محتوى القصة
وصلات الرحلة للندن وحجزو شقة صغيرة مفرشة جنب الشقة ديال سارة وحطو اغراضهم وجلسو ارتاحو .. هز عيسى الفيكس ديال الدار تاصل بسارة وكان الحوار كالتالي .
الو
الو سلام عليكم
عليكم السلام معاك عيسى
ااه السي عيسى. اش خبارك لاباس كولشي مزيان. وصلتي ؟
وصلنا الحمد لله جا معايا ساجد
شكون اللي جا معاك!؟
ساجد اللي جا معايا
اااه ساجد حيت ماسمعتكش مزيان المهم الحمد لله على سلامتكم
الله يسلمك مشغولة واقيلا
لقيتيني فالخدمة .. ايوا وراك عارف
فهمتك ..وصافي بغيت نعلمك وصافي باش غدا الصباح نشوفو جنة
صافي واخا غنخرج من الخدمة دابا ندوز لاكريش نشد ليا واحد ديس جوغ باش تبقا معاكم فهاد العطلة .. كنت غنقول ليك سير لاكريش. الى كنتي بالي تشوفها ليوم ولاكن مغاديش يعطيوها ليك
لالا مايعطيوهاش ليا اصلا الضلام بدا كيطيح خليها حتى للصباح غتخرج بالليل تمرض ولا شي حاجة
اه بدا كيطيح .. الضلام كيطيح مع العصر هنايا
راييه داكشي اللي بان ليا
وا صافي خليكم رتاحو غدا ان شاء. الله قبل منمشي للخدمة ندوزها ليكم سيفط ليا لوكاليزاسيون فين نتوما
حنا حداك فنفس الكارتيي
فين حدايا ؟؟
حداك غير فالعمارة اللي حداك
ايوا مابعادينش علاش منتعشاوش اونسومبل ليوم مدام نتوما غير حدايا
اللي عجبك شوفي نتي
صافي نخرج من الخدمة ونتلاقاو حدا لاكريش مزيانة ؟
اوك مزيانة يا الاه الله يعاونك
بسلامة سلم على ساجد باي باي
قطع وحط السماعة تلفت عند ساجد قاليه كي جاتك لندن
قاليه ساجد مافيهاش الضوء
قاليه عيسى الضو عندهم هنا بالقياس اولدي ماعندك مادير نصبرو وصافي
ساجد : غنبقاو جالسين غير فالدار ؟
عيسى : هاحنا دابا شوية غنخرجو .. كليتي مزيان فالطيارة ولا باقي فيك الجوع؟
ساجد انا بغيت غير نشوف جنة
عيسى : يالاه دير الجاكيط ديالك على البرد نمشيو نشوفوها
خرجو على رجليهم كيهضرو قاليه عيسى واقيلا ماعجباتكش لندن
ميل ساجد راسو وقاليه. شوية
كنلو الطريق كيضحكو حتى لاكريش. وتلفت ساجد على غفلة بانت ليه متوسطة القد والطول لابسة سروال توب مجموع فيه فتحات فالجناب كحل وصباط عالي مقمقم كحل ومونطو بني معقود بحزام وصاك فيدها وشدة تركية بشال بني وجايا زربانة.. بقا كيحقق فيها حتى شيرات ليه بيدها كضحك قاطعة الشارع وتلفت بسرعة قاليه بابا بابا عا طاطا سارة ها هيا
تلفت شاف فيها ودار ابتسامة خفيفة حتى وصلات عندهم وشافت فيهم كضحك قالت ليه السلام السي عيسى. الحمد لله على سلامتكم كي وصلتو . وتحنات على ساجد باستو كتهضر معاه بداو يتبادلو اطراف الحديث بثلاتة على الاحوال وقالت ليه اجي ندخلو
دخلو معاها لاكريش عرفاتهم على المديرة ومدات الاخيرة يدها تسلم لاكن تراجع عيسى ابتسم ليها ودار يدو على صدره خلاها كتشوف مافهمات والو .
كان متشوق يشوف جنة هوا ساجد وبقات واقفين كيهضرو مع المديرة حتى خرجات عندهم شادك فيد صاحبتها ودايرة كرينات لشعرها الاشقر وجارة شكارتها معاها لابسة ليبة غليضة بيضاء وليبوط فالسومو ومونطو سومو فيرور حتى للركابي وكتهضر وتخاصم مع صحاباتها بالانجليزية. نتي درتي ليا نتي نخاصمة نتي صالحك وسارة تابعاها وسط ضجيج الاطفال كتعيط ليها وتجرها من يدها وهي كتشير بصبعها وتهضر على تصفية الحسابات مع البنات . شداتها سارة كضحك قالت ليها بالانجليزية ااجي شوفي شوفي شكون جا عندك
تلفتات جنة تشوف بعبوس من الصراعات مع البنات شافت باها قدامها كيضحك وساجد جاي عندها وحلات عينيها تصدمات شافت فسارة ورجعات شافت فباها وضارت عند صاحبتها اللي مخاصمها قالت ليها قالانجليزية باباا جا عندي ناااناانااا غنمشي للمغليب ونخليكم يالاه
جراتها سارة قالت ليها سيري بعدا سيري عند باباك
مشات كتجري تعرض ليها ساجد هوا الاول عنقها تلاحت عليه قالت ليه هزنيي
جرها عيسى كيضحك عنقها وبالفرحة بدات كطلع عليه وتتعلق هزها ومشا خارج بيها وسارة جارة الشكارة وكتهضر مع ام صاحبتها على داك الخصام وكيضحكو حتى خرجو وتوادعو برا وضارت تشوف بنتها سمعاتها كتقول لباها جبتي معاك سميسة
شاف فيها كيضحك قاليها ااودي يا ودييي على العربية ! فين هي العربية؟؟
شافت فساجد قالت ليه جبتي معاك سميسة
قاليها ساجد نحيدو الشمش من السما ونجيبوها !؟؟؟ اشمن شمش؟؟
جرها عيسى قاليها شوفي فيا .. هضري معايا العربية
شاف فساجد قاليه هضر معاها الدارجة اولدي باش تهضر معاك
قالت ليه سارة كتعرف غير دابا خرجات من لاكريش نهار كامل وهي بلبلبلبلبل بلونكلي صبر شوية غادي تبدا تهضر راسها
قاليها كتهضري معاها الدرجة فالدار
قالت ليه كنهضرو مرة مرة
قاليها خاصك تهضري معاها يوميا ماتخليهاش تنسى العربية
قالت ليه لا كنهضر معاها كنخفضها الاذكار والقرآن .. ضاروري
قاليها مزيااان وتلفت عند جنة كيهضر معاها وهي غطير تزادت فيا ضلعة فاش شافتو وروناتهم وبدات تفشش وسارة تابعاها .. سيري نيشان .. حشمي .. جلسي. وقفي. حتى وصلو للدار طلعو بالريكاطا رحبات بيهم سارة وقاليها عيسى شوفي واش غتبدلي ليها ولا شنو غديري نخرجو برا نتعشاو
قالت ليه منبدل ليها ما والو غندخلها غير طواليط
جراتها بزز داتها للطواليط قضات حاجتها وبقات كتوصي فيها تنقص من الطيران و خرجاتها طلقات ليها شعرها ودارت ليها بيرية بيضاء وطلقاتها مشات عندهم قالت ليهم يالاه صافي لبست وشافت فسارة قالت ليها بسلامة ماما
تمات سارة جايا كتسد الباب قالت ليها هاي هاي على بسلامة هانا جايا قالك بسلامة
خرجو مجموعين لمطعم كبير وجلسو على طاولة يطلبو الاكل .. عطاو لجنة تختار وبقات عليهم هادا .. لا هادا .. لالا هادا .. بحالكم .. بحال ديال دوك الناس
خدات ليها سارة لائحة الطعام قالت ليها اري نوريك شكون اللي حسن
شافت بنص عين فعيسى لقاتو كيشوف فيها وخافت تكون غلطات مع بنتو بلا ماتقصد ويقول ليها شي كلمة وقالت ليه بابتسامة الى بقيتي داير ليها الخاطر اكثر من لقياس تخرج ليك عقلك
قاليها ماشي مشكل باقا صغيرة مزال خصها الخاطر ويعيط ليها هزها على رجلو باسها وعطاها اللائحة كيوريها بالخاطر حتى حمقاتو وسدها قاليها شوفي. ماماك شنو بغات طلب ليك شوفي
كحز عندها ساجد قاليها بحالي انا اجنة خودي بحالي
قالت ليه لالا بحال ديال دوك الناس
دور ليها عيسى وجها قاليها هضري بالعربية
دورات وجهها ماداتهاش فيه وناضت مشطونة رجعات بلاصتها كتجلس وتوقف. وطلع على الكرسي. وسارة شاداها لاطيح وكتنفخ وقالت ليه مكديرش هاكا كتجلس مكتحركش غير حيت شافتك دابا داكشي علاش كدير هاكا
بقا ساكت كيشوف فجنة وكيجرها بغاها تجلس عندو وهي كل شوية طلع عليه وتجر فساجد وتلعب ..حطو ليهم الماكلة ومدات يدها تاكل وشدها عيسى وقفها وقاليها شنو كنقولو قبل مانبداو
بقات كتشوفيه قالت ليه شنو ؟
قاليها قلت ليه هضري معايا العربية يالاه شنو كنقولو
بقات كتوف فسارة اللي كانت كتخرك ليها لسانها بتخبية وشنايفها وجنة كتحقق فيها وشافت فعيسى قالت ليه بسم الله
قاليها مزيااان يالاه دابا عاد كولي
حطات سارة يدها على وجهها دوراتو وغطاتو دارت راسها ماراهاش معاهم وخبات الضحكة على ساجد اللي كان كيشوف فيها ويضحك عاق بيها وبقا ساكت وهز الفرشيطة قال بسم الله وبداو كيتعشاو مع فرط الحركة اللي فجنة .
عم الصمت من بعد العشا والصراع ديالو مع الاواني لا تتهرس وعيات جنة بالحركة وقطعات الحس تكات على الكرسي ديالها وبقات كتشوف بعينيها وعيسى كيضحك قاليها صافي عيتيي
ابتسمت سارة وقالت ليه هادي الساعة فاش كتنعس
شافت فساجد اللي كان شاد تيليفون كيلعب فيه وقالت ليه ساجد كي غادي مع القرايا
مسح عيسى على راسو وقاليها مجتهد هوا الاول ديما
قالت ليه تبارك الله الله ينجحك يا ربي
ساجد بقا ساكت حشمان وعيسى عنقو بدراعه وقاليها امين .. وديك البخوشة كتتعلم شوية ولا غير البسالة
حركات راسها كضحك وقالت ليه لالا ذكية تبارك واخا باسلة
سكت كيتأمل فجنة اللي بدات كترمش حتى نعسات وتنهد قال لسارة كي غادية مع الخدمة ولفتو الحياة هنا بعدا
دارت رجل على رجل تنهدات وشافت فجهة اخرى بتأمل وقالت ليه كما كان الحال احسن من قبل .. واخا الجو خايب وماكيشجعش على العيشة هنا ولاكن كاينين ميزات اخرين كيغطيو عليه . المشكل هوا فاش غتسالي المدة ونعاودو نرجعو للمغرب .. خاص الوقت عاوتاني باش نتأقلمو مع الحياة تما
هز كاسو ديال القهوى شرب منو وقاليها والواليد والواليدة مزيانين ؟. كيعيطو ؟
ابتسمت وقالت ليه الحمد لله . تقريبا يوميا كنهضرو معاهم .. توحشو جنة بزاف
حرك راسو بالتقالة وقاليها هضرت مع الواليد ديالك قلت ليه على الحج الى كان باغي زعما يمشي نمشيو ..
قاطعاتو قائلة ؟. وشنو قاليك ؟؟
قاليها قالي الى كان غيمشي خاصو يدي معاه ماماك حتى هي .. قلت ليه ماشي مشكل زعما نتكلف بالمصاريف وداكشي الى كان مامستاعدش من جهة المصاريف ولاكن مابغاش.. عييت فيه والو
بقات ساكتة كتخمم مطولا وقالت ليه يمكن عيان ولا شي حاجة
قاليها ماعرفتش .. المهم قلتها ليه قالي حتى نشوف
بقات ساكتة بابتسامة ويدها عل جنة وسولها على رمضان والعيد كي دوزوه وبقات كتجمع وتعاود هي وياه حتى وصلو لموضوع الطلاق ديالها وسولها قاليها مزال ماخرج ليك الطلاق
قالت ليه بلا مبالات. مزاال .. باقي معلق فالمحكمة وانا مامسالياش
قاليها علاش باقي معلق فين كاين المشكل؟
تنهدات وشافت وشافت فدفار يديها كتقشرهم وقالت ليه هاداك قليل الاصل مابغاش يطلق .. داير ليا بيت الطاعة وداك التخربيق . .
استغرب وقاليها كيفاش بيت الطاعة ونتي هنا فلندن
حركات راسها بالنفي بتتاقل وقالت ليه ماعارفنيش هنا اصلا .. الى عرفني غيزيد يلسق وانا بغيت نتفك قلت مع راسي انا اصلا غنجلس عماين هنا وخلي ديك الدعوة تما مجرجرة راه المحامية مكلفة حتى نشوفو شكون يعيا .. بغا بيت الطاعة راه خرج ليه .. اما انا هضرت مع المحامية قلت ليها دفع ليا اوراق ديال السبيطار باللي ناعسة مريضة باش منحضرش لدوك الجلسات الى سول القاضي . خليه يربح بداك بيت الطاعة ماعندو مايصور مني لا هوا لا داك القانون ديالو
تنهد وبقا ساكت مطولا وقاليها شنو كيدير هادا ؟
مارضاتش تقول ليه شومور وقالت شريك فشي شركة..
قاليها شنو سميتو ؟
بقات ساكتة كدور عينيها قالت ليه علاش ؟.
قاليها سولتك مابغيتيش تعطيني سميتو صافي ماكاين حتى مشكل
قالت ليه راني كنت دفعت الطلب ديال الزواج وكانت فيه سميتو وكنيتو
قاليها مابقيتش عاقل على سميتو فكريني فيها
بقات ساكتة مطولا كتفكر واش تعطيه ولالا والى ماعطاتهاش غنبين انها محسوسة وهوا بإمكانه يجبدها غير بتيليفون واحد وعطاتو سميتو وكنيتو وقاليها الانسان قبل مايحط وجلو خصو يعرف فين كيحطها .. زوج طلق داكشي مصالحش والباب الى تحل كيرجع ساهل ماهل فالحلان والسدان
قالت ليه اصلا مابقا كيهمني حتى واحد دابا .. الى مالقيتش راحتي مانجلسش .. كما قلتي نتا صعيبة غير البدية
دار يدو حدا راسو قاليها بقاي تفكري مزيااان قبل ماديري شي حاجة .. هانتي وحلتي مع هاداك وافكيها دابا
هزات كتفها وتغزز دفرها وقالت ليه لهلا يفكو خليه هاهواك معلق تما بحال الزبيبة .. اما انا راني عايشة كيتو هوا اللي طالع هابط.. نهار نرجع للمغرب غنجلس شهر ونعمر عاوتاني لبلاصة اخرى .. هادشي الى بغا يتساعد معايا الرئيس وقدر الضروف
هز حاجبو قاليها الرئيس يبقا مقابلك غير نتي ؟. راه حتى هوا عندو اولويات ومصلحة الوطن فوق مصلحة الموضف واش الموضف جاي يخدم البلاد ولا البلاد اللي خصها تخدم الموضف
قالت ليه بجوج ..كما هوا كيخدها تخدمو حتى هي
قاليها هاد الخدمة اللي خادماه ماقنعاتكش؟. الحماية اللي موفرة ليه مابانتش ليك ؟. سولي اللي مشاو للعراق ومشاو لسوريا وغزة .. هادوك هما اللي عارفين بحق بلادهم وكيتمناو يرجعو ليها. . اما نتي راكي فلندن وما ادراك ما لندن كيجي ليها غير شكون وشكون
بقات ساكتة فاللخر هزات كتفها بلا مبالات وقالت ليه المهم خال احسن من حال الحمد لله .. حتى واحد مالقاها كي بغاها . اصلا كن حياتي مقادة وفيها كولشي مقاد ومافيها حتى عيب. غنشك فينا واش الجنة .. نشك واش مت ودفنوني ومشيت للجنة .. حنا اصلا فالدنيا وباغيين نعيشو فالجنة مايمكنش . كل واحد والمشاكل اللي عندو
بقا ساكت ماهضرش وماقال ليها لا نوضي لا جلسي حتى جات منعندها وناضو كل واحد لدارو ..بغا ياخد معاه جنة تبات معاه وعطات ليه ووصاتو عليها ومشاتبحالها وكتقول عنداك غير ينعسها حداه وتبول عليه ولا مايفيقهاش بالليل للطواليط .. بقاعقلها مشطون واخا نعست ففاقت فنصاص الليل عيطات ليه جاوبها وصوتو مبحوح قالت ليه نوض جنة للطواليط غدير بيبي فالفراش .قاليها نوضتها
قالت ليه مابكاتش
قاليها شوية فاش مالقاتكش .. هزيتها ضرت بيها شوية حتى نعسات وحطيتها
قالت ليه اوكي تصبح على خير حتى لغدا
قطعاتورجعات نعسات ومع الصباح فاش كانت غادية للخدمةعيطات ليه لقاتو فايق.وسولاتو عليهاقاليها ناضت بغات تفطر شنو ندير ليها
قالت ليه هادا هوا الوقت اللي كتفيق فيه هاشنو دير هاشنو كتبغي وقطعات خلاتو معاها يعرف نيت شنو كتاكل بنتو وشنو مكتاكلش وشنو اللي كتبغي شنو مكتبغيش. ضربات الطناش عاودات عيطات كتسول لقاتهم خارجين وقطعات رجعات لخدمتها حتى للعيشية وتاصلات بيه قاليها رجعنا للدار
قالت ليه بغيت نشوف جنة وقاليها دوزي للدار عندها
ترددات فالاول تمشي عندهم فالاخير قالت بنتي تما اصلا ومشات دقات عليهم فتح ليها ساجد ودخلات سمعات صوتو كيصلي من البيت ولقات جنة فيدها زلافة ديال سلطة فواكه ومكسرات كتاكل ومشات عنقاتها قالت ليها حبيبة ديالي. نعستي لبارح بلا بيا مابكيتيش
حركات جنة راسها وقالت ليها لا ونتي مابكيتيش؟
بدات سارة كضحك وجلسات حداها كتلعب ليها فشعرها وتسولها فين مشيتو وفين جيتو وسولات ساجد عليها وعلى البسالة بقا كيعاود ويضحك حتى خرج عندهم عيسى ابتسم وقاليها السلام وجلس على كرسي فالطرف سولها على الخدمة وبقاو كيتابدلو اطراف الحديث .. شوية شوية بدات كتبع ليه العين وبنص عين وهوا نايض يجاوب فتيليفون حتى رجع ودورات وجهها كتهضر مع جنة وساجد وقالت ليها تبقاي. مع بابا؟
لسقات فيها جنة قالت ليها ديني معاك
قالت ليها سارة فين غنديك حشومة !!وشوور باباك غيبقا فيه الحال
سكتات جنة وقطعات الحس معنقة يد سارة وحاطة عليها راسها . رجع عيسى وجر عندو جنة قاليها علاش مابغيتيش تبقاي معايا؟.
هزات كتفها وقالت ليه لا نمشي مع ماما
دور ليها وجهها عندو وقاليها وباباك ؟
هزات كتفها وبقات ساكتة الشيء اللي حرك مشاعر عيسى اتجاه بنتو وشاف فسارة قاليها ولفاتك
قالت ليه شكون عندها من غيري هنا وشكون عندي من غيرها جالسين هنا فهاد الغربة
تنهد وقاليها ماتمشي غير فين مشات الله
ابتسمت فوجه جنة وقالت ليها نمشيو؟
حركات جنة راسها وشدات فيدها قالت ليه حتى لغدا ان شاء الله السي عيسى وندوزها ليكم الصباح قبل ماتمشي
حرك راسو بتتاقل كيشوف فيها ورمشات كتشتت النضر وخرجات دات بنتها ومشات بحالها
كان لقاء باارد .. خالي من المشاعر حسب ماكيهضر عليهم بجوج ..ًكانو الحوارات كلهم على بنتها وعلى الخدمة .. نهار على خوه ووكل نهار كايعاود نفسه حتى انتهت العطلة عند عيسى وساجد وبقا ليهم نهار واحد فلندن ويرجعو بحالهم .. دوزو ديك العشية ديال داك النهار مجموعين فمطعم وكان عيسى كيحاول يتقرب من جنة طيلة هاد الفترة لاكن كان تعلقها بأمها اكثر من تعلقها بباها وهادشي كان واضح بالنسبة لعيسى .. كان كيشوف كلشي على عينيه ومكانش عاجبو الوضع وماعندو كيفاش يخلي بنتو تبغيه بزز منو من غير الى سكنها معاها وعاش معاها دقيقة بدقيقة وثانية بثانية .. لاكن الامر صعيب او شبه مستحيل وماعليه غير يولف على هادالوضع الي كيألم .
نعسات جنة فأحضان سارة وشد ساجد تيليفون كيلعب وبقات جالسة هي وياه على اضواء المطعم الخافتة كيشوفو فالشارع المنير من لداخل .. تنهدات وتفكرات شيء ما وقالت ليه . تفكرت . قبل مانسا راني بغيت نسيفط بابا وماما للحج .. وماقلتهاش ليه حتى ندير ليه مفاجأة
ابتسم وقاليها مزيان الله يسر
قالت ليه بغيت نقولها باش تكون على علم انهم غيمشيو معاك فنفس الكروب .. والى كان ممكن دخلهم معاك للكروب ديالكم
رد بالايجاب وقال .. ان شاء الله
ابتسمت وقالت ليه الله يقبل ليكم .. ماكرهتش حتى انا نمشي للحج ..
قاليها ان شاء الله كلشي عند الله قريب
قاليت ليه كل عام كتمشي؟
قاليها لا ماشي كل عام .. هاد العام قلت نمشيو نحجو . منها حجة وندير عمرة على لبنى الله يرحمها
بقات ساكتة كتشوف فيه مطولا وقالت ليه خلات بلاصتها
تنهد وربع يديه قاليها كلنا ليها ..
وتلفت عند ساجد ابتسم وجرو عندو عنقو بيدو طبطب عليه حيت كان كيسمع وكان مزال متأثر بموتها لاكن ماكيدير حتى ردة فعل .. ابتسم ليه عيسى وقاليه غنديرو عمرة على ماما للنى ياك
حرك ساجد راسو وبقا ساكت كيشوف فتيليفون وسارة كتأمل فيهم بجوج. . قالت ليه غتديه معاك
حرك راسو بنفس الابتسامة قاليها ان شاء الله الى كتاب
ابتسمت وقالت ليه ان شاء الله الله يقبل . نمشيو واقيلا مشا الحال
حرك راسو وناض وقف قاليها اري ليا جنة نهزها وهزها باسها وعنقها ناعسها خرجها وصلهم حتى للدار ودخل حط جنة بلاصتها وشاف فيها قاليها يالاه هوا هادا .. تهلاو فبعضياتكم وردو البال لراسكم
ابتسمت قالت ليه الصباح غتمشيو ؟
قاليها ان شاء الله .. دوز واحد اربع شهور ولا ست شهور ونعاود نجي نشوفها .. ردي ليها البال عفاك
تحنى على حنة باسها فراسها وخرج مشا بحاله وكانت هاداك اخر لقاء بناتهم واللي من بعده كملوها اتصالات فقط عبر الهاتف وكل واحد رجع للروتين ديالو
الايام كطير .. سارة من الدار للخدمة ومن الخدمة للدار .. دخل عليهم فصل الشتاء وزاد الجو كآبة وواخا كيخرجو واخا كيدورو لاكن الشمس اللي محتاجينها مكايناش . استمر الحال على ما هوا عليه حتى جاها اتصال من عند المحامية ديالها واحد النها وقالت ليها راه طليقك تاصل بيا على قبل الدعوة ديالك فالمحكمة واش فخبارك
استغربت سارة وقالت ليها لا مافراسيش علاش؟
ردت المحامية وقالت ليها تدخل باش تسالي هاد المهزلة وطلب مني الملف ديالك لاكن ماقدرتش نعطيه ليه
بقات سارة ساكتة وكتفكر مطولا وقالت ليها غير عطيه ليه
أكدات عليها المحامية وقالت ليها الى عطيتو الملف غنخرج من القضية
قالت ليها سارة الى كان غيتدخل يفكني من داك الجرتومة غير خليه يتدخل .
قبلات المحامية طلب سارة اللي قطعات معاها وتاصلات مباشرة بعيسى سولاتو على الاحوال وقالت ليه راه المحامية قالت ليا بغيتي الملف ديالي
رد عليها قاليها اه انا طلبتو ليها نشوفو هاد القضية اللي مابغاتش تسالي
قالت ليه اه ماشي مشكل قلت ليها عطيه ليه .. سمح ليا السي عيسى على هاد الديغونجمو ماكنتش باغا نشطنك فالمشاكل ديالي
قاليها امم.. مهم دابا نتي ديها فهدمتك وردي البال للبنت وحنا هاحنا غنفكو هاد الدعوة
شكراتو حتى طيباتو بالشكر ورجعات لخدمتها وروتينها ونعسات على جنب الراحة مدام عيسى اللي شد الملف ديالها فالطلاق أكيد بين يديها .. بقات كتسناه على احر من الجمر حتى فاجأها اتصال عيسى وهي فالخدمة واول حاجة سولاتو عليها مللي جاوبات هي الدعوة ديالها وقاليها باستهزاء.. السيد مشا كيخطب وكيبني فالمستقبل فجهة اخرى .. قلتي ليا شريك فشركة
قالت ليه اه
قاليها شكون قاليها ليه ضحك عليك هادا .. هادا خدام فسونطر دابيل وكيتفلا عليك
قالت ليه يمكن دار فاييت ولا وقع ليه بروبليم
ضحك قاليها بروبليم .. ااودي . المهم على سلامتك راك تفكيتي
قالت ليه بصح صافي طلق؟
قاليها طلق ؟. واطلقناه غيابيا بغا ولا كره كن جات عليه هوا ميطلقش .. المهم عل سلامتك ..مرة اخرى عرفي فين كتحطي رجلك زوج طلق غيطيحك شي نهار فشي سفاح .. المهم الكداب فلتي منو مرة الجايا ردي بالك
قالت ليه واخا شكرا سمح ليها عدبتك السي عيسى ..سلم على رجاء وساجد وتهلا فراسك
هم ونزاح وقدرات تنفس .. جلسات بوحدها فالخدمة وقات كتفكر وتقول. . شووف ليك السيد اللي درت ليه الخلع هوا نيت اللي فكني من تزويجة فالصو .. ناري العيب شحال خايب وشحال زوين تجاوب الناس بلخير .. كنحس براسي منسوا والو وحتى الوجه باش نشوف فيه مابقاش عندي .. على الاقل كن تعامل معايا خايب كنت غنبقا مرتاحة ونخرجو للعيب مايبقاش فيا الحال .. لاكن دابا وليت انا اللي مامزياناش وانا اللي مانسواش.. شداني لشي خلع اعباد الله وفين كان عقلي وفين كنت كنفكر .. وشووف دابا واش باقي نرجعو كي كنا .. واخا نحلم بيها بالالوان مانرجعو على الضوسي لكحل اللي عندي .. كن واحد اخر مايشوف فيا حتى الشوفة واخا نكون انا اللي كنفرق الزين على عباد الله .. بلحق هادا دوايا هادشي اللي يصلاح ليا .. الراجل المسكد هانا خليتو لرجاء اللي تعرف ليه اما انا سري ولاد لحرام .. كنت مزوج براجل تتمناه اي وحدة وفاللخر ضيعتو وشوف واش نلقا واحد نكمل معاه حياتي ولالا .. ولا توقع شي معجزة ونرجعو .. هه .. واخا نطير مايردنيش بلا منطمع فشوية دالخير دارو معايا ..
سهات كتخمم وتدي وتجيب حتى عيات .. عقل كيقول ليها يردك وعقل كايقول ليها والله لا حلمتي بيها . اش دير ما دير تبين ليه انها ندمات وتبدلات وتحاول تردو ليها هادشي الي كان مزال كيشوف جيهتها بعدا ومزال ماحشم من التعدد .
بعد تفكير عميق قالت خلي ينسى ليا هاد الزبلة دالزواج ويحن الله .. ماشي بيه فيه نبقا نزنزن عليه .. خلي كاع حتى نرجع للمغرب .
دخلات سوق راسها وشدات فتربية بنتها وخدمتها وبينات على الكفاءات ديالها ودارت لواليديها مفاجأة ديال الحج على الله يغفرو ليها ديك الهربة اللي دارت لبنتها .. كان هاداك هوا النهار الكبير عند واليديها ماتوقعوهاش وعرفات باها باغي يحج لاكن العين بصيرة واليدًقصيرة ومابغاش عيسى يخلص عليه شي ريال ولا يديه الا الى كان غيخلص على راسو وعلى مرتو .
العيد كيقرب والضيم كيطيح على سارة وتوحشات تعيد مع دارهم .. ريحة العيد فلندن مكايناش .. لا اجواء ولا حتى حاجة .. اما عيسى وواليديها مشاو للحج وخداو معاهم ساجد.. بقا غير الحاج الحجوجي الكبير اللي مامشاش بسبب المرض ديالو والعيا والتعب ومشات فثر مرتو تحج ودير عليه عمرة ودعي معاه ينوض بالسلامة
العيد الكبير فلندن .. صبحات سارة خدامة فيه ومكاين عطلة ولا والو .. تقول مكاينش العيد. الضيم والقنط وتزيرات حتى بدات كتبكي فالبيرو بوحدها ورجعات تكمل خدمتها .. خرجات فالعشية ومشات دارت خدات شوية داللحم وكبدة وداتهم للدار هي وبنتها شواتهم فوق الشواية ديال الضو وعلقات البولات والاضواء فالدار ولبسات واحد الجلابة ولبسات بنتها حتى هي وجلسو كيتعشاو خالقين الاجواء غير بيناتهم وكيتجمعو ويضحكو ..جاها اتصال مم عند عيسى وفتحات ليه الكامرة شافتو جالس على ناموسية بسورفيت رمادية ..لاحت شال على راسها وابتسمت قالت ليه عيد مبارك سعيد
قاليها علينا وعليك كي دايرين لاباس كي دوزتو النهار
قالت ليه خدمت عاد دابا قلتا نديرو شوية الباروك .. ونتوما. كي داير بابا لاباس عليه
رد بالايجاب قاليها الحمد لله كولشي مزيان .. حنا عندنا الفجر غادي نوض دابا نتلاقا بيهم لتحت فالاوتيل نمشيو نأديو المناسك
ابتسمت وقالت ليه الله يقبل .. ها جنة هاهيا
دورات الكامرة لجنة وحل عينيه ابتسم قاليها هوووه بالصحة والراحة شكون جاب ليك الجلابة
قالت ليه ماما
قاليها بالصحة..وعيد مبارك سعيد
قالت ليه كتمضغ الكبدة اميين حنى بعدا عندنا العيد فدارنا نتوما كاع ماعندكم فالمغليب
بدا كيضحك قاليها غير نتي اللي عندك العيد حنا لا
هزات كتفها ورجعات للكبدة ديالها ماداتهاش فيه وعيط لسارة قلبات الكامرة عندها قاليها مالها واش عيانة؟
قالت ليه لالا ماعندها والو .. راك عارفها كي دايرة ..
حرك راسو وتنهد قاليها على تهلاو فراسكم
ابتسمت وقالت ليه ماتنساوش دعيو معانا
دار ابتسامة خفيفةوحرك راسو وقطع . حيدات تيليفون قدامها وقالت لجنة قداش عزيز عليك باباك؟
ردت جنة قالت ليها عزيز عليا
قالت ليها شكون عزيز اكثر ؟. انا ولا باباك
ردت جنة : نتي اماما
قالت ليها سارة وباباك حتى هوا زوين وكيبغيك علاش مكتبغيش تهضري معاه ؟
بقات جنة ساكتة مطولا كتاكل فاللخر قالت بعفوية عندو ساجد نتي ماعندكش ساجد
تصدمات سارة قالت ليها كيفاش؟؟ شنو عندو ؟؟
بقات جنة ساكتة كتقطع الكبدة وتلعب وقالت ليها مكنبغيش بابا انا كنبغيك غير نتي وميما وباسيدي مكنبغيش بابا ومكنبغيش ساجد ومكنبغيهمش
بقات سارة مصدومة حالة فمها وناضت من بلاصتها جلسات حداها كتشوف فيها قالت ليها علاش ؟؟ شنو دارو ؟. وساجد شنو دار ليك ؟؟ ياك كيبغيك وجا عندك حتى للهنا
شافت فيها جنة هازة حجبانها وببرودة صدمات سارة قالت ليها ماكنبغيهمش.. مابغيتش؟
طاح السقف على سارة من كلام جنة وطريقتها وقالت ليها شنو دارو ليك واش كاين شي واحد مكيبغيش باباه وخوه؟
هزات جنة كتفها قالت ليها ماشي خويا دابا يعطيه بابا بززاااف ديال خوتاتو هااكا بزاف .
دارت سارة يدها على فمها ماعارفات شنو تقول وكيفاش تعامل معاها؟؟ ويلي شنو كتقول هاد البزة وهادشي. كله جامعاه وساكتة ؟؟ هادشي كله خرج من بنت صغيرة !! كيفاش وعلاش؟.
بقات غير كتشوف وساكتة وهبطات ديك الللقمة بزز وعقلها مع بنتها .. دوزو العيد ديالهم على طريقتهم وومن ساعتها وسارة مشطونة وعقلها كيفكر فكلام بنتها .. كيفاش تبدل ليها تفكيرها وتحبب خوها وباها ليها .. وراش كاين شي بنت اللي مكتبغيش باها ولا خوها ؟!!
من يومها وهي كتحاول تصلح تفكير جنة وكتشري الهدايا وتقول ليها رسلها ليك باباك. وتشري وتجيب وتقول ليها شراها ليك ساجد .. ولفاتها ديك القضية ديال شرا ليك باباك شرا ليك ساجد وكتجلس وتشكرهم ليها وتسايس معاها حتى لواحد النهار شرات ليها لعبة وسولاتها جنة شكون شراها لي ؟
قالت ليه سارة انا اللي شريتها
قالت ليها جنة بابا شرا لساجد
شدات سارة راسها قالت ليها باباك ماشراش لساجد . ساجد كبر هوا اللي كيشري ليك دابا وكيتسناك ترجعي للمغرب..
قالت ليها جنة وعلاش بابا ماكيتسنانيش
قالت ليها سارة كيتسناك وغادي يجي عندك فعيد ميلادك فالشهر الجاي
قالت ليها جنة انا بغيت عيد ميلاد هاد النهار
قالت ليها سارة عيد ميلاد كيجي بوقتو
غضبات عليها جنة ومكان على سارة غير تشري لحلوى وتديها للدار وتشعل ليها الشمعة وبقات كتقول ليها هابي بيرتاي ..صونا ليها تيليفون وكان عيسى . فتحات ليه الخط مباشرة فجنة .. ضحك وقاليها ياك حتى للشهر الجاي
قالت ليه سارة قالت ليك بغات عيد ميلاد ليوم .. هاحنا درناه ..
قاليها عيسى وماقدرتيش تسناي باباك حتى يجي
هزات جنة كتفها قالت ليه انا ماما دارت ليا عيد ميلاد حسن من ديال ساجد
الايام كتجري والوقت كيطير والعمر كيمشي . سنتين مرت بلمح البصر وحان وقت العردة للديار .
حطت الطائرة على ارض الوطن ونزلات بشنطها وهي في غاية السعادة والفرحة لقات واليديها في انتضارها عند بوابة المطار .. اول حضن عطاوه لجنى .. بكاء. عناق اشتياق وتبادل الاحضان وبعدها العودة للبيت اللي هجرات لمدة سنتين .. لقات رحال واليديها فيه وحطات شنطها حتى هي فغرفتها وبدات كدور من ركن لركن مشتاقة لبيتها وراحة غرفتها واواني مطبخها .. اما جنى فكانت الاولى فالسباق لغرفة نومها وعناق العابها القديمة واغطيتها وجذران بيتها .. سرور وسعادة غمرات البيت .. تجمعو على العشاء فجو عائلي سعيد خالي من المشاكل.. تكلم الامام وخبرهم بقراره .. انه يدير صدقة كبيرة فالناضور . وطلب منهم يلمو الشنط ديالهم من جديد .
وكان ليه ما طلب.. شدو الطريق وفطريقهم وهي راكبة اللور جاها اتصال من عند عيسى وماقدراتش ترد .. حسات براسها انها كترتاكب جريمة وانه راجل غريب عليها وباها قدامها كيسمع . قطعات الخط. حتى رن هاتف بباها وسمعاتو كيقوليه حنا فالطريق الناضور غنديرو الصداقة وبدا كيعاود ليه ويتجمع وقطع .
من بعد سيفط مسج ليها قاليها علاش ماقلتيش ليا غتمشيو الناضور ؟ الواليد مريض وتزاد عليه الحال وكنت كنتسنا ترحعو ندي ليه جنى يشوفها .
بقات ساكتة كتشوف فالمسج وهزات راسها قالت لباها واش فراسك عمي الحجوجي مريض تزاد عليه الحال
قاليها لا مافراسيش !
قالت ليه راه مريض قالت ليا يسرى بغا بشوف جنى
قاليها متفاجأ ماقالها ليا حد ابنتي !! غنوصلو ونعيط ليه .
سدو الموضوع وكنلو الطريق حتى للدار وبقات كدور بباها باش تعرف اخبار الحجوجيين .. دخل عندها من بعد صلاة العشاء كيتنهد شافها بغات طلع الباليزة وقاليها غير خلي ديك الباليزة غنمشي الصباح لفاس .. راه الحاج مريض تزاد عليه الحال بصح
قالت ليه واش عيطتي ليهم؟
قاليها هضرت مع الحاج عيسى قالي مريض راهم كلهم عندو فالدار .. واقيلا شي حاجة واقعة مابغاو يقولو لحد المهم الصباح نمشيو نشوفو شنو كاين نديو البنت .. كنشم شي ريحة ماشي هي هاديك
انتابها شعور غريب اثناءها ونفس الشعور اللي جاها عند المرحومة لبنى عاود جاها وقالت ليه ياكما شاد الفراش
قاليها داكشي اللي غايكون غير مابغاو يخلعو حد .. حتى عيسى قالي بغا جنى يشوفها جدها ..ًشي حاجة كاينة
صبحو من جديد شادين الطريق لفاس على الصباح .. الامام وبنتو وبنت بنتو .. وصلو للفيلا دالحاج الحجوجي لقاو سيارات كثار تما مصافين .. دخلات شادة لبنتها فيدها ولقاو الناس جالسين وجههم اصفر . استغربو كانه كلينيك فقلب الدار .. جات عندهم الحاجة نزهة سلمات وطبطبات على كتف سارة وهزات حفيدتها قالت ليها اجي اماما يا ضو عويناتي توحشتك ابنتي.. توحشتك الكبيدة ديالي الله الله على بنتي كبرات وماشفتهاش .
داتها وموراها سارة لغرفة نوم الحاج الحجوجي لقاوه مستلقي على فراش الموت وجنبو يسرى كتبكي ووارلادو طايح عليهم الضيم.ً شافت يمين يسار مالقاتش عيسى ..ًولدو فقط اللي كيمشي تما ومشا عند جنى فرحان عنقها وعنق سارة قاليها جيتو !!
باستو وعنقاتو وقالت ليه اه غادي نشوف الحاج ونجيو توحشناك حتى حنا الحبيب
قاليها واخا انا غنهبط عند بابا نعطيه شارجور ديالو ونرجع
ابتسمت ليه مشا وجلسات جنب الحاج شدات ليه فيدو باستها وقالت ليه عمي .. واش عرفتيني؟
سد عينيه ابتسم قاليها بصوت تقيل ووجه اصفر ولحية بيضاء عرفتك ابنتي.. فين جنى
هزاتها قدامها وراتها ليه وهز يدو لمس وجهها البريئ وباس يدها وقاليها تهلاي فيها .. الله يرضي عليكم .. انا راضي عليكم كاملين كبير وصغير ..
غرغرو عينين سارة وشافت فالحاجة اللي واقفة جنبو من الجهة الاخرى كتبكي .. اما يسرى ماقداتش تصبر وخرجات من البيت سدات الباب وراها خلاتهم بوحدهم .. تحنات سارة على يدو كتبكي طلبات منو السماحة وبدات الصورة كتكرر من جديد.. نفس الاجواء نفس الاحساس ونفس النضرة .. كانها كتسترجع ذكراياتهل يوم رحيل لبنى .. عرفاتو غادي يموت لأن نضراتو كانت نقل نضرات لبنى الاخيرة .. وحتى هوا كان مبتاسم مطمأن حيت عارف راسو غيمشي ومرتاح حيت غسل دنوبو فالحج وادا الواجب ودار اللي عليه وشاف ولادو واحفادو .. بين اصوات النخصصات والدموع تحنات ليه على يدو قالت ليه با الحجوجي.. مكاينش من غيرك من بعد الله اللي يجمع ليا الشمل مع راجلي وبنتي.. انا ندمت وتبت .. بغيت نرجع .. تعلمت من الدنيا ما يكفيني .. مابقا كيهمني لا مرى لا جوج .. كيهمني عشي يتلم .
هزات عينيها فالحاجة اللي شدات فيدها وقالت ليها ماشي وقتو ابنتي دابا راه حالتو ماتسمحش ليه .
من كلام الحاجة كان كيبان انها عندها امل يرجع يبرى عكس سارة اللي كانت حاسة انه غادي يموت ودوك النضرات مايخفاش عليها ابدا .. ماخلاتهاش الحاجة تستنزف ليه الطاقة اكثر وخرجاتها من البيت بالهداوة قالت ليها خلي المشاكل الشخصية لمن بعد الله يرضي عليك .
مسحات سارة دموعها وحركات ليها راسها بالايجاب وشدات بنتها فيدها ..حتى كانت غتزيد وهزات راسها فعيسى اللي طأطأ راسو قاليها السلام وهز جنى ابتسم ليها وعنقها ودخلها معاه للبيت هوا ومو .. نزلات خلاتهم ومشات جلسات مع النساء مقابلة مع رجاء اللي مربعة يديها كتشوف جنب .. دخل ساجد لقا سارة جالسة سولها على جنى قالت ليه مع باباها لفوق ومشا تبعها كيجري ..
بقات جالسة مطولا فصمت حتى واحد ماكيهضر مع لاخر حتى نزل عيسى هازها فيدو وبدات كتركل نزلات عند ساجد وعيطات ليها سارة جات عندها وتبعها حتى ساجد.. شدات ليها فيدها قالت ليها شنو قاليك جدك؟
حركات راسها وقالت لقها هضر غير مع بابا
قالت ليها سارة شنو كان كيقول ليه
قالت ليها جنى قاليه با سيدو ديرو العش ديال الطيور ..
قاليها ساجد لاا ماشي العش ديال الطيور !!
قالت ليه جنى واش نتا كنتي جالس عند بابا نتا كنتي حدا الشرجم انا كنت جالسة عند بابا
شاف ساجد فسارة قاليها لا ماشي هاكاك
قالت ليه سارة شنو قاليه ؟
جا ساجد يهضر عيطات ليه رجاء بنرفزة قالت ليه اجي لهنا ومشا عندها جراتو من يدو كتهضر معاه وسارة كتشوف فيهم .. فلت ليها فاخر لحضة ومالقات غير جنى تسولها قالت ليها شنو قاليه باك سيدك فالبيت اماما ؟
قالت ليها جنى قاليه ديرو العش ديال الطيور عندكم ..زعما يشري لينا بابا العش نديروه فدارنا ويجيو ليه الطيور
قالت ليها سارة كيفاش العش ؟ نو سمعتي بالتفصيل شنو قاليه باك سيدك لباباك؟
قالت ليها جنى واا ماما واش مكتفهميش..راه قاليه جيب سارة وجنى فالعش مع الطيور .. مالكي مكتفهميش؟ قالو عاصيتك باش تجيب العش الى ماجبتيهش مانراضيكش؟
قالت ليها سارة باستغراب عاصيتك!! زعما وصيتك!! قاليه وصيتك
قالت ليها جنى هاديك ااه ولاكن بابا مابغاش يشري لينا العش قاليه عندو العش ماباغيش يدير فيه المشكل
بقات سارة غير كتشوف فيها مافهمات فيها حتى حاجة وكلاها الفضول بغات طرطق وجراتها خرجات لبرا كتسولها حتى شافت ساجد خارج وجراتو عندها قالت ليه ساجد اولدي قول ليا داكشي اللي قال باك سيدك لباباك؟؟
ميل ساجد راسو قاليها ماعقلتش
عقدات سارة حجبانها قالت ليه زعما نتا ذكي دغيا نسيتي؟؟
رمش فالجنب قاليها ماعقلتش اطاطا سارة نسيت
دفعاتو جنى بغيض قالت ليه نتا ماشي خويا ماتجيش عندي
جراتها سارة من يدها قالت ليها حشومة اش هاد قلة الاداب خوك كبر منك
نترات جنى يدها قالت ليه شير عند باباك اللي كيشري ليك الطيور ويشري ليك العش ماتجيش عند ماما
بصوت مرتفع حاد قالتها حتى انتبه ليها عيسى من باب الفيلا وهوا مع خوه وتلفت شاف فيها وجا عندها قاليهم اشنو كاين
بقا ساجد ساكت وسارة بارتباك قالت ليه والو غير جنى كتتتت. راك عارفها
جلس القرفصاء قدام جنى قاليها شنو بغيتي ابابا مالكي
دورات وجها بعدوانية خشاتو فجلابة سارة البيضاء وقالت ليه ماشي بابا انا مكنبغيكش كنبغي ماما
تبدل اللون فوجه عيسى وشد ليها فيدها قاليها حشومة بابا شنو كتقولي ؟؟
بدات سارة كتزراق وتصفار وكدخل وتخرج فالهضرة انا جنى نترات يدها وشدات فسارة قالت ليها نمشي بحالنا لندن مانبقاوش هنا
جرها بزز عندو باغي يهضر معاها وهي كدفع بيديها وطلقها مشات عند مها .. هز راسو فسارة هاز حاجبو وقاليها مالها علاش كدير هاكا ؟
عقدات حجبانها ماعجبهاش السؤال وقالت ليه ماعرفتش انا براسي علد كنسول مالها شنو وقع ليها
وقف شاف فساجد قاليه واش قلتي ليها شي حاجة ؟؟
حرك ساجد راسو قاليه لا ابابا ماقلتش ليها حتى كلمة هي بوحدها دفعاتني قالت ليا نتا ماشي خويا سير عند باباك
تصدم عيسى وكملات ليه جنى قالت ليه نتا ماشي خويا ااه ماكنهضرش معاك
جراتها سارة وراها قالت ليها حشومة هادشي واش حماقيتي علاش كتقولي ليه هاكاك
بقا عيسى ساكت غير كيشوف فيها ماعجبوش الحال وحتى المورال عندو طايح .. جرها من يدها قاليها شنو دار ليك ساجد يالاه قولي ليا شنو دار ليك؟. غادي نعاقبو الو دار ليك شي حاجة
هز ساجد يديه قاليه وامادرت ليها والو اعباد الله
تلفت عيسى قاليه سكت نتا
خرجات جنى عينيها وفمها كي النقطة قالت ليه مابغيتش خويا .. غتجيب ليا ماما خويا جديد حسن منو يالااه
رجع وجه سارة حمر شهقات وهز عيسى عينيه شاف فيها قاليها شهادشي ؟ً فين تعلمات هاد الهضرة؟؟
جلسات سارة القرفصاء قالت لجنى بعصبية منين جبتي هاد الهضرة شكون قاليك هادشي؟؟ فين تعلمتي
نترات جنى يديها بجوج قالت ليهم وابعدو مني انا غنرجع لندن بوحدي كااع يالاه .. مابغيتكمش غنمشي عند بابا وماما وحدين خرين
تمات غادية بوحدها قالت ليها سارة سيري. اختي نشوف فين حدك يالاه ؟؟ يالاه سيري
حمر فيها عيسى قاليها بشوية على البنت مالنا ياك لاباس؟؟ ااش كتعرف قرينة هادي
قالت ليه بعصبية وعلاش كتسولني مالها وفين تعلمات هادشي؟. حساب ليك انا عملتو ليها ؟؟
خزر فيها قاليها قلت ليك علمتيه ليها؟؟ واش قلتها ليك بفمي ؟
ربعات يديها قالت بيه مانعرف بان ليا بحال الى بغتي تقولها
بقا مخرج فيها عينيه وبعدهم تدريجيا بمعنى الله يعميها ليك وشد فجنى كيهضر معاها بالهداوة وهي حلفات ما تبقا فيدو ورجعات عند مها لسقات فيها فاللخر حط يدو بعفوية على راس ساجد قاليه صافي خليها حتى تبرد ماتهضرش معاها دابا
بقات جنى كتشوف فيهم بنص عين واحد اللحضة طلقات واخد الغوتة ووجهها فجلابة سارة ولاسقة ليها فرجلها وبدات كتنقز وتبكي قالت ليها نمشيو بحالنااا نمشيو بحالنا …
خلعاتهم بديك الغوتة حتى رجعات سارة كتفتف قالت ليها واخا واخا صافي يالاه نمشيو
هزاتها فيدها قاليها عيسى اجي عند بابا بغا يسكتها ويدورها شوية لاكن قلبات وجهها وتعصرات كي الخشبة كتغوت قالت ليه ماشي بابا الاا الاا ماشي بابا .. جرات سارة من الفولار قالت ليها بجنون نمشيو بحالنا .. مات سارة بيها كتجري خلاتو واقف وطلعات فالطموبيل دباها وعيطات ليه قالت ليه راه جنى مابغاتش تجلس وعاشنو طرا ليها هاشنو طرا قاليها ديها خرجيها من هنا مامزيانش ليها تبقا هنا الدرادي الصغار اي حاجة كتشد فيهم . ديمارات الطموبيل خرجات من تما داتها لواحد الغيسطو وجلساتها شرات ليها عصير وحلوى وجلسات حداها دايرة يدها على خدها وكتشوف فيها كتمص فداك العصير وتبررق بعينيها .. قالت ليها سارة غلاش كديري ليا بحال هاكا ديما مشوهاني؟ اش دار ليك باباك مسكين حشومة وحرام داكشي اللي درتي غادي يعاقبك الله
مازال ماكملاتش هضرتها صونا ليها عيسى كيسول على بنتو كي بقات وشنو كدير ..طمناتو وعطاتو خبارها وخبرها انه حجز ليهم فأوتيل يجلسو تما احسن من اجواء المرض والاكتآب اللي فالفيلا وعينين الناس وقبلات بالعرض وخدات العنوان وخبرات باها ومشات للاوتيل جلسات فيه حتى وصلات الطناش ديال الليل ..صونات غلى باها تسمع اخبارو وجنى ناعسة حداها رد عليها عيسى قاليها كيقرا القرآن على الحاج ماعندوش كي يدير يجاوب وسول على جنى طمناتو مرة اخرى ورجعات نعسات .
الجوج ديال الليل رن الهاتف وكان باها .. ردت دايخة بالنعاس ..فاجأها باها بخبر الموت المحزن اللي طير النعاس من عينيها وصمك ليها ودنيها جابها واقفة ماعرفهات اشنو دير .. تمشي ولا تجلس؟ شنو دير ؟ وبنتها؟ الى مامشاتش غادي تحل فان عباد الله عليها .. والى مشات غتنوض الحرب مع جنى وتأزمها وتسهر بيها .. سمعات صوت عيسى كيهضر مع باها وتقطع الخط فجأة .. من موراها بدقيقة صونا ليها قاليها بلا متجي خليك مع البنت تما ما عندها مادير هنا .
داخت ماعرفات مادير ولا ماتقول ..قالت البركة فراسك ورد عليها قاليها لهلا يوريك باس ..هادي هي الدنيا المهم خليك مع البنت بلا ماتجيو حتى يصبح الحال ويحن الله
خبر محزن بكاها .. تفكرات تعامله معاها وكيفاش كان رجل طيب وفمو مكيجبدش العيب .. بين ليلة ونهار مشا عند اللي خلقو وخلا وراه الدنيا مقلوبة .. اولادو اللي عارفين بينهم وبين الله مابكاو ما ندبو ما دارو كنارة .. الحزن فالقلب معالم بيه غير الله لاكن العقل والتبات حاضر . اما البراني اللي جا يعزي منهم اللي عزاو داك الصباح وجلسو بحال ايها الناس ومنهم اللي بغاو يبينو الحزن بأي طريقة .. بالبكا بالانهيار بالصراخ .. لاكن كان ليهم عبد الجبار الاخ الاكبر للحاج عيسى .. اللي سمع صوتو كينوض ليه يسكتو بجوج كلمات حتى دخلهم فجواهم وعم الصمت والهدوء والتعزية بصوت منهفض بلا صدع وبلا ضجيج .. غسلو الميت وغسلوه اولادو .. واللي عايش على برا دخل واللي فمدينة اخرى وصل والمغرب فبلاد اخرى رجع وتجمعو الخوت واحد واحد بلا مينقص منهم حتى واحد. كانو بالتمام والكمال واحد وعشرين واحد ابن وابنة وابنة .. تسعة وطناش لذكر .
ولد مع الزوجة الاولى تسعة .. والثانية ستة ..والثالتة اربعة واخرهم الحاجة لاللة نزهة جوج . ولاول مرة فالتاريخ يتجمعو الابناء كلهم بلا ماينقص ولو فرد منهم وتلمو فالفيلا هم والعاىلة كلها ..منهم المتشدد فالدين لاقصى الحدود ومنهم ومنهم اللي داير جهدو وعلاش قادر ..كلها وحياته وكلها وهمو والعالم دياله. وفين داتو الوقت .
خرجو الحاج مع العصر يدفنوه ومشاو معاها مئات الناس اللي كيعرفوه .. كان راجل مزيان ومتقي الله واسمه ساطع وعندو مكانة ..ترفع له القبعة ..راجل خدم لدينو ودنياه .. خلا ثروة لا تعد ولا تحصى وخدا معاه تروة لاتعد ولا تحصى من الاعمال الحسنة والكل كيشهد ليه بالكلمة الطيبة والكل وقف فجنارته اللي ملات شوارع حتى تعجبو الناس لداك العدد الهاىل من الناس والسيارات اللي غاديين بالجنازة.. اللي سول وقالو ليه فلان كيتحسر على موته ويدعي ليه بالرحمة والمغفرة ويذكره بالكلمة الطيبة .
تلمو الناس فالفيلا اللي ماقدات لا لعيالات لا لرجال واضطرو يزيدو الخزاين فالجردة والطبالي للناس باش يتعشاو .. كان واحد المسكين دايز حالتو حالة لباسه مقطع هاز واحد الخنشة وكيبان بحال الى هبيل شوية ..لقا عيسى وواحد من خوتو اللي فالخاريج واقفين متكيين على واحد الفيراري كيهضرو بجوج ووقف سلم عليهم باليد قاليهم شكون اللي مات ؟
قاليه الابن الاخر الواليد
عاود سلم عليهم قاليهم البركة فراسكم وبغا يدخل للفيلا ومتردد قاليهم نديرو الواجب
كان غرضه يتعشى وحرك ليه عيسى راسو وقاليه الابن الاخر دخل الشريف دخل ..نهار نموتو غنديو معانا غير طرف ديال التوب
كان داخل مع الباب ورجع عند عيسى شار ليه بيدو قاليه ماتاخد غير اللي مقسم ليك الله .. فيك فيك واخا تهرب لآخر الدنيا ..داكشي اللي مكتب عليك الله غاتعيشو
بقا عيسى كيشوف بنضرات باردة هوا وخوه والمتشرد كيهضر واحد الشوية ربع يديه وسد عينيه وبدا كيجود القرآن بصوت تقشعر له الابذان وكيتلو عليه بعض الصور من صورة النساء …تصدمو فالصور دالو والتجويد بقواعده ..ابتسم كيسمع ليه حتى سالا ودخل مع الباب تعرض ليه واحد من المنضمين ديال الجنازة كان غيرضو وقاليه عيسى خليه يدخل ودخلو داه جلسو فطبلة كبيرة كانو فيها بزاف من الناس اللي دخلو ما فحالهمش واي واحد متشرد ولا كيجمع الزبل او ضايع فالدنيا سمع بموت الحجوجي التاحق بعين المكان ..خصصو ليهم طبلة طويلم فيها اكثر من ثلاتين واحد وحطو ليهم نفس الاطعمة اللي حطو للناس من جهة اخرى وفرقو عليهم علب بلاستيكية باش اللي بغا يجمع شي حاجة يديها معاه وفوق هادشي خرجو ليهم صدقة نقدية فأضرفة لكل واحد فيهم وخلاوهم مشاو بحالهم كيدعيو ويكررو الدعوات مع الحاج المتوفي .
كانو النساء على طاولة المائدة جالسين كيهضرو وكانت بينهم اخت عيسى الكبيرة اللي عمرها بانت وكان كتبان عليها صعيبة فالتعامل وكلامها قاصح .. قالت ليها اختها وحدة اخرى شقيقة .. قالك با الله يرحمو قبل مايموت وصا عيسى يرد مرتو اللخرة .. ومابغاش ..
ردت عليها اختها قالت ليها كيفاش وصاه يرد مرتو كون قاليك هاد الهضرة؟
قالت ليها سمعت نزهة كتقولها ليسرى قالت ليها وصاه وهوا شاد ليه فيدو قاليه مرتك وبنتك خصك تردهم .. وعيسى قاليه ماخصني لا بتعدد ولا بمشاكل مشات اللي كان كيعول عليها واللي كانت السند دياله فهاد الدنيا ..من موت لبنى حلف ما يعاود يعدد
ردت اختها الكبيرة كتنهد قالت ليها ايييوا شتي..الدنيا مادايماش.. عاد كانت لبنى الله يرحمها فالحياة .. مشات صغيرة
ردت عليها اختها الاخرى قالت ليها بقات فيه لبنى كطلع وتهبط ..هزيتي واحد وحطيتي واحد
ردت عليها الكبيرة قالت ليها وراه عشرة ديال سنين ..بسيف ماتبقا فيه وتجيه صعيبة ..ولاكن وصاه با خاصو يطبق الوصية . صافي لبنى الله يرحمها مشات وحنا غنتبعوها ودابا الحق الاول للاحياء اللي باقين فالدنيا وديك البنية اللي عندو … عمرني شفتها انا شحال تكون عندها دابا
قالت ليها الاخرى حتى انا عمرني شفتها بغيت نشوفها ..ماشفتها لا هي لا امها .
ردت الكبيرة وقالت ليها مادارت فيها مايصلاح ماجات حتى تعزي فينا ..ياحسرا كان شيخها ومات كيوصي عليها وهي ماقدرات حتى تجي ساعة دالمكانة وتمشي
قالت ليها اختها راها فلندن يمكن هادشي اللي سمعت .. اجي ياك طلقها بثلاتة ماشي حرام يردها ؟؟
تنهدات الكبيرة وقالت ليها وااقيلا كانت تزوجات من موراه وطلقات والله واعلم ..
ردت الاخرى وقالت ليها تسمع رجاء وصية الحاج لعيسى طيح بالعضام
هزات الكبيرة حاجبها قالت ليها طيح بالاعضام ولا طيح بالارياح وماتجبديهاش ليا .. باااز ليه اللي مزال معاها .. هي براسها جات ضرة على لبنى وخرجاتها من عين لبرى وماخلات فيها غير اللي نسات .. عايراتها بالعكر ودوزات عليها السيراط .. نسات هادشي بان ليها غير تجي عليها الضرة .. نسات اش دوزات على المرحومة من السم .واخا هاكاك هاهواك بقا شاد فلبنى وباقي كيتحسر عليها لدابا وعيا يصبر فاللخر هاهواك طاح مرض بالطونسيو بسبب الموت ديال لبنى.. بقات فالاولاد ! هاهي ماولدات ما دارت والو وبغاها
كانو جالسين كيهضرو حتى سمعو صوت الصدع من لفوق مع صوت الامداح .. ناضت الاخت الكبيرة بسرعة وكانت طويلة وعامرة وهي الابنة الثانية من بعد عبد الجبار واخته شقيقته ..كانت لابسة قميص بلدي كحل والشال والبلغة وعينيها منفوخين بالبكا ..مشات كتجري تلاقات مع الحاجة نزهة فالدروج كتجري وكل وحدة سولات لاخرى على شنو واقع وحتى وحدة فيهم ماعارفة شنو كاين .. وصلو للطابق الثاني لقاو رجاء وسط العاىلة وجهها احمر مقابلة مع تجمع اخر ديال النساء .. شافو شكون وسط داك التجمع لقاو سارة وحتى وجهها احمر كتنهج ..اش واقع ما واقع نوضوها تما سباط.. علاش؟. على قلة الشغل وكل وحدة كتقول هي اللي جبداتني لا لخرى اللي جبداتني .. هزات رجاء يديها كطل على سارة باغة تاكلها وقالت ليها ها منين دخلي وها منين تخرجي يا خطافة الرجال .. تعياي دوري عمرك تستاقري ولا يقبل عليك شي راجل ..
ردات عليها سارة من لهيه قالت ليها بزاف عليك نتي اللي لسقة يا المدلولة دبصح انا بزاف عليك مانوصلينيش وتقلاي فسمك
هزات الاخت الكبيرة يديها وقالت فوجه رجاء .. ايييواااا ماشي دار باكم هادي باش تغاوتو فيها .. نسيتو راسكم فين ولا نفكركم
قالت ليها يسرى انا غادي نعيط ليه دااابا باش يجي يشوف بعينيه هاد المهزلة اللي دايرين لينا فالكنازة وماختارمتو حتى واحد .. ماحتارمتو مشاعرنا
جبدات تيليفون كترعد وحيداتو ليها الكبيرة من يدها قالت ليها ماتعيطي ليه مايعيط ليك .. دااابا غتجمعو حوايجكم .. اللي عندها شي صاك تهزو وتزيد مع الباب يالاه
هزات سارة صاكها مارضاتش تمات غادية ويسرى تابعاها كتجر فيها اما رجاء خرجات عينيها فالكبيرة وقالت ليها ماشي نتي اللي توريني اش ندير ..راكي لاللاهم هما ماشي لاللة انا
خرجات فيها الكبيرة عينيها وقالت ليها جوج كلمات ..غتزيدي مع باب الدار ولا غنخرجك كتعتري فجلايلك .
قالت ليها رجاء هانا خرجيني الى سميتك مرى
جراتها الحاجة من يدها قالت ليها الله يهديك تورية بعدي من الصدع .. خليك فالتيقار خليها منو ليه يجي يوريها شغلها
وصلات سارة للباب مارضاتش والبكية شاداها نترات يدها من يد يسرى ومشات كتبكي خرجات كتقلب بلا عقل على بنتها .. شافتها مع عيسى على برا هازها ومعاه خوتو واقفين كيضحكو معاها وكل واحد شنو عاطيها ..دازت قدامهم بحال البرق بقا عيسى غير كيشوف وتبعها للطموبيل هاز جنى . قاليها مالك اشنو كاين ؟
قالت ليه جيت .. درت الصواب .. صافي الله يعاون عمرني غنحط رجلي هنا فهاد الفيلا والى عاودتو شفتو هاد الوجه دفلو عليه .
خدات بنتها وطلعات سدات عليها الباب وزادت مشات بقا واقف فبلاصتو ورجع دخل بالزربة كيجري صادف يسرى قدامو قاليها شنو وقع مال سارة خرجات كتبكي
بلعات ريقها قالت ليه دابزات هي ورجاء .. ولاكن رجاء اللي طارت عليها مع الدخلة كانت كتقلب على ماما تعزيها ورجاء نقزات عليها على قضية الرجوع ما الرجوع والوصية اللي وصاك بابا ..
عطاها ودنو قاليها كيفاش؟؟
قالت ليه راه منعرف شكون وصلها لرجاء قاليها بابا الله يرحمو وصاك على سارة باش تردها ونتا مابغيتيش.. وهي فاش سارة دخلات شعلات ماعقلاتش على راسها وطارت عليها قالت بقات عليها يا المدلولة ومايقبل عليك حتى واحد واخا تبوسي اليدين والرجلين مايرضكش وعيتي ديري. عيتي تفعلي هاهوا عبر عليك قال لباه وهوا على فراش الموت منرضهاش وهاديك تكفيك ووو
هز يدو قاليها صافي صافي صافي
زاد دخل طلع لفوق لقا الجوقة تفرقات .. تلاقات تورية وهزات يدها قالت ليه سمع اعيسى .. راك دخلتي لفعة للعائلة .
ضرب فيها ومشا كيقلب على رجاء لقاها جالسة كتسوط وتنفخ باغا طرطق وحرك يدو قاليها يالاه .. يالاه جمعي الوقفة زيدي
وقفات قالت ليه هما دارو بيا وبدات تبكي وهز صبعو على فمو قاليها منسمعش الحس دياالك .. ولا هاد الهاد الصداقة غتولي كنازة .. يالاه زيدي قدامي وقطعي الحس
خرجها لبرا وعطاها الساروت قاليها سيري للدار
ضارت عندو بغات تشرح ليه وخر عينيه قاليها تحت سنانو سيري. للدار .. نيشان الدار
قالت ليه ساجد ..
قاليها معنعاودش معاك الهضرة ياك .. وبلا مطلعي ليا طونسيو فهاد الليل .. يالاه تحركي للدار
طلعات سدات عليها وبقات كترجاه بعينيها ومشات شدات الطريق ورجع دخل كيقلب ختو الكبيرة .. تلاقا وحدة من خواتاتو لخرين قاليها فين لاللة ؟
قالت ليه لفوق فالبيت وطلع نبشان دخل لواحد البيت كبير يعرف اش وقع لقاهم مجمعين تما كلهم كل واحد مصدوم فقنت ومو معاهم حتى هي كتحك بوحدها مارضاتش مرت ولدها دير ليها ديك الفضيحة .. غير دخل دارت يدها على جبهتها قالت ليه انا بالله وبالشرع مع ديك المرى عندك ؟
قاليها شنو وقع ؟
هزات تورية يديها قالت ليه هاهما يقولو ليك شنو وقع انا جيت نفك الجرة مشيت بين الرجلين
وقفات واحد ختو وحدة اخرى قالت ليه انا نعاود ليك شنو وقع بليديطاي الحاج .. انا كنت هنا وجات سارة .. ماعرفتهاش تبدلات عليا من العرس ديالها ماشفتها .. سولاتني على الحاجة قلت ليها واقيلا فالبيت .. جات رجاء خارجة من طواليط شافتها وطارت عليها قالت ليها مزال جايا برجليك اخطافة الرجال وبقات كتعاير .. قلت ليها انا مالكي اويلي شنو وقع خلعاتني وجيت نفك وكنسمع غير رجاء كتعاير .. قالت ليها سارة انا ماجيتش عندك جيت عند خالتي نزهة .. شداتها رجاء من يدها بغات تجرها جات لمياء (اخته) لمياء شداتها كتفك .. بقات كتغوت وكترعد ..
قاطعاتها لمياء وهي جالسة قالت ليه عرفتي عينيها وصلو لفمها خلعاتنا بغات طير عليها تاكلها والسيدة كتهرب منها … حنا كنقولو ليها الكنازة وصوت الذكر كيتسمع وحشومة هي تصمكات راسها ماعقلاتش عليه كن بقاو طيط اطيط كن قتلاها ولا ضرباتها بشي عجب تصفيها ليها .. انا قلت صافي تسطات
قالت ليه تورية السيدة شي حد وصل ليها شي هضرة .. شعلات .. ايييه ماشي ساهلة تسمع ديك الهضرة ولاكن ماشي وقت الحساب والدباز ماحتارموش الروح ديال با اللي مزال كتسارا بيناتنا .. ماوقرات حتى واحد
شاف بنص عين فيها قاليها اشمن هضرة ؟
قالت ليه لمياء شي واحد قاليها راه با وصى عيسى يرد سارة وهوا مابغاش قطع ليه الياس . هادشي اللي بدات كتقولو لسارة وتعايرها بيه .
شاف بنص عين فمو ودار فيها شوفة حادة حتى هزات صبعها قالت ليه والله اولدي ما قلت ليها شي كلمة … سولاتني يسرى على شنو كان كيقول با لعيسى قلت ليها كان كيوصيه يلم الشمل ديالو مع بنتو ومرتو وهوا مابقاش قادر لايكلف الله نفسا الا وسعها ..
قالت ليه يسرى وانا والله ماقلتها ليها
وقفات تورية قالت ليه شوف باش تكون هاني .. حتى وحدة ماقالت ليها شي حاجة .. كون هاااني راك عارف خواتاتك .. شووف دابا منين جاتها الهضرة وشكون اخر كان معاكم فالوصية.. وزايدون راه با وصاك اعيسى .. وصاك والوصية غتبقا دين على رقبتك ونتا تعرف اخويا العزيز .. اللي سلكاتك ديرها .. اما باش تشك فينا ولا فمك راه ماشي خرج لينا العقل باش نجيبو الهضرة ونعطير هضرة .. وديك المرى عندك راه مامربياش.. ماوقراتنا .. ماحتارماتنا .. مادارت بوجه شي واحد فينا .. جيت لقيت الريكاطة ؟!! هزني غواتها مت الطبلة لتحت طلعت كنجري !! ماحتارماتني حتى انا اما لخرى قلت ليها زيدي فحالك زادت فحالها
قالت ليها الحاجة ماكانش عليك تجري عليها ماجات عند حتى واحد جات عندي تعزي
قالت ليها تورية واش انا عرفتها بعدا شكون ؟؟ واش الصوت عالي عاد غنبقا نسول شنو واقع .. صافي بجوج بداو كيتعاطاو جريت عليهم .. لخرى مازادتش الهضرة مشات كطير ايوا ولاللة رجاء بغات ضربني ايوا فكها دابا يامن وحلتيها
وصلات للاوتيل وطلعات كتبكي .. جنى لاسقاها كتسول مالها حتى بدات تبكي معاها حتى هي فالاخير هزاتها عنقاتها ومسحات وجهها باش بنتها ماتبكيش وحاولات تنعس واخا شي نعاس ما بغا يجيها .. بقات ساهية وضوء القمرة داخل من النافدة وهي فالفراش مع بنتها كتدوز صبعانها على شعرها الناعم حتى صونا تيليفونها على حجرها وهزاتو كترمش بتتاقل . شافت رقم عيسى وتخض قلبها من بلاصتو .. ماتوقعاتش يصوني عليها وهوا اصلا مشغول مع الصدقة والناس .. خلاتو كيرن عرفاتو غيسول غير على بنتو وصافي لهادا مجاوباتش ومابغاتش حتى تسمعو صوتها من بعد التبهديلة اللي تبهدلات قدام العائلة .. رجع معاها الندم الشديد وتمنات لو يرجع الوقت للور وتسامح مع الحاج الحجوجي وتخرج بحالها وماتعاودش تحط رجلها تما .. لاكن مع الاسف اللي كيفوت مكيرجعش وماعليها غير تكمد حرقة الندم بالبكا الصامت باش متفيقش بنتها .. بحر الندم وعزة النفس اللي فاقت وكبريائها اللي تشرد بقات كتعض شنايفها وتكمدها بالدموع على سالو بالدم بلا متشعر واستمرت على داك الحال وكتقرا المعودات باش تبر او تنعس وتنسا .. بقات تقرا تكرر المعودات وعاود رن الهاتف مرة اخرى وكان عيسى .. هاد المرة هزاتو قطعات عليه وطفاتو وتقلبات كتنخصص سدات عينيها وبقات كتكرر المعودات حتى نعسات رتاحت .
اما فدار العزو مكان نعاس.. باتو سهرانين حتى للفجر مع بعضياتهم واحد فاش مشغول .. الى الناس الكبار والاطفال اللي نعسو ومنهم ساجد اللي نعس فبيت جدو وفبلاصتو .. تهدنات الاوضاع مع الفجر ورجعات الفيلا كيما كانت والاشغال انتهت .. صلاو صلاة الغجر الرجال اللي بقاو مجموعين وكل واحد فين مشا يرتاح ..
رجع عيسى لدارو لقا رجاء جالسة وعينيها منفوخين بالبكا كتسناه وطول الليل مانعساتش .. غير دخل وقفات ليه بغات تهضر لاكن هز يدو وقفها وحيدها لافيست من الدخلة قاليها مافيا اللي يهضر .. مزال نتفاهمو على داكشي اللي درتي .. اما دابا ما دوزيش قدام عين
مشا. لبيت النعاس حيد حوايجو ونعس وسط الناموسية ، جات تنعس مالقاتش بلاصة وماقدراتش تفيقو ولا تحركو وخلاتو ومشات بلاصة ولدها ونعسات .
كانت ليلة شاقة ومتعبة وطويلة .. فاق الحاج مع الحداش ودخل دوش . خرج لقا فطور ملكي فوق الطبلة محطوط .. سبق بالدواء. وجلس فطر ماهزش راسو فيها . اما هي صبحات متولة وجامعة الدار وكدور بجنابو . خصك الماء ؟. خصك العاصير ؟. نزيدك السكر .. مانطق ماهضر معاها ماشاف فيها وهي كطلب الله يبقا ساكت وينسا اش وقع .. بغات تعرف اشنو كيدور ليه فراسه وفاض كيفكر وشنو كيطيخ وعلاش لحد الساعة باقي ساكت .. قهرها السكات وخافت يصدمها بشي قرار من مور داك الصمت وبدات كتفكر تفاتحه فالموضوع . خلاتو حتى فطر وسمعات تيليفونو كيصونو ناضت كتجري. جابتو ليه .. شد تيليفون سكتو ونفض يديه وجر الفوطة على كتفو قاليها اجي لهنا
سمعات ديك اجي لهنا رجعات زرقة بحال البحر وجلسات متوثر قدامو .. هز راسو كيشوف فيها مطولا وهز صبعانو بجوج قاليها غادي ندمك على ديك الفضيحة اللي درتي ليا البارح فالموت ديال با .. كاع الناس ساكتين وجالسين الا نتي .. غير نتي اللي عندك المشاكل وكتعصبي.. همك الوحيد فالدنيا سارة .. ماهمكش الموت دبا انا همك غير سارة ماترجعش ياك .. وادابا حلي ودنيك مزيان وسمعي.. غنرد سارة.. وغندير بوصية با الله يرحمو .. ومزال غنوريك مزيااان شنو كيوقع للمرى اللي كتعلم ولدها يجيب الخبار .. كان مربي ساجد .. كان مكيعاودش الهضرة فاش كان مع لبنى .. جا عندك فسدتي ليه الترابي .. فسدتي ليه اخلاقو .. مكتعلميه الحلال من الحرام .. مكتوريه الدين اللي نتي اصلا ماكتفقهي فيه حتى حاجة .. وبزاااف جامع ليك ارجاء ونتي ولا بغيتي تفيقي وتقادي .. لبنى اللي كانت كطاكي عليك الصهد مشات الله يرحمها .. اللي كانت كدير ليك العقل شوية هاهيا مشات .. بقيتي بوحدك مكاين لاشكون يستر فعايلك .. لاشكون يحبسك من الفضايح لاشكون ينبهك على داكشي اللي كديري .. تعريتي .. دابا وجدي راسك للشواية باش نعلمك كيفاش الناس كيجلسو فالجنازة ودايرين عقلهم
بقات كتشوف فيه وتبكي قالت ليه انا هزني خاطري ماعقلتش على راسي ماشعرتش .. اي مرى بلاصتي تقدر دير ديك ردة الفعل
قاطعها قاليها لا ماشي اي مرى .. غير االلي مكتحشمش بحالك .. اما العيالات اللي بحال لبنى وبحال بزااف منها.. مكيديروش ديك الفضيحة وفالكنازة والناس حاضرين . اشنو دابا ربحتي ؟. ها سارة غترجع يالاه بردتي ؟؟ غواتك نفعك ؟. ضسرتك ورخيت ليك وكنقول خليها دابا نقاد دابا دير عقلها ومافينا مايهضر مافينا اللي يجبد الصدع .. ونتي والو نيبالا .. داخلة الربعين ودايرة عقلك فوحدة مزنزنة كتاااااااار منك غاسل عليها يدي هاديك كاع .. هي بعدا كتحشم مرة مرى على وجهها اما نتي والو بلاكة فين مامشيتي كتفكي حريرتك بالدباز .
صبحات كتجمع حوايجها تمشي بحالها هي وبنتها بإحباط .. حطات الشنط ديالها فالباب وجلسات كتسنى باها اللي كان بايت فغرفة اخرى يعيط ليها باش تهبط ويمشيو بحالهم .. لاكن فاجاها اتصاله وقاليها باللي غيرجعو لدار لعزو وباللي الحاجة قالت ليه جيب معاك سارة وكتأكد عليه. هنا رفضات رفض قالطع واخا ماشرحاتش لباها على السبب لاكن حس بيها عندها شي حاجة اللي خلاتها تقطع رجلها ومابززش عليها .. اتاصل بعيسى اللي وصل ليه طلب مو وقاليه باللي عيانة ليها البنت وخصهم يرجعو بحالهم . قطع معاه وكانت اثتائها كتلبس جلابتها.. جاها اتصال من عيسى وطلات شافت شكون المتصل وخلاتو كيرن جوج وثلاتة حتى رسل ليها مسج قاليها جاوبي ضاروري
ردت عليه قبل ما يقول شي كلمة بصوت بارد قالت ليه الى كنتي كتسول على جنى راها لاباس الحمد لله وغادي نوجعو بحالنا للناضور نديرو الصداقة نن بعد يوماين غنرجعو للرباط صافي؟
قاليها مالك مالك غير بشوية .. علاش مكتجاوبيش؟
عطات التيليفون لجنى قالت ليها هضري مع باباك
ناضت نفضات الوقفة وجنى كتمد ليها تيليفون وتقول ليها بغا يهضر معاك وهي كتقوليها الى ساليتي الهضرة قطعي
قطعات عليه جنى تيليفون وعاود صونا وردات عليه سارة مع البدية قاليها شهاد شغل البراهش كديري
قالت ليه شنو بغيتي بنتك هانا قلت ليك عليها كولشي شنو بغيتي اخر ؟
قاليها اجي مع عمي عندنا ليوم للدار ..
قاطعاتو ويدها على جبهتها قالت ليه شوف انا غنقول ليك كلمة وحدة .. قولو عليا مامزياناش قولو عليا ماتسواش اللي عجبكم قولوه . صافي غسلت يدي منكم ورجلي الى تحطات عندكم حيدها ليا .. المرحوم اللي درت بوجهه وكان بحال بابا مشا عند الله .. بقات بيني وبينكم هاد البنت مرحبا الى بغيتو تشوفوها .. سي حاجة اخرى الله يرحم ليك الواليدين ماتعيطش ليا . بيناتنا الاحترام واخا نتوما ماخليتو فيها لا احترام لا والو .. سمح ليا دابا غادي نمشيو
قطعات عليه ولاحت تيليفون للجنب وجلسات كتفكر فهضرتها .. صونا عليها باها قاليها نزلي عندي نتي وجنى لتحت وخلي البالز مغنمشيوش دابا .
نزلات عندو جلسات هي وياه وبقا كيشوف فيها بتساؤل قاليها مالك مع ايت الحاج ؟؟ شنو واقع
دورات وجهها وقالت ليه والو مابغيتش نمشي ماعندي مندير عندهم
قاليها قالي عيسى ماتمشيوش راه جاي هوا والحاجة .. المرى عاد لبارح دفنو ليها الراجل ليوم خارجة جايا علاش جايا؟
بقات ساكتة وبالتدريج بداو عينيها كيغرغرو وبدات تعاود ليه شنو وقع ليها حتى عيات وهبطات وجهها كتمسح عينيها . بقا باها ساكت غير كيشوف قاليها وعلاش هادشي ماقلتيهش ليا؟. علاش بقيتي ساكتة؟
قالت ليه مابغيتش الصدع
قاليها الصدع وقع ونتي ساكتة عليه ؟؟ مزياان
وصل عيسى ومو بالابيض وختو تورية الكبيرة وعبد الجبار .. بلا متشعر سارة ابتسمت وناضت سلمات عليهم حشمات تقلب وجهها وهما قدامها .. عنقاتها تورية وشدات فكتافها قالت ليها سمحي ليا .. سمحي ليا بزاف انا ماعرفتكش لبارح وماعرفتش شنو وقع كااع .. الكنازة والصدع نايض داكشي ماكيدارش .. عاد فهموني البنات شنو واقع
حطات الحاجة يدها على كتف سارة قالت ليها هادي ختو الكبيرة دعيسى تورية
كحزات سارة بارتباك قالت ليها جلسي اخالتي جلسي ماتبقايش واقفة . وبقات كضحك بقا باها غير كيشوف فيها .. تقول جايين ضياف وكدير فالصواب بقا غير اتاي تحطو ليهم والسيدة ولات حمراء غير كضحك وتقوليهم ماشي مشكل ماوقع والو مكاين باس الدنيا هانيا انا اصلا نسييت
بقا عيسى غير كيشوف فيها هوا وباها .. هزات تورية جنى عنقاتها كتبوس فيها وتراري بيها وداوهم معاهم للفيلا .. فالطريق فالطموبيل رهي اللور وباها حدا عيسى فسيارة كبيرة رسل ليها مسج قاليها غتوصلي للفيلا نحيد ليك رجليك .
هزات عينيها شافت فيه فالمرايا وهوا كيشوف قدامو وقلبات وجهها مربعة يديها فصمت .. دخلو للفيلا وجلسو مع العاىلة ودارو ليها خواتاتو استقبال مختالف .. مكاين غير البوسان والتعناق والترحيب واخا وجههم اصفر بالبكا والعيا وجلسوها وسطهم فرحانين بيها وجنى .. اما الحاج الامام مشا مع الرجال ومالقا فين يهضر ولا يقول شي كلمة .. ماخلاوش ليه مايقول .. ايوا حشومة المرى جات برجلها وباقا حازنة وبالابيض!!! فين باقي ليهم يهضرو ولا يلومو ؟! صافي هادي تكفيهم وترد ليهم اعتبارهم . اما عيسى مشا كيقلب على ساجد .. خرج لقاه فالجردة مع الكلب وعيط ليه بصوت صارم جابو عندو وقاليه تبعني
طلعو لبيت فالفيلا وسد عليه الباب وجلس على واحد الكرسي ووقفو قدامو عطاه ودنو وقاليه فاش كنا جالسين مع با سيدو سمعتي شنو قلنا
حرك ساجد راسو بالايجاب ووجهه اصفر عارف شي حاجة وقعات وشي زبلة دارها .. هز فيه عيسى حاجبو قاليه فاش نسولك جاوبني بلسانك .. سمعتي ولا ماسمعتيش؟
حرك راسو بالايجاب كقفقف قاليه سمعت
قاليه شنو سمعتي؟
قاليه با سيدو كيوصيك
قاليه ولمن قلتيها؟
بقا ساجد ساكت وعينيه فالارض كيترعد .. عاود سولو عيسى بحدة وحمر فيه خلعو حتى قاليه قلتها لماما
هز عيسى حاجبو قاليه هاااا.. قلتيها لماماك !! علاش قلتيها لماماك؟
قاليه هي سولاتني
قاليه وكيفاش سولاتك ؟ باش عرفاتك كنتي معانا؟
قاليه كنت مع طاطا سارة وجنى .. قالت ليا طاطا سارة فين كنتو قلت ليها مع با سيدو وبابا
قالت لينا شنو قال لباباك .. صافي وعيطات ليا ماما .. ماقلت والو لطاطا سارة جنى اللي بقات كتخربق عليها كتقول ليها قاليه شري العش ما العش وبابا مابغاش يشري العش وانا بغيت غير نصحح ليها ابابا حيت بقات كتخربق وكتقول ليها العش ديال الطيور .. صافي وماما عيطات ليا قالت ليا شنو كتقولو .. قلت ليها والو ماكنت كنقولو والو .. وبقات كتقول ليا غادي نتخاصمو ومغاديش نديك للنادي نهار الاحد وقلت ليها
خرج فيه عيسى عينيه قاليه هادا هوا الراجل ديال الدار علامن معولين ؟؟ انااا شنو قلت ليك شحااال هادي؟؟؟ شنو قريتك ؟؟
بقا ساجد ساكت وجر عيسى من الكتف بصبعو قاليه جاوبني شنو قريتك
بقا ساجد كيتمتم ويبكي ويتفتف بين الحروف.. عن ابن مسعود قال : قال رسول الله (ص) لا بلغني احد من اصحابي عن احد شيء، فإني احب ان اخرج اليكم وانا سليم الصدر .
خزر فيه عيسى قاليه زييد
رد ساجد كيتفتف ويبكي وعينيه فالارض ملعون ذو الوجهين ملعون ذو اللسانين ملعون كل شغاز، ملعون كل قتات، ملعون كل نمام، ملعون كل منان .
حط يدو على خدو كيمسح الدموع وعيسى كيشوف فيه قاليه ماعلمتكش شنو كيعني هاد القول ؟. ماوصيتكش باش تجمع لسانك .. وتسد فمك .. واللي سمعتيها تخليها عندك ؟. ماوصيتكش تسكت وماتنوضش الفتن بين الناس بشنو سمعتي .. عرفتي دابا شنو درتي؟. درتي فتنة .. والفتنة اشد من القتل…
تزير ساجد قاليه سمح ليا اخر مرة نعاود
رد عليه عيسى بصرامة لا غير عاود .. عاود باش نتبرا منك .. انا معنديش الولاد اللي كينشرو الفتن بين الناس ويتسببو فقطع صلة الارحام ويديرو الصدع بين الناس .. درتي كما كيدير الشيطان .. هادشي اللي بغيتي ؟ باش ماتمشي للنادي وشيتي بشنو كان كيوصي با سيدو !!! ها ربي فضحك وغيحاسبك وداك النادي اللي كنتي غادي تمشي ليه صافي سالينا منو ..اخر مرة غتمشي.. باش تتعلم تسكت وماضحيش بالاسرار دالناس وتشعل العافية بيناتهم .. يالاه سير تحرك من قدامي
بقا ساجد واقف كيردد سمح ليا لاكن عيسى بقا مصر على موقفه وخرج خلاه فالبيت واقف .. مشا تركن فواحد القنت وهبط راسو كيبكي في حين تصادف عيسى مع تورية فالدروج قاليها سيري شوفي ساجد راه قصحت معاه خليتو كيبكي تما ..ماتخليهش بوحدو
هزات راسها قالت ليه مالو علاش اش دار
حرك راسو قاليها واغير سيري عندو سكتيه .. هوا اللي قال لرجاء على الوصية
خرجات عينيها قالت ليه ياكما ضربتيه
قاليها ماضربتوش ولاكن عطيتو با عمرو يعاودها
مشات كتجري وتعيط على ساجد ديالها فخاطرها
تغداو مع الناس فالفيلا ودارو بيها خواتاتو كيفرشو ليها ويديرو ليها الطريق منين دوز .. باش حتى الى طلبوها للزواج مرة اخرى ماتردهاش فوجهم واخا راه هي نيت اللي طالبة عليها .. ولاكن هما معارفينش ومعاندهمش منين يعرفو .. السر مشا مع الحاج وبقا مع الحاجة اللي مكتدي خبار مكتجيب خبار .. دوزات النهار ونساوها فداك التجرتيلة اللي دازت منها .. مافراسهاش باللي خواتاتو كيمهدو ليها .. صافي عند بالها ردها ليها عيسى فوجهها .. وحسب ما شمات من خبيرات قالت مع راسها كافيه دواج واحد وعش واحد وماعليها غير دير راسها ماشمات خبار مافهمات والو باش مايطيحش كبريائها قدامهم اكثر.. ولاكن الحقيقة كلها مغطية بالغربال ..واللي فراس الجمل فراس الجمال .. ديرها غير زوينة توصل وتوصل والفضيحة بالاخص كتوصل بحال النيزك .
المهم رجعات بحالها راشقة ليها من واحد الناحية انا عيسى ماعاردات شافتو ماعاود شافها .. مشات لدار باها للناضور هي وبنتها ودوزو صداقتهم اللي كانو عوالين عليها ورجعات بحالها لخدمتها وشتيني ماشتك.. تسد الموضوع ماعاودش تجبد .. لاكن الغريب فالامر واللي جديد عليها هوا ختو الكبيرة اللي كيقولو ليها كولهم لاللة حيت كبرو قدام عينيها بحال امهم ..خدات نمرتها وبغات تتقرب منها وتجرها لجيهتهم ..ورجعات هي وياها وختو لمياء فالواتساب هاك بالاك ..سيفط لي دعاء نسيفط ليك ورد.. ورينا جنى .. والاخبار بيناتهم كدور ..وعاد يسرى اللي حتى هي رجعات من جديد علاقتها معاها وحسات براسها عندها قيمة وسط منهم ومكبرين بيها وكيسولو فيها.. حتى لاللة نزهة ..حتى هي كل مرة تسول على حفيدتها المجعورة .. بسم الله الرحمان الرحيم تقول فيها شي جن .. البنت كتكون صحة سلام حتى كيتبدل ليها المجاج .. دخلاتها تقرا فالثاني وماتفاهمات ليها لا مع معلمين لا مع تلاميد .. كل مرة معيطين ليها ودوز تجري من الخدمة ديالها تشوف مالها ..ديما البنت كتبكي ديما كتشكي ديما كترد بعدوانية ..حارت معاها وباها مكاينش اللي يعاونها عليها وشاد كونجي وجالس ففاس . دازت العشرت الايام الاولى بحال الحشر عند سارة مع بنتها .. مكاين غير جري عليا نجري عليك .. دخلاتها تكمل فالمسرح ديالها وبالكشايف باش لقات كروب ديال المسرح بالانجليزية .. البنت نفرات ليها العربية وكتجيها تقيلة وطويلة فالهضرة .. والمعلمين حارو معاها .. فالحصة دالفرونسي تهضر بلونكلي وفالعربية كذلك. اما عند لونكلي فعاجبو الحال ومجلسها قدام عينيه واخا بعد المرات كطيح ليه اليد مع الرجل فاش حتصصحح ليه وتحشمو حتى كيبقا غير كيشوف فيها ولا يقول ليها ايوا اجي شرحي بلاصتي حسن ؟! عزيزة عليه حيت خفيفة وذكية وكتلقطها فالسما ..ولاكن عيبها واحد مكتسكتش وحشماتو فالادارة واخا كايعاملها مزيان .. قالت ليهم مكيشرحش. مزيان ..خلاتو غير كيشوف ولاكن ماداش عليها وبقا كيضحك ..
ايوا النهار لكبير هوا نهار و صبحات سارة فالخدمة .. وصبح عيسى فالبيرو . من الكنازة ماشافتو ونهار غدق عليه اول حاجة غطلبها هوا تخرج بكري.. دقات عليه بحال علدتها القديمة . الاحترام ولاكن ماتسرطش ليها الرفض ديالو ليها وبقا واحل ليها فحلقها ..ًرجعات كتخدم ونفسها فالسماء. دخلات هادة راسها كتشوف قدامها وهوا فالبيرو .. زادت وقالت ليه السلام عليكم مسيو حجوجي.. الى كان ممكن نخرج دابا نمشي لاجتماع الاباء فمدرسة بنتي
هز عينيه شاف فيها كيفكر ورجع حدر راسو قاليها باها غيمشي سيري كملي الخدمة ديالك
حركات ليه راسها وخرجات كتردد مع راسها وتقول .. سير نيت خاصك تمشي وتفرج بعينيك وتعرف بنتك كي دايرة .. مزيان هادشي نيت اللي بغيتي ايوا دابا غادي نتفرج عليك مزيان خصوصا الى دارت ليك شي فضيحة تما قدام الجميع هاداك هوا النهار الكبير
ردها فالعشية طايحة بالنعاس نزلات عندها طلعاتها وقاليها راه تعشات غير ديها تنعس .. شافت فساجد وابتسمت وباستو قالت ليه طلع تبات مع جنى
قاليها تلفت ليه عيسى وحط يدوعلى راسو قاليها مرة اخرى ان شاء الله
ودعها ومشا واستمر الحال غلى ماهوا عليه .. ماتبدلات حتى حاجة فالخدمة ..نفس الروتين والمعقول والمساىل الشهصية كتبقا على برا وفالهاتف النقال . وصلات الربعين ديال الحاج وعيطو ليها باش تمشي وحتى باها عيطو ليه .. مشات على نيتها للصدقة وواخا صادفات سارة رجاء حسباتها مكايناش.. يكفيها اهتمام العاىلة بيها .. دازت الصدقة على احسن ما يرام حتى لمور العشا وفجمع الرجال ونن مور الخطبة دالامام تكلم عبد الجبار اللي فمتابة الاب قدام الاخوة من بعد ما مشا البراني وفاتح الامام فموضوع الزواج .. عم الصمت وبكلام رزين وموزون تكلم عبد الجبار ودخل بخيط ابيض.. الامام حار فموضوع بنتو اللي كل مرة كيتجد. ماعرف مايدير خصوصا فاش سمع بوصية الحاج لولدو بعد اخذ ورد قاليهم انا منعطيكم مانحيد ليكم .. ها البنت هاهيا راه هي تعرف مصلاحتها.. باش ماشي ليوم ولا بعدو نوليو واخدين العيب ويقول الله يلعن اللي كان حيلة وسباب.
وفعلا الكل خرج سوق هاد الزواج هاد المرة ..بقا الخط بين شارة وعيسى..جابوها حضروها ومكانتش متوقعة يطلبوها.. حلسوها قدام عيسى وحضرات مو وختو لكبيرة وخوه وباها .. بقات ساكتة مهبطة راسها كتسمع وهوا مربع يديه قالب وجهه وكيشوف فيها بنص عين وفشنو كيدور ليها فراسها . سكتات حتى شبعات فالاخير قبلات . وبوصية الخاج زعما دوزاتها باش تحافظ على دم وجهها فهاد الرجعة . قلبها فرح من هنا ورجاء سخفات ليهم لهيه .. عتقوها بالماء والسكر وحلفات ماتنوض .. دارت ليهم كنارة .. كاين اللي بقات فيه جا فصفها كاين اللي ماعجبوش الحال على داكشي اللي دارت وكانها كتمتع بيه داك الزواج .. خلاها عبد الجبار حتى توكضات ومشات وقف عليها قاليها كنتي فرحانة فاش كنتي عروسة .. دابا بغا يسكت ليك القلب مالك على هاد الفضيحة واش نتي اللولة ولا اللخرة .. بدارك بولادك حمدي الله خلي السيدة تجمع شملها وتجمع بنتها براكة من هاد الجهل اللي فيكم
خرج خلاها ماحنش فيها بقات كتبكي حتى طابت مالقات ليهم جهد ..قالت ليها الحاجة الى ماقديتيش صافي كما حلل ربي الزواج حلل الطلاق ماشادك حتى واحد بزز لا نتي ولا هي
قالت ليها يسرى حتى نتي راكي جيتي على لبنى ضرة ودخلتي عروسة وعاجبك الحال .. المرحومة نهار طاح ليها النص طاح بسبب هاد التزويجات عليها واخا قبلاتهم وبززاتهم على راسها ومامشات ضرة على حتى وحدة .. اما نتي ارجاء راك مادرتي فيها مايصلاح وماخليتي فيها مسكينة غير اللي نسيتي ..بغيتي طلقيها من راجلها كاع وشبعتي فيها معيور ..كان عاجبك الحال كنتي عروسة جديدة وعند الشان والمرشان قلتي هاديك قديمة اجي ندردك عليها ..ها ربي دوقك من نفس الكاس ثلاتة ديال المرات غير الى مابغيتيش توبي
يتبع...
التعليقات
لا توجد تعليقات بعد، كن أول من يعلق.