قصتنا ليوم هي قصة واقعية من صلب المجتمع .. أحداتها فحومة عايشين فيها ، بطلتها وحدة فحالنا حطات أحلامها على شخص واحد وضناتو غايكون سند ليها ورفيق دربها وتخايلات حياتها معاه كيف غاتكون ..
" زواجي التالي"
بملامح حزينة و كئيبة فتحت تلاجة تتشوف فيها ، منظرها تيزيد يحسسها بجوع لي تيقطع مصرانها ، كيف كل نهار سيناريو كيتعاود معارفة مطيب لغداها ولا نقولو حالة ناشفة وتلاجة كتصفر سداتها كتأفأف ومشات نيشان لبيت نعاس تتجر فرجليها تاتشوف حوايجو مليوحين و شارجور مزال لاصق فالضو قلبت عينيها بعصبية أو تمتمت بسخط
بسمة : الله يجعلو يطرطق و يحرق الخرا كولو اولد الحراام
فتحت ماريو و حلات واحد لمجر وهزات بزطامها لي كانت فيه 20 درهم لاحت عليها جلابيتها لي رجعت معروفة بيها و الوحيدة لي عندها وكلاكيطة فرجليها وخرجات من الباب تتشوف فارجاء لحومة شعبية ناسها بساط فجهة دراري صغار كيلعبو كورة وفجهة تانية عيالات حاطين كراسة قدام بابهم وگالسين مجمعين وشادين فلغادي وجاي كيف عادتهم
معارفة رجليها فين غاديين بيها مكمشة فيديها ديك عشرين درهم كتبان مهمومة فحال الى هازة جبل فوق كتافها كتفكر فهاد دنيا وفين غادة بيها وهاد زمان وشنو عطاها ، هزات راسها لقات قدامها نيشان سويقة تنفسات ودخلات نيشان جيهة لخضرة وقفت عند الخضار
خضار : اوا الوقت بغات هاكا ، مادا بينا ترجع بستين ريال
بسمة : عبر ليا نص كيلو
_على قد فلوسها شرت بيض و مطيشة و قبطة نعناع رجعت ادارجها و تتنفس بصعوبة و شادها بكية فخاطرها وهيا دايزة من جنب قهوة و تتسمع عليها نكان و تتهبط راسها و تتساءل فنفسها فين هاد زين لي تيمدحوه ، فين هاد لاطاي لي تيشوفوها زيرات على لميكة وتمشات بزربة حادرة راسها حتى لقدام باب دار ودخلات كتنهد حطات لي جابت فوق لبوطاجي ومشات لبيت گلعات جلابتها وجمعات شعرها بفيلول لفوق وتمات راجعة لكوزينة زربات على داك لبيض او ماطيشة أو هزات لميدة لصالة حتى كيبان ليها گالس فوق لمضارب داير رجل على رجل كيضحك وشاد تلفون حطات لميدة وجابت طاجين لي دارت فيه لبيض او لخبز او حطات لما حداها او ناضت شعلات تلفازة لي كانت فيها لخطبة ديال جمعة ... على إثر صوت تلفازة هز فيها راسو وحنحن حاط تلفون حداه
عماد : ( شاف فتلفازة ونطق ) شنو اليوم ؟
بسمة : ( بدون نظر ليه ) الجمعة ( بحرقة ) اليوم قلت نفيق لقاك جبتي ليا خضرة طعام
عماد : ( ضرب جوج دغمات ناض ) مالو من اركان اسلام ؟ راه الخضرا غالية ، كصعة طعام طيح عليك بخمسين درهم
بسمة : شري كما تيديرو الناس ! تخليطة ولا خلي ليا المصروف انا نتكلف ! ( حابسة دمعة ) راه تقهرت
عماد : ( رجع جلس مبرد ) العشية و نجيبها ! و المصروف تيشدو الراجل
حركات ليه راسها بإيجاب او قطعات لخبز ليها و گلسو بجوج كياكلو حتى سالا وناض هاز تلفونو
عماد : هانا خارج ..
ساست يديها ونطقات بهدوء كتشوف فيه : فين خارج ؟
عماد : نسرح الغنم ! راني فالقهوة
بسمة : ( قلبت عينيها بالم ) جيب ليا معاك الويز !
عماد : باغة تقسمي معايا فلوس القهوة ؟
بسمة : منين باغيني نجسب لفلوس ؟
سمح فيها ! مشا بدل حوايجو بلبسة أنيقة كيف عادتو ديما مهلي فراسو ... تقابل مع لمراية كيقاد فتيشورت وطلع شعرو بيديه او رش ريحتو .. هز مگانتو او خاتم لبسهم فيديه اليمنى او ليسرى فيها خاتم زواجو ، أو تم خارج ساد من وراه لباب مخليها هي ناضت كتجمع دار بحكم معندها ميدار أو قنطات شعلات راديو او طلاقات نيشان مع شعبي گلعات بيجامة د 30 درهم لي كانت لابسة او بقات بشورط او ديباردو أو بدات تخمل دار مسالات حتى رجعات كولها كتقطر بالعرق او كتنهج خلات دار كتشعل بنقاوة او ريحة سانِكْرْوَة عاطية فدار ... مشاات لكوزينة دارت جوج گدرات كبار ديال لما يسخنو او حطات بيجامة سخونة كتلبسها كل مرة منين كدوش ... دخلات دوك جوج گداري لطواليط باش يسخن او مشات تشوف شبكة تاع دوش شنو فيها لقات شوية صابون لبلدي تأفأفات أو حطات شبكة مشات لماريو فين حاط حوايجو أو هزات ليه قرعة شابان او باندوش بقات كتشوف فماريو تاعو مكرهاتش تهز كتر ولكن خافت لا يقشعها او كتافات بشابان او باندوش حتى رجعات حطات باندوش خافت لا يعطي ريحة أو مشات دوشات بالخف او جمعات طواليط او لبسات حوايجها ونشفات شعرها بفوطة دغيا او جمعاتو بزيف حياتي ....
بسمة : تفووو جوووع و قلة شي الله يعطيني غير موتة نتهنى من هاد زواج القهرة
مع جوايه العشا دخل لدار كيماصي عنقو بيديه بملامح جامدة !! دخل لكوزينة حط تقدية لي جاب او مشا لبيت نعاس لقاها گالسة تتطوي لحوايج
عماد : قهرتينا بهاد برودوي باش تتسيقي
شافت فيه مبتاسمة بعياء : قول غير السلام
عماد : تكعدي نصبي داك طعام
_حفظاتو و فاهماه ! ولو ست شهور مرت على زواجهم الا تتعرف حالة هو مقلق ، وكتحاول تفادى صداع بيناتهم ! حطات لحوايج بين يديها وناضت لكوزينة
عماد : ( شاف فيها مخنزر وغوت بجهد ) وتحركي أبنادم راه فيا جوع
قفزات من حدة صوتو ودخلات دغيا جبدات حداها لخضرة وبدات تنقيها بلا عقل ويديها كيترعدو ليها حتى ضربات صبعها بالموس وغوتات شادة فصبعها كتبكي .. دارت لقاتو وراها متكي على كادر دلباب صدرو كيطلع وينزل تقيصو يطرطق عليها .. خوات على صبعها لما دغيا وكملات تقطاع لخضرة وهو كينگ وراها
عماد : ياودي ياودي باقي كتعلمي متعرفي تشقاي كيف لعيالات متعرفي طيبي لاش جايبك أنا لاش ؟ تاكلي وتشربي ومايگر فيك لخير
زيرات على لموس وصبعها تاني كيسيل بدم لاحت لخضرة فلكسكاس وهزات سميدة دطعام من الگصعية دارت تخويها فلكسكاس ولقات فيه لخضرة تنفسات وحطات لخضرة فلگدرة او سميدة فلكسكاس .. دارت بشوية شافت موراها وملقاتوش وتنهدات ، جابت شرويطة لواتها على صبعها ...
ماكملات داك طعام حتى قربات تموت رادة لبال مع لملحة لا تزيد ولا تنقصها او مع زيت لا تكترها ولا تنسا شي حاجة عارفاه دابا غير على سبة واخا تكون لماكلة مقادة غايعيبها محساك تكون بصح ناقصاها شي حاجة غاينوض يفوت فيها شي دقة !
شافت فيه دمعة قريب طيحها ومشات لصالة گلسات قدام ليمدة ونطقات فنفسها : الله يرحمو
حطات قدامو زلافة ومعلقة وخوات ليه لبن فكاس كيف كيبغي وبدات كتاكل غا بزز هي لي كانت مشهية طعام وشحال هادي مداقتو هاهي دابا طالبة غا سلاك ومكرهاتش تمشي تنعس بجوع غير دوز ليلة على خير !
عماد : كديريها بالعاني قلنا ليك خوي شوية وخاوية لگدرة كاملة طعام هدا ولا صوبة ؟
گلب ديك لگصعية دطعام وحط جيهتو فاش كان كياكل ليها بقات هي غير كتشوف فيه وساكتة .. يلاه قالت راه سكت حتى خسر سيفتو فيها ونطق : نوضي تگعدي حيدي عليا هاد لگدرة ريحتها كتعيف دگولي غير غاملة شي سيمانة ...
بسمة : ماغاملاش خالتك لي عطاتها ليا وراه مولف نطيب فيها
عماد : اوا الله يخلف على خالتي ! ( بعدم اعجاب تيسوط ) تفووو على عيشة برا تمارة ، للداخل تمارة ماعرفت فين رد راس
تنهدات من كلامو وناضت حطاتها فلكوزينة و بدات تجمع و تنقي و فداخلها صوت تيقول
_اش مجلسك ابسمة ؟ خليتي فداركم المحنة لقيتي فزواج اكثر منها
صبح صباح ، وفاقت على إثر صوت رنة هاتفو .. ناضت حتى هيا غسلات وجهها وجمعات شعرها وبقات واقفة فلكوزينة كتشوف آش تحط لهاد لفطور .. وهو مشا غسل وجهو وسنانو وشاف لحيتو فلمرايا كانت مخربقة شوية وقال فخاطرو حتى يدوز عند لحلاق فلعشية ويقادها .. ساس يدو من لما وتوجه لبيت جبد من لماريو سروال توب زرق او شوميز فنفس لون أو كغافاط بالكحل ... لبس حوايجو وهز تقاشر جداد لبسهم مع صباط بالكحل .. مشط شعرو وقادو بالجيل ورش ريحتو وهز مگانة لي توالمو مع لبسة وتوجه لكوزينة على أساس يفطر ، حتى لقاها شادة حنكها او ساهية فلحيط او حداها قرعة زيت لعود بقات فيها جغمة ! عرف مكاين مايتحط وخرج مخليها ضبر راسها بعد مانطق كيف عادتو :
هاني خارج
سمعات لباب تسد ونطقات مغددة :
مشية بلا رجعة رجلة الكذوب
رجعات تنعس مفقوصة حيت عارفاه مغاديش يرجع وضارها راسها من لأحداث لي طراو لبارح ومن العذاب لي عايشة كل نهار جوع فكرشها وشنو غاتاكل مكاينش !
_فاقت على صوت آذان ضهر ناضت توضات وصلات ومشات لكوزينة كتقلب حتى لقات طعام لي شاط لبارح سخناتو فوق بوطة صغيرة وكضحك بفقصة
بسمة : زوافرية ومدايرين بحالي يا حسرة براجلي ( هزات داكشي لي شاط حيدات منو لخضرة وقعدات فلكوزينة كتاكل تسد جوعها ) لاهم هادشي ولا والو !
غسلات فاش كلات و سمعات دقان فلباب حلاتو بشوية كطل بنص عين حتى بانت ليها خالة راجلها وبتاسماات وهي حالة لباب مخلياها دخل ...
بسمة : ( ضحكات بخفوت وهي كتشوف فيديها قفيفة .. و سلمات عليها بالوجه ) مرحبا بخالتي زهرة
دورات راسها بشكل دائري كتشوف فيها بمعنى عارفة لي كاين وحطات يديها على فخضها كطبط عليها
زهرة : راه جبت ليك شي حاجة خفيفة فتقضية وصلات سلعة ليوم وگلت ندوز ليك معايا شوية
( كتوصلهم كل شهر سلعة من بوجدور فيها قوالب سكر او باكيات دفرماج او بيدو دزيت لعود او لوسيور او خناشي صغار دروز او لعدس او لوبية او خنشة ديال دگيگ د 50 كيلو .... او كل عيد كبير حاولي كيوصلهم تالدار وهادشي كيجي من راسيون ناس لي عندهم وبتحديد ناس لجنوب فقط )
: ولد ختي عماد أبنتي خرجو عليه لي هو ماشي من سهمهم راه غاااارق كريديات ( هزات فيها عينيها وكملات هضرتها ) البرطمة أبنيتي لي رَوْحَك ليها هي هادي ؟ اختي غير دريويشة وهو لي قالت ربي سهل عليه ويهز راسو ساعة تيتعلق فين يتفلق !
_ شافت فيها وسهات كتسترجع الأحداث العرس ودخوها لبرطمة اولى
ᘳ فلاش باك ᘰ
_كانت عروس مثل الوردة متفتحة ! الموسيقى على انغام ماسخينا الالة ماسخينا بجمعية و الحضور واقفين للوداعها وكل بنت تاشوف راسها فيها ، اخير بسمة ليتيمة لي مرات اباها مدوزة عليها العذاب تزوجت بشاب خدام فالبانكة و جاها راسو ماتصحابت معاه مع خيط بيها دروبة ، كانت بلاغوب بيضة و لافوال مليوح عليها يديداتها محنين و خاتم زواج مزينهم هازة جلايلها و اليد اخرى شادها بيها زوجها مروحها و مرات باها تتزغرت وراها حتى وقفو للوداع
مرات باها : ( شادة يديه تتهزز فيهم بتوصية ) تهلا فيها أولدي راني جيت لقيتها صغيرة وربيتها وعلى وجه لمرحوم أولدي لاما تهلا فيها وديرها فعينيك راها يتيمة
عماد : ( ضحك ليها فرحان كيشوف فبسمة تتبكي وحط يدو على صدرو ونطق ) ماااتوصينيش أخالتي غانديرها فوق راسي ميخصها معايا خير لي بغاتها تحضر ! ( شاف فبسمة لي كانت أجمل عروسة خارجة من دار باها شعر عسلي رطب مليوح على كتافها ضاربة فيه شمس كيبان ذهبي أو لوجه بلارة لحنيكات حمرين او دايرة مكياج خفيف بالكاد كيبان ومع ذلك كتبان زوينة وطبيعية ) باسها فوق راسها او قبل ميغادرو عنقات بسمة مرات باها ونطقات كتشوف فيها
: راك غادة دابا عند راجلك هو لي يدوم ليك تهلاي فيه ( قربات ليها ونطقات بشوية ) شدي فيه ومتخصريش ليه لخاطر راه هو لي عندك دابا ..
حركات ليها بسمة راسها بالإيجاب أو ودعاتها ، او مشاات مع راجلها ركبو فطموبيل مع مو أو باقي لعائلة مقسمين فجوج بيجُوَات أو منوضين لحيحة فطريق بطعارج أو طارات ...
وقفات طموبيل قدام عمارة نزلو لعرسان او لعائلة وراهم .. خدا لعريس باليزتها او لورد فيديه او موراهم لعائلة طالعين معاهم فدروج حتى لقدام لبرطمة حل لباب بساروت ودخلو مجموعين حاطين لها دهاز لي جابو أهل لعريس وغادروا بعد ماودعوهم ودعاو معاهم ... بقاو بوحدهم ومشا لبيت حط فيها باليزتها وبقات هي كتشوف فأثات دار لي عجباتها واخا ماشي شي برطمة نيت وإنما على قد الحال فيها جوج بيوت وصالون وكوزينة وطواليط .. ولكن فنة بسيطة وسكنة فيها زوينة .. تبعاتو لبيت بخطوات بطيئة حشمانة وكتحك فصباعها .. لقاتو مبدل حوايجو أو بقا غير بشورط أو لفوق عريان ، غير شافها ناض عندها ضاحك وجرها لعندو وقرصها فحنكها لي رجع حمر
عماد : ( ساهي فيها وفعينيها لي عجبوه ) بدلي عليك هاد لاغووب وأجي غانتسناك
حركات ليه راسها بالإيجاب وجرات باليزتها خارجة من لبيت حتى لصالة وبقات معافرة مع لاغوب حتى نزلات سنسلة لي كانت لور وگلعاتها بقات فقط بسوتيامات او شورط قصير .. حلات باليزتها كتشوف فالحوايج لي كان جاب ليها وبيجامات وكريمات وعطور حارت معرفات شنو تهز فالأخير ختارت بيجامة على شكل تيشورت وشورط قصير ورشات شوية ريحة عليها وبقات كتشوف فدوك لكريمات معرفاتش كل حاجة ديال آش تلفات بيناتهم وهزات صابونة تاع وجهها وسدات لباليزة وتوجهات لطواليط غسلات وجهها من مكياج لي كانت دايرة ومشطات شعرها مخلياه مطلوق .. شافت راسها فلمراية حشمانة وخا مدايرة والو لوجهها ولكن متحتاجش تنفسات وتمشات بخطوات مترددة لبيت وهي كتشوف فشورط لي لابسة قصير وحشمات كونها أول مرة غاتعري رجليها قدام شي راجل .. دخلات لبيت كتشوف فيه مجبد فوق ناموسية كيمشط شعرو بيديه غير حس بيها دخلات دور وجهو شاف فيها ميكدبش انو كان كيتسناها بشي سوميج دونوي ولكن قال مع راسو أيام الله طويلة إلى ماشي ليوم غدا ! ناض عندها جارها بيديه تا لناموسية وگلس حداها
هزات عينيها فيه وبتاسمات إبتسامة خفيفة وجرها عندو مدرعها بواحد اليد : تي هضري مالك سقلتي امم ( ضرب ليها نيفها بصبعو ) خايفة تالهاد درجة مالي غاناكلك ..
حركات ليه راسها بلا كضحك
عماد : ولكن راه بصح غاناكلك
جرها من عنقها لعندو منغامس معاها فقبلة كيتلدد بمداق شفايفها وهي سادة عينيها بتوتر مخلياه يدير مابغا ..
سالات ليلة بيناتهم وهي فحضنو ناعسة على دراعو وشادة فليزار كتزير عليه مرة مرة فاش كتحس بألم تحتها بسبب الدخلة ولي مرت بسلام و بسهولة وبعد دقائق نعسات فحالو ..
صبح صباح فاقت كتحك فعينيها وشافت جنبها ملقاتوش حيدات ليزار عليها وناضت بشوية حتى هزات حوايج لي كانت لابسة لبارح لبساتهم يلاه كانت ناوية تخرج حتى شافتو داخل هاز بلاطو فيديه فيه لفطور ضاحك ونطق
: نعاسة صباح الخير الالة لعروسة
بتاسمات ورجعات بلاصتها حتى حط ليها فطور قدامها وگلس حداها
بسمة : صباح نور ( شافت فلفطور وهزات عينيها فيه بعتاب ) عدبتي راسك كنتي تفيقني أنا نوجد لفطور
عماد : عدابك راحة هانيا مرة نطيب ليك أنا ومرة نتي ( هز كاس عصير كيدوز بيه ) كي بقيتي شوية ؟
بسمة : ( نزلات عينيه كدهن خبزها بشكلاط مقدراتش تشوف فيه ) حمد الله ! مزيان شوية لحريق
عماد : احح على الحريق ( بنظرة ماكرة رمى نظرة لحجرها ) منزلاتش منك الدم ؟
بسمة : مزال ماتوضيت
عماد : ( قرب لفمها قبلها ) طيبي ليا الغدا من يديداتك ؟
حركات ليها بسمة راسها بالإيجاب معندها متقول ليها أو ودعاتها زهرة كدعي معاها وخرجات سدات وراها لباب مشات نيشان لديك لقفيفة كتشوف شنو فيها لقات إيترو دزيت لعود او لوسيور او باكية دلفرماج او شوية من لعدس او لوبية او روز أو خنيشة صغيورة عمراتها ليها بدقيق او باكية دلخميرة او شوية دلخضيرة تعدي بيهم يوماين هكاك وميكة فيها جوج تفاحات او ليومانات او بنان .. ضحكات فرحانة عارفة لخضرة او ديسير زادتهم من عندها عارفاها معندها والو فدار او تفكراتها بشوية .. ستفات داكشي فلكوزينة كدعي معاها وهزات داك ديسير غسلاتو أو كلاتو كتبنن وهي كدعي معاها فخاطرها ، مرت ساعات
وصلات وقتو فاش كيجي من دار أو دخل كيقلب عليها بعينيه ولقاها گالسة قدام تلفازة كتفرج .. هزات فيه عينيها لقاتو داخل خاوي فيديه كيف عادتو تمنات شي نهار تلقاه مدخل عليها غير شوية ديال تقدية أو والو .. خلاها ومشا لكوزينة يشرب حتى كيشوف فوق بوطاجير قرعة دزيت لعود او باكية دلفرماج .. من نوع دلفرماج عرفو انو سلعة دبوجدور هاديك حيت مكيتباعش فالحانوت بحالو مشا لمجر دلميكة لي حدا تلاجة حلو ولقا لوبية ولعدس .. تما تأكد ومشا نيشان لصالة واقف متكي على لباب
عماد : ( مخنزر )منين جا داكشي لي فلكوزينة ؟
بسمة : ( شافت فيه ونطقات بملل ) خالتك الله يكثر خيرها
عماد : اهاااا !! الله يخلف عليها ودبا أرا متاكلي مع راسك
دار غادي لبيت يبدل حوايجو ومخليها موراه كتشوف فيه بنضرات غاضبة وكتسب فخاطرها .. بدل عليه بشورط وتيشورت ديالو أديداس ومشا عندها گلس قريب لها كيشوف فيها من رجليها حتى لوجهها
عماد : ( دوز يديه على لحيتو ) مجاكش صهد ؟
بسمة : ( دارت كتشوف فيه باستغراب ) شوية وصافي
عماد :( طلعها وهبطها ) نوضي بدلي عليك بشي حاجة خفيفة من لبارح ونتي لابسة هاد بيجامة
بسمة : ( عاد فهمات شنو باغي ) فينهم هاد بيجامات باش غانبدل مابقاوش عندي لحوايج
عماد : ( ضحك كيشوف فيها ) تزوجنا بيك غالبارح ولحوايج مابقاوش عندك كي درتي ليها
شافت فيه بشوفة ذات معنى وبقات ساكتة
_بعض الاحيان سكوت زوجة تيأدي للتراكم، تيخلي الزوج يزيد يطغى و بعض الاحيان تيكون السكوت حكمة او تجنب للمشاكل لانه يزيد طين بلة
بسمة : فوقاش تجيب ليا الحوايج اعماد ! راه تقهرت
عماد : ( غمض عينيه بعصبية ) راه داك ولد قح*بة مول الدار شدهم ليا
بسمة : بغيت نعرف غير علاش باليزتي أنا بضبط ؟ علاش ميشدش شي حاجة خرا !
عماد : ( شاف فيها بملل ) فاش كنت كنزل لفراش لتحت خليت باليزتك ورا لباب باش رجع ليها نزلها فاش طلعت لقيت مول دار دخل كيبدل فقفل ديال دار ومخلانيش رجع ندخل لي بقا فدار راه مخديتوش
بسمة : ( دارت عندو وشافت فيه باترجي ) كن عطتيه رزقو كن ماشدش لينا لحوايج و دوش و البوطة و ثلاجة.. راه من حقو يبدل لقفل ويجري علينا ، خلصو وجيب ليا حوايجي ويلا بقات شي حاجة فدار جيبها
عماد : ( هز يديه حطها فوق راسو ) انا معندي منعطيه مزير هاد ساعة وعاد كيتسالني غير شهر واحد ودار لينا هاد حالة كاملة
بسمة : ( شدات ليه فيديه وزيرات عليهم ) عماد أنا راني مراتك علاش تخبي عليا ؟ ناكلو غير خبز ولما ونعيشو بيخير حسن من هاد لحالة هادي واش عاجبك هادشي لي راه فيه حنا دابا ؟ معدنا دوش كي ناس تلاجة تخدم صباح تسكت عشية .. عماد ! ( سكتات بضع ثواني وكملات هضرتها ) قالت ليا خالتك راك غارق كريديات و تتعطي شيك و كولشي تيتسال
عماد : ( نطر يدو من يديها بزعاف ورفع صوتو ) هاد خالتي أنا شكتعرف ؟ شكتعرف آش دخلها فيا ولا فخدمتي لا كانت غاتجيب ليا غير صداع ولمشاكيل بلاش منها متبقايش تحلي ليها آش غاتجيب ليا بسلامة شوية لوبية ولعدس ( خرج فيها عينيه ) كنسعا أنا حدا جامع ؟
بسمة: ( تهزت بتخصيصة الفقصة ) الكريدي راه حرام و تيقول المثل المكسي بديال للناس عريان ، انا مستعدة نصبر معاك و نعض فالصبر ولكن بركة من لكريدي ، شوف فين كنا ساكنين فين رجعنا؟ فين فراشنا ؟ فين بيت نعاسي ؟ تاتقولي مول دار شدهم و الناس قالو بعتيهم
عماد : ( نفس مابقاتش تطلع ليه وقف خارج ) ندير لي بغيت ماعجبك حال راه الباب تتعرفيه و تمارة مرات باك تاتسناك
_خلا دموعها نازلين و الغصة فقلبها ! زواج القهرة و الحبس ، لا خروج لا دخول و جوع و شنعة متزوجة تاخد فبانكة ، فراشها تباع و حوايجها مشاو ..مسحت دموعها و رجعت بيها ذاكرة تتفكر اول نهار للبداية مشاكل
ᘳ فلاش باك ᘰ
بعد مرور 3 أشهر على زواجهم فالبرطمة .. گالسة كتصلي حتى سمعات دقان بجهد فلباب قفزات من بلاصتها وغمضات عينيها حتى كملات صلاتها وناضت بجرا باقي بعباية باش كتصلي أو وقفات حدا لباب
بسمة : ( بصوت مرتجف ) شكون ؟
لي كان كيدق ضرب لباب برجليه قريب يفرعو وضرب لباب بيديه كيغوت : حلو لباب أنا مول لدار !!!
_حلات لباب بشوية و لخوف طاغي عليها شافت فمول الدار لي كان كينهج وصدرو كيطلع وينزل بالأعصاب أو وجهو حمر
مول الدار : ( كيشوف بعينيه داخل دافع الباب بقوة الدار ) كلمي ليا داك راجلك دابا قولي ليه يخرج عندي...
بسمة : ( نطقات بصوت خفيف ) والله أسيدي ماكاين و حشومة عليك مهجم عليا
مول دار : إلى كاين غير قولي ليه يخرج راه والله مغانتحرك ليه من هنا ! ( طلعها و هبطها ) هو ماحشوماش عليه معطل عليا فالكرا و انا محتاج فلوسي ؟
بسمة : والله أسيدي مكاين راني بوحدي فدار و غير يرجع نقولها ايه
_ عاود طلعها ونزلها وعرفها مقلوبة عليها القفة ومافراسها ميتعاود و نزل نبرة صوتو بعد عليها خارج للباب
: سمعي نقوليك أبنتي ! أنا نهار كريت ليه الدار راه على وجه واحد السيد كان بيناتنا شكرو ليا وبقا عليا حتى كْريت ليه ساعة مصدق لا هو لا داك سيد .. هدا شهر الثالت وباقي مخلص ليا لخير لي يدير فيا يهز حوايجو ويزيد ( خنزر فيها ) ولا الى مكيفهمش الهضرة راه بيناتنا المخزن و عندي حتى لي يركعووو راه غالك فيا و بزاااف
_شافت فيه بإحراج هو كيغوت أو لي ساكنين فلعمارة كيطلو من البيبان يعرفو شواقع
بسمة : صافي أسيدي غايجي غانقولها ليه
_زاد نازل فدروج و نطق بصوت مرتافع معصب : قوليها ليه ولا متقوليهاش أنا نابَتْ هنايا
_نزل من العمارة او بقا واقف حدا الباب كيتسناه وهي دخلات سدات عليها الباب شادة فقلبها من الخلعة أو وجهها حمر مشات نيشان لشرجم كطل وامتا يبان ليها جاي حتى من تلفون معندهاش باقي مشراه ليها .. مدازش وقت طويل حتى بان ليها جاي أو وقف حدا باب العمارة خرجات راسها من شرجم كتحاول تشوف شنو واقع واخا مكيبانش ليها مزيان وشافت مول دار وقف عليه تسالمو فلول مسمعاتش الحوار لي دار بيناتهم حتى بدا صوتهم بجوج كيرتافع أو تشانقو جيران لي فلعمارة كيطلو ولي كان دايز وقف كيشوف
مول دار : 3 شهور ونا كاري ليك ونتا كل شهر تهرب من الخلاص حط ليا أسيدي فلوسي ولا بيناتنا المخزن
عماد : ( شاف ناس حداه مرضاش دفعو وغوت فوجهو ) جمع يديك و فلوسك دبا توصلك ! و المخزن راه فصفي مامنحقكش تخرجني من داري
مول دار : اوا لي ماعندو سيدو عندو لالة و بربي تاتخرج اليوم قبل غدااااا
_سدات شرجم وگلسات فالأرض شادة راسها معارفة مادير حتى سمعات دقان فلباب بجهد ناضت دغيا ودموع فعينيها حلات لباب ودخل كي رعدة تبعاتو كتشوفو مزير على يديه حتى عروقو برزو وقاميجتو حالتها تقطعات ليه من جهة او فعنقو آثار ضفار ودم نازل مع عنقو
: بغا يخرجني من لاباخطمون ويبيعها وقاليك ألالة كيتسالني 3 شهور ديال الكرا ! كيتسالني غير ديال هاد شهر وكنت ناوي نخلصو ليوم .. ماشي من حقو يجي يهجم على دار والله تانمشي ندعيه ونصايفتو فين يتربا
_گلسات حداه كدوز على ضهرو باش يتهدن متيقة أي كلمة نطقها !
بسمة : قالي مامخلصوش فمرة وجا دار شوهة هنا
عماد : مخلصو و هادي داري ماخارجش ...
_دازو أيام ورا صداع لي ناض ، ومول دار مارجعش بان و عماد كما العادة خدمة لخروج و هيا غير دار ، فصباح كانت يلاه فايقة من نعاس وسمعات صوت دقان فدار بجهد فالول ترددت تفتح لكن حست بالباب غايتهرس من قوة دقان ... حلات لباب ولقاتو مول دار أو واحد جارة حداها يلاه نازلة من دروج شافتهم وهي تجي عند مول دار نيشان قبل ماتهضر بسمة
جارة : ( شافت فبسمة بشفقة وهضرات مع مول العمارة ) شوف اخويا هاد المرة الله يعمرها دار من نهار جات مسمعنا منها شي حاجة دلعيب لابغيتي راجلها سير قلب عليه راك عارف فين خدام
مول العمارة : ( شاف فجارة ) ألالة راه مشيت عندو تالخدمة وملقيتوش وجيت عندو دابا ( شاف فساعتو ) هاد الوقت فاش كيمشي لخدمة قلت نتلاقا معاه نيشان عاد خارج من البرطمة ساعة غانكونو تخالفنا
بسمة : و الله اسيدي ماكاين
مول الدار: نتبعو لكذاب حتى الباب دار..
_نزل مع الدروج وخلاها هي مع الجارة حانية راسها كتشوف فالأرض حتى نطقات الجارة : خلصو السيد أختي ! راه ماكرا دارو الا محتاج ، راني ساكنة هنا ربع سنين حتى هو الله يعمرها دار
بسمة : أختي راه راجلي كيخلصو راه هو لي بغا يخرجنا ويبيع البرطمة
الجارة : لا أختي هادشي مكاينش العمارة معروفة للكرا و الملك داخل فيه الورثة مستحيل تباع بين ليلة و نهار! وسيد عمر وقع ليه شي مشكل مع شي واحد حتى لراجلك كيكري لناس هو تخلصيه فلوقت ميخصك معاه خير والله يعمرها دار تعطلي عليه حتى شهراين يدير معاك المزيان ويصبر عليك ( سكتات شوية كتشوف فيها ) إوا اختي هادشي دلبيع مكاينش مامنو والو !
بسمة تبلوكات ملقات متقول ليها كتافات أنو تشكرها وتسد وراها لباب .. تمشات بخطوات بطيئة لصالون رجليها مهازينهاش كتفكر واش سيد لي دارت فيه ثيقة وتزوجو يلاه هادي 3 شهور يطلع كداب وكل كلمة قالها ليها ما منها والو ! شغاتسنا منو من هنا لقدام وهما عاد باديين مدارو لا ولاد لا والو وباديينها مشاكل وصداعات ولكدوب ملقات مدير من غير طيح لارض وتبكي ربي لي خلقها كتكبي وتقول مابكيت حتى رجعات تشهق وصدرها تزير عليها ... سمعت حسو داخل للدار هزات راسها لقاتو واقف عليها أو وجهو طافي
بسمة: ( قلبها مشى و جا زيرات على صباعها بصدمة ) اويلي ! خاتمي اعماد دزواج آش بغيتيه
عماد : ( تنهد كيدوز يديه على شعرو جاب كرسي وگلس قدامها ) بسمة راني مزير معندي دابا والو ولخلصة مدخلاتليش وهو مزيرني على خلاص دهاد شهر
بسمة : ( شدات راسها ودموع غاديين على وجهها ) اعماد راك مخلصتيهش 3 شهور ( شدات على قلبها بحرقة ) عفاك لا ملقا شي حل يلاه قلنا بسم لله وبدينا فمشاكل
عماد : ( ناض من على لكرسي وضرب برجليه بجهد صاعر وهي قدامو تهزات بالخلعة كتقفقف قدامو ) شكون قاليك هاد الهضرة ؟ أدوي ( شافت فيه مخلوعة تقوليه الجارة غايصدق داير ليها شوهة معاها ويفوت فيها شي دقة هي ) كتيقي فالحمار دلخلا كتر مني أنا ؟ واش هو لي مزوج بيك ؟
بسمة : ( شافت فيه بخوف وشدات فخاتم فصبعها ) خاتمي لا حتى لخاتم لا يلاه 3 شهور هادي باش تزوجنا وتقولي عطيه ليا
_ وقف كيشوف فيها وناضت تبعاتو لكوزينة بقات كتشوف فيه وهو كيصكاني دار بعينيه باش غايسبق واش يهز تلاجة هي لولة وتلفازة وينزلهم ولا يسبق لفراش .. دوز يديه على لحيتو كيخمم عارف راسو خسرها مع مول دار وخاص يهز حوايجو ويخوي فأقرب وقت
بسمة : عماد الله يرحم ليك الواليدين دير شي حاجة دار زوينة ملقاوش حسن منها خلصو وغايخلينا فيها علاش ميجري على جيران تاهما
دار عندها بجهالة ومع كانت غا وراه رجعات بلور كتشوف فيه سارطة ريقها ومزيرة على يديها
عماد : منين جبتي لدين موك هاد الهدرة ( خرج فيها عينيه حتى خلعها كان كيبان ليها فحال شي وحش هايج تقرب ليه يلصقها مع الحيط هو كيدوي ودفالو وصل تا لعندها ) وخا على هاد لحساب نخرج نقفل عليك ندخل ونقفل تاني لباب إلى خرجتي راني شماتة
صونا ليه تلفون فجيبو وجبدو وجاوب بعيد عليها حدو نطق جوج كلمات ( صافي واخا هاني نازل نطلاقاو ف***) قطع وتوجه عندها .. شد ليها يديها بغا ينصل ليها لخاتم وجبداتها بجهد كتبكي
بسمة : ( عينيها تنفخو بالبكا وحالتها حالة كلها كترعد ) لا أعماد الله يرحم ليك الواليدين ( طاحت لارض حدا رجليه ) عفاك لخاتم لا يلاه عروسة جديدة وتحيد لي خاتم ماشي حشومة عليك خود لي عجبك لخاتم الله ( هزات فيه راسها كتشهق بالكاد قادرة تهضر صوتها كيتقطع مع لبكا عينيها حمرين وشفتها سفلية كترعد تشوفها تبقا فيك ) الله يخلي ليك ميمتك متحيدوش ليا
عماد : ( هز راسو لفوق كيسوط ونزل عندها نوضها من على ضس وداها لبيتهم حتى گلسها فوق ناموسية وجرها حاط راسها على صدرو وكيدوز يديه على شعرها باش تهدن ) غانجيب ليك ماحسن منو إن شاء الله غير يتقادو أمورنا ونديك تختاري لي عجبك دابا بغيتو غير نخلص بيه هاد شهر وشهر جاي باش يخلينا فدار وديك ساع غانكون أنا تخلصت ( هز راسها عليه حتى تقابلات معاه وباس يديها بجوج ) وقفي مع راجلك فهاد المحنة راه معدنا غير بعضياتنا لا طحتي نتي أنا نهزك ولا طحت أنا تعاونيني نتي .. معندي من غيرك يعاوني !
مسحات دموعها كتشوف فيه وصدرها باقي كيطلع وينزل بشهقة : عماد ( شافت فيه بتمعن ) واعدني رجعو كيف كنا ونعيشو بيخير مقاداش على هادشي
خدا ليها يديها بحنان وحيد ليها لخاتم وخشاه فجيبو بزربة وناض باسها فراسها وشاف فيها كيطمأنها بعينيه : يكون خير
خرج بزربة قافل وراه لباب مخليها وراه طاحت على ناموسية ضامة رجليها على وضعية الجنين وكتبكي معندها مادير من غير لبكا كتشوف كولشي قدامها وساكتة وكتقول فخاطرها كولشي غايتبدل غارجعو بيخير غايخلص مول دار وغانجمعو فلوس نشريو دارنا ونتهناو .. مسحات دموعها كتحاول تبتاسم وطمأن قلبها أنو كولشي غيتبدل وخا عندها إحساس وشي حاجة فداخلها كتقول : بسمة تاحاجة مغاتبدل هدا هو لواقع ! باقي مشفتي والو ...
نزل مع دروج بزربة وفيديه جاكيطة تاعو قطع شانطي كيتمشا بزربة .. نزل عينيه لأرض كيبان ليه خيال بنادم وراه وقراب ليه بزاف ، دار حتى كيشوفهم مقربين ليه أو واحد فيهم دار يدو على كتفو مدرعو جارو معاه كيبان فحال ولدو قدامو بديك البنية ديالو ضخمة و 3 لي كانو معاه دارو بيه فجنب
عماد : ( سرط ريقو كيشوف فيهم خلعوه كل واحد مخسر من قنت وريحة الماحية ضاربة فيهم مجهدددة ) اش تما اصاحبي ؟
_داك لي حاط عليه يدو زير عليه ونطق ببرود : زيد اصاحبي عندنا واحد جوج كلمات معلم
جرو معاه حتى دارو مع واحد جوج زنقات خاويين أو وقفو قدامو كيشوفو فيه بربعة
_طلقو ودفعو بيديه مخليه غادي كيجري وجهو مشا منو لون وقلب كيضرب متوقعش غايصايفط ليه هاد نوع .. سرط ريقو معارف شغايدير تلف مشا تالحدا واحد شجرة وگلس جابد باكية گارو وبريكة وبقا گارو ورا گارو بالأعصاب محس تاضرب 8 دقة وحدة تهدن شوية وجبد تلفون يصوني لصحابو دور نمرة لواحد فيهم وتسنا يجاوبو وهو فيديه گارو نتر نثرة منو وهز راسو لفوق سايط دخان من نيفو .. جاوبو لاخر ولاح لگارو من يديه عافط عليه
عماد : أفين أودا علي لاباس عليك ؟
علي : حمد الله ونتا بيخير
عماد : هاحنا أودي ( سكت شوية ) محتاج شي فلوس مزير هاد ساعة ( تنهد ) وگلت غا علي لي يعتقني .. دوز ليا أصاحبي لخلصة ردهم ليك
قبل مايكمل لاخر هضرتو غمق عليه بمعنديش وأنا نيت خاصني شي فلوس نكمل تامان واحد الأرض باغي نشريها وقطع عليه
_ شاف فتلفون قطع عليه قبل ميكمل هضرتو ودوز نمرة لواحد خر .. بقا نمرة ورا نمرة حتى سالاهم وكلهم مابغاو يعطوه حتى ريال كل واحد كيعطيه حجج أغلبهم معنديش ! بغيت نبدل طموبيل ! الواليدة عندها عملية كنجمع لها فلوس ! أحنا لقينا لفلوس تا نتصورو معاها ...
ناض كيسوط ضرب رجليه مع الأرض مغزف فلخر ساس حوايجو و شد تاكسي غادي نيشان عند خالتو وهو فبالو يخوي دار ليوم قبل غدا .. وقف قدام دار كيقاد قاميجتو لي تخسرات ودق لباب كيعض فشفايفو ويحرك فرجليه بتوتر بعد دقائق حلات عليه بنت خالتو ودفع لباب طالع كيجري فدروج حتى لصالون وبانت ليه خالتو گالسة مع بنتها تانية كيتغداو .. قفزهم من بلاصتهم بحالتو كينهج وناضت عندو خالتو ب بيجامة ديال دار طويلة او زيف حياتي ملوي على راسها
خالتو : ( خرجات عينيها فيه ) أنقولها ليك فوجهك نتا مكتسواش واخا ولد ختي مك شي نهار طيح لا سمعات هادشي كامل ، فيها سكارو تركب فيها لملحة ( هزات صبعها فوجهو ) أنا متسكنهاش عندي مناقصني مشاكل تزوجتي بيها ومشينا تا خطبناها ليك دبر راسك راه مامزوجة بيها لا أنا لا مك أنا خدامة وكنخلي بناتي بوحدهم فدار نستقبل مراتك عندي 3 يام هدا هو جهد شي حاجة خرا مكايناش وسير شوف ليك فين تكري شي دار خرا ! لان هاد صداع انت مولاه
خالتو : ( هزات ملحافها لبساتو ونضاضرها دشوف ) كنعرف واحد سيدة بغات تكري سفلي تاع دار راها قريبة ليا نيت فوزية راك تعرفها طالبة غير 14 ألف...
عماد : ( خرج عينيه ) 14 ألف ؟ غاتكري ليا ڤيلا لديلمها دار عندها كلها حالتها شراجم طايحين صباغة كلها مقشرة
خالتو : ( تحنات تهز صابوها وناضت مخرجة فيه عينيها ) لقيتها ؟ أدوي لقيتيها وباقي كتشرط متحمد سيدي ربي .. بغيتي نكري ليك ڤيلا مرحبا ( مدات يديها ) حط واحد مليون ولا جوج
عماد : ( شاف فيها سارط ونطق بصوت منخافض ) معنديش منين نجيب ليها ديك 14 ألف
خالتو : ( شافت فيه بفقصة وميلات راسها فيه ) لا أنا عندي راك كتشوف كولشي على عينيك كيعتقنا غاداك راسيون لي عدنا كل شهر توصلنا ش بركة دسلعة نقضيو بيها وخدامة أوليدي على قد لحال يلاه مكافية مع لبنات وداكشي لي خاصها ومقاتلة مع زمان ( شافت فيه ونطقات لاحول ولاقوة الا بالله فنفسها ) راك خدام زعمة خدمة تعيشك بيخير ولكن فلوسك تقول كتشد غا 100 درهم لشهر ومباينة باقي ، شعندي منقول ليك من غير الله يهديك !
عماد : ( تنهد كيشوف فيها طالب غا سلاك ) صافي شوفي ليا معاها ونا غانشوف فين نضبر لفلوس واحد شوية غارجع نعطيك تخلصيها ونجيب بسمة ( بتأكيد ) ومتقولي ليها والو ! فحال ماطرا تاحاجة متجبديش ليها حس شي دار خرا حتى نجي نتفاهم معاها
_خرجات تشوف ليه مع ديك لمرة وهو مشا نيشان شد طاكسي طالع لإنزگان عند دهايبي يبيع داك الخاتم .. طريق كلها وغير تيشد فراسو و يسب داخلو ! وصل المكان ودخل مبتسم لمول المحل
عماد : هاواحد سلام عليكم
ذهايبي : اهلا بالبونكيي ديالنا ! كي داير احوال
عماد : الله يحفظك اودي مع دنيا
ذ : كنت انتصل بيك !
عماد: مرحبا، شي حاجة؟
ذ : واحد شيك يدخلني هاد سيمانا وقول جوج شيكان و بغيت نوصيك تعلمني لا نخلص الخطية
عماد : ماتخممش ! ( حط ليه خاتم ) شوف لنا هدا
_ذهايبي هز الخاتم و شافو و رجع شاف فيه حطو فالميزان تيقيمو و هضر معاه
: ياك هدا لي خديتي لعرسك ؟ باغي تبدلو
عماد : ماكرهناش اودي نبدلوه ولكن راه بغيت نبيعو
ذ : ااه ااه ! تبيعو ؟ ياك والو باس ؟
عماد: ( يتاسف ) راك عارف عليا كريديات و زمان ماساهلش
ذ : الله يحسن العوان ! ولكن راك يلاه قلتي باسم الله اولدي ! مهم فيه اربعة عشرين الف
عماد : وايلي من كدا و ربعين بعشرين ؟
ذ : ذهب هو هدا ! من عندي نزيدك ستة و عشرين
عماد : ( هبط راسو باسف ) قضي وصافي راني مزير مع واحد مول الدار
_ذهايبي حسب ليه الفلوس و عقلو تالف!
.. شد فلوس خشاهم فجيبو ورجع شاد طاكسي تاني حتى لدار خالتو حسب فلوس فطاكسي خشا 14 ألف فجيب أو فجيب تاني خلا لباقي وخلص مول طاكسي ونزل حتى دخل لدار لقاها فانتظارو ومد ليها 14 ألف يلاه كان نازل
عماد: انا مشيت
خالتو : اجي هنا !! زيدني 200 درهم تسبيق تاع ضو ولما
عماد : ( دار عندها ) إنا تسبيق مالها شغتكري ليا بسلامة براكة دايرة عليها هاد لحالة
_شافتو غايديماري تاني مكيتقاداش من الهضرة وهي تقاطعو بهضرتها مخرجة فيه عينيها معصبة قريب طيح ليه تماك : شوف أولد ختي تحط 200 درهم هو هداك ماتحطهاش متوصلنيش باقي وسير قلب ليك فين تسكن ! طاعة الله اولدي لي كان فيك سكوت و داخل سوق راسك و فرحانين معاك بخدمتك رجع كولو فيك مشاكل!
عماد : ( مد لها لفلوس ) خالتي فوتيني ! انا صكع و مسخوط راسي هدا ماكان! وقولها تنقص شوية فثمن راه بزاف 200 درهم لشهر وخا يكون كيديرو عرس كل نهار ودير 14 ألف مالهم عاطيني برطمة مفرشة ... واش أنا نخلص 18 ألف كل شهر وا بزاف ...
_سكت فاش شافها زدحات لباب وراها وخرج تاهو قلب على هوندا ! تيمسح فعروقاتو جاية اربعة سوايع هة تيجري و يجاري ! و تينعث لشيفور الدار حتى وصلو طلب منو ينتظرو طلع تيجري داخل عليها
عماد : لبسي جلابتك تحركي
بسمة : ( بدهشة) شكاين ؟
عماد : ( زربان طاح ضلام ومشافش تا ساعة شحال ) غاتمشي عند خالتي عارضة علينا
لبست جلابتهل و دارت شالها خارجين ! ماعلاباهاش انها اخر مرة تشوف دارها ! خرجها تالشانطي شد ليها طاكسي هي كتهضر وهو ممسوقش ليها ركبها وسد لباب وخلص مول طاكسي قاليه فين يحطها بضبط وزاد عند مول هوندا كيجري وحاضي جنابو ... تعاون معاه حتى نزلو تلفازة و لمضارب لي فصالون ولمخاد وطلع جاب حوايجو كاملين حتى تأكد أنو مخاصو فيهم والو عاد رجع طلع ناوي يجيب بوطة ولماعن ويخلي حوايجها هما لخرين حيت خفاف وتفاجئ فاش لقا مول دار حدا لباب كيقفل فيه ورجال لي وقفو عليه صباح حداه .. سرط ريقو معارف ميدير لا دوا وقال ليهم يهز حوايج لي بقاو غايفوتو فيه شي دقة رجع بلور ناوي يمشي حتى وقفو مول دار
مول دار : لقاك باقي حدا هاد لعمارة تشوف حاجة متعجبك ولي بقا فدار راه ولاو ديالي يلاه تعوضني ف 3 شهور لي كنتسال ونهار تبغيهم جيب ليا فلوسي ورد ليك لي بقا فدار
عماد : منين نجيب ليك الفلوس؟ راه ربي كريم
مول دار : اوا حسب دروجك
_مجاوبوش ونزل مع دروج ركب مع مول لهوندا حتى دار عند خالتو خلصو .. وخدا ساروت دار لي كرا حلها دخل ليها داكشي لي جاب ممسوق لدار لي كلهم مغبرة ولفراش غايترون ! فقط حوايجو لي جامعهم فباليزة خايف عليهم حطهم فجيهة وخدا لي غايخصو يلبس لخدمتو فصباحة او مستلزماتو لدوش ومشا يدوش عند خالتو وينعس عندها وصباح ينتقلو لدار جديدة ..وتم راجع
حلات ليه خالتو لباب وعاود ليها گاع لي وقع ليه تنهدات كدعي فخاطرها مع مرتو وطلب ربي يصبرها معاه .. دارت ليه لما يسخن باش يدوش وخلاتو يبات مع مرتو فصالة حيت معندهاش شي بيت خاوي يبات فيه .. مشات تنعس حيت تعطل لوقت وخاصها تفيق بكري لخدمتها وهو دوش ومشا لصالة لي كانت مفرشة بزربية او مخاد على طريقة صحراوة و لقاها گالسة بجلابتها حاطة يد على خدها وساااهية غير شافتو ناضت عندو
بسمة : أشواقع لاش جايبني عند خالتك كنسولها شكاين كتقولي دابا يجي عماد يشرح ليك ( شافت فيه بنضرة دشواقع ) فين هاد لعراضة لي قلتي ؟
عماد : ( شاف فالفراش لي حطات لهم خالتو وفرش ليهم بجوج وتكا على مخدة كيتنهد ضارو ضهرو من هاد نهار طويل تنهد كيشوف فيها هي لي جات گلسات حداه كتسناه يهضر ) دار لي كنا فيها جرا عليا مول دار وخا بعت لخاتم وعطيتو لفلوس ولكن مابغاش يشدهم جرا عليا وبغيت ناخد لفراش حدي هزيت فراش صالة وحوايجي ولقيت حدا لباب شي شماكرية جايبهم يخلعوني تجاريت معاهم يخلوني ناخد لحوايج ومابغاوش كانو 4 مقديتش عليهم كاملين ( شد راسو وغمض عينيه ) خليت ليهم داكشي لي بقا فدار ورجعت كريت لينا دار حدا خالتي خلصت تسبيق ضو ولما وخلاص دشهر وحطيت فيها حوايجي ولفراش .. وجبدت معايا سوارت غدا نتاقلوا ليها
شافت فيه بصدمة دمعة عند عينيها مقداتش تهضر وهي كتشوف فيه عاطيها بضهر وحاط يديها على راسو فحال الى كيقول ليها سالات لهضرة !
حطات راسها على لمخدة كتبكي فصمة نيفها حمر بالبكة او وجهها صفر يوم واحد كان أكفس أيام حياتها مابين ليلة ونهار مابقا عندها خاتم زواج ولا حوايج ولا فراش فحالها فحال ناس خشات وجهها فالمخدة عاضة فيها كاتمة صوت شهقاتها لي كيتسمعوو بصوت خفيف ولكن شكون سمعها ؟ وهو بدات صوت شخيرو كيتسمع مامسوقش ليها فحال الى كيقول ليها موتِ نتي گاع ! تنهدات كتحاول تنعس ولكن فينو نعاس بقات حالة عينيها حتى صباح كتخمم فشنو جاي باقي شنو كيتسناها من غير هادشي ؟ حسات بيه ناض من حداها وناضت تبعاتو غسلات وجهها ولقاتو واقف قدام لمراية كيقاد حالتو خرجو بجوج مخليين غير لبناات وراهم أما خالتو كتخرج مع 5ونص صباح لخدمة بحكم أنها خدامة فلوزين ديال لومبالاج ( الخضرة ) كتسنا طوبيس دلوزين تايوصل وتمشي فيه ... مشا معاها تالدار عطاها ساروت وهو زاد لخدمتو مخليها واقفة كتشوف فدار من برا وناس غاديين فزنقة كيشوفو فيها ويبرگو شكون جا يسكن معاهم جديد .. دخلات وسدات وراها لباب كتعطس لغبرة مجهدة فدار .. خرجات عينيها وهي كتشوف فالمضارب مليوحين لأرض نيشان جرات تاهزاتهم معافرة معاهم وخلاتهم واقفين ودخلات تكتاشف دار لي كانت فيها جوج بيوت او طواليط او كوزينة كانت على قد لحال لحيوط مقشرين او لبيبان على قد لحال قدام .. تكات على واحد لحيط غير كتشوف مابقا عندها جهد تهضر فيه فكل مرة كتهز عينيها فدار كتجي فبالها برطمة فين كانت ساكنة خرجات منها شهقة صغيرة وتبعها صوت تنخصيصها گلسات هكاك فضس جامعة رجليها كتبكي فراحتها بحكم تاحد فدار او تاحد مغايشوفها كتخوي قلبها على لحيوط ! وشكون يسمعها من غيرهم
بسمة : ( بصوت مرتاجف هزات راسها كتشوف فسقف لفوق ) أربي وشنو مخبي ليا باقي اهئ اهئ أربي هادشي بزاف مابقيت قادة أربي تصبرني ( غطات وجهها بيديها ) ياربي يرجع كولشي كيما كان ورجعو لدار لقديمة .. ياربي يتحل مشكل قبل مايكبر كتر
مسحات وجهها وحطات راسها على لحيط وفكل مرة كتعطس وتمسح نيفها
ᘳ نهاية فلاش باك ᘰ
شادة عاصير فيديها وكتشوف فلغادي وجاي لافاك كانت عامرة وكل رباعة شادين بلاصة مجمعين ..
حطات عاصير من يديها وقادات زيف لي خسر ليها وفنفس الوقت كتشوف فتلفون كتحقق فلخياطة : غزالة ياختي ولكن ياك درتي مع الخياط داكشي لي خصك بلا متزيدي !
تأفأفات لوخرا كتحك فراسها بإنزاعاج : وغاسكتي خسر لي اصاحبتي الخياطة وعرسي بقات ليه شهر ونص ( شافت فيها مخسرة سيفتها ) كنتفكر كتشدني الفقصة
هدى : ضيعتي فلوسك على والو قوليه يرد ليك فلوسك ولا شوفي معاه شي حل .. وشوفي فالعرس فرقي مابين رجال ولعيالات لابغيتي تلبسي هادشي راك عارفة غير ريحة وحرام ترشيها وتخرجي محاساك تلبسي هادشي وديري ماكياج غاتولي فتنة ! ( طلات على تلفون ورجعات حطاتو وبقات ساهية فيه )
حنان : ( شربات من العصير لي قدامها كتشوف فيها ) الله يهدي الجميع اختي غانفرق مابين رجال وعيالات على قبلك باش تحضري وغاندير غاداكشي خفيف ضريف أصلا مغانكترش ( شافتها ساهية ) مالك من صباح ونتي تقلبي فداك تلفون مالنا شكاين
هدى : ( حطات يديها على خدها ولوات شفايها ) والو غير تعرفت على واحد هادي 3 شهور هكاك ( تقادات فلوقفة وبدات تهضر معاها بحماس ) نسيت معاودت ليك عليه احنان جات الفرصة
هدى : ( حلات تلفونها ودخلات جيهة تصاور وجبدات طوف تاعو ) هاهو اختي ولد طنجة فعمرو 28 عام الخدمة كان قالي خدام مع صاحبو مابقيتش عاقلة فاش ( دارت يديها على حنكها كتفكر ) ولكن قالي راه دافع لشي خدمة كيتسنا يتقبل
حنان : ( شدات تلفون كتزومي على طوف ) ممم على مزيناتو صراحة هههه ياختي طول وتجريدة لا لا كاين كاين
هدى : ( حيدات ليها تلفون من يديها ) اسبحان الله بقات ليك شهر ونص تكركبي لعش الزوجية جمعي عينيك وأصلا مابقاتش فزين لاكان شخص مديها فصلاتو ومتبع طريق الله ويتاقاا فيا الله راه حسن ليا من شي زين !
حنان : إوا أختي زين حبو مولانا إوا دغيا دخل القلب ولا شنو غا ف 3 شهور زعما !
هدى : فحال هكاك تقريبا عندو هنا ختو مزوجة كنت هضرت معاه واحد لمرة أبيل وطلعها معانا دوينا واحد شوية وعرفني عليها وخدات نمرتي صايفتات ليا فواتساب .. قالي غايدوز عندها يشوفها ( قلبات عينيها فيها ) من بعد نتلاقاو فشي بلاصة !
حنان : امممم سيد 3 شهور وعطاك دوي مع ختو .. هي ناوي المعقول ؟
هدى : ( تنهدات ) إوا باقي معرفت من غير حاجة وحدة رتاحيت ليه وحسيتو ولد الناس ! وحتى هو نفس الحاجة قالها ليا وكيلمح ليا لزواج شحال من مرة
حنان : إوا توكلي عالله إلى فيه الخير ياربي يكتبو ليك ويلا فيه شر ياربي يبعدو عليك .. لا رجع فتح معاك الموضوع وقاليك زواج عطيه نمرة خوك وخرجي من باب واسع
هدى : نعطيه نمرة خويا ؟ صافا با !! باش يهرسني انا وياه و تريكتو ، لي مرضني فصحتي و معكزني على قضية زواج هيا ماما حبيبتي مريضة !
حنان : ( هزات حاجبها فيها ) اصاحبتي حمدي الله خوك عندو فلوس ومبرعكم مامخليكم مخصوصين من والو ! اما مك راه حاطها فوق رموش عينيها ها فرملية جايبها ليها تالدار ولبنت لي كدير ليها ترويض كتخلي كليان عندها وتسبقها هي لولة ! وخدامة كل نهار كتجي تجمع دار وقوة دوايات زبالة فلوس كيخسر كل نهار
هدى : ( شافت فيها وتنهدات ) : غا خلي داك جمل راگد تواحد ملقاها كيف بغاها أنا حاجة وحدة لاكان داك ولد ناس ناوي المعقول وعجبني داخل سوق راسو وشاد طريق الله راه غانتوكل عالله ونتزوج بيه لا كتاب ! اما إلا غير دوران فزناقي وعينيه فحاجة خرا غانقول ليه الله يعاون .. بغيت شي واحد لي نعيش معاه بيخير مهامنيش فلوس يكونو كتار نعيشو باش قسم الله مهم الهنا وراحة البال أهم حاجة عندي لا داز كولشي بيخير وكنا غانتزوجو نقوليه ينتاقل لأگادير نقرب شوية لماما ونبقا نجي نعاونها ونخدم ونتعاون معاها
حنان : ( شدات فراسها ) واش خوك غايخليك تخدمي ؟ آش ناقصك لي حليتي عليها فمك يحضرها ليك طموبيل لا قلتي ليه خاصني يجيبها ليك بلا متبقاي شادة طاكسي كل نهار او لبيرمي وراه عندك !
ناضو بجوج شدو طاكسي وصل حنان هي لولة تالباب دار ومن بعد هدى لي وقفها حدا شانطي قريب لدرب فين عايشة خلصاتو ونزلات كتمشا بشوية عليها حتى وصلات قدام باب دار ، شهوة منها فيها طروازيام إيطاج كتبان من برا كلها مقادة ومساحتها كبيرة تقريبا شي 200 ميترو ... وقفات قدام لباب حلاتو بساروت ودخلات ضربات فيها ريحة سانيكروا ودار بااااردة مقارنة ببرا لي كان لحال سخون .. طلعات فدروج تالبيت مها ملقاتهاش فيه ومشات لصالون لقاتها گالسة فوق لمضارب بزيف حياتي على راسها وبيجامة طويلة تالتحت .. نضاضر دشوف فعينيها وتسبيح فيديها ، وحداها كانت لخدامة گالسين كيتفرجو ومرة مرة تهضر معاها موناساها
ناضت مخلياهم رجعو يتفرجو متبعين مسلسل فدوزيم وهي مشات خدات دوش بالخف تحيد عليها العروگات وخرجات دارت روتينها ورا كل دوش كيف ديما مهلية فراسها بشرتها بيضة ونقية .. نشفات شعرها طويل ولبسات بيجامة بسروالها وخا كاين صهد ولكن كتحشم قدام خوها ضروري تلبس قدامو شي حاجة طويلة حتى تنافرد براسها فبيتها وديك ساع كتلبس لي بغات
گلسات حدا كوافوز كدير مرطب لشفايفها وسمعات تلفون كيصوني هزاتو كانت نمرة عليها سمية " يوسف " دوزات لخط ودارت هوت باغلوغ وحطات تلفون
يوسف : ألو هدى بيخير
هدى : ( جاوباتو بصوت هادئ ) حمد الله ونتا بيخير كيداير مع خدمة ؟
يوسف : حمد الله هاحنا غاديين كيغادة مع قرايتك ؟
هدى : ( ناضت تكات على نموسيتها ) مزيان حمد الله قربو لإمتحان كنوجد ليهم دابا
يوسف : الله يعاونك كنت گلت ليك غانجي هاد ليامات لأگادير بعد غدا غانشد طريق
هدى : أمين .. الله يوصلك على خير ياربي
يوسف : ( تنهد ) لاوصلت بغيت نشوفك !
هدى : ( دارت يديها على حنكة مبتاسمة ) إن شاء الله ياربي فاش توصل علمني
يوسف : إن شاء الله غانگولها ليك غاندوز واحد نهار عند ختي وفالعشية نتلاقاو لا بغيتي تجي عند ختي مرحبا راه كل مرة كتسولني فيك ( ضحك ) هههه دخلتي لها لخاطرها
هدى : ( دارت معنقة مخدة كضحك فصمت ) تا أنا دخلات لي لخاطري وعزات عليا سلم عليها فاش توصل وإن شاء الله لا كتاب راه نتلاقاو وجيبها معاك أحسن
يوسف : واخا إن شاء الله ويلا بغيتي عطيني نمرة خوك نهضر معاها باش تكون شي حاجة رسمية بيناتنا ويلا تفاهمنا اكتر نتوكلو على الله ونجي نخطبك
هدى : ( عضات على شفايفها بتوتر ) لا تلاقينا نهضرو فهاد الموضوع
يوسف : لي بغيتي يلاه الله يعاون تهلاي فراسك
هدى : وحتى نتا
قطعات دغيا وخدودها حمرين واخا مدة قليلة باش تعرفات عليه عاودات ليه لقليل عليها وعلى عائلتها رتاحت معاه وحساتو هو لي ناسبها تعاملو معاها مزيان ماشي شخص لي قلل عليها لحيا من أول مرة هضرات معاه وبقا عليها بزين وكبيدة وديك الهضرة الخاوية .. كانت هضرتو قليلة ومعقولة ومواضيع فاش كيهضر يا إما شي حاجة على خدمتو ويزيد يعرفها عليه ولا يسولها على أحوالها .. عرفها على ختو وكان باغيها تهضر مع مو غير هي لي رفضات وقالت ليه حتى نتلاقاو ونتعارفو وديك ساع لا كتاب تكون شي حاجة رسمية بيناتنا ويكون أول تعارف مزيان بين العائلات .. ولحاجة لي عجباتها فيه كتر مكانش كيفوت معاها مدة طويلة فمكالمة ولا يصوني ليها فنصاصة ليل هادشي لي خلاها تعجب بيه واخا باقي مطلاقات معاه
ناضت خرجات من بيتها وتوجهات لكوزينة لقات طاجين كيطيب طلات عليه مبتاسمة عجباتها ريحتو من ديما كيعجبها طياب رقية لا ماكلتها ولا خدمتها فدار كولشي متول واخا دار مشاء الله كبيرة سفلي كولشي مفرش فيه جوج صالات كباااار متولين غير لضياف صالة لولة مفرشة فراش عصري صباغة كتبري فلحيوط ومعلقين لوحات فجناب فيها آيات قرآنية ولفراش بلون زرق ورمادي تريات 3 معلقين فلحيط كلهم مجوهرين ولميدات 3 مستفين لوسط وحدا حدا ختها وصالة تانية واسعة وعريضة دايرنها على طريقة صحراوة زربية بالحمر ولكحل وبونجات نازلين عليهم طلامط ومخدات فنفس لون زربية دايرين على صالة كاملة وتاهيا تقريبا نفس زواق صالة لي قبل منها .. وطاج لولة جوج صالات ليهم تاهما مفرشين فراش على حقو وطريقو وبيت لمها او ليها او جوج طواليطات او دوش او كوزينة او طاج 3 لولد لكبير تاع دار فيها بيت واسع وعريض وكوزينة كبيرة او طواليط او دوش وصالون واحد ... وآخر حاجة كاين سطاح
_ داقت من المرقة متبننة كان طاجين كبير بالحم والبرقوق وزبييب .. طفات عليه او داتو لصالة هو ولخبو او جوج قراعي كبار دلموناضة او جابت غدا مها لي كان عبارة روز مفور مع خضرة فوقو او شوية دلحم او حطات ليها معاه كاس دعصير ليمون .. گلسو مجموعين وهزات هي تلفون شافت ساعة كانت هادي هي وقتو .. بعد دقائق كان طالع فدروج ، وقف عليهم عاقد حجبانو حيد سبرديلة من رجليه ودخل كيدوز يديه على وجهو من لعرق ديال صهد .. شاف فيهم مجموعين على طبلة ونطق : السلام عليكم
ردو عليه السلام و توجه عند مو مبتاسم باس فوق راسها : ( الحوار بشلحة ) مي لاباس ( گلس حداها مدرعها بيديه ) كي داز ترويض قادة تحركي يديك ورجليك شوية
مْبِيرِيكَة : ( بتاسمات ليه بتسامة بشوشة وطبطبات على رجليه ) بيخير اوليدي وليت نحركهم مابقاوش تقالين عليا كيف قبل
حرك ليها راسو بالإيجاب ودور وجهو عند رقية وختو لي كانت مكتشوفش فيه : ياك متقادا لها شي دوا نجيبو ليها ولا مخاصها شي حاجة ؟
رقية : لا اولدي مناقص تاحاجة كولشي كاين
ناض من بلاصتو ونطق : واخا لا خاصكم شي حاجة تصوني عليا هدى غير تغداو بصحتكم انا زربان دابا مسافر جيت غير نطل عليكم ونزيد
مْبِيرِيكَة : ( بصوت حنين كتشوف فيه ) طريقة السلامة اوليدي رد لبال لراسك وسير راني مفرشاك برضى ومغطياك بيه
نزل قبل راسها ومشا لكوزينة كيسكانيها بعينيه كيشوف شنو خاص وشنو ناقص ، حل تلاجة لقاها عامرة وشاف لفريگو تاهو مناقصو والو كولشي موجود لحم او دجاج او بيبي اولحوت شكال ونواع .. طلع لبيتو خدا دوش خفيف دغيا وبدل حوايجو بتيشورت كحل وسروال دجين وسبرديلة نايك بيضة دار مگانة فيديه و نشف شعرو بفوطة ورش ريحتو وهز جاكيط سخونة بحكم بليل كيتحرك لبرد .. خدا تلفونو ولكونطاكط دطموبيل ومشا حل مجر بساروت كان عامر فلوس حسب دغيا واحد 50 ألف ورجع سدو ونزل مع دروج لقاهم كيتغداو وشاف فختو : خاصك شي حاجة قبل منمشي ؟ ولا ناقصة شي حاجة فكوزينة
بقات كتاكل منزلة عينيها فطاجين ومها طبطبات على يديها وجاوبات بلاصتها : مخاص والو اوليدي غير سير بلا مَتْشْطَنْ علينا وفاش توصل صوني عليا
مع جوايه لعشا هكاك كانت متكية فوق ناومسية طافية ضو ديال دار كاملة مخلية غير شرجم لي كان صغير وكيدخل منو برد خفيف .. هي مكمشة فجوج كاشات مغطية كاملة راسها بوحدو لي مخرجاه ودايرة قرعة دجاڤيل على كرشها فيها ما سخوووووون كتحاول تهمد بيه لوجع لي فيها .. سادة عينيها كتنفس وجبتها كتنقط بالعرق وحنوكها حمرين ، هادي هي عادتها كل مرة كتجيها ليغيگل كتكرفص معاها خصوصا نهار لول كتبقا تلوا بالوجع ولحاجة لوحيدة لي كتلقاها قدامها هي قرعة جاڤيل كدير فيها ما سخون اما لا قرفة كاينة ولا حليب .. حتى حاجة باش ديرها تسخن وتشربها لاهم تعدي بلي كان حتى يحن الله
سمعات صوت لباب تحل عرفاتو هو .. ناضت بشوية عليها شاداها دوخة وشعرها لصق عليها بالعرق حطات قرعة جاڤيل وتمشات بخطوات بطيئة شادة فكرشها حتى خرجات من لبيت ولقاتو واقف فضلام ، شعل ضو وبانت ليه حالتها هكاك عرف مالها مشا لكوزينة عمر كاس دلما كيشرب وتبعاتو هي
بسمة : عماد عفاك جيب لي أولويز
عماد : ( حط لكاس وساط ) غانبقا مقابلك نتي كل شهر أولويز أولويز ديري شي شرويطة وهنينا !
بسمة : ( حطات راسها على لحيط عيات من نفس لكاسيطة ) راه منقدرش عندي حساسية فيما كنديرهم كنبقا غير نحك والبشرة كتلتاهب وبين فخاضي كيرجع حمر ويحرقني
عماد : ( خرج من الكوزينة ومشا البيت كيحيد الكراڤاط وتبعاتو ) نتي حسن من العيالات القدام لي كانو يديرو شراوط وينوضو ؟
بسمة : ( وجهها عابس وعاضة على شفايفها من الوجع ) كتقارن دابا بناس لقدام كون كان عندهم أولويز ديك ساع كون داروه !
عماد : ( گلس على ناموسية بسخط وكيشوف فيها مخنزر ) غاتبقاي مقابلاني دابا جاي من خدمة عيان وتزيديني نتي تقلبي ليا مخي !
بسمة : ( قربات تبكي عينيها حمرين حطات يديها على كرشها ودوات بصوت منغنغ ) مدرت ليك انا والو دابا ! بغيت غير أولويز منقدرش نزيد ندير شي شرويطة راه نبقا هكا حتى نصدقو فسبيطارات وتحط كتر من ديك 10 دارهم دأولويز
_ ناض داير راسو مكيسمعهاش هي كتهضر وهو كيبدل حوايجو لبس سروال كيطمة بالكحل او تريكو دلخيط بالبيض وتقاشر جداد بيضين أديداس او وقف كيشوف فيها هي لي كانت كتشوف فيه بعينين حمرين كتبان بحال لا طلعات ليها سخانة
بسمة : ( تنهدات ودوات بصوت ضعيف ) على الأقل جيب لي غير شي جوج بلا متجيب باكية !
عماد : سيري ابسمة تنعسي انا خارج نقدي واحد غرض ونجي بلا متعصبيني راه كنگول غارق كريديات ونتي كتزيديني بنادم
بسمة : ( شدات راسها حاسة بقلبها غايوقف بالفقصة ) بغيت غا نعرف أنا هاد كريديات فين كتصرفهم ماكلينا فحال ناس مكتصرف بيهم على دار عمرني قلت ليك جيب لي هادي كنراعي ليك ونقول مسكين معندوش
عماد : ( خرج فيها عينيه ) مسكين انا كنسعا حدا جامع الالة انا مامسكينش كريديات ديك لبوطة لي كاينة تماك ديك تلاجة وديك تلفازة نتي لي شريتيهم ( ضرب على صدرو صعر وكشاكشو خارجين ) فلوسي كنحطهم فدار ونتي مابان ليك والو بنات ناس عايشين فبراكة وحامدين الله وشاكرينو
بسمة : ( طاحو دموعها كانت على سبة لوجع قتلها مقادة حتى توقف وهو زادها ) بزاف هادشي قربت نموت راه صبرت وكنصبر ونعض فصبر شي نهار تلقاني طايحة بالأعصاب
لدقائق وهما مني منك مني منك هو لي زاد صعر عدوه لي يقول ليه مسكين ولا يقلل منو ويجبد ليه المصارف ديال دار وخاصني وجيب .. بقا يهز فيديه ويغوت عينيه خرجو فيها ولا فحال شي وحش صدرو كيطلع وينزل ورجع حمر هي رجعات لور تكمشات على لباب دطواليط خلعها ولا غير كيغوت قرب ليها وجات تنوض هاربة وجات فيها دقة بضهر ديدو لودنيها نيشان طاحت فلارض من حر دقة .. للحضة مابقات كتسمع والو فقط حاسة بيديه لي كيزعزعوها وهي مغمضة عينيها طاحو دموعها دمعة ورا ختها كتسمع فودنيها طنيييييييين .. تهز صدرها بتنخصيصة وبقات تبكي وهو كيعنق فيها
مصطفى : ودايرين مع 12 فريسطو *** باقي لوقت حتى نتا
عماد : واخا هاني جاي
قطع كيسوط معندوش فلوس باقي مدازت ليه لخلصة وريسطو خاص ليه على الأقل شي 500 درهم فجيبو عاد يرتاح ... سد لباب ومشا طل عليها لقاها كتاكل فسقاطة وساهية فسقف .. دخل حتى نتابهات ليه وشعل ضو هز حوايج لي غايلبس وداكشي لي غايخصو وخرج وهي بقات تشوفيه بستغراب
عماد : ( رجع وقف حدا لباب ) انا خارج عرض عليا واحد صاحبي داير سبوع لولدو غير نعسي انا غانتعطل شوية
حركات ليه راسها بالإيجاب بغات غاتبقا بوحدها فدار شوية تهنا من كمارتو رجعات نعسات وهو مشا بدل عليه بزربة بسروال فصالة بالكحل او قاميجة بيضة مخلي 2 صديفات لفوق محلولين مبينين سنسلة دنقرة غليضة كتبري دار مگانة فيديه فضية من Dior وهز سباط أسود جديد شراه غير مؤخرا من Chanel .. رش ريحتو وقاد شعرو بالجيل .. لقا نضرة أخيرة على نفسو فلمراية شاف سنانو واش نقيين ودوز يديه على لحيتو لخفيفة قاداها .. لي شافو بديك الحطة لي ضرب يقول سيد عندو شي ڤيلا او شي رونج حدا لباب !
هز تلفونو وشاف بسطامو لقا فيه غير 100 درهم ساط وخرج شد طاكسي وعطاه العنوان بعد دقائق وقفو قدام ريسطو لي كان من برا كيبان فخم ونواع وشكال دطموبيلات فاخرة مبلاصيين حداه .. نزل داخل كيتفقد المكان وطلع طاج تانية وشيرو لو صحابو من بعيد مجموعين فطابلة واسعة وعريضة .. توجه عندهم مبتاسم ومعنگر عاجبو راسو سلم على كل واحد فيهم وجبد كرسي وجلس حاط رجل على رجل .. كان كل واحد فديك طبلة ضارب حطة من شي ماركة فلوس غير كيتشايرو وكونطاكط دطموبيل حدا كل واحد فيهم گاع حديتهم كان على لخدمة ومشاريع يا إما شراو بقعة فشي بلاصة مطرطقة ولا بدلو طموبيل بوحدة حسن منها شي كيبان على شي .. بعد دقائق من جلستهم كل واحد طلب شنو بغا وعماد كان شاد الموني بين يديه ومطرطق عينيه فالأثمنة كيبان ليه تماك غير 300 درهم لفوق دور فعينيه كيبان ليه كل واحد لْبْلاَ ديالو ب 400 درهم لفوق .. دارها فيد الله وخدا لي بغا معاند معاهم واخا معندوش .. حطو ليهم ليسيغڤوغ طلب كل واحد فيهم وباشرو فالأكل وصوت ضحكاتهم واصل لبعيد .. كلاو وشبعو وناضو يخلصو كل واحد بدا يجبد فزرقة حدا ختها ويخلصو إلا هو لي شاف بسطامو فيه قل من 100 درهم مرگ وهو كيشوف كلشي خلص وهو بقا واقف كيحك فراسو بإحراج وصحابو واقفين كيتسناوه يخلص وسيرفور قدامو ماد له الفاتورة لي كانت فيها 350 درهم !
_ دار عند واحد من صحابو كان حداه وهو نفس مصطفى لي صونا عليه ..
مصطفى : ( ضحك بصوت مرتافع حتى نتابه ليهم كولشي وضرب على كتفو ) هانيا اصاحبي لا معندكش فلوس نخلصو عليك بالحق دوز ليك الخلصة انا لول تفكرني
جبد من بزطامو 400 درهم وحطها لسيرفور وحرك ليه راسو بمعنى خلي عندك الباقي ... فهاد لحضة عماد وجهو رجع صفر مرضاش بتحشيمة لي وقعات لي قدام كولشي وقدام صحابو لي رجعو يضحكو من تحت دف وتحرك كل واحد فيهم خدا طموبيلتو وزاد وهو شد طاكسي راجع لدار مفقوص وكيسب فخاطرو
حطو طاكسي قدام دار مد ليه 10 درهم و نزل كيسوط او ودنيه حمرين حل لباب دغيا بساروت ودخل سد لباب بجهد حتى قفزات بسمة مخلوعة هزات راسها شافت ساعة كانت 2 هكاك ورجعات حطات راسها عالمخدة دايرة فيها ناعسة وتكمشات فالكاشة مابغاتش تنوض تسولو مالك عارفاه داخل معصب وشاعل غير من ديك زدحة دلباب يشوفها فايقة غايخوي فيها سمو كامل باش يرتاح
ضرب باب لبيت برجليه حتى تزعزع وشعل ضو عليها لاوح تلفونو فوق ناموسية وحل لماريو جبد منو سروال كيطمة وقبية بالحمر لبسهم او مشا غسل شعرو من الجيل وبقا كيدور فدار ديك نص ساعة حتى برد ورجع نعس حداها جر ليها ديك الكاشة مافيه لي ينوض يجيب اوخرا وهي كانت ملوية فيها تجبدات منها كاملة وكحزات من حداه حالة عينيها وكتسب فخاطرها خلاتو حتى نعس وناضت بشوية جابت كاشة لراسها ورجعات نعسات
فاق صباح على صوت منبه تلفون ناض عاقد حجبانو محاملش كرو على صباح وماباغي يتلاقا مع تاشي حد فالخدمة .. هز تلفون وناض بزعاف مخسر سيفتو مشا غسل وجهو وسنانو وبدل حوايجو بقاميجة بالبيج او سروال فصالة بيج غامق او سمطة بالكحل او سباط كحل .. قاد شعرو او جا يرش ريحتو وطاحت من يديه
عماد : ( بنضرات غاضبة ) قلاو** صباح كي لخرا قرعة لدين مها ب 300 درهم
_نفس الكاسيطة ! ماعنديش ماعنديش ، هيا تكرهت و ملت وهو واش بغى يحشم و يعرف انه مسؤول عن زوجة و بيت
( بعد مرور أسبوع )
على صباح هزات جلابتها لبساتها ودفتر صحي فيديها .. كان عماد يلاه خرج من دار ستاغلات لفرصة وقالت نمشي لسبيطار لحومة نجيب لي خصني ورجع قبل مايجي .. سدات باب دار وراها وقادات زيف على راسها وتاجهات لدار خالتو كانت عارفاها مخداماش حيت حبسوهم واحد سيمانة على ود شي إصلاحات فلوزين .. دقات عليها لباب وطلات عليها فشرجم لايحة ليها ساروت
بسمة : غانزلي اخالتي بغيتك
زهرة : واطلعي يلاه حطينا فطور نتجمعو عليه
هزات ساروت ودخلات طلعات فدروج حتى لصالة ولقاتها هي وحدة من بناتها كيفطرو اما تانية كانت مشات تقرا
بسمة : ( سلمات عليهم وجلسات كتفطر معاهم ) جيت عندك اخالتي تمشي معايا لسبيطار لحومة نجيب لكينة الى مسالية
زهرة : ( شربات من كاس اتاي ) اويلي ابنيتي كينة د مية وستين ريال تمشي عليها تاسبيطار لحومة وتشدي نوبة فشموشات !! قوليها ليه يجيبها ليك بلا هاد لعداب
بسمة : ( كدهن خبز بشكلاط وبتاسمات بستهزاء ) أوا شغانقول ليك اخالتي الى غير أولويز ودابزنا عليها حلف مايجيبها ليا حتى كليت واحد صقلة على ودني تفكرت بيها حليب مي عاد بدا يحزر ومشا يجيبو
بنت زهرة حطات كاس اتاي من يديها وعينيها خارجين فيها بصدمة وزهرة حطات يديها على حنكها وتنهدات
زهرة : ( جبدات حنكها ) اويلي ابنيتي شغانقول ليك كون كان لعقل يتباع كون شريتو ليه وندير فيك خير .. كينة رخيصة وخا يجيب ليك 3 فشهر يحطهم راه مافيهم فلوس !
بسمة : لي قاتلني كنعيا نسولو فين كيمشيو فلوسك وهو يضل يقولي راه كنصرفهم فدار ( ضحكات بفقصة ) ودار راك شتيها اخالتي فرماجة مكدور فيها
زهرة : ( دورات راسها بحركة دائرة ) : أودي شغانقول ليك أبنتي صبر وصبرتيه هادشي بزاف ولد ختي خرج على راسو كيتعلق فين يتفلق كيتعاند مع صحاب مناصب كبار ف لبنكة مالين لحديد صحيح هما بفلوسهم وكيعرفو فين يخسروهم وهو وراهم كي لهبيل
فطرو وناضت معاها لبسات عليها ملحاف وصابو ومشاو على رجليهم بحكم مكانش بعيد عليهم بزاف دخلو دنيا كانت عامرة صوت غوات دراري صغار فجيه او لي جا على ود لانسولين فجهة خرا .. كل فئة مجموعة فقنت وستاجيرات خدمتهم تقيييلة كاين گاع لي ممسوقة گالسة وشادة تلفون لقليل منهم لي خدام بنيتو .. مشات شدات صف بحال خوتها حتى وصلات نوبتها عطاتها دفتر صحي قيدات نهار وشهر فاش خداتها وعطاتها ليها ورجعات هي وزهرة شادين جماعة فطريق حتى وصلو شدات فيها زهرة تاعيات طلع تغدا معاهم ورفضات بحكم عماد وقتو هادي وقريب غايجي لدار ..تتقول فنفسها ياربي ماتغير احوال و اول حاجة دارت دخلت شربت حبة
بسمة : وخ نعرف نسعى لكينة ومانجيبش ولد ولا بنت نعذبهم معايا
قصة زواجي التالي
محتوى القصة
قصتنا ليوم هي قصة واقعية من صلب المجتمع .. أحداتها فحومة عايشين فيها ، بطلتها وحدة فحالنا حطات أحلامها على شخص واحد وضناتو غايكون سند ليها ورفيق دربها وتخايلات حياتها معاه كيف غاتكون ..
" زواجي التالي"
بملامح حزينة و كئيبة فتحت تلاجة تتشوف فيها ، منظرها تيزيد يحسسها بجوع لي تيقطع مصرانها ، كيف كل نهار سيناريو كيتعاود معارفة مطيب لغداها ولا نقولو حالة ناشفة وتلاجة كتصفر سداتها كتأفأف ومشات نيشان لبيت نعاس تتجر فرجليها تاتشوف حوايجو مليوحين و شارجور مزال لاصق فالضو قلبت عينيها بعصبية أو تمتمت بسخط
بسمة : الله يجعلو يطرطق و يحرق الخرا كولو اولد الحراام
فتحت ماريو و حلات واحد لمجر وهزات بزطامها لي كانت فيه 20 درهم لاحت عليها جلابيتها لي رجعت معروفة بيها و الوحيدة لي عندها وكلاكيطة فرجليها وخرجات من الباب تتشوف فارجاء لحومة شعبية ناسها بساط فجهة دراري صغار كيلعبو كورة وفجهة تانية عيالات حاطين كراسة قدام بابهم وگالسين مجمعين وشادين فلغادي وجاي كيف عادتهم
معارفة رجليها فين غاديين بيها مكمشة فيديها ديك عشرين درهم كتبان مهمومة فحال الى هازة جبل فوق كتافها كتفكر فهاد دنيا وفين غادة بيها وهاد زمان وشنو عطاها ، هزات راسها لقات قدامها نيشان سويقة تنفسات ودخلات نيشان جيهة لخضرة وقفت عند الخضار
بسمة : ( بصوت مجروح ) شحال مطيشة ؟
خضار : ( ملهي تيقاد فالميزان ) مية و ستين ريال
بسمة : ( نزلت عيونها بيأس تتحسس دوك لفلوس ) هاد ماطيشة تتخلص البلاطو ؟
خضار : اوا الوقت بغات هاكا ، مادا بينا ترجع بستين ريال
بسمة : عبر ليا نص كيلو
_على قد فلوسها شرت بيض و مطيشة و قبطة نعناع رجعت ادارجها و تتنفس بصعوبة و شادها بكية فخاطرها وهيا دايزة من جنب قهوة و تتسمع عليها نكان و تتهبط راسها و تتساءل فنفسها فين هاد زين لي تيمدحوه ، فين هاد لاطاي لي تيشوفوها زيرات على لميكة وتمشات بزربة حادرة راسها حتى لقدام باب دار ودخلات كتنهد حطات لي جابت فوق لبوطاجي ومشات لبيت گلعات جلابتها وجمعات شعرها بفيلول لفوق وتمات راجعة لكوزينة زربات على داك لبيض او ماطيشة أو هزات لميدة لصالة حتى كيبان ليها گالس فوق لمضارب داير رجل على رجل كيضحك وشاد تلفون حطات لميدة وجابت طاجين لي دارت فيه لبيض او لخبز او حطات لما حداها او ناضت شعلات تلفازة لي كانت فيها لخطبة ديال جمعة ... على إثر صوت تلفازة هز فيها راسو وحنحن حاط تلفون حداه
عماد : ( شاف فتلفازة ونطق ) شنو اليوم ؟
بسمة : ( بدون نظر ليه ) الجمعة ( بحرقة ) اليوم قلت نفيق لقاك جبتي ليا خضرة طعام
عماد : ( ضرب جوج دغمات ناض ) مالو من اركان اسلام ؟ راه الخضرا غالية ، كصعة طعام طيح عليك بخمسين درهم
بسمة : شري كما تيديرو الناس ! تخليطة ولا خلي ليا المصروف انا نتكلف ! ( حابسة دمعة ) راه تقهرت
عماد : ( رجع جلس مبرد ) العشية و نجيبها ! و المصروف تيشدو الراجل
حركات ليه راسها بإيجاب او قطعات لخبز ليها و گلسو بجوج كياكلو حتى سالا وناض هاز تلفونو
عماد : هانا خارج ..
ساست يديها ونطقات بهدوء كتشوف فيه : فين خارج ؟
عماد : نسرح الغنم ! راني فالقهوة
بسمة : ( قلبت عينيها بالم ) جيب ليا معاك الويز !
عماد : باغة تقسمي معايا فلوس القهوة ؟
بسمة : منين باغيني نجسب لفلوس ؟
سمح فيها ! مشا بدل حوايجو بلبسة أنيقة كيف عادتو ديما مهلي فراسو ... تقابل مع لمراية كيقاد فتيشورت وطلع شعرو بيديه او رش ريحتو .. هز مگانتو او خاتم لبسهم فيديه اليمنى او ليسرى فيها خاتم زواجو ، أو تم خارج ساد من وراه لباب مخليها هي ناضت كتجمع دار بحكم معندها ميدار أو قنطات شعلات راديو او طلاقات نيشان مع شعبي گلعات بيجامة د 30 درهم لي كانت لابسة او بقات بشورط او ديباردو أو بدات تخمل دار مسالات حتى رجعات كولها كتقطر بالعرق او كتنهج خلات دار كتشعل بنقاوة او ريحة سانِكْرْوَة عاطية فدار ... مشاات لكوزينة دارت جوج گدرات كبار ديال لما يسخنو او حطات بيجامة سخونة كتلبسها كل مرة منين كدوش ... دخلات دوك جوج گداري لطواليط باش يسخن او مشات تشوف شبكة تاع دوش شنو فيها لقات شوية صابون لبلدي تأفأفات أو حطات شبكة مشات لماريو فين حاط حوايجو أو هزات ليه قرعة شابان او باندوش بقات كتشوف فماريو تاعو مكرهاتش تهز كتر ولكن خافت لا يقشعها او كتافات بشابان او باندوش حتى رجعات حطات باندوش خافت لا يعطي ريحة أو مشات دوشات بالخف او جمعات طواليط او لبسات حوايجها ونشفات شعرها بفوطة دغيا او جمعاتو بزيف حياتي ....
بسمة : تفووو جوووع و قلة شي الله يعطيني غير موتة نتهنى من هاد زواج القهرة
مع جوايه العشا دخل لدار كيماصي عنقو بيديه بملامح جامدة !! دخل لكوزينة حط تقدية لي جاب او مشا لبيت نعاس لقاها گالسة تتطوي لحوايج
عماد : قهرتينا بهاد برودوي باش تتسيقي
شافت فيه مبتاسمة بعياء : قول غير السلام
عماد : تكعدي نصبي داك طعام
_حفظاتو و فاهماه ! ولو ست شهور مرت على زواجهم الا تتعرف حالة هو مقلق ، وكتحاول تفادى صداع بيناتهم ! حطات لحوايج بين يديها وناضت لكوزينة
عماد : ( شاف فيها مخنزر وغوت بجهد ) وتحركي أبنادم راه فيا جوع
قفزات من حدة صوتو ودخلات دغيا جبدات حداها لخضرة وبدات تنقيها بلا عقل ويديها كيترعدو ليها حتى ضربات صبعها بالموس وغوتات شادة فصبعها كتبكي .. دارت لقاتو وراها متكي على كادر دلباب صدرو كيطلع وينزل تقيصو يطرطق عليها .. خوات على صبعها لما دغيا وكملات تقطاع لخضرة وهو كينگ وراها
عماد : ياودي ياودي باقي كتعلمي متعرفي تشقاي كيف لعيالات متعرفي طيبي لاش جايبك أنا لاش ؟ تاكلي وتشربي ومايگر فيك لخير
زيرات على لموس وصبعها تاني كيسيل بدم لاحت لخضرة فلكسكاس وهزات سميدة دطعام من الگصعية دارت تخويها فلكسكاس ولقات فيه لخضرة تنفسات وحطات لخضرة فلگدرة او سميدة فلكسكاس .. دارت بشوية شافت موراها وملقاتوش وتنهدات ، جابت شرويطة لواتها على صبعها ...
ماكملات داك طعام حتى قربات تموت رادة لبال مع لملحة لا تزيد ولا تنقصها او مع زيت لا تكترها ولا تنسا شي حاجة عارفاه دابا غير على سبة واخا تكون لماكلة مقادة غايعيبها محساك تكون بصح ناقصاها شي حاجة غاينوض يفوت فيها شي دقة !
ماحطات داك طعام حتى جوايه 11 أونص ... مشات بخطوات بطيئة لبيت نعاس لقاتو متكي بتيشورت وشورط هز فيها عينيه ونطقات
بسمة :( بصوت منخفض ) طعام طاب نوض تاكل
عماد : ( ناض عاقد حواجبو ) غاناكلو مالو جايبو ليا باك من جيبو
شافت فيه دمعة قريب طيحها ومشات لصالة گلسات قدام ليمدة ونطقات فنفسها : الله يرحمو
حطات قدامو زلافة ومعلقة وخوات ليه لبن فكاس كيف كيبغي وبدات كتاكل غا بزز هي لي كانت مشهية طعام وشحال هادي مداقتو هاهي دابا طالبة غا سلاك ومكرهاتش تمشي تنعس بجوع غير دوز ليلة على خير !
بدات يقلب بمعلقة طعام فلقصرية ونطق مخنزر فيها : مال هاد طعام ناشف تگعدي جيبي لبلول
ناضت جابت ليه لگدرة وهزات لمغرفة خوات ليه قدامو شوية حتى ضرب ليها يديها وجات معلقة على زربية نيشان مخليا ليها طبعة قداش
عماد : كديريها بالعاني قلنا ليك خوي شوية وخاوية لگدرة كاملة طعام هدا ولا صوبة ؟
گلب ديك لگصعية دطعام وحط جيهتو فاش كان كياكل ليها بقات هي غير كتشوف فيه وساكتة .. يلاه قالت راه سكت حتى خسر سيفتو فيها ونطق : نوضي تگعدي حيدي عليا هاد لگدرة ريحتها كتعيف دگولي غير غاملة شي سيمانة ...
بسمة : ماغاملاش خالتك لي عطاتها ليا وراه مولف نطيب فيها
عماد : اوا الله يخلف على خالتي ! ( بعدم اعجاب تيسوط ) تفووو على عيشة برا تمارة ، للداخل تمارة ماعرفت فين رد راس
تنهدات من كلامو وناضت حطاتها فلكوزينة و بدات تجمع و تنقي و فداخلها صوت تيقول
_اش مجلسك ابسمة ؟ خليتي فداركم المحنة لقيتي فزواج اكثر منها
صبح صباح ، وفاقت على إثر صوت رنة هاتفو .. ناضت حتى هيا غسلات وجهها وجمعات شعرها وبقات واقفة فلكوزينة كتشوف آش تحط لهاد لفطور .. وهو مشا غسل وجهو وسنانو وشاف لحيتو فلمرايا كانت مخربقة شوية وقال فخاطرو حتى يدوز عند لحلاق فلعشية ويقادها .. ساس يدو من لما وتوجه لبيت جبد من لماريو سروال توب زرق او شوميز فنفس لون أو كغافاط بالكحل ... لبس حوايجو وهز تقاشر جداد لبسهم مع صباط بالكحل .. مشط شعرو وقادو بالجيل ورش ريحتو وهز مگانة لي توالمو مع لبسة وتوجه لكوزينة على أساس يفطر ، حتى لقاها شادة حنكها او ساهية فلحيط او حداها قرعة زيت لعود بقات فيها جغمة ! عرف مكاين مايتحط وخرج مخليها ضبر راسها بعد مانطق كيف عادتو :
هاني خارج
سمعات لباب تسد ونطقات مغددة :
مشية بلا رجعة رجلة الكذوب
رجعات تنعس مفقوصة حيت عارفاه مغاديش يرجع وضارها راسها من لأحداث لي طراو لبارح ومن العذاب لي عايشة كل نهار جوع فكرشها وشنو غاتاكل مكاينش !
_فاقت على صوت آذان ضهر ناضت توضات وصلات ومشات لكوزينة كتقلب حتى لقات طعام لي شاط لبارح سخناتو فوق بوطة صغيرة وكضحك بفقصة
بسمة : زوافرية ومدايرين بحالي يا حسرة براجلي ( هزات داكشي لي شاط حيدات منو لخضرة وقعدات فلكوزينة كتاكل تسد جوعها ) لاهم هادشي ولا والو !
غسلات فاش كلات و سمعات دقان فلباب حلاتو بشوية كطل بنص عين حتى بانت ليها خالة راجلها وبتاسماات وهي حالة لباب مخلياها دخل ...
بسمة : ( ضحكات بخفوت وهي كتشوف فيديها قفيفة .. و سلمات عليها بالوجه ) مرحبا بخالتي زهرة
زهرة : ( شادة فراسها كتنهد ) ترحب بيك جنة ابنتي .. أحح أميمتي راسي وشمس برا كتحرق .. هاد أگادير متفهمي فيها والو لبارح لجو فحال ديال شتا وصباح تبارك الله شمس طالعة ولحال سخون
تبسمات ليها بسمة واخدة قفيفة من يديها وحلات شراجم دار باش تنفس ودخلات تابعاها لصالة
بسمة : أگادير هي هادي أخالتي كل مرة الجو كيتقلب ( گلساات حداها ) كيف دايرة نتي ولبنات وخالي محمد ياك لاباس عليهم
زهرة : بيخير أبنتي يسول فيك الخير ( حيدات لملحاف من على راسها لي لاوية عليه زيف حياتي وبدات تْنَشْ على راسها بيه ) إوا أبنتي كيدايرة نتي ( شافت بتسامتها تلغات ونطقات من حالتها ) ياكما ضربك ثاني ولا دابزتو ؟
بسمة : ( بنبرة خافتة ) اوا دعي اخالتي الله يهدي سرنا وصافي
دورات راسها بشكل دائري كتشوف فيها بمعنى عارفة لي كاين وحطات يديها على فخضها كطبط عليها
زهرة : راه جبت ليك شي حاجة خفيفة فتقضية وصلات سلعة ليوم وگلت ندوز ليك معايا شوية
( كتوصلهم كل شهر سلعة من بوجدور فيها قوالب سكر او باكيات دفرماج او بيدو دزيت لعود او لوسيور او خناشي صغار دروز او لعدس او لوبية او خنشة ديال دگيگ د 50 كيلو .... او كل عيد كبير حاولي كيوصلهم تالدار وهادشي كيجي من راسيون ناس لي عندهم وبتحديد ناس لجنوب فقط )
بسمة : ( بتاسمات ليها بفرحة وناضت باست راسها ) الله يسهل عليك ياربي ويعطيك شي حجة اخالتي
زهرة : آمين أبنتي آمين .. ( تنهدات وشافت فيها ) كي غادة مع راجلك ابنتي ؟ تيقضي شوية !
بسمة : اوا البركة ماتخطاش مامات احد من جوع هاد الوقت
زهرة : اياااه ابنتي ! جوع و قلة شي و الفقصة تقتل ابنتي تقتل
شافت فيها بسمة كتحاول تخفي الحزن فداخلها وكتافات ببسمة باردة وجاوباتها وعينيها فالأرض
: غير مرة مرة كيجي معصب من الخدمة ..
شدات ليها زهرة فيديها ونطقات وهي كتشوف فيها بأسف
: ولد ختي عماد أبنتي خرجو عليه لي هو ماشي من سهمهم راه غاااارق كريديات ( هزات فيها عينيها وكملات هضرتها ) البرطمة أبنيتي لي رَوْحَك ليها هي هادي ؟ اختي غير دريويشة وهو لي قالت ربي سهل عليه ويهز راسو ساعة تيتعلق فين يتفلق !
_ شافت فيها وسهات كتسترجع الأحداث العرس ودخوها لبرطمة اولى
ᘳ فلاش باك ᘰ
_كانت عروس مثل الوردة متفتحة ! الموسيقى على انغام ماسخينا الالة ماسخينا بجمعية و الحضور واقفين للوداعها وكل بنت تاشوف راسها فيها ، اخير بسمة ليتيمة لي مرات اباها مدوزة عليها العذاب تزوجت بشاب خدام فالبانكة و جاها راسو ماتصحابت معاه مع خيط بيها دروبة ، كانت بلاغوب بيضة و لافوال مليوح عليها يديداتها محنين و خاتم زواج مزينهم هازة جلايلها و اليد اخرى شادها بيها زوجها مروحها و مرات باها تتزغرت وراها حتى وقفو للوداع
مرات باها : ( شادة يديه تتهزز فيهم بتوصية ) تهلا فيها أولدي راني جيت لقيتها صغيرة وربيتها وعلى وجه لمرحوم أولدي لاما تهلا فيها وديرها فعينيك راها يتيمة
عماد : ( ضحك ليها فرحان كيشوف فبسمة تتبكي وحط يدو على صدرو ونطق ) ماااتوصينيش أخالتي غانديرها فوق راسي ميخصها معايا خير لي بغاتها تحضر ! ( شاف فبسمة لي كانت أجمل عروسة خارجة من دار باها شعر عسلي رطب مليوح على كتافها ضاربة فيه شمس كيبان ذهبي أو لوجه بلارة لحنيكات حمرين او دايرة مكياج خفيف بالكاد كيبان ومع ذلك كتبان زوينة وطبيعية ) باسها فوق راسها او قبل ميغادرو عنقات بسمة مرات باها ونطقات كتشوف فيها
: سمحي ليا إلى شي نهار عدبتك معايا ( تغرغرو عينيها بدموع ) سميحيليا
عنقاتها مرات باها تتنزل دموع بسيف قدام الناس
: راك غادة دابا عند راجلك هو لي يدوم ليك تهلاي فيه ( قربات ليها ونطقات بشوية ) شدي فيه ومتخصريش ليه لخاطر راه هو لي عندك دابا ..
حركات ليها بسمة راسها بالإيجاب أو ودعاتها ، او مشاات مع راجلها ركبو فطموبيل مع مو أو باقي لعائلة مقسمين فجوج بيجُوَات أو منوضين لحيحة فطريق بطعارج أو طارات ...
وقفات طموبيل قدام عمارة نزلو لعرسان او لعائلة وراهم .. خدا لعريس باليزتها او لورد فيديه او موراهم لعائلة طالعين معاهم فدروج حتى لقدام لبرطمة حل لباب بساروت ودخلو مجموعين حاطين لها دهاز لي جابو أهل لعريس وغادروا بعد ماودعوهم ودعاو معاهم ... بقاو بوحدهم ومشا لبيت حط فيها باليزتها وبقات هي كتشوف فأثات دار لي عجباتها واخا ماشي شي برطمة نيت وإنما على قد الحال فيها جوج بيوت وصالون وكوزينة وطواليط .. ولكن فنة بسيطة وسكنة فيها زوينة .. تبعاتو لبيت بخطوات بطيئة حشمانة وكتحك فصباعها .. لقاتو مبدل حوايجو أو بقا غير بشورط أو لفوق عريان ، غير شافها ناض عندها ضاحك وجرها لعندو وقرصها فحنكها لي رجع حمر
عماد : ( ساهي فيها وفعينيها لي عجبوه ) بدلي عليك هاد لاغووب وأجي غانتسناك
حركات ليه راسها بالإيجاب وجرات باليزتها خارجة من لبيت حتى لصالة وبقات معافرة مع لاغوب حتى نزلات سنسلة لي كانت لور وگلعاتها بقات فقط بسوتيامات او شورط قصير .. حلات باليزتها كتشوف فالحوايج لي كان جاب ليها وبيجامات وكريمات وعطور حارت معرفات شنو تهز فالأخير ختارت بيجامة على شكل تيشورت وشورط قصير ورشات شوية ريحة عليها وبقات كتشوف فدوك لكريمات معرفاتش كل حاجة ديال آش تلفات بيناتهم وهزات صابونة تاع وجهها وسدات لباليزة وتوجهات لطواليط غسلات وجهها من مكياج لي كانت دايرة ومشطات شعرها مخلياه مطلوق .. شافت راسها فلمراية حشمانة وخا مدايرة والو لوجهها ولكن متحتاجش تنفسات وتمشات بخطوات مترددة لبيت وهي كتشوف فشورط لي لابسة قصير وحشمات كونها أول مرة غاتعري رجليها قدام شي راجل .. دخلات لبيت كتشوف فيه مجبد فوق ناموسية كيمشط شعرو بيديه غير حس بيها دخلات دور وجهو شاف فيها ميكدبش انو كان كيتسناها بشي سوميج دونوي ولكن قال مع راسو أيام الله طويلة إلى ماشي ليوم غدا ! ناض عندها جارها بيديه تا لناموسية وگلس حداها
عماد : ( شاف فيها منزلة عينيها فالأرض ويديها كيترعدو عرفها خافت .. ضحك كيحاول يلطف الجو ويخليها تطلق معاه ) هانتي وليتي ليا دابا ( تنهد بحرارة ) الحلال زين
هزات عينيها فيه وبتاسمات إبتسامة خفيفة وجرها عندو مدرعها بواحد اليد : تي هضري مالك سقلتي امم ( ضرب ليها نيفها بصبعو ) خايفة تالهاد درجة مالي غاناكلك ..
حركات ليه راسها بلا كضحك
عماد : ولكن راه بصح غاناكلك
جرها من عنقها لعندو منغامس معاها فقبلة كيتلدد بمداق شفايفها وهي سادة عينيها بتوتر مخلياه يدير مابغا ..
سالات ليلة بيناتهم وهي فحضنو ناعسة على دراعو وشادة فليزار كتزير عليه مرة مرة فاش كتحس بألم تحتها بسبب الدخلة ولي مرت بسلام و بسهولة وبعد دقائق نعسات فحالو ..
صبح صباح فاقت كتحك فعينيها وشافت جنبها ملقاتوش حيدات ليزار عليها وناضت بشوية حتى هزات حوايج لي كانت لابسة لبارح لبساتهم يلاه كانت ناوية تخرج حتى شافتو داخل هاز بلاطو فيديه فيه لفطور ضاحك ونطق
: نعاسة صباح الخير الالة لعروسة
بتاسمات ورجعات بلاصتها حتى حط ليها فطور قدامها وگلس حداها
بسمة : صباح نور ( شافت فلفطور وهزات عينيها فيه بعتاب ) عدبتي راسك كنتي تفيقني أنا نوجد لفطور
عماد : عدابك راحة هانيا مرة نطيب ليك أنا ومرة نتي ( هز كاس عصير كيدوز بيه ) كي بقيتي شوية ؟
بسمة : ( نزلات عينيه كدهن خبزها بشكلاط مقدراتش تشوف فيه ) حمد الله ! مزيان شوية لحريق
عماد : احح على الحريق ( بنظرة ماكرة رمى نظرة لحجرها ) منزلاتش منك الدم ؟
بسمة : مزال ماتوضيت
عماد : ( قرب لفمها قبلها ) طيبي ليا الغدا من يديداتك ؟
بسمة : نطيبو ليك ههه ! كاينة تقضية ؟
عماد : انا نمشي لمرجان نجيب ليك تقضية
بسمة : بصح مرجان قريب هنا ؟ نمشي معاك ؟
عماد : انا لالة نخرج نتسخر ليك نتي ارتاحي ليا ( دوز يدو على حنكها ) مرجان كي والو مزال ندي لبلايص عمرك حلمتي بيهم
بسمة : لهلا يخطيك !
ᘳ نهاية فلاش باك ᘰ
خرجات من سهوتها على إثر صوت زهرة
زهرة : إوا صبر أبنتي معندك مديري نتوما باقي عرسان جداد دابا ربي يسهل ويدير شي تاويل دلخير
حركات ليها بسمة راسها بالإيجاب معندها متقول ليها أو ودعاتها زهرة كدعي معاها وخرجات سدات وراها لباب مشات نيشان لديك لقفيفة كتشوف شنو فيها لقات إيترو دزيت لعود او لوسيور او باكية دلفرماج او شوية من لعدس او لوبية او روز أو خنيشة صغيورة عمراتها ليها بدقيق او باكية دلخميرة او شوية دلخضيرة تعدي بيهم يوماين هكاك وميكة فيها جوج تفاحات او ليومانات او بنان .. ضحكات فرحانة عارفة لخضرة او ديسير زادتهم من عندها عارفاها معندها والو فدار او تفكراتها بشوية .. ستفات داكشي فلكوزينة كدعي معاها وهزات داك ديسير غسلاتو أو كلاتو كتبنن وهي كدعي معاها فخاطرها ، مرت ساعات
وصلات وقتو فاش كيجي من دار أو دخل كيقلب عليها بعينيه ولقاها گالسة قدام تلفازة كتفرج .. هزات فيه عينيها لقاتو داخل خاوي فيديه كيف عادتو تمنات شي نهار تلقاه مدخل عليها غير شوية ديال تقدية أو والو .. خلاها ومشا لكوزينة يشرب حتى كيشوف فوق بوطاجير قرعة دزيت لعود او باكية دلفرماج .. من نوع دلفرماج عرفو انو سلعة دبوجدور هاديك حيت مكيتباعش فالحانوت بحالو مشا لمجر دلميكة لي حدا تلاجة حلو ولقا لوبية ولعدس .. تما تأكد ومشا نيشان لصالة واقف متكي على لباب
عماد : ( مخنزر )منين جا داكشي لي فلكوزينة ؟
بسمة : ( شافت فيه ونطقات بملل ) خالتك الله يكثر خيرها
عماد : اهاااا !! الله يخلف عليها ودبا أرا متاكلي مع راسك
دار غادي لبيت يبدل حوايجو ومخليها موراه كتشوف فيه بنضرات غاضبة وكتسب فخاطرها .. بدل عليه بشورط وتيشورت ديالو أديداس ومشا عندها گلس قريب لها كيشوف فيها من رجليها حتى لوجهها
عماد : ( دوز يديه على لحيتو ) مجاكش صهد ؟
بسمة : ( دارت كتشوف فيه باستغراب ) شوية وصافي
عماد :( طلعها وهبطها ) نوضي بدلي عليك بشي حاجة خفيفة من لبارح ونتي لابسة هاد بيجامة
بسمة : ( عاد فهمات شنو باغي ) فينهم هاد بيجامات باش غانبدل مابقاوش عندي لحوايج
عماد : ( ضحك كيشوف فيها ) تزوجنا بيك غالبارح ولحوايج مابقاوش عندك كي درتي ليها
شافت فيه بشوفة ذات معنى وبقات ساكتة
_بعض الاحيان سكوت زوجة تيأدي للتراكم، تيخلي الزوج يزيد يطغى و بعض الاحيان تيكون السكوت حكمة او تجنب للمشاكل لانه يزيد طين بلة
بسمة : فوقاش تجيب ليا الحوايج اعماد ! راه تقهرت
عماد : ( غمض عينيه بعصبية ) راه داك ولد قح*بة مول الدار شدهم ليا
بسمة : بغيت نعرف غير علاش باليزتي أنا بضبط ؟ علاش ميشدش شي حاجة خرا !
عماد : ( شاف فيها بملل ) فاش كنت كنزل لفراش لتحت خليت باليزتك ورا لباب باش رجع ليها نزلها فاش طلعت لقيت مول دار دخل كيبدل فقفل ديال دار ومخلانيش رجع ندخل لي بقا فدار راه مخديتوش
بسمة : ( دارت عندو وشافت فيه باترجي ) كن عطتيه رزقو كن ماشدش لينا لحوايج و دوش و البوطة و ثلاجة.. راه من حقو يبدل لقفل ويجري علينا ، خلصو وجيب ليا حوايجي ويلا بقات شي حاجة فدار جيبها
عماد : ( هز يديه حطها فوق راسو ) انا معندي منعطيه مزير هاد ساعة وعاد كيتسالني غير شهر واحد ودار لينا هاد حالة كاملة
بسمة : ( شدات ليه فيديه وزيرات عليهم ) عماد أنا راني مراتك علاش تخبي عليا ؟ ناكلو غير خبز ولما ونعيشو بيخير حسن من هاد لحالة هادي واش عاجبك هادشي لي راه فيه حنا دابا ؟ معدنا دوش كي ناس تلاجة تخدم صباح تسكت عشية .. عماد ! ( سكتات بضع ثواني وكملات هضرتها ) قالت ليا خالتك راك غارق كريديات و تتعطي شيك و كولشي تيتسال
عماد : ( نطر يدو من يديها بزعاف ورفع صوتو ) هاد خالتي أنا شكتعرف ؟ شكتعرف آش دخلها فيا ولا فخدمتي لا كانت غاتجيب ليا غير صداع ولمشاكيل بلاش منها متبقايش تحلي ليها آش غاتجيب ليا بسلامة شوية لوبية ولعدس ( خرج فيها عينيه ) كنسعا أنا حدا جامع ؟
بسمة: ( تهزت بتخصيصة الفقصة ) الكريدي راه حرام و تيقول المثل المكسي بديال للناس عريان ، انا مستعدة نصبر معاك و نعض فالصبر ولكن بركة من لكريدي ، شوف فين كنا ساكنين فين رجعنا؟ فين فراشنا ؟ فين بيت نعاسي ؟ تاتقولي مول دار شدهم و الناس قالو بعتيهم
عماد : ( نفس مابقاتش تطلع ليه وقف خارج ) ندير لي بغيت ماعجبك حال راه الباب تتعرفيه و تمارة مرات باك تاتسناك
_خلا دموعها نازلين و الغصة فقلبها ! زواج القهرة و الحبس ، لا خروج لا دخول و جوع و شنعة متزوجة تاخد فبانكة ، فراشها تباع و حوايجها مشاو ..مسحت دموعها و رجعت بيها ذاكرة تتفكر اول نهار للبداية مشاكل
ᘳ فلاش باك ᘰ
بعد مرور 3 أشهر على زواجهم فالبرطمة .. گالسة كتصلي حتى سمعات دقان بجهد فلباب قفزات من بلاصتها وغمضات عينيها حتى كملات صلاتها وناضت بجرا باقي بعباية باش كتصلي أو وقفات حدا لباب
بسمة : ( بصوت مرتجف ) شكون ؟
لي كان كيدق ضرب لباب برجليه قريب يفرعو وضرب لباب بيديه كيغوت : حلو لباب أنا مول لدار !!!
_حلات لباب بشوية و لخوف طاغي عليها شافت فمول الدار لي كان كينهج وصدرو كيطلع وينزل بالأعصاب أو وجهو حمر
مول الدار : ( كيشوف بعينيه داخل دافع الباب بقوة الدار ) كلمي ليا داك راجلك دابا قولي ليه يخرج عندي...
بسمة : ( نطقات بصوت خفيف ) والله أسيدي ماكاين و حشومة عليك مهجم عليا
مول دار : إلى كاين غير قولي ليه يخرج راه والله مغانتحرك ليه من هنا ! ( طلعها و هبطها ) هو ماحشوماش عليه معطل عليا فالكرا و انا محتاج فلوسي ؟
بسمة : والله أسيدي مكاين راني بوحدي فدار و غير يرجع نقولها ايه
_ عاود طلعها ونزلها وعرفها مقلوبة عليها القفة ومافراسها ميتعاود و نزل نبرة صوتو بعد عليها خارج للباب
: سمعي نقوليك أبنتي ! أنا نهار كريت ليه الدار راه على وجه واحد السيد كان بيناتنا شكرو ليا وبقا عليا حتى كْريت ليه ساعة مصدق لا هو لا داك سيد .. هدا شهر الثالت وباقي مخلص ليا لخير لي يدير فيا يهز حوايجو ويزيد ( خنزر فيها ) ولا الى مكيفهمش الهضرة راه بيناتنا المخزن و عندي حتى لي يركعووو راه غالك فيا و بزاااف
_شافت فيه بإحراج هو كيغوت أو لي ساكنين فلعمارة كيطلو من البيبان يعرفو شواقع
بسمة : صافي أسيدي غايجي غانقولها ليه
_زاد نازل فدروج و نطق بصوت مرتافع معصب : قوليها ليه ولا متقوليهاش أنا نابَتْ هنايا
_نزل من العمارة او بقا واقف حدا الباب كيتسناه وهي دخلات سدات عليها الباب شادة فقلبها من الخلعة أو وجهها حمر مشات نيشان لشرجم كطل وامتا يبان ليها جاي حتى من تلفون معندهاش باقي مشراه ليها .. مدازش وقت طويل حتى بان ليها جاي أو وقف حدا باب العمارة خرجات راسها من شرجم كتحاول تشوف شنو واقع واخا مكيبانش ليها مزيان وشافت مول دار وقف عليه تسالمو فلول مسمعاتش الحوار لي دار بيناتهم حتى بدا صوتهم بجوج كيرتافع أو تشانقو جيران لي فلعمارة كيطلو ولي كان دايز وقف كيشوف
مول دار : 3 شهور ونا كاري ليك ونتا كل شهر تهرب من الخلاص حط ليا أسيدي فلوسي ولا بيناتنا المخزن
عماد : ( شاف ناس حداه مرضاش دفعو وغوت فوجهو ) جمع يديك و فلوسك دبا توصلك ! و المخزن راه فصفي مامنحقكش تخرجني من داري
مول دار : اوا لي ماعندو سيدو عندو لالة و بربي تاتخرج اليوم قبل غدااااا
_سدات شرجم وگلسات فالأرض شادة راسها معارفة مادير حتى سمعات دقان فلباب بجهد ناضت دغيا ودموع فعينيها حلات لباب ودخل كي رعدة تبعاتو كتشوفو مزير على يديه حتى عروقو برزو وقاميجتو حالتها تقطعات ليه من جهة او فعنقو آثار ضفار ودم نازل مع عنقو
عماد : ( ردخ سوارت ) علاااش تحلي الباب ؟ مال دلمك تتاكلي كارطووون ؟
بسمة : ( تراجعات للوراء بخوف ) قالي مول دار ..
_حيد ديك القاميجة بجهالة او دخل لصالون بصباطو
گالس
: بغا يخرجني من لاباخطمون ويبيعها وقاليك ألالة كيتسالني 3 شهور ديال الكرا ! كيتسالني غير ديال هاد شهر وكنت ناوي نخلصو ليوم .. ماشي من حقو يجي يهجم على دار والله تانمشي ندعيه ونصايفتو فين يتربا
_گلسات حداه كدوز على ضهرو باش يتهدن متيقة أي كلمة نطقها !
بسمة : قالي مامخلصوش فمرة وجا دار شوهة هنا
عماد : مخلصو و هادي داري ماخارجش ...
_دازو أيام ورا صداع لي ناض ، ومول دار مارجعش بان و عماد كما العادة خدمة لخروج و هيا غير دار ، فصباح كانت يلاه فايقة من نعاس وسمعات صوت دقان فدار بجهد فالول ترددت تفتح لكن حست بالباب غايتهرس من قوة دقان ... حلات لباب ولقاتو مول دار أو واحد جارة حداها يلاه نازلة من دروج شافتهم وهي تجي عند مول دار نيشان قبل ماتهضر بسمة
جارة : ( شافت فبسمة بشفقة وهضرات مع مول العمارة ) شوف اخويا هاد المرة الله يعمرها دار من نهار جات مسمعنا منها شي حاجة دلعيب لابغيتي راجلها سير قلب عليه راك عارف فين خدام
مول العمارة : ( شاف فجارة ) ألالة راه مشيت عندو تالخدمة وملقيتوش وجيت عندو دابا ( شاف فساعتو ) هاد الوقت فاش كيمشي لخدمة قلت نتلاقا معاه نيشان عاد خارج من البرطمة ساعة غانكونو تخالفنا
بسمة : و الله اسيدي ماكاين
مول الدار: نتبعو لكذاب حتى الباب دار..
_نزل مع الدروج وخلاها هي مع الجارة حانية راسها كتشوف فالأرض حتى نطقات الجارة : خلصو السيد أختي ! راه ماكرا دارو الا محتاج ، راني ساكنة هنا ربع سنين حتى هو الله يعمرها دار
بسمة : أختي راه راجلي كيخلصو راه هو لي بغا يخرجنا ويبيع البرطمة
الجارة : لا أختي هادشي مكاينش العمارة معروفة للكرا و الملك داخل فيه الورثة مستحيل تباع بين ليلة و نهار! وسيد عمر وقع ليه شي مشكل مع شي واحد حتى لراجلك كيكري لناس هو تخلصيه فلوقت ميخصك معاه خير والله يعمرها دار تعطلي عليه حتى شهراين يدير معاك المزيان ويصبر عليك ( سكتات شوية كتشوف فيها ) إوا اختي هادشي دلبيع مكاينش مامنو والو !
بسمة تبلوكات ملقات متقول ليها كتافات أنو تشكرها وتسد وراها لباب .. تمشات بخطوات بطيئة لصالون رجليها مهازينهاش كتفكر واش سيد لي دارت فيه ثيقة وتزوجو يلاه هادي 3 شهور يطلع كداب وكل كلمة قالها ليها ما منها والو ! شغاتسنا منو من هنا لقدام وهما عاد باديين مدارو لا ولاد لا والو وباديينها مشاكل وصداعات ولكدوب ملقات مدير من غير طيح لارض وتبكي ربي لي خلقها كتكبي وتقول مابكيت حتى رجعات تشهق وصدرها تزير عليها ... سمعت حسو داخل للدار هزات راسها لقاتو واقف عليها أو وجهو طافي
عماد: ( لاسلام لا كلام ) اري داك خاتم ديال زواج بغيتو
بسمة: ( قلبها مشى و جا زيرات على صباعها بصدمة ) اويلي ! خاتمي اعماد دزواج آش بغيتيه
عماد : ( تنهد كيدوز يديه على شعرو جاب كرسي وگلس قدامها ) بسمة راني مزير معندي دابا والو ولخلصة مدخلاتليش وهو مزيرني على خلاص دهاد شهر
بسمة : ( شدات راسها ودموع غاديين على وجهها ) اعماد راك مخلصتيهش 3 شهور ( شدات على قلبها بحرقة ) عفاك لا ملقا شي حل يلاه قلنا بسم لله وبدينا فمشاكل
عماد : ( ناض من على لكرسي وضرب برجليه بجهد صاعر وهي قدامو تهزات بالخلعة كتقفقف قدامو ) شكون قاليك هاد الهضرة ؟ أدوي ( شافت فيه مخلوعة تقوليه الجارة غايصدق داير ليها شوهة معاها ويفوت فيها شي دقة هي ) كتيقي فالحمار دلخلا كتر مني أنا ؟ واش هو لي مزوج بيك ؟
بسمة : ( شافت فيه بخوف وشدات فخاتم فصبعها ) خاتمي لا حتى لخاتم لا يلاه 3 شهور هادي باش تزوجنا وتقولي عطيه ليا
_ وقف كيشوف فيها وناضت تبعاتو لكوزينة بقات كتشوف فيه وهو كيصكاني دار بعينيه باش غايسبق واش يهز تلاجة هي لولة وتلفازة وينزلهم ولا يسبق لفراش .. دوز يديه على لحيتو كيخمم عارف راسو خسرها مع مول دار وخاص يهز حوايجو ويخوي فأقرب وقت
بسمة : عماد الله يرحم ليك الواليدين دير شي حاجة دار زوينة ملقاوش حسن منها خلصو وغايخلينا فيها علاش ميجري على جيران تاهما
دار عندها بجهالة ومع كانت غا وراه رجعات بلور كتشوف فيه سارطة ريقها ومزيرة على يديها
عماد : منين جبتي لدين موك هاد الهدرة ( خرج فيها عينيه حتى خلعها كان كيبان ليها فحال شي وحش هايج تقرب ليه يلصقها مع الحيط هو كيدوي ودفالو وصل تا لعندها ) وخا على هاد لحساب نخرج نقفل عليك ندخل ونقفل تاني لباب إلى خرجتي راني شماتة
صونا ليه تلفون فجيبو وجبدو وجاوب بعيد عليها حدو نطق جوج كلمات ( صافي واخا هاني نازل نطلاقاو ف***) قطع وتوجه عندها .. شد ليها يديها بغا ينصل ليها لخاتم وجبداتها بجهد كتبكي
بسمة : ( عينيها تنفخو بالبكا وحالتها حالة كلها كترعد ) لا أعماد الله يرحم ليك الواليدين ( طاحت لارض حدا رجليه ) عفاك لخاتم لا يلاه عروسة جديدة وتحيد لي خاتم ماشي حشومة عليك خود لي عجبك لخاتم الله ( هزات فيه راسها كتشهق بالكاد قادرة تهضر صوتها كيتقطع مع لبكا عينيها حمرين وشفتها سفلية كترعد تشوفها تبقا فيك ) الله يخلي ليك ميمتك متحيدوش ليا
عماد : ( هز راسو لفوق كيسوط ونزل عندها نوضها من على ضس وداها لبيتهم حتى گلسها فوق ناموسية وجرها حاط راسها على صدرو وكيدوز يديه على شعرها باش تهدن ) غانجيب ليك ماحسن منو إن شاء الله غير يتقادو أمورنا ونديك تختاري لي عجبك دابا بغيتو غير نخلص بيه هاد شهر وشهر جاي باش يخلينا فدار وديك ساع غانكون أنا تخلصت ( هز راسها عليه حتى تقابلات معاه وباس يديها بجوج ) وقفي مع راجلك فهاد المحنة راه معدنا غير بعضياتنا لا طحتي نتي أنا نهزك ولا طحت أنا تعاونيني نتي .. معندي من غيرك يعاوني !
مسحات دموعها كتشوف فيه وصدرها باقي كيطلع وينزل بشهقة : عماد ( شافت فيه بتمعن ) واعدني رجعو كيف كنا ونعيشو بيخير مقاداش على هادشي
خدا ليها يديها بحنان وحيد ليها لخاتم وخشاه فجيبو بزربة وناض باسها فراسها وشاف فيها كيطمأنها بعينيه : يكون خير
خرج بزربة قافل وراه لباب مخليها وراه طاحت على ناموسية ضامة رجليها على وضعية الجنين وكتبكي معندها مادير من غير لبكا كتشوف كولشي قدامها وساكتة وكتقول فخاطرها كولشي غايتبدل غارجعو بيخير غايخلص مول دار وغانجمعو فلوس نشريو دارنا ونتهناو .. مسحات دموعها كتحاول تبتاسم وطمأن قلبها أنو كولشي غيتبدل وخا عندها إحساس وشي حاجة فداخلها كتقول : بسمة تاحاجة مغاتبدل هدا هو لواقع ! باقي مشفتي والو ...
نزل مع دروج بزربة وفيديه جاكيطة تاعو قطع شانطي كيتمشا بزربة .. نزل عينيه لأرض كيبان ليه خيال بنادم وراه وقراب ليه بزاف ، دار حتى كيشوفهم مقربين ليه أو واحد فيهم دار يدو على كتفو مدرعو جارو معاه كيبان فحال ولدو قدامو بديك البنية ديالو ضخمة و 3 لي كانو معاه دارو بيه فجنب
عماد : ( سرط ريقو كيشوف فيهم خلعوه كل واحد مخسر من قنت وريحة الماحية ضاربة فيهم مجهدددة ) اش تما اصاحبي ؟
_داك لي حاط عليه يدو زير عليه ونطق ببرود : زيد اصاحبي عندنا واحد جوج كلمات معلم
جرو معاه حتى دارو مع واحد جوج زنقات خاويين أو وقفو قدامو كيشوفو فيه بربعة
تقدم واحد فيهم مصغر فيه عينيه وگارو ففمو :
مناويش تخلص لسيد ديك 3 شهور لي كنتي حاط طرمت** عندو فدار
عماد : ( رفع من نبرة صووتو ) شمن ثلث شهور ؟ شكوون انت اصلا ؟ كاري ليا ؟ كاري منك ؟
_ماكملش حتى هضرتو قرب ليه داك لي كان مدرعو بيديه .. شاف فيه كيضحك وخبطو بيديه فضهرو حتى حس بصدرو غايتهرس وبدا كيكح .. وشنق عليه زادحو مع لحيط
: ممساليش نبقا نتعاطا معاك كي طيابات ( شاف فيه هاز حاجبو ونبرتو قوية ) غانگول ليك جوج كلمات منفوتهمش معاك غاتهز قشاوشك من ديك دار ودور تقو** ولا غانلصق زا** بوك مع داك لحيط ( دار صبعو على ودنو ) هاودني منك باقي مكتعرفني مزيان عندي لحبس كي دار نگرض لمك رجليك ونخليك كتزحف فلارض ومنحنش فيك ( ضرب ليه على حنكو وشاف فساعة ) 11 دليل لقا طاسيلتك كدور فديك لبرطمة نخرج لمك عينيك .. كليتيه ف 3 شهور يلاه خوي داك سيد خيرو سابق علينا وديك لعمارة تاع الورثة من هنا لقدام حنا غانتكلفو بيها ونشوفك كدور هنا نصايفتك تبدل لافيشور تاع كمارتك
عماد: بالمفاهمة اصاحبي! كي ندير انا لحوايجي ؟ وفين لقى شي دار؟
**** : هامشي عاودو لمك اصاط ! عقل عليااا مزيان راه حداش ليل نرجع ليك ويااا ذبحة ياربحة
_طلقو ودفعو بيديه مخليه غادي كيجري وجهو مشا منو لون وقلب كيضرب متوقعش غايصايفط ليه هاد نوع .. سرط ريقو معارف شغايدير تلف مشا تالحدا واحد شجرة وگلس جابد باكية گارو وبريكة وبقا گارو ورا گارو بالأعصاب محس تاضرب 8 دقة وحدة تهدن شوية وجبد تلفون يصوني لصحابو دور نمرة لواحد فيهم وتسنا يجاوبو وهو فيديه گارو نتر نثرة منو وهز راسو لفوق سايط دخان من نيفو .. جاوبو لاخر ولاح لگارو من يديه عافط عليه
عماد : أفين أودا علي لاباس عليك ؟
علي : حمد الله ونتا بيخير
عماد : هاحنا أودي ( سكت شوية ) محتاج شي فلوس مزير هاد ساعة ( تنهد ) وگلت غا علي لي يعتقني .. دوز ليا أصاحبي لخلصة ردهم ليك
قبل مايكمل لاخر هضرتو غمق عليه بمعنديش وأنا نيت خاصني شي فلوس نكمل تامان واحد الأرض باغي نشريها وقطع عليه
_ شاف فتلفون قطع عليه قبل ميكمل هضرتو ودوز نمرة لواحد خر .. بقا نمرة ورا نمرة حتى سالاهم وكلهم مابغاو يعطوه حتى ريال كل واحد كيعطيه حجج أغلبهم معنديش ! بغيت نبدل طموبيل ! الواليدة عندها عملية كنجمع لها فلوس ! أحنا لقينا لفلوس تا نتصورو معاها ...
ناض كيسوط ضرب رجليه مع الأرض مغزف فلخر ساس حوايجو و شد تاكسي غادي نيشان عند خالتو وهو فبالو يخوي دار ليوم قبل غدا .. وقف قدام دار كيقاد قاميجتو لي تخسرات ودق لباب كيعض فشفايفو ويحرك فرجليه بتوتر بعد دقائق حلات عليه بنت خالتو ودفع لباب طالع كيجري فدروج حتى لصالون وبانت ليه خالتو گالسة مع بنتها تانية كيتغداو .. قفزهم من بلاصتهم بحالتو كينهج وناضت عندو خالتو ب بيجامة ديال دار طويلة او زيف حياتي ملوي على راسها
خالتو : آش كاين أولدي شواقع ؟ ( شافت فبناتها وقالت ليهم يكملو ماكلتهم وجراتو حتى لبيت تلفازة وسدات لباب ) ياك شي باس مكاين ؟
عماد : وقع ليا مشكل مع مول برطمة تعطلت عليه فخلاص هاد شهر بغا يجري عليا وسايفطت ليا شي حشايشية كيهددو فيا
خالتو : ( دارت يديها على حنكها مخرجة عينيها فيها وكتولول ) ياك ؟ وشنو لحل دابا وديك المرة مسكينة فين خليتها مخليها بوحدها وجاي عندي
عماد : ( ساط حاط يديه على جنابو ) مكاين ميطرا ليها واصلا مفراسها والو .. دابا شوفي ليا شي حل
خالتو : ( خرجات عينيها فيه ) أنقولها ليك فوجهك نتا مكتسواش واخا ولد ختي مك شي نهار طيح لا سمعات هادشي كامل ، فيها سكارو تركب فيها لملحة ( هزات صبعها فوجهو ) أنا متسكنهاش عندي مناقصني مشاكل تزوجتي بيها ومشينا تا خطبناها ليك دبر راسك راه مامزوجة بيها لا أنا لا مك أنا خدامة وكنخلي بناتي بوحدهم فدار نستقبل مراتك عندي 3 يام هدا هو جهد شي حاجة خرا مكايناش وسير شوف ليك فين تكري شي دار خرا ! لان هاد صداع انت مولاه
عماد : فين غا نكري ؟ كتعرفي شي حد ؟ كفاش صداع انا مولاه ؟ كرهت راني مزير
خالتو : ( هزات ملحافها لبساتو ونضاضرها دشوف ) كنعرف واحد سيدة بغات تكري سفلي تاع دار راها قريبة ليا نيت فوزية راك تعرفها طالبة غير 14 ألف...
عماد : ( خرج عينيه ) 14 ألف ؟ غاتكري ليا ڤيلا لديلمها دار عندها كلها حالتها شراجم طايحين صباغة كلها مقشرة
خالتو : ( تحنات تهز صابوها وناضت مخرجة فيه عينيها ) لقيتها ؟ أدوي لقيتيها وباقي كتشرط متحمد سيدي ربي .. بغيتي نكري ليك ڤيلا مرحبا ( مدات يديها ) حط واحد مليون ولا جوج
عماد : ( شاف فيها سارط ونطق بصوت منخافض ) معنديش منين نجيب ليها ديك 14 ألف
خالتو : ( شافت فيه بفقصة وميلات راسها فيه ) لا أنا عندي راك كتشوف كولشي على عينيك كيعتقنا غاداك راسيون لي عدنا كل شهر توصلنا ش بركة دسلعة نقضيو بيها وخدامة أوليدي على قد لحال يلاه مكافية مع لبنات وداكشي لي خاصها ومقاتلة مع زمان ( شافت فيه ونطقات لاحول ولاقوة الا بالله فنفسها ) راك خدام زعمة خدمة تعيشك بيخير ولكن فلوسك تقول كتشد غا 100 درهم لشهر ومباينة باقي ، شعندي منقول ليك من غير الله يهديك !
عماد : ( تنهد كيشوف فيها طالب غا سلاك ) صافي شوفي ليا معاها ونا غانشوف فين نضبر لفلوس واحد شوية غارجع نعطيك تخلصيها ونجيب بسمة ( بتأكيد ) ومتقولي ليها والو ! فحال ماطرا تاحاجة متجبديش ليها حس شي دار خرا حتى نجي نتفاهم معاها
_خرجات تشوف ليه مع ديك لمرة وهو مشا نيشان شد طاكسي طالع لإنزگان عند دهايبي يبيع داك الخاتم .. طريق كلها وغير تيشد فراسو و يسب داخلو ! وصل المكان ودخل مبتسم لمول المحل
عماد : هاواحد سلام عليكم
ذهايبي : اهلا بالبونكيي ديالنا ! كي داير احوال
عماد : الله يحفظك اودي مع دنيا
ذ : كنت انتصل بيك !
عماد: مرحبا، شي حاجة؟
ذ : واحد شيك يدخلني هاد سيمانا وقول جوج شيكان و بغيت نوصيك تعلمني لا نخلص الخطية
عماد : ماتخممش ! ( حط ليه خاتم ) شوف لنا هدا
_ذهايبي هز الخاتم و شافو و رجع شاف فيه حطو فالميزان تيقيمو و هضر معاه
: ياك هدا لي خديتي لعرسك ؟ باغي تبدلو
عماد : ماكرهناش اودي نبدلوه ولكن راه بغيت نبيعو
ذ : ااه ااه ! تبيعو ؟ ياك والو باس ؟
عماد: ( يتاسف ) راك عارف عليا كريديات و زمان ماساهلش
ذ : الله يحسن العوان ! ولكن راك يلاه قلتي باسم الله اولدي ! مهم فيه اربعة عشرين الف
عماد : وايلي من كدا و ربعين بعشرين ؟
ذ : ذهب هو هدا ! من عندي نزيدك ستة و عشرين
عماد : ( هبط راسو باسف ) قضي وصافي راني مزير مع واحد مول الدار
_ذهايبي حسب ليه الفلوس و عقلو تالف!
.. شد فلوس خشاهم فجيبو ورجع شاد طاكسي تاني حتى لدار خالتو حسب فلوس فطاكسي خشا 14 ألف فجيب أو فجيب تاني خلا لباقي وخلص مول طاكسي ونزل حتى دخل لدار لقاها فانتظارو ومد ليها 14 ألف يلاه كان نازل
عماد: انا مشيت
خالتو : اجي هنا !! زيدني 200 درهم تسبيق تاع ضو ولما
عماد : ( دار عندها ) إنا تسبيق مالها شغتكري ليا بسلامة براكة دايرة عليها هاد لحالة
_شافتو غايديماري تاني مكيتقاداش من الهضرة وهي تقاطعو بهضرتها مخرجة فيه عينيها معصبة قريب طيح ليه تماك : شوف أولد ختي تحط 200 درهم هو هداك ماتحطهاش متوصلنيش باقي وسير قلب ليك فين تسكن ! طاعة الله اولدي لي كان فيك سكوت و داخل سوق راسك و فرحانين معاك بخدمتك رجع كولو فيك مشاكل!
عماد : ( مد لها لفلوس ) خالتي فوتيني ! انا صكع و مسخوط راسي هدا ماكان! وقولها تنقص شوية فثمن راه بزاف 200 درهم لشهر وخا يكون كيديرو عرس كل نهار ودير 14 ألف مالهم عاطيني برطمة مفرشة ... واش أنا نخلص 18 ألف كل شهر وا بزاف ...
_سكت فاش شافها زدحات لباب وراها وخرج تاهو قلب على هوندا ! تيمسح فعروقاتو جاية اربعة سوايع هة تيجري و يجاري ! و تينعث لشيفور الدار حتى وصلو طلب منو ينتظرو طلع تيجري داخل عليها
عماد : لبسي جلابتك تحركي
بسمة : ( بدهشة) شكاين ؟
عماد : ( زربان طاح ضلام ومشافش تا ساعة شحال ) غاتمشي عند خالتي عارضة علينا
بسمة : غير هكاك ؟ قولي واش واقعة شي حاجة؟
عماد : ( بنبرة عالية ) بسماااااااا ! طلقيني واش نعطيك محضر
لبست جلابتهل و دارت شالها خارجين ! ماعلاباهاش انها اخر مرة تشوف دارها ! خرجها تالشانطي شد ليها طاكسي هي كتهضر وهو ممسوقش ليها ركبها وسد لباب وخلص مول طاكسي قاليه فين يحطها بضبط وزاد عند مول هوندا كيجري وحاضي جنابو ... تعاون معاه حتى نزلو تلفازة و لمضارب لي فصالون ولمخاد وطلع جاب حوايجو كاملين حتى تأكد أنو مخاصو فيهم والو عاد رجع طلع ناوي يجيب بوطة ولماعن ويخلي حوايجها هما لخرين حيت خفاف وتفاجئ فاش لقا مول دار حدا لباب كيقفل فيه ورجال لي وقفو عليه صباح حداه .. سرط ريقو معارف ميدير لا دوا وقال ليهم يهز حوايج لي بقاو غايفوتو فيه شي دقة رجع بلور ناوي يمشي حتى وقفو مول دار
مول دار : لقاك باقي حدا هاد لعمارة تشوف حاجة متعجبك ولي بقا فدار راه ولاو ديالي يلاه تعوضني ف 3 شهور لي كنتسال ونهار تبغيهم جيب ليا فلوسي ورد ليك لي بقا فدار
عماد : منين نجيب ليك الفلوس؟ راه ربي كريم
مول دار : اوا حسب دروجك
_مجاوبوش ونزل مع دروج ركب مع مول لهوندا حتى دار عند خالتو خلصو .. وخدا ساروت دار لي كرا حلها دخل ليها داكشي لي جاب ممسوق لدار لي كلهم مغبرة ولفراش غايترون ! فقط حوايجو لي جامعهم فباليزة خايف عليهم حطهم فجيهة وخدا لي غايخصو يلبس لخدمتو فصباحة او مستلزماتو لدوش ومشا يدوش عند خالتو وينعس عندها وصباح ينتقلو لدار جديدة ..وتم راجع
حلات ليه خالتو لباب وعاود ليها گاع لي وقع ليه تنهدات كدعي فخاطرها مع مرتو وطلب ربي يصبرها معاه .. دارت ليه لما يسخن باش يدوش وخلاتو يبات مع مرتو فصالة حيت معندهاش شي بيت خاوي يبات فيه .. مشات تنعس حيت تعطل لوقت وخاصها تفيق بكري لخدمتها وهو دوش ومشا لصالة لي كانت مفرشة بزربية او مخاد على طريقة صحراوة و لقاها گالسة بجلابتها حاطة يد على خدها وساااهية غير شافتو ناضت عندو
بسمة : أشواقع لاش جايبني عند خالتك كنسولها شكاين كتقولي دابا يجي عماد يشرح ليك ( شافت فيه بنضرة دشواقع ) فين هاد لعراضة لي قلتي ؟
عماد : ( شاف فالفراش لي حطات لهم خالتو وفرش ليهم بجوج وتكا على مخدة كيتنهد ضارو ضهرو من هاد نهار طويل تنهد كيشوف فيها هي لي جات گلسات حداه كتسناه يهضر ) دار لي كنا فيها جرا عليا مول دار وخا بعت لخاتم وعطيتو لفلوس ولكن مابغاش يشدهم جرا عليا وبغيت ناخد لفراش حدي هزيت فراش صالة وحوايجي ولقيت حدا لباب شي شماكرية جايبهم يخلعوني تجاريت معاهم يخلوني ناخد لحوايج ومابغاوش كانو 4 مقديتش عليهم كاملين ( شد راسو وغمض عينيه ) خليت ليهم داكشي لي بقا فدار ورجعت كريت لينا دار حدا خالتي خلصت تسبيق ضو ولما وخلاص دشهر وحطيت فيها حوايجي ولفراش .. وجبدت معايا سوارت غدا نتاقلوا ليها
شافت فيه بصدمة دمعة عند عينيها مقداتش تهضر وهي كتشوف فيه عاطيها بضهر وحاط يديها على راسو فحال الى كيقول ليها سالات لهضرة !
حطات راسها على لمخدة كتبكي فصمة نيفها حمر بالبكة او وجهها صفر يوم واحد كان أكفس أيام حياتها مابين ليلة ونهار مابقا عندها خاتم زواج ولا حوايج ولا فراش فحالها فحال ناس خشات وجهها فالمخدة عاضة فيها كاتمة صوت شهقاتها لي كيتسمعوو بصوت خفيف ولكن شكون سمعها ؟ وهو بدات صوت شخيرو كيتسمع مامسوقش ليها فحال الى كيقول ليها موتِ نتي گاع ! تنهدات كتحاول تنعس ولكن فينو نعاس بقات حالة عينيها حتى صباح كتخمم فشنو جاي باقي شنو كيتسناها من غير هادشي ؟ حسات بيه ناض من حداها وناضت تبعاتو غسلات وجهها ولقاتو واقف قدام لمراية كيقاد حالتو خرجو بجوج مخليين غير لبناات وراهم أما خالتو كتخرج مع 5ونص صباح لخدمة بحكم أنها خدامة فلوزين ديال لومبالاج ( الخضرة ) كتسنا طوبيس دلوزين تايوصل وتمشي فيه ... مشا معاها تالدار عطاها ساروت وهو زاد لخدمتو مخليها واقفة كتشوف فدار من برا وناس غاديين فزنقة كيشوفو فيها ويبرگو شكون جا يسكن معاهم جديد .. دخلات وسدات وراها لباب كتعطس لغبرة مجهدة فدار .. خرجات عينيها وهي كتشوف فالمضارب مليوحين لأرض نيشان جرات تاهزاتهم معافرة معاهم وخلاتهم واقفين ودخلات تكتاشف دار لي كانت فيها جوج بيوت او طواليط او كوزينة كانت على قد لحال لحيوط مقشرين او لبيبان على قد لحال قدام .. تكات على واحد لحيط غير كتشوف مابقا عندها جهد تهضر فيه فكل مرة كتهز عينيها فدار كتجي فبالها برطمة فين كانت ساكنة خرجات منها شهقة صغيرة وتبعها صوت تنخصيصها گلسات هكاك فضس جامعة رجليها كتبكي فراحتها بحكم تاحد فدار او تاحد مغايشوفها كتخوي قلبها على لحيوط ! وشكون يسمعها من غيرهم
بسمة : ( بصوت مرتاجف هزات راسها كتشوف فسقف لفوق ) أربي وشنو مخبي ليا باقي اهئ اهئ أربي هادشي بزاف مابقيت قادة أربي تصبرني ( غطات وجهها بيديها ) ياربي يرجع كولشي كيما كان ورجعو لدار لقديمة .. ياربي يتحل مشكل قبل مايكبر كتر
مسحات وجهها وحطات راسها على لحيط وفكل مرة كتعطس وتمسح نيفها
ᘳ نهاية فلاش باك ᘰ
شادة عاصير فيديها وكتشوف فلغادي وجاي لافاك كانت عامرة وكل رباعة شادين بلاصة مجمعين ..
حنان : ( حطات لها تلفون قدام وجهها ) هدى شوفي معايا هاد الخياطة كيجاتك حمقني هاد القفطان
حطات عاصير من يديها وقادات زيف لي خسر ليها وفنفس الوقت كتشوف فتلفون كتحقق فلخياطة : غزالة ياختي ولكن ياك درتي مع الخياط داكشي لي خصك بلا متزيدي !
تأفأفات لوخرا كتحك فراسها بإنزاعاج : وغاسكتي خسر لي اصاحبتي الخياطة وعرسي بقات ليه شهر ونص ( شافت فيها مخسرة سيفتها ) كنتفكر كتشدني الفقصة
هدى : ضيعتي فلوسك على والو قوليه يرد ليك فلوسك ولا شوفي معاه شي حل .. وشوفي فالعرس فرقي مابين رجال ولعيالات لابغيتي تلبسي هادشي راك عارفة غير ريحة وحرام ترشيها وتخرجي محاساك تلبسي هادشي وديري ماكياج غاتولي فتنة ! ( طلات على تلفون ورجعات حطاتو وبقات ساهية فيه )
حنان : ( شربات من العصير لي قدامها كتشوف فيها ) الله يهدي الجميع اختي غانفرق مابين رجال وعيالات على قبلك باش تحضري وغاندير غاداكشي خفيف ضريف أصلا مغانكترش ( شافتها ساهية ) مالك من صباح ونتي تقلبي فداك تلفون مالنا شكاين
هدى : ( حطات يديها على خدها ولوات شفايها ) والو غير تعرفت على واحد هادي 3 شهور هكاك ( تقادات فلوقفة وبدات تهضر معاها بحماس ) نسيت معاودت ليك عليه احنان جات الفرصة
حنان : ( هزات حاجب ) ياك اختي 3 شهور ( كحزات الكرسي حداها ) طلقي طلقي اش سماه الله فاش خدام شحال فعمرو طويل قصير بيض سمر
هدى : ( حلات تلفونها ودخلات جيهة تصاور وجبدات طوف تاعو ) هاهو اختي ولد طنجة فعمرو 28 عام الخدمة كان قالي خدام مع صاحبو مابقيتش عاقلة فاش ( دارت يديها على حنكها كتفكر ) ولكن قالي راه دافع لشي خدمة كيتسنا يتقبل
حنان : ( شدات تلفون كتزومي على طوف ) ممم على مزيناتو صراحة هههه ياختي طول وتجريدة لا لا كاين كاين
هدى : ( حيدات ليها تلفون من يديها ) اسبحان الله بقات ليك شهر ونص تكركبي لعش الزوجية جمعي عينيك وأصلا مابقاتش فزين لاكان شخص مديها فصلاتو ومتبع طريق الله ويتاقاا فيا الله راه حسن ليا من شي زين !
حنان : إوا أختي زين حبو مولانا إوا دغيا دخل القلب ولا شنو غا ف 3 شهور زعما !
هدى : غا ولفتو صراحة وقالي ( نطقات كدور فعينيها ) غايجي لأگادير هاد ليامات
حنان : ( حابسة ضحكة ) ومالك كتقوليها ودوري فعينيك هههه جاي يشوفك ولا شنو ؟
هدى : فحال هكاك تقريبا عندو هنا ختو مزوجة كنت هضرت معاه واحد لمرة أبيل وطلعها معانا دوينا واحد شوية وعرفني عليها وخدات نمرتي صايفتات ليا فواتساب .. قالي غايدوز عندها يشوفها ( قلبات عينيها فيها ) من بعد نتلاقاو فشي بلاصة !
حنان : امممم سيد 3 شهور وعطاك دوي مع ختو .. هي ناوي المعقول ؟
هدى : ( تنهدات ) إوا باقي معرفت من غير حاجة وحدة رتاحيت ليه وحسيتو ولد الناس ! وحتى هو نفس الحاجة قالها ليا وكيلمح ليا لزواج شحال من مرة
حنان : إوا توكلي عالله إلى فيه الخير ياربي يكتبو ليك ويلا فيه شر ياربي يبعدو عليك .. لا رجع فتح معاك الموضوع وقاليك زواج عطيه نمرة خوك وخرجي من باب واسع
هدى : نعطيه نمرة خويا ؟ صافا با !! باش يهرسني انا وياه و تريكتو ، لي مرضني فصحتي و معكزني على قضية زواج هيا ماما حبيبتي مريضة !
حنان : ( هزات حاجبها فيها ) اصاحبتي حمدي الله خوك عندو فلوس ومبرعكم مامخليكم مخصوصين من والو ! اما مك راه حاطها فوق رموش عينيها ها فرملية جايبها ليها تالدار ولبنت لي كدير ليها ترويض كتخلي كليان عندها وتسبقها هي لولة ! وخدامة كل نهار كتجي تجمع دار وقوة دوايات زبالة فلوس كيخسر كل نهار
هدى : ( شافت فيها وتنهدات ) : غا خلي داك جمل راگد تواحد ملقاها كيف بغاها أنا حاجة وحدة لاكان داك ولد ناس ناوي المعقول وعجبني داخل سوق راسو وشاد طريق الله راه غانتوكل عالله ونتزوج بيه لا كتاب ! اما إلا غير دوران فزناقي وعينيه فحاجة خرا غانقول ليه الله يعاون .. بغيت شي واحد لي نعيش معاه بيخير مهامنيش فلوس يكونو كتار نعيشو باش قسم الله مهم الهنا وراحة البال أهم حاجة عندي لا داز كولشي بيخير وكنا غانتزوجو نقوليه ينتاقل لأگادير نقرب شوية لماما ونبقا نجي نعاونها ونخدم ونتعاون معاها
حنان : ( شدات فراسها ) واش خوك غايخليك تخدمي ؟ آش ناقصك لي حليتي عليها فمك يحضرها ليك طموبيل لا قلتي ليه خاصني يجيبها ليك بلا متبقاي شادة طاكسي كل نهار او لبيرمي وراه عندك !
هدى : فاش غانتزوج غانولي محسوبة على راجلي معند خويا مايقول ديك ساع ! ولابيت نخدم راه غانخدم ( ناضت هزات ساكها ) يلاه نزيدو لوقت هادي
ناضو بجوج شدو طاكسي وصل حنان هي لولة تالباب دار ومن بعد هدى لي وقفها حدا شانطي قريب لدرب فين عايشة خلصاتو ونزلات كتمشا بشوية عليها حتى وصلات قدام باب دار ، شهوة منها فيها طروازيام إيطاج كتبان من برا كلها مقادة ومساحتها كبيرة تقريبا شي 200 ميترو ... وقفات قدام لباب حلاتو بساروت ودخلات ضربات فيها ريحة سانيكروا ودار بااااردة مقارنة ببرا لي كان لحال سخون .. طلعات فدروج تالبيت مها ملقاتهاش فيه ومشات لصالون لقاتها گالسة فوق لمضارب بزيف حياتي على راسها وبيجامة طويلة تالتحت .. نضاضر دشوف فعينيها وتسبيح فيديها ، وحداها كانت لخدامة گالسين كيتفرجو ومرة مرة تهضر معاها موناساها
هدى : ( گلعات سباطها ومشات عندها عنقاتها ) ماما لحبيبة
مْبِيرِيكَة : إيلي منزاكمين لاباس دارام ، ( هزات يديها لي قادرة تحركها حطاتها على يديها ) إس ترميت أيلي يغكم لاز ( بنتي لاباس عليك ، واش عيانة فيك جوع )
هدى : ( الحوار لي غايكون داير بيناتهم بشلحة ) لاباس اماما ( باست يديها ) لا مافياش جوع تالواحد شوية يجي خويا ونتجمعو على لغدا
حركات ليها مها راسها بالإيجاب ودارت شافت فلخدامة لي كانت كتشوف فيهم مبتاسمة
هدى : خالتي جات لبنت لي كدير ترويض لمي صباح ؟
رقية : ( تكات على لمخدة ) جات أبنيتي دارت لمك ترويض راه غادة وكتحسن حمد لله ولات تحرك رجليها ويديها شوية ماباقاوش فاشلين عليها كيف قبل
هدى : ( حركات ليها راسها ) صافي شكرا انا نمشي نبدل حوايجي ورجع
ناضت مخلياهم رجعو يتفرجو متبعين مسلسل فدوزيم وهي مشات خدات دوش بالخف تحيد عليها العروگات وخرجات دارت روتينها ورا كل دوش كيف ديما مهلية فراسها بشرتها بيضة ونقية .. نشفات شعرها طويل ولبسات بيجامة بسروالها وخا كاين صهد ولكن كتحشم قدام خوها ضروري تلبس قدامو شي حاجة طويلة حتى تنافرد براسها فبيتها وديك ساع كتلبس لي بغات
گلسات حدا كوافوز كدير مرطب لشفايفها وسمعات تلفون كيصوني هزاتو كانت نمرة عليها سمية " يوسف " دوزات لخط ودارت هوت باغلوغ وحطات تلفون
يوسف : ألو هدى بيخير
هدى : ( جاوباتو بصوت هادئ ) حمد الله ونتا بيخير كيداير مع خدمة ؟
يوسف : حمد الله هاحنا غاديين كيغادة مع قرايتك ؟
هدى : ( ناضت تكات على نموسيتها ) مزيان حمد الله قربو لإمتحان كنوجد ليهم دابا
يوسف : الله يعاونك كنت گلت ليك غانجي هاد ليامات لأگادير بعد غدا غانشد طريق
هدى : أمين .. الله يوصلك على خير ياربي
يوسف : ( تنهد ) لاوصلت بغيت نشوفك !
هدى : ( دارت يديها على حنكة مبتاسمة ) إن شاء الله ياربي فاش توصل علمني
يوسف : إن شاء الله غانگولها ليك غاندوز واحد نهار عند ختي وفالعشية نتلاقاو لا بغيتي تجي عند ختي مرحبا راه كل مرة كتسولني فيك ( ضحك ) هههه دخلتي لها لخاطرها
هدى : ( دارت معنقة مخدة كضحك فصمت ) تا أنا دخلات لي لخاطري وعزات عليا سلم عليها فاش توصل وإن شاء الله لا كتاب راه نتلاقاو وجيبها معاك أحسن
يوسف : واخا إن شاء الله ويلا بغيتي عطيني نمرة خوك نهضر معاها باش تكون شي حاجة رسمية بيناتنا ويلا تفاهمنا اكتر نتوكلو على الله ونجي نخطبك
هدى : ( عضات على شفايفها بتوتر ) لا تلاقينا نهضرو فهاد الموضوع
يوسف : لي بغيتي يلاه الله يعاون تهلاي فراسك
هدى : وحتى نتا
قطعات دغيا وخدودها حمرين واخا مدة قليلة باش تعرفات عليه عاودات ليه لقليل عليها وعلى عائلتها رتاحت معاه وحساتو هو لي ناسبها تعاملو معاها مزيان ماشي شخص لي قلل عليها لحيا من أول مرة هضرات معاه وبقا عليها بزين وكبيدة وديك الهضرة الخاوية .. كانت هضرتو قليلة ومعقولة ومواضيع فاش كيهضر يا إما شي حاجة على خدمتو ويزيد يعرفها عليه ولا يسولها على أحوالها .. عرفها على ختو وكان باغيها تهضر مع مو غير هي لي رفضات وقالت ليه حتى نتلاقاو ونتعارفو وديك ساع لا كتاب تكون شي حاجة رسمية بيناتنا ويكون أول تعارف مزيان بين العائلات .. ولحاجة لي عجباتها فيه كتر مكانش كيفوت معاها مدة طويلة فمكالمة ولا يصوني ليها فنصاصة ليل هادشي لي خلاها تعجب بيه واخا باقي مطلاقات معاه
ناضت خرجات من بيتها وتوجهات لكوزينة لقات طاجين كيطيب طلات عليه مبتاسمة عجباتها ريحتو من ديما كيعجبها طياب رقية لا ماكلتها ولا خدمتها فدار كولشي متول واخا دار مشاء الله كبيرة سفلي كولشي مفرش فيه جوج صالات كباااار متولين غير لضياف صالة لولة مفرشة فراش عصري صباغة كتبري فلحيوط ومعلقين لوحات فجناب فيها آيات قرآنية ولفراش بلون زرق ورمادي تريات 3 معلقين فلحيط كلهم مجوهرين ولميدات 3 مستفين لوسط وحدا حدا ختها وصالة تانية واسعة وعريضة دايرنها على طريقة صحراوة زربية بالحمر ولكحل وبونجات نازلين عليهم طلامط ومخدات فنفس لون زربية دايرين على صالة كاملة وتاهيا تقريبا نفس زواق صالة لي قبل منها .. وطاج لولة جوج صالات ليهم تاهما مفرشين فراش على حقو وطريقو وبيت لمها او ليها او جوج طواليطات او دوش او كوزينة او طاج 3 لولد لكبير تاع دار فيها بيت واسع وعريض وكوزينة كبيرة او طواليط او دوش وصالون واحد ... وآخر حاجة كاين سطاح
_ داقت من المرقة متبننة كان طاجين كبير بالحم والبرقوق وزبييب .. طفات عليه او داتو لصالة هو ولخبو او جوج قراعي كبار دلموناضة او جابت غدا مها لي كان عبارة روز مفور مع خضرة فوقو او شوية دلحم او حطات ليها معاه كاس دعصير ليمون .. گلسو مجموعين وهزات هي تلفون شافت ساعة كانت هادي هي وقتو .. بعد دقائق كان طالع فدروج ، وقف عليهم عاقد حجبانو حيد سبرديلة من رجليه ودخل كيدوز يديه على وجهو من لعرق ديال صهد .. شاف فيهم مجموعين على طبلة ونطق : السلام عليكم
ردو عليه السلام و توجه عند مو مبتاسم باس فوق راسها : ( الحوار بشلحة ) مي لاباس ( گلس حداها مدرعها بيديه ) كي داز ترويض قادة تحركي يديك ورجليك شوية
مْبِيرِيكَة : ( بتاسمات ليه بتسامة بشوشة وطبطبات على رجليه ) بيخير اوليدي وليت نحركهم مابقاوش تقالين عليا كيف قبل
حرك ليها راسو بالإيجاب ودور وجهو عند رقية وختو لي كانت مكتشوفش فيه : ياك متقادا لها شي دوا نجيبو ليها ولا مخاصها شي حاجة ؟
رقية : لا اولدي مناقص تاحاجة كولشي كاين
ناض من بلاصتو ونطق : واخا لا خاصكم شي حاجة تصوني عليا هدى غير تغداو بصحتكم انا زربان دابا مسافر جيت غير نطل عليكم ونزيد
مْبِيرِيكَة : ( بصوت حنين كتشوف فيه ) طريقة السلامة اوليدي رد لبال لراسك وسير راني مفرشاك برضى ومغطياك بيه
نزل قبل راسها ومشا لكوزينة كيسكانيها بعينيه كيشوف شنو خاص وشنو ناقص ، حل تلاجة لقاها عامرة وشاف لفريگو تاهو مناقصو والو كولشي موجود لحم او دجاج او بيبي اولحوت شكال ونواع .. طلع لبيتو خدا دوش خفيف دغيا وبدل حوايجو بتيشورت كحل وسروال دجين وسبرديلة نايك بيضة دار مگانة فيديه و نشف شعرو بفوطة ورش ريحتو وهز جاكيط سخونة بحكم بليل كيتحرك لبرد .. خدا تلفونو ولكونطاكط دطموبيل ومشا حل مجر بساروت كان عامر فلوس حسب دغيا واحد 50 ألف ورجع سدو ونزل مع دروج لقاهم كيتغداو وشاف فختو : خاصك شي حاجة قبل منمشي ؟ ولا ناقصة شي حاجة فكوزينة
بقات كتاكل منزلة عينيها فطاجين ومها طبطبات على يديها وجاوبات بلاصتها : مخاص والو اوليدي غير سير بلا مَتْشْطَنْ علينا وفاش توصل صوني عليا
حرك ليها راسو بالإيجاب وتوجه عندها حط ليها ديك البركة دلفلوس حداها وزاد : سدو لباب فليل ومتحلو لحد حتى تعرفو شكون
مْبِيرِيكَة : ( شافت فدوك لفلوس عارفة لاقالت ليه راه مناقص والو غايگول ليها غا خليهم عندك ) واخا اوليدي رد لبال راسك
مع جوايه لعشا هكاك كانت متكية فوق ناومسية طافية ضو ديال دار كاملة مخلية غير شرجم لي كان صغير وكيدخل منو برد خفيف .. هي مكمشة فجوج كاشات مغطية كاملة راسها بوحدو لي مخرجاه ودايرة قرعة دجاڤيل على كرشها فيها ما سخوووووون كتحاول تهمد بيه لوجع لي فيها .. سادة عينيها كتنفس وجبتها كتنقط بالعرق وحنوكها حمرين ، هادي هي عادتها كل مرة كتجيها ليغيگل كتكرفص معاها خصوصا نهار لول كتبقا تلوا بالوجع ولحاجة لوحيدة لي كتلقاها قدامها هي قرعة جاڤيل كدير فيها ما سخون اما لا قرفة كاينة ولا حليب .. حتى حاجة باش ديرها تسخن وتشربها لاهم تعدي بلي كان حتى يحن الله
سمعات صوت لباب تحل عرفاتو هو .. ناضت بشوية عليها شاداها دوخة وشعرها لصق عليها بالعرق حطات قرعة جاڤيل وتمشات بخطوات بطيئة شادة فكرشها حتى خرجات من لبيت ولقاتو واقف فضلام ، شعل ضو وبانت ليه حالتها هكاك عرف مالها مشا لكوزينة عمر كاس دلما كيشرب وتبعاتو هي
بسمة : عماد عفاك جيب لي أولويز
عماد : ( حط لكاس وساط ) غانبقا مقابلك نتي كل شهر أولويز أولويز ديري شي شرويطة وهنينا !
بسمة : ( حطات راسها على لحيط عيات من نفس لكاسيطة ) راه منقدرش عندي حساسية فيما كنديرهم كنبقا غير نحك والبشرة كتلتاهب وبين فخاضي كيرجع حمر ويحرقني
عماد : ( خرج من الكوزينة ومشا البيت كيحيد الكراڤاط وتبعاتو ) نتي حسن من العيالات القدام لي كانو يديرو شراوط وينوضو ؟
بسمة : ( وجهها عابس وعاضة على شفايفها من الوجع ) كتقارن دابا بناس لقدام كون كان عندهم أولويز ديك ساع كون داروه !
عماد : ( گلس على ناموسية بسخط وكيشوف فيها مخنزر ) غاتبقاي مقابلاني دابا جاي من خدمة عيان وتزيديني نتي تقلبي ليا مخي !
بسمة : ( قربات تبكي عينيها حمرين حطات يديها على كرشها ودوات بصوت منغنغ ) مدرت ليك انا والو دابا ! بغيت غير أولويز منقدرش نزيد ندير شي شرويطة راه نبقا هكا حتى نصدقو فسبيطارات وتحط كتر من ديك 10 دارهم دأولويز
_ ناض داير راسو مكيسمعهاش هي كتهضر وهو كيبدل حوايجو لبس سروال كيطمة بالكحل او تريكو دلخيط بالبيض وتقاشر جداد بيضين أديداس او وقف كيشوف فيها هي لي كانت كتشوف فيه بعينين حمرين كتبان بحال لا طلعات ليها سخانة
بسمة : ( تنهدات ودوات بصوت ضعيف ) على الأقل جيب لي غير شي جوج بلا متجيب باكية !
عماد : سيري ابسمة تنعسي انا خارج نقدي واحد غرض ونجي بلا متعصبيني راه كنگول غارق كريديات ونتي كتزيديني بنادم
بسمة : ( شدات راسها حاسة بقلبها غايوقف بالفقصة ) بغيت غا نعرف أنا هاد كريديات فين كتصرفهم ماكلينا فحال ناس مكتصرف بيهم على دار عمرني قلت ليك جيب لي هادي كنراعي ليك ونقول مسكين معندوش
عماد : ( خرج فيها عينيه ) مسكين انا كنسعا حدا جامع الالة انا مامسكينش كريديات ديك لبوطة لي كاينة تماك ديك تلاجة وديك تلفازة نتي لي شريتيهم ( ضرب على صدرو صعر وكشاكشو خارجين ) فلوسي كنحطهم فدار ونتي مابان ليك والو بنات ناس عايشين فبراكة وحامدين الله وشاكرينو
بسمة : ( طاحو دموعها كانت على سبة لوجع قتلها مقادة حتى توقف وهو زادها ) بزاف هادشي قربت نموت راه صبرت وكنصبر ونعض فصبر شي نهار تلقاني طايحة بالأعصاب
لدقائق وهما مني منك مني منك هو لي زاد صعر عدوه لي يقول ليه مسكين ولا يقلل منو ويجبد ليه المصارف ديال دار وخاصني وجيب .. بقا يهز فيديه ويغوت عينيه خرجو فيها ولا فحال شي وحش صدرو كيطلع وينزل ورجع حمر هي رجعات لور تكمشات على لباب دطواليط خلعها ولا غير كيغوت قرب ليها وجات تنوض هاربة وجات فيها دقة بضهر ديدو لودنيها نيشان طاحت فلارض من حر دقة .. للحضة مابقات كتسمع والو فقط حاسة بيديه لي كيزعزعوها وهي مغمضة عينيها طاحو دموعها دمعة ورا ختها كتسمع فودنيها طنيييييييين .. تهز صدرها بتنخصيصة وبقات تبكي وهو كيعنق فيها
عماد : بسمة ! بسمة والله مقصدت هزيت يدي بجهد وجات فيك فاش تشوفيني معصب بعدي مني متقربيش ليا
بسمة : ( شافت فيه كتبكي وصوتها كيتقطع ) اهئ اهى بع د بعد مني اهئ
عنقها كيحزر فيها بقا معاها لدقائق حتى تنفسات وسكتات وهي فحضنو نزل عينو فيها ولقاها ساقلة كتبان فاشلة عينيها حمرين ونيفها حمر ودموع نازلين على خدودها المنفوخين عجبو منضرها هكاك ! نزل عينو لشفايفها لي كانو فحال شي فريزة صغيورين ولونهم غوز فاتح ، عض شفايفو من ديما كتعجبو كلها وشفايفها كيجوه فحال تاع شي بيبي .. نزل باسها فخدها ونوضها معاه حتى جلسها فوق ناموسية غطاها وباسها فوق راسها
عماد : هانا الالة نمشي نجيب ليك لي بغيتي
خرج وسد وراه لباب وبقات هي مكمشة فكاشة وفكل خطرة كتنهد صدرها داق عليها وحاسة بحمل تقيل على كتافها .. سدات عينيها كتقلب على نعاس تنسا دنيا وشنو بيها
توجه لحانوت خدا ليها باكية أولويز او شي سقاطة من بيموات او تشيبس او عاصير جمعهم ليه مول حانوت فشاسي ورجع لدار .. لقاها مكمشة فكاشة وداها نعاس قرب ليها حركها بشوية
عماد : بسمة ( شافها حلات عينيها ) نوضي راه جبت ليك لي بغيتي وشي سقاطة
حركات ليه راسها بالإيجاب وناضت بشوية عليها شاداها دوخة او ودنيها باقي عاطياها صداع .. دارت مقراج دلما يسخن او مشات هزات حوايج باش تبدل .. بدلات عليها ديك لحالة و غسلات وجهها وجمعات شعرها لفوق كوب شوڤال .. مابين ماهيا كانت كتجمع شعرها قدام لمراية لدقائق بقات تحقق فوجهها لي مشا منو لون ولات تبان صفرة ! تحت عينيها كحل ! حناك لي كانو يبانو فوجهها مابقاوش يبانو لها تنهدات تنهيدة من قلبها وخرجات من طواليط لاحت ديك باكية دأولوزير فوق ناموسية بإهمال دورات عينيها لسقاطة وخرجات من لبيت مموسقاش مابقا عندها خاطر لوالو ..
_ مشات لصالة لقاتو گالس حاط يديه على لمخدة كيتفرج وتلفون فيديه گلسات فجهة خرا حاطة راسها على لمخدة وساهية فلفراغ
عماد : ( دار عندها ) كاين شي عشا
بسمة : ( بلا متشوف فيه نطقات بصوت هادئ ) تلاجة كتصفر كيف ديما الخضرة مكيناش يلاه شي 2 بيضات تما ( ساطت ) بيض وماطيشة لدرنا لغدا راه ماطيشة تقادات
عماد : صافي سيري تنعسي
ناضت لبيت وهو شاف تلفونو كيصوني وناض شافها تادخلات لبيت وسداتو وهو مشا حل باب زنقة وبقا واقف حداه وجاوب
عماد : ألو مصطفي لاباس
مصطفى : هانيا اصاحبي بيخير لمرة الفايتة فاش كان عارض علينا سعيد محضرتيش ليوم دايرين واحد الفيشطة متفلتش منها ضروري اصاحبي تحضر كولشي جاي
عماد : ( حك راسو كيخمم ) دابا اصاحبي ( شاف ساعة ) 11 هادي !!
مصطفى : ودايرين مع 12 فريسطو *** باقي لوقت حتى نتا
عماد : واخا هاني جاي
قطع كيسوط معندوش فلوس باقي مدازت ليه لخلصة وريسطو خاص ليه على الأقل شي 500 درهم فجيبو عاد يرتاح ... سد لباب ومشا طل عليها لقاها كتاكل فسقاطة وساهية فسقف .. دخل حتى نتابهات ليه وشعل ضو هز حوايج لي غايلبس وداكشي لي غايخصو وخرج وهي بقات تشوفيه بستغراب
عماد : ( رجع وقف حدا لباب ) انا خارج عرض عليا واحد صاحبي داير سبوع لولدو غير نعسي انا غانتعطل شوية
حركات ليه راسها بالإيجاب بغات غاتبقا بوحدها فدار شوية تهنا من كمارتو رجعات نعسات وهو مشا بدل عليه بزربة بسروال فصالة بالكحل او قاميجة بيضة مخلي 2 صديفات لفوق محلولين مبينين سنسلة دنقرة غليضة كتبري دار مگانة فيديه فضية من Dior وهز سباط أسود جديد شراه غير مؤخرا من Chanel .. رش ريحتو وقاد شعرو بالجيل .. لقا نضرة أخيرة على نفسو فلمراية شاف سنانو واش نقيين ودوز يديه على لحيتو لخفيفة قاداها .. لي شافو بديك الحطة لي ضرب يقول سيد عندو شي ڤيلا او شي رونج حدا لباب !
هز تلفونو وشاف بسطامو لقا فيه غير 100 درهم ساط وخرج شد طاكسي وعطاه العنوان بعد دقائق وقفو قدام ريسطو لي كان من برا كيبان فخم ونواع وشكال دطموبيلات فاخرة مبلاصيين حداه .. نزل داخل كيتفقد المكان وطلع طاج تانية وشيرو لو صحابو من بعيد مجموعين فطابلة واسعة وعريضة .. توجه عندهم مبتاسم ومعنگر عاجبو راسو سلم على كل واحد فيهم وجبد كرسي وجلس حاط رجل على رجل .. كان كل واحد فديك طبلة ضارب حطة من شي ماركة فلوس غير كيتشايرو وكونطاكط دطموبيل حدا كل واحد فيهم گاع حديتهم كان على لخدمة ومشاريع يا إما شراو بقعة فشي بلاصة مطرطقة ولا بدلو طموبيل بوحدة حسن منها شي كيبان على شي .. بعد دقائق من جلستهم كل واحد طلب شنو بغا وعماد كان شاد الموني بين يديه ومطرطق عينيه فالأثمنة كيبان ليه تماك غير 300 درهم لفوق دور فعينيه كيبان ليه كل واحد لْبْلاَ ديالو ب 400 درهم لفوق .. دارها فيد الله وخدا لي بغا معاند معاهم واخا معندوش .. حطو ليهم ليسيغڤوغ طلب كل واحد فيهم وباشرو فالأكل وصوت ضحكاتهم واصل لبعيد .. كلاو وشبعو وناضو يخلصو كل واحد بدا يجبد فزرقة حدا ختها ويخلصو إلا هو لي شاف بسطامو فيه قل من 100 درهم مرگ وهو كيشوف كلشي خلص وهو بقا واقف كيحك فراسو بإحراج وصحابو واقفين كيتسناوه يخلص وسيرفور قدامو ماد له الفاتورة لي كانت فيها 350 درهم !
_ دار عند واحد من صحابو كان حداه وهو نفس مصطفى لي صونا عليه ..
عماد : ( نطق بصوت خافت ) بروجلة واخا تخلص بلاصتي 350 درهم دوز ليا لخلصة ردها ليك
مصطفى : ( ضحك بصوت مرتافع حتى نتابه ليهم كولشي وضرب على كتفو ) هانيا اصاحبي لا معندكش فلوس نخلصو عليك بالحق دوز ليك الخلصة انا لول تفكرني
جبد من بزطامو 400 درهم وحطها لسيرفور وحرك ليه راسو بمعنى خلي عندك الباقي ... فهاد لحضة عماد وجهو رجع صفر مرضاش بتحشيمة لي وقعات لي قدام كولشي وقدام صحابو لي رجعو يضحكو من تحت دف وتحرك كل واحد فيهم خدا طموبيلتو وزاد وهو شد طاكسي راجع لدار مفقوص وكيسب فخاطرو
حطو طاكسي قدام دار مد ليه 10 درهم و نزل كيسوط او ودنيه حمرين حل لباب دغيا بساروت ودخل سد لباب بجهد حتى قفزات بسمة مخلوعة هزات راسها شافت ساعة كانت 2 هكاك ورجعات حطات راسها عالمخدة دايرة فيها ناعسة وتكمشات فالكاشة مابغاتش تنوض تسولو مالك عارفاه داخل معصب وشاعل غير من ديك زدحة دلباب يشوفها فايقة غايخوي فيها سمو كامل باش يرتاح
ضرب باب لبيت برجليه حتى تزعزع وشعل ضو عليها لاوح تلفونو فوق ناموسية وحل لماريو جبد منو سروال كيطمة وقبية بالحمر لبسهم او مشا غسل شعرو من الجيل وبقا كيدور فدار ديك نص ساعة حتى برد ورجع نعس حداها جر ليها ديك الكاشة مافيه لي ينوض يجيب اوخرا وهي كانت ملوية فيها تجبدات منها كاملة وكحزات من حداه حالة عينيها وكتسب فخاطرها خلاتو حتى نعس وناضت بشوية جابت كاشة لراسها ورجعات نعسات
فاق صباح على صوت منبه تلفون ناض عاقد حجبانو محاملش كرو على صباح وماباغي يتلاقا مع تاشي حد فالخدمة .. هز تلفون وناض بزعاف مخسر سيفتو مشا غسل وجهو وسنانو وبدل حوايجو بقاميجة بالبيج او سروال فصالة بيج غامق او سمطة بالكحل او سباط كحل .. قاد شعرو او جا يرش ريحتو وطاحت من يديه
عماد : ( بنضرات غاضبة ) قلاو** صباح كي لخرا قرعة لدين مها ب 300 درهم
على صوت زاج فاقت هزات راسها كيبان ليها فطواليط كيسب حدا المراية ناضت كتبان ليها قرعة ريحة مشتتة فلارض وريحتها مقربلة فدار
عماد : ( بصوت مرتافع ) جمعي عليا هاد زبل لوحيه
خلاها كتجمع فزاج وهو مشا هز قرعة خرا رش منها .. يلاه كان ناوي يخرج او وقفاتو بصوتها
بسمة : جيبلي معاك نص إيترو دلحليب راه آتاي تقادا !
عماد : ( دار كيشوف فيها طالع ليه دم وهضر مخرج عينيه ) معنديش سيري تركني متفرعيليش كر*ي تانتي
بسمة : ( هزات حاجبها ونطقات بهدوء ) باش غانفطر أنا ؟ نسخن لما وندير فيه سكر ولا لملحة ؟
عماد : ديري فيه لخر*ا وشربيه
زدح وراها لباب معصب ومشا شد طوبيس مخليها كتشوف فلباب بجمود
_نفس الكاسيطة ! ماعنديش ماعنديش ، هيا تكرهت و ملت وهو واش بغى يحشم و يعرف انه مسؤول عن زوجة و بيت
( بعد مرور أسبوع )
على صباح هزات جلابتها لبساتها ودفتر صحي فيديها .. كان عماد يلاه خرج من دار ستاغلات لفرصة وقالت نمشي لسبيطار لحومة نجيب لي خصني ورجع قبل مايجي .. سدات باب دار وراها وقادات زيف على راسها وتاجهات لدار خالتو كانت عارفاها مخداماش حيت حبسوهم واحد سيمانة على ود شي إصلاحات فلوزين .. دقات عليها لباب وطلات عليها فشرجم لايحة ليها ساروت
بسمة : غانزلي اخالتي بغيتك
زهرة : واطلعي يلاه حطينا فطور نتجمعو عليه
هزات ساروت ودخلات طلعات فدروج حتى لصالة ولقاتها هي وحدة من بناتها كيفطرو اما تانية كانت مشات تقرا
بسمة : ( سلمات عليهم وجلسات كتفطر معاهم ) جيت عندك اخالتي تمشي معايا لسبيطار لحومة نجيب لكينة الى مسالية
زهرة : ( شربات من كاس اتاي ) اويلي ابنيتي كينة د مية وستين ريال تمشي عليها تاسبيطار لحومة وتشدي نوبة فشموشات !! قوليها ليه يجيبها ليك بلا هاد لعداب
بسمة : ( كدهن خبز بشكلاط وبتاسمات بستهزاء ) أوا شغانقول ليك اخالتي الى غير أولويز ودابزنا عليها حلف مايجيبها ليا حتى كليت واحد صقلة على ودني تفكرت بيها حليب مي عاد بدا يحزر ومشا يجيبو
بنت زهرة حطات كاس اتاي من يديها وعينيها خارجين فيها بصدمة وزهرة حطات يديها على حنكها وتنهدات
زهرة : ( جبدات حنكها ) اويلي ابنيتي شغانقول ليك كون كان لعقل يتباع كون شريتو ليه وندير فيك خير .. كينة رخيصة وخا يجيب ليك 3 فشهر يحطهم راه مافيهم فلوس !
بسمة : لي قاتلني كنعيا نسولو فين كيمشيو فلوسك وهو يضل يقولي راه كنصرفهم فدار ( ضحكات بفقصة ) ودار راك شتيها اخالتي فرماجة مكدور فيها
زهرة : ( دورات راسها بحركة دائرة ) : أودي شغانقول ليك أبنتي صبر وصبرتيه هادشي بزاف ولد ختي خرج على راسو كيتعلق فين يتفلق كيتعاند مع صحاب مناصب كبار ف لبنكة مالين لحديد صحيح هما بفلوسهم وكيعرفو فين يخسروهم وهو وراهم كي لهبيل
بسمة : ( سرطات ديك لهضرة مكمداها فقلبها ) اخالتي صبر وصافي لا مسالية عفاك يلاه معايا
فطرو وناضت معاها لبسات عليها ملحاف وصابو ومشاو على رجليهم بحكم مكانش بعيد عليهم بزاف دخلو دنيا كانت عامرة صوت غوات دراري صغار فجيه او لي جا على ود لانسولين فجهة خرا .. كل فئة مجموعة فقنت وستاجيرات خدمتهم تقيييلة كاين گاع لي ممسوقة گالسة وشادة تلفون لقليل منهم لي خدام بنيتو .. مشات شدات صف بحال خوتها حتى وصلات نوبتها عطاتها دفتر صحي قيدات نهار وشهر فاش خداتها وعطاتها ليها ورجعات هي وزهرة شادين جماعة فطريق حتى وصلو شدات فيها زهرة تاعيات طلع تغدا معاهم ورفضات بحكم عماد وقتو هادي وقريب غايجي لدار ..تتقول فنفسها ياربي ماتغير احوال و اول حاجة دارت دخلت شربت حبة
بسمة : وخ نعرف نسعى لكينة ومانجيبش ولد ولا بنت نعذبهم معايا
يتبع...
التنقل بين الأجزاء