صاحب اللحية السوداء الجزء الثالث

خبار الناس ل جاو لنجمة تنشرات ولعند تاجة وبَابَا وصلات ، عديانها تفقصو وحبابها فرحو وكلشي يجري ويقول نهار لكبير مابقى ليه والو ، دازو ليام طايرة قضاوها طيور الحب محلقين فسما قبل ميدخلو للقفص الذهبي ، لكبيرة دهزات ووفات وفنجمة تهلات وفاطنة لتقضية لغتحتاج للخطبة حطات ، بداو يعرضو على الناس ،العائلة لقريبة ولبعيدة كبيرهم بصغيرهم كانت ممتيقاش راسها بلي نهارها وصل وبلي ربي ستاجب ليها وحقق رجاها وعطا لقلبها شنو بغى وما بخل ، راجل مكيتعاب من حتى حاجة خدمتو مع المخزن شاريها وكي لما لقليل داير ليها ، مأذب وعقلو موزون ورزين وهادشي لي كتمنَّى كل بنت مادة يدها للحنَّة ......

كملت خدمتها ناشطة وفرحانة ولي شاف فيها تبسم فوجهو وتعطيه صوابو كانت غادا لعند وردية تودعها قبل متخرج ،جاتها من ظهر قفزتها حتى تخلعت وقالت ~ الله يا نجمة الله مالك ديري غا حس راه العقل غايب وسارح شي نهار تزهقيه ليا بغمزة كي درتي لمعاوية ...

راضاتها ببوسة في الحنك وقالت ~ حضريه معايا ومتخليهش يسرح راني محتاجاك معاه ، ...

طلعتها ونزلتها وحركات راسها بدائرية ~ بايعاني تاني ليوم ، ولا انا يدي رطبيب ونتي ولفتي تشدي في لحروشين..قالت وضحكت بصياعة ..

شدات نجمة على فمها حشمانة وكتلفت ليسمعهم شي حد ~ تي سكتي دابا تشوهينا ، راك عارفة مكنتشاوفو حتال ضرورة راه عبد الله داير عليا مردة ،كون ما تحججت ليوم بالخاتم ل غنمشيو ناخدوه والله ميخليني ..

وردية شدات فيديها وقالت فرحانة ليها ~ لخطبة بقى ليها يومين وكي بغاكم تختارو وتاخدي عبار صبعك الا مقيستيه ، لمهم سيري اختي الله يكمل عليك بالخير ،ونوصيك ضربي الطم الحاجة المستورة كيكمل فيها الله

نجمة وهي مزيرة على يدها ~ عندك الصح اختي ، انا مشيت نتلاقاو نهار سبت وعنداك متجبش غنتسناك ،بتاكيد كتحلف عليها..راه نتقلق عليك

وردية باقا معارفا راسها من رجليها ~ يكون خير وعلاه انا كرهت نحضر لصحيبتي ونشطح وندردك ليها ،انا مع الوقت وضروف، دورت وجهها رجعات خدمت في ماكينة مخبية عينيها لعمرو بدموع الفرحة , يله سيري متخليش نسيبي يستنى لعينين را عليه !!

ودعتها ومشات حيدت توني دالخدمة ولبست دالخروج ، تأنقت وقادت شعرها وخرجات لعندو كتقلب عليه بلهفة لقاتو واقف كيتسناها في بلاصتو المعتادة ولي ولفاتها من نهار جات مو وهو كل نهار تلقاه عند راسها يدويو شوية ويمشي معاها حتى تركب ويرجع بحالو ، مدت يديها كتشوف فيه وبضاد باين فعينيها ~ لاباس عليك !!

حط كيف يدو لوخرا على يدها وقال بصوت مبحوح ~ كوني ليا غا نتي لاباس

سلب ليها داك شوية العقل لي باقا تساب عضات على فمها كلات دوك شفايف بعفوية حاسة بإحراج قالت بعد مسلتت يدها منو ~ يله نمشيو قبل منتعطلو ...

ضحك على الحشمة لي كتعجبو فيها ول قلالت فوقتنا دابا ، ركبت وراه متفادية تشد فيديه قبل ميديماري قال ~ قرب لعند ودرگي وجهك بظهري على البرد

كيفما قال دارت لقات راسها بلا هواها مخشية فيه وحاطة راسها على ظهرو حسات بأمان وبشعور مختلف ، بدفئ غريب وباحتواء عمرها جرباتو بظهر وبسند متكية عليه ،حسات بهموم دنيا تنساو فرمشة عين وبمتاعب الحياة خفافو من على كتافها وما الرجل الا سند المراة بعد أبيها

دخلو لقيسارية الذهب غادا حداه واصلة لعند كتافو الا بغات تدوي معاه خاصها تهز عينيها والا بغا يشوفيها خاصو يحدر الراس، كتمشَّى فجنبو بحال الفراشة تا حاجة ممتقلة عليها ، كانت ساكتة فرحتها معاطياها لحد حاسة براسها فحلم ومبغاش تفيق منو ، حسات بيدو جرتها وصبعانو تملكو صبعانها هزت عينيها بعوينات كيبريو لقاتو كيشوف في لڤيترينات هز صبعو واشار ليها وقال ~ نجمة شوفي هنا الا عجبتك شي حاجة هاد سيد بان ليا عندو داكشي زوين ..!!

نجمة ضيقت عينيها كتشوف كلشي عجبها وحمقها وجدب ليها العين ،بلاما تحس قالت ~ هادشي باينة فيه ساوي الثمن

حسات بيه زير على يدها وهبط لعندها وقال ~ تا حاجة متغلى عليك ، لي عجباتك حطي عليها يديك وانا عليا نخلص

جاوباتو قارية همو ~ نتا يله حاط فلوسك فالبني عاد باقي مصاريف الخطبة والعرس بزاف عليك هادشي كلو

بحدة جاوب~ صافي هضرناا حقك هادا ومنحرمك من حتى حاجة والله يقدرني نبقى ديما مهلي فيك !!

قلبها بدا يخبط كتحمد الله فسرها ل كمل رجاها ونعم عليها بعاطاياه ، دوز الابهم ديالو على ظهر يديها وقال ~ شنو لي عجبك

قربت من الزاجة كتشوق وقالت تالفة كلشي حمقها ~ شارك معايا ذوقك وعوني راني تلفت !!....جا وراها وتكا كرشو على ظهرها حتى رفعها لسما سابعة وحسات براسها مكايناش فوق الارض ، حط صبعو على خاتم زوين وسامبل وقال ~ شوفي هادا !!

بإعجاب جوباتو ~ زوين ، ولكن باينة فيه ثقيل

سَبقْها قدامو ودخلو للمحل ،أمرو لبائع يعطيه ليه ومدو لنجمة تقيسو على يديها ، جا مع صباعها لغلاض مواتي ، وزاد ايديها زين فوق زينهم الطبيعي ، كتحرك فايديها وكتشوف وتضحك بحال بنية صغيرة فرحانة بشنو خدات ، تكى على الحيط دالمحل حاضيها وكيبتاسم معاها، خلاها حتى وعات براسها وشافت فيه وتبتت الارض وقالت مهربة عويناتها بحال لي داير زبلة وحصل ~ عجبني زوين ،جا معايا ...

خدا ايدها حيدو مكايس على صبيعات يديها وقال ~ لقالب غالب، غلظ صوتو وقال بصوت عالي ~ بشحال هذا اشريييف ؟؟

مد لخاتم لصايغ وقال بصوت غليظ ~ بشحال هذا اشرييف ؟؟ هاك عبرو وقول ليا ،شاف فنجمة وتبادلو الابتسامة بيناتهم تحت نظرات الذهيبي لي خداه من عندو وقال ~ يتوزن هو لول ويكون خير ، حطو فوق الميزان وقاليه بعدما حسب ستالاف ريال

معاوية هز حاجبو مع غمزة رجولية وقال ~ تكايس !! زوين اه ولكن ماشي ديال هاد الثمن شي كلمة دالبيع

بدا يحلف كاي يبائع ويزوق في سلعتو ~ والله اسيدي الا ديتي حاجة مزيانة وذهب مليح ،بشوفات زايغة فنجمة كمل وراه لمليح كيلبسو غا لمليح

معاوية كان طافي ومكالمي وبهاد الكلمة شعلت ليه البولة الحمرة فراس وتعصب حس بيه قلل من رجوليتو وهو كيشوف في ايدين نجمة لي كانو قبالتو وغياكلها بعينيه ،عظ على فكو من لداخل وسوخر نجمة بأدب وجرو لعندو شانق عليه مخسر سيفتو وجهو كان غيطرطق بسخونية مكرهش يدفنو ~ عاود اش قلتي اشماتة ، نزل عليه بروصية واش انا بنت ليك مرا قدامك ولا شنو ،واش هادي مراتي ولا مرتك باش تاكلها بعينيك

نجمة معرفت باش تبلات ،تخلعت وهي كتشوفيه نازل على سيد سبان وكروشيات شداتو من يديه كتجر فيه ~ معاوية اش كدير طلق من راجل اويلي

بعدها بيديه بلاما يشوفيها وزاد جرو لعندو تا خلاه مقجوج ~ نتا راجل نتا طلع في لعيالات نتا باغي تبيع ولا باغي تزها ، ها دوي اشماتة

تجمو ناس ملي سمعو صوت لغوات ونجمة بالخلعة بدات تبكي معرفت باش تبلات عاد كانو هانين واش عين خرجات فيهم ولا مالهم

نعل شيطان ، طلق من الراجل راه غا سوء تفاهم ، مضيعش شبابك فيه ميستاهلش ...

كانت هادي هضرة الناس كلها شنو يقوليه داخلين بيناتهم مفارقينهم بزز باش فكوه من بين يديه كينهج ويكحب كيرد الروح ، اما سيد الرجال مبردتش مازال كيقلب بعينيه على شي حاجة يهرس بيها الدنيا باش نارو تطفى وخاطرو تبرد ،جراتو نجمة لبرا كترجا فيه ولات باغا غا تفك مبقات عينيها لا فخاتم لا فخوه بلاش منو ، غادي حداها كيطلع النفس بزز ويصوط مدواش خاف يهضر يخسر الهضرة بقات غادا حداه مكمشة كتمسح في عينيها وهو سابقها بشوية حتى تمالك نفسو وجرهامن يدها شد فيها وبقاو سارحين برجليهم حتى وصلو لجردة جلسو مقداتش تدوي معاه خافت يضور فيها خلاتو على خاطرو حتى هز عينو فيها ببطئ بانو ليه بحال الدم ومازال مرة مرة تطلع معاها تنهيدة حط يدو على ظهرها كيطبطب عليهم وقال بصوت باح ~ نساي شنو وقع صافي متقلقيش ، يله ناخدو علاش جينا ؟؟

باعتراض جوباتو خايفة ~ صافي بلاش من هاد الخاتم والله

خنزر فيها ~ كيفاش بلاش منو ، مالو كاين غا هو الكلب تاع بوه لي كيبيع ذهب عطا الله رجال يله نوضي تاخدي شنو بغيتي ونساي عليا زمر محدي طفيت قبل منرجع ليه

وقفت كتنهد وهو يجرها لعندو كيمسح فعينيها باغي يراضيها واخا مداير والو ، بقى معاها حتى ضحكت عاد قضاو غرضهم علاش جاو

تزينات لالة نجمة و سبحان من سماها ،اسم على مسمى زوينة وتشبه لنجوم … القلب بيض و القالب قاليه مكتعرفش حنيكاتها ديما حمرين و مع الحب غير ما زاد طغى عليها لون الدم، معاوية عرف كيفاش يتسلل لقلبها برجوليتو و حروشيتو اما مواقفو مخلين ليها الفم يتلجم ما تعرف تقدم ولا توخر وراه … و جدات و زربات و نهار الخطبة حنات عرضات على حباباتها وصحاباتها وحتى لي يكن ليها الدغينة سلمات قلبها لمولانا و قالت ليه النهار الكبير فرح معايا …

بان خيط صباح نهار الخطبة فاقت فيه فرحانة و قلبها قرب يخرج من بلاصتو معارفة راسها شنو دير … خرجت من البيت لقات ختها فاطنة فايقة و على سطولة الحلوة واقفة تقاد و تستف و كل شكل تحط حداه خوه … ضارت لعند ختها و لاحت صباح الخير و كملات شغلها بعدما قالت كلامها

فاطنة ~ سيري فيقي ديك عُراجا تنوض تعاونا اليوم نهارك خاص كل شي يوجد قبل ميجيو ناس …~ غوتت بصوت عالي ~ وااا السكايري وااا المعواق تنوضي تبوولي ولا نجي ندير ليك ليكوش … ضحكات نجمة على كلام ختها و مشات تفيق خديجة لي لقاتها اصلا فايقة و مخسرة عليها سيفتها طايح عليها الضيم غيخوا عليها سداري ولبلاصة ومتلقى شكون تشكي عليه وتضحك معاه ونيستها في الحياة دارت ونيس وبقات هي وحدانية ~ متنوضيش زعمة تعونينا !!

خديجة جوبتها منهدة ~ صافي درتي ناس جداد وغتسمحي فينا ...ضحكت بلاما تخبي سنانها وجوبتها ~ دابا يجي وقتك تا نتي ، وزايدون انا مازال معاك ليوم غادي غير نتكاتب وبت باقا نبت هنا ، جرت ليها يدها منوضاها يله نوضي

نفضت لعگز وناضت كملو شنو ناقص ووجدو شنو خاص ساعة وكان كلشي كان مجموع ومقاد على حقو وطريقو شوية تمت داخلة تاجة مع دادا سعاد جايا مع بناتها وحدة طلع وتهبط ولوخرا تعوج ومهم حداهم عيات تغمز وتحلف

فاطنة تلقات ليهم بترحيب ~ اهلا اهلا بمي سلمت عليها وقالت ايوا غبرتي كون ما هاد نهار لكبير متجيش ..

تاجة وهي كتقاد في الجلسة فوق السداري ~ ولفت خيمتي ابنتي منكدبش عليك ، منقدرش نرگد برا عليها ...

دازت سلمات على سعاد وبناتها وقالت ~ نجيمة لاباس عليك ،ونتي انجاة كيدايرة

جوبت نجاة بعينين في الارض باغا ثير انتباه عمتها بالحشمة ~ حمد لله اعمتي ونتي صحيحتك مزيان

فاطنة هزت ايديها لسما ~ نحمدو الله ونشكروه

نطقت سعاد وقالت كتبارك ~ مبروك على نجمة عقبة لوليداتك لاخرين ...

فاطنة قالتها موركة عليها ~ الله يبارك فيك اختي سعاد نوبة عبد الله دابا راه حاط العين على شي بنت يمكن من خدمة راه كنتسنى غا نتفرغ ونعمر ليه قولي لعقبة لعند نجاة

قالتها تحت مسامع هاد الاخيرة لي حسات بحلقها نشف ووحل ليها الريق ،بدات كتنش على وجهها بيدها وقالت مرتابكة ~ الحال سخون عندكم

فاطنة عيطت على نجمة وجوبتها ~ ايوا بسيف شهر سبعة كتكون الحرارة ،الله يرحمنا من حر لاخرة اما حر دنيا دايز

دخلت نجمة ل غير شافت مها تلاحت عليها تبوس وتعنق ودازت سلمات على دادا بعناق حار ودارت صواب مع بنات خوها ، تخشات حدا تاجة لي جبدت ليها من صاك قفطان حرير مزوق صوباتو ليها لهاد نهار ،خداتو من عندها كضحك وفرحانة بيه ويكون كيفما بغا يكون قيمتو كتغلا الا كان من عند ميمتها ،مشات بفرحة لبيت توجد عليها لبسات وتقدات ولشعرها طلقات ، دارت خيط ريح على جبتها ولبسات حوالقها وشربيل وخرجات لعندهم جلست وسط صالون في بلاصتها تحت نظرات ختها لمدمعين بالفرحة ،وتزغريت وتباريك مها ونظرات بنات خوها ليها بحرقة ...فدوك الاثناء طيابة كانت فسطح كتطيب في اللحم ودجاج كانت حداها عايشة لي معاوناهم من بعيد وحاضية لفاطنة الشغل ....كثرت الهضرة واللغا وضحك والغنا ، دار عمرات بخواتات نجمة وخوتها وعيالاتهم ولقراب ، رجال شدو لبيت والعيالات فبيت كيتسناو في ناس ...ل كانو جايين وجاييين، الحولي على خير تبارك الله جارينو والعريس هاز مشمومو وعائلتو وراه كلها اش هاز فيديه من فاكية وسكر وحلوة ودهاز لعروس ، تلقاو ليهم العائلة في الباب بترحيب ووجه مبشور كل واحد يرحب من جيه ، دخلو رجال عند الرجال ونسا مع نسا وبدات الحفلة ،قولها وضحك ،سول وسال خواتات لعريس جاو بثلاثة زهرة ل من وجها تحلف حتى جالسة على شوك ولوخرين رمانة مغمة ممعروفش شنو تحت راسهم ، لعروسة لي فيها كافيها والخلعة طالعاها من ساسها لرجليها

تحطو صواني وطباسل الحلوة وفاكية عطاو لام نجمة لالة تاجة الصينية لي جلست حدا لكبيرة تعرف عليها ، لكلام كان بحال اي كلام كيكون فبحال هاد نهارات الهضرة على زواج والعروس ولعريس وكلها يشكر لي ليه دوزو كيسانهم حتى جا لعدول جا لعبد الله لعند فاطنة يعطي لنجمة لكتاب تسني شداتو فيديها وصبعانها كيترعدو ختها توريها وهي كتخطط حتى كملت وسمعات زغاريت وفرمشة عين رجعات مرا مزوجة كيف كانت كتسنى وتمنى ،هي فحلم ولا فعلم ، واخيرا تهنات من اسم فاتها تران ، واخيرا مغتبقاش تسمع امتى يحن عليك الله ويصيفط ليك كيالك ، واخيرا غتولي مزوجة وماشي بايرة اللقب لي كتبصم بيه اي وحظة فاتت عشرين عام

زواج وتزوجات وللمعقول دخلات ولأشمن هم مخبية ليها دنيا مازال معرفات !!

دخلوها للبيت تبكي على خاطرها بالفرحة ،ايدها مزال كيترعدو كلشي مجموع عليها من مها وختها كيباركو ويسكتو فيها ، حتى جا عندها عبد الله باسها في جبينها وقال حابس دموع عينيه مهما كان ختو ومعمرة لبلاصة ~ مبروك عليك اختي !! الله يثبت ليك الغرس ، وانا غنبقى خوك وهادي غتبقى دارك وراك بحبابك ...غلبوها دموعها وبدات تنخصص بصوت مسموع ، جات لعندها لكبيرة لي كانت كتشوف من بعيد اش كيوقع ناضت خداتها في حضنها وقالت وهي كتمسح ليها فعينيها ~ الله يقدرنا ونخليوك ديما فرحانة وهاد دموع متنزليهم غا بالفرحة ، شافت فعبد الله لي قدماتو ليها فاطنة وقالت ليه ~ شوف اولدي هادي أمانتكم من عندكم جات لعندي وان شاء الله نحافظو عليها ،ولدي منشكروش ليك مربي وحنين و عمر لكلمة الخايبة مغتسمعها من فمو والايام توريك ، وراك جلستي معاه هو ومول الدار وشفتيه

هز ليها عبد الله راسو ونطق ~ تا انا الالة وباش منكذبش عليك راه ختي هادي مشيت وسولت عليكم فين كتسكنو ومسمعت غير كل خير ، الله يجيبنا في صواب معاكم

طبطبت تاجة على ظهرو بلطف وقالت ~ هانتا دويتي اولدي !!،زواج راه سفينة وسط لبحر كل واحد منهم خاص يسيرها شوية مرة الحمل عليه ومرة عليها باش متغرقش ، لي نوصيهم عليه هو الصبر حتى حاجة مساهلة في البدية وبنتي تبارك الله راه ذبابة منخافش عليها

لكبيرة عنقت تاجة وباست على راسها ~ الله يطول فعمرك عليها كلمة ، وانا كنحمد الله ونشكرو لي طحت في نساب بحالكم ...

ويله انجمة بنتي مسحي دموعك وفرحي راه نهار صداقك هادا بضحكة باغا تنشطها مازال ليك معاهم شوية الوقت تشبعي منهم وتقليد عليك هانا نقولها قدام مك وختك وخوك نهار تبغي تجي عندهم منحبسكش وتاهما فاي وقت يجيو عندك راه دار راجلك هي دارك ودارهم .....

عند الرجال كان جالس بابا عبد الهادي مترأس المجمع مع معاوية وباه خليفة ، كيديو ويجيبو في الهضرة ...

بابا عبد الهادي قال كيوصي معاوية ~ ايوا بلاما نوصيك اولدي تهلى تهلى وساعف راك عارف لبنات واخا نجمة راه منشكرهاش ليك مرا بذراعها

بحشمة منزل راسو الارض ~ نحطها على راسي كون هاني كن هاني اسي عبد الهادي ميخصهاش خير معايا

نظم ليهم عبد الله ،كيشوف فيه عرفو هو لي كان في تصويرة ل لقا ،مهم قصد الدار ودخل من الباب ،دوا وقال ~ يكون غا المعقول اسي معاوية ونتا ملي دخلتي من الباب راه فيك ،

معاوية وهو كيشوفيه ~ تا نجمة مربية ومأذبة ومعقولة وعندها غا نيشان ،ربيتو وعرفتو اش تربيو وانا كيشرفني نتناسب معاكم دقاكعو باه وقال ~ والله وما تسالني حلوف اسي عبد الهادي ، الا كنت خايف راك عارف زواج راه لدوام كنقول كيدايرين هاد ناس وهاد العائلة وغير نضت مع صباح وصليت الله يقبل وشعلت الراديو وانا نسمع زغاريت قلتي ليهم هاد البنت باينة مزيانة فالها زين والحمد لله من وجوهكم باين العربون

تشكرو عبد الهادي براسو وبقاو مشاركين لحديث حتى وجدت الماكلة وتحطات ، دجاج وتبعو لحم وديسير وحلف عليهم ميمشيو تا ياكلو من لحم الحولي لي جابو لي كان تذبح في سطح وقت جاو

جالسة فبيت خاوي كتطرطق صباعها بالخلعة وهي كتسنا فيه يجي لعندها يودعها قبل ميمشيو ، لاول مرة غتوقف قدامو بصفتها مرتو ماشي خطيبتوو، احساس مغاير يله غتعيشو كانت حانية راسها ووذنيها كتسمع فيهم صوت قلبها لي كيضرب بقوة ، سمعت صوت خطوات قوية وحنحنة بصوتو الخشن لي ولات كتميزو وعارفة بحتو دخل لعندها وسد الباب شيء لي خلاها تفافا وبدات تحرك فرجليها بتوثر ، كيقرب منها وعينيه غياكلوها وتاها لبلدي وجات معاه ، كتبان قدامو مرا كاملة مكمولة من كلشي تحركت رجوليتو ومشا جلس حداها كيتنهد هز ايدها من فوق ركابيها وقربها لفمو كيبوس فيها مغمض عينيه ومنتشي ،قال بفحيح ~ مبرروك علينا انجمة !!

بلعت ريقها وبتاسمت بخجل وهزت عينيها لمحكلين ~ الله يبارك فيك

وهو كيتحسس ملمس ايديها الرطب نطق ~ فرحانة !!

نجمة كتحس بالفرشات فكرشها ~ وعدتي ووفيتي ومغنكونش فرحانة ، كنحمد الله ونشكرو لي عطاك ليا

رجع باسها وخدا راحتو في تقبيلها ~ انا لي كنحمد الله لي دارك في طريقي

نجمة حمارو ليها حناكها و يديها عرقو عليها في الداخل ديالها كتقول الله اربي شهادشي كنحس بيه … هزت عينيها فيه مبتاسمة شيء لي خلاه يزيد يقرب عندها كتر و كيشم في ريحتها لي كانت بحال الورد قرب شفايفو لحنكها و حط عليهم بوسة خفيفة،حست بقشعريرة و حلقها نشف … حس بيها و شد ليها ف يديها وهضر بكل نخوة ~ نهار جات عيني على عينيك حفرتك هنا ~ اشار على قلبو … و غرستك هنا ~ كان حط صبعو على راسو ~ و حلفت حتى نتي لي تكوني مولات ديك الدار و ماشي شي وحدة اخرى ، واعدتك بيني و بين راسي و الوعد دين

خشا يديه فجيب سروال وجبد منو جوا مدو ليها ~ هادا صدااقك والا مقدكش علميني كلشي ديالك

خداتو من عندو وقالت ~ بسم الله ، غيقدني ومغيخصني والو شكرااا

ضحك بجولية وباس جبينها ~ حقك هذا !! جمع الوقفة حس براسو مقادش يزيد يجلس حداها كثر وعارفها شرعا مراتو وقف مقاد حوايجو ووقفها معاه خاشيها فحضنو مودعها وكيلعب فشعرها ~ نتلاقاو غدا !! نجي لعندك باش نخرجو مع قبلة قال ،واخا !!

هزت ليه غير راسها لسانها تسرط ، لهاد درجة لحياة ضحكت في وجهها ، لهاد درجة جا لي يحميها ويحتويها ، لي تكى عليه ويبغيها وتبغيه ، ل ملي تكون فرحانة ولا غضبانا تخشى فيه ، كدعي الله فسرها باش متنكدش فرحتها ، مشا ودا قلبها وعقلها معاه وخلا غير بقايا انثى غارقة في بحر الحب

لبست احسن معندها ، صايا كلوش حد الركبة مع قميجة مهزوزة من لكتاف طلقات شعرها لي خلاتو على طبيعتو كان مازال مصايب ،زينت وجهها بلقليل مخليا جمال الرباني يبان ، كملت وجلست تسنا فيه يجي لعندها لدار باش يخرجو ، مبقى عندها دابا علاش تخبى ومعندها علاش تخرج فسر والكذوب ، براس مرفوع كتقوليهم خارجة معاه حيت عارفة تا حد معندو الحق يمنعها ،كتخرجي بتحميرة لوجه تشوفي فناس ماشي مخبية منهم وبراس عالي كتمشاي حداهم كتقولي للكل بمشيتك وشموخك بلي هذا راجلي ،حلالي وما اجمل الحلال !! كانت فرحانة ومبينة على بيوضية سنانها ، غا تفرنس دنيا مقاداهاش ، دازت ساعة وزوج وثلاتة على الوقت لي دارت معاه فيه ، ابتسامتها بدات كتلاشا والخلعة بدات كتبان عليه ووجهها طفى بعدما كان كيلمع ،تساؤلات كثيرة زارو ذهنها شنو واقع ؟؟ يكون نسى ؟؟ تكون وقعت ليه شي حاجة ؟؟ ياكما دارهم مشاو مقلقين من شي حاجة معجبتهمش ...تساؤلات كثيرة ومساوئ أكثر توقعتهم ، عيات فيها فاطنة تحط حوايجها وتبدل ساعة بخرا الغايب حجتو معاه وهي ولا قدرات ،كيف تحط يديها عليهم تقول لا دابا يصوني بقات مكمشة فبلاصتها وشادا قدامها صاكها حتى تناص ليل عاد ناضت فاشلة بدلات وتخشات فالفراش وحلفت هي لنعسات ...مطرطقة عينيها كتسنى امتى يصبح الحال وتخرج تاني من الخدمة وتلاقاه قدامها كيف عادتو ، بالحق خاب ضنها نهار تاني ملي ملقاتوش ، عيات واقفة ووردية حداها عزت عليها تخليها بوحدها وتمشي ، عنقها تعنز كل مرة تضور تقلب فكل جهة بحال الحمقة ، دام داك الحال يومين ولا خبار عليه ، جالسة نهار تالث خدامة وفقرارة نفسها كتقول تسالي خدمة وتمشي لعندو لدار تقلب عليها وتسول عليه مهم تبرد النار لي شاعلة قلبها، باغا تشوف مالو واش غير حالو ، شنو دارت ليه ،واش بخير ووووو

حتى كيجي عندها الباطرون ..لقاها شبه غايبة عن الوجود الخدمة قدامها مزال معرمة قاسها فكتافها ومحساتش بيه ، بقى يعيط عليها شحال كانت كتحس براسها فبير غارق وصوت جايها من بعيد حتى وقف قدامها عاد فاقت

قال بلاما يشوف فعينيها ~ نجمة تبعيني لبيرو

حسات بفقلبها تكمش عليها ، وتنفسها ولا بطيء رجلين لي يوصلو عليه جراتهم بزز باش مشات بيهم لعندو كان مقابل مع شرجم مع قالت ليه هانا شنو كاين ، دار لعندها بحزن وقال ~ احم لا والو غير معاوية عيط ليا وقاليا نديك لعندو بغاك ضروري

نجمة عينيها بداو يبكيو ~ كيفاش تديني عندو ، ياك مولف هو لي كيجي عندي ،

قرب من عندها وقال كارز على سنانو محكم فراسو ~ نجمةة !! سمعي مني !! يله معايا

سبقها وهي غادا وراه بحوايج الخدمة جثة هامدة فوق الارض كتحرك راسها بلا وحابسة دموعها قلبها ضارها ومعارفاش علاش ، ركبت معاه في طوموبيل وشحال طوالت عليها طريق ، كانت دايرة راسها على رجليها وكتحرك فيهم وتطلب الله وتقول ~ ياااربي !! وقف معايا غير هاد المرة ، ياربي متخسرش فرحتي راني منستاهلش نتنغص !!

حسات بطموبيل توقفات ووقف ليها معاها القلب ملي شافت قدام دار لوصلو ليها ناس داخلين خارجين ، وصوت لبكى ولغوات ، حل عليها فؤاد طوموبيل مازال كتستوعب شنو واقع وهي طير عليها زهرة كتبكي ~ جيتي هاا !! جيتي المنحوسة ، اقدام نحس ، بدات تضرب فيها بهستيرية ، خوووياا ماااااااات !! ماااااات المنحوسة !!!

شكون هادي لي تجيها ف البال عرسها يرجع جنازة ، والراجل لي كانت غدخل لبيتو عريس غتحطو في لقبر مغسل ومكفن… الراجل لي كانت غتحط عليه الراس و تشكي همها ليه غتحط عليه التراب و الحجر… الزمان تقلب عليها و لوجهو الثاني عطاها …سرق الضحكة من فمها ولمرار الحياة دوقها ، خلاها طايرة فوق سحابة بيضة وفرمشة عين مع الارض خبطها ...نجمة صبرت على الطفولة ل عاشت مقسمة وملاوطة ،صبرت على التفرقة بينها وبين ولاد خوتها صبرت على تمارة والقهرة والكلام القبيح ، لكن شكون يصبرها على فقدان شخص حسات معاه بالحب بالدفئ والحنان ، شكون يصبرها على خسران راجل كانت باغا تكون ليه عروس ، شكون ل غيصبرها على كلمة منحوسة وفالها فكعابها الموت لاصق بجنابها ،شكون يداوي قليبها ويوقف بجنبها كتفو على كتفها، شكون يحيد عليها وصمة گدام الويل فحالة هيا اللي قتلاتو ، كون هيا ل ماتت كون قالو من الخير، ممكتاباش ليه لانو راجل وماكاينة حتى كلمة تجي عليه لكن هيا غير ولية في مجتمع ذكوري وكيف كيقولو حويط وقصير شحال قدها تصبر وتداري ل جاي ماشي ساهل

بقات جالسة مشللة فديك طوموبيل ومقاداش تنزل الهضرة كتعاود في وذنيها بحال صدى صوت فجبال بعيدة ، شكون هادا لي مات الا كان العقل ممستوعبهاش كي غيدير لقلب يتقلبها ، الدموع في عينيها تحجرو و حس اللغى عليها كثر و شحال من واحد ولا ينعت عليها بالصبع .. ها هي جات مرتو بسم الله الرحمن الرحيم دخلت عليهم بلموت .. وكاين لي مأمن بهضرة المرا يا دخل عليك بالفرح يا دخل عليك بالقرح … وكاين لي قاليها قدامك قدام الغراب و موكة ومنهم زهرة ل نعدروها في موت خوها مكوية والعقل هارب ليها و القلب العافية شاعلة فيه قطعة منها و تقطعت و كيف الوردة مشا ف عز شبابو … كلامها عليه خلا لي ميبكي بكا

زهرة ~ وا ربي على خويا وراااااه خويا عمرو شاف الطبة وراه حبيبي عمرو گال احح هادي ضرتني وراه حنيني غضرني و خلاني نقوليه غا البرد و يفوتك … وخويا الحنين اش هاد التمغطية لي درتي ~ بدات تهز في تراب كان في الارض و تندب بيه في حناكها~ وربي راني تشويت اربيييي واا معاوية نوض وقول راك كتضحك معانا … جاو عندها عيلات الحومة تجمعو عليها شي كيسكت فيها و شي كيبكي معاها بقات على حالها و الناس تسكت فيها و معلوم حرقة فراق الميت صعيبة كيتو كتكون حارة واخا تحط عليها الدوا ما تبرا ….حطات ايدها على قلبها ودخلت لدار بدموع فعينيها ،عينيها مضببين مكتشوفش قدامها ناس لي كيطالعوها من ساسها راسها دخلت وسط الدار لقات لكبيرة جالسة و كتبكي باش تبرد قلبها اما بمكتاب الله راضية ناس العزو و لصبرها تعجبو … سعدات من نزل عليها الصبر وهمد حرقتها ...غير شافت نجمة وهي توقف وتمات جايا لعندها فاتحة دراعها ~ مشااا الغالي ،مشا معاوية وخلا ليا غا امانتو جرتها لصدرها كتبكي معاها

كيقولو الموت راحة للميت وعذاب للحي وكيقولو كية ل حط خدو لتراب معارفينش رآه كية ل بقى موراه تالف ...

خشاتها لكبيرة فصدرها ايدها كيترعدو عليها ممتيقاش شنو كتسمع ، هزات راسها وبدات تخبط على حناكها باش الا كانت ناعسة تفيق ، قالت بالغوات والقلب عالم بيه غا ل خلقو ~ ماااات !! كيفاااش مات ،كيفاااش مات ، كتدوي موجهة هضرتها لعدوزتها ، ياك عاد كنتو عندنا وملي بغيتو تمشيو كان معايا ، وبيديه عطاني فلووس صدااق كيفاش مات اخالتي كيفاش مشاا ، واناا ها ؟؟ انا لمن خلاني ...!!

هنا لكبيرة حطات ايديها على عينيها كتنخصص بالصوت حاسة بكبدتها كتشوى على زوج جوايه ومعندها جهد ، شدت ليها من ايدها وقالت كتمسح على وجه نجمة لي ولا معصور من حر الصدمة ~ بغاه الله وداه الله ابنتي !! هو عزيز وربي عز منو ، نعلي شيطان !! علاه لموت كتعلم ،ولا كتشاور ....

صاحت نجمة بغوتة تبكي الحجر ~ لاااااااا !! طاحت الارض حتال هادي ولاااا علاش اسيدي ربي علاش شنو درت تاا يوقع ليا هادشي ، اشمن دنب درت مانع فرحتي

كتبكي مألمة، حاسة بصهد طالع معاها من رجليها عاقت و فاقت على راسها راها ترملات صغيرة… نزلت عندنا لكبيرة وقفتها صحة وخشاتها من جديد فصدرها لحنين خلاتها تبكي حتى ما خلات في راسها جهد ~ بكي ابنتي بكي ولدي لي بغاك و ختارك من دون النسا كان كيلحق و سميتك ما فارقت لسانو ، بكي حتى تبردي

كلامها زاد خوا عليها سطل ديال ليصانص و شعلتيه فيها بدات كتغوت و معرفاش اشمن كلام من فمها كتخرج ~ وااا خالتي وا غير قولي ليا ياك انا سبابو ،دخلت عليه بالموت الغدارة لي خطفاتو قبل منشبع منو ، وقفت كتقلب بعينيها غير قولو ليا راجلي كيف مات ووريني وجهو وخليوني نتيق وقللبي يبرد

دخلوها لبيتو ل كان مصبوغ جديد ومفرش على ذوقو كلشي باقي بميكتو موجدو لمرتو، عينيها جات عليه نيشان مغط فوق سرير مغطي بليزار راسو لي كيبان ، غادا كتقرب منو وكتشهق ، كان وجهو منور ، غادي عريس فجنة لوجه بيض ومجبد واللحية كحلة مرتبة والابتسامة على فمو ، لي شافو يقول ناعس تكفات على ركافيها وخشات راسها في عنقو مهزاتو تا خلاتو سارد بدموعها ، نطقت لكبيرة وعينيها على ولدها كتشبع منو شوفان ~ من نهار ابنتي جينا من الخطبة وهو مليوح مريض ، قبل منجيو لعندكم كان ضال خدام واقف على عمال لي كيصاوبو في طريق ويعلقو رايات لعيد العرش ، تما ضربتو سالمة مشا لخطبة بزز وغير رجع لدار تلاح فديك البلاصة وهاهو باقي فيها مخلينا عرگة مخلينا مخينزة ،عند بالنا مرضة ودايزة ساعة متگعدش منها وليدي حبيبي ، قالتها وكسيرات بالبكا ....

حمد لله على كل حال دايم الله ، الموت حارة وموت الغفلة حر منها ، لكن لا اعتراض على قضاء الله "كلُّ نَفْسٍۢ ذَآئِقَةُ ٱلْمَوْتِ ۖ ثُمَّ إِلَيْنَا تُرْجَعُونَ"

لو كان لبكا يرجع لميت غتكون المقبرة خاوية ، بكات حتى نشفو دموعها وطابو وشنو بيدها مدير ولا تغير ، تا حاجة مكتبدل ،معاوية مات والجنازة خرجات وهي راه جالسة في صالون كي ليتيمة ولغميز عليها ، كانت منزلة عينيها الارض بحال لي كيتحاسب على زبلة مدايرهاش ، شوية وهي تم داخلة تاجة وفاطنة لي وصلتهم لخبار من عند باطرون الخدمة داخلين يقلبو بعينيهم على نجمة ، بانت ليهم ومشات لعندها فاطنة تجري ، هاديك تبكي ولوخرا تسكت فيها نجمة معنقة ختها وتنين ~ فيقيني اختي وقولي ليا راك غا كتحلمي ، قولي ليا راك غا كتهتهتي ،قولي ليا راه اصلا متخطبتي ولا تزوجتي

فاطنة قالت منهدة ~ معندك زهر ومعندك سعد بحالك بحالي ،غا مسحي دموعك وشدي فراسك هادشي ديال الله !! لبكا والمنذبة معندها باش تفيد .

جلسات حداها تاجة من جهة لوخرا بعدما عزات لكبيرة ، خدات نجمة في حضنها وقالت كلمة بلا متقصد خلاتها كتقطع فقلبها ~ فين كان مخبي ليك هادشي ، تطلقتي بلا عدول ابنتي !!

من لقريب وسمعتها واش بقى لغريب ميقول ،!!؟ كمدتها فقلبها وسكتت موجدة راسها ل باقي حيث هادي غا البدية ، داز الوقت ودانيا عمرت ولي جالس على برا كثر من لداخل ، تمات جايا زهرة عينيها گارناهم وناوية على خزيت هازة فيديها ميكة كحلة لي مع دخلة لاحتها شنو فيها على نجمة وقالت حاطة يديها على جنابها ~ نوضي شدي الحزن على راجلك ولبسي الابيض ولا خرجي مع الباب !! نجمة شافت فثوب حياتها لي قدامها ثوب البيض لون لي تمنات تلبسو فعرسها قبل گنازتها ، عينيها بداو يدوزو بدموع معارفة متقول وهي تنطق فاطنة واخدة الجلابة من حجرها ورداتها لزهرة وقالت ~ سيري فرقي عليك البنت لاش غتشد الحزن وهو مازال مدخل عليها

يله غتنوض معاها زهرة بالمعيور وهي تسمع صوت موقفها ~ زهرررة !! اش هادشي كديري فيه ، قرب منها سي خليفة مخنزر فيها وقال ، فرقي عليك البنت وعبري شبرك وجلسي عليه ولا غتكون ليا معاك هضرة قاصحة مغتعجبكش ...مجا فين يكمل كلامو حتى غبرت من قدامو ، دخل تحت نظرات الكل لعند نجمة فاتح ذراعو عنقها وقال وكلشي كيسمع ~ ليوم ضربت على ولدي من الحالة المدنية وزدت فيها سمية بنية ، الا مات ولدي معاوية راه خلاك ليا امانة وعمري منفرط فيك حتى يدي مول امانة امانتو

طبطب على ظهرها بحنية وخرج مخليها كتبكي ، مشا نيشان لبرا فين كانو مجمعين رجال ، جر من بيناتهم رجل دين وقال ~ بغيت نتشاور معاك فشي هضرةة

طأطأ ليه راسو وقال ~ الله سمعنا خيرر !!

" واصبر لحكم ربك فإنك بأعيننا " الله اذا احب عبدا ابتلاه ، ونجمة ربي كيبغيها وكيمتحن صبرها فدنيا ،هادشي لي كيوقع فحياتها من نهار تولدت لدابا ،ماشي صدفة فهو مكتوب بالقلم من نهار تخلق الكون ، ومعاوية لسبب ما حطو ربي في طريقها باش تتزوجو، اما موتو مقدرة عليه من نهار تزاد مكاين لا قدامها نحس ولا فالها خايب فالله شاء ، خلق ، قدَّر

~~~

هضرة سي خليفة خلات ناس في صالة يتوشوشو بيناتهم كل واحد كيف نواها فدماغو كاين لي قال !! باغيها ليه ، وكاينة ل قال غيسكنها معاه تا يشوف بيمن يزوجها ..كلها لغى بالغلاه واغلبية فهمو ل فهمت خت كبيرة لي كانت جالسة حداها حناكها نادباهم ودايرة حامض جهة نواضرها وشادا راسها بزيف حياتي ، حطت يدها على فمها ودوات بينها وبين ختها ~ لكبيرة ختي !! سي خليفة علاش ناوي ؟؟ ياكماا يا صگعه !!

لكبيرة مجرد تفكير فهادشي خلاها تخلع فما بالك يديرها بصح ، دوات عاضة على فمها طالبة ربي يدير تاويل ، عزت عليها نجمة وبقاتوفيها اه ولكن ماشي على سباب راحة بال ولادها ~ غاا سكتي ياربي ميكونش عينو فهاداك حيت الا فكر فيه هو ، بتنهيدة كملت ، ايامنا مغيطلعش فيهم صباح ، نتي عارفاه كيف داير ولبنت درويشة متقدش عليه غيمحنها ويعذبها

منانة هزت عينيها فنجمة شافتها دايرة بحال فريخ شتا صحتها على قدها وتخيلاتو كيف داير هو وهي تحرك راسها كتولول ~ مسكينة سعدها فيه صكعه معندها زهر ، الله يرحمك امعاوية كانت معاك سلاكا

على برا كان سي خليفة كيتناقش مع فقيه جامع واقفين بعيد على ناس لي باغين غير يديو ميعودو ، شابك صبعانو مع بعضياتهم وقال ~ بغيت نتشاور معاك اسي لفقيه !!

حرك ليه راسو وقال ~ الله يسمعنا خير ، انا كنسمع فيك !!

تنهد بصوت مسموع وقال هاز حواجبو وكيدوي مهموم ~ منكذبش عليك بقات فيا البنت لي خلا ولدي وراه ، بنية مازال صغيرة ومعارفة والو ، وصعيب عليها ترمل فهاد سن ، زيد عليها هضرة ناس لي مكتساليش ، داكشي علاش خديت واحد القرار وبغيت ناخد رأييك فيه نتا قاري عليا وواعي فأمور دين

لفقيع ~ الا كان فمقدوري نعاونك علاش لا ؟؟ قول نسمع

خليفة وهو حاضي شخص لي جاي لعندو~ بغيت ناخدها لولدي لكبير ، اللهم تبقى تحت جناحي ناخد فيها اجر تعيش قدام عينينا امانة ولدي منفرطوش فيها

لفقيه كيحاول يستوعب شنو سمع ~ اشمن واحد في ولادك اسي خليفة وااش كتقصد

خطفها ليه خليفة من فمو وقال ~ هاداك اسي لفقيه هاداك ، غُلاَمْ !!

نزل من طوموبيل وتم جا بخطوات ثقيلة قاصد باه، هاز گارو فيديه كينثر منو باغي يقاد دماغو ، كل مرة يجي لعندو واحد يعزيه ، كيكتفي يهز ليهم راسو ولا يحط ايدو على صدرو بامتنان معندو خاطر يهضر ،موت خوه جاتو قاصحة ملامح الحزن كانت باينة على وجهو وعينيه الناعسين طاغي عليهم حزن كبير ، لاح لگارو فور موصل لعند باه ل تحنى باس على راسو وسلم بعينيه على لفقيه ورجع وقف باستقامة موقف رجليه بزوج بثبات ~ لوالييد اش درنا ؟؟ قالها بنبرة صوت رجولية وبملامح حادة ومعقودة كيتسنى الجواب

خليفة باستفهام ~ فاش اولدي !! مفهمتش

غلام جر باه من يديه بعدما قال ~ سمح لنا الفقيه !! جرو لبعيد باش يدوي معاه راس فراس ، حط ايد فوق ايد قدامو وبتحديد جهة حجرو ونطق باختصار ~ الصدقة ؟؟ ليوم ولا غدا ؟؟

خليفة عاد فهم قصدو ~ ااه ، اش بان ليك نتا ؟؟، قرر اولدي نتا ف الكفاية انا عفيني

غلام دوز يديه على وجهو وخلاها مستقرة في لحيتو الطويلة ل كيسرح فيها بصبعانو ~ خليها ليوم ، نطعمو ناس لي جاو ، انا غنمشي نشوف شي ثور ندوزو لعند دراري لگرنة يدوزو عليه وفطريقي غندوز على صحاب العمالة يبنيو خزانة وهو كيشير ليه بيديه كيوريه ناس ل مجمعين ~ حشوووما كاع يبقاو واقفين على برا ..وسول لينا معاك الواليدة شنو خاصهم لداخل باش نصيفطو ليهم مع دراري بلا ديك سير وجي لحانوت ودنيا عامرة رجال

خليفة بسؤال ~ ونتا مغتجيش غتخليني مني لهادشي مغتوقفش حدايا

غلام على سبة دغيا كيشعل ~ وفيني انا دابا الواليد ؟؟ قالها بالغوات ورجع قاد من نبرة صوتو وهضر بشوية مهما كان باه وكيحتارمو ~ انا معاك ، معاك ، نقضي غا صوالح لي تابعيني ونجي لعندك ، ضيق فيه عينيه واش باغيني فشي حاجة

خليفة ~ ندوزو هاد لعشا وعندي ليك شي هضرة الله يرضي عليك

غلام وهو كيجبد سوارت طوموبيلتو وگارو من جيبو ~ ما تبقى غير على خاطرك لعشية انا هنا ، هز ايدو بزوج باستسلام وهاز معاهم حواجبو..وخليني دابا نقصد اش تابعني

خليفة وهو كيربث على ظهرو ل ولد ما ماتش ~ سير اولدي الله يرضي عليك ...

قاليه تهلىى ومشا لطوموبيلتو تبعاتو زهرة لي كانت على برا تجري باغا تدوي معاه ~ غلااام !! غلاام وقف وقف سمع عندي ليك شي هضرة

خرج فيها عينيه وهو كيشوف فيها باش خارجة ~ تي سايبة ولا مالك ، شفتك خارجة ببيجامتك معندكش رجال

زهرة بدات كضور في عينيها كتسرط القمعة ~ خرجت زربانة بغيت غا نقوليك شي هضرة

حل طوموبيلتو ركب فيها بعدما قال ~ سيري دخلي فحالك الله يرحم باك دماغي مصدع متزيديش تشعليني

كسيرة وخلاها واقفة والهضرة واحلة ليها في الحلق

وهذا هو غلام دغيا يشعل وصعيب يطفى الولد البكر بعد زهرة فولاد خليفة هو لي مسير الخدمة كاملة وهازهم من كبيرهم لصغيرهم ومن ساسهم لراسهم ، طبعو صعيب وكيتنيرڤا على نقشة ، مكيعرفش شنو هو الضحك ولا تقشاب ، شخصيتو مع معاوية بحال الما والعافية

تقلبات الدنيا والدار عمرات ، لخزانة تبنات و البعيد سمع خبار موت خير الناس … ناسو كتار و عزيز على عباد الله ، قبل ميجيب غُلاَمْ الضحية كان العسل مع الزبدة تفرق و الناس شبعات كرشها و ريحة الكسكسو كاينة في كل دار و هادي هي العادة الى مات الميت الجيران كيتكلفو ...عاد معاوية كانت سميتو سبقاه و بخيرو سمعتو نقية كاين لي بكى عليه و كاين لي موتو في عقلو متقبلهاش… وصل وقت لغدا و لي دار شي گصعة دخلها لدار سي خليفة كتهز وحدة و تحط لخرى … الكرش شبعت و لي عندو شي دار قصدها و لي جا من بعيد بقى تما … كان جالس سي خليفة في خزانة وحداه لفقيه كيكمل معاه الهضرة لي بقات واحلة فحلقو

خليفة مد كاس اتاي لفقيه~ … ايوا اسي الفيقه اش بان ليك ؟؟ نورني وگول ليا شنو ندير

- وهو كيمسح على جبهتو لي عرقت ، اش غنقوليه اسيدي ، هي فدين جائز ياخدها ولدك يدي فيها الاجر ، خاص غير تكمل العدة ديالها و توكلو على الله ديك ساع

خليفة حط كاسو من يدو وناض زربان ~ واعليه ليوم يطرق هاد المسمار بغيت ولدي يرتاح في تربتو ، جمع الوقفة و تم نايض لعند مرتو لي غير شافتو جاي قاصدها قلبها بدا يضرب ، اشار ليها براسو تمشي لعندو ستاذنت من ناس لي كيدويو معاها وتبعاتو كتقاد في زيفها وتمسح فعينيها لي ورمو بالبكا ، دخلت عليه لبيت نعاس لقاتو جالس فوق سداري كيخمم هز عينو فيها وقال بامر ~ سدي داك الباب وتعالي عندي ليك شي هضرة

لكبيرة طرقت ساقطة وتمت غادا حداه ~ الله يسمعنا خبار لخير مالك !!

خليفة دخل نيشان في موضوع ~ … هضرة وحدة غنقولها ليك و سمعيها متزيديش فوق منها كلمة !! بنتي نجمة ترملات وهي صغيرة و كلام الناس عليها كثر و غيزيد يكتر وانا منخليش مرت ولدي مكسورة الخاطر وتلاوط بعيد علينا وراه ولات منا وفينا داكشي علاش انا قررت غير تكمل فريضتها ونزوجها ل غلام

الكبيرة خبطت على فخاضها ~ الله اسي خليفة الله كي غدير ليها و هو الحجر تهرسو يعطيك الطوع وراسو ميتحنى ، ونتا عارفو مباغيش يتزوج ياك شحال عييتي معاه تشوف ليه شي بنت غيجي دابا غيقبل ليك

خليفة هز يدو معصب ~ الالة راه انا لي والدو ماشي هو ل والدني ، وكلامي هو لي غيمشي عليكم كاملين ولدك يحكم في راسو ماشي فيا الى قلت نجمة لغلام اذا راها ليه… تكمل العدة ديالها و ديك الساع يتكاتبو و من هاد الدار ماليها خروج منهنا لديك الوقت

لكبيرة حسات بنواضرها كيزدحو وطونسيو طلع ليها شدتها دوخة حركت ليه ايدها بلا وقالت ~ دويتي معاه فهادشي شاورتيه ، انا راه ميسمعش مني الكلمة ...منك ليه !!

خليفة خنزر فيها ~ مالو غيقطع ليا راس ورا لعشا تكون فخبارو ولكن قبل خاصني ندوي مع لبنت

دخلت نجمة لبيت عند خليفة مع مها وختها والعقل لي تفكر بيه فشنو بغاها ماشي فبلاصتو هاد ساعا غايب عن الوجود ، كانت حادرة راسها عينيها مخيم عليهم الحزن ووجهها ذابل باين عليه لعيا اما قلبها كيبكي الدم لداخل ، كيشوف فيها كيضعف وكتبقى فيه باقا صغيرة على هاد الهم باش تهزو بوحدها ، ماشي ذنبها شنو كيوقع ، هذا غير القدر كيلعب لعبتو ، شابك يديه مع بعضياتهم وقال بصوت حنين ~ بنتي نجمة !!

شافت فيه بعينين مدمعين وقال بصوت مبحوح ~ نعام اعمي !!

خليفة تنهد بأسى ونطق ~ ينعم علينا وعليك رسول الله ، سمعيني ابنتي شنو غنقوليك قدام مك وختك !! ولدي معاوية الا مات فراه ممشى حتى خطب لخوه لكبير ...

كتشوفيه كتسناه يكمل باش تفهم شنو بغا يقصد ، ناض لعندها خدا كرسي وجلس قدامها واخد يدها بحنان وعطف ابوي ~ عمري نفرقك ابنتي تا يدي مول الامانة امانتو داكشي علاش الا مات ولدي معاوية غناخدك لخوه لكبير غلام

حسات بالبيت كيدور بيها وبحناكها غيطرطقو وكلمة غناخدك لخوه هي لي كتعاود في وذنيها ،لسان باش تجاوبو تقال ومبقاتش متحكمة فيه ، تضببات قدامها الرؤية ، وختها حداها مخرجة عينيها فخليفة وكتدوي فبلاصتها ~ اش هاد الهضرة اشرييف !؟ بنتنا ممكتاباش ليكم صافي ،هي هنا دايرة معاكم صواب مجاتش تخليكم وتمشي حيث مهما كان لي مات راجلها وخاصها تعزا فيه وغير غيفوت لعشا وتفاريق ديك ساع عمركم مازال تشوفوها كل واحد يكمل حياتو فين وقفت

خرج تنهيدة من قلبو وطاحت دمعة من عينيه ~ حياتنا وقفات مع موت ولدي ، كبدتي الالة كتمزگ من لداخل مساهلش عليا فراقو عرفتي لي مصبرني شكون ، نعت جهة نجمة ..غير هاد البنت حيت كتفكرني فيه وربي حطها في حياتنا بلش تواسينا فموتو والا مشات تا فرقتنا ديك ساع عاد ندير گنازة ونتهرس ديال بصح

لكبيرة من نبرة صوتو باش كيدوي عرفات راجلها غير عاض في صبر وقلبو مألم محسات على راسها حتى بدات تبكي وتنخصص كأنها عاد مخرجين جنازة ولدها قدامها ، ضار لعند نجمة وقال ~ شنو قلتي ابنيتي !!

تاجة ضارت لجهتها لقاتها كتبكي بلا صوت معندها متقول ومعارفة باش غتجاوب ، كيفاش تتزوج بواحد وقلبها معلق بخوه ، كيف دير تشوف فيه بلاما تفكر فعينين حبيبها ، كيف دير تسمع ليه بلا تسترجع اخر كلام قالو بصفتو رجالها ، فكرت فكلشي الا هادي عمرها مطاحت على البال ، تزوج لخوت ،حست بيدو تحطت على ركبتها شافيها وقال ~ متجوبينيش دابا فكري ابنتي فكري بعقلك ، و عسى ان تكرهو شيئا وهو خير لكم

قال هضرتو وخرج مع الباب بعدما لاح قنبولة في وجههم ، تبعتو لكبيرة كتصبر راسها مخلياهم يدويو على خاطرهم ، يله بغات تدوي نجمة وهي تهز ايدها فاطنة وقالت بامر ~ متفكريييش فيها تا بضحك ، راجلك مات الله يرحمو نحضرو لعشا ونزيدو بحالنا مالك مونيكة دوزي من يد اليد

دابا يجيك رزقك عطا الله رجال لي يقبلو عليك

هاد لكلمة فحد ذاتها خلات نجمة تفيق بهضرتو ملي قال فكري بعقلك ، شكون هادا لي غيقبل بوحدة منحوسة نهار عقدت مع راجل مات ، معادا الا كان مطلق بولادو ولا شرف وبغا يجدد حياتو

كجثة هامدة كجسد بلا روح ،كفتاة اصابتها لعنة الشقاء والحزن كانت جالسة وسط الناس ، الناس لي مكترحمش لي مكتعذرش ل مكتحسش ، تا حد معالم على قلبها ل كيتألم ، على خاطرها لمجروح ، على نفسها المنهكة ....مكرهتش حضن حنين تخشى فيه ،يحميها ويحامي عليها ، مكرهتش نجمة اخرى تواسيها ...مكرهتش عائلة ديال بصح توقف معاها فمحنتها وتنسيها ، عطاتهم الحب بلا مقابل وهي دابا قلبها عامر جروح، عطاتهم دفء بلا حساب وهي دابا كترعد بالبرد ، عطاتهم الامان وهي دابا فقمة الخوف من اللي جاي ،وصلتهم لبر الامان وهي دابا موضرة كتقلب على الطريق ....

الحياة قسات عليها بزاف والزمان والناس جاو عليها ، ولات منزلة عينيها باش متشوفهمش كيشوفو فيها ،مصمكة وذنيها باش متسمع هضرة تعگرها ، هضرة الناس لي دايرة بحال المرض الفتاك كتقتل الذات بحال سم ، مكرهتش تغوت ووتقول رَحْمُونِي ، باراكا عليا انا انسانة من دم ولحم حتى انا كنحس ،حتى انا مات ليا راجلي والسند وكون غير مات احساسي معاه ، مكرهتش متبقاش تحس ، متجرحها هضرة ولا ياثر فيها كلام ولكن هي عبد ضعيف الهم لي جاا كياثر فيها ،قدرتها على التحمل ستنزفات وصبرها تقادا وجهد لي غتوقف بيه فوجه الناس وتستحمل سالا بينها وبين تفكير في انها توضع حد لحياتها خيط رفيع ممفكراش انو حرام وغدخل لجنهم قد مباغا تتهنى وتحكم على راسها بالاعدام ضد تهم الموجهة ليها .....

فاطنة هضرة خليفة مشافتهاش من الناحية الايجابية ، لا حكمت على ختها ترجع تواجه المجتمع كأرملة مازال نقش عرسها حمر فيديها ،بغات ترجع ليها نجمة الخدامة لي هازة معاها الدار ودراري ، لي كتصبن وترس على ولادها نجمة قليلة الحظ ل الحيط لي تبغي تحط عليه ظهرها يريب ويقصحوها حجارو ، كانت جالسة جنبها على جنب مها بغاو امتى يرجعو بحالهم دوات تحت من سنانها وقالت ~ ناس يله دافنين ولدهم وكيفكرو يزوجو لاخور ، اشمن كبدة كيدوي عليها

تاجة حركات راسها بحزن على بنتها ل جالسة حداها كتسمع فيها وقالت ~ اودي نسكت تانعيا ونقول بنتي معندها زهر ....

حسات بيها تنهدات من اعماق ملي قالت تاجة ديك الكلمة وهي تشد على يدها وقالت بدون قصد ~ كون تعرفي شحال دگيت عليك ابنتي من فنيدة ملي طحتي في كرشي باش نطيحك ولا نتي نزلتي ، كنت نطلعهم يشتفو عليا ومديت منك لا حق ولا باطل ، حلفتي نتي تاتجي لدنيا وتذوقي مرارها

نجمة بابتسامة ساخرة جوبتها ~ ديك ساع دفنيني حية باش نتهنى قبل منحل عينيا

فاطنة بعتاب ~ ومالك دابا اش خاصك ،ولا باغا ز ** بزز مات الله يهنيه ويرحمو ، انا راه قتلت ثلاثة كلنا غنعطيو وجهنا لتراب

ثور تدبح ووصلهم حتال عندهم مگرض بقوامو ، تقضية ديال لعشا تكلف بيها راجل الدار بعد سي خليفة ، ولدو وسندو وعزوتو ، غلام ل ديما رافع ليه راسو بين ناس قد فمو قد ذراعو خرج خدم على ولد ربعطاش عام ، تكرفس نعس في زناقي وربااه شانطي مزياان حتى ولا فحل ، ومكيخافش كلشي داير ليه حساب واعتبار من اصغر واحد فدرب لاكبرهم ، تجمعو ناس لي غيحضرو لعشا ول كانو كثار كلشي عيطو عليه، لخير موجود كول بيدك ورجليك ، في الاثناء ل كانو ناس كيتعشاو كان هو جالس في طوموبيل كيكمي ويتسنط لراسو ل خدام كيعيد ليه ذكرياتو مع خوه ، وبالضبط نهار العقد

~~~

معاوية تلاح عليه كيعنق فيه فرحان بشنو خدا ليه ~ الله يحفظك ليا اخويا ، هاد كوستيم فين يبان ل كنت غنلبس

غلام كان منزل يدو على كتافو كيطلع وينزل فيه بفرحة مخفية ~ بصحتك الخوادري ! حط يدو ف جيبو وقال ،شحال خاصك

معاوية بامتناع ~ لا لا عندي رزقي خلي فلوسك عندك دير علاش ترجع ...

غلام جبد من جيبو بلا ميحسب وحطهم لخوه صحة ~ الله يلعن بو لفلوس ، سير جيبك عاامر راه خوك انا ، وعرسك متضرب ليه حساب ،خبط على عنگرتو ،نتا غير جلس وتفطح ليا معاك راجل

تلاح عليه معاوية عنقو محاسش بيه خوه فقط ،انما خوه وصاحبو وباه ، اما غلام خوتو دايرهم ولادو كيخاف عليهم وتجي فيه ومتجي فيهم .....

خرج من طوموبيل كيتنهد وكينثر دخان بزعف وهو كيتفكر اخر لحظة جمعاتهم بزوج والعرس لي كان مواعدو بيه رجع جنازة ،بدون شعور هز يدو حتال سما وخبطها مع زاجة ديال طوموبيل بقلب ميت وبلا احساس ...سمع اسمو بنبرة صوت انثوية وبخطوات سريعة قربت منو ،حطت ايدها على يديه كتبكي باغا تشوف مالو بصوت كيرجف قالت ~ غلاام انشوف يدك ، دم بزااف

تنثر منها وخشا يدو من زاجة لي مهرسة خدا قرعة لما خواها على يديه حتى وضاحو ضرابي لي كانو محلولين وقال ~ سدي فمك وهنينا

صباح بخوف ~ يله نمشيو لايرجونص ؟؟ يخيطو ليك ،

لاح طفية في الارض وخبط عليها بالگاط لي لابس بجهد وحيد زيف من على راسها لواه على يدو وقال بزعف ~ سيري دخلي لعند بنتك وخليني نضبر روحي ..

صباح سبقتها دمعة وقربت منو خايفة عليه ~ روحك راه هي روحي ، علاش عزيز عليك تعذبني

ملص يديها منو ~ ديري حل لراسك ، حيث مغيجيك مني غير العذاب

بغات تزيد تقرب منو وهو يخنزر فيها بعينيه الحمرين وهاد شوفة عارفاها مزيان رجعت بخطوة لور وقالت ~ يله دخل معايا لدار نغسل ليك يديك ونداويها ومغنخرج من فمي حتى كلمة كنواعدك .....

الا دخلت معاك مغيعجبك حال ، الله يرحم باك غبري من قدامي ، راسي ومحانش فيه هاد ساعة

بصوت مرعود قالت ~ غلاااام

خبط على كابو تاع طونوبيلتو وغوت بحر جهدو ~ واسيري تتتت ***

دخلت معودتهاش معاه عارفاه غيبدا يسب وميحير لا فجيران لا فدارهم ، اللهم تخليه تيكون على برجو ، بقا متكي على طوموبيل حتى شاف ناس تعشات وغادا بحالها وهو يقصد الدار يشوف باه ، لقاه واقف في الباب كيقلب عليه غير شافو وهو يوسع عينيه وقال ~ جيتي اولدي ، يله زيد معايا ندويو لداخل

خرج يدو صحيحة لي كان خاشيها في جياب دجاكيط وقال باستفهام ~ فين غندخل الواليد راه كاينين غا لعيالات لداخل ..

خليفة بدون اهتمام ~ زيد وسكت كلامنا غنقولوه في سطح مكاين لي كيدور تما

ستسلم بزز منو معندو ميدير الا بغا الرضى خاصو يحدر الراس، طلع وراه منزل عينيه في الارض ، ماباغي يشوف حد حتى وصلو لسطح كانو تما شي كراسا كل واحد فيهم خدا واحد وجلس غلام متكي ظهرو براحة وجبد رجليه طوال وقال ~ قول نسمع ؟؟

~~~~

فنفس الوقت كانت نجمة في البيت مع لكبيرة جامعة يديها لعندها وراسها للأرض غير كتسمع معارفة متقول تلفت عليها الهضرة وكثر لغيط وقوة الرايات كلها يقول اش بغى وهي شكون سمع منها ،شكون حس بقلبها وطالع عليه ..قربت منها لالة لكبيرو... معنقاها بيديها بزوج ودموعها لي على سبة سابقينها ~ وافقي ابنتي وميخصك خير ولدي مغنشكروش ليك خرجي غا لدرب وسمعي بوذيناتك اش كيقولو عليه بلاما تحتاجي تسولي ....راجل وسيد الرجالة قد فمو قد ذراعو يجيبها من فم السبع خدام عليا انا وباه وخواتاتو لي مزوجين وحتى لي بلا زواج عمرو خصصنا من حاجة بخيرو حنا عايشين وبيهبتو باش مكملين وهازين راسنا وسط العائلة والناس محيد علينا الضسارة والبراني ميقد يحل علينا فمو حتى بنص كلمة

لبنات هما كيعرضو راسهم عليه دابا تزوجو وتعرفيه وتعودي عليه انا عارفاها صعيبة عليك بالحق كلشي يدوز هاهي مك حدايا تقوليك فين عمر شي وحدة فينا ختارت راجلها ياك كانو غا تا يلبسونا ويزينونا ها لحنا ها سواك ها الكحل هاحنا مسدود علينا فبيت مع راجل مع يقوليك سلام مع ينصل سروالو ويقضي الغرض متشوفيه كي داير بوجهو تا يبداو يغنيو فوق راسك صباح صباح ماليه وهو يفرنس خاشي يدو فجيبو كيخرج لبياض ، ضمتها ليها كتدوز على ظهرها بمواساة ~سمعي مني وتوكلي على الله هذا هو مكتوبك والمكتوب مامنو هروب

هزت عينيها الذابلين كتفكر فكلتا الحالات تا خيار مبغاه رجل فالعافية ولوخرا فشووك ، قررات تختار الاقل الضرر و قالت وهي راسها مهزوز… فين عمر الميت كيشد يد غسالو ، نزلو الدموع من عينيها سربوب هذا مكتابي وخاصني نرضى بيه

كتكون دنيا ضاحكة في وجهك وكتقول الحمد لله ل كنتمناه وصلت ليه بعد صبر طويل ومعاناة كثيرة وفجأة وفرمشة عين كلشي كيتبخر ، الضحكة لي كانت مرسومة على فمك كتمسح والقلب لي كان فرحان كتزرع فيه غصة ، والراحة لي حسيتي بيها بعد الفرج كتولي عذاب نفسي مضاعف ، كتدخل فشرك الله وكتبقا تلوم القدر وتقوول علاش انا ، علاش انا لي خاصني نبكي ، علاش انا لي خاصني نتحرم ,ل خاصني نعاني ، ل مكنوصل لحتى حاجة بساهل ، علاش انا لي مكتوب عليا الشقا ، ل ديما فرحتي مكاملاش ، علاش انا من دون الناس ،علاش انا وماشي هوما....

كيغلب علينا الحزن وكنساو بلي حنا مسيرون لسنا مخيرون ، كنساو بلي المؤمن مصاب وبلي الله اذا احب عبدا ابتلاه كنساو بلي حنا في امتحان وربي كيختابر صبرنا واكيد غيجازينا عليه بالاحسان وغيدهشنا بالعطاء ....

نجمة وافقت ،ماشي حبا في الزواج لكن هروب من كلام البراني وحتى ل حباب حيت الوقت ل خاص مها وختها يبردو نارها بكلمة زوينة وبكلمة حنا معاك كل وحدة فيهم سممتها بكلمة بلاما تعيق ، جلست مع راسها وفكرت ولقات بلي وهي فعز معاناتها النفسية وشنو سمعت منهم اما الا داز الوقت وسنين وبقات بلا زواج شنو غتزيد تسمع مازال ، لقات راسها بلي خاصها توافق ، سواء تزوجت ولا لا غتضرر اللهم تختار اقل ضرر لعله خير ...قنعت راسها بلي الله مكتب ليها هاد شخص ماشي من دون الناس وبلي گاع ل وقع فحياتها كان سبب باش تتلاقا بيه ، لقات راسها كتقول اه قابلة هذا مكتابي وخاصني نرضى بيه ، مدايرة بشوار لا مها لا ختها ، هاد الاخيرة ل ضربتها لقوة مبقاتش قادة تدوي دغمات لي كلات في العشا حسات بيهم رجعو للحلق وخنقوها اما حتى تاجة عندها زايد ناقص ، لكبيرة فعز حزنها ملي سمعات موافقتها ضحكات وخشاتها في صدرها الحنين وطبطبات بدموع ف عينيها دعات ربي ل حط نجمة ف طريقها تطفي نارها واخا غير شوية ...ناضت كتهرول تقلب على زمانها تعطيه لبشار وغير خوات بلاصتها وفاطنة طلقات لسانها ، زعزعت نجمة من كتافها وقالت مغددة ~ واش عقلك باقي فراسك ولا طار ؟؟ كيفااش قابلة تزوجي بيه ، معامن تشاورتي واش حنا عائلتك ولا غا زايدين ، لهاد الدرجة ميتة على هزان رجلين...

نجمة كتطركق في صباعها بتوثر ~ انا باغا سترة ، انا باغت نرتاح ، انا باغا نسد فام الناس ، مبغيتش نخلي قصتي حديث صواني ، مبغيتش نرجع ل يامي لقديمة ، مبغيتش لي يشوفني يقول ها كحلة العفطة جات .....

نجمة كتطرطق في صباعها بتوثر ~ انا باغا سترة ، انا باغا نرتاح ، انا باغا نسد فام الناس ، مبغيتش نخلي قصتي حديث صواني ، مبغيتش نرجع ل يامي لقديمة ، مبغيتش لي يشوفني يقول ها كحلة العفطة جات .....

كون ما زمان ومكان تلاح عليها تاكلها تقادات معاها وگفضت يدها وقالت ~ علاه مالها حياتك ؟ كنتي تنعسي في زنقة ؟؟ فرطنا فيك ، كنتي تباتي جيعانة ؟... واكلة شاربة ناعسة داخلة خارجة سيري شوفي ناس كيف عايشين وبوسي يديك ، زواج حلاوتو سيمانة وديك ساع غدوقي لي عمرك ذقتيه

نجمة قالت بلاما تحس ~ الا كان غا قطران راني ذايقاه من صغري كاين ما مُرْ منو ؟؟ رجعت قالت استغفر الله العظيم وقادات زيفها ودوات بصوت منخفض مهما كان ختها ...بصوت حنين نطقت ~ واختي ؟؟ حني فيا شوية ...واش مفكرتيش بلي راه العمر غادي ويجري ويزيد لقدام ، راني غادا ونكبر ، غدا ولا بعدو بطولة عمرك الا مشيتي نتي ، شنو اخرتي انا ، بنتك تزوج وولادك يتزوجو وانا شنو نتلاح لزنقة شكون غا يقبل عليا ،وانا معندو لا دار تغكيني من حر شمس ومن برد الشتا لا ولاد يترحمو عليا الا مت و يحنو فيا الا مرضت ...

خسرات سيفتها وقالت غضبانة ~ لي داتو القرعة غا ديه مو شعور ، سالات الهضرة معاك هنا ابنت مي ، يصبح الحال وعمرك تشوفي كمارتي مازال وعومي ديك ساع بحرك ونهار تغرقي شوفي شكون يعتقك

تنهدات نجمة وضارت شافت في تاجة تسناها تقول شي حاجة تجي من صفها ولا تأيدها ،لقاتها منزلة راسها لتحت وكتحركو بأسى ، حطات ايدها على يديها وقالت ~ ونتي امي مغتقولي ليا والو ؟؟ تاجة طبطبت عليها ~ نتي تعرفي لي يصلاح ليك منقدر لا نزين لا نخيب ليك ....

باست لمها يديها وطمت قلبها ، قرار وخداتو ومغترجعش فيه وقابلة على حياتها من هنا لقدام كيفما كانت ، خلاوها المصريين " قالو اللي رماك عل مر قال اللي أمر منو "

جالس وجهو في وجه باه كيتسناه يدوي ويقول اش عندو، بان ليه مطول وكيدخل ويخرج في الهضرة ومازال معطاه لمفيد ، حط مرافق يديه على ركابيه.. صباعو كيلعبو بلحيتو مضيق عينيه فيه وكيشوف ، خلاه حتى سالا ونطق عاض على فمو ~ واا بويا !! قول اش عندك ؟؟ خرجها من فمك دغيا راني حافظك ... شاف ساعتو ، الوقت مشى خاصني نمشي ...

خليفة بتاسم بخفة وهز حاجبو ~ معليكش، عرفتيني مازال مدخلت ليك ف المفيد ...تنهدت مكمل ~ انا اولدي ، عطيت واحد العهد بيني وبين الله وبغيتك تعوني فيه

غلام بقلة صبر كيزعزع فرجليه معندو لا گانة لا خاطر ~ راني كنسمع فيك كمل كلامك ...

خليفة ختاصرها في جملة وحدة ~ بغيتك تستر مرت خوك !!

تقاد في الجلسة كيطرطق فعينيه ،كيحاول يفهم باه شنو بغا يقصد ~ كيفاش زعمة نسترها ؟؟ بغيتيني نكسيها ولا نشري ليها نگااب ولا شنوو

خليفة نطق بحدة وبصوت مرتفع شوية ~ غلاااااام !! رااك قلعتيها فسما بلاما نحتاج نشرح ، بغيتيني نبسطها ليك واخا اسيدي ، غتزوج مرت خوك !!

كلمة كانت بحال فتيلة تلاحت على ذاتو وشعلاتو مزيان ، وقف على طولتو كيمشي ويجي و ويضحك بسخرية وكيدوي مزير على سنانو ~ تزوج مرت خوك !! زوييينة هادي ، بحالا كتقوليا جيب ليا معاك شي لعبة ، دار لعند باه ووهضر بدون شعور ممتحكمش فنبرة صوتو ~ واااااش كتسطى عليا ابويا ولا شنو ، راك قلتيها بفمك ...بدا يخبط بكف يدو لموعتة في الحيط مع كل كلمة ، مرت خووووووك خوووك ،خوويا لي لبستو بيدي وصيفطتو يخطب ، خووويا لي شفتو بعيني قداش كان فرحان وهو غيتجمع مع لي كيبغي ، خووويا لي هزيتو على كتافي ملي مرض ، خوياا ل نزلتو بيدي وحطيتو في القبر ، باغيني نتزوج لييييييه بمرتو ..... هز كرسي لي كان جالس عليه قربو من الحيط وطلع فوق منو ، غير خليني نتلاح ون ق ت ل **** حسن ليا ....

هز كرسي لي كان جالس عليه قربو من الحيط وطلع فوق منو ، غير خليني نتلاح ون ق ت ل **** حسن ليا واش كتخربق عليا ولا شنو ، واش باغي تجهلني، عارف شنو كتقول ولا معارفش ؟؟

كيفاش غيحس هاد الشخص لي عاد دفن قطعة منو تحت التراب كان غيكون عرس و رجع گنازة عقلو لدابا متقبلهاش اما جوفو كيبخ منو الدم، حاس براسو تهرس وصابر و كيكابر بزز ،واقف ف جنازة خوه كيف كان غيوقف ليه في فرحو ، من برا كيبان سد عالي ومن لداخل مخبي حزن غارق ، مكرهش يعطيهم بظهر ويزيد تا يلقى راسو ويرجع ولكن مباغيش يخليهم وراه ...وهو فعز حزنو كيقولو ليه تزوج مرت خوك

قرب منو باه كيحيد في الكرسي وقال ~ نزل ولا سخطي غا يبقى تابعك ليوم دين، نقز لعندو غلام مقرب و جهو ليه و كيخبط على صدرو ~ وااا بوياااا !! غا خود النفس لي كتطلع وتنزل فيا رجعها في خويا و دفني بلاصتو و متفتيش عليا هاد الخبيرات ديالك حيت مغنديرش بيهم ...

خليفة وقف على طولتو مرجع يديه وراه بحالا كيقوليه كب عليك ليصانص و خوي عليك العافية كلامي هو ل كاين ~ فين عمر خليفة رجع في كلامو اولد الدار الكبيرة ااااااا دويييي ؟؟

غلام ضرب الكرسي برجليه حتى تهرس وطوا لسانو معصب دافل لمرار من فمو ،ضور وجهو للحيط لقا فيه جويجة معلقة نترها ولاحها لباه حدا رجليه ~ غاااا عمرها الحاج خْليفة و خويها فيا حيت كلامك ..ضرب في الحيط برجليه و نطق~ ضربوووو في هاد الحيط ، مغاديش يمشي عليا !!

من اين ذالك الشبل من ذاك الاسد، شعلت بيناتهم مزيان خليفة معصب وغلام قاليه دوز تجلس، صدرو كيطلع وينزل وكيسوط اش جا مهدنو داير بحال لبركان كيغلي ، كلشي كان في دروج من خوتو ومو كيتسنطو وحتى واحد معندو الجرأة يتدخل بيناتهم لكبيرة سروالها سرد وخواتاتو وجههم صفار ، دفع خليفة جويجة برجليه جهة غلام وقال ~ وليت على اخر يامي زبالة عند ولادي ، كلامي ولا يتقال عليه لا ، خودها اسيدي نتا نيت وخويها فيا ، ربيت ليك لكتاف حتى تقادو ووليتي تهز صوتك ويديك عليا ، وبلا حشمة بلا حيا كتقول ليا كلامك ضربو في الحيط ...كيدوي وكيقرب من ولدو بلوم وعتاب ووجهو معصب ومخنزر ، غلام مزير على يديه بزوج ، وحظة منهم غارقة ف دمها دايرة طريق معاه منين ما داز ، كل كلمة قالها خليفة كيسرطها ليه كيدوزها ويعض على سنانو ويبرد حرو فنفسو ، شنو غيدير يهز ايديه على باه يضربو يرجع مسخوط يموت وميديرهاش كون كان شي حد في زنقة كون الله يرحمو ولكن جات من عند لحنين الغالي ، علا يديه سي خليفة وشنق على غلام من عنقو بيديه بزوج ونزلو لعندو بكل قوتو باش يتقاد معاه وقال ~ تكمل مرت خوك عدتها كيف قال سي لفقيه غتعقد عليها ، ولا ما نتا ولدي ما انا باك ....

كنزز على سنانو حتى تصورو عروقة جهة نواضرو وقال بصوت مغدد وداير ايديه وراه رابطهم مع بعض خايف ميتحكمش فراسو ~ جبددد ديك الحاااالة المدنية وشعل في صفحتي العاااافية نتااااا گاع ، الله يعطييييني معاااا ******. الغرق ماشي غاا السخط

محس غير بطرشة قاصحة جاتو لحنك من عند باه هاد الاخير لي ضربو بلاما يشعر. عمرو هز على ولدو ايديه فصغرو ودارها دابا حتى ولا راجل بلا وعي منو ، طلق من قرفادتو ودفعو على الحيط بجهدو كامل لكبر سنو حتى بدا ينهج اما غلام مازال محافظ على ليدين وراه وملامح وجهو مكتفسرش ، كان منزل عينيه الارض وزغب نيفو كيتحرك بالعصاب ، بدون ميشوف في باه نطق ~ من عندك عسل ابويااا ، هز سبابتو بتهديد كون دارها غيرك ، هز كرسي لاخور لاحو من سطح ، نلوح *****مو ، بحال هاد كرسي ومنحنش ، ضرب على صدرو وغوت ، ولكن ندوزها بگويييرو حيت جات من عندك ابويااا، جبد جوان مصاوب واخا عمرو كما قدام باه ولكن مقادرش خاصو يسكت عقلو لي كيفتي عليه بشي حوايج صعاب على قلبو ، لاح جوان ففمو وقال كيقادو حوايجو وكيمسح دم يديه في الحيط وقال ~ من ساعة اليوم عمرررك مازال مغتشوف ديلمو هاد الوجه ، نتا ل نسا عندك شي ولد سميتو غلااام

غنرجع حيدرة لقديم ل نتا زاوگتي تا نمحييه ، تهلااااااا برمقة اخيرة وهو كيشعل ترويقتو ، ابوووويا !!!!

اخر كلام خرج من فم غلام ،مكانش ضارب ليه خليفة لحساب ومكانش باغي يوصل ليه.....عارفو راس ولدو قاصح مكيرطابش ولكن حنين واخا مكيبينش ،كان كيقول بزوج كليمات وشوية تبوحيط غيكسبو فصفو وياخد موافقتو ،نسا معامن هو ونسا الاسد لي روضاتو الدنيا ، عارفو صعيب ومكينساش وبيديه كبرو على هاكدا و بكلامو قصحو و الدنيا لي سيفطو لعندها هي ل حقداتو… من ديما المشاكل تابعينو و لي خرج فيه عينيه يجبدهم ليه، و يا ويل لي يطاول على شرفو قرجوطتو يدليها ليه …. بلقب حيدرة سماوه ، كان ملك الدرب الكبير و الصغير يحدر ليه الراس ، ودوز ديال بصح ودازت عليه من حبس وتشرد ولكن كان راجل وباقي راجل ، مكيشفر مكيضلم كيخدم بذراعو عدوه الضساارة ولي يجي يدير فيها واعر فدرب يحدهم ليه ..

خليفة فاش سمع منو سمية لي مدبحش ليه عليها قلبو تكمش حتى قال تهد ونقص من وعوريتو شوية وهاهو غيرجع ليها وجهد لي يجري وراه سالا ..

شد القنت وهو كيردد في فمو وايدو كترعد ~ اش داني نهز عليك يدي ، اش داني كون تقطعت قبل منديرها اولدي

خرج غلام من السطح وجهو مكيتفسرش مع حل باب غينزل فدروج لقى ميمتو حدا رجليه شادة و مزاوگة فيه لعتبة الدار ميخطيهاش

الكبيرة ~ هالعار اولدي هااا بزيزيلة ميمتك بقى ليا متقتلنيش وانا حية واش دفنت معاوية و يمشي ليا لي هاز كتافي

طفى لگارو بصبعو ،وتحنى على مو حاط جبهتو على جبهتها ونفسو كطلع وتنزل ~ وراسك اميمتي مسامح فيك و لا في بو غلام غير هو الموت حسن ليا من الكلام لي خرج بويا من فمو داكشي علاش خليني نزيد فحالي راه الدم سخن و غنطيح شي بطانة و نوليو في مرضك و انا مقاد عليه ...كانت مكوشة ليه على حوايجو وكتبكي ، ودموعها نقطة ضعفو هز يدو مسحهم وقال بخشونة ~ ميمتي !! الا كنتي كتبغيني طلقيني خليني نزيد راك عارفاني وا حني فيا شوية متزيديش عليا

معودتهاش معاه ، طلقت سراحو طبع قبلة على جبينها وهبط مدردب مع دروج مخلي خوتو لي يبكي لي مخلوع ولي كيتحلف ،نطقت زهرة وقالت لمها بعتاب ~ كلشي بسبابكم ،فضلتو لبراني على ولدكم هاهو زاد صيفطات لول وغتزيد تاني الله ياخد فيها الحق ، غنمشي نجري على الكلبة تمشي لجايحة ل ضربها

جات تمشي وهي تغوت عليها ~ تزيدي خطوة مغادي يعجبك حال فهاد ليل ، وغبرو عليا وجهكم سيرو عطيو ناس لغطا ول خاصاه شي حاجة مدوها ليه خليوني فهمي ننذب ونبكي عليه

مشاو وطلعت لعند راجلها تواسيه عارفاه غيكون مقلق مهما كان اول فرحتو اول واحد سمع منو كلمة بابا وجرب معاه احساس الابوة ...لقاتو جالسة في الارض وهاز جويجو واقفة قدامو وحاط عليها راسو وكيخمم مشات حداه بدون لوم ولا عتاب قالت ~ متخافش !! عمرو غيفرط فينا يتنفخ تا يعيا ويتفش ،فين عمر العين علات على الحاجب اسيد الرجال

خليفة عارف اش والد واش مربي هز عينو في لالة العيالات و هضر بصوت مجروح ~ معاوية في الارض و غلام خوا ليا الظهر !! الدايم الله

~~~~

دازت ديك ليلة كيف مكتبها عليهم الله ، لكبيرة بايتة ناعسة تبكي وتنخصص وخليفة حلفو شفرانو لا تسدو زهرة كتحلف على نجمة وهاد الاخيرة كانت حاطة راسها على المخدة ودماغها كيديها ويجيبها بحال مواج لبحر ،عينيها مغسولين من نعاس ، فاطنة ناعسة حداها لابسة جلابتها كتسنى امتى ييبان ضو وتهز مها وتمشي بحالها ، تخليها منها لاختيارها مبغات توقف معاها في اش بغى عقلها اما حتى القلب و الخاطر راه دفناتو في التراب و مكرهت تلبس عليه البيض ...بدا يبان خيط الصباح و يوضاح و كيف قال الفجر الله و اكبر ناضت فاطنة بلا متغسل وجها فيقت مها و جراتها قدامها … مجات فين نخرج مع الباب حتى وقفت عليهم نجمة دموعها ملاقين

نجمة ~ واختي واش غتخليني و تسمحي فيا هنا بوحدي

فاطنة مقصحة قلبها ~ معندي خواتات بايعات راسهم قلت ليك ابنت ميمتي زيدي قدامي و الخير لي ديري في راسك نساي اش طاري و عيشي حياتك

نجمة شدات ليها فيدها بترجي ~راني وجه الغراب و عفطتي عفطت موكة واش مكتسمعيش الناس وكلامهم عليا شكون هادي و لا هدا لي غيقبل بوحدة مزال مدخل عليها لي تجمعت سميتي مع سميتو ودا مول امانة امانتو

فاطنة~ ايوا وهاذا لي ناوين يزوجوك ليه كيفاش تا قبل عليه ؟ شفتيه عارفاه كيف داير ، غا جيتي وقلتي اه ، معرفتيه مزوج ولا مدوز ولا سكايري ولا ولا ولا ...باغا تهناي من هضرة ناس وتلوحي راسك لزوبيا ،دايرة الخطوة ومعارفاش فين تحطيها

شافتهم لكبيرة واقفين حدا الباب كيتلاغطو وهي تجي لعندهم عينيها كل وحدة قدااش ~ ياك لاباس فين غادين مع الفجر !! نجمة بنتي شكون خسر خاطرك

نطقت فاطنة ~ نجمة جالسة حنا ل غادين ، الله يصبرك على فراق ولدك نتي بعدا حطيتي عليه تراب ،كيتك ل دفنو وهو مازال حي

قالتها وكتشوف ف نجمة كتحسسها بتأنيب الضمير

لكبيرة وهي شادة تاجة من يديها ~ والله منتوما خارجين دابا. مالكم ناعسين في لخلا ، تفطرو وتغداو گاع مديوش عليا انا الا مجلست معاكم وعطيتكم صوابكم القلب مضيووم والعقل مهواش هنا

تاجة حاسة بيها جوبتها بابتسامة~ معذوورة ، راك مقصرتيش ... لكبيرة وهي مرجعاهم ~ وا زيدو ،دخلت عليكم بالله الا مدخلو ، زيدي الالة فاطنة داركم هادي رجعات جلسات فوق من قلبها حشمت من لمرا وكان ، بقات جالسة حاطة يديها على خدها وكتشوف مجات فين توصل ثمنية تا بداو يدخلو لفطورات من عند جيران ، كلها شنو جايبة اخر وحدة دخلات كانت صباح هازة طبسيل كبيرة عامر بوشيار حطاتو على طبلة ومشات لعند لكبيرة سلمت عليها مع بغات تجلس محسات بزهرة حتى قالت ~ نسيتي مسلمتي على مرت خويا ل مات ولاخور ل باقي حي

يتبع...