محتوى القصة
رجعو جلسو كيتغذاو هي ضربت غير النص ماقدرتش تكملو قابلت غير الفريت وهو كملو كامل حيت اصلا كياكل كثر منها وجهدو مجهد عليها واخا هكاك شبع مزيان غير بهاد طاكوس حيت عامر وفيه الذهون كيݣهمو ، شافها كتاكل غير الفريت وكتغطسها فالمايونيز والكاتشوب ماشي اول مرة يشوفها كتسوط فالفريت حتى قال
يزيد : كتعجبك الفريت بزاف ؟؟
حركت راسها : اه كنحماااق عليها
يزيد : داكشي علاش طالعة فنيااانة وماعندك صحة
نطقت بصوت حنين وهي حادرة عينيها : ياازيييييييد
جاوب : نعاااام
نور : احم كنحس بالملل بوحدي فالنهار
حرك راسو : عااارف ... انا غنمشي نقص لحيتي ومن بعد نجي عندك ونهضرو فهادشي صافي ؟؟
تلفتت ليه بسرعة كتشوف فلحيتو لي بدات كتكبر بزاف : نعاونك ؟؟؟
لاقا حواجبو باستغراب : فاش غتعاوني؟
حدرت راسها حشمت : صافي ماقلت والو غير سير
ناض وقف : اجي دغيا كنتسناك
مشا وهي ابتسمت بسعادة وناضت جمعت الطبلة دغيا ولحقت عليه للحمام ، يزيد عطاها كريم الحلاقة وهزها جلسها فوق البوطاجي باش توصلو حيت مافيه لييبقى يتحنى عندها
نور خوات فايديها وبدات كتذهن ليه فلحيتو : هههه صراحة كنت شوفتا فواحيد الفيديو ديكشي علاش بغيت نجرباا
يزيد مصغر فيها عينيه : اممم راني عرفتك شفتي هاد التجربة وبغيتي تعيشيها
نطقت بدلع : وباااش عرفتي
يزيد : حيت ماخافيش عليا هادشي
ضحكت وشدت الموس كتحسن ليه ببطء وحذر
يزيد : الى جرحتيني تخلصي الحق
نور الزهراء مركزة : غير بقى فموطعك وماتحركشي
خلاها كتحسن ليه ببطء وهو متكي بيديه قدامها ومستاغل الفرصة كيتأمل فيها خصوصا فدوك العوينات الزرقين ولي كيزدادو جمااال فاش كتكحلهم بالكحل ميمكنش شحال كيوليو خطيرين وفتااانين ، نزل عينيه لعنقها لي كيبان فيه شوية طبايع من مخلفات تقبيلو ومصااانو بحالا داير ليها الطابع حتى سالات وقالت فرحانة
نور الزهراء : صاافي كملت ههههه
باسها فحنكها ونزلها غسل وجهو وهز طوندوز قاد لاطراس ديال اللحية وصلح بعض العيوب لي دارت ليه وانتابه لواحد الجرحة ماحسش بيها حيت كان عقلو مسافر عندها ، قاد اللحية حتى ولات مطراسية ومنقوصة وغسل وجهو امام انظاها ونشف
نور يدون شعور نطقت : كتحيك لحية مزييييونة هيدا
غير نطقتها ضار عندها بسرعة جرها من جهة صدرها حتى تزدحت مع صدرو ونزل كيبوس ففمها بعنف وشغف
بقى كيشلقم فيها وياكل ليها دوك الشنايف حتى قنع وطلقهم منفوخييين وحمريييين غمزها وشد ليها فايديها وخرجو كيهضر معاها
يزيد : الملل غتحاربيه بالقراية قراي في هاد العطلة باش مني تجي المدرسة تلقاك فاهمة شوية
مشى تكى فبلاصتو وتسرح متكي ومكالي بالمخاد وراه وهي واقفة عليه كتهضر وتعبر بايديها
نور : ماكنبغيشي نقرا كل نهار كنزيد نمل
يزيد : باااينة ماعندكش مع القراية ... سيري جيبي شي دفتار وستيلو نشوف شنو عندك فداك الدماغ
مشات مغوبشة كتقلب على دفتر وستيلو فمحفظتها لي جابت معاها حتى لقاتهم ورجعت عندو جلست حداه مربعة رجليها حتى ناض حيد ليها البانضة وطلق شعرها كيعجبو مطلوق
يزيد : شنو المواد لي ناقصة فيهم
نور الزهراء : مااط كنكرهووو مااكنحملوشي ماااارة والفيزيييك وكاااع مواد علميية اووووف منهم
هي كتهضر بقرف وهو رافع حاجبو فيها باااينة علاش سقطت ضروري يا اما الزين والتكوليخ يا اما الخيوبية والقرااية قلييييل فين كتلقاهم مجموعين هاد 2 حوايج وحتى الى كانو بجوج كيكون مستوى متوسط
يزيد بجدية : واللغات ؟؟
نور الزهراء : كنعرااف العربيية وشويش اسبانية ديك فرنسية وانجليزية لااا ماكيدخلوشي نالعقل
يزيد : انا غنفتي عليك واحد الجملة بالفرنسية وترجميها الانجليزية
شافت فيه بواش من نيتك : كتضحاااك ياااك ؟
يزيد مبرد : J'étudie en deuxième année de baccalauréat ... كتبيها وترجميها للانجليزية عندك 5 دقايق
غوبشت وتحنات كتكتب وتعصر حتى دازت 5 دقايق وشد من عندها الدفتر كيشوف فيه باستغراب ورافع حاجبو خطها مابيهش وداكشي لي ملاه عليها فيه اخطاء املائية اما الترجمة بالانجليزية كااارثة وهادي غير عطاها جملة مفهومة
نور حشمت : ماالك ؟؟؟
شافيها : الديكتي واااالو ا نور خاصك ترجعي للسادس تعلمي الديكتي
هزت كتافها ماعاجبها حال : ماعنديشي مع اللغات انا اسمي نور الزهراء ماشي جاكلين كنعرااف نعربية مالوم هوما مكيقراوشي عربية كيقراو لغة ديالوم
بقى كيشوفيها مطول وفي الاخير نطق : الى مابغيتيش تعاودي الباك مرة اخرى خاصك تعلمي لغتهم واخا غير تنجحي بيها ومن بعد قراي لي عجبك ولا ولفتي الليسي ؟؟
شافت فيه بترجي : نمشيو نتفرجو لشي فيلم مزييون ؟؟
يزيد : بلاتي نساليو الفيلم ديالنا مع القراية ... اجي نشوفو داك الماط حافضة جدول الضرب ؟؟؟
بلعت ريقها وحركت راسها ايجابا : اااه حافضاااه
يزيد : مزيااان عرضي عليا جدول الضرب ديال 9
نور الزهراء شهقت : هييييييه مشيتي نصعيييب كااامل خاليني نبدا ب 1
يزيد : 1 !!!! راه نجيب دري ديال الروض يعرض عليا 1 واطلقينا
نور سرطت ريقها : قولي نتينا وانا نجاوب
يزيد : اوكي 6×9 ؟؟؟؟
نور فركت يديها بتوثر وشافت فالسقف كتحسب فراسها ، شاف فين كتشوف وقال مني تعطلت
يزيد : غايطيحو عليك الارقام من السقف ؟؟؟؟
نور مارضاتش : كتساوي 45
يزيد حرك راسو بنفي : لالا ابنتي حتى الماط خاصك ترجعي للابتدائي
نور غززت الستيلو بسنانها : راني قوتلك عااملة آداااب كون كنعراف نهادشي مانعملشي آداب
يزيد : اللغات راه ديول الاداب « تنهد » اجي اجي حدايا
جات حداه بدفترها حتى تكاها عليه وشد من عندها الستيلو والدفتر كالاه بركابيه وبدا كيكتب التصحيح ديال الجملة لي عطاها فلول ، كان كيكتب بليسرية وكتشوف خطو زويييين ومرتب وايدو معرقة وفيها الزغب خفيف منتاشر ، ركزت مع ايدو لي عجبتها وخلات التصحيح حتى سالا وقال
يزيد : شفتي دابا فين غلطتي ؟؟
نور : اه شوفت « هزت راسها فيه ببراءة» يزيييد علاش قولتيلي ديك نهار حبسوك من قراية ياك انتينا لي خرجتي بوحدك ؟؟
تنهد وسد الدفتر حطو جنب هو والستيلو وضمها لصدرو كيمسح على ضهرها وكيداعبها فحنكها وشعرها
يزيد : انا كنت باغي نكمل وكان حلمي نشد ديبلوم ماستر ونكمل برا ونخدم برا مي صافي ديك الوقت كان مات جدي الله يرحمو والواليد بغاني نخدم معاه حيت ديجا كنخدم معاهم فالعطلة وكندير خدمة متقونة وبان ليه البلان فيا « سكت شوية وكمل مخنزر » جيت عند الواليدة ݣلت ليها على احلامي كاملين وبغيتها تقنع الواليد يخليني نكمل قرايتي ولكن صدقت هي كثر منو غوتت عليا وݣالت ليا ماعندك مادير بالقراية غير مضيعة للوقت صافي شديتي الباك وليتي كتعرف تكتب وتقرا صافي سير خدم ودخل الصرف وعيش حياتك ماشي تقابل الكتوب
نور الزهراء : كون هربتي حسن
نزل راسو فيها : بغيييت نمشي وماخلاونيييش الواليدة راه صعييييبة الى مابغاتش شي حاجة ماكتوقعش وعندها واحد التأثير على الواليد ميمكنش تقدر تحرضو علينا غير باش يتدار داكشي لي بغات
نور فلتت ليها الهضرة : اه باااينة فيها شر...
عضت شفايفها وسكتت قبل ماتزبلها
يزيد : ووقع داكشي لي بغااو الواليد مكانش محكر عليا بزااف غير شوية الاقناع ويقتانع ولكن السعدية فاش ساقت الخبار صافي ولات فحال العدوة ديالي قطعت عليا الهضرة ودااارت فيلم درااامي حتى نفرت وكرهت وجلست حداها وطويت صفحة الكتوب ودخلت لحياة المهنية هادشي لي كاين
نور بقى فيها الحال من جيهتو : ودابا ماكرهتيشي كون بقيتي تقرا ؟
يزيد : فالاول جات صعيبة من بعد ولفت ووليت كنتخلص مزيان ماشي فحال العطلة غير كيدورو معاك باش ديباني راسك اما فاش دخلت خدام رسمي وليت انا كنخلص راسي ونخلص الخدامة واستافدت درت مشاريع ديالي اوموان فسن صغيير هذا هو الايجابي فهادشي كامل لو بقيت كنقرا ماغنوصلش لهاد النقطة غنكون يلاه كنكون فراسي ومن بعد غنتوضف ماشي بحال التجارة وخدمة عندك فيها نصيب
نور الزهراء فالعالم الموازي : حتى انا ماكرهتشي شي حد يخرجني من قراية ويعطيني خدمة وندخل لفلوس
قرصها فحنكها حتى تألمت وقال : نتي خاصك تقراي وهاد العطلة لي عندك فيها الملل غتبداي تراجعي المواد لي ناقصينك وتطوري من راسك وهاكا مغيبقاش الملل صافي ؟؟
نور الزهراء : صافي ولكن حتى نتينا عاوني
يزيد : عاوني راسك باش نعاونك ماشي ماديريش مجهود وتسدي الكتاب
نور : واخا نمشيو نتفرجو ؟؟
دار ليها خاطرها وناضو خرجو للصالون هو جلس وهز الريموت قلب للنتفليكس وهي مشات للكوزينة قادت فبلاطو المملحات والمكسرات والسقاطة وجابتهم يتلاهاو بيهم ، سدو الريدو باش تضلام الدنيا وفرشو فالأرض مانطة دالريش ومخيدات جابتهم من البيت وتكاو حدا بعض والبلاطو الوسط باقي مابداش الفيلم بدات تنقب
يزيد : شنو النوع لي بغيتي اكشن ؟ دراما ؟
نور الزهراء : لالا مابغيتشي هادشي شوفلنا شي فيلم كوميدي وخفيف
بقى كيقلب حتى طاح فبزاف الافلام خلاها اختارت واحد وشدوه ، يزيد ماعندوش الخاطر ولكن داير ليها خاطرها وباغي يدوز معاها الوقت اكثر ، بدا الفيلم وشدت شيبس كتاكلها حتى حيد البلاطو حطو حداهم فوق السداري وجابها عندو تكاها عليه وسرح بعقلو فحوايج اخرين كيتفرج ولكن عقلو ماااشي مع التلفازة كيفكر فمشاكل الخدمة كيفكر فشكوون لي دار لحجابات لنور كيفكر فرضوان والكريدي كيفكر فالسفر لي تأجل بسبب مو وعاااق بيها هي مولات قالب الحنة غير مابغاش يبين قدام نور راسو فييه شلاااا مطاارق حتى سمعها كتضحك وكتنخشش فيه انتابه ليها لقى دوك الحنيكات محفورين بثقيبات الزين والضحيكة من الوذن الوذن تنهد وهو كيشوف فاش كتفرج بالنسبة ليه حامض داكشي وماعندوش خاطر للضحك ولكن هي خلاتو يبقى منتابه معاها بداك التكركير ، كملت شيبس ومدت ايدها بغات تهز وحدة اخرى حتى عاونها وعطاها ليها
نور تبسمت ليه : شكرا هه
وديك التبسيمة شحال حلوة ماشعرش حتى خطف بوسة من فمها وخلاها كتفرج وتنخشش فيه ، تنهد وجبد تليفونو من الجيب ملاهي فيه حتى حس بيها صقلت وكدوز ايدها على صدرو بلا ماتحس ، شافيها لقاها منيمة عينيها فالتلفاازة وصاااقلة وديك الايد غادية جاية فوق صدرو ، شاف فشنو كتفرج حتى بانو ليه الابطال كيهضرو كلام رمانسي والبطل كيداعب البطلة ويلعب فشعرها وكيحاول يتقرب منها ، رفع حاجبو وحط ايدو على ايدها وهي تهز راسها فيه كتبلع ريقها يلاه عاقت براسها اش كدير ...
يزيد : حيدي هاد الفوقي دالبيجامة
بلعت ريقها : ع علاش غير خاليها
ماهضرش حدو خنزر فيها وهي تنوض بلهلا يطريه ليها كتفتح الصدايف وهو طفى التلفازة وكيشوفها كتحل الصدايف وكيبان الديباردور لي لابسة وصدرها لي مكشوف النص فيه البيوضة والاثارة حتى حيدت الفوقي لاحتو جنب وجرها لعندو طلعها فوقو وتكاها عليه كيبوس فعنقها حتى كيدغدغها
نور : ههه كتهرنيي
يزيد : ياااك ؟
خشا یدو تحت ديباردور كيتلمس ضهرها بحنان
وكيقبل شفايفها وهي کترتاعش وترجف ، ماتنكرش واخا كتحشم ولكن كيمتعها وكتحس باحساس زوين ، بقى كيقبل فيها ويقبل فوجهها كااامل قبلات سااخنة حتى ذااابو بجوج من حر الشهوة وجردها من ملابسها ، تحت داك الظلام بقاو کیتسمعو غير آهات خفيفة منها وصوتو الثقييل المعسل لي كيهمس ليها بيه باش تسيح لييه ، كانو فالفراجة حتى كملوها بعلاقة جنسية ساااخنة ومن وراها نعسو
أذن الضهر والمغرب وداز وقت طويييييل عاد فاقت هي مبنجة كتشوف راسها مخشية فيه ومغطيين بالمانطة لي كانو متكين عليها واجسادهم تحتها عااارية تماما ، تزنكو حنيكاتها وهي كتشوفو نااعس وعويناتو مجبدييين ، بقات كتشوف فملامحو وأول مرة تركز فيه حيت فاش كيكون فايق مكتقدرش تبقى تشوفيه ، بقات كتأمل فيه كتأمل الراجل لي هزها من دارهم بلا رغبتها الراجل لي كان حنين عليها كثر من باها الراجل لي دخلها للقفص الذهبي وفرعها ووراها الجنس على يدو بلا ماتحس كتلقى راسها بدااات كتعلق بيه شوية بشوية ، تبسمت وحطت ايدها على لحيتو قالت مع راسها تزعم عليه ماحدو نااعس وطلعت لشعرو لي مخربق من الفوق زادت خربقتوو كتضحك بقات كتشوف ونزلت ايدها لصدرو كتلعب فالزغب لي فيه حتى قنعت وبغات تنوض وهو يزير على ايدها وقال بصوت ثقييل ومبحوح
يزيد : بقااااي
بقات فبلاصتها حتى حل عينيه فيها وهي تهرب عينيها منو حشمانة
يزيد : كملي داكشي لي كنتي كديري
سرطت ريقها وقالت : ماعملت واااالو
شد فايدها وحطها على صدرو وشافيها بمعنى كملي بلا مانعاود الهضرة ، حشمت وبقات كتداعب صدرو وهو عينيه معسلين فيها ومستمتع بجمالها حتى قرب باسها فحنكها ونطق
يزيد : شحاال فالساعة ؟
لمحت تليفونو محطوط فوق السداري ومدت ايدها شعلتو شافت شحاال وقالت : 8 ونص
عقد حواجبو طولو النعاس : نوضي ندوشو شركنا ليل والنهار
نور بخوف : لالا غير سير بوحدك « شافتو غوبش فيها وكملت كترجاه» الله يرحم والديك
تنهد وناض قدامها عريان ماتسوقش ليها حتى دفنت وجهها فالمخدة اما هو لبس البوكسور ومشا شعل الضو ودخل البيت وحتى هي ناضت كتلبس قبل مايجي يلقاها باقية ربنا خلقتنا
ناضت جمعت الروينة وحلت الشرجم يضرب البرد فالدار ومشات دخلت للبيت لقاتو دوش بالخف وواقف كيصلي الصلوات لي فاتوه لابس سروال سورفيت رمادي وتيشرت بيض ، مشات للحمام هي الاخرى خذات دوش وتعطلت فيه حيت كتدوش على خاطرها حتى سالات وخرجت لبست بالخف بيجامة كيوت سروال مقبوط من التحت فيه رسومات وتيشرت ديالو فالغوز ، لبست بانطوفتها الأرنوبة وخلات شعرها مطلوق بعدما نشفتو ودارت ليه السيروم ديالو سالات وخرجت من البيت وهي تلمحو واقف فالبالكون ديال الصالة كيكمي ، توجهت للكوزينة معولة تدير ليهم عشا شي حاجة فيها التغماس عرفاات الراجل عندها مايقنع غير بالتغماس والتغلاق وماعرفت كيفاش ديك الكرش فراكة قاصحة وهو عاطيها غير للبلدي
حطت الطاجين وجبدت اللحم من الفريكو خذات 2 طروفة حطتهم وكبت عليهم زيت نباتي ودارتهم يتقلاو ويتطلقو مايبقاش اللحم مكونجولي فديك الاثناء جبدت بطاطا كتقشر فيها حتى سالات ورجعت للطاجين قلبت اللحم وبدات كتدير فالعطرية وزادت حتى المروزية وعطرية اللحم ، قطعت شوية الربيع لاحتو وخلطت داكشي حتى دخلت العطرية فاللحم وزادت البصلة مقطعة طريفات صغااار بكمية كثييرة باش تجيها الدغميرة لاحتها وسدت على طاجين خلاتو يطيب على خاطرو ، يلاه غتمشي دير حاجة اخرى حتى دخل عندها كيمضغ المسكة دفليو باش تحيد ريحة الكارو
يزيد : شنو كديري ؟
نور الزهراء : البطااطا والزيتون ولا بغيتي بالخضرة كلها ؟؟
يزيد : لا غير كملي شغلك ... نعاونك فشي حاجة ؟؟
نور : لا غانعمل غير هاد بطاطا فالفران ونكمل
حرك راسو وخرج خلاها كتكمل شغلها فحين هي شدت ديك بطاطا كل حبة قسمتها على ربعة وغطستهم فالعطرية مع زويتة بلدية حتى تشربت بطاطا ديك العطرية مزيااان وستفتها فوق ورق الطبخ فالطاوة ودخلتها للفران فضلتها تجي محمرة فالفران حسن من منصوبة كتعطي مداق اجمل ، خلاتها تطيب ودازت للشلاضة عدلت غير بحال ديال الغذا وحطتها فالثلاجة تبرد عاد غسلت يديها ونضفت داكشي كامل لي شقات فيه باش ميتجمعوش عليها المواعن وهي كتنضف سمعت الصونيط فالباب دغيا سربكت داكشي ونشفت ايديها ومشات تشوف لقاتو حال الباب ووحدة كتهضر سرعت فخطواتها حتى جات حداه وشافت ختنا كتطلعها وتهبطها بلا حشمة بلا حيا جاية عندهم بحوايج النعاس كسوة رمادية ساتان تحت الركبة بالبينوار ديالها والصدر باااين والشعر مطلوق
يزيد لقاها فرصة وقال : هاهي مراتي هضري معاها
كاع الوان الطيف دازو فوجهها ماتوقعتش يكون مزوج وتصدمت اما هو حشم بلاصتها وبغى يدخل حتى وقفتو بصوتها المحلون : ماشي مشكل حتى تكون بوحدك ونهضرو
رفع حاجبو ونور حاجبها طلعتو للسما السابعة فين يبان هو كحزتو لور ووقفت قدامو شادة فخصرها وكتطلع فهاديك
نور الزهراء : نعام شنو خصك ؟؟ فاش غاتهضر معااه ؟
البنت ميقت فيها : على حساب الويفي بغيت ندخلو وقلت نشوف شي واحد من جيران نتعاونو عليه
نور : امممم انتينا ساكنة فهاد العمارة كاملة وكتسنى لي يعاونك ؟؟
البنت شافت فيزيد وتجاهلتها : واقلة غنشوف شي واحد اخر غير سمحليا
نور عصبتها وهي تبدا تشعون بايديها : اديك زبييلة راه انا لي كنهضاار معاااك ماشي هو بغيتي تقول شي حاجة هضااار معااايااا انا
يزيد دخل طالع ليه الدم وخلاها معاها البنت طلعتها باحتقار ونطقت : على مستوى ؟؟؟ جيت قصدت الراجل ماجيتش عندك
نور الزهراء : ياااه على كمااارة عندااااك وديك الراجل راه ديااالي عندو مراااتو واذا قصدتي هاد الباب غاتقصدني اناا مااشي هو يا قليلة الحيا
البنت : سيري سيري بزاف عليك انا سيري حيدي غير ريحة الطياب من حوايجك
نور الزهراء : فيا ريحة الطياب وفالدار ديالي العيب على لي واقف فباب الرجال بحوايج دالنعاس ومرخص راسو
يزيد جا دخل نور وسد الباب على هاديك تلفت لقاها كتغلي ومعصبة وهو يخنزر فيها : عجبااتك المعاطية قدام الباب ؟؟
ردت عليه بغضب : عاااجبك الحاااال ياااك ؟؟ عاااجبك تجي نعندك ملعوقة بحالا ؟؟؟ وتبقى واااقف كتهضااار معاااها وهي لابسة ديك الحوااايج؟؟؟
بقى كيشوف فيها مغوبش كيف معصبة عليه ومخرجة عينيها حتى سالات هضرتها ومشات للكوزينة مسح على وجهو ماعجبوش الحال تنزل المستوى هاديك وتهضر معاه بهاد الطريقة وفنفس الوقت حس بغيرتها وعجبو الحال ، اما هي مشات للكوزينة خرجت ديك بطاطا لي تحمرت وطلت على الطاجين لقات اللحم قرب يطيب ضافت الزيتون يطيب مع ديك الدغميرة وسدت عليه وجلست فالطبلة مغوبشة كتفكر فديك ختنا لي عصبتها حتى طاب داكشي وستفت بطاطا فالطاجين بحالا طابت معاه وهزتو حطتو ليه فالصالون لقاتو جالس شاد البيسي ماشافتش جيهتو مشات جابت طبيسلات شلاضة وقادت كلشي عاد ناض هو غسل ايديه وجا جلس حداها شافها كتقسم الخبز ومغوووبشة وديك التغوبيشة شحال حلوة ماشعر حتى جرها من خصرها وتكاها عليه ضامها فحضنو وهي كتقاومو حتى نطق بحدة
يزيد : زݣااااااي « هدات ليه وكمل بهدوء » علاش تنزلي للمستوى ديالها ؟ ماتستاهلش تعطيها وقت
نور بعدوانية : على ديك الوقاحة ديالا تستاهل نسمعا خل وذنيها وحتى نتينا عاجبك الحال واقف معاها
يزيد تنهد : مااشي عاجبني الحال كنت يلاه فتحت الباب سولت شنو كاين بدات كتهضر ومن بعد جيتي نتي مزال ماهضرت كاع معاها
نور الزهراء : وعلااااش تسااقسيها شد عليها البااب الموسخة
مسح على ضهرها ونطق : شكون الراجل ديالك ؟؟
سرطت ريقها عرفتو غيشد فيها : احم كاتعرفو
يزيد : لا مكنعرفووش غير ݣولي نسمعها منك
شدت فالتيشرت مزيرة عليه : نتينا هو الراجل ديالي !!!
باسها فراسها وهو مغمض عينيه كيتنغم بديك الجملة لي خارجة حلوة من فمها بصوت حنييين ، حط جبهتو على جبهتها وقال بنبرة منخفضة
يزيد : نور عينيا نتي !!
تبسمت وقدر يرجع ليها المورال غير بكلامو الاخير لي تغزل بيها وبااانت عجبها الحال حتى ضربها بخفة لنيفها
يزيد : عجباااتك هاديك ؟
نور ضحكت فقط : ههههه
تبسمو عينيه من ضحيكتها وطلقها باش يتعشاو كانت الريحة عااطية كتشهي وحتى شكل الطاجين بداو كياكلو وقالت
نور : نسييت ماعملتشي ليلك الفلفلة حارة
يزيد : هاانية حتى هاكذا مزيااان
تلفتت ليه : عجبك ؟؟
يزيد : وعلاش مايعجبنيش ونور العين مصيباه بايديها ؟؟
زااادت طلعت وعجبها الحاااال بلا قياس حتى نسات واش كانت معصبة ، الطاجين فعلا كان بنييين هي لي مطيباه ودخلت فيه طول وعرض حتى سالاو عشاهم وجمعو الدنيا ومشاو ديريكت ينعسو حيت اصلا كان تعطل الوقت وهو صابح خدام ، لكن قبل ماينعس صيفط ميساج لكريم كيعلمو باش يهضر مع رضوان لي خاص يتلاقا بيه غذا
في الصباح وفالرياض كانت وئام خارجة مع ديك العشرة باش تمشي للكلية سدت باب الرياض وتمات غادية كتقلب فصاكها حتى بان ليها واحد وااقف بعيد كيشوف فالرياض ديالهم ، ماتسوقتوش ودازت من حداه حتى حست بشي خطوات تابعينها ضارت رافعة حاجبها وقالت
وئام : صبحنا على الله مااالك اخويا تاابعني ؟؟
.... : بغيت غير نساقسيك اذا سمحتي واش هذا رياض شوݣراد ؟؟
غوبشت فيه : اه هو هذا علاش كتسول وشكون نتا ؟؟
..... : انا مراد وبغيت نشوف واش نقدار نخدم فشي حاجة
زفرت كتشوف فساعتها تعطلت : سير اخويا قلب على راسك ودوي مع مالين الرياض
ضارت ومشاات مزروبة وهو غير تأكد من المعلومة ابتاسم بخبث ومشا قاصدو صااافي عوااال من اليوم يدخل كااابوس عليها وينكد حياتها كيفما تنكدت عليه بسبابها .
الصباح في الرياض كيف عادتو غير لي تبدل فيه هو غياب يزيد وهادشي لي مطلع ليهم الدم بزياااادة ، كيف العادة كانت جالسة الحاجة كتسبح ولطيفة والسعدية كينقيو الزرع ويهضرو بيناتهم بلا مايسمعو الهضرة للخدامات
السعدية : عييت نخمم شكون تقدر تدير هاد الحجابات ماطاح ليا حد فراسي ويزيد الى مارجعش غنتسطى
الحاجة مغوبشة : بيزيد ولا بلا يزيد خاص نعرفو شكون كيغذرنا وباغي يخلق الفتنة
لطيفة بهمس : ماتكونش وحدة من لخدامات ؟؟
السعدية : المشكل باش غاتعرفي ودابا فاش تفضح هادشي راه لي دارتو غتضمس القضية وماتخلي تاحد يشك فيها
الحاجة بصرامة : نتوما حلو عينيكم مزيااان وصافي لي دار هادشي غيبااان غيباااان فيا ماينوض يشير لشي وحدة فيهم ولكن الى مكانتش هي غانخرج العيب
السعدية : لالا مانطيحوش الباطل خلي تانتأكدو ويبان مول الفعلة
جات وقفت عليهم حادة وقالت : الحاجة شي دري فالباب كيقلب على خدمة هنا فالرياض
الحاجة مغوبشة : مااخاااصناااش سيري حيدي عليا
حادة مشات رجعت عند مراد لي كان واقف فالباب وكيسول على مالين الشي داير السبة بالخدمة باش يدخل للرياض ويلقى نور ينكدها عليها ولكن مااااشي كاع الخطط كيجيو بالساهل وتاحاجة ماكتجي على طبق من ذهب ، شاف حادة جات وقالت ليه بجدية
حادة : غير سير اخويا الله يسهل مالين الرياض ماخاصهمش
مراد بلع ريقو : غير خليني نهضر معاهم
قاطعتو هازة حاجبها : انا دويت مع مولات الرياض وݣالت مخاصناااش الله يعااونك
سدت عليه الباب والعساس دار ليها اشارة باش يمشي فحالو ، زفر مراد ومشا وهو كيتلفت للرياض الخطة تضربت فالزيرو ماااشي سااهل تجي وتخدم ولاتدخل مع عائلة وبقى ليه غير يراقب الرياض ويشوف الداخل والخارج حتى تبان ليه صاحبة دعوتو ولكن هادشي غيطول وخاصو يبقى عساس تما !!!!!
السعدية دفعت الصينية من قدامها وتمرحت : عيييت ضهري ضارني ورجلي ضاراني
الحاجة شافت فيها بنص عين : باان ليا راك صحيحة فصيحة ديك الرجل غير كتنقزي بيها ماشي ديال وحدة مهرسة
السعدية : غير تهناي الحاجة غذا غنحيد الجبيرة
الحاجة شافت فلطيفة : بنتك حفصة راه عااجبة كريم وباغيها للزواج
لطيفة هزت فيها راسها بدهشة : ويلي يا الحاجة بصح ؟؟؟
السعدية فوق خاطرها : ايه داك النهار جا عندي ݣاليا نهضر معاك غير تدهيت مع الهرس
لطيفة ماعرفت ماتقول : موحاال واش الدرية تبغي كتبان ليا مقابلة غير قرايتها
الحاجة بجدية : ومالها لي ماتبغي ݣوليها ليها القراية ماغتهربش الزواج هو لي ليه الشان ومايدوم ليها غير راجلها
لطيفة : حتى تجي من لافاك ونشوف شغاتݣول
الحاجة : غاتبقى غير ديك دواحة مو الخيام نشوفو ليها شي راجل
•الجديدة•
فواحد الأرض كبيييرة مدورة بسور وعندها الباب وفالداخل كاين بزاف الكاميونات والطراكسات وفكل جهة كتلقى المواد ديال البناء وجبال ديال الرملة ولا التراب وتستيفات ديال البرييك والحجر وما الى ذلك من مواد البناء والعمال كل واحد شنو كيدير لي كيستف السلعة لي كيدخلها ولا لي خارج بيها وكان هذا هو المقر الرئيسي ديال الخدمة ديالهم وهو لي كبييير وجااامع كاع السلعة ومن هنا كيتمو الحسابات والبيعات والشريات وكتدخل سلعة وتخرج سلعة ، فالوسط كان واقف يزيد بسروال اسود وبودي نفس اللون مزير على عضلاتو وشاد الستيلو كيحسب مع الكونطابل مركزين فشي وراق والعمال غاديين جايين حداهم حتى جا عندو واحد العامل وقال
- السي يزيد شي واحد سميتو رضوان واقف برا ݣال عيطتي ليه
يزيد حرك راسو : خليوه يدخل « شاف فالكونطابل» صافي كلشي هو هذاك حتى نقرب نخرج وجيب ليا الضوسي ديال هاد السيمانة كاملة
الكونطابل : هي لولة
يزيد دار ايديه فجيابو وشاف رضوان جاي داخل مع الباب شير ليه باش يتبعو ومشاو لواحد البلاصة بعيدة على جو الخدمة فيها كيتكالما يزيد والى بغى يكمي جر كرسي وجلس وحط مرفقو على الطبلة حتى جا رضوان بغى يصافحو ولكن يزيد خلاه معلق حتى جلس قبالتوو محرج من الوضع
رضوان : هههه باقي شاد فخاطرك
يزيد ببرود : شنو يحسابليك كنسى ؟؟ خصوصا لادار معايا شي واحد بلان ديال الشمايت مكنساهاش ليه
رضوان : اهاه من حقك وشنو لي مخليك تتفكرني دابا ومعيط ليا ؟؟
رد باستهزاء : حتى بنتك ماسولتيش فيها
رضوان : حيت عارف مغتجاوبنيش ياك بفمك ݣلتي ماتحاديهاش
يزيد صغر عينيه : وعمرك غاتحاديها صافي نهار عطيتيها ليا كنتي ضربتي عليها ... ماعلينا فكرني فيك واحد الدين لي شحال وانا كنتسناك تردو
رضوان : ايوا تسنيتك دير بوجه النسوبية والبنت لي عطيتها ليك
يزيد : البنت ماشريتهاش باش تخلص بيها دينك !!! البنت تزوجتها وهي فقنت ونتا وكريديك فقنت اخر كتفهم ؟؟
رضوان محاملش راسو : تكمل واحد الدار فالبيع ونعطيك فلوسك
يزيد : سيمانة غانزيدها ليك نعاود نعيط تجي نتا والفلوس
رضوان : حتى هذا كلام وبنتي الوقت لي بغيتها غانجي نشوفها والى مابغيتينيش نعتب باب دارك غانرجعها عندي
يزيد رفع حاجبو : الى قدرتي ديرها « شير بايديه الباب » يلاه شوف شغلك راه عندنا شغالنا
ناض رضوان حاقد على الوضع ومشا بحالو تحت نظرات يزيد لي حاقد عليه كثر منو ديك الشمتة لي شمتو مابغاتش تدوز ليه غير كيتفكر فاش مشا خطبها وقالت ليه ديجا مخطوبة وهانتو كتخليه يتجنن على رضوان والموقف فاش حطهم وزايدها كيبيع ويشري فيها عاين باااين بلا حشمة بلا حيا ، تنهد وجبد تليفونو من الجيب صونا ليها
نطق بهداااوة فاش جاوباتو بصوتها الحنين : نور عينيا لباس عليك ؟؟
نور الزهراء : حمد لله ونتينا ؟
يزيد : سمعت صوتك رجع ليا المورال ووليت بيخير « حدها ضحكت بخفة وكمل » شنو كديري ؟
نور الزهراء : كنغسل القشوع
يزيد : مزيان ماتعذبيش راسك بزاف ... فطرتي ؟
نور الزهراء : اه فطااارت احم نعمل بحسابك فالغذاء ؟
يزيد : لا ماتولفيهاش غانجي فالوقت ديالي ديال ديما ...
تنهدت وقالت بخجل : واخا يزيييد ممكن تجيبلي واحيد الحاجة ؟
يزيد : شنو خاصك ؟
نور الزهراء : ديك العلك دفليو لي كنتي كتاكلا باراح
يزيد : واخا نجيبها ليك علاش لي مانجيبهاش يلاه تهلاي فراسك والى احتاجيتي شي حاجة عيطي ليا
خرج رضوان من عندو ومباااشرة رجع لدارو دخل لقى فتيحة جالسة مجبدة كتهضر فالتليفون وطرطق المسكة غير شافتو حطت لي فايديها ووقفت حسكة
فتيحة : سيدي رضواااان مااالك جااااي مقلق شكون قلقك ليا ؟؟؟
رضوان حيد صباطو وجا جلس فوق السداري مغوبش : داك النسيييب تزرفت فيه تزرفت
فتيحة جلست مقابلة معاه : ݣلتها ليييك شحااال هادي ولكن مالك دابا
رضوان : عيط ليا على حساب الكريدي ݣتليه نبيع الدار ونوجد ليك فلوسك
فتيحة : ضرتي حتى عييتي فلخر غترد ليه فلوسو والمشكل عطيتيه الدرية فااابور هانتا غاترد الكريدي ومانعك تشوفها
رضوان حرك راسو بنفي : لالالا هادشي مامسلكش نولدها نكبرها فلخر يجي يديها ليا واحد ويمنعني نشوفها من الفوق
فتيحة : ايوا دير اللازم البنت بنتك ماعندوش الحق يمنعك عليها ماتعرف اش خبااارها واش عايشة مزياان ولا مكرفصة وبحال داك الݣنس باااينة متسلط غتكون عايشة معاه الويل
رضوان : وشنو غاااندييير عتقيني افتيييحة عتقيينيي
فتيحة طرطقت المسكة : غذا غاتوجد راسك وغانمشيو عندهم للرياض ونشوفو البنت سوا بغا سوا كره
رضوان : والى جراو علينا يزطمو على كرامتنا؟؟؟
فتيحة : ياك المشكل غير بينك وبينو نتوما لي عارفين هادشي ايوا غتستاغل الوقت لي خدام فيه وغاتمشي تشوف بنتك وعاود شمتو وريه اللعب ديال الدراري صغار
رضوان كيفكر فهضرتها : واقلة هادشي لي غاندير
•
فالمساء كانت جات حفصة من لافاك وغير شافتها لطيفة ناضت تبعتها للبيت ، حفصة يلاه غاتبدا تبدل حتى دخلت عليها مها
لطيفة : كي دوزتي نهارك ابنتي؟
حفصة كتفسخ سروالها : لاباس حمد لله الروتين كيف ديما ... بابا ماعيطش ليك ايمتا غيجيو ؟؟
لطيفة : مزال شوية ولكن قربو يشدو كونجي يقرب العيد الكبير ويجيو
حفصة : مزيااان نكونو نيت جلسنا تاحنا ونشدو عطلتنا بحال الناس
لطيفة : ياك بقاو غير الراطراباجات دغيا
حفصة لبست بيجامتها : واييه راني معصبة الناس لي فاليداو كلشي شدو عطلتهم قبل منا وانا وئام مزال واحلين مع الرطراباج يخ
لطيفة جات جلست حداها فوق السرير : واااجي تسمعي اخر الاخبار السي كريم عينو فيك للزواج
حفصة وسعت عينيها وطلعت الصبع : ݣولييه هاااهو لي غنتجوج بيييك
لطيفة : انا الهضرة سمعتها راني وصلتها ليك والحاجة بنفسها ݣالتها وراكي عارفة الحاجة لابغات شي حاجة
حفصة بكره : هاديك الحاجة حاجة غير بالسمية لي ݣدها مكمشين يسبحو ويصليو حتى يجي أجلهم وهي حاااضية البشااار ماعندها لاشغل لامشغااالة
قرصتها لطيفة من جنبها : سكتي دابا يسمعك شي حد هاد الهضرة سيري ݣوليها ليها
حفصة بغات تنتف شعرها : من لخر مااابغييييتش والله مااانتزوج بداك الزلاال بقى ليا غير هو
لطيفة : عطيهم سبب مقنع باش يقبلو الرفض ديالك راهو الكبير فحفايدها وتبعتو بالهضرة تاتزوج بقيتي غير نتي
حفصة : واااتديها فرااااسها ولا غانمشي نهاجر لسبانيا مع بابا نتكرفص ولانتزوج بداك كريم
لطيفة بقات كتشوفيها لمدة : حفصة لي ماشي من نصييبك رااه داار دااارو وجاااب مرتو شوفي حتى نتي حيااتك
غير جبدت الموضوع حفصة غرغرو عينيها وقالت : هانتي كتشوفي باقي حتى مامسروط ليا زواجو وباغياني نوض نقبل بأي واحد ونفرح وانا مافرحاناش ؟؟؟
لطيفة : قبلي باش تنساايه مامكتااابش ليك ابنتي واش نعارضو القدر ؟
حفصة بحالا تحلو عليها الجراح دارت ايديها على وجهها وبدات كتبكي وتنخصص : كنبغييييه اماما كنبغييييه مااقااادراااش ننساااه كنبغي نموووووت فاش كنتفكرو تزوج علاااااش هي وماشي انا علاااااش وااش صااافي غير حيت عينيها زرقين وشعرها زعر حسن مني ؟؟
لطيفة شافتها كتنخصص وضرها قلبها جابتها عندها عنقتها وطبطبت عليها : ماتݣوليييش هاكا ابنتي نتي حسن منها زينك مسراااار اما هي زينها باااسل دابا شوية ويمل منها ولكن ماتعمريش بيه راسك راه الى مابغاكش هو ماعندك ماديري بيه تاحاجة ماكتجي بزز واش غير هو لي راجل فوق هاد الارض ؟؟
حفصة : اه « كتشهق » انا كنشوفو غير هو لي رااجل فوق هاد الارض بغيتو هو واخا ندخل ضرة عليها المهم يكون ليا راجل شي نهار
لطيفة : ولااواااه ماتحمااااقيش ابنتي الله يرضي عليك
حفصة شافت فيها كتدمع : غندير المستحيييل باش يكون ليا ماتصلاحش ليه هاديك البرهوشة شوفي جات غير يومين خلاتو يخرج من الدار
لطيفة طولت الشوفة فبنتها وحركت راسها : نتي مولات دوك الحجابات احفصة يااك ؟
حفصة نكرت : ماشي انا اش كتخربقي
لطيفة بتشكيك : حيت تاواحد فهاد الرياض ماعندو مشكل مع يزيد ومرتو نتي لي عينك فيه وراني كنعرفك ابنت كرشي كتحقدي ولي بغيتيها خاص تكون ليك بزز
حفصة مسحت دموعها : اه انا شنو استافدتي غاتمشي تݣوليها ليهم ؟
لطيفة شدت على راسها : لاااااا حول ولاقوة الا بالله الصكعة باااغية تجبد لينا الصدااااع عرفتي لاااسااقت الحاجة الخبار تجري علينا حفيااانين
حفصة : الى ماݣلتيهاش تاحد ماغيسيق الخبار
كيف العادة كل مساء كتسناه يجي وهي موجدة العشا ولابسة زوين ومقادة فحالتها حتى دخل هو هاز فايدو واحد الماليطة والايد الاخرى فيها بلاستيك ، سلم عليها وناضت عندو شدت الميكة وطلعت على صبيعات رجليها سلمت عليه بالوجه ودايرة ابتسامة صغيورة فوجهها ديك الابتسامة لي كيشوفها كيرتاااح وينسى مشاكل الخدمة ، مشات للكوزينة حيدت من الميكة بعض المشتريات جابهم ومعاهم كريطينة صغيرة ديال المسكة دفليو لي طلبت تبسمت وحلتها خذات وحدة كتمضغها فاش شمتها فيه البارح تفكرت ايام الطفولة وتشهات تاكلها ، دارت كل حاجة بلاصتها ومشات هزت الطاجين حطتو وبدات كتقاد طبلة العشا على مايجي ، شي ربع ساعة وخرج مبدل بتوني فالرمادي وكيطرطق عنقو بااين فيه عياااان جا جلس حداها ودور ايدو على خصرها حتى باسها فنيفها
يزيد : لباااس علييك كيف دوزتي النهار ؟؟
نور الزهراء : لبااس هه نهار روتيني بالحق عدلت برنامج نتبعو باش مايجينيشي الملل
يزيد : وهاد البروݣرام فيه القراية ولالا ؟؟
نور الزهراء : اه ضروري
باسها فراسها : مزيااان برافو حتاال نهار الاحد ونخرجو لشي مكتبة تقداي كاع داكشي لي خاصك والى بغيتي بيرو ولا شي حاجة هاكا ديال القراية خوذيها وغانشوف ليك حتى شي بيسي مزيان تخدمي فيه حسن من التليفون
شافت فيه بعيون كيبرقو بالفرحة : بصصصح ؟؟؟؟؟
يزيد : اه بصح اي حاجة بغيتيها نشريوها وجدي الجو ديالك باش تفتح ليك النفس على القراية وقراي مزيان وماتعݣزيش نتي غير قرااي ولي بغيتيها تحضر
تنخششت فيه كتشم فريحتو لي كتحمقها : شكرا ليلك ربي يخاليك هههه
مسح على ضهرها وعرا على الطاجين لي كانت دايرة فيه حوتة ديال التونة عجبو الحال حيت نوعت من المرقة وبداو كيتعشاو فجو لطيييف كيسولها وتسولو حتى تعشاو وجمعو الدنيا ومشات جابت الفليو وجلست حداه هو لي كان مسرح فالسدراي وشاد البيسي قدامو وحاط الضوسي فوق الطبلة وحداه شي جوايات ديال الفلوس ، جات جلست حداه وشدت الرسوم نقصت ليهم الصوت وبقات كتفرج سيلونص وكتاكل المسكة ومرة مرة كتلفت ليه كتلقاه خدام كيحسب وشاد الستيلو كيقيد فالضوسي وماقاليها راسها غير تبرزطو
نور الزهراء : واش كاتخدام حتى في الدار ؟
يزيد جاوبها وهو حاضي شغلو : ماشي ديما غير اليوم جبت نراجع شي حسابات وصافي
نور الزهراء : تبغي نحسب معاك الفلوس ؟؟
يزيد : وعلاش غاتحسبيها راه داكشي محسوب كيدوز فالماشين شحال قدنا نحسبو ؟
نور هزت كتافها : واالو غير كايعجااابني نحسب الفلوس
مد ايدو هز جوا وعطاه ليها : هاكي حسبي هذا
شدتو فرحانة وربعت رجيلاتها وبركت كتحسب الزرقة تنطح ختها وتاهي كدير ديك القضية كتلحس صبعها شوية وتحسب لاحظها هو ودار شبه ابتسامو منظرها كيضحك بقات شحال تحسب تحسب هو قرب يسالي وهي باقة غير كتقاد الورقات وتحسب حتى تلفت ليها رافع حاجبو
يزيد : باقي ماحسبتيش ؟؟
نور تلفها : ششششش صباار دوختيني هنااا 80 الف اه وهنا 40 لالا اووووووف دوووخت خاصني نعاود من لول
يزيد : من الصباح ونتي تعاودي واش عشرين الف درهم دوختك فالحساااب ؟؟
نور الزهراء : وشحااال هي عوشرين الف ردهم ؟؟
ضربها بالستيلو فراسها : ديجا ݣلت ليك راك مطنݣة فالماااط
شد من عندها الفلوس وعطاها 5 الزرقات وقال : شحال هادو ؟؟
نور شدتهم حسبتهم : 20 الف « زادها 5 اخرين » 40 دابا
بقى كيعطيها ب بالخمسة بالخمسة حتى جمعتهم ووصلت ل 100 الف وقال : هد مية الف هي 5 الاف درهم اوكي ؟؟ « هزت راسها باصغاء » وهادي الضوبل ديالها 5 الاف درهم اخرى هي 10 الاف درهم هي مليون فهمتي ؟؟
نور الزهراء : اه فهااامت دابا وديكشي لي بقى هو 10 الاف درهم ياخرى والمجموع عوشرين الف درهم هي 2 مليون
يزيد شد من عندها الفلوس رجعها للجوا : على سلاااااامتك
نور الزهراء : شووفتييي راااني كانعرااااف هههه
سد البيسي دارو فالماليطا هو والضوصي وناض جمع دوك الجوايات وقال : نوضي تنعسي
طفات التلفازة وناضت خبات المسكة ومشات دخلت للبيت لقاتو كيخبي الفلوس فواحد الخزنة دايرها فالبلاكار حتى سالا وتلفت ليها لقاها تكات بلاصتها وجرت عليها الغطا ، اما هو دخل الحمام توضى وخرج صلى العشا ومن بعد جا تكى حداها وطفاو الضو ، حازها عندو وضمها ليه ناعس فحضنها وناعسة فحضنو كتشم فريحتو حتى داها النعاس .
•
في اليوم الموالي كانت فتيحة ورضوان واقفين قدام باب الرياض حتى جات حاادة دخلتهم كترحب بيهم ولقاو السعدية والحاجة واقفين لي فور ماسمعو بقدومهم ضهر ليهم العجب وناضو يستقبلوهم على وعدهم وسعدهم
الحاجة : مرحبااا والف مرحبااا زيدو دخلو
فتيحة : ربي يخليك الحاجة وسمحولينا على هاد الدخلة
السعدية كانت حيدت الجبيرة فالصباح : لاواه جيو فأي وقت مرحبا بيكم
رضوان سلم عليهم باحترام ودخلو جلسو فالصالون والخادمات كيحطو الضيافة
رضوان : توحشت بنتي نوور بزاااف وفاش جيت لمراكش ݣلت نجي نطل عليها
السعدية : اييه من حقك ولكن البنت راه مابقاتش ساكنة هنا ماݣاالتهاش ليكم ؟؟
فتيحة : ويييليي مافراسنا واااالو
الحاجة : لا راهم سكنو بوحدهم فݣلييز
رضوان عقد حواجبو : واا كون حسابليا كون مشيت ليها تما نيييت بلا مانجي نصدعكم
الحاجة : لاالااا ماتݣولش هاد الهضرة اسي رضوان مكاين لاصداع لاوالو الى بغيتو ندوك حتال عندها مرحبا الله اودي
فتيحة : والله ماااكرهنا توحشنا الدرية ومنها نشوفو حتى نسيبنا
كيف العادة كل صباح كتفيق مكتلقاهش حداها كتنوض تطرف حالتها تفطر وتبالي بالدار تجمع وتسيق وتجلس وهاد المرة مابقاتش مقابلة غير التليفون والتلفازة دخلات القراية لراسها وولات كتجبد دفتر وستيلو وتبدا تتعلم شي حاجة حيت مارضاااش واخا ضعييفة فالدراسة ولكن نفسها عند نيفها كتشوفو هو حابس القراية فالباك وكيعرف يكتب ويقرا حسن منها المهم مارضاااتش ودار فيها النفس ماتبقاش مطنݣة قدامو بقات كتدرب على الديكتي حتى وصل وقت الغذا وناضت تطيب ليها شي حاجة خفيفة يلاه جمعت شعرها كعكة باش تبدا تطيب وهي تسمع الجرس فالباب عقدت حجبانها حيت هو عندو الساروت وحتى الى كان غايجي كيعلمها ، عوجت فمها ومشات كتكشوط ببناطوفتها حتى حلت الباب وهي تصدم من شوفتهم ، كانت الحاجة والسعدية وفتيحة ورضوان كلهم واقفين عند الباب تدعقت وتصدمت حتى نطقت فتيحة. كتضحك
فتيحة : وااانوووور هههه توحشناااااك يااخويتي
بلعت ريقها ودارت ليهم الطريق يدخلو وقالت : مرحبا بيكم
سلمت عليهم فوق خاطرها وباها حتى هو بزز باش سلمت عليه مزااال هازة من جيهتو ، خلاتهم دخلو وزاادت تلفت ماعرفت مادير قدامهم
فتيحة كدور عينيها فالشقة : تبااااارك الله ماااشاااء الله الدار كبيييرة وعلى حقها وطريقها دار بنتنا زيييييينة
السعدية : هههه ايوا هانتي كتشوفي النص انا لي مفرشاه على ذوقي
نور دخلت للكوزينة وخلاتهم كيهضرو جبدت تليفونها من جيب البيجامة وسدت الباب دوزت ليه الخط حتى جاوبها وقالت
نور الزهراء : آلو يزيد الله يعطيك الستر ممكن تجي دابا ؟؟
رد عليها بخوف : شنو كاين ياك ما واقعة ليك شي حاجة ؟؟
نور الزهراء : لا غ غير العائلة جاااو ودوخت ماعرفتشي كيفاش نتصرف بوحدي
يزيد : واخا انا غانشوف ونجي ولكن شكون بااضبط جا ؟؟
نور الزهراء : احم يمااك والحاجة وبابا ومراتو
غير نطقت جملتها سمعتو سكت من غير انفاسو لي مامنتاظماش ولي كتوحي انه فقمة اعصابو فديك اللحظة حتى قطع عليها .
غير قطع عليها رجعت تليفون للجيب ومسحت على وجهها بتوثر فعلا ماعارفة كيفاش تتصرف والدنيا ضااارت بيها من شوفتهم ، تنهدت وماجا فبالها غير تعمر أتاي يلاه ردتو يطيب وهي تسمع صوت باها كيناديها ، خلاتو على البوطة ومشات خرجت عندهم للصالة
نور الزهراء : نعام ابابا ؟
رضوان : اشنو كديري ؟
جاوبت وهي كتشير للكوزينة : كانعمل غير أتاي
رضوان : حنا ماجيناش ناكلو ابنتي جينا نشوفوك جلسي معانا
حركت راسها وجات جلست فواحد القنت كتشوفيهم بتوثر
فتيحة : ومالكي خايفة يااختي كيدايرة بعدا كي جاك الزواج ؟
نور الزهراء : الحمد لله بيخير
رضوان : عايشة مزيان ابنتي
نور : اه حمد لله
نقزت الحاجة : وعلاش لي ماغتكونش عايشة مزيان وهي مزوجة بالسي يزيد شوݣراد
رضوان ماجاوبهاش ولكن فتيحة لسانها ماضي : ايوا الله اعلم المعاملة ماجاتش بالسمية كاين لي سميتو تݣول هنا نبات وهو
قاطعتها السعدية هازة حاجبها : ايوا شوفي غير حالة ربيبتك تعطيك الخبار واش عايشة بيخير ولالا ؟؟؟
فتيحة طلعت ونزلت نور لي كانت جالسة جامعة رجليها ولابسة بيجامة زوينة فالرمادي سروال وقميجة ديالو ونقية فحالتها وكورميط الذهب مع الخاتم فايدها والڤيرني احمر فالضفار ووجهها منور ماباين عليها تعب ولا عيا مضهرها زوين وماشي ديال شي وحدة كتعاني
فتيحة : ايوا حنا غير كنسولو وصافي ضروري نطمنو على بنتنا
نور ناضت : احم انا غنجيب أتاي
مشات تسلتت للكوزينة وقفت على اتاي حتى عمر وحطتو فبلاطو مع كيسان جداد وحلت الثلاجة جبدت منها شي حليوات كانو جابوهم من مرجان ومرافقات اتاي قادت كلشي فبلاطوات وداتهم حطتهم فوق الطبلة ، كتضايفهم ودير الواجب هادشي لي فجهدها ، سالات ورجعت جلست بلاصتها كتسمع ليهم كيهضرو فشتى المواضيع وفتيحة والسعدية كيتعطاو غير من تحت الهضرة الزوينة
رضوان : علاش مابقيتوش ساكنين فالرياض ؟؟
نور بلعت ريقها : ماعرافتشي يزيد لي بغى
فتيحة : ايوا شوفي نتي فين بغيتي تسكني ماشي يزيد
نور مجاوبتهاش والسعدية غير كتخنزر ففتيحة جاتها بحالا صحة كتبغي تطيح من ولدها ، كلاو لي قسم الله ورضوان هضر مع فتيحة بعينيه لي بدورها تلفتت للسعدية والحاجة
فتيحة : ايوا نخففو الزيارة ونوضو نخرجو نخليو الاب يجلس شوية مع بنتو ويهضر معاها
السعدية يلاه بغات تمتانع وهي تنقز الحاجة : ايه ماݣلتي عيب نوضي السعدية خلي الراجل مع بنتو
ناضو على وعدهم وسعدهم ونور زااد خوفها حيت غاتبقى مع رضوان الراس فالراس
رضوان تسناهم تا خرجو وهو يجي يجلس حداها وكيشوفها كتفرك يديها بالتوثر حتى نطق : بصح مرتاحة ابنتي هنا ؟؟
سرطت ريقها وقالت : اه مرتاحة
رضوان : ياك كنتي ماباغياش تتزوجي هاا كيفاش حتى دغيا ارتاحيتي ؟؟
نور الزهراء : حيت ماجبرتشي معاه مشاكل ومعيشني بخير
رضوان غوبش : ولكن راه مايصلاحش ليك في لخر تزوجك بزز منك
شافت فيه بتعجب : وشنو لي صالح لي ؟
رضوان : تطلقي منو ورجعي معايا
وسعت فيه عينيها بصدمة وقالت : ك كيفااش ؟؟ ياك انتينا لي جوجتيني ليلو بزز اذن تاواحيد ماصالحلي فيكم !!!
رضوان طلع حاجبو : وليتي تعرفي تهضري ... سمعي ا نور داك السيد مامزيانش ماحدك باقة فلول تطلقي منو وتفكي
نور الزهراء : وعلاش ؟؟
رضوان : حيت ماصالحش ليك وغيتكرفص عليك
نور غوبشت بعدم رضى : انا ماباغياشي طلاق صافي تجواااجت ولي عطى الله عطاه
رضوان بحدة : وانا كنݣوليك غاتطلقي منو ياك انا لي زوجتك وانا لي غانطلقك
ناضت وقفت وتراجعت للوراء فاش حست بحدة صوتو : م مابغيتشي ولا مابقاشي عاجبك حيت غاتخلصو فكريدي؟؟
رضوان ناض وقف حتى هو مخنزر فيها : اش تتݣولي نتي دابا تحل ليك الفم نسيتي ايامك فاش كنت نزرݣ ليك اللحم على الهضرة الزايدة ؟؟
نور الزهراء : قوتلك غير الحقيقة ومغاديشي نتطلق
رضوان قرب ليها : نووور راه ماشي حيت تزوجتي غتعصي كلااامي ديري فبالك الوقت لي بغيت نرجعك غانرجعك
وقفت ليها الدمعة فعينها ونطقت : وانا مابغيتشي نرجع انا ماشي سلعة كاتبيع وتشري فيها وقت مابغيتي اذا خلصات تهملا واذا ماخلصاتشي ترودا
ماحست حتى جاها كف تلفها على القبلة وخلاها تطيح فالارض شادة على حنكها ودموعها طاحو كيتسرسبو والشهقة محبوسة وسط ضلوعها
رضوان : وليتي تردي الهضرة غا تزوجتي تزادت فيك ضلعة شنو يحسابليك غايحامي عليك مني ؟؟؟
غير نطقها تفتح الباب ودخل يزيد لي عينيه جاو نيشان فيهم كيشوفها هي طايحة شادة على حنكها وباها واقف عليها كينهزرها حتى سمعو الباب تحل وتلفتو ليه ، نور شافتو طاح ليها الما فالركابي اما رضوان اعتادل فوقفتو وبلع ريقو مخنزر
عينيه ولاو جغمة ديال الدم كيشوف غير فنور لي طايحة ولاطراس ديال التصميكة مطبوع فحنكها ، حول عينيه لرضوان لي واقف مخنزر وزاااد جععرر صدرو كيطلع وينزل بالاعصاب ، سد الباب بهدوء كيخلع وبدون سابق انذار لاح السوارت من ايديه وتما جاي قاااصد رضواااان بتخنزيرة لاا اله الا الله الى ماقتلت ماتحيي جااااي ليه بخطوات سراااع ومعول يردو تفرتيت تحت منو مغذذ مغذذ علييه لواحد الدرجة مكتصورش يلاه غايوصلو وهو يحس بحااااجز وقف فطريييقو وداك الحاجز هو نوور لي ناضت كتجري وقفت قداامو دافعاه من صدرو وكتبكي وتنخصص
نور الزهراء : يزييييد لاااااا الله يرحم يمااااك ماتعملشي شي حاجة تندم عليها « كتنخصص» كنطلبك ا يزييييد
رضوان : خااليييه خليييييه الى كان قليل الترابي يجي يضرب راجل ݣد باااه
يزيد زاااد تجنن ودفعها حتى حيدت من طريقو ومشا شنق عليه حتى حس رضوان بروحو غاتطلع ، نور جات كتجر فيه من لور وكتغوت بكاع جهدها
نور : يزيييييييييد لاااا ماتعملشيي فييييه هيدااااا يرحم يماااااك طلاااااق منوووو يزييييييد والله حتى نمووووت
يزيد فين هو مامسوقش ليها جنونو كيشوفو غير رضوان لي شاااانق عليها وكيتسنى روحو تخرج ، رضوان لي وجهو حمااااار وكيتسنى تاهو غير ملاك الموت من ديك القجة لي داير ليه حتى سمعو صوت ارتطام فالأرض وضار يزيد كيشوف بسرعة وماتجي عينو غير فنور طايحة سخفانة دغيا طلق من رضوان وتحنى كيقلب فيها بخوف
يزيد : ن نوووور نوووور مااالك فيقي نوووور
هز ليها راسها حطو على فخضو وبدا كيضرب فوجهها بهستيرية وكيناديها باش تنوض فحين رضوان كان كيكحب وكيستجمع قواااه ويرد النفس
رضوان : قتلتي ليا بنتي « كيكحب » يا قليييل التراابي
يزيد كيسمع فيه ولكن الجهد باش ينوض يرفسو مااابقاااش كيحس برااسو فاااشل وهو كيشوفها جثة هاامدة ماكتحركش هزها خشاها فحضنو ونطق
يزيد : نور الزهرااااء فيييقيييي « تنهد بقوة وناض هازها بين احضانو وتلفت لرضوان » حل داااك الباب نديها لسبيطاار
رضوان مشا يحل الباب وهي تبدا تكحب نور بشوااااية كحبات صغااار فحضنو حتى نزل راسو فيها وقال بلهفة
يزيد : نووور نووور لبااس علييك ؟؟ باااش كتحسي هممم ؟؟
نور شافت فيه بعيون ثقااال ونطقت بصوت ثقيييل ايضا : د دووخة ك كيوقااعلي هيدا فاش كنتعصب د ديني نعااس يرحم يماااك
تنهد بارتياح وقلب الدورة للبيت مشا دخلها ليه وحطها فوق الفراش تحنى باسها فجبهتها وبغى يمشي وهي تشد فايدو موقفاه
نور الزهراء : ماتعمل وااالو اذا عملتيلو شي حاجة نموووت كنحلف ليك والله حتى نقتل راسي ونموووت اصلا مابقيتشي حاملا الدونيا والله حتى نعملا « ماردش عليها بقى غير كيشوف كيف كتعصر عليه فالهضرة » يزييد ماتنساشي راه كيبقى بابا اذا عملتيلو شي حاجة هاد المرة غانهرب وماغتجبرنيشي واذا جبرتيني غاتشوفني ميتة ماشي حية
يزيد نطق بزز منو وبصوت معصب : صااافي نعسيي انا غانجي
نور الزهراء : واااعدني ماتعمل والو وماتحاديشي بابا
يزيد زير على ايدها وطلقها : كنوااعدك غير ارتاحي
دار فيها نظرات أخيرة وخرج لقى رضوان واقف حدا الباب بلا حشمة بلا حيا وزايدها هضر : مالها بنتي اش وقع ليها ؟؟
يزيد سد الباب وشافيه : بنتك كانت بيخير غير جيتي مابقاتش بيخير يعني كانت هانية بلا بيك ودابا غاتخرج تت**** ماحدني قااااادر ندير بوجهها ونتحكم فأعصابي نلقاك باقي كدور حدايا ولا عاودتي رجعتي لهنا غادي نساها وغانخلي اعصابي يتحكمو فيا ويديرو فيك مابغاو
كان كيهضر وصوتو مجهد وقااااصح عينيه جغمة ديل الدم وفكو مشدوووود وااحد الحااالة تخلي أي واحد غير يشوفيه يترعب ورضوان كلو راه خايف غير ماباغيش يبان خايف من نسيبو ولكن حتى ديك القجة لي كان غيموت فيها ردعتو شوية وعرف ان يزيد ماكيفرق لابين صغير ولا كبير الى شدك مايفكك منو حد ، بلع ريقو وخرج حسن مايقلب على قبرو بايديه
مسح على وجهو ومشا هز السوارت من الارض وجبد تيليفونو عيط للسعدية
يزيد : نتوما فالدار؟ واخا انا جاي دابا
قطع عليها وخرج من الدار سد الباب وهبط فالسانسور للباركينغ هز طوموبيلتو وعفط على الكسيراتور معصب ماوقف حتى كان قدام الرياض نزل من الطوموبيل ودخل مع الباب ماشافش لاهنا لا لهيه نيشااان مشا للصالون فين كيتجمعو ويقيلو فيه نهار وماطال ماحس حتى كان واقف عليهم وهوما جالسين كيتفرجو غير شافتو السعدية تبسمت
السعدية : وليدي جيتي ههههه
يزيد دخل بصباطو مامسوقش بان ليه واحد الفاز هزو تال السما وخبطو مع الارض خلاهم كيغوتو
لطيفة: اويييييليييييي تسطيييتييي
الحاجة : يزييييد اش هاد الحااالة
يزيد شافيهم كاملين وجا خبط بايديه فوق الطبلة وقال مكشكش : دييييك المرررة فااااش خرجت من هاد الرياااااض ݣلت مااااايجي عندي تااااحد مااااانبقى نشوووووف تاااااحد حتى تلقاااااو شكووووون باغي يخرب ليا حياااتي ومع ذلك جييييتو وميكت ودوزتها ولكن باش تجيو وتجيبو ليا معاكم البشااااار هنا غانقلب عليكم الدنياااا
السعدية بخوف : اش درنااا اوليدي راه بات مرتك ماعرفش الدار جا يزور بنتو درنا فيه اجر وديناه عندها
غوت حتى طارو ونزلو : وااااااادخلييييي سووووق راااااسك الاجر ديرييييه فراااااسك وجلسي فداااارك معااااامن تشاااورتي هاديك الداااار راااه ديالييي مااااشي اي واااحد غاتجيبيه تدخليه على مرتي وانا مكاااااينش واااخااا يكون باااااهاااا فهمتيييي ؟؟؟؟؟
الحاجة : ياااويلي اليزييد واش تسطيتي باها بغى يشوفها ماعرفش الدار دينااه
شافيها وعينيه قرطاس : الحاااجة ريحي تصنتي لعظااامك عوض تدخلي فحياتي معاامن تشااورتي توريه الدااار ؟؟؟ تا الى بغيتي توريه غاتهزي التليفزن تݣوليها ليا انا لول ماشي تجيو مدرمين داخلين عليها
السعدية ماعجبهاش الحال : ومالنا حنا برانييين ؟؟
يزيد تلفت ليها : وليتو برانيين عليا فاش نجي نلقى مرتي مريضة ونعرف بسباب ويييل كحل دايرينو فالمخذة ولحد الان مزااال ماعارف شكون كيضحك فوجهي وهو لي دايرو ليا ... « ضغط على سنانو بصرامة » من وسط هاد الريااااض لي فيه غير لي قراااب ليا كنلقى ويييل كحل ففراشي غايخرب ليا حياااتي شنو خليتو البراني مايݣوول ؟؟؟
الحاجة بانفعال : مااااشي حنااا بلااا مااتبقى تلوح فالهضرة ݣلنا ليك لي دار ديك الفعلة حنا بنفسنا غانجيبوه ليك
يزيد قلب عليهم ديك الطبلة بلي فيها : ايوااا حتال ديك الوقت غتبقاااو براااانيييين حتى تجيبو ليا شكون ساخية عليه روحو حتاااال ديييك الوقت غاتبقااااو برااانيييين وماتعتبوووش باااب داااري عطيييوني التيساااااع « خرج فيهم عينيه » عطيييونيييي التيسااااااااع
صوتو الغليض كان كيتردد فداك الرياااض وكيهز معاه قلوب السامعيين حتى خرج بحال العاصفة وخلا العافية شاااعلة ورااااه
خرج بعدما دار ليهم القربالة وخلى كاع لي فالرياض يسمع كلامو اما السعدية كان غايوقف ليها القلب واخا ماشي اول مرة يكون فهاد الحالة بل شايفاه فحالات ماكفس ولكن لي مخليها كترعد هو السبب علاش جاي كيزدف ويغوت عليهم بلعت ريقها وشافت فالحاجة
السعدية : شفتي شفتي ؟؟؟ ولا يجي يغوت على ميمتو لي ولدتو غير باش ماتمشيش عند مرتو !!!! دغيااا دغيااا نسااااني دغيااا دات ليا ولدي وحازتو عندها المعيوجة
الحاجة خنزرت فيها : الناااس فالناااس والقرع فمشييط الراااس ولدك كون عرفتي ليه من الاول كون جوجتيه بلي بغيتي نتي ماشي مطلعك تال قرطة حنة تجوجيه بلي بغا هو
لطيفة مطلعة حاجبها : دابا هو جا دااير لينا هاد الحااالة كااملة على قبل مرتو
الحاجة : هاانتي تشوفي قليل الآدااب ولكن تايجي السي محمد لي ماربى فيه والو ... ولى يجي يغوت عليا انا الحاجة لي كلشي يحتارمني هاااي هاااي
السعدية : النااااس فالنااااس والقرع فمشييط الرااس
الحاجة هزت عكازها بغات تضربها بيه تاناضت السعدية خفا زربا : ياويلي يا الحاجة
الحاجة بغضب : نوضي حيدي عليا الله يقل حيااك لا تي لاولدك
•
نور غير عرفتو خرج ناضت للصالة جمعت ديك الطبلة بالبكا كانت هااانية حتى جاو زعزعو ليها هدوءها وسبحان الله الحاجة والسعدية طريقهم كحلة غير كيجيو كتوقع شي حاجة تزعزع الاستقرار ، جمعت كلشي وجلست فالسداري جامعة ركابيها عندها وكتنخصص ديك التصرفيقة من عند باها كانت حااااارة عوجت ليها الحنك وحست بتشنج فييه وهي لي يلاه بدات تودع حياة العنف وتولف حياة الفشوش والدلال ديك القيمة لي مادارهاش ليها باها لقات ولد الناس دايرها ليها ديك الحياة لي ماعيشهاش باها لقات ولد الناس معيشها فيها ماشعرت براسها حتى بدات كتقارن بين باها وراجلها لي كانت رافضاه وماحاملاهش ، فين عمر رضوان شجعها على القراية ؟؟ بل فاش سقطت لقاها من الجنة والناس باش يضغط عليها تتزوج فحين يزيد كيدعمها وباغيها تقرا كثر من راسها ، فين عمر رضوان خرجها تتقدا لي بغات ولاجاب ليها شي حاجة من نهار عقلت وهي كتاكل غير داكشي لي كيبغي هو ومايكسيها من العيد العيد وغير دارت 15 عام قاليها مابقات كسوة صافي كبرتي واخا حتى هو ماااشي فقير شي فقر ولكن بخيييل فحين يزيد لي كانت باقي حتى ماعقد عليها وجد ليها حوايجها كااملين وصيفط ليها باليزة عامرة حوايج واخا كانت غير باش يسرعو فالتزويجة ولكن شكون عمرو تهلى فيها من غيرو ولي حلت عليها فمها يجيبها ؟؟ جات عندو مشارجية بفلوسو بحوايجو لي جاب ليها اما كون عولت على رضوان تجي خااوية مدلولة وزييييد وزييييد حتى من الحنااان لقاتو فراجلها وافتاقدتو من باها والى جات تحسب غاتلقى الراجل لي يلاه عرفتو قل من شهر دار لي ماداروش باها لي كان معاها 18 عام في الاخير ولات كتعتابرو اب غير حيت اب فالوراق اما احاسيسها ماااتو عليه من شحااال هادي فاش قهر مها وقهرها ودخل فتيحة ضرة على ميمتها وصيفطها للقبر بالفقصة ، كانت كتفكر فهادشي وقلبها كيبغي يطرطق بالبكى حتى سمعت الباب تفتح وهزت راسها فيه شافتو داخل مغوووبش ومطلع حاااجبو بعصبية ، مسحت دموعها دغيا فاش شافتو مشا للبيت وناضت تبعتو دغيا
دخلت لقاتو كيطرطق صدايف الشوميز الكحلة حتى حيدها ولاحها فالأرض باهمال
قربت منو بحذر وقالت بضعف : يزييييييد !!
جلس فالسرير ودار ليها اشارة باش تجي تجلس حداه حتى جات جلست جامعة رجليها عكسو هو لي مفرقهم ، تلفت ليها وشد فذقنها مدور وجهها شوية وكيشوف فالحنك لي مصور وحمر بالتصرفيقة عينيه مضيقين وحواجبو ملاقيين بالتغوبيشة
يزيد : علاش ضربك ؟؟ « قبل ماتنطق كمل » ماتبدايش تقطعي فالهضرة غاتهضري نيشااان وتݣولي فاش هضرتي معاه حتى ضربك يلاه انا كنسمعك والى كذبتي نقطع ليك لسانك
بلعت ريقها بخوف كترعد ونطقت : م مابغيتشي نرجع معااه ديكشي علاش ضرابني
خنزر فيها حتى حست بالبولة غاتنزل ليها : نووووور ݣلت ليييك فاااش هضرتو يعني شنو ݣاليك وشنو ݣلتي ليه بالتفصييييل بلا مانعاود الهضرة حيت الى عاودتها غايتصور ليك الحنك لاخر
مسحت على وجهها وبعدت عليه شوية خوفاانة منو وقالت كترجف : ق قالي طلق منو مايصلاحشي ليلك قوتلو يانا مابغيتشي ومرتاحة معاه وبقى كيضغط عليا باش نبغي نطلق ونرجع معاه بالحق مابغيتشي وقوتلو ماتبيعشي فيا وتشري فحال السلعة وصافي ضرابني هادشي لي وقع
حرك راسو مفقوص : جااي هنا باش يعمر ليك راسك ويرجعك معاه
مجاوباتوش كتحس بقلبها كيخبط بالخلعة وعينيها عيااو حابسين الدموع فلخر طلقتهم كتبكي بصمت وسدت عينيها كتنفس بضيق حتى حست بيه شدها من خصرها وجابها عندو لصقها معاه حلت عينيها فيه ونطق بجدية
يزيد : دااك لي مسمي راسو بااك اااخر مرة يجي هنا اااخر مرة تحلي عليييه مانبغيش نشوفو كيحوم حداك سمعتي
حركت راسها ايجابا : ص صاافي واخا
بقى كيشوووف فيييهااا كيف كتبكي وترجف وكيشوف فحنكها الحمر ، عزت عليه وتحنى باسها فيه بلطف وهمس ليها
يزيد : كيضرك ؟؟
جاوبت بصوت مخنووق : ا اااه « خرجت ليها شهقة بلا اذن »
جمع النفس وطلقها مطولا بحالا بااغي يتسطى ومااالقى غير ديك النفس يبرد فيها هوايشو حتى ضمها ليه وزير عليها خلاها كتبكي فصدرو وتخرج مافقلبها وهو حاط ذقنو على راسها وكيفكر يفكر حتى هلكتو بالبكا وهو يهز ليها راسها عندو وحمر فيها
يزيد : برااااكة قهرتي دوك العينين بالبكااا صاااافي هااادشي اخر مرة غيتعااااود
نور : ص صا فيي و واخا
تنهد وطلع تكى وجابها عندو متكية عليه كيمسح على ضهرها حتى نعست وقادها بلاصتها وناض لبس الشوميز باش يرجع للخدمة ولكن ماخرج حتى سورت عليها
داز اسبوع اخر كانت تهدنت فيه الاوضاع ورجعت المياه لمجاريها بعدما كانو جاو العائلة غير نوضوها ومشاو رضوان غبر ليه الاثر والسعدية والحاجة شدو رجليهم مابقاوش سولو فيهم وحتى يزيد تهنى فراسو كيمشي غير يخدم ويرجع عند مراتو لي غير بشوفتها كتمص ليه التعب والاعصاب ، يتمتع بجمالها وياكل ماكلتها لي كتعجبو وينعس فأحضانها ولات السعادة بالنسبة ليه هي نور الزهراء وولى كيتسنى غير ايمتا يوصل وقت خروجو ويهز طوموبيلتو مكسييري باش يوصل دغيا ، اليوم كان يوم الاحد ماخدامش ولكن عندو شي غرض مع الصباح ناض لبس حوايجو وهو كيشوفها ناعسة جنب ومغطية غير صدرها وضهرها اما دراعها عريانين وبااينة مالابسة والو وحالة فمها بالنعاس اكيد كتبان تعبااانة بعد علاقة جنسية سخسخها فيها تاني ، كمل لباسو وجا تحنى باسها جنب فمها وخرج بلا مايفيقها
دازت سعتين على خروجو وناضت هي كتفوه اول حاجة هزت التليفون كتبقشش فيه عاد تنوض ولقاتو نيت مصيفط ليها ميساج كيعلمها انه عندو شي غرض وغايجي مع ديك 12 يجي يلقاها واحدة باش يخرجو ، شافت الساعة لقاتها العشرة تفوهت مزيااان وناضت لبست الشوميز ديالها البيضة ومشات للحمام مزاجها كتحس بيه تحت الصفر وماراشقاش ليها دخلت دوشت وخرجت لبست كولون اسود مزير عليها وتيشرت ابيض اوفر سايز هابط شوية على مؤخرتها ، خشات بانطوفة فرجلها وخرجت للكوزينة نيشان كتقلب على المسكة دفليو ولكن لسوء الحظ لقاتها سالات زفرت وفتحت الثلاجة تشوف باش تفطر بقات وااقفة وااقفة كتشوف بلا عقل غير حاضياها وصافي حتى سدتها وجلست فالطبلة كتهضر مع راسها
نور الزهراء : هووووف كل نهار نخمم شنو نفطر كون بقيت فالدار دينا فطنجة كاع مانوحل خبز واتاي وصاافي دابا النيبيرة عاامرة كندووخ ماعرفتشي نعمل حليييب بالشوكو ولا عصييير اييععع لالا عصيير لا مابقاشي عاجبني « تفكرت شي حاجة وتبسمت » اييي ميلفاااااي تشهييتااا تأ بالحق ماكايناشي هنا هوووف
ناضت رجعت للبيت وهزت تليفونها صيفطت ليه ميساج كتستأذن واش تخرج تسخر للحانوت وبقات كتسنى الرد ولكن مجاوبهاش بدات تصوني ليه لقات تيليفونو طاافي
نور : اووووف على زهر اوووف انا بغييتااا داابااا بغيت نفطر بيها ونتينا ماغتجيشي دااباا ومن الفوق طافي تليفون ديالك ؟؟؟
لاحت التيلي ومشات لبست مونطو بارد تحت الركبة وبدلت البانطوفة ديال الارنوب ببانطوفة عادية وخفيفة ديال السخرة ، جمعت شعرها ذيل حصان وهزت بزطامها وخرجت من الدار ، ديك ميلفااااي سيلت ليها الريوݣ وماصبرتش حتى يجاوبها بغاات تفطر بيها ديك الساعة وهو مزاال معطل برا قالت تغامر وتخرج قبل مايجي لاعين شافت لاوذن سمعت ، نزلت فالاسانسور حتال التحت وخرجت من العمارة كتقلب بعويناتها واش كاين شي حانوت قريب ولكن الدنيا هنا قاالصة حيت جات فحي راقي خاصها تزعم شوية باش تلقى حوانت ، يلاه غاتحرك وهو يخرج ليها من حيت لاتحتسب حتى تصدمت بشووفتوو بل حست بجسمها برد عليها فاش شافتو
نور : م مراااد ؟؟؟
مراد داير يديه فجيابو وكيشوفيها فرحان : شحااال وانا كنتسنى ومرااقب هاد العمارة حمد لله الانتظار ديالي جاب نتيجة وخروجتي نعندي
نور كتدور عينيها بخوف : واش حمااقتي شني كاتعمل هنااا مشي فحاالك قبل لايشوفك شي واحيد
مراد حرك راسو بنفي : صيمانا وانا ماشي ماجي مخلي الخدمة ديالي غير عليك باش نجبر هاد الفرصة
نور بغااات تبكي وخااايفة بلااا قياااس اصلا مزااال مصدومة من شوفتو ولكن لي زاد صدمها كثر هي فاش شافت الطوموبيل ديال يزيد وقفت حدااااهم وجاو عينيها فعينيه نيشااان ، مراد شافها صفااارت وحماارت وخضااارت وشاف جهة يزيد ولكن ماعرفوش فايت شايفو داخل للعمارة ولكن عمرو عرفو راجلها
اما يزيد هبط عادي وضار عندهم كيشوف مراتو المصونة هابطة ليه بالكولون لي مزير على السيقان وخارجة بلا علم منو ومن الفوق واقفة مع راجل دوك الاعصااب كاملين لي شدوه حطهم فالثلاجة وجا وقف حداها وقال كيشوف فمراد
يزيد : شكون هذا معامن واقفة ؟؟
مراد استنتج غير من طريقة هضرتو انه راجلها وبلا حشمة بلا حيا نطق : انا لي كنت خاطبا وكانت غتكون مراتي !!!
غير شافتو التقفقيفة شدتها وخصوصا كيبان ليها مطلع حاجبو بواحد الطريقة كتبين انه غير شاد راسو اما فاش دور وجهو عندها وتلاقاو عينيه الغاضبين مع عينيها المذعورين كانت غاتطيح بالخوف
يزيد بنبرة قااااصحة وضااغط على الحروف : سسسسيييرييي طططللللعييي الفففووووق
بلعت ريقها ومشات كتجري ماعاودتهاش معاه حتى تكون حمقة وتعاودها معاه الى ماخلطها وصيفطها الانعاش ماتقولها لحد اما مراد كان كثر منها كيشوف السيد لي قدامو كيباان واقف على الصح الطولة والعضلات وغير التخنزيرة بوحدها كاااافية تخليك دير حسااب عرف انه غايخرج من هاد النزال وهو منهزم ويقدر يفرشخو يصيفطو للقبر حيت يزييييد فيييييين ومراد فيين مراد بنيتو ضعييفة قدامو وقصر منو شوية وماعندووش الحضوور وااالو الى شدو يزيد يطويه على ربعة
يزيد طلعو ونزلو ونطق بهدوء كيخلع : ݣلتي كنتي خاطبها وكانت غتكون مراتك ؟ « مراد حرك راسو وهو كيبلع ريقو ندم علاش تواجه معاه» واخا اجي معايا واحد الدقيقة
شد فيه من ذراعو ومراد بغى يتنثر وهو يزير عليه يزيد بعنف ودخلو للطوموبيل وسد عليه وجا ركب حداه وديمارا
مراد حس بالخوف وقال : شكاتعمل انتينا واش بعقلك ؟ فاين ماشي بيا الخاوة فتااح الباب
يزيد مبرد : بحالا خفتي ؟ واغير صبر اصاحبي نتا جاي معذب حتال عندي ومعرض لمرتي ودابا خاايف ؟؟ كان عليك تخاف فاش نويتي تقلب عليا
مراد بلع ريقو : مرتك هي لي بغات تجي نعندي
غير نطقها ماحسش براسو حتى كان ملصق مع النافذة ببونية دايزها الكلام وديك اللحظة وقف يزيد فواحد الخلى ونزل ضار حل عليه والقرودة كيشطحو فوق راسو ، شدو من ذراعو وجرو بحال شي حثالة مامخليش ليه فين يهضر ولا يتنفنف غير خرجو لاحو فالارض وعطاه ركلة قوية لكرشو حتى خلاه يكحب الدم
يزيد مكشكش : انا غانوريك كنتي خاطبها وغانوريك شنو معنى تجي لعند مرتي وتعرض ليها
ماجا مراد فين يوقف حتى شنق عليه وعطاه بروسية قاااصحة دوختو على القبلة وشدو لصقو مع الارض وهز البونية كيعطيه فينما جات فالوجه يدو كانت بحال شي حجرة كتخمج وكتهرس لمراد وجهو ، الدقة فينما جات ماكتبردش ليه الغذايذ شرك ليه عين مع نيف مع فم حرفيا خسر ليه الملامح وخربقهم من بلاصتهم حتى خلاه طايح جثة هامدة بدون حِرااااك وناض ايدو مدمية ركلو برجلو وخلاه مكيتحركش ، نفسو كتطلع وتنزل بسرعة ومع ذلك غليلو باقي ماشفاش ، توجه للطوموبيل جبد قرعة الما غسل بيها ايدو حتى مشا الدم وواخا هكاك بقات مجروحة بالضرب ، ركب فمقعدو وديمارا مكسيري يشوف المدام المصونة حتى هي الدور عليها
يتبع...
التعليقات
لا توجد تعليقات بعد، كن أول من يعلق.