محتوى القصة
شفت فيها وتبسمت وشفت فصحاباتها كيفاش كيشوفو فيا مافهمتش علاش كيشوفو فيا هاكاك وانا اصلا مكنعرفهمش!! المهم ناض تبسم شبم عليها بالوجه قاليها
هدى !! صافا
سلمات عليه ونضت بحالو مديت ليها وجهي سلمت عليها وقال السلام للبنات اللي معاه
ر جهنا جلسنا وتكيت على ضهري شديت داك نونوس بحال المخدة متكية عليه ساكتة وبعدت الصاك ديالي والكادو حطيتو فالكرسي اللي حدايا.. جلسات معانا وجاو صحاباتها دفعات ليا وحدة الكادو من فوق الكرسي قالت لي بلاتي غا نجلس
هزيتو بعدتو بالزربة حطيتو حدا رجلي وشديت شكولا شو فيدي فكًوبلي كبير من البلاستيك في اللابايحدا فمي كنمص ونشوفغير بعيني ونسمع غير بودني ودايرة رجل على رجلي جهة ناصر
شافت فيا وشافت فيه قالت ليه
مال تيليفونك ؟ شحال وانا كنصوني
قاليها : جاو عندي الضياف .. جا الادمين ونهى وختها
قالت لي :امممم .. ولاكن علاش ماعيطتيش ليا تقولها ليا ؟
همس حداها قاليها
مزال مادرنا لاكط واقيلا ا هدى!!!
دورات وجهها قالت ليه
عادي كما انا كنقوليك تا نتا خصك تقوليا
قاليها:قلتي ليا جايا لمروك مول دابا؟
هدى : كن قلت ليك كاع منلقاك هنا
هضرات صاحبتها بواحد الصوت بالجهد غليض قالت ليها
هوودا..ياالاه نتحركو
هدى: عا خلينا جالسين
جا النادل قاليهم شنو تشربو وطلبو كاملين مشروبات وحطو صيكانهم فوق الطبلة حتى مابقاتش كتبان ..شفت فاللي حدايا من قبيلا كتخنز فيا قلت ليها
عفاك ..كحزي صاكك شوية
شافت فيا قالت ليا فين ااانحطو
شاف فيها ناصر هز حاجبو ضرت شديت ليه فدراعو قلت ليه يالاه نمشيو عند حفصة..انا غنمشي صافي
قالي
جلسي.. دابا يجيو ..هبطي اختي صاكك شد الطبلة كلها
قلبات عينيها هبطات الصاك وضار عند هدى قاليها مولفة تجيبي ليا صحاباتك؟!
قالت ليه علاش مالي كنت دايرة معاك. اناصر!! شنو بينك وبينها اصلا صااحبتك ؟!!
هزيت صبعي وخنافري قلت ليها
ااي ااي ء..انا امي ديالو منسمحش ليك تهضري عليا خايب تقولي صاحبتو وانا عارفها كيواعدك
ضحكو صحاباتها عليا وبدات تا هي كضحك عرفتهم كيضحكو على هضرتي ولاكن ماديتهاش فيهم وقاليها ناصر
سمعتي دابا الناس اللي كتعرف تهضر
هدى: ختي حنا ما عندنا لا امي لااا ..
ردت صاحبتها : نمي
هز ناصر سوارت على الطبلة قاليها تكعدي اختي سيري تسنايها لهيه تا تجي عندك ..
ناضت كتشوف فينا خرجات عينيها وحطات الصاك قالت ليه
نااري..نااااري تايجري عليا..هدى صحيبك تايجري عليا
هدى : صافي اسعاد صااافي.
سعاد:تي كيفاش صااافي..جالس ليك مع هاد لق٠٠٠ وكتقولي صاغي
جراتني من كتفي وناض ناصر ضرب ليها يدها طيحها قاليها تحركي سيري تسنايها
وقفات هدى :ماضربش ليا صاحبتي اناصر
سعاد عينها فيا باغا تجرني انا والكوبلي زلعتو عليها كامل بغيت نحيد ليها يدها وبقينا كنتغاوتو قلت ليها نتي اللي٠٠٠٠ انا ماشي ق٠٠٠ وهازة صبعي كنشير ليها وناصر داير يدو بيني وبينها .. جات صاحبتها لخرى مورايا جراتني من شعري حتى طحت وضار عندي بالزربة وهدى كتقوليها سعااااد ..واسعااتد . فاطمة الزهرااا
دفعها ناصر كان غيرميها من الزاج اللي كيطل لتحت ودخت بيناتهم تخلعت وهوا يوقفني جاو عندي بجوج دقة وحدة قصدوني .. بعد ديك فاطمة الزهرا وسعاد جات طير عليا ماحسيت براسي حتى عطيتها واحد الركلة مشات نيشان واخا تيقيلة دخلات فواحد المحل ديال حوايج الاطفال من الباب دالخروج ونضت تخبيت ورا ضهر ناصر ..شافوني ركلتها وجهلو عليا خصوصا خديجة جات بغات تجرني وشد ليها ناصر يديها وناضت سعاد بالغضب جات كتجري فنفس الوقت وانا شادة فناصر من اللور بيدي شتها وصلاتها وزدتها واحد الركلة اخرى قوى من اللولة دخلتها لمحل حدا الحوايج حيت جات بالجهد..هدى فالاول كانت كتفك فاللخر جراتني على غلفة طيحاتني شداتني من شعري والروينة ناضية ..هزيت رجلي بجوج فالسما حدا راسي عنقتها بيهم من رقبتها وجبتها عندي قدامي ضربتها مع الارض وناصر واقف بيناتهم بتلاصة كل مرة يدفع وحدة حتى جا سيكوريتي وحفصة والادمين فدقة وحدة شافونا مدابزين وتدخلو كيفكو ورجعت نضت تخبيت ورا ضهر ناصر وهوا شادني بيديه اللور و قال لهدى
سالينا.. صافي رتاحيتي..يالاه سيري فحالك دابا
فرقونا كل مجموعة فجهة كنهضرو كلنا فدقة ..حفصة حطات الصاك شافت فيا وشافت فيهم بالفقصة ضارت بغات طير على ديك سعاد لاكن الامن فكونا والادمين كيردها اللور وناصر كيتغاوت مع هدى حتى مشاو ووقفنا ديك الطبلة اللي تقلبات وجلسنا نرتاحو
حفصة: ااويلي ياا ويلي ماحضرتش ناااااكلهم بسناني..ديك الساااعة ضربي مها هزيها وعطي لخرى شي بونية لوحيها لتحت حدا الدروج مالكي خفتي منهم
رديت النفس كنقاد شعري قلت ليها
وراه ضربتهااا!!
الا دمين: ماحسابش ليا هدى ..قولتها ليك اصاحبي قلت ليك ما عندك ما تزمر بيها
قاليها ناصر معصب
بقات فياااا..ماجاتنيش نهزها ونحطها تبدا تبكي علياا
الادمين: واتمشي تعاود لمها ..ودابا جاتك؟!
هز ناصر يديه. قاليه: صافي تهنييينا ..كنت كنخمم كي ندير ليها
ضار عندي شاف فيا قاد ليا القب دالجاكيطة من اللور قالي ماوقع ليك والو ؟
حركت راسي قلت ليه لا ..تفو تزلع ليا داك الكًوبلي دالشكلاط كامل
ضربات حفصة فخادها كدور راسها قالت لي
ارييلي وحدي يا وييلي..هادي هي المونييتور والكيك بوكسين والرياضة باش فاضحانا نهار وليل الو بسلامة غنمشي نتريني..الو بسلامة غنمشي ندير السبور..صافي ؟ نتفوك
هزيت يدي في حيرة قلت ليها
شنو غندير راه ضربتها واش نقتلها نمشي للحبس؟!
حفصة: لوحي مهم وحدة ورا لخرى لدوك الدروج
حرك صبعي درت رجل على رجل قلت ليها لالالاا اختي يموتو ونمشي انا للحبس!! الله ينجيني
حط ناصر يدو على راسي جرني كيضحك قالي
هاا ديك على كيك بوكسينغ..ماعندي مانتسالك ..
شاف فيهم كيضحك قاليهم
كضرب وتخبا فيا كن حسابني انا بحال هاكا كن قلت ليك عطي لمهم
ادمين: ونتا براسك اصاحبي ضرب مها طير ليها سنانها
هز ناصر يدو قاليه
اش غاضرب اصاحبي ..ضرب مرى ..هي هيييا كن حسابني كن دفعتها تسلخ مهم مزيااان..مان خاصك تشوفها اصاحبي راه ضربات ديك السمرا لاحتها لهيييه..شتي فين كاين دوك الحوايج لداخل..تما وصلات جوج مرات
تقلبات القضية ضحك بقينا كنعاودو عليها ونضحكو وجيت نعز الصاك اللي حطيت ديالي مالقيتوش..بقيت كنقلب على الصاك فين هوا وفيه تيليفوني وباسبوري ونضت نوضتهم قلت ليهم اوييلي صاكي.. فين مشا
ناض ناصر ديك الساعة قلب الكرسي كيقلب وجبد تيليفون بالزربة كيصوني على هدى وهي كتقطع عليه وبدا الادمين كيصوني عليها ويعاود حتى جاوباتو وقاليها
هدى..ردي الصاك ولا غتمشيو فيها للحبس..
حيد ليه ناصر تيليفون قاليها
الو ..سمعي سمعي سمعي ماباغيش كاع نسمعك.. دااااابا غتجيبي الصاك كما هوا باللي فيه ولا غتمشي نتي وصحاباتك وراكم مشدودين قطي فالكامرات
ادمين : وااصلا البنت ماشي من هنا كبتوها الحبس واخا تنازل ليهم
ناصر : بلا متقولي ليا ماشي انا وداك الق""""وي..يا غتجيبي الصاك ددددابا دابا يا غتلقايني مع الصطافيط فباب داركم يالاه. قطع عليها وقال لادمين
الصاك بوحدو ساوي تلاتة دالمليون وتيليف جوج ونص والاوراق و يعلم الله اش فيه ..
انا : لا الصاك هاداك داير تمنية مليون
خرج الا مين راسو فيا قالي :شحال اختي نهى !!؟. الصاك تمينة دالمليون ؟!!
حفصة: وشنو يحساب ليك !! راه كولشي. اوريجينال !!حساب ليك داير مية درهم
شد راسو قالي
تمية دالمليون وشاداها فيدك وحاطاه فالارض!!! هادا خصو كارد كورد وبوسيت يرتاح فيها ..الصااك تمينة دالمليوووون!!!!
ناصر: هاهي جايا
تلفت شفتها جايا هي وصاحبتها خديجة هازينو حتى لعندنا وقالت ليه
ماشي انا اللي خديتو ..سعاد اللي خداتو ماشفتفهاش كاع
ه خديت صاكي وبغات تمشي ووقفها ناصر قاليها
بلاتي ..تسناو ..قلبي صاكك شوفي واش هوا هاداك
حليتو لقيت فيه تيليفون وهزيت الاوراق ديالي قلبتهم ولقيت كولشي هوا هاداك وقلت ليه صافي كولشي كاين
قالي:متأكدة ؟ زيدي قلبي
طل ليا شيمو على الصاك كيقلب قالي
تيلفون هاهوا ..الشارجور الاوراق ..
حل باسبور قلبو قالي
شي ديامون شي دهب ..ماكان فيه والو ؟ شي ساعة روليكس. ؟!!
قلت ليه لا هاهيا فيدي
بقا كيشوف فيا ويحرك ليا راسو وهزيت صبعي وصاكي فيدي قلت ليها
شتي نتي حسييت بيك مامزيااناش وقلتها ليه ..ولاكن هوا راجل دززززمان مابغاش يخليك ..ماتستاهليش حيت كان يقدر يتزوجك ويديك معاه سويسرا ولاكن نتي الصراحة سراقة وتساهلي الحبس..انا مغنسمحش ليك غادي ندير بيك شكوة ونأدبك سمعتي
بقات كتشوف فيا وتشوف فيه قالت لي
ختي صاكك رجع ليك ..صافي
قلت ليها : غير سيري دابا متشي ضاروري تبقاي دابا يجيو يديوك من داركم نتي وصحاباتك لمامربيينش
جراتها صاحبتها داتها وشديت صاكي عندي قلت ليه
ماتستاهلهاش الصراحة ..قلتها ليك قلت ليه حاسة بيها مامزياناش ماجاتش معاك ماشي ديال الزمان
جلس كيتنهد ويسوط وشد يدي مع بعضياتهم وحفصة كتنفخ قالت لي
سررهم ديكلاري بيهم ..يمشيو يترباو
حرك ليها راسي ورديت شعري درت رجل على رجل قلت ليها بيان سيغ ..غنديكلاري بيها فالصباح ..دابا الخمسة مشا الحال مانلقاوش مكتب الشكايات مستاعد باش يسمعنا
قالي الادمين: لاااالا حنا عندنا مكتب الشكايات مستاعد يسمعك حيت اصلا مكيسمعش
تنهدت رتاحيت من ديك الموجة ورجعنا كنتفرو شنو وقع ونضحكو ..جر ليا الادمين يدي قالي انشوف روليكس الحقيقية
وريتو يدي وناصر كيشوفيه ويضحك قاليه كتشوف فيها كتحس براسك روولاكس دياك
سيمو :وايييه اخاي ناصر.. الله يرحمنا
شاف فيا ضحك قالي
تبارك الله اختي نهى ..كنا كنشوفوكم غير فالافلام
حفصة: غاضربها بالعين بقوة اللغوط ديالك
قلت ليها :راه عيني فمراكش بقا كيهضر على الطموبيل حتى كان غيدخل فيا الطاكسي
حفصة:ها حفنا فيها
ناصر: يالاه نبدلو هاد القنت ..
نضنا خرجنا من تما ركبنا بقيادة ناصر اللي كنتمنى نسوق بحالو ولاكن كنخاف مكنقدرش ..دخلنا بلمعاريف وعلى واحد الشارع اللور فاش نزلنا لقينا واحد مول البيوش فواحد الكروسة ديال لكريب وقلت ليهم اللللله…تشهييت شي وحيدة
مشينا وقفنا عليه حتى واحد فيهم مابغا لكريب من غيري انا ..صاوب ليا وحيدة عامرة وقادها بالشكلاط وعطاها ليا ..جيت نخلصو لقيت فيدي ميتين درهم عطيتها ليه وقالي
ماعنديش الصرف ..ماعندكش شي صرييف؟
قلت ليه لا غير ميتينيات
ردها لي قالي هانيا صافي بالصحة والراحة تا لمك اخرى الى مكانش عندك الصرف
طل عليا ادمين قالي شنو شنو؟ وشا الصرف؟. هاك اخويا هاهوا
خلصها عليا وضرنا عند ناصر كان كيهضر فتيليفون ويمشي ويجي وهزيت كريب ديالي مشينا لواحد القهوى ووقفت برا قلت ليهم حتى نمكلها وندخلها
جرني ناصر قالي علاش اتبقاي هنا !!
قلت ليه حيت عندهم لا باتيسغي ..ماخصنيش ندخل معايا الماكلة نخرج على القانون
قالت لي حفصة : زييدي زيدي يا القانون
دخلوني جلسنا وحطيتها قدامي كناكل وجا النادل عندي تبسم لينا قالينا شنو تشربو وقالي
مادموزيل.. مننوع دخلي ماكلة من برا
وقفت بالزربة قلت ليه :اه اه عندك الحق ليا جو سوي فغيمون ديرولي
جرني ناصر جلسني وطواها دخلها ليا ففمي وجمع الورقة قاليه
صافي اخاي سمح لنا
النادل : شنو تشربو وسمحو لينا بزااف راكم عارفين عندنا لا باتيسغي الى بقا كل واحد كيدخل معاه شي حاجة حنا غتبقا لينا لحلوى فالراس. كن ماكناش دايرينها مرحبا ماشي مشكل
مسحت فمي بلعت وقلت ليه
لالا ماعندك علاش تعتاذر انا اللي غالطة ..سمحو ليا نتوما
قالي: مرحبا بيك شنو تشربي
قلت ليه :واخا جيب ليا الحلوى نشوفها
ضحك قالي خاصك تنوضي نتي تشوفيها باش تختاري
قلت ليه :علاش مكتجيبوهاش فبلاطو!!!
قالي الادمين: تي مالكي جالسة فالعرس!!
قلت ليه :حيت فمراكش جابوها لينا نسيتي
جرني ناصر من يدي كيضحك قالي كل قهوى وكيفاش دايرة اجي شوفي الحلوى اللي بغيتي
عشية دازت زوينة ..داز كلشي فنص نهار .ماسخيتش..رجعنا للدار قالينا ناصر بلا ما تعشاو برا الواليدة راه دايرة العشا ..دخلنا شمينا ريحة المرقة ..ريحة كتشهي
مشيت لبست بيجامتي ودخلت عندهم للموزينة لقيت ناصر واقف قدام واحد القصرية كبيرة كيسقي وقلت ليه
واش هادي هي الرفيسة؟؟؟
دوز عليها بالمغرفة قالي هيااا هادي. كتعجبك
قلت ليه امم بنييينة ولاكن كدير الصهد
قالي:هيا كااتسخن ..ولاكن الى ضربك البرد عليها كتمرض
قلت ليه : فيها السخاين؟
قالي: فيييها المساخن
قلت ليه فين ماماك
قالي:كتصلي
بقيت كنشوف فيه كيقادها وهز اللور ودرو عليها والبيض وقلت ليه
كتعرف طيب؟
قالي: شوية ..ماشي كلشي..ونتي؟
قلت ليه :غير داكشي فيت في مانعرفش نصاوب بحال هادي
ضحك قالي: وايلا كنتي متعرفي تصاوبي بخال هاديك واك نتي اللي ديال الزمان
حركت ليه راسي قلت ليه: انا ديال الزمان واخا مكنعرفش نصاوبها
شاف فيا كيضحك عطاني اللوز لفمي وقالي
اجي تعشاي
مشينا جلسنا وجات جداتو جلسات معانا ..شفت فالدار وقلت ليهن
داركم مريحة بزاف
هز الا دمين فورشيط وقالي
حيت مافيهاش الهايش مايش..
قلت ليه :شنو زعمااا ااااا..ماني …
قالي: الصدع زعما
سمعت حفصة همسات ليه قالت ليه
خليها غتزبلها
بقيت كنشوف فيها قلت ليها منزبلهاش راني فهمتك
جلس نصر مقابل معايا قال لحفصة منين جابت ديك راجل ديال الزمان و الزمان
خشات حفصة الفورشيط فمها مضغات وقالت ليه
كتسمع ماما كتقولها
قلت ليه : مابقيتيش دابا غدير لا كط مع هدى صافي؟
هز عينيو شاف فيا وشاف فيهم وشاف فمو وقالي
اشمن لاكط
قلت ليه: حيت قلتيها مزال مادرنا لاكط
بقا حال فمو كيشوف فيا وجداتو كتشوف فيه قالت ليه
القاعيط زعما؟!!!
قلت ليها: ااه الغائط
كحزات ليا حفصة السرييتة كضحك فصمت قالت لي كولي ..كولي اللوز ميعجبك اللوز مقلي
هبط الا مين راسو لتحت كيتهز بوحدو وطليت عليه قلت ليه علاش كضحك ؟!
شفت فناصر كيشوف فيا ويضحك وقالب وجهه على مو قالي
ماشي هاكاك ..بدات كتفهم قلت ليها زعما لاكط مادرنهاش باش تفهمي عليا فهمتي
قلت ليه :مافهمتش شنو زهما فهمات؟ فهمتيها شي حاجة؟
مو : نصر الدين؟!!!
هبط راسو ويديه على ركابيه جالس فوق الكرسي كيضحك وانا كنشوف فيهم كيضحكو الا انا ومو اللي بقينا مصدومين
قالت لي: اشمن كاغيط ابنيتي؟
حفصة: نووهااا كولي..نعطيك الدجاج
هبطت راسي قلت ليها حطيني لفخاد
ميل الادمين راسو قال لحفصة كيضحك والفورشيط حدا نيفو مغطي فمو
عطيها الفخاد
سكت كلشي وبقينا كنتعشاو فصمت حتى واحد ما هضر وكل شوية كنسمع صوت ديال الضحك خرج من مناخر شي واحد فيهم وكيتيعوه كلهم كيضحكو وانا ومو كنشوفو فيهم وكتقولي الله يهدي ما خلق..كليت حتى شبعت ومامولفاش ناكل ديك الكمية كلها بالليل وحتى ريجيم نسيتو ..كتر من دوك المساخن بزاف حتى جاني الصهد وتكيت فالصالة كنرتاح حتى جمعو الطبلة وكولشي وجاو عندي جلسو معايا كل واحد فين تكا وطفينا البولة خلينا غير تلفازة ومو مشات نعسات .دار لينا ناصر فيلم فداك ريسيبتور اللي شرا وكان فيلم جديد كما قالينا
صار عندي لادمين قالي
خاصك تعلمي الدارجة مزيااان انهى
هزيت راسي تكيتو شوية قلت ليه
كنهضر بزز كنعيا دغيا
جا ناصر جلس حدا رجلي شاد تيليكوموند والادمين كيشوف فيا قال لحفصة
دابا هي كيفاش تا شدات الدارجة واش غير فهاد العطلة
تكات على جنبها دارت يدها تحت راسها قالت ليه
لالا كتهضر حيت كيهضروها بزز منها فالمانيا غير هي ما كتعرفش تعبر فهمتي.. دابا كيفاش كيوقع ليها. ..كدير الطرجمة فدماغها وكتخرج ليها مزاكلة ونتا وزهرك اش تقوليك من المفردات ديال الكلمة .. مثلا. ناكلو .. فيها بزاف نتا وزهرك وشنو فايت ليها سمعات ومع الطرجمة كتجيك فسياق الجملة هي اللولة ولا هي اللخرة وتقدر تقوليك ناكلو. ولا نعالجو ولا نقصيو ولا نمونجيو ولا نعلفو كاع..نتا وزهرك وشنو هي سامعة وباش عارفة معناها فمهتي..وتقدر تقولها مقادة تقدر تخربقها
بقيت دايرة يدي على خدي كنشوف فيها وصغرت عيني مزيان وقلت ليها فين عمرني انا جبتها خاسرة ؟ ديما لاسقة كتجي ..اشمن طرمااااا اا جا؟؟؟ مكندير حتى طرماجة
حسيت بناصر كيشوف فتلفازة ويقلب على الفيلم كيتحرك حدا رجلي بالضحك والادمين هاز راسو جيهتي ناعس كيقولي هي هاا ديك ..راكي غادا فالطريق المستقلب
هزات حفصة راسها كضحك وسكتات حتى سكتات وقالت ليه بصوت خافت سمعتها
عندها الودنين .. فااايقة واخا هاكاك والملاحضة عشرة للضس
بقيت كنشوف فيها ماعرفتش اشنو قصدات ولاكن عندها الودنين فهمتها وحطيت يدي على ودني كنقلبهم جاوني صغار وقلت يمكن كتهضر على شي حاجة اخرى ..هز ناصر يدو حطها على رجلي وانا لابسة التقاشر قالي
غنتفرحو على دوقك شنو بغيتي ندير ؟
شاف رجلي وهزها كيقيص فيها قالي شحال كتلبسي
قلت ليه ستة وتلاتين
قالي الادمين : ترونت سيس فكلشي راه باينة
قلت ليه لا ماشي فكلشي..
قالي ناص ر كيضحك معايا
والوزن شحال كتوزني؟
قلت ليه سبعة وخمسين خمسة وخمسين ..دابا ستين حيت مكنديرهش سبور
مسح على رجلي قالي تبارك الله
ادمين: ماضبريش لخوك على شي سويسرية هاكا بحالك نتزوجها
قلت ليه: نضربها لك ؟
طارو كلهم لسقو مع الحيط كيطحو وكنسمع مناخفر حفصة كيفرانيو حيت ضحكتها مجهدة وكتحبسها .. اما ناصر هبط حدا رجلي كيضحك وانا كنشوف فيهم علاش كيضحو ؟. مالهم ؟
قلت ليهم علاش كضحكو ؟. مافهمتش ؟
ضار عندي الادمين بقا كيشوف فيا قالي
ماقلت والو
هز ناصر راسو شاف فحفصة قاليها
ماكيطراوش ليها بلانات قدام باباك؟
قالت ليه : اييييه .. لهلا يوريك ..ولاكن مكيديض عليا
قلت ليها :نتي راه فيك الغدر..كتهضري عليا بالمعاني واانا زعما ماحشمتيش على نيفك
قالت لي كضحك: اناري اشمن معاني..
ضار عندي ناصر قالي
هادي اللي كتقولي ليك جري بلاصتي؟
قلت ليه. : اه. . الله يستر شفتي على مكلخة
تقلب الا دمين كيضحك قاليها طنااازة تا نتي ا حفصة
تنهدت كنشوف فيهم قلت ليه حزاقة..عزيز عليه لكرور
بداو كيضحكو وقالي ناصر
شنو عزيز عليها
قالت ليه حفصة
تكركير بغات تقصد هههه
تنهد رجع اللور قالي
وافيييلم معاك
قالت ليه حفصة
ماطرا والو فاش مشيتو لموريتانيا ورجعتو ؟! ميمكنش ماتكون طرات حتى حاجة
قاليه الادمين:اواااه مشيتو تا لموريتانيااا!!! انا بخال لا سمعتها ولاكن ماديت ماجبت
قاليه ناصر:مشينا تااااا لموريتانيا وتلفات ليا كان غيهرب ليا وصمكتها واحد تصميكة وبقا فيها الحال
قلت ليه كانو غيفرعوني الشفارة
خرج الادمين عينيه قالي :شنووو!!!
رجع ناصر لور كيضحك ورجع تنفس قاليه
انا اللي قلت ليها كن فرعو مك
قلت ليه: كن ماجاش ناصر فالقوقت كن فرعوني ورماوني
شد ليا ناصر فمي كيضحك ويشوف جهة البيت دمو وقالي
هضري بشوية
تقلب الادمين كيضحك تا طاح فالارض وحر معاه حفصة كضحك وتبكي حتى حزقات وتعلات اصواتهم كلهم بداو كيتلواو قدامي بالضحك وناضو بزز رجعو بلايصهم وحفصة كتقاد حوايجها قالت ليهم بكل روح رياضية ..عادي جدا
قاليها ناصر: خودي رااااحتك بكل روح رياضية
رجع الادمين تكا على ضهرو كيضحك فشلان قاليها
حفصاا..واا حفصااا.. ريحة الميكة عطات
دفعاتو كضحك ويدها على نيفها قالت ليه
هاداك غير العرق ديال الحلبة جاي منك
الادمين: خاي ناصر شنو درتي لينا فديك الرفيسة ترفسنا
تكا ناصر كيضحك قاليه والو هادو المساخن
ادمين: هادا راه البارود ماشي المساخن
تنهدت ماضحكش حيت ماجاتني حتى حاجة كضحك والحزاق عادي كلشي كيحزق ..قلت ليهم
ديرو لينا شي فيلم غومونتيك
قاليه الادمين
دير ليها فيلم غومونتيك نكملو معاه الباقي
هز ناصر تيليكوموند كيقلب قالي نديرو اكشن
قلت ليه لالا غنمصو الطاقة السلبية ونعسو مخنوقين .دابا الليل خصنا نعسو مرتاحين
ناصر :ماانعرف واش ترتاحي فبيت واحد نتي وحفصة
هبطات تريكو على نيفها كضحك قالت ليه
اجي نعس بلاصتها الى بقات فيك
شاف فيها كيضحك وقاليها الادمين
مالو حمق.. كن كان غينعس بلاصتك هانيا كوراه طفا علينا التلفازة وقالينا نوضو تنعسو
جبد لينا واحد الفيلم قلت ليه مايكونش حزين
قالي لا غومونتيك
سكتنا تغطينا فالكواش كنتفرجو فالفيلم وكان كيهضر على الحب والخيانة
والادمين مابغاش يسكت من الهضرة هوا وحفصة ..لحت الكاشة قلت ليهم غنمشي نعس عييت
بقاو كسقولو ليا كملي معانا الفيلم قلت ليهم لا حيت مولفة مانفوتش واحد التوقيت
مشيت للبيت لقيت الكاشة محطوطة وخليتهم كيتفرجو وتكيت شديت تيليفون شوية حتى دخل عندي ناصر قالي نعستي؟
قلت ليه نو تجلس معايا شوية
رد الباب شوية وجا جلس حدايا عطيتو الكاشة تغطا معايا ولاح يدو ورايا
شفت سنسلة فعنقو ما كانتش عندو قلت ليه هادي كاع ماكانت عندك
قالي
حيديها ماعندي مندير بيها
نترها حيدها وشفت فيها قلت ليه علاش حيدتيها؟
قالي: ماعندي مندير بيها
قلت ليه ولاكن جاتك زوينة !
قالي:حسن بلا بيها
كمشها لاحها للجنب وقرب مني باسني فحنكي قالي
نهى : انا بصح باغي نمشي لبرا ونخدم تما .. ولاكن من غير الخارج باغيك نتي
بقيت كنشوف فيه مطولا قلت ليه : زعما باغيني انا نتزوج بيا؟
قالي: باغيك ..باغي نتزوج بيك وباغي نكون معاك.. من غير الخارج كنت باغيك من النهار الاول وحسابني عايشة هنا وبغيت ندير معاك علاقة هنا وماكتابش ووقع لي وقع
تبسمت كنشوف فيه وهبط راسي شديت ليه فيدو قلت ليه حتى انا .. ولاكن انا مابغيتش نتزوج ..مامستاعداش نتزوج دابا حتى نكون محتاجة للزواج والنكاح
ضحك قالي
رجع ليا شعري اللور قالي ماشي مشكل..المهم نكون انا وياك واحد..نقزو الصداقة
قلت : ليه والى مشيتي سويسرا ماتخلينيش؟ انا بغيت نتساعد معاك ماشي مشكيل ولاكن مانتكسرش..ماتخدلنيش
عنقني قالي :كنواعدك ..سوا مشيت ولا مامشيتش عمرني نغدرك ولا نخدلك..نتي الى ماعجباتكش شي حاجة اجي ديك الساعة قوليها ليها
تنهدت قلت ليه صافي اوك
قالي: توحشتك غير فهاد دو جوغ اللي ماشفتكش فيها..واصلا ماعندي ما ندير بشي وحدة اخرى عقلي معلق معاك الوقت كامل
عنقتو قلت ليه حتى انا كنفكر فيك ولاكن كتهمني حياتك ومستقبالك اكثر ..
جرني بواحد اليد حدا كتفو عنقني وباسني فوق وجهي وحنكي بقوة وشد ليا يدي زير عليها وبقا هاكاك واحد شوية على رخا ليا
رجعت اللور كنشوف فيهم وحطيت يدي على حنكو كنشوف فيه وعندي رغبة قوية نعنقو ونبوسو ..قربت منو بستو فمو وجرني بقوة تكاني مع السداري كنحس بيه كيبوسني ويضغط عليا وشوية بعد شاف فيا قالي
جوطيم
بغيت نقوليه شي حاجة ولاكن مامتأكداش مزيان من مشاعري جيهتو ..واش حب واش اعجاب ..خصني وقت مع راسي نشوف واش نشيت ادوارد !! واش بصح قلبي كيضرب ليه !!
رجع باسني وسديت عيني حسيت بقلبي كيضرب وغيخرج حتى دخلات حفصة كتنهد وترد
ااايااايايي
حلات الباب ورجع ناصر اللور ونضت جلست لقيتها واقفة كتشوفينا وقلت ليها
ماكتشوفيناش مشغولين ؟
خرج ناصر كيضحك وبقيت جالسة فبلاصتي كنشوف فحفصة داخلة كتشوف فيا وشدات الباب قالت ليا
اويييلي يا نهى !! راه ماجاتش تبوسيه ويبوسك ماشي عادي!! واش رجاء ماعلماتكش الاداب والحيا؟؟؟ ولا ديك رجاء اصلا كتاار منك من نهار تزوجات الكاوري ولات سيمتها راجوين
درت رجل على رجل وتكيت قلت ليها
قاطعتيني احبيبة وانا اول مرة نبوسو ويبوسني فخاطرنا!! ما شفتيش الباب محلول وحنا جالسين
حفصا: لاالالا نتي وديك مك قلبوكم لكور ..ولفتي تشوفي لبوسان فين ما مشيتي وكبرتي معاه ..بسيف ماتبوسيه قدام با ماشي غير قدامي
بقيت غير كنشوف فيا قلت ليها
خصني نحس بالحب ديالو ..كيبغيني وبغا يحس بالحب. يالي وحتى انا بغيت نحس بالحب واش حرام ؟!!
هزات صبعها قالت لي
حلااااااال..الحرام هوا انا اللي قاطعتكم على الحب الله اااودي
قلت ليها: ايوا مالكي دابا كتهضري ؟! واش كتفلاي؟
حفصا :اويييلي وحدي
ناضت جلسات حدايا كتشم ريحتي
وانا مبعدة منها كنشوف مالها واش غبية ولا مالها قالت لي
نتي تشاركتي معاه الروايح بقا ليكم غير تشاركو العروق وكتقولي لي نحسو بالحب؟!
نهى … نتي كتفهمي تبارك الله وذكية وركزي معايا
قلبات الهضرة بالفرونسي قالت لي
مكنبوسوش انهى .. الحب ماشي ضاروري نحسو بسه تطبيقيا.. فهمتي.. صافيالى حسينا بيه كنخليون فقلبنا ونحتافضو بيه
جاوبتها قلت ليها
وعلاش نحتافضو بيه اشمن ربح فيه الى خليناه عندنا وماعشناش بيه وستمتعنا
قالت لي
لا الى بغيتي تستمتعي تزوجي بيه وستمتعي .المشكل ديالك دابا كن كنتي غير كتجي للمغرب كنتي غتفهمي شحال من حاجة ولاكن دابا فات الفوت ..على الاقل بعداا بعدا ماتوصليش معاه للجنس وختى الى بغيتي تحسي بالحب وبغيتي تبوسيه بوسيه ماشافك حد
هزيت كتفي كنحاول نفهم وجهة نضرها قلت ليها
الزواج دابا مامستاعداش ليه..خاصني الوقت باش عاد نرتابط من جديد ونستاعد باش نشارك حياتي مع شي واحداخر …الحب ماعندو حتى علاقة بالارتباط
حفصة: غلاااط..غاالاط ماعرفت كيفاش نفسر ليك .. الى بغيتي شي راجل وبغيتي تعيشي معاه المتعة تزوجيه
جاوبتها: والى مارتاحيتش ليه من بعد ؟. نطلقو ؟ نبقا مقابلة زوج طلق. طلع وهبط
حفصة: اذا ماتعيشيش هاد المتعة اللي مزال ماقتانعتيش بيها
قلت: لا نعيشها حتى نتأكد من راسي مقتانعة
حفصة: مايمكنش
قلت: عندك نتي اما انا لا
حفصة: اذا مامقتانعاش بناصر
جاوبتها: ناصر هوا اللي فحياتي دابا ..مغنعرف راسي ونتأكد حتى نرجع لسويسرا وندوز واحد المدة ونشوف واش نزوة ديال السفر وضغوطات النفسية اللي عشت ولا بصح حب جديد حقيقي كنحسو وكنعيشو .. اما دابا منقدرش نتيق لا فنفسي اللي كترتاح معاه ولا فقلبي اللي متعلق بيه ولا فعقلي اللي كيفكر فيه على مدار الساعة.. خاصني ضاروري نرجع للمحيط ديالي باش نشوف واش انا بصح محتاجاه فحياتي والمحيط ديالي محتاجو ..مزاال غتبان ليا شحال من حاجة من بعد اللي توضحليا الصورة ..حياتي تما ماشي هي حياتي هنا و هي اللي غتقرر فاش نستاقر نفسيا ونبعد ..اما دابا راني باغاه وباغا شحال من حاجة معاه ومتعلقة بيه وكنشوفو غير هوا..وهاد المشاعر كوولها خصها اختبار يكشفها واش حقيقية ولا مزيفة ..اما الارتباط اللي كتقولي لا مستحيل نرتابط وانا مزال متأكداش مية فالمية وخاصني نرتابط عن حب وحب قوي وقناعة
شدات حفصة راسها كتنهد قالت لي
هادشي اللي كتقولي ميمكنش يتقبلو العقل ..وعلاش كتقولي تديه وتعاونيه وكتواعديه؟ هي كضحكي عليه
هزيت صبعي قلت ليها
لاا..انا مكنضحكش عليه !!
علاش كتخلطي الامور ! نتي واخا قارية وواعية كتخربقي وتخلطي الامور
حفصة: وشنو معناتها هادشي؟! فهميني ؟
قلت: انا غنديه باش يخدم ..كنشوف انسان تعرفت عليه عرفتو كيفاش داير يستاحق الافضل ..ماشي نديه باش نتزوج بيه..نونونو ..هوا انسان غيبقا فحياتي واخا تطلع علاقتي بيه نزوة ولاكن غيبقا فحياتي حيت انسان مزيان ستاحق الافضل وانا غنخليه فحياتي من بعد مللي نتأكد من مشاعري تفاهمنا.. يعني الخدمة ومعريفتي بيه بوحدها ..وعلاقتي ومشاعري بوحدهم ..وهادشي كامل غادي يتوضح من بعد فاش نمشي..الى كان حب حقيقي مية فالمية غنرتابط بيه وخاصني نتأكد من الحب ديالو ليا حيت واخا قالي كنبغيك هوا براسو غيتأكد فاش يمشي لتما ويبانو ليه مية مني داكوغ..هوا كيحس حسب الرضعية ديالو وانا كذلك ..تافقنا ونساجمنا وكانت نسية الاقتناع دكل واحد فينا مية فالمية ديك الساعة لارتباط باش نكملو مدى الحياة ونولدو الحب اللي هما لاطفال..اما الى خرج الاختبار نيكاتيف وتغيرو مشاعري ولا تغيرو مشاعرو وحنا اصلا ولاد ناس مزيانين ماوقعش بينا خلاف من غير تغيير المشاعر غنبقاو اصدقاء مدى الحياة ..
حفصة:اهاه الى طلعات ليك بوزيتيف وهوا نيكاتيف شنو ديري اختي؟
رديت: عادي غادي يعيش حياتو مانقدررش نبزز عليه الحب بزز حيت ماشي بخاطرو ..حيت تقدر طلع العكس ومستحيل نعيش الحب معاه وانا نيكاتيف وهوا بوزيتيف اوك..هادشي واضح غنطر ننساه ونبدا من جديد واخا غنعاني كما حتى هوا غيظطر ينساني ويبدا من جديد ..على قبل راحتي ..وانا كذلك على قبل راحتو ..خاص ضاروري يكون توافقحيت الحب هادا مامعاهش اللعب..يا نيكاتيف. يا بوزيتيف..المهم الانسان يكون مزيان ونواياه حسنة والباقي كيقرروه المشاعر
تنهدات حفصة قالت لي
ختي انا هادشي ديالكم مكنفهوش
قلت ليها :غير حاولي تفهميه حيت الى مشيتي من بعد لسويسرا غاتمرضي وتعاني ومايجي فين تتأقلمي ودخلي مع العقليات فعقلية وحدة حتى تلقاي راسك خسرتي طاقة كبيرة..انا مثلا كندير مجهود نفهمكم ومكنطيقش العقلية ديالكم وكنحاول نسايركم بمجهود كبير..ولاكن مكنحاولش نتأقلم ونخسر طاقتي حيت جلاسي هنا مؤقت وصافي ماكاين لاش ندير مجهود وانا جايا نرتاح
حفصة: الصراحة صعيب تتأقلم ..هادشي جديد عليا
تنهدت : صعيب بزاف..فالاول غيعجبك الحال ..غتمشي غتلقاي شعب مختالف دولة مختالفة .. كلشي يضحك معاك كلشي يتعامل معاك غتفرحي.. حيت حياة جديدة حياة مختالفة مجتمع غيير المجتمع ديالك ..ولاكن نهار على نهار غايخصك تردي الجميل..تردي المعاملة ..تردي الصنيع .. وتردي التجاوب ديالك مع المحيط والمجتمع ..وهنا غتحسي بصعوبة الامر حيت غتولي وحدة من داك المجتمع فهمتي..غتنقزي مرحلة الدهشة والفرحة والتغيير وغدخلي مرحلة التأقلم..وديك الدخلة اصعب حاجة حيت نتي غتبداي تحاولي تغيري فيها نفسك والنفس صعيب تتغير وتتأقلم وخصها مجهود كبير..غيخصك تفكري بطريقتهم ..غيخصك تهضري بطريقتهم ..غيخصك تمشي مع النضام ديالهم ..يعني غيخصك تحول باش تقدري تعيشي حيت السياحة ماشي هي اللجوء ..والا غيوقع ليك بحالي هنا فالمغرب كنعاني معاكم الصراحة مكنعرفكش كيفاش كتفكرو وطرق التواصل ديالكم وكنطيح فالاخطاء معاكم ودوك الاخطاء كيهدرو ليا طاقتي معاكم ومكنحسش بالراحة ..كنحس بالغربة هنا واخا بلادي ومنقدرش نزيد نطول اكثر حيت كنفتاقد للمحيط ديالي والناس اللي كيفهموني بلا مجهود وبلا حتى حاجة ..هنا كنحس براسي جايا من الفضاء
حفصة: عليييها كيقولك الغربة صعيبة
قلت:الغربة صعيبة على اي واحد..اي واحد كيخرج من المحيط ديالو كيمرض وكيعاني..حتى الحيوانات براسها..الدب الى هزيتيه من القطب الشمالي لافريقيا غيموت ولا يتسطا.والحوت حتى هوا ..كل واحد كيعيش مع المحيط ديالو ومع الناس اللي بحالو والبلاصة اللي كبر فيها ..هادا علاش الغربة صعيبة وكيبقا الانسان ديما عندو تفكير العودة لبلادو مستقبلا والاستقرار فيها حيت هاديك الارض هي ارضو ..اما اللي بحالي تربا بعيد كيشوف البلاصة فين تربا هي موطنه
حفصة: اودي والله مالقيت مانقول…
قلت:ناصر براسو و حتى صاحبو..معارفينش هادشي..مي غيعرفوه من بعد وهادا تحدي ليهم ..يا جلسو يا يرجعو ..والتحدي الكبير هوا للي عند ناصر معايا ومع البلاد ومع المجتمع والحياة كلها ..تما يبان الحب واش حب وسط الصراعات المقاومة اللي جاياه ولا غير نزوة كدبا عليه خلاتو يتهايأ ليه انه حب حقيقي
تخشيت فبلاصتي ننعس وقلت ليها
عمممرك تاخدي قرارات متعلقة بمصير حياتك فأوقات يكون فيها المود ديالك مامستاقرش حيت يقدر قرر واحد يغير ليك مخططاتك كلها ويدمر ليك حتى المحور ديالك
حفصة:ياختي بقاي ديما تهضري معايا فهادشي..هادشي راه هوا المعقول الصراحة الله يعطيني بحال تفكيركم نوقف بيه غير على رجلي بعدا..ولاهيلا كيقووولو لكور ناقصهم غير الاسلام .
ضحكت قلت ليها ايوا حاولي تفكري لمدا البعيد ماشي على حسب المود اللي نتي فيه
حفصة: ولاهيييلا ..كنقولو عليكم مكلخين واطرني حنا اللي طلعنا مكلخين
قلت: كن كنا مكلخين من راحنا من دول العالم الثالت ههه نتوما الخطأ ديالكم كضيعو الوقت بزاف والطاقة بزاف ..وكتعاودو نفس التجارب واخا فشلتو وعاودتو ..كتمشيو بالحظ..يعني الحياة بالنسبة ليكم كلها كتمحور على الحظ..مثلا نتزوج ونشوف واش يصدق..نخدم ونشوف واش تصدق.. نولد ونشوف واش تصدق..هادشي راه حنا عارفينو وكما نتوما كتهضرو على عقليتنا حتى حنا كنهضرو على عقليتكم ..مي حنا مكنجربوش الحظ بشي حاجة كتعلق بحساتنا ومستقبالنا حيت يقدر مايساعفناش الحظ ونخرجو منها بخسائر و نبقاو هاكاك كنجربو بلا منفكرو ..وعاوتاني حنا حياتنا ناجحة كثر حيت كلشي صريح ..هنا لا..كاين مثلا شي واحد مامتأكدش من راسو كيبغيك ولا كيتزوج بيك بلا ميعرفك مزيان وكتشاركو الحياة ..الى صدقات مزيان ماصدقاتش كتفرقو بالاولاد وكضيعو وكيكثرو المشاكل ..مي تما لا ..نسبة الزواج قليلة مي مبنية على الحب والصراحة ..حتى الى مابقاوش مفاهمين ماكيبقاش فصراعات ومشاكل كيرجعو اصدقاء ويتعاونو حريتك هي حريتك مناخدهاش ليك ومتاخدهاش ليا وها حنا مفاهمين
حفصة: واطرني ريحتنا عطاااات
ضحكت قلت ليها : حيت انا دابا بعد المرات منتفرج فالفيلم ..فمداولة.. ولا شي حاجة مغربية سيختو فرمضان فاش كنت مع ماما فالمانيا..كنبقا نقول علاش هما هاكا ..علاش كيديرو هاكا!! كيفاش كيفكرو ..وعلاش هادشي كله؟ شنو الهدف..فالاخير مكاين حتى هدف !! ..تصبحي على خير صافي خاصني نعس منقدرش نهضر كتر
فقنا بكري مع الفجر حيت كان تابعنا الطريق وعندنا الرحلة مع الكًروب فمراكش والادمين خاصو يوصل فالوقت باش ينضم الرحلة ..مللي بدينا الطريق وهوا فتيليفون كيعيط ويجاوب. وقبل ما نتحركو من باب الدار وصلنا الجدة عند بنتها حيت على حسب ما قالي ناصر كتمشي عند ولادها خصوصا فاش كيكون خدام ولا مسافر
جلست حداه ناصر هوا سايق وانا شادة كافي متكية على كتفو وحفصة اللور ناعسة
شدينا الطريق نيشان وصلنا فالوقت المناسب مع الكار دالرحلة ولقينا الاعضاء كيتجمعو ..نزلنا من الطموبيل هبطنا البابيزات ومشيت انا وناصر عاوتاني حطينا طموبيل وغطيناها وطلعنا جلسنا خدا بعضياتنا فكرسي واحد
قبل مايقلع الكار ناض عند الادمين كيهضر هوا وياه وتكيت راسي كنتسناه يرجع وانا نسمع جوج مورايا كيهرو
-ناصر واش شرا حديدة ؟!! منين جاتو ديك جي كلاسي!!
-ديال نهى ..ماشتيهاش سويسرية
-واايلي نهى عندها جي كلاسي
- وقالك اخاي ملعقااا ديال بصح حيد عليا صحاب فيلا وكاط كاط ويقول ملعق
- واايلي وباقا اصاحبي صغيرة
-وراه سويسرا هاديك اصاحبي حساب المغرب
- واييه اخاي الله يعطينا شي هزة تا حنا
-باينة ناصر لاسق فيها تديه
-تديه!!!
- هادشي اللي سمعت قالك غتديه معاها لسويسرا
-دابا ناصر صدقات ليه ولا كيفاش!!! سويسرا دقة وحدة !! حيد حيد
حسيت بيه طل عليا من الجنب قالي
نهى ..صافا كلشي مزيان
ميلت راسي تبسمت قلت ليه وي صافا ميغسي
قالي:غبورات هادي شحال ما شفناك
حركت راسي قلت ليه كنت مسافرة
جا ناصر جلس لقاه كيهضر معايا ومد ليه يدو كيضحك معاه قاليه
معاد ..فين اخاي صافا هانيا
معاد: هانيا خاي ناصر اش كتعاود ..كلشي مزيان
ناصر: الله يحفضك اخاي معاد كي غادي مع شي خدمة
معاد: سلك وصافي
ناصر: ايوا الله يعاون اخاي
طليت على حفصة اللي قدامي عطاتني صكي دالسقاطة يونسني ورجعت جلست بحال عنقني ناصر وباسني فحنكي خدا واحد الحبة دشيبس وبدينا كنهضرو .حا الادمين قدامي جلس حدا حفصة وقال
يالاه اخاي تحرك تحرك
تحرك الكار شوية زاد وقاليه الادمين وقف وقااف..تسنا
ناض بالزربة جهة الكار حتى كيبانو لينا طقيطيقات طالعين واحد هاز دربوكة ولاخر بدير كبير وبيهم شي خمسة كل واحد والآلة واللي هاز ولابسين حوايجهم عادي وجواكطهم وهازين الشكاير على ضهرهم ..دارها لينا الادمين مفاجأة ومع الطلعة والكار مهدن ولخرين تابعينو من اللور هز صبعو شاف فينا قالينا
تاق
شباق
زباا
قالت ليك مك عيشة الى كنتي حدا باب الدار جيب
ادمين والطبقة:ياوجيب وجيب وجيب
هاانتا جيب وجيب وجيب
طقيطيقات والفناير وكلامي يخليك حاير هايااا وها يخليك حاااير
الطبقة : حاير حاير حاير
هادي سااعة مبرووك
الطبقة : هايوااا
هااا واللافوكا
الطبقة :هايواا
هااو في لفلوكا
الطبقة:هايواا
من الصباح. تا لدروكاااا
ناض الكار كامل وقف كيشطح ويغني ويصور ونضت بالزربة كنسفق بغيت نخرج وزطمت فناصر بقا كيقولي
بشوية بشوية وخرجني وقفت معاهم كندور فبلاصتي حيت كيعجبوني وكنتلف فاش كنشوفهم ومكنبقاش نتحكم فراسي بالفرحة
هز يدو وبعد البندير والكار غادي قالي
اش سماك الله
قلت ليه نهااا
سكت كلشي وتلفت شفت ناصر وقف وتكا يديه على الكرسي اللي قدامو كيشوف فيا ويحضك
يااو هادي نهى زالهية
الكل:هاادي نهى زاهية
كيف القمرة ضاوية
الكل :كيف القمرة ضاوية
بديت كنسفق وشفت فحفصة قالت دارت بصبعانها حركة الفلوس اللي كنشوف دما كيديرو فالدار فاش كينطقو بالفلوس ومشت هزيت صاكي جبدت ميتين درهم عطيتها ليه ليدو وبقا كيشوف فيا قالي علقيها تنشف
بقيت كنشوف فيه قلت ليه مافازكاش ناشفة!!
قالي: هاااسلك علقيها هنا
عطاني عنقو دخلتها تما وبقيت كنشوف فيه كيفاش تنشف ولا ماتنشف ورجعش كيغني وضرت خليتو هوا وتفسيرو كنسفق
ياو هادي نهى زااااهية
الكل:هادي نهى زاهية
كيف القمرة ضاوية
ياو كحزو شوية شوي خليو نهى تشطح ليا
الكل:خليو نهى تشطح ليا
بالكندورة وشاشية وطنجية مراكشية ولعزاوي يسفق ليا
الكل: اه اه يسفق ليا
هو بالصحة والراحة
الكل:ايوا يوا
ي وهادي نهى
الكل:ايوا يوا
وهادا سيمو
الكل:ايوا يوا
وهادا شيفور
الكل:ايوا يوا
وهادا باادر
الكل ايوا يوا
قلت ليه بالجهد
وهاااادا نااااصر
كلشي بقا كيضحك وقالي يغني
فين هوااا ناصر
الكل: هاهواا
جيبو ناصر
جا راسو كيضحك علق ليه مية درهم حدا عنقو وانا كنشوف فالفلوس علاش معلقين وعاوتاني تشغلت ضرت كنشطح وهوا كيغني وعطاو لناصر طقيقطات فيدو كيضرب بيهم ويرد معاهم وانا كنسفق ونشطح الشعبي ديالي لعوج
بقينا هاكاك كنشطحو ونعنيو حتى وصلنا للاوتيل اوكاليمو فالطبيعة خارج مراكش ونزلنا درنا واحد الطرح تما ديال الشطيح كلنا حدا الدخلة ومن بعد تفرقنا مشا كل واحد لبيت يحط حوايجو وطحنا انا وحفصة على ناموسيتنا كنرتاحو
حفصة: ناري ياختي صرعها سيمو بهاد التقيتيقات .. مسخوط كيطير من المقلة ولاكن راه وااعر خطير حاضي كلشي
نضت جلست قلتها ليها واقيلا هادي اخر رحلة غندير وغنرجع سويسرا
قالت ليا
صافي سخيتي!!
قلت : شهر دابا وانا هنا
حفصة: هييه!! ولاهيلا !! داز كيطير
قلت: نمشي ونرجع ماشي مشكل..هاد المرة نرجع فالطيارة حسن ليا
حفصة:واخليينا وبرفيتيو بعدا فهاد الرحلة اللي بقات ليك هنا معانا
نضنا ديك الساعة نزلنا عند الكروب لقينا كلشي مجموع فوق وحد لاتيراس كبير ولاوتيل بلدي بحال شي رياض ..جلسنا وجلست حدا ناصر عنقني بيدو قالي شنو تشربي اتاي ولا قهوة
قلت ليه
اتاي
خوا ليا كاس وجلسنا كنفطرو ومعانا تقيتيقات كيفطرو ووسط الفطور ناض واحد وقف سفق بيديه
ااااه هااااا
تبعو لخرين كلشي كيسفق :اهياااااواااا
ااااه اهاااا هاا ااهااا ..اه اهااا..اهاااا اه اهاااا
تعالو الاوصاف اكثر وبدا يسفقو بسرعة وانا تابعاهاهم هااهوا هاهي هاهاه وصوتي مكنسمعو لا انا لا هما وواحد بدا يسبح بيدو حتى ختموها
واا مراااكش
الكل : واااهيا سبعاااااتتو رجاال
وجلس كأنه شيئا لم يكن ومكانش كاع كيسفق قال لينا
هداااا ..ارا لخبز
كملنا الفطور ونتشارنا تما فديك لاتيراس شي كيتصور شي مزال كياكل
نضت وقفت عطيت لحفصة تصورني وجا عندي داك معاد وقف حدايا
نهى صافا؟؟
ضرت عندو قلت ليه
اجي اجي هاك صورني انا وحفصة
عطيتو تيليفون ووقفت مع حفصة كنتصورو ورحع معاد قالي عطيني نمرتك انهى
ضرت عندو قلت ليه علاش؟
قالي: ندويو وصافي هه كيفاش علاش
جا عندي ناصر حط يدو على كتفي قالي كتصوري احبيبة
شاف فيه معاد قاليه
واش اخاي ناصر..
ناصر بعفوية: هاحنا اخاي معاد
معاد : وا مابقيتي كتسول مابقيتي ..كيفاش البلان اصاحبي
ناصر: غا مع الخدمة وصافي
بانت لي واحد البلاصة زوينة وجريت حفصة ليها نتصورو وبقينا واقفين كنتصورو ..قالت ليا حفصة بلاتي نسيت صاكي فوق الكرسي
مشات تجيب صاكها وجا عندي عادل ..مارديتش ليه كاع البال فالرحلة حتى صدمني ووقف حدايا هوا وراحد الولد اخر
قلت ليه عادل!! كاع ماشفتك
قالي:مشا عليا الكار مالحقتوش فالوقت ..صافا
قلت ليه:صافا ونتا صافا
قالي : مللي شتك راه ماشي غير صافا
قلت ليه :مافهمتش!!
قالي: والو المهم نتي هانيا..شتك مع ناصر مابغيتش نجي نديرونجيك
قلت ليه:لا عاادي ..كن غير جيتي
قالي:واش اونكوبل نتي وياه ولا شنو؟
قلت ليه: اه
قالي: وكيفاش اونكوبل وهوا مصاحب!! مصاحب معاك نتي ومع هدى !!
قلت ليه:لا تفارق مع هدى
قالي: واايلي.. طحتي من عيني انهى
قلت ليه: عينك!!
قالي: زعما نتي ماشي ديال هادشي..ماتيقيش بزااف بنادم راه خطار راس مالو غير هضرة خاويك
قاليه اللي معاه : شتي خالد اللي تزوج بديك الكاورية وداتو طاليان .. غير صاوب لوريقات وقلب عليها
عادل: ااه سمح فيها..راه كولشي فاش كيمشي كيتبدل ..
قلت ليه: عادي كل واحد كيدير اللي مرتاح فيه ..
قالي: ونتي تبغي اللي يكدب عليك وقاللخر يسمح فيك ؟ نتي بنت زويونة ونية..وبنتدم هنا راه غير الكدابة والمنافقين
شداتو حفصة من اللور متفاجأة قالت ليه
عااادل!!! اهلاااااان
ضار مصدوم قاليها :حفصة!! تا نتي جيتي
سمعت سمعيتي وضرت لقيت ناصر واقف متكي بيديه على الحيط اللي كيطل على لتحت وكيسوف فيا ويتساؤل وقالي اجي هنا
مشيت خليت حفصة مع عادل وشديت لناصر فيدو وهوا كيهضر مع الادمين وقالي
شنو كان كيقول ليك هاداك ؟
قلت ليه: كان كيعاود ليا على واحد الراجل مشا للخاريج وسمح فالكاورية اللي داتو
تلفت كيتنهد شاف فالادمين وقاليه
هاحنا مزال فيها..شتي الى فت انا الصويرة .. دفل عليا
جرني من يدي قالي اجي نمشيو نجلسو لهيه
مشيت معاه جلست على واحد الدرجة فيها مخدة وجلس فالدرجة اللي فوق مني وعنقني من عنقي جرني لصدرو ..شديت فركابيه اللي فجنابي وكحزت اللور كنضحك
همس فودني قالي: جوطيم وباسني فحنكي
شديت يدو اللي معنقاني حدا وجهي بستها وقلت ليه يقدر نرجع السيمانة اللي جاية
طل عليا قالي
بصح؟!! غترجعي السيمانة اللي جايا؟ بالزربة؟
قلت ليه : غنمشي نجلس شوية ونعاود نجي مرة اخرى
بقا سكت كيشوف فيا قالي
صدمتيني
قلت ليه حيت خصني نقاد شحال من حاجة ..راه عندي شغلي تما وراس العام قرب.. كنجمعو فيه الملخص ديال العام كامل والحساب كله ونخلصو ونقادو الامور كاملة باش نبداو عام جديد
عنقني بقوة قالي
غنتوحشك .
ضرت عندو قلت ليه حتى انا غنتوحشك..كنواعدك غندير المستحيل باش نديك
تنهد قالي: عرفتي شنو .. منكدبش عليك حسيت بالقنط فاش قلتي ليا غتمشي.. الضلام نزل واحق الرب..ومع هاد الجو غتكمل
تكيت على صدري عنقتو قلت ليه
نفس احساسي..ولاكن ماعرفناش شنو مخبي ليا لينا الايام ..خاصنا ضاروري ندوزو من بزاف حاجات باش نفهمو حياتنا
بقا كيشوف فيا قالي
اش غنفهمو ؟!!
قلت ليه منعرفش كيفاش نقولك..ولاكن انا مثلا خصني نتأكد من مشاعري ..شووف انا غنديك ..كنواعدك غنديك واخا مكنبغيكش..
قالي: مكتبغينيش؟! مافهمتش
بقيت كنفكر ونحاول نشرح قلت ليه
لا انا دابا كنبغيك..ولاكن منقدرش نقولها ليك.حتى نتأكد..وحتى نتا ..باقي غتأكد واش كتبغيني ولالا..انا كرهتك تكون كتبغيني بصح وكرهتك نكون كنبغيك بصح ونعيشو انا وياك الحب..ولاكن ماعنديش مشكل..انا نصبر ونخليك تعيش الا ماكنتيش كتبغيني فاش تمشي ..انا حر ونتي حرة
بقا كيشوف فيا ويتساؤل : اش كتقولي؟!! دوي بالفرونسي ولا لونكلي كاع الى عكلتي باش نفهمك مزيان
هزيت يدي تنهدت قلت ليه اوك… انا دابا كنبغيك
ولاكن مشاعري كتماشا حسب المود اللي انا فيه والحو مناسبني ومناسب مشاعري..ولاكن باش نتأكد من راسي بغيتك بصح وبالحب ديال بصح خصني نرجع بحالي..ونشوف واش غنفتاقدك ..ولا صافي غيتلاشا الحب والاحاسيس الزوينة .. ماكرهتش هادشي اللي كنحس بيه يكون حقيقي وماشي نزوة. حيت انا جيت من سويسرا مشحونة بطاقة سلبية ومدمرة ..ولاكن نتا نسيتيني الدمار ديالي كامل .. دابا غنرجع لحياتي الطبيعية ونشوف واش غنبقا على هاد المشاعر الزوينة ولا غنتبدل وتبقا ذكرى زوينة ..واش غنحس براسي تما محتاجاك وحاسة بالنقص ومقادراش نعيش بلا بيك ولا غادي يشغلني شغلي وحياتي وداكشي كامل فهمتي..ونتا كذلك ..الى مشيتي تقدر تبدل رأيك فيا..يقدر يطلع هاد الحب ديالك ليا نزوة مثلا..غادي تنفانح على واحد العالم و واحد الدولة وواخد الحياة اللي لاعلاقة بدول العالم الثالت ومن دول العالم ودولة رأس مالية ..تشوف وتسمع ماشي هي تمشي وتجرب الحياة بكل مشاعرك وبكل طاقتك وقوتك ..عاد غتشوف واش باقي عندك ديك همسة الحب ولا لا ..حياتك كلها غتبدل غير نسااا هاد الحياة وهاد المجتمع كامل..راه كلشي غيتبدل كولشي ..يقدر كن كانت فرانسا ولا سبانيا نقولو غتبقا عندك ديك همسة حب فقلبك ولاكن سويسرا ..الدول البعيدة والغنية شعوبها كيختالفو على باقي الشعوب واخا كلشي اروربا وداكشي فهمتي.. مي ماشي مشكل انا كنعذرك من دابا حيت الانسان طاقة والطاقة ديالو محدودة ميقدرش يتحكم بيها فراسو وخصوصا مشاعرو ..وحتى انا ..خاصني نتأكد من نفسي اولا .. كنتمنى يكون تطابق فالمشاعر لا من الناحية السلبية او من ناحية الاجابية باش حتى واحد مايعاني ويبقا مرتاح…
بقيت كنعاود ليه ونعضر معاه وكررت الكلام ديالي كامل بكل حرف اللي قلت لحفصة حتى عييت وحركت ليه راسي قلت ليه
تفاهمنا؟
بقا كيشوف فيا مخرج عينيه وعاقد حجبانو وعرفتو غيتصدم حيت كان كيفكر مايقولش ليا كنبغيك حتى يتأكد..وانا مابغيتش نسمع كلمة كنبغيك بهاد الطريقة العشوائية وخص يكون عندها ساس ومعنى وادلة ..مسح على وجهه وعاود شاف فيا بنفس الطريقة و
سد عينيه تنهد ومسح على وجهه بيديه بجوج مرة اخرى حتى قلت ليه
شنو قلت ليك شي عيب ؟!
قالي:
والله مابقيت عارف مانقوليك.. هادشي كيخلع وفنفس الوقت عندك الحق..مي حسيت باهتزاز ماعرفتش كيفاش نفسر ليك
قلت ليه:ياك عندي الحق؟
قالي: عندك ولا كان مم ممااا قدرش نتقبل هاد الهضرة.. وحتى ..متأ اففففففففف
هبط راسو وقلب وجهه وشاف فيا قالي بأسى
نتي كيحساب ليك طامع فيك..وو ولا باغيك تديني..راه ماكرهناااش نخوي هاد البلاد ولاكن باش نخويها وتخوي نتي مانبقاش كاع نشوفك ونبقا كنتفكرك هادي اللي مقادرش ندخلها لراسي
قلت ليه: لالا نبقاو اصدقاء ..حيت نتا عزيز عليا بزاف وتستاهل غير الخير
قالي: والى طلعتي ماا..ماا
حركت ليه راسي قلت ليه شنو؟
قالي :الى طلعتي مكتبغينيش؟ وغير نزوة
تنهدت قلت ليه كنتمنى يصدقو مشاعري ومشاعرك ..ولاكن الى ماصدقوش غادي تبقا ذكرى زوينة..بحال الذكرى ديالي مع ادوارد
جمع يديه حدا نيفو ودور وجهه قال
ادوارد عاوتاني
قلت ليه مالو ادوارد..ادوارد عمرني نساه ..واخا يسكن قلبي حب جديد ولاكن ادوارد هوا الحب الاول.حب حقيقي وارتباط واحلام و حياة عشنا فيها الحلوة والمرة ..منقدرش نسا ادوارد..الذكرى ديالو غتبقا خالدة فحياتي
شاف فيا هاز راسو ويديه ملاسقين حدا فمو وتعابير الاسى على وجهه وكيسوط من مناخرو وانا كنشوف فيه ونرمش كنتسناه يقول شي حاجة
قالي بلاتي واحد الشوية وغنرجع وناض نزل مع دوك الدروج دار يديه فجياب جاكيتو وبقيت انا جالسة كنفكر وهزيت راسي للسما قلت. ياااربي..
مزال حتى ماكملت دعوتي ضلع ليا ضميري بين ضلوعي قفزني قالي
واش مكتعرفيش باللي هوا عقليتو مختااالفة على عقليتك؟!! علاش متحاوليش نهضري معاه بالطريقة اللي كيفهم بيها بلا ماتقولي كلشي فدقة !!! نتي كتعاملي مع واحد غريييب عليك واش كتفهمي شنو هوا غريب عليك
حسيت باحساسي خرج ليا بهدوء قاليه
شووف..انا منقدرش نكدب ونقول غير الحاجة اللي كاينة..مانسمحش ليك ضغط عليا قلت ليه. احساس عندو الحق
الضمير: فاااش عندو الحق؟ واخا يحس يسكت ؟ فين هوا العقل. اللي يوزن الهضرة قبل ماتخرج
العقل: عاطل
تنهدت : دابا انا قلت غير اللي كاين فاش غلطت؟
احساس: ماغلطتيش..
الضمير: تخرج داكشي اللي عندك باش تبقا مرتاح ؟ وناس اخرين مايرتاحوش!!
احساس:منسمحش ليك تقولي شنو ندير وشنو منديرش..ديها فخدمتك وخليني بعيد عليك ماعندي باش نفعك وماعندك باش تنفعني ..وماتلومنيش انا مكنتلامش ومكنتغيرش
سمعت ناصر عيط ليا من لتحت نهااا
وهبطت كنجري والضمير تابعني
ماتسواي ماتصالحي الراجل مزيان ونتي لسانك طويل..الغبية
نزلت عندو نيشان شديت ليه فيديه قلت ليه
سمح ليا..انا واقيلا مكنعرفش نوصل الفكرة ديالي.. ولاكن نتا عندك دور كبير فحياتي..يعني عالجتي ليا واحد الجرح عمرني ضنيت يتعالج وعالجتيه بلا مادير حتى مجهود..غير الشرفة فيك والجلسة معاك خلات عندي امل فالحياة ورغبة فالعيش وحرراتني من القيود ديالي
عنقني بقوة وشد ليا وجهي قالي
انا متأكد من راسي كنبغيك انهى ..سولتيني واش عمرك بغيتي قلت ليك لا..عمرني حسيت بهادشي اللي كنحس بيه معاك… وانا متأكد وكنتمنى مايوقع حتى شي تغيير..وحتى فمشاعرنا بجوج
باسني وزير عليا بالجهد وشاف فيا قالي والله تا كنبغيك ..
بقيت كنشوف فيه حسيت بقلبي فرحان وكيبكي بالفرحة ويسفق وجميع حواسي كتنجارف ليه .. حتى القبلات كانت حنينة وكانت بنينة وبقينا تحت واحد الشجرة كنتبادلو القبلات حتى بدات الشتا كتنقط على وجهنا .. تباعدنا شفنا فالسما ودرنا القب ديالنا وتشادينا قاليدين رجعنا للاوتيل لقينا تقيتيقات كيشطحو والكروب كامل ناشط ومشيت دخلت انا وياه كنشطحو ونضحو وكل شوية نعنقو ضارو عندنا اللي كيغني شار لينا بصبعو وسكتهم قال
ياو هااادا ناصر ..
الرد: هادا ناااصر
ياو هاادي نوهااا.
الرد: هاادي نوهاا
والحووب الحوووب
الرد : الحووب الحوووب
الحووب الكتكوت
الرد:الحب الكتكووت ..
قتال الخوت
الرد: وااقتال الخوت
اللي داقو يموت
الرد: اللي داقو يموت
وانا كنشوف بعيني ، و نتشها يجي يديني ، يدفني ويغطيني.. وراني كنغرق الخووووووت ياوا هيااااا اه اه وا اهاه اه اه اهوا ااه اه اه ااهو ااه. اه اه اهوا ونا عيدك وانا عبدك وااا يهواااا ييييه
غنفتاقد هاد الاجواء.. غنفتاقد اللمة والاحباب واخا كبرت على برا ومكنتافهم مع حتى راحد فبلادي لاكن الحزن والضيم خيم عليا ..بالرغم من انها اول مجيك ليا وماكنتش متوقعة غنتعلق بيها لهاد الدرجة لاكن غيرات من نفيستي بزاف ورتاحت وتشحنت بطاقة اجابية واستغليت كل ثانية وكل دقيقة قضيتها فالرحلة مع ناصر حيت كان عندي تخوف كبير نفيق من النزوة ونودع المتعة واحساس بالحب والفرحة والسعادة.استغليت جميع اللحضات معاه وجمع ذكرايات كثيرة ليا انا وياه فتيليفون وحسيت بيه سند ليا وكيهتم بيا وكنحصلو ديما ساهي فيا حتى لاخر نهار نهار عندي فالمغرب . اللي فيه جمعت حوايجي وقررت نرجع والحزن مخيم على دارنا .. ماما كتبكي وبابا جد حزين وانا اكثر حيت غنفتاقدهم ونفتاقد لهاد الاجواء والحنان والدفئ اللي لقيتو تما ..بصراحة الاسرة مهمة بزاف فحياة الانسان ..حنانها ودفئها لا يمكن تحسو مع ناس اخرين من غير عائلتك ..يقدر تحس نوع اخر من الدفىء وسط صحابك لاكن يستحيل تعيش نفس الدفىء اللي كتحسو مع عائلتك مهما قلبتي وجربتي.. قرار رجوعي صدم الجميع..كانو كيضنر انني غنزيد ايام اخرى معاهم ..لاكن خاب ضنهم وتفاجأو وماقدروش يمنعوني . ماكتابش نعرض على ناصر لدارنا ويتعرف على بابا واخا كنت باغيتو يجي عندنا لاكن واعدني يجي عندي النهار اللي نكون راجعة فيه ..
جمعت حوايجي والشنط ديالي ..وواعدت بابا بالحج اللي كان قالي هوا وماما ..وحزمت الامتعة كلها وودعتهم بالدموع والبكا ونزلنا للزنقة نكملو الوداع ..مابكيتش ..ماعرفتش علاش!! يمكن حيت كنت كنتقبل الواقع والمنطق اكثر منهم .. وبقيت انا اللي كنواسيهم واخا حزنت على فراقهم وتقطعت من لداخل لاكن كان عندي هدف..واهداف كثار.
كنت كنسمع ماما كتردد كلماتها المتقطعة بالدموع
غتخوي علينا الدار ..غتمشي علينا ..
كنت كنواسيها ونهدنها ونواسي حتى بابا وواعدتهم باللي غنعاود نزورهم ونقدر نزورهم حتى لثلاتة مرات فالعام وباللي ماكنتش عارفة البلاد زوينة وكتعلق جميع الزوار بيها سواء كانو منها او غرباء عليها ..بعيدا على العقليات والمشاكل اللي كيعيشها المجتمع والعشوائية لاكن فيها بزاف ديال الاماكن زوينة وفيها ناس زوينين وعشت فيها تجارب كثيرة ..تعرفت على انواع الناس..لقيت الخايب ولقيت المزيان ..ومن بين اعز الناس والاقرب ليا اللي تعرفت عليهم هما ختي حفصة اولا حيت عمرني شفتها وشافتني مباشرة وكنعرفو بعضياتنا غير من ورا الشاشة..نصر الدين اللي شفت فيه جميع صفات الرجولة ..عشت معاه مشاعر مختالفة وحب نقي بطريقة مختالفة ..عشت معاه مغامرة زوينة ولمست قلبو و الجوهر ديالو عن قرب .. عرفت الفرق بين الجوهر ديالو والشكل الخارجي ديالو ..كيبان عليه شخص صارم ومعقول لاكن الداخل شخص حنون وحساس وطفل صغير العكس تماما على اللي كيبان عليه من برا وكأنه لابس درع رجل كيبان من برا مجرد رجل فقط .
مانساش الادمين..الادمين اللي ماقدرتش نعيط ليه بسميتو وبقات شمية الادمين عليه وهوا اللي ساهم فسعادتي بجزء كبير وكبير بزاف وكان ليه الفضل باش قدرت نتعرف على المغرب وعلى ناسو وجمعني بكروب تعرفت فيه على الناس المزيانين والناس الخايبين. ادمين كان من الناس اللي قراب ليا وحسيت بيهم ..تشبتو بحبل النجاة بالنسبة ليه كان قوي وعمري شفت شي واحد متشبت بهدفه لهاد الدرجة وكيدير المستحيل عليه ولو على حسب رجولته..وكما قالي واحد الكلمة بقات راسخة ليا فراسي.. رجولتي الى ماكانتش غتهزني من هنا طيرني لحياة احسن من هادي ماهيا رجلة ما عندي مندير بيها .
كان دمه خفيف بزاف ولاكن حسيت بيه ولد الناس .. ومكافح حتى كيقلب على لقمة العيش بطريقتو وعلى حسب شخصيتو وخلا الطابع ديالو فذاكرتي زوين .. دمعات عيني وانا كنسترجع هاد الذكريات كلها فطريقي للخرجة دمراكش حتى صونا عليا ناصر قالي كنتسناك فالبلاصة اللي سافرنا بيها فالرموك اول مرة .
قربت ليها وكانت الشتا خيط من السما .. وقفت كنقلب شفتو تحت واحد السقيفة هوا وادمين دايرين القب وجاو كيجريو عندي طلعو معايا وسدو الباب ..لقاني ناصر كنبكي بوحدي وعنقني بقوة وطل عليا ادمين قالي
نبكو حناااا اختي نهااا..حنا اللي نبكيو على ايامنا ماشي نتي
جاي لي الضحكة حيت وليت كنفهمو شوية وضرت عندو مسحت وجهي قلت ليه ماضحكنيش
قالي : غتسقطي
بقيت كنشوف فيه هادي مافهمتهاش..اما ناصر شفت فعينيه وهوا كيهربهم حسيت بيه حزين ويمكن اكثر مني ..شد ليا فيدي قالي اري نسوق بيك حنا غنمشيو معاك حتى لطنجة
تفاجأت قلت ليه بصح!!
قالي: اري نسوق ..رتاحي مزال الطريق تابعاك.
تبادلنا البلايص وتكيت شادة فيدو كنشوف فيا حتى نعست .
وصلنا لطنجة وجات لحضة الوداع ..بقات ليا هاد اللحضة هي اللي غنبقا ذكرى الحب ديالي من بعد مع ناصر الى طلع اختباري بوزيتيف .
عنقتو وشفت فعينيه الحزن وهوا كيشوف فيا ..باسني اطول بوسة فحياتي وقالي
تهلاي فراسك… حتى الى ماكناش نقدرو نبقاو حباب غنبقاو اصدقاء.
عنقتو وخديت من عندهم الملفات ديالهم بجوج وعنقت ادمين حتى هوا وبقينا كنشوفو غير بعينينا ..لحضة وداع جاتني قاصحة شوية وانا كنغاذر ارض الوطن وشايقة سيارتي نحو الباطو فصف السيارت وقلبي وعقلي اللور نع حبابي وعائلتي وصحابي
فطريقي لسويسرا.. جلت كل الطرقان..رتاحيت فليزوتيل..ودخلت للبلد المقيمة فيه ..البرد والجو مختالف.. شوارع خالية والسيارات غادية جاية .. اختلاف كبيير..الصراحة التجول والسفر مفيد بزاف..كيخليك تتعرف على ثقافات وعقليات مختلفة.. شفت الفرق الشاسع بين البلدان بعيني حسيت بالراحة فاش وصلت واخا بقا فيا الحنين لبلادي..لاكن اطنأناني استقر فور ما دخلت لجونيف..لقيت الشوارع مزينة والاضواء بالليل شاعلة والتحضيرات لرأس السنة .. تبسمت حيت ماكانش على بالي غنلقا الحو بحال هاكا لان المغرب ماعطاني حتى تلميح لراس العام وكان مشا من بالي.
وصلت مع منتصف الليل للدار ونزلت وهبطت الحقائب ديالي وشفت الضوء شاعل فالدار اللي تحت مني اللي كارية لصاحب ادوارد..بانو ليا من النافدة وانا طالعة حدا المحلات اللي تحت من الدار واللي كان ادوارد باعهم بثلاتة وخلا فلوسهم بالحساب اللي تحول ليا من بعد . شفتهم من النافدة محتافلين كيضحكو ومابغيتش نصدعهم واخا عندهم واحد الضيف توحشتو بزااف ، لاكن حسو بيا شعلت الضو طالعة وخرجو تفاجأو برجوعي وشفت الفرحة فعينيهم وجات صاحبتو عندي ع نقاتني وخرج جون ختى هوا عنقني وموراهم سمعت صوت سام جاي كينبح خرجني عندي عنقني وهزيتو فرحانة بيه وكنعنقو وهوا مسكين كيلحسني بالفرحة ..كان نوع شيواوا فيه الالوان مخلط بالابيض والبني وشي زغيبات فالكحل على عنقو وشعرو رطب طويل كامل مزغب..قلت ليهم
توحتو بزاف ولاكن مابغيتش نصدعكم
قالت ليا صاحبتو : حتى هوا فتاقذك بزااف
هزيتو معايا وقلت ليهم تصبحو على خير وطلعت للدار حليت الباب وشعلت الضو..ضرباتني ريحة الدار ومعاها الذكرايات..
داري كانت تقليدية بزاف ولاكن فاش جيت ليها ماعجباتنيش حيت كانت قديمة بحكم انها متوارثة ابا عن جد وقديمة ولحسن حضي جيت فالمدينة ..جبنا ليها شركة هي اللي غيرات ليها الديكور كامل والاصلاحات ورداتها عصرية وبلاصت الزليج اللي كان فلارض درنا الخشب و خليتها سامبل وحليتها كلها من غير بيت النعاس الوحيد اللي بقا معزول وعزلتو بالزاج كحل كامل بلاصت الجدار وخديت اتات سامبل عادي وتلفاز كبير..اما الدار اللي تحت مني اللي جات فوق المحلات خليتها تقليدية على الطراز السويسري هي والواجهة بخال باقي البيوت اللي ملاسقة معايا طلقت سام مشا كيجري فيها وسديت الباب عليا تنهدت حيت تابعني ميناج كبير وكبير بزاف باش نقدر نرتاح ..كل ماقدرت ندير ديك الساعة مع تعب الطريق وساعات السياقة نوا انني ناخد غير دوش خفيف بماء دافي وصابون خفيف وشعلت مجموعة المدافئ باش نرتاح من البرودة القاصية وخليت الدار كدفا ومشيت ننعس وتبعني سام لسق حدايا
صبحت على الميناج..والليكات فيدي والطابيلة والبافيت فنيفي وبديت ندور بحال الروبو على كلشي ..دزت على الفراش بدلتو وعلى الغبرة مصيتها كلها ولمعت بلاصتها والاواني اللي كنستعمل كلهم عاودت ليهم غسلة فلافيسل والحمام دزت عليه هوا والرخام ديالو اللي فالحيط بالرغوة والماء وصربتو ليه مسحة بنشافة وختمتها بدورة ديال ماكينة الصابون جمعت فيها كاع حوايجي وتكيت على الفوطوي وسط الدار كنرتاح عرقانة.. سخفت ودوزت النهار كامل فالميناج ماهزيتش راسي حتى تأخر اللي وعاودت واحد التشليلة خفيفة بالماء والصابون وصاوبت ليباط بلبيشاميل ومشيت نعست عيانة ولاكن فرحانة غنصبح على النقا ويصبح الجسم ديالي مرتاح من العيا ومن السموم اللي خرجت مع العرق .وفعلا نضت مع حليت عيني تكسبت واحد التكسيلة بيدي فالسما فبلاصتي وحليت نيفي استنشقت الرائحة الزكية ديال الشمع المعطر اللي بيت شاعل وسط الدار على قبل الريحة الخفيفة الزوينة ..نضت رشيقة متحمسة ونفسي مفتوحة مشيت للدولاب كنقلب على باش نفطر فداك الصباح الباكر .. لقيت الشوفان عندي محطوط ولاكن الثلاجة خاوية ..غليتو مع الماء وحليت واحد الساشي ديال المكسرات لحتهم معاه وزدتو معيلقة ديال شكلاط اصلي غبرة ينشطني وطحنت كولشي وحطيتو فكوبلي ومشيت لبست سورفيت سخونة بحال ديال السورف مبطنة عبارة خن كولون كحل وفيست ديال بالكولو كتسد بالسنسلة وتجبد كلها مبطنة من لداخل وسخونة ولبست حدائي الرياضي وهزيت الماء فيدي وجمعت شعري كوتشفال وخرجت سام معايا درت ليه السمطك وشديتو فيدي نزلنا للشارع وشفت الساعة كانت تمنية .. حققت لكرونو يضبط ليا التوقيت ومشيت كنتمشى على رجلي فداك الصباح الباكر مع الشوارع والناس شي غادي للخدمة شي خارج يدير الرياضة ..ضربت مسافة على رجلي حتى للجيت ضو جنب اللاك وبديت كنجري شوية انا وسام ودخلت للغابة ديال الرياضة كانت عامرة شي غادي شي جاي.. جيت نشوف لقيت راسي ضربت تمنية كيلو ميتر على رجلي فساعة .. صونا ليا لكرونو باش نرجع وضربت عاوتاني التمنية كيلو متر ديال الرجعة مشية وساعة جري حتى وصلت للشارع فين ساكنة ودخلت لمخبزة اللي تحت مني خديت طوست ديال ريجيم وقطعت الشانطي لواحد بتي مارشي قدامي دخلت تقديت داكشي اللي خاصني والماكلة دسام وطلعت بحالي للدار حطيت كلشي فالمطبخ وحيدت داز الزي لقيتو فازك لحتو فالماكينة يدور ومشيت نيشان كنقطر عاد دخلت عمرت البانير بالماء وجلست ناخد دوش عميق على حقو وطريقو
اللللله…شحال زوين للنقى.. حسيت براسي رتاحيت من العيا ديال السفر والسياقة.. الحمد لله خرجتو فالرياضة والا كان غيرجع كامل عليا يهدني سيمانة منقدرش حتى نهز يدي.. لبست بينواري الابيض وجلست قدام مراية الحمام ديالي..شحال توحشتها وتوحشت الجلسك فيها..شهر ما حطيت شي ماسك على وجهي ومادرت شي كريم..حسيت بوجهي عيان وقلت ليه اااجي نرد فيك الروح ..جريت الدولاب الكبير اللي حدايا وهزيت شعري بالفوطة فاسما مزيان وشفت فراسي يمين وشمال..باش نبدا .. حطيت يدي على وجهي لقيتو سخون ..هادي الوجيبة نقشرو .
درت ليه كوماج بواحد الالة صغيرة قشرتو كامل ووسعت البينوار من العنق هبطت للعنق وفزكت فوطة مسحت بيها وجهي بشوية ..جلست ساعة كنحط ماسك مور ماسك ونماسي بالالات الصغيرة وحكيت سناني مزيان وحطيت عليهم جيل بلونشيمو مع الكيت بيدمن مسحت شعري ودهنتو عاد عيدتو وشللت فمي وعسلت وجهي بماء وحطيت سيروم لوجهي ودهنت رجلي ويدي وخرجت حبدت بيجامتي الحنينة لبستها من بعد مانشفت شعري من الماء وطلقتو على راحتو ، ستفت التقدية فبلاصتها ودرت قفازات نقيت اللي خصو يتنقا وغسلت اللي خصر يتغسل وستفت كلشي ونشفتو وبديت نصاوب الغدا باش نجي مع الطناش نيشان .
صوابت وجبة ديال ستيك فالفران ناشف مع سلطة فيها الروز وطوماط سوغيش ولافوكا مطيشة البصلة الكروم الدرة والفول الاسود عليهم معلقة زيت العود والحامض وجلست فالصالون شديت تيليفون وتبسمت فاش شفت صورتي انا وناصر على واجهة هاتفي..تنهدت بعمق وبديت ندوز على الريبيرطوار.. بديت بماما وبابا هما اللولين وماما الثانية رجاء وخليت ناصر هوا اللخر باش نهضر معاه على رواق.
صونيت ليه جاوبني مع الرنة الاولى قالي
الو نهى ..
رديت: ناصر..لاباس عليك
قالي: نقولو لاباس شوية دابا..وصلتي على خير
قلت: وصلت الحمد لله ونتا شنو كدير ؟ اش خبارك ؟
قالي:فالطريق داخل للمغرب..فتحي لاكام نشوفك
حطيت تيليفون قدامي وفتحت ليه لاكام شفتو كيسوق لابس سو فيتمو بيضا بالسماطي وداير كاسكيط كحلة بالمقلوب .. تبسم كيشوف فيا وقالي توحشتك .. بقات بلاصتك انهى
بقيت كنشوف فيه مطولا وتنهدت قلت ليه حتى انا توحشتك ..
قالي : تسنيتك البارح تعيطي .. وماعطيتينش حتى نمرتك دسويسرة ..سيمانة وانا كنقول هايها غتصوني .. ولا ياكما وقعات ليها شي حاجة..ترونت تا صافي كنت غنعيط لباباك نسولو عليك
قلت ليه : الطريق خدات ليا الوقت وكنمشي شوية ونرتاح..وقفت فسبانيا نهار ..وففرنسا نهار ويالاه وصلت دو جوع دابا رتاحيت شوية ..حيت ماكنتش غنقدر نهضر على راحتي كما انا باغا
جا عندي سام طلع ليا على رجلي وجلس . شافو ناصر وقالي كيضحك
شكون هاداك الحيوان
قلت ليه :سام. الكبيدة ..العمرر
قالي: سعداتو
سولتو على ماماه قالي راها بيخير وعلى خير وبقيت كنعاود ليه على الطريق وهوا كيعاود ليا على وقتو اللي دوز من ورايا وقالي
خصني الوقت باش نتأقلم عاوتاني مع الوقت والجو ..من نعاو مشيتي وانا مقبوط
تبسمت قلت ليه حيت ولفتيني ..ولاكن كيفاش كنتي كتعيش من قبل قبل مانتعرفو
قالي: والله ماعرفت..كنت عادي ..بين الخدمة والكروب كنفوجو فيه وصافي.دابا رجع داك الروتين ولاكن ماقادرش نطيقو ونطيق الملل ديالو حاس بشي واحد قاجني وكنقلب وكنقول شنو دابا؟ شنو المعمول؟ مشات ماخلات ليا ماندير وراها ..تقطع ليا الراس واحق الررب
قلت ليه:حتى نفس الاحساس كنحس بالملل شوية ولاكن حيت تابعني بزاف ديال الشغل معمرة بيه راسي هادشي اللي ماخلانيش نوصل للنيفو ديالك يمكن
قالي: وا تاا انا تابعني طون ديال الخدمة..غير نتي غديريها وراضية عليها وانا غنديرها والحجر على كَلبي..حتى الاكسيجين ماكنحسش بيه.. نازل عليا واحد الضيم … ااافففف اودييي
دور وجهه كيتنهد وتلفت قالي
ماحاملش نرجع للدار وماباغي نتلاقا تا واحد..تا داك الكروب والصداع ديالو مقادرش نطيقو ..ماعرفت فين انمشي بهاد الزمر اللي ضاير بيا
قلت ليه :الى بغيتي نبقاو نهضرو بزاف نهضرو ماعنديش مشكل باش ماتحسش بالقنط
قالي:شتي مور هاد لابيل هادي مور مغتقطعي غنوقف فشي قنت ونعس.
قلت ليه : انا موراك غنقاد بروكرام ديال هاد الشهر نحط داكشي الل فراسي قبل ماتجي شي حاجة اخرى عاوتاني تنسيني فشنو تابعني
قالي: الله يعاونك ..
قلت ليه: ماعندك حتى شي هواية ؟ مكدير حتى نشاط؟
قالي: اشمن نشاط واش حنا ديال النشاط والهوايات..داك النضام اللي عندكم تما حنا ماعندناش هنا ..داك الكلب اللي مربياه راه عايش حسن من ثلاتين مليون نسمة فهاد القارة
بديت كنضحك قلت ليه ولاكن ضاروري تكون عند شي هواية
قالي: الهواية الوحيدة اللي كانت كتنفس عليا هي الماطر..كان عندي واحد الموطور ودرت بيه كسيدة ومشا وبقيت لا موطور لا موطورولا
تنهدت قلت ليه : صافي براكة جاني القبض
قالي : شنو؟
قلت ليه: جاني الضلام فهمتي
قلب وجهه كيضحك قالي كترت عليك الشكاوي
قلت ليه:مكنبغيش اللي يشكي عليا كنولي كي بحالو
ضحك قالي: شن. طن.. صافي منبقاش نشكي عليك ..وشنو دابا ماتوحشتينيش؟
قلت ليه: وراني عاد ساليت
قالي: ااه .. كنتي مشغولك..كتوحشي غير فاش كتكوني مسالية؟
قلت ليه: لك نتا راك فقلبي ولاكن كنخدمك بيك كولشي
بقا كيشوف فيا ويضحك قالي: بينك وبين الدارجة غير الخير والاحسان..بغيتي تقولي زعما كتقضي وتفكري فيا ولا انا غالط
قلت ليه :ااه كننن نن. داكشي القضاء والتفكير
قالي:القضاء والتفكير..توحشتك الخايبة
قلت ليه:خايبة؟
قالي: العكس صحيح..يالاه ا زوينة
درت يدي على خدي كنشوف فيه
قلت ليه: ماكرهتش كن كنت انا وياك دابا ونسافر معاك ولاكن عمرني نعاود نسافر معاك ونعيش داك الرعب
قالي:دابا ماكرهتيش ولا عمرك تعاودي. ختاري وحدة فيهم
قلت ليه: عمرني نعاود ولاكن الى شي مرة عاوتاني جيت نسافر معاك ماعنديش مشكل
بدا كيضحك بوحدو وقالي وهانتي دابا معايا ومامعياش
تنهدت درت يدي على خدي كنهضر معاه شي ساعتاين ماحسيتش بالوقت حتى هزيت يدي نشوف الساعة ولقيتها الربعة ونضت جلست قلت ليه صافي صافي بسلامة ويلي خصني نقاد لبروكرام
قالي: قاديه من بعد
قلت ليه:لالالا قررت نقادو ليوم من بعد عندي داكشي لاخر ..يالاه باي باي
قالي: دابا نمرتك هاهي عندي غنوصل نعيط ليك ..اوك بب
قلت ليه اوك. بب موااح
بستو وقطعت ومشيت هزيت واحد طابليط بستيلو ديالها كنقيد فيها مذكرات العمل ولا الاشغال واي حاجة تنضم ليا حياتي وجلست حليت صفحة جديد على تاريخ ووالشهر وبديت كنفكر
اول حاجة بعدا خاصني نشوف الخدمة فين واصلة ونتجامع مع لكونطابل وجيرو الاجتماع السنوي للمحاسبة .. تانيا خاصني نشوف المحامي على قبل الكونطرات ….
قيدت كل شي مانسيت حتى حاجة .دارت التمنية دلعشية مشيت صاوبت عشا خفيف تعشيت ودرت كاس دلحليب دافي ومشيت لبيتي شعلت تلقازة درت فيلم كوميدي رمنسي نعس على اطلاله وتكيت كنتفرج حتى داني النعاس.
صونا المنبه مع السبعة ..بحال العادة نضت خلطت البروتين الطبيعي ديالي شربتو ودرت ساعة الا ربع ديال الجري انا وسام الصباح ورجعت دوشت ونشفت شعري وفطرت بكاس لافوما والمكسرات واومليط بالطوست القمح ونضت لبست سروال كحل ك وبودي كول مونطي كحل و حداء رياضي ومونطو وهزيت صاكي ركبت فطموبيلتي ومشيت نيشان للماكازا ووقفت قدام بابها الزجاجي لكبير والحوايج الرياضية معروضة على المانكات من الزاج ..نزلت وسديت باب طموبيلتي ودخلت بابتسامة كنحيي العاملين فالماكازا ..لقيت شي بعض الزبناء كيشريو .. استقبلني الجيرو كان من الجنسية الفرنسية مقيم فسويسرا وبشوش الوجه اشقر ولابس ملابس رياضية عادية ..سلمت عليه بيدي قالي
مرحبا ..مرحبا بيك ..على السلامة كي داز الفواياج ؟
حركت ليه راسي قلت ليه داز زوين ..اسمتعت بيه .. شنو الجديد وكيفاش ماشية الخدمة هنا ..واش كلشي هوا هاداك
شار ليا بيدو مشيت معاه كندور فالماكازا قالي دخلنا بلاطو جديد ديال الاطفال بحكم بزاف ديال الزبناء كايطلبو ها منا ..
انا بصراحة ماكنتش كنمشي للماكازا بزاف عمرني تدخلت ..لاكن هادا اول تدخل ليا واحتكاك مع العاملين .. وراني واحد الركن قالي
كان هاد الركن ديال الكورات وكل ما كيخص تينيس ..حولناه لجهة اخرى واستغلينا هاد المكان للاطفال ..
لقيت نضرة كنشوف لقيتها فكرة زوينة ومناسبة وسولتو قلت ليه
واش كاين اقبال؟
قالي: الاقبال على ملابس الاطفال الرياضية اكثر .
قلت ليه: الا كان اقبال كثير وسع هاد البلاطو اكثر ..دخل ليهم العاب رياضية ومضارب حتى هما ..
لفت انتباهي دراجات هوائية مستفين فواحد الجهة وقلت ليه
ااه جبهتو دراجات هوائية ..مزيان
قالي: جبنا غير شونتيو ..الى كان اقبال على هاد نوع نزيدو من الدراجات وندخلو معدات اخرى
قلت ليه هاد الموضوع خصو تفكير ..عندي واحد الفكرة ناقشوها من بعد .
قالي مرحبا
تبسم ومشيت. معاه لقيت نضرة وطلعنا للطابق الثاني كانو فيه غير لكراطن ديال السلعة والسطوك والبيرو فالجنب صغير..قلت ليه الفكرة اللي قلتي ليا ديال المعدات ولا الالات كنفكر نستاغلو هاد الطبق هادا ..مايبقاش غير ديال السطوح وصافي ..
قالي نفكرو فيها ونشوفو
حل ليا الباب دالبيرو دخلت جلست انا وياه وبدينا الخدمة ديال بصح ..لقيت راسي خصني ضاروري نقرا على هادشي باش تكون عندي فكرة اكثر ونعرف نجيري الخدمة واخا هوا كاين ..حاولت مانبينش ليه باللي مكنفهمش مزيان تسنطت ليه وراني كولشي بالحرف.. كل ريال خرج من الحساب بالفاكتورة ديالو من الشركات اللي كنتعاملو معاهم وكلشي هوا هاداك بالنسبة ليا.. شفت الساعة لقيت راسي خصني نمشي عند الكونطابل للمكتب ديالو وجمعت الملف الشامل وخرجت ودعتهم ومشيت دزت اللينك خديت لي غولوفي بونكيغ باش نجمعو الاوراق كلها ييان لينا شنو دخل شنو خرج شنو كاين باش نبداو عام جديد ونخلصو الضرائب ونقادو المسائل القانونية وهادشي اللي درت مشيت عندو للمكتب ديالو من بعد ما تغديت وجبة خفيفة واستقبلني فالموعد ديالي وجلست انا وياه حطينا جميع المسائل وبدينا الخدمة عليهم بجوج لمدة صلاتة دسوايع حتى بغا راسي يطرطق اما هوا مولف عارف شغلو ..وعارف كيفاش يقسم داكشي وجمع ليا الاجمال كامل السنوي وخرجنا مصاريف المسائل القانونية للجنب وقادينا الامور وخليتو يتكلف بالباقي ويجيب ليا الاوراق ديالي . سخفت وعييت جات الستة كنت مسخسخة فيها ..ومزال تابعني ما اكثر باش نقادو لامور ونبداو سنة جديدة
مكانش يحسابني الخدمة هاكا صعيبة.. كنت كنقول البيع والشرا وصافي..وماشي حتى المجال ديالي.. صدقت ضيعت عماين ديال القرايا على التصميم والازياء غير هاكا..كن كنت عارفة شنو مخبي ليا الزمان كن بديت نقرا الجيستيون من اول. نهار ليا فالمدرسة.. مشيت انا قريت داكشي اللي كيشبه ليا وكنرتاح فيه وكنميل ليه غير حيت انا باغاه ..ودابا كيفاش نخرج راسي من هاد الروينة اللي طحت فيها والمشكل المحامي كيهضر معايا كندير راسي كنفهم وانا زرقة والمحاسب كيشرح ليا وانا زرقة والجيرو كيوريني الاوراق وانا سطلة وكلهم مقولبين فيا مافراسهمش باللي هاديك اللي كيهضرو معاها مطنكة وكتعرف غير تصاوب شعرها وتصبغ دفارها وشرب شوكولاشو وتنعس مع توقيت سام وتفيق بكري باش تجري صافي هادي هي حياتها وهادشي اللي كتفهم فيه والباقي كيجيها بحال الشينوية .
حطيت دوك الاوراق عليا فوق الطبلة وسط والدار وهبطت راسي على يدي بغيت نبكي
شنو غندير دابا انا فهاد الروينة جاتني البكية..
حضرت عقلي يلقا لي حل باش نفسي ترتاح
وهزيت يدي في حيرة كنشوف فنفسي
نفسي: شنو دابا غنديرو انا تدركت وتضغطت وتزادني هم ماكنتش ضاربة ليه الحساب وهادشي فرق طاقتي
عقلي: نهى ..غير بشوية ..ماشي بوووحدك اللي مطنكة.. عادي قريتي التصميم والشراوط غادي تقراي التسيير
نفسي: بغيت نقرا ونتعلم هادشي تابعني تابعني ولاكن بغيت داكشي بالزربة مافيا اللي يصبر
خاطري: انااا مضغوووووووط..ماعندي طاقة لهادشي ولا جهد ماقابلش على هاد القراي
شديت راسي قلت ليهم : شنو غندير دابا انا تافقو على حاجة وحدة ..خاصني الخاطر يبقا على خاطرو ..النفس تكون متحمسة
عقلي: نتي مراجية انهى.. سمحي ليا نقوليك واحد الحاجة بلا ميتقلق الخاطرو ويهز عليا..نتي عام ونتي كتشخري كن على الاقل طليتي على شنو واقع فالدنيا كن راكي هاد العام شديتي شي زقيقة من داكشي اللي حاصلة فيه دابا حيت بزز منك غادي تمشي تقراي ..وتعلمي.. ها الماستر قراي على الجيستيون ..حيت الى ماقريتيش عليها ماتعرفيش تزيدي القدام ودوك المداخل هما اللي غيشريو ليك صاك ارميس وصباط لوي فيتون ويصاري ليك دفارك فالكوين فرانش
نفسي: يااك ..بصح الصراحة راني طايحة فواحد اللبسة عاد خرجات جديدة فديور وكتسوا التمن .. وشي تسافيرا لسانتوريني وسبرديلا دالكوتشي… هيييه اما واحد شانيل..ميمكنش غادي نموت على واحد تريكو دالصوف عندهم و…
عقلي: وا بقاي تعلقي فين تفلقي ..بغيتي هادشي كامل نوضي وتحركي ولا شي نهار ديرو فاييت وترجعو لالمانيا تككمشو كااااملين
نفسي: لالالالا غدا نبداو لقرايا
خاطري: دااابا نيت..انا شكون يهزني ويفرحني الى درنا فاييت !!
بقيت كنشوف فيهم وهزيت تيليفون ديك الساعة كنقلب فين نبدا القرايا فأقرب وقت ممكن حتى خرج ليا قلبي قالي
واعيطي لناصر ..مسكين توحشتو
عقلي: دابا علاااااش خاوج لينا واش. حنا فيك ولا فالقرايا ولا فييين كتخرج تخربق لينا كولشي
نفسي: لالالا عندو الحق الخاطر ماعندو خاطر حتى هوا ياك متافق معايا
شاف فيا خاطري كيتمسكن قالي .الى جات على خاطرك
قلت ليه :ونتا جات عليك
قالي: جات عليا
قلت ليهم صافي نعيطو ليه نسولو فيه
عقلي: والقرايا؟… وصاك شانيل وصباط ديور
قلت ليهم : لالا بصح القرايا هي اللولة ..نسبقوها عاد نعيطو لناصر
قلبي: واغير دقيقة ..مادات ماجابت
نفسي: اه غير نشوفوه قبل منعسو
تنهدت وبديت نشوف فعقلي بص عين وكنحبد نمرتو وهوا يقولي
تااافهة …تاااافهة تافهة تافهة واشوفي شكون يشري ليك روز رايساللي ساوية الملاين دابا ديري فاييت اما ناصر غتعيط ليه فأي وقت القرايا اللي ماعندكش الوقت ضيعيه فيها وكولشي واقف عليك
هزيت راسي وتيليفون فيدي تنهدت وقلت
صافي غلبتي..غلبيتي صافي
عقلي: دخلي طلي دغيا باش تبداي التسجيل غدا واخا تكون بريفي ماشي مشكل يالاه سربي
دخلت كنقلب ونقلب ونقلب ونقلب حتى بدا راسي كيميل فبلاصتو وخرج ليا قلبي قالي
هييه..راه خصنا نشوفو ناصر نسيتي
عقلي: صافي عييت غنعس حتا لغدا
حسيت براسي غيطيح وحطيت تيليفون فوق الطبلة ومشيت لفراشي نعست
صبحت على الروتين ديالي الصباحي وبديت اول حاجة مشيت تسجلت فمدرسة خاصة لقيت راسي غنخلص فلوس نيت ولاكن ماشي هباءا منتورا وغنقرا ونتعلم واخا ماعنديش رغبة فداك الميدان ومكنتميش ليه .لاكن ماعدي مندير بزز مني وماشي لخاطري والا غادي ندير فاييت بسبب الاستهتار .. من موراه مباشرة مشيت عند المحامي بغيت نزيدو خدمة اخرى ديال لكونترات لاكن رشدني باش نشوف مع مستشار قانوني ، مشيت عند المستشار قانوني عرض عليا مسطرة قانونية طويلة عريضة وعطاني معلومات ماكنتش اصلا عارفاها بخصوص الشركة ديالي لاكن استفادت منو باش حتى الى لقيت شي واحد مكلف بالكونطرات نكون عارفة المراحل كلها بلا ميضحك عليا حتى شي واحد.هادي من جهة . رجعت بحالي نرتاح فالدار ودق عليا صديقنا اللي كاري عندي ودخلتو قالي بغيت نجلس معاك شوية ..قلت ليه واخا جلس .كان باغي يهضر على ادوارد وصداقتنا ولقاني اذن صاغية ليه بقيت كنسمع وكنتنهد على موتو .. قالي الى حتاجيتي شي حاجة نعاونك فيها هنا فسويسرا بحكم انكي ماشي من هنا مرحبا منكن نعاونك .بقيت كنشوف فيه ونفكر وقلت ليه بغيت نسولك ..واش كتعرف شي واحد مثلا يتكلف ليا بكونطرات بلا منطلع ونهبط..بغيت جوج كونطرات لجوج شباب من المغرب يجيو يخدمو عندي بسمية الشركة
قالي. وي بيان سيغ ..كاين فوقاش بغيتيه
قلت ليه: ماكرهتش نهضر معاه فاقرب وقت ممكن..انا موجودة
قالي: صافي نتكلم معاه ويجي نقابلكم
شكرتو حيت غاينقص عليا الخدمة ويالاه نتكافا مع القرايا ومع المحاسبة المالية اللي مزال ماسلات وخدامين عليها .
تافقنا وكل واحد مشا يشوف شغلو وبالليل دخلت لبيتي نرتاح وبغيت نتاصل بناصر لاكن سبقني وتاصل بيا وفتحنا الكامرة .. لقاني غندخل الفراش نرتاح وقلت نسمع صوتو عاد نعس وجلست كنضهر انا وياه ونتجمعو ..ماخلينا حتى موضوع ماجبدناهش حتى بديت كنميل وتكيت فناموسيتي حطيت تيليفون قدامي وحتى هوا حطو قدامو ونعس كيهضر معايا وانا كنهضر ونشوف فيه حتى نعست .
ضرباتني الفيقة بالليل لطواليط ولقيت تيليفون قدامي قرب يطفا وهزيتو لقيت الكام باقا محلولة والضو ضارب فوجهه وهوا ناعس خاشي نيفو فالتنية ديدو على كرشو وكيبانو غير عينيه وشعرو ..تنهدت وماكرهتش كن كنت حداه نعنقو ونبوسو فدوك الحجبان ودوك العينين ونلعب ليه فشعرو ونعس حداه . بستو من الشاشة وحطيت تيليفون يتشارجا ومشيت طواليط ورجعت نعست.
حياتي ولات بحال شي مراطون ..كنمشي كنجري نقرا ..ونرجع كنجري عند الكونطابل..ونمشي كنطير نتقدا ونرجع كنجري ونمشي كنجري وكل ليلة نفتح كام انا وناصر ونبقاو هاكاك حتى كنعسو حتى رجعات عندي عادة وكنقط فاش كيكون خدام ولا مكيشدش ليه الريزو فالطريق وهوا سايق واخا ماخلا مادار ..جوب جميع الكارطات والفورفيات باش يشد ليه فالاوقات اللي يكون سايق ونبقاو كنهضرو باللي لاكن والو..كيشد شوية وغير كيفوت وتحد البلاصة كيمشي وكنبقا انا نتلوا فبلاصتي كنقلب على النعاس. سخفت
جلست على الفوطوي نرتاح وحطيت يدي على وجهي لقيتو ناشف ..
هزيت تيليفون ناخد رونديفو ندير شي سوان ميديكال لوجهي حتى دق عليا جون اللي تحت مني ومشيت فتحت ليه الباب لقيتو هوا وواحد غريب معاه وصاحبتو ..تبسمت وسلمت عليهم ودخلو عندي رحبت بيهم وحطيت ليهم قهيوة وجلسنا ..عرفني جون على الشخص اللي معاه وقالي باللي هوا اللي غا ي يتكلف ليك بالكونطرات ويجيبهم حتى لهنا .. لاكن خاصك ديري ليه وكالة التصرف على اساس انه مدير الشركة غير بالسمية ..قلت ليه زيد شرح ليا مثلا ..حيت انا هاد مدير الشركة جاتني كبيرة
قالولي: مهمة بزاف باش سقدر يتصرف باسم الشركة ويصغر المسافة ويطلع الكونطرات بسرعة
جبدو ليا ورقة بيضا كبيرة فيها غير جوج سطور الوسط صغارين بزاف وقالو ليا هادي هي الوكالة ومكتوب فيها غير توكيل على الشركة كمدير لمدة شهر وصافي تنتاهي الوكالة
مد ليا ستسبو ماخلانيش نفكر وكنشوف فديك الورقة فيها غير شي جوج سطور صغار وصافي..
حضر عقلي ووقف قالي
نهى… ماتوقعيش واخا يكون اللي بغا يكون .
جملة وحدة خلاتني نحط داك الستيلو على الوقة وقلت ليه
اوك ..خلي ليا شوية ديال الوقت باش نفكر .
قالي لالالا ماعندك مناش تخافي وحنا ديزامي ونخاف عليك اكثر من اي واحد اخر .
بقا كيهضر بزاف ورون ليا عقلي وكلهم كيهضرو ويقنوعني وضارو بيا كل واحد كيشرح لاكن انا بقيت ساكتة وهزيت ديك ك الورقة غير بشوية طويتها بلا منشوفها حيت ماخلاوش ليا حتى الفرصة نقرا .قلت ليهم صافي واخا انا غنوقعها ونهبطها ليك
قالي وعلاش وشنو المشكل وراه فترة وجيزة
رجع هوا كيحاول يقنعني واخا القضية فيها كونطرات وماعندو ما يربح منهم ..اشنو سبب هد الالحاء وهاد الاقناع ..كونطرات متعلقين باشخاص اخرين يعني هاد الالحاح جاني ماشي عادي..والموضوع مكيطلبش كان شي حاجة اللي غندم عليها مثلا وهما كيحاولو يقنعوني كأنني الا موقعتش غندم ..خسيت بيهم بغاو يعيشني فدور وفوهم اللي اصلا مكاينش ومايستاهلش المجهود ديالهم كامل
طويتها وخديتها قلت ليهم اوك ..غادي نوقعها ونجيبها ليكم
رجعو عاوتاني كيتراجعو على التلحاح وبغاو نرجعهم ليهم الورقة ولاكن بطريقة مختالفة ما قدروش يقولو لي رجعيها لينا ..لاكن انا احساسي ماكيكدبش عليا..حسيت بشي حاجة كدور مانعرف..وحساسي قالي خليها عندك ماتعرفي تكون لصالحك حيت الوضع مكيطمنش ونتي محتاجاه ..لاياش؟. مانعرف المهم احساسي قالي غتحتاجيها خليها عندك اما احساس الشك بالخلل فكان قوي .
رديت عليهم بنفس اللباقة بلا احراج ونضت بشوية حطيتها فواحد الدولاب حدا التلفاز وبديت كنحاول نصدرهم ونردع فطريقة فنية كما هما بداو كيحاولو يقنعوني نوقع ديك الساعة بطريقة فنية ونفس الوقت كيحاولو معايا نرد ليهم الورقة.. بقينا فداك الفن جرني نجرك وحتى كيقربو يجروني ونردها بلا احراج وكيرجع عقلي واحساسي يوقفوني ..رجعت حمرا معاهم باش نتفادا الاحراج وفنفس الوقت تبقا عندي الورقة حتى خرجتهم كيشوفو فبعضايتهم وسيفطتهم بالابتسامة والطاقة ديالي قريات تنفد ليا معاهم عاد مشاو وسديت الباب ومشيت كنجري عند ديك الورقة هزيتها كنقرا كنلقا تما شي مفاهيم غريبة!! اشنو هادشي؟ شنو كيعني بهاد المسطلحات؟ انا ماشي بزاف باش جيت لسويسرا والمشكل حتى الفرنسية ديالي مواصلاش هاد المستوى هادا..نكون انا اللي غالطة؟ الفرنسية ديالي ديال الحوار فقط قليل فاش كنفهم اللغة القانونية ولا نتعمق فيها وعلى قد جهدي . صورتها ورسلتها للمحامي قلت ليه عفاك شرح ليا شنو المقصود بهاد المسطلحات وشنو مكتوب فهاد الورقة .
تاصل بيا ديك الساعة قالي
مدام نهى اشكون عطاك هاد الورقة؟
قلت ليه هاشكون وهاشكون وقالي
عنداك توقعي عليها..ديك الورقة فيها وكالة على جميع الاملاك اللي كتملكي بما فيها الحسابات البنيكة والشركة والسيارة والمكازا ووووو
بقيت مصدومة وقالي لابد تخبري الشرطة بهادشي الى ماكنتيش نتي اللي موافقة تعطي لهاد الشخص الوكالة ..وهاد الشخص مدخل معاه شخص اخر فوكالة وحدة
بقا كيشرح ليا وانا مصدومة حاطة يدي على فمي قلت ليه كان غيتنصب عليا
قالي :خبري الشرطة فأقرب وقت
قلت ليه صافي غادي نخبر الشرطة .
قطعت معاه وجلست مصدومة كنشوف فديك الورقة وماجاتنيش حتى نبلغ بصديق العمر ديال ادوارد واخا مادارش بوجه العشرة وماعندوش علاش يحشم
شديت الورقة وتاصلت بيه ديك الساعة من تيليفوني قلت ليه
شكرا على المساعدة ديالك ليا وفعلا نعمة الصديق وخصوصا وقت الضيق .عطيتني درس جديد فالحياة وخصوصا فالصداقة
وقطعت ماخليتوش يجاوبني..تسنيتو يعيط ليا ويفسر ليا ويوضح ليا ويبرهن ان داكشي كدوب ويدافع على راسو لاكن ماعيطش ..خاب ضني وخيبة امل واحساس مابغيتش كاع نعيشو ويعكر ليا مزاجي ..موقف مابغيتش كاع نتحط فيه .
بقيت جالسة كنفكر فشنو كان غيوقع ليا واخا كنت مواعدة نفسي منوقع على حتى ورقة حتى دوز للمعاينة ..لاكن بداك الالحاح والدورة اللي دوروني..ناري كن وقعت !! كن غاب عقلي وترفعت وسط منهم ووقعت..اشنو كان غيوقع ليا!! كنت غنمشي فيها .
سمعت ابواب السيارة كيتزدحو بالليل وطليت من الشرفة الصغيرة على الشارع شفتهم كيهزو الشنط ديالهم فسيارتهم وماقدروش يهزو الراس يشوفو جيهت داري..اصلا مابقاش عندهم الوجه اللي يشوف جهة الضو اللي شاعلة ..ديك الساعة ركبو ومشاو وبقيت انا كنقول
كن دابا كنت فشي بلاد اللي مافيهاش القانون !! كن قتلوني ولا دارو ليا شي حاجة باش نوقع. جاب الله جيت فسويسرا القانون مكيرحمش ماقدروش يديرو ليا حتى حاجة ومشاو
عيطت ديك الساعة لماما قألمانيا كنعاود ليها من كثرة الصدمة متقدرتش نجلس بقيت غادية جايا كنعاود ليها وقالت لي
قلتها ليك انهى ..قلبي كان حاس وقلت ليك ماتيقيش حيت صاحبو وغادي يحسدك على داك الورث.وكيقول باقا صغيرة وباغا غير تعيش وتتمتع ومعرفاش والبلاد جديدة فيها..وصيتك قلت ليك ماتيقيش ..مللي بغيتي تخليه فالدار صافي خليتك على خاطرك وحاسة غيديرو ليك شي حاجة وكنوصيك فكل مكالمة
تنهدت قصت جبهتي قلت ليها : تصدمت .. قلت ممكن يسرق يكدب ولاكن ينصب عليا بحال هاد النصبة هادي!! هادي متوقعتهاش..هانتي شوفي شنو كاتب ليا فالورقة الى كنتي تقدري تفهمي وشوفي شنو كان غيدير ليا ..كان غيدير ليا فاييت بديك الوكالة ..وصاحبتو حتى هيا..اففف زعما لعجب
ماما: ونتي كتعرفي هاد الدراري اللي باغا تجيبي من المغرب؟! علاش كتقحمي راسك فالمشاكل انهى ؟! هانتي شفتي الصداقة وعشرة العمر شنو خرج منها ماحتارموش حتى صاحبهم مسكين اللي مات
قلت ليها: هادو كنعرفهم..ناصر ماي بوي فراند ماشي بحال هادو
ماما: نهى..راه الانسان مكيبانش على حقيقتو الا فالمواقف..ماتقوليش ليا بوي فراند ومزيان.. انا من هادشي اللي وقع مكنضحكش كاع تجيبيهم ..راه عندك شغلك تلهاي فيه اماما ..عااندك بزاف مايدار فير غديري راسك المشاكل بهاد الكونطرات
وقفت تكيت على كونطرار ساهية فدفاري وكنفكر وقلت ليها
لا قررت ..غنجيبهم لهنا والى ماصدقوش صافي ..المهم انا قطعت معاهم وعد منقدرش نخلفو واخا يكون اللي بغا يكون..انا ماطامعاش فيهم ولا فشي حاجة تجيني منهم ..كانو ولاد الناس ودوزت معاهم وقت زوين يستهالو نعاونهم على قبل داكشي اللي دارو معايا وديك السعادة اللي حسيت بيها معاهم . منقدرش نخدلهم
ماما: المهم ردي بالك.. توقيع ..لا ..اوك ..حتى تأكدي من الصحة ديالو والمحامي ديالك راه يوريك كلشي ..
حرك ليها راسي وسمعت لنصائحها وقطعت معاها
مشيت نكمل نحفظ شوية حتى لليل وبحال العادة شويت بلاصتي وصونيت لناصر وتكيت كنشوف فيه لقيتو كيتعشا ..سولتو على ماماه قالي مشات عند ختو ..ختو اللي هي خالتو وكبر معاها .
تكيت كنشوف فيه وهوا كيتعشا ووهوا كيحك سنانو وهوا كيغسل طبسيلو ورهوا كيقاد بلاصتو… حطني مقابلة معاه ووقف حدا البلاكار قالي غنبدل
قلت ليه اوك
حيد الحوايج الفوقانين كلهم ويقا عريان عطاني بضهرو جبد الحوايج وضار عندي كيشوف فيا وكيقلب سو فيتمو ..شفت فيه باعجاب وحطيت يدي جهة صدري قلت ليه بلونكي
عندك تضاريس زوينة
ضحك وانا كنشوف فالتضاريس ديالو وقالي
عجبوك
قلت ليه وانا كنشرح بيدي جهة صدري
عندك جسم جداب.. يعني مختالف على الغرب
خرج راسو من تيشورط قالي
حنا العرب ماشي هما الغرب..حنا راه مزغبين عليهم
قلت ليه: اه انا عارفة ..ولاكن ماشي زغب مقرف
قالي: لا كاين اللي بحال القرد..حنا دمنا سخون واقيلا على داكشي مزغبين
قلت ليه :يمكن..نتا مدايرش نفخ عضلات
جمع يدو كيضحك حدا الشاشة قالي وراني العضلة يارزة وعروقها بارزين قالي مابانش ليك هاد النفخ ؟
قلت ليه: اه باين ماشي طبيعي
هز حجبانو كيضحك قالي: اشمن نفخ !! منفخوج بالخدمة وهز التقل حط التقل ..الطريق وفوق منها فاش مكتلقا اللي يهبط ديك السلعة كنهبطا راسي
قلت ليه: كاملة !
قالي: كوللللها ..كنت فالاول كنتقطع ..اللحم كيقطع فيا..دابا عادي ولات كتجيني بحال الهبطة
قلت ليه: حاول على راسك ..حيت الصحة مهمة
قالي: مهمة والخبز حتى هوا باش تربي الصحة مهم
قلت ليه : الصحة الى كانت مخدومة على الصح وشوية بشوية مزيان اما اللي منفوخة بالابر والبروتين لا مصالحاش
لبس كابيتشو ديالو حكل ولا القب على راسو وتكا دار يدو ورا راسو وهزني قدامو قالي
رجعتي للسبور ؟
قلت ليه رجعت كندير غير المشي الصباح والجرى مزال مارجعتش مع الكوتش ديالي.. خاصني نقاد بروكرام نعاود نضم اوقاتي
قالي: مزيان لانسان يكون من منضم
تنهدت قلت ليه : مزال ما لقيتي شي ريزو زوين يشد ليك فالطريق ؟
تنهد قالي: واحبيبية راكي عارفة الريزوات ديال هنا كيدايرين ..تفوت داركم يمشي الريزو كامل
حليت عيني قلت ليه : ااه نسيت..عرفتي ليوم شنو وقع لي
قالي بتركيز : شنو وقع ليك ؟
يديت كنعاود ليه وهوا كيسمع وختمتها بدي على فمي عضيت شنايفي قلت ليه
الحمد لله ماسنييتش
قالي: نااااري..ولاد للل… برافو عليك مزيان مللي ماوقعتيش..مانو ناويين يديرو ليك ميسسسة..بناقص كاع من هاد الكونترا
قلت ليه لالا رادة بالي ماتخافش.. علاش لبستي حوايجك؟
قالي: علااش؟ هههه نبقا عريان
قلت ليه: الجسد ديالك مثير ..
ناض جلس حيد. حوايجو قالي
هاهوا يالاللة
تكا على ضهرو هز يدو ورا راسو كيشوف وقالي
نتي عندك الدار ..اما انا مسخنها غير بالصهد ديالي ههه
قلت ليه حنا عندنا كيحيدو زغب كامل..الجسد المثير هنا هوا اللي كيكون فيه عضلات ورطب مفيهش الزغب
قالي: يمكن اول مرة تشوفي شي واحد هاكا نو؟
قلت ليه لا اول مرة ..المشكل ديال الرجال هنا كيحيدو اللحية ..كيحيدو الشعر ..كايحيدو كلشي.. لدرجة البنات كيفضلو يعايشرو السومر والافارقة .. الرجال الغرب بحال الاطفال.. قليل اللي كايبقا كما هوا .. اما اللي متعلق بالاثارة وداكشي كلهم متبعين هادشي اللي قلت ليك
قالي: حتى هنا ..حنا عندنا البنات عاوتاني مكاين غير نفخ ..نفخ الصدر نفخ لكر .. نفخ الفم ..نتا خارج وهما دايزين حداك بحالللل..بالبگر صدرها لقدام وطرمتها اللور
مكتعرفها غادية ولا جايا بكثرة النفخ
قلت ليه: كيديرو التجميل
قالي: والله ماعرت اش كيديرو ..كياكلو شي حاجة هادو ..
حطيت يدي على بزولتي مصدومة قلت ليه كياكلو الدوا باش يديرو الصدر ؟!!
قالي : والله مانعرف..مهم داكشي ماشي عادي …ياكما تا نتي نتفخة؟
رجعت اللور قلت ليه لاااالا الله ينجيني
حليت الصدقة على صدري كنقيس فيه ونعكبز ونتأكد ونقول شنو اللي بينو منفوخ حتى سولني هاد السؤال . حركت ليه راسي قلت ليه
لا طبيعي!!
دور وجهه قالي : غتبيتينا بلا نعاس هاد الليلة
قلت ليه: سولتيني !! اشنو اللي بان ليك فيه ماشي طبيعي
شاف فيا قالي وااغير سولتك ..غطي داك الصدر غطيي
سديت الصدفة وبقيت حاطة يدي حتى قالي
واحيدي يديك خلينا نهضرو ..الليل هادا والبعد والوحدة غنباتو كنستحلمو
قلت ليه :شنو هي نستحلمو؟
قالي: قارية الدين شوية؟
قلت ليه: قارية القرآن قارية شوية .. الحمد لله
قالي: معارفاش اشناهوا الاستحلام؟. وشناهوا الغسل من الجنابة؟ وشناهوا الوضوء
قلت ليه: الوضوء كنعرفو.. لخرين لا
حل عينو قالي: دابا نتي مزالة مجونبة من العام اللي فات على هاد الحساب
يتبع...
التعليقات
لا توجد تعليقات بعد، كن أول من يعلق.