زواجي التالي الجزء الثامن

صلاح : ( شد فران سيك حدا رجليها او نزل زاج طموبيل .. هز عينو فيها مطلعها ومنزلها ونطق بصوت بارد مهيب وعينيه عليها حواجبو معقودين وداير فيها شوفة لي كتخلعها ! ) طلعي

رجعات بلور مخلوعة من صوت لي صدر من طموبيل .. هزات فيه عينيها باين عليهم الخوف او قلبها كيضرب ، كيه شافتو وجهها مشا منو لون حطات يديها على قلبها كتنفس او عقدات حواجبها فيه بالستغراب ! شوفة لي داير فيها طيح منها نص ومع ذلك خلات عينيها فعينيه وفداخلها كتقول لاش حابس عليا طريق وعلاش قالي طلعي !

بسمة : ( لسانها تسرط بعدات عينيها من عليه بتوتر وسرطات ريقها بعدها نطقات بصوت خافت ومتردد ) مطالعاش

صلاح : ( بصوت جاف وبارد نطق بنبرة مافيهاش مجال لنقاش ! وعينيه باقي عليها مراقب تصرفاتها وعينيها لي مكتقدرش تهزهم فيه لمدة طويلة .. حل باب طموبيل لي جنبو وشار ليها براسو تركب ) طلعييي !

بسمة : ( ألوان طيف دازو فوجهها نفس تحبس فيها وعينيه لي متحيدوش من عليها وتروها ) مابغيتش

صلاح : ( بنبرة حاااادة ومهيبة نطق بصوت عالي قفزها وخلاها تنصاع لأوامرو ) غاطلعي ولا نزل ليك

حماااااارت فلبلاصة علقات فيه عويناتها بصدمة وشافت بنادم لي كيدوز ويشوف فيه حسات بالإحراج ودارت دغيا طلعات حداه وسقلات ، وحتى هو فهمها ديمارا دغيا وخرج من الحومة

صلاح : ( عينيه على طريق ) فين بغيتي نهضرو ؟

بسمة : ( شافت فيه بنص عين ودورات وجهها دغيا ناحية شرجم ) علاش غانهضرو

تنهد بعمق وسكت معاودش جاوبها ولا هضر معاها بقا مركز مع طريق حتى وقف حدا لبحر وقدام كافي شكلها زوين وفيها ناس قلال كتبان كالم .. نزل وتسناها حتى نزلات دخل لكافي وهي تابعاه طلعو لاطيراسات وجلسو فجليسة بعيدة شوية على ناس ومقابلة مع البحر لجو كان زوين وقربات الشمس تغرب

صلاح : ( أسار لنادل وشاف فيها ) شنو تاخدي ؟

بسمة : ( عينيها على لبحر كتافادا تشوف فيه ) مابغيت والو

صلاح : ( وقف حداه نادل ) واحد كافي كحلة وعاصير فريز او كريب بشكلاط ( مشا نادل وتكا على الكرسي .. دوز يديه على لحيتو او نطق بستفسار ) مالك

بسمة : ( غير كدور فعينيها حاسة فحال الى جالسة على شوك ) والو ( سكتات لثواني ) غير عمري جلست فشي كافي مكرتاحش

صلاح : ( تبسم بجنب ومطق بطنز ) ديك لي تلاقيت معاها فكافي فإنزگان جالسة كضحك حتى بانت لها ضرسة دلعقل خيالك ؟

بسمة : ( حماااارت و الهضرة وحلات ليها شافت فيه بنضرة عادية او وجهها ماعليه حتى تعبير وهو دور وجهو كيضحك .. نزلات راسها كاتنفس بجهد وعتقها غير نادل لي حط ليهم طلبية كيف حط حداها كاس عصير شربات منو ربع كتبرد بيه ) صمت

صلاح : ( كحز لها طبسيل حداها ) كولي

( سكت لثواني ) دوات معاك لواليدة ؟

بسمة : ( دورات وجهها جيهة لبحر ) اه هضرت معاها

صلاح : ( كيلعب بالكونطاكط دطموبيل فيديه ) فين كنتي غادة بوحدك

بسمة : ( حاسة فحال الى جالسة فكوميسارية ) كنت غانمشي لدار فين كنت كارية ( تنهدات ) شكرا على الخير لي درتو فيا ونتا بالخصوص عاونتيني وخليتيني فدارك واخا مكتعرفنيش ( ترددات تهضر ولكن فلخر نطقات ) مهم لا شفقتي عليا وبغ...

صلاح : ( قاطعها فهم المقصود من كلامها ) كون شفقت عليك غانخلي مي وختي يعاونوك راه فيهم الكفاية علاش فنضرك غانهضر مع مي ونبغيك لزواج ؟ إلا وشفت فيك حوايج عجبوني وباغيك للحلال

بسمة : ( حناكها سخنو عليها ويديها رجعو يترعدو تلفات ومعرفات متقول مضناتش يقول ليها هاد الهضرة نهائيا ) أاا اا أ مابغيتش نتزوج ( حدرات راسها ) راني مطلقة ومنصلاحش ليك تستاهل حسن مني الله يسهل عليك فماحسن

صلاح : ( كي سمع هضرتها خنزر ) فنضرك أنا معارفش واش راك مطلقة ؟ على شكون وقف معاك حتى طلقتي ! ومسألة متصلاحيش ليا أنا عارف شنو كندير كون شفت فيك حاجة خايبة راه شوفة منشوفها فيك ومتحطيش رجليك فداري كيما ربي حلل زواج راه حلل طلاق مافيها عيب ( بتحذير ) وآخر مرة طيحي من راسك قدامي ولا قدام شي حد .. أنا ختاريتك نتي مابغيتش شي وحدة أخرى وهضرت مع مي باش دوي معاك مابغيتش نجيك فاص ونقوليك ها شنو كاين مابغيتش تحسبيها فشكل ولا تقولي هدا كيضحك عليا وزواج مكاتب يقدر طريقة باش تعارفنا ولا طريقة باش وصلت ليك هضرتي معجباتكش ، أنا هادشي ماعطاني الله هكا داير

بسمة : ( مركزة مع هضرتو وكتحلل فعقلها وتفهم قصدو كتر ) صمت

صلاح : ( رشف من قهوتو ) تاواحد ماحسن من لاخر كلنا فحال فحال ( هز فيها عينيه ) ويلا عندك شي أسئلة مرحبا انا قدامك نجاوبك على لي بغيتي

دام صمت لدقائق خلاها على خاطرها وهز تلفون مدوز بيه الوقت هي ساهية فلبحر والهواء كيلعب بخصلات شعرها ريح خفيفة ومنعشة كضرب فوجهها خلاتها تستنشق الهواء براحة وستمتاع بداك الجو زوين وحتى منضر غروب شمس كان عندو نعكاس زوين على لبحر

صلاح : ( دوز يديه على وجهو ) شنو قلتي ؟

بسمة : ( شافت فيه ونطقات بهدوء ) غانفكر

حادر راسو وكيسمع باه وخالتو كيهضروا وهو مكتافي بآه وصافي ويحرك راسو ! عارف راسو غالط غير يدوي ينوض ليه باه ..

زهرة : ( شدات طرف دلملحفة كدير بيها لبرد لوجهها ) شغانقول ليك أ عْلِي غير على وجهك مشيت عندها كون بقيت على عماد والله منمشي عندها وخا يجلس يطلب حتى صباح

عماد : ( حادر راسو وكيلعب بگورميط فيديه ) عارف لي كاين اخالتي الله يسهل عليك ويخلي ليك بنياتك

زهرة : ( دورة راسها بمعنى أحياني عليك ) دير مشاكل وتوحلنا فيهم مخليتي لا باك لا مك لا أنا .. فيما يخصوك فلوس ولا يجيو ناس يقلبو عليك حيت مسلف من عندهم وهارب باك مسكين يخلص كبرتي وربيتي لكتاف ولخدمة لي مفرحهم بيها جراو عليك منها ( حطات يديها على راسها ) كون ماخلص عليك لفلوس لي شافرهم وگلس مسكين يطلب ويزاوك حتى حولوك تخدم فبانكة خرا كون راه كدور فزناقي لا فلوس لا دار فين تعيش ومك مسكينة فيها سكار وأمراض دنيا ودين مجموعين فيها وباقي تعصبها بمشاكلك ( حطات يديها على حنكها ) دير عقلك وتبدل راه هادشي منافعكش طلق واجي صدعنا حنا لا بغيت رجع بسمة بغيت بسمة عرفتيها مسكينة هي لي قابلة على هبالك

عْلِي : ( خنزر فيه وقاد سروال قندريسي لي لابس ) الله يهديه ولينا حنا نجريو عليهم ونگادو من هنا وهما يعوجو من جيهة تانية ماخليت مادرت على ودو اختي زهرة هانتي تشوفي على عينيك خلصت ليه كريدي او وقفت معاه فسبيطار او خلصت سيد لي دار كسيدة بطموبيلتو او وقفنا معاه فسبيطارات وباقي مابغا يدير عقلو لعگاز وقربنا نشدوه ( حك راسو الأصلع ) وحتى المراة لي طلقات منو هاحنا نجريو باش ترجع ليه وعالله غير يدير عقلو نتهناو من جيهتو

زهرة : ( تنهدات ) شغادير اخويا لولاد هما هادو تكبرهم وتبعهم فمشاكلهم ونتا فراسك شيب ( ميقات فعماد ) غير هاد الگنز عندك وسمحلي على هاد لكلمة راه مايگر فيه والو على وجهك مشيت عند لبنت ولقيتها مسكينة محروقة فجنبها وجالسة عند ناس خدامة عندهم مناقصينها مشاكل ونزيدوها عاد متفكات ( رجعات خنزرات فيها محاملاهش ) يعلم الله لارجعت عندها وجبدت لها لموضوع شادير من حقها بعدا لاجرات عليا تكركبني من دروج نبوس فوق راسها حيت سررري ( حطات يديها على صدرها ) أنا لي تابعة هاد الحمق لي مدار فيا الخير وجايا عندها بوجهي حمر

عماد : ( عض على لسانو مصبر راسو غير بزز .. هز عينو فيها عاقد حجبانو ولي فيه شي حالة فيه تطلق كي الكاسيطة مابغا يسكت ) وامتقوليش هكاك اخالتي سمحي لنا .. مكان عندي عقل واش انا كنقلب عليها وعقلي هرب وبغيتي نعرف باقي شكاندير

زهرة : ( خرجات فيه عينيها ) سكتنا باقي منسيتها ليك واخا تكون مقرقب مدير ديك الحالة وتهز صوتك عليا هدا هو خيري ( شافتو سقل ورجع حدر راسو ) بسيف ماتقلب ومتلقاهاش ونتا مخرجها فنصاصة ليل الفجر يوذن وسميقلي ناس مكمشين فمانطهم ونتا ناعسة مغطي بثلاتة الكواش عاد گرو فيك ودفيتي وهي مخرجها ببيجامة رقيقة مسكينة معندها حتى حوايج سخان متلبس طلابة وعندهم باش يدفاو ( ضربات على فخضها ) عيشة الحمير هادي ماشي بنادم

عماد : ( حمااار او دنيه سخنو ) وامرتي هاديك وغير تخاصمنا وم...

زهرة : سكككككت متقوليش مرتي البنت مطلقة ومابقا عندك حق فيها

عْلِي : ( تنهد بقوة ) أودي أختي زهرة لبنت مشفنا منها عيب والمشكل كامل من هاد بوراص دولدي بغينا غير ترجع ليه ومايخصها خير أنا براسي غانشوف واش كيجيب تقضية واش كيصرف عليها عالله غير ترجع ليه

زهرة : شغانقول ليك لبنت تكرفصات حتى عيات من قوة جوع لي دار ليها خرجات تخدم باش تلقا متاكل وجا هو قاليك كتخوني منين جاوها لفلوس وبجهو حمر باغيها ترجع ليه لاشافت حتى فوجهو متقولها لحد

عماد : ( دار فيها تخنزيرة دلعدو ) اخالتي آش جبد هاد الهضرة

زهرة : ( دارت يديها على خصرها ) ياك مكنفضحك اولد اختي ياك باك فراسو كولشي

علي : ( شاف فعماد ) لا حول ولا قوة الا بالله

عماد : وراه مراتي هاديك والمشاكل كيوقعو ولي دازت على راس مزيانة هاحنا نتعلمو من أخطائنا ونحاولو نصلحوهم م...

نقل بنضرو لخالتو لي كانت دايرة فيه شوفة دالله ينعل لي مايحشم وهو يقطع الحس ورجع نزل راسو مخليهم هما كيدويو .. بقا يدور فعينيه ويسمع ليهم وهو قاطع الحس عارف راسو لا دوا باه ينوض وخالتو والله لاعاوناتو وميشوف لا بسمة لا نصها

صلاح : ( دوز يديه على وجهو ) شنو قلتي ؟

بسمة : ( شافت فيه ونطقات بهدوء ) غانفكر

صلاح : واخا مقلتي عيب .. ( رد لبال ليديها لي مزيرين على صاك ) شنو ناوية ديري دابا

بسمة : ( هزات فيه عينيها وطولات فيه شوفة ) غانمشي عند رحمة

صلاح : ( دار يديها تحت ذقنه ) متفكريش تمشي عندها جلسي فدار مناقصك حتى خير حسبي راسك فدارك وحتى الى مابغيتيش تزوجي بيا وكنتي رافضة هاد الفكرة نهائيا ، معنديش مشكل ديري لي عجبك فلخر راه نتي لي غاتزوجي وتاحد مغايفرض عليك رأيو .. ديك ساع نوقف معاك حتى تلقاي شي خدمة مزيانة وشي دار

مصلوحة تسكني فيها وعيشي كيف بغيتي

بقات المدة ساهية فيه وفكلامو لمسات واحد الجانب عمرها عرفاتو فيه متنكرش أنو إنسان غااامض معارفة عليه والو ولي فراسو معالم بيه غير الله مع ذلك كيبان حنين كيف قالت هدى

بسمة : ( حنحنات نزلات عينيها وخدودها موردين ) معرفت منقول ليك مهم شكرا واخا مابغيتش تعدب راسك الوقفة لي وقفتي معايا من نهار طلاقينا كافية وموفية

صلاح : مكاين عداب ( ناض وحط فلوس فوق طبلة ) زيدي نوصلك دابا لدار عندي شي شغل

حركات راسها وتبعاتو حتى خرجو من كافي وركبات حداه ساقلة وساهية فزاج حاضية طموبيلات غاديين وجايين وعقلها شارد ممعاهاش ! كتفكر ! فاياش معارفاش لمهم أنها شاردة وبالها مشغول وعقلها مشوش ، تكات براسها على زاج وغمضات عينيها براحة وماحسات حتى داها نعاس .. بعد دقائق قليلة كانت فاقت وحلات عينيها حمرين بنعاس على صوتو وهو كيعيط عليها

بسمة : ( هزات راسها دغيا بإحراج محساتش نهائيا حتى داتها عينيها ) وصلنا !

بقا كيشوف فيها مجاوبهاش وهي توترات وتلبكاات دورات وجهها دغيا شافت دار ونزلات كتجري دقات فلباب تسنات حتى حلات لها رقية وطلعات كدردگ فدروج قلبها كيضرب وشوفات لي كان كيدير فيها حشموها نضرتو فشكل ! كيبقا مركز مع بؤبؤ عينيها فحال الى كيحدد لونهم وتقول واش ينزل عينو عكسها هي تشوف فيه وتهرب عينيها دغيا

طلعات تالصالون عند مبيريكة لقات هدى رجعات لدارها كي خرجات تبعاتها تاهيا .. دخلات حشمانة وجلسات قريب ليها

مبيريكة : ( حطات تسبيح من يديها ) رجعتي ابنتي

بسمة : تلاقيت اخالتي ( سكتات لثواني ونطقات بشوية ) بولدك حدا لباب ومخلانيش قالي غير طلعي

مبيريكة : ( عقدات حجبانها ) اويلي ياكما طلعك بزز ( شافت فساعة ) وراه بشي ساعتين ولا كتر باش خرجتي فين تلاقيتي معاه باش تعطلتي

بسمة : ( حنحنات ) احم حدا دار اخالتي غير داني لواحد قهوة ودوينا شوية

مبيريكة : ( بتاسمات ) اااه وقولي هكاك ونا صحابني غوت عليك حتى طلعتي تجري هكا او وجهك حمر

بسمة : ( زادت غرقات فحوايجها ) لا غير مع لحال سخون داكشي علاش حماريت

دورات وجهها لشرجم لي كيدخل منو البرد والخامية كيديها ويجيبها البرد ، ضحكات ودورات وجهها شادة تسبيحها مخلياها على راحتها

_________

دايرة رجل على رجل شادة تلكموند فيديها وكتقلب على شي مسلسل زوين تفرج فيه الملل قتلها وملقات مادير من غير تقطع لها من الحلوة لي قادات او دور بيها سقاطة كي عادتها جالسة تاكل وتلوح رونات دنيا ومهامها حد

هدى : ( شادة تلفون باليد تانية وحاطاه على ودنيها وعينيها مركزين فتلفازة ) وقاليها زعما فاش خدام ؟ انا درية فاش هضرت معاها حسيتها فحال إلى معارفة والو

فريد : ( بغضب ) هدى واش عمرك شفتي خوك كيبيع لحشي**ش غا كتهضري ومعارفة والو

هدى : ( عقدات حجبانها ) وباش دار هاد الفلوس كاملين بسلامة وراه باينة ومعروف بأنو بزناز نتسنا انا تانشوف بعيني باش نتيق على فاش خدام بسلامة

فريد : ( نهض فيها ) مغادخليش سوق راسك وضربي طم بينو وبينها يقولها ليها ولا ميقولهاش اصلا خدمتو هاديك غاتزوج بيه ماشي بالخدمة يكفي غير تعيش هانية شي حاجة خرا مكتهمش ! ونتي ديها فراسك خوك راه مقطرة ليه من لعينين تجبدي هاد الموضوع قدامو يتقلب عليك متوليش تعرفيه هاودني منك !

هدى : ( غوبشات ) ماقصدتش هكاك انا راه مكرهت لو بسمة درويشة وبنت ناس وغايتفاهمو تاهيا سكوتية ومكتبغي صداع ( سمعات ضحكتو ) لاش كضحك زعما تقولي نتي فيك صداع ( تنهدات ) مهم الله يكتبهم لبعضهم مكرهتها ليه تبدلو ويرجع طريق مزيانة ويبعد على لحرام

فريد : ( حبس ضحكة بزز ) واش منضحكش نتي لي قلتي فيك صداع انا مقلت شاي ( دوز يديه على وجهو ونطق بجدية ) إوا هكاك دعي معاه والله يسهل عليهم دعي يهديه الله ماشي تجبدي مشاكل ولا تقولي هادي علاش وكيفاش خوك عارف شكايدير

هدى : ممم واخا ( شغلات مسلسل تفرج فيه ) نخليك دابا متبعة مسلسل

قطعات وحطات تلفون جنبها وتكات على الفوتوي مجبدة رجليها وحاطة راسها على مخدة صغيورة

"بعد" مرور ثلاتة أيام

مع جوايه الضهر كان جالس فلكوزينة كيفطر بعد مادخل عيان وبلا فطور من صباح .. خلا مو وبسمة فصالون مجمعين وجلس كيفطر ورقية كتنصب لغدا .. ساس يديه من دشيش لي فلخبز وناض قاد تيشورت متوجه لبيتو لفوق حتى سمع سرسار وتم نازل يحل لباب ، كيف حلو كتبان ليه نفس المراة لي جات تزور بسمة آخر مرة هي وشي مراة كبيرة

زهرة : ( بتاسمات ) السلام عليكم

صلاح : ( عاقد حجبانو كيشوف فيهم ) عليكم السلام !

زهرة : عفاك اوليدي جينا نطلو على بسمة نقدرو نطلعو نشوفوها ؟

صلاح : ( بقا المدة كيشوف فيهم معجباتوش مجيتهم حاس فحال الى موراها شي حاجة .. تنهد ودوز يديه على لحيتو لكتيفة ورجع لور مخلي ليهم مجال يطلعو ) طلعو تلقايهم فصالون فين شفتيها ديك المرة

خرج هو وجلس فطموبيل مخليهم هما طلعو وحدة شادة فتانية المراة لي معاها كدور عينيها فدار وتقول تباارك الله ناس فين عايشين وزهرة حداها تنغزها وشير ليها فين يمشيو

زهرة : ( حيدات صابو من رجليها ودخلات ) سلااام عليكم

مبيريكة : ( عقدات حجبانها وشافت فلمراة لي موراها ) عليكم السلام!

زهرة : ( حشمات ) مديروهاش منا قلة صواب الالة جينا نشوفو بنتنا بسمة

مبيريكة : اهاه مرحبا الالة

كي هزات بسمة عينيها فيهم تبلوكات وهي كتشوف فعگوزتها القديمة بقات لمدة كتشوف فيها وعينها مرمشوش حتى حسات بيها عنقااتها وباستها فوق راسها

سالكة : ( حطات يديها على ضهرها وشافت فيها بحنان ) كيدايرة ابنتي لاباس

بسمة : ( شافت فزهرة لي جلسات فجنبها وتانية حداها خشاوها وسطهم ) حمد الله

سالكة : ( دوزات يديها على شعرها ) كي بقات ليك ابنتي الحرقة شوية ؟ سقت لخبار من زهرة تخلعت عليك ابنتي والله عاد كتاب نجي نشوفك الله يحفضك ياربي ويشافيك

بسمة : ( فحال الى ضاربينها بطرشة مجيتهم معجباتهاش وحسات من وراها شي حاجة ) أمين

سالكة : ( شدات يديها وزيرات عليهم ) ابنتي نقوليك شي هضرة ومديرهاش مني قلة صواب نتي راك فحال بنتي معزتك من معزة ولادي وكتر

مبيريكة غير حاطة يديها على حنكها وكتشوف من هضرتها عرفاتها واش عگوزتها لقديمة اما زهرة رجعات لور وكتفرج مخلياها هي تهضر وتقول ماعندها ..

بسمة : ( تنفسات بعمق وسلتات يديها من بين يديها ) خبار الخير اخالتي

سالكة : ( تنهدات بحزن ونطقات بصوت مضيوم ) ولدي كيبغيك ويموت عليك ميلقاش فحالك يضل مسكين يقول لينا بسمة بسمة ندم حتى ندمات زغبة لي فراسو يضل يهتهت بيك وجينا على ودو ر..

بسمة : ( عقدات حواجبها ) خالتي جايين على هاد الموضوع ؟

سالكة : سمعي ليا وديك ساع قولي لي بغيتي راه عماد ولدي وعارفاه مدار فيها ميصلاح ولكن راه تبدل رجع لخدمتو او ولا راجل يتعول عليها علاش ابنتي مرتجعو وتلمو شمل

بسمة : ( رجعات بلور نافرة منها كي تسمع سميتو كتحس بداتها كترعد بالأعصاب ) خالتي مابقيتش ب...

سالكة : ( قاطعاتها ) ابنتي فكري ومتسرعيش راه والله ميخصك معاه خير تعيشي مزيان وبيخير راه ندم ويطلب ويزاوگ باش ترجعي ليه الكريديات لي عندو فكهم او خدام او كيتخلص خلصة مزيانة يهزك بيها نتي او ولادك لا كتاب او تزاد عندكم شي وليد ولا بنيتة ابنتي والله حتى كيبغيك غا مكان عندو عقل دابا نتي ابنتي مريضة ومقادة تهزي راسك الوقت صعيبة او المراة مطلقة بلا راجل كاتكرفص متقسحيش راسك .. دابا نتي خدامة عند هاد ناس وجالسة عندهم علاش ماتجي تسكني عندي مايخصك خير متهزي متحطي نقابلك حتى تبراي

زهرة : ( كتحاول دخل بخيط بيض ) بسمة ابنتي عارفة مداز عليك ولكن بلاصة متبقاي عند ناس مكتعرفيهم اجي عندي ولا عند عگوزتك

كترعد كترعد أعصااااب دنيا ودين طلعو فوق راسها قلبها كتحس بيه كيضرب بجهد عينيها حمارو او نفس كطلعو بزز فكرة ترجع ليه عقلها ولا قلبها ماتقبلهاش فعقلها كتقول عمري رجع ليه وخا نموت يحطو سيف على عنقي نشهد ويقتلوني احسن من انني رجع ليه

بسمة : ( بلا ماتحس نطقات بالنفعال وهي مخرجة فيهم عينيها ) مجالساش عند ناس غراب جالسة عند عگوزتي او راجل لي غانكون مرتو

كي سمعاتها مبيريكة بتاسمات وعجبها الحال .. زهرة رجعات لور كدور فعينيها وتشوف فيها بصدمة اما سالكة كحازت من حداها وناضت كتحنن وتقاد فملحافها ردها معجبهاش نهااائيا

سالكة : ( حركات راسها لزهرة بمعنى نوضي وشافت فبسمة وقلبات عينيها هازة خنافرها لسما وبعدها بتاسمات بتسامة صفرة ) إوا مكنا عارفين مبروك مبروك .. إوا خليناكم على خير

لاهي جاوبتها ولا حتى شوفة مشافت فيها طريقة باش هضرات محملاتهاش حساتها إهانة ليها فحال الى كتقول ليها فوجهها ولدي سيد رجال وخا يدير لي دار ميتعابش نتي خاصك تصبري وتحني راس وترجعي ليه ! دارتها فحال شي كلب•ة تسكت على ذل وعلى جوع والعنف وفلخر ترجع ليه على زينو ولا على فلوسو ولا على حترامو ، خرجات تنهيدة حاارة من قلبها حاسة براسها مخنوقة هضرتها مطلعات منزلات ليها وباش تبرد على راسها ومطيحش قيمتها قدامهم نطقات بكلام هي مراضياش عليه ! فقط باش يفهمو راسهم ويعرفو انو الف واحد يتمناها مواقفاش على ولدهم !

خدات تلفون من عند مبيريكة وطلعات نمرة هدى .. دخلات لبيت وسدات عليها لباب ، مخليهم متبعين ليها العين ونزلو مع دروج بسرعة سالكة كتمشا بزربة وزهرة تابعاها من وراها .. ماخفات خطواتها حتى بعدو على دار عاد دارت سالكة كتشوف فجنابها مابان لها حد ونطقات بتهكم ..

سالكة : ( قلبات عينيها وجمعات فمها كي البسطام ) شتيها كي كدوي عينيها مخرجاهم تاوصلو لحنوكها قربات طير عليا تقجني قالت ليك قاعدة فدار راااجلي وعگوزتي ( نطقات بسخط ) الله يبغر ليها شقف يصحاب ليها غير هي لي كاينة ولدي الف وحدة تمناه ويلقا حسن منها

زهرة : ( كدور فعينيها طالبة سلاك عرفاتها شاعلة او ولدها واخا معرفت اشنو يدير تنوض تحامي عليه ) ايه

سالكة : ( قدات نقاب لي دايراه بالملحفة ) ربات جناوح وبغات طير تزادو عليها شي فليسات او عاجبيناهم دوك زوج زليجات لي فدار قالت قطعت الواد او نشفو رجليا زعما راني غانولي لالة ومولاتي منهز منحط واخا وتشوف العگوزة لي عندها آش غادوز عليها تكره زواج ومايجي منو ترجع عند ولدي تبوس لو رجلو هالهار غير يشوف فيها

زهرة : ( تنهدات ) باش عرفتي غادوز عليها العداب

سالكة : ( ميقات فيها ) باينا عندها العگوزة حارة شوفي غاطبالي يشعلو كي المراية تشوفي فيهم وجهك تحشمي تحطي عليهم شي حاجة ( بالستهزاء ) طررر شلحة واجرك عالله هاديك تخليها نهار كامل فشقا حتى يتهرس لها ضهرها ويزيدها باقي ولدها داك شمكار يضرب ليك الماحية على قلبو ويجي يتضرب مع الحيوط آخرتو حبس وهي تابعاه بالقفة

زهرة : ماتعرفي تكون مزيانة ! وحتى ولدها ماشي من هاد نوع وجهو متشوفيهش هنا ومعروف فدرب مهدن ومايجبد صداع ولي قلب عليه يلقاه

سالكة : ( هزات كتافها متجاهلة هضرتها ) ولدي سيد رجال خدام فبنكة ومع دولة وياكلهم حلال هي آخرتها مع شمكار يعيشها بخبز كارم وتبعو فالحباسات ( قلبات عينيها المكحلين ) سرها وجهها غا تاع تمرميد

______________

حالة شرجم وجالسة حداها شادة مخدة وكل مرة تعض فيها بالفقصة .. جامعة رجليها عندها ومتكية براسها على الحيط كتسنط لهدى فأبيل

بسمة : ( بفقصة ) وراه جاو على غفلة ومضنيتش ديك سالكة حتى هي تجي صدموني قاليك رجع لولدها انا طلع ليا فصحتي وبغاتني رجع

هدى : ( عقدات حواجبها منرفزة ) اويلي على شيبة العاصية كون كنت فدار نكركبها من دروج

بسمة : واقالت ليا رجعي ليه واجي سكني معايا متبقايش عند ناس غراب وانا بفقصة قلت لها مجالساش مع ناس غراب قاعدة فدار راجل لي غانكون مرتو ومع عگوزتي ( قربات تبكي ) اويلي على هضرة راه محسيتش براسي بغيت ناكل راسي بهاد تحشيمة قدام خالتي مبيريكة ( عضات فيديها بالفقصة ) تزيرت وملقيت منقول

هدى : ( جابت لها ضحكة ) اويلي مقلتي عيب عبرتي عليهم وراه خويا باغيك نيت مالكي قلتيها وهو مداويش فيك

بسمة : اويلي حطي راسك بلاصتي تا الى قبلت كي ندير لهاد زواج راه كيخلعني وشوفة منقدرش نطلعها فيه ينهض فيا كرجع نترعد غانصدق ساخفة بالخلعة لا لا اختي انا مقاداش راه فاش كيعلي صوتو كيرجع يخلع فحال الى غاينوض يقتلني عصا ( بخوف بان على نبرو صوتها ) وباينة دقتو قاصحة ! ( برفض ) لالالالا طبعو صعيب وبزاف

هدى : ( شدات فمها لا تفلت لها ضحكة ) صبري هانا جاية عندك ونهضرو

كي قطعات معاها دوزات الخط لفريد دغيا وهي كتمشا فدار كاملة مخلات قنت مكرهات طير وتحط فدارهم

هدى : ( كي جاوب نطقات بسرعة ) فريد اربي اجي ديني لدار ضروري

فريد : ( عقد حواجبه ) خبار الخير ياك شي باس ماكاين

هدى : لا لا ماواقع والو غير بغيت نمشي ضروري

فريد : صبري نسالي شي شغال ونجي

هدى : ( العافية شاعلة فيها مقادة تصبر ) لالا الى غاتعطل نشد طاكسي دار قريبة

فريد : ( بصوت عالي حاد ) تعتبي لباب رجليك نگرضهم ليك هاودني منك

هدى : ( غوبشات ) واصافي مخارجة فين قول غير لصلاح يجي يوصلني راه كاين فدار مكيدير والو راه قالت ليا بسمة كي نزل هو طلعو خالة راجلها او مو بقاو عليه ب .... ( عاودات لو كولشي من طاق طاق حتى سلام عليكم الحرف منساتو )

فريد : ( بتشكيك ) بسمة عاودات ليك هادشي ؟ وصلاح كاين فدار وطرا هادشي !

هدى : ( بتأكيد ) ايه وغايكون نزل لتحت راك عارفو كيجي شي حد كيطلع لبيتو ولا ينزل يجلس فطموبيل

فريد : صافي انا نصوني ليه دابا

كي قطع معاها صونا نيشان لصلاح عاود ليه گاع لي قالت ليه هدى وقاليه صافي انا نجي نجيبها قضي شغلك ..

لبسات عليها برقع دغيا وصباط فرجليها وكي سمعات كلاكصون خرجات وسدات لباب موراها .. طلعات فطموبيل وديمارا نيشان لدار

هدى : ( شافت فيه كيبان ليها كالم ومبرد ولكن تخنزيرة هي تخنزيرة ) عاود ليك فريد شنو كاين

صلاح : اه ( دور وجهو عندها ) نتفاهم معاك من دابا نسمع شي هضرة على خدمتي ولا شي حاجة هكا منتفاهموش ( دار صبعو على ودنو وخنزر فيها ) هاودني منك

هدى : ( سرطات ريقها ولصقات على لكرسي ) وعلاش متصارحهاش وتقول ليها شنو كاين مالك غاتبقا مخبي عليها

صلاح : ( وقف طموبيل حدا دار وحل ليها لباب ) ماشي شغلك ودردبي لدار

"بعد أسبوع"

مسرحة رجليها براحة ومتكية على الوسادة صهد دلحمام عرقها او الجو أصلا كان مشمس وسخوون .. گلعات لكويرة وحطاتها حداها وبقات غير بتيشورت رمادي قصير خاشياه فسروال بوي فريند أسود وسبرديلة نايك فرجليها

بسمة : ( كدير البرد بيديها وحداها شي عيالات كيلبسو حوايجهم ) الله اختي رحمة ولحمااان عندكم هنايا معرت كي كديري تجلسي تحضي بنادم سيكانهم او دخلي تحكي لهم فهاد صهد غير جالسين برا وعرقنا

رحمة : ( مسرحة وحاطة راسها على مخدة ) قولي الله يعفو علينا من هاد خدمة العداب لا خلاص زين لا حتى حاجة زينة ضو والما ولاو يجيو غاليين زيت ولات ستين درهم لإترو .. سكار غلا والبوطة حتى هي ( بفقصة ) وامن ساشية دتيد ماخلاوها فتيقار

بسمة : ( تنهدات ) شغاديري كلشي غلا يطلعو فأسعار المواد الغذائية او يخفضو فدخل العمال

رحمة : ( حكات شعرها وقدات زيف حياتي ) وكلنا عليهم الله دريويش مغاديش يعيش معاهم معرت فين غاديين

بقاو مودة وهما مجمعين رحمة كدخل تحك العيالات وهي تبقا بلاصتها تحضي لعيالات سيكانهم وتشوف لي خلصات ولي لا ، حتى وذن الضهر وتمات داخلة المراة لي كاتناوب مع رحمة هازة گصعية طعام فيديها وبنت وراها هازة لبن ومعالق وجبانيات ، تجمعو على داك الخير تغداو وناضت رحمة لاحت عليها جلابتها وشال باش تخرج

رحمة : ( خشات صابو فرجليها وشافت فبسمة ) تمشي معايا لسوق بغيت نختار شي طلامط لدوك جوج بونجات لي عندي ؟

بسمة : ( هزات تلفونها من صاك شافت ساعة وقدات شعرها وتمات نايضة ) يلاه توحشت ندور فيه نيت

رحمة : ( ضحكات وهزات بزطامها .. جراتها من دراعها وخرجو ) إوا باقي طلي عليا راه خويتي عليا دار وليت كي شي زوفري

بسمة ( كتمشا براحة الحرقة برات لها مابقاتش كضرها الأثر فقط لي كاين ) إن شاء الله شي نهار تاني نخطف شي نهار ونجي .. دابا غير قنطت فدار وجات خالة صاحبتي وصراحة معندي معاها ( وقفات حتى دازو شي طموبيلات وقطعو شانطي ) كي صبح صباح نضت لبست حوايجي وخرجت ولكن واخا هكاك مكتهضر معايا موقراني على شي هضرة سمعات

رحمة : ( دارت كتشوف فيها بفضول ونطقات بصوت عالي باش تسمعها حيت سوق كان عامر وكل واحد كيهضر من جيه ها مالين الفرشات وها صحاب الخضرة وديسير ) إنا هضرة ؟

بسمة : ( شدات ساكها ودخلاتو فراسها باش مايصدق شي حد جارو لها ) ولد ختها داك لي تلاقينا معاه فالقهوة قالي تزوجي بيا فاش وصلاتها خبار ضربات طم ولات تهضر عادي

رحمة : ( بتاسمات بفرحة ) هاي هاي هاي على بسمة وغاتزوج وتعرض عليا امكاين غا شتف هايتف هي نوجد تكشيطتي من دابا يلاه نجمع فلوس

بسمة : ( ضحكات على طريقة باش كتهضر .. حطات يديها على حنكها وضحكات حتى تغمضو عينيها و بانو سنيناتها ) هههه اماتوجدي شاي راني مقابلاش وماباغا نتزوج خليني اختي نعيش نخرج ندور ونتهنا شوية راني تخنقت

رحمة : ( جراتها من دراعها حتى تزعزعات ونطقات بصوت عالي ) واتزوجي اصاحبتي وعيشي لحياة معاه مال مك معكسة وتفرطي فداك زين ؟ مابغاهش نتي دوزيه ليا اويلي اصاحبتي طولة وتجريدة دراعو يديرو منك عشرة العيون الكوحل وشعر واللحية على مزيناتهم تخنزيرة طيح زوز من فوق سور وغاديك طموبيل ونقبل الى كانت طموبيل هكاك دار كي غاتكون ( حركات يديها بلالا بنادم بدا يشوف فيها وبسمة تنغزها وتقول ليها سكتينا شوهتينا ) وتلقايه داير لاڤابو بذهب بحال داك الممثل نسيت اسميتو ( هزات يديها الفوق كدوي بأريحية معندهاش هي حشومة ولاناس كيشوفو ) مهم سيد على مزيناتو دار فحال شي تركي لوشام فليد والأناقة وباينة فيه راجل يتعول عليه من هضرتو كيبان تقيل ومرزن ومايخرج الهضرة حتى يشحفك تبغيه غير يهضر وتبقاي تسمعي ليه

بسمة : ( ندبات حناكها من شوهة لي دارت لها وسط سوق ) اويلي ابنت لح•رام سكتي شوهتينا ونتي كتهضري فحال مالين الخضرة ( جراتها الجيهة مافيهاش صداع بزاف ) واشفتك سحتي ليا هنا وقاعدة تعبري زين ماتزين ويلا زوين راه زين لراسو مالو ليا الله يسهل عليه اختي آش بيتو قاليك تخنزيرتو طيح زرزور من فوق سور واخا ... ويخنزرك فيك الى مبلتي ليا فسروالك ويلا غوت خلاص لا اختي مقادة عليه فيومين يركب فيا الخلعة نولي غادة ونترعد بوحدي بلاش

رحمة ( شدات كرشها وكضحك وجهها حمار ) امييمتي كرشي اميمتي هاناري علمسخوطة هههههه

دازو عند الخياط عطاتو رحمة العبار وختارت توب وفنفس الوقت كان صلاح طالع مع دروج مسخسخ من طريق كتبان ليه غابيتو الفوق يطلع يدوش وينعس يرتاااح ، داز لصالون فين كاينة مو دخل باس فوق راسها وسلم على خالتو

مبيريكة : ( بفرحة غير كيبغيب عليها كتوحشو ) على سلامتك اوليدي سيمانة ونتا غايب غاتكون عيان ( دورات وجهها ناحية باب صالون وعيطات بصوت عالي ) رقياااا وارقياااا ( غير وقفات حدا لباب نطقات ) عفاك حطي لصلاح يتغدا غايكون عيان ياكل ويطلع ينعس

صلاح : ( دار إشارة لرقية بلا ) لا بلا متعدبي راسك مافيا لي ياكل شي حاجة انا غانطلع رتاح ( ناض وقف يلاه غايخرج ودور راسو بالستغراب ناحيتهم ) فينها بسمة ؟

ملعيدة : ( غير كدور فعينيها ) صمت

مبيريكة : خرجات صباح واقلة غاتكون مع رحمة ولا كدور

كي سمعها عقد حجبانو بطريقة كتخلع عض على شفته سفلية وتم نازل فدروج سمح فشي نعاس ولا دوش داك العيا دسيمانة كلها وتسخسيخ ديال طريق نساه وركب فطموبيل .. هز تلفون وكيصوني ويعاود ويرجع يصوني او واااالو

صلاح : ( ضرب بداك تلفون حتى تهرسات لو لانكصابل ) الق••لاوي شري لها تلفون نتا وتحطو ديكور فين غاتكون !!

الأفكار غاديين جايين فعقلو ! عقلو يقولو راها مع شي حد دابا وعقل يقولو الله وعلم فين غاتكون سارحة .. تحرك بطموبيل معارف فين غادي وتلفون فيديه يصوني ويعاود ولا من مجيب ..

هي كدور وضحك وتكركر خالقينها هي ورحمة مخلاو محال مدخلو ليه سوق كان عامر وكلشي حال ، تلفون دايرة لو صيلونص ومخلياه فساك يصوني ومرداتش ليه لبال .. دازت نص ساعة تقريبا عياوو وتهدو رحمة تقدات داكشي لي خاصها لدار وشراو كبال مشوي وجلسو فواحد بلاصة كيجلسو فيها ناس .. حلات صاكها غير باش تشوف شحال ساعة حتى كتفاجئ بثلاتين أبيل من عند شخص معرفاتوش ! نمرة عندها ممقيداش ، يلاه بغات ترجع تلفون لساك ممسوقاش ليه حتى رجع صونا لها فيديها ..

بسمة : ( عضاات فلكبال وجاوبات وهي كضحك مع رحمة وصداع لبراهش ودراري مجهد ) ألو

صلاح : ( العروق تطراساو فجبهتو وعنقو .. غوت بصوت عالي قوي وحاد قفزها وخلا الكبال يوحل ليها وتنزل راسها عينيها خارجين او وجهها حمااار ) فييييين كااااااااااينة

بسمة : ( تبتات راسها ) أنا مع رحمة فسوق دأسايس يلاه خرجنا

صلاح : ( بأمر ) وقفي فبلااااصتك أنا جاي دابا

قطع فوجهها مخليها كتبرق فعينيها وكتشوف فتلفون .. تنفسات ورجعاتوو لساك كدور فعينيها

رحمة : ( هزات حاجبها ) شكون هدا لي طالق حلوقو

بسمة : صلاح !

رحمة : ( توسعو عينيها ) أويلي هو هدا ؟ وباينة اختي فيه مكيتفاهمش

بسمة : ( ضحكات ونطقات بطنز ) مابقاش زين او باينة فيه درويش او سكوتي صافي ؟

رحمة : ( حركات راسها بلا ) لالا لا اختي مدرويش شاي هدا راه يغوت عليك تبولي فحوايجك بسيف مايوحل ليك لكبال وتجيفي

بسمة : ( نزلات فيها راسها ) مابقيتش أنا خوافة أودي أودي راه قلت ليك مامجرباش يغوت عليك راه الخلعة تركب فيك

رحمة : ( لمحات طموبيل جاية مكسيرية لجيهتهم كي فرزات وجهو جراتها سلمات عليها بالوجه دغيا ) الله يعاون اختي الله يفكك نمشي قبل مايجمعني معاك

مشات وخلاتها كتحك فودنها بتوتر ، عضات على شفتها سفلية كي وقف طموبيل عند رجليها ونزل زاج كيشوف فيها مخنزر ، العيا باين فوجهها العرق نازل مع عنقو او تيشورت لكحل لصق عليه .. شعرو مخربق على غير العادة وطايح على عينو ، وعينيه حمرييين بقلة نعاس والإرهاق .. دارت كاتحنحن وركبات فلور وهي مزيرة على صاكها وكتحاول ماتشوفش فيه هو لي دار عندها وبقا مركز فيها شوفة

صلاح : ( ببرود ) دوزي لقدام

بسمة : ( شافت فيه وقلبات عينيها دغيا ورجعات كتحك فودنيها بتوتر ) أ لا مرتاحة هنا

صلاح : ( دار متكي على لكرسي رجعو لور شوية وحط راسو عليه .. سد عينيه ونطق بجمود ) شيفور عندك أنا دوزي لقدام

بسمة : ( شداتها رعدة ) أ أ ااا لا بحال بحال

صلاح : ( دار عندها بزربة مخنزر ونطق بصوت فيه نوع من الحدة ) لا ماشي فحال فحال

معاوداتش معاه الهضرة نزلات عينيها لأرض وخرجات من طموبيل وهي كلها كترعد فحال إلى فيها بوتفتاف ، وجهها حمااار ويديها تعرقو .. ركبات لقدام غير بزز وقلبها كتحس بيه كيخبببط ، شدات سمطة باغا ديرها هي تجر وسمطة تجر تقول كيجرها لها شي حد وهي يديها فاشلين كتجرها فحال الى كتهرها طيح وتعاود تهزها ويديها كيترعدو أمام نضراتو المتفحصة لها

صلاح : ( دار يديه على لحيتو ) راني مهازش عليك شي فرد•ي ولا جنو•ية

بسمة : ( دارت شافت فيه وعبسات بطريقة كيوت ) لاء غوتي عليا

صلاح : ( قرب منها حتى رجعات بلور خايفة ومخرجة فيه عينيها وهو قابلها بنضرات جامدة وباردة حقق الشوفة فعيونها الخضراء وتبسم بجنب وهو مراقب نضراتها الخائفة ودقات قلبها المتسارعة لي حس بيهم من قربهم .. مد يدو حتى قاد لها السمطة ورجع لور مديماري طموبيل ) حنا لاش دايرين ليك داك تلفون إلى مكنتيش غاتجاوبي

بسمة : ( كتحاول تلتاقط قدر كبير من الأكسجين .. مدة لي حبسات فيها أنفاسها كانت طويلة ) مرديتش ليه لبال كنت دايرة لو صيلونص وخليتو فساك مع سوق عامر مطليتش عليه نشوفو حتى بغيت نشوف ساعة ( نزلات راسها ونطقات بتوسل ) سمح ليا مقصدتش

صلاح : ( عجباتو طريقة باش عتارفات بغلطها وعتاذرات ) مطرا باس .. ( دار شاف فيها ) فيك جوع ؟ نديك تغداي

بسمة : ( بتاسمات ) لا شكرا تغديت غير ديني لدار

حرك لها راسو بالإيجاب وداز نيشان لدار ، كيف وقف طموبيل نزلات دغيا متلبكة والمشية مقادة تمشا كي حسات بنضرتو لها المشية عواجت لها تنفسات وجرات حتى لباب ، كي شافتو مسدود عضات على شفتها بخجل وبقات واقفة حتى جا بشوية عليه كيطرطق فعنقو ، حل ليها لباب مخليها طالعة كتجري لبيت وهو طلع نيشان لبيتو لاح دوك الحوايج يتصبنو ودخل خدا دوش سخوون كمد بيه عضامو وحس براسو بيخير والعيا مابقاش كيحس بيه بزاف .. خرج لاوي عليه فوطة رش عليه ديودوغون ولبس تيشورت كحل مع سروال كيطمة فنفس لون ونشف شعرو بالفوطة ، هز تلفون فيديه ولبس كلاكيطة فرجليه ونزل وشعرو طايح على عينيه ، داز نيشان لكوزينة سخنات ليه رقية غداه وتغدا وداز لصالون جلس مع مو وخالتو كانو جوايه المغرب هكاك كي ودن ناضت خالتو تصلي ومو توضات بتيمومة .. خلاهم وخرج دار شي تصالات وبقا فطموبيلتو لموودة وهو شاد گارو فيديه وعينيه على تلفون ..

فهاد الوقيتة كانت خرجات بسمة من بيتها دازت نيشان لكوزينة لقاتها خاوية عرفات واش رقية تكون خرجات شمرات على دراعها وجمعات شعرها لفوق بفيلول .. وجبدات طاجين كبير حطاتو ونصبات طويجين بلحم وزيتون وزبيب والبرقوق كان غير بالبصلة وجا معيسل على مزيناتو ريحتو عطات فدار .. خلاتو يطيب وقدات جوج عواصر مع شلايض منوعة ، غسلات ديسير ونشفاتو وحطاتو فطبسيل فطاوس كبير ، كي سالات غسلات يديها وقدات الخبز فشبيكة وطفات على طاجين .. كي دارت لقات رقية جات

بسمة : خالتي ها لعشا عفاك حطيه ليهم أنا مقداش عليه ( لولبات عينيها ) معدتي كضرني غانمشي نعس رتاح

رقية : ( شافت فوق بوطاجي بابتسامة ) علاش عدبتي راسك مريضة رتاحي ( شداتها من يديها ) سيري رتاحي ابنتي رتاحي

خرجات من الكوزينة كتسلت لبيت ، كي دخلات سدات عليها ومشات نيشان فوق ناموسية وتلفون فيديها متلفة الوقت .. فنفس الوقت كان صلاح طالع مع دروج دخل صالون لقا مو بوحدها ورقية حطات العشا فوق طبلة

صلاح : ( هز عينو فرقية ) جلسي تعشاي معانا

رقية : لا اولدي غا بصحتكم كنت معولة نجي نصب لعشا ونمشي لقيت بسمة نصباتو

صلاح : ( حرك لها راسو .. حك حاجبو بصبعو الإبهام ودار عند مو ) فينها هادي

مبيريكة : معرفت اوليدي ( قربات ليه ونطقات بصوت منخفض ) راها معندهاش واقلة مع ملعيد كي تكون هي تنوض لوخرا

صلاح : ( تنهد ) مي راك عارفة لي كاين ( خنزر ) واش قالت ليها شي هضرة ماهياش تاني ؟!!!

مبيريكة : ( حركات راسها بنفي ) لالا اوليدي مدواتش معاها گاع راها فراصها بلي باغيها لزواج ملي عرفات مابقات حتى تهز فيها العين ( سكتات لثواني وتنهدات ) معرفت مندير إلى زيرت عليها ونعيط عليها بزز تجي تجلس راه يبقا فيا الحال ومنبغيهاش ويلا خليتها على راحتها نخاف تحسبها ممسوقاش لها

ناض نيشان لبيت دق جوج دقات وهي كي سمعات دقان ناضت حلات لباب وتلفون فيديها

صلاح : زيدي تعشاي

بسمة : ( لولبات عينيها ) أ لا غير بصحة راه معدتي ضراني غادي غير نعس رتاح

صلاح : ( ركز مع الحركة لي دارت بعينيها لاحض كي تكون تكدب ولا متوترة ديرها ) زيدي تعشاي وديك المعدة عندك نشوفو آش نديرو معاها

تنهدات وحكات ودنيها بتوتر حسات فحال الى قشع كدوبها ، تبعاتو حتى لصالون وجلسات معاهم مداتهاش فخالتو لي كانت عاد دخلات ونضمات ليهم ..

فاليوم التالي ومع جوايه العشرة تقريبا كانو مجموعين على الفطور وبسمة ورقية غاديين جايين من لكوزينة لعندهم كيحطو ويعمرو طبلة ، جلسو فطرو مجموعين وبعدها ناضت رقية تنصب لغدا باش تمشي تقضي غراض عندها .. ملعيد جمعات حوايجها ومشا معاها صلاح حتى شد لها طاكسي تديها حتى لباب دار ، مبيريكة جالسة فصالون كي عادتها مخدمة تلفازة وحاطة حداها شي لوز وگرگاع مرة مرة تنقب منها ، وبسمة كي فطرات ناضت لبيت وجدات دوش ضرباتها بتحمحيمة تبرد القلب ، خرجات بحنيكات حمرين من دوش لي كان سخون ، نشفات ذاتها ودهنات كريم رطبات بيه لحمها وسيروم لشعرها بعد منشفاتو بفوطة ، رشات سبرايت لجسمها ولبسات ملابس داخلية بالأحمر او تيشورت عريض مبرد مع سروال كيطمة توب عريض وبارد .. جلسات قدام لكوافوز و حلات مجر لي حاطة فيه هدى گاع مستلزماتها وجبدات علبة فيها مقص ومبرد .. نقصات ضفارها وحيدات جلد الميت من جناب نقاتهم هما وديال رجليها ودازت لشعرها نشفاتو بشوشوار وشافت ناحية لبلاك بعيون كتلمع ، هزاتو وسرحات شعرها خلاتو مسبسب فوق كتافها .. جمعاتو لفوق بفيلول ودهنات مرطب لوجهها او لشفايفها ، ناضت كتجبد عيات وتاجهات نيشان ناحية ناموسية عوالة تنعس حتى سمعات صوت دقان خفيف على لباب ، ناضت كتجر رجليها فكلاكيطة ودورات راسها شافت ساعة لقااتها جوج دلعشية .. حلات لباب وهزات عينيها فيه

صلاح : ( كي حلات لباب ضرباتو ريحتها ) وجدي راسك انخرجو دابا انا كنتسناك لتحت فطموبيل نقادو شي وراق

نزل دغيا وبقات هي واقفة لثواني متبعة ليه العين كان لابس تيشورت كحل كيف عادتو ديما فيما تشوفو تلقاه لابس تيشورت كحل وسروال جينز أسود ولا ديال كيطمة ومرة فشحال يلبس لوان أغلب ألوان فحوايجو عبارة على لون الأسود وأكثر حاجة كيعتامد عليها هي تيشورت كحل كيجيه ساهل يبدلو دغيا وعملي ميحتاجش يفكر شنو غايلبس ..

دخلات كدور فعينيها وكتقول فراسها إنا وراق ؟ تاجهات نيشان لماريو خدات منو سروال با تلفون أسود جلد مع قويميجة بلون الأزرق الملكي فاتحة الزر الأول فيها مبين على سنيسلة رقيقة فعنقها .. مشطات شعرها وطلعاتو كوب شوڤال ودارت براصلي فيديها ، حطات يديها على فمها بتفكير معارفاش شنو غاتلبس فرجليها صهد كاين ومجاتش تلبس سبرديلة ، مشات حتى لناحية فين كتحط هدى سبابطها بقات كدور فعينيها حتى ستاقرو على صنيديلة بيضة بطالون قصير جاية خويطات على صباع ومحجرة كتبري لبساتها مبتاسمة وهزات صاك بيض دايرة فيه تلفونها أيفون 13 برو ماكس ..

دارت إكخون لوجهها دغيا وكتافات بگلوص غوز كيبري ، لقات نضرة أخيرة على راسها فلمراية عجبها راسها بتاسمات وتمات خارجة من لبيت لقات مبيريكة ورقية فصالون مجمعين علماتهم غاتخرج ونزلات دغيا عاضة على شفتيها عرفات راسها تعطلات .. كي خرجات من دار تاجهات لطموبيلتو يلاه غاتركب لور وكلاكصونا خلاها تقفز ودور دغيا ركبات لقدام كدور فعينيها وهو كيشوف فيها بجنب عينيه ، زرق وتاها وجات ضاربة عشعة .. حنحن وديمارا طموبيل وهو كيستنشق ريحتها الخفيفة ، وقف طموبيل حدا كافي كلاص نزل وتسناها حتى نزلات كتقرقب بطالونها تسناها حتى لحقات عليه ودخلو وجلسو على كراسا على شكل كنابيات .. طلب بعض الحلويات والمملحات ليها وكتافا هو بقهوة كحلة مدازش وقت حتى حط ليهم نادل طلبيتهم فوق طبلة

صلاح : ( هز عينو فيها ونطق بجدية ) فكرتي ولا مزل ؟

بسمة : ( حنحنات ونفس سيناريو عاوداتو ) احم أنا راك عارف معنديش واليدي...

صلاح : ( قاطعها ) هادشي كامل عارفو وأنا مقلت ليك بغيتك حتى راني عارف عليك صغيرة والكبيرة ( علقات فيه عينيها ) لا جيتك عصبي ومكنتفاهمش راه منمدش عليك يدي بلا متخافي صبري عليا مع الوقت غاتفهميني ونفس الحاجة أنا واخا طبعك باين .. ( سكت لثواني ) جلستنا فدار معجباتنيش من الأحسن نديرو العقد أما هكا مامرتاحش

بسمة : ( شابكات يديها وهزات فيه عينيها تنفسات ونطقات وهي عينيها فعينيه ) قابلة

صلاح : ( تبسم بتسامة خفيفة ) صافي إن شاء الله تجمعي وراقيك وكولشي يكون فالقريب .. بغيتي عرس ؟ هضري وقولي لي فخاطرك متبقايش ساكتة

بسمة : ( حاولات تطلق معاه ) لا مابغيتش عرس يكفي شي عشا خفيف كيف هدى انا مهامنيش شي عرس بغيت غير راحة البال ونعيش بيخير بلا صداع بلا مشاكل ( ركزات شوفة فيه ) أنا نصبر معاك فأي حاجة يكفي يكون حترام بيناتنا ونلقا راجل يوقف معايا وأنا نفس الحاجة

صلاح : ( حرك راسو بالإيجاب ) الله يسخر

بعد آخر لقاء بيناتهم لي كان فكافي بعدها بيوماين كانت جالسة كي عادتها فلبيت جامعة شعرها شفنجة مهملة وخاشية وجهها فتلفون متبعة فيلم ، كانت مركزة معاه لدرجة مسمعاتش الباب لي تحل ودخلات هدى دايرة يديها على خصرها وكضحك

هدى : ( صفقات بجهد ) يلاه نوضي نوضي الالة العروسة

بسمة : ( قفزات مخلوعة ) اويلي ديري غا الحس قفزتيني

هدى : حليت لباب بجهد ودخلت مدرمة ومسمعتينيش .. بسيف راك خاشية وجهك فداك المشقوف مهم نوضي دابا نمشيو نتقداو

بسمة : ( رفعات حاجبها ) آش غانتقداو ؟

هدى : ( نوضاتها وداتها عند الماريو ) جبدي متلبسي غانجيبو ليك دهاز الالة

بسمة : ( دارت عندها ) اويلي إن دهاز مابغيت والو والله راه عندي مالبس وداك تخربيق تاع دوش راه كاين فلبيت هنا مناقصني والو والله

هدى : ( هزات يديها ) أنا مشغليش تفاهمي مع صلاح هو عطاني لفلوس قالي جيبي لها دهازها ولي عجبها تاخدو ( دارت يديها على خصرها ) شكون بحالك تختاري لي عجبك مايقول ليك حد لا ولا نقصي تي دگعدي زيدي معايا

شافت حتى عيات ولبسات سيرڤيت دغيا وسبرديلة فرجليها ، خلات شعرها مطلوق او دارت نضارات شمسية فوق راسها .. دارت گلوص دغيا ففمها او واقي شمسي لوجهها ..

نزلو لتحت وخرجو بجوج حتى لطموبيل فريد .. ركبات بسمة لقدام او هدى حداها وبعدها ديمارات طموبيل

بسمة : ( حطات راسها على زاج ) مكنتش عارفة عندك بيرمي وكتعرفي تصوگي ههه

هدى : ( بتاسمات ) وي ديجا عندي وغير حاطاه وليوم حتاجيتو قلت لفريد يخلي ليا طموبيلتو حيت عارفة غانتعدبو مع طاكسيات لاهم طموبيل

طلقات أغنية ديال شلحة وبقات دندن معاها وبسمة كتشوف فيها وضحك مفاهمة والو .. بعد دقائق وقفات طموبيل وخرجو بجوج داخلين لمول توجهو نيشان لمحلات ديال بيجامات بقاو يختارو بجوج بسمة تهز بيجامة مستورة وهدى تهز مقزبة وحدة تجر وتانية تجر قالأخير هزات ليها غير جوج مستورات وما تبقا كولشي مقزب عبارة على شورط وتيشورت قصير

هدى : ( خنزرات فيها ) تي ريحي صيف داخل غاتلبسي هادشي ؟

بسمة : ( حنوكها حمارو ) اويلي كترتي منهم غير جوج براك أصلا ممولفاش نلبسهم ( لولبات عينيها ) مكنحملش هادشي مقزب

هدى : ( صغرات فيها عينيها ) امم هادي هي لي قالت ليا كنموت على كسيوات قصار وستيل كلاص أيهاي هاي ودابا مكتلبسيش مقزب

بسمة : ( مكرهات تقول ليها منقدرش لبس هادشي قدام خوك ) قلت ليك كساوي ماشي بيجامات

جراتها من يديها يخرجو ومشاات هدى خلصات داكشي لي خداو بكارط وبعدها عطاوهم الأكياس وخرجو ناحية محل جنبو ، هدى كانت تشوف محل من بعيد يعجبها وتجر ليه بسمة وخا تقول ليها لا صافي براكة هادشي كتير دير راسها مسمعاتش متبعة هضرة صلاح .. مخلات مجابت لها من بيجامات او مستلزمات دوش وميكاب وحوايج ستيل لي عجبها هي تعمر وبسمة تجر فحناكها مخلوعة من الأثمنة لي على كل بياسة ، كانت فيما ترد ليها لبال عجباتها شي حاجة تهزها حتى من صنيدلات صيفية او سبرديلات جابت ليها بكثرة مخلاتها مخصوصة من والو عارفة معندهاش حوايج ...

بعد ثلاتة سوايع من دوران رجعو لطموبيل حطو الأكياس لي ثقلو بيهم ورجعو دخلو تاني ختارت ليها هدى شي تواب تفصل بيهم جلالب وختارت ليها صاك او صندالة لي تجي مع توب وبعدها رجعو لطموبيل وتوجهات هدى عند خياط كتعامل معاه ديما هو لي كيقاد ليها جلالبها هي ومها ، معروف بخدمتو زوينة واخا ثمن مرتافع ولكن خدمتو مثقونة .. حطات عندو تواب او وصاتو يفصل ليها خمسة جلالب او ثلاتة تكاشط او ربعة قفيطنات .. بعد متافقو على لخياطة او شافت بسمة موديلات لي خارجين دابا ختارت لي عجبها وخرجو بجوج مسهوتات او العيا متمكن منهم ، المغرب كان كيأذن او ضلام دغيا طاح

بسمة : ( ركبات فطموبيل شادة فرجليها ) اميمتي متنا ليوم اناري بزاف

هدى : ( ضحكات او هزات تلفون فيديها كتشوف اسم فريد مزين شاشة ) تانا عييت شبان ليك نمشيو شي كافي ناكلو وبعدها رجعو لدار

بسمة : ( شافت فتلفونها ) لالا غير رجعيني لدار وسيري عند زمانك يكون مشوش عليك

هدى : ( غمزاتها وجاوبات كي سمعات صوتو نطقات بصوت رقيق محلون خلات بسمة غير كتشوف فيها شادة ضحكتها ) ألو كبيدة

فريد : فينك ألالة مشيتو تقضاو ولا تجيبو لمول كامل

هدى : ( دارت كتشوف لور دطموبيل لي كان شي فوق شي لدرجة الأكياس وصلو عند رجليهم ) بحال هكاك هههه

فريد : مناوياش تجي ؟

هدى : ( مركزة مع طريق لأن ديك الوقت فأگادير طريق كتكون عاااامرة ) واحد شوية .. غاناكلو انا وبسمة شي حاجة ونوصلها ونجي

فريد : ( تنهد ) واخا متعطليش

قطعات عليه وفنفس الوقت وقفات طموبيل قدام كافي نزلات وتبعاتها بسمة .. دخلو وطلعو لاطيراس وجلسو فجليسة زوينة ، كراسا عبارة على كنابيات او طبلة عريضة دزاج ، كي جلسو جا عندهم نادل خدا طلبيتهم ومشا

بسمة : ( دورات راسها فلكافي عجباتها خصوصا فداك الوقت كانت كلها ضواو .. بتاسمات بمكر ونقلات نضرها لهدى ) هانا على كبيدة شديري لتحلوين

هدى : ( ضحكات بخفوت ) إوا شنو لابغيت حاجتي بشوية تانوصل ليها كون طفيت عليه تلفون ولا جاوبتو وكنهضر بطريقة ناشفة راه متلقاينيش حداك باقي تلقايني طرت لدار

بسمة : ( سدات عينيها مستمتعة بالجو لي كان بارد ) ولاهيلا عندك الحق لاهما تسايسي شدان ضدد مكينفعش

هدى : ( جا النادل وحط طلبيتهم ) داكشي لي كاين

دازو أيام كانو عبارة على تجهيزات من طرف مبيريكة وهدى لعشاء خفيف بيناتهم كي دارت هدى ، ولكن مع ذلك كانو مكبرين بيها ماخلاو ماشراو لها وخصوصا مبيريكة كي تفكرات أصلها أنها صحراوية زادت على دفوع لي جابو لها ملاحف غاليين دصحراوة كل وحدة كانت فايتة 600 درهم وصلوها مخصوص لها من العيون مع كساويهم أو صنادلهم او حتى صيكان .. زادت مضمة ديال ذهب واازنة وجوج علب ديال ذهب فيهم أونصومبل ، سنسلة وخاتم وطوانگها وإكسسوارت كيجيو مع ملاحف مع ضفرة لي كدار على الجبين .. وحتى من صلاح زرزرها ذهوبات وتكلف بالباقي

الدار كانت عاطية فيها ريحة بخور على مزيناتو عائلة لي جاو عند هدى نفسهم جاو يحضرو لصلاح ، كل مرة تبلاصي طموبيل قدام دار رجال يدوزو لصالون لتحت والعيالات كيطلعو الفوق ، باب دبرا مفتوح ولي داز من حداهم فجيران يطل ويبرگگ لدرجة منهم لي دارو كراسة حدا ديورهم وجلسو شادين العسا عليهم كل واحد كيألف من راسو هالي يقول البنت لي كانت عندهم فدار طارت براجل وها لي يقول فيها هضرة خايبة ومنهم لي عرفها شكون ويقول الله يعطينا زهر المطلقات مدوزات حتى عام وهاهي لقات راجل دار بثلاتة طاج وطموبيل كل مرة جايب وحدة ...

فالفوق وفبيت هدى كانت جالسة فوق لكرسي متوترة وكتصفار وتحمار غا بوحدها ، هدى كانت دايرة يديها على جنبها لابسة قفيطين بالبوردو جاي سامبل وفيه عقيق جيهة صدر ممزيرش عليها بزاف ومغطي ، مع ذلك واتاها وجا معاها ناسقاتو مع زيف وصندالة طالون بكعب عالي زادها فطولتها وبين فصالتها كتر

هدى : ( حطات يديها على حنكها ) اويلي تي مالكي كتصفاري وتخضاري غا بوحدك غا بشوية عليك

بسمة : ( كتنش على راسها وجهها عراااق ) شاداني الخلعة

هدى : بسيف راه الملحفة تكون سخونة قلت ليك لبسي شي قفطان بارد

بسمة : ( حركات راسها بنفي ) لا عجبني هاد الملحاف كي شفتو عشقتو وجا غزال مع كسوتو الشبكة لي فيديها فنة

هدى : ( بإعجاب ) عمري لبست شي ملحاف خاص نجرب شي نهار ونزعم جا معاك صراحة والبيض ضارب على شعة يالالة هههه

بسمة : ( بتاسمات بخجل ) ياك

خلاتها واقفة حدا شرجم باش ميخسرش لها الماكياج بقوة التوتر كتحس بالعرق نازل مع ضهرها .. دوزات يديها تحت عينيها ودازت قدام المراية كتشوف فلميكاب لي قداتو لها هدى كان خفيف كي بغات مابغاتش شي حاجة كتيرة ورفضاااات تقاد لها شي كوافورة ، لطالما كان بعجبها ميكاب خفيف عبارة على فغاجو او ماسكارة او أيلاينر وهاد المرة كانت زادتها هدى هايلايت عند نيفها وخدودها خلاهم يبريو ويعطيو لمعة زوينة لوجهها

هدى : ( لاحت شال لجنب وتقدمات قدام المراية وفيديها عكر ) والله تانعكر واش أنا نديرو وهو يحيدو

بسمة : ( دارت كتشوف فيها ) لالا ديري لو خاطرو وأصلا هداك معيق ديري داك الغوز لي دايرة أنا

هدى : ( كتشوف فعكر أحمر لي فيديها ) هدا لي يجيني زوين مع قفطان وراه كاينين غا مع لعيالات مشايفني حد

دارت لي فراسها وطراسات فمها بلون أحمر داكن وبعدها دوزات عليه بعكر وفوق گلوص عطا لفمها واحد ليفي فحاال الى دايرة بوطوكس ..

بسمة : ( هزات راسها كي سمعات صوت لعب لعيالات ) بداو يلعبو

هدى : تعطلنا فلبيت دابا تجي دق علينا رقية ولا شي وحدة من العائلة زيدي نخرجو

تنفسات وقدات الملحاف فوق راسها مخلية گصيصة على عينيها مبيناها كيوت .. لبسات صنيديلة بالبيض طالون قصير فرجليها وخرجات وهي حشمانة

جلسات فبلاصة لي مزينينها ليها .. هدى جنبها وفرحانة ليها كل مرة تزغرت ويوصلها ميساج من عند فريد وطفي تلفون مخلياه كيتشوى غير بوحدو فالتحت مع رجالة ، كانو عائلتو كيتعرفو عليها ولبنات دارو بيها مجمعين وكل وحدة كتشوف فيها بإعجاب كانت إستثنائية بيناتهم بالملحفة عطات لعين خلات كولشي كيشوف فيها ويقول مشاء الله

هدى : ( فرنسات وقربات لوذن بسمة ) قالي فريد العدول جا واحد شوية غايطلعو يعيطو عليك

بسمة : ( حكات وذنها بالرتباك ) فين شفتيه

هدى : ( منزلة راسها فتلفون ) كنهضرو ميساجات

هزو العيالات طعارجهم ومكاين غير الله يعطيك صحة حتى عياو او حبسو يستارحو ومن وسطهم كانت مراة عمة هدى جبدات صينية ومعالق حداها وبدات تضرب وغنات أغنية صحراوية قحة خلات بسمة كتشوف فيها بالبتسامة عجبها الجيست لي دارت .. لباقي كان غير متبع دقة لي غادا عليها وساكتين كيسمعو ليها حتى سالات وناضت حدا بسمة وسلمات عليها

العمة : ( بالبتسامة بشوشة ) شحالك ياك لاباس ياك الخير

بسمة : ( ضحكات من قلبها ونطقات بالحسانية ) الحمد الله ياسر من الخير نتي شحالك صحيحتك ياك لاباس شحال طافيلات ( البنات ) والأهل

العمة : الحمد امْنَيْتي ( ابنتي )

بعد دقائق كان طلع صلاح وفريد مع العدول كي طلعو كان صايفت فريد ميساج لهدى وناضت دغيا منوضاها معاها وجابت مها فالكروسة حتى لصالون لي كان عريض وخاوي والعدول كان جالس بوحدو وقدامو روجيستر ، كي خرجات من صالون وقفات كتسنا هدى تجيب مها محسات غير بيد دافية شدات فيديها وجراتها معاها ، هزات عينيها بذهول وبقات معلقة فيه عينيها مزنگة ريحتو الرجولية دخلات مع جيوبها الأنفية خلاتها تستنشق عطرو براحة وفنفس الوقت بتوتر ..

كانت واقفة أمامو ، ومبيريكة حداهم كتشوف فيهم بعيون مدمعة بالفرحة ، و فريد شاد هدى فجنب ومزير على يديها كيتحلف ليها على داك العكر وهي كتسبل فعويناتها ودير فيها البراءة ..

كي سول لعدول بسمة على صداقها حط لها صلاح قدامها جوا كانت فيه مليون وبعدها سولهم الأسئلة الإعتيادية و سْنا صلاح وتبعاتو بسمة لي غير حطات يديها على روجيستر تفكرات زواجها لول رجعات كترعد وتفتف او وجهها زاد حمار وتلبكات فالأخير سنات بزربة او وقفات كتحاول تمحي دوك ذكريات من مخيلتها ، حكات ودنيها بتوتر حتى حمارت لها يلاه كانت غاتبعد يدها وحسات بيد حنونة كانت كدوز على ودنيها بشوية وبصبعو الإبهام حكها لها وجرها العندو ضمها وباسها فوق راسها

صلاح : ( حس برجفتها بين يديه دوز يديه على ضهرها وطبطب عليها ) حيدي من هاد الودن طيبتيها ( سكت لثواني ) مبروك علينا

بسمة : ( قلبها كيضرب كيضرب كيضرب او وجهها مشا منو دم تبلوكات وجمدات ) صمت

مبيريكة : ( بتاسمات لمنضرهم ونطقات بصوت خافت ) حمد الله عشت تاشفتو مزوج

فجنب لاخر كانت هدى لي مطرطقة عينيها فيهم وكل مرة تنغز فريد ولاخر يجرها تخرج يدوي معاها وهي لاصقة ليه تم

هدى : ( مخرجة عينيها وقربات من فريد كدوي بشوية ) واش هدا خويا ولا بدلوه

فريد : ( هز حاجبو فيها بتساؤل ) كيفاش ؟

هدى : ايهاي هاي على صويلح ورومانسية صدمني خويا ( حطات يديها على حنكها ) لعجب

تقدمو بجوج حتى باسو لمبيريكة فوق راسها باركات ليهم ورضاة عليهم بجوج ضلات دعي معاهم بالخير وهي فرحانة من قلبها مقاداها فرحة .. جات هدى باركات ليهم وعنقات بسمة وفريد بارك ليها مبتاسم ونزلو هو وصلاح ولعدول باش يتحط لعشا ويتجمعو عليه

حطو سرباية لعشا لي كان عبارة على لحم مشوي او البسطيلة او سفة .... كانو منضمين ورادين البال مع ضياف لي خصاتو شي حاجة يجريو يجيبوها .. كولشي داز زوين ومقاد كي تعشاو ناس رجال خرجو وركبو فطموبيلاتهم كيتسناو العيالات لي بقاو الفوق كولشي عطا الكادوات لبسمة وسلمو عليها وباركو لها ، خرجو ومشاو وطلعو شي عيالات نضفو دار وغسلو الماعن مدازت حتى ساعتين مقادة رجعات دار تشعل فحال عمر كانت فيها شي مناسبة ...

كي خوات دار وقفات هدى مع فريد سلمو عليهم ونزلو يمشيو ، و مبيريكة هتمات بيها رقية لي كانت بايتة معاهم ديك ليلة .. كي بقاو بجوج شدلها فيديها وجرها معاه حتى لفوق ، بقات هي غير كدور فعينيها بتوتر وفنفس الوقت رادة لبال مع ديكور لي عجبها وكان أنيق .. وقف قدام بيتو حل لها لباب حتى دخلات يلاه كان غايدخل وصلو ميساج فتلفونو .. عقد حجبانو وشعل تلفون وهو حاس بشي حاجة ماهياش خصوصا لوقت لي تعطل .. كي شعل تلفون بان ليه ميساج من دري خدام عندو " طاحت بطانة فالقهوة "

صلاح : ( عز عينو فيها مخنزر بطريقة تخلع ، خشا تلفون فجيبو ونطق ببرود ) دخلي نعسي عندي شي شغل

بسمة : ( رجعات لور خايفة من نضرتو ) واخا !

نزل بحوايجو لي كانو عبارة على سروال فصالة كحل مع قاميجة كحلة وسباط فنفس لون حدو لاح عليه كويرة على لبرد وخرج من دار دغيا نيشان لقهوة لي كانت قريبة فآخر ديال درب ..

واقفة فلبالكون باقي بملحفتها والحنا فيديها ، قلبها مقبوط والقلق تسلل لداخلها البرد دخل مع عضامها حتى ضمات نفسها مشيتو بديك سرعة وملامحو لي تبدلات فور ماقرا داك الميساج لي معرفاتش شنو فيه خلا شك يتسلل لداخلها وعقلها بدا يشكل فرضيات عديدة معارفاش لي تيق ولا لي لا

بسمة : ( زفرات حتى خرج بخار من فمها ) أشهاد زهر ياربي

كانت فحالة قلق وشرود حتى تحولات لخوف كبير وذعر ! كي شافت شرطة العلمية و طموبيلات دلبوليس دايرين صوت مزعج فشانطي خلاو كولشي يبدا يطل من شراجم بنادم ضرباتو الفيقة مخلوع من داك صوت القوي والمجهد ولي غير شافو وجهتهم عرفو أشنو طاري ! ولا نقولو توقعو شنو ممكن يكون .. لومبيلونص غادا بسرعة كبيرة وسيارات البوليس من موراها .. جلسات فوق الكرسي شادة على قلبها لي كيضرب كيضرب حاسة بيه غايخرج وزاد كمل عليها طموبيلة فريد لي ضربات فران صيك مجهد حدا دار عرفات القضية فيها صلاح !

فالدار كانت جالسة فصالون شادة حنكها وعينيها على شرجم وهدى حداها كدور فعينيها وفريد قدامهم شاد تلفون فيديه وعااااقد حجبانو

بسمة : ( مقابلة مع شرجم كتسنا يبان ليها جاي لدار .. تنهدات بخوف ونطقات وهي كتشوف ففريد ) فين غايكون تعطل بزاف

هدى : ( شافت ففريد وناضت عندها ) متخافيش مغايكون طرا والو لبلوليس غايكونو محتاجين لصلاح حيت هو لي كاري القهوة وراه كي وصلاتو الخبار خرج دغيا حيت حتى لي مات سيد كيعرفو

فريد : ( دوز يديه على وجهو وحاول ميبينش قدامها والو ) متخافيش اختي گاع لابقا غدا غايجي ماطرا والو غير غايسولوه على كاميرات لي داير ويشوفو لي قت•لو باش يلقاوه

بسمة : ( جلسات وفركات ودنيها حتى حمراتها ) مغايطرا ليه والو ياك ؟ واينتا غايجي مغايباتش تما ؟

هدى : ( شافت ففريد لي باينة فيه معصب ) گاع لا تعطل غدا يجي بلا ماتشطني وسيري رتاحي حنا غانمشيو لدار وغدا غانجي عندك غا تهناي ( ناضت وشدات فيديها ) ديري راسك فحال إلى مطرا والو هادشي ميوصلش لمي غاتخلع عليه صافي ؟

بسمة : ( حركات راسها بالإيجاب ) واخا كوني هانيا

خرجو من دار وهي طلعات نيشان لغرفته حلات لباب وتوجهات نيشان لبالكون جلسات فوق كرسي وستانشقات الهوا بعمق وزفرات نفس سخووون من نيفها

بسمة : ( هزات راسها لسما و تنهدات ونطقات وهي ضامة نفسها ) خرج بزربة او مات شي حد فالقهوة لي كاريها و هزوه سطافيط ( حكات راسها وسهاات فنجمة فسما ) فاش غايكون خدام !؟

عند صلاح كي وصل حدا القهوة لقا دنياا عااااامرة وشانطي لي مقابل مع الكافي طموبيلات حابسين الحركة ، وكولشي كيطل ويبرگگ ، كلشي عرف بلي مات شي حد فقهوة فلان ! الأغلبية كيقول القهوة لي كاري صلاح تاحد معارف بأنها ديالو وبسميتو لي عارفين أنو ولا كاريها بلاصت داك الگاوري لي مات ، ولي كانو غافلين عليه والخبار لي مخبيها صلاح على كولشي أنو كي شد القهوة شراها من عند مولاها ..

لومبيلونص هزات سيد لي مات وبداو يقلبو على المتهم لي قتلو وهرب .. الأخبار داعت فالحي كامل والأغلبية عرف سبب الوفاة هو مشاحنة طرات مابين جوج مقرقبين وفلخر قلبوها مدابزة على ود لحشيش ..

كي وقف حدا القهوة ضرب عليه الكوميسير وتوجه عندو هو والحراس

الكوميسير : زيد معانا

قبل مايجي كان هضر مع فريد لي دغيا وكل ليه محامي صحيح وصايفتو ليه ، القهوة سدوها وجمعو وطواو ..

بلا مايدوي ولا ينطق بحتى حرف ! طلع فسطافيط مبرد حتى وقفو قدام الكوميسارية داوه نيشان لغرفة تحقيق ودخل جلس فوق كرسي وبقا مودة وهو بوحدو حتى تفتح عليه لباب ودخل نفس الكوميسير لي شدو

ك : ( طلعو ونزلو بعينيه ونطق معفر ) القهوة ديالك ولا كاريها اشريف

صلاح : ( تكا على الكرسي براحة ونطق مبرررد وعينيه فعينو ) دياالي

ك : ( ضحك بسخرية ) ديالك وجاي بشوووية عليك روح طاحت عندك ونتا مسايق خبار

صلاح : ( حك حاجبو ونطق براحة فحال الى جالس فدارو ) وصلوني لخبار فحالي فحالك

ك : ( هز فيه حاجبو ) فين يكون داك لي قتل سيد

صلاح : ( هز يديه ) هدا عليا الكاميرات ودايرهم فالقهوة يعني حدي نقدر نوريكم شنو وقع اما لي قتل وعلاش دابزو ولا شنو بيناتهم الله وعلم داكشي كيخصهم أنا مالي !

ك : ( صغر فيه عينيه داير فيه ديك شوفة ديال تاحاجة متخفا عليك بلا متبوهل عليا ) اهاه واخا غاتبقا معانا هنا شي يامات

نزل رجليه من على لكرسي و ضحك بسخرية كان كيقلب عليه من شحال هدا ومعارف منين يدوز ليه ، عارفو بزناز وعندو سوابق كيضرب غا من لتحت ومكيسيق ليه حد خبار هادشي لي مخلي كولشي حاط عليه العين وباغي غير يغلط غلط صغير باش يلقاو منين يدورو ليه

صلاح : ( دار رجل على رجل ونطق قبل مايخرج ) المحامي ديالي يكون وصل عيط ليا عليه

فاليوم التالي كانت جالسة فبيتو حتى سمعات دقان فلبيت ناضت بشوية حتى فتحات لباب ورجعات جلسات فوق ناموسية

هدى : ( دخلات وردات وراها لباب ) مالك معبسة قلت ليك متخافي من والو

حنات راسها لأرض وسهات حسات بخدمتو ماشي حتى لهيه وفيها تخلويض من تصرفات هدى وفريد وحتى المدة لي ستغرق وهو فالكوميسارية جااتها ماشي عادية شي حاجة تماك

بسمة : ( هزات فيها عينيها ) باقي مغايخرج ؟

هدى : ( جلسات حداها وتنهدات ) قريب إن شاء الله راه كيقلبو دابا فالكاميرات ومع صلاح عندو معارف غاينفعهم باش يلقاوه

بسمة : ( هزات فيها عينيها وبقات كتشوف فيها شحال حتى بعدات هدى عينيها وحنحنات ) واخا

من عينيها قشعاتها كتكذب عليها متجادلاتش معاها نهائيا وخلاتها على راحتها فالأخير كولشي غايبان وحتى حاجة مكتخبا !

ناضت معاها حتى نزلو لتحت تغداو مجموعين وهما ضاحكين وناشطين رقية ساقت لخبار او وصاوها متقول والو وبقات حتى هي ساكتة وغير كتشوف ! ومبيريكة فدار غفلون معندها منين تسيق لخبار حتى زنقة مكتخرج لها وتاحد من جيران مكيوصلهم

العشية كاملة وهي جالسة معاهم حتى أذن العشاء تعشات معاهم وناضت توضات وصلات هدى مشات ومبيريكة تعاونات هي ورقية حتى داوها لبيتها عطاوها دواها وخلاوها تنعس ، رقية مشات لدارها وبقات هي بوحدها فصالون فالأخير ناضت لبيت هدى هزات منو حوايجها وطلعات حتى لبيتو حطات كولشي فوق ناموسية ، بقات لنصف ساعة وهي كطلع وتنزل حتى تسخسخات .. خوات بيت هدى من حوايجها ودهازها وطلعات كولشي لبيتو حلات دريسينغ لقات ديجا مخلي ليها بلاصة لحوايجها ، علقات لي خاصو يتعلق وطوات الحوايج وحطاتهم فجنب مستفين .. سبرديلات وصنادل حطاتهم فبلاصة مخصصة ليهم ستفاتهم كاملين وبعدها هزات دهبها وحطاتو فبلاصة خاوية حدا حوايجها قدات كولشي وحطات حداهم ماكياجها او مستحضرات لي غادير بيهم سكين كير مع داكشي لي تحتاج لدوش ..

كي سلات بدات تحل كدوات لي جاوها لقات أغلبية ذهب ها لي جايب ليها أونصومبل من سنسلة وخاتم وطوانگ وها لي جاب ليها دبالج تقال او وازنين وكاينين لي جابو لها ميكاب من ماركات معروفة او باخكات من ديور ...

حطات داكشي مع ذهب لي جاها فدهازها وحطات صداقها فوقهم .. خرجات من لبيت ناوية تنزل لكوزينة حتى بانت ليها كوزينة عريضة جنب لبيت ، تقدمات لها بفضول شعلات ضو وهزات فيها عينيها بالنبهار كان ديكورها غزال وأنيق متيسعة او مجهزة بگاع لي تحتاجو ، دخلات قدات لها قهوة او خرجات كدور فطبقة لي عندو جاتها غزالة احسن من لي فلتحت او متيسعة أكثر ..

هزات تلفونها شافت ساعة ورجعات لبيت جلسات فلبالكون وعينيها على طريق على أمل يبان ليها جاي ، بقاات دايرة يديها على حنكها بملل وهزات تلفونها دخلات لآخر نمرة صونات ليها عرفاتها ديالو قيدات نمرة او صونات ليه عارفة مغايجاوبش ولكن جربات حضها بقاات مودة حاطة تلفون على ودنها وهي ساهية فطريق حتى فقدات الأمل وقطعات ، البرد تحرك وناضت سدات البالكون ودوزات الخامية شافت ناحية دوش وشمات فراسها ريحة العرق حكات ضهرها بتعب وهزات بيجامة سخيخنة مع دوبياس فزرق حطاتهم مع كريمات او بينوار او فوطة دشعر فوق ناموسية وهزات لي تحتاج لدوش ودخلات خدات دوش خفيف دغيا .. حيدات عليها العيا وخرجات مخشية فبينوار دورات فوطة على راسها ونشفات لحمها ، هزات كريم بنكهة الخوخ دهنات للحمها لي مافيه حتى زغبة كان نقي وبيض ، دوزاتو على لحمها كامل وبعدها دارت سيروم شعرها ورشات سبرايت من نفس الباخك لبسات حوايجها ودارت مرطب لوجهها وشفايفها .. هزات دليدين او واحد آخر درجلين دارتهم ولبسات تقاشر ..

تخشات فليزار سخون وهزات تلفون بقات شاداه لمودة فلخر طفاتو ونعسات

خرج من الكوميسارية كيطرطق فعنقو عيان من بعد 48 ساعة وهو فسيلون محجوز على والو كان عارف لكوميسير شادو غير باش يسخسخو أما مايصور منو والو معندو حتى حاجة عليه ، تلاقا بفريد كيتسناه قدام لكوميسارية طلع حداه فطموبيل وديمارا

فريد : ( دوز يديه على لحيتو ) ولد القح•بة كيقلب غير منين يشدك

صلاح : ( ضحك بسخرية ) غير خليه ينبش حتى عيا مغايصور مني غا الق•لاوي

فريد : ( ضحك وحرك راسو يمين وشمال ) أودي معرت منين خرجات ليك هاد مصيبة جاو ولاد الق•حاب حتى لنهار الفرح قال ليهم كر•هم نوضو ندابزو

صلاح : ( دور راسو لعندو ) مي ياك مافخبارها شي حاجة ؟

فريد : ( حرك راسو بلا ) مافخبارها والو كون هاني قلنا ليها عندو شي شغال وخرج صباح بكري

صلاح : ( حرك راسو ) مزيان .. وبسمة شنو قالت ؟

فريد : ضلات تسول فين مشا شنو طاري قلت ليها غايمشي يغير يعاون البوليس حيت عندو معارف وصافي ( دور عينيه جيهتو ) ولكن باينة فيها حسات غير كطل فشرجم وتنهد

حرك لو راسو او وصلو حتى لدار دخلو بجوج فريد توجه لصالون لي فيه هدى ومبيريكة وهو دخل سلم على مو وطلع نيشان لبيتو كي دخل بانت ليه كتصلي ، داز نيشان لدوش دوش دغيا وخرج لاوي على نصو فوطة ..

بسمة : ( حطات المصحف من يديها وكي سمعات الحس وراها دارت حتى تبلوكات وهي كتشوفو عاري الصدر غير لاوي عليه فوطة من لتحت .. نزلات عينيها ونطقات بلا متشوف فيه ) علاش شدوك ؟

صلاح : ( جبد حوايجو وحيد فوطة قدامها لبس عليه دغيا ودار عندها ) حتاجوني فشي أمور داكشي علاش تعطلت

بسمة : ( كي حسات بيه لبس حوايجو هزات فيه عينيها او وجهها حمر ) ماشي نتا لي قتلتي علاش يشدوك يوماين

صلاح : ( هز فيها حاجبو ) القهوة أنا المسؤول عليها طبيعي نمشي معاهم

بسمة : ( رغم نضراتو بقاات حاطة عينيها فعينيه ) لا ماشي طبيعي يوماين بزاف نتا مادرتي والو لا طولتي يسولوك وترجع

صلاح : ( خنزر فيها حتى سرطات ريقها راسو مفروع وزادتو ) متفرعيش لي ك•ري هضرة وحدة لي عندي قلتها ليك

خرج كيسب فنفسو ماباغيش يطرطق عليها نزل حتى لتحت وركب فطموبيلتو مخلي وراه غير العجاج .. ماوقف حتى لقدام لقهوة نزل ساخط دخل مخنزر باينة فيه جاعر دوي معاه ينقز عليك ، جمع دراري لي خدامين عندو وطلعو كاملين لفوق مخليين لكليان لتحت

صلاح : ( واقف كيشوف فيهم واحد واحد وهما حادرين ريوسهم ) من اليوم نقصو عليا من الحشي•ش منبغيش شي واحد يجبد الصداع فالقهوة لي بغا يدابز يخرج لبرا ( بصوت حاد نطق ) فين كنتو نتوما روح طاحت حداكم وكتفرجو حاطكم شيخات أنا

المسؤول على الخدامة : ( نزل راسو ونطق ) خويا راه كانو مناقشين بيناتهم غير بشوية مدايرينش صداع حتى صدق واحد طاير على تاني وخشا فيه موس فعنقو

صلاح : يباليكم شي واحد مهواش جريو عليه منبغيش هادشي يتعاود صداع ومينوضش البوليس حاطين علينا العين ردو بالكم

سمعو الهضرة مزيان وبقا لساعات فالقهوة راد لبال لصغيرة ولكبيرة حتى لجوايه لعشا خرج ركب فطموبيل وتاجه لديبو هز 12 لمليون تقريبا وداز لدار ، طلع نيشان لبيتو لاوح دوك الفلوس بإهمال فوق ناموسية حتى تشتتو وداز لدوش باغي ياخد دوش سخون يريح عضامو ..

فهاد الأثناء كانت بسمة جالسة فصالون مع مبيريكة جمعات طبلة فاش تعشاو ونوضاتها هي ورقية حتى لبيتها .. بسمة دازت لكوزينة شربات كاس دلما وطلعات نيشان لبيتو تفوهات و دفعات لباب لي كان مردود وكي حطات رجليها فلبيت طاحو عينيها الفلوس .. بقات مبلوكية بلاصتها كتبان ليها بريكة دلفلوس فوق ختها وغير زرقات ، كي هزات عينيها بان ليها خارج من دوش لاوي فوطة على نصو وفوطة صغيرة فيدو كينشف بها شعرو .. كي شافها عض على شفته سفلية ناسي واش راه معاه فلبيت مولف هو يطلع يلوح الفلوس فيما بغا مكاين لي يطلع عندو ولا يقول ليه شحال فساعة

بسمة : ( بلا ماتحس جبدات حنكها وقالت فنفسها اميمتي ،هزات فيه عينيها حتى تقابلو ونطقات بصوت مرعود ) شهادشي ؟

صلاح : ( جمعهم كاملين ولاحهم عند حوايجو ) فلوس ديال البيع وشرا

بسمة : ( عقدات حواجبها متيقاتوش ) صلاح ! ( سكتات لثواني) كدير شي حاجة ماهياش هادشي بزاف

صلاح : ( لاح فوطة من يديه وقرب لعندها حتى حاصرها بيديه وقرب منها حتى تخالطو أنفاسهم .. ستنشق ريحة شكولا منها ونزل نيفو عند عنقها حتى بورشات ونطق بصوت خافت ) من بعد ونشرح ليك

يتبع...