محتوى القصة
المطلقة ... كلمة تقيلة كاتخفي وراها بزاف ديال المعانات ... بزاف ديال التضحيات ... بزاف ديال التنازلات ... وبزاف ديال الصبر...
ومااااالها المطلقة ! ماشي إنسان ! ماشي من حقها تعيش ! ماشي من حقها تاخد داكشي لي كاتستحق ! ماشي من حقها تاخد فرصة !
الطلاق ماشي نهاية العالم، ولكن بداية جديدة لتجربة الحياة بطريقة اخرى .. الطلاق هو فرصة لإعادة اكتشاف الذات وبناء مستقبل احسن .. الطلاق فرصة باش يتصحو أغلاط الماضي وإثبات أن المطلقة هي امرأة أقوى مما يعتقد المجتمع وقيمتها اكبر ممن يعتقد أن المطلقة هي بقايا رجل آخر ...
المطلقة هي مرا حرة مارضاتش بدل عزات نفسها وختارت ابغض الحلال باش تخلي بالها يعيش ويمكن ختارت الطلاق باش تنقد راسها من الهاوية ومن مستقبل مجهول .. ختارت الطلاق حيت هو الحل
المطلقة ماشي مجر مة .. ولكنها سجينة حكمت لها بالبراءة
هي: وجدت في الانكسار قوة .. وفي البناء إنجازاً
ورفعت رأسي بكل فخر .. بعدما أعدت بناء حياتي من بقايا انكسار
العوض الذي جاء بعد الصبر ..هو أجمل ما قدّر الله
وجدت في قلبه بداية .. لحياة لم أكن أحلم بها
وجدت في قلبه .. ما لم يكن في حياتي السابقة
✨أنــــا المـــــطلقــــــة ✨
بقلم وفاء و فاطمة الزهراء
******
المحمدية
يوم من أيام الصيف الشمس صابحة مطنطنة الجو مبهج الناس فايقة ورايقة ، العشرة ديال الصباح فواحد من مشاريع السكن الإقتصادي الهراج على الصباح البياعة وشراية فراس المشروع اما مالين الحوت ماكاين غير العياط ، لداخل ديال سكن كل جهة والگروب ديالها ، فواحد من دوك الگروبات وبضبط فالكاطريام كايتسمع صوت ريدوات كايتحلو ، داخلة شميسة على داك الصالون لي غير بان فيه ضو الشمس بانت روينة لي فيه من ألعاب وحوايج فوطات مليوحين فكل جيه ، غير حلات السراجم وهي تقصد طواليط دخلات طرفات عليها وغسلات وجها ديجا مصلية الفجر والظهر مازال عليها الحال غسلات فمها وخرجات لكوزينة ، توجد الفطور حطات زبيدة وزيت والفرماج دارت واحد جوج مسمنات يسخنو فالبانيني وعمرات واحد البريريد ديال اتاي ، تفكرات دير البيض مالقاتوش فتلاجة ، زفرات وهي حاطة يديها على خصرها عاد مشات لبيتها كاتسلت جمعات شعرها بفيليل وجرات واحد العباية كاشفة من ورا الباب لاحتها عليها وهزات بزطامها وسوارت وخرجات...
وكيف عادتها فينما تجي زغبية خارجة يتقبط عليها قلبها وماتحملش راسها حتى كاترجع وتسد عليها عاد كاترتاح ، مع حلات الباب مايجي وجها غافوجه جارها حتى عدفات ديك سكنة ولي يجي منها الباب على الباب وكون غير كان بنادم كايحشم على راسو ، يبقا يحنزز فيها حتى كايوصلها دروج هادشي يلا ماكانش خارج يبقا تابعها كايعبر فيها وشكون عرف يكون جابو عليها وهي مادارت لا بيدها لا برجلها حتى من ديك العباية خلاتها كشفات غير باش تبقا تلبسها شعرها كاتجمعو وماتخليش زغبة طايحة، كاضرب صندالة ديال الميكة محرتكة غير باش تبان مبهدلة ومايطمع فيها حد ، حتى من الماكياج حرماتو مصاب عليها غير تبان صفرة كاتخلع ولا يشوف فيها شي منطيح من المناطح لي كاتصبح عليهم وتمسي عليهم ، ولايني لي زين زييين واخا فدربالة سر كامل فالعين ولي كاتهرب منو كاطيح فيه ، ستغفرات الله وضرباتها ليه بتخزيرة ونزلات كاتشتف حتى لزنقة غير ضربات فيها شمس وهي دير يديها على جبهتها حاجباها حتى دازت لحوانت لجهة التانية كان ضل حطات يديها على الكونطوار كاتسوط
نعمة: الله ياربي الله هاد النهار صابح مطنطن
الحسين: صباح الخير بعدا وصباح تيسير
نعمة: صباح الخير اعمي الحسين ماديش عليا راه غلبتني الشمش حارة
الحسين: ايوا صبر ابنتي جا صيف يغلبنا جا البرد يغلبنا
نعمة«يالاه غاتجاوبو وهو يوقف واحد الكمارة ماحملاتو ماقبلاتو شافت فمول الحانوت ونطقات بهدوء»: عطيني اعمي الحسين نص بلاطو ديال البيض
****: صباح الخير ابا الحسين كانصبح عليك كانصبح على زهر
الحسين«ميك عليه عارفو علامن كاينگ»: بغيتي البلدي ابنتي؟
نعمة: كيف العادة ابا الحسين خلط ليا بلدي ورومي راك عارف
الحسين«كايعزل ليها فالبيض ويهضر غير باش ماستزللش عليها هداك لي واقف»: ايه يه ولدي شمس الدين ماكاياكلش البلدي
****«عينيه عليها حلف لا هبطهم كايهضر وغاياكلها بعينيه»: ارا ابا الحسين واحد يطرو حليب راه غانفيض ليك هنا بقوة ماوقفت
الحسين«مشا جبدو ليه وتخلص وصيفطو هو لول شافها تزيرات»: هاكي ابنتي هاهو مقاد شي حاجة خرى؟
نعمة: لا صافي غير قيدو عندك
الحسين: هي لولة ابنتي سلمي ليا على شمس الدين
نعمة «هزات لبلاطو وتنهدات»: واخا اعمي واخا
قصدات المخبازة لي تم خدات خبيزات سخان وطريق لي جايتها رداتها ماتنفسات حتى سدات عليها بابها ، عاد رتاحت لاحت عبايتها بقات غير بديباردور وبيرميدة عازلاها عاد دخلات لبيت ، طلعات ريدو حتى بان ضو وتحنات فوق ناموسية كاتشوف فيه كيفاش ناعس براحة طالعاه تزنيگة وباين فيه البرونزاج ديال البحر عرفاتو البارح طول فالبحر بزاف ولات خايفة لا يمرض ليها كاتعيا ترد ليه البال ولكن كاتلقا راسها بزز منها كاتبعد عليه وماشي ديما معاه...
نعمة«بصوت حنين»: شمس !! شمس نوض احبيبي نوض
شمس الدين: مممم
نعمة«بدلع»: نوض نفطرو راه جاني جوع
شمس الدين«شاف فيها بنص عين»: خليني اماما غير شوية
نعمة: وانوض عندنا بزاف مانديرو نوض الله يرضي عليك
قبل ماطيب ليه جابت أكثر حاجة كاتكرها وكاتكره تشوفها ولا تقيصها ولي هي لبرا ديال الأنسولين ، قاداتها ليه فلبرا وگلسات مقابلة معاه فالكرسي ، عرات ليه كرشو وهو عاطيها الخاطر حيت ولف ، دگاتها ليه وهي قلبها كايتعصر عليها عاد باستو فكرشو وناضت ،، طيبات ليه اومليط مع الفروماح روج حيت كايعجبو حطاتو قدامو وعاد طيبات ليها بيضات بلديين وگلسو كايفطرو فهدوء حتى سمعات صونيط فالباب عارفة شكون ناضت حلات الباب حتى دخلات مرا فربعينات من عمرها بجلابة صيفية ولاوية زيف على راسها غير دخلات حيداتو كاتنش على راسها من صهد ...
كريمة: صباح الخير ازين
نعمة«سدات الباب»: صباح النور يصحابليا غاتعطلي
كريمة: لا جيت بكري اليوم راكي عارفة اليوم لحد كانسالي بكري ونخرج وحيت على حساب شمس بغا رفيسة وگلت ليه غانصاوبها ليه
نعمة«بتاسمات»: كايتوحم عليك .. دخلي دخلي تفطري بعدا
كريمة: ايه علاش لا
تمشات الكوزينة وغير شافها شمس ناض سلم عليها بحماس باستو وگلسات حداه مكملين فطورهم فجو زوين من ضحك وتعاويد والقلوب عالم بيها الله ، ناض شمس لبيت مور ما كمل فطورو وبقات نعمة وكريمة كايجمعو روينة
نعمة«مسحات يديها من الماعن لي غسلات»: عيت اختي عيت
كريمة«مسحات على دراعها بحنية»: صبري دابا يحن الله
نعمة«عينيها غرغرو»: جهد لا جهد الله راه طبت ماحيلتي لدار ماحيلتي لبرا ماحيلتي لدري ماحيلتي لراسي
كريمة: دابا شنو متقل عليك طلقيها فيد الله
نعمة: ماكرهتش نزيد شي ساعات اخرين نخدمهم نعاون بيهم وصافي راكي عارفة شمس الدين عندو مصاريف كثيرة وزيدي عليها سكر خاصو يركب لاباراي وانا جهد كمل ليا اختي
كريمة: ششش نعلي شيطان راه ربي ماينساكمش .. دابا نشوف ليك شي ساعتين تزيديهم غير كوني هانيا
نعمة«نطقات بترجي»: الله يعطيك ستر ماعنديش حل اخر يالاه مكافية مع لكرا والمدرسة ديال شمس مانقدرش نقيص فلوسها
كريمة: فلوس المدرسة خليهم ماتقيصيهمش ولا خاصك شي حاجة نزيدها لك غير صبري
نعمة: الله يصاوب وصافي
كريمة«نطقات بتساؤل»: مامشيتيش هاد نهار لداك لاصال؟
نعمة: لا البنات ماغايجيوش داكشي علاش مامشيتش
كريمة«حركات راسها بالإيجاب»: فيها خير ابنتي رتاحي
عنقاتها وباستها وهي قلبها عالم بيه غير الله هازة مسؤولية كبيرة بزاف وكلشي تصبر ليه حتى لولدها ماتگدش تصبر ، خرجات جمعات الدار كلها حيت ماكاتكونش مسالية سيمانة كلها غير نهار الأحد ولي خاصها ترتاح فيها من تعب سيمانة كاملة كاتلقا قدامها خدمة اخرى ومسؤولية خاصها تقضيها ، ضرباتها بتسيقة حتى ولات الدار كاتشعل و خلات كريمة كاتطيب رفيسة ريحتها كاتشهي ومشات دخلات لدوش گلعات حوايجها وسخنات دوش وگلسات تحك حتى دخلات عندها كريمة تحك ليها ضهرها
كريمة«بغات تفرحها»: بنتي زينة تبارك الله لحمك كايضوي
نعمة«تنهدات»: دباليت اختي كريمة
كريمة: ويلي على دباليتي نتي تسطيتي تبارك الله كلشي فيك متول باقي ان شاء الله تعيشي حياتك مايضيعكش ربي
نعمة«ضحكات نص ضحكة»: احياني
كريمة: ايوا گولي ان شاء الله ماعرفتيها عندمن صغر باقا صغيرة زين وزينة لي دزتي من حداه كايتلف العقل تبارك الله وعندك تقالة نتي مولاتها ايوا شكون مايبغيش هادشي
نعمة: نسيتي واحد الحاجة
كريمة: اما هي!!
نعمة: منحوسة
كريمة: شتي غانتقلق منك ... راكي مامنحوساش المنحوس هو لي ماعرفش قيمتك ولا قيمة داك دري لي كي العسل عمرك تقولي هاد الهضرة انا علمتك
سكتات نعمة على ما بيها مابقا ليها كلام ستحلات داك الحكان ديال. ضهر حيت كاتحك ليها بشوية وترخات حتى شلات ليها وقالت ليها بصحتك عاد فاقت من سهوتها ، عمرها ماكانت كاتبين ضعفها وناس قلال فحياتها لي ممكن تضعف قدامهم ولكن شي مرات الحمل كايتقال والكاس كايعمر وكايفيض واخا يعيا بنادم ما يخبي ويقول غدا حسن كايجي وقت ويعيا ويطيحو كتافو وهادشي لي كايوقع ل نعمة فكل مرة كاتهز فيها مايهز جبال وكاطيح وتعاود تنوض حيت باختصار ماعندهاش علامن تحط الراس...
صباح جديد وبداية اسبوع جديد عند نعمة لي كايبدا نهارها بكري بزااف ، الساعة 6 ديال الصباح حلات عينيها على صوت لالارم طفاتها وهي ماساخياش تنوض من بلاصتها ولكن مابيدها حيلة خاصها تعافر وتنوض ، لاحت داك ليزار لي ساترة بيه داتها وناضت لحمام طرفات حالتها وتوضات وخرجات صلاة عاد لبسات عليها انصومبل فالباج وتوب ديالو صيفي وبارد جمعات شعرها على شكل ديل عاد مشات لكوزينة توجد ليها ماتفطر ، بالخف عمرات ليها اتاي وسخنات خبيزة ديال زرع وحطات ليها زيتون وزيت وگلسات كاتفطر بشوية عليها حتى ضربات سبعة عاد ناضت دارت واحد طويسة فيها رفيسة كانت خلات منها لبارح بدجاج ودارت معاها فرشيط وقرعة الما فصاك ديال الماكلة حيت ماعندهاش الوقت تخرج تقلب على ماتاكل والوقت عندها ضيق ، لبسات فرجليها صندالة وهزات ساشي ديالها فيهم حوايج الخدمة وخرجات كاتسلت باش ماتفيقش شمس الدين على ماتوصل تسعود وتجي عندو كريمة ، سورتات عليه ومشات متوكلة على ربي
مسافة ديال الطريق حتى وصلات لطاكسيات خدات طاكسي وتوجهات لخدمتها ... قدام كلينيك كبير خاص بطب لأسنان نزلات والشمس ضاربة فيها حتى دخلات ديريكت هبطات لاكاف فين غاتبدل عليها
لبسات لبس الخاص بالميناج وطلعات تبدا خدمتها وأول حاجة هي طواليطات بلا ماتهضر مع حتى واحد بدات خدمتها بجدية ، وغير سالات بدات بلي كولوار حتى هما ، ريحة دوا مع ريحة تنظيف كاتعطي ريحة خاصة غير بالسبيطارات والكلينيكات لي تقريبا ولفات بيها نعمة واخا كان صعيب عليها فالأول....
سالات خدمتها ووصل وقت لي خاصها تغدا فيه نزلات لاكاف لي كان كبير وجهة دايرين بلاصة خاصة فين يقدرو العمال ياكلو ويرتاحرو وقت لبوزز ديالهم...دارت رفيسة ديالها فسخان حتى سخنات وجبداتها گالسة فواحد القنت كاتاكل بشوية عليها حتى جات عندها وحدة ملي خدامة معاهم...
نزهة«جايا بعجاجتها»: الله ياختي رفيسة ماندوقوش؟
نعمة«كاتاكل بالعقل»: جيبي فرشيطة واجي تاكلي معايا
نزهة«گفضات وبدات تاكل بيديها وتبنن»: عرفتي شحال بيني وبينها كانحماق عليها
نعمة«ببتسامة»: بصحتك كولي
نزهة«كاتاكل وتهضر»: احم .. شفتي الجراح جديد لي جا اليوم
نعمة«حركات راسها بلا»: لا مازال ماطلعت لفوق حتى يخرج كلشي عاد نمشي نضور على البيروات
نزهة«تاكل وتسوط»: صاااافي أنا طحت بغييت غانعرف داك البيض المنقي منين كايجي راه كانعيا نقلب ماكايبانوش
نعمة«شربات لما ومسحات يديها مخلياها تاكل فخاطرها»: فاش عينيك انزيهو لا كان غا الطبة والجراحة كلهم ضرتي عليهم وخضرتي عينيك
نزهة: لالا لا دابا انا راه عجبني الجراح ولكن لي كان معاااه اناااا أدوووب أختي نعمة أدووب باااين براني
نعمة«حركات راسها ونطقات وهي مبتاسمة من هاد الهبيلة لي حداها»: لا حول ولا قوه الا بالله
ماجات فين تهضر نزهة تاني حتى سلاطت عليهم مرا اخرى من لي كايديرو الميناج كانت كبيرة شوية وقديمة فالكلينيك
مليكة«گلسات حداهم»: شادين لحتيت تاني«شافت ف نزهة»: مالك علامن طاحت عينك ازايغة تاني
نزهة«لي فيها مامهنيها كاتاكل وتهضر»: مي مليكة !! لعااار دابا غاگولي ليا داك زين لي جا مع الجراح شكون واش غايخدم هنا
مليكة«سكتات كاتفكر»: طبقة جوج؟؟
نزهة: اييييه
مليكة«ميقات فيها»: أنور التازي طبيب اطفال غاهني مخك راه ماخدامش هنا الجراح صاحبو داكشي علاش
نزهة: مممم واختي منين عرفتي هادشي
مليكة: واقيلة راكي نسيتي انا راه قربت نضفر شيب فهاد الكلينيك
نزهة«بطنز»: مممم
نعمة«بقات كاتشوف فيهم بهدوء وناضت»: مي مليكة نخليك نطلع نكمل شغالي
مليكة: سيري الله يرضي عليك انا نجمع ليك هادشي«شافت ف نزهة ساهية»: تگعدي لخدمتك تگعدي
كل واحد وهمو وكيف كايقولو الليل شبعني دوران وأنا فبلاصتي والنهار رزمني وأنا كاندور ، الكسدة حاضرة والعقل غايب .... سيدة فهمها يالاه مضاربة مع خدمتها وتمارتها ومسؤوليتها وتربية ولدها الراس عندها عامر شلا مطارق و وحدة باغا غير تشوف فالزين وتزلل وتاكل ماخصها خير ، ملي مشات نعمة من حداهم مگهومة بالهم دازت ديريكت طلعات تكمل لي بقا ليها فخدمتها ، واخا العقل ساهي كايفكر وأول واحد كاتفكر فيه هو ولدها لي خاصو شلا حوايج وهي مابغاتش تربيه باشما كان باغاه يكون فأحسن حالاتو كاتسمح فراسها باش يقرا فمدرسة مزيانة وفلوس مدراستو ماكاتقيسهمش واخا تبقا بجوع عاد لاباراي لي خاصها تركب ليه مصاريفها فوق طاقتها وباش تكونطرولي سكر ولدها خاصها ديرها ليه ، وهي ملاهية كاتغسل فلاباڤوات ديال الحمامات دخلات واحد سيدة هي وبنتها لي دايرة كلينيكس على فمها جايا معاها باش تغسل بدون ماتقصد نعمة هازة لبرودوي فيديها ماتخرج غير فديك سيدة أربعينية شعرها اشقر فكامل اناقتها ، خواتو عليها بلا قصد الشوميز لي كانت لابسة فلون لبلوسيال فلبلاصة رجع لونها بيض ماعرفو باش تبلاو
السيدة«كاتشوف فشوميز مغوبشة وجها غايطرطق»: واش نتي حماااااارة ولا شنو
نعمة«تدعقات»: س سمحي ليا ماشفتكش سمحي ليا امدام
السيدة«شافت فيها باحتقار»: سمحي ليا شنو غاندير بيها .. ويلي ويلي على حالة ويلي على نهار كحل
نعمة«قلبها كايضرب بغات تقرب عندها»: مدام والله ماشفتك سمحي ليا
السيدة«حبساتها بيديها»: ماتقيسينيش ماتقيسيش فيا «خرجات من الحمام شادة فشوميزتها كاتعيط»: شي مسؤول هنا والو
نعمة بدات كاتغزل غير بوحدها بصح كانت ساهية وماحساتش كيفاش وقع داكشي فضرف تانية وحدة ، تجمعو دموع فعينيها وجها ولا حمر كتر من القياس حتى جات لأسيسطونت ديال المدير حيت صداع كتر فداك الكولوار وقوا التبرزيط
لاسيسطونت: ياك لباس مدام السليماني
مدام السليماني«نطقات بحدة»: اش هاد النوعية مخدمين معاكم شوفي على فضيحة دارت ليا على حوايجي مافهمتش انا واش عورة ولا شنو هادشي راه دايرين الحس قبل ماندخلو
لاسيسطونت«طلات عليها براسها»: نعمة!؟
نعمة«عينيها تجمعو ليهم دموع»: والله مادرتها بقصد مع دخلات كنت غانضور وخرجت فيها ماسمعتهمش حتى لقيتهم ورايا
مدام السليماني«هزات صبعها بتأكيد»: نتي ماخاصكش تبقاي هنا غاترجعيني كدابة دابا وهاد شوميز غاتغرميها
جا المدير فديك اللحظة حيت برزطوه وفنفس الوقت كان خارج الطبيب والجراح من البيرو ديالو حتى وقفو كايشوفو فديك جقلة لي واقعة ، عاودو لمدير المشكل بالتفصيل
المدير«باحترام وهدوء فصوتو»: مدام السليماني مسحيها فينا تفضلي معايا لبيرو مايكون غير خاطرك
مدام سليماني: خاطري هو تخدمو معاكم ناس كايفهمو فخدمتهم ماشي من والا وزايدينها بالكدوب وحلنا مع الخدامات
المدير«شاف فيها وغمض عينيه وحلهم»: نعمة نزلي لتحت
حركات راسها مازال يديها كارمين على طابليتها بقوة القهرة والحشمة قدام المدير وناس لي تما ،دازت فيهم ومشات كاتجري وهي ماقادراش تحبس دموعها غافلة على الكتف لي دازت فيه ودخلات فلاسانسور وغابت، من غير الأنظار لي بقاو تابعينها حتى طلعات فالمصعد..جقلة تفرتكات ونعمة بكات وبردات ساعة وهي فالفيستير كاتسنا شنو غايوقع حتى عيط عليها المدير وطلعات عندو واول مادخلات
نعمة«كاتحاول تجمع الكلمات»: والله ماقصدت مادرتهاش بلعاني
المدير«بهدوء»: ماوقع باس ا نعمة غير المرة جايا ردي بالك مدام السليماني معروف عليها ماكاتفاهمش وجات فيك هاد النهار ديجا بنتها دارت عملية على فمها وكانو شي مضاعفات داكشي علاش خرجات معصبة وجيتي فطريقها
نعمة«تنهدات بحرقة»: سمحليا ادكتور المرة جايا غانرد البال الله يكتر خيرك
المدير«حرك راسو حيت كايعرفها مزيان»: تقدري تمشي ماديري فبالك والو
نعمة: شكرا ليك بزاف
خرجات من عندو كتافها طايحين من القهرة عارفة راسها كان خاص ترد البال ولكن نفسها عزيزة وتبهديلة لي تبهدلات خلاتها تحس بالعافية شاعلة فصدرها بالخوصوص حيت كلشي تجمع وكانت كاتغوت عليهاا قدام كلشي وهادشي لي خلاها ماترضاااااش
سالات نهارها كيف العادة واخا الخاطر مرض خدات طاكسي لوجهتها تقدا شي تقدية عاد دخل ، ماكرهتش تمشي لدار ضربها بتدويشة وطفي ضو وتنعس باش عاد تحس براسها رتاحت وخاطرها رجع كيف كان ولكن الواجب والمسؤولية تابعاها ، خدات لاداند وحتى الفخوضة ديال دجاج دازت عند الخضار خدات من عندو خضيرة وعاد مول زيتون حتى هو تقدات من عندو كيف عادتها عاد خرجات خدات طاكسي ديريكت لدار ، وأكيد طريقها شوك سوا المسؤولية لي على كتافها سوا دياب لي برا وكلشي كاينهش فيها مستورة وماقالوها
عريانة وماقالوها ولكن كاتصبر راسها على قبل ولدها لي على الأقل كاتشوف فيه داك الحب لي مفتاقداه وداك السند واخا هي مسؤولة عليه كاتحس بلي معاها ،هو فيه كلشي بانسبة ليها....
حلات الباب ودخلات عيانة كانت الشمس غادي تغرب ، لقات كريمة حتى هي كاتلبس جلابتها باش تمشي لدويرتها حاليا راها معاوناها على ولدها كاتقابلو ليها على ماتوصل المدرسة وديك ساعة تبقا معاه غير السبت والأحد...
كريمة من الناس القلال لي تقدر تلاقينا بيهم الحياة وصعيب لقاو فحالهم ، باش يكون واحد الشخص ماشي من دمك مابينك وبينو حتى صلة كاتلاقيك بيه المكاتيب وكايكون هو داك الصدر الحنين لي فتاقداتو نعمة من نهار ماتت الحنينة فيها ميمتها ، عمرها طلبات المقابل حيت كاتقابل ليها دري بالعكس كاتكون فرحانة حيت كاتقابلو ودار بلاصتو فقلبها
نعمة: غاتمشي بقاي تعشاي معانا
كريمة«بابتسامة»:هدا جهد ابنتي نمشي تانا ندير شي طاجين لياسين راكي عارفة كايجي من لگراج خاصو ياكل
نعمة«بتساؤل»: ومرتو ؟!
كريمة«حركات راسها مدوراه»: هاديك لا عول عليها يبقا بجوع احنينتي...
نعمة«مسحات على كتفها بحنان»: واخا اخالتي وسمحلي ليا والله خيرك عمري نساه حياتي كاملة
كريمة: غانتقلق منك ماتگوليش هاد الهضرة حنا لبعضياتنا
شمس«كايعيط من الصالون»: ماما أجي تفرجي معايا
نعمة«بنفس نبرتو»: واخا احبيبي انا جايا
كريمة: راه دار لگوتي ديالو دوشت ليه من العرق راك عارفة صهد وكان كايلعب ودابا راه كايتفرج
نعمة«قربات باستها من حنكها بوسة عزيييزة وعنقاتها حاطة راسها على كتفها بحالي حاطة تقل ليام عليها»: لهلا يخطيك عليا
كريمة«طبطبات عليها»: الله يرضي عليك ابنتي الله ينور طريقك
نعمة : اميييين
كريمة: هاني مشيت
نعمة: بسلامة
دخلات اول حاجة عند ولدها تلاحت حداه عنقاتو وشمات ريحتو نقية باستو وشبعات منو عاد ناضت گلعات حوايجها بقات غير بدو بياس ولاحت عليها بيجامة ديال 30 درهم بالخف دخلات الكوزينة تحيد داكشي لي جابت وترد العشا ، دوك الفخوضة رقداتهم فالخل والملح ودازت نقات البصلة والثومة وربيع قدرات طنيجرة بينما غسلات دوك الفخوضة مزيان حتى تحيدات منهم زفرة وسقطراتهم عاد دارتهم يتقلاو مع العطرية ، من بعد روات بالما وزادت بطاطا مع زيتون والحامض مصير وسدات طنيجرة ، الاكلة لي كايحماق عليها ولدها غير نقصات لبوطة ومشات ديريكت لدوش حيدات حوايجها وتخشات تحت رشاشة مسترجعة گاع احداث نهارها بأسف على شنو وقع ليها هاد نهار ، كادوز بيديها على لحمها وعقلها غايب فكل مرة كايبقا فيها راسها دماغها كايسرح بيها ما بين لي فات ولي هي فيه ولي جاي بدون ماتحط فبالها شي طريق محددة همها هو تهلا فولدها وتقريه مزيان واهم من هدا تربيه تربية حسنة وطلعو رااااجل ...
نهار العيد نهار مبارك عند الناس نهار الفرحة عند الكبير الصغير ، كاتكون فيه اجواء خاصة واخا تمارتو ولكن كولشي بحلاوتو ملي كاتكون جماعة مع الحباب و العوين ماكاتحسيش بالنهار كيف كايدوز، ولكن ماشي كولشي عايش نفس شي، عندها هي المسيكينة لي من صبح الله وهي واقفة كولشي دايز على ضهرها الى الفطور هي توجدو وتطلع تعاون فالسطح تغسل الكرشة و تنقي و تشوي حتى لقمة هي اللخرة ديال الكبدة ما خلاوهاش دوقها غير تبغي ترتاح تلقى العگوزة موجدة ليها شغال غير من وحدة لوحدة ولوسة گالسة مبوردة على السداري الكاس هو اللخر ماتهزوش...
هابطة من سطح من بعد ما سالات غسيل الكرشة و المصارن ،دخلات نيشان للكوزينة و حطات البنيوات حاسة بالفتحة لي فكرشها ضاراها علاش لا وهي ما كاملة حتى 20 يوم باش والدة ، ما هزوها ما نفسوها من سيمانتها ناضت لشقا حيت لا ماطيباتش بيديها ماكاينش لي يمد ليها لقمة هي لخرة ،وحتى الراجل لي ترجات فيه الخير يحن فيها ما مسوقش.. حطات دوك البانيوات وخرجات شافت فعگوزتها كانت گالسة مجمعة مع بنتها مزال گالسين حدا طبلة
نعمة«جبهتها كتندي بالعرق»: خالتي انا غسلت كولشي غانمشي نرتاح شوية كانحس بكرشي كضرني
العگوزة«طلعات فيها و هبطات»: وداك الغدا شكون بغيتيه يطيبو
نعمة: ها هي اخالتي سارة طيبو راه نقيت ليها كولشي
سارة«خنزرات فيها»: مالي خدامة عند باك مزيان تبارك الله
نعمة«عينيها غرغرو وحاسا بالوجع»: غير نرتاح شوية و نوض نكمل لي بقا غير نصبي الغدا
العگوزة: سيري كملي شغلك و باركة من تبوحيط حنا كنا نولدو صباح ونوضو لشغلنا العشية تحركي نصبي الغدا
شافت فيهم بعينين مدمعين وشافت فراجلها لي كان ممدود تما كيخربق فتيليفونو ما هزش فيها العين، تنهدات ورجعات للكوزينة كتنصب داك الغدا و دموعها مسرسبين على حنكها ،الفتحة لي ضاراها بالوقيف و صدرها لي كتحس بيه غايطرطق بالحليب حيت الصباح كولو ما رضعات ولدها ، بكات و فشات خاطرها على زهرها لي طيحها فمتعوس ليام ، الراجل لي ضناتو هو السند ولا حمل على كتافها ، لا كلمة زوينة لا محنة تجيها من جيهتو ،من نهار ولدات حتى لدابا عمرو شي نهار جا سولها واش خاصها شي حاجة واش عيانة، من نهار تزوجات بيه ما عرفات الراحة لا معاه لا مع طاسيلتو لي ردوها تراسة عندهم وهي صابرة..
مسحات دموعها بكمها و كملات نصيب الغدا ونقات الكوزينة حتى رجعات كضوي بقات گالسة كتستاراح على الكرسي حتى طاب الغدا وعمراتو ليهم عاد هزات ولدها لي كان فاق كايبكي و دخلات لبيتها ترضعو،حيدات عليها ديك البيجامة لي كانت توسخات بطبايع دم وهزاتو عندها كترضع فيه شادا فيديه كتأمل فملامحو...يمكن الحاجة الوحيدة لي كتخليها تنسى القهرة لي عايشة فيها هي ولدها واخا مكانتش باغا تولد وهي فهاد الحالة وفهاد الضروف لي هي فيهم ولكن ربي قدر عليها وما دام رزقها الا وعارف علاش...رضعات ولدها حتى نعس و حطاتو عاد شربات مسكن الم وتخشات حداه ترتاح من العيا لي حسات بيه قبل ما يجيو يطفجوها تاني...
ايام الله كدوز كل واحد وكيفاش معديها ،ولكن عندها كانت كادوز تقيلة وهي غارقة فشغال ماحيلتها لولدها لي نعاسو مقلوب كتقيل تراري بيه ما حيلتها لشغل الدار لي كل مرة جابدا ليها العگوزة حاجة ما تجي مسكينة فين تهز الراس من شي حاجة حتى كتلقا فين توغلها تاني وهي و بنتها گالسين كيف القايدات...
كانت هابطة من سطح مع وقيت المغرب كلها كتقطر بالما وولدها فضهرها ،من بعد ما صبنات زرابي و نشراتهم كايوجدو لخطبت لوستها و دكاكة دايزة على ضهرها بغات تخليهم غير حتى يجي راجلها و ينشرهم ساعة شكون يخليها خسرات عليها العگوزة جوج كلمات "نشريهم غايخنازو ليا" نشراتهم على سعدها ووعدها و هبطات لقاتهم مجمعين ولغيط من كل جيه علاش لا وبناتها ب 3 مجموعين عندهم باش يدوزو الخطبة ديال ختهم ...
جرات رجليها للصالون لاخر ما بغاتش تگلس حداهم گلسات و حيدات ولدها من ضهرها باقي كميشة وهي ديما محملاه حيت ما كاين لي يعاونها فيه، يلاه تكات ضهرها على المخدة ترد نفسها تا سمعات غوتتها فودنيها صمكاتها
العگوزة: ويلي ويلي ويلي على بنت الحرام نوضي من تما غاتوسخي الدنيا وحنا عاد نقيناها
نعمة«بتعب»: غير نرتاح شوية اخالتي ونوض
العگوزة«خرجات فيها عينيها»: گلت ليك نوضي من تم واش بغيتي تشوهينا مع الناس يخزيت تفو على تريكة
سارة«خنزرات فيها»: خطية جابها لينا خويا ما عرفتو اش عجبو فيها لا زين لا مجي بكري كلها مبهدلة
خولة«شافت ف نعمة بقات فيها و رجعات شافت فختها»: سارة هنينا من الهضرة الخاوية
العگوزة: خلي علك ختك گالت صح كون سمع ليا نهار لول كون زوجتو بلالاها كي النوارة وهو جاب ليا هاد الخطية «غوتات مشيرة على نعمة بصندالتها»:گلتليك تهزي من تم
نعمة مع شافت الصندالة وهي تكالي على ولدها لي كانت هازاه فيديها وعينيها عامرين دموع ما فهماتش علاش ماكايحملوهاش ومعاملينها هاد المعاملة ياك لي بغاوها كاديرها شنو مازال بغاو كتر ، وقفات تمشات جيهتهم شافت فيهم و الغصة فحلقها يلاه بغات تهضر حتى شافت راجلها دخل مخنزر من صداع لي واقع..
عصام: اش طاري هنا واش عارفين صوتكم فين واصل
العگوزة«دغيا تسيفات وبدات تهبط فالدموع خلات نعمة حالا فمها»: جيتي اوليدي اجي تشوف مك على اخر يامي ولات مرتك تعايرني گلت ليها غير نوضي من تم باش ما توسخيش الصالون حيت الناس غايجيو ما خلات فيا غير لي نسات«هزات طرف من شالها كتمسح الدموع» خواتاتك يلاه جاو من طريق اما ما يخليوهاش تحل فمها علينا و نتا عارفني قليلة الصحة
بقات نعمة غير حالة فمها من هاد الباطل لي حطات عليها ، شافت فالراجل لقاتو داير فيها تخنزيرة ديال القتيلة
نعمة«حركات راسها بلا»: والله ما كاين هادشي غير كاتكدب راه هي لي شيرات عليا بصندالة بغيت غير نرتاح حيت كنت كنصبن وو...«شافت فعگوزتها كتبكي»: علاش اخالتي شنو درت ليك باش تكدبي عليا ياك لي بغيتيها كانديرها فاش ضريتك فاش
هي كاتكبي ودافع على راسها و نص رويجل ما طاحت فودنيه غير ديك كاتكدب هز يديه حتى للسما و نزل عليها للحنك حتى حسات بالدوخة وعينيها تغاشو ليها بالدموع
عصام«شدها من شعرها كارف عليه»: شحال من مرة گلت ليك الوليدة عليك بالتيقار ونتي ما بغيتيش تحشمي غير ما زايدة فالتبوحيط«زاد زير عليها حتى كمشات عينيها»
كلام مي لي كايمشي فهاد الدار عجبك الحال مرحبا ما عجبكش الباب ولا تعاود هادشي غايكون حساب اخر فهمتي«حركات راسها ب اه عاد طلقها بجهد حتى كانت غاطيح»: يلاه تهزي لبيتك
شدات فراسها باش ما طيحش مزيرة على ولدها وشافت فيهم عينيها شلال بالدموع ضورات عينيها عليهم وحدة وحدة كيفاش كايضحكوو ويوشوشو بيناتهم قلبها ضرها على راسها وعلى حالتها و فين وصلات تكبي على زهرها لي طيحها فواحد مافقلبوش الرحمة يدلها و يهينها و عند بالو الرضى هو يرضي مو و يتكرفص على بنت الناس و الله ينجينا و ينجيكم من هاد النوع...ترعدات فاش سمعاتو رجع غوت عليها و ضارت غادا لبيتها..
كايقولو فراش الليل هو لي كايقاد النهار ولكن اش نقولو لا كان لا ليل مقاد لا نهار مقاد...فبيت نعاس كاين غير ضو خفيف ديال الفيوز لي شاعل اصوات خفيفة كتسمع ، كانو وسط علاقتهم لي كان هو اكبر مستمتع فيها..
من بعد ما دخل عندها لبيت ولقا راسو محنسر و باغي حاجتو فيها بقا كايحزر فيها باش يقضي الغراض اما هي عيات ما تهرب ما قدراتش تخطا لي دارو فيها اليوم وزائد كل ما كتفكر معاناتها معاه و كيفاش ديما كايهملها ومايلبش رغبتها فالفراش كاتزيد تكره العلاقة معاه...
كان مستمتع وهو كايجيب رغبتو وعلاش لا وهي كلشي فيها زوين وكلشي فبلاصتو متول سوا لحمها سوا ريحتها ولكن شكون يقدر هادشي !! هي وكلات امرها الله بأنها صافي تزوجات تحطات أمام الأمر الواقع غاتعايش مع الوضع ولكن كلشي جا ضدها ،الدمعة محقونة فعينيها وغير سالا وقضا غاراضو ناض للدوش مخليها مكمشة ففراشها كتبكي وفحال ديما خلاها معلقة بين الالم و الخذلان لي كاتحس بيهم روحها لي تجرحات من قلة الاهتمام والبرود لي بيناتهم...
مسحات دموعها بطرف اللحاف و تلوات وسطو جامعة رجليها عندها محاولة تكتم شهقتها باش ما يفيقش ولدها لي ناعس فالكونة ،عيات و ملات من هاد الحال شحال قدها تصبر على هاد العيشة ما هي فهنا ما هي فراحها وعاد علاقتها مع راجلها لي مكفسة عيات تصبر راسها بلي يقدر يتبدل و يحس بيها يشوفها مرتو يحن فيها ماشي غير جسد كايقضي فيه رغبتو ولكن فكل مرة كانت كتبني امل كاتلقى عكس توقعاتها...
خرج هو من دوش ناشط بدل عليه و تخشا بلاصتو هاز فيديه تليفونو بلا ما يتسوق ليها غراضو قداه اش بغا فيها المهم هو رضى راسو، ضارت شافت فيه مطولة على أمل ينتابه ليها ولكن والو لوات عليها لزار ساترة لحمها و ناضت للدوش، تقابلات مع المرايا كتشوف فعينيها لي حمرين بكترة البكا حققات فلحمها لي مطبع باثارو كرهات راسها و كرهاتو و كرهات الحياة لي عايشاها اشمن ربح عندها فهاد زواج من غير انها كتهد فصحتها و نفسيتها كانت كتصبر حيت ما عندها فين تمشي وشكون يكون بيها هي وولدها حتى ميمتها لي تحن فيها مشات عند لي خلقها اش غادير !! عيات تصبر و الصبر كايضبر و هنا جهدها تحد
تخشات تحت الرشاشة مخلية الما مطلوق على لحمها كدوز عليه بيديها وعقلها خدام فكرة تديها و فكرها تجيبها حتى سالات الدوش ديالها لوات عليها فوطة وخرجات ، طلات على ولدها لقاتو مازال ناعس هزات فوطة صغيرة نشفات شعرها مزيان وعاد مشات للماريو جبدات حوايجها لبساتهم حتى سمعاتو نطق
عصام«عينيه فتيليفونو وكايهضر»: سيري جيبي ليا شي قرعة ديال الما
نعمة«مجاوباتوش هزات المشطة كتمشط شعرها»: الصمت
عصام«هز عينو فيها مخنزر»: راه معاك داوي ابنادم جيبي ليا الما
بقات على حالها ما جاوباتوش كاتمشط شعرها و ساهية حتى جعراتو و ناض ليها جرها حتى ضارت عندو
عصام: علاش كاتقلبي الكــ لبة نتي معامن داوي انا
نعمة« نطرات منو و شافت فيه ببرود عينيها طافيين»: طلقني
كانت كلمة بسيطة متكونة من خمسة احرف أول مرة تخرجها على فمها وماشي بطريقة ساهلة نطقاتها بنفس مريضة ونفس متشردة ونفس واكلة العصا ، عيات تقلب على فجوة فيها ضو فداك الراجل وعائلتو تقدر تغمض عينيها على بزاف الحوايج وعلى قبل ولدها ولكن لا حياة لمن تنادي ، كاتحس بكلشي فيها موسخ واخا حلال كرهات داتها وكرهات الوقت لي بقات فيه حية مور مها حتى ولات جفاف بين رجلين وجسد لواحد كايلبي فيه رغبتو فقط...
عصام: عاودي لمك شنو گلتي؟
نعمة«غمضات عينيها متألمة»: طـــلـــقنــــي...
عصام: شنو تزاد علك مم؟ شنو تزاد علك باش تالدابا بانت لك هاد الكلمة
نعمة: مابقيييييتش گادة رحمني
عصام«جرها من دراعها»: تگعدي تگعدي «وقفها كايطلع وبهبط فيها بحال شي مريض عاد جمع ليها حناكها مورك عليها حتى تصورو صباعو»: هاد الهضرة باقا تعاوديها رجليك غانحشهم ليك كاتسمعي؟
مالقات باش تجاوب ولا تهضر من غير تسكت وتشوف فيه وعينيها مدمعين ، تلاحت بلاصتها تنعس على الأقل تهرب من داك الواقع لي هي فيه ولكن لي بلا اخلاق وبلا ضمير ومنعدم الإنسانية والتربية ماعندوش مبدأ انه كسر بخاطر شخص وماشي أي شخص مرتو ، فعلا كان كايشوفها فائض لغريزتو وخدامة عندو لا غير...
غير غفات بدا كايتلمس فيها بحال شي واحد عمرو شاف اللحم ، يقيص ويقرب حتى قفزها عاضة على فمها حيت ماشي المرة اللولة لي كايديرها ، رجعات دارت راسها ناعسة على الله يحبس ولكن والو بحال شي كــ لب ... حتى شدات ليه يديه محيداها
نعمة: بغيت غير نعس الله يرحم ليك الواليدين بغيت رتاح
عصام«بلا مايتسوق لهضرتها»: دوري بلا ماندورك بزز
ضارت عندو كاتحسبن عليه فخاطرها مابقاش ليها جهد لي يتقاشح معاه فهاد ليلة باركة غير شنو داز عليها فهاد النهار ، تمنات تفقد الإحساس وهو كاينهش فيها بالمجعور لي ولدو ولا تغرس فيه شي موس تصفيها ليه وترتاح .... حتى سمعات البكا ديال ولدها وكأنه نقدها فديك اللحظة..
نعمة«كاتدفع فيه»: شمس كايبكي «ماردش عليها»: عصااام راه شمس كايبكي خليني نوض
عصام«شاف فيها مخنزر»: بلا بلا بلا سسسسكتي
نعمة: اويلي دري كايبكي
حرام واش داها فيها ولا فولدو بقا حتى كمل على خاطرو عاد طلقها
ناضت كاتقيا عايفة، دري سكت وهي لي بكات ، دخلات دوشات وخرجات هزات شمس رضعاتو وجبدات الفراش تجبدات فالأرض نعسات كرهات داك البيت وداك الفراش لي مشروك معاه وحتى نفس الهوى لي مشاركاه معاه كرهاتو ، كاتحاول تزعم راسها تخرج من ديك دوامة حتى غفات من قوة التعب...
الرجعة...
طريق كلها وهي ذكرى كاتجرها لذكرى وكأنها رجعات لداك الوقت ولدوك المعانات لي كانت فيهم وهي كاتحس بنفس الإحساس وبنفس الألم ، فاقت من تفكيرها ومن ماضيها لي باقي كايضرها والوقت لي ضاع فوالو ومع والو ويمكن احسن حاجة هي داك الولد لي عندها الباقي كلو ماعندو معنى ، ماحساتش كيفاش لقات راسها قدام واحد العيادة كبيرة وكاتأكد من العنوان لي عطاتها كريمة بلبسها العادي مكتافية بشوميز صيفية فالبيض مفتوحة من جناب مع سروال جينز واسع على طايتها جامعة شعرها من لور بمقبط فنواغ ووجها طبيعي ويمكن حتى شوية الإرهاق باين على عينيها ، تنهدات خافية داك توتر وسمات الله ودخلات كاتشوف فداك ديزاين لي فدخلة أكيد عيادة اطفال غايكون داكشي كيوت وألوان مختلفة ، وقفات فالإستقبال عند الولد لي تما شاب فمقتبل العمر لابس لباس طبي غير شافها بتاسم فوجها...
نعمة«بهدوء»: احم سلام و عليكم
سعد: سلام
نعمة: الله يخليك عندي موعد مع دكتور على حسب الخدمة
سعد:نتي هي لافام دو ميناج؟!
نعمة: اه
سعد«بقا كايطلع فيها ويهبط جاتو ماشي ديال الميناج»: واخا تسناي تما شوية على تايدخل طبيب وندخلك
نعمة«حركات راسها ونطقات »:واخا شكرا
بقا متبع ليها العين جاتو فشكل بنت بحالها تكون كادير الميناج ، حرك راسو ورجع مكمل خدمتو والمرضى كايجيو ، أما هي گلسات كاتشوف الأمهات مع وليداتهم ومنهم لوليدات لي كايلعبو تما وهي كاتنهد غير تدويزة هنا بالنسبة ليها غالية وبزاف ، ياريت كون كانو عندها الإمكانيات حتى هي كانت غاتدي ولدها وماتخممش فالفلوس ولكن الغالب الله ، بقات كاتشوف فناس غير كايتزادو حتى وصلات شي 10:30
توقفات سيارة من نوع Mercedes-Benz GLA 180 نزل منها كايقاد الشوميز لي لابس خدا نظرة على ساعتو ورجع هز فيديه بوشيط صغيرة ، وسد الباب متوجه لعيادتو غي دخل حيد نضاضر لي كانو على عينيه لوح سلام بدون مايشوف فشي جهة وقصد البيرو ديالو ، بقات متبعة ليه العين حاطة يديها على سمطة ديال صاك ديالها وهي كاتحاول تفكر فين شافتو حتى بان ليها الولد لي فالإستقبال دخل عندو هاز بزاف ديال ضوسيات فيديه عرفات بلي غايبداو يدخلو عندو المرضى ، كل مرة كاتشوف ساعتها حيت بزز باش خدات وقت من خدمتها باش تجي تشوف هاد الخدمة يلا سهل فيها الله ويلا مامكتاباش ماعندها مادير...
هزات عينيها ملي سمعات اسمها ، لقاتو واقف قدام البيرو كايعيط بإسمها لي ديجا عندو حيت بتوصيات من كريمة هي هنا دابا...
توجهات عندو كاترجع شعرها لور باش تحيد داك توتر ديال أول مرة فشي خدمة عاد دخلات لايحة الخلفة لداخل المكتب وخرج الولد ساد الباب وراه ومخليهم..وقفات مقابلة معاه هو لي كان واقف كايقاد القهوة ديالو فالمكينة ، قبل مايضور هزات عينيها فيه كاتشوفو بلبستو الطبية فشيبي وعليها رسومات خاصة بالأطفال حقات فيه نظر شعرو لي مزين بشيب حتى لكتافو وطولتو الملفتة كانت نظرتها عادية كأي واحد قدامك غاتحقق فيه ، حنحنات منظفة صوتها حتى تلفت عندها ببتسامة ورجع يهز كاسو ديال القهوة وهو يرجع هاد المرة ضار عندها وهو رافع حاجبو...
نعمة«نطقات بكل احترام»: صباح الخير ا دكتور
أنور«حرك راسو گالس فكرسيه»: صباح الخير«شاف الورقة لي فيها اسمها»: نتي نعمة ياك ؟
نعمة: اه هي أنا
أنور«حرك راسو»: حيت وصات عليك الخالة كريمة وضمناتك ماغانطولوش الإجراءات تقدري تبداي من غدا ماعنديش مشكل
نعمة: شكرا ادكتور..احم يمكن گالت ليك بلي ديجا خدامة على حسب التوقيت لي نجي فيه نخدم شغلي ونخرج
أنور«شاف فيها»: ديجا قالت لي هاد الخبر ..تقدر تجي مور ماتسالي خدمتك ودير الميناج ديالك هكا مايحتاجش تجي فالصباح من غير يلا كانت شي حاجة ضرورية نعيطو لك ،غير هو دير بحساب انه العيادة كبيرة شوية كايخاصها وقت
نعمة: واخا ادكتور هادشي مناسبني الله يكتر خيرك ويلا على حسب الخدمة كون هاني يدي خفيفة ومتقونة فنفس الوقت
أنور«شاف فساعتو»: تقدري تمشي
نعمة: شكرا بزاف نهارك مبروك
حرك راسو باحترام حتى خرجات ، عاد رجع كايشرب من كاسو ديال القهوة وهو ساهي فتفكيرو ومرة مرة كتمشي عينو لباب ويرجع لقهوتو
أنور«كايفكر الموقف لي شافها فيه ونطق بدون اهتمام»: يدها خفيفة
رجعات لخدمتها وهي كاتفكر بلي غايتزاد صاليرها شوية على الأقل تسد الإحتياجات ديالها وديال ولدها ، داك نهار داز عندها مزيان فأحسن الأحوال بدات الخدمة فالعيادة حتى هي ساعات ديالها دوزاتهم وخرجات ،طبيب ماكانش ولكن كانو كايشدو ليرونديڤو وهي خدمات شغلها حتى حسات بضهرها تقسم عليها حيت العيادة كانت شبعانة غبابر...
جا يوم السبت فاقت شوية معطلة حيت ماكاتخدمش فيه فالميناج وجدات فطورها باش تفطر مع ولدها على ماتجي كريمة ، وديك ساعة تخرج
شمس«كايشوف فيها بفرحة»: مامي اليوم غانمشي ل parc de jeux مع خالتي كريمة
نعمة«بتاسمات ليه»: ممم وليتي كادير مشاريع مع خالتك كريمة اسيدي مزيان بالصحة وراحة
شمس: ماكرهتش تمشي معانا
نعمة«بحب»: احبيبي حتى انا ماكرهتش نتا عارفني كانخدم اليوم غير سير ودوز وقت زوين بحالك اشميعة ديالي
شمس«كايشوف فيها بنص عين»: تخلي خالتي كريمة تشري ليا بورگر ؟
نعمة«بلا ماتفكر»: لا ا شمس لا
شمس«رمش فيها»: بليز غير هاد المرة
نعمة«هزات صبعها كاتنعت ليه»: اخر مرة درت ليك فيها خاطرك نعست بيك فالكلينيك عشرين يوم«ناضت كاتلعب ليه بشعرو»: بلاش احبيبي الله يرضي عليك نتا مريض
شمس«حدر راسو»:واخا
ناضت كاتجمع طبلة حتى سمعات صونيط مشات تحل كايصحاب ليها كريمة شي لي خلاها تحل بشورط وديباغدور حتى تخطفت ملي شافت جارها واقف مخرج عينيه وهي تسد الباب دغيا لاحت عليها بينوار ورجعات حلات الباب
نعمة«مخنزرة»: ياك لباس
الجار«عينيه غايخرجو فيها»: صباح النور
نعمة«طلعات فيه حاجبها»:شي مانقديو اعمي
الجار«كايطلع فيها ويهبط فمو مفروع»: هههه وايلي على عمك جيت على قبل فلوس لكررا وصاتني مولات الدار نشدهم اليوم
نعمة: واخا تسنا«زدحات الباب فوجهو ودخلات لبيتها»: يخخ الله يعطيك شي مصيبة شارف الهارف
مشات لماريوها تحت حوايجها جبدات فلوس الكرا وهي كاتنهد زرقة على زرقة وخرجات مداتهم ليه بنفس تخنزيرة يالاه غاتسد الباب وهو يتحل الباب لي قدامها خارجة منو مراتو طلع وتهبط كتر من راجلها
الجارة«دارت ليها واحد ضحكة صفرة» : ساليتي وادوز دخل بحالك ولا عندك شي شغل سير قضيه
راجلها«دار راسو كايشوف فالأرض»: كنت غادي
الجارة«ميقة فيه»: هي دابا «شافت فنعمة وهي ماحاملاهاش»: نعمة واقيلة يالاه فايقة ياك راشقة ليك على الحتيت
نعمة«ضرباتها ليها بتخنزيرة ودخلات»: نهاركم مبروك
مشات لبيتها بغير نفس من هاد جيران نحس ، جبدات حوايجها لبساتهم سروال جينز وشوميز بيضة وهزات واحد صاك صغير جامعة فيه شي حوايج خاصين بخدمتها لي موجهة ليها وجمعات شعرها كعكة من صهد حتى سمعات صوت الباب مشات تحل لقاتها كريمة سلمات عليها
نعمة«لبسات سبرديلتها»: تعطلتي اخالتي انا غانمشي
كريمة: سيري حتى حنا شوية ونخرجو
نعمة«جبدات بزطامها عاطياها شي فلوس»: شمس خودي ليه غير لي باط ولا كفتة مشوية وشي صالاد داكشي ديال لي صوص بلاش اخالتي عافاك
كريمة: ماتوصينيش راني عارفة غير كوني هانيا
نعمة: انا مشيت
كريمة: الله يعاونك ابنتي
الدار البيضاء
على موسيقى روبي (بقالي ليالي) غير الموسيقى بدون كلمات فواحد من احسن les salles ديال رقص كانت كاتمايل بخصرها فلبسها رياضي البارز طايتها ومحزمة نصها بحزام فيه الخراشش ومعها بنات من مختلف العمر ، صوت الموسيقى مجهد وصوتها كايتسمع مع كل هزة
نعمة«بحماس»: 3... 2...1 يالاه نعاودو نفس طريقة فجنب ليسر
كانت معاهم فهزة الخصر فالجانبين بزوج وكانت كاتعلمهم بالخاطر لي اصلا ماعندناش ولكن خدمتها كاتخلص عليها خاص تأديها على أكمل وجه، عارفة الناس لي كاتعلم عندها وشكون هما ومستواهم المادي داكشي علاش كادير لي فجهدها مادام كاتخلص خلاص مزيان ، عارفة بلي كاين لي جاي غير يدوز الوقت وكاين لي كايتلف العيا ديال سيمانة كاملة وكاين لي شايطين عليه الفلوس وماعارف مايدير بيهم حاطهم تما..منهم لي باغا تعلم تشطح لراجلها ومنهم لي باغا تعلم حيت كاتموت على الرقص شرقي ومنهم لي واخداها رياضة ليها جسمية ونفسية فنفس الوقت...الحاصول كل واحد وهمو..
نعمة بالنسبة ليها هاد الخدمة ضرورية زيادة على انها وسيلة لي كاتجيب منها الفلوس ، بالنسبة ليها كانت ليها هاد الهواية متعة كاتفرغ فيها كل ما هو سلبي ولكن حاليا كاتفكر فولدها وكيفاش تأمن ليه حياة بمستوى متوسط على الأقل من ماكلة ومن لبس ومن مدرسة وحتى الخروج وسفر كاتقيل عام كاملة كاتدمر على قبلو هو فقط لا غير...
سالات الحصة وهي كلها عروقات خرجو من عندها البنات لي كايتعلمو كاملين من غير وحدة تكون فديك أواخر ثلاتينات
سيدة: نعمة بغيت نسولك
نعمة: وي مرحبا
سيدة«بتودد»: صراحة كانتعلم معاك دغيا وماكانسخاش ماعرفتش واش ممكن تبقاي تجي عندي لڤيلا وديري ليا سوايع زايدين
نعمة«ضحكات بتعب»: الله ياختي الله لقيت الوقت فين نحك راسي نزيد سوايع خاصين فرقص
سيدة: يلا من ناحية الفلوس نتهلا فيك
نعمة«تنهدات محركة راسها» : لا لا والله ما قضية فلوس ولكن والله هدا جهد ماعنديش الوقت نهائيا عاد عندي طرونسبور بعيد
سيدة«مسحات ليها على دراعها بحب»: اوكي حبيبتي ماشي مشكل غير خليك معانا هنا بعدا على الأقل راه ماكاينش بحالك
نعمة«بادلاتها الإبتسامة»: شكرا بزاف
سيدة: العفو قلت غير لي كاين..نخليك دابا
نعمة: بسلامة
بقات نعمة گالسة كاتشرب لما ديالها وترتاح باش ترجع فتران بلا مادير شي روطار..لبسات حوايجها مور مارتاحت هزات صاكها وخرجات كاتحس بجوع دازت لواحد القهوة تما خدات بيتزا وعصير عتقات راسها وتوجهات لاگار باش ترجع للمحمدية وهي كتافها طايحين بهاد المعنى بالعيا والتعب ، غير طلعات لتران وهي تحط راسها وماجات فيه ترتاح تاكانت وصلات...خدات طاكسي ومشات لدارها حلات الباب ماكاين حد عرفاتهم باقين خارجين ، حيدات حوايجها ومشات ديريكت لدوش دوشات عاد حسات براسها رتاحت ولكن نعاس داير فيها خبلة ، لبسات بيجامتها وتخشات بلاصتها عاطية لوقت لراسها فين تغفا وفعلا دخلات فسابع نومة وداتها كلها كاتزدح بتعب اسبوع كامل بدون توقف...
طاح ضلام ولكن الهراج مازال على برا الصيف والجو مغربي الناس شي داخل شي خارج..
جايا كريمة هي وشمس شادا فيديها كان لابس شورط وتيشورط فالبيض فيه روسومات ، مقاد شعر كايبان كيوت من ديما هكا ولفاتو نعمة يلبس احسن حاجة ودائما مقاد لي شافو يقول هدا ولد شي ناس لباس عليهم ،هاز فيديه كارطونة فيها طوموبيل صغيرة ، دازو من وسط واحد رباعة ديال جيران بما انه گروب كانو مجموعين على الكراسة وزريعة والحتيت حتى كاتوقفها وحدة من دوك العيالات...
جارة«جايا كاضحك»: كريمة تي گولي غا سلام
كريمة«بتعب»: ماشفتكش والله العظيم عيت بغيت غير نگلس رتاح
جارة«كاطلع فيها وتهبط»: ايوا من الله ومنك اختي كريمة منك طيابة منك مربية«شافت فدري»: شمسون لباس فيناهي ماماك
شمس«ماعجبوش الحال تقوليه ديك سمية»: سميتي شمس
كريمة: انا شمس مربياه راه ولدي هادشي لي كاندير معاه ماشي خير واجب عليا
جارة«كاطرطق فزريعة»: يا ختي ومو فين ماتكون سيمانة كلها اويلي راه بزاف
كريمة«على نيتها»: راها خدامة على هاد دري ملي تگلس شكون بغا يصرف عليه
جارة: وباه مالو اويلي مالها غاهي لي والداه
كريمة«تنيرڤات»: يعطيه لوبة سيري سيري كملي زريعتك راكم كاتشوفو غالي بغيتو
جارة: ماديريهاش مني قلة صواب «قربات ليها باش مايسمعهاش دري»: جيران كلهم كايهضرو عليها وجارتها لي قدامها قالت لك كاضور ليها بالراجل
كريمة«خنزرات»: لعنتو الله وعليهم ايوا صافي هادشي لي بقا«جرات شمس قدامها»: زيد اولدي زيد نطلعو بحالنا
جراتو ومشات محقدة عارفة فامهم مشرگة وجيب يافم وگول ، بقات كاتستغفر الله حتى طلعات خلات الباب بساروت ودخلات كايبان ليها سقيل وضلام ، شعلات ضو وسدات الباب عاد دخلات كاتقلب بعينيها
كريمة«كاتعيط»: نعمة !!
زادت لبيت شعلات ضو وهي تبان ليها ناااعسة ، مشات عندها وشمس حتى هو كايعيط عليها حتى بدات كاتحل عينيها المنفوخين بنعاس
نعمة«بصوت ناعس»: جيتو
كريمة: نعستي ابنتي
نعمة«كاتفوه»: نعست ماعقلتش على راسي مهدودة «جرات ولدها عندها»:حبيبي صاڤا
شمس«بفرحة»: شبعت اماما لعب شبعت
نعمة: بصحتك احبيبي «شافت ف كريمة»: ماعدبكش؟!
كريمة: لا مسكين ماقال والو غير هو خاصو دواه نسيت شوكة ديالو كان خاصو ياخدها قبل دابا راه شحال باش كلا عطيها ليه دابا
نعمة: واخا انا نوض نعطيه
ناضت غسلات وجها صحصحات وخرجات لقات كريمة بدلات لشمس هي غير جات دگات ليه الشوكة ومشا ينعس عيا باللعب ودوران ، جرات رجليها لكوزينة تشوف شنو تقضي حيت حسات بجوع حتى شافت فكريمة جايا عندها مور ماحيدات جلابتها
نعمة: خالتي!
كريمة: غانبات معاك الليلة مافيا لي يمشي عيطت لولدي گلتها ليه
نعمة«بتاسمات ليها»: الله احسن حاجة غاديري
كريمة: فيك جوع
نعمة«حركات راسها بتعب»: اه ولكن يديا طايحين عليا ديال بصح
كريمة: انا نضيبانيك حيدي سيري ترتاحي
نعمة «بامتناع»:وحتى نتي راكي عيانة
كريمة: انا كنت كانتسارا ابنتي ماعياناش غير گلسي
نعمة«باستها»: الله يعطيك صحيحتك
مشات لصالون شعلات تلفازة كاتفكر غير فالصباح كيغادير تنوض تاني لنفس روتين وباقي تابعها شلا وشوية ، خدمات تلفازة كاتفرج ولكن العقل غايب والوقت كايدوز وهي مازال فسهوتها حتى تحط قدامها طويجين صغير فيه مطيشة والكفتة و عليهم البيض وحطات الخبز والعصير من التلاجة ، عاد ردات البال وهي تنهد ماحساتش براسها كيفاش سهات هادشي كامل حتى وجد لعشا...
گلسات حداها كريمة وهي كاتفكر الهضرة لي سمعات وكل مرة كايشرگو فلحمها كي بغاو تنهدات على حالها حيت عارفاها لا حنين لا رحيم هازة راسها براسها من نهار ماتت مها ، ضهر لي مشات تعض فيه وتشد فيه لقاتو راشي وخوا بيها أما لي وكلات امرها معاه حفرة خانزة غرقات فيها وطلعات عاطية ريحة واخا نفسها طيبة ولايني تطلات من الحفرة وكاتحاول تغسل راسها كل مرة شوية...
كريمة: كولي ابنتي الماكلة غاتبرد
نعمة«هزات طرف ديال الخبز وسمات الله »: بسم الله ..الله يعطيك صحة
كريمة: بصحتك...غدا غاتسالي من لكلينيك وتمشي لعيادة
نعمة«حركان راسها»: ان شاء الله العيادة ماعنديش فيها بزاف ديال تمارة حيت درت ليها الميناج الكبير كانت حالتها دابا غير ندوز عليها ورجع بحالي
كريمة: الطبيب مزيان بعدا؟
نعمة: ماكاينش شفتو غير النهار لول لي مشيت كاين غير داك الولد
كريمة: مزيان...«طولات فيها شوفة»: تكايسي ا نعمة على راسك تكايسي راه صحتك هي الأساس
نعمة: هانتي كاتشوفي اخالتي هادشي لي عطا الله
كريمة: ضربي وقيسي راك باقا صغيرة وداك دري مسؤولية بين يديك
نعمة«تنهدات حاطة دغمة من يديها»: اصلا على قبلو هادشي كامل وكون لقيت فين نزيد نزيد ومانگولش عيت «تفكرات شي حاجة بقات كاضحك»: اودييي
كريمة: ضحكينا معاك
نعمة : وحدة من هادوك لي كاتعلم عندي اليوم گالت ليا واش تزيديني شي سوايع فدار «فلتت ليها ضحكة»: ههه لعار واش انا لگيت الوقت تالمخي نزيد سوايع خاصين فديور الناس....وقالتي ماتخميش فالفلوس الناس عندها الفلوس كي روز خاصها غير فين تحطها«ضحكات تاني»: انا بغيت ندير لاباراي لولدي ديال ديابيت بقيت واحلة عام
بقات نعمة كاضحك بهستيرية وتحبس و تضحك و ترجع تحبس وكريمة كاتشوووف فيها مخلياها على راحتها حتى بدات نعمة كاتبكي وديك البكية لي كاتكون مور ضحك هازة بزاااف ديال القهرة وبزاااف ديال الألم وبزاف ديال الغصات ، بكات حتى بدات تشهق وناضت كريمة معنقاها
كريمة«خلعاتها حالتها»: ويل الشيطان ابنتي نتي فعار الله
نعمة«دغيا حمارة عينيها وتقج صوتها»: عيت اخالتي تهديت ، لي هزني لحم لاحني عضم ولي حسبتو راجل طلع شماتة...كلاو لحمي اخالتي كلاوه جيران وكلاوه الدياب بعينيهم ،مكتوبة على ضهري المطلقة بلا راجل...مكتوبة فجبهتي كاتصرف على ولدها بالحرام ومنين بغات تجيب الفلوس
كريمة«كاتبرد عليها»: واش الهضرة كاتلصق ااااانعمة
نعمة«بحرقة»: كاااااتلصق ا كريمة كاااااتلصق ولصقات فيا مشيت الحانوت نسمع مشيت لخضار نسمع ،طمع فيا الشارف وصغير ماقالونيش هلكاتني تمارة بغيت نسكن فشي دار مايعرفني حد مانعرف حد ولايني هدا جهدي
كريمة«طبطبات عليها»: معاك الحق فگاع لي گلتيه مانلومك مانگوليك والو عارفة لبير وغطاه
نعمة: نهار ماتت مي ...
فلاش باك
الخزانة ديال لعزو واقفة العزاية شي داخل شي خارج الدنيا مخلطة لداخل نعمة شادة واحد القنت دمعة وخنونة والناس تواسي وتسكت واش كية الأم كاتبرا !؟ لالا عمرها تبرا وعمرها تجبر الكلام كايواسي ولايني القلب ليه الله هو القادر يخفف عليه...
ماتت الأم وبقات الدار خالية راجل الدار هو لخو ، ايه خوها لي هازها ملي مات باهم وكان يصرف عليها ويتهلا فيها ، ربع شهور على موت المرحومة كل نهار تگلس قدامو يلوح ليها كلمة من هنا على الزواج ومن لهيه على الولاد ، الحاصول راسو عمروه ليه بلي خاصو يزوجها ويتهنا ويعيش حياتو
نهار جا فيها واحد ماعطلوش دغيا رحب بيه بلا ري بلا شوار ناضت بين الخوت عداوة من كلام مسموم تقال وديك "" دارك لي دايمة ليك انا غانتزوج مانعقلش عليك "" مازال كاتعاود فودن نعمة
لاحها لوحة وماسول عليها ، تزوجات بلا شرط بلا جوج بحال شي وحدة بلا شرف وزادت حاقدة على خوها ولي غايجي من جيهتو كامل ماعندها عمة تهزها ولا خالة تسندها عولات على راسها حتى لقات راسها كاتحارب مع الدياب فدار وحدة
اند فلاش باك....
نعمة«مسحات دموعها»: لاحني عضم اخالتي هو سبابي لا سماحة ليه
يوم جديد عند نعمة لي كل صباح كاتفيق فيه كاتمنى يدوز مزيان ومصاب غير يدوز النهار على خير بلا مشاكل بلا صداع..
كيف عادتها كانت خدمات فالكلينيك عاد مشات لخدمة الثانية باش تختم نهارها كيف دخلات لعيادة كانو المرضى كايدخلو بالترتيب مشات هي ديريكت بلا ماضيع الوقت لبسات عليها طابلية وجمعات شعرها بقراصة وبدات كادير الميناج ديالها فالحمامات والكلوار على مايساليو المرضى وتدخل القاعة ديال الانتظار دير الميناج ديالها تما وتخرج...
سعد: ختي نعمة؟
نعمة: نعام !
سعد«خرج من عند طبيب واحد سيدة مع ولدها وقبل مايدخل التالي عليط عليها»: دخلي خرجي شبيكات ديال لبوبيل من لداخل غايكونو عمرو عندو
نعمة: واخا«حطات لي فيديها ومشات دقات فالباب ودخلات باحترام» سلام دكتور
أنور: سلام نعمة لباس ؟
نعمة: الحمد لله جيت ندي لبوبيل
أنور ديك ساعة تحنا على سلة لي حداه كانت ديجا فيها بلاستيك جمعها وجر التانية فين كايدوز لدراري صغار كايدير تما كلينيكسات ولا لومبالاج ديال شي دوا ولا شي برا كلشي كايجمعو تما حتى ديك البلاستيك جمعها
نعمة: ماشي مشكيل انا نجمعهم
أنور: ماكاين باس«بحالي تفكر»: عاين نهضر معاك
نعمة: نعام
أنور: كنت مشغول هاد الأيام ماباليش فرصة فاين نهضر معاك على خلاصك أو لا؟
نعمة: ماعليش خالتي كريمة گالت ليا راه مايضيعكش وعاد سيدة لي كانت قبل مني گالت ليا كنتي مهلي فيها يعني ماكاينش مشكل لي خديتو خير وبركة عندي غير ساعتين فنهار ماشي بزاف
أنور«هز فيها حاجبو على هضرتها»: هادشي كامل قالتو خالتك كريمة ؟
نعمة«بحالي مسمعاتوش»: اا؟
أنور«هضر معاها نيشان»: اوكي ملي قلتي هاد الهضرة تستاهلي كل خير .. نبدا معاك ب 2000 درهم من بعد نزيد حيت نقدر نخليك حتى يخرجو les patients على حساب لوليدات راك عارفة كايربلو برا فالألعاب ونديكلاري بيك باش نتفاداو المشاكل ولا ماعجبكش مرحبا الإختيار عندك«حط يديه على صدرو»: ماغانلقاش حسن منك
نعمة: الله ياودي 2000 درهم الخير والبركة ا دكتور لهلا يحاشم
أنور : مرحبا كملي على شنو كنتي كادير
حركات راسها وتحدرات هزات لبلاستيكات ورجعات سلات لبلاستهم أما هو رجع كايشوف فالبيسي قدامو على ماتخرج ، وغير خرجات حول شوفاتو لباب لي خرجات منو ماعرفش علاش جاتو فشكل تخدم فالميناج كايبان عليها صغيرة وعاد من هضرتها راه عبر مستواها حيت باين فيها ماكاتصنعش ، رجع نافض داك التفكير كايقول مع بالو الله يحسن العوان لكل واحد مادام انها كاتخدم فالميناج هنا ولهيه راه محتاجة....شتت تفكيرو تيليفونو لي كايصوني غير شاف المتصلوز الخط دغيا
المكلامة
أنور«ببتسامة ترسمات على وجهو»: يما ...
ناجية: اولدي كيبقيت راك لباس
أنور«هز ستيلو كاينقر بيه على لبيرو»: الحمد لله ايما كيبقيت نتي راك على خير
ناجية: ايوا شوية اولدي مرة مزيانة مرة عيانة ،توحشتك الحبيب ديالي راك غيبت عليا
أنور: راك عارفة الخدمة ايما ماكاتساليش غير نسالي شغالي ونجي
ناجية: واخا اولدي الله يرضي عليك
أنور: خاي حمد لباس ؟ خوتي لبنات كلشي مزيان؟
ناجية: ايوا حمد راك عارفة مع الخدمة والبنات راه ماكانشوفم شاي راهم مع رجالم
أنور: خير ايما الله يسرلم .. شني راك كاتلقي ؟! ( شنو كاديري)
ناجية: طيبنا أنا ومرات خاك الخبز على برا ودخلنا نتغداو
أنور: مزيان ايما تكايس على صحتك وانا غير نسالي راه نضرب لعندك ونولي ضروري
ناجية : واخا الحبيب الله يرضى عليك بسلامة
جا وقت الغدا خرج سعد باش يتغدا بقات نعمة وطبيب والمرضى مابقا حتى واحد لي عندهم لي رونديڤو كلهم ورا جوج ، دخلات la salle d'attente دارت فيها الميناج وجمعات الألعاب فالغرفة تانية
بقا ليها غير الكولوار تعاودو باش تخرج بحالها ، يالاه هزات سانيكروا كاترش وهو يخرج من البيرو ديالو لكن مارداتش لبال مع رشة مع هو لاح الخطوة ولكن هز رجليه فآخر لحظة عاد شافتو
نعمة«شهقت ودارت يديها على فمها»: ويلي .. سمحليا ماشفتكش
أنور«هز يديه»: نو ماعليش
نعمة«وجها ولا حمرر بالحشمة»: واش قصتك
أنور : لا ماوقع والو تهدني
نعمة«بتوتر»: هادي تاني مرة غاتوقع ليا سمح ليا
أنور«شاف حالتها ونطق»:ماوقع باس تهدن راه ماواقفاش قبالتك مدام السليماني باش يولي وجهك هكا داير
نعمة«بقات كاتشوف فيه حتى فلتت ليها ضحكة بزز منها»: واش كنتي تما
أنور«حرك راسو كايشوف فيها كاضحك»: كملي شغالك ماوقع باس
نعمة: واخا
فعلا كملات شنو كادير وماغاتنكرش بلي عجبها التصرف لي عتابراتو مربي من جيهتو ، ماعقلتش عليه فاش وقع المشكل مع السليماني ولكن قالت غايكون كان تما وشاف ديك روينة حيت كلشي كان واقف...
فجهة أخرى
كانت كريمة مع شمس دوشات ليه بان ليها ماشي هو هداك ومشات توجد ليه ماياكل غير رجعات لقاتو طايح ملوي حدا ناموسية غوتات ربي لي خلقها هزات راسو كاتعيط عليه وهو عينيه شبه مسدودين ، ناضت تالفة ماعرفتش فين تصد كاتقلب هنا وهنا على لاباراي فالأخير لقاتها فالماريو ديال نعمة ، جبداتها بالخف كاتعبر ليه ويديها كايترعدو لقاتو طايح مشات لتلاجة جبدات منها ساشيات ديال الگليكوز حلات وحدة ومشات شرباتها ليه وعاودات ليه العبار فالبلاصة وهي كلها كاترعد وعرقات بالخوف...عاودات ليه لعبار لقاتو تقاد
كريمة : شمس الدين!!! ولدي !! واااشمس
شمس الدين: ممم
كريمة«عنقاتو»: ولدي «تحل الباب ديال دار ودخلات نعمة كاتعيط حتى سمعاتها كريمة»: هاحنا هنا
غير دخلات نعمة وشافت داك المنضر وهي تغوت أكيد كبدتها تعصرات عليها حيت عرفات شنو واقع
كريمة: طاح ليه هاهو شوية ويفيق
نعمة«كاتمسح دموع من عينيها»: عارفة اخالتي عااارفة
كريمة«شافت فيها بقلة حيلة»: ابنتي صبر
نعمة: خاصو لاباراي ضاروري خاصو يديرها صعيب عليه الحال كيفاش غانقدر نكونطرولي معاه سكر بلا لاباراي وهو صغير اخالتي كيفاش
كريمة: يكون خير نوضي هاهو فاق غير يرتاح شوية تهدني راه ربي مانعرفوش حسن منو
ناضت نعمة بغير نفس بدلات عليها ومشات تكات حداه كاتلعب فشعرو حتى غفاو بزوج بيهم ناعسين ، طلات عليهم كريمة بحب وهي كاتشوفهم معانقين نعمة لي هازة مسؤوليتو هي براسها خاص لي يهز مسؤوليتها عاشت وكاتعيش حوايج كبر منها بزاف ولكن مكتابها هكا وماعندها مادير من غير تواجه...بقات كريمة ساهية فيهم بصح نعمة عزيزة عندها بزاف من عند الله وهنا عرفات بلي ربي لي كايسخر الناس لناس ماشي العبد نهار تلاقات بيها ماكانتش كاتعرفها قبل ولكن كانت صدفة رحيمة خلات نعمة دير بلاصة فقلب كريمة بدون اذن حتى سمعات قصتها عرفات شنو مخبي داك الوجه زين عاد دخلات لدارها وبغات تعاونها وفعلا هاهي معاها كواجب عليها ماشي خير منها....
ستة ديال العشية الگوتي محطوط تلفازة شاعلة كريمة ونعمة كايضحكو مع شمس ويهضرو نساو شنو وقع اول نقولو بدلو المود باش مايتأزموش...كلاو وتفرجو وهضرة كاتجبد هضرة حتى نطقات كريمة...
كريمة«حنحنات منظفة صوتها»: بنتي كون ساعفتيني وشفتي مع الطبيب أنور راه الله يعمرها دار على حساب لاباراي ديال ولدك
نعمة«ميلات راسها فيها»: راه مانقدرش اخالتي شنو غايگول عليا هادي يالاه خدمات بغات تستاغل خدمتها
كريمة: المرض مافيهش هادشي لي كاتگولي نتي غاتخلصيه ولكن يتعامل معاك من باب الإنسانية غير ينقص عليك تكلفة ديالها بعدا راه كل مرة خاصو وحدة ومهمة ليه
نعمة: عارفة وملي كانفكر كانبغي ناكل جنابي حيت ماقدراش عليها
كريمة: واغير فكري فشنو گلت ليك ويكون خير
نعمة«حركات راسها»: ان شاء الله دابا نشوف
فنفس المدينة ولكن فبلاصة اخرى ، فوحدة من البرطمات صوت الغوت واصل حتى لباب الإقامة لي داز كايوقف يسمع صداع وماشي أول مرة ولاو معروفين فداك سيكتور بشوهتهم لي ماكاتساليش
فين هو داك تفرعين وجهد لي ملي كايجي شي جهد كتر منو كايواطيه ، بصح لي عوج عمرو لا تقاد ولي مقطع مقطع مايتخيط مايترقع .. وهكا كان فدار عصام المزوق من برا اش خبارك من داخل...
واقف كي المش المشوط كايسمع خل ودنيه لا هو ولا لي معاه الرجلة كان يترجل بيها على لي ضعف منو واخا مايكسابهاش حيت يا ايما يكون راجل و الرجلة تزاد بيها ولا غايبقى حياتو كاملة سامع بيها...
حنان«كشاكشها خارجين»: خرج عند ديك العقروشة تاع مك تجمع فمها ولا نخرج نهرسو ليها
عصام«هاز صبعو سبابة على فمو»: دابا غاسكتي من صداع خليها تبرد
حنان«كاتحلف عليه بيديها»: يبردو جنابك نتا وياها كان نهار كحل نهار خديتك شي تفك من لخرا شي طلاه
عصام: واقيلة زدتي فيه ماتشوفينيش ساكت وتركبي راه ماباغيش نهز ايدي علك
حنان«دارت يديها على خصرها»: لا غاهزهم نسميك راجل يلا مايحكو ليك خوتي زنافرك مع الأرض راني ماشي حديوية والدين فيا جدودي غالخلا
حليمة«دفعات باب البيت ودخلات»: دابا هداك وجهك ولا گفاك غاگولي كاين شي غدا فزك النهار
حنان«خرجات فيها عينيها»: ايوا اش غانگولك ماجيتش تراسة لا عندك لا عند بناتك وزايدون تسنيت ولدك يجيب تقدية
حليمة«مگفضة يديها وعرق غايطرطق فيها بالفقصة»: لگيتيها تسلكك مانتي من الحلاويات مانتي من الطيابات مانتي من المخملات مانتي من لي يديرو رفيسة ولا طعام ااامالك فهاد جهد
حنان«ميقات فيها»: ايوا راه گالوها ماعند الحادگة مادير فدار المزلوط
سي سيد بقا كايشوووف فيها ويتمعن فيها مزيااان وخرج من حداهم ماعرف معامن يهضر ولا نقولو جهد لي كان فيه جا لي جهد منو فيه
حليمة«حداتهم ليها»: ولينا مزاليط والبركة قلالت غي منك من نهار حطيتي رجلك هنا
حنان«قلبات وجها كاتنش عليه ويدها على كرشها»: سيري سيري طيبي لغدا ولا خليه انا واحلة فروحي هاد ساعة وشحال ما كالست غانعزل راسي انا علمتك هاد العيشة معاك ومع بناتك مادايزاش ليا
حليمة«هزات حاجبها فيها»: علاش كي جاوك بناتي بسلامة
حنان«ضحكات بغل»: وااااااالو غي وحدة راجعة مطلقة بولادها ولي بقا مسرح على سدادر
حليمة«خبطات صدرها»: سري زيديني رضينا بالهم والهم مارضى بينا ضو كان فلولة زدناه تانية كون صحابني مانزوجو مانقرب ليه
حنان: لولة ليقيتوها حيط قصير واتي سيري گبل مانجبدو الماضي والحاضر والمستقبل راه ريحتكم عطات
هادا الكلام وهدا حدو والقوي فالدنيا كاين ماقوا منو وربي فوق كلشي لي رحم غايلقا لي يرحمو ولي تعدا غايجيب ليه الله لي يتعدا عليه وكما تدين تدان...
بعد أسبوع
من بعد نهار طويل لي داز عليها فالخدمة بغات غير ترتاح ولكن كان لابد تخصص شوية د الوقت لولدها و تخرج هي وياه حيت حسات راسها هملاتو هاد الايام ولكن ماشي لخاطرها الجهد جا فوق جهدها...مشات تقدات شي تقدية ناقصاها فالدار عاد مشات مع دخلات للدار كضور عينيها حتى تلقات ليها كريمة كانت حتى هي لابسة كتسناها غير تجي باش تمشي فحالها...
كريمة: جيتي على سلامتك ابنتي
نعمة«بتعب»: الله يسملك اخالتي ،فينا هو شمس ؟
كريمة: راه فبيت الگلاس كايتسناك لبستو حوايجو وگلس كايتفرج«شافت فوجهاا كتبان مهدودة»: شوية نتي ابنتي
نعمة«حركات راسها»: الحمد لله ما نرتاح حتى ندير لاباري لولدي صورتو ديك نهار باقا بين عيني
كريمة«طبطبات ليها على كتفها»: دابا يحن الله ابنتي صبري وتكايسي على صحتك
نعمة: ونعم بالله
كريمة«حركات راسها»:المهم ابنتي انا مشيت
نعمة: واخا اخالتي بسلامة..
مشات فحالها كريمة لدارها ونعمة دخلات طل على ولدها لقاتو كايتفرج غير شافها وهو يجي قاصدها كايجري تلاح عليها عنقاتووو باستو كتشم ريحتو وهو فرحان حيت غاتخرجو اليوم ،خلاتو رجع كايتفرج ومشات هي بالخف دخلات دوشات عليها غير لحمها من العرق مقاصتش شعرها و خرجات نشفات لحمها و جبدات حوايح نقين من الماريو لي كانو عبارة على سروال عريض فالباج مع ديباردور فالبيض لبسات عبايتها صلات الصلاة لي فاتتها عاد زادت عليها شوميز فالصفر ساترة طايتها جمعات شعرها بقراص ووجها خلاتو كيف ما هو كتافات غير باكخون صافي..هزات صاكها دارت فيه بزطامها ولي غاتحتاجو و مشات عند ولدها لبساتو صباطو وخرجات هي وياه وهو طاير بالفرحة...شدو طاكسي ونيشان قصدو واحد الكافي لي كانت زوينة فيها العاب فين يلعب ولدها وحتى ثمنها مناسب ليها ،،
وصلو حدا القهوة خلصات نعمة طاكسي و دخلو شمس غير شاف الالعاب طلق منها و مشا يلعب وهي حاضياه كضحك، گلسات فطبلة قريبة ليه باش تبقى حاضياه و ما تغفلش عليه...
اما فجهة اخرى وفنفس البلاصة كان هو لي گالس مع صحابو مجمع معاهم هضرة كتجر هضرة حتى فلحضة رما عينيه و ماتجي غير عليها هي لي داخلة مع الباب وولدها فيديها بقا كايحقق و يتاكد واش هي ولا لا حتى قربات و گلسات قريبة عليهم شاف فشمس مطول ولاحض الشبه لي بينو و بينها وغير سمعو كيعيط ليها بماما زاد تاكد بلي ولدها..استغرب حيت ما يحسابش ليه مزوجة و عاد من حالتها واللبس ديالها كاتبان مزيانة لي يشوفها ما يوقلش هادي لي كاتقيل ضرب فجفاف فالنهار...للحظة سها فتفكيرو حتى نغزو صاحبو وضار مكمل جماعتو بدون اهتمام و مرة مرة عينيه كتفلت لشمس..
بقات حاضية ولدها كايلعب وهي الابتسامة على وجهها وفنفس الوقت عقلها خدام كتفكر ففلوس لاباري لي بغات ديرليه حيت شوفتها ليه داك النهار هاكاك خلات قبلها يتشوى عليه حسات براسها مهملة وبقا فيها ولدها لي كايعاني وهو مزال صغير...ما فاقت من سهوتها غير على السرباي لي جا كايحطليها شنو طلبات...خدات لشمس حليب سخون مع طوسط فيه فرماج و كاشير وهي كتافات غير بقهيوة باش تفيقها شوية ، شيرات لشمس بيديها حتى جا عندها كايجري كولو و عرقان باللعب ، جبدات كلينيكس مسحات ليه جبهتو و گلساتو حداها كتوكل فيه من بعد مادگات ليه شوكة ديالو و مرة مرة كايضحكوها الهضور ديالو وهو كيعاودليها على شي حاجة...بقات گالسة معاه حتى سالا ماكلتو اما هي ربي لي عالم بيها العيا هالكها غير كاتكابر...خلاتو گالس كايلعب فتيليفون و ناضت للحمام تغسل وجهاا بشوية د الما باش تصحصح من بعد ما وصاتو ما يتحركش حتى تجي...دازت من حدا طبلة فين كان انور حتى هز عينو فيها ملي لمحها غادا رما عينو للطبلة فين كانت لقا شمس حاني راسو على التيليفون...
حتى لشوية بدا تيليفون نعمة كايصوني و غير شافو شمس هز عينو كايشوف ماماه مالقاهاش ناض من بلاصتو كايقلب عليها تالف حتى جراتو واحد اليد...
كان نفسو انور لي كان خارج فحالو وغير شافو تالف جرو خافو يتلف على مو...
انور«تحنى مقرد عندو»: البطل فين ماشي
شمس«شاف فيه بنص عين وحنا عينيه»: الصمت
انور«بتاسم ليه»: ما تخافش الغزال نتا ولد نعمة؟
شمس«هز فيه راسو»: كاتعرف ماما
انور«حرك ليه راسو»: شنو سميتك ؟
شمس«بتاسم»: سميتي شمس الدين
انور«خربق ليه على شعرو»: سميتك زوينة البطل«جبد شكلاطة صغيرة عندو فجبب مدها ليه»: يلاه هاك هادي
شمس«شاف فديك شكلاط مطول واخا باغيه ولكن ماقدرش حرك ليه راسو بلا»: منقدرش
انور«هز حاجب»: علاش!
شمس الدين«ميل راسو فيه»: حيت..حيت انا مريض ديابيت
قوص حجبانو من هضرتو كايحاول يستوعب ،للحضة ضرو خاطرو عليه بصح دازو عندو حالات فحالو ما مرة ما جوج و فكل مرة كايبقاو فيه دراري صغار..مد يدو مسح ليه على شعرو يلاه بغا يعاود يهضر حتى سمع صوتها من وراه..
غير رمات عينيها لطبلة و ما لقاتوش حسات بالبرودة طلعات معاها يلاه غاضور تبدا تعيط وتقلب حتى لمحاتو واقف مع شي راجل..قلبها مشا و جا وواحد لي جا فبالها ،خافت حتى شداتها رعدة و مشات قاصداهم..
نعمة«جراتو من يديه»: شمس ياك گلتليك بقا بلاصتك خلعتيني اماما
يلاه بغات تكمل كلامها وهو يتلجم فمها فاش لمحاتو قدامها حنات شافت فولدها لي كايهضر و رجعات شافت فيه شنو كايدير هادا او بالاحرى شنو وقفو مع ولدها...
انور«حرك ليها راسو»: ما تخلعش غير كان ماشي تالف و وقفتو
نعمة«بحشمة»: احم شكرا ادكتور
انور: بنك ياك ؟«حركات راسها باه»: بغيت نعطيه شكلاط ساعة حافض الدرس ماعليهش
نعمة: اه ما يقدرش حيت ديابيتيك
انور«خشا يديه فجيابو و حرك راسو» : وي عرفت را قالالي «شاف فيه مبتاسم»: حافض دروسك ما عندي مايسالك«عاود شاف فنعمة»: شحال فعمرو
نعمة: 6 سنين
أنور«طول فيه شوفة»: quel type de diabète a-t-il?
نعمة: Diabète de type 1
أنور: كاتعطيه الأنسولين ديالو فالوقت ؟
نعمة«حركات راسها بسرعة»: اه كاياخدها فالوقت مانقدرش نغفل عليها
أنور : مافيها باس ياكل شكلاط مرة مرة ماتحرموش منو فمرة«رجع خدا ديك شكلاطة مدها ليه»: خود ابابا
شمس الدين«شاف فماماه واش تعطيه الأوكي حتى حركات ليه راسها عاد خداها»: شكرا اعمو
نعمة«تشوكات من ديك الكلمة ديال بابا برغم من انها عفوية منو»: واش نبقا نعطيه حيت كايبغيه بزاف
أنور«شاف فيها بجدية»: ماتحرميهش من شي حاجة عطيه القياس وماشي ديما مرة مرة والأنسولين ديالو ياخدو فالوقت وكلشي ايكون على خير«جاه صغير مسيكين»: مزيان لي دخلتولو الفكرة بلي ماياكلش أي حاجة ممنوعة على صحتو كايبان فاهم الوضع ديالو«شاف فيه مطول»: الى كانت شي حاجة نعاون فيها مرحبا
نعمة«حنات راسها محركاه»: شكرا ادكتور لهلا يخطيك
انور«سكت شوية كايشوف فيهم بزوج عاد نطق»: مرحبا خليت ليك الراحة
حنات ليه راسها باحترام حتى ضار مشا و غير شافتو تحرك بقات متبعاه بعينيها حتى غاب جاتها عجب طلاقاه برا الخدمة وفنفس الوقت عجبها الجيست لي دار بتاسمات بجنب فمها وضارت عند ولدها شدات من عندو تيليفون و دازت خلصات عاد قصدات دارها من بعد العيا ديال هاد نهار غاطيح كاو...
فجهة أخرى
كان مع صاحبو فطوموبيل شادين طريق بقا كايفكر فداك الولد صغير لي دخل لخاطرو ، كاينين شي وليدات من شوفة فيهم كايكونو مقبولين وحتى هاد الولد تقبل عندو فالبلاصة لحظة لي تفكرها هي بضبط فام دو ميناج لي خدامة عندو شوفة ديال هاد النهار عكسات ليه بزاف كاتبان انسانة متوازنة بسيطة ماكانش كايضن غاتكون مزوجة وعندها ولد حيت مابايناش عليها نهائيا...تفكيرو فيها فهاد ساعة تفكير عادي لأي شخص كانعرفوه معرفة سطحية وتلاقيناه وفكرنا فيه، هكا كان تفكيرو من جيهتها خالي من شي مشاعر ولكن علامة استفهام كاتخليه يتقبلها كيف ولدها لي دخل لخاطرو...غير شاف راسو عيق بالتفكير وتفكر بلي السيدة مزوجة نطق بصوت مرتافع وهو كايمسح على لحيتو
أنور : استغفر الله العظيم
عبد الحق«شاف فيه»: امالك اصحبي
أنور: مابقاش لي يستغفر ولا
عبد الحق: خود راحتك الله اودي«حنحن»: شكون سيدة لي كنتي واقف معاها؟ كاتجيك شي حاجة ولا معرفة
أنور«عبنيه على طريق»: كاتخدم عندي
عبد الحق: بصح فاش؟ جريتي على سعد
أنور: لا ، خدامة فالميناج
عبد الحق«حرك راسو باستغراب»: سي ڤري !! مابايناش عليها
أنور: حضيتيها يا خااااي على بلية فيك
عبد الحق: ايوا راه كنت كانتسناك عادي «سكت شوية ورجع نطق لي فيه ماكايهنيه»: ياكما؟
أنور«ضار عندو بتخزيرتو »: عبد الحق...
عبد الحق: هاني ساكت اصلا كاتبان مزوجة بولدها ماديالكش بلا ماتفكر
أنور«حرك راسو»: لا حول ولا قوه الا بالله
عبد الحق: غير شاد فيك اسي أنور ..ايمتا غادي عند الوليدة ؟
أنور: سيمانة لماجا يلا كتاب
عبد الحق : صافي دوز عليا نمشي معاك اخر مرة عجبتني المنطقة
أنور: يكون خير
أما عندها غير وصلات لدار قضات حوايجها وتكات كاتفكر فهاد العشية لي دازت حسات بنوع من الراحة انه ممكن تزعم وتقوليه على لاباراي ديال ولدها غير ديك ""يلا حتاجيتي شي حاجة مرحبا "" ريحاتها واخا ماطلبش منو بان ليها واحد شوية الأمل ولدها يدير ديك لاباراي واخا غاتخلصها ولكن غايكون شوية رفق بالمصاريف
رجعات كاتفكر فشكلاطة لي عطاه المشكل ماشي هنا المشكل فديك كلمة ""بابا"" لي هي محرومة منها كيفاش غايكون ولدها ؟! أول مرة غايبقا فيها الحال على شمس الدين لي ماعندوش أب أو بالأحرى عندو ولكن مــ ــيت وهو عايش...
أصبحنا وأصبح الملك لله....
صبح الجو مغيم وبارد واخا صيف كان البرد محرك فداك صباح الناس فخداميهم روتين ديال الخدمة معروف وحال نعمة وغيرهم لي كايبداو بكري غير مرة يفطرو مرة يبقاو بلا فطور ، هاد صباح نعمة صبحات فيها واحد الطاقة لي كاتجي مرة مرة كايكون عندها خاطر لخدمة وحتى نهارها كايكون بدا فأحسن حال ومبتسمة رغم الظروف
بدات الميناج ديالها فالكلينيك ديال السنان ولكن حسبات حتى تفطر وتكمل لي بقا ليها ، بحوايج الخدمة خرجات كاتفكر فين غاتلقا شي محلبة ولا حانوت حيت فين جا الكلينيك كلشي قهاوي وريسطورات وداكشي غالي عليها ، مشات واحد المسافة حتى خرجات من تما مشات لواحد سناك ، خدات بانيني اومليط وعصير بشهوة ناوية تفطر وتعقل عليه وخدات معاها عصير لنزهة حيت عارفاها ملي كاتحضر الماكلة كاتحضر نزهة معاها...خلصات وفطريقها راجعة مستمتعة بداك الجو ماتخرج غافوجه نحس ديال عصام بحالي شافت عزراين وجها تخلطو فيه لوان ، ماشي خوف منو اكتر من انها كانت كاتمنى عمرها تشوف كمارتو وعمرو يبان قدامها..جمعات نفسها وضربت فيه وزادت كاتزرب الخطوات وهو تابعها من لور
جميع دعاوي صدفاتهم ليه حتى وصلات لخدمتها مع غادور شدها من دراعها باش مادخلش ماشافش سيكيريتي لي تم كايصحاب ليه شي شفار وقف عليها
سيكيريتي: شي حاجة ا ختي نعمة ياك لباس ؟
نعمة«خافت من شي فضيحة وهي تبرد سوق»: والو اخويا انا شوية وندخل
عصام«بحدة»: زيدي نهضر معاك
نعمة«تنترات منو»: طلق مني ماعندي فاش نهضر معاك
عصام«حرك راسو »: لا عندك
نعمة«كاتنتر والو حاكمها من دراعها»: واااطلق ازمر طلقني راه غانجمع عليك الناس
عصام: غوتي شكون حابسك
نعمة«بعصبية»: باغي تمشي لحبس كايبان ليا لا نسيتي نفكرك
عصام: داك ولدي باغي نشوفو ماغانبقاش محروم منو وحتى نتي باغيك معاه
نعمة«شافت فيه باشمئزاز»: ماعندك ماتشوف ولدك يالاه بان ليك نمـــ وت شتي نمــ وت ومانخليكش تقيص زغبة منو وأنا ينوض با ومي من القبر والله داك نهار لا كان ليك
****«وقف وراهم ونطق بصوتو الحاد»: شي حاجة اشريف!!
عصام بلا مايتلفت غير سمع ديك "شي حاجة اشريف"" ماتسوقش وزاد باغي يجرها وهي مالقاتش حتى كيدير تفلت منو ، جرو عندو بجهد وشد ليه فاليد لي مزيرة عليها حتى طلقها منو
عصام«مخنزر»: مالنا شنو كاين شكون نتا
أنور«بهدوء»: قابط سيدة بسيف عليها وزايدها كاتسول..
عصام«طلعو وهبطو»: بيني وبينها نتا مالك غيرها از***بي الصباح هدا
أنور«شاف فيها»: نعمة سيري لخدمتك
نعمة«مشات جيهتو هازة يديها بحالي كاطلبو»: يالاه ادكتور الله يجازيك هدا راه مامعاهش الهضرة
عصام«تلاح عليها شاقمها تاني من دراعها»: ماغاتمشيش تاندويو بربي مامحرك ونتا«دفعو من صدرو»: سير تقـ**ود ياولد القـ**حبة
أنور وجهو تزنگ فديك لحظة يمكن جاه انسان مستفز وزاد ختمها بالسان لي خانز بحال وجهو شي لي ستافزو ، اما جعرة ركباتو ملي حط عليه يديه وزاد تغزف ملي فكر بلي ممكن يكون راجلها وبهاد المعاملة ديال لويل ماعقلش كيفاش عقد الكروشي وصيفطو ليه ديريكت لمشوار ديال وجهو تاجا مكربع فوق الگازو هدا لي غايمد يديه عليه مازال ماولداتوش مو ، الناس تجمعات ولي فالقهاوي خرجو ، نعمة كاتولول وتجر فالطبيب وتزاوگ لاحت لي فيديها وكاتجر فيه اما أنور راه الإستفزاز لي حس بيه هو لي خلاه يتعصب لهاد الدرجة اما فالأول هضر بفمو ولكن الطرف الآخر مامربيش وكانت خاصاه قلة التربية باش يتقادو ... تجمعو الناس على عصام مليوح تما حنكو مبنج وهي جرات الطبيب كلها كاتغزل حتى وصلو لباب الكلينيك..
أنور«نعت ليها مغزف»: راجلك هاد ميخي ؟
نعمة«حركات راسها بخجل»: لا لا مطلقة معاه ماعرفتش شنو بغا عندي ..سمح ليا الله يرحم ليك الواليدين على هاد تبهديلة
أنور: نتي بيخير ؟
نعمة: اه مافيا والو«غرغرو عينيها»:ماعرفتش شنو بغا عندي دعيتو الله
أنور«باستفسار»: ديما كايتلقا ليك ولا ؟
نعمة: لا أول مرة
أنور«حرك راسو بهدوء بحالي حتى حاجة ماوقعات»: مشي لخدمتك دابا
يالاه غاتدخل تمات خارجة نزهة حيت شافت الروينة كاملة من الزاج ومالقاتش كيدير تهبط حيت كانت خدامة غير هبطات عنقاتها
نزهة«طبطبات عليها»: كون يصحاب ليا مانخليكش تمشي تسخري
نعمة«هزات كتافها»: كانت مكتابة باش عرفتو غايجي عندي لهنا
نزهة: ولايني ماكايحشمش
نعمة: خسر ليا نهاري بغيت ليك مصيبة تصيبو ياربي مايلقاو مايجمعو فيه
نزهة: خلانا بلا عصير بغيت ليه لويل«كاتشوف فيديها»: فينا هو فطورك
نعمة«ميقات فيها»: بقا شي فطور على هاد الشوهة! زيدي نطلعو زيدي
مشاو طلعو ونعمة راه غير الله لي عالم بيها الحشمة لي حاسة بيها وصورة باش تحطات مارضااااتش يشوفها السيد لي خدامة عندو بديك الطريقة مابغاتش تسرط ليها زاد كمل عليها هدا لي شبع حزاق عاد تفكر ولدو وطفات عليه شمعة
عندو
طلع موراهم ديك ساعة عند صاحبو حيت عندو موعد ديجا تعطل عليه كايعمر ضرستو ولكن لي وقع شغلو وتعصب من الفوق ، دخل بوجه مغوبش حتى تنوا الطبيب
بركات«بطنز كيموالف معاه»: اه اه اه جبهتك هازة 190 ماشي 112
أنور: صباح الخير
بركات«حرك راسو»: نتمناو يكون خير
أنور: قهوة معاك اخيي الراس ديالي ايتشق
بركات«شاف فيه»: مالك
أنور«هز يديه»: ساعاتو لله
جاب ليه قهيوتو على مارتاح وبدا كايخدم ليه واخا ماكايعمرش ولكن صاحبو كايوقف عليه بيديه ، أنور غمض عينيه مخليه يخدم والبنت لي معاه معاوناه حتى كمل مازال ماسالاش ليه ولكن نقص عليه الخدمة شوية
بركات«طبطب ليه على كتفو»: تگعد عليا لخدمتك
أنور«ناض كايقاد شوميز ديالو»: شحال مازال ؟
بركات: رجع عندي الخميس نكملها ليك
أنور: ان شاء الله...
خرج من عندو تهدن شوية على كيفاش دخل ، بلا مايمشي لطموبيلتو توجه لكافي PAUL لي تما خدا منها كافي كريم وخدا كرواسون مازال سخونة وطوسط فرماج جمع داكشي اومبورطي ورجع لكلينيك ، هاد المرة ماطلعش داز لريسيبسيون حط داك شي وعطاهم سمية لمن ومشا هو لطموبيلتو وقصد لعيادة...
كانت مع نزهة كايخدمو على مايوصل وقت خروجها باش تمشي لعيادة ، عيطو ليها لتحت مشات عندهم غير عطاوها ساشي ستغربات حتى قالو ليها شكون صيفطو زاد فمها تحل ، رجعات عند نزهة حطات داكشي مازال سخون
نزهة«عينيها خارجين منهم القلوبة»: شكون جاب هادشي !؟ «ماجاوبتهاش ساهية»: تي شكون جاب هادشي
نعمة: دوزي فطري وسكتي لاش كاتسولي لي جابو راه جابو
نزهة: لعااار لي خلقك واش طبيب لي خلاليك هادشي
نعمة: گالو ليا هو ماعرفتش
نزهة: وراه هو شكون غيرو«ضرباتها بكتفها»: الناس كاتهلا فالناس لي كايخدمو عندهم
نعمة«شافت فيها »:ايوا صافي ماتندميناش حيت گلناها ليك «حكات شعرها ونطقات كاتشوف فالفطور»: باش عرفني مافاطراش
نزهة: يمكن سمعني فاش كنت كانهضر معاك دوزي دوزي نفطرو انا PAUL راه كاندوز غير من حداها
نعمة: والله مابقات عندي شي شهية ولكن القهوة ريحتها زوينة
گلسو كاياكلو نزهة تاكل وتدعي مع نعمة حيت بسبابها كاتفطر دابا كملو وجمعات نوضة ، خلات نزهة غاتخرج زبل وهي خدات طاكسي وحاضية جنابها لا يكون تابعها عصام حتى وصلات لعيادة وبدات خدمتها عادي ، كاتقول حتى يبان ليها وتشكرو على الجيست لي دار معاها هاد الصباح وفعلا ماجات تكملها فعقلها حتى كان خارج من البيرو متوجه لواحد الغرفة ديال الفحص ولكن ماشافش جيهتها كان زربان ، مشات لريدوات كادوز عليهم بالخف وحدا سعد حتى هو وكاتحاول تضيع الوقت باش تهضر معاه مايمكنش ماتقولش ليه شكرا ، ملي سالات بقات مجمعة مع سعد لي دمو خفيف وغير كايضحك بدل ليها الجو ديالها شوية حتى خرجو گاع المرضى ومشات باش تجمع ديك صال لي كانو گالسين فيها ...
سعد: نعمة انا مشيت اختي نعتق راسي وقت الغدا دااز وجاني الهيمري نجيب ليك شي حاجة معايا؟
نعمة«حركات راسها»: لا غير بصحتك حتى انا ساليت شوية ونمشي لدار
سعد: واخا اختي
مشا هو وهي توجهات لبيرو دقات جوج دقات خفاف حتى سمعات ديك دخل عاد دخلات ، كان بدل عليه وكايجمع داكشي ديالو حتى هز راسو فيها
أنور: صاڤا؟
نعمة: الحمد لله...احم شكرا على الصباح والفطور لي خليتيه ليا ماكنتيش تعدب راسك
أنور: نتي مزيان!؟
نعمة: اه الحمد لله
أنور: ماديرش فبالك عادي ماكاين لاش تشكريني
نعمة«باحترام»: مهم شكرا وصافي
حرك راسو فقط وكايشوفها مازال مترددة حس بيها باغا تقول شي حاجة ولكن لسانها مربوط ، فكرات تقوليه على ولدها ولكن ماعرفتش لا كيفاش تبدا ولا كيفاش غاتخرجها وهي كاتحس بحالي غايفهمها غلط
نعمة: غير كنت بغيت نهضر معاك ف...
أنور«مع غاتكمل قاطعو تيليفون لي كايصوني عليه جاوب فالبلاصة »: وي ألو
خلاتو كايهضر وتسلتات خارجة من عندو حمدات الله ماقالت والو حيت جاها راسها كاتخربق ، كيفاش غاتقوليه "" عافاك عاوني ندير لاباراي لولدي "" لا وفوق هادشي ينقص عليها تكلفة ديال كل مرة خاصها تبدل !! حشمت وحيت كرامتها ماسمحاتش ليها ضربت طم على فمها تاني وخرجات من العيادة متوجهة لدارها حتى ضارت ليها فالخوا وبقات كاتمشا من هنا لهنا حتى وقفات قدام واحد صالون كبير جا وسط الڤيلات كان زاج مفتوح وكايبين كاتشوف فالبنات كايصاوبو شعورهم وضفيراتهم لحظة بقا ليها راسها ، حتى هي زوينة وكلشي فيها زوين ولكن شي مرة تبدل روتين وتهلا فراسها هكا ماعندهاش الوقت وماعندهاش الفلوس ديك 300 درهم لي غاتحطها فصالون دايرة ليها الف حساب وحساب ودايرة ليها طريق ، بقات كاتقيص فشعرها وهي ساهية فدوك البنات حتى نعلات شيطان وكملات طريقها مكسورة الخاطر ...
فوحدة من البرطمات لي متواجدة فوحدة من الإقامات الكالم وقريبة لبحر مع حل الباب لاح سوارت ودخل حط شي سخرة من يديه عاد توجه لبيتو حيد ساعة من يديه وسباطو عاد دخل لدوش كايحيد فحوايجو ، خدا وقتو حتى دوش وتوضا عاد خرج بدل عليه وصلا شنو فاتو ملي حس براسو مرتاح خرج لكوزينة حط الماكلة لي جايب وتغدا حتى بدا تيليفونو كايصوني بنمرة لي غير شافها زفر وعرفها ديالمن خلاه تما كايصوني حتى سكت راسو..
تكا على سداري وحط لبيسي قدامو كايطابي فيه ومركز ، ولكن تركيزو تشتت مور مارجعات لداكرتو مرة أخرى وتفكر بلي كانت غاتقول ليه شي حاجة قبل ماتخرج ولكن قاطعو تيليفون ، رجع كايفكر نهار لي شافها مع ولدها وداك الولد بضبط لي غير تفكر شكل ديال باه حقد حقدة وتغيلف على أب بحال هداك حتى ولا كايقول مستحيل يكون ولدو و لقا راسو تاني كايقارن شبه بينو وبين ماماه ، لي شافو كايخربق فالبيسي غايقول بلي خدام ولكن العقل غايب لجهة أخرى ، بقات حاجة كاتديه الحاجة وماستوعب حتى حس بلي داز وقت مزيان وهو غايب...
أنور«مسح على وجهو»: اش كاتبني وتريب ا أنور اااش
ناض صايب ليه قهيوة بالخف ورجع گلس فالبالكون كانت شمس كاتغرب ، صونا تيليفونو ومشا ليه هزو هاد لمرة دوز الخط بلا مايتعطل
المكالمة
أنور«جغم من قهوتو عاد نطق»: يما
ناجية«بصوت حنين»: المرضي كيبقيت
أنور: الحمدلله نتي كيبقيتي
ناجية: الحمد لله ديك رجل رجعتلي عاود
أنور.تقاد فگلستو»: حتى نجي الخميس ونشوفهالك ..وحتى نتي ايما نقص شوية من شغل راك عيانة...
ناجية: الحبيب وشنو ندير يلا ماخدمتش شغل مانقدش نبقا غير گالسة نمرط
أنور«حرك رلسو»: ايوا ماتگلسش فمرة غي عطي الراحة لراسك
ناجية: واخا ايوا خدم الكاميرة نشوفك
حط القهوة من يديه وقلب ابيل ڤيديو وحتى هي جاوباتو غير شافتو ضحكات حتى تغمضو عينيها ، توحشاتو بلا قياس ،كانت مرا باين فيها حق الكبر ولكن الزين والحروف شادين بلاصتهم
أنور«غمزها»: غزالي
ناجية«حركات راسها مدوراه»: مابقا غزال ابني غي شوف لمن تقولا
أنور«نعت ليها بصبعو زعمة نتي»: ليك ايما ومازال غزالي واخا ديري مية عام
ناجية«بقات محافضة على تبسيمتها»: انا معروضة هاد العشية عند جيران«سكتت شوية وكملت كلامها»:خليني غير نرمي العين على شي بنت ليك ماتعطينيش طوع ؟ والله ابني يلا بنت تمنطاش تمنيتها لك
أنور«هز حاجبو وزفر من نفس الموضوع»: هانتي ايما بديتي كادخل وتخرج بنت تمنطاش لوكان جيت نتزوج صغير غاتكون بنتي قدها يهديك الله الحاجة
ناجية: ايوا وفوقاش
أنور«بقا كايشوف فيها»: اش كنا قلنا شحال هادا
ناجية«حبست ضحكتها»: حمامتك محواطة نهار يكتاب ربي يطلقها توصل تا لعندك
أنور«بطنز»: ايوا خليني ايما كانعاين حمامتي
ناجية «ضحكها»: واخا الحبيب لي بان ليك
قطع معاها وهو ضاحك حيت خلاها تضحك ، وفنفس الوقت تنهد من العقلية لي مازال مابغات تحيد ليهم و الراجل شحال ما كان كبير يديها صغيرة وبلي البنت يلا فاتت تمنطاش كاتسما كبيرة وهو هاد المنطق ديالهم مامنغموش وعمرو غايدخل ليه لراسو ، خاطرو فالحاجة لي كاتجي بلا مايخطط ليها ومازال الحمامة لي باغي مربوطة ومازال مولاها كايتسناها...
تـــــازة
قبل المدينة بكيلوميطرات خارج على الطريق أراضي كبيرة كلها زيتون وفدانات وسط داك المنضر دار كبيرة بثلاث طوابق وعاد سطح وضاير بيها صور من برا ، اما جهة تانية من الدار كاين كوري ما كبير ماصغير وحداه زريبة، الشمس كانت غربات ديك ساعة واغلب البيوت تما كايگلسو على برا حيت الصيف والحرارة كاتكون زايدة نغزة، فوسط الدار ناجية فين كانت كاتهضر مع ولدها گالسة فواحد الگليسة مفرشينها فالأرض وقدامها طبلة حاطين كاسكروط ديال العشية غير هي ومرت ولدها و ولد ولدها صغير كايلعب ،غير قطعات مع أنور حطات تيليفون حداها وخوات ليها كاس ديال أتاي عاد تمات خارجة مرت ولدها وجها مبشور وبيضة كي الحليب ، لابسة بيجامة طويلة وجامعة شعرها لفوق هازة طبسيل ديال البغرير فيديها...
مارية«مبسمة»: غي كاتهضر مع بنك وجهك اينور اخالتي
ناجية«تنهدات»: راك عارفاه كانجبدلو الزواج كايبدا يتملغ معايا كانعيا معاه والو لي فراسو فراسو
مارية«حطات طبسيل وگلسات»: شنو قالك؟
ناجية: قالك كايعاين حتى تجي بخاطرها
مارية«ضحكات»: ايوا بقاااا أنور لوسي يضفر شيب اخالتي بغينا نفرحو معاه
ناجية:يانا ماعندي مانقيلو خاطرو فوق الخواطر ابنتي مابغاشاي مالقيت مانقولو
مارية: ماتشوفش لو بنت تسولي لي حدانا ؟ ولا هو ماباغيشاي من هنا يمكن
ناجية:شكون! عايدة ؟ «حركات مارية راسها »: هو ماقالي لا بغيتا من هنا ولا من تما كايعاين النصيب
مارية«حركات راسها»: فيها خير .... بنت تسولي غزالة وماصغيرة شاي بزاف بحرا تجي معاه عاود
ناجية: لا هاديك خطبوها وعاودو وناس لي خطبو فيها سمحو مانديهالوش
مارية: ايوا ما كتابلاشاي اخالتي نصيبا باقي ماجا، ما تعرف يكون رزقا معاه
ناجية«بامتناع»: لالا انا بني غزال ومازالو عزري نبغيلو شي وريدة فحالو ماشي وحدة سمح فيها شحال من واحد
مارية : ايوا نتي تعرف«مدات ليها البغرير»: كول اخالتي علاين يجي صالح يعبينا عند الناس
ناجية«كاتحك على رجليها»: كون غي عفاوني رجلي كاتحرقني ومانقد على سهير
مارية: ايوا تمشي تونسني قالا مانمشي شاي بوحدي مع دري فيدي يالاه اخالتي يعجبك الحال
ناجية: واخا ابنتي الله يرضي عليك
كملو ماكلتهم وناضو مارية جمعات داكشي وطرفات الدنيا وهزات ولدها و كل وحدة دخلات لبيتها كاتلبس عليها ، فات المغرب عاد جا ولدها بطوموبيل من الخدمة لعندهم ، غير سمعوه وهما يخرجو كانو واجدين ، طلعات مارية لور مع ولدها كانت لابسة جلابة بقميصها وصاك وطالقة شعرها والعگوزة القدام حتى هي لابسة جلابة فالباج مطروزة...
صالح«شد يد مو باسها»: يما كي راك؟
ناجية: الحمد لله ابني من تمارة جيت الحبيب مورانا
صالح: نتي غي أمر نجي من وسط الحرب الغالية«شاف فالمراية حتى شافت فيه مارية وغمزها خلاها غارقة فحشمتها»
ناجية: الله يرضي عليكم
يتبع...
التعليقات
لا توجد تعليقات بعد، كن أول من يعلق.