صاحب اللحية السوداء الجزء الخامس

الدنيا عدماتها وخلاتها تسني موتها وروحها مزال كطلع وتنزل ، فرضت عليها تعيش وتتسمى مزوجة تحت دراع خاوي ، راجل حگار مكفاهش الحياة ل ظلمتها زادها بظلمو وفرض عليها تعيش على ذمتو وغبر مبقاتش شافتو ...طبعو بوحدو مكاينش شبيهو فيه مكيتفاهم لا بالخاطر لا باللين وكلمو متنزلش للأرض

واش ل ميقدروش عليه والديه غتقدر عليه بنت الناس اللي مزال طامعة يحن فيها ؟؟ اكيد لا !! نجمة بغات تهرب من سداري في دار ختها بالحق جات ولقاتو في دار مع عدوزتها ، معندها لا ماريو لا بيت لا دفة تسدها عليها وتتهنى، ولات تنعس في بيت الضياف وبعض المرات في صالون على الاقل عند ختها كان عندها فين دير حوايجها وكدخل وتخرج براحتها واخة فاطنة نكارة وكدير الفرزيات لكن مستحيل تفوتها اما هنا معندها حتى مانطة بسميتها حوايجها معرمين في قنت البيت وكتلبس غير من الحبل والراجل ل غيشوف من حالها ويدير ليها شان عطاها بالظهر وخشاها في القبر وهي حية ...

كانت جالسة فقنت سداري شادة راسها وكيتعاود شريط حياتها قدامها !! مرة تنهد مرة تبكي مرة تلوم ايديها ل خلاتها تسني على ورقة اعدامها ...حياتها هنا عذاب واعمال شاقة ..

نهار حطها قدام باب دارهم ورما عليها كلامو ل بحال سم

"ل بغيتيه وصلتيه ، دابا نتي مرتي وعلى سميتي وشرفك من شرفي ومن هاد الدقيقة تاع ليوم وجهك منشوفو لا في زنقة لا ف شراجم ،هاد الباب عتبتو نار بين رجليك وياويلك ديري عكس كلامي ديك ساع نوريك اللي معمرك شفتيه " ولات محبوسة ظلم كتسنى امتى يجي نهار ويتطلق فيه سراحها .....

سالا الصيف ودخل لبرد وهي مازال على نفس الحال مرا بلا راجل ...كلمة راجل اللي كانت كضن أنها الدنيا ومفيها وانها غتهنيها من لقب بايرة ولات هيا الكابوس ل منغص عليها حياتها ،ياريت كون ترجع بالزمان اللور وتقول مبغيتش غير خليوني أرملة ومنحوسة ولا زواج الذل لي وصلت ليه، غير خليوني نحرت على ختي وولادها نهار وماطال وبالليل نحط راسي ونغمض عيني وننعس مرتاحة ماشي فحال دابا العين مغمضة والدماغ خدام وبقاليه عرق ويوقف وشي حل ملقاه في كل صباح كتحل عينيها على نفس المخدة كتستغفر ربها وكتطلب منو يدير ليها مخرج ...نجمة ل كانت منورة وعينيها كيضحكو ومضوية بحال الگمرة ذبلات وطفاها القدر ل مازال شاد خيوط حياتها بيديه ،نجمة ل كانت كيف طير الحر ولات مسدود عليها في قفز الزواج بلا زواج مكيجمعها مع راجلها من غير سطر جمع سميتها مع سميتو وسط ورقة سناو عليها بزوج .....

~~~~~

ناضت من بلاصتها كيف كل صباح جمعات البيت ل نعست فيه ودخلت لكوزينة ، ملقاتش الخبز وعلى سعدها ووعدها جبدت القصرية تعجن بطبوطات لفطور وهادا هوا حالها منهار جابها لدارهم الشقى بالليل والنهار ومو وخواتاتو كلشي جالس وهيا منها گراص وزيف الراس

وحتى من لعدوزة ل كانت متمنية فيها الخير تحسبها وحدة من بناتها وتهلا فيها تقلبات عليها ملي لقاتها حادگة ونقية وكتبرد القلب تسوخرت اللور وحطت الايد على الرجل وولات كل مرة مزيداها لتخميلة جديدة ولا حكان الماعن أما الصالون ولا يتخمل كل يومين

والعافية الزرگا تاع زهرة مكاينش النهار اللي متبكيهاش فيه على الأقل مرة ولا زوج بكلمة طالعة وكلمة نازلة وملي تشكي لعدوزتها متهدر متكلم وتجي من بنتها وتقولها مديريش راسك فيها خليها تقول اللي بغات نتي مولات الدار وهيا غير ظيفة راجلها خدام بعيد وغير يرجع تهز ولادها وتزيد ..."مولات الدار" كلمة كَضَّحَكْ وهيا معندهاش حتى سلك فهاد الدار كتشوف راسها بحال الخدامة ل جابوها ترس عليهم فابور ، الحمام هوا اللخر عمرها مشات ليه ضروها جنابها ببرد التواليت ومع ذالك صابرة وساكتة وكتناجي ربها فجوف الليل واكيد مغيتخلاش عليها ....وهيا كتعجن دخلت عليها زهرة ناوية على خزيت بحال كل صباح، شعرها طالع لسما ومزال مغسلت حتى وجها وقالت وهي هازة حاجبها ليمن ل قرب يفوت جبهتها ~ ويلي مي !! عاد كتعجني ،؟ الحادكات وعيلات الرجال الحرات راهم حطو الفطور وسلاو ...معاش غيفطر با بالسلامة ؟؟

شافت فيها نجمة بنضرة جديدة وعينين خارجين ، القلب قدما كان طايب رجع قاصح وعْمَرْ ومبقاش عندو فين يزيد ~ ايوا الا بغيتي باك يفطر ،نوضي شمري على دراعك وفيقي بكري ديري ليه لفطور نتي نيت !! أما انا غير بنت الناس ونتي ولا مني فيه ...

زهرة سمعت الهضرة ومتيقيتش ومرضاتش تقوليها هكاك ولفات تعايرها وتسكت معارفاش بلي سكات كيولد الانفجار ،تمات غادة ليها وعينيها على وجهها ل من ديما حاسداها على صفااوتو باغا تجرو ليها وفنفس الوقت كتغوت ~ ياك المنحوسة يا قدام الشر ، يالي من نهار شفناك مشفنا النهار الزين، تحل لك الفم ووليتي ترادي على سيادك ل دارو فيك خير وستروك ...

تلاحت عليها وهي تدفعها نجمة بيديها مبعداها على وجهها هادي تعطي ولوخرا تعطي تا وحدة مخلات من حقها ..محسو غير بالعدوزة وشيخ بيناتهم كيفكو هاد الاخير كيضرب في بنتو مقادش يقيس حرمة ولدو بقا حتى فكهم، نجمة حدرت راسها احتراما ليه وزهرة مزال كتغوت وتعاير حتى ضربها لراسها عاد سكتات ...نطق معصب وايديه كيترعدو ~ صباح لله ، مالنا اش كاين ؟؟ كان كيشوف في زهرة كيتسناها تهضر

حتى نطقت نجمة قبل منها وهي كتشوف في حوايجها لتكون شي حاجة من لحمها بانت ~ شوف أعمي !! بنتك قجرت عليا خاصها فين ما تشوفني تعيرني معرفتش شنو درت ليها وااه انا عييت لي نمسي عليه نصبح عليه معاها

دار عندها شيخها وباس راسها بأسى وقال باغي يلين خاطرها حيت عارف بنتو لفعة سامة ~ مسحيها فيا ابنيتي ونتي مولات العقل وخليها ليا أنا غنتفاهم معاها ولدارت لك شيحاجة غير جي عندي مضاربوش تخليو خبارنا تخرج لجيران...

خنزر في بنتو ل كتبلع الريق بزز مزال مسرطت ل وقع وقال بنبرة تهديد ~ الهدرة معاك من بعد وهاهي قدامها كنبهك ها وذني منك الا تشكات منك شي مرة متلومي غير راسك ؟؟!

خرج كيستغفر وخلا العيلات بوحدهم ، ضورت لكبيرة عينيها عليهم بتناوب كتسول وزهرة كتعاود ل كاين ولي مكاينش حوايجها عامرين عجينة ل كانت فيد نجمة ،دارت لكبيرة عند مرت ولدها معصبة وبنبرة عتاب قالت ~ ياك ابنتي !! ايوا هادا المضمون فيك وليتي كتعايرينا بخبزة كتعجنيها وتاكليها معانا ، ايوا تباااارك الله عليك..طولتها معلية صوتها وايدها كل وحدة حاطاها على جنب ، بكلامها وصلات بنتها فين بغات ل شافت ف قليلة الزهر بقليان السم ...

نجمة كانت مصدومة من هضرت لعدوزة ليها ، شنو كانت كتسنى تجي على بنتها معاها لعدوزة كتبقى عدوزة وعمرها ديرك وحدة من بناتها واخا تضوي ليها صباع يديك

كاملين ....خرجات لكبيرة مخلية بنتها تبرد فقصتها و تكمل ل بدات من معيور و بكلمات جداد سمات نجمة وخلاتها وراها كترعد ~ عرفتي مقامك شنو ؟؟ راك غير خدامة جابها خويا ترس علينا ، يعلم الله اش شاد عليك حتى لاحك علينا وزاد خلفة عايفك وعايف لبلاصة ل نتي فيها كي شفتي مكيحملش يقرب للحاجة لمقيوسة ، ختمت كلامها بغمزة بمعنى عيقي راك غا شياطة خوه وخرجت خلاتها بوحدها والكوزينا كدور بيها ، حطات ايدها على بوطاجي مسندة عليه هضرتها فيضت كاسها ،وشعلت العافية في ذاتها ولا صدرها كيطلع وينزل ، كبات ليها كاس الما كتشرب وتغدد وتحلف صافي هنا والله يجعل البركة مبقاش الراس غينزل ياربحة يا ذبحة مغنعيشوش قل ولا كثر من عمرنا ولمدرناش الحل لراسنا وهزيناه الفوق غيبقى ذليل تال يوم القيامة ، جمعت راسها ومشات لعند شيخها ل كان مع مرتو وولادو ل من بيناتهم زهرة جالسين يتسناو في فطور ومنها ينهي بنتو وهي تدخل عليهم نجمة وقالت ~ عمي أنا غنمشي نشوف داارنا

قطع هضرتها محنحن مخلاهاش حتى تكمل شنو بغات تقول بترجي نطق ~ بنتي !! الله يهديك ، راه راجلك مباغيكش تفوتي الباب وانا كون جات عليا نديك ونجيبك ولايني منقدرش ندخل بين لمرا وراجلها غير صبري حتى نهضر معاه ويكون خير ، انا غنوض نتوضى نصلي شي بينما وجد لفطور ، هرب منها حيت كتبقى فيها ومقادر يدير ليها والو ، شافت فيها لكبيرة وقالت باغا ترطب معاها الجو ~ واا بنيتي واش راجلك مانع عليك لخروج ونتي كتقولي نمشي ، تبتي عفا بنتي وهادشي ديال الصباح مبغيتوش يتعاود نتي مولات الدار وزهرة غير ضيفة وغتمشي جالسة تحاسبي معاها على شقا هادشي راه معندناش

بنبرة عتاب نطقت نجمة والحزن باين على عينيها~ مولات الدار ل معنديش فيها حتى بيت ،؟ مولات الدار ل كتصبن گراصن الضياف ولي تخمل كل يومين ودوش غير في التواليت حتى البرد هلكها في كلاويها ؟؟ بتحدي خرجت عينيها وقالت من جديد ~ شتي دار ختي هيا لي غمشي ليها واليوم والا شفتي لي كتقولي عليه راجلي قوليه مشات لدارهم راك مخديتيهاش مقطوعة من شجرة

خلاتهم مخرجين عينيهم فيها ممتيقينش ، اما هي راه لبسات جلابتها وزيفها وخرجات مخلياهم مستغربين منين جابت هاد الجرأة باش تجاوبهم وهيا من نهار جات على طرف لسانها غير نعام، وواخة، ولي بالك

مفخبارهمش بلي بضلمهم طفااو ديك البراءة لي فيها ، وولدو نجمة قاصحة بسبب معاملتهم معاها ، حتى واحد محاس بشنو فقلبها كلشي غير كيآمر ويغوت ويفتي عليها اشنو دير واشنو باغي ، و عمر شي حد قالها مالك ولا اشنو عندك ولا اشنو نتي باغا

مشات وخلات وراها عجاجة نايضة، كيفاش البنت السكوتية ل دايرينها تحت الصباط تحل فمها بعدما كانت غير كتشقى وتحرث بلا كلمة اح ، مَتَيْقُوشْ بلي البنت ل عاد لقاو راحتهم من وراها تحل الباب وتزيد خلفة مع طريق بلاما دير بحساب حد ، كون كانو فبلاصتها صبرهم غيتقادا ويديرو كثر منها، محاسينش بيها شحال مقاسية وصابرة، محققوش في ملامح وجهها كيف عينيها ذبلو من لعيا ولغبينة ،مخشية وسط حوايج باليين وهي ل كانت مكيخطاها خير

ناضت زهرة من بلاصتها مطرطقة عينيها في مها ~ تي شفتي مرت ولدك الكبيرة اش دارت ؟؟ كيفاش تحداتنا وتحدات هضرة با وراجلها وحلات الباب وخرجات ، هادي هيا العروسة لي عجباك ؟؟

شفتي تربية العيلات ل معندهم رجالة في الدار بسيف بزاف عليها ديور وَلْفَتْ الدوران بين لخوت يعلم الله شحال من صبع قاسها وجايبها لينا تنتر علينا منهار دخلناها وحنا لور قدامها قدام النحس واحد صيفطاتو لقبر يعلم الله اشنو ملغجاه والتاني خلاتو يخوي دارو حتى ولينا نسمعو حسو غير من عند البراني ، جرات شعر راسها وخبطت على الحيط وقالت ~ وشفتي دابا والله لبقات فيها الا مخليتو يسلخ مها قدام الجيران راك مولدتي فيا غا لخلا أَ مِي

لكبيرة طمرت كتشوف فكشاكش بنتها خارجين خلاتها حتى كملت هضرتها وقالت ~ سمعي ابنت كرشي راني كنعرفك مزيان وعارفة نبازاتك والبنت الا خرجت راه بسبابك ، منهار جات ونتي سمحتي فدارك وولادك و سكنتي عندي وليت كنشوفك كثر مكيشوفك راجلك هادشي كلو لاااش ، خنزرت فيها وكملت باش تبقاي تلوحي ليها المعيور في الوجه الا مخفتيش لا مني ولا من باك خافي من ل خلقك ... البنت عاجباني وباغاها نقاتني ومسحت ليا ركانية وكون ما هي كوراني واقفة في الكوزينة ونتي كي تنوضي تاكلي وتخلي الماعن موراك حتى گراصنك بغيتي ل يصبنهم ليك .....والا مشات لدارهم من حقها غا ولدي الله يهديه عكسي...والا سمعتك وصلتيها ليه غيكون معاك كلام خر ونعاود لباك لي كاين ولي مكاينش راني ساكته عليك غير باش منضسرهاش وتبقى تحت من ايدي ماشي باش تهربيها ليا وتهربي لدارك وتخليني واحلا في شقا تا خواتاتك في عروبية ماشي هنا ،ايوا هانا دويت ونوضي كملي على فطور ل بدات وورينا حنة يديك اما طول لسانك مولفين عليه

هضرة مها مدخلاتهاش لوذنها باش تخرجها ل كيدور فراسها هو ل غيكون حالفة تا تكحلها ليها مع غلام اما حتى سعدها القطران بيض عليه

وصلت نجمة ل الدرب ل ياما خرجات سلتة تلعب فيه وهي مسخرة ، لدار ل كبرات وتربات فيها ل ضحكات وبكات مع ماليها ، كانو عينيها حمرين وراسها للارض حشمانة ومعندهاش لوجه ل غتوريه لختها ، بلاما تردد فبالها كتقول اللحم الا خناز كيهزوه ماليه ، دقات كيف مولفة وهي تسمع صوت ل توحشاتو كيقول شكون ؟؟

ثواني وحلات فاطنة لباب وحطت صبعها على حنكها مجبداه كتشوف في ختها لابسة جلابة مع زيف وصندالة الميكة والعيون وارمين ، تلاحت عليها نجمة مخشية في حضنها كتبكي بلا صوت كيتسمع غير صوت انفاسها المخنوقة في مقابل سكات من جهة فاطنة ، خلاتها حتى تفشت وقالت ليها طلعي وطلعات موراها حاضياها كيفاش ضعافت وعضومتها بانو والهم ل باين في تقاسيم وجهها ، دخلو لبيت جلست وحدة قبالت تانية ، فاطنة لوجه ل بانت بيه ختها عارفاه ديالاش وكانت متأكدة بلي طوال زمان ولا قصار غيجي هاد نهار ل غتوقف فيه قدامها كتعاني ....

شافت نجمة فختها ل كانت باينة على عينيها شلا هضرة باغا تقولها غير مطمرة وبلاما تخليها تسنى نطقت وهي كتبكي زوج دمعات من العين ~ .ندمت ندمت ندمت حتى ندم زغب راسي لي مسمعتش هضرتك أ ختي !! اللهم مسكينة ترملت بكري ولا نسمع وراه تزوجات ومات وتزوجات وطلقات ، اللهم تمارة الحي الصناعي ونرجع ناكل غير خبيز بايت وكاس أتاي ونغمض عيني مرتاحة ولا ناكل اللحم حار قطران والقلب معصور

بدات كتنخصص ~ انا ل كانت كلمة راجلك كتخليني طايرة وشادة النجوم دابا كلمة راجلك كتباليا شناااق واقف عليا كيتسناني ندوز لدبيحة

الراجل لي معمري شفتو منهار حطني في عتبت دارهم وزاد ، وزايدها حكم عليا منطل منعتب الباب، دخلني لدارهم ل معندي فيها حتى دفة راشية ولا مانطة بسميتي على الأقل هنا كان عندي سداري وكانو كيقولو بلاصة نجمة

ومكملينها اختي الشقا لي ليا ولي عليا ولي مفروض عليا. ، مني الصابون مني العجينة مني التخمال عاد مسامر الميدة لي مين ما دزت يدگوني وساكتة رجعت جفاف كيتمسحو فيا الرجلين، كون غير كندير هادشي ويجي الليل ونلقى ل يطبطب عليا ويسولني كيداز نهارك ولا غير يوقرني ،صافي عييييت ومليت ومبقيت باغة والو باغة غير الفكاكة ....

طاحت على ركابيها كتبوس لفاطنة ايديها وكطلب ~ ها العااار اختي ، ها العار امي التانية بغيت نتفك ، عتقيني وديري ليا الحل والا شي نهار قتلك بغيت نتزوج قتليني وشربي من دمي ومتحنيش فيا ، نخرج نخدم بالليل والنهار عمري نقولك اح غير هنيني من هاد القوم رآه الجهد لا جهد الله

تبكي وتنخصص وتبوس لختها في الايدين والرجلين وتقول واش تحركت فيها الشعرة ، شنو دير تحرضها على الطلاق ، تخرب معاها العش ل عاد بدات تبني فيه ، ببرود

نوضتها فوق السداري ونطقت ~ نوضي غسلي وجهك ونعلي الشيطان وملي تستاراحي رجعي لدارك هي ل دايمة ليك أما أنا غيجي الوقت ل غنظرگ فيه وجهي عند مولايا وغتبقاي تلاوطي ولامن يقبل بيك

نجمة طرطقت فيها عينيها ممتيقاش ~ اش كتقولي اختي ، فين بغيتيني رجع للعافية ياك !! مبقيتش فيك ؟؟

فاطنة رفعت نبرة صوتها ~ شكوون لاحك فيها من الأول ، خبطت على صدرها مع كل كلمة ضربة وقالت بالغوات ..واش انا ؟؟ واش مك , واش خوك ، الا نسيتي نفكرك فيه ابنت ميمتي ، عييت فيك وزاوگت وجريتك وقلت ليك زيدي خلفة معايا راه كل زرع غيجيب ليه الله كيالو ونتي وتگولي واش سمعتي مني ، مكانت هامك تا حاجة من غير دودة ل جاتك تا كبرتي شنو كيسحاب ليك زواج فيه غير ليل وحديث لمخدة ، اسمعيني هاه باش تكوني مرا مزوجة خاصك تكوني گادة وگدود صبارة ديري عين ووذن ميكة تصبري لتمارة وتمارة وتمارة ولراجل الا كان خايب ولعدوزة واللوسة ، ياما صبرنا لشقا ولعصا ومعيار فينا وعمرنا جبدنا على فمنا طلاق ، والا كان غير على لمانط ودفة راشية ل كتدوي عليه ، راه نتي ل معزيتيش راسك من لول رخصتيه من لعزو قردتي عندهم مدرتيش بحال لالياتك باش يدار ليگ لگود بحالهم ايوا شربي اش عصرتي معندك لاش تجي عندي دابا تبكي عليا حيث معندي باش نفعك بلاصتك معاهم ماشي معايا أنا مندخلش لداري مطلقة وانا عندي راجل في الدار غيتزوج و بنت مادة يدها الحنة اش يقولو الناس الدار فيها هجالة ومطلقة أوهو ابنت مي الطريگ اللي جابتك ترجعك ...

كانت كتقول غتضربها تعايرها تلوما ولكن باش تجري عليها مكانتش دايراها على البال الا مغضبت عندها فين غتمشي ؟؟ لعندمن غتصد لزنقة ينهشوها لعند مرت لخو يتشفاو بناتها فيها ، بالحق هذا سر ل مدارش علاش يرجع هذا جزاء ل ميديرش بحساب نهار الخايب ...

عفطت على ما بقى من نفسها وكرامتها وقالت بصوت باكي وهي كتمسح عينيها ~ واخا تقتليني اختي معندي فين نمشي ، معندي تا حد من غيرك ، الا غلطت سمحي ليا ومتقسايش عليا باركا ل فيا كافيني.. ناضت لبيت حيدت زيف وجلابة وسداتو عليها وجلست

بقات على داك الحال حتى بردات ، وهي توقف مقابلة مع لمرايا جامعة شعرها على شكل شفنجة مهملة .. مخلية لي بقى منو مبعثر على وجها … تحت عينيها كحل بسهير وتفكير وتمارة .. كتشوف راسها كيف رجعات تقول هزيتي نجمة وحطيتي وحدة خرى …مكذبوش ل قالو الهم يكبرك ويمحييك قد ما كنتي عاطية العين تذبالي.. هبطات دمعة كتسابق فوق حنكها مسحتها دغية … مبغاتش تضعاف ومبغاش تبقى ديك نجمة البكمة لي حجرة متحركها من بلاصتها.. براكة عليها اش دوزات واش تقال عليها … خاصها توقف على رجليها ماشي هي لولة ولا لخرة لي معندها زهر … قدرها مكتوب وهي راضية عليه … تفضل تكون عبدة تحت رجلين ختها ولا تكون عبدة عند لعكوزة ولوسة … تنهدات بتعب وحزن كبير … صاف جا الوقت لي تبدل وتهضر على حقها تخرج عينيها ودير اعتبار لراسها مبقاتش قادة تهضم لكلام… مسييح الصباط والمعيار عيات منو … خرجات من البيت حالفة مترجع واخا تعرف تبقى فزنقة المهم كرامتها متزيدش تمرمد كتر وكثر … دخلات نيشان الكوزينة باش متشوفش ختها وتناقش تاني معها مبقى عندها جهد … بانت ليها الخضرة محطوطة مشات غسلاتها وقاداتها فالتلاجة جبدات اللحم شلضات عليه البصلة ودموعها هابطين تمسح ويعاودو يهبطو واش بالبصلة ولا من قلبها لي بقى فيه حالها …ردات لغدا ومشات باش تعجن الخبز لقات ختها عجناه وحطاه يرتاح…. كفضات ومشات تهز الماعن تحكهم وتلف الوقت باش متفكر فوالو …. طالعة خديجة كتلاوح رجليها في دروج جات فنيفها ريحة طياب نجمة كذبات شنو كتشم ولكن كل مكتقرب كتزيد تأكد حسات بالفرحة وعينيها لمعو بمجرد تفكير بلي نجمة تكون في دار ، الرجلين ل كانو يتمشاو بالعبار ولاو يشتفو طلعت بجرا وحلات لفصيل وغير بان ليها خيالها في كوزينة وهي تغوت تا قفزت فاطنة " نجمةةةةةةةة " عنقتها من ظهرها كتنقز فرحانة من قلبها ضارت عندها نجمة مبادلاها العناق توحشو حديثهم وتوحشت معاتبتها كأخت كبيرة ونصيحتها مع شقاوة الاخت صغيرة ل كانت مفوجة عليها شقى الايام

خديجة بضحة واصلة لفين وفين ~ الله ياختي وشحال توحشتك اجي بعدا شوفي فيا ، حققات فملامحها مزيان، الضحكة بدات تلاشى بشوية بشوية والخوف ركبها قالت بوجه حزين ~ناري ماالك ؟؟ ، ياكما ماجاش معاك الزواج ولا انا عيني مضبين ، ردات لبال لنجمة والغصة ل باينة واحلة ليها في الحلق غير من طريقة باش سرطات الريق وهي تحاول تبدل الهضرة ، تي فين هو صدر الواقف شفتو تمص ياكما غلام مدايرش خدمتو ياك بعدا هادي هي سميتو ؟؟

كتافات تجوبها مستهزئة وبدلات الموضوع وقالت ~ باقا مصندلة معندك علاش تحشمي !!

خدييجةة هزت كتافها وجرتها من يديها باغا تجبد من لسانها الهضرة ~ ماشي سوقي !! اجي معايا وخوي ليا لمزيودة ونصحيني راني مقبلة على زواج منبقاش فيك ؟؟ قالت بحماس ،كي داير زواج زوين ولا خايب واش بصح ليلة لولة غمزتها وهضرت بشوية باش متسمعهمش فاطنة ، كتوعت !!

نجمة حطات صباعها على نواضرها ل كيزدحو ، وعقلها كيدوي مع راسو ، على اشمن زواج وليلة كتدوي ،شفت حتى وجهو ، قست حتى ايدو ....تنهدات وهي ضربها لكتفها ووقفت ~ خليني نمشي نگرص لعجينة نديها لفران داك سوق بعيد عليك

هربت من الحاحها الشديد ماشي حيت مبغاش تعاود ليها ولكن معندها متقول مجربتش هاد الاحاسيس بش توصفهم ،دخلات لكوزينة لقات ختها گرصت لعجينة وكتلبس في جلابتها غادا بيها تخبز وهي توقفها باغا تحيد ليها الوصلة ~ غير خليك اختي انا نديه لفران راني ساليت روينة

فاطنة هزات فيها حواجبها بجووج كتشووف فالكوزينة كيف كتشعل والماعن كيبريو تنهدات وهضرات معاها ناقص ~ سيري تجلسي الأرض وخليني فشغلي نتي مرات الراجل تغداي ويجي خوك يديك معندناش العيالات فعائلتنا لي كيطلقو

نجمة مصات شفايفها بقوة مبللة ريقها لي نشف وخطفات ليها الوصلة من يديها واصلة فيها العضم ~ واا ختييييييي راني قلت ليييييك ماعندي راجل ماعندي داااااار نمشي ليها هادي هي دارنا والى مبغيتينيش قوليها ليا نمشي نفرش فزنقة ونعس غير منمشيش عند هذا لي كتسمييييييه راجلي واخا نعرف نمووووووت ضغطات على هاد الكلمة باش توصل ليها كمية الجرح والتعاسة لي كتحس بيها

فاطنة جمعات النفس ولاحت جلابيتها الأرض بضيق ~ واش دخول الحمام بحال خروجو ، واش عند بالك زواج لعبة وقت ل قال ليك راسك تقولي بغيت نتزوج شوية بغبت نطلق ؟؟ اش بغيتي يقولو علينا ناس ، بغيتيهم يجمعو بيك على صواني دأتاي

نجمة زفرات بجهد ~ فمهم عندهم يقولو لي بغاه ، قدما دواو غيسكتو ، حطات ايدها على حوايجها كتجبد فيهم محاملاش راسها ~ راني مبقيتش قادرة ومبقى هامني تا حد ، واش هاد الناس غينفعوني الا جبتها في صحتي راجلي ل كدافعي عليه مشفتوش من نهار عقد عليا معرفني واش مكسية ولا مهنية

فاطنة قصحت قلبها مهما كان مغاديش تزين ليها شنو كدير ~ ديري لي بغيتي الالة انا خاااااارجة سووووقك غير هو كيف علمتك !! الى طلقك سيري عند بابا عبد الهادي بلاصتك مبقاتش معايا داك البيت غنعطيه لعبد الله قريب يتزوج

نجمة ضيقت فيها عينيها وحركات ليها راسها بالايجاب بلاما تقول حتى كلمة، تبهدلات عند لي يسوى ولي ميسواش مجاتش على ختها عادي تقول لي بغات تقول ، هزات الوصلة وخرجت ببيجامتها ل كانت على شكل قميص لا جلابة لا والو ، دموعها حابساهم بزز مبغاش تبكي… مولفة بكلام فاطنة لي ديما جارحها ومبقى دابا كيهمها والوا كيف الرباح كيف الخطية … كتمشى بخطوات ضعاف وعينيها مضبين قدامها … الفران كان فالدرب لي تحت منهم … غادة فطريق وكتخطط اول حاجة خاصها ترجع تخدم وتجمع شوية دالفلوس باش تجمع راسها وتعيل نفسها ومتحتاج حتى واحد واخا تعطلت على هاد القرار كان خاص هادشي تفكر فيه وقت ل كانت خدامة وكتخسرهم في الخاوي ناس يخزنو فلوسهم في ذهب ويشريو ديور وهي عطي لهذا جيب هادي شري لهادي ...

ناضت مشمرة على كتافها توجد الغدا وتجمع الدار ، خدامة وتنگر و تعاير و الكلمة المخيرة فنجمة وطاسيلتها … مشات لعند مها لي كانت حاطة يدها على وجها تنهد وترجع الهم لقلبها و تفكر في راسها وصداع ل جاها بعد ماقالت زوجت ولدي وعمرت داري و رتاحيت .. حتى تمت داخلة عليها كي العجاجة

زهرة وقفات عليها مگرضفة ~ ها الدار جمعتها و غداك كيطيب بقا تسياق هاني غنخرجو على برا ونتي نوضي ديري ليك حل اخر يامك تجي خانزة ديال الخلا تخلي الناس يجمعو بينا

الكبيرة تقهرت من فعايل بنتها وهضرتهغ طيبت ليا الرية اما تا قلب خدا حقو ~ واسيري تلهاي فشغالك وفرقي عليك البنت ونتي من نهار شفتيها محملتيها تقولي بينك معاها حساب قديم ، قهرتيني ومرارتي غنحيدها معاك الا كملتي خرجي شدي طريق لدارك راه سخطي ليك كنشوفيه قدامي

زهرة وهي مفرعنة ~ مقلتي عيب امي !! انا لي بنت الحرام و ما عندي اصل جالسة نترس عليكم ، هزات سطلها و تمت منزلة التسييقة مع الدروج حتى وصلت بيه لباب الزنقة و كملت على اش كدير وهي ذبحيها و ميسيل منها باغا تبخ الدم ، تمت داخلة لدار تا وقفت عليها صباح .. ضارت عندها وحطت يديها على الباب و معوجة عليها الوقفة ، وقالت بضحكة مستفزة صويبيح !! اش هاد الغبرة ؟؟

صباح مدت ليها حنكها سلمات عليها ~ … غا سلمي عليا بعدا اختي كنت مريضة و طايحة في الفراش

زهرة صغرت فيها عينيها وقالت معوجة هضرتها ~ … هلكاتك العطفة احنينتي ، وستسلمتي بكري مخلية ساحة لوحدة تربع فيها كيف بغات، نعتت فيها وقالت هازة حاجبها لسما ، لا نتي مرتاحة ولا هو عايش مزيان

صباح تحلو عينيها ووساعو بعدما كانو ناعسين ، هضرتها هونت عليها لمرار ل كتحس بيه بعدما تزوج ، مساهلاش عليها ل خدا قلبها يتزوج غيرها ، الراجل ل كانت تنعس تحلم براسها مرتو وخارجة شادة فيدو وبحياتها معاه بعد زواج ياخد مرا من غيرها ، كانت تظل تسخر ليهم وغادا جايا لدارهم وكلام لكبيرة دايراه فوق راسها غير بلش تقول عليها حادگة وظريفة وتاخدها ليه ، جاها قاصح هادشي كلو يتبخر فرمشة عين ويتزوج كان اهون ليها يبقى بلل زواج وتبقى عايشة هي على أمل شي نهار يكونو بزوج ولا يتزوج وتبقى تفكر فيه وهو مع مرتو قلبها كان كيتعصر يوميا وكيتقسم لطراف ،ضعافت وبانت فيها ...تنهدات وهي كتقرب من زهرة باغا تعرف خبارو ~ شنو كتقصدي ؟؟ علاش مالو ل معايش مزياان ، وهي كتضور فعينيها شفتك نتي ل كاينة فدار عروستكم فين هي

كانت غتخليها دارها راسها ومعلقة ومتدي منها بلش تهني بالها ولكن سخاار ديال خوها عتقها ، كان جايب تقدية كيف ديماا ل مصيفط غلام ولقاتها فرصة وقالت باغا تسمع ليه الهضرة ~ ايوا شغنقوليك اختي غا خليها على الله معرفناها هربت ولا زادت خلفة مع شي حددد وركت عليها وهي كتشوفيه بنص عين كيفاش مركز مع هضرتها ، السيدة باتت ما صبحت

صباح قلبها تهز و تحط بالفرحة ل بانت على وجهها ~… وهادي ماشي ديال خالتي لكبيرة مسكينة متستاهلش كحولية الوجه

زهرة بصوت مسموع ~ ايوا عشنا و شفنا حتى ولات لمرا تخرج بلا شوار راجلها ولا ناسها، الدنيا مسخت الله ينجيك و ينجينا

صباح غمامة كحلة كانت على عينيها وحيدت ~ يا ختي داركم دار الشرفة ماشي ديال العيب ، الله يهديها وغلام فخبارو

زهرة حركت راسها بلا ~ ومنين ياختي دار خازنين عليه خايفين منو حيث منبه عليها متعتب لباب ،مدارت لا بحسابو ولا بحساب والديا ل ناس كبار ماشي ديال تمرميد عاد يخرجو يقلبو عليا ، وصلت لشنو بغات وهي تختم هضرتها ~ اختي داكشي بين الراجل ومرتو حنا مالنا

حكمل حطان السخرة قدام الباب وتم غادي وهي تنطق ~ الله يرحم الواليدين عذبناك وبلغ سلامي لخويا وقوليه توحشناك

هز ليها غير راسو بلاما يهز عينو فيها ولا ينطق رجع منين جا وهي كركبت صباح ساعتها سلات هزات سطلها وقالت كتسد الباب ~ سيري خليني نكمل لي بديت حتى نتشاوفو ، دخلت زهرة لدارهم فرحانة وراشقة ليها ل بغاتو وصلت ليه … اما صباح غير فاتت عتبتهم و هي تبدا تفكر خاصها تمشي لحمام وتشري احسن ما كاين ،عارفة غلام غيبان ليوم قبل غدا وعرفات راسها بلي غير طريق دارتها زهرة باش توصل لخبيرة ، مدوزهاش عليها ولاد حي واحد وترباو قدام بعضياتهم والحنش كيعاشر غير ل طول منو

عايش مجلوق معندو تا بلاصة مقادة ينعس فيها كيعرف غير يدمر ويجيبها بالحلال ، من صغرو مكرفص هاز مسؤولية والديه قبل ميهزو مسؤوليتو، يحيدها من فمه ويوكلها ليهم ، حتى كبر قبل الوقت يفيق قبل ميصبح الحال وينعس اخر واحد مهدود بتمارة ، أخر همو اش باغي ولا اش محتاج ، عندو مسؤولية عائلته قبل كلشي ، متسكولش ماشي حيت مبغاش حيت مكانش الموجود ، طفولتو لي معرفها كيف طارت مدوزهاش لعب دوزها كيهز صنادق في لمارشي يهبط لبهيمة من لبيكوب ، يهز اللحم للكزارة ، مگفض على ذراعه عمرو عيا ولا حس بعائلتو عبئ عليه ، يجيبها من فم سبع ويوكلها ليهم ، المهم يكونو مرتاحين واكلين شاربين ناعسين ، بدا حمال عند لي يسوى وميسواش وهو طفل صغير عاد لاح رجليه لدنيا لي مشاف والو منها من غير تمارة ، حتى ولا ُغلاَاامْ ومن لا يعرفه خدام على راسو وهاز عائلة على قدها وموفر ليها كل شي ، من لكبير لصغير كل شي كيعرفو ويمد ليه سلام ومكتسمع غير سي غُلام ..

كان واقف وسط لگرنة بسروال دجين مبرقع بدم ، بوط دالميكة واصل تال ركبة ...كيحل عينيه مع لفجر مشبعان حتى نعاس كيوقف على كبيرة وصغيرة شغله يقضيه بوحدو ، لعيا وتمارة باينة على وجهو ل كلو عرق حتى من تريكو ل لابس لصق على لحمو ، كان مغطي شعرو بكاسكيطة مرجعها اللور ، لحيتو لكحلة مخربقة زغبة طويلة ولوخرا قصيرة معندوش لوقت يشوف راسو في المرايا ويتزوق لمهم هو النقا ، وأخر همه هو المظاهر ، لبسو على قده ونفسو حدى نيفه، وكلامه سيف حاد ، بنسبة ليه الراجل هو ذراع هو لي يجيبها من سماء ولا من الأرض بلاما يمد ايديه لغيره ويطلبها واجدة، تعلم هادشي مين كان صغير يطير هنا ويجي لهيه حتى كبر ولقى راسو فات تلاثين .

خرج على برا يحيد ريحة دم من نيفو بعدما غسل يديه مزيان مع وجهو ، ومنها يكمي واحد يحيد بيه ستريس نهار كامل كان غارق ناسي راسو بجوع ، وتمارة گاع مبغات تسالى … اليد هاز بيها لكارو مشعلو وصايط دخان معاه لبعيد ، ولوخرا كتحك على شعرو بإهمال ومرة مرة يدوي مع ل تما ولا يرد السلام بعينيه ، تاني رجليه التانية مع الحيط وعقلو خدام بعيد ، … شوفتو بوحدها كتخلع لي شافو يقول غير باغي يتشاد وهو ديما مخنزر عندو واحد العرق فجبهته ديما منفوخ ، الى شفتي فيه تقولي يا ربي سلامة منه وياربي يخرج طرح على خير وبيخير معاه ، … حتى من نبرة صوتو غليضة و قوية كتحس بيه فكل شي باغي يدابز ويا ويله هذا لي جا فطريقو وبغى يدير فيها واعر غتكون مو كتسخط عليه بليل ونهار حيت غيشوف لويل معاه … تكى على طموبيلتو وعينيه كيشوفو بعييد .. صااط دخان تاني فسماء وهو كيشوف سيد لي صيفط معاه تقدية وصل وجهو مفيهمش قطرة دم وباين عليه الخوف من يديه لي كيترعدو وعينيه لي كيسرقو نضرات خفيفة ويرجع يهبطهم … كيدور فعينيه والكلام واقف ليه فالحلق .. باغي يهضر ومتردد ، ريقو ناشف مكرهش يهبط على قرعة دالماء يبرد فيها هاد اللكحة ونشوفية لي فحلقو ، طلعو وهبطو ماشي من عوايدو يدير هاكا إلا لكان خايف ينطق بشي حاجة ، هز يديه الغليضة لمزينة بعروقو المنفوخين ، وعينيه فعينيه بلا ميرمش كيشوف فيه ويتسناه ينطق باش فحلق واحل، بنبرة حادة نطق غلاام ~ قوول اش عندك ؟؟

كان كيدخل ويخرج فالهضرة الا سكت مشكل والا نطق موصيبة قرر يدوي حيت منبه عليه اي صغيرة على عائلتو توصلو بلا زيادة ~ سي غلام انا راني وصلت الأمانة لدار وكل شي على خير وبيخير ،سكت شوية كيشوف فعينيه ورجع حنى راسو غير هو ....

بعينين حمرين سف لي بقى من لگارو حاضيه كيتسناه يهضر وهو كيبلع فالكلام طرطق فيه عينيه شيء لي خلاه يهضر بلى فران ~ مغانباتووووش هنا غير هوووووو شنوو

عبد الله قالها وراسو منزل للارض ~ ….المدام !! المدام ديالك اسي غلام خرجات صباح ومرجعاتش سمعت ختك كتدوي و ...

حس غا بالبرد ضربو هز راسو لقاه مكاينش حداه غادي مشربن اخر حاجة توقعها هو يسمع عليها الهضرة من عند البراني ، منبه عليها مزيان الباب متفوتوش مدارتش بحسابو ومخداتش هضرتو بجدية دارتو زايد ناقص … بعينين بحال جمر كرز على يديه بجهد ومشى جيهة طموبيلتو كيتحلف مسافة الطريق كان وصل نزل مكيشووفش الناس لي حداه ولي غادي وجاي … باغي غير يوصل ويتأكد انها فعلا مكايناش فالدار وديك ساعة ايدير شرع يديييه

رااجعة لدار عينيها الارض مهزتهمش مبغاش تلاقا مع عيالات الدرب يسمعوها شي كليمات معندها فين دزيدهم ساعة ل خافت منو طاحت فيه ، جارتهم وهي مخرجة تسييقة على برا بانت ليها نجمة وسعت عينيها وحققات فيها مزيان حتى تأكدت بلي هي وحماتها بتعيااط ~ نجمةة وا نجمةة

دارت لعندها هاد الاخيرة بضحكة صفرة دغيا جمعتها وتمت قاصداها تشوف اش بغات ،صوت دقات قلبها كتسمعهم في وذنيها بصوت شبه مسموع قالت وهي كتمد حنكها ~ سلام كي داايرة لاباس ؟؟

~~ ما لاباس والو ،دايزة حادرة عينيك شكون خاصو يتقلق حنا ولا نتي ،درتي عرسك وكليتي دجاجك بوحدك هادو هما بنات جيران

نجمة جوبتها فوق من لخاطر ~ اشمن عرس كدوي عليه، ل خبار راه فراسك زعمة تا حاجة مدوز عليك

خبطتها على كتفها بضحك باسل~ وغير كنضحك معاك الا محضرنا في لعرس نحضرو فسبوع ، حركات راسها بتساؤل باقي مبغيتي ديري صداع وتبرزيط شفتك غبرتي قلت تكون ولدات

خنزرت فيها نجمة ودوات معصبة ~ مالي مشة غنولد على شهرين ست شهور تاع زواج طالعة فيها على اشمن ولاد كتدوي ؟؟

شافت لمرا نجمة ضورتها فيها وهي تسرط ريقها وقالت ~ مديش عليا راني نسيت وحسبت ليك من خطبة

بغات تعيرها ساعة غضيع معاها وقتها واخر همها ناس دابا ، خلاتها واقفة كتدوي بوحدها ورمات عليها بسلامة ورجعت لدار طلعت نيشان عند عايشة لسطح هربانة من اسطوانة فاطنة ، تسالمت معاها بالعناق والبكى من ديما كترتاح ليها حيت كتفاجي عليها خلاتها على خاطرها كثر من ساعة تا تفشت ،كانت جالسة فوق سداري نصو محفور جامعة رجليها تحت منها و راسها لي غيتفرگع مزيراه بزيف حياتي ، الحياة ضلمتها و باقا كضلم فيها ولكن حامدة ربي و شاكراه وهي في ديك الحالة دخلت عيشة هازة صينية ديال أتاي حطتها فوق طبلة وجلست حداها

عيشة كبت الكاس ومدتو ليها بحنية وقالت ~ .. بنتي نجمة مالكي دغيا طفيتي و هراتك ليام واش هادي هي نجيمتي لي كنعرف

هزات الكاس بين يديها بزوج كتلعب بيه وعودت ليها اشنو داز عليها فهاد تزويجة من طقطق لسلام وعليكم ، وخنونة دمعة تا خوات قلبها وقالت …~ ايوا اش بان ليك فشنو سمعتي

عيشة تنهدات بصوت مرفوع بقات فيها وملقات ليها جهد ~ مسحي دموعك بعدا وكوني قوية كيف كنعرفك

جوبت مقاطعاها ~ وهاني مسحت دموعي باش ميبان على عيني حس بكا ، ايوا والقلب اش ندير فيه ؟؟ الخاطر لمهرس شكون يجبرو ويواسيه ، حاسة براسي هادي لخرة ليا و مبقى عندي جهد نستحمل شي موصيبة خرا تجي عليا ، كون غا سمعت كلام ختي اش داني لشي زواج قلت نتهنا !! علاه انا وجهي وجه لهنا ؟؟ ، فينما مشيت تابعني تكرفيس ولكن صافي نطلق ونخدم على راسي وعمري نشوف جنس رجال ل بغيتو راه داه الله نكمدها في قلبي ونصبر راسي

عيشة هزات صبعها في وجهها معجبهاش شنو كتسمع~ اش هاد الهضرة كتقولي !! واش طلاق ساهل باغا تخرجي من حفرة طيحي فغْيَسْ منها ، نتي عارفة ناس مكيرحموش ، بغيتي يشوفوك سلعة رخيصة وكلشي يطمع فيها ، اللومة غترجع غي ليك يقولو ترملت وجاها رزقها وتزوجت ومحمدتش الله وهاهيا طلقت ، صبري ابنتي !! راه تا وحدة فينا ممشات لدار راجلها ولقات دنيا مقادة قدامها كيف تمنات ،كلنا تمحنا وكلينا لعصى مجيناش وكبرنا لولاد غا هاكداك راه حتى تمرمدنا، هانا قدامك وكلشي دايز قدام عينيك ياك كيمشي بشهور وكيرجع مني ام واب وعمري قلت اح ولا شكيت عايشة فديور لكرا وكنقول حمد لله هذا هو رزقي ل جابو ليا الله ومازال طامعة فيه يحنن قلب الراجل عليا

شوفي انجمة الزواج كرموصة مشوكة وعلى قد شوكها على قد حلاوتها ، على ما عودتي ليا ربي لقاك مع شجرة مجدرة ماشي فحال لغصن الطري لي دغيا بغيتيه وبغاك وجا هواك على هواه مكتابو عند الله لقاه ولا اعتراض على حكمو

ودابا وليتي محسوبة على خوه وكيف قلت شجرة ومجدرة ولبغيتي الشجرة ترطاب خاصك تسقيها ومتمليش ابنيتي باش جنابها يرواو وجدورها ترطاب وكي كيقولو زواج ليلة تدبيرو عام ونتومة مدبرتو موالو ...كتاب عليكم هاد الزواج والصبر لكبير كيكون على المرا وانتي خاصك تصبري راه حتى وحدة مكتاخد خوها ولا باها باش يحنو فيها راه اول مكتروحي لدارك كتاخدي العدوزة واللويسات عاد الراجل ونتي وفهامتك يا تنزلي راسك حتى دوز الريح ولا تبقاي واقفة وتعماي

جاوبتها نجمة بعيون مضببة ~ واش انا جلست معاه و عاشرتو باش نعرفو ولا يعرفني نفهمو ويفمني ندوقو ويدوقني مكنعرف عليه والو من غير تخنزيرتو وسميتو ، راني والله حتى صبارة واش اللي عاشت مع فاطنة غتكون قليلة نفع ولا صبر ولكن راه جهد الا جهد الله مبقى عندي فين نزيد عييت وساليت

عيشة جمعت الوقفة ~ غنبدلو ساعة بخرا وغنكفيو الغضب غنوض نوجد ليك واحد لبرمة دالما ونسخ ليك طواليط ونفركك وحيدي عليا هاد زيف ل دايرة وكحلي دوك العينين الناسلين البكى في الركنة غادي غير يزيد عليك

مخلاتش ليها فين تقول لا ولا كافياش مشات بجرا شعلت مجمر سخنات بيه طواليط ودخلت جبدت ليها من عندها قفيطين خفيف مخيطاه عيشة بشهوة مكتاب ليها

قبل ميوصل للباب كانوا شبه لعيالات ل معندهم ميدار من غير نميمة فعباد الله مجمعين وكلامهم يتسمع من شراجم نساو راسهم ونطقت وحدة فيهم حاطة ايدها على حنكها كتحسر عليه ~ ياختي شوفي هاهو جاي من زيناتو راجل الف وحدة تتمناه راجلها، هاه وايني الفول يتعطى ل معندو ضراس

جوبتها لوخرا ~ وزايداها ياختي تكبرت مرتو على نعمة ، سمعوها ناس كتغوت وخرجات مع صباح علم الله فين زادت متكون غا هربات وملي مبغاهش لاش مزوجاه ..

زادو ليصانص على لعافية كرز على يديه بلاما يحس ، واحد العرق فجبهتو تنفخ ورجع خضرررر شوية ويطرطق حجبانو مگرونين ووجهو معصوور محس براسو غير وهو كيغوت عليهم ويسب بكلام من سمطة لتحت~ لي عندها شي خربة ت *** ليها ، تحركو عليا من هنا فرتكو عليا الجوقة كتقلبووووو على ل يتعرى عليكم هاد النهار باش دخلو لخرابييكم ؟

كمل كيسب ودمو باقي كيغلي عليهم جاوه عيالات اما اليوم دم يدي دم… وهما غير شافوه هاكاك دخلو شي كيعفط فشي …زاد زند وهو كيتفكر كلامها وكلمة هربات ومبغاتوش ل جات فوذنيه… بان ليه باب دار مشرع ضربو برجليه حتى تحفر الحيط ….لكبيرة طلع ليها طونسيو بالخلعة وباه خرج من حمام كيهز في حوايجو ويتفتف … اول وحدة بانت حداه كتلون بجميع الألوان كانت زهرة، مطرطقة فيه عينيها عارفاه سمع الهضرة وواصل لطوووب ديالو خاصها غير تكمل باش يمشي نيشان ليها يهرسها ويبرد ليها العافية ل شاعلة فقلبها من جيهتها…

زهرة قلبها كيضرب بالخلعة ولي فيها ممهنيها~ خويا غلام !! مزيان ملي جيتي عرفتي اش وقع ؟؟

لكبيرة خرجات من صالون كتجري سمعاتها كتهضر وباغا تعاود ليه وهي تغوت ~ سكتي ادييييك شيطانة واش باغا شي روووح طييييح ؟

زهرة قاطعاتها ~ صافي امي خليييه يسمع لمرا ل عندو اش دارت !! سمع اخوية شفتي هادييييك لي مزوج بيها ضربات على كلامك وكلام مي وكلام با ومشات بحالها غا طلقها معندك مدير بيها ...

هز يدو قدام وجهها باش تسكت كيشوفيها بنظرة شرانية عارف ختو مزيان قاريها بلاما تدوي ، نطق تحت من سنانو معصب ~ حتىىى نسولللللك عاد هضري كتفهمي ؟؟ وشكوون قاليك عطيني رأييك ووريني شنو ل ندير وشنو منديرش ....تلفت لعند موو ل وذنيها كيصفرو عارفة هاد الوجه وهاد العصبية ل راكباه مكتبشرش بالخير نطق بتساؤل خاسر عليها زوج كلمات ~ واش مشات لدارهم ؟؟

بللات حلقها وجاوباتو تحت منها بنبرة صوت حنينة باغا تستعطفو بيها ~ مشات اوليديي !!

مزادش هضر معاهاولا تناقش ولا سول عطاها بظهرو وهي تلاح ليه على تريكوه من لور جراتو كتزاوك ~ انا راضية عليك اوليدي غيير سمعني بعدا !! البنت توحشت ختها وبغات تشوفها شحال مسكينة وهي مسدود عليها ،عمرها تشكاات من حقها تشوف عائلتها

ضار لعند مو كيضحك بسخرية وواحد لحاجب هازو لسما ~ وانا شنو هناا ها ؟؟ دوييت معاها ونهار جبتها تبريت فيها ،ضربت فكلامي وزادت زعمة نتا سير تموت وهضرتك زيدها ف بغى يخسر الهضرة وحبس فدقيقة لخرة وقال استغفر الله العلي العظيم ، هز يدو الفوق وقال بالغوات، وا غا طلقي دابا خليني نمشي !!

سمع صوت باه ل كان واقف بعيد متكي على دفة الباب وكيشوف فهاد الشحط ل قدامو نطق بعتاب ~ ربيت فيك غا لخلا اولدي !! قلت راك راجل وغتصون مرت خوك وتحافظ عليا ساعة واقلة غلطت فيك وزوجتها الشخص الغلط

حس بالعافية شعلت في صدرو رجعو قالو ليه نفس الكلمة ل مباغيش يسمعها مصممين يكرهوه فيها ،حنى راسو مزير على يديه كيكالمي فروحو باش ميقولش شي كلمة لباه يندم عليها مبغاش يعگرو ...كمل خليفة على كلامو وقال وهو هاز سبابتو فوجهه ولدو ~ زوجتك البنت باش تكون ليها راجل يحميها ماشي يلوحها ليا هنا ويزييد ميفكرش فيها ، ساد عليها ففقز متشوفش زنقة مالها حمامة مربيها ، راه الكلب الا رباوه ناس مرة مرة كيخرجوه ونتا اش درتي هاه ؟؟

كل كلمة من فم باه كيحس بالدم ديالو كيغلي ويديه بوحدهم كيترعدو باغي يضرب فلي كان باش ديك العافية لي كيحس بيها كتحرقو تبرد ، أكثر كلمة كيكرهها هي ديك مرت خووك على هو بغى يكون راجلها ؟ هو شافها ؟ حس بيها ؟ ياك كان مگيد ومقيد بواليديه حتى تزوجها ؟ دابا ولات مرت خوه !!! غزز سنانه بين لسانه وهو كيغلي قبل ميلوح لباه كلامه لي بين حلقه ~ نهار بززتوها عليا نتزوجها اش قلت ليكم الواليد ؟؟؟ هااا كيعلي حجبانه فباه وعروق يديه مطرطقين كيزدحو وعينيه حمرين بحال جمر مخرجهم بعصبيه كيكمل ليه كلامو~ كلها يدخل سووق راسسسسسه ،ديك البنت لا انت ولا حتى واحد فيكم عندو الحق يدخل بيني وبينها ياك زوجتوها ليا وانا قبلت ، واسوقها خويييييييوه ،رجع مطرطق عينيه فباه مزير على سنانه واحد العرق فجبهته منفوق غايطرطق لدرجة خلعهم فاش شافوه هاكاك رجع هز صبعو بتهديد وهو كيعني كل حرف خارج من فمو~ أخر مرة نسمع ديك كلمة مرااااات خوووووك نهار نسمعها نهزها ونزيد نعوووم بحري معاها وكنقسم فمي بالله ابويا عمركم تشوفوني من غير واجبي تجاهكم ...

ضرب الباب بقوة خلى باه حال فمه فيه وخرج كيسب غير بألفاظ الشتم

طلع لطوموبيلتو معصب واصل للخر ديالو ، باغي فيمن يخوي اعصابو ، يدابز ولا يتغاوت المهم هاد العافية لي فجوفو تبرد ، يد حاطها على فولون ولوخرا كيكمي بيها باغي يطفَى كان كيتنفس بعنف وكيردد بين شفايفو وعينو على طريق غادي مسابق ~ بقى لبويا غا زواج !! اش خاصني بشي مرا ولا بشي فريع المخ ، عارف راسي خْنات لعيالات معندييش معاه هاهي بكات هاهيا غضبات كنت هاني مع راسي غا بغاو يتعداو عليها وعليا وزوجونا كيحرك راسو بلا هادشي مخدامش وممسلكنيش ومغنصبرش ليه ...كسيييرة بجهد ومرة مرة يخرج وجهو من شرجم يعاير شي حد الا عمر عليه ، ل شافو من بعيد يحلف عليه سكران ومفوت ....

وقف قدام محل زرع ديال خو نجمة هبط كيقاد في حوايجو تاع لخدمة جاي بيهم ومهاموش خبط الباب بشنتة ، وتحرك مضيق عينيه كيشوف اشمن حانوت فيهم هو ، غادي كيتمشى بخطوات ثقال وخطاوي كبار وقف قدام الباب بان ليه عبد الهادي متكي على المجر كيحسب في الفلوس ولِ متگعد حتى سمع الهضرة ...

غلام بلل حلقو وكحكح بصوت غليظ وقال ~ واحد السلاااااام وعليييييكم !! طولها باش يسمعو

هز عبد الهادي راسو فيه كيحقق شوفة عرفو من نظرة اللولة وكيف غيدير يخفا عليه، واحد بحال هذا ميتنساش ... وقف من فوق الكرسي وقال مع ابتسامة ~ اهلا اهلا اهلا !! زارتنا البركة أَسي غلام ، تسالمو برجولية وطبطب ليه على ظهرو وقال ~ دخل دخل شفتك واقف في الباب راك منا مبقيتيش براني

هز ليه غلام راسو باقي معصب وكابح فنفسو ، رد عليه بصوت رجولي ~ الله يكبر بيك ، جلسو فوق الكراسا بدا يصفق عبد الهادي على خدام عندو ل جا كيجري ..ضار شاف في غلام وقال ~ شي دكة ولا قهيوة قاصحة

غلام من وجهو باينة ماشي على برجو حط يدو على صدرو بشكر وقال ~ لا هادي ولا ديك بغيتك فزوج كلمات وغنمشي بحالي

القلق والخوف بانو على خو نجمة حس بشي حاجة ماهياش واقعة واخا هاكداك هادشي مغينسيهش واجب الضيافة امر يجيبو ليهم براد اتاي مشحر ورجع شاف فغلام و بقلق نطق ~ ياك لاباس!! نجمة ختي واقعة ليها شي حاجة؟

تقاد في الجلسة حاط ظهرو على الكرسي براحة ونطق بجدية وبنبرة صوت معاجبو حال ~ سي عبد الهادي !! فصراحة مبغيتش نصدع ليك راسك وندخلك فهادشي ولكن بنتكم مخلاتش ليا حل اخور ، داكشي علاش جيت نشهدك عليها باش الا درت شي حاجة متعجبكش متلومنيكش وتقول حگرها ومدارش بحسابي

خو نجمة قادر يميز بنادم غير من شوفة العين ومن خلال هضرة غلام عرف واقع شي مشكيل كبير بيناتهم ، شابك يديه ورخى اعصابو كيتصنك كمل غلام كلامو وقال كيعقل فيه ~ اول مرة دويت معاك في الدار شنو قلت ليك

عبد الهادي وهو كيتفكر قال ~ على ما خفت نكذب قلتي ليا نجمة امانة دابا عندك ، منبغيهاش تفوت عتبة الدار

حرك راسو بالايجاب وكمل ~ الله يفتح عليك هادي هي الهضرة ل سمعتيها مني ولي مازال غتسمعها الا كملناا فهادشي ... انا وباش نجيك نيشان ونكون معاك صريح حيت معنديش مع تزواق الهضرة طبعي صعيب نفسي حارة ومكنرضاش ، الا كانت مي ل والداني ومنبغيش ضحكتها تسمع في زنقة فما بالك مرتي !! راه كون كانت العين تعلا على الحاجب لوالدة نمنع عليها زنقة متشوفهاش ولكن جاتني مي !! عندها راجل يحكم فيها كيف بغى تسالني انا غا نهيها على شي حوايج ، وباش مندوخش ليك راسك وندخل ليك في موضوع نيشان بنتكم نهار عقدت عليها قلت ليها شي شروط ....

هز صبعو وبدا يحسب ليه~ واحد والواحد هو الله الزنقة مكيناش !!الخدمة مكيناش !! معنديش لمرا ل تدور في زناقي ولا تخرج بلا خباري، معنديش لمرا ل مديرش بكلامي وطيح كلمتي الارض ،انا مرتي نبغيها تجلس في دار معززة مكرمة ل بغاتها توصلها باش يديها ميقيسوش ايدين رجال لمحرمين عليها وباش منعصاش الله فيها ونتطاول على وصية الرسول

خوها كان جالس محني وهو يتوگض ، حس بالعرگة طلعت معاه قال متوثر ~ شنو كاين ، شنو دارت نجمة معجبكش ؟؟

جوبو قاصح وگال ~ بنتكم خرجات بلا شواري من دار ومعرفتها فين مشات ، من الاول هضرتي كانت باينة وواضحة وهي قبلت عليها ؟ انا عارف راسي ملايقش نتزوج وعارف راسي بلي مكنشبه للمرحوم فحتى حاجة ، كنعرف غير لخدمة وتمارة ولكن ممفرطش في واجباتي اتجاهها لا من ناحية ماكلة ولا فلوس كلشي كيوصلها حتال دار بينما لعقل يتقبل اش وقع حيث مغاديش نجي بين ليلة ونهار ونسا شنو كانت غتكون !! بغمزة قاليه كنظن فهمتيني ياك ؟؟ ولكن باش توصلني خبارها حلات الباب وخرجت بلا خبار حد حتال هنا ومنقبلهاش ل عارف وسمعتك عليك بلي راجل ومربي بناتك احسن تربية وواش يرضيك نتا تدخل لدارك تلقى مرتك ولا وحدة من بناتك خرجات بلاما تقولها ليك

تمعن فكلامو كل كلمة من فمو فهمها وفهم مغزاها وعندو الخق فيها هو بروحو ميرضاش مرتو تخرج بلى شوارو ، ~ عندك الحق كان عليها تعلمك الا بغات تمشي انا معاك فهادي !! سكت شوية ونطق ، ختي نجمة دريويييشة وعارفها البيضة متحركهاش كيفاش خرجات هادي مفهتهاش غيكون عندها شي حاجة

هز فيه حواجبو باقييين مقرونين بعصبية ونطق وهو كيلووح ليه اخر كلامو ~ يكون شنو مابغى يكوووون من داري متخرجش وانا مكاينش إلا هادي منقبلهاش مراتي تجلس فدارها مدوورش ليا في زناقي وسط رجال ~ قاطعوا وهو كيطبطب ليه على يديه لي كانت فوق طابلة كترعد وتكلم ~ غير تهدن وجلس نشربو كاس اتاي يرد ليك دماغك ونوض معاك نمشيو نشوفو مالها وانا قدامك غنقي ليها وذنيها غا الله ينعل شيطان وصافي

جوبو غلام ووقف ~ معندو منين يدوز غا عفيني ، ناض معاه بعدما وصلى على المحل خرجو على برا وهو باقي كيلطف الجو ~انا غادي نهضر معاها ونفهم منها اش واقع ، خلاه كيهضر وتمشى لجيهة طوموبيل حلها ~ طلع اسي عبد الهادي نشوفو هاد سخونية الراس

جالسين فالبيت بعدما تغداو ، متكية فوق سداري حاطة ايدها على عينيها ل مغمضاهم يرتاحو حتى كتحس بإيدين كيدوزو ليها بالمشطة على شعرها عرفتها غتكون خديجة... ترخات عجبها الحال ، سالفها لملون الطويل حرير هابط كتمشطه ليها فيه وفالنفس الوقت كتهضر معاها وكتحاول تخرجها من جو الحزن ل خيم عليها … نطقات ويديها باقين كيدوزو على شعرها ~ نجمة واش صافي رجعتي بمرة ولا غير شي أيام حتى نولفك تاني وتمشي، كنتي فاكاني من ختك دابا خاصها غير منين دوز ليا

هزات راسها وبعدات الشعر على وجهها حتى بان ، هي زوينة وزادها نور الحمام ، لوجه كِ الحليب والعوينات مشفرين وملونين ،حناكها بلون دم غزال محقون فيهم الدم ،زينها طبيعي وفتان ، تنهدت وقالت حايرة~ معارفة والو من غير انو حياتي ترونت وخاصني نشوف منين نبدا نقاد فيها

بمواساة قربت منها معنقاها ~ كلشي غيفوت ويبقى تعاويد مهم نتي دابا خاصك ترتاحي ترجعي صحتك وتنساي لي وقع ليك راه كلشي قسمة ونصيب متفقصيش راسك وخليها فيد الله

ضحكت بلا خاطر وشافت فخديجة وقالت بغمزة ~ امتى درتي عقلك ووليتي تنصحي تانتي وتعلمتي تواسي ل كنعرف عليك خضرة مجنذرة

خديجة هزات كتافها ودارت فيها مقلقة ~ ايوا غز الله فيا وسري ل باركة نواسي فيك ، سمعت صوت الباب وقالت بلاتي نمشي نشوف شكون قبل متعربط عليا ختك

مشات مخلياها كتنهد بعنف حاسة بحجرة واقفة على قلبها ومزيراه ، مشاعرها مخربقين بين الضلم والقهرة والحسرة لي كتحس بيهم ، وقفت وتقابلت مع لمرايا ل فالبيت كتشوف فراسها وفي القفطان كي جا عليها فشعرها ل زاد طوال وفات خصرها ، فحناكها ل دخلو ، تبللو شفرانها وحبست الدمعة فطرف عينيها وهي كتقول صافي باراكا من البكا ....

سمعت صوت الهضرة كثيرة في المراح تسنطات من ورا الباب باغا تميز الاصوات وهي تدفع خديجة الدفة ودخلت كتشهق والهضرة كتوحل ليها في الحلق ~ نااري ياا نجمة وااحد لمگلظم مع بابا عبد الهادي

مسبق عبد الهادي قدامو كيبقى ولد دار وعارف ناسها اما هو مازال غريب ، دوا هاد الاخير بصوت عالي بعدما حلات ليه خديجة الباب ~ مالين داار كاين شي حد هناا ...؟؟

فاطنة وهي كتقاد في زيفها ،خرجات من صالون ل دخلات طلات على مخادو واش مستفين ، حانية عينيها الارض كتمشى بابتسامة تكات باست على يد خوها ل خطفها ليها قبل وتگعدت باستو فكافو وقالت ~ بابا !! بخير لاباس علييك زارتنا البركة

تنهد كيقلب عليها بعينيه باش يتاكد باي هنا ويرتاح قلبوويهنا بالي ومتكحلش ليه وجهو ، عارفها معندها فين تصد من خير فاطنة ، وهو كيفتح طريق لغلام ل بقى فتيساع قال~ دخل اولدي غلام مالك مبعد ؟؟

عرفاتو فاطنة من سميتو هزات عينيها خزنة فيه كطلع فيه وتنزل وتقارن هو قد صخط وهي رابعة اللحم متقد عليه ولا تقد تهز دقتو قالت كتشوفيه ~ بلا شك راجل نجمة دخل اولدي مرحبا بيك !!

هز ليها راسو ودخل مع عبد الهادي جلسو فصالون وتاعي معاهم ، كان مشابك يديه وجالس على خاطرو كيتسنى خوها يشوفو اش غيدير هاد الاخير ل مكانش من عاگزين هز ايدو لفاطنة وقال ~ واحد ختتك جات عندك !!....من نبرة صوتو عرفات خوها مقلق ومعاجبو حال حركت ليه راسها باه وقالت ~ جات عندي اخويا هاد صباح وحالتها حالة كتضر في الخاطر ،شافت فغلام وقالت بعتاب بلاما تحشم منو ~ هادشي ل كدير فيه ختك ومك ميبغيه لا ربي لا عبدو

شافيها گارن حجبانو فسماا وجاوبها بحدة ممعطلهاش ~ وهادشي ل دارت ختك نتي كيديروه بنات ناس !!

بغات تجاوبو قاطعها عبد الهادي عارف ختو فاطنة مساهلاش وغلام كثر منها ومغيتافقوش وغيكبر الموضوع وهو جاي باش يصفي لخواطر ، فاطنة واخا تعاير وتسب نجمة وتضربها گاع متقدرش دوزها واخا تقوليها عطيني تيساع غير بلسانها ، من ديما كدافع عليها في غيابها وفوجودها لحالة ل جات عندها بيها صباح خلاتها تقطع عليها ولكن متقدرش تزين ليها شنو بغات دير فعينيها حيت طلاق مساهلش ، هي عارفة بلي لبنت ل رباتها مكظلم مكتعرف تعاير مكتعرف تكون ديبة وسط ذياب ، على سبة ودغيا تبكي ومعندهاش نهائيا مع حرب لعيالات ولكن ملقاتش ليها جهد هي ل تحداتها وختارت وكون قدرات فداك الوقت واخا تعرف تخيط لحمها على لحم ختها غير متخليهاش ترمي راسها وسط من هاد زوبيا

حمر عبد الهادي فيها عينيه ونطق من تحت سنانو ~ سيري كلميييها ليا !! الهضرة معاها ماشي معاك ولا بغيتي تقولي شي حاجة قوليها بالخير ولا متسمعيناش صوتك يكون حسن !!

ناضت من حدا خوها مصبرة راسها بزز كتحتارمو ومتقدرش تزايد معاه في الهضرة كيبقى خوها لكبير دخلت لعند نجمة ل

كانت في البيت ايدها كيترعدو وسنانها كيتراقصوو مخايفاش منو وانما مقاداش تواجه خوها وبأشمن عين غتشوفيه وهي مازال لدابا عاقلة على شوفات ل دار فيها نهار حطاتو امام الأمر الواقع وقالت ليه قدام الجماعة بلي وافقت على زواج منو ، باقا عاقلة كيفاش مدواش ولكن عينيه قالو بزاف كانو كيلومها كأنو كيعاتبها كأنو خايف عليها من هاد نهار ل وصلت ليه دابا ، دخلت عندها فاطنة وقالت بعدما سدت الباب ~ خرجي عينيك ودافعي على راسك الا سكتي ليوم غا بقاي ديما ساكتة بلاما تجي من بعد تشكاي عليا راجلك مساهلش وتانتي كوني بحالو ومتحنيش ليه الراس

مجوبتهاش كتافات تهز زيف ديرو على راسها وهي تنثرو منها ودفعتها لباب بقوة ~ راه غا راجلك ل برا مكاينش شي حد غريب .....محسات غير براسها مدفوعة ومحطوطة امام امر الواقع ، كتمشى على صباع رجليها ، سالفه وراها ولي للقدام هبط على وجها غطاه ، تمتمات وهي حادرة راسها وهازة يديها كدوزها على شعرها مرجعاه لور ومبينة تفاصيل وجها لي عمره شافو بشكل مباشر ، عينيها كيرمشو ويديها كيترعدو، بان ليها خوها مشات حداه وبلاما تحس تلاحت عليه معنقاه وبدات تبكي بصوت عالي وتشهق ، كيشوف فيها وحاضيها وعينيه كدوز عليها من صباع رجليها لراسها كيفاش كتبكي كيفاش كتمسح دموعها شعرها ل غطا وجهها ومليوح نصو على خوها ونصو لاخور فوق سداري زغب ل لصق على وجهها ،صدرها ل كيطلع وينزل مع كل تنخصيصة كدير ، عض على فكو من لداخل وضيق عينيه حنحن بصوت مرتفع شي ل خلاها تقاد في الجلسة وهي هازة عينيها لِ جاو فعينيه المضلمين ، بؤبؤ عينيها الملون كيشوفو فيه بتحدي، ونطقات بصوتها الباكي المبحوح ، ماباغاش نعيش مازال معاهم اخويا !!

عينيه كانو كيحققه فيها وكيتمردو طلوعا ونزولا على تقاسيمها شعرها وجهها عينيها ملامحها لاول مرة يشوفهم ، خلاتو خرج من شرودو فاش نطقات وكرز على يديييه بقوة حتى بانو عروق يديه

يتبع...