها عندها ونطقات بجدية ) شوف نگوليك أولد ختي أنا ماعندي حتى ريال ومكندير قرعة مع لعيالات معندي جهدها
عماد : ( ناض مخنزر كيقاد فسروالو ) واخا اخالتي معندكش ؟ خليت ليك راحة الله يعاون
زهرة : ( تبعات ليه لعين مخسرة سيفتها وهو نازل فدروج ) سد موراك لباااااب ( زادت صوت تلفازة ) غا لي بغا يلوح فلوسو فبير يسلفهم ليك
دخل دار سمع تقرقيب فلكوزينة طل عليها لقاها كتنصب لعشا .. داز نيشان لبيت بدل حوايجو وتكا على ناموسية شاد تلفون فيديه حتى طلعات ليه نمرة صاحبو لي خدام معاه فلكيسيي دوز لخط وغمض عينيه كيحك راسو
عماد : ألو أبا حمزة هانيا
حمزة : حمد الله .. المشكل لي طرا ليك مع ديك المراة فكيتيه ؟
عماد : لا باقي ولكن غانعطيها فلوسها سلف لي المدير ألفين درهم غاردها ليها
حمزة : هادشي علاش مصوني ليك المدير داير ليك قالب باش يكركبك
عماد : ( تهز من بلاصتو أو وقف عاقد حجبانو ) كيفاش ؟ مفهمتش
حمزة : المدير لا جا عليه ريكلاماسيون غاينقصو ليه من درجات دلخدمة مسلفك ديك ألفين درهم وقت مارشقات ليه دابا غايديكلاري بيك أجيو شوفو هاد سيد داير لي مشاكل فلابونك شوفو معاه شي حل
عماد : ( فحاال لا ضربو ضو وجهو مشا منو لون قلبو مشا وجا ) داوي بصح
حمزة : راه باينة اصاحبي
قطع عليه ومشا نيشان لكوزينة هز قرعة لما شربها كاملة ورجع لبيت بلا مايتعشا معندو منين يدوز .. وهي حطات داك طاجين وطلات عليه لقاتو ناعس ورجعات تعشات على خاطرها وغسلات لماعن سمعات صوت شتا وخرجات حلات لباب لقات زنقة عامرة بلما ورعد كيضرب تبورشات وسدات لباب .. دازت لبيتهم دفعات لباب بشوية كطل عليه
بسمة : ( بصوت خافت ) عماد مالك ؟
عماد : ( هز راسو فيها مغوبش ) دوري تق**ودي نتي لي خاصاني دابا
رجع نعس كيسب وهي هزات مانطة من لبيت و نعسات بوحدها فصالة
صبح صباح صوت شتا كيتسمع من بعيد مجهدة وقوية ناض من فراشو لبس حوايجو وغسل وجهو وهز مضلة ولبس مونطو مغطي راسو بلقب وتاجه نيشان لبنكة مخنزر وعاقد حجبانو .. غير وصل داز نيشان لمكتب لمدير بلا مايدق دخل مدرم وگلس قدامو كيشوف فيه
عماد : داير ليا قالب باغي تجري عليا ( بإستهزاء ) صحابني سيد بغا يعاوني ساعة بغا يكركبني
المدير : ( خنزر فيه وضرب بيدو على لبيرو ) أشريف رد لبال لهضرتك درنا فيك الخير تردو لينا ب بومزوي معجبك حال نوض تگعد خلص سيدة فلفلوس لي شافر ليها وضربتيهم فجيبك
عماد : ( ناض من على لكرسي صاعر ) مدوز سنين فخدمتي فلخر باغيين تخرجوني لخدمة هي لي منخرج منها
مدير : ( ناض من على لكرسي وشير ليه بيديه يخرج ) داير فيك خير جاي كتغوت عليا وتهز فصوتك ضرگ عليا زلافتك سير لخدمتك كتعرف غير لغوات ( خرج عينيه فيه ) دابا غانقدم بيك ريكلاماسيون
خرج عماد وداز نيشان لبلاصتو گلس فوق لكرسي مغدد معارف مايدير كيشوف قدام عينيه خدمتو فخطر فأي لحضة يجريو عليه شغايدير يبقا بلا خدمة ؟ ولكريدياات فوق راسو باش غايخلصهم !! تنهد ضارب بستيلو وبدا فخدمتو ساقل مكيهضرش حدو كينفد متطلبات ناس وكيتسنا واينتا غايخرج حاس براسو غادي يتفرگع
وصل وقت خروج الموضفين ناض كيقاد فسروالو وهز مضلة فيديه وخرج عاقد حجبانو حتى سمع شي حد كيعيط عليه ودار
مصطفى : ( لي عرض عليه لريسطو وخلص بلاصتو ) عماد هانيا
عماد : ( عاقد حجبانو محاملش يهضر مع شي حد كلشي كيتشفا فيه من تحت دف ) حمد لله !
مصطفى : داير حفلة عندي ليوم فدار كولشي غايجي نشطو شوية راس لعام هدا
عماد : لا شكرا عندي ميدار مرة خرا إن شاء الله
مصطفى : لا اصاحبي ضروري تجي غادوز ليلة ناضية ( سكت لثواني كيضحك ) ولا قول دوز راس لعام مع لمراة
عماد : ( بدون نفس ) اه غانخرجو نتعشاو فشي بلاصة وندوزو ليلة بزوج
مصطفى : ( ضرب ليه على كتفو كيقهقه بجهد ) لا كان هكا ماشي مشكل
تبع ليه لعين بعيون واضح فيهم الغيرة والحسد .. حتى ركب فسيارة ديالو رونج بالبيض .. زاد مع طريق كيتنفس بجهد وكل مرة يسوط
عماد : ( بغيرة واضحة على وجهو ) قاليك حفلة نتوما لي جات معاكم كل واحد ضارب حديدة تنطح ختها وانا منكساب حتى داسيا باغيين تشفاو اولاد لق*حاب
كيتمشا ويدور راسو فناس ليكوبل بكثرة كل واحد شاد فصاحبتو وغاديين ضاحكين شاريع عامرة او واضح عليه أجواء إحتفال براس لعام .. شانطي مطرطق بطموبيلات كل واحد او الوجهة ديالو وكل واحد وفين ناوي يدوز راس لعام .. لمحلات مطرطقين بناس خصوصا رجالة أغلبية جايين ياخدو كدوات لصحباتهم ولا زوجاتهم وباتيسريات عليهم إكتضاض كبير لدرجة ناس شادين صف .. تنهد بقوة وهو كيدوز يديه على عنقو .. خشا يديه فجيبو ولقا صرف قليل مكاملة حتى عشرين درهم تبسم بسخرية على حالو وتوجه نيشان لدار حل لباب ولاح مضلة من يديه بإهمال ...
كتحك ماطيشة ودور تشوف فيه بنص عين غادي جاي كيدور فلمراح كي شي مراة حاملة ! عرفات ليلة مغادوزش على خير آشنو بيه ومالو على هاد الحالة ؟ الله وعلم لي عارفة خاصها تسد فمها وتسلت بجلدها لا يفوت فيها شي دقة
عماد : ( باقي بحوايج الخدمة تقدم لعندها بخطوات مزروبة ) هاد العشا كتسنايني حتى نجي عاد طيبي بنادم كيدخل فيه جوع ميلقا مياكل
بسمة : ( غمضات عينيها بفقصة مصبرة راسها قالت حسن ليا نسكت كيقلب غير فين يخوي سمو .. نطقات بصوت خافت ) مابقا والو دابا طيب حميمصة
جرها بجهد من كتفها وضرب ديك ماطيشة لي حكات مع لحيط .. و هي رجعات لور كتشوف لحيط لي مصبوغ غا بالجير رجع حالتو حالة .. طفا على لبوطة وهز ديك لكوكوت تالسمة وخبطها جيهتها كان قاصد يجيبها فيها ! عينيه مضلمين مكيقشع والو كون يبان ليه شي جنوي قدامو يرتاكب جريمة بلا ميحس .. يديه كيترعدو وعينيه مفيكسيين على ديك لكوكوت لي تحلات وتخوا گاع لي فيها ... هز عينو فيها كانت هاربة غير شافتو هز لكوكوت وجرات مخبية ورا لحيط خايفة لا يتسلخ جلدها ! البخار سخوووون طالع من لارض دليل على الحرارة العالية لي كانت فلما .. جمدات بلاصتها كتفكر كون تخوات عليها شنو غايطرا ؟ فإنا حالة كانت غاتكون .. حطات يديها على صدرها كتحس بدقات قلبها طالعين فحال الى كيتسابقو !
عماد : ( بصوت مرتافع ) بسماااااااااااااااااا
بسمة : ( طلات عليها براسها وجهها صفر والخلعة راكباها ونطقات بصوت مرعود ) نع ام !
عماد : تق*ودي نصبي طاجين دايرة ليا ليباط قنية أنا ؟ هاد زمر كياكلو غا لي شابع
لبسات صندالة فرجليها ودازت لكوزينة وخايفة لا تزلق جبدات لخضرة وبدات تنقيها وتدعي فخاطرها .. ياربي دوز ليلة على خير .. ياربي يسكت ويمشي ينعس .. ياربي متوقع تاحاجة .. ولكن إحساسها كان غير كيقول ليها لي غاتشوفيه ليوم عمرك شفتيه فحياتك غمضات عينيها كتحاول تطرد دوك الأفكار من راسها .. خدات نفس طويل وبدات فشغلها ..
داز وخلاها مضاربة مع طاجين كتقلب عليه تالفة معارفة فين تحط يديها ! كأنها وحدة جديدة على دار لخلعة لي ركباتها خلاتها كلها كترعد أبشع حاجة عندها هي لعنف هي تشوف شي واحد قدامها كيتضرب ولا هي ! كيعجبها الكالم وتعيش طرونكيل ولكن راجل لي طاحت فيه كان عكسها غير مراعي مكيعرفش شي حاجة سميتها الحوار كيعرف غير فاش يتعصب يخوي سمو فبنادم لي حداه وخا يكون بريئ مدار ليه والو
هز باكية گارو فيديه وگلس حدا لباب كيكمي وكيشوف شتا بدات تصب وبنادم دخل لدارو مكمش فمانطة تاواحد مكيدور فزنقة ! إلا لقليل لي خارج مسخر ولي عندو غراض ولي خارج يدوز ليلة راس لعام فشي بلاصة .. صوت طموبيلات ولكلاكصون فشانطي مجهد مزهيين دنيا وباينة ليلة طويييلة عند كولشي !
عماد : ( خدا نفس طويل وهز راسو بخ الدخان فسماء ونطق بنبرة خافتة ) ناس لي عندهم لفلوس ناشطين فلبيران او ريسطوات مطرطقين بالبشار هما لي بات ليهم مدوزين راس لعام مطرطق ومكاين غا نشاط حتى لصباح ( لاح لگارو وعفس عليه ناوي يدخل .. فحالي يانا خديت أقو*د قالب هاد نهار
مدورة حداها دفاتر مركزة معاهم كتراجع ومها حداها كتهضر مع رقية فتلفون
مبيريكة : الله يرحمو ياربي ويوسع عليه إن شاء الله يكون من أهل لجنة
رقية : ( بصوت ضعيف وبحزن ) أمين اختي أمين سمحي ليا خليت ليك دار ومشيت ولكن الموت مكتشاور
مبيريكة : ( كتسمع صوت ناس كتار حداها وصداع ) متقوليش ديك الهضرة راه باك هداك بقاي تماك قد مابغيتي معنديش مشكل كاينة معايا هدى راه دير كولشي مديريش فبالك
رقية : واخا اختي الله يسهل عليك انا نخليك نوض نعاون العيالات كنت باغاك تحضري العزو ولكن رجاف الله
مبيريكة : ( شافت جيهة رجليها ويديها لي مشللة فيهم ) بحال إلى كاينة اختي يلاه نخليك تعاوني العيالات ياكلو ناس بكري وتجمعو روينة
قطعات متحسرة عليها بقات فيها وقطعات لها فقلبها .. حطات تلفون حداها وسمعات صوت سرسار فدار
مبيريكة : نوضي حلي ياك مايكون خوك ونسا سوارتو
حطات ستيلو من يديها وناضت لايحة عليها عباية وزيف دغيا ونزلات حلات لباب ولقات 3 دراري يديهم عامرة .. كحازت لور وخلاتهم يطلعو عارفة تقضية من خوها وكيف كل عيد كيصايفط دراري يجيبو ليهم داكشي تالدار .. نزلو وركبو فطموبيل و جا واحد عندها ماد ليها جوج ميكات كبار
الولد : هاكي اختي هادو قال ليا صلاح نعطيهم ليك ( شافت جهة لميكات وطلعات عينيها فيه ) هادشي لي جبنا بمناسبة راس لعام الله يدخلو عليكم بصحة وسلامة
شداتهم من عندو حادرة راسها ونطقات بصوت هادئ " شكرا " سدات لباب بجهد و طلعات لفوق مشات لصالة عند مها لقاتهم حاطين گاع لي جابو فوق طبلة
هدى : ( نزلات عينيها جيهة طبلة كانت عامرة بالعواصر وشكلاط وجوج بسطيلات مشكلين وحلوى كبيرة مزوقة بشكل زوين وكيشهي .. طلعات عينيها فمها ونطقات بصوت جاف ) عاوتاني !
مبيريكة : ( شدات فراسها ) عرفنا هادشي حرام ومخاصناش نحتافلوا تبقاي تقوليها كل عام ؟ آشغندير أنا نقوليه متبقاش تجيب راه لعام جاي غاتلقايه جاب نتي كولي قبل 12 دليل هانتي مكتسنايش محتافلة
هدى : ( حطات دوك جوج ميكات وطلات عليهم كانو مطرطقين بسقاطة عارفها كتموت على شي حاجة سميتها سقاطة .. حلويات .. تشيبس .. بيموات .. عواصر صغار .. كانيطات دموناضة .. گلاص .. لي تشهيتي كاين تماك وبزيادة ) غالوح هادشي كل عام كيدير هكا لعيد نقولو واخا ولكن راس لعام راه حرام غير لي ماشي مسلم لي ينوض يحتافل
مبيريكة : ( بدات تعصب ) تلوحي شي حاجة نوض ليك واخا رجل منقد نوض ولكن والله تانوض بلهلا يطريه ليا نعمة الله ابنيتي باغا تلوحيها شبعتي ؟ حطي داكشي وتسناي نتي حتى لغدا وكولشي صافي ؟ باش غاتحتافلي ديك ساع
هدى : ( جلسات فوق لمضارب مغوبشة وزامة فمها ) مواكلاهم لا ليوم لا غدا ياكلهم هو
على آخر جملة قالتها كان واقف حدا صالة حيد لبرودكان من رجليه ودخل باس راس مو
صلاح : ( گلس مفرق ايديه كل يد على مخدة وهز عينو فيها ضاحك ) لهلا تاكليه ناكلو انا
مبيريكة : ( غمزات هدى بمعنى متجاحديش معاه ) نوضي ابنتي جيبي موس ندوقو هاد الخير
ناضت جايت ليها موس وقطعات ليها من بسطيلة وحطاتها لها فطبيسيل ومدات لها عصير دوز بيه
صلاح : ( گلس حدا مو وبدا ياكل تاهو ممسوقش لهدى عارفها متحط حتى حاجة فمها خلاها على خاطرها دير لي عجبها ) مي جايين لخطاب لبنتك من بعد يوماين لاخاصك شي حاجة قوليها ليا نجيبها
دخل وسد موراه لباب لقاها جمعات روينة لي فلارض وطفات على طاجين .. دات الخبز والما وحطاتهم فوق المايدة او هزات طاجين بشوية حتى حطاتو .. تجمعو على داك طاجين بدا كياكل وهي كتقطع لخبز .. حتى فلحضة بان ليها بدا كيخسر سيفتو ناضت دغيا بجهد لي عندها لبسات صندالة ودخلات طواليط مدوزة ساقطة وخلاتو نايض تابعها وسدات فوجهو لباب
عماد : ( نطق بصوت مرتافع وغاضب و ضرب لباب بيديه بجهد ) عارفة ديلمك حاطة ليا طاجين مالح خاوية فيه نص كيلو دلملحة حلي تاكليه لبوك كامل متنعسي حتى تلحسي طاجين انا نجيب لخضرة ونتي خسريها ( بحدة والعروق برزو فوجهو ) آش علماتك هاد مك آش علماتك
بسمة : ( شادة على صدرها كتنفس بجهد شداتها لقفقافة وعيونها مدمعين ) والله مدرتها بالعين راه نكون غلطت وتزاد لي بزاف والله مرديت لباال
عماد : ( ركل لباب برجليه بعنف ) خرجي ابسما متعصبينيش والله ونفرع عليك هاد لباب حتى نقتلك !
طفا عليها ضو طواليط وهي گلسات فلارض كدور عينيها فضلام ضربات طم وضماات نفسها بيديها مخلوعة وعينيها العسليين مغرغرين بدموع ..
ضرب لباب بيديه ضربات متتاالية مكيسمعش صوتها حدو قادر يسمع صوت أنفاسها العالية .. مابغاش تجاوبو ولا تحليه توجه نيشان لبيتهم خدا شوية الحوايج لي عندها ناوي يحرقهم مكيقشعش قدامو باغي يفرغ غضبو فشي واحد وملقاش مابيهش هو طاجين بيه خدمتو لي كيشوفها قدام عينو فأي لحضة يجريو عليه مدوز سنين معاهم وفلخر يقولو ليه لباب الحباب ؟ والكريدي لي عليه شكون غايخلصو الى مشات خدمتو مغايلقاو مايقطعو ليه من لفلوس وغايصدقو مسايفطين ليه لبوليس تلدار يدوز لحبس ...
هزهم ولاحهم فلارض حدا طواليط وجاب بريكا نزل بركابيه عند سروال عندها هزو وطاحت منو ربعالاف ريال خرج عينيه وهزها كيشوف فيها ممتيقش ! منين غاتجيها ؟ تكون سرقاتها ليه ؟ ولكن فلوسو كاملة مكيخليهومش فدار كيكونو فحسابو ! .. طلعات معاه الحرارة او بداو يديه يترعدو بالأعصاب ناض بجهد لي عندو ضرب لباب لي كان أصلا ماشي شي باب صحيح .. تفكات ساقطة وطاح عليها لباب .. غوتات غوتة تهزات بيها دار كاملة خلاتو يدخل صاعر ويجبدها من شعرها وردخها مع لارض
عماد : ( خشا ليها ربعالاف فوجهو حتى شافتها ودخلها لجيبو ) منين جاتك هادي ؟ دوي القح*بة
بسمة : ( خرجات عينيها فلفلوس عرفات ليلتها كحلة شدات فراسها بألم ونطقات بصوت مرتجف ) خدامة خدامة كندير لناس لميناج
عماد : ( صرفها حتى دار حنكها ) خدامة يا الق*حبة كتهزي رجليك مدخل باطرونة لداري موكلك ومشربك ونتي كضربيهم صحاح مورا ضهري
بسمة : ( كتبكي بألم حنكها حمر وشعرها مشنتف .. نطقات بصوت مخنوق من لبكة ) والله مكندير شي حاجة الله يعطيني الموت مكندير شي حاجة خايبة ( شهقات بألم ) بعد مني كتقلب غير على سبة باش ضربني
مجات فين تكمل هضرتها حتى كان فكها دار لجهة ليسرية بطرشة نملات ليها حنكها .. نزل عليه بكروشيات كيدخل ليها فوجهها وهي تحتو كتصرخ وكطلب نجدة بكل ماعندها من قوة كتعافر معاه وتجابد كتحاول تبعدو عليها وتهرب .. تهرب لمكان بعيد تلوح راسها فالجحيم ولا تبقا معاه دقيقة وحدة ! كتشوف لموت بين عينيها يديها فاشلين عليها مابقاتش متحملة دقة خرا جسدها عيا من العنف صرخاتها لي كانو عاليين تحولو الأنين خفيف بالكاد تقدر تسمعو ..
عماد : ( زير على شعرها حتى توجعات وصدر منها أنين ضعيف ) كتهزي رجليك يا لق*حبة ودايرة ليا فيها شريفة عفيفة كتصلي زعما باشمن وجه كتقابلي مع الله ( خشا وجهو فوجهها حتى حس بجسدها المرتجف ) مقادكش أنا ولا عينيك على لفلوس
ناض من عليها وتاجه نيشان لشطابة هرسها على جوج ورجع عندها لقاها يلاه ناضت وشادة فكادر دلباب لا طيح عينيها شبه مسدودين او كتنهج .. وجهها حالتو نيفها غادي بدم او واحد العين زرگة وحنكها حمر وتنفخ .. بقا ينزل عليها بديك شطابة حتى تقسمات على جوج للمرة تانية .. جسدها مابقاش ملكها ! مابقاتش كتعرف معنى الألم ! مابقاتش كتحس ! كيخبطها وهي كتهز مع كل دقة عطاها فالأخير خسر عليها دفلة جابها لها وصت وجهها وجرها من شعرها جيهة لباب مخليها كتبكي بصوت مكسور وكتحاول توقف على رجليها .. لاحها قدام لباب كيشوف فيها بإشمئزاز
عماد : سيري كملي تقح**بين ديالك مع لكلاب دابا
ردخ لباب فوجهها وهي كانت واقفة بجسد نحيل و شعر منتوف نازل على وجها عامر كدمات و جروح تسيل دماء .. واقفة جامدة سادة عينيها كيتسمع فقط صوت شهقاتها كانها روحها تتغادرها من جسدها حطت يديها على فمها قاطعة صوت آنينها و دارت تتشوف فالباب بدموع غزيرة و للحظة رجفت من البرد لي حست بيه كيدخل ليها مع العضام .. تائهة تتشوف فرجليها احداهم حافية و ملابس خفية عليها و وتهز راسها للسماء باغة تصرخ بأعلى صووت ! باغة تغوووت و تخرج حرها و يسمعها جميع الناس و تشهدهم على حالتها...رمت خطوة على ارض باردة و لزجة بماء المطر و البرودة تتطلع معاها للدرجة بدات تاترجف غادة تتحط يديها على لحيط تتحاول تمشى و تدور تشوف يمين و شمال و تهز عيونها فنوافد جيران متأملة تشوف احد فيهم ..بغات دوك لبركاكة لي تيسمعو غواتها و بكاها ليل ونهار هما تيطلو يخرجو دبا يشوفها ..باغة لي يسولها فيهم سؤال واحد و يقولها
_اش مخرجك فهاد ليل ؟
_ شهاد الحالة راك فيها ؟
تمشت حتى وصلت للباب الدار ، بدون شعور رجليها خداوها لتما... گلسات فالعتبة منها لضس نيشان و تْكَات راسها علحيط وصوت شهقاتها كيرتافع تدريجيا ودموع كيطيحو من عينيها شلال .. حاسة بالحگرة وضلم كل ماكتفكر لي طرا وصداع لي ناض بيناتهم قلبها كيتقبط عليها .. هزات يديها لي رجعو زرگييين بالبرد مسحات دموعها وشفايفها كيترعدو مقداتش تصبر باقي حاسة شوية غاطيح على وقفتها ! و تتهمس بين شفايفها
_ياااربي اناااا متاايبة لييك ..ياااربي مااتشوف حالتي..( هزت يديها انش حطت على لباب كانت تتدق لكن لقوة لي دق مشات بحال قطة تتخربش ) ياااااربي
_للحظة سمعت صوت لكلاب و اصوات دراري طالقين موسيقى و تخسار الهضرة بدات تترعد و قربت دخل فالباب من لخوف حتى للحظة وقفت سيارة .. نزلات عيونها بخوف رهيب ونفس لوقت تتشم ريحة غريبة و عيونها تقابلات مع شخص كان واقف قدامها بقبية كحلة وكويرة فوقها وسورال كيطمة وسبرديلة فرجليه وساط دخان فوجها للدرجة كحبات بشوية بعد ماخنقاتها ريحة گارو وبعدها لاحو وعفط عليه
صلاح : ( بصوت مدعدع ) آش تديري هنا ؟
_تتحاول توقف ولخلعة شداها من صبع رجليها وهيا كتحاول تشوف ملامحو وخا مغطي راسو بكاسكيط ولقب مع ذلك بانولها حواجبو معقودين فيها وعينيه حمرررين ومنيمين ...
بسمة : ( بنبرة ضعيفة بالكاد تقدر تسمعها .. راخية جسدها على لباب ) عتقني الله يرحم ليك ميييمتك
سد باب طموبيل وجبد سوارت دار حل لباب وشار ليها براسو تدخل .. ناضت من على لعتبة مكنزة بالبرد مقادراش تدوي شفايفها رجعو زرقين وكيترعدو .. گلسات فدروج ضامة نفسها وكتشوف فلأرض معارفاش آش كدير ! متبعا غير إحساسها وغاديا !
صلاح : ( شعل ضو ديال دروج و سد لباب وخشا باكية گارو فجيبو .. هز حاجبو و نطق بنبرة قاصحة ) واش تعدا عليك شي حد ولا هاربة فهاد ليل من شي حد ؟
معلاتش فيه عينيها بقات حادرة راسها كتشهق بالبكا وكتنخصص وجهها كلو عاگرها او رجليها مابقاتش كتحس بيهم من قوة العصا
صلاح : ( حقق فيها شوفة ونطق ببرود ) فايت جاية عند هدى ؟
بقات كتهز راسها بآه مرار وتكرارا وهو غوت لهدى بصوت غليض وعالي خلاها تقفز من بلاصتها كتقول فخاطرها ليلة كحلة هادي مسحات دموع من على وجهها .. بايتة ليل كامل تبكي وتنخصص معنقة مخدة وكتشكي ليها .. لبسات بانطوفة فرجليها ونزلات بشعرها مطلوق ومخربق او وجهها عرقان .. وعينيها منفوخين وحمرين باين عليهم آثار دموع
هدى : ( عقدات حجبانها كتشوف جسم صغير متكي على لحيط ) نعااام !
صلاح : ( طلع فدروج ناوي يهز حوايجو ويخرج ) شوفي معاك لبنت
تبعات ليه هدى لعين ونزلات بشوية حتى تقابلات معاها شهقات من منضرها وجهها كلو واكل دق رجليها وحدة لابسة صندالة دلميكة وتانية رجعات كحلة من لغيس لي فزنقة .. بيجامة لي كانت خفيفة لصقات عليها .. كتبان فحالة تقطع القلب ، فحال شي وحدة طلقات إغت*صاب جماعي !
هدى : ( قربات ليها وشداتها من دراعها باش تعاونها تنوض ولوخرا خسرات سيفتها بألم ) بسمة أويلي اختي شهاد لحالة
بسمة : ( زادت كتنخصص ماحيلتها لجلدها لي عاطيها صداع ماحيلتها لوجهها لي فكل مرة تحاول تهضر كيعگرها ) تعدا عليا اختي اهئ اهئ قتلني عصا
جراتها معاها حتى لفوق مخليين ضس وراهم توسخ فكل عفطة كتعفط كتحس بضو ضربها .. هزات رجليها لقات زاجة صغيرة تخشات فوسط رجليها .. تبسمات بملامح حزينة على حالها عمر فكرات غاتحط فهاد الموقف خرجات زاجة من رجليها وهي عاضة على شفتها سفلية كتحس فحال الى مخرجة موس من كرشها .. عاوناتها هدى وخدات زاجة من يديها ودخلو بجوج لبيت هدى .. شعلات ضو وجابت ليها بانيو تاغسلات رجليها
بسمة : ( قاصت حنكها كتحس بيه منفوخ ) سمحي ليا جيت عندك فهاد لوقت معرفتش عند من نمشي ( بمرارة ) معنديش واليدين ولا عائلة ( مسحات دمعة طاحت لها ونطقات بصوت ضعيف وهي كتشوف شعرها طايح على وجهها كل مخربق ومنتوف ) غدا إن شاء الله نقلب على شي خدمة ونقلب شي دار نكريها
هدى : مغادة فين بقاي معايا محتاجاك ( هزات بانيو خواتو عندها فدوش او حلات ماريوها واخدة منو بيجامة سخونة وتقاشر وطاگية ودوبياس جداد ) اجي دوشي ترتاحي شوية
حركات ليها راسها بواخا وتاجهات لدوش سدات عليها لباب بعد ماقبطات من عندها لحوايج وبينوار علقاتهم فالعلاقة ودورات عينيها فلبرودويات هزات مشطة وشومبوان وباندوش .. حيدات حوايجها وهي كتشوف فخاضها زرگين او واحد ركبة تنفخات ليها غمضات عينيها كتنفس او تقابلات مع لمراية عريانة كتشوف وجهها لي كان نقي وزوين رجع حالتو دارت بملامح جامدة عطات بضهرها لمراية محاملاش تشوف كمارتها خوات عليها لما كتحاول تفك شعرها او والو كان كلو معقود .. بقات مدابزة معاه حتى فكاتو وغسلاتو او دوزات على لحمها باندوش مقاداش تحط عليه شي حاجة خرا .. شللات دغيا او لبسات لحوايج لي حطات لها ونشفات شعرها بفوطة وخشات فراسها طاگية .. جمعات دوش وخرجات ..
شارت ليها هدى تجي تنعس حداها .. حيدات بانطوفة من رجليها وطلعات حداها .. غطاتها بمانطة وبقاو كيشوفو فبعضياتهم بجوج
هدى : ( نطقات بنبرة خافتة وهي كتشوف فوجهها بتحسر ) علاش دار ليك هكا
بسمة : ( تبسمات بمرارة ونطقات بصوت مغبون ) رشقات ليه مالقا فين يخوي سمو بنت ليه أنا ( تنهدات من قلبها وحطات يديها على خدها كتحسسو ) لقا عندي شي فلوس من لخدمة دلميناج لي كندير ( بنبرة باردة ) وردني قح*بة وكنخونو
هدى : ( بلا ماتحس رجعات تبكي ) ولد لحرام الله يجيب ليه لي يدگدگو
بسمة ( هزات فيها عينيها بصدمة وقربات ليها معنقاها ) علاش كتبكي ؟!
هدى : ( مسحات دموعها كتنخصص ) والو مديش عليا مغاطلقيش منو ؟ رفعي عليه دعوة حتى ديال العنف
بسمة : ( بشرود ) باقي كنفكر شنو ندير ولكن طلاق هادي أول حاجة غانديرها غير نجمع شوية فلوس غانمشي لمحكمة
هدى : أنا معاك متخافيش إن شاء الله غاطلقي منو وتهناي ( بتاسمات من قلبها ) باقي صغيرة يجيك سيدو
بسمة : مابغيتيش اختي لا سيدو لا فحالو عييت عييت كيكونو فلول بوجه ويتقلبو عليك كي زمان !
هدى : ( بلا متحس نطقات بخفوت ) وحدة غاطلق وتانية غاتزوج
بسمة : ( بعدات عليها كتشوف فعينيها لي دغيا تغرغرو بدموع ) غاتزوجي ؟
هدى : مابغيتش نتزوج بغاو يزوجوني بزز ( بحرقة ) الخطبة بعد يوماين هما لي كيقرروا وانا خاصني نفد على أساس ماشي انا لي غانتزوج هما لي غايتزوجو
عقدات بسمة حجبانها مفهماتش شنو باغا تقصد .. بقاو مدة طويلة كيتعاودو بيناتهم وكل وحدة كتشكي لوخرا وتبكي وتخوي قلبها فلخر ناضو صلاو الفجر ورجعو نعسو معانقين ..
صبح صباح لجو بارد والشمس شارقة ، فاق كيتكسل بشوية عليه ويتجبد .. ناض كيحك فعنقو باقي مدوخ بنعاس .. شاف لمراح مرون وتفكر لبارح قلب عينيه ولبس كلاكيطتو وتاجه نيشان جيهة لباب وهو كيتفوه .. حلو كيطل بعينين معمشين غير مبانتش ليه حل عينيه بجهد وخرج كيشوف ورا دار .. ملقاهاش ! طاحو فبالو أسئلة معندوش أجوبة عليهم ! فين غاتكون مشات ؟ شنو غايكون وقع ليها ؟ مضنش نهائيا انو يحل لباب ويلقا غير يدو وريح يسحاب ليه غايلقاها فبلاصتها مكمشة حدا لباب وكتسنا يحل ليها !
عماد : ( دوز يديه على راسو طلعات معاه الخلعة ) فين غاتكون هادي
دخل دغيا لدار لبس سيرڤيت بالبلو مارين وسبرديلة بيضة خشا تلفونو فجيبو وبسطامو فجيب لاخر .. توجه نيشان عند خالتو وهو كيدعي ربي تكون غير عندها
عماد : ( دق لباب بجهد و هو كيعض فشفايفو بتوتر ) خااااالتي زهرااااا
حلات بنتها لكبيرة لباب كانت يلاه خارجة تسخر وتصادفات معاه نيشان
خولة : ( عقدات حجبانها معندهاش معاه ) مكايناش مي راه خدامة
عماد : ( كيشوف وراها جيهة دروج على أمل تبان ليه ) عندكم بسمة ؟
خولة : ( سدات لباب وحركات راسها بلا ) معدناش ! فين غاتكون خرجات على صباح
بلا ميجاوبها كان كيتمشا بخطوات سريعة جيهة شانطي شد طاكسي نيشان عند مو .. وقف حدا لباب كيدق شحال حتى نزلات شادة فلحيط وحلات ليه لباب وهي لايحة على كتافها بينوار دلقطن
مو : ( كمشات فيه عينيها باستغراب ) عماد اشهاد الوقت ؟ خبار الخير
عماد : ( باس راسها ونطق بزربة ) امي واش جات عندكم بسمة
مو : ( خرجات فيه عينيها وشدات فلباب ) اويلي اولدي فين غاتجي درية على هاد صباح فين عمرها أصلا وصلاتني ؟
دار كيجري لطاكسي قبل ميمشي عليه مخلي مو وراه كتعيط عليه مفاهمة والو
عماد : ( سد لباب كينهج تقداو ليه شد فراسو تالف معارف مايدير فين غاتكون مشات الله وعلم خايف غير طرا لها شي حاجة ! .. ضرب على كتف مول طاكسي بمعنى تحرك ) ديني لكوميسارية اخويا
حطو حدا لكوميسارية وقال ليه يتسناه جوج دقايق ويرجع ليه .. دخل مخلوع كيدور فعينيه .. حمد الله لكوميسارية خاوية على صباح تاجه نيشان لضابط لمسؤول على الإختفاءات
عماد : ( بصوت متقطع ) أاا السلام ع ليكم مراتي ختافات مع 4 صباح ( قبل مايكمل هضرتو هز فيه ضابط عينيه )
ضابط : ( بجدية ) دوز 24 ساعة ورجع
عماد : ( برجاء ) ماتقدروش تحركو دابا ديرو شي حاجة الله وعلم شنو غايكون وقع ليه من صباح حتى لدابا
ضابط : ( شار ليه بيدو يخرج ) 24 ساعة ورجع اشريف !
خرج ساخط كيسب فيه فخاطرو حك عنقو بجهالة حتى خلاه حمر وركب فطاكسي .. وكانت وجهتو هاد المرة سبيطار إنزگان ! آخر بلاصة متوقع غايلقاها فيها هي سبيطار دار فراسو غايكون شي حد شافها فديك لحالة وبغا يعاونها وداها ليه هو أقرب حاجة ليهم ..
نزل كيسوط وخلص مول طاكسي ودخل ساد نيفو من ريحة الخانزة لي كاينة .. ريحة دوايات كتعطي وحس نقا مكايناش ! لي بغا يلوح راسو ويموت يمشي ليه .. عطا سميتها كاملة وقلبو وقالو ليه تاوحدة بهاد سمية مجات عندهم هاد صباح ! شد فراسو لي تنفخ وحلف مايخرج حتى يشوف واش كاينة فمستودع الأموات ! قلبو ونفس الحاجة قالو ليه مكايناش شد فراسو كيبكي وينذب خايف لا تكون طرات ليها شي حاجة لا يكون تعدا عليها شي واحد ! ولا قتلها شي حد ! گاع الأفكار الخايبة دازو فمخيلتو هادشي لي خلاه يخرج بزربة ويشد طاكسي حتى المحطة دليكران كانت هادي آخر فكرة جات فبالو مدام أنها عندها فلوس متكونش هربات ؟ .. وقفو طاكسي حدا لمحطة لي كانت عامرة بالبشار كل واحد كيغوت من جيه ولگريساج على جهد .. جبد تلفونو وطلع تصويرتها لي داز من حداه يسولو واش مشفتيش هاد لبنت هاد صباح هنا ! مخلا ماسول لا صغير ولا كبير ! بقا تماك لساعات لكار لي جا يوقفو ويسول مخلا كار فلمحطة ماقلب عليها فيه بغا يتسطا ولا كي لهبيل حوايجو بغا يلوحهم ! رجع عند خالتو سخفان جهد تقادا ! شاف ساعتو لقاها 7 دلعشية كانت هادي هي لوقت فاش كتوصل لدار بقا گاس حدا العتبة دلباب شاد فراسو حتى بانت ليه جاية من بعيد تسناها حتى وصلاتو او وقف وعينيه حمرين بلبكا
زهرة : ( كتشوف عينيه مغرغرين بدموع ) آشمن موصيبة تاني ؟
عماد : ( گلس وحط يديه على راسو ونطق بصوت مبحوح ) ملقيتهاش مخليت فين قلبت سبيطار لمحطة عندك عند مي بقا ليا غير نقلب عليها فزناقي
زهرة : ( عقدات حجبانها ونطقات بنرفزة ) شكون هادي ؟
عماد : بسمة !
زهرة : اويلي على كتقلب عليها فين طجات لبنت مسكينة !
عماد : دابزنا لبارح فليل ( هز عينو فيها ونطق بتردد ) جريت عليها ( شهقات مخرجة عينيها فيه ) خليتها حدا لباب ميصحابنيش غاتغبر
حطات يديها على حنكها معرفات متقول جلطها فهاد لحضة ...
زهرة : تعدووو اولد ختي مايبغيه لاربي ولا عبدو وتعدو على لولية ذنب كبير سير راها تابعاك دجاجة كحلة عمرك طفرو
ناضو دقة وحدة .. كل وحدة تشوف فتانيا بتاسمو لبعضياتهم وناضو غسلو وجههم وعطات هدى لبسمة شيتة دسنان جديدة .. هدى بقات ب بيجامتها جمعات شعرها لفوق كيكة مهملة او بسمة لاحت عليها تريكو دخليط أنيق واسع من اليدين او نازل تحت طرمة حتراما لراجل لي فدار .. مشطات شعرها لي نشف وطاح مسبسب على ضهرها ، ضفراتو وخرجو بجوج كي توام طولهم كان متقارب ..
هدى : اجي نوض مي نبدل ليها حوايجها ونتسناو لبنت لي كدير لها ترويض تجي
بسمة : واخا يلاه نعاونك
حلو عليها لبيت بشوية لقاوها ناعسة فيقاتها هدى بشوية وناضت كتشوف فبسمة مستغربة ولحالة لي فوجهها خلعاتها
مبيريكة : ( جرات بسمة من يديها حتى گلسات حداها ) مالك ابنيتي ؟ شهاد الحالة فوجهك
بسمة : ( توترات من نضراتها ونزلات راسها ) ضربني راجلي اخالتي
مبيريكة : اويلي على عدو الله مكيحشمش شكون باقي لي كيهز يديه على مرتو يدير فيها هاد لحالة
سكتات بسمة بإحراج حناكها دغيا حمارو تلبكات وحشمات معرفات متقول رجعات تحشم من لي طرا ليها
بسمة : ( بصوت خافت واضح عليه توتر ) جا معصب من الخدمة وخوا فيا سمو بقا يضربني حتى برد ( هزات فيها عينيها لي تغرغرو بدموع ) جرا عليا وخلاني مليوحة حدا لباب مع 4 صباح حالتي حالة محسيت غا برجليا داوني لداركم تلقاني واحد سيد واقلة ولدك هو لي حل ليا لباب وعيط على هدى
مبيريكة : ( طبطات على كتفها بحنان ) ربي يخلصو ابنتي ربي يخلصو ضالم عمرو يطفرو ولا يشوف نهار زين فحياتو
بسمة : ( دغيا رجعات حدرات عينيها حشمانة من المجية ديالها عندهم ناس مكتعرفها مكتعرفهم غير جامعها معاهم نهار تعرفات عليهم و حسات بطيبوبة ديالهم خصوصا هدى ! ) سمحي ليا جيت مصدعاكم على صباح غانخرج دابا نقلب على شي خدمة ونحاول نكري شي دار
هدى : ( غوبشات وضرباتها لراسها بشوية ) تخرجي لبرا رجلي على رجليك وأصلا مغاتخدمي فين ديك البيت عندي نقسموها انا وياك راك فحال ختي !
مبيريكة : ( ضحكات من منضرهم كتقاد فنضاضرها وسمعات سرسار ديال دار ) غا گلسي ابنتي قد مابغيتي متفكري لا فخدمة لا حتى حاجة لي كليناها نتقاسموها حتى يحن عليك الله ( شارت لهدى بيديها ) نزلي شوفي لباب تكون غير درية لي كدير لي ترويض وقتها هادي
فتحات هدى لباب كانت لبنت لي كدير لمها ترويض سلمات عليها وطلعو بجوج حتى لبيت مبيريكة
البنت : سلام عليكم خالتي لاباس كي بقات يديك ورجليك
مبيريكة : ( كتشوف فيديها كتحاول تحركها وكتحرك بشوية ) حمد الله حمد الله ماشي فحال قبل
البنت : ( شافت جيهة بسمة ولقات عليها سلام ورداتو ليها بابتسامة وفكل مرة كانت ترجع تهز فيها عينيها بلا شعور بقات فيها وجهها منفوج باينة كلات سلخة دلمعقول ) يلاه خالتي نبداو على بركة الله
بقات كدير ليها حركات مختلفة لرجليها ويديها مدة وهي معاها حتى سالات او ودعاتهم تمشي تفتح العيادة ديالها .. تعاونو عليها البنات بدلو لها حوايجها وهزوها حتى لصالة فين موالفة كتجلس ...
هدى : ( جرات بسمة تجلس ) گلسي نوجد الفطور ونجيبو دغيا
بسمة : ( طوات كمام البيجامة دغيا وجمعات الگصة لي طاحت على عينيها ) لا غانجي نعاونك
هدى : لا والله حتى تگلسي راه كولشي كاين مغاندير والو غير غانحط
مبيريكة : گلسي ابنتي رتاحي هدى تكلف
بسمة : لا والله اخالتي منجلس ندير يديا معاها وصافي
جرات بسمة هدى من يديها حتى مشاو بجوج لكوزينة تعاونو على لفطور وتفكرات بسمة دروج لي وسخات لبارح سلتات من حداها بشوية حيت عارفة متخليهاش سولات مبيريكة على طواليط ومشات لها هزات سطل عمراتو بلما وسانكروا وجاڤيل .. وهزات جفاف فيديها وكراطة .. دوزات تجفيفة من لتحت حتى لعند لكوزينة ودوزاتها لها تاهيا مخلية هدى كتنگر عليها وهي كضحك عليها
حطو الفطور وفطرو وجمعو الماعن غسلوهم بجوجهم وحدة دوز صابون وتانية كتشلل دخلو لبيت يرتاحو وفنفس الوقت كان طالع صلاح فدروج داز نيشان عند مو سلم عليها وگلس وعينيه على بيت هدى
صلاح : لواليدة صحيحة بيخير ؟
مبيريكة : حمد الله اولدي
صلاح : فينها رقية ؟ مبانتش لي
مبيريكة : مات ليها باها مسكينة ومشات لبلاد غادوز مووودة تماك
صلاح : ( حرك راسو بأسف ) الله يرحمو ( دوز يديه على لحيتو لكتيفة وهز عينو فمو ) لبنت لي جات لبارح مقالتش ليكم شكوون دار فيها ديك لحالة
مبيريكة : ( حطات يديها على خدها بحسرة ونطقات بأسف ) ضربها راجلها مسكينة مخلا فيها غير لي نسا وراه كتعرف هدى وفايت خدمات عدنا هنا فدار
صلاح : ( حك حاجبو ببرود ) لا مفاهمة مع هدى شدوها تخدم بلاصت رقية مافيا لي يشوف شي مراة خرا وصعيب تلقا شي حد تيقة فهاد الوقت
مبيريكة : واخا إن شاء الله أنا نسولها ( عيطات على هدى بصوت عالي ) هداااا ابنتي اجي حطي لفطور لخوك
سمعاتها هدى ونضات جارة معاها بسمة من يديها غير بغاو يخرجو وحدة دخلات فوحدة وطلقاات هدى ضحكة من قلبها
بسمة : لالالا ختي هدى غير سيري هو خوك اه ولكن راه كره_ت نظرة فالرج_ال
يتبع...
وآش البطل هو صلاح امممم