زواجي التالي الجزء 13 والأخير

فاليوم التاني ومع صباح بكري حطات بسمة لفطور وجلسات هي ومبيريكة كيفطرو وفنفس لوقت مجمعين ، كي سالاو خلات بسمة مبيريكة كتفرج فتلفازة كي عادتها وناضت هي كتجمع فصالون لي خلات لبارح مرون ، شطباتو وقدات سدادر ولمخاد .. مسحات طبلة مزيان وخلات كولشي مقاد وبعدها بدات تهز لمخاد وتقاد ليهم جوا .. وهي كتقاد سنسلة ديال واحد لمخدة بانت ليها شي حاجة طايحة فلور وباينة مخشية بين سدادر ومدرگة مزيان ، عقدات حواجبها وهزات سداري حتى طاح داكشي فلارض وتفتحو عينيها معاها كيبان ليها حجاب مليوح تم

بسمة : ( بصوت عالي وباين عليه الذعر والخوف ) خاااالتي خااالتي

مبيريكة : ( وقفات مسندة على لحيط مخلوعة وقربات عندها ) مالك ابنيتي شواقع

بسمة : ( كتشير ليها على لحجاب ) لقيت هاد لحجاب هنا وداري مكيدخل ليها حد وديما جامعاها مافيها والو ( بنبرة مأكدة ) هادشي جابوه ضياف ديال لبارح اخالتي

مبيريكة : ( دارت يديها على حنكها بإحراج ) ياربي سلامة ياربي سلامة شبغاو عدنا الله يحفض

جلسات مبيريكة على سداري وهزات تلفونها مدوزة رقم رقية وفلبلاصة جاوباتها

مبيريكة : ألو رقية أربي اختي ما شوفي ليا شي راقي دابا وعطيه عنوان دار بسمة واجي معاه

رقية : ( دارت يديها على ودنيها باش تسمع مزيان ) اويلي خبار الخير مالكم شنو كاين

مبيريكة : ( تنهدات بحسرة ) اختي خواتاتي شي وحدة فيهم ولا فبناتهم جاو لبارح تعشاو عند بسمة ولاحو ليها حجاب بين سدادر وزادو

رقية : ( شهقات مخلوعة ) أويلي متقوليهاش گاع هدا حسد ؟ ياك ماشي حد خر ويصحابك هما لا تصدقي قاطعة هضرة معاهم على والو

مبيريكة : ( بنفي قاطع ) لالا ارقية دريا مكيدخل عندها حد وزايدون خواتاتي وبناتهم انا لي كنعرفهم كي يجيو فشي مناسبة ولا جماعة يبقاو يدورو فعينيهم وسم ولحسد ضاهر عليهم غير وكان كندير عين شافت وعين لا مابقا لينا والو فدنيا ومابغينا نقطعو صلة الرحم

رقية : ( بأسف ) الله يهدي ماخلق اختي هادوك مافيهم تيقة انا واحد نص ساعة ونجي عندك ونجيب معايا راقي سي محمد

مبيريكة : ( دايرة يديها على راسها وقلبها واكلها حشمات من بسمة ومرضاتش تجي هاد لفعلة من خواتاتها ) واخا ارقية الله يسهل عليك

قطعات معاها وهزات عينيها فبسمة لي كانت دايرة يديها على خصرها وكنشوف مخنزرة فلحجاب

مبيريكة : عيطي ابنتي على هدى طلع ويجي حتى فريد حشومة يجي راقي ودار يكونو فيها غير لعيالات هو بعدا راجل يدوي معاها

بسمة : ( حركات لها راسها بالإيجاب وتوجهات لباب ) واخا

نزلات لتحت حتى عيطات عليهم وطلعو كاملين مخلوعين لفوف وبعد دقائق قليلة جا راقي ومعاه رقية شاف داكشي ورقا دار وقرا بعض الآيات القرآنية وفالأخير طمأنهم أنهم بيخير ومغاطرا حتى شي حد .. خدا معاه داك لحجاب ونزل معاه لتحت فريد يخلصو وفنفس لوقت كان تلفونو كيصوني من رقم ديال صلاح

دايرة يديها على كرشها وكتشوف بصدمة ناحية بسمة لي كانت كتعاود ليها شنو شافت

هدى : ( حطات يديها على بطنها بخوف ) ياربي سلامة اختي وصلنا لسحور گاع الله يحفض اويلي على سم ولحسد

بسمة : ( هازة فيديها إلياس وكطبطب عليه ) هانتي تشوفي بنادم تصرفي فيه لخير يرجعو ليك ب بومزوي كون غا درت ليهم شي حاجة

مبيريكة : ( تنهدات ونطقات بإعتذار لبسمة ) سمحي ليا ابنتي والله مكنت عارفاهم غايوصلو لهاد مواصل ولكن لغلط مني من ليوم مايبقاو يوصلوك لانتي ولا هدى ونا غانشد رجلي عندي ( دارت يديها على حنكها باقي صدمة مأثرة عليها ) وصلنا گاع لتخريب بيوت ناس تيقار دابا

رقية : ( كتمسد فرجليها لي منفوخين وكيضروها ) مكاين ماحسن من تيقار هاد لوقت مابقات تيقة

مبيريكة : ولاهي...

قاطعها صوت هاتفها كيرن ، هزاتو وبقات لمدة كتشوف فنمرة حتى حمارت ! عرفاتها ديال ولدها من الأرقام لخرة .. تنهدات عرفات لخبار وصلاتو وملقات مادير من غير تجاوبو

مبيريكة : ( حنحنات ) ألو ولدي

صلاح : ( زمجر بغضب ) ديك تريكة لقح•اب وصلو لسحور

مبيريكة : ( زيرات على يديها حتى بياضو عارفاه علاش قاد ) اولدي مديرش فبالك دازت على خيرك ومابقاو يوصلونا ولا حنا نلحگوهم

صلاح : مي راك عارفة يدي واصلة ! واخا فلحبس غانشتت زمر كامل مابغاوش يوقروني كنتبرا فدينمهم ويرجعو يديرو كبر منها مغايتهناو حتى نقتل شي واحد

مبيريكة : ( شهقات مخلوعة خايفة عليه من شي تهمة وخرا ) اولدي غير هادي عمر باقي ميلحگو عدنا دار مديرش راسك فيهم

صلاح : ( تنهد بغضب ) لا شفت كمارت شي حد كدور بيكم ميلومو غير راسهم الله ينعل بوها عائلة لا كانت غير هكا

بعد مدة وهي كتهضر معاه وكتحاول تهدنو وتقنعو قطعات معاه لخط وهي شادة على قلبها من لخلعة عارفاه عصبي وفاش كيتعصب مكيبقاش يقشع قدامو وخا يعرف يلوح راسو فالعافية لمهم يبرد

مبيريكة : ( هزات راسها فيهم ) الله ياخد فيهم لحق باغيين يشتتو شمل ( هزات يديها كدعي من قلبها ) ياربي لي دار هاد لمصيبة بغيتو مايشوف نهار زين فحياتو وصحتو ديما تبقا لور لور ( تكات على لفوتوي بعياء ) مشاكل فوق راسنا وبغاو يزيدونا

هدى : ( تبعات لعين لبسمة لي خدات باف وطلقات منو صورة لبقرة ونقصاات صوت شوية ) هادو غا فعايل خالتي سالكة امي

مبيريكة : مابغيت نهز تقليد حد ولكن تانا قلت نفس لحاجة من نهار صلاح دار فبنتها وهي وياه مكيتحاملوش

بسمة : ( طالقة وذنها ) علاش دار فيها

هدى : درية عندها مدودة وكانت تموت على صلاح كدير سبة بيا وتجي تبات عدنا فدار كتبقا تحلون عليه ومها كل مرة تهضر مع مي وتحشي ليها لهضرة ديال نزوجوهم راهم مواتيين بضحك وسيدة حاطة لعين عليه من زمان

مبيريكة : ( هزات يديها بالستسلام ) الله يهدي ماخلق

هدى : ( شداتها ضحكة ) واحد نهار ابسمة شافتو طالع لدار لفوق تبعاتوو كتعوج وجابت ليه لعشا زعما ( حبسات ضحكة ) نهض فيها وقال ليها باقي توصلي عندي نقطع لمك رجليك هههه ناري درية مرضاااتش

بسمة : ( عاد ضحكات وتنفسات بعد ماسمعات هضرتها .. بقاات ساكتة كتسمع لها حتى نطقات بلا ماتشعر ) عبر عليها

هدى : ( غمزاتها ) ناس كيغيرو

بسمة : ( ردات ليها لغمزة ونطقات بلا متحشم ) وراه راجلي هداك اختي كون لقاها قدامي دابا نتفاهمو ( غوبشات ) ولاهيلا سيدة جايا بوجهها حمر ونا نقول مالها بغات تاكلني بعينيها لبارح ياك بعدا هي لي كانت لابسة جلابة خضرة ؟

هدى : ( بتأكيد ) وي هي

بسمة : ( خسرات سيفتها ) لبارح دور دور وتخنزر فيا وعينيها على عنقي او رجلي تقول عمرها شافت بنادم ياربي سلامة رديت لها لبال غير طمرت

مبيريكة : ( تنهدات ) اودي مابقات تيقة فلعائلة مدخلينهم حتى لقاع دار وماخلينا ما جبنا ساعة هما ناويين علغدر وباغيين يشتتو شمل ولادي واحد مسكين فلحبس آش بغاو عندو

رقية : ( دارت حركة دائرية براسها ) أحياني مابقاو يخافو من لي خلقهم عاد غايشوفو بنادم لي مريض ولي مسكين مهموم ومقاد على صداع .. الخير يديرو بنادم فراسو فهاد لوقت

ناضت بسمة لكوزينة طفات على طاجين وحطات لغدا فوق طبلة وجابت داكشي لي بقا من لكوزينة وهزات ولدها فيديها بعد مافاق ..

بسمة : ( مدات لخبز لهدى تقطعو ) دوقي طاجين وردي عليا عالله يعجبك راه درت فيه لحار كيف بغيتي ونقيت لحوت مزيان

هدى : ( كتشوف فطاجين بريوگ سايلين احسن حاجة عندها هي طاجين بالحوت خصوصا داك لكبير ولي لحمو بيض ) باينة زوين الله يعطيك صحة ( داقت منو كتبنن ) غاديري باقي ديك لحليوة نعاونك فيها ولا ناقصاك شي حاجة نوصي فريد يجيبها ليك

بسمة : ( حركات راسها بنفي ) لا كولشي عندي فدار ونافعني يوتيب وليت نتعلم حسن بقالي دابا غير نشوف شي سونطر خاص نتعلم شي شهر ولا شهرين دغيا .. حمد الله غادا مزيان ولكن لاتعلمت فسونطر غانتطور كتر

هدى : الله يسهل لقيتي شي واحد ولا باقي

بسمة : ( حركات راسها بالإيجاب ) وي عجبني واحد واخا باقي ممشيت ولكن كولشي كيعاودو عليه زوين

مبيريكة : ( بتاسمات لها ديجا كانت عاودات ليها شنو باغا دير ) إوا الله يسهل ابنتي

بسمة : امين اخالتي

_______

فنفس توقيت ديال ديما كانت شادة تلفون فيديها وليد لخرة رضاعة مخلية إلياس يشرب لحليب ..

بسمة : أودي أنا ملحت عليهم لباطل مكيعرفوني مكنعرفهم غير ديك دار كل مرة جايين فأي مناسبة بسباب هكاك مابقيت باغا نبقا تم والله وعلم آش دايرين فداركم الله يحفض

صلاح : تريكتي هاديك مكاينش لي كيعرفهم قدي أنا غا داير عين شافت وعين لا على ود لواليدة أما نخرج فيهم طول وعرض ( تنهد ) عمرهم يوصلو باقي لدار يدق عليك شي حد علميني ويلا جاو عند هدى گوليها ليا حتى مي ميوصلوهاش باقي دابا راك عازلة بوحدك فيما لقيتي راحتك انا معاك

بسمة : ( تنهدات ) صافي

( حنحنات ) صلاح كنت ديجا قلت ليك بغيت نقرا باتيسري فشي سونطر لقيت واحد وعجبني وقلت نمشي نشوف .. شنو باليك ؟

صلاح : ( تفكر آخر محادثة بيناتهم فاش قالتها ليه ) لا كان الإختلاط مابين رجال وعيالات لا !

بسمة : لا لا غير بناات وأصلا مغانطولش فيه غير مدة قليلة وصافي ديجا عندي خبرة فهادشي غير بغيت نزيد نتعلم كتر

صلاح : واخا إن شاء الله إلا خصاتك شي حاجة قوليها ليا ويلا محتاجة لشي حاجة وصي فريد عليها

"بعد شهرين"

حاطة قدامها كيك كبير مزوقاه بتدقيق وبالحترافية يديها خفاف وبقوة ماكتقاد حليوات ديما وكتشكل وتصنع لي بغات ولات يديها خفيفة ورجعات تصرع أي حاجة حطاات فيديها يديها .. خدات ورقة كبيرة من لفريگو وحلاتها بشوية وهي مبتاسمة كانت مقادة وريدة بشوكولا أبيض وأسود هزاتها بشوية باش متهرسش وحطاتها لوسط دارت فجناب سيگار ودورات على لكيك قطع من شوكولا لأسود لمر .. وهي مركزة مع عملها جات وراها بنت وفيديها تلفون

البنت : ( كتشوف ناحية لكيك بإعجاب ) تلفونك كيصوني ازين

بسمة : ( حيدات لكاسك من على ودنيها وشدات من عندها تلفون ) واخا شكرا

مسحات يديها وخرجات على برا وجاوبات دغيا بعد ماطلعات ليها نمرة مبيريكة فشاشة

بسمة : ( نطقات بخوف ) ألو خالتي ياك إلياس مابيه شي حاجة ؟

مبيريكة : لا ابنتي غاتهناي عليه راد شاداه رقية بغيت غانعلمك هدى قبطها لوجع وفريد جابنا لكلينيك **** لحقي علينا

بسمة : ربي معاها اخالتي هاني جايا دابا

قطعات دغيا وجرات لداخل خدات صاكها وحيدات طابلية لي كانت لابسة وخرجات ركبات فطموبيلتها ونطالقات نيشان لكلينيك لي كان قريب ليها ومبعيدش بزاف

كتمشا بسرعة وعينيها على لغرف كتقلب على غرفة هدى ، قبل متوصل ليها تطلقات غوتة زعزعات داك لكولوار .. خرجات بسمة عينيها وتبعات صوت موقفات حتى قدام لغرفة لي كانت فيها مبيريكة شادة راسها وفريد كيهدن فهدى لي كانت كتعض فيديها وتبكي بالوجع والحريق

بسمة : ( قربات عندها بزربة كتفحصها بعينيها ) هدى بيخير واش غاتولدي دابا

هدى : ( عرقانة وقربات تسخف بالبكا ) اميمتي غانموت لوجع لوجع ابسمة لوجع

بسمة : ( هزات راسها ففريد ) شقالت ليها طبيبة

فريد : ( الخلعة متمكنة منو ) سقاية طرطقات ليها فدار وقالت لينا لوالدة كتفتح ليها خاصها تصبر شوية وغادي يديوها تولد

هدى : ( شدات فشعرها بجهد وتكات على لحيط ) اميمتي مابقيتش قادرة ( كتنهج ) اميمتي لوجع غانموت

مبيريكة : ( شداتها لبكية من حالة بنتها ) الله معاك ابنتي صبري صبري دابا كولشي يفوت دابا كولشي يفوت

دازو ساعات وهدى على نفس لحال تجلس شوية وتنوض تبكي شوية .. لوجع قتلها وتهلكات قبل ماتولد ، فريد شاد ليها لخاطر وجالس حداها مامفارقهاش ومبيريكة وبسمة تاهما نفس شيء ..

دخلات عندها طبيبة وخرجات بسمة ومبيريكة على برا حتى قلباتها ولقاتها واجدة تولد عيطات على لفرمليات باش ينقلوها لغرفة لي غاتولد فيها وفريد تبعها وبسمة بقات مع مبيريكة كتمشا معاها خطوة خطوة حتى وصلو ..

بسمة : ( شارت لمبيريكة تجلس فكراسي لإنتضار ) خالتي جلسي رتاحي ومتشطنيش مع هدى إن شاء الله تولد بيخير

مبيريكة : ( قلبها عند بنتها ) إن شاء الله ابنتي

( شدات لها فيديها ) سيري ابنتي عند ولدك بلا منشدوك هنايا

بسمة : ( حركات راسها بنفي وهزات تلفون ) أنا نصوني على رقية ونطمأن عليه مغارتاحش الى مشيت وخليت هدى

دوزات لخط لرقية وعينيها على باب لغرفة لي كان مسدود ولي من وراه كان فريد شاد فراسو وكيشوف فهدى بألم لحالتها

هدى : ( كتبكي وتعصر ) ما ما قد يتش

فريد : ( شد فيديها وزير عليهم ) حاولي اهدى مابقاش بزاف

طبيبة : ( تنهدات كتماصي ليها كرشها ونطقات بصوت عالي باش تسمعها هدى لي كانو عينيها منيمين ) زحمي زحمي اهدى زحمي

مابقاتش قادرة تحمل باقي سدات عينيها وغابت بتعب ، فشلات وجهد مشا ليها لساعات وهي كتوجع وتبكي طاقتها مشات وتعب تمكن منها

فريد : ( وقف عينيه خارجين ) آش وقع ليها آش وقع ليهااااا !!!

طبيبة : ( خنزرات فيه وشيرات ليه على لباب ) الى كنتي غادير هاد لحالة خرج على برا تعاون معانا ماشي تغوت سيدة فشلات ويلا بقات على هاد لحال لبنت غاتموت وسط كرشها

قربات عندها طبيبة كضرب على خدها بلطف وهدى معافرة تحل عينيها .. بعد ثواني حلات عينيها فيها حمرين ودموع كيطيحو منهم

طبيبة : ( تنهدات بأسف لحالتها ) حاولي تزحمي مابقاش بزاف تنفسي ومتزيريش على راسك

تنفسات بقوة وزحمات زحمة وحدة بجهد لي عندها هزات راسها لفوق وزحمات حتى لعروق تطراساو فعنقها او وجهها رجع كي جغمة دم بعدها رجعات سدات عينيها بفشلة وطبيبة شدات لبيبي وقطعات لحبل سري وضربات على مؤخرتها ضربات متتالية حتى تسمع صوت بكائها فلغرفة ..

دارتها لفرملية فإيزار بيض وعطاتها لفريد لي كان معلق عينيه فيها .. كي شدها بين يديه حمرة وصغيورة باسها فوق راسها وتنهد براحة

فريد : ( هز عينو فهدى لي كانت حالة عينيها بزز وكتشوف فيهم ، قرب منها بنتها وحط ليها وجهها صغيور على حنكها حتى تبسمات ) ها ماما

هدى : ( تبسمات بحنان ونطقات بصوت خافت ضعيف ) خليها حدايا شوية ..

____ ____ ____

مع أذان لعشاء كانو مجموعين فغرفة عندها هي متكية وشادة بين يديها بنتها كترضعها وجنبهم فريد جالس على كرسي وبسمة ومبيريكة وخالة فريد جالسين فوق فوتوي قبالتها

خالة فريد : ( الفرحة غاتنقز من عينيها ) على سلامتك ابنتي والله يحفض ليكم لبنيتة ياربي

هدى : ( بتاسمات لها ) أمين اخالتي

وقفات خالة فريد وقربات عندها باست صغيورة فوق راسها وهدى بعد مارضعاتها مداتها ليها حيت حسات بيها بغات تهزها ، شداتها عندها وباستها فحنيكاتها بزوج ومدات لهدى بواطة طويلة شيك وخدات وحدة صغيورة وفتحتاتها او خدات منها گورميط غليضة شوية ديال ذهب او صغيورة ديال دراري صغار

خالة فريد : ( بالبتسامة واسعة ) هادي گورميط لبنت ولدي الى سميتوها كتبو عليها سميتها

هدى : ( فتحات بواط لي عطاتها ولقات فيها سنسلة غليضة ديال ذهب بديكور غزاال وطوندونس .. تبسمات هدى عجبها لكادو ونطقات حشمانة ) شكرا اخالتي عدبتي راسك

خالة فريد : متقوليش هكاك راك بنتي ختاريتهم شهر هدا قبل متولدي وغير حطاهم حتى وصل هاد نهار ( باست يديدات صغيورة بحب ) ماشاء الله كتحمق الله يحفضها ياربي ( هزات عينيها فهدى ) شنو ناوية تسمي هاد لقمر

هدى : ( نقلات نضرها لفريد بحب ونطقات بفرح ) رِتَاجْ

داز أسبوع رتاحت فيه هدى شوية ، تربية كانت تعاونها مها فرتاج وتقول ليها شنو ندير وكيفاش تصرف وتعامل معاها وفريد ممخليش من جهدو لدرجة سيمانة كلها هو لي كان كيهز بنتو فنصاصة ليل ويراري بيها حتى تنعس ويخلي هدى ترتاح حيت دازت عليها فلولادة ولعداب لي شافتو منساهش باقي قدام عينيه ، داكشي علاش كان ونِعم زوج لها راد ليها ولبنتو لبال والأيام لولة كان مخلي خدمتو لدراري وهو جالس معاها ويعاونها فشقا دار ويتهلا فيها ويحضيها فماكلتها ويعاونها تبدل حوايجها .. أي حاجة تخصها كان هو لول يديرها ومتحتاجش تهضر هي نهائيا ..

بسمة مدوزة نهارها فسونطر مركزة مع شغلها وكتحاول تعلم دغيا باش تشد دبلوم ديالها وتخدم على راسها ودير داكشي لي عجبها .. وعلاش لا ! ترسم مسارها وتمشا عليه تحقق ذاتها وهي أم ، طول هاد لمدة كانت جدية ودغيا كتعلم وكي ترجع دار تشد ولدها من عند رقية لي رجعات مربية ديال إلياس وبسمة كتخلصها لشهر بحكم مدة طويلة لي كتخدم فدار صلاح ومبيريكة لي كتعرفها وحتى هي شاهدة على أخلاقها وحسن نيتها وطيبوبتها فقررات تخليه غير عندها ومتعطيهش نهائيا لشي مربية ولا تجيب شي وحدة لدار ..

علاقة بين صلاح وبسمة نهار على نهار كتزيد توطد وتبان أو ولا شيء أكبر من لحب بيناتهم ودليل مواقفهم مع بعضهم وغيرتهم لبعضهم وحتى إهتمام لكبير لي كل واحد كيعطيه لتاني ، لحوار بيناتهم ولاشيء أساسي وشحال من حاجة تغيرات فيهم بسمة مابقاتش كتخاف منو ولا كتجيها رهبة بالعكس ولات تشوفو نصفها تاني وتغيرات نضرتها عليه .. المسافات بين جوج بعد لخطرات كيكونو شيء إيجابي لتطوير علاقتهم ولتوضيح لمشاعر لي كيكنها كل واحد لثاني !

مجموعين على طبلة كبيرة فصالون موجدة بلي تشهاتو نفس من بسطيلات ومشاوي ... وشلايض وعصائر ودجاج مقاد بطريقة دلعراسات كيف تشهاتو هدى ولي وجداتو بسمة ليها

مبيريكة : ( كبات لراسها عاصير دليمون ونطقات براحة ) مكاين ماحسن من سبوع فحال هكا كون عرضنا على خواتاتي وجابو تريكتهم كون ماحنا فخير

خالة فريد : لباب لي يجي منو صداع سديه مافيهم خير وماشي ديال لعراضة لاهم لواحد يدير سبوع حدو قدو ويعرض غير على لحباب الله يجعل لبركة وهدى كون بغات سبوع حتى فقاعة فريد يديرو ليها

هدى : ( حركات راسها بنفي وهي شادة فخض ديال دجاج وكتاكل فراحتها ) معنديش مع قوة تجمعات وسبوع لي يكون فيه لإختلاط بلاش منو حتى هكا زوين معندي مندير ببنادم براكا نتي اخالتي ورقية ومي وبسمة هدا هو رباح

بسمة : ( هزات كمام جلابتها باش ميتوسخوش ونطقات وهي كضحك ) يسيقو لخبار يبقا فيهم لحال هههه

مبيريكة : ( حركات راسها بحركة دائرية ) على هادي فيها شك أبنيتي غايقولو ليك ولدات لبنت ومعرضتي علينا

رقية : واشنو لمعمول ؟

مبيريكة : ( تنهدات ) غانشوف كيندير نعرضهم عندي فداري ميوصلوش بسمة ولا هدى نحط لي قسم الله وينوضو وسبوع نقول ليهم لبنت مريضة مدرنا والو ولفاهم يفهم ( دارت يديها على حنكها ) يسيق ليا صلاح لخبار يدير شي مصيبة غا داك نهار هو يحلف ونا نحلف عمر يحطو رجلهم عدنا ودابا غانجيبهم عندي حتى لدار

بسمة : ( دارت كتشوف فإلياس ناعس على سرير صغير وكيجر فسكاتة ورتاج جنيو ناعسة ) مغانقول ليه أنا والو غير ميوصلهاش ليه فريد

هدى : توصل ليه من شي قنت آخر خويا ونعرفو غير لدار عين شافت وعين لا وسكت

تعشاو مجموعين وناضت بسمة هي ورقية جمعو طبلة ورجعو جابدين طعارج وطارات ورقية هازة فيديها صينية ومعالق .. حنحنات مبيريكة وبدات تغني بشلحة ولكل متبع معاها ويعاود مورها حتى من بسمة لي ولات تنطق بيها شوية وحتى لفهم رجعات تفهم بحكم مدة طويلة لي كانت جالسة معاهم فيها ..

بقاو على داك لحال حتى عياو وناضو كيضحكو بسمة هزات ولدها وطلعات لدارها تنعس وخالة فريد خرجات موصلها فريد حتى لدارها وبقات هدى مع مها ورقية حتى شدو ليها طاكسي راجعة طل على وليداتها ..

هزات هدى رتاح لي كانت كتبكي وجلساتها فوق ركابيها وعطاتها صدرها ترضع وعينيها على يديها بإعجاب عجباتها لحنة لي دايرة

هدى : ( خسرات سيفتها بألم من لعضة لي عضاتها بنتها ) مي باقي عندك نمرة دنقاشة لي نقشات ليا ياك

مبيريكة : ( عينيها مع لبنت ) كاينة كاينة ردي لبال لدرية لا يشرگ ليها لحلي...

باقي حتى ماكملاتها شرگ لبنت لحليب وتجيفات كتكح حتى رجعات حمرة ، هدى تخلعات وبقات غير كتشوف ومها ناضت دغيا تعتق لموقف

مبيريكة : اويلي واينتا غاتعلمي عودي ردي لبال مع لبنت ومتخليش ليها صدرك نتي شديه

هدى : ( رجعات صفرة دم هرب من وجهها ) قلبي مشا وجا

"بعد مرور أيام"

بجوج صباع شادة فجلابتها من لتحت لاتوسخ او واقفة فلكوزينة رادة لبال مع طيابات لي كل وحدة حاضية شغلها وطالقة يديها كتسربي

بسمة : الى قربتو تساليو عيطو عليا نجي نعاونكم ونجيب طباسل

وحدة من طيابات : واخا زين رتاحي قربنا نساليو

تاجهات لصالون ودخلات هازة زنافرها لسما من لي دخلو ماسلمات مع شي حد حدها لقات سلام من بعيد ومحاشتها لحد فعلتهم ولحجاب لي كانت لقات فقلب دارها ماتسرطش ليها ومدوزاتوش دارت بوجه غير مبيريكة وسكتات وقالت يدوز هاد نهار على خير ويتكركبو وهما كانو جالسين ولي جابت شي ولد شداتو حداها وسقلو عارفين شنو دايرين ومن سلام ناقص لي دارو معاهم عرفو شنو كاين

ملعيد : ( عينيها على هدى ) إوا أبنتي معرضتي علينا لسبوع

مبيريكة : ( بجدية ) مدارت سبوع أختي لبنت عندي مريضة ومقادة على جماعة وأصلا سبوع تهز منو غير لعين معدنا منديرو بيه لاهم غْديوة دغيا الله يجعل لبركة

سالكة : ( حنحنات ) واحد خالة راجلك اهدى مكايناش ياك لاباس مسكينة

مبيريكة : ( نطقات قبل ماتهضر هدى ) مريضة مسكينة الله يشافيها مقداتش تجي

ضحكات بسمة بالحس حيت مبيريكة مكانت حاملة فيهم شعرة خصوصا سالكة لي كانت فاهمة قصدها وعارفاها علاش كتقلب من صباح وكلامها بصريح لعبارة كتمعني لها على سبوع لي يكونو داروه ومعرضوش عليهم حيت عارفة هدى مستحيل دير شي مناسبة عندها فدار ومتعيطش على خالة راجلها

سالكة : مسكينة الله يشافيها ( دورات عينيها ) منشوفوش طفلة

هدى : ( بالبتسامة صفرة ) خداها باها حتى يجي

سقلات سالكة وهنا تأكدات أنهم شافو لحجاب لي حطات ليهم فدار وعرفات هدى خايفة على بنتها ومابغاتش تعطيها ليهم يشوفوها

بسمة : ( خنزرات فبنت سالكة لي عينيها كانو كي لقرطاس عليها ) مالك اختي شفتك مني دخلتي ونتي مخنزرة ياك مابيك شي حاجة .. آش سماك الله بعدا

ربيعة : ( طلعاتها ونزلاتها ونطقات فوق نفسها ) ربيعة

( دام صمت لثواني ) والو اختي غير لقيتيني مريضة ومعندي خاطر

بسمة : ( ردات شعرها لجنب ودارت رجل على رجل ) الله يشافيك احبيبة

سالكة : ( نغزات بنتها وخنزرات فيها حيت عارفاها لسانها سابقها .. ضحكات كتلطف لجو ونطقات وعينيها على بسمة ) غا كيضروها حلاقمها وكيديرو لها سخانة

متسوقاتش ليها بسمة وناضت بعد ماسمعات طيابات كيعطو عليها دازت عندهم ونزلات طباسل .. قادو دجاج بوحدو او لحم بالبرقوق فجوج طباسل كبار ديال طاوس او طباسل ديال ديسير او ديال سفة او بسطيلة ديال دجاج ولحوت فجهة تانية ..

هزات طبسيل وعاونوها طيابات لي كانو جوج خداو كولشي حتى من لعواصر او لموناضات ونزلات مع لعيالات حتى لتحت ورجعات طلعات لفوق لقاتهم تجمعو كيتغداو وكيشكرو فطيابهم

بسمة : ( بالبتسامة صفرة ) زيدو بسم الله

ملعيد : ماشي نتي لي طيبتي هاد لمرة ياك

دارت فيها شوفة ديال واخا إن شاء الله دابا تاكلوه مشافت منهم غير لويل لكحل وباقي تنوض طيب ليهم وتخشا فلكوزينة من صباح حتى ليل على ودهم

بسمة : ( كتقطع فلخبز ) لا جبنا طيابات انا عندي ولدي نقابلو ومريضة مقاداش

ملعيد : ( طلعاتها ونزلاتها مكيبان ليها حالة مرض فيها بالعكس سيدة مقادة ) فينو ولدك ياسين ولا يونس ولا معرت شديك سمية سميتوه

بسمة : ( هزات فيها حاجبها ) إلياس إلياس

ملعيد : ايه إلياس

بسمة : ( كتاكل بشوية عليها ممسوقة لحد ) عند فريد خرجو مع رتاج

ملعيد : مم إوا خليه مسكين يفوج ماحد لقا فريد يخرجو راه إلى بقا فدار يعود ديما يبكي ليك

بسمة : مايحتاجش يخرجو شي حد عندو مو ومكيبقاش فدار وقت ما رشقات ليا كناخد طموبيلتي ونخرج ولدي

مبيريكة وهدى ساقلين مخليينها دوي وتقول مابغات وسالكة ضاربة طم شوفات ختها مبيريكة معجبوهاش الجو كان مشحون وزاد تضغط ملي سمعو كلام بسمة وعرفو عندها طموبيل ومن تلفون وذهب لي مزرزرة بيه عرفو سيدة عايشة فالخير ومناقصها حتى خير ولو راجلها فلحبس ولكن فحال إلى حداها خاصها غير تقول بغيت ويحضر كولشي حدا رجليها ..

ماتنهدات مبيريكة براحة حتى تفك لمجمع وخرجو وخلاوهم غير بوحدهم راس فراس ، قامت بالواجب وتهنات وحلفات من هاد نهار عمر شي وحدة فيهم توصل بابها ولا تعتب عندها ..

مبيريكة : ( جلسات ودارت يديها على ركابيها ) اففف الله يخليهم بلخلا

بْيَد شادة رضاعة فيها لما وعاطياها لإلياس لي حاطاه فوق ركابيها وباليد تانية شادة تلفون كتسنا إتصال ديال صلاح .. لدقائق وهي على داك لحال كتسنا حتى عينيها بداو كيطفاو وجاها نعاس ، هزات عينيها فساعة ولقاتها لوحدة دليل حكات عينيها باش تصحصح وحطات إلياس بلاصتو وقداتو باش ينعس حيت غفا ليها بين يديها ، خدات تلفونها ودوزات رقمو وناضت حدا شرجم مبعدة من حدا دري باش متفيقوش

بسمة : ( عاقدة حواجبها وكطرطق فصباعها جات عجب مصونا عليها مصايفت ليها ميساج .. قطعات ورجعات عيطات ونفس لحاجة مكطلع ليها لا بواط ڤوگاال لا راه كيهضر مع شي حد نمرة كدوز عادي ومكيجاوبهاش ..

رجعات قطعات من جديد ولاحت تلفون مخنزرة ) شهاد زمر

هزات تاني تلفون ممفاكاش عقل كيقول ليها لا راه مابغاش يجاوبك وعقل كيقول ليها كاينة شي حاجة وعندو سبب ولا طاري شي حاجة .. ستغفرات الله ودعات ميكون واقع باس ونْحات الأفكار السلبية من بالها حيت ملقاتش شي سبب لي يخليه يتجاهلها وهو كل نهار كيدوي معاها ويسول فيها وماطرا بيناتهم حتى خصام ولا مناقشة لي يخليه يقطع لكلام بداك شكل .. بعد مودة وهي كتصوني تفتح لخط

بسمة : ( بقلق ) صلاح من صباح ونا نصوني علاش مكتجاوبش

صلاح : ( تنهد ونطق بكذب و بصوت باين فيه لعيا ولمرض ) كنت ناعس مشفتوش

بسمة : ( مركزة مع صوتو ) مريض ياك ؟

صلاح : ( بنفي ) لا مابيا والو

بسمة : ( هزات حاجبها عارفاه كيكذب ) دير أبيل ڤيديو

تنهد وبقا ساكت كان عارف الى جاوبها غاتقول ليه نفس لهضرة داكشي علاش فضل مايجاوبهاش ولكن مع إصرارها المستمر وعدد الإتصالات لكتيرة لي طلعات ليه فتلفون خلاه يجاوب بلا هواه

صلاح : ضلام ابسمة آش غاتشوفي ( كحب بجهد ) افف

بسمة : ( مخرجة عينيها ) هادي هي مامريضش وزايدها ماباغيش دوي معايا

صلاح : الله يهديك راه غير ضاربني لبرد شوية وصافي وضلام حتى الى صونيت عليك مغاتشوفي والو

بسمة : ( بإصرار ) مشغليش دير دابا أبيل ڤيديو

دار لها خاطرها وصونا ليها أبيل ڤيديو وهي فلحين جاوبتو وكيف قال مكيبان ليها والو غير ضلام وغير أشعة خفيفة جاية على كتفو وصافي

بسمة : ( مطرطقة عينيها كتحاول تشوف وجهو ) باش مريض شنو طرا ليك

صلاح : قلنا ليك غير ضربني لبرد تروحت شوية وصافي

بسمة : ( كتشير ليه جنبو ) كاينة بريكة حداك تم ياك راهيا حدا كتفك هزها وشعلها جنب تلفون نشوف وجهك

صلاح : ( قهقه بصخب ) لا حول ولا قوة إلا بالله وزعما مامفاكاش

هزها وشعلها كيف قالت ليه وهي بقات كتحقق فوجهو وفحنوكو ونيفو لي حمرين باينة بلي طالعة ليه سخانة

بسمة : طالعة ليك سخانة أشلاهبي وكضحك عليا كرضع صبعي أنا

صلاح : ( بتاسم وغمزها ) حتى حوايج خرين طالعة ليهم سخانة وخاصهم بسمة

بسمة : ( حركات راسها بحركة دائرية ) أحيااني عليك شربتي دوا ؟

صلاح : ( حرك راسو بالإيجاب ) شربت دوا وشافني طبيب غاكوني هانيا مكنتش باغي نجاوبك غير على ود هاد لونكيط حيت صباح غانصبح بيخير وديك ساع ندوي معاك

بسمة : ( بتاسمات ) ممم كاينين فكوميسارية حنا ( فرفرات بعينيها ) وشكون كره هاد زين يدير ليه لونكيط

صلاح : ( غوبش فيها ) راني مريض لدلمك مقادش على ما بارد تجمعي

بسمة : ( خنزرات ) اسبحان الله مالي شقلت بسلامة دغيا اخويا كديماري

صلاح : ( بتاسم ) كتمشي لسونطر

بسمة : اه كنمشي وغاتهنا بلا متبدا عليا بالأسئلة كيف ديما معدناش دراري تم

صلاح : ( هز فيها حاجبو ) عمر تبسل عليك شي حد ؟

بسمة : ( حكات ودنيها ) لا كنخرج ورجع نيشان لدار

صلاح : ( متبعة حركة يديها ) ولكدوب لاش ديك لودن عندك كتحكيها وقت ما كنتي كتكذبي

بسمة : ( حمارت حيت قشعها ) احم لا

( عوجات شفايفها ) أصلا أنا كنبغي غير صلوحة ديالي

مع نتهاء أذان الضهر كانت نازلة فدروج نحو شقة هدى ، وقفات قدام باب دار ودقات وحلات ليها هدى وهي مشعكة وبنتها هازاها فيديها كتبكي ..

بسمة : ( دخلات وشدات من عندها ريتاج ) مال حبيب خالتو كيبكي ممم

هدى : ( طاحت فوق لفوتوي كتنهد ) شيباتني اختي آش بغيت شي ولاد براكا راسي وباقي زايد عليا

بسمة : ( قهقهات بصوت مرتفع ) هاي هاي هاي باغا تولي أم بالفم طررر باقي مشفتي والو ابنتي

هدى : سعداتك أختي إلياس كبر شوية واخا يلاه شهورة ولكن شاد فراسو وأصلا دراري دغيا كيكبرو مشاء الله على لبنات

بسمة : دوز عليا تانا لعداب فلول كنبات بلا نعاس ولحديت دابا غا صبر وصافي وحتى رقية ليامات لولة مكانش كيحملها دازت سيمانة لولة بدا يولفها شوية إوا كنخليها عندو واحد شوية ورجع كنجري تاني

هدى : ( حكات راسها بملل ) غاتمشي لسونطر

بسمة : ( باست رتاج فحنكها ) وي غدا دابا دزت عندك نعطيك مقادير ديال ديك لحلوة لي وصيتيني عليها الى معندك ميدار نوضي جربيها

هدى : واقلة داكشي لي غاندير نلهي راسي شوية أما دار طلعات ليا فراسي وفريد مخلاني لا نرجع نقرا ولا ندير شي حاجة نتلاها فيها

بسمة : طلبيه ولكن ماشي دابا حتى تكبر رتاج راها باقي صغيرة وماشي تاع مربياة

هدى : ( حركات راسها بسلب ) تت أحياني على هداك نجبد ليه لموضوع يقلبو ليا هداك نَمرود صافي

بسمة : ( قرباات عندها ومدات ليها بنتها ) واخا يكون راسو حجرة كوليه ليه ومنخافش عليك راه نتي لي غاتعلميني فهادشي

هدى : ايااه لا وليت نخاف منك من نهار مابقا حداك صلاح تعلمتي لكولشي ( غمزاتها ) دارها لحب ولإشتياق

بسمة : ( هزات تلفونها من فوق طبلة كضحك ) سيري سيري بعدي مني ههه راني تعطلت

خرجات بزربة وركبات فطموبيلتها وتوجهات لسونطر ، مركزة مع طريق وكتسوق بشوية عليها واخا معطلة فضلات متكونش متهورة فطريق .. هزات عينيها فإشارة لخضراء ويلاه كانت غاتوقف طموبيل ضرباتها طموبيل خرا من لور ، مشات او جات بلاصتها وجاب الله دايرة حزام سلامة اما كون كلات شي دقة فراسها

بسمة : ( وقفات طموبيل ونزلات منها تشوف شنو واقع ) ياربي سلامة

فنفس لوقت نزلو جوج بنات من طموبيل لي ضربوها بيها وكانو بجوج مخنزرات ومنفخين .. تقدمات بسمة عندهم وطلات على طنوبيلتها من لور لقاتها تبجغات شوية من جنب

بسمة : ( هزات فيهم راسها ) بشوية عليكم واش مشفتوش الإشارة خضرة ؟!

قربات منها لبنت لي كانت سايقة كطرطق فلمسكة وخنزرات فيها : أسبحان الله اشريفة لغلط منك وباقي كتهزي وتحطي

بسمة : ( خرجاات عينيها بصدمة ) كيفاش ؟ شكون ضرب طموبيلة لاخر ؟ نتي لي دخلتي فيا

لبنت : ( مخرجة عينيها وكتغوت بجهد ) قستك غابشوية متزيدش فيه وزايدون نتي لي رجعتي طموبيلتك لور بلعاني باش تجرح ولا توقع ليها شي حاجة وتسبيها فبنادم فحالك نتي كيقلبو غا منين يشدو لفلوس

بسمة : ( بصوت هادئ ) نقصي صوتك بنادم كيتفرج لي شافك يقول لغلط مني

لبنت : ( كتهز فيديها وتغوت ) مسكاتاش ومهاضراش بشوية تريكة نصابة وشلاهبية عارفة راسك دايراها قد فمك وبديتي تكالماي اما فلول مخرجة عينيك كي موكة غادردبي مع طريق ولا نجر لختي دوك جوج زغيبات صفرين لي فوق راسك

صاحبتها : ( دفعات بسمة من دراعها ) سيري ابنتي لداركم مكتعرفيش تسوقي عيطي على باك لي دار ليك لبيرمي يسوگ ليك ( عينيها على حوايجها والأيفون لي فيديها ) تريكة كيليميني غا لي شبعات خبز تنوض تبغي طموبيل تاهيا

دورات بسمة وجهها حابسة لبكية وجهها حمار ومرضااتش حسات بالحگرة ولخلعة منهم كانو مشرارات واخا لغلط منهم قلبوه عليها خافت لا يضربوها ولا يتحاماو عليها تماك

يلاه كانت غاتركب فطموبيلتها وتزيد شافت مراة نازلة من طموبيلتها ومتوجهة لجيهتها وجوج رجال كانو شاهدين على كولشي من لول

المراة : ( شدات فبسمة وخنزرات فلبنات ) حگرتو على لبنت شفتوها درويشة وبغيتو تحاماو عليها

واحد من رجال لي كانو واقفين : تحركو أسيادنا راكم شادين طريق للناس ولغلط من لي ضربو طموبيل لسيدة عيطو لبوليس ولا شوفو آش ديرو

لبنت : ( هزات تلفون دايرة راسها كتصوني ) أنا نعيط دابا لبولبس ونفكو هاد جرة ولاهيلا بسالة هادي

بسمة : ( بنبرة مبحوحة ) عيطي عليهم هاني كنتسنا هنا يلاه سربي

لبنت : ( طلعاتها ونزلاتها ) باينة معندك شغل

بسمة : ( خنزرات فيها ) مخلية ولدي كيتسنا أشريفة عندك متقولي هضري دابا ولافوت منك ولاباغا نصلح ليك ديك لخبشة لي فطموبيلتك والله متشمي مني ريال ومكايناش سيبة فلبلاد عطا الله الكاميرات فشوارع

لبنت : ايهاي هاي هاي شتك باغا ضربيني وكتخرجي فعينيك

بسمة : ( جبدات تلفونها ) بغيتي غا لبولبيس أنا نصوني ليهم وهما يشوفو كولشي من كاميرات لي فشاريع

لبنت : ( هزات حاجبها كطرطق فلمسكة ) هاد شاريع مافيه كاميرات

بسمة : ( عينيها على تلفون كتقلب على نمرة فريد وكي نطقات هزات فيها راسها وشيرات على قهوة فيها كاميرة مقابلة معاهم ) هاديك قاضية لغراض

لبنت : ( كي شافت لكاميرة صفارت ) آا ا صافي الأخت المسامحة راكي عطلتيني أصلا الله يعاون

دارت دغيا وركبات فطموبيلتها هي وصاحبتها مخليين بسمة كطلع وتنزل فيهم قشعات بلانهم ، رجعات تاهيا لطموبيلتها وديمارات نيشان لدار دارت بناقص من شي سونطر هاد نهار ..

يلاه ركبات ودارت حزام سلامة ، ديمارات طموبيل وقلبات دورة راجعة لدار ماحسات غير بواحد زدحة من لور مشات وجات بيها طموبيل وقفات مخلوعة ودورات وجهها لقاتهم نفس لبنات زدحو لها طموبيل وهربو

بسمة : ( تنفسات بجهد مغددة ) زمر تفو على بنادم كي داير

"بعد مرور أيام"

فايقة ناشطة طالقة موسيقى وكتغسل لماعن وإلياس حاطاه فمشاية مخلياه كيتمشا ويلعب مع راسو ويغنغن غا بوحدو ..

سالات داكشي لي فيديها ومشات حلات شراجم ديال دار مخليا لبرد ديال صباح كيدخل ويهوي دار ، توجهات لغرفتها وهزات صاك ديال لحمام وحطات فيه سيرڤيت سخونة وزيف وبانطوفة جديدة عاد شراتها وملابس داخليا وروتينها بعد دوش حاطاه فجهة خاصة مبعداه على لحوايج ..

بقات بسيرڤيت لي لابسة ولاحت على كتافها كويرة وخلات شعرها مطلوق .. خدات داكشي لي خاصها وحطاتو قدام باب دار وهزات إلياس والمستلزمات ديالو وداتهم معاها منزلاهم حتى لتحت ، حطااتهم فطموبيل وقداتو تاهو فلكرسي ديالو

بسمة : ( عطاتو شكلاط وضربات على نيفو بشوية ) إلياس غانطلع نجيب داكشي لي خصني ونجي صافي مترونش ليا هنا ومتبكيش هاني جايا

إلياس : ( حرك لها راسو وهو كيلحس فشوكولا ) انن ننن

سدات طموبيل وطلعات جابت صاكها دلحمام وداكشي ديالها ونزلات عند هدى دقات عليها وعلماتها تنزل باش يمشيو مجموعين ، لقاتها تاهيا عاد فايقة كتجبد وتكسل خلاتها كتجمع حوايجها وخدات ليها هي رتاج منزلاها معاها لتحت ..

دخلات كولشي لكوڤر طموبيل وركبات لقدام كتسنا فهدى تنزل ، ورتاج حاطاها على دراعها كتلعب معاها

بسمة : ( عينيها على عينين البنونة لي لونهم كي لعسل ) لعسل ديالنا فايق مغوبش اممم شهاد زين ( باستها فحنكها ) شهاد لكياتة اسيدي ربي ( باست يديها وحلات طموبيل بعد ماحطات هدى حوايجها فلكوڤر وطلعات حداها ) هاد بنتك اختي شي نهار غاناكلها ونشفرها ليك

هدى : ( تنهدات ) غا شفريها هنيني اختي واحد شوية راني جالسة حداك ومبوقة اصاحبتي بنعاس ( شعلات تلفون تشوف ساعة ) تسعود هادي مالنا غاديين نحكو لقبيلة راه غير غاندوشو

بسمة : ( ديمارات طموبيل ) إوا أختي كيقولو ليك لفياق بكري بذهب مشري نتي مخدامة مردامة غا ناعسة ومكرشخة مالك باغا تبقاي مجبدة ليا فدار حتى تحماض بولتك نوضي تگعدي حيدي منك لخمول ضربيها بشي تدويشة جاتك اختي مع سبت نيشان ديري لفريد شي صامدي سواغ فرفرشي عليه شوية ( دارت كتشوف فيها وكضحك ) راني كنسمع غواتك بليل هههه هو لي كيضل شاد ليك درية مسكين ريحيه هاد سبت نعسي درية بكري او وجدي لبيت زوقيها بشموع او لورد او نفاخات وديري ليا داكشي مطرطق الالة يجي وديري لو شس ماساج وطلقي شعبي ومكاين غا هز يا وز حركي طروفة يدير ليك ترشرش بلفلوس ( طلقاتها بضحكة مجبدة ) اسيدي ربي كرشي

هدى : ( دايرة يديها على خصرها ) كطنزي عليا لمك

بسمة : ( مسحات دموع تحت عينيها ) ههه والله ياختي مكنطنز داويا معاك ڤغي راجل عندك حرمتيه من نهار ولدتي هاد لعسل

هدى : ( عنقات بنتها وتستوات بلاصتها ) شغاندير ليه هو لي باغي لولاد إوا يشد لولاد دابا

بسمة : ( وقفات طموبيل قدام دار مبيريكة ) تهلاي فراجلك أتا

نزلو بجوج طلعو لولاد لرقية او نزلو معاهم مبيريكة لي كانت جامعة حوايجها دلحمام ، خداتهم بسمة لحمام شعبي خلصات ودخلو ضربوها بفركة ديال لغدايد كان لحمام زوين على صباح سخون ونقي ومافيهش بنادم خداو راحتهم وبقات بسمة وهدى غير طلي طلي .. بقاو هكاك تلاثة سوايع عاد خرجو ومعاهم مبيريكة لي سخفات ليهم بسخون حتى ولات غير جارة رجليها لي رجعات تحس بيهم كي لحبق بقوة لفشلة ، عطاوها فوطة دغيا او لبسو لها حوايجها وخلاوها جالسة كضفر فشعرها وهما جلسو كل وحدة كدهن فلحمها ودير سيرومات وكريمات لشعرها وجلدها .. كي سالاو او لبسو حوايجهم خرجو كاملين داتهم بسمة حتى تغداو فواحد سناك ورجعات مبيريكة حتى لقدام دار

مبيريكة : ( حلات لباب تنزل ) طلعي ابسمة وبقاي معانا

بسمة : ( كتنش على وجهها ) غانجيب غا إلياس اخالتي ورجع لدار عييت مرة خرا إن شاء الله

مبيريكة : ( حركات لها راسها بالإيجاب ) واخا ابنتي لي باليك

هدى : ( ضرباتها لكتفها ) دار غاتهرب نجلسو بجوج حتى لعشا ونزيدو انا وياك لدار

بسمة : ( دورات عينيها بتفكير ) واخا صافي نزلو نزلو دابا نطلو على إليااس ورتاج غايكونو قلبو راس رقية

نزلو كاملين ومبيريكة معاهم كتمشا بشوية عليها ، تحسنات فليامات لخرة او ولات كتمشا مسافات طويلة على رجليها بلا ماتعيا .. ولات تخرج بوحدها وتمشي تسخر وتجيب لي بغات وتخرج مع رقية ويمشيو فيما رشقات ليهم .. طلعو كاملين لدار وهدى شدات بنتها وبسمة كذلك لقاو رقية شادة فراسها وكتراري فكل واحد فيهم إلياس عصبي وغير على نقشة وضد آش يدير ليه او واحد رتاح قالت ليه متعرف والو مزكارة وحاجتها متحمل حد يقيصها ليها ومعياافة تكب شي حاجة على حوايجها مترتاح حتى يبدلوهم ليها ..

ناضت بسمة لكوزينة او وجدات صينية دأتاي مع حليوات وداتهم لصالون شعلو تلفازة وجلسو مجمعين ومدوزين لوقت ببراد دأتاي .. وهما كيضحكو على هضرة قالتها بسمة سمعو صوت دقان فلأسفل ناضت بسمة طلعات لفوق تجيب شي سروال لإلياس تبدلو ليه حيت كب عليه لحليب او هدى ناضت ونزلات فدروج ..

وهي نازلة كتسمع صوت دقان غير مزاد وكيجهاد خنزرات ومعجبهاش لحال حيت لباب قريب يتفرع

هدى : ( بصوت عااالي غاضب ) وااافرعو نتوما لباب بشوية البشار

حلات لباب بزعاف ومخنزرة كي شافت شكون قدامها غوتات متفاااجئة ومصدومة

هدى : خووووووويااااااااااا

صلاح : ( داير يديه فجيابو ومبتاسم ) مال والديك كتغوتي تقادو لكتاف

تلاحت عليه بتعنيقة حارة وكتنقز بالفرحة وهو بادلاه لعناق كيضحك وكيطبطب على ضهرها باش تحبس من تنقاز

صلاح : ( خنزر فيها بضحك ) وهداي ولا نطوعك

هدى : ( حبسات وعلى شفتيها إبتسامة واسعة ) واتوحشتك اخويا هانا قدامك دير لي بغيتي ( تلاحت عليه تاني بتعنيقة ) ناري توحشتك

صلاح : ( درعها بيدو كيضحك ) ياك لمك توحشتيني هادي هي هدى لي ندوي معاها تقلب عليا عينيها تما وتشد زكاير

هدى : ( تخشات فيه طالعين فدروج ) لا اخويا بلعما واش نهز فيك تا عيني هاد لمراة غا بقا معانا

فريد : ( سد لباب موراه كيضحك وهو متبع ليهم لعين ) والله اخويا صلاح عاد تعنيقة لي دارت ليك عمرها دارتها ليا انا لي راجلها

هدى : ( حمارت فلبلاصة وطلات عليه بنص عين كتعض فشفايفها بفقصة وتخنزر فيه ) صمت

صلاح : ( طلق منها ودفعها بشوية عند فريد ) تلاحي عند راجلك بعدي مني خليني نمشي نعنق مي

طلع نيشان لصالون عند مو لقاها فبلاصتها ديال ديما ، طل عليها مبتاسم حتى ردات ليه لبال وطاح طبسيل دلفاكية من يديها وطلقاتها بغوتة وهي كتعاود كلمة " ولدي " مرار وتكرارا بفرحة .. عينيها عمرو دموع وماحسات غير وهي نايضة كتجري حتى تلاحت عليه معنقاه وكتبوس لصدرو ممتيقاش واش ولدها هداك او واش أخيرا خرج وراه قدامها دابا

صلاح : ( عنقها مزير عليها وكيبوس فراسها بفرحة كبيرة لشوفتها واقفة على رجليها وكتمشا كي أيامات زمان ) متبكيش امي

مبيريكة : ( بعدات من حضنو كتشوف فيه بحب وشدات ليه فوجهو كتحقق فيه كان كيبان مرتاح وبصحة جيدة حمد لله وتعابير لفرحة كتبان على وجهو ) الله اولدي وشحال توحشتك الله اولدي وفرحتيني بشوفتك

صلاح : ( درع مو وباسها فوق راسها وجرها حتى جلسو وسلم على رقية حتى هي ) تانا توحشتك امي

دور راسو كتجي عينو على ولدو ضرب قلبو بعنف بقوة شوق ولحنين محس براسو غير وهو نايض عندو وهزو بين يديه كيشوف فوجهو بحب وبفرحة كبيرة

صلاح : ( بصوت خافت ) ولدي

إلياس : ( كيشوف فوجهو وكينقز بفرحة وعينيها مجبدين وضااحك .. فغفلة نطق بصوت عالي وطفولي وهو ماد يديه عندو باغي يتعلق فيه ) باابا غغغغ

توسعو عينين صلاح بصدمة وديك لكلمة لبسيطة كان لها أثر كبير عليه جرو عندو وضمو بقوة لصدرو باسو فراسو وستنشق عطرو طفولي بشتياق وبألم

صلاح : ( حك ليه ضهرو وباسو فحنكو ) ها بابا جا

مبيريكة : ( متأثرة من المشهد ) فوطوكوبي ديالك سبحان الله

نازلة فدروج وكتسمع صوت صداع وحركة كتيرة عقدات حواجبها مستغربة وعينيها على صنادل لي قدام لباب حققات شوفة وبانو لها جوج سبرديلات رجالية مزيودين .. متسوقاتش ليهم وتمات داخلة لصالون حتى وقفات مشوكية وحالة فمها شوية وعينيها على صلاح لي كان واقف وهاز فيديه ولدو وكيلعب معاه

بسمة : ( بصوت بالكاد كيتسمع ) صلاح

لتافت عندها على إثر نطق اسم ديالو بتاسم ليها بحب ومد لها يديه وهي دغيا وعات وجرات عندو مخشية فيه بشتياق عنقاتو وهو كذلك ضمها ليه وباس فوق راسها وطبطب على ضهرها

صلاح : ( خشا وجهو فعنقها ونطق فودنها بهمس ) توحشتك

بسمة : ( هزات فيه راسها مزنگة ونطقات بخفوت ) حتى أنا

جلسو كاملين وناضت رقية توجد شي حليوات بمناسبة حضور صلاح معاهم وهما تجمعو فرحانين بيه وكل واحد كيسولو من جيه

مبيريكة : ( شادة فيدو ) معلمتيناش اولدي غاتخرج ليوم اما نجيو حتى لعندك

صلاح : ( حرك لها راسو بنفي ) عارف شغاديرو داكشي علاش مابغيتش نعلمكم شاديرو تماك ياودي .. مهم انا جيت تالعندكم

مبيريكة : ( عنقاتو بفرحة ) حمد الله على سلامتك اولدي

عنق مو بيد وباس راسها وجبد من جيبو بواطة شيك ومدها لهدى لي حداه

صلاح : هادي ديالك واري ديك لفنكوشة نبوسها

مداتها ليه هدى وحلات لبواطة لقات فيها براصلي وكولي ديالو كانو ديال ذهب ومزوقين بنجمة زرقة وكتبان غزالة وراقية وفنفس لوقت أنيقة

صلاح : ( باس رتاح فحنكها ) حبيبة خالو

هرها فكرشها حتى بدات ضحك وجبد بواطة تانية وخدا منها براصلي ذهب غليض وفيه اسمها فلوسط ومزوق بأحجار كلو كيبري ركبو لها فيديها وضمها ليه

هدى : ( ناضت عنقاتو ) شكرا اخويا عدبتي راسك

صلاح : ( طبطب على كتفها ) متقوليش هكاك كنت مخليهم حتى نعطيهم ليك بيدي

دور عينو جيهة بسمة لي كانت ساهية فيه وبتسامة مفرقاتش شفايفها كانت نضراتها ليه عبارة على حب وشوق مكرهاتش تلاح عليه وتعنقو ولكن حشمات منهم ، بتاسم لها وغمزها ورداتها ليه فلبلاصة بشقاوة مخلياه طالق ضحكة مجهدة لكل لتفت ليه مستغرب وهي خبات وجهها حشمانة بعد ماكولشي دار كيشوف فيها

دوزو نهار مجموعين مبيريكة مشبعاتش من ولدها كل مرة تلفت ليه وتعنقو ولا تبقا شادة فيديه وتاهو مخليها على خاطرها وعاطيها إهتمام كبير .. غير تعشاو ناضت هدى وفريد يرجعو لدار او ودعو مبيريكة وتبعهم حتى صلاح وقف وهو هاز فيديه ولدو

صلاح : ( قرب وباس راس مو ) نخليك امي حتى لغدا إن شاء الله

مبيريكة : ( شافت ناحية بسمة وهزات عينيها فولدها مكرهاتش يرجعو يسكنو معاها ) واخا اولدي

صلاح : ( شير لبسمة تنوض ) بسمة يلاه

تبعاتو وتمو نازلين بربعة فريد خدا هدى ورتاج وبسمة ركبات فطموبيلتها وصلاح هاز ولدو حداها ..

بسمة : ( ديمارات طموبيل وقلبها كيضرب من إنفرادهم رجعات حشمات ومعرفات متقول ) دير سمطة

صلاح : ( حط ولدو على رجليه ومد يدو خربق ليها شعرها ) تعلمتي تصوگي وبغيتي تعلمينا لقوانين

بسمة : ( ضحكات بخفوت وعينيها على طريق ) ماشي هكاك غير كرد لبال وصافي

صلاح : ( حرك لها راسو بالإيجاب وهو راد لبال معاها ) مزيان بعدا دايرة عقلك وسرعة عندك على قد لحال .. عمر وقفوك لبوليس ولا وقع ليك شي بلان ؟

بسمة : لا حمد لله ديما وراق طموبيل عندي ومكنديرش شي غلط ويلا هازة معايا شي حد فطموبيل كنولي رادة لبال كتر خصوصا إلياس

صلاح : ( حك عنقو بتعب واضح على وجهو ) مزيان الله يرضي عليك

بسمة : ( شافت فيه بحنان ومدات يديها كدير ليه مساج لشعرو ) عيان بزاف

صلاح : ( تنهد وسد عينيه براحة لملمس يديها الناعم ) عضامي مدگدگين عليا وفيا لموت دنعاس بغيت غانوصل لدار ونعس ورتاح راك كتشوفي فلحبس مكنتش كنعس

بسمة : ( زادت سرعة شوية باش يوصلو دغيا ) حتى لدار وندير ليك مساج ترتاح واحد شوية

صلاح : ( شد يديها وباسهم وهو ضاحك ) والله مكرهت

وقفات طموبيل قدام لعمارة وبلاصاتها عاد تمو نازلين وطلعو نيشان لدارهم ، حلات بسمة باب دار وصلاح كيدور فعينيه وحاضي صغيرة ولكبيرة دخلو مجموعين وجراتو من يديه نيشان لغرفتهم

بسمة : ( تلفتات عندو بابتسامة ) كيجاتك دار

صلاح : ( مركز مع صور لي فلغرفة ) زوينة

( قرب من واحد صورة معلقاها ونطق بالستغراب ) إمتا صورتي هاد تصويرة

قربات عندو وطلات براسها كتشوف فتصويرة لي كانت جامعاهم بجوج هو وراها شاد تلفون ومخنزر عاقدهم وهي كانت شادة سيلفي بتخبية ومخرجة لسانها كضحك

بسمة : ( بتاسمات ) واحد لمرة غفلتك وصورتها هنا كنت حاملة فشهر لول واقلة

صلاح : ( درعها بيديه وعضها فودنها ) مشاغبة

هز ولدو لي كان واقف كيشوف فيهم مغوبش وباسو صلاح فنيفو حتى فك لغوباشة وضحك ليه

صلاح : مال هاد سيد غا مخنزر

بسمة : ( هزات يديها بمعنى معرفتش ) شابه ليك اخويا عاد ماقلت حمد الله راجل عندي مابقاش غا عاقدهم ونا نتصدم بالولد شابه لباه حتى فتخنزير

صلاح : ( قهقه بصخب وعنكش لولدو شعرو حتى خنزر فيه ودار صوت كيعبر على الإزعاج ) ولد باه هدا

بسمة : ( هزات فيه حاجبها ) ولد باه اه ولكن لولد عندي حتى لشعرو وحبس كيتصطا على دوك جوج زغيبات لي فوق راسو

صلاح : ( دور وجهو لإلياس لي شعر عندو واصل لعنقو ورطب وخفيف .. وعنكشو ليه ) غدا نحسن ليه وندرب لوالديه زيرو

إلياس : ( خرج فيه عينيه غياكلو وقرب وجهو لعندو حتى تخشا فيه بنيفو ونطق بصعرة وبغضب ) اععععععععععععع

صلاح : ( تصدم ) ايهاي هاي هاي على تخراج لعينين تقادو لكتاف دابا نربي والديك نخليك تشوف فيا تحدرهم

بسمة : ( خدات من عندو إلياس وعنقاتو ) بعد ليا من لولد مسكين غاتخلعو

إلياس : ( داير فصلاح تخنزيرة دلموت وملاقي سنانو بشراسة ) صمت

صلاح : ( مد يدو وفك ليه لغوباشة بصباعو ) مال هدا غايقتلني بشوفاتو

بسمة : ( ضحكات على نضرات إلياس لعدوانية ) هههه فاش قلتي غاضرب ليه زيرو عرفك كدوي على شعرو وباغي تحسنو ليه دابا مغايتهدن حتى تقوليه مغاندير ليك والو

صلاح : ( خربق ليه شعرو ) غاتهدن مغانقيصو هاد جوج زغبات لي عندك

حطاتو بسمة وعطاتو كاس دلحليب وجابت ليه بيجامة حيدات ليه سيرڤيت لي لابس ولبساتها ليه وقداتو ينعس فوق ناموسية .. وصلاح خدا دوش سخون يريح بيه عضامو وخرج لاوي على نصو فوطة لقا بسمة تاهيا بدلات حوايجها وحطاتهم زيوت مخصوصة لمساج فجنب سرير

بسمة : ( شيرات ليه يتكا حداها ) زيد رتاح

تكا جنبها وخلاها كتشم فواحد زيت ومن بعد خدات منها شوية وبدات كدير لو مساج لضهرو وكتافو ، لدقائق وهي كدير ليه مساج وهو ساد عينيه مسترخي ومرتاح عاد حس براسو مزيان وعضامو خفافو عليه شوية

صلاح : ( حل عينيه ) صافي شكرا

ناض جبد بوكسور وشورط وتيشورت أسود كيف عادتو لبسهم ورجع طفا ضو و تكا جنبها لقاها نعسات إلياس وجبدها عندو من ضهرها عنقها وباسها فعنقها حتى تبورشات

صلاح : ( ساد عينو مرتاح ) عاد رتاحيت

بسمة : ( بتاسمات ودارت تنخشات فيه ومدات يديها كتمسد ليه فروة رأسو ) داكشي لي بغيت غا راحتك نعس دابا ورتاح ليك شوية

فصباح اليوم التالي فاقت على قبلات فعنقها عنكشوها ، حلات عينيها مغوبشة ولقات صلاح داير يديه على حنكو وكيشوف فيها وهو ضاحك

صلاح : ( جبد لها حنكها ) صباح الحب وزين لي عندي

بسمة : ( بتاسمات او باستو فحنكو ) صباح الخير اكبيدة فقتي بكري ولا شنو

صلاح : تت عاد فقت

ناضت كتكسل وتجبد لقات إلياس باقي ناعس ، دوزات لخامية على شعا باش ميفيقش وشدات فيد صلاح جاراه معاها حتى لكوزينة

بسمة : ( طلقات من يدو او تلفتات لعندو ) شنو نطيب ليك

صلاح : ( غمزها وشحطها لمؤخرتها حتى عضات على شفتها ومدات يديها كتحكها ) غانطيب ليك هادي حاليا من صباح وهي تبومبا عليا وأنا صابر

بسمة : ( لوات يديها على عنقو وغمزاتو ) طيبها فاش نفطرو دابا خاصنا طاقة راه جهد مكاين

صلاح : ( خرج فيها عينيه وهزها فغفلة منها وحطها فوق بوطاجي ) اجي نتفاهمو نتي بعدا مفهمتش أنا زعما مخليك تموتي فأرضك من لحشمة خرجت لقيتك مقلعة بلاكة دلحشمة

بسمة : ( طلقاتها بضحكة وضرباتو لصدرو بمزاح ) إوا راك راجلي ياك ماباغي ندير فيها حشومية ونبدا ندور فعيني كي لول راه غير كنتي تخلعني بدوك تخنزيرات وكنتي كتجيني مهيب وكتخلع صافي ضهشرتيني ( باستو فحنكو ) اما دابا لاء مابقيتش نخاف

صلاح : ( هز فيها حاجبو ) ياك مابقيتي تخافي ولا تحشمي ! .. إوا مزيان دابا نشوفو ، نزلي ديري لنا فطور ولا نفطر بيك نتي على صباح ( عجن ليها مؤخرتها ) احسن فطور فيه لبروتين ولڤيتامينات

بسمة : ( دارت فيه شوفة دمنيتك ) الله يمسخك

جبدات بغرير ومسمن سخناتهم وحطات كيكة وحليوة زوقات بيهم طبلة مع براد دأتاي وبريق دلقهوة وحطات ليدام فجنب كانت ديجا مقاداهم فبلاطو خاص بيهم ، خوات عاصير فقرعة ديال زاج وحليب جنبو وتوجهات لبيت فيقات إلياس وبدلات ليه وجابتو معاها يفطرو

صلاح : ( مد يدو لإلياس ) اجي ابابا

قرب لعندو مغوبش وخاسر بنعاس ، هزو صلاح فوق ركابيه وفطرو معاه

بسمة : ( شربات من كاس عاصيرها ) ديما كينوض خاسر مع صباح ومكيدويش حتى كيفطر

صلاح : ( دوز يديه على شعر ولدو ) نفس حاجة فاش كنت صغير حتى أنا

بسمة : ( صغرات فيه عينيها ) نسخة مصغرة عليك صافي

سالاو فطورهم وناضت بسمة تبدل حوايجها بعد ماعلمها صلاح انهم غايخرجو ، لبسات كسيوة صيفية تحت ركبة مع صنيديلة وخلات شعرها مطلوق ودارت ميكاب خفيف وإلياس لبسات ليه سيرڤيت فيها رسومات وسبرديلة وكاسكيط مواتيين مع لبيسة .. وصلاح كان لبس عليه منيمتا سيرڤيت برمادي وسبرديلة بيضة وداير ساعة روليكس فيديه ومطلع شعرو لفوق بجيل

هز إلياس وتمو نازلين مجموعين حتى لتحت خداو سيارة بسمة لي كانت مبلاصية غير تماك وصاگ بيهم صلاح هاد لمرة

بسمة : ( دارت كتشوف فإلياس لي مجلساه فكرسي ديالو لور ) فين غانمشيو

صلاح : فين تبغي تمشي نتي

بسمة : ( هزات عينيها فساعة لقاتها عشرة صباحا ) معرفتش صباح هدا

صلاح : قلت ناخد إلياس نشري ليه شي حوايج ويلا بغيتي حتى نتي خودي لي عجبك

بسمة : ( حركات راسها بالإيجاب ) واخا

وقف طموبيل قدام لمول ونزلو صلاح هاز إلياس وبسمة جنبو شاد لها فيديها .. توجه لمحال خاص بملابس ديال أطفال أولاد وبدا كيختار ليه هو بسمة حويجات مخلا ماهز ليه خصوصا كاسكيطات مع سيرڤيتات حيت قالت ليه بسمة كيعجبوه وكيرتاح فيهم ، من بعد خرجو وخلا بسمة تاخد لي عجبها وهي خدات حويجات بساط عجبوها من بيجامات صيفيين ديال دار او تقيشرات ليها وليه

بسمة : ( عينيها على محال لملابس رجالية ) متاخدش نتا

صلاح : ( متبع عينيها فين كتشوف حنى كيبان لها محال عامر برجالة وعقد حوايج. ورفض لفكرة فلبلاصة ) لا مرة خرا

خرجو من لمول وكانت وقيتة لغدا طلعو لبحر وجلسو فقهوة جنبو وكطل عليه .. ختار صلاح غظا على دوقو وبعد مدة جا نادل وحط ليهم طلبية

بسمة : ( تنفسات براحة عجبها لجو ) توحشت نخرج معاك

صلاح : ( هز فيها عينيه وبتاسم لها ) على هاد لحساب نبقاو نخرجو ديما

بسمة : ( حركات لو راسها بالإيجاب ) إن شاء الله

صلاح : ( بتساؤل ) باقي ماشديتي ديبلوم ديالك ؟

بسمة : لا قريب نشدو بقا لي قل من شهر فهاد سيمانة عندي متحان ندوزو وناخد ديبلوم

صلاح : إن شاء الله

بسمة : ( رجعات لور شبعانة وعينيها على إلياس لي كيغمض عينيو ويرجع يفتحهم ) إلياس فيه نعاس غايكون عيا

دور وجهو عندو وهزو وناض مد لها يدو وشدات فيه ومشا حتى خلص لغدا ورجعو طلعو فطموبيل نيشان لدار ..

حل لباب وإلياس فيديه حطو فوق فوتوي فصالون وغطاه بإيزار دافي .. توجه لغرفتهم وبدل عليه بشورط وتيشورت ودخل لدوش غسل وجهو بما بارد وخرج لقا بسمة لابسة شورط وسوتيانات يلاه كانت غاتلوح عليها تيشورت حيدو من يديها وجبدها لعندو حتى شهقات ولاصق شفايفو مع ديولها بقبلة ساخنة كان المسيطر عليها هو ومن بعد تفاعلات معاه وتعلقات فيه وزادت قربات لعندو برغبة كبيرة وهو هزها من فخاضها ولاحها فوق سرير حتى توجعات وحك ليها ضهرها بحنان

صلاح : ( بعد عليها بعد ماحس بيها محتاجة تنفس وميل راسو لعندو ودنيها وعضها ليها ونطق بصوت خافت كلو رغبة وشهوة ) غناكلك

بسمة : ( صدرها كيتهز ويتحط ولحرارة طالعة معاها ) تكايس عليا

نزل بقبلات على عنقها وفتح ليها حمالات صدرها حتى تبسم بعد ماشاف صدرها لي زاد كبر على آخر مرة شافهم خشا راسو فوحدة وقبلها ببطئ حتى تأوهات وتبورشات وهزات راسها لفوق وشدات فشعرو مزيرة عليه وهو كان كيحيد لها فشورط ويديه كيتساراو على جسدها بالكامل مخلا حتى قنت ماداز عليه بقبلاتو لي طيرو لها لعقل وخلاوها كتوحوح وتمجنن غير بوحدها ه‍ادشي لي خلاها تكون جريئة وتزعم ودير حركات وأصوات خلاوه بلا عقل .. بعد ساعات من ممارسة لحب وبعد مودة كيعبر فيها كل واحد لتاني على شوقو لآخر بطريقتو هزها وخداها لدوش يكملو على مابداوه وفهاد لأثناء تسمع صوت بكاء إلياس هادشي لي خلا بسمة كضحك وصلاح عاقدهم معاجبو حال ..

دازت سيمانة بسمة مامشاتش فيهم لسونطر وبقات مع صلاح مقابلاه وعاطياه وقت وإهتمام وفنفس لوقت كانت كتدرب لإمتحان لي عندها ولي بيه غاتشد ديبلوم ديالها وهو كان واخد وقتو ورتاح فهاد لمدة وكان فيما يلقا وقت مناسب يخرج بسمة وإلياس حتى ولا ولدو كيتصطا عليه وديما لاصق فيه ومخلي بسمة ..

فصباح بكري الجو مغيم وبارد نوعا ما كانت فايقة ناشطة وحالة شراجم لغرفة باش تهوا ويدخل ليها برد صباح وهي دازت نيشان لكوزينة توجد لفطور مخليا صلاح وإلياس ناعسين بجوج فوق ناموسية وكل واحد عاطي تاني بضهر ودايرين نفس نعسة ..

وجدات طبلة وتوجهات لبيت فيقات صلاح وباستو فحنكو حتى فاق معنكش من ضو لي داخل لبيت وناض بزز منو كيجبد فعضامو ويتفوه ، عنكش لولدو شعرو حتى فاق خاسر ومخنزر ناض سبقهم ودخل لدوش كيتسنا فبسمة وهو مخنزر وحنوكو حمرين ، تبعاتو هي وغسلات ليه وجهو وسنانو ومشطات ليه شعرو كيف كيبغي كل صباح وبعدها بدلات ليه بيجامة ديال نعاس ولبسات ليه سيرڤيت أديداس وتقاشر بيضين ، وتمات جاراه حتى لكوزينة وجلسو فطبلة فجنب ..

صلاح : ( عينيه على إلياس ) لولد خاصو يفيق ويقاد حالتو عاد يفطر

بسمة : ( تبسمات ) ولفت ليه هاد لقاعدة اما شعرو فيما يتخبل ليه ولا يجي على عينو كيهز مشطة راسو يمشطو ولا يقولها ليا

صلاح : ( حرك راسو ) عندو جوج زغبات فوق راسو فحال الى مرصعين بذهب اودي ياودي على لولد حتى يكبر شوية ونقطعو ليه

إلياس : ( ببرود ) نووو

صلاح : ( حرك ليه راسو مسايرو ) واخا إن شاء الله

بسمة : ( دوزات يديها على شعر إلياس ) مكاين لاش نحيدوه ليه كيجي معاه وهو عاجبو

صلاح : ( كب كاس دلحليب ومدو لإلياس ) طويل بزاف خاصو يتنقص

بسمة : ( حركات راسها بنفي ) واصل لتحت ودنيه او فدين هانيا يكون حتى لعنق وهو قصير مكاينش مشكل وعاد صغير يدير لي عجبو حتى يكبر يقدر يعجبو ستيل آخر

صلاح : واخا الالة لي عجبكم

بعد مافطرو خدا صلاح إلياس وجلسو كيتفرجو بجوج وبسمة جمعات دار ودازت نيشان خدات دوش خفيف تحيد عليها لعرق .. نشفات شعرها ودارت لو سيروم ورطبات لحمها وعطراتو وبعدها لبسات ملابس داخلية جداد وختارت سروال دجين بوي فريند وتيشورت قصير لاصق بيض وڤيست قصيرة وعريضة شوية بالخضر ملكي مع صنيديلة طالون قصير بيضة .. خدات صاك أخضر جاي مواتي مع لبيسة وجلسات حتى قدات شعرها ودارت لو بوكلي وقدات وجهها بميكاب خفيف ركزات فيه على شفايفها وحدداتهم حتى بانو منفوخين وبشكل زوين ..

وجدات صاك فيه مستلزمات إلياس معولة تنزلو عند هدى حتى دوز إمتحان ديالها وترجع تاخدو من عندها .. حطات فيه داكشي لي ممكن يحتاج مع طابليط ديالو فيها ألعاب وهزات صاكو وصاكها وتلفون وكونطاكط دطموبيل فيديها وتمات خارجة عندهم

بسمة : ( عينيها على صلاح بنص عين ) إلياس أجي أماما نمشو عند خالتو هدى

صلاح : ( هز فيها عينيه وطلعها ونزلها وستنشق عطرها الفايح فالأرجاء وبعدها هز فيها حاجبو ونطق بتساؤل ) فين خارجة فهاد الوقت

دق قلبها بعنف وجاو أفكار كتيرة لعقلها خافت لا يكون طول لمدة لي كان مشدودة فيها غير مسايرها او واخد بخاطرها وصافي ودابا غايحبسها أنها تخرج ولا يقول ليها شي حاجة

بسمة : ( سرطات ريقها ) عندي إمتحان ليوم وخاصني نمشي ندوزو عيطات عليا المديرة دسونطر البارح وعلماتني نحضر

صلاح : ( بقا كيشوف فيها لمدة وتنهد ) واخا أنا نوصلك

ناض ودار صندالة فرجليها وقاد لقبية لي عنكشها ليه إلياس وتم هاز ولدو وبسمة حطاات صاك فدار ونزلات تابعاهم كطقطق بطالونها ، حتى لتحت ركبات فطموبيل لقدام او صلاح حط إلياس فمقعدو لور وهو ركب جنبها وديمارا نيشان فتجاه سونطر

صلاح : ( مرة مرة عينيه كيفلتو لرجليها لي كيبانو بويض ونقيين وصنيديلة جات معاهم ) كون غير لبستي سبرديلة عندك إمتحان مغاتقدريش تحركي فخاطرك

بسمة : ( حاسة بيه من لول غار تخرج بوحدها ) نو عادي مولفة وعاد صهد سبرديلة غاتعرق ليا رجلي

صلاح : ( حك شعرو وتنهد ) الى كنتي خارجة صوني عليا نجي نجيبك والله يوفقك

بسمة : ( بتاسمات ليه وشدات ليه فيديه مزيرة عليهم ) واخا إن شاء الله شكرا اكبيدة ..

وصلها قدام سونطر وباستو فحنكو حتى لصقات فيه لعكر وتمات نازلة ودعاتو وصايفتات بوسة فلهواء لإلياس ومشات وخلاتو متبع لها لعين حتى دخلات عاد رجع لدار

وقف طموبيل وهز إلياس وطلع لدار لفوق كي دخل لدار خسر سيفتو من ريحة لي جايا منو ، هزو من رجلو وشمو وسد نيفو عايف من ريحة مشا حل صاك لي خلات بسمة فدار ولقا فيه ليكوش هز وحدة بقا كيشوف فيها شحاال وبعدها كيدور عينيه فإلياس حتى عيا ورجعها لصاك وهز ولدو وتم نازل عند هدى

صلاح : ( نازل فدروج وهو مخنزر فإلياس ) اصاحبي راك كبرتي وباقي كديرهم فحوايجك

إلياس : ( غوبش فيه وضربو لكتفو ) بابا نووو

خلا إلياس عند هدى وطلع هو لفوق توجه لبالكون وبقا جالس وفيديه تلفون وليد تانية گارو .. لمودة وهو على داك لحال حتى صونات عليه بسمة او خرج من دار خدا طموبيل وتوجه نيشان لسونطر علمها أنو وصل وخرجات هي وبعض لبنات تسناها حتى سلمات عليهم او ودعاتهم وتوجهات لعندو وهي مبتاسمة

صلاح : ( فتح لها طموبيل ) كي دوزتي

بسمة : ( مبتاسمة ) حمد الله مزيان كولشي داز بيخير والمديرة شكراتني وقالت لي غاتاخدي إن شاء الله ديبلوم

صلاح : ( فرحان لفرحتها ) متأكد إن شاء الله غاتاخديه

ديمارا طموبيل وتوجه لواحد محل دشوكولا فأگادير نزل وخدا ليها بواطة من شوكولا غالي وديكوري فخم وغزال وبعدها خدا باقة ورد من محل جنبو كان مخلط مابين ورد أبيض وزهري وشكلهم كان زوين وكيوت .. توجه بيهم لطموبيل وكي جلس مدهم ليها وقرب حتى قبلها فوق راسها

صلاح : مبروك ديبلوم من دابا

بسمة : ( فرحات بلوجيست لي دار معاها ) شكرا ولكن الى مخديتوش ؟

صلاح : ( حرك لها راسو بنفي ) غاتاخديه إن شاء الله داكشي لي كاتقادي واعر وشهاادة لمديرة تعطيك لخبار

بسمة : ( بتاسمات وطلقات موسيقى فطموبيل ) يخليك ليا

وقف طموبيل قدام دار وطلعو عند هدى خدات من عندها إلياس ناعس وطلعاتو لفوق وهي هازاه معنقاه وكطبطب على ضهرو باش متفيقوش ويخسر فيه نعاس ، دخلاتو لبيت وحطاتو بشوية فوق سرير وغطاتو وهي حطات بوكي دلورد وبواط شوكولا وهزات بيجامة وبدات تبدل حوايجها مخليا صلاح متوجه لبالكون بعد ما سمع من تلفونو رنة كدل على شي واحد كيصوني عليه .. بدلات حوايجها دغيا وجمعات شعرها بقراصة لفوق وبدات ديماكيي وجهها حتى لمحات صلاح لبس كلاكيطة فرجليه دغيا وهز كونطاكط دطموبيل ديالها وتوجه ناحية لباب بسرعة ، تبعاتو مستغربة مجات فين توصل عند لباب لقاتو نزل مع دروج

بسمة : ( بصوت عالي ) صلاااح صلاااح

نزل لتحت وهي كتعيط عليه وضاهر أنو مسمعهاش ، لوات شفايفها وشك تسلل لقلبها عقدات حوابجها ودخلات وسدات وراها لباب بعنف .. ديماكيات وجهها وعينيها على ساعة لي كانت ستة دلعشية وبعدها بقات جالسة قدام تلفازة وعقلها وبالها معاه ! ..

فاق إلياس او عطاتو ياكل ولعبات معاه وخلاتو جالس كيلعب بألعابو وهي عينيها على ساعة ولبالكون لي كان كيبين ليها أنو طاح ضلام ! ساعات دازو وهو باقي مجاش صونات عليه مرارا وتكرارا ولا من مجيب ، تأفأفات وتفقصات وقربات تاكل راسها بالفقصة وهي كتشوف فالوقت كيدوز وساعة كتشير لطناش دليل ! طاحو دموعها وتكورات فبلاصتها وبدات تبكي حتى مقدات ، خدات إلياس لبيت وحطاتو ينعس وهي كتبكي وبقات معاه حتى نعس ورجعات لصالون وهي كتمسح فدموعها وعينيها منفوخين ..

تحل باب دار وتم داخل وفنفس لحضة ناضت بسمة كي سمعات صوت لباب ونطقات بغضب وهي كتشوف فيه بملامح غاضبة وبصوت عالي نوعا ما

بسمة : ( مخرجة عينيها وكتمسح فنيفها ) عييت معاك أقسم بالله كل مرة كرجعو لنقطة صفر !! فين كنتي اعباد الله انا كنعيط عليك ونتا نزلتي بلا متقولي فين غادي كنصوني عليك وممسوقش ليا ؟ رجعتي لعوايدك

صلاح : ( عقد حواجبو من هضرتها وسد لباب ) نقصي صوتك وهضري بشوية !

بسمة : كيفاش نقصي صوتك ؟ واش منيتك انا فين ونتا فين من هادشي كامل شديتي غا فصوتي لي عالي

صلاح : فاش كنت خارج كنت زربان مسمعتكش واش كتعيطي ولا لا وحتى تلفون مرديتش ليه لبال حيت كنت دايرة لو صيلونص

بسمة : ياك ؟ رجعتي تاني لداك لوسخ باغي تشد تاني فلحبس وتغبر على ولدك خمس سنين هاد لمرة ولا كتر واش اصلاح بعقلك فيما نقول حمد الله كولشي تقاد كلقاك خارج ليا من جنب

صلاح : ( بنضرات باردة ) ساليتي ؟

خرجات فيه عينيها بصدمة هي شاعلة ومعصبة وهو مبرد وكيشوف فيه بنضرات مكتحملهمش ! نضرات البرود والامبالاة نضرات لطالما فقصوها وخلاوها تنفرو وتعيا منو ، نضرات لي كان ديما كيوجهم ليها كأنها وحدة غريبة عليه وحدة مكتعرفوش ومكتربطهم حتى صلة ! كأنها ماشي مراتو وماشي أم لولدو !

تعصبات ودم جمد فعروقها لعافية شعلات فيها وزادت تعصبات ومحساتش براسها حتى نطقات بصوت عالي كتر وفقدات السيطرة على أعصابها ..

بسمة : كضحك عليا ولا شنو ؟ واش أنا كنهضر معاك ونتا مبرد مخصك حتى خير ؟ وفين كنتي حتى لهاد لوقت طناش دليل هادي

صلاح : ( لاح كونطاكط طموبيل بزعاف وشير ليها ناحية لغرفة ونطق بصوت هادئ مستفز ) سيري تنعسي

بقات واقفة بلاصتها جامدة مقداتش تحرك تبسمات بالستهزاء على راسها وعلى طريقة باش عاملها ، تلفتات لعندو لقاتو توجه لبيت تبعاتو ولقاتو نعس بلاصتو وغطا راسو بيديه .. ممسوقش ليها واش تفرگع واش تنتف راسها بالفقصة ، خدات مخدة وكاشة وخرجات من لبيت ، توجهات لصالون ودارت مخدة ونعسات سدات عينيها كتحاول تنعس ولكن عقلها وقلبها ممخلينهاش قلبها موقفش من نبضاتو المجنونة وعقلها موقفش فتفكير فحتمالات ضروها فخاطرها وخلاوها قربات تبكي بلفقصة على راسها

مدوز ليل كامل مقابل إلياس ومرة مرة كينوض يطل عليها ويرجع ينعس ، تعنكش ومعجوش لحال تنعس فجيه وهو فجيه جاها تصرفها طفولي ودغيا تقلقات وناضت هازة فراشها ومشات تنعس ، كان عارف غاتكون ردة فعلها فحال هكا داكشي علاش فضل يتصرف ببرود ويبرد سوق ويخليها حتى صباح تهدن ويشرح ليها حيت كل مرة كان كيحاول ينطق كانت كتقاطعو وتبدا تغوت وتناقشو بعصبية !

فصباح بكري ناض من بلاصتو كيحك فعينيه غسل وجهو وسنانو وبدل حوايجو وفيق إلياس بشوية وبدل ليه تاهو حوايجو وخرجو معاه مخلي بسمة ناعسة فصالون .. نزل حتى لتحت و لقا فريد عاد خارج حتى هو

صلاح : ( سلم عليه ) غادي لخدمة

فريد : ( حرك ليه راسو بالإيجاب وهز إلياس كيلعب معاه ) اه غانمشي نطل على دراري ونشوف خدمة فين وصلات

صلاح : مزيان الله يسخر

فريد : نتا معوالش تجي باقي مهداك الله

صلاح : ( تكا على طموبيل ) هاد ليامات إن شاء الله نقاد شي أمور ويحن الله

فريد : عندك شي غرض دابا ضروري ولا نديرو شي قهيوة ؟

صلاح : لا خارج أصلا غير نفطرو أنا وإلياس على برا

طلعو بجوج فطموبيل فريد وإلياس بقا عندو وديمارا طموبيل ناحية قهوة مولف يجلس فيها هو وصلاح .. كي وصلو نزل صلاح وهز ولدو ودخلو لداخل وشدو طبلة معزولة فلقنت باش يجلسو على راحتهم , جا نادل عندهم خدا طلبية وبعد دقائق قليلة رجع وحط ليهم فطور فوق طبلة

فريد : ( كب ليه كاس دأتاي ) إوا داك دري دلبارح كي دازت لجنازة

صلاح : ( مد لإلياس كاس دلحليب ) مزيان حضرو رجال وجبنا طلبة دغيا وداز كولشي بيخير وما جمعنا حتى طناش دليل بقيت معاه حتى جاو شي خدامة وجمعو دار هلي خليتو ورجعت لدار

فريد : مزيان درتي فيه خير مسكين

صلاح : درنا فيه خير ورجعت لدار دارت لي بسمة لونكيط باقي حتى مادويت معاها بدات عليا برجعتي لتبزنيز وديك لهضرة ! كيصحابها الى باغي تعيش حياتك هاني وتبعد على داكشي دغيا مابين نهار وليلة

فريد : هضر معاها بالخاطر وبرد سوق

صلاح : ( حرك ليه راسو ) يكون خير

بعد مافطرو خلص صلاح وناضو مجموعين فريد مشا لخدمتو وصلاح شد طاكسي لدار وطلع نيشان حل لباب لقا دار مجموعة عرفها غاتكون فاقت ، وداكشي لي كان كي تفتح لباب وقفات عليه مغوبشة

بسمة : خارجين على صباح

صلاح : ( خربق ليها شعرها ) ومالنا منخرجوش انا ولدي على إنفراد

بسمة : ( ميقات فيه ) اهه على إنفراد ! مزيان بصحة

صلاح : ( تخطاها وجلس فصالون مقابل مع تلفزة وإلياس فيديه ) الله يعطيك صحة

بسمة : ( تبعاتو وجلسات مقابلة معاه ونطقات بهدوء وبجدية ) صلاح خاصنا نهضرو وهادشي مابقا يعجب

صلاح : ( تكا براحة وعينيه عليها ) حتى كتفشي عاد كتجي تقولي هاد لهضرة لبارح مكانش وقت لهضرة ولا كتعرفي غير تهزي مخدة ودوزي لصالون

بسمة : ( تنهدات ) كنت معصبة ومقدرتش نفكر كتر تصدمت ومعرفتش كيفاش نتصرق ولحديت دابا راك ماوضحتي ليا والو ! فين كنتي لبارح ؟

صلاح : ( حك حواجبو وتنهد ) كنت فجنازة ديال واحد دري كان مشدود معايا .. لبارح خرج من لحبس ومو ماتت ليه لبارح نيت فصباح دري على قد لحال وعاونتو انا لي وقفت على كولشي وبقيت معاه حتى تفك لمجمع مع طناش دليل

بسمة : ( متبعة معاه بتركيز ) وعلاش مقلتيش ليا هادشي

صلاح : شغانقول ليه دري مااتت مو غالبارح او كي وصلوني خبار خرجت او بديت نوجد وعيطت على ناس لي كنعرف ودرنا عشا خفيف وعيط على لعائلة وجيران ومو مشينا معاه حتى دفنوها مسكينة الله يرحمها

بسمة : ( سكتات ملقات متقول ) الله يرحمها ياربي

إلياس : ( كيدور عينيه بيناتهم ) صمت

بسمة : ( كتفرك يديها بتوتر ) شنو غادير من هنا لقدام ؟ فاش كتفكر

صلاح : ( صغر فيها عينيه عارفها شنو كتقصد داكشي علاش فضل يجاوبها على سؤالها بلا متسول ) تبزنيز وديك طريق بعدنا منها حمد الله شفت ديك طريق متصلاحش ليا ودابا عندي ولد ونتي ومي وختي الله يجعل لبركة ( دوز يديه على عنقو ) بقاو لي شوية لفلوس غاندخل شريك مع فريد وراني دويت معاه وقادينا كولشي تقريبا ومع ديجا عندي ديبلوم ديال الميكانيك وكنفهم فطموبيلات فماشي شي حاجة لي صعيبة وحمد الله عارف فين حاط رجلي ولفلوس لي بقاو لي راه غانستثمرهم فمشروع ديالو وتبارك الله راه غير هو راسو وكيدخل زبابل دلفلوس مشروع عندو محرك مزيان وتعرف مابين ناس وعاد قديم شوية فالحرفة غانزيد انا بهادشي لي عندي ويكون خير إن شاء الله

بسمة : ( تبسمات بحماس ) إن شاء الله يكون خير الله يسهل عليكم ياربي

ناضت حتى لعندو وجلسات حداه وعنقاتو بفرحة وراحة مضناتش يكون مخطط لهادشي كامل فداخلها غاتنقز بالفرحة حيت لي كانت باغيا تحقق حمد الله غايبعد من حاجة كانت كتشكل خطر عليه هو اولا عاد هما ويشوف حاجة مزيانة ليه وليهم مابقاتش غاتخاف عليه كيف قبل ويبقا بالها مشوش عليه كل مرة خرج ولا غبر

صلاح : ( بتاسم عارفها فرحات ، دوز يديه على شعرها وباس راسها ) ديري عقلك حتى نتي وماتبقايش تسرعي كولشي كيتحل بالخاطر

بسمة : ( بعدات عليه شوية وعينيها على شفايفو ونطقات بكياتة ودلع وغنج واضح فصوتها ) حاضر شاف مابقيتش نعاود

صلاح : ( غمزها ) لا غير عاودي

بسمة : ( بطريقة درامية حطات يديها على قلبها وشافت فيه بشوفة قتالة وردات ليه لغمزة وعضات على شفايفها ) احح اقلبي تشتت بهاد لغمزة حاول عليا امسخوط راني كندوب

صلاح : ( جرها من تيشورت ديالها حتى لصق بنيفو على ديالها ودوزات لسانها بإثارة على شفايفو ) علاش كتقلبي لمك اممم

بسمة : ( قلبات عينيها لإلياس لي كان عاطيهم بضهر وملاهي مع لألعاب فطابليط وطلعات فوقو دغيا وجراتو لعندها حتى دمجات شفايفها مع شفايفو بقبلة معنفجة وحلوة من طرفها ) عليك ازين

قلبها دغيا وجا فوقها وقلع لها تيشورت وخلاها بسوتيانات بزرق مشبكين وسيكسي وكلهم مجوهرين وشكلهم خطير كيحمق

صلاح : ( صفر بجنون ودوز لسانو على شفته سفلية بشهوة ) عرفتي لدلمك شحال كنموت على زرق وهو عليك

بسمة : ( دفعاتو من صدرو شوية وشيرات ليه على إلياس وهي كتلوى تحتو كي لفعة غير مزادت جهلاتو بصباع رجليها لي كتفركهم مع رجليه ) إلياس اكبيدة غايشوفنا

صلاح : الله ينعل دلمو هاد لبعلوك نعلق والديه من رجليه إلا لكوا

ناض وهز إلياس بطابليط ديالو وتوجه بيه لباب دار وهي كتموت بضحك عرفاتو نازل عند هدى يخليه عندها

"بعد تلاث شهور"

مزوقة دار بنفاخات بلونين أبيض وذهبي ودايرة ديكور بسيط وغزال وفنفس الوقت طفولي .. دورات وجهها ناحية طبلة لقاتها مقادة وكولشي واجد والكيك لي قدات وسط طبلة كبير واخد مساحة ، تفننات فيه وخدا لها وقت كبير لأنو من برا كان سامبل بزاف ومن لداخل عبارة على طبقات وبشوكولا مختالفة وبديزاين غزال ومصمماه بالعشق وكان قريب من لكيك لي كانت مقاداه فآخر إمتحان ولي بيه خدات ديبلوم ديالها فلباتيسري ..

خدات تلفون او علمات هدى أنها سالات باش طلع إلياس لي كان كيلعب مع رتاج عندها فدار .. قدات لباف على أغنية لعيد ميلاد ودارت عند صلاح لي كان كيقاد فواحد ديكور وشدات ليه فيديه مبتاسمة

بسمة : ( الفرحة واضحة فعينيها ) ولدنا كمل ليوم عام

صلاح : ( بعيون واضح عليهم لحب زير على يديها وباسها فراسها ) الله يخليه لينا ياربي ويحفضو وإن شاء الله يجيو خوتو فطريق

بسمة : ( بخفوت وبسعادة ) إن شاء الله

وقفو حدا لباب ومبيريكة ورقية معاهم وحتى خالة فريد واقفين كاملين وفرحانين لإلياس لفنكوش لي كان غير هادي شهورة فبطن مو دوزو معاه أيام زوينة وذكريات عمرها تنسا .. الفنكوش لي من صغرو طبعو صعيب وباينة فيه مزكار وحاجة باغيها مايتفاكش حتى ياخدها .. طفل صغير معمر عليهم ومخلي حياتهم تزيان وتزيد لقدام

دخل بخطوات معكلة لابس سالوبيط فلبيج وسبرديلة بيضة وشعرو طايح على عينيه كي تطلقات موسيقا بدا يصفقو ليه وكلهم وبصوت واحد كانو كينطقو " Happe birthday ilyasse بتاسم بطفولية وبسعادة وبدا ينقز ويصفق بيديه واخا مفاهم والو ولكن داك لجو عجبو ونفاخات كذلك .. هزاتو بسمة وحيدات ليه سبرديلة وتقيشرات وحطاتو على ركابيها وكلهم دارو بيه كيلعبو معاه وعطاوه كادوات حتى من رتاج شرا فريد كادو وحطو فيديها وبقا شاد فيها حتى مداتو لإلياس ..

صلاح : نقطعو لحلوة ؟

نقلات نضراتها بيناتهم بسعادة كبيرة فرحانة بيهم وبلمتها معاهم كانت هادي أحسن عائلة ليها مافيهم لا حسد ولا غيرة رغم لمشاكل ورغم أي حاجة كتوقع كيرجعو يتصالحو وفالأخير شدة كيوقفو مع بعضياتهم وكيجبرو خواطر بعضياتهم وكيبغيو لخير لكل واحد فيهم .. الحياة كانت صعيبة بنسبة ليها قبل متعرف عليهم وفداك درب كيف كانت تقول عمر شافت نهار زين وكانو ذكرياتها فيه كيجرحو وكيخليوها ديما ترجع لور .. من نهار نقلات منو وسكنات فهاد برطمة رتاحت نفسيا ورجعات صحتها او حتى من مول دار خلا ليهم ديك برطمة بعد ماتفاهم مع صلاح وقرر يشريها من عندو والحمد الله حتى الأمور تحسنات بعد ما خرج صلاح من الحبس وخدم مع فريد او ولا شركاء تعرفو كتر او ولاو لكليان بكثرة والخير كيزيد ..

بسمة : ( تنهدات بسعادة ونطقات بحماس ) ناخدو تصويرة كذكرى ومن بعد نقطعوها

وقفو مجموعين جنب طبلة وشد فريد سيلفي وبسمة معنقة إلياس لوسط وصلاح مدرعها وضاحك بتاسمو ولطاقط فريد صورة ، هز إلياس رجليه ورجع حطهم بزربة وجاو وسط لكيك حتى تصورو رجليه فلوسط على لكريمة خرجات بسمة عينيها وشهقات وبقات كتشوف فيه بصدمة

صلاح : ( قهقه بصوت عالي ) هانيا ماشي مشكل لي عاف من رجلين ولدي نجري عليه

مد يدو وقطع منو ومد لبسمة تاكل منو وهي كي شافت رجلين ولدها مطبعين على لكريمة خسرات سيفتها وبعدات وجهها

بسمة : ( غوبشات ) والله مناكل من داك طرف قطع ليا من جيهة لي ممقيوساش

غفلها وطلا ليها ديك لحلوة على وجها وخشا ليها طرف فمها وخلاها تسرطو بلهلا يطريه ليها وهي خدات شوية من وجهها وطلاتو ليه فوجهو وفشعرو وهو هرب منها كيضحك ولكل كان ضاحك على هبالهم وفريد كان كيصور ڤيديو بأمر من صلاح لي كان باغي هاد لحضات يتوثقو ويبقاو ذكرى عندو ..

قطعو لحلوة وكل واحد خدا طرف وجلسو كياكلو ومجمعين مع بعضيااتهم مبيريكة عينيها عليهم بسعادة الفرحة مساعياهاش وكل مرة كتحمد ربي وتشكرو وعينيها كيدمعو ودور وجهها حتى تمسح دموعها وترجع تشوف فيهم مبتاسمة وبسمة كانت رادة ليها لبال وكان شعورها قريب ليها ولا نقولو مضاعف حيت وأخيرا كانت حاسة بأنو بصح عندها عائلة وأنها مرتاحة فحياتها ، حققات ذاتها ودارت لي عجبها خدات ديبلوم ديالها وكتفكر أنها تفتح بااتيسري تكون كبيرة وتقادها وديكوريها على دوقها ، عندها فراسها بزاف دالأخلام وطموحات قبل كانت أنثى كترضى بلقليل وتحني راس ودابا ولات أنثى متكاملة تبدلات فشخصيتها وفطريقة تفكيرها ولات إنسانة طموحة وكتفكر تزيد تطور من هنا لقدام وعمرها تبقا غير جالسة فدار ومادير والو ...

نقلات نضرها لصلاح لي كان كيشوف فيها وهي شاردة وساهية بتاسمات ليه ورد لها إبتاسمة فلبلاصة بتعنيقة كيعبر فيها على كل مشاعرو وأحاسيسو من جيهتها ، بتاسمات وهي كترجم حضنو لكلمات لطالما كان إنسان كيعبر ليها على حبو بالأفعال وديما واقف فضهرها راجل وسيد رجال قد كلمتو قد دراعو ، راجل شهم عولات عليه ومخابش ضنها .. كان ونعم زوج ليها كيفكر فمصلاحتها وحقاني وعمرو هز عليها يديه ، راجل عولات عليه وكان سند وزوج وأب وأخ وكولشي ! كولشي لقاتو فيه عمرو نساها وحنين عليها ..

ضمات ولدها ليها براحة بال أخيرا ودعات فنفسها عمر يتفرقو ويبقاو ديما مجموعين ويطول فعمر مبيريكة لي كانت ونعمة الأم ولعگوزة بالنسبة ليها ...

[ كل البدايات صعبة ومرهقة ، إلا النهاية تأتي على شكل شعلة حب تنفجر بدواخلنا لتشعرنا بالأمان والسلام أخيرا ]

النهاية