همسة حب الجزء الثالث

تخلعت والرموك كيجري كنسمع الحجر كيضرب اللور وهوا كيقول ليا راه الروايض ديال الرموك كيقلبو الحجر لفقو غير جلسي ماتخلعيش

شفت قدامي كان الضلام ختى حاجة مكتبان من غير الضو ديال الرموك ضارب فالطريق والطريق كتبان مسرحة قدامنا كلها شانطي ملس ولاكن الرموك كيمشي عليها بحال الى غادي على الحجر وشي حجر مكنشوفو قدامنا

قلت هزيت راسي شفت فيه وهوا كيشوف قدامو قلت ليه شي حاجة ماشي عادية

عقد حجبانو كيشوف قدامو سايق وقالي

غير صبري هاحنا غندخلو للعيون مابقا والو

هبطت راسي كنترعد شادة ليه فركبتو اللي جيهتي وهوا كيحركها فالسوقان حتى سمعت لفران تشد بالجهد بحال شي حادثة وهزيت راسي بالزربة لقيت قدامنا واحد الكاميو قديم تقلب وغوت وكنش ناصر كيزيد فالسرعة غادي يدخل فداك الكاميو حتى وصل ليه وانا نسخف ماعقلتش على راسي

حسيت بالماء نازل مع صدري ووجهي ودخل ليا معايا نيفي خنقني ونضت شهقت حليتي عيني وهزيت يديه نشد فشي حاجة ونضت جلست مخلوعة شفت فناصر لقيتو واقف قدامي والقرعة فيدي..بقيت كنشوف فيه مصدومة وهزيت راسي بالزربة قلت ليه

الكاميو!!! درنا اكسيدو

قالي مادرنا والو مكاين والو ..مالكي تخلعتي

هزيت راسي كنشوف فين حنا لقيت راسي فسطاسيون والضوء والاضواء ديال المدينة فكل جهة وبديت كنتساؤل مافهمت والو وقلت ليه

فين حنا؟

قالي فالعيون

قلت ليه كيفاش؟ واش ماطرا والو

بعد ليا العشر الفازك على وجهي قالي ماطرا والو غير تخايل ليك

بقيت كنحاول نفهم وكنقول ليه

لالا انا شفتو بعيني..شفت الكاميو تقلب..ميمكنش عيني يكدبو

قالي :مكاين والو انهى ماكاين لا كاميو لا حتى حاجة..جاك الجوع قلتي ليا فيا الجوع ..قلت ليه غندخلو للعيون نجيب ليك شي حاجة تاكليها ..صافي من موراها طحتي سخفتي

حطيت يدي على قلبي قلت ليه قلبي غيسكت ..قيس

حط يدو على قلبي كيشوف فيا ويكأكد ليا باللي مكاين والو لاكن ماقدرتش نستوعب..مافهمت والو ..واش دخت بصح ولا تهيأ ليا..ولاكن كن كان بصح وتقلب الكاميو قدام بديك الطريقة ودخلنا فيه بديك السرعة كن راه تبجغنا ..دخت ..المنطق ديالي داخ ماعرفت شنو كاين

قالي ماتخافيش جلسي غنهبط نجيب ليك شي حاجة تاكليها

جريتو من دراعه لسقت معاه وكنشوف فجنابي قلت ليه

مانبقاش بوحدي..غنهبط معاك

دور يدو على خصري قالي يالاه لبسي تيشورط اللي عطيتك ..خوافة

جريتها لبستها وخليت شعري حيت تشنتف ولسق مع وجهي بالخلعة ..هاد التسافيرة خصني موراه حمام ديال نص نهار يالاه نرجع كي كنت ..

جمعت شعري كوي شوفال عالية ونزلت لاسقة فيه وهوا بديك سو فيتمو كحلة سورال كحل كيطمة والسوارت فيدو ..عنقني جرني حداه ومسح على كتفي قالي مازالة مخلوعة

قلت ليه مزال مافهمتش شنو وقع

هبطنا جلسنا انا وياه فالقهوى ديالهم لداخلهم وخدا ليا سوندويتش وخدا لراسو واحد وجلست قلت بسم الله ..مع عضيت جريت البصلة وعطيت اللقمة حيدتها من فمي حتى بدا كيقول ليا مالكي

قلت ليه :مكاناكلش البصلة

خدا ليا داك السوندويتش حلو حيد منو البصلة ونقاه وعطاه ليا قالي شوفي دابا

عضيت وحركت ليه راسي بالايجاب وتكيت كنشوف فالناس اللي واقفين تما اغلبيتهم شوافرية .. حيت المنطقة بعيدة وقليل كيوصل ليها ..

كلينا وسالينا وشتو غيشعل الكارو وتكيت على كتفو قلت ليه قلتي ليا انا معاك ماتكميش

لاح يدو على رجلو قالي

صافي منكميش

قلت: قليتي ليا حيت انا معاك مانكميش…هانتا بلاتي

هزيت ديك البكية كنقرا قلت ليه شرف شنو كاتبين..هما براسهم كيقولو ليك مضر بالصحك وكيسبب السرطان وعدة امراض..واش بغيتي تمرض؟!!

قالي لا عندك الحق

قلت ليه :راني عارفك راسي عندي الحق ولاكن نتا خاص تكون عندك الادارة. باش تحيدو

حط يدو على وجهي كيضحك غطاه وقالي

:الارادة ماشي الادارة

بعدت وجهي قلت ليه اييه::الارادة والعزيمة ..خاصك تخي فوووغ…

سترونغ باش تغلب عليه ..حيت فيه نيكوتين تسعين فالمية عرفتي شنو كيدير فالصدر ..مكيضركش صدرك؟

حرك ليا راسو بالنفي كيشوف فيا وعينيه ضاحكين. وقالت ليه

كيمرضو راه باينة ..شنو غيكون كيدير ليه فنضرك

قالي: تبقاي تسافري معايا ديما باش منبقاش نكمي صافي

رجعت اللور قلت ليه

لاااالا انا منعاودش نسافر معاك .. انا خاصني ندوش دابا حاسة براسي بحال المرقة

هبط راسو كيضحك قالي وانا كيفاش كتحسي بيا

شفت فيه وشميت ريحتو قلت ليه حتى نتا بحالي..

قالي:بحال المرقة ؟

قلت ليه : ااه الصراحة كتعاني بزاف كن غير كانو دايرين ليكم شي حمام صغير بحال الكرفان تبقاو دوشو باش ترتاحو ..شحال باقي لينا دابا ونوصلو؟

قالي:غنوصلو غدا ان شاء الله لمراكش فالوقيتة اللي قلعنا من تما بالضبط

قلت ليه مع الخمسة دلعشية؟

قالي:اييه

قلت ليه :نمشي نعس باش منعياش اكثر ..اففف ميمكنش شحاا ديال القهرة ..ولاكن تبارك الله عليك الراجل ديال الزمان

ضحك حتى شبع وقالي :فين تعلمتي هادي حتى هي

هزيت حاجبي قلت ليه ماما كتقولي الراجل دالزمان هوا اللي كيخدم ويضرب تمارة ومايخافش..كتهضر عليك تماما

تكا على ركابيه كيحرك راسو ويشوف فيا قالي

ماعندي منتسالك راك حافضاا ه

بقيت ساكتة كنشوف فيه مطولا وقلت ليه

الصراحة هدى كاع ماتجي معاك ..نتا زوين وضريف والراجل دزمان

مسح وجهه كيشوف قدامو ويضحك وقالي

من اناحية ماتجيش معايا؟

قلت ليه حسيت بيها مامزياناش..انا احساسي عمرووو كدب عليا.. متأكدة مامزياناش ..قلبها ..قلللبهااا مازوينش وانا متأكدة من راسي..تنهد وناض هبط يدو على راسي ونزل باسني من شعري وقالي

يالاه نوضي نمشيو الى رتاحيتي

نفضت يدي جمعت دوك الكواغط اللي فوق الطبلة فاش كلينا وبقيت كندور كنقلب فين نرميهم مالقيت فين وديتهم للرموك وبديت كنجمع الروينة .. كاع الكواغط جمعتهم فصاك الكادو وحيدت سبرديتلتي وجلست شديت واحد كلينيكس فزكتو بالماء كنمسحها من الجناب ونقيها وهوا شاد الطريق سايق وكل شوية يدور يشوف فيا..حطيتها حدا الباب ونفضت ديك البلاصة فين نعست مزيان والكرسي فين جلست وغسلت يدي من السرجم قبل مايجهد السرعة ورجعت جلست حليت صاكي وجبدت واحد الريحة وخيدت تيشورط شميت بيطاني لقيت فيهم الريحة وبديت كنرش وتفكرت الريحة اللي هرست ليه وقلت ليه

الصراحة خسارة هرست ليك البارفان ..ولاهييلا

قالي ماعليش اجي رشي ليا البارفان ديالك

شفت فيه قلت ليه :بصح!!

قالي :اه بصح

نضت رشيتها ليه فيدو وحدا عنقو وجلست جمعت حوايجي فالصاك ونفضتو من الغبرة ونقيتو من الجناب وقتلت. ليه

الحمد لله ما سرقوش ليا الصاك عاد شريتو باقي اول مرة نهزو

تلفت شاف فيا قالي داك الصاك اريجينال

قلت ليه اه

قالي شحال واخداه؟

بقيت كنحسب من الفرنك السويسري للدرهم المغربي وقلت. ليه

شريتو بشي ثلاتين الف درهم تقريبا

هز حاجبو قالي ثلاتين الف درهم ولا ثلاتين الف ريال ؟

قلت ليه ثلاتين الف درهم علاش خايب؟

قالي :غاالي وكانو غيرخدو داكشي اللي فيه ويرميوه ..الصاك غلا من تيليفون

قلت ليه هادشي باش كنشريهم !!

قالي الى كنتي كتشري الصاك بثلاتين الف درهم صبايط شحال كتشريهم

قلت ليه هاديك بالونسياكا كنت شريتها بديك تمنالاف وتسعمية درهم

هز حجبانو قالي: بااااخ …تبارك الله ..الصالير ديالي فجوج ..الى كنتي كتشري الصيكان بداك الثمن غير ديني معك لسويسرا

شاف فيا بقا كيضحك وقلت ليه

راه غنديك صافي قررت ..غنمشي نسيفط ايك كونطرا باش تخلص مزيان ..الصراحة كتكرفس بحال هاكا مكيخلصوكمش مزيان . واش غير بوحدك ولا شنو؟

قالي: بحالي بحال كاع الناس باش حسن منهم انا

قلت ليه :ايوا تمشي برا تخدم بالساعة وتخلص حسن من هنا ..كيضلموكم دابا ربي يحاسبهم حيت شركة بحال هادي اللي خدام فيها شركة عملاقة باينة..نتوما خاصكم تخلصو مزيان خصوصا فاش كتوصلو الساعة في امان ..راكم نتوما اللي كتوصلو ليهم سلعتهم وخصهم يشكروكم

تنهد تكا على الشرجم اللي حداه قالي

اااودييي: خلي داك الرماد طافي وصافي

كحزت حداه تكيت على كتفو وشديت ليه فيدو فيدي بجوج وسكت كنشوف فالطريق حسيت بواحد الراحة وبغيت هاد الطريق ماتساليش..بغيت نبقا غادية بلا منحبس فيها واخا سخفاتني وعياتني وتكرفست ولاكن مرتاحة فيها وعاجباني .

حسيت براسي بغيت نعس ونضت تكيت كنشوف فيه وكنقول باز ليه مسكين..يعلم الله شحال فيه ديال النعاس وشحال وهوا سايق وجالس..غيكون عيا

بقيت كنفكر ليه هزيت ليه الهم فراسي وفقلبي وعرفت شحال خدمتو صعيبة ماشي ساهلة..خصها الصبر وكلها مخاطر وسهير كتمص الطاقة وماشي اي واحد يقدر يدير بحال هاد الخدمة ويتنقل مسافة فيها ربعة ساعة ديال الطريق ويرجع ربعة وعشرين ساعة اخرى..السفر مرة فشحال كيسخف ويعيي فما بالك هوا اللي دايرها خدمة وكيخدم كتر ما كيتخلص….خلصتو مكتقضي ليا انا والو كتمشي ليا فنهار .. يستاهل على المجهود وهاد الكفاح وهاد الصبر وحتى الشجاعة انني نعاونو ونمد ليه يد المساعدة ..الحمد لله ربي كيبغيني وعطاني ومما نقدرش نشوفو مكرفس وانا قادرة نعاونو بلا منخسر والو ..طارت عليا الراحة وليت باغا غير فوقاش نديه لسويسرا وحتى الى خدم ودار مجهود يتخلص عليه خسن ما يبقا فهاد الخدمة ديال الويل على والو توقع ليه شي حاجة شي نهار ولا يبقا يتشجع ويغامر بحياتو حتى تجيه فصحتو

بقيت كنفكر ونخمم حتى داني النعاس ..وفاش فقت لقيت الشمس ضاربة ليا فوجهي ونضت حسيت بالبرد شوية ولقيتو مزال سايق

درت يدي على كتافي قلت ليه صباح الخير

تلفت قالي

صباح النور ..نعستي مع راسك راه قربنا نوصلو

قلت ليه :مانعستيش؟

قالي :نعست شوية بالليل

حطيت يدو على الرقبة ديالو من اللور مسحت على شعرو قلت ليه نااري بزاف عليك ..بناقص من هاد الخدمة كن بدلتيها كن حسن

تبسم من عينيه كيسوف قدامو وقالي

ان شاء الله..فطري راه الفطور ديالك ..جمعي فطور وغدا وقبلي علينا

ضرت لقيت سنوديتش فيه الفرناج والبيض وعصير ..وخبزة مقسومة فيها الكفتة مشوية الوسط

هزيت قرعة نغسل وجهي ووقف ليا حتى غسلت وشللت فمي وطلعت بغيت ناكل وقلت ليه

واقيلا خسرتي عليا بزاف دالفلوس فالماكلة

تنهد قالي:وااايلي شخال خسرت عليك وشحال كتاكلي

قلت ليه:بصح !! خسرتي عليا داكشي كامل اللي عندك؟!

قيدا كيضحك قالي الله يهديك اش خسرت ..كولي ماتبقايش تحاسبي بزاف والو بغيتي نزيدك والى تشهيتي شي حاجة قوليها ..شحال قد بنادم يبقا يجمع الفلوس راه كتمشي وتجي

قلت ليه شكرا وجلست فطرت وماقدرتش نزيد وعطيتو ليه قلت ليه خودو ومابغاش بقا كيقولي كليت كليت ولاكن انا حسيت بيه غيكون جاه الجوع عاوتاني واخا كلا وكلتو ليه بزز وبقينا كنضهرو ماحسيتش بالوقت حتى شفت البلاكة دمراكش وقلت ليه

وصلنا؟!!

قالي:وصلتييي.انا مزال غنزيد لكازا

شفت فيه بقا فيا حزنت وتبسمت فنفس الوقت قلت ليه

ربي دابا يعاونك .. نتا انسان مزيان تستاهل غير الخير وربي كيبغي الناس اللي بحالك

بقا ساكت كيشوف قدامو مجاوبنيش حتى وصل للبلاصة اللي هزني منها وكنت لبست حوايجي بقات ليا غير جاكيط نديرها قبل منزل ..دور المرسي جيهتي وجرني من يدي عنقني زير عليا وعنقتو سديت عيني واستنشقت كاع الاكسيجين اللي تما ..مسح على ضهري قالي شكرا ..شكرا ونستيني فهاد السفر

شفت فيه قلت ليه ماشي مشكل غنبقا نوسك ديما ماحدي انا هنا ..واخا عييت وتكرفست ولاكن نمشي معاك على قبلك ماشي مشكل

عنقني كيضحك قالي واخا قلتي ليا عمرني نمشي معاك

قلت ليه واخا هاكاك ..اشغندير غنصبر باش نونسك ماعندي مندير ..مشكييلة دابا

ميل راسو كيشرف فيا ويضحك وعاود عنقني بواحد اليد قالي

دابا غادي نولف ونهار تمشي غنسمح فهاد الخدمة مغنقدرش عليها..الفشوش بزاف كيضسرو

قلت ليه :غير خليها اصلا غتمشي لسويسرا هادا وعد ..انا عارفة شنو كندير

قالي : عتقي باك غيكون تسطا ..ماعطيتو حتى النمرة وتيليفونك. طافي

قلت ليه:لالا هضرت مع حفصة قلت ليها غيطفا ليا ماجبتش معايا شارجوج دابا تقولها ليه

لبست جاكيط ديالي وهزيت صاكي طليت شفت واش كلشي مجموع فيه ونزل سبقني لابس تريكو ديالو مشمر عليه من الكمام خل ليا الباب ومد ليا يديه هزني من تحت يدي هبطني وقالي

فاش غتمشي نشد ليك طاكسي؟

قلت ليه:لالا جبت طموبيلتي ..حطيتها لهيه فماكدو

سد البيبان قالي يالاه نمشي معاك نوصلك

قطعت الشانطي تابعاه كنجري بانت ليا مزالة فبلاصتها كحلة ومربعة عالية فيها الشارة دمرسيديس مدورة وكبيرة من القدام والبولات ديالها مدورين والشتا طاحت عليها كتبان كتبري..

مشيت جيهتها بالزربة وهوا ورايا حبدت الكونطاك شعلات الضوء وحليت الباب لحت صاكي لداخل وضرت عندو قلت ليه صافي غادي تمشي لكازا

بقا ساكت كيشوف فيها وضحك قالي هادي طموبيلتك ؟

قلت ليه اه

رجع اللور كيشوف فيها قالي عرفتي شنو..صدمتيني والله

قلت ليها علاش غنصذمك!!!

قالي:اولا تبارك الله الله يزيدك من فضله ..ثانيا حسابني واش كنتي كضحكي وصافي بخصوص سويسرا وداكشي..

تنهد كيشوف فيها قالي : ماعرفت منقول

بقيت كنشوف فيه ونرمش مافهمت والو وشاف فيا بنص عين داير يديه على جنابو وضحك قالي

حضي مع الناس انهى ..عنداك يضحك عليك شي واحد ولا ينصبو عليك

ضحكت قلت ليه اه راني عارفة كلشي ولاد الحرام الا نتا

حط يدو على وجهه كيضحك قالي

ميمكنش ..نهى ..سويسرا . .الشركة. مرسيديس جي كلاص ..تسطية والله

ركبت فالطموبيل وجلست حالة الباب قلت ليه

واش حسابني كنكدب عليك!!!

مسح على شعرو كيشوف فيا ويشوف فالطموبيل قالي

ماعرفتش..تلفت واحق الرب…جي كلاص!! راه ميمكنننش؟

قلت ليه مالها جي كلاص؟؟

جبدت شارجور بونشيت تيليفون مع طموبيل يتشارجا وحطيتو ضرت عندو لقيتو واقف قدام الطموبيل كيشوف فيها ويشوف فالماطريكيل ويدو على جنبو كيضحك.. شحال زوينة ضحكتو حسيت بيه تفاجأ والمفاجأة زوينة ..جا حدايا وقف كيشوف كي دايرة من لداخل وقالي

الحديد ديال بصح تبارك الله

قلت ليه كيعجبوك طموبيلات؟

قالي:بيان سيغ كاين شي واحد مكيعجبوهش الطموبيلات !! جي كلاسي اصلا مكتبانش بزاف ..عرفتي هادي شكدير فالطريق..كطير

قلت ليه اه زوينة حتى انا كتعجبني

قالي: الو ماعجباتكش هادي اشنو غيعجبك؟ داسيا هه.. ولاكن جات معاك .. جاتك ناضية

قلت ليه :ختى الصراحة تستاهل بحالها .

شاف فيا كيضحك وتنهد قالي

سيري للدار باك غيكون ديكلارا بيك يقول خطفت ليه بنتو

ضحكت عرفتو كيضحك معاك حيت بدا كيضحك ومد ليا الباب سديتو وحيدت جاكيط ديماريت رجعت اللور وضرت شيرت ليه بيدي عطيتي بوسة من لداخل وهوا واقف كيتسناني نخرج ..خرجت للشارع غادية وشيرت ليه من لبعيد وهوا كيضحك معايا ومشيت بحالي نيشان للدار ومنين مادزت كلشي كيشوف فيا خصوصا كنبان بحال الكانيش راكب فطموبيل بكثرة ما كبيرة عليا وانا فيا شوية من الحاجة

وصلت للدار وقفتها بين الطموبيلات وهزيت جاكيط وصاكي واغراضي وطلعت للدار باغا غير نوصل باش ندوش ونرتاح

غير دخلت لقيت ماما فالباب وبابا حتى هوا واقف مخلعوع قالي

فين كنتي ابنتي خلعتينيا عليك ؟!!

بقيت واقف رجل فالارض ورجل هازاها كنشوف فيهم وهزيت كتفي كنتسائل قلت ليهم

راني قلت ليكم غنسافر لموريتانيا مع ناصر!!

بابا:وعلاش ماعيطتي ماسولتي!! على شوية نمشيو عند البوليس

قلت ليه:راني قلتها لحفصة !! مقالتهاش ليكن؟!

قالي:واخا قالتها لينا راه خصك تعيطي لينا ..نعرفو غير اش واقع ليك؟!!

قلت ليه:الصراحة ماوقع ليا والو حيت ناصر كان معايا وصدق ولد الناس بحالي..شرالي الماكلة شرالي الماء ساراني فنواكشوط..خاصك تعيطو تشكرو ضاروري حيت ولد الناس ابابا

بقا كيشوف فيا ويشوف فماما وقالي

الحمد لله على سلامتك ..دخلي دخلي..وعمرك تعاوديها بنتي الله يرضي عليك ..الى ماحفضاش النمرة ديال الدار حفضيها باش واخا يطفا ليك تيليفون تصوني علينا نعرفو شنو كاين

حرك ليه راسي قلت ليه صافي واخا

جراتو ماما من الجلابة قالت ليه

صافي صافي..خليها دابا دخل بعدا ..

هلت كنشوف فيها وهي كتغمزو وهوا كيهضر معاها ويغمزها وضرت قلت ليهم

علاش كديرو هاه !!

قالت لي ماما:والو والو ابنتي غير شي حاجة دخلات ليا فعيني

قلت ليها :كتغمزوو!!

قالي بابا:مكنغمزو والو ..يالاه ابنتي سيري دخلي سيري

مشيت لبيتي بالزربة لقيت حفصة جالسة قدام البيسي وشافت فيا كضحك قالت ليا

فيك ريحة الرموك

قلت ليها :حيت نعست تحت البياص

قالت لي:تحت ااش؟

قلت ليها :يالاه ديني للحمام ..يالاه غيا

قالت ليا عاد مشيت لبارح بيتي الجلدة تسلخ ليا

قلت ليها :وشنو ندير؟؟ بغيت نمشي الحمام

قالت لي: رجعتي مكًلكًة ههه سيري لسبا

قلت ليها : شنو زعما مكلكة؟؟

قالت لي :مسخة زعما هه

قالت ليا بلاتينشوف ليك واحد السيا وااعرة قريبة سيري ليها

جبدات تيليفون كتقلب وشدات ليا موعد على نص ساعة ووراتني الاثمنة وشحال خصني نخلص وجمعت حوايجي مشيت كنجري عندهم لقيتو عامر وتعصبت لداخل قلت ليها

انا خديت غونديفو ؟!! شنو هاد سيغفييس عندكم!!

قالت لي:ماعندنا مانديرو راه السيدة حتى هي تعطلات ماجات ؟!

قلت ليها : وشنو ندير دابا انا مكًلكًة خصني نغسل دغيا !!

شافت فيا قالت ليا :شنوو؟ مكًلكًة؟؟

قلت ليها قنطت خاصني دغيا نغسل منقدرش نصبر دخليني غسلي ليا ونمشي بحالي اخر مرة نجي عندكم ..ماشي سيغفيي هادا عندكم ماشي بروفيسيونيل نتوما

بقات كترمش قالت لي واخا اجي نديرو ليا لاسيغ على حسابنا بيدمن وصلاتنا نوبتك صافي

شديت جبهتي قلت ليها : انا دايرة لازيغ لكلشي مافيا والو بغيت غير ندوش..اففف تعصبت

قالت لي :شنو بغيتي نصاوبو ليك بيدمن يخوا الحمام ؟

تنفست بقيت كنشوف فيدي قلت ليها خيدي ليا هاد الدفار

جلست حيدات ليا الدفار كلهم ودخلت نغسل ..عجبني حمامهم زوين دارو ليا مساج وحمام وغسلو ليا شعري مزيان وصافوناج حسيت براسي نهى عاد بردت وخرجت لابسة بينوار نرتاخ من السخوينة وعطاونيي اتاي مع الحلوى وخرجت نشفت شعري وجلست نعاود دفاري حتى سالات ليا وهزيتهم كنشوف مالقيت منقول خدمتها هي هاديك عجبوني ونضت خلصتهم ورجعت بحالي لقيتها لخداش دالليل

ماقدرتش نتعشا واخا عياو فيا قلت ليهم ماقدرتش ومشيت بغيت نعس وطفيت الضو حتى فيقني التيليفون كان ناصر وحطيتو على ودني وعيني كيتسدوقلت ليه

الو

قالي: فينك ماشفتيش ليزابيل ديالي؟

قلت ليه كنت فالحمام عرفتي شحال ديال الخنز كان فيا ..

ضحك وقالي:حيدتيه؟

قلت ليه :حيدتو دابا بغيت نعس ختى لغدا ونهضرو ..يالاه بسلامة

قطعت ونعست تقول عمرني نعست فحياتي..من بعد التعب والارهاق دقت احلى نومة ماعقلتش فيها على حتى حاجة حتى صبح الحال

نضت مرتاحة جلست جمعت شعري وهزيت تيليفون كانت لحداش ديال الصباح

عيطت لناصر هوا الاول وكنشوف فدفاري واش هما هادوك مافيهم حتى عيب حتى رد عليا باين عليه فيقتو من النعاس من صوتو قلت ليه

فيقت ؟ صافي حتى تفيق وعيط ليا غير نعس ترتاح

قالي:لالا غنوض ..صافا..عاد فقتي

قلت ليه:عاد فقت نعست مزيان..الصراحة باز ليك منقدرش نبقا نمشي ونجي ديما ..واش غتخدم حتى ليوم؟

قالي:مالي برابول نخدم صباح وعشية…تا للسيمانة جايا

قلت ليه:ااه يعني كتخدم سيمانة وسيمانة لا

قالي:ويالاه نرتاحو شوية نعقلو على راسنا ..ربع ايام ديال الطريق الي وغوتوغ وكرفيص راه هي سيمانة

قلت ليه:غدوز عاد السيمانة فكازا؟

قالي: غير كازا هاد الساعة ..باباك صافا عليه مقالك والو

قلت ليه: شنو يقول لي؟

قالي:زعما مخاصمش عليك؟

قلت ليه:لا !!ًتخلع عليا شوية وصافي

ناصر: ايوا مزيان ..شنو غديري دابا؟

قلت ليه:غنمشي نفطر..تشهيت لكراوع

قالي:شنو تشهيتي؟!!

قلت ليه لكراوع مع الحمص

قالي:لكرعييين الكراوع ههه

قلت ليه:ااه هادوك ..غنقول لماما تصايبهم لينا

قالي:بالصحة .

قلت ليه:غتلاقا بهدى؟

قالي:علاش دابا كتسوليني؟!

قلت ليه :باش نعرف شنو غدير ليوم

قالي: غنمشي لاصال دابا حنا فراس الدرب ونتحرك مع الدرادي

قلت ليه: صافي انا غنمشي نفطر ..بسلامة

قطعت ونضت مشيت عند ماما للكوزينة كانت فيها طبلة وجلست لقيت البغرير والعسل وكليت حتى شبعت وماما كتسولني فين مشت شنو درت ..عاودت ليها كاع المغامرة ديالنا وكانت مرة ضحك مرة تخلع حتى دخل بابا هاز القفة فيها الكرعين والربيع قالي

ها الكرعين اللي بايتة تحلمي بيهم

ماما:قالت لينا حفصة اللي كامل ونتي كتهضري على لكراوع وتمضغي فالنعاس ها باك صبح على الصباح عند الكزار

نضت عنقتو بست ليه يدو وقلت ليه

بابا ماعيطتيش على ناصر تشكرو مسكين ولد الناس..ضريف

ضار عندي كيرمش قالي

وا بنتي شنو غنقوليه ؟!! نقوليه شكرا ديتيها موريتانيا و جبتيها ؟

قلت ليه :لا قولي ليه شكرا حيت تهليتي فيها وساريتيها ..عرفتي مسكين راجل دالزماان

ضارت عندي ماما كضحك قالت ليا : هاكاوا يا راجل دالزمان

بابا: دابا غنعيط ليه نقوليه حكا راجل دزمان

جريت الكرسي لبابا جلستو قلت ليه

خاصك تهضر معاه وتشكرو راه داني وجابني مسكين ونتا وصيتيه عليا وهوا دار جهدو كله معايا .

بقا باباساكت كيتهد ويشوف فماما وانا تنهذ قلت ليه

دابا حنا مامربيينش!!

جيد تيليفون كيسوط قالي يالاه اري لنا النمرة ديال هاد ولد الناس..

عطيتو النمرة بالزربة صونا ليه وماما كتكرض الربيع ودور عندنا .

بابا:الو السلام عليكم…كي داير اولدي لاباس وصلتي على خير…ايوا مزياان ..شكرا اولدي رديتي البال لنهى وساريتيها ..اييوا دابا راه كاع هادو اللي كبرو وعاشو برا دايرين هاك ا وعاد هي عمرها جات دابا ملهوفة باغا دير كلشي فدقة

وقفت قلت ليه علاش قلتيليه ملهوفة ماقلت ليك قوليه ملهوفة !! ياك مكناكلش بزاف

ماما:ماشي حلوفة ..ملهوفة يا هاد البنت الله يهديك هي موحشة المغرب

ضرت عند باباقلت ليه:اااه ..واقوليه يجي عندنا لمراكش خاصك ضاروري تعرف عليه ابابا عرفتي تباارك الله تخي فوووغ كيخدم مززززيان ..قوليه يجي عندنا لمراكش

بقا كيشرف فيا ويتمتم قاليه

ايوا الى جابتك الوقت مرحبا بيك نتعرفو عليك وتتعرف علينا

حركت ليه راسي:ااه مرحبا بيه الدار دارو نديرو الرحم يجي عندنا ونمشيو عندهم الناس مزيانين

ضارت عندي ماما كضحك وباب شاد تيليفون كيقول ليه

مرحبا بيك اولدي مرحبا ..الله يعاونك

قطع تيليفون وشد فيا جلسني حداه قالي

سمعي الله يرضي عليك…راه عيب المرى تخرج تسارا مع الراجل ..ولا تهضر معاه ..

قلت ليه:هاء!! ونبقا كنهضر غير مع البنات ؟!!

قالي:هضري ماشي متهضريش ولاكن ماشي تسافري وتخرجي مع الراجل..وااه ابنتي الله يرضي عليك ماشي معقول..الغلط كيوقع كحل الراس راه مافيه تيقة .. راه غيعرفوك فسويسرا وعندك الملاكات ويضحكو ليك ويلسقو فيك فاللخر يشوطوك ويغدروك ويسمحوك فيك ..راه مكاينش اللي يبغي ليك الخير قد واليديك

قلت ليه: اه حتى انا باغا لخير لناصر حيت مسكين ضريف ..بغيت نديه معايا لسويسرا ويخدم تما

تنهد مسح لحيتو قالي:غايديو ليك رزقك ..غيكشطوك ويخليوك ابنتي وغادي تمرضي ولا توقع ليك شي حاجة

قلت ليه: لالا كيفاش يديو ليا زعما زرقي زعما يسرقوني؟

قالي: يسرقوك ولا يعطيوك شي ورقةتسنيي عليها ..راه الغدر موجود

قلت ليه: نوو انا مانسنييش على شي ورقة حتى دوز المحامي ..ديجا كان غيوقع لي هاكا مع واحد الكداب قالي كيجي لادوارد مي انا قطعت وعد منوقعش نهائيا والمحامي وصاني..

قالي:هاااا شتي شنو كنقوليك..ايوا هاد ناصر مايكون غير كيكدب عليك باش تديه وقاللخر يسمح فيك

قلت ليه:لالا مكيكدبش عليا بلعكس هوا مزيان وقلبو زوين ..انا حسيت ..غير تيق بيا انا عارفة شنو كنقول..غادي نديه يخدم حسن ليه من هنا عرفتي كيفاش معدب ومسكين ماماه ماتت وهوا صغير ورباتو غير جداتو.. ماكبرش مع واليديه كااع بحالي

تبدل اللون فوجه بابا وشاف فماما وبقا كيشوفياماهضرش وهبط راسو كيشوف فيديه .. قلت ليه

ناصر عندو الحبيبة ديالو كايواعدها انا غير صديقة ديالو دابا ..بغيت نديه لسويسرا يخدم وصافي ..يستاهل ابابا ولاهيلا يستاهل وكنعرفو مزززيان يونسني مانبقاش بوحدي ..مزال ما ولفت حتى انا فسويسرا من نهار مات ادوارد مسكين

بقا ساكت كيشوف فيديه وقالي

ماعندي منقوليك ابنتي..راكي كبرتي وقريتي ..اللي يريحك ديريه انا خايف يكسروك ..مابغيتش كاع نشوفك مهرسة ولا معدبة

قلت ليه: اه بصح الناس خداعين ولاكن ناصر فنن..باينة عليه فوجهه وعجبني بزااف بغيت نعاونو ..ومسكين يستاهل حتى هوا يمشي ويخدم ..نديرو الخير ..الخير زوين بزاف وهوا يستاهل

بقا ساكت وجرني عنقني طبطب على ضهري وقالي

جيبيه نشوفوه ..نشوفو بعدا كي داير ونعرفوه ..على الله يطلع مزيان وتكون النية ديالو صافية…ولاكن الو مكانتش نيتو صافية وقلت ليك بعدي منو تبعدي منو

قلت. ليه:صافي وعد… ولاكن تكون صادق معايا ابابا..

بابا: المهم هوا نشوفوه راه الشوفة غتبين النص والتواصل يبين النص الباقي

عنقت بابا وضرت عند ماما لقيتها مهبطة راسها كتبكي وتمسح فالزيف ديالها اللي على راسها

مشيت عنقتها قلت ليها علاش كتبكي؟!!

قالت ليه مكنبكيش غير البصلة دخلات لي فعيني ابنتي

قلت ليها ديري نضاضرك نجيبهم ليك

قلت لي جيبيهم

مشيت للصالون هزيتهم وديتهم ليها دارتهم وبقيت واقفة حداها كنشوف شنو كطيب لقيتها كتنقي الحوت ووقفت حداها كنتفرج

ماما:كتعرفي طيبي شوية

حرك ليها راسي بالنفي وضحكات قالت لي:رجاء ماعلماتك كاع الطياب؟!!

قلت ليها:كنصاوب معاها شي حاجات وصافي

عطاتني الحوت قالت لي: ديري لهادا العطرية نشرملوه

شديتو عطرتو بواحد المعلقة وخليتو بقيت كنشوف شنو كدير حتى صونا ليا تيليفون ونضت جاوبت لقيت عادل

عادل:الو عادل..

عادل:غبورات هادي من الكالا ما شفناك

انا: كنت مسافرة انا وناصر

عادل: نتي ونصر الدين؟ نصر الدين ديالنا؟

انا: اه نصر الدين

عادل: واش نتي وياه اونكوبل؟

انا:لا هوا كيواعد هدى انا وياه اصدقاء

عادل:اااه..واهاكاك..فين سافرتو؟

انا:مشينا موريتانيا

عادل: تا لموريتانيا!!

انا:ااه

عادل: شنو نديرو شي كافي ليوم

رديت:واخا

عادل: صافي نتلاقاو فلعشية نعيط ليك

رديت:اوك

قطعت و مشيت للكوزينة قليت الحوت مع ماما وجلسنا كنتغداو فالطبلة مجموعين وهما كيتجمعو

ضحك معايا بابا قالي

بنتي نهى :غتسيفطيني للحج هاد العام

حرك ليه راسي كنمضغ وشافت فيه ماما قالت ليه

ايوا وانا ؟!!

بابا: نمشي انا وياك ..نغسلو دنوبنا

شفت ماما قلت ليها

مكًلكًة حتى نتي ؟!!

ردات حفصة الماكلة من نيفها وشداتها بيدها كضحك وانا كنشوف فيها وماما كتقولي

شنو كتقولي؟

شربات حفصة الماء وبابا كيشوف فيها عاقد حاجبو قاليها

ياك هضرت معاك

هزات صبعها قالت ليه والضحكة شاداها :والله ماقصدت ابابا

بابا: مالقيتي ماتعلميها ؟!!

حفصة:راه تا نهضر عادي ابابا شنو بيتي نقول ليها !!

بابا:هاا ودني منك

دورات وجهها كضحك وانا كنشوف فيها مافهمتش مالها قلت ليها

نتي مكلخة ..مافهمتش كيفاش وصلتي للماستر !!

هبط بابا راسو كيضحك وهي كضحك قالت

لالا تبارك الله الدكاء كيقطر مني

بقيت كنشوف فيها ماعجباتنيش حالتها واخا نقية ولاكن غليضة قلت ليها

خاصك ريجيم وسبور ميمكنش تبقاي تاكلي وتنعسي

ماما:قالت ليك الصح ..فين غادية بداك الغلض

حفصة:الصحة هادي اشمن الغلض انا هاكا عاجبني راسك

قلت ليها:شنو عاجبك الشحمة؟

حفصة: راه هاد الصحة كيقلبو عليها بالريق الناشف وماخلاو ماشراو ليها ..ربي عطاها ليا نوض نضيعها ..

بقيت كنشوف فيها وسكت كملت ماكلتي ونضنا مشيت حكيت سناني ومشيت للبيت نلبس حوايجي باش نخرج ودخلت لقيتها متكية على جنبها والبيسي قدامها لقيت كتسوط على راسها وقالت لي

حلي معاك الشرجم الزمت فهاد البيت

ضرت عندها قلت ليها غير شحمتك هاديك !! دابا تغلف لقلب وتسكتو ليك

بدات كضحك قالت لي الغلض راه كيقلبو عليه بالريق الناشف نتي راه معارفك والو

هزيت كتفي كنشوف قلت ليها : بيزااغ

جبدت حوايجي حطيتهم وقالت لي

فين بيتخرجي؟!

قلت ليها :غنمشي لكافي مع عادا

ناضت قالت لي:عادل اللي تلاقينا فالكالة؟

قلت ليها:اه عيط لي قالي نخرجو

ناضت وقفات قالت لي: ماسولكش عليا؟!

قلت ليها: لا علاش يسرل عليك خلا عندك شي حاجة؟

قالت لي: وازعما يقولك كي دايرة ختك من باب الصواب

خركت راسي:قلت ليها لاالا كاع ماسول عليك

قالت لي: حتى انا قنطت يالاه نخرج معاك

جبدات واحد لكولون كحل لبساتو وتريكو نازل واسع فالغوز وجبدت انا سورفيت ديال ديور الرمادية سروالها حتى للارض لبست معاها تريكو كحل كول مونطي مزير ويديه طوال وسبرديلة غليضة وطلقت شعري وهزيت صاكي وجاكيط فيدي على حسب البرد . وهزيت صاك برادا خفيف وخرجت انا وياها ركبنا فطموبيل وسدينا علينا وعيطت لعادل قلت ليه يسيفطي ليا لوكاليزاسيو وسيفطها ليا .تبعتها كنسوق بشوية وكل مرة يخرج ليا موطور من جنب كيخلعني وكل مرة كيوقفني بوليسي يحمقني ويطلقني ويشدني لاخر حتى وصلت للقهوى وحا عندي الكارديان كيجري عطاني البلاصة وقفت ونزلت كنترعد متوثرة بالسوقان حتى كنقول صافي الطاكسي دخل فيا ..الموطور نقز عليا وجوج مرات كنحبس وسط الطريق مكنقدرش نزيد

تبعت حفصة وهي كضحك قالت ليا

القهوى كلها هنا غير الله يحضر السلامة من شي عين ..اما واحد عادل ما عرفت فين عازل راسو

شفتو قدامي جالس كيشوفينا ودخلنا حتى لعندو وهوا جالس متبع لينا العين ماتحركش وتصدم وقف قالي

ناريي والله ماعرفتك!!! كنقول شكون هاد التوتات اللي نزلو من ديك الطموبيل

ضحكات حفصة قالت ليه

ايوا نقص من التوت راه كيجري الكرش

جلسنا وحطيت بكاجي حدايا فوق واحد الكرسي وجا النادل طلبت شوكولا شو وطلبت نشوف الحلوى قالي هانا غنجيبها ليك ومشا من يعد ما خدا الطلبية..حط عادل يديه على الطبلة وحفصة كتشوفيه وضحك وتهضر معاه وتشول على احواله وهوا كيجاوبني انا وانا كنقلب فصاكي على الباور بانك باش نشارجي تيليفوني

قالي:الناس وصلو حتى لموريتانيا

حفصة: مشات مع ناصر عرفتيه؟

عادل :واايلي على منعرفوش..معانا فالكروب من ايام القوافل

برونشيت تيليفون مع الباور بانك وقلت ليه :مكاينش شي رحلة اخرى؟

قالي: ماعرفتش شفت الادمين ساقل هاد الساعة مع اللخر دالشهر راك عارفة البلان ماشي كلشي غيبغي يشارك

حركت ليه راسي قلت ليه: نعيطو ليه يجي عندنا ؟

عادل:بلاااش صافي هاحنا جالسين

حفصة:لالا كن غير نعيطو ليه يجي نقنعوه بشي خرجة

جبدت تيليفون بلا مانفكر عيطت ليه جاوبني ديك الساعة قلت ليه ها فين حنا ها فين جالسين اجي عندنا وناض ديك الساعة قالي هانا جاي وقطعت .موراه بدقيقة عيط ليا ناصر وتبسمت تقلبت على حنبي تكيت على جاكيطتي خليك حفصة كتهضر مع عادل وجاوبتو قالبا وجهي بعيد كنشوف فالناس ونهضر بشوية

الو ..

ناصر: فينك ؟

قلت ليه : جالسة مع حفصة وعادل فكافي

قالي:شكون عادل ؟ توزاني؟

قلت:ماعرفتش مهم معانا فلكروب

قالي:فهمتك …نتي عيطتي ليه قلتي ليه نخرجو

قلت:لا هوا عيط ليا

قالي:ونتي غير اللي عيط ليك تقولي ليه بسم الله

قلت ليه:كيفاش؟

قالي: عاد لبارح جيتي من موريتانيا نعسي شوية راه غااا غير اتمرضي

رديت نافيا:لالا بغيت نخرج الحو غزال..عرفتي جالسين فواحد الكافي فنة فيها جريدة على الشارع والمنضر غزال

بقا ساكت قالي وا اللي عجبك انا غير داري خاوي

قلت:شنو؟

قالي :والو ..غير كنهضر

قلت ليه :اجي عندنا لمراكش

قالي:غنجي بلاتي نسالي شي لعيبة هنا ونجي

تكيت خديت راحتي كنهضر معاه وحليت كام ودرت يدي على حكني كنشوف فيه كان وسط دارهم فواحد الصالون مغريبي لابس واحد الكابيتشو كحل بالقب وقالي خليك معايا ماتقطعيش.

خط تيليفون مقابل معاه وطلع فوق واحد السداري حيد واحد التلفازة من لحيط والسلوكا خارين وبزاف ديال الدوزان حداه مشتتين وشاد واحد اللقاط كيجر ويلاقي شي مع شي.قلت ليه شنو كدير؟

قالي كندوز واحد الخيط ديال ريسبتور عاد شريتو

قلت ليه وعلاش مقاتل معاه جيب شي واحد يصاوبو قالي: كنعرف نصاوب هادشي راسي

دازت واحد المرى كبيرة لابسة بيجامة زرقا والزيف على راسها دايرة حنة حمرا فيديها وشدات معاه الخيط كتقوليه

بشوية وليدي غتجر معاك السلوكا

قاليها:هزييه لفوق مزيان مكيبغيش يتجر

بقيت كنشوف فيه حتى جرو من الحيط ..وصل الادمين عندنا فرحان شلم علينا وجلس حدايا ..شفت فعادل كيشوف فيا وحفصة شاداه بالهضرة..هزيت تيليفون قلت ليه ها ناصر معانا فآبيل

قايلتو معانا وهز ليه الادمين يدو كيضحك قاليه

واااش الخاوا ..ااجر ليا مع راسك

ضار ناصر كيضحك هبط من فوق السداري شمر على يدي ووثف مثابب معانا كيسوط ويدو على جنب سروالو لكحل قاليه

سطاني هاد الزمر هادا

ادمين: شنو هاداك

ناصر: ريسيبتور عاد خديتو كنجر ليه الخيط..ماخرج تا مرضني

عيطات المرى من بعيد قالت ليه

نصر الدين ..ااناصر الدين..شي واحد فالباب كيسول عليك

تلفت قاليها:شكون؟

المرى: حمزا

ناصر:ذخوول احمزاااا..جابو الله يشد معانا

قلت ليه :صافي حتى تسالي وعيط ليا

باي باي

قطعت وشفت فالادمين قلت ليه دير لينا شي خرجة هاد لويكاند

قالي:لويكاند بقات ليه يوماين مغيتجمعوش لينا لاعضاء

قلت ليه نمشيو غير حنا ..

شفت فحفصة:حفصة نخرجو هاد الويكاند؟

حفصة :اهاه

قلت لعادل:عادل تخرج معانا

قالي :نخرجو

قلت :للادمين ها حنا دابا ربعة .. ناصر حتى هوا جالس غيبغي يخرج معانا ..ها خمسة.نضم لينا خرجة وحطها فلكروب اللي تزاد مرحبا بيه

حل تيليفون كيشوف فيه قالي :واا ..مااعرفت..خاص نريزيرفيو وعاد ترونسبور

قربت حداه كنشوف معاه فتيليفون كيقلب على شي بلان يقادو وحفصة دايرة يدها تخت فكها كتسول عادل وتهضر معاه

ادمين:فين نمشيو ؟ نديرو شي حاجة قريبة مافيهاش مسافة بزاف باش بنادم يبغي يزعم

قلت ليه:اه نمشيو لكازا

قالي:وشنو فيها كازا !! مافيها تا لعبة …عرفتي شنو ..لقيتها ..غنديرو توغ غير هنا فمراكش..نعاودو بحال البلان ديال المرة اللي فاتت ..

تنهد كيعمر وانا كنطل عليه ونحرك ليه راسي وهوا كيهضر بوحدو ويفكر

ادمين:عندنا .. دو جوغ ..اوك ..غنديرو المبيت فاوتيل ..اوكاليمو ..زوين داكشي تخاديسيونيل عاوتاني. . شي توغ فسيتي فاضمااا لغدا كل واحد يخلص غداه. اهممم ..

عمرو بالزربة وقالي صافي غنعيط على ترونسبور نعلمو هوا ولوتيل

حرك ليه راسي وعيط عليهم قدامي قاد معاهم لا غيزيغفاسيو وقالي

صافي العدد فلوتيل مايفوتش عشرين واحد . بلاتي نزيدو واحد a t v ندوزو بيه واحد نص نهار . المنطاد تاهوا ماكنتش غنديرو دابا مللي غير عشرين واحد نزيدوه باش البلان يعمر والثمن يطلع ومايتكبوش علينا بزاف اما عشرين واحد مضمونة غير نتوما راه خمسة ..طرن ..صافي تلاحت

هزيت تيليفوني طليت وصلني الشعار انه حط لالونص دغيا قاد ليها التصاور داغيا كتب وعمر فنص ساعة !! قلت ليه تبارك الله عليك. الراجل دزمان دغيا قاديتيه

هز راسو كيضحك قالي عاوديها

قلت ليه شنو هي

قالي : هاديك اللي قلتي..الراجل دالزمان

بقا كيضحك وانا كنشوف فيه قلت ليه اه دعما داكشي فيت في دغيا ..واقيلا حيت ولفتي ياك

شاف فتيليفون كيضحك قالي: علاام نتي انهى كنا غنضيعو فيك

وراني تيليفون قالي هاا شقلت. ليك..ها بنادم دخل كيشري تيكي ..ها جووج..هاهي وصلات خمسة ..ها عشرة .. فدقيقة داكشي بالخف.. بقاو ثلاتة ديال لي تيكي.. هاهي شراتهم هادي بثلاتة لصحابها

قلت ليه. وحنا؟!! قالي صافي نتوما راه محسوبين مالي حطيت ليهم عشرين تيكي كلها !! نعسو حنا فسطح اوكاليمو !!

ضحكت وجريت صاكي قلت ليه هاك تخلص فتيكي ديالنا حنا

هادي ديالي انا وحفصة..هادي ديال ناصر

شدهم حسبهم وقال لعادل

ارا عادل ..واش غادي

عادل:اه اصاحبي..شحال؟!

ادمين:خمس مية درهم

جبد عادل الفلوس وهز حاجبو عطاها ليه قاليه

الله يعطينا وجهك

ادمين: هانيا مابغيتيش نحط تيكي ديالك

عادل:واسييير اصاحبي براكة من الهضرة ..زعما معارفش شحال ليوم فالشهر

شدها الا مين وماجاوبوش وضرت كنشوف الحلوى اللي قلت هادي ساعتاين باش قلت ليه يعطيني الحلوى شتو كاع ما رجع ؟!!

هز الادمين يدو عيط ليه جا وقاليه

واش اصاحبي؟!! واش مالنا صايمين !! فين الحلوى اللي قالت ليك البنت وانا ماحطيتو لينا تا قرعة دالما

هز النادل يدو قاليه وا هانتا كتشوف راه الدنيا عامرة غير سمحو لينا

ادمين: الله يسهل يعاون .. وافكنا اصاح. راه نشفنا

النادل:قلتي ليا بغيتي حلوى اختي

بقيت كنشوف فيه وشفت فالادمين قلت ليه واش مكيقراوش على التعامل مع لي كليو؟!!

ضار عندي الادمين قالي:تايقراو الوززز.. راه دراري قاديين حاجة وصافي

قلت ليه:كافي بحال هادي خصها بزاف ديال ليبيخسونيل ماشي غير شوية !

قالي:مول القهوى كرشو كبيييرة اختي هادشي اللي عطا الله

قلت ليه :ايوا يدير الريجيم مالو فاتح القهوى ومايعطيش للناس شنو بغاو ياكل كلشي بوحدو!! عمرني شفت شي واحد فتح محل ديال شي حاجة باش ياكل فيه بوحدو والناس يبقاو جالسين !!

ضار الادمين عند النادل كيضحك قاليه

سمعتي ..قوليه يدير الرجيم شوهنا مع البراني

النادل: السلاك وصافي .

مشا كيجري جاب ليا واحد البلاطو كبير فيه انواع الحلويات هزيت واحد موس اوشوكولا وهز البلاطو بغا يديه والادمين هاز يدو قاليه

وا صااحبي..مالنا فينا السكار !!

رجع هبط ليه البلاطو كيضحك هز وحدة وعيط لينا ناصر فديك اللحضة حطيت تيليفون فوق الطبلة قدامي كيشوف فينا ويمسح يديه بالفوطة ويحرك راسو قال لادمين

اضراااب ليا مع راسك جات معاك

ادمين:ضرب ضرب طلة راك معروض

بقيت كنشوف فيهم مافهمت والو شنو كيقولو

ناصر: فين ؟

ادمين: فلكروب اصاحبي ماوصلك والو

ناصر: ماشفت والو ..نهااا..عجباتك الجلسة

حرك ليه راسي قلت ليه زوينة ولاكن سيغفيييس مازوييينش كاااع

ادمين: سي سا لو ماغوك.. لو غوطاغ لو اوطاغ باخ تو

ماتديناش معاك لديك سويسرا نديرو استراحة من هاد المؤبد اللي حنا فيه

قلت ليه :غندي معايا ناصر وهوا الى بغا يديك يديك

حل عينيه وضار بالعرض البطيىء عند ناصر شاف فيه ولاخر كيضحك قاليه

ا هيااااا…كتغفل اخاي ناصر هادي هي العشرة والزريعة والحمص..الدق والسكات

ناصر:واسيييير شتيني هاز شكارة غادي

ادمين: لاااا اخاي ناصر شميت شي ريحة …

ناصر: ووراه ريحت لحراق

اديمن: لحراق دالمازوط فالسما هادا ..ايوا اصاحبي..وااشششش .. واش تما ؟!!

ناصر : وا كااتبان ليا ديك الطبلة غتقلب الى ماهنيتيناش وحيدتي منك هاد القاعدة

ادمين: والقاعدة سعيدة ..سعيدة ديتيها وخليتينا لينا القاعيدة .. ناصر: وصافي اصاحبي واه مكاين ووناا تيقتي

ادمين: اسيييير ..شميييتك واحق الرب تا شميتك ماتقولش ليا

ناصر: والله مكاينة شي حاجة اخاي سيمو ..تيق ولا ماتيقش

ادمين: واااا …كيفاش البلان اصاحبي ووو ..تقولك كدا ماكدا

ناصر: تيقها ..شوية تقلب عليك الطبلة توريك طن طن

قطع علينا ناصر وعاود صونا ليا ابيل فالبلاصة جاوبتو فودني. قالي اشمن سويسرا انهى علاش جبدتيها اصلا ؟!!

قلت ليه شنو فيها ؟

قالي: فيها بزااف بنادم غيحساب ليه طامع فيك ولا ماعرفت شنو

ادمين: هاديك هاديك اخاي ناصر وصي مزيان

ناصر : سكتي انهى ..سكتي ماتعاوديش تجبدي المشية على فمك تفاهمنا

بقيت ساكتة مافهمتش شنو بغا يقصد بالضبط وفهمت ومافهمتش ..

قالي: صافي جلستي فوجتي وا نوضي سيري لداركم مافيكش النعاس؟

قلت ليه :لا نعست حتى لحداش

قالي:واسيري نعسي بكري باش تفيقي

قلت ليه:علاش غنفيق بكري مكاين ما يدار

قالي:صافي صافي..صافي اللي عجبك ديريه تا نعيط ليك

قطعت معاه وضرت هزيت شوكولا شو ديالي كنشرب منها وتلفت الادمين عندي قالي

واش بصح غتدي معاك ناصر ؟ كندوي بصح دابا؟ غير بيني وبينك

حرك راسي قلت ليه غيمشي يخدم تما

ادمين: هااكاك..واش ماغيااج ؟؟ولا كونطرا؟ ولا شنو ؟

قلت ليه: كونطرا غيمشي بيها ..حيت ماخدامش مزيان

جر حوايجو قالي:شوفي لينا تا حنا معاه راه تا واحد ماخدام مزيان غا معديين..شحال دايرة هاد الكونطرا نشريوها ؟؟

قلت ليه: نونو مكنبيعش انا كونطرات ..انا غنديرو كونطرا مع لا سوسييطي ديالي يمشي بيها ..هوا غيخلص الطيارة وصافي

بقا مصدوم كيشوف فيا شحال وبدا يرمش

قالي: ك كم كي كي كيفاش زعما واش نتي عندك شركة ؟!

قلت ليه مكازا فسويسرا

قالي:ديالك نتي نتي !!

قلت ليه:ااه!! علاش؟

قالي:حححلفي باللللله

ضحكت قلت ليه:علاش نحلف ليك !! فين كاين المشكل؟

دور وجه للجهة لاخرى كيهضر بوحدو ورجع شاف فيا قالي: واش بصح بصح كتهضري؟؟؟ اجي اجي اجي ندوي غير انا ونتي

نوضني كيشوف فعادل بعدني فطبلة بوحدنا وركز معايا قالي

دابا كيفاش زعما ؟ نتي غديري لناصر الكونطرا بسمية الشركة؟!!

قلت ليه اه

رجع اللور قالي: اوااه!! هي ناصر غيمشي لسويسرا ديريكت !! سويسرا دقة وحدة ما ..من ما هي فرنسا. ماهي الطاليان

قلت ليه: وي حيت كيخدم مزيان يستاهل

حط يدو على صدرو قالي :وانا!! حتى انا ختي ولد الناس واحق الرب..ودرويش سولي عليا فالكروب.. كي كنجيك؟ ماشي ولد الناس؟؟

بقيت كنشوف فيه واللابايدالشوكولا شو فمي

قلت ليه مابيكش..كطير بزاف

خرج عيني قالي

كنطير مع الزمان…هانتي ماخدام ما ردام ولاكن مضبر على راسي مع الكروب وكنتحرك ..وقااري زعما راه عندي ماستر بحال ناصر ..غير القضية محززقة بالججهد..نشري من عندك ديك الكونطرا والله تا نشريها غير ديني معاك

دور وجهه للجهة لاخرى سد عينيه يتنفس ويردد

يا رضااة ال واليدة ..يا رضاة الواليد

رجع شاف فيا قالي

حني فخوك الله يحن عليك ..راه والله تا ولد الناس..مكنسرق مكنشفر ما كنكدب..شوفي.. هانتي حتتتتا واحد منقولها ليه اصلا الله يعطي لمهم الغراق من عندي ..غير صرفي خوك نعطيك شحال ما بغيتي فيها نهز مو كريدي ونشريها غير ضمني ليا بلاصة تما والله منسا ليك هاد الخير

بقيت كنشوف فيه ونمص فالشوكلا وبدا كيحاول يقنعني شوية وجاني ضريف حتى هوا وبعا يخرج من حوايجو بالرغيب كتى القميجة تكمشات عليه

تنهد قلت ليه : وا نشوف

تقاد فالجلسة وضار عندي قالي

شوفي انا اصلا دماااار ..كندمر ..وعييت بالشوماج كندفع ويردوني تا عييت وحليت هاد الكروب جمعتكم فيه كلكم ..شتي انا والله ما منافق . وعندي الدين فقلبي والله تا فقلي غير مازال ماخرجتوش فهمتيني

قلت ليه: ااه حتى انا عندي الدين فقلبي

قالي:هانتي فهمتي.. وا ضبري لخوك فشي طيارة تهزني من هاد القارة ..انا وناصر والله تا بحال الخوت سوليه ..ولاكن ماتقوليش ليه رغبتك وكدا ..فهمتي..راكي عارفة غيجهل عليا وانا م٠٠ودة على ديلمي هنا غا شوفي مي كيديري ليا هزيني معاه واخا نمشيو فالكار هاانيا ..نمشي على رجلي انا كاع

حركت ليه راسي قلت كنضحك: كيفاش تمشي على رجلك ههه ولاهيلا

جبد الفلوس اللي عطيتو من الجيب كيحسبهم قالي

شدي اختي فلوسك والله لا خلصتي فهاد الخرجة انا عارض عليكم بثلاتة نتي وناصر وختك ..هادو فلوس عادل خلي مو يخلص..شدي رزقك

شديتو فيدي قلت ليه :شكرا على العراضة

قالي: هاانيا شوووفي..سافري كولي شربي..تساراي..هااانيا ..كولشي ديالك ماتعاودي تخلصي تا ريال

تبسمت قلت ليه شكرا ..ولاكن ميمكنش تخلص علينا كولشي ونتا ماعندكش

قالي: هاانيا الفلوس تمشي وتجي لو جيست كي كونط خليتوها نتوما

رديت الفلوس فالصاك وهز يدو عيط للنادل جابو قاليه تخلص فالحساب كله ..

طل على عادل شافو واخد قهوة وقال

صافي هانيا تا هاداك دخلو فالحساب ماشي شي حاجة

تخلص منو النادل فكلشي وقالي

يالاه نمشيو بحالنا

قلت ليه لا مزال باغا نجلس مع عادل وحفصة

شاف هنا ولهيه مشطون قالي

لالا ماتبقايش جالسة يالاه نمشيو جامع الفنا حسن نغيروها

نضت للطبلة هزيت صاكي وجاكيطتي قلت ليهم انا غنمشي مع سيمو ..

تبسمات ليا حفصة قالت لي ..صافي غير سيري انا جالسة انا

عادل: نمشيو كاملين

جراتو حفصك :غير خلينا جالسين باقي الحال

رجع جلس وتكات على يد الكرسي مبسمة قالت لي

حتى دوزي عليا الى مكانش غيوصلني عادل

حملت صاكي قلت ليها اوك ومشيت انا وادمين كيقلب على شي طاكسي بعينيه من بعيد وقالي

فاش جيتي؟ طاكسي طموبيل فاش؟

ضار كيقلب عليا وانا كنشوف فيه ونضحك غادية جهة الطموبيل شافها يالاه قالي

بااباباااا على الحديد دسويسرا ها الفال سبحان الله

شعلت ليها الضواو بالكونطاك ورجع اللور شد فراسو قالي

نارييييييييي ماتقوليش ليا ديالك

حليت الباب قلت ليه واطلع طلع قولي تبارك الله باش ماضربنيش بالعين

قالي مخرج عينيه: وا تبااااااارك الله والحمد لله ولا الاه الا الله … بلاتي اختي نرتاح ..غتسطيني نتي

حل عينيه مزيان وبقا كيشوف فيها ماقدرتش يتحرك من بلاصتو قالي

وراه ميمكنش…جي كلاسي ضربة وحدة !!!

جا كيجري عندي جرني من راسي باسني وعينيه خارجين بالفرحة تمينت شي فرحة بحالها تكون كما بغات تكون المهم تمنيت ديك الفرحة اللي شفت فعينيه ..

قالي: عرفتي الى ماديتينيش معاك. لديك سويسرا ..منضمنش ليك شنو ندير فراسي

قلت ليه : طلع طلع يالاه شحال بقيتي فيا

حل الباب كيضحك ركب حدايا وكيشوف فالطموبيل فرحان ويعض شنايفو قالي

جي كلاسي…تحشم دوز من حداها

ديماريت خارجة وهوا كيتقاد فالجلسة ويهضر مابغاش كاع يسكت وانا كنقوليه نمشي جامع الفنا نتعشاو وهوا كيقولي سويسرا ما سويسرا حتى شديت الفران انا وواحد مول الطاكسي وتخلعت نزلت كنجري طليت لقيتو لاسق حدا البولة وجرحها واحد الجرحة وانا نتعصب…تعصبت ونزل لادمين كيجري يشوف وجريتو من قميجتو حدا الجرحة قلت ليه

نتااا اللي ضربتي بالعين من قبيلة ونتا كتقولي جي كلاسي حي كلاسي ردها كما كانت دابا

دوز يدو قالي غير خديشة صغيرة مابايناش

ضرت عند مول الطاكسي والناس وقفو فالشارع خرجت عيني تفقصت قلت ليه

واش عور ؟!!! واش ماشفتينيش؟ واش بغيتي دخل فيا ؟!!

بقا كيقولي نتي اللي فيك لافون وانا انا مافياش لافوت والادمين واقف كيمسحها قالي نديرو كوسطا

ضار عند مول الطاكسي شنق عليه قاليه غنجيد لمك عينيك العور مللي ماشفتيش هادي غا خيد دوك العينين

دفعتهم بجوج عصبوني قلت ليهم بعدو منييي ..الزمر كي داير ..كحز عليا الطاكسي ديالك

ادمين:خليه غنقيدو كوسطا يخلص الخطية

انا: مايخلص ليا ما نخلص ليه. بعد علياا الطاكسي ديالك تفووو

الطاكسي ركب ديك الساعة مشا كيجري وتحنيت القرفصاء هزيت كلينيكس كنمسحها والادمين واقف كيسوط قالي مابايناش غير خديشة صغيرة

دفعتو قلت ليه بعد مني نتي السبب عينيتيني اخ

تحنا حدايا بدا كيمسح ويعاود حتى تحيدات والحمد لله ماكانتش جرحة غير الطاكسي مسخ قاصحها وبانت بحال الخدشة ..خرا عليها الماء غسلها وقالي

صافي مشات هانتي

دوزت يدي كنتأكد قلت ليه ايوا الحمد لله ..اخر مرة تقولي جي كلاسي عصبتيني

مسحتها بكلينيكس وطلعت بحالي قلت ليه اففف ..تفقصت هاد العشية

قالي:بشوية عليك على راه السوكان هنا مريض ..انا تققصت كتر منك تجي فيا وماتجيش فيها ….تبارك الله

وصلنا لجامع الفنا ومع الدخلة تفكرت التخويرة وكحزت حدا ادمين شديت ليه فدراعه قلت ليه

الدرادي هنا مامربيينش

قالي:علاش؟ دار ليك شي واحد شي حاجة ؟

قلت ليه: خوروني انا وصحاباتي

خرج عينيه شاف فيا قالي شنووو!!!

قلت ليه تحماو علينا

صونا ليا تيليفون و قلت ليه ناصر

خرج عينيه قاليه ماتقوليش ليه ..

ماسمعتوش اشنو قال وكيحرك ليا صبعانو وانا كنجاوب

الو :ناصر

ناصر: فين وصلتي ؟! شهاد الصدع ماتقوليش ليا باقا برا؟

قلت ليه انا والادمين فجامع الفنا غنتعشاو

دور الادمين وجهه مشا ويديه فالجياب وعاود رجع كيسوط

ناصر: نتي ومن ؟!!!

قلت ليه : انا وسيمو حينا نتعشاو…

قالي: واش ماااا م مم ما اري. اري ليا سيمو اريه

عطيتو تيليفون قلت ليه بغا يهضر معاك ووقف قاليه

الو خاي ناصر..وااا..وو..اه..هاا؟ صافي..اه ..واشش غاا ..غو؟. صاف..اه ..هاك

رديت : الو ناصر

ناصر: سيري فحالك ااانهى ..سيري ماتبقايش دوري بوحدك

قلت ليه:قننطت ..قنطت مايمكنش ليا نبقا جالسة فالدار

ناصر: واعرفتي شديري..غدا اجي عندي لكازا ..ملي قنطتي اجي جلسي هنا شي يامات

قلت ليه:صافي واخا غدا ان شاء الله ..صافي فاش نرجع للدار ونهضرو

قطعت وضرت عند الادمين قلت ليه غدا غنمشي لكازا تمشي معايا؟

قالي:عندمن ؟ عمد ناصر؟!

قلت ليه :اه

قالي: دابا تخاف يبقا يغوت ..واش نتي وياه دابا اونكوبل ؟!!

قلت ليه:لااا هوا مع هدى

قالي: ومابقيت فاهم والو ..هوا صاحبي ونتي تل نتي صاحبتي ..خفنا يوقع شي سوء تفاهم عاوتاني

قلت ليه: لالا ماكاين حتى مشكل نمشي عندو لكازا .. مايقول والو

دار يديه فجيابو قالي: وا نشوفو

بقا شاد ليا فدراعي غادي بيا كيدورني وجلسني كلينا الطنجية وبغا يخلصها ماخليتوش قلت ليه لااا

دابا انا خصني نعرض غليك نتا عرضتي علينا لويكاند نسافرو

حيد ليا يدي قالي والله ماتخلصيها ..هاك تخلص اخويا

خلصها ومشينا كلينا غلالة وجلس حدايا كينقي ليا ويقولي

حيدي ليا الوسخ اللي تحت ..ماتاكليهاش كلها

قلت ليه واخا

ادمين:هاكي

حيد وعطاني حتى سالينا وبقينا كندورو ونتفرجو فالحلقات حتى عييت قلت ليه نمشي بحالي باش نوجد حوايجي

خرجنا ركبنا قالي حطيني غير هنا

وقفت ليه ينزل وقالي كيأكد عليا

عنداك تنسايني..انا الصباح مع نحل عيني نعيط ليك نمشيو لكازا

قلت ليه واخا

صافي

مشا وبقا واقف حتى زدت مشيت بحالي لقيت حفصة فالدار جالسة ودخلت

نيشان للبيت تبعني بابا وقف قدامي

بابا: تعطلتي ابنتي فين بقيتي؟

قلت ليه: كنت مع ادمين فجامع الفنا

قالي:شكون هاد ادمين عاوتاني؟

قلت ليه:ادمين ديال الكروب

قالي:وهاد الكروب ابنتي مافيهش البنات ؟

قلت ليه :فييه

قالي: شتك كتخرجي غير مع الدراري

قلت :ليه غير اللي مزيانين

تنهد قالي:خايف عليك ابنتي ..كتمشي وتجي بديك طموبيل غيعطيوك بشي عين الله يحفض خااايبة..ياكما كيطلبو منك الفلوس

حرك راسي قلت ليه لااا..هما كيعرضو عليا مكياخدو والو نن عندي الصراحة

تنهد وقالي:الله يحضر السلامة وصافي

ضار بغا يمشي وشافني جبدت البابيزة ورجع ضار عندي قالي

فين غادية تاني؟

قلت ليه:غنمشي عند ناصر لكازا

حل عينيه قالي :الله يهديك ..الله يهديك يا هاد البنت اشمن كازا ولا ناصر عاوتاني

بقيت واقفة كنشوف فيه وكنتساؤل قلت ليه

علاش كتمنعني؟ علاش ابابا كتقولي هاكا انا كنتخنق فاش كتقولي هاكا !!

قالي: راه المغرب هادا ..ماعندك فين تمشي جلسي بحالك

حليت الباليزة قلت ليه: لالا بابا غادي نمشي صافي قررت

بابا:كيفاش قررت عاوتاني

انا:قررت نسافر لكازا ..ميمكنش نبقا جالسة هنا فمراكش بوحدو غنمشي نشوف ناصر ونتعرف على ماماه وصحابو

قالي:صحابو!!! للااا عيشة ..اا للاا عيشااا..اجي دغيا

جات ماما كتجري كتسول مالكم قاليها وجه الله لاما فكي لينا هاد الحريرة..قالك بغات تمشي عند ناصر لكازا

ماما :ويل الشيطان ؟ فين بات تمشي

طويت سروالي حطيتو فالباليزة وقلت ليه كنتنهد

باابا..راك كتحطمني هااكا ..مابقيتش كنرتاح عندكم واقيلا غنمشي نجلس فأوتيل ..كتهضرو بزاف كنحس بطاقة سلبية فالدار وانا غنعس دابا شوية ميمكنش ننعس ونفسي مخنوقة عليا ..كتسولني بزاف قين مشيتي نهى ..فين جيتي نهى ..كنعيا كنحاوبك ديما ديما فين مشيتي فين جيتي

بقا كيشوف فيا ويشوف فماما وهي كتغمزو عاوتاني ..عيت من داك الغميز وضرت كنطوي الحوايج ..خرج مشا هوا وماما ومن بعدو جات ختي عندي كضحك قالت ليا

يالاه غنمشي معاك

قلت ليها :غير خليك ماتمشيش عندك القرايا

قالت لي:لالا غنمشي معاك ماشي مشكل حتى قنطت

جبدات باليزتها كطوي كطوي الحوايج اما انا طويت وساليت وغسلت وجهي وسناني ونعست حيت كنت عيانة

الصباح شديت الطريق انا وحفصة وادمين راكب اللور وشاد تيلفون ..حفصة غادية وكتبدل الموسيقى وانا كل مرة ملوح ليهم شي حاجة ينقبوها معايا حتى وصلنا لكازا ..اول مرة ندخل تخلعت وتلفت ..ميمكنش شحال ديال الزحام بزز باش قدرت نوقف فالجنب دوزيام برديسيون ودرت السينيال ديال ربعة باش نعيط لناصر يجي هوا عندنا فين حنا حسن ما نبقا ملاسقة مع طموبيلات

هزيت تيليفون فرحانة حطيتو فودني بحماس ..جاوبني قالي الووو

وطرت بالفرحة قلت ليه

انا فكاا زاا….

طير ليا واحد الشفار تيليفون من ودني ماعرفت كي دار ليه ختى بقيت كنقلب شنو وقع واش طاحت واش دخل فيا شي واحد مافهمت والو .. شفت ادمين نزل كيقلب بعينيه وحفصة كتولول

اويييلي شفاااار

قلت ليها شنووو؟!! فين تيليفون ؟ شنو وقع !!

قالت ليا: اويلي طيرو ليك من السرجم ولد الحرام …مشاااا تيليفون

نزلت وقفت حدا طموبيل كنشوف فين تيليفون ويدي على فمي قلت لادمين

واش سرقوه؟!!

قالي: ولاد لحرام…طلعي الزاج طلعي عمرك تخليه محلول

بقيت كندور فبلاصتي وطلعت سديت عليا ودرت يدي على وجهي كنبكي وحفصة كتسكتني وكنسمع ادمين اللور كيهضر مع ناصر

قاليه: خاي ناصر..وصلنا اخاي ..اه جيت معاها .. راه طيرو ليها تيليفون مع الدخلة هاهيا فين كتبكي مسكينة …انا نسيفط ليك لوكاليزاسيون اجي عندنا راه ماقدراتش تحرك من بلاصتها .يالاه تهلا

حفصة:صاافي اصاحبتي دا البلا والباس..صافي دابا تشري واحد اخر

هزيت راسي كنمسح نيفي قلت ليها

دنوب بابا… انا متأكدة ..دنوب الواليدين كيخرجو .. غاضب عليا داكشي علاش وقع ليا هادشي انا حاسة

حفصة: هاويييلي خلاوها كازاوا نيت …دابا نتي كتبكي على تيليفون ولا على بابا

خديت ليها تيليفون قلت ليها عيطي ليه ..عيطي نهضر معاه منقدرش نجمع بزاف الدنوب..عيطي ليا

دوزاتو ليا كتشوف فالادمين واشوف فيا وتنهدات عطاتني هضرت معاه

الو بابا… سمح ليا ..سمح ليا صافي كنواعدك منبقاش نقلقلك

بابا: ياك لاباس اش وقع ؟!! اش وقع قولي

قلت: خرجو فيا الدنوب ديالك ..والدنوب ديال ماما ..

بابا: اش وقع هضري شنو كاين

انا: سرقو ليا تيليفوني فكازا ..

تنهد: لا حولة ولا قوة الا بالله العلي العضيم..دا البلا والباس..ماكاين لا دنوب لا والو ماتبقايش تعمري راسك بالخوا الخاوي..شكون هادا اللي قاليك دنوب؟

مسحت عيني قلت ليه :قالتها ليا حفصة

خرجات حفصة عينيها : اااع ..اااناا!؟!!

بابا: اريها ليا هاديك انا اللي غادي نخرج فيها مابغاتش تحشم

عطيتها تيليفون وهي مدورة وجهها مكتهضرش وكل مرة كتجي تهضر كتسكت حتى قطع وضارت عندي كتنهد

متأ..حن حسابني غيوقع هادشي والله منحل فمي لبارح ..شداني كاع نصحك ..بقا فيا با ومي هاهما دابا طلاوني من كرشي ومن ضهري ودير لخير تلقاه

هزيت قرعة دالماء كنشرب ونتنفس حتى وقف واحد الطاكسي حمر قدامي نزل منو ناصر لابس دودون كحلة ودجينز وطاقية كحلة والبرد كيقرص على برا حل عليا الباب كيضحك وقالي

كرموك ؟!!

نزلت عندو عنقتو وكنتنهد كنحس بنفسي كترتاح وتحط الحمل ..قالي طلعي نخيدو من هنا

ادمين: وافين اخاي

ناصر

ناصر: غاا بلاتي تشوف خوك من بعد

رجع الادمين اللور كيضحك وحتى جيت نطلع ورجع جرني قالي اري السوارت اري رجعي اختي اللور عفاك

شفت فحفصة ماعجبهاش الحال ينزلها وقلت ليه

ختي حفصة هادي

قالي: ااه متشرفين

ماجاوباتوش طلعات اللور حدا الادمين سدات الباب عليها وقالي

طلعي من الجهة لاخرى ماتعرفيش تخرجي فالزحام

طلعت جلست حداه كنجري ونضحك وطلع بلاصتي ديمارا الطموبيل والادمين اللور كيطل عليه قاليه

اللي عطاك يعطينا ..كتعرف لوطوماطيك بعدا

شاف فيه ناصر فالمرايا قاليه

سكت اصاحبي..سكت شوية

خلعني الادمين حتى كنت غنقول لناصر نزل انا نسوق لاكن تحرك دخل وسط داك الزحام داز بيناتهم كاملين وانا يدي على فمي كنقول دابا غيدقع شي واحد..دابا غيطم فشي واحد..دابا غيلسق مع شي واحد

يدي قلبي وقلبي على فمي حتى خرجنا من وسط داك الرومبوان وكسيرا بالجهد فالطريق وانا كنشوف مخلوعة

لالالا بشوية بشوية بشوية غتسخفها

شاف فيا كيضحك :نتي اللي غتسخفي

دانا للحي ديالو ودخل للباركينغ خاص وقف وقالينا نزلو

نزلنا وعنقني بيدو عطاني الكونطاك شديتها ودرت يدي على ضهرو من اللور غادين حنا اللولين وكل شوية يخلط ليا وجهي مع شعري

ناصر: توحشتك جلستي فديك مراكش عاطياها غير للدوران قلت ليه كنضحك : غير شوية وصافي

ناصر: تهلات فيك كازا ههه

ضحكت قلت ليه ماشي مشكل دابا ناخد واحد اخر ونحول كاع ليدوني عندي

قالي: هادا باش زوين الايفون ..اما الايفون ديالك راه تحل دابا وتفصل وكيتياع بياس ديطاشي

قلت ليه :توحشتك

عنقتو بيدي بجوج وحنا غاديين دخلنا لواحد القهوى حيت الشتا بدات كطيح وجلسنا حدا بعضياتنا فواحد القنت فوق واحد الفطوي وحطيت يدي على فخدو وهوا معنقني وهبط راسو كيشوف فدفاري قالي

شهاد الدفار هادو ..

قلت ليه :خايبين؟

قالي :علاش زرقتيهم بالكحل؟ ماجاش معاك

قلت ليه: غير حيت البرد قلت. ندير شي حاجة تجي معاه

زيرني عندو بيدو كيضحك حط راسو على راسي وتنهد ورجع شاف ليا فعيني وشعري كيبعد ليا الشعر على جبهتي قالي

زيانيتي

قلت ليه :حيت مشيت للحمام

قالي:لالا ماشي الحمام.. حيت جيتي عندي

عنقتو عاوتاني قلت ليه

ميمكن شحال توحشتك ..

قالي: حتى انا توحشتك كن ما جيتيش كن غنجي

قلت ليه واش هادي هي كازا اللي كيهضرو عليها

قالي: هي هادي كازا اللي كيهضرو عليها

حط يدو على حنكي كيضحك قالي

وانا ماهضروش ليك عليا

قلت ليه :لا

هبط ليا وجهي حدا صدرو كيضحك وقالي

درتيها واعرة مللي جيتي..ولاكن خسرتيها ملي جبتي معاك هاد خونا هادا

وشار ليا بيدو للادمين كيضحك وقاليه

فرحاان

ادمين: ماشي عشرة اصاحبي..تخبي عليا الاسرار

ناصر:واسيير

رجع الادمين اللور كيضحك ورجع شاف فيه قاليه مالك ..شكون بحالك غادي ندوزك فاابور فالرحلة دلويكاند..دزتي على وجهها اساط

ناصر : واسير راه غنوض نسوط مك .. ضار عندي قالي:تشوفيه المرة الجايا كيضحك ولا كيغمز ضربيه ..

شفت فالادمين هاز راسو كيضحك وشفت فحفصة كتشوف فناصر وكتجمع النفس وقلبات عينيها للجهة لاخرى

ضحك ادمين وقالي: شتي ولاد كازا. كي دايرين..مكاين فير نسوط مك نسلخ مك نعطي لمك ..حنا ولاد مراكش مكنهضروش هاكا ..

قاطعو ناصر قاليه :ااه اييه ..نتوما الطنجيااا البراااد واسيير اوا سير

تنهدات حفصة قالت ليهم بلهجبتها المراكشية بحال ديما

اصلا مكاينش احسن من ناس مراكش الباقي كي والو

شاف فيها ناصر بقا كيحرك ليها راسو شحال وقاليها

ياك. اختي.. الباقي كي والو

قلب عينيه شاف فيا وضحك جرني وقاسني لحنكي بيدو اللي معنقاني قالي

كي جاوك ناس كازا نتي؟

تنهدت وتقاديت قلت ليه شفارة الصراحة

طلق الادمين واحد الضحكة وسط القهوى سمعوه من الطبقة الفوقانية وحفصة زادت اكدات ليا بحجبانها وناصر ماعرف يضحك ولا وشنو يدير بقا كيشوف فيا وقالي

اييه !! الله يرحم الواليدين

شد الادمين راسو وهبط لتحت قاليه

لالالا ميمكنش اخاي ناصر..والله تا جمعاتك ..مابقا ليك فين تزيد

ناصر :سكت نتا قولي نتي.. ناس كاز مزيانين واخا فيها كريساج

قلت ليه باستغراب: علاش غنقولها

قالي: عاودي ورايا ..ناس كازا مزيانين واخا فيها كريساج

رديت: ناس كازا مزيانين واخا فيها كريساج

قالي: هاااكاك ..ماتنسايش منين انا الله يرضي عليك يالاه شنو تشربي

دورت وجهي قلت كنشوف فلقهوى

بغيت ناكل شي حاجة فيا الجوع عندهم ماكلة

قالي : بغيتي تاكلي نديك فين تاكلي ماشي هنا

هزات حفصة حاجبها قالت ليه ومالو هنا ماعندهمش؟!! ولا غالية

هز عينو شافيها مطولا وقاليها الى بغيتي تاكلي هنا مرحبا ..شنو بغيتي دجاج دسيمانا ؟ لحوت دخمسطاش ليوم ؟ شنو تهشيتي ؟

هبط الادمين راسو عدا عنقو كيضحك ويتفرج وهي كتشوف فيه قالت ليه علاش زعما قلتي هاكا؟

قاليها : الماكلة مكتمشاش هنا ختي كيبقا داكشي مجموع تا كيجييو…

سكت وضار عندي ضحك قالي شنو بغيتي تاكلي؟ نديك تاكلي الحوت ؟

حركت ليه راسي قلت ليه

اهمم..ناكلو الحوت

ناض شد ليا فيدي قالي يالاه نمشيو

نضت وناضت حفصة والادمين مشينا للطموبيل ومشات حفصة بالزربة قدامي ركبات القدام وكنشوف فيها كنقول باز ليها ماقنطاتش فالغلض ديالها وكتمشا وتزرب بيه عادي وماعندهاش مشكل وكتلبس حتى دجينات مطرطقين ومرتاحة فيهم ..انا كنتعجب مكنقدرش نتخيل راسي بلاصتها

ركبات حطات الصاك حداها وسدات الباب ربعات ومشيت لحقت عليها انا وناصر كنهضرو وقالي

اري ديك لكونطاك لهنا ..وجلسي تهناي مع راسك ماتعصبي مانتعصبو معاك

عطيتهم ليه كنضحك ركب بلاصتي وضرت حليت الباب على حفصة قلت ليها حفصة رجعي اللور حدا ادمين

نزلات هزات الصاك ورجعات اللور طلعات وزدحات الباب وضرت عندها قلت ليها ناري ياختي..بشوية عليها

دورات وجهها قاليت مالها عزبة !

دانا لحدا للمرسى لواحد المطعم كبير وواسع شعبي ودخلنا لقيناها عامرة ..تقدم قدامنا لقا لينا بلاصة ومشينا جلسنا وجلست حداه عنقني من جنبي وقالي

هنا غتاكلي الحوت نقي وجديد..كاع انواع الحوت اللي تشهيتي

شفت فيه وهوا كيهضر معايا ضاحك حسيت بيه فرحان بالمجية ديالي بحال شي دري صغير فجسد راجل حرش.. جريتي لموني كنشوف انا وياه دايرين الراس عند الراس وحفصة وادمين شادين كل واحد فيهم واحد كيشوفو وبديت نقرا ونقلب قلت ليه وصبعي حدا فمي

تشهيت لي زويتخ..اوه عندهم حتى اللي منسمين .

قالي:عندهم كولشي ..شنو بغيتي اخر

بقيت كنشوف وكنتشهى حتى جمعت الطلبية وقلتها ليهه. يدو طلبها ليا وطلبات حفصة حتى قلت موحال تسالي .. اما ادمين قاليه

شي طاجين بوزروك وواحد فخيتوغ

مشا النادل بالزربة حط لينا الماكلة وعمرات الطبلة حتى مالقينا فين نحطو الطبسيل اللخر .

درت رجل على رجل وضرت عند ناصر قربت حداه اكثر وقلت ليه

الصراحة باينة نقي

قالي بالصحة والراحة ..كيعجبوك ليزويتخ ؟

قالها وهوا كيقربهم ليا وكيعصر ليا عليهم الحامض وعطاني ليدي كناكل

بدينا كنهضرو على الحوت و كينقي ليا وحدة بوحدة ويعطها قدامي ومرة يعطيها ليا ليدي مرة يحطها ليا فمي ..دقة دقة مع الهضرة حتى سالينا الماكلة وناض هرج بزطامو من اللور بغا يمشي يخلص وتبعو الادمين حتى هوا ونضت جبدت بزطامي بغيت نوض وجراتني حفصة قالبت. لي

جلسي فين غادية ؟! الرجال اللي كيخلصو ماشي العيالات

نترت يدها قلت ليها لاا ماعندوش مسكين

خليتها كتنرض وتجلس وتبعتو كنحل البزطام ونجبد الفلوس دخلت بينو وبين لاكيس وكان اصلا فصراع مع الا دمين وقلت ليه

لالا انا اللي عارضة عليكم

جرني اللور حيد ليا دوك الفلوس كمشهم يحال الورقة قالي

لالالااا صافي بقيتي ليا غا نتي

الادمين: هاك اخاي قسم الله يحفضك

هبط ليه ناصر يدو قالينا

غتعصبونا عاوتاني..صافي خليونا نخلصو

تخلص اخاي الله يحفضك نمشيو بحالنا

خلص الغدا وبين ما هوا كيخلص دخلت ليه جوج ورقات زورق ديال ميتين درهم مطوين فجيبو اللور بلا ميحس بيا وتبسمت قلت ليه

شكرا اناصر هانا كنتسناك لهيه

رجعت خليتو كيقول للادمين

ياك الرحلة على حسابك لويكاند ايوا صافي الغدا والعشا داكشي لاخر هنا على حسابي..

جلست حدا حفصة لقيتها مزال كتنقب ماسخاتش وغير جلست قالت لي

عنداك تكوني خلصتي؟

قلت ليها لا ناصر اللي خلص

قالت لي :ايوا هاكاك ..

تحنات على واحد لكروفيتة كتنقيها وقالت لي

ماعرفت اش عاجبك فيه..عاطياه يسوق طموبيلتك انا اللي ختك وعمرني جلست بلاصتك حتى بالضحك ..عاطياه نتي الطموبيل عمرو كان كيحلم يشوفها قدامو حتى رجع كيسوقها

ضرت عندها قلت ليها

ولاكن كيسوق مزيان حسن مني الى جينا للصراحة ..ماشي مشكل شكون فينا يسوق المهم شون فينا كيعرف يسوق..وهوا راه كيسوق الرموك تبارك

سبللات عينيها قالت لي ماعرفت اشنو عجبك فيه.. جايا كتجري عندو حتى لكازا ..خلي الخانز اللي ولدو يخلص على كًلبو نوريه انا ينزلني يقولي رجعي اللور ..شكون هوا كاع كيحسب فراسو

تنهدت كنشوف فيها بأسى كتهضر وتقطع فديك لكروفيتة قلت ليها

راه ماكناش واقفين فبلاصة مقادة..وشفتي كيفاش خداو ليا تيليفون تما والناس كيدوزو وحنا مزاحمين ..قاليك هاكاك بالزربة باش نحيدو من الطريق مانديروش للناس مشكل..فهمتي اختي

عقدات حجبانها قالت لي ماتعطيهش الاللة طموبيل ..طموبيلتك سوقيها نتي ..مايجيش يتحم لينا فديالنا ويتحكم فينا

حرك ليها راسي بالنفي قلت ليها

كضلميه احفصة ..غير ماكتعرفيهش مزيان ..

نتفات واحد الكروفيتكة كتشوف قدامها قالت لي

ندمت اللي قلت ليك عليه فالاول..راس الق٠٠وة

حطيت يديا على رجلي كنتنهد وكنتسناهم يرجعو وقالت لي

غنمشيو نشدو اوتيل نجلسو فيه ويبسع منا ..داك صاحبو حسن منو بااينة عليه ولد الناس لاخر ولد لحرام ..غير تاكدب عليك لقاك نية وزوينة وعايشة برا وقال هادي دجاجك يكامونها يدير بيك اللي يغا…اممم…بالصح والله لاكانت ليه

سديت عينيه كنتنهد ونسمع وهي مابغاتش تسكت

حفصة : تجيبي سيد سيدو الق٠٠٠للاوي لاخر ..راسو كي لوصلة

ضرت بقيت كنشوف فيها وقلت ليها

حشوومة علييك..براكة ماتعيبي فيه

حفصة: خليني نعيب فديلمو يستاهل ..ندمت حتى شكرتو ليك

دورت وجهي ساكتة حتى رجعو عندنا ومديت ليه يدي شديت فيه نضنا وشفتو خشا البزطام اللور بلا ماينتابه للفلوس ورجعنا للطموبيل عطيتو السوارت ومشيت اللور بغيت نركب وشاف فيا باستغراب قالي

فين غادية؟

قلت ليه جاتني الدوخة بغيت نجلس اللور ..حفصة غتجلس قدام

ناصر: اللور فين غتجيك الدوخة اكثر

قلت ليه:لالا غنتكا شوية

طلعت جلست اللور حدا ادمين وخليت حفصة ركبات حداه وديماراها زاد مع الشارع وهي كتقلب وتبدل الاغاني وكتصور ..شاف فيا فالزاج قالي واش فيك الدوخة بالزاف

حطيت راسي على ادمين قلت ليه شوية

هز ادمين يدو بغا يعنقني قالي رتاحي رتاحي ..شوية حيدها دغيا قبلمايحطها عليا قالي بحال ختي

دانا معاه نيشان لحي شعبي على واحد الشارع كيعمر وتحت منو البيع والشرا ووقف قذام واحد الدار كبيرة فيها ثلاتة ديال الطبقات ..

قالينا هبطو ليفاليز ديالكم وهبطناهم حتى هبطات عندنا نفس المرى اللي شفت معاه فلاكام ..كبيرة ونقية ومنورة فوجهها كتهضر بشوية ويديها حومر بالحنة قالت لينا

مرحباا بيكم ..مرحبا بيكم اوليداتي باس ليها ادمين راسها قاليها مي فطومة ..لاباس عليك كي بقيتي

قالت ليه شوية وليدي شوية

تبسمت ليها مشيت سلمت عليها بنفس الطريقة ديال ادمين بست ليها راسها وبدات كترضي عليا وباست ليها حفصة راسها حتى هي قالت ليها كي دايرة الحاجة ..لاباس كولشي مزيان

قالت ليها

لاباس بنيتي الحمد لله زيدو طلعو مرحبا بيكم

حل ناصر الباب ك ديال الطموبيل طلع وقالي

نهى يالاه تمشي معايا

طلعت حداه بالزربة قلت ليه فين

قالي:نديو طموبيل للكراج ماتبقاش هنا

قلت ليه صافي واخا

رجع اللور قلب الطريق والشارع كله كيشوف فينا وسمعت واحد واحد داز على بيكالا كيجري قاليه

هاااديك ابا ناصر ..وصلتي لعلااامية كاع

بدا ناصر كيضحك وضار عندي قالي ماديهاش فيهم .

مشينا للشارع لكبير كان تما كراج كبير بالعساسة حاضيين طموبيلات وحطيناها وقالي

الباش ديالها كاين؟

قلت ليه

اه كاين فطموبيل

اللور رجع اللور حل لكوفر جبدو كان كحل قاصح طلقتو انا وياه غطيناها كلها مابقاتش كتبان واش مرسيديس ولا بيكوب وشد ليا فيدي زير عليا ورجعنا للحي حتى قربنا للباب ووقف قدامنا واحد مد يدو سلم عليه ومد يدو ليا حتى بغيت نسلم وردني ناصر اللور قالي طلعي للدار عند الواليدة هانا جايا

طلقت منو طلعت لقيتهم جالسين فالصالون المغريبي كيشربو اتاي والحلوى محطوطة وديك المرى مسكينك كبيرة جايبة لما ..ناضت تعرضات ليها حفصة قالت ليها

اري عليك اميمتي ..جلسي رتاحي ماتشطنيش راسك

جلست معاهم وشافت فيا ديك المرى قالت لي فين بقا ناصر!

قلت ليها لتحت مع واحد الدري

ناضت طلات عليه حسيت بيها مشطونة عليه وشاغل بالها .عيطات عليه وطلع عندنا بالزربة كيضحك قالينا

مرحبااا ..نهار كبير هادا

جلس معانا ورحبو بينا وانا كنشوف فيه ونقيس شعري ونشوف دارهم كي دايرة .. بحال اي دار مغربية ..بسيطة عادية نقية فيها السدادر وصور القرآن فالحيوط كبار ومتولة ..

قلت ليه

كتعيشو غير بجوج بيكم فالدار مامعاكمش شي واحد؟

قالي: غير انا والواليدة الله يخليها ليا

جرها من راسها باسها وشدات ليه يدو قاليت ليه

الله يرضي عليك اوليدي …ايوا بنيتي الدرادي خوتو كلشي تزوج بقا ليا هوا الله يسهل عليه ..كنرضي عليه بالليل وبالنهار ربي يسهل عليه وعلينا

قلت ليه :امم قلتي ليا عندك غير جوج خواتاتك ؟

قالي:كتقصد ليك خوالي فهمتي

ضارت عندو قالت ليه

اش بغا داك المسخوط منك لاش جا عندك

دور وجهه كيحرك راسو بالايجاب والادمين كيشوف فيه قاليه خونا عاوتاني؟

حرك ليه ناصر راسو بالايجاب وقاليه ادمين

هرج من الحبس

هز ناصر راسو قاليه

راه غنضرب مو نشرو شي نهار خليه يقلب عليا

شدات فيه مو مسيكينة قالت ليه

مايشرك ماتنشرو عطيه التيساع ..انا مزاركة فيك اوليدي بعد منو .. الله يبعد بلانا على بلاه والله يهنيك منو فمرة ماتعودش تشوف كمارتو

تنهد ساكت وانا كنشرف فيه كنحاول نفهم شنو كاين وقلت ليه

شكون هادا ؟ مالو معاك اناصر؟

جاوباتني مو وباينة عليها محروقة من جهة هاد الموضرع وقالت

والو يا بنيتي.. واحدالمسخوط الله يهزو علينا ..حاط عليه باغي ينبشو وكيقلب منين يدوز ليه ..الحسد فهاد الحومة ..حاسدينو على والو

قاليها :علااااياش غيحسدوني على القصر اللي ساكن فيه ولا الفيراري اللي فراس الدرب ولا الخدمة اللي خدام

ادمين:وراه غيحسدك على الزلط وعلى السروال اللي شاري بعشرين درهم ..بنادم محساد اصاحبي هاد النوع بعد منو

تنهد ناصر وقاليه: عييت اصااحبي نتفاداه عييت وفين ما يشوفني يجي يتلاح ليا فالطريق ولا يبدا يحرش من البعيد..كيقول ليا واحد الراس نهبط ندوز على مو من الوريد للوريد ونتهنااااااااا .. سورووسة فحياتي

شدات فيه مو قالت ليه

انا مزاوكة فيك اوليدي بعد عليه..بعد على الزبل

خلعني قلت ليه

لالا بعد منو ما بقاش ليك بزاف هنا وغتمشي لسويسرا وغتهنا فمرة..

شافت فيه مو قالت ليه :فيين اوليدي غتمشي؟!!

حرك راسو قاليها:مغادي فين الواليدة

قاطعتو قلت ليها: راه غنديه معايا لبرا ..غيمشي يخدم تما حسن ليه

بقات كتشوف فيا وتشوف فيه وقالت ليا

هاداك هوا النهاااار الكبيييير يا بنيتي..غيتسطى ويخرج لبرا وكن تشركوووفي شحال عطينا دلفلوس وشحال ديال كانطرات وداو لينا رزقنا وخلاونا

ناض وقف قاليها الوادك نوضي تصلي الضهر راه كيودن

قلت ليها:كنواااعدك انا عادي نديه ..هادا قرار حاسم مغنرجعش فيه ..غنهضر مع المحامي ليوم يوجد ليه لكونطرا وفاش نرجع نكمل الاجرائات اللي بقات ونسيفطها ليه فأقرب وقت غي رتاااحي

ضار عندي ادمين كيرمش

..ختي نهى ..ءءء ءءء ا ءناا .. ءءءء ممم مااا ءءء

شفت فيه قلت ليه :صاافي صافي دابا نشوووف

حط يدو على صدرو كيترجاني بعينيه

معول عليك ..والله تا نموت وخويتي بيا

ناضت الجدة قالت لينا

اجيو ابنياتي دخلو لهاد البيت لا بغيتو تبدلو ..دخلو الباليزات ديالكم وتكاو لا عييتو بالطريق ..نصلي الضهر ونتغداو

نضت انا وحفصة لواحد البيت صغير مدور بسداذر فيه تلفازة فالحيط وسرجم كيطل على الشارع وردينا الباب

حفصة:غانتدي ناصر بصح؟!!

قلت ليها بيان سيغ ..فكرتيني خصني تيليفون

رجعت خرجت قبل ما نبدل لقيت ناصر غادي بالصينية للكوزينة حطها ورجع عندي قالي

خصك شي حاجة ؟

قلت ليه خصني تيليفون

قالي: ااه حكا..باباك عيط ليا

قلت ليه بصح!!

قالي :عيط ليا ودويت معاه وصاني عليك وصافي قالي مال تيليفونها طافي وحفصة حتى هي تيليفونها طافي

قلت ليه :غيكون ديشارجا

قالي: باغا تيليفون تهضريولا باغا تيليفون تشريه

قلت ليه خصني نشري تيليفون ..خصني نشوف شنو كيوقع فالدار والمكازا

قالي واخا تمشي دابا

قلت اه

هز جاكيط ديالو قالي يالاه وجا عندنا ادمين كيجري قالينا فين غاديين

قلت ليه نمشي نشري تيليفون

قالي: تسناو نمشي معاكم

ناصر: تكا اصاحبي ماضركش ضهرك؟

ادمين:لا اخاااي باغي نتحرك

تبعنا كيضحك مشينا غير على رجلينا دخلنا لواحد السوق كبير كيخلع بقوة الزحام وتيليفونات .. عنقني ناصر من عنقي دارني قدامو وداني عند واحد المحل كبير سلم عليه وباين كيعرفو حيت مول المحل سماه وعيط ليه بسميتو .. قاليشنو بغيتي تشري

قلت ليه: ايفون

هبطت عيني كنشوف تيليفونات الجداد وخديت واحد فالكولد من غير الكحل الليكان عندي . جبدو ليا حليتو بيدي باقي جديد كيبري وقاليه ناصر شحال واصلين هادو

البائع: هادو واصلين خمسة وعشرين الف درهم اخاي ناصر راك عارف يالاه خرج للسوق. الى بغاتو نتقادو معاها

شفت فناصر قلت ليه شحال بالاورو؟

قالي: الفين وخمسية يورو

قلت ليه:صافي ناخد هادا عجبني .. نخلصك بالاورو ممكن ؟ حيت ماصرفتش ماحسابنيش غيسرقو ليا تيليفون

قالي: ماشي مشكل بحال بحال ناصر ديالنا

ناصر: وهبط للارض شوية اصاحبي شتك طالع فالسما

البائع : ثنين وعشرين ليك نتا اخاي ناصر ماشي مشكل جيتي عندي منخسرهاش فوجهك

جيدتهم حسبتهم وعاود حسبهم ناصر وادمين كيدور ويشوف فتيليفونات ويسول شخال دايرين .

شدالبائع الفلوس قالينا هانتا هنا خاي ناصر نجي دابا

خرج خلانا فالمحل حليت تيليفون دخلت لايكلود قاديت كلشي رجعو ليا تصاوري رجع ليا كاع داكشي اللي كان عندي والنماري ديالي بقا ليغير لاكارط خديت وحدة عادية باش ندوز العطلة .رجعت الواتساب ديالي ورجع البائع بالفلوس مصرفة بغا يرد ليا الصرف من حيت خلصت بالفرنك السويسري وقلت ليه

دغيا صرفتيه!!

ضحك قالي: كولشي موجود هنا اختي غا نوي

بقيت معجبة قلت لناصر يصرف ليا ماحدنا تما وداني عند واحد كيبيع تيليفونات حتى هوا صرف ليا وقلب الفرنك اللي عطيتو وخرجنا بحالنا من تما معنقة تيليفوني وخايفة يديره ليا وكنسمع ادمين ورايا كيقول

يااربي شي فرنك تا حنا نوليو نصرفوه

خرجنا من داك السوق وشحال ديال الزحام للشارع وقلت ليه

ناري شحال عامر ..

ضحك قالي: اييوا درب غلف ضرب تلّف الدار ما نعرف ..هوا هادا ..اري نشوف داك التيليفون

عطيتو ليه قلبو وشافو وقالي

زويييون..

ادمين: عطيني غا فلوسو ماعندي منديرو بزينو

ناصر: شكتعرف اصاحبي .. سكتنا

ادمين: نتا اللي سكت اخاي ناصر ضامن بلاصتك ..اما ان اغاااا خليييني ندوي على حقي

ناصر: وا بزااف اصاحبي عيقتي

ربع ادمين يدو وقلب وجهه وعطاني ناصر تيليفوني ومشينا رجعنا للدار .

قبل مندخلو شفت فالحومة لقيت هداك اللي وقف علينا فالاول واقف مع واحد الحيط وكيشوف فينا .. باينك فيه كبير وماشي قد ناصر ولاكن متبعنا بعينيه وحالتو كتخلع ..جرني ناصر عندو عنقني وحل ليا الباب بغيت ندخل وسمعت داك المسخوط كيقول

بنااادم ديلمو ديال التسرفيق ..حسب كرو شي لعباااا

وقف ناصر ضار عندو بقا كيشوف فيه ونفض داك المسخوط يدو من شي حاجة كان كيحك فيها وقاليه

مالك كتشوف فيا!! مال ديلمك

هز ناصر صبعو قاليه

كتقلب على شي منتيف..شنو باغي؟

جا لينا هاداك بالزربة بواحد المشية خلعني وجريت ناصر خفت لاكن ماتجرش ليا وبديك القوة تعرس ليا الدفر من النص حسيت بالضو ضربني والدم سال كنشوف ناصر واقف معاه كيشوف فيه وهاداك مخرج عينيه فيه بك عرفتو باغي غير يجبدو ..هز يدو داك المسخوط حطها على وجهه ناصر ودفعو قاليه

سير: ولا نخسر لمك وجهه اولد. ل٠٠٠٠

دفعو ناصر قاليه :غتجبد ليا مي غنفسك مك

هز داك المسخوط يدو كيضحك قاليه ها هاي هااي تخل ليك الفم البرهوش باغي طيب عليا قدام صحييتك

ناصر: سير فحاالك..سير فحالك اكمال

جرو داك كمال من الجاكيطة قطعها ليه قاليه

باغي طيب عليا اولد ل٠٠٠ اجي نوريك مك شنااهي الطيابة

جرو بالجهد وحسيت بناصر كيترعد من يديه ويشوف فيه وادمين شادني حدا الباب وانا كنعيط. ليه وشادة صبعي كنقول ياربي تحفضنا ..بقوة الاعصاب اللي حسيت بيهم تجمعو وداك الضغط ولد الانفجار وحيد ديك الطاقية وديك الجاكيط .. ورجع جرو ضربو بالراس حتى سال الدم من الفم والنيف وتجمعو الناس..بقيت كنشوف فالبونيات كيطيحو وينوضو فوق الارض وكنغوت بغيت نجرو ..جات مو مسكينة كتجري ماعرفات فين تشد وفكوهم الناس بزز ردوه اللور كينهج ..نتر يديه وضار حدا واحد الكراج مسدود بدا كيضرب فيه وقال ليه

غنقتل ل…دمو… غنقتل مووو

قالها بواحد الصوت مبحوح طلع بالزز كيتعصر بحال الى بغا يبكي ولاكن شفت فعينيه غير الغضب ومو كتجرو والرجال كيقولو ليه

دخل بحالك اولدي..دخل بحالك الله يرضي عليك

بعدوه من تما وهزو الدرادي داك المسخوط من الارض وقف وهز صبعو كيشوف فيه وبزق الدم قاليه

هاهيا انااصر.. هاهيا عقل عليا… هانتا غتشوف

شد ناصر راسو تعصر بغا يمشي عندو وشدوه من يديه وجا واحد الكارديان طويل وعامر جرو عنقو قاليه

اجي ..اجي ندوي معاك اجي غا ندويو

ناصر: كيهددددني… وا غنقتل ط٠٠٠٠٠ن دمووو

دخلوه مع الباب بزز منو وطلع مع الدروج كيضرب فالحيوط حتى للفوق وطلع معانا داك الكارديان وشي رجال اخرين للدار ومو كتبكي وهازة يديها فالسما

الله ياخد فيه الحق…كما كيتعدا على هاد الولد بغا يخرج عليه الله يعطيه شي موصيييبة ..هلكنا قتلنااا..عيينا نسكتو عيينا نسدو عينينا ..اشنو بغا عندو؟! شنو بغا منو علاش حاضيه .. ديما يلوح ليه فالهضرة وديما ينبشه فيه مابغاش يتفرق عليه

جلس داك الكارديان حدا ناصر وهوا شاد راسو وكيشوف فالارض قاليه

خليه يهضر اصاحبي..خلي الزمر يقول اللي بغا

جر ناصر حوايجو قاليه

بزاف اصاحبي واعيييت غندوز على مو وغنرتاح فدماغي ..الحبس ولا هاد الحياة ديال النم

اعصار كيخلع هزنا كاملين وحطنا كل واحد فين كيشوف..داك الكارديان بقا كيبرد فناصر وانا مقنتة قابطة صبعي كنبكي عليه ومكمداه حتى فاتت ديك الموجة ومع الاسف عكر الجو داك المسخوط حتى الغدا نسينا عليه ونسينا حتى علاش جينا ..تلفتا وكل واحد فينا شد قنت حتى خوات الدار وناض ناصر غسل وجهه وكل مرة يطل من السرجم ..مشات مو كتصلي مسكينة وكنسمعها كدعي بالقهرة وبصوت ضعيف معاه حتى بغات وتبكي وناضت كتنهد مشات للكوزينة وتبعها حيط معاها ودار على نيفو فوق فاصمة صغيرة ..جلس مقابل معايا على الطبلة مهبط رسو كيحك لحيتو وهز عينيه بعفوية حسيت بيه معصب ومامرتاحش..شافني شادة صبعي وقالي

مالك فيدك؟

هزيت صبعي قلت ليه تهرس ليا الدفر

دار حركة بتعابير وجهه مؤلمة فاش شاف صبعي وناض قالي اجي

نضت تبعتو لواحد البيت هاز واحد القرعة فيها الدواء وشد ليا صبعي قالي

كي وقع ليك؟

قلت ليه : بغيت نجرك وبالجهد تهرس

بقا كيشوف فيه وشدو خوا عليه الدوا واللحم ديال صبعي السبابة كيبان ليا بقا فيه غير نص صفر..دور عليه فاصمة بيضا وغطاه بلسقة اخرى بيضا وقالي

كيضرك بزاف؟

قلت ليه :شوية قبيلة كنت غنسخف

مسح على شعري قالي صافي..ماوقع والو اجي نتغداو

شدني من يدي ومو كتعيط لينا نتغداو ومشينا جلسنا واخا واكلين الحوت تشهيت كسكسو ودارتو بالقديد والخضرة كيشهي..جلسنا كنهضرو عليه ونضحكو وشحال بنين. اك كسكسو ميمكنش عمرني كليت بحالو..شي سر فيه ماشي طبيعي . قالت ليا مو

كسكسو دكالي هادا بنيتي

قالت ليها حفصة:الله يعطيك الصحك الحاجة..سمحي لينا عدبناك

قالت لينا:مكاين لا عداب لا حتى حاجة مرحبا بيكم

قلت ليها :مكاين حتى واحد كيعاونك حيت نتي شارفة خاص يعاونك شي واحد

دارت حفصة يدها على فمها حشمات بقات كدور فبلاصتها وناصر ادمين كيضحكو

قالت لي:اييه ابنيتي شرفنااا..غير البركة دالله اللي واقفة معانا

قلت ليها: عندك بناتك؟

قالت لي:عندي بنيتي ولاكن مزوجين

تنهدت قلت ليها: اممم..مشكييلة عندك .

قالت لي: عياو فيا نمشي عندهم ويهزوني وعيار فيا وليداتي ولاكن منقدرش نخلي وليدي راه هوا باش كنشوف البنيتي.. الكبدة صعيييبة

قلت ليها:قلت ليها صافي دابا هوا غيمشي يخدم فسيوسرا غير سيري عند ولادك

بقات ساكتة كتشوف فيا وجرها ناصر كيضحك باس ليها راسها وهضر ليها فودنها كيضحك وشافت فيا كضحك قالت لي

لا مشا وتهنيت عليه غا تجي الموت صافي..

قاليها: واش حمق نمشي ونخليك..انا معاك هنا

قالت ليه: لااالا وليدي الله يسهل عليك انا راحتي وهنايا نهار تنهنا عليك

شوية بشوية بدا الجو كيصفا وعاونا ديك المرى مسكينة جمعنا معاها الطبلة وغسلنا ليها الماعن وشطبنا وماخليناهاش دير حتى حاجة .طاحت واحد الرعدة دالشتا ديك العشية شداتنا فالدار ماخرجناش وجلسنا كنلعبو البليستيشن بالنوبة ومرة نلعبو كارطة حتى ضلام الحال ونضنا كلنا للكوزينة كنطيبو وتعشينا وجلست انا وناصر فالبيت ديالو ..كان بيت صغير شوية فيه ناموسية صغيرة ديال شخص واحد وبلاكار وزربية صغيرة ..باين جديد حيت اثات ماشي موديل قديم ..كنت لابسة بيجامة ديال فيندي قهوية رطبة وجامعة شعري وبانطوفة غوز..قالي

ها بيتي ..جي كاك

حركت ليه راسي قلت ليه زوين..الصراحة عجبني

قالي: يالاه الشهر اللي فات قاديتو.

قلت ليه: زوين عجبني

طليت من واحد السرجم تما على الزنقة كانت خاويك والشتا كطيح والليل وسديتو ورجعت جلست فوق السرير .. رد الباب غير شوية ماسدوش وجا تكا حدايا قالي

اجي تكاي

شديت مخدة حطيتها على رجلي وطلعت جلست حدا رجليه قلت ليه بغيت نهضر معاك

ناض جلس دار مخدة ورا ضهرو قالي:شنو ؟

جبدت ليتيفون قلت ليه :هضرت مع المحامي قبيلا..سيفط ليا الاجرائات اللي مطلوبة وقالي غياخد شوية الوقت باش نقدر نديك وداكشي شوية مرون ..حيت انا باقا جديدة فسويسرا والجنسية عندي المانيا ماشي سويسرا وغيصني بزاف ديال الاوراق ونأكد للحكومة حسن العمل ووو وو ونتبت ليهم باللي الشركة محتاجة عمال من على برا وباللي مالقاتش عمال مواطنين..هادي من جهة فهمتي..حاجة اخرى .صعيب نجيب عمال من دول العالم الثالت حيت عاطيين الحق للي بغا عمال وحتاجهم يجيبهم من الدول اللي داخلة فالاتحاد الاروبي هما اولا وهادي مسألة ماصعيباش ..يعني باش نديك خصني نتبت ليهم حسن السيرة ديالك المستوى ديالك ..وتكون كتهضر فرونسي مزيان مزززيان ونتبت ليهم باللي هادشي كامل لصالح البلاد بالدرجة الاولى باش نزداهرو وداكشي..دابا ضاروري تعطيني واحد الوثائق غنطلبهم منك ..ودوز واحد لونتخوتيان من بعد فالمراحل الاخيرة..حيت عندنا القانون تما والخدمة ستخيييكت ماشي بحال هنا ..القانون مكيعرفش التلاعب والمعقول هوا اللي كاين ..ماخصنيش نغلط باش مانحرمش على راسي فرص ندي شي واحد اخر من بعد..حيت الطكَية دابا ضقية كونطرا واقامة وداكشي ماشي توغيست..باش يقبلو ليك كونترا خصك تكون مزيان بزاف وانا متأكدة نتا مزيان بزاف ولاكن خصني نتبت ليهم هما ..لاسويس كتهتم بحسن السيرة اكثر باش تحافض على الاستقرار والنضام ديالها والقوانين فيها صارمة فهمتي باش ميوقعش ليهم الزحام والروينة بحال فرنسا والطاليان وتكرفيس ..شوية معقدة فهاد الطكَية

حرك ليا راسو وربع يديه قالي:فهمت فهمتك ..اللغة ماعنديش فيها مشكل..حسن السيرة عندي مزيان نجيييب ليك كاع الوثائق..حتى الباسبور عندي داخل خارج نوريتانيا والشي لاخر ..كن بغيت نهرب بيه كن هربت..عندي اكسبيغيونص عندي كولشي واجد حتى الوثائق حافضهم حيت ما مرة ماجوج جمعتهم ودفعتهم

طل علينا ادمين كيضحك قالينا

فاش كتهضرو!

عقد ناصر حجبانو قاليه: راداار اصاحبي خلينا ندويو جوج كلمات مقادين

شاف فيا قالي:فاش كنتو كتهضرو نتي اللي ندوي معاك

قلت ليه: فالاوراق اللي خصو

رجع بالزربة وراه دخل كرسي ودخل جلس حدانا وقالينا

اهااه: كملي اختي نهى

قاليه ناصر : وا معقاااااد داكشي غا بلا متحلم

تنهدت قلت ليه: دابا بزاف..ماشي فرنسا ولا الطاليان ولاا سبانيا..هادي دولة في اي بي صعيب توصل ليها

حركت راسي في حيرة كنفكر فكلام المحامي وقلت ليه :

خاصني نشوف المحامي واش كيعرف شي واحد يتكلف ليا بكلشي..ضاروري يكونو اللي كيعرفو الثغرات فهادشي

ادمين: شوفي مع المحامي ديالك نخلصوه حنا كاع نعطيوه فلوس يتعامل معانا

ناصر: سير اصاحبي تكا سير

قلت ليه: زعما يدير التخلويض؟!! لالا غادي يجيب ليا البوليس ميمكنش..القانون صارم وغيسولوك ف اونتخوتيان اسئلة خاصك تفهم بين السطور وتجاوب على شنو قصدو فالمدى البعيد..فهمتي.. ماشي تجاوب غير على السؤال صافي حيت الى كنتي هاكا غيجريو عليك مايقبلوكش.. كيقبلو الناس المعقولين بزاف

ناصر: سمعتي.. راه مايقبلوكش المخلويض غا نوض تكعد

قلت ليه: لالالا الى ماعاقوش بيه مخلوض يقدرو يقبلوه واخا هوا ولد لحرام حتى تما كاين شوية دولاد لحرام مي القانون الى شدو ماينعسش ويخليه فهمتي..مكاينش الرشوة فالقانون وسط المجتمع كله اباار درك الهيئات السياسية وداكشي اللي بين الدول هادوك عندهم الخدع وداكشي مي المجتمع منضابط كله واللي تضبط كيدير شي حاجة يعاقبوه مايطلقوهش ..القانون في خدمة الشعب ولصالح الشعب ..ماشي مشكل واخا نتا ولد لحرام ولاكن ماتبينهاش باش ميشدوكش تما

رجع ناصر اللور كيضحك وادمين تا هوا كيضحك قالي

اختي انا ماشي ولد لحرام ..غا قلت زعما يدوزها وصافي مع حنا هنا عندنا كلشي كندوزوه بالصابون فهمتي..تيزلق ويزيد فاش ماحطيتي يدك قلت ما تعرف تا نتوما تكونو كدوزو بالصابون

ناصر: سكت اسيمو خلينا نسمعو شنو كاين..واحنا واحلين غا مع الهضرة ديالها نزيدوك تا نتا

تنفست كنفكر قلت ليهم

خصكم تكونو معقولين..هادا هوا الحل

ادمين:انا سميتي المعقول

قلت ليه: دابا غادي نحاول عاوتاني نقلب كما قالي محامي..نشوف اللي مهتم بهادشي كونطرات كيعرف يصاوبهم ونعطيه الوثائق كلها يتكلف بيها

ادمين: جوج كونطرات ياك اختي؟

ناصر:مالك اصاحبي داير لينا عرقلة فالطريق..خلينا نمشيو ندقو وجهنا من هاد الحبس ونضبرو ليك فشي قرينة تجيبك

ادمين: رجلي على رجلك اخاي ناصر

ناصر: مزوج بيك دابا انا

ادمين: وصافي اصاحبي واش باغي طرطق ليا عروقي..وصااافي مكاين غل سويسرا صافي

حبدت تيليفون قلت لناصر

هانتا ..جمع هاد الاوراق كلهم عطيهم ليا

طل ادمين صور كلشي بتيليفونو وقالي ناصر

بااااااخ شحال دالاوراق!! هادشي كاع ماطلبوهش ليا فلكونطرات لخرين ..غا النصابة ولاد لكلاب

قلت ليه : ااه حيت نتا مكلخ

شاف فيا قالي:هادي جبتيها نيشان..مكلخ وتكلخت فيها دايرينها بيا جوج مرات بتفس الطريقة

ادمين: راه القلب باغي يمشي والطمع فالهربة داكشي اللي كيخلينا نتيقو اي حاجة ماباغيينش شي واحد يقيقنا ويحبطنا اختي نهى

حركت ليه راسي قلت ليه: صعيب نديكم بجوج فدقة وحدة ..خاص على الاقل عام بيناتكم .. ناصر حيت اول واحد غنديه ماعنديش ديجا سوابق فهادشي غيقبلو واخا غيطلبو منا بزاف ديال الاوراق ولاكن نتا خاصك تسنا شوية ..

صفار وجهه بدا كينهج ويشوفينا قبل منكمل كلامي وقلت ليه

الحل الوحيد الى لقيت اللي يصاوب كونطرات نقولو يصاوب ليك على سمية دشركة وحدة اخرى ماشي على سميتي

ناض عنقني قالي

شوفي.. ديري فيا هاد الخير.. راه ميمكنش راه صاافي كتبان لي غا سويسرا..راه مانقوووولش لك .. الواليدة قالت ليا تبيع كااااع داك الذهب اللي عندها مسكينة باش نمشي ..غا شوفي كي ديري ليا الله يحفضك

تنهدت قلت ليه حيت خصني نرجع ماعنديش كي ندير دابا

قالي: واسيري اختي لاش جالسة هنا دابا هادي حياة تيليفون مشا لك الطموبيل باسوها فمراكش العصا شوية وكنتي تاكليه

ناصر: اااايه ااه ااه اه وااا ..وا مراااكش.. واش كتخرا اصاحبي خلعتيها كاع

ادمين: راه يخطفوك شي نهار هنا

قلت ليه: اويلي!!

ناصر: واااصاحبي واش مريييض جيتيني قدارنا اما نرمي مك للزنقة

ادمين: مهم اختي نهى انا عوال عليك .. غنمشي نرجع نجمع ليك وريقات كلهم

ناصر: هااانتا غتسخطني اسيمووو

سيمو: وصافي اصاحبي خلينا نننن

شرحت ليهم بجوج وبقا فيا الادمين حسيت بيه مسكين عندو امل واحد هوا سويسرا ..عطيتهم الاوراق اللي سيفط ليا المحامي ولحسن الحظ عندي محامي هوا اللي كيتكلف بأي حاجة قانونية .

عطيت امل لادمين واخا ماقدرتش نواعدو لاكن شتو تعلق بالامل اللي عطيتو بزاف وخليتو مشا كيقرا ويعاود فدوك الوثائقة وجلست انا وناصر فالبيت كنهضرو

تكيت حداه وخلينا الباب مايل وعنقني بيديه بجوج دخلني فصدرو وبقينا كنهضرو ونتجمعو حتى جاني النعاس ونضت بستو فحنكو قلت ليه غنمشي نعس حتى لصباح ومشيت للبيت حدا حفصة لقيتها ناعسة ونعست .

فقت الصباح مشيت نغسل وجهي وسمعت مو فالكوزينة كتهضر معاه وهوا كيتسف البلاطو

عنداك اوليدي ضحك على بنات الناس الله يرضي عليك ماتقولش خواتاتي مزوجين صافي نضحك على بنات الناس..يجيب ليك الله اللي يضحك عليك على بناتك حتى نتا

ضحك قاليها: جات شي وحدة تشكات ليك مني ؟

قالت ليه:لاالا الله يستر غا قلت ليك ماضحكش على بنات راه غا بنيات مساكن وكيتيقو فالرجال ..البنت كتبقا ديما تقلب على اللي يدفيها ديما خصها اللي يحن عليها واخا يكون باها حي ومها حية ديما كتبقا تقلب على اللي يقوليها كليمة زوينة ويحن فيها ..ومساكن كيجيو ولاد لحرام عا بكليمة ميضحكو عليهم ..

هز البلاطو قاليها

لااالا كوني هانيا الواليدة ماغنضحكش على بنات الناس

خرج كيضحك لقاني واقفة قدامو قالي

صباح الخير

قلت ليه صباح النور وضحكت معاه مشيت لطواليط غسلت وجهي وجلست معاهم فالطبلة ..ضار عندي الادمين مشطون قالي الباسبور نعاودو ياك ؟ درتو ومامشيت بيه تا بلاصة وتقادا ليه التاريخ

قلت ليه:ضاروري خصك باسبور

قالي: نعاودو صافي

جلس ناصر بدينا كنفطرو وقالت حفصة

كازا بااردة على مراكش..تبارك الله شتا عندكم

ادمين: غدا الرحلة اللي منضمين ..عنداكم تنساوها

ناصر: فطرو باش نتحركو تمشي نهى تشوف كازا كي دايرة

فطرنا وكان الحو بارد وزوين كيعجبني الجو دالشتا .. كنحس بالراحة فيه

لبست حوايجي كنت جيت بشروال جلد وبوت كحل طالع بروطكان ديال برادا فيه الجياب فالجناب وجاكيط قصرة رمادية غليطة بالقب وطربشو كحل ..ليستهم وهزيت صاكي خرجنا مشينا للطموبيل عرينا الباش وعطيت الساروت لناصر يسوق وركبت حداه طلقنا الموسيقى ومشينا كنتساراو فكازا ..ماخلا فين سارانا ودانا اخر حاجة لموروكو مول ودخلنا كندورو ..دزت كنتمشى وشفت الروايح وتفكرت الكادو ودخلت قلت ليه بلاتي نشوف شي ريحة لبابا

دخل معايا قلت ليه قلب معايا شي بارفان تكون زويينة لبابا

بقا كيقلب ويجرب وقالي هادي ..هادي واااعرة

شديتها نشوف ثمنها لقيتها الف وميتين ..هزيت جوج مشيت خلصتهم وناصر والادمين واقفين كيشوفو الروايح ويرشو حفصة كتعكر وتقاد وجهها ..ضرت هازة جوج صيكان فيدي بحال بحال ومشيت شديت فيه خرجنا سبقناهم لقدام وعطيتو الريحة قلت ليه

كادو دلانيف ديالك ..اللي هرست ليك

شدها بقا كيشوف فيها ويشوف فيا قالي

لالالا صافي خديتي ليا كادو ما كتباش..ماتبقايش كل مرة كادو

قلت ليه :لا خودو انا بغيت نشم الريحة فيك

شدو كيتنهد وزدنا شوية كنتمشاو ودخلت جهة المكياج كانو دايرين تخفيضات زوينة ولي باك وحاطين نونوسات كبار

واخا مكنعرفش ندير شي مكيااج ولاكن كيعجبني نشريه نخربق بيه ويكون عندي واخا كنعرف غير داكشي الاساسي

خديت واحد العكار وهزيت واحد الباك كان فيه زيت اللحم وكريمات وسبراي وبخاخ الشعر عجبني ..قالت لي حفصة وااعر ياختي

ديتو لاكيس ولقيت ناصر تما واقف شد لافاكتوغ خلصها هوا وكان حداه واحد نونوس غوز ما كبير ماصغر ماحسابنيش كاع ديالو حتى هزو عطاه ليا كيضحك قالي هاكي هادا يونسك

شديتو كنضحك عنقتو قلت ليه شكرا وخرجنا كندورو قالت لي حفصة بغات تشوف لحوايج ..

جلسنا حنا فالقهوى لفوق وعطيت لحفصة لفلوس باش تشري وجرات الا مين قالت ليه

اجي نتا ونسني..مافيا اللي يدور بوحدي

نزلو وتكيت على كتف ناصر كنضحكو حتى شفت هدى جايا مع جوج بنات كتشوف فينا ووقفات قدامنا تبسمات قالت ليه

ناصر !!

يتبع...