عشقتك دائما وأبدا الجزء الرابع

كان فالبيرو ديالو خداام... حتى دخلات من بعد ماسمعات الإذن ديالو... عارفها بللي غاتكون هي... حيت الوحيدة للي ممكن تدق بابو وتدخل لعندو هي أزهاار.... لدرجة أن الموظفين مللي يبغيو يعطيوه شي ملفات كايحطوهوم فالبيرو ديااالهاا.... وهي للي كادخلهوم لغيت...

دخلاات هازة وراق فيديهاا نطقات وهي كاتقرب لعندو: هاادو يالله جاابهووم سميير...

قبل ماتكمل كلاامهاا طلع رااسو مخنزر... وغير شاافها شنو لاابسة زااد خنزر مخرج عينيه...

غيت: أزهاار وااش كاتحركي مرتااحة؟؟

جاوبااتو باستغراب: آه مرتااحة... علااش؟؟

غيت: على قبل دااك نص توب للي لابسة مامزيرك مااقاجك؟؟

حركاات راسها كاتشوف فكسوتها: ل... لاا عادي مواالفة نلبس هاااكاا...

غيت بجدية: أزهاار أنا عارفك ماامحجبااش وعاارف بللي كاتلبسي بحرية... ولكن هااد اللبااس ماعاجبنيش..

أزهاار: انا كانرتااح هااكاا... ونتا راك تعرفني هادي سينين انا هااكا كانلبس...

قاطعها بصراامة: هااكا كنتي تلبسيي.... (نااض جاي لعندهاا): أناا كانبغيك ونتي عارفة هااد الشي... وكانبغيك ديالي أنا ماشي هي كانبغيك ديال شي كااوري صفر كايتمشا معاها لابسة دوبيااس ومعنقها جنب وهاانية...

خرجات عينيها مصدومة من هدرتو وهو تابع كلامو واقف مقابل معاها كاايشوف فيها من لفوق لتحت: بهااد الشي للي لابسة نتي راك عاابرة جسمك ومخلية كاع تفاصيلو يباانو.. علااش دايرة هااكا؟؟ شنو الهدف؟؟ علااش مزيرة على طاايتك؟؟

بلعات ريقهاا ماراضيااش: أ... أنا حرة نلبس للي بغيت وهذا هو اللباس للي كانرتااح فيه...

زير على سنانو بعصبية وتنهد كايحاول يصبر رااسو: أزهاار... نتي إنساانة مؤمنة كااتصللي وأنا منك تعلمت الصلااة.... وزعما تابعة طريق الله وكااتقراي القرآن... وعارفااه ماراضيش على هااد الشي... (اشار بيدو لراسو): أنا خااصني بززاف بااش نتبع طريق الله بكاع شرووطوو... وعارف راسي مفرط.. وكانطلب من الله يعاوني ويغفرلي قبل مايفوت الحاال.... ولكن فهاادي أنا مستحيل نخلليك تزيدي تلبسي بحال هاد الشراوط... واخا نعرف ندخل لبيتك ونقطعهووم كلهووم...

جلسات فوق الكرسي مصدومة وعينيها حمرين... تخلطات عليها الأمور... ونطقاات: ولكن هادو للي عندي و...

غيت: أنا عارفك مادايراش الفولار ولكن على الأقل كاتلبسي حوايج مستورين شوية بشوية غااتحتااجبي إن شااء الله... ماغانجيش بين ليلة ونهاار نفرض عليك شي حااجة... والظليل راك شفتي الحوايج للي لقيتي فالدريسينغ على الموضة ومستورين ولايقين بستيلك...

حركاات رااسها مطلعة رااسها كاتشوف فيه وابتااسماات: أهااه... وااخا عندك الحق... غانفكر فهااد الشي...

حرك راسو بنفي: مافاتفكرييش غااتنفدي أأزهاار... غاتنفديي..

تنهداات ونااضت: مللي تسالي لوراق عيطلي نجي ناخدهووم؟؟

غيت وهو كايرجع لبلاصتو: باش يجي سمير ياخدهوم من عندك؟؟

ازهار باستغراب: ماعرفتش شكون يجيلهووم...

هز الفيكس كايدوز اتصاال: آخر مرة غايطلع لعندك شي رااجل.. سارة وفاتي هما للي غايتكلفوو بالوراق للي يجيبوهوملك...

أزهاار: وااخاا... حتى أنا هااكا نرتااح كثر... (يالله عطاتو بالظهر حتى وقفها): فين غاادة؟؟

أزهاار: للبيرو ديالي....

غيت وهو كايشوف دوك لوراق: غير جلسي غاتبقاي معايا هنا حتى نخرجوو...

أزهار: وعلااش؟؟

غيت: علااش...؟؟ (سكت كايفكر): غااتراجعي معايا هاد لورااق

كاانو خاارجين من باب الشركة... وهي حااطة دجاكيط خفيفة ديالو فوق ظهرها اكيد بأمر منو وهو بقا غير بالتيشوورط..... قدام الموظفيين وكاع للي كااينين... كل مرة كاايدير تصرف جدييد لدرجة ماابقااوش ... وتأكدو بللي غيت طاايح عمى فأزهاار وهااد الشي مامحتااجش للنقااش... خرجو لبراا... ووقفات طوموبيلتو حدااه... بلاا مااتسنااه يهضر... ضاارت من الجهة الأخرى ركباات... وحتى هو ركب... ديمارا وهي كااتشووف قداامها مرفووعة... شاافت فييه: غيت؟؟

غيت وهو كايشوف فالطريق: عييونوو....

تنهداات كاتفكر ورجعات شافت فيه: الموظفين كلهوم كايقولو دابا حنا بيناتنا شي حااجة...

غيت: آه... وحتى أنا كاانقوولهاا...

سكتاات مخرجة فيه عينيها ديما جوابو على ناابو... حتى فيقها مللي نطق مرة أخرى: ونتي ماكاتقوليهااش؟؟

جاوبااتو بنرفزة: أنا ماكانضحكش...

شاف فيها بنظراات مامفهومااش: هي أناا كانضحك يااك؟؟

بلعاات ريقهاا كااتشووف قداامهاا... حتى حسات بالطومبيلة حبساات شاافت فالطريق كانو باقي ماوصلوش وكاان خرج على الطرييق شااف فييهاا ونطق بجدية: بااقي ماجاوبتينيش أ أزهاار...

يالله بغات تسولو علاياش غاتجاوبو حتى قااطعهاا راافع شوية من صوتو: داابا فهااد اللحظة... أنا غيت... غيت للي كايبغيك وكايغير عليك وكاتبقااي معااه النهار كاامل وكايوصلك حتى للداار وللي مرااقبك سبع سنين هاادي.. (نقص من صووتو): هااد غيت.. شنو كاايجييك؟؟ شنو حااسبااني؟؟

عضات على شناافتها مامنتاظراش سؤاالو هذاا ومامعولااش علييه وماعندهااش جواابو... جمعاات يديها مع بعضهووم كااتفركهووم بتوثر وكاتشوف فالأرض وهي عارفااه كاايشوف فيها وماناويش يديمااري حتى تجااوب... وهاد الشي للي كاان... طلق من الفولون للي كان شااد فيها: أهااه... باغة نبقااو هناا؟؟ (هبط الكرسي ديالو مرجعو اللوور: هااناا متكي.. مللي تلقااي الجوااب اناا معااك...

غمض عينيه وهي حااضيااه لمدة كااتشوف فتفااصيلوو... سااهية وماساخيااش ينووض ولاا يحل عينيه... عجبها هااكااك وبقاات مركزة فييه مبتااسمة... لمدة خمس دقاايق... حتى حسات بيه تحرك وجمعاات ابتساامتها بالزربة... وهو حل عينيه شااف فيهاا.... بلعاات ريقها: أناا... أنااا براسي ماعارفااش شكوون نتا بالنسبة لياا...؟؟ أناا فااهمة بللي علااقتنا مااشي طبييعية وبللي أناا ونتاا مااشي غير مدير ومسااعدتوو... ولكن ماقادرااش نعطي جوااب نهاائي... وماعارفااش...

تنهد كاايشووف فيهاا... إلى هو معذب فهااد العشق سبع سنين... هي راه باقي جديد عليها هااد الشي... ومااشي من مصلااحتو يضغط علييهاا... وماابقا قد مافاات...

نطق بصوت هاادئ: كاانخنقك؟؟

شافت فيه باستغراب ماافهمااتش كلامو وهو كمل هدرتو: مااشي لخااطري... وداير كثر من جهدي بااش مانضغطش علييك..... (حرك رااسو): كاانبغييك وكانغير علييك... ومااشي حب عاادي... (سكت شوية وعاود نطق): ولكن إلى نتي ماقدرتيش تبغييني وقلبك ماادقش لياا... (ابتااسم): واش غانخلليه يدق بزز؟؟ (ضرب بيدو على قلبو): إلى هذا عشق بلا ماايتشااور معاايا وبلا ماايفكر فالعوااقب... كيفااش غانخللي قلبك نتي يدير داك الشي للي بااغي أناا...؟؟

بقااات ساكتة مصدوومة من هضرتوو... حساات بشي حااجة تجرحاات فدااخلهاا... مااشي بقا فيها هو ولكن ماعجبهااش الحاال... بحاليلا قاالهاا بللي ماغايحاربش على قبلهاا... ويلا مابغااتوش مااغايصدعش راسو معااهاا... حتى عينيها تغرغرو... ودغيا شافت قدامها ماراضيااش يشووفها ضعييفة... رجع هضر بحاليلا كايجاوب على أسئلتهاا: أنا نقدر نحاارب العاالم والدنياا كلهاا على قبلك مستااعد ندير كثر من المستحيل بااش تكوني ديالي... وندخل فحرب أخطر من خطيرة ومع أي وااحد... إلا مع قلبك...ماغانقدرش نحاربكنتي على قبلك نتي.... غير غانخلليك تكرهييني...

تنهدمقاد جلستو مطلع الكرسي وديمااراا... وهي بقاات ثاابتة كاتشوف قدامها... حتى وصلوو لحدا الداار ووقف... غير شاافت دارهووم حلات لبااب باش تهبط... حتى وقفها بكلامو مبتااسم: ماغانبززش عليك تكوني لياا ومستحيل نخلليك تكوني لغيري...

ازهاار باستغرااب: ك...يفااش؟؟

غيت: يعني يا لياا ياا.... باااايرة... يعني عاانس ياا آنسة

هبطاات مبتااسمة مزااجها تغير بكلمة منو...واخا ماعجبهااش كلاامو للي قاال فالطوموبيل...ولكن بهادالجملة الأخيرة قدر يفرحهاا...ماعرفااتش علاش هادالأحااسيس المخلطة... المهم كاينين... تمشات معنقة صااكها... حتى قفزاااتها طوموبيل وقفاات حداا رجليهاا... خلااتها بقاات كااتشووف فيها مخرجة عينييهاا... تحل البااب وهبطاات وحدة... لاابسة مزير كثر منها هي للي كانت باقة دايرة دجاكيط ديالو فوق ظهرها... بقاات كاتشوف فيها وتشووف فالدجااكيط... ونطقاات: ههههههه.... الدجااكييط دياالوو هاادي؟؟

بقاات سااكتة مافهماتهااش... ولوخرى رجعاات شعرهاا ورا وذنهاا ورجعات كاتشوف فيهاا مصغرة عينييهاا... نطقات مفكرة: هااا... نتي للي عيطلي داك النهاار على قبلك... (قلباات عينيها): كنتي مرييضة زعماا... (عوجاات شفايفهاا): قاالك هااذي هي عائلتيي....

زادت قربات لعندها حتى تلاصقات معااها... وتابعات كلامها بجدية: كاانبغيييه... ومن هذاا زماان... (ميلاات راسها كاتشوف فييها): يالله بنتي لباارح... وباينة برهووشة عااد... وقلتي آش ندير نووض ندخل لحيااة غيت... اصلاا رااه ماكاايبغييش... وجامي بغا فحيااتو... بلا مااتحلمي ألغزاالة....

تنهداات يالله فهماات آش قصدهاا قلبها حساات بالعافية شااعلة فييه... وجهها حماار وبانتلها فشي ترييشة... حيت من طبعها ماكااتسكتش... هزاات صبعهاا حطااتها على صدرها بعدااتها عليها بالشوية ونطقاات بثقة: بعدي علياا لهييه... حييت خنقتييينيي... عااد هضريي... (عنقاات الدجااكييط ديالو عندها مكملة كلامها باستفزااز): هاادي دياالوو... هو عطااهالي حييت مابغااش يشوفني بناادم بهااد اللبااس... (طلعاتها وهبطااتها): ونتي؟؟ عاادي... (بدلات ملامحها لأسف مصطنع): حرة وتلبسي للي بغيتي سعدااتك... ماكانش للي يغيير علييك...

خرجات لوخرى عينيها وجهها صفاار يالله غاتنطق حتى قاطعاااتها: سيري لعندو... وقوليليه هااد الشي.. علااش مبرزطااني أناا؟؟

تحركاات مبعدة عليها: إلى بغااك ولا غير شااف فييك... الله يهنييك بيه... وانا كانتمناالك التوفيق... (ابتااسماات باستفزااز وعطااتها بالظهر جامعة ابتساامتها كااتنفس بالجهد... جبدات التيلي من جيبها مركبة رقموو... غير سمعاات صووتو): آلووو....

نطقاات: لااا واالوو... غير كنت بغييت نبدل سميتك فالكونطااكت ونحاايد مديري وقلت نتشااور معااك قبل...

غيت: وشنو كنتي غاديري فبلااصتهاا؟؟

ابتااسمات عاضة على شناافتها: كنت غاندير عشقي.. إلى ماعندكش ماانع...

.......

كان باقي جالس فطوموبيلتو... من ورا مااحطهاا حدا الداار... تمشاا قاصد بلاصة خاالية ووقف... كاايفكر مرفووع... هو قاالها بللي ماغايحاربهااش هي... وعندو الحق... الحب مااشي بزز... ويلا قلبها مابغااهش مااعندو ماايدير... زير على الفولون بيدو بعصبية... هو راه ماقادرش يتخيلها ماكاتبغييهش... واخا تبقا حيااتها كاملة وحيدة غاايبقا يتعذب بحال كيف ما تعذب فالسنين للي دازو... يعني بغااها تكوون ليه ودياالو حبيبتو عشيقتو مرااتو وأم ولاادو... فيقو صوت التيلي للي صوناا... حرك عينيه جهتو ماناويش يجااوب... غير شاف نمرتها هزو بالزربة متعجب... غير جااوب بآلوو قاالت كلاامهاا للي صدمو... حل فمو خاارج من الطوموبييل... ونطق كايحاول يستوعب: م.. ماافهمتش...

ازهاار: شنو للي مافهمتييش؟؟

جاوبها مزير على الحرووف: مافهمتش واش كاتلعبي على أعصاابي ولا شنو كاتحااولي ديري؟؟

سمع صوت ضحكتها للي كان بحاال الرنة على سمااعتو ونطقاات: طراا وااحد الموقف صغيير داابا للي خلااني نعرف شحاال كانبغييك وشحاال كاانعشقك

خرج عينيه ورجع شاف فالتيلي كايتحقق من الرقم واخا هو متأكد من صوتها ورجعو لوذنو حااط يكو على راسو كاايمشي ويجي بهستيرية... نطق بصوت مرعوود: فيينك نتي دااباا؟؟

جاوبااتو ببرودة: أنا يالله غاندخل للدار...

قاطعها بحدة: ماتدخلييش هاانا جااي لعندك...

أزهاار: وااخاا انا غانستنااك فلاري دالطوبيس للي كاينة هناا..

يالله غاتقطع هضر: ماتحاايديش الدجاكيط على ظهرك...

ابتااسماات: طلبااتك أواامر...

قطعاات خلااتو كاايشوف فالتيلي مصدوم... غير وعى ركب مديماري بسرعة مفرطة دااير الحس ورااه وحاارق الضوااو... أما هي كاانت وااقفة كااتسنااه بشوق... حتى وقف بالزربة داار الصووت والدخاان بكثرة ماكان يجري... خلا كاع للي كان تماا منتاابه... شاافتو وابتااسماات قبل ماايهبط زاادت حلاات البااب وطلعاات... قرباات بااستو فحنكوو وحايداات الدجااكيط لااحتها اللور... وهو بااقي مصدووم كاايشووف فييهاا حتى نطقاات: آش كااتسناا؟؟

غيت: هاااا...؟؟؟

شاافت فالفوولوون: روووول...

حل فموو بصدمة كثر من اللولة... هدرتها بنجااتو... حك على عنقو حااس بالعرق هاابط منوو... وديماارا كاايسووق تاايه وهي كااتشووف فالطرييق... نطقاات بحمااس: بغييت نمشيو لداارك..

شااف فييها مرة أخرى مصدووم... وهي تابعاات كلامها كاتجبد التيلي من الصااك: غانقول لخالتي بللي غاانباات خداامة....

شهق مخرج عينيه هي ناوية تباات... ورجع كايشوف فالطريق حاس براسو غايحمااق... يالله حس بيها هي قبل ماتعرف حقيقتوو والصدمات للي كان كايخلليها تعرضلهووم... خرج على الطريق الرئيسية متاجه لدارو وهي هضرات مع خاالتهاا... وقطعاات شاافت فيه: كايجيني عذااب الضمير مللي كاانكذب... ماعزيزش علياا لكذووب..

قفزاات مللي حبس الطوموبيل بالجهد حتى مشات وجاات فبلااصتهاا ونطق: يعني داابا ماكاتكذبيش علياا؟؟

جاوبااتو: فاااش؟؟

شاف فيهاا: كيفااش فااش؟؟

شدااتو من يديه ونطقاات بجدية: ركز نظرك على عينياا.. وشووف شنو غااتلقاا؟؟ أناا عارفااك غاتكون كاتقرا لعيوون حييت ذكااءك يخلليك تقرااهووم...

بلع ريقو كاايشوف فعينيها بتركييز ويديه كايترعدو وسط يديها وحتى هي كااتشوف فيه حتى غمضااتهوم مزيرة على يدييه: لوونهووم زوييين وبززااف...

جاوبها مرفووع: شنو هماا؟؟

نطقاات بابتساامة: عينيييك....

تنهد كاايحك على جبهتو وه١ر راافع صوتو: أزهاار وااش شاربة شي حااجة؟؟ (شاف فيها): شنو وقع مللي نزلتي من الطوموبيل..؟؟

أزهار مغوبشة: وقعات واحد الحااجة مازوينااش... (شافت فيه): ولكن هي للي كانت السبب بااش عرفت قيمتك عندي...

غيت مصغر عينيه: شنو وقع؟؟

ازهاار بقلق: جاات وحدة وقالتلي كاتبغيك من هذاا شحاال وأنا ماعندي مانصور منك...

ابتاسم وعينيه لمعو فالبلااصة: وااش غرتي؟؟

حركات كتافها: غرت وعرفت رااسي بللي كاانبغييك...

ضحك بنشااط: هههههه... شكوون هاادي؟؟ غير نمشي نشكرهاا على شنوو داارت؟؟

ضرباتو لكتفو: إلى شفتك حداها ولا معااها غااننن...

غيت بفرح: غاا شنوو..؟؟ هااا...؟؟؟

ازهار كاتشوف قداامهاا: واالوو غير زيد نمشييو...

رجع ديمارا طوموبيلتو ودااخلو غاايمووت بالفرحة... ولأول مرة فحيااتو يحس بسعاادة كبيرة لهااد الدرجة ويحس بالكماال فحيااتو بحاليلا وصل للخلااص... وأخيييرا الحب الممنوع رجع مسمووح... وعشقو رجع حتى هو عشقهاا...

كانت جالسة فالصاالوون.. لابسة سيرفيت وجامعة شعرها كوت شووفاال... بدلاات حوايجها مللي دخلاات لدااروو... كاانت مرفوعة كااتفكر... قلبها كاايضرب بسرعة... كيفااش ماقدرااتش تفسر مشااعرها اتجااهو وتغاابات لهااد الدرجة؟؟ وشنو وقع باش قدراات تفهم وتسمي إحسااسها اتجااهو... وااش غيرتهاا هي للي ترجماات كلشيي؟؟ ولاا هدرتو للي خوفااتها من انها تخسروو... منين جااتها الجرأة بااش تتاصل بيه وتهضر معااه بلا خجل ولا توثر...؟؟!! وعلااش غاتحشم وتتوثر...؟؟ ياك هي أزهاار... للي ماكاتخااف ماكاتحشم... عاادي هي غير رجعات لطبيعتها والسلاام...

فااقت من أفكاارهاا مللي جر الكرسي حدااها وجلس عليه بالمقلووب... شاافت فيه... ودغيا تقلبو نظرااتها لإعجااب... مللي شاافت شعروو فازك ووجهو بااقي كاايقطر... مسح على لحيتو بيدو: ماانشفتش حتى بالفووطة فرااسك؟؟... جيت زرباان بااغي ندوي معااك....

جاوبااتو مرفووعة: هااا...؟؟ فااش؟؟

غيت كايشووف فيها بجدية: شرحيلي شنو وقع؟؟ آش هااد السرعة؟؟ هااد الشي ماكانضنش يكوون وقع حتى فشي فيلم قصيير...

بلعاات ريقهاا كاتشووف قداامها سااكتة... وهو تاابع كلاامو كاايدوي بهدووء: ماتعيشينيش شي حااجة... للي مااشي حقيقية... حييت هااكاا غااتقتليني وأناا حي... عاارفة هااد الشي؟؟

تنهداات كااتشووف فنقطة بعييدة وهضراات: أنا بصح ماعقلتش علييك بحال كيف مانتا عقلتي عليا.. (ابتاسمات بحزن): أصلا فديك اللحظة.. كنت تقريبا فاقدة الذااكرة... (شافت فيه): كنت كانسمع بيك... كنت كانتفرج فاللايفاات ديال لبناات... كاايجبدوك بززاف فهضرتهووم... غيت الدرقااوي غيت غيت... كااتعجبهووم ودااك الشي... ههههه... خلااوني نقلب علييك فالسوشل ميدياا ونشووف شكون هذا للي دايرين هااد التحدياات كلهوم على قبلوو... وباغيين مجرد صورة وهما قرااب لييه... وهاد الشي كاان مستحيل بالنسبة ليهووم... (تنهداات): طلعولي بززااف التصااور دياالك... كاتكون تمشى بوحدك مخنزر ولا معااك شي رااجل... ماكاينااش ولو صورة وحدة ليك ونتاا ضااحك ولا على الأقل مبتااسم... (ابتااسماات): بحاالي بحال أي بنت شاافتك... عجبتيني وطولت الشوفة فتصاورك... ولكن حاايدتهووم ونضت لشغاالي... حيت جاامي فكرت ولو تفكير أني حتى نتلاقا معااك... (ربعات يديها كاتفكر): مللي قنعاتني خالتي نجي للشركة ديالك ماكانتش عندي نية اني نشوفك مبااشرة وقلت ممكن نخدم سطاجير فشركتك لمدة قصيرة ونتخلص شوية ونستلي ولكن ماجاتش فبالي غاتكون حاضر ولا نتلاقاو... خصوصا أني سامعة بللي ماكاتعمرش المغرب كااع...

(عضاات على شناافتها شاردة): نهار جيت للمقابلة وقالولناا بللي نتا للي غاتقاابل شخصياا... قلبي قفز... وكنت باغة نهرب بحاالي بحاال أي وااحد تماا.. جاو فبالي تخنزيراتك وقلت باينة غااتغوت علياا ولا أصلا ماتعطينيش وقت.. حيت يالله عندي الإجاازة... ومادام نتا للي غادوز المقاابلة شخصياا... يعني رااك ماغاتقبلش بللي كاان.. (شافت فيه): ومللي دخلت لعندك وشفتك مباشرة قلبي قفز... ومابقيتش عارفة حتى ندوي مقااد.. (ضحكاات): ههه... حتى لون الحيط ماعرفتوش وهو قداامي... أصلا الشوفة فيك مبااشرة خطييرة... رجولتك تصرفااتك... عينيك... وهضرتك... هذاك النهاار أثرتي فيا ومن اللقااء اللول... وجبت مدة وأناا كاانفكر فداك اللقااء... أصلا ماطولنااش حتى وصل اللقاء الثااني... دغيا تقبلت واخا ماجاوبت على حتى سؤاال... ودغيا رجعت انا المرشحة باش نكون المساعدة ديالك... ومللي جيت لعندك باش نسولك... طريقتك فالتعاامل... وتصرفاتك لغريبة معاياا... (حركات راسها): هاد الشي كاامل خلاااك تسيطر على تفكيري بالليل وبالنهاار...

ازهاار: كنت كل نهار وكل ماكادير شي تصرف كااتزيد تشغل بالي كثر... وكل ماا استغربت من تصرفااتك كانزيد نتأثر بييك... وفكل ليلة قبل ماننعس كانخصص سااعة للتفكيير فييك... حاولت نبعد ونخلق لراسي أعذاار... ونحميه منك... كانقول اكيد عندو شي غرااض من هاد المعااملة ماايمكنش تكون شي حااجة أخرى... حتى للنهار للي وقع داك الشي فوق لسطاح واعتارفتيلي بكلشي... توضحاات الأموور.. وزدتي سيطرتي على تفكيري.. ولكن... ماكنتش فااهمة مشااعري... للي كانت بادية من اول نهار شفتك فيه فالشركة... رجعت كانبغي نكون قريبة ليك... وكاايعجبني اهتمامك بياا... وهاكا وماافهمت والوو فراسي... (شداتليه فيديه هوو للي كان مرفووع كايسمع لهدرتها): اليوم مللي قلتي ديك الهدرة فالطوموبيل جرحتيني... ماعجبنيش الحاال... ماتقبلتش انك تسمح فياا.. بغيتك تحااربني انا على قبلي أناا... (ابتاسماات): وغير قلتيليا يا ليا ياا باايرة عجبني الحاال... (صغرات عينيها): شنو كاايعني هااد الشي؟؟ (تنهداات): ومللي جاات هاديك وقاالت بللي كاتبغيك عيني فعينيها... حسيت بالناار شاعلة فقلبي... (زيرات على يديه): حسيت بإحسااس بحاال داك للي حسيت بيه نهار شفت واليديا مقتووليين... غرت بطريقة خطييرة... وبقيت كانتخاايل نقتلها فبلااصتهاا... بلا ماانفكر اتاصلت بيك... حيت حسيت بللي إلى تعطلت غير شوية غااتمشي مني بمرة... وهاد الشي للي ماتقبلتووش....

ابتااسم بصدمة: فحيااتي كااملة... كاانقسملك بلا إله إلا الله.. إلى أحلى وأروع تفسير وأعظم قصة كاانسمعها هي هااذي... وبأحن صوووت... (حط يديها على شفاايفو كاايبووسهووم): عرفتي نتي داابا شنو درتي؟؟ (شاف فييها): نتي داباا عطيتيني حياة جدييدة... وخلليتي هااد النهاار يكوون متميز بالنسبة لياا... وجاامي ننساه فحيااتي... (ناض من فوق الكرسي وحلس على ركابيه باقي شاد فيديها): كنت غانتناازل إلى مابغيتينييش... (شاف فيها بجدية): داابا التناازل ماكاينش فقاموسي معااك... والله شااهد على ما أقوول... مستحيل نخلليك.. ولا حتى نفكر فييهاا.. هاد المرة وااخا نتي تبغي تبعدي... مستحييييل تقدريي... وأنا قلبي غاايبقاا يضرب من هنا الفووق غير على قبلك... ونهاار يحبس غاايحبسوو بجووج...

(شد وجهها بين يديه وقرب لعندهاا ملااصق جبهتو مع جبهتها وهي مغمضة عينيها ونطق): أول وآخر وااحد غاايقربليك هو أناا.... وأول وآخر وااحد غاايحط شفايفو فوق شفايفك هو غيت... (تنهد): أصلا أول وآخر وااحد غاتجلسي معاه هااكا وقريبة ليه هو أناا... (حط شفاايفو فوق شفاايفها كاايمررهوم بااشوية وهي كااترعد بين يدييه... حتى رجعاات لمستو قبلة سااخنة من عندو هو للي متحكم أما هي بقاات جاامدة غير كاترعد

سالا البووسة فااصل شفايفهووم غير بزز... ونطق وهو حاط نيفو على نيفهاا: شششش... علااش كاترعدي؟؟ نتي بين يدين عااشق مجنوون.. يآذي رااسو ومايآذيكش..

بلعات ريقها حااطة يديها على كتاافو ونطقاات: و.. والووو... (عنقااتو مزيرة علييه وهو بادلها العنااق من بعد مافااق من الصدمة... كانت مزيرة عليه لدرجة غريبة وانفااسها كاايصووتو فوذنيه... حتى نطقاات): كااانبغييييك....

عض على شنااافتو حتى خلا فيها جرح صغيير وزااد زيرهاا عندوو: وأنااا كل دقة من قلبي كااتضرب بسميتك....

بقااو ساكتين لمدة معانقين بجووجهوم ماسااخيينش يبعدوو... حتى حس بتنخصيصهاا... دغيا فرقهاا عليه كاايشوف فيها وهي كااتبكي.... نطق بقلق: ماالك علااش كااتبكي؟؟ وااش..؟؟

قاطعاتو بصوت مرعوود: أول نهاار شفتيني؟؟

نطق بالزربة: ماالو...؟؟ (عاد تفكر إمتا شافها أول مرة... سااط مكره... عاارف بللي طريقو ليها عاامر شووك وهو مستااعد يقطعو): نساايه... انا مستااعد ننسا أول لقااء بيناتناا...

قاطعااتو مبتااسمة ودموعها هابطين: هذااك النهاار كانتعذب فييه... مللي كايوصل دااك التااريخ كاانمرض... أصلا مللي كاتدخل الشتاا كاانكرهها وماكانحملهااش عاارف؟؟

حرك رااسو: آه عاارف...

ضحكاات كاتشوف فالسرجم للي كان مندي مقابل معااهوووم ونطقاات: رجعت كاانعشق الشتاا... (شافت فيه): حيت فيها حبييت وعشقت.. (تنهداات): وهذااك النهاار... غاينقص عذاابي فيه... حييت كاان النهار للي بغيتيني فيه... يعني واخا سالات فيه حياتي القديمة بداات حيااتي الجدييدة...

حرك راسو مستغرب: المقصوود؟؟

شداتليه فيديه مرة أخرى: يعني نتا جيتي وقلبتي حياتي كلها وخلليتيني نرجع طبيعية بحاالي بحاال كاع النااس..

ابتاسم عينيه كايلمعو بحاال شي دري صغيير.... وشد راسها بين يديه بااسو ونطق: نجي نخطبك من عند خاالتك؟؟

خرجاات عينيها: شنوو...؟؟

قااطعها: ماتقوليش آش هاد الزربة؟؟ حيت سبع سنين تبااركالله مدة مابيهااش..

ازهار بتوثر: غ... غانكمل قرايتي...

غيت مبتااسم: أناا غانقرييك حتى توصلي لفين بغيتي...

ازهار: هاا... حتى يجي بعدا مرااد...

خنزر وناض من بلااصتو: مرااد آش كاايجيك؟؟ غانخطبك من خاالتك... مااشي من مرااد... (عطااها بالظهر دااخل للكوزينة): غاانوجد شي حااجة للعشاا...

وقفاات بالزربة وتعرضاات طريقو: أناا للي غاندير لعشاا..

طلع حااجبو: لاا غير خلليني ندوز سيري رتااحي..

ابتااسماات كاتشوف فيه بإعجااب: شحال زوين ونتا مقلق؟؟ صاافي هاانتا دابا خلليتي ندير لعشاا ويلا عجبك أجي خطبني...

شاف فيها زعما واش من نيتك؟؟

أزهار: والله حتى داوية بصح..

غيت: بصح...؟؟

حركات راسها وهو تابع كلاامو: وااخاا... أناا قابل...

ضحكات بحمااس وهو دارلها إشارة بصبعوو: غانااكلو واخا تكوني دايرة فيه السم هانا علمتك... (غمزها): وغايعجبني

بقات واقفة فالكوزينة هي كاتقولو شنو بغات وهو كايحطلها داايرة الطابلية.... وهو معاونها كل مرة كايخطف بوسة مرة من حنكها مرة من عينها ولا نيفها ويلا قدر حتى من فمها وهي عاجبهاا الحاال... مدة طويلة وهما واقفين ماحاسينش بالوقت حتى سالات التوجااد... كاان طااجين ديال الكفتة بلاصووص مع سلاظة دالرووز وعصير ديال الحاامض والليموون... حطو فوق الطبلة وجلسوو وهو كاايستنا غير إمتا يبداا... غير جلس هز الفورشيط كاايدووق... شااف فيهاا: جاا بنيين... بززااف... يدك بنيينة...

ضحكاات: بصح...؟؟ حتى خالتي كاتقولهاالي...

تنحنح ونطق: و.. واش كنتي كاطيبي بززاف..؟ يعني فداار خاالتك مللي كنتو مجمووعين...؟؟

ازهار بابتساامة: آه كنت نطيب كااتعجبني الكوزينة.... فاللخر خالتي مابقااتش بغاات توجد المااكلة حيت ولدها ماايبغيش يااكل حتى نطيب أناا...

بلع ريقو مخنزر هز يدو كايحك على عنقو كااره وخاايف يخسر الجو.. ونطق: غاانجي لدااركووم فأقرب وقت...

عضاات على شناافتها: هي عجبااتك المااكلة...

غيت باستغرااب: آه عجبااتني وبززاف... كان كايحصاابلي غاتكثري فيها الملح ولا شي حااجة بااش ماتعجبنيش ولكن صدق العكس...

أزهاار: لا حشوومة عليك تشك فياا...

غيت بتأكيد: لوكان درتي فيهاا اسوء ما يؤكل نكون كليتهاا...

ضحكاات: هههه... وعلااش؟؟

حط الفورشيط وشاف فيها بجدية: دااوي بصح... بااغي نجي فأقرب وقت.. (شاف فيديها): خااتمي خااصو يتركب فصبعك ودغيااا...

أزهاار: حتى انا داوية بصح... مرحباا بيك... خلليني غير ندوي مع خاالتي وأجيي...

غيت بفرحة: وااخاا.... (تنهد): فرحت هااد النهار كثر من اللازم... زعما نستااهل هااد الفرحة كلهاا؟؟

أزهاار: نتا تستااهل أيامك كلها تكون فرح.. (هزات لقمة فالفورشيط دارتهالو ففمو): بالصحة...

نطق باستمتااع: غاتولفيني هاد القاعدة وتوحلي فياا... أنا راه جامي وكلني شي حد بيدو...

جاوباتو وهي كااتمدلو وحدة أخرى: ماتكونش نكاار الخير علاه ماماك ماكانتش كاتوكلك...؟؟

جمع ضحكتو وتنهد: ماكانش كايخلليها الواليد كان كايقولها رااه رااجل خاصو يعول على رااسو (ابتاسم بانكساار): وانا ماكنتش كانقدر حتى نهز المعيلقة فيدي حيت كنت صغير بززاف...

بلعاات ريقهاا ونطقاات بأسف: وبااقي عااقل؟؟

جاوبها كايشوف فعينيها: شي حوايج ماكايتنساوش..

تنهدات كاتفكر: عندك الحق شي حواايج مايتنسااوش...

ابتااسم مللي شافهاا غاتدخل فشي دوامة ونطق: بحاال هااد الحواايج للي وقعو هااد النهاار أناا بعدا مستحيل ننسااهوم...

ابتااسماات: حتى أناا....

هزات لقمة أخرى حطاتها ففمو: غير ولف... حيت من اليوم غاتبقا نوكلك بيدياا...

شد من عندهاا فرحاان والضحكة فعينيه... وهاد الشي للي مستحيل غيت جربوو

دخلاات للبييت كاانت واقفة مربعة يديها كااتشووف فالحيط للي كان خااوي وكااضور عينيها فكااع أنحااء الغرفة... حتى دخل علييهاا وقرب لعندهاا... شاافت فيه: فيين داك جهااز التحكم؟؟

جاوبها مطلع حااجبو: علااش بغييتيه؟؟

ازهاار بعفوية: نشووف تصاوري... (غيرات ملامحها لأسف): ولاا مابقااوش هناا؟؟

هزو من فووق الكوافوز: هاهو غير حدااك...

شعلو وظهرو تصاورها بحال داك النهاار وهي حاايدااتلو التيليكومونظ وبداات كااتقلب مبتااسمة بإعجااب... نطقاات وهي كااتفرج: جااو زوينين بززااف... (ضارت لعندو): عندك موهبة خطيرة فالتصواار... مااشي بحاال فرح... كااتجيب نهار كامل وهي كاتصورني وماكاتخرج حتى وحكة مقادة بحاليلا مصورااني بآلة حااسبة..

غيت مبتااسم: شكوون فرح؟؟

صغراات عينيها: ماكاتعرفهااش؟؟

غيت: غير ديريني ماكانعرفهااش وجاوبيني..

حركاات رااسهاا: أممم... فرح صااحبتي الأنتييم... واحد المفروحة كثر مني...

غيت: أهااه.. هااد الشي رااه وااضح...

أزهاار: وااشفتي...؟؟ قلتليك كاتعرفهاا...

رجعاات كااتشووف فالتصااور: ماكرهتش بيتي تكوون بحاال هااكاا...

غيت: هادي هي بيتك...

أزهاار: لاا للي فدار خاالتي...

غيت: ماغاطولييش فييهاا...

أزهاار: إيوا غير هااد المدة...

غيت: أوكي... إلى بغيتي نعطييك باش تقااديهاا ولا نقادهااليك...

ابتاسمااات: أهااه... وااخاا... والتصااور؟؟

غيت: ماعندكش تصاورك؟؟ أنا نصيفطليك هاادو؟؟

أزهاار: لا وشكون قالليك غانقاادها بتصااوري؟؟

غيت بتعجب: وبتصاور شكوون؟؟

أزهاار: بتصااورك طبعاا...

ضحك محااوطها بيديه وبااسها فعنقها: تصاوري مخنزرين وماغايجيوش زوينين فالحييط...

جبد التيلي من جييبو... وحللو على الكاميرا دااير سيلفي وبااسها فخدها مصور: هاادي اول تصويرة نديرها وأنا مبتااسم والفرحة فعيني من بعد واحد التصزيرة درتها فعيد ميلادي الثالت وأنا معنق الوااليدة...

ضحكاات حااسة بقلبها كايفرفر... وهزات يدو بااستهاا... خلااتو مرفووع... حركااتها ماكايكونش متوقعهووم... وكل مرة كاتصدمو حيت ماازاال مااولف على جرأتهاا... واخا هو كان عارف طبعها وبللي زعاامة وماشي من النوع الخوااف... وماكاتسمحش فحقها وماكاتخبيش فقلبهاا... وشحاال من مرة داارت المشااكل فلافاك وفالليسي مللي يظلمها شي حد... حتى كايتدخل هو من بعيد ويحل الموضووع وهي ماعارفة والوو حتى كايجيو يعتااذرو منهاا... هاد الشي كللو ماكانش صاادمو.. بحال تصرفااتها دااباا... حيت هو اول واحد تخااف قداامو وتحني رااسها وتترعد بقربوو وتبين ضعفهاا لييه... مابين ليلة ونهاار ترجع هااكا زاعمة علييه وكااتقرب منو بلا حوااجز... مااعارفش بللي هي طايحة فحبو عمى... وفنفس الوقت كااتشوفو هو باباها الثااني وعندو سلطة عليهاا... ويلا غوت عليها ولا خرج فيها عينيه غاتخااف منوو وتحتاارموو...

بعداات عليه شادة التيلي من عندو كاتشوف فالتصويرة: جاات زوينة بززاف.. (طلعات راسها شاافت فيه): وااش هاادي أول تصويرة تكون ضاحك فيها ولا أول تصويرة تكون معنق فيها شي بنت؟؟

تمشا جهة الفوتوي جلس متكي كايحل فالبيسي: بجووج...

قربات عندو وجلسات حداه فنفس الفوتوي كاتشوف فيه: زعماا ماعمرك درتي شي علاقة ولا قربتي من شي بنت؟؟

حرك راسو كايخدم: لاااا...

أزهاار: حتى بوسة...؟؟

غيت باقي خداام: لااااا...

أزهاار: وكيفااش؟؟

شاف فيها مطلع حااجبو: شنو للي كيفااش؟؟ رااه بغيتك فالعشرين إمتا غاندير هاد الشي؟؟

أزهاار: واازعماا غير بااش تنساا؟؟

غيت عاطيها الخااطر: وعلااش غاننساا وانا كنت كانخطط لحيااتناا بجووج؟؟

بقاات ساكتة شوية كااتشوف فيه حتى تفكراات شي حااجة وهضرات مقفزااه: ومن قبل ماتشووفني؟؟

شااف فيها مخلووع.. وتنهد: وااش الهرمووناات مزياانين عندك يااك؟؟

حركاات رااسها بالزربة: آه آه مزياانين.. غير جااوب...

غيت: علايااش غانجااوب؟؟

أزهاار: قبل ماتشووفني ماعمرك درتي شي علا...

قااطعهاا: مااعقلتش الله أعلم ماعرفتش..

أزهاار: سولتك أغيت جااوبني..

غيت كايفكر: وحدة ولا جووج... الله أعلم...

رجع كايخدم فالبيسي وهي سكتاات... انتابه لهدووءها وضار شااف فيهاا... كانت كاتشووف قداامها وتفرك فيديهاا... صغر فيها عينيه وضور وجهها لعندو... عينيها كاانو حمرين بحاليلا حابسة الدموع... نطق باستغراب: ماالك؟؟

ابتاسماات: و.. واالوو غير عياانة وبغييت ننعس...

يالله جاات تنوض جبدهاا جاات جاالسة: غير ضحكت معااك... مااعمرني درت شي علااقة...

حركات راسها: لاا مااشي داك الشي قلتليك غير عياانة

غيت بجدية: أزهاار راه قلتليك ماعمرني درت شي علااقة فحيااتي... ماعمرني قربت لشي وحدة ولا حتى دويت معاهوم فالموضووع...

شاافت فيه مافاهمش نظرااتها وشدات يدو مزيرة عليها: مااديرش فباالك... أصلاا نتا ماكنتيش كاتعرفني يعني هااديك حيااتك عاادي...

غيت: ماكنتش كانعرفك... وماكانش داك الشي فرااسي أصلاا... ولوكان مااشفتكش نتي ماكنتش غانحل هااد البااب نهائياا... وغاانبقا حيااتي كااملة بعييد على لبناات وصدااعهووم...

أزهاار مغوبشة: هي أنا كانصدعك...؟؟

ابتااسم وباسها فرااسها: وصدااعك حلو... بحاال العسل الحر...

ابتااسمات كاتمسح على وجهها: لاا بصح صدعتك ونتا خداام... أنا غانوض ننعس..

غيت: لوكان كنتي تعرفي قيمتك عندي.. ماغاتقوليش هاد الهدرة...

نااضت: عاارفة... ولكن مشاا الحاال خااصني ننعس...

غيت: تصبحي على خيير...

أزهاار: نتاا.. فيين غااتنعس؟؟

غيت: إلى بغيتي ننعس حدااك ماكرهتش؟؟

أزهاار: ش... شنوو؟؟

غيت كايضحك: غاننعس فالبيت لااخووور...

ابتااسمات باستو فحنكو خلااتو كاايضحك ومشاات نعساات فالناموسية مقابلة معااه تغطاات وهو خفف الضو باش ترتااح وبقاا خداام وكايشوف فيها هي للي دغيا دااتها عيينها... ونطق كايشوف فالبيسي: كاندير خدمتي وخدمتهاا... (شاف فيها مبتااسم): غايخصني ندير مسااعدة.... هي غير تبقاا معااياا...

................

داز الوقت... نااض من بعد ماسد البيسي قرب جهتهاا جلس قدامها كاايشووف فوجهها وكايدوز بيديه على شعرهاا تنهد ونطق: وأخييييراا... رجعتي دياالي وكاتنعسي فبييتي... وحدااياا... من بعد مااكنت كاننعس غير على تصااورك فالحييط... قرب شفاايفو لشفاايفهاا باسها بوسة خفييفة: هااد البييت وهااد الداار وهااديك الشركة وهادوك المعامل... وهاد غيت كللو يالله رجع عندو معنى... ورجع وجودو فالحيااة عندو هدف... من قبل كنت حااس براسي ماكااينش لا أنا ولا أي حااجة كااتعلق بيهاا...

بقاا جاالس مدة كاايشووف فيها بلا ماايرمش... حتى حس براسو ضاررو وشااف فالسااعة كاانت الثلااتة ديال الصبااح... رجع باسها هاد المرة فخدها ونااض طفا الضو وخرج سااد الباب... مشا لبيتو ينعس شوية

فااقت كااتحل عينيها وتمسحهووم... مدة قصيرة حتى عرفاات راسها فين كااينة... نااضت جمعاات شعرها فالباانضة.. دخلاات للدوش غسلاات وجهها وخرجاات... كاتمشى بالشوية باش ماتفيقووش حييت شاافتو باات سهراان مع الخدمة... يالله خرجاات من االبيت حتى وقفاات مخلوعة مللي لقااتو جاالس على الكرسي لاابس حواايجو ومقااد رااسو وريحتو ضرباتها من البيت... هااز البيسي كاايرااجع... طلع راسو شاف فيها ورجع شااف فالسااعة: تمشي معايا للشركة ولا تجلسي هناا...؟؟

أزهاار: كااين غير هااد الجوج احتمالات؟؟

غيت: آه... ماعجبووكش؟؟

أزهاار: والثاالت للي هو مهم... نمشي لداارناا؟؟

غيت بجدية: هاديك ماشي داركووم... هاديك شراها ولد خالتك لموو...

أزهاار: لاا... غلااط... (زادت لعند الطبلة دالماكلة وجلساات): شراها لينا بجووج وصبغها باللون للي كايعجبني...

خنزر فيها هي للي كانت عاطيااه بالظهر... سد البيسي ورماه فوق السدااري بعنف: سيماانة وغاانجي لديك الداار باش نخطبك منهاا...

أزهاار: وداابا ماغاتفطرش؟؟

غيت: لاا... فالصبااح كانشرب غير قهيوة...

أزهار وهي كاتشوف فالطبلة: هاد الشي نتا وجدتيه؟؟

غيت: آه... ماعجبكش..؟؟ ولا ولد خالتك كايوجد حسن منوو...؟؟

ضارت شافت فيه باستغرااب: غيت يالك لابااس؟؟ واش كاتغير من مرااد؟؟

قاطعها بحدة: مراااد...!! سميتو كاتلحنييها براافوو...

خرجاات عينيها: أويلي حمااقييتي...؟؟

غيت عينيه حمارو فالبلااصة هز الكاس دالقهوة شربو كللو وحطو فوق الطبلة للي قداامو ونااض جر الكرسي جلس قداامها كاايشوف فعينيها وثرهاا: الراااحل الوحيد للي تنطقي بسميتوو هو أناا... يعني السمية الوحيدة للي تنطقي بيهاا هي غيت... (نقص من نبرة صوتو بأمر): فهمتي...؟؟

بلعاات ريقهاا محركة رااسها: واااخااا.. غير ماتزيدش تتعصب... كاتخلعني...

تنهد ونااض خاشي يديه فجيابو جا ورااها وبااسها من رااسها كايرجعلها شعرها وراا ظهرهاا: فطري ماانزيدش نتعصب ومانخلعكش... غير فطري وارتااحي...

أزهاار: وااش تكالميتي؟؟

زير على سناانو من وراها ماكاتشوفش فيه: مكاالمي أعمري مكاالمي... غير فطري مزياان بااش نمشييو... يااك غاتمشي معايا للشركة؟؟

أزهار وهي كاتفطر: آه نمشي معاك...

غيت: صاافي فطري على خاطرك ولحقي علياا...

خرج كايتمشى بالزربة غير شم الهواا فالجردة ضرب الحيط بركلة... حااس بقلبو غادي ينفااجر... مااحملش سمية مرااد من فمهاا وماحملش مللي قالتلو صبغ الدار بذووقهاا... ناار الغيرة شعلاات من الدااخل.. وحبس راسو غير بزز مايهرسش حدااهاا... وهو عارف بللي ممكن يخرب علااقتهووم... ولكن آش يدير... رااه عااشق مهوووس.... ومابيدو حييلة

جاالس مترأس البيرو دياالوو ومعااه وااحد الرااجل... كاايهضرو فالخدمة ويرااجعو شي ورااق... وهي جاالسة بعييد علييه فالفوتوي هاازة البيسي كااتبقشش فييه... شتتاات نظرها لبعيد كااتشوف قداامها سااهية... تفكراات مللي جاو دااخلين مع لبااب وهو شاادلها فيدها.. واخا حاولاات تطلق منو كان حااكمهاا..... بتحنزيرتوو ووقفتو وثقتو بنفسوو دااخل ويدها فيدو... حساات بالسخاانة طلعاات معاهاا... خصووصا كاع الأنظاار اتاجهو ليهووم... واخاا دغيا حناو رااسهووم المهم رااه شاافو... وداك الشي للي كانو شاكين فييه رجعو متأكديين منوو... كانت كاتسنااه يعطيها تفسير على تصرفوو... غير وصلو للطاابق ديالهووم لقااو الرااجل يستنااه حيت كان عندو معااه موعد... رجعات اللور متاجهة للبيرو دياالها حتى وقفهاا...

غيت: أزهاار؟؟

شافت فيه... وهو تابع كلاامو داير إشارة بيدوو: تفضلي...

شافت فداك الرااجل ورجعات شافت فغيت وحركات رااسها: وااخا السي غيت...

شاف فيها زعما واش من نيتك...؟؟ دخلو وهي مشاات جلساات فوق الفوتوي... وهو مشا للبيرو مع السيد... غير سالا معاه تصافحو وخرج... وهو هز ملف وجاا لعندها... جلس حداها هي للي كاانت سااهية وجبدها لعندو حتى غوتاات مخلووعة جلسهاا فحضنوو وبااسهاا جنب شفايفهاا مبتااسم: ماال عمري سااهي؟؟

أزهار وهي كاتشووف فالبااب: غيت... غاايدخل شي حد...

صغر عينيه: ويدخل...؟؟ ماكانديرش شي حاجة بالتخبية...

بلعاات ريقهاا: آه... عاارفة.. اصلا دخلنا ونتا شاد فيدياا...

غيت بملامح مامفهومااش: آه... نتي للي قلتي شااكين... وأنا أكدت لهوم الشك...

حركاات رااسها ونااضت جلساات حدااه وهو كاايشووف فيها بااينة ماعجبووش الحاال... رجعات شعرها ورا وذنهاا: ممكن يدخل شي حد...

تنهد وهز الملف حللو كاايشووف فيهاا: ماكايدخل عندي حد بلاا إذن... غير ارتااحي...

بقاات سااكتة كااتلعب فيديهاا وهو بقا كايرااجع فالملف حتى سالاا... وشااف فييهاا مطول عااد هضر: بديتي كااتندمي يمكن...

شافت فيه باستغرااب: كيفااش؟؟

ميل رااسو: لباارح فحاال واليووم فحاال آخوور...

بقات كااتشووف فيه باستفهاام وهو تابع كلاامو: للي شافك دابا ماايقولش بللي لبارح اعتارفتيلي بحبك وكنتي جريئة معااياا هااكاك... (طلع حاجبو): ولاا نعستي وفقتي وقلتي بللي دوك المشااعر مااشي حقيقيين وغير زربتي فيهووم؟؟

خرجاات عينيها مستغربة: شنو كااتقصد؟؟ (حركات راسها): رااه غير خفت توصل الهدرة لخاالتي وانا مازال ماقلتليهاا وااالو... ولا يطلقو عليا شي إشااعة... كيف ماكان الحاال... كانبقا أنا المسااعدة ولاا غير متدربة ونتا المدير دياالي..

قاطعها بانفعاال: خاالتك هضري معاها اليووم... وانا مستااعد نخطبك من غداا... وللي دواا فييك أنا نقتلو قبل مااتخرج الهدرة من حلقو وتوصل للساانو... وأصلاا ماغانخلليلهومش الوقت فين يهضرو.. وقبل مايقولو حبيبتوو غاايقوولوو خطييبتو ومن ورااها مباشرة يقوولو مرااتووو....

بقات سااكتة كااتشوف فالأرض قنعها بهضرتو ومالقاات ماتزيد... وهو تنهد وهز البيسي من حدااهاا... حللو وتكا اللوور... كتب ميسااج للموظف للي مكلف بالإعلااناات وديال الشركة منهووم الإعلاناات ديال البحت على الموظفين للي خاصين... آمرو باش يحط إعلاان بحث على مساعدة وعطااه الشرووط... هي كاانت حااضية الميسااج غير كملو يالله غايرسلو غوتاات محايداالو البيسيي.... كااتشووف فالميسااج وتعااود تقرااه بااش تتأكد... شاافت فييه بااينة بللي واصلة لدرجة كبيرة من الأعصااب وهو مافااهم والوو.... وقفاات عينيها حوومر وزدحااتو فالأرض حتى تقسم على جووج... خلااتو نااض حتى هو مصدووم... نطق كاايشوف فالبيسي: عندي فييه الخدمة ياا أزهاار سهرت عليها الليل كاامل...

زيراات على قبضة يدييهاا وقرباات لعندو دمووعها بداو كاايهبطو بوحدهوم خلااتو زااد تصدم: ماشي انا للي لبارح كنت فحال وداابا صبحت فحاال... نتا للي بنتيلي دغياا تناادم معاك الحاال ورجعت كااتقلب على مسااعدة جدييدة... (طلعاات حاجبها): صاافيي الحب ديال سينيين تبخر غير حيت توثرت شوية وخفت وتخلطاات عليا الأموور... ولاا مللي كنت بعييدة كنت عزييزة ومللي قربت رحعت مملة؟؟

حط يدو على شعرو كايديها ويجيبها بهستيرية وهو كاايشووف فيهاا... وهي وااقفة شافت فالبيسي: سمحلياا... هرستوو... مللي كاانتعصب ماكانبقااش عااقلة على رااسي... وهااد الخدمة للي ضيعتلييك... مللي تجي المسااعدة الجدييدة وتعااودهاا معااك... غااتكون مجهدة غير من الشروط للي طلبتي يكونو فيهاا...

هزاات صاكها ولافيست دياالها وجاات غاادية حتى شدها من يدها كاايشووف فالأرض ويحااول يتهدن... حاولات تنثر منوو وهو نطق بحدة: تبتي ولا قسما بالله حتى نهرسهاالك...

جمداات فبلااصتها وهو شاف فيها: داابا غاتجلسي وتهدني..

طلقهاا وجلس وجلساات حتى هي بعيدة عليه كاتشوف قداامهاا وصوت انفااسهاا مسمووع بكثرة مامعصبة... نطق بهدوء مخيف: شفتي ياا أزهاار؟؟ مااحد حبي ليك كاايباانلك ضعييف لهااد الدرجة مااغايعجبنييش الحاال... (شاف فيها راافع شوية من صووتو): عرفتي أناا وااخاا تقوليلي ياا نبعد علييك ياا نمووت غانختاار تموتي على أنك تبعدي علياا... (ضحك بسخرية): هههه.. وقلتي مللي قربتي رجعتي مملة؟؟ وااااو... ذكااءك خاارق مادموزييل..

شدها من دقنها مضورها لعندو بعنف يدو كااترعد وكاايضغط على الحرووف: مللي قربتي... ماغاتبقاايش تبعدي... ماغاتقدرييش وااخاا تبغيي... واخا تتمنااي... وااخا تترجاااي مستحييييل تبعدي غييير نسااااي...

حطات يدها على يدو كاتحااول تفكها من ذقنهاا وهو باقي مزير علييهاا: هزييتي صااكك وخاارجة... يعني صافي رااه سااليناا وبهااد السهوولة يااك...؟؟ بهاااد السهوولة ياا أزهاار غاتخرجي من حيااة غيت؟؟ (ابتااسم): مستحييييييييل آخر مرة تحااولي ولو مجرد محااولة تخرجي من الدار ولا من الشركة ولاا من حيااتي وااخا تكوون المسألة مسألة حيااة أو موت... فهمتي؟؟

طلق منهاا خلااها كااتمسح على وجهها بعنف وهو تاابع كلاامو كاايشووف قداامو: المسااعدة بغييتها بااش دير خدمتهاا.. غااتخدم لتحت مع الموظفيين... وأي حااجة بغاات تعطيهالي غااتجيبهاليك نتي للي غاتبقااي فالبيرو ديالك...

بلعاات ريقها: المسااعدة خدمتهاا هي تحضر معاك الإجتمااعات وتمشي معاك للسفرياات... وتكون قرييبة ليك بززااف...

ابتااسم: إلا المساعدة ديالي... غااتكلف بحواايج أخرى.... حيت الخدمة تراكماات علياا شوية ونتي للي غاتكوني فجنبي فالسفرياات والإجتمااعات...

شافت فيه: ماعرفتش علااش تعصبتي هااكاا...؟؟ وااش نتاا عاارضتي الصبااح وتقلقتي غيير حييت نطقت سمية مر...

قاطعها بنرفزة: بلاا ماتكملييهاا...

أزهاار: واناا ماامنحقيش نعاارض على الحاجة للي ماعجباااتنيش...

غيت: أناا عارضت حيت استااهنتي بحبي لييك ووحييت كنتي غااتمشي بسهوولة وهاانية... هااد الشي للي عصبني وخلااني غاانااكل راسي..

عضات على شناافتهاا: هي ماتعصبتيش حيت انا مابغيتكش دير مساعدة؟؟ ولا حيت هرستليك البيسي؟؟

بااسها فيدهاا: لاا... واش نتي رخيصة عندي لهااد الدرجة...

أزهاار: إيوا ماديرهااش...

ابتااسم: ماانديرش أناا هااد المسااعدة... اناا ندير خدمتي وخدمتهاا غير عمري ماتقلقش علياا...

ضحكاات بفرح: أناا ندير خدمتهاا... ياك انا هي المسااعدة دياالك؟؟

غيت: وااخاا... من هناا حتى ترجعي تكملي قراايتك غاديري خدمتك.. ومن ورااها يكوون خير...

حركاات رااسها: وااخاا...

شدها من دقنهاا بالشوية وبااسها فييه: قصحتك؟؟

ازهاار: شوية... داابا عاادي...

غيت: سمحييلي... (شاف مباشرة فعينيها مقرب منها بززاف): ازهاار نتي نقطة الضعف دياالي... عرفتي انا لوكان نصبح معرض للإفلااس ومايبقاا عندي حتى سنتييم ونضييع فكااع هاد خدمة سينيين وهااد تماارة... رااه نقدر نضبط رااسي وندرس خطوااتي... ولكن مللي كايكوون الأمر متعلق بييك راه ماكانبقااش نفكر... وماكايبقااش عندي الصبر نهاائياا... ديري هااد الشي فباالك.. (ابتااسم): وااخاا زغنوونتي...؟؟

ابتااسماات حتى هي محركة رااسها: وحتى نتا خااصك ماتبقااش تشك فالحب دياالي لييك... ومااشي غير حييت تقلقت على حااجة عاادية ولاا خفت.. صاافي رااه ماكانبغييكش... أنا كانبغييك ونتاا عاارف هااد الشي... مابغيتكش تبقا تفكر هااكاا...

غيت بغشق: مااتهضريش على الخووف وأناا معااك.. وماتدويش على القلق وأنا حدااك...

ازهاار بابتساامة حب: كاانبغييك...

غيت: كاانعشقك... (تابع كلاامو بغمزة): هااد النهاار تدوي مع خاالتك...

عضات على شنافتهاا: آه اليووم...

ضحك كاايلعب فصبااع يدييهاا... وهي ابتااسماات فرحاانة... شاف فالبيسي مهرس حدااه وتنهد جرو لعندو برجلو هزوو لقاا الفيشورة تحرقاات... حطو حدااه وهي تحرجاات ونطقاات: س... سمحليي...

شاف فييها: غيت مساامحك وبااغيك غير تكوني نتي مرتااحة كاتبغييه وكااتحمااقي علييه... وهرسي كلشي... وخربي كلشي... نتي تهرسي وهو يصلح... وفرحاان...

ازهاار بخجل: ماتعطينيش خااطري نهرس شي حااجة... غير تعصبت...

غيت ضااحك: هي مللي تعصبي غاتهرسي...

أزهاار: ماعرفتش... ولكن انا أعصاابي خاايبة...

غيت: هرسي وقلبي للي حدااك وللي وراك غير مااتفكريش تمشي.. حيت حتى انا اعصاابي خاايبة وكثاار منك وبززاااف...

بلعاات ريقهاا سااكتة عرفااتو فالجملة الأخيرة ماكايضحكش وكاايدوي بجدية..

دخلاات للداار... ماشاافتش خاالتها وسمعاات الحس فالكوزينة عرفااتها تماا... دازت لبيتها بدلاات حواايجهاا وغسلاات حاالتهاا وخرجاات... لقااتها كااتحط الغداا... شاافت فيها: ازهااار جييتي؟؟

ازهاار باستها فحنكها: آه أخاالتي جييت... حيت لبارح خدمت حتى بالليل داك الشي علااش خرجت اليووم بكري...

خاالتها بابتساامة: آه... مزياان.. بااش يالله تغداي معااياا... (تابعاات بحمااس): وسبحان الله وجدت باستيشوو ونتي كاايعجبك...

ابتااسماات بتوثر وجلساات: هي اللولة أخالتي.. أصلا كنت مشهيااه...

جلساات حتى خاالتهاا وبدااو كاايااكلو... وهي سااهية كااتفكر... حتى نطقاات خالتها: أزهاار ماالك ماكاتاكليش؟؟ فااش سااهية عااود؟؟

ازهاار: لاا والوو أخاالتي...

طلعات حااجبها: كيفااش والوو؟؟ بااين بللي عندك شي حااجة شاغلااك... نتي مللي يتحط حداك هاد لبلاا كاتمسحيه كاامل وداابا ماكليتيش حتى جوج دغماات كااملين...

يالله غاتنطق قاطعااتها مغوبشة: رجعتي كااتخبي علياا يااك؟؟ أحصرااه ياا أزهاار للي كانت كاتبرزطني بخبارهاا... مابقيتي كاتقوليلي واالوو...

تنهداات: واخاالتي الله يهدييك... خلليني نهضر.... (سكتات كاتفكر وخاالتها كاتشوف فيها): انا جيت اليوم بكري غير باش ندوي معااك..

خالتها بقلق: الله يسمعنا خير...

زيرات على عينيها ونطقات بالزربة: المدير ديالي فالخدمة بغا يجي يخطبني...

قالتها وحطاات يدها على صدرها كادير شهييق زفيير... وخالتها مخرجة عينيها كاتشوف فيها حتى استوعباات ونطقاات: كيفااش المدير ديالك شكوون المدير دياالك؟؟

بلعاات ريقها: غ... غيت... السي غيت...

ابتاسماات خالتها بصدمة: غيت... وااش مول الشي؟؟ وااش هذااك للي كاان فالتلفاازة دااك النهاار...؟؟

قاطعتها: آه هذااك... ماالك أخالتي يااك قلتليك السي غيت هو للي خدامة عندو أنا حاالياا؟؟

حركاات راسها: آه قلتيهااالياا... وعاد قلتيلي بللي جاك غريب وكيفااش قبلك بلا ماايسولك ومارتاحيتيش... (كاتعبر بيديها): كيفااش داابا رجع باغي يخطبك آش كاتخوري أبنتي فهميني؟؟

شداتها من يدهاا: هاانتي انا غانفهمك كلشي ونتي عطيني عقلك... عقلتي نهار م... نهاار وقعاات ديك الجريمة... (وجهها صفار وهي كاتدوي وخالتها لاحظاات هااد الشي وعارقة بللي صعيب عليها تجبد داك النهاار): آه عقلت ماالوو...؟

ازهاار: داك النهاار مللي كنتو كاتقلبو علياا نتي ومر... (قبل ماتكملها بدات كاتشوف يمين وشماال بحاليلا خاافت يسمعها ورجعاات شافت فخاالتها): نتي وولدك... لقيتووني حدا واحد الطوموبيل..

صغراات عينيهاا كااتفكر: أيييه عقلت... (ساطت بنفاد صبر): الله يرضي عليك ابنتي اختاصري... رااك شوشتيني آش دانا لداك النهاار؟؟

أزهاار: هذااك مول الطوموبيل كان هو غيت..

خاالتها: كييفاااش؟؟

حركاات راسها: أييه أخاالتي ومن داك النهاار قاال بللي مانساانيش وبقا تابعني ومرااقبني...

خاالتها بصدمة: كييفااش...؟؟!! من داك النهاار وهو تابعك؟؟... آش هاد الفيلم أبنتي؟؟ واش هو للي قاللك هاد الشي؟؟

أزهار بجدية: آه.. هو للي قالهاالي... وعرفتي هاادوك لفلوس للي كنا كاانقولو ديال الجمعية رااه هو للي مصيفطهووم.. تكلف بفرايتي ولباسي وحتى الأطباء للي تعالجت عندهووم... كاان هو للي مكلف بكلشيي...

خرجاات عينيها كااتشووف فأزهاار: هاا.. دبيك المراا...

أزهاار: آييه هاديك لمرا راه كانت المسااعدة دياالو وهي للي كانت مكلفة... وحتى من الجمعية للي مشيت شفت داك النهاار أسسها غير بااش نتيييق...

خالتها كاتحرك فرااسها: لاا... هااد الشي مايدخلش لعقل... (ضرباات بصبعهاا على رااسها): هذاا رااه غيير عقل صغيير ياابنتي.. هااد القصة راه خااصها عقل صحيح يتقبلها..

ازهاار بضحكة: حتى انا هاكا وقعلي فاللول ولكن من بعد تقبلتها... (سكتاات شوية مبتااسمة وتاابعات كلاامها): وحتى أنا رجعت كاانبغييه... وداابا بغيتك تقوليلي فوقاش نقوولو يجي...

شافتها غير سااكتة باقة ماصرطااتش الصدمة ونااضت: هاانا دابا نخلليك على رااحتك حتى ترتااحي وتتقبلي الخباار وأجي قوليلي إمتا يقدر يجي؟؟

تمشاات غادة لبيتهاا حتى وقفاات مفكرة شي حاجة وضاارت لعندها: حقاا نسييت ماقلتليك.. مر... بغيت نقول ولدك.. راه هو للي تكلف وصافطو للخاريج... وحنا داك الوقت جاتنا عجب يمشي بديك السهوولة..

خاالتهاا وجهها حمار وعلاامات الصدمة باانت على ملاامحهاا بكثرة: هاااا..

ابتاسمااتلها ودخلاات لبيتها... خلاتها باقة جامدة فبلااصتهاا

كانت جاالسة فبيتها يالله سالات الهدرة معااه.. سولها واش دواات مع خاالتهاا قالتلو بللي عاوداتلها كلشي وخلااتها عااد مصدوومة.... ومللي سالاات... دخلاات للفاايسبوك كااتلف الوقت.... حتى تدق البااب ودخلاات خاالتهاا... جلساات حدااها...

أزهاار: داابا مزياان؟؟

خالتها: أحمم.. قوليلي اأزهار داابا دااك السي غيت للي معمر التيليفون والبيسي وحتى التلفاازة... وكلشي كايهضر عليه... صدق كايبغيك من زماان؟؟

أزهاار: آه... علااش شنو فيهاا؟؟ مانستااهلش ولاا؟؟

حركاات راسها: لاا... تستااهلي عااد .. (هزاات التلي كانت مدخلة واحد التصويؤة ديالو هاابط مع الدروج ديال شي مصنع كبير مخنزر كايركب فنظااظروو... ازهاار سااهية فتصويرتو.. حتى فيقااتها خاالتهاا: دابا فهااد التصويرة كاان يبغييك... وقلبو كاان عاامر بيك؟؟

ابتاسماات كاتشووف فالتصويرة: آه كاان كايبغيني.. وأنا متأكدة بللي فهاد التصويرة وبهااد التخنزيرة لوكان شافني قدامو كان غايبتااسم بلا هوااه...

خاالتها: ولايني نتي ماساهلااش.. (رجعات كاتشوف فالتصويرة): بااش يبغيك واحد بحاال هذاا خااص تكون سميتك أزهاار ...

ضحكاات بفخر وخالتها تابعات كلاامها: يعني دابا غير شافك ساليتي لافاك وهو يدير فالخطط باش تخدمي معاه..؟؟

أزهاار: آه بصح... هاد الشي للي وقع.. خصوصا مللي شافني غانقلب على خدمة... مابغااني نخدم عند حد...

خالتهاا بابتساامة: عرفتي نتي رااك مرضية ابنتي مرضية واليديك وحتى انا راضية علييك... وهاا النتيجة... هااادي رااه قصة الأحلاام.. مانضنش وااش هااد القصة تكون وقعاات فشي قنت آخوور...

ازهاار بخجل: عندك الحق أخاالتي... ربي عوضني بييه...

عنقااتها جنب: غير قوليليه يجي الوقت للي بغا هو أنا واجدة... نعيط لمرااد إلى قدر يحضر...

أزهاار: مراد رااه مادخلش من إمتاا ماغايدخلش غير على الخطبة...

خالتها بفرحة: آه... حتى نديرو العرس ويجي... داابا غادي غير نعلمووه باش مايبقااش فييه الحاال..

ازهاار: للي بغيتي أخاالتي...

باستها فراسهاا: نتي راك فاال خيير عليينا أبنتي.. لهلاا يخطيك علياا... رااك فمقاام بنتي...

ازهاار عنقااتها: ونتي راك فمقاام مااماا...

......

كان جالس فغرفة الإجتمااعات مخنزر كاايعطي كلمتوو... والتيلي ديالو كاايصووني كايشوف نمرتها ولكن مايقدرش يجااوب وبااش يقطع مستحييل.. كاينقص الصووت ويخلليه يصووني... حتى سمع لرنة ميسااج... اعتاذر وهز التيلي وشااف الرسالة منهاا.. دغيا حلها وقرااها: غيتي... نسيت بللي عندك اجتمااع داابا وماغاتكونش مساالي... اصلا كان خاصني نكون معاك ولكن ماكتاابش مرة أخرى... المهم بغيت غير نقوللك بللي دويت مع خالتي ودابا تقدر تجي مللي نتا تقرر...

ابتااسم حتى باانوو سناانو بفرح... وحط التيلي فرحاان دياال بصح.. شاف فللي كانو معااه مصدومين فيه هاادي اول مرة يشوفو سناانو وضحكتو.. تنحنح كاايحل القاميجة من الفووق... وكمل خدمتو وهو فموراال طالع وبززاااف

طااح الليل... وهو كاان مشغوول من إجتمااع لاجتمااع... ماسالاش باش يشووفها وهي قالتليه بللي هي عيانة وباغة تنعس ماتقدرش ترجع للشركة...

كاانت جاالسة فبييتهاا كااتشوف فالتصويرة للي داروها بجوجهوم فبيتوو... صافطهالها... مبتااسمة وعينيها كاايلمعوو... غمضااتهوم باستمتااع الحووب زويين وبززااف... غيت دااباا كاايباانلها حلو وأي حااجة فيه هي بالنسبة لييها غاالية... تنهداات معنقة التيلي مع صدرها عاضة على شناافتهاا... كااتشهى بووستو وتعنيقتوو وقبضة يدو على يدهاا وتسمع لدقاات قلبو... كاتوحش صوتو وهمساتو وعيووونو العسلية مللي يكون فرحاان ومللي يكوون معصب ومللي يكوون مخنزر ومللي يكون جدي ومشغوول... كاايعجبها ستيلو الريااضي ومشيتوو... كااتعشقو هي وتعشق تفااصيلوو... كاتستغرب مللي تفكر بللي هو كان كايحس بهااد الشي لمدة سبع سنيين وبقاا بعييد... كيفااش قدر...؟؟!! هي يالله بدات تبغيه وماقادرااش على بعدوو...

فيقها من سهوتهاا التيلي للي صونا فيديها... شاافت صوورتو مع سمية عشقي... ابتااسماات بفرحة غير كاايلقاا شي فراغ كايصونيلهاا... يعني وقت الإسترااحة عندوو كايهضر معااها فييه... جاوباات: آلووو...

غيت: أحححح... وصووتك شحاال حلووو...

ضحكاات: ههه... باقي ماساليتي الخدمة...؟؟ غاتكون عييتي

غيت: كااتخممي فياا...؟؟

ازهاار بقلق: باينة ماكليتيش النهاار كاامل... غير كاتساالي من شي اجتمااع كاتعيطلي وتبقا تهضر معاايا حتى يعيطولك على اجتماع آخوور...

غيت: والمااكلة بلاا بييك باااسلة... آش نديير بييهاا؟؟

أزهاار: من نيتك؟؟ وأناا رااه كلييت واخا بلاا بييك..

غيت: أهااه... إيوا سعدااتك... (تسمعاات تنهيدتوو من سمااعتها): هبطي نشوووفك أنا كاانسااينك لتحت..

خرجاات عينيهاا: فييين لتحت؟؟

غيت بهدوء: تحت الداار وبالضبط تحت بييتك...

نااضت بالزربة وحايدات الريدو على السرجم كااتشوف لتحت... وكيف قاال مبااشرة تحت بييتهاا كاانت طوموبيلتو وااقفة... وهو مهبط الزااج مطلع راسو كاايشووف فييهاا... بحاليلا كان كايستنااها طل من تماا...

نطق: وداابا تأكدتي.. يالله هبطي رااه عياان وبغييت نرتااح...

ازهاار: وارتااح شكوون حايدلييك؟؟

غيت: داك الشي علاش قلتليك هبطي بااش نرتاااح...

أزهار بتسااؤل: كيفااش؟؟

تنهد: بييك ومعااك أناا كاانرتااح ياا أزهااري...

ابتااسماات: هاانا جااية

مدة خمس دقايق باانت خاارجة مع بااب العماارة لاابسة دجااكيط فوق البيجاامة... هاازة شي حااجة فيديها... خرجاات كاتجري وتااجهاات لسياارتو حلاات البااب وركباات دغياا... وهو غير سدات البااب طلع السرااجم بجووجهوم بااش مايباانوش من برراا... بااسهاا جنب شناافتهاا: توحشتك...

ازهاار: حتى أناا...

جبداات البوااطة وحلااتها: درت سوندويتشاات ديال الكفتة والفريت للعشاا... وانا جبتليك معااياا... (جبدااتهوم كاتشوف فيه): كااتعجبك بعداا يااك؟؟

نطق مبتااسم: للي جات من عندك تعجبني وبزز مني...

مدااتلو السوندويتش: هااك... كوول النهاار كاامل ماواكلش.. حتى الصبااح فااطر بقهوة كحلة...

غيت مطلع حااجبو: إلى كنتي غااتبقاي تهبطيلي كل نهاار الماكلة حتى لهناا انا مستااعد نبقا بالجووع حتى لدااباا...

حطاتلو ففموو بااش يعض: غانتقلق منك أغيت... نتا راك كاتخدم بززاف وكااتعياا على الأقل خااصك تااكل...

عض كاايمضغ مخرج عينيه حيت خشاتلو النص دالخبزة فالفم وعض عضة كبيرة... بلعها بزز عينيه حماارو كاايتنفس بالجهد: ازهاار غير بالشوية... خنقتيني...

مداتلو قرعة دالعصير: هااك دوز رااه حتى هو قاديتو فالداار...

شدو من عندها قلب القرعة كااملة لفموو... حتى شربها كلهااوحطهاا...

ازهاار: شربتيها كلهاا؟؟ وبااش غادوز هااد الشي...؟؟

شدو من عندها: مامحتااجش... الحااجة للي تقاديها بيدك كاادوز بووحدهاا...

بدا كااياكل بالشوية وهي طلقاات موسيقى هادئة فالتيلي ديالها... شدو من عندها برونشااه مع المسجلة ديال الطوموبيل وتطلقاات الموسيقى... ضحكاات متكية جنب... وهو كايااكل حتى ساالاا... وهز قرعة دالماا من لتحت شرب منهاا... وحطهاا.... ضار لعندهاا: ازهاار..

شاافت فيه وهو شد يدها بااسهاا: ماعمرني ننسا هاد الجيست للي درتي معاايا...ازهاار مافاهمااش: أشمن جيست؟؟

غيت: من نهاار عقلت على رااسي وبهااد الفلوس وهااد الهيبة جامي شي حد فكر فيا ولا انتاابه بللي ماواكلش النهاار كاامل ولاا هز من عشااه وجاابلي نااكل وخمم فياا..

ازهاار شاافتو تأزم ومن ملاامحو باان عليه التأثر... نطقاات: ماتزيدش فييه.. علاه ماعندكش الخدامااات؟؟

ابتااسم جنب: الخدامات راه كايديرو خدمتهوم... كاايطيبو الماكلة ويحطووها... وااش مافهمتيش قصدي؟؟

تقاداات فالجلسة وضاارت لعندو حتى هي: فهمتك... وعرفتك شنو قصدتي؟؟ (زيرات على يدو): ماعندكش ماماك للي تحن فيك.. عاادي... (ابتاسمات): من هنا لقداام أنا هي ماماك... انا ختك أناا صاحبتك... للي بغيتيني نكون غانكوونو... والدور للي بغيتي نلعبو غانلعبو فحيااتك...

قبل ماتكمل كلامها خطفها معنقها خااشييها فييه مزير علييهاا بدرااعو... وهي بادلااتو العنااق... نطق بصووتو البااح والمهمهووس فوذنهاا: كنت كاانعشقك.. ودابا رااه زدت فوق العشق عشق... (تنهد متابع كلااامو): بغييتك فحيااتي ونتي لااعبة أدواار كااع النسااء... حيت ماكااينة حتى وحدة من غييرك...

ازهاار بهمس: غانلعب ادوارهوم كااملين وكانوااعدك غاانتقن لعب كل دور... لدرجة ماغانخلليك تفتااقد لحتى شي وحدة..

جاوبها باقيين على نفس الوضعية: أصلاا من نهار شفتك وأنا ماكانتفتااقد لحد وغير نجي نفتااقد يكفي نتفكر بللي نتي فحيااتي وموراالي كاامل يتبدل...

بعدها عليه كاايشوف فعينيها: حتى أناا... غانلعب أدواار كااع الرجاال فحيااتك... (صغر عينيه): يااك مااعندك حتى شي رااجل فحيااتك؟؟

تفكرات ولد خالتها وعرفااتو كاايقصدو... شافت فيه: واانتا راك عارف حيااتي كثر مني... إلى ماباانلك حتى رااجل يعني ماكااينش؟؟

حرك رااسو بالزربة: مااكااينش رااني عارف ماكااينش...

مدة طوييلة وهما جالسين هي متكية وهو حاط راسو على صدرهاا كااتلعب فشعرو بيدهاا سااهية مع الأغنية وهو مستمتع على الآخر... مغمض غينيه حااس بالعيا ديالو كاايتبخر...

أزهاار: ماقلتيش لياا...؟؟ إمتا غاتجي لداارنا؟؟

نطق وهو باقي مغمض عينيه: عطيني يوومين وغانجي...

ازهار بصدمة: يوومين؟؟ كيف درتيلها؟؟

غيت: أمممم..... درت للي فجهدي باش نقدر نجي غدا ولكن الله غالب غير صبري علياا يوميين...

غوتات مقفزااه: الله يهديك أغيت... اويلي يومين راه بجالها بحاال غدا... ماموجدين والوو...

نااض من عندها كايشوف فيها: كيفاش زعما وااش انا زرباان؟؟

ازهاار: آه زرباان... خللينا غير نخملو ونشريو ونوجدو...

جاوبها ببرود: تخملو؟؟ علاه داركوم دابا موسخة؟؟ (يالله غااتجاوبو سبقهاا): غير خلليها كيف كاانت انا غانرتااح فيها... للي غاتحطو وشنو غاتلبسي (مدلها كاارط كيشي): غدا تكلفي... خرجي نتي وخاالتك وشري للي بغيتي..

شافت فلاكاارط: لاا مابغييتش... انا غانتكلف رااسي رااه عندي...

غيت بنبرة آمرة: ازهاار شدي... هادي دياالك اصلا قاديتهاالك...

شداتها من عندو لقاتها بسميتها حلات فمها: كيف درتيلها؟؟

غيت كاايشوف فالتيلي دياالو: معلوماتك كلها عندي والكونط حلليتو فبانكة أنا كلياان فيها.. والفلوس كايديرو الطرييق فالبحر...

ازهاار: ولكن ماتشاورتيش معااياا.. انا ماحتااجاش وبااقي مابيناتنا حتى حااجة باش تعطيني الكيشي...

خنزر فيها وهي بلعاات ريقها: من نهاار شفتيني ونتا مكلف بياا ومتحمل مسؤوليتي... ماغانقدرش نرجعليك هااد الشي كاامل ماابغيتش...

قاطعها بحدة: تكلفت بيك ونتي ماكنتي عارفة واالوو... ودابا غانتكلف بيك ونتي عاارفة حيت رااك تحت جنااحي... ياك يالله قلتي بللي غاتلعبي جميع الأدواار فحيااتي... وانا غانلعب جميع الأدوار فحيااتك... ماتزيديش تهضري فالموضووع...

حنات راسها سااكتة وهو حج جبهتو على جبهتها: عرفتي هااد الماكلة للي جبتي وجيتي تجري بااش نااكل أناا... كايعنيولي بززااف غير بهااد التصرف للي درتي ياا أزهاار رااك خلصتي الديين للي فاات وللي جااي..

طلعاات راسها كاتشووف فيه وابتااسماات: ماعمرني كنت فرحاانة بحاال هااكا مللي كانت عندي ربعطااش... فرااسك؟؟

غيت: وأنا ماعمرني كنت فرحاان بحاال هااكاا مللي كنت فالسبع سنيين...

رجعاات عنقااتو: غانبقااو ديما هااكا يااك؟؟

غيت: حتى يدفنوونا تحت الترااب...

بقااو مدة طويلة هاكاك... حتى بعدات عليه: غايخصني نمشيي داباا... خالتي تفيق وماتلقاانيش..

حرك راسو: مااسخييتش بييك...

ازهاار: حتى أناا...

شدها من شعرها مقربها لعندوو وبااسها فشفاايفها بووسة سااخنة لدرجة لعب بريقهاا... وهي جاامدة... وبعد مبتااسم نطق كايشوف فييهاا: غاانعلمك كيفاش...؟؟ من ديما واناا من ورااك وكانعلمك من بعييد... وهادي غاتكون أول مرة نعلمك فيها ونتي قريبة...

ازهاار بدهشة: غاتعلمني شنوو؟؟

رجع شدهاا وبااسهاا مرة أخرى وهي مخرجة عينيها: غانعلمك هااد الشي... (بعد كاينهج): كاانفصل غير بزز...

فالصبااح خاارجة هي وخالتها من المحاال ديال الحلوى... من بعد ما تقداو للي بغااو... وقفوو كايستنااو طااكسي...

نطقاات خالتهاا: الدجااج واللحم نمشييو لعند خديجة للي فالحومة لقديمة نتفاهمو معااها تشري وطيب...

أزهاار وهي كااتشوف فالسااعة: لاا نطيبو أناا... (شاافت فجنبها): هاا المرشي نمشيو نتقدااو من تماا...

سبقااتها ومشااو تقدااو اللحم والدجاج والديسير وكااع للي غايحتااجو ورجعو وقفو كايستنااو طااكسي بااش تمشي تشري القفطاان للي غاتلبس...

خالتها: مراد النهار كامل وأنا نعيطليه كاع مااحل الكونيكسيوون...

أزهاار: غايكون غير مشغول

خاالتهاا: واخا هاكاك غانشاارجي ونهضر معاه أبيل عادية غايتقلق إلى ماعلمتوش.. راك عارفة راسك شحال عزيزة علييه...

أزهاار: آه... للي بغيتي أخاالتي... أصلا يعرف يعرف... إلى ماحضرش للخطوبة يحضر للعرس إن شااء الله...

خاالتهاا: عندك الحق... ولكن ضروري نعلموو قبل... باش بعدا يشكر السي غيت حيت بسباابو مشا لبلجيكاا... (صغرات عينيها مفكرة شي حااجة): وااش غير حيت ولد خالتك عااونوو؟؟

ازهاار ببروود: لاا... غار علياا منوو وبعدو علياا...

خالتها بصدمة: كيفااش...؟؟ اويلي وااش داوية بصح؟؟

أزهاار: والله...

ضحكاات: وااغيرتوو نفعااتنا هههه... مراد بحاال خووك...

أزهاار: وهو كاايقوول مااولداتوش موك يعني مااشي خووك..

يالله غاتجااوبها حتى صونالها التيلي: آلوو... كيفاش؟؟ واش صاافي وجد...؟؟ واحد السااعة ولاا ونجي... كيفااش؟؟ علااش.. راه عندي واحد الشغل..؟؟ يااك؟؟ وااخا وااخا صاافي....

قطعات وأزهار كاتشووف فييها: يااك لاباس أخاالتي؟؟

جاوباتها كاتخشي التيلي فالصااك بالزربة: غايخصني نمشي أبنتي المقدم للي عيط... هذاك الراميد للي شحال وأنا نجري ونتبعوو عليه قااللي واجد ونمشي داابا ندييه...

ازهاار: إيوا نقضيو الغرااض وسيري.. يااك القيادة حداا الداار...

خالتها وهي كادير سطوب للطاكسياات: قاللي غايخرج داابا وغايستنااني... مابغيتش نغاامر عاود ينكرني فييه...

وقفااتلها طاكسي وهي هزاات السااشياات على أزهااار: أناا نحط هاد الشي فالثلااجة.. ونتي قضي الغرااض وأجي ابنتي... تلقاايني فالداار...

مشاات قبل ماتجااوبهاا... ركباات وخلااتها واقفة كااتسووط بغااتها تختاار معاها... حتى وقفاات طوموبيلتو حدااها... خلااتها كاتشوف مافاهمااش... دارلها إشارة باش تركب... حلات الباب وركباات بااسها فخدها وديمااراا: غانديك لواحد البوتيك دياال البلدي.. زويين ودااك الشي رااقيي..

ازهاار مافاهمة واالوو: كيفاااش؟؟.. واش نتا ماخداامش؟؟... وشنو كادير هناا؟؟

غيت وهو كايسووق: خدمتي فهااد السااعة هي نتي...

ازهاار: وباش عرفتيني بووحدي؟؟ وغير خاالتي مشاات ونتا تجي؟؟

غيت: إحسااس

ازهاار: كيفااش إحسااس؟؟ (شاافت فيه بشك): واش كنتي عارف بللي غاتمشي؟؟ يااك ماانتا للي...؟؟

قاطعها ببراءة: المراا الراامييد شحاال وهي تسنااه... وانا غير درت فييها خيير...

خرجاات عينيها بصدمة: مااايمكنش... لاا لاا نتاا خطاار... (رجعاات شاافت فييه): وعلااش؟؟ رااه كاتنت غاتختاار معاايا... أنا كاانتلف بوحدي...

شاف فييها بنص عيين: وأناا ماعاجبكش... غير تيقي فياا ذووقي حسن من ذووق خاالتك...

أزهااار: كيفاااش؟؟... واش غاتختاار معااياا؟؟

غيت: غانختاارلييك... غاتلبسي على ذووقي أعمري...

بقاات ساكتة كاتشووف قداامها كاتستوعب... ورجعات شافت فيه: يعني نتا صيفطي خالتي غير باش تختاار شنو نلبس؟؟

حرك رااسو: براافو زغنوونتي فهماات...

ابتااسماات: غانلبس على ذووقك...

شاف فيهاا وغمزهاا: هذا غير القفطاان... مازال يعجبك ذوقي فحوايج آخرين..

ازهار بغبااء: آه... رااه شفت الحواايج للي خديتيلي كلهووم زوينيين

غيت: لاا دااك الشي للي داوي عليه بااقي ماشريتوليك...

يالله غاتسولو حتى فهماات... خرجاات عينيهاا: هاااا....؟؟! (شافت فالطريق): فين جااي هااد البوتيك؟؟

ابتااسم بلا ماايجاوبها وهي بقات كااضور فعينيهاا

يتبع...