قصة همسة حب الجزء الأول

بعيد على البلاد ..بعيد على الاحباب وبعيد على الصحاب..هادي حياتي من نهار قررت نخرج برا بلادي.. مكنتش كنضن ان خرجي من بلادي مغيكونش فقط مغادرة ارض الوطن ..بل غادرت لهجتها وتقافتها ومجتمعها وحتى عقلياتها ..حياتي فالخارج لمدة طويلة خلات بلادي تجيني غريبة عليا كأنني ماشي منها ومكنتميش ليها واخا حبها فقلبي محفور وذكرياتها فعقلي راسخة. عشت بديت اول يوم ليا من بعد ما سافرت اول سفر لالمانيا..تما بدات حياتي وتعرفت على شريك حياتي فسن صغيرة ،لاكن بحكم العمل دياله وجنسيته مشيت معاه لسويسرا وقررت نعيش الحب معاه ونبني حياتي انا وياه ..لاكن مع الاسف الشديد تصاب بالسرطان فالسنة الاولى من زواجنا وتوفى قبل عيد زواجنا بنهار. دوزت العيد وحيدة كنضحك على سخرية القدر مني ومن احلامي..كنت كنتسنى داك العيد يوصل باش نحتافل بيه بحال انا وياه بحال اي كوبل كيبغير بعضياتهم خصوصا واننا تزوجنا عن حب .لاكن مع الاسف دوزتو بوحدي ودوزت معاه اصعب انواع الالم والفراق حتى كنت كنتمنى لو مت ورتاحيت من هاد العداب . كنت كنقول موحال نقزها بلخصوص انني كنت بوحدي فسويسرا ومكان معايا حتى واحد يصبرني ..وماكنت عارفة القانون فسويسرا كيفاش داير والحياة فيها كيفاش غتكون.. حتى كنتفاجأ بخبر هزني وحطني عمرني كنت متوقعاه..بعد الانتهاء من اجراءات الدفن واللاوراق القانونية كلها فاجئني المحامي بخبر الورث اللي عمرني توقعتو..بقيت غير كنسمع ليه وهوا كيقول لي باللي الدار صبحات ملكي والمكازا ديال الملابس الرياضية للرجال والنساء اللي مساحتها كتعدى مئة وخمسين ميترحتى هي صبحات ملكي والفلوس اللي فحسابو اصبحو ملكي..يعني انا الملكة الوحيدة لممتلكاته كلها خصوصا انه وحيد وواليديه توفاو وماعندوش اخوة!! .. انا النهار الاول فاش تعرفت عليه وقالها ليه شفقت عليه حيت ماعندو عائلة وهادا من بين الاسباب اللي خلاوني نبغيه الى جانب الادب والتعامل والحب اللي قدم ليا خلاني نبغيه قبل منعرف حتى شنو كيملك ..قبلت نتزوج بيه وماسولتوش على البيت اللي غنسكنو فيه .. الحاجة الوحيدة اللي عرفت عليه انه عندو محل ملابس رياضية ورتو على باه فقط.لاكن مع الاسف ماورتش غير المحل بل ورث حتى المرض الملعون اللي خلاه يلتاحق بوالديه قبل مايحل عينيه على الدنيا ..ماقدرتش نفرح بداك الورث كله بل تخلعت ..خلعني وقلت للمحامي انا كيفاش غادي ندير بوحدي لهاد الثروة. هادي وانا مزالة صغيرة ماعنديش حتى استعداد لتقبل الفكرة!! انا عمرني تخيلت راسي نكون صاحبة بيت او مشروع او عندي فلوس فالحساب. وخصوصا فبلاد من غير بلادي وبلاد اللي معارفاش عليها بزاف ومزال ماتعودت عليها ويالاه كملت فيها عام !! خاصني اعوام باش نتأقلم باشندير اصحاب باش ندير شبكتي الخاصة اللي تعاوني على التأقلم ..لو كان هاد الورث وقع فألمانيا كنت نقدر نتقبلها حيت عشت فيها مدة طويلة مع ختي وعندي فيها عائلتي لاكن فسويسرا!! اللي اصلا جاتني مقناطة ماقدرتش نتأقلم فيها وغير راجلي مسكين اللي كان عندي فيها ومكانش القنط كيبان ليا!! تلفت ماعرفت ماندير كان خاصني ضاروري استراحة من هاد الوقائع كلها والابتعاد على كلشي وكان خصني شي واحد جنبي يوقفني ويقولي شنو ندير واخا المحامي كان كيعاوني لاكن بصراحة كان خاصني شي واحدمن الاقارب ديالي حدايا ف في فترة بحال هاديك .يجمعني ونحس بالدعم وبالقوة خصوصا انني انسانة كتأثر وحساسة بزاف وشخصية كتحب الضحك والمداعبة وماليهاش فالاحزان والى دخلات فالحزن كتيه وتبدا تقلب فينن تشد وتتمسك

قررت نهرب من سويسرا ومشيت على وجه السرعة لالمانيا عند ختي.لقيتها كتسناني ولقاتني ضعيفة ومكسورة وبدات كتجمع اشلائي وتقويني ولقيتها سند ليا كتشجعني وتقولي باللي جا الوقت اللي تكبري فيه فكريا ونفسيا وماتبقايش معولة على ركيزة وكوني نتي الركيزة ديالك وماتخليش حقك يضيع او ضيعيه بيدك .. تخيليلو كان عندك بيبي شنو كنتي غديري؟ غتنوضي على قلبه تهزي المسؤولية ..يعني نتي بيبي ديال راسك هزي راسك ووقفي لانه كاين بنات ثلاتة وعشرين سنة مزوجين وهازين مسؤولية بيت .

فكررت وقلت ميمكنش ثلاتة وعشرين سنة يكونو مزوجين وعندهم اطفال حيت انا كنت مستبعدة فكرة الاطفال ونحيتها جانبا الى سن ما فوق الخمسة وعشرين سنة ..ولولا الحب ماكنتش ابدا نفكر فالزواج وكنت فقط ندير معرفة صطحية او الحد الاقصى ديالي ندير بوي فراند لاكن نتزوج لا .حتى تلاقيت بالحب اللي خلاني نخاف نخسرو وغطيت عيني على جميع انواع الشباب واقتنعت .

موتو مكانش ابدا ساهل بالنسبة ليا ..لاكن جات موجة الورث اللي شطناتني خلاتني نتشغل على وحدتي وتفكيري واحزاني..لاكن من بعد مللي رجعت لجونيف واستقر الوضع قانونيا واصبحت المالكة للمحل والبيت اللي كان كيتكون من جوج طبقات وسيارة مرسيديس كلاسيكية بقيمة تمانين مليون مغربية و مال فالحساب البنكي اللي تحول مباشرة لحسابي بعد انتهاءكل الاجرائات

بعد استقرار الوضع المادي جلست نصفي الحسابات انا وضميري ونفسي وقلبي وحطيت عقلي وسطهم وجلست نخاطبهم بلساني..اشنو بغيتي نتا ؟ وشنو بغيتي نتي؟ ونتا اشنو كطلب ؟. اشنو بغيتو مني ميمكنش تتجمعو فجسد واحد وتردوه حلبة مصارعة وضاربو فيه

قالي قلبي شوفي فينا وشوفي شكون واكل العصى فديك الحلبة ديالك

تلفت جيهته لقيتو فعلا كينزف والضمادات كيلسقو ويرجعو يطيحو ..قالي واخا بالدوا واخا بالضمادات حتى حاجة ماقدضات فيا..حاولي تجربي شي دوا اخر من غير النسيان يمكن يوقف النزيف ونرتاح شوية من الالم ونوقرك حتى نتي

قلت ليه علاش هادشي كله ؟. علاش هاد الكدمات والجروح كلهم من كل جهة واش مابغيتيش تبرا واخا داز شحال على الفراق

شار لي بصبعه جهة عقلي اللي كان قالب وجهه مكيشوفش فينا بالمرة وقالي

ها اللي كل مرة كيفكرني وينزل عليا بضربة

تنهدت بتعب كنحاول عقلي بالسياسية لعل وعسى يتنازل شوية ومايعاندش وقلت ليه

ماكفاكش هادشي اللي عشنا وهادشي اللي داز علينا كله ؟ ماقدرتيش تفكر فالمستقبل شوية وتبعد على العاطفة

قالي ميمكنش انا حاليا ماعنديش ذكرايات من غير داكشي اللي مخزن وميمكنش ليا نتوقف على التفكير ..اتيني بالجديد اللي يخليني نرد الذكريات الزوينة اللي عشتو مع بعضياتكم للارشيف..نسيتي باقة الورد اللي كان جاب ليك وكنبغيك اللي كان قال ليك

دورت عيني جهة القلب لقيتو كينزف اكثر وبديت كنترجا عقلي ونقوليه براكة ..صافي براكة فكر فهاد الفلوس اللي عندنا فكر فشنو غنديرو فكر فالحياة

قالي..الفلوس وكلشي والوحدة والحب فين هوا ؟ كلشي كيدار على قبلالحب والمتعة فين هي

سكتو قبل مايبدا القلب ينزف قلت ليه سكت ..صافي ..صافي ماتقولي حتى كلمة

قالي شوفي مع نفسك اللي ماعندها نفس فحتى فحتى حاجة اللي عييت نضغط عليها تخرج وتعيش باش تعطيني ما نخزن ونعمر سينتك جديدة لاكن هي مامساعدانيش

شفت فيها لقيتها غمامة كحلة مطوية عاطيانا بالضهر ..قبل مانتكلم قالت لي

ماتقوليليا والو ..مابغيت حتى حاجة بغيت غير نعس ..حتى واحد مايصدعني ولا يملي عليا رغباتو .. ماعندي جهد لحتى حاجة خلينوني عليكم فالتيقار .

مالقيتها من حتى جهة ..هزيت راسي فالسما وهزيتهم معايا مدكدكين بثلاتة وقلت لراسي

ماعندك فيين تهربي يا نهى ..حقك فالعداب غتعيشيه غير وجدي راسك بلا ماتقاومي تكيت على قلبي قلت ليه صبر .. لامفر من هادشي ماعليك غير بالصبر صبر حتى يفرج مولانا

مجاوبنيش ورجعشد بلاصتو ورجعت كل حاجة فين كانت وجلست على البكا لعل وعسى نرتاح شوية..شفت نفسي الغمامة كيفاش مطوية وكيفاش سادة على راسها وقررت نجرب ندير بحالها باش نتغلب على عقلي ونخلي قلبي يرتاح شوية وعطيتها غير للنعاس ..النعاس ولا شيء غير النعاس ..لحسن حضي ان الماكازا كان عندها مسيير والقوانين فسويسرا صارمة وكلشي ماشي بالوضح وبالورقة وستيلو والا كان غيوقع ليا السيزي..بحكم ان المكازا كبيرة كان عندها كونطابل وجيرو وكانو كاع ليفاكتور اللي كتجي بيهم السلعة والمصاريف كلها كدخل فالحساب وتسجل فجدول العمل وكانو الايمايلات ديال الشركات اللي كنتعاملو معاهم كلهم كيوصولني انا هاكا كنت كنعرف شنو دخل وشنو خرج بلا منسول .

بقيت على داك الحال لمدة سنة تقريبا كنطالع على الميل ديالي ونشوف رسائل التسويق ونرجع نتكا حتى بديت كنعيا من النعاس ونمل وبدا عقلي كيدفعني نتحرك ..ضحكت عليه بسخرية قلت ليه صافي هادا جهدك !! لا غير خليك طاغي نشوفو شكون غيعيا انا ولا نتا .قالي عييت من النعاس وليت مكنعرفش نفكر صافي ديري اي حاجة الا النعاس ..راه كلشي تلف ليا وكلشي تخربق ليا

طليت على قلبي لقيتو كيرغب ويزاوك ويقوليلا غير خليك ناعسة راه فاي لحضة يرجع ينزل عليا بشي ذكرى واجا ما جمع الجرحة

تنهدت بعمق ودورت وجهي جهة نفسي قلت ليها مزال مابغيتي تصفاي من ديك الكحولة؟ ديري الدراع شوية ويالاه نتحركو راه عيينا وراحنا مقهورين

ضارت عندي قالت لي انا توحشت المغرب..توحشت البنات لقدام وريحة البلاد ..مانقدرش نهز الراس هنا ونتعالج هنا خرجيني من هاد البلاد اولا اللي مكنطيق فيها حتى واحد

تنهد واحد تنهيييدة ودرت يديه على خدي قلت كنتسنا الرد ديال عقلي.. ماردهاش فوجهنا حيت عارف راسو غنطمسوه بالنعاس وأييدنا فقرارنا وتافقنا على سفرة للمغرب واخا الجو مكهرب وفصل الشتاء والجو غير ملائم للسفر لاكن حنا مابيناش المسارية والدوران ..بينا نبدلو اللغة والحيوط والريحة حتى هي

اذا ..هيا بنا الى المغرب..مباشرة من بعد ماتقبل عقلي الطلب قلبي تكمش مابقيتش كنسمع حسو وخليتو يتسنط لعضامو ..لاكن تصدمت فنفسي اللي ناضت تحمسات للسفر ودفعاتني نجمع حوايجي ودوزت الليلة كلها كنطوي ونحط فالباليزة حتى ساليت وقلت ليها

صافي هادشي اللي بغيتي

قالت لي شوفي مافيا اللي يتمرمرد فالطرقان ..الى بغيتي نبقاو مزيانين دي طموبيل

طار علينا عقلي قالي ديها غتنفعك حسن ماتمشي وتكري باش غتكري دي معاك طموبيلتك ونمشيو مساريين من بلاد لبلاد واخا نشدوها كرجة فالطريق لاكن حسن حنا غرضنا نخرجو من الخيوط ولعل هاد السفرة تكون سفرة صلح بيناتنا

قلت ليه ماقلتو عيب على بركة الله

شديت الطريق بالطموبيل وبكثرة ما شبعت راحة ماحسيتش بيها حيت كنت متلهفة ندير شي حاجة ..اي حاجة تحسسني بوجودي فالحياة المهم مانبقاش محسوبة من الاموات ..توحشت نتحرك توحشت نشد طريق طويلة..توحشت نسافر ..توحشت نضحك وتوحشت روح الدعابة اللي فيا..عييت من الحداد ومن الكآبة حتى عقلي مل من ديك الاسطوانة الحزينة يعاودها بقوة ما كل مرة يطلقها علينا ..اما القلب بكثرة ما كلا دق مابقاش كيحس بالالم واخا ينزف ولا يجلس. حسيت بأي حاجة رجعات كتطلب تعيش وكطلب مني انا مدير محاولة ويمشيو معايا فيها ..المهم ما نسدش عليهم من جديد.

دزت على فرنسا دوزت يوماين فيها وخديت بعض الهدايا للعائلة اللي علمتهم بالقدوم ديالي..خديت شي حاجات كانو خاصيني حتى انا وانطلقت من جديد دزت على اسبانيا حتى للخوزيرات وشديت الباطو لميناء طنجة ودخلت .حليت السراجم وواخا كان البرد واستنشقت ريحة البلاد.. الله على ريحة شحال غزالة..احسن من عطور شانيل وكرستيان ديور ..وقفت السيارة فالمدينة واخا ماعندي غرض بالمدينة لاكن بغيت نسمع الدارجة اللي تعشطت ليها بزااف.واخا بدات كتهرب ليا مع البعد والغربة وكنعيا وانا كنهضر بيها لمدة طويلة لاكن كنحبها ..على قبلها وعلى قبل الوجوه المغربية والشعبية ديال الناس دخلت للمدينة سرحت رجلي وانا لابسة بوط حتى للربكة بلاستيك فالاسود وسروال كحل وجاكيط رمادية غليضة والطبوش كحل ويدي فجيابي والصك محزمة بيه قدامي وعادية كندور ونضحك مع الناس حتى حسيت براسيرصيت نفسي شوية ورجعت بحالي للطموبيل سديت عليا وحطيت قدامي صاك من الكارطون فيه جيبيوبرينكلز وشوية دالشكلاط يونسني فالطريق وكافي سخونة خطيتها حدايا..حيدا الجاكيط حطيتها حدايا فالكرسي وبقيت بواحد البودي خفيف صدره عريان وحيدت الطربوش حتى هي وخليت الطموبيل كتسخن ختى صهدت وكملت الطريق نيشان مونسة بدوك الطقيطقات والموسيقى المغربية حتى لمراكش. يالاه دخلت ماشفتش السطوب حيت اصلا طافي مافيه حتى لون حتى وقفني البوليسي للجنب وشاف الماطيريكل لقاها سويسرية وشار ليا بيدو نهبط الزاج

شفت الجو مابيهم فمراكش ماشي بحال طنجة ولبست الجاكيط باش نهبط الزاج وميضربنيش البرد وانا سخونة وهبطتو قلت ليه السلام

قالي السلام لاللة .لوريقات

مديت ليه لوريقات شافهم وقالي عندك مخالفة حرقتي السطوب

قلت ليه هوا اصلا محروق واقيلا ماخدامش !

قالي: السطوب اللي مقابلمع الناس اللي من الجهة لاخرى مابنش ليك شاعل فيه الخضر .يعني نتي غيكون شاعل عند الاحمر

بقيت كنضحك على هاد العملية اللي دار ليوقلت ليه شنو المعمول

قالي غتخلصي

ماكترتش معاه الهضرة حيت بان ليا غياكلني بعينيه قلت ليه شحال وعطيتو وخديت التوصيل وزدت فحالي كنضحك على استقبال مراكش ليا من اول دخلة ليها من نهار خويت البلاد..هادي باينة غضبانة على غيبتي وعطاتني فالباب قبل منزيد

فييين دارنا ..فيين الحي..حي المسيرة ..الاحبااااااس..الله الشارع جيت معاه عامر غيطرطق بالناس والطموبيلات غاديين جايين..كما خليتو لقيتو ..ميمكنش شحال توحشت شارع الاحباس . بلا منشعر دمعو عيني من كثرة الشوق لبحال ديك الاجواء..الدراجات النارية بكل انواعها فكل بلاصة راكبينهم بنات واولاد وعيالات واللجهة المراكشية اللي مستحيل ننسا عليها وبقات كتردد فاذاني طيلة غيابي على البلاد. هبطت الزاج كنضحك مع الناس بالفرحة ودخلت السيارة مع واحد الشارع لمجمع سكني كبير عندو باب كبير وجيت مع وقت المغرب دخلت حتى للمجمع لقيت الكارديان تما وقفني فمكان فارغ وحيدت الحزام لحت عليت الجاكيط ونزلت تبسمت ليه قلت عمي مبارك مابقاش هنا

شاف فيا باستغراب قالي مااات مسكين الله يرحمو انا ولدو انا الليوليت شاد بلاصتو ..شكون نتي واش كتعرفيه؟

تأسفت ليع وعزيتو قلت ليه انا بنت الحاج عمار

قبل حتى منكمل كلامي معاه خرجات ختي اللي كبر مني بعماين وماما وراها كيجريو بالفرحة طارو عليا عنقوني وعنقتهم وبدينا البكاء الحار وخرج بابا بجلابة غليضة ديال الحبة كحلة وباغة وتقاشر رماديين رقاق وطربوشة ديال رقيقم على راسو عنقني شميت فيه ريحة المسك ..بست يدو توحشتهااااوتلمست فنعومتها وعنقتو وعنقت ماما وطلعت معاهم موحشة دارنا المغربية بالكبص ديالها والزرابي والصالونات ..لقيت معاهم ولد ختي فالدار حيت حسب ماقالو ليا فتيليفون كتخليه معاهم وتمشي للخدمة حيت استاذة فالاعدادي.

الحوار اللا منتهي ..هما كيسولو على حالي وكيف بقيت وانا كتسول على حالهم وكيف دايرين مافراسهمش باللي نفستي المأزمة هي اللي جابتني ولاكن مابغيتش نقوليهمعلى حقيقة مشاعري واحوالي باش منشطنهمش وعطيتهم غير الحاجة اللي تفرحهم وتريح بالهم باش. حتى انا نفرح فاش ونرتاح فاش نشوف وجوههم ضاحكة .

وصلات ختي سلمى من الخدمة جات عندي كتجري حتى هي تعانقنا وجلسنا نهضرو مابغيناشنساليو لعشية كلها

اما ماما مسكينة لقيتها موجدة لينا لعشا كلنا وجا حتى راجل ختي لتاحق بينا وتجمعنا ديك العشية تعشينا مجموعين وكانت ماما مصاوبة لينا طنجية باللحم ..الله شحال بنينة وشحال توحشتها وتوشحت التغماس والمرقة ..بقيت كنغمس ونعاود ماهموني دفاري اللي صاوبت ولا لفرانش الابيض اللي رجع اصفر

كليت وكنتلدد بديك البنة وديك اللمة دالعائلة اللي فعلا كانت هي دوايا وهي العلاج لنفسيتي المستعصية الكئيبة .

بعد العشا مشيت رقدت دفاري فالخل حتى صفاو من الصفورية وجلست كتفرق فالكادويات .. قالت ليا ماما بالضحك كاع ماجبتيليا صباط ام كتلوم والمشطة دعبد الحليم

قالت لي ختي الكبيرة اييه والصابون راه من نهار مشيتي ماغسلنا وجهنا

بقيت كنضحك قلت ليها جبت ليك الصابون ديال شانيل تكايسي عليه ماتعرفي فوقاش نعاود نرجع وتجلسي بلا غسيل

دوزنا العشية كنضحكو على الكادويات ولاكن الصراحة والله واعلم كنقول تهليت فيهم حيت خديت ليهم داكشي اللي كنبغيه لراسي وتشريه لراسي والل كيعجبني..والادواق كتختالف عاوتاني والله واعلم لاكن بان ليا فرحو بيا وماعطاوش اهمية للكادويات بقدر ما لسقو فيا كل مرة تعنقني وحدة .

نعست اجمل نعسة فحياتي مع ختي فالبيت وصبحت على الفطور المغربي على حقو وطريقو ..كنفطر وكنفكر فصحاباتي القدام اللي مشيت وخليت وسولت عليهم ختي عطاتني رقم واحد صاحبتي فيهم سميتها احسان .عيطت ليها صدمتها قالت لي متقوليش ليا نتي فالمغرب!!

قلت ليها انا فالمغرب ايوا وجدي راسك نتشاوفو

ديك الساعة ناضت كتجري بغات تجي عندي لاكن انا بغيت ناخد راحتي مع صحاباتي بوحدنا كنا كما خديتها مع واليديا ودرت معاهم نتلاقاو ونتغداو فشي بلاصة وناخدو وقتنا حيت اللقاء الاول كيكون عميق.

وجدت راسي لبست جيب توب فيها كارويات كحلكة كلها مخططة ولافيست ديالها قصيرة بالبوطون ديال ليبيغل وبودي رقيق كول مونطي ودرت شاو مايل للجنب فالغور وهزيت صاكي وبوط بالسيور كحل مع لبية موس . كان ستيل كلاسيكي فرنسي شوية مؤنث على اللزوم لاكن كيجي معايا حيت ملامحي شوية مايلة للشينوا غير انا عيني كبار عليهم ومشفرين لاكن نفس الشبه بيني وبينهم وفمي صغير ووجهي بحال القلب وبشرتي مابين خمرية وبيضا كل مرة كيف كنبان على حسب الجو ..شعرب كحل بزاف لمتسوط الضهر متومج شوية وحجبامي غلاض مسحوبين مع عيني .ماغليضة مارقيقة بين وبين مرة نغلاض مرة نضعاف داكشي عني على حساب الكانة لاكن مؤخرا بقوة ما كترت من النعاس بقيت كما اانا واخا الخاطر مريض مادا مني والو

دزت على صاحبتي حدا دارهم بالطموبيل ونزلت نعنقها ، غير تعنقنا اجاا مافارقنا تفاقرنا بالبكا وركبات معايا لقات الكرسي عامر بالصيكان ديال شيبس وبديت كنخوي ليها ونضحكو باش تجلس ومشينا دزنا على نور حتى هي لقيتها فراس الشارع كتسنى ونفس العناق ونفس الاشتياق حتى كلشي بقا كيشوف فينا

ركبتهم معايا وبقينا كنقلبو فين نجلسو..حسيت بيهم كيبعدو من الاماكن الغالية وقلت يمكن ماعندهمش امكانيات ليهم خصوصا فاششفت واحد الغيسطو فكيليز ووقفت قدامو قلت ليهم هادا باين زوين

قالت لي احسان:ويلي ويليهادو قرعة دالماء بربعين درهم

قلت ليها واخا ..كيبان زوين

حطيت الطموبيل ونزلنا جلسنا تما على برا ..حان الجو رائع .. مابين الدفئ والبرودة لاكن الشتا مطاحتش والسما حمرا ..الجو ساهم فديك الجلسة الزوينة اللي جمعاتنا وحاولت منقول حتى حاجة عليا ..حيت الى جبدت غير كلمة غنضطر نشرح كلشي واي كلمة خصها تفسير وانا جايا باش نفوج ومانقول حتى حاجة لا على حياتي لا على حياة شي واحد اخر . حدهم سولوني قالو ليا واش مابقيتيش فالمانيا مع ختك قلت ليهم لا مشيت عشت فسويسرا وخدمت تما .صافي هادشي اللي قلت وسديت على الموضوع باش منرجعش نتخبط من بعد ونعيش الازمات وداكشي..سولتهم على احوالهم قالت ليا احسان انا درت اوتيست دوليغ وخدامة فالمطار دابا كنتسنى يحولوني للسرفيس دو فول

ونور قالت لي خدامة فباغا فاغماسي فالاحباس ..بقينا كنتجمعو على الاحوال ونتذكرو ذكرياتنا حتى داتنا الوقت ونسينا راسنا وبدا الضلام يطيح وقلت ليهم توحشت جامع الفنا

قالو لي يالاه نمشيو ليها

جمعت الحساب كله واخا ماخلاونش نخلص لاكن حسبتها عراضة حيت انا اللي قلت ليهم نجلسو تما .دفعت الفاتورة ومشينا لجامع لفنا ..بزز باش لقيت بلاصة للطموبيل ومع طويلة كتمحني فالسطاسيون الى كان مضيق.

هزيت صويك ديالي حزمت بيه فالجنب ومشينا كندورو وكل خطوة كنخطيها كنحس بقلبي كتحل والروح كدخل معايا .. مشاهد توحشتها واصوات ماكرهتش نضمها..حماس لوموبيونص ..يا سلااام

تلفت جهة القرد كنشوف فيه لاكن ماقدرتش نهزو شفتو لتيراتو طريبشة الغوز فوشيا بغا يشدها وخفت يجرليا حتى شعري معاها حيت تفرجت فبزااف دالفيديوهات ديال القرودة فمراكش كيديرو زبايل

رجعت اللور بعدت كنضحك وضرت لقيت احسان واقفة كضحك مع جوج دراري طوال ونور كتسلم ..كانو شباب كنضن مواصلينش الثلاتينا وواحد شاف فيا شوفة حسيت بيها ماشي شوفة عادية وتبسمت ليه ..واش تبسمت حيت ديك الشوفة حسيت بيها مميزة ليا ولا حيت اصلا كنضحك لكلشي منين مادزت وموحشة فالبشار يقولو عليا هادي غير شي حمقة .

لتاحقت بيهم من شوفتو حسيت بيه متوقعش نكون مع البنات وضحك معايا مد ليا يدو ومديت يدي سلمت عليه قلت ليه صافا

قالي صافا الحمد ونتي

قلت ليه الحمد لله

سلمت على صاحبو حتى هوا ضحك معايا حتى تسدو عينيه وتأكدت ان اصلا شوفات الدراري هاكاك دايرين مع البنات مكاين لا مميزة لا والو غير انا اللي شحال هادي ماجيت للمغرب تخلطو ليا الناس

شارت ليا احسان للولد لاول اللي شفت قالت ليا نصر الدين ..والولد التاني فيصل

تبسمت انا ونور قلنا ليهم متشرفين وشفت بنص عين جهة ناصر كان لابس دجينز ازرق وجاكيط الكوير وصاحبو لابس دودون

ماعرفتش علاش نصر الدين لفت انتباهي واخا انسان عادي رجل شرقي يقدر يشبه لبزاف ديال الرجال الشرقيين..ملامح وجهه عادية ماشي شي زيين اللي يطيحو عليه الارواح بحال الزين اللي كنشوف فسويسرا .. وحتى فورمتو عادية كيبان عامر وطويل بحال صاحبو ..عينيه كوحل وحجبانو كوحل ماعندوش مسافة واسعة بين العين والحاجب الشيء اللي عطا غموض لعينيه ونضراته للناس كتبان غامضة ومسرار ولحيته كحلة خفيفة .. ربع يديه ساكت كيشوف فجهة اخرى وانا كنعبرو كنشوف شنو اللي فيه اتيراني ؟! عندو وقفة زوينة ..عندو نضرات صارمة ..لاكن هادشي اصلا كنشوفو عند الرجال الشرقيين كلهم وفالمغاربة اكثر ماعرفتش علاش غير هما اللي فيهم هاد عزة النفس اللي كتخلي عليهم انطباع خارجي واضح ..قلت مع راسي يمكن شحال هادي مقابلت شي مغربي رجع كيبان ليا مميز.

دورت وجهي شادة فنور واحسان كتهضر مع فيصل ..داز واحد القريد اخر حدانا شيرت ليه بيدي بغيت غير نضحك معاه ساعا خلعتو كان غينقز عليا وهربت اللور كنضحك حتى داز ..ضرت جيت مع احسان نيشان كتشوف فينا وتشاور عاد فهمت باللي فيصل وصاحبو عرضو علينا نتعشاو تما وقبلت حتى انا ومشينا بثلاتة حدا بعضياتنا وانا وسط البنات وفيصل حدا اخسان وفالطرف ليه نصر الدين دخلى وسط الناس وتخربق الترتيب جيت فبلاصة نور فالطرف وهي رجعات لوسط حتى حسيت بنصر الدين داز من مورايا وجا حدايا

وسط الدخاخن وداك الرواج وديك الاجواء اللي واخا نوصفها منقدرش نوفيها حقها وقفنا قدام واحد عندو طبلة طويلة مدورة بحليسات بونج صغير وبدينا نتخشاو واحد من مور واحد وقالي نصر الدين غير دخلي نتي اللولة

ودخلت جلست حدى نور وجلس حدايا نصر الدين وبدينا نتشاورو شنو ناكلو ..تشهيت الشوا ونضت وقفت ضرت عند مول الشي كنطل لقيتو حاط شواية وشيرت ليه بصبعي و ريوكي سايلين على داكشي اللي كيشوي قلت ليه

عفاك صاوب ليا قطيبات مشويين

شفت الدنجال فالاول ماعرفتوش لاش كيصلاح ولا حتى شنو هوا جاني مرخي فوق الربيع حتى قالي دنجال مقلي وانا نقول اللللللله شحال توحشتو .طلبت ليه واحد جوج دنجالات حتى هما وجيت نجلس جلست على صاكي ورجعت نضت حطيتو على رجلي لقيت نصر الدين غير كيشوف فيا وصاحبو حتى هوا .همسات ليا نور فودني قالت لي راهم عارضين علينا دابا ومع مكيعرفوكش غادي يقولو هادي كتغنم

قلت ليها الاا راني غنخلصو راسي!!

قالت ليا غير قلت ليك شنو يقدر يقولو وصافي

هزيت كتفي قلت ليها لالا راه عادي

دازو قدامنا كناوة بطقيطيقات وقفو لينا كيضحكو وبداو يشطحو ويطبلو ووقفت كنسفق ليهم بالفرحة كنت غنتسطى .. تقول كنت محبوسة فشي حبس ماكنتش عايشة ..هاد الاجواء كنت كنشوفها غير فاحلامي وكان قلبي كيفرح اما فالحقيقة راه ميمكنش شحال تحمست وفرحت والناس كيزيدو يحمسوني بلومبيرنص..عطاني دوك طقيطقات شديتهم فبلاصتي وانا واقفة بديت كنقرقب بيهم شوية ورديتهم ليه ك ورجعت جلست شفت نصر الدين جبد بزطامو عطاهم شي حاجة ومحاسبليش انا واش كيدورو على الفلوس حتى شفتو عطاهم وبداو كيدعيو معانا وانا نحشم وجلست كنشوف بعيني وساكتة حتى حطو لينا الماكلة وكحز ليا نصر الدين الدنجال قالي عزيز عليك دنجال مقلي

ضرت عندو كنضحك قلت ليه عزيز عليا شحال هادي ماكليتو

قالي موجود علاش شحال هادي ماكليتيه

بقيت ساكتة مطولا وقلت ليه ماكتابش وصافي

قالي مساكناش هنا واقيلا ؟

قلت ليه علاش؟

قالي هضرتك بحالنا ماشي مراكشية

عاد انتبهت ليه حتى انا وقلت ليه حتى نتا ماشي مراكشي واقيلا

قالي ولد انا كازا غير جيت لهنا مع الدري صاحبي وصافي

قلت ليه اااه فهمت ..كازا حسن من مراكش؟

قالي علاش عمرك مشيتي ليها؟

قلت ليه لا عمرني مشيت ليها

استغرب قالي ميمكنش كاين شي واحد مزال مامشاش لكازا

ضحكني قلت ايه اناا نيت

بدا كيضحك قالي ايوا مرحبا بيك

بقيت كنشوف فالضحكة ديالو قلت ليه عندك واحد الضحكة زوينة

هز عينو بقا غير كيشوف فيا والقطيب فيدو وكمل الضحكة قالي شكرا حتى نتي عندك ضحيكة زوينة

عجباتني عندو هادي حتى وضحكت من قلبي وكليت الماكلة اللي كانت قدامي كلها وقالي واش تزيدي

قلت ليه لا منزيدش مزالة باغا ناخد حلزون

بدا كيضحك وطل عليا صاحبو قالي الشهية تبارك الله عندك محلولة..اشنو سماك الله بعدا

قلت ليه سميتي نهى

قالت ليا احسان بالصحة والراحة حتى تهضمي بخودنجال

مسحت يدي رجعت اللور تكيت على واحد الخشبة كنتسناهم حتى كملو و جا الطباخ جمع لينا الحساب وحليت بزطامي يالاه غنمد ليه الفلوس شدني نصر الدين من يدي هبطها قالي الله اودي اش كديري؟!!

قلت ليه علاش راه خصنا نخلصو شنو كلينا

بدا كيضحك قالي الله يهديك مكدارش هادي حتى بالضحك

رجعت فلوسي لصاكي قلت ليه واش غتخلص عليا نتا!!

بقا كيشوف فيا وخلص داك العشا هوا وصاحبو ونضنا كنتمشاو شديت فاحسان قلت ليها فين كاين مول الحلزون

قالت لي هاهوا غير هنا

داتنا كلنا حتى لعندو وقفنا لاكن فيصل بغا وقف قالينا

البنات .هوا هادا فرصة سعيدة

تلفت ضحكت معاه درت ليه باي باي قلت ليه شكرا على العشا

قالي بالضحك غنتسالكم عراضة دابا

قلت ليه صافي غدا نعرضو عليكم صافي

بقا غير كيشوف فيا وضرت عند نصر الدين نقوليه بسلامة لقيتو شاد تيليفون فيدو قالي تعطيني النمرة ؟

قلت ليه اه اه بيان سيغ خودها ..زيغو سيس

مليتها عليه قيدها عندو وهز عينيه شاف فيا عاوتاني بديك النضرة العجيبة ماعرفت شنو معناتها ..سمعت تيليفون كيصوني فصاكي وحبدتو بالزربة بغيت نجاوب لاكن قطع قالي غير انا ..قيدي نمرتي عندك

قيدتها ديك الساعة ومدو لينا يديهم سلمنا عليهم ومشاو وبقيت انا مع صحاباتي حدا عربة الحلزون ..ضرت ورايا نشوف فيهم وبقيت متبعة ليهم العين حتى ضار نصر الدين لقاني كنشوف فيه ودرت ليه بيدي باي باي وهز يدو ردها ليا ومشا

اللللللله شحال زوين هاد الحلزون ..كليت حتى ضراتني كرشي وبقات ليا جغيمة يالاه هزيت راسي نقطرها فيك مي حسيت بدقة حدى صاكي وضرت بالزربة

احسان : اهياااا اش اوا تادير !!!

لقيت احسان شادة اليد لواحد الدري صغير فوق صاكي حيدات ليه تيليفون ديالي وقلت ليها

هيييه تيليفوني!!!

قاليها بغيت غير نعيط لمي تلفات عليا

جراتو قالت ليه بيتي تعيط لمك فصيكان ديالنا عندنا تيليبوتيك حنا الشمكار اللي اللي ولدك انعيط ليك للبوليس

بدا كينقز ويحلف ويقوليها بيت نعيط لمي لاكن هي عطاتو واحد التصميكة للراس قالت ليه هاا مك للحلوف اللي ولدك

مشا كيجري حتى بعد وهبط سروالو ورانا داكشي وبدا علينا بالمعيور قدام الناس..قالت لي حضي تيليفونك على شويكيك با يديه ليك ..شدي الصاك قدامك كي تا ندير ليه انا راه ولاد الحرام اير الشفار على خوه . القلاّوي لاخر ..الكحلوش اللي ولدو

شديت صاكي قدامي من ديك الساعة وانا معنقاه وجينا خارجين مع الشارع حتى خرجات لينا واحد المجموعة ديال الدراري صغار ومعاهم داك المسخوط اللي كان غيسرق ليا تيليفون .. فالاول حسابني غير دايزين لاكن فاش شفت احسان ونور هربو كيلسقو مع الحيوط بقيت واقفة بوحدي كنشوف وجاو عندي شي وحدين ولخرين تبعو احسان ونور ..مافهمتش علاش جاو عندي حتى حسيت بواحد طلع ليا الميني جيب وضرت بالزربة هبطتها غوت وجات لاخر جر ليا الصاك شديتو حتى هوا وبقيت كندور فبلاصتي كل واحد منين كيجرني وانا كنقوليهم شنو بغيتو مالكم ؟!! حسيت بواحد خورني وطرت بالزربة كنغوت دخلت لواحد المحل ديال الصيكان وقفت فيه وماعجبنيش الحال حسيت بيهم اقتاحمو خصوصياتي ومسوني فالنقط الخاصة بيا الممنوعة على شي لي كان كيقربها ولو بلمسة هوائية ..

بديت كنبكي وجا مول المحل قالي مالكي قلت ليه دارو ليا هاكا وجروني من حوايجي ..

جبد واحد العصى وخرج عندهم بدا كيشحط كل واحد فيهم فين نقز مشا وبدا مول المحل كيسب فيهم عاد قدرت نخرج ومشيت مع جنب الحيط كنقلب على البنات ونمسح عينيه ونتنخصص لقيتهم ملاسقين مخبيين حدا واحد الحانوت كيضحكو وخرجو عندي كيجريو ويشوفو موراهم خايفين وقالو ليا علاش كتبكي !! خوروك حتى نتي

بقيت كنتنخصص وكنشوف فيهم هما كيضحكو وقالت لنور

ولد الحرام حسيت بالسليب تجر من بلاصتو ..ال٠٠٠امل اللي ولدو

قلت ليها علاش دارو لينا هاكا قدام الناس

اخسان: وا تا نتي راه ديما هاكا..اللي ماخورو برهوش راه خورو حمق شكون هادا اللي ماعمرو تخور فحياتو

نور: اللي ماتخور بصبع تخور بقوالب

بقاو كيضحكو مافهمت اشنو كيقصدو .المهم مشينا وحاضيين جنابنا حتى للطموبيل وركبنا وصلتهم كل وحدة حدى دارهم ومشيت بحالي لدارنا لقت بابا كيصلي العشا وماما فالكوزينة قالت لي تعطلتي..درت ليك واحد الكصحة دالرفيسة بالمساخن ودجاج البلدي من داااكشي

وقفت حداها قلت ليها على دوك الدراري شنو دارو لينا وشدات حناكها قالت لي ويل الشيطان الى ولاد لحرام ..بقاي ابنتي تلبسي السروال..لبسيييي السروال لا يعودو يحيدو ليك الصاية فالزنقة

قلت ليها اخر مرة نعاود تلبسها

مشيت لقيت ختي فبيتها كتقرا حيت كانت كتوجد للماستر وجلست حداها حتى هيا عاودت ليها كولشي وبقات كضحك قالت ليا راه انا خورني حمق ختى حزقت وانا جايا من الحمام فالصيف وودرت براسي ماتخورت ماوالو كملت طريقي للدار

قلت ليها اخر مرة نلبس الصاية

بدات كضحك قالت لي علااش!! لالا غير لبسيها كتجيك زوينة .. راه ماشي دييينا ديما كيوقع بحال هاكا غير دابا تلاقيتو مع دوك البراهش وصافي اما راه ماشي ديما كيوقع هادشي

تنهدت سمعت تيليفوني كيصوني وجبدتو ماعرفت النمرة ديالمن!! رديت قلت الو. ورد عليا. قالي

الوو نهى ..صافا

قلت ليه صافا الحمد لله شكون اللي معايا؟

قالي معاك فيصل..خديت النمرة ديالك من عند احسان دابا عاد ..بغيت نسول واش وصلتي للدار واش كلشي مزيان ..ياكم جو طو ديغوج؟!

بتسمت قلت ليه اااه لالالا بلعكس..وصلت للدار مزيان ونتا وصلتي مزيان ؟ ونصر الدين وصل مزيان

ضحك قالي لااالا وصلنا مزيان ..المهم كنت بغيت ناخد نمرتك من عندك نتي شخصيا مي فاش شفتك عطيتيها لناصر قلت صافي ..

قلت ليه اه هوا اللي قالي نعطيها ليه وعطيتها ليه

قالي: المهم عطيتيها ليه وصافي مكاين والو

قلت ليه. مافهمتش؟!! كيفاش؟

قالي: والو غير بغيت نسول فيك شوية ونهضرو شوية

ضحكت قلت ليه اه ماشي مشكل

قالي ماكرهتش نتلاقاو غدا الى ماكانش عندك حتى مشكل ..نديرو كافي اونسومبل الى مكان عندك والو

قلت ليه ماعندي والو غير فالدار وصافي

قالي دونك نتلاقاو دوما نديرو كافي انا وياك

قلت ليه واحسان ونور ؟ وناصر ميجيش معاك؟

قالي لالا بغيت نهضر معاك فشي حاجة مهمة وبغيت نكون غير انا ونتي

قلت ليه صافي واخا حتى لغدا نتلاقو

ماعرفتش اشمن موضوع بغا جاني احساس غريب من ناحية هاد المكالمة ..خليت ختي حتى خوات البيت ونفاردت بوحدي ودرت اجتماع من جديد مع نفسي وعقلي وقلبي ..ربعت يدي تنهدت كنشوف فيهم قلت ليهم شنو بان ليكم دابا

القلب بقا ساكت ماهضرتش وشفت الجروح اللي عليه مابقاوش كينزفو شفت جهة نفسي قلت ليها شنو بان ليك فهادشي

قالت لي لا مابغيتش نتلاقا بداك فيصل هارب ليا منو ومامرتاحاش

قالي عقلي وعلاش اشنو فيها الى طلاقتييه ؟ تعرفي بعدا غير شنو باغي..ماشي ضاروري ترتاحي ليه .

قلت ليه وشنو غيبغي مني ؟ هوا يالاه عرفني

قالي : ماتقدريش تحكمي على الناس تلاقايه شوفي شنو عندو مايقول وصافي.. ماتعرفي

جمعت وطويت قررت نتلاقاه ونعرف شنو كاين ولغد ليه الصباح قالت لي ختي يالاه نمشيو للحمام .قلت ليها الللله على الحمام ..توحشت الحمام ديال المغرب

جمعت حوايجي فواحد الصاك ومشيت معاها للحمام دلحومة .. دخلت جلست فالسخون والضبابة كمدت عضامي وعطاتني شي عشوب وشب صابون وشي عجب فالطاسات بقيت فير كندهن ونغسل .

خرجنا هازين سطولاتنا وحومر بحال الجمر لا انا لا هي بقوة الحكان والسخونية..حسيت براسي انضف وحدة فالدنيا وكولشي مسخ الا انا . رجعنا للدار تغدينا وقالت ليالا نمشيو نصاوبو شعرنا ونزلت انا وياها كان عندها موطور كبير بركمان كحل وطلعات هي اللولة لابسة جلابة ديال الكاشمير طويلة وتقاشر بيضين والصابو دمامل وانا كنت غنبدا قالت ليا غير خليك بالبيجامة ديالك ديري غير المونطو ..قلت ليها نمشي بالبيجامة !!

قالت ليا عادي ديري عليك شي حاجة اخرى وصافي

درت عليا مونطو كحل ديالي وتقاشري والصابو دماما حتى هوا والبيجامة زرقة دالكاشمير ومخطيين بالزيوف على راسنا .

ركبت وراها ومشينا للصالون فين كتصاوب شعرها صاوبناه ونشفنا الزيوف رديناهم على راسنا وخرجنا رجعنا للدار قلت ليها علميني نسوق الموطور

قالت ليا سااهل دابا نعلمك ..ونتي علميني نسوق طموبيل

قلت ليها صافي تافقنا

قلت مع راسي اجي علاش ما نقولش ليها تخرج معايا بلا منمشي بوحدي وسولتها لقيتها واجدة وسولاتني شكون وفين تعرفتي عليه وعاودت ليها كولشي وبقات واقفة كتشوف فيا قالت ليا دابا نتي عطيتي النمرة لصاحبو وهوا معيط ليك شنو زعما !

قلت ليها ماعرفتش المهم صاحبو مابيني وبينو والو وحتى هادا مابيني وبينو والو

قالت لي وهي كتلبس سروالها :ولاكنسمحي بيا ماشي معقول هادشي..هادا فيه الدغل بلانو ماااهواش

قلت ليها : وشنو دابا ندير بناقص!!

قالت لي:قولي ليه غتجي معايا ختي باش يجيب داك نصر الدين معاه ..الى مشا جاب شي صاحبو اخر نت غير هاداك عرفيه راه فيه الخواض

فكرت فكلامها لقيتو معقول وخليتو حتى صونا عليا وقلتها واخا حسيت بيه مارتاحش فالاول وقالي كنت باغي نجلس غير انا وياك ولاكن ماشي مشكل

اكدت ليه حتى انا قلت ليه جيب معك صاحبك ناصر

حركات ليا ختي صبعها قالت لي لالالا مكانش عليك تقوليها ليه

بقا ختى هوا ساكت وقالي انا غنشوف الى كان مسالي

قلت ليه راه عندي نمرتو نقولها ليه انا

قالي: لالا صافي انا غنأكد عليه

قطعت معاه وقلت لختي صافي خليه يقولها لصاحبو

قالت ليا ختي وا مللي قلتيها اختي دابا غير عيطي ليه قوليها ليه بلا مايوقع شي سوء تفاهم ..حيت بنتي ليا نتي كتميلي جهة هاد نصرالدين وهادا باين ناوي يخورك

بقيت ساكتة كنفكر وصونيت على نصر الدين لقيت تيليفون طافي وعاودت صونيت ليه مرة اخرى كذلك فالاخير حطيت تيليفون ونضنا لبسنا حوايجنا ولبست هاد المرة سروال كحل وفيست ديال الصوف رمادية مع ليبوط طالعين حتى للركبة وخرجنا يالاه غنمشي نحل طموبيل قالت ليا نمشيو فالموطور احسن

قلت ليها البرد… ناري مافيا اللي يتمرمرد مقادراش والله

طلعات قالت ليا واعير ركبي دابا تولفي..ماتبقايش تبيني لبنادم شنو عندك وفين عايشة..راه الطمع طاعون ا نهى ..خليك عادية مع الناس اللي كتعرفي واللي عاد غتعرفي باش تعرفي راسك معامن .

بصح هضرتها معقولة ..انا مشات ليا من بالي هاد القضية لاكن مزيانة ..باش نشوف شكون اللي باغيني على فلوسيولا باغي الصحبة ديالي وشخصيتي .

المهم مشينا تلاقينا بفيصل فواحد القهوى وشافنا فاش نزلنا .دخلنا لقيناه هوا وواحد اخر وسلمنا عادي وجلسنا معاهم

جلسنا معاهم واخا مارتاحيتش فديك الجلسة حيت حسابني غنلقا نصر الدين تما ..جلست غير كندوز الوقت وصافي معاهم وبقيت كنتسنى نشوف شنو يقول ليا .تعطل بدا كيراوغ بزاف وانا كنتسناه يهضر فاللخر قلت ليه علاش مجاش معاكم نصر الدين

قالي راه تيليفونو طافي كنصوني ليه والو ..اصلا هوا ماشي ولد هنا ولد كازا غيكون رجع

تصدمت قلت ليه بصح ؟!! غيكون رجع !

بقا ساكت وقالي اجي نجلسو ليه نهضرو

نضت معاه خليت ختي مع لاخر وجلست كنسمع قالي

نتي تبارك الله بنت زويونة ومأدبة وعجبتيني..وبغيت نتعرف عليك اكثر..زعما تكون بيناتنا شي علاقة

غير سمعت علاقة وهما ينوضو عليا حواسي كلشي كيرفض وقلت ليه انا دابا مامستاعداش نهائيا ندير شي علاقة عاطفية وماعنديش الرغبة فيها

بقا كيشوف فيا قالي واجربي معايا وشوفي..انا متأكد غادي ترتاحي ليا كنا رتاحيت ليك حتى انا

رفضت قبل ميكمل قلت ليه لالا مابغيتش نهضر على هاد الموضوع كيزعجني..

قالي واش كتبغي شي واحد ولا عندك ديجا شي علاقة

قلت ليه ماعندي والو ولاكن خرجت من ازمة غير مؤخرا مابغيتش نهضر فموضوع بحال هادا

بدا كيحاول يقنعني لاكن مابغيتش وقديت كنرفض نسمع ليه فالاخير قالي نبقاو اصدقاء..المهم ماتقطعيش الامل فمرة

خلينا نتشاوفو ونخرجو ونتلاقاو

قلت ليه ماشي مشكل..الى كانت صداقة في الحدود اه ..ولاكن الى مارتاحيتش فالصداقة حتى هي غنساحب منها تفاهمنا

قالي صافي تفاهمنا ماقلتي عيب

تبسمت ونضنا رجعنا جلسنا مع ختي وصاحبو كانو كيهضرو على الماستر وجلسنا بدلنا الموضوع بقينا كنهضرو على مواضيع اخرى ورجعت سولتو قلت ليه واش ناصر عندو غير ديك النمرة صافي؟

قالي واش بغيتيه فشي حاجة ؟

قلت ليه لا غير حيت حتى انا صونيت عليه لقيت ايليفون طافي

قالي راه كيصبح ناعس مع هوا كيخدم شيفور كيشد الطرقان ..مولف يسهر بالليل ويفيق معطل

قلت ليه خدمتو واش شيفور

حرك ليا راسو بالايجاب قالي خدمتو ماشي شي حاااجة..واخا يعطيوها ليا بالملاين مانخدمش ديك الخدمة

استغربت قلت ليه علاش مالها !!

قالي واش تخدم فشركة تبقا غادي جاي فالطرقان على خمسالاف درهم!! فاللخر دالشهر يلوحو ليك ديك جوج دريال ونتا كضرب السوايع هاز السلعة ومكرفص ..

قالت ليه ختي :وشنو خدام نتا ؟

هز يديه قاليها هاد الساعة باقي..دافع ليكونكور ودافع لشحال من خدمة ماردوش عليا..انا باغي نخدم مع الدولة الى مكانتش خدمة مع الدولة ماعندي مندير بيها..نقدر نقبل نخدم فشركة خاصة ولاكن يعطيوني بوسط فالشركة وشي صالير على الاقل يكون واصل واحد عشرين الف درهم.. اما باش نبقا نقصر فالطرقان كي كيدير ناصر دابا كيضرب من كازا لموريطانيا وشي مرات حتى لسبانيا ولا اكثر على خمسالاف درهم ..مالي مالقيت مناكل!

بقينا ساكتين وشارت ليا ختي براسها باش نوضو ونضنا ودعناهم قالي نعاودو نتشاوفو قالت ليه ختي نشاء الله

خليناهم خلصو داك العصير ومشينا ركبنا فالموطور بدلنا القهوى وجلسنا فوحدة اخرى كنتجمعو وهزيت تيليفون عاودت صونيت لنصر الدين لقيت تيليفون طافي وقلت لختي

ماعرفتش علاش تيليفونو طافي

قالت لي شوفي ياكما غلطتي فالنمرة ..كي داير هاد نصر الدين ؟

قلت ليها عادي بنادم ..غير انا رتاحيت ليه

حركات ليا راسها قالت لي حتى انا ..صاحبو بدا كيحاول يطيح من قيمتو ك ويرخصو مي انا جاني هاد نصر الدين بدراعو على هاد الفلوس..على الاقل مجالس كيتسنى اللي يعطيه ولا الخدمة تجي حت لعندو ويتشرط .

قلت ليها: انا اصلا مافهمتش علاش طفا تيليفون ..مشكيلة

بقا عقلي معلق بنصر الدين يدور ويدور ويفكر فيه وفين غبر !! ميمكنش يكون طافي تيليفون والخدمة ؟ كيفاش يدير فيها؟ بقيت كنفكر شحال على السبب اللي يخلي تيليفونو يطفا مالقيت حتى سبب وكل مرة نسول ختي كتعطيني اسباب هما . تفكيري فنصر الدين من جهة واتصالات فيصل من جهة اخرى كل مرة كيقولي نتلاقاو وكنقوليه لا حتى رجعت كنلقا راسي مجمعة انا وياه فتيليفون وجابد ليا موضوع اللي يخليني نهضر فيه ..رجع كيطمعني بالخرجات الزوينة ورسل ليا كروب ديال الرحلات اللي حدانا فالمدينة واللي ماكنتش كنعرفهم اصلا واش كاينين وبديت كنتبع دوك الخرجات ديالهم وتحمست نخرج حتى انا نتسارا ونعيش فالبلاد ونشبع منها وبديت كنستقبل اي دعوة وصلاتني وكنخلص الخرجة مع الكروب وكنمشيو فالكار ديما كل مرة فين ..مرة داونا لسيتي فاضمة والثلج ومرة داونا لوارزازات ..ومرة داونا لاوريكا ..

المهم كانو خرجات زوينين بزااف وتعرفت على داك الكروب كله بالبنات بالاولاد ولقيت راسي عندي بلاصة بيناتهم وتعودت على وجود فيصل معانا واخا مابيني وبينو والو لاكن مخليا بيني وبينو مساحة .

عشرين يوم فالمغرب دازت كلها مساريات وخرجات كل ويكاند وكنت كنبغي نخرج ختي لاكن كتوجد للماستر وكان كت وقيتة ديال القرايا يعني الاغلبية اللي معانا فالكروب بعقلهم وخدامين الا انا اللي اصغر وحدة فيهم ماعندي لاشغل لا مشغلة غير كنقلب فين نمشي وفين نتسارا

دخلت للكروب نطل لقيتهم منضمين خرجة لافران وتاصلت بصحاباتي نشوف واش يبغيو يمشيو ..لقيت نور مسافرة عند جداتها واحسان بوحدها اللي بغات تسافر لاكن ماعندهاش مسكينة باش تمشي وقلت ليها غنخلص عليا وعليك باش نمشيو نسافرو بجوج ونيت نتوانسو واخا كنعرف البنات فالكروب ماكرهتش كن ديت معايا صحاباتي..

قالت ليا راه عاد خصني نشوي جاكيط ونشري بوط. ونشري ونشري

قالت ليا خاصها الحوايج وماعندهاش الفلوس صافي وخليتها قلت ليها صافي اللي بغيتي ..ماعندي مندير ليها الصراحة كنت باغا نخلص عليها تمشي ولاكن مللي عندها بزاف دالعراقل صافي ماكملتش معاها الهضرة حيت ماقادراش نسمع شكوى ولا نحس بشي طاقة سلبية تغير مزاجي..كنقلب على الطاقة الاجابية فقط شي حاجة دالمشاكل والعراقل كنتفاداها .

عيطت للادمين دالكروب قلت ليه صافي قطع ليا غير انا. قالي اصلا بقات فير بلاصتك خليتها ليك الكار عمر وحتى ليشومبر فلوتيل عمرو وجاو الناس بزاف بغاو يسافرو مالقينا فين نزيدو شي واحد

قلت ليه ماشي مشكل ياك بعدا بلاصتي كاينة

قالي كاينة غير تهناي بلاصتك موجودة ديما

قلت ليه. شكرا وسيفط ليا البروكرام ديال السفر دخلت نشوفو حتى قاطعاتني احسان عيطات ليا جاوبتها وقالت لي

صافي راني ضبرت فالحوايج دافران غير قطعي لي معاك

بقيت ساكتة مالقيت منقول ليها قلت ليها تعطلتي دابا عاد هضرت مع الادمين قالي كلشي عمر ..مابقاوش البلايص ..من الاول كن قلتي ليا غنضبر فيهم باش نعلمو

قالت لي ماحسابنيش انا ماكنتش عوالة نسافر وافران خصو الحوايج ماشي بحال مراكش

تأسفت ليها قلت ليها ايوا خلي حتى لمرة اخرى

قالت ليا عاودي سوليه شوفي يدير ليا بلاصة قلت ليها ميمكنش صافي الكار عمر ولوتيل عمر ماعندو دابا فين يزيد شي واحد

تنهد تنهييدة نيت وشرحت ليها وقطعت معاها مشيت حليت الماريو اللي فيه حوايجي كنشوف شنو ندي معايا لقيت عندي غير حوايج مابين وبين ..يعني خصني حوايج الثلج عاوتاني!!

بديت كنقلب مزيان وتفكرت جاكيط ديالي اللي جيت بيها جبدتها وكانت تقيلة وماركة اصلية كلها مبطنة من لداخل فالبني وعامرة والقب كبير مزغب ..جبدت ليبوط ديالي الكحل ديال البلاستيك مكيدهلش الما كان عمدو بزيم حدى الركبة وهزيت اي حاجة تسخني ومانسيتش الباور بانك ديالي وجمعت باليزتي..دخل بابا يطل عليا لقاتي كنوقف البابيزة وحرك ليا راسو قالي فين غتمشي شي رحلة عاوتاني

قلت ليه غنمشي لافران

حرك ليا راسو قالي افران بارد دي معاك حوايجك ..الكبابط الكبااابط عنداك يضربك البرد

قلت ليه ديتهم راه حتى حنا فسويسرا عندنا واحد البرد قاصح

قالي ايوا مزياان..سيري تفوجي شوية ..شحال غتجلسو تما

قلت ليه دو جوع وصافي..غير ويكاند..كن غير بغات حفصة تمشي معايا

قالي:وادابا حفصة غارقة فالقرايا خليها..سيري نتي بعدا شخال هادي ما جيتي هي راها ديما هنا دابا تمشي وقت ما بغات

عنقتو خديت الرضى ديالو وبدا كيوصيني ندي معايا الحوايج سخان ومشا..

متأ..بابا مسكين شحال حنين..عزازين عليه حنا وكان كيتمنى يكون عندو ولد ولاكن جاب ليه الله غير البنات ..ختم بيا انا اللخرة فاش ماجاش الولد واقتانع بقسمة الله ليه وفرح بينا وكان حنين مع كل وحدة فينا وتعامل معانا معاملة البنات وعمرنا لمستا فيه الجانب القاصي..حتى فاش كيهضر معانا كيبدا طريقتو فالهضرة ويرجع لطريقتو معانا ..دوج اختي لكبيرة مشات لالمانيا وختي اللي من موراها مشات لميريكان وكنت بقيت انا وختي حفصة ..داتني ختي لكبيرة عندها حيت مسكينة مكتولدش وكانت تزوجات وانا صغيرة بزاف وفاش عيات وفقدات الامل قالت لماما عطيني نهى نربيها وجات داتني وانا فالابتدائي ومن تما وانا عايشة معاها .. كنت كنسافر عند ختي لامريكا ونرجع لالمانيا مع ختي لكبيرة ..كانت ماما وبابا هما كيجيو عندنا وحتى ختي فاش كانت كتبغي تجي للمغرب كنت انا كنسافر لامريكا عند ختي لاخرى وبقينا هاكا كل مرة سبب فشكل حتى كبرت ..لاكن لحسن الحظ كنا كنهضرو الدارجة فالدار وكنديرو التلفازة المغربية اما كن راه كندخل ونخرج فالهضرة وحالتي حالة

السبت مع الربعة دالصباح نضت حطيت سوارت الطموبيل لبابا حيت كيعجبو يسوق طموبيلتي واخا عندو سيارتو كيعجبو يسوق بحال النوع اللي عندي ويخرجها . المهم لبست على حسب الجو ديال افران وحتى ديال مراكش..حاولت نجمع بيناتهم بجوج ولبست واحد السروال كحل كينز ماط ولبست بوط تريكو بالسيور حتى للركبة بخال بروطكان فالاخضر ميليتير سومليلة ديالو كًومة غلييضة ديال الثلج وتريكو من لفوق فضفاض ديال الصوف طويل من الكمام والكول مونطي حتى هوا منفوخ واسع والصوفة ديالو غليضة ..غير هوا صهدني وعاد جاكيط ديالي هزيتها فطموبيل مع باليزتي فالكحل كلها كًومة قاصحة وهزيت صاكي حزمت بيه فالجنب كحل وطلقت شعري ووصلني بابا حتى للمحطة فين كان كلشي مجموع حدا الكار ..نزل مسكين بجلابتو ديال الحبة فاكرونة والبلغة ولحيتو بيضا مخلطة بالكحل حط ليا البابيزة فالكار وبدا كيوصي عليا الادمين اللي لقينا تما ويعاود وانا كنضحك وكنسلم على اعضاء الكروب .مشا وقف حدا الطموبيل كيتسنانا ..قلت ليه صافي غير سير ترتاح قالي لا غير خليني مرتاح

ربع حداها وكروازا رجليه وغير هوا بوحدو اللي جا معايا كلشي حا بوحدو ولا بطموبيلاتهم وحطوهم فالبراكينع الا انا اللي جا معايا بابا

وصل فيصل كينقز بدا كيسلم علينا وخفت يبغي يتمادا وبابا كيشوف ومشيت بالزربة وقفت حدا بابا وشديت فيه خليتو كيشوف فينا فهم راسو وهبط عينيه حتى تجمع كلشي وبدينا كنطلعو

عنقت بابا ومشيت لتاحقت بالاعضاء طلعت فالكار جلست كنتسنا الكار يعمر حتى جلس حدايا فيصل قالي واش باباك جا معاك

تبسمت قلت ليه اه وصلني مسكين

تسد الكار وسرحت عيني لقيت اماكن كثيرة فارغة والادمين كيدور ويقاد المسائل قلت ليه

قلتي ليا مكاينش بلايص !!

قالي هادو ديال ماليهم راه مقطعين من كازا ومن الرباط ..قلت ليه

ااه فهمت

رجعت تكيت والكار خارج من المحطة حتى شفت طموبيلتي قدامي كتكلاكصوني ونضت كنجري ماعرفتش بابا مالو

مشيت عند الادمين قلت ليه يهضر مع مول لكار يوقف ووقف فتح ليا الباب خرج بابا عندي كيجري هاز فيدو صاك ديال التوب كبير قالي نسيتي هادا ديالك

شديتو كنضحك من بعد الخلعة قلت ليه ماشي مشكل فيه غير السقاطة

قالي ايوا ماشي مشكل دوزي بيها الطريق..يالاه طريق السلامة

شديت داك الصاك بست ليه يدو مسكين والادمين كيشوف فينا قالي سعداتك بباك

رجعت بحالي هازة صاكي حطيتو حدا رجلي جبدت واحد شيبس كبيرة حليتها وقالي فيصل

واش نتي ديما هاكا ! غادية بسقاطة وجايا بيها

مدت ليه ياكل هز واحد الحبة وسكت وطفاو علينا الضواو باش نعسو حتى نوصلو وبديت كنتلف بديك الشيبس حتى داني النعاس ونعست .

ضرني عنقي ونضت هزيت راسي لقيتو محطوط غلى كتف فيصل وهوا معنقني .شفت فيه مصدومة وكحزت بلعت فتاوت الشيبس اللي بين سناني وقلت ليه فين وصلنا !!

قالي قربنا لافران

حيدت الريدو على الزاج لقيت الشمس ضاربة فالسما ويدي باردة اللي جهة الزاج

قلت ليه دزنا على رباط وعلى كازا

قالي :وصلنااااا وحبسنااا وكملنااا..مكتشوفيش التلج والجبال ..راكي غدخلي افران

قلت ليه بصح!!

طليت كنتمنضر وتفكرت الصاك اللي حدا رجلي جبدت واحد دانيت وكيكة حليتهم دوزت بيهم المنضر وكنسمع الهضرة والضحك حتى قربنا نوصلو وناضو كينشطو ويغنيو ويضحكو ووقفت كنتفرج قدامي ونسفق ختى وصلنا وحبس الكار وخرج فيصل من الكرسي باش ندوز ..

ضرت جهة الزاج كنلبس جاكيط ديالي والطربوش الكحل وكنهر حوايجي حتى سمعتو كيهضر مع شي واحد قاليه

ماشفتكش اصاحبي!! كنا ناااعسين مع من الربعة وحنا شادين الطريق عيينا

ضرت لقيت و كيهضر مع نصر الدين وكيسلم على دراري اخرين..ماعرفتش شنو وقع ليا حسيت بقلبي ضرب واحد الضربة بحال الخلعة فاش كيقفزك شي واحد..تصدمت وكان حتى هوا فالرحلة معانا وماشفتوش!! لابس جاكيط دودون كحلة وهاز شكارة فيدو كبيرة ..ضحكت معاه قلت ليه

نصر الدين!!!

مد ليا يدو قالي سلام ختي صافا

مديت ليه يدي نسلم عليه لاكن مافهمتش سلم عليا بحال الى مكيعرفنيش

بقيت غير كنشوف فيه حتى داز هوا وصاحبو ونزلت انا وفيصل ماقدرتش نحيد عينيه عليه وفرحت ملي شارك معانا فالرحلة عاد تحمست وعجبني الحال حسيت براسي لقيت شي حاجة عزيزة عليا

هزيت عيني لقيت لاوتيل اللي غنجلسو فيه كلنا كان ستيل اوروبي من برا بداك السقف والقرمود لاكن من لداخل تقليدي مغربي وديكورات زوينين وكبير فيه صالون كبير بالسدادر فالاسفل جالسين فيه النزلاء. تقسمنا شدينا غرف كبيرة كل غرفة فيها ثلاتة ديال البياصات .عطاونا نص ساعة نطلعو ناخدو فيها راحتنا ونوجدو راسنا باش نفطرو ونخرجو نبداو الانشطة ديالنا

طلعنا حطينا حوايجنا وبقيت بنفس الحوايج ديالي مابدلتش وكاين البنات اللي بدلو اللبسة ونزلنا لقينا الدراري سبقونا وجلسو غلى واحد الطبلة ديال الخشب طويلة فيها الفطور محطوط . مشات عيني نيشان لنصر الدين شفت حداه بلاصة خاوية ومشيت كنجري نجلس حداه لاكن جرني فيصل قالي اجي تجلسي من قبيلة وانا شاد ليك البلاصة

جلسني حداه فالجهة المقابلة مع نصر الدين وداك الكرسي جلسات فيه واحد البنت اخرى ..ناض عليا الخاطر فاش ماجلستش تما وطارت لي وبقيت غير كنشوف فيه وهوا كيضحك مع ديك البنت ..

حطو لينا القهوى واتاي وشديت واحد الكاس ديال اتاي عنقتو بسخانتو وكنشوف فتصر الدين كنتسناه يشوف فيا لاكن ماشافش كاع فيا..مافهمتش علاش تجاهلني!! واش ميعرفنيش؟!! ياك تلاقينا فجامع الفنا وهضرنا بجوج !! واش يكون مابغانيش حيت درت ديك الفضيحة زعما!! اصلا مادرت والو ماعرفتش واش تهرب مني حيت كنت كنضحك وكنهضر !! واقيلا مكتعجبوش البنت اللي كتحرك بزاف؟ انا اصلا مكنتحرش بزاف! علاش ؟ يمكن مارتاحش ليا

بقيت كنشوف فديك البنت اللي كتهضر معاه وضحك معاه وعمر ليها الكاس باتاي عطاه ليها وعنقات ليه يدو قالت ليه شكرا ..تبسمت بلا منحس وانا شاردة وتذكرت واحد الذكرى بنفس المشهد فاش يالاه تزوجت

حسيت بعيني بغاو يبكيو ونضت بالزربة مشيت سولت على طواليط ودخلت سديت عليا وتكيت على الحيط كنبكي وسديت عيني كنخاطب قلبي

قلت ليه مالك ؟ علاش بديتي كتنزف عاوتاني ياك بريتي

قالي انا كنبرى ولاكن العقل كيرجع يعطيني الدق

تنهدت قلت لعقلي شنو بغيتي مني؟ مافهمتش لشنو بغيتي توصل

قالي مابغيت نوصل لوالو ..انا رجعت الذكرى فاش بانت صورة مشابهة ليها صافي هادي خدمتي ماعندي مندير.. القلب اصلا حساس وعلى سبة

سمعت نفسي كتقولي

انا مخنوقة .. مخنوقة غنطرطق

قلت ليها ياك حنا مزيانين ومرتاحين شنو اللي خنقك

قالت لي شي حوايج كيدوزو كيخنقوني

قلت ليها شنو بغيتي بالضبط باش ترتاحي

قالت ليا بغيت تهضري مع نصر الدين ..ماتبقايش كتشوفي فيه من البعيد ..ولاكن ماتبززيش عليا نحضر معاك عطيني مخدر عاد هضري معاه

قلت ليها مافهتش!!

قالت ليا مغنتفش الى هضرتي معاه نتي يجي هوا يبادر حيت هوا اللي بعد وتجاهلني

والى بادرتي نتي هاد الهوا كله اللي جامعة غنبخو عليك نقتلك

رد قلبي وقاليها

علاش متهضرش معاه نيشان نتهناو ونرتاحو من هاد الضغط

قاليها عقلي. اه مالها علاش عاد قوة التفكير هصنا نعرفو سبب التجاهل والغيبة هادي كلها

ردت نفسي قالت ليهم

لااا هوا يجي يعطي مبرر ..علاش نمشيو حنا نتنازلو ..هوا تجاهلنا خصو يجي وبأي طريقة

رد القلب وقال: وعلاش غنطولو الطريق ونبقاو صابرين لهاد الهم هادا كله

رد عقلي قاليه

لالا عندها الحق..علاش حنا نتنازلو ياك هوا اللي بدا التجاهل

تنهدت بتعب قلت ليهم شنو المعمول دابا عطيوني الخلاصة

قالي لعقل:صبري نوصلو لنتيجة مرضية

سكت خليتهم شد ليا نقطع ليك شي قابل شي مقابلش وشي قابل وبطريقتو ونوضوها بيناتهم فاللخر طفاو وتقدم ليا العقل وقال

وصلنا لنتيجة

الحل هوا تباني ليه فالواجهة ..اما باش تمشي نتي وتنازلي لا حيت النفس ماقابلاش وعندها الحق والقلب كيقلب على الساهلة وديما واكل الدق بسبب غباىه ..غتبعيني انا حيت انا اللي كنعرف نسير ليك الامور

دابا رجعي بلاصتك وديري براسك ماعنرك شفتيه حتى نتي .. تنازل وجا مرحبا بيك ماتنازلش صافي خليه اما نتنازلو حنا لا ماعندنا ربح فهادشي فكلتا الخالتين

ناض القلب قاليه ماتافقناش على هادشي تافقنا تعطيها الوصفة اللي تخليه يجي يرضينا

قاليه العقل يجي يرضيك نتا يا المشرمل شو حالتك بغيتي نتسطى انا بكثرةالندم فاش نتنازل ويتعفر علينا ونبات فايق كنتفكرها وندب..نتا اصلا غتندب سوا جا ولا مجاش واصلا مجايش الله ندب بوحدك بلا متجرنا حتى حنا معاك فالهاوية

حليت عينيه ونفضت راسي كنسوط وجمعت النفس وخرجت بلا نتيجة رجعت لبلاصتي جلست

دورت وجهي ماقدرتش نفطر تسدات ليا الشهية ..شديت غير داك الكاس فيدي كنسخن بيه صبعاني وبقيت كنشوف فجهة اخرى وكلشي كيفطر ..قالي فيصل فطري راه غتسخفي مافطرتيش

تلفت نقوليه ليا وجات عيني على نصر الدين لقيتو كيشوف فيا وضحكت معاه بلا منحس لاكن مشافش الضحكة دغيا بعد عينو ..مشكييلة هادي مافهمتش علاش كي دير هاكا واش مكيعرفنيش!!

تنفست بعمق ونفسي شاداني ماخلاتنيش نمشي وعقلي تقلب عليا كيقول ليا سيري سوليه ..شوية كضغط عليه نفسي ويرجع يقولي لالا خليه يجي هوا

بقيت هاكاك حتى لقيت كلشي فطر الا انا وناضو ونضت معاهم هزيت صاكي ومشينا كندورو وعيني على نصر الدين وفيصل تابعني ..

داوزونا حدا السبع ووقف الكروب كامل كيتصور وشي كيصور شي..ضرت على غفلة لقيت نصر الدين واقف داير يديه فجيابو كان لابس جينز وكاط موطارد كيهضر فتيليفون وكيشوف فيا ودغيا بعد عينيه ..بقيت كل مرة نشوف فيه حتى قطع ومشيت عندو بالزربة وقفتو ضحك معاه قلت ليه

ناصر لاباس عليك

حرك ليا راسو قالي صافا اختي نتي صافا

قالها وكيحرك ليا راسو باغي يمشي لاكن شديت ليه يدو وقفتو قلت ليه علاش تيليفونك طافي

شاف فيدي وشاف جهة فيصل وحيد يدو تبسم ليا وهبط راسو قالي تكلمي يمكن كيعيط عليك

تلفت جهة فيصل لقيتو كيشوف فينا وماديتهاش فيه عاودت شديت نصر الدين بيدي بجوج وقفتو قلت ليه كنت كنصوني عليك تيليفونك طافي ؟؟

بقا كيشوف فيا ويرمش ويشوف فيدي ماعرفتش شنو بغا يقولي حتى جات ديك البنت اللي كانت جالسة حداه بقات كتشوف فينا وتبسمات قالت ليا نهى ياك

رخيت يدي على يدين نصر الدين بتتاقل حسيت براسي كنضعاف خصوصا فاش شدات فيه قالت ليه كاع معرفتيني عليها !!كتعرفها ؟

بقيت كنشوف فيه شنو يقول عليا حيت هاد الجواب هوا اللي كنت كنتسنا لاكن طول الشوفة فيا وقاليها Un ami en commun

بقيت كنشوف فيه حتى مشا معاها ودار يديه فالجيب عطاني بالضهر وبقيت واقفة بقا فيا الحال ماعرفتش مناش؟ كن غير جاوبني ولا قالي علاش مكانش كيجاوب؟! مقالي والو

جا عندي فيصل قالي شنو كنتي كتقولي لناصر؟

قلت ليه علاش كان طافي تيليفون مقالش ليك علاش؟

قالي مانعرف باش غنعرف

قلت ليه شكون هاديك البنت اللي معاه

قالي هاديك صاحبتو راه باينة ماشفتيهاش مكتفرقش هي وياه ..يالاه نمشي ..بنتي ليا عيانة مالكي

عنقني وكنت فعلا عيانة شديت فيه ومشينا كملنا الطريق وهوا معنقني وهز ليا الصاك قالي انا نهزو غير رتاحي

سبقونا كلهم قدامنا وحنا اللخرين وراهم غاديين باش نركبو على الخيل وحسيت براسي فشلانة غادية ومتكي على فيصل ومتبعة نصر الدين بعيني ..شفتو كيهضر اغلبية مع الدراري وضار عندنا واحد اللحضة شاف فينا ورجع شاف قدامو حتى وصلنا عند لخيول وسط واحد الطبيعة كبيرة خضرا ووقفنا

ركبنا كلنا وقالي فيصل نركب معاك قلت ليه لا بغيت نركب بوحدي

قالي نتوانسو

قلت ليه لا كيعجبني نركب بوحدي

شديت ليه اللجام وقالي مولاه واش كتعرفي تركبي عليه قلت ليه غير طلق كنركب عليه من صغري

شديتو بوحدي ولخرين بقاو شادين معاهم ماليهم وغادين كندورو ..سولت مولاه واش نجري قالي الى كنتي مولفة بيه جري الى ماكنتيش مولفة بيه غطيحي تهرسي

قلت ليه مولفة وبقيت غادية فديك الارض الهضرا كان المنضر زوين سبقت كاع لكروب اللي جاي بشوية وبدا الخيل كيزرب شوية بدا كيجري بيا بالجهد حتى طارت ليا الطربوشة وقفت بديت كنجري والبرد كيضرب ليا فوجهي..احساس زوين حسيت بالراحة وتوحشت نركب الخيل والصراحة جا فوقتو ..مشيت بعدت بزاف وضرت مابقاوش كيبانو ليا ورجعني الخيل مع الطريق راسو بشوية حتى تلاقيتهم جايين كلهم ومتبعين ليا لعين ..جا فيصل عندي فوق الخيل قالي كاع ماحساب ليا كتعرفي تركبي الخيل

تبسمت ليه وسكت وشفت فنصر الدين لقيتو كيشوف فيا وتبسمت ليه ليه ..دور وجهه قدامو وكملنا غاديين ضربنا دورة ورجعنا لاوتيل نتغداو . جمعونا فنفس الطبلة وهاد المرة ماتسابقتش مشيت جلست فأي بلاصة لقيتها خاوية ..حطو لينا الطواجن داللحم وكنت مشهياه ومافطرتش فرحت فاش تحط..كليت حتى ماقدرتش نزيد وكملنا بديسير وفاش سالينا جابو لينا الدقة المراكشية لديك البلاصة اللي تغدينا فيها نوضو الحماس والنشاط وكلشي ناض كيشطح ..اما فيصل بدا كيدير واحد الشطحة كتقتل بالضحك

البنات بداو بالشعور كيشطحو وكاين اللي دارت الحزام ..اما انا ماعرفتش ندير شطيحهم بقيت كنتلوى ماعرفت ندير شرقي ولا غربي المهم درت محاولات بحالي بحال كلشي وكنقلد البنات فالشطيح وكنتعلم حتى سخفت وجلست على واحد السداري ..

دوزنا العشية فالشطيح كل مرة ينوض واحد فاللخر تفرقنا كل واحد فين مشا وطلعت للبيت نعست شوية حتى فيقوني لبنات باش نتعشا وبدا الادمين يجمع الاعضا ونضت غسلت وجهي وحكيت سناني ولبست بيجامة سخونة فالشيبي وبانطوفة طالعة بيضا ولحت عليا كاب غليض وطربوش ونزلت لقيت كاع البنات بالبيجامات .تجمعنا على الطبلة تعشينا كانو دايرين دجاج محمر فالطباسل والشلايض وحتى كملنا وغسلنا يدينا وتجمعنا فديك الصالة كلنا ..شي كيلعب الكارطة شي كيلعب الرامي

جلس معانا نصر الدين وقالو يلعبو كانت كوبي..ماعرفتش شنو هي هاد كانت كوبي حتى شرحوها ليا باللي كيجي كوبل مع كوبل وكيفسرو ليا وبداو يفرقو الكارطة باش يبان شكون غيجي مع شكون .جات فيا انا اللولة وفيصل متحمس كيتسناها تجي فيه باش يطلع معايا لاكن حات فنصر الدين

فرحت فاش جيت معاه بديت كنسفق قلت ليهم يااااي كنت باغا نجي مع نصر الدين

بقا نصر الدين غير كيشوف فيا بانت ليا الصدمة فعينيه اما فيصل قالي غيبقا كل كوبل مع بعضياتو بلا منديرو هاد الروندة

مافهمتش قلت ليه كيفاش!!

قالي مدايزاش غنبقا انا ونتي وهوا مع هدى ..صافي ليكوبل باينين

شفت نصر الدين حط الكارطة فوق الطبلة وانا نلوحها قلت ليهم مالاعباش .. مكايناش المصداقية فهادشي ماطلعتيش ليا نتا علاش غنجي معاك

كلشي بقا كيشرف فيه ويشوف فيا وهوا عقد حجبانو قاليهم صافي خليوها على خاطرها مابغاتش تلعب خليوها نكملو حنا

بغيت نوض ورجعت جلست قلت ليهم غنلعب ولاكن غنجي مع نصر الدين هوا طلع ليا غنبقا معاه

قالت لينا هدى اللي كل ساعة لاسقة فيه حتى هي

نعاودو ..غنعاودو اخر مرة اللي طلع مع شي واحد يلعب معاه

كان الادمين جالس معانا كيفرق الكارطة قالينا شوفو ..اخر تعاويدة

قلت ليه لا منعاودوش صافي جيت انا ونصر الدين غنلعب انا وياه

الادمين:نتي من الاول باغا تجي معاه ..وعلااام تا نتي

قاليه نصر دين :صافي عاود ..هادي اللخرة لي جا مع شي واحد يلعب معاه

قلت ليه علاش يعاود راه فرقها وجيت انا وياك مابغيتيش تلعب معايا!!

بقا كيشرف فيا ويرمش وفيصل حتى هوا اما الادمين شاد صبعو حدا لسانو بغا يلحسو باش يبذا وبقا مصمر وقالي

واشن طن اخاااي مافيهاش تخرشيش هاد السيدة

ربعت يدي قلت ليه يالاه عاود ..اخر مرة

فرقها الادمين وطلعات الورقة الاولى عند فيصل ..بقا كيفرق وانا حاضية هدى كنتسناها طلع عندها حتى قالي الادمين هاهي عندك ..

شفت قدامي لقيت راسي غنلعب مع فيصل وهوا كيضحك

دورت وجهي كنفخ مابغيتش نجي معاه وكنت كنتسنى نجي مع ناصر لاكن مالقيت منقول انا اللي حمارة قلت ليهم نعاودوها اخر مرة

بدينا اللعب وجا عندي فيصل كيوريني الغمزة وقلت ليه صافي حفضتها

ربعت رجلي وكلشي ربع فالارض كنلعبو وانا شادة الاوراق كنشوف فنصر الدين وناضر حاضي هدى وتافقنا على الحكام اللي خسر يطبق شي حاجة

بقينا لاعبين حتى شفت ناصر كيشوف فالكارطة وكيضحك وقلت ليه كوبي

هز عينو كيضحك حط الكارطة ومكانتش عندو محموعة ..مافهمتش شنو وقع وطليت على هدى لقيتها باقا كتجمع حتى هوا وشفت في فيصل لقيتو غيطرطق ومعصب قالي من صباح وانا هااه هااه هااه ماخليت تا اشارة باش تشوفي هنا ..هاااهي جمعها كنتسناك غير نتي

قلت لناصر علاش كنتي كضحك بوحدك؟!! بغيتي تقولبني زعما

رجع اللور تكا على المخدة كيضحك قالي والله مابغيت نقولبك ولا شي حاجة

قاليه فيصل واشووفي فياااا ومالكي بقاي ليا نرض نجرك نقوليك هااهياااا

الادمين بقا كيضحك وانا ربعت يدي كنشوف فيهم كيضحكو قلت ليهم نعاودو نفرقو نشوفو ليكوبل

قالينا الادمين بلاتي بعدا ارا لينا لحكام راكم خاسرين قلت ليه شكون غيحكم علينا

قالينا ناصر وهدى

ربعت يدي كنشوف فناصر قلت ليه باش غتحكمو علينا دابا؟

شاف فهدى كيدوز يدو على شعرو قاليها ماعرفتش..باش غنحكمو عليهم ؟

قالت لينا هدى: شي بوسة طوييلة قدامنا

شفت فيصل مصدومة لقيتو كيدوز لسانو على شنايفو وقلت ليها وعلاش هاد الحكمة بالضبط !!!

شفت فناصر حتى هوا لقيتو مصدوم قاليها غنحكمو عليهم بشي حاجة اخرى

قاليه ناصر قابلين ..صافين ندوزوها ونكملو اللعب

كحزت اللور قلت ليه لا ماقابلينش مكاينش غير البوسان

هدى:هادي هي الحكمة

قلت ليها ناصر حتى هوا مامتافقش ياك اناصر

كلشي شاف فيهم واولهم فيصل وهوا كيشوف فيا بقا ساكت قالي ديرو اللي بغيتو هاهيا عندك اهدى حكمي

بقيت كنشوف فيه مافهمتش علاش ماعطاش رأيو والادمين حتى هوا قالينا

يالاه يالاه ..صافي حكمة ساهلة بوسة مادات ماجابت بالزربة

سكت ربعت يدي وقرب مني فيصل عطيتو حنكي وناصر قالب وجهه كيشوف فجهة اخرى كنتسناه غير يشوف فيا مابغاش

باسني فيصل فحنكي فرحان لاكن هدى قالت ليه لالا ماشي هادي..بوش ابوش.

قلت ليها صافي اختي قلتي بوسة هاهوا باسني فحنكي

وماشي غير باسني عنقني كاع

شفت فناصر لقيتو كيشرب من واحد القرعة دالماء وهي كتأكد علينا نعاودوها قلت ليها صافي البوسة طبقناها من الاول قولي لينا بوش ابوش..ماشي الحنك ..دابا غنوليو فجوج بوسات

قالت لينا المهم من دابا نعلمكم البوسة مزال ماتطبقات عليك غاتخسري غتطبق عليك واخا يجي معاك الادمين

قاليها الادمين: صاف صافي وا تا تخسر بعدا

قلت ليها مغنخسرش عاد المرة والى خسرتي نتي غتباسي بوش ابوش فيها خمسة الدقايق يالاه وان شاء الله يجي معاك الادمين

قالت ليا :ان شاء الله نتي اللي غتباسي ديك خمسة دقايق ..دابا كلكم متافقين على الحكمة من دابا باش اللي خسر معاها يطبقها بلا منبقاو نعاودو الهضرة ..حيت ماطبقاتهاش اصلا

هزيت كتفي قلت ليها ان شاء الله مغنخسرش ونتي اللي غطبقيها مع اي واحد جا معاك

تراجع ناصر قاليهم انا عييت شوفو شي واحد يلعب بلاصتي

قاليه الادمين:وصافي كملو هاد اطرح ونقلبو اللعب

ناصر: وايلي اصاحبي لاعبين كارطة ولا لاعبين بوش ابوش

الادمين:سلك اودي سلك

عاود فرق علينا ديك الكارطة نشوفو ليكوبل وبديت كنشطح بصبعي وحاضية ناصر كنقول ياربي يطلع معايا ياربي يطلع حتى طلع معايا وطرت كنسفق قلت ليهم اخيبيييييرا

بقا شي كيشوف فشي وتلفت الادمين كيضحك عمد فيصل قاليه مشااات عليك اودي اخاي فيصل

هز فيصل راسو شاف فيا قالي ماعييتيش من اللعب. براكة عليك

جمعت الكارطة قلت ليه لا غنكملو

بقا فيصل كيشوف فيا ويشوف فيه وهدى ختى هي سكتات .فرق الادمين الكارطة علينا وجمع يديه كيشوفينا وقالينا

باقيين عاقلين على الحكمة ..والراجل هوا الكلمة ..يالاه انطلقو

قاليه فيصل سكتنا اصاحبي مابلان ما والو

الادمين: صااافي تافقتو وساليتو ..شروط المسابقة باينة

بديت كنحاول نجمع الكارطة كانت عندي جوج عشراوات جاو فيا من الدقة اللولة ولاح ليا ناصر واحد جوج ديال السوطات جيهتي مع الهزة اللولة ماعرفتش كيفاش حتى عرفني كنجمعها .. الادمين حاضينا كلنا وانا كنشوف فناصر جاتني الضحكة وكنحرك ليه حجباني معنقة الكارطة بغيت يقولي ديك كانت باش

نربحو ويخسر فيصل وهدى ويديرو ديك بوش ابوش ونتفرح فيهم لاكن قفزني فيصل وحتى كان ناصر غيهضر زرب عليه فيصل قالي كوبي و ..حطيت الكارطة كاملة فيها دوك السوطات بربعة و

تقلب الادمين كيضحك قاليه وا كن غا سكتي ..وغاااسكت اصاحبي خسرتيهم بيديك كن غير خليتيهم يربحو

طل فيصل على الكارطة اللي عندي قاليه والله تا حساب ليا باقا ماجمعاتها ..مع شفت ناصر لاح ليها جوج ديال العشرات قلت راه عندها غير وحدة وبان ليا بغا يقول ديك كانت وهيا اصلا مجامعاهاش

قلت لناصر وهوا شاد لحيتو كيضحك ..علاش مادرتيش ليا الغمزة!! جمعتي الطناش كلها !!ًهييه ولاهيلا

قالي درتها ليك وعاودت حتى هدى عاقت بيا وبقات ساكتة ونتي ماعقتيش هاحنا خسرنا على والو

فيصل:مابلان ماوالو

الادمين: سمح ليا اخاي فيصل حتى واحد مقال ليك قوليها كوبي وهي حامعة ربعة ..دير مدارت هدى وسكت تا تخسر..اصلا حصلتو فيها دابا لانتا لا هدى ولا ناصر ونهى ..بربعة كنتو غطبقوها بزز منكم ..ودابا يالاه طلقونا ..خمسة دقااايق ارا بررع

قلت ليه شكون حنا ولا هما ؟!!

قالي نتوما الزين

فيصل:والله مابلان

الادمين:وبلان كن درتيها نتا وهدى!! دابا كمدها حيت نتا اخاي فيصل كطير حيديتها الكانت من يديها

بقيت كنحاول نفهم اشنو كيقصدو مافهمت والو اللي فهمت هوا خسرنا وغادي يحكمو علينا ..هدى دورات وجهها سكتات وفيصل كيعارض والادمين كيشوف فيا قالي

شتك سكتي ما عتارضتيش

قلت ليه انا كنطبق القانون وهما اللي مكيطبقوش

قالي وانوضي الزين طبقي القانون عندك خمسة دقايق ارا مطبقي فيها ..هااااه ..بوسة ديال بصح خليني من ترافيك دوالو ..يالاه نوضي جلسي حداه غتشبعي بوسان ليوم هه

نضت مشيت جلست حدى ناصر وهوا موقف رجليه بتقاشر بيضين ومتكي عليهم بيديه ومهبط راسو ماعرفتوش واش ساكت ولا كيضحك..كحزت حداه وشفت فهدى كنضحك وماعرفتش علاش جاتني الضحكة ..اما فيصل ناض من حدانا قالينا المهم هانا لهيه

بقا الادمين كيشوف فينا ونهى حتو هيا قالبة وجهها وكتشوف فينا

هز ناصر راسو قاليهم ماشي لعب هادا اصاحبي وماشي حكام..

شفتو دار حركة بصدو من لفيصل ونفخ بحال الى مابغاش

دورت عيني جهة الادمين شفتو غمزو وكيشير ليه براسو مافهمتش شنو كيقصد وفاللخر قاليه وهي بغات صافي طبق

مافهمتش انا شنو كيقصدو بدك العينين وكيفاش انا بغيت ؟ زعما بغيت من اينا ناحية

سمعت الادمين قاليه خود الرضى اصاحبي مالك مصعبها

قلت ليه شنو عما بغيتي تقصد هضر نيشان مالك كتخربق

قالي لا والو غير كنقادو الامور باش دوز الحكمة مقبولة ومنعاودوش مرة اخرى نعاودوها

قلت ليه اصلا اخر مرة لعب

قالي واغير قضي تا لقاي معامن تلعبي وبدا كيضحك

دورت وجهي شفت فناصر وجاتني الضحكة لقيتو كيشوف فيا عن قرب وكيستاعد..قلت ليه بلاتي تسنا وجبدت واحد الشكلاطة من جيبي كليتها باش نحيد مداق الزيتون اللي كنت مكنقب كل شوية وسرطتها عاد استعديت وقربت منو وكنسمع الادمين كيضحك بوحدو ويهضر بالالغاز مافهمتش اشنو كيقول

حدي سمعتو قاليه عوالة على شي نص ساعة

ضرت قلت ليه نص ساعة ديالاش

قالي ماشي معاك مع لخرى كنهضر

رجعت ضرت لقيت ناصر كيضحك ويشوف فالادمين وكل مرة كيبغي يقرب كيرجع يشوف فالادمين ويبدا يضحك حتى عيت من ديك الجلسة المعدبة ورجعت اللور تكيت على الحيط قلت ليهم عييت

شفت الادمين جالس وكيغمز ويالاه دورت عيني نقوليه مالك من الصباح ونتا كتغمز ضار عندي ناصر نيشان وباسني فمي وسكت بقيت مصدومة شفت فيه ..كان حاط شفاهه على شفافي وكيشوف فيا وبدا كيضحك حتى تبعدو الشفاه وضحك حتى شبع وانا كنشوف فيه حاسة بواحد الراحة و حسيت بقلبي كيضربي بالجهد..تلفت عند الادمين قاليه سكتنا اصاحبي شوية

قاليه الادمين هانا ساكت والله مندوي تا دوز خمسة دقايق . فاش تسالي نعلمكم يالاه بداو

عاود قرب مني وحط شفافه على شفاهي غير تقاسو وبقا هاكاك وانا كنتسناه يدير شي حركة اخرى لاكن متحركش..بقا ميشوف جهة فمي وبلا منشعر حركت شفاهي شوية وتحركو معاها الاحاسيس ديالي وقصت ليه شفتهه بطرق شفاهي بجوج وتحرك تجاوب مع الحركة ورديت عليه بحركة اخرى وقربت اكثر وعاود رد عليا بحركة وحدة اخرى

حسيت بيه حط يدو على جنبي وبدا صدرو كيتحرك بحال الامواج فوسط البحر كيتهز ويتهز ويتحط وحرك راسو باسني نيشان ..هزيت يدي حطيتها على كتفو شديت فيه وزاد قرب بشفافه اكثر ختى تحولات لقبلة حقيقة بمداعبة الشفاه وتخالطو الانفاس ووصلني مداق فمو حسيت بمدام اتاي مع نسمة الكارو ومخلطة مع بارفان اللي راش فحوايجو ..جدبني هاد المزيج كله وقبلنا بعضنا حتى سمعت الادمين كيسفق ويضحك قالينا صافي..انتهى الوقت…وا انتهى الوقت

تراجع ناصر شاف فيا وضحك وبعد شاف فالادمين اللي قالينا كيضحكو

نوضو تشللو

درت يديه على فمي اما شفت فيه اما ناصر بدا كيتبرا منو بيدو وناض كيضحك مشا وبقيت انا كنشوف فالادمين لقيتو غير هوا اللي قدامي اما هدى مشات حتى هي

قالي اجي نسولك ..دابا غير بيني وبينك ..شنو بينك وبين فيصل بالرجولة وماتقوليها لتا واحد خليها بيناتنا

قلت ليه مابيني وبينو والو

قالي ومالو لاسق فيك واش اونكوبل نتي وياه

قلت ليه لااالا ماشي بوي فراند قالها لي ومابغيتش قلت نبقاو دي زامي

الا مين: هاااكاك ..يعني غير امي نتي وياه

قلت ليه:امي وصافي

هز حاجبو قالي وازيييري شوية السمطة واش جالس علينا جمتي جمتي مالنا على هاد الفعايل

قلت ليه كيفاش مافهمتش!

قالي واش نتي معايشاش معانا !! راه ردك صاحبتو ..وازيري انهى شوية

بقيت كنحاول نستوعب كلام الادمين وزاد فهمني مزيان وقالي

راه طالقها علينا وحنا كيحساب لينا مصاحب معاك وجالس كيردع فالبنادم ..

قلت ليه واش على هادشي مابغاش ناصر يهضر معايا واش حساب ليه بيني وبينو شي حاجة

قالي هاااانتي فهمتي داااابا.. واميمكنش نتي مصاحبة معاه يجي صاحبو يدخلك شي دخلة ماشي رجلك هادي فهمتي

تعصبت حيت بسببه جلست كنبلاني بوحدي ونخمم وندير فالمجهودات وقلت ليه

انا داااابا غادي نوريه الكداب

جرني قالي لالالااا غتجبدي الصدع

نترت يدي نضت مشيت عند فيصل كان واقف قالب وجهه علينا جريتو قلت ليه علااش كتكدب كتقولي للناس انا ووياك فعلاقة ياك قلت ليك لااا وقلتي ليا نبقاو دي زامي قلت ليك واخا

بقا كلشي كيشوف فينا وناضو وفيصل كيشوف فيا قالي شنو كتخربقي اميانكوبل بحال بحال

قلت ليه لا ماشي بحال بحال

ضرت عند كولشي قلت ليهم انا ماعندي حتى علاقة بشي واحد ومداخلة فحتى علاقة وفيصل عرض عليا علاقة عاطفية مابغيتش وبقينا ديزامي ..اوك

يعني وفصل عمرنا اصلا كانت بيناتنا شي علاقة من الاول..التعامل ديالو معايا كان يحساب ليا كصديق محسابنيش غيكدب ويخلق ليا مشاكل مع ناصر وانا مفاهماش علاش ناصر مكيهضرش معايا وكيتجاهلني

قالي بغضب وكيشوف فالاعضاء : اش جاب دابا ناصر للهضرة؟

شفت ناصر جاي وجريتو قلت ليه شنو قاليك قول الصراحة ؟

قاليه ناصر :اه مالك تنكر علاش جاي كتقول ليا مصاحبين ما مصاحبين مافعايل ما تا لعبة هادو

قلت ليه :وكيحاول يطيح منك قالي غير شيفور ديال السلعة ومايرضاش يخدم بحال الخدمة ديالك

قرب منو ناصر معصب:قاليه شيفور تقد عليها؟؟ براكة عليك تجقر الفلوس اما الخدمة بالدرااه بزاااف علك

ضرب ناصر على دراعه بالقوة وقاليه كن جينا ندفعو كبير منجلسوش مع البراهش ومنضسروش علينا لقرودة حتى رجعو ينقزو لينا فوق الراس

شار فيصل بصبعو ليا قاليه وراه غااا٠٠٠بة…مالها رابعة العدوية ولا اشنو بغات تكون ..غااا٠٠بة باش تنوض عليها هاد الريكاطة كلها ..محلولة ديلمها شو كيدايرة

دفعو ناصر بجبهتو قاليه

ااه جمع راسك جمع راسك من تخصار الهضرة سمعتي..

قلت ليه لالالا انا ماشي ٠٠٠بة…ياك جيتي قلتي ليا علاقة ماعلاقة قلت ليك لا ..علاش كتكدب على الناس

قاليه الادمين حشومة اصاحبي ..بنت عائلة وشفنا باها وشفتي العقلية عندهم كي دايرة ماتقولش كاع عليها بحال هاد الهضرة

قلت ليه انا اصلا ماشي ٠٠٠بة علاش غادي نقوليه يسكت خليه يقول اللي بغا

فرقهم الادمين قاليهم بلاتي بلاتي..البلان باين ..صافي ..هي باينة باغا ناصر.. ياك نتي باغا ناصر ؟ باينة غا من ديك بوش بوش اللي مابغاتشدير معاك نتا ودارتها مع ناصر..صاف يراه باينة دابا مابينك وبينها والو ..صافي خليها منها لناصر

فيصل: ومابغيتش انا كاااع هاد الصداع ينوض على وحدة ماعرفت ديلمها بعقلها ولا هاربة من شي سبيطار

قلت ليه نتا اللي هارب من شي سبيطار نتا اللي كتكدب ..انا اصلا بغيت نهضر مع ناصر مابغيتش نهضر معاك نتا مارتاحيتش ليك. كاين شي مشكل؟!واش بزز مني!!

قالي الادمين تا حاجة ما بزز وتا حنا فهمناك ..جبتيها من اللخر قلتياش كاين هاهوا كيسمعك دابا كولشي بان منك ليه

الحمد لله توضح كلشي وتصدمت ف فيصل .. بقيت واقفة انا وناصر وبقا كيشوف فيا ونشوف فيه وكنتسناه شنو يقول ليا ..مسح على لحيتو وقالي اجي نمشي نجلسو لهيه؟

حركت ليه راسي ومشيت معاه جلسنا على واحد الكنبي بعيد على الكروب وقلت ليه

فيصل صدق كداب ومنافق .. ومامربيش وكيعايريني تصدمت فيه!!

بقا كيشوف فيا بتساؤل قالي:مافهمتش اصلا شنو بينك وبينو هوا قالينا تصاحبتي نتي وياه!!دابا صدق داكشي ما منوش

قلت ليه : كنت كنصوني عليك فتيليفون كان طافي وكنت كنتسناك تتاصل بيا ومتاصليتش ؟!!

قالي نسيت تيليفون فطاكسي داك النهار نيت ..عاد خديت واحد اخر ورديت النمرة وقبل مانردها تلاقيت فيصل لغد ليه بالليل قالي راكم خرجتو انسومبل وتافهمتو ..قلت ليه الله يسخر

تصدمت وقلت ليه: هيييه مااايمكنش هاد فيصل شحال كداب ..انا قلت ليه مامستاعداش لحتى علاقة ونبقاو دي زامي صااافي..مشا كيكدب على الناس

هز يديه قالي دابا صافي كلشي بان ..نتي ياك مزيانة ! اش كتعاودي

ضحكت قلت ليه الحمد لله ..انا كنت باغا نشوفك فرحت فاش جيتي معانا للرحلة

بدا كيضحك قالي شفت تصاورك مع الكروب كتخرجو ..عجبك الكروب

قلت ليه عجبني بزاف كيديرو خرجات زوينين وقالينا الادمين غيدير لينا كولة نهار السبت فيها الشعبي

قالي :كولة؟!! شنو هي هادي؟

قلت ليه كولة هوا اللي قالينا كولة ..دايرة بحال العرس. ولاكن مافيهاش عروسة وعريس

حك حاجبو قالي اااه كَالة سميتها ماشي كولة ههه.. وغتمشي؟

قلت ليه اه غنمشي ونتا واش غتجي

قالي:دابا نشوف الى كنت جاي طريق ندوز على مراكش..

قلت ليه : واش عايش فكازا ؟

قالي:معايش فحتى مدينة ..غادي جاي بحال الرحالة ..مي عندي لافامي فكازا

تبسمت بقيت كنشوف فيه وتلفت شفت هدى واقفة بعيد كتشوف فينا وقلت ليه

واش هدى صاحبتك؟!!

ضار شاف فيها قالي :لا ..مكاين حتى شي حاجة واضحة

قلت ليه : حتى انا

بقا كيشوف فيا وقالي شحال فعمرك؟

قلت ليه انا دابا طالعة فربعة وعشرين بقات لي شهرين..ونتا

قالي غندير سبعة وعشرين الشهر الجاي .

بقا ساكت كيشوف فيا وقالي:كتقراي؟ ولا خدامة ؟ شنو كديري؟

تلفت بقيت كنتمتم وتفكرت حفصة اللي قالت لي ماتقولي لحتى واحد شي حاجة باش تعرفي شكون صادق معاك وشكون كيكدب راه ينادم طماع

تبسمت قلت ليه مكندير والو

قالي والو حتى حاجة؟!!

قلت ليه واالو حتى حاجة

قالي:ولاكن هضرتك جاتني فشكل ..بحال شي واحد مامولفش يهضر الدارجة واش كنتي عايشة برا؟

قلت ليه لالا كنهضر هاكا ديما

بقا كيشوف مطولا قالي فشكل..قريتي فشي ايكول بريفي يمكن فيها غير الكور هنا فالمغرب

حركت ليه راسي قلتي ااه ولاهيلا قريت فايكول مافيهاش المغاربة..لالا فيها ولاكن غي شوية

تبسم كيشوف فيا قالي مزيان ..

قلت ليه ونتا شنو كدير فحياتك؟

تنهد قالي شديت الاجازة ابخي خدمت واحد العام فالبنكة ..ورجعت كملت درت الماستر فماخكوتينغ ستخاتيجيك ..دفعت لبزاف ديال ليكونكوغ ماردوش عليا ..خدمت فشي شركات كل مرة مع وحدة ..ابخي قلت ندوز بيرمي كبير نشوف يقدر ينفعني ..خديت بيرمي ديال رموك من بعد شفت مع واحد الشركة دفعت ليا بالشواهد ديالي ماجاوبونيش سمعت كيقلبو على شيفور يسوق الرموك ..دفعت ليهم السيفي ديال السياقة جاوبوني ..بديت معاهم عجباتني الخدمة بعيدة على الستريس وقوة التفكير وكتحتاج غير مجهود بدني شوية ..هادي اول تجربة ليا كسائق شاحنة.ابخي ردات عليا وحدة من دوك الشركات اللي دفعت ليهم وبدلت الخدمة..خدمت عام معاهم من بعد وقعو مشاكل بدت كتنقص من الناس اللي خدامين ..خرجت منها بديت كندفع هنا ولهيه بالشهواهد وبالبيرمي بكاه داكشي اللي عندي..

ردات عليا الشركة اللي انا معاها دابا وراني خدام معاهم كنسوق الرموك

عجبني الحال فاش سمعت بالتجارب ديالو وقلت ليه

عمرك فكرتي تمشي لبرا وتخدم تما

ضحك قالي :ماكرهتش.. راه مشاو لنا الفلوس غير هاكاك ومكاين والو

قلت ليه: علاش واش حاولتي شي مرة؟

قالي: حاولت مي كاينين غير النصابة..شكون غيديك لبرا واخا بالفلوس

قلت ليه : برا فيها الخدمة..

ضحك وقالي:الى كتعرفي شي واحد كونفيونص نشريو من عندو شي كونطرا 

بقيت ساكتة كنشوف فيه ونفكر واش نقوليه الصراحة..نقوليه انا عايشة برا وارملة..والى قلتها ليه وتبدلات النضرة ديالو ليا كما قالت ليا حفصة! لالا منزربش ..نصبر حنا اصلا فالبداية

سكت وبقا ساكت كيشوف فيا وتبسم قالي عرفتي شنو..كنت باغي نجلس انا وياك طيط ا طيط

قلت ليه انا ماعنديش بوي فراند..بغيت تكون نتا بوي فراند صافي؟

بقا مصدوم بقا مصدوم كيشوف فيا وفاللخر ضحك قالي علاش لا . فرحت ونضت جلست حداه شديت ليه فيدو كنشوف فيه قلت ليه صافي

حسيت بالراحة والسعادة حسيت براسي بغيت نطير وحسيت بقلبي فرحان وعنقتو ..ماعرفتش علاش حسيت براسي توحشتو من ديك اللحضة اللي تلاقينا فيها وانا كنتسنا نعاود نتلاقاه وفرحت بزاف خصوصا فاش لقيت الراحة وحسيت باستقرار نفسيتي واطمأنان قلبي..اما هوا حسيت بيه مصدوم واخا عنقني لاكن بقا ساكت .بقيت معنقاه وتكيت عليه كنشوف فاعضاء الكروب كل مرة يشوف فينا واحد ..اما الادمين كل شوية يضور عندنا ويبدا يضحك..هزيت راسي شفت فناصر لقيتو كيضحك معاه وقلت ليه

علاش كنتو كتغامزو قبيلا ودابا كضحكو؟ كضحكو عليا زعما؟

تسنيتو يجاوبني لاكن زاد فالضحك حتى حسيت بيهم كيضحكو عليا وهزيت راسي بعدت حسيت بالاحراج وقلت ليه غادي نمشي نعس ..تبسمت قلت ليه تصبح على خير حتى لغدا ونتشاوفو

ناض وقف جرني قالي علاش غنضحك عليك؟ واه سيمو هاكاك داير غير كيكركر بوحدو ماتديهاش فيه

تبسمت حسيت بيه غير كيسايسني وداك الاحساس بالاحراج مابغاش يتحيد قلت ليه اه كضحكو عليا انا احساسي مكيكدبش عليا ..عرفتكم كضحكو من قبيلا ..ماشي مشكل المهم تصبح على خير حتى لغدا ونهضرو دابا مابغيتش نهضر رجع شد فيا قالي بجدية مكنضحكوش عليك علاش شنو درتي باش نضحكو

قلت ليه صافي مغنهضروش..حتى لغدا ..دابا لا

وقفني قالي علاش دابا لا ؟ عاد كي كنا مزيانين ؟

قلت ليه كنا مزيانين ونتوما ضحكتو عليا صافي ..انا مضحكتش عليكم

بدا كيحلف ويشوف فيا رجع احمر لاكن ماقدرتش نبقا جالسة معاهم كان خاصني نجلس بوحدي عاوتاني خصوصا داك احساس الاحراج اللي كنحس بيه مغنقدرش نبقا جالسة لتحت وانا مامرتاحاش. المهم صافي تفاهنا وتافقنا نبداو بجوج هادا هوا المهم فاش نرتاح نهضرو عاوتاني لاكن هوا مخلانيش نطلع وانا مكنبغيش اللي يبزز عليا شي حاجة صافي خصني نبقا بوحدي هي خصني نبقا بوحدي.ماجاوبتوش ومشت حتى للدروج وتبعني قالي غتخليني كنرغبك على والو

قلت ليه لا مترغبنيش راني قلت ليك غادي نمشي حتى لغدا ونهضرو

بقا واقف كيشوف فيا وتبسمت قلت ليه بون وي وطلعت

طلعت للبيت لقيتو خاوي مافيهش البنات اللي معايا وكلشي بقا لتحت ..جلست كنتنتسا داك الاحراج وصونيت لختي نهضر معاها شوية تقولي شنو ندير ودنا ابيل فيديو وبديت كنعاود ليها كلشي وعاودت ليها على فيصل وكلشي بالتفاصيل لمدة نص ساعة غير ديال التعاويد حتى كملت وقالت لي

مكانش عليك ديري هاكاك انهى ..نتي كتصرفي عادي ولاكن هاد التصرفات ماشي ديال المغاربة.. هادشي كيديرو هنا غير اللي مدلولات واللي كيرخصو راسهم ونتي طيحتي من قيمتك بلا ماتقصدي وخليتيهن كيضحكو عليك وعطيتي انطباع على راسك بعيد على حقيقتك..مكانش عليك نهائيا تصرفي هاكا واخا عجبك نصر الدين ماكنتيش تبيني ليه هاكا مغاديش تعجبيه غير غينفر منك ..اما داك فيصل انا شميت فيه ريحة الشمايت من الاول وهاهوا طلع شماتة

قلت ليها عندك الحق الصراحة قلتيها ليا وداكشي كامل اللي قلتي صدق بصح ..نتي عندك الحاسة السادسة

قالت لي لاالااا ماعندي لا حاسة سادسة لا سابعة غير معاشرة هاد القوم هنا عارفاه كيفاش كيفكر وشنو ناوي يدير..

تنهدت جريت واحد الخنشة دشيبس بشومبينيو كبيرة قلت ليها شنو ندير دابا؟ انا عاودت ليك كلشي بحال الى كنتي حاضرة معانا ..قولي ليا شنو ندير وانا ندير

تنهدات وكانت دايرة النضاضر كتحفض وقالت ليا

دابا صافي وقع اللي وقع ..ولاكن المرة الجايا ماتقوليش داكشي باش كتحسي..ماتبينيش للناس الحقيقة ..هاهوا نصر الدين حتى هوا ضحك عليك

تنهدت قلت ليها شنو دابا المعمول..انا تحرجت حسيت بيهم كيضحكو عليا

حفصة:بيان سيغ غتحسي مالكي ماشي بنادم ! شوفي عزة النفس هي كولشي..ماتعاوديش ضحكي مع شي واحد فيهم صافي ..بيني ليهم باللي مقلقة

حسيت بالخنقة قلت ليا منقدرش.. صافي منقدرش بغيت نجي اخر مرة نخرج معاهم مابغيتش نتلاقاهم .

قالت ليا:لالا مالكي دغيا نضتي..غير بالشوية انهى نتي دغيا كتقلبي

نضت قلت ليها :لاا صافي غادي نجي بحالي..ضحكو عليا انا صارحت ناصر وهوا ضحك عليا

حفصة:وصاافي مالكي صافي عادي ماوقع والو

قلت ليها: ندمت مغنعاودش نقول ليه شي حاجة ..حتى هوا بحال فيصل..صافي غادي نرجع بحالي ومنبقاش كاع نفكر فيه

حفصة:ويييلي ندمتيني كاع علاش هضرت معاك

نضت خليتها كتهضر حسيت بالخنقة وجمعت حوايجي ورجعت قدامها كنلبس قلت ليها غادي نجي

ناضت جلسات قالت لي فين غتجي فهاد الليل !! شكون غيجيبك؟

قلت ليها ماعرفتش..المهم غنجي

قالت ليا ايوا مللي بغيتي تجي انسطالي ابيلكاسيون كريم عندك شوفي واش تلقاي تما شكون يجيبك حتى لمراكش

قلت ليها لالا غادي نسول فالغيسيبسون واش عندهم ترونسبور يجيبيني صافي اخر مرة غانخرج ..تخنقت حاسة براسي باغا نبكي

حفصة: صافي ماتبكي ماوالو اجي بحالك الى مامرتاحاش اجي

حطيت باليزتي مور الباب ونزلت لابسة حوايجي للاستقبال مادزتش جهة الصالون ومشيت سولت على ترونسبور يوصلني وقالي غيكون ولاكن غادي نخلص بزاف

قلت ليه ماشي مشكل غير عيط ليه

بقا كيتاصل ويجرب وقالي الفين درهم الى بغيتي يديك حتى لمراكش فهاد الوقت

قلت ليه صافي يجي عندي دابا مايتعطلش عليا

قالي صافي هاهوا غيجي عندك دابا

رجعت لبيتي عيطت على حفصة قلت ليها صافي لقيت اللي يجيبني غنجي دابا

قالت ليا صافي اجي ..حسن كاع ماتبقاي تما يدوروك وضحكو عليك..

حسيت براسي بغيت نبكي وبديت كنتفكر المشاهد ونلاقيهم مع كلام حفصة وزدت حسيت بالاحراج اكثر حشمت من راسي وناضت ليا نفسي بغات تقتلني بغيت نتفك منها ماقدرتش لقيت الحل الوحيد هوا نمشي مانبانش ليهم مرة اخرى

رجعت لبيتي هزيت باليزتي وحزمت بصاكي ونزلت للغيسيبسيون لقيت تما الادمين كيهضر معاهم وغير شافني تصدم قالي علاش باغا تمشي شنو المشكل

وقفت الشنطة وقلت ليه بغيت نمشي مافيا اللي يجلس هنا

بقا كيشوف فيا مصدوم قالي حتى لغدا وغادي نرجعو كاملين علاش باغا تمشي دابا والليل وعلى والو واش شي واحد دار ليك شي حاجة

ربعت يدي قلت ليه اخر مرة غنخرج معاكم وغنخرجش حتى من داك الكروب..

قالي علاش شنو درنا ليك ؟ مالكي قولي واش شي واحد قلقلك؟

قلت ليه كضحكو عليا وكتستهزؤو بيا وبقيتو كتغامزو عليا ..انا حسييت بيكم ودابا عادفهمت كووولشي

دورت وجهي كنتينى الطاكسي وهوا مصدوم كيحلف ليا ولاكن انا فهمت تصرفاتهم كلها وحفصة شرحات ليا كولشي مابقا عندهم علاش يكدبو عقت بتصرفاتهم .جا ناصر عندنا حتى هوا مصدوم شاف الشنطة ديالي محطوطة وبدا كيسول شنو واقع

قاليه الادمين بغا تمشي بحالها اصاحبي !!

قالي ناصر :فين غتمشي ؟؟

هزيت صبعي فيه قلت ليه نتا بالدات ماتهضرش معايا اوكي..مابغيتش نسمعك

حل عينيه فيا مصدوم وقلبت وجهي بقا كيتفتف قالي مافهمتش؟!! شنو وقع ؟!! ياك لاباس اشنو درت ليك انا ؟

قلت ليه نتا منافق اصلا ماتستاهلنيش..حيت صارحتك ونتا كضحك عليا وكتستاخف بيا

خرج عينيه قاليه هييه بلاتي كيفاش منافق وكيفاش اش كتخربقي فين اصلا بدينا باش نافقك؟ واش نتي مريضة ولا مالك ؟

قلت ليه لا انا مامريضاش نتوما اللي مراضين فيكم مرض سميتو النفاق خاصكم تعالجو حيت انا صارحتك قلت ليك بغيت نكون معاك ..بقيتي كضحك وتغامز عليا حساب ليكم انا هبيلة ولا حمقة ..ماعرفتش اصلا شنو اللي ضحككم فالموضوع ..غلطت فيك حسابني غادي تصارحني..نتا طلعتي منافق ..كنسحب كاع هضرتي كلها اللي قلت ليك

هز يدو قالي بلاتي بلاتي مالنا على هاد الهضرة كلها .. منافق ما منافق!! فاش اختي ناققتك؟! جيت كدبت عليك ولا قلت ليك شي هضرة وطلعت داير غيرها ؟!! نتي جيتي قلتي ليا نكونو بجوح قلت ليك واخا مالكي كتسبي دابا !! نتي بنتي ليا ماشي طبيعية فشكل وانا داير فيك راسي

دورت وجهي حركت ليه راسي قلت ليه نتا اللي طبيعي ..كتغامزو على الناس وكضحكو عليهم ..صافي كنسحب كلامي

عقد حجبانو كيشوف فيا قالي سحبيه ولا خليه اش غيوقع !! نتي ماشي عادية

هزيت صبعي قلت ليه نتا اللي ماشي عادي نتا منافق..الحمد لله كتاشفتك دابا قبل ماطول العلاقة

شاف فالادمين وشاف فيا قاليه واش كتبان ليك عادية؟!! واش نتي شوية لاباس!! بناقص كاع من هاد العلاقة سيري اختي شوفي راسك راك ماشي حتى لهيه

تعصبت قلت ليه انا كنت باغا نعاونك باش تمشي لبرا وتخدم تما ولاكن نتا متستاهلش انا اصلا ندمت كاع تهدلت فيك اناصر ماحسابنيش نتا داير هاكا

بقا كيشوف فيا قالي اش غتعاونيني ولا نعاونك واش نتي صافا ؟؟ سير اختي بعدي مني

هزيت صبعي قلت ليه انا مبعدة منك ماتقوليش بعدي مني سمعتي..ندمت علاش هضرت معاك اخر مرة نهضر مع شي مغريبي فيكم النفاق والكدوب

جريت باليزتي جاتني البكية وزدت خلفة وضرت ورايا شفت فيه لقيتو كيشوف فيا قلت ليه تخدلت فيك انا مابغيتكش كاع تكون بحال هاكا

دورت وجهي وخرجت من تما بغيت نبكي وطلعت فالطاكسي زدحت الباب عليا وبديت كنبكي بوحدي وقلت لطاكسي سير عفاك بغيت نمشي من هنا تخنقت

رجعت لدارنا سخفانة بالطريق ولاكن بردت شوية على فاش خرجت من الاوتيل .. فتح ليا بابا الباب فالصباح بكري لقاني فالطاكسي وتصدم مافهمش علاش رجعت

سولني قالي مالكي رجعتي علاش مارجعتيش فالكار ياك كنتو دايرين ترجعو الاحد بالليل

جريت باليزتي قلت ليه دابزت معاهم وجيت

قالي علاش دابزتي معاهم ياكما دار ليك شي واحد شي حاجة

قلت ليه لا انا مارتاحيتش تما وجيت بحالي

تنهد قالي ايوا دخلي دخلي..دخلي سيري تنعسي باينة على وجهك مسهوتة

طلعت لدارنا انا وباليزتي وبابا مشا يجيب الكومير للفطور بحال ديما ..دخلت عند حفصة لقيتها ناعسة وحيدت حوايجي مابغيتش نفيقها ونعست حداها شبعت نعاس ورتاحيت مزيان ..فقت لقيتها الوحدة ونضت غسلت وجهي ولبست بينوار فوق البيجامة وخرجت لقيت حفصة جالسة قدام البيسي ديالها كتقرا وماما فلكوزينة

بدات كضحك قالت ليا اجي جلسي عاودي ليا

جلست حداها حطيت واحد الزلافة دكورنفليكس كنفطر وبديت كنعاود ليها بالتفاصيل..شدات حنكها كضحك قالت ليا

وييلي ويلي ويلي..والله حتى كنت عارفاك غادي ديري ليهم تما شي سكوندال عاد تجي ههه

قلت ليها :صافي اخر مرة نخرج معاهم

صحكات قالت ليا داك نصر الدين بعدا موحال يكون نعس..غيقول هادي مالها جات عندي برجليها ورجعات قلبات وجهها ..كنتخيل وجهه كي غيكون

هزيت كتفي قلت ليها الصراحة خدلني..كنت بغيتو يكون مختالف ..مابغيتش نتهدل فيه حيت رتاحيت ليه بزاف ..ولاكن دابا صافي قلتها ليه مغاديش نعاود نفكر فيه مرة اخرى

تنهدات حفصة قالت لي: خليي عليك كحل الراس غادي غير يحمقك والله مايليق ليك..انا عارفة اش تنقول ..غيردوك حمقة

تنهدت قلت ليها وشنو دابا غندير كنت كنفوج مع الكروب

قالت ليا التفواج بحال هادا غير بلاش منو .. البسالة كي دايرة

قلت ليها ندمت علاش صارحتوش

قالت ليا عنداك تعاودي تصوني ليه ..صافي نوضتيها معاه خليه حتارمي راسك شوية

قلت ليها منعيطش ليه صافي قررت ..ومغاديش نهضر معاه خديت قرار .لحسن الحظ ماطولاتش العلاقة اما كن تخدلت فيه اكثر

حفصة: عنداك تمشي ديري شي حاجة مع شي واحد ..

قلت ليها شنو هاد الحاجة

قالت لي: تمشي تنعسي مع شي واحد

قلت ليها لاااا اويلي

قالت ليا ايوا مانعرف وصلت مع ناصر للبوسان راه توصلي لما اكثر

قلت ليها :لالا منديرش النكاح

حفصة: ايوا هاكاك ..النكاح بالكاغيط الى مكانت لاكط مكاينش نيكاح فهمتي

قلت ليها فهمت راني عارفة نيكاح خصو لاكط ..ضاروري

قالت لي :ايوا هاكاك

جلست كنحاول نتلف شوية باش نسا شنو وقع وكنخرج غير مع ماما وحفصة صافي

رتاحيت شوية لاكن بديت كندخل للكروب كنشوف التصاور ديالهم اللي دارو فافران وكنشوف شنو دارو من مورايا وكنتحسر..بقيت كنتحاك بوحدي ودخلت كنقلب على كروبات وحدين اخرين باش نبقا نخرج معاهم ودخلت لشحال من واحد لاكن طلعو ليا فمدن اخرى ..

كان نهار الجمعة وكانت ماما مصايبة لينا كسكسو ودارتو بالكديد وكليت بزاف حتى دخت وانا مومولفاش بالماكلة التقيلة وخصوصا الكديد..بقات كتعطيني وانا كناكل حتى جاني النعاس .شربت واحد الكاس داللبن وتكيت على واحد السداري شادة تيليفون كندور فيه ختى طلعات ليا لالونص ديال لكروب دايرين الكًالة فيها الشعبي وجايبين شيخة ومغني ودايرين الحلوة والسوشي والعدد محدود ..بقيت كنشوف فديك التيكي وبقا فيا الحال حسيت بالبكية عاوتاني ماكرهتش نقطع وحدة ونمشي .. جلست غير كنشوف فيها حتى داني النعاس ونعست ماعقلتش على راسي

فيقني تيليفون كيصوني لقيت حفصة قدامي كتفرج فواحد المسلسل ديال الخمسة دلعشية ونضت كنقلب فين تيليفون لقيت راسي ناعسة. عليه

طلع ليا ادمين سيمو وتصدمت جلست وقلت لحفصة

الادمين كيصون عليا نجاوبو؟

ضارت عندي قالت ليا شنو بغا ؟

قلت ليها منعرف

قالت ليا جاوبي وكبري الصوت نسمعو اشنو بغا

يتبع...