محتوى القصة
كـلً شيء بدأ في مجتمع شرقــي تؤد فيه الانثى، تولد ووصمة العار وتكبر عار لاهلها و بني جنسها لتحمل نسب زوجها، بينما الذكر مفرد المجد و العز، ليرث الجاه و النسب في مجتمـع ينصف الذكر و يحقر الانثى في مجتمع تجاهلو فيه ذكورية الغدر و الخداع
انا الانثى اذن انا نزوة رجل و عار لاهلي، انا انثى اذا انا عورة، غيرتي نقص ومشاعري عاطفة...لم اكن يوما فاعلا كنت دائما مفعول بها... انا انثى اذن انا خطيئة... لست الا بكرة
انثى تعني تنازل، خضوع و استسلام... انثى اختزال للقيود و السدود و الحصار... انثى جمع للذل و المهانة و طرح للكبرياء والكرامة... الانثى تختصر بالجنس، تحرش، وابتزاز مقابل السكوت و الخوف لان صوتي فضيحة !!
الانثى اهانة ونجاسة لكن الذكر عز وشرف... لم يكف ابدا عن احتقاري و استغلالي... حمل ولادة تربية، كنس،طبخ وتنظيف
اعمل 24/24 ساعة خادمة بيوت و ما ان يحل الظلام اصبح لعبة جنسية... مستمرا في تصغيري و تقييدي
لم يرى الانثى وطنا، بيتا. تدفئك بردا، تغنيك حبا،
لم يستوصوا بنا خيرا يا رسول الله، كسرو القوارير والافئدة
⚠️ للتنبيـه والتحذيــر : انا لا ذكورية ولا نسوية، قلمي لا يبوح الا بما عشته ولا يمثل افكاري، لايعبر عن شخصيتي و انتمائي.
***
روايــة مستوحاة من قصة واقعية
🕊️ تــحـت عـصمــــة رجل .. 🕊️
- D. Laaribi -
***
المراة : زوجي كسرني ،خانني
المجتمع :لعلك لا تلبي رغباته او انك تكسرين رأسه بالكلام ام انك لا تهتمين بانوثتك
المراة : زوجي هجرني، ضربني
المجتمع : لعلك تستحقين ام انك كسرتي كلمته ؟
المراة : زوجي تزوج امرأة ثانية
المجتمع : كأنه ارتكب جُرْما و هو ما طبق الا شرع الله
المراة : لا جرم غير جرمي جريمة انثى عشقت حقيرا اكثر مما ينبغي
القصة لكل نساء العالم العربي لكل وردة فبستان اما ان يسقيها البستاني فتزهر وتعطي جمالية اما ان يهملها لتصبح عود كبريت تحرق الاخضر واليابس 🖤🕊️
***
كتبكي فوق صدرها دموع بللو الاخرى وهي كطبطب فوق راسها :منـال واش مغديريش حل لراسك [كانت كتشهق وكتحاول تحبسها] منال رحمي دوك لعينين اختي راه غتطفيهم بالبكا اختي طلقي منو شنو زايد عليك قهرك غير بالعصا
منال كتمسح عويناتها بكمامها :فين غنرجع واش معارفاش خوتي ا سهيلة والله تا يقتـلوني غيديرو جنازة فمحكمة الطلاق
سهيلة سكتات حيت عارفة مزيان حالة منال و وضعيتها كبرات فعائلة ذكورية بامتياز تولدات بنت على سبعة ديال الذكورة لي كلهم مارسو عليها رجولة و الاستبداد، مخلاوها لا تقرا لا تخدم كيفها كيف البنات فسنهاا، ربيع شبابها ونهار مشات تقرا الميكاب لي كان هو شغف ديالها و حصلوها مشاو يقتـ ـلوها عصاا و حبسوها... كانت كتشوف الزواج هو املها هو منقذها ومخرجها من داك الحفرة [ دار بـاهـا ]ومها كانت تاهيا غير ولية لاحول ولا قوة لها الا بالله وتقليدية باغيا غير هنا بالها وتاهيا تربات ففكرة المرأة بلاصتها دار راجلها تسخن تحت دراعو و تحتمي بكتافو
سهيلـة شافت فالساعة :انا غنمشي دابا غيجي داك كينكو ديالك ولا جا وجهي فوجهو غنتنخم عليه
منال حركات راسها باه وعويناتها غرغرو وعنقاتها كتبكي كثر زاد طاح عليها الضيم من جديد وسهيلة كتوصي فيها وهي كتقاد فولارها فوق راسها : متغبريش ومكفيش تيليفون رااه نمشي نديكلاري يصحابليا غير دار فيك شي فضيحة
وهي تجبد من صاكها مانع الحمل :هاكي ها الفانيد علاش وصيتيني
شداتو منال و خبعاتو فستياماتها كتكمش فيه :الله يرحم ليك لواليدين ا ختي
وخرجات سدات من وراها الباب
لتحت فنفس الدار لي كانت ساس من تلات طبقات الفوق فين كانت جالسة منال مع سهيلة وهاديك هي دارها هي وراجلها و الطبقة الثانية [الوسطانية] كانت ديال لوسها و مراتو و الطبقة السفلية هي فين ساكنة عقوزتها وبناتها دخل للمراح جلس و خواتاتو جاو كيبوسو فوق يدو :على سلامتك اخويا
و هو باس فوق راس مو لي جالسة حداه، وخواتاتو كيتصخرو وكيوجدو فطبلة الغذا : فيناهيا
عوجات قنانفها : معرفناها حية ولا ميـتة ملي طلعات مسمعنا حسها، غير سادة عليها تقول كاريا مع جيران
مجاوبهاش جبد تيليفون من جيبو وصونا عليها و نطق بكلمة وحدة :نزلي
وحط تيليفون وهو كيحسب فذهنو دقايق باشما تعطلات باشما غتكبتها معاه... محبس تا سمع صوت رجيلاتها فالدروج هابطة دخلات للدار وهي لابسة عباءة كحلة و دايرة عليها فولار تسالمات مع العقوزة لي عطاتها حنكها بزز وجلسات... بدات تقسم الخبز و حطات قدامو هو لول حيت هو كبيرهم فطبلة وراجل فدار
تغداو وجمعات طابلة مع خواتاتو و دخلات للكوزينة كتغسل الماعن حيت كانت نوبتها نطقات وحدة فخواتاتو : راه نوبتك فتسياق هاد سيمانة أ زوينة
منـال هزات حاجبتها :عاد سيمانة لي فاتت كانت نوبتي
يسرى كتتعوج :حتى دابا نوبتك ولاما بغيتيش غنعاودو نوضو صداع [وكتشوف جهة الباب] الى بغيتي معاه شي صداع اخر
تنهدات منال حيت معندهاش فين تزيد صداع اخر بغات غير تغسل دوك لماعن و تمشي ترتاح سالات وخرجات من كوزينة ملقاتوش عرفاتو غيكون سبقها لطبقة ديالهم طلعات تاهيا وراه دخلات وتمشات للدوش ديريكت بلاما نشوف جهتو
حتى حسات بيه شدها من يديها : اجي لهنا
وقفات : محتاج شي حاجة نوجد ليك دوش ولا ندير ليك مساج
جواد قربها ليه بزوج صباع من خصرها : بغيتك نتي
وقرب وجهو لوجها تحنا تا لقد طولتها باش يتقابل مع وجهها و قرب فمو باغي يبوسها وهي تقلب وجها لجهة لاخرة مخلياه يبوس خدها بلاصة فمها : مالكي [شد وجهها بيد وحدة ضورها وحط عينو فعينيها] منفخة
وحيدات يديه من وجها : لا
وشدها جرها بجهد وباسها من قنينفاتها : ومالك كتهزي وتتحطي عليا
كرهات راسها فداك الموقف : غير عيانة شوية
جرها من يديها لفوق السداري : جلسي [شعل تلفازة ومد ليها تيليكومند ورمى ليها ماسك ديال الزجه من لمجر و واحد لكيتكات و مارس باش تحلي] ارتاحي انا نوجد ليك دوش
وجد الدوش عمر البينوار ودار فيه برودوي وجيل دوش : سلتي حوايجك واجي
دخلات للدوش: صافي خرج انا نكمل
جرها قدامو وكيحل ليها صدايف القاميجة: متكتريش الهضرة
منال مبغاتش كتبعد يدو وكترفض: انا غنحيد حوايجي وندخل غير خرج
مستمر : كاينة شي حاجة مبغيتينيش نشوفها
منال: لا [كتحيد يدو] مكاين والو
حيد ليها البيجامة بصدايف لي لابسة الفوق وهو كيشوف الطبايع لي فكتفها و دراعها و مرفقها كلها مطبعة طبايع زرقين : شنو هادشي [كيطرح سؤال بصيغة عارف الجواب]
منال حادرة راسها ودمعة طرف عينها: والو
جواد هز راسها و دمعة هبطات ملي جات عينها فعينو: سولتك تجاوبيني شنو هادشي
منال: نحسبهم ليك [كتشير لكل وحدة] هادي نهار لقيتيني خارجة نجيب الخبز ونت ماشي فدار وهادي نهار طلعت نشير للسطح وهادي نهار كنت كنوجد العشا فكوزينة وخوك فصالون وخواتاتك فسطح وانا مادرت حتى حاجة [كتبكي] وهادي نهار تسالمت مع خوك بليدين [كلها علامات ماشي ديال العصا ولكن كل مرة كيجرها كيشدها بجهد و كيضغط عليها فبلاصة كتطراسا يدو]
شد ليها يديها بزوج لي كتحسب بيهم : مكنبغيش نضرك [طلق ليها شعرها و حسات بيه زيرها منو بشوية] ولكن حتى نتي ديري عقلك
وخرج ورد الباب وراه دخلات لبينوار وهي زوج دموع للعين و كتحبس نفسها بزز فاش كتشوف شهقة غتخرج كتغطس تحت الماء مخبية دموعها ووجاعها و كتردد: الله ياخد فيك الحق
« حــي الحبــوس » - الدار البيضـاء...
٠٦/٠١/٢٠٢٣
سهيـلة دخلات لدارها، لي كانت على شكل رياض هاد المرة.. ورياض كبير من دوك لي فالواجهة معروف بزاف بـ [ ريـاض الكبير ] هو رياض متوارث عبر اجيال من اليازيد الاول حتاال اليزيد 7 ولد البشـير حاليا، العادة هي كل حفيد كيورثو على جدو...
دخلات لقات كوكوت لي خلاتها مزال كتصفر : ويلي حرام عليك هااجر، فينك علاش مطفيتيش عليها
هاجر طلات عليها من الرياض لفاق : راني كنحفظ غذا امتحان
سهيلـة تأفأفات وهي داخلة للكوزينة :تقول غير نتي لي كتقراي حنا مقريتاش!
طفات عليها وسمعاتها وراها : بنتي خلي لي فيدك واجي ندوي معاك..
تلفتات فيها مبتاسمة :الله يسمعنا خير ا خالتي راضية
سبقاتها جلسات فصالون قبالتهم و باغيا تنطق و بحالا حشمانة من داكشي لي غتنطق بيه :ا بنتي الوليدات زينة الحياة
هنا تجمعات ضحكة المستمع :اه بصح اخالتي راضية
راضية : ا بنتي سهيلة حنا مكرهناش نشوفو وليدات اليزيد
بلعات ريقها هبطات راسها للارض كتغرس ظفر سبابتها فلحم صبعها الكبير والهضرة وحلات ليها :ا اه اخالتي انشاء الله
راضية حطات يديها فوق يد راضية :نتي بنتنا وغتبقاي مرت ولدنا ولكن ابنتي ضروري من لوليدات
وكضحك ليها فوجها بدون اي خجل : راه شفنا بنت خالتك سليمة سيمانة لي فاتت دارو خطبة خفيفة و يعقدو القران هاد سيمانة
الكلام هبط صاعقة فوق راسها حطات يديها فوق قلبها كتحس بيه كيتعصر بين صدرها حلقها نشف و ريقها ولا مر عينيها تحجرو بدموع و الصوت مشا ليها مقدراتش تزيد تنطق
علات راسها فيها و راضية تخلعات من لون عينيها الاحمر عروق عينيها برزو ودموعها على رف رموشها : فاش نعاونك اخالتي نمشي نقلب على نغافة ؟ ولا نجيب الطباخة ولا نتعلم نزغرت ؟
وناضت واقفة فحال لهبيلة كتنطق بحرقة : صلى و السلااام على رسووول الله
وخرجات من الصالون كتضرب الزغارييت... مشات هربانة للكوزينة طفات على البوطة والدموع غير مزادو كيهبطو بلاما دير حتى صوت من صدمتها صوت غاب عليها.. غمضات عينيها فاش حسات بيديه حاوطو خصرها من اللور وغطس وجهو فعنقها كيقبلها بشغف و شوق : توحشتك ا زينة البنات
ابتاسمات كضحك على راسها وسذاجتها السيمانة لي فاتت كان كيخطب ودابا جاي كيضحك عليها حيت لقاها هبيلة، وكلامو كيقززها ،كتحس براسها موسخة فكل بلاصة قاسها منها : كي دوزتي صباحك
مكانتش كترد رجع عنقها بجهد كتحس براسها قريب تختارق جسمو : توحشتك
مزال في سكون و صمت وقبل ميزيد يستفسر على حالتها سمع مو كتعيط من صالون :اليزيد اجي ا ولدي الله يرضي عليك
ضربها لطرمتها : هانا راجع ليك
وخرج غادي ياخد الرضا من مو هي فهاد اللحظة طلقات شهقتها و صدرها بدا يطلع وينزل حيت كانت حابسة نفس فاش كان وراها
- فالصالــون -
راضية : الله يرضي عليك ا ولدي ، راني دويت مع بنتي سهيلـة ووضحنا الامور
فحالا تصرفق :اشمن امور ا مي
راضية : فزواجك الثاني ان شاء الله
البشير نطق بعصبية فوجه مو لاول مرة تشوفو فحال هاكا: اشنو درتي ا مي اش درتي معاامن تشااورتي [ بلوم ] ياك قلت ليك بغيتها تسمعها مني بغيت انا
راضية : حتى نت اولدي كتزيد فيه مالك داير الحرام ، راه مراتك ان شاء الله على سنة الله و رسوله و الشرع محلل ليك ربعة ونت برزقك تبارك الله حتى الى معجباتك تانية زيد الثالتة
كان شاد راسو بين يديه عاد فهم ردة فعلها فلكوزينة تلف معرفش كيفاش غيتعامل معاها..
وقف تابعها ملي شافها طالعة كتجري لبيتها ورا ماسمعات كلام مو اللخر : سهيـلـة
دخلات عينيها منفوخين وحمرين بدموع كتهز فشنطة ديالها كتحلها بلا عقل ويد التانية جارا كمايمها وكتمسح فدموعها لي مضببين ليها صورة هوا شدها من يد ودفع شانطة باليد الثانية : خلينا نهضرو بلعقل
سهيلـة : نت خليتي ليا شي عقل اليازيـد أ
جرها من كوع يديها : جلسي ندويو معندك فين تمشي
سهيلة نترات منو : انا غادة لدار باا و المحكمة بيناتنا
و كتحل فالماريو وهوا كيسدو : علاش مقصحة راسك
بسخرية :وليت انا لي مقصحة راسي
اليازيـد : علاش باغيا توقفي فطريقي
ضحكات ديك ضحكة المرارة، ديك الضحكة ديال الشمتة : اه ووليت باغيا نوقف فطريق سعادتك [طلعات عينيها فيه باشمئزاز] منشوفكش قدامي كرهتك
ضورها ليه وكيهضر بصوت صارخ : معندك فين تمشيي
كتنتر منو : حيد عليا غنمشي لدار باا
و هزات الشانطة عاوتاني من الارض وهوا دفعها فوق الناموسية ووقف قدامها هاز صبعو لجهة عينيها بتهديد : الى عتبتي من هاد لباب عمرك غترجعي دخلي منها
باستهزاء :لا غنرجع نبارك ليك عرسك
دوز يديه فوق راسو بعصبية : سهيلـة [تنهد ] باغيك نتيا و تعاهدنا.
قاطعاتو : و عاقل بلي تعاهدنا
اليزيد : واش بغيتي ناس تعيب عليا مكنولدش[رجعو عينيها تغرغرو ] ياك ويعيبو عليا انا
شد فيديها : اعطيني عقلك ا سهيلـة عمرني غنبغي شي وحدة من غيرك نتي عارفة هادشي حاربت كلشي باش نكون معاك ،و اول ولد غنعطيه ليك نتي تربيه
هزات يديها للسماء واعكاتها ليه لخدو كانت اول مرة تتجرأ وترفع يديها عليه : كيفاش كانو عينيا مغمضين وعمري شفت هاد قلة الحيا لي فيك مزوج علياا و مكملها باغي تاخد لمراة ولدها واش معندك علاش تحشم
من كثرة ماعصباتو وركبات فيه جهل ولا هوا لي كيجبد ليها برودوياتها من لحمام و ماكياجها كلو رماه فالارض و زاد دفعها : حبسي علاش غتاخدي هادشي جيتي بيه نهار لول
حركات راسها بلا حيت نهار لول مجابت معاها والو حتى دهاز ماكانش عندها ماشي باها لي دارو ليها اليزيد لي كبر بيها و دارولها وكساها وصبطها : لا
تكى على الحيط كيستفزها ويستهزء بيها : خرجي بداكشي لي جبتي فوق كتافك نهار لول
سهيلـة بكبرياء كتحس براسها غطيح بالسم : ما قلتي عيب اسي اليزيد كلامك هوا لكبير
و جبدات من بلاكار لفوق الغوب البيضاء ديال زواجها و لبساتها و دارت و دارت عليها حجابها حتى من بيجامة لي لابسة سلتاتها حيت ماشي هي لي جابتها : دخلت بالبيض وهانا غنخرج بالبيض [مسحات دميعتها ] الله يكمل عليك بالخير اسي اليزيد اعطيتك كلشي ونت خديتي مني كولشي والله يرزق بالذرية لي كتحلم بيها
وهي تخرج حافية القدمين و مفيديها حتى ريال حتى من تيليفون حيدات منو لاكارط وخلاتو حيت حتى هوا من فلوسو دارتو شدات طريق لدار باها لي كانت قريبة غير فدروبة لي وراهم، طريق كلها وكاع ناس كتتلفت فيها وهي كتبكي وتنخصص
كدق وكتبكي تفتح لباب ودخلات تجري : امالكي ا سهيلـة
كتبكي : فيناهوا باا
مرات باها : الحسن راه فالفران
باقي كتنخصص :عيطي عليه امرت با الله يرحم لواليدين
مرت باها:ومالكي اش هاد لحالة باش جايا
سهيلة :والله معندي ليك خاطر ا لالة جميلة صوني ليه قوليه يجي يفك بيني وبين داك ولد ناس
[هزات تيليفون ومشات للكوزينة كتصوني ] الو الحسن اجي للدار را بنتك جات بخناينها مبغاتش تدوي الاما حضرتي
مع الفران فالدرب دغيا جا بحوايجو عامرين دقيق خدام فواحد لفران ديال الناس :فينهاا سهيـلة
تلاحت عليه كتبكي وتشكي :باا فك بيني وبينو
الحسن : اش كاين ابنتي ؟
و مرت باها وراه كتسرق السمع : ابا باغي يتزوج باغي يجيب عليا ضرة
الحسن تفكيرو فبلاصة اخرى : بيناتنا القااضي تشدي حقوقك داك الخير ولملكاات متدي منهم والو
سهيلة : وبباا را كنقولك باغي يجيب علياا ضرة ونت كتقولي الخير ولملاكات [الحسن سكت وهي مزال كتدوي ] مالك ابا سكتي شفتك متصدمتيش [ضارت شافت فمرت باها و بنتها وراها غير ساكتين ] حتى نتوما ممصدومينش [كتغوت ] كنقولكم اليزيد غيجيب عليا ضرة !! اليزيد لي كان كيحماق عليااا غيجيب عليا ضرة واش ممصدومينش
باها حادر راسو وهي كتقلب تقابل عينيها بعينيه : باا شوف فياا واش هادشي كان فراسك
بدات تبكي حيت السكات علامة الايجاب :وانا كي الهبيلة بيناتكم انا اخر من يعلم بزواجو [كضرب على حنوكها ] يااك ابوياااا ياك ياا حافظ عرضي يااك
وكتندب حتى طاحت فاشلة فالارض اقرب ناس ليها غدروها اقرب ناس ليها باها لي اعتابراتو سند ليها ايوقف فوجه العالم وقف فوجهها
مكانتش قادرة تدوي ناضت كتمسح عويناتها بفولارها و طلعات لبيت مها المرحومة هو لي بقا ليها منها وهو فين كترتاح كتحس بحالا جالسة بين احضان مها وساداه بسوارت تقدر تدخل ليه غير هي تلاحت فوق سرير كتبكي وتنوح وكتشهق بجهد وهي كلها كتترعد كتخشي لاكارط سيم ديالها فتيليفون قديم ديال مها مخبياه من موتـها وغير خدماتو لقات منال كتصوني ليها كانت فرحانة بسنسلة باغيا تعاود ليها تا جاوباتها كتبكي وتشهق : سهيلـةاويلي ياك شي باس مكاين
سهيلة بصوت متقطع غالب عليه البكاء : غ غيتزوج غيتزوج
منال :شكون لي غيتزوج دويي يا هاد المراة
سهيلة انفاحرات بالبكاء : باغي يتزوج عليا اليزيـد
منال بدات تضرب على فخاضها : اليزيـد ديالنا لي كنعرف، هاداك لي كان يهبل عليك [بعدم تصديق] يستحـيل يديرها ميقدرش يشوف غيرك ا سهيلة
هي كانت غير كتبكي : دارها اختـي تحلو ليه العينين ولا تاهوا باغي الولاد
منال سكتات شوية قبل متنطق : سهيلة رجعي لدار راجلك
سهيلة : كضحكي علياا
منال بجدية : سهيلـة اليزيـد راه كيحماق عليك عمرو غيفرط فيك علاش تسمحي ليها فراجل بقواامو واش كيصحاب ليك ساهل تلقاي واحد اخر فحالو بدارو بطموبيلتو بفلوسو، البلاصة المخيرة كتسافري ليها، ولي حليتي عليها فمك كيجيبها ليك من فم السبع، غا كنيتو ظايرة ليك الهبة واش غترجعي لدار با الحسن اش غديري تم غتتزادحي مع مرات باك وبنتها غيشربوك السـم بفمهم ويديروك ضحكة
كتغوت : وراانيي ولييت ضحكة
منال : اعطيني عقلك ا سهيلـة انا عارفاك كتبغيه وصعيبة وعمري غنقولك سمحيليه ولا تقبليها ولكن ضد فولاد الحرام لي غيتشفاو فيك مالو فسد عليك؟ ياك تزوج حلال، ربي وعاطيه داك الحق شكون نتي لي تحيديه ليه [بنبرة اكثر جدية] نتي غتحيديه لديك الضرة راجلك و نتي احق بيه غتجريه ليك نتي غيبقا يحماق على سهيلـة والله متاخدو بنت المرأة
قطعات عليها، ومنال فهمات بلي هضرتها معجباتش صاحبتها تنهدات : الزغيبية الله يدير ليها تاويل ديال الخير
بدات كتفكر فحياتها لي رجعات ظلام منين دفنات مها تحت التراب تهرسات بعدما كانت متفوقة فالقرايا ولات مسهوكة وسقطات فالسيزيام عاماين وهي كتعاودو والحزن مكتاسحها كون ملقاتش اليزيد لي كان واقف معاها ديما حتى قبل زواجهم معمرو فارقها كان الدرع الحامي و الملجأ ليها فكلشي هو لي زيرها تقرا تا شدات الباك وكان كيخلص عليها دروس دعم و ياخدها ويجيبها حتى خدات ديبلوم ديال الفندقة قبل زواجهم.. كانو غير مصاحبين ولكن علاقتهم كانت زوينة وهي كانت متيمة بيه كانت كتشوفو شي مرات هو باها حيت دار فيها الخير لي مداروش معاها باها كان مفششها ومدللها بزاف وجات فترة لي تخاصمو وتفارقو فيها وهو مكانش عارف عليها بزاف معارفش فين تسكن ولا عائلتها قبل كانو ساكنين فبلاصة اخرى عائلة سهيلة و انقاطعات اخبارهم وعلاقتهم لمدة عام كامل حتى بدات تنساه وتوجد فخطبة بنت مرات باها [اية] كانو جايين فيها لخطاب و كيعاودو عليهم ناس ملاح ومن الزهر والميمون متكون هادي غير عائلة اليازيد جايين يخطبو ليه آية ولكن فاش جاا و شاف سهيلة تبدل البلان قرب لمو بشوية وبلا حس نطق ليها فوذنها : بغيت هاديك
هنا مو فهمات وابتاسمات عرفات ولدها طاح حبو عليها واخا فالنية جاو يخطبو آية اعتذرو و قالو بغاو سهيلـة... كانت غير هي وياه لي عارفين بعلاقتهم قبل زواج
- بعــد أسـبوع -
...
كانت ناعسة من ورا مشبعات عاوتاني بكا مبقاتش كتنوض ولا تهز راسها من فوق لوسادة علـى صوت الزغاريد و الدقة المراكشية فالزنقة دايزين بالعروسة لدار العريس و كلشي كيتطال من شراجم و مرت باها و بنتها كيتزاحمو حدا لباب باغيين يشوفو الدفوع لي جاي مع العروسة واش فحال ديال سهيلة ولا حسن وهي هابطة مع دروج لعندهم كدور على راسها و دموع هوادة شلال على خدودها :روووي روووي روووي
كضحك و دموعها تبكي و احبالها تغني : اليزيـد داها سيد رجاال دااهااا [وكتصفق بحرارة و فاللخر بدات كتضرب على حناكها بكاع جهد لي فيها بحال لهبيلة] داتو ودااتوو والله ماخلاتو
ولات فهستيرية و كتشطح و كتدردق و تحرك فاطرافها و مرت باها كتشوف فيها وبنتها حابسة ضحكتها حيت كتبان فحال لهبيلة عقلها غيخرج وهي كتصرفق فراسهاحتى سخفات وهزوها فوق سداري ورشوها حتى استعادت وعيها ورجعات طلعات لبيت مها ولكن هاد لمرة بدون اي دمعة ولا همس داخلة فصدمة
بعد ساعات نزل الظلام و باقي الديدجي خدام و الزغاريت فرياض الكبير لي كان معروف فدرب وكبير شحال العروض جاوه باش يبيعو كانو كيبغيو يستثمرو فيه يرجعوه قاعة لحفلات ولكن هوا كيرفض حيت معزة داك رياض بلاصتو كبيرة فقلبو هوا موروثه الغالي فين كبر باه وجدودو... وعمر العائلة غتفرط فيه كيفما كبر فيه غيكبر ولادو فيه، حسات بالعطش شوية وناضت مسحات دموعها وجمعات راسها بخرقة حيت كيحرقها و هبطات كتسمع اصواتهم كتتعالى من لكوزينة
لالة جميلة كتغوت :ولا الحسن لااا لاا بزاف عليا هادشي واش حنا جبنا ليها راجل تتمناه كل بنت مرااا حيدتوو لبنتي واعطيتو ليهااا لولد جبتو يشوف بنتي صدق طالب يدهاا وسكتت بنتي و زوجناها وقلنا الله يسخر غير تهنينا
الحسن خايف بنتو تسمع : سكتي راه البنت غتسمعك ، را غنسيفطها لدار راجلها غير تا تبرى
مرت باهاا غير كتزيد تغوت :و شرطات علينا بيت مهاا يبقا تسورتو و تمشيي فحالا جالسة ليا فديور الكراا وبنتي كنعسها فالصالون باش لالة سهيلة تبقا على خاطرها ااا الحسن انا لي غنخلي لييك هاد دار نت وبنتك
كلشي داز على مسامعها طلعات لبيت مها بلا اي كلمة لبسات وحدة من جلالب مها لوساع و دارت عليها فولار و سورتات داك لباب وهبطات : غنجي من بعد نعطيك فلوس الكرا أ لالة جميلة الله يكثر خيرك
وخرجات تبعها باها باغي يشدها و تنترات منو : سير قابل مرتك وبنتك اما انا
سكتات وخرجا ردخات عليه لباب و مشات من جهة لاخرة مدازتش على رياض الكبير تمشات لواحد جريدة بعيدة جلسات تما كتبكي حتى تخنقات بالبكا و حلقها بح وكيحرقها بزاف و عينيها تنفخو وحمارو و بدات تحس بالبرد و الدنيا كتخوا بزاف و الشماكرية بداو يتجمعو خافت وتحركات من تما كاع لحوانت سدو مالقات فين تجلس و خافت وهي كتشوف خيال تابعها قلبها كان غيسكت ليها بالخلعة دخلات بزربة لواحد [تيليبوتيك] من تيليفونات تقليديين خشات يديها فصدرها وجبدات شي دراهم كانت مخبعاهم فصدرها من صرف السخرة
كتبكي وتشهق : الو ! اليزيـــد
هبطات لعند عقوزتها كدق وحلات لباب لقاتهم حالسين مقصرين على كاس ديال القهوة ةماينة حتى مرت لوسها. نكقات الكبيرة : على سلامة لالة منال
شافت فيها : الله يسلمك
ياسمين كتهضر وتتطلع وتنزل فيها لابسة عباءة جديدة : جيبي كاس واجي تشربي معانا القهوة
جابت الكاس و جلسات فطرف سداري نطقات ياسمين : بصحتك العباية بشحال خديتيها زوينة ؟
منال : خديتها من عند مرات السعودي ب1500 درهم
بقاو غير حالين فيها فمهم ونقزات يسرى ختو الصغيرة : منين جاوك هاد فلوس بسلامة كاملين
دا زهرة بالسم : كتحلب فولدي لقات يدو متقوبين
الكبيرة كتلوي مسمن فحنوكها : وحنا بعدا مكيتفكرنا حتى ببيجامة ديال 20 درهم
تنهدات : كيصرف على ولادك كاسيهم ومصبطهم كتر من باهم
الكبيرة تقرصاات و دا زهرة ضارت فيها : وليتي تحسبي فلوسو فين كيخرجو هادي راه ختو وهادوك ولاد ختو
ابتاسمات منال بشوية محافظة على هدوءها : وتا انا راه مراتو
مسكتهم غير باب لي تفتح داخل رشيد غير شافتو منال رجعات تقاد فالفولار فوق راسها داخل جار فيديه بناتو بزوج
جنات واحلام دخلات جنات الصغيرة فيهم كتجري فعمرها خمس سنين طارت كتعنق فمنال : طاتي منال
منال كتبوسها : القطيطة فين كنتي
جنات كتلعب ليها فظفارها كيعجبوها يد منال حيت ديما ملصقة ظفيرات ومقلماهم ومصبوغين ويديها ديما مهلية فيهم بالكريمات : يديك زوينين
وهزاتهم كتبوس ليها فيهم ومنال كضحك وتاعي كتبوس فيد جنات : بغيتي نقاد ليك شي حاجة فلكاسكروط ؟
جنات : بغيت نمشي معاك لدارك تعطيني شكلاط لي حدا راسك
منال شافت فاحلام ختها الكبيرة فعمر عشر سنين : نمشيو حنا واحلام نجيبو شكلاط ؟
وهزاتها : يالله احلام معانا حتى نتي
جنات فرحانة وكتعنق فمنال وتبوسها حيت مولفاها الى جات عندها لطبقة ديالها كتعطيهم سقاطة ولكن احلام حدودية بزاف معاها ومكتبغيش تهضر معاها قدامهم الى كانو بوحدهم كتولي تهضر وكترتاح فحالا عليها شي ضغط من جهة مها نقزات حتى يسرى : حتى انا جايا ناخد شكلاط وجرات معاها ولد الكبيرة
طلعو حلات الباب دخلو كينقزو و واخدين راحتهم فدارها كتخليهم يديرة مبغاو و يسرى دخلات نيشان لبيت نعاس ديالها و جلسات فلكوافوزة لي فيها مكياج وبدات تهز فروايح و كدوش بيهم : عندك روايح زوينين
و كتجرب فلعكورة وكتهضر معاها من بيت وهي فلكوزينة : غناخد ليك هاد لعكر وهاد سيروم
منال كانت غاطسة راسها فهاديك التلاجة الصغيرة لي عندها فدار عامرة غير فالسقاطة و بشي تخربيق باش كيفطرو لا مبغاش جواد يهبط وبغا ينفارد بيها بحال البيض و الفرماج و المرغاز و الشكلاط و العواصر و مشروبات غازية بدات تجبد وتفرق على لوليدات عزاز عليها حيت كتشوفهم هما البراءة الوحيدة فهاد الدار
احلام : اعطيني حتى دانون
جبداتو منال : علاش مكيجيبش ليكم عمو جواد دانون
قفز ريان ولد الكبيرة : كيجيبو وكتخبيه علينا مّي زهرة
تأفأفاات حيت عارفة حروب عقوزتها مسمومة وجيعانة كتاخد المونة من ديسير وسقاكة وكتخبيها تحت سريرها ولا كتسد عليها فماريوها و مقليل فين كتعطي لوليدات يدوقو واخا السقاطة جواد كيجيب لكلشي حتى كتسمع صوت تيليفون كيصوني كان جواد : الو
جواد حداه صداع : خرجي يسرى تشد الامانة لي سيفطت مع عبد الهادي
وهو يقطع بلاما تجاوبو عبد الهادي المتعلم لي عند جواد صغير فعمرو 16 العام هو لي كيتصخر ليه مع خفيف و حتى جواد مهلي فيه بتضويرة و فالاعياد كيزيدو فالخلصة : يسرى هبطي جواد مسيفط عبد الهادي
ناضت فرحانة كتنقز : واش مسيفط لينا شي حاجة
وهبطات كتجرب حتى عيطات عليها من لفوق : لبسي فوقك شي حاجة راك عارفة خوك كي داير
وسدات الباب ديال برطمة وهبطات هي مع لوليدات تا دخلات يسرى مدخلة معاها عبد الهادي حتى للكونوار حيت كان هاز صندوق تقيل وهو حاني راسو حشمان كيحتارم دار جواد بزاف حيت كيحتارمو و كيخاف منو فنفس الوقت مباغيش يخسرو وهو واكل معاه طرف الخبز
كلهم ناضو كيتزاحمو يشوفو صندوق الا منال جالسة معقلة : هذا حوت كنشم ريحة المرصى
دّا زهرة ابتاسمات : وليدي سمعني مشهية الحوت و جابو
الكبيرة : كنا مشهيينو نيت
خدات منال النفس مطولة فيها حيت عارفة اش تابعها فالحوت ماشي الروينة ولا طياب لي خالعها ولكن الحوت كيسخن وعارفة الى جواد تعشا بيه ليلة غدوز طويلة عندها
منال كدير راسها مكلخة : غنديروه غدا حيت العشا اليوم كاين
دّا زهرة : الحوت باقي جديد خاص يتكال جديد
تنهدات وشاداها البكية : خالتي الليل الحوت غيتقل عليكم
مليكة هي كبيرة فخواتات كتلوز بيديها : لي كيتقل عليه مياكلوش
و هزو الصندوق تعاونو عليه دخلوه كان عامر بالحوت مشكل ها البوري ها سردين و صول و الاخطبوط والكروفيط روايال داك الكبير كل وحدة يا وحدة منو ربعة كيلو حيت هما كتار عائلة كبيرة الكميات كانت كبيرة يالله تقدهم. كان حتى واحد لحوتة كاملة ديال السلمون و كان الروكان وسيبيا و لومار ولانشوبة والشرغو والقرب، الفرخ والروجي
الكبيرة ملي شافت الخدمة كتيرة بلعاني دارت راسها مفقوصة مع ولدها ومشات سدات عليها البيت كتضربو باش تلقاها دريعة ومتغسلش الحوت و يسرى هزات شكارتها و خرجات للسوايع اما مليكة فيها الغزيمة يديها مكيقيسوش الماء و دّا زهرة حيت هي العقوزة اذن هي ملكة غير كتحلس تبقا حاضية خدامات اش كيديرو
منال سدات الدار باش ميدخلش رشيد لوسها على غفلة و سلتات ديك العباية و ياسمين مرت لوسها تاعي سلتات بقاو غير بلباسهم التحتاني ومع منال كانت لابسة كولون وفوق منو تيشورت عريض و طويل غير حتى لفخيضات كيبان فلاصتها مطراسية عندها ليهونش وطرامي وشوية ديال الكريشة ممعيقاش ياسمين بقات غير حالة فمها فيها وهي كتتخرك فلكوزينة و طرمتها كتتحرك معاها
جلسو فصوابة بزوج هازين البانيويات كبار و كيغسلو فلحوت وكاع ريحتهم وحالتهم ولات حوت حتى كسرات الصمت : منال
هزات فيها راسها كترجع شعرها بجنب : نعام
ياسمين ضغطات على قلبها : واش كتعرفي شي حاجة زوينة للغلض
منال مفهماتش : لا مكنعرفس
ياسمين : ونتي شنو كتاكلي ؟ بغيت شي حاجة تقاد ليا الفورمة
منال : كناكل عادي وانا لاعندك باش نضعاف اعطيه ليا نيت انا
ياسمين غمزاتها : فورمتك هاكا ومكتاكلي والو
منال : مخبيت عليك والو كناكل عادي انا كتعجبني لحلاوة بزاف سقايتية اعطي لضراسك السكر غتغلاضي و فنفس لوقت مكيشبعش
ياسمين ابتاسمات ديك ضحكة صفرة وممتيقاهاش فقرارة نفسها حيت هي كتاكل اضعاف مكتاكل منال و مكيبان فيها سمعات بنتها الكبيرة كتعيط من لفوق : ماما جنات طاحت
ولغوات ديال الدرية صغيرة مسموع وهي تنوض كتجري و الميمان كتتقاطر من يديها ديال الحوت طلعات ببيجامة لي لابسة مدارت حتى فين تلبس عليها تنهدات منال و بقات كضحك بالفقصة حيت عرفاتها غتمشي مغترجع و غيحصل فيها الحوت كامل من خمسة ديال العشية وهي كتنقي وتساراح حتى لسبعة ديال العشية و باقي مكملات و لي حيداتها كدير ليها تشرمولة نصو دارتو مقلي و السلمونة دخلاتها للفران و القورب هو و الروكان دارتهم طواجن مع هما تبارك الله كياكلو ميشبعو واخا هادشي كتير فالطياب غيساليوه فوجبة وحدة وهي كتدخل الحوت للفران سمعات دا زهرة طلات عليها من شرجم صالون لي كيطل على الضواية لي فلكوزينة : عجني معاك واحد زوج خبزات مغنلقاوش الخبز فهاد الليل
منال قربات تبكي كتحس بظهرها غيتقسم عليها وقدام رجليها كيحرقوها و العرق فيها بزاف كتشرشر و شعرها كلو فزغ وحنيكاتها حمرو بسخونية ديال الفران و البوطة
مسالات حتى ل 22:30 دخلات السلطة للثلاجة وهي تطلع للبرطمة ديالها سلتات من الباب حوايجها ومشات ديريكت لدوش محاملاش راسها خاصها تحيد عليها ريحة الحوت و العرق
وواحد نص ساعة سمعو الطوموبيل وقفات باب الدار جواد جا ناضو وحدة بوحدة الكبيرة و مليكة وويسرى وحدة بدات تجفف ووحدة كتمسح بلعاني بشيفونة نقية لبوطاجي ووحدة جبدات شلاضة لي فتلاجة كتحط فوق منها الحامض شنينفات فحالا هي لي قاداتها دخل فيديه زوج بلاستيكات مد ليهم وحدة وتانية حطها فدروج هما كيتغامزو عرفو البلاستيكة تانية غيطلعها ليها
بداو خواتاتو كيبوسو ليه على يديه واخا مليكة كبر منو بعام ولكن كتبوس على يدو حيت كتحتارمو وحيت هو لي كيصرف عليها وعلى دار كاملة خوه الكبير كيعاون ولكن غير بنسبة قل منو مدايرينش نص بنص وجواد مكيتحاسبش: منال مكيناش
دا زهرة : وهانت اولدي كتشوف ملي مشيتي منزلات تطل علينا وخلات البنات فروينة كاملة
مدواش معاها قبل ميجلس هز البلاستيكة وطلع حل الباب لقاها متكية ناعسة دخل لابس فرجلو و تحنى عليها وهي ناعسة فوق واحد لكنابي هي غير حسات بنفس ديالو على وجهها فاقت كترجع بلور حيت تخلعات فلول : جواد
جواد : مالك ناعسة هاد لوقت
حط يدو فوق خدها كيقيس حرارتها : عيانة
جمعات الجلسة و حيدات يدو من فوق خدها : لا مواقع والو
جواد : هبطي تعشاي
ناضت كتلبس عليها جلابة ودارت الزيف فوق راسها و هبطات معاه لقاتهم كيحطو فطبلة وكلشي جالس كيتسناوه غير هو يجي بداو كيتعشاو جواد كان غير كيشوف فيها مرة مرة حيت كتبان مسهوكة و بحالا قريب تنعس فوق الطبلة عويناتها معسلين بنعاس وكتاكل غير الحوت لي مافيهش الشوك مقرياتش لطواجن ولا حوت الفران كتاكل غير كروفيط وكلمار مقليين وبوزروك فمقيلة بدا كينقي الحوت فواحد طبسيل ومدو ليها هزات عينيها فطبلة كاع لي جالسين غياكلوها بعينيهم كيف كينقي ليها الحوت من شوك بحال شي بنت صغيرة
-----------{ لقد كنت حذرا من الجميع ما عداك ! }----------
...
مكانش بارز حيت معندوش مع هادشي دلعراسات حضر وبرز فعرس واحد هوا عرسو لول مع سهيلة حيت مبغاش يخسر ليها فرحتها كانت تحلم بعرس كبير دار خاطرها ولكن هاد زواج ثاني شرط انه ميبان ميبرز يديرو عرسهم بوحدهم ويعزلو رجال من النساء ويكلف بيه ماديا و يبقا بعيد كان فلبيت من ورا ماسالا البراز دلعروسة وناس بداو يتفرقو ولعروسة قدامو فوق سرير حشمانة مهبطة راسها قدامو حتى كيصوني تيليفون : الو
وقف بجهد ناسي شكون ضاير بيه : سهيلـه
كيلبس فرجلو ممعبرش العروسة : سكتي انا معاك فين كاينة نتي دابا
وخرج هاز لكونطاكت ديال طوموبيل وخرج بلاما ميبرر ليها
سليمة رمات تاجها وغوتات حتى مها و عقوزتها دخلو من وراه كيجريو : فين خرج الحاج فيين مشااا
سليمة غضبانة ومفقوصة وعينيها مغرغين: عيطات لييه [كتغوت] دارتها بلعااني اللفعة دارتهاا بلعانييي [كتدمع] بلعاني بغاات تخسر ليا ليلتي
ومها معنقاها :صافي ابنتي صبري ابنتي
راضية : الراجل هبل مخليي ليلتو انا غنعيط ليه يرجع مخلي ليي البنت عروسة وخارج [وجالسة كتبرد فالبنت] مخلي ليا عروسة قمرة وخارج يصمرو البرد تحت القمرة
كانو دقايق قليلة وهي مزال واقفة فنفس البلاصة وقف بطوموبيل وهبط فيدو جاكيط ديالو رماها عليها وكيخنزر فدوك دراري لي كاينين تم ركبها وهي كتنخصص وكتبكي دار ليها سمطة وركب حداها : ياك لاباس شنو كديري فهاد الليل هنا
باقي كتبكي : مقدرتش
اليزيد : مالكي ا سهيلة اش مخسر خاطرك
كتنخصص : مقدرتش على فراقك
كان واقف فسطوب بصدمة جا ضوء الاخضر ومزادش حتى بدا لكلاكصون عاد تحكرك بلاصا فواحد لبلاصة و حط يديها كيمسح دموعها : و شكون يقدر على فراقك كنت غنجي نجيبك من دار باك سوا بالعقل سوا بالعصا
ابتاسمات والغصة فقلبها : انا جيت بالخاطر [نطقات بصوت رقيق] ياكما ديرونجيتك هاد الليلة
اليزيد قرب ليها : نتي را حيدتي الديرونجمون لي كان عندي
قرب حتى تلاقاو شفايفهم هي كانت جامدة و باردة باقي قريب منها نفسو كتضرب فوجهها و شفايفو كتقيس دياولها نطق بصوت رجولي : نتحركو من هنا
حركات راسها باه وكتبعد عينيها على دياولو حيت باقي منساتش شنو دار وباقي مرارة الغذر فحلقها كطلع وتهبط : فيا الجوع
اليزيد حط يدو فوق كرشها وهو سايق : شنو تشهات لكريشة
وقف طوموبيل و هبط تلقاولو خداو منو الكونطاكت طوموبيل يبلاصيوها فباركينغ وهوا دخل وهي معاه حاط يدو فوق ظهرها بكل رجولة
خداو شومبر وحدة طلعها و هبط يجيب ليها ماتاكل دخلات سلتات عليها داك جلابة و دخلات ديريكت للدوش خلات الجلابة و دو بياس مزلعين فالارض وتخشات تحت رشاشة كتغسل فذاتها من الافكار و الهم عاد تداركات وفهمات موقف منال من الطلاق هي كانت ديما كتشجعها تطلق متعيشش فالدل والظلم حيت هي عمرها عرفاتهم مع اليزيد ولكن نهار عرفات زواجو وقررات تخليه ضربوها الحيوط بغات ترجع لدار باها ملقاتش ليها بلاصة مع مرتو و بنتها، هنا فهمات بلي عندها واحد هو اليزيد شنو غدير بلا بيه غتتكرفص يا غتصلر لدل الضرة ولا غتجفف بيها الارض مرت باها وماشي بعيد باها يجري عليها كيفما متبعها مخاف عليها هاد الليلة فاش خرجات
بالغات فتقدير نفسها ولكن الدنيا رجعاتها لبلاصتها و وراتها فيمتها كتبكي ودموعها مكيبانوش تحت الدوش حتى سمعات صوت الباب تفتح عاد حبسات الماء ومسحات عويناتها مبغاتوش يعرفها بكات و خرجات من دوش لابسة عليها بينوار قصير فوق ركبة وشعرها فازك نازل على عويناتها وخدودها الموردين و نيفها حمر شوية بالبرد ديال الزنقة حط داكشي لي فيدو فوق طبيلة لي قدامو وقرب بلاما ينطق
حط يدو فوق خصرها وجرها فغفلة منها لعندو حتى ارتاطمات بصدرو و بلل شوميز ديالو نطق وفمو قدام وذنيها : شي نهار غتحمقيني
و ترمى عليها كيلتهم فشنايفها باردين كيمص فيهم بلهفة وشوق كتحس بيه من لمساتو ملهوف عليها و مشتاق لكل جزء منها
هبط يديه ليديها شابك صباعو بصباعها حتى سمع صوت رنين الهاتف لي كسر عليهم اللحظة كتتسنا ردة فعلو لي كانت وبكل برود طفا تيليفون ورماه بعيد و رجع ليها بغا يقرب ليها وهي تحط يديها فوق صدرو مبعداه ونطقات بشوية: فيا جوع
تنهد وهو عاض على فمو : حتى انا فيا جوع
جلسات وهو بدا كيفتح ليها فلومبورطي فحال شي بنية صغيرة حط قدامها ليباط بيضين بلاداند لي كتحماق عليهم وحل ليها وازيس لي كيعجبها و مافين ديال شكلاط وبدات كتاكل هو سلت حوايجو بقا غير بلبوكسور و التيشورت لتحتاني وجلس حداها محاوطها بيدو حتى كلات وحيدات يدو منها : نعسو ؟
وقبل ميزيد يقرب ليها هربات منو نايضة : فيا نعاس
مبغاش يضغط عليها واخا توحشها بزاف نعسات و طلع نعس معنقها حضنها كافيه فهاد الليلة كيحس بالروح كترجع فيه وهو معاها كون بات فداك العرس مكانش غيصبح عليه الحال
الربعة ديال صباح تيليفون كيصوني وهوا كيطفي فيه كيصونيو ليه من الدار مو ومرتو الجديدة فضحو ليه راسو وهوا يطفي تيليفون بمرة
هي تحركات بشوية وهي ناعسة فوق صدرو : شكون ؟
رجع عنقها كيبوسها من راسها : غير نعسي انا معاك
وتاهيا غمضات عينيها مبتاسمة بانتصار وهي كتقرا فالتيليفون [الواليدة ترن]
هي ناعسة فالسلم والسلام فحضانو وهما قالبين عليه الرياض : كنصوني والو
هاجر : ماما راه طفا تيليفون
راضية : ياك اوليدي وليتي تطفي عليا التيليفون كح
كحرك راسها بلا : ولدي عارف بينو وبين لي خلقو مغيعلقش ليا وحدة عروسهاا هاد المسكينة عارها على من ؟
هاجر مترددة تنطق : ماما المسكينة عارها عليك كلشي عارف بلي اليزيد كيبغي سهيلة غضلميهم كاملين هو و سهيلة وهاد سليمة
راضية : ياك ا بنت كرشي وليت غالطة حيت بغيت نشوف وليدات ولدي. واش لي تزوج ودار شرع ربي كيولي خايب
هاجر مبغاتش تبقا تسمع نويحها باست ليها فوق راسها : ماما تباتي فراحة الله
راضية : اليزيد غيدير وليداتو وسهيلة على راسي وعينيا كنت دايراها بنتي ماشي عروستي
طلعات لبيتها وخلات وراها مها باقي جالسة فواحد لجليسة على دخلة الرياض مقابلة مع باب كتشوف داخل ولي خارج كتتسنا فولدها كتر من العروسة الجديدة لي جالسة كتبكي فبيت لي اعطاوها زوقوه وقادوه ليها. بيت العروسة الجديدة كان لتحت وبيت سهيلة لفوق
سليمة طرا فيها الضحك كيقولو العريس هرب عليها وهما قالو لا مبغاش يبرز وكيتسناها برا يمشيو لوطيل واخا تاواحد متيق هاد النكتة
[][][]
سالاو العشا و كلشي رجع اللور كيهضرو و و البنات تا وحدة ممسوقة عندهم الخدامة لي تجمع من وراهم وناضت هي بدات كتجمع فالطبلة حتى وقفها صوتو قدام كلشي : طلعي وجدي ليا الدوش
كلشي تلفت ومنال حسات بحالا حمل نزل من فوق ظهرها رحمها من هاد روينة ديال العشا لي كانت غتحصل فيها بوحدها و البنات بقاو كيضورو بيناتهم الشوفة منال معاوداتش معاه الهضرة حطات لي فيديها و طلعات و هو زاد وراها واحد عشرة دقائق و تبعها
دّا زهرة : نوضو جمعو عليا هادشي
الكبيرة : وا مي راه بزاف مالها مترجع واش نصوني ليها تهبط تعاونا
دّا زهرة : واش بغيتي تسمعي شي حاجة تحشمك ملي يكون جواد متعيطي ليها متدويها ونوضي دابا بداي تجمعي فهادشي
يسرى : انا غذا قاريا خاصني نعس بكري
دّا زهرة : نوضي تعاوني خواتاتك نتي تعرفي تاكلي وتنعسي
منال كانت كتجبد ليه فحوايج لي غيلبس من بعد الدوش حتى سمعاتو دخل : كلشي واجد تدوش دابا ؟
جواد خدا دوك لحوايج رجعهم لماريو : مبقيتش مدوش
مفهمات والو شدها من اللور معنقها و كيحك ذقنو على عنقها ومع لحية خشينة كتحرقها وكتهرها في نفس الوقت و يدين على خصرها مزاحمها معاه حطات يديها فوق يدو بغات تفكهم : جواد ا [مترددة] اليوم عيانة بزاف
بدا كيطلع ليها الكسوة لي لابسة : علاه اش كنتي كديري بالسلامة
حنات راسها غاضها الحال حيت نهار كامل وهي واقفة فاللخر اختزل تعبها فهاد الكلام عند بالها عرف شنو دارت نهار كامل وعارفها ضالة واقفة فالكوزينة و هو معارف والو
خداها بين حضانو كانت عارفة ليلتها غتكون طويلة خصوصا الحوت كيهيج الاثارة الجنسية وهو ضرب طبسيل ديال بيض الحوت وفعلا الليلة كانت طويلة عليها كتدعي ربي يخويه دغيا باغيا غير تنعس ترتاح
فاقت على صوت الصداع فزنقة كانو سكايرية مع يبدا يصبح الصباح يبداو يفرقو الطرح وكلها يمشي كيشرشر بدما ياتو من ليلة دالبارح
حسات بدراعو تقيلة فوق يديها كتحس بثقلها كلو هابط على ضلوعها بغات غير تتحرك مقدراتش، و حطات يديها فوق يدو لي مسرحة فوق خصرها كتهبط فيها حتى حسات بيه زفر بنفس سخونة ورا وذنها ووصلها ريحة فمو خانزة بالغارو لي كيضل يطحن فيه نطق بصوت مدعدع مع نعاس : فين غاديا
منال : صباح الخير اليوم نوبتي فالصابون
وهي نايضة وكتدوي من فوق السرير وكتجمع فشعرها محسات غير بيه جرها خبطها مع الناموسة و يديها تحت منها و راجع محاوطها بدراعو :هاد النوبة ما بانت ليك غير الاحد فين كنكون جالس انا ؟
بلعات ريقها :خالتي لي اعطاتني اليوم
قربها من كرشها تا لصقات معاه و حط حتى رجلو فوق فخيضاتها العريانين : مغيتصبنوش اليوم، الاحد ديالي كنجلس فيه وباغي مرتي تجلس معايا
حسات بيدو كتحسس خصرها عرفات مقصدو تنهدات وهي كتحاول تتملص منو باغيا غير تهرب :منقدرش ا جواد خالتي غيصحاب ليها واش غير صبحت ناعسة و غتقلق عليا [عوجات قنينفاتها بغنج ] غيصحابلها واش غير نت لي مضسرني
معطاهاش الفرصة فين تهضر بغا يسكتها وولا جرها من شعرها فوضعية عنـف و تملك و خشا وجهو فعنقها كيبوسها منو و يدو كتتسارا فسائر جسمها ممسوقش لكلامها ولا سوق العيالات ديال النوبة حيت هو فدارو هو الملك والحاكم و الاحد هو نهار لي كيبغي يجلس يسد عليه معاها ويحيد الشوق ديالو كامل منها
فالمراح كانت دّا زهـرة فايقة كتتسنا عروستها لي فيها نوبة تهبط تدير ليها الفطور وتبدا الصابون مع هاد الصباح.
دّا زهرة : الكبيرة فينك ابنتي واش هاد العروسة مزال مغتنزل تسامعي معاها فالواطزاب
الكبيرة هزات تيليفونها كتصوني مكيجاوب تا واحد :مكتجاوبش أمي راه كنقولك جواد مضسرها علينا بلا قياس تقول هي مولات الدار
دّا زهـرة كتتحلف فيها: حتى توريني وجهها
يسرى : كون تشوفي ديك سيمانة جاب ليها بيجامات جداد و الى دخلتي لبيتها تتلفي بكترة الروايح كيدوخوك من باب الدار ماشي كتريح كدوش بيها وغير مزايدة فيه
دّا زهـرة : العيب ماشي فيها العيب فراجل لي عندي مكيرعدهاش ولكن والله متبقا فيها
بقات غير كتتحلف حيت مبيدها حيلة و متقدرش تصوني على ولدها ومتتجرأش تدق عليه باب البرطمة ديالو فهاد الصباح عارفة ولدها راسم خصوصيتو وحدودو لي مخاصش حتى مو تتجاوزهم معاه وصلات ال 12:00 ديال نهار و مكاينش اثر منـال ولا حتى جـواد كان ناعس ومعنقها من اللور خاشيها فيه كل حاجة فيه كانت دير ضعف حجمها يديه حرشين بالخدمة ديال الكراج و دراعو قاصحة بالحديد لي كيضل يهز و كتافو عراض وواسعين فاقت مرة اخرى قبل منو كان غارق فالنعاس بعدما جاب البليزير ديالو فاقت كتتمشى بشوية مقصحة شوية و كان افضل حاجة من مورا ممارسة هو تاخد دوش يكون سخون ولكن من دون اي منظف [جيل انتيم] ولا اي صابون لديك المنطقة تكتفي بالماء سخون حيت بالمنظفات تقدر تزيد سوءا للمنطقة توضات واخا كانت عارفة هاد نهار وضوءها مزال غيخسر مرة اخرى و نشفات شعرها قدام المرايا جالسة فلكوافوز غير بالفوطة ملوية عليها و فخيضاتها كيبانو وصدرها تاهو مقدراتش تستعمل سيشوار مخافة يفيقو بدات كنتنشف غير بفوطة ديال الشعر و كتدهن فالكريمة لذاتها ومع كتتحرك فالبيت فيقو صوت خلخال الذهب لي ضاربة فرجليهاا كيتسمع رنينو بشوية وسط داك السكات و الظلام لي دايرين فالبيت بريدويات كانت واقفة قدام الماريو كتجبد متلبس
خدات كسوة طويلة و زوينة كلها مرصعة بخطوط ذهبية و رمات الفوطة كتلبس وهو حاضيها مخسر ومغوبش : تبغي نطلع ليك الفطور هنا [بصوت ناعم] ا سيدي جواد
رجع تقلب للجهة لاخرة كيتكسل : انا هابط
و هي تنزل دخلات عليهم قبل ميهضرو كلهم بداو كيتغامزو على سنسلة جديدة لي ضاربة فعنقها : بصحة سنسلة واش ذهب حقيقي
حطات منال يديها فوق صدرها فرحانة بسنسلتها : اه حقيقي
للكبيرة كتعوج فمها :و منين جاوك اخيتي فلوسها ناعسة على شي ورث
منـال : جواد لي جابها ليا
دٌا زهـرة كانت غتوقف صلاتها بالسم لي ركبها من ورا هاد الهضرة كتشوف فلوس ولدها كيضيعو سناسل فعنق مرتو غا سلمات وهي تبدا تغوت :و فين كنتي من صبح الله، واش حنا كل حد نبقاو نتسناوك ناعسة حتال دابا ياك لاباس تصحبي راسك فدار باك
منـال ملقات متقول : سمحي ليا ا خالتي را
قاطعاتها :داك الصابون راه كيتسناك غتروحي فيه هاد العشية
و تم دخلات مرت ولدها وولدها الكبير ووراهم جواد و بداو العرايسات كيحطو فالغذا دايرين دجاج فالفران وشلايض جلسو كياكلو و دّا زهرة مزال مبغات تهنا :منـال متنسايش داك الصابون
وحلاتها ليها المضغة بقات فحلقها، حتى نطق جواد بلاما يشوف جهة مو :مكاين صابون هاد النهار انا تزوجتها باش تعمر عيني ماشي باش ندوز الاحد بوحدي
حنا كلشي سرط لسانو ومو حشمات مقدرات تقول والو حيت شوية غيولي يهضر معاها بالخشيبات و شنو باغي مرتو و حقوقو فيها و خواتاتو بداو غير كيضورو فعينيهم و كيتغامزو بينااتهم اما العروسة الثانية غتاكل راسها وجنابها حيت راجلها داير فحال البوكيمون ومعندوش شخصية فحال جواد بين مو وخواتاتو واخا هو الكبير
سالاو الغذا و مع صهد الحال حيدات منال البوليرو لي فوق كسيوتها حيت كانت اونسومبل كسوة و فوق منها بحال جيلي بنص كم و طويل و زوينة كابان فيها انيقة و عصرية و دايرة فولارها... و لكن فاش سلتات البوليرو وبدات غاديا جايا الهزة لي هز عينو فيها كيشوف كيفاش حناك طرمتها كتتحرك فداك الثوب كل حركة كديرها كتبان... هنا غمض عينو بعصبية كيلعن فيها وخوه حداه فراسو كيدورو سيناريوهات شحال من مرة خوه هز العين جهتها
جمع الوقفة من فوق الطبلة وهو كيشوف فيها قاصدها : تبعيني
هي حطات يديها فوق صدرها بمعنى واش انا
و مسحات يديها بزربة من الصابون و تبعاتو غير سد باب الفصيل ديال دار و هو يشدها من دراعها :كديريها بلعاني
منال مفهمات والو :جواد الله يهديك انا فالكوزينة كنغسل ماعن فاش غلطت
حط يدو وعصر طرمتها بقوة حتى قفزات :شنو هاظ القحوب هابطة بهاد الفصاالة هادي ديال بييت نعاس ماشي دار
كيدوي وكشاكشو غيخرجو و هي كتحاول تهدن وكتهضر بشوية مبغاتش يشوهها معاهم هما هاص غير علاش يتشفاو فيها :جواد عافاك
كتترعد : راني منويت والو بانت ليا مستورة
بهضرتها كانت فحال الوقود غير مكتزيد تشعلو وتجعرو مزيان : معرفتيش المستور من المفضوح [حرك راسو ] انا غنوريك دابا
و طلع و هي تابعاه فدروج : جواد جوااد
طلع لدار و ديريكت مشاا للماريو ديالها و بدا كيجبد فالحوايج و كيقطع فيهم، كيقطع خلا غير شوميزات ديال النعاس و الخمارات لي كتلبس فالزنقة وهي مصدومة دايرة يدها فوق فمها كتشوف حالتو مقادراش تتدخل حيت غيشركها بلاصة دوك شرااوط
وقف وهو كيضرب برجلو كيقبس دوك الشراوط برجلو : غتولي تهبطي بنقابك
حركات راسها وهي حابسة دمعة :واخا ا جواد بقا غير على خاطرك
قربات :نقدر ناخد نقابي كيتسناوني فكوزينة
جواد وهو مغدد كتزيد تستفزو بتصرفاتها هو بركان هايج كيفور منو العافية وهي ببرود كتقولو غتهبط للكوزينة : معمرك تخطي رجلك فالبلاصة لي فيهااا ذكر بلا بياااا نهار يكون خويااا التحت متعتبش رجلك فيه [دفعها جهة السرير] دابا مغتهبطي فين سيري تريحي
بقات جالسة وبدات تحيد داك الفولار من فوق راسها و كتحيد ديك الكسيوة شافت فيديها حمرة البلاصة منين كان مزيرها اما لتحت كانت مقلوبة عليها الدنيا :هاهيا عاوتاني غتدير لينا من هنا دازو
ياسمين مرات رشيد: اليوم ناخد نوبتها راك شفتي جواد كي خرج فيها
الكبيرة :سمعتيه كان غياكلها براا يصحاب ليها داك الضسارة خويا هو لي غيربيها
مليكة ختهم المتوسطة: شفتيها هابطة بديك الكسوة غزالة كاعما جات فيها و سنسلة و كتحرك فداك الذهب فيديها، تقول غير هي لي عندها
الكبيرة دارت جهتها : وعلاه عندك نتي ؟
مليكة : تا انا غيديرو ليا راجلي
الكبيرة كتعوج فمها :ماشي كاع رجال هاهوا خويا رشيد كاعما كيشري لمرتو ذهب غا خويا جواد لي مضسر ديك الخانزة
هنا ياسمين تخوا عليها الماء البارد كتضحك غير ضحيكة صفراء و كتبلع ريقها حيت مبقاتش مستحملاهم
فاقت على صوتو كيصلي النوافل لي قبل صلاة الظهر وهي كتتكسل وكتشوف ففورمتو طويل و كتافو عامرين و سيقان رجليه مزغبين حيت لابس غير شورط بدا كيسلم : الفطور را واجد الزينة
من نهار عرفها وهو كيدلعها بهاد السمية [الزّينة] و كيغنيلها ديما اغنية ا الزينة ومادرتي فيا انا وقلبي حوسنا عليك مالقينا
سهيلة جلسات كتاكل فلكرواسون و شكلا شو : فطري باش نتحركو لرياض
هبط هو يقلب على قهوة كحلة تفيقو شوية حيت مخدمش من نهار خرجات سهيلة من دار وتعرمات عليه الخدمة وهي هزات تيليفون البشير وسيفطات ليها ميساج : الفقمة
منال : الحلوف [دغيا جاوبات حيت هي الوحيدة لي كتعيط ليها هاكا وحتى منال كتقولها حلوف بالضحك] غبرتي شوشتيني عليك
سهيلة : غنرجع مدلولة لدارو [تنخصات بالبكاء من ورا الشاشة] كنتخنق
منال: سكتي سهيلة شكون قالك غتسمحي ليه ولا غتبقاي معاه واش مغتاخديش حق على هاد زواج لي حصلك فيه فابور واش حواك فابور غتخلصي على كاع داكشي لي درتي معاه بالفن. [سيفطات هاد ميساج وبدات تكتب اخر] غتشرطي عليه يعطيك محل من هادوك لي كيكري ويحلو ليك ويأثتو ديري فيه الباتيسري لي كتحلمي بيها و خدمي وجمعي رزقك خاصك توقفي على رجليك نهار تبغي ترميه خاص حسابك فالبنكة يكون عامر باش ماشي تبدليه بباك القحط و التكريدة جمعي راسك وكوني قوية نتي عندك فرصة فين تغناي متكونيش بحالي
سهيلة : نتي حزقي ليه بالذهوبات لي داير ليك راه كاينة تريميسة تم
وغير سمعاتو كيحل شومبرة مسحات لميساجات وبلوكات نمرة منال باش متقدرش تعاود تسيفط دخلو للرياض لقاوهم حاطين الفطور التاني مع 12:00 و مجموعين عليه
راضية : على السلامة الحاج
وحادرة العين من سهيلة لي دخلات تسالمات مع هاجر و حتى مع سليمة مرات اليزيد الجديدة و باست فوق راس راضية بزز وهي كتنتر منها وجلسات اليزيد طلع للفوق وراضية حركات سليمة من رجليها : تبعي راجلك لصقي فيه
وهادشي قدام عينين سهيلة لي الغيرة كانت كتاكل فيها و وجهها بارد مافيه حتى تعبير
دخلات سليمة ورا اليزيد : الحاج
تلفت فيها : سليمة جلسي
مترددة : البارح م
جلس قدامها و قاطعها : سليمة تزوجت على سنة الله ورسوله ونهار جيت نخطبك كنت واضح معاك غنعدل بينك وبين سهيلة و مغتخصك حتى حاجة معايا نتي غيى حلي فمك انا نحضرها ليك ولكن بلاصة سهيلة بوحدها وهادشي مخبيتوش عليك مبغيتش نظلمك معايا ونعار لول صارحتك بكلشي غنديرك فوق راسي و غنطبق كلام ربي
حدرات راسها حشمانة ومحرجة مقادراش تجاوبو : انا فاهمة
شافت فيه بطرف عين : مهم تكون عندي بلاصة فقلبك
خشا صباعو بين زغيبات لحيتو وناض حيت مغتغهمش كيحاول يشرح لها بلي القلب خداتو مخلات فيه سهيلة والو
لقا سهيلة كتتسناه غمزاتو ونطقات بغنج : نديرو شي صواري سينما
اليزيد : غندوز الليلة مع سليمة
سهيلة فحالا تقرصات : بغيت نخرج مع منال اعطيني طنوبيل لاكنتي جالس فدار
خشا يدو للفوقية لي لابس فالدار جبد سوارت مدهم ليها : خرجي بظلي الجو شوية
سهيلة : انا غنخوي ليك دار نخليك تخلوا بيها
قالتها وهي مفقوصة وهو كيقرا الغيرة والسم كيخرجو من عينيها
راضية كتعيط : سليمة هبطي عندي ابنتي
هبطات وهي كتمسح دموعها وعينيها توردو بالبكاء : هاني اماما راضية
ضحكات ليها : وليتي تقولي ليا ماما الله يرضي عليك ا بنتي عرفتيني علاش عيطت عليك
سليمة : لا ا ماما راضية
راضية : بغيت نقرصك شوية ونعلمك حيت شفتك خبز ربي فطبغو
سليمة ببهلان : شنو غتعلميني ا ماما راضية
راضية :نعلمك الحروب وتاحرايميات لي مكتعرفيش ليهم
قربات ليها كتهضر بشوية: كيفاش تخلي راجلك يموت عليك وميفرقكش
سليمة حلات فيها فمها : كيفاش
راضية :وحلي معايا دوك لوذينات الالة الراجل يموت على زوج على كرشو ولي تحت منها كوني حادقة كل صباح تفنني ليه فالماكلة وشهيوات خليه ياكل ويتنغم را التلاجة قدامك كلشي فيها ولي خاصة نجيبوها نتي غير عري لينا على دريعاتك وورينا شطارة يديك وشنو تعلمتي فدار باك و فالليل خاصك تكوني وغنقولها ليك حرفية حيت نتي فحال بنتي هاجر خاصك تكوني قح + بة تخليه ينسى شنو كيشوف فزنقة لبسي المعري والمقزب والمزير ولا نتي سلتي كاع كلشي عرفي كيف تجريه عندك بلسان الحلو و المعسول
غمزات ليها بعينيها : سنو يصحاب ليك باش شاداه سهيلة جربي دوزي من حدا بيت نعاس مكاين غير حبيبي و مولا داري ونتي انشاء الله غتكوني مامات وليداتو غير ديري لييه لولاد غينسا كاع بنت المرا
سليمة: بصح اماما راضية يشوف فيا لا كانو بيناتنا لولاد
راضية :غيعمر بيك عينو كيفما عمر بيك دارو غير ديري لي عليك وصبري ا بنتي الراجل مكيجيش ويعطي قلبو و نزيدك رجال كاعما كيخطيو قلبهم لي نصويك بيه هو خودي عقلو هو لي عندو وباش تاخديه خاصك متخرجيش من عقلو يضور ويتفكرك
اعطاتها واحد كارطونة :هنا كاين كاع داكشي لي غتحتاجيه الليلة
منال : عرفتي الحاج راجل سهيلة
جواد كيرتب وراق لاسيرونص ديال الدار : كان عندو العرس البارح
تدهشرات : البارح اويلي واش دارها بصح
بغات تقلقل اش فراسو: هو لي عبر مولداتش ليه امرأة ناض تزوج عليها معليه لومة شرع ربي هذا
ملي مجاوبهاش بغات تحك على الدبرة: وحتى نت زعما
بدات تفرد فصباعها ملي بدا كيشوف فيها : نمشي انا نزوجك لا بغيت الاولاد منقدرش نحرمك من لفطرة ديال بنادم
مجاوبهاش وهي حلفات متسكت له : رآه كاينة بنت عيشة صاحبة خالتي زّهرة هي نيت لي قالتها ليا باقي صغيرة وزوينة ومتعلمة تا وحدة متفوتها فشغال الدار اش بان ليك
جواد ضرب داك الضوسي فوق طبلة معصب كتزنز ليه فوق راسو بحال ذبانة : اش بان ليك تخليني طرونكيل
تحركات من حداه هازة تيليفون : سهيلة جي عندي توحشتك اصحيبتي باقي مقلقة عليا
سهيلة : نتلأقاو فسويقة مابغيتش نشوف داك المنطيح
طلات عليه : جواد ناقصني شي حوايج بغيت نخرج مع سهيلة وعندي غير اليوم مفياش نوبة ديال لكوزينة
جواد : هزي الصرف لي فجيب
مشات فرحانة باستو من خدو : واش مبغيتيش تخرجي
غهمات بلي لا زادت تعطلات غيجي فوقها مشات كتلبس اوسع خمار وحتى عينها نقصات منهم الكحل ولماسكارة باش ميندمهاش ويحبسها متخرجش
و مشت لسروالو لقات فيه ٢٥٠ درهم وشي دراهم : انا خديت كلشي
ومشات حتى لفوق واحد لحويطة فصالون صغيور عندهم فالبرطمة فين كيخلي ليها مصروفها كل صباح وكل نهار وزهرو مرات الى مضور الحركة وراشقة ليه يقدر يخلي ليها حتال ١٠٠ درهم ديالها بوحدها مكتصرف تا ريال منها على الدار لقاتو حاط ليها ٥٥ درهم باش كملات لحساب وخرجات قدامو وهو كيدوز عليها بعينو واش كتجيب العين ولالا
خرجات فرحانة حيت ماشي ديما كيخليها تخرج و كيخليها غير مع سهيلة حيت كيعرفها مزوجة وكيعرف راجلها معروف الحاج كلشي كيحتارمو ميخليش مرتو تديع ولا تغلط
تلاقاو حدا سويقة فبلاصة معلمينها ديما كيتلاقاو حداها ركبات منال فطموبيل لي جايا بها سهيلة ديال اليزيد وكتستعملها لوقت لي بغات وكانت ليبر تسالمو و من تما تحركو : حوبي توحشتك
سهيلة : واحلة مع ضرتي
منال عنقاتها : ربي كيعطي لفول غير لي معندو ضروس كون غير المنطيح [لقب كيعيطو لجواد بيه غير بيناتهم ب٢] لي عندي يتزوج نخوي ليه تا لبرطمة ونهبط عند مو غير تهنيني منو نعطيها زوج ليالي ولاكاع ليالي
سهيلة : كتمنيكي بيا شكون تبغي ضرة غا قولي ليا راه كنتقطع ا منال غير صورتو معاها فالفراش كتقتلني منقدرش
وبدات كتبكي: راه كنبغيه هو كان كلشي فحياتي
عنقاتها : وعلاش مصارحتيهش بالحقيقة
سهيلة : اليزيد غيتهلك لاعرف غيحس براسو ماشي راجل خلي هاد الهم ليا اللهم هم الضرة ولا همو هو
منال : اختي سعدات لحاج بيك
سهيلة : حتى كان هو راجل معايا واخا ضرني فخاطري بزاف
منال: كلشي عارف اسهيلة الى كان هو راجل نت كنتي دراع ووسادة يتوسدها كلشي شايف العز لي دايرة ليه
خداو كريب بالغلاص و الشكلاط و كابوتشينو كيهضرو ويتمنظرو فالبحر : رحمتيني ا سهيلة بهاد الخريجة كنت مضيومة ومخنوقة فالدار
سهيلة : كن يخليك كون ديما نخرجو
منال: لمنطيح يعرف غا يفقصني اليوم واقيلة كامي داك العجب تا خلاني نعتب فيها
هما كيهضرو وقف عليهم واحد : السلام عليكم
هزات عينها فيه هي وسهيلة : كاين منقضيو اخويا
كيشوف فمنال شوفة رطبة : بغيت نمرتك ناوي المعفول معاك مباغيش نتفلا وندوز الوقت كنقلب على بنت لحلال
سهيلة بزز حابسة الضحكة. منال : سمح ليا اخويا راني مزوجة
هو : باغي الحلال اعطيني نمرة باك ولا خوك
سهيلة : ولصقة هادي ا شريف راه قالت ليك السيدة مزوجة وروليي
وهي توقف حطات الحساب وخرجو بجرا وطلقات سهيلة ضحكة : وهانتي من غذا تجيبي راجل
منال : واشنو راه باقي نجيب سيدو
سهيلة : عاماين زواج ومزال مولفتيه ومزال قلبك مبغاه
منال: واش نسيتي بلي مختاريتوش غير وافقت بلا منشوفو بغيت غير نتهنى
سهيلة : واش بالك باقي مع بلال
منال خرجات واحد تنهيدة من قلبها : نهار قررت ندخل لهاد زواج نسيتو
سهيلة : لا باينة من هاد تنهيدة نسيتيه
منال : وزيدي لايندمني المنطيح على هاد لخرجة
مشاو مزال لسويقة تقدات لي جاقدامها غير باش متدخلش بيديها خاويين حيت هو فراسو غاديا لسويقة ماشي تتقهوا
وصلاتها سهيلة حتى باب الدار وهي كتشوف زاجة ديال لور : واش هاد طنوبيل ساكنة حداكم فالدرب
منال ضورات راسها : لا عمري شفتها
سهيلة : راه كانت تابعانا من سويقة
منال : يمكن شي ضيف عند جيران
سهيلة : لماطريكول ديال برا
باستها وهبطات و اللوسات كيطالو عليها من تقابي : بداو رجليها يخرجو شواري
الكبيرة :ولاو طنوبيلات يجيبوها تال دار
دّا زهرة: موكلة ولدي تيبيخا ولا بحال الضبع قدامها
دخلات هي عندهم مدات ليهم ميكة من الصواب فيها شي بيجامات من سوق خداوها كيضاربو على الالوان وهي طلعات لقاتو باقي كيجمع فالاوراق وكيقاد ضواسا لي خاصينو كيجمعهم ديما فهاد العشية مخلي المتعلمين فلكاراج :جبتي لي ناقصك
لفصل لي وراه هو لي ملقيتش غنعاود نكتبو بحال شي اسدة 🥲
الدار عبابارة عن ساس من تلات طبقات لفوق كاع تالتهم ساكنة منال وجواد فبرطمة فيها بيت نعاس كبير بزاف وواسع واخد نص مساحة الدار وصالون صغير و ميني كوزينة مكيطيبوش فيها فيها بوطة ديال زوج غير باش يديرو فطور وفران كهربائي باش يسخنو لاجابو حاجة من زنقة وتلاجة صغيرة فيها سقاطة وحليب ومشروبات ومثلجات
منال: اه [كتكترلهضرة] السويقة كانت خاوية كتصفر
بلعاني قالتها باش ميفكرش بزاف وبالو ميمشيش للتحرش والاحتكاك لي كيكون :مزيان
خرج للكاراج وهي بقات متكية كتاكل فالشبس وكتتفرج فمسلسلها المفضل "الازهار الحزينة"
مع دخل للكراج لقا المتعلم ديالو كيتسناه: المعلم جواد
جواد: اشنو كاين
شاف جهة البيرو ديالو كان صغير فيه مكتب جامع بيه الوراق ديالو والحسابات ديال الغاراج كان واحد راجل جالس: هاد سيد كيسول عليك
جواد: السلام عليكم
وقف دغيا وصافحو بيدو: انا حسن وعندي 32 عام من ايطاليا
جواد معندوش مع كترة الكلام: كاين منقضيو اسي حسن
حسن: صراحة جيت قاصدك بغيت بنت ناس من عندكم للمعقول بغيت نجي ندوي معاك وسيمانة جايا نجيب الواليدين
جواد: مرحبا بيك عنددنا غذا ا سي حسن
وغير خرج تبعو بعينو حتى غبر بطوموبيلتو وصونا على مو: مي شي ناس جايين يخطبو
دّا زهرة غطير بلفرحة: شكون فالبنات
جواد: معرفتش قولي ليا شنو ناقص فالدار راه جاي للغذا
دّا زهرة: جيب شي تلاتة دجاجات زايدين و زوج كيلو ديال اللحم باش نكملو وزيد حتى من ديسير
قطع معاها خلاها كتزغرت وحدة فبناتها غتمشي حيت سعدهم طايح مليكة الكبيرة زهرها عمرو جاب ليها شي ولد الناس وعمر الخطاب مادقو بابها وهي على ابواب الربعين كبر من جواد و معقدها هادشي فحياتها اما الكبيرة على اعتاب التلاتين تزوجات وطلقات بولد حيت راجلها مكان لا خدام لاردام وكان من شماايت ديال القمر الفلوس لي كتجيب كبيرة من دار مها يضربها ويخدهم للقمر حتى لنهار لي عرض عليه جواد لدار ودخلو للكاراج ديال دار وشبع فيه عصا مويان سيفطو ظهرو رطب من كرشوو و سيفطليه الطلاق لدارو و من تما الكبيرة ولات عايشة هي وولدها ايمن تحت جناح خوتها اما يسرى هي الصغيرة عشرين عام و مضوبلة تلاتة مرات فالباك رجعات باستعطاف وهي الوحيدة فخواتاتها لي خلاوها تقرا و بالصداع والغواتات حيت جواد محاملش خيطي بيطي و محذرها نهار يسمع ولايشوف عليها شي حاجة غينسيها فديك 12 لعام ديال القرايا بالعصا
تجمعو عليها بناتها: مي شكون اشنوو واقع علاش زغاريت
دّا زهرة: سعدكم جاا ا بنات زهرة
مليكة بدات تزغرت: كنت عارفة مغنموتش بلا راجل
الكبيرة كتخنزر فيها: وباش عرفتيه سعدك اختي وماشي سعدنا حناا
دّا زهرة: هنيوني ونوضو عريو على درااعكم وريوه شطارتكم فالكوزينة و نقيو الركاني
ناضو بلا عقزة عليهم كيتناقزو بحالا راكباهم الدودة وكيتساابقو فرحانين :شنو غنديرو ا مي غذا
يسرى: مي واش عرفتيه شكون هو هذا لي جاي يخطب
دّا زهرة: مقاليا والو دابا حتى يجي جواد عاد نعرف وملي مرجعوش وعرض عليه كيبان ليا غيكون فيه الخير ]شافت فكبيرة] داك ولد لحرام ديال خالد راه من نهار شافو محملو من نهار لول جرا عليه ولكن نتي درتي ليا طيارة حتى بديت نسودن ليه ونطلب ونرغب ولا رزق ختك غضيعو عاد بحرا بحرا ما وافق
جواد كان كيتقدا داز عند الدجايجي ومن بعد الجزار فاش كان كيعبر ليه اللحم هضر: الهبرات
الجزار : كي العادة ا سي جواد
وخرج مع الجزار حدا جامع بدا كيختار فالديسير علاما وجد ليه اللحم خذا من كل حاجة كيلو و شرا حتى التمر لي كيتعمر و خدا مشروبات وبدا كيشارجي فالكوفر ديال طوموبيل..
وداز لباتيسري ياخد باش يديرو لغوتي كيكيل فكرواصة و حليوات كريم حتى بانت ليه واحد طارط ديال الحامض لي كتحماق عليها منال: ديريليا من هادي وعزلي واحد زوج بوحدهم
خداهم ودخل للدار لقاهم جالسين على كاسكروط كيشربو اتاي وحاطين قهوة ولمسمن وبغرير مد البلاستيكات للبنات ولكبيرة شافتو عازل بلاستيكة وكدير راسها مكلخة مدات يديها ليها تاخدها حتى رجع يدو ورا ظهرو :غنطلعها لفوق
دّازهرة : شكون هاد ولد ناس اوليدي [ومدات ليه كاس اتاي]جلس بسم الله
جواد: مكنعرفوش وماشي ولد سيكتور قاليا من طاليان
رشيد خوه قفز: مزيان يدي شي وحدة لطاليان تعيش وتعيشنا
جواد تجاوز هضرتو بحال شي ذبانة زننات: هادي هي الهضرة غذا غنشوفو واش لايق ولا يتسيق
و سلت عليه جاكيط ملي شاف البنات كيحطو براد تاني وعيط على احلام بنت رشيد :احلام طلعي هادي لختك منال
دّا زهرة غير قدامو كتبغي تبان مزيانة: قوليها تهبط تشرب اتاي
احلام عزيز عليها جواد حيت كيتهلا فيهم سقاتة والعاب خدات منو بلاستيكة ومشات كتجري طالعة بيها فدروج : طاطا منال
منال :احلام دخلي الباب محلول
احلام: اعطاك عمو جواد هادي [واعطات ليها]
منال فتحاتها قدامها:اجي كولي معايا [واعطاتها معيلقة]
احلام: راه جاب لينا تا حنا
جراتها : اجي تاكلي معايا عاوتاني
احلام فرحات وجلسات كتاكل معاها: كيعطوليك تشري اتاي
منال: ناكلو ونهبطو نشربو اتاي
لبسات عليها عباية ورمات عليها الشال ديالها و مسحات عيينها من لكحل ونقصات شوية من تحميرة العكر لي دايرة وشدات بيد احلام ونزلو:السلام عليكم
جواد كيشوف فلباسها:وعليكم السلام [اعطاها كاسو] كبي اتاي
قربات كتعمر ليه الكاس وهو كيطع وينزل ففصالتها واش باينة واعطاتو ليه :بصحة
دخلات للكوزينة ومليكة كتسمم فيها:جايين فيا الخطاب
الكبيرة: مزال معرفنا واش فيك ولا فيا
يسرى: غير تهناو مافيك مافيها وحدة عندها لولاد مطلقة وتانية لحمها شارف وفاتها لكار لخطااب [كتقلب فعينيها] فيا انااا
منال: الله يفرحكم كاملين غير صبرو ومتتسرعوش
الكبيرة: قالتها لي قالت اه قبل متشوفو
منال: الله يعطيك زواجي
مليكة: شنو بغيتي تقصدي امرات خويا
منال :زعما راجل بحال جواد [كتقولها فوق من خاطرها]راجل
الكبيرة: رااجل وسيد الرجاال لي لمك من هادوك شماايت لايصحاب ليك معارفينش فاش كنتي عارفة الدرب كامل عارف خوتك اش كانو دوزين عليك الدكاكة [حطات يدها فجنبها] ونتي جيتي دوزيها على خويا
ياسمين كتفرج وعاجبها الحال فمنال
منال: وعلاش نتي عايشة حسن مني حتى نتي راه دايزة عليك [غمزاتها وكتهضر بشوية حيت صوتهم كيتسمع من شرجم ديال ضواية للصالون] الدكاكة
غوتات لكبيرة: خوياااااا
رشيد :نعام
اما جواد كاعما ممسوق كيشرب اتاي وكيهضر مع مو على غذا: ميتزوقوش ليا بحال الطعارج ومنشوفش شي زغبة خارجة من تحت الحجاب و الجلالب لاتدخلي ليا شي وحدة ببيجامة
دّا زهرة: لا ا وليدي كون هاني على انا ناقصني عقل ولادين
خواتاتو كانو كيسمعوه: كيفاش جلالب وهاد راجل مغيشوفش فصايلنا
الكبيرة:مو لي غتمشي معاك للحمام [شافت فمنال] مي راه دوختيها غير بفصالتك اما والله لا عتبتيها فدارنا
يسرى: ولي معندو فصالة
ضحكات عليها مليكة حيت هي صغيرة و رقيقة داخلاها المو+ت :ليه الله
الكبيرة:منال سلفينا شي جلابة ولا عباية من دياولك غا يشوفنا بيهم
منال عرفاتهم مكيرجعوش ليها ديما كيتسلفو جلابة عمرها كترجع تلبسها: لبسي ديك لي كنت مسلفاك [يعني لا بالفن]
ومرت اللوس بغيا تخشي راسها: انا عندي شي كسيوات زوينين
يسرى: كاعما باينين عليك
دوشات وعطرات بكاع عطور لي عندها و اعطاتها عكوزتها عطر من بيت سهيلة سرقاتو و جلسات حاطة يدها فوق رجلها حشمانة دخل كيشم ريحتها ريحة مؤلوفة الريحة ديال الزينة ديالو لي كتسلب عقلو وتفكيرو
اليزيد: سهيلة شنو كديري هنا
شعل الضو حيت كان ظلام مبتاسم حتى شاف وجه سليمة: لحاج
اليزيد: سليمة
وقفات وقربات ليه حطات يدها فوق عنقو نازلة مع صدرو و رجعات بعدات رمات عليها البينوار ستان لي لابسة وبدات كدوز يديها على جسمها على صدرها تبجغو وكضرب ففخاضها ومخرجة لسانها :انا ديالك
كانت كتبان ليه فحال شي هبيلة بهادوك الحركات ترمات ليه فوق السداري قرب حى هو على نية انه غيدخل بيها حيت هذا حقها والمراد تا هو باغي ولادو واخا نهار كامل كان كيصلي ويدعي ربي يقدرو يعطي لكل وحدة حقها وميظلمش لمراة تانية بالحب لي كيكنو لسهيلة
تكا عليها وهو يسمعو واحد الغوتة مجهدة فرياض الفوق طلعو كيجريو وسليمة مشات بشوميز لقاو سهيلة طايحة فالدرجة السادس وكتبكي :رجلييي رجليي
و راضية وراها: اش واقع ليك ياك لاباس
سهيلة كتغوت: رجلي كتحرق كتحرقق
شافت فسليمة جايا بشوميز دو نوي باين اش كانو كيديرو تحنى عليها اليزيد كيقلب فرجلها غير كيقيص الشوفية كتغوت ربي لي خلقها : كي وقع ليك
سهيلة: تلوات ليا رجليا
اليزيد كيقيصها بشوية: علاش مكترديش لبال لراسك
حط يدها فوق عنقو هزها مدخلها لبيتها:سليمة جيبي بانضة فاللمجر و جيبو ليا السمن الحر
مع من التقفات و ناس زمان كيعالجو الفديع بالسمن حطها فوق سداري وخدا سمن دهنو فوق رجلها وكيدير مساج وهي كتغوت ربي لي خلقها و كيلوي البانضة و كيزير عليها :واحد ٣ ايام راحة تولي صح من ظالم
سهيلة :بغيت نشرب
مد ليها الكاس:انا نعمر ليك قرعة حدا راسك [مد قرعة لسليمة] جيبي لما
سهيلة:علاش انت فين غادي
شداتو من يدو غتبكي: تا لابغيت نوقف مكاين لي يعاوني
شاف فعينيها عارف فمرضها كتضعاف حيت كتسترجع ذكريات [مها كون كانت معايا مي متخلينيش ومتفوتنيش] وهو ميقدرش على وجعها
اليزيد: غنبات معاك الليلة [هادشي تحت مسامع سليمة]
خرجات سليمة وهو تكى ورا سهيلة وهي كتخفي ابتسامة الانتصار بصعوبة لصقاات زكها معاه وهو عنقها ونعسو
دازو ساعات وسهيلة ناضت للحمام كتتمشى عادي بحالا مواقع والو و مكتشكي حتى من ضر بان ليها ضوء البيت شعل وهي ترجع تزحف وتزيد على رجل وحدة وتنين بحال لمريض :سهيلة علاش مفيقتينيش
وناض هزها بين يديه وحطها فوق سداري :ارتاحي [اعطاها كاس الماء وهبط عند رجليها] دابا باش كتحسي
سهيلة :كيحرقني بزاف
ليزيد: قلت ليك ارتاحي علاش نضتي بوحدك [معصب عليها ]
سهيلة حيدات ليه يديه : خاصني نعول على راسي حيت راجلي ولا مشروك
جمع يدو وحتى حجبانو : مبغيتيش تنساي
تجمعو الدموع فعينها : قصحتيني بزاف [حطات يدها فوق صدرها] نويتها من كلشي الا نت غدرتيني
ضور عليها وجهو: هذاك حقي
سهيلة دمعات: وانا ممنحقيش نعرف كون مقالتهاش ليا خالتي راضية غير حتى دخلها عليا
اليزيد: واش مبغيتيش تشوفي ولادي
سهيلة: غنشوفهم مع مراة اخرى
اليزيد: غيكونو ولادك حتى نتي غيكونو بزاف
سهيلة: واش نت جايب مراة ولا نعجة [تنهدات] الولاد ولاد مهم عمري غنطمع فيهم انا بصح عمري جربت الامومة ولكن عندي قلب ونت بينك وبين الله
اليزيد تعصب: فاش غلطت
سهيلة: انا لي غلطت لي تقت فيك
تقلق منها بزاف وناض باغي يخرج حتى غوتات كتكذب بلي تقصحات ورجع كيجري عندها: سهيلة مالك اش ضارك [هزها لسداري] ميكونش راسك قاصح
سهيلة: سير عند مرتك كتسناك
اليزيد: تا انا دابا راه مع مرتي
بقا كيمسد ليها رجليها الصباح كامل حتى نعسات وفاش فاقت لقاتو باقي حدا رجليها حاط يدو عليهم وناعس معنكش غير حركات رجلها فاق :صباح الخير
سهيلة جات تنوض وقفها: متحركيش عنجيب ليك الفطور تال عندك
ولبس عليه الفوقية لي كيلبس فالرياض حريرية رطبة و مخيطة بجودة عالية فالبيض و مخيطة بالذهيبي دخلات راضية لكوزينة تطفي على الغذا لقاتو هاز بلاطو وكيعمر فعصير الليمون: صباح الخير العريس
اليزيد: كي صبحتي الوليدة
راضية: نت لي كصبحتي لي بايت بعيد على العروسة جديدة
تخطاها هاز لبلاطو: صباحك مبروك الواليدة
سليمة دخلات كتنتف فراسها: واقلة هي العروسة ماشي انا
هاهيا عروستنا الجديدة
منعسوش باش يفيقو الليلة كلها وهما يخبزو فلحلاوي و الملوي ومسمن معمر وخاوي و الصابلي بالاشكال والانواع وكي صبح الحال خرجو كيشريو فحلاوي ديال اللوز وكيعمرو فالتمر نزلات منال تعاونهم ومع كاين جواد مقدروش يحكرو عليها هبطات وتعاونو خملو الصالون ديال الضياف بدلو الطلامط و الخوامي و تا الزبية جمعوها وطلققو وحدة زون منها
جبدو الدجاج واللحم مشرمل من البارح رضوه يطيب فطناجر كباار دارو ٤كيلو لحم و ٥دجاجات غيحطو ٣ لرجال و ٢ يبقاو لعيالات ولوليدات يتغداو من بعد
كل وحدة وشنو كدير منال كانت مقابلة الطياب حيت كانو يديها بنانو كتتقن الدجاج ديال العراسات وياسمين كتزوق الطباسل ددياول الديسير ولحلوى و البنات مكلفين بغسيل الماعن و لمسيح
يسرى: انا عييت من صباح كنغسل غيجي يلقا يديا كاع تقشرو
جواد: منال
مسحات يديها فالطابلية :قابلي الطنجرة انا جايا [قادات الزيف فوق راسها حيت كانت عاقداه ورا راسها حيت صهد ديال البوطة خنقها عنقها كان كيبان غطاتو] هاني جايا
خرجات عندو لسطوان : غطلعي لدارك دابا حتى يخرج السيد وهبطي
منال: ولكن البوطة عليا
جواد: هضرنا ريحتك مبغيتهاش ضور هنا حسك منسمعوش
منال كتحيد فطابليتها: واخا [ضربات بيها الارض وطلعات]
دّا زهرة: علاش منال مشات وخلات لينا الطياب
جواد: انا لي سيفطتها معندها مدير هنا و البراني داخل
دّا زهرة: سيفطهي تلبس نقالها وترجع
جواد: مي مراتي مباغي حد يشوفها واخا تككون لابسة الكفن
سمعو الدقان وحبسو كيطالو عليه لبنات من تقابي دخل فيديه تقدية مدخل السكر والشكلاط وشبوانات ديال برا وكريمات جلسوه فصالون لقا جواد ورشيد و دّا زهرة :مرحبا بسي حسن تفضل دار دارك
حسن: الله يبارك فيك الالة
جواد مخلا حتى وحدة تجي تسربيهم ولا تحط الطبلة هو لي كان كيجيب طباسل وصواني اتاي و خوه رشيد كيعاونو ميخليش خواتاتو يبقاو غاديين جايين و الراجل كيوزن فيهم
رشيد :مرحبا كول بسم الله نشركو الطعام
بداو باتاي ودوازو وهما كيهضرو فخدمة حسن و دّا زهرة مكانتش معاهم غير دارت الصواب ورحبات بيه وهو يحمر فيها جواد باش حتى هي تجمع الوقفة
ومن بعد دخلو طباسل الطاوس لول فيه ٣ دجاجات و التاني فيه اللحم بالبرقوق ومشماش معسل و زادو طبسيل ديال السفة بالقرفة و السكر كلاصي
رشيد: وشكون فلبنات جاي متقصد ا سي حسن
حسن كيتبسم: معرفت لا اسمها ولا فين تسكن طلبتها غير على عنوانها ولا نمرة باها معطاتنيش وقت وانا بغيت غير المعقول و نكمل ديني وجيتكم من الباب
جواد : هذا هو لمضمون فيك
رشيد تحمس : عندنا ٣ ديال البنات [غوت] مي سيفطي لينا سكر كلاصي وشي قرعة ديال لماء
بلعاني باش يدخلو خواتاتو ودخلو هازين قرعة الماء وبلاطو كيسان وتالتة السكر كلاصي حطوه و يسرى هزات عينها فحسن مزال لاخرين بقاو حشمانين ودغيا خرجو وجواد محملش الموقف جاه رشيد فحالا كيعرض عليه فلبنات
رشيد: هادو هما بناتنا [حسن غير كيتبسم] اشمن وحدة فيهم قصدتي
حسن: مبانت ليا تاوحدة فيهم لي فخاطري
جواد بحالا تعصب جاه كيطنز عليه :وشنو فخاطرك
حسن: هادي عينها شرقيين كبار مكيشبهو لحتى وحدة فهادو ومخبية راسها تحت نقاب كحل طويل كيبانو غير عينيها
رشيد مفهم والو وشاف فخوه جواد بدات سخونية كتطلع معاه: كتلبس نقاب
حسن: اه نقاب
جواد كيردد كلامو: عينها شرقيين كبار [غيهز كاس زاج لي قدامو يردخو فوق راسو] فين شفتيها
حسن: كنت كنتقهوا وبانت قدامي دويت معاها معبراتنيش ونعم التربية عرفتو وعرفتو اش تربيو
فلكوزينة كيتصنطو عليهم: كيفاش نقاب ولكن تا وحدة فينا مكديرو من غير
مليكة: مزال مفهمتي المكلخة[ رمات خرقتها من فوق راسها معصبة] جاي يخطب فمنال
يسرى: واش مزوجة وقاطعة رزقنا الله يعطيها مصيبة تغبرها من دنيا
الكبيرة: وشافها فقهوة طوالو ليها رجلين ليوم خويا يحشهم ليها
راضية كتواسي سليمة : الحاج حنين حنين غير عرفي كيف تمسكني عليه حتى نتي بحالها
دخل عليها فيديه البلاطو: هاهوا الفطور جا حتالعندك
منفخة: شكرا غير سير انا تكلف
حطو فوق السرير ومشا للبالكون خدا وردة حمراء من وحطها فوق لبلاطو :باش تفتح ليك الشهية
وبدا كيهز وكيوكلها وهي بحال بنت خمس سنين كتاكل من يدو وكتعاود تحل فمها للقمة ماجية خدا من بعد كؤواصون حيت كتحماق عليها فتحها بموس وتارتيناها بشكلاط و حشوة اللوز و مدها ليها مع كاس الحليب و كيمسح ليها فمها فكل مرة كيخرج الشكلاط ويتطبع جنب فمها : اليزيد بغيت ندوي معاك
كيعطيها الفريز ففمها من ورا مغمسو فشكلاط: هاني معاك
سهيلة: انا تخنقت فدار و تزيرات عليا فلفلول كان وقتك كامل ديالي دابا كلشي ولا مشروك بغيت حتى انا نعمر وقتي باش منبقاش نفكر بزاف
اليزيد: بقاي تمشي لاصال ديري صبور و السباحة مخلصين لابونمون فابور مكتمشيش
سهيلة تأفأفات: ماشي هادشي لي بغيت
اليزيد: وشنو بغيتب
سهيلة: عندي ديبلوم فالفندقة ديال لباتيسري كي عرفتي وبغيت نخدم
اليزيد: علاش غتخدمي ونت مرتاحة فدارك
سهيلة: وشكون قالك انا مرتاحة [بانفعال وغضب] انا مخنووقة
اليزيد : انا منرضاش تخدمي مع واحد يفتي عليك شنو ديري و يتهز ويتحط عليك
سهيلة :هادشي علاش كنهضر معاك علاش متفتحش ليا باتيسري ديالي بوحدي نكون ديال راسي فيه مواقف عليا حد ندير مبغيت فيه
سكت شوية: انا نفكر ونشوف [باسها من راسها] غنخرج وراجع لك دابا متتحركيش من بلاصتك [وجاوب فتيليفون] الو رضوان واش سلعة رجعات انا جاي..
فالرياض لتحت كانت هاجر كتتغبن على راضية: ماما عاافاك غير هاد العشية بغيت نخرج راك عارفة مابقا ليا والو للجهوي ومخنوقة بغيت نفوج
راضية: سيري شوفي لحاج الى بغا يخليك تخرجي
هاجر: لحاج واش فراسو غير انا وغيدير ليا اونكيط على ساعة ديال لمكانة
راضية: غير لي بغيتي ا تمشي عندو ياتجلسي فدار
هاجر :عرفت شكون غيفك ليا حريرتي
وهي تطلع تجري لبيت سهيلة: ختي سوها زين ديالنا عروستنا الفنة
سهيلة: هاجر شنو بغيتي
هاجر جلسات حداها: مالكي كتتنواي فيا اريليا رجليك ندير ليك مساج
سهيلة: قولي شنو جابك ا الرتيلة [رتيلة لقب حيت هي رقيقة بزااف فيها 45 كيلو وفسيزيام 17لعام]
هاجر: بغيت نخرج مع البنات للمول و بغيتك تطلبي معايا خويا اليزيد يخليني
سهيلة: ميسمعش مني غير سيري شوفيلييك مع خالتي راضية
هاجر: نتي ميبغيش يخسر ليك وكيتيق فيك غير قولي ليه راه كنعرف صاحبتها
سهيلة: وعلاش انا كنعرف صاحبتك بغيتيني نكذب
هاجر: عافاك راك كتعرفيها صاحبتي حليمة بنت العساس ديال الدرب
سهيلة: اشمن درب فدروبة هذا
هاجر: واش حتى نتي غادي ديري ليا اونكيط
سهيلة: واخا ولكن عندك مشي ديري شي مصيبة طيح ليا فوق راسي
هاجر تلاحت كتبوس فيها: لا كوني هانيا غير ضويرة ونرجعو نقدرو نشربو شي عصير فشي قهوة ولا ناكلو شي سناك ونرجعو
سهيلة: ملس يجي قولس ليه غتخرجي قدامي قدامي ونتداخل
هاجر: سيري اسوسوو الله يفرحك بشي وليدات يشبهوك
ابتاسمات ليا سهيلة وغير خرجات هزات تيليفون و رجعات صونات للطبيب لي كان كيهضر معاها ولكن فاش دخلات هاجر قطعات: الو دكتور
- مادام خاصنا نديرو تحاليل دم اخرين راجلك باش نشوفو واش عندو شي نقص فالفيتامين
سهيلة: واخا ادكتور و بالنسبة لتحاليل ديال المرة لي فاتت
- كيفما توقعنا المشكل كانت فالخصوبة عند راجلك
سهيلة: شنو مشكل بالضبط
- خاصكم تاخدو موعد وتجيو باش نهضرو
سهيلة: دكتور واش حاجة كبيرة؟ واش عمرو يقدر يولد؟
- غنديرو كاع لي فجهدنا كتبقا ديما نسب ديال النجاح والفشل
قطع معاهاباش تاخد رونديفو مع سكريتاريا وهي خايفة من المستقبل وخايفة من ردة فعل اليزيد كتخاف من قهرو عارفاه حساس فموضوع الانجاب و كيحط رجولتو فهاد الموضوع والى عرف راسو مكيولدش غيتهرس بزاف
سهيلة لبسات وتقادات وهابطة مع دروج : خالتي راضية واش اليزيد فالدار
راضية: لحاج راه فالصالون مع سليمة
سهيلة باستها من راسها: خالتي راه واخا تغضبي عليا غتبقاي عزيزة عندي وكنشوف فيك المرحومة مي حيت نتي لي حنيتس عليا من وراها مشكلتي ماشي معاك مشكلتي مع اليزيد ماشي حيت تزوج عليا ولكن حيت غدرني ومعلمنيش
راضية عنقاتها: نتي عارفة بلاصتك بحال ديال هاجر [غرغرو عينيها] ولكن بغست نشوف وليدات ولدي معرفتش اجلي امتى
سهيلة: الله يطول ليك فالعمر حتى تفرحي بيهم
ودخلات معاها للصالون لي مكانتش فيه غير سليمة ولكن حتى هاجر : الحاج بغيت نخرج عنديغرض نقضيه
اليزيد: شمن غرض نوصلك
سهيلة: لا والو باس غير غنمشي نشوف منال عيانة شوية
هاجر نقزات من وسط الكلام: حتى انا بغيت نخرج
اليزيد: مبغيتيش تقراي اش غديري فزنقة
هاجر: عافاك الحاج غنمشي انا وصاحبتي نراجعو شوية وتشرح ليا شنو مفاهماش
اليزيد: هادي 40 الف ديال سوايع كاملة مقداتش فيك ياك دايرة كاع المواد شنو مزال غتشرح ليك
سهيلة: خليها تفوج شوية الى حفظات مع البنات ماشي هي لاحفظات بوحدها كيشجعو بعضياتهم
اليزيد خشا يدو فجيبو وجبد ضور معاها وهاجر فرحات وكتبوس ليه على يديه : الله يخليك تاج فوق ريوسنا الحاج
اليزيد: فين غتمشي نديك ونجيبك نتي وصاحبتك
سهيلة: خليهم بنات بيناتهم غيحشمو معاك [شافت فهاجر وكتغمز ليها]ياك دغيا ترجعي
هاجر: اه دغيا قبل من المغرب نرجع
اليزيد: متبعديش وشكون هاد صاحبتك
هاجر كتشوف فسهيلة: راه كتعرفها سهيلة كتجي عندي للدار
سهيلة : واليديها الله يعمر ليهم الدار دراوش
حرك راسو ومبقاش هضر خرجات سهسلة وهاجر باقت معاها تا لقات طاكسي صغير عاد شدات تاهيا طاكسي صغيرة : bd Ghandi الله يجازيك بيخير
حطها قدام كنينيك غاندي معروف فالدار لبيضاء ورا شارع قصر البديع بزاف ناس نصحوهم بيه كنينيك مشهور فالتخصيب و علاج العقم وتأخر الانجاب دارو تحاليل و فحص شامل لسهيلة وتلفازة لرحم
دخلات كانت عندها روندييفو لي شدات هاد العشية مع طبيب مختص دخلات وجهها صفر بالتوتر :دكتور اعطيني امل
- اليزيد عندو مشكل ضعف فالحيوات المنوية انتاجها قليل وخاصنا نزيدو نديرو تحاليل ديال الدم باش نزيدو نشوفو واش كاين نقص ففيتامين لي ضرورية فالاخصاب عند الذكور
سهيلة: وشنو سبب
- اليزيد عندو l"orchiépidymite وهو التهاب لي كيكون جراء عملية وبما ان اليزيد معندوش سوابق جراحية اذن غنستثنيو هاد الحالة كتجي من مشكل فلافيسي وهو معندوش هاد الحالة ومن تحاليل البولية و اكتشفنا التهاب فالمسالك البولية وبغيت نسولك واش مكاتجيهش سخانة واش مكتيجيوهش اعراض بحال حساسية فالمنطقة ولا سائل تقيل محيط بالخصيتين
سهيلة: سخانة كتجيه مرة مرة ولكن كيقول من تعب كياخد دوليبران وكيرتاح
- من امتى هادشي كيجيه
سهيلة: مدة طويلة هادي وكل مرة كنقولو يشوف طبيب مكيبغيش كيقولغير العيا
- خاصني نشوفو باش نعرف منو الاعراض يمكن مكانش كيبغي يقول باش كيحس هادي مشكلة اغلب الرجال
سهيلة: دكتور عافاك مبغيتش اليزيد يعرف هادشي
- ولكن هادو من اساسيات المهنة منقدرش نخبي على مريضي
سهيلة: دكتورراجلي حساس فهاد الموضوع بزاف بغيت حتى نعرفو الحلول ونلقو العلاج عاد ندسر خطوة ونصارحو
- فحالة اليزيد العلاج كيكون غير بالادوية بدون اي تدخل جراحي كياخد اونتيبيوتيك على حسب نوع الالتهاب بالضبط غيخصنا ناخدو عينة حتى من ظهرو
سهيلة: وغيكون امل ؟
- كاين نسبة نجاح 65% واذا منجحش كاينين وسائل اخرى فحال التلقيح...
سهيلة: دكتور راجلي مخاص يعرف والو [بغات تلعب على مشاعرو وكتكذب] كان كيتعالج عند طب نفساني عندو اكتئاب حاد بسبب مشكل الانجاب وعندو افكار انتحارية حيت مكيشوفش راسو راجل بلا القدرة على الانجاب
الطبيب تعاطف: ولكن ضروري خاص يعرف من حقو
سهيلة: غير ندوي مع طبيبو النفساني نستاشرو ونعرف كيف نتعامل معاه ضروري مغنعلمو بالحقيقة [وقفات] دكتور شكرا بزاف على مجهوداتكم حنا كنتيقو فيك
يتبع..
التعليقات
لا توجد تعليقات بعد، كن أول من يعلق.