محتوى القصة
جاوبت آلاء و قالت :"" و انت ماالك .. انا و صاحبتي و انت اش دخلك ""
ضحكات هدى و قالت :"" انا اخويا لي بغيت نعاونها .. كاتقطع القلب الزغبية ""
نغزاتها آلاء و هي كاتخنزر فيها ..ضحك زياد و قال :"" و طلقونا انا راه جاني الجووع ""
جاوبت آلاء و قالت :"" واخا ... قربنا نساليو خاص غير لاخر يدخل ""
دخل زين العابدين للدارو .. لقا امو جالسة كاتفرج .. دخل باس يدها و تكا حداها .. شافت فيه و قالت :"" يسحاب لي ماغاتجيش اولدي .. اشنو درتي ""
جاوبها و قال :"" والو الوليدة .. مالقيتش خدمة ""
تنهدات و ربتات على كتفو و قالت :"" الله يجيب اولدي ""
هز عينو شاف فيها و قال :"" عرفتي منين كنت جاي الوالدة .. لقيت واحد الحاجة ""
جاوباتو و قالت :"" اشنو هي اولدي ""
خشا يدو فجيبو و جبد الفلوس .. خرجت عينيها و قالت :" هادشي لقيتيه ؟؟ ""
ضحك و قال :"" عجب ياااك .. انا نلقى هادشي من فلوووس .. تعاوديها لحمق يضحك عليك .. هكيهم .. و الله الوليدة ماعارف حتى شحال تما ""
شافت فيه و قالت :"" اش بغيتهم اولدي .. خليهم لييك .. ماخاصني والو ""
شاف فيها و قال :"" كيفاش ماخاصك والو .. دواك شوية و يتقادا .. و الصير ديال الدار و التقدية .. و .. اجي ياكما .. ""
جاوباتو و هي نوعا ما كاتهرب و قالت :"" لا اوليدي مابقيتش كانطرز للعيالات .. غير كون هاني ""
جاوبها قائل :" و بلا مانوصيك الوالدة .. انا طلعت ""
جاوباتو قائلة :"" فين طالع .. انا دابا نحط الغذاء ""
جاوبها و قال :"" غير حطيه .. انا نصلي الظهر و نهبط ""
طلع للطابق الفوقاني .. دخل للحمام توضا و خرج لغرفتو ... صلى صلاتو و جلس يدعي لله كيف عادتو بالتوفيق و بحفظ والدتو و يطول عمرها و بالتيسير فجعل البنت لي كاتعجبو تكون من نصيبو .. ناض وقف جمع صلايتو و هو يصوني تيليفون ديالو .. كان رقم غريب جاوب بتساؤل و سمع صوت بنت .. كاتسول "" واش انت زين العابدين الزغبي لي دفع السيفي ديالو داك الشهر لشركة **** للتصنيع ؟""
جاوبها بلهفة و انتباه و قال :"" اه اه .. انسة انا ""
جاوباتو ببشاشة و قالت :"" الى كانتي مسالي جي عندنا غدا مع 8 ""
جاوبها بلهفة ماقادرش يخبي فرحتو و قال :"" بطبيعة الحال .. شكرا ""
قطع و هز يدو للسماء كايحمد الله ... ياله غايهبط يبشر امو و صونا تيليفون جاوب باستغراب من الرقم الغريب و تصدم منين عرف بلي تم القبول ديالو في شركة اخرى ... تصدم بقا حال فمو كايشوف بصدمة فتيليفون .. و ها هو كايصوني تاني .. جاوب و زاد استغرابو و كانو 3 عروض الشغل جاو فدقة وحدة و غير بووحدهم ..
هبط كايجري عند امو و كايغوت و قالت ليه :"" امااالك اولدي خلعتيني اش كاين ""
جاوبها و هو كايضحك و قال:"" و رااه جاوبني 3 الخداامي الواالدة .. وا تلاااااتة فدقة وحدة ""
خرجو عينيها حتى هي مامتيقاااش .. حتى استوعبات و تبسمات تدرييجيا و عنقااتو كاتضحك و قالت :"" وا مبروووك اولدي .. واش خدمة رسمية و لا ..""
جاوبها و تلاشات شوية من فرحتو و قال :"" الخدمة الرسمية الوالدة نسييتها و نساايها حتى انت .. هادو غير خدامي ديال سلك .. و لكن ماعلييش .. غانختار احسن 2 .. كاينة وحدة بليل و وحدة بنهار ""
جاوباتو برفض و قالت :"" مالك على 2... وحدة صاافي مااالنا حمد الله مستورين .. ماعنداش الكراء لي نهزو ليه الهم .. حق باك من الورت و خلاه ليك .. و الصير راك معاون انت و اختك شيماء .. مالك تضرب فتمااارة هكا كيف حمار الطاحونة ""
جاوبها و قال :"" الوااالدة .. انت كاتبسطي فالامور حتى نيت كاتبان بحال والو .. و لكن انا ماراضيش بهاد العيشة .. كولشي كانتزقرمو فيه .. و انا ماراضيش ختي تصرف معايا . راه انا الراجل ديال الدار و مانرضاش شي حد ينعت فيا .. و زايدون ياك انت باغياني نتزوج .. اوى راه خاصني نجمع الفلوس باش نقدر ننزوج .. اولا ؟""
جاوباتو بفضول و قالت :"" وا هي حاط عينيك على شي وحدة .. سمع ااه نقول ليك .. ماغاتزوج غير بلي انا بغيتها ليك ..""
جاوبها و هو كايشوف فيها بنصف عين و قال :"" و شكون هادي لي غاتختاريها ليا .. البيلسانة عاوتاني؟!!""
جاوباتو و قالت :"" و ماالك كاتقول فيها هكاك .. علامن نظل نجمع مع العيلات و كولشي عيالات الحي تصاحبت معاهم و نظل نجمع مع طيابات الحمام و كل 4 ايام نمشي ليه غير كانديرها سبة باش نلقاها ليك .. اه ..؟!!""
جاوبها و هو كايربت على حناكها بلطف و قال :"" نساااي عليا الواالدة دووك الخراايف راه ماكاينش داكشي ... ""
حيدات يدو و قالت :"" هانتا اولدي .. قلب حتى انت راه موصية شيماء حتى هي .. ماتنساش راه شعرهم و جلدهم ابيض و عيونهم يمكن كايبريو بحال الجوهر و لا معرفت كيفاش قالت ليا .. ""
ضحك و جاوبها ساخر :"" و ما ماكاتشعلش الضو ؟""
ضرباتو على كتفو و قالت :"" ماكانضحكش الحلوف .. حل عينيك و رد البال راه تقدر طيح فيها .. ""
جاوبها و هو داخل للصالة كايقلب على التيليكوموند و قال :"" الغذاء الوالدة راه جعت ""
جالسة الاء و خةتها و هدى كايتغداو ..
شبع زياد ياله غاينوض و شاف فاختو بنصف عين حداه و هي كاتغدا .. دور يدو لتحتو و داير تجويف وسطها .. حزق فيها و نيشان حطها على نيفها .. لاحت لي فيديها و رجعات لور كاتضارب مع ديك الضبابة الخضراء لي حط قدامها .. و ريحة الجيفة لي خنقها بيها ..
ضحك هو و هدى .. اما زيد كيف عادتو كايخاصم عليه و يعطيه درويدس اداب الطعاام ..
غوتات الاء و هي كاتقاوم شعورها بالغتيان وقالت :"" و اللهتا زدتي فييه .. اش هااد الفعاايل اصااحبي واه كانتغدا .. يااخ عاجبك حزااقك ؟؟""
ضحك و هو كايشنق عليها و قال :"" كيف جاااتك حزقة فطور البيض .. باقي خاصك تجربي حزقة اللوبيا ""
قال زيد :"" وا كانتغدااو ابناادم ""
ضحك زياد و شاف فهدى لي كاتاكل و تضحك و قال :"" هدى عمرك جربتي .. غانرحم هاد المسكينة و نجرب فيك حتى انت ""
جاوباتو و قالت :"" لاا اخويا .. حجارك يشدووك ""
ضحك و جاوبها :"" اجي بما انني بوقوص و اخو صاحبتك .. ماتكونيش مزعوطة فيا و مخبياها ""
ضحكات هي و الاء حتى بانت لهاتهم كاتلعب و قالت هدى :"" كيف غاانديير نتزعط فيييك اخويا و انت كاتحزق قدامي و تشممها لينا بالعلالي ""
ضحك زياد و ضرباتو الاء فكتفو ضاحكة و قالت :"" الكا .. حمد الله هاد الجانب النتن ديالك ماشافتو غير هدى مسكينة .. نصيحة اخوية .. عمرك ديرها قدام شي انتى حيت غاتهرب حتال القمر و مايكفيهاش ""
جاوب زيد و قال :"" وا بصراحة .. القمر خاصكم نتوما ب2 تمشيو ليه و تهنيو البشرية من مصايبكم ""
ضحكات هدى و جمعات الاء ضحكتها خنزرات فيه و فهدى .. هز راسو فيها و هي دور وجهها كاتبرغم ..و قال :"" تخافي ماتحشمي.. معاش داخلة ؟ ""
جاوباتو و قالت :"" الجووج و ماغاندير واالو .. رخفو عليا شوية ""
وقف كايجمع الماعن و قال :"" غير بالشوية عليك .. ماقلنا والو .. غير هو رجعي للدار نيشان .. ""
شافت فيه و قالت :"" علاش بنت ليك كانرجع عوجة ""
تحنا كايهز شيء وهمي و هو كايقول : "" تي انا شفتك كلمتي بكلمتك تصحابيني زياد لي مضسرك .. و الله يا والديك حتى نعاودك فالتترابي ""
مع تحنى ناضت كاتجري للحمام تغسل و تبعاتها هدى كاتضحك .. رجع كايجمع الماعن و ناض زياد كذلك كايضحك ...
رجعات الاء للدار مع 5 العشية ... زيد جالس وسط الصالة خدام فالحاسوب .. سلمات عليه و دخلات لبيتها بدلات و طلقات موسيقتخا كيف العادة و هاد المرة نقصات و هي كاتنغر ..
آلاء :"" نقصو لا يتم جاي داك المصيبة كايدق تاني .. و اصلا غايكون على سبة بسباب داكشي ديال الصباح .. زعما يقولها لخوتي ؟ ناري يسيقو ليا الخبار .. غايندموني و يرضوني انا السباب .. اصلا خاصهم غير السبة باش يعلقو على لبسي و خروجي .. اشنو ندير نطلبو ؟ لهلا يحييه .. اوى بقا غير هو نمشي نهضر معاه .. و اشنو ندير ماخاصهاش توصل للخوتي ؟ ""
راجع زين العابدين من الحانوت شاري بعض المشتريات .. حتى سمع صوت شي حد كايعيط باسمو .. دار وقف و تقدم ليه شاب صغير .. و قال :"" خويا زين العابدين بالرجووولة ""
جاوبو و قال :"" اش دااكشي تاني ""
جاوبو و قال :"" هانتا هدا البيسي ديالي .. الحرام سيمانة و انا خدام على واحد البروجي .. جات البرهوشة ختي مسحات الزمر كامل و انا غانقدمو غذا و مابقاش ليا الوقت فين نصايبو .. انت عندك مع هادشي .. ضبر كيفاش ترجعو الله يحفظك ""
جاوبو زين تلعابدين و قال :"" مسخووط انت .. كل مرة جاي بمصيبة هذا راه غير زبل .. لوحو راك هلكتيه ""
جاوبو بترحي :"" الله يرحم الميييمة .. عتق خووك الله يحفظك و بحلاوتك ""
ضحك زين العابدين و قال :"" بحلاوتي .. و منين غاتجيب هاد الحلاوة .. ارا ارا لهنا رجع ليه بالليل انا غانشوف ""
جاوبو و قال :"" الله يحفظك .. ها انت عنداك توقع ليه شي حاجة هو راس مالي بالرجوولة ""
جاوبو زبن و قال :"" وا صافي فهمنا .. دوووg""
دازت الاء قدام خوها مبدلة .. و قالت :"" انا خارجة عند هدى ناخد عندها شي دفتار ""
طل من تحت نظاراتو و قال :"" اشمن دفتار الكذابة .. قولي غاديا تجلوقي فالزناقي ""
جاوباتو و قالت :"" انا دغيا غانرجع ""
رجع حدر عينيه لشغلو و قال :"" و الى كنتي خارجة هزي معاك الزبل لوحيه ""
جاوباتو و قالت :"" دابا يخرجو زياد.. انا كولي نمشي للبركاصة نلوح الزبل ""
جاوبها و قال :"" مانعاوش معاك الهضرة ""
جاوباتو بتذمر و هي كاتنغر و قالت :"" وا حشوومة عليك .. مابقيتش غاادية انا غااع "" و تمات راجعة لبيتها ..
جاوبها و قال :"" وا الى ماعندك مايدار طلعي سيقي داك السطح راه والا مغبر ""
رجعات غادية للباب و قالت :"" انا خاارجة ""
بلا مايهز عينو قال :"" الزبل ""
رجعات و قالت :"" ماخارجاش ""
و رجع قال :"" السطح ""
رجعات غادية للكوزينة مفقوصة و هي كاتخبط برجليها :"" اوووووووووووف ""
يتبع
التعليقات
لا توجد تعليقات بعد، كن أول من يعلق.