محتوى القصة
قــــــبـــــل ست سنوات...
صعيب الظلم والحرݣة ديالو ماشي ساهل باش تبرا ، تعبيرها سوا بالبكا سوا القهرة لي فصوتها وهي كاتبرر ليهم على شي حاجة لي باينة ولكن شنو نقولو على لي كايتسنا غير سبة باش يتفرج ، دارها سم والحسد والغيرة..گالسة على سداري كلها مشروطة من جلابتها مكياجها تجخلط دموع مسيقين ليها حناكها وشعر لي تشنتف ، ضايرين بيها بحال يلا فشي تحقيق لوايسات من جهة والعݣوزة من جهة والمعلم الوسط ، تحلف وترد لقلبها مادارت شي حاجة
حليمة«تلاحت عليها مليعاها من فخاضها»: ياك ابنت الحرام بغيتي ديري لينا شوهة بقا لينا غا طيكطوك
نعمة«شافت فيه على الله يسمع ليها»: والله ولي شانو عضيييم يلا كنا كانشطحو كاملين انا وخواتاتك وتيليفون راه كان عند سارة
سارة«خرجات عينيها»: لهلا يطيح علينا شي باطل قلتي صوريني صورناك
نعمة«نعتات بصبعها لراسها»: انا قلتها ؟
حليمة: جمعي داك الفم كون ماكنتش حاضرة نقول بصح ونتي ملي نضتي ونتي تلوزي كي شيخة عاجبك راسك
نعمة«بحرقة وتنخصيصة طالعاها»: علاش اخالتي علاش تكدبي هالبنات«شافت فيهم»: ياك كنا كانشطحو مجموعين وݣلستو وانا ݣلست وراكم
عصام«بقا كايشوف فيهم كايتلاغطو هزها من جلابتها جارها لبيت»: يتبعني شي حد غانضبر معاه
جارها لبيت بحال شي سلعة شايطة وخلاهم وراه يتغامزو عليها عارفينها ليلة تاكل وتشيط، الكلام شلا وسكات خير وحدة لي قلبها عليها هازة دري فيديها وكاتشوف فيهم ، حتى هي ختو ولايني صيلها ماهو صيلهم وعمر ظلم ماكانت كاتسكت عليه
خولة: ماشي حشومة عليكم«شافت فختها»: نتي لي كنتي كاتصوري ياك نتي لي لحتي داك الفيديو
حليمة«خنزرات فبها»: تهزي غبري لبيتك نتي تهزي
كيف كايقولو لولين لا شيخ يفلق ولا عگوزة طلق شي حد يتبع ديك المسكينة ولا يفرق عليها وعارفين ملي كايسد عليها فالصباح كاتخرج كلها مزوقة ، ولكن دكر ديما كاتبان رجولتو غير على لي ضعف منو ونعمة كانت هي ديك الإنسانة لي كاتخليه يحس براسو راجل حيت كايستقوى عليها وهي ضعيفة ، بلا مايسمع وبلا مايفهم منها غير شاف داك الفيديو شعلت فيه البولة الحمرة هي لي عمرها هزاتها قدامو تلاح قدام الخلق والكومنطيرات حدث ولا حرج...
سورت الباب وشروط عليها ديك جلابة خلاها بالبيرميدة وديبارضور ...واش سالة؟! لا حتى هما شروطهم عليها حتى بقات صولو ، سمطة راها فيديه والخبيط لي عطاها لجنابها تموت ماتنساه كلها تزوقت
صوت لي غادافع بيه على راسها بح ومشا طاقة لي غاتكالي بيها على لحمها تبخرات ولات قدامو مرخية وهو بحال شي جاعر فين ما والاه كايخبطها...يمكن يكون الڤيديو لي تلاح ماضروش كتر ما أنه شحال من مرة طلبها تشطح ليه ومابغاتش !! ودائما صد من جيهتها حيت المعاملة ديالو معاها ماشي ديال واحد غاتلبي ليه رغباتو...
نعمة«هزات عينيها المدمعين فيه »: ربي غاينتاقم منك على هادشي غير قتلني خليني نرتاح
عصام«حرك راسو بحال شي مريض»: مازال زايدة فيه ... تسناي انا مازال ماساليتش
نعمة«نطقات بالفقصة والحگرة لي فقلبها لداخل»: نتا راك مريض خاصك داوا
عصام: صبري انا غانوري لمك لمريض
بدا كايحيد فحوايجو ويلوح عينيه حمرين بالنسبة ليه المنظر لي كايشوف دابا راه ملبي ليه غرائزو الحيوا*/نية ،منشوي بشنو كايشوف واللوحة لي رسمها ليها فلحمها ،هزها من الأرض بلا رحمة وسمطة باش كلات العصا ربط ليها يديها بيها وتلاح عليها بحال شي حـ***يوان كاينهش فلحمها وصدرها تكا عليه بالعضان بلا دخلة المزفتة لي دار ليها خلا ديك شوية صوت لي بقا ليها مشا ، كرهاتو ولا كايبان ليها غاتقتلو وتقتل راسها وتهنا حتى شوفة ماقدرتش تشوف فيه خافت من ديك صورة تبقا مرسومة بين عينيها خافت بصح دير كارثة، ولدها مستحيل يبقا فهاد دار ومع هاد الكـ**لب فنفس البلاصة ،
كان كاي ايلاجي معاها بواحد العـ.// نف وفنفس الوقت كايسب فيها ويعاير بحالي جايب قحـ***بة ماشي مرتو لي والدة معاه بقا هكاك كل مرة يگلبها على جهة ومستمتع نسا الڤيديو ونسا كلشي ولقا ليه متعة من نوع آخر على حسابها هي وعلى حسب نفسيتها كان كايرتاح ويرجع يستمتع مع راسو وهي مىبوطة ما عندها كيف تحرك ولا دافع على راسها ...كمل بحال شي بهيمة وتلاح عليها لاهت بحال شي زامـ**ل شبعان كبـ**ت
عندهم برا
كانو گالسين فصالة لعشا مابقا والو تأدن ، الشارفة شادة تيليفون وبنتها حتى هي تقيل تميساجا مع زوج الغفلة ، اما خولة شادة داك صغير عطاتو رضاعة تانعس وبقات شاداه كرهات الوضع كامل
خولة«نعتت ليها جهة لبيت»: ديك البنت ماكاينش لي ينوض يسول عليها ماتت ولا عاشت غواتها باقي فودني
حليمة«كاتحرك يديها بمعنى نوضي»: نوضي نتي نيت سولي عليها باش تاكلي حقك
خولة«خنزرات فيها»: والله يلا حرام هادشي حرااام مايبغيه لا ربي لا عبدو شنو دنب هاد دري
حليمة«هزات صبعها كاتحلف عليها»: خولة ديها فراسك منو ليها مرتو يربيها كي بغا شغلو هداك ماعندي فاش ندخل
خولة«حدرات راسها لدري كاتشوف فيه ناعس»: مادخليش غير ملي كاتكون كاتاكل العصا أما ملي تكون نايضة عليها كاتزيدي ليه فطبخة
دارت راسها ماسمعتتهاش بقات كاتغدد خولة من داخل ديالها ، حتى بان ليهم الباب تحل وخرج هو من تم مدوش لابس حوايجو..
عصام: حطي ليا ناكل
حليمة: واخا انا جايا
تبعاتو عطاتو مايحنجر وخولة كادعي عليه واخا خوها كرهاتو ، مشا كلا تاشبع ورجع دخل لبيت طفا ضو وضربها بنعسة مخليها تما كاتعگر غير راسها وتنين حالفة حلفة غير يصبح ويفتح ، تهزات شوية هزات تيليفون ديالها من حداه كاتسلت حتى خداتو وتركنات فيما تعگرها داتها يهبطو دموعها وتعض شفايفها بحر الألم لي هي فيه عاد لوجه لي كاتحس بالحريق ليه وماعارفاش فين مضروبة
قلبات تيليفونها لقات الفيديو مازال مسجل رجعات خرجات من تم وكاتقلب تالقات تيك توك مانسطالي وهي ماعندهاش اصلا مامدخلاهش كيفاش دابا مآنسطالي عندها دخلات ليه وهو يطلع ليها الكونط ماشي ديالها وحيت شافتو واش جديد لقاتو ديجا قديم والإسم لي فيه ديالها ، مهم سارة دارت فيها مابغات وداك سـ*م لي فيها طلقاتو وهادي عمرها لا نساتها ليهم...
صبح الصباح و فاقت المسكينة على ضو الشمس لي داخل من السرجم ، كاتحس بداتها كلها كتعگرها..وغير رجع عليها شنو وقع البارح وكيفاش عنفها و اغتا /صبها و رماها فحال شي كلبة بدات كاتبكي كرهات راسها و حياتها لحمها كرهاتو وهي كتحس براسها توسخات ،زاوگات و طلبات فيه ولا حن فيها كان فحال شي حيو_/ان عنــــ فها ونهش لحمها بابشع طريقة...حسات بالرضان وهي تنوض كتجري لحمام تقيات لي فجوفها واخا ما واكلة والو حتى حسات بالمرار طالع ليها، وجها لي تجخلط بالدموع و الماكياج لي بقا سايح على وجهها من البارح، شافت فالمرايا كتمعن فوجهها لي ولا كولو ضرابي ،هزات يديها كاتقيص فوجهها وداتها كولها ولات زرقا و الحمورية طلعات ليها شوية فعينيه...كرهاتو و كرهات عيشتها معاه ومع طاسيلتو عيات تزواگ فيهم و طلبهم يعتقوها منو ساعة ما لقات لي يحن... طلقات الما كاتغسل وجها و دموعها هابطين بالسكات حتى هبطات منهارة فوسط الدوش، تبكي د*//م على زهرها و مكتوبها وعلى خوها لي سمح فيها لشمايت يديروها بين رجلين و يتكرفصو عليها...صبرات لضلم و الحگرة و دل حتى طفاوها وهي لي كانت كيف نوارة ، كانت كترجا الخير فهاد الراجل يتبدل و يعاملها مزيان لا هي لا ولدها ولكن غير ما زاد فيه و بهادشي لي دارو فيها البارح حنا وصل حد الصبر و هنا تهدات طاقتها...
ناضت جمعات الوقفة هكاك مابغاتش دوش ولا تقيص لحمها تادير حل ، خرجات كتسلت وهي حاجة وحدة فراسها و مغاتراجعش عليها، نشفات لحمها لي سرد بالما و لبسات عليها جلابتها هزات وراقعها ولي غاتحتاجو دارتهم فصاكها و خرجات من بيتها كتسلت كان كولشي باقي ناعس..دازت طلات على الصالون صغير لقات ولدها ناعس حدا عمتو مشات هزاتو بشوية باش ما يفطن ليها حد و خرجات من الدار، نيشان قصدات الصبيطار، الى عند بالو غادوزها ليه هاد المرة فراه غالط ، هنا فاض الكاس و ما بقا عندها علاش تصبر...
مشات نيشان للمستعجلات و دخلات كاتوسل على شي طبيبة حتى جات عندها ممرضة وغير شافت حالتها دخلاتها بقات فيها و دخلاتها عند الطبيبة لي غير شافتها قلباتها وقلبات ليها حتى لتحت كل مرة كاتقيصها كاتعگر بحالي داز فيها حمـ**ار ماشي بنادم ، بدات كتغوت مخرجة عينيها من حالتها حيت كانت كلها ضرابي ..
الطبيبة«وجها مابقاش كايتفسر»: استغفر الله العظيم ولا حول ولا قوه الا بالله العلي العظيم شكون دار فيك هادشي شكون لي تكرفص عليك هكا؟؟
نعمة«هبطات دمعة سخونة على حنكها و ضحكات بمرارة»: راجلي لي دار فيا هاكا و ماشي اول مرة
الطبيب«غوتات بعصبية»: كيفاش! حـ**يوان هادا لي داير فمرتو هاد الحالة ، فقاش طرا هادشي واش ديما كايضربك هكا ولا أول مرة ؟
نعمة«كتبكي»: البارح و ماشي أول كايدير ليا هاكا و ...
الطبيبة«تنرفزاات»: ماشي أول مرة ؟ وساكتة واش واعية براسك اش كتگولي راه لحمك كولو مزوق شوفي وجهك«شدات على جبهتها»و غتااا***صبك من لفوق هادشي كامل دارو فيك ومزال كتگولي راجلي !!علاش كتصبرو على هاد شي علاااش بغيت غير نعرف
نعمة«كتهضر و شهقة واحلة فحلقها حيت ماعندها ماتفسير الهضرة ساهلة والتطبيق صعيب»: م ماشي لخاطري..كنت كانقول غايتبدل بيني وبينو ولد ولكن غير مزاد فيه حيت عارفني ماعندي لا حنين لا رحيم كايتكرفص عليا هو وتريكتو
الطبيبة : محاولوش يفرقو عليك منو يفكوك؟
نعمة«حركات راسها بلا»: اصلا هوما السباب فلي طرا البارح شعلو العافية ولاحوني فيها
الطبيبة«بقات فيها»:لا حول ولا قوة الا بالله الله ياخد فيهم الحق«هزات ملف فيديها»: سمعيني مزيان ،انا غانوتق كولشي هنا اي اصابة سواء صغيرة ولا كبيرة ،وغاتمشي ديري شكاية بيه ،غانصيفطك عند واحد سيدة صاحبتي ضابط شرط ف**** هي غاتعاون معاك «هزات عينيها فيها بتحدير»: عنداك تنازلي ليه ما تسمحيش ليه طلقي الحيو/ ان وعيشي حياتك فكري فراسك وولدك...
داكشي لي كان بقات الطبيبة كتقاد ليها الشهادة الطبية و مرة مرة تشوف فيها بقات فيها بزاف و من حالتها و طريقة هضرتها بانت ليها درويش ماتستاهلش هاد تكرفيص...اما نعمة فكانت فعالمها عينيها على ولدها كترضع فيه و راسها غرق فالتفكير حتى سالات الطبيبة وهزات ورقها و مشات قاصدة البلاصة لي قالت ليها....
خرجات من عند طبيبة هازة جوج ديال les certificats médicaux نيشان للكوميسارية فين غاديكلاري دخلت نيشان كتسول على الشرطية لي قالت ليها طبيبة ، دخلوها لمكتب ضابط الشرطة لقاتها ديجا كتسناها رحبات بيها و خدات منها الوراق ،عيطات ضابط الشرطة لكاتب الضبط باش يقيد اقوالها و بدات نعمة كتعاود ليها كولشي لي وقع من الأول و معاملتو ليها هو وعائلتو العنف لي تعرضات ليه و الاغتــــ. صاب لي كان متككر المهم غرقات لباباه ضوسي ، استامعو لاقوالها شدو من عندها الشهادات و تحرر المحضر و ترفعات ضددو شكاية العـ**نف الأسري ، خرج كاتب الضبط بقات غير هي مع الضابط كتسمع ليها و بقات فيها ملي سمعات قصتها و من حالتها وهضرتها عرفاتها درويشة وجهاتها شنو دير و كيفاش تدفع طلاقها وخلات ليها نمرتها باش تواصل معاها فحالة ما حتاجت شي حاجة...سيفطاتها مع البوليس لي كانو غايمشي للدار باش يعتاقلوه و فنفس الوقت باش تهز حوايجها وهي محمية و ما يقدروش ياديوها واخا ما عارفاش فين غاتمشي ولكن ما بغاتش تزيد دقيقة فديك الدار ....
وداكشي لي كان ركبات فالطموبيل مع البوليس ما توقفو غير فزنقة ديال الموبل كولشي بقا كابشوف شنو كايديرو البوليس هنا شنو واقع و زادو تعجبو فاش شافو نعمة نازلة معاهم ووجها كولو مزوق كتر لغا و القيل والقال و كل واحد كايلغي بلغاه..
اما فالدار كانو مزال يلاه فايقين و صوت عصام قالب الدنيا مليي ناض و ما لقاهاش فالبيت هي و الولد...ماطالش انتضارو بزااف حتى سمع صونيط فالباب مشا بجعرة يفتح عند بالو هي حتى كايفتحها على وجه البوليس، بقا كايضور عينو عليهم و فالاخير ستقرات عليها هي لي وراهم..
الشرطي«فيقو من سهوتو فاش سولو»: عصام الرحالي !!
عصام«مخنزر فيها»: هو هادا اشاف كاين ما نقضيو
الشرطي:خاصك تجي معانا
حليمة«نقزات من موراه خارجة فاش قالت ليها بنتها البوليس»: ولدي ما دار والو اشاف علاش غايمشي معاكم«شافت فنعمة شوفة ديال القتيلة»: شنوو درتي الكافرة ما عيتيش من الكدوب
الشرطي: ااا شريفة هنينا «شير لشرطي لاخر باش يدير ليه المينوط»: غاتمشي معانا ملي نوصلو غاتعرف شنو كاين
اوا غير دارو ليه المينوط و جروه هكاك مزال بحوايج نعاس ،حماتها حليمة و بناتها على الغوات بغات تجر نعمة تضربها ساعة لقات البوليسي فوجهاا ،دخلات نعمة بالخف لبيتها كتجمع حوايجها و دخلات وراها خولة كتسلت حتى هي كتجمع معاها من ديما مكانتش كاتبغي الضلم و مكانتش كتحمل لي كايديروه فيها خوها ومها وخا شافت البوليس غاديين بيه ما تحرك فيها والو حيت عارفاه يستاهل و ما دوزش القليل على هاد بنت الناس حتى هي بنت و م تبغيش نهار يكتاب عليها المكتاب وتزوج يوقع ليها هادشي...
بقات كتجمع نعمة الحوايج و هي معاوناها فالاخير بقات هازا ليها غير شمس باش ما يبكيش وهي كاتجمع ما خلات حتى حاجة ديالها...بقات كتقلب على الحالة المدنية ما لقاتهاش وهي تفكرها فالمجر ديال الماريو مشات تحلو و من زهرها لقات الساروت مزال موغل فيه وغير حلاتو وهي ضرب على الفلوس لي مخزونين تم...خرجات عينيها كانو جوج ماصوات محطوطين مليون ينطح مليون بلا ما تفكر بزااف جمعاتهم حتى هوما زادتهم على هادوك لي كانت خازنة ،واخا هاد الفلوس ما ساويين والو قدام العداب لي دوز عليها فهاد تلت سنين ديال القهرة ، غير سالات شدات ولدها و صاكها و خرجات تحت انضارهم لي كون كانو قرطاس كون غربلوها...شافت فعگوزتها مطولة و نطقات بهضرتها قبل ما تخرج
نعمة«عينيها مدمعين و القهرة فصوتها»: الله ياخد فيك الحق كيفما عدبتيني و قهرتيني ،درتك فمقام مي و تكرفصتي عليا نتي و بناتك وولدك ، ولكن ربي كبير كيف ما تعديتو عليا انا وولدي غايجيب لي يتعدا عليكم حتى نتوما ما عمري نسمح ليكم حتى لغدا گدام الله
رمات ليهم هضرتها و خرجات حاسبة الدروج و البوليسي وراها حتى وصلات للزنقة ضربات عليه فالطموبيل مع البوليس شافت فيه ببرود و جرات رجليها غادا خارجة من ديك الدار و من ديك القهرة واخا عارفة لي كايتسنها ماشي ساهل و الدنيا صعيبة و الزمان حار ولكن اللهم ضلم الدنيا ولا ضلم العباد....
بقات غادا طوالة ديال طريق وهي كتبكي وولدها فيديها ناعس مجايب خبار لشنو واقع يلاه قفل 4 شهور و دوز تمرميد بين اليدين ، ما وقفات حتى لواحد جردة و گلسات فيها، تنهدات وهي كاتفكر فين غاتمشي ،ها هي خرجات من ديك الدار فين غاتصد واشمن باب غادق و شكون لي غايبغيها هي وولدها ،خوها واحد لي عندها و مستحيل تمشي لعندو حيت عارفاه ما يهزهاش و ما ترضاش تمشي لعندو و يجري عليها هو ولا مرتوو وحتى الى بغا يدخلها عارفة غادي تسمع لي ما يرضيها الى غير هضرتو و سمو شبعات و تگهمات منو، بقات كتفكر و تفكر بقا ليها حل واحد ووحدة لي تقدر تمشي لعندها فهاد الوقت بين ما فكات حريرتها مع شماتة ديال راجلها وتشوف حل لراسها... ديك ساعة وبلا ما تزيد تفكر ناضت جمعات الوقفة و قصدات المحطة ديال طاكسيات تسنات حتى عمرو البلايص و تحركو وهي عينيها على طريق ،شحال هادي ما بقات زارتها ولا عرفو خبار بعضياتهم من نهار ماتت مها ، للحضة حسات برجفة فداتها رجفة ديال الخوف خافت ما تقبلش عليها حتى هي و فين غاتصد ، استغفرات الله فخاطرها و بقات متبعة طريق حتى خرجو من المحمدية و وصلات لواحد الڤيلاج صغير ،نزلات تم و شدات خطاف لي دخل بيها لفين بغات كانت فحال واحد العروبية صغيرة مكانت بعيدة على المدينة بزااف ، ليها مدة طويلة ما حطات رجليها هنااا ، اخر مرة كانت قبل ما تموت مها بشي عام...
نزلات كضور عينيها و بالضبط تركزو على واحد الدار كانت دويرة صغيرة مضورة بارض صغيرة و مضورة بالصور ، بقات كاتشوف قدامها كانو بزاف ديال طموبيلات و بنادم داخل خارج ، دار الحاجة يزة معروفة من زمان و كولشي كايقصدها الصغير و الكبير ، كتبخ على نار الفارسية ، كاتكمد على الشقيقة ، تمسد للدراري الصغار الحاصول عندها بركة من عند الله كتنفع بيها الناس وشحال من واحد جاب ليه ربي شيفا على يديها، دازو السنين ووخا كبرات فالعمر مازال الناس كتقصدها..
بقات نعمة كاتشوف فداك المنضر فالاخير تشجعات و تمشات داخلة ،و مع دخلة ديال الباب ضرباتها ريحة العشوب و الزيت و البخور ، حتى كمشات عينيها محاملاش الريحة ، مع دخلة ضربات على الناس لي گالسين تم كايتسناو نوبتهم ، حنات راسها و زادت داخلة لداخل تشوف خالتها فين حتى سمعات وحدة من العيالات هضرات مقصداها
المرا: اختي اا ختي نوبة راه من الصباح و حنا نتسناو
نعمة«ضارت شافت فيها بمعنى واش معايا»
المرا : ايييه اختي معاك رجعي شدي نوبة فحالك فحالنا فين غادا داخلة
نعمة: انا...
مع بغات تنطق قاطعها صوت من وراها حتى ضارت تلفتات عندها، و بانت مرا فاواخر الخمسينات من عمرها وجهها باين فيه التكماش بفعل تقدم السن ،كانت لاسبة بيجامتها و محزماها بفواطة و زيف حياتي على راسها...
يزة: امالنا ياك لباس اش هاد الغوت
المرا: والو امي يزة غير گلت ليها تشد نوبة كيفها كيفنا وهي غير جات بغات تسبقنااا
يزة«ضارت تشوف شكون هادي»: شكونن ها...
تقطع صوتها فاش شافت فنعمة كتشوف فيها و تحقق واش هي بصح ولالا، حتى نطقات نعمة و الدموع فعينيها
نعمة«صوتها مقجوج»: خــ...خالتي
بقات كتحقق فيها وغير سمعت ديك خالتي تاكدت ،استغربت من شنو جابها لعندها و شافت فتربية لي فيديها و رجعات شافت فيها عرفاتها و عرفاتها مزيان علاش لا وهي نسخة من ختها المرحومة طولات فيها الشوفة حتى قربات نعمة كتسلم عليها و باست ليها يديها
نعمة: خالتي لباس عليك
يزة«دارت يد على يد»: واش نعمة هادي ولا كدب
نعمة«حركات راسها»
يزة: نهار كبير هادا لي زرتينا تي عاد تفكرتي عندك خالتك
نعمة«حنات راسها»: لا حاشا اخالتي غير الدنيا وصافي
يزة«حركات راسها»: اوا مرحبا بيك ابنتي «ضارت شافت فالمرا لي كانت كتهضر على نوبة»: هادي غير بنت ختي جات تزورني لي نوبة ديالها دخل لداخل انا جايا «رجعات شافت فنعمة»: اجي معايا لداخل
داكشي لي كان تمشات نعمة تابعة خالتها حتى دخلاتها لبيت لگلاس و نطقات
يزة:ستاراحي هنا بين ما ساليت مع الناس و نجي صافي
حركات ليها نعمة راسها و حيدات صباطها و دخلات حطات ولدها لي كان فاق كايلعب برجيلاتو و يلاغي و گلسات قدامو كضور عينيها فداك البيت لي كان فراشو بسيط كاي دار فالعروبية..هزات ولدها كترضعو حيت بدا كايبكي وهي مرجعة راسها لور كتحس بطاقتها مسالية وعيانة لحمها مزال كايعگرها و شريط الاحداث لي وقعو ليها البارح مازل بين عينيها.. شافت ولدها رجع فنعاس وهي تحطو قاداتو على سداري و تكات حداه سامحة لراسها ترتاح شوية و تريح داك العقل لي ما بقاش قادر يحبس من التفكير..
ضربات ديك الخمسة ديال العشية ما ضرباتها الفيقة غير على صوت خالتها كتفيق فيها، حلات فيها عينيها بزز حاسة براسها مطحطحة ،بقات كتشوف فيها كتستوعب شنو ضاير بيها عاد ناضت گالسة كاتشوف فخالتها لي هازة شمس و كايبكي..
يزة: يا ويلي نصحابك غا متي دري من گبيلة وهو يبكي
نعمة«مسحات على وجهها و مدات يديها شاداه من عندها»: احم ما حسيتش كيفاش نعست
يزة«حركات راسها»: رضعي رضعي ولدك انا نجيب الغدا نعتقو روحنا
داكشي لي كان مشات يزة تجيب الغدا، كانت مطيبة طاجين ديال دجاج بالمرقة و الفريت ، حطاتو على طبلة و سماو الله كياكلو ونعمة حشمانة وفنفس الوقت ساهية بين دغمة و دغمة كتفكر كيفاش غاتهضر معاها باش تخليها تگلس عندها هاد ليامات، اما يزة فكانت غير حاضياها مستغربة من المجية ديالها ولي خلاها تغوبش كتر هو وجهها لي كولو زرق وفحالا فهمات البلان و باغا تاكد
يزة«خشات دغمة فمها»: شكون لي زرق ليك وجهك
نعمة«سرطات ريقها و حنات راسها والدموع بداو يتجمعو ليها»: راجلي
يزة«حبسات الماكلة كتشوف فيها»: هربانة منو
نعمة«حركات راسها بلا»: لا ،لا هو شدوه البوليس حيت شكيت عليه
يزة«خرجت عينيها»: اناري ياصكعة اش درتي ولاش ردك فهاد الحالة
نعمة«قلبها طايب بداو دموعها كيطيحو»: تكرفص عليا اخالتي تكرفص عليها ردني جفاف كايمسح فيا رجليه هو وعائلتو ، خواتاتو دارو ليا المصيدة و طيحوني فيها و البارح،، البارح شفت المو*ت و كون غير مت ولا لي عشتوو«بدات كتشهق»:خويا باعني لشمايت يتكرفصو عليا
يز«طولات فيها شوفة ضرها خارطها عليها وهي بديك الحالة»: رجوع الله ا نعمة «شافتها الشهقة ما بغاتش تحبس ليها و ناضت لعندها»: نعمة ويلي بسم الله عليك باركة
هزات كاس د الما شرباتو ليها و كبات شوية فيديها مسحات ليها على وجهها و عنقاتها كطبطب عليها كيف ما يكون الحال كاتبقا د**مها و بنت ختها و من ديما كانت عارفة نعمة هي الحنينة ماشي فحال داك رزگ سيفة ديال خوها... بقات معنقاها كطبطب عليها حتى شافتها تهدنات شوية
يزة«حيدات ليها شعر على وجهها»: شوية
نعمة«حركات راسها بشوية طاقتها مسالية»
يزة: شنو ناوية ديري دابا غاتبقاي هاربة
نعمة: لا مهارباش ،غانطلق و نهز راسي براسي وولدي غانهزو بسناني «شفات فخالتها ميلة راسها»: نتي لي بقيتي ليا اخالتي قصدتك بقيت لا حنين لا رحيم فهاد الدنيا نبقا عندك غي هاد ليام بين ما فكيت حريرتي و نمشي نضبر على راسي الله يشد ليك فصحيحتك«شافتها ما جاوباتهاش»: غير نسالي الامور ديال الطلاق ونمشي فحالي ولي بغيتيها نديرها معاك
يزة«تنهدات كتشوف فيها ما عرفت ما تقول بقات فيها هي و تربية لي فيديها»: لا حول ولا قوة الا بالله ،اش غانگوليك ابنتي گلسي مرحبا بيك
نعمة«وسعات عينيها»: الله يسهل عليك اخالتي خيرك عمرني نساه
يزة«هزات صبعها بتحدير»: ولايني هاه نتي عارفة الدار كي كاتقيل عندي غاتعاوينني فالشقاا ،وولدي ساكن معايا ماطوفي بيه ما تجي جيهتو راه جلاخة ما يعقلش علك
نعمة«حركات راسها بزربة»: كوني هانيا لي بغيتيها نديرها معاك الله يرحم ليك الوالدين
طبطبات عليها يزة و رجعات لبلاصتها مكملة ماكلتها ، قربات لنعمة الخبز باش تاكل وحناو على داك طاجين واخا برد ، بقات نعمة كتاكل شوية واخا الشهية مكايناش ولكن ضروري تاكل باش ما يتقطعش ليها الحليب وهي لي تبارك حليبها فايض واخا الفقصة و العداب ولكن ما تقطعش عليها ، بقات گالسا و نسبيا رتاحت شوية ملي قبلات يزة تخليها معاها ،وعقلها بدا خدام فحاجات خرين فطلاقها وكيفاش غاتعيش منهنا القدام و مصيرها هي وولدها...
كلات شوية و سدات جوعها ،خلات ولدها ناعس و ناضت هي جمعات طبلة و دخلات لكوزينة طرفاتها شوية حيت كانت نقية و غسلات دوك الميعنات لي كلاو فيهم ، عاد مشات هزات حوايجها من صاك باش تبدل وراتها خالتها الحمام و دخلات باش دوش ،ولكن غير سدات داك الباب تلاشا داك الهدوء و بدات عندها فوضة داخلية وهي كتحيد حوايجها و عينيها على لحمها لي مزوق و طبايع فعلتو لي خلا فيها ،هزات عينيه بانت ليها رشاشة تخشات تحتها و طلقات عليها الما كدوز على لحمها بيديها حتى فلحضة بدات كتحك بطريقة هستيرية ما حاملاش اترو يبقى فيها حتى جرات واحد البلاصة وهبطاتها حتى دمات و طاحت گالسة وسط دوش ، لي يفتح قلبها و يطل عليه غايلقا نار گادية كتحرق فيه تقهرات و تدمرات حتى ما بقا ليها فين تزيد ،بقات گالسة و الما كايتكب عليها كتبرد على قلبها على الله تطفى ديك العافية لي حاسة بيها ، بقات مدة گالسة حتى نشفو دموعها و تحولات نضرتها لبرود، ماشي هي لي تخلي راجل يهدها و ماشي هي لي غاطيح لارض واخا لي دوزاتو صعيب و لي باقي غادوزو صعيب ولكن البكا ما عندو فاش يفيدها خصها ترجع حقها و ضمن لولدها عيشة مزيانة و تفرق على داك عيفة الرجال لي ما هو لا من سهم الرجال وحتى دكر بزاف عليه...
جمعات الوقفة و ناضت كملات دوش ديالها توضات... عاد نشفات لحمها و لبسات عليها بيجامة مستورة لوات فوطة صغيرة على شعرها عاد خرجات من الدوش..مشات لداك البيت طلات على ولدها لقاتو غارق فنعاس مسكين صلاة صلاتها عاد مشات طلات على خالتها فالكوزينة لقاتها كتقاد فالعشا
نعمة : احم نعاونك فشي حاجة
يزة«حركات راسها بلا»: لا غير سيري ترتاحي
نعمة«قربات عندها شافتها كتنقي فواحد الحوتة»: اري عليك اخالتي انا نكمل
يزة: كوني تسمعي يا هاد البنت سيري حدا ولدك
نعمة: غير عطيني نكمل عليك مانگدش نبقا گالسة و شمس راه ناعس
شدات من عندها ديك الحوتة و بقات عليها حتى مشات تگلس ،نقات هي ديك الخوتة مزيان و غسلاتها عاد دازت شرملاتها ، قطعات البصلة دارتها فالطاجين مع بطاطة زادت عليهن ديك الحوتة و قطعات مطيشة دوائر زادتها عليهم من الفوق و زادت فلفلة حارة عاد سدات عليه خلاتو يطيب على گانتو و طرفات ديك الكوزينة و مسحاتها تا رجعات كضوي ،ما بغاتش تبقا گالسة باش ما تحسش براسها عالة عليها على الاقل شغل الدار ديرو هي ،فدوك الاثناء لي هي مزال فالكوزينة ،تفتح باب الدار و تم داخل ،مدروگي حاس براسو طاير و راشقاليه كايغني من الباب حتى بدا كايعيط على مو..
حمزة: الواليييدة
يزة«جاوباتو من بيت الگلاس»: هاني هنا
حمزة«مشا عندها حتى دخل مشا باس ليها راسها و شاف فشمس لي فيديها كان يلاه فايق»: تي منين جبتي هادا ا مي ولد من
يزة«كطبطب على دري»: ولد بنت خالتك نعمة
حمزة«گلس متكي ضهرو»: بنت خالتي شكون هادي؟
مع كملها تمات داخلة نعمة وهي حانية راسها رمات عليه السلام و مشات گلسات حدا خالتها و شدات من عندها شمس، اما هو غير بانت قدامو بقا كايحقق فيها طلعها و نزلها حتى فلاها، وا سلعة جديدة هادي بانت عندهم فالدار ،بقا غير كايحنزز فيها حتى ركلاتو مو من رجليه عاد تجمع...
دازت ديك العشية و دازت يومين اخرى ، صبحات نعمة فايقة بكري على صوت بكا ولدا ضربات على الساعة لقاتها 7 ديال الصباح ،مدات يديها لشمس قرباتو عندها كتر و جبدات صدرها كترضع فيه يعينيها مسدودين بالنعاس...بقات متكية حداه حتى شبع و بدا كالعب بديه و يضحك وهي غير كتشوف فيه ،بالنسبة ليها الانجاز الوحيد لي حرجات بيه من هاد الزواج هو ولدها،خشات راسها فعنقو كتشم ديك الريحة الحلوة لي فيه و كتبوس فيه وهو كايضحك لعبات معاه شوية ناسية الهم حتى شبعات منو عاد ناضت لبسات عليها بيجامتها دارت ولدها فضهرها و جمعات فراشها فين نعسات، خرجات لكوزينة لقات خالتها يلاه فاقت حتى هي و بداو كايوجدو الفطور و نعمة عقلها خدام كايفكر، خصوصا فاش عيطو ليها البارح باش تمشي تكمل اجراءات المتابعة ديال الشكاية لي دارت ب عصام ، وجدو الفطور وتحط على الطبلة و تجمعو عليه حتى لحق عليهم حمزة عينيه مازال مبوقين بنعاس صبح عليهم و گلس كايفطر ،و مرة مرة عينيه تفلت لنعمة لي كانت حانية راسها، يومين لي دوزات معاهم شادة فيهم تيقارها و كتحاول ما تحكش معاه بزااف خصوصا فاش عرفاتو كيداير و بزناز من الفوق خافت على راسها وهي عندها غير فترة معاهم بغات دوزها بسلام...
فطرو و سالاو ونعمة مشات لبسات حوايجها من بعد ما علمات خالتها بلي غاتخرج ،لبسات ولدها حتى هو حيت ماعندها لكن تخليه خالتها شوية وغايكترو عليها الناس ما غاتقدش تگابلو...
هزات صاكها لي فيه وراقيها و كولشي و خرجات، شدات خطاف حتى وصلها لڤيلاج عاد خدات طاكسي اخر للمحمدية ، ما دازش الوقت بزااف حتى وصلات، و توجهات نيشان للمحكمة رفعات دعوة ديال طلاق بغات طلق راسها وقررات دير "الخلع "حيت عارفاه غايشد معاها زكير و ماغايبغيش يطلق...
هي لي عمر باب الكوميسارية ولا المحكمة عتبات فيهم حتى ولات اليوم داخلة ليهم بزز منها، غير سالات مشات نيشان للكوميسارية دخلات عند ضابط الشرطة لي ستقبلاتها، بقات كتشرح ليها الاجراءات كيفاش كادوز وراتها شنو تقول و شنو دير بالضبط و طبعا الحلاوة كاينة باش يسرو معاها الامور وعاد خلاتها تشوفو...دوزات الضابط الخط حتى دخل عندها شرطي علماتو باش يديها لعندو..
هبطوها لعندو هو لي كان گالس داير يديه بين راسو غير هاد 48 ساعة لي دوز هنا كان غايهبل فيها ما رضاش و ما بغاتش تسرط ليه كيفاش هي تبلغ بيه..تقدمات عندو حتى سمعات البوليسي قال ليها عندك 5 دقايق عاد هز فيها عينيه وشاف فيها مخنزر شرارة كطير منهم
نعمة«شاف فيه ببرود»: كي جاتك السكنة هنا مزيانة
عصام«ناض جيهتها جاعر»: طوالو لمك رجلين تا وليتي تعرفي طريق البوليس و الكوميساريات شنو تزاد على مك ا شايطة
نعمة: تزادني العقل لي ما كانش عندي فاش كنت صابرة عليك وعلى طاسيلتك
عصام«ضرب فالحديدة»: غاتنازلي ولا غانگطع مك طراف
نعمة«غينيها غرغرو و حابسة البكية ملي كتفكر شنو دار فيها شافت فيه عايفاه»: الى بغيتي نتنازل خاصك تقبل على شروطي
عصام: اشمن شروط عند مك يا الكـ**لبة
نعمة«حركات راسها»: بعدا هاد مي لي كل مرة كاتجبدها على فمك بزاف عليك هي ما يجوز عليها غير الرحمة اما نتا راك لعنة ديال الدنيا والدين هزيتيها وفوق منهم دنوبي..المهم ما طالباش بزااف طلاقي راني دفعتو وغاناخدو بغيتي ولا كرهتي ، ودابا سمعني بغيتي تخرج من هنا غاتسني ليا التزام ديال عدم التعرض عمرك دور بساحتي و الحضانة ديال الدري غاتنازل عليها فمرة نسا بلي عندك شي ولد ،اصلا عمرك حسبتيه كاين ،وغاتعطيني 2 ديال المليون
عصام«خرج فيها يعينيه مجنن غير مالقاش كيدير ليها اما كون شنق عليها كايشوف طريقة هضرتها لي تبدلت ماشي هادي نعمة لي كايعرف و ديما حانية الراس»: والله لا شديتي من عندي الريال و ما مسنيتيش
نعمة: تا هادا نضر نتا تعرف تانا ما متنازلاش سير دوز الحبس ملي تخرج شوف واش شي حد غايخدم واحد مدوز الحباسات ،ضوسيك راه غارق«ضارت خارجة فحالها»: الى بدلتي رايك گول لمك تصوني عليا باش نتفاهمو
خرجات من عندو وهي قلبها كايضرب و الهضرة لي گالت ليها ضابط گالتها ليه بصح هي ما عندهاش غرض فيه كانت بغاتو يتربا و يدخل الحبس ولكن ملي لقات الفرصة باش تفك هي وولدها فمرة ما غاضيعهاش ،طلعات كملات الاجراءات لي طلبو منها عاد خرجات راجعة فحالها...
دازو ايام الله و نعمة مع خالتها گالسة حتى فكات امورها ، عصام لي تحنسر شاف راسو غايضيع خدمتو وشحال من حاجة رجع بزز منو واقف سناليها على الالتزام و تنازل على الحضانة و زادها الفلوس ملفوق ، بغا يخرج ليه العقل فاش لقا حتى الفلوس لي كانو فالمجر مشاو حس بالشمتة و حقد عليها هي و داك الولد حيت عارف ما يقدر يدر والو،دازو اجراءات الطلاق بعد جلسات الصلح خصوصا ان بيناتهم ولد ولكن نعمة كانت مصرة على طلاق وهو معندوش الحق يعتارض حتى لنهار لي خرج ليها طلاقها و تهنات ، ديك ساعة حسات بقلها رتاح و تهناات ،حمل و زاليها من على كتافها و اكثر حاجة مفرحاها هي ولدها لي عمر غاتخليه يشوفو ولا يحلم بشعرة منو...
كانو گالسين على طبلة الفطور كايفطرو ولكن هي ما مرتاحاش وهو قبالتها كايشوف فيها، هاد الايام كلها كتحس بتصرفاتو ماشي هوما هادوك و كل مرة كتهرب و كتجنبو ما باغا صداع لا معاه ولا مع خالتها..
وهي فغرق تفكريها حتى حسات بشي رجل قاست ليها رجليها طالعة معاها...خرجات عينيها وهزات فيه راسها لقاتو داير نص ضحكة و كايشوف فيها جرات رجلها منو ووقفاات بالزربة حتى طلعات فيها خالتها راسها من الوقفة لي دارت....
نعمة«بتوتر»: احم خالتي انا غاندخل شمس ندوش ليه
يزة«شافت فيها باستغراب»: وا كملي فطورك بعدا
نعمة: لا صافي شبعت
يزة«حركات راسها»: اوا ردي البال لا يضربو البرد تاني راه يلاه براا «حتى جات نعمة تمشي وهي تعاود تهضر»: اه ،راه اليوم غاتجي عندي واحد سيدة نمسد ليها لولدها ديري بحساب الزايد فالغدا
نعمة: ياك اليوم مكاتشديش الناس !
يزة: هادي معرفة ماجاتش نردها
حركات ليها نعمة راسها و خرجات من تما بالخف مشات هزات ولدها وخا مكانتش ناوية دوشليها دخلاتو ، تعصبات و تزيرات حتى تجمعات ليها البكية واش فين ما مشات ما يقيلوها شمايت ، ولكن ما عندعا ما دير خاصها تصبر حتى تشوف شي خدمة لي تقدر تهز بيها راسها وولدها عاد تخرج ، واخا الفولس عندها ولكن
مغايكفيوهاش و بدات كتاكل منهم و مرا مرا تمد لخالتها مدام گالسة معاها خاصها تصرف على راسها...تنهدات وجرات بانيو صغير عمراتو بالما دافي و حطات فيه شمس كدوز ليه على لحمو بالما وهو كايضحك ، ما حسات غير تا هي مبتاسمة كتلعب معاه و هو كايلاغي عليها الوحيد لي كايخليها تبتاسم وسط همها، دوشات ليه و لواتو فالفوطة مزيان و خرجاتو للبيت نيشان نشفات ليه لحمو و لبساتو حويجاتو بالخف عاد رضعاتو و حملاتو فضهرها و ناضت لكوزينة قادات الغدا
تسمع صوت خالتها مع شي مرا كترحب بيها حتى دخلو عليها للصالون الصغير سلمات عليها و گلسات ، كان فيديها وليد صغير يكون قد ولدها بقات كتحقق فيه كيفاش ضعيف و باينة عليه المرض حتى نوغشها فقلبها..مداتو المرا ل يزة كتشوفو وهي كتشرحليها مالو..
كريمة: ها نتي تشوفي اختي ما بقاش كايبغي يشد حتى بزولت مو
بزة«قاست ليها على سدرو وهو كيزهر»: الدري سدرو عامر فين بقيتو بيه
كريمة«حركات راسها مدوراه»: احياني، شحال و دري مريض و مو ما مسوقاش كاتگول دابا يبرا دابا يبرى ما خلاو ما دارو ليه فدوايات ووالو ، حتى گالت ليا عليك واحد جارتي و گلت نجي ندير النية..
ناضت يزة جابت واحد القريعة ديال الزيت صغيرة عندها تما ورجعات خوات منها شوية سمات الله وهزات الوليد بدات كتشربو داك زيت وهو غاطرطق بالبكا ، شرباتو القياس لي بغات وهزات ريشة و بدات كتقييه باش يصفا ليه صدرو ، نعمة غير شافت داكشي لي كايخرج عقدات غوباشتها و تنوغشات بقات حاضية معاهم حتى سالات مسحات ليه و مداتو لجداه و دري غايصفا بالبكا...
يزة: هانتي شفتي اش خرج دري كون زاد شوية غايصفا ليكم
كريمة«كتراري بيه باش يسكت»: لا حول ولا قوة الا بالله ميمتي على ولدي مكانتش كترد ليه البال حتى كلاها
يزة«حركات راسها»: زيدي رجعيه عندي غدا و بعدوو ان شاء الله و ما يكون غير الخير «شافتو باقي كايبكي»: دري خاصو يرضع باش يربي صحتو
كريمة«جبدات رضاعة من صاك، بقا فيها حفيدها»: مو ما بقاش فيها الحليب ،حليبها قليل وفاش ما بقاش كايرضع فيها نشف ليها كنقضيو ليه غير بديال الفارمسيان وقليل فين كايبغي يشدو
بقات كريمة كتحاول تعطيه يرضيع ولكن والو حلف لا هو شد ديك الرضاعة ولا سكت، طولات نعمة فيه شوفة بقا فيها تخايلت كون مرض ليها وولدها هاكا قلبها ضرها، حنات عينيها لشمس لي بين يديها ناعس ، وشافت فداك الوليد ،ترددات فالاول تهضر ولكن طلقاتها ليها فيد الله بغات ما بغاتش كايبقا اختيارها..
نعمة«شافت فكريمة ورجعات شافت فالبيبي»: اريه ليا نرضعوو
يزة«شافت فكريمة لي ضارت شافت عندها و شارت ليها»: ايه عطيه ليها على الله يرضع ،تبارك الله عندها الحليب
كريمة: الله يرحم ليك الوليدين ابنتي
ناضت كريمة عندها مدات ليها الولد و شدات من عندها شمس كان غارق فنعاسو من بعد ما دوشت ليه ستحلاها، هزاتو كريمة كتسمي الله وكتشوف فيه شميسة مضوية تبارك الله باستو من راسو و گلسات كتشوف نعمة ليجبدات صدرها جاها شعور غريب ترضع شي واحد اخر من غير ولدها ولكن بقا فيها ما قدراتش تخليه هاكا سمات الله و قرباتو كترضع فيه ،و سبحان الله غير شدها بدا كايرضع ما نفرهاش ، بتاسمات نعمة فاش سكت و بدا يرضع وهو ميت بجوع بقات كتلعب ليه فشعرو حتى نطقات كريمة...
كريمة«تعجبات»: شوفي سبحان الله و الله مكان كايبغي يشد البزولة ديال مو
يزة: ايه تبارك الله نعمة حليبها زوين شوفي ولدها كي منور
كريمة«رجعات شافت فشمس شحال عجبها و باستو فراسو»: غزال الله يخليه ليك ابنتي ،و الله يرحم ليك الوالدين
نعمة: امين اخالتي
يزة«جمعات ديك روينة من تم و ناضت»: انا غانجيب الغدا نتغداو
داكشي لي كان ناضت يزة غرفات الغدا بقات غير كريمة و نعمة فداك البيت ، و مرة مرة يهضرو حتى رضع الدري و شبع و نعساتو عاد مداتو لجداه حطاتو قدامها ،تحط الغدا و شركو الطعام بيناتهم تغداو فجو زوين موراها ناضت كريمة باش تمشي فحالها عطات ل يزة البركة ديالها عاد دازت سلمات على نعمة و مدات ليها فلوس فيديها خرجات نعمة عينيها حيت لي دارتو ماشي بغرض الفلوس غير بقا فيها الولد ما بغاتش تخليه هاكاك
كريمة: شدي ا بنتي رزقك هادا الله يرحم ليك الوالدين
نعمة«حشمات»: والله اخالتي مكاين لاش
كريمة«طبطبات على يديها»: منصاب كون لقيت لي ترضعو ليا و يشد صحتو مسيكين ها نتي تشوفي كيف ولا
يزة: اوا بقاي تجيبيه ليها ترضعو
كريمة«شافت فنعمة ورجعات حركات راسها»: لا اختي يزة ما نبززش عليها رضعاتو هاد المرة الله يجازيها بالخير
نعمة«سكتات مطولة حانية راسها و رجعات شافت فيها»: ما كاين باس اخالتي غير جيبيه نرضعو مع ولدي
كريمة: بصح ابنتي
حركات ليا نعمة راسها ب اه ما حسات حتى حتات عليها بتعنيقة خلاتها مخرجة عينيها جاتها هاد المرا فشكل باينة فيها حنينة ، وعاد هي لي جايبة ولد ولدها لهنا كتجري بيه تعجبات كيفاش مو ما مسوقاش وهي ولدها غير مرض ليها داك نهار شوية كانت غاتحماق،توادعات معاهم كريمة ودعات معاهم عاد خرجات راجعا فحالها لدويرتها..
ليام باش عطا الله كادوز سعدات لي دار الخير أما الشر يتصرف بالشر...
نعمة كانت عندها مناعة قوية لي ماحاساش بيها وأنها بقات صامدة قدام هادشي كامل ، عكس كون كانت وحدة اخرى بلاصتها كانت غاتوصل لماصل ماكاتعجبش ، ولكن المناعة ديالها فالمواجهة كانت قوية وهادشي نقطة تحتسب لشخصيتها...
رجعات كريمة حفيدها لعند يزة جوج مرات اخرين من بعد المرة لولة وبقات كاتجيبو كل يومين لنعمة باش ترضعوو حتى بدا كايشد صحيحتو و حليبها بان عليه و صحاح تبارك الله..كانت گالسة نعمة هي و كريمة فبيت الگلاس اما خالتها ملهية مع الناس، شادا عندها الولد كترضعو و غارقين فكلامهم هضرة تجبد هضرة حتى بدات نعمة كتعاود ليها على ما جرا فيها و كيفاش محناتها الدنيا حتى وصلات لهاد الحال...
نعمة«بحسرة»: الباك ديالي كنت شديتو ب 16 فالعلوم الفزيائية كنت فرحانة بزاف كانقلب على المدارس لي ندفع ليهم ولكن ما كملش الله مرضات ليا ماما و بقيت مقابلاها ضاع ليا داك العام و زدت تهرست كتر فاش ماتت«مسحات دمعة هبطات ليها»: مكملاتش 4 شهور على موتها حتى بدا خويا فحشيان الهضرة حيت المرا لي كان باغي يتزوج بيها ماكانتش باغاني معاهم فالدار ، واول واحد جا عطاني ليه ضيع ليا قرايتي و مستقبالي، وفاش مشيت لدار الراجل تقبلت داك زواج بلي هو سنة الحياة واللهم ضل الراجل ولا ضل الحيط ولكن لقيت حياة كفس من لي عشت مع خويا
كريمة«عزات عليها»: لا حول ولا قوة الا بالله حتى ختو ما رحمهاش..الخاوة حدها الدنيا
نعمة«حركات راسها»: الخاوة حدها الوالدين اخالتي نهار كايمشيو مكاتبقا خاوة كل واحد كايشوف راسو
كريمة«قرباات عندها طبطبات عليها»: الصبر ابنتي كولشي دابا يفوت وخوك لي فرط فيك ضيع جوهرة يجي النهار لي يندم عليك غير صبري
نعمة: الصبر كايضبر اخالتي هانتي تشوفي بقيت صابرة على القهرة حتى دار فيا الراجل لي ما يدار دا النهار نمـــ. وت و ما نساه
كريمة: الله ياخد فيه الحق ربي كبير ما يضيعكش يجي النهار لي تشوفي حقك كايتخاد قدام عينيك «بتاسمات كتشوف فشمس»: هانتي ربي عطيك وليد كيف الگمرة ،كوني مع الله يكون معاك
نعمة«تنهدات»: الحمد لله
كريمة«جبدات مدكرة صغيرة من صاكها كتبات فيها عنواان دارها و مدات ليها الورقة»: هادي لادريسة ديال داري لي حتاجيتيها مرحبا ابنتي ما تحشميش مني ربي لي شاهد دخلتي ليا لقلبي ونتي وهاد الغزال
نعمة«بتاسمات وسط همها»: لهلا يخطيك عليا
بقاو شوية مجعين حتى سالا دري رضاعة ،فرحات بيه كتلعب معاه و كريمة مطولة فيها شوفة عزات عليها واخا ما عاوداتش ليها كولشي ومزال عندها علامة اتسفهام على شحال من حاجة تعجبات كيفاش راجل قدر يفرط فبنت فحال هادي لي عتابراتها هي جوهرة حيت قليل بنات الناس فحالها..
جبدات نعمة شوية ديال الحليب من صدرها دارتو ليه فالرضاعة باش تديه معاها ، عاد ناضت كريمة هزات حفيدها غاديا فحالها من بعد ما مدات ليها شي بركة فيديها هاكا ولفاتها كل مرة كتجيبو ليها واخا نعمة ما بغاتش حيت لي دارتو غير فسبيل الله ولكن كريمة اصرات عليها ، وقبل ما تخرج خدات من عندها نمرتها و زادت اكدات عليها الى حتاجتها فشي حاجة تواصل معاها عاد خرجات...
تعاشات العشية و خالتها سالات كيف العادة مع الناس تغدات و دخلات لبيتها ترتاح مهدودة، ناضت هي للكوزينة وجدات العشا بلي كتب الله حسات بالراحة هاد اليومين ملي ولدها غابر و فخاطرها كتمنى يزيد يطول،
وجد داك العشا و تعشات بيه هي وخالتها و تفرقو كل ينعسو كل وحدة فبيت....
فرشات بلاصتها و بقات گالسة كترضع ولدها تاينعس حتى سمعات باب الدار تفتح و تزدح حتى قفزات، تم داخل كحل سيفة محيج و جايب الكاو...تحل عليها الباب فالبيت فين كتنعس حتى شافتو قدامها،ناضت واقفة بالخلعة نسات صدرها لي مازال جابداه
حمزة«عينيه منيمين فيها»: بنت خالتي لبااس«شاف فصدرها لي مجبود حتى ردات البال و جمعاتو و رجع شاف فيها»: ما تضعيناش حتى حنا معاك
يزة«خرجات بالخف من بيتها فاش سمعاتو محيح وخرجات جراتو»: اويلي على ولد الحرام واش ما بغيتيش تحشم زيد قدامي زيد
حمزة«شاف فمو كايضحك وباسها على راسها»: وا مي تي خليني تانا بغيت نرضع
يزة«دفعاتو مزيداه قدامها مخنزرة و شافت فنعمة»: سدي علك الباب ودوزي تنعسي
صبح الصباح من بعد ما باتت ديك الليلة فايقة النعاس طار عليها ، فزعاتها حالتو كيفاش دخل عليها البارح و كيفاش كان كيشوف فيها بانحراف خافتو يرجع ليها وهي مازال حتى ما تخطات لي دارو فيها عصام...بقات الليل كولو گالسة ولدها ناعس حداها وهي كتحسب النجوم وخا نعاس كان كايقلب فيها و كل ما تغفلها عينيها كاترجع تنوض قافزة حتى صبح عليها الحال...جرات عندها و لدها لي فاق هادي ساعتو كل نهار يصبح مبكر ، رضعاتو حتى شبع ورجع فالنعاس وهي ناضت لكوزينة توجد الفطور كيف كل نهار ، مع دخلات ما تجي غير ف حمزة كايشرب الما ، ما هضرت ما تكلمات معاه حنات راسها و مشات ديريكت دارت الما يطيب لاتاي و دازت لتلاجة جبدات منها لي داكشي لي غاتحتاج ، بانت ليها فشي حرشة هاد الصباح هزات المقادير لي غاتحتاجم و بدات كتقاد فيها، اما هو حلف لا خرج من ديك الكوزينة عاد حلات لي الگلسة فيها يطلع و ينززل فيها و يعبر حتى قنطها و تزيرات بقات غير كتسب فخاطرها و تحسبن عليه ، حتى لواحد اللحظة حسات بشي يد تحطات عليها وقرب باغي يتحك ، طارت فسما وخرجات عينيها و بعدا منو حتى طاح البول لي كانت كتخلط فيه ديك الحرشة و تكفح فالارض
نعمة: واش نتا مريض
حمزة«طلع فيها و نزل»: مالك غير بغينا نهضرو معاك
نعمة«الحمورة طلعت فوجهها وتزيرات»: واش الهضرة كاتكون هاكا
حمزة: دايرة فيها شريفة زعما«غمزها مقرب»: هاديك لي غاتخافي عليها ما بقاتش غير ديري ليا خاطري نبرعك
نعمة«خرجات عينيها و زادت بعدات»: بعد مني ولا والله حتى ندير يدي فودني و نغوت عطيني التقار والله حتى نگولها لخالتي
حمزة«عط شفتو»: والى ما بغيتش
نعمة«ما حسات حتى غوتات»: خاااااالتييي
حمزة«شاف فيها مخنزر كايتحلف عليها»: والله لا بقات فمك
خرج من تما معصب كايسب و يربب دخل لبيتو لبس عليه وخرج هو من الدار گاع ،بقات هي متكية على البوطاجي قلبها كايضرب فحلقها بالخلعة و دموعها بداو يطيحو متابعين وحدة مور وحدة مسيقين حناكها سعدها سعد كحل ما بغا يتسگم ليها، بقات كتبرد فقصتها و حرقتها فالبكا حتى دخلات عليها خالتها يلاه فايقة شافت فيها و شافت فالارض لي مرونة ما فهمت والو...
يزة:ياك شي باس ما كاين اش واقع هنا عيطيتي عليا
نعمة«مسحات دموعها»: اه سمحي ليا اخالتي ما عرفتش كيفاش طاح لي من يدي انا غانجمع هادشي
يزة«شافت فيها باستغراب»: ياك لباس لاش كتبكي؟
نعمة«مسحات دموعها»: غير...غير تعصبت فاش طاح ليا داكشي علاش انا غانگاد الفطور غير سيري ترتاحي تا نجي...
حركات يزة راسها و خرجات مستغربة ، دخلات لبيت ولدها مالقاتوش عرفاتو غايكون خرج و مشات هي لبيت الگلاس جمعات الفراش لي كان تما و هزات شمس حطاتو على على سداري مكمل نعاسو، حتى جابت نعمة الفطور بدات كتحط فيه و گلسو كايفطو و نعمة غير كتنقب شهيتها مشات من داكشي لي طرا قبيلة...سلاو و ناضت جمعات طبلة مشات طرفات ديك الكوزينة و جمعاتها و عقلها خدام فكرة تديها و فكرة تجيبها حتى خرجات بنتيجة وحدة...
شحال قد الواحد يهز فقلبو وعلى كتافو التقل والمسؤولية بلا مايشكي وشحال قدو يكابر ويقول ماعليش هاهي غاتفوت ولكن ماكاتفوتش ، كانشدو بيدينا فشي حاجة لي كاتخلينا مستمرين ونعمة كانت كاتشد فولدها لا غير داكشي لي كان ناقصها حتى هو جاها غير تحرش من ولد خالتها وخرجات قبل كايطيح الفاس فالراس وينوص ليها شي ليلة يتكرفص عليها شي لي خلاها تهز ولدها وتحسب الخطوات...العنوان لي فيديها والفلوس لي فصاكها هما آخر حل عندها بقات كاتسنا تخرج خالتها ديك العشية عند شي ناس وغير هي خرجات ناضت هزات حوايجها وولدها وزادت لمحطة ركبات فطاكسي كبير حتى عمر ورجعات منين جات فاللول، وقفات حتى خدات طاكسي صغير تاني وصلها حتى لقدام الدار لي عندها رقمها فالورقة، هزات التيليفون ودوزات الخط كان المغرب كايأدن
نعمة«بتردد»: الو خالتي كريمة؟
كريمة: سلام و عليكم شكون معايا
نعمة«حشمات»: انا نعمة
كريمة: ااااه نعمة ويلي ابنتي سمحي ليا راه نمرتك مدخلاها غير مارديش لبال لسمية
نعمة: ماشي مشكل اخالتي ، نتي فالدار ؟
كريمة: انا غير فالدار هاد ساعة
نعمة«شافت فولدها وكاتهز عينيها فالدار»:واخا تهبطي عندي شوية الله يجازيك بيخير
كريمة: جيتي عندي!! واخا ابنتي هاني نازلة
مشات تطرفات على طريق حتى تهبط ، شوية بانت ليها خارجة كاتقاد فزيفها بانت ليها وهي توصل عندها كاتبتاسم عنقاتها وباستها وباست صغيور
كريمة: زيدي طلعي
نعمة«يديها كايترعدو وحشمانة»: بغيت نهضر معاك بعدا
كريمة«شافت باليزتها»: ونطلعو لدار ونهضرو بعدا ماشي فزنقة
حركات راسها وهي تشد من عندها دري ونعمة جرات الباليزة تابعاها حتى طلعو لدار ، كانت الريحة ديال الحريرة كاتضرب من دروج واحد الدفئ حسات بيه نعمة شحال وهي مفتاقداه ملي ماتت مها ، طلعو و دخلو لصالون حتى تلقات ليهم مرت ولدها سلمات عليها عادي ورجعات الكوزينة مخلية كريمة و نعمة فصالون ...
كريمة: مالك كتباني ليا مهدودة !
نعمة: خرجت من عند خالتي عيت مانصبر ومابقيتش گادة نگلس فخاطري ولدها كل مرة يلوح ليا كلمة من هنا كلمة من لهيه ودابا ولا بغا يقيص وعلم الله اش ناوي هزيت راسي وخرجت
كريمة«حركات راسها»: لا حول ولا قوه الا بالله العلي العظيم على هاد الناس مابقا حد بغا يخاف الله
نعمة«عينيهاا غرغرو فينما تفكر بلي لا حنين لا رحيم من غير الله»:قصدتك نتي لي بقيتي عندي درت رجاية فالله وجيت عندك غير نلقا شي كرا ونخدم فلي كان
كريمة«طبطبات ليها على فخضها»: ماتگوليش هاد الهضرة مرحبا بيك حسبيني ميمتك انا ماعندي لا داخل لا خارج مرت ولدي شادة تيقارها ولدي راه كايبقا فالگاراج تالليل ويدخل ياكل ويتخشا فبيتو ماعندك منين تهوي الهم گلسي معايا تايحن الله
نعمة«مسحات عينيها»: الله يرحم ليك الواليدين
كريمة: الناس لبعضياتها نتي مارضيتينيش ولد ولدي كون مانتي مايكسابش صحتو الله يجازيك
نعمة: حتى تجيبيه ليا نرضعو ونرضع شمس
كريمة: دبا راه عطاتو رضاعة غير رتاحي نتي نشربو كاس ديال أتاي وكولي شوية وديك ساعة نگلسو وعاودي ليا اش درتي مع داك خايب سمية
حركات راسها نعمة براحة حسات بنوع من الأمان انها مابقاتش مليوحة وحتى قلبها رتاح مع كريمة عكس فاش كانت مع خالتها
رضعات ولدها فخاطرها ودارو كاسكروط كلات تامقدات وناضت معاها وراتها فين دوش وتبدل حوايجها.. وداكشي لي كان غير بدلات وصلاة كاتدعي الله يبدل حالها ومشات تكات فوق الفراش حسات بنعاس الدنيا والدين تجمع فيها ، خشات ولدها فيها ونعسات نعاس ديال الراحة أول مرة فحياتها تحس براسها فهاد الراحة من بعد موت مها، ماتابعها حتى حد من غير ولدها تقل وتحيد على ضهرها لدرجة كيفما حطات راسها بقات حتى ضربت 11 ديال الليل وفاقت على يدين كريمة جايبة ليها بلاطو فيه زلافة ديال الحريرة كبيرة والبيض مسلوق وتمر وطرف ديال الخبز ، ديك الريحة غلغلات فنعمة ماعقلتش ايمتا كلات داكشي وشبعات ورجعات لبلاصتها مامفرطاش فالحلاوة لي لقاتها فديك نعسة...
العودة
تازة
ستة ونص ديال الصباح الريحة ديال القهوة المغلية عاطية فدار وأكيد يلا كنتي من المنطقة الشرقية غاتفهم بلي القهوة فالصباح وفالعشية شي حاجة لي ضرورية فكل دار ، كانت ماشي اي ريحة ريحة القهوة دايرة جو خاص وبوحدو، اما على برا كانت مارية ببجامتها الصيفية وجامعة شعرها بمقبط من لور ، راشة لما وكاتشطب فين غادي يفطرو على داك المنضر وفالصباح بكري ماكاين ماحسن منو...حطات طيرموس ديال القهوة على طبلة وحطات كيكة والقراشل حتى خرجات ناجية مصبحة عليها بابتسامة تسر الخاطر
مارية: صبحتي مخيرة اخالتي هاد الصباح على ماضهرلي
ناجية: لا شوية الحمد لله
مارية«غمزاتها»: ولا غير ملي دار ليك لبارح أنور دوا ليها ياك؟
ناجية«ضحكات»: ايوا الحنين يديه زوينة الله يرضي عليه وعليكم كاملين
مارية«قربات باستها على راسها»: الله يطول عمرك الحاجة
ناجية: امين الحبيبة ، سير عيط لصالح يجي يشرب القهوة
مارية: و أنور؟
ناجية: أنور وهلي فاش خرج«مازال ماكملاتهاش بان ليها داخل بطموبيل»: هاهو جا عمرو مازال طويل
مارية: انا ندخل نفيق صالح
دخلات مارية قاصدة بيتها دخلات كاتفيق فيه غير بشوية باش ماينوضش دري ، صالح عادتو كاينوض مور هاد الوقت غير كايصلي الفجر كايرجع ينعس تالوقت الخدمة وينوض ... نوضاتو من بلاصتو حال عين وساد عين و خرجات هي وخلاتو حتى يتبعها ، مع غاتخرج تلقا ليها أنور فالباب هاز فيديه
مارية«باحترام»: صباح الخير اخيي
أنور: صباح الخير امرات خاي«مد ليها سخرة»: حتى تحطي منهم فالفطور
مارية«حركات راسها»: واخا
طلع لطبقة ديالو غسل يديه وهز تيليفون شعلو و جاوب على الميساجات لي واصلينو من لبارح ، عاد دخل بدل حوايجو ونزل لقاهم گالسين ، تصافح مع صالح بلا مايخطا الجو ديال الضحك...خوات ليهم مارية القهوة وهي لي كايفتاتحو بيها نهارهم على مايوجد الفطور التاني
أنور«منغم بديك القهوة»: الله نعيا نشرب القهوة ونقادها بيدي زعمة وماتصدقليش بحال ديال الدار
ناجية«بفرحة»: بصحتك اولدي ماكاين ماحسن من الحاجة دالدار
صالح«نطق طانز»: خاصو ايما غا مولات دار وهاهو مخير
مارية: مالها غريبة ! دابا يديرها ان شاء الله
ناجية«نطقات برزانة منها فوسط الموضوع»: يلا خدا شي بنت الناس لي موقادة راه غاياكل ماكلة متولة
أنور«شاف فصالح لي جبد هاد الموضوع»: كايضهرلي ماشبعانش نعاس
صالح«تكسل عليه»: والله يلا شبعان نعاس تامقديت
أنور حرك راسو بلا حول ورجع كايشرب فقهوتو مدوزو بطريف ديال الكيكة ، عاد ناض خدم البومبة وطلق الما كايسقي فداك الخير لي قدامو المهم يشوف الأرض فازگة وعاطية منضر مع صهد كلشي كايتشوط بشمس واخا صالح كايقابل الخدمة عندو شي مرات مزيرة ومارية لي كاتكلف .... وصلات العشرة ديال صباح أنور تلاها مع شغل تما...حتى سمع مارية كاتعيط عليه ، غسل يديه ومشا لقا مو كالسة تما گلس حداها فالكرسي شد من عندها ولد خوه كان گالس فحجرها فايق دايخ سول على خوه قالتلو مشا لخدمتو ... ديك طبيلة كاتشهي والريحة ديال أتاي خلاص تحطات الحرشة لي مصايباها مارية فوسط طبلة ومعاها زبدة بلدية والبيض مسلوق و الزيت البلدية والعسل وزيتون وعاد الخبز لي بغاه وطبيسلات حطات فيهم كرواسات وبتيبان شوكولا لي جابهم أنور كايعجبو مارية وحتى مو...
مارية سربات ليهم الفطور وگلسات مشهية تفطر وكايعجبها تفطر على خاطرها ساعة ماجات تحط ديك اللقمة فمها حتى شافت الباب ديال برا تدفع وداخلة هي وبنتها جايا ببجامتها صيفية ملامحها هاديين وشعرها طايح على كتافها داخلة مع مها على الصباح وهازين فيديهم .. قالت صبحنا على الله فخاطرها واخا مادايرين ليها والو ولكن كانت بغات تفطر فراحتها .. وصلو لعندهم فين كايفطرو وضحكة واصلة لمرا لضراسها
نصيرة : ولدي أنور على سلامتك
أنور«حادر عينيه لتحت»: الله يسلمك امرات عمي
نصيرة: صباح الخير عليكم
ردو عليها كاملين حطات طبسيل من يديها وعراتو كان فيه الملوي وحاطة وسط منو طبيسل صغير فيه زبدة بلدية وبنتها هازة سطل صغير فيه لبن عطاتو لمارية ، مدات يديها سلمات على أنور لي كتافى يسول على الأحوال وعمو وصافي .. گلس كايفطر فخاطرو بلا مايهز العين...
كمل فطورو بالخف وناض دا معاه ولد خوه ومشا من داك المجمع..خلا مرت عمو غير كاتشوف فيه ، أما مارية عجبها الحال حيت عارفة النية ديال نصيرة وشنو تحت راسها فينما يكونو گالسين تجبد ليهم أنور وبنتها لي باغا تزوجها ليه وهما هاربين من زواج العائلة هادي شحال ، ومارية ماعندهاش مع بنات نصيرة ومسحيل تقبل بوحدة منهم مرت لوسها من عند الله ماكاتبغيهمش ، داك الفطور وجداتو بشهوة فتالي حلفات تاتفطر وماشي شغلها فيهم عطاتهم صواربهم وعطات الوقت لراسها فين تاكل فخاطرها...
ناجية«بهدوء باين على ملامحها»: فطري ا نصيرة
نصيرة«حركات يديها»: لا والله ماقادة غي بصحة شربت قهوة حليب مازال متقلة
ناجية«شافت فبنتها»: فطري ابنتي
مريم«بتاسمات ليها»: مايحتاجش تعارطني امرات عمي هاني كانفطر
مارية«بلا ماتحس نطقات»: الله اودي
نصيرة«دخلات فالموضوع لي جاية عليه»: ايوا أنور مازال ماناويش يعمر دارو ولاد عزيزو زوجو كاملين شني مازال ايعاين أنور ماجوجش
ناجية«نطقات برزانة منها»: نهار يكتاب ا نصيرة ماعندي مانقيلو خاطرو مانوض شاي نقولو زيد تزوج بسيف ، راك كبير وبعقلو وشيبات فراسو ماشي عاد نوريه شني يلقي وشني مايلقيش
نصيرة«حركات راسها كاضحك»: ايوا حتى نتي هضر معاه تبارك الله البنات موجودين اللهم تزوجو ولا حتى يجيب ليك شي وحدة ماتعرفا ماتعرفك
مارية«حطات الكاس من يديها كاتشوف فيهم»: امرات عمي أنور راه ما ايبغيش لي يبزز عليه شي حاجة وعاد الزواج مايبغي لي يهضر معاه فيه نهار يكتاب دابا يكتاب
ناجية: نصيرة!! بني أنا عارفاه وزواج العائلة غي نساه راه مايزوجش من بنات عمو يلا على هادشي ادهبش راه مايكونش خوي بالك
سرطانت نصيرة ديك الهضرة مزيااان ولات غير كاتدور فعينيها فتالي جمعات الوقفة وناضت هي والعزبة ديال بنتها ومشات، بقات مارية كاتفطر فراحتها حتى جا عندها ولدها فطراتو ومشا يلعب حدا عمو وهي ناضت لشغالها، أما حتى ناجية ناضت كاتمشا ماتنكرش بلي كلام نصيرة عندها فيه صح وخاص أنور يتزوج يدير دارو ومرتو علامن يحط راسو ويعيش حياتو ويدير وليدات ، هدا جهد والعمر كايجري وهو مازال مابغاش يحن خلاص كون بغا ليها تزوجو المخيرة فالبنات ولكن مابغاش ومازال مالقا لي غايقول فيها بسم الله هادي لي بغيت ، شنو غادير معاه مات باه وهو مشهي يشوف ولادو ولاد عمو تزوجو وهو مازال لي طالع وهابط يسول فوقاش غايتزوج ، هالي جاتو عجب كايقولو كلشي متوفر علاش مايتزوجش وهالي كايقول ساحرين ليه هالي كايقول طايحة عليه شي وحدة فالمدينة كل واحد كايلغي بالغاه ، هازة الهم لولدها بزاف عزري وعزيز وغالي عليها وخايفة بصح يطيح فشي اختيار غلط يخليها تخرج معاه لعيب وهادشي لي ماتقدرش عليه ، كاتشوف راسها مرا رزينة ومن الأول ديالها ماكاتبغيش لي يبزز على ولادو شي حاجة ولكن فنفس الوقت مايكونش الأمر معيوب ، ماحساتش براسها حتى وصلات عندو فين گالس گلسات حداه كان كايهضر فتيليفون حتى قطع عاد ضار عندها
أنور«حس بيها»: مااالك ايما
ناجية«ماقدراتش تقوليه شنو مقلقها»: والو اولدي غي تمشيت شوية وجابوني رجلي عندك
أنور«عارفها حيت قبل ماتجي مرت عمو كانت بيخير»: صدعاتك مرات عمي بديك الهضرة عاود؟
ناجية«شافت فيه»: كدبات؟؟
أنور«تقابل معاها»: الحبيبة راه أنا ماشي قلت عمري لا تزوجت غير ايما هاد ساعة مازال لي يرتاح ليها البال مابانت نهار تبان مانردها شاي فوجهك
ناجية«طبطات ليه على كتفو»: واخا اولدي لي بغيت
كايقول واحد المثل ما حدها كتقاقي وهي كتزيد فالبيض...زعما الراس غارق فالهم و المشاكيل كايتزادو من الفوق...وهادا حال نعمة تقيل فالنهار مقاتلة مع كحل الراس برا هازا هم حياتها و حياة وولدها لي مريض ، ساعة مسكينة ما كفاها التفكير حتى علماتها كريمة بلي شمس طلعات ليه السخانة شوية وكايتقيا، بقات خدامة مبرزطة و بالها معاه و كل مرة تصوني على كريمة تسول على حالتو، لي شاف وجهها هاد الساعة غايعرف بيها شي حاجة...كانت گالسة فالبوز ديال الفطور الماكلة قدامها ولكن الشهية باش تهبطها والو حتى وقفات عليها نزهة
نزهة«گلسات حداها»: نعمة ياك لباس ما عجبتينيش
نعمة«تنهدات»: شمس صبح ليا مريض هاد النهار
نزهة: مسيكين الله يشافيه دابا يولي مزيان غير ما تخلعيش
نعمة: امين «هزات فيها عينيها»: فطرتي
نزهة: مازال اختي يالاه غانخرج نشري شي حاجة نعتق بيها الروح
نعمة«كحزات ليها ماكلتها»: بلا ما تخرجي هاكي فطري
نزهة: ونتي ؟
نعمة«ناضت وضارت غادا»: ماگاداش بالصحة
مشات تكمل خدمتها ما عندها لا نفس لا خاطر باغا غير ايمتا تسالي و ترجع لدارها عند ولدها ، مشات كملات لي بقا ليها بالخف عاد شدات طاكسي للعيادة دخلات بدات فيها الخدمة كيف العادة و كتحاول تخفف يديها باش تسالي بكري ،ديجا العيادة خاوية حيت الطبيب مكاينش غير ناس قلال لي كايجيو باش يشدو لي غونديڤ...حتى سعد لي موالفة كتقشب معاه مرة مرة فالصباح ما هضراتو ما كلماتو حتى دخلو العجب ، كملات خدمتها حيت مكانش عندها تمارة بزااف و خرجات من تم نيشان للصيدلية خدات لولدها الدوا عاد قصدات الدار..
تنصنص الليل وخيم الضلام وكولشي سالا نهارو ومشا يرتاح من العيا ، مكاين غير جري و جاري و بنادم تابع رزقو يجيب طرف ديال الخبز كاين لي يخاف الله و يجيبها حلال و كاين لي ما همو لا حلال لا حرام المهم يكونو الفلوس مسخنين جيبو ، و سعدات لي جابها حلال يخلي رقبو صافية من دنوب عباد الله...
عندها هي مسكينة كانت مزال حدا ولدها تفزگ الفوطة و تكمد ليه بيها و هو السخانة فيه كاتگدي غير هي وياه و ربي فوق منهم، عيات معاها كريمة تبقا معاهم ولكن ما قدراتش تزيد تعدبها وهي النهار كامل معاه بقات حتى قنعاتها تمشي والى كانت شي حاحة غاتعلمها...
بقات كتكمد ليه ومرة مرة كتسمعو كيهلوس و مرخيي...ناضت للتلاجة جبدات سيرو سخانة تعطيه ليه و رجعات عندو كتوگض فيه باش تعطيه دوا ولكن بان ليها مرخي بزااف بقات كتحاول تگلس و كطبطب ليه على وجهو ولكن والو ماكايجاوبهاش ، قلبها بقا كايضرب فحلقها و البرودة هبطات معاها حلات ليه عينيه بيديها لقاتهم مقلوبين ،غوتات ربي لي خلقها حيت كان غيب ناضت كتجري هزات تيليفون بلا ما تفكر عيطات لومبيلونص و مشات لماريو كاتجري هزات لاباري عبرات ليه السكر لي زاد خلاها تفشل حيت لقاتو طايح ، ضارت بيها الدنيا و جبهتها بدات كتندي بالعرق...ديك الساعة طارت لبسات عليها عباية سترات بيها راسها فوق ديك البيجامة و هزات صاكها لي فيه الفلوس و التيليفون هزات ولدها فيديها و حسبات الخطوات، هابطة فداك دروج و تكبي غايخرج ليها العقل معاه...
نعمة«كتحك حكنها مع راسو و تبكي»: سمش ا ولدي عافا ماما صبر شوية حل عينيك اولدي
وصلات لباب العمارة كضور عينيها كتسنا فلومبيلونص و ما هي الا دقائق حتى كانت وصلات شدو من عندها شمس حطوه فالباياص وهي طلعات معاه وعلماتهم بحالتو و بالسكر لي طاح ليه...هزات التيليفون يديها كايترعدوو مدوزة الخط لكريمة وعينيها عليهم كايركبو ليه الصيروم ولوكسيجين ،غمضات عينيها من داك المنضر لي ما بقاتش حملاتو حتى جاوباتها كريمة وعلماتها تبعهم لكلينيك عاد قطعات ختارت تديه لكلينيك حيت عارفا الى داتو لصبيطار المخزن غايجرجروها و خافت توقع ليه شي حاجة وهي كولشي دوزو الا صحة ولدها تخسر عليه لي وراها ولي قدامها غير يبقا ليها...هزات يد ولدها كتبوس فيها و كادعي فخاطرها ربي يشافيه ليها حتى وصلو و دخلوه نيشان للمستعجلات وهي بقات برا دارت الإجرائات بعدا بزز منها عاد بقات غادا جاية وعقلها غايخرج....وهي على داك الحال حتى تمات داخلة كريمة وموراها ولدها لي جابها ، وجها صفر كتقلب بعينيها حتى لمحاتها واقفة مع الحيط وكتبكي
كريمة«شادا على قلبها»: مالو اش طرا ليه كيف بقا ولدي
نعمة: غيب اخالتي غيب كان يسحابليا سخانة لي مسخفااه كان ناعس وانا ما عرفتش ما عرفتش طاح ليه السكر و غيب وماعرفتوش اخالتي ولدي غايضيع ليا انا لي مارديتش ليه البال...
كريمة«عنقاتها»: ششش نعمة استهدي بالله ابنتي ما غايوقع ليه والو
نعمة«زيرات عليها كتبكي»: هوو لي عندي اخالتي غير هو لي بقا ليا ما نقدش بلا بيه
كريمة«قلبها واكلها غير كتصبرها»: كوني مع الله يكون ماغايطرا ليه والو غير صبر الله يرضي عليك
جراتها كريمة گلساتها كطبطب عليها وبقاو گالسين كايتسناو تا يخرج الطبيب من عندو يعيطهم الخبار..نعمة دموعها ما بغاوش ينشفو و جاها تأنيب الضمير لي ما رداتش البال لودلها تا وصل لهاد الحالة..مدة من الوقت حتى خرج الطبيب غير شافتو نعمة طارت عندو كتسول فيه
نعمة: دكتور كي بقا ولدي ؟!
الطبيب:الحمد لله دابا حالتو مستقرة دابا ، السكر ديالو رجع طبيبعي وحتى السخانة هبطات شوية
نعمة«كتمسح على وجهها»: الحمد لله يا ربي الحمد لله
الطبيب«مكمل كلامو»: السخانة لي جاتو زادت شوية من استهلاك السكر ف le corps ، وديجا ما واكلش مزيان ، و الانسولين بقا خدام ، هادشي لي خلا السكر يطيح ليه حتى غيب ، هادشي كايوقع par fois عند الأطفال ديال السكري الى مرضو و ما رديناش البال للسكر ديالهم
نعمة: انا ما عرفتوش طاحليه حيت كان ناعس حتى بغيت نفيقو نعيطه دوا عاد لقيتو مغيب
الطبيب«كيحاول يطمنها»: ماتخافيش ا مدام دابا حالتو مزيانة غادي نخليوه شوية تحت المراقبة باش نتفاداو انه يعاود ينزليه و نعالجو حتى السخانة ، ولكن خاصك تزيدي تردي البال معاه هاد الايام كتر و من الأحسن نركبو ليه un capteur de la glycémie en continu هاكا باش تبقاي مراقبة ليه السكر باستمرار بلا ما تحتاجي ديري ليه ال piqures كل ساعة...
نعمة«حركات راسها بقلة حيلة»: واخا ادكتور الله يجازيك بخير
الطبيب: مرحبا ، غادي نزيد نشرح ليك كولشي قبل ما تخرجيه وان شاء الله هادشي ما يتعاودش ،الله يجيب الشيفا
مشا الطبيب من عندهم و رجعات نعمة گالسة فاشلة على الكرسي، كيغادير ليها و منين غاتجيب فلوس لاباري لي كل مرة خاصها تبدلها ليه...بقات مرجعة راسها لور متكية على الحيط و كريمة كتصبر فيها ،مشا ولدها شرا ليهم قراعي ديال الما وشي ماكلة تعتق نعمة بيها الروح عاد مشا من بعد ما علماتو مو بلي غاتبات معاها...
بقاو گالسين شوية حتى بانو ليها مخرجينو غاديين بيه لغرفة عادية ناضت نعمة تابعاهم و كريمة وراها حتى دخلوه و انصطالاو كولشي وهي عينيها عليه ما بغاوش ينشفوو ، باقي صغير بزااف على هاد المعاناة كاملة ولكن اش غادير ربي كتب عليه وعليها...عيات فيها كريمة تاكل شي حاجة تعتق روحها عارفاها ماكلاتش ساعة ما بغاتش مشات لعند ولدها حتى طلعات حداه فالباياس و جراتو عندها معنقاه وهو مغيب..بقاات كتمسح ليه على شعرو و تبكي حتى داتها عينيها حداه وكريمة غير كتنهد عليها...
صباح جديد"
صبح عليها الصباح وهي مازال فالكلينيك حتى ضرباتها الفيقة على ضو الشميسة لي داخلة ،الليلة لي دوزاتها مكرفصة ولي عتابراتها هي ليلة كحلة لي ولدها بايت مغيب فسبيطار...هزات تيليفونها شافت الساعة 9 ،حنات عينيها لولدها لقاتو مزال ناعس و مخشي فيها ، قفزات شحال من مرة فوسط نعاسها و كل مرة كتفيق تشوفو واش كايتنفس...
توگضات كاتمسح على وجهها وناضت گالسة رمات عينيها ل كريمة لقاتها ناعسة و راسها معدب على داك الفوطوي تنهدات و ناضت جيهتها قادات ليها المخدة مزيان و قادات ليها راسها ساعة ما جات فين ضور حتى كانت فاقت
كريمة«بصوت ناعس»: صباح الخير ابنتي كي صبحتي
نعمة«گلسات حداها راخية تقلها على الفوطوي و مرجعة راسها لور»: ما مزياناش اخالتي ما مزياناش سمعتي طبيب شنو گال البارح كان خصني نرد ليه البال شنو كنت غاندير كون طرات ليا فولدي شي حاجة
كريمة: اا نعمة يهديك الله راه ما بيه والو الحمد لله دابا يصح
نعمة«عوجات فيها راسها كتبكي»: قلبي واكلني عليه اخالتي حتى لباراي كي الناس ما قديتش نديرها ليه ما لقيت ليها جهد
كريمة«تنهدات»: كون درتي بريي ابنتي الله يرضي عليك راه الدكتور انور راجل مزيان و غايعاونك ياك گلتي ليا طلاقا معاكم ديك المرة و عرفو مريض راه ما يردكش غير ديري بريي
نعمة: ولكنن..
كريمة: ما كاين ما ولكن صحة ولدك لولة ا نعمة فكري فيه هو
هزات عينيها فولدها كتشوف فيه مدة وهي كتفكر فالاخير ما لقات راسها غير نايضة قاصدة العيادة هو الحل الوحيد لي بقا ليها عارفاه انسان طيب و ما يردها ولكن ما رضاتش خافتو يشوفها بشي شوفة ناقصة، ولكن دابا ملي وصل لودها لهاد الحال ما بقاش كايهمها...شدات طاكسي من تم نيشان للعيادة هاكاك ببيجامتها والعباية لي محلولة شعرها مشنتف وهي ما مسوقاش اخر همها حاليا هو كيفاش غايشوفها الناس...
صولات قدام العيادة خلصات الطاكسي و نزلات
و تمات داخلة كتمناه يكون رجع..مع دخلات ضربات على سعد كان گالس كايبقشش فتيليفونو الدنيا خاوية كايجي غير هو باش يشد لي غونديڤو من عند الناس...تقدمات عندو صبحات عليه اما هو غير شافها خلعاتو حالتها...
سعد : ختي نعمة ياك لباس مالك
نعمة«حركات راسها»: والو باس ،الدكتور انور رجع ؟!
سعد: لا مزال ولكن غالبا غايرجع غدا واش واقعة شي حاجة اختي
نعمة ما جاوباتوش رجليها خواو بيها جرات الكرسي لي حداه و گلسات عليه مغمضة عينيها هو لي يقدر يعاونها و مكاينش من غيرووو خلات سعد غير كايشوف فحالتها حتى بقات فيه...
تازة
هادي سطاتني ما يا ما وبغيتها وبغاتني ♪♪
لبارح صوناتلي ماياما واليوم بلوكاتني ♪♪
وياك أنا حبيبها ماياما وسدت گليبها ♪♪
يامانلقا كيفها ماياما وحمقني زينها♪♪
كادندن بصوتها وتغني كانت كاتجمع فبيتها شميسة داخلة عاطية طاقة زوينة وحتى هي منورة داك البيت لا بزينها ولا بصوتها لي طالقات، كاتلمط فناموسيتها كانت محيدة البيجامة لي كاتخرج بيها برا البيت وحيت صهك لابسة غير ديباردور وبيرميدة ديالو على ماتسالي ، البسمة على وجها وهي كاتشقا بقاو ليها غير الحوايج طويهم وترجهم لبلايصهم حتى كاتشهق ماعرفت باش تبلات كايجي على غفلة يغفلها بشي زدحة ولا تعنيقة حتى كاطير من بلاصتها
مارية«ضارت عندو مخنزرة»: هاد القاعيدة مازال مابغيت تحيدها شي نهار تساليهالي مع بوحبل
صالح«باسها فعنقها»: بوحبل هو لي غايساليلي يانا بهاد زين
مارية«رجعات كاطوي فالحوايج»: علاش وليت؟
صالح«گلس مقابل معاها»: ساليت شي شغل وجيت نشوفكم،،، شوشت عليك برا ماجبرتكش
مارية: هانتا كاتشوف فين واحلة ،غاتغدا معانا؟
صالح:واه هاد العشية انخرجو نتعشاو برا نبدلو الجو ومنا يلعب غالي شوية
مارية«بتاسمات وهي كاتفكر وجه نصيرة»: اليوم جاو الخطاب فخاك هههه لا عرفت شكون!
صالح: بالنية ؟
مارية«شاف فيه»: والله مرات عمك قالك أنور يدي وحدة فالبنات ساعة يماك قطعت لها زواج العائلة بعاد منو ونهار يكتاب دابا يكتاب«ضحكات شادة على فمها»: مابيا غي بنت عزيزك جايا على الصباح مقادة لاجعل تفلت لأنور شي شوفة ماعاينش يكمل داك الفطور تاكان هرب
صالح«ماعجبوش الحال»: مازال هاد الخبر مانساوه ماشي يبقاو يهبشو على صداع الراس حتى ايخرج معاهم أنور العيب هاد ساعة راه مكالمي ساعة اخرى مانعرفلو
مارية : ايوا هادشي علاش ايقلبو سيد بعقلو وهما تابعينو بالعرايس «هزات بيجامتها لاحتها عليها»: انا ساليت نمشي نشوف لغدا
خرجات من بيتها كاتجمع شعرها ودخلات لكوزينة شافت لغدا لقاتو طاب كلشي واجد على مايدخل أنور ويتغداو ، جرات ولدها لدوش دوشات ليه بالخف وبدلات ليه عطاتو ياكل ومشا يتفرج ، أما هي وجدات طبلة ديال لغدا على حقها وطريقتها شلايض والعواصر غير دخل أنور مشات حطات اللحم لي مطيباه بالبرقوق والمشماش معسلين والخبز ديك طبلة كاتشهي ، غسلو يديهم وگلسو مجموعين على طبلة بلا كلمة بلا جوج كايتغداو وعاقلين عليه قليل يلا لاح صالح شي كلمة ل مارية يخليهم يضحكو هدا هو جوهم وأجوائهم
أنور«رجع لور»: الله يعطيك صحة امرات خاي
مارية«بتاسمات ليه»: بصحتك حتى نتا راك موحش الماكلة دهنا
غير سالاو لغدا كل واحد قصد بيتو من غير مارية لي جمعات الروينة ديال لغدا ومادخلات لبيتها حتى خلات كلشي نقي وراها، هكا روتينها ماتنعسش فنهار يلا ماجمعات وراها كلشي
أما عندو كايطلع لطبقة ديالو دوش ورتاح النعاس مانعسش حيت كان كايشوف شي ضوسيات ديال المرضى لي عندهم الفتيح ، حتى وصلات شي الخمسة ديال العشية ماخرجو من قوقعة العمل غير داك صونيط ديال التيليفون لي كايصوني ، لاح عينو عليه كايشوف بانت ليه نمرة مامسجلاش ميك ماجاوبش حتى قطع راسو
(بوحبل: كايمثلوه بالعمر)
المحمدية
كانت گالسة حدا ولدها لي تحت المراقبة فالكلينيك ملي رجعات من العيادة وعطاها سعد نمرة وهي عينيها على تيليفون كاتشوف فديك نمرة وتعاود يطفا تيليفون وتعاود تشعلو وهي كاتشوف فديك نمرة لي حفضات ارقامها بقوة ماشافت فيها أولا تردد لي فيها انها تصوني وطلب المساعدة زائد انها ملي تشجعات وصونات ماجاوبهاش..بقات كاتعض فحناكها من داخل بقوة التوتر لي هي فيه ، حتى هزات عينيها فالملاك ديالها لي ناعس ماجايب خبار كايبان مرتاح والحمد لله صحتو كاتحسن ولكن ضروري هو لي خاصها ديرو المرة جايا ماخاصش يتعاود نفس شي حيت ماضامناش راسها غاتعتقو سوا طاح ليه سوا طلع
ناضت بعدات من حداه تقابلات مع سرجم كاتشوف فسما لي ضلامت بحال حياتها وكلشي ولا نواغ غير الفرق شوارع فيهم ضواو مزينينها وحياتها ضو الوحيد لي فيها هاهو حداها مجبد لا حول ليه ولا قوة ،
بدات كاتبني وتريب قبل مادوز الخط كاتفكر كيغادير ليها هاهو حتى ساعدها مرة لولة وتانية ومن بعد؟! شنو غادير !! منين غاتجيب دوك الفلوس لاباراي خاص تبدلها جوج مرات فشهر والقليلة خاصها 1900 درهم كل شهر بلا مصاريف ديال الكرا لي فيه 1500 درهم وزيد عليه المصروف والاحتياجات ديال ولدها يعني ماغايكمل شهر حتى غاتكون كاتطلب بهاد المعنى ، كل مرة كاتفكر بلي خاصها تعيط ليه باش يساعدها على الأقل يلا كايعرف شي حد يتساعد معاها على ثمن ديالها كاتحس براسها تقيلة عليها وغايفهمها غلط يالاه خدمات وحيت طبيب الأطفال غاتستاغلو! ماقدرتش تقبلها ورغم دالك تنفسات مزيان حتى تشجعات واخدة قرار انه يلا ماجاوبهاش غاتسد الموضوع وتقبل على طريقة اخرى ، وركات على نمرتو مغمضة عينيها وكاتسمعو كايصوني وقلبها غايخرج من بلاصتو
عندو
كانو گالسين هو ومو وخوه ومرت خوه فواحد ريسطو كبيرة مفتوحة جو زوين ومبرد فداك الليل ، مستمتعين بداك الجو العشا محطوط قدامهم على شكل مشاوي وشلايض ولد خوه كايلعب فالألعاب وهو كان كيصور مو گالسة قدامو ودارها فشاشة ديال تيليفونو عاجبو داك الجو وبصح هاد الأيام لي كايدوز معاهم كايرتاح من كلشي ، هز كاسو ديال أتاي شرب منو وحطو حتى طلعات نفس النمرة كاتصوني عليه هاد المرة هز حاجبو حيت عيق عليه بتعياط وهادشي نيت يلا كان هو نفس الشخص لي فبالو .... ناض من حداهم كايقاد فتيشورط ديالو باش يهضر بعيد عليهم
ناجية«شافتو مخلي كاسو ونايض»: لاين ماشي اولدي
أنور«نعت ليها لتيليفون»: غي نهضر ونرجع ايما
مشا قاصد واحد البلاصة على برا ساعة ماجا فين يجاوب حتى كان الخط تقطع ، دوز الخط بنرفزة كايتسنا شي حد يجاوب حتى تطلق داك الخط وأول ماسمع ديك ألو ترخفو حواجبو
أنور: وي شكون معايا؟
نعمة: أنا ... أنا نعمة لي خدامة عندك
من غير حواجبو لي ترخفو حتى تنرفيزة لي طلعاتو هبطات مور ديك أنا نعمة، علاش!! الله وأعلم مهم ماشي لي فبالو لي كان كايصوني...حيد تيليفون على ودنو حتى شاف ساعة طلعات ليه علامة تعجب فهاد اللحظة علاش مصونية عليه هادي فهاد الوقت
أنور«سمع تحنحينتها»: نعمة بيخير؟
نعمة: الحمد لله ... سمحليا مصونية عليك فهاد الوقت برزطتك
أنور: ماشي مشكل... ياك لباس!! شي حاجة ؟
نعمة«عينيها غرغرو فهاد اللحظة»: عـ... عيطت ليك حيت ولدي مرض ليا
أنور«سمع تغنغينتها وصوتها لي تبدل زاد ركز معاها»: شنو وقع !
نعمة: مرض ليا بسخانة «غلباتها البكية»: وانا ماديتهاش فيه حتى غيب بسكر مايصحابليش طاح ليه و....
أنور: غير بشوية تهدني بعدا باش نفهمك
نعمة«كاتشرح بيديها بحالي نيت كايشوفها»: طاح ليه سكر وهو طايح بسخانة وانا مارديتش لبال لسكر كتر ماكنت مركزة على سخانة وعلم الله شحال وهو مغيب هزيتو لكلينيك دابا شوية ولكن خاصو ضاروري يركب le capteur
أنور«تنهد حيت بزاف الوليدات كايعانيو من نفس المشكل وكاين لي مات غير من الإهمال»: هادشي كايوقع انعمة ضروري غاطيحي فيه خاص شوية دصبر وصافي ،لاباراي ضارورية ماغانقولكش ماشي مهمة وكانضن المدرسة علاين خاصاه مراقبة خاصة
نعمة«غمضت عينيها ونطقاتها ديريكت»: عيطت ليك باش تعاوني
مور ماقطعات تيليفون حسات براسها كأنها كانت وسط شي حـ**رب مع نفسها عرقانة وقلبها كايضرب الدموع مابغاوش يحبسو من عينيها كاتلعن فقلة شي وفزهرها وحياتها والفلوس لي هي سبب فهادشي حيت كون كانو عندها ماكانتش غادل راسها لشي حد وماكانتش الطلب المساعدة من شي حد ، كون كانو الفلوس كانت دابا غاتكون دايرة لولدها جميع وسائل راحة لي غاينقصو من ديك المعانات ديال المرض المزمن ، بصح المرض ماشي شي حاجة ساعة يستاهن بيها الانسان بالأخض يلا كان بوحدو لا حنين لا رحيم غير راسو وخاصو يواجه بوحدو بلا مايقول اح ولا عيت حيت ماكايناش فرصة
نعمة حاليا عارفة النعمة ديال الصحة شنو هي حيت كبدتها لي مريضة كانت كاطلب كون جاها هي وماجاهش هو لي صغير على الأقل
كايتشوفو مازال صغير على انه يصبر لسكري مازال صغير على الانسولين مازال صغير بزاف على هاد المعانات ، وفنفس الوقت كاترجع تقول الحمد لله حيت كاينين وليدات مراض بشي امراض كتر من هادشي ....
البكا لي بكاتو مور ماقطعات التيليفون ماشي بسبب كرامتها فقط حتى تراكمات لي عندها خرجاتهم وكانت ديك لابيل سبب مور أسباب هما خلاوها طيحهم كي شتا حتى تنفخو عينيها ، گلسات فالأرض وبقات فنفس وضعيتها حتى صبح الحال ملي طلات عليها الفرملية لقاتها ناعسة فالأرض مشات فيقاتها حتى ناضت مفزوعة ، شافت ولدها حال عينيه مشات غسلات وجهها ورجعات عندو
نعمة«گلسات فوق راسو»: شمس! صباح الخير
شمس الدين: صباح الخير
نعمة«شافت فيه»: كاضرك شي حاجة اولدي ؟ فيك جوع
شمس الدين«حرك راسو شعر هابط ليه على عينيه»: اه فيا جوع وفيا العطش
نعمة: انا نعطي لولدي يشرب دابا
ناضت حلات ليه قرعة ديال لما شرب منها وصونات لكريمة لقاتها جايا وجايبة ليه الفطور ، داتو نعمة بعدا لطواليط وغسلات ليه بدلات ليه حوايجو عاد جات الفرملية عطاتو لبرا ديالو ، كانت كريمة جات وحطات ليه فطور صحي خاص بيه فطر مزيان وحتى نعمة نقبات شوية معاه وغير ساهية كاتفكر حتى جا الطبيب دار كنترول بسيط عليه باش يخرج عاد مشا ، هزاتو وخرجت من تما دازت لمحاسبة خلصات التكلفة لي أكيد حطات فيها مبلغ صحيح بقات كريمة كاتشوف فدوك الفلوس لي جامعاهم بعرق كتافها عاد خدات طاكسي من قدام الكلينيك ومشاو لدار
وصلات نعمة مهدودة بقلة الراحة وقلة الماكلة وقلة نعاس كتافها طايحين وعينيها دابلين حلات كريمة الباب وهي هازة شمس الدين مازال مالاحتش حتى الخلفة لداخل وقفات عليها مولات الدار وكيف كانقولو ماقدو فيل زادوه فيلة
سيدة: صباح الخير عليكم
نعمة«حركات راسها بلا خاطر»: اهلا بيخير
سيدة: الحمد لله جيت عندك بكري شوية ساعة ماكنتيش حيت جيت من كازا راك عارفة جيت بكري كان عندي شي غراض ودزت يصحاب ليا غانشدك گبل ماتمشي لخدمة
نعمة«حركات راسها»: لا ماكنتش فالدار يالاه جيت ولدي كان مريض وكنت معاه فالكلينيك يلاه جينا
سيدة: مسكييين مايكون باس عندو
نعمة«تنهدات وهي معنقاه»: ماتشوفي باس
كريمة«شافت هنا وهنا وهي دفع لباب نعتات ليهم»: واخا دخلو من الباب بعدا وهضرو
داكشي لي دارو دخلو لدار گلسو فصالون نعمة دات ولدها لبيت ينعس ورجعات عند لمرا مخلية كريمة كاتعمر اتاي
سيدة«حنحنات منظفة صوتها»: ايوا انعمة نتي عارفاني عندي غير نيشان ماغانبقاش نخيط فالهضرة جيت على حساب الدار بغيتها وربي شاهد ماشي باش نبدلك ولا على شي حاجة الدار بغاها ولدي غايتزوج وهادي شهر وانا نساير فيه ويلاه كتاب نجي عندك
صباح جديد
شرقات عليه الشمس وهو فطريقو راجع للمحمدية من بعد ما صلا الفجر خرج شاد طريق، واخا كان فبالو مازال يزيد يگلس حيت المواعيد لي عندو مزال بعاد شوية ولكن لابيل لي وصلاتو البارح من عند نعمة بدلات البروگارم، ما قدرش يبقا گالس خصوصا وصوتها الباكي مزال فودنيه و كيفاش طلباتو يعاونها شي حاجة لي ما يقدرش يستاهن بيها، بقا فيه شمس للحظة حيت باقي صغير و بصفتو طبيب من الوجب ديالو يعاونو هادي باش كان كايقنع راسو...
وصل لوحد سطاسيون نزل مشا لحمام غسل وجهو مزيان باش يطير عليه نعاس ومشا خدا ليه عزية بلا سكار ورجع مكل طريقو لي مكانش باقيليه فيها بزااف...
وقف بسيارتو قدام العيادة كانت 10 ديال الصباح ،نزل و تم داخل كايحك فعنقو من العيا ديال الطريق وعاد ما شابعش النعاس، مع دخلة بان ليه سعد گالس كان كياخد رونديڤو من عند شي ناس حتى وقف عليه علمو يدخل عندو فاش يسالي عاد دخل للببرو ديالو گلس فالكرسي ديالو كايرتاح حتى تسمع دقان فالباب و تم داخل عندو...
سعد: دكتور انور على السلامة
انور«حرك ليه راسو»: الله يسلمك ا سعد ،الامور كولشي مزيان
سعد: اه ادكتور شديت لي غونديڤو و كولشي مزيان
انور: صافي من غدا غانبدا نستقبل les patients حتى تعلم الناس لي كانو واخدين غونديڤو فهاد الايام
سعد: واخا ادكتور كون هاني
انور«حرك ليه راسو وشاف فيه بساءل»: نتا لي عطيت نمرتي ل نعمة؟!
سعد«تفكر حالتها البارح»: اه ادكتور جات على الصباح كتسول عليك البارح ساعة ما لقاتكش كانت حالتها خايبة بزااف غير كتبكي وعلى ما فهمت ولدها كان مريض بزااف
امور«مسح على وجهو»: واخا ا سعد تقدر تولي لخدمتك شوية وتجي هي ولدها ودخلهم
سعد: صافي واخا
خرج سعد من عندو خلاه غير هو غارق فافكارو وحدة تديه وحدة تجيبو حتى لقا راسو كايقلب عليها ف كمرات المراقبة وكايشوف فحالتها لي كتقطع القلب حتى طلقها بتنهيدة من قاع گلبو....
اما فجهة اخرى
هي لي كانت گالسة فالكوزنية عينيها بقوة ما بكات تنفخو وجفونها حمارو ، الليل كولو وعينيها محلولين من بعد ما مشات مولات الدار لي رمات ليها الساعقة وخلاتها كتبتني و تريب غير بوحدها، راسها بين يديها كتفكر كانت فلاباري ديال ولدها حتى ولات كتفكر فين غاتمشي و فين غاتلقا دار بتمن فحال هادا لي كارية بيه عقلها غايخرج بالتفكير وشي حل ما طاحت عليه، عيات كريمة ما تهدن فيها بغاتها غير تنعس شوية تعطي لصحتها الراحة ولكن والو ما قداتش...وهي مازال فبلاصتها حتى سمعات التليفون حداها كيصوني هزاتو مدوزة الخط بلا ما تشوف شكون
نعمة«صوتها مبحوح بالبكا»: الو
انور«هز حاجبو»: نعمة صاڤا
نعمة«ما عندها خاطر»: الحمد لله شكون معايا
انور: مصونية عليا و ما مقيداش نمرتي؟!
نعمة«خرجت عينيها عاد ستوعبات وحيدات تيليفون شافت سميتو»: احم دكتور غير سمحليا ما رديتش البال
انور«حرك راسو فحالي حداه»: ماعليش ،واش مريضة ؟
نعنة: لا احم غير..
انور«قاطعها»: المهم بغيت نعلمك راني فالعيادة الى كنتي مسالية دوز عندي راني كانتسناك
نعمة: واش جيتي ؟!
انور: وي جيت هاد الصباح ، ما تعطليش حيت مزال عندي ما نقضي
نعمة«جمعات الوقفة»: واخا هاني شوية و نكون عندك
لبسات عليها غير جلابة وجمعات شعرها ، دازت لشمس الدين لبساتو شوميز فشيبي وشورط جينز مع صندالة سماطي ومشطات ايه شعرو رشات ليه من بارفان ديالو عاد باستو، هزات صاكها وخرجو خداو طاكسي ومشاو لوجهتهم ... مسافة طريق كانو وصلو لعيادة كاتحس براسها مامرتاحاش نهائيا ولكن عافطة على نفسها ، دخلات مع ولدها لي غير شافهم سعد قرب عندها لاح ليها سلام وتحنا عند شمس الدين مور ماعلمو أنور بلي جاية وغاتجيب ولدها معاها...
فلاش باك ...
أنور«تنهد حيت بزاف الوليدات كايعانيو من نفس المشكل وكاين لي مات غير من الإهمال»: هادشي كايوقع انعمة ضاروري غاطيحي فيه خاص شوية صبر وصافي...لاباراي ضرورية ماغانقولكش ماشي مهمة وكانضن المدرسة علاين خاصاه مراقبة خاصة
نعمة«غمضت عينيها ونطقاتها ديريكت»: عيطت ليك باش تعاوني
أنور: مرحبا .. المرة الفايتة قلت ليك يلا حتاجيتي شي حاجة مرحبا بيك
نعمة: شكرا ربي يخليك...ماعرفتش كيفاش نگولها ليك عافاك ماتفهكنيش غلط غانخلص وكلشي غير محتاجة لي يوقف معايا دوام هدا وديك لاباراي ماشي ساهلة عليا«كايصحاب ليها قطع»: ألو
أنور: وي معاك كملي كانسمع
نعمة: يلا كاتعرف شي حد يبقا يخليها ليا بثمن ناقص كل شهر مانسالكش هاد الخير نخدم عندك فابور غير تكلف ليا بيها الله يرحم ليك الواليدين مابقاش عندي جهد فين نزيد وهو صغير
أنور: واخا تهدني أنا دابا ماكاينش تما غدا نجي ان شاء الله وجيبه لي الصباح يكون خير
نعمة«دموعها شلال»: واخا الله يجازيك بالخير ياربي الله يفرح قلبك سمحليا ادكتور الله يسر أمرك
أنور«حس بيها»: مرحبا فأي وقت
اند فلاش باك..
شي مرات كانصعبوها على ريوسنا ولكن الشخص لي عندو نفس وكرامة صعيبة عليه من جميع نواحي عاد ملي كاتكون ماقادرش تحيد داك الحيط لي بنيتيه باش مايجرحك حد ومايآديك حد ولو بكلمة راه كاتكون صعيب طلبي مساعدة من شي حد ويرجع شي نهار يعايرك بيها ولا يمن عليك بيها وهادشي كامل كانت نعمة متفادياه
باش ماطيحش فيه ونسات بلي شي مرات كايجي جهد فوق جهد تعيا تواجه لابد مانحتاجو شي حد يساعدنا وماشي كلشي نقدرو نديروه راسنا...دخلهم سعد وقاد واحد ضوسي على حساب شمس عاد خرج مخليهم واقفين
نعمة: صباح الخير ادكتور سمحلينا على هاد تبرزيطة
أنور: ماديرش فبالك ماكاين لا تبرزيط لاوالو «شاف شمس»: جيت لعندي البطل هاحنا تلاقينا مرة أخرى«مد ليه يديه»: صاڤا
شمس الدين «صافحو»: لباس
أنور: خديتي دواك فطرتي؟
شمس الدين: اه
نعمة«نطقات وراهم»: اه خدا دوا فطر مزيان عاد جبتو
انور: مزيااان البطل
ناض من بلاصتو وشد فيه حتى طلعو فين غادير ليه الفحص على شكل كونترول وصافي خلا نعمة گالسة كاتشوف فيهم وعقلها كامل مع ولدها ،دار ليه تلفازة وقلبو مزيان
نعمة: داكشي لي كنت گلت ليك ادكتور شفتي ليا شي حد
أنور«شاف فشمس»: بقا هنا صافي «رجع بلاصتو گلس فيها»: كيف قلت لك هادشي كايبغي صبر انا شفت واحد الدكتور صيدلي كايجيب les capteurs ولكن على حسب واحد الجمعية خاصة فين كاياخدوها بثمن ناقص أنا هضرت معاه على قبل شمس باش يبقا يخلي ليه ديالو بثمن لي كايحطهم فديك الجمعية واخا راه قاصحة وعارفها ماشي ساهلة واخا يكون ثمن ناقص حيت راه كانهضرو على حياة كاملة ... خاص بزاف ديال صبر على الأقل حيت باقي صغير أما ملي يكبر ليه الإختيار فمتابعة الحالة ديالو
نعمة: عارفة عارفة المهم هو شنو درتي معايا دابا عمري نسا هاد الخير الله يجازيك انا نبقا نخلصها فكل شهر ماعنديش مشكل واخا تقطعها من خلصتي نخدم عندك بلاش ماعنديش مشكل«شافت فيه وتفكرات حالتو» المهم شمس
أنور: ماشي لديك درجة«حرك راسو وهو كايشوف فيها»: رتاحي
رتاحت شوية من كلام أنور ليها والصدمة بانت ملي جبد واحد الكارطونة زرقة فيها le capteur ديال ماركة معينة عينيها لمعو وبحالي كاتشوف المنقد ديالها فديك الكارطونة ، هز وريقة صغيرة كتب فيها شي حاجة ومدها ليها
أنور«مركز مع شنو كايدير»: دخلي هاد l'application دابا وعطيني نسكاني ليك هاد le code-barres معاها
نعمة يديها كايترعدو من توتر دغيا جبدات تيليفونها وبدات كادخل شنو كتب ليها حتى دخلاتها ناض هو عند شمس فيديه لاباراي وعيط ليها باش تحيد ليه شوميز داكشي لي دارت وعرات ليه دراعو...
أنور«شار ليها بيديه»: شوف شنو غاندير باش من هنا 14 اليوم ان شاء الله تركبيها ليه راسك
نعمة«حركات راسها»: واخا انا مركزة معاك
جاب لالكول مسح ليه تحت دراعو شوية وفنفس الوقت كايقلب بصبعو ، عاود مسح مزيان وكايشرح لنعمة لي حالة فمها كاتسمع بلا مجهود هضرتو حفضاتها ، حط ديك الكابتور على دراعو ورك على البوطون حتى تسمعات ديك (كليك) كانت لصقات ديك ساعة ،عطاتو تيليفون حتى سكانا داك الكود وهو يورك على الكابتور لي فدراعو خلاوها تقريبا واحد شوية حتى بدات كاتعطي العبارات راسها ماحساتش نعمة ديك ساعة حتى بدات كاتضحك بالفرحة الغير ارادية لي جاتها ، عطاها تيليفون والورقة لي فيها الكود و اكد عليها تخبيه فحالة نا حتاجتو ورجع لصق ل شمس ديك الكابتور مزيان متبتها بلصاق ديالها عاد قاد ليه شوميز ونوضو راجعين لبلاصتهم..
أنور: كلشي عندك تما وكل 5 دقايق غايعطيك العبار وشحال ديال انسولين خاص ملي غايكون طالع سكر ولا هابط ديك l'application غاتعطيك كلشي وغاتعلمك بكلشي
نعمة: صافي فهمت الله يستر خيرك شكرا بزاف «بقات كاتفرك فصباع يديها لي عرقو»: شحال دابا غانخلص فهادي وايمتا ناخد لي جايا كيفاش غانتواصل مع سيد
أنور: هاد الكابتور حسبيها عليا هاد المرة«ضحك فوجه شمس وباش ينقص عليها الإحراج لي كايبان عليها» التعارف ديالي مع شمس ياك
نعمة«حركات راسها بلا»: ماغاديش نقدر نقبل باركة غير الخير لي درتي معايا كافيني
أنور«حرك راسو بالإيجاب»: ماعليش غير خليها عليا هاد المرة«جبد ساشي اخرى» هادي من هنا 14 اليوم عاودي ركبيها ليه هاد شهر مني ماشي مشكل
نعمة«تزنگات وحشمات جميع لوان بانو فيها»: والله حتى بزاف ا دكتور غير هاد الگلسة لي گلسنا راه تعطلنا عندك والناس كاتسنى برا
أنور: كانتعاملو مع البراني وديجا انا قلت لك لا حتاجيت شي حاجة مرحبا هاد المرة ماكاين لاش تخلصي خليها عليا«شاف فشمس»: هاد ماماك راسها قاصح ياك
شمس الدين«شافيها كايضحك»: ههههه
أنور: شفتي ضحكتي يعني بصح«حول شوفاتو ليها»: سيري دابا لشغالك وردي لبال لولدك
خرجات من عندو ولدها فيديها غاطير بالفرحة جميع دعاوي الخير صدفاتهم ليه فخاطرها حتى ماقدات عمرها عاتنسا خيرو تأملات بلي مازال الخير فالدنيا على الأقل ماشي كلشي قلبو حجر كاين الخير وباقي الخير ، حمدات الله وشكراتو على الأقل لي نقصات عليها مزيان واخا ماشي ساهل ولكن كاتخدم غير على قبلو وغاتوفر ليه شنو محتاج واخا على حساب صحتها المهم يكون هو مزيان
بالفرحة نسات ماسولاتوش على كيفاش غايتم توصيل الكابتور كل شهر واش هو غايجيبها ولا هي خاصها تواصل مع الشخص لي كايجيبها..تفكرات بلي سولاتو ولكن ماجاوبهاش قالت يمكن نسا حتى تسولو من بعد...
فجهة أخرى
كاتجينا غريبة نسمعو بلي الدار فيها كل نهار صداع وكل نهار المشاكل وهادشي راه بصح كاين....نقدرو مانعرفوش الأسباب ديال داك صداع ولكن كل نهار نايض على اتفه الأسباب ، و فالدار ديال عصام هادشي لي واقع نفس نهار كايتعاود بروتينو وبمشاكيلو أي واحد ناقص نخوة وناقص رجلة وحتى كتافو باردين غايعيش فالصداع نهار خسر خدمتو مابقاش عارف شنو غايدير حيت ولف ستيلو ورقة و ماولفش تمارة
تخلويض خرج عليه وگلسو لأرض ، لولد لي من صلبو مايقدش حتى على شوية من داكشي لي كادير ليه نعمة باش يديرو ليه كسوتو ولا ماكلتو وشرابو ودواه مايقدرش عليهم فما بالك يهز نفاقتو وهو واحل مع مرا جلاخة وأم سلطوية زائد أخت مطلقة ليه فركنة ، قالوها لولين سارح ملي كايضحك على سارح بحالو كايتلف الغنم
كان گالس مفرق رجليه كايفكر فشنو طرا ليه مع نعمة والكروشي لي زعزع ليه وجهو حتى قفزاتو حنان مفضفاه
حنان: ماناويش تخرج تقلب على راسك ولا كيفاش؟
عصام: حنان يتوب عليك خليني علك هاد ساعة راسي غايتفرگع
حنان«حركاتو من كتفو»: وااانوض شوف شنو دير راني قريبة نولد تگعد قلب على راسك راه ماغانولدش لك انا فسبيطار المخزن باش تعرف
سارة: مالو سبيطار المخزن انا ولدت فيه اش وقع
حنان: ماداوياش معاك نتي تكمشي وسكتي كون كنتي لالة ومالي ماترجعيش من دار راجلك خاوية
سارة«عيطات على مها بالفقصة»: واااااا ماما اااجي لهادي راه مافيا لي يمد يدي عليها انا علمتك
عصام: صافي هنيونا «شاف ف حنان»: يكون خير دابا غيريها
حنان: هاني ساكتة تانشوفك اش غادير
ناضت كاتمختر عليهم تما بواحد دراعية شادة فضهرها حتى دخلات لكوزينة لقات العگوزة كاطيب لغدا ضربت فيها وزادت ، خلاتها تابعاها بعينيها وتنهد للحظة جات نعمة بين عينيها وتفكرات الغلبانية لي كانت دايرة عليها ولكن ربي يمهل ولا يهمل تمنات حياة كاملة مع نعمة وماتعيش نهار واحد مع حنان كان نهار كحل ملي خطباتها ليه ،هزات يديها عضاتها مزيااان بردات فيها حر شمتة عاد كملات شغلها
عند أنور
كمل خدمتو واخا العيا ديال طريق زائد الخدمة حس براسو عيا ديال بصح مع غايخرج كاتبان ليه جايا عندو كاطقطق بطالونها ، عوج راسو مكره غايضطر يهضر تاني وهو ديجا فيبل وقف حتى دخلات
ضحى: سلام أنور صاڤا
أنور: صاڤا نتي ؟
ضحى«حركات راسها ومبتاسمة»: وي صاڤا كانصوني علك ماكاتجاوبش تشوشت قلت نجي نشوفك
أنور«هز تيليفونو داير بيه سبة»: يشوفك الخير ماكنتش مسالي هادشي لي كاين
ضحى: غاتخرج؟
أنور«حرك راسو وعينيه فتيليفون»: اه خارج عندي شي غراض
ضحى«حكات على حاجبها كاتمايع عليه»: نشربو شي قهوة
أنور«شاف فيها ونطق بطلب»: ضحى الله يسر ليك والله ماراني قاد هاد ساعة عندي غراض وغانمشي رتاح حيت غدا عندي اوبيراسيون
ضحى«بابتسامة»: ايوا صافي غدا نشوفك فالكلينيك ونشربوها
أنور«ضرب نضاضر فعينيه وزاد»: نهارك مبروك اختي
يتبع...
التعليقات
لا توجد تعليقات بعد، كن أول من يعلق.