الماكرة الجزء الثالث

أمال …تبسمات عاضة على شفايفها~ كوني هانية خلي عليا هادشي انا نقلب لينا

كارما …اوك انا غادي نجيب مروان من المدرسة نتغداو بجوج ومن بعد نتلاقاو فصالون نقادو راسنا اش قلتي ؟

أمال … صافي واخا علميني كيف تسالي نتلاقاو عند فتيحة [مولات صالون ]

قطعات من بعد ما تافقات معاها … وكسيرات بالبورش بسرعة فائقة للمدرسة دمروان… لي دازت من حداه كيبقى حال فمه فالبورش… وقفها ضو الحمر ، دايرة نضارات كلاص فوق عينيها وفمها بالحمرة من بعيد كيبان… سالفها مطلووق ملوي ريح مطيرو… سمعات تصفار وريحة الحشيش عطاتها للنيف وهي دور باليها هاز تيليفونه كيشير ليها زعمة اري نمرة … طلعاته وهبطاته كتشوف فسيارة لي راكب .. وهي ضحك باستهزاء ، قبل ماتقوليييييه لبس قدك يواتيييييك القو*** وعاطياه صبعها الوسطاني زعمة فاااك ومكسيرية مخلية غير دخان موراها… مسافة طريق كانت واقفة حدى باب المدرسة دياله … كيبان ليها خارج مع شي دراري .. غير شافها وهو يعيط جبد كيجري لعندها …

مروان … كيصفر ~ مييييمتي واش كنحلم ولا فين انا عينيه مطرطقين~ وحديدة وشمن حديدة هادي الخوادرية

كارما …نزلات عطاته لراس غير بشوية ~ معلمووكش تسلم البرهوووووش ؟

مروان … جرها بايسها من حنيكاتها بجوج ~ واختي خليتي ليا شي عقل بهادي واااااااو واش ديالك ؟

كارما … لا ديالك انت !!

مروان … وهضري راني على أعصابي

كارما … كضحك ~ وي ديالي عجباتك ؟

مروان …. وابرب حتى خطيرة ~ بغا يقول مقودة وهو يرجع يصرطها حشم يطلقها حداها~ ضربي بيا ضويرة الله يحفضك اختي نبان شوية قدام صحابي

ضحكات عليه وقالت ليه طلع … ركب فرحان وعينيه خارجين منهم القلوية .. شير لصحابو زعمة شوفوني هانا فين راكب .. كسيرات مخليا صوتها قوي كيزفر.. وعفطات بيه … مخلياه كيغوت ويضحك أول مرة يركب فشي لوطو بحال هادي .. بعد تقريبا نص ساعة وهي كضور بيه مشاو للمطعم ديالهم تما يتغذاو .. مسافة طريق وكانه تما … نزلات كتقاد فالأونصومبل لي لابسة ودوز على شعرها .. خداو طبيلة حدى الباب جلسه فيها … وهي كتحذث مع مروان وقفها صوته ..

عيسى … عينيه عليها كيبريو بالفرحة غبرات مدة عليه نطق~ الله الله شكون معانا اليوم زارتنا البراكة الشريفة ، توحشناك فين غبرتي علينا ؟

كارما …مدات ليه يديها تسلم عليه وعلى محياها ابتسامة خفيفة نطقات ~ غير فشي شغالات تلهيت انت صافا ؟

عيسى … قرب ليها وسلم عليها بلابيز ~ انا صافا وانتي ؟

كارما بعدات شوية عليه ممهتماش لجيسط لي دار معاها ونطقات ~ أنا صافا حمد الله قدمات ليه مروان ~ هذا مروان

عيسى …شاف فيه ومد يديه سلم عليه ~ اهلا بسي مروان عرفني بيك اول مرة نشوفك الصغيور

مروان …سلم عليه وزير على يديه بقوة معرفش علاش محملوش نطق ~ انا هو خوووووووووووها وطولها ليه~ مرة جايا مد يديك سلم عليها بحال ناس ، ماشي طير على الحنوووووك تبوسهم وايييلي حنا بنا ليك هنا بيادق اشريف ؟ شكون صغيوور فينا ؟

خلاه مصدوم حال فمه فيه … محسابليهش لسانه فيه متر وكتر من طوله ، بلع ريقه ملقى باش يجاوبه .. وهي تنطق هازة فيه حاجب ومصدومة من كلامه لي هضر بيه .

كارما …غوتات فوجهه ~ مررررررروان اش كتقول اويلي !!؟ حشومة هذا عيسى تاهو بحال خوية

مروان … مع هو زعيعر رجع حمر بقوة لي تعصب~ مكاينش شي خوووو كيبوووووس ختوووو بديك طريييييقة مرانيش ناعس على وذني رجع شاف فيه ~ مرة خرى جمع شلاقمك عندك واش لي جات كتمدهم ليها ؟ ولا كارما حالة خاصة ؟ شرح لينا الأخ المحترم هادشي ؟؟؟ كيهز راسه ويشووف فيه زعمة راني فايق ليك

كارما …غوتاااات عليييه ~ مررررررروان حتارم راسسسك قلت ليك شهاد قلة الأدب

عيسى …قاطعها حاس بريقه نشف من شوهة لي دار ليه هاد المراهق~ شششش خليه باقي صغير اكارما عادي مديريش في بالك و رجع شاف فمروان باغي يقلب الجو للضحك~ كنعتاذر منك اخوها منعاودش اش قلتي ؟ قابل ؟

مروان … شاف فيه بنص عين طالع ليه دم وجاوبه~ صاف صاف الله يسامح ميتعاودش هادشي قدامي

ضحك ورجع سول كارما شنو يتغذاو … بعد ما طلبه مشى وهو كيغلي مكرهش كون جمع معاه بصقلة حول ليه عينيه ولكن جاه معاها وماشي غريب عليها … مكانش عارف عندها أخ هادي أول مرة يشوفه معاها ، تنهد حسابه معاه من بعد فاش يشد يقجه حتى يخرج ليه عينيه … ضرب الباب ديال المطبخ وهو كيغوت على الخدامة يزربو كييبرد حر الفقصة لي شاداه عليه فيهم …

من بعد الغذاء لي داز بين الإثنين بارد ، كانت معصبة من تصرفات مروان لعيسى ، خرجه بعد ما ودعه عيسى هاد الأخير لي كارز على يديه بقوة .. ومشاو لجهة لوطو ..

كارما …ركبات حاطة نظاراتها وكتهضر بعصبية ~ مبغيتش بحال هادشي يتعاود مرة اخرى امرواااااان كان لازم تعتاذر منه

مروان … كيقاد شعره فالمرايا نطق وهو مبرد~ حتى نكون بوكيمون انا جالس حداكم باش نخليه يبوسك حدايا! عاد نبرد

كارما … كتشوف فهاد المراهق لي كلامه كتر منه نطقات ~ وهاهو تا باسني اش فيها ؟ دابا خاصني ناخذ اذنك ولا ؟ مابقى احترام بيناتنا ولا كيفاش؟

مروان …كرز على يديه عويناته الخوضر حمارو~ نهار قلت ليك عندك اخ اسمه مروان عنيتها ماشي انا لوبية باش نشوف واحد كيبوس ختي حدايا وانا كنتفرج!! ياكما بانتليك بالألوان ؟

كارما …طرطقات عينيها فيه وغوتات ~ مررررررررررروان حبس براكة واش مبقيتيش تحتارمني انا لي كبر منك

مروان …لأول مرة يغوت ويعلي صوته عليها ~ لاااااااااا مباراكاش قلت ليك لاااااا هي لاااااااا

محساتش براسها غير وهي نازلة عليه بكف لوجه ، مقدراتش تصبر وهي كتشوفه طالع لسماء ، وكيتجابه معاها فشي حاجة معنده حتى دخل فيها ، يديها بداو يغزله ومصدومة من شي لي دارت ، هز عويناته فيها كيرمقها بنضرات غاضبة ، ويديه كارزهم بقوة ، تمتم بكلام بين شفايفه ضربتيني على قبله ~ قبل ماينزل من سيارة ويمشي كيجري ، مبعد ومخليها مصدومة حالة فمها …

ضربات بيديها على لڤولا بقوة نادمة حيت هزات يديها عليه وضرباته ، ديمارات بسرعة تابعاه ، حتى وصلات ليه ، ونزلات كتجري تابعاه ، قلبه صغير كيضرب بقوة كبيرة ، وعويناته كيبريو بالدموع ، حس بيها شداته من يديه وجراته بقوة لعندها معنقاه.

كارما … قلبها كيضرب بقوة بالجري لي جراته نطقات ~ سمحلي مقصدتش نضربك غير عصبتيني ومقدرتش نتحكم فراسي

مروان … دفعها عليه كيشوف فيها بغضب نطق ~ بغيت نرجع عند واليدية مبغيتش نبقى معاك مزال

حسات بالدنيا ضارت بيها وكلمته كتعاود فوذنيها ، ولفاته بزاااف وعمر عليها الفراغ لي كتحس بيه ، كتحس بيه قطعة منها ، كترتاح وهي معاه ، وكيعجبها فاش دخل للدار تلقاه كيتسناها ، حتى فالهضرة معاه كتحسه كيحس بيها ، وكلامه بعد المرات كتلقاه منطقي واخا صغير كلامه كبير .

كارما … تمتمات بين شفايفها بصدمة وهي كتعاود تسوله ~ كً ك كيفاش ؟

مروان …مسح دميعة هبطات ليه من عينيه ~ كيف سمعتي مبغيتيش نذخل فيك ولا ندافع عليك بغيتيني نشوف ونسكت واخا تا انا مبقيتش باغي نعيش معاك ولا نبقى جنبك ديري لي بغيتي انتي حرة فحياتك دابا

كارما … كرزات على يديها بقوة ~ واش بصح باغي ترجع لعند واليديك ؟ مبغيتيش تبقى معايا ؟

مروان …عويناته حومر ضاغط على الحروف ~ ااااه مبغييييتش نبقى معاك

كارما … عطاته بالضهر عينيها خالين من اي تعبير وقلبها كيضرب بقوة ~ زيد نوصلك لداركم

مروان …غادي كيتمشى~ كنعرف طريييق شكرا على مساعدتك ليا عمري نساها بالسلامة

كارما … بدات تعصب شداته من يديه بقوة وجراته معاها ~ نديككككك لداركم برجلي ونشوفك فيها وديك ساعة سير فينما عجبك ودابا زيد باش منبداش نتعصب ونصدق دايرة شي حاجة لي نذم عليها

مروان …نطق وهو مفيكسي عينيها فيه ~ بحال تصرفيقة لي عطيتيني ؟

مجاوباتوش حدها جراته معاها لوطو وكسيرات بقوة شوية ويطيره ، بغات تجبد سيجارة تكمي وفالتالي تراجعات حيت هو معاها .. مسافة ديال الطريق كانه وصلوا حطاته حدى الباب حتى دخل وضربات زاجة بقوة قبل ما طير مكسيرية مخلياه موراها كيشوف وعويناته سايلين بالدموع … جبدات گارو شعلاته ، وراسها مرفوووع يمكن ماشي قد هاد المسؤولية باش تهزه يمكن معاملتها غالطة ليه ، ويمكن ماشي هاكا كيعامله الأطفال ، معارفاش بلي الولد فسن المراهقة وكيكونو حساسين وقاصحين فالنفس الوقت ، هو باقي صغير مراهق وكيحس بيها ختو طرف منه، كسيرات عافطة دايزة فالحمر ، كانت وصلات للصالون فين دارو يتلاقاو ، صافي مبقات ليها گانة . نزلات باقة معصبة..

أمال … ذايرة فوطة على راسها حيت غسلو ليها شعرها بانت ليها داخلة وكتعرفها مزيان فاش كتكون معصبة ناضت لعندها وهي مشوشة نطقات > كارما ماللللك ؟

كارما … جلسات على الفوطوي كتنهج ~ اففف شافت فيها بعيونها عامرين حزن ونطقات ~ مشى مروان مشى بحاله عند واليديه!

أمال … عارفاها ولفات بيه وكتحس بيه جزء منها ~ علاش مشى ؟ شنو وقع ياك كان فرحان معانا ؟

كارما … عاودات ليها لي رقع ~ بسبابي مشى انا لي هزيت عليه يدي مكانش عليا نضرب ولد ماليه اختي

أمال … هزات حواجبها فيها ~ وكيفاش بلان عيسى ؟ علاه هو عمره باسك فوجهك ؟ ياك جامعانا بيه غير المطعم ؟

كارما … زفرات معصبة ~ معرفتش أمال انا مديت مجبت مروان لي صدمني راه صبنه اصاحبتي حشومة يدير هاكاك انا كل شي إلى قلة الإحترام منعلمووش ليه

أمال … عجبني فيه صراحة تا هو كيبالي شوفاته ليك ماشي تالتم شحال مرة لحضتها وقلت عادي

كارما … نوووو مكاين والو الله يهديك راه عادي غير انتما مكبرين الموضوع تكات راسها كيطبخ, عرفتي الگانة مشاتلي أمال غير سيرو انتما انا مفياش غانمشي نعس

أمال … حسات بيها حزينة حيت مشى مروان وهي ولفاته ~ الله يهديك اكارما واش ولدنا مروان لي حاضينا ويسول علينا وينبش ويبحث فين حنا كضني غادي يخليك راه غير مقلق غادي يتفش ويرجع راسه صبري عليه راه تلقايه دابا كاعي حيت مشيتي وخليتيه ، واش انوريك انا فمروان راه عجينة يديك ، خليك يتفش ويرجع راسه، وانتي عاود تفهميه راه مراهق وصغير هذا هو وقته فين كينضج خاصك توقفي معاه ومتخليهش يتقلق ولا يتعصب واش نسيتي مراهقتنا كيف دازت الله يهديك اصاحبتي بردي ودابا يرجع

كارما …. صاطت النفس بحزن~ والى مرجعش ؟؟

أمال … اويلي غادي يرجع والله حتى غادي يرجع دابا تشوفي نوضي اصاحبتي تقادي حنا فرحانين اليوم متنكديهاش علينا ومروان والله حتى غادي يرجع هادشي الى مرجناش ولقيناه فالدار اليوم

كارما … تنهدات ~ اااااف صاف واخا

عيطات لوحدة من لبنات قادو ليها عاصير بارد ، وبداو كل وحدة شنو كاتقاد ضفران وشعر ، ملهييين وكيتعاوده على فين غادي يخرجه يحتافله اليوم ، كان معندها خاطر اليوم وأمال مشجعاها ، حتى موتيفاتها تاني . بعد سوايع عديدة دازو وأخيرا سالاو. جاو كيفتنو شعر مقاد وظفران والميكاب جاهم خطير ، لبسه بجوج كسيوات بكعب عالي ، وخرجه راكبين فالبورش كطرطق، المكان فين غايحتافله عبارة عن ديسكو غالي كيدخله ليه غير ناس لباس عليهم … كان شوية بعيد على فين هما ب ساعتين… طالقين موسيقى مجهدة وكيغنيو معاها … مسافة طريق طويلة دازت ، الحال مظلم ، صطالاو لوطو ونزلو كيبريو فديك الليل وريحة دالعطور من بعيد تشميها،

كارما …نطقات وهي كتشوف البلاصة حراس المكان واقفين فالباب حاضيين ~ فين وسيم ؟

أمال …رجهات شعرها لووور ~ غايكون سبقا للداخل

أومأت ليها راسها بالإيجاب وتمو داخلين ، فتحو ليهم الباب الحراس بلى ميهضرو معاهم ، وهما شايفين البورش فاش جايينييين كيعرفو هاد النوع لي كيكون لاباس عليه ، كانت موسيقى صارخة والزدحة ، كلووب بمعنى الكلمة ، vIP حاجزين فين يجلسو ، وسيم لابس الكلاص وهاز كأس فيديه كيدندن مع الموسيقى ، ناشط وفرحان ، هاد المرة دخلهم فلوس صحيحة ، تمشاو لعنده وهما فالطريق أصحاب المال لي جالسين بحالهم كيشوفوا فيهم بإعجاب أول مرة يجيهم بحال هاد النوع ، ماشي من طبقة الكادحة نو باينين لباس عليهم غير من لباسهم وأكسيسواراتهم والمكان لي حاجزين ، جلسه كيسلمو بجوج على وسيم كل وحدة منين شاداه، وهو كيبتاسم كيعجبه الحال فاش كيتخشاو فيه بجوج ، قادات شعرها لوور عينيها كيزيوميو على لي كانديدا باليها فالجهة التانية كاين كازينو فين ناس كتلعب القمر . هزات كاسها كتشرب بتبات وعينيها كيدورو من قنت لقنت .

وسيم … البلاصة كالم عجباتني انا بعدا كيشوف فامال لابسة كسيوة قصيرة مغلوقة مبينة بياض بشرتها وطالقة شعرها الأسود بحال ظلام ليل وسنيديلة عالية ~ اووووووه البلارة ديالي هانا عاود على طالون كيضحك عليها حيت عارفها مكتعرفش تمشي بيه مزيان كتعواج ههه

أمال … شافت فكارما بعتاب~ راها سبابي انا كنت جايا بالصبرديلة ديالي وحلفات لخلاتني لبستها هادشي لي بغيتي هاهوا بدا دابا وجا مسكتوو ~ كتخنزز فيه

تبسمات ابتسامة مغرورة وعينيها كيبرييييو هادشي لي كانت بغات من لول قبلات ترقص حيت كانت مزومية على صلع مول شي ، كان واقف بعيد كيتفرج وكيعطي الأوامر غافل على عينيها لي متربصين عليه بحال الثعلب ، الرقص لي رقصات ماشي كان غير حيت أمال قالتها ليها نوووو، كان بهدف واحد لي هو طيح مووول شي ، باينة لاباس عليه وباينة شابع غير من الخواتم وسناسل لي معلق ديال الألماس. خفات ديك الإبتسامة ديال الشيطان ولبسات قناع إبليس ، هادي هي ضربة اي كانت تسنى فيها من قبيلة ، هو لي طلبها وهو لي خاصه يجي برجليه حتى لعندها ، بللات حلقها بريقها وسمعاته صوتها.

كارما …. اااايه مرحبا قوليه انا كنتسناه

مشى كيطير بحال ريح ، يوصل ليه الخبار ، حتى هو كان مترقبها بعينيه منين ناضت تشطع وهو كيشوف غير فيها حتى جلسات وهو حاضيها ، سحراته بجمالها وبرقصها ، وجسمها الخلاب زاد كمل عليه ، تبسم كيف سمع قبلات تشوفه ، قاد الگرافاط دياله وقصدها للبلاصتها.

وسيم …تي كيفاش صبرديلة كيضحك بصوت عالي ~ ولهيييلا معانا علال القلدة وحنا اخر من يعلم صافا شوية لا ؟ ههههه

كارما …طلعاتها وهبطاتها~ داكشي لي بقى باش تشوهي بينا هنايا

أمال … واعيباد الله راه مكنعرفش نمشي بهاد الموصيبة

كارما …نطقات عينيها فجهة اخرى~ هاهي جاتك الفرصة فين تعلمي

عيبات وجها فيهم بجوج وهزات كاسها كتشرب منه ، شوية بداو يتعاوده على العطلة لي باغين يدوزو قريب ، باش يتفاجاو شوية ويتبحره نيت. تسمعات موسيقى شرقية عالية وهي تغمزها أمال دافعاها من يديها وكضحك

أمال … والله اختي حتى تفرجينا نوووووضي خلاص عافااااك أكارما

كانت أول مرة تجي لهاد البلاصة مموالفاش بناس لي هنا ومكتعرف تاواحد ، تشجعات اصلا هي من نوع لي مكتحشمش ، هزات حواجبها بتعالي وقفات بطولتها الأخاذة وسالفها حداها ، صدرها خارج ولوور تاني حكاية تانية ، فصالة ديال مرأة لي يتمناها أي راجل عنده ، نزلات الوسط فين كاينين مجموعة من ناس كيرقصه ، وبدات كتمايل على أنغامها ، نسات الناس ولي دايرين بيها ، كتقن فن الرقص من صغرها، مخلية ديك المجموعة عاطيينها مساحة كبيرة ومبهورين من جمالها وجمال رقصها ، تسمعات تصفار أمال وهي كتقووولها { هاااااكااااك أكارما رعديييييييها مزيان } هزات شعرها لفوق بيديها بجووج ولبات ليها طلب ، مرعداها مزيان ومخلية لفام محلولين عليها وريوگ سايلييين ، مجموعة من الشباب واحد ينسيك فتاني داخلين للداخل جاو نيشان مع لقطة ، وباينة فيهم زهوانييين تاهما ، دخلو الوسط كيرقصه ، أي حركة كدير كتخلي ريووووگ والعينين تابعينها ،، واحد شوية وهي تشخد القضية گاع رجال لي كانه يلعبه القمر ناضو فاش سمعه تصفار حالين فمهم، هادشي أول مرة يشوفه بحاله ، بداو الفلوس كيتراشو عليها من للفوق ، وأمال مشخداها بتصفار ، وكارما كتعاود بين لسان ناس ، سالات الموسيقى وهي تضرب بسالفها للوور كتنهج وتصفاق عليها ، تصدمات من كمية للفلوس لي لاحو عليها … هزات عينيها وهما يبانو ليها غير تيتيز واحد ينسيك فتاني جابدين رزمات كيشيرو بيهم عليها ومن لفوق صحاب القمر تاهما كيلوحه ، تبسمات ابتسامة شيطانية وهي كتقول { وهادي خدمة نقية } دقائق وهي تم غادة راجعة لبلاصتها مخلياهم متبعين ليها العين ، جلسات كطلع نفس وشعلات واحد تقاد بيه المجاج ،

أمال …كتصفر ~ ويلي ويلي قربلتيها البنت ضحكوني غير هادوك لي كانه يلعبه ههههه اجي واش شفتي ديك المجموعة لي دخله؟

كارما … شفتهم باينين كيبيعو الغبرة وقاصرين هادوك غير صحاب عشرين والواحد وعشرين

أمال …لاحت عينيها ليهم كانه جالسين كيشربه وعينيهم عليهم تاهما كتهضر ~ باش عرفتيهم؟ كيبانو ديك تلاتين للفوق !!

كارما … سفات اخر سفة ورجعات شافت فيها هازة حواجبها للفوق ~ حافضة مزيان هاد النوع الى كانوا صحاب تلاتين عام نقطع يدي بجوج حداك

وسيم …. جاب الكاو نطق ~ مدويوش معاهم باينين كيطيرو وحنا جايين قصارين وغاذوبو بحالنا

أمال … بان ليها سيرڤر جاي وفيديه شي حاجة كان عبارة عن بوشيط مكتوب فيه اسم الديسكو ديالهم ] تفظلي أنسة هادو دياولك!!

كارما … هزات عينيه فيه حميمرين عاطييينها جمال بزيادة ونطقات عرفاتهم الغرامة ~ خليهم المشروبات على حسابي

سيرڤر … تبسم هادو فلوس كبيرة ماشي مبلغ لي صغير نطق ~ شكرا أنسة رجع سولها~ موول المحل بغى يهضر معاك على إنفراد الى بغيتي طبعا

تبسمات ابتسامة مغرورة وعينيها كيبرييييو هادشي لي كانت بغات من لول قبلات ترقص حيت كانت مزومية على صلع مول شي ، كان واقف بعيد كيتفرج وكيعطي الأوامر غافل على عينيها لي متربصين عليه بحال الثعلب ، الرقص لي رقصات ماشي كان غير

حيت أمال قالتها ليها نوووو، كان بهدف واحد لي هو طيح مووول شي ، باينة لاباس عليه وباينة شابع غير من الخواتم وسناسل لي معلق ديال الألماس. خفات ديك الإبتسامة ديال الشيطان ولبسات قناع إبليس ، هادي هي ضربة اي كانت تسنى فيها من قبيلة ، هو لي طلبها وهو لي خاصه يجي برجليه حتى لعندها ، بللات حلقها بريقها وسمعاته صوتها.

كارما …. اااايه مرحبا قوليه انا كنتسناه

مشى كيطير بحال ريح ، يوصل ليه الخبار ، حتى هو كان مترقبها بعينيه منين ناضت تشطع وهو كيشوف غير فيها حتى جلسات وهو حاضيها ، سحراته بجمالها وبرقصها ، وجسمها الخلاب زاد كمل عليه ، تبسم كيف سمع قبلات تشوفه ، قاد الگرافاط دياله وقصدها للبلاصتها.

أمال … شافت فيها بنص عين ونطقات ~ غير قوليلي اختي كيف درتي ليه ؟ ههههه

كارما …. فاش دخلت دشنت البلاصة مزيان وعرفت شكون فيهم مول الحبة

وسيم … ههههههه شاف فأمال ~ كتعرفي داك التعلب الماكر وهي هادي مكاينش لي حافظها قدي وانا كنقول هاد الشطيح لي شطحات وطولات فيه علاش ؟ وهي سيدة من قبيلة حضيتها بانتلي مقرنصة عليه وتا هو مسويهلش كان حاضيها

كارما … ميعات فيه ~ ديك النوع كنعرفه مزيان اش باغي خليوه عليا غمزات أمال ~ هاد الديسكو عندنا معاه غير هاد الليلة وقلبينا على جهة اخرة هههههه

تسمع صوت حداهم قريب وباين سكران معارفش راسه فيه هو ، ولا اش كيقول ، لي عارفه هو من قبيلة وهو حاضيها وفاش شاف بو صليعة تابعها بعينيه وصيفط عليها ، حلف مايخليها ليه هو لول شافها وهو لول يذوقها. قرب منها حتى انفاسه ضرب فشعرها ، طلعات معاه ريحتها زادت كملات عليه . غمض عينيه وهضر رسانه ملوي عليه بشراب .

شد ليها فيديها بغى ينوضها لا سلام لا والو بيه فيه ، نطق ~ بغيتك تشطحي معايا

كارما …هزات حجبانها مقوصاهم فيه وجرات يديها عندها ~ سير تلعب مع قرانك وشوفليك لي تشطح معاك

تبسم بغضب عينيه غادي ياكلوها عاود شد يديها بقوة وتكلم بنبرة عالية ~ وبرب وماتنوضي تاتقربل عاد البار

وسيم … تحرك جارو من يديه ودافه عليها بقوة ~ قالت ليك سير تقود لعب فتيساع مفهمتيييش نفهمك انا بطريقتي

تمنتر منه معصب وبدأ يسب من سمطة للتحت محسش غير بو صلعة واقف عليه ونازل عليه براس ، ومع جايب الكاو تجبد تما مليووح بحال البروصي, شير لصحاب الحال لي كيحضيو هزوووه فالبلاصة ولاحوه على صحابه تاهما خرجووهم من تم ، قاد الكول د قميجته وشاف فيها بابتسامة~ كنتمنى تكوني لاباس وهاد الجرتومة مأداكش

كارما … صكاناته مزيان بعينيها صلع وعنده الكرش شوية ، وباينة فيه فوق الخمسينات ، زادت صكاناته مزيان حاط مجوهرات ثمينة بزاااف فيديه وعنقه والخاتم تاهو هاز وغالي بزاااف تبسمات بشر وهي كتقول هادي دجاجة بكامونها ، لاحت عليه تعويذة سحرها كتحلون عليه بعينيها وتلعب بيديها فشعرها .. تكلمات بصوت محلون عارفة لهاد الشراف اش كيعجبهم~ نووو انا صافا شكرا بزااااف على مساعدتك ليا

تكلم وهو عيونه واكلينها من راسها لرجليها ، جاب ليه الله معامن يدوز وقيت ، هبلاته بزينها وضحكتها وسالفها لي كتلعب بيه ، وكملات عليه فاش هزات صبعها حاطاه فمها وكتعضه غير بشوية وتشوف ليه فعينيه ، حس بالعرق هابط ليه مع سنسول ضهره ، بلل ريقه فحلقه ومد ليها يديه .

مصطفى … اسمي مصطفى والأنسة ؟ اش سماها الله ؟

كارما … لعبات بلسانها فمها وعينيها فعينيه بحال داك اللبؤة لي كتسنى الوجيبة فين تقبض على فريستها~ وانا ندى

مصطفى … بإعجاب باس ليها يديها ~ اسم على مصطفى مرحبا بلالة ندى نورتي لينا الديسكو

كارما … شافت فأمال لي حاضية هي وسيم الفيلم من بعيد غمزها هاد الأخيرة لي فهمات للبلان عندهم ضي كود غير هما لي كيعرفهم ورجعات شافت فيه بابتسامة ساحرة ~ سمعت بغيتي تشوفني ؟

مصطفى … شاف بين جنابه دنيا عامرة وهو باغي بنفارد بيها فشي قنت حنحن ورجع تكلم بهداوة ~ اممم اااه بصح على انفراد الى بغيتي ؟ لفوق عندي البيرو ديالي الى بغيتي طبعا نجلسه تما ونهضرو

كارما …يبليس جالس يتفرج فيها نطقات ~ مرحبا علاش لا ! غادي غير نقول لأصدقائي بلي غانغبر شوية وهاني معاك اوكي ؟ مع ابتسامة خلابة مبينة ليه سنيناتها البويض المستفين

تبسم ليها تمشات بطرمتها كتلوزها حدى عينيه ، عارفاه دابا كيسكانيها وكيفليها قنت بقنت ، ضحكات بغنج جاب ليها الله باش دوز ليلة ، قربات لوسيم حنات عليه عطاته جوج كلمات ورجعات كتميل خدات من أمال كيسان ديال المشروبات، شافت فيها وفالكيسان وغمزاتها . تبسمات بشر وجغمات من الكاس تا وصلات حداه ، ومدات ليه الكاس مع غميزة صغيرة ،،، مسخفاه بيها .

خداه وهو حال فمه فيها بحال ضبع ، متلفاه بابتسامتها، كتمشى بحال النعامة تحت انظاره وأمال موراها جالسة شادة ضحكة ... طلعو فأسانسور لي فيه تا هو كاميرا ولكن واقفة … كتلعب بشعرها وتشرب من كاسها ، حس بريقه شحف محسش براسه غير وهو هابط على المشروب ، وعينيه عليها ، مكتب كان متوسط الحجج دخلات وهي عينيها كيدوره وتشوف واش كل شي هو هداك ، باش تجلس فراحتها ، سمعاته شد الباب وحيد لاڤيسط ، كيشوف فيها بحال صقر ويدوز على شفايفه بلسانه .

مصطفى …جر ليها الكرسي بكل لباقة وعينيه باقة عليها~ نوررررتينا انسة ندى

كارما …ضرباته بشعرها بالعاني وتبسمات بعجرفة ~ مررررررسي

مصطفى …جلس مقابل معاها كيشوف فالفرقة دصدرها لي باينة بوضوح قدام عينيه~ اممم احممم صراحة الموضوع فاش بغيييتك هو كدوز بيديها على عنقها تحت انظاره~ احمم زعمة الرقص الرقص ديالك عجبني والى قبلتي العرض ديالي غادي نكون سعيد ومستاعد نخلصك بثمن لي بغيتيه

كارما …زادت دفعات صدرها للقدام ~ شحال تقدر تخلصني ؟؟؟؟ صغرات عينيها فيه ونطقات~ خلاصي غالي بزاااااف

مصطفى …طول فيها نضرة مكرهش ينقض عليها فهاد الدقيقة ويفرسها تحته ~ شحال بغيتي ؟ انتي غير أمري بالمبلغ لي يوالمك وأنا معليا غير نفذ

كتشوف فيه بعيونها بحال عيون الصقر لي كيتسنى الوقت فين ينقض على فريسته ، عارفة مزيان دواء المفعول فقاش كايبدأ يشد فالإنسان ، عيونها فقط على المجوهرات لي معلق وعلى ساعة لي فيديه ، مترقبة بعيونها الخزينة الإليكترونية لي موراه، فيها بعض من الأرقام ، عرفتها هادي خاصها الكود ، وقفات قدام عينيه كتشوف فيه مع ابتسامة ، وقربات منه هازة صبعانها بين عينيه وكتحسب وفالنفس الوقت كدوز على أزرار قميجته … واحد جووج تلاتة … كان مفهم واله حتى بدأ يشوف منها جوج ودنيا كدووور بيه … شوية بشوية ذاته بدات تهد وعقله بدأ يغيب ، وهووووب مال بصلعة دياله حتى طاح على طاولة المكتب كيشخر …. ضحكات بخفوت وعينيها عليه … وشوية بشوية بدات تجرده من داكشي لي معلق حتى مخلات ليه واله … فيساع صيفطات مساج لأمال علماتها بالخزنة وجلسات تسناها… دقائق عديدة وهي تبان ليها داخلة كتجر رجليها بديك الطالون حيت مكتعرفش تمشي بيه … حنات على الخزنة كتشوف فيها … بانليها البيسي دياله محطوط ومحلول بدات تشوف الكاميرات وبعد دقائق مسحات كل شي وقفاتهم ومتحركات حتى تأكدات منهم كاملين موقفين… تنفسات وهزات عينيها فيها ..

أمال … منقدش نحلها خاصني البيسي ديالي وشي كابلات وحنى معندناش الوقت

كارما …هزات حواجبها فيها ونطقات كتسولها ~ هاد البيسي هذا مصالحش ؟

أمال … شافت فيه كتفكر ورجعات جوباتها بسرعة ~ غاياخد وقت ويقدر يفيق ولا دووك الكمامر لي لتحت يقلب عليه ونصدقه حاصلين هنا

كارما …هزات حاجب فيها كتفكر ورجعات قالت ليها ~ حليها منتحركه من هنا غير الى متحلات وشي لاخر خليه عليا انا وسيم نتكلفه بيه

أومات ليها براسها وخلاتها خدامة ، بدات تبحث فالبيسي دياله ودخلات سيستيم ديالها باش تختارقه ، بداو يطلعه ليها شي معلومات فيه بزاااف برونشاته مع تيليفون ديالها وكلشي بدأ كيتحول …. كارما غادة جايا وعينيها عليها حانية والكسوة گاع تعرات على فخيضاتها، شعرها معذبها ، ورجعات كاملة كتقطر بالعرق ، دقائق عديدة وهي كتقاتل واحد شوية وهو يطلع ليها الكود فالبلاصة وهوووب تحلات بين عينيها … بدات كتشوف فديك الخزنة عامرة بالوراق والفلوس غير الكمامس ملككين ومحزومين … عامرة بالفلوس وحداهم مسدس … قربات الخزنة وضربات كف مع أمال لي ولات كتقطر بالعرق … ضحكو بجوج وهما كيجمعو ليه كل شي حب وثبن… حتى الوراق هزاتهم ، بقى غير ديك المسدس شداته بيديها كتشوف فيه …. وهي تزعزعها أمال ..

أمال … حطي الموصيبة ونوضي نمشيو بحالنا قبل مايفيق

كارما …خشات المسدس تحتها~ لا نقدره نحتاجوه

وقبل مايخرجو هزات عكارها من بوشيطتها الصغيرة … وكتبات فالصلعة دياله بالعكار حمر كاااااااارممممممما كبيرة … وضحكات { هادي باش عمرك تبع شي وحدة وتنوي ليها على العذر اصليعة} جراتها أمال بعد ما هزات حتى البيسي دياله معاها .. حيت بقاو فيه بصماتها والبرنامج ديالها باش ختارقاته… ومع معندهم وقت باش تمحي كل شي قررات تديه حتى هو معاها … مع صاك متوسط الحجم كان تما محطوط هزو فيه كل شي ونزلوا مخفين رجليهم حتى لأسانسور… كان وسيم لبتحت كيتسناهم وهاز فيديه مونطويات خفاف لبسهم من لفوق… خرجو لبرى مغطين باش وجهم مايتعرفش مزيان … وتمشاو بخطاوي سراع مخلين الحارسين فالباب كيشوفه فيهم .

ركبوا مكسيرين بسرعة فائقة مع ظلام البلاكة مبايناش ليهم منين ، تسمعات ديك زفرة ديال البورش مجهدة مقلعة ، وتصفار أمال كضحك بهيستيرية… قلعوا وموراهم وسيم كيضحك تا هو … هادي خدمة تاني متقونة مكيمشيوش بلاش يديهم ديما عامرين … فالسطوب فين واقفين كانو بعض من السيارات تما وناس غادة جاية جيهة شانطي… ضحكات أمال هازة حفنة ديال الفلوس فيديها وزفات بيها لجهة ديال الناس وكسيرات مخلية ديك الفلوس طايرة فالسماء … شعلات موسيقى وجهدات فيها أمال وكتشالي بسالفها وضحك … ناس تعيا وهما ميعياوش من خنز دنيا للأسف محدهم كيربحو وهما كيزيدو يطغاو الفلوس عماو ليهم عينيهم مكشوفوش الصحيح من الخايب ، المهم هو الفلوس البينگة ، لا خوف فمصطلحهم ولا قناعة فقاموسهم ، ونهار يحصلو تا طريق مايلقاوها خروج مين يهربو…

نهار جديد ….

بعد تلاثة أيام عاطياها غير لنعاس وراحة … من نهار مشى مروان ورجعات للدار ملقاتوش وهي حزينة كتقيل مع مي رحمة وبليل ترجع تنعس ولا تقصر مع أمال … اليوم وهي راجعة للدار بعدما طمنات على مي رحمة وجلسات معاها شوية … ولعبات مع دراري صغار … عيات وبغات ترجع لدار دوش وتمشي للصال شحال هادي ممشات ليه … منها نيت درب شوية فاتوها بزاف دالحصص… صطارات برى ونزلات كتمشى عقلها غايب عليها … توحشاته بزاف خوى عليها الدار … تنهدات باغة تشوفه ولكن محتارمة رأي دياله هو لي بغى يمشي ويخليها … واخة كطمن عليه من بعيد مكرهاتش يكون معاها ومونسها… دخلات للجردة كتسمع الهضرة عرفاتهم غايكونوا غير هنا وشكون من غيرهم أمال وسيم … قربات وهي تسمع صوته حافضاه مزيان … ومتقدش

تنساه … تبسمات بخفوت حتى بانليها جالس جنب أمال فشلية لابسين لباس العومان ومجبدين كيتشمسه بزوج … قربات منه ونطقات إسمه بين شفايفها بسعادة

كارما …. مروااااااان !!!

قلب وجهه مبادلها ديك الإبتسامة حتى هو … عينيه كيدورو عليها بشوق .. فهاد المدة لي كان مع والديه فتاقدها بزاااااف … حس بالدار خاوية عليه توحش صوتها وتوحش اهتمامها بيه …. لقى فرق كبير مع دارهم وهي … مو مكتسوله على واله تمد ليه غير الماكلة وتمشي .. والأب دياله كذالك مكيشوفوش جيهته .. حس بعدم الإهتمام وهو مولف بكارما تديه وتجيبه المدرسة… وتحط ليه الماكلة فشكارته… تلبس ليه حوايج نقيقين وتهتم بأدق تفاصيله… الى مرض كايلقاها والى حتاج كيلقاها… علاوة على هادشي عاطياه الخاطر وكتناقش معاه فكلشي …محساه بلي عندو قيمة كبيرة فحياتها … فتاقد هاد شي كامل … وكان يقول شي نهار تجي موراه وتديه ولكن ظنه كيخيب فاش مكيلقاهاش… تنهد وناض لابس غير شورط وبيبيض وشعر جامعه للفوق سفنجة… قرب ليها وضمها من جيهت صدرها واخا عنده خمسطاش العام خاتر وطويول…

مروان ….بعتاب نطق ~ علاش مجيتيش مورايا ؟؟؟

كارما …عنقاته بدورها بقوة كتحس بشي حاجة كانت ناقصاها وكملات دابا ~ انت بغيتي تبقى وانا خليتك على راحتك

مروان … واش الأخ ممنحقوووووش يتقلق من خته ؟ هاااا ؟ وتا انا تقلق كان عليك تجي بديك الحديدة الواعرة تراضيني وتديني معاك !!! واش اعيباد الله تاحد ميبقى يتقلق على خته فهاد الوقت ؟

ضحكات حتى بانه سنيناتها بويض مستفيييييين بحال الجوهر ، وحنات كتبوس حنيكاته ودوز على شعره وتشم ريحته تقول عام هاذا مشافته،عنقاته بقوة حتى بدا يقهقه … وهز يديه كيدوز على ضهرها وشعرها بحنان … حسات بروحها رجعات ليها … عينيها كيبريييو بالفرحة… أمال لي كنشوف فيهم شحال بجوج كيووت وفصاحبتها لي ربات دغيا الكبدة على مروان … متأترة بعناقهم الحار ..

كارما … عمرك تعاود ديرها عمرك تخليني وتمشي ~كتشم ريحته بحب أخوي

مروان … زاد تشبت بيها ~ منقدش نخليك مزال كنواعدك

أمال … وعينيها فعين كارما فرحانة ليهم ~غادي تكوني أحسن أم فالعالم أكارما

كارما ….تبسمات كتحماق على دراري صغار من صغرها ~الى كتاب ان شاء الله نتبنى شي بنيتة تكون بحالك بيوضة هههه

أمال …. ميقات فيها ~ تبيقستر ويلي على تبناي مالك عاگرة

مروان … مخشي فكارما ~تبنايني انا نيييييت حنا عاد نزيدو البزاوز براكة عليكم غير انا فهاد الدار تزيدوني درية اخرى نحضيها ليكم البولون لي بقالي تطيرو ليا

ضحكو بجووووج على كلامو لي كبر منو …. وجروووه عندهم كيهرووووه من كرشو وهو كيموت بالضحك وسطهم…تافقو عليه كيضحكو ولاحووووه فلاپيسين…

كارما …. هادي باش أخر مرة تخليني وتخوي الدار

مروان …غمز أمال بعينيه على كارما ~ وانا مانسخاش نعووووم بوحدي بلى بيييييك المكرمة ديالي

طرطقات عينيها فيه على ديك الكلمة وقبل ما تستوعب لقات راسها تا هي فالماء … وأمال منقزة معاها … كيضحكو عليها بجوج وهي مغوبشة گاع فزگات ومكانش باغا تعوم … نطقات ب والله متبقى فيكم بجوج وطلعات فدروج المسبح هاربة منهم … حتى جروها تاني عندهم … كيرشوها بالماء وهي كضحك وترشهم تا هي … هكا داز نهارهم مكاين غير النشاط … طلع كلها لبيتو يدوش و تافقو يتغداو كاملين مجموعين فالجردة و تكلف ليهم وسيم بالماكلة …

في المساء …..

الموسيقى صاخبة و الدنيا كتقلب بريحة الدخان و الشيشة ، كانو جالسين بربعة بيهم دايرين بيه ، وحدة كتمد ليه الكأس يشرب وتانية شادا ليه الگارو بيديها …. وهو بحال الملك وسطهم ، عيونو الحرشين كيشوفو بعيد وحومر بالشراب ، وبشرتو الحنطية سمرة مبرونزية… و وجهو مزين بلحية بنية غامقة… عضلات يديه قاصحين و مزغبين عاطيينو منظر رجولي ، وقفات لابسة ليه غير الميني كاتلوز ليه … عينيه ماشي عليها ، كيفكر فشي حاجة شاغلة بالو ، من لباسو باينة فيه من برات البلاد ، سعودي مئة فالمئة ، حط الكأس من يديه وقرب لهاذيك لي كتشطح كيرش عليها غير الزرقة تابعة ختها ، هذا كتر من أسبوع وهو كيعمر فهاد الكاباري ويحط فيه فلوس الصحيحة ، والبنات كيتقاتلو عليه شكون فيهم لي طيحو وتجيب ليه التمام ، ساعة والو كينشط ويشرب ويمشي اللوطيل ينعس ، تا وحدة من دووك البنات معمرات ليه العين ، دوقو سبيسيال ديك قوة الزواقات والصباغة معندوش معاها ، ديك الطبيعة لي بغى مالقاهاش فدوك البنات ، كل ليلة كتقول وحدة فيهم غايتحرك ليا سعدي وفالتالي كيخليها وكايزيد … مول الكباري فرحان بهاد الكليان ومباغيهش يخوي الساحة من عندو ، من نهار بان وهو كيحط الفلوس الصحيحة ، ولكن الى مشى صافي الرزق غادي يمشيلو طاحت ليه فالبال غير سمسارة لي تقدر ضبر ليه فشي وحدة كتعرف تشطح وتكون ملفتة وعاطية العين وشكون من غيرها طبعا السمسارة المعروفة باسم بسمممممة … فالبيرو ديالو طلع قلب على نمرتها بحكم هي معروفة عندو وعند البنات ديما مضبرة عليهم بالهمزات الصحيحة ، لي زوجاتها لي صيفطاتها بكونترات لبرا كلها وكيف جاها رزقها . دوز نمرة وشوية تفتح الخط

قاسم….صاحب الكاباري ومعروف بإسم المومني ~ أهلًا بلالة بسممممة واهلي فين غبرتي علينا

بسمة … لابسة قميص قصير مزير على قناتها و صابغة شعرها فالكحل هما وحجبانها يديها مزلگين دمالج ذهب نطقات وهي كطرطق فالمسكة ~سيدي المومني هذا مرحبا مررحبا كيف نتينا ؟

قاسم …. بغى يدخلها فالموضوع نيشان ~ لالة بسومة سمعيني مزيان وحليلي وذنيك راني محتاجك فشي حاجة وانتي الوحيدة لي ممكن

تعاونيني وبداكشي لي بغات خاطررك

بسمة …كتمضغ المسكة تقبات ليه الطبل ديال ودنيه نطقات بصوت طرطيق~ مرحبا وألف مرحبا انت غير آمر وانا نغامر زيد قولي اش حب الخاطر ؟

قاسم …. تنهد ~ضربة صحيحة عندنا فالكباري هوتة دايزها الكلام الى عاونتيني نضبر عليك

بسمة … طرطقات عينيها و تقادات فالجلسة ~ ايييييبه شكون هذا ؟ ومنين جا؟

قاسم … سعودي ومن نوووووع لي صعيب شي وحدة طيحو … باغيها تكون كتعرف تشطح وعاطية لعين ،والبنات لي عندنا باينة مل منهم ، بغينا نجيبو ليه شي حاجة جديدة باش ميبدلش البلاصة ، و السيد مرفح هادي سيمانة وهو يحط فالفلوس صحيحة عندنا على البنات لي هنا انا راه ندير أي حاجة باش يبقى عندي ماباغيش يفلت من يدي

بسمة …حيدات المسكة من فمها لسقاتها فوق الطبلة وعقلها بعيد كيمخمخ حتى طاحت عليها فالبال وهي تسمعو ضحكتها المشيييخة ~اوى ماطلبتي غير الموجود .. قلتي سعودي عامر حبة ؟

قاسم …. اييييييه ايييييه وكنقوليييك السيد مين جا وهو يفورني فلوووس صحيحة عمري دخلت بحال ديك لاصوم فحياتي عتقيني غير بنات جداد جيبيهم المحل ويكونو كايعرفو يشطحه راني والله منفوتك غير ضبري عليا

بسمة … كضحك بصوتها المبحووح صمكاتو ~سير الله يرضي عليك خلي عليا الموضوع البنت انا نجيبها ليك ماشي غير غادي تحمقو …..كضحك بصوت عالي ~غادي تخليه يحط لي وراه ولي قدامو بلى مايحس براسه

قاسم …. تبسم عارف بسمة علاش قادة مسماوها بسمة السمسارة حتى كانت نيت سمسارة ~ وهاني نعاينك وهااا عنداك تغبري راه معارفينش شحال غادي يجلس مزال فالمغرب خاصني قبل مايمشي نذخل مور ضهرو شي حصيصة مقادة

بسمة … كووون هاني غانوووض دابا نييييييييت نقاد هاد البلان ياله دوز بخير حتى نتلاقاو مسمارك مطرق عندي توكل على الله السلام عليكم

قطعات عليه الخط مخلاتووش يقولها بحلاوتك ، وناضت كتجري كتقلب فأجوندا على نمرتها ، العروقات كتساكف منها ، كتصوني وتا نمرة ملقاتها كلهم طافين وتقول شي وحدة خدامة عندها … جلسات كتسارح فالمراح وتفكر شكون ممكن يوصلها عندها وهي تفكر مريم من غيرها مكاينش لي يعاونها ، تبسمات وهزات نمرتها دوزات الخط وهو يجاوبها واحد الراجل قاليها النمرة غلط ، كحلات بالعمى وبدات تسب فخاطرها ….مافيهاش لي يشد الكار وتمشي تالعندها ولايني معندها مدير خاصها ضبر على راسها …. خصوصا مدة هادي وهي محنسرة لا ريال لا موزونة من أخر مرة فاش تلاقاو مولات شدات شي فلوس مسگدة البنات لي كتعرف كيضربه غير على قدهم وايني هاد المرة جاب ليها الله دجاجة بكامونها ومن سابع المستحيلات تمنعها ، باغة تاهي تصوڤي راسها ودور الحبة فجيبها ، ومكاينش لي غادي يقضي ليها هاد المهمة من غيرها ، كيف كتسميها ابنة إبليس ، من نهار خدمت معاها وهي غير كتربح ، تاباطرونيات علماتهم ليها ، وبوحدها لي عندها الجرأة والخوف ماشي فقاموسها … جمعات الوقفة مگفضة وهزات شي شراوط كانو منشورين لاحتهم فواحد الصاك ، ولبسات جلابتها ، خدات طاكسي وقصدات المحطة دالكيران…

يوم جديد …

رجليها حفاو بالمشي كتقلب على دارها لي تلفات ليها ، ومع الشمس رجعات گاع عرقانة وهي هازة لهبرة ، الشحوم و الذهون گاع دابو، جلسات حدى واحد العتيبة كتسارح وترد النفس ،من صاكها هزات قريعة ديال الماء هبطات عليها بلى ماتحس ، كانت عارفة بلي هادي هي الحومة فين مريم ساكنة وايني دار تنسات عليها … دازت ساعة وساعتين وتلاتة ومبان ليها حسها … تحركات من بلاصتها معصبة … وكتقول لبلاصة الوحيدة لي تقدر تلقاها فيها هي الكاباري لي كانو كايعمرو فيه … تحركات مخاصهاش ضيع الوقت بزاف هاد المسمار اليوم خاص طرقو… خدات طاكسي اول مخرجات من الزنقة … وقصدات المكان …

الدنيا مرونة بالشطيح و الزدحة … الشراب تما كيدور … وريحة الگارو مظلمة الدنيا .. هنا عالم تاني بعيد كل البعد على لي كانعيشوه … هنا ناس كياخدو حبوب غير باش مينعسوووس وينشطو ويبقاو ساهرين بسيمانة … تمشات بكعبها العالي كاتكوسل… لايحة شعرها موراها كاتبان وحدة اخرى بالماكياج ولباسها المفضوح من ساسها لراسها حتى ملامحها تبدلو … لابسة واحد الكسيوة قصيرة معرية من جيهت الصدر … قربات لصاحب دعوتها قبلاتو وهي هازة الكاس فيديها … وهو متشبت بخصرها بقوة كايشطح معاها … ويتحاك عليها جايب الكاو … بعد ثواني عديدة من الرقص ، شافت الحارس كيشير ليها ديال الباب كيعرفوها كاملين تما … بعدات من الشخص لي مايل عليها ، وهضرات فوذنيه بطريقة محلونة ~ تسناني شوية وهاني جاية …..مخلاتش ليه الفرصة فين يجاوبها وتمشات بكعبها العالي ، كتسووط دخان دالگارو فالسماء … وتقلب شعرها للجهة لوخرى …

مريم … قربات ليه ونطقات حواجبها معلياهم لفوق ~ ايييه اش تما ؟

نطق وهو كيطلعها ويهبطها ~ شي وحدة برا كتسنى فيك من قبيلة

مريم … رمقاته بحيرة ~ كيفاش شكون هادي ؟ مقالتش ليك سميتها ؟

نطق وهو كيشوف جهة الباب حاضي مع الغاشي ~ قالت ليا قول ليها السمسارة بسمة …. خرجي شوفيها مالها مبغاتش تحرك من هنا

مريم …كيف سمعات سميتها تبسمات وهي كتقول فنفسها ياربي تكون شي همزة صحيحة عطاتو قبلة فالهوا وخرجات كتجري تشوفها … بانت ليها واقفة حدى واحد السيارة مهدودة بالعيا والجوع … تمشات كتجري لعندها وهي تغوت معنقاها

مريم … بسوووووووومة حبي امتى جيتي ؟

ابتسام … وملقبينها غير بسمة ومعروفة كتر بهاد الإسم دفعاتها وهي طالعة ليها الگناويها وبدات تعطيها غير فالمنقي خيارو ~ واش نتي القح بة مكتخرجيييش من هنا رجلي طابو وانا كنقلب عليك و الجوع قتلني يبغيييكم الواحد گاع ميلقاكم لا انتي لا ديك القح بة الكبيرة معندكمش نوامر اويلي

مريم … دفعات شعرها لووور مطلعة حاجب ~ اختي راكي عارفاها مكاتخدمش النوامر وانا من اخر مرة شفتها گريسات واحد، بدلت نمرتي تا انا ههههه راه كيقولو الوقاية خير من العلاج

ابتسام … كتشوف فيها حواجبها راسماهم بالتاتو كوحل ديال لپاطرونات الكبار ~ سمعيني جيت على شي موضوووع مهم شافت بين جنابها ونطقات ~ زيدي نقودو من هاد البلاصة بعدا

حركات ليها مريم راسها بالإيجاب وزادو جيهة رونج روفر ركبووو… وهما فالطريق عاودات ليها مريم على بلان السيارة خلات بسمة كتموت بالضحك والدموع دايزين من عينيها … خدات ليها العشاء وتحركو لدارها باش يهضرو على راحتهم …

كملات أخر دغمة وهي كتمص صباعها بلذة … وناضت غسلات يديها ، لقات مريم وجدات ليها براد دأتاي مشحر …

مريم ….كبات كاس فكاس ومداتو ليها مشحر ناطقة بفضول ~ هانا حبي بصحتك غير ايتيني الفراجة..

ابتسام … جغمات منه كتنشوى عليه ~ سمعيني مزيان وحلي ليًا وذنيييك ، جاتنا دجاجة بكامونها … صونا ليا المومني

مريم …كتسمع ليها باهتمام ~ اييييه مووول الكباري ؟ مالو اش بغى؟

‎ابتسام … البلان ومافيييه هو واحد السعودي خانز فلوس

‎مريم …طرطقات عينيها بلهفة ~ عار ربي ؟ هادي خبار ناضية اوى اش بغى شنو قاليك ؟

‎ابتسام … المومني بغى بنات جداد شي حاجة مجهدة لي تخليه يحط فلوس صحيحة تما خصوصا انه لاحضو بحال الا مل گاع البنات لي تما شبعهم فلوس وباش يشدو المومني عندو قاليك نضبر ليه على بنات جداد يشطحو ليه ~ تبسمات وهي كتغمز مريم ~ والوحيدة لي كتعرف تشطح وتحمق البشرية راك عارفاها شكون

‎مريم … طلقات الضحكة بالجهد ~ هههههههه اححح هادشي عجبني اختي بسمة خاص غير نلقاوها

‎ابتسام …جمعات ضحكة ~ سمعي اديك الشيخة بربي ومتلقايها ليا تا نحو يك واش انا جايا من مدينة حتى لمدينة كنقلب عليكم باش تقولي ليا خاص غير نلقاوها بربي اليوم تلقايها ليا سيد معارفوش شحال غادي يجلس تم

‎مريم …خلعاتها فاش طرطقات عينيها ورجعات حمرة فعلا الفلوس كتخلي بنادم يتسيف ~ غير تهدني كاين واحد البرنامج هو لي كيجمعنا دايراه أمال غادي نحلو ونشوفها فين راها

‎ناضت كتجر رجليها وتلاوح كتقلب على البيسي ديالها … حتى هزاتو وفتحاتو تحت انظار ابتسام … رجليها كيترعدو بتهزاز والمسكة فمها مكتخطاهاش كطرطق وتعاود … سمعات صوت رنات يعني كيصوني شوية وتفتح الخط ومعاه صوت أمال الناعس …..

‎مريم … غوتات كتفيقها بصوتها > واااااانوووضي نووووضي اختي براكة من الخمير عندي ليك بلان صحيح

‎أمال … باقة دايخة بالنعاس حيت عياو اليوم ~ الله يسمعنا خبار الخير اش تما مفيقاني من نعاسي اختي

‎مريم … نوووووضي كنقوليك وتواگدي معايا وكملاتها فتحات الكاميرا مبينة ابتسام فصورة

‎أمال … طرطقات عينيها فاش شافت ابتسام وناضت قافزة يحسابها غير شي خبار خايبة نطقات ~ هضري يا ختي خلعتيني مال بسمة معاك ؟ واش شي حاجة ؟

‎ابتسام … نطقات وهي كطرطق فالمسكة ودور فعينيها كتقلب على صاحبت دعوتها واش تبان ليها ~ مكاين غير الخير وتيسير اختي غافيقيلي وفتحيلي عينيك وذنيك مزيااااان

‎أمال … تنهدات فنفسها ورجعات جاوباتها ~ هاني اختي بسمة اتيني اش تما ؟

‎ابتسام …. عيط ليا المومني على قبل واحد الساعووووووووودي خانز فلوووووس خلاني جيت نجري حتى لهنا كنقلب عليكم ….ايوا سمعي دابا لبلان ومافيه ~سرسبات ليها كل شي من طاق طاق حتى لسلام وعليكم

‎أمال …. فتحات فمها وعينيها طرطقاتها حسات بالنعاس طار ليها وسمعاتها صوتها كضحك ~ يحفضك ابسوووووومة وهادي خبار تفيقوني عليها بعدا اححح هوتة وشمن هوتة هادي

‎تقادات بلاصتها وهي كتناقش معاهم وتفاهم ومن بعد تافقووو يطلاقاو فبلاصتهم لي عارفاها غير مريم … تما فين غادي يقادو ليه البلان … قطعات معاهم الخط من بعد ما دارت معاهم غذا يتلاقاو وناضت كتجري لغرفة كارما تعاود ليها …

‎في مدينة مراكش …

‎نزلوا بسياراتهم مصافين فقنت ومعاهم ابتسام فرحانة… دار على قد الحال دخلو ليها يستارحو ومنها يوجدو راسهم للمهمة ديال اليوم ، تلاحت فوق الفوطوي ويديها على سالفها كاتجمعو ، نطقات وعينيها على بسمة ~ واش علمتيه ؟ جاوباتها وهي كتنش على راسها قاهرها الصهد وهي مهبرة ولات گاع تقطر ~ ايييه ايييه كوني هانية راه علمني اليوم غايجي انتي غير وجدي لينا راسك لشي دخلة ناضية بغيتك تبهريه و تخليه حال فمو فيك .. طولات فيها شوفة وحواجبها معلياهم نطقات ~ غادي نخلي ريوگو يهبطو ماشي غير فمو محلول انتوما غير ديرو ديكشي لي قلت ليكم ~ نطقات مريم لي بدورها داخلة فالمهمة وهي كتقول ليها ~ انا لي عليا نحضي ليكم كاسو نسكرو حتى يتلف على القبلة ههه

وسيم …هز عينيه فاش قرأ مساج وصلو ~ لقيت أوطيل فين جالس ….غمز أمال ~ تكلفي بالكاميرا انتي

كارما …وقفات ~ تحركو خاص نقادو راسنا وكيف قلت مبغيت حتى غلط منكم

تمشات على ريوس صباعها طالعة فدروج وتبعاتها بسمة ومريم وأمال كيجريو تاهما يتقادو من غير أمال معندهاش مع دوك البلايص ومكتعمرش فيهم مهمتها هي الحاسوب غادي تكلف بيه .. داز الوقت وجا ليل … نزلاتهم ليموزين طويلة هازاهم من غير أمال … هبطو غير كارما ومريم ومعاهم وسيم … دخلو وهي مشات لبلاصة فين كيبدلو..من الباب لورانية بحكم هي الراقصة الجديدة … مريم دخلات شادة فوسيم لابسة كسيوة عريانة قصيرة وماكياج صارخ متعرفيش بيه ملامح وجهها ، كانت موسيقى عالية والناس فالوسط كايشطحو وشراب كيدور وريحة الدخان عاطية … دخلو لمكانهم مريم حاضية بعينيها وسيم كذالك ، جلسو فالقنت حتى بان ليهم صاحب دعوتهم مبودر وعريض لابس قميص بيض تقلعيه من الطيارة بلي سعودي مئة فالمئة ، تبسمات بمكر وهي كتنغز وسيم لي بدوروه قشعو ، كان جالس وباينة فيه مل من نفس الأجواء ، غمز مريم لي فهماتو وناضت كتمشى لعند المومني لي عرفهم وصلو.. هزات كاس ومشات جيهتو كان جالس مع جوج بنات كيتلوطو عليه … قربات منو ونطقات

مريم … اش سماك الله

نطق وهو كيشوف فيها وفصدرها من نضراتو بان عليه بلي متارتوووش بشكل لي باغي هو ~ أنا ولد شيوخ ..تركي آل الشيخ

وانتي منو وشو اسم الگمر

مريم …تبسمات وجلسات حداه ناطقة بطنز ~ انا هي Rihanna ….كملاتها بضحكة عالية ديال الشيخات

تركي … نطق وهو كيفليها بعينيه~ ماتشبهينها

تبسمات بغنج ومدات ليه الكاس جغم منو و أول ما طفات الموسيقى خرجات بلباسها دالرقص ، الأضواء تسلطو عليها ، وصوت الموسيقى الشرقية عالي ، كتقن فن الرقص ومحترفة فن الإثارة ، ميلات خصرها وبدات مع الموسيقى كاتلوى بخصرها ، وكتهز بدراعها قربات لطبلة فين هو وطلعات فوقها صوت الخلخال كيرن فمسامع وذنيه ، بدات ترعد ليه فالترمة حتى عينيه خرجو ولكح ، كان متبع معاها وحال فمو فيها ، مصدوم من جمالها ، خمرية وزينها سمر قتال ، حنات لعندو كتهز فصدرها قدام عينيه وتميل بيه حتى كيبغي يخرج من سوتيام مخلية معاه عينيه خارجين ولسانو هابط ، قرب منها مفتون بزينها وحيد باكية دالفلوس بدا يلوحهم عليها ، محدها كاتشطح وهو كيشير بالماصوات دلفلوس ، سالفها كاتحير بيه مرة مرة حتى كيضرب فوجهو ، وريحتها فنيفو هلكاتو وخلاتو يبلع ريقو ، زاد قرب حتى لمسات يديه صدرها وبدأ يعلق ليها غير فزورق ، والباقي كيشتتو عليها ويغوووت ~ هلا هلا عاشو عاشو وده اللي تگول أنا رگاصة ~ رمق المومني ومد ليه بريكة دالفلوس خلاه حال فمه وقال ~ اي والنعم بالخوي ده اللي كان في بالي ولبيييه على النوتيلا اللي ترگص قدامي لك ترى بردلك السهرة هادي عندي بالرياض واخليك تعيش الجو المزين

قربات ليه كتميزو بعينيها وتقراه ، بابتسامة ماكرة على فمها قربات ليه كترقص على أنغام قلبو لي دقاتو غاديين مع ريتم الموسيقى ، وترجع تشوف فيه بعينيها بحال القرطاس ساحراه بكحلهم ، مقدرش يزول عينيه من عينيها زم لاته بهاد المعنى ، حتى عرق وهز مشروب كيبرد بيه… ما سالات الموسيقى حتى كانت سخفاتو ، تحت تصفيقات الجميع تبسمات وهزات كاس دالماء هبطات عليه ، متبع ليها لعين حتى سالات وهو ينوض وقف عليها ..

تركي آل الشيخ … كيتبسم وعينيه كلاوها من راسها لرجليها نطق وهو كيقرب ليها ~ وش اسمك يا بعد الروح والقلب

كارما … نطقات بدورها وهي كتشوف فيه ~ قمر

تركي … افااا افا گمر وانتي احلى منو ودي انزلو واحطك مكانو هههه بس حسافة ابي اشوفك لحالي …..بااس ايديها بلباقة وهوا كيطلب فيها بعينيه قبل لسانو ~ يا گمر منور وش رايك تگلطين معانا (تجلسين هيا تكلطين )

كارما …شافت كمية البنات لي مجمعين عليه وهي تنطق ~ لا مكيعجبنيش نجلس فين دنيا عامرة

تركي … ياله بغات تمشي وهو يشد فيديها ~ تاامرين أمر بنجلس لحالنا ودي اسولف معاكي شوية ونتسامر ...وكملها بغمزة

كارما .. هزات حواجبها فيه ونطقات~ اممم اوكي

شد فيها خايفها تهرب ، وتمشاو لبلاصة فين غايجلسو وحدهم ….مول الباار فرحان وعاجبو الحال حيت شاد عرام ديال الفلوس والغرامة لي تلاحت عليها باقين كيجمعو فيها ، هاديك بوحدها ماعرف شحال ، رمقهم وسيم جلسو وهو يصيفط ليهم المشروبات ، لبسات قناع الشيطان وهي كطلعو وتهبطو هذا حالو ساهل بالنسبة ليها المهم هو مرفح وعندو مايقول ، محسات غير بيديه حدى عنقها كيدور ليها شعرها لور ، نطق وعينيه واكلينها..

تركي … من وين الحلا والدلع ده كلو ؟ وينك عني من زمااان

شاف فالمكان ورجع سولها ~ اول مرة اشوفك ده الصوب اكيد جديدة هنا لانو ده مكاني المفضل بس عمري ما شفتك

كارما … نطقات وعينيها فعينيه حالفة تجيب تاليتو على يديها ~ كنخدم فكباري تاني غير اليوم جاتني دعوى باش نجي نشطح هنا راك عارف الخدمة هي هادي كل مرة فين

تركي … هز يديها باسها وعينيه على شفايفها واكلهم ~ والله حرااام الزين ده والدلع والجسم الملبن يجي يتعذب لين هنا ويبهدل بين الصالات

اكيد مايهون علي اترك الجمال ده ورايا واروح

كارما … رسمات ليه ابتسامة مبينة ليه سنيناتها البويض ونطقات ~ اش ندير ؟ معندي ماندير خاصني فلوس باش نعيش

تركي … نطق وهو ملهوف عليها ~ يالبيه على الصوت الناعم انتي بس تامرين أمر بس اطلبي واتمني وزود وكلو يجي لين تحت رجولك بس قولي ابي يا تركي وانا سم طال عمرك

كارما … هزات حواجبها فيه وسولاته باهتمام ~ كيفاش ؟ وبإنا مناسبة ؟ يعني شنو مقابل هادشي ؟

تركي … زاد قرب ليها تا قاص لحمها صبرو سالى وهو ينطق ~ ابيك لي لوحدي واخبيك عن الكل وماراح ينقصك شي تبين بيت ابشري تبين سيارة تم تبين فلوس من المليون لترليون كلو يحضر لجل هاالمزيونة وهالصوت وشتبين بعد ترقصيلي لحالي وبس وادعلك دلع لا كان ولا صار

هزات فيه عينيها لكبار المشفرين من عند الله ونطقات ~ مافهمتش كيفاش نرقص ليك وحدك

جاوبها وكو كيقرب ليها كثر مبقى فاصل بينو وبين شفايفها والو ~~ ابيكي خويتي اقصد حبيبتي وشريكتي في السهرات ولا اقولك وش رايك نتزوج عرفي واخدك معي لسعودية

قربات منه كتر كتوريه صدرها وحسن جمالها عينيها فعينيه وابتسامة شيطانية على شفايفها لي معكرين باللون الأحمر ، كتخمم وتفكر فالخطة باش تنصب عليه وتخليه لا ديدي لا حب الملوك ، عقلها كيخططو إب_ليس حداها جالس طالب السلامة ، حسات بيه شد يديها باسها وهو مبهور بجمالها ، والكحل لي فعيونها زادها إغراء ، بلات شفايفها تحت انظاره وهي كتنطق

كارما …بنظرة ديال منيتك ~ هههههه دابا عند بالك انت اول واحد غتقوليا هاد الجملة كون بغيت العرفي كوراني دايرة المشاريع من وراهم كل 3شهور نبدل الستيل ديال بني قلوان كعما نخرج نلوز ....كلشي نلعب فيه إلا الزواج اللي بغاني يجيني لباب الدار ماشي غير حيت كنشطح ممممكن ندير كلشي ~~~كدور في عينيها وكتفكر اشنو تزيد باش يتمغط أما التطياح رآه طاح قبل ميجلس معاها ~~~~ وحاجة أخرى ماما مغتبغينيش نتزوج لانو أنا هوا المصروف اللي كيدخل لدار نجلس أنا يضيعو هوما

تركي… شد يديها بتملك وهو كيقول ~ ولا تشيلين هم امك وكل اهلك يمونون ومصاريفهم كلها مجابة المهم انتي تكوني معي والي والباقي سهل

كارما … قربات ليه كتر بنظرة عيونها ساحراه~ راك غير داوي معارف والو تقدر تهزهم شهر شهرين ثلاتة كاع من وراها غتمل .. شكون قال غير تاخد اللي بغيتي وتلوحني اشنو ندير أنا مانا عروس مانا راقصة خلينا حبايب وخليك زبون ...قالت كلمتها ونزلت راسها حزينة زعمة ~ وهي الشي_طان مجلس ولادو وجالسين يتعلمو منها

تركي … قال ليها بحزن ~ يا گلب تركي انتي وحياة عيونك الجميلة دول لعيشك انتي واهلك احلى عيشة واذا عشان امك بفرشلها الأرض ذهب وفلوس لين توافق وتقول هالگمر الك بكفي بس اشوف هالظحكة وهالعيون

كارما … تبسمات ليه وهي كتقول ~خليني نفكر ونتشاور ونجاوبك ~المهم خاصني نمشي نبدل وندوز ناخد حسابي خاص غير مول الشي يعطيني رزقي كامل بلاما يشحفني فحال الآخرين

تركي … نطق وهو كيحقق فيها ويقول ~ انا وقلبي والبوك حگي فداكي بس ابي وعد انو نتقابل بكرا ونتكلم عشان نقرر وش نسوي ونزبط الموعد اللي يناسبك عشان تكوني معاي وتحت اسمي

كارما … ابتاسمات ليه وعضات على شفايفها ~ اك يكون خير

مكملاش خمسة دقايق وهو يجبد رزمات ديال الفلوس من قميصو، باكيات مربوطين بلاستيك وغير الزورق ، حطهم ليها بين فخاضها العريانين ، شافت فيه بعيونها الساحرة وهي كتقول ليه شكرا اكتفى بوسة فيديها وناض خارج معاها لبرى فين كانت مريم واقفة كتسناها مثلة معاها بلي هي ختها طلب ليهم طاكسي مساخيش بيها غير ركبو مشاو هو تاني وصلاتو طاكسي لوطيل فين جالس ……

اليوم الموالي ….

لابسة كسيوة طويلة مبينة ليه فتنة جسمها ، مبوكلة شعرها الطويل هابط حتى للتحت ، مقادة مكياج خطير مبدلة بيه جمالها الطبيعي ، جنبها بسمة لي مثلة عليه انها الأم المصونة لثلاتة ديال البنات لي هما مريم وأمال وكارما ، لابسة قميص ديال الصقلي من قديم ناس دقة القديمة يلبسوووه ، وحازمة شعرها بشال فنفس اللوووون ، مكحلة عيونها وضاربة عكار ديال الباطرونات ومسكتها فمها كطرطقها ، وعينيها عليييه كطلعو وتهبطو نطقات …

ابتسام… ايييييه اسي تركي ولا اش سماك الله شفتك ساكت ؟ مغاديش تقولي اش حب الخاطر ؟ كيف كتشوف بغيت نقادوليك شي حاجة زعمة صواب وايني هانتا كاتشوف ….بغات تقوليه مقودة علينا وهي تسكت ناطقة ~ الحالة ممسلكاش

تركي … قرب ليها شاد معاها الخاطر وهي نافخة ريشها عليه تكلم ~ انا جيت عشان اصير منكم وفيكم والحياة اللي عايشينها الحين اكيد بغيرها بإذن الرحمن واي شي تتمنيه سم وعلى ده الخشم حاضر وبيوصل ~ سكت شوية كيبلل حلقه ~ واليوم أنا جيت طالب القرب منكم في المصونة بنتكم ~ وكملها جبد ليها رزمات ديال لفلوس بقى يحط ليها فوق قميصها وهي حالة فمها مصدومة وعينيها خارجين ريوگها نزلو هزاتهم خاشياهم تحت المخدة وشافت فيه

ابتسام … وعينيها عليه باقة كطرطق فالمسكة ~ اوى انت بغيتي وحدة من بناتي شكون فيهم بالسلامة ؟

تركي … نطق وهو ملهووف عليها ~ گمر گمر

ابتسام … ضحكات بصوت عالي وقلبات عينيها فيه ~ ختاريتي مولات السالف لي مخلية عقول الرجالة تالف اوى انا مين نعطيهاليك شكون يخدم علينا ؟ وشكون يهزنا ؟

تركي … كيهضر بلى شعور لهفة فعيونو ماشي نورمال ~ أنا بعد الله سبحانه وتعالى معيلكم واللي بتحلمي بيه بيوصلك لين بين ايديك ~ ورجع شاف فكارما لي جالسة كتسمع وتنيييم بعينيها ~ المهم الگمر تكون من نصيبي واكيد العز اللي بتعيش فيه بيكون كمان من نصيبكم ومارح تحتاجو شي

ابتسام … تحمسات كتر وهي تنطق ~ بغيييت دار كبيرة طوموبيلات لبناتي يكون غالييين وبغيت خدامة تقابلني ومدخول شهر وحوايج جداد

تركي … نطق بملل ~ بس كده تامرين أمر ..طلباتك كلها مجابة واليوم قبل بكرا

ابتسام …كطرطق فالمسكة عليه ~ اوى تسنى بغيتك تزلگ ليا يدي ذهب ~ كتوريييه~ شوف كيف خاويين تا انا بغيت ذهب بحال الناس

تركي .. تبسم ليها ~ هههه تكرمي احلى ذهب من المزنط للكف وعيار واحد وعشرين وش تبين بعد

تبسمات بفرحة وهي كتافق معاه على اش يزيد يجيب ، تافقو يديرو الخطوبة فقاعة كبيرة مجهزة وتكون غير بيناتهم ميكونوش ناس ، وطلبات مهر بنتها لي فاق تخيلاته ، فوق طلباتها بغات تزيد الفلوس وماشي مبلغ عادي لا طلبات الملايين منو ، وهو حيت المبلغ كبير قال ليها نهار تركاب الخواتم يمدهم ليها فيديها كاش ، عيونها الجيعانة كتشوف فيه بحال البنك جالس حداهم ، مور ما كمس لكل وحدة فيهم الباكيات دلفلوروس خلاهم حالين فمهم فيه ، وقالو هادي دجاجة بكامونها غادي يولييو مرفحيين وبحال والو يخويو المغرب فخطرة ويستاقرو فشي بلاد . نطقات بسمة وهي كتقول ليه ~ اوى دابا نهزو الفاتحة … قراو الفاتحة فاش فتخووه من فلوسو

وعاد ناضت وجدات ليه براد ديال اتاي وغير كملو الخذيث تافقو الخطبة من بعد سيمانة بحكم خاصو يجهز ليهم الفلوس لي طلبو باش يقدو الوقت طبعا … سلمو عليه ودعوه فالباب …

نهار جديد …

جالسين فدار دايرة بحال الخربة مجمعين كيهضرو ويتافقوا ، بسمة لي هي زعمة الأم ، كتكمي گاروها وتسول وتعاود ، مخاصش يكون حتى غلاط خاص كل شي يكون مزيان وكيف متافقين عليه

،.. سمعات صوت رنة هاتفها كانت دايرة معاه تلاقاه اليوم التالي قبل الخطوبة ، بعد ما شبعها فلوس وذهب ، وغير الحوايج و الروايح الغاليين لي شرالها اليوم تافق معاها يتلاقاها .. لابسة كيطمة مطرطقة لفوقاني حد الصرة والشعر مقاد دايراه فلون جديد … معكرة و مقادة ليه .. نطقات بسمة وهي كتقول ليها ~ جاوبيه باش نعرفو شنو نديرو نطقات وهي كتشوف فنمرتو ~ شكيت يكون شرى الدار لي وريتو ….شافت فيها بسمة وهي تقول ~ كيفاش الى مشى حتى شراها مشكيلة كيف انديرو نبيعوها وحنا لي كارط ديالنا كاملين مزورين …شافت فيها وتيليفون لي باقي كيصوني وقالت ~ نتوما وجدو راسكم كيف علمتكم وخليو الباقي ليا الى مشى يشري الفيلا غادي نبدلو الوراق المزورين بالأوراق الحقيقة انا غانكلف واحد سيد كانعرفو هو لي غادي يتكلف بيهم قبل مايخرج التوثيق من الدائرة غادي يتكتب بإسم حقيقي خلي الموضوع عليا ..

تنهدات بسمة وأمال كطابي فبيسيها خدامة تقاد ليها فالوراق وهي ودعاتهم فاش صيفط ليها مساج بأنه برى كيتسناها

تمشات على ريوس صباعها كتشوف فمرسيدس أخر مودل كاطرطق فالكحل واقفة ، وهو بكل شموخ كيتسانها غير قربات نزل كيسلم عليها بالوجه ويديه مشابكين فيديها ، عينيها مزالوش عليها مبهور بكمية الأناقة والبرائة اللي فيها .حك دقنو وقال ...وش الحلا ده كلو انتي كل يوم بتقومي احلى من اليوم اللي قبلو ياويل قلبي معاكي بيوگف

تبسمات وهي كتخبل فعويناتها ونطقات ~ بيييك انت كنزيان تكلم وقال ~ يا لبيييييييه على الصوت

كسيرات اللوطو داها لأغلى ريسطو فكازا تغداو ومن بعد داها شرالها مجوهرات خرين كيعلق ليها ويزلگ ليها فيديها وصباعها وهي مبهورة من هاد كمية الفلوس لي كيميزي عليها مصدومة لأبعد حدود أول ضحية يعطيها هاد الفلوس وهاد المجوهرات بهاد السهولة ، من بعد نهار شاق عليها وهي معاه وصلاتهم لوطو لأفخم حي نقي وباينين غير ناس لاباس عليهم تما ، نزلات كتشوف بعينيها فين جابها وفبالها ألف سؤال وسؤال … كتشوف فيلات كبار وكل فيلا عندها بابها كبير ديال الحديد ، هبطات كتمشى ومذهولة كتشوف فالفيلا كانت حداها سيارة أخر مودل Bentley تقريبا نص مليار مغربية ، يبسات بلاصتها مصدومة وهو واقف ماد ليها سوارت الفيلا ومعاهم سوارت السيارة … حسات بقلبها كيضرب بقوة هائلة شوية وتسخف حداه ، راسها داخ تلفات ليها الهضرة ، وذنيها بقاو يصفرو فاش سمعاتو كيقول ليها هادول اللي وعدت بيهم الوالدة البيت والسيارة مشان اهلك عشان يسكنو ويرتاحو من الخرابة اللي عايشين فيها

شافت فيه بلا ماترمش ، يديها عراقو ليها ولسانها يبس حلقها نشف ، نطقات وهي كتقول ليه ~ نوووووو واش بصح ؟ كضحك معايا ؟

تركي … ضمها لعندو وهو كيضحك على ردة الفعل ديالها ~ والله من جد ماامزح هدول حقك وبعد 5دقايق بيكونو باسمك بس ندخل جوى وتحط امضائك

كارما …ضماته هي تانية باقة تحت تأتير صدمة وقربات لودنيه ودوات بصوت بالكاد هو يسمعه ~ غادي تكون سعيد معايا غادي نفرحك فكل شي …وتبعاتها ليه بغمزة

تركي …لحس شفايفه بشهوة وهو كيشوف فشفايفها باغي ياخدهم وسط فمه حتى قرب بغى يبوسها وهي مطاوعاه بدورها قربات وهو يتراجع فأخر لحظة ~ ابيها بعد مانملك مو الحين لانو مارح تكفيني بوسة أو حضن ابي زوجتي كاملة مكملة

كارما … هزات عيونها فيه بحال الى كتقراه ورجعات جاوباته ~ وانا بدوري غانكون ليك كيف كتمنى

شد يديها ودخلو الداخل كيوريها الفيلا قداش ، بشوميني ولابيسين والبيوت كبيرة وزوينة مأثثة بكل شي ومقادة ، سنات على الاوراق وهزاتهم فيديها فرحانة بهاد الهمزة لي جاب ليها الله ، بعد سين و جيم تافقوا و خرجوا من تما وصلها للدار وهو كيأكد عليها بلي غدا طونوبيل كبيرة غادي تجي تهزهم كاملين ويمشيو للقاعة فين غايديرو حفلة تركيب الخواتم…

في الحفل …

كانت قاعة ممتوسطة والطبيلات مقادين فالأبيض ، مكاين حتى شخص تما كيدور غير هما مجموعين ، بعد ما حطاتهم ليموزين كبيرة ، نزلو كايكتاشفو المكان ، لابسة كسيوة طويلة مبينة ليها فورمتها وطالقة سالفها الطويل كيرلي قوي ، ومقادة وجهها غير بمكياج خفيف ، راسمة على شفايفها ابتسامة خطيرة ، فجنبها ليمن واقفة مريم تا هي مقادة راسها وجيهتها ليسرية أمال لابسة كسيوة مع سبرديلة وطالقة شعرها ، ابتسام عينيها خارجين وفمها شاحف كتسنى هادشي يدوز على خير وتشد فلوسها وتهرب من هنا عندها كريديات كتار تجمعو عليها، وسيم بقى بعيد مترقبهم برات القاعة فلوطو لي غادي يهربهم فيها ، أما كارما كانت غير هاد المرة قلبها مامرتاحش وكتفكر غير ساهية حاسة بشعور غريب متملكها ، قلبها كيقول ليها هربي خرجي من هنا باش تلووح الخلفة مقادراش ، ومن جهة اخرى عقلها كيقول ليها عندك ضيعي هاد الهمزة من يديك ربي جابليييك ضبع حال فمو بروفيطي فيه وخودي اش باغا منو وسوسيه كيف خوتو ، تنهدات كتشوف فالقاعة خاوية كتصفر. لأول مرة قلبها يدق بقوة ، معارفاش اش واقع ليها وعلاش قلبها كيعطيها هاد الانذار الخايب لي جاها على غفلة ، كرزات بقوة على يدين أمال بلى ماتحس خلات هاد الأخيرة تشوف فيها باستفهام …

أمال … هزات عويناتها فيها لقاتها ماشي على بعضها، الحماس لي كتشوف فوجهها مختفي زعزعاتها من شرودها وهي كتسولها~ كارما هييييييه واش صافا ؟….. مرضاتش ليها البال ومسمعاتهاش گاع لدرجة خافت عليها ورجعات داتها وجابتها كتعاود تسولها~ كاااااارما ياك لباس شطنتيني عليك اختي مالك ؟

كارما … هزات عينيها فيها مكانتش ديك اللمعة فعينيها كيف ديما ، ديك المتعة والنشاط لي كتوشوفهم فيها أمال نطقات وهي كارزة على يديها بقوة ~ معرفتش قلبي كيضرني ء أمال وشي حاجة شاداني من لداخل بحال الى غادي نتخنق ~ بتردد رجعات نطقات~ خلينا نمشيو بحالنا قلبي مامرتاحش

أمال … خافت وهي كتشوفها كدخل وتخرج فالهضرة نطقات وهي كطمنها بعينيها~ الى مكنتيش مرتاحة نمشيو وايني حنا تافقنا هادي أخر مرة انكملو فهاد الطريق ياك قلتيلي ربي غنانا وغادي نخويو ونعيشو بعيد على هنا ؟ واش تراجعتي على قرارك ؟

كارما … نطقات وهي كتفكر ~ اه عارفة غير معرفتش مالي متوترة بزاف ويدي كيترعدو وقلبي فشكل كيعطيني شي سينيال غريب اختي ، رجعات طلعات النفس وصاطتو كتردد جوج كلمات ~ معرفتش مالي

مريم …قاطعاتها وهي كتحاول طمنها شدات فيديها كانو فشكل باردين وكيترعدو ~ تهدني احبيبة واش تبغينا رجعوو بحالنا ؟ غير قولي راحتك هي الأولى عندنا

ابتسام … قوصات حجبانها وهي كتشوف البنت لي قدامها كيف تبدلات فرمشة عين جاتها غريبة خصوصا أنها معروفة مكتخافش والخوف معندهاش فقاموسها ، من ديما هي فالواجهة ومكيهمهاش راسها ، وهادي لي حداها اليوم ماشي كارما لي كتعرف قربات ليها ورفعات حواجبها كتموتيڤيها بصوتها الغليض ~ فين هي كارما لي كنعرف ؟ ياك مكتخافيش وانتي لي علمتيني عمري نخاف ولا نحني راسي الأرض ، شنو وقع ليك دابا مناش خايفة ؟ …..قربات كتشوف ديريكت فعينيها ونطقات كتفكرها فما جرى ليها وتحك ليها على الضبرة فين مقصحة~ الى كنتي نسيتي انا نفكرك !!! عقلتي أول مرة جيتي عندي ؟ كانو الدموع فعينيك عقلتي شنو قلت ليك ؟ ….جراتها من يديها بقوة وهضرات بصوت بالكاد تسمعو ~ فين هو وعدك ؟ مخلعكش الكبير لي ضربك فقلبك غادي يخلعك واحد بحال تركي آل الشيخ ؟

كارما … رجعووو عينيها حومر بحال دم فور ما فكراتها فالماضي الخبيث ، عقدات حواجبها وستقرووو عينيها فعين بسمة بعنف، جاوباتها~ ماتسميتش كارما باش نخاف وعمري خفت …ورجعات كرزات على يديها بقوة وجاوباتها ~ الماضي كيبقى ماضي ابسمة وتعاودي تجبديه سميتك منبقاش نعقل عليها لا انتي لا غيرك…

نترات يديها منهم وهزات راسها للفوق بتعالي ، كتمشى بحال شي مودل مشيتها خاصة بيها ، تبعوها وهما كيتبسمو من غير أمال لي خنززات فبسمة وكملات طريقها تابعاها للداخل ، سمعات حسو كيشعل الشمع ، وكيتسناها بابتسامة اول ماشافها ، قربات منو وحنى باس يديها ، وعينيه واكلينها ، كتشوف فالطبيلة حداها طويلة مستفة ومقادة بالورد والحلوى والفواكه الجافة ، فجناب الذهب على يمينك وشمالك ، الخواتم تاهما مستفين بالبواطات غلاضين وكبار ، تصدمو من الكم الهائل ديال الذهب لي جاب ، أما هو كان لابس ومقاد بأبهى حلة ، عينيه مشفرين كبار وبيض عكسها هي سمرة ، لحية مقادة شوية شهبة ، لابس لباس خاص بالسواعدة ، تحرك جيهتها وهو كيشوف فعينيها منكرش عجباتو ، زينها غريب كتخليك تبقى ساهي فيها ، أما شعرها حكاية تانية من العذاب ، كيطلعها ويهبطها الكسوة جاتها أكتر من شي حاجة سميتها زوينة ، خاطفة للأنظار فينما مشات ، شيطانة فتصرفاتها وماكرة فعقلها ، وساحرة بلجمال لي عطاها الله ، قرب ليها عينيه واكليها وهز يديها بزوووج باسها كيشوف فعينيها نطق ..

تركي … يا بعد قلبي عسى يومي قبل يومك ...وش ده الزين والدلال كلو والله انك احلى من الاميرات ...معقول انك لي لحالي ..مو مصدق أنا

كارما … مثلات عليه انها متوترة وهي عينيها على دوك شوانط لي حاط نطقات وهي كتشوف فيه وتبسم ~ اااه أميرتك بوحدك

زاد حنى راسو باس خدودها وهو كيشوف فيها ، عاجبو زينها الأخاذ ،

لي عمره شاف بحالو كيحس بيها حلوة فكل شي ، كلامها نظراتها كل شي فيها زوين ،

تحرك حدى عينيهم من بعد ما سلم عليهم ، وجاب شوانط حلهم قدام عينيهم

خلاهم حالين فمهم ،

بسمة بدات تحلم من دابا شرات دار وطونوبيل وترفحات ،

اما مريم كتقول تغنيييت صافي وعمري مزال ندور بالقح ووووب ، كارما كانت كتشوف فديك الكم الهائل ديال الفلوس واخا عندها الفلوس عمرها تشبع منهم

محد الإنسان كيذوقهم وهو كيزيد يحبهم ، ويقدر ماشي غير يشفر ولا ينصب يقد حتى يق_تل المهم ياخد الدينيرو، نطق وهو كيشوف فيهم كيف مبهوطين مكانش مبلغ عادي نووووو كانو جوووج شوانط فلووس وكبار متقدريش تهزيهم.

تركي … شاف فبسمة لي وحلات ليها المسكة فحلقها بالصدمة ونطق وهو كيسولها ~ ها وش بتقولي مدام نهال بيكفي ولا ناقص عليكي شي ؟

بسمة … بلعات المسكة مع ريقها ونطقات وعينيها على شوانط ماشي عليه هو ~ كافييييين ومعدييييين الله يرضي عليك اولدي

قربات جيهة الشوانط ومعاها مريم واحد أمال غير كتشوف مصدومة فديك الفلوس ، كارما كانت كتحلل وتفكر كيفاش هاد المبلغ قدر يدخلو لمغرب وكيفاش فسيمانة وجدو عقلها حبس وتفكيرها تشوش، مفهمات حتى شي حاجة جاها كل شي بالزربة وعلى غفلة ، سي تركي كمل كيوريهم الذهب والمجوهرات ، وبعد سين و جيم بداو بالزغاريت البنات ، قرب حدها وهز الخواتم يركبهم ليها…

مدات صبيعاتها كتشوف فيه راسمة على وجهها ابتسامة أخاذة ، لابسة قناع الشيطان ، فالبلاصة غمزات مريم تقاد المشروبات مع الحبة ، ركب ليها الخاتم وهو كيتبسم و فجأة بدات كاتسمع صوت خطوات كثيرة دخلين للقاعة حتى طوووووقوها عليهم كتشوفي غير البوليس عرمة بيهم بلباسهم الأسود مع مسدساتهم التقيلة ، هازينهم فوجهم ومترصدين المتهمين ، حلو فمهم بصدمة ونطقات بسمة وعلى فمها كلمة ~ الحافيظ الله … واحد أمال بدورها مصدومة كتشوف الكم الهائل ديال البوليس لي دخلو ، والفرادة لي مشيرين بيهم جيهتهم ، تقدم واحد فيهم طويل كادر طول بعرض ، حجبانو كحلين مرسومين ووجهو ضعيف كان سيفيل من ميشيتو باين هو الشاف ديالهم كيتمشى بنفخة وهاز راسو لسما هاز فيدو لا سلكي وعلى دراعو شارة لبوليس ، تقدم لعندهم فين مجموعين وواقفين مصدومين امال سبقتها الخلعة وبدات تبكي مريم شوية وديرها تحتها اما كارما متنكرش خافت ولكن مبان على وجهها والو ضحك باستهزااء وهو كيدور عينيه عليهم و نطق بصوت غليض ~ الله يجعل كلشي مبارك ومسعود سمحو لينا قاطعناكم متخافوش العرس غيكمل غير هو فلابيجي أشار لدراري لي معاه وقال مخنزر ~ جمع ليا هادشي دخلو لصطافيت ونتا خود هاد لي كارت وهاد فلوس گاع لي فوق الطبلة …. قرب لجيهة كارما وهو كيشوف فعينيها لي كون كانو قرطاس كون تيراو فيه ، جمع يديه على شكل لكمة وهو كيغوت على لوخريييييين

نايف …. منيرڤي راسو ضارو بالخدمة ومعندوش فين ذبانة تزنزن ~ ميييينط الزمر كامل

شي شاف فشي أمال قلبها بدأ يضرب بقوة ، وبسمة طاحت فالأرض سخفانة ، واحد مريم غير كتغوت حتى صدعاتو فراسو ، وكارما كانت ساكتة الصدمة خلاتها تبلع لسانها ،كتشوف فختها وصاحبتها كيف كترجف بالخلعة ، كرزات على يديها بقوة وشافت فيه كان كيحك جيهة ناظرو عاطيه الصداع

كارما … تحت سنيها كتهضر عرفت الطرح حامض لي كارط لي محطوطين كلهم مزورين الا متحبست بالنصب غتحبس بالتزوير شافت فيه دايرة فيها عايقة وقالت ~ باشمن حق دخلو علينا عندك شي اذن

نايف …تم جاي لعندها عاض على فمو وكيطلع فيها وينزل بكره ~ جهدك خليه لهيه نصحك غا تسدي فمك…. وكمل حرك راسو ل دراري لي فهموه ومينطوهم بالواحد بالواحد تحت من صراخ لبنات

هز عينيه فيها وضحك بابتسامة استفزازية قبل مايدفعها بقوة ويجر يديها كيمينط فيها وفنفس الوقت كيهضر ~ متهمة بتهمة السرقة والنصب ورجع شد المينوط وهو كيضحك نطق ~ عشر سنين دالحبس كتسناكم (الفصل 539 الفقرة الأولى). التنفيذ(الفقرة الثانية من الفصل 539). هادشي غير شفارة بلا النصب والاحتيال ~ جرها قدامو وهي بحال الى صرفقتيها غير كتسمع مصدومة ~ فالكوميسارية تزيدي تعرفي كتر اش كايتسناكم, بدا يغوت على لخرين ~ جر عليا الزمر والى مفاقتش فيقها بطريقتك ~ كيهضر على بسمة لي طاحت مثلة عليهم أنها مغيبة

خرجو كاملين مينطين ، مريم وأمال غير كيبكيو وبسمة كطلب وتزاوگ فالكوميسير ، فارگونيط كبيرة طلعوا فيها لقاو وسيم لي كان برى كيتسناهم تا هو مينط وجالس عقلو بعيد كيفكر فهاد المصيبة لي طاحت عليهم ، خنزر فبسمة لي وجها تجلخ بالماكياج والدموع ، بانت ليه أمال ولات حمرة بالبكا حط يديه على يديها كيواسيها وهو مالقى لي يواسيه ، عينيه على كارما لي بانت ليه هادئة كيف ديما ، معلى وجهها حتى شي تعبير ، مغمضة عينيها وكتفكر هاكا كتكون فاش كتحس براسها مهلوكة وكل شي تجمع عليها ، دقائق عديدة وصلو الكوميسارية الكبيرة ، نزل بكل شموووخ ، كيحيييوه برى ، وتم داخل لداخل وهما موراه مينطييين ، قلبهم فالألف كيضرب ، عمرهم ضربو حساب لهاد الحصلة ، تصافو واقفين والأعين عليهم ، كيف مقادين ومقزبين ، السعودي لي كان معاهم مبانش ليه الاثر طار و تبخر ، جر كرسي و قلبو جالس عليه وعينيه كدوور عليهم من وحدة لوحدة نطق ،

نايف … بلل حلقه ونطق وهو باقي كيشوف فيهم ~ شكون فيكم سميتها الكارمة ؟ …عم السكون شي كيشوف فشي وهو يعاود ينطق ~ غادي نعاود نسول لمرة التانية التالتة تهبطو لتحت تبردو شوية بيدما عقلكم فكر مزيان …عاود نطق ~ كارما شكون فيكم ؟

مريم كتشوف فأمال وبسمة وفوسيم شي كيشوف فشي حسو براسهم حصلو ومعندهم مايزيدو يقدمو ، ثواني قليلة وهو بدأ يسمع كل وحدة فيهم كاتنطق أنا ، أنا ، أنا ، أنا. شافت فيهم كارما بمعنى واش منيتكم ، عينيها حومر وعقلها غايب كتفكر ، شوية وهو يرجع ينطق ضاغط على يديه بقوة ~ كلكم وليتو كارمات ؟ ياااك معلييش !!! بدا كايجبد فالتصاور ويحط ليهم فوجهم ضحية مور تانية ،جميع الدلائل حطهم ليهم حدى وجههم ، كملها جبد البطاقات المزورييين حطهم فوجهم كل مرة منتاحلين شخصيات ديال ناس جداد ، عرفو راسهم غرقو وهاد المرة غرقو بالمزيان. نطق وهو كيشوف الصدمة لي واضحة على وجوهم، شنو باليكم تهبطو ترتاحوووو عندي لتحت حشومة مذوقووش من الضيافة ديالي غوت على الحارس لي برى ~ جي دي عليا هادوووو نورييييييهم تفلسيف على سيادهم بشحال كايطيييح

قلبها بدأ كيضرب بقوة ، وهي كتشوف فيهم كيف خايفين ، واحد أمال شوية وتموت كاملة كترعد ، لمسات الخوف لي فذاتهم والحزن لي فعيونهم ، متنساش هي لي جراتهم لهاد الطريق ، ومتنكرش بلي وقفو معاها وساندوها فالوقت لي كانت هي محتاجاهم ، بسمة عارفة ضوصيها خانز ودابا كمل وغادي تخلص كل شي هاد المرة مضوبل ، هبطوو دموعها كتشوف تاليتها كيف دايرة ، دخلو ربعة د البوليس كبار مزطكين ، وقبل مايجروهم سمعوو صوتها ،

كارما … مكاين لاش هادشي كامل ، انا هي كارما لي بغيتي ديرو ديرو غير طلقهم معندهم حتى علاقة بهادشي ~ ورجعات حنات راسها باستسلام…

أمال … غوتات عليها باش تفيقها ورجعات حمرات فالبوليسي ودموعها هابطين ~ كاملين مشاركين ماشي غير بوحدها يا نمشيو كاملين يا نبقاو هنا كاملين يا نموتو مجمووعين يا نعيشو مجموعين ~ كانت كتوسل لكارما بعينيها ودميعاتها شلال هابطين نطقات ~ مديريش فينا هادشي ماتكذبيش باش تبرئينا

كارما … نطقات وهي كتشوف فالبوليسي عينيها بحال الصقر كتشوف فيه بكره ~ ديييير خدمتك الشاف

نايف …قرب منها وهو كيشوف فعينيها ونطق ~ ماشي انتي لي توريني خدمتي ~ رجع غوت على هادوووك … ديوو هادو عليا من هنا

جروهم وهما كيغوتو ، وسيم بقوة الصدمة حرف مقدر يخرجو ، غير كيشوف فيها كيف ساكتة ، عارفها من لداخل عالم بيها غير الله ، هو الوحيد لي عاش معاها طفولتها وهو الوحيد لي كيفهمها واخا تكون ساكتة ، تمتم بين شفايفو وهو كيشوف فيها ويقول ~ مديريهاش ابنتي لا ….

كانو داوهم ، حسات بقلبها كيوجعها وفعينيها صورة مروان لي خلات موراها ، تحرك نايف من حداها خرج ، وشد الباب ، بقات واقفة كتشوف فالفراغ ، عينيها بعيد كيرسمو ويفكرو، عيشة السجن عمرها جرباتها ، ولكن مكيهمهاش المهم تبرأهم وتمشي هي ترتاح ، كتحس براسها باغا ومقادراش ، ثواني قليلة وهي تسمع الباب رجع تحل ، دخل منو شخص طويييل وعريض لابس سروال دجين وقاميجة مزيرة على كتافو شوية وطرطق عليه ، كاسكيطا فوق راسو ، سمر وسموريتو حرشة وغامقة، صوت صباطو ضرب فوذنيها ، شيئ لي خلاها تهز راسها للفوق ، وجهو لا يبشر بالخير عينيه مظلمين مقوسهم فيها ، وحجبانو عاقدهم كتحس بنضراتو كيختارقوها ، توقفات ساعة وهي كتشوف فيديه لي عامرة وشام وكتفكر هاد الطولة وهاد الجسم الضخم وهاد اليد الموشومة فين شايفاها ، قرب لجيهتها كيطلع ويهبط فيها ، استقرو عينيه فعينيها بحال الصقر ، دار يديه وراه كيشوف فيها باحتقار مخسر سيفتو فيها محاملهاش بهاد المعنى ومحاملش الشوفة فيها وايني مضطر ، خنزر فيها مزيان بعدما سكاناها كيطلع وينزل فيها باحتقار وهي مقوسة عينيها فيه كتسناه ينطق بشي حاجة

كتسناه ينطق بشي حاجة ، فنفس الوقت مخدمة عقلها تستعقل فين شافتو ، حيت هاد الشخص كاتعرفو وكاتعرفو مزيان ، جر لكرسي من لبيرو جاابو تال حداها وجلس عليه داير رجل على ختها بعدما حيد دجاكيط ياخد راحتو ، حيد ساعتو من يدو حيد كاسكيطة من على شعرو وشافيها بنظرات ثاقبة خلاوها تحس بالخلعة شاداها من كرشها بلل حلقو ونطق بصوت خشن قوي بث فيها الرعب ~ شهد الشرقي !! ولا نقول ليك حسن سحر ، مريم ،سمارا ، أسيل ، عبير ، قمر … رجع نطق ~ صاافي ساليتي شبعتي فلوس؟ ولا نخليك شي عام اخور تستمعي بطعم الحرية؟؟ نطق وهو كيكرز على يديييه ~ حيت الضو مغاديش تبقاي تشوفيه من هنا لفوووق

حسات برجليها فشلو كون ما الحيط لي رامية عليه ظهرها طيح على وقفتها ، عقلت عليه دابا ومزيان وتأكدات شكون يكون ، وهي كتشوف فيه دماغها كان خدام اش جابو لهنا واش كوميسير ومشات غالطة فيه ، ولكن هي عاقلة على خدمتو وشنو كيدير ، دابا قدامها تساؤلات كثيرة طاحو فبالها ملقات ليهم حتى جواب ، مجاوباتوش ومعندها ماتقوليه من غير السكات تشدات متلبسة وماجا ووقف قدامها بهاد الثقة إلا وعندو عليها شلا ادلة ، سميتها مكاينش لي غيطيح عليها حيت بوحدهم لي عارفينها هنا تاكدت بلي الشخص لي قدامها مساهلش ، واللعب معاه ماشي بالطريقة كيف تصورات ، قصرت عليه الطريق ونطقت بزوج كلمات وعينيها عليه ~ شنوو بغيتي ؟؟

ناض من فوق الكرسي ولاحو لتيساع برجليه ، وتم غادي ليها حاط يدو على جنابو وعاقد حواجبو نطق وغير صوته بوحدو يخلعك ~ هنا انا لي ندوي وانا لي نسول ؟؟ كتسمعي ؟؟ ….كمل باستهزاء ~قالت ليك شنو بغيتي , باغا تسمعي مني رجعي ليا فلوسي …توتوتو ~حرك راسو بلا …. هادوك زيديهم فيك لفلوس كون بغيتهم ناخدهم اول مهربتي …. هز حاجبو ~ عنداك يسحابليك بلي قدرتي تهربي مني …نطق بجهد ~انااا لي خليتك تهربي وملي قررت انا ،جبتك تال عندي.

طرطقات عينيها ، كتحاول تستوعب هادشي لي طاحت فيه ، من وجهه مبايناش عليه كيضحك ، كيتكلم معاها ببرود قاتل فنفس الوقت كارهها ومحاملش الشوفة فيها ، جر واحد الكرسي أخر كان جنبو ، وبدا يطلعها ويهبطها بعينيه ، كانت بالكسيوة ديالها واقفة كتشوف فيه بصدمة لسانها تعقد مقدراتش تهضر ولا دافع على راسها ، لقات راسها محاصرة فدوامة صعيب تخرج منها ، عقلها كيحاول يستوعب حوايج كثيرة و اسئلة عديدة كدور فراسها مزال مالقات ليهم جواب ، نطقات بصعوبة كتحاول تلوح التهمة عليها ، وتبرئ راسها بأي طريقة كانت …

شهد … نطقات واخا لسانها مقادرش ينطق بكلمة ~ انا انا كنت ناوية نتزوج بييييه و …

قاطعها وهو محاملش يسمع صوتها ~ كيفما كنتي ناوية تزوجي بيا ؟ هاكاك كنتي باغا ديري ليه ياك ؟

تسمع صوت الباب داخل منه نايف وهاز ديك الشوانط تقال وذهوبة حطهم فوق المكتب راسو مفروع عليه بالحريق ، شاف فيه ونطق قبل مايعاود يخرج من تم …

نايف ….. غانم وريييها السلعة ديالنا كيف جاتها ~ طلعها وهبطها ونطق ~ تريكة الشفاريييين

تبسم باستهزاء فوجها وهو كيحل فالشوانط ويورييها الفلوس كاملين مزورين و الذهب غير بلاكي ، كيهزهم حدى وجها ويلوحهم عليها كيبين ليها شحال هي ناكرة بالنسبة ليه ، ورخيصة مكتسوى حتى بصلة …

غانم … نطق وهو كايحتاقرها بعينيه جر الكرسي وحط شي وراق كانو معاه فوق البيرو وستيلو جنبهم ~ غادي لخص عليك الطريق !!! عندك انتي ومجموعة النصابين لي معاك كل واحد فيكم غادي يتحكم بالمدة لي يستحقها من عشرين عام لفوووق بتهمة النصب والاحتيال زائد التزوييييير والسرقة ….

شهد… كانت كتشوف فيه وكتفكر فأمال وسيم ومروان هزات راسها بتعالي ونطقات عاضة على الحروف ~ دير لي تشووفو هو هداك ومسلكك التهم لي كتهضر عليهم جيب ديك الأدلة ودخلني الحبس معنديش موشكيل غير هو دوك لي معايا معندهم تا علاقة بهادشي ومفراسهم والوو ~ وكملاتها هزات حواجبها فيه للفوق كتستهزأ بيه وكتشوف فيه بديك نظرة أفعى وكتحاول تقرا اش كيدور فراسه

غانم … تبسم وهو كيشوف فيها كيف تسيفات عاجبها راسها، ومغرورة وباينة مخايفاش نطق وهو كارز على يديه باغي يمرمد بكرامتها ويطيح كواريها الأرض ، باغي ديك نظرة يكسرها ليها فخطرة ، باغي يشوف الخوف فعينيها ~ مقلتي عييييب الأدلة واجدين وكيف نصبت ليك الفخ وطيحتك بسعودي نعاود نفكرك مهدي ، كمال ، … هادو كاملين عارفك اش درتي ليهم وبالدليل انتي وصحابك لي كتحاولي تبرئيييهم …. نطق وصوته عالي ~ بالرب تانغرقكم واحد بواحد …

حسات بالماء بارد تكب عليها ، مكانتش ظاناه عارف كلشي عليها ، حلقها نشف وهي كتشوف فيه كيف ولا كامل حمر وعروق يديه منفوخين ، قنبلة وغاطرطق فوجها...شافت فيه مخرجة عينيها من برا واخا لداخل يعلم بيه الله قالت وهي كتحداه ~ كون كنتي باغي تغرقني مغتوقفش قدامي هنا جيني من تالي وقوليا شنو بغيتي ؟؟

صفق بيديه وقال ~ برافوا ذكية مع راسك وبما انك لخصتي عليا اشواط انا نهني بالك ، حط يديه على جنابو وبدا يدي ويجيب فداك البيرو وكيدوي ~ بما انو عزيز عليك تلعبي عروسة وعريس غنعاودو نلعبوها وبطريقتي هاد المرة ، خدا وراق زواج مقادين ناضين ناقصين امضائها دفعها على الحيط بقوة وقرب ليها كيهضر تحت سنيه ، وكيهدد فيها ~ جوووووووووح حلوووووول عندك !!! يا تقبلي توقعي على دييييك الاوراق يا انتي وصحابك فخبر كان ، والخبار فراسك كنقسم ليك حتى نربيكم كاملين فالحبس ونعرف نبيع لي قدامي ولي مورايا ومتخمميش موجوود الخير فين نغبركم فخطرة

شهد…قربات ليه بلا متحس كتشوف فيه باستفهام عينيها فعينيه طرطقاتهم وعلات صوتها ~ شكتخربق شمن زواج ؟ كضحك معايا ؟

غانم … دفعها من عليييه عايفها وهز صبعه جيهت عينيها كيبرك على الحروف كيعني كل كلمة قالها ليها ~ يرجع صوتك يعلى عليا غادي نحسب ربي مخلقكش ، بغى يجمع معاها وهو يتراجع فأخر اللحظة كينطق ~ استغفر الله العظيم

شهد … رجعات كاملة كترعد كون مشادهاش من اليد لي كتوجعها كانت غاتكون كتجفف بين الأرض ، خصوصا وهي مكترضاش ، نفسها حارة ، رجعات باللور كتشوف فهاد المصيبة لي طاحت على راسها ، ورجعات شافت فيه كتسوله ~ بغيت نعرف شنو هو سبب علاش باغي تزوجني؟؟

غانم … ضحك باستهزاء فاش سمع سؤالها وقوص عينيه كيشوف فيها وكيتفكر كيف كان حاضيها وفرمشة عين ختافات وخلاته مشوه قدام عائلته وصحابه وناسه سيرته على الفام ، كانت واخا يقتلها متبردش ليه الشمتة لي شمتاته ، كان باغي يشدها متلبسة ساعة مو فافاته عليها ، صدق محشم قدام لي يسوى ولي ميسواش ، خبط البيرو وقرب منها حتى رجعات باللور منها للحيط وهو محاوطها كيشوف فعينيها ديريكت بدأ يهضر ~ القح اااااب كيبقاااااااو قحااااااااب حسابلييييك معشوووق نتزوج بيك ؟ بنتليييك هارب ليا فخطرة باش ندي وحدة بحالك ؟ ضحك باستهزاء وشدها من كتافها العريانين غرس يديه بقوة فيهم حتى بدات تنين وكمل هو كلامه ~ غادي تمناي كون متلاقيتيش بمي ديك النهار غادي تنذمي حيت شفتي وجهي ، غادي نعذبك حتى تكرهي راسك وعيشتك ، لي غادي نديرو ليك عمرك كنتي تنويييييه ~ ختاري تسني ولا تهبطي تبردي لتحت مع خوووتك ؟ تسناها تجاوب ولا ترفض ولا تقول غير كلمة ، حدها شافت فيه بتحدي كانو عينيها حومر مواجهاه بيهم ، وهزات الستيلو هبطات على الوراق سناتهم ورجعات شافت فيه بنفس نضرة التحدي … ضحك بصوت عالي وهو كيقول ليها ~ غادي تنذمي حيت سنيتي عليهم تيقي بيا …

وقبل ماتسوله على صحابها كان جرها معاه مخنزز وغير كيصوط ، كون لقى يذفنها حية ميكره ، سلم على نايف من بعد مالاحها فلوطو وخلاه هو يتكلف بالباقي، كان قلبها كيضرب بقوة وهي كتفكر ، موصيبة وطاحت فيها ، هاد المرة الضحية لي كيف كتسميهم هي خطير وممعاهش اللعب ، خاصها تحل هاد الموشكيل وتخرج من هاد الكارتة فين طاحت .. مسافة طويلة ضرب ديال الطريق للفاس ، مكيشوفش جيهتها وغير ساكت وكيصوط ، ومرة ومرة ينتر من گارووه، كيدخلو حتى لريته ويرجع يصوطه برى ،

هي براسها محاملاهش ومعارفاش اش كتسنى معاه لي عارفاه فهاد الساعة هو خاصها تهرب وتهرب فأسرع وقت منه … سمع رنات هاتفه كيصوني بانليه رقم لطيفة فتح الخط وجاوب بصوت غليض طاغي ~ نعم الواليدة ؟ هاد الأخيرة لي الشيكي والأناقة منها كيفووح جاوباته وهي كتكب كأس دأتاي ~ وليدي شفتك من صباح ماجيتي شطنتيني عليك … نطق وهو كيحك على لحيته يد شاد بيها الڤولا ويد فيها گاروه كيبخ مرة مرة ، حاط مكبر فسيارة ، تنهد وهو كيجاوبها ~ هاني الميمة فالطريق قريب شي ساعة نكون فالدار بغيتك تسنايني عندي ليك شي مفاجأة

لطيفة … سمعات مفاجأة تحمسات بدات تضحك وهي كتسوله ~ ايييه وقولي شمن مفاجأة لولدي ؟

غانم … ساط دخان لفوق ورجع جاوبها قبل مايقطع الإتصال ~ حتى نجي وتعرفي يا الله الواليدة تهلاي

قطع الخط ، ورجع جبد گارو أخر ، كانت كتسنط ليه وتفكر بعيد ، تفكرات مو نهار بلاناو ليها بلانها وكيفاش داروها بيها ،تيقاتهم ومثلو عليها مزيان وتلحلحت عليها بخالتي وكبيدة ولعبت عليها بلي بنت القاع والباع ، باشمن وجه دابا غتشوفيها ولا غتوقف قدامها وتسكن معاها ، كيفاش غتولي مرت ولدها حياتها تقلبت خممات لكلشي تا لانها تحصل هاد الحصلة ويتقلب عليها السحر ، خاصها تلقى لراسها الحل كون ما صحابها اللهم الحبس ولا هاد التزويجة ل باينة مخارجاش على خير ووراها وجع الراس

سمعت صوت ولدها كيدوي مع الخدامة كيسول عليها فين كاينة ،جوبتو من صالون عصري فين كانت جالسة كتفرج وقالت ليه ~ غانم ولدي انا هنا !!

سمعت صوت خطوات كثيرة وقفت بحماس تشوف المفاجئة ل موجد ليها حتى كتصدم، كتشوفو جاي وجايب معاه وقفت على طولتها كاتشوف لوجه ل داخل مع ولدها ...ملامح مخافياش عليها ،نفس الطولة نفس المشية نفس القد ، محد شهد جايا كتقرب ومومو عينين لطيفة كيوساع حتى تلاقاو العيون مع بعضياتهم ،بدهشة وصدمة حلات فمها كتشوف فيها وهي واقفة قدامها بشحمها ولحمها ، زاحت نظرها لعند ولدها كتشوف فملامح وجهو لقاتو كيشوفيها نافخ ريشو وبثقة فنفس نطق موجه هضرتو للأم ديالو ~ عقلتي على هاد المسخة النصابة ل واقفة قدااامك !! قلبها بدا يضرب ملي عرفتها وتفكرتها رجعتها ذاكرتها لنهار المشؤوم ل دارت ليهم ، كيفاش هبطات من قيمتها وقيمة ولدها قدام ناس وخلات سيرتهم بالايام وشهور على كل لسان ، فكرت نيتها الغالبة ل دارت فيها وكيفاش بغاتها وتمناتها عروستها وهداتها ذهبها ومكبرت فيها حتى حاجة ،وهي جزاتها بقلة الاحسان ،ايدها بداو يترعدو وقلبها بدا كيغلي عليها بغات تاكلها بسنانها ولكن كتبقى ماشي من هاد مستوى ومعندهاش مع هاد نوع ، خيبت ملامحها وشاف فيها كانها وباء غيعاديها رجعت بخطوة اللور وهزات ايدها كدوي مع غانم~ اش مازال جايا دير عندي هادي هنا فداري !!، ل بحالها خاصهم الحبس يعاود ليهم ترابي باش عمرهم يمدو ايدهم على الحاجة ماشي ديالهم ولا يضحكو على الناس ، خرجها عليا !! ميشرفنيش توقف قدامي ورجليها يعفطو على فراشي الغالي عليها

رجعات كاملة كترعد شالها طاح من فوق راسها ، وفمها غير خرجها عليا من داري ، كانت واقفة كتشوووف فدراما لي سماتها هي ، كطلعها وتهبطها، تفكرات كيف فتخاتها ودات ذهبها ، نصبات عليها غير بالفن، تبسمات باستهزاء مخلياها كتدعي فيها

لطيفة … هزات صبعها كتهددها ~ خرجييييييلي الملعوووقة من داري خررررجي اشفارة عليا , بدات تغوت ~ خرجها عليا من داري اولدي محاملاش نشوف فيها عييييط البوووليس

حس بيها كيف مكوية والغبينة لي فقلبها غاتقتلها خاف يطيح ليها طونسيون كيف ديما قرب لجيهتها وهو مخنزز فهاديك لي واقفة حداه كتشوف فصمت وكطلعهم وتهبطهم بسمها ، نطق وهو شاد فمو

غانم … تهدني الواليدة مجبتهاش باش تفقصك !! جبتها باش انا ل غنعاود ليها ترابي حيت ملقاتش ل يربيها في صغرر

يتبع...