ألف مبروك الجزء الثالث

ماعرفت نزيد ماعرفت نرجع مشيت دخلت الطواليط جلست مصدومة ويدي على حناكي وانا كي لهبيلة كنت كنقول ليها كنبغي واحد وبغيت نتفك من عبد الحق وبا جاب ليا واحد ماباغاهاش !! لا والزوينة كتبات ليا الشعر ومسيفطينو ليه بسيف ما يسكت ليها القلب صافي عرفاتني غتكون شافت تصاور العرس وطاح ليها النص !!! يااه يا ربي شهادشي كيوقع لي هادشي راه نعاودو لشي واحد مايصدقش !!! حياتي غادية جنب مكترجع باللور مكتزيد القدام ودابا باشمن وجه نقابلها ولا نشوف فيها وشنو غنقول ليها وجلسات كاعاود ليا عليه كان سكايري كان … هييه السي عيسى شخصيا كان منحرف هاداك اللي كنعرف كان شي وقت منحرف !!! بغيت غير نشوفو منحارف كفاش كان اللي شافو يحلف عليه تزاد ملفوف فسجادة. .. اشمن يا اذكار اشمن يا استغفار ومكيهزش الراس اما العين راه كهزها كن كان مغمضها مايدينيش انا !

من بعد ماستوعبت تقبلت الصدمة وجلست شحال فالحمام خرجت بوجهك نهضر من غير اللي دخلت بيها لهاد الدار. ، مشيت بلاصتي جلست تخت المجهر كولشي كيسرق مني الشوفة ويطلعني ويهبطني وانا كنشوف فرجاء جالسة فالقنت كاع دايرة رجل على رجل وولدها كيلعب حدا رجلها بقيت حاضياه كيشبه لعيسى لخالق الناطق باينة توحمات عليه حتى جابتو غير هوا .. رن تيليفوني كان عيسى شفت فجنابي وجاوبت بشوية قلت ليه الو. قالي بدلي ديك البلاصة فين جالسة جات مقابلة مع الباب. .. شفت الفالصالون كان عامر قلت ليه مكاينش البلاصة

قالي دوزي ليا الحاجة. وعطيتو عكوزتي هضرات معاه قبل ماتقطع ناضت وقفات قالت لي يالاه نجلسو فالبيت حسن مانبقاو هنا ونضت هزيت صاكي معصبة من هاد الحكام الخاوي !! فين شافني وفين بنت ليه منوضني كيحرك فيا بحال المونيكة ، جلسنا فبيت اخر مع الناس كولشي كيشوف فيا يديا ورجليا عامرين بالنقش. هاهيا مرت عيسى هاهيا لعروسة هاهيا الثالثة. طلع ليا الدم جلست على اعصابي ساكتة حتى حطو العشا نقبت شوية ونضنا نمشيو دخلت لبيت النعاس عند لبنى وراسي فالارض حشمت شفت فيها بنص عين كانت جالسة فالفراش ساكتة وشعرها كحل قصير كوب قصيرة وكتشوف فيا بعينيها شفت العافية كتتهز فصدرها بغات تسوطها عليا وكتنين كانها كتالم وتسد عينيها وتحلهم .. ماقدرتش نشوف فيها بقيت ساكتة وعكوزتي بعداتني بابتسامة عليها وتحنات قالت ليها رخفي الله يرضي عليك .. رخفي على راسك ابنتي قطعتي ليا قلبي

سدات لبنى عينيها كتنين وسنانها ملاقيين كتشير لراسها باليد الاخرى وتلوم نفسها حتى سمعنا صتوت عيسى فالدار وقالت ليها عكوزتي بصوت منخفض. صافي صافي عيسى جا صافي نعلي الشيطان الله يهديك مكتاب الله تصرف

ماقدرتش نبقا واقفة حسيت بيهم عارفين شي حاجة وكيهمدوها فوجه كولشي وخرجت من البيت صادفت رجاء حدا باب الكوزينة كتهضر مع عيسى قالت ليه الفقصة مسكيينة اللي دارتها ليها ماشي مريضة راه قالك الطبيب تفقصات الحمد لله اللي مامشاتش فيها

دزت حدا الباب شافوني ومشيت ماكرهتش نهرب من ديك الدار نخرج مانضورش مورايا . سمعت. سارااا ووقفت جا عندي السي عيسى قالي غتمشي مع الحاج والحاجة حتى للصباح وغانجي

قلت ليه اللي عجبك

قالي الى بغيتي شي حاجة قوليها ليا

قلت ليه لالا بغيت غير نعرف فوقاش غنرجعو للناضور ..

قالي في حيرة مزال شوية الحالة ديال لبنى خصها الترويض وطلع ونزل غنشوفو شنو نديرو وتستاقر الحالة ديالها ونمشيو

دورت وجهي قلت ليه الى كنتي مزال معطل سيفطني ويتعرض ليا بابا

قالي بتساؤل علاش بغيتي تمشي ؟

جمعت نفسي ولحتها ليه قلت ليه مامرتاحاش هنا بغيت نمشي للناضور

بقا ساكت داير يديه فالجياب كيشوف فالارض واقف حدايا وكيفكر قالي الصباح يحن الله

سكت كنقاد الحجاب ديالي وجا ولدو كيجري عندنا تعرض ليه هزو كيضحك معاه قاليه بالفرونسي. بابا تمشي معانا ياك

باسو عيسى وحطو فالارض قاليه واخا بابا حتا لغدا عندي الخدمة دابا

قاليه ساجد نبقا معاك

قاليه عيسى لا غتمشي مع ماماك عندك المدرسة غدا

جات رجاء كتقرقب بابتسامة ضحكات معايا وشدات ولدها فيدها قالت لعيسى غنبات مع لبنى ليوم

قاليها علاش ماخداماش غدا ؟

قالت ليه شديتو على قبل لبنى غادي تبدا الترويض

قاليها صافي مزيان

ابتسمت ليها من باب الصواب وهي كتشوف فيا وضحك معانا .. وقالي عيسى يالاه نمشيو

قلت ليها بابتسامة الله يشافيها

ابتسمت ليا قالت ليا امين اختي لهلا يوريك باس حتى نتي

نزلت قدامو مشيت جيهة سيارة شيخي وقالي فين غادية مغنمشيوش

مشيت عندو قلت ليه قلتيًحتى للصباح

تبسم ليا وقرب شوية قالي غنمشيو انا ياك

دورت وجهي حليت باب الطموبيل وطلعت طلع حدايا سد ليا فيدي وانا كنشوف قدامي كنحس بيه كيمرر صبعو وشبك اصابعنا بجوج حسيت بيدي تنملات وحاطها على رجلو .. نخزني منها قالي وصافي نعلي شيطان راه هضرنا

دورت وجهي للزاج بغيت نجر يدي ويزر عليها قالي ساارة .. ورخفي شوية ماشي لهاد الدرجة

مجاوبتوش. بقيت كنسوط حتى وصلنا للدار الطريق كلها وهوا شاد ليا فيدي ودخلنا مشادين كانت الدار خاوية طلعنا فالدروج جرني عندو عنقني من خصري قالي فودني مال الزين ديالي شنو بغا نديرو ليه

شافتنا يسرى طالعين هاكاك بقات غير كتشوف وبعد عليا قلب وجهه ماشافش فيها اما انا حشمت حسيت بيه خدا ودني كان شوية يبوسني ! ابسمت يسرى وهبطات راسها استخيات منو ومن المنضر ووقفت انا ماكملتشً الطلعة طلقت من يدو طلع بوحدو وقلت ليها علاش مامشيتيش معانا للصداقة

قالت ليا كنت مشغولة .. اجي نجلسو الى كنتي مساليك

قلت ليها اه واخا ونزلت معاها حسيت براسي كنرتاح ليها وحتى هي كتعطيني وقت وكتقرب مني ، بقينا مجمعين لتحت انا وياها درتا القهرى وبدينا الهضرة على الصحابات ما الصحابات قالت لي انا ماعنديش الصحابات عندي كولشي سطحي

قلت ليها حتى انا عمرني درت الصحابات حتى فوقت القراية عمرني ترافقت مع شي بنت من غير الصداقة ديال القراية وصافي حيت عندي خواتاتي مصاحبة معاهم

قالت ليا مزياان حسن ليك .. عندك الدكتورة فليكونومي علاش ماخدمتيش بيها ؟

قلت ليها كنضحك ماكرهتش الحلم ديالي هوا نخدم

غمزاتني قالت ليا شوفي مع عيسى يخدمك راه عندو صحابو وعندو معارف كبار

قلت ليها نتي فاش خدامة ؟

قالت ليا ماعرفتيش فاش خدامة انا ؟؟

قلت ليها لا ! قالت ليا انا نائبة العمدة دفاس

تفاجأت قلت ليها تبارك الله عليك حساب ليا واش مهندسة ولا طبيبة. ولا موضفة

قالت ليا عندي ديبلوم ديال الهندسة ماخداماش بيه .. ماشي ضاروري تخدمي بديبلومك راه المعارف هما كولشي .. شوفي مع عيسى راه دخلنا البراني ماكنعرفوه ماكيعرفنا حراك العائلة

قلت ليها منقدرش نقولها ليه مايبغيش قالي ديري الخمار .. نقول ليه الخدمة يقول ليا السدل الشمن الخدمة

هزات حاجبها قالت ليا وعلاش رجاء خلاها تخدم

قلت ليها واش تزوجها من الاول خدامة !!

تنهدات دارت واحد الابتسامة قالت ليا اه .. كانت غير كادر فالقبضة وبغات تدفع لكونكور القابض نفسه لاكن كيشيروهم لأبعد بلاصة كل ثلت سنين فمدينة وفاش تزوجات بيه دفعات ليه وهاهيا دابا فنفس القبضة هنا ففاس ست سنين هادي .. مامشات لحتى بلاصة .. غير شوفي معاها تحايلي عليه راه يشوف ليك مايقولش لا .. يكونو غير الكفائات والقدرات هادشي اللي كيبغي ماش يجي واحد سطل ويتوسط ليه .. شحال من واحد عندو ديبلومات واعرين ماكانش مسكين كيقدر حتى يوصل الديبلوم ديالو ولا يبان وعاونو وانا براسي وكاع عاونا ناس عندهم خاص غير اللي يعاونوهم يعطيو شنو عندهم

قلت ليها دابا نقولها ليه عرفتي فرحتيني هاداك الحلم ديالي .. ولاكن علاش لبنى ماخداماش؟

قالت ليا لبنى بوحدها عاوتاني ماعندهاش نيفو ومايمكنش تخدم وهي ماعندهاش وماشي النوع اللي باغي يخدم ..ًداير ليها صالير كيدوز ليها كل شهر قادها شغادي دير بشي خدمة .. شدات ولد رجاء مقابلاه وكتربيه ماعلا بالهاش بشكون خدام شكون ماخدامش

قلت ليها ااه هي اللي شادا ليها الولد مزيان .. وهي ماعندهاش الولاد

بقات ساكتة شحال بابتسامة وقالت ليا ماكتابش مسكينة

قلت ليها انا راني مافهمت والو مكاينش اللي يشرح ليا شي حاجة نتي الوحيدة اللي كنهضر معاك

بقات ساكتة مطولا كتشوف فيا وقالت ليا خلي هادشي بيناتنا مابغيتش تعرفني قلت ليك شي حاجة ..حتى هي عزيزة عليا بزاف ومابغيتهاش تقلق

حلفت ليها قلت ليها مانقولش دابا تعرفيني مزيان غير تهناي

درنا الراس عند الراس كنتعاودو استحليناها قالت ليا

لبنى الاللة تزوجات هي وعيسى على سبعطاش لعام كانت عندو ثلاتة وعشرين تزوج صغير بقا عليه بابا بالهضرة باش يتزوج حيت كان باسل كان كيطير قال اجي نزوجو ولد ختي نتقل ليه الجناح ماحدو مزال فيه مايتشد اما ال دار ثلاتين عام صافي مشاا واللي بحالو اصلا مكيتزوجوش

قلت ليها كفاش مالو كي كان

دورات راسها كضحك قالت ليا مالو .. كان فسايدي وطايش هرج من الجنب.. وحنا راه ماعندناش. يك الصحبة وتخربيق العاىلة كلها نيشان .. المهم الاللة زوجو لبنى وهي مسكينة كان عندها مشكل ومها ماقالتوش لينا وستروه حتى تزوجو وضربو الكحل فالابيض عاد عرفناها عندها كونسير فالوالدة انتشر قالو ليها خصك تحيديها وهي مسكينة مامزوجاش غتبقا حياتها كلها بلاش سترو عليها حتى تزوجات واخا ماعجبناش الحال ودازت علينا بابا راه مرض حمل راسو المسؤولية اما عيسى كان كاع مامسوق تحيدها تخليها كان عايش حياتو ولاكن بابا بغاه يولد ويتقل بالولاد على الله وعسى يتهد ساعا والو مكاينش من داكشي وبقا معاها صبرات عليه صبر عليها مشاو هلندا عاشو تما شحال رجع فاش دخل دخل متدين السيد هزيتي واحد حطيتي واحد حتى الهضرة معاه مستعصية تبدل .. صافي هداه الله شد الطريق نيشان .. الصيام ثنين ولخميس ديما الصلاة فالوقت الدين ديال الصح بدل الصحاب بدل كولشي المهم مشا عيسى وجا عيسى تقولي ماشي هوا .. ضرب ربعة وثلاتين عام بغا لولاد وحتى لبنى تفهماتو وزوجات ليه بنت خالتها هي اللي هي رجاء وهي اقتارحات عليه رجاء

درت يدي على فمي قلت ليها اويييلي وقدرات !!

حركات ليا راسها كضحك قالت ليا وابلاااتي نكمل ليك .. رجاء كانت كتجي عند لبنى ماكيتفارقوش كدوز معاها العطل ودوز معاها الويكاند وعاوناتها بزاف لبنى ماديا وكانت عارفاها رجعاء مكتولدش اصلا كولشي عارف ولبنى متقبلاها عاشت بحال الملكة وكانت عزيزة عليها رجاء وصحابات الروح بالروح بقات كتشكرها ليه وتعاود ليه عليها بهاد الطريقة باش ختار رجاء وعاىلتها معقولين وبنت الناس كايشوفها داخلة خارجة عندو وكان كايحتارمها واقتنع صافي بغا وليدات وعجباتو .. فاش الاللة تزوجها وهي تقلب وجهها على لبنى .. دوزات عليها المرار بقات لبنى كدور وتقول ليهم درتها راسي انا اللي كنت دايراها بحال ختي انا اللي دخلتها المهم ديك الهضرة دالعيالات وتربعات ليك رجاء على العرش رجعات الحرب من تحت لتحت عطيني نعطيك وعايراتها بالعاكرة وديما مسبقة راسها عليها وهادشي كامل عمر لبنى وصلاتها لعيسى ولا قالتها ليه ولا دخلاتو فالمشاكيل رجعو الشكاوي من عند رجاء ديما كتشكى من لبنى ماكرهاتش تحيدها .. لاكن هايهاات معامن هي فاللخر عاد عرفات باللي لبنى بلاصتها تما مضمونة كايحماق عليها عيسى مسبقها فكولشي ورجاء مغيارة كتبقا تحك من لبنى ودوزاتها عليها الصراحة والمشكل عيسى ماشي شي واحد اللي كيبين الفرق بيناتهم كانو بجوج بحال بحال وكيدافع على لبنى من رجاء حيت درويشة وحتى لبنى عارفاه تزوج بيها غير على قبل الولاد .. مي فاللخر بدات كتقصح بان ليها رجع كيبغيها ولا منعرف ناضت فيها ديك الغيرة ديال حيديني نحيدك حتى تهدو بجوج وعياو وولدات رجاء لقات لبنى اللي شدات الولد عاد تكالماو .. وحدة شوقها فالولاد ربات ساجد والثانية شوقها فعيسى شافت لبنى عطات الحب لساجد تهدنات من جهة عيسى قالت ربحتو. حتى جيتي نتي الاللة مولاتي قلبتي الموازيين كوولها حتى واحد ماتوقع فالعائلة يعاود عيسى الزواج من الخيخ اللي خيخ فالتعدد ومايجي منو حتى صدمنا قالينا بابا راه غيتزوج واجي تفرجي ديك الساعة ههه

بقيت غير كنشوف فيها وفشنو عاودات ليا تقال عليا اللسان وبقيت مصمرك كنشوف فيها حتى غمزاتني قالت ليا نسولك وجاوبيني بصراحة

قلت ليها شنو ؟؟

قالت ليا فين عرفتي لبنى ؟؟

صفاريت قلت ليها مكنعرفهاش

بقات كتوف فيها بابتسامة هازة حاجبها وقالت ليا ماتقتيش فيا !! انا هاودت ليك كولشي وتقت فيك ونتي ماتقتيش

بقيت ساكتة كنشوف فيها وتنهدت قلت ليها قسمي ليا بالله حتى نتي تخليها بيناتنا

تخلعات فيا وقسمات ليا بالله وقلت ليها عرفتها فاش جيت لهنا للعرس .. انا فاش كنت كنقرا كنت كنعرف واحد ولاكن غير معرفة فحدود وليت كنبغيه وداكشي وبابا مابغاش يزوجني. بابا فشكل متشدد

قالت ليا بعفوية اه اه عارفة سمعت بابا كيهضر عليه قالك معقوول وداكشي

قلت ليه اييه وهاداك خدتم غير فبنكة قاليه بابا خدمة حرام ماحرام اصلا بابا هوا اللي كيخطب لينا داكشي عندنا فشي فشكل

قالت ليا بعفوية كتشربرقهوتها عادي عادي بين صحاب اللحية عادي داكشي ديال عطيني بنتك عطيني ولدك نزوجك بنتي نزوجك ولدي ماعندهمش عيب عادية

قلت ليها داكشي اللي كاين اصلا .. المهم رفضو وعجبو عيسى من الاول فاش جاو خطبو ختك لولد خالتي ولاكن يمكن فاش شافو مزوج تراجع ..

قالت ليا سمااعت شي حاجة بحال هاكا وقالها لينا بابا قالينا على باباك كي داير وعجبوو. وحتى عيسى شكرو وعاودو لينا شنو دار بيناتهم .. داروها ضحك فالاول كانو غير كيقشبو قاليه باباك نعطيك بنتي تتهلا لي فيها

قاليه عيسى نحطها فرق الراس كاع اللي جات من عندك مرحبا بيها .. ماعرفناش واش كانو بصح كيدخلو ديك الهضرة بالضحك ولا شنو ووصلات لرجاء جات دارت فضيحة هنا قالت لبابا سمعت ماسمعت وبداك كتبكي قاليها غير كيضحكو الله يهديك ماكاين زواج عاد بردات

قلت ليها المهم هاكا وقعات انا مكنعرفش خوك حتى. هوا مكيعرفنيش ولاكن باش نتفك من ولد عمي ملت جيهتكم نتوما قلت يقدر الى هضرت مع خوك يفهمني مدام بابا عجبو وكايعاود عليه مزيان يهضر ليه عليا باش بابا ينسا عليه ولد عمي و من بعد نقولو ماتفاهمناش على الاقل نكسب شوية دالوقت نشوف شنو ندير .. وجا عرس ختك جلست خدا لبنى ماعرفتهاش شكون بقينا كنهضرو وكان قلبي طايب بين نارين بغيت نتفك وشكيت عليها هي ملات عليا هاد الراي وجبدت خوك عندي يتفكرني وكتبات ليه بيدها مسج ولاكن ماعارفاش لمن كنت ماتبة عليه اكس وبدات عليه بالشعر والكلام الزوين حتى تصيدت معاه

بقات كتموت بالضحك قالت ليا ااااربي على لبني المسخوطة بسيف مايطيح ليها النص ديما دايراها قد راسها مكدخلش سوق راسها عزيز عليها التجمعات .. وعيسى حتى هوا كان ناقصو الحنان مسكين ههههه قال هاد العصفورة كتعرف تغرد … عرفتي شنو .. الراجل يقدر يكون مزوج ولاكن عايش الفراغ والبرود وكتكون عندو شعلة فصدور .. واخا مايقلبش على بديل يكون مقتانع ولاكن كيكون عندو غاز فصدور خاصاه مرى .. مرى الى بانت وشعلاتها صافي مشا الراجل هادشي اللي وقع لعيسى .. واخا كان مقتانع بزواجو حيت عمروو دمر الزواج بلعكس كينصح بعدم تعدد الزوجات كن كانت لبنى كتولد مكنضنش يفكر فالزواج حيت صافي شبع وقنع دوز صغرو كامل دافع الجهد ..فاش تبت وختر مع راسو رجع باغي يتسنط لعضامو ويستاقر صافي .. صدق شعل من الفتلة اللولة ..

قلت ليها لا لا راه قمعني ضار فيا قالي حشومة هادشي ابنت الفقيه

هبطات راسها على يديها كضحك قالت ليا اااا ربي على عيسى صافي صافي تاب .. ولاكن واش شافك بعدا عرفك فوجهك ؟؟ مكنضنش يدور فيك راه واخا هاكاك عشاق الزين .. كن شافك مايقمعكش غايقدر هاد الزين اللي كيجيب التعب والارهاق لبنادم يجلس غير يتنهد

بقيت كنضحك قلت ليها كتشكريني زعما

قالت ليا لالا انا براسي كيعجبني الزين كنقولها نيشان ايوا نكدبو !! زوينة تبارك الله مالكي دفعي عليه شبابك غاااالي راه كيموت فتجرحير هههه هاديك هي المتعة عندو عدبيه يكون توحش التعديب

بقات كضحك وضرب فخدها وتقول ليا اااوييلي عليكم ولاهيلا رواية

قلت ليها مشافنيييش اصلا حتى خرجت دزت حداه ماعرفترش فرشني بابا قدامو .. اما فاش عرفتر راه حشمت على داكشي اللي كتبت ليه كن شفتو قبل مانسيفط ليه تا حرف

حطات الكاس كضحك قالت ليا وقول نتوما خبلتوها قبل الزواج رجعتيه للمراهقة اصاحبتي والسيد ختر مابقاش كيشوف فحنابو كيشوف قدامو نيشان حتى صبح باغي يخطب وناضت الحرب بينو وبين رجاء قالت ليه الى دخلتيها مع هاد الباب نخرج من الباب لاخر كتحلف ليه قالت ليه الضرة هي اللي ماتجيش عليا وعمرها هزات عليه الحلق حتى رجعات كتغوت بغات تحماق عمرها فحياتها نواتها كانت كتقول انا وبعدي الطوفان حتى طوفها عيسى قاليها عجيك هوا هدام ماعجبكش اللي سلكاتم ديريها فاشرطلعات ليه الدم .. ولبنى مسكينة تصدماات فيه قالت تهد تا رجعات كتقول ماكايناش التقة جاب ليها الشلل النصفي كاع هي

قلت ليها هادشي اللي وقع صدقت مزوجة بصح مابقا ليا فين نتراجع ديك الساعة

سدات واحد العين وقالت ليا بيني وبينك زعما ماطحتيشً فعيسى

بقيت ساكتة شوية وقلت ليها ودابا صافي تزوجنا بطبيعة الحال كنبغيه

قالت ليا وحتى هوا راه راجل تعولي عليه مغتندنيش انا كنقول ليك .. غير التعدد اللي صعيب غتلقاي مشكل مع رجاء اما لبنى مسكينة حتى باش تهضر دابا وتقول ليك ديتيه ماتقدرش تخاف غير يسيق غيسى لخبار لشنو درتي نتي وياها ويطيح ليا النص التاني حيت ديما كيقول ليها تبقاي دخلي سوق راسك وهي مكتسمعش حتى دخلات سوق عضامها مسكينة فمرة وحدة الله يشافيها ياربي … عليها بقات كتغوت فاش شافت التصاور كتقول لينا انا اللي فرطت وانا عطيتو ليها بيدي كن حسابني مانحضرش كاع لي عرس نمشي نصلي صلاتي ها دوا اللي يحضر مع الشياطين

تنهدت قلت ليها ياكما عادي يغضب عليها عيسى الى عرف

قالت ليا وشنو يحساب ليك راه جمع ليها حتى عيا ديما دايرة مشكل غير بدخول الصحة كتخشي راسها فشغال الناس وهادي الى ساق ليها الخبار عندها يد فيها والله مايرحمها .. بلحق يقدر يعذرها راها كلاتها عمرها تعاود … قالت ليا ونتي مخايفاش يعرف شنو وقع

قلت ليها انا يديرعلى راسي .. يقول ليا الله يعاون نهز باليزتي نمشي بحالي غير مايفضحنيش قدام بابا يقوليه ماتفاهمناش

قالت ليا ولاهيلا سعدااتك مبرردة مزياان هاكا خاص يكون بنادم الى بغا يعيش مزيان

تنهدت طولنا فالهضرة حتى نزل عيسى بسروال سورفيت و تيشورط كيجر بانطوفة وقف علينا قالينا ماعيتوش من الهضرة ؟؟. الجوج هادي

زفرت درت يدي على يد مابغيتش ندور عندو كنت هانيا حتى نزل

قالت ليه يسرى واش بغيتي تصحر ؟

حرك ليها راسو بالايجاب سولها على واليديه قالت ليه رجعو شحال هادي وناضت ضحكات معايا قالت ليا تصبحي على خير حتى لغدا ونضرو

ضحكت معاها مشات وجلس عيسى بلاصتها تشتت على المخاد قاليا فاش كنتو كتهضرو

قلت ليه والو حتى انا غنوض نعس عييت

نضت وهزيت صاكي تلاقيت مع خدامتهم هازة بلاطو فيه الماكلة غادا بيه عندو عرفتو غيصبح صايم وخليتو مشيت لبيتي بدلت لقيت الدم مشات وخاصني نصبح مدوشة .. تحررت من ديك الفوطة كضايقني وحيدت اللون الغامق عليا لبست بيجامة خفيفة مستورة طبعا احتراما لمول الحبهة الدين والاحترام والوقار زعما

طحت نعست حققت الساعة مع العشرة باش نوض مانصبحش ناعسة قدام العاىلة ويفطرو وانا مزالة ناعسة حشومة !

تهنيت ديك الليلة ختى هي مارجعش للبيت نعست بوحدي تمرحت وفقت على المنبعه نضت الصباح دوشت ونشفت شعري وخرجت ملوية عليا فوطة ديالو لقيتها فالحمام وتحنيت على باليزتي لبست حوايجي درت حمالات الصدر فالاسود وديباردوربشورط ديالو فالاسود قصير من ال من الملابس المثيرة اللي حاوني فالدهاز مالقيت غيرهم فالباليزة جبتهم معايا .. تحنيت عاطية بالجنب للباب كنقلب على قميصي البلدي اللي نلبس قدام العاىلة والفوطة على راسي حتى تحل الباب ضرت بالزربة تخلعت جا وجهي فوجه عيسى تشوكا فاش شافني. هزعينو فااسما تقول دخل ليه الزاج فعينيه ورجع فالبلاصك سد الباب كيبركم بشفايفو قالي وجهه

تحرجت مابغيتهاش لراسي حسيت الخدش الاحراج وانا حمارة ماسديتش الباب من لداخل وكن غير لابسة شي حاجة عادية. تلقاه شرا ليا الانسومبل بالشهوة كما تخليها فراسه شافها عليا .. تجمعت بالزربة لبست وكنقول كفاش غايجي وجهي فوجهه مور هاد المنضر وصايم من لفوق !!قابلت اهل البيت ووجهي حمر كنودور بجنابي حاضياه منين غايدوز ليا لاكن مابانش ليا بمرة حتى حطو الغدا للي فاطر سمعتهم جبدو حسو قالو باللي مغدي مع لبنى ورجاء بغا يحضر للترويض ديالها فالدار وانا مع راسي قلت يقدر يعيط يسول لاكن ماعيطش ومارضيتش جاتني النفس على راسي عمر وقته ماسيفط حتى مسج يقول ليا واش كليتي واش شربتي كيعرف غير يزعف ويتنفخ عليا انا تقول جابني صولد بلحق انا اللي حمارة مزالة جالسة هنا اما نعيط لبابا نقول ليه يهضر معاه يردني بحالي ماشي خلاني كي الدجاجج فدارهم ومونس مع عيالاتو ! عيطت لبابا شكيت عليه قلت ليه بغيت نرجع صافي درت الصواب مابغيتش نبقا هنا مع الضراير قوليه يردني بحالي وحتى حوايجي ماجايباهمش وهوا مشغول معاهم ما كيديهاش فيا وانا جالسة هنا بلا شغل

قالي واخا ابنتي هانا غنعيط ليه فير سايسي ماديريش المشاكيل ولا تعايبي مع شي واحد. كولشي بالسياسة

قلت ليه داخلة سوق راسي وماقابلاش على الضراير ضاريني فحلقي بغيت نرجع

قالي غادي نعيط لو دابا الى ماصلاحش ليه يجي ويرجع نجي نجيبك

قلت ليه واخا وقطعت وجلست وسط الدار بوحدي حتى صونا ليا تيليفون حسابني بابا لاكن طلع عيسى جاوبتو والضيم طايح عليا قالي واش لاباس ؟

قلت ليه الحمد لله

قالي انا جاي فالطريق ياك نتي لاباس ماكاين حتى مشكل

تنهدت هبطت راسي كنشوف فصبعي قلت ليه لاباس

قالي قريب من الدار يالاه حتى نجي

قطعت .. الطريقة باش هضر معايا عرفت بابا عيط ليه ومن موراه عيط ليا بابا قالي صافي السبت غنجي نجيبك. .. راه هضرت معاه قالي غنجيبها السبت هوا مزال معطل تما قلت ليه بلاش ماتجي حتى لهنا وتعاود ترجع بزاااف عليه يضرب الطريق ربعة دالمرات فسيمانة وحدة انا غادي نجي عندها بحااال بحااال المهم عندي تكونو عل خاطركم هادا هوا المهم

قلت ليه صافي واخا بقا غير غدا وصافي اجي عندي فالصباح بكري

قالي ان شاء الله وبقا كيوصيني وانا كنقول غير اه واخا حتى قربات المغرب كانو كاع مالين دار صايمين الا انا و شيخي فيه السكر مسكين حشمت نفطر لقيت راسي بوحدي فاطرة تقول واكلة رمضان وبزز باش بلعت النعمة .. وجد الفطور بحال اجواء رمضان عندهم فالدار حتى الطبلة حطوها واجدة تقول رمضان وخلاوها حتى تأذن. . كنت جالسة على الفوطوي دايرة رجل على رجل كنلعب بيها ونتفرج انا ويسرى متبعين نفس البرنامج وكنهضرو عليه حتى دخل عيسى كان سبورتيف مع راسو لابس كولشي سامبل جا لقا السلام بلا مايشوف فينا وجلس فالطرف حدانا حنا راسو على تيليفون ماعاودش هزو هناني من شوف فيا نشوف فيك نبقا نتفكر فديك اللقطة اللي دخل فيها لقاني مشبكة بالكحل .. بقات يسرى كتهضر معاه وهوا كيجاوبها وعينيه على تيليفون متكي بيديه على ركابيه حتى قال الله واكبر وناض فالبلاصك خشا تيليفونو فجيبو مشا غبر حتى تجمع الكل وجروني نفطر واخا مغدية بكينتاكي مصاوب فالدار شلاضة فيها كاع انواع الخضرة ولافوكا والاناناس .. جلست معاهم عاد رجع على وجهه ابتسامة هاز راسو كيشوف فينا سبق مني انا اللولة بقا كيطلع ويهبط فيا جات نوبتي ساعتها نحدر عيني ونحشم على عرضي

فطرنا وجلس حدايا كل شوية يقول ليا كولي وانا قالبة وجهي عاد بانت ليه كولي فاش كان مع عيالاتو ماكنتش انا على البال انا. زعما آلك لتفريغ الغضب. !! دخلو علينا الضياف فجأة نضنا كنسلمو وكان معاهم راجل خمسيني عنقاتو يسرى ومديت ليه يدي سلمت عليه حشمت نخرج من الجماعة وهوا كبير بحال عمي ولا خالي . يالاه رديت يدي. نزل عليا عيسى شحطني والساعة فيدو يبسات ليا يدي قالي شنو قلنا على السلام واش مكتجمعيش يدك !!!

شديت فيدي كمدتها مصدومة وشفت فيه بقيت غير كنشوف عينيه محلولين عليا مانويتهاش ولا توقعتها وبابا اللي ولدني عنرو قاسني بالألم ولا حط عليا شي واحد يدو ، حسيت بالحكرة اول مرة نتضرب مولفة بالتهديد الصراخ لاكن الضرب !!! انااا نتضرب!!! شفت قدامي عيني غرغرو حسيت بخدش فصري وقلبي ضرني وشفت فالناس واش شافوني لقيت يسرى كتشوف فينا وراسها محني مصدومة انا البقية تلهاو مع السلام . شتتات يسرى النضر ورجعت اللور مشيت كنحري للبيت سديت عليا ونفاحرت بالبكا كنبكي ونجمع حوايجي فالباليزة ووقفتها وسمعت الدقان ويسرى متقول ليا من برا حلي ليا انا يسرى. ، خليت ليها شفاتني حامعة حوايجي وقالت ليا علاش اسارة شنو ماع طرا علاش جمعتي حوايجتك

خرجت العضرة بزز وتالفة فبلاصتي قلت ليها غنمشي بحالي

قالت لي. نتي عندنا فالدار ديري راسك جيتي عندي انا.. اااه عيسى ياعيسى .. كوراه ماقصدش غتكون غير ردة فعل وصافي

قلت ليها ردة فعل !!! هادي ردة فعل

وريتها يدي كانت حمرا والحنة مغطية عليها بقات كتهدئ من روعي .. جبدت تيليفوني عيطت لبابا والصوت كيتقطع فيا سمعاتني يسرى قلت الو بابا وخرجات كتجري من البيت تخلع بابا مسكين من صوتي سولني مالي شنو وقع قلت لي عيسى ضربني اجي عندي انا مقهورة هنا اجي ديني

قالي هانا جاي هانا جاااي لاحولة ولا قوة الا بالله ..

دخلات عندي عكوزتي كتجري معاها يسرى كتسول شنو واقع وراتها يسرى يدي دقة الساعة اللي فيدو كتزدح وشاداها عندي كنكمد فيها خلات ليا يديها عنقاتني كتواسيتي وتسمح على ضهري ويسرى كتجر الباليزة بغات تحيدها حدا الباب قلت ليها بصوت مقطع خليها بابا جاي عندي

سمعات عكوزتي بابا جاي تحلو عينيها فيا مابغاتش نعيط ليه وانا كنتنخصص دخل عيسى دفع الباب بقوة مخرج عينيه لقا باليزتي قدامو وشاف فيا لقاني واجدة لابسة حوايجي ، رجعت اللور مابغيتش نهضر معاه ومو تعرضات ليه قالت ليه عيسى !!!واش هادشي اولدي ضرب مراتك !!! حشومة باقا عروسة ماكملتشي السبعيام تضربها !!

جا جيهتي وانا جالسة على واحد الكرسي مهبطة راسي كنتنخصص وكنمسح وجهي قالي ماشي لهاد الدرجة اسارة مشكل بسيط نحلوه بيناتنا علاش خرجتي باك للطريق ماشي كاااع لهاد الدرجة !!!

تنهدت جمعت النفس قلت ليه فخاطري الى بقيت راني ماشي سارة واخا تجيب ليا الشمس بين يديها الطلاق هوا اللي غناخد ودار با غنرجع ليها

قالت ليا عكوزتي نعلي الشيطان ابنتي عيطي لباك قوليه يرجع الليل هادا معاياش كاع غيوصل

سكت وعيسى غير كيشوف فيا وفالشنطة ديالي تصدم مالقا مايقول جراتو مو من يدو خرجاتو كتهضر معاه ويسرى كتشد فيا كتحاول تقنعني لاكن مابغيتش حتى عيات وجلسات كتنهد فصمت سمعت عكوزتي كتهضر بشوية حدا الباب وقالت ليه بصرت مسموع الله يرضي عليك اولدي. .. الله يرضي عليك

رد عليها كتأتأ قاليها ماشي شي ضربة مانويتش نضربها كاااع لاحولة ولا قوة الابالله العلي العضيم

قالت ليا يسرى راه مانواش راني قلتها ليك نعلي الشيطان

قلت ليها ماكملتش سيمانة مزال يالاه قلت بسم الله هادي تاني مرة .. المرك اللولة فالكلينيك والمرة الثانية قدام الناس علاش غنصبر على الضراير وعلى هادشي.

سمعني ودخل قالي بصرامة وصييتك .. قلت ليك ماتسلميش وهضرت معاك هانتي شوفي فين وصلنا السلام ديالك

حقدت عليه زدت كرهتو بغيت غير نشوف بابا ونخرج بحالي فأقرب وقت عاد مزايد فيه ومو موراه كتجرو قالت ليه اولدي الله يهديكم هديو النفوس راه يالاه قلتو بسم الله

قلت ليه وعيني فالارض ماكرهتش نخرجهم فيه لاكن كنوقر الناس لكبار وعندي مبادئ وحتى هوا كنوقرو ماولفتش نخرج عينيا كنحشم من الناس عمرني خرجت عصابيتي بالغوات الطوب ديالي نشد القنت ونبدا نبكي

قلت ليه وعيني جنب ما وصلتكش نتا اللي وصلتيني

قالي هضرنااا عليها قلت ليك ماتسلميش علا الرجال علاااش كتمدي يدك شنو غندير معاك ؟؟

قالت ليه يسرى بالسياسة غير بشوية ا عيسى صافي باقا جديدة ماعارفاش

قاليها باها امام راه عارفة هادشي علاش كتستافزني ؟؟

قلت ليه ماستافزيتكش انا اصلا غنمشي بحالي غيجي بابا غنمشي معاه صافي

بقيت بوحدي جالسة غير انا ويسرى دارت عدة محاولات بدون فائدة حتى ضربات الحداش مشاو الضياف وجا شيخي دخل عندي قاديت الجلسة ديالي بالزربة حيت راجل ونعم الرجل كما قال عليه بابا .. دخل كيضحك قالي ايييييه يا عروستنا دغيا صافي سخيتي بينا

هبطت راسي ساكتة كنشوف قدامي. وجلس على واحد الكرسي قالي حنا بااااقي ماسخيناش بيك … اشنو وصلكم لهاد المواصل

عرفتو غيبغي يشدني ومسألة الدقة ماكافياش نبرر موقفي وقلت ليه بخجل ماقدرتش على الضراير اعمي الحجوجي

قالي كيتنهد الضراير صعاااااي ابنتي الى ماقدرتيش عليهم ماعندي مانقول .. الخير فيما اختاره الله .. ولاكن عاد قلتي بسم الله مزال ماشفتي فالضراير والو

قلت ليه ماقدرتش وصافي

سكت بقا كيشوف قدامو حتى صونا ليه تيليفون سمعتو كيضهر مع بابا قاليه مرحبا مرحبا الحاج دخل تفضل انا عندك فالباب دابا

قطع قالي بواحد التقالك. باك وصل الحمد لله على سلامتو .. فكر مزيان ابنتي ان ابغض الحلال عند الله الطلاق .. بلحق مانغموكش على شي حاجة ماقدرتيشي عليها راحتك هي اللولة

حدرت عيني وناض خرج قالت ليا يسرى باسف. فكري. اسارة عنداك يجي شي نهار تندمي فيه مزال ماشفتي والو اصلا يالاه بديتي … عطي لزواجك فرصة اخرى

دورت وجهي سكت مابقيتش كنهضر حتى دخلات عليا ماما ومعاها عكوزتي غير شفتها نضت ترميت فحضانها كنبكي وهي معنقاني كتواسيني وتنهدات تنهيدة طويييلة قالت ليا كنت عااارفاك ابنتي عااارفاك راك تربيتي يدي. وماتقدريش على التعدد

قالت ليها عكوزتي شرع الله الحاجة هادا هي كانت عارفاه من الاول غير الله يهدي النفوس

تنهدات ماما بحرقة وشدات ليا فيدي زيارات عليا قالت ليها شرع الله لمن استطاع الحاجة .. بنتي ماتقدرش راه من الساعة اللي تزوجات وعقلي مشطون وقلبيً واكلني تمنيت نكون بلاصتها وماتكونش هي .. راكي حاااسة بالهضرة اللي كنقول ليك مايحس بيها غير اللي يدو فالعافية

هزات عكوزتي يديها كتستغفر وقالت لي ماما يالاه هبطيرعند باك يشوفك ونشوفو هادشي

شديت فيها لسقت على يدها ومشيت نازلة معاها فالدروج قلت ليها بصوت منخفض مابغيتش نبقا هنا بغيت نرجع لدارنا

زيرات على يدي. قالت ليا مغنخليكش غير كوني هانية صافي عولت عليها مايشدني حتى وحد بجهد الواحد القهار

لقيت بابا بالجلابة كحلة شفافة تحتها سروال قندريزي ابيض وقميجة شادو بسمطة كحلة والبلغة فالكحل مع تقاشر بيضين وصلع جالس فرق رجليه بهبته وقدو وقامته عضمة تبارك الله .. مشيت عندو كنتنخصص شفتو بديت كنبكي وبست يدو وجلسني حداه عنقني كيسكتني وعيسى مقابل معايا كيشوف فيا وباه جالس وكولشي جلس فصالون واحد مدور بالفوطويات

قالي بابا وادابا قولي ليا شنو وقع ماتخبي حتى حاجة. يالاه بسم الله

بقيت ساكتة حشمت نهضرت قدامهم كلهم كيشوفو فيا بحال اللجنة وبابا كيتسنا نهضر وكيشوف قدامو هزني بصوتو خلعني مع صوتو مجهد مولف ياذن ويعطي الخطبة فالجامع قالي وياالاه هضري هاني كنسمع شنو وقع

بقيت كنتمنم شفت فعيسى متكي على ركابيه هاز عينيه فيا كيتسنا يسمع شنو نقول. وقلت بصوت منخفض

ضربني

قالي بابا فين ضربك ؟

قلت ليه ليدي

قالي علاش؟؟ يالاه زيد

بقيت ساكتة ماقدرتش نهضر وقاليه عيسى مدات يدها سلمات على خالي

قاليه بابا وعلاش ضربتيها هضر معاها باللتي هي احسن

بقا ساكت كيشوف فيا وشفت فيه بنصرعين خفت يقول ليه هضرت معاها مابغاتش تسمع ولا يشريها ليا لاكن ماقال والو وشاف فجهة اخرى عاقد حجبانو كيسمع قاليه بابا بسياسة وا حشومة ضرب البنت فسبعيام السي عيسى ماشي ديالك وعطيتك البنت تتهلا فيها ماشي ضربها راه عندها ضرابي اخرين من جهة اخرى براكة عليها ولالا

تنهد شيخي قاليه ايييه الحاج ماقلتي عيب .. وضراابي وااشمن ضرابي

قاليه بابا وياك كاينة بعدا ولالا. الحاج

قالت ليهم عكوزتي بصوت ممنخفض مادب راه ردة فعل وصافي .. الغيرة دالرجال الحاج وماغاتعاودشي مرة اخرى

قاليها بابا كلامك هوا الكبير الحاجة بلحق مسألة الضرب انا مانقبلهاش … شنو مادارت الى مارضاش ما بغاش يردها لدار باها … انا عطيتو الصغيرة فبناتي راكم عارفين الصغير ولا الصغيرة كيكايكون .. معزتو عندي هي اللي خلاتني نعطيها ليه والله وماتسالني حلوف. الى اللي خطبو فهاد البنت ديال الناس اكثر من اللي كنصلي بيهم فالجامع .. ومزالين كيجيو عندي هزيت يدي قلت ليهم مابقاو عندي. بنات اسيادنا الله غالب

بقا شيخي كيضحك والكل كيضحك وعيسى وتقول واش طلق البشرة كل شوية يشوف فيا وتكا ليك مع راسو دار رجل على رجل طالق ودنو وقاطع الحس .. بلحق عجبني الحال رجع ليا بابا اعتباري ودار ليا تكبيرة دايزها الكلام .. لاكن ماخلانيش نفرح بيها دغيا ضار ليا وقالي تباارم الله على بنت الفقيه … فوقاش ونتي كتسلمي باليد على الرجال هااا؟؟

هبطت راسي حشمت نقول ليه من ديما وحتى فاش كنت كنقرا ومع ولاد عاىلتي لاكن الحياة مع عيسى صعيبة متشدد فشي حوايج اكثر منك نتا اللي امام

قاليه شيخي بالضحك باقا صغيرة مزال ماولفات

تنهد بابا قالي صافي هادا المشكل؟؟

بقيت ساكتة حتى عييت وماما حدايا كتنخزني نهضر وقلت ليه التعدد ماقدرتش عليه بغيت نرحع بحالي

قبل ميهضر بابا تقدم عيسى قالي شنو اللي ضرك فالتعدد علاش ماقدرتيش

قالت ليه ماما بالاداب والصواب كاين شي حوايج ماكايتقالوش الحاج بالفم وكيضرو فالخاطر .. التعدد ماشي ساهل الى قالت راه ماقدرتش يعني ماقدراتش ومن حقها

قالي بابا وشنو المطلوب دابا شنو كتعني بغيت نرجع

قلت ليه وفمي كيقرقب بغيت نطلق

رد عليا عيسى قالي بواحد الجدية حسيت بيه ماكرهش ينوض من بلاصتو

الطلاق مكاينش عيتي بغيتي ترتاحي جلسي فداركم شحال ما قدك اما الطلاق غير نسايه

سكت كنتسنا بابا يهضر لاكن عيسى كمل كلامو وقالي من الاول كان كولشي واضح وتافقنا ووافقت على كاع الشروط واخا مامناسبينيش وقبلتي على هاد الزواج … ودابا ماعندي طلاق ومزال عند وعدي .. السكنة ديالك فالناضور واخا صعيب الحال نمشي كل مرة فالسيمانة حتى لتما والوقت ماكافيش والخدمة والصوالخ كلها عندي هنا … وشرطتي وقبلتي وهضرت انا وياك نهار دالرؤية الشرعية كملتي شروطك راكي عارفة ..ودوزتهم . لولا هاد الضروف المستعصية اللي وقعات ماكناش غنطيحو فهاد المشاكيل كنتي تبقاي فالناضور حتى تولفي طبعي ونولف طبعك عاد نزيدو لبلاصة اخرى .. دابا ابنت الناس كنقولها ليك قدام باك مع اخترامي ليك الحاج نتا فوق العين والراس .. الطلاق مكاينش

سكت الكل وسكت حتى انا بديت كنتحك من لداخل اما هوا قال شنو عندو ورجع اللور كيشوف جهة الباب بواحد الصرامة والحدية .. حط بابا يديه على ركابيه قاليهم سيادنا … عرفتو شنو يجيكم مليح .. غادي نردها للدار شي يامات تهدا شوية ويفوت هادشي وتبدل الاوضاع .. اما القرار فهاد الوقت ومع هاد الاحداث المتوثرة مادايزش .. نخليو لغدا هوا يرد علينا شنو كاين ..منها تخرج هي من هاد التوتر ومنهاترتب المسائل ديالك على خاطرك ويصفاً الجو ويرجع كولشي بحال الاول عاد نشوفو شنو نديرو … حتى البدية ديال الحياة الزوجية فاش كتكون مظطربة وشي مكيعرفش شي كتولد واحد النفور بين الازواج وحتى الوقت ولا الوضعية فين تقال ديك الكلمة الطيبة ولا داك الغزل مكاينش والضروف مامساعداش

دورت وجهي سديت ودني عرفت بابا غيبدا الموعضة ديالو على الازواج والمعاشرة والاوضاع ما الاوضاع وفعلا تعمق بقا عليهم الزوجين ما الزوجين ها شنو خاص يكون هاشنو خاص مايكونش والكلمة الطيبة كتطفي الغضب وبدا مابغاش يسالي ختى تسالا الكلام وقاليه شيخي ماقلتي عيب الحاج ونعم النسيب

خرجنا بقرار رضا الجميع و مشيت طلعت لبيتي دوزت ليلتي ماما طلبتها تبات معايا باش مانشوفش الحاج عيسى اللي ماعرفتوش حاج حتى قالها باه .

صبح النهار دالجمعة فدار شيخي دوزت الليلة كنشكي على ماما ونحكي ليها على حياتي اللي ماراضياش عليها هزات ليا همي وخففت عى صدري شوية ورتاحيت وجلست جنب ماما وسط الدار كنسمع لحوارها هي وعكوزتي اللي داز كامل غير عليا وعلى التعدد ، اما بابا مشا للجامع هوا وافراد العائلة الرجال صلاو صلاة الجمعة ورجعو كاملين بالبلدي تقول عندهم العيد حتى من الدار كانت معطرة بالبخور وصوت القرآن عالي فأرجائها ، وريحة الكسكسو فلكوزينة كتشم على بعد امتار، فباب الفيلا فاش وصلو الرجال وصلو افراد العائلة كلها بما فيهم اولاد شيخي المتزوجين كلهم تبارك الله كانو فيهم اللي مزوج جوج نساء. فيهم اللي مزوج وحدة فيهم اللي عندو اطفال وفيهم اللي ماعندوش وصلو هما والزوجات ديالهم تبادلنا السلام وانا مرتاحة ماحسيتش بالاحراج او الخجل حيت كانت ماما حدايا وصوت بابا من الصالون كنسمعو فارض الحضور دياله كيهضر فالدين ويضحك بتلقائية .. كنا جالسين حنا النساء بوحدنا فصالون كبير فسيح منعازل والاطفال كيلعبو بحال اجواء العيد. ويسرى حدايا بجلابة مخزانية والشال على راسها وانا كذلك لبست جلابتي وشالي حيت علماتني انه كل يوم جمعة كتجمع العاىلة كاملة وكيحضرو اخوتها الساكنين قراب داكشي علاش درت حسابي .. كنا كنهضرو وكانو النساء كل مجموعة كتهضر مع بعضها وكنت انا محظ اندارهم كوني جديدة فالعائلة ..دخلات فجأة رجاء بجلابة كحلة وبلغتها وشال كحل متولة بقيت غير كنشوفها كتعرف للصواب والهضرة متولة والضحك وصلات عندي تقول كتعرفني سلمات عليا وبقات عليا كي دايرة. لاباس اش خبارك ودازت لماما كذلك ومشات جلسات بين نساء اخرين كنسمعها كتقول لولدها نتا راجل امامي سير جلس مع الرجال سير عند باباك يالاه سير

قلت ليها فخاطري اممم بغيتي تجلسي بلا تبرزيط باش ديري رجل على رجل ! كرهتها من المعاودة ديال يسرى عليها رجعو عيني كيدورو ويمشيو ليها ، حطو لينا كسكسو كانو جوج طبلات ديال العيالات ماجلسناش فطبلة تعزلنا وسولت يسرى على لبنى قالت ليا بقات فدارها غيتغداو معاها عاىلتها نقدرو نمشيو نشوفوها غيبقا فيها الحال ولاكن وجدي راسك مور لعشا كاينة واحد الموعضة كيديرها بابا كل جمعة غنتحمعو فيها كلنا

قلت ليها مافهمتش كفاش؟

قالت ليا من الجمعة للجمعة كايدير بابا موعضة مور لعشا ولا ربين المغرب والعشا واللي ضاراه شي حاجة كايقولها وكيهضر على الموضوع اللي كايكون حديث داك الاسبوع .. يقدر يهضر على لبنى دابا

دورت راسي قلت ليها ومع بابا كاين بااينك غيعطي الخطاب ديالو ماعطاهش فالجامع غيعطيه هنا

ماستغربتش بزاف حيت بابا كان كيجلسني انا وخواتاتي ويعطينا دروس واخا ماشديت منهم حتى حاجة وعند بالي كنت شادة ،. تغدينا وشربنا كاس د أتاي من موراها وتفرق المجمع كل واحد فين مشا لاكن كان العشا كيوجد للعائلة والنهار مزال مسالا وحتى بابا شفتو ماقالش لينا يالاه قلت مع راسي غايكونو شدوه يجلس حتى يتعشا ولا يبات ماعرفتش وماجاتنيش خبار عليه حيت مابانش ليا وقت الغدا وفاش تغدا نعس فالصالون هوا وشي رجال اخرين تكاو تما ماعرفتش شكون غالبا يكونو خوتو. .. مشات عكوزتي وشيخي وبعض افراد العاىلة وحتى ماما مشات دارت الواجب لاكن انا مامشيتش بقيت مع يسرى قالت ليا نخرجو نشمو الهواء قلت ليها موحال يبغي بابا

قالت ليا قوليها لعيسى ولا غير سيفطي ليه مسج قلت ليها هوا اللي منهضرش. معاه

شدات تيليفون عيطات ليه قدامي كبرات الصوت سمعت الهضرة والضجيج غايكون عند لبنى قالت ليه بغينا نخرجو انا وسارة نشمو شوية الهواء

سولها قاليها فين غتمشيو

قالت ليه نجلسو فشي كافي ولا نسرحو رجلينا

قاليها واخا وقطعات قلت ليها متفاجأة واش عادي نجلسو فكافي زعما شفتو قاليك واخا فين هوا الدين ؟؟

بقات كتشوف فيا قالت ليا يسريها اصاحبتي مالكي مصعبة عليك الحياة واه عادي نجلسو فكافي. ناكلو فالزنقة نخرجو نهضرو ماراحناش فعصر الجاهلية ضاروري التأقلم مع الحياة في حدود واحترام واش نموتو !! نتي فهمتي الدين زعما صافي انا متدينة ممنوع الغلط بغيتي ماتحاسبيش كاع دخلي الجنة كتابك فارغ !!! مايمنكش راه الحياة هي هادي رخفي شوية على راسك

قلت ليها حيت بابا الى ساق الخبار مشيت لكافي جلست يقتلني

قالت ليا باااباك راه تلقايه كيخرجك ماماك وحاكمك باش ماضسريش نتي

سكت شوية قلت ليها الصراحة كان كيخرجنا يغدينا برا ويسارينا

قالت ليا ايوا هانتي وفين الفرق بيناتهم .. غير سمية ديال كافي وبوحدك مع البنات اللي كنضن مايقبلهاش الضروف كتختالف

سكت وابتسمت حسيت بيها كتودد ليا وتحببني فعيسى وعاىلتها باش نتراجع على قراري و عاوتاني نعلت الشيطان قلت يمكن بغات غير نخرجو وصافي ان بعض الضن اثم

خرجت معاها ركبنا فسيارتها دفاعية الربع ومشينا كنضورو فشوارع فاس وازدحامها وصوت الكلاكصون كييد التوثر . وقفنا قدام مقهى راقية شوكة على الرمبوان وطلعنا حسيت بقلبي انشرح والغمة مشات والابتسامة على وجهي مفارقاتنيش كانت مخلطة نساء ورجال جلسنا فمكان ممنوع فيه التدخين صافي من الهواء الملوث وطلبت عصير وهي قهوى وبقينا كنتجمعو عاودت ليها على مساري الدراسي وعاودات ليا حتى هي على مسارها الدراسي. وعلى العاىلة قالت ليا هما تبارك الله بيهم عشرين اخوة واخوات وباها كان مزوج ربعة الاولى والثانية ماتو بقات غير الثالتة مريضة كداوي عند ولدها فميريكان وعكوزتي اللخرة ولد معاها جوج بنات و ولد هوا عيسى وختو اللي تزوج ولد خالتي ويسرى وباللي خوتها وخواتاتها كل وحدة فين مزوجة فيهم اللي فالمانيا و هولندا و لندن وفدول الخليج مفرقين وكاين اللي والد وولادو مزوجين وولادين وكاين اللي عايش فالمغرب مفرقين على المملكة وبقاو ففاس ثلاتة من بينهم عيسى كيتجمعو كل جمعة والباقي كيتجمعو فالمناسبات والاعياد عند شيخي وقالت ليا باللي صلة الرحم عندهم مهمة جدا وبيناتهم روابط قوية ماكاينش. فرق بين ولد فلانة او بنت فلانة .. كتاشفت ان عاىلة الحجوجي عندهم ماركة عالمية ديال الذهب ومنقصد بعالمية انها مفرقة فبعض دول العالم واسمها من بين الماركات المعروفة بحال عطور وزيوت القريشي ونجحات ليهم ومكتاسحين الساحة فمجال الذهب فالمملكة بأكملها وبان السي الحجوجي سلم التسيير لولادو واخا كل واحد خدام فمجالو الخاص بيه الا وانهم كملو المشوار اللي بداه الاب وواقف على رأس التسيير الابن الاكبر البالغ من العمر خمسين سنة كرس وقتو وعمله فقط باش تبقا الصمعة والقيمة ديال الاسم ديالهم الرقم ولاول فالسوق .

كنت عاطياها ودني كنسمع حتى شفت عيسى طالع مع الدروج ودورت مقابلين معايا من لتحت ودورت وجهي حساب ليا شبه دياله لاكن فاش عاودت حقق فيه كان هوا شخصيا لابس سروال كحل وموكاسان كحل دالرجال من الدان وسروال دجينز اسود وقميجة رمادية كان طالع وخدا الدروج طبلة فيها البنات شفتهم كايتغامزو عليه وبعيني اللي ياكلهم الدود بسبسات عليه وحدة وبقاو البنات كيضحكو بيناتهم وانا مصدومة من ديك التبسييسة ومنو هوا نيت اللي جا وشنو جا يدير هنا .. يالاه غندور نسول يسرى حتى وقف علينا لاح السلام وحر الكرسي جلس بقيت غير كنشوف فيه ونشوف فيسرى اللي حنات راسها قطعات الحس وشافت فيا بنص عين كدور فعينيها وابتسمت ليا قالت لي مدام عيسى جا انا غنمشي نشوف واحد صاحبتي عيطات ليا غير هنا قريب ونرجعو تلاقاو صافي

هزات صاكها وقالت من هنا دازو مشات وخلاتني كنشوف فجنابي وجهي حمر

جمعت يدي جلست جنب ودورت وجهي ماكرهتش نوض ونخليه ولاكن ماقدرتش اولا بابا يقجني ثانيا نبقا مبندة فالزنقة ماعرفت حتى سمية الحي اللي ساكنين فيه وماهزيت حتى درهم جيت معولة على يسرى اذا نجلس ونسكت حتى ترجع اما هوا بقا كيحنز فيا شحال جا عندو النادل طلب براد د أتاي حطو ليه منعنع برزتو وقالي بابتسامة هاز حاجبو طلعتي قبييحة هاا!

زفرت من نيفي مابغيتش نهضر معاه ودورت وجهي للجهة لاخرى بانت ليا وحدة من دوك البنات اللي جالسين لتحت طلعات كتقلب بعينيها غادية جهة الطواليطات شافت جيهتنا ودخلات بقا بالي معاها غير كنشوف بااز لهاد البنات اللي ماكيحشموش يبسيسو على راجل دايز. واخا يكون غادي وجاو الزين ما خصهاش تبسيس عليه. .. والصراحة عيسى ماشي زوين حتا لدرجة نقطع يدي عليه !! عندو حقو وزينو مختالف شوية وزايدها بديك الهبة والطولة وتجريدة وصاافي !! قلة العرض وقلة الحيا زايدينها بالتقزاب فوق الفخاد والصدر معري وكيكميو لتحت كنسمع ضحكهم من هنا !

كسر المشهد اللي فخيالي وقالي وصلنا لدرجة تجيبي باك من الناضور وتجمعي حوايجك وطلبي الطلاق !! لهاد الدرجة هادي كاع واش قطعت ليك يدك ولا ضربتك بصح !

هزيت نيفي مكنشوفشً كاع جيهته تجمعات ليا كورة من الحزن فصدري وبقا فيا الحاا قلت ليه ماتحطش عليا صبعك انا لحمي ماشي شايط.

قالي وا قلت ليك شايط؟؟

قلت ليه قلتي ليا شايطين عليك يديك و ضاربني فيدي شنو كتعني هادي

قالي كتعني ماتسلميش على البراني وقلتها ليك .. وماقصدتش نضربك اصلا جات فالسياق وصافي

قلت ليه دابا صافي ماكاين لاش هاد الهضرة

قالي شنو باغا بالضبط ؟

قلت ليه هضر مع بابا انا ماعندي منقول ليك ومعنهضرش فغياب بابا

تنهد قالي هضرت مع باك ومتفهم نتي اللي شنو بغيتي

بقيت ساكتة شحال وقلت ليه طلقني .. هادشي اللي بغيت

قرب للطبلة قالي علاش ؟ً شنو اللي خلاك طلبي الطلاق عطيني سبب يخليني نقتانع

ماكرهتش نقول ليه بغيت يونس ونرتاح لاكن مانقدرش قلت ليه مابغيتش التعدد انا مابغيتش الحاجة المشروكة

قالي ياك ابنت الناس نهار الاول قبلتي شنو اللي تبدل

قلت ليه انا ماكنتش عارفة .. ماحسابنيش مزوج حتى ضربنا لكحل فالابيض

رجع اللور بقا ساكت قالي كفاش ماكنتيش عارفة وباك من نهار عرف عليا كولشي

قلت ليه بابا ماقالهاش ليا وكيهضر على التعدد بصفة عامة عند بالو راني فاهمة وعارفة .. انا

قلت ليه بابا ماقالهاش ليا وكيهضر على التعدد بصفة عامة عند بالو راني فاهمة وعارفة .. انا حساب ليا كيقصد بالتعدد يعني نتا تقدر تزوج عليا ماشي انا نمشي على الضرات

بقا غير ساكت وصبعو على لحيتو قالي فاش دخلت هضرت معاك اول مرة علاش ماقلتيش هادشي

قلت ليه ماقدرتش خفت من بابا .. الى ماتقتيش بيا سولو

دور وجهه قالي ماعندي مانسول دابا هادشي عاد باقي نسولو فيه ..

بقيت ساكتة وهوا ساكت فاللخر قالي فاش عرفتيني نتي ماعرفتينيش كاع عندي التعدد

حركت ليه راسي وسكت قلت صافي. غادي يتفهم ويقولي بسلامة. لاكن صدمني قالي وهانتي عرفتي بالتعدد شنو ناقصك دابا؟. شنو ضرك؟

شفت فيه بردة فعل قوية .. ماشي قوية بحال شي سبع ولاكن جهدي انا ضعيف الله غالب. عقدت حجباني قلت ليه مابغيتش مرى اخرى بغيت نبقا بوحدي

شد دقنه هز حجبانو فيا قالي وشنو غندير مع لخرين يالاه ؟؟ً شنو الحل اللي عندك اتينا بيه

قلت ليه الحل هوا طلقني انا وتخليهم هما حشومة ضلمهم اما انا غنتقبلها

حرك ليا راسو قالي اهاه نتي غتقبليها ماعندكش مشكل ! .. حتى تزوجنا وعرسنا وشوف شحاا ديال الجهد والطاقة عطينا فهاد الزواج فاللخر نجيو نطلقو وعادي ونتقبلوها وكل واحد يشد طريقو

قبلت وجهي قلت ليه مادرنا فطاجين فالمقلا مايتقلا غاتردني لدار با غنرد ليك مجهودك والله يفرقنا بلا دنوب

بقا غير ساكت مصدوم فيا وقالي اش قيمة داك المجهود دابا قدام هادشي اللي كتقولي الا مشا داكشي غير الله يعوض دابا الاهم كبر من هادشي

قلت ليه وشنو هادشي اللي اهم !!

بقا ساكت وقرب ليا قالي راه بيناتنا ارتباط ماشي اسم زواج وصافي غير بالفم ولا على الورقة .. راه تزاوجات العائلة وتزاوجو العقول و النفوس والقلوب وقدام الله والملائكة وبارك فيه الله عز وجل .. اجا ما فك هادشي راه ماشي غير اجي وطلق الطلاق ساهل غير بالفهم هادي هي كنبغيك ونموت ومن غيرك مانن.. اا؟؟

دورت وجهي ودرت يدي على نيفي حسيت بشعري وقف كنت غتقول ليه راه لبنى المسكينة اللي كتباتو اما انا مكنعرف منين نجي للشعر ونتا تيقتي لاكن زميت فمي وهوا كيشوف فيا بواحد الابتسامة كيممشها حشم يطلقها . قالي هادشي علاش كنهضر من الصباح واش يهون عليك ترجعي لدار باك ؟؟

بقيت ساكتة وقالي غير كتقولي وصافي غطلقي وتعرفي بحر الطلاق

هزيت كتفي قلت ليه غير طلقني وخليني من لحرورو

بدا كيضحك وجر ليا يدي شدها قالي مابغيتكش دوقي الحر

قاطعتو قلت ليه الحار هوا اللي عايشة دابا مغاديش نقبل هاد الزواج ونجي الثالتة وتجي عليا الرابعة علاش؟؟ علاش كاع مالقيت ماناكل

قالي شكون جبد حس الرابعة دابا الله يهديك نعلي الشيطان

قلت ليه كما جبتي الثالتة تجيب الرابعة ملي نتا مزوج ديك الساعة مسح المسج

بقا كيضحك وهبط راسو قالي راني جاوبتك

قبلت وجهي وقلت ليه ومالك جيتي تزوجتيني

قالي كن عرفت مالي كن داويت راسي بيدي كاع مانجي عندك

تنهدت وشديت راسي بغيت نبكي وجريت يدي عندي وهوا كيشوف فيا .. مرت لحضة صمت وناض من بلاصتو قالي يالاه نوصلك للدار . هزيت صاكي فالبلاصك ونضت نازلة فالدروج مشاو عيني جهة دوك البنات بقاو كيشوفو فيا شفتهم عن قرب.. اش داك العكاكر ودوك الشلاقم مبوقين ودوك الشفار بحال العزافة تجمع بيهم الخملة ودوك الشعر كي النوالة وكيضحكو سنانهم بويض بحال بلاكارات كل سنة قداش. باين داكشي ملسق وعاجبهم الحال كيحساب راسهم زوينات ومتبعين الموضة زعما ماعرفتش كفاش قدرو يعيشو بديك الحالة وغافلين بقوة ما تبعو داك العجب وكيشوفو كولشي دارو رجع كايبان ليهم همة وشان وهما حالتهم واخا كيبانو فملامحهم زوينات ولاكن شوهات وخسرو راسهم بداك الشي وكايحساب ليهم بحالهم ماكاين الله يستر .. كن يشوفو بعيني داكشي اللي كايبان ليا غادي يهربو مايعاودوشً يبانو . حسيت بيد عيسى شدات يدي ديك اللحضة السخونية ديالها كمدات ليا صدري ودخلات بين صبعاني بقاو دوك البنات كيشوفو فينا حتى خرجنا طلعني حداه فنفس السيارة الزرقاء اللي شفتو فيها اول مرة تفكرت يدو وهي مدلية وكيهضر مع بابا بقيت كنقول شو سبحان الله شكون قال غنجلس شي نهار فعاد الطموبيل ومع نفس الراجل اللي كان سايقها . وقف بيا فواحد البلاصة خاوية غير الطبيعة وشي عيالات حالسين مع ولادهم كيلعبو فديك العشية وسكت الطموبيل. شفت فيه كنتسائل بعينيا .. ضار عندي تنهد وشد ليا يدي قالي طلبي اي حاجة الا الطلاق .. مانقدرش نطلقك اسارة

شفت قدامي قلت ليه جبتيني لهنا باش تقول ليا هادشي

شد ليا دقني دور ليا وجهي بلطافة وقالي ماشي سبب نطلقك عليه

قلت ليه التعدد ماشي سبب؟

قالي كن تزوجتك اول وحدة عمرني نفكر فالتعدد

بقيت ساكتة مطولا قلت ليه غتفكر فيه حيت نفس الهضرة غتقولها للرابعة .. غير خليني نمشي بحالي

حدو يدو الثانية على يدي قالي وشنو خلاك تقولي بحال هاد الهضرة واش شفتي فيا شي حاجة تخليني نزيد نتزوج مرة اخرى

شفت فيه قلت ليه وشنو خلاك تزوج على رجاء ؟؟؟ مرى زوينة وقارية ولدات ليك وكاملة مكمولة يالاه شنو خلاك تزوج عليها

بقا كيشوف فيا ساكت وقالي كيشتت النضر راه ماعرفتش شنو غنقول ليك .. انا قلبي بغاك وتزوجت وعاودت عمرني حسيت بهادشي اللي كنحس من جيهتك هادي هي الحقيقة .. مكنكدبش عليك ربي العالي علم على صدق قولي ………..عمرك تحسي بالتعدد انا كنواعدك

شفتو كيقرب وكيهضر بحال الى كيدير ليا التنويم المغناطيسي حتى لقيت وجهه قدامي وجهي كيشوف ليا فعينيا وحط يدو على وجههي كيهضر معايا بواحد الطريقة كتنوم حاولت نشتت نضري منبقاش نشوف فيه لاكن بلمسات يدو كيتبع انجهات وجهي براسو وكايحاول يقنعني .. كنت كنسمع ليه حتى حسيت بشفايفو على شفايفي دخلهم فلهضرة وعوض الكلام بقبلات اول مرة نجربهم كان كيقبلني كانه كينعس ليا شفاهي بسياسة التقبيل حسيت بمداق فمو ونعومة لسانو بين شفاهي كان حلاوة اتاي باقا ليه ففمو تبعت رقصات شفاهي وشفاهه شفت فيه بين رموشي كان مناعس مافايق كيشوف فيا وفشفاهي اللي خانوني حسيت بيهم كيطلبو لمزيد فكل مرة يخلي فجوة بيني وبينو ويشوف فيهم ويرجع لتقبيلهم .. قبلات كانت عبارة عن منوم ليا حسيت بالدم هبطات سخونة عليا قلت فعقلي الباطن عاوتاني جات !! رن تيليفونو فجأة وماعطاهش اهمية لاكن انا اسيقضت انا وشهقت رجعت اللور عاد هز حجبانو وخل عينيه شد تيليفون فيدو وخرج من الطموبيل زدح الباب وبقيت انا شادة فمي كنبلع ريقي وريقو الصهد طالع معايا مابغيت وماحملتش راسي شفت يدي كيترعدو بوحدهم بقيت كنقلب على شي حاجك نخشي فيها وجهي مارضيتش من الصباح وانا نفخ على الحاج فاللخر تكفحت على يدي بحال لعجينة

حشمت نقابل وجهه وبقيت كنشوف فالزاجة من بعد ما رجع طلع حدايا وكان مزال باغي يهضر لاكن مابغيتش نهضر قلت ليه نرجعو للدار وردني كنت الطريق كلها وانا كنشوف جنب ماتلفتش وماعرفتش شنو اللي خلاني نبوسو !! واش يمكن لوحدة مكتبغيش شي واحد تجاوب معاه ؟ واش الرغبة بين مرى وراجل عندها علاقة باعجاب ولا حب ولا شي حاجة بحال هادشي ؟ حرت ماعرفتش قلت يمكن حيت قرب ليا راجل وانا مرى بحال كاع النساء كابتة غريزتي ورغباتي من زمان وجا الوقت فين تفيق خصوصا انه من قبل كنت بعيدة على الجنس القصيف ودابا العكس على طول الوقت قريب مني راجل فكنضن عادي تنوض ديك التربة اليابسة الجافة من سنوات عدة وهي بقربها وديان من الانهار كتجديها . قبلت ماما عشية اليوم كانو رجعو من عند لبنى وبدات العاىلة كتلم من جديد وتحمعنا على كاسكروط كلنا النساء كنت حينها شاردة طول الوقت وغايبة على الواقع ويسرى جنبي كتسولني شنو درت لاكن كنت كنعطي حرف ونسها بقيت كنتخيل ديك اللحضة وعندي احساس اللوم كيلومني كانه رجل غريب. وعندو ماليه ومحترم وانا فاجرة سلمت ليه راسي !! و باش من وجه غنشوف فيه ونجلس قدامو من بعد ديك الخطيىة اللي كنحس بيها خصوصا وانا كنشوف فرجاء جالسة قدامي وبديت كنتخيلها بلاصتي ومعاه فديك الوضعية او اكثر .. احساس غريب. ماقدرتش نرتاح من مور داكشي اللي وقع وزدت تحرجت وحشمت فاش تجمع الكل فصالون واحد وجلسو الرجال مقابلين النسا كانو خمسة وبيهم بابا وشيخي الوسط كان جالس جنبه بابا وحنا فجهة وحدة ، دت رجل على رجل ونخزاتني يسرى قالت ليا هبطي رجلك ولبسي تقاشر ماديريش رجل على رجل

قلت ليها ماعنديش تقاشر

ناضت ونوضاتني مشيت لبست تقاشر من عندها ورجعنا كان الكل جالس مقاد محتارم ومعانا جوج نسا بالخمار وحدة لابسة الباج وحدة الاسود والرجال لحيتهم حتى للصدر الا عيسى وخوه واحد اخر اللي لحيتهم عادية مقادة .. كان راجل كبير لحيته كبيرة مخلطة بالابيض والاسود سولت عليه يسرى قالت ليا خويا لكبير عيد الجبار اللي قلت ليك واقف على الشغل ديما مزوج بدوك جوج عيالات اللي منقبات

طليت عليهم شفتهم وقالت ليا ماشي مغربيات وحدة اوكرانية. وحدة روسية وسلمو بجوجات .. تبارك الله عندو سبعة دلولاد كلهم دراري ماعطاهش الله البنات وعزاز عليه كايحماق عليهم

ابتسمت قلت ليها تباارك الله ودورت وجهي لقيت عيسى ساهي فيا وخبيت وجهي فالبلاصك. افتتحت بابا الجلسة بصورة النساء وعم الصمت بدا كيقرا في خشوع حسيت بالجو دفا والكل هادئ وصامت وواحد الحياء بين النساء والرجال .. كانو فعلا وجال ديال ونعم الرجال ماهزوش العين وعلى وجدهم واحد الجدية والصرامة مكيشوفوش جهة النساء. كل واحد فين كيشوف ولاحضت ان النساء كذلك ساكتين كيشوفو قدامهم ويتسنطو لتجويد بابا القرآن .. هبطت راسي شفت فيدي كنسمع قرا لينا شوية من كلام الله ووقف على أية بيها بدا الكلام باللغة العربية بدا كيشرح لينا المعنى ديالها ويعطي احاديث ويوصي. على اننا منصقوش كل الاحاديث لربما تكون ضعيفة وعطانا مقدمة طويلة شاركه فالكلام الحاج الحجوجي .. فهمت علاش كيعيطو ليهم ايت الحاج لأنهم كلهم حجاج هوا و اولادو كاملين .. كان الحجوجي كيهضر وجبد موضوع النميمة وتعمق فيه شاركاتو فالهضرة وحدة من النساء كتبدي رأيها وكيهضرو بالمعاني فهمت انه كدور تما شي حاجة والا علاش غيهضرو على هاد الموضوع حتى قالت ليا يسرى بصوت خافت راه كيهضر على مرت خويا لاخر اللي حدا عيسى و مرت خويا الكبير بيناتهم مشكل .. المهم نتي سمعي وغتفهمي حيت شحال قاطعين الهضرة وبدا ليهم التشريح هما اللولين

قلت ليها عنداك يجبدوني

ضحكات قالت ليا ماتعرفي ركزي راه يقدر يهضرو عليك ونتي مجايبة خبار

تسنطت للحوار اللي داز كامل نصه ايات قرآنية وشفت النساء مع بعضياتهم تسامحو وسط المجمع وعطا شيخي الموعضة على الننمة للجميع و دنوبها وضرارها فالدنيا وبقا ميهضر حتى جات لبنو فالسياق هضر عليها وعلى المراة بصفة عامة وهنا تدخل بابا هضر على الرجل قاليهم علاش الرجل كيبغي يعيش هاني وكيشحن المرا ديالو بالمشاكل ويسممها .. هاد الرجل اللي غادي يسمم هاد المرأة .. مكيفكرش انه هادي قبل مانكون امرأته راه مربية لأولاده .. راه سبب فساد المجتمع بالدرجة الاولى هوا الرجل .. اااه الرجل .. الى جا معصب فرغ العصب ديالو فالمرأة راه هاد المرأة غتفرغ العصب فأولاده !! وهاد الابناء راهم جيل المجتمع القادم كيكبرو مشحونين بكم هاىل من العقد وطالعين والسم كيجري فعروقهم .. علاش الابن كيتزاد لحمة .. بحال لعجينة نتا وشنو درتي فيها .. وشنو كونتي منها .. ماش كتربي. راك كتربي بالقول او الفعل المباشر …التربية راه انواع وانواع كثيييرة والتربية اللي كيشد الابن اكثر هي اللي كتجيه عن طريق مو .. ايوا الى بغيتي هاد الابن اللي من دمك ولحمك وكتبغيه يعيش فبيئة نضيفة فخدم عليها وعاشر مو بالمعروف. وعاملها بالحسنى وخليها على كانتها باش تكون عندها واحد الطاقة اجابية تعطيها للالن ديالك وتوفر ليك الجو اللي نتا باغي تعيشو فالبيت ديالك …راااه كتشوف الصورة ديالك فداك البنت ولا الولد اللي مخلي ليها فالدار فماتكونش غبي وتشد العكس وتشد الضد معاها .. على قبلك نتا باش تعيشك هاني مرتاح … وخليها لمولاها الى دارت معصية فراه كايتسناها حساب عسير عند خالقها .

صوت بابا كان مسموع فالدار كلها وهضرتو جات على قلب كاع العيالات كلهم طأطأو الراس قالو ليه كلامك على صواب الا رجاء اللي هبطات راسها قالت ليه واللي كدير هادشي كامل وماعندهاش الزهر مسكينة .. واخا يتعصب عليها الزوج ديالها كتلقا السند اللي هما ولادها

قاليها بابا بصوت مرتفع هاديك تحمد الله عندها نعمة رزقها الله السند فالحياة لانه الدنيا مافيهاش غير الزوج فقط. .. فيها من همومها ما يذهب العقل وفكل مرة تصادف فيها خيبات امل غتلقا السند علامن تسند ..ماشي تقول ماعندي زهر .. كل واحد فهاد الدنيا عندو الزهر وعندو الجهد وعندو العقل … لانه قبل ان يكون انسانا اسيادنااااا كان نطفة من مني … بين اللوفات الحيوانات المنوية اللي انطلقت دفعة واحدة باتجاه الرحم كتحارب باش توصل.. هناك من الحيوانات من يموت في سباقه و اندفاعاته .. هناك من يموت بسبب التعب والارهاق وفشل فالوصول .. وبقا فقد خمسون حيوانا من بين الالاف يتقاتلون .. شكون فيهم يدخل للبويضة .. وفآخر هاد الحرب العضيمة كيدخل واحد وينجح. واحد ويكسب الحرب واحد من الالاف تصور معي ياخي ويا اختي .. وهاد الواحد هوا انت .. نااااعم انت اللي كتقول دابا ماعندي زهر .. ماعندي. وماعندي وماعندي. ونتا فزتي بحرب. عضيييمة سيحان الله بدون شواهد وبدون والدين وبدون دعم وبدون سند وبدون وبدون وبدون وحتى العقل ماكانش عندك فقط هدفك توصل .. ومشيئة الله وصلتي ونتا ماعندكش مأهلات. . ودابا اللي عندك عقل وسند واقارب ودعم كتقول مانقدرش. و لا ماعندي زهر .. من اين اتيت بهادا الفشل يا اخي ويا اختي وربي رزقك بالنعم اللي فاش كنتي نطقة ماكنتيش. تكسابهم وكابرتي وحققتي الهدف .. قبل ماتقول انا فاشل انا لاشيء تذكر انك كنت حيوان له عقل واحد يقوده نحو هدف واحد وكسبتي المعركة. . تذكر ان الله عز وجل معاك كن غير نتا مع الله وخلي عليك الاحباط جانبا وخيبات الامل اللي عرفتي ملي ولا عندك عقل كتفكر بيه .. بقا متشبت بالهدف ومتفكر غحتى حاجة وتذكر الله معاك وانك رابح اكبر وبديتي الحياة من كرش مك بالفوز والسلام عليكم ورحمة الله وبركاته

خرجنا من ديك الموعضة من بعد ما هضر بابا وسكت كولشي كان شيخي فالاول اللي ناوي يهضر صدق بايا ترأس الجلسة وسكتهم وكنت كنشوف فيه بافتخار وعجبني الحال ماحسيتش براسي مهمشة حسيت بقيمتي كبيرة اكبر من كاع النسا اللي جالسين كيتسنطو وحسيت برجاء ماعجبهاش الحال كل شوية تشوف فيا بنص عين كانها جالسة عل الجمر حتى أذن العشا وتفرقنا وجلسنا نتعشاو جيت انا وياها فطبلة وحدة وماما حدايا وحسيت بدوك النساء كيحاولو يتقربو مني وعاطيني من وقتهم وكيهضرو معايا تعرفنا على بعضياتنا ورجاء ساكتة كتشوف واخا حتى هي راه كتهضر وتحرك كيف بغات فالدار ماشي بحالي مامطلوقاش والعيالات كيحاولو يطلقو فيا انا وماما وعكوزتي كل شوية ضحك معانا وترحب بينا .. كنت جالسة على كرسي معدبة حيت الطبلة مدورة وجات عكوزتي نوضاتني قالت ليا معدبة تما ابنتي اجي جلسي هنا باش تعشاي مرتاحة . ناضت مرت لوسي من الوسط قالت ليا اجي هنا بلاصتي اجي ماشي مشكل انا نجلس تما

قلت ليها لالا غير خليك على راحتك انا مرتاحة

وصلات عني قبل منكمل الهضرة كانت فنة فاسية والحجاب وجليليبة باينة عليها الضرافة خدات بلاصتي وجيت حدا رجاء جالسة ابتسمت ليا وابتسمت ليها وشفت فماما كتشوفينا بجوج يعلم الله شنو كيدور ليها فراسها شفتها شاردة فيا بواحد العين . خطو لينا البسطيلة دلحوت بدينا كناكلو ونهضرو كلنا حتى لواحد اللحضة سمعت رجاء كتهضر فأوديو قالت

واخا بب سيفطو عندي باش تعشا على خاطرك

كنت كنمضغ حتى حبسو سناني دورت وجهي ودرت اسقاط اانضر بانت ليا حطات تيليفون على ودنها كتسمع وخدمات لاوديو كتهضر بشوية قالت

. وانا احبيبي راني كنتعشى دابا خليني حتى نسالي وهانا معاك الى ديرونجاك سيفطو ليا ماشي مشكل مايتعشاش حتى للدار رنصقم ليه شي حاجة صافي الحبيب ديالي؟

طلع ليا الدم ماعرفتش هادي واش كتستافزني ولا شنو جالسة حبيبي ما حبيبي زعما انا غيرر شايطة خلاتني نعيط ليه بلا هوايا واخا ماعندي منقول ليه صونيت وقطعت وكتبت على سميتو اشكم بالتركية ودرت حداها قلب وحطيت تيليفوني على الطبلة بيني وبينها كنقول ياربي يعيط ياربي يشوف ابيل ديالي حتى صونا خليتو كيصوني شوية لمحتها لمخاتو بنص عينها وهزيت جاوبت قالي نعام الزين ديالي صونيتي عليا

بقيت كندور فعيني شنو نقول خاصني نبرد الفقصة اللي دارت ليا ولا يطرطق فيا شي عرق فاش تمشي قبل منردها ليها. وقلت ليه فوق طاقتي وتحملي. والو احبيبي غير بغيت نشوف بابا واش غيبات ولا يشد الطريق سولاتني ماما عليه

تزنكت ضحيتي بخجلي فسبيل الدم يبرد ورد عليا قالي حتى للصباح علاش غيشد الطريق دابا واليل هادا الدار دارو هاهوا مسافر مبدل الجو

قلت ليه حيت قالينا غيمشي الجمعة داكشي علاش سولت

قالي مور لعشا نهضرو انا غنعيط ليك صافي احبيبة

كمشت شنايفي شفت فجنبي لقيتها طالقة ودنها حتى المديغ كتمدغ بشوية باش تسمع مزيان قلت ليه واخا احبيبي

قطعت وحطيت تيليفون هضرت معاه بواحد الطريقة حساسة للغاية وهدوء خليتها كتشطح برجلها حدايا نوريها تستافزني واخا ماكنتش باغا نستافزها حساب ليها انا هي لبنى غادي دير رجليها عليا وضسر باينة هادي هي البدية باش بدات مع لبنى وبقات كتسكت ليها حتى طغات ومسحات بيها الارض بلحق حالفك مانخليها تزيد خطوة تجبدني تلقاني فالبلاصك .

تعشينا داك العشا دوزتو بالستريس وكملنا بالديسير ونضت من حداها توادعنا مع العاىلة بقات غير هي بوحدها كتمشي فالدار وتجي زعما انا مولات الدار نتي برانية طلعت لبيتي مع ماما خليتها ماعرفتها مشات ولاباتت ومدام بابا ماقالش لينا يالاه اذا غيزيد هاد الليلة حتى هي . سديت علينا الباب وانفردت انا وماما حيدنا الجلالب وقالت ليا عنداااك ياكلو ليك مخك وتبقاي انا شفت هاديك خيتي كفاش كتشوف فيك ماكرهاتش السم تعطيه ليك غير كضحك معاك داك الضحكة الصفراء

قلت ليها راني عارفة واش توريني فيها

قالت ليا هاودني منك هاني كنقولك الى بقيتي هنا يوقع ليك ما وقع للولة مسكينة مابقاتش كتهضر ولا كتحرك وباقا صغيرة هاهياك شدات الركنة

قلت ليها هادشي اللي كتقولي كامل عارفاه

صونا ليا تيليفون هزيتو كان اشكم جاوبتو قدام ماما قالي فين مشيتي

هزيت حاجبي قلت ليه علاش

قالي اجي تباتي معايا علاش مشيتي عند ماماك

قلت ليه فين غنجي وشفت ماما كتشير ليا بيدها كتقولي لا

قالي واكنتسناك زعما باقا هازة فخاطرك من جيهتي قلت ليه اصلا هضرنا وصافي شنو باقي مايتقال قالي شنو ؟ فاش هضرنا؟قلت ليه قالك بابا صافي غايديني انا قلت لي التعدد ماقابلاش عليه وماقابلاش حتى تفرق على شي وحدة من مراواتك بسببي واللي عندي راني قلتو السي عيسى الى كانت شي هضرة قولها لبابا هوا المسؤول عليا وقطعت عليه. قالت ليا ماما صافي سالينا مكاين زواج فضي عادشي يالاه ترجعي بحالك

قلت ليها راه مغاديش نبقا صافي قررت الصباح نمشيو بحالنا

طلعت الكاشة على وجهي وطفيت تيليفون والضو وسديت الموضوع بصفة نهاىية

صلى بابا الفجر ولبسنا جلالبنا والصباح باقي ماطلع وكان البرد على برا خرجنا لوسط الفيلا لقيت عيسى جالس على واحد الفوطوي هوا وبابا وشيخي ومهبط راسو على يديه غير شافني هز راسو شفتو تابعني بعينيه كيقول ليا ماتمشيش وفنضراته الكثيرمن التساؤلات تهربت منهم ماشفتش جيهته

قالي شيخي بابتسامة ماهداكش الله

طأطأت راسي وشفت جهة بابا اللي ناض قاليهم سيادنا ..شكرا على حسن الضيافة والله الموعد

ناض عيسى قالي قدامهم هضرنا وتفاهمنا شنو تبدل

شفت فيه مصدومة كنقول شنو كيقول هادا علاش تفاهمنا!! بغا يقصد زعما تباوسنا وتفاهمنا اشمن مفاهمة تفاهمنا عليها

شديت فيد با لسقت فيه وهوا كيشوف فيا قالي نعلي الشيطان الله يهديك راه حتى هاديك دارك

قلبت وجهي وماما كتشوف فيا وتحرك ليا راسها باش منقبلش وبابا واقف كايتسنا حس بيا لاسقة فيه وتنهد قاليهم ايوا هوا هادا .. الله يهدي النفوس. سمحو لينا

قاليه شيخي الله اودي السي الحاج اش كتقول مرحبا بيك فأي وقت

خرجنا ماشفتش ورايا مشيت ركبت فميرسيديس بابا وشديتا الطريق كملت نعاسي حتى للدار ودخلت موحشة دارنا تقول غبت عليها عام .. بقيت كندور فيها قنت بقنت حسيت بالروح وجعات وجاني الحماس لبيتي خملتو وطويت حوايجي وبديت نعاون ماما يديا بيديها داكشير اللي ماكنتش كنديرو قبل رجعت كنديرو بالفرحات عليا وكلي سعادة ، توحشت الحرية مكاين ماحسن من دار الواليدين واخا يكون عندك قصر.. لاكن واخا كولشي هادشي لقيت حكام اخر متشدد اكثر من اللي سبق. . السرجم مانطلشًمنو ولا السطح ومانرقفش فباب الدار اما الزنقة الى قلتها بحال الى قلت ليهم نخرج عريانة وحتى الضياف الى جاو وكان معاهم رجال منخرجش حتى يخرجو هما .. فالاول كنت كنتقبل كولشي لاكن ضربت اسبوع بديت كنتخنق وكنتقج وبغيت نتسطا كنقول لماما نخرج معاك للسوق كتقول ليا ماعندك ماديري فيه وليت من الحمام للدار لا غير وجيرانا دارو العرس مقابل معانا فالسطخ مشات ماما وبابا وسورتر الباب وبقيت انا كنتفرج غير من السرجم تخت الخامية . حسيت براسي غنطج ودارنا رجعات كتبان ليا كحلة وقلت ليهم نمشي لداري لاكن وقف ليا بابا قالي هاي هاي تمشي تجلسي تنا بوحدك مال هادي ماشي دار !! سكتني وحسيت بالقنطة بغيت نموت وطافية تيليفون على عيسى وبابا كل شوية يسولني شنو غاديري واش غتبقاي هاكا ما نتي نزوجة ما نتي مطلقة !! الو مشيتي حتى طلقتي غنزوجك ولد خويا انا ماعندي بنات اللي يبقاو جالسين لاشغل لا مشغلة

تفكر ولد عمي اللي حلف ليا ديك المرة وهوا اللي قالي بابا تخعلت قلت اويلي نشنق راسي ومانديهش والمشكلة فعائلتنا اللي طلقات كاتدي من العائلة بزز منها حيت كنسترو بعضياتنا وانا استبعدت هاد القضية قلت بابا مايديرهاش حيت ماشفتش اصلا شي طلاق ولا شي حاجة عن قرب. الحمد لله خواتاتي بقاو كما مشاو وانا رجعت نحلم بولد عمي ونفيق مخلوعة وعقيلتو كفسً كاع من ديال عبد الحق هاداك غيدير ليا الحداد . عرفت راسي لا نفر صافي حصلت يا اما عيسى ولا ولد عمي وقلت اللهم عيسى كما كان الحال يقدر يدير ليا خاطري شوية وشعلت النمرة سيفطت ليه مسج قلت ليه عيط ليا . عيطت ليا ديك الساعة كيسول عليا وعاتبني علاش طفيت عليه تيليفون وقالي ماسخيتش بيك خليتي بلاصتك وحشومة عليك مشيتي وماسولتي ما خليتي اللي يسول.

قلت ليه الى بغيتي نرجع عندي واحد الشرط

قالي شنو هوا هاد الشرط

قلت ليه نخدم ..غنقبل على التعدد اللي عندك فوق خاطري وبزز مني ..لاكن تخليني نخدم

بقا ساكت مطولا قالي علاش بغيتي تخدمي شنو اللي ناقصك ؟ داك الصالير اللي غتشدي انا نعطيه ليك كل شهر غير جلسي ورتاحي

قلت ليه لا مابغيتكش تعطيني بغيت نخدم وهادا هوا شرطي الوحيد

قالي حتى نجي ونهضرو فهادشي

قلت ليه لا قولي دابا باش نعرف

قالي شنو اللي بغيتي تعرفي؟

قلت ليه جاوبني

قالي حتى نجي ونهضرو فاص افاص ماشي فتيليفون قضية الخدمة خصها وقت وتفكير

قلت ليه ماعنديش انا الوقت ولد عمي سمعني غنطلق جا بغا يرشمني الى ماجاوبتنيش غنجاوبو بالرد ديالي

قالي كفاش كفاش؟؟؟! نتي على دمتي انا وجاي واحد اخر باغي يرشمك اش هادشي؟؟

حسيت بيه طلع ليه الدم قلت ليه صافي ماقبلتيش على شرطي. صافي حتى انا مقابلاش على التعدد كلها يشد طريقو السي عيسى الله يعاون

قطعت عليه تيليفون وكنطلب الله يقبل ونرجع ليه مانبقاش فهاد الموصيبة وهاد الحبس رجع همي كامل غير هوا يرضى ويردني اللهم هوا بعدا كما خلاني خرجت للقهوى مع يسرى غايخليني نخرج مرة اخرى ويخرجني ويتهلا فيا باينة عجبتو وعينو فيا وشاد فيا وداير ليا خاطري واللي بغيتها يجيبها ليا ودوك عيالاتو نحسبهم مكاينينش .. الى كنت غنعيش القهرة مع ولد عمي حتى العرس ما يخليني نمشي ليه اللهم نعيش فكنف عيسى وعزو وخيرو والكلمة الحلوة ماشي ضاروري نبغيه المهم نرتاح معاه وعيشتي تكون مرتاحة ويبغيني هوا هادشي كافيني. .. خليت الحب لماليه اما انا ماجاش معايا صافي هادا قدري وهادا مكتوبي. ماشي انا اللولة ولا اللخرة اللي مزوجة راجل مزوج ، راهم مزوجينو وعاجبهم الحال كيحسو براسهم بحال الاميرات وعزيز عليهم الزحام والمنافسة ..وانا هادشي ماختاريتوشرالضروف رغماتني ووليت وحدة منهم زوجة ثالتة .. اللي مهم دابا هوا نخدم على بلاصتي باش ماتجيش الرابعة نبقا ديما المميزة فعينيه باش مايزيدش عليا وحدة اخرى تبورد عليا ودردك ليا فوق راسي .. مدام هادا مكتوبي نتقبلو ونوجد ليه ونرتب ليه ونشوف راسي شنو مسلكني الهبال ديالي والخوف الى بقيت تابعاه غايخرجني فشي زوبية كفس من هادي اللي خرجني منها . بلحق الدقة اللي مكدير ليك عقل كتزيد تحمقك .

بقيت غادية جايا فالدار كنفكر ونخمم بغيت نوضها فعيسى باش يخليني نخدم ويردني ليوم قبل غدا يخرجني من هاد الغمة ساعا جا بابا دخلني فواحد الغمة ماتوقعتهاش مع الدخلة سمعت سميتي مشيت كنجري تعرضت ليه قالي شنو قلتي للراااجل واش بغيتي نقتلك اهاد البنت عيييت معاك بالسياسة .. علاش قلتي ليه ولد عمي حا يرشمني واش هادشي كيقولو الناس

جات ماما كتجري وقفات بيني وبينو خلعني تكمشت فالقنت وهي كتهدنو وتسولو على اللي حاصل قاليها السيد مخلي عندي الامانة حتى تهدا رجع كيلومني قالك هي مزالة على دمتي واستقبلتي الخطاب وهادشي ماكيدارش والسيد شعلات فيه العافية هاد الموصيبة اللي عطاني الله خلاتو بلا عقل كتدي دنوبو وعند بالها قضااتها بهادشي !!! بلحق انا اللي ضسرتك ودابا غترجعي بزز منك بغيتي ولا كرهتي سمعتي

مشيت لبيتي كنجري سديت عليا بديت كنبكي وشعلت تيليفون كنتنخصص فيبيت على عيسى رجل عيط عليا قلت ليه مافيك تيقة انا هضرت معاك ونتا وصلتيها لبابا بغيت نتفاهم انا وياك غير بلعقل وكبرتي الموضوع

قالي علاياش كتهضري شنو واااقع تما بالضبط واش نتي كتقولي ليا بغا يرشمك ولد عمك واش عارفة شنو كتقولي ؟؟ انا جاااي صبري عليا نوصل ونشوفو هادشي.

قلت والصوت كيتقطع فيا والله حتى ندير شي حاجة فراسي ماغاديش نرجع ليك نموت ومانرجعش درتي ليا غير المشاكل فحياتي

قطعت عليه ولحت تيليفون مشيت هزيت وتحد المقص من المجر وعريت يدي بغيت نقطع لعروق ديالي وعطيت لكيتور وسديت عيني كندوز بشوية على يدي حسيت بيه ماضي ضرني وحليت عيني لحتو فالارض ماقدرتش وخفت نموت نمشي جهنم ماكرهتش ندير شي انتحار ونبقا حية بحال داكشي دالافلام لاكن خفت مايعتقني حد ونمشي وانا مزال ماسخيت بالدنيا ومنقدرش ننتاحر مسحت يدي كانت فيها جريحة خفيفة وبقيت واقفة هزيت داك الكيتور كنجرب احساس دوز على يديك بيه وماقادراش باز لهادوك اللي كيزعمو مانقر حتى نحرج راسي.

دخلتت ماما وبابا فرعو عليا الباب ديك الساعة تقول عرفوني شكاندير لقاوني شاداه وحاطاه على يدي غير شفتهم لحتو فالارض ودرت يدي ورايا جات بابا كيجري شاف يدي لقا فيها شوية دالحمورية حسيت بيديه كيرجفو وبردو وماما من الخلعة طاحت على ركابيها قلت صافي هادي اللخرة ليا غادي يقتلني بابا لاكن صدمني جرني واحد الجرة بالحهد عنقني حسيت بقلبو غيسكت ماعضر مانطق انا من الخلعة بقيت مصدومة وماما فلارض شادة راسها قالت لبابا ايما ااا يمااا مانت غتوقع كترتة قلت ليك رخف على البنت .رقلتهاااا ليك لطف الله بينا وبيها

شاف فيها بابا بنضرات بائسة قالي بغيتي تمشي لجهنم … ماعرففاش عاقبك المنتحر ..

هبطت راسي كنبكي وهوا جالس حدايا كايهضر معايا وانا ساكتة بقا فيا هوا وماما وبلا منشعر هزيت يدر بستها طلبت منو السماحة قالي نسمح ليك الى ماعاودتيش فكرتي فهادشي

بست يد ماما حتى طلبت منها السناحة وعنقاتني كتبكي في حين بدا تيليفون بابا كيصوني هزو شاف فيه وخرج فشلان كانه جرا مسافة طويلة

يتبع...