أسمرينو الجزء الثاني

دخل عندها داير جبيرة فيدوو...

هزات عينيها فيه: تانتا تعطبتي؟

عنداك تقول أنا؟

هز راسو كيدورها فلارجاء: واش لكاميرات خدامين؟

عصام: لا

جر لكرسي كالس حداها: عرفتي كنت سايق غادي فطريق تا خرج لي كاميو من حيث لا أدري

الحرة: كاميو وباقي حدايا؟!

مغيت:نخاف لنمشي ويضربوك بالمؤبد.

الحاج شاف فيهم معنكش وجهو: وااش نتوما تتعرفو بعض قبل؟

مغيت: لا عرفتها غير هاد ليام..علاش؟!

الحرة: على زين المعرفة

تنهدات متكية على الكرسي.

مغيت: جيت غير نعلمك بلي قضيتك أتعطا لنائب آخر..كيف شفتي انا تضربت فيدي مغنقدرش نهضر مزيان غدا..ونتي عزيزة عليا مغنبغيش نغرقك.

عصام: على داكشي غتجيب وحد آخر يغرقها؟!

مغيت: غير تيقو فيا قضيتهااا غتكون فيد اكثر شخص عادل فديك نيابة وانا راه غنكون حاضر غير مغنهضرش ولكن غنهضر معاه متخافيش انا عندي كلمتي وكيسمع مني.

تكا على لكرسي كيدور عينو: كيف شفت لمخزن كولو فيديك تا لدخلتي لحبس مغيضركش

شاف فيهم لقاهم مخنزرين فيه قربوو ينقزو عليه ضحك بجهد: غاضاااحك

ناض بشوية: اضااااحكككك (جمع ضحكتو) غنمشي نشوف نائب لول باي نتشاوفو غدا.

زاد خارج وهو شاد فيدو: أي اياي لحرييق.

مع خرج عصام شاف فيهم: مزيان منين هاد لكلاون ميكونش فقضيتك غيسيفط حسك لمؤبد غير باش يضحك لقاضي.

لحاج: يكون خير يكون خير خود ليها متاكل قبل مينقلوها لسيلون.

تم خارج فحين هي شافت فعصام: عيط على مك ڤييدو بغيت غير نشوف ماما..

جبد تيلي معيط عليها ثواني تا كانت دايرا ڤيديو مع مها.

كتحرك يدها بهاي: سلااام ماما الحبيبة توحشتكك..

كتسمع غير انين مها لي منو عرفتها كتسول عليها: ماما أنا راني مسافرة على شي خدمة نقدر نتعطل عليك شوية متشطنيش وراه ماماين عصام اتبقا معاه وتاهو غيبقا يجي عندك مرة مرة

سمعات انينها مجهد

الحرة: غرجع دغيا متخافيش عليا دعي معايا الحبيبة.

قطعات لاتصال مسحات دمعة فطرف عينيها" شكرا ليك اعصام

قرب عندها معنقها وهي كالسا: كولشيي غيدووز دوزنا حوايج كفس من هكدا غير رتاحي

"فجهة خرا"

كان سايق عينووو على طريق ومغيت كيهضر معاه فتيلي كيعطيه تفاصيل القضية.

مغيت: هذي هي القضية ومافيها..وخا الادلة كلهم ضد الحرة ولكن هي بنت ضريفة مديرهاش

أسمر: الشريف راك ممثل الحق العام ماشييي محامي ديالهااا.

مغيت: احساسي وانا تايق فيه

أسمر: احساسك من نهار خدمتي وهو نفس شي مكيتبدلش

مغيت: نتمنى تانتا يخدم لك شي نهار مع شي قضية

اسمر: مكاينش بلاصة هنا لاحاسيس..صيفط لي دوسي دلقضية

مغيت: غدا فصبح نجيبو لك

أسمر: غدا لمحاكمة وغدا اتجيبو منيتك؟!

مغيت: يدي كضرني خصني نمشي لطبيب ولمحاكمة ماشي مع نبوري أنا غنجيبو لك فصباح واصلا غدا غير الجلسة تانية مكنضنش يتنطق لحكم

أسمر: كاع دوك لادلة علاش غيعطلوه؟! ماعلينا شنو قولتي اسم المتهمة

كيدور فعينو: ح ح ح (تنهد) الحرة

أسمر: الحرة (حرك راسو) قريب تكوني حرة بلا حرية.

قطع عليه فحين مغيت : اش ديك سمية لمعنكشة عندها (هز كتافو) دابا يشوفها فملف لقضية

كانت كالسة فلبيرو كتشوف فالإفادة ديال خونا لي لقاوه طايح بسباب البوفا خلاوه تا فاق و توكض و عطاهم الإفادة ولكن كي والو قال بلي مكيعرفوش و هو غا كيبيع ليه ولكن على الأقل قدو يوصلو لشخص لي جرحها فعنقها.

هزات تيلي منين سمعاتو كيصوني

مريم : وي

- شاف جانا تبليغ على عملية تهريب غطرا كاميو ديال ثواب غيوصل لمدينتنا محمل بكمية كبيرة من لبوفا

مريم : شكون لي قدم هاد البلاغ (وقفات كتقاد فالسمطة لي كدير فيها السلاح و هزات جاكيط ديالها )

- معرفناش كانت بنت قطعات دغيا

مريم : واش معرقالتش امتا غيخرج لكاميو وامتا غيوصل؟

_ لا معطات تا معلومات خرا؟

مريم: ديرو حواجز فدخلة دلمدينة خص ميدخل تا كاميو تا نفاليوه

هبطات دغيا بلاما تعلم عصام كسيرات تا وقفات فالدخلة دلمدينة .

تنفسات بجهد مبتاسمة حسات براسها حنتات عصام على الهدرة لي قال وغتقدر تشدهم بلا بيه

هزات لاسيلكي مريم : لوفيسيي الفيهري فالإتصال شحال بقا ليكم دالوقت و توصلو

_ تحياتي مون شاف قل من دقيقة

مريم : مزيان مزيان

قطعات

مريم:غنباتو هنااا تاتجيوو على خاطركم .

دازو ساعات شمس صباح بدات تشرق وتا كاميو مبان شدات شعرها كتسوط :يقدر يكون البلاغ كاذب

هزات تيلي منين سمعاتو كيصوني مع ردات تتسمع غواتووو

عصام:غتبتيي تم انا جاي غديري هاااه ولاهاااه بحال اخر مرة غند..فنك فهمتي

مريم:آااا كفاش؟

عصام: غنجييي ونتفاهمووو رانيي قريب امريم راني قريب متهناي تا يصفيوها لمك.

قطع عليها بدات ترمش فعينيها مفها والووو : هذااا لاش تعصب عليا؟!

" فالمحكمة "

كان واقف كيعاين يجي مغيت يجيب ليه ضوسي ولكن كي لعادة..باقي مجاا..

بقا غادي جاي فلكولوااار ..

هزز راسوو بانو ليه مدخلين المتهمة لقاعة عرف مبقا والو لمحاكمة تبدا بلا ميحقق فيها هز تيلي كيعيط لمغيت وهو زعفان..

حط تيلي منين بان ليه مغيت داخل بجرا وقف حداه كيتنفس بجهد: طرييق عامراا

أسمر:عامرا فصباح؟!

مغيت:كولشي خدام .

أسمر: نساليو ونتفاهمووو...

شد من عندو ضوسي ودخل باش تبدا المحاكمة

نبدااااو ولا نعستو؟!

شادة فيديه بيديداتها صغيرين كتشوف فيه وهوا لابس لباسو الاسود لي متوسطو الأخضر وشاد لملفات فيديه .

عيونها كتلمع فوق مكتشوفو بحوايج الخدمة

نطقات وابتسامة عريضة مرسومة على وجها:" فاش غنكبر غنولي بحالك

حناا لعندها :" غتولي حسن منيي كااع لمجر.مين غيخافو منكك ولي بريئ غيرتاح منين يشوفك "

حركات راسها باه :"غنولي عادلة بحالك"

عنقهاا لعندووو مبتاسم وكلو فخر أن بنتو بغا تولي قاضية بحالو فاش تكبر.

هزات راسها منين سمعات القاضي كيهضر بصوت مسموع": الممدعى عليها "

شافت فيه بعيونها الكوحل وخصلات شعرها نازلين على وجهاا "

شار ليييهااا باش تجاوب المحامي ديالها" علاقتك مع الضحية حدها لاصال؟

حركات راسها باه: هو كيتريني عندي و هو عزيز عليا انا عارفا أنه كيدوز بظروف صعاب كنحاول نخفف عليه

شاف فلقاضي: موكلتي مكان عندها تا مشكل مع الضحية وعلاقتها معاه حدهاا لاصال بحيث موكلتي هي المدربة الخاصة بيه فكيف يعقل ياسيدي الرئيس والسادة القضاة التهجم على شخص بدون سبب؟؟فممثلتي بكامل قواها العقلية ولا يوجد شخص عاقل سيتهجم على احد دون سبب؟

حرك راسو القاضي باه: عندك مضيف؟

حرك راسو بلا:" لا سيدي الرئيس

تم غادي كالس فحين شاف القاضي لجهة تانية": السيد ممثل الحق العام عندك ما تضيف؟

كان واقف و حاني راسوو كيسمع لاقوال لي كدوز قدامووو هز راسو فلقاضي" نعم سيدي الرئيس ...

تقدم لقدام شاف فلقاضي وهوا معلي راسو وبنبرة مسموعة نطق :"سيديي الرئيس

السادة القضاة وبحيث أن المدعى عليها تهجمت على الضحية وتسببت له في نزيف دماغي وهو الان في غيوبة شبه مي.ت لا احد يعلم هل سيستفيق أم لا؟

ضرب محاميها فلخشبة بجهد": اعاارض سيديي الرئيس ممثل النيابة العامة يدعي ادعاءات بدون اي دليل"

رسم ابتسامة عل ثغرو شاف فيه بعيونو الكوحل القاتمين": بدووون دليل؟

شاف فلقاضي": سيدي الرئيس لقطات التي صورتها كاميرة السيارة التي كانت قرب الحادث والتي تضهر المدعي عليها تحمل حجرا في يديها متوجهة لمكان حصول الحادث دليل كافيي

المحامي:" سيدي الرئيي الشريط لم يوضح ان موكلتي ضربت الضحية؟ بل حملت الحجر فقط!

شاف فيه" الحجر الذي ضرب به الضحية والذي كان ملطخا بد.مه عليه بصمات المدعي عليها

المحامي:" موكلتي تقول انها حملت الحجر ودما.ء عليه

أسمر: انت تقول ان موكلتك بكامل قواها العقلية والشخص العاقل لايحمل حجرا به. د.ما مجهول مصدره ؟! فالقانون هنا لا يحمي المغفلين

سكت لمحامي كيشوف فيها سرط ريقووو ملاقي باش يجاوب

شاف فلقاضي": سيدي الرئيس المتهمة دائما تهدد المدعي بأنها سوف تقت.له

طلب لادن باش يدخل شاهد. دخلات جارة عمورة لي عطات افادتووو وتمات خارجا.

حرك لقاضي راسوو بشويا شاف فيها:" اشنو كتقولي فهاد لهضرا واش فعلا كتهددي الضحية؟

ابتسمات جنب وشعرها مغطي وجها": انا بحال ديما بحال لي كنكول لكاع دراري هذي طريقة هضرتي لقلت ليه لمجيتيش غندفنك مكيعنيش اني قاصداها

زاد واقف اونفاص معاهاا بصوت عالي نطقق:" هددتيييه اه لاااا؟؟؟ جاااوبيييينييي باه ولاا لااا.

هزاات راسها فيييه. بعدات خصلات شعرها من قدام وجها..

.جات عيونهاا سودة فقلب عيونو القاتمة كتحركهاا مع حركة بؤبؤ عينووو..

سكت للحظة وهوا كيشوف فعيونهااا. شفايفوو تبنجحوو عليه...عقد غوباشتووو منين حس بقلبووو علن الحرب عليه باغي يخرج من صدرووو لعندها.

فرانا لوطو حداها نزل كيكشكش: من امتااا وليناااا نديروو لخدمة بلا منعلمووو شاف؟!

هزات راسها فيه: شفتك مشغول قلت منصدعكش

عصام: وصدعتيني امدام جاي مقابلك هنا ومخلييي محاكمة لبنت لي فمقام ختيي

مريم:مقال لك حد اجي؟

عصام:نتيي مسؤوليتي لوقعات لك شي حاجة غيحاسبوني اناا.

يلاه جات تجاوب سمعات لبوليس حداها كيقولو كاميو جاي..

شاف فيها وهو كيجبد سلا.حو:خليك مورايا..

كانت ناعسا معرفاش فين وصلات ولا من امتا شادة طريق تهزات منين فرانا الكاميو غوتات بصوت خافت: هااااشم

حطات يدها على قلبها كترجف: صافي مشيتي فيها اصافية

ناضت كتعاينو يحل لكاميو تنقززز دوز فيه وتهرب ثواني وهي مترقباا.. غطات وجهاا منين تحل لكاميو وضرب فيها ضوء حلات عينيها بشوية جات عينيهات فعينووو وسعاتهم بصدمة نطقات بخفوت: عصام!

ميل راسو كيشوف فيها متتيقش عينو: صافية؟!

"فالمحكمة"

كيشوف فيها بلا ميرمش .ملامح وجهاا مغرابش عليه...

طلعاتو ونزلاتوو لون عيونوو لحيتو سوداء بشرتوو سمرا .

لي لونهااا صدفاتو جوج دلمرات فحياتها مرة فشخص لي كان كيدير كولشي باش يعاونها ودابا فشخص كيدير كولشي باش يغرقهاا.

لحظة صمت جابت المحكمة ...كولشي كالس من غيرها وغيرووو كيشوف فيها وتشوف فيه بلا مينطقو.

نطق القاضيي مفيقهم من سوهوتهم: جاوبيه على السؤال

هزات راسها باه: هدد.تو.

سد عينو وحلهم كيجري على شكوك لي لبساتو للحظة نطق بهمس:" نتي مستحيل تكوني هي"

رفع صوتو" : سيدي الرئيس السادة القضاة وبحيث أن جميع الادلة ضد المدعى عليها وبحيث أننا هنا نسعى لخدمة الصالح العام وحماية المجتمع من المجرمين اطالب بتطبيق القانون ومقتضيات الفصل 114 من القانون الجنائي

شاف فيها" وذلك بتنزليل أقصى العقو بات "

شار ليه لقاضي باش يرجع لبلاصتوو تم غادي وعينوو عليهاا..

القاضي: استراحة قصيرة وغنطق بالحكم

داز وقت قصير كانت واقفا كتعاين لحكم لي غيقول

القاضي:" بعد النظر للادلة واقوال محامي الدفاع و ممثل الحق العام وبعد الاستشارة مع السادة القضاة وطبقا لاحكام الفصل114 من القانون الجنائي حكمت المحكمة على المتهمة "حوراء مجااهد "

"هززز راسوو فيه بصدمة"

لمحاولتها قت.ل عمر الطيب بالسجن 25 سنة نافدة"

واقف كيشوف بلا ميرمش دنيا كدور بيه واسمها كيتعاود فبالوو" حوراء مجاهد"

لقاعة خوات وبقااا بوحدو واقف تم دار منين تحطات عليه يد نائب وكيل الملك الثاني:غنشجع لحرة دير الاستئناف غرقتيها اصاحبي

شاف فيه كارز على سنانو": نتا قلتي لي سميتها الحرة؟

حرك راسو باه": الحرة كولشي كيعيط لها الحرة ولكن الاسم كنضن حوراء"

غوتت تا هزووو:" وامتاااا ولينااا نستعملوو لالقاب فخدمتناا أاا؟

خرج كيجري مخليه مفاهم والو.

كانت واقفا مع لمحامي لي كيعلمها بلي غيستأنف لحكم وكن مكانش اسمر اليزنانسي مكانش يتنطق بالحكم ليوم

جروهاا البوليس وهي مرفووعة كتعاود فبالها غير اسم " اسمر "

وقفاات منين عيط لها بصووت عالي : حوراااء

دارت كتشوف فيه وفيدها لمينوط ..كيتنفش بجهد صدرو كيطلع ويهبط وعينووو عليهاا...

صغر عيونوو :" الحرة؟!"

ابتسمات ليه": أسمررر، ..أسمرييينوووو"

" قبل 10 سنين"

فإحدى ثانويات كان شي داخل وشي خارج صوت المراهقين سايد فالأرجاء..

فواحد من الأقسام كانت كالسا ..جامعا شعرها Queu de cheval

لابسا طابليتها البيضة فوق كسيوة كحلا ..وصباط فنفس لون الكسوة..

وجهاا عادي بلا تا نقطة مكياج..ملامح وجها وحروفو الكحلة باينين..

قدات نظاضرها تتشوف فلكتاب...

فصف حداها كان كالس ولزيات فودنو .. سروالو ددجين كان هابط لابس معاه تيشورت كحل جايو واسع على جسمو الهزيل ومطلع تشويكة فشعرو..

تموو تلاميذ واقفين منين دخلات لاستاذة ...الا هو لي باقي كيتهز كاع مشافها بلي دخلات ..

حيد لزيات منين علمو لولد لي كالس حداه ..

شاف قداموو فلاستاذة وهو مبتاسم لها: مرحبا مدام

خنزرات فيه

جر ابتسامتو كتر: مدام موزيل

الأستاذ: عصام آخر مرة لقااااك كتشطح ليا فالقسم

عصام: حاضر مدام موزيل

زادت كالسا كدور عينيها: قبل منبداو درس خليونا ندوزو لاليست دلغياب .

هزات لملف كتعيط بلاسماء ابتسمات منين وصلات لاسمها: حورااء مجاهد

وقفات حوراء مبتاسمة: حاضرة

جمعات ابتسامتها منين عيطات: عصام مجاهد

هز يدو: هاهو

الأستاذة: أش تتجيو لبعض نتوما؟

عصام: شهر هادي ونتي تتسولي وانا كنقولك مكتجيني مكنجيها..

شافت فيه حوراء مخنزرة: مكنعرفووش.

الأستاذة: ايييه بايناا متتعارفوش

اش جاب وحدة باها قاضي القضاة وديما هي لولى فليسي لواحد هو لخر فليسي ولكن بجوج مجا هد

عصام: جدي جا.هد مع جدها صافي .

قبل متجاوبو شافت فلباب منين سمعات دقان .

وقفات فدخلة دلباب كتلهت ...لابسا كسيوة غوز فوق ركبة مع ليبة بيضة جامعة شعرها الأشقر اسفنجي..كتشوف فيها بعيونها الزورق: سمحيلي استاذة تعطلت

الأستاذة: أش هاد لوقت اصافية وفين طبلية؟

الصافية: فشكارتي ااستاذة

الاستاذة: علاه شكون خصو يلبسها نتي ولا الشكارة؟

الصافية: بحال بحال أأستاذة ..

ناضت لاستاذة بزربا منين بان لها لمدير جاي : دخلي الويلة طلقينا..

دخلات تتجري زادت لبلاصتها جابدة مراية: اووو على حالة خارجا بيها ليوم..

جبدات عكار24 ساعة تتعكر..وتقااد لماسكرا ..

شافت فعصام منين نطق: لخلعة

صافية: عاودها لمك الكلوشار

تهز من طاولة :ميي متجبديهاش على فمكك المسخة

صافية: وهاني جبدتها اش فيدك مدير؟!

جبدات قطن من لاطروست دارتو فودنها باش متسمعش لغوات لي موراها وكلسات تتخرج لمعادلة.

ضربات لاستاذة فلباب: سكتوووونااااا

وقفات تتشوف فيهم منين سكتو: غيتزاد معانا ولد يلاه حطاتو طيارة من امستردام..( شافت فلباب) اسمر ولدي دخل

دخل واقف لابس قميجة بيضة فوق تيشورت كحل مع سروال دجين كحل . مرجع شعروو لور ..

حاط لكغطابل ديالوو فوق كتفو .

الأستاذة: أسمر عرفهم أولدي براسك.

هز راسو كيشوف فيهم...شي نازل على كتابو وشيي كيهضر مع صاحبو وقلال لي كيشوفو فيه

أسمر: سلاام أنا أسمر

الأستاذة:أسمر جا من امستردام باش يكمل قرايتو هنا.

الصافية:فين جات هاد امستردام ااستاذة؟

الأستاذة: ف هولندا ابنتي

غير سمعات هولندا خرجو لقلوبة من عينيها قدات كلستها مبتاسمة: شرفتيينا اسي اسمر اسم على مسمى كن غا علمتينا ااستاذة نوجدو ليه لحليب وتمر

استاذة: راه جاي يقرا مجايش يخطبك الصافية

بدا كولشي يضحك عليهم نطقات معنكشا: اش فهمكم فصواب

أستاذة: ولدي كلس حدا حوراء

شاف فيها معارفش فانا بلاصة..

الاستاذة: حوراااء بنتييي

نازلة على كتوباتها

الاستاذة: حورااااااء

هزات راسها فلاستاذة محيدة لقطن من ودنها

الاستاذة: خلي أسمر يكلس حداك

حوراء: أسمر؟؟!

زاد واقف حداها كحز كتابها عندها وكلس

الصافية: كن غا جيتي تكلس حدايا اما ديك عوراء كاع متتقدر نعمة .

شافت فيه مبتاسمة: واش نتا جديد هنا؟

حرك راسو باه

حوراءة: أنا حوراء ونتا اسمر ياك متشرفين

حرك راسو باه..

حوراء: واش متتفهمش لعربية؟

حرك راسو باه.

هزات راسها مستغربا قبل متهضر نطقات لاستاذة: لمشروع لي خارج المدرسة كلكم درتوو بقات حوراء ملقيتيش كروب يدير معاك ياك؟

حركات راسها باه عارفا كن كان مشروع داخل لقسم كلشي غيبغي يدير معاها ولكن خارج لقسم كيختارو غير صحابهم وهي معندها صحاب

الأستاذة: ديري نتي واسمر

شافت فصافية وعصام: وتانتوما معاهم لمدرتوش لمشروووع عتابرو راسكم ساقطين فلمادة ديالي ...نتوما غتكلفوو بدار شباب لي حداا ليسي ديجا شرحت لكم اش غديرو لحصة لي دازت شرحو معاكم لاسمر..

شافت صافية فعصام: اش كانت شرحات؟

هز كتافو : معرفتش؟!

حط يدو على راسوو كا.ره عيشتو ودقيقة لي حطاتو طيارة فالمغرب مخلي صحابوو وعشرانو فيها.وجاي لبلاد معارف فيها حد ومباغي يعرف حد

جات الحصة دلعشية وفيها دارو يتلاقاو باش يتفاهمو على بلان لمشروع.

واقفا فباب لمدرسة كتسوط بجهد وهي كتشوف فصافية قدامها كتمضغ وتطرطق لمسكة..

شافت لساعة:" واش مزال مجاو؟

نطقات صافية بنفخة:" معرفتش..

طلعاتها وهبطاتها:" بحالا معاجبكش توقفي معايا؟

حركات راسها باه:" بصح معاجبنيش مكرتاحش لك

شافت فيها بصدمة خرجات ضحكة طويلة:" بصاااح على انا مي.تاا باش نوقف معاك كن مكان لبلان ددار شباب مغنوقفش معاك ازين ميحصلكش شرف

هزات عينيها منين شافت عصام جاي..وقف مع شي دراري قبل ميكمل عندهم

حوراء" ها عصام بقا اسمر

شارت لها لباب:" تا اسمر جا

ثواني تا وقف عليهم عصام:" لحلاولاو اش تم لاش طالبين نتجمعو؟

صافية:" ابسم الله اشريف نسيتي بااش نقولوو لاستاذة بلي مباغينش نقادو دار شباب يرشح دراري خرين و يعاود تعازيلة

خشاا شكلاطة ففمو كيهضر وفمو عامر:" تاهذا بلان ..اصلا لخير ماشي دكمارتكم

صافية:" اه باينا لخير دكمارتك نتاا.

نترات من يدوو شكلاط:" ووجوه لخير مكاياكلوش بوحدهم .

عضات وحدة وعطات وحدة لحوراء

لي غير كتشوف فيها:" شدي ولا لهلا

شداتها من عندها..

ثواني تا وقف عليهم اسمر. خشا يدو فجيبو كيشوف فيهم :" شنو باغيين؟

حوراء: لاش كولتي متتهضرش لغتنا؟!

اسمر: جيت نقرا هنا بجابونية اذكاء؟

عصام:" داخل طويل لا سلام لا كلام وزايدها تتهز على مجاهد.رقم جوج

تنهد مفاهم اش كيخربق:" سلام اشنو باغين؟

حوراء: وعليكم السلام واش نتا لباس اش خبارك وخبار مالين دار؟

قوس حواجبو مخنزر فيها:" ياك لباس ياكما مصاحبين بلا خباري؟

حوراء : مالك ضرتي فيا مكلت ليك والو ؟

اسمر : متهضرينيش باش منضورش فيك وخا؟

سكتو عصام بشكلاطة ففمو:" فمك هضرتو خانزا حلي باش تولي حلوة ..واش هاديك هضرة تكولها لهشاشة؟جوبها باذب وقولها خبار لعائلة؟!

اسمر:" حنا ماشي صحاب ماشي سوقكم فصحتي وعائلتي

صافية :" اه رضى (قادت الوقفة ) حنا ماشي صحاب وعمر نكونو..على داكشي غنكولو لاستاذة بلي مغاديش نشدو بلان دار شباب داكوغ متافقين

حوراء'" انا متافقة بغا ركز على دروسي ماشي شي حاجة خرا

عصام:" وانا خدام ممساليش لتخربيق

صافية:"اوه مبقاش خير

شافت فاسمر:" وانت؟

هز كتافو:" ياكما تيقتو اني غنكون معاكم

ضحك باستهزاء ومشاا..

عصام:" هاد خونا كيعصبنيي غنفرشخ موووو..متكبر عليها كيبو.ل هواي

زااد كيعيط ليه:"اشش تتحسب راسكك العزوة أاا؟؟

شدو شانقو من طريكو:" مال مك اصديقي تتهز عليناا واش حيت جاي من مور لبحر تشوف راسك علينا ولا شنوو..

كيشوفو فيه لبنات مصدومين وهوا شانق على ولد سمرر ...

شافوو فبعض

حوراء:" علاش شانق على داك لولد ومدار ليه والو

صافية؛'معرفتش ياكما شافو سمر وتشابه لي باسمر..

تهزو مخلوعين منين شافوهم كيضا ربوو ضر بة فيه ضر بة فلاخر وتلاميذ تجمعو عليهم فساحة

شدات صافية فيدين حوراء:" وشوفيي صحابوو هجموو علييه..لح..رب ناضت غيد.فنووه..

حوراء: انا غنتكلف بجنو.د شمال نتي تكلفي بالجانوب غوتات بجهد : " بعدوووو منووووو

وزادت بجرا كضرب فتلاميد لي مفهموو والوو

صافية :" فين هوا الجنوب بلاتي (كتقلب فجيوبها )فيناهيا البوصلة ديالي فينها

بدات دور بلاصتها وكتجري بلاصتها بلا متحرك:"انااا جاياااااا

وصلات عندهم زادت ديريكت عند وحد لبنت جراتها من شعرها:" المو.ت للاعد.اء

التلميدة:" اي شعرييي طلقيييي

صافية:" المو..ت او النصرر...ليكن المجد لناااا

التلميذة:" اش تتخربقي طلقييي الخرااا

طيحاتها لارض وبداو يدابزو تم..

روينة ناضت فساحة...عصام كيضارب وينقز من ولد لولد..حوراء كضرب بشكارتها دراري..لي مفهموو والو وحدهم كيعايرو فيها..وصافية لي طايحاا لارض...

هزات حوراء شكراتها نزلات على ولد بيها لراس فرعاتوو تا دفعها طايحاا لارض.:"

هزات راسها وعينيها كيتسدو ويتحلو منين شافت يد ممدودة لها

ابتسمات:" سمرر ديالي (وسعات عينيها )النصر لنا

كيحل عينو ويسدها أسمر:" اش واقع هنا لاش هادشي كولو كيتحرك؟

ميلات وجها:" هجمو علينا خداو عصام كأ.سير وعلنو الح.رب..هجمو لينا على القلعة و بغاو ياخدو الحريم حريمك غيضيع

وقفات تتمايل..

حوراء:" خصرنا بزاف دالجنو.د..ولكن انا كافيا...(هزات شكارتها لفوق معلياها و كتغوت بجهد ) هجوووووووووو.م

زادت منقزا على لي دفعها طيحاتو لارض وبدات ضرب وتعض فيه..

شافت فاسمر :" واش مغتعاوناش؟

غبر وخلاها..

نطقات بلغوات:" الجند.ي الحقيقي مكيهربش من المعركة .نتا مخاصكش تهرب

دقايق تا تجمعوو لاساتذة كيفكوهمم.

.بصعوبة قدو يسيطرو عليهم .

واقف الاستاذ مخنزر فيهم:" اش تديرو اش هاد العب دلبراهش يلاه تحركو لادارة..؟

ثواني تا رجع بعد مجاب من طواليط الكراطة:" انا مشيت نجيب سيفي

شافو فيه تلاميذ مستغربين معارفين اش كلاو هادو

يلاه لاستاذ بغا يدور يشوف اش كيقول هذا

غوت اسمر بجهد:" الله. واكبر ليدخل لااامعااااا و يخرج اححمررراااااا

وخشا ليه الكراطة فمؤخرتو..حيدها بزربا ونزل عليه بيها لراس

واقفين قدام المدير كيدوروو فعينيهم...

شاف فيهمم عاقد غوباشتو:" اش ديك لحالة لي درتو فساحة. دويو..

طول فيهم شوفة تاحد فيهم مهضر...شاف فحوراء.:" دوي ابنتي نتي ماشاء الله قرايا ومأذبة اش وقع لك؟

هزات راسها فيه ميلات وجها بشوية " عميي

هز راسو : دوي

خرجات عينيها مقربا منوو كتشوف فلحيتو:" عميي وحد لقملة فلحيتكك تتغرق فدفال لي كيتشتش من فمك."

حط يدو على فمو وغوت بجهد:" شنوووو هوااااا

طاحت صافية لارض كضحكك...وعصام كينوضها وهوا ميت بضحك:"

شويا بدات تغوت بجهدد وتبكي" نوضنيييي ازمرر نوضنييي المرض لارض غتسرطنييي وااااا نوضنيييييي...وعتقووونييي

زاد كيضرب فلارض ويغوت:" تكرعيهااا لمككك تكرعيهاااا:"

لمدير واقف كيشوف فيهم حاس بودنوو كيصفرووو عليه معرفهم حماق ولا كيحماقوو عليه...

كيشوف فصافية تتغوت وعصام كيضرب لارض وحوراء بقا تتشوف فلحيتوو بلا مترمش

حول عينوو لاسمرر لي واقف بلا ميتحرك ولا يدير صداع:"ولدييي نتاا لي فيك ضوء واول نهار ليك هنا وعارفك بحال باك صادق....

يلاه على وجه الحاج قول اش واقع ؟

شاف فيه بملامح مطموسة حرك راسو بوخا..تم غادي جيهة الباب

الحارس:" فين غادي؟

أسمر:" غنمشي لحج نجيب وجه الحاج .باش نقوليك وانا واقف على وجهو

جالسين فقاعة الاساتذة لي قريبة من بيرو المدير مدوخين و كل واحد ملاوح لجيه …حداهم كراطن لحليب كيشربو باش يوليو مزيان و ضحكهم كيتسمع لبرا…دخلات عندهم امرأة في الخمسينات كتلوك فلمسكة و لابسة جلابة كحلة مزيرة عليها و مع هي غليضة جاتها معيقة…دايرة فولار خفيف و كتبان باطرونة نيت …قربات لعند الصافية و شداتها من يدها كتديها و تجيبها….

حادة: مامشيتي حتى جبتيني لهاد لمقااام …اش دخلني انا للاساتذة و المدراء ؟؟؟

الصافية: حادة نتي هادي هههههه

حادة: يااااويييلي و زايداهالي بلمعجون…تحركي قدامي نشوفو حريرتك

…لقاتها فاشلة ماقاداش تنوض و خلاتها بلاصتها و مشات لبيرو د لمدير مع دخلات لقات الاساتذة معاه غير شافوها خرجو و خلاوها مع المدير …تبسمااات و جلسات …

حادة: اوااا غييير سمحليهم اسيدي ولاد صغااار معارفين والو

المدير: هادوك راه شياااطيين لعفووو …و باش تعرفيني مكنكدبش هاني لقيت غير نمرتك لي حقيقية من بين نماري د اولياء الامور جوج نماري ماشي حقيقين ووحد مكايجاوبش

حادة:(ناضت) ربييي صافطني ليييك باش نبقاو راس فراس

…قرباات منو متبسمة و كتذبل ف عينيها … " طمس القضية و ليك عندي قصارة مع الشيخات امتكون غير على خاطرك "

المدير:(توسعات ضحكتو) الشيخات ؟؟

حادة: ايييه و مالك نتا عندنا قليل و لا رخيص اسيدي و ماتخلص والو كولشي على حسااابي و حادة راه بكلمتها

المدير:(بعد منها) لالا مانصيبش خصهم يترباو

حادة:(عوجات سيفتها) راه الى سمعو الناس بلي المعجون دخل لهنااا ماغايعجبك حال ولولاد مساكن غير نية كياكلو كولشيي ماعرفين اش كيدخلو فمهم حنا غندوزوها لولادنا ولكن ناس خرا لا كن وقعات لهم شي حاجة شكيكو (ضربات فلمكتب)… انا بغيت ليك الخير

…بدا يضورها فراسو و يفكر…

المدير:واش شيخات لي غيكونو من لكروب لي كيعجبني؟

ضحكات بجهد:هانتا دويتي غيكون لكروب لي تتحماق عليه

كانت داخلا لدار ..دار كبيرة فحي راقي ..

داخلا وهي مهبطا راسهااا

وقفات قدامها ماماها: حوراء بنتي واش نتي لباس كيف دازت لحصة؟

حوراء: لباس اماما انا غنطلع لبيتي

شافت فيها مستغربا: كلسي تاكلي بعدا؟

حوراء: مفياش جوع عييت اماما بغيت غا نعس انا غنطلع ولسول عليا بابا قولو نعسات وصافي

زادت بجرا لبيتها..حطات شكارتها وحيدات نظاظر كلسات على لاموسية

حوراء: انا كليت المخد.رات انا خنت تقة ماما وبابا فيا ..انا وحدة مكنسواش ؟

ترمات على سرير مخشيا فلغطا تتبكي..تهزات من بلاصتها: خصني نوض نصلي ليل كولو باش ربي يغفر لي...

عند اسمر لي كان داخل لدارهم.مخنزر لقا مو وباه على طبلة دلعشااا..

هزات ماماها فيه راس: ولدي مرحبا بيك بحالا تعطلتي ليوم؟

الأب: راه توقيت عندهم هنا مختالف ..كلس اولدي تاكل وخا باقي لحال ولكن مولفين نتعشاو بكري..

أسمر: نغسل يدي ونجي..!

كلس حداهم بعد مغسل يدو شاف فيه باه : كيف داز نهارك لول فالمدرسة اولدي ؟

اسمر: زوين.

ابتسمات ليه مو: اش درتي فيه؟

أسمر:ضربت أستاذ لراس بكراطة

ضحكووو بجوووج :اهاه ودرتي شي صحاب؟

أسمر:اه عرفت وحدين ماشي صحابي ولكن كلينا لمعجون مجموعين.

شرب باه لمااااء كيضحك:عارفين باغي غير ترجع بحالك ولكن اولدي ختارع شي قصص يتقبلهم العقل..

ناضت مو مدوزا يدها على راسو:دابا تعرف ناس جداد هنا وحبيبي غيرر ترخف خدمة باباك ولبغيتي رجعو رجعوو..ونتا بلا متشدها منين تقيلة بحالا راك فالحر.ب

هز راسو فيها: ربحت فالح.رب اليوم مقدروش يديو الحريم..

ناض من طبلة طالع لبيتو وهما متبعين ليه لعين..

الأب:لمرا جايا غيقولنا غنمشي لمسيرة غير باش ميقراش

بداو يضحكووو عليه وهما صحابهم غا طالقها عليهم معارفينش كاع داكشي لي قال حقيقي.

أما عند عصام لي غير دخل لدار ترما على سداري ناعس زادت عندو مو منوضاه

فاطمة:ولدي نوض سير لطواليط ونعس!

بصوت نعسان:وخا

فاطمة:يلاه نوض

ناض من داك سداري وزاد طالع على سداري لاخر كالس لكلسة دطواليط بلدية فوقو.

فاطمة:اش تدير المسخوط؟

داايخ:كنخرا

حيدات صندالة مشيرا عليه:تااا شرفتي عاد خصك لخروق الله ينعلك رجع تنعسسسس

نهار جديد ..دوزوه مزيان فليسي بعد مفاقو وتوكضو تاحد فيهم مهضر لاخر صباح كولو

.كانو فاخر حصة..ديال العلومsvt

نطقات لاستاذة وضحكة مشركة فمها:" ليوم غنديرو اول عملية تشريح.

جبدات من لمختبر ميكة فيها الجران وميكا خرا فيهاا لحوت .

هزات لحرة يدها:" استاذة تشريح درناه فلكوليج علاش غنعاودوه دابا؟

ابتسمات لها:" بنتيي اجيي قري بلاصتي اجي حسنن

خنزات فيها وفتلاميذ:" غنبداو بتشريح سمكة غتنوضو ربعة بربعة تعطيو ملاحاظتكم وترجعو يلاه احوراء بيك نبداو

شكون اخر يبغي يبدا

تاحد مهز يدو

الاستاذة: اجي لهنا اهولاندي ديالنا

خنز فيها اسمر وتم نايض.

الأستاذة:يلاه شكون اخر لي غينوض دابا غيسالي بكري ويخرج قبل ميصو...

قبل متكمل هضرتها هز عصام وصافية يديهم:"

تنهدات:" يلاه نوضو

جمعاتهم على لمختبر:" كل جوج يهزو حوتة ويحاولو يشرحوها ويعطيوني ملاحظاتهم باش ندوزو لجرانة..

شد عصام وصافية وحدة وحوراء واسمر لوخرى

بدات صافية تحلها وتجبد مصرانها

الاستاذة: حيدي بشوية مراكش فلكوزينا

شافت فيها وشافت فعصام :" كمل نتا

عصام:" منين غنجيب انا شرمولة دابا؟

صافية:" كمل بلا طنز.."شمات يدها" يعققق خانز"

حوراء كالساا تتشوف غير فجران لي كيتحرك واسمر خدام

اسمر:" مناوياش اانسة ديري يدك؟

قربات منو:" اشنو ندير؟

هز عينو فيها:" شدي معايا

بدا يشرح وهي شادة..ساط بجهد منين تقاست قاميجتووو بشوية دلحوت

حوراء:" راك لابسها واسعا دخلها فسروال باش متقاسش

زاد كيغسل يدوو دخلها فسروال .ورجع..كيكمل ولاستاذة على راسهم:" يلاه دغيا غندخل المختبر نخرج لقاكم ساليتو باش ندوزو لجران و ينوضو تلاميذ لخرين..

دخلات هي لمختبر فحين كلهم حانيين على خدمتهم معادة حوراء لي عينيها على الجران

حوراء:" حشومة لاستاذة تقتل الظفادع وهي حية

شاف فيها بنص عين :" بقاو فيك عتقيهم..

صغرات عينيها..وقربات لهم بشوية..هزات ديك لميكة فاش كاينين فيدها وغير شافت لاستاذة جايا..بدات تقفقف معرفات فين ديرهم..شافت فاسمر حاني ملهي مع الحوتة...زادت قدامو بشوية تتشوف فيه..شافت فضهرو لي كيبات شوية حيت قاميجتو واسعا على غفلة من لاستاذة خشات تم لميكة .

هز راسو فيها:" اش خشيتي؟

حوراء :" والووو

خنزر فيها:حاس بشي حاجة

نطقات لاستاذة يلاه سالينا:" عصام اش تتشوف بعد مشرحتي سمكة؟

عصام:" كنشوف اسستاذة قبل تشريح حوتة بلعضام بعد تشريح حوتة بلا عظام..ووخا كيقولو لبنة فلعضام ولكن لقضية مماشياش فلحوت

باس يدو:" كيكونو بنان بلا عضام

الصافية:" علاه لحوت فيه لعضام هذاك راه شوك المكلخ

عصام:" ها شكون كيدوي اذكى بنت فلعالممم.

ساطت لاستاذة بجهد بغا غير تفك منهم ومن صداعهم ودوز لخرين لي فيهم ضوء:" ملاحظة ليس فمحلها

عيطات لاسمر وحوراء لي واقفين قدامها:ونتوما اش لاحضتو؟

اسمر واقف مزير وجهوو حمررر حاس بداكشي كيتحرك فضهرو ومعرفو شنو بغا غير يحيد قاميجتو من سروال يخليه ينزل مقادر قدام لاستاذة

الاستاذة:" اسمررررر؟

اسمر:" كنلاحض

مع تهزات جرانا تهز مقرب من لاستاذة:" بلي ظهر السمكة..

تهز عاود منين جرانة تهزات

حوراء كتشوف فيه وهي كتعض شفايفها وصباعها

وقف اونفاص مع الاستاذة كينطق وهوا مزير:" ظهرر الحوو .( تهز بجهد منين حس بنغزة فضهرو تا ضرب جسم الاستاذة ) وااا ياااااااااي

واقفا تتشوف فيه مخرجا عينيها صمت فلقسم :" الحوووو...

هزات يدها نزلات عليه بتصرفيقة :" قليل لادب.

مداهاش فيها بعد عليها كيحيد قاميجتو من سروال مبغاتش تجبد وبدا يحيد سنطة..

غوتات لاستاذة بجهد:" راني قد مكككك الحمار شدوووه...

ورجعات بلور مبتاسمة تتلغب بشعرها بخفوت:" هاد لجيل لي عارف بقيمتي

قبل ميقيسوه هز طريكوه وطاح كيس جران

كلهم خرجو عينيهم من لمنظر. و.شاف كيلهتتتتت

حوراء:" غنشرح لك .نتااااا لي ..

قبل متنطق غوتات بجهدددد...هربااانة من لقسم وهوا تا بعهاااا...ولقسم كولو مفرشخ بضحك الا لاستاذة لي باقي كدور فزغيبات شعرها

زادت بجرااا وهوا موراها تا لقات راسهاا داخلا لقاعة لانشطة وقفات منين وقف على راسها لمنظم:" واش نتي تلميذة دلاستاذ مرشد..دخلي ابنتي دغيا عيينا نعاينو من صباح لمفتيشين ولاساتذة كيعاينو لعرض فين شركاء؟

قبل متكمل دخل اسمر كيلهت

الاستاذ:" يلاه اولدي دغيا طلعو على لخشبة فين دراري لخرين..

شاف فصافية وعصام لي جايين

موراهم مور مصفطاتهم لاستاذة..طلعهم وهبطهم:" ماعلينا دخلو دخلو..

زادو داخلين طالعين لخشبة..كيشوفو فلاساتذة ولمشرفين..ولمفتشين..

شافت فصافية :" اش نديرو

اسمر: غنصفيها لك هنا

هزات كتافها" ماشي وقتك اصلا نتا قولتي لي عتقهم

خنزر فيها:"نتييي

عصام قاطعهم: شوفو لبطاقة فيها مسابقة ثقافة اش تتعرفو عل ثقافة؟

صافية:" كنعرف نشطح ونغني العيطة من ثقافتنا العريقة

عصام:" يلاه غني وحنا نتبعوك..ونشطحوو معاك مشات

حركات راسها بوخا: انا نغني ونتوما قولو مالييي

بدااا تغوت بجهد:" عظمة ممنوووش الفلوس لي معندووووش

هما:" مالييي ماليييي مالييييي

صافية:"هذاااا ماراد الله يااميييييي حالييي حالييي

هما :حاليييي حالييييي

صافية:" العظمة ممنوووووش العظمة ممنوووووووش

بداا عصام يصفق بدفة المراكشية:" العضمة ممنوش ممنوش:"

وصافية تتشطح

وهما كيعاودو معاها :" اوللله ممنوش ممنوش

اسمر كيشوف فلجنة ولاساتذة لي شي كيشوف شييي فشي مصدومين استغرب وعاود شاف فلاعلان لي جنبووو خرج عينو منين قرااا " مسابقة جمعية الثقافة والدين لتجويد القران الكريم '"

واقفيين قدام لمدير شي كيشوف فشيي وهوا عاطيهم بضهر كيغوت

المدير: كليتووو لمعجنوون فالمدرسة .لاساتذة وضربتووهم ..شوهة ودرتوها دوزناها لكم قلنا دراري ماشي فعقلهم..ولكن باش دخلوو لقاعة لانشطة وتغنيو فمسابقة دتجويد.. قدام المفتشين

شاف فيهم: راه ابليس ومدارهاش.

حوراء: سمح لنا أاستاذ حنا غير وصلنا لباب لقاعة وهو لاستاذ يجرنا لخشبة

المدير: اش وصلك تممم أش وصلكممم.

أسمر: قاعة لانشطة ديال كولشي أولا؟

صافية: اه نشااط من حقنا جميع

عصام (تحت سنانو): النشاط هاهوا شاط

ضرب فلمكتب بجهد: سكتووونا بغيتوو ترضوو الأستاذ لي غلط ونتوما مدرتو والو؟

أسمر: علاش أشنو درنا حنا؟ هو جرنا وطلعنا فوق لخشبة غير خير منا قلنا نغنيو ليه.

كتشوف فيه حوراء باش يسكت..

خشا يدو فجيبو وهز كتافو: كفاش لأستاذ لي منضم مسابقة ومعارفش تا تلاميذ لي غيشاركو فيهااا..؟؟ (حرك راسو باستهزاء)هادشي ماشي مهني

قاد لوقفة كيشوف فيه: وشنو هي المهنية؟

أسمر: أنك محدك غتنظم مسابقة وغيحضروو فيها ناس مهمين خصك تكون عارف لمشاركين وتنضم معاهم حصص تأطيرية قبل.

حرك لمدير راسو باه: هادشي ماشي مسؤولية

أسمر: بالضبط ونتا من حقك تختار استاذ اخر ينضم الانشطة باعتبار لاخر محتارمش الضوابط المهنية

تكاا لمدير على المكتب عاجبو اش كيسمع : آه أسستاذ وكولي لمبغاش .

سكت منين شاف لخرين كيضحو منين قال لأسمر أستاذ جمع لوقفة وغوت بجهد: أحم سكتوونا بغيت غير نعرف لاش فكاع لمصايب كلقاكم مجموعين

شافو فبعض

عصام: تا نعرفو حنا ونكولو ليك.

المدير: يلاه دركوو عليا زلافتكم..وعقابكم غيكون هو لمشروع لي عطاتكم لاستاذة غتبداو فيه من ليوم ممنوع تنساحبو فهمتوو.

ساطوو بجهد وتمو خارجين متابعين..

عيط لمدير لاسمر..زاد عندو حاك يدو على كتفو: مرة مرة دوز اولدي عندي قريني داكشي لي قراوك فهولندا بحال هادشي لي قلتي دابا .

هز كتافو: هادشي مقراوهش لي كاع ناس لي بعقلهم غيعرفوه.

تم خارج

لمدير ابتااسم: اييه بعقلك تبارك الله(جمع ابتسامتو) كفاش واش قصد أنا مكلخ؟

خرجوو من عند لمدير شي كيخنز فشي وقفات صافية تتشوف فيهم رمات شكارتها بزعاف

صافية: واش متعرفوووش تبعدوو من طريقي اعباد الله.

حيد عصام شكارتو راميها: دوووسمووون ياااك نتيي لي بديتي تغنييي وحنا تابعينك

صافية: شكون كيهضر نسيتي نتا لي موكلنا لمعجون..

عصام: وباش عرفتو انا معجون ماشي شكلاط واصلا نتي ديتيه من بيديك ماشي أنا لي عطيتوو لكك..

كيتغااوتوو واسمر وحوراء كيشوفو فيهم .

تنهد بجهد : خليونا منبقاوش نتلاقاو من غير دار شباب منشوفوش كمارت بعض.

هزات صافية شكارتها من لارض:ايييه منشوفوش كمارت بعض لي غنشوف كمارتو قدامي غندفل عليها

هز عصام شكارتو من لارض: ولييي غنشوووف أنا كمارتو قدامي غنخرا عليهااا.

هز أسمر راسو بلاحول وزاد غادي لقسم..تبعاتو حوراء بجرا.

حوراء: واش مكنظنش أن الله كيجمعنا باش نكونو صحاب؟

أسمر: بعض الظن إثم..

وقفات تتشوف فيه: أش فيها لولينا صحاب وخا حنا مختالفين ولكن عشنا جوو زوين مع بعض فهاد ليام..

وقف هاز صبعو فوجها: جووو زوين جران لي خشيتي لي فضهري عندك نتي جووو زوين.

حركات راسها بلا راجعا لور ..قرب منهاا كيغوت بجهد:متخلينيش نشوف وجهك الالة أشمن جووو ولا زمر مباغي نتصاحب لا معاك ولا مع تاواحد فيهم .(شار لكمارتو)وجهك متوريهش لي.

زاد لقسم. فحين هي جبدات نظاظر تتقادهم باش دخل لدرس: مالي معشاقة فيك.

بعد مدة كانو فلحصة كل واحد مركز على حاجة تا حد مدايهاا فلاخر..

كانو كينقلوو درس لي كاتبا لاستاذة فسبورة...

الا هو متكيي ممسوقش..

دخلات لاستاذة ..كتلهت حطات وراق على طبلة: هادوو امتحانات تجريبية جبتهم من الادارة فاخر يامي نهز تقل على حسابكم..غنمشي نغسل وجهي وغنفرقهم عليكم قادوهم فدار..

تمات خارجا شافت فاسمر متكي غوتات بجهد: أسمرررر نوووض..

خرجات فحين هو تهز مخنزر حط يدو على راسو وشاف فحوراء حداه:أش قالت هادي؟

حوراء:قالت ليك مسح صبورة ورد لوراق لي على لمكتب لادارة..

ساط بجهد: واش انا خدام عندها..

ناض من بلاصتو يلاه بغات تعيط لو تقولو كنضحك معاك لقاتو مسح نص درس...

شي كيشوف فشيي مفهموو اش كيدير هذاا..

سالا لمسيح وزاد هاز لوراق لادارة..

كان راجع لقسم وقف منين لقا لاستاذة واقفة تتعاينو.

شاف فيها وزاد داخل

عيطات ليه بجهد: فين غادي أشريف؟

شار لبلاصتو مستغرب: نكلس

الأستاذة: تكلس شكوون قالك مسح صبورة ورد الوراق لادارة؟

أسمر: نتيي؟

شار لراسها: أنا قلتها بفمي!

شاف فحوراء لي حانيا على لكتاب تتشوف فيه بنص عين.

بدات تغوت وهو غا واقف كيسمع ..

الأستاذة: يلاه دوي شكون كالك مسح صبورة ورد لوراق؟

حرك راسو بلا: تاواحد غير مسمعتكش مزيان.

الأستاذة:مسمعتيش هززز ادواتك وخرج عليا باش مرة خرا تسمع..

حرك راسو بوخا زاد هاز شكارتو جات عينو فعينيها وهي تتصغرهم ببراءة

أسمر:هزي عليا عينيك ولا نتقبهم لمك.

هزز شكارتوو خارج...

ثواني موراه دق لجرس هزات شكارتها خارجا بجري تابعاه

.بان ليه خارج برا ليسي..

زادت موراه .بجرا

حوراء:أسمرررر

وقف مخنزر فيها:اشنووو عاود اشنوو

حوراء:شكرا حتاش مقلتيش سميتي لاستاذة

أسمر:لمتحركتيش من قدامي غنمشي نقولها سميتك..

حوراء: وسمحلي غير كنت معصبا منك عارفا راسي تبرهشت

أسمر:التبرهيش من البراهش حاجة عادية ؟

يلاه بغا يزيد وقفات حداهم طومبيل..نزل منها شخص فلخمسينيات مبتاسم..زاد عندها معنقها.

حوراء: بابا

بعد عليها:أش خبارك كيف دازو لحصص

حوراء:مزيااان

شاف فاسمر:وااش هذا كيقرا معاك؟

حركات راسها باه: كيقرا معايا يلاه جديد.

يلاه بغا ينطق أسمر زاد عندو باها معنقووو قا.جوو.

بعد عليهم:يلااه ركبووو

شاف فيه اسمر مستغرب: انا خصني نمشي لدار

ابتسم ليه:ركب أنا نوصلك لدار يلااه ليوم لغدا على حسابي علم والديك..

شاف فيهم مستغرب..

قاستو حوراء:ركب ركب..

زاد راكب هما لور وباها لقدام...بقاو غاديين بطومبيل باباها كيسولو وهوا كيجاوب وقفو فلبراج دلبوليس ..زاد عندهم بوليسي لي غير شاف وجه باباها عطاهم تحية ..وزادو..

شاف فحوراء:لاش لبوليسي مقال والو لباباك؟

حوراء: حتاش بابا مدار تا غلط ومغيقدو يهزو تا درهم منو عارف لقانون.

أسمر: واش باباك محامي؟

حوراء: لا قاضي

ضحك بجهد : القاضي عياض؟

شافت فيه مخنزرا وشاف فباباها:منين قالو مال لقاضي عياض؟

أسمر:هو قدوتي

ابتسم ليه:هي باغي تولي محامي بحال حوراء.

حرك راسو بلا:مفيا لي يدافع على شي حد

حوراء:غتجي معاك غراق.

أسمر:غراق؟

حوراء:اه ممثلو النيابة العامة لي لدرتي غلط صغير كيرضوه مصيبة كبيرة

حرك راسو باه: عجابتني. غنغرقك نتي لولى .

خنزرات فيه رجعات شعرها لور: أجي وغرق محامية.

ضحك باها بصوت عالي: نزلو نزلو وصلنا لمطعم

بعد يوم.

داخلة كيما العادة للقسم كتلهث عطاها الاستاذ الاذن و نبهها اخر مرة تعطل و دخلات لقات غا بلاصة حدا عصام خاوية جلسات خرجات الطابلية كتلبسها …حط يدو على حنكو كيشوف فيها

الصافية : مالك كتشوف فيا ؟

عصام : و مالك زوينة بحال هاكا ؟

الصافية :ويييييلي قووول تبارك الله و نااااري هاهو ايضربني بلعين غدا يصبح وجهي مطرطق بلحبوب

عصام: تيقتي راسك اتي نوووضي

الصافية : و ماااالني مازوينااااش ؟؟ (كتشوف فالاستاذ لي كيضحك معاها و تبسماات كضور فعينيها) كون ماكنتش زوينة كون بقيت حاصلة ف الكاطريام

عصام: عطاااتكم ليام البنات ساهلة عندكم المأمورية

الصافية : هادا ماشي موضوعنا جايبة ليكم بريكول

عصام : شكون حنا ؟

الصافية : حنا حناااا (كتشيرلو على حوراء و اسمر )

عصام: نساااي ماغانتجمعش معاهم (جبد الكالة من جيبو باش يحطها ففمو و حيداتها ليه )

الصافية : غادي تجمع و يدك فوق راسك و لا دابا نوووض نقول الاستاذ كدير الكالة فالقسم

عصام : قوليهالي و غااادي نكر و نقولو ديالك

الصافية : جرب و شوف شكون ايتيق انا و لا نتاااا

دازت ساعة مع صونات ناضت مشات عند حوراء و اسمر قالتلهم بغات تشوفهم ف الساحة و خرجات …. و بقا عصام متبع ليها العين كيضحك

عصام : والله حتى زوينة …!

ناض خرج حتى هو تابعهم و تجمعو مور واحد القسم …

اسمر : اوا نطقي اش تما

الصافية : حادة قالت ليكم رجعو ليها الصرف

حوراء: شكون حادة ؟

الصافية : لي طمسات قضية المعجون داك نهار

عصام : علاه ماشي مك هاديك

الصافية : لا هاديك مرات راجل مي…ماما و بابا ما//تو و بقيت عايشة مع راجل مي حتى تزوج

….بقاو كيشوفو فيها بشفقة و بقات فيهم و هي تنطق

الصافية : ماتبقاوش تشوفو فيا هاكا و قولولي دابا شنو قلتو

اسمر : شنو بغيتينا نديرو

الصافية : هانتوما سمعو حادة شيخة و انا مرة مرة كنمشي نشيخ معاها دابا الفرقة لي كتقصر بغاو كونجي و مشاو سافرو و هي خرجاتلها واحد العراسية و محتاجين لفلوس…بغاتكم تشدو معاها الميزان

اسمر: داكشي لي بقا نهزو طرمتنا بالموزون…

حوراء : نووو مانقدرش الى ساقت مامي و بابي الخبار ايتقلقو منو

الصافية : شوووفو دابا راااه مكنشااااوركمش حادة عتقاتنا انردو ليها الخير …نتوما غير طبلو و غنيو بحال داك نهار ….

عصام : صافي غير هادشي ؟؟

الصافية : و خلاص بحلاوتكم انقسمو فلوس لغرامة (شافت ف الحرة ) و نتي قولي لوليديك راك اتباتي عندي …

حوراء : خليني نفكر و نردو عليك

عصام شاف ف اسمر : الراجل هو لي كيرد الدين ديالو صافي اصاحبي

اسمر :(تنهد) نشوفو …

الصافية : غداااا كاينة لقصارة فليل كونو واجدين انعطيكم العنوان غدا يالاه تلاحو …

….كملو الاستراحة ديالهم موراها دخلو ساعتاين لفيزيك و خرجو من ليسي …بقات واحد طوموبيل كتسنى الصافية واقفة بعيد …مشات كتزرب و ركبات دغيا و ضارت عندو باستو…

الصافية : توحشتك بزاف هههه

هاشم : حتى انا توحشتك اوا كيداز الكور مزياااان ؟؟؟

الصافية : وي صافا كيما العادة …

هاشم : مابقا والو للوطني و تاخدي الباك ديالك ان شاء الله

الصافية : وااييه و من موراها نبقا نخرج معاك على خاطري

هاشم :(باس يدها ) عارفك مزيرة مكنبغيش نشوشك معايا دابا ديها غير فقرايتك صافي …

الصافية : ههه صافي احبيبي

…مشاو تغداو بجوج منبعد وصلها لواحد الحي راقي بزاف هبطات و سلمات عليه و مشا …غير شافتو مشا و هي تزفررر

الصافية : تفو خصني نضربها كراعية على رجلي عاد نلقا طوبيس…ياااا على زهر و لكن سري انا لي كدبت الكدبة و تيقتها (كتشوف ف الفيلات) سعدااتكم نتوما لي عايشين ….

وصلات لداركم كتلهث منبعد ما وصلها الطوبيس دخلات فيها الهيمري دجوع بغات غير تعمر كرشها سمعات صوت الكوكوط و هي دخل للكوزينة قربات ليها شمشاتها و هي تعوج سيفتها

الصافية : عااااوتااااني البيصارة

…سمعاتها حادة و نطقات…

حادة: صفية جيتييي ؟

…مشات توجهات عندها لبيت لجلاس لقاتها جالسة كتخيط ف شي قفاطن…

الصافية : الصهددد

حادة : بدا كيسخن الحال

الصافية : فين هو با علوان ؟؟

حادة : راه جا من المعمل مسخسخ و طاح نعس

الصافية : مسكين كيضرب تمارة بزايد

حادة : اوا هانتي كتشوفي الحالة على قد الحال و فهاد الزمان الى بغيتي تعيشي خصك لفلوس صحيحة و علوان عيا من المسؤولية و المصاريف و خصك تهزي راسك و تعاونيه

الصافية :(تنهدات ) يكون خير .. ابعدا راه دراري و الحرة ايخدمو معاك فالقصارة د غدااا

حادة : مزيااان نضورو مصيريف و قلتي ليهم كاين حتى المدير ديالهم ؟

الصافية : لا

حادة : ماعليش غدا جيبيهم ليا لدار نتفاهم معاهم عاد نخرجو

الصافية : صافي غير نخرجو نجيبهم ليك …

…ناضت حيدات طابليتها وتمات خارجة

حادة : فين غادة ؟؟

الصافية : غادا ناكل بوكاديوس ولا شي لعبة برااا البيصارة قهراااتني

حادة : يييخ على گنس يخليك بلخلا البيصارة لقيتيها تصوري معاها …

نهار جديد غير سلاو لحصص دازو لدار شباب وقفو بربعة قدام ديك دار شباب غير كيضورو فعينيهم حوراء شادة فمحفاضتها و حداها الصافية لي كتمدغ المسكة اما عصام شاد مصاصة بفمو و كيشوف فالأرجاء و حداه أسمر داير يدو فجيبو و كيتنهد

الصافية :دابا على خر يامي نجي نبدا نشطح مع البراهش و نرسم و نغني معاهم

حوراء : و باز اي سمعك يقول فعمرك كدقي على تلاتينات و نتي بينك و بينهم غا طولة اما العقل را بحال بحال

تقدم أسمر سابقهم كيسول العساس لي فالباب اما عصام بقا حداهم كيسمع لهدرتهم الخاوية

عصام : دابا نتوما اش فهمكم.فشي دار الشباب انا كنت كنجي مع زريقة مول ديطاي ملي كنت صغير كنشوفهم عندهم ورشات و كل ورشة ديالاش ها ديال الرسم ها ديااال الموسيقى هااا ديال الرققص

صافية غا سمعات الرقص و هي تقاد الوقفة و حلات ودنيها

عصام : و انا كنت كنمشي مع زريقة لتيكواندو كيتعلم كيفاش يسلخ بنادم

حوراء : دابا مفهمتش حنا اش دخلنا فهاد الشي ؟اشمن تيكواندو ولا زميرة.

عصام : باينة جايبينا نحكو ليهم طواليطات و نقيو ليهم الجردة

بان ليهم أسمر جاي قاصدهم و تجمعو عليه بزربة

أسمر : لي فهمت انبقاو هنا شهر نعاونوهم يسجلو ناس لي كيدخلو جداد و الأرشيف نخملوه من الغبرة ونديرو لانشطة مع دراري ونشاركو فلورشات

الصافية : (كتشوف فييدها و عينيها غرغرو ) اويلي واش انا غندخل نمسح الغبرة يديداتي غيتشقو و يزراقوو و ضفاري غيتهرسوو امبوسييييبل ندير هادشي ؟

عصام :(شاف ليها فيديها)واش هادو يدين ولا سلا.ح الأبيض هادو لامشيتي تا زيرتي بيهم البوطة بقينا بلا غدا(شاف ضفار لي طوال و مصبوغين بالحمر )تبارك الله هاادو ظفار ولا يدين دطراكس

الصافية : لهلا يحييك الززرg نجيو نشوفو يديك نلقاوهم كيتقشرو كي البطاطا

حوراء: هادشي فاش حادكين اصلا انا دغيا دغيا نزرب على هادشي ونمشي بحالي

(شافت فأسمر) كولينا اش غنديرو تاااني

صافية: يلاه الالة عوراء فرجينا

عصام : متقوليش عوراء لمجاهد رقم 2

صافية: اشنو الكولوشار جاك عليها نفس

حوراء: الصافية لي مصافياش رحمينا بسكوتك

ضحك عصام بجهد: صافية لمسخة سدي فمكك

شاف فيهم اسمر: مغتسكتوناش؟

حرك عصام راسو بوخا: هضرتك مغتعاودش العزوة

بقاو مشادين تاعيطو لهم لجهة لخرا

دخلو هازين شوكتهم على بعضياتهم تلقات ليهم مساعدة المدير و داتهم ديريكت لورشة الرسم و شرحات ليهم البروكرام دخلو و كانو الدراري و دريات من خمس سنين تال 14 لعام و صداع فالقسم

المساعدة :مالوغوزمو مجاش ليوم الأستاذ ديال الرسم عندهم ساعاتين و يخرجو بقاو معاهم و كالميوهم

حوراء :(كمشات يديها و دبلات عويناتها ) وييينو اصلا عزازين عليا ليزونفو سوو كيوووت

(خربقات لواحد الوليد شعرو حيد ليها يدها من فوق راسو و خنزر فيها )

-حيدي عليا يديك

محبساتش الصافية الضحكة طلقاتها بجهد تا دار كلشي كيشوف فيها

الصافية : اويلي باين العربون مع هاد البراهش لسانهم مضا من درعهم

عصام :سكتي نتي لي بقيتي لينا

المساعدة : فلخر ديال شهر غيكون رابور نقطة غتخسب ليكم مع نقطة دالسلوك

خرجات و خلاتهم وسط ديك الروينة

جرو الكراسة و كلسو وسط ديك الروينة شي كيرش الصباغة على صاحبو و شي كيررسم فوجهو ها لي معمر حالتو جاو واحد جوج و وقفو على اسمر هازين الصباغة فيديهم

- دابا هادا لرسمنا ليه فوجهو مغايبانوش لوان ؟

- لا لا اصاحبي اش بغينا فهاد العزي (جراو عند الصافية ) هادي وجهها بعدا فيه الضو تا لحطينا الألوان غيبانو

خرجات فيهم عينيها بصدمة انا اسمر تنهد حيت تهنا منهم

الصافية :(هزات دري من قاميجتو و قرباتو لوجهها )سمع البرهووش والله و ضور بساحتي تا نشويك

باقي مكملات تا هدرتها و هز يدو عامرا بلون الحمر و ضربها لفخضها تا ترش ليها السروال كامل

غير شافت المنضر تغرغرو عينيها كولشي تصدم خصوصا السروال فالباج

الصافية :اويلي على شووووهة ليومااا غنحمر ليه قزيييبتووو( يلاه كانت غادا تشدو و هو يجرها عصام تكلس )

عصام :واش باغا تخرجي علينا

أسمر : الله ياربي دووز هاد الشهر على خير عمر وجهي ما يبقا يجي فوجهم معرت انا اش وصلننني هنااااا

عصام : هادو خاصهم دوا دنعاس باش يتكالماو ولا عرفتو شنو كل جوج يشدو صف البراهش غنلعبو معاهم نديرو ليهم داكشي لي بغاو و غدا يحن الله

دار عند الصافية و حيد قاميجتو بقا غا بتريكو لتحت

و عطاها ليها

عصام : و هادي ستري بيها راسك لبسيها تا تخرجي باش متعمريهاش تا هي

الصافية :(ابتاسمات ) هاي هاي ولاهيلا جنتلمان نعوضها ليك فساعة الخير.الكروشار

فحين أسمر زاد كالس حدا لبراهش كيشوفو فيه وكيشوف فيهم .

زاد عندو وحد لبرهوش مصبغ يدو : عمي شوف شوف

يلاه غيحني يشوف نزل عليه لبرهوش بتصرفيقة لوجه تاطبع فحنكو يديه بصباغة صفرا.

شد على حنكو كيشوف فحوراء لي تتموت بضحك

ضحك أسمر بزز خشا يدو فصباغة وهزهاا ضارب لولد بتصرفيقة لوجهووو..

جمعات حوراء ضحكتها: اويلي اش تدير راه غير صغير؟

أسمر: علاش واش حتاش صغير من حقو يصرفقني ويتقب لمي عينيي ويخور لي مخي؟

زاد لولد عند حوراء كيبكيي..

معنقها وهي تتسكت فيه هزز يدو تانية ضرب بيها حوراء من لور مخليها مطبوعة بلحمر..

وزاد بجرا عند لبنات كيضحكو: سرولناهم بجوج بيهم

طلق عصام ضحكة مسموعة: عطيها عطيها طريكوك

أسمر: لابس غير واحد

تم خارج وعصام وقف كيحيد سروالو: لابس جوج سراول امجاهد متخافيش..يلاه هبطو لقا راسو لابس غا سروال وكارصون بداو تلاميذ كيضحكو وتا لبناات كيضحكو بجهد..

طلع سروالوو :بربي تا كونت لابس جوج فين مشا لكولون دلوليدة

.جا على راسو طريكو .

أسمر: ستر بيه راسك نتا ولا هي ولا دابزو عليه

وصلات ستة د لعشية و خرجو و جاو فطريق كيتمشاااو وصلو لبلاكة د طوبيس و ركبو و مع حوراء و اسمر جديد عليهم هاد لهيت غير صافية و عصام لي عاونوهم و قطعو وراقيهم و جلسو

عصام: تفو عمرني خلصت ديما سالت

صافية: مافيها باس تخلص مرة مرة ولا حادك تلوحهم ف المعجون و الكالة

عصام:(كيعوجها) واديها سوق راسك

….وصلو لشارع فين وقف طوبيس و هبطو و هوما تابعينها كيشوفو دربها المهمش و مقاااودة عليه حتى طلعات لواحد الدار و طلعو معاها حوراء شادة فيها و خايفة هادشي جديد عليها …دفعات الصافية الباب و بدات كتعيط

صافية: حااااادة ….دراري جاااو

…خرجات حادة لابسة قفطان زرق و دايرة جالوق د البلاكيور و مطلسة وجهها بلماكياج و نطقات ….

حادة : مرحباااا مرحباااا زارتنا البرااااكة دخلو نعمرو كاس د اتاي

صافية: بلااااش راه تسالا لينا سكر

اسمر: دابا منلخر شنو بغيتونا نديرو

حادة : انقصرو (لاحت عليهم قفاطن و نطقات ) لبسو هادو …

عصام: اش هادا ؟؟؟

حادة : قفاطن الشيخات ديالي كيلبسوهم و دابا مسااافرين

اسمر:(ضار عند الصافية لي كديرلو عفاك بيدها ) ولكن حنا تقال لينا غير انطبلو بلبنادر و دربوگة

حادة: اوا انا عندي غير شيخات لي كيطبلو و زيد عليها المدير ديالكم ايحضر لقصارة و الى مالقاش شيخاااات لي واعدتو بيهم ايعاود يديرلكم مجلس تأديبي

عصام: (كيقيس القفطان و كيتعوج) ويييلي احااادة ماعجبنيش هاد لون بيني كحلة…

حوراء :(قربات منو كدير بحالو ) ويلي يعطيك الدل جيتي على مزويناتك

…تفرشخو بضحك و كيضربو فيدين بعضياتهم و صافية شافت ف اسمر

صافية: اش قلتي ؟

اسمر : مغلبسش هاد لخرا هذا

عصام: دينك خصك ترضوو

اسمر:زيدو نشوفو حريرتكم فين بغات توصل…

….بدات حادة كتلبسهم فلقفاطن و تقاد ليهم لمضمة …جابت تقاشر و خشاتهم فصدرهم باش يكبر و جابت وسايد صغار لصقاتهم مع طراميهم و شداتهم ب الحبل باش مايطيحوش ولاو دايرين كيف شيخة طراكس…دازت لوجههم عصام عطاها وجهو ديرليه ماكياج و اسمر مابغاش جابت شيلان و دوزاتهم على كمامرهم نقباتهم باش مايتفرشوش غير عينيهم لي كيبانو اما حوراء و صافية بقاو عاديات لبسو قفاطنهم و قادو شعرهم و بدات الصافية كتوريها …

صافية: شوفي منين كيبدا الميزان كنبداو غير نغنيو منين كتضرب الضربة لخرة كنتشقلبو هاكا (تشقلبات)

حوراء: واااش مكتفرعش ليك ظهرك

صافية: هااادشي ولفناه مهم تحركي بلاصتك بلموزون و حيحي و بقاي ضاحكة… (كتشوف ف عصام و اسمر و كاتمة ضحكتها) ماتنسااااوش ضورو على لغرااااماااات راه موهيييمين….

خرجو دايرين صف واحد مور واحد …هبطو من دروج و جات صافية كتجري رمات على حوراء النقاب ديالها …

الصافية : هاكي راك نسيتيه نتي باغا تشوهينا

حادة : الصافية سربينا راه عمبولا مازال تابعاه كورصة اخرى …

الصافية: وصافي هاني جايا

…جابت واحد صاك كبير و طلعات معاهم ف البيگوب…جالسين واحد حدا واحد و هازين لبنادر و طعارج ف حجرهم…

حادة: سير على الله اعمبولا

عمبولا:(كيضحك و يهرنط) ابانلي جبتي شيخات جداد احادة لاخرات مابقاوش قاضيين ليك الغرض خخخههههخه

حادة : اوا ساعة الله كل وقت ووقتها

عمبولا: اوا سمعونا شي طرح العيالات مال هاد البيكوب ايتحرك هكك

حادة:(غمزاتهم) يالاه بداو

صافية:(هزات بندير و بدات تحنحن) واااا شربت الكاااااس اللول تحلووو عينياااا بااانوووليااااا بيبان صويييرة

عصام:(كيضرب الطعريجة و الحرة كتبقش بيديها ) واااا هاااايلي يااااواااا هاااايلي ياااوااا

اسمر:(كيرقق صوتو) الكاس الاول شربتووو تحلو عينيا بااانووولياااا بيبااان صويرة

عمبولا:(كيصفق و يضحك و هو يغمز اسمر من زاج د بيكوب) اتباااارك الله عليك مليييحة

خنزر فيه اسمر

الصافية: واااا هاااايلي يااااوا و مك اوا شارفة و هبيلة وا بغات الحنة بغات سواك وا بغاااات العزري يتساااارا بيها (ضربات عمبولا لكتفو كضحك)

حوراء:(كتبقش بيديها و تزغرت ) واااا هااايلي ياااااوااا هااايلي ياااااواااا يويووووويوووووي

عصام :(نسا راسو و بدا يتحير) واااا هاااايلي ياوااا و مك اوا شارفة و هبيلة و بغات الحنة بغات سواك وا بغااات العزري يتسااااراااا بيهاااا

اسمر :(كيضرب البندير و مخشع) هااااايلي ياااااوا

الصافية: (بقات كتلعب مع حادة بكتفها) الله معاك ا حادة الغزاااال غير بيعيني و شري مالي الشابة يا المعناااااوية

حواء: اللله معاك الحادة لغزال غير بيعيها و شري مالها ا والله ماتجيبلك الثمااااان

اسمر : الله الله النبي يا رسول الله و القاضي فيناهوا فالفيلااااا (كيشوف ف حوراء)و القاااااضي فينهووو

عصااام:(فنفس الميزان) فييينهواااا

اسمر: و بنتووو

الصافية : فييين هي

حوراء: هاهي

اسمر : و حناياااا

كلهم: فيييين حنااايااا

اسمر: و العزيز على ميمتو عمرووو مايتخص…

ختماتها الصافية بواحد التزغريتة عاااالمية و عصام ب ضربة حوراء ف طعريجة و سالاو كيرتاحو و حادة غير كتشوف فييييهم مبهوطة و مبتسمة…

حادة : تبارك الله عليكم العيااالات ههه

عمبولا : وااا شيخات هوما ا حادة الله اعطيهم الصحة

حادة : اوااا راه الصح و العمل…

عمبولا : هاحنا وصلناا هبطو على سلامتكم …

…هبطو كاملهم و هازين ماطيريال و اي حاجا ديالهم و قربات حادة من عمبولا و نطقات

حادة : سير الله اعرض ليك الخير و منين تسالي رجع دينا

عمبولا :(كيشوف ف اسمر و يضحك) نجي نجي علاش لا (غمزو تاني )

اسمر: يااااربي صبرني (جراتو الصافية دغيا كترغبو) صاااافي سير حناااا خدامين دابا ….

كانت الخزانة فوق السطح مصايبة و مقادة …دخلو لدار و طلعو فدروج لي كانو مضيقين لبني قديم …وصلو لسطح لقاو رجال فقنت و لعيالات فقنت كولشي لابس و مقاد على الحالة بغاو غير اعرفو سبب لقصارة حتى واحد ماقاليهم شيحاجا داكشي مامعروفش….جات مرا فقرابة الاربعينات عند حادة و سلمات عليها

سهام : (كتلوك المسكة) اهلا ختي حادة لباس عليك

حادة : لباس اختي فين مالين دار كولشي بيخير اوااا شفتك دغيا رجعتي من السفاااار

سهام : اوا صافي ضاع لبلان و رجعنااا راك عارفة لحسن دغيا كيتفگع …ماعلينا مع وصلت ڤيبيت عليك

حادة : اوا مزيااان …اوا منين نقصااني لفرقة ضبرت على هادو يعاونوكم نتي و صافية ف الميزان

سهام:(كضحك مع اسمر و عصام ) هااانيا مرحبااا بيهم يشربو لحرفة…

حادة: يالاه العيالات وجدو ليا راسكم

…مشاو كيقادو الجلسة و الميزان…عصام و اسمر جالسين فوق الكرسي و الصافية و حوراء و سهام واقفات و حادة واقفة بين عصام و اسمر ففموالميكرو باش يغني…كحز عصام لور و هو ينغز اسمر …

عصام : ورق ليا على المدير شاد صف اللول

اسمر : جبتي التيليفون صورو

عصام: نسيييتوو تفو …

حادة : شششت سكتونا انبداو… (بدات تقاد فالحبال الصوتية) مانشوف نعاس انا مانبات هاني نكب ليطرو و نزيد الليطرو تاني …

…تسمع تصفار و سكايرية كيبقشو و فرحانييين و يعيطو بسمية حادة "تبارك الله علييييك "

حادة :(ضحكات) اكووولشي محن هههه يالاه العيالات بدااااو

شاف عصام ف اسمر و هوما يشخدوها بالبنادر و حوراء و الصافية بطعارج و كيشطحو…

حادة : حبك نتي جااااابني بلييييل جاااابني بليل ماااابياااا ماعلياااا

عصام و اسمر : مااااابيا ماعلياااا

حادة : حبك نتييي جاااابني بلييييل جابني بليل مابيا ماعليااااا ديييييمااااا زهري مع المشاكيل البوليس و الجادارمية…زهري مع المشاااااكييييل البوليس و الجاااادارمية

الصافية :(كتلوز ب الموزون كتمشي حتى لقنت و ترجع و سهام مقابلاها كدير بحالها ) حبك نتييييي جابني بليل جابني بليل مابيا ماعليااا

حادة : ماااانشوف نعااااس انا مانبات هااااني نكب ليطرو و نزيد ليطرو تاني يااا قوليا راك نتي مسكراني فين مادزت انا لاراف شاداني….

عصام و اسمر : يااا قوليا راك نتي مسكراني فين مادزت انا لاراف شاداني….

الصافية :(غمزات حوراء) تشقلبيييي يالاه

حوراء: يااااا بسم الله (طلعات يدها لفوق و هي تسبق الراس ماجات فين تكمل تشقليبة حتى بقاو رجليها معلقين ف سما و راسها معوج) عتقييييي عتقييييي

الصافية مشات عندها كتنوضها حتى ناضت و عاودات قالتلها تشقلبي …مع باقي مدوخة بتشقليبة لولة و زادت ثانية و هي طيح على سكايرية….

حوراء ؛ وا مي ياراسي

….ماداتهاش فيها الصافية و كملات شطيحهااا

تسالات الاغنية لولة و رتاحو شوية …

حادة : نوض جمع الغراااامة سربي

عصام: العاقة …هي لولة

…ناض كيتبودر ب صدرو و طرمتو لي صايبوهالو ب البونج و كيقلد مشية لبنات هز البندير و بدا يضور على رجال ها لي كيتلوط عليه ها لي كيتغزل بيه ها لي بغا نمرة …وصل حتى لعند المدير و هو يشدو من يدو

المدير : عمرني شفت هاد الجمال هناااا اشننو سماك الله

عصام:(ضحكة صفرة) سميتي سوسن

المدير: يااا حليلي يا سوسن…(جرو كيهمسلو) اجي عندي شي قريعاااات مزيانين نضربوهم انا ويااااك

عصام: هههه ويلي يا الحاج اوا ارااا ليا حلااااوتي بغينا نذوووقووو من فلوسك بعداااا

المدير: كوووولشي دياااالك (جبد كاع جيابو و حطهم ليها ف لبنذير)

عصام: اوا دابا دويتي غير تسالا لقصارة تسناني لتحت …

…مشا كمل الضورة على رجال و رجع لبلاصتو كيتمختر حط لغرامة لحادة و جلس مفقووووص ….

عصاااام: صاااافي على خر يااااامي ولييييت خنثى

اسمر:(كاتم ضحكتو) اتزعطووو فيك رجال طيحتي على لبنات سوق

عصام : سكاااات عليا سكت …المدير طاح فيا

حوراء:(حازمة زيف على راسها و جلسات) مابقيتش قادة ندير شيحاجا راسي ايتفركع دعييييتك الله اصافية

الصافية: و انا شنووو درت نتي مكتعرفيش تشقلبي

حوراء: اميييي راسييييي كنشوف جوج جوج من لحاجة

حادة: جمعووو راسكم انبداااو

سهام: غير عذريني انا احادة مااانصيييبش ويلي عليا (تحنات عند اسمر و نطقات) واااش مانلقاش عندك لخروق جاااتني الكافرة بالله …

اسمر: (كيمثل صوت بنت) الكافرة بالله؟

قرب عندك حوراء: شنو هي الكافرة بالله؟

حوراء: هما لي مكيأمونش بالله

اسمر: فاخر يامي وليت نشطح مع الكافرات

قرب اسمر عند سهام: الله يهديها الله يتبتك على د.ين الله

سهام: أاا كفاش؟ ماعلينا كيشتي لحسن داني نعوم فلبحر و خرگت لما تحتي و دابا هاهي جاتني بلوجع غير عنقيني الحبيبة غدا نشريهالك

أسمر:لوجع؟

يلاه فهم لبلان خنزر فحوراء كيتحلف عليها هزات كتافها بمعنى معرفتش.

حادة: سهام سيري لصاكي اتلقاااي سوكور خلي لعزيزة تخدم

….مشات سهام و هوما بقاو اضحكو و اسمر متقزز و ماحاملش راسو تخنق …

الصافية: اوا صافي هاهي سهام ماغاديش تشطح و حوراء راسها ضرها و انا بقيت وحدي …

حادة: اوا مانخافش عليك بيني على حنة يديك و نشوفو شحال تجيبي فلغرامة

الصافية؛ (عينيها فيهم لقلوبة ) هي لغرامة لخرة ليا

حادة: نتي و شطارتك …

شدها عصام من يدها: كفاش غتشطحي هنا بوحدك خليني أنا نشطح

صافية: علمناهم لحرفة بغاو يورتونا زادت واقفا وهما

شدو بلايصهم مرة اخرى و جلسو كيسخنووو طرح …هزااات صافية واحد الگعدة و وقفااات فوقها و هي مقادة حالتها و كضحك مع رجالة و نطقاااات هازة الميكروفون كتغني…

صافية: اهاااا و بصبر ويلي ويلي بصبر ناري ناري و بصبر …

…بداو يصفرو و يبقشو عارفين الاغنية لي غادي تغنيها ماسخة…

صافية: وااااش هاداااا يصبر (حطات يدها على جنبها) يااااو ناااري نااااري و بصبر …عطيييتو لحيط راااب علياااا احححح ويلي و بصبر

حادة : (موراها كتعاونها) اهاااا و بصبر

الصافية: ياااا ديتووو لطبيب قاليا عري عريييتووو و حشمت اغطيييتووو و ندمت اهااا و بصبر ويلي ويلي و بصبر ناري ناري ….

دراري و حوراء بقاو مبهوطين و تصدمو مابقاتش هاديك قصارة رجعات دعارة

شافو فبعض مخرجين عينهم

أسمر: علامن تتغني هاذي؟

حوراء: معرفتش اشنو لي مشا لطبيب وقالها عريه وحشمات.

عصام: ترمتها؟!

اسمر: دلقدام ولا دلور؟

شافت فيهم حوراء مصدومة: راني هنا ابنادم

الصافية: اهيااااا لعيااالاااات كلكم صباااارااات و الرجااااالة؟؟؟ اش هااااد الحالة (بدات تتشطح كتفيبري)

….شخداااات ديال المعقووول و بداو دراري و لعيالات كيشطحووو و كولشي محيح و طااايح كااااو…شوية قرب واحد من سكايرية عند صافية و شدها من يدها …

سكايري: و شحال تباتي الغزالة ؟؟

صافية:(كضحكلو ضحكة صفرة) اوا حك على جيبك و نشوفو

سكايري:(خرج موس من جيبو و نطق) نتي لي انحك ليك هاد لوجه…

…بداو لعيالات يغوتو و موسيقى حبساااات و صافية غير كضور فعينيها صافي هادي لخرة…ناض عصام بلا مايحس حيد داك نقاب و عرا راسو و هو ينزل على سكايري بالراس ….

عصام: و هادي كيجااااتك مزياااانة توگضك…

تزاد ق الغوات و ناض اسمر حيد حتى هو نگاب و منين شاف صحاب هاداك باقيين يتحاماو على عصام دخل معاه كيضارب ضربة فيهم ضربة فلوخرين كولشي تروبل صدقو سكايرية كيدابزو بيناتهم و حوراء و صافية كيشيرو ب كيسان اتاي…حادة و سهام هبطو هربو و الرباعي منين شافها حماضت و هوما يضربوها بسلتة خلاو الروبالة موراهم….هبط كولشي و بقا غير عصام يالاه بغا ينزل من الدروج و شيحاجا شاداه من رجلو ضار لقا المدير …

المدير : عطييييني فلووووسي المجااااهد

عصام: جااااهد.ت فيهم و الله لاشتيهم طبق مني و لا نقول لمرتك فين كيمشيو لفلوس طلق …

عفس عليه برجليه و هرب هابطين ..ولوسادة طاحت ليه..شدها لمدير معنقها

المدير: ساوسااان وا سوسن ديتي رزقي وعطيتيني رزقك اساوساااانتي

طاح سكران معنق ترمة سوسن.

هربو واحد مور واااحد صافية جارة حوراء من يدها و اسمر كيفتح ليهم طريق و عصام كيجري و شراوط هابطين منو …حتى وصلو لتحت و عطاو رجليهم لريح … غوتات حادة عليهم كتشيرلهم و هي فوق البيگوب د عمبولا

حادة: اجييييو ركبوووو

الصافية: غااااا سيري احادة حتى نتلاقاو فداااار

اسمر : لااا صبري

عصام: اسمر زييييد اصاحبي السكايرية تابعينا

اسمر : لا والله مانخليها فخاطري

…مشا كيجري و هو ينزل على عمبولااا بتصرفيقة

اسمر : غمز لمك الحمار ….

شد عمبولا على حنكو: مولات لون ولعيون ..

…كملو الهروب ديااالهم كيجريو و يجريو حتى كيتقطع فيهم النفس و يعاودو يجريو لقاو راسهم هبطو لطريق لبحر و مابقاش شيواحد تابعهم حتى طاحو فالرملة كيتنفسو بجهد و سخفانين شوية شافو فبعضياتهم و تفرشخو بضحك ….

"بعد شهر "

نزل كيجر رجلوو مع حل لباب وسع عينوو.

أسمر: اشش تديري هنا نتي ؟

شافت فيه ببتسامة: مجيتيش لمدرسة جييت نشوفك

دار منين سمع مو قالت ليه بريفية" أسمر أُوديني؟

أسمر: والوو

حوراء: اش قالت لك؟

أسمر: سولاتني شكون تم؟

حوراء: وقولتي لها والو؟أنا دابا والو

دفعاتو داخلا: أنا أخالتيي .

مع شافتها مو زادت عندها ديجا ولاو عارفين بعض.

الأم: حوراء بنتي مرحبا مرحبا دخلي لاش بقا واقفا تم

زادت داخلا : جيت نشوف أسمر حيت محضرش ليوم لحصص

الأم: اوا راه صباح كان عيان دابا راه ولا بصحتو سبحان الله

شافت فيه حوراء بنص عين: بوحاطي

خنزر فيها تم غادي

الأم: سيري تكلسي نتي وياه فجردة نجيب ليكم شي حاجة تشربوها..

شافت فأسمر: نقل دروس لي فاتك منها

حرك راسو بوخا..زاد غادي وهي تابعاه..

خرج لجردة كالس فكليسة صغيرة حدا بيسين صغير.

جبدات دفاتر حطاهم..وهو كيتفوه: مفيا لي يقرا شي حاجة.

حوراء: غنعلم خالتي أنك مباغيش تقرا

أسمر: نتي معايا ولاضدي؟

حوراء: أووف كورز ضدك

تنهد متكي

حوراء:واش نتا تتعرف تهضر بريفية؟

حرك راسو باه

حوراء: ولهولندية؟

حرك راسو باه

حوراء: وكفاش درتي لهاا؟

أسمر:دارجة عرفتها فاش كنت فلمغرب ريفية من والديا ولهولندية منين كنت فهولندا .

حوراء:تا انا بغيت نتعلم لريفية؟

أسمر: تعلمي

حوراء: لبغيت نقول سلام اش غنقول

أسمر: سلام هي سلام

حوراء:آه وشكرا؟

شاف فيها مصغر عينو: تافوناست(بقرة)

حوراء:اييه تافوناست..ولبغيت نقول شكرا ليك؟

أسمر: زيدي عليها شم لبنت وشك للولد

زادت مو حاطة لعصير ولبسكوي على طبلة شافت فيهاا حوراء

مبتاسمة: شم تافوناست أخالتي

يتبع...