صاحب اللحية السوداء الجزء 13

واقفة قدامو كتڤيپري وكتطلب من الله متدخلش دابا وتحشمها قدامو وتخليها عليهم بزوج ، اما هو دار يدو فجيبو هاز حاجبو لسماا متبع عينين رحمة ل كيتحلو ويتسدو بتوثر ، قال مقوس عينيه وبنبرة صوت قوية ~ علاش خليتيها مشات راسها

مولفة كتمشي بوحدها ؟؟

رحمة بصوت مرعود عضات على فمها كتبرر ~ لا اخويا راه مشيت انا وياها ، غير سخفت وسبقتها خليتها ورايا كتغسل شعرها راه يله كيف دخلت

حرك ليها راسو بالله يجعلني نتيق ، كان موقفها قدامو وكيسول بحالا جالسين فكوميسارية مرحمهاش شوية وتگر بلا عصا من ديما كتخاف ومعزيزش عليها المشاكيل وعمرها دارت علاش ... شوية سمعت صوت دقان في الباب هنا رحمة مشات عند الله ورجعات

للحياة قلبها كتسمعو في وذنيها كيزدح الخطوة مبقاتش قادة تخطيها قال بأمر مگاود مع الباب ~ سيري حلي على ختك نشوف هاد الحمام ل بقات فيه تال دابا

جوباتو بصوت ضعيف بالكاد سمعو ~ واخا اخويا !!

مشات تجر في رجليها وكتمتم تحت فمها ~ اميمتي اميمتي فينك وتعالي طلي على هاد لحريرة ل ميجمعوها شراوط ، كون لقات دوك دروج يطوالو وميتحدوش تبقى غا هابطة ومتوصلش لباب تودر عليه ويتعكس ميتحلش والموصيبة كان واقف وراها يشوف شكون ... باش متزيدش تعَيَّقْ حلاتو على وسعو حاسة بسخفه وهي ترجع فيها الروح ملي شافت صباح ل قدامها جايا ببيجامتها معندها ل يحكمها تقول كتسارا فبيت نعاس رمات عينيها على غلام ل غير شافها خسر سيفتو ودرگ عليها وجهو اما هي لحنت صوتها وسمعاتو ليه ، صافي البيبان ل كيديو ليه تسدو في وجهها وعرفات عمرها مزال تجمع بيه مشا منها وداتو نجمة وهي بقات وغتبقى مشوية عليه مابيدها مدير من غير تشوف فيه وتنهد لا هو من صحاب لعينين زايغين ولا بوبنات ل غيخون مرتو معاها طبعو شارباه ما مدارش لحرام تا وهو زوفري ويجي يديرو دابا ؟؟ ...خبطت حناك رحمة بسلام بلعاني وقالت كتغمز فيها وتقرص ~ رحمة لاباس عفاك كلمي ليا مريم ؟؟

رحمة عضات على فمها بمعنى اش كاين ونطقت ~ راه في حمام !! كنت انا وياها انا سبقتها وهي مزال مجات بغيتيها فشي حاجة ؟؟

خبطت على جبهتها بلطف وقالت ~ سبحان ل ميسهى نسيت راه قالت ليا غادا ليه صافي ملي تجي قوليها سولت فيها انا مشيت

عطاتها بظهر وتسنات حتى سدت رحمة الباب ومشات بالخف لدارهم لقات مريم ورا الباب كتطل من شق ، قالت وهي طالعة في دروج ~ تبعيني الموصيبة ليوم سلكاتك منها رحمة قالت ليه مشيتو الحمام نتي وياها وخلاتك وراها !!

مريم تابعاها مخلوعة تخاف متحشم ، خرجات ونسات راسها وتحلات حتى تصدمت وهي راجعة من طوموبيلت خوها ل واقفة قدام الباب كحلت بلعما وعرفت ليلتها كحلة وهي تقصد غا صباح ل فكت ليها جرة دخلتها لطواليت خشات راسها تحت روبيني سرداتو غسلت وجهها ودارت صابون لعينيها حمرتهم عطاتها سطولة وفوطة راس ورجعتها تحلف عليها الا بصح كانت في سخون

طالعة هازة سطولة وكتنهج وتمسح وجهها وتعاود لقاتو واقف في وجهها شافتو وقالت كتسخفن عليه ~ خوياا سلام مدت ليه يدها وحطات دوك سطولة وسط دار دايرة يدها على قلبها كتقن فن الثمتيل ~ اووف سخفت لحمام شحال عمر ورا ممشيتي ارحمة !! لعار مدي ليا كاس لماا على وقفتك

كون لقات تقجها تا يخرجو عينيها بالحق دازت في وجه غلام ل واقف حاضي لفيلم هز يدو وقال بنفخة ~ طلعو تشربو اتاي بعدا وتكون الهضرة

غير غبر من قدامهم وحسو بيه طلع في دروج مشات رحمة سورتت الباب وگفضت كمامها وجات ليها تسب وتعاود ~ والله ما كتحشمي ابنت لحرام !! كنتي غتخرجي عليك وعليا ، شحاال ساعة فين بقيتي تال دابا قلتي ليا شوية ونرجع هادي هي شوية كون بتي في زنقة حسن

ميقت فيها ممسوقاش ، اشارت ليا بيدها بمعنى سكتي وقالت ~ هنينا دابا يسمعك وديك ساع عاد يورينا !! ياك دازت هاد المرة ايوا صافي مديريش من حبة قبة بقيت مع البنت في دارهم محسيناش بالوقت حتى داز

وقفت غادا لبيتهم ورحمة وراها كتحيد جلابتها وحيدات حوايج نجمة ل كانو تحت منها مگفضاهم شداهم كمشتهم ولاحتهم في ماريو حيدات صندالة من صاك وكلشي رجعاتو لبلاصتو دارت زيف حياتي ولبست بيجامة وكتدنن ووحدة حداها غتموت بالفقصة

وهي مكيناش هنا ، خرجت ودارت مبغات وسلام لقات رحمة حاضياها ودموعها دايزين كانت على سبة خاصها غا علاش تبكي ، قربت منها كتنغز فيها وتدوي معصبة ~ دابا مالك دايرة لينا مندبة ؟؟

رحمة كتهز في كتفها ~ اخرر مرة ديري ليا هادشي معرفت منقول لخوك وتا دابا طلبي من الله مرتو متقوليه والو حيت عاقت

مريم هزات حاجبها بتعجرف~ بغاتني نضربها ليها بشي نتفة تحل فمها وديك ساع نوريها واكلة دگة واكلاها مهم ندير علاش

رحمة وقفت كتمسح دموعها بجلايلها ~ زيدي طلعي راه كيتسنى فينا وفرقي عليك البنت وفرقيني عليك معاها

طلعو لسطح تما كانت طبلة على برا وكراسا نجمة حاطا صينية ودوازها جالس غلام كيكب اتاي تا وقفو خواتاتو ، هزات نجمة عينيها فيها بلا حول عقلها ممستوعبش كيفاش كذبت عليها وتيقتها دغيا دارت سيناريو فدماغها ومثلاتو ونجمة حيت ضبعة تيقاتو ، مقدتش تدوي معاها سكتت مد ليها غلام كاس اتاي خداتو من عندو في سكات وكلاو في سكات حتى نطق هو وكسر داك صمت وقال موجه هضرتو لخواتاتو ~ داك خيطي بيطي لزنقة نقصوه تا حد مكاين في دار مجاكم الحمام تال ليوم !! وملي عينيكم تمشيو قولوها ليا ديك سااع

جوبتو مريم كتنقز ~ اخويا راه كان خاصني نمشي ضرووري وراني طلعت صباح عند نجمة وعلمتها وقلت ليها نيت تمشي معانا ومبغاتش خافت تسخف فيه مع سخونية

ضار لعندها كيشوف فيها لقاها حالة فمها ، كتكذب عليها في وجهها بلا حشمة بلا حيا ،بغات تنطق وهي تشوف شوفات رحمة المترجية ونعلت شيطان وسكتات كتفكر كيفاش تقولها ليه ، معندهاش مع كذوب ومتبغيش راجلها يعيش فدار غفلون كون كانت عارفاه من نوع ل متفهم ومتحكم فراسو غتسارحو دغيا ومترددش ولكن عارفاه يدو سابقاه خافت يدير شي كارتة تندم عليها هي حياتها كاملة

خلاهم مجموعين على صينية وهز كاسو وهبط لزنقة يكمي ليه شي واحد وستغلت تما نجمة الفرصة وقالت مخنزرة في مريم ~ سمعي نقوليك هادي دازت مرة اخرا والله منعقل عليكم انا ممولفاش نكذب على راجلي

مريم جغمت من داك الكاس بصوت مسموع وقالت كتعوج فهضرتها ~ وشكون قاليك كذبتي عليه ؟؟ راه بصح كنت في حمام حيدت زيفها من فوق راسها ووراتو ليها سارد، شفتيه يعني غا كوني هانية مكذبتيش على راجلك غير حيت كنت في الحمام مع صباح ومبغيناش نقولوها ليه حيت غلام سكتات وافأفت وقالت من نهار تزوجك مبقاش بغانا نجبدو سميتها فدار خسارة مدوزوش لقليل هادوك زوج بالحق عادي تاحاجة مكتدوم

قالت هاد الكلمة اللخرة مطولة

لاحت ليها كلامها غير بالفن كتستفزها بيه وفالنفس الوقت كتمسكن ودور بعينيها مع رحمة خلاتها تلونات ومعجبها حال جالسة كتسمع على راجلها هاد الكلام وسمية صباح باقة فوذنيييها كتعاود متنكرش احساس بالغيرة انتابها

خلاتها كتنوي فدماغها شي حاجة مكيناش ومكاينش ل كيخرج على لمرا من جهة راجلها قد شك ، كانت على سبة وهرموناتها مزاگينش واستفزاز مريم ليها وموضوع صباح ل بنسبة ليها مزال متطرقش معاه حيت عمرها جبداتو هي وياه رجع كيحوم ليها في الدماغ ، دوزت ديك لعشية ماشي على برجها غير مساعفة ومكابرة غلام غبر عليها مطلع حتى اذن لعشا وفات كانت كل مرة تطل من شرجم بتخبية واخا منبه عليها حاضية باب جارتها باغا تشوف شي حاجة وخايفة منها

هادي حالة المرأة فاش كتغير، عيبنا واحد وكل وحدة فينا كيفاش غيرتها دايرة بقات من شقيقة كطل تا بان ليها جاي هاز ميكة فيديه ونيشان فتح الباب ، مهزش عينيه فجييهة اخرى طلع نيشان دخلات بحالها لبيت طالقة شعوورها

بزز منها تغير عليه علا ماشي راجلها وبات ولدها ل جاي !!؟ راجل بحالو الف وحدة تمناه راجلها ومن نصيبها وشنو فيه ميتبغاش واخا عارفة ومتاكدة منو بلي ماشي من نوع زهواني ... من ديما وفكل مرة كيخرج معاها عينها كتكون عليه كتلقاه كيشوف قدامو ولا حاني راسو شوفة مكيشوفش في نساا الا مجابتها صدفة وصافي ، طريقو حافظاها ووقتو تقاد معاها من خدمة لدار دار خدمة ونهار مكيكونش خدام يخرجها يساريها ولا يدوزو هو وياها ، هادشي كلو يخليها ترتاح ولكن بعض مرات الشك كيقتل والشيطان كيوسوس وحيث هي كتبغيه بزز منها تغير من صباح عليه ، كتبقى كانت معاه قبل والعلم الله شنو دوزو هي معارفاش ...عمرها تجرأت تسولو وعمرو فصح ليها بشي حاجة كتبغي غير تسل الهضرة من لسانو باش يريح قلبها ل كينبض بيه وشاعل بالغيرة من جيهتو ولكن مكهنيش بالها ساد داك الباب وموضر سوارتو وهي موضوع صباح واخا تعيا تنساه كيفكروها فيه بزز منها ، كيبغيو يقيسوها في نقطة ضعفها ل هي غلام وحبها ليه كيبغيو يشعلو العافية فقلبها وينكدوها عليها ويفكروها بلي نتي غير دخلية جيتي فرقتي بين زوج كيبغيو بغضياتنم ، كيبغيو يخليوها تشك فحبو ليها وبلي ما هي الا مرا تجبر يتزوج بيها .....

شافتوو طالع هاز فيدو وهي تمشي كتجري تقاد حالتها عزيز عليها تشوف راسها بعينيه واخا تكون فيها الموت كتبغي تقاد وتبان زوينة ، سرحت شعرها وطلقاتو ورشات ريحتها ومشات جلسات قدام تلفازة دارت راسها كتفرج....دخل عليها وحط الميكة فوق طبلة وقال كينصل في دجاكيط ل لابس ~ شوفي شنو جبت ليك !!

قلبت الميكة فرحانة عمرو نساها ديما مفكرها بداكشي ل كيعجبها ، لقات شوية سقاطة والفواكه الجافة غمزها وقال بعدما جلس لايح ايدو على كتفها ~ حتى نتعشاو وحطي لينا شوية نتقوتو بيهم ونشدو ليه

بابتسامة جانبية حركت ليه راسها بواخا كتفكر فشي دخلة تبدا بيها كلامها عندها متقوليه ، حتى نطق وقال كيشوف في ساعة ~ داااك الميخي تاع عبيد معرت واش دخلل ولا مزاال !!

قلت حاطة راسها على كتفو وكتلعب فصباعو ل على كتفها ~ تبارك الله راه راجل ميتخافش عليه !!

غلام بنبرة قوية ل سمعو يقول كيتناقش ماشي كيدوي ~ الالة يجلس مع خواتاتو يعمر دار ملي نكون في خدمة واحد فينا يبقى هناا !!

نجمة بغات تشوف شنو فراسو منها تعرف ردة فعلو الا بغات تعاود ليه على مريم ~ علاش زعمة مدايرش فينا ثيقة خايفنا نخرجو !!

حيد يدو من على كتفها وقال بنرفزة ~ وااا الله يهديك !! ميق فيها وقال معوج فمو ~ تخرجو ؟؟ بغيتوني نهرس لشي وحدة فيكم ركابيها ، قبيلة غا دوزت تاع الحمام ونعلت شيطان ، بغاو لحمام تتكون الواليدة وتديهم معندناش لبنات ل يخرجو يديعو فزناقي يتزللو عليهم رعاوين

نجمة تنهدات وقلبت ليه الهضرة وقالت ~ غيرة ولا حكام

غلام ضربها لنيفها بخفة ~ سميها كيفما بغيتي قاليك ربط تلقى متسيب ...مابغاو يقراو يتركنو تا يجيهم رزقهم وديك الساع الله يربح بنادم خاصو علاش يحل فمو بنات فلان وخواتات فرتلان نصدق مكحلها مع شي حد راك باااقا معارفاني مزياان شفتي مني غا شوية

خلعها خلاها غا كدور فعينيها وكتشوف اش بقى عندها متقوليه ترزى فيه وهي باغاه ومحتاجاه فحياتها ،سرطت الهضرة ل عندها ليه وقررات لكلام مع لكبيرة اما غلام دمو حامي وسخون ومغتقلبش لراسها على خراب حياتها ، حسات بيدو طالعة نازلة مع ظهرها بورشها وترخات جرها من خصرها وقربها ليه وخشى يدو فجيبو جابد منها بركة تاع لفلوس وحطها ليها فوق طبلة وقال ~ هاكي هاد الاماانة خزنيها عندك !!

قالت بسم الله وهزتها كتشوف وعينيها كيسولو ~ ديالاش هادي!!

اشار لكرشها وقال ~ نوجدو ل داكشي ل جاي !! بلل فمو وقال كيعبر بيديه ومرة مرة يحك لحيتو لمضلمة ~ كل مرة نعطيك ل قسم الله خزنيه عندك باش نهار تولدي ان شاء الله نلقاهم

بدات كتفشس عليه بدلال عفوي وقالت حاطة يدها على كول تريكو كتلعب فيه ~ غدير لياا سبوع وتذبح الحولي ؟؟

غمض عينيه ونزل لعنقها باسو حتى دغدغها ورجع حال عينو فيها وقال كيدوي بجدية ~ الا حياااااني الله غنذبح ثور !! ومغنديرش سبوع ،حرك ليها صبعو بلااا وقال ،غندييير عرس !! العرس ل مدارش ليا غنديرو لولدي ونفرح بينا ان شاء الله

حسات بالبكية والفرحة مشاعر مخلطة ، غرغرو عينيها دغيا مسحتهم بطرف صبعها وقالت ~ الله يجيبو على خير يارب

باستو فحنكو وقالت من جديد محدو باقي رطب معاها ~ غلااام نسولك !!

جمع ليها شعرها ورا ظهرها محرك راسو باه ~ مالك شنو !!

بححشمة وحناك مزنگين ~ مندمتيش حيت تزوجتي بيا !!

شافت فيه هز حاجب ونزل خوه وهي تكمل وقالت ~ زعمة بغيت نقول راك عارف زواجنا كيف كان ؟؟ لتكون كنتي باغي شي وحدة اخرا وتفرضت عليك انا وسمحتي فيها شنو زعمة مكنتي كتبغي تا وحدة ولا حاط عينيك

كحاز عليها شوية كيشوف فيها ويعاود راخي عينيه ومهدن ، كانت حاضيا ملامح وجهو ل معرفتش تفسرهم كتسنى فيه يدوي يريح قلبها يقوليها كاينة غا نتي وباغيك غير ونتي ل حبيبتي ، هضرة الافلام ل كتحلم بيها وكتعجب كل درية وكتبغي تسمعها ولكن هي تلاقات مع واحد خضر مجندر كلام المعسول جاهل فيه ومكيفقه فيه والو معندوش معاه ، شابك يدو كيضور في صبعانو وقال كيضحك بنخوة ~ دابا انا كنقول ليك تولدي غندير عرس ونفرح بينا ونتي باركا عليا مندمتيش حيت تزوجتي بيا !! كون كنت ندمان ابنادم غتلقايني جاي مخشي فيك كوراني حاطك سطل بلا تقرقيب تشوفيني كي لهلال فينما ندخل عندك نرسم على جبهتي الله يقربلها منقوليك تا سلام !!

هزات كتافها كتلعب بشعرها وقالت كتعوج عليه فهضرتها ~ واش ممنحقيش نسول راجلي ونريح قلبي ...قوص حجبانو فيييها كتحمقووو فاش كتبدا تشيطن وتعوج كيحسها بنت صغيييرة شد يديييييه خدى يديييها وصطهم كيبانو صغاار قدام عضمة يديه الكبار حقق فيييها لقاها كتشوف فيييه كتسناه ينطق بشي حاجة يخلي قلبها يرتاح والغيرة تلاشى

نطق هاز راسو وقال ~ من حقك تسولي على راسك !!

رجع سولها كيخمم~ دابا ل شاغلك هو واش كنت مع شي وحدة قبل منك

بللات حلقها وهي كتشوف فعينيه لي كيشوفو فيها بأريحية ويديييه وسط يديييها كيدوزو ، رخاها بهاد الطريقة ~ اه

تبسم شبه ابتسامة وهو حاضيها وعايق بيها باغا تعرف وباش ميخليييهاش كتخمم جاوبها فالحين ~ نتي لي هنا حط ليها يديها على صدرو جيهة قلبو ورجع كيشوووف فعينيها ، وعمر هاد العينين تحطو فشي بنت المرا من نهار وليييتي على سميتي مكتووووبة

ضيقت فيه عينيها منفخة وقالت ~ غير حتى وليت على سميتك يعني قبل متزوج بيا كانت شي وحدة في حياتك !! شنو سميتيها صباح يااك

طلع حجبانو فاهم واخيرا الموضوع ل كياكل فدماغها يعني سامعة بصباح وبقصتو معاها ، جاوبها في ساع باش ينهي هاد الموضوع لي معاجبوووش يهضر فيه هو جاي وباغي يرتاح معاها ، وهي كتنبش وتسول على وحدة عمرو حس بيها ولا واعدها بشي حاجة نطق زاعف ~غنقوليك واحد الحاجة ودخليها هنا قاس راسها بصبعو ونطق مخرج عينيه ، غنجاوبك غير باش نتهنى من هاد سمية ل بغاو يلصقوها فيا صحة وبزز ، ديك سيدة عمرها كانت ولا غتكون جامعانا شي حاجة من غير جورة والله ينعل اصل مها جورة درنا معاهم زوين ندمونا ....تعصب وتقلبت گانتو فدقيقة خلاها غير كتشوف فيه كيفاش تعصب عاد كان لاباس بيخير وعلى خير بغى ينوووض وهي تشابك يديها مع يديييه وكتنيييييم عينيها فيييه باغا تلييينو ومتخليييهش معصب، قربات لوجو وباستو بجهد ونطقات ~ متقلقش مني ، غير بغيت نعرف واش راجلي ممشاركاني في بغوك تا وحدة وصافي ..طول فيها شوفة كيحرك راسو حركات دائرية بمعنى معامن انا وقال ~ تا انا جاوبتك من غيرك مكايناش بنت لمرا لي نهز فيييها تا نص حاجب

حطات راسها على صدرو فرحانة بكلامو عنقاتو وقالت وهي مخشية فيه غكير بالفرحة ~ الله يخليك ليا يارب

وما حلاها جلسة جالسين بزوج بيهم وثالتهم ل جاي في طريق في الكرش كيركل في مو قفزت في حضن غلام تقالت اي بصوت مسموع ،ضحك ضحكة خاترة عليها وقال حاط يدو على كرشها كيتحسسها ~ وصل علييه الوقت بدا يركز تاني ها ؟؟ قالت ليه اه مذبلة عينيها وجاوبها كيضحك ~خلييييه يدير ما بغى

علات راسها فيه وقالت مقوسة حجبانها ~ باش عرفتييه ولد والا كانت بنت !!

جمع وجهها بيدو وقال كيتسارا عليها بعينيه ~ معنديش مشكيل ل جابو الله مرحبا بيه ، واش انا كنت معول على هاد الخير ل عايش فيه باش نتشرط دابا ...تنهد من قلبو وقال حاط راسو على راسها كيدوي ويشوف بعيد ~ وهبني الله حياة كيف ناس مستقرة وليت نعرف راه من بعد نهار كاين ليل غا ندخل ونتركن نتخشى حدا مرتي نعس مخشي فيها ، وليت نتجمع على طبلة في الوقت ونضرب الهم لغدا ، خفيت من شوية الجعرة ل كانت فيا ووليت نخدم عقلي حيت عرفت كاين ل كيتسناني

مكنتش هاكدا انجمة جيتي تبدل فيا بزااف هاد غلام ل قدااامك بفضلك نتي ولا عندو حياة

حسات بضيم طاح عليها وبعينيها جايين بدموع تخشات فيه معنقاه بجهد مكرهاتش تدخل وسط ضلوعو ،كلامو اثر فيها بزاف وكيف هي كانت عندها دور في حياتو زوينة تاا هو مركز حياتها جا نقذها من شحال من حاجة دار ليها العز وخرجها من القهرة والحگرة وذل ل كانت عايشاه ولات عندها حياة واستقرار واخا مكاملش ولكن كلشي مع الوقت يتقاد حيت لا بد من عثرات في الاول وما بعد العسر يسر

مكرهتش لو فرحتهم ل كانو كيحسو بيها فنفس اللحظة تبقى للابد بالحق لا ضلام حزن يستمر ولا نور فرح يدوم حياتنا تقدر تقلب فلمح البصر داكشي علاش الانسان يخلي الايام تدير ل بغات وكيفماا بغات ...

سيمانة ل دوزت لكبيرة وخليفة بعيدة على دار دازت على بناتهم طايرة اما على نجمة كانت ثقيلة بغات امتى يرجعو لدارهم باش تتهنى على راجلها من طيش خواتاتو خافت من موضوع مريم ليتكرر مرة اخرة وترجع تخرج ويعيق بيها غلام وتكحال القضية ما هنات حتى سمعت واحد صباح صوت شيخها وعدوزتها عاد رتاح بالها وبغات تنعس على جنب الراحة سااعة شكوون خلاك ....

كانت جالسة مريم حدا لكبيرة حامية فيها البيضة كتمشي وتجي شعلات فيها العافية كل مرة تطل من شرجم وترجع تجلس حتى زفت عليها لكبيرة بمخدة وقالت كتغوت ~ واااااا ريحي الارض وسدي داك الشرجم دابا يشوفك شي واحد من خوتك ؟؟

قالت بارتياح وجلست مقربة من مها ~ غلام وقتو معروف تال لعشية وعبيد را ناعس وحدة وزوج والا فاق ، وقفت كتشوف وقالت ، انا غنطلع لسطح نشوف لمانطة واش نشفت ولا لا يومين باش نشرناها

حركت ليها مها راسها بلا حول وكملت على تفراجها كتاوب باقي شاد فيها لعيا تاع طريق ، اما مريم طلعات دايرة سبة وغرضها كان باين قصدت نجمة نيشان ل كانت في كوزينة كتطيب ليها باش تتغظى من البيض البلدي ل جابو من لعروبية ول عطاتها منو لكبيرة وهو وشي باروك دازت غير على وجه غلام وخليفة اما متدوقهاش ، دخلت عليها مريم بلاما دير الحس وقالت بتمسكين ~ نجمةة ختي !!

قفزت حيت كانت ساهية وضارت لعندها شادة على قلبها وقالت مخلوعة ~ قفزتيني ديري غا الحس مالك !! خدات تنفسها وحركت يدها بمعنى مااالك !!

مريم عضت على قنانفها وعينيها غير كيدورو ~ بغيت غير نقوليك راه صندالة ل خليتي عندي تقطعات ليا وديتها تصاوب وانا غنمشي نجيبها ليك اختي سمحي ليا عطلتها عليك

حركت ليها نجمة راسها بنفي وقالت شارباها ما وكيف قالو لوالا الذيب كتدار بيه غا مرة ~ لا غا خليها معندي مندير بيها بلاما ديري بيا سبة وتخرجي ، داك المرة دازت وهاد المرة غنقولها لباك منك ليه ديك ساع ، لاحت ليها كلامها ودخلات لبيتها وسدات طالع ليها دم من هاظ الموضوع ، كيفاش بعلوكة بغات ترجعها لعبة فيديها تحركها كيف بغات نهار توقع ليها شي حاجة تلصق فيها ،مريم تعصبت وعينيها ولاو حمرين تقطعت على زنقة باغا تخرج وربي كبير هبطت لعند مها فيساع وقالت بكذوب ~ مي راه نجمة بغاتني نتسخر ليها انا نمشي دغيا نجيب ليها اش بغات ونجي غا لصيدلية خاصها شي دوا سالا ليها

لكبيرة قالت بعدم فهم ~ اويلي على تسخري ليها ؟؟ مولفة كتجيبي ليها شنو بغات ؟؟

مريم كانت لابسة واحد كسوة لاحت عليها جلابة ودارت زيف وكتدوي ممخلياش لمها الفرصة باغا غير امتى تسلت ~ ومتعطلينيش امي كوراني فاش مشيت وجيت دابا كون قلت ليها لا يجي خويا يصبني وانا مقادا على معيورو وتقولي ليا وكون مشيتي وشنو فيها كي درنا وحلة !!

لكبيرة واخا دخلها شك سلمت امرها لله وخلاتها تخرج قالت ربع ساعة المگانة مدات مجابت بالحق ولينا فساعة ومرجعتش

فساعتين ومكاين عليها خبار وهي تطلع لعند نجمة ل كانت متكية مجايبة خبار لهاد الموصيبة ل وحلت فيها حتى دقت عليها عدوزتها وقالت بلوم ~ اشمن دوا سخرتي عليه مريم راه مشات ساعتين وزيادة وباقا مجات !!

نجمة حسات بوجهها ولا سخون غيتفرگع قالت ليها باقا كتستوعب ~ اشمن دوا !! مسخرتها على حتى حاجة اخالتي غير كتكذب !!

لكبيرة خرجت عينيها كي القطة فيها مكرهتش تتلاح عليها ~ مالها مولفة كتكذب باش ديرها دابا ؟؟

جوبتها نجمة فالحين مقاطعة هضرتها وقالت ~ ايوا ملي جابتها الفرصة سمعي اش دارت بنتك من قبل ...

عودت ليها ل وقع كامل وكيفاش خبات على غلام على ود صداع كملت كلامها وقالت ~ وراه طلعت عندي دابا وقالت ليا بلعاني صندالة تقطعت ومخلياها تصاوب نجيبها ليك وانا قلت ليها غا خليها معندي مندير بيها ...بنتك باغا سبة باش تخرج ودارتها بيا انا ، شوفي اخالتي نقوليك انا الا سكت وكذبت على راجلي مرة دابا مغنعودش نكذب عليه إلا سولني غنقوليه لي كاين !!

لكبيرة حسات بدوخة شداتها تحنات بغات تبوس يد نجمة وقالت بخوف ~ ها العار ابنتي !! ستريها وقولي بصح مسخراها ليوم يقتلوها

بدات تخبط في فخاضها ~ وا ميمتي اش غنقول لباها الا فاق وسول عليها ، وا ميمتي اش ندير الا مجاتش ، واممتي فين مشات هاد بنت الهم وفين كان مخبي ليك هادشي الكبييييرة فيين ؟؟ هبطت لدارها تجري ونجمة معاها لكبيرة كتطل من شرجم وتعاود شوية صيفطت رحمة تشوف واش كاينة فدرب وعند البنات ل كتعرف اما نجمة جالسة فوق سداري كتطلب من الله يدوز هاد النهار على خير قلبها مقبوض ومزير عليها خايفة على راجلها بزاف حيت عارفاه كن ديما فوجه المدفع .... فاق خليفة وتم خارج من البيت كيعيط على رحمة دير ليه يتوضى ، لقى مرتو كتطل من شرجم غوت عليها على باب جهدو وقال ~ لاش خاشية راسك في شرجمم علاش كتطلي

ضارت لعندو وجهها صفر الهضرة مكتخرجش ليها وقال بغوات ~ فييينها رحمةةة ؟؟ غوتت على مريم تاهيا مجوبتوش وهو يخنزر فيها كيقلب عليهم فالبيت ~ مريم مكينااش

لكبيرة معرفت متقول ليه من غير ل تقال ليها ،قالت كترعد ~ رحمة هايا جايا ، و مريم راه مسخراها نجمة تجيب ليها شي دوا وراه ساعة دابا وباقا مجات يمكن ملقاتوش كتسناهم يجيبوه

قاطعتها نجمة وقالت ~ لا اخالتي مسخرتها تجيب ليا حتى حاجة غير كذبت عليك

عارفة بلي غتزيد تكرههم فيها ، عارفة بلي العداوة غتكبر والحقد غيزيد الا ممشاتش على هواهم ولكن ميمكنش تكذب فهادشي ... ماشي كل مريم عذرة ماشي گاع ل سميتها مريم داخلة سوق راسها وعفيفة ،الا وقعت ليها شي حاجة خايبة غتسمى هي ضامنة ل كتغطي عليها والا فتحت ليها هاد الباب غتولفها وغديرها ق و ا د ة كتسرح ليها طريق تمشي تخرج تديع ، شنو ل يخليها تكذب مرة وزوج وتحجج بحبال خاوية باش تخرج ، كون كانت نيتها صافية مغتعتبش الباب وهي عارفة عندها رجال فدار كيتسناو ليها الغلطة ، غدير كيف ختها وتخاف وتردع ولكن هي طغات ومحارت فحتى واحد وما دارت لا بحساب باها ولا غيرو خرجات بالعلالي وحيت نجمة زايدة ناقصة ارا نديرو سبة بيها فكل مرة ، ولكن حن تمحن ل يبغى يدير الخير يديرها فراسو عاد علاقتها مع غلام تقادت وزيانت ميجيوش دابا بزبايلهم ونبايزهم يخرجو عليها الطليب ل طلباتو ليها عدوزتها مگرش فيها متقدرش تسكت على بحال هاد شي مريم فسن صعيب وخاص ل يرد ليها البال ماشي يزيغها تدير شي موصيبة تندم عليها حياتها كاملة الا كان قولها للحق غيزيد من عداوتهم معاها ماشي مشكيل الاهم غيجي واحد نهار وغيقولو الله يعطي ستر لفلانة كون ماهيا كوراني درت شي موصيبة ،

شافت فشيخها حاطة لكبيرة بوجهها وقالت ~ لا اعمي مسخرتها على حتى حاجةة وعمري نسخرهاا غير كذبت عليك !!

خليفة بحالا تكب عليه سطل الما ولا يقطر بالعرق وختل توازن ديالو كون ما نجمة ل مشات تجري شدت فيدو مسنداه عليها كون طاح على وقفتو ، ضار شاف فمرتو بحدة وقال هاز سبابتو قدام وجهها كيدوي بعتاب ~ كتكذبي باش تضرگي على فعايل بنتك !! علم الله من امتى كتخرج وفين كتمشي وحنا مجايبين خبار مدوزة علينا نتي وياها دكاكةةة !!

جات لعندو عينيها يقطرو وقالت كتحلف وتعاود ~ ترزى فيا الا كانت مولفة كديرها ، انا غير خفت وقلت نقول هاكداك البرهوشة ممولفاش ليها معرفتها فين مشات وشنو ل طججها

شكون طججها ؟؟ فأي مشكل كتبغي تدخل فيه عروستها زعمة بناتي مبقاو لقاو راحتهم ، كتبغي تخلي صورة بناتها مزيانه ولهلا يقلب مع ديك بنت ناس....طلعت رحمة وملامح وجهها

باينة عليهم الخوف ، كتشوف في المنظر ل قدامها وباغا تعرف شنو تقول حتى دوا باها وقال كيغوت ~ لقييتيها !! فين زادت لكلبة ليوم بيا ولا بيها ؟؟

عرفت بلي ساق لخبار ول عطا الله عطاه ، ل كانت خايفة منو وقع بالحق بينها وبين راسها كتقول سرها هي ل مكتحشمش ، جوباتو كتمتم وقالت ~ ملقيتهاش ابا !! سولت صاحبتها قالت ليا مجاتش لعندها

غير سمع هضرتها دخل لبيتو كيهرول لاح عليه جلابتو ودار طاگيتو وخرج مستند على عكازو ، عارضت طريقو لكبيرة وقالت ~ تسناني نمشي معاك شووف حالتك دابا طيح في زنقة ولا توقع ليك شي حاجة

شافيها بنظرة حسرة ونطق ~ شنو ل غيوقع ليا كثر من هادشي ، بنتك بغات دير وجهي فتراب الكبيرة ، الوقت ل كنت انا خدام نتي فين كنتي علاش مربيتيش بناتك ؟؟

خلا ليها هاد لكليمات في وذنها وخرج عينيه خارجين اما هي دخلات كتخبط في فخاضها وكتويل للبيت ....واش بصح مرباتش بناتها ولا هما ل صعابات ، ل عليها دارتو وكأي أم ورات ونبهات ونتفات وقرصات ولكن كيف كيقولو لوالة كل زبيبة ف ك ر ها عود

بدات تبكي وتضرب في صدرها وتعدد ~ اميمتي وتعالي طلي على بنتك شوفي فين كان مخبي ليها هادشي !! كنتروى فولادي واحد بخوه ياربي الا كانت من عندك مرحبا والا كانت من عند العبد لا سماحة ليييه ...شافت نجمة واقفة جامعة يديها وكتشوف فيها وتسمع بالم بقات فيها وهي تنطق بعتاب وقالت ~ قلت ليك ستريها وغطي عليها غير هاد المرة علاش فضحتيني وحطيتيني بوجههي العلم الله اش غيديرو فيها دابا نتي معارفاش تريكتي ....تنهدات وجلست فوق سداري منزلة راسها لتحت بحالا دايرة زبلة ونادمة عليها ، فحين ل خاصو يحشم هي لكبيرة ل كتقول هاد الهضرة وبنتها معارفة اشمن جايحة شاداها ~ حبل الكذوب قصير اخالتي الا نتي خايفة على بنتك انا خايفة على راسي من ولدك !! شافت فيها وهزات راسها بتساؤل وكتعتليها نظرة حزن ~ الا وصلاتو لخبار شنو غيدير فيا ، كيفاش مزال غيتيق فيا وانا كذبت عليه زوج مرات وخبيت موضوع كيخص ختو وسولني ونكرت فوجهو ..لولة دوزتها ليها وتبريت فيها ولكن تانية هي ل قلبت عليها

ضربت لكبيرة طم مخنزرة مجوبتهاش عارفة كل كلمة خرجت من فمها عندها فيها الحق ، الوقت كيمر والقلب كيزيد يتشوش بغات طل من شرجم خافت تزيد الخل على الخميرة بقات غير غادا جايا فداك الصالون ورحمة ونجمة حداها حاضينها كل وحدة فيهم ربي ل عالم بيها ، لولة خايفة ختها تحصل مع شي حد وتتنكد عليهم كاملين وتانية خايفة من ردة فعل راجلها الا جا وسمع اش وقع مكاين ل خالعها قدو شنو غيدير وكيفاش غيتصرف .....

الغوات مجهد كيتسمع من برا ، صوت غليظ كيسب وصوت بكاا رقيق كيتسمع ، لكبيرة ناضت قافزة من فوق صداري حاطة يدها على قلبها ل غيسكت عليها هادو ولادها ....صوت عبيد وغواتتو وسبانو ختارقو طبل وذنيها حلات شرجم حتى تخبط كيطالو كاملين حتى من نجمة معاهم ، شافوه جارها من شعرها كينتفو ليها بين يديه وكشاكشو خارجين بحال شي مصعور وطلقوه فالزنقة بين عينيه غير صورتها وهي معكرة ومقادة لابسة لباس مزير عمرها لبساتو حداهم وطالقة شعرها كتشالي بيه ، بين عينيه غير سيد لي مقنتها كيبوس ويتلمس فيها بلا حيا بلا حشمة ، باقي فوذنو صوت صاحبو وهو كيقول ليه واش ختك هاادييي !! كيفاش غتكون نظرة صحابو عليه وهما شافو ختو فقنت خالي بايعة راسها رخيصة ومخلية يد محرمة عليها تقيس في لحمها وكتعبز فيها وهي كتضحك عاجبها الحال كانها بائعة هوى معندها اصل ولا دين وملة

عبيد تعماو عينيه ودمو سخن ومرضاش قدام صحابو حس بروجولتو تمست وبلي ختو هانتو وعفطت عليه هو وخوه وباه برجليها ،محس براسو غير غادي كيجري شاد رعواني ل معاها بين يديه كيعطيه لوجهو مخلي دمو دايز وفمو خدام كيسب من سمطة لتحت مبقاش حاس براسو ، كان قبيح وبحال طبع خوه عندهم نفس الدم الحامي ، ولا كيبان ليه قدام عينيه غير الموت والحبس لمهم يرفع راسهم وتا الا مشا وترزى فشبابو يقولو مشا على قبل شرف والعرض ل كان فداك الوقت غاالي وكيتعناو بيه ، جروه صحابو وفكو سيد من بين يديه خافو يقتلو اما مريم خلاتو مشغول بيه وجرات لدارهم غادا وتبكي وتجري تبعها بجرية وحدة ملقى راسو غير مليييوح عليها شدها شانق عليها من گنة شعرها وجارها فالدرب وكيركل برجليييه فجنابها ،شعر لي طالقاه كيقطعو ليها بين يديه صوتها بح بالغوات وزايداها كتعير فيه محشماتش .... الكبيرة غير شافت المنظر من شرجم وشافت لباس بنتها ل ماشي نفسو ل خرجت بيه عرفت دارتها قد راسها جابتها فيه ،بقات تغوت ربي لي خلقها ونزلت تجري في دروج ، تصادفت معاه مطلعها جارها وهي تنطق كتطلب ~ها العار اولدي طلق منها ها العار غادي تقتلها وتمشي الحبس

غوت على الكبيرة عينيه حمرين كيف الجمرة متطفى شعلتهم حتى يصفيها ليها ~ اليوم نقتلها بيا ولا بيها ****

نزل عليها بالتصرفيق وسط الدار تا طاحت الأرض وجمعها معاها بركلة وهي تعودو كتعير فيه ~ ماشي شغلك فيا بعد من .. وقفات الكبيرة باغا تجرو ،

وكتدوي فنفس الوقت ~ غاا قول ليا شنو دارت خليني مني ليها دابا تموت فيدك!!!

عبيد كيغوت وعروقت وجهو باينين قلبو غيتفرگع ووجهو ولا حمر بقوة الغوات ~ وااااااااا مي لقيتها مع واحد ز ***** كيبوس فيهاااا وعاجبها الحال الق** الخانزة وكتضحك شوهتني قدام صحااابي !!

صرفقت لكبيرة وجههة صدمة ل عطاتها بنتها مكانتش ليها على البال نزلت لعندها كتقرص وتعض ~ ياااك ابنت لحرام هذا هو دوااا ل مشيتي تاخديه لمرت خوك كتكذبي باش تخرج بغيتي تشوهيني في درب وتشوهي خوك بغيتي يدفنوك ، كلاتها وتلاحت جلست حداها سخفانة كتبكي وتدوي ~ وهانتي سنيتي على موتك !! مكاينش ل يفكك منهم ليوم

دخل عبيد لبيتو جبد عصا مخبيها وخرج لعندها باقي مبرد حالف رجلين ل يعتبو الباب ويتعراو يتهرسو ليها هزها من ذراعها بغا يعطيها ليها الراس وهي توقف لكبيرة على ركابيها كتدفعو من رجليه وكتدابز باش تنوض وتغوت ~ عتقوني اعباد الله !! عتقيني انجمةو ...

بدات تطلب نجمة تعتق الروح حيث عارفة الا مفكتهاش اليوم موت بنتها على يدين خوها ،نجمة بخوف وجهها صفر واقفة كتشوف في الكبيرة كتبوووس يديها باش تعاونها ~ عتقيني ابنتي اليوم يقتلها حسبيها ختك وعتقيها

وقفات بيناتهم باغا تجر عبيد تبعدو على ختو شافتها مريم ومرضاتش تتفرج فيها وهي كتاكل لعصا ، باش تدفع عبيد هزات رجليييها باغا ضربو لكرشو باش يبعد عليها مكتجي غير فكرش نجمة لي غوتات وشدات كرشها متنية على زوج

كيقوليك واحد المثل بعد من الصداع و غني ليه وواحد نجمة تعرضت وحضرت ليه من ديما كتكون غير هي فوجه المدفع كيعيطو ليها غير الخايبة عمرهم حضروها لزوينة ....ماكان ليها لا على البال و لا على الخاطر اش غيوقع و لا شنو غتشوف قدامها ليوم ، الروح غتطيح و تقدر تكون هي السبب فيها حيت مكذبتش ومسترش وديك الساع النفس اللوامة ل عندها مغتخليهاش في راحتها إلى مريم وقعت ليها شي حاجة ....شافت حتى عيات و ترمات وسط منهم تفك وتدفع عبيد على ختو ل كانو عينيه عليها يقتلها عاد يبرد حر الشمتة ل شمتاتهم رجعتهم بيادق وشفاية وسط الجيران ،فجأة معرفت الضربة ل تعطاتها للكرش منين جاتها كان قوة الغوات وقوة ليدين كيفكو وهي دايخة وسطهم حتى كتحس بالم رهيب فكرشها جلست متنية مكمشة حاضناها كتغوت بينها وبين راسها وكتنين بحر دقة ، عبيد رجع اللور مكوانسي كيشوف في مرت خوه حس بالصهدة طلعت معاه ولا كيقول يمكن انا ل قصتها واش جا مفكو من يد غلام ولكنازة غتولي زوج ليوم اما الكبيرة شافت اش وقع وعرفت شكون ضرب طارت عليها كتقلب فيها شدتها من يدها ودخلتها للبيت معوناها وكتراري بيها قلبها بغى يسكت وماشي حبا وخوف عليها جلستها فوق سداري ونطقت شفايفها كيترعدو ~ ميمتي ميمتي ميمتي ، كتشوف فيها فمها ولا بيض نشف تقول داخلها الموت عطاتها تشرب وهي كتقلب فيها ~ باش كتحسي ابنتي ياكما شادك شي وجع !!

نجمة حست براسها بردت ودقات قلبها كتحس بيهم في وذنها كيضربو بشوية بلعت ريقها وقالت كتنهج ~ ش شويةة !! تگعدت من على المخدة ونطقت بخوف كتحسس كرشها ~ عنداك يكون وقع لولدي ولا بنتي شي حاجة

لكبيرة كتعض على قنوفتها وتبرد السوق ~ لا متخافيش غير مع الخلعة غيكون هبط ليك طونسيو هانتي جلسي هنا رتاحي تا يفوتك الحال

قصدت ولادها وخصوصا عبيد ل كان واقف داير يديه على راسو وكيمشي ويجي وقالت بعتاب ~ صافي هنيتي بغيتي تقتل مرت خوك ول فكرشها وديك ساع شوف اش غتقول ليه !!

عبيد بدا يغوت مشربن ~ الواااليدة بلاما تبقاي دوخي عليا وتسكتيني بهاد الهضرة مرت خويا مقربتش ليها وبنتك والله ايلا دوزتها ليها مشى جر كرسي من الكوزينة گلس فيه كينهج اما لكبيرة دخلت لبيت فين هربت مريم مع رحمة وقالت بصوت تحت منها ~»بغيتي تقتليها ابنت الحرام !! ضربتها لذراعها بقوة وقالت ، طلبي الله ميوقع لداكشي ل فكرشها والو ومتعرفكش راه نتي مولاتها اما اجا ميفكك من غلام

على ذكر سميتو تسمع صوت القوي داخل كي رعدة عامر دم

كان خدام هاني مهني نهارو دايز في الغوات وتمارة وفريع المخ كيف ديما وهذا هو درهم الحلال ما كيصورو حتى كيعرق وينشف عليه وشكون قدر ؟؟ سمع صوت تليفونو كيصونو جبدو وحطو على وذنو بلاما يقول الو ،سمع صوت باه مرعود قلبو تهز من بلاصتو وما جا فبالو غير مراتو ل متقلة كيگول وقعت ليها شي حاجة لاح الگارو من فمو ونطق بخوف ~ اش كااين ابوياا مااالك !!

الكلمة ل خسر عليه باه خلاتو جاي طاير متلفتش وراه ولا تكلم لواحد من رجالو ل كان كيغوت عليه ، طول طريقو وهو تاني جبهتو وجامع قبضة يدو والهضرة ل سمع كتاكل في دماغو " المسخوطة تاع مريم معرفناها فين مشات " معقلش على طريق كيفاش قطعها كان ساگ وعقلو مرفوع ختو وتربات قدام عينيه وعارف معدنها مزيان كتطير وكون ما حاكمينها ورابطينها تسيب ، كيفاش دارت حتى خرجت وفاتت العتبة ل مبري فيهم عليها ، لقى باه واقف في راس درب مقدرش يطلع لدار بلا بيه ركب معاه وعاود ليه شنو وقع بالحرف ، وصلو قدام الباب جوقة لعيالات ل تجمعت كانت باقا متفرتكت لعينين كلهم كانو عليهم وهادشي زاد سخن غلام وفيض دمو، عض على فكو من الداخل وطلع سابق خليفة ل حنى راسو الارض حشمان يهزو قدام العادي والبادي ، ما وقف بو لحية غير وسط الدار عينيه خارجين وصدرو كيطلع وينزل غوت باعلى صوتو حتى تجرحو قراجطو وقال ~ مررررررررريم م م م !!!

السمية ل تسمع صداها وسط الدار كاملة نجمة ل كانت مركنة ناضت مخلوعة ايدها كيترعدو متناسية حر الضربة خايفة على راجلها اما مولات زبايل ولفعايل لكحلا وجهها تخطف منو اللون دايراها قد راسها وتخلعت ل كيخاف مكيديرش علاش ، بدات كتبكي وتخبات ورا مها كتبكي وتطلب فيها تفكها منو حيت عارفاه وعارفا عصاتو مغاديش يعقل ويحن فيها غتشوف معاه ل عمرها شافتو الا عبيد قاليه فين لقاها وكيفاش لقاها ، هاد الاخير كان داير راسو بين يديه وعلى فمو غير كلمت فين غنعطي وجهي من صحابي حتى بانت ليه غلام وقف ومشا لعندو وقال كيشالي بديك لهراوة ~ شوهتنا اخويا غديير بوووم وسط الدرب

غلام صبرو تقادا شنق عليه وقال ~ …فييين كانت !!

عبيد مكانش من العاگزين فعلتها شواتو في قلبو و ضحكت فيه صحابو ل فيهم عديانو وباغين غا فاش يجمعو بيه ، حدر راسو وقال حشمان من خوه ~لقيتها اخويا وواحد المسخ غير في الخلا و القيفار و مخلا فين حط يديه

غلام غير سمع اش كيتقال حس بوذنيه كيصفرو ، نجمة كانت عينيها على راجلها لي يديه بداو يحلو في سمطة سروالو ، دخل خليفة سخفان و كينهج وغير سمع هضرة عبيد طلع ليها السكر و بدا يغوت ويخبط الباب بعكازو ل طرقاتو لكبيرة شافها مبغاتش تحل وهو ينطق بعصبية ~ ومتحلي هاد الباب حتى تولي حرااام علياا !!

سلمت امرها لله وشافت فبنتها وقالت ~ قلبتي على خلا عشتك بيدك ، حلي لبيت ارحمة !!

غير تحل البيت دخل خليفة هو اللول ل نزل بعكازو على مريم للضهر غوتت غوتة خلات مها تخبط ف فخاضها ، نزل عليها ثاني بضريب وهو كيهضر على راسو و سميتو و شرفو كان كلو كيقفقف ~ الله يلعن النهار لي تزاديتي فيه كون عرفت غطلعي رجليك سايبين كون دفنتك نهار ولادتك ، ياك ابنت الحرام ممنقصك من والو ؟؟ اش بغيتي عندي هذشي باش تجازيني !!

غلام كانت موقفاه نجمة ل قربت منو كتبكي خايفة وربي ل عالم بحالتها شدت فيه من حوايجو كطلب فيه وتبكي ~ عفاك اغلام حضر عقلك ونعل الشيطان عندك تدير ش حاجة تندم عليها من بعد !! فكر فينا راه كلشي كيتحل بالعقل

بحالا كتكب لما فالرملة هي كتدوي وهو كيلوي فديك السمطة على يدو غير كمل رمقها بشوفات عمرها شافت بحالهم وقال ~ دخلي سوووق راااسك وبقاي فتيساع ، كتسمعييي !! قالها بصوت عالي حتى قفزت من بلاصتها ودخل لبيت تعرضت ليه مو لي طاحت ليه على يديه كتبوس فيهم و تزاوگ ليه في الحليب لي رضع و لكن هو كانو عينيه عميين من شنو سمع ، خوه لي كان البكا غيبكيه مراضيش و نفسو كتاكل فيه ، وباه ل كلو كيغزل قدام عينيه تخطى لكبيرة سايس هضرتها و عينيه نيشان عليها بدات تغبن و باغا تزاوك غير هي قالت ، خويا أنا مزاوگة ما حست غير بدم سخون هابط ليها من حدا وجهها كانت الضربة لي عطاها بالبزيم مخسرش عليها كلمة وحدة سبق يدو خلاها غوتت حتى تجرح حلقها رحمة غير بان ليها دم طارت لبرا كتبكي و كتغوت على نجمة تعتقها وعلى عبيد يفك ولكن شكون يقدر يدخل ولا يوقف بينو و بينها ...غلام كان واصل للحد في الاعصاب ديالو و بحالا شديتيه و خويتي عليه الما القاطع دمو هارب منو ، مشا شدها من شعرها و هزها منو ودفعها ملصقها مع الحيط كيزدح ليها فراسها ويسب ،مخلا لا ملا ولا دم كل شي جبدو وحتى من تربيتو مو طعن فيها ...لكبيرة منظر بنتها كلاها في كبدتها بدات تضرب ليه فظهرو باش يطلق وهو كيغوت جاعر ~ هااكاك امي ضربي ودافعي على بناتك !! بغيتي تخلينا نتي وياهم مسكة بين لفام ، بغيتي تلبسينا دفينا وترجعينا وليات ،كيدوي ويضرب ويسب كشاكشو خارجين مريم قوتها سالات معاه مقدتش عليه ونجمة بكات حتى بردات عمرها شافت ولا عاشت هادشي تاع اليوم ..مطلق منها حتى كانت سخفانة فيدو لاحها فوق سداري وحل لماريو كيجبد فحوايجها ويلوح برا البيت ، الكبيرة كتبكي ومعنقة رحمة عبيد مربع يديه وكيشوف فخوه اش غيدير اما خليفة قدما قلبو ضارو عليها قدما بغاها فيها حيت ل دار الذنب يستاهل لعقوبة

خلا ليها الماريو كيصفر ووقف فوجها وقال ~ ها لحوايج ل كتخرجي تزك ك ي بيهم على رجال غنشعل فبوهم لعافية باش نعلمك قدامنا تغطاي وتخرجي تال برا وتعراي ، جرها من شعرها ورجع قال ، وهاد شعر ل عاجبك وفرحانة بيه انا غنعجبك فيه جبد من جيبو جنوي صغيرة كيكون هازها معاه وهي كتغوت مسالي ليها جهد ~ لا اخويا لااا!! عفاك شعري لااا

وشكون داها فيها ولا فطليبها حكمها مزيان وضور سالفها على يدو الكبيرة شدت ليه فكتافو كتبوس فيهم وتطلب ~ وجه الله اوليدي إلى مطلقها عليك ، باراكا ل درتي فيها عمرها باقا تعاود ولا تعتب خطوة ورا الباب

غلام ضحك ضحكة استهزاء وقال ~ تخرج ؟؟ علاش باقا غتفكر في لخروج دابا

ضار عند مو عينيه في عينيها وهو مزال شاد شعر ختو ، هادشي لي حنا فيه ديري في بالك نتي مولاتووو ودابا رجعي ربي برهوشتك ، يالاه غتجوبو كان ضرب ليها شعرها زغبة بختها مگرش فيه غواتها مگرش فيه بكاها ، تعمات ليه البصيرة ومندماش شعر ل كتعنى بيه وخرجات تشالي بيه خلاها بلا بيه خلاها كيف دري وسلبها الحاجة ل كتباها بيها كل مرا

البنت جلوسها في ظار باها واخا دير ربعين عام تبقى تحت جناح واليديها حتى يجي حلالها و لي يكون بيها ، مريم مكانتش ضاربة حساب لشنو يقدر يوقع ليها إلى حصلوها و كانت دايرا في بالها غوات و الصداع و السوق يبرد، مفكرتش الدينا غتقلب عليها و الوقت غتجي ضدها و لي تبع طريق الشيطان هادشي لي تستاهل و لي يليق ليه ، غلام مبردش ليه الخاطر ومكرهش رجليها يحشهم ليها ماشي غير يقطع ليها شعرها عينيه معميين و مكيشوف حد قدامو وحتى من حوايجها خرجهم السطح خسر عليهم قرعة ديال ليسانس ووقيدة ها هي بقات لا شرويطة لا ختها بالحق تستاهل هادي دير ليها عقل ولي عطى زك* لهلا يفكو ..يله تعرف بقيمة الهنا ل كانت عايشة ومرتاحة فيه وشان ولمرشان ل كانو دايرين ليها خوتها قيمتها لا هي لا ختها كانت لفوق عالية ممخصصينهم من والو فلوس وهبة وذراع حامي وباش ردات ليهم الجميل ،قلبات على زطاط كتخرج لعندو كل نهار المراهقة لعبات بييها وخلاتها متفكرش فشرفهم ولا شنو يقدرو يحسو وهي فحضن واحد غريب كيقيص فشعرها ويبوس فيييها بالنسبة ليها هي غير تعيش ديك اللحضة وربي كبير ،تخرج تلاقا تصلگط وترضي جموحها ونعرة ل شدتها مفكرتش فشرف عائلتها مفكرتش فخوتها لي يقدرو يقتلووه بسبابها جالسة معليها مبيها معاه كترومانسا مع راسها نسات بلي دنيا صغيرة تا لقات عبيد مسلط عليييها دمو سخون حامي وغلام ل قاليه دوز تريح مكتعرف والو تلقى سلاكة مع لول وتاني والله ميدوزها ليها وداكشي ل كان كلات قتلة وطاحت من عينيه بحال الدمعة وخرجات من فمو بحال الدفلة

بعدما كمل على شنو كان كيدير راسو كان مرفوع ومعاقلش على مو ل ولداتو فديك اللحظة غوت على عبيد بأعلى صوتو وخرج هاد الاخير لي كانت الشمتة مزال كتاكل فيه و حر مريم مزال ما برد ، لبس في رجليه و لاح عليه جاكيطتو و قصد الباب تابع خوه حيت قاريه مزيان شنو غيدير وتاهو بحالو حالف حتى يقلب على لي طيح بيهم و بوجهم بغى يمرمد ...خرج لقى غلام واقف كيتسناه هز فيه عينو لقاهم حمرين و يديه كلها كترعد جبد گار من جيبو لاحو في فمو وجر خوه قاصد طوموبيل وقال~ ولينا رعاوين و يتضحك علينا ولا شنو ، فين شفتي الكلبة !!

حك عبيد على قرفادتو و تكلم حادر راسو ~.. التيرا فين كيتباعو الطريفات

غمظ عينيه و عض على فمو حتى حس بمذاق الدم ، ما هضر ما تكلم ركب في طموبيلتو وقصد لبلاصة ل قاليه خوه وكيدوي منيرڤي ~ ونتا ملي شفتيها اش درتي !! جايني لدار بوحدك ل كانت معاه دوزتيها ليه ولا غلبك ما قديتيش عليه ؟؟

عبيد كان كيدوي مراضيش على راسو ~ لا اخويا متفاكيتش معاه راه غير دراري فكوه من يدي وهرب ولكن نسول عليه ونلقاه نلقاه

عين على طريق وعين عليه كيشوف فيه بعتاب وكيخنزر~ ديك ساع مطلقووش نتا گاع واش حتى فهادي منقدرش نعول عليك ولا شنو ؟؟ ديك ساع هرس ليه رجليه باش كيمشي وجيبو ليا نوريه يضحك على بنات الناس بشحال كيتقام بالحق غا بيا ولا بيه نجبدو من كرش مو

وصل لبلاصة ل نعتها ليه عبيد ول شحال خدا منها دخانو لكبير وصغير كيعرفو فيها ...نزل من طموبيلتو و عينيه كيدورو شافوه صحاب الحال والبلية تمو جايين عندو كيجريو يسولو عليه و فيه وهو يعطيهم النعت لي عطاه عبيد ،معطلوهش ديك ساع جبدو ليه سميتو و كنيتو و الزنقة فين كيعيش ، شاف غلام في عبيد مطلعو ومنزلو من الفوق التحت ونطق ~ رجع بحالك و منعاودش نسمع بووك رجليك كيمشيو و يجيو في هاد القنت كتسمع !!

حرك ليه راسو باه ومشى ما خلا ليه فين ينطق ولا يهضر مازال ،تا تأكد منو رجع وهو يركب في طموبيلتو وقصد المرگد فين وراوه ، القيسارية وبالضبط سوق الخضرة نزل من طوموبيلتو وغادي بلباس الگرنة ممسوقش نص في ناس حاضينو كيفاش غادي نافخ صدرو شعرو مخربق ولحيتو طويلة عشوائية كيدوز يدو عليها مرة مرة ، عينيه كانو كيضورو على صحاب ديسير واحد بواحد كيقلب عليه عطاوه نعتو فيديه سمية موشومة قد سخط صغر عينيه حتى بان ليه صاحب دعوتو ناشر رجليه و جابد جوان كيبرم فيه ، وجهو ملون بعلامة البصمة ل خلا فيه عبيد وجا ل يكمل عليه ، تمشا لعندو بخطوات تقال حتى وقف عليه حاط يديه على جنابو كيطلع و يهبط فيه وغير لاخر هز عينيه فيه وهو يدفل عليه غلام. حدا رجليه و هضر مخسر سيفتو ~ انت هو عبد الكريم !!

مكانش من العاگزين ولا نكر شكون هو ،خنزر فيه بدورو ووقف مقابل معاه واصل ليه حتى صدرو حتى في الطولة محگور حط الجوان فوق الكروسة و جاوبو كيتنفخ كون عاودو ليه على شنو غيوقع ليه ميقرقبهاش مع ختو باش ميتلاقاهش ~ اييه هو هذا وشكون انت ؟؟

غلام عارف راسو اخرتو في هاد الفيلم الحبس و لا القبر ضحك باستهزاء و هز كيلو ديال الميزان و عطاه بيه لراس بلاما يخمم خلاه مليوح شاد راسو و كيغوت بحال الولية ودماياتو دايزة تحنى عليه و تكلم بخشونة ~ راجل مك هذا !! كتعرف مريم ايوا خوها وسير قيد بيا اولد الزانية ، رجع دفل عليه و عفط ليه على يديه كيعفس يبرد قلبو و لا بغى يبرد ، هادي هي اليد لي تحطات في ختي مكانش حاس براسو اش كيدير و لا بلأخر لي كان كيغوت من الحريق ما حيلتو لراسو و لا يديه لي كتضغط مع الارض ، الناس تجمعو عليه شي كيقوليه نعل الشيطان و شي كيقوليه يستاهل ولد الهم عطيه وشوية تمو جايين صحابو دايرين فيها واعرين باغي يتحاماو كون يعرفو معامن هما تا حد ميدخل بيناتهم ، غلام مهامو لا حاحة لا ملاحة داير كي الجبل واقف مقدوش ياخدوه من بين يدو ولا يدفعوه عليه ، ل يجر ثيران في الگرنة ويسلخهم يغلبو نص ميترو ورابعة اللحم ، نزل لعندو شانق عليه من عنقو وقال ضاغط على سنانو ~ عقلتي على سميتها ولا دايزة بحال نقطة وسط وسخك هاا !! مع كملها نزل عليه بكروشي حتى دفل الدم من فمو وقال بصوت مرعود ~ عقلت اخويا

قال كيترعد ندمان ل دوا معاها ولا وقفها ولا تزلل عليها من اصلو ~عقلت اخويا ها العار عمري نطوف بساحتها مازال ندمتت

وشكون سمعو كروستو تقلبات ونيفو تهرس خبار وصلات لموجات تجري تشوف ولدها كياكل لعصا على يد راجل ماشي رعواني بحال ل ولدات طاحت عليه كتعنق وتمسح في وجهو ل عمر دم ومبقاش مفرز ~ اميمتي ولدي بغا يرزيني فيه وا عيطو المخزن عيطو لبوليس

جر غلام كرسي وجلس داير رجل على ختها ونطق مخسر فيها سيفتو وقال ~ سيري هاهيا الكوميسارية فدورة ونشوفو شكون غيمشي لحبس انا ولا ولدك ل معدي على وحدة قد ضفرو باقا مينوغ !!

ركبتها لخلعة من صبع رجلها صغير هبطت على فخاضها كتخبط فيهم بحال گاع لعيالات مبغاش ولدها الوحيد يدخل للحبس قالت نايضة لعند غلام كتطلب ~ انا مزاوكة فيك اولدي اش وصلنا لشي حبس كلشي كيتحل بالمفاهمة

ضحك باستهزاء ووقف هو لاح صنارة والحوتة غتجي تال عندو ~ زاوگي في ولدك وربيه كيفاش يفوت عليه بنات ناس الا مولف يضحك عليهم ويدوز عند بالو دنيا سايبة ،ساعة طاح فيا انا خلاه نعاود ليه تربية ونحد ليه ضسارتو ، دار شافيه هاز يدو كيهدد ويتحلف ~ منامتي معاك مسلاتش هناا وهاد لوجه عقل عليه مزيان ومتنساش راك درتيها مع غلام ولد خليفة وسول عليا مزيان وتمعن بشنو غتسمع في وذنيك

~~~~~

نهار داز كحل مغيم على دار كاملة خليفة ساد عليه بيتو مخرجش ، مريم دايراها يغرق فيها جمل ومقلقة عاطيا وجهها للحيط ،رحمة حاطا يدها على حنكها وكتشوف اما لكبيرة بيجامتها ل فوق لحمها سردات عليها بالعرق گاع قراعي لما خواتهم غير حاطا راسها على لمخدة تشرب وتدخل لطواليط اما واحد نجمة طلعت لبيتها خايفة كترعد ما بقاتش خرجت لماكلة مداقتهاش عمرها شافتو فحالة ليوم كيضرب فختو بكل قوتو بحالا راجل ل واقف قبالتو محنش فيها وماقالش ولية ومعندا جهد تهز دقة وكملها قطع ليها شعرها لهاد درجة قلبو قاصح ومافيهش لمحنة تصدمت وبزاف وسنانها كيترعدو ، عمرها تنسى شوفاتو الحاديين وصوتو القوي ل مازال تاثيرو على وذنيها...خوفها على راسها زاد كبر كثر وكثر كيفاش إلى عرف كانت مخبية و متسترة عليها في الخرجة الاولى اش غيدير فيها و ووجها لمن تعطيه في كل مرة كتفكر راسها خاصها تواجهو كيشدها لوجع ،بقات على داك الحال ودماغها خدام كيرجع ليها في سيناريو تاع ليوم ل مقدراتش تتخطاه وتنساه حتى تحل الباب ودخل بلاما تحس قفزت من بلاصتها وجهها رجع بيض ، رد ليها البال وهو يضيق عينيه وقال ~ وليت كنخلع

معندها بلش تجاوبو عينيها كانو على حوايجو ل موال فيهم دم ،ركزت مزيان بانو ليها ايديه حتى هما عامرين هو وتريكو ودم جظيد ريحتو وصلت حتال نيفها بلاما تحس دارت يدها على فمها وناضت كتجري خارجة من للبيت تحت نظراتو

نجمة فكرت حتى عيات قلبها كان قريب يوقف لا راحة لا شهية غير كتفكر إلى راجلها ساق الخبار يقدر يصومها و ميبقاش يشوف فيها ، عارفة قدما سكتت مريم ولا لكبيرة غا يدويو وميدوزوهاش ليها داكشي علاش جمعت شتات نفسها ودارتها في يد الله وقالت ليه ل كاين ما زادت ما نقصت برأت ذمتها قدامو وحيدت الهم ل كان مثقل على كتافها ومقلق راحتها ، وراحتها هي غلام يكون تايق فيها و معاها وطريق بيناتهم بيضة وواضحة ، اه تعصب و غوت عليها مزيان حس براسو ضحكت عليه وهي كتشوف في وجهو ولكن شاف حتى عيا و حط راسو في بلاصتها وراعا ليها وحذر الراس ودوزها خصوصا ملي عرف منها ملي رجعت عودتها هي فاش حطاتها بوجهها مع خليفة ....

دازو يومين عليهم ديال الاكتئاب و العذاب مريم مسكتتش من البكا وجهها كولو مضروب وشعرها لي مشا ليها وولات كيف العزري، فينما تقابل مع المرايا وتشوفو تكحل بالعما وتدير گنازة ، خوتها نفاوها اما باها مبقاش كيشوف ليها في الوجه ولات عايشة تحت ضغط كبير لماكلة متقد تاكل والثقة فيها نعادمات ولا كتطلب من الله يحنن قلب غلام ويسمح ليها وتتهنى ولكن معامن هي مع واحد قلبو من الحجر بالنسبة ليه هو مدار ليها حتى حاجة هي لي دارت وجنات على راسها .... خرجت عند مها بعد ما سمعت خوها خرج لخدمتو ونجمة شدت وقرها في بيتها و باها مشا الجامع يصلي ليه ركعات ينفعوه عاد تمات نايضة جلست حدا الكبيرة لي كانت حاطة يديها على خدها و عقلها يخمم في المشاكل ل تبلات بيها بلاما ضرب ليها حسبة وسط الدار

مريم لايحة عليها شال مغطية شوهتها ~… اش غندير ا مي فهاد شعر امتى غيطوال ولدك غيضحك فيا لعديان

طلعت فيها وهبطت عينيها بشوفات قاصحين وقالت معوجوة فمها ~ نوضي غا من حدايا ولا ابنيتي سخطي ينزل عليك شكون ضحكهم فينا حنا ولا نتي شديتي الدار و گلبتيها ليا سفاها على علاها الضحكة مبقات طل علينا من ورا وجهك و مصايبك

مريم بدات تاني تبكي و عرات ليها راسها ~… واخا يكونو شافوني معاه في بيت النعاس ميديرو ليا هاد الحالة قطعو ليا شعري و خسرو ليا وجهي حتى الحمام صافي مبقيتش قادة نمشي ليه

الكبيرة ضحكت باستهزاء~ حتى يخليوك تمشي ليه نسااي داكشي ل كان قبل تخرجي معايا ولا توقفي قدام الباب ولا تمشي قيسارية ولا حتى لحمام مبقاك هنا حدايا حتى يجي لي يسترك

مريم خسرت ملامحها ~ علاش يسترتي مالي جايبة ليكم شي كرش راه غا لقاني واقفة معاه

لكبيرة غضات على فمها مغددة ل بقى كملتو ليها بنت كرشها ~ على داكشي لي شاف خوك عبيد جاك قليل ؟؟ اسمعي ابنت كرشي نقوليك البنت لحاگها لخيمت بوووها ما تخرج ما طل من شراجم وبنات الناس و بنات الاصل و الشرف مكيعطيوش لحمهم بالرخيص بالعكس كيجلسو متبتات حتى كيمشيو بالهمة و الشان اما نتي ابنتي توسختي و تخلطو فيك ليدين

شكون هاذا ل مازال غيقبل عليك جيران گاع داو خبارك راسي مبقيتش قادا نهزو في عيالات الدرب من هضرتهم ل كيف سم وملي نتي زغبك الله وبغيتي تخرجي لاش واقفة في بلاصة كلشي غيعرفك فيها راه قاليك ق ح ب مع نصارة وليهود وخلي جيران شهود !!

مريم هزات كتافها وقالت كتنفخ وتسوط~ صافي امي عفاك بلاما تزيدي على ما بيا سترتوني وسمحتو ليا بكري راه اللحم الا خناز كيهزوه ماليه

ضربتها لذراعها وقالت ~ ومالنا دابا لحناك لزنقة حمدي الله وشكريه باقا جالسة هنا وكدوقي نعمة تا نشوفو اخرتك شنو

بدات تمتم وقالت ~ كون غير خليتوني مشيت عند زهرة نبدل لحيوط راه غنطرطق

علات لكبيرة من نبرة صوتها وقالت بالغوات ~ راه انا ل غيطرطق فيا شي عرق غبري من حدايا الله يعطيك الغرق !!

شافتها غوتت ناضت تعوج ما تحشم ما ترمش دخلات لبيتها وخيطتو على باب جهدو بسيف عارفة دار خاوية ومكاينش لي غيدير ليها لجام ...

تعشات لعشية وجاي راجع لدار كيف العادة جايب تقديتو معاه مع غينزل من طوموبيلتو مع غيوقف عليه راجل مكيعرفوش باين على وجهو الوقر وصوتو وهضرتو معقولين نطق بلطف وقال ~ ولدي غلاام ياك !!

ضيق عينيه وهز راسو باه ~ هو هذا !! اش حب الخاطر

جاوبو حشمان يديروها صغار ويوحلو فيها لكبار بالحق كل دار تلقى فيها كيدار ~ انا اب عبد الكريم اولدي كنظن عرفتيه الخضار ل جيتي لسوق وتناقشتي راك عارف بلاما نكمل

غير جبد ليه سيرت الموضوع وهو يحس بدمو غيبدا يسخن ميل راسو لجنب كيمسح على وجو ومزير على سوارت طوموبيل ل كانو فيدو وقال بصوت خافت ~ دخل في موضوع !! ، بان ليه وجهو ماشي وجه تمرميد ولا المحاكة مبغاش يقصح معاه وحتارم كبر سنو وعطاه وقتو يسمع شنو عندو وتا راجل دخل في موضوع وما نطق غير بالمعقول ~ مهم اولدي انا عودت ليا مولات دار على شنو وقع وماجيت هنا الا وانا حشمان منك ، كاين ل كيعطيه الله ولاد يفتاخر بيهم ويعليو ليه راسو وكاين ل خاشينو ليه فتراب وانا منهم

اي حاجة درتيها فيه من حقك وانا لو كنت بلاصتك ندير بحالك وكثر الا العرض والشرف خط حمر والدراري الا غلطو نوريوهم الغلط ديالهم ونصحوه حنا الكبار بيناتنا ..انا منكذبش عليك سولت وعرفت بلي راك راجل مزيان حقاني ومعقول داكشي علاش جيت برجلي لعندك نطفيو الغضب ونهيو صداع ومن غدا نجيو نخطبو فدرية ختك لولدي

حنحن غلام بصوت مسموع وقال مقطب حجبانو معصب ~ البنت انا اشريف خرجت سوقها من داك نهار كاين باها هو ل يعطيك ولا يقلع ليك دوي معاه

تزوج ولا تجلس بنسبة ليه ولات نقطة على السطر ضيعت قيمتها عندو بيدها ومبقاتش كتهمو ، ملي ولات بضاعة رخيصة كيقيس فيها ل يسوى ول ميسواش مابقاتش كتهمو ، ملي ولات تكذب باش تخرج تلاقا بواحد كلو خطوط مبقاتش كتهمو ...كان غيلوم راسو ويسمح ليها لو كان حارمها لا هي وختها من شي حاجة لو كان مكبر فيهم شنو خصهم، ل بغاوها كانت كتوصلهم خاصهم غا يقولو ارا وكيجبد ويعطيهم وبعد المرات بلاما يدويو كيعمر جيبهم كيغمض عينيه على عكر ولا على شعر ولا صباغة دايرينها فدار بينو وبين راسو كيقول يحدو منها شهوتهم وباش تجي دابا وتضرب كلشي فزيرو وتديرو صفر على شمال يصومها فخطرة ويديرها عارف راسو قلبو حجرة تا حاجة متلينو ...غادي طالع لبيتو وملاذو بلاما يدوز على مو هاد الاخيرة ل كانت حاضية لباب يتحل ،خطوت رجلو وصوت صباطو ملي كيتمشى كانت كتسمعها ، عندها امل غيحن قلبو فلي ولداتو ويطل عليها ولكن مشاكل الحياة قصحوه وطلعو ليه فراسو ونغصو عليه حياتو هادشي ل قالت بينها مع راسها ملي سمعت حسو غادي وكيبعد تنهدت كتدور عينيها فدار ل ولات بنسبة ليها غير خربة ظواوها معمشين وحيوطها حازنين من نهار ل فارقها صاحب الضحكة ل كان عاطيها الروح...

لكبيرة بنسبة ليها مدفناتش غير ولدها دفنات معاه حياتهم كاملين وبقاو غير لگسدات ل عايشين....

كانت واقفة في كوزينة كتوجد لعشا بزز منها نهار كلو وهي ناعسة كتحس براسها كرشها ولات ثقل من قبل مرة مرة تهزها من لتحت حتى ترتاح وترجع تنزلها ، غادا جايا كتوجد بخطوات ثقال مظاهر العياء باينين على وجهها ومعندها لمن تشكي الوحدة قتلتها وما لقات معامن تحكي مولفة الا ثقالت عليها هموم دنيا كتعود لصحيبتها ولا خديجة وكتخوي شوية وتنفس على كربها ودابا مكاين غير الحيط قدامها ل تعاود ليه بلاما يجاوبها كتسنى غير امتى تولد باش يعمر عليها دنيتها ويلون حياتها بلون مبهج ... طفات على عشا بعدما طاب غسلت وجهها ل خلعها في لمرايا كان صفرر وباهت فمها مشقق وناشف، حسات براسها كبرات بزاف من نهار حطت رجلها فهاد الدار ، تضحك شوية و تبكي بزاف و تقول خليها على الله الدنيا هكا دايرة كتلعب بيك كيف بغات..دخلت لبيتها شافت فساعة وتبسمت ، وقتو وصل !! حيدت بيجامة ل كانت لابسة ولبسات وحدة اخرة جديدة كتفوح بعطرها الفطري دوزت تحكيلة على عينيها ضوات بيها شوية على وجهها.. وجلست قدام التلفازة كيف كل نهار بلاصتها المعتادة ل غير يدخل يلقاها فيها ...تحل الباب ودارت لعندو راسمة ضحكة على وجهها وسرعان ما محاتها ملي شافتو كاعي ، نزل لحنكها طبعو قبلة مع تنهيدة عامرة هضرة شداتو من يدو وبلاما يتكلم جلس حداها راخي ظهرو على المخدة وهي تكى على ذراعو مشابكة صبعانهم بزوج وقالت بصوتها ل كيهدى من روعو ~ ماالك شفتك عيان ومقلق شنو وقع !!

غلام تقل عينيه فيها براحة ونطق~ …غا صداع الراس ، قاد جلستو وحدر راسو التحت منزل العيا عليه . .. جا عندي بات داك المسخ لي كتعرف ديك الكلبة وقاليك طالب يدها الزواج !!

نجمة جوبتو باهتمام ~ ونتا شنو بان ليك !!

غلام حرك فمو جنب كيسوط ، دغيا حجبانو گرنهم ~ يضبرو لمحاينهم سيفطتو عند باها انا معنديش دخل في هادشي لي بغى الموت راه البحر خرجت سوقها نهار ضربات ترابي باها وسميتو في الحيط وخرجت مطولة لزنقة بحالا معندها ل يحكمها ،ما تسالني حتى حاجة من غير نهار لقاها خارجة نهرس ليها ركابيها غيرها تفوت ساحتي

نجمة قلبها لحنين خارج عليها ، نطقت بغات تصفي لخواطر وتخلي لما منين يدوز بين الخوت ~ راك خوها اغلام معندها حد من غيرك ، بغات تجبد سيرت معاوية و رجعت سكت وقالت ~هي غلطت ولكن إن الله غفور رحيم و مسامح كريم متكونش قاصح

غلام حيد يدو من ويط يدها وتم نايض ~ …وانا ماشي كريم ، أنا غادي نكمي ليا شي واحد نرجع مجاجي

رجع شافيها زاعف وقال معاجبو حال ~ نساي عليا هاد سيرة سديناها

الحال كان على ما هو عليه المحزون فدار وسباب مريم هاد الاخيرة ل ضربت الدنيا بركلة مقابلة غا شعرها وتمشط فيه قدام لمرايا وتدهن في زيوت باش يطوال وتدعي فلي كان حيلة وسباب ، اما مها كيتها كية راجلها هجر فراشها وخلاها بحال الحنش لمقطوع ليه راسو ، رجع لومة كلها عليها هي ل معرفتش تربي ومربطتش بناتها باش نلقى ما تسيب حتى كبرت كل وحدة فيهم وعر من لوخرا .....كانت جالسة شادة صينية قدامها كتشرب اتاي لعشية وتدوزو بلويزات تا سمعو صوت دقات جرات رحمة كتجري تشوف شكوت كتموت على حلان الباب ،حطات يدها على جنبها وقالت بشوية ~ علامن كتسولي اخالتي !!

~ كاينة لالة لكبيرة !! حركت ليها رحمة راسها باه وهي تكمل هضرتها وقالت ~ سيري قولي ليها واحد لمرا طالبة ضيف الله !!

طلعت كتجري ف دروج قالت لمها بالحرف شنو تقال ليها ، لكبيرة شدها لفضول بغات تعرف شكون وهي تنوض كتقاد في حوايجها وشدة زيفها وطلات من دروج لفوق وقالت ~ طلعي الالة مرحبا بيك

طلعت أم عبد الكريم ل بغات تطرق مسمار ولدها ليوم قبل غدا ، علاش لا وهي غتناسب مع خليفة وغلام لمرا بغات تضرب زوج فواحد كانت جايا وجايبة معاها سكر سلمت على لكبيرة ل دخلتها لصالون لمقاد ولمفرش تبدلت الصينية وتحطت وحدة اخرا على حقها وطريقها بدوازها ومدخلو في المعقول حتى تشاركو طعام

عاد قالت ليها شكون هي وعلاش جات

حطات صفية كاسها فوق طبلة وكملت هضرتها ~ ايوا شنو قلتي الالة لكبيرة ، انا جيتك نيشان وقلت ليك ل كاين وراه راجل متعيبو حتى حاجة من غير ذراعو وولدي بذراعووو كي الفاس فينما حطيتيه يحفر

لكبيرة زمت فمها معرفت متقول

ليها معيباتوش حيت خضار وكيبيع فسوع حيت راجل بنسبة ليها مكيتعابش ، ولكن كانت باغا بنتها نهار تزوج ويجيوها الخطاب يخطبوها حيث جالسة فدار باها معززو مكرمة ماشي حتى الفاس توقع فالراس

حركت راسها بلا بلاما تفكر ونطقت ~ بنتي مازال صغيرة وطايشة ومبغاش نزوجها دابا وتا باها مغاديش يبغي

جوبتها صفية ~ فهمتك ولكن هادو هما لبنات كيكونو زريعة لبلاد ودارهم خااالية تشاوري مع بنتك هي اللولة وشوفي شنو تقوليك متوقفيش في سعدها

ضحكت باستهزاء فخاطرها والهضرة واحلة ليها في الحلق ، الا كان بحال هاد سعد الله يقطعو...بضحكة صفرة نطقت وربعت يديها كتخمم ~ يكون خير

رحمة ل كانت كتصنط هزات الخبار حامية وحطاتها لمريم ل كانت غطير بالفرحة كتنقز وتضحك وغير تشوف في لمرايا ويبان ليها شعرها تشدها البكية ~ اويلي غنبرز بهاد شعر هاكا داير

رحمة عيبت فيها وقالت كتشير بيدها ~ وتا يقبل با بعدا !! علاما سمعت مي قالت ليها بنتي صغييرة منزوجهاش دابا

مريم جوبت بعصبية ~ تالين تنولي قدك ونشرف وميساومني حد ،الا اختي انا باغا نتزوج وبغيت عبد الكريم هو ل يكون راجلي

رحمة ضرها خاطرها من هضرة ختها لدخلت ليها لصميم وعگرتها ، وهي كرهت تتزوج شنو ذنبها الا باقي حتى واحد مجا دق فبابها حتال دابا من ديما باغا تاهيا تتزوج وتكون عندها دارها وكوزينتها وتطيب لزمانها ولكن ماشي گاع ل حلمنا بيك كيتحقق ناضت من حدا مريم بلاما تجاوبها وخرجت مشات لكوزينة تنصب لعشا دير ل كتعرف ليه وتخشى في كوزينة ل دخلت ليها صغيرة ودازو سنين عمرها فيها بلاما تحس اما مريم تكات على سداري وكتحلم براسها فوق العمارية وفجنبها عريسها ل كيبان ليها فعينيها سلطان زمانو ، غرها لوشام ل فاليد وغرها زين والقباحة كانت كتقول يا هو يا بلاش ودابا غدير بالمستحيل باش تاخدو

كما تديين تدان ولو ضار الزمان ، ول درتي فناس غيدار فيك ... ل ضلم غيتضلم ولي شمت غيتصاب بما شمت ....لكبيرة ياما ضربات لمعاني لنجمة ياما فقصتها وبكاتها ونغصتها بمعيورها ، كانت تخرج البارود من فمها بلا مضرب حسبة معندها سوق فلي واقفة قدامها وباركا تلوح عليها فسمها ل كينخر فيها وياكلها ويبكيها بلا صوت وبلاما تجاوب ولا تقول آه ، كانت كتكابر وتدبب تغمض عينيها وتدوز ستقبلت الاساءة بإحسان حيت مآمنة بكلمة كل مسيء بما اساء ...وهاهو جا النهار ل كل واحد غيشرب من نفس الكااس ل سقاها بيه ، كلمة منحوسة ل داروها ليها بحال حبل داير على عنقها بطلعة ونزلة يقجوها فيها حتى تقطع فيها النفس والعرس ل تعيرت حيت جات بلابيه ودهازها ل مدارتوش وفطورها ل مجابتوش تا مريم وقع ليها كثر وجدر بعدا نجمة تخطبت بشانها وتزوجت بعزها اما مريم غتمشي بدلها غتبقى ديما موصومة على جبهتها حصلت معاه وحيت بنادم عزيز عليه يزيد من جنابو يقدرو يديروها حملت قبل متزوج هي وياه ....هادي هي الدنيا الغرارة ل ضحكاتو البارح تبكيه ليوم ول تعجب تدوز ليام وتخليه يتبلى ، ولكبيرة معرفت باش تبلات وهادشي ل تسلط عليها بسباب بنتها معرفت مدير فيه ، الراجل ل كانت متمنية يخدم قلبو ويحن فبنتو وكان عندها يقين غيرفض زواجها ومغاديش يقبل يصلح الغلط بغلط كبر منو صدق واافق ، تلاقا ببات الدري فجامع قنعو بكلامو الموزون وقال الله يسخر ل دار الذنب يستاهل لعقوبة ، اما حتى غلام شد فريو وكلمتو عيات مو تمشي وتجي عليه باش يتدخل مدات منو لا حق لا باطل كلمتو كان سيف على رقبتو وفى بيها ، بقات وتْشَّوَات حتى عيات وفلخر لقات راسها غتصيفط بنتها عروسة بلا عرس ، مجاتها هدية مخيطات تحتية زربو عليها زربة خايبة وهي باغيا وفمها محلول عاجبها الحال عند بالها زواج فيه غا ليل النهار معرت فين نساتو ، معذورة طايشة ومزال رمانة مغمضة مولفاها باردة وكتشوف غا زوين عمرها سمعت على الخايب مولفة غا كدوزها على بنادم ومازال دوز عليها وتذوق لمرار وتحس بيها مزياان ....

كلشي كان حاط خدو على وسادتو وناعس الا هيا !! كانت فالبيت ل فيه بناتها عينيها على مريم ل وجهها مبشور وكتبان مرتاحة فنعاسها علاش لا وغدا هو نهارها نهار ل غتزوج بيه وغتربط حياتها فيه مع انسان عرفتو مدة قليلة وجاها على هواها وگانتها كيت مها ل عينيها نشفو وحاسة براسها مزوية مقادة تضحك كيف ناس ولا تنطق وتقول زوجت بنتي وحيدت اللوم عليا ،كانت جالسة مقردة مطرطقة عينيها بحال موكة دماغها خدام كيغزل لحرير وينسج الصوف حتى صبح الحال واذن لفجر ، توضت وناضت صلاة وكتطلب من الله ميكملش هاد زواج شنو تقول لجيرانها لعائلتها لخواتاتها ، كلشي كان كيتسنى نهار ل تعيط عليهم فيه الكبيرة وتقوليهم مرحبا بيكم لعرس فلانة حيت عارفين خليفة صاحب عراضة وواجب وكيسكت لفام والعرس كيبدا عندهم قبل بشهر مكاين غا كول ووكل لغنا بليل ونهار كلشي كيكون على حقو وطريقو من ليلة الحنا حتال لحزام سبعيام ودابا مكاينة لا خطبة لا حنا كاين ضريب صداق والله يعاون وجهها معرفت لمن تعطيه ،اش تقوليهم زوجت مريم بلاما ندير العرس ممولفاش عليهم كلشي غيتنوى ول خافت منو غتوقع فيه وبنتها وسيرتها غتولي على كل لسان

يتبع...