ألف مبروك الجزء الثاني

سمعت حس العرس قلت ويلي على العرس هادشي فيه حتى العرس !! اتا كنحاول نتقبل الزواج كزواج ونزيد نبرز فوق خاطري !! لزمت الصمت خليت بابا كيتصرف سمعتو قال لماما مانحرمها من حاجة قلت ليه فهاطري حرمتيني من كولشي. وماقدرت نستمتع بحاجة من داكشي اللي جاني واخا كنت كنحلم حتى انا نكون عروسة وندير داكشي اللي ماقدرتش نديرو وانا عزبة ونشري حتى انا كاع اللي نفسي فيه .. مافرحت بحتى حاجة وبديت نستف فداكشي كامل فوق نفسي وماحليتو نا طليت عليه كما وصل خليتو هاكاك كانت كل حاجة فالعلبة ديالها وكل حاجة مرتبة ومتولة فمكانها .. حسيت بكولشي جا مزورب وشي مور ماحسيتش براسي حتى شفت بابا فالصالون جالس وشاد واحد اللائحة كيقيد فيها الناس المدعوين للعرس ومن موراها بدات الدار كتعمر عندنا وخوالاتي وبناتهم وعماماتي جاو والكل كيعنقني ويبارك ليا ..!الله يكمل بلخير .. الله يجعل كولشي مبارك ومسعود .. الف مبروك .. الله يسخر .. سيمانة كلها ديال المباركات حسسوني عروسة بزز مني وعطاني بابا لأوكي ندير اللي بغيت .. دارو ليا التقاليد على حقها وطريقها وداوني للحمام والسبا تهلاو فيا وضارو بيا خواتاتي هما كيبكيو وانا كنبكي فالصالون عارفيني ماباغاشرنتزوج وبنات العاىلة كيصبرونا عند بالهم غير البكا العادي ديال كل عاىلة فعرسهم لاكن مامطالع بقلوبنا غير الله عز وجل . مديت يدي لاول مرة نصاوب الدفار بحال الفنانات ونقشوهم ليا بالحجر وطولوهم ليا وانا غير معبطة راسي وكنبكي حتى طبت مكنشوفش كاع فداشي اللي كيصاوبو ليا . . دوزنا النهار ديال الحمام بوحدو دوروني البنات خواتاتي بالليل كيصبروني وينصحوني نشد تيقاري ومانحبد عيب مع حتى واخد صافي صافي المكتاب كتاب عليا ماعليا غير نشوف شنو جاي من هنا القدام

فقت نواجه مصيري وكان نهار الحنة جهزوها ليا فالدار بتقاليدها كلها وخرجوني من البيت كنجر رجليا بزز وخواتاتي جنبي .. لابسة قفطان جوهرة حرة ديال لعرايس بالراندة غليضة وسروالو جوهرة مضور بالراندة من لتحت وطلقو ليا شعري ضورو بسبنية وجلسوني فالصالة وسط العيالات ديال عاىلتنا بالزغارت كانو مفرشين ليا الجلسة بالطرز فالابيض والاخضر والطبالي قدامي ديال الحنة ورق والورد و السواك والحنة معجونة . جلست بلاصتي كنحس بصدري كيتنخصص وخواتاتي حدايا لابسين وكيصليو على النبي قربات ليا ماما وهي لابسة البلدي هي وعماتي طبق الحنة وراق وعراو ليا على يدي ليمنية وعطو ليا كوع يدي وسط داك الطبق وهزيت كمشة فيدي من نفس البلاصة لحتها فواحد الصينية قدامي ديال النحاس فيها الماء دزمزم و الورد شدوها قدامي رميت فيها ديك الحفنة وانا كنشهق كنطبق ديك الطقوس بزز وخالتي كتصبرني كتقول ليا ماتبكيش. وكتهضر ماسمعتش شنو كتقول مع الزغارت والغنا ديال الحنة بصوت العيالات .. من بعدها مدو ليا ايناء قدامي كبير فيه الحنة معجونة ديال اللحم وشدات ليا ماما يدي بجوج غطساتهم ليا تما وهزاتهم مسحاتهم وانا كولي كنترعد حسيت بالسخفة بغيت نهرب كرهت راسي عروسة وكنشوف ختي هزات خيوط الصوف من اناء الحنة كانت فيهم واحد لكميميسة خضراء معمرة وحداها ودعة دورات ليا دوم الخيوط على معصم يديا وعاودات غطساتهم ليها فنفس الاناء اللي سبق لحت فيه الحنة شللاتهم ليا ومسحتهم ونفس الطريقة دار ليا لرجلي كنت لابسة شربيل مطروز كامل ديال الصم فالخضر ماكي الباج ودارو ليا نفس الطقوس وعقدو ليا لخيوط وشللوهم ليا وجلسات حدايا ختي نقات ليا دفاري مزيان رجع داك لفرانش نقي كي كان عاد بدات النقاشة تنقش ليا يدي عمراتهم بيا كاملين بالنقش وهبطات لرجلي بدات تنقش ودخل اثنائها بابا بسرعة خادر راسو تصور معايا بقا كيسكت فيا وخرج شفت عينيه غرغرو وخواتاتي كيبكيو حدايا دوزت لعشية كلها مرة نبكي مرة نسكت حتى ساليت ونقشو خواتاتي من مورايا وسالات العشية وبداو يقشرو ليا ديم الحنة جمعوها وقلت لختي لكبيرة طلعني لبيتي ننعس نتسنط لعضامي .. لاكن دخل عندي بابا للبيت خرجني لابسة جلابتي البيضاء والشال ديالي والحنة مزال لاسقة فيديا خرجني بالتخبية على العاىلة انا وختي الكبيرة وحنا كنشوفو فبعضياتنا مافهمتا والو حتى وصلنا عند واخد النوطير ودخلني لقيت تما السي عيسا جالس شفت فيه نص شوفة ماخققتش وجلست عطاوني وقعت على دار كتبها السي عيسى بسميتي

وقعت وخرجت من تما كنرد الشال اللور وقفت برا وختي لكبيرة عاجبها الحال قالت ليا وهانتي شكون بحالك كتب ليك الدار بسميتك غير الى مابغيتيش

حولت عيني قلت ليها هوا عطاني شوية من داكشي اللي عندو شايط وغادي ياخد ليا النص من عري وجهدي وحياتي ماتقارنيش شي بشي. .. راه اصلا خانزين فلوس شابع تلقايه هاد الدار ماتسوا عندو والو مصدقها عليا … انا اللي غنفني عمري عندو باين عليه قويصح مع راسو وعولي الرابعة جايا فالطريق بنفس الطريقة

دارت يد على يد قالت ليا وهادوك المغربيات اللي كياخدو الراجل مزوج من الخليج ودير ليك عرس مطرطق هنا وتمشي لتما مالها ماقالتش هاد الهضرة وعايشة بييخير وعلى خير .. شدي تيقارك وصافي ماتوصليهم مايوصلوك

خرج بابا كينفض كتافه مشطون قال لينا عنداك تمد ليه شي وحدة فيكم يدها راه مكيسلمش ونتي براسك ماحدك مزال ماعقدتي خلي يدك عندك

قلت ليه فخاطري ماغنمد ليه ما يمد ليا انا بالله وبالشرع معاه . قالت ليه ختي ياك قراو الفاتحة

قاليها ايوا الله واعلم ماتعرف انا غير وصيتكم

خرج السي عيسى كان لباسه عادي مكتبانش عليه اخواني ولا متدين كاع بلعكس لباسه زوين انيق بزاف اول مرة تشوفو ختي وابتسم لينا بنص عين وقالينا بابا سيرو سبقوني للطموبيل حتى نجي ومشينا طلعنا شدات فيا ختي قالت ليا عرفتي فاش دخلتي كي بقا كايدير فيك. ماشعرش براسو

دفعتها قلت ليها خليني عليك مابغيتش كاع نسمع عاد الهضور راه ماحاملاش هاد الزواج وكرهتو هوا براسه

قالت ليا شنو اللي ماعبكش فيه مالو ؟؟. .. انا غيير شفتو قلت شهاد الزين .. فشكل ماشي عادي وجا داير داك الموسطاش خلاه تجبد جاه فن ومكيهزش العين

سديت عيني قلت ليها يهز لعين ولا كاع لا يهزها هاهوا هز كولشي دابا وناض يزيد الثالتة .. بلحق كوولشي مني انا سبب هادشي

قالت ليا نتي اللي سيفطتي ليه ديك الهضرة بوجهك حمر والله ماعندك علاش تحشمي .. قال مع راسو هادي كتبات تحلم بيا معدبة مسكينة اجي ندير فيها خير نهنيها .. كملتيها وجملتيها قلتي ليه الى ماكنتيش نتا مايكونش واحد اخر من غيرك وزيد على هادشي عاجبو يتناسب مع با بلا والو وجا شي فشي حتى صدقتو غتزوجو بصح

سديت ودني قلت ليها هالعار خليتي عليك مابغييتش نسمع هادشي وماتفكرينيشً راه كولشي من ديك الموصيبة اللي كتبات داكشي

قالت ليا راه الموصيبة هي نتي اللي سلاطيتي عليه ختاريتيه غير هوا من بين رجال ترمي عليه حبك وغرامك وجبتيه كيعتر فجلايلو السيد غير شافك دخلتي ترفع مابقا لا دين ولا ملة فتنتيه حتى من داك النوطير تلف بقا كيقول ليك سني هنا للالا هنا

جاتني الضحكة تعاويد ختي وطريقتها كيقتلو بالضحك بقينا كنهضرو حتى رجع بابا طلع شاف فينا فالمرايا قالي الله يكمل بلخير

خبيت وجهي حشمت وسولاتو ختي قالت ليه فين جات الدار بقا كيضحك ضور راسو وهوا سايق بينا قاليها. واه واه واه على دار تبارك الله رفيعة الله يدخلها عليها بزايد الرزق والتيسير .. تبارك الله كبيرة فيها مية وخمسين ميترو فمارتشيكا

قالت ليه ختي بصح !!

قاليها بلحق زوينة من داكشي الرفيع

بقيت ساكتة كنسمع حتى صونا ليا تيليفون فيدي طلع ليا يونس ماقدرتش نجاوبو خليت حتى نزلت وجاوبت قاليا بغيت نشوفك.

قلت ليه ماعندي كي ندير صافي مامكتابينش لبعضياتنا مكتاب الله تصرف

بقا كيبكي قالي بغيت غير نشوفك لأخر مرة قلت ليه راك عارف شنو كاين ماعندي كي ندير

قالي الى ماخرجتيش نشوفك غندير شي كارتة فراسي.

بقيت كنشوف كيفاش ندير والعشا كياذن بغيت نسلت قبل ما ندخل للدار حتى ماكرهتش نشوفو لأخر مرة ونودعو. .. خليت الناس كولشي مشطون وسلت مع الباب خرجت بالزربة كنضرق بين طموبيلات مغطية وجهي وكنزرب حتى سمعت سميتي ورايا

ضرت لقيت ختي مورايا تبعاتني قالت ليا فين غادية فهاد الليل ماخفتيش على راسك ونتي عروسة بقات ليك ربعة وعشرين ساعة تمشي عند راجلك

سكت بقيت كنتمتم مالقيت مانقول ورجعت معاها للدار طلعت لبيتي سديت عليا وطفيت تيليفون باش مانشوفش مكالمة يونس ويأثر عليا . حطيت راسي على المخدة فقفطاني بغثت نرتاح حتى سمعت ساارااا بصوت مرتفع على برا وتهزيت مخلوعة قلت لختي شهادشي !!

ناضت كتجري طلات من السرجم ودفعتها طليت لقينا يونس كيغوت برا عليا ويضرب قصدور سكران شوهني. بديت كنضرب فوجهي ونغوت وختي كتولول مشات كتحري هبطات وهوا كيعيط ليا ويضرب بالحجر فالحومة كيقول ليا كنبغييك اسارة .. والله ماتزوجي بشي واحد من غيري. .. باش حسن مني .. باش حسن مني ؟؟. مالي انا ماشي راجل

بقا كايتمايل ويغوت وانا كنغزل فبلاصتي بالخلعة خرج ليه بابا بسروال قندريزي وصندالة مشمر على كمام يديه مع تبارك الله طويل مكلضم شدو بواحد اليد لسقو مع الحيط قاليه ها سارة يا سلكوط . خرجو ليه خوالي وعمامي وولاد عاىلتي شدو بابا دخلوه كان غايقتلو خلا دمو كيشرش وجروه خوالي حيدوه من الحومة بعدوه وطلع عندي بابا دمو حامي فرع الباب عليا وماما تابعاه وخواتاتي وعمامي ماعجبهمشً الحال نتشوه قالي بابا شكون هادا كتعرفيه

لسقت مور ختي قلت ليه عمرني شفتو فحياتي

قالي عمي وفين كيعرف سميتي قالت ليه عمتي نعلو شيطان راه ساهل يعرف سميتها البنت ماكتعرفوش جا راسو كيغوت

زعف واخد عمي حتى هوا قبيح بحال بابا قاليها كن ماكان يعرفها كاع مايجي يفضحنا فهاد الليل

قلت ليه ولساني كيشطخ بين سناني عمرني شفتو ولا كنعرفو عمرني عرفت شي حد انا

قالي بابا ايوا الله يعميها ليك لا نتي لا هاد قراناتك كلهم اللي كيسمعو .. الله يعميها لشي وحدة فيكم والله حتى نعلقها من شعرها

خرجو من البيت ولسقنا كاملين لا انا لا بنات العاىلة مع الحيوط تخبينا ونزلو كيهضرو طالع ليهم الدم كنسمع صوتهم كيزلزل الحيوط. واحد اللحضة عم الصمت كولشي قطع الحس وتكمش شي ما كيهضر مع شي بغيت نوض لطواليط ماقدرتش حتى هدات الوضعية وسمعت بابا والعاىلة كيديرو الذكر فالصالون وخرجت مشيت لطواليط سديت عليا ورديت النفس كان قلبي غيسكت بالخلعة .. رتاحيت وخرجت يالاه حليت الباب لقيت ولد عمي كايتسناني فالباب وعينيه كيتحلفو فيا هز صبعانو بجوج قالي حتى هوا بالريفيك حيت مكدورش عندنا الدرجة فالدار .. والله ياوالديك وماتشدي الطريق حتى نكرج ليك دوك الرجلين .. يحساب ليك دوزيها علينا راني ديتو قالي كيعرفك تلت سنين هادي .. بلحق غادي ندوزها ليك والى خرجو رجليك الشواري. عاد ديك الساعة غتكونالفراجة سمعتي

بلعت ريقي ماجاوبتوش ومشيت مهبطة راسي دزت قدامو وهوا متبع ليا لعين قالي هاي هاي هاي خرجو رجليكم الشواري قلتو ماهنا رجال ولا !

تحدو ليا صافي دخلوني سوق راسي عارفة عاىلتي يلا مشاو حتى حصلو عليا شي حاجة يمحيوني على وجه الارض من كبيرهم لصغيرهم اما بابا يدبحني من رقبتي ومايحنش فيا .. كولشي الا العرض والشرف والصمعة دالعاىلة كطيح عليها الروح وانا البهلان ديالي نساني شكون انا ومنين انا وشكون هي عائلتي .. عندي الزهر كيهرس الحجر دزت فالضو قدام ولد عمي وسكت خلا الليلة دازت على خير لاكن بقا حاضيني فين مشيت وفين جيت هوا وواحد اخر ماخلاونيش نتنفس وجالسين لينا فباب الدار اللي طلات كيقولو ليها فين غادا ويردوها للدار وماتقدرش تهضر الى هضرات ينوض ليها باها يكمل عليها ولا خالها ولا عمها . جمعو معايا الحوايج والدهاز كامل فالباليزات ودوشت فالدار تحميمة خفيفة وخرجت وصلونا للقاعة فين غندير العرس وبقاو تما كيدورو البق مايزهق ،. كانت اول مرة نشوفو القاعة كي دايرة. .. كانت كبيرة فيها جوج طبقات لفوق غايديرو النسا ولتحت الرجال كانت كتبهر كلها زاج كتبري والارض رخامة وحدة دخلنا لواحد البيت جابو ليا نكافة من برا معروفة عندنا كتنكف فالخاريج للجالية المغربية اللي لاباس عليهم وكتعرف غير الريفية ولغتها باش كتواصل على برا . جابت ليا جوج برزات كل وحدة فشكل والتكاشط كلهم تقال ومعاها اللي كيصايبو الشعر جلسوني صاوبر ليا المكياج باش غندخل والمشطة و ولبساتني تكشيطة فالابيض كريمي كتهبل ديالي جاتني فالدهاز كلها حجر ديال العرايس وطويلة واسعة من لتحت وزادتني النكافة الفوال على راسي وليزاكسيسوار والتاج وحطات ليا المرايا شفت راسي ماعقلتش كاع على راسي وشكون انا تصدمت حطيت يدي على حناكي كانت الحنة قهوية فيدي ودوك الخيوط باقا دايراهم قلت ليها واش هادي انا !! عمرني درت المكياج تبدلت بزاف

عجبني راسي اول مرة نطلع بهاد الشكل تصدمت وخواتاتي اللي معايا فالبيت حتى هما تصدمو بقاو غير كيشوفو فيا .. بغات النكافة تصورني لاكن مابغيتش قلت ليها لا مانقدرش بلاش وضرت سمعت الدقان فالباب ماعرفتش شكون دوك العيالات اللي دخلو كانت مرى كبيرة بيضاء رقيقة دايرة نضاضر الشوف والسنسلة مدلية من الجناب وحداها بنت قدي بالتكشيطة والشعر كحل مصاوباه ولايحة عليها الشال من الفوق ومرو اخرى معاهم غليضظة شوية دخلو بابتسامة وكيهضرو بشوية ومتولين دخلات معاهم ماما جابتهم عندي. قالت ليا هادي عكوزتك كانت فالعمرة

نضت نسلم حشمت منها وشارت ليا على كتفي كتشوف فيا وضحك معايا قالت ليا لالا غير جلسي ابنتي .. الله يكمل بلخير .. تبارك الله والصلاة على النبي الله يحجبك من العين

حدرت عيني قلت ليها امين وقالت ليا ماما كتشير لديك البنت. هادي لوستك .. هادي عمت عيسى

رتبو على كتفي ماسلموش عليا باركو ليا شفتهم كيشوفو فيا منباهرين وكيقولو مشاء الله .. قالت ليا عموزتي شيخك بغا يشوفك ويسلمك عليك قالت ليها ماما اه مرحبا

انا تزنكت رجع وجهي حمر وانا تحت الانضار ديالهم مشات بشوية عليها خرجات جابتو وراها كان لابس جلابة بيضاء وبلغة داير طربوش احمر على راسو ابيض البشرة .. اخيرا شفت السي الحجوجي شخصيا نضت نسلم قالي خليك بلاصتك غير جلسي .. كيضهر ولسانو ملوي مكينطقش بالراء نيشان ولحيتو بيضاء وجبهتو كحلة بالصلاة .. قرب ليا كيدعي معايا وينصحني كان حكيم فكلامو وضحك معايا وخرج مشا وخرجات معاه عكوزتي. ورجعات عندي بواحد الباليزة فيدها صغيرة مربعة مداتها لماما قالت ليها هادا الذهب ديالها .. حتى الى بغيتو تندلوه فالطيافر

شداتو ماما واستاذنو خرجو وحلاتو قدامي بغات تشوف شنو فيه .. تصدمت شفت تما جوج مضمات ملويين وحدة حدا ختها كبار وحدة صفراء وحدة بيضاء. محطوين بترتيب وطقم فعلبة بوحدو ابيض كيشعل بالديامون ابيض وواحد اخر اصفر بالحجر فالغوز بارد ماعرفتش واش حتى هوا دياموند كان كل واحد بوحدو فعلبة زرقاء بحوالقهم واسوارهم وعلبة اخرى فيها شوكة ديال الصدر بلدية بوحدها حداها نبالة بلدية ديالها وعلبة اخرى فيها ساعة ديال اليد كتشعل الوسطاني ديالها اكحل وعاد الخاتم فعلبة بوحدو مربع ابيض.

بقات ماما كتشوف فداكشي وتقرا المعودات وحمعات قالت ليها ختي خليه نحطوه مع الدفوع يشوفوه الناس. قالت ليها ماما اش غايشوفو ابنتي العين خايبة غايعطيوها ليها مقادة

قالت ليها ختي ياك محصنة صافي ماعندهاش مناشً تخاف

قالت ليها ماما خفت عليها من لعين

بقاو مني منك حتى سمعت هزة ديال التعشاق فودني بغات النكافة تخرجني باللبسة اللولة ونضت خرجت هزوني فالعمارية دخلوني بيها كانو غير لعيالات وكاع اللي خدامين عيالات حس الراجل ماكيدورش تما . بقيت كنشوف فالناس من لفوق شي كنعرفه شي مكنعرفوش والخلعة فيا ماعقلتش على ديك الدخلة اللولة كي درت ليها حتى لقيت راسي راجعة للبيت من جديد وجلست على واحد الفطوي. اهضر كبير قدامو طبلة جابت ليا ماما شال طويل لواتو عليا قالت ليا غيدخل باك وراجلك معاه العدول

شديت فيها قلت ليها عنداكم تمشيو تخليوني بوحدي

شدات فيا قالت ليا لالا مانمشيوش. حنا معاك

طلعو شيلانهم على راسهم وانا كنترعد دخل بابا بالبلدي هبته كتبعت ليا الفخر والطمأنينة فاش كنشوفو قدامي كنحس بالراحة والامان . كان معاه عيسى وهاد المرة لابس البلدي على حقه وطريقه سرقت الشوفة ماخققت مزيان فحتى واحد بقيت جالسة والشال مدلي عليا حسيت بيه جلس حدايا وبابا حتى هوا جلس حدايا داروني الوسط وباه جس جيهتو ودخلو شي عمامي وخوالي حتى هما حسيت بالسند والدفئ دالعاىلة وكنشوف خواتاتي معايا وماما واقفة مورايا حاطة يدها على كتفي .. بدا بابا كيهضر دار واحد المقدمة دينية وافتتحها بآية قرآنية قراها بالتجويد واكل ساكت .. حسيت بلحمي تبورش عليا داك بديك الاجواء حسيت براسي فديك اللحضة فطور الانتقال والتحول من حياة لحياة اخرى .. لخضة تخول مهمة فحياتي وتقاتها ختي بكامرة لحضة بلحضة ، سولوني واش قابلة حشمت نهضر قدام كولشي. وقالي بابا هادشي مافيهش حشومة. وقلت ليه قابلة وعاودو سولني ثلاتة دالمرات كنجاوب وسولوه جاوبهم حتى هوا وعطاوه وقع وكحز ليا لكتاب نوقع شديت الستيلو كنترعد وراوني فين نوقع ونسيت على توقيعي بالخلعة والدهشة بقيت كنتفكر كي كنديز ليها وسنيت والستيلو كيزلق من يدي. وتمت المباركات وشي كيستسالم مع شي وتقرات الفاتحة من جديد وخرج الكل بقا حدايا عيسى تلفت هز ليا الشال على وجهي

- [ ] رفع على وجهي اشال وانا مهبطة راسي ماشفتش فيه حسيت بيدو تحطات على كتفي وقبل جبهتي تحت الزغارت ديال النكافات .. خرج كولشي واحد اللحضة بقبت غير انا وياه جالسين كنشوف غير يدو على رجلو فيها كم الجلابة وتحتها كم اخر بتوب شفاف مدرو بالراندة والساعة فيدو والخاتم صغير مربع فصبعو الصغير .. كانت يدو كتشعل بالنقا وابشرته قمحية والكف دياله وصابعه حمرين .. جمعت يدير كتفردهم مع بعضياتهم كنشوف فداك النقش اللي مزين اصابع يدي فصمت وكنتسنا فديك لحضة الجلوس تحت الضغط دوز بزربة لاكن دازت طويلة اكثر من حياتي اللي دوزت فقرايتي .. قالي بصوت منخفض مبروك

- [ ] ردبت عليه قلت ليه الله يبارك فيك

- [ ] بقا ساكت مالقا مايقول وانا ساكتة حسيت بمعدتي كترعد ويدي بداو كيرجفو وفمي كيجري بالماء عرفت راسي غادي نستفرغ وحطيت يدي على فمي ماعرفت شنو ندير وتقيلة بالحواية التكشيطة فيها قلاتة الطبقات ها حرير الدودة لتحت والطبقة الشفافة والكريب من لفوق والحجر وزدتها بواحد الطالون رقيق جابوه ليا فالدهاز قدو قداش والمضمة مزيرة عليا .. قالي مالكي شنو عندك

- [ ] بقيت سادة فمي كنشوف فجنابي ماقديتش نشدها وقلبت وجهي تكيت على يد الفوطوي اللي حدايا تقيت فالارض وقلت مسارني .. ماكنتش واكلة حتى حاجة رديت غير الماء وناض بالزربة جا قدامي شد ليا الفوال اللي كان مدلي على وجهي وشعري اللي دلا عليا ردهم اللور وانا كنتعصر ريدي على قلبي حتى سخفت رجعت اللور ومشا حدا واحد الطبلة فيها المنادل هز البكية عطاها ليا وخرج للباب دخل ختي لكبيرة جات كتجري عندي لقاتني منوضة قلبي بالردان ومشات كطير جابت بانيو صغير وجاو وراها ماما وخواتاتي كيتجاراو ضارو بيا كيشمو ليا الريحة وهوا بوحدو اللي راجل وسط منهم كيشوف فيا قال لماما الخلعة يمكن

- [ ] قالت ليه واه راه كاع البنات كيوقع ليهم هاكا

- [ ] قاليها عطيوها تاكل واقيلا ماكلات والو

- [ ] قالت ليه ماما هاهي ختها غتجيب ليها شي حاجة

- [ ] بقا واقف معانا شحال حتى توكضت عاد قرب ليا قالي صافا شوية؟

- [ ] حرت ليه راسي بالايجاب وبقا شوية وخرج لبرا حتى رتاحيت ورجعات كرشي لبلاصتها بغيت ندخل الطواليط كانت عندنا فالبيت وجاو النكافات حيدو ليا كولشي بقيت لابسة واحد الشورط ابيض ديال لعرايس قصير والديباردور ديالو لحت عليا واحد البينوار خفيف جبداتو ليا ختي من داك الدهاز اللي كان محطوط فالطيافر وعطاتني بانطوفة بيضاء خشاتها ليها فرجلي بالزربة ومشت دخلت الطواليط جاني الاسهال ولقيت الدم هبطات عليا وماشي وقتها عرفتها جات بالخلعة وبدلات ليا الخاطر وشوشات عليا وتقلب مزاجي . حليت الباب كانت ختي واقفة عليا قلت ليها هاشنو كاين ومشات كتجري للباليزة جابت ليا محموعة جديدة بدلت كولشي ودرت فوطة صحية وخرجت قدام واخد المرايا كبيرة فين واقفة هي عطاتني كينة تهدأ اعصابي و تحيد ليا الوجع اللي ممكن يجيني من بعد حيت عارفاني كنبدا نتقطع بيها وكنضرب عليها ليباري باش نرتاح من حريقها . سمعت النكافات على برا كيهضرو بيناتهم قالت ليهم ماما ولاهيلا تخلعنا قلنا ياك لاباس مالها

- [ ] قالت ليها النكافة حنا قلنا ياكما العروسة صبحات دخل عليها لعريس وجاو خواتاتها كيجريو ماحسابش لينا طاح ليها طونسيو مسكينة .. تخلعات

- [ ] قلت لختي شوفي لخرين حتى هما فين مشا عقلهم قالك حسابهم لعروسة صبحات

- [ ] قالت ليا ختي حتى حنا داكشي اللي قلنا فاش قالو لينا سخفات قلنا ياكما يكون دخل عليك ماتعرف شخال من وحدة طرات ليها

- [ ] قلت ليها ها الدم دخلات عليا اراك للوجع من دابا واحد شوية.. عاد عتبدا عندي انا الفراجة سربي يالاه ندوزو هادشي دغيا قبل مايشدني الوجع البدية ديالي فهاد الزواج باينة من حموريتها .مانقدرش نكمل جوج لبسات اللي بقاو

- [ ] خرجت بالزربة عندهم لبسوني تكشيطتي الثانية كانت فنوازيط بارد مخيطة بالصم والخدة دالمعلم محجرك بحجر الخاتم كلها فالبرونز والدوغي والالوان الزاهية حتى هي كانو فيها ثلاتة الطبقات التحية تليجة فالباج بالسفيفة صدرها واسع وزواق الملعم والشبكة عليها عاد الفوقية كلها محجرك جات الشيكة خارجة من اليدين والمول ناعسة على صدري قالت ليا النكافة واش نكف ليك بالدهب ديالك قلت ليها واخا ولبساتني المضمة الصفرا والشوكة فالصدر و درت الطقم ديالي ديال الذهب بحوالقو طوال زادتني غير التاج وبدلو ليا المكياج بنت بشكل مختالف جديد تفننو فيا ولبست صباط اخر دوغي دايرين ليا التخليلة هزوني فالطيفور وانا كنشير بيديه وجلست فالمنصة دخلات عندي عكوزتي وعائلتها دخلو داك الدهاز مع العيساوا عيالات والطيافر بقيت كنتفرج فواحد تابع لاخر حطوهم قدامي شفت خواتاتي كيفاش ستفو داكشي وقادوه طلع ملكي وعلب الماركات باينين .. لفت انتباهي واحد المصحف صغير الوسط مذهب فواحد الصندوق بوحدو ماشفتوش مع الدهاز قلت يمكن عاد جابوه. .. حطوه فالمقدمة بقاو كيصورو داكشي ورجعو هزوه تبعتو انا من بعد العشا وبقات ليا لبسة وحدة ونتفك حيت الوجع بدا كيدور بيا غايبداني ميخلينيش حتى نوقف على رجلي

- [ ] طليت على تيليفوني لقيت ليزابيل ديال عيسى ونمرة اخرى ماعرفتش ديالمن خفت تكون ديال يونس حيت صونات شحال من مرة .

- [ ] فضلت نبقا فالبلدي مابغيتش اللبسة البيضاء وكانو فالدهاز ثلاثة ديال التكاشط لبستهم غير هما صدقت منكفة بحوايجي مالبست حتى حاجة من داكشي اللي جابت النكافة بقات غير كتكمل ليا بالفوال وصافي . لبساتني تمشيطتي كانت فالابيض ناصع بحال الثلج محجرك بالابيض والزعري بارد وتحتها ثليجة فالزعري والدوغي باارد كتموج وتحت منها كاع توب شفاف زهري لاكن كيبان ابيض حيت خفيف كتبان غير الشفيفة ديالو هابطة رقيقة لبسوه ليا منو للحم وحزمات ليا بمضمتي البيضاء ولبست مجوهراتي البيضاء كلها وطلقو ليا شعري كامل دارو ليا تاج خفيف على راسي وطرحة توبها شفاف مرشوشة بالحجر وبدلو ليا المكياج كله دارو ليا الوان زاهية خفيفة وعكر زهري بارد كيلمع خرجت بالورد عند الناس لقيت كولشي داير الشال ورجال عاىلتي المحارم دخلو مع العريس لقيتو حدا الحلوى كيتسنا لابس بدلة كحلة وربطة عنق داير يدو فالجيب. . انيق كيبان جنتلنام بحال شي بطل ديال شي فيديو كليب رمنسي .. كان كيضحك مع عمي ويهضر معاه اما بابا ماشفتوش كيدور تما عييت نقلب عليه بعيني مابانش ليا لا هوا لا ماما ..تاثرت بديك الاجواء شفت خوتاتي كيبكيو وجاتني البكية حبستها فحلقي رتزيرت بقيت رادك البال مع الارض انا كنجر فديك التكشيطة قدها قداش .. مشيت وقفت حدا العريس دار يدو ورا ضهري تعرض ليا بحال معرض لشي حلوة دلاكريم خافها تزلق تخسر .. عطاوني سكين طويل شديتو وحط يدو على يدي شفت بيه بنص عين فرحان عاجبو الحال كيضحك قلت ليه فخاطري سعداتك عطاك الله كولشي غير الى مابغيتيش توب وتشد الارض !

- [ ] دار يدو على يدي فوق السكين قطعت الحلوى وكولشي واقف معايا وجلست بلاصتي كانت النكافة بدلات البرزة حطات كراسا كلاسيكية ضخمة كبار فالخزي ملكين مضورين بالنحاس وقدامنا طبلة ديال الزاج حاطين عليها التمر الحليب الخواتم بدينا فطقوس تركاب الخواتم شفت فيدي على يدو كيدخل فصبعي المشنقة وانا صابرة ومستحملة دايرة بالي مع بابا وماما مادخلوش عندي. . عطاوني خاتم رقيق منحوت شديتو بجوج صبعان دخلتو فصبعو الخنسر كان فارغ مافيه حتى خاتم ركبتو ليه وشربنا الحليب والتمر دوزنا ديك الطقوس وانفاجرت ماقدرتش نكبت حزني بديت كنبكي وكنشوف خواتاتي كيسكتو بعضياتهم وانا فالبرزك بوحدي.. انتابه ليا عيسى وتقلب جيهتي كيهضر معايا ويسكتني ماسمعتش شنو مان كيقول كانت الموسيقى مجهدة . شد واحد المنديل حطو على خدي كيمسح ليا الدموع ويواسيني قدام كولشي وكيشد ليا فيديا وانا كنهربهم حشمت قدام عاىلتي وعمومي غير اللحية على خوه واقفين جهة الباب مصافين .. جاو خوتاتي كيعنقوني ويبردو على قلبي حتى تهدنت شوية وبغيت نوض حسيت بكرشي كتزدح والحريق مشا ليا مع رجليا وضهري لحسن حضي جا مع الختام ونضت خرجت دايرة سلهام طويل ابيض مليفة كيتجر معايا القب ديالو كبير غطا وجهي كامل ولحتو على كتفي تغطيت وخرجت لقيت بابا فباب القاعة هوا وماما هزيت عينيه شفت فيهم لقيت عينيهم حومر ورجعت تزيرت من جديد .عنقني حسيت بالدفئ فصدرو ماسخيتش نهز راسي وماما مسكينة كطبطب على كتفي .. تفكرت فديك اللحضة كلام يونس فاش قالي هربي واستغربت لتفكيرو يمكن هوا ماحاسش بحنان الواليدين ماشي بحالي انا على قبل هاد الحضن نضحي بحياتي .. واخا بابا صعيب وصارم ومتشدد لاكنني كنبغيه وكنموت عليه منقدرش نتخلا عليه ولا نصدمو فيا وحتى الهبة ديالو مهمة فحياتي كيحسسني انني عندي سند وعندي علامن نعول ونلتجأ فأوقات ضعفي وعندي بطل كيتضرب ليه الف حساب نفتاخر بيه قدام الناس ودرع حامي ليا وسقف آواني منذ نعومة ادافري عمر البرد ساط فيا ولا ضار بجنابي .. لاكن الخرجة ديالي كانت قاصحة بالنسبة ليا حسيت براسي كنخرج من بين ديك الجذران الدافئة وكنتسل من تحت جناح بابا وكنبعد القلوب على بعضها بالقوة .. حسيت بصدرو كترعد من لداخل كانه مخبي وسطو بركان وزدت زيرت عليه كأنني كنقول ليه خليني هنا مابغيتش نخرج .. جراتنب يد عيسى من دراعي شوية ونترتها لسقت فبابا وماما كتبكي قالت ليا صافي ابنتي الله يرضي عليك واش بغيتي باك يطيح ليه الطونسيو رأفي شوية

- [ ] هزيت راسي وحط ليا بابا يدو على حنكي كيضحك حسيت بيدو بمثلجة وكترجف ماقدرش يتحكم فيها وكيبين ليا ديك الضحكة فوق خاطرو ووجه صفر مخطوف خفت يطيح ليا وضحكت فوجهه وعنقت ماما بقات كترضي عليا وتلاحو عليا خواتاتي ب فاياج من الحنان بزز باش فارقنا خالي قالينا صافي نعلو الشيطان خليوها تمشي راجلها كيتسنا برا

- [ ] جرني خالي من يدي خرجت ضربني برد الصباح لنيفي حتى سال لقيت الدنيا مقلوبة على برا بالرجال وعيسى واقف فالجنب كان كيهضر مع شي راحل اخر حتى هوا بالكوستيم وكل شوية يشوف فالساعة.. تعرض ليا فتح بابا واحد السيارة بيضاء لاسقة مع الارض كتشعل فيها جوج بيبان ومجبدة بحال الحوتة صالونها احمر كامل طلعت لداخل جلست وطلع حدايا ركب سد البيبان وداني حيت لا ادري .. تبعوني سيارات عائلته من اللور شفت فيهم من ضضضض كان صف ديال السيارات الفاخرة كانه موكب ملكي وكانت من بين دوك السيارات وحدة مورايا مباشرة كحلة من نوع بي ام على سطح مقدمتها راية البلاد حمراء بنجمة خضرا مسطحة ومن سقفها كيطل واحد الولد فيدو هاتف كبير كل شوية يشوف فالسماء .. رفعت راسي بعفوية لقيت واحد الدرون تابعنا فالسماء بحال شي طبسيل طائر .. بقيت ساهية كنتفرج وهوا حدايا جر ديك الربطة دالعنق بواحد اليد حيدها وفتح صدايف القميجة وبدا كيسوط من تعب السهير .. تكيت راسي على الزاجة فصمت والنخصة فيا ماشعرتش بالطريق حتى وصلت لمجمع سكني بمساحات خضراء راقي ومنازل فاخرة دخلت وسط المجمع بالسيارة وتبعاتني السيارة الكحلة بوحدها من اللور دخلات معايا كان محمع مأمن بالحراسة استقبلونا بالتحية واتاجهنا نحو القبو مباشرة كانت مساحته كبيرة بزاف ووقفنا نزل اللور مشا لديك السيارة السوداء كيهضر مع نفس الشخص اللي كان واقف معاه قلت غيكون غير خوه . شفت ختو حتى هينزلات وقلت يمكن غيكون راجل ختو . عطاتو الشنطة ديالي وديالو جرهم وفتح عليا الباب تبسم ليا قالي ماسخيتيش ؟ نردك للقاعة !

- [ ] ماجاوبتوش ونزلت جات عندي ختو عاوناتني هزيت جلايلي ومشينا طلعنا فالاسانسور كنقول ياربي غير فوقاش نوصل ندخل فالكاشة ونحط راسي على المخدة يهدا الوجه مابقيتش قادرة نصبر وقلبي كيضرب بقوة الصبر اللي صابرة كنحس براسي مفصلة كاملة . فتح ليا الباب دخلت ضرباتني ريحة العطر المنزلي والسخونية كانت مضلمة شوية عاد رفع ليها الستائر بواسطة زر حدا الباب لقثت راسي فشقة عصرية بحال لعروسة كبيرة فيها صالون كبير قدامي بكنبات فالموطارد والازرق من الجوانب وبيناتهم جدار كبير وطويل من نوافد زجاجية واحد حدا واحد من الاعلى للاسفل فارق بيناتهن جوج ساريات كبار وباب كبير الوسط كيطل على شرفة دائرية كبيرة مدورة بجدار من رجاج كلها لمحتها من الدخلة دالباب .. لوحات فنية بألوان رائعة ومرايا فكل بلاصة واتات عصري مرتب وكل حاجة فمكانها وشاشة كبيرة بزاف وراها جدار من رخام ابيض .. شقة مبهجة بعتات على قلبي السرور كان ليها ممر واسع فالجنب وقفت حداها ودعت ختو مشات وسد الباب رجع عندي كيشوف فالجذران قالي كي جاتك الدار ؟

- [ ] دورت عيني فجنابي قلت ليه زوينة تبارك الله

- [ ] قالي دخلي شوفي البيوت وشوفي الكوزينة

- [ ] ميلت راسي قلت ليه واخا ومشيت دزت على داك المرر لقيت نضرة خفيفة ماركزتش مزيان كان الوجع هالكني ومطيح ليا النقطة وراني بيت النعاس وفتح ليا الباب دخلت لقيت بيت كبير عندو جدار حتى هوا من زجاج كيطل على شرفة مربعة كبيرة داير بيها الزاج والضوء داخل لقلب الغرفة .. كان فيها ممر واسع مربع فيه باب كبير قالي هادا الحمام وشار بيدو لباب اخر مقابل معاه كان عبارة عن مربع فارغ من اي باب قالي هادا دريسين ..حركت ليه راسي وجلست طرف الناموسية دخل ليا القائب لداك الدريسين وانا كنسد عيني ونحلهم بغيت نترخف ونرتاح لاكن ماقديتش . ماقدرتش نشوف حتى البيت كي داير كل ما حسيت بيه انه مريح مشمش ريحته زوينة وفراشه والوانه مريحة ، تفكيت من صباطي خلا الاثار ديالو على رجلي وحيدت السلهام عليا بان ليا انعكاس صورتو فواحد المرايا على برا مقابلة مع داك الدريسين شفتو لداخل حيد لافيست وكيتكسل ويرمي التعب ديالو تما وفتح ازرار القاميجة حيدها بقيت كنشوف فيه كان مختالف على يونس بزااف .. انا كنكره الراجل اللي فيه الشعر وهوا فيه كلشي زوين وحتى جسده كان مخدوم وكان وافي فالطول والعرض ماعندوش الكرش والوقفة ديالو مرجلة وزوينة لاكن عندو الشعر منتشر فصدرو وكرشو ماحملتووووش وكحل ناعس ليه مع صدرو ، كان عليا نتوقعها فاش شفت يديه وصبعانه ناعس معاهم الشعر كان خاصني نوحد نفسيتي لاكن ماقدرتش ماحملتش نشوف فيه ودورت وجههي بقيت كنقول مع راسي وييلي كي غندير نسلم ليه راسي ونخليه يحط صدرو عليا .. ماقدرتش حتى نتخيلها كرهتو واخا عييت نقلب على شي نقشة تحببني فيه والو فاللخر عاد مازدت نفرت .. رجعت دورت وجهي شفتو جالس شاد تيليفون بواحد اليد وكيحل صباطو باليد الاخرى وحط رجليه على الزربية كيصوني فتيليفون وبدا كيهضر بصوت منخفض ماقدرتش نسمع شنو كايقول ورجع قطع ومشا هز فوطة دخل للحمام وسد عليه . غير دخل نضت بالزربة فكيت راسي خيدت كولشي عليا بدلت قبل مايخرج حيدت كولشي وبديت نقلب شنو نلبس مزال ماسيفطوش ليا حوايجي كاملين وحتى الدهاز ماقلبتوش كله نشوف شنو فيه . لقت. شي حوايج ديالو مطويين فواحد الرف ومعلقين منهم شي وحدين اخرين وسبرديلة محطوطة قلت مع راسي كان جالس هنا يمكن كايتسنا يجيب ليها العروسة ولاهيلا، حليت الباليزة كنقلب من زهري لقيت ختي دايرة بحساب العادة حطات ليا تما المساىل كلها وهزيت كولشي مشيت للطواليط اللي على برا بدلت ولبست واخد الانسومبل سروال طويل قهوي وبينوارو ناعم وبانطوفة وديباردور لحت فيه شبكة رقيقة على الصدر ختاريتو تحسبا لاي حدث محرج ولونو شوية داكن ما باج ما بني المهم يستر شوية . مشطت شعري مسحت وجهي وغسلتو بواحد الغاسول قريت سميتو كانت ماركة شانيل جا فالدهاز حتى هوا كنت كنشوف الماركات غير فالتلفازة ودوك الاغراض الانثوية حتى وليت حتى انا كنستعنل منهم شكون قال غنتحول من سارة اللي عندها ريحة و كريم دالوجه لسارة عندها محل ديال الماركات عاد خاصني نجلس شي جلسة ونشوف داك الدهاز حاجة بحاجة

- [ ] خرجت طالقة شعري وراشة الريحة وبانطوفة فرجلي مشيت للبيت لقيتو فالبالكون كيهضر فتيليفون لابس واحد الشورط باج وتيشورط بيضاء فرجليه بانطوفة كحلة ومتكي على الزاج عاطيني بضهرو قلت ماسمعنيش بعيد ساعة سمعني وضار عندي شاف فيا وقطع دخل ورد الستائر على الزاج من وراه هزني كيشوف فيا من رجلي لوجهي قلت ليه فخاطري اييه هي هاديك شخصيا اللي سيفطات ليك الشعر بشحمها ولحمها وشعرها واقادمها ارا ماتفرج دابا .

- [ ] تبسم كيشوف فتيليفونو قالي كولشي جا بالزربة ياك

- [ ] درت ليه ضحكة بزز قلت ليه امم. وسكت بقا كيشوف فيا مرة ويشوف فتيليفونو مرة وحطو هز واحد العباية خليجية بيضاء ناصعة لبسها وطلق السجادة قدامو كيستاعد يصلي .. شفتو كيتقل الحركة يمكن كيتسناني نلبس و نوض نصلي معاه ونضت هزيت فيدي واحد اولويزة ودزت قدامو حطيتها على طبلة طويلة ديال التلفازة وزدت خليتو واقف لمحها وكبر بدا كيصلي ومشيت للفراش كان مطلوق عليه كوفرلي باج غليض وتحتو ليزار ابيض هزيتهم ودخلت تغطيت كندور فبلاصتي بالوجع ونتقلب من جهة لجهة بقا جالس بلاصتو عاطيني بضهرو طليت نشوف شنو كيدير فتيليفون من باب الفضول لقيت الشاشة فيها قرآن كان كيقرا فصمت ، رجعت حطيت راسي كنتسنط لوجع كرشي حتى داتني عيني

نضت حتى للخمسة سخونة فبلاصتي حناكي سخان لا حومر وفمي احمر شفت وجهي فمرايا مقابلة معايا فاش جلست .. استوعبت قين انا عاد تفكرت راسي عروسة فداري زعما وتلفت حدايا لقيت بلاصتو مزالة مسرحة مانعسش حدايا والسكات فالدار جو مريح مكنسمع حتى صوت . لحت الغطا عليا ولبست بانطوفتي خرجت للشرفة طليت منها لقيت قدامي ارض خضراء وبحيرة طويلة على حد الشوف وهضبات فالاخضر بحال شي ارض ديال الكولف وتحت مني نفس البالكون ونفس الديور واخد حدا واخد فارق بيناتنا الشجر والخضورية طويلة حتى للسطح .. عجبتاني الطلة وبقيت شحال كنتفرج من تما بانو ليا الناس جالسين فالشرفات ديالهم كيتبردو واستمتعت بالحو شوية ورجعت دخلت كنقلب عليه نشوف فين مشا ولا فين مخشي لا يخرج ليا من شي قنت على الاقل ندير بحسابو ،. ضربت دورة فالدار كلها شفت الحمامات والبيوت وواخدرالصالون اخر فجهة اخرى بحال اللي فالدخلة جا فاللهر ديال الممر فيه شرفة قدها قداش حتى هي كطل على وسك المجمع .. عجباتني الدار كطل على ربعة ديال الاتجاها مالاسقة معايا حتى دار .. دخلت للكوزينك حتى هي ماعندي منقول عليها منضمة ومتولة ناقصينها ماعن بزاف مافيها حتى قجاقاجة كدور .. سمعت تيليفون كيصوني مشيت لقيت يونس كيعيط ودخلت للبيت سديت عليا جاوبتو بقا كيبكي قطع ليا قلبي وماكرهتش كون تزوجنا لاكن القسمة ماشي بيدينا تعصب فاش قلت ليه منقدرش نهضر معاك انا مرت راجل اخر كناخد دنوبو صافي نساني خليني باش حتى انا نقدر نساك . لاكن مابغاش تعصب قالي ماتبقايش تقولي ليا مرت راجل نتي مرتي انا انا اللي غناخدك .قلت ليه راني قلت ليك صافي راه تزوجت

قالي واش نتي مقتانعة واش عاحبك الحال

قلت ليه ماشي مقتانعة ماشي عاجبني الحال ولاكن هادا الزواج ماشي اللعب. وانا عمرني ننساك اصلا نتاخرت فهاد التزويجة هادشي كاافييني

قطعت عليه وحلست كنسوط. كنشوف شنو ندير .. كنت كنسمع على الحجوجي حتى وليت مرتو بالشرع والقانون عمرني حلمت بيها وكولشي جا على غفلة . بقيت شاردة حتى عييت ونتهدت نضت بغيت ناكل شي حاجة جاني الجوع مشيت للكوزينة لقيتها كتسفر وخرجت سمعت الباب تحل ضرت كان عيسى اللي دخل لابس دجين رتيشورط كحلة فيدو قفة صغيرة شافني وتبسم قالي صباح الخير

ابتسمت قلت ليه مساء الخير .. جا عندي عطاني وجهه بغا يسلم عليا ومديت ليه حنكي قاصني بلحيتو وقالي عيطي لماماك هضري معاها راه عيطات ليا كتسول فيك

حركت ليه راسي ومشيت لبيت النعاس عيطت ليها سولاتني مي بقيت مع الوجع قلت ليها مزيان وسولاتني واش كولشي هوا هاداك قلت ليها الحمد لله قالت ليا واحد الثلت ايام ونجيو نشوفوك نجيبو ليك لحوايج ديالك والكادويات وهضرنا شوية وقطعت معاها ماعرفت ماندير وكيفاش نتصرف وتيليفوني كل مرة يصوني ليا يونس. حتى تعصبت خفت يبقا يزن فيه وحتى كنقول صافي غادي ننساه كيرجع يفكرني فيه ماخلاشربيا فرصة ننساه وثلت سنين صعيبة نساها بين ليلة ونهار وكنحاول نتعايش مع وضعي الحديد ونتقبل زواجي وزوجي ونبدا حياة جديدة . حيدت نمرتو فمرة ورجع كيصوني ليا بنمرة اخرى وخلاني حتى جلست حدا عيسى ناكل وصونا جاوبت ماحسابنش هوا .. غير سمعت صوتو وقطعت بقيت كنقول الو الو وطفيت تيليفون فمرة حسيت ساعتها بقلبي غيسكت بالخلعة . كنت كناكل ساهية مابيا ماعليا حتى حسيت بيد عيسى شدات ليا فيدي وهزها حطها على رجلو وتلفت شفت فيه قالي فاش ساهية

ارتبكت هبطت عيني حشمت منو كيجيني فارض الاحترام وكنوقرو وكنحتارمو كنحس بيه بحال بابا ماعرفتش كفاش نوصف هاد الاحساس اتجاهه حتى من الشكل ديالي كنحاول نخليه عادي قدامو ومحتارم بلا نتلفت الانتباه .. سليت يدي من بين يديه قلت ليه والو وقالي واش مرتاحة هنا ؟. كنحس بيك مامرتاحاشر

بلعت ريقي قلت ليه لالا مرتاحة الحمد لله

عبط راسو فالارض شوية وجع تقلب جيهتي هاز واحد الرجل على الفوطوي ودار يدو على ضهر الفوطوي وقالي زواجنا حا بطريقة تقليدية .. مكنعرفوش بعضياتنا مزيان وماعارفينش الطباع ديال كل واحد فينا .. بغيت نقول ليك .. خودي راحتك فهاد الزواج .. ماتابعنا والو وعندنا فرص فين نتعرفو على بعضياتنا مزيان ونولفو الطباع ديال بعضياتنا .. نتي دابا فدارك تصرفي كما بغيتي ويمكن ليك تشوفي عائلتك فالوقت الي بغيتي .. تمشي عندهم .. يجيو عندك انا ماعندي حتى مشكل من هاد الناحية .. ماعندك علاش تبقاي مزيرة

ابتسمت حركت ليه راسي بالايجاب وبقيت ساكتة قالي بابتسامة كيشوف فيا !

هضري .. قولي شي حاجة

حركت راسي بغيت نهضر ومالقيتش باشرنعبر ميلت راسي على كتفي وابتسمت

قاس بيا بصبعو على شعرة مدلية على وجهي قالي كولي ماكليتيش

مسحت يدي قلت ليه الحمد لله كليت . وماكرهتش نقول ليه راه ماشي انا اللي كتبت المسج راه داك الشعر ماشي من ابداعي ومكنعرف منين نجيه غير زرفتك معايا والى كنتي كتسنا شي كلمة زوينة راه ضيعتي حياتك وحتى المشاعر اللي يخليوني نعبر بالفطرة ماعنديش اتجاهك من غير الاحترام و الهيبة ديالك والزين اللي فوجهك اللي كيخليوني نحشم منك

سمعت لكلامو كان كيحاول يخليني نرتاح لاكن انا مامرتاحاش .. كنسترجع ذكرياتي مع يونس كنمرض .. كنحس بقلبي كيتقطع تمنيت من اعماق قلبي نتجمع معاه لاكن تخطفت ماحسيتش براسي حتى لقيت راسي مزوجة براجل اخر وعندي الضرايرات .. اخر ماكنت كنفكر وعمرني تقبلت فكرة الضرايرات واخا غير بيني وبين نفسي ، قاطع سهوتي تيليفونو كيصوني وقطع هزو فيدو وخرج من لدار بقيت بوحدي تنفست على خاطري وحمعت الطبلة ومشيت لبيتي بغيت نشغل راسي وجبدت حوايجي كلهم شتتهم جلست كنطوي فيهم .. يااااه الزواج كي داير !!! ممل مافيه حتى حاجة زوينة من غير تبدلي دار بدار وراجلك بباك وتكملي على روتينك وحياتك المملة .. كنتمنى نخدم ونكون حتى انا شي حاجة مهمة فحياتي لاكن عمرني نحلم بيها وواخا نبغي نديرها غنلقا بابا واقف فوجهي وفصف راجلي .. لو كنت جبت الراجل لراسي كان بكون حسن كان غيبقا بابا ديما فالجنب بعيد على حياتي الخاصة وقراراتي لاكن مدام ان العلاقة بين راجلي وبابا قوية وجمعاتهم صداقة قبل ماتجمعهم النسوبية فمن المستحيل نبعد بابا من طريقي وهوا تكلف بكل صفيرة وكبيرة فهاد التزويجة هادي كلها .

قهرني التفكير وقهرني بعدي على يونس توحشت نشوفوً توشحت نمشي انا وياه فالطريق واخا كنت كناخد احتياطاتي من العاىلة. ، توحشت نهضر معاه ونضحك انا وياه كنت حرة معاه وكنت مرتاحة دوزنا ثلت سنين كلها عمرنا تفارقنا فيها عشنا فيها المرك والحلوة وكنت باغا نصبر عليه حتى يدير عقلو ولا يخدم لاكن تصرف المكتاب .

تفكرتو وبديت كنبكي بوحدي ماشعرتش براسي حتى لقيت التيليفون فيدي كنصوني عليه جاوبني ملهوف قلت ليه انا ماقدرتش. ايونس. .. ماقدرتش على هاد الزواج كنموت وقلبي كيضرني

قالي فتحي كامرة نشوفك انا اللي كنموت انا اللي مفصل هنا عادي يخرج ليا عقلي .

فتحت الكامرة وشعري عريان اول مرة يشوفو كان ديما كيشوفني بالحجاب ومانتابهتش ليه واصلا مابقا كيهمني والو ساعتها بغيت غير شي جغمة تبرد عليا شفتو جلس فاش شافني قالي مانسمحش لباك اللي داك ليا مانسمحش ليه وعمرني ننساك ولا نفكر نتزوج وليت كنتمى الموت صباح وليل

قلت ليه حتى انا صافي عييت … الدنيا كدور بيا مابقيت عارفة راسي من رجلي بغيت نتفك وعييت نتلف عييت ننسي والو ماشي بيدي

قالي شنو نقول انا اللي عارفك مع واحد اخر فداك البيت ولابسة ليه داك اللبسة وطالقة ليه الشعر !! هي حتى نتي عاجبك الحال

جيت نجاوبو وسمعت الباب تحل عليا وقعت طيحت تيليفون فالارض طفا فمرة وضرت شفت فعيسى وهوا كيقلب بعينو وسط حوايجي اللي حطيت فوق الناموسية والارض قالي فين السجاد اسارة ؟. عطيتها ليه وطلقاها مورايا كبر بصوت مرتفع كيصلي العشا

خلعني حسيت بقلبي وقف مشيت للكوزينة شربت كاس دالماء ورجعت لقيتو متكي فوق الناموسية داير رجل على رجل شاد الهاتف فيدو كان عندو هاتف قيمته غالية بقيت كنشوف فيه عكس هاتفي المتوسط،. ساليت طويان الحوايج وخرجت من البيت مابقا ليا مايدار تما وحشمت نجلس بلاصتي وهوا تما ويقيت واقفة شحال حتى عييت ورجعت دخلت للبيت هز عينيو فيا قالي اجي ترتاحي ودرت ليه ابتسامة مشيت جلست حداه كان طالق يدو وراء ضهري .. طلعت الغطا عليا وبقيت كندور فيعينيا خطرتيليفون فوق الفراش على رجليه وهز تيليكوموند شعل تلفازة كبيرة كانت فالحيط دار فيلم وقالي فاش بغيتي تفرجي؟

هزيت كتفي قلت ليه حتى هادا مزيان

هبط يدو على كتفي قالي حسيت بيها سخونة قالي شنو النوع الافلام اللي كتبغي تشوفي ؟

قلت ليه بحال بحال. وكنحاول نهرب كتفي وحالسة مامرتاحاش ريحتو طلقات فالبيت وكنحس بالصهد كيجيني منو .. جيت نهز يدي نجمع بيها شعري للجنب ودوزتها حدا يدو اللي على كتفي جرحتو بالبراسليات اللي فيدي وجمع يدو شاف ديك البلاصة. قلت ليه سمح ليا ماقصدتش

رجع يدو اللور على المخدة اللي متكية عليها قالي ماشي شي حاجة واناخليت ليه فيدو خط قدو قداش.

تكمشت كنشوف فيه بنص عين كيشوف فالتلفازة شوية صونا تيليفون كان حاطو على وجهه وهزو باليد الاخرى شاف المتصل وسكتو وتنهد بالاتفاتة ليا ضحك معايا قالي عندي واحد الولد مبرزيييط

حليت عيني تصدمت قلت ليه عندك ولد ؟

غير ملامح وجهه لاكن بقات ابتسامة خفيفة على وجهه قالي ماعارفاش. باللي عندي ولد

دورت وجهي وهبطت راسي تنهدت قلت ليه ماعرفتكشً مزوج حتى لنهار العقد

تفاجأ قالي ميمكنش!! ماعارفاش باللي عندي التعدد باك ماقال ليك والو !

قلت ليه وانا كنضرب حساب لكلامي وشنو كنخرج من فمي معاه

لا ..ًكان كايحساب ليه عارفة .. والولد حتى لدابا عاد عرفتها

دور وجهه قدامو ابتسم قالي عندي ولد عندو ثلت سنين

بقيت ساكتة جاني الفضول نعرف حياتو كنت كنسمع عليه بزاف وقلت ليه غير وليد واحد اللي عندك ؟

عاود الالتفاتة جيهتي شاف فيها شفت فعينيه الاعجاب بقا كيتأمل ملامحي و شعري بابتسامة قالي ولد واحد اللي عندي .. الله يجيب لينا ولاد اخرين ..

سكت ماكملهاش عض على شفايفو بعفوية كيشوف فيا قلت ليه شنو سميتو ؟

قالي ساجد

قلت ليه الله يخليه ليك .

تنهد شاف قدامو وقالي امين

عاود صونا ليه تيليفون من جديد قلت ليه جاوبو غايكون توحشك

هز تيليفون قالي بغا نفتح ليه الكامرة داكشي علاش كيصوني

قلت ليه معامن خليتيه؟

بقا ساكت شوية وقالي مع مو

بغيت نعرف اينا وحدة فيهم واش اللولة واا الثانية لاكن مالقيت حتى دخلة وسكت وقطع عليه وعاود صونا حط تيليفون على ودنو شفت فعينيه بريق وابتسامة وهوا كيهضر مع ولدو نص عربية و نص فرونسي فاش مكيقدرش يعبر مزيان كيقلبها فرونسي وانا ساكتة بقا كيهضر ويضحك معاه ويدو على كتفي كيداعب توبي بأصابعه وسمعتو كايقول ليه انا ناعس حتى للصباح ونفتح ليك لكام وكايحاول يقنعه لاكن بدون جدوى فاللخر قطع وقالي وهوا نايض

هانا جاي غنوض ندير لهادا خاطرو قالك بغا يشوفني

خرج للبالكون استغليت غيابو وضرت تغطيت وسديت عيني درت راسي ناعسة هربت من الترثر والضغط والاحراج ماعرفتش علاش كنحشم من هاد السيد وكنحتارمه كيخصني نبقا نهضر بالاداب ونغطي صدري ومانديرش شي حركة ملفتة ولا نقول شي كلمة ماشي هاديك ومتشنجة بغيت نرتاح ماقدرتش لقيت النعاس هوا مأوى للهروب ديالي

درت راسي ناعسة صدقات بصح نعست حيت ماكنتش شابعة نعاس وتلت ايام ديال السهير . صبحت الصباح على خبر مأسف جدا مع الطناش مع الحلة ديال عيني يالاه هزيت راسي شفت الضوءً دخل عيسى مع الباب لابس حوايجو هز تيليفونو قالي غنمشي لفاس ونرجع ضاروري حتى نجي ونقول ليك شنو كاين ..

بقيت كنشوف فيه مافهمت والو وتيليفونو كيصوني فتح الخط وهوا غادي جاي قدامي مشطون سمعتو كيهضر وقالي هاكي. باك بغا يهضر معاك وشديت تيليفون ديالو جاوبت بابا قالي سيري معاها ماتبقايش حالسة سيري ديري الواجب

قلت ليه شنو كاين ماعرفتش شنو وقع !

قالي المرى اللولة راه طاحت بلاكريز هاد الصباح داوها للمستعجلات سيري معاه حشومة المرض هادا مافيه لا حبيبي لا عدوي

بقيت كنبرقً مافهمت والو دخت وبابا كايقول ليا سيري ودوز ليا ماما قالت ليا بادري بالحسنى وديريً الواجب راكم عاىلة وحدة نساي دابا واش ضرتك ولا ختك السيدة فالمستعجلات هزوها كتموت ماشي حشومة يمشي راجلك ونتي تجلسي ..ً حتى عاىلته تاخد عليك نضرة خايبة يقولو هازة عليهم فقلبك سيري ابنتي ديري الواجب واجي بحالك يعرفوك بنت الناس يعاملوك مزيان سيريً الله يرضي عليك

بقيت كنتمم زربو عليا قلت ليهم واخا واخا ونضت بالزربةكندور بلاصتي رجع عيسى عند تيليفونو لقاني لبست جلابتي الباج والتحتية ديالها وبلغتي ديال الصم هي لقيت قدامي وهزيت صاكي ونضاضري درت بحساب لعشية يقدر نرجع يقدر نبات الله واعلم ماتعرف الوقت اش تجيب . قالي غير خليك انا غنمشي نشوف شنو وقع ونعيط ليك. قلت ليه حشومة هادا واجب وانا كنحمع الحوايج فباليزة صغيرة من البلاكار ليها كما هما مطويين ولاتروس ديالي والاغراض جاب الله ستفتهم بالليل عرفت مل حاجة فين محطوطة دغيا تحمعو ليا اما كن بقيت كندور ماعارفة حتى شنو عندي من اللي ماعنديش . هبط الباليزة سبقني كيجري وسديت الباب بالساروت هبطت موراه كنقاد الشال على راسي مابان ليا لا فطور لا ماء نشربو فتح ليا الباب بالزربة طلعت حداه تشطنت وترفعت وطلع حدايا فسيارتنا البيضاء خرج من الناضور كيجري فالطريق مكاين غير دوبلاج وتيليفونو مابغاش يسكت كل مرة يهزو يجاوب ..وصلنا لواحد البومبة دخل ليها عمر البنزين ونزل جاب ليا فطور خفيف قالي غير ديباني حتى نوصلو لفاس

قلت ليه ماشي مشكل علاش عدبتي راسك

قالي مكاين لا عداب لا والو. وطلع حدايا كملنا الطريق لفاس شفت المدينة وهبطت الزاجة كنشوف وجهي مادايرة حتى نقطة ديال المكياج مزنكة بغيت غير نكحل عيني حشمت نجبد لكحول قدامو ودرت بناقص المهم ماشي صفرة كانو حناكي حومر والدورة الدموية كتجري فيا بالخلعة والتوثر ماعارفاش شنو جاي فالطريق

كان قلبي كيضرب كنسمع دقاته كتعالى فكل مرة كندوزو فيها من شارع مختالف … خجلي وخوفي وتوثريً من مقابلة عاىلته وضرايراتي مباشرة خلاني نفقد وزني فساعات قليلة .. كنت كنحلم نتزوج ونمشي حتى انا معروضة بحال اي عروسة اول مرة عند عاىلة راجلها ويرحبو بيها ويفرحو بيها لاكن تبخرات احلامي وأول مقابلة ليا مع عاىلة الحجوجي غتبدا بالمستعجلات وهادشي كان واضح من ليلتي الاولى عرفت. زواجي غيدوز مله مخاض بحال وجع الدم . ترفعت بقيت كنفكر كيفاش نتصرف. ؟ شنو نقول وشنو ندير وكفاش نتعامل … شفت كلينيك قدو قداش قدامي و عيسى نزل وبقيت انا جالسة كنفرد يدي مع بعضياتهم قلت ليه الى كانت ختك لداخل سيفطها ليا ندخل معاها

قالي واخا انا غنشوف ومشا دخل للكلينيك بقيت جالسة على اعصابي. كل شوية نهبط المرايا قدامي نشوف وجهي وجايا بالحناني باينةللعمى عروسة ، استغليت غيابه وجبدت الكحل كحلت عيني وقاديت راسي شوية وتدورت وجهي شفت ختو جايا جيهتي كانت لابسة عباية كحلة فخمة رمادية والصاك ديال ديور مربع فيدها والشال كحل واحد مدور على كتفها واخد طايح قدامها ونضاضر كوحل كيبان عليها الثراء فمشيتها ولباسها ومجوهرات يديها كانت هي نفسها اللي طلعات معانا حتى للدار ومشات ..مأدبة وراقية فتعاملها كتهضر بشوية حيت بيها كتشبه ليا وهادئة. داكشي علاش تفاهمت معاها ورتاحيت ليها ،. حليت الباب نزلت سلمت عليها من الوجه ابتسمت ليا وضحكت معاها بقيتا كنتبادلو. اطراف الخديث من بعد ماسولاتني كي بقيتا مور العرس وسولتها كي وصلتو. قاليت ليا هانتي كتشوفي .. الله يلطف وصافي

قلت ليها مافهمتش شنو وقع واش شي حاجة وقعات خايبة؟

بقات ساكتة كتشوف قدامها حسيت بيها مخبية شي حاجة وقلت ليها كنتسائل بعينيا على شنو وقع وقالت ليا باسف كتنهد برقة ولحسن حضي انني قارية كنحاوبها باش مابغات وتفاهمت معاها

قالت لي لبنى مرت عيسى طاحت هاد الصباح بكريز .. جبناها لهنا مسكينة تعتقات ولاكن طاح ليها النص الى شفتيها تبقا فيك

تاسفت واخا جاني هادشي اللي كنعيشو فشكل وجديد عليا كنت حاسة براسي غير انا اللي مرتو فاش كنا فالناضور ماحسيتش بيه كاع مزوج لاكن دابا كنحس بداكشي كامل بحال الحلم واخا يوماين اللي دوزنا مكاملاش لاكن ماحسيتش فيها بشي حاجة مختالفة لاكن دابا فاش كنسمع يسرى كتقول ليا مرت عيسى وهوا دخل كيجري بقيت بوحدي حسيت بالفرق لكبير وحسيت بنبضي تقاس وانوثتي تقاست بالرغم من انني لا اكن له مشاعر حب او اهتمام لاكني كزوجة حسيت بخدش فصدري وانصهرت من بعد ما كنت كنحس براسي معززة وعندي قيمة فديك الدار وكنت اميرة فالعرس كولشي داير ليا كي لما لقليل .

قلت ليسرى شنو السبب اللي خلاها طيح بكريز

سكتت مطولا شاردة قدامها وقالت ليا اجي ندخلو لداخل

سديت الطموبيل من المفتاح اللي خلا ليا عيسى ومشيت معاها قلت ليها واش عامرة الدنيا لداخل

قالت ليا بعفوية لالا ماشي بزاف .. ولاكن كاينة مريم ..رجاء مرتو الثانية لداخل

حسيت بيها من كلامها كتبنهني باش نكون على علم وانستعد باللقاء ديالي الاول معاهم وبلعت ريقي داخلة وانا عارفة راسي ماعندي لا تجربة ولا خبرة ولا حتى حاجة اي حاجة كنبغي نديرها مكنعرفهاش واش صح ولا غلط ولفت كنمشي بارشادات بابا وغير خطاني تقطع بيا الحبل وتلفت ووكلت امري لله ومشيت

قول تعوذ برب الفلق من شر ما خلق و من شر غاسق اذا وقب ومن شر النفاتات في العقد ومن شر حاسد ادا حسد. ..

بقيت كنكرر الموعدات ومركزك معاهم باش ننسا تركيزي مع الناس حتى وصلنا لواحد البيت فداك الكلينيك الصامت الهادئ لقينا الباب محلول وصوت الهضرة منخفضة لداخل قالت ليا يسرى خرجوها من الانعاش وحنى وصلنا معطلين مع العشية ..دخلات قدامي يسرى ودخلت موراها كنقرا المعودات ماعرفت واش نسلم ولا منسلمش ولا شنو ندير لقيت مو تما هي اللولة سلمت عليها ورتاحيت نسبيا قالت ليا على سلامتكم ابنتي .. قلت ليها الله يسلمك ولقيت حداها مرى اخرى طويلة وزوينة حروفها كوحل بيضاء البشرة عينيها عسلية دايرة حجاب بشدة تركية كانت لابسة سروال الترب كحل طويل وقميجة كحلة وجيلي كحل من توب اخر طويل ومسدود من لقدام وصباط عالي ومتولة شافت فيا وحلات عينيها كانها تصدمات من شوفتي وهبطات عينيها حسيت بيها تقدر تكون رجاء ومجرد شك انها تقدر تكون مرتو خلاني نحس بالغيرة منها واخا ماعندي لا اناقة ولا جمال فهادالزواج لاكنني كنبغي راسي مكنبغيش شي وتحد يكون معايا فنفس النيفو ديالي وكنبغي نكون الافضل وغيرتي منها كغيرة أمرأة من امرأة ومتأكدة غتكون ختى هي حسات بنفس الشعور او اكثر حيت انا اللي جيت عليها ضرة شركتها فحياتها واخا هي اصلا مشروكة لاكن الجرح تجدد . سلمت عليها درت الواجب وابتسمت ليا نصف ابتسامة وخرجات لبرا وكان حداها شاب طويل مديت ليه يدي بارتباك سلمت عليه وداز سلامي كامل ارتباك وتلفت لقيت عيسى جالس فوق الكرسي عاقد حجبانو وقفت ليه الحركة كان غيتكى على يدو وحبس بقا كيشوف فيا وحول عينو كيشوف قدامو وانا دايخة مشيت بالادب عند المرى الاولى كانت ناعسة فوق الفراش عينيها داخلين وواحد العين بحال الى دايبة مكتحلش وحنكها ذايب ونص فمها حتى هوا كذلك عوج ويدها قدامها مكتحركهاش لاكن كانت كتبان زوينة غير ملامح وجهها تخربقو مابقاوشًً واضحين .. قلت لبها مايكون عندك باس وميلات راسها جنب كتنين ومها واقيلا هاديك اللي كدور بيها وكترتب على كتفها قالت ليا مامشا معاك باس

رجعت اللور وقفت حدا يسرى وعكوزتي فصمت وهما كيهضرو على حالتها وعلى الترويض اللي قاليها الطبيب خصها ديرو. .. بقات كتنين وعيسى جالس كيشوف فيها كانت نضرته كتمشل الخدة والاسف مابغاش داكشي اللي وقع ليها وناض عندها شد ليها فيدها قاليها غتبراي مغتبقايش هاكا اي واحد ممكن يوقع ليه هادشي وكيرجع كي كان .. صافي ماتزيديش تكملي على راسك

سدات عينها بدات كضرب بواحد اليد على فخدها وتبكي بقات فيا مانتمناش ديك الحالة لعدويا وكدور كتشوف فيا وعيسى كيشد ليها يدها باش تلعن الشيطان ومسح على كتافها كيهدئها بقيت كنشوف فيه فصمت حتى دخلات المرأة لاخرى قالت ليه بشوية ..

عيسى ..

وشارت ليه براسها بغاتو يخرج معاها وخرج تبعها حسيت براسي منبودة تما بقيت غير كنشوف وقلت لعكوزتيًمايكون عندها باس وبغيت نخرج. قالت ليا فين غادية ؟ قلت ليها بغيت غير نطمن عليها وصافي غنمشي للطموبيل

قالت ليا يالاه تمشي معايا للدار ترتاحي شي شويش.

حركت ليها راسي بالايجاب وخرجت معاها انا ويسرى عادين غالمرر شفت عيسى واقف كيهضر مع لاخرى ومو كتسول عليه قالت ليه راه مع رجاء لهيه

شارت ليه بيدها شافو فينا وقرب منا هوا ورجاء كانت كتشوف فيا بنص عين وتعبرني وانا عرفتها حيت حتى انا كنشوف فيها بنص عين ونعبرها .. قالت ليه مو سارة غتمشي معايا نتا دابا مشطون مع لبنى

حرك ليها راسو بالايجاب ودار يديه فحيبو كيخزر فيا ويالاه زدت خطوة نمشي معاهم قالي تسنايًً بلاتي ووقفت ماغهمتش شنو بغا اصلا حسيت براسي ماشي منهم وبعيدة عليهم قال لمو سبقيني للطموبيل ومشاو ورجاء قالت ليه هانا فلاشومبر عند لبنى ومشات بقيت انا وياه جرني من دراعي حنززفيا مزيان مع حجبانو عاليين على العين شوية ومسحوبين وعامرين فتستسفة وحدة عقدهم الوسط واحد العقدة خلعاتني قالي داك السلام اللي سلمتي على الراجل فالبيت مزال غنتفاهمو عليه

شديت دراعي قصحني قلت ليه اشمن سلام ؟؟

قالي منين جبتي هاد السلام يديك شايطين؟

بقيت غير كنشوف فيه مافهمت والو علاش اصلا كيهضر معايا بهاد الطريقة بقا فيا الحال دغيا قلب وجهه بحال الى عمرو شافني ماهضر معايا حتى بحرف فاش. خلت بقا فقنت وانا فقنت وجا يفرغ فيا عصبيتو وغدايدو خلاني ساكتة مصدومة وقالي بحدة سيري وجمعي يدك عندك مادوزيش حدا شي راجل وفاش غنجي غنفهمك شنو اللي مافهمتيش

طلق مني حسيت بصدري تزير جاتني البكية وداني لواحد الرانج كحلة ديال يسرى كانت مو جالسة لقدام حداها و حل ليا الباب اللوراني بعصبية طلعت وزدحو ومشا بقات مو وختو كيشوفو فيه ساكتين مافهمو والو وانا كابتاها فحلقي وعيني كيشرشر بوحدهم بلا مندير الحس بقيت كنمسح ونعاود طول الطريق حتى وصلنا

وصلنا لواحد الفيلا كبيرة من الفيلات لقدام نزلت كنشوف غير الضبابة بالدموع وكنمسح باش مايعيق بيا حتى واحد لاكن يسرى انتبهت ليا قالت ليا مالكي

قلت ليها والو وكنخفي وجهي

قالت ليا كتبكي!!!

فيضات ليا الكاس بديك الكلمة وبديت كنبكي نزلو سخان وضارت عكوزتي عندي قالت لي علاش كتبكي واش شي واحد قلقك ؟؟

بقيت ساكتة غارقة فالبكى حتى الهضرة ماقدرتش نخرجها حتى بردت وقلت ليهم عيسى

قالت لي مو اللي كنعيط ليها خالتي ربيعة لسانها حتى هي بحال شيخي مكبل مكتخرجش حرف الراء مالو معاك ياك لاباس ؟؟ انا عرااافتو معصب عمل شي حاجة من ديك السدة اللي عمل للباب ومشا

قلت ليها على السلام ما السلام وقالت ليا يسرى كتنهد ويهدها على كتفي

قلتها مع راسي حتى انا عرفتو غيعلق عليه ويتعصب ولاكن عادي .. خطأ كيوقع دابا يبرد مايجي فين يرجع للدار حتى يكون برد

قالت لي عكوزتي ماعندو مايعمل نتينا دهشتي وصافي وسلمتي وصافي مغاتعاودش مرة اخرى فاش يجي انا نهضر معاه غير دخل ماتخافش

مشيت معاهم كنمسح عينيا قالت ليا يسرى كاملين هاكاك احبيبة رجال ديالنا طبعهم صعيب فاش غتعرفيه مغيبقاوشً هاد المشاكيل بيناتكم

لزمت الصمت ودخلت كانت فيلا كبيرة لقيت خوه اللي مشا معانا حتى للدار نهار العرس تما كان خارج مع الباب وقف لينا حتى هوا مكيسلمش ابتسم لي رحب بيا وقالي على سلامتكم ومشا خرج لقيت الدار خاوية مافيها حتى واحد. جلست دارو كاسكروط بالمالح على حسابي وضايفوني وماخلاونيشً بوحدي. حسيت براسي وسط عاىلتي رتاحيت ليهم ونسيت الهم وعطاوني غرفة نوم نرتاح فيها من تعب السفر وقلت ليسرى تعيط ليه تقول ليه يجيب ليا باليزتي بقات عندو فطموبيل وعيطات ليه عرفاتني غضبانة منو مارضيتش يغوت عليا . قطعات معاه قالت ليا راه غيجيبها مشا يشوف ولدو وغيجي

حركت راسي بالايجاب وجلست ضيفة معاهم حتى للعشا دخل شيخي لقاني جالسة وسط الدار وبدا يرحب بيا نضت سلمت عليه قالي نهار كبير هاادا .. بنت الحاج علي عندنا فالدار .. نهار معتبر .. باك راه عزييز علينا هااه .. صديق عزييز علينا وكنحبوه

بقيت كنضحك وترتب على كتفي قاليهم فين عيسى باقي فلوبيتال ؟؟

قالو ليه اه باقي

قاليهم كيبقات لبنى مسكينة شوية ؟؟. مسمحليشي الوقت نمشي نشوفها والزيارة سالات غدا ان شاء الله نمشي نشوفها .. اايييه لبنى مسكينة .. عزييزة عليا شووف شنو وقع ليها .. مكترخفش على راسها ها النتيجة

بقيت ساكتة وهوا كيضهر حدايا وبغار يحطو العشا وعيطات مو لعيسى تشوف فين وصلو وقطعات قالت لواحد السيدة خداة فالدار هي ووحدة اخرى

صافي غير حطو العشا .. شافت فينا قالت لينا غيتعطل قالك غير تعشاو

قال شيخي وهوا متكي مرتاح : عيطت لو نسول فيه قاليه مشا يشوف ساجد .. غيتعشا عند رجاء. ااااه .. مسكين ساحد توحشو غيلسق فيه ولا يجيبو معاه مايطلقش منو دابا

بقيت غير كنسمع فصمت حسيت بواحد الجمرة كانت طافية فصدري رشعلات وشيخي كيهضر على نيتو كيتعاود. .. داكشي. اللي كان نيت تعشينا وطلعت للبيت سديت عليا حيدت الجلابة بقيت بقميص شفاف شوية نعست فيه وطلقت شعري على راحته عاد جا حل الباب ودخل ليا الباليزة معاه وسدها

دخل حط ليا باليزتي وضرت عطيتو بالضهر وطلعت عليا الغطا ماكرهتش نوض نلبس شي بيجامة لاكن بقا ليا فالبيت كيدور وانا ملابساش الحوايج غير واحد طرف ديال توب شورط شبكة باليباردور وعليهم قميص الجلابة شفاف كيبين درت بناقص كاع وماحملتش نشوفو ولا يتسد علينا باب واحد بقات ديك الهضرة ديالو كطلع فيا وتهبط

سمعتو عيط ليا. سارة وماضرتش بقيت قالبة وجهي وعاود عيط ليا وضار جيهتي وقف داير يدو فجيبو كيحل صدايف القميجة علد صدرو قلت ليه فخاطري غير خبي ديك الغابة بلا متوريها ليا جاي حدايا وكتحيد القميجة كتوريني اكره حاجة فحياتي وكن غير كنتي ملس ندوزك بجغمة دالماء

قالي شنو زعما قال ليك راسك مطولة يدك على الراجل كتسلمي عليه قدامي وقدام كولشي ماعلموكش تجمعي يدك

خليتو ضرت للجهة لاخرى عاوتاني طلعت عليا الغطا وكنغلي من لداخل مارضييتش واصلا كرهت راسي اللي سلمت على داك خيينا وبلا منقصد غير تورترت ومديت يدي .. ماكرهتش نوض ليه نعطيه واحد جوج كلمات نسكتو نطيح من رجولتو كما يقلل مني .. هي كلمة وحدة صادقة نعطيها ليه غادي يدخل جواه مايهزش راسو مرة اخرى لاكن ماعنديش الجرأة الكافية حيت ديك الكلمة ساهلة تقال لاكن وزنها تقيل غتجبد ليا مشاكل قد الجبل وانا اللي غنغرق فيها .

رجع بخطوات بطيئة جهة المرايا وقف كيشوف فراسو شفت فيه بنص عين لقيتو كيشوف فيا من المرأة وكيحيد حوايجو قالي بواحد البرود مسطنع كيشوف فيا من فوقً مناخرو

.ااخر مرة ديريها .. سمعتي .. هانت علمتك

وحط صبعو على ودنو كيدرني ومشا للباليزة جمع واحد التنهيدة كيستغفر الله كانني زعما شيطان جالس يستغفر مني !! غطيت وجهي حتى سمعتو دخل للطواليط كانت فواحد القنت فالبيت ومشيت بالزربة جبدت بيجامتي جبت وحدة كحلة بالسروال لبستها كي البرق خرج كان لابس سروال محموع من لتحت سورفيت رطب بالسيور من الحزام حكل وصدرو عريان عليا لقاني كنجمع الخوايج اللي حيدت وجبدت واحد المقبط كنزدح فداكشي بالنفخة جمعت شعري هزيت لاتروس بغيت نمشي لواحد الحمام على برا ويالاه جيت نخرج وقف كان غيبدا الصلاة داير عليه فوقية بيضاء حتى للارض مطلع حاجبو قالي فين غادية بشعرك عريان وديك البيجامة قصيرة بحال هاكاك

قلت ليه للطواليط وحليت لباب نخرج قالي ها الطواليط هادي ماعجباتكش

قلت ليه مابغيتش ندخل ليها

قالي سدي الباب

وشار ليا بحاجبو بصرامة وكبر بدا الصلاة بقيت واقفة بلاصتي مقجوجة بغيت نفرغ غضبي وكربتي وماخلانيش .. سديت الباب ومشيت للطواليط سديت عليا وبقيت كنبكي تما بوحدي بغيت نهضر مع يونس ماقدرتش بغيت نشكي عليه ونقول ليه توحشتك ونعاود ليه شنو كيوقع ليا لاكن اكتفيت بالمساجات وصافي جلست فوق لاشاص طالقة الماء وشعلت تيليفون كنهضر معاه تأكدت انني طال الزمان ولا قصار غادي نرجع عند بابا وماغنطولشً بزاف فهاد الزواج اللي بالنسبة ليا انا ماشي زواج ماعندي غلاش نصبر .. هاالضراير ها الراجل اللي كنت كنحاول نتعايش معاه ضرب كولشي فالزيرو وليت كنكرهه ومابقيتش باغا حتى نتلاقاه ونشوفو وصابرة وفوق نفسي .. عاودت هادشي كامل ليونس قالي بغيت نشوفك .. لغيت نجلس معتك ونهضرو. قلت ليه راني ففاس ماشي فالناضور

قالي نتسناك تجي ونتلاقاو نهضرو انا براسي مريض من نهار تزوجتي وبغات لواليدة تزوجني مابغيتش وماعمرني مانساك

دمعو عيني حنيت ليه وتوحشتو بقا كيهضر معايا كيقولً ليا لكبيدة لحبيبة ديالي رجع ليا الضحكة لوجهي وكيفكرني فالايام اللي دورت انا وياه واخا عمره حط عليا يدو .. كانت علاقتنا زوينة بزاف كنا الى تفارقنا سيمانة كنرجعو نقلبو على بعضياتنا وفالعطل عمرنا نعسنا بلا منهضرو ابيل فيدو فالسكايب . رتاحيت نسبيا نسييت راسي بقيت جالسة شي نص ساعة حتى سمعت الدقان تفكرت عيسى .. عيط ليا سارة

هزيت راسي على تيليفون قلت ليه نعام ؟

قالي ياك لاباس ؟؟ تعطلتي لداخل

رديت بنرفزة قلت ليه ماماليش

قالي خرجي من تما نعلي الشيطان مامزيانش تجلسي فالطواليط

هبطت راسي بإكراه قلت ليه فهاطري ديها فراسك ماشي نتا اللي غتوريني اللي مزيان من اللي مازيانش! كتبت ليونس مسج قلت ليه غادي نطفي تيليفون فاش نرجع للناضور انا غادي نعلمك

قالي ماتعصبيش راسك الحبيبة ديالي راه كنتعصب معاك .. بلا ماديريًالمشاكل خلي نفكو هاد لحريرة بلا صدع

ابتسمت وسديت معاه رتاحيت نسبيا وطفيت تيليفون ونضت طرفت حالتي وبدلت عليا وغسلت وجهي بداك الغاسول دشانيل حسيت بالراحة ورشيت الريحة باش كنعس ومشطت شعري وبديت ندور بحالتي شوية باش نطلع لمورال لراسي ونحس بالراحة ونشوف راسي زوينة اما الباقي لهلا يقلب .

وقفت قدام المرايا كنت لابسة بيجامة كحلة قصيرة بالصدايف والكول وسروالها جاتني زوينة واخا مزيرة عليا شوية صدري كايبان ابيض وسناسل فعنقي ديال الذهب شي رقيق شي غليض طايح على صدري من لداخل .. طلقت شعري وضرت كنشوف راسي عجبني اللي لبستها كتجي معايا ومقادة فيا كولشي مقاد كنشوف راسي زوينة كتزيدني التقة فالنفس ونفسي كترضى وكنت هاكا فدار بابا كنطلع لمورال لراسي ديما مكنتسناش شي واحد يطلعو ليا وكنفوج على راسي واخا عايشة وسط الظغوطات والتسلط والحكام لاكن كنشبع شهواتي فدارنا حسب المستطاع .

خرجت لقيتو متكي حدايا شاد تيليفون فيدو والصدر عريان !! لا كملات داكشي اللي بقا انا وحشمت نشوف فيه وهوا ماحشم ماستحيا .. انا وكنحشم نبين المفاتن ديالي وكنوقر ديك الجبهة وداك الموسطاش وديك اليد البيضاءًبالوضوءً وكنخبي راسي حتى كندخل فالفراش وسديت الصدفة دالبيجام زيرتها على صدري واخا خنقاتني قلت حتى نتغطا !!ًوهوا عاجبو راسو مشتت عليا ماقدرتش نعس ولا نقرب لبلاصتي مابغيتش نشوف صدرو ولا نشوف داك الشعر واخا كاين ماكفس منو شعرهم كتيف بزاف ومشوك واقف ولا مكردد .. كنشوفهم فشي تلفازة ولا فتيليفون كتجيني تقية كنبغي نرد .. اما هوا شوية ولاكن لالالا يكون زغب رطب ولا ناعسً ولا فايق ولا متول ولا مشتت كنكره بشتى انواعه .. تخيلت كن كان من هادوك اللي واصل ليهم حتى للكتاف ولا الضهر ومشوك !!!! ناري. كن هربت نطلق من نهار الاول والله مانزيد عندو قسم يكون كما بغا يكون .. تنهدت بلعت ريقي وهز عينو فيا قاليا ماشي مزيان تبقاي تجلسي فطواليط بوحدك بزاف

قليت عيني قلت ليه فخاطري جمع غير راسك راك عيفتيني راك مازوينش الى عيالاتو كيموتو عليك ولا عاطي للعين انا راه عطيتيني المعدة زويتيني عييت ندوزك بجغمة دالماء مابغيتي دوز ليا غير مازدت كرهتك

دزت قدامو بقا متبع ليا عينيو من تحت لتحت ومشيت دخلت فالفراش عطيتو بالضهر قلت الى مشا حتى حط عليا صبعو غادي ندمو .. حليت العقدة على صدري تنفست وطلعت عليا الغطا سمعتو قالي

ماتعطينيش بضهرك

بقيت كنشوف قدامي وتلفت قلت ليه هاكا مرتاحة

حط تيليفون حداه وقالي بهدوء اتا حداك ونتي عاطاني بالضهر !

بقيت غير كنشوف فيه ونشوف فداك الصدر ودورت وجهي خليتو وبقيت عاطاه بالضهر شميت فيه ريحة الشمبوان فشعرو وسمعت تيليفونو كيصوني وهوا كيقطع زدت توثرت وسمعتو ورايا كيهضر بصرامة كيقول .

ماتعطيهش تيليفون ليدو لحداش ونص هادي وهوا مزال منعس باقي كيلعب فتيليفون …. حيديه ليه لا مكاينش مابغاش وقت النعاس هدا ماشي وقت اللعب

قطع سمعتو لاح تيليفون حدا راسو تقرقب وطفا الضوء. هبط فالفراش حسيت بيه حط يدو على خصري عنقني تقل عليا حسيت بتفسي تقطع وكحزت للطرف قالي

زوينة الريحة اللي دايرة

مجاوبتوش جاتني واحد الخلعة حسيت بالقشعريرة عمر شي راجل قرب ليا واخا دوزت مع يونس ثلت سنين كانت علاقة محتارمة ماسمحتش ليه يتجاوز الحدود دياله معايا وكنت ديما كنقول مع راسي واش يقدر شي راجل يحرك ليا مشاعري من غير يونس شي نهار الى ماتزوجناش !! واش يقدر شي راجل من غيرو يحرك فيا غرائزي .. حسيت بدغدغة فجسدي كله وتهربت متمردة على جسدي كنحاول نستوعب هاد التقارب بيني وبينه وكنعيش لأول احاسيس جديدة عليا وكيدخلو لعقلي افكار اخرى خلاوني كنصل بخط بين الاحداث والاحاسيس وخايفة يكون ربطي هاذا غير صحيح او اخطات الربط .

هز يدو على شعري مررها كانت كتشبه يد الاب الحنونة لاكن هاد اللمسة جديدة عليا كانو من لمسو شعري او اقتربو مني معدودين على رؤوس الاصاعب ، فقط اخواتتي وامي وابي الحنون كنت كنحس بالدفىء والحنان فديك اللمسة كما حسيت بيها الآن لاكن زايدة شي حاجة .. خلاتني نبغي شعري ويعجبني ونبغي راسي ونبغي كل حاجة فيا .. رديت شعري قدامي فصمت وسمعتو قال حدا ودني ويديه عليا مقلقة مني ؟؟

هزيت كتفي حدا ودني كنهرب من وشوشاته و حطيت يدي على كتفي كنخبي راسي فصمت حسيت بهزة فصدري فاش قالي مقلقة مني فيق فيا سارة الطفلة اللي كتغضب وتبغي اللي يحزرها وتقولي انا مقلقة منك ومجروحة بغيتك تراضيني وتجبر بخاطري ونتمرد باش تلم كسوري مع كل مرة كنشوف فيها تكرار المحاولات ماشي نرضى بسهولة .. تنهدت حليت عيني خرجت من بين افكاري تفكرت انني مع راجل اصلا مكنبغيهش لاكن كنحتارمه او يمكن فارض عليا الاحترام .. كنت كنقول الى حط عليا يديه غادي ندمه لاكن فاش وقعات بصح ماقدرتش نوقف فوجهه وجها لوجه او نصرخ حيت من طبعي مكنرفعش صوتي وهادىة وكنبغي غير اللي يفهمني ومايديرش ليا الضجيج حدا راسي ويشوش عليا .

قرب وجهه حدا وجهي قالي ضوري غير نهضر معاك قلت ليك لا مابغيتش نهضر

تنهد قالي داكشي اللي درتي الصباح ماعجبنيش .. نتي عارفاني انا اللي راجل مكنسلمش مكندمش يدي للعيالات ونتي اللي مرى عطيتي يدك لراجل علاش عطيتيه يدك ؟

شفت فيه بنص عين حسيت بيها كطلع وتهبط فيه وأخا كيهضر ر باللتي هي احسن حسيت بيها مالغاش تبرد ليه ، قلت ليه انا دخت ماعرفتش شنو ندير مكنعرف حتى واحد سلمت على كولشي.

قالي اييواا لاا ! هانتي صافحتي واحد جاتو من الجنة والناس يقيس يدك شكون بحالك .. نتي كتقولي انا غير سلمتك ولاكن واحد اخر راه كيقلب يشم غير ريحتك نتي عارفة شنو فعقل بنادم ؟؟ عطيتي يدك كادو شد فيها علاش نتي معارفاش الشدة فاليد شنو كدير ؟

بقيت غير كنشوف فيه قلت ليه شنو غدير ؟.

سكت بقا غير كيشوف فيا عقد حجبانو قالي ماتعاوديش تعطي يدك لشي راجل ولا توقفي قريبة من شي واحد .. احسن كن درتي الخمار غطيتي وجهك ماتسخري والو

هزيت حاجبي قلت ليه لا انا شرطتها عليك النهار الاول قلت ليك مانديروش. ونتا قبلتي

بقا كيشوف فيا عيني حدا عينيه متكي عليا قالي وشنو اللي ماعجبكش فيه ؟. احسن مايبقاو الرجال مخرجين فعينيهم ومع العيالات لبسي اللي عجبك

دورت وجهي قلت ليه لا منقدرش انا الحجاب درتو بزز

قالي مزيان اللي فكرتيني بعدا شعرك علاش كتخليه يبان من القدام شنو معناتها ؟

قلت ليه مامقتانعاش بيه انا غير ساترة راسي.

بقا غير كيشوف فيا قالي الله يهديك .. الله يهديك. ونعلي الشيطان راك بعقلك وحشومة تقولي بحال هاد الهضرة

تفكرت نفس الجملة اللي قال ليا نهار رسلت ليه المسج وقلت ليه مللي حشومة علاش جيتي طلبتيني من عند بابا

مافهمش قصدي قالي وشنو دخل هادي فهاديك

قلت ليه مانعرف خليني نعس

زير عليا بيديه على جنابي ماخلانيش نضور وقالي حنا غير كنتناقشو علاش تقلقتي

قلت ليه نتا جريتيني من يدي قدام الناس وبغيتيني نفرح حتى خالتي ويسرى عاقو بيك .. اول مرة نجي لهاد الدار جيت بتفو خزيت

قالي ماقلت ليك والو علاش كنتي كتبكي شنو قلت ليك كاع ؟

قلت ليه بتقة فالنفس مابكيتش علاش غنبكي

طأطأ راسو بقا ساكت وقرب بغا يعنقني مابغيتش نخليه ختى سمحي ليا ماقدرش يقولها ولا مارضاش بغا يحضني حرمتها عليه ومارضاش حسيت بنبضه تقاس حتى هوا كما قاسو ليا وبقا غير كيشوف فجنابو حيدت ليه يدو وهوا كيشوف فيا وعطيتو بضهري طلعت الغطا على وجهي حشيت بيه بقا فبلاصته كما هوا عاد تحرك ناض لبس تيشورط وحل الباب خرج

رتاحيت فاش خرج فاش خرجت ونعست في امان الله وفقت في امان الله ماعرفتش فين بات ماباتش حدايا وماحسيتشً بيه بالليل ومابغيتش نقابلو من بعد الحوار ديالنا كنت جريئة لاكن هوا طأطأ ليا راسو باش قدرت نعطي رأيي كن بقا صارم ماكنتش نقدر نهضر ونبقا قاجة راسي. فطرت مع العاىلة ماسولتشً عليه جلست بحال الضيفة وهوا مابانش لا فالفطور لا فالغدا حتى الجوج عاد عيط ليا فتيليفون مابغيتش نجاوبو فالمرة الاولى وعاود صونا جاوبتو قالي واش خصك شي حاجة ؟

قلت ليه ماخصني والو الحمد لله

قالي فلعشية غنجي

بقيت ساكتة ماعرفتش علاش كيقولها ليا

قالي واش ماناقصك والو قلت ليه لا كيف بقات لبنى

قالي الحمد لله على لطف الله خرجناها ليوم مشات للدار

قلت ليه على سلامتها مايكون عندها باس

قالي شكرا تهلاي فراسك وقطع دوزت نهار مع مو اما يسرى مكتجلسش فالدار كل مرة داخلة خارجة حتى دازت المغرب وبغا شيخي وعكوزتي يمشيو يشوفو لبنى فدارها وشفت راسي غنبقا بوحدي فالدار كن كانت غتبقا يسرى بعدا كانت غدوز اما نبقا غير انا مجاتش ماشي قاتلة ليا روح نجلس والى جا شي راجل للدار وانا فيها بوحدي واخا معايا الخدامات. خايبة فحقي . لبست جلابتي اللي جيت بيها وشالي وبلغتي ماجبتش ماع حوايج الخروج والزيارات درت بحساب حوايج المبيت وحتى حوايجي بقاو فدارنا كملت الثلا ايام ففاس .. درت شالي كما موالفة نديرو خليت واحد البزقة كطل من القدام وتريحت وهزيت صاكي مشيت مع شيخي وعكوزتي فطموبيل لدار لبنى كانت وسط المدينة فعمارات كبار بالاسانسور طلعنا حلو لينا الباب كانت الدار كبيرة اتاتها تقيل مصري والجبص والديكور تقيل والخشب تاويل العيالات لكبارات زعما ، لقينا الناس عندها جاو يشوفوها سلمت وجلست حدا فكوزتي عاد عرفت انهم دايرين الصدقة والرجال فدار اخرى مقايلة معانا كيقراو القرآن وتريتور والماكلة ماحسابش ليا كاينة الصداقة .. دخلات رجاء. لابسة الجلابة متولة بالتحتية والصباط والصاك والشدة تركية خاطة مكياج خفيف مامعيقش وفيدها ولد صغير شفتو تفكرت الولد اللي شدني من التكشيطة قلت واش هوا هادا !! ولاهيلا هوا !!! تصدمت يعني ولد عيسى وشكون ديك المرى اللي كانت شاداه عندها تكون ختها ؟؟؟ وييلي ياكما هضرت مع ختها !!!

جات سلمات على الناس وعليا وجلسات بعيدة شادة ولدها وانا كنخمم ونفكر والعيالات كيشوفو فيا بنص عين .. بغيت نمشي طواليطرناضت معايا عكوزتي داتني ليها وفاش خرجت جيت راجعة مع الكولوار كانت واحد الطاولة تما عليها الديكورات لمحت التصاور فوق منها شفت واحد الصورة ديال ديك المرى اللي هضرت معاها فالعرس بالحجاب مصورة هي وعيسى معنقاه كضحك !! درت يدي على فمي وليت صفرا ركابيا فشلو قلت اوييلي ياكما مرتو !! هي !! هي نيت اللي راه طايح ليها النص وناعسة فالبيت !!

يتبع...