ألف مبروك الجزء السادس

بقيت ساكتة كنشوف فالجنب ونتنهد قلت ليه بخيبة امل نتا عادي عايش حياتك .. مرتاح فيها .. تزوج حتى عشرة وطلق بالعشرة وولد ودير اللي بغيتي ماكاينش اللي يقول ليك لا ماديرش ولا علاش درتي

قاطعني وقرب للطبلة شاف فيا قالي انا واش كنرضع؟؟ دوري كأب نهز المصاريف كلها ودورك كأم مايعوضو حتى واحد.. علاش النبي (ص) وصى على الام ثلاتة عاد الاب وكتقارني راسك بيا انا ! بغيتي النت الناس تزوجي الله يسهل عليك ماوقفتش ليك فطريقك ولاكن عندي معاك بنت ديك البنت يالاه عام باش تزادت محتاجة ليك كتر مني .. اغلب الاباء مغربيين خدامين بعاد ولادهم ماكيعرفروفهمش كاع نعار كيجي الاب كيقول ليه ولدو عمي كاع .. الام هي الاساس فحياة الدرادي !! كنجي كل سيمانة عندها ماشي باش نتي ترضاي ولا باش باك يرضى .. باش بنتي تعرفتي تحس بيا .. اما باش باش تديها نتي تعيش مع راجل اخر وتقولي يعوضها على باها لا هادي مغاديش نقبلها منك

قلت ليه شنو بغيتي دابا نعطيك بنتي تديها ؟ تربيها نتا؟

بقا كيشوف فيا وقالي اريها ليا الى كنتي غاتهناي فحياتك

قلت ليه وشنو غدير ليها نتا غتجلس من الخدمة وتربيها ؟

حسيت بيه تصدم من ردي وقالي اري ليا بنتي وخرجي سوقها نهار تبغي تشوفيها مرحبا بيك اجي عندها شوفيها

بقيت ساكتة مطولا وقلت ليه خاصني نعرف فين غنتمشي وعندمن

قالي غتمشي للأمان غير شوفي نتي حياتك وخلي عليك البنت حيدي ليها الرضاعة واريها نديها

قلت ليه واخا انا غنشوف شنو غادير غنحاول نحيد ليها الرضاعة فالقريب.

بقا ساكت غير كيشوف فيا وناض هز سوارتو قالي السيمانة الجاية فاش نرجع غنديها جمعي ليها حوايجها

نضت قلت ليه ان شاء الله الله يعاونك

هزيت صاكي وخرجت من القهوى قبل منو حسيت بقلبي غيسكت وركبت شفت فيه فالمرايا اللور خرج مشا ركب وزدح الباب بواحد الطريقة ماشي طبيعية ودار واحد الخرجة من تما تقول كان مشدود بسيف ومشا

رجعت للدار راسي مطبوخ قلت غادي ندخل نلقا بابا فالباب ينقي. ليا ودنيا . لاكن مالقيت حتى ردة فعل عرفتهم مازال ماساقو الخبار ومزال عيسى ما قالها ليه .. دخلت شربت كينة دالراس ويالاه جيت نحط راسي عيط ليا ياسين . كانت العشرة ديال الليل شفت لابيل وخليتها كتصوني ماحملتوش يعيط ليا مع داك الوقت حيت قلة الاحترام تصوني على شي واحد بالليل ماتعرفو ناعس ولا جالس مع العائلة ولا شنو كايدير . هادي نقطة حطيتها فاللائحة السوداء واخا كيبان متقف وواعي تقبها فهاد الاتصال ومن موراه سيفط ليا مسج كيسول شنو كندير شنو مكنديرش . خليتو مارديتش عليه ونعست لقيت مسج الصباح ديال الورد والياسمين كيصبح عليا … تفكرت خطوبتي بعيسى عمرو عيط ولا صونا ليا ولا سيفط. ليا حتى مسج حتى لنهار العرس درنا العقد ومشينا .. اما ياسين بدا بالرسائل الغرامية كيصبح عليا ويمسي عليا وفالكلية كنقولو ماتبقاش تعاملني معاملة خاصة غادي تلفت ليا الانتباه لاكن قالي منقدرش داكشي كيجي راسو واخا نعيا نرد البال

خلاني غير كنشوف ونقول يمكن فعلا كيبغيني بصح .. اللي كيبغي شي واحد كيدير تصرفات المراهقين واخا حدا الناس.. أكد ليا ان الحب كيفرض نفسه فكل زمان ومكان ..ونهار على نهار كيزيد يأكد ليا ان عيسى عمرو بغاني .. مكانش داك الحب ولا العشق.. كان مجرد اعجاب وصافي .. انا اللي بغيتو بصح وكان كيبقا فيا الحال فاش كيدير الفرزيات بيني وبين رجاء ولبنى .. وشحال بقا فيا الحال آكثر فاش تأكدت انه عمرو ما كان كيبغيني .. على الاقل من قبل مان عندي شوية دالشك .. لاكن تأكدت وهادشي جرحني بزاف خلا الجروح تنوض عليا فكل مرة كنشوف الفرق الشاسع بين عيسى وبين ياسين .. واحد كان كيغمرني بالكلام المعسول فاش كنكون انا وياه وفاش كيكون الزايد كيدور وجهه كأنه عمرو عرفني .. زائد الغضب دياله كان كيسيطر عليه وكان كيخرج فيا عينيه ومكانش كيواسيني ولدرجة ضربني ليدي من النهار الاول ، وكان كايحساب ليا غيرة عليا وهادشي شفع ليه وتصالحنا .. لاكن فالحقيقة كانت غيرة على عزة نفسه ورجولته وفوق هادشي طلقني من الدقة اللولة .. عارفة راسي غلطت وعايرتو قدام واليديه لاكن ماقصدتش كان مجرد ردة فعل قوية ماقصدتش كاع نقلل منو .. لاكن هوا ماعقلش عليا عز راسو عليا وطلقني من اول جلسة وقلب وجهه كأنه مكيعرفنيش . اما ياسيين نوع اخر مختالف تماما على عيسى .. واخا كنتهرب منو وشي مرات كنبين ليه انني مابقيتش بغيتو كيتبعني ويسولني واش غلط معايا فشي حاجة والى دورت وجهي عليه كيبقا يقلب على الاسباب وكيدير مجهود باش يراضيني ، كتبان عليه انه كيبغيني وماباغيش يخسرني وفضل يصبر عليا لأجل غير مسمى وكيعاملني بحال الاميرة وكيزيد ليا التقة فنفسي فكل مرة كنتلاقاه . اما كن كان عيسى كوراه ضرب الدورة مايصبرش عليا حتى نهار .. هاداك اصلا متدين مايزيدش معايا الهضرة وحتى السلام كيرميه من بعيد تقول غناكلو . شفتو ماجاش هاد السيمانة يشوف بنتو وسولت بابا قلت ليه واش مغاديش يجي يشوف جنة قالي راه مشا للعمرة

استغربت لهاد العمرة اللي جات عل غفلة مالقا زعما فوقاش يمشي غير حتى قلت ليه انا بغيت نتزوج! لعجب . طلعت لبيتي سديت عليا وعيطت ليسرى نسول فيها لقيتها على القرص. قالت ليا يالاه غادي نعيط ليك

بقيت كنضحك ونسول على الاحوال وهي كتسول على جنة ومالين الدار وقالت ليا مرحبا بيك نهار السبت بلا هادا للعرس وعنداك ماتجيش

قلت ليها ديالمن العرس واش ديالك

قالت ليا ديالي وفرحت ليها بزاف بقيت كنبارك ليها قالت ليا راه بابا غاعيط لباباك باش يعرض عليه وانا كنت غنسبقها ليك .. قلت ليها ان شاء الله ولاكن سمعت باللي باباك واقيلا مشا للعمرة !!

قالت ليا مامشاش شكون قالها ليك ؟ هاداك عيسى و لبنى اللي مشاو

قلت ليها ااه ايوا صافي يعني ماغاديش نتلاقاهم حيت مابغيتش نتلاقاه

قالت ليا مغايحضرش. غير اجي مرحبا بيك .. زايدون راه فارقين العيالات على الرجال

بقيت كنهضر ونتجمع وكتعاود ليا حيت علاقتي بيها بقات نقية وعلاقتنا معاهم مزيانة ونقية كنباركو ليهم الاعياد وكيجيو عندنا وكنمشيو عندهم واخا عمرني حطيت رجلي عندهم لاكن بابا وماما كيمشيو فالحج والعمرات والصدقات وفالاعياد كيجيو عندنا وبقينا على هاد الطريق غادين مزيان .

جلست كنفكر لهاد العرس اللي خرج ليا من الجنب والمشية ديالي عندهم اكيد كاع الانضار غتكون عليا ،. عمرني مشيت ولا شافوني من نهار طلقت وغادي نتلاقا برجاء وماكرهتش ندوز قدامها هازة راسي ونحشي ليها شي هضرة حيت حسب ماسمعت دارت الزردة ومات للعمرة فاش طلقني ودارت اللي مايدار عرفت راسي كنت جالسة ليها على قلبها ماتنفسات حتى طلقت وحتى وحملي وولادتي طيحوها بالعضام وماكرهاتش كن ماولدتش ولا كن طرات لبنتي شي حاجة فالولادة باش تهنا مني فمرة .

وصل الخبر لبابا وعرضو عليه وقالها لينا باش نديرو حسابنا ومن ساعتها وانا كنهندس لهاد العرس . شنو نلبس وشنو ندي. وشنو نلبس بنتي وباغا نفقص ليهم العينين لكاع اللي تشفاو فيا وبغيت نطرطق ليهم المرارة وماقالي راسي غير نمشي نشري خاتم المارياج يكون باين ونديرو فصبعي نبين ليهم باللي تخطبت ولا تزوجت وكاع ماشايطة باش نقبل على وضع مزري كما قابلين بيه هما واخا جيت على الضرات ماشي هما اللي جاو عليا وحالي احسن من حالهم ومع ذلك مادليتش راسي بحالهم وبغيت نضرب شي صورة مع يسرى فاعلة تاركة نقوليها وريها لخوك يشوف خاتمي ويشوفني كي منورة وعلى مزيناتي يعرف الدل المدلدل اللي مزوج ويعرف العيالات الحرات اللي لهلا يحيه ويتمناه حتى نكون ليه مرى ثالتة فاللائحة ديالو ويطلقني ويتبوزق عليا يحساب ليه عايشة فالغيس كنبكي ونحط عليه

قلت لياسين غادي نمشي للعرس نحضر وبقا كيبحث فيا قالي ديالمن وجلس كيسول فتيليفون قلت ليه ها ديالمن ها فين .. غير سمع شكون قالي لا ماعندك ماديري تما وبقا يحكم فيا وتعصب عليا قلت ليه غادي نمشي صاحبتي ومنقدرش نخسر ليها .. ضربها بغضبة عليا وخليتو منفوخ بحال الحنش ماهضرتش معاه كاع وفاض مشيت للكلية درت راسي ماشفتوش ودخلت دوزت المحاضرة وخرجت تلاقيتو فالمكتبة درت راسي عورة حتى جا دار ليا واحد الجرة من يدي بقيت كنشوف فجنابي وهوا كيزعف قالي شهاد التصرفات كديري

حشمت بقيت كندور بلاصتي و خرجت من المكتبة وجهي حمر كنسوط بحال التور وهوا تابعني حتى للطموبيل ووقفني قالي كنهضر معاك جاوبيني

هزيت صبعي قلت ليه اااخر مرة تهضرني وسط الكلية ولا تعاود تعتارض طريقي. مرة اخرى صافي سالينا

جيت نطلع وشدني من يدي ومع الشدة وقف واحد البروف اخر بسيارتو ونزل عندنا قالينا ياك لاباس اش كاين نعلو الشيطان

قلت ليه بالادب لالا والو غير سوء تفاهم وصافي

قالي ياسين مغطلعيش حتى نهضر معاك

خرجت فيه عيني وانا كنترعد عليه قلت ليه فاش غتهضر معايا بعد مني

قاليه البروف لاخر نعل الشيطان اش كاين

قاليه ياسين خليك بعيد خلي هادشي بيني وبينها

جاب ليا الساكتة وقلت ليه لزم حدك ولا مغادي يعجبك حال وطلعت هربت من تما مشيت باغا ناكل جنابي ماضنيتش الامور توصل لهاد الحد وماعجبنيش الحال بقا كيعيط ليا شحال ما جاوبتوش وديك السيمانة مامشيتش كاع درت شهادة طبية وتهنبت حتى لنهار الجمعة ومشيت ندرس واحد نص نهار وتلاقيت نفس البروف وقف سلم عليا كيسول على الاحوال وعطيتو صوابو حتى صدمني قالي واش عندك شي وقيتة نديرو فيها شي كافي

بقيت غير كنشوف فيه قلت ليه سمح ليا لا ماعنديش الله يعاون ومشيت مارضيتش بغيت نموت ماعقلتش على المحاضرة كي دازت وخرجت كنترعد كنقول مع راسي الى مشيت حتى تلاقيت ياسين ووقفني غندير ليه الويل حيت هوا اللي تسبب ليا فهاد الاحراج وضسر بنادم عليا ووصلني لهاد النيفو ساعا ماتلاقيتوش مشيت رجعت بحالي حيت كان بابا كيتسناني غير انا باش نشدو الطريق لفاس .

كنت موجدة كولشي وحاطة باليزتي غير وصلت صليت وشديتا الطريق ساق بينا بابا النص حتى طاح الضلام وسقت انا الباقي حتى لفاس حيت مكيشوفش مزيان بالليل ،. حجزنا فأوتيل حطينا فيه حوايجنا ودوزنا الليلة وكانت يسرى باغاني نحضر للحمام لاكن ماتساعنيش الوقت غير وصلت تلهيت مع بنتي كنجبد فالحوايج ونطلق ونعست وفالصباح نضت دوشت وجلست لاوية على راسي فوطة وبينوار وقدامي بنتي بدلت ليها كولشي من لداخل ومن برا وحطيت ليها كسوتها اللي تلبس وفطرتها وفطرت معاها هزيتها هي ولبستها ديتها للبيت دماما خليتها معاهم ورجعت لبست حوايجي وهزيت صاكي نزلنا كاملين سقت سيارة بابا وصلتهم حتى للفيلا حيت بغا يشوفو العائلة ويجلسو مجموعين يشبعو من جنة شوية . قلت لبابا غنرجع لاوتيل حتى لليل وندوز عندكم نمشيو للقاعة وفهمني مابغيتش ندخل للدار و رجعت بحالي مشيت للصالون صاوبت شعري درت ليه مشيطة بلدية بالفرقة الوسط ومجموعة اللور لتحت سامبل. ومكياج سموكي مع عكر خفيف لامع بانو عيني كبار وصاوبت دفاري مامولفاش نصبغ ولا نلسق مع الصلاة غير من المناسبة للمناسبة وكنرجع كنحيدهم وهاد المرة صاربت بخال ديال لعروسة ورجعت للاوتيل لابسة نضاضر والشال مغطيني لبست تكشيطتي من احسن التكاشط الدارجين على الموضة بالتنبات و الحجر عنقها متلت وتعطرت ولبست مجوهراتي البلدية نع حوالق نازلين بلديين وشوكة فالصدر وساعة ومجوهرات فاليد ومضمة ودرت الشال غير من لفوق ومشيت حشمانة نتلاقا بابا مزوقة . عيطت ليهم خرجو كانت ماما ملبسة بنتي ولابسة نزلت ورجعت اللور مدرقة وجهي عطيت لبابا يسوق ومشينا للقاعة حيدت الشال فالدخلة حيا كان كولشي مقزب وغير النسا ومانسيتش خاتم الزواج طبعا . سرحت عيني بانت ليا غير العاىلة مزال ماجات الضرة . هزيت بنتي فيدي ودخلت خليت ماما برا مع بابا ونسيت تيليفوني فطموبيل وتميت راجعة حتى للباب نقول ليها تجيبو ليا حتى كنخرج فعيسى قدامي حطو الاسانسور اللي طلعنا فيه وخرج منو هوا ورجاء .. تصدمت وحتى هوا تصدم فاش شافني وبنتي بدات تركل ليا فيدي بغات تمشي عندو . اما رجاء صفار وجهها ويلي من صابت كن قجاتني .. انا عيسى تحنا عند ولدو كيتلف معاه وبنتي صعرات جاتها الغيرة وحتى انا جاتني الغيرة عليها بغيت رجع وجهي احمر وضرت هازاها بغا يسكت ليها القلب بالبكا حتى كنت غندخل وسمعتو قالي سارة

ضرت عندو جات عيني على رجاء. كنشوف فيها بغات تاكلني بعينيها وساكتة ولابسة ومقادة وهوا لابس كوستيم تم جاي عندي بغا يهز جنة ورجعت اللور قلت ليه لاللا غير خليها . جرها من تحت يديها وهي كتلسق فيه وجراتني من ودني كانت غطيرها ليا دات ليا راسي حتى لعندو ولسقات على الحلقة مابغاتش طلق وهوا كيرجع اللور تقول غادي نسرطو وانا تابعاه براسي كنقول ليه الحلقة الحلقة .. ماشافهاش كيقول مالي هادي كتسند عليا اش بغات وانا ودني غطير تابعاه فاللخر جريتو من دراعه وشادة فودني كنقول ليه وقف وقف راه شادة ليا فودني . انا كنقول ليه وقف وهوا كيرجع اللور حتى كان غيتعصب عاد انتباه ليا علاش لسقت عليه وعطيتو راسي. وشد لجنة فيدها فكني ورجعت اللور شادة ودني ورجاء كتشوف . مارضيتش ومارضاتش ومارضاش وتحطينا فموقف خايب وحسيت بيها بغات تشرب من دمي وماقادراش تهضر قدامو قاطعاها فنفسها باغا طير عليا وشادة راسها حتى تحل الاسانسور خرجات لبنى هازة التكشيطة تصادفات مع العيالات كتسالم معاهم وعينيها فيا مخرجاهم . اما عيسى بغا يمشي وقلت ليه فين غادي ؟ فين غتديها!! تخلعت خفت يديها ليا وبقيت برا فداك الكولوار غادية موراه قلت ليه لا ماتديهاش والله لاديتيها

رجع اللور قالي شوية وغنجيبها

قلت ليه لا شوفها هنا واراها

شفت فلبنى كتجر رجاء باش يدخلو وهي كتنتر يدها باغا تجي ليا ولبنى كتخزر فيا وشاداها حداها حتى جات ماما هازة صاكها لقاتنا قدامها وجات مصدومة كتسول اش واقع. ، قال ليها هاهي جنة معايا بلاتي ونجيبها

قالت ليه واخا وكان ولدو كيجرو بغا يشوف جنة وتحنا عندو عيسى القرفصاء كيضحك معاه عطاه باسها وانا وماما مشادين هي كتجرني للقاعة وانا كنتر يدي وقفت عليه حتى وقف قلت ليه صافي اراها نديها

دار فيا واحد الشوفة كتخلع وبغا يمشي وانا نوقف قدامو شديت ليه فيدو وقفتو بغيت ناخد بنتي وضربني ليدي .. نفس الشحطة وبنفس اليد ونفس التقسيحة دالمكانة قالي حتارمي راسك الاللة

حسيت بالضوء ضربني فيدي والدموع مشاو فعيني مارضيتش وجريت بنتي بالقوة مابغيتش نجاوب قدامها وماعجبوش الحال قالي سيري ستري راسك هوا الاول شهاد قلة الحيا

مشيت خليتو كنت غنطيح وبنتي كتبكي ليا وتجبد بغات تمشي عندو . اللي شاف الشبه غير انا محطوطة .. غير عينيا وفمي وشعري وحناكي وبيوضيتي .. لاكن القلب على باها طيح وتموت عليه كتنكرني فاش كتشوفو .. كمدت د الدقة ودخلت للقاعة تبعاتني ماما قالت ليا واش هرج لبك العقل خرجتي بشعرك عريان

درت يدي غلى راسي نسيت الشال وعاد انتباهت واصلا دمي كيغلي ماعقلت حتى على راسي وعاد فهمت علاش قالي ديك الهضرة ومارضيتش بغيت نقتل راسي. ومابغيتش نتشوه ولا ندير شي فضيحة كمدتها فقلبي رديتها لداخل حتى تطعنت ومشيت كنرد فالطواليط بالفقصة

حسيت بقنبلة غادي طرطق فصدري عييت نتقيا ماقدرتش نرتاح والصهد جاني والغضب عماني مشيت للطبلة فين جالسة هزيت شالي لحتو عليا وماما كتسولني فين غادية قلت ليها هانا جايا

دزت حدا لبنى ورجاء. بداو كيضحكو عليا ويتشفاو حتى رعدوني كان كيبان ليا نقتل شي واحد والحمد لله مادرتهاش وخرجت لبرا كان الضلام كنقلب على شي برهوش يكلم ليا عيسى ينزل عندي مالقيتوش .. ضورت وجهي كنقلب بان ليا جالس فطموبيل بوحدو وكيهضر فتيليفون ومشيت ليه كنشوف واش بنتي معاه ماكايناش قلت الله واعلم يكون عطاها لبابا ونزل !! نزل معايا نيشان بالغضب والرعدة ديدي وكنت لاوية الفولار عليا كل شوية يميل وعيني مغرغرين جريتو من كتفو هزيت كاع طاقتي مابقيتش كنعقل وهزيت يدي عادية نزل عليه بشي طرشة يالاه نبرد لاكن صدها فالدقيقة تسعين شد ليا يدي. لاحها للارض وهز صبعو خوج فيا عينيه قالي وياااك ويااك تزعمي .. سمعتي

دفعتو بغضب مع البكا مع القهرة والحكرة وكاع الزمر تخلط عليا بقثت كندفع فيه ونتعكل ونعاود ندفع وهوا هاز يديه كيقول ليا جمعي يديك ..و جمعي يديك حسن ليك

قلت ليه نتا والله ماراجل … كايحساب ليك راسك راجل ولاكن والله ماراجل . بغيت نرد ليه الدقة وهزيت يدي عاود صدها وهزيت لخرا عاود صدها حتى هي وتعصب عليا قالي جمعي راسك واش نتي مريضة ؟؟ واش خرج ليك العقل

صدق ليا كاع الهجمات فاللخر هزيت واحد الحجرة من الارض كبيرة مابقا كيبان ليا لا برستيج لا احترام ينعل ابر الاحترام وضربت كلشي عرض الحائط مابقاش كيهمني النضرة ديالو عليا ولا شنو يقول. اللي كيهمني نرجع ليه الغدايد ونخرجهم فيع وماحدو كيصدني وانا كنزيد نتفقص ونشعل وتابعاه وغادي كيرجع باللور شافني هزيت الحجرة وكنبكي زيرت على سناني بغيت نضربو بيها وحيدها ليا لاحها وطلق من يدي دار بيا خركة قالي نتي ولا هيلا مسطية

دفعتو قلت ليه ماعندكش الحق تهز يدك عليا .. ماعندكش الحق تقيس فيا ولا ضربني انا با عمرو ضربني .. ناتقيسنيش ماتوسخنيش بيدك

وبديت ندفع ونضرب قالي ماتقيسينيش حيدي يديك علاياش كتقلبي؟. شنو بغيتي

زاد صعرني بديت كنضرب بحال الى كنضرب فشي طبل وهوا هاز راسو فالسما كيبعد ليا يدي فاللخر شفت وجهه حمار وتعصب شدني لسقتي مع واحد سطافيت كحلة فديك الضلمة تردخت معاها وتزير ليا على يدي مع غنسمعو قال شنو بغيتي فشلت مشات مني الطاقة وانا نطيح ليه تما .. ماشي فقدت الوعي ولاكن فشلت مدام فشلت وردخني ديم الردخة وناقضار ليا يدي والو قلت ندمو بشي سخفة اصلا طيح ليا النص

جيت نطيح جا يشدني فلت من يدو مشيت جنب وجيت على راسي حسيت بالضو ضربني غبت بالصح واحد الغيبة تقول طفا ليا عقلي وشعل فلحضة وحدة حسيت بالدوخة بحال الى نعست وفقت فنفس اللحضة وحليت عيني شفت فيه مخلوعة ماعرفتش شنو وقع ليا مزال ما رتبتش احداثي لقيتو عند وجهي كيقولي سارة. سارة

هزيت يدي بغيت نجلس حسيت براسي بقا محطوط ورايا والشال هبط وشد ليا فيدي باش زعما نوض. ساعا رجعت جلست مالقيتش الجهد وتكيت على الرويضة ديال السطافيط كنقول ليه راسي راسي

حسيت بيه تلف بقا كيتفتف وحط يدو على راسي وهزها فالضوء كيشوف واش كاين شي دم وانا كنهضر ونتنخصص البكية كطلع وتهبط فيا

قالي بلاتي نعيط. لمك وهزيت صبعي حركتو ليه مابغيت لا مي لا جدي يباتو ينكرو عليا قلت ليه بالتنخصيصة خليني هنا .. صافي بعد مني خليني دابا نوض راسي عطيني شبر تيساع

رجع اللور بقيت بلاصتي حاطة راسي سادة عيني الدموع كيهبطو راسهم وهوا وقف عليا بحال الجن كيبان غير الكوستيم كحل ورجع جلس القرفصاء. كيشوف فيا مارضيتش نبكي قدامو وخانوني دموع الحكرة والضلم لا انا لابنتي ودرت يدي على نيفي كنبكي . قالي نعلي الشيطان حشومة هادشي اللي كديري ؟؟

قلت ليه انا ندمت على نهار اللي عرفتك فيه

قالي شنو درت ليك انا ؟؟ نتي بغيتي تزوجي بيا تزوجت بيك قلتي طلقني طلقتك ! بغيتي تزوجي قلت ليك الله يسخر !! قلتي خود عليا بنتك قلت ليك مرحبا اش بغيتي ؟؟

مسحت عيني قلت بعد مني .. عطيني غير تيساع

ناض وقف قالي غنمشي نعيط على مك تجي عندك

قلت ليه والله ديك البنت لا شفتيها ولا عطيتها ليك سمعتي

رجع جلس القرفصاء قدامي وقالي ماحيدتهاش ليك بزز .. كنت واضح معاك بغيتي تزوجي تزوجي ولاكن تبقا مع مك

عصبني جريتو من الفيستة قلت ليه هاديك بنتي فين ما كنت غتكون معايا واخا ندخل للقبور نديها يالاه

قالي واجمعي يديك شوفي الى ضربتك ليدك ماتلومينيش وتبقاي عليا با ما باا

ديتو وجبتو قلت ليه هااا.. زعما حاج وداكشي .. هاااا يالاه الاااه

وجلست نمسح فيه يدي فين ما جاب الله وهوا كيشوف فيا ويزفر شدني رقبتي قالي شنو بغيتي علاش كتقلبي دابا؟؟ هاا؟؟

حط نيفو قدام نيفي. حسيت بالنفس كتزفر كتحرق فوجهي وريحة القهوى من فمو جارجة بقيت كنترعد وقلبي كيضرب كنشوف فيه حتى باسني من فمي وتكاليا راسي مع الرويضة فقبلات طويلة كيضغط عليا كنت دفعو فاش باسني سكت بدا قلبي كيزدح حسيت بالشوق والبكية طالعة مع صدري لقيت راسي معنقاه ومصدومة فراسي كنبوسو .. باغا يبعد واحد اللحضة وشديت فيه عاود رجع كيدخل النفس كتر ما كيخرجها وعنقني كيشد ليا فوجهي ولاسق مع شفاهي حسيت براسي كنزير ليه على دراعه ونغرس دفاري وندعي فيه فخاطري يهزو ربي عليا ويهنيني منو

تقطع الخط اللي بيناتنا وبعد راسو كينهج وناض وقف وبعد شوية عطاني بالضهر وانا جالسة بلاصتي دايرة يدي على فمي وكنقول اوييلي واش هادشي بصح!! واش هادا الخاج شخصيا اللي مكيسلم ما كيهز العين !! وانا!!! ياخسرا بنت الامام وبنت القاع والباع اصل ومعدن وترابي وخلوق واداب وصواب !! الشيطان الله ينعلو ويهزيه .. الله ينعلو يخزيه غرار وطيحني فالخطيئة وباشمن وجهه غنرجع نشوف فيه !! فين الاحترام والوقار وعزة النفس و و و و وووووو وييلي ويلي هادي هي ندير وندير وندير اش درت فاللخر ومعامن !!! مع بات بنتي وحاج ودايراه فمرتبة قداش وطيحت بقيمتي ولي على فضيحة كن بقيت فالناضور ولا هاد العار اللي جبت راسي وشنو غايقول عليا دابا وفين هوا الكبرياء والويل لكحل كاع ماشفت داكشي فالبوسة .. نضت وقفت كنقاد حالتي وهوا واقف قدامي كيمسخ على راسو ولحيتو وانا موراه كنشوف فجنابي والدقة كضرني فراسي .. درت الشال لويتو عليا ومشيت دايخة كنشوف قدامي ماهضرتش معاه وماهضرش معايا دخلت للقاعة ومشيت لقيت العروسة لبسات اللبسة التالتة وانا غابرة وماما شادة بنتي فيدها .. مشيت للحمام نيشان وقفت قدام المرايات وحيدت الشال شفت فوجهي ومامصدقاش راسي . بديت نقاد شعري ونمسح العكار من الجناب حتى دخلات رجاء فجأة وغير شافتني بدات كتميع فيا ووقفات حدايا كتصاوب مكياجها وضحك غير بوحدها وقالت ليا شخبارك لباس عليك

قلت ليها الحمد لله اختي

قالت ليا كي بقات يدك

شفت فيدي وقلت ليها علاش مالها نو ناقصها

ضارت عندي وقالت ليا من الدقة اللي عطاك راجلي.. شتي اللي كيمد يدو على الرجال

درت ليها ضحكة صفرا وقلت ليها والله اختي الى كتبقاي فيا .. عرفتي شنو .. مغاديش نجاوبك

هزات صبعانها وقالت ليا غنقول ليك جوج كلمات .. قلبي ليك على شي واحد يسترك وعطي تيساع لرجال المزوجين

قلت ليها اختي نتي راك كتقلبي على خلاك .. نسيتي !! راه كان راجلي … وعندي معاه بنت يطير ولا ينزل غادي يرجع .. وانا الى بغيت نرجع غير بكلمة مني غنردو واسيري سولي ضررتك تقوليك علاش بكلمة مني غيرجع باش تعلمك دخلي سوق راسك حتى نتي ولا غادي نطيرك ونجي بلاصتك .. ومزال غادي نطيرك بلا ماتفرحي بزاف الى بقيتي مزوجة بيه عكري ليا بالكحل

خرجت من الطواليط خليتها تما كنهددني حساب ليها غتخلعني ونبقا نتجاوب معاها ! مشيت حدا ماما جلست وبقات كتسول فيا وتبحث فين مشيت فين تعطلت قلا ليها مشيت اوتيل جبت تيليفوني وجيت وبقات كتنكر عليا حتى طابت وانا غير جالسة عيني على لبنى وعينيها عليا كتشوف فيا بنص عين وتقلب عينيها ، حطو العشا تعشينا ونضت تصورت مع يسرى صورة للذكرى ورجعت جلست مكاين غير حضيني نحضيك حتى داز العرس وخرجت ملوية عليا الشال لطموبيلة بابا وراسي تقيل بالعيا الطبل والغيطة بقاو كيزننو ليا فراسي حتى وصلت للاوتيل ، قلت مع راسي يقدر يعيط يقول شي حاجة على الموضوع لاكن ماعيطتش وتفكرت انه مغاديش يعيط فوقت متأخر ونعست دايرة فراسي انتا غادي نرجعو بحالنافالصباخ لاكن تفاجأت ببابا كيقول لينا باللي راحنا معروضين للغدا كلنا عند ايت الحاج ! تفاجأت قلت مع راسي غايكون شيخي اللي عرض على بابا ماخلاهش يمشي وصبحت كنوجد للغدا ومشينا وانا على اعصابي كنتمنى مانلقاش عيسى فالدار وتجي عيني فعينيو ماعندو مايشوف فيا ولا نشوف فيه وليت كنحس براسي بحال شي عاهرة سلاطيت عليه خرجتو على طوعو !

رحبات بينا حماتي وماخلات ماوحدات لينا وفرحات ببنتي وغير كتراري بيها .. لقيت الدار خاوية فيها غير هما وخو عيسى الكبير الاخواني و واحد عمو ومراتو وشيخي ، ..عزلونا على الرجال تغدينا بوحدنا ودرنا موعضة عاوتاني وتجمعنا كلنا فصالون كبير بحال المعتاد ولقيت عيسى تما جالس داير رجل على رجل مصغر عينيه كيشوف فجهة اخرى .. اشمنك يا نخوة ويا شخصية ويا هبة ويا وقار !!! اللي شافو يقول عمرو يغلط. وهوا لبارح خرج الطريق خرجة وحدة ! من السلام اللي مكيسلمش عليا وعينو اللي مكيهزش فيا دخل عليا ببوسة دخلة وحدة ! يعلم الله واش ندم عليها ولا ماندمش ! ولاكن شفتو كاع ماشاف جيهتي بمرة وحتى انا دورت وجهي رافتتح بابا الموعضة بآية قرآنية على النساء والطلاق وانا نفهم راسي. . قلت صافي غادي يجبدوني ويهضرو عليا ومكاينش هنا فالمجمع اللي مطلقة من غيري ! بقاو كيهضرو ويهضرو والاحاديث والآيات ويهضرو على التعدد مرة اخرى والذرية وانا غير ساكتة وكنسمع عرفتهم كيقصدوني انا فالاخير خرجو ليها نيشان ومع بابا صريح كيهضر ديريكت قالي بنتي سارة … هاد السيد باغي يردك على سنة الله ورسوله .. واش قابلة ترجعي وتجمعي شملك ولاماقابلاش؟. وكلشي بالتراضي .. لا ضغط ولا إجبار عليك

تدهشت من السؤال الموجه ليا وشفت فعيسى لقيتو كيشطح برجلو وكيشتت النضر وطالق ودنيه ماشفاش فيا وماعرفتش علاش ماقالي والو ؟ حطوني امام الامر الواقع وبقات مرت عمو كتقولي نعلي الشيطان وراه بيناتكم بنية وراه التعدد حللو الله المهم هوا العدل

نفس الكلام قالت حماتي وكيحاولو يدخلو بخيط ابيض ويتناقشو .. صونا تيليفون لبابا وقالينا سمحو ليا وناض هازو فيدو وداز قدامي قالي فكري مزيان قبل ماتقرري وحطي النقط على الحروف

تنهدت وانا ساكتة وقالي شيخي شنو السبب اللي ماخلاكش ترضاي بالتعدد

سكت شحال وقلت ليه ماقدرتش انا ماقدرتش على الشركة … ومكيعدلش ديما ضالمني

ضار شاف فيا واحد الشوفة تصدم وقالي انا كنضلمك؟

دورت وجهي سكت وشيخي كيشوف فيا قالي غير هضري مافياا عيب اللي كيضرك قوليه راحنا هنا باش نقادو الطريق

قلت ليه كيميز بيني وبين لخرين .. انا كيهمشني ديما وكيضحكهم عليا وكيطيح من قيمتي قدامهم

حل عينيه فيه بقا غير كيشوف وانا مترددة كنقول واش تزيد نهضر ولا نسكت شفت هضرتي ضهشراتو حتى تسر ليه اللسان وشيخي كيسولني قالي كيفاش كيهمشك ؟؟ مثلا؟؟

قلت ليه فاش كنكونو كاملين حتى السلام مكيسلم عليا وكيهضر معاهم ويضحك وانا لا ديما كيقلب عليا وجهه وديما عاطيني بالضهر ومسبقهم عليا وانا اخر وحدة وحقي مهضوم

قالي الحاج عيسى الله ااودي فين وامتى هادشي اللي كتقولي دابا انا اول مرة نسمعو

ربعت يدي ودورت وجهي وقالي فوقاش يمزتهم عليك؟ هضري يالاه عطيني شي حاجة كتبين باللي كنميزهم عليك

بقيت ساكتة كنشوف قدامي وكنهضر وحشمانة منهم قلت ليه فاش كنا مشينا عند لبنى نطلو عليها ماشفتيش حتى فيا وحتى كتبعد عاد كتعيط ليا فتيليفون علاش ديك الساعة ماقلتيهاش ليا قدامهم؟. وعلاش كضحك معاهم هما وانا لا وكدير ليهم خاطرهم فكولشي. وانا لا واللي طلبات شي حاجة كتقول ليها اه وانا بغيتي دير ليا النقاب وبغيتي نبقا غير فالدار جالسة و كتزعف عليا وضربتيني وبزاف ديال الحوايج .. ديما الفرزيات وديما انا مهمشة مكنعرف شنو واقع وماكتقول ليا والو والصدقة هي اللخرة اللي دارت لبنى ديك المرة ماشقت ليها الخبار حتى مشيت لتما .. مالي انا ماشي بنادم ؟. وبنتي حتى هي مهمشة وماكتديهاش فيها وكتفضل الولد عليها هي !! واش حيت بنتي ؟. وعلاش كدير معايا هادشي كامل وباغي تردني ؟ فين غنرجع ؟ انا منقدرش نرجع ومانقدرش على الضرات وداك الجو ديال الحساسيات والمشاكل

كولشي بقا غثر كيشوف فيا ودخل بابا جلس بلاصتو وانا نسكت قالي ايوا شنو قلتي دابا يالاه اتينا ماعندك

بقيت ساكتة مهبطة راسي وعيسى مزال مصدوم قاليا هادشي كامل اللي قلتي مكاينش كاع ونتي كيتهيأ ليك وحتى حاجة من هادشي ماصحيحة

قاليه بابا اش قالت ؟!

قالثه شيخي قالت ليك كيدير الفرزيات بين ولادر وبينها وبين نسا الاخرين

قاليه عيسى بصرامة مكاين حتى حاجة من هادشي .. لا فرزيات لا والو هي كيجيب ليها الله كندير الفرزيات والله وأعلم .. اصلا كنعاملهل بحال الى كاينة غير هي

بلا منشعر قلت لبابا لالا كاع مكاين هادشي بلعكس كيعاملني بحال الى كاينين غير هما

هبط شيخي راسو كيضحك بوحدو وقلت لبابا راه السلام ديال الله ماكيقولوشً ليا فوجهي الى كنتي مع لخرين وعمرو فحياته هضر معايا قدامهم ولا عطاني قيمة ديا مبهدلني والى ماضربنيش مايشكرنيش

قالي بابا فين ضربك!! ياك مرة وحدة اللي ضربك صافي حديناها شحال هادي !!

قلبت وجهي سكت بديت كنرمش وبابا كيشوف فيا قالي الله يهديك .. الله يهديك راه ماشي اي واحد غادي يدير ليك الفشوش اللي داير ليك باك ومك .. راك كبرتي فكري فمستقبلك ومستقبل بنتك خلي عليك الزواق والرش هوا اللخر .. الزواش شروطه واضحة .. الدين المال المودة والاحترام والى كانو هاد الميزات فهاد السيد صافي تغاضاي على الباقي .. شي كيغطي على شي .. هوا يصبر ليك تخدمي و ماديريش النقاب ونتي غمضي عينيك على التعدد وخليو السفينة تبحر .. قلبي الهنا فحياتك ماشي على المشاكل

بقيت ساكتة وهوا كيصحني ويتسنا الرد وقلت ليه بشرط يخليني نبقا فخدمتي ومايجمعنيش مع الضراير و مايديرشً الفرزيات ومايجيبش عليا شي وحدة اخرى

قالي بابا هاهوا كيسمع ..

قاليه عيسى بغات تخدم تخدم مابغاتش تلاقا بيهم حقها هاداك اما الزواج راه فكرة مستبعدة مكنفكرش فيها نهائيا .. شروطها عادية ماشي شي حاجة

واش قالي بابا وشنو قلتي

بقيت ساكتة مطولا والكل كيتسنى اارد وقلت لبابا اللي درتيها

قاليهم بابا سيادنا .. الله يكمل بلخير الحق بان .. نضربو الحديد ماحدو سخون ..

شرطت عليه نبقا فالناضور مانرجعش لفاس وهوا يجي عندي .. وحتى يسرى اللي كنشوف وتشوفني وتفاجي عليا تزوجات مغتبقاش مسالية ليا دابا والقنط ففاس واصلا موحشة داري وباغا نعيش فيها وكتعجبني وكطل على موقع زوين ومريح ومبهجة كتفتح ليا الشهية ..

بصراحة ماكنتش متوقعة هاد الرجعة ابدا وكنت فالسفر حتى صدقت فالرجوع وجري عليا نجري عليك .. رجعت للناضور خويت الدار وجبنا ليها اصلاحات جداد وبدلناها من راسها لساسها بالفراش والديكورات وتلهيت مع التجهيزات ولحسن الحظ جاتني مع العطلة لقيت راحتي وفرشت على خاطري وصايبت البيت لبنتي على حقو وطريقو وبديت فشريان الحوايج وهاد المرة دهزت راسي شريت حوايجي راسي وعلى دوقي وتم الرجوع وقت قصير ودرنا صداقة فدارنا عند بابا وتجمعات اعائلة كلها دوزنا ديك العشية وجهزت نفسي من جديد بحال اي عروسة .. جاتني الخلعة وخا سبق ليا مزوجة ووالدة لاكن جاتني الرهبة عمرني توقعت نرجع لراجلي حتى صدقت خارجة من دار باب لابسة الجلابة والشال على كتافي والفولار مدرر على وجهي وجارة باليزتي لقيتو كيتسنا هوا وبابا وهاز جنة كيضحك معاها . توادعت مع ماما اللي عيات تنصحني وتبدل ليها الرأي رجعات كتفكر فمصلحة جنة كتر مني وكتوصيني نصبر على قبل بنتي ونكون حسن منهم ماشي هما حسن مني . عنقتها وطلعت اللور شادة جنة فيدي وهوا غادي سايق بينا فصمت طول الطريق .. نعسات ليا فيدي. ووصلت للدار مشيت للبيت اللي صاوبت ليها نيشان حطيتها فالبياص وتحنيت كنقاد ليها الغطا حتى جا وقف ورايا عنقني وطل عليها بقا كيشوف فيها ويتأمل وقالي كتشبه ليك غير نتي

حركت ليه راسي قلت ليه امم داكشي علاش مهمشها حتى هي

دورني عندو شاف فيها وشد ليا دقني قالي انا مهمشك !!

هبطت ليه يدو قلت ليه انا رجعت ليك على قبل بنتي .. باش تعيشًبين باها ومها وتربي عليها الكبدة

شدني من يدي وقالي على قبل بنتك خاويها ماتخليهاش بوحدها

وقفت هزيت فيه نيفي وقلت ليه هاديك هي اللي عمرها مغتكون .. مغنزيدشً نضلم شي بيبي اخر وانا ماعارفاش واش هاد الزواج دايم ليا ولالا … وماتحاولش تقرب مني

مشيت وخليتو دخلت للبيت ديالي هزيت حوايجي ودخلت للدريسنغ بدلت ولبس سوميج بالدونتيل والبينوار يديه مزغبين شفافين كحلة وخرجت كنلوي شعري وريحتي كتعطعط لقيتو واقف معري عليا كيدور غير بالشروط وشاف فيا وبقا متبعني بعينو … لحت البانطوفة بغيت ننعس ورجعت نضت جلست قدام مرايتي حيدت حلقات كبار كنت دايراهم كيضروني ونضت غادية للفراش حتى وقفني قدامو قالي كيفاش؟

قلت ليه شنو؟

قالي شنو كنتي كتقولي

قلت ليه بكل ثقة ما تقربش ليا .. راه عندك جوج اخرين

هز راسو كيتبوزق عليا قالي اهاه !! ونتي؟

قلت ليه حسبني مكايناش انا غير زايدة

جرني من يدي بجوج بقوة حطهم على جنابو وشدني من خصري قالي انا باغيك نتي

بغيت ندفعو وزير عليا قلت ليه انا بزاف عليك ماغاديش نكون ليك

لاحني فوق الناموسية غلى غفلة جيت غلى ضهري وطلع عليا شد ليا يديا لفوق. قالي هاحنا غنشوفو

هبط عليا بحال الباطل تقول عمرو شاف مرى فحياتو ولا عمرو تزوج وهوا عندو جوج وجا عندي بجهد واحد عمرو ماشاف ماتشوف حتى بديت كنطلب الشرع معاه ولا تغوت بنتي من البيت ونلقا السبة نمشي نخليه يتقلى .. حديت الشوق اللولاني وبردت حر البعد والحرمان ووليت باغا غير نعس معنقاه ونتسنط لعضامي لاكن ماخلانيش . بقينا فايقين اللي كله حتى بدا الضوء يدخل للبيت من الزاج ديال البالكو وبدا كيبان ليا ويبانو تفاصيله حيت ماخليتوش يضوي عليا البيت ويتفرج فيا وهوا عزيز عليه يتسارا فتفاصيلي . كنا فلحضة رمنسية وسط. العمل كيشوف فيا وكنشوف فيه ومصبرة راسي بحال الى اول مرة غنتعاشر .. قالي تجمعتي بزاف

عجبني الحال فاش قالها ليا ودفعت كبير قلت ليه ياكما ولفتي …ماكملتهاش وبقا كيضحك قالي غير كمليها … مالكي سكتي

دوزت وجهي شديت الضحكة وهبط على عنقني باسني قالي توحشتك

بقيت ساكتة وهي كيداعبني يديا ويبوسهم وقالي نتي زعما ماتوحشتينيش؟ فين كبيدة وحبيبة وديك الهضرة كلها اللي كانت عندك

قلت ليه شرفت عليها مابقيتش قدها

ضحك وقالي ماشرفتي وااالو غادية وكتصغاري وكتزياني

بديت كنضحك قالي توحشت هاد الضحكة

قلت ليها امم باينة

قالي راه باينة توحشتك وحتى نتي توحشتيني .. غير قوليها

قلت ليه الوحش راه عندو وقت ويسالي وغنرجعو للفرزيات

بقا ساكت ماهضرش حتى نال مبتغاه وتكا حدايا قالي علاش كتقولي كندير الفرزيات ؟؟ فين هاد الفرزيات انا معرفتش علاياش كتهضري

قلت ليه صافي دابا غير نسا … ديرهم ولا ماديرهمش مابقاش كيهمني

بقا غير كيشوف فيا قالي ياك !!

قلبت وجهي ودورو بقا كيشوف فيا والشمش داخلة عليها وباسني قالي وسط القبلة كنبغيك وبدا كيعبر ليا على الشوق والحب والاحاسيس وكيرصفني ويمدحني حسيت براسي. اسعد انسانة على وجه الارض .. منت هايمة وكنلعب ليه فواحد السنسلة دالفضة دايرها فعنقو زوينة بزاف ورقيقة عمرني شفتها عندو من قبل وكنسمع ليه وساهية فديك السنسلة وكل مرة قبلك كل مرة همسة حتى دخلنا فالجماع وطاحت ديك السنسلة على عيني بديت كنشوف فيها بانت ليا شي خبشات مكتوبين فيها فواحد الطرف مسطح من ديك السنسلة فالجنب وقلبتو كنشوف فيه قريتو بزز لقيت عليه اسم لبنى منقوش نقش رقيق. مكتبانش.. حست بالضو كيطلع معايا مع كل حركة دارها وطاح ليا النص وهوا معايا وسط المعاشرة ماشعرتش براسي حتى قطعتها وزيرت عليها بيدي بغيت نقجها وعضيت على شنايفي بالفقصة حتى سالات الحصة وعنقني بقيت كنقول ليه خليني .. بغيت نعس .. عييت

تقلب ليا المزاج وخلاني وتكا حدايا دار يدو على عنقو وبقا كيقلب بيدو حداه قالي قطعتي السنسلة

مجاوبتوش ولحتها من يدي حسيت بيها تلوات ليا بين صبعاني وزيرت عليها حتى قطعات فيا الدم . هزها حطها حداه من الجهة الاخرى وانا كنحس بالموت كتاكل مني وقالبة وجهي ومغطية . عنقني وقالي فودني مالكي

سديت عيني كمدتها وسكت وخليتو معنقني كيلعب ليا فشعري. حتى نعست

فقت معطلة وهزيت راسي لقيت بلاصتو خاوية والسكات فالدار الدبانة مكتزنزن والبلاصة اللي ساكنة فيها انا مهدنة وغير الطبيعة .. تخلعت على بنتي وشفت فالساعة لقيتها الوحدة!! وييلي. ماكلات ماشربات ما بدلات .. وقفت كنجري لبست السوميج ديالي وبينواري ودزت على بانطوفتي وخرجت كنجمع شعري للبيت اللي حدايا مالقيتهاش ومشيت لوسط الدار كنقلب مكاين حتى صوت حتى فجأة !! كنشوفها خدا زاج البالكون جالسة ببيجامتها وعيسى حداها شاد ليها الملاعق وشي طاسات من لكوزينة مخلطين مع الالعاب وكتلعب وتتجمع هي وياه ! هز عينو فيا قالي صباح النور الشهدة

تفكرت السنسلة وانا نجمع معاه هزيت خنافري ومشيت عند بنتي هزيتها اول حاجة ديتها بدلت ليها لقيت ليكوش عامر وهوا واقف عند راسي قالي بغيت نبدل ليها وماعرفتش كي ندير

قلت ليه ساهلة هاهي ..

بديت كنوريه شنو يدير وقالي راه عطيتها لحليب الصباح

قلت ليه اشمن حليب !!ًكي درتي ليها

قالي داكشي اللي مكتوب فالبواطة هوا اللي درت

قلت ليه عنداك تكون عطيتيه ليها سخون

قالي لا راه تبعت داكشي اللي تما بالحرف ولعبات شحال وفطرات معايا

قرب ليها كيضحك معاها وناضت كتعلق فيه بغاتو يهزها وخرجها معزوزة عاى راسو عاجبها الحال وانا موراه كنشوف باش فطرات وشنو عطاها لقيت الفطور فلكوزينة !! هاي هاي هاي السي الحاج شخصيا وجد الفطور وهبط للمخبزة تسخر وحط كولشي على الطبلة؟. حادك سخنت لحليب لراسي وجلست لقيت طبسيل صغير فيه الشوفان عرفتو وكلها الشوفان ودقت نشوف ياكما نسمو ليها بشي حاجة لقيتو هوا هاداك اصلا راه عندو خبرة وسبق ليه ربا الولد الاول .. جا حدايا هازها بغا يجلس وبدات كتركل مابغاتوش يجلس وناض دار بناقص قالي فاش تفطري يالاه نخرجو نتسخرو للدار

قلت ليه مغتمشيش للخدمة قالي شنو دابا بغيتي تسيفطينا نخدمو مابغيتيش نبقاو معاك ولا شنو

بقيت ساكتة قلبت وجهي وقالي سبحان الله نتوما وكانتكم تنعسو على مود وتفيقو على مود ماعندكمش الوضوح فحياتكم

ماجاوبتوش وبقيت كنشوف فه بنص عين لقيت أثار دفاري فعنقو خطوط عشوائية .. عجبني الحال .. بغيت فاش يمشي لفاس يمشي مزوق نفقص ليهم المرارة لا رجاء لا ديك لبنى . نضت دوشت ولبست حوايجي خرجنا تقدينا بحال اي اسرة سعيدة فآخر الاسبوع ودينا معانا جنة شرا ليها العاب جداد وحوايج جداد وتعطلنا لحسن حضي هازة ليها ماكلتها معايا ، جلسنا نتغداو فواحد البلاصة نقية وجلستها معانا قلبات علينا الطبلة غطسات يدها فشلاضة وكمشات وهزات بغات تاكل وفاش حيدتها ليها بدات كتجبد فرجات فينا الناس حتى ناض عيسى هزها كيدور بيها قاليها وماخليتي فمك حتى حرف

شفت فيه بنص عين كيحشي ليا الهضرة ولاكن ماشي مشكل كيتقلى فسمو فاش كيبقاو الناس يقولو ليه كتشبه لمها. غير محطوطة ومكتشبه ليك فحتى حاجة .. كنفرح .. وزادت واحد المرى كانت حدانا شافتها وباستها فيدها وبقات كدعي معانا ربي يحفضها و شفت فجنة بغات تمشي عندها وانا نسخط حسيت بالشياط فصدري مابغيتها لا تبوسها ولا تقيسها وبقيت كنشوف ونضحك بزز مني وقالت ليا ماماها نتي ياك .. تبارك الله كتشبه ليك

قلت ليها شكرا وودعاتنا مشات ورجع عيسى جلس قلت ليه علاش خليتيها تبوسها؟؟

قالي وشنو فيها ؟

قلت ليه لا ماتبوسهاش عندها ماماها ماعندها مادير بالناس

قالي مالكي مالكي على هاد الغيرة هادي كووولها

دورت وجهي بقيت كنشوف قدامي نقول واش بصح غرت !! زعما جاتني الغيرة على جنة ؟ عمرني ضنيت نغير من الناس على بنتي ولا يبقا فيا الحال الى شفتها بغات تمشي عند شي واحد ولا تبوس شي واحد. بلحق ديك قضية البوسان خبيتها حتى وصلت للدار ودرت السلعة بلاصتها وجلست غير انا وياها بوحدنا فالبيت كنلعب معاها وبقيت كنوريها شنو ماخصهاش دير وكنبوس ونقول ليها هادي ديالي .. حتى واحد ماتعطيها ليه صافي ..هادي لا .. بيزو لااا .. غير ماما صافي دخل على غفلة لقاني كنقريها وتكا حدايا قاليها وبابا

تلاحت عليه بقاو كيلعبو وقالي شنو غديري فاش غنمشي لفاس غتبقاي فالدار بحدك

قلت ليه ماعندي مندير هنا غنمشي لدارنا

قالي داكشي اللي بغيت نقول ليك

قلت ليه جنة اصلا غتبقا مع ماما وانا كنجي عيانة كنبغي نرتاح

قالي اصلا ماعندك ماديري بحدك هنا حتى نجي

قلت ليه ونتا فوقاش غتبقا تجي

قالي غنجي فالويكاند

سكت بقيت كنفكر فهاد الويكاند اللي جاني فحقي ! شافني قاطعة الحس وقالي مالكي ماعجباتكش الويكاند؟

قلت ليه لا بلعكس حسن باش تشبع مزيان عيالاتك

سكت بقا كيشوف فيا وانا كنلعب مع جنة وضرت لقيتو مزال على نفس الشوفة وسولتو بعيني قالي شوفي نتي اش كتقولي !! واش هادي هضرة!

قلت ليه اشمن هضرة مالي كدبت!

قالي هاد الهضرة مكنبغيش نسمعها.. مرة اخرى ماتعاوديش تقولي شي هضرة بحال هادي

دورت وجهي سكت وبقيتا جالسين شوية وقالي واش عندك فيزا؟

قلت ليه لا علاش؟

قالي نمشيو نسافرو لشي بلاصة نبدلو الجو

قلت ليه نديو معانا جنة؟

قالي وفين غنخليوها؟؟ نديوها

قلت ليه صافي

قالي فين نمشيو

قلت ليه بغيت نمشي لدبي

حرك ليا راسو وبقينا جالسين قالك ديري لينا شي عشا زوين ومشا خرج خلاني مع جنة نعستها ومشيت نطيب شي عشا حتى رجع جايب معاه صاك قدو قداش حليتو لقيتو عامر بالسقاطة والمشروبات والفواكه الجافة .. قلت مع راسي هادا عوال على شي سهرة وغادي نديرها ليه نشوفو شنو تجيب ليا من موراها .

حطيت لعشا تعشينا بقينا مع جنة حتى نعسات ومشيت ضربتها بواحد الغسلة وتماميجة وضربت ليه واحد السوميج كتولول غير بوحدها لحت عليها بينوار ديالها مقزب وتعطرت وطلقت الشعور ومشيت للكوزينة ماضرتش جيهتو خليتو فالصالون جالس و حطيت الطبلة فبيت النعاس عمرتها وزوقتها حتى دخل على غفلة لقاني كنحط ااخر بلاطو ديال الكيسان ومانسيتش ليه اتاي مشحر عرفتو كيعجبو اتاي بزاف .. وقف بقا كيشوف فيا دار ليا واحد الضحكة معتبرة وجا عنقني طير لبا بوسة وبدا يطلع يديه مع جنابي وانا كنهرب قلت ليه مالك زربان

قاليا بواحد التنهيدة. راه باقي ماصليت لعشا

قلت ليه بديتي كتعكز على الصلاة

قالي واش اللي معاك غيبقا عندو شي عقل .. شحال من عام ما شفت فشي وحدة جيتي نتي ضربتي لينا كاع داك الحداد وخرجتينا على الطوع الله يسمح لينا وصافي

قلت ليه مالي انا شديتك بزز منك نتا اللي كنتي طااايب كتغلي وخ خخ خخننن

بقا واقف شادني مصغر عينو فيا وقالي كملي كملي .. شنو كنتي باغا تقوليقلت ليه والو

مشا جلس جنب الناموسية قدام الطبلة وكيشوف فيا بواحد الضحكة وكل مرة ينقب منها ويشير ليا بصبعو ويقول ليا نتي خطيييرة

شعلت تلفازة درت اليوتوب وقلت ليه وجد راسك للخطر وطلقت ليه واحد الشعبي دالشيخات وكنقول مع راسي دابا وهوا تسيف عليا يقول ليا حيدي داك الحرام طلقي القرآن نعلة الله عليك . وبصراحة من ديما كنت كنتمى نعيش حياتي الزوجية بحال هاكا كنا كنت كنشوف فالافلام المصرية قديما خرجو عليا الله يخليها سلعة .. وطحت مع عيسى الدين والتدين الحقيقي كنت كنخاف نقلل الحيا ويدور فيا والمصيبة الى دار فيا غندخل قوقعتي ونندم اشد الندم وعمرني نتجرأ .. وكنت فالزواج الاول كنبغي نجبدو بطرق بحال هادي لاكن كنخاف وكنحتارمو وكنوقرو وهيبته كتخليني مانتفنفنش ولا ندير شي حركة ماهياش،. لاكن فاش باسني حدا الرويضة وهوا محرم عليا صافي طيح داك الستار اللي كان بيني وبينو وسرح ليا الطريق منين ندوز مابقيتش كنحشم لاكن مزال عندي تخوف ياخد عليا شي نضرة خايبة ويقول عليا خارجة الطريق. وفين تعلمت هادشي .. بديت بالشعبي نشوف واش يقول ليا طفي لاكن ماقال والو بقا كيتسنا يشوفني شنو ندير .. قلت مع راسي والله تا نعيش التسلكيط اصلا كيعجبني كانت امنيتي نكون سلكوطة لاكن الحرام حرام وكن تحلل الحرام كله اول حاجة نديرها هي التسلكيط نخرج ليها ديريكت .. كنحس براسي فيا واحد النفس سلكوطة من الطراز الرفيع وكابتاها من زمان مابغيتش نخليها تسيطر عليا وتخليني ندير لحرام حيت ماشي اي حاجة تشهاتها النفس نديروها ونتبعوها كأن الدنيا مغتساليش والمحرمات مكاينينش

جاني على كانتي وتجبد على ضهرو دار يديه اللور وتكا على المخدة وسط الناموسية بالعرض وتصدم ديك الصدمة ديال الاعجاب خصوصا فاش درت ليه واحد الدخلة شيخاوية مرتبة و متولة مع النغمة دالشعبي ومع الدورة اللي غندور عندو ضرت براسي وشعري دورة وحدة وتبعت ليها مباشرةجوج دورات بصدري وكملتها بواحد الهزة بكرشي من الجنب و طيرت داك البينوار جريت ليه الحزام لويتو عليا وبديت نمشي مع النغمة على صبعان رجلي والصدر كيتهز بوحدو شفتو تصدم ! الغابر الضاهر بقا غير كيشوف قال مع راسو هاد الشيخة بريستيج متكون غير خدمات رقاصة شعبية فشي اوتيل سانك ايتوال عندها الهزة بقواعدها ونيت ناقصني شي اكسسوارات ونخرج ديك العاهرة اللي فيا واللي شهوتي فيها من بكري ولاكن ماكان عندي ليها جهد .. بلحق حل وقتها تخرج و فيما يرضي الله .. يقول عليا عاهرة .. يقول هرجت ليها .. يقول معلمة . يقول البي بغا اصلا كن كان العهر يجوز كاع مانتسوق هضرة الناس المهم نتعهر فباباه حتى القاع ماعندي ماندير بشي عفة ولا حياء واخا حتى هوا كيعجبني باكن العهر كتر وكنشوف فيها الانوثة طاغية لا من ناحية الهضرة ولا من ناحية الحركات ومن جميع النواحي .

درت ليه واحد الطرح مقاد وطلعت على باباها ديم الطبلة قلت لديك العاهرة اخرجي انطلقي ماحد الباب محلول وهاتي ماعندك وماجمعتب وما خبيتي فجري ليا جسدي المحتشم وطلعي من بين ضلوعي طلقي العنان لموهبتك و وشوقك اللي لاطالما كنتي ضاغطة عليا وكابحاه . حسيت براسي ساعتها ماشي انا !! ماشي كاع ولا علاقة ليا بيا !! حسيت بقلبي كيضرب بالجهد وعايشة واحد السعادة وواحد المتعة وانا كنشوف فيه منبهر بيا وكنحس براسي سيدة الكون وعندي قوى عضيمة وتقة فنفس عمرني حسيت بيها من قبل! .. والاهم انني حسيت بسعادة لا مثيل لها وتصدمت مكانتش متوقعة انني غنعيش الساعدة فقلة الاداب وقلة الحياء .. سخن فيا الدم حتى وليت خف من رزقي وكنشطح فوق ديك الطبلة تقول مولفة وهزيت رجلي دوزتها ليه على حنكو وهوا غير كيشووف وعطيتو واحد الدفعة للصدر تكيتو وانا نسمع بنتي دارت واع ونقزت كنجري خليت ليه البيت ومشيت حليت الباب سخونة بالشطيح لقيتها واقفة فبلاصتها كتبكي وهزيتها سمعت صوت الشعبي تنقص وبقيت كندور بيها نردها فالنعاس لاكن مابغاتش تنعس بدات كتبكي ماعرفت مالها واش حلمات ولا شنو وقع ليها حتى دخل عندي عيسى كيستكشف مالها وهزها قلت ليه غنصاوب ليها تاكل يمكن بغات تاكل .

خليتو مقاتل معاها كيمشي ويجي بيها باش تنعس وكنسمعو كيقول ليها نعسي الله يرضي عليك. وكيرغبها لاكن توكضات وطار ليها النعاس ودخلت عطيتها تاكل وجلسات بغات كتسفق. بغات تلعب

ضيعات لينا السهرة وعيينا نراري بيها مابغاتش فاللخر ديناها معانا للبيت قالي خليها تلعب حتى تهد وتنعس نيشان. وناض مشا توضا وصلى ورجع جلس قدام الطبلة كيشرب اتاي ويدوز بدوك التقاوت وانا متكية كنتسنى جنة تحك عينيها حتى بداو عيني يتلسقو وقلت ليه غنعس شوية عييت حتى تبغي تنعس وجيبها ليا

نخزني وقالي ننعس شوية !!! مكاين نعاس نوضي ضربي شي دكة داتاي ولا قهوى

قلت ليه بتعب لالا عيني كيتسدو صافي عييت

عمر ليا كاس دالماء ولاح ليا فيه سوبرادين وقالي هااانتي غتوكضي دابا مزيان

عطيتو بضهري وقلت ليه واخليها حتى تسالي تفشفيش

جرني من عنقي نوضني قالي غنمحححنك هاد الليلة غير وجدي راسك وبلاصة كاس شربي جوج

ضحكني بديت كنضحك وقلت ليه غتندمني على هادشي

قالي مكاينش اللي نادم قدي .. كن حساب ليا هاكا كن خليتي البنت لمك ومشينا ندوزو هاد السيمانة فشي جبل .. غير انا ونتي والملائكة

قلت ليه الملائكة؟؟!!

قالي ااه نسيت نتي مولفة بجنون .. غير انا ونتي وجنون مزيانة

دفعتو قلت ليه احياااني عليك نتا هوا الجن الكبير عاد بديتي كتبان مزيان ..قالك الايمان ايه

قالي الايمان وإيمان بجوج لا تفريط ولا تكريط

بقيت كنشوف فيه على هاد إيمان عاود اللي جبد وحسيت بيه بحال الو فلتات ليه من فمو وقلت ليه شكون إيمان؟

قالي شكون إيمان؟

قلت ليه نتا قلتي دابا الإيمان وإيمان شكون هاد إيمان !!

قالي إيمان كتعني المرى .. راه باااينة

حسيت الصهد طلع معايا وجلست قلت ليه وكتقولها لقا نيشان فوجهي؟؟!! اصلا راني عرفتك من ديك البوسة اللي عطيتني ونتا محرم عليا عرفتك ما شاد حتى طريق

هز حاجبو كيشوف فيا مطولا وقالي هانتي غتخرجي للعيب … الدين مكنلعبوش بيه ومكنشكوش فيه .. وخير الخطائون التوابون

قلت ليه اممم خير الخطائون .. اللي كيخطاو مرة ماشي عشرة

تمر فيا وقالي يهديك الله

سكت وقلبت وجهي جمعت غوباشتي حتى قالي هاهي بدات تحك راه بغات تنعس

جاب ليا كنعسها حتى نعسات وديتها للبيت حطيتها ورجعت مشيت نيشان لبلاصتي يالاه جيت نطيح وتعرض ليا بيدو مع طيحة مع تكا عليا وعينيه تقال بالنعاس بدا يوشوش ليا وقلت ليه خليني نعس

قالي. راه قلت ليك مكاين نعاس … حتى نكرمك مزيااان مزيان ونرد ليك حسن الضيافة والكرم عاد تنعسي .. الدين خاصو يرجع لصاحبو

دفعتو قلت ليه من الصباح ونتا جالس عليا إيمان ما إيمان سير عند إيمان ديالك

قالي كيضحك وها إيمان ديالي

قلت ليه انا سميتي سارة ماشي إيمان

قالي وصافي خلينا من هاد تخربيق

قلت ليه بعد مني نتا بنتي على حقيقتك

بعد راسو وقالي اشمن حقيقة؟

قلت ليه مافيكش التيقة كما درتي معايا غدير مع وحدين اخرين

قالي الى كانو بحالك علاش لا

خرجت فيه عيني قلت ليه كتعتارف

قالي بنرفزة. كنضحك راه غننن

قلت ليه لااالا مكضحكش باينة كتهضر بصح

حط صبعو على عقلي قالي غيخرج عليك الشك والوسواس .. كتشكي فيا انا ؟؟ ماحشمتيش!

قلت ليه علاش نتا مرفوع عليك القلم

قالي والله الاللة الى ندمت على داكشي اللي وقع بيني وبينك ومادانيش النعاس ديك الليلة .. بايت بلا نعاس وماعجبنيش داكشي اللي وقع وراكي حضرتي وشفتي وصححت اللي خاصو يتصحح وتبت .. بقيتي غير نتي مابغيتيش توبي

قلت ليه شنو دابا كتعايرني ؟؟ هي اللي غلطتي معاها غادي تصحح غلطك باش ترتاح !!! وكيفاش اصلا هاد مابغيتش نتوب مالي شنو درت

بقا ساكت كيشوف فيا قالي راه بصح المرى فتنة وشي فتنة قدك عمرني عرفتها فحياتي و انا كنفهمك بلاتي هيا احسن ونتي كتلواي عليا .. صعيب الواحد ينقاشكم

ناض حساب ليا غيغضب وهوا يجرني من رجلي غفلني حتى شهقت هزهم فالسما وقالي ها شنو يصلاح ليك

انهال عليا ضرب وجرح من الذ ما دقت فحياتي .. كنت فكل مرة كنبين الصبر من خلال تعابير وجهي كيزيد يتحداني وانا غير قطعة هشيشة متقدرش تتحمل المعانات .. لاكن بحال معانته تحملتها وعن طيب خاطر وبسعادة وحب كانت كتغلبني الضحكة فكل مرة كيبان داك التحدي وكيضحك معايا حتى هوا .. علاش كنضحكو ؟. شكون عرف .. كيفهمني وكنفهمو ولغة العيون والاحاسيس كيفسرو كل شيء .. كنت مشتاقة ومتعطشة نروي عطشي .. ورويته بجميع حواسي حتى تنهكت ورجعنا السرير بحال حلبة المصارعة والبيت بحال شي غرفة دالولادة .. صبح علينا الصباح مسخسخين بحال الى كنا كنتسابقو على جائزة الاوسكار . عنقني وباس جبيني وقالي غنرتاح شوية باش نشد الطريق لفاس. وغادي نتوحشك

خطيت راسي على صدرو قلت بقه حتى انا غادي نتوحشك بزاف فوقاش غترجع؟

قالي السبت غنجي ..

وعنقني مسخاش ينوض ونعسنا حتى صونا المنبه .. من عناء الليلة والتعب ماقدرتش نوض وبقيت بلاصتي حتى حسيت بيه حط ليا جنة حدايا وهي ناعسة وباسني وقالي هانا مشيت وفاش تفيقي نعيط ليك ..دوز يدو على شعر جنة وباسها قالي تهلاي ليا فعويناتي

قلت ليه وانا ماشي عويناتك

ضحك وباسني قالي نتي القلب

عجباتني وبديت نتمحكك كنضحك ومشا بقيت بلاصتي متكية طار ليا النعاس ونضت دوشت بسرعة ووجدت لفطور ليا ولبنتي حتى فاقت وفطرنا ولبسنا وتميت غادية هازاها جثت نهز سوارت الطموبيل لقيت حداهم ضرف فيه الفلوس باش نصرف ، هزيتو درتو فصاكي ووصلت بنتي عند ماما وهزيت القدر الكافي اللي يقدني فالاحتياجات ومشيت حطيت الباقي فالبنكة .. قلت مع راسي مادام هوا كيعطي بالكترة مكاينش لاش التبدير غادي نصرف ونخبي الباقي .. واصلا من طبعي ماشي مبدرة واخا حتى انا كيسعدني ويفرحني نشري الحوايج والمكياج والصيكان ونقابل الصالونات لاكن ماخليتش الفلوس ضسرني وكنشري بالقياس وللضارورة وكنقابل راسي بالقياس ومقسمة متطلباتي فالشهر كامل .. كافياني خمسية ولا ثلت مية درهم بين الصالونات واسبوعيا حمام مغربي انا وبنتي ومصاريفها ومصاريفي بين الاكل والشرب والملبس مكتفوتش الف وخمسية وشي مرات منوصلش حتى خمسية درهم حيت عايشة مع دارنا وبابا مكيقبلش نصرف شي ريال فالدار .. لاكن مع عيسى الوضع تبدل وغادي نقدر ندير شي مشروع جنب العمل ديالي ونزيد لقدام ونرفر الصالير ديالي كامل وبلا حتى مايديرو ليا هوا … بغيت نجمع شي مبلغ كبير ونفاجأهم شي نهار هوا بابا ونوقف عليهم نقول ليهم بغيت ندير بروجي كبير .. امنيتي شي مدرسة خاصة ديال الابتدائي .. ومن موراها ندير شي سلسلة ديال المدارس الخاصة .. وعلاش لا واخا صعيبة وغير حلم الى زيرت راسي نقدر نديرها من هنا تسع سنين ولا عشر سنين .. اصلا جامعة شوية وغنزيد نوفر اكثر .. والاهم مابغيت الدعم من عند حتى واحد حيت يقدر عيسى يدعمني ماديا نديرها ماصعيباش عليه وهادشي الى بغاني نزيد راه يطلعها ليا فعام .. لاكن انا مابغيتش .. بغيت شي حاجة نديرها بمجهودي والى كنت غنزيد نوفر نوفر من الفلوس اللي كيخلي ليا ولا اللي كيدوز ليا واخا عمرني طلبت ليه وعمرني نطلب ليه وماعمرو يسمعها مني .. وان شاء الله نوصل لشنو بغيت وعندي امل كبير .. الى وصلت ليه فلي ذلك .. وإن لم اصل فقدرعشت بذلك (الامل) هادا ما عشت عليه من ديما واللي غنبقا عايشة عليه دائما ومابغيتش نكون زوجة فقط

مشيت للكلية نخدم على راسي وغادية وكنفكر نزيد نطور من نفسي. اكثر من كوني استاذة جامعية .. بغيت نبدا نأطر اللي باغيين يديرو الدكتورة وخاصني الاهلية لهادشي .. وماحدي عندي فرصة والوقت الكافي وراجلي كيغيب نستاغلها وندفع للكونكور ونوجد ليه مزيان وندير فيه راسي باش ناخد الأهلية للتأطير .. غادي تنفعني بزاف وتزيد قيمتي وماكرهتش نكون عضوة فحزب يستافدو مني ونستافد منهم وهاد الاهلية غادي تفتح ليا بيبان كثيرة .. مابغيتش نكون بحال لبنى ولا رجاء كيتسناو الدعم وتفكيرهم محدود .. انا بغيت نصدمو هوا ونصدم عائلته كلها اللي واصلين ونصدم عائلتي حتى هي .. كيعجبني التمييز وكيعجبني النجاح وكنت كنطمح لمناصب عليا عليا وكنت اللي هضرت معاه فهادشي كيحك عليا .. عمرني طمحت ندير غير طموبيل زوينة ودار زوينة ونجلس .. هادشي كيجيني لاشيء. مقارنة بشي إسم ساطع ونجلس مع الاسماء المرموقة ونشرف كاع وبنتي يقولو عليها بنت فلانة واللي سمع بيا يعرفني .. افف شحال كيعجبني نحلم ونمشي بخيالي كنعيش واحد السعادة لامثيل لعا وكنقول مع راسي تصور لو كانت بصح !! هادا غير خيال وباش حسيت فيه اما كن كان وواقع كن طرت بحال الريشة. ووفرحتي منقدرش نوصفها .. وهادشي كامل وعندي لحجر فالطريق والناس معكسين ليا وقدرت بجهد الله نكون استاذة جامعية … اما كن ماكانش بابا وراجلي واقفين ليا يعلم الله فين كنت غنوصل والحمد لله عندي عقل القراية وكنركز فيها وحاطاها محور حياتي ن البداية حيت من غيرها مكاينش اللي يوصلني ولا يحطني فالمرتبة اللي باغا انا . كنت كنقول يا إما نوصل بيها لشنو بغيت او على الاقل ناكل منها حتى نموت المهم نستاقل ماديا .. وبكل صراحة .. احساسي وانا مستقلة ماديا لا علاقة بإحساسي الاولاني وانا مع عيسى ما دايرة حتى حاجة فحياتي .. كنت واكلة شاربة وكنتسنى الموت اما دابا كنحس بحياتي نشيطة وماكاينش الملل فحياتي وناقصني الحب هاهوا معايا .. اذا شنو باقي ؟ باقي ليا داك المنصب اللي حاطة بين عيني نوصل ليه . وماحدي متحمسة قلت غادي نبدا بديك الأهلية ناخدها ونبدا بيها التأطير هي اللولة ومنقولها لحد .. مابغيت لا تشجيع لا إحباط من شي واحد غنخليها بيني وبين راسي حتى ننحخ وناخدها وديك الساعة نقولها ليهم .

وصلت للكلية كان المورال طالع ليا ودوزت المحاضرة من احسن ما يكون وجيت خارجة بحالي صادفت صديقتي بقينا كنهضرو وشفت ياسين واقف تما كيشوف فيا وانا نضور ليها وضحكت قلت ليها هاد العطلة شديتها على قبل راجلي. حيت رجعت انا وياه

قالت ليا شنو؟؟ علاش ماشي كنتي مخطوبة نتي مسيو ياسين

قلت ليها شنو؟!! وضحكت. قلت ليها لا لا هاد الهضرة كلها كدوب وانا رجعت لراجلي وها تصاورنا

وبديت كنوريها وقالت ليا راجلك غزال وحسن ليك من شي حد اخر

قلت ليها انا زوينة عليه غير كيبان زوين فتصاور

قالت لي لالا حتى هوا باين زوين بايينين لحروف

قلت ليها راه خااايب انا حسن منو بالف درجة اشمن هوا زوين .. كولشي كيقول لي نتي خسن منو

يخ بنادم شحال مكيحشمش!! انا ننقدرش نقول لشي وحدة راجلك زوين واخا يكون كيقطر بالزين !! وهاهوا كاع زوين ومن بعد؟. علاش نقول ليعا اع حقى زوين !! بنادم شحال اينو زايغة تفو ، بغيت نوريها رجوعي لراجلي باش ضرب ليا شوية ديال الطر فالكلية صدقنا فزوبن وخايب. وشوف. بنادم شحال ماكيحمش ماقداتني لبنى ورجاء اللي يمون وصل عندهم زادني بنادم كحل الراس حتى هوا الله يخليها سلعة. . اصلا كنكون ناسيا ديك رجاء ولبنى انهم مزوجين بيه وكيجيو مساهطر الواليدين يفكروني باللي هما فالحياة غير باش يشاركوني فيه حرام واش تطوع شي وحدة فيهم ودير النفس فراسها وتطلب الطلاق. .. زعما هاد الحلم صعيب يتحقق !!

شفتو كاع مسول ليا وانا نهز تيليفون صونيت ليه وجاوبني بدلت نبرة دصوتي مباشرة بلا تفكير للتحلوين !! مافهمتش راسي منكون منهضر عادي حتى ليه هوا كتخرج ديك السلموطك اللي مزوجة بيه تهضر بلاصتي !

بقيت عليه شخبارك واش مرتاخ واش ما مرتاخش. واش وصلتي واش ماوصلتي. قالي وصل راه معايا شي ناس نسالي معاهم ونعيط. ليك

قلت ليه امن وشكون هاد الناس

قالي رجال رجال يالاه غنقطع فاش نسالي نعيط ليك

مالقيت مانقول وقلت ليه اوك صدقت نادمة كاع على اتصالي وبغيت نعرف واش مشغول ولا بغا يصدرني حيت بوسان الروايض فقدت التقة فيه الشيطان هادا ماتعرف فوقاش يبان . تاصلت بيسرى دوزت معاها دقيقة ديال لاباس بيخير وقلت ليها عيسى مكيجاوبش على اتصالاتي خفت توقع ليه شي حاجة شوفي لبنى واش راه معاها ولا مع رجاء واش عندهم شي خبار وردي عليا بالزربة . قالت ليا اوك وقطعت تميت خارجة تلاقيت مع ياسين غير شفتو طلع ليا الدم وقلبت وجهي وحتى هوا مارقفنيش. حتى ركبت فطموبيل وصونا ليا فتيليفون جاوبتو بقا كيسول غلى الاحوال وانا كنجاوب بالرسميات وقلت ليه سمح ليا رجعت لراجلي خلينا كنحتارمو بعضياتنا. وراجلي صعيب ماكيتفاهمش فهاد الامور .. راك تكون كتسمع بالحجوجي .. الله يخليك خلي الاحترام بيناتنا بلا منخليو الامور تخرج على حدها والله يعاونك. وقطعت معاه جمعت وطويت

شديت الطريق لدارنا وكنتسنا مكالمة يسرى ترد عليا .. قبل نندهل صونات ليا قالت ليا راه مع رجاء

فاش قالتها لقا حسيت البرودة فعضامي والهشاشة فركابيا والعافية فقلبي

قلات ليها واش متأكدة

قالت ليا اه اصاحبتي راه سولتها قالت ليا معاه

قلت ليها صافي شكرا وكمدتها فقلبي. وبقا فيا الحال بزاف واكثر حاجة بقات فيا هي الكدوب .. علاش كدب عليا ؟ كن قالي الصراحة مايبقاش فيا الحال قد هاكا .. كن على الاقل يبقا فصراحته. ياك مكيكدبش والدين والايمان ولا داكشي غير فالوقت اللي كيبغي .. تقلقلت وماقدرتش. نسرطها وشديتها عندي طالعة هابطة حتى صونا ليا بالليل ومابغيتش نجاوبو خليتو كيصوني ونعست على مخدتي كنبكي حتى داني النعاس. الصباح صبح كيصوني عليا مع الثمنية ! شفت مكالمتو وخليتو ومشيت لخدمتي اللي غتنفعني .. زواجي الحقيقي اللي نعول عليه واللي يغطي ليا راسي ويدير ليا قيمة ،. اما الزواج فهاد الوقت غير جزء. من الحياة ماشي الحياة كلها وليوم ولا غدا نلقا راسي بلا راجل .. ماعرفتش شكرن فبنا السابق. ولاكن الموت كدور والزمان الى متقلبش. الموت واجدة تخطف . ساعتها مانلقى لا صدر حنين ولا ركبة نوسد عندها .. وشحال ما ضربت وتأملت غيجي واحد النهار نلقا راسي بوحدي … لا أخ ولا والو .. كنتمنى من ربي يطول لبابا وماما فعمرهم لاكن مع كل متمنياتي وتعلقي بيهم. خاطة بين عينيا انني شي نهار نصبح على خبر وداع واحد فيهم وكنحاول نستاعد ليها نفسيا ونبقا ديما مفكراها باش مانفقدش عقلي ساعتها ونتبت راسي .

هاد المرة مشيت حانية الراس ماهضرت مع حتى واحد ومشيت نيشان درت الواجب ديالي وطفيت التيليفون اثناء المحاضرة وخرجت تناقشت مع بعض. الدكاترة على الكونكور ديال التأهيلية وتفاجأو مللي شافر وحدة فالسن ديالي كتفكر تأطر الدكاترة الصاعدين وبقاو كيخلعو فيا وانها مسؤولية ما مسؤولية والقليل اللي كينجح والتأهلية مكتعطاش بالساهل والزيادة ديالها على الصالير ماشي شي حاجة اللي كتيرة .. لاكن هضرتهم دازت من ودن وزادت وانا عارفة شنو خاصني وماشي الفلوس. اللي غيزيدوني اللي باغا وانما غادي تزادني مكانة احتماعة وقيمة ونقدر ندخل كعضوة فشي حزب. ونتسلل لنائبة ولا رئيسة ولا مستشارة وغادي ندخل للسياسة حيت هي اللي غتعاوني نشق بيها طريقي. وداك الشغل عارفة ليه وعارفة كي ندخل ليه وشنو ندير فيه

رجعت للدار نرتاح لقيت بابا كيتسناني قالي راه عيط عيسى بغا يهضر معاك

تمرت وطلعت للبيت سديت عليا حتى بدا كيصوني وجاوبتو وانا جالسة كنمسد رجلي اللي تنفخات ليا بالطالون ومافيا اللي يهضر معاه ويدير مجهود . قالي علاش مكتجاوبيش. فتيليفون قلت ليه كنت مشغولة فالقاعة مايمكنشً ليا نهضر

ماعجبوش الرد ديالي وقالي بغضب واخا تكوني وسط العافية جاوبيني وماتخلينيش كنصوني

قلت اوكي وسكت مابغيتش نهضر وبدا كيسول على بنتو وعلى شنو. درت النهار كامل وختاصرت ليه كلشي فجملة وبقيت ساكتةحتى بدا راسو كيشرح ليا قالي كنت فاجتماع الصباح فاش عيطتي ليا وماساليتش بكري

بقيت كنسمع والضحك ديال الفقصة شداني كنقول ليه مع راسي كن غير ما بررتيش كن غير تسكت وتهنيني غير كتزيد تفقصني

بقيت كنسمع ليه حتى سالا هضرتو وما عاتبتو ما سولتو حيت شوطاتني هضرة يسرى حتى تفححمت مابقا ليا فين نزيد كاع شي هضرة . ساليت المكالمة وطحت حدا بنتي نعست كنبكي وعقلي كيدي ويجيب. وكتهيلو دابا راه مع وحدة فيهم داير السهرة وعايش. الحياة وانا كيجي يكدب عليا بجوج كلمات . كفاش اصلا قادرة نتقبل. هادشي اللي يوقع ليا ونتعايش معاه!! اخر حاجة كنت نتقبلها هي راجي تشاركو معايا وخدة اخرى. .. لاكن الحقيقة مررة وها انا فين كنتكرمل عالمهل ونتشوط ومتعايشة مع الوضع . نعست مقهورة وفقت مقهورة وخدمت مقهورة والضيم طايح عليا وكنهضر معاه بالعبار فتيليفون مابقيتش. كنسولو كاع فين نتا ولا شنو درتي ولا شنو غادير .. كيسول. كنجاوب والى مسولنيش كنسد فمي ونسكت . بقينا على دا الحال السيمانة كلها والمورال طايح ليا وماعاجبني حال حتى طار الاسبوع ونزلات عليا الدم وجيت مع الويكاند هي هاديك . تاصل بيا الجمعة بلعشية قالي انا جاي فطريق سبقيني للدار ومشيت سبقتو وديت معايا جنة وضربت دورة فالدار عطرتها ودوشت بالماء والصابون باش نرتاح وتزادني التقة فالنفس ولبست وتعطرت وتقاديت حسيت بالمورال طلع شوية وحالتي تحسنات . جلست كنتفرج فالتلفازة وجنة كتلعب حدايا حتى نعسات وديتها لبيتها يالاه حطيتها سمعت البال تحل وصوت السوارت ومشيت لقيت عيسى اللي دخل . درت ليه ابتسامة باردة وقلت ليه على سلامتك

قالي الله يسلمك وجرني باسني وعنقني قالي ماتوحشتينيش ولا شنو

مد ليا صاك فيدي ودرت ليه تفرنيسة باردة وسولني على جنة قلت ليه عاد نعسات ومشيت نجيب ليه الماء يشرب. في حين تكا على الفطوي كيرتاح وحليت انا داك العلبة لقيت فيها تيليفون جديد اخر سيري ساوي جوج مليون ونص. عمرني شفت جيهته ولا قلت نشريه فحياتي

مشيت لبيت النعاس دخلت ليه باليزتو وخرجت لقيتو مع كيبوس اليدين لبنتو وهي ناعسة .. مشيت نوجد العشا اللي سبق ليا حضرتو حتى دخل عندي للكوزينة عنقني من اللور وباسني فعنقي قالي اشر هاد الثلج

بقيت ساكتة كنسخن الماكلة ماهضرتش وهوا كيعنق فيا ويبوس من اللور. وقالي مالكي واش هادا هوا الاستقبال

قلت ليه هاني كنوجد ليك الماكلة

قالي واش انا جايباني الماكلة

قلت ليه وشنو جايبك ؟؟

بقا كيشوف فيا مطولا وطلق. مني مشا بقيت بوحدي وجدت ليه الطبلة و رجعت نجيب الماء سمعتو كيصلي فالبيت وخرج عندي كيجر البانطوفة فرجلو بالبيجامة دالدار عبارة عن تريكو رياضي وسروالو مجموع من لتحت فبلو مارين وجلس حدايا ساكت هز فرشيطة ياكل وقالي كي غادية مع لافاك

شفت فطبسيلي وقلت ليه مزيان

سكت كيشوف فتلفازة حتى كمل عشاه وناض ماهضرش معايا حك سنانو وتيليفونو حدايا كيصوني قالي من الحمام جيبي ليا تيليفون

جيت نهزو وقطع ماشفت شكون صونا كاع .. عطيتو ليه طل عليه ومشيت كنجمع الطبلة شفتو خرج من الحمام وتيلي فيدو ومشا خرج للبالكون سد عليه تما وجلس على واحد الكرسي كيهضر ويقطع ويعاود يعيط وتيليفونو الثاني كيصوني ومشغول مع تيليفونات شي ساعة عاد دخل

دخل عندي للبيت وعطيتو بضهري خليتو غير كيشوف وطلعت عليا الغطا .. قالي مالك نتي اش هاد التصرفات وليتي كديري

ماجاوبتوش وقالي بصرامة راه معاك كنهضر

ضرت عندو قلت ليه بقا فالبالكون علاش جاي ؟؟

قالي باستغراب بقا فالبالكون علاش جاي؟ .. ياك لاباس ا واقع

فركعتها فوجهه وقلت ليه عندك البديل معامن توانس راه عندك عيالاتك شبع معاهم هضرة اما انا ماعندكش الوقت ليا

رد عليا بجدية قالي بديتي كتحماقي واقيلا .. هاد الشك ديالك غادي يحمقك شي نهار

قلت ليه عطيوني غير التيساع نتوما .. ماشي تجي عندي عاد تحلا ليك الهضرة مع عيالتك

سكت بقا كيحنزز فيا وسكت دخل بلاصتو دار واحد اليد مور راسو وشد تيليفون كيقرا القرآن ماعرفتو فوقاش فوقاش نعس حتى صبح الحال وحليت عيني لقيت راس ناعسة على صدرو اللحم على اللحم فارق بيني وبينو توب السوميج الرقيق .

نضت انا اللولة سمعت صوت بنتي ومشيت عندها كنلبس بينواري لقيتها جالسة كتلعب بلاصتها وهزيتها ديتها معايا للطواليط طرفت ليها ومشطت ليها وجلستها فوق الرخامة كنسرح ليها شعرها .. حروفها احسن من حروفي .. يمكن حيت مزالة صغيرة كيبانو مختالفين عليا .. عينيها كبار محلولين كتبان فايقة وموكضة وشفارها طوال وشعرها بين الاشقر والبني عندها شي خصلات مشتتين لونهم فاتح وفمها صغيور مطبز .. عندها شي سنينات فاشً كضحك كيبانو وبيضاء وحنيكاتها حومر والاسوء انها كتموت على باها اكثر مني واخا ندير ليها اللي درت كيبقا هوا المفضل عندها ماعرفتش علاش؟ مع العلم انني كنعاملها مزيان وكندير ليها الخاطر ونلعب معاها ومكنخلي مندير ليها وكتقلب عليا ومكتبغيش تجي عندي فخضوره .. وهوا كيعجبو الحال وكيبدا يستافزني .. ديتها معايا للكوزينة جلستها على الكرسي ديالها سبقتها هي اللولة درت ليها الشوفان مع الحليب والفواكه الجافة طحنتهم مزيان ودفيتهم شوية وحطيت ليها تفطر وجلست كنوكلها حتى سمعتو ناض وجا كيقلب عليها نيشان باقي ماحل حتى عينيه مزيان تحنا عندها كيهضر معاها ويبوس وهي كتلسق فيه .. قاليها نخرجو نمشيو؟؟ .. نمشي لبرا يالاه فطريً

هز راسو ماشافش فيا وقالي غنخرجو نفطرو برا ماديري والو ومشا للحمام وحتى انا ماعطيتوش وجه وماجاوبتوش نضت لبست ولبست بنتي وخرجنا موراه ركبتا اللور ماسولتو لا فين غنمشيو ولا فين غنجيو حتى وقف بينا فواحد البلاصة زوينة ونقية ونزلنا دخلنا مانت مقهى بحال الحديقة فيها فطور وغدا واللي تشهات الخاطر

جلستا فصمت ماهضرش معايا ماهضرت معاه لاكن تيليفون عندو مكيستكش حتى تعصبت وخليتو حتى قطع وانا نقول ليه واش حتى فلويكاند غتبقا هاز تيليفون واش ماشبعتيش من فاس سيمانة كاملة

هز عينيه فيا وحط تيليفون قالي مزيان مللي جبدتي الموضوع حيت كنت غنعضر معاك فيه.. اول حاجة .. ردي البال لراسك فاش تكوني كتهضري معايا وماتهزيش عليا صوتك .. وتعلمي تهضري بشوية .. المرة الجاية ترفعي صوتك مغنهضرش معاك بحال هاكا . اما تيليفون وفاس وداكشي اللي كيدور بيك فراسك من لبارح وعصبتينا على الخوا الخاوي.. راك ماعنديش غير نتي ودوك الجوج لخرين فهمتي ..

قبل مايكمل كلامو حسيت بقلبي ضرب ووجهي صفار خلعني قلت صافي زاد الرابعة فشي قرينة اللي ضربو هوا وياها وبديت كنسخن حتى كمل هضرتو ببرودة وعجرفة وقالي راه عندي خدمتي عندي المشاغل ديالي اللي كياهدو من وقتي بزااف .. ماشي مسالي نبقا كنتجمع فالتخربيق ديالكم نتوما العيالات اللي مكايساليش ونبقا مقالبلكم ومقابل مشاكلكم ..كن غير شي حاجة تستاهل .. كدورو فبلاصتكم ومحدودين .. هاهوا عيط لفلانة هاهوا كيهضر مع فلانة .. لا صافي داكشي اللي بقا غير نقطع مع هادي نشد الهضرة مع الاخرى وهي غادية .. ماعندي مايدار من غير الخوا الخاوي ديالكم .. فبلاصة ما تديها فشغلك وشنو يصلاح ليك وتخلينا ندوزو معام هاد الويكاند مهنيين نجددو فيه الطاقة انا وياك ونعيشو بيخير حاضياني شنو كندير .. معامن هضرت ! شنو كتبت .. نعلي الشيطان وديري عقلك واش باقا مراهقة ؟ هاد التبرهيش ديال المراهقات وزعما كبرتي على هادشي وبعقلك واستاذة جامعية !! لعجب كي درتي لهاد التعليم العالي وكي كديري ليه انا بعدا كنستعجب لهاد الطلبة اللي كيحضرو المحضرات ديالك وحتى لهادوك اللي كتجتامعي معاهم فالكلية

قطعني طراف بقيت مصدومة فيه قلت ليه علاش كيفاش جيتك؟؟

قالي كتجيني باقا صغيييرة فعقلك مزال مانضجتيش.. لا الزواج ولا الولادة ولا حتى اللاج بدلو فيك شي حاجة .. باقا سارة هي سارة من نهار عرفتها

بقيت ساكتة ماقدرتش نهضر بقا فيا الحال وغرغرت قلبت وجهي درت يدي على نيفي حسيت بواحد الدمعة هبطات ليا ومسحتها بالتخبية ،. اما هوا قلب وجهه كيشوف فجنة ومجلسها على حجرو كيهضر معاها بشوية ويشير ليها بحجبانو جيهتي .. ماعرفت شنو كيقول ليها عليا .. حطو داك الفطور دوزتو بسيف بحال الى مدوزك الرملة مع حلقي ومن ديك الساعة ماهضرنا بقينا ساكتين وجالسين واحد مكيهضر مع لاخر من غير جنة اللي جامعانا .. دوزنا النهار كله على برا مع البنت وكل واحد كيشوف فجهة حتى عيينا ورجعنا للدار نيشان نعسنا وسبقت ليه القلبة بضهري ماضرتش عندو وما قربش ليا خلاني كما انا وبقا متكي كيتفرج فتلفازة حتى نعس خلاها شاعلة .. صبح الحال ديال الاحد وقالي راني عيطت لباباك وماماك يجيو يتغداو معانا وجدي الغدا ومشا جاب كاع داكشي اللي خاص وقالي طيبي فثر شي حاجة علاش قديتي الباقي غنكومونديه . صاوبت البسطيلة بوحدها ديال الحوت وطلب هوا شلاضة و اللحم مبخر بالخضرة وديسير والحلوى وكولشي وجاب ليا وحدة من عند تريتور اللي طلب من عندو كولشي عاوناتني فالعراضة واستقبلت بابا وماما وفرحو بينا وفرحو بالعراضة وكبرتا بيهم وجلس من مور الغدا بابا والسيهم الحاج على اتاي والحلوى كيتجمعو فالصالون حتى للمغرب ووخرجو فرحانين مشاو ، بقات معايا البنت فكات الكوزينة وجمعات الدنيا وعاوناتني. وهوا جلس هز تيليفون عاوتاني وقالي صاوبي ليا المسمنة ديالك توحشتها . كنت كنصاوب ليه واحد المسمنة ديما من ابتكاري وكانت كتعجبو .. واخا غضبا مشيت لبست ليكات على سعديو وعديوخلطت الطحين على طريقة المسمن وكنزيد غليها واحد خنيشة دالفاني ونص معلقة دالسكر وعجبنتها وبيدت كنطلق ونورق بابزيت والطحين كل مسمنة بوحدها فالاخير حطيتهم كلهم وحدة فوق وحدة فمسمنة وحدة دائرية وجمعتهم فتوريقة وحدة وكترت ليها الزيت من لفرق ودخلتها للفران طابت نص طيبة وخرجتها وجدت ليها للبيسطاش مطحون مع شوية دالسكر واللوز ايفيلي درت الطبقة اللولة داللوز فوقها مزيان حتى غطيتها ورديتها تكرملات مزيان وخرجتها درتدرت عليها مسحوق البيسطاش وديتها ليها غير شافني جايباها بحال العمارية عالية ومورقة كتفتت بوحدها فرح وتقاد فالجلسة قالي واستقبلينا بحال هاكا ماشي تقلبينا علينا وجهك .. حشومة ولالا ؟ وبدا كيضحك

حطيتها ليه وجيت نرجع بحالي وعيط ليا قالي اجي فين غادية

شفت فيه واحد الشوفة ناقصة وقلت ليه مشغولة

حط يدو على الغوطوي قالي واجي اشمن مشغولة .. اجي جلسي

ترددت بقيت كنشوف فجنابي شنو ندير ومشيت جلست حداه غير جلست جرني من جنبي باسني فحنكي وبدا كيضحك بوحدو وحتى قلت ليه علاش كضحك عليا واش انا كلون

طرطق عليا بالضحك وعنقني قالي عزييزة عليا واخا مسطية شي شوية

هزيت حاجبي قلت ليه مسطية ! ..

قالي مسطية فحاجة وحدة.. فعلاقتي انا وياك اما الشي. لاخر ماعندي منقول

قلت ليه اييياااه مابقيتش حمقا وفيا العجب وماشي ديال التعليم العاللللييي و الطلبة ديالي ضايعين معايا وداكشي لاخر

قالي انا قلت ليك هاد الهضرة؟

بقيت غير كنشوف فيه قلت ليه نتا فيك الزهايمر .. ااشرديك الهضرة قلتي ليا قبيلة ؟

دار صبعو حدا فمو وصغر عينو فيا قالي وقولي ليا الصراحة بصح كيفاش دايرة مع الطلبة فالكلية ومع كاع الناس اللي تما

ميعت سيفتي خلاني نميع من سوء الضن دياله فيا وقلت ليه اصلا باش توصل لتما خاصك تكون سيدي ومولاي ماجيتش ووليت استاذة جامعية .. نتا مزال غالط فيا ياكما كايحساب ليك كاع الناس عائلتي كاع الناس حبابي نبقا تابعاهم فحياتهم !! الواجب العملي ديالي كنأديه على اكمل وجه .. الناس اصلا كيشوفوني واعرة عليهم غير نتا اللي كتشوفني مراهقة مسالية اما انا عارفة راسي شكندبر عااارفة راسي شنو باغا فحياتي

ضحك وقالي امممم ماعندي مانتسالك واهاكا نبغيك ..

قاطعتو قلت ليه كاع لاتبغيني انا. باغيا راسي

جرني من عنقي قالي لسانك طويل

لوا ليا يدي مورايا حسابني بصح لاكن جرني وباسني فعنقي من اللور ورخاني بدا كيعنق فيا ودفعتو قلت ليه بعد مني

شدني بالسيف قالي كفاش بعد مني

قلت ليه كيف كتسمع

زيرني من يدي قالي والى مابغيتش

قلت ليه حتى تعرف راسك اشنو كتقول عاد اجي هضر معايا

ضحك وقالي بقا فيك الحال على الهضرة اللي قلت ليك قبيلة؟

شفت فيه باشمأزاز قلت قلت. بقا فيك الحال على الهضرة اللي قلت ليك قبيلة !!! اه اخويا بقا الحال ماشي انا ضاربة تمارة وحياتي كلها كنبخيباغي وندوز فليكرنكور ونبات سهرانة كنقرا ونوض مع الستة باش تجي تقولي بااااز للطلبة اللي كيقراو عندك .. هادوك الطلبة بعدا كيستافدو مني اكثر ما كيستافدو من الاساتذة لخرين

قالي باااينة.. حيت فيك الهضرة بزاف

نترت يدي دفعتو قلت ليه تفرق عليا وجيت نوض وجرني كنت غنطيح على ديك المسمنة فوق الطبلة وشدني لاحني حداه قالي كنتي غترزينا فيها

قلت ليه داكشي اللي كيهمك غير كرشك

بغيت نوض وشدني من المعصم دار يدو على قلبو وقالي وقلبي

قلت ليه سير سير داك القلب عندك بحال الكار فيه خمسين بلاصة

نترت يدي ومشيت بقا كيشوف فيا بقا عليا يااكي ما ياكي وعقلي فيها وخليتو مشيت بحالي اصلا ماعندو مايصور مني .. جاني فبالي نخرجها منو ومشيت عند دبك البنت اللي جاب ليا تعاوني قلت ليها تسخر ليا للفرماسيان اللي حدانا وقلت ليها غير سيري انا غنعيط ليها تعطيك الدوا وعيطت للبنت اللي تما فتيليفون قلت ليها بغيت منشط. جنسي شي حاجة فعالة وآمنة

يتبع...