محتوى القصة
قيل عنه كألم الأسنان لكن مكانه القلب💞
وعدتك أن لا أعود... وعدت..
وأن لا أموت اشتياقاً... ومت..
وعدت مراراً، وقررت أن أستقيل مراراً، ولا أتذكر أني استقلت..
ليت الزمان كان قاسياً وأخبرني عنك وعن نهايتنا..
لم أعتقد يوماً أن هناك لقاءً واحداً وهو لقاؤنا... اللقاء الحقيقي..
وجدتك في درب الثلج منصهراً بحرارة قلبي..
ليته لم يعد يوماً وظل ذِكْرَى سيئة تجمعنا..
★اللقاء الحقيقي
فكرة وكتابة شروق كلثوم
فوحد العرس فمدينة هوارة المعروفا بموروثها الثقافي المتنوع ، وأهم ها الدقة الهوارية
فقاعة فخمة كيتسمع صوت الدقا الهوارية
البنات و العيالات كيشطحوا وكل وحدة كتبين المهارات ديالها فشطيح وكل وحدة ونيتها كاين لي كتقلب تشوفها شي مرة تخطبها لولدها كاينا لي غير بغا تنشط وتفوج على قلبها
{ فوحد القنة فهاد القاعة گالسا وحد البنت كتصفق بيديها لي مزيناهم بخاتم النقرة مع براصلي ديالو
بشرتها بيضة وعينيها خضرين بسبب ليلونتي لي مركبة على حسب العرس,
أما الأصل لون عينيها عسلي وجها فيه وحد لابيوتي كتزيد طيح عليها السر
دايرة شوية دالمكياج ممعيقش ودايرا شدا بشال مناسبا لوجها
خلود (كتهدر بزعفة): ماما حشومة عليك كون عرفتك مغتخليني نشطح والله منتبعك لهاد العرس سهير على والو
خديجة(كضحك لعيالات لي كتعرف من بعيد وكتحرك ليهم راسها وتهدر من تحت سنانها مع بنتها):واش بغيتي خوك يحيح علينا خلينا بلا شي شوهة
خلود: وراه عازلين الرجال ولا تالعيالات غيتشهاوني تقول ولدين ماريا كلارا
خديجة: سكتينا دبا يصورك شي حد يلوحك فالفيسبوك راه مبقات تيقة اللهم شدي الأرض
خلود (عوجات فمها معجبها حال ) :غنمشي لطواليط ولا حتا هيا غيصوروني
خديجة: تهزي قبل مندخل فيك بشي قرصة بحالك بحال باك ديما خارجا ليا من جنب
{وقفت وبان طولها المتوسط ولكن فورمتها تعطيها كتر من عمرها خصوصا المواخرة لي عندها خارجا وخا مكانت تكسابها ولكن وصفات مها الصحراوية دارت المفعول بزيادة
صدر ها واقف ولكن غير بالبصمة علامات الجودة، البونج)...
قبل مدخل لطواليط وقفت فالممر كتشوف راسها فالمرايا هزات تليفون لي دايراه بتخبيا على خوها كتضرب فالتصاور تشبعت عاد دخلت لطواليت زادت شويا د العكر ودوزات عليه شفايفها ..
صيفتت لراسها قبلة فالمراية معجبة بجمالها عاد خرجات
خرجت من طواليط على صوت الدقايقية لي كتهز القاعة
حاولت تحكم فهوايشها ومتمشيش تحيح معاهم ويصدق خوها مهرسها من شي قنط قدام أمة لا إله إلا الله
حست بيد جراتها من كتفها بسرعة دورات وجها
ترسمت بتسامة على شفايفها
خلود: ختي نهيلة نتي هادي
نهيلة: من صباح كنقلب عليك عرفتك غتكوني تاني مخشية فشي قنط
خلود:داكشي لي كاين راكي عارفة داك الحلوف د خويا قاليك شدو القنط مقادين على شوهة تاني قدام الناس
نهيلة: هداك مريض فراسو —إوى وقفي غير شويا نشوفو العريس ونبرݣݣو ...ها هوما داخلين نيت
"شوفة فيهم وهما داخلين بداك دفوع لي بين عليه من ليمارك الغالية و ذهوبات تعطيك خبارهم العريس القدام بكومپلي فبلو مارين..مع قاميجة بيضة وݣرافطا راجل طويل رقيق شوية أسمر اللون الإبتسامة مزينا فمو وعلاش لا وهو كيشوف فحبيبتو ولات مرتو كيعيشو ليلتهم لي غتشهد على أجمل قصة حب تويجات بالزواج داخل مع 8 درجال من عائلتو المقربة
خلود: تبارك الله بين عليهم ناس ميسورين الله يواتيهم بالخير
نهيلة: أمين أختي الله يجعل سعدها حسن من سعدي...
خلود: إن شاء الله تانتي تلقاي لي ينسيك فداك السعد الكحل لي داز عليك
نهيلة: نكذب عليك أخير حاجة نفكر فيها هي زواج ندمت لي تزوجت صغيرة تانتي عقل الصغر كيخرج على بنادم اللهم نخدم على راسي ونعيش طرونكيل حسن ليا
خلود (كتهدر فوذنيها بجهد):واش لمياء كانت كتعارفو قبل ولا زواج تقليدي
نهيلة: أه شي عامين وهي كتهدر معاه هو صحفي تعرفو فوحد الندوة كانت عندها فالجامعة
( كايهدرو فودنين بسباب الموسيقى العالية
حداهم بضبط كانو عينين وحد لمرة على خلود تحديدا كيراقبوها بإعجاب"
فاطيمة" كتوشوش لبنتها فوذنيها وتشير بيديها جيهت خلود"
حسناء: معيتيش أماما صافي فوتيه عليك..راه ݣاليك هو مديال زواج هاد الساعة
فاطمة: غير مشافها كون شاف هاد البلارة والله ميفلتها
حسناء : لاحول ولاقوة الا بالله العلي العظيم
" وصل العريس لبرزة وطلع الطرحة على عروستو و أضواء فلاش الكاميرا عليهم طلع ليها الطرحة ورسم قبلة حب قبلة راحة بعد مولات ديالو فجبهتها...توردو خدودها حشمانة من الحضور بان جمالها الطبيعي ولكن بنسبة ليه مكانش طبيعي كان الجمال لي سلب عقلو وحرق قلبو
شعرها كحل وحروفها كحلين بشرتها بيضاء عينيها مجبدين و المكياج زاد زينها
ݣلس حداها وشد يديها بين يدو
بداو عائلتهم يتصورو معهم
فاطمة عينيها على خلود جاتها على الݣانة...قلبت بعينها على مات العريس لي هي مرت لوسها
فاطمة: تبارك الله عروستك زوينة أختي زوبيدة
زوبيدة(ببتسامة): إوى غير ملي عجباتك راه الخير هداك
فاطمة: بيني وبينك مكرهت تا أناًنزوج ياسين ونتهنى عليه
زوبيدة:وخيارت لا درتيها غير هو ياسين عارفاه شوية قاصح عندو أغراس أغراس وزيد من بعد لي وقع ليه محال يقبل وزيد خصكي شي بنت مرزنة على بالك شي وحدة ولا
فاطمة: شفت وحد لبنت هنا عجباتني بلحق معرفتها شكون واش من عائلة العروسة ولا من بنات صحاباتك
زوبيدة : وريها ليا ݣاع
/بدات تنعت ليها بصبعها ناحيا د خلود فالبلاصة مشات زوبيدة سولات نسيبتها لي عطاتها لخبار صحيحة عاد رجعت لعند فاطمة فطبلة فين ݣلسين
فاطمة(ملامح الفضول على وجها) أمضرا عرفتيها شكون ، ياك ما مزوجة،ولا مخطوبة
زوبيدة(جرات الكرسي):صبري غنݣلس ، البنت يا خيتي من عائلة العروسة وباقي عزبة سميتها {خلود} هي وعروستي بنات بنات الخوتات
فاطمة: مكرهت نهدر مع مها دبا لبنت عاطيا لعين متعرفي كيما عجباتني تعجب شي وحدة خرى تبغيها لولدها
زوبيدة: نقول لعيشة توريك مها قاتلي ناس الله يعمر ليهم دار غا دراوش
"لهدرة وصلات لعيشة لي دارت معاهم لوزوم...مشات مع فاطمة فين واقفا نهيلة وخلود كيبرݣݣو فبنادم وقالت ليهم يمشو مع فاطمة عند مها راه بغاها فشي حاجة
وداكشي لي دارو مداو مجابو عند بالهم شي وحدة كتعرفها من زمان ولا شي وحدة بغا تقدا الوصفات الصحراوية ر لالة خديجة
أما فاطيمة غادا وكدوز سكانير لخلود من لور عجباتها وبغتها تكون عروسة فدارها
خلود: ماما جبت ليك وحد سيدة بغا تهدر معاك فشي حاجة
خديجة(تبسمت ليها عند بالها بغا تقدا من عندها):مرحبا مرحبا واش من عائلة العريس
فاطيمة: مرت عم العريس نيت ليمعك
(سلمات على خديجة وݣلست حداها سولو على الأحوال بينتهم عاد دخلت فالموضوع):صارحة مكاين ميتخبا شفت بنتك وعجبتني تبارك الله زوينة ومتبتا ومكرهتهشي لولدي لبغيتو وبغا الله
خلود(غير كتسمع مخرجا عينيها ماشي أوال مرة يجو فيها الخطاب ولكن هاد الزربة أوال مرة تشوفها وزيد خايفا مها تقبل حيت بين هاد الناس ميسورين ماشي كيف دوك لي سبق كيجو ليها لمݣرد حدا خوه)
خديجة(ببتسامة صفراء):خلود سيري مع نهيلة وحد شوية حتا نهدر مع السيدة
دفعت لكورسي بشوية وتمشات مع نهيلة لقاتها سبة نيت تمشي تاخد شي تصويرات فالبرزا ماحد العروسة مشات تبدل اللبسة
بقات خديجة وفاطمة فطبلا مجمعين على الموضوع
خديجة: مرحبا ألالة لا مكتابين لبعضيتهم منزيدهم غير الخير بلحق هادشي خصو وقت راكي عارفة قاليك زواج المزروب كلو عيوب
فاطمة: داكشي لي كاين بلحق أنا جايا بنيتي وربي شاهد
خديجة( طبطبت عليها ):منين نتوما
فاطمة: جينا من الدار البيضاء ولكن أصلنا من أكادير وعدنا الدار فأݣادير كنجو مرة مرة فصيف انا عندي 2 ولاد و2 بنات
خديجة:الله يحفظهم لك هيا شلوح
فاطمة:يه شلوح بالحق الولاد مكيعرفوها بزاف باقي الكبير شوية...ونتي غير هاد العزبة لي عندك
خديجة: لا خلود هي صغيرة رزقني الله ب2ولاد و2 بنات الكبيرة تزوجت تاهيا لدار البيضاء ومقدرتش تجي حيت حاملة وعندها طوابع نازلين
فاطيمة: الله يفكها على خير
بقاو كيتعرفو بيناتهم وخديجة تهضر وتقيس بعينيها فذهوبات لي كتشالي بيهم فاطمة هاتبالج ها المضمة
وزيد ملامح الراحة لي على وجها بين مهليا فراسها نيت شهبة وفيها نقيطات النمش فوجها ويديها غليضة وقصيرة شوية —
عكس خديجة لي سمراء وطويلة وتا هيا عامرة زينها مسرار عندها وحد مولاتي مسعودة لي راجعا لأصلها الصحراوي تحنتك وتهدرك
خديجة: مهم اختي غنهدر معها ومع باها ويكون خير المهم راه تلفون بينتنا
فاطمة: إن شاء الله اختي ليكان ردي عليا غنبقاو نيت فأݣادير شي سيمانة إلا بغيتو وتفاهمو الولاد نجو نرشموها فالقريب
خديجة: الله يدير لي فيها الخير اختي مهيم تليفون بينتنا
« مشات لمرة وهي تجي ونهيلة وخلود لي كانت حضياهم من بعيد
خلود : ماما ياك مقلتي ليها اه
خديجة: تنسولوا عليهم بعدا شوفي غير ذهب لي لابسا راه باينين من عائلة كبيرة
نهيلة: ولدها هو لي قلت لك صاحب خويا كون تشوفيه نتي تخطبيه راجل مرزن وثقيل والهيبة والزين والفلوس
خديجة: بصاح خبار خير هذا
نهيلة: عندها جوج ولاد إنا وحد قالت لك الكبير ولد راجلها مو متت وخلاتو صغير هو وختو ولكن لالة فاطمة رباتهم بحال ولادها وكيعتبروها مهم
خديجة: معرفت ياختي لمن بغاتها فيهم
نهيلة: وحتا نتي بحال بحال لمهم راه عائلة الله يعمر هدار
خويا راه صاحب ولدها لكبير
ديما كيعاود لي عليهم
خلود: شتكم كتخيطو وتفصلو عليا (هزات كتافها):أنا مبغا حد هاد ساعة
متسالا العرس تتسربات فيه لحريرة وثمر مع الفجر
وكل وحد رجع لدارو والعريس مشا مع عروستو الأوطيل يختمو زواجهم بليلة العمر
-----
الساعة واقفا على11
( أݣادير )
فوحد الدار كتكون من 3 طوابق بحي السلام بني جديد
دخل ياسين من باب الزنقة فيديه صاشي من الباتيسري سلم على مماه باس راسها وجلس كيفطرو
ياسين(بصوت غليض وحرش): معاش رجعتو باقي البارح
فاطمة:5صباح مالك نتا جيتي بكري
ياسين: راكي عارفة هاد السيمانة كانت عندي الخدمة مزيرة ومقديتش نسهر بزاف مع 12 جيت باغي غير ننعس
فاطمة : صراحة اولدي شفت واحد البنت وعجباتني مكرهتش تشوفها ولا عجباتك نخطبوها
ياسين( حط كأس دأتاي لي كان هاز وهدر بالخاطر إحتراما ليها): الله يهذيك الوليدة انا راه هاد الساعة باقي مكنفكر فزواج ..ومقاد على مشاكيل بعدا لا كنت نتزوج نفضل ناخد وحدة كبيرة شاربا عقلها ماشي نجيب شي وحدة نربيها وزيد عليها ماشي دبا
فاطمة(جمعت فمها معجبها حال ): أنا لي حمقة كل مرة نتحاشم مع الناس بسببك، بعدنا ݣاع من العائلة ملي ݣلتي بعد من دم ليطليك ومشينا لبراني غير باش تقبل والو
ياسين:ألواليدة الله يهديك واش وصيتك على شي حاجة أنا هاد ساعة مرتاح هكا... ومكنفكرش نعاود تجربة الزواج هاد ساعة
شلا مطارق فراسي
فاطمة( كتحاول تسايس معه):كون شفتي هاد البنت اياسين والله تتعجبك
(دور راسو بالله يعفو ولتازم الصمت مكمل فطورو)
تسمع صوت من دخلا د صالون أري نشوفها الوليدة ولا عجباتني نتزوج بيها
ياسين( بطنز):اه ها هو امين زوجيه هو نيت
فاطمة( عرفات بلي ولدها ياسين مغيوافقش وهي تبان ليها فأمين )
أمين(دخل لصالون):اري نشوف تصويرتها
فاطيمة: راه بنت الناس هاذي مكتعطي تصاورها لحد ندير معاها شي وقيتة وشوفها وتشوفك
ياسين:واش منيتكم راه غتجبدي عليك صداع الرأس امين باقي صغير على زواج ويلاه كمل القراية ديالو تيبني مستقبلوا بعدا عاد يشوف زواج
امين: اشمن مستقبل تا نتا انا غنخدم مع با ياك غير البراني لي مقابل لينا الخدمة نقابلها انا نيت
فاطيمة(صربت على كتفو):الله يرضي عليك اولدي هكاك نبغيك خليه هو تيشرف ويهرف عاد يتزوج
« وقف ياسين لي بانت القامة ديالو الطويلة الملفيتا
بكتافو العراض وطولو المهيب كتحسي به راجل ديال الزمان ملامح وجهو حرشة لحية كحلة وعينين ميلين لعسلي حجبان عامرين و شعرو كحل فيه بعض زغبات بنية ولون البشرة ديالو ميكس بين حروفو الشهبين ولون بشرتو ليسمر شويا عمرو 34 سنة استاذ جاميعي وعندو 3 د المكتبات ديال الطباعة فمدن مختلفة فالدار البيضاء و الرباط داخل شريك مع صاحبو
والاب ديالو عندو محالات الذهب فقصارية القريعة وحالتهم المادية ميسورة
مو توفات فاش دار 6 سنين وبعدها تزوج الأب ديالو بفاطيمة لي كانت ليه نعمة الزوجة و أم لولادو لي خلت المرحومة ياسين وحنان لي خلات وهيا باقي رضيعة فعامها الأوال
عمر حسساتهم بالفرق بينها وبين ولادها لخرين وتا ياسين كيعتبرها الأم لي رباتو ومعزتها كبيرة فقلبو...
هو من النوع لي يشد معاك الخاطر تا للخر ولكن إلا مشا تتعصب كيحرق الخضر واليابس وكلمتو مسموعة بين خوتو وكيعتبروه هو الأب التاني ديالهم
امين عكسو تماما فعمرو 26 سنة كيشبه لمو فالملامح لون بشرتو بيض وعينيه كحلين طويل وتا هو عندو كتاف عراض
شعرو كحل مخليه طويل شويا
يلاه كمل قرايتو
عندو كلشي ضحك باغي يعيش الحياة بطول وااعرض والسلام
امين: انا نقوليك من دبا الواليدة راه إلا معجبتني نسدو الموضوع من راسو لساسو
حسناء : غتعجبك إلا غير زين زوينة
فاطيمة: المهم نهضر معا مماها و تلقاو لا عجباتك وعجبتيها ذنقولها لباك ونمشو نخطبوها ليك
حسناء:ياك مقلتي ليهم من لول ياسين
فاطيمة:لا لا قلت ليها ولدي وصافي انا ديك البنت عجباتني وبغيتها تكون عروستي نبان بيها قدام العائلة ونعمرو دار بالحفايد
امين (تبسم مرجع شعرو لور):هيا شي زين نيت هاذي
فاطيمة: وشنو كنلعبو هنا ...فين ياسين
حسناء:مسمعتيهش قاليك غيشوف شي صاحبو راه خرج
نعيمة: شتي اش ديري جيبي ليا تلفون نصوني لديك سيدة دبا راه 1 غيكونو فاقو
----------
فوحد دار فهوارة نواحي أݣادير نيت
دار لكتسكن فيها خلود وعائلتها
خارجا من بيتها بپيجامة شعرها مجموع كعكة نازلين عليها بعض الخصلات سادا عين وحالا الثانية جايا كتجر فرجليها بپنطوفتها الوردية
خلود( ديرا يديها على فمها كتفوه):صباح الخير بابا كيف صبحتو
محمد: راه ظهر هذا اشمن صباح الخير
خلود:هدرت مع بابا ماشي نتا
محمد: إلا مسكتي غنفطرك مع صباح بشي كروشي
لحسن:اهيا واش مبقيتو تحشمو جالس معكم ومديرين ليا حساب
خلود: بابا راك شفتيني هو لي ديما حاط عليا
خديجة:راه باغي غير مصلاحتك ابنتي
محمد: سمعتك قبيلا كتهدري فتلفون مع شي حد شكون جاو فيه الخطاب
خلود:نتا
هز وحد صندالة صيفتها ليها جاتها فرجليها
خديجة: وحد المرة من عائلة العريس عجباتها خلود لولدها
محمد:اش بلانهم
خديجة:قالت ليا عيشة ونهيلة الناس الله يعمر ليهم دار ولباس عليهم وحتا ولادها مرزنين
خلود: وأنا مبغيتش نتزوج حشومة عليكم خرجتوني من القراية وسكت قلتولي ديري الحجاب درتو بزز مني وبزاف تاني ولادها مالي غناخدهم كاملين
محمد(وقف كيقاد سروال):شغلكم هذاك غير أوكان داك خيطي بيطي عند صاحبتك مبقاش حدك الدار ممنوع الخروج والدروج كترت الفشوش
خلود: انا مغتتزوجش '''''يلاه بغيت نبقا بايرة ولا ماشي من حقي
خديجة: الله يهديك راه هدرت مع نهيلة تهدر مع بنت ختها اش بان ليها فدوك الناس وراه قالت ليها بلي بغاتك لولدها صغير وولدها متفتح يقدر يخليك ترجعي لقرايتك اما لبقيتي هنا راه خوك غيعيشك فالحبس كيما كان داير لختك متهنات حتى تزوجت
خلود( غير سمعت ترجع لقراية تحلو عينيها ):زعما اماما يخليني ندير ليبغيت خفت غير يكون بحال خويا ونصدق غارقة بالولاد تا هما والهم والشقا
خديجة:هانتي غير شوفيه بعدا ويحن الله ولكن متقوليها لحد خوك إلا عرف غنتلقاو بيه برى والله تيحيح علينا يصدق مجوزك لحمودة مول الحانوت
خلود:دبا واش نتي لوالده ولا هو لاش كتخافي منو
خديجة:نتي عارفة خوك عندو سكر مكنبغيش نعصبو راك شفتي اخير مرة فاش وقفت فوجهو اش وقع ليه كنا غنخسروه
<أݣادير >
(بعد يومين)
فاطيمة يلاه سربي اولدي راه درت مع المرة الوقيتا يصدقو سابقينا
أمين: ياك ݣلتي فهوارة
فاطيمة:راه جات عند شي حد من عائلتها ودرت معاها نتلقاو فوحد القهوة حدا البحر
امين: كون درتي ليا شي بلان نتلقا مع البنت الرأس فالرأس
فاطيمة: ياك مصحاب ليك دوك صلݣوتات لي كتعرف راه الناس محترمين هادو جمع معيا راسك
امين: وخا وخا غير زيدي دبا
خرجوا من الدار وركبو طموبيل حتا البلاصة فين غيتلقاو
فهد ساعة خديجة وخلود راه راكبين فطاكسي
خديجة: قادي داك شال ونتي غير لايحه عليك
خلود(بزعفة):راه مكاينش خويا هنا وأصلان غنشرط عليه نعري شعري مور زواج وشحال من شرط إلى قبل مرحبا مقبلش الطريق لي جابتو تديه
خديجة: اهياتا تبتي شويا راه الرجال كيبغو غير الخاطر تا إلا قال ليك لا مور زواج برعيه ويولي بحال الخاتم فصبعك
خلود: كون زوجتي خويا يولي بحال الخاتم فصبع مرتو نتهناو منو
خديجة (حركت وجها كتنهد من المكلخة لي والدا):راك مكلخا ابنتي غير سدي فمك راه وصلنا
هبطو من التاكسي ودخلو القهوة
خديجة:هاهيا السيدة فين ݣالسا عمري جيت لشي قهوة فوق البحر واشفتي رزقك يوى شدي فيه
فاطيمة:ها هوما جاو ترزن اولدي حمر ليا وجهي
امين (تبسم محاول ميطلق الضحكة):كون قلتيها ليا قبل ميوصلو غنصرفقك ألواليدة تيطوش دم ماشي غير نحمرو ليك
فاطيمة(من تحت سنانها): سكتنا لا تشوهنا
أمين ( غير بانت ليه خلود جايا بلا حشمة بلا حيا بدا يطلع فيها ويهبط لابسا جلابة فالترابي بالخياطا فلونها وحاطا شال فݣرونا على راسها غير شافها داخ ليهونش خارجين صدر واقف والوجه كيبري
حس بالقرصة فجنبو عاد نزل عينيه و باس يد خديجة
وسلم على خلود بيديه عينو على يديها البيضين رقيقين وظفارها كبار شوية دايرا ليهم لافغونش
الإعجاب بان فعينيه وحركات جسادو
ݣلسو فالكراسا لي دايرن على الطبلة
فاطيمة :يوى نهار كبير هذا ياك متعدبتو فطريق
خديجة: كبير بك ألالة نعيمة
فاطيمة(بضحكة): لاسميتي فاطيمة
خديجة(بحرج): بحال بحال الله يجيبنا غير فصواب
فاطيمة: ياك متعدبتو فطريق
خديجة: لا لا حمد الله — ونتا اولدي لباس
امين :حمد لله اخالتي
فاطيمة:اش بان ليك نخلوهم يهضرو شويا يشوفو واش يتفاهمو
خديجة:اه علاش لا
امين : وخا نهبطو حدا البحر شويا أخالتي
خديجة:وخا اولدي نوضي ابنتي الله يرضي عليك
وقفات خلود وتمشات قدام امين ليكيبانو ليه ليهونش خارجين ولا يحس بالصهد ووجهو ولا حمر
لابس سروال كحل مع قاميجة بيضة وسبادري كحلة و جاكيط الكوير مع البحر كيتحرك فيه البرد مور العصر
بقاو كيتمشاو حتى وصلو شي كراسا فلاكوط مارينا
امين: يوى أخلود ياك هكا سميتك هادشي ليعارف عليك هاد ساعة
خلود (حنحنت): أه خلود عمري 21 سنة شديت الباك وخرجت من القرايا ودبا غير الدار
امين(عينو عليها):متشرفين وانا امين عمري 26 يلاه كملت قرايتي وخدام مع الأب ديالي عدنا محالات الذهب فالدار البيضاء
خلود:متشرفين
امين: اش بان ليك فموضوع الزواج
خلود(فركات يديها مع بعض):صارحة فلول رفضت ولكن من بعد قلت نعطي فرصة إلى تفاهمنا وكان فيه خير مرحبا
امين: إن شاء الله نتفهمو انا صارحة عجبتيني قبل منشوفك غير بالمديح ديال الوليدة اما ملي شفتك راه قلبي طار
(تبسمت مخبيا وجها بيديه ولا وجها حمر)
خلود : صراحة انا عندي شي شروط لا ناسبوك مرحبا ولا مقبلتيش من حقك الله يسهل عليك على محسن
امين:الله ياودي قولي ألالة خلود نتي راه تأمري ماشي تشرطي
...شخصيتو جاتها على الݣانة إنسانة كبرات فجو القمع من طرف خوها لدرجت كرهات رجال ولكن أمين حست بروحو كتشبه لروحها وبين عليه متفتح
حست بتجكيت لكوير على كتافها هزات عينيه فيه كتشكرو
في صمت
فاطيمة وخديجة بقاو مجمعين مخلاو موضوع مجبدوه شادين عصير لاڤوكا
فاطيمة تشكر فأمين
وخديجة تشكر فخلود
وكيما يقولو. ( القرد في عين أمه غزل وميدوم غير الصح)
بصاح خلود زوينة كجمال ولاطاي وتا أمين من الشباب الوسيمين ولكن معدن الشخص الحقيقي مكنعارفوه غير مع العشرة ...وداخل كل شخص كنلقاو فيه جزء من الخير وجزء من شر ولا واحد ملاك لكن كتبقا نسبة الخير كتغلب على الشر عن البعض والعكس عند الاخرين
من بعد مسلاو الحديت ديالهم وتفاهمو ورتاحو لبعض طلعو لقهوة...
خلود كتحاول تمشا جنبو باش ميبقاش حاضيها من لور ملي كيبقا شي واحد حاضيها بعينيه كتحس بالحكة نظرا لجادبية العين
فاطيمة (غير بانو ليها جاين وعلامة الرضى على وجهوم طلقاتها بتزغريتا بصوت منخفض ) : يوى اولادي اش قلتو
خلود( وجها حمار وكتفت بإبتسامة)
أمين: حنا تفاهمنا دبا غير نتوما حددو الوقت نجو نخطبوها
خديجة:الله يسر الأمور نهدر مع مول الدار وخوها ونقولو ليكم إنا نهار إن شاء الله
فاطيمة: إن شاء الله راه قربنا نمشو لدار البيضاء نجو نخطبوها ومن بعد نحددو وقت ضريب صداق نعاودو نجو إن شاء الله
خديجة: وخا بعدا تيتخطبو عاد نرسيو على ضريب صداق ...دبا الله يعاونكم باقي تبعنا الطريق لهوارة راه المغرب قرب
فاطيمة:يوصلكم امين
خديجة:فساعة الخير دبا راك عارفة باقي مكاينا شي حاجة رسميا بين لولاد مجات نركبوا عندو
فاطيمة: وخا ألالة خديجة كلامك هو الكبير
«تسالمو وكل وحد رجع لدارو»
"""""
فاطيمة:إوى كيف جاتك البنت
امين(كينقر فوق طبلة بدقة دأحواش)؛توتة البرقوقة زين ولاطاي كلشي كاين ومنكدب شاي كلشي كين
ماروخا بلوز الواليدة لي جبتي ليا
دخل ياسين ليكان خارج كيسمع تطبال من فم الباب...سلم على مماه وخوه
امين:الله ينصرك اخويا بسببك غنتزوج بتوت اللذي لا يموت
ياسينن(حرك راسو):تبارك الرحمن وصلتو ياد لزواج الله يدوز هادشي ديالكم على خير نعاود نقولها ليك الواليدة امين راه باقي طايش غذا نتي لغتغرقي فالمشاكيل
أمين (دار يدو على كتفو):ياك نتا مبغيتيش تزوج وخلي خوك يكمل دينو
ياسين(ضربو لقرفادتو):صليتي العشاء عاد ودن كمل غير نص لول من دين عاد كمل التاني ـــــ انا قلت ليك داكشي لي بان ليا ونتوما تعرفوا
تحل باب الدار من طرف لحاج حسن باهم
فاطيمة:سي حسن قول مبارك ومسعود لقيت عروسة لأمين
حسن :اشوا كتݣولي منين هاد العروسة تاني ياك ݣلتي ياسين ولا نتاقلتي لأمين
فاطيمة:ياسين شيبني ومبغا يتزوج أنا بغيت نشوف حفايدي ـــ ملي مبغاش ها أمين بحال بحال
ياسين( حط تليفون لي كان هاز فوق الطبلة):يهديك الله ألواليدة هاد ساعة زواج منقصنيش
فاطيمة (ميكت على هضرتو):الناس من هوارة أسي حسن مها صحراوية وباها هواري ومن عائلة العروسة مرت ولد خوك
حسن:مزيان ألالة الله يكمل بالخير
« نفس الموضوع تجبد فوحد دار فهوارة
محمد: ومزيان شكون بحالك تزوجي لكازا تونسي ختك
خلود (كتهضر بنفخة وكتجبد فالهدرة تزادت فيها ضلعة):حااااااجة وحدة ملي نتزوججججج متبقااااااوش دخلو فيا كلها يديها فسوق راسوووو
محمد:ايهاي هاي هاي هاي كتحشي الهدرة من دبا عندك يصيفت مك شي نهار مفدوعةولا مهرسة ديك ساعة قلبي على لي يدافع عليك، حيت وجهك غديال العصا
خلود (ببتسامة صفراء):راه مكيشبهش لك سيد محترم ومثقف
محمد: راه نتي لي ممحتارمة أقليلة الترابي
خديجة(شدات راسها):عار الله إلا مسكتو ، لحسن اش بان ليك
لحسن: إلى البنت باغا الله يكمل بالخير راه سولت خويا يسول عليهم وقالي تريكة الله يعمر ليهم الدار
خديجة: إنا وقيتا نقول ليهم يجو حيت زربانين
لحسن: بعد غذا غذا نمشي نتقدا ونتوما جمعو دار
خديجة:صافي دبا نقولها لسيدة ونيت نعيط لختي تجي تعاوني محدها هنا بوحدي منقضي والو
محمد(دار صبعو على ودنو):شوفي ألواليدة داكشي د إتلاقاو يتفاهمو راه معندنا ها ودني منكم كلشي قدام عيني
خديجة: رجوع الله راه ختك مربية متحتاج ݣاع توصيها متيقش فتربيتك ولا؟؟
اصبحنا واصبح الملك لله
....على أنغام الراديو واقفا فاطيمة كتعمر أتاي مشحر منعنع فكوزينتها
( أݣادير أݣادير، أݣادير إعزا ها لهنا ها لمان ،هالبحر هتفوكت..
أݣادير أݣادير ، أݣادير إعزا هالبحر هلمان ،ها لهنا هتفوكت)
وجدات الفطور وحطاتو فصلا مونجي ليفلمراح
دارهم فأݣادير كانت بني جديد وكلها مصلوحا ومݣبصا وغا الفراش الواعر لي حاطا حيت عزيز عليها تبان قدام العائلة
خرج ياسين من بيتو سلم على مماه بايس راسها كيف عادتو
فاطيمة :صباحك مبروك اولدي سمعت باب دار تحل بكري نتا ليدخلتي ولا أمين لي سهر فشي قنط تاني
ياسين: لا أنا هداك جريت شويا حدا البحر الجو هنا زوين حسن من كازا كون ما الخدمة كنت نتحول لهنا ونستاقر فيه
فاطيمة: كلنا هكاك اولدي ولكن راه تماك فين كاين مستقبلكم
شوف أولدي الله يرضي عليك متبقاش تقول لأمين راك تصرعتي بفكرة زواج دبا يحشمني مع الناس نتا مبغيتي تزوج بقا بلاش, ولكن هو خليه أنا بغيت عروسة فهاد دار نتا كتخرج من صباح لخدمة وتا فاش كتكون مسالي كتبقا مشغول بحوايج خرين تا من المبيتا قليل فين كتبات فدار وأمين عاطيها لدوران ... كنبقا فدار قنطانا بغيت نسمع صوت حفايدي فدار(كتهدر ولمعة دموع كتغشي عينيها)
ياسين:اللهم يتراجع دبا ولا يدخلك فشي صداع ألواليدة راه انا ليعارف امين غير البارح بليل ملي تفاهمتو يمتا تمشو عند الناس لقيتو هاز وحدة فطموبيل فاش مشيت نجيب لك دواء من الفرمسيان دبا هدا تعولي عليه يكمل شي حاجة
فاطيمة(ليفراسها فراسها):راه غير يتزوج غيشد الدار ويقابل مرتو انا كنت بغيتها لك نتا ولكن ملي مبغيتيش مبغيتش نفلتها بنت زوينة ومرزنا وهيا ليغتݣلسو فدار بزز منو ، ربي مكتب ليك الخير فزواج لول متفكرش ݣاع لعيالات بحالها ، من لول مبغيتهاش ليك ولكن خالتك الله يهديها دخلتك بالمرموحة وتݣدمتي أصلان كون كانت مرة ولالة مطلقش من راجل لول لي معروف عليه ولد الناس
ياسين(دار راسو مسمعش هدرتها لخرة):دبرو راسكم غير متجيش تشكاي ليا ملي يحطها لك فالدار ويخرج يهز وحدين خرين .. أما أنا باقي حياتي مصالحا لزواج ومكنفكرش فيه
ومنبغيش نكرفص معايا شي حد، هاد ساعة منقدرش نعطي تيقتي لشي وحدة
فاطيمة : وخا أسيدي بقا توكان تصلحها بالعنبر وتزوج
وأمين دبا يتزوج ويعجبك ـــ أجي بعدا ياك غتمشي معانا ملي نبغو نخطبوها
ياسين:إنا نهار راه باقي عندي ميدار ،محد باقي مبديت الخدمة ديك ساعة مكنكونش مسالي
فاطيمة: لا غدا نيت غنمشو عند الناس كنت بغيت غير نرشموها ساعة خوك زربان.
امين(هابط كينقز 2 درجات بالفرحة):صباحكم مبروك فاطرين بيا تاني ولا
فاطيمة:اجي تفطر نخرجو نتقداو مندو معانا البنت
امين:دي معاك حسناء هيا لي كتفهم فداكشي (مد ليها 60الف): هاكي باش تقضي
فاطيمة(هزات حاجبها):شحال هنا
امين: 3000 درهم
فاطيمة:اش غتشري ليك هاذي
ياسين (ضحك هاز حاجبو):هانتي بديتي تشوفي
امين:راه يلاه غنخدم مع الوليد صبرو عليا تاني واه
هز ياسين 4000 درهم مدها لمماه هاكي باش تقضي والباقي تالعرس وكملو ليها
فاطيمة(طبطبت على كتفو بحب ورضى):الله يرضي عليك أولدي
امين:يتوب عليك الخوادري
(هدر فوذن ياسين بهمس): باقي عندي وحد 2000 درهم نخليها غير لشوميز دونوي الليالي الحمراء تنادي
(ضحك ودور راسو بلا حول ولا قوه ـــــ عاود وشوش ليه ياسين فوذنيه ):يكما صحاب ليك زواج فيه غير ليل جمع راسك لا خصر نهار يخصر لك الليل
أمين: نرد نهار تا هو ليل ونتهنا
دار كلها تهزات وتحطات بتخمل خديجة عيطات لختها وجابت 2 عيالات يعاونوها عندهم دار فيها السفلي والفوق ولكن كبيرا نقيا وزوينة بسبب دوق خديجة وفيها جردة صغيرة حدا الباب فيها الغرس
مسحو زاج و فرشو طلامط جداد
لحسن كل شويا يحط شي حاجة فتقدية ويعاود يتفكر شي حاجة ويرجع
(بابت خلود خدام فلاح عندو فيرمة صغيرة ديال الخضرة وكيبيع ويشري فالحولى)
اما لالة خلود ليوم فششوها صيفتتها ماها لحمام وعطتها فلوس طيابة
ݣلسين فالكوزينة كيقربو الماعن ليغيحطو
خديجة(دمعو عينيها):كون غير قدات بنتي تجي لبارح هدرت معاها حسيت بيها مغبنا
ثورية"طبطبت عليها":لا حسن ليها تبقا فدارها ياك قاليها طبيب ممنوع السفر يوى تشد دارها حتى تولد —
خديجة:داكشي لي كاين
جايا خلود من صالون كتمايل من بعد مسرحات شعرها دارتو مبوكلي شعرها مارو طويل واصل المؤخرة لايحا شال عليها بعشوائية حيت عارفا خوها خاوي سيكتور
لحمام بان عليها الݣدام والحناك حمرين لي شافها يقول بصحتك وهيا دايرا تغوبيشة مراضيا تتهز الصطل
قربات لدار عاد قدات شال على راسها ليكون خوها لداخل ويگردو ليها من جدر
سالاو تخمال دار مفرشة ومقادة وطيابة غسلات دجاج وشرملاتو
جالسين فصالن كيتناقشو فسوق العيالات
ثوريا:مجتش تلبس قفطان بيض من لول
خديجة"حركت راسها":زعما يوى تمشي تكري شي قفطان عند بهيجة خلود سيري قبل ميرجع خوك عيطي لصاحبتك ولكن متخليهاش تختار لك راه الحاجة لي جات معاك تقوليك العكس
خلود: من نيتك اماما بلعكس حياة كتشوفني بحال ختها
خديجة ،"دورات راسها":يهيه راه ختك وتحسدك "شويا تفكرات ختها ثوريا لي واقفا حداها وهيا تقول إلا كانت ماشي من ماك"
مشات خلود مع حياة عند النݣافة بهيجة لكتكري القفاطن والتكاشط شي ينسيك فشي ولكن خلود بغات حاجة بسيطة وأنيقة حيت غير غيتعرفو العائلات ويلبسو الخواتم بان ليها قفطان جوهرة بسمطة ديالو عجبها وكراتو
حياة:هيا صافي غتولي مرت الرجل واش كتبغيه
خلود(ضحكت):شفتو مرة وحدة وليت نبغيه تي كيدرتي ليها راه غير بغيت نتهنا من خويا نرجع نقرا نلبس لي بغيت وتا هو عقليتو بحالي غندوزو حياتنا غير سفر داكشي ليعجبني فيه ماشي شي معقد يمرضني حاليا معجبة به ولا بقا هكا راه ماشي غير نبغيه ندوب أختي ندوب
حياة: وصارحة داك خوك يهرب منو الواحد البارح داز عليا وبدا يخنزر شويا و يجي يضربني تقول واكلا ليه رزقو
خلود(بستها فحنكها):يلاه تلاحي غدا ملي نفيق نصوني لك تجي تعاونيني
(أݣادير )
ݣالسا فاطمية وبنتها حسناء كينهجو
فصالون عمروه بصاشي د ليبوتيك
فاطمية؛الله ياربي عيت
حسناء: انا رجلي طابو شي يتزوج شي يتمحن
فاطيمة: ياك الالة عاد عطاك ياسين500 درهم باش تكساي
دخل امين عندهم
امين: تبارك الله اش هادشي كلو
نعيمة:خدينا تواب و 2 جلابات و قفطان و 3 كسيوات ديال دار وشي سراول ددجين كيما وصيتي والقوامج وشي حوايج د العيالات
حسناء:دبا مفهمت ياك سيدة كتلبس جلالب لاش قلتي نجيبو سراول والقوامج
امين: باش تلبس لي بغات
وصيتي بابا على الخاتم
نعيمة: اه راه صيفتوه ليه من المحال عاد جابو فالأمانة
ختك عاد عيطات ليا بغات تجي ولكن ممات راجلها مريضة مكاين لي يجيبها
امين: واصافي تالعرس وتحضر دبا راه غير خطبة صغيرة شكون غيمشي معنا
نعيمة: قلتها لعمتك وراجلها. وعمك ومرتو هو كيعرف الناس فين ساكنين وولدو ومرتو
امين:دبا مرت جمال اش كتجي خلود
نعيمة: خلود و مرت ولد عمك بنات بنات الخوتات
متكية فوق ناموسيتها صغيرة كتهدر مع امين فالميساجات وتبسم مع تليفون
📲📱
امين: انا من نهار شفتك نعاس طار عليا
(صيفتات ليه إيموجي☺️☺️):ممم بصاح
امين: يخليلي لي كيحشم وشنو؟ لي شاف عينيك يغرق أبنت خدوج
خلود:ناري ضحكتيني كون تسمعك ماما تقول خدوج تلغي فكرة الزواج
امين: بغات نجي نحيح ليكم حدا الدار أنا راه منك نخلاق
خلود(كتلوي فشعرها بدلاع):إوى الله يدومها محبا
أمين: يمتا غير نتجمعو فبيت واحد أخلود ــ فراسك مبقيت قاد نصبر
خلود(حست به بدا يحيد بلاكة الخجل ولكن شي حاجة فيها بغا تسمع كلامو بغا تكتاشف وتعرف عقليتو): بصاح علاش بحال دبا بحال ديك ساعة
أمين: فين بحال بحال أودي تتكوني حدايا عاد تفهميني
خلود:مممم شوقتيني ــ قوليا إمتا بغيتي لولاد وشحال من بيبي
أمين: أنا بغيتك غير نتي هاد ساعة لولاد غير غيخطفوك ليا
خلود"ضربت لمخدة بحماس وݣلست مدخلا رجل فرجل": لا لا صافي نتا وأنا غنتفاهمو مزيان مزيان
أمين:طاح الحك وصاب غطاه
خلود:نخليك ديا تصبح على خير
امين: مغنصبح على الخير تا تكوني حدايا
قرات الميساج ومجوبتش ..نعسات مرتحا لحد الأن كلشي غادي كيما بغيا هيا
اصبحنا واصبح الملك لله
فاطيمة(كتحيد عليه ليزار):امين نوض راه 8 هاذي راه درنا مع الناس نكونو عدهم لوحدة
فاق ودخل لطوليت غسل وجهو وقضى حاجتو عاد خرج يفطر لقا ياسين وباه مجمعين على الخدمة
ياسين " هاز طبليت كيوريه":هاد الموديلات زوينين فالخواتم هما ليخرجوا دبا انا كون تسمعني دخل حتا دياموند راه ولا كيتمشى حتا هو الناس ولاو يخرجو الفلوس
حسن: وتا تجي عندي الخدمة و ختار ليا نتا كتفهم فداكشي ليدخل الفلوس مزيان
ياسين(ضرب على كتف أمين):صباح الخير العريس وسريي وجد راسك راه فاطيمة غتحيح عليك
امين: ناري وليت كنحس بالخلعة بحال العروسة
ياسين: بدا يوصلك الصهد
امين: غير ضاحك سيدة عجباتني وتشجعت نتزوج (وشوش فوذن ياسين ) كون شتيها تديها نيشان عند لعدول لليلة الدخلة هازا مهز قلبي ــ ماتسلفنيش أخويا دارك ليخديتي فمراكش بغيت غير بيت النعاس و لحمام براكة
ياسين:الله يقلل حياك راه الزواج مافيه غير داكشي صحابليك بحال صاحبتك دبا تشوف براسك خصك تكون مسؤول وتا هيا نفس شي أما داكشي كيبقا حلاوة الزواج وصافي ولكن لا مكان الأساس متلقا متحلي فيه
لبسات فاطيمة جلابة فالزرق بقفطانها وحسناء لبسات كسوة صيفية منبتا بالحجر كتبان من لمارك الغالين اما امين لبس كومبلي فالكحل جا معا فصالتو وياسين لبس سروال دجين وقاميجة
خرجو من دار ودارو مع الناس لي عرضو عليهم يتلقاو فدخلة دهوارة حدا ليمونة
وصلو عائلة العريس لي كيتسماو بكنية اليعقوبي حدا الدر خرجت خديجة ولحسن وخوه وولادهم ستقبلوهم جايبين الورد والشكلاط و محملين ومجملين بصاشيات د ليبوتيك دخلو لصالون الكبير لي كاين فالتحت والعيالات طلعو لفوق لصالة وبدا الترحاب والتعارف عند العائلة
امين فرحان وفنفس الوقت خايف من المسؤوليا
لحاج حسن: يوى اسيدي نهار كبير هذا لي لاقانا فسعت الخير وراه جاين نطلبو منك بنتك المصونة لولدي صغير على سنة الله ورسوله
لحسن:مرحبا الحاج نهار كبير هذا إلا تافقو الولاد منزيدكم مننقص ليكم
دخل محمد طبلة د اتاي كأي عائلة مغربية فالمنسبات كتهلا في الضياف
اما الفوق عند العيالات خرجات عندهم خلود لبخرجاتها نهيلة بالصلاة والسلام
سلمات عليهم ولي شافتها تشكر فزينها
فاطيمة(عجبها لحال وزين خلود جاها على الݣانة دور دور وتشكرها):تبارك الله على عروستي الله يحجبك ابنتي
خلود: امين اخالتي الله يحفظك
تحط اتاي والحلوة وتبعو بدجاج محمر ولحم بالبرقوق و السفة والديسير
وخلاص كلاو الناس حتا شاط الخير
فاطيمة(بصواب): مكنش عليكم تشقو راسكم اختي
ثوريا: مرحبا بكم الله ياودي
بداو العيالات يجمعو بينتهم وشي كيتعرف على شي
عند الرجال
حسن: يوى اسي لحسن خص الولد يشوف البنت إلا تفاهمو
محمد:اه ضروري نضرة الشارعية وهاذي اول مرة يتشاوفو يالله تشوفها وتشوفك بعدا وتتفهمو
ياسين جالس ومرة مرة يهدر هو شخص سكوتي كيهدر بالعبار وبالمعقول
ملي سمع كلام خو خلود عرف بلي مفراسو راه تلقاو عند البحر وعرفو غير من هضرتو بلي زامت ختو
" هو فتربيتو لخوتاتو معمرو زمتهم بالعكس كيحس بلي البنت إلا زمتيها عاد تخرج ليك من جنب كان عاطيهم حريتهم في حدود ملي كيشوف شي حاجة كبيرة عاد إدخل ود
.... 💞عمرو ظن أنو غتجي وحدة غتبدل ليه هاد القاعدة وتخليه يدير حوايج بعاد عليه كليا
طلع امين فالدروج تبع محمد حتا طلعو الفوق وداه لوحد البيت فيه سدادر وعيط لختو
محمد(بتخنزيرة): خلي مسافة الأمان بينك وبينو وهبطي عينيك 5 دقايق خرجي ولا ندخل نجمعكم بجوج
خلود: دخل نتا بلاصتي حسن
محمد(تلفت موراه ورجع شاف فيها): دار عامرا اما غندخل لك وحد الحنك نعلمك صواب لينقصاك أ قليلة الثرابي
" دخلات وݣلسات قدام امين
أما محمد بقا واقف فم الباب مرة مرة يطل عليهم كينيش عينو عليهم بحال سيف
طلع أمين عينو فوجها وغير مازاد تصدم من زينها بالمكياج والبلدي يلاه وقف يݣلس حداها نعتات ليه بحجبانها جيهت خوها
دور عينيه بان ليه خوها كيشوف من الباب رجع ݣلس بلاصتو
امين(بتلفا مبقا عارف أش يدير):كيف راكي لباس
خلود: الحمد لله ونتا
امين: لباس كون ماخوك لي واقف علينا
( ضحكت بشويا )
امين: يحسن عوانك معاه
محمد(دخل عندهم مغوبش):صافي شفتيها شافتك يالله ليكاين قوليه الواليدة
خرجات خلود عند ماها وهي اصلان كانت موافقة قالت ليهم خديجة راه وفقات وبداو زغاريت وصلاة على النبي
طلبو من الرجالا يطلعو الفوق عندهم باش يلبسو الخواتم ويتصورو يالله غيطلع ياسين حتى سمع صوت تلفون كيصوني
( كمش حجبانو.. عارف إمتا كيتاصل به):الو نسيب لباس كيف الخوادريا كلشي هنين
عبد العزيز: اودي اخويا ياسين راه وقف حدا داركم فأكادير تنقشنا شويا وهيا تجمع حوايجها بغات تجي فالكار وقلت نوصلها تا تبرد تاني
ياسين (عض على سنانو عيا من التبرهيش د ختو):هاني جاي دبا نيت
(خرج معصب كل شهر تجي تغضب وهاد المرة جايا حتا لأكادير
سايݣ طموبيل كيݣمݣم بوحدو)
ياسين: قاليك تزوج تهنى زواج المحاين دبا هادي متخصر عليها إطرو مازوت كل مرة جامعا باليزتها بلحق تهوا راخي ليها أما جمعت باليزا يجمع ليها 5 ويصيفتها
فالصالة شادين العرسان وحد سدايري مݣادينو بحال البرزة لبسو الخواتم وتصورو ودارو كسكروط مع المغرب حبسوهم العشاء ولكن رفضو كل وحد تاجه لدار ديالو
امين:مفهمتش انا علاش مشا بلا ميقول والو ياك مشاف خلود وتنادم معه الحال علاش رفضها
حسن: الله يستر شوف قدامك تمشي ضرب شي حد ونعل شيطان راه صونا ليه راجل ختك ، جايا تاني غضبانا وسيد بغا يرجع مجتش يتسنا حتا العشيا قدام دار ومشا بعدا غير يحل ليها الدار تدخل
فاطيمة: هاد البنت مبغات تدير عقلها
امين:يا لطيف واش زواج كلو هكا داير
حسن:وشنو صحابك راه نهار بيض و نهار كحل
امين(تفكر خو خلود ): الله يستر وصافي ــــ أنا مكاين لي خالعني فداك زواج قد داك دلقوش د خوها
حسن: مالو السيد غير خايف على ختو وصافي
أمين:مالنا فالعصر الحجري
(قبل عند ياسين)
وصل لحدا دار سلم على راجل ختو لي كان واقف بعيد على دار
(حس بالإحراج من تصروفات ختو):سمحلينا بزاف أعبد العزيز زيد دخل
عبد العزيز: نتا لي سمح ليا مخليتك تكمل الخطبة دخوك راه زربان ، مهم ملي ترجعو نجي ندي حنان على متبرد شويا
حاولت معاها فدار والو كلمة وحدة على فمها بغيت نطلق
ياسين(تنهد): واش ممفهمينش بيناتكم
عبد العزيز: ألا هي مرة مرة كدير هاد دراما غدا تصوني تاني عليا يمتى غتجي ليا ولفنا هادشي كتبقا فيا غير ديك البنت صغيرة كل مرة جاراها فشمس بزز باش خلاتها لواليدة
ياسين(ضرب على كتفو): وسع خاطرك شويا غنهضر معاها
عبد العزيز: يلاه سمح لينا مرة خرا أبا ياسين
مشا جيهت الباب فين جالسا ختو حل لباب بلا ميهدر معاها ودخل باينا عليه معصب
دخلت موراه جارا الباليزة
حنان:هذا المضمون فيك اخويا حتى السلام مقلتيه
ياسين،(تلفت ليها منيرڨي):واش عندك شي عقل ولا لا كل مرة مجرجرا معاك هاد السيد كون انا منو والله تنصيفتك لدار باك نهار لول تا بنتك مكتديها فيها بقا غا الراجل
حنان: ياك اخويا سولني بعدا غير اش وقع نيشان أنا لي خايبا
ياسين:اش وقع بسلامة الله راه باينا كل شهر خصك تغضبي كرهتي ديلمي فزواج كثر ما كارهو الفشوش الخاوي
حنان (حيدات شال على شعرها لاحتو كتنش على وجها):راه قلت ليه ديني الخطبة دخويا وقاليك حݣا مو مريضة وهيا غير كتمثل بلي مريضة شحال قدي نبقا تبعا هبالها
ياسين(كيهدر مكشكش ):تمثل ولا مثمتل هو راه عند بالو مريضا ولكن هو ليمعرف يربيك كثر ليك الفشوش حتا خرج عليك دبا منسمعش حسك سيري تكمشي قبل منفوت فيك شي دقا ݣنس كيف داير مو مريضة ومخليا ليها بنتك من الفوق وكتݣوليها بوجهك حمر
حنان (بقا ليها غير تنتف راسها):وناري راه ممريضا وزايدون ماشي بنتي بوحدي
ياسين: حنان غبري مبغيش ندير فيك يدي
هزات كتافها ملي بان ليها طالع فدروج
و مشات لكوزينة كتقلب على متاكل وهدرت خوها دخلات من وذن وخرجت من الثاني هيا عايشا بمبدأ انا وبعدي الطوفان
لي كيهمها هو ترضي راسها فقط شي لاخر ولا على بالها
مشا ياسين توضا وصلى صلاتو وتكا فبيتو ينعس شويا هو شخص رزين ومتبث مكيتعدا على حد ولكن إلى تعصب حالة خاصة مكيبغيش لي يستحمرو ومع ذلك هو ماشي شخص ميتالي عندو عيوب كيما عندو ميزات
سمعت حنان صوت والديها وهي تخرج عندهم
(حنان فعمرها 28سنة وكتشبه لخوها ياسين لونها ما بيض ما سمر من النوع المسرار طويلة وعندها حقها من كل حاجة وكتبقا ليها مكانة خاصة عند ياسين وخا يزير معاها ولكن كلشي إلا حنان لي خلت ليه مو فرقبتو وهو ولد صغير)
حسن( معجبوش لحال ملي شافها):واش ابنتي باقي مغديري عقلك زعما راه وليتي أم
حنان(عنقاتو): وصافي ابا راه باقي ݣاع مهضمت كلام ياسين بلا متزيدوني وزتيدون فين بغيتوني نمشي راه نتوما وحدكم لي عندي
حسن:زيدي كولينا بحلاوة لسان كون كنتي كتخدميها معا ناسك ݣاع متلقاي المشاكيل
بدات تقلب عينيها معجبها كلامهم
فاطيمة: دبا لي وقع وقع واش عبد العزيز مشا
حنان:اه يلاه عيط ليه قرب يوصل
امين( ميق فيها مخنزر):ياك زعما جيتي غضبانة ولا غير سبا
حنان: انا كنت بغيت نجي نحضر لك وصافي نتوما رجعتوني غضبانا
دخل ياسين عندهم لي برد شويا من جيهت ختو
ياسين: دبا محضرتي مخليتينا نحضرو فخطرنا
حنان (بصوت منخفض):وتا نتا أخويا ليسمعك يقول بلي خطبتك هادي ــ كيداز بعدا داكشي والناس كيف دايرين والعروسة
فاطيمة: وا الحق يتقال الناس د المعقول
امين: داك خوها مارتحيت ليه ياربي السلامة ݣنس حسن عوانها مسكينة معه
ياسين(ضحك مستهزاء):لكيقول المعقول ولا ݣنس بهكاك والماء دايزا من تحتو خلي كون راخي لحبل
امين: مالك نتا كنتي داير لخوتاتك هكاك
ياسين: ليتزوج شي يربيه خوتاتي محدهم محتارمين الحدود لي راسم ليهم راني معاهم بات مزيان
أمين :كيف جاتكم عروستي بعدا
حسن:تبارك الله الله يحفظها غير نتا دير عقلك راه زواج كيبغي يكون الرجل والمرة مسؤولين
ياسين(جمع الوقفة):بعد غدا إن شاء الله غنمشي
حسن:كلنا غنمشو راه درت مع بات خلود سي لحسن موعد ضريب صداق و قال بلي البنت مبغاتش العرس
فاطيمة :لاواه انا بغيت نفرح بولدي وندير عرس مطرطق
حسن: لي بغت البنت بغات حفلة صغيرة بين العائلة الله يسخر بلا منضغطو على الناس
حنان:مزيان حتا لسبوع وديرو العرس حفلة بينتنا بركة
حسناء:وصلتي ياد لسبوع
فاطيمة: وشنو لاش زوجناه غير باش يعمر علينا الدار
أمين:هداو عليا أنا باغي مرتي نعيشو الحياة عاد نفرخو
فاطيمة:جيبها بعدا ويحن الله
بقاو مجمعين وحد ساعة و مشا ياسين جاب العشاء من برى تعشاو
ݣالسين وسط الشراوط فبيت خلود كيشوفو دهاز لي جابو ليها
خديجة (هازا حاجبها كدور عينيها على دهاز):تبارك الله وها الدهاز ماشي 2 بيجامات لي جاب لي باك فاش خطبني وباقي يجبدهم لي
ثورية: ياختي باين عليهم ناس عامر جيبهم شوفي غير الخاتم د الخطبة
خديجة:راه عائلة ذهيبيا عندهم بزاف د المحلات ديال ذهب
خلود(رمات عليها وحد ثوب):خودي ليك اماما هاد الثوب وتانتي اخالتي هاك هذا
ثورية: غير خليهم ليك ابنتي راه ديالك
خلود:لا راه كاين بزاف
خديجة: غير خوديه اثوريا راه اصلان تا حنا باقي غنشروا ليها نكبرو بيها قدام ناسها
ثوريا: وحد الرجل كان بينتهم لتحت ولكن مبقاش بان ليا ملي بغينا نركبو الخواتم علاش مطلعش
خديجة:هذاك خو امين الكبير مشا عندو شي غراد على ماقالت مو
سمعو دقان فالباب ودخل محمد
داير صبعو على ودنيه كيتحلف :خولودة عندك شي نهار يزغبك الله وتلقاي بيه راه ماحد باقي مكتب عليك راه مكاين والو وتا لهدرة فتليفون نقصيها
خلود(ببتسامة صفراء):الله يحفظك ليا أخويا العزيز
خديجة:اولدي راه الناس غيمشو لكازا فين غتلقاه تا نتا
محمد:انا داك الولد باقي كيبان لي برهوش كون بعدا قلتي خوه كيبان مرزن وشارب عقلو لا بغا يتزوج جات معاه بقات فجوج زغيبات
خلود:غير ملي عجبك خوه باين شي ݣنس بحالك
دخل البيت بغا يجمع معاها بتصرفيقا ولكن تدخلات خديجة وخرجاتو من البيت بالكشايف وخلود تخبات مور خالتها وخا كتخاف منو ولكن صنطيحة ضروري تخرجها
ثوريا:سدي فمك راه دبا يضربك يخلي فيك شي إمارة
خلود(مسحات عينيها لي دمعو بالحݣرة):تفو الحمار لاخر بسببوا بغيت نتزوج نتهنا منو الله يعطيه مصيبة
اصبحنا واصبح الملك لله
خديجة(شادا على ظهرها من الأسفل):كنحس بظهري تقسم اربي سمحيليا اختي شقيتك معايا
ثورية:ولاواه اختي متقوليش هكاك راه خلود بنتي تا انا إلا باقي كاين فاش نعاون قوليها ليا
خديجة: الله يحفظك اختي ويحفظ لك وليداتك صافي راه سيقنا ورجعنا الماعن كلشي مقاد
خلود(كتحسب بصبعانها):ماما دبا واش من هنا لشهر صافي غنتزوج باقي ممتيقاش
خديجة: وشنو كنلعبو هنا لبنت مكتيق راسها مزوجة تيدخل عليها الرجل وتحول من بنت لمرى
خلود(معندهاش حياء فهاد المواضيع مع مها) ~: بصاح
خديجة: عندك تنساي بعدا ضروري تمشي معه ملي يقرب النكاح تدوزي عند طبيبة
خلود: لا لا إلا متقش فيا بلاش منو
خديجة(خرجات عينيها):سمعني ملي نكون نهدر سيري معه دوزي راه داكشي بحر تصدقي فشي مشكيل والله تينحرك خوك
(سطات بنفخة)~: صافي وخاـــ دبا واش هما غيرجعو ولا شنو
خديجة: اه داكشي لي قالو غيجو ديرو لاكط فأكادير وشي حفلة صغيرة وديك ساعة تمشي معاهم لكازا ديك ساعة غتكون ختك قربات تولد ونجو عندك
خلود : دبا واش غنسكن مع والديه حيت قالي باقي مشرا الدار مي قريب يشريها
خديجة:داكشي لي خالعني ونتي تا حاجا متعرفي ليها جاب الله ديك فاطيمة ظريفة
ثوريا(دخلت عندهم كتقاد فشالها): ~ نهار لول كلشي كيبان ظريف ولكن راه العݣوزة غير تشوف لولد كيحمق على مرتو كتجيها الغيرة شحال من طفلا عندك
خلود: 2 لي جات البارح ووحدة مزوجة على مقال لي أمين
ثوريا: إوى بعدا وحدة مزوجة وهاذيك باقي صغيرة متلقاي معاها مشكل غير تا نتي ديري عقلك وتهلاي فراجلك وفناسك ومشاكيلك خليهم بينك وبين راجلك
خلود: انا غير ملي وافق على شروطي هذاك هو المهم والباقي يتقاد مع الوقت
/خرجت كتغني بصوتها ليتقول عليها شيخة من طراز الرافيع/:~ ولي مرباه الحب أنا نربيه أجا يدير جابو الهوى فنصصا دليل...
أكادير
خارجين من الدار بعد صلاة العصر بليباليز متجهين لكازا
فاطيمة: لحاج حسن نركبو فطموبيل معاهم راك عارف حنان لعقل الله يجيب
و طموبيل لخرا يركب فيها ياسين و امين
ياسين: كون ركبتي معاهم تسوݣ لواليد كيعيه سوݣان
امين:راه ديك الهبيلة د حنان بغات تصوݣ
ياسين :غير تزوجات ولات كطير كثر من لول ولكن كلشي من راجلها فششها حتا طلعات ليه فوق الراس
امين: هيا حتا انا بلا منفشش مرتي
ياسين: على حسب كل مرة وشنو خدام معاها
امين: انا هاذي من دبا نقولها هيا ليغتحكمني أنا كنذوب قدامها
ياسين (ضحك حتى بانو سنانو البيضين وعطاها ليه لقرفادتو): ياك ابا امين واجمع راسك وديها فخدمتك تا هي لمرة (كتبغي إقلريضن تسنت نغد أهو)
امين: سنغ سنغ ــ بعد المرات كنخاف نكون تسرعت المشكيلة لبنت عجباتني وبغيتها ولكن خايف من زواج فسيمانة تبدلو احلامي كنت بغيت نسافر لبرى ونزيد نقراء كنت بغيت غير نشد فالواليدة ولكن ملي شفتها تبدلت فيا شي حاجة أفكاري و أحلامي واقيلا طحت فالحب
ياسين: دبا صافي غير تبت خطبتي البنت ورسيتو الأمور توكل على الله بنات الناس ماشي لعبا ماشي حتا خطبتيها عاد يتنادم معاك الحال
امين: ألا مندمتش أسي كيف جاتك مرتي المستقبلية بعدا
ياسين(كيضوبلي الكاميو لي قدامو): اولا مشفتهاش ثانيا مكنشوفش فعيالات رجال و خصوصا مرت خويا
امين: وتا انا نخليها معاك فصحراء ومنخاف عليها
ياسين:ياك قالوليك عليا ماشي راجل ولا؟ باش تخليها معايا فصحراء !
امين بقا كيضحك وكل مرة يجبد موضوع مع خوه هو عزيز عليه يضحك ويهدر اما ياسين وخا معندوش مع كثرت الهدرا ولكن امين عزيز عليه كيبغي يدير ليه خاطرو مقطر ليه من عينيه من صغرو
داز شهر كل وحد ملهي مع حياتو
ياسين لي واقف على الخدمة ديالو فالمكتبات ودار النشر حتى تطبعو النساخ جديدة د الكتب
اما لالة فاطيمة وحسناء وحنان بقاو ملهين مع دهاز الثاني د العروسة والحوايج لي خصهم
اما وحد امين عطيها غير نعاس والدوران و كيبقا يهدر مع خلود بليل
فاطيمة: أمين راه اولدي هادشي ليكدير فيه ماشي معقول شهر حتا نهار محطيتي رجليك فالخدمة عند باك متخلينيش نندم حيت تقت فيك
امين(عنقها كيجر فحنكها):وصافي الواليدة حتى نتزوج ونخدم وزايدون راه بحالي بحال با كلنا مول الشيء
فاطيمة: وراه فلوس دهاز وبيت نعاس باك ليخلصهم من جيبو وكون غير عاونتيه فالخدمة انا كنهدر على قبل مصلاحتك راه حنا مديمين ليك اولدي
امين(باس راصها وجر ليها حنيكاتها هاد لمرة بجهد تغوتات):صافي الواليدة كنواعدك مور العرس غنمشي نقابل الخدمة ونصيفت لك الوليد لدار هاد الفيلم كلو عليه غير كوني علا خاطرك
فاطيمة: عالله دير عقلك
حنان(دخلت عليهم لصالا):ماما لمهم انا غذا غنمشي نجيب تكشيطة عند الخياطة نجيب ليك ديالك ولا تجيبيها لراسك
فاطيمة: غير جيبيها ليا ابنتي معندي الوقت لي يمشي لقصاريات مهم 4 تكوني هنا راه نصلو العصر غنشدو طريق
حنان: صافي كوني هانيا راه حتا عبد العزيز غيمشي و مماه وختو
نعيمة:يوى مزيان هكاك حسن عݣوزتك عمرها شافت دار لي فأݣادير نفقصوها شويا
حنان(تلقات ضحكة د شيخات):~ ومن بعد تجو تقولو لمن كنشبه راه كنشبه ليك غير نتي وخا مولدتينيش من كرشك
فاطيمة:سيري سيري راه خليتي راجلك كيتسنا بزاف
وصل يوم سفر والوجهة كانت أكادير عاصمة وجوهرة سوس ماسة...المدينة ليتبنت على أنقضها مرة أخرى بعد زلزال لي ضرب المنطقة
مشاو ف 3 طومبيلات
عائلة أمين و حنان وناسها وياسين مع عمو ومرتو وبناتو
بعد 4 ساعات دخلو لمدينة
أكادير ديما جوها مختلف على باقي المدن دافيا ففصل الشتاء وباردة ففصل الصيف، شي لي كيخليها وجهة سياحية بمتياز
و فيها كتشوف المدينة وسط الجبال منظر ساحر
توجهو نيشان لدارهم لقاو خوتات فاطيمة دايرين الواجب جمعو دار و وجدو الغداء
( تافقو مع عائلة العروسة يديرو العقد ويفرحو بيهم شوية فحضور العائلة المقربة فقط وتمشي العروسة مع راجلها
كان كلشي مشغول كيوجد بحب لهد العرس بعتبار اوال عروسة غدخل لهاد الدار بطريقة مرغوب بيها عكس الزوجة الألولى لي كانت بنت خالت ياسين وكانت مطلقة وعندها ولد والعائلة بزاف منهم مقبلش بيها
فاطيمة مقادها فرحة وتا سي لحسن
بعد محاولات من أمين أنو يقنع خلود يتلقاو ويخرجو أخيرا وافقت ليه بمساعدة مها قدرات تخرج من دار بلا ميعيق خوها بها مشا ليها تالهوارة
وقف فرأس الدرب كل مرة يهز عينو على أمل يلمحها خايف يكون خوها حصلها ويصدق زواج ملغي من ساسو
بانت ليه جايا لابسا كسوة فالأبيض ولايحا عليها شال فالزرق لابسا طالون بيض وهازا صاك زرق كان وجها خالي من مساحيق تجميل من غير واقي الشمس مع بشرتها دهنية كيبقا وجها يبري بقا كيتأملها توصلت لعندو
جربت تحل الباب متحلش عاد دقات فالزاجة مفيقاه من التأمل
(حل لباب ببتسامة ومد يدو سلم عليها ركبت حداه وركبت لاسنتور ونطقت بنبرة هادئة مع بتسامة كتزيد تبين سنينتها البيضين)
خلود ~ ياك مطعتلت عليك بزاف
أمين(ديمرا طموبيل كيرجع مرشليان) : ~ على قبلك نتسنى عام ونقول باقي الوقت
خلود(ضحكت ودارت يديها على فمها): أجي واش غتبقا تقولي ديما هاد الكلام ولا غير نتزوجو صافي
أمين( تلفت ليها): مبغيتش نحرق ليك المراحيل ونݣوليك شنو غيوقع مور زواج
(جمعت فمها وحركت راسها بتأكيد فهما قصدو السافل): ممم ياك أسيدي وخا
مدت يديها بقات كدوز الأغاني تا وقفت على أغنية سعد لمجرد وبقات كدندن بها
ومرة مرة يهضرو فشي موضوع كيزيدو يتعرفو على بعضيتهم تدخل لإنزݣان
أمين: على بالك شي بلاصة نمشو ليها
خلود: أه
(كتفرك صبيعاتها):~صارحة أمين أنا مجيتش باش نمشو ندورو كيما درت معاك لبارح
(كمش بين حجبانو والقلق بان فوجهو) ~ خلود واش تراجعتي على زواج ولا ؟؟
خلود( بنبرة سريعة) ~ لالا ماشي هكاك ماما طلبت مني نمشو عند طبيبة بلعت ريقها وكملت هدرتها على حسب شهادة العزوبية
أمين( حط يدو على قلبو) ~: خلعتيني بعطيك متاكلي عند بالي تراجعتي قولي هكاك هو ميحتجش أنا بغيك نتي والصلاة عالنبي ومكيهمني والو ولكن ماشي مشكيل نشوفو طبيبة نيت نعارفو كيف نتعاملو
( دورات وجها لزاج مزداتش هضرات بطبيعتها زعيمة خصوصا مع أمين ماشي من النوع لي كيحشم ولكن فهد المواضيع كيجوها مصالحش لهدرة فيهم قبل الزواج)
أمين( مد يدو ونطر ليها الشال لي كانت ليحاه على شعرها) ~ حيديه عليك خليني نكحل عيني
خلود (تبسمت ليه) ~ مبقا والو ونحيدو بمرة بعد غدا غنكتبو كتابنا
أمين(هز يديها وبسها): مبقا والو وغنكونو بجوج وديك ساعة حد ميقدر يتدخل فينا
(سحبت يديها بلاباقة) ~ حسن نزربو شوية نخاف يرجع خويا قبل مني
أمين : كتعرفي شي طبيبة
خلود (تفكرت كلام مها لي وصتها تخليه يختار الطبيبة):لا شوف نتا لا كتعارف شي وحدة هنا
خدم جي بي إيس وشد الوجهة تا وقفو قدام عيادة مكتوب فالپلاكة دكتورة أميمة طب النساء والتوليد
نزلو من الطموبيل وهو شاد فيديها
كتحس براسها كتعيش حوايج جداد عليهاخروجها مع راجل غريب لبلاصة لي داخلين ليها شعرها لي تحرر من الحجاب لي بنسبة ليها كان خانقها
تبعو الأسهم لي مرسومين فالحيط كيبينو طبق لي فيه العيادة ولحسن حظهم لقاو فقط 2 نساء مع رجالتهم
متسناوش وقت طويل باش يعيطو عليهم
دخلو لعند طبيبة لي سولات على سبب زيارة
خلات أمين يشرح ليها
فهد اللحظة وخا عارفة راسها نقرة صافية لكن الخوف تسلل لقلبها، خايفا يكون وقع ليها شي مشكيل فصغرها كيما كتسمع فالقصص لي كيوقعو خافت تكون فقدت بكارتها بحراكتها العنيفة ـــ سمعت صوت الطبيبة كتنادي عليها دخل لغرفة الفحص
كتحس بالغرفة باردة بحال داتها مبقات عرفت واش برودة الغرفة لي سيطرت على أنامل جسدها ولا برودات جسدها ليغلبت على عقلها الباطيني تكت فوق البياص وسرحت رجليها فالحديدات مفرقاهم بعد محيدات ملابسها الداخلية
شهقت على إتر الألة باش كتقلبها طبيبة حست بالبرودة زادت نملت جسدها و الخوف سيطر على أفكارها وجسدها منتبهاتش لرجليها لي بداو كيترعدو بطريقة غير طبيعية تبسمت ليها طبيبة كطمنها بعينيها
طبيبة:ساليت أبنتي لبسي حوايجك وخرجي عندي
دقائق وخرجت لمكتب بمشية مرتبكة
طبيبة: البنت نقيا تبارك الله وبنسبة البكارة لي عندها فاهي البكارة المتصلبة السميكة
نطق أمين وخا مفاهم والو
~ : ماشي شي حاجة غتجيها صعيبة؟
طبيبة: هاد الغشاء كيكون صعب التعامل معه خصو عدة محاولات لأنو سميك و لكن لاكان وجع بزاف على المدام حسن تدخل طبي ولاحظت أنو المدام عندها تشنج فالمهبل
هادشي بسبب الخوف الزائد
(شافت فعينيها نيشان): من الأحسان قبل العلاقة تكوني مهدنة ومتفكريش بزاف أمدام هاد الخوف غيعدبك فالعلاقة حسن تغلبي عليه طبعا بمساعدات الزاوج ديالك
خلود(بقت محدقة عينيها فطبيبة ما فهما والو والخوف باقي مسيطر عليها حوايج جديدة كتكتاشفهم فراسها )
أمين : ماشي شي مشكيل كبير
دكتورة(تبسمت ونطقت) ~ : هو فالأصل ماشي مشكيل هو فقط حالة نفسية كتسيطر على الجسد غير البداية كتكون صعيبة ومن الأحسن تكترو المداعبات
خلود( مفهمات تا كلمة من غير البنت نقيا جاتها على الݣانة الباقي يحن الله شكرو طبيبة وخرجو من عندها من بعد إصرار كبير من أمين قنعها أخيرا يمشو لشي قهوة وداكشي ليكان طلعو لوحد القهوة فأكادير أوفلا خلا طموبيل لتحت وطلعو فتليفريك
كانت تجربة أولى ليهم بجوج دازت بيهم فوق لاكوط والمنظر ولا أرواع
هالبحر هالجبال هالمولات كلشي كيبان من لفوق
ݣلسو فوحد القهوة تماك
كانت كتجمع بين الأصالة الأمازيغية والمعاصرة مفرشين غير فالأرض زرابي وحاطين المخاد والقنادل فكل قنط ، أجواء أمازيغية بمتياز
ومول الكمانجة مرة مرة يدور على القهاوي ليتماك بلحن أمازيغي سوسي ، كيضرب فالكمانجة ويغني
" أحبيبينو راديك نمون ريغ أنمون أنمون أوى إغيتريت أديك نمون أداك أورتنيت أهو نكين أرك نرا..." أراتمنت مداك إنان أيخفينو أنمون أوى نشرك لحب نشرك أوال نشرك تايري فنمون أوى....
(كينين شي شلوح هنا ولا والو)
علق ليه أمين 50 درهم وݣاع الزبائان ليفيهم لعرق تسوسيت علقو ليه
--
أمين: أش بان ليك فكلام طبيبة
خلود(رجعت خصلا مور ودنيها):مكيعجبنيش نهضر فهادشي خصوصا حنا باقي مطيحنا العقد غير ماما قاتلي ضروري تمشي ملي غيكون نهار العقد هو نهار الحفلة لي غنديرو
(فهم بلي حشمات تهدر فهادشي بذل الموضوع ):مكتعرفي شلحة والو والو
خلود:ههه والو هاد ساعة تتعلمني نتا
أمين: كنعرف غير شي كلمات خويا ياسين لي كيهدر بيها شويا
خلود: ديما كنلاحظ ملي كتهدر ليا على خوك عينيك كيلمعو سعداتو بك
أمين: سعداتي به وسعداتو بيا وسعداتي بك
خلود(ضحكت ضحكة عفوية): بالحق شكون كثر ولا عزيز عليك أنا ولا هو
أمين(سكت مدة كيفكر من نيتو): بجوجكم مكنقدرش نتخايل حياتي لقدم من غير واحد فيكم
خلود: إوى الله يخلينا لك الناس كيوحلو مع لوسة أنا بان لي غنوحل مع اللوس
أمين ( شد القهوة لي معطرة بالأعشاب عند السرباي ومدها لخلود وخدا كاسو):~ عارفتي هاد القهوة كترجع الروح وقتما جيت لأكادير ضروري نشربها)
خلود: أنا وخا قريبا ليا أكادير قليل فين كنجي غير لا جينا عند خالتي وكنا نمشو معاها لبحر صافي
أمين :فكرتيني بعدا فين بغيتي ندوزو شهر العسل
خلود: معرفتش كنسمع بزاف على إفران ومراكش وشمال
أمين: فايت مشيتي ليهم
خلود (حركت راسها ب لا): أنا حدي تزنيت تا ختي ليفكازا ملي كتمشي ماما كتخليني نقابل الدار
أمين: إوى على هاد الحساب غنساريك فݣاع المغرب
خلود(وسعت عينيها بالفرحة): يخليك ليلي
أمين (كحز لحداها تقاس فخدو فخدها وخدا يديها بين يدو )؛
~ ندوزو شهر العسل فشمال ألالة أش بان ليك
خلود(هزات فيه عينيها): فكرة مزيونا هادي
أمين: واعدي أنا على العايلة دالرواية وليتي تهدري شمالي من دبا
ضحكة وضربت على كتفو
خلود: هيا كتعجبك الشمال
أمين: بزاف كتحس براسك خارج المغرب ديما ملي كنبغو نسافرو مجموعين كنوحل مع ياسين هو عزيز عليه جيهت مراكش أكادير الصحراء
أنا الشمال
خلود: لا كنتي عزيز عليه كيما هو عزيز عليك راه غيدير ليك خاطرك
أمين: ياسين ماشي غير خويا كنشوفو فمقام با كيسبق راحتنا على راحتو وخا كيقجر علينا مرة مرة
خلود(شافت فساعتها) : ~ ويلي 3 هادي مشا لحال خصني نمشي
أمين: مسخيتش بك
خلود: بعد غدا غنتزوجو وراك وراك والزمن طويل
وهما خارجين من أكادير وقف أمين فوحد البوتيك د مروى بان ليه كانو فيه ملابس عصرية
( بلاصا طموبيل): نزلي أمدام
خلود(كتشوف بدهشا): فين غننزلو راه قلت لك تعطلت
أمين: بزربة مغنتعطلوش
نزلو من طموليل شادين فيد بعض ودخلو المحال
خلود(كدور راسها على دوك الحوايج لي معلقين شي ينسبك فلاخر):أمين شنو كنديرو هنا
أمين : غنسرقو راه بينا غتاخدي ليك شي پياسات ياك مور زواج غتلبسي رومي خودي شي 3 لبسات والباقي تالشمال
(هزات فيه عينيها لي كيبرو بلمعة وزيرات على يديه):شكرا بزاف عرفتي كنحس بك نتا العواض الجميل فحياتي...عنكش ليها شعرها
أمين: ياك ألالة راه تنتي غتعوضيني غير بلاتي
خلود: ماسخ لاخر
أمين: راه نتي لي عقلك ماسخ
{اليوم الموالي}
خديجة(واقفا فم الباب كتشوف فخلود لي كطوي حوايجها الجداد فليباليز ، وفهد اللحظة حست بغصة فقلبها كأي أم نهار كتشوف بنتها غتخوي عليها الدار مسخياش بيها ولكن أخيرتها تزوج وربي جاب ليها سعد زوين بحال وجها)
خلود(دارت عندها):ماما علاش واقفا ففم الباب
(حولت تخفي ديك دمعة لي واقفا فطرف عينيها ومتبكيش معاها بنتها لي كتشوفها فرحانة بشراوطها جداد كل مرة تهز شي لبسا ولا توب وتمشي تقيسو قدام لمرايا):~ تبارك الله عليك أبنتي لي لبستيها تواتيك هاد جلالب لي جابو تقولي غير تفصلو عليك
خلود(مشات عندها وحضنتها): جمعت ݣاع الحوايج أماما وعزلت كلشي كيما وصيتيني
خديجة: لخرقة لي تمسحي بيها صباحك أبنتي خبيها تتعطيها لي ومتيقيش بزاف سمعي مزيان ومتهدريش بزاف أسرارك لا تخرجيهم لحد أنا ميمتك وأنا صاحبتك لبسي عليك يجي خوك ينزل الحوايج مور الغداء غنتحركو نتعشاو عند خالتك ونباتو تم غدا فصباح غنمشو لدار لعريس تماك فين تبرزي وتكتبي كتابك إن شاء الله
(أكادير)
دايرين على طبالي د الغداء فجوء عائلي حاطين لحم بالبرقوق والشلايض
براهيم: هيا صافي أولد خويا حلفتي تتزوج أنا ملي ݣالوها ليا عند بالي ياسين لي غيتزوج
أمين: ممكتوباش ليه أعمي مكتابا ليا وزايدون ياسين باقي مبغا يتزوج
براهيم( وجه هدرتو لياسين لي كان كيهدر مع باه): وا ياسين هيا مناوي تزوج ولا
ياسين: هاد ساعة مرتاح هكا ساعة خرى يحن الله
فاطيمة: عيت معاه الحاج قاليك تيقاد شي أمور لي يسمعو يقول مخدام معندو دارو
ياسين: دبا خليكم غير فأمين أش موجد لينا أسي لعريس غدا وجتي شي صداق ولا باقي
أمين : واهداو عليا تكترو عليا نخلي ليكم العرس ونرجع لكازا
فاطيمة (هدرات بشوية حدا ودنو): أش درتي معاها فصداق بعدا
أمين : باقي مهدرنا فهادشي ولكن راه بينا لبنت قانعا 5000 درهم الله بجعل البركة
فاطيمة؛ داكشي بيناتكم تا لا بغات كتر يزيدك باك ماشي مشكيل
(باس راسها): يخليك ليا الواليدة
أمين (بدل لبلاصة لحدا خوه ونطق):خويا لعزيز
ياسين(هز حجبانو بجوج): غير نطق أش باغي
أمين؛ مور منطيحو العقد بغيت نسافر مع المدام ندوزو أسبوع العسل
ياسين: الله يسخر لاش كتعاود ليا ياك مبغيتي نمشي بلاصتك
أمين (ضحك): كون جيتيني فشي حاجة خرى أما المدام نصلح ليها أنا نتا بحال خوها -- صارحة بغيت أبرطمون ديالك لي فمراكش تسلفهالي غندوزو فيها سيمانة هكاك
ياسين: أخير مرة عطيتك سوارت عيطو ليا لبوليس نسيتي
أمين: ألا أصاحبي ديك ساعة ديت بنت زنقا دبا راه المدام لي غننكح لاش غيشدونا
ياسين: غنعيط لعساس يجيب شي وحدة تجمعها شحال هادي ممشيت ليها
امين: با ياسين قوليهم يحلقو لينا على بيت نعاس بالورد والشموع
(دور راسو بالله يستر وصيفت ميساج لعساس)
أمين(عنقو):لعز أخويا لعز
ياسين: فين كنتي لبارح كلو داك تسلݣيت حيدو راك غتولي مزوج و غتوجد لوليدات شد طريق
أمين؛ ألا أصاحبي راه تبنا كنت مع المدام فوجنا شويا بينتنا وتنزهنا من داكشي
(يوم العقد)
كان يوم ماشي عادي خصوصا عند العرسان
نهار لي فيه غتجمع قلوب وتربط للأبد بوثيقة الزواج لي حللها الله ، نهار ليكتحلم به كل عزبة" ليلة العمر"
فقت على صوت نغمة المنبه لي فالهاتف على الساعة 8 وهي شابعا نعاس كتحس براسها نشيطة دائما ملي كتكون عندهم شي مناسبة كتنعس بكري باش يبان وجها منور سيمانة كلها كتنعس مع 11 باش تبان ليوم فأجمل حلا تلفتت لسدايري فاش كانت نعسا مها لقاتو خاوي
جمعت ليزار باش كانت مغطية وقدات لمخاد بلاصتهم عاد خرجت من البيت ، دخلت لطواليط غسلت وجها وتوجهات عندهم لكوزينة لقتهم يلاه غيحطو الفطور فالصالون بقات كتحط مع بنات خالتها
غير فطرو كل واحد مشا يبدل
حوايجو باش يتوجهو لدار لعريس
هزات حوايجها لي غتلبسي وطلعت لبيت بنت خالتها
زولات حوايجها ولبسات ملابس داخلية فاللون الأبيض وكلون بيض مشبك من التحت مع ديباردو ديالو ومشات قدام لمرايا دهنات وجها بليكخون مع قلم لعينيها و ݣلوس ولبسات جلابا دو پياس فلون الأزراق ودارت شال ميكس بالأزراق والبيض مغطية كل خصلة من شعرها بغا تفدا أي مشكيل مع خوها هاد النهار
رشت ريحتها لي كانت ميكس من الورود
وبقت كتأمل راسها فالمراية تسمعت تزغريتا دخالتها وبناتها كيشكرو فزينها مسحات خديجة دمعتها وبداو يصلو على النبي مخرجينها من دار ولي عندو شي شرجم راه خشا راسو كيطل عليهم توجهو لحي السلام لي فيه دار العريس وباقي العائلة غيلحق عليهم لعشية
مسافة الطريق ووقفو قدام الدار لقاو لباب محلول شي داخل شي خارج
ثواني وخرجت فاطيمة وراجلها وعمام العريس وعماتو رحبو بهم ترحيب كبير
عاد دخلوها بصلاة والسلام دخلو لصالة لي كانت شادا نص دار لتحتانيا بفراشها الهماوي
طلعت فاطيمة مع خلود لبيت لي غتنݣف فيه لقات نݣافة مستفا المكياج فوق الناموسيا و التكشيطة لي جابو ليها معلقة فالپوشيط ديالها
زولات جلابتها باش متعمر ليها وبدات ليها نݣافة بشعرها لي كان طويل مبوكلي خلوق سرحاتو ليها ومسحات وجها مديمكياه
ديمكات ليها وجها وبدات ليها بلمسات الإبداع من بعد مخدات رأيها فالألوان ليغتستعمل
بعد ساعتين من دخولها الغرفة واقفا قدام لمرايا بتكشيطتها فبلون كاصي كانت خاصة للعرائس ودارت ليها مضمة الذهب لي كانت هادية من حماتها وقدات ليها شدات لفولار بشكل جديد عليها خلات وجها يزيد يوضاح
صالون التحت بدا يعمر بالعيالات
والرجال كانو فالخزانة لي فجردة
محمد(غير كيسوط):فين العريس مقدر حتا يدخل يسلم علينا !
لحسن: سولت عليه باه قاليك مشا عند الحلاق كيوجد راسو دبا بحال العروسة بحال العريس
دخل عليهم ياسين بلبسا رسميا فلون البلو ماري بقاميجا بيضاء و ݣرفتا بزرق سلم على الرجال لي لقا عاد ݣلس فطبلا لي فيها عائلة العروسة
يدير معهم صواب
بقاو كيهضرو فمواضيع مختلفة
تبان ليه باه داخل مع العدول
(عند خلود)
ݣالسا فوق الكورسي مقابلا مع لمراية كتشوف فجمالها ليزاد تبرز وسر لي طاح عليها...
أفكارها كتمشي وتجي بين الفضول لهاد الحياة جديدة و الحرية لي تحرمات منها بسبب الأخ ديالها هاهي ليوم كتشوف راسها غتخرج من حكمو الديكتاتوري والذكوري لذمة راجل أخر روحو كتشبه لروحها
ـــ بدات ترسم حياتها معه فمخيلتها الصغيرة كتفكر فين غتسافر إنا مدرسة غتقيد فيها إنا ستيل فالرومي غيجي معاها وإنا تقطيعة دير لشعرها هاد الأفكار كلها لي كضارب فرسها شكلات ليها ضغضغة فكرشها من شدة الفرح
فقت من شرودها وأحلامها على دقة الباب ترسمت إبتسامة فوجها وهي كتشوف بنت خالتها وخت الرجل لي غتربط حياتها به داخلين عندها لبيت رجعت الطرحة على وجها وباقي نفس الإبتسامة على وجها لكن سرعان متلغت بعد مسمعت صوت خوها كينطق بنبراتو العصبية
محمد: واجدة؟
كتافت بالصمت حست بيه جر يديها وخشاها فدراعو للحظة غظن أنو خوها متأثر على فراقها بسبب اللون الأحمر لي مكتاسي عينيه ، لكن ماخفيا أعظم
نزلو من دروج على صوت صلا وسلام وزغاريت
فرحتها متعطيها لحد بأنها غتحرر أخيرا خلات كل هاد تفاصيل تكون أخر همها
صورة موضحاش عندها من تحت الطرحة ݣلست بمساعدة خوها فالكرسي لي قدام العدول عاد هبطت عينيها كتشوف فصباط الشخص ليحداها ولي طبعا غيكون راجلها المستقبلي الرجل لي واعدها أنه غيحقق أحلامها
سمعت صوت العدول كينطق بالمقدمة المعروفة شاف البطاقة الواطنية لكل واحد فيهم وسولهم على موافقتهم لي كانت
(نعم) طبعا وعطاها تسني بلا ميزيد يدخل تفاصيل القبول كان واضح ليه وهو فرض من عائلة العريس عارف تفاصيل علاقتهم كاملة سنت ولحت عينيها على يد عريسها كيسني عاد سناو شهود أما حتا صداق تافق معاها يعطيه ليها وهوما مسافرين
وقف العدول وعلنهم زاوج وزوجة على سنة الله ورسوله وقراو الفاتحة عاد طلب من العريس يهز الطرحة على وجه العروسة
حدرات عينيها كتحاول تخفي إبتسامتها لي فضحها وتبان بنت مرزنا ،حست بالشبكة تحيدات عليها طلعت عينيها شوية بشوية وكل مطلعت عينيها إبتسامتها كتختافي سرعان متحولات لعلامة الإندهاش والخايبة والغدر على وجها وهي كتشوف صورة راجل خر من غير أمين
(قبل لحظات)
كل وحد كيصوني من جيهة كلشي واقف على أعصابو العدول حاضر والعروسة موجودة والعائلات ݣاع حاضرين ولكن العريس باقي غايب
دازت ساعة على الوقت لي دارو مع العدول يكتب الكتاب وباقي العريس غايب
عيط ياسين لݣاع صحابو تا واحد مشافو
دخل عند مو لبيت لقا ختو كتعبر ليها طونسيو
فاطيمة( كدرب على فخاضها وتندب)
~ أميمتي أنا ليدرتها لراسي قاليك تسحر مع دراري صغار تصبح فاطر فطرني ولد لحرام بالسودانيا غير لبارح قالي أش غديري إلا هربت غدا وخليت ليكم لعروسة عند بالي كيتفلا تدارها بصاح ، مشا باك عند الحلاق قاليه ݣاع مداز عندي ولد عمتك شافو فالخرجا د أكادير موقف طاكسي
ياسين( صاط منيرڤي)
:~ عيت ونا نهضر ألواليدة علمتك أمين باقي صغير باقي تا معارف أش باغي ولكن حلفتي تا ديري لي فراسك
فاطيمة(شدات فيدو كتزاوݣ وترغب)
:~ مزاوݣا فيك أولدي لقا شي حل شوهتي شوهة كيندير نخرج نعلم الناس راه مبقا والو والعروسة وعائلتها وياحصرة فداري كيف نقوليهم راه ولدي هرب
(قبل متكمل كلامها سمعو صوت صداع لتحت هبط ياسين كيجري لقا محمد محيح
محمد(كيهدر ويضرب صدرو):~أنا ترجعوني ضحكة ولدكم ضحك على ختي وتفلا عليها وغبر ليوم طيح الروح فهد الدار , غير تحضروه ولايهزونا لبوليس جملة
ياسين(كيحاول يكالمي أعصابو عارف بلي الغلاط من خوه )
:~ سي محمد تهدن هدا غير سوء تفاهم وغيتحل مكاين لاش هاد الشوهة
محمد(ضحك بالقصة):سوء تفاهم كضحك عليا ولا، خوك كان كيتلقى بختي بلا خباري والله تننحرهم بجوج
ياسين(عارف هدرتو صحيحة وخوه براسو علمو بلي تلقاو شحال من مرة نطق باش يخفف من هاد الشوهة)
~ : معرفت شكون كذب عليك فهاد لهدرة
محمد:عاد قالها ليا باك ولا باك كداب ، فينها ديك الكلبة قسما بالله تنقبرها
ياسين(مبقا عندو حتا حل من غير يسكت بينو وبين ختو مغيدخلش ينحرها ولا تنحرو)
غادي جيهت دروج تحس بيد مو كتجر فيه وكتبكي والو
هابطت فاطيمة مخلوعة من صوت الصداع شافت روينة لي نايضا ولاخر لي باغي يطلع يصفيها لختو
و الضياف لي فالقاعة المتناقلة كيتسناو العروسة والعريس يدخلو
شدات فيد محمد ونطقت بكلام لي مكانتش راضية عليه ولكن كان أخير حل ليها
فاطيمة: عطيني 10 دقايق وكلشي غيتصلح ختك معندها خروج من هاد دار غتبقا فيها عروسة
محمد(هز حاجبو) ~ 10 دقايق ولا غتمناو كون معرفتونيش لا أنا لا تصيلتي
.حد معارف لكلام لي دار بينتهم حست بيد ياسين دارت عليها
وخنزر فمحمد
ياسين :عندك شي هضرة قولها ليا أنا لواليدة خط حمر داير بحساب هادشي لي واقع أما على كيتلقاو وديك لهضرة نتا لي معرفتيش تربي ختك لمفروض هيا لخصها تصون راسها ماشي تبقا سايبا والريح لي جا يديها
محمد(جمع قبضة يدو وشاف فاطيمة ليبداورها غمضت عينيها كطمنو جرات ياسين لي كان معصب من هاد الروينة لي واقعا من الأوال مرتاحش لهاد زواج وها هما وقفو على كلامو
سد الباب بعصبية ونطق بنبرة كدل على الأعصاب لي وصل ليهم
ياسين ~ كان عليك تخليني نسمعو خل وذنيه يتعصب على هاد لحمار لي غبر من حقو سكتنا وقلنا لافوت منا ولكن يجي يحيح على قبل ختو لي معارف يربيها زاد فيه واش كيتسنى أنا نربيها ليه ولا
فاطيمة( حبست نفس مدة وطلقاتو ) ~ ياسين من نهار دخلت أولدي لهد الدار عتابرتك ولدي ومعزتك من معزات ولادي وكثر لا نتا لا ختك وربي شاهد عليا
(كيشوف فيها مستغرب من هضرتها)
فاطيمة(حيدات شال ولاحتو حدا صباطو) ~ رميت عليك أولدي عاري إلا مستر فضيحت خوك صغير لي معندو لعقل رميت عليك أولدي عاري لا حاسبني فمقام غير خالتك ماشي حتى مامك تزوج هاد البنت و فك لينا فضيحتنا
ياسين( بقا مصدوم من لهضرة ليكدخل لودنيه كيشوف مو فاطيمة ليرباتو وكانت ليه نعنة لأم محنيا عند رجليه كتبكي وتزاوݣ فيه ، طلع راسو كيشوف فسقف تنهد تنهيدة طويلة طلع معها نفس سخون من جوفو، وتحنى شادها من كتافها وقفها وباس على راسها ومسح دموعها وخدا شال دارو على راسها
ياسين ~ باقي مخلاق هدا لي يخلي راسك ينزل
(عنقاتو بكل جهدها مخليا دموعها يتسرسبو على كتافو
نزل معاها وخرجو لجردة لي كانو فيها العائلة ݣلس فطبلة المخصصا العرسان رخف ربطة العنق لي كان كتزيد تخنقو
كيتحلف على خوه لي خلاه يتحط فهاد الموقف
عقلو مفكرش فالبنت لي بقات دقائق ويتربط إسمو بإسمها وكيف غيكون مصيرهم
عقلو بقا محصور فهد اللحظة فقط، وكأنو مكينش بعدها
ݣاع الأنظار توجهت ليه والمقربين كيسولو :فين أمين ياك أمين ليغيتزوج
أما حتا لبراني مدا مجاب
الرجوع للوقت الحالي
قبل متستوعب شنو واقع حست بيد مها جراتها معاها كتمشا وراسها داير لشخص لي ولات على سميتو كتشوف فقط فكتافو وملامح الصدمة مصيطرين عليها دخلاتها مها لبيت لي تنݣفت فيها وسدات لباب
خلود( الكلام على طرف لسانها لكن كل متبغي تنطق بحرف كتلعتم فالحروف ـــ حست بحضن مها ودموعها لينزلو على قميصها)
~ ميستاهلكش أبنتي ميستهلكش هرب وخلاك مفكر لشوهتك ولا لخوك لي ساق الخبار بلي طلاقيتي بيه كان غيصفيها ليك ليوم الله ياخد الحق فداك الكلب
خلود( صدمة شللتها، هضرت بصوت متقطع)
~ لم ن زوج توني
خديجة(مسحت دموعها كتحاول تبت راسها) ~ خوه أبنتي خوه لي تحمل مسؤوليت داك البرهوش ، خوه لي مكتب ليك الله خوه ليسترنا
خلود(حست برجليها فشلو عليها شدات على الماريو د الحيط نازلا معه تجمعت فخاضها بجوج خاشيا وجها بينتهم وطلقت دموعها حست بغصة والحݣرة كتنزل وتهبط فقرجوتها
: ~ علاش شنو درت ليه ياك هو ليبغاني هو لي وافق على شروطي علاش خلاني علاش
(هزات عينيها ليكانو حمرين بسبب الدموع وزيد ليلونتي لي بداو يحرقوها ونطقت بنبرة كتقطع فالقلب)
: ~ لهاد الدرجة سخيتو بيا زوجتوني لراجل عمري شفتو حولتو فرحتي لقرح ليوم قتلتو فيا أي حاجة زوينة
سطات خديجة بجهد محاولا تخلص من ديك العافيا لي شاعلا فقلبها ولي كتزيد توهج بكلام بنتها عارفا صعيب عليها لي واقع رسمت أحلام كثيرة مع راجل لي ختارت حتا كتلقا راسها مع راجل خر نطقت بنبرة جدية
~ تيقي بيا غيجي نهار وتشكري الله وتحمديه حيت وقع هادشي وخا غتعدبي فلول قالو ناس زمان أبنتي دير لي مبغيتي تخرج فلي بغيتي
ديها فحياتك وفراسك وفراجلك
راه حسن من داك لبرهوش لي كان غياخدك
باقي مستوعب لي وقع وبين القيل والقال صبح راجل مزوج هي كلمة غتكون بنسبة ليه عادي
ــ لكن ظروف لي هو فيه دبا أبدا واش كانت عاديا
كلمة وحدة كتخرج من فمو تلقائية (شكرا) لݣاع لي مدو يديهم صافحوه كيباركو ليه
مد يدو مرة خرى لشخص لي غيصافحو تا سمع ضحكة مستفزة طلع فيه عينيه لي كانو حمرين وفعلان مخابش ظنو طلع هو محمد تحنى عن ودنيه ونطق بكلامو السام لي كان كيحاول يخفف به على كمية السم لي منتشرة فعروق جسادو
محمد: إوى مبروك أنسيبي قلتي معرفت نربي ختي هاهيا فجوج دقايق ولات مرتك --- ورك على سنانو ونطق: مرتك الشياطة ديال خوك
فهد اللحظة حس ياسين بملامحو تشنجو من قوة الأعصاب لي كاتم عارف مزيان الشخص لي قدامو بدون مبادئ كيحاول ما أمكن يحافظ على هدوءو وميزيدش شي شوهة
قدام الحضور بدا يتحط العشاء لضياف حاولت فاطيمة ولحاج حسن يبينو بلي ماوقع والو وخا الوشواشا د الناس طالعا على العريس لي تبدل طلقت الموسيقى مرة خرى لعلى وعسى تخفيف التوثر والوشواشات لي طالعا
طلع محمد بلا ميشوفو حد لبيت لي فيه ختو مزير على قبضة يدو وملامحو بين فيهم واصل لحد الثوران
لقا مو يلاه خرجت من عندها مجرد ماشفت ملامحو عرفاتو ناوي على خزيت حاولت ترجع بزربة لبيت وتسد الباب ولكن كان سريع منها دفعها على برى ودخل هو عند ختو وسد الباب
رمى خطواتو بزربة تجاهما هيا لي كانت باقي منهارة فالأرض حست بيديها قربت تقلع من الجرا لي دار ليها توقفها مجرد ملمحت وجهو زادت فوثيرة دموعها--- الكلمات مكانوش مفروزين من فمها بسبب الدموع والغصة تا زادها على مبيها
بتصرفيقة قلبت وجها
محمد( حيد صمطة دسروال كيعطيها فينما جات): هالي يخرج بلا خباري هالي فيه دودة هاكي يالقحبة بالكلبة 21 عام وأنا محافظ عليك فلخر خرجتي ليها طاي طاي
شهقات خفاف كيخرجو من فمها على كل شحطا كتحط على جسدها مهمهاش كلامو بقد مبغا غير يحبس هاد العنف على جسدها
بزربة نزلت خديجة خطوة تديها خطوة تجيبها ، عيطت على ياسين لي طلع كيجري كيسمع شهقات خفاف من البيت وصوت محمد لي كيعاير طالع
دفع لباب لقاه مسدود دفعو بكتفو 3 دفعات متابعا عاد تحل لقا محمد هاز سمطة ينزلها على ختو لي كانت ملوية فراسها طلقا لديك صمطة وجرها منو بعنف
تلاح عليه بلبوكس مبقاش بغا يطلق منو تا حس بيدين خديجة كيجروه عاد طلق منو تدريجيا
(هز سبابتو فوجهو ضغط على سنانو من قمة الأعصاب لي وصل ليهم): مراتي متحطش عليها يديك أخير مرة ولا يديك نݣردها من جدر
محمد(دفل دم من فمو وتبسم بسخرية): بصحتك بيها غير عرف راسك ديتي شياطة د خوك
سدات خديجة ودنيها على كلام ولدها حست براسها مربات فيه غير الخلا
ياسين(ضرب لماريو برجليه تنقزات خلود): خرج عليا دبا ومتخلينيش نشوف كمارتك مرة خرى ياالله
محمد( عاود ضحك بإستهزاء ــ وجر ختو من يديها لاحها على صباط ياسين): هاهي ومتجيش تشكا لا لقيتي شي حاجة دايزا غير خوك هداك---
قال هدرتو وغمزو ودار يخرج بمجرد متململ ياسين يتبعو حس بيدين شادين فرجلو نزل عينيه ليها وزفر لنفاد صبرو تحنا عندها بغا يوقفها لكن كانت مها أسرع منو جراتها لحضنها
كتسكت فيها...
خرج مخليهم بجوج
نزل لتحت هاز راسو فسماء جر الربطة لي فعنقو لاحها وحل نص صدافي لي فقاميحتو كيحس بالخنقة من كل جسادو زاد ركب فطموبيلتو وكسيرا لوجهة مجهولا لا بقا فهاد الدار غيهبل مفيهاش
قبل ميخرج محمد من دار ركز عينو فحسناء لي عقل عليها أنها خت أمين فلاها مزيان بعينيه لي كانو نقطة من دم كل مرة يمسح نيفو لي كينزف
محمد: مغتبقاش فيكم ياتركت القحو/ب
الواحيد لي مافهم شنو وقع هو أب خلود عندو بحال أمين بحال ياسين معرف أصلان واش أمين لي جاليها من لول ولا ياسين
نزلت خديجة عند راجلها لقاو العائلة غادرو بعد العشاء بقا غير ولد ختها لي غيوصلهم معه
مكانتش راضية على لي واقع نهائيا لكن كتبقا أهوان من الفضيحة لي كانت غتوقع كتشوف فاطيمة لي جايا لعندها حادرة عينيها وعلاش لا وولدها وطا ليها راسها الأرض
فاطيمة(قربات عندها وجرات يديها حاضنا عليها): عار الله أختي خديجة سمحيلينا
خديجة(جرات يديها بزعفة): لا سمح ليكم الله على قلب ديك البنت لي جرحتوه ليوم وحالنا راه حنا مسامحينكم ــ الكلام كثير أ فاطيمة ولكن غنسكت و حاجة وحدة نتمنى تكوني فيها مرأة ولالة هي تهلاي فبنتي
فاطيمة(يلاه بغت تنطق حتا بان ليها طارت من قدامها ومشات جيهت طموبيل--- هزات كفوفها الفوق كدعي: ياربي ياربي دوز هادشي لي بقا على خير ياربي سمح لولدي راه باقي صغير ياربي متوريني فيه باس
الساعة واقفا على 3:00. د ليل هالي دخل لبيتو ينعس هالي باقي واقف كيستوعب الأحداث لي وقعو
وهالي فضلام غارق
صوت تخنصيصها باقي كيطلع
رجعات بيها داكرتها لأخير محادثة دارت بيناتهم
⏯️⏯️
أمين: من هنا ليل غتكوني مرتي
خلود: واعدني منندمش على هاد الزواج
أمين: واش منيتك غتزوجي بأمين المحجوبي وتندمي عولي من لحظة لي يتكتب فيه كتابنا تودعي كل مشتقات الحزن
◀️◀️
حاولت تجمع أشلائها وتوقف مسندا على الحيط توصلت لناموسية نطرات ديك الطرحة لي حست بيها منحوسة عليها بكل جهدها حتا نتفات بعد خصلات من شعرها
حلت لمضمة و زولات الفوق د التكشيطة طلعت لقميص على رجليها كتشوف أثار بعد شحطات لي نزلو عليها ولحسن حظها أنا تكشيطة كانت ثقيلا هزات عليها شحطات
بين فكرة وفكرة داتها عينيها فسبات عميق بسبب كومات الإنهيارات لي عاشتهم هاد ليلة
أصبحنا وأصبح الملك لله
بعد ليلة طويلة مليئة بالأحداث لي مكانتش على البال ولا كانت عاديا
ݣالسا فاطيمة فوسط دار حازما لراسها لبطاطا
وتحت عينيها زرݣ بسهير والبكاء
حنان: أماما الله يهديك مديريش هاد الحالة فراسك ها هي تحلات
فاطيمة(حركت راسها كدورو): أحيانا أبنتي أش كان غيوقع كون ما خوك ياسين الله يرضي عليه كان خوها صفاها لختو عدنا فدار وتبعنا ليها وزيد الفضيحة
حنان: أنا مفهمتش داك الحمار د أمين ملي مبغاهاش لاش وافق من لول
فاطيمة(ضربات على صدرها): نستاهل أنا لي درتها لراسي قالها لي ياسين قالي راه ماشي د المسؤوليا ومديتها فيه
حنان( بست راسها وعنقاتها): صافي أماما عفاك عطي لخاتر لراسك كلشي غيتقاد
دخل لحاج حسن عندهم مغوبش لبارح بقا كيتفرج وساكت حيت معندو ميدير
(خنزر فاطيمة): عجبك لحال ألالة بقيتي علينا بالحفايد والعروسة تا ولينا ضحكة
حنان: بابا راه ماوقع باس ياسين تزوج بحال بحال
حسن(بصوت مجهد):سكتينا نتي عند بالكم ياسين فرحان حيت مزوج بخطيبة خوه
فاطيمة: مزاوݣا ألحاج لا مسمح لي فشوشي الزايد عليه خرج عليه
لحاج حسن (تنهد): دبا لي وقع وقع لبنت ولات عروستنا عاملوها مزيان ومينقصها والو ياسين راه مشا لكازا عيط عليه قاليك بغا يبقا وحدو شوية
حنان: بابا واش متأكدين أمين هرب يكما وقعات ليه شي حاجة
لحاج حسن(بعصبية):أش عندو ميوقع ليه هدرت مع صاحبو قاليا شافو غير فصباح
فاطيمة: فين شافو ألحاج واش باقي هنا
لحاج حسن: مسولت ومكيهمني حسن ليه منشوفو هاد العام ولا العام الجاي البرهوش د الخلا
يتبع...
راكي مبرعانا واو شكرا بزاف
زوينة