ألف مبروك الجزء الثامن

دخت وتلفت مابقيت عارفة شنو كايدوز قدامي .. مرة يبانو ليا مزيانين مرة لفعات مابقيتش فاهمة شنو كيوقع !! لاكن اللي فاهمة هوا ان الضرايرات عمرهم يبغيو ليا الخير مهما يكن.. رجاء اللي خاصمتها مع عيسى صدقت انا نيت اللي مصالحاها معاه!! ايوا خصني العصا وهادي دير ليا لعقل نعطيهم التيساع مانعاودش ندور بيهم حيت مساكناش حداهم وماعارفاش شنو كيطرا كاع .

دوزت الصدقة والتقوليبة ديال رجاء كطلع وتهبط فيا وعييت نكمدها مابغاتش تتكمد ليا حتى شديت الطريق راجعة بحالي وبعدت على المدينة البي جامعاهم عاد بردت .. وحتى مع الخدمة والحركة نسيتهم عليا وجيت مباشرة مع الكونكور اللي كنت كنتسنا وبديت نوجد ليه ووقتي كامل كندوزر فالتحضير لهاد لكونكور . شيخي الحمد لله على سلامتو رجع لاباس وعيسى بحال العادة كيجي فالويكاند والصراعات اليومية والروتين نفسه ونهار على نهار كنقرب الكونكور وخاصني نصارح عيسى حيت مابقيت قادرة عل مشاكل ولا صدع معاه وداك الغضيب كنكرهه ومكنحملش داك الجو المكهرب، وصل الويكاند والزوج المصون غادي يجي عندنا .. بحال اي مر كايكون راجلها مسافر ولا خدام فبلاصة بعيدة مكتشوفو ماكيشوفها فاش كيقرب يجي كتنوض تديها فحالتها .. نضت دوشت قاديت الحالة لبست حوايج جداد ومجوهراتي الخفيفة اليومية وعطرت البيت ورجدت جو هغدئ ومريح ورمنسي وحتى التقدية تقدات ليا زينب اللي كتعاوني فالدار ودرنا العشا انا وياها وغطيناه ، ضربات التسعود ديال الليل نعسات ليا جنة ومشيت حطيتها فبلاصتها وجيت خارجة مع الكولوار وصادفتو داخل مع الباب والسوارت فيدو .. تبسمت ليه لاكن ماضحكش وقالي ببرودة والعيا باين على وجهه . السلام عليكم

مشيت نعنقو ورد ليا التعنيقة بيد وحدة وطبطب على ضهري زعما راضي على عليا لاكن ماكيتجاوبش معايا بحال العادة .. جاني هاد التعامل الجديد غريب عليا ومامولفش يديرها ومولف يعنقني ويبوسني فالباب قبل مايفوت العتبة وكيتم داخل ومعنقني !! لاكن هاد المرة جاتني المجية ديالو على غير عادتها . سولتو مالو ياكما مريض. قالي عيان شوية ودخل حط السوارت وتكا على واحد الكنبة كيسوط ويدو على جبهتو. . سولني على جنة قلت ليه نعسات غير دابا وقالي عطيني نشرب .. عطيتو شرب وناض نيشان مشا توضا ودخل للبيت صلى ورجع جلس بقا كيسولني على دارنا واحوالنا واحوالي مع الخدمة .. بقيت كنعاود ليه ودخلت فالموضوع قلت ليه دفعت لواحد الكونكور وبغيت نشرح ليه لاكن الى قاطعني وقالي خلي لمن بعد راسي كيضرني باغي غير ننعس .. سكت وخليتو ونضت حطيت لعشا ورجعت مالقيتوش حتى بان ليا خارج من بيت جنة ومشا جلس تعشا ودخل للبيت طلق سورة البقرة وتكا على ضهرو ويدو على جبهته .. مشيت نعست حداه ومابغاش يديني النعاس بقيت كنتقلب من جهة لجهة .. ناض هز تيليفون وخرج من البيت ووتبعتو جاني الفضول نعرف معامن غيهضر فهاد الوقت وهوا اصلا عيان ومافيه اللي يهضر .. طليت بالتخبية من الريدو على البالكون ديال وسط الدار وانا نسمعو كيقول .. البنى الله يهديك نعلي الشيطان ..

طلعات ليا السخانة فاش سمعت لبنى ودخلت عليه وهوا شاد تيليفون .. ضار عندي قلت ليه معامن كتهضر ؟؟

شار ليا بيدو نتسنى وتلفت كيقول ليها واخا .. واخا انا غنعيط ليك من بعد يالاه بسلامة

ربعت يدي خليتو حتى قطع وقلت ليه انا مافيك اللي هضر معايا ولايسمع ليا ولبنى عندك ليها الوقت .. تهضر معاها مع الصباح مع الليل لا وماكفاكش هاد السيمانة كلها اللي نتا حداها زايدها حتى بهاد الويكاند المنحوس اللي كنبغي انا نرتاح فيه كتجي غير باش تنكدعا عليا .. ديك الساعة بقا معاها تما وطلقر عليا شي كدبة احسن من هاد الحالة .. شكون بزز عليك تجي

بقا ساكت غير كيشوف فيا وهز يديه قالي لا حولة ولا قوة الا بالله العلي العضيم .. وزاد خلاني واقفة وما ينعس ! بغيت ناكل جنابي ومشيت حدا بنتي نعست وتغطيت وبقيت شحال شفت الحس مقطوع ونضت رجعت للبيت حليت الباب قلت ليه بنااقص كااع من هاد الويكاند ها البيت ربح بيه وعنداك تجي تحزرني ولا تبعني

زدحت الباب خليتو فبلاصتو بقا كيشوف فيا ومشيت رجعت للبيت جاتني واحد البكية مع الفقصة خرجتها فصمت وتسنيتو يجي يحزرني لاكن ماداهاش فيا وزدت تعصبت وكمدتها ونعست .

الصباح مافقتش للفطور وماوجدتوش .. درت غير لبنتي فطورها وجلست كنوكلها فالبيت ديالهها حت دخل علينا كيضحك قصدها نيشان هزها فالسما وبدا يبوس فيها .. اما انا خليتو وخرجت مشيت جمعت ليها حوايجها ولبست حوايجي وخرجت قلت ليه غنمشي نتغدا فدارنا وندوز معاهم النهار

رد عليا وهوا مع جنة قالي غنمشيو كاملين وناض عيط لبابا علمو ولبس حوايجو وصدقنا غاديين بلا عراضة هاجمين على ماما .. فرحو بينا واستقبلوه بخال العادة وكبرو بيه وجلس العشية كلها مع بابا ومشاو صلاو بجوج فالجامع. ومن تما دازو للقهوى بقاو جالسين شحال عاد رجعو لقاونا موجدين كاسكروط. كلينا مجموعين وسبقني عيسى للطموبيل. هاز جنة وانا موراه .. وقفني بابا وشدني نن يدي وجمع صبعانو الخمسة وقالي

غير بشوية وبالهداوة راه الصدع مكيحلش المشاكل..

قلت ليه مادرت والو اصلا والله مادرت شي حاجة

سولاتنا ماما قالت لينا مالكم

قال ليا بابا انا غير كنقول ليك ..ًراك تربية يدي. وكيتبدل ليك المزاج فدقيقة ونص .. سايس سايس باللتي هي احسن وماتحكيش بزاف .. وخلي الحياة تستمر الله يرضي عليك

بقيت ساكتة مالقيت منقول ومشيت ركبت حداه بقا كيدور بيا فالطموبيل فصمت وقف بينا قدام واحد المطعم نزلنا تعشينا فيه وشربنا قهوة وبقينا ساكتين . شفتو كيتامل فيا وانا قالبة وجهي وكنتسنا يهضر .. حل فمو قلت غادي يقول شي كلمة لاكن ماهضرش وتنهد هز تيليفون كيشوف فيه ويدو على فكو حتى طلع ليا الدم وقلت ليه عييت بغيت نرجع بحالي وحتى البنت نعسات ليا فيدي

حرك راسو وعثنو فتيليفون قالي هاحنا غنمشيو غير تسناي شوية

سكت وحط تيليفون وتنهد قالي مغنجيش السيمانة الجاية.. غنسافر شي يامات على برا

حركت ليه راسي ببرودة وماسولتوش واخا جاني فضول نعرف معامن واش مع شي وحدة ولا معامن

قالي غتمشي معايا لبنى .. عيانة شوية هادشي علاش غنسافرو

حركت ليه راسي قلت ليه مزيان مافيها باس تديها تفج شوية .. انا مسامحة ليك فديك التسافيرة اللي كنتي غدير ليا غير عطيها للبنى ولا رجاء هما مساكن ستاحقوها اكثر مني

سكت بقا كيحنزز فيا وقالي مالكي ديما مزروبة ؟؟ علاش كتسبقي العيب واش قلت ليك مغاديش نديك؟. مانسافروش ؟. كنا غنسافرو ولاكن دابا حكمات علينا الاقدار وجات ضروف بدلات كولشي ..

قلت ليه شنو هي هاد الضروف هادي واش ماشي مراتك؟ واش انا برانية ؟ علاش مخليني فالجنب مكتعاودش ليا ومكنعرف عليك حتى حاجة ؟

حط صبعو على صدرو قالي شي حاجة كتخصني انا بوحدي راكي كتعرفيها .. بغيتي نهز اي حاجة طرات بيني وبينك ونشرها ففاس كولشي يعرف اش كيوقع بيناتنا ؟؟ مزيانة تبقاي على خاطرك؟ .. صافي قلت ليك ضروف لزمات عليا نسافر واصلا ماكنتش عوال على هاد السفر .. ومع لبنى عيانة شوية خاصها تخرج منها تمشي ..وافهميني شوية اسارة علاش كتبغي تخلقي مشكل

قلت ليه حتى انا عيااانة .. وكنموت فيا الموت وباغا نسافر وباغا نرتاح

تنهد وقالي واحمدي الله عندك صحتك وعندك بنتك وواليديك وحياتك هانية .. شوفي. اللي تحت منك وشوفي اللي ماعندو صحة .. واللي عايش الفقر و اللي عايش الكحط وتمارة .. واللي ماعندو حتى عشا ليلة .. شوفي هاد الناس كيفاش عايشين .. نتي اللي كتهضري على الراحة والسياحة. وواحد باغي غير ينعس مرتاح من الوجع والحريق واخا ينعس منو للارض

قلت ليه الحمد لله بصحتي كنحمد عليها الله وكنجاهد باش نعيش عيشة زوينة وكندير السبب لراسي وربي كيسهل ليا .. نتا اللي فين هوا العدل ديالك؟ فين هي هاد الحياة الزوجية والراحة

قالي نتي اللي ماباغلش تخلقيها راسك .. ياكما يسحاب ليك كاااع الناس عايشين بحالك.. كياكلو بحالك .. وكيلبسو بحالك !! .. طلي على هاديك اللي مزوجة عسكري مسكينة كتشوفو من الصيف للصيف مكيعرفش كااع ولادو .. واللي عايشين فالكرا الى ماخلصوهش يخرجو يباتو فالزنقة .. وشحال من وحدة باغا غير هاد الجلسة اللي جالسة نتي هنا وفهاد البلاصة ومع راجلها ومالقاتهاش كتشوفها غير فالافلام .. الناس راه كيكملو الشهر بالكريدي وعايشين فالحسابات والميزيرية .. واللي موضفة كتحط النص بالنص مع راجلها وتصرف معاها والنهار الاول كيشرطها عليها .. ونتي كيبان ليك غير التعدد !! ماكنقول ليك عطيني . سلفيني .. عاونيني .. مكنشوفش كااع الصالير ديالك ومكنشولكش فاش خسرتي فاش وفرتي .. داير ليك كونط كدوز ليك المانضة واخا خدامة .. كنجي كنخرجك كل ويكاند .. كنهضر معاك كنضحك معاك عاطيك وقت كنسول فيك صباح وعشية .. جاتك شي حاجة زوينة كنقولها ليك كنهضر معاك بالكلمة الطيبة !!! شنو بغيتي ؟؟ السفر غادي نسافرو الكادويات كل سيمانة جايبهم معايا والخدمة خليتك تخدمي باش متقنطيش .. شنو بغيتي؟؟ كيفاش دايرة هاد الحياة اللي نتي باغا !! حساب ليك كاع الرجال هاكا !!

كمل كلامو وشد تيليفون رجع اللور وسكت عاقد حجبانو .. قلت ليه انا ماباغاش هادشي اللي حسبتي .. راجل حر طليق احسن ليا من التعدد

قالي ايوا الله يسمع منك ويرزقك على قد نيتك

صدمني حسيت بدعوتو طالعة من قلبو .. بان ليا بحال الى باغي يرتاح ويتفك مني وانا جالسة ليه على قلبو بزز منو .. حسيت بقيمتي طاحت ولا يمكن مكانتش عندي قيمة من الاول حيت انا اللي عرضت عليه راسي ومادرتش قيمة راسي ونستاهل حيت انا اللي قبلت على هاد الدل .. هما هاز ليهم هبالهم وداير ليهم الهاطر وانا كيعطيني القاصح .. بلحق الى ماخققت ليه الامنية ودرت لعز راسي راني ماشي سارة باش يعرف انا شنو كنسوا حيت مزال ماعارفنيش مزيان . سكت مابغيتش نهضر بغيت نخليها فصدري حيت الى فرغت غادي نبرد وننسا كولشي بحال ديما .. لاكن هاد المرة كتمتها باش تبقا شاعلة فصدري ومانساهاش ومانتراجعش. رجعنا للدار ساكتين حطيت جنة ناعسة ومشيت حداه بغيت ننعس .. قرب ليا وكبان ليا فمو كيهضر ويردد ديك الجملة .. خليتها مكمدة وعطيتو حقو واها مابقا ليه حق عندي وفرشت ليه الحرير بحال الى مكاين والو .. رطاب وقالي سمحي ليا على ديك الهضرة وكنت معصب وراه معالم بيا غير الله وبقا كيشكي .. سكت خليتو حتى شكا وسايست معاه ونعست ودوزت الويكاند ديالي عادي غير فالدوران حتى مشا بحالو وعيط ليا قالي مسافر ودعيت ليه بالسلامة ونضت تقاديت ليه . وحلفت حتى نوريه قيمتو ونوريه قيمتي حيت انا ماشي شايطة ونهار داني داني بالشان والمرشان وساكنة فثلاتة طاج وبيتي يجري فيه الخيل وكناكل الماكلة المخيرة وكنلبس احسن من البنات اللي قرار معايا وعائلتي عندها اصل ومفصل ومعروفة كنيتي فالناضور وبابا امام قدو قداش ديال الجامع .. ويجي هوا يبقا يمن عليا ويحسب ليا . مشيت عند المحامية اللي طلقاتني المرة الاولى قابلتها واستقبلاتني بقينا كنهضرو وسولاتني على حياتي قلت ليها راني رجعت ليه وجيت نطلق عاوتاني

تصدمات وخرجات ليها الصدمة بالضحك بقات كتشوف فثا وقالت ليا علاش . قلت ليها السبب الاول راكي عارفاه. التعدد وداك الزمر . والسبب الثاني باغا نجاوبو على واحد الهضرة قالها ليا تقول قبل منو كنت كنموت بالجوع وبلا بيه غنموت .. وبديت كنعاود ليها على الكلام اللي قال ليا . بقات غير كتشوف فيا وقالت ليا نعلي الشيطان وماشي سبب. وكن تعرفق الاسباب ديال الطلاق اللي كتجي تصدمي اما نتي راكي منورة عليهم . حاولات معايا نتراجع لاكن رفضت وقلت ليها باغا ندير الخلع ومغاديش نتراجع

حلات عينيها قالت ليا ماقلتي طلاق الشقاق ماقلتي الطلاق اتفاقي طلاق غيابي. نيشان نقزتي للخلع؟!! عارفة شنو هوا الخلع !!

قلت ليها عارفاه كن ماكنتش عارفاه مغاديش نطلبو

قالت ليا غايكلفك بزاف الخلع .. حيت فاش المرى كدير الخلع. راه كتسمى شارية طلاقها .. يقدر الزوج يطلب المبلغ اللي بغا وتعطيه ليه باش يطلقها .. بالنسبة للرجل راه ثمن رجولة وقيمة .. كتهبطيه بداك الخلع لاسفل سافلين .. يعني نعطي عليك فلوس ونتفك منك

قلت ليها هادشي تماما اللي بغيت .. بغيت الخلع ونكركبو باش يعرف راسو معامن . بغيتو يعرف باللي انا اللي مابغيتوش .. يعرف باللي ساليت منو نعطي عليه الفلوس باش نتهنا منو

وضحت ليها وجهة نضري ومكان عليها غير تخدم على هاد الخلع وتسربيه ماحدي متحمسة وباغا نشوف ردة فعله فأقرب وقت ..

رجعت بحالي وسكت ماقلتها احتى واحد واخا عارفة راسي غادي ناكلها من عند بابا لاكن فسبيل ديك الصدمة دالحاج كولشي يهون . ونشوفو واش انا عايشك بفضله ولا بفضل الله سبحانه وتعالى . كان كيسول فيا فتيليفون يوميا وكنجاوبو عادي بحال الى مكاين والو وعايشة عادي حتى قرب يجي وقطعت التيليفون عليه وبدلت الساقطة دالباب باش الى جا على غفلة مايدخلش. للدار .

كنت جالسة فالدار وعيط لبابا سمعتو كيهضر معاه وتلفت بابا عندي قالي علاش مكتجاوبيش عيسى ؟؟. شدي بغا يهضر معاك .

قلت ليه غير هضر معاه نتا حتى تسالي ونضت للكوزينة عند ماما قلت ليها هضري مع بابا مايبقاش يتدخل بيني وبين عيسى .. هوا معايش معانا معارفش مشاكلنا يخلينا بيناتنا .. الى مابغيتش نجاوب راني عندي اسباب .. واي حاجة وقعات بيناتنا يخلي راسو بعيد

بقات مصدومة كتشوف فيا وقالت ليا ابنتي اش عرفنا حنا !! هوا عيط سول باك قالك هاكي هضري مافيها والو

قلت ليها واشرحي ليه هادشي بطريقتك .. باش مايتدخلش

هزات يديها وقالت ليا هانا غنشرح ليه .. الله يهدينا وخلاص

مشات بقات كتهضر معاه وانا فالكوزينة كنغزز ظفري .. لبحمد لله ماسولني ماطرح عليا اسئلة ودوزنا لعشا سكوتي وحاولت نمهد ليهم انه بيناتنا مشاكل وضعوطات باش يستاعدو لأي قرار مفاجأ.

مشيت نعست وضربتها بنعسة .. فقت على رقم عيسى كيصوني وماجاوبتوش .. رسل بيا مسج قالي داابا خرجي اجي للدار

بقيت غير كنشوف فداك المسج ونضت قلت لماما غنخرج نقضي شي غرض ونرجع وكان الويكاند .. سولت على بابا قالت ليا ما للصدقة من جيهتو ومن الاسىلة ديال فين غادية فين جاية ..هزيت طموبيل ومشيت نبشان للدار وقلبي كيضرب لقيت طموبيلتو واقفة فالباب وهوا جالس لداخل كيشوف فتيليفون .. نزلت درت راسي ماشفتوش وطلعت للدار دخلت ودخل ورايا زدح الباب ولاح ليا البرا فوق الطبلة وقالي بعصبية شنو هاادشي ؟

وقفت قدامو وقلت ليه شنو ؟

قالي هااادشي شنوو هوا ؟؟ هاد الطلاق والخلع اللي دايرة وكنهضر معاك وكتجاوبي عاادي وورا ضهري جالسة كتبني .. شنوو هادشي. هضريييي

خرج فيا عينيه ولو مضاعفين وانا كنشوف فيه قلت ليه بكل جرأة منقدرش على التعدد .. ومنقدرش على هاد العيشة .. الفلوسً وهادشي كاامل كنت عايشة فيه من قبل ماشي عاد غنعيش فيه .. ونتا بفمك قلتي ليا الله يسمع منك ويجيب ليك اللي تمنيتي ولالا؟

ربع يديه وسكت بقا كيشوف فديك البرية مطولا وقالي اهاه .. غير قلت ايك ديك الهضرة نضتي خلعتيني !! بان ليك غير الخلع ؟؟ لاياش باغا توصلي بهادشي ؟

جلست وربعت يدي قلت ليه انا قادرة نعيش بلا بيك وسعادتي مامرتابطاش بيك نتا .. الى طلقت .. غناكل وغنشرب وغنلبس وغنعيش حيت الرزاق الله ماشي نتا . ودابا اولد الناس شنو خاصك نعطيه ليك ونطلق

قالي بسخرية : شنو خاصك نعطيه ليك !! مافكرتيش فديك البنت ؟ فكرتي غير فراسك ؟. مكتفكريش فالناس اللي دايرين بيك !! كتفكري غير فالتخربيق .. الناس كيطلقو الى حرارت العيشة وولات حارة ووصلات للجدر ومابقاتش الضحكة كطلع ليهم .. هاد الميثاق ديال الزواج اللي نتي كتستهزأي بيه راه ميثاق مقدس ماشي غير ورقة سنييناها.. تزوجنا قدام الله ماشي فالسر .. والزواج مكنلعبوش بيه ونتي مزال معارفاش اشنو هوا الزواج واشنو هوا البيت وشنو هوا العش والمسؤولية والاولاد .. كتخربي بيتك على اتف الاسباب .. الخوا الخاوي اللي ماليه حتى معنا .. ماضربتك ماعايرتك ما حرمتك من شي حاجة وما كنعاملكش معاملة خايبة .. واصلا كنبقا انسان. بشر ماشي ملاك مافيه عيب … باغا واخد مافيه حتى عيب كامل مكمول الله يلاقيك بيه .. وسمعي دابا وحلي ودنك . نتي مطللللقة وبالثلات والريال ديالك خليه عندك غادي ينفعك نهار ماتلقايش هاد الراجل الكامل على الله تشريه بالفلوس

نضت بغيت نجاوب لاكن هز يديه قالي ملقانا فدار القاضي. باشما حكم انا قابل

وخرج سمعتو غادي وكايقول يخخ تفوو حتى غبر .. ماعرفتش واش نتبعو نجاوبو عاى ديك يخ تفو ولا نجلس نستوعب ديك التطليقة ولا شنو ندير .. مهما كان الوضع حسيت بيها قاصحة بزاف وضراتني وحسيت بالدار كتريب عليا والندم والتسرع نتيجة قرراتي .. اتا من النوع اللي الى تعصب كيرد فالبلاصة ومنقدرش نصبر وفاش كيفوت الفوت كنندم .. واحد اللحضة قلت ياكما كنحلم !! واش وصلت لهادشي بصح !! واش فعلا طلقت ورجعت مرى مطلقة ومابقا لا راجل يدخل عليا ولا ويكاند ولا والو !! مشيت غسلت وجهي لعل وعسى نفيق من الحلم لاكن لقيت راسي عايشة الواقع والحقيقة المرة وحسيت بالدنيا دارت بيا والضلام فعيني وبقيت كنبكي فصمت ومنصبر راسي ونقول عادي عادي عادي اصلا فالاول كتجي قاصحة ومع الوقت نولف وهاكا وقع ليا من قبل .. تفكرت دارنا اللي خليت ماعرفوني فثن زدت ومشيت رجعت كنجري مرفوعة لقيت غير ماما فالدار وبابا باقي مارجع .. جلست حداها كانت شادة بنتي وسولاتني قللت ليا مال وجهك صفر وقلت ليها اللي كاين ورجعنا لنقطة الصفر والاحداث اللي عشت من قبل من ورا الطلاق وديك الازمة النفسية والمرض والهم والغم والاكتآب وخصوصا فاش ساق بابا الخبار وواجهني ببرودة وقالي انا هزيت يدي من هادشي .. غير هوا وجدي راسك تتحملي مسؤوليتك .. الخدمة الدار الدار الخدمة ماعندي بنات يدورو فالزناقي ويخرجو بلا سبب . سكت حيت اصلا ماعندي منقول وهادشي راني عارفاه وحاولت ندرز الازمة بسير واجي للخدمة وحطيت الغضب ديالي فداك الكونكور وباغا ننجح فيه ومزالة شي حاجة فيا كتنوض وتبغي تبين للناس انني ناجحة براجل ولا بلا راجل .

داع خبار الطلاق فالعاىلة والمكالمات اللي كنكره والاتصالات والويل لكحل اللي اصلا مكنردش عليهم وغير ماما اللي كتوصل ليا الهضرة .. واللي زاد ازمني اكثر وانا فأزمة هوا بنت عمي دارت العرس وكنت انا وياها بحال الخواتات وماعرضاتش عليا وحشاتها مرات عمي لماما غير بالفن قالت ليها بلا متعدبي سارة راه تكون عيانة خليها ترتاح اصلا مادايرينش شي حاجة كبيرة !

حسيت براسي بحال شي نعلة ولا عالة ورجعت كنشوف فنضرة الناس الاحتقار والكره واخا مادرت ليهم حتى حاجة .. اما عاىلتي ولاو خايفين مني وكل وحدة خايفة نطير ليها راجلها وكنبان ليهم بحال شي وحدة متاحة للجميع وهادشي شفتو فولد عمي اللي داز عندنا سلم علينا فاش رجع من السفر وفاش ساقت ليه مرتو الخبار دارت ليه فضيحة ومعيطة ليا بلا حشمة بلا حياء. تقول السيدة خرج ليها العقل !! ماخلات فيا غير اللي نسات حتى مشات ليهم ماما كتبرر شرفي وعرضي كأنني مرتكبة جريمة .. وحتى ولاد العائلة اللي مزوجين مابقاوش كيطوفو بدارنا بوحدهم .. والى مشيت حتى نزلت من الطموبيل كنلقا الجيران كيطلو عليا من التقابي وخاضيين رجالاتهم !! شي حوايج بديت كنلاحضهم وكنشوفهم كيمرضو ويقطعو فالقلب وأزموني بزااف وكملات عليا يسرى ماعرفتش اش بغات عندي معيطة ليا كتشول عليا واها عييت نترهب من اتصالاتها رصداتني بنمرة اخرى وقالت ليا واش فخبارك شنو واقع للبنى ؟

قلت ليها اختي انا هادي شهوور ما تلفت لديك الجهة واصلا اللي فيا كافيني وبنتي ولات بحال داك اليتيم اللي باه فالحياة .. عندها غير انا تقول ولدتها بوحدي

قالت ليا راكي معارفاش اشنو واقع راه لبنى عندها سرطان وراه غادية جايا لبرا كتعالج وحتى كيقولو لينا صافي راه داكشي كيمشي حتى كنلقاوه فبلاصة اخرى .. فيين هي لبنى اللي كتعرفي .. مشاا ليها الشعر ومشات ليها الصحك ولاو فيها العضام وحالتها حالة وكولنا مخلوعين عليها ومتشبتين بالامل وكنطلبو الله تشافا ..عيسى اللي كتقولي سامح فبنتو راه برا اصلا مكاينش .. نتي اسارة كتسبقي العيب وعيطت ليك نسول فيك لوجه الله ونسول فديك البنية اللي من لحمنا ودمنا اختي

بقيت ساكتة مالقيت منقول وقالت ليا المهم نتي لاباس وبنتك لاباس .. هادشي اللي بغيت نعرف الله يعاونك وقطعات خلاتني مصمرة كنشوف قدامي .. نزلت كنجري عند ماما للكوزينة خلعتها عاودت ليها شنو كاين وتصدمات وهزات تيليفون عيطات لعكوزتي كتهضر معاها وسولاتها على لبنى قالت ليها واش مكاين باس عند لبنى راه عاشنو سمعنا ها شنو سمعنا .. خطفت بيها تيليفون كبرت الصوت وجلست كنسمع قالت ليها عكوزتي غير خليها على الله راه غادية وكترجع اللور مابقات عندها صحة وباقي عندها الامل مسكينة كتقول غادي نبرا ونرجع نوقف حتى كيخرج داك العجب عاوتاني فبلاصة اخرى ..

درت لماما اشارة تسولها من امتى وداكشي فيها وقالت ليها عكوزتي من شحال هادي .. هادي شحال وهي كداوي بالدوايات شي خمس سنين .. ولاكن هاد المرة هدها طيحها ولات ناعسة فالدار شهر وفسبيطار شهر والطبيب قالينا داكشي نتاشر ليها بزااف ومافيه مايفهم الواحد

تأسفت على حال لبنى وسكت وخفت توقع ليها شي حاجة .. مابغيتش ليها المضرة ومانبغيش نكون بلاصتها والله يكون فعاونها والروح عزيزة عند الله مابغيتهاش تموت وهي مزالة صغيرة .. تأزمت وجلست قاطعة الحس بقيت كنتفكر صورتها وهضرتها ماقدرتش نتقبل انها تكون طريحة الفراش والمرض متمكن منها .

وصل بابا وتعرضات ليه ماما قالتها ليه وحرك راسو بالايجاب وهوا داخل للصالة كيحسد البلغة وقاليها لا الاه الا الله ..

قالت ليه واش كانت فخبارك ؟

خرجت وقفت قدامو كنشوف فيه قالينا باللي عيسى قالها ليه فاش كان جا شحال هادي وبغا يبقا المرض فالسر حيت لبنى مابغات حتى واحد يسيق الخبار وكانت كتعالج بلا خبار شي واحد ..ًولاكن المرض تمكن منها ومزال كيعيط على الحاج عيسى وكيسول عليها وهوا كيرد ليه الخبار

قلت ليه علاش ماقلتيهاش لينا ؟؟

قالي كن كنتي كتسنطي للهضرة دباك .. وااهلي فين كنتي غتوصلي .. وانا ماشي بحالك يجي السيد يأمني على سره ونعاودو ليك .. واخا تكوني بنتي وكبدتي منقولوش ليك . دابا الى عندك شي حساب مع ديك السيدة هزي صندالتك سيري تسامحي معاها .. ليوم الدنيا وغدا لاخرة .. تسامحو ماحدكم هنا اما الى مشيتو لهيه مابقات سماحة

قلت ليه مالي انا غادي نقولها للناس .. يقولها ليا

قالي بصرامة واش السيد امناتو على السر يجي يقولها ليك نتي !! نتي

قلت ليه وعلاش جا قالها ليك !

هز حاجبو فيا وقالي واجي صلي بالناس بلاصتي يالفاهمة ..كاع هاد الناس اللي كيجيو يعاودو ليا قوليهم علاش كتعاودو ليه !! السيدة مريضة كان عندها امل تبرى وماتوصلش لهاد الحالة وتنوض مايسيق ليها حتى واحد الخبار ساعا تزاد عليها الحال كولشي عرف شنو عندها ..

بقيت ساكتة ورجعت اللور وكنفكر واش نمشي نتسامح معاها ؟. واش مانتسامحش معاها؟ شنو نكون درت ليها ؟. نكون هضرت فيها ؟؟ قلت عليها شي كلمة ؟؟ وكيفاش غنقابلها وكيفاش كنواجهها !

بقيت على داك الحال كنقول ليوم غدا ليوم غدا والكونكور فالطريق قلت غير ندوزو ونمشي عندها . مشيت دوزت الكونكور ومابقات حتى حاجة كاتمنعني باش نمشي لاكن كندير مبررات لراسي ونتعطل حتى لواحد النهار كنت فالكلية وعيط ليا بابا قالي يالاه تمشي تسامحي مع المرى راه الحال تزاد عليها. . بقيت كنتمتم وقالي يا عاد البنت كن ماكنتي بنتي كاع مانديها فيك لهلا يتوالاك بشي سماحة .. زيدي تسامحي ليوم الدنيا وغدا لاخرة راني خايف عليك تكوني أديتيها بشي حاجة وتمشي تبقا نحسوبة عليك ليوم الدين

قلت ليه عمرني وصلتها وبقيت كنحلف ليه قالي علاه حنا كنعرفو دنوبنا ولا اغلاطنا يا هاد البنت !! حنا ديما مضلومين وعندنا الحق حتى لغدا قدام الله ويخرجو ليك يقولو بيك هاحنا .. شنو غتخسري الى تسامحتي راه كانت ضرتك وكنتي ضرتها تسمحي ليها وتسمح ليك ونابينا عليه السلام .. والبراني ومكنوحلش معاه ونتي مانعرف منين جيتي بهاد العكس

بقيت ساكتة كنتفتف قلت ليه واخا وفوقاش نمشيو

قالي ليووم .. راه المرى كتموت نمشيو نسامحو معاها شوف تلحقيها ولالا .. الى كنتي مرضية راك غتلحقيها

درت يدي غلى فمي وعمرني تخيلت يوقع ليا هادشي ونشوف لبنى مريضة ومجرد تخيلات كيمرضوني.. شديت الطريق مع بابا وغاديين وكنسمعو كيطلب الله نوصلو قبل مايدي مول الامانة امانته والطريق كلها وهوا كيهضر ليا فالدين وفالمعقول وانا ساكتة حتى وصلنا وسمعتو كيهضر مع عيسى وتبعنا لوكاليزاسيون ديال دارها واخا كنت عارفاها لاكن ماعارفاش الطريق صونا ليه تيليفون قبل وعوج الطريق قالي راه راه تزاد عليها الحال

قلت ليه فين غادي علاش قلبتي الطريق

قالي غنتعرضو ليهم فالدخلة دفاس راهم جايبينها من المطار .. حسيت براسي تشوك ليا لحمي وجاتني البكية وتبوريشة وخايفة مشينا وقفنا بالطموبيل فالطريق كنتسناو حتى بانت لينا سيارة الاسعاف جايا من بعيد وداك الصوت كيخلع وكتجري والطموبيلات كيخويو ليها الطريق وموراه صف ديال الطموبيلات دايرين سينيال دربعة كيسينيو وجات حتى قربات ووقفات فجأة فالجنب مافهمنا والو ونزلو الناس من ديك الطموبيلات اللي موراها ونزل بابا ونزلت موراه .. شفت كولشي كيجري جهة الاسعاف ومشيت كنجري مور ورجلي كيخويو بيا دخلت بين دوك الناس وكنسمع البكا ديالهم والتنخصيص .. طلع بابا فسطافيط ولقيت نضرة لقيت عيسى لداخل محني على البياص وهي مغطية بمانطة رمادية وقدامي غير الرجلين .. شفت عيسى شاد ليها فيدها وبابا قرب جنبها لداخل وشار ليا بيدو طلعني حداه فالسطافيط ماشفت لاهاكا لا هاكا .. شفت فيها ماعرفتهاش.. تقول ماشي هي .. صفرا كلها وحازمة راسها وناعسى كترمش بعينيها وفمها ناشف وكتشوف فينا .. قرا عليها بابا شوية دالقرآن على راسها وقاليها واش عرفتيني .. عرفتيني ؟

رمشات ليه بمعنى عرفتك وجرني قاليها سارة بغات تسامح معاك

شافت فيا ودارت واحد الابتسامة ورمشات وفمها محلول مكتهضرش وعيسى كيدير ليها الماء بالقطرات فحلقها .. جاتني واحد البكية وواحد الاحساس وتحنيت عليها قلت ليها سمحي ليا الى درت ليك شي حاجة وبلا منشعر بست ليها يدها وبقيت كنبكي .. رمشات ليا وبابا كياكد واش سمحات ليا وكيعاود يسولها حتى حركات ليه راسها بالايجاب وقالي واش مسامحة ليها قلت ليها مسامحة ليك دنيا واخرة ونزلت فشلانة رجليا ماقادرينش يهزوني وعمرني خضرت لداك المنضر وكنسمع بابا كينطقها الشهادة وقوة التيليفونات كيصيوني .. لاح بيا السوارت ويدو كترعد قالي تبعينا بطموبيل غادي نكملو الطريق وسدو البيبان وكل واحد مشا كيجري لطموبيلتو وسمعت وحدة كتقول الطريق كلها كنقول صافي مشات عند الله وكنزلو مخلوعين .. تبعتهم بالطموبيل دبابا وماعارفاش شنو كيوقع تما وكنصوني عليه مكيجاوبش حتى وصلنا للفيلا فين عايشة لقينا الطموبيلات والناس والعاىلة معرضين ليها بالبكا وشي مرى خرجات كتجري وطاحت غيبات حدا باب السطافيط والناس كيبكيو وشي كينعق شي. وريحة الموت كدور .. نزلت كنجري وشفت باب السطافيط تحل وطلعو لتما غير شي وحدين بالنوبة وبقيت كنطل نشوف شنو واقع لقيتهم كيبوسو راسها ويدو الغطا غلى وجهها وبقيت كنسول حتى واحد ماجاوبني ومشيت عند بابا قلت ليه شنو كاين قالي الله يرحمها دعي ليها بالرحمة والمغفرة .. شفتي الموت شحال صعيبة .. سعداتك يافاعل الخير . هاااشكنقول ليك انا راه الدنيا مادايماش والموت حدا ودنينا كدور

ودعاتها العاىلة وكولشي تنفتن ورجع كولشي كيبان ليا كحل ومرضت عمرني توقعت هادشي يوقع .. من سيارة الاسعاف مباشرة للدفن مانزلوهاش ومشاو يأدير معاها الواجب وبقا الطايح اكثر من النايض وبكيت حتى شبعت بقيت كنقول مع راسي واش لبنى لبنى !!! لبنى نيت اللي كنعرف اللي ماتت !! واش هي شخصيا اللي كانت كتوقف قدامي وكتهضر وكانت عندها واحد الشخصية عجيبة !! واخا نعيا نحللها مانقدرش .. كانت قوية ومتأكدة من نو كدير وشنو باغا وكانت مرى ونص لدرجة كنت كنكرهها على ديك الشخصية والطريقة ديالها فالتعامل .. كانت كتحرك كولشي كيف بغات بلا ماتخسس حتى واحد .. وفنفس الوقت كانت زوينة ومتولة ومكتبينش ضعفها قدام لخرين .. بديت كنحلل شخصيتها بيني وبين راسي حتى تأثرت بيها ولقيت راسي كنقلدها وكندير نفس حركاتها بلا منشعر ..وماكرهتش نكون بحالها حيت وحدة اخرى فبلاصتها ماعندها ولاد ومكتولدش ومريضة غتكون ماتت غير بالاكتآب .. انا هي لا خلات العاىلة كلها تبغيها حتى من الخدامات ضاربين ليها حساب و كيهضرو عليها كانها الوحيدة اللي مرى .. والاهم من هادشي كانت محافضة على عيسى وكانت الملجأ ديالو وبأر اسراره وشاداها بقوة شخصيتها والكاريزما ديالها والعقل ديالها. وواخا تزوج عليها بقا ليها بوحدها ومابدلهاش وبقات هي الامان والراحة النفسية ديالو .. ماعرفتش اشنو اللي بيناتهم وشنو اللي خلاه يميزها ؟؟ ماعرفتش شنو اللي فيها مكاينش فرجاء وفيا ! وواش غيتأثر بموتها وفراقها ؟؟ مافهمتش واصلا خرجت الى الابد من هاد العاىلة وماكرهتش نكون بحال لبنى ونسير حياتي وننجح فيها وننجح حتى فمستقبلي ونخلي الناس يبغيوني ويقدروني ويحتارموني .. ماكرهتش كن تعرفت اكثر على لبنى على الاقل نتعلم منها بزاف ديال الحوايج ناقصيني فحياتي .. واخا مقراتش بحال القرايا اللي قريت والنيفو اللي وصلت ليه لاكن سابقاني بزااف وكنتمنى حتى انا نكون بحالها ولا هاد الشخصية المزاجية والمتسرعة ديالي والاكفس انني حساسة دغيا كيبقا فيا الحال واخا نعيا نستقوى كنضعاف وماعنديش الصبر وماعنديش القوة والصمود وحتى الحوار اللبق ماعنديش ودغيا كنتنرفز .. واش حيت ماعنديش خبرة فالحياة ومزال مانضجت بما يكفي ولا مزال نكبر ونتبدل وننضج راسي !

جلست بين العيالات بالليل والامداح والطلبة كيقراو ودار ليها العشا على حقو وطريقو وكالعادة سمعت بابا كيهضر فالميكرو ويعطي الموعضة على التسامح وغلى الدنيا وغلى الاخرة … شي مرات كنلقاه عندو الحق فكل كلمة وحكيم .. وشي مرات كتجيني هضرتو لا علاقة وكنفرط فالنصائح دياله .. لاكن اللي متأكدة منه انني فكل مرة فرطت فشي نصيحة كنجيبعا فراسي. .. وواخا نعرف حتى نعيا عمرني نعرف بحاله .. هادا علاش قررت من اليوم نسمع لكلامو ونطبقو بالحرف .. وكما كاع الناس كيستاشروه ويعاودو ليه حتى انا نحسب راسي من الناس ونستاشر عاد نتصرف .

عم الصمت بين النساء وماصادفت لا رجاء لا عيسى . من غيريسرى اللي بانت ليا كتتحرك وغاديك جاية وعينيها ناشفين من الدموع .. تقطع صوت القرآن وحطو للرجال لعشا وسمعت العيالات كيهضرو على لبنى ويشكروها ويدعيو ليها بالرحمة والمغفرة .. حطو لينا حتى حنا تعشينا وكلينا الخلوى وشربنا ونضت باش نمشي لطواليط وقصدتها حيت عارفة فين جات وغاديك حتى سمعت صوت مبحوح تقول جوايقي كيغني فالعراسات. عيط وقال لبنى

ضرت لقيت رجاء طالعة مع الدروج حبسات وعيسى جايب ولدو وعيط ليها وغلط ليها فالسمية .. قبلت وجهي ومشيت دخلت طوليط وخرجت صادفت رجاء فطريقي وشافت فيا شي شوفات بغات تاكلني .. ماديتهاش فيها وخليتها مابغيت اثم ولا دنب معاها ومشيت سلمت على عكوزتي والعاىلة اللي صادفت وخرجت عند بابا سبقتو للطموبيل خليتو كيرتب على عيسى وشيخي واقف معاهم لابس جلابة بيضاء. .. ماحققتش كاع فوجهم وبقيت كنشوف قدامي حتى رجع بابا ركب وقلت ليه نسوق انا غير رتاح وشدينا الطريق رجعنا بحالنا ورجعت هازة فقلبي مشاعر جديدة .. حسيت بالدنب من جيهة التسرع ديالي ولمت راسي حيت ماكانش خاصني نتسرع ونتهور حتى نعرف شنو كاين .. وقررت عمرني نسبق رجلي حتى نعرف فين كنحطها سواء فحياتي الشخصية او العملية وخديت درس جديد فالحياة خلا عيني يتحلو ويشوفو الدنيا بمنضور اخر

رجعت بحالي وموت لبنى مأثر عليا .. جلست مع ماما وعاودت ليها على شنو وقع ودعينا معاها بالرحمة والمغفرة وبديت كنحاول نخرج من الاكتآب اللي دخلت فيه والحزن والهم ولتاجآت لبنتي ولحنانها وبديت كنخرجها كل يوم فاش كنرجع من الخدمة وكنحاول ندوز اطول وقت معاها وكنستمتع بوقتي انا وياها .. دوزت السيمانة انا وبنتي حتى حسيت براسي كنرتاح وكنلقا راحتي معاها ودرتها صاحبتي وختي وفآخر الاسبوع مشينا للحمام وسبا فركتها مزيان وخرجت جلستها عل رجلي على بيدمن نصاوب شعري وكنعلمها تنساجم مع الناس الكبار باش تكبر فعقلها وتولف بحياة الكبار وماديرش البسالة .. بقات جالسة كتشوف فيا كنجبد فشعري وقالت بصوتها الطفولي ماما واش حتا انا تصاوبي لي شعري

بديت كنضحك قلت ليها انا شعري خايب داكشي علاش كنصاوبو ونتي شعرك خايب ؟ قالت لي لا .. قلت ليها وغتصاوبيه ؟ قالت لي لا ونسات الموضوع وكملت شغلي كنتجمع انا وياها ونهضرو وكنشوف فيها فالمراية تقول غير سارة بنسخة مصغرة .. واخا كنلاحض فيها شوية ديال الشبه مع عيسى لاكن اللي شافها من النضرة الاولى وشافني كيقول ليا كتشبه ليا غير انا .. جاني اتصال من عند بابا كيهضر ويضحك كانه كان فحوار وجاوبتو على غفلة قالي واش ساليتو

قلت ليه اه هاحنا جايين

قالي يالاه طلقي راسك الله يرضي عليك

نضت شديت لبنتي فيدها ومشيت رجعت بحالي ودخلت لقيت عيسى عندنا فالدار .. كان جالس متكي على السداري وهاز رجلو كيهضر مع بابا اللي متكي حداه وكيتجمعو على اتاي والحلوى . هبذت راسي لحت السلام وومشيت . اما جنة مشات كتجري عندو طلعات عليه وجلست كنسمع صوتها كضحك من الصالون وكتعاود ليه شنو درنا وفين مشينا وشنو كلينا وانا كنحلف فيها على هاد التعاويد اللي كتعاود بلا سوالات .. خليتها حتى جات عندي للكوزينة وشديتها قلت ليها عجبك الحمام اللي مشينا ليه ؟

قالت لي اه. قلت ليها كيعجبك تخرجي معايا ؟

قالت ليا اه

قلت ليها ايوا مغاديش تبقاي تخرجي معايا ومتبقايش صاحبتي وغنبقا نخرج بوحدي

تصدمات قالت لي علااش

قلت ليها حيت كتعاودي كولشي ومكتحافضيش على الاسرار .. علاش مشيتي كتعاودي لباباك ؟؟ علاش بقيتي كتقولي ليا كلينا هادي وشربنا هادي ومشينا لهادي وجينا من هادي؟؟ علاش مكتسكتيش؟ هانتي دابا غادي تبقاي تجلسي بوحدك فالدار

دارت يديها على عينيها بدات كتبكي وخليتها قلت والله مانحزرها باش تعلم تبقا تسكت من التبرويل. اوييلي. شي نهار تشريها ليا مع بابا تقول ليه شي حاجة يندم طاسيلتي على الخروج والدخول .

جراتها ماما كتسكت فيها وهي كتجرني باغاني انا نتصالح معاها بلحق خليتها مابغيتش نتصالح معاها غير هاكاك حتى دير علاش نتصالحو .. باش ماتعلمش تنال الحاجة بالساهل .. جلسات كتبكي حتى وصل صوتها لعند بابا وعيسى للصالون وسمعت بابا كيقول ليا مالها شنو درتو ليها ؟؟ قلت ليه فخاطري قطعنا ليها الراس ! عيط ليها عيسى من الصالون قاليها اجي عندي ومشات كتجري وتبعتها كنتسنط نشوف اش غتقول ليه .. ناض جلس وهزها عندو كيسولها علاش كتبكي وكيسمح ليها خنونتها وبقا عليها واش غوتات عليك ؟. واش ضرباتك؟ حيدات ليك شي حاجة ؟. شنو درتي ؟

بقات عليه هي لا لا لا وهوا كيسول وهي كتجاوبو بلا حتى مل وعنقها كيسكتها عاد رجعت للكوزينة وعيطت ليها جات عندي كطل عليا من الباب وتسملل فعينيها باغا تصالح .. كتقتقلني بالضحك وكتفوج عليا فالصراحة .. هزيتها وبستها قلت ليها صافي هاحنا تصالحنا ..وماتبقايش تعاودي ياكي

حركات ليا راسها بالايجاب وقلت ليها وعد؟. عطاتني يدها زعما وعد وتصالحنا وطلقتها مشات كتنقز فرحانة بشي قشاوش جابهم ليها وواحد الطموبيل. كبيرة كاط كاط بيضاء معرية كتمشي بالضو بغات تركب فيها وتمشي بيها لاكن الدار صغيرة .. حطينا ليهم الغدا تغداو وخرجها دور شوية بديك الطموبيل فواحد الجردة حدانا اللور كبيرة وطلعت للسطح كنطل عليها نشوف لقيتها راكبة زعما راها سايقة الطموبيل وهوا تابعها بتيليكونومد حتى جا واحد الولد صغير بغا يلعب معاها ودفعاتو جابتو على وجهه ناض كيبكي وجا باه كيجري عندو هزو وبدا كيهضر مع عيسى وكيحزر فجنة وجلس حداها داك الولد .. قلت صافي غادي ترضا لاكن هزات وجهها للسما طلقات واحد الغوتة وناضت كتنقز غضبات وعيسى كيشد فيها ويتبتها وهي بدوك الكرينات كتمشي وتجي مابغاتوش يركب حداها وكدفعو باش ينوض .. اشمن خاطر واشمن صبر انا اللي كنعرف بنتي مزيان والله لا خلاتو يركب ولا يزيد بيها وداكشي اللي وقع نيت بقات تجدب تما وعيا يحزر فيها ويرغب مابغاتش وهزها كتغوت خلا دا الولد ضرب واحد الضورة خفيفة بالزربة ونزلو باه داه قبل ميصعر حتى هوا .. انا بنتي فاش رجع بغا يحطها تما بدات كتركل مابغاتش تركب فيها وصعرات ليه فرجات فيه عباد الله كاملين وبقات كتبكي حتى شبعات .. ماخلا ماشرا ليها وبشوية وبالهداوة جلسها فديك الطموبيل شادة النفاخات فيديها وكدور

ردها فالعشية ناعسة على كتفو ودخل ديك الطموبيل للكراج ديال دارنا وطلع عندنا تعرضات ليه ماما وانا وراها قالت ليه لعبات شوية؟

عطاها ليها وقاليها هي غير لعبات !! ماخلات مادارت

سول على بابا قالت ليه فالجامع ومشا تبعو ماشفتوش حتى دازت العشا وحتى هوا مكيشوفش جيهتي كاع كأنني مكايناش وسطومنهم .. مابقاش فيا الحال حيت انا اللي ختاريت وبديت كنولف من جديد وكنتعود على الحياة الجديدة .. الحمد لله ربي عطاني الزهر فالخدمة واخا ماعطاه ليا فالزواج الحمد لله حت و واحد مالقاها كي بغاها . نجحت فلكونكور وخديت الاهلية وطلعت للمستوى العالي وفرحت بزااف وفرح لبا حتى بابا حيت انا الوحيدة اللي فالعاىلة عندها مكانة مهمة فالمجتمع ورجع كايفتاخر بيا من بعد ما كان رافض فكرة الخدمة ، كنت انطلاقة للبنات اللي فالعاىلة ديالي ودرت فيهم النفس هما وواليديهم ورجعو يضربو بيا المثل من جهة الخدمة والمناصب لاكن كيخاغو على رجالهم مني حيت فكل مرة كنزيد نعلى كيزيد احترام الرجال ليا وتوددهم ليا باش نعاونهم على شي ترقية ولا نتوسط ليهم .. خصوصا انني درت معارف كبار وركايز صحاح مت المستوى ديالي وهادشي خلا العيالات الناقصات عقل ودين اكثر مني يفكرو غير فالخوا الخاوي !! نكيفكرو فحتى حاجة من غير الراجل ! عنداك يطير ليها وتجلس بلا ماشي تفكر تكون راسها ودير من راسها همة وشان تخليه هوا يخاف يخسرها !! لا هي حيت عارفة راسها لا تسوى بصلة وانا احسن منها دايرة من اطونسيون وخايفة نطير ليها الراجل تقول شايطة على راسي. وغنمشي غير لرجالهم هما ونطيرهم !! مافهمتش كيفاش كتشوف راجلها باش نجي انا نطمع فيه بااز !

جاني الانتقال للرباط وغادي نودع واليديا وبنتي حتى هي ونبدا مسيرة جديدة ونشق طريقي من جديد وتحملت مسؤوليتي ومابقيتش تحت كنف واليديا خصوصا فاش سبقت بابا فالقرايا وطلعت وتحلو ليا ابواب كثيرة رجع هوا كيسولني على شي حوايج قانوينية وخلاني نعوم بحري. وديما كيوصيني على السيراط المستقيم ومنتعمقش فالسياسة اكثر من القياس ونتحمس فيها ونخرج على راسي وهادشي مناش خايف . هزيت رحيلي وانتقلت للرباط وتعرفت على ناس جداد .. طباع جداد عليا وخرجت من القوقعة اللي كنت فيها وحسيت براسي انفتحت على المجتمع وتلاقيت اشكال واجناس ودرت اصدقاء وكان ليهم دور كبير فالمسار ديالي ومنهم كنتعلم كيفاش نتعايش مع طباع هاد الناس دهاد المدينة اللي غراب عليا ومتفتحين بزاف عكس طباعنا حنا المحافضين . وكنت كناخد منهم المعلومات اللي غتتفعني فحياتي وعاونوني حتى عرفت الحي اللي نقي سكنت فيه وبديت كنأطر الطلبة ونقري فالكلية وعايشة حياة جديدة وعجبني الحال حيت كولشي تبدل عليا وحتى الطلبة مبدلين ومنهم بزاف غريبي الاطوار وعايشين العالم ديالهم بوحدهم وصعيب يتقبلو اي حاجة منك ، واللي زدت اكتشفتها ان الناس اغلبهم كيسايرو بعض واخا ميكونش مقتانع بالفكرة كيسايرك حتى تسالي ويزيد بحاله كانه عمرو سمع ليك !! جلست كنناقش هاد المواضيع فواحد القهوى مع بعض الزملاء فالعمل وكنضحكو وهضرة تجبد هضرة حتى قالينا واحد الدكتور انه كاين واحد الكونكور في غاية السرية حتى واحد ماعارفو خاص بالاستاذة الجامعيين ومستوى التعليم العالي الى بغيت ندفع ليه ! بقيت كنسول ونستفسر وعرفت من كلامو انه كونكور ديال الداخلية ونصحني ندوز معاهم ونخرج من الكلية وصداع الراس ونبدا خدمة اخرى اللي فيها غادي نعيش واحد التحول جدري جدا

تبعت الخطوات اللي عطاني السيد ودفعت لهاد الكونكور .. قلت مع راسي ندفع ونشوف الى بغيت نخدم نخدم مابغيتش ندير بناقص .. المهم جمعت المعلومات الكافية عليا ودفعتها والفضل كيرجع لله سبحانه اللي سخر ليا الناس باش نعرف نو ندير ونعرف شنو كاين .. رجعت للدار وتاصلت بيا الصديق ديالي السي الطيب .. كان راجل مزوج وعندو جوج بنات وكولشي كيشكرو وحتى هوا من الناضور داكشي علاش كيعاوني كانني وحدة من عاىلتو .. قالي وجدي للكونكور وضربي طلة على الاخبار وعلى شنو كيروج فالاحداث دالبلاد حاليا والمواضيع السياسية حيت هي اللي غيسولو عليها وحتى الاقتصاد اللي دايرة راجعيه حيت شي واحد كيعرفو تما هوا اللي عطاه المعلومات حول الاسىلة اللي ممكن يطرحوها . شديت انا الموضوع بجدية كنراجع ليل ونهار ونوجد وخايفة حيت عمرني تخيلت راسي غندخل لشي شبكة بحال هادي وكنسول راسي واش انا قد المسؤلية ؟. واش نتي اسارة قد هاد المناصب. العليا اللي مكيشدها غير شكون وشكون .. مانتي داخلة بالباك ولا بالاجازة ولا بشي سلم على قد الحال .. راك داخلة مع ناس صحاح وبالدكتورة والاهلية وهادشي مافيهش الاستهتار واللعب حيت ماغانجلسش مع ناس قدي. .. وانما غنجلس مع شخصيات مهمة اللي قراو غير مع شكون وشكون ومع فلان وفرتلان ..واش نتي عندك الكمارة باش تجلسي مع هاد الناس وتعاشريهم ؟. راك مابقيتيش ديال الدوران والصحابات والعقل الفارغ .. واش عندك الكاريزما اللي تخليك تبتي الحضور ديالك بعدا وتسمعي كلمتك ؟. واش نتي قادرة علاش هادشي اللي ماشي اي واحد كيوصل ليه واي وحدة غادي دخل ليه .. واش اصلا قادرة تكتمي اسرار الدولة بعدا ولا من النهار الاول يجلسوك على القرعة بالاستهتار ديالك وتكرهي قرايتك اللي جلساتك على الزاج

ارا نشوفو شنو مخبي لينا هاد الكونكور .. صبحت الصباح واقفة مع السبعة .. شربت واحد فيتامين سي باش نتوكض وبقيت كنشوف شنو نلبس .. تاصلت بالسي الطيب كنسولو واش كيعلقو على الهندام وقالي دابا لا ولاكن فالشفوي كيلاحضو على كولشي .. بحال التقاشر ديال العيالات ولا داك التزمت الى شافون فشي واحد كيقصيوه . قطعت معاه وقلت فخاطري ومالي عليها نصعبها على راسي ونبدا تفلسف .. ارا نرخيها من دابا .

لبست واحد الصندالة بلا وكان الصيف وسروال الترب وفيست ودرت الشال ديالي وصاكي ومكياج اخف من الريح ومشيت تبعت النعت حتى وصلت لواحد الادارة فالرباط تقول غندخل لقصر .. لقيت الباريير فالباب والبوليس ووقفوني خداو مني لاكارط ودارو ليا سكانير عاد دخلت لقيت شي عشرين واحد جاي يدوز وكلهم كبار وبعقلهم فواحد القاعة كبيرة فالباب ديالها شي رجال طوال بالكوستيمات وحتى واحد مكيشوف فلاخر .. كيديرو خدمهتهم بلا حتى ابتسامة .. الواجب فقط . جلست بلاصتي وتفرقو الاوراق وبداو كيدورو علينا .. سولني واحد منهم قالي باش تجاوبي. ؟

قلت ليه فرونسي

قالي ديري كروة هنا

درت علامة على اللغة باش غنجاوب حيت الفرونسي االي كنعرف نعبر بيها ومولفة نهضر بيها مع الطلبة. طليت على الورقة دلقيت جل اسئلتها سياسية ومتعلقة بالاقتصاد .. بقيت كنشوف فيها وكنشوف فالبنات اللي غيدوزو داخلين وبقيت مصدومة كنقول واش هادو تعليم عالي!! مابايناش عليهم !! الطالون كيقرقب منين ومنين بحال الى جايا لعرس. والمكياج وي ميني جيب كلاص وصوت الطالون فالقاعة كيتقب الودنين ودوك الرجال اللي واقفين وتقول واش شي واحد فيهم تلفت لشي وحدة تقول مكيشوفوش . دوزت الامتحان وساليت وبديت ندور عيني كنشوف فجنابي كنلقا كولشي كيشوف فالورقة ويفكر كيفاش يجاوب.. راجعتها مزيان وخرجنا تلاقيت بالسي الطيب بقينا كنهضرو وخرجنا عطاونا ليكارط ديالنا وتيليفونات ومشينا بحالنا

مكاينش اللي خالعني قد الشفوي .. هوا اللي مخلوعة منو وضاربة ليه حساب اكثر هنا غيتعرفو عل اللي طلعو مباشرة ويشوفو السلوك والحوار والكلام واش موزون .. وجدت ليه واحساسي كيقول ليا بلاصتك تما معاهم وحاسة براسي غنرجع ونعاود لديك البلاصة ونصادف نفس الكمامر مرة اخرى . صبحت واقفة فنعار الشفوي ومشيت مرة اخرى وركزت على الهندام ديالي ..مابغيتش نكون رسمية ومابغيتش نكون مبرشهة ..بين وبين وحتى الفولار طلعو بينت القصة شوية باش منبانش متزمتة ولا شي حاجة بحال هاكا .. لقيت السي الطيب تما وسلمت عليه وباركت ليه حيت طلع للشفوي وجلسنا كنهضرو قالي ماتبينيش باللي مخلوعة ولا كتفهمي اكثر من القياس.. بقاي فالوسطية راه شحال من واحد حا يكحلها عماها . قلت ليه فخاطري لهلا يوريك شحال وانا سهرانة على الفيديوهات ديال التعلم والاستقبال فلكونكورات ووالحركات وفوقاش خاصني نهضر فوقاش خاصني نسكت وفوقاش نبتاصم فوقاش منبتاسمش .. تعلمت بزااف دالقواعد ولقيتهم لصالحي حيت لاحضت باللي حاو غير شي عشرة دالناس وكاع صحابات الشعور والطالونات تقصاو .. عرفت ان الامر جدي للغاية واللي عندو شي حاجة فراسه يحطها وبحال هاد الخدمة اللي واقف عليها ساس دولة بشعبها ماشي غير اجي ودخل ليها من والا والا كن راه نهارت من زمان وتشردنا حنا واولادنا .. لا طالون لا عكار وابسط حاجة كينتابهه بيها ونسبة الخطأ منعدمة واول حاجة تعلمتها من نهار الاول جيت وقابلت دوك الوجوه هي المعقول والجدية فالحياة والاستهتار بلاصتو ماشي هنا . دخلت للقاعة لقيت ثلاتة دالرجال جالسين اللور وثلاتة لقدام قدامي وجلست بالادب . بقا واحد فيهم هوا اللي كيتجمع معايا جموع عادي وكيسولني اسىلة وكيدخلني ويخرجني وانا مركزة معاه وخايفة نقول شي حاجة ماشي هي هاديك .. بقاو كراوغ بيا وكنحاول مركز معاه مزيان ومرة يبتاسم ويدخل ليا فالاقتصاد مرة يخرج منو ويدخل فالسياسة وشي مرات كيسولني على شي حوايج كانه نسا على شي تاريخ كيقوليً فكريني وكيقولو غالط بلعاني باش يعرف واش كنفقه شي حاجة وعندي الفطنة ولالا واخا انا عارفاه عارف العجب وكيدوخني ..اما اللي حداه ماكيشوفوش فيا بمرة كل واحد ساكت وكيشوف فجهة وذالقين ودنيهم وكيهبطو على ديك الورقة يكتبو وكنقول يعلم الله اش كتب ليا تما الله يحضر السلامة . ساليت وخرجت بحالي حمرا ووجهي سخون تفكيت من داك المجهر اللي كنت تحت منو ومشيت بحالي كنراجع شنو قلت عاوتاني وعيطت لبابا قلت ليه راني دوزت واحد الامتحان وعييت نفهمو ديالاش غير بالمعاني حيت عطاونا واحد الورقة وقعنا عليها قبل مندخلو باش مندكرو لا اسم الادارة ولا نوع الكونكور ولا حتى حاجة من داكشي . عيا بابا يسول فيا فاللهر قلت ليه ديال الوزارة وصافي بدينا كنهضرو قلت ليه حتى تجي وتزيد نشرح ليك

على بركة الله .. صبحت على نجاحي فالكونكور.. وكان عندي الزهر تهزيت مع العشرة اللي نجحو من بين ستين واحد دوز داك الكونكور .. لاكن السي الطيب مانحجش وبارك ليا وهنا غنبدا نصنع من نفسي سارة جديدة .. او بالاحرى المحيط اللي ضاير بيا هوا اللي صنع مني انسانة اخرى .. اول نهار ليا فالسطاح مشيت لديك الادارة انا اللولة وخفت نتعطل .. كان تابعني سطاج ديال ست شهور لاكن الخلصة ديالي ماتبدلاتش واخا غير سطاج كنتخلص نفس الخلصة اللي كياخدو تما اللي بحالي . كانت ديك الادارة عبارة على عمارات كل وحدة فين مدورين بالامن والحراسة المشددة .. كانت كل عمارة عندها مطعم لتحت والماكلة فابور وكنخدم نهار ونجلس يوماين وكان الدور ديالي فداك السطاج نرتب الوقات ديال العمل دالموضفين تما ونبقا شادة النوبة وعاقلة عليها باش منتلفش شي نوبة وحتى العطل كانو من العمل ديالي . ماكانتش شي خدمة صعيبة وكنت كنخدم نهار ونجلس يوماين وكان عندي بادج كندخل بيه بين دوك البوليس اللي فالدخلة والى نسيتو نبقا برا .. نهار على نهار كنكتاشف شي ملفات كيدوزو بين يدي وشي اسرار و قرارات كنعرفوهم حنى فداك القسم قبل مايخرجو للاخبار .. رجعت سابقة الاخبار بيوماين ورجعت كنعرف شي حوايج ماشي كاع الناس كيعرفوهم ومابقيتش محدودة بين التفاهات ، وليت كنحس براسي مهمة .. كاع اللي نجحو معايا فرقوهم وكل واحد فقصم وجيت انا فقسم الادارة العليا .. ياه على زهر عندي !! كنت كنسمع بواحد السمية غير فالتلفازة حتى رجعت خدامة فنفس الكولوار ديالو .. فلان بن فرتلان. ومن لا يعرفه .. اصلا ماشي كولشي غيعرفو غير اللي مهتم بهاد الوسط والمواضيع السياسية . بصراحة ماكنتش كنعرفو فوجه حتى تفاجات بواحد الاجتماع على غفلة وكانو اللي حاضرين للاجتماع غير المديرين ديال دوك العمارات و والمسؤولين على الاقسام والكاتبات . طليت على باب الاحتماع فاش سالاو وشفتو خارج. كان عندي فضول نعرفه فكمارتو . كان كبير فالسن وفيه الشيب وكيبان صارم لاكن موفر الحقوق للموضفين فهاد الشبكة وعرفت من بعد باللي كاع اللي كيرصلو الستينات ولا الخمسينات كيسيفطوهم للحج على حسب الخدمة و الاعياد كيعطيو بيرمات لجميع الموضفين و فالعيد وفرمضان كيعطيو فلوس الحريرة والى مرض شي واحد تما كيتكلفو بيه من ساسو لراسو وكيسيفطوه لواحد المستشفى العسكري كيتعالج على حسب الخدمة حتى من الفوطات كيسيفطوهم ليهم واكتشفت ان اللي خدامين تما كتكون عندهم مهام خارج البلاد وكيدوزو فيها ربع سنين ولا قلت سنين وكيجيو جايبين ثروة حيت كيتخلصو للنهار .. كاع اللي خدامين تما لاباس عليهم مكاينش اللي مكحط والمخير عندو فيلا ولا جوج ديور وكاين اللي مدخل ولادو .. اما انا الصالير ديالي طلع طلعة وحدة وليت كنشدهم ضمسة على ختها ونهار على نهار وليت كنحس براسي كنتبدل بلا منشعر .. لا فهضرتي ولا فتصرفاتي .. المشية ديالي هي اللهخرة تبدلات وليت غادية ومخنفرة هازة راسي . اما البوليس الي وقفوني وقلت ليهم فاش خدامة كيضربو ليا السلام ويخليوني نزيد

الحاصول .. الثقة فالنفس كتزاد والهبة والهمة والشان .. ماشي غير الفلوس اللي كيديرو هادشي وانما حتى المنصب ديالك والمحيط ديالك كيساهم فشخصيتك وفاحترام الناس ليك وحتى المعارف تبدلو مرة اخرى وتعرفت على ناس كيتعاشرو غير مع الناس اللي ليهم قيمة

رصيت الامور العملية اللي كانو شاغلين ليا وقتي وغبرت هاد المدة كلها على مالين الدار وعلى بنتي وقررت نمشي الويكاند نشوفهم .. تقديت ليهم الكادويات وتقديت لبنتي ومابقيتش كاع كنضرب حسبة للفلوس .. مشيت للناضور ووقفت لقيت الطموبيل دعيسى قدامي ..نزلت هزيت البكاج ديالي وطلعت للدار كنجري تعرضات ليا بنتي عنقاتني وهزيتها كنبوس فيها ونعنق ونعنق ماما .. ناض بابا تفاجا حيت ماقلتش ليهم غنجي ودرتها ليهم مفاجأة .. عنقتو وسلمت عليه ودخلت لقيت عيسى جالس .. لحت ليه السلام ومشيت بحالي متحمسة نهضر مع ماما ونعنق بنتي .. جلست فالكوزينة هازاها وهي كتقولي نمشي معاك ديني معاك .. بقيت كنحاول نشرخ ليها باللي خدامة وغل قلبها كندير شحال من حاجة باش نشوفها احسن من كاع الوليدات وكاع الناس مستقبلا ويجي النهار اللي تحضى فيه بالاحترام والوقار حتى هي .. مشيت لبيتي ديتها معايا وجلست باش ناخد راحتي معاها وبقيت كنسولها شنو كديري واش كيجي باباك عندك واش كتهلا فيك وهي غير اه اه اه وعينيها على باكية دالشكلاط .. ماخديت راحتي مع دارنا حتى مشا عيسى بحالو عاد جلست معاهم وبقا بابا كيسولني على شنو كنت منعاود ليه وقلت ليه راني خدمت فالوزارة ديال الداخلية وصافي مابغيتش نقول ليه فاش خدامة ونجبد على راسي النحل والاسئلة ، قلت ندوز معاهم ديك الويكاند فالهنى ونمشي حتى يحن الله . جلسنا فالعشا وسمعتو كيهضر عاى عيسى قالينا غيسافر على برا باش نكونو عارفين انه مغيجيش يشوف جنة .. ماديتهاش فيه حيت اصلا مابقاش كيهمني كاع شنو كيدير وخرجتو من بالي فمرة وتهنيت ودوزت ديك اليوماين ومشيت نقابل خدمتي وكل ويكاند كنشد الطريق لدارنا ندوزو معاهم ونرجع بحالي وحتى هما كل مرة جايين عندي وبعد المرات كتجلس معايا ماما اسبوع وترجع .. بقينا على داك الحال حتى ساليت السطاج وتحولت من داك القسم لقسم اخر وهاد المرة المهمة ديالي كانت كبيرة .. من زهري جيت مع التقاعد ديال واحد الكاتبة دالرئيس ديالنا وجيت انا بلاصتها وجاتني خدمتها صعيبة ومسؤولية كبيرة وخاصني الدماغ لهادشي وانا كانت عاجباني خدمة العطل وداكشي ماحسابنيش غنشد مكتب بوحدي ونكون مسؤولة على اللي تحت مني . هزيت ليها الهم وضربت فيها اربع اشهر ديال الخدمة مع الرئيس المنحوس مرضني كل مرة عاطيني مهمة ومكتعجبو حتى حاجة والمشكلة هوا مريض وكبر رجع كينسا وعندو زهيمر وكيتسناو الفرصة فين يهزوه من تما ويحيدوه حيت مابقاش قد المسؤولية وميجي فين يمشي حتى يخرج ليا عقلي معاه .. واللي هضرتي معاه يقصح معا الهضرة مكاينش الاستهتار فالخدمة واللعب .

اخيرا جا السبب وطاح مريض واستبعد من المكتب ديالو وبقا وفارغ وتحملت المسؤولية كلها على ضهري ودايرة خدمة دالرئيس والنائبة وضاغطة على اللي تحت مني وتضغطنا كلنا وعشنا واحد الستريس وجات مع شي مشاكل سياسة وعشنا واحد الضغط. رهيب حتى مرضنا عاد جات اللائحة البيضاء عندنا فيها الرئيس الجديد .. من نهار جات وانا هازة الهم كنطلب الله يكون شي واحد مزيان وماناقصو لا عقل لا والو باش ميحمقنيش ويحمقنا كلنا حيت غنخدم معاه ولاسقة عليه ومني ليه وانا اللي غنسمع الهضرة الى ما كانتش كل حاجة فمحلها .

صبح نهار الاثنين وقالك ليوم غيبدا ومشيت وجدت كاع الملفات والوثائق اللي خدامين عليها حطيتهم وكنتسنا الرئيس يدخل للمكتب ديالو حتى قالت ليا واحد الشاف راه جا هوا الاول وراه فالبيرو ديالو

قلت ليها حسابني مزال ماجا حيت على ما اضن عندنا اجتماع

قالت ليا داكشي اللي كاين

سمعت تيليفون الفيكس كيصوني وهزيت جاوبت من مكتب الرئيس ديالنا قالي جيبي الوثاىق فلان فلانية وهزيتهم مشيت دقيت عليه ودخل .. مع غنهز راسي كنجي فالسمية اللي فواحد الزاجة قدامي فوق المكتب مكتوب عليها عيسى الحجوجي !!

هزيت راسي واللون تخطف ليا شفت فيه كان هوا بشحمه ولحمه معلق لافيست وراه وجالس بالقميجة والسروال والبيرو قدو قداش وكيشوف فيا باستغراب تصدم .. وقالي سارة؟!

كنت غطيح من هول الصدمة !!! بقيت واقفة مصمرة وبعد واحد الملف قدامو وقالي ااشكديري هنا

ماعرفت نجاوبو كرئيس ولا كطليق ولا كيفاش ندير ليه!! كان فالذهب اش جابو عندي !! هاد السيد مابغاش يتفهم ليا وماقدرتش نفهمو .. عمرني طاح ليا على بالي يكون خدام هنا ولا عندو علاقة بهادشي كاع ولاكن تصدمت .. نقدر نقول انني اول مرة نتصدم شي صدمة نيييت فحياتي .. تلفت بقيت كنحنحن قلت ليه عيسى .. السي الحاج السي الرئيس !! وبقيت كنتمتم ماعرفت مانقدم ولا منوخر

قالي زيدي زيدي جلسي

مشيت المشية دالشينوا وهبطت خنافري وجلست عطيتو دوك الوثاىق وبقا كيطلع فيا ويهبط ويدو على فمو وانا كنشوف فيه بنص عين .. قالي وليتي خدامة هنا

حركت ليه راسي قلت ليه اه

قالي شي واحد ترسط ليك ولا ؟؟

قلت ليه لا راسي ..دوزت مع الدكاترة وهزوني

هبط راسو شاد فستيلو وقالي مزيان .

قلت ليه واش حتى نتا خدام هنا !!

تكا الور كيشوف فيا وقالي امم

قلت ليه عمرني عرفتك خدام هنا واش عاد بديتي ؟

بقا ساكت وحل دوك الوثائق كيشوف فيهم وسولني عليهم وعلى الخدمة تقول عمرو عرفني !! السيد تهز واحد وتحط واحد كن كان بلاصتو واحد اخر مكيعرفنيش كن عاملني نفس المعاملة .. اصلا ماكنتش كنتسنا منو شي معاملة فشكل واللي بغيت هوا يخليني مرتاحة فخدمتي ميضغطش عليا ويخرج ليا عقلي .. على الله يوقرني ويخليني ندير خدمتي فخاطري بلا ميدخل المشاكل الخاصة فالخدمة .. بقا كيشوف ويدور دوك الاوراق وانا كنربط الاحداث القديمة مع الجديدة .. بصراحة عمرني عرفتو فاش خدام وكان ديما كيصدرني ويقولي مسافر خدمة. ولا معطل خدمة ولا شي حاجة متعلقة بالخدمة وكيدخل ليا الذهب فالطريق. حتى دوخني .. وحتى فاش سيفطوني لمدينة اخرى وتوسط ليا دخلني الشك قلت مع راسي خاص يكون عندو شي منصب كبير باش يقدر يتوسط ليا ويكونو عندو معارف كبار ..كاع هادشي فكرت فيه ولاكن متوقعتش بمرة نطيح انا وياه فنفس الصف .

رجع اللور تكا على ضهرو مكيشوفش فيا كاع تقول جالس بوحدو عيط على الكاتبة الثانية اللي كتسجل الموعيد وخدمتها بحال المنبه. حيت ماعندهاش سكريتيرة حنا لاكن عندنا واحد التقسيم مخربق وشي فوق شي وشي حدا شي وبينا مجموعات مقسمين كل واحد وخدمتو .. قاليها فتيليفون باللي غيبداو الاجتماع من دابا عشرة دقايق وقطع وهبط راسو قالي صافي شكرا غير سيري للبيرو ديالك ونضت خرجت مشيت بحالي وجلست كنتسنا يبان ليا شي واحد يشبع فيا تسرفيق باش نفيق ونخرج من هاد المنامة

تقلبات عليا الدنيا بالضحك بديت كنضحك غير بوحدي بحال شي حمقة وكنشوف فهاد الزمان اللي كدورني كيف بغا .. دوزت دوك الدقايق كنستوعب ونضت مشيت للاجتماع جلست باش نتعرفو غلى رئيس القسم ديالنا .. كلشي داير عقلو الا انا اللي كل مرة كتخرج ليا الضحكة من ودنيا وجاتني واحد الهستيرية ديال الضحك ماقدرتش نشوف فوجهه وقالبة وجهي جيهة واحد المرى جالسة حدايا وكنبكيص بالضحك وهي كتسولني مالي وعلاش كنضحك .. ماحدها كتسول وانا كنزيد نضحك حتى قالي ضحكينا معاك نضحكو حتى حنا

سديت فمي وسكت زيرت غلى سناني باش منضحكش والموضفين اللي معانا كيشوفو فيا ومنهم اللي ضحك لا اراديا وانتقلت ليه العدوى .ً شفت فالحاج عيسى لقيتو كيدور ستيلياو فيدو وكيشوف فيا بجدية وهبطت راسي قامعة الضحكة فيا حتى بردت .. ماهضرت ما نطقت بقيت ساكتة كنسمع حتى دازت ديك نص ساعة دالاجتماع وخرجنا كل واحد مشا لخدمتو .. يالاه جلست نسوط على راسي عيط ليا فالتيليفون قالي اجي ونضت كنسوط مشيت عندو ودخلت نشوف اش بغا لقيتو جالس واحل بين دوك الوثاىق وبقا كيسولني وانا كنجاوبو ومتبعة معاه ورقة بورقة جميع الملفات والعناوين وكنخليه حتى يراجعو ونحط داكشي بالترتيب حتى سخفت وجاني الجوع وماعطانيش البوز ديالي دالغدا وبقيت عاصرة كنحسب انا وياه حتى ساليناهم وهز تيليفون عيط على الكاتبة الثانية قاليها طلعهم للحصانة وهزاتهم داتهم وقالي صافي غير سيري ونضت جمعت الاوراق اللي بقاو في حين جر السجادة طلقها تما وخرجت بحالي خليتو كيحل سيور سباطو باغي يصلي . هبطت نيشان للمطعم تغديت وجلست كنتجمع مع واحد المرى كبيرة فالسن كيقولو ليها الحاجة لكبيرة وحجات شي خمسة دالمرات على حسب الخدمة وقربات تخرج تقاعد وكتقاتل باش تدخل بنتها فبلاصتها .. بقينا كنضهرو على هادشي وقالت ليا باللي عندها الاجازة و دوزات الكونكور ديال السلم عشرة وحداش وبنتها نجحات فالكتابي وبقا ليها الشفوي وقالت ليا غنهضر مع مسيو الحجوجي على بنتي

قلت ليها راه متديين موحال يبغي يدير معاك هادشي

قالت ليا لا خفت غير تنجح ويحيدوها ويديرو بلاصتها شي واحد اخر من برى .. هادشي فيه التحراك والى جات شي ليستة من برا فيها اسماء بزاف غينقصو حتى من اللي نجحو .

قلت ليها هضري معاه ماتعرفي

قالت ليا كيعاودو عليه راجل مزيان ومعقول

قلت ليها كن كان معقول مايسمحش لشي واحد جاي من الطرف ويدخل واللي ضارب عليها الجهد يضيع

بقات ساكتة وقالت ليا بلاتي ونمشي ..

تغدينا ورجعت للخدمة حتى بانت ليا دايزة ونضت شيرت ليها دخلات عندي قلت ليها امضرا شنو درتي ؟

دخلات عاضة شنايفها قالت ليا دخلت لقيتو واقف يالاه بغا يصلي العصر ويخرج ووقف مابداش قالي غير زيدي دخلي .. قلت ليه زعما السي لحجوجي راه عندي واحد البنيتة وهاشنو هاشنو وراه نجحات وبغيت نوصي عليها وغير هي اللي عندي وانا قربت نتقاعد وخفت عليها ضيع .. ايوا وبدا كيقلب تما على ديك الورقة بدا كيشوف دوك الاسماء وقالي مكايناش هاد الهضرة كاع اللي نجحو حتى واحد مغيضيع فحقو وقلت ليه الله يرحم الواليدين والله يقبل وخرجت

قلت ليها راني قلت ليك متديين مغينقص ومغايزيد

قالت ليا بصح .. لالل باينة عليه ديكودي

قلت ليها شنو هي زعما؟

قالت ليا دغري

بقيت كنشوف فيها مافهمتش وقالت ليا زعما نيشان

قلت ليها اااه اه اه لا نيشان ماتدي منو لا حق لا باطل

قالت ليا واش فايت خدمتي معاه فشي بلاصة

بقيت كنضحك قلت ليها لا غير كنسمع عليه وصافي. ومشات فرحانة مطمنة على بنتها

ناري على نهار كي داز .. داز اطول نهار فحياتي العملية .. رجعت للدار مسخسخة طحت كاو رتاحيت .. عيطت لدارنا نسول على بنتي وسكت ما جبدتش حس عيسى ولا غيرو .. ضربت الطم وقطعت الحس وبقيت كنتجمع مع بنتي وكنواعدها غير تكمل ربع سنين ونجيبها عندي تعيش معايا وندخلها لاكخيش ومابقا ليها والو .. اربع اشهر ونجيبها عندي .. مسكينة بقات كتحسب ليا شحال بصبعها وانا مساسيساها حتى تسدو عيني ونعست وصبحت على الخدمة .. هاد الصباح ماجاش مسيو حجوجي وخدمنا راسنا داكشي اللي موالفين نديروه والاخداث الجديدة اللي كدخل علينا .. مشاو منا شي وحدين لغزة غيجلسو فيها عماين وجات الخرجة على برا وناضت المفاوضات مع المدير وكلشي ماكرهش يمشي وكولشي دخل فاللاىحة وباغي يخرج والنص منا منتشار على برا فدول عمرني سمعت سمياتهم وبزاف ديال العجب بديت كنشوفو .. وصلاتني اللاىحة ديال الناس المرشحين واراك للتبحليس وكلشي جا فصفي. وكولشي باغي يدير معايا المزيان واخا ماعندي منصور منهم انا اصلا .. شديتها حيدت كاع هادوك اللي رجعو هاد العام وخليت اللي شحال هادي مامشاو وماعطيت لا حس لا خبر لشي واحد وقاديت اللاىحة وحطيتها و رجعت منين مادزت كيعيطو ليا لاللة سارة وكيديرو ليا كي الماء القليل وحتى اللي رجعو هاد العام ولقاوني جديدة جابو ليا عرام دالكادوات باش زعما نخليهم فالاىحة .. اما لعيالات وجعت حبيبتهم ووحدة عرضاتني لعرس بنتها ووحدة بغات تصاحب معايا .. اوودي والله كن ما داك البيرو اللي كنجلس فيه لا عطاوني جغمة دالماء. خليت اللاىحة باتت تما حتى الغد ليه شديتها راجعتها لانكون ضلمت شي واحد ووقعت عليها ودخلتها لمسيو لحجوجي عطيتها ليه طالع عليها وقالي واش هادو كانو على برا.

قلت ليه لا هادو عاد رجعو . بقا كيشوف فيهم وضرب على واحد جوج فيهم بستيلو .. قلت ليه ماخرجوش هادو كاع

قالي هادو بوجاديين وماشي ديال الخدمة برا

بقيت كنشوف قلت خليه يضبر محاينو شغلو هاداك المهم درت اللي عليا .. حط جوج اسماء اخرين ديال واحد الجوج قافزيين وقلت ليه راه عاد دخلو

قالي يدخلو ولا يخرجو .. حنا ماشي كنفرقو الصدقة هنا ولا العطل .. اللي قد المسؤولية وكابابل هوا اللي كنسبقوه .. هادا بالضبط ماتعاوديش تحطيه فعاد لاليست ديال الناس اللي خارجين فميسيو .

حركت راسي كنشوف فديك الورقة اللي شد طواها وقالي عاودو لاىحة اخرى

خرجت من تما كنفخ مشيت عاودت خرجت وحدة اخرى غلى سعدي ووعدي وكولشي باغي يعرف شكون فديك اللائحة .. خرجت وحدة جديدة والقديمة حرقتها حيت لاطاحت فيد شي واحد مشيت فيها فخطرة مايعقلوش عليا . دخلت عندو لقيتو كيصلي .. سعداتو والله .. بعدا الصلاة مكيدوزهاش واخا يكون كيغرق. .. رجعت بحالي مادخلتش حتى عيط ليا قالي اجي ومشيت ديتها ليه حطيتها ليه قراها ووقع عليها ودخلها فالملف قالي صافي ديها وخرجت بحالي .

تعلنو من بعد ثلت ايام الناس اللي غيسافرو وبدينا روينة اخرى ديال واحد الملف اخر مشحر .. خصيني نحضيك والتبركيك والبق مايزهق ..

هاد الويكاند جاو عندي مالين الدار .. وتجمعنا على قصرية دالرفيسة . قلت لبابا انا صافي دابا استقريت هنا فالرباط والسياج ديالي هنا ماعندي فين نرجع.. حتى جنة غتزيد شوية وتتحول لهنا .. وبغيت نشري شي دار احسن ما نبقا فالكرا

قالي الى كنتي غتشريها بالربى غير بقاي فالكرا

قلت ليه لالا بغيت نبيع هاديك اللي فالناضور ونشري هنا حيت مابقا لي ماندير فالناضور

قالي نتي تعرفي .. بقيت كنسايس معاه حتى اقتنع وهم الاسقرار والسكن انزاح .. قالي راه عيسى حتى هوا تحول للرباط وراه باغي يخرج جنة تلعب شوية مع ولدو باش يولفو بعضياتهم وتتربا بيناتهم ديك الاخوة ماشي يبقا شي غريب على شي

قلت ليه هي تحول هوا وعاىلته

قالي ايوا ضاروري واش كاين شي راجل يقبل يعيش فمدينة والمرى فمدينة

سكت ماعرفتش شنو وقع بين رجاء وعيسى وكيفاش حتى تحولات معاه واش باقا خدامة ولالا ولاشنو دارت . قلت مع راسي يضبرو راسهم وانا مالي ..نديها فحياتي اللي مهمة والباقي لهلا يقلب . خرج بابا فالعشية خرجها معاه واخا كنت باغا نبقا معاها ونشبع منها ساعا جا طيرها ليا داها وبقيت كنشوف فالحيوط..قنطت ومالقيت ماندير وخرجت حتى انا خرجت ماما قلت ليها يالاه نمشيو لحديقة الحيوانات ندوزو العشية تما ونجيو ونيت تشوفي الحديقة عمرك مشيتي ليها . لبسنا ومشينا كندورو فخديقة الحيوانات انا وياها حتى كنخرج فعيسى لابس سورفيت كحلة وداير نضاضر الشمس حتى قلت مع راسي شكون هاد الزين قبل مانعرفو ..عرفتو غيرر ببنتي اللي غادي تابعها وهي كتجري مور ولدو .. تباارك الله ولدو كبر شحال ما شفتو .. ضحكت لااراديا قلت لماما ها جنة

ضارت يمين وشمال قالت ليا فين فين؟ قلت ليها هااهيا كتنقز

ضربتها بالعين حتى جات على زنافرها ومشيت كنجري عندها لاكن سبقني عيسى وهزها من الارض وتصدم فاش شافني . ماعقلتش عليه تحنيت عندها كنقلب ليها وجهها وهي كتبكي وتعجبات فاش شافتني . وقف ولدو حدايا تكا على ركابيه كيسوط من العيا وعيسى كيهضر مع ماما كتعاود ليه قصة حياتنا كفاش حتى تلاقيناهم .واحد الشويك وقفات علينا رجاء هازة قرعة دالماء ولابسة سورفيت طويلة وسبرديلة كضحك قالت ليا السلام وتحنات قالت لبنتي ياكما تقصحتي اماما .. لاباس عليك احبيبة ديالي لاباس غليك .

حسيت ساعتها بواحد النار طالعة معايا وشفت فيها من تحت حجباني واحد الشوفة كنخزر فيها وماما واقفة سلمو غلى بعضياتهم وبقات كتهضر وانا كنمسح لبنتي وجهها وساكتة ماهزيتش راسي ومابغيتش نبين كاع احساسي .. وقفت قلت لبنتي صافي عيييتي ؟ يالاه نمشيو بحالنا

قالت ليا رجاء خليها مسكينية تفوج شوية راه عاجبها الحال

هبطت راسي كنمص ديك الهضرة ديال السم البارد ومابغيتش كاع نجاوبها ولا نشوف جيهتها وهي كتهضر وعاجبها الحال تقول ربحات رحلة للمالديف قالت لينا مرحبا بيكم اجيو تجلسو معانا

قالت ليها ماما لالا حنا بغيتا نتمشاو شوية على رجلينا عيينا بالجلاس ابنتي

هبط عيسى لمستوى جنة كيشوف فيها وكيضحك ومخبيها تحت الكاسكيطة اللي داير كنسمعو كيقول ليها فين تقصحتي .. انشوف. .. جرها من تريكو باسها وهزها على كتافو داها وبقينا حنا واقفين وماما كدير الصواب مع رجاء وتسولها على العاىلة وهي كتهضر والفرحة غتخرج من عينيها .. بسيف ماتفرح وهي كانت الرسط ودابا خوات ليها الساحة وغتكون مرتاحة من جيهتي حيت تطلقت بالثلات مابقا ليا فين نرجع ومحرمة عليه

قالت لينا الله يعاون ومشات كضحك وانا كنشوف هاد الله يعاون ديالها زعما خليت ليكم الراحة .. انا بيا بنتي ولا شيء من غير بنتي وهي عقلها غير فالازبال وزادتها بالغلض ولات بحال البقرةووجها تنفخ بغا يطرطق مابقات كااع جايا معاه اصلا .. لا علاقة ليه بيها .. هوا بعيد كل البعد ومهلي فراسو بالرياضة وفصحتو و حتى فحوايحو وهي موراه شادة واحد الكاغيط غادية وكتقشر فالزريعة .. قلت لماما عجبك هادشي ؟؟ تشوفيني انا غادية مع مرت با ونتي كتشوفي بعينيك ؟ عجبك هادشي؟

قالت ليا سيري ردي بنتك وعطيه واحد جوج كلمات ..هاديك راه باغا دير البنت تحت باطها وهادشي كامل باش تبين ليه هوا شحال هي حنينة ومابحالها حد..سيري جيبي بنتك راه انا وشعلات فيا العافية

مشيت عندو نيشان ابتسمت وقلت ليها وهي فوق راسو ماما يالاه نمشيو لدوك البلايص الزوينين ديالنا انا ونتي

شاف فيا قالي خليها حتى للعشية ونردها للدار

قلت ليه لا براكة عليها حتى لمرةاخرى ان شاء الله

نزلها وتحنا باسها وجات ام الصدر الحنون البقرة الضاحكة تحنات عندها باستها وعطاتها وريدة قالت ليها ديالمن هادي؟

قالت ليها جنة ديال طاطا رجاء

دورت وجهي كنزفر وكنحاول نتحكم فأعصابي حتى سليت بنتي ومشيت بحالي كنبحث فيها ونسولها شنو قالو ليك شنو قالت ليك فين مشيتو فين جيتو .. جلسنا فواحد المطعم ناكلو شي حاجة وبقيت كنشوف حتى بانو ليا من بعيد غاديين وهي كتمد ليه يدها باغا تشد فيه وكتهز وتحط فديك السورفيت اللي لابسة .. عيفاتني ولات حالتها بالغلض مابقا باين ليها راس من رجلين وكتلسق فيه بحال الى غيهرب ليها .. هوا براسو كرهتو وخيخت منو لا هوا لا دوقو المزفت ومضيع راسو مع وحدة منافقة ومسمومة وماشي ديالو كاع … تحسرت عليه فهاد اللحضة وبقا فيا مابغيتهاش ليه ولاكن سرو خليه انا بغيت يموت معاها ..كان بثلاتة دالعيالات رجع بوحدة واكفس وحدة فدوك آلثلاتة . بكثرة ما شبعات نعاس على جنب الراحة فاضت حتى تزلعات ..يخخ

يتبع...