محتوى القصة
نزلات بجرا من دروج تتبسم تحت منها لقات صفية طالعة تبسمت ليها بخجل طبطبت ليها على كتفها و فرحتها بيها مالها مثيل .. خرجات و مشات لباب كان باقي محلول مصطفى و احمد مزال تيتحتو طلعات بالجرا لقات بشرى حيدت جلابتها و دخلات ترد العشاء .. دخلت عليها كوزينة و عنقاتها
بشرى""(حاوطتها بيديها باست على راسها) الله يكمل على بنيتي بالخير ..
امل"" اميين الحبيبة .. مابقتيش مقلقة مع بابا
على ذكر اسمو طلع تيحنحن سد الباب شافت في بشرى و تبسمت جراتها من يديها خرجتها لمرح فين جلس
امل"" و بابا و الزين ديالي .. اتبقاو مخاصمين
مصطفى"" (شاف فيها و عاود شاف تلفازة ) مامخاصم حد
بشرى"" باين (قلبات دورة باغة ترجع و شدات امل و رجعتها جلستها حداه ) اش تديري ابنتي انا لي درتها لراسي
امل"" انا نخليكم بزوج هضرو ( باست باباها من حنكو ) لين لين ابابا الحنين عفاااك
تبسمت و مشات دخلات لبيت و سدت عليها و مشات بجرا لبين حوايجها جبدات الخاتم دارتو تتبسم و تضحك الفرحة تخرج من عيينيها بدلت عليها بقات بالبيجامة و مشات تلاحت فوق ناموسية على كرشها شدات تلفون لقات ميساج من عند عاليا ..
__ و الحب ديالي زين العالم
ردت— اش كاين شنو هاد الحب
عاليا— شديت كونجي
امل__ هههه من عند راجلك
عاليا— جرا عليا من الخدمة مابقاش بغاني نخدم قالي رتاحي تالعرس
امل— مزيان حبي امتى العقد
عاليا— قريب وليني نتوما باينن غاتسبقونا ههههه
بقات شادة فيها و تضحك عليها و على حشمتها لي كانت مبينة بزاايد و داتها كي كانت تترعد حتى شافت ميساج من خلال تصويرتو بانت ضحكتها دخلات ليه فاتحة عينيها بصدمة و الزربة لي دار ليها
__قولي لباباك يوجد ليا غدا الوراق العقد
بقات تتقرا و تعاود بالصدمة حتى جاوبت
— مزروب رتاح بعدا و نتا جرحك باقي خضر
بقات بعينيها معاه تيكتب و تحولت عينيها لخاتم تتبسم تاسمعت ميساج وصلها تاني نزلت عينيها
__ مانگدتش نزيد نتعطل ..بغيت نشدك بين يدي باش مايكتروش ليا شوفة فيك
بقات غا تتشوف و تضحك على هاد مخلوق لي بلاها بيه الله
امل— خديتي دوا شراف
شراف__ عاد كليت وطلعت في حالي نعس
امل__ واخة تصبح على خير رتاح رتاح
شراف— راحتي تنشوفها معاك
تبسمت تتلعب برجليها بالفرحة على اخر ميساج منو بقات مدة و هي ماعرفت ماتكتب حدها صيفطت ليه قليب
❤️
و حطات تلفون و ناضت خرجات لقاتهم تيهضرو بحالا ماكنوش مقلقين ضحكت عليهم و مشات كملت العشاء وجدت غي ليباط تعشاو وهضرت مع مصطفى باش يجمع ليها وراق ديالها و مشاو ينعسو يرتاحو .. بعد هاد العناء ديال يومين و هي ماحطت راسها على مخدة كانت مغاااايرة تماما .. تحسبت على حبيبها تحسبت على اول راجل سلب ليها العقل و القلب .. شافت تلفون مالقات منو تاميساج عرفاتو نعس غمضت عينيها تاهي تتسنى النعاس يزورها.......
اول مافاقت صباح بانت ابتسامة واااضحة وضوح .. حلات عينيها و صححت مزيان و مشات توضات صلات صلاتها و لبست عليها كسوة مبردة عريضة دارت ايكخو ملمع شفاه و مسكرا و خرجات لقات مصطفى حاط حالة مدنية فوق طبلة حشمت وجهها تزنك صبحت عليه و جلست جنبها عاد خرجت بشرى بالحرشة .. فطرو و هي ماقدتش تجبد موضوع حشمت تا ماكلة وحلت ليها في حلق .. ناضت هزات طريف حريشة في يديها و خرجات .. متوجهة للفارماسي .. بوجه بشوش لي تلاقاتو تيقولها على سلامتك انها تهنات من حسو .. دخلات فرماسي صبحت على لبنات لي لقاتهم جاو و سبقوها .. لبست عليها طابلية ديالها و باشرت في العمل بوجه منور و باين راحة عليه .. حتى خوات دنيا شوية و جلست جبدات تلفونها دوزت ليه الخط .. بقى تيصوني تاقطع و عاودو صونات عاد جاوب بصوتو تخين خلاها تحمار و تزراق
شراف"" ( كان تيحاول يجلس )صباح زين هدا
امل"" كي صبحتي شوية
شراف"" (ريح و تكى براسو على الحيط ) شوية الحمد لله .. عطاتني الحريق شوية من واحد جنب
امل""(بخوف ) علاش حيدتي لصقة لي داير ؟
شراف"" (بهدوء ) لا غي شوية صداع ماتشطنيش
امل"" باين تحركتي في نعاسك ماسالش الدم ؟
شراف""(بتقالة ) ريحي بالك تاتسالي و دوزي شوفيها
امل"" واخة مع وقت الغدا ندوز عندك نيت ايخصها تعقم .. مهم بسلامة دابة
قطعت عليه بلاما تسنى جوابو عارفاه يقدر يمرگها و يفوتها ليهه ناضت كملت خدمتها .. دازو دوك سويعات تاوصل وقت الغدا .. خدات معاها دوك معدات .. لي مولفين يخرجوهم من فارماسي بطلب من الطبيب اي شخص من الحومة كان محتاج مساعدة تيخرجهم .. هزات داكشي في يديها و خرجات مخلية نوبة لي وحدة من لبنات .. تمشات قاصدة الدار تاكتلمح البوليس وقفو قدام الباب الدار ديال منير .. خرجو دغيا من طوموبيلتهم و ناس تجمعت بحالا دارو. ليهم صفارة .. وقفت تتأكد من كلام شراف و سهيلة ... حتى بالفعل مخرجينو بالمينوط منزل راسو .. بقات تتشوف تا بانو ليه داوه و مشات مكملة طريقها .. وصلت لدار طلعات حطات ليها بشرى تغدا و جلست جنبها
امل"" منير تشد .. شفتي ربي عمرو يضيع المظلوم ..
بشرى"" لي زرع شي حاجة تيحصدها ابنتي ضيع لراجل سنين من حياتو
امل"" ويييه الغدر الصحاب صعييب بزاف والله
بقاو من و منك بالهضرة و الكلام تا كملت غداها و ناضت غسلت فمها و خرجت بعد ماعلمت بشرى انها غادوز عندهم على ود التعقيم.. وصلت قدام الباب و صونات .. بقات تتسنى شوية تالاحت ليها صفية الساروت فتحات الباب و طلعات و قلبها سابقها .. دخلات ساعة مالقاتوش في بلاصة فين كان تاخرجت صفية من الكوزينة
صفية"" ابنتي كي درتي شوية
امل""(قربت سلمت عليها) بيخير اخالتي نتي شوية رتاحيتي
صفية"" نحمد الله ابنيتي ..( طبطبت ليها على دراعها بحنية) فضل تيرجع ليك نتي بعد الله سبحانه.. خلتيني نفرح بولدي و نشوفو مكمل طريقو لي سدوها ليه ولاد الحرام
امل""(تبسمت ) ماتخافيش حقو تيرجع شوية بشوية .. منير يلا داوه بوليس .. وهاد ساعة راه هو مذنب و شراف غاترجع ليه برائتو
صفية""(تبسمت و دمعتها نزلت) الحمد لله ياربي على خبار .. قدامك قدام الربح ابنيتي .. سيري راه لفوق ابنتي يلا نزلت من عندو خليتو تيحاول يتمشى ضراتو
حركت براسها و قلبت دورتها و تمات طالعة لطابق الفوقي .. الطابق لي غادي يجمعها معاه و يعيشو فيه حياتهم الزوجية .. علات بعينيها تيبان ليها لباب محلول غا شوية .. مدات يديها دفعات الباب شوية و دخلات براسها ..نطقت بشوية
امل"" شراف .. ش
مقاطعها بوجهو لي قريب لعنقها يديه بشوية تحطت على دراعها دفع لباب برجليه مخلي نفسو تضرب عليه غمضات عينها بجههد بقربو تتحس بداتو سخووونة قريبة ليها حرقتها ونفسو اكتر وداك تماس من شفايفو بحالا ضربها ضو ..
شراف""(بصوت شااابع ختورية و نخوة ) ڜش بشوية عليك الخوافة ...
كتحس بركابي تيخويو بيها ودقات قلبها تيضربو بجههد اكيد يكون تيسمعهم وسط مخو .. حطات يديها على يديه و بدات تحرك بشوية باش يرخف عليها .. لكن عاد مزاد زير و زاد بيها بخطواتو تقيلة و هي بداك القرب و نطق في ادنيها
شراف""(بصوت تقيل ) غا ريحي
امل"" (تالفة بيه و يديه تتحرك ليه تا تكاها على الحيط و هي مزال بضهرها عليه) خ خاصني نشوف جرحة
شراف""(زير عليها نطق في ادنيها) غا تبثي مالك
لهي بغات تبث كمل ليها لباهية مخلياه تيتبسم و براحتو حتى رخف ودورها لعندو مخنزرة فيه تاشافتو تيتبسم بشووية بتقالة .. وسط ملامحه و هي قريبة ليها .. بدات تلف تاني نطق بشوية
امل"" واش حماقيتي نتا ولا شنو انا تيسحب لي لقاك لتحت لاش مانزلتيش
شراف""(هز يديه و شد دقنها بصباعو و طلعو تالقدام عينيه و نزل بشواربو باس على جنب فمها يمينا و دار يسارا نطق متاااقل ) حمق بيك
حس بيديها تحطت صدرو و هي تقفز كان طايب و سخون و زادها بالكروزية لي مكروز زاد تلفها مزيااان نطقت بشوية
امل"" شراف طلقني عفاك من بسالة ديالك عيقتي
شراف""(تبسم و نطق متاقل حروفو ) ماجيتش و سميتك خوافة ..( قرب معوج براسو و نطق) غا رتاحي(غمز ليها بمكر) ماندير ليك والو ..
امل""( ضرباتو لرجليه بجهد و وجها ولا حمرر ) حشومة عليك مالك ماعندك فرانات مالك .. ويلي ويلي
شراف""(تيلعب في دقنها بشوييية بصباعو و عينيه ترخات بيها نطق) حيث تتلفي ليا المخ ..(نزل بعينيه لشواربها) كولشي فيك مقود و كيطلع ليا مورال ديال
مخلاتوش يكملها تابدات تتجار معاه مخلياه تيتبسم محمقاه بهاد حشمة و عصبية و الخوف جاتو حلوة بزاف زاد بيها شوية و نطق بصوتو تخين
شراف"" كاين شي ديار اصلا وانا في هاد حالة
طلق منها و مشى البيت شاد على كرشو و هي مخلياها غاتموت غا بالحشمة والخلعة و الدهشة و هي تابعة خطواتو وسط قاع البيت .. لي يكون بيتها و عشها هي و ياه .. البيت هااادي و متول غالب عليه اللون الابيض و الگري شافتو تيجلس بصعوبة قربت شدات عليه و عاوناتو تمدد و مشات جابت ديك العلبة ديال اسعافات لي طاحت من يديها بالخلعة و عاود دخلات لقاتو كارز على بين عينيه
امل""( بخوف جلست جنبو )عطاتك الحريق؟؟
شراف"" شوية ( رجع دار يد تحت راسو و يد مشات لشعرها شد خصللات ) كولشي يفوت
تلفها ديال بصح كون تزيد معاه شوية تعطيه راسها بكترة تلفة لي مركب فيها شافت فيه و نطقت
امل"" غادي تقصح شوية تصبر اشراف
بقى يعينيه معاها و هي حايرة غا مع شعرها حتى شدو بيديه الصلبة و بان عنقها بالكامل بقى تيشوف و يزيد يتمعن بجمالها هادئ المريح على العين .. فيقاتو من تلفة بيها
امل"" حاول شوية على راسك .. تورمت من جنب اشراف.. ( شافت فيه و نطقت هازة حاجبها عليه) خديتي دوا صباح
شراف""(حرك براسو متاااقل و عينيه مرخيييية فيها نطق بشوية) لا نسيتو
خنزرت فيه و ساطت بجههد و رجعت تتكمل تعقيم مزيان .. و قادت ليه فاصمة و دارت لصقة على جرحو و شافت فيه
امل"" بغيتي تخرج عليها تاني و تعاود تخيط لحمك ..( ناضت ) فين هو الدوا
غادي بعينيه معاها بشكل مرخوييييي بزااف و ابتسماتو متقلة فيها نعت بعينيه للمجر و نطق بهدوء
شراف"" تم
خنزرت فيه تاني و مشات تحنات قفازية حلات مجر و جات في عينيها بواط كبيرة شوية بالكحل عاودت شافت فيه مصدومة سرطت ريقها و عاودت ضارت لعندو نطقت بشوية
امل"" ماكينش هنا
شراف""(بصوت فايت الختورية) شنو تم
امل"" ماشي دوا ا شراف ( قربت يديها و هزاتها بين يديها و نعتت بعينيها) ها شنو كاين
شراف"" (تبسم بجنب و عينيه تمشي و تجي مع ملامحها و نطق ) و حلي الزمر شوفي اش فيها ..
جاتها ضحكة كحزت تكات بدراعها على السرير و هي مزال نفس الجلسة شافت فيه و بقات تضحك بصوتها رقيق ..و هو مرخوي عينيه فيها بشكل مطووول تاسمعها نطقت في عز ضحكتها
امل"" واش هاكة تيهضرو ناس في بحال هاد امور اشراف
حبست ضحكتها و تحنات بعينيها تاني مع البواط حلاتها و بانت لمعة في عينيها و هي كتشوف اسمها مكتوب وسط سنيسلة ذهبية رقيقة و خفيفة خداتها بين صبيعاتها ..شافت فيه و زادت وسعت ابتسامتها عضت على شفايفها بخفة و نطقت بصوت قليل
امل"" زويينة فنة
عجباتو ردة فعل ديالها و ديك لمعة لي شاف فيها تكعد شوية و جا قريب منها وقرب بيديه شد عليها هي وسنسلتها و باس عليها مخلي عينيها ايطيحو معاه محمقها بكل حالاتو لكن هاد القرب تيسالي معاها حست بيه شد عليها و حيدها من وسط صباعها و حرك براسو باش تدور حركت حاجبها حابسة ضحكتها
امل"" و مانقدتش نشدها تاضرب بيا كاغيط
شراف""( صغر عينيه و في رمشة عين جابها جالسة بين رجليه و عاطياه بالضهر دور شعرها قدامها نطق متقل ) نضرب عليك الكاغيط غايبقى شي كادويات .؟
امل""( خبطاتو لركبتو على عقلو و نطقت) واااربي على ماسخ
شراف""( تبسم و ركبها ليها نزل بشفايفو باس على شعرها و نطق ) ݣلت لي كاين
امل""( دارت لعندو و شدت عليها تتبسم نطقت ) شكرا عجباتني بزاف .. بالحق امتى خديتيها؟؟
شراف""( مراقب فرحتها و نطق بصوت تقيل) مشية المحمدية
امل"" ( تبسمت بفرحة) شكراا بزااف زويننة
شراف""(نطق بتقالة ) قبلي عليا راني زرݣ في هادشي
امل'"" هههه بالعكس زوينة .. و غير من جبتيها و مانستينيش هادي بحد داتها كادو
شراف"" (بقى تيشووووف مطول على ملامحها ونطق بصوت تخين) تا تكوني تنساي بعدا
امل"" (وجها تزنك) ك كيفاش زعمة
شراف""" دخلتي لمخي بداك هروب والحشمة ديالك بزز عليا وليت طايب غير تجي عيني في عينيك
امل""(ضحكت) هههه دابة عجباتك حشمة لي فيا ياك
شراف"" (تبسم و نعت براسو ) نوضي اختي سيري لخدمتك عاارفة فمي كي دااير لازدت كلام معاك نولي معاك فشي لعبة
امل""(هزات عينيها بالعرض البطيئ ) اوااعدي .. قول غيي شكرا
شراف""(تبسم متااااقل و نطق بصوت تخين ) من تجي لهنا بمرة اتسمعيها
جمعت وقفتها مخنزرة تاني عارفة عقلو مشات تتخبط هزات ديك علبة اسعافات و تا تمات غادية و عاودت رجعت شافت في مرايا على عنقها و تمات غادية تاغتحل لباب و شافت فيه متبسمة
امل""( نطقت بحلونة) شكرا المهيب ديالي
حلت لباب تمشي تاحست بيديه تسللات مع يديها ودورها بشوووية تتسرط في ريقها هزات عينيها لعينيه و هي مرخوية فيها .. نزل براسو لعندها شوية وجاب يديها لفمو باس على خاتم لي مزين صبعها تبسم بجنب و نطق بختورية تتفيض
شراف"" سمحي ليا على طلبك من باك و في وسط دارنا بديك طريقة .. بغيت ديك الفاتحة تفتحها علينا ݣدام الواليدين .. باقي غادي نجي للداركم و نكبر بيك .. تكبيرة لي تستاهلي .. ݣدام لعباد لي عارفك و عارفني
ماقدرتش تنطق سوى عينيها لي تتمشي و تجي من هنا لهنا حايرة و تالفة بين عينيه و ملامحه رجولية و حروشيتها لي واضحة ليها بين حروفو و شوفاتو جرت يديها بشويية تبسمت مخلية ابتسامتو تبان شوية بشوية حتى مشات من بين يديه و عينيه تابعاها خرجات من الباب ....
غي سدات الباب عليها و قصدت الدروج تتضحك و تبسم و قلبها يرف و يزيد ...مخلياه هو عاض على فمو يجهههد عليها و على تصرفتها لي ولات ادمان عنده .. رجع جلس فوق سرير جبد كارو شعلو و تيبخ في ريتو ..
هي نزلات لتحت و بانت ليها صفية في كوزينة طلات عليها
امل"" خالتي خليتك على خير
صفية"" جلسي تغداي ابنتي؟
امل"" مغدية والله غي بصحة.. و هضري مع ولدك اخالتي يرد بالو راه والو معكس
صفية"" قصوحية راس كاع جامعها .. شوفي معاه نتي يسمع ليك
امل""( تبسمت ) يلا بسلامة دابة نعاود نهضر معاه
توادعت معاها و كملت طريقها خرجات و قصدات لفارماسي .. دخلات لقات ليلى يلا دخلات مراقبة علبة اسعافات
ليلى"" كنتي عند شراف يمكن
امل""( شافت فيها و حركت راسها) اه مشيت عقمت ليه الجرح
ليلى"" (بطريقة مستفزة متبسمة)و شكون قالها ليك هو ؟؟.. هي بصح مصاحبة معاه ؟؟
امل""(محملت طريقتها في الكلام شافت فيها و نطقت) انا وشراف ماشي صحاب .. (وراتها الخاتم ) فاتحتنا تقرات احبيبة ديالي..
نطقت كلامها و مشات دات ديك علبة اسعافات لبلاصتها مخلياها غا تتشوف و وجهها رجع حمر و بينت غيرتها بلمزيان .. تارجعت امل لبلاصتها و باشرت في خدمتها و عقلها و عينيها شرحو ليها كولشي لكن هي ماحكرتش .. حتى خوات دنيا و دخل رضى في يديه شي دوايات ونطقات تاني
ليلى"" دكتور بارك لالة امل تخطبت
رضى""(شاف فيها بالخف مستغرب و نطق) بصح مبرووك
امل" الله يبارك فيك ادكتور
تبسم و حرك براسو و دخل في حالو و عاودت قربت ليلى لعندها و نطقت بلكنة مسمومة ..
ليلى"" ياختي عطيني شوية من زهرك .. رضى شحال تبعك تكوني مرتو ثانية.. و دابة المهيب ديال الدرب خديتيه ..( ضحكت ) اش خليتي لينا ..؟
امل""( شافت فيها بهدوء و نطقت) لي في رزقك غاتاخديه .. رزقي احبيبتي هو لي تيجيني ماتنقلبش عليه ...
ليلى""(تبسم و عينيها مبيينة غيرتها) مزيان ازين .. خديتي زين العزارة فحولة و رجلة .. بصحتك بيه
امل"" الله يبارك فيك ازين ( تبسمت و مشات تتقاد دوا نطقت تحت منها معيباها ) زين العرازة .. و بصحتي بيه
غيرتها بكلامها ماحملتها ماقبلتها كيفاش دوات و كيفاش بينت انها ماعجبهاش الحال بالمرة .. ماعودات جبدت الموضوع و هي حاولت ماتسوقش ليها .. كملت سويعاتها و خرجت بقات اخيرة سدت فارماسي و زادت قصدت الجارة تاخد من عندها قريشلات منسمين .. بالفعل خداتهم و نزلات براسها تتقاد في ميكة بصباعها تاوقفت طوموبيل حدا رجليها قفزتها تا رجعت بلور شادة على قلبها .. صغرت عينيها من شافت لباب تحل و نزل منها بتقوولية حلات عينيها فيه و قربت ليه عاقدة حاجبها
امل"" اوااعدي لاش خارج .. بغيتي تخرج على راسك .. جرحك باقي خضر ا شراف بغيتيه يتورم تاني
شراف"""(شاف في عثمان و حرك براسو باش يمشي و شد يديها و جرها شوية بعدها من الطريق و نطق بتقالة ) شش بشوية عليك
امل"" كيفاش بشوية تاني .. مالك العكس كاع جمعتيه مالك لاش خارج
شراف""(صغر عينيه و نطق بهدوء ) تسوطيني ؟؟
امل"" حيث تدير لي في راسك لاش خارج و نتا مزال عيان ( طلعت فيه و نزلت بسروال سورفيط كحل و تيشورط بيضة مزيرة عليه و سبرديلة كحلة ) شنو سبب لي مخليك تخرج ماتسناش
شراف""(عينيه تتمشي وتجي على ملامحها بانت ابتسامة شبه مخفية على شفايفو نطقت بصوت تقيل ) البوليس
امل""(حطت ييديها على فمها و عينيها خرجو ) اويليي لاااش ياكما ديكلارا بيك على عصب لي قطعتي ليه ناااري
شراف""(شد دراعها و جرها شوية منزل براسو ) شش سكتي شوية نتي خلعة تتجري في دمك
امل"" وشنو مشيتي دير عندهم ( تفكرت ) اااايه نسيت ماقلت ليك منير داوه لبوليس قبيلة كنت نقولها ليك .. (عوجت بفمها ) وتلفتيني
شراف""(تبسم حرك براسو و نطق متقل ) عيطو ليا عليه هو نيت ..
امل"" ايوا اشنو قالو ليك
شراف"" يكملو اجراءات و تحقيقات معاه .. مهم دلائل قاااضية الغرض
امل""(تبسمت ) الحمد لله واخة ديك خيتي ماتنحملهاش ويني دارت معاك زوين ..(هزت بكتافها ) ماعليش
شراف""(تبسم بتقااالة عينيه مرخية فيها ) مزيانة نتي ؟
امل""(تبسمت) بيخير بيخير
شراف""عاد خرجتي دابة ؟
امل" اه دزت خديت(وراتو ميكة) هادو كيعجبوني مع قهيوة معطرة
شراف""(عوج براسو ليها مع كاسكيط ) هي نديرهم في بالي
امل""(تبسمت نزلت عينيها مشتتة شوفتها من على عينيه و كيفاش شاف فيها نطقت بخجل ) ش شنو هوما
شراف""(تبسم بتقالة على على ملامحها و هي حشمانة منو و نطق بصوت خااتر ) ندير في بالي لي تعشقي فيه..( نزل شوية لودنيها خفض صوتو ) كي عاشقك نتي
نزلت عينيها بالخف و زادو حنيكات توردو كتر ما هوما موردين نطقت بشوية
امل"" حشومة يسمعك شي حد
شراف""(هز بحواجبو ونعت براسو ) دركي داركم ..
امل"" و نتا اش تبقى دير في زنقة
شراف""(جبد كارو غايشعلو و حيداتو ليه جمع بحواجبو نطق ) هانا على الزعامة تاني
امل"" (لاحتو في واحد كارطونة و شافت فيه) ايوا حاجة لي تضرك نحيدها ليك ..(غلبت خجل تبسمت قالبة عينيها) ياك نولي مرتك
شراف""(عسل عينيه فيها معوج براسو .. بانت ابتسامة فوق واحد عضة جانبية على شفاه تحتية نطق متااقل ) زيدي قوديها على ݣلبي
امل"(حطت يدها على فمها ) اوعدي جمع فمك شوية ( دارت باش تزيد و نطقت) وزيد لداركم تاتبرا بعدا
شراف"" (حرك براسو و شد على مكان ضربة و رمى خطوة بجنبها) نزيد
تبسمت تتمشى بشوية و عينيها مع يديه و كسدة جسمو و كي تتبان هي معاه .. واحد احساس غادي يسطيها و هي جنبو و نفس الطريق .. هزات عينيها شافتو وقف شوية
امل"" (بخوف )تزيرت عليك ا شراف ؟؟
شراف""(حرك براسو) خياطة بدات تكرم تتقرص
امل"" (شدات على دراعو بخوف مخلية عينيها مع جرح ويديه ) ايه غي صبر غادي تقرص بزايد
شراف""(نزل بعينيه معاها و نطق ) ترجعي تدواي ؟؟
امل""(طلعات عينيها فيه و بعدت ميقة فيه) على زين كلامك و فعايلك ..
شراف""(تبسم و زاد بخطواتو) نتي تتخرجي ملتي على طوعي ..
امل"" لا خويا انا وياك مازال مادرنا والو يلا الفاتحة بيناتنا
شراف"" شنو دار باك جاب الوراق ؟؟
امل"" ماعرفت مزال ماشفتوش ..(نزلت عينيها متلفاهم بخجل) تانوصل و نرد عليك
شراف""(بصوت تقيل ) غدا ندفعهم .. باش تمشي مع الواليدة و عاليا.. تاخدي لي يخصك
امل""(حكت جنب ادنيها بيديها تترعد) ان شاءالله
شراف"" الخواتم بعد غدا؟؟
امل"" (بصوت حشماااان ) لي بغيتي .. ولكن نتا عيان لا
شراف"" بعد غدا نمشيو .. نمشيو ديريكت عند السيد تنعرفو ..
امل""(حركت راسها ) واخة لي بان ليك
شراف""(حبس بعد ماوصل للقدام دار شاف فيها و نطق بصوت تقييل ) ديري بحساب نتعطلو شوية .. بزاف الكلام باقي مادوينا فيه ..(شافها حركت راسها ورجع نطق ) يلا جيتك زربت في هادشي .. مابغيش نخيط انا وياك زناقي .. العقد يجمعنا ديك ساعة مايبقى حرج ليك ولا ليا ..نتلاݣاو گولي لي عندك و نگول لي عندي
امل""(تبسمت ) فهمتك .. معاياش؟
شراف"" (بصوت تخين ) باش ماكان نعلمك .. و الخروج غدا تجي الواليدة عندكم و تعلمكم .. لي تبغيها و لي عاشقاها خوديها
امل""(شافت فيه متبسمة و نطقت ) ربي يخليك
شراف""(تبسم على ابتسامتها بتقالة و نطق بصوت منخفض منزل براسو لعندها ) حبيبي!!!!
دورت براسها مدرقة بيديها على عينيها بحشمة و نطقت و هي عطياه بكفاها
امل"" تبقى شادها عليا.. غي خرجات ليا وصافي
شراف""( مراقب خجلها و نطق بهدوء ) شنو نعاود نتضرب باش نسمعها
امل""( دارت بزربة لعندو ناطقة بخفة ) الله ينجيك ليا
تبسم بشكل تقييييييل مخلي عينيه يتعسلوو بشكلها و هي تالفة يلا ينطق تا نزلت عينيها و مشات بزربة قصدات لباب فاتحاه و دخلت مخلياه تيحك على لحيته مدرق بيديه ابتسامتو .. حل الباب دارهم و دخل تاهو طلع بشوية مراعي للجرح طلع للطابق لفين كاينن الواليدين رمى السلام لمو و باه و عثمان تيتفرج في الماتش و دخل تجبد على سداري
احمد"" هي صافي اولدي مابقى ليه خروج
شراف"" هاد ساعة غادي في الغريق
صفية"" دعوة المظلوم اولدي توصل توصل
عثمان"" ويني صراحة سهيلة دارت معاك بلان مزيان
صفية"" (عيبت فيه ) يشويني فيك نتا و ياها
احمد"" خلاص عليا .. كل يتخلص على فعالو..(ضرب على ركبة شراف و نطق ) كبري بيه و بمرتو و العرس المخير يتدار ليه في الحومة
شراف"" الله يكبر بيك الواليد(شاف في صفية) غدا الواليدة تمشيو تاخدو لي يخصها ..
صفية"" الخواتم اولدي ؟
شراف"" نمشي انا وياها
عاليا""( مخرجة صينية اتاي ) كون هاني اخويا .. الدفوع المخير يوصلها .. (خبطت ليه على كتفو )طلع غا البينگة
شراف""(شاف فيها متبسم بجنب ونطق ) ماتقديش من عندك زعمة
عاليا"" ههههه لا خويا فلوسك بحلاوتهم ..
شراف""( تبسم و شاف في صفية ناطق بختورية) لاخر سيمانة ايكون العقد .. راكي عارفة الواليدة .. بلاما نحتاج نوصيك
صفية""(تبسمت و قربت لعندو باست على كتفو ) بالفرحة عليا نزوجك اوليدي ونفرح بيك و بوليداتك .. ماداز عليك قليل احبيبي
عثمان""(شاف فيها ) انا ماتزوجونيش زعمة مانبقاش فيكم
عاليا"" باراك عليك نتا غا تيك توك .. ياكما تجيبها تدير معاك فيديوات
عثمان"" (تبسم ) و مالها نبقى ندير ليك برانكات معاها تنوضيها معاها .. اللوسة السوسة
عليا""(شيرت عليه بمخدة ) يمسخك الشلاهبي بقى ليك غا زواج
عثمان""(ناض و لاح ليها مخدة ) الله ينجيني اختي بحرا نتهنى منك ..
شراف"" (ناض شاد على جرحو شاف في صفية و نطق) غدا الواليدة علميهم على الوقت ..
صفية"" واخة ان شالله و ريح تعشى اوليدي
شراف"" (تم خارج و نطق بتقالة ) تاطلعو ليا عاليا..
بعد ما طلعت في حالها للدار لقات مصطفى و بشرى تيديرو كسكروط سلمت عليهم و مشات بدلت عليها توضات صلات صلاتها و خرجت سخنت قهيوتها حطات قريشلات في طبيسيل و جلست جنبهم كيتحتتو حتى نطق مصطفى
مصطفى"" وريقاتك ابنتي واجدين .. امتى ايدفع
امل""(ماقداتش تهز شوفة فيه) غدا ابابا قالي
مصطفى"" ايه الله يسهل عليكم ابنتي ..
بشرى"" يعني سيمانة جاية العقد؟؟
مصطفى"" هداك هو الجهد ..
بشرى"" و دوي مع الطبيب ديالك .. ريحي هاد ليامات ابنتي .. باقي تابعنا شلى تقدية و شلى حوايج خاصين
امل""(نطقت بشوية مع بشرى) غدا نهضر معاه .. و غدا اماما نمشيو انا وياك خالتي صفية و عاليا باش ناخدو حوايج الدفوع
بشرى ""( حركت براسها وتبسمت) سعدي ببنتي
جمعت الوقفة من قدامهم بكاسها ماقدت تزيد بالحشمة قدام باها .. دخلات لبيت و سدت عليها بوجها حمممر بالحشمة.. مشات لكرسي قدام مراية و جلست حطات كاسها قدامها .. و بدات تتقاد في ضفارها و ابتسامة مبينة تاتحل لباب عليها .. دخلات بشرى مرقبة لعندها
بشرى"" (حطات يديها على كتافها و باست على راسها ) الزينة عرايس
امل""(تبسمت و باس على يديها) يحفضك ليا ماماتي الحبيبة
بشرى"" و رتاحي ليا ابنتي و عطي لراسك راحة باش تجي منورة في نهارك الحبيبة
امل"" واخة(دارت عندها) بعد غدا اماما نمشيو ناخدو خواتم ..
بشرى""(تبسمت) غانتوما بزوج وو؟
امل"" اه اماما .. غدا غانمشيو باش ناخدو حوايج و. داكشي لي يخص و بعد غدا نمشي انا وياه
بشرى"" ان شاءلله .. عارفاك دوقك خفيف و متوازن .. واخة هكاك نوصيك ابنتي .. عنداك تعمى عينيك على شي حاجة غااالية تاني و تحرجيه .. يعني ضروفو شايفاها و عارفاها
امل""(تبسمت) لا اماما ماتخافيش .. اصلا عارفاني عزيز عليا سامبل و داكشي لي في رزق ايجيني
بشرى""(باست جبينها ) الله يرضي عليك ابنيتي.. ( تمات خارجة) من نحط دلاح نعيط ليك ؟؟
امل"" ايه اماما
سمعت تلفون تيصوني و ناضت متبسمة هزاتو و رجعت لمكانها مقابلة مع مرايا .. و جاوبت بصوت خجول
امل"" الو شراف
شراف""(متكي على ضهرو موقف رجل و منزل رجل نطق بصوت تخين و تقييل ) شراف قتلتيه و مرمدتي گلبو ..(تبسم بجنب) الوراق ؟؟
امل"" (عضت على فمها بالحشمة ) اه واجدين
شراف""(تبسم بجنب بتقالة عرفها حشمت ليه تاني نطق بصوت خااتر ) تحشمي و تقوديها عليا انا
امل""ههه تعبير عندك
شراف""(زادت ابتسامتو مغمض عينيه بنغيز لي بداه نطق متقل ) ..واخة مريض في تعبيري .. ويني راك غالية على گلبي
على اخر حروف منو خلى قلبها يدق بالحب اتجاه هاد سيد بصح غريب و جريئ في كلامو معاها فوق الحد .. لكن كلامو لي تيبوح ليها مرة مرة و مواقفو معاها تيخليها تزيد تعشق فيه بلاما تحس ... تبسمت عاضة على فمها و يديها على قلبها المفضوح بيه... حتى سمعت صوتو تاني المزعزع قلبها بتخانتو ...
شراف""( متقل حروفو ) غاتمشي لخدمة غدا ؟
امل""( صوت مغلوب بالحشمة) غانمشي غي في صباح باش نعلم الطبيب على هاد سيمانة نريح فيها
شراف""( بتقالة ) مزيان الاله .. رتاحي ليا (متقل حروفها ) امل
امل""(تبسمت حاسة بداتها تترعد و تزيد ) ربي يخليك ( بتردد) تقدر تصواني لراسك غدا؟
شراف""(تبسم بتقالة و نطق ) وليتي تخافي مني ولا شنو بلانك
امل"" ههه اه عاد وليت نخاف منك
شراف"" مانعرفش ..نتسناك بلاما تخافي تلقايني غي لتحت
امل"" ههه من هاكة نجي
شراف""(تبسم نطق تاني ناويها فيها ) نجيبك تحتي بخاطرك غا رتاحي
امل""( حطت يديها على فمها) اوعدي شراف عيقتي والله غانقطع (قاطعهم صوت بشرى تتعيط ) انا جايا اماما
شراف""(تبسم و نطق) يلا سيري
امل"" نتا كليتي باش تشرب دوا ؟؟
شراف"" مزال عاد
امل"" و عنداك اشراف عفااك رد بالك لا تنساه باش يتعفنش ليك الجرح و يبرا دغيا
شراف""( خرجت عقلو بكترة اهتمام نطق بختورية ) غي رتاحي راه مانسيتوش صباح غا دويت هكاك
امل""(تبسمت و جبدت على سنسلة عنقها تتحسسها ناطقة بحشمة ) امم طريقة زوينة واخة ماتعرفش تهضر
شراف"" قبلي عليا ...يلا سيري تكلمي
امل"" بسلامة..
قطعت معاه تتبسم و خرجات لقاتهم بداو ياكلو في الدلاح ..كلات معاهم تحت حديث و توجاد و كل مايتعلق بالخطبة .. سلاو جمعت طبلة و غسلت ماعن و مشات غسلت وجهها و سنانها و دخلات لبيت تكات بعد ماخلات ليه ميساج انه ماينسى دواه .. غمضات عينيها براحة قلبها..
حتى فاقت صباح على صوت المنبه ناضت كيف عادتها بعد روتينها صباحي لبست عليها كسيوة خفيفة بالمارو .. طلقات شعرها جمعات خصلات جانبية .. لبست صنيديلة خفيفة و خرجت فطرات مع بشرى تا مصطفى خرج مبكر يقضي اغراضو .. خرجت لخدمتها كيف عادتها .. التاحقو بيها البنات .. و قلبها هرب من ليلى و من شوفاتها و تصروفاتها.. دوزت معاهم ديك سويعات صباحية.. و مشات لعند طبيب المختبر.. لقاتو مراقب شي تحاليل ..
امل"" دكتور الله يعاون
رضى"" امين ( هز عينيه فيها و نطق) محتاجة شي حاجة
امل""(تبسمت ) جيت نقولك غا نغيب هاد semaine عندي العقد و مانساليش
رضى""( تبسم بطريقة بحالا ماعجبوش الحال حيذ نضارتو و شاف فيها ) مافيها باس .. الله يكمل بالخير ..
امل"" شكرا ادكتور ربي يخليك ..
رضى""(مطول شوفتو ) واخة تخلي بلاصتك
مع اخر كلمة دخلات ليلى و عقلها فين و فين تتحلل و تزيد تانطقت بطريقة مستفسرة
ليلى"" علاش غا تخرجي ماخلاكش الراجل تخدمي
امل""(شافت فيها ) لا احبيبة غي مامسالياش
رضى"" تقدري تمشي عارفة بلاصتك غاتبقى كيما هي
ليلى"" (تبسمت بالفقصة) سعداتك اخيتي على زهر عندك
بقات تتشوف فيها و على كلامها استغفرت الله في خاطرها من نوعها و نوع كلامها المسموم خرجات حيدت طابلية و خدات معاها دواء خاص باش يبقى عندو .. و خرجات متوجهة لعندو ديريكت ..وقيت ديال الطريق تاكانت قدام الدار .. لقات الحاج احمد في الباب سلمت عليه باحترام .. حل ليها الباب و طلعات مخلية قلبها يدق و يزيد مع حطات رجليها في اخر درجة و ايمعت صفية نطقت بصوت مهزوز خلى قلبها يتزعزع
صفية"" الله ياوليدي و مالك على حالتك .. مالك
دخلات بزربة وجها مخطوف تتبان ليها صفية محنية عليه تتحاول تكيه
امل"" مالكم(قربت بالخف جنبو ) شنو وقع ليك
شراف""(هز يديه بهدنى بلكنتها المخلوعة وجها المخطوف منو اللون) ا تهدني ما وقع والو
صفية"" عنداك ابنتي ... قلت ليه ماينزلش .. ماعرفتش اش وقع تاخوات بيه رجليه و نقز درجة .. و خرج هاد الدم
نزلت عينيها بالخف تيبان ليها ديباردور مقيوس قلبها تعكد عليها مشات من جهة الضربة بالخف و عرات عليها بالخوف مخلية عينيه ايطيحو معاها تيطلع و ينزل بملامحها و خوفها عليه تالهاد درجة فيقاتو من شافت فيه
امل"" فين عقلك .. كون بقيتي بلاصتك كاع
صفية""(دخلات لكوزينة ) قلتها ليه ماتيسمعش
شراف""(نطق بشوية مخلي عنيه معاها) نزلت باش ماتخافيش مني
امل"" (بمعاتبة) اودي غي بقى بلاصتك ..(جابك كرسي بدات تحيد اللصقة بشوية) صبر تاني
جلست جنبو و بدات تحيد في لصقة وراها لفاصمة و هو عينيه معاها و مع كل حركة من يديها و شفايفها لي مرة مرة تعض عليهم وهي مراقبة جرح .. بطريقة زايدة بجنونها عليه .. حتى سمع صوتها تاني
امل"" رد بالك شوية الله يعطيك الستر.. الحمد لله ما تحلتش الخياطة
شراف""(هز يديه و حط كف صباعو على خدها تاخلاها تهز عينيه ليها مزننننكة نطق بصوت منخفض ) تخافي من كولشي نتي ..
حنات بعينيها تاني مكملة شغلها و حاسة بنضراتو غا تاكلها بحوايجها كيتلفها ديال صح.. ماكملت تعقيم تا عرقات و نشفات قادت ليه لصقة تاحست بصفية مدات ليها ديباردور اخرى ..
صفية"" عاوينه عايش بنتي
تبسمت بزز و شدات عليها دورت عينيها ليه و تبسم بتقاالة و عينيه معسسسلة فيها بشكل ذوباااان قربت بشوية مدت يديها شد عليها و عاوناتو تكعد و طلعات ليه تيشورط برااحة حيدتها ليه و رمات عليه لاخرى نزلتها ليه عاودت شدات يديه و تكاتو بشوية ناوية تبعد تاجرها شوية منزلة يديها على سداري مشى بشفايفو لودنيها نطق بصوت منخفض
شراف""(بختورية كلامو ) زينة لحروف ..
دعقها بالجرة لعندو و زادها باكلامو بقات تشوف تاحست بخطوات و بدات تبربص ليه وسط يديه نطقت بشوية
امل""" ا طلقني شرااف اوعدي
شراف""(تبسم و عينيه مفضوحة نطق باتكرار ) اوااعدي ( تبسم و عاود نطق ) كون تشوفي اش تدير فيا..
امل"" (تبسمت و تدور مرة مرة لكوزينة) عفاك طلقني مابغيتش تحشمني قدام خالتي طلللق
طلق منها تكعدت تتقاد في شعرها لي نزل كولو قدامها عاد خرجات صفية بالخبز ..
صفية"" جلسي ابنتي تغداي
امل"" لا خالتي ماما تتسناني ..
صفية"" غي جلسي دوقي معاانا
امل""( تبسمت و هي باغة غاتهرب) غير سمحي ليا خالتي
صفية"" واخة ابنتي .. راه درت مع بشرى ورا الغدا نمشيو
حركت راسها بخجل و هزات صاكها ..
امل"" واخة .. (شافت فيه لقات عينيه مرخوية براحتها) خليك في بلاصتك
حرك راسو و مشات لبست صنيديلتها و عينيه تنزل و طلع فيها حتى نزلت على عينيه و قربت صفية عندو حابسة ابتسامتها
صفية""رخف على البنت .. بسبتك مابغاتش تجلس تغدا
شراف"" (شاف فيها بهدوء) علاش شنو درت
دوحت براسها و دخلات مخلياه تيدوز بيديه على وجهو ..
فين حين هي دخلات لدار لقاتهم مجموعين على طبلة تيتسناوها .. رمات سلامها عليهم و مشات دغيا لبست كندورتها و رجعت تغدات .. و حديثهم لي ولا غي في توجاد .. كملو داك الغدا جمعت طبلة و مشات طرفات حالتها لبست جليلبة في الشويبي مخزانية طلقات شعرها شويية ميكاب ملمع الشفاه صندالة كعب خفييف هزات صاكها و خرجت تتعيط لبشرى ليكانت تتقاد الشال ..
امل"" يلا ماما عاليا تتعيط ( دخلات عليها البيت )كيتسناونا لتحت
بشرى"" نزلي انا جاية نزلي
حركت براسها و نزلات بانت ليها طوموبيل ديال شراف خارجة بقات تتشوف تابان ليها عثمان نزل الزاج ..
عثمان"" غازيدي ماشي هو ..
باقة تتحنزز تا بانت ليها عاليا و صفية خارجين شوية بدات عاليا تعيط باسمو
عاليا"" ولوح ليا بزطامي من سرجم
يلا رمات خطيوة و سمعت صوتو من فوق خلاها تهز عينيها و جات عينيه فيها ديريكت بجليلبتها تبسم و شاف ف عاليا لاح لها البزطام .. هي نزلت عينيها تتبسم بالحشمة حتى بانت ليها بشرى سدات الباب و توجهو للطوموبيل طلعو و كسيرا عثمان مخلي عينيه معاها ..قربت عاليا منها شدات عليها و نطقت بشوية
عاليا"" ياختي على العشق .. كل مرة يوصيني عليك .. ماتخليش نفسها في شي حاجة.. لي بغاتو خوديه ليها..
امل""(تبسمت عاجبها الحال واخة هادشي ماغريبش عليه ويني توصيات عجبها بالمزيان نطقت بشوية) اختي الله يخليه ليا
وقفت بيهم طوموبيل قدام القصاريات بعد ما علموه غي يساليو و يجي ليهم .. نزلو متوجهين لداخل .. بشرى و صفية قدام و عاليا شادة في امل و دخلو لداخل .. اول محل دخلو ليه هو ديال الثواب .. خاصين بالقفاطن و تكاشط .. عيون حارت بين الوانهم و شكيلاتهم..
صفية"" زيدي ابنيتي فاش عشقت عينيك
امل""(خدودها ولات مطيشة محمرة نطقت بخجل) ماعرفتش كولشي زوين
عاليا""(جراتها عرفاتها تلف و تحشم) ها حنا نشوفو
مشات هي وياها و كيشوفو و و ايختارو لوينات لي يقدرو يجيو مع لوينها .. ختارو ثلاثة ثواب لقفيطنات مابغاتش تدير تكشيطة .. و مشاو خداو ثلاثة تواب الجلابة .. و بعدها محل البيجامات كدالك صبابط و صنادل و محل الصيكان ختارت لوينات لي يجيو مع كلشي و سامبل .. مشاو المحل العطور و ميكاب .. على العموم غي روايح كانو من انواع لي زايدين في الثمن .. طلب من صفية و عاليا .. واخة هي مابغاتش تحكر لكن صفية كانت واقفة على شغلها خرجو
صفية"" ابنيتي من نقولك شوفي لي بغيتي ماتبقايش تقولي ليا ماعرفتش ..(دوزت يديها على ضهرها بحنية ) الله يكملك بعقلك.. (تبسمت) نتي ماتشرطتي و هو ممفرطتش .. غير ماتجبديش ليا صداع معاه
عاليا""(عنقتها بجنب ) مابغاتش تكتر عليه قالك .. حيث مزال يلا رجع لخدمة
صفية"" بحال كان معانا بحال من مشى ابنتي .. فلوسو كانت تتحط بحالا هو لي كاين ..ماترفديش الهم
تبسمت بخجل تحت نضرات بشرى لي حسات بالفخر من حال بنتها و كيف مساومينها غالي..
صفية"" باقة لينا حاجة واحد دابة
عاليا"" ايه ياماما يلا عند السيد لي تنتصارفو معاه
شدات فيها تاني و قصدو محل خاص بالذهب .. دخلو بترحاب من السيد لي كيتصارفو معاه ..
السيد"" مرحبا والف مرحبا الاله صفية اش حب الخاطر
عاليا "" بغينا ensemble للعروستنا
السيد"" مرحبا الله يكمل بالخير الاله صفية
صفية"" الله يكبر بيك
جبد ليهم موديلات شكيلات و انواع واحد ينسيك في لخور.. امل كانت الحشمة لاعبة عليها عشرة .. جرتها عاليا لعندها وبقات توريها في موديل حتى طاح اختايراها على ensemble (دك البرة) تفاهمو على الثمن و تحط كاش و هي غي تتشوف و خجل واكلها .. خداوه في اديهم و خرجو لبرا و جلسو فوق كرسى يتسناو عثمان حتى يوصل
عاليا"" (قربت ليها حيث هوما لي كانو واقفين )كيف جاك دهازك احبي
امل"" اختي كترتو عليه بزاف .. و مزال بزاف حوايج
عاليا"" ياااخويتي هازة الهم لراجلها .. نتي و مااالك رزقو بغى يلوحو على مرتو
امل""(تبسمت بخجل) امم
وقف عليهم عثمان و قرب تيهز معاهم الصاشي و خرجو دار كولشي في كوفر و طلعو و كسيرا
عثمان""(شاف في مرايا) كيفاش بلانك نتي تزوجي و انا نتسخر
صفية""(ضرباتو لراس) ياك الحتروف
امل"" غا خليه من يتزوج يشوف شكون يمشي معاه
عثمان"" لا لا الله اودي .. كولشي يهون عليك امرت خوادري ..
طريق كاملة و هو شاد فيها شافها زادت بالحشمة و الخجل لي كان واضح وضووح غير طبيعي .. وقف قدام الباب دارهم ديريكت ودار شاف فيها
عثمان"" هانا ازين العرايس
عاليا"" والله تا كتقلب عليه نتا يهرس ليك سنانك
عثمان"" و مالي راه هو لي جا يتزاحم معانا
امل""(ضرباتو لكتفو) احشم شوية
صفية"" غا خليه راه تيقلب عليه نيت
عثمان"" صافي هانا ساكت على سلامتكم
نزلو كاع قربت عاليا نطقت عند وجهو
عاليا"" ماتنزل والو .. تاتدخل طوموبيل للكاراج
صفية"" ايه اوليدي من سترة مزيانة (قربت تسالمت مع بشرى) طلعو تشربو كويس اتاي
بشرى"" مرة اخرى ان شاءالله نشوفو داك راجل تاني
عاليا""سيري ترتاحي بناتنا تلفون احبي
مشى حل الكاراج و دخل طوموبيل و هوما تسالمو و طلعو في حالهم لديارهم .. دخلو لقاوه متكي منزل كاسكيط على وجهو مربع يديه لعندو تاسمع الحس ديالهم و حيد كاسكيط و لمح لصفية تتحيد الفولار
صفية"" كي بقيتي وليدي شوية
شراف""(بصوت مدعدع بالنعاس) مزيان؟؟
صفية"" كولشي هو هداك اولدي غي تهنى
عاليا"" هاي هاي رافد الهم
لمح لعثمان مطلع الصاشي كل في جهة جابهم حطهم فوق طبلة نزل عينيه معاهم و عاود شاف في عاليا..
شراف"" غي هادشي ؟؟
صفية"" باقين شي حوايج .. ولكن ماشي دابة تالعرس هادشي غي غايمشي مع الصداق
شراف"" (حرك براسو نطق ) قدوك الفلوس؟؟
عاليا"" باقة شي حاجة ويني مايقدوش .. باقين لينا بزااف الحوايج تمر حلوة الورد وداكشي معاهم
شراف"" انا سولتك على حوايج ليوم ماشي لي جاي..
صفية"" ايه غا شي حاجة قليلة لي بقات (شافت في عاليا) وريه الذهب
ناضت بلا عجز حلات صاشي و جبدات بواط و حلاتها قدامو ديركت مخلي عينيه ينزلو معاه سكاناه مزيان ..و حرك براسو
شراف"" عجبها؟ هي لي اختارتو.؟
عاليا""(تبسمت) هي هي غا رتاح .. كولشي بدوقها واخة مسكينة قاالت لينا مابغيتش داكشي غالي.. هو يلا خارج و خدمتو مازال ماشدتش فيها الوقت بزاف ..
صفية""(بالحنية) بنت الاصل اوليدي .. ديتي و عرفتي اش ديتي ماتشرطت ما كبرت عينيها
شراف""(عارفها و عارف معدنها داكشي لاش عشقها ماشي مادية ماشي تبغي الكبيرة كولشي قراه فيها و عرفها مزيان ) عارف الواليدة داكشي لاش تنأكد عليك لي بغاتها خوديها ليها
صفية""( تبسمت و ناضت تتحيد جلابتها) الله يتاويكم الخير اوليدي .. يسهل عليكم
شراف"" (بهدوء )امين الواليدة امين
دخلو للدار تاهوما مسهوتين جلسو في المرح كيتسارحو .. تا خرج عندهم مصطفى من الكوزينة موجد براد اتاي ..
بشرى"" الله يلا درتيها مزيانة راسي ضارني نيت
مصطفى"" ايوا على سلامتكم عاد ؟
بشرى"" عاد سالينا
امل""(ناضت ) نبدل عليا و نجي
مشات بدلات حوايجها لبسات كنيديرة جمعات شعرها و مشات غسلت وجهها و جات تشرب اتاي
جلست جنب مصطفى و هزات كاسها تانطقت بشرى
بشرى"" واايني ولد اكابر هاد السيد (شافت لي امل و نطقت ) قولي ليا ابنيتي غاداك الذهب شحال ساوي بالريال
امل"" (بخجل ) 180 الف ريال
بشرى""(تبسمت ) تبارك الله .. ويني بنتي تستاهل و كتر كاع
مصطفى"" الله يسهل عليهم انا مهني عليها معاه .. بلا هاد التهلو
بشرى"" (حدرت عينيها) المظهر الخداع صراحة.. شتت الفلوس غي اليوم و باقي تقريبا كولشي
مصطفى"" الله يكمل بالخير ابنيتي ..
امل"" (بخجل و عينيها على طبلة ) امين ابابا
كملت كاسها و ناضت دخلات لبيتها هزات جلابتها رجعتها بلاصتها و رجعت لكوزينة خدات ماسك الخيار و رجعت دارتو لوجها تتحس بالحرارة في وجهها .. و مشات تكات فوق السرير هزات تلفون قدام عينيها و بان ليها ميساج الواتساب Sharaf
—مرتي مزيانة؟
تبسمت بزز حفاظا على ماسك و جاوبت
— بيخير و نتا كي بقيتي مزيان هاد العشية
كتباتو و خرجت دخلات انستا تتسارا و بداو يطلعو ليها غا فيديوات ديال الخطبة و العقد بقات تتبسم و تخيل في راسها هي و حبيبها .. و ابتسامتها تتزيد عاد وعات تخصر ماسك .. تابان ليها تيصوني ابيل فيديو .. قطعت عليه و صورت ليه نص وجهها و كتبت تحتو
— غانخسر الماسك يلا هضرت
بقات تتبسم من جوابو قبل ما تقراه تاشافتو يسجل اوديو قلبها بدا يضرب قبل ما تسمعو وصوتو منخوي نقصت صوت و جابتو لعند ادنيها عاضة على شنوفتها بجهدد و قلبها يطيح من صدرها
شراف"" تشكاو ليا منك امل
حلات فمها و قلبها بدا يضرب تكعدت وماسك كاع سخونية لي جر عاود خرجها مع سخونية اكتر من لي كانت و سجلت اوديو نسات راسها
امل"" اوعدي اشمن شكوا هادي اش درت انااا
فين حين هو سمع اوديو ديالها و كيتبسم و زادت بتلفة من صوتها .. مخليها حاضية تلفون تا بان ليها تيسجل ..قرباتو ادنيها تاني و تعض على شنوفتها
شراف"" مسوم مرتي و حاط عليها عرق كتافي .. ( بختورية) و نتي حشمانة على رزقك .. ياك گلت ليك لي شاهيتك فيها خوديها !!
مغمضة عويناتها بجههد و شنانفها كلاتهم ماكلة .. و باين تاني غادين يتورمو .. قلبها يضرب و يزيد يطلع .. كيساليهم ليها بالكلام لي تيخرج .. لكن هاد تكبيرة و قيمة لي عاطيها .. تتخليها تيزد تعشق فيه ..و ماتملش غادية تجاوب حتى صونا مكالمة جاوبت
امل""(بصوت قليل و مبين الخجل جاوباتو على سؤال ديريكت ) لا شراف خديت
شراف"" (بصوت تخين) وصلني كلشي امل .. من گلت ليك خودي لي خاطرك بغاه خوديه ..
امل""(بحشمة) شراف مابغيتش نكتر عليك .. و مزال بزاف حوايج في الطريق
شراف""(بتقالة ) مشي بالكلام لي تنخرج معاك .. ماشغلكش نتي
امل""(تبسمت ) واخة اسيدي مانعاودتش
شراف""(تبسم بتقالة عينيه مرخية بالنعاس ) غدا نخرجو نتغداو برا ندوزو من بعد للخواتم
امل""(تبسمت) ياك قلتي مانمشيوش القهاوي
شراف"" شكون گال شي قهوة
امل"" و فين نتغداو
شراف"" تالغدا و تعرفي فين تمشي
امل""(تبسمت ) امم واخة ان شاءالله
بقاو بالكلام مدة طوييلة تا عيطت ليها بشرى تعشى عاد قطعت معاه و خرجت لعندهم تعشاو في الجو هادئ و الفرحة بنتهم كانت ماليها مثيل .. كملو عشاهم ريحو شوية و ناضو كل مشى ينعس . الا هي مشات قادت ضفيرات و صايبت شعرها و الوجه تبرض بالماسكات و حتى ولا يشعل قادت الحجبان و مشات تكات في بلاصتها .. و دغيا زارها النعاس ماعقلتش على روحها امتى غفات .. تا فيقها الصباح غي صوت مول النعناع دايز .. هزات تلفون تتلقى عشرة و نص صباح ناضت قافزة .. ناضت لقات غاكوكوط كتصفر .. مكاين حد مشات للحمام توضات صلات و رجعت سخنت اتاي فطرت جمعت طبلة عاد دخلات بشرى في يديها ديسير
بشرى"" عاد فقتي على سلامتك
امل"" الله يسلمك احبي .. فين كنتي سويقة
بشرى"" (حطات داكشي في كوزينة و جات وقفت حداها )الا غا هنا عند العربي .. معاياش غادين
امل"" ماعرفتش بضبط قالي الغدا على البرا
بشرى""(حركت راسها تتحيد جلابتها) كي وصيتك ابنتي .. هو مايبغيش يفرط وليني ماتطلعيش بزاف حدو قدو
حركت براسها تتبسم و ناضت باست عليها و مشات للبيت جبدات جلابة في موڤ بااارد سامبل مخزانية و فتيحات في الجناب كانت اخر جلابة فصلت على دوقها و كيف مشهياها خيطتها في العيد الفطر .. لبستها طلقات شعرها متوسط الطول .. مسرح و يلمع دارت ميكاب جد جد مخفف اكتفت بمسكارا خفيييفة و كحل زاد بسواد عينيها ملمع شفاه و زاد بين غا جريحات لي بصمت عليهم حمرت حنيكات شووية واخة بداو يتطبعو بلونهم جبدات صبيبط سامبل في بيج و صاك نفس اللون .. رشات بارفان المفضل .. و تحل الباب ضارت و بانت ليها بشرى عينيها غرغرو..
بشرى""(قربت منها ) ماشالله عليك ابنيتي .. الله يحجبك و ينجيك ليا من العين ..
امل"" امين اماما (باست على خدها ) دعي معايا اماما يسهل الله و يسر في طريقنا ..
بشرى"" الله يسهل عليكم ياربي .. خرجي راه باباك قالك تيتسناك لتحت ..
امل""(حركت براسها و عاودت باست عليها و خرجت ) بسلامة اماما
خرجات لبرا باست باباها من بعيد و نزلات و خطوايها يتعكلو غا بوحدهم .. و هي تخرج معاه نيشان و اكيد كولشي ايلاحض علاقتهم ..فتحات الباب و رمات بصباطها لبرا وقفت جارة الباب معاها تاتزدح عاد هزات عينيها بشوية و قلبها يضرب يضرب واقف متكي بضهرو على طوموبيل تيكمي .. رجليه لي عليها سبرديلة بيضة و سروال جينز كحل و جات تيشورط بالكول في بيج كاسكيط كحلة سرطت ريقها بصعوووبة و قلبها يضرب بجههد .. زادت بخطويات متعكلين مخلية عينيه يطيحو و ينوضو بتركييز كبير بحواجب مكروزة سرها ديما طايح لكن بهاد سترة الزينة خرجات ليه العقل.. وصلت قدامو ناطق بصوتها رقيق ..
امل"" سلام ..تعطلت عليك
شراف""(قرب بشوية معوج براسو بسبب كاسكيط باش يتلاقى مع عينيها و نطق بصوت خاااتر منخفض ) مگواني نعشق في ملتك
نزلت عينيها تتكدد في شواربها ماقدت تهز عينيها فيه .. حتى حست بيه حل ليها الباب و مشى بشوية شاد على مكان جرج حتى طلع سدا لباب دارت ساتينغ كترعد غا بوحدها خدا ساتينغ غادي يركبها حتى خداتها من عندو و قربت تتركبها باش مايدورش و يصدق مقصح ..
رجعت بلاصتها تتبسم بلاما تشوف فيه .. مخلية عينيه تاكلها تبسم و كسيرا خارج من الحومة .. و لي دازو من حداه تيفهمو الموضوع نيشان ..خرج من الحومة عاد لمح ليها بطرف عينيه تتفرك في يديها و ريحتها سلبت ليه العقل .. مد يديه بشوية و شد عليها مخليها تعرق و تنشف مشات بعينيها مع يديه و هي مكروزة و معرقة و موشومة من دراع و يديها تتبان صغيرة و رهيفة ..
شراف""(شاف فيها بعيون مرخوية فيها نطق بصوت تقييل ) مزيانة ؟
امل"" (بخجل تترد شعرها وراها ودنيها ) بيخير نتا شوية ليوم
شراف""(شاف فيها متبسم بجنب بتقاالة و نطق بختورية ) شنو بان ليك ؟
امل""(تبسمت منزلة عينيها ) بان لي مزال عيان و خارج فوق جهدك ..
شراف""(مركز مع الطريق و صوتو تخين مزعزع كيانها ) على ود المرمدة گلبي .. (دار شاف فيها غمز ليها بتقالة ) نديرو بوه هاد الجهد
امل""(عضت على فمها تتبسم على ردودو ) الصمت
شراف""(تبسم عاود شاف فيها فهمها ضحكت على عليه و رجع شاف في طريقو ونطق ) نشوفوك واش تصلحيه نتي ...
لجم لسانها ماعاودت هضرت تاوقف قدام صناك و شاف فيها
شراف"" شنو تبغي ؟
امل"" ماعرفتش لي جبتي .. ولكن فين نمشيو
شراف""(تبسم غامز لها بشكل دوبان نطق بتقالة ) للغابة القطيطة ديالي
امل"" (بصدمة ) اويلي للغابة
شراف""(حابس ابتسامتو) دوي اش بغيتي
امل""(تدور في عينيها ) ناخد طاكوس صافي
حرك براسو باس على يديها و نزل بتقالة و داز قدام عينيها بكتلتو تتخطوي تبسمت و رجعت تتنش على وجها تا بان ليها جاي وصى عليه و رجع لعندها طلع و نزل للكرسي شوية للور
امل"" ياكما تقصحتي .. شفتي عكسك كون خليتي من بعد يا شراف
شراف""(متكي براسوعلى كوسان و مدور بعينيه لعندها تيشوووف مطول و يحفض ورهي تتلون و تزيد قدام عينيه نطق بصوت خاااتر) المهم عندي هو تحسبي عليا .. مابغيتش عينيا يظلامو بلا بيك...
وصلت طلبية تالعندو خداها و مدها ليها رداتها للكوسان لور خلص ورجع الكوسان كي كان و كسيرا بالهدوء .. وصل للحانوت نزل تاني .. خدا كانيتات منوعة ديال موناضة .. شي سقاطة و زرارع منوعة و تم راجع تاني .. حل لباب لور حطهم و طلع بشوية .. و كسيرا
امل"" (شافت وراها و عاودت شافت فيه ) مالك على هادشي كامل ا شراف
شراف""(عينيه قدامو نطق بهدوء) قدامنا الوقت بزايد
شافها صقلت تبسم على حالها و زاد مركز بصواگتو تابالفعل خرجو من المدينة و بان ليها غالخلى بدات تلعب يديها بارتباااك واااضح هو حدو تيلمح ليها بطرف عينيه و يرجع يركز مع الطريق .. وقت قليل تادخل مع دخلة الغابة .. و بالضبط لبلاصة كانت شبه خاوية فيها بعض العائلات قليلة وليدات تيلعبو .. مشاو لمكان متكون بالطبلة و عليها كراسيها وقف جنبها سكت طوموبيل و شاف فيها بهدوء ..
شراف"" (تبسم و نطق بصوت تقيل ) الخوافة خفتي مني
امل""(تبسمت و حلت لباب و عطاتها ريحة الشجر و شافت ليه) احسن من زحام المدينة
شراف""(رجع بالكوسان للوراء مزيان و نطق بصوت تخين مخلي عينيه مع عينيها سود ) احسن بزاف ..يشوفوك ليا
امل""(تبسمت قالبة عينيها) انا بعدا شهمتيني بلسانك
شراف""(تبسم و دار براسو علق رجليه في الباب كارز على فكو من حر زيار) نخليو خرجتنا زينة بحال مولاتها
امل""(كتشوف في كتلتو و بالضبط يديه ل تحطت على جرح قربت شوية ) واش تقصحتي
شراف""(حرك براسو ومد يديه حطها على خصرها جابها لعندو ) جي لهنا ( تكى ليها راسها على كتفو نطق بتقالة ) غي القريص خياطة
امل""( هزات عنيها لملامحه حروشية تقطر منو ناطقة ) جبتي دوا ديالك
شراف""( دار براسو و جا قريب مع ملامحها مركز مع عينيها و داك الكحل وحل ليه في الحلق خلى حروفو يتقالو ) مانحتاجوش .. عينيك كافين
امل""( كانت بزعامة تزيد تطول شوفتها لعينيه تبسمت بخجل ) ماكفينش خاصك دواك ..
شراف""(صغر عينيه فيها متبسم بتقالة نطق بهدوء) قربي شوية
امل"" ( بصدمة) هااا
شراف""( حرك راسو بشوييية و نطق بهدوء ) قربي امل
زادت قربت بلا وعي طلعات يديه مع خصرها تاحكمها و زاد بيها تاطلعت بيديها على صدرو تاطاح شعرها عليه مخلي عينيها يزيدو يقربو من عينيه معسلة و زايدة بحلاوتها .. طلع براسو بشووية و خشى وجهو في عنقها بطرييقة تقيييلة جابت ليها تبوريشة من ريحتو ... متخلطة بشهامتو و رجولتو .. مغمض عينيه كيستنشق ريحتها بشكل قوي .. هي ملامسته بعنقها طري و رهيف حط شواربو عليه طبع بوسة عليه و نطق بصوت تقيييييل ..
شراف"" دوايا لول و لاخر هو نتي...صعيب نفرط فيه ..
احاسيس قوية و غي ماكتزيد تجهاد بالنسبة ليه .. دخلات لراسو بالخف و قلبو اكتر خفة .. ماكان ليه في لبال غادي و حالم انه غادي يعشق بهاد سرعة.. حس بيديتها فوق صدرو و تنفسها اقوى و اسرع عاود باس على عنقها بتقوولية حتى حس بيها تتحرك .. رجع براسو متكي بعينين مرخييية و تبسم بتقااالة مخليها دايخة بيه و بقربو ..نطق بختورية
شراف"" رخفي نفسك ماتخافيش
امل""(تبسمت تدور في يعينيها على حروشية ملامحو ) لا نخاف نخاف (هزات بعينيها للغابة) شوف فين جايبني
شراف""(تيدور عينيه مع ملامحها بشويية هز يديه تيرد شعرها ورا ادنيها نطق بتقالة ) زعيم و قربت ليك .. ويني داك حلاوة تتبغي الخاطر
امل""(ضرباتو لصدرو قالبة عينيها ) الماسخ
شراف""(تبسم بشوييية شاد على دقنها ناطق ) نديرو وراقو و نشوفو ديك ساعة
امل""(حيدت يديه و تكعد قالبة عينيها عليه ) يااا شراف حشومة
شراف""(متكي براسو براحتو و داير لعندها بعيون مرخية فيها تتقاد شعرها وراها مد يديه تيلعب في خصلاتها نطق بهدوء) نهضرو ولا من بعد
امل""(دارت لعندو ) فااش
شراف"" (بصوت تخيين) شروطك قبل مانعقدو
امل""(نزلت عينيها و عاود دارت بجسمها لعندو ناطقة بخجل) ماعندي تا شرط .. غير تنقص من كماية و الكارو و حتى (تبسمت) و حتى لسانك صلحووو
شراف""(تبسم بتقالة نطق ) زيدي نشوف
امل""(تدور عينيها ) و تخليني نمشي لدارنا لوقت لي نبغي
شراف""(صغر عينيه فيها) داركم في زحيليگة ياك قدامك
امل""ههههه لا ( هزت بكتافها بطفولية ) واخة هكاك
شراف""(تبسم على حركتها و نطق متقل) زيدي !!
امل"" (بخجل اكتسى ملامحها ) صاافي غي هادشي(نزلت عينيها بخجل واااضح) و تبقى تبغيني ( حلات عينيها بدهشة عضت على فمها بجهد ) زعمة تعاملك معايا (دارت تاني درقت بوجهها عليه)
حست بيديه تسللت ليديها و دورها لعندو وجر يديها لعندو حطها على شواربو تقابلت مع عينيه
شراف""(نطق بصوت خاااتر) كون ماعاشقك تلقايني هنا و نزرب باش تحسبي عليا..
امل"" (ضحكت) غي قلت ليك وصافي
شراف""(جرها تاتزدحت معاه و طلع بيديه لرقبتها مشى بشواربو لجنب فمها باس عليه بشويية نطق متقل حروفو ) عاشقك و هدا لله امل
عاود باس عليه بتقالة من جنب الاخر و رجع بعينيه عليها واخدين راحة وهوما تيدورو على ملامحها وسمورية لونها .. بعد شوية تتعض على شنانفها بلا وعي تاسمعاتو ناطق بتقالة
شراف""نقصي عليهم .. وعليا معاهم .. داك الماكلة لي تتاكليهم انا ليخاصني ناكلهم ماشي نتي( شافت فيه مخرجة عينيها تبسم و غمز ليها )
امل"" شرااف
شراف""( رمى رجليه منزلهم و بختورية حروفو نطق) شراف قتلتيه اختي (مد يديه شدت عليه و تكعد بشوية و شاف فيها متبسم)
امل""( مزيرة ليه على يديه بخوف واضح) تقصحتي ياك
شراف""( حرك براسو ) نزلو شوية
حركت براسها و نزلت هي لولى دارت من جيهتو و مدت يديها شد عليها وعاوناتو نزل مشاو للطبلة و جلس بشوية و هي حاضية معاه تانعت لعينيه باش تجلس .. ريحت جنبو تتفرك في يديها و تدور بعينيها على الجو .. تاسمعاتو نطق بهدوء
شراف"" تسمعي كلامي و شروطي عليك
امل""(شافت فيه و نطقت) مرحباا
شراف""( سرح رجل جنبها وشد يديها و اليد ثانية مشات لشعرها و شاف في عينيها و نطق بصوتو تخين ) اول حاجة شعرك بغيتو يتغطى على العينين ..( قاس على حاجبها بشوية) و هادو مايبقاوش يتقاسو
امل""(بقات تتشوف مدة تتدخل الكلام لعقلها حتى سمعات صوتو تاني) الصمت
شراف""(بهدوء) ماباغيش العينين تطول شوفة في حاجتي .. و حقي ..
امل"" (بخجل) مامولفاهش يعني
شراف"" (تيلعب في خصلاتها) غاتولفيه مع مدة نخلي ليك الوقت الكافي تاتدخليه لراسك باش تقتانعي مزيان
امل""(حركت براسها بخجل متبسمة) ان شاء الله
شراف""( نعت لحاجبها ) و هادو
امل"" (بخجل )اصلا كاين غي تعديلات صغيرة فيهم هوما هكاك ( نزلت عينيها) نفوتو هاد ليامات ديال العقد و مانبقاش نقيسهم
شراف""(تبسم تيدوز يديه على خدها نطق بتقالة ) يرضي عليك
تبسمت مدورة عينيها على الدنيا تما عاودت شافت فيه من نطق بهدوء
شراف"" العقد الجمعة ان شاء الله .. بالنسبة للنهارك يتدار ورا شهرين.. الدار باقي فيها شي اصلاحات
امل"" شمن اصلاحات هي هاديك
شراف"" (بهدوء تيلعب بشعرها) الكوزينة شي اصلاحات فيها و يخصها شغلها .. الفراش البيت خاصو يتبدل ( غمز ليها متبسم) خاصو فراش زوج الناس
امل"" (ضرباتو ليديه ) حشم شوية
شراف""( حط يديها على فخضو و نطق) كولشي من حقك بدوقك لي نفسك فيها حطيها على دارك ( قرب بشوية و نطق متقل) و يبقى غي تعمريها عليااا
تبسمت منزلة عينيها بخجل وااضح مخلية عينيه تمتع فيه دورت عينيها له و نطقت
امل"" كملتي شروطك
شراف""(بهدوء) كاملين ياكما تفكرتي شي حاجة باقة عاد تخرجيها
امل""(تبسمت و حركت براسها بالنفي) لا لا مابقاو عندي واالو.. (رمشت فيه ) غي جاني جوع
شراف""(تبسم حرك براسو و ناض بشوية ناضت معاه تنطق تادار يديه ) خليك غاريحي ..
مشى بشوية شاد على جنب كرشو مخليها متبعة ليه العين تتبسم و عينيها بيهم القلوب مشيتو .. كتلتو... خطواتو.. كولشي تيقطر بالشهامة و الرجلة .. بان ليها هاز في يديه الصاشي شدات من عندو و رجع جاب صاشي الثاني و قرعة ماء شدات من عندو و ريح بضهرو على طبلة و جا مقابل معاها تيشعل في كارو عينيه مطلعة معاها لي تتقاد في الغدا فوق طبيلة تاشمت ريحة الدخان دارت عندو
امل"" عاود الكارو اشراف
شراف"""(نتر و بخ مطاااول نطق ) صعيب يتحيد في دقة ..(نتر و نطق دخاخن شابكة حدا وجهو) شوية بشوية
جلست جنبو حلات ليه كانيت و دفعات ليه غداه قدامو و هو عينيه تيتعسلو و يزيدو فيها
هزت عينيها فيه و بانت ابتساااامة خاااترة على شفايفو مخلي دخان يخرج بخااااطرو
شراف""(بصوت تخين) الحشمة عندك ..
امل""(قلبات عينيها عليه ) تااااأ
شراف""(وساعت ابتسامتو رمى كارو عفس عليه و زاد قرب لعندها ناطق بصوت منخفض) اوااعدي
امل""(ضحكت تتلعب في كانيت) صافي من بسالة
شراف""(شد على كم جلابتها من جهة كتف و جرها لعندو تاقربت بودنيها و نطق بحروف تقيلة ) عاشقها من شواربك
دورت عينيها لهيه قلبها تيبغي يسكتو ليها من تتقرب ليه تلهاد الحد حست بيه طلق عليها ورمى يديه قدامها من جهة الطبلة دورت بعينيها لهيه و عاود تبسم بتقولية حتى تبسمت منزلة بعينيها في على كانيت تتلعب بيها و الحشمة كاسياها و لابساها و هو بعينيه بحال هاكة عليها و يدقق في ادق تفاصيل .. بعد يديه و دار شوية مخليها تبدا تاكل بخاطرها
شراف"" (نطق بهدوء) كولي (شد كانيت حلها ليها و حطها قدامها) بشوية تجرحيهم ليا (شافها شافت ليه نطق بتقالة ) تزيدي تمحنيني بمصان دمهم ....
امل"" (حطاتها حابسة ابتسامتها) بناقص كاع
شراف""(نعت بعينيه باش تبدا نطق بحروف تقيلة ) نحير فيك و لا فيهم .. دمهم دايقو دايقو ..(قرب شوية) گد دابة گد من بعد
هزات عينيها ليه مدعوقة بقربو بعدت تتشرش هنا و هنا ناطقة بهمس خجوول
امل"" شراف اوعدي حنا في زنقة
شراف""(بعد عليها تيتبسم معاود مخفض صوتو ) اوعدي
نزلت عينيها تتبسم و الخجل واكلها هزات كانيت لفمها و عاودت شافت فيه جاتها ضحكة و نطقت
امل"" كون جبتي معاك غي كاس بعدا
شراف"" نخيمو حنا .. بالحق فكرة مزيانة نريحو
امل""(ضحكت) لا حمقتي نتا .. (جرات قدامو) دور تاكل باش تاخد دوا ديالك
تبسم و دار بشوية و بداو ماكلتهم و الحديث ورا الحديث بساعات بدون ملل .. زادت تعرفت على شخصيتو اكتر و اكتر .. الشخص الطيب برغم من قصوحية ملامحو .. نفسو حارة من الصغر خدمة و تمارة بسبابو كبرو المحل ديال الباه ... اما هو زاد عشق شخصيتها حشومية و رهيييفة لاقصى درجة طيوبة و هااادئة عكسو تماما .. تغداو و هضرو و تفرغو بلي عندهم .. و ناضت جمعات داكشي و طلعو شدو الطريق ديالهم .. للمحل الذهب باش ياخدو الخواتم .. حبس بطوموبيل قدام المحل ديريكت و نزل طل على محل واحد مدة عاد رجع عندها حل ليها لباب و تحنى عندها
شراف""(مد يديه) زيدي
تبسمت و حشمة مبنية مليون بالمية.. نزلات سد الباب و شابك يديه مع يديها تيترعدو و يرجفو وهي وسط يديه احساس غرييب بالنسبة ليها .. دخلو للمحل لقاو السيد موجد ليهم بواطات جهد شي خمسة فوق الطبلة جرها جلسات قدامهم و ريح جنبها ناطق بصوت تقييل
شراف"" لي عشقتيه هنا خوديه
نزلات عينيها وعاودت شافت فيه بتلفة و حيرة و حشمة تتفرك في يديها عاودت نزلت عينيها تتشوووف و تحيير .. مشات يديها لواحد سامبل و خفيف ..شافت فيه لقاتو مصغر عينيه فيها مخلي حواجبو وحدة داخلة في وحدة
شراف"" (بتقالة )گلت ليك لي عشقتيه ماتفكري في والو ( نعت بعينيه) اختاري امل
عاودت نزلت عينيها تتشوف بصح تحلو عينيها مع لبقية لي كانو هماوين و وازنين مزيان طاحت عيينها لواحد بحجيرات و مفتول شافت فيه و نعتت بصبعها تيترعد عليه تم .. جبدو و مدو ليها باش تقيسو .. و جاها عبار تقول مفصل عليها هزات يديها تتشوف ... هو عينيه على يديتها عينيه تبسمو شاف فيها و هي تبسم ليه نطق بصوت تقيل
شراف"" عجبك؟
امل""(حركت براسها ) اه زويين
شاف في السيد و قاله يجمعو ليه و هي بالها غي مع ثمن اش غايقول خايفة و مرتبكة بشكل كبير .. حتى سمعت السيد
الذهايبي"" 5500 درهم
حطاات يديها على فمها و نطقت بخجل باسم شراف دار لعندها و رجع شاف في السيد
شراف"" شي حاجة اخرى تمشي معاه
مشى لعندها و هي توقف تتهضر بشوية بشكل خجووول
امل"" شراف غالي و اشنوو غاتزيد باراك غي داكشي لبارح والله كتير و نتا
شراف""( مقاطعها بشوية مطلع حواجبو ) ششتت
قاطعهم الذهايبي حط ليهم براصليات و بالنفس النوع الخاتم نزلت عينيها تتشوف و مترردة بشكل كبيير تاشافتو نعت بعينيه باش تختار نزلت عينيها بزز عليها و طاح عينيها على براصلي صامبل و عليه حجيرات وسط جبدو ليها تاني عطاها تقيسو تاهو جاها هو هداك مشا لعند السيد و جمع ليه كولشي و هي عينيه معاها تيحسب في الفلوس .. بالضبط مليون لي تحطت كاش تتسرط ريقها بزز
الدهايبي"" الله يكمل بالخير اخويا شراف ..
شراف""(شاف فيها حرك براسو باش تنوض) الله يعزك اخاي
ناضت مد يديه شدت عليه و خرجو ديريكت لطوموبيل طلعات و طلع هو .. و كسيرا مادوات ماتكلمت وجها مزنك تتفرك في يديها تاولاو حمرين بالمعيك لي معكت فيهم دور عينيه عاقد حواجبو .. شد يديها و جابها لفوق فخضو تيدوز ابهامو على يديها
شراف""(نطق بصوت تقييل) مالنا .. (شاف فيها نطق ) بردي ( رجع مراقب طريقو و جاب يديها باس على مكان براصلي و صبعها بلاصة لخاتم) نشتت رزقي عليك مرتي و تحسبي عليا..(رجع شاف في عينها نطق بصوت تقييل ) وازنة غالي الغالية على گلبي ..
حنيكاتها ولاو حمرييين على الجهد.. بصح كلامو خاسر لكن بعد كلمات تتخرج منو في بعض مواقف تتدخل لقلبها بحال القوس و فراشات تتوزع داخلها .. نزلت عينيها ابتسامتها خااافتة .. شاف فيها و عاود ركز مع الطريق حتى .. وصلو للحومة و بضبط قدام بابها ديريكت حبس طوموبيل و لمح ليها تتجر يديها ناطقة بشوية
امل"" طلق حشومة
شراف""(طلع زاج من جيهات بزوج وباس على يديها من داخل و كفها ناطق بفحيح) مانعاودش نشوفك دابة ولا شنو
امل""(جرات يديها بشوية و نطقت مع ابتسامة خجولة) لا تالنهار العقد
شراف""(تبسم بتقالة مخلي عينيه تمشي و تجي عليها ) ماشي قويتي
امل"" ههه لا لا اصلا مابقاش بزاف غي 6 ايام
شراف""(بصوت تخين) نصبرو الاله .. حتى يلا تشاوفنا تكوني محسوبة عليا
امل""(تبسمت منزلة عينيها ) ان شاءالله .. يلا بسلامة
شراف"" (نعت بعينه ) وهادشي ؟
امل"" (ضحكت تترد شعرها ورا ودنيها) هادشي غاتجيبو في يديك من تجي لدارنا
شراف""(حرك براسو بمزاح ) علاش انا نجي ؟
امل"" ههه وشكون غايعقد عليا مثلا
شراف""(تبسم جامع حواجبو ) جمعي غا تنوي تفكري تنطقي شي كلمة نحر مو داك لسان
امل""(ضحكت تادموعوً عينيها) ههههههه ناري ونتا لي قلتي علاش نجي جاوبتك
شراف""(حرك براسو و تبسم) نزلي نزلي
امل"" بسلامة .. انا نقول لعاليا كيفاش تعقم ليك الجرح و ماتنساش الدوا تاعك ..
شراف""(حرك براسو و نطق بتقولية ) تهلاي القطيطة ديالي
تبسمت و نزلت بالخف عاد عاود عيط ليها مد ليها الصاشي السقاطة لي خدا معاه شيرت ليه بيديها و حلات لباب طلعات و هو رجع بلاصة طوموبيل قدام بابهم و هز الصاشي و طلع تاهو في حالو .... دخلات لقات بشرى و عاليا مجمعات على اتاي
عاليا""صلاااة و السلام على الرسول الله الله معااا جاه العالي لولولولولولوي
امل""(حشماااانة ) اوعدي سكتي
بشرى"" و مالنا ابنتي تنسرقو .. كلشي ايفهم راكم مخطوبين
عاليا"" امضرا خديتي الخاتم اخيتي
امل"" ايه خدينا ..شنو كديري هنا بعدا
عاليا"" سوقك اختي .. يا على دخول شبوقات
بشرى"" والو ابنتي غي تنتفاهمو على نهارك و شنو انوجدو
عاليا"" ماعلينا نتي ماشي سوقك في هادشي ..ماغاداش تخرجي اخيتي تاليلة لي قبل العقد تخرجي الحمام و الصالون مايشوفك ما تشوفيه
امل"" في خباري هادشي اخيتي
بشرى""مزيان باش يطيح على بنيتي السر و تخلي وجهك يرتاح نيت
عاليا""(وقفات ) نخليكم نمشي نتسخر مزال تابعني شلى حوايج
امل"" غا بلاتي مالك
عاليا""(حلت لباب ) لا مانصيبش دابة ندوز عندك (لاحت ليهم بوسة و تمات نازلة ) في راحة الله
بشرى"" ايو ابنيتي اش درتي في خاتم وشحال تقام
امل"" (بخجل )110 الف
بشرى""(صغرت عينيها) غالي ابنتي
امل"" وييه وليني مابغاش واحد سامبل قالي لي عجبك خوديه .. و خدى لي براصلي تاهو
بشرى"" هي اش مجموع
امل"" مليون لي تحطت ليوم
بشرى""(وسعت عينيها ) تبارك الله مسومك غالية هاد الراجل .. الله يكبر بيه لبارح 180 و ليوم مليون عاد حوايج وباقي بزاف ..الله يزيدو من يعطيك ابنتي
امل"" اميين اماما هاد دعيوة لي بغيت الله يسهل ليه
بشرى""(جرتها لعندها) الله يسر ليكم ابنتي ..يبعد عليكم العين الخلق..
بالفعل نهار على نهار تيدوز طاير بشرى و عاليا تيضلو خارجين وجدو كولشي نهارها تافقو مع نكافة على اللبسة العقد و مسائلها و تريتور باش يقاد الجلسة ديال العرسان .. عموما كلشي قامو بيه عن جد .. اما الاله العروسة دوزت سيمانة كلها غا ماكلة و نعاس و ماسكات ساعات لي خرجتهم هوما ديال الحمام و الصالون فقط الكلام تلفون و مساجات .. بصح انها دارت ليه الحجب ماشافتو ماشافها .. توحشها و شحال من خطرة يقولها غا طلي نشوفك لكن اسرت انها تالنهار العقد هادشي لي كاين نيت هاهي ليلة العقد وصلات تزينت بلباس الابيض ميكاب راسخ مع لون بشرتها الشعر مطلوق مجعد من الخصلات وفوقو الثاج ملكي .. وصلت الطوموبيل ديالو تحت صواكة سي عثمان لي فين ما يزيد شي قنت ينگر ...
عثمان""(دور عينيه لعندها لي جالسة بالباس ملكي مغربي ) بقات ليه سويعات قليلة و تحسبي عليه .. فكري مزيان لا تبغي تهربي
امل" مانجاوبكش
عاليا"" (ضربت على كتفو )كيتك (نزلت و حلات ليها الباب شدات يديها ) يلا حبي نزلي
شدات عليها و حطات رجليها بالبليغة مزينة رجليها بالنقش و يديتها كدالك مخفف .. تسمعو الزغاريت من الجيران لي كانو تيطالو من الزنقة بالفرحة عليها و لي داها .. نزلو بعد البنات عائلة و بشرى كيزغرتو و يغنيو ليها .. بدخلوها طلعوها تحت زغاريت و صوت اغاني دخلة العروسة مطلوقة و عاليا معاها و لا فارقتها تادخلاتها لبيتها و قربت ناطقة
عاليا"" نمشي عليك احبي .. رتاحي ليا (قادت ليها خصلة )
امل"" هو جا كاين في الدار
عاليا"" عاد جاي مشى يجيب شي حاجة
حركت براسها و خلاتها تيجيو خالاات و العامات يباركو ليها و يسلمو عليها بحكم مازال ماشافوهاش بقات جالسة و قلبها يدق بالخلعة تادخلات عليها بشرى قربت منها باست على جبينها
بشرى"" تباارك الله جيتي تتحمقي ابنيتي بسم لله عليك الله يكمل بالخير
امل""امين اماما اميين
خرجات بعد ما عيطو ليها من برا و صوت الشطيح خدامين مخلينها هي ارتباااك وااضح وضووح تادخلات ليها بنت خالتها صغيرة العمر 18 السنة تتجري عندها شدات على يديها و قربت باست على جبينها
سلمى"" ياااختي ياختي على الزين
امل"" الحبيبة فين كنتي ماشفتكش
سلمى"" عاد دخلت كنت في صالون .. حلفت تانلبس و نزيز تاانا واخة مي قالت ليا لبسي غير قفطانك ويني لاااا
امل"" (تبسمت)مرحبا بيك ازين
بقاو كيتحتتو بيناتهم تاسمعو دقايقية عل برا دورت براسها لقات خامية مردودة ناضت تبعاتها سلوى تيطلو بشوية بالفعل الطيافر مخرجينهم في يديهم و عثمان تيشطح مع عاليا
سلمى"" ياخويتي واش هاداك هو العريس تيحمق ..
امل" اوعدي لا راه لوسي هاداك ( تتقلب بعينيها والو ماباين ليها توحشاااااتو بلا قياس ) مكينش معاهم
بقات مراقبة و عينيها تتقلب و تزيد تا دخلات عليها بشرى وقفت جنبها تتطل و شدات عليها داتها جلستها
بشرى"" ريحي ابنتي هنا لا تبانيش (شافت في سلمى لي باقة تطل) ادوزي ديك مهبولة لسرجم لاخور و لا نزلي
سلمى"" اححح ياااختي واش هاداك هو العريس
بشرى"" الله يمسخك
خرجات و خلاتها باقة تطل امل ماكرهتش تطل لكن من عرفت كاين غا من دقايقية لي تيغينيو عليه ولااات تترعد و زادتها سلمى
سلمى"" ياختي ياختي تيهبل منين جبتيه غا قولي ليا
امل"" ماشي عيقتي نتي
سلمى"" و شحال رزين و مهيب و غا لباسو تيتلف
شدات راسها بزز ماكرهت طل تا مشات سلمى تتزرب و سدات عليها الباب مخلياها تتنش بيديها على وجهه .. حتى تمو طلعين بالدفوع و اغاني بدات تسمع قرييب و هي قلبها قريب يسكت بالخلعة و الحشمة .. حتى تحل الباب هزات عينيها و لمحت لطيف العائلة و في يديهم الدفوع .. دخلت عاليا و سدت الباب جات عندها
عاليا"" تترعدي شوري شوري بقى ليك غا دقايق معدودة
امل"" اووف شداتني الخلعة والله تنحس براسي انسخف
بقات معاها شوية و خرجت و خلاتها تاني .. تترعد تعرق و تنشف حتى عاودت دخلت عندها وقفاتها رمات عليها السلهام و القب ديالو و علماتها بلي ايخصها تخرج العدول وصلو ...
امل"" غا نسخف والله
عاليا"" ثبتي ياا ( غمزت ليها ) حبيبك تيساينك برا تشدي فيه ماتبقايش مخلوعة
امل"" وراه منو هادش كامل اصحبتي
شدات يديها و تمات ماشية تفتح الباب و بانت لكل و اعين كلها ضارت عليها و صوت دقايقية على انغام
(العروسة جات قولو مرحبا )
و منهم السلطان لي من جلس و عينيه تتمشي لداك الباب عينيه تنومو و تعسلو بحلاوتها بالبيض و هي مابقى تيفصلهم غي سينياتور و هاهي ملكو واخيرا .. اما هي عينيها ماطلعتهمش بالحشمة لي مشية تتجيها تقيلة تاوصلت لداخل الصالون و هنا تهزت عينيها بالرغم من غطاء لي مغطي وجهها هي وضاحت ليها شوفتو واقف بشهامتو تتقطر داير بيديه قدامو مكروز الدراع بالشوميز بالبيض و سروال الكحل الصباط الكحل عاد وصلت بعينيها لملامحو و قلبها بدا يتخرق و نيفها تعطر بريحتو .. وقفت قدامو و مدت يديها ليديه نزل بعينيه ليديها مزينة بلحنة شد عليها و كحز جات جنبو .. زغاريت و الصلاة على النبي ماحبستش .. خداو ليهم تصاور .. و طلبو منهم يجلسو عاونتها عاليا ريحت .. دور عينيه بشوية لعندها ساعة ماقشع مزيان حتى دورت عينيها و بانت ليه غي ابتسامة تحت داك الغطاء
شراف""(قرب لعند ودنيها نطق ) باراك سيمانة ديال تخبية لفين اختي
امل""(نطقت تتبسم) حتى تسيني عليه
حرك براسو و نعت بعينيه لعدول داخلين بالفعل قربو حداهم .. سقييل كل متبع مع كلام العدل بدات اجراءات العقد و بعد اسئلتهم بقى فقط سنياتور .. وقع هو الاول و مد ليها هي سينات و تعالات الزغروتات كيف العادة و هاهي ملكو و هو ملكها .. بالشرع و القانون .. قدام الله و العباد .. خرجو العدل و جات صفية و بشرى تيعنقو فيها و يعاودو كدالك شراف البقية احمد و مصطفى عثمان و عاليا .. مشاو العدل و زاد النشاط بيناتهم ..
عاليا""(تتنعت بيديها لشراف) هز هز عليها
دور عينيه ليها تتفرك في يديها هز يديه و بالفعل تيطلع داك ستار على على ملامحها لي توحش بلا قياس حتى بالفعل توضحت ليه بزينها و سرها لي طاح و طيحو فيها .. هزات عينيها فيه متبسمة بخجل .. جات عاليا حيدت ليها سلهام بشوية و غمزت لخوها
عاليا"" بوس جبين بوس
شراف""(خنزر فيها يعني سيري تكمشي عاود دار بعينيه لها تترمش بزربة قرب تالحدا ودنيها و نطق بفحيح حتى نفسو تضرب ليها في قاع ادنيها ) مبروك علينا المرمردة گلبي
بانت ابتسامة خجولة على شفايفها و هوما مزينن بشكل مغري مخلين عينه ينزلو و يطلعو مع ملامحها منزلة بعينيها و نطقت
امل"" الله يبارك فيك
قربت صفية منها تتعنق فيها تحت نضرات شراف لي عاجبو الشوفة في ميمتو و فرحتها بيه و الشوفة حبيبتو و هي ملكو بعد عناء القلب و العقل ..
صفية "" الله يكمل عليك ابنيتي بلخير مرحبا بيك وسط عائلتك جديدة
امل""(باست يديها) الله يكبر بيك اخالتي
صفية""(قربت باست على جبينو و باس يديها) فرحانة ليك اوليدي الله يدخلها عليك بالرزق و التيسير ياربي
شراف"" امييين الواليدة يحفضك ليا
مشات مخلية العينين ديالهم عليها تاحست بيديه تسللات على يديها شافت فيه متبسمة بخجل و عينيها مع يديه لي تتزيد بشوية تاشابك صباعها مع صباعو و داك الوشام و الحنة خردل ليها العقل .. جاو العائلة كيباركو ليهم و ياخدو معاهم صور .. و لي تيشطح راه تيشطح .. الوقت تيدوز و هي حسات براسها عيات بالجلاس تا جات عاليا عندهم .. محنية عندهم حاطة يد عليه و يد عليها
عاليا"" اجيو خرجو من هنا ترتاحو بينما تعشاو الضياف
حركت براسها وشافت فيه بحشمة وقف هو لول موقفها شدت عليها عاليا من يد الثانية و مشات بيها فتحات لباب بيتها و شافت في امل نعتت براسها بغمزة
عاليا"" نمشي نعاونهم على العشاء
شراف""(طلق يديها و قرب شوية ) نمشي نكمي و نجي
حركت براسها و دخلاات لداخل سد عليها لباب و نزل لبرا يكمي .. في حين هي دخلات بشوية عليها و فرحتها بووحدها انها واخيرا دخلات لحياتو بالشرع و القانون ولات مرات شراف شخصيااا جلست على جنب السرير تتقاد في الكم التكشيطة تاتحل لباب و بانت ليه كتلتو وسط داك الباب .. تبسمت بحشمة مخلي عينيه معاها دفع لباب دور الساروت وهو تيشوف فيها بشوفات غرقوها و دوبوها .. تتشوفو تيقرب و قلبها يزيد بدقاتو حتى جلس جنبها بكتلتو الضخمة..تيشوف ارتباااك وااضح عليها غير من رموشها لي منزلتهم مع يديها تترمش و تفرك في يديها بشكل ملفت نزل بعينيه مع يديها وزاد كحز عندها تا تلاصق جسمو مع جسمها و تحنى بمرافقه على ركابيه تيطل عليها و يزيد يتمعن في رزقو مد يديه شد على يديها تيمسح ليها العرق لي وسط يديها ..
شراف""(بصوت تقيييل ) هزي عينيك
امل""(هزات عينيها بشوية اتقابلت مع عينيه لي توحشتهم و توحشت الشوفة ديالو ليها ) الصمت
شراف""(تبسم بتقالة عينيه مرخويية بشكل فضيع فيها بعض حمورية من جنابها نطق بصوتو تخين) هنى بالي دابة .. (قرب باس على جبينها ) الله يبارك ليا فيك
امل""(قلبها تيشطح و يعزف سمفونية نطقت تحت منها ) اللهم امين
بقى تيشوف مطووول ملامحها زينة و زادت ماينكرش بلي هادشي جاها قتال بالخصوص مع سواد عيونها و شفايف لي مغرقينو .. شد بيديه على دقنها مقربها ليه معلي بملامحها لعندو و ارتباكها مبين غا من شفاييف لي تيترعدو قدام عينيه .. تحنى معوج براسو حط شواربو على شوارب المحنينو طبع عليهم بوسة تقيييلة .. و احساااااس مغاااااير تماما حلااااوة زايدة و هو تيتحسس رهوفيتهم حلالو و محسوبين عليه .. بوسة ورا بوسة هاكي حق لكل شنوفة بتقااالة ماقدتش يبعد و هي مامنعت برزقو ..بعد شوية تيدوز ابهامو على دقنها ..
شراف""(نطق بصوت خاااتر و تقيل ) حلالي (عاود تحنى و طبع عليهم بوسة ناطق بصوت تخيين مخلي شواربو يتحكو مع شواريها ) عاشق في حلالي...
يتبع...
قصة ناضية