محتوى القصة
صافي ! مسولهاا واش بخير كيداز تصوير والو برر غيابو بجوج كلماات ...مجاوباتش حطاتوو وقالت فنفسها يمكن تقلق على لباارح
لبسات حوايجها وخرجات مع طارق
طارق:ايمان معاش غتبداي الخدمة !
ايمان :4 خاصني نكون هناا باش ندرب معاهم على شنو نغني و 9 كنبدا
طارق: مزيان اا عقلتي على البنت لي قلت لييك كاينة هناا
ايمان(ضحكات)ههه مالهاا
طارق: درت معاهاا ليوم باش نشووفهاا
ايمان:هاااي هاي مكضيعش الوقت هههههه كتقلب على الورااق اطارق
طارق(ضحك) هههه لا لا هي براسهاا مزال كتقرا ...بغيت نمشي ناخد شي حوايج وبغييت رأيك
ايمان: بغيتي ضربها على الشعاا وصافي هههه...اجي هناا كاين واحد لبوتييك ديما كنشوف فيه الصولد
تمشااو كيهدرو توصلو. ل بوتيك خاص بالرجال ...دخلوو كيشوفو شنوو يااخد وكضحك عليه حيت تالف
طارق؛ايمان تي هدشي مكاين غير 30 اوروو لفووق
ايمان:ههههه (هزات تيشورت فلكحل ) اوى لي بغا العسل يصبر لقريصو
بقاو كيقلبوو هناا وهناا حتى كمل اللبسة لي ختار ومعاها سبرديلة خرجو وايمان كضحك علييه وقالت؛ شوف راه طريق لبنات فيهاا خسران لفلووس
طارق: وباااينة هههه اجي ندي ليها شي حااجة
ايمان: قلتي لياا شعرها بوكليي (حرك راسو باه وضحكات)خود ليها مشطة دير فيها خير ههههه ناري تسمعني هههه
طارق:هههههه دابا بالمعقول شنوو ناخد ليهاا شي كادو جيست التعارف وصافي
دازو من حدا بوتييك تاع الاكسسوارات ودخلوو لييه وقالت: خاصك تاخد ليها بدوقك حيت دوقنا حنا البنات معروف ههه من طيارة تعرف بنت لي ختاارتو
طارق(ضحك وهز واحد السلسة نقرة وفيهاا فراشة صغيرة بحجيرات ملونين ) كيجاتك !
ايمان: زوييينة (شافت التمن وضحكات )حتى التمن زويين
طارق(تلغات ضحكتوو بالصدمة ) واش مشللة بدهب
ايمان: وغير نقرة هاهي مكتوبة هههه ولكن راه شياط
طارق: شنو بان لييك
ايمان:خودهاا لييهاا الى كنتي كتشوف هد البنت تستااهل
بقا كيشووف فسلسلة وقال: نغامر
ايمان:فلوس لبن كلاهم زعطوط ههههه لي صورتيه اليوم حطيتيه ا طارق هههه لبنات راه كيخويو جييب اصديقي هههه
ضحك وهوا متوجه لاكيس رمات عينيها على لمحال قشعات كاسكييط بنواع مشات جيهتهم ...كتهز فكل وحدة وكتشووف ...هزات وحدة فلكحل فيها فجنب علامة فلحمر صغيرة ديال لمارك ...عطاتها لبنت دارتها ليها فلبواطة ديالهاا ديال لماركة وتوجهات لاكيييس ونطق طارق كيضحك: ماشي غير لبنات لي كيخويو جيب تا دراري
ايمان: برد على رااسك ههه
حطات 50 اورو فكاسكيط وخرجات هازة الصاشية وطارق هاز صاشياتوو ونطق كايضحك :الحب كيضرب جييب هدشي مصالحش
ايمان: ههههه مزال مشفتي والو فعالم الانااث ههه
تفارقوو فشارع هوا شد طاكسي لدار يبدل ويمشي وايماان مشات تقدات ليهاا شنو خاصها من حواييج وسقااطة تحطها فلبييت خدات نص حوايجها غير كساوي وشورطات وصنيدلات صيفيين ...مشات لدار كتقييس فرحاانة انها ولات كتاخد حوايج جداد مقابلة مع لمراية لي ملصقة فلماريوو فرحانة بطايتهاا الممشوقة لي لبساتها كتواتيهاا باقي شعرهاا مموج من قبيلة ...استقراات فتيشورت لارج مع كولون اسود فوق من الركبة لبسات سبرديلتهاا دارت صاكها خرجات هازة لكادو وتوجهات لريستوو دير لبروفة ديالهاا
**
عند يوسف شاد تصاور فايدو وقدامو رجل اخر كيشوف فتصاور وقال : ضبرتي على جوكير ناضي ...صوت وصوورة
يوسف:اش معروف علياا ! il cacciatore (إلكاتشاتوري * الصياد )
_معلييكش
يوسف : بقا ضبر لينا على اعلاناات ..اشهارات
_غير توريها للاعلام مرة اخرى غطير منك ...(كيشوف فالصورة ) كون متاكد مغطولش عندك الى تعرفات
يوسف:كون هاني هادي هي لي غتبقاا الوجه تاع لا لوناا مغاديش نفرط فييهاا
_رسل ليا الصور فل ايميل ..اه فتح ليها كونط فانستاغراام حط فيه تصاورهاا و شي لقيطات من لحفلات ديالها ...تبدا تشارك يومياتها (هز صبعو ) المهميين فقط
يوسف:غينفعنا هد الانساغرام !
_(ضحك)بان ليا نتا باقي حاصل غير ف باج فيسبووك ...انستااغرام راه ولاا عملة للجميلات واش مامواكبش الوقت بان لياا
يوسف:الصراحة لوناا لي مكلفة ب ليريزو صوصيو ولكن درتيها ليا فلباال ...غتبقا تاخد صور وتحطهم
_حيت انستاغرام بحال السلعة ...كيدخل صاحب المنتوج كيقلب شكون لي يصلااح لمنتوجوو غنشريو كونط يكون ديجا واصل ل 50k باش يسهل علينا الخدمة ...شنو قلتي ؟
تصافحو لايدين وقال:مشااات
في يومهاا التااني فالعمل كتحرك بأريحية فوق الخشبة لابسة غوب هد لمرة نص كم مسدودة من العنق وهابطة كلووش وطويلة حتى لتحت بلموف مع سباط اسود
عينيها تهرب لبلاصتوو مكاينش تفكرات انه كيمشي لسااحة يرسم وكملات خدمتها. ...مع 12 سالات مشات لبسات حوايجها تعشاات وهزات صااكها خرجات قاصدة الساحة مع الصيف والحال كيكون سخون بنهار كلشي كيخرج بليل كتكون اومبيونص زوينة قدام السااحة ...وعامرة بسيااح
كتقلب بعينيهاا علييه صونات لييه وجاوبها اخيرا وقال: ساليتي !
ايمان:سالييت ونتاا
حذيفة(جا حدا ودنها حتى خلعها )حتى انا سالييت
بعدات كضحك كتحقق فييه فظرف نهار واحد توحشاتوو وقالت: وخة علييك غبرتي علياا اليووم
حذيفة: كانت الريستو عامرة اليوم بزاف مع الصيف خلاص...توحشتيني ولا !
ضحكاات مهبطة راسهاا وقالت متلفة الهدرة : جبت لييك شي حاجة
حذيفة: شنو هي
مدات ليه الصاشية شدها من عندها كيشوف فيها باستفسار وقال:اش هدشي
ايمان: كادو صغيور
تبسم حل الصاشية جبد لكارطونة غير من الرسم عليها وسمية عرفها كاسكييط حلهاا بابتسامة رضى وقال: علاش عدبتي رااسك
ايمان:عجباتك ؟
حيد ليها التيكي من بعدها حيد لكاسكيط ديالوو ودارها وقال: كيجاات
ايمان:من دااكشي بصحتك ههه (حيدات ليه لكاسكيط ديالو دارتها فوق شعرها ) هاديي كتعجبني خليها لياا
حذيفة : بصحتك (قرص حنكهاا ) الله اعطييك الخيير
ايمان:قليلة فحقك..نمشييو
حرك ليها راسو ب ياله تحركو فطريق ساكت داير ايديه فجيب سروال ولقميجة نص كم حالها لابس تحتها تيشوورت خفيف ..كتهز عينيهاا فييه وتهبطهم
حذيفة: مرتاحة فلخدمة
ايمان:اه عجباتني الصرااحة ونتاا
حذيفة:بخير خدام ولكن مزال كنقلب على الدومين لي بغييت
ايمان:شوية بشوية ان شاء الله
ركبو فطاكسيي حطهم تحت دار فين سااكنة وقفو وقفتهم لمعهودة
ايمان(بغات تهرب من عينيه ) نخلييك تصبح على خير
حذيفة(حك لحيتوو بهدوء )ايمان
قلبها كيضرب على جهد حيت سكااتوو وراه شلا هضرة لي مكضنش واش غتفرح ليهاا وقالت: وي
قرب خطوة حداها تسرطات ريقها شوفتو لعباات على رجفتهاا منوو قبل مينطق قالت: كلاراا الى زدت تعطلت غيير شوية والله تغتسد علياا الباب هههه غدا نتلقااو ان شاء الله...تصبح على خيرر
مشات بجريي خلاتو واقف مغمض عينيه ساط النفس لمدة على وضعييتو حتى مشاا
هي بقات فباب دار واقفة قلبها كتحس بييه بغا يخرج من بلاصتوو نضرتوو كانت كافية تفهمها شنو بغا يقوول
طلعات فدرووج رجليها فاشليين ...حلات لباب ودخلاتت لبييت وكلارا كتنكر وكتوريها السااعة حيت تعطلات على 12 ونص لي كتسد فيها باب دار خلاتهاا كتهدر وسدات لباب تاع بيتهاا ودخلات مشعلاتش الضو كان ضو الزنقة داخل لبييت توجهات لبالكوون...مع طلات من ورا الريدو على بيتوو بان ليها الضو شعل تجنباات باش متباانش ..بان ليها كلس فطرف سرير محني وكيحك فلحيتو كانه كيفكر شوية شاف جيهة لبالكوون ..كترقبو بعييون لامعة حتى شافتو خرج لبالكون وعينيه عندها...بقات مدة واخدة راحتهاا كتشوف فييه...تنهدات مشات شعلات الضو وتكات مكمشة فراسهاا بحال شي بنت صغيرة
دازت تلت شهور على حاالهم كل واحد فيهم مشغول فخدمتوو لقائاتهم قلالو واتصالاتهم كذلك
حذيفة مابين الخدمة بنهار والخدمة بالليل باش يقد يصوڤي رااسو
و ايماان نهارها كيدوز نعااس والبااقي تدارييب والليل كيدوز فالريستوو ...عجبها لحال ...بلاصة محتارمة ...كتغني برااحتهاا باللغة لي بغات وكتلقاا اعجااب من كلشي عاطيها يوم رااحة لي هوا السبت كيكون فييه غير لبيانوو وموسيقى هادئة بلا غناء ...كترتااح فييه
كان لبرد بدا كيدخل شهر 11 على ابواب يخرج ... ولجو عاد زيان بالنسبة ليها هي كوحدة كتعشق فصل الشتاء
كالسة فبيتهاا حتى صونا تيليفونهاا بنمرتو تبسمات تلقاائيا وجاوبات وهي خارجة لبالكون حتى كتصادفو فلبالكون ديال بيتو...
ايمان: جااري خاصك الزيت هههه
حذيفة (بخ دخاان كيسمع صوتها وفنفس لوقت كايشوف فيها قدامو ) صاڤا !
ايمان: بخير ونتاا !
حذيفة: بخير ...ماخداماش اليووم ؟
ايمان: راااحة ههه
حذيفة(تقاد فلوقفة)حتى اناا ليوم عندي روپو (سكت شوية وقال) شنو بان لييك نديك لواحد لبلاصة زوينة هناا
ايمان: فيين ؟
حذيفة: بحيرة كومو بعيدة على ميلانو ب نص ساعة بتراان
ايمان: و زوينة ؟
حذيفة: زويينة خصوصا فهاد الشهورة ...نمشييو ؟
ايمان: ههه واخة ...ولكن بتراان ميشدونااش يااك ؟
حذيفة: لا غير هزي معااك لپاسپور ديالك مخفتيش
ايمان: نلبس ونهبط
مشات لماريو تشوف شنو تلبس بغات شي حاجة لي ترتاح فيهاا ...جبدات اللبسة لي عاد خدات ...أونصومبل سخون ف لبلو سيال متكون من سروال لارج و جيلي بقاميجة بيضة
لبسات سبرديلة بيضاء وصاك جمعات فييه داكشي ديالهاا رشات ريحتهاا وصايبات ميكاب خفيف وشعرهاا كان ديجا مصاوب من لبارح
خرجات نااشطة لعندو
واقف فراس الشارع عاطيها بالجنب تبسمات تلقائيا وهي كتشووف قدامها معالم الرجولة شخص مرزن ومتقل وشارب عقلوو داخلو زويين وخارجو اكثر من ذلك
لابس كويرة كحلة لكاسكيط لي عطاتوو ودجيين ...جبد ايدو كيحك فييهم وتقلب جيهتهاا لقاها واقفة كتشوفييه ...تبسم ليهاا من ديما كتحمقو ملي كتلبس هاد اللون كتباان وسطو منورة وفرحاانة...شعرها الشهب فكتاافهاا وضحكتها مزينة وجهها ...تنهد وهي كتقرب لييه وقالت: سلااام
حذيفة: علا سلامتناا
ايمان:الله اسلمك
حذيفة:مشيناا !
ايمان: وخاا ...هادي اول خرجة نبعدو على هناا
تبسم ليها وقال:ان شاء الله ماشي اللخرة
شدو الطريق ل لاگار تاع التران قطعو التيكيي وركبو جنب بعضياتهم
مع تحرك بيهم التراان كانت كتعاود لييه وهو غير كيشوفيها
ايمان: فراسك اول مرة نركب فتران هههه
حذيفة : ديما كتكون اول مرة فكلشي
جبدات التليفون كتشوف ف تصاور لبحيرة
ماشي بزاف تاع الوقت حتى وصلو الجو كان خياال ...الطبييعة ضايرة بلبحيرة حداها اوطيلات وقهاويي كلهم بنفس الديكور الايطاليي بلون المائل للابيض ...كتزيد تمشا لتحت كاين شجر و موقفيين لباطوات كيتكرااو نص ساعة كيجيب بيك دورة وسط لبحيرة كاينين پيكالات باش تجيب دورة فلبلاصة السياحيية وتاخد تصاور ...مشات من حداه كتنقز ودور على راسهاا ...كتخرج طفولتهاا المحبووسة وفرحتهاا
داخلها طفلة مزال مكبراتش تحبسات طفولتها من نهار ولات كتعرف وتعقل وتفهم لي ضاير بيها من تما وهي سجينة الجسد...ليوم كتحس براسهاا حرة ...قدرات تحقق شوية من امنيتها البسيطة انها تفيق فرحانة وتنعس مرتااحة مكاينش لي ينغص عليهاا يومها مكااينش ليي ينكد عليهاا حياتها ويلومها على اشيااء متقدرش هي تبدلهمم
تحاجة من معاناتها مناسياهاا كل مرة وشنو كيطيح فعقلها كينغصها عليهاا ولكن كترجع تشبت بلحياة وتقول انا خاصني نكون قويية اي حاجة دازت عليا خاصني نرجع لقوتيي ماشي نضعف ...تحاجة مكانت ف ايدي ...معندي ذنب فحتى حاجة وقعات لييا ...مكانش فايدي نكون بنت لحراام ...ومكانتش فنيتي تزهق روح على يدي
هزات يدها قدامهاا ...مزال المنظر فعينيهاا وخة تحاول تنسااه كتحاول يكون يومها ايجابيي ولكن فور مكيبان ليها شخص دو بشرة سمرااء كتفكر ليلتها السودااء ليي بقات منقوشة فعقلهاا ولكن مكتخليش الافكاار يدمرووها وكتردد فكل خطرة طاحت فبالها: ماشي ذنبيي كان غيق_تلنيي دافعت على راسيي وعلى شر_في
فيقها حذيفة من سهوتها وقال: نركبوو !
بسرعة تبسمات : وخة
هبطو لتحت جيهة لباطوات صغاار خلص الركبة عاونها حتى ركبات كضحك كلساات كتشوف كلس هوا حداهاا ومول لباطو القداام ...كان الجو مبرد و مضبب دخل بيهم وسط البحيرة كتستنشق ريحة الطبيعة والمااء و السكون همد خاطرهاا وسد جراحها لي فتحاات ...كان الامر كأنه علااج ليهم ساكتيين كيسمعوو صوت الماا ...وضعات ايدها فلما باارد مستمتعة بييه محساتش بديك نص ساعة امتا سالات هبطوو من تما ناشطيين توجهو لكافيي كطل على البحيرة من لفووق كانت عامرة بزز لقاو بلاصة لفووق خداو قهوة وكلسوو بجوج
حذيفة: دابا معندك فين تهربيي
ايمان(شربات من قهوتها ) علامن كنهرب
حذيفة: نسولك نتيي
ايمان: لاا مكنهربش علاش كتقول هكا ..غير تشغلناا وصافي ههه...كتعرف لپيكالا ؟
حذيفة: كنعرف ليهاا
ايمان: اشبان لييك ...نضربو ضويرة بيهاا ولي سبق يخلص العشاا هههههه
حذيفة: عنداك تبكيي فاللخر ههه
ايمان: هههه لا لا كون هانيي ...كتهدر مع لواليدة ديالك !
خذيفة: ديما كتسلم علييك
ايمان: سلم عليها... و باك ؟
حذيفة: لاا
ايمان: حاول تصالح معااه هوا كان غير كيخااف علييك مكانش ناوي شي حاجة خايبة باش تحقد علييه
حذيفة: انا محاقدش علييه ولكن كاينين شي حوايج الى فاتو لحد كيخليو بنادم يتفركع ..(بدورو سد المضووع )جيناا نهدرو غير فلحاجة الزوينة ..الخايبة خليناها وراناا
ضحكات لييه كملو قهوتهم وناضو كراو بيكالات غاديين جنب بعضياتهم فجو مرح وزويين فالرجعة جاية ساابقااه كان بدا المغرب كيوصل لحال بدا كيبرد وقفات لپيكالا فبلاصتهاا وضارت عندوو وقالت: غلبتك اصديقي ههه غتخلص العشاا وانا لي غنختاار
حط بدورو لپيكالا كيضحك وقال: غير خفتك تبكي داكشي لاش خلييتك تربحيي الزيين
تمشااو دازو من حدا قنطرة ممراتهاا ورود بالالوان كانت وريدة فلحمر مهرسة حيدهاا ومشا لناحيتها هي لي مزال مسلوبة بالاجوااء تقابل معاها كيقاد فلوردة ..خدات وقتهاا تشوف فييه بخاطرها وعينيه فلوردة...هز عينوو مع غروب الشمس لي ورااهاا ، ضو الشمش لي كتغرب من بيين ضباب كتبان مرة مرة ولون عينيه لي صفااو وزادو سلبوهاا كثر ...هز ايدوو وضع لوردة حدا ودنهاا حسات بتبووريشة شداتهاا و قلبها كتحس بييه غيخرج من بلاصتوو ...مابغاهاش تهرب من عينيه مزال وعياا يسكت...حط ايديه بجوج فوق لعود تاع القنطرة حاصرهاا وتحنا عندها شوية وقال عينيه فعينيها: فين غتهربي داباا
ايمان(بتوتر) مغنهربش ...اااه (كتبغي تهدر من كترة ما قلبها كيضرب لهدرة مقدراتش تجمعها حسات بالسخفة والخلعة وكلشي مخلط علييها ) ح حذيقة
حذيفة(مسلوب بعينيها) ايمان
ايمان: نمشيوو ! لجو بدا كيبرد
حرك راسو بلاا حيد ايدو من محاصرتها ودغيا عطاتو بالظهر يديها كيرجفو شدات فلخشب حتى تحطات على كتفها لكويرة سخوونة شكراتو ولبسااتهاا كتحاول تشوف بجنب عينيها يكماا حاضيهاا كان محني على العود حاضي معاها الغروب فصمت وهي كتسناه غير يقوليها ياله نمشييو
حذيفة: خاصنا نهدرو
جاه الصمت من جيهتهاا شدها من يدها جابها قداموو وهي مستسلمة عاضة على فمهاا نطق بهدوء : مبقيتش قادر
ايمان(برجاء ) ح حذيفة
حذيفة(قرب ليهاا خلاهاا تبنج كان نيفو قريب يلامس نيفهاا ..نفسو كضرب فوجهاا ) عييت نخبيي عييت نقول هدشي غيمشيي مع الوقت ولكن مامشاش
ايمان(هزات صباعهاا لفموو بغات تسكتوو )سكووت (بصوت راجف)
حذيفة(باس ايدها وحيدهاا ) عام وانا ساكت ماكفاكش ؟ ...دابا نتي لي غتسكتي وغتخليني نهدر...من نهار شفتك فلبحر ونتيي ساكناانيي ا ايماان ماشي قضية نهار ولا يومااين ...صورتك معمرها حيدات من باليي ...نهار لقيتك فتركياا ...حسييت بلي نتيي لي خاصااني فحيياتي ...انا ماشي انساان غيضرك علاش كتهربيي منيي ؟ عمري ضريتك هم
ايمان(برجفة فصوتهاا ) ماشي وقت هاد لهدرة عفااك
حذيفة: ايمتى وقتهاا ! ...ايماان (ب فحيح مغمض عينيه لامس نيفها مع نيفو ) القلب لي بغاك مبقاش كيسمع ليا الهدرة ...ولا كيسمع غير لييك
تنهدات كابحة دوك المشااعر و الاحاسيس المتضااربة وهوا بنفسو بدون اشاارة كيعتارف ليها بالحب ...اول مرة تحس باحساس ان لسانها فاشل يجاوب فاشلة انها تبيين رد فعل لكلااموو
خاصهاا تحبسس هاد المشاعر ودير ليهم پوز مخصهاش تغرق كتر من هكاا ..هدشي فبالها مدايمش ..هادو غير فرحة البدايات والبداية هي الزوينة فالقصة اما نهايتو معرووفة وهي مقادراش على خيبة امل وحدة اخرى
بغات تهدر وحبسها: متجاوبينيش داباا فكريي وردي علياا
ايمان(بترعيدة): ب بغييت نمشيي عييت
بعد عليهاا شوية خلاها تنفس حس بيها صفاارت و الدمعة حابساها فعينيهاا تمشات قداموو قلبهاا كيضرب حاسة براسهاا ماشي حتى لهيه ودنيهاا كيصفروو لقات الدنياا كدوور بيها من كترة مقلبهاا ضرب ...كيجيها صوت حذيفة بعييد وهوا كيقوليهاا
حذيفة(بخوف) ايماان ...ايمان مالكي
مقدراتش تسمع لكلمة الاخيرة قبل ميتقلبوو عينيهاا وطيح بيين يديه
****
دقات قلبهاا كانو تجهدو بشكل غير طبيعيي مبقاش عندها الجهد لي يوقف رجليهاا ...معرفاتش امتا حتى مالت علييه ورجليها خواو
لقات راسها فلارض وراسها فحضنوو كيضرب فحنااكهاا بشوية وصوتو كان تقييل شوية بشوية بدا كيوضااح ...شي جوج تناس مدو ليه قرعة تاع لماا رش ليهاا وجهها حتى شدات ليه ايدوو
ايمان (بخفوت) اناا بخيير
حذيفة: متاكدة !
ايمان(توكضاات شوية)بخير بغيت نمشي لدار عييت
نوضهاا داعمها من ظهرها...مسحات وجهها...بقا مدرعها بايدوو وقال: نكلسو فقهوة حتى ترتاحي
ايمان: لا لا نمشي لدار (بتبرير) مبقيتش كناكل مزياان ...غيكون غير فقر الدم رجع ليا هوا لي كيدير ليا السخفة حتى كنطييح
حذيفة: خاصك ديري شي تحليلة
حركات راسها بااه ...ركبو فطاكسي توجهو ل لاگار
حاطة راسهاا على الزاجة وهوا لقدام عاضة على فمهاا ولبكية حابساها فحلقها بغات تنفارد براسها باش تفررغ كلشي
كان غيكون اجمل اعترااف بالنسبة ليها من طرف انساان ولات كتحمااق علييه ...كلمة كنبغييك يمكن ولات كتبان قدام لمشاعر لي هازة لييه ..قليلة و مغتوصلش احساسهاا من جيهتوو ..ولكن مقادراش تكبح داك الاضطراب لي عندهاا فحياتها ...العقد و المصائب لي دازت منهم من رجل خلاتهاا متبغيش تكون صلتها بالرجال قريبة ...قلبها غدرهاا فلحظات ضعفهاا وتملكوو رجل
كتجر دموعها بصبااعها مبغاهمش يزيدو يهبطوو حيت مغيحبسووش فلحظة ...غيتكشف حبهاا ومغتقدرش تبعد مزاال
جبدات كلينيكس مسحاات دموعهاا كتنش على راسهاا ...غافلة علييه هوا لي متبعها من لمرااية ...متبع كل دمعة نازلة من عينيهاا خلاتوو يدخل فدوامة التفكير ويعرف جوابها قبل متنطقوو ...مكانش كيظن بلي الامور غتكون نهايتهاا هكاا ...اعترافو بالحب وردة الفعل ديالهاا خلاتوو سااكت مقادر يخرج كلمة وحدة ...شنو غيكون عندها؟ ...شكون يكون وصلها لهاد الحالة ...واش كتبغيي شي حد...واش ظلمها شي حد
بزااف ديال علامات الاستفهاام تشكلات فصورة ايمان بالنسبة لييه ...كان عارف بلي وراا هاد لعينين لي كيحمقووه قصة طويلة ولكن عمرو ظن يكوون ردهاا هكا على الاعترااف ديالوو
هبطو من الطاكسي معقبش بتاتا على عينيها الحمريين توجهو لتراان تسنااوه حتى جاا مشا جاب ليهاا قرعة تاع لماا وشكلاط يحيد ليها السخفة شداتوو بابتساامة كتعكس جرحهاا وقالت: شكرا
اومئ ليها براسوو وحل القرعة ديالو شرب منهاا صونا تيليفونها وجبداتوو لقات نمرة يوسف طالعة جاوباتوو فلبلاصة يخرجها من دائرة الصمت وقالت: الوو ويي
يوسف : بيانكيتاا ...راكي مسالية
ايمان: حم علاش
يوسف: بغيتك تجي عندي دابااا الى ممكن
ايمان: انا بعيدة على تما بشي نص ساعة غير نوصل نجيي
يوسف: ؤك متعطلييش
قطعات مععاه وقالت: هدا يوسف معرفتش شنو بغاا (تبسمات ليه بتوتر لقاتو كيشوف فيها بهدوء حيت كلس مقابل معاها )
حذيفة(تحنا حداهاا كيلعب بلقرعة ) : حمم ..ايمان واش خاصني نعرف شي حاجة ؟
ايمان: لاا
حذيفة(باصرار ) غنتسناا جواابك ..متبقايش تهربيي
تنهدات كتشووف ..تلهات بتيليفونهاا وحتى هوا طمر ...مرة مرة يهز عينو فيهاا حتى تهزهم فييه ويبقا يشووف فيهاا
وصلوو لميلان خدا ليهاا طاكسي مشاات نيشان لريستوو شدات فقلبها من بعدما ودعاتوو مسحات على وجهها كتسووط
وصلات لريستوو هبطات لتحت مشات لبيرو ديال يوسف دقات ودخلاات لقاتو كالس هز فيها عينوو وقال: تعطلتيي
ايمان: سمحلياا
طلعها وهبطها كيضحك :ايمان شنو هاد اللبس
ايمان(شافت فراسها): علااش مالو
يوسف(وقف جاي عندها) :فكرتيني فاللبسة الموحدة فالابتدائي هههههه ...نتيي مبقيتيش ديال هاد لحوايج (هز شعرها )نتي انسانة نااضجة ومع الوقت اتولي مشهوورة ...خاصك تعرفي شنو تلبسيي ...صالير مكافيكش ؟ باش تشري ماركة زوينة
ايمان: لاا مكافينيش
يوسف:( ضحك وكلس فوق لبيرو ) وخة وخة نزيدك فالصاليير ...شنو الصالير لي يكفااك
ايمان؛ صالير لي نقدر نخلص بييه لكراا و نشري بييه لماركات لي بغيتي
يوسف(شعل كارو كيضحك) : غنهنييك من لكراا (لاح ليها سوارت شداتهم ) هادي ابارطمون فسونتر ...مجهزة و مفرشة دخلي غير نتيي
ايمان (كتشوف ف سوارت كترمش ): علااش ...زعمة علاش غتعطيني دار
يوسف: باش تقادي وريقاتك خاصك تكوني ساكنة وخدامة يعني مستااقرة ... واش غتكوني فنااانة مشهوورة فريستو لا لونااا وتسكني فبييت مشروك مع شارفة
ايمان(ضحكات كدور فراسهاا وكلساات
يوسف: دابا خلينا فلمعقوول ...ضبرت لييك على اشهاار زويين
ايمان: اشمن اشهاار ؟
يوسف(توجه لبيرو ديالو هز كارطونة بيضة موسطة ) اولاا كيف قلت لييك فتحت لييك كونط انستاغرام ب اسم (ima bianca )
مد ليها لكرطونة واقف عند راسهاا شداتها بان ليها تيليفون اخر مكااين
يوسف: غيخصك تبقاي تااخدي تصاور فبلايص زويينة وبحوايج زويينة ...حوايج يبيينووك نتيي ماشي حوايج الابتدائي ...يكون الرقي ااه غتمشي لبوتيك ديال لوناا غتبقا تعطييك لحوايج غتصوري بيهم غاديري ليها اشهار وفنفس الوقت حتى هي غدير ليك اشهار بلكونط ديال لبوتيك فهمتي !
ايمان؛ فهمت
يوسف:هادي اول خطوة لطريق الاضواء (تبسم ليها)
ايمان: قلتي لياا اشهار
يوسف: سيي اول اشهار غيكون ل لونا ...اه غيبقا يجي مصور خاص غياخد ليك فيديو بروفيسيونيل غتبقاي تحطيه عنده فلبااج...خاصنا نشهروك و بأي طريقة...كتيقي بياا ؟
ايمان(حركات راسها باه ) اه
يوسف(بترقب )غيولي اسمك كيتقارن باشهر لفنانة غير خاصك تيقي بياا
ايمان(تبسمات ليه ) واش نقدر نمشي
يوسف: غتمشي لعند لونا تختاري حوايج مناسبينك ...كلشي على حسابي ومن بعد تحولي لدار على راحتك
ايمان: غير يكمل هد شهر عاد خلصتو
ضحك وقال: باقة كتهزي الهم ل 150 اورو ازوينة قريب غتولي تلعبي بلملااين
خرجات من عندوو كتحرك فراسهاا ...كيجيها كيحلم بزااف ولا غير هي لي فقدات الامل انها تفرح وتوصل ولا هوا لي زايد نغزة فالتوقعات
تمشات بوحدها لمدة طويلة معندهاش لخاطر تشوف لحوايج شدات طاكسي لدار هزات عينيها فشومبر تاع حذيفة كانت مسدودة طلعات لداار ولحال مظلم ماتعشااتش حاسة بسخفة الجووع وسخفة القلب ..دخلات لبيت كلساات بتعب على السرير حيدات الجيليي وحلات القمييجة كتفكر قربوو ليهاا وكلامو الحنين معاهاا ...اعتراف الحب لي خلاا قلبها غيسكت عمرها حساات هكاا ومتاكدة عمر هد الاحساس اتعيشو مع شي حد الذكرى الاولى كتبقاا راسخة فلبال ... ناضت تعتق راسها وتااكل طيبات نودلز خدات فرشييط جرات الطبلة لحدا السرير صغيرة وكلسات كتااكل والعقل مرفووع
هزات عينيهاا لساروت و تيليفون وكدور راسها جيهة لبالكون كتلقا الضو طافي ...هبطات راسها بحزن ...معندها لمن تشكي ولا تاخد نصيحة ...حتى نجااة حاليا مع راجلها وبنتهاا مبغاتش تزيد عليهاا و ماتقدرش تشاور معاها فموضوع بحال هدا كيخصها بوحدها تاخد القرار لي غتمشي علييه منهنا لقدام..
دوزت ليلة بيضاء من جديد نعاس حلف يزورهاا عقلها غيطرطق بالافكاار ...متكية فبلاصتهاا كتنهد حتى بدا الصباح كيطلع عاد حساات بنعااس وغفاات ... مفاقت غير على صوت صداع البنات فلكولوار ...حلات عينيهاا وبقات فبلاصتها شافت الساعة لقات 11 ملقات لا ميساج لا والوو
ساطت وتقلبات على ظهرها ...هزات التيليفون الجديد حلاتو وتبسماات كان زويين كبيير و بلونها المفضل الازرق...ركبات نمرتها ولكارط ميموار لي جامعة فيها تصاور دكرياتها الزوينة مع نعييمة فكل مكتبغي تنعس كيخصها دوزهم قدام عينيها بحال شي فلم ...لقاتو ديجا مأنسطالي فييه كلشي انسطا وفيس و واتساب
دخلات لكونط ديالهاا لفيس لقات ديجا انسطا مقادة ..هزات حاجبهاا وهي كدخل على صفحتهاا لقات لكونط طاالع ...ولايح فييه تصاور ليي ضربات بلكاميرا فنهار اللول ...شي لقطات من غنااءهاا ..بقات غير كترمش كانت كل تصويرة واصلة ل الف جادوغ والتعالييق قلال
ناضت غسلاتو جمعات لبييت وبدلات عليها بقات واقفة قدام لماريو تشوف شنو تلبس ...عاضة على فمها بغات تبدل ستيل حوايجهاا مرضاتش ملي يوسف ضحك ليها على حوايجها نعتهم بزي الموحد للابتدائي ...لقات غير سورفيت خفيفة قدامها لقببية قصيرة والسروال طالع شوية مجموعة من لتحت لبسات معاها سبرديلة خلات شعرها مهمل على رااحتو هزات صاكهاا وخرجات والوجهة عند لوناا
**
الاخير واقف فلكوزينة كيقطع فلحووت وحجبانو مݣرونين عقلوو خدام كتر من ايدوو
كيتفكر لبكا ديالها فطاكسي حالتها ورا الاعترااف ...تصرفاتهاا بحالا اعتارف ليها بخيانتو ليها ماشي حبوو...طريقتهاا ضراتو فدماغوو ...والحد الساعة مزال مجاوباتو معطاتو راس الخييط لي يخلييه يتنفس ويرتاح
جات حداه لمساعدة جديدة كتحاول تعلم منو حتى هوا
_ انا صعيب عليا نقطع بهاد الطريقة ههه نتا دغياا
حذيفة:مع الوقت غتعلمي ...تحاجة مكتجي دقة
_وخة تعلمنيي ...ولا غادي يجرييو عليا قبل مانسالي السطااج ههه
جبد ستييك ديال لحوت الغرض هوا يحيد العظام وتبقا غير لهبرة باش يسوطيهاا
مد ليها لموس وامرها باش تحط الايد التانية فوق ستييك وتحاول تلقا لفراغ بين العظم و لحم باش تقطع مقاد ولكن عواجت وجرات معاها حتى لحم...شد من عندها لمووس وهي كطل علييه وتبسم
_ غتمشي نيشاان هكا بشوية ...شفتي العظم كتمشي من تحت منوو حتى اللخر
_اه صافي غنجرب
جبد ليها ستيك وحدة خراا دارت شنوو قال بلحرف حتى صايباتهاا ...والشااف ديالهم كان دايز من وراهم و وقف كيسمع وكيشووف الاحترافية لي مكيوصلوش ليها بسااهل
_لاميين
ضار حذيفة لعندو بابتساامة وقال: هولا
_من بعد الخدمة بغيت نكلس انا ويااك ونهدر معااك
حذيفة: شي مشكييل
_نوو نووو كمل خدمتك
مشا وخلاه واقف ...شاف تفكيرو ناقص زاادوو تفكير اخور يطرطق لييه الرااس
**
دخلات لبوتييك كبيير ..عاامر حوايج ...عينيها شعلو فيهم لقلووبة وهي كتشووف عاضة على فمها تجات عندها لمساعدة : باش نقدر نعاونك ؟
ايمان: جيت عند لوناا
_ انعيط ليها دقيقة وهي معااك
هي مشات وايمان هزات كسوة من توب سخون شوية قصييرة وفلون لبيج حمقاتهاا ...حتى سمعات طالون لونا فلكولوار ودورات راسها بابتساامة...كمية الانااقة والرشااقة مهلية فراسهاا معلوم لفلوس كي شتاا عليهاا...بنت عائلة إيطاليا عريقة قبل ميموت باها خلا ليها الجمل بما حمل ..هناا كتلقاه معندو والو والد فرقة كيموت كيخليهم مضاربيين على صينية
لونا: اهلاا وسهلاا اش خبارك
سلمات عليها بلايد فقط بابتسامة قالت:لبااس ونتي
لونا:لبااس ... لقيتي شنو عجبك
ايمان:ياله كنقلب هههه
لونا: المهيم ختاري شنو خاصك وحدة من لبنات تعاونك ابخيي غنمشييو لفيلا ديري شوتيينك ديال التشكيلة الجديدة تاع لي غوب لي غتبقاي تلبسي فلي صواغي
ايمان:وخة (تبسمات ليها ومشات رجعات هي كتشوف فلحوايج )مممم نشوفو هد الدوق زويين
خدات علاش مقداات سروال صايات مونطوات قوامج
وتيشورتات اي حاجة حمقاتها هزااتهاا فالاخير حطات ليها لفاكتورة شافتهاا ايمان وخرجو عينيهاا فلبلاصة صونات ليووسف مدة باش جاوبها وقال: ايمان اش كاين
ايمان: واش هدشي غنخلصوو اناا
يوسف: راه قلت ليك تقدااي لي خااصك وصافي
ايمان: يكما غاتحيدو لياا من فلوس الشهر
ضحك بجهد وقال: كوني هانيية لونا غتسيفط ليا لفاكتير انا نخلصهاا ميهمش شحال
هزات حجبانها وقالت ؛وخة
رجعات لفاكتير حطاتها حتى جاية لونا هازة صاكهاا مشافتش شحال خدات وقالت: رسلوو لفاكتير ل ريستوو (شافت فايمان كدير النظاظر وتبسمات )بصحة ...لوكاااس هز هدشي لطموبيل
تقدم الشاب لي واقف فلباب هز عرام تاع صاشيات لحوايج وصبابط وصيكان بردات غدايدها فلحوايج جاتها حاجة فابور ساهلة لي عجباتها كتهزها بلا متشوف التمن
تبعاات لونا لطموبييل شهقاات ايماان باعجااب وهي كتشوف فطموبيل كتشعل كبيرة وبشيفوور
ايمان (برجاء)ياااربي سهل عليا حتى انا يااربي
ضارت عندها لونا : شي كوزا ! (شنو)
ايمان :نينتي (والو)
ركبات اللور وركبات حداها لوناا اول منطالق الشيفور قالت: اااه نسييت عطينيي نمرة لاميين محتجاه ؟
ايمان(باستغراب)لا لاميين ؟ شكون
لونا: الشااب لي كيدير لكاسكييط وكيلبس لكحل بزااف
ايمان: ااه حذيفة ....(بتساؤل )علاش بغيتي نمرتو ؟
لونا(كتشوف قدامها ) مكرهتش نعرفو على صاحبتي هههه وفنفس الوقت بغيتو يكون عارض لمجموعة رجالية ديال لحوايج، غيقبل !
ايمان: مفهمتش كيفاش تعرفييه على صااحبتك ؟
لونا: صاحبتي عاد خرجات من علااقة فااشلة وبغيتهاا تعرف علييه ...الصراحة كون ما كنت مزوجة كنت نطير بييه بحالو مكيتعوضش
كتشوفيها بمعنى منيتك كيفاش نطير بيه نطقات بلا متحس وقالت: لاا مع الاسف متقدريش تعرفييه ب صاحبتك
لونا:علاش !
ايمان(شافت قدامها بغيرة ) كيبغيني (بتلعتم)وكنبغييه ...مبايناش فييه كيبغيني (شافت فيهاا )
لونا:ههههههه واش مزال شي حد كيتيق فحب رجال (ضحكاات )راك غالطة هههه
ايمان(شافت فيها ودورات راسها لجيهت زاج كتهدر فنفسها
لونا:شنو قلتي لياا سميتوو من غير لامين
ايمان:حذيفة
لوناا: هههه شنو هد الاسم العجيب
ايمان: اسم عربيي داكشي باش جاك صعيب
لونا: بحال يوسااف
ضحكات ايمان وقالت: الله اسمح ليك
لونا: شنو
ايمان: كيجيك الاسم صعييب ...كتعرفي كلمات بلعربية !
لوناا :لااا
ايمان:زعمة يوسف مغربي
ضحكات لونا وقالت: مغربي غير من اسم الاب ...اما جوزيف عمرو مشا لمغرب ولا تلاقا بعائلتوو المغربية
ايمان؛ علاش
لونا:تبقا بيناتنا ...الصراحة كتباني صديقة وفيية ... اب جوزيف جا لايطالي من زمان ...بحالك
ايمان:حارݣ
حركات راسها باه وكملات : مدارش لوراق لمدة طويلة ...وتلاقا مع ام جو ...كبيرة علييه ولبااس عليهاا ميحسابش لييه غتحمل على 45 عام هههه غير دار لورااق وهوا يهرب
ايمان: ومبقاش رجع
لونا: نوو
ايمان:وماماه باقة عايشة ؟
لونا: ماتت العام لي فات على 84 عام
ايمان: اووه الله ارحمها (كتقول فراسها. واش خاصني نترحم علييها ) سلماات ؟
لوناا: نووو مكنظنش
سكتات من بعدما دخلو لشارع بديور شكلهم تقول قصر ...دخلو بالطموبيل لداخل جردة كبييرة هبطات ايمان مبهورة بالمنظر و بالشكل الكلاسيكي ديال لفيلا كتبان من الطراز الايطالي القدييم طلعو دريجات تابعة لونا الباب الرئيسي ديال الفيلا حلو عليها الخادمات لي من شكلهم باينين اجنبيين على ايطالياا من شكل عينيهم وجههم كتعرف انهم من اصل آسيوي بلباس موحد فلابيض
موسيقى ايطالية فارجاء لفيلا لداخل دار عامررة طابلوات و مجسماات كأنك داخل لمتحف للاثاار نحت ديال شخص مغطي فقط مصو بايزار كيفما فالنحت الروماني ...بقات غير كتشووف شافت لوناا مشاات لفيترينا كبيرة فيها عرام تاع لقرااعي كبات ليهاا كااس وشافت فايمان: شنو كتفضلي ! بارولوو ولا بارباريسكو اسيلي
ملسات فلكرسيي كترمش فيها : شنو هادو ؟ شرااب
لونا: مكتشربيش هههه عجيب
ايمان:لااا (بالعربية ) الله انجيني
لونا (مدات ليها الكاس ) دوقي ...النبيد الفاخر ماشيي الروج
ايمان(بتوتر ) لا لا مكنشربش
ضحكات كلسات فلكرسي لمقابل ليها حركات لكاس وشماتو عاد شربات: اول مرة شربت كان فعمري مممم 16 ...كنت كنشرب بتخبية على بابا ولكن غير وصلت ل 18 وليت كنشرب انا ويااه هههه
تبسمات ايمان ملقات متقول غير كتشوف فديكور حتى حطات ليهاا المساعدة قدامها طاس تاع القهوة شكراتهاا وهزات شربات منوو
من بعدما شربات قهوتهاا جا المصور و لبنت لي غدير ليها لميكاب دارت ليها ميكااب كثيف بدل ملامحهاا وسمرهاا شوية على لونها الطبيعيي باش يظهر لون عيونهاا ويتماشا مع الفستان لي كان فلبيج لااصق على طايتهاا كان توب رغم انه منبت الا انه شفاف من غير منطقة الصدر والمؤخرة لي كانت بتوب اغمق من لداخل بنفس لون اللحم من البعيد كيبان كلو شفاف ... قادو مكان التصوير فالجردة كل مرة المصور يوريها بووز جرييئ يبيين زينها والفستان حتى هواا. ...لبست ما يقارب 4 رغم لبرد وكانو شوية عريانين وخفاف ولكن استمتعاات بداك لجو وحاسة انها بدات كدير خطوة لقداام
نهارها ولا كيدووز عامر ماسالات التصوير حتى كان وقت لخدمة وصل كلات فالطريق ومشاات لريستوو دخلات صاشياتها لبييت و مشات كدرب ...
كانت شادة تيليفون ومترددة واش تسول فيه ولا تخلي الامور كيفما هي حطات التيليفون وطلعات تغني وهوا مكاينش ليه الاثر
فشومبر ديالوو كالس كيقلب فتيليفون ديالو على معاهد التصميم او شركات يقدر يجرب حظو فيهم حتى دخل عليه طارق وقال: حذيفة مامشيتيش ؟
حذيفة(عينيه فالتيليفون )فيين
طارق(كيحط فلكاميرا ) ل عند ايماان
حذيفة: شفتيها اليووم !
طارق:الصراحة لاا علاش
حذيفة: مبغيتش نبرزطهاا خدامة
طارق: مناقشيين ؟ مولف كتمشي لعندها !
حذيفة(حك جبهتو ) لا مكاين والوو غير بعدت وصافيي ...شنو درتيي نتاا الخدمة مزيان
طارق: صافا اخوياا مسلكيين
حذيفة: الشاف لكبير لي فالرسيطو
طارق: مالو ؟
حذيفة: قال ليا غيحل الريستو ديالو وبغاني نكون فيها
طارق(بفرحة )وهادي خبار زوينة اصااحبيي علاش كتقولها ونتا معاجبكش لحال
حذيفة: طارق كون بغيت هد الدومين كنت نبقا فبلاديي
طارق: علاه نفس الصاليير ااصحبي
حذيفة(كيحك فشعرو ) معرفتش لبلان كيفاش ...
طارق: نتا مالك داباا عطاك الله جوج صنعات وبجوجهم كيموتو عليهم الطاليان كرشهم وحوايجهم ... بدا بعداا فريستو جمع الصرف الدومين لي بااغي نتاا راه خاصو فلوس،
حذيفة: و فلوس نيييت
طارق: متنسااش لكريديات لي مزال علييك منين غتردهم الى مستاقريتيش فهاد الخدمة
حذيفة: تخدم معاياا ؟
طارق: نخدم مع عشيري غير دير ليا صالير زويين
حذيفة: الريستو مخليها ليا باا
طارق: نتا راه مزهاار
حذيفة: مبعاار نوض فحالك نووض ...خليني نفكر
طارق: ااه مقلتش ليك ...ليوم كان عند ايمان شوتينݣ مع مرات داك يوسف
حذيفة: باش عرفتيها
طارق:واش نسيتي بلي خدمت مع داك المصور
حذيفة: مامشيتيش نتاا
طارق: لاا عطاني شي خدمة نديرهاا
حرك حذيفة راسو بالايجاب وسكت
مكفاهش التفكير فلبيت خرج على براا مراقب الطريق واقف طرونكيل كيكميي شاف ساعتو لقاها الطناش ونص هدا هوا الوقت لي خاص ايمان دخل فييه
بانت لييه طموبيل من نوع مرسيدس كبيرة وقفات قدام باب العمارة هبط منها راجل وحل لباب اللوراني ...هاز فايديه عرام تاع الصاشيات عاد هبطات ايماان ...شداتهم من عندو وشكراتوو
االاخير كيشووف عاض على صبعوو وشاد لكاروو متبعها بعينيه حتى طلعات... بعد لمسافة البسيطة من بعدما طلعات وتقابل مع لبالكون ديالهاا كيشوف واش دخلات كيكمل داك لكاارو ومرة مرة يحك جبهتوو ..كيطلع عينو لبالكون كيلقا الضو مشعلش ...بقا كيتسناا حتى سالااه زطم عليه حتى طفااه وهزو رماه فزبل حداه وتوجه لعمارة فين كاينة
ايمان طالعة بجري فدروج حيت اليوم تعطلاات مشاات تحل الباب لقاات الساروت كاين فلباب بدات كدق على كارلا حتى جاوباتهاا وقالت: شنو بغيتي
ايمان: بغيت ندخل
كارلا: مشاا الحاال درت مع 12 كنسد داار
ايمان: اويلي واش هادي حمااقت (بالايطالي) واش نبات فالزنقة كاارلاا
وقفات مصدومة فقصاتهاا كلساات فدرووج على وعدهاا حداها صيكانها حتى شافت الضو شعل فدروج هزات عينيهاا وبان ليهاا حذيفة ناضت قافزة شافيها باستفسار وقال: اش كديري هناا
ابمان: الشارفة مخلاتنيش ندخل
حذيفة: تعطلتي
ايمان: مولفة كتجي حتى لهنا ونتعشاا ولكن اليوم عييت كلست تعشييت تماا وتعطلت وسدات عليا الباب هد خيتي (كلسات كتسوط هزات عينيها فييه ) مشفتكش اليوم
حذيفة (كلس حداها فدروج وميل راسو لعندها ) الخدمة ...قالياا طارق كان عندك شي شوتينݣ
ايمان:ااه مع لوناا سولات فييك علاش قالت لياا لامين
حذيفة: ديما واحلين فسميتي كنضطر نعطيهم كنيتي نيشاان
ايمان: كنيتك لاميين
حذيفة: أيت لامين
ايمان: حذيفة ايت لاميين ...علاش سواسة كتكون كنيتهم كتبدا بايت بزاف
حذيفة: العرب بزاف كتبدا كنيتهم ب بن فلاان
ايمان: كتعرف لسوسية احذيفة !
تاوب كيحرك راسو بالايجااب وقال: معلووم راه اصليي هداك
تبسمات لييه وقالت: ودابا شوف لييك هادي غاتخليني نبات فالدرووج وفيا لموت ديال العياا
ايمان: عندك انستاغرام
حذيفة: لاا علاش
ايمان: ديرو وبقا تحط فيه حتى نتا داكشي لي غتصمم
حذيفة:وخة عطيني لكونط ديالك ملي نديرو نقولها ليك
صور من تيليفونها وقال: شريتيه ؟
ايمان: عطاه لياا يوسف باش نبقا نصور
حذيفة(بقا كيشوف فالتيلون كيعض ف فمو مبرد فييه الفقصة ) سخيي بلا قيااس (شاف فعينيها )ونتي نية تفات القيااس ازعيبيلة
سكاات وقع بيناتهم ضو كيشعل وكيطفاا بفعل الحركة حتى قالت: نووض سير تنعس ههه انا غنتسناهاا تاتحل
حذيفة(وقف دق عليها) الضو راه شاعل
ايمان :غيكون ديال التلفازة مكطفيهااش
حذيفة: شنو سميتهاا كارلاا (حركات ليه راسها باه وبدا كيدق ) كاارلاا ...كارلا
مجاوباتوش وجا كلس حدا ايماان كضحك وقالت: نشراتنا هناا
حذيفة(شاف جيهتهاا بحب )نعسنا وسط الغابة ..بغاو يخلعونا الدرووج
تبسمات ليه وقالت: هوما لي بقااو ليناا
شافتو سكت ودورات راسهاا عندو لقاتوو متبعهاا كيشوف فتفاصيل وجهها بهدوء بطراف صباعو بعد شعر على عينيهاا حاجب علييها رؤية وجههااا...تبسم لييها بلطف وهي حاسة بانجداب لجيهتوو وقلبهاا غيوقف نطق بصوت خافت وصبعو على حنكهاا كأنه كيبنجها شوية بشوية :مزال مغتجاوبيني ؟
سرطات ريقهاا وقالت بتوتر: ف فاش
..تفاصيلو قريب وحاسة بييه كيزيد يقرب حتى ولا صدرها كيطلع ويهبط حط ايدو على عنقها منتااشي بقربهاا حتى مبقااش كيفكر عقلوو وقف وتابع قلبو لي باغي قربها تنفس نفسها لثواني باغي يرويي عطشوو بقبلة من شفايفهاا ...حس بيهاا منتااشية معااه ...تغمضت عيونهم مستاعدين يتدوقوو ريق شفايفهم
..نقدات راسها فدقيقة اللخرة قبل مضعف
مسح على وجهوو حتى سمع كارلا كتقوول:هولااا
جمعات صيكانها ايدها كيترعدو دخلات من وراها كتعكل بييهم خلات كارلا كتنكر بلي اخر مرة تعطل ...تبسماات وهي كترجع عند حذيفة تلغات باتسامتها ملي لقات بلاصتو خاوية ...بدات كتقلب علييه فدرووج حتى سمعات باب لعمارة تسد ودلات شفايفها بحزن وقالت: ااااه تفليتو علياا
سدات ايمان لباب بالساروت يديها كيترعدو وقلبها غيسكت رجليها فشلو عليها هبطاات على لباب حاطة ايدها على فمهاا مغمضة عينيهاا كتفكر نفسو وريحتوو لي لصقات فنيفهاا ...كيفاش براسهاا كانت غضعف لييه
ايمان: كلهم كيبداوهاا هكاا ...وانا كيلحماارة ضعفت قداامو
شعلات الضو كتحيد حوايجها بزعفة كتفكر قربو وكتبدا ضرب فجبهتها باش تحيد الصورة من بالهاا ولكن والوو كانها باقة بجنبو وحاسة بحرارة اللحظة
نعساات فبلاصتهاا كتنهد ..حتى وصلها مسااج فتيليفونها طلع ليها اسم حذيفة وبدا قلبها كيضرب مقدراتش تحل الميساج وتقرااه
بقات متجنبة تقرااه ولكن فالاخير زعمات حلات لميساج لقاتو كاتب ليها * غدا غنتسنااك مع 11 مخدامش نهدرو *
مجاوباتوش حطات تيليفون وتكاات ونعااس مزارهاش وخة كانت كتموت بلعياا شنو غتقولييه كتكون موجدة هدرة غير كتشوفو كلشي كيتلف لييهاا
بقات كالسة فبلاصتهاا طافية الضو ولكن لبيت مضوي بضو تاع الزنقة وصداع لهرااج مكيخليش لواحد ينعس ...ربعات فوق السرير هازة السوارت دار لي عطاهاا يوسف كتلعب بييهم
ما تغمضو عينيها حتى بدات الدنياا كتخوا ضرباتها لفيقة بكريي بالضو تقلبات كتسووط مع حلات عينيها رجع دماغها لتفكير
ناضت بلعكز جمعات بيتهاا خرجات قضات روتينها ورجعات تلبس ..بقاو هكاك الصاشيات بدات كتقلب فيهم حتى جبدات اش تلبس
خرجات من الدار بكامل اناقتها لابسة ليبة موس سوداء ولكن كتبيين وجيب ديال جلد قصييرة مع تيشورت باج بصدافي عريض شوية ...لابسة بوط قصير و دايرة صااكهاا ...وقفات فباب لعمارة كتنهد كتشوف سماا فيها ضباب وشتاا كتنقط ... مشات فطرات والخلعة شداها من المعدة ...خدات طاكسي لساحة جرات كمام تريكو على ايدها لي بردو هبطات هازة تيليفونهاا سيفطات ليه ميساج بليي كتسناه فقهوة لانوو شتاا بدات كتجهد ولحال بارد
دخلات لداخل كان داافئ وموسيقى كلاسيكية خدامة خدات كاس تاع لقهوة وكلساات مقابلة مع طريق وشتا كضرب فزاج حداها مُصِرْ الجو يبكيي معاهاا ...علاش دائما اصعب لحظاتها كيكونو مصاحبيين لهاد لجو من طفولتها وهي كتعقل على راسها كطل من سرجم عينيها كيبكييو وشتاا كتونسهاا ...عرفات من نعيمة ان ولادتها كانت فشتاا ...موت جدها وسندها الاول كان فشتاا ونعيمة كدالك ...جراو علييهاا فشتاا
مسحات دمعتهاا دغياا وشافت قبالتها حتى بان ليهاا جايي داير طاكية على شعرو لابس تريكو بيض صوفيي وفوقو كويرة سوداء وتجيين اسود .. زيرات على لكااس بايديها لحمريين بلبرد متشبتة بيه باش متبانش ترعيدة فايديها ...خرج ايدو من جيااب ملي شافهاا وتوجه لجيهتهاا شافت فيه بابتساامة باهتة كل مرة ترجع شعرها ورا ودنها دليل على توترهاا
حذيفة:صباح الخير (شافها شنو لابسة من البعييد ) مجاكش البرد !
ايمان: صباح الخير ...لا
هز حجباانوو حيد لكويرة حطها فلكرسي وكلس قبالتهاا طلب قهوة كحلة وحيد طاكية قاد شعرو اللور ونحنح : كيصبحتي مزيان
ايمان: مزيان ونتاا !
حذيفة: على حسب ...شوية السخفة ؟
ايمان: شوية غنمشي هد الايام ندير التحاليل
حرك راسو باه كيشكر السرباي من بعدما حط ليه القهوة شرب منهاا شوي مكمش عينيه فزااج كيشوف فناس كتجري فشتاا
حذيفة: ايمان ! تدوي ولا ندوي ولا نبقاو ساكتيين شنو بغيتي
ايمان: شنو بغيتي
حذيفة: كيفاش شنو بغييت ...قلت لييك شنو عنديي دابا كنتسناك نتيي تقولي ليا شنو عندك
ايمان: معندي والوو
حذيفة(حك عينيه )ايمان مغانبقاوش نهدرو بالالغااز ...شرحت لييك وبينت لييك بليي نتي بالنسبة لياا انسانة ماشي عادية
ايمان: حتى نتا هكاك بالنسبة لياا
حذيفة: ولكن تصرفاتك كيبينو العكس
تحت الطبلة كانو ظفارها قربو يتقبو راحة يدها من كترة مازيرات عليهم :حم
حذيفة: ايمان غنقولها ليك لآخر مرة ..هدشي لي بيناتنا بغييت تكون عندو سمية ...
ايمان: ضروري تكون عندو علاش شنوو غيتزاد على داباا؟ ضروري نكونو مصااحبيين باش نتسماو كنبغييو بعضيااتناا
حذيفة(كيدور فكاسو ) شكون دكر لمصاحبة داباا ...نتيي مبغاش تعتارفي حتى بشنو كتحسي من جيهتي علاش هدشيي كلوو ...واش كاين شي حاجة خاصني نعرفهاا ...ف حياتك شي واحد
ايمان: لاا قبلك ولا بعدك غيكون شي حد و مامستاعداش حتى داباا يكون شي حد ...اه احذيفة انا كنبغييك ولكن ماشي بداك الحب ليي بغيتي نتاا ...انا...اناا شفت فييك خوياا
إيمان : انا شفت فييك خوياا شفت فييك التيقة لي مكنتيقها فتوااحد ولكن ولكن نتاا باغي كتر ... انا باغة هدشي لي بيناتنا يبقا هكاا زويين مبغاش تخسر علاقتناا بمواضيع الحب والمصااحبة الغيرة ...خليناا هكا
حذيفة: كتقارنيني بشي حد ا ايمان ؟
ايمان: معنديش ومكانش فحياتي شي حد يتقارن بييك ...نتاا نتاا خاصك شي بنت متكونش شابعة عقد بحالي ...انا راه مستحييل نعيش معااك داكشي لي بغيتي
حذيفة: لي بغييت...شنو بغييت عرفتيني اشنو بغييت
ايمان: لبارح كنتي باغي تبوسني ...غدا طلب مني حاجة خر
حذيفة(قبل ماتكمل قرب ليها واضع صبعو على فموو بتحذير باش تسكت ) تزيدي كلمة وحدة غنقلب عليك هاد الطبلة
بقات كتشوفييه خلعهاا ورجعات اللور...رجع تقاد فبلاصتوو ساكت كيشرب قهوتوو
ايمان:ح
حذيفة(حمر فيهاا)راه قلت لييك سكتيي ..صافي سالات الهضرة وسالا هاد الموضوع
بقات كترمش فييه دموعها تحجرو فعينيهاا وهي كتشوف راسها ضيعاتو ولكن راه مقادرااش ...مقادراش تعيش عاديي مبغاش تزيد تعلق بييه باش متكونش نهايتهاا مؤلمة ...سالا داك لكااس خبطو بالزعفة جبد االصرف حطوو فوق الطبلة ونااض ...هز طاكية دارها وهز تجاكيط مهضرهاش مزال حتى قرب يخرج ورجع لاح عليهاا لكويرة بدون اراادة تعرضات ليها لتجي فوجهها وقال: لبسيها راه كاين البرد أ ختي
بقات غير كتشوفيهه حتى مشاا هبطو دموعهاا وهي حاضنة تجاكيط ديالو كتشهق ...
علاش مقادراش تعييش عادي بحال كاع البناات ...رمات عينيها لطبلة قداامها بنت و ولد فريعان الشباب ماشبكيين ايديهم وكيضحكو ...هبطات عينيها وهبطو دمعات شاقين طريقهم ...جبدات كلينيكس مسحاات وجهها ..ناضت هزات لكويرة خلات الصرف فوق الطبلة وخرجات مع ضرب فيها لبرد حسات برعشة ولبرودة كضرب فوجهها لبسات لكويرة كتنخصص
ايمان:هء هء حيااتي عداااب عداااب تفووو
بقات غادية فديك الشتاا حتى لريسطو
دخلات لبييت لي كان سخوون نشفات شعرها بسوشوار تماا وكلساات كترتااح
من وراهاا حطات لكويرة ومشاات ل مسرح مكانوش الدراري حيت كان باقي لحال هزات غير لميكروو نفاردات براسها وسط ضو خفيف كتغني باحساس عاليي ..
ايمان (دموعها مفزكيين شفارهاا تنهدات مغمضة عينيها ) موجوووع ݣلبي والتعب بياا
من اواابع على رووحي ،ينكسر قلبي علياا
تعبااان وجهي (سكتات كابحة دموعهاا ساطت مكملة ) ودمووعي قهرتني
دنيا شلت حال حاليي ،وفي حياتي كرهتني
كرهت الحب ، ما ريده دمرنيي
طيب اني وادري طيبه، لها لحال وصلني
موجووووع قلبييي
هبطات لميكرو كتنهد حتى سمعات تصفيق شخص من طبالي اللور هزات عينيهاا كيبان ليها جاي وكايقرب شاب ثلاثيني بملامح مكسيكية ...بقات كتشوف فييه بغرابة حتى وقف جنبهاا بابتساامة وجبد مدكرة من جيب لافيست كتب فيها ودورها لايمان : صوتك رائع ..واش الاغنية حزيينة
استغربات حيت كتب ليها مفهماتش وقالت: اه (حركات راسها )
تبسم من جديد وعاود كتب ليهاا : اسميي كريس عندي مشكل فلحبال الصوتية داكشي علاش مكنهدرش ولكن كنسمع احس الاصوات
عطاها تقراا وتبسمات لييه وقالت: شكرا
كان شااب ببشرة سمراء لابس لباس رسميي ساعة يديو فاخرة سباط كيلمع هندامو كيبين انه رجل اعمال
كتب ليها من جديد : كتفهمي لغة الاشاارة !
ايمان:لاا
كريس(تبسم لييها ونطق بشفايفو بفحيح فصوتو مكيستشمعش كأنه كيهمس نطق بالانجليزية ) عينيك زوينين ولكن فيهم حزن
تبسمات لييه وناضت :سمحلياا خاصني نمشيي ..تشرفت بيك
مد ليها ايدو و عطاتو يدها تسلم عليه وهو ياخدها لجيهة فمو باسهاا برقة وقال: شرف لياا
مع هزات عينيهاا باستغراب فييه كتلمح طيف حدا لباب كان جااي ورجع قفز قلبهاا ملي شافتوو دغيا نترات ايدهاا وقالت: خاصني نمشيي
مشات بجري لجيهة لباب تابعااه وتوضح ليها بليي هواا قلبهاا علمهاا قبل متشوفوو غادية كاتعيط باسموو وهوا رااه شااعل ديال بصح
ايمان: بلااتي حذيفة حذيفة
جراتوو من دراعو بزز حتى جات قدااموو ...هزات عينيها فديك الشوفة القاسحة لي عطاهاا هاز فييهاا حاجب وقال : غبريي عليا ا ايمان مكااميش غنصدق مخلطك وخة
ايمان : وغير صبر وغير صبر مالك ...
حذيفة: ماماالييش بغييت نمشي لخدمتي واش ممكن ..سيري كمليي هضرتك خليتيها فالنص
ايمان: متفهمش غلط راه ر ...معرفتش (تلفات ) حذيفة
حذيفة: هدشي علاش مبغااش شي حاجة تربطنا ...باش تكوني ليبر ميحاسبك حد
ايمان: باش تبقاا علاقتناا زوينة نبقاو بعاد على هد صدااع بحال داباا ... نتا بالنسبة لياا حاجة زوينة مبغيتش نفرط فييها
حذيفة: نونوس اناا ...بورتكليي بغيتي تبقاي تلعبي بييه ولا شنوو نبقا حداك ونفس الوقت منقربش لييك شنو هد اللوجييك تاع لخراا طلعتي ليا بييه الييوم جيينيي فااص قولي ليا شنو عندك اما هد لخريف معندي مندير بييه
ايمان: هدشي لي عندي الى كاتقلب على شي حاجة خرا منعرف ...واش بزز نتصااحبو بزز مبغاااش من حقيي
حذيفة: من حقك ...من حقك وتا انا غنقولييك واحد الحاجة في حياتي كنعطي فرصة وحدة لشي حاجة مكانزيدش التاانية...وفرصة باش نكونو انا ويااك صافي سالات ...دابا سيري لخدمتك الله اعاونك
ضرب فكتفهاا ومشا خلاها واقفة صدرها كيطلع ويهبط مع هدرتوو لي بقات فخاطرهاا ...تقلباات عندو لقاتوو غاديي متقلبش جيهتها شاد طريقو حتى ركب فطاكسي ومشاا
واش صافي هنا ساليناا ! هنا سلات الحكاية قبل منبداوهاا !
واش تسرع باش يعتارف بمشاعره ولاا اناا ليي كنت غادي نصدو ولو بعد سنين
رجعات ادراجهاا حانية راسهاا لريستوو وقفات فدرووج كيتبدل لونهم وكلساات على درجات متكية على لحيط كتمسح دموعهاا هزات ايدها كتحسس العقد لي عطاها وكتنهد
تقدم كريس جيهتهاا واشار ليها بحركاات ايدو لكن مفهماتوش وجبد مذكرتو كتب فيها : واش الامور بخير !
ايمان(وقفات )بخيير ...سمحليا خاصني نوجد راسيي لخدمة
**
خلات فقلبو عافية كي الجمرة بالنسبة لكور والايطاليين بصفة عامة بوسة ليد فهي حاجة عادية اتجاه اي امرأة ومن تقنيات البرجوازيين وجنتل مان انه يقبل يد المرااة ولكن الرجل الشرقي والمغربي خااصتاا بالنسبة لييه لمراا مخاص تاحد يقيسها ولا يبوسهاا من غير راجلها وخوتهاا اما بوسة اليد فراه كتبان لييهم جرأة مبالغ فييها ويقدر ياكل من وراها قتلة تاع العصاا
كيكدد فموو بعصبيية حيت مربووط مقدرش يدير شي تصرف مهوااش لكان جاتو فبلاادو وبورااقوو كان يهرسها لييه ولكن كيبقا مهاجر غير شرعي فبلادات النااس ...على تخنزيرة يقدرر يديكلاري بييه
بردها فلكااروو ولبرد كيضرب فييه على الله يبرد نفسوو...كالس فقهوة كيتسنا وقت خدمتو ليوم راسو حرقوو بكترة مشدو العصااب ومبرددش داكشي ترااكم لدااخل حتى زير لييه عروقوو
كمل ديك القهوة بسيف وناض لكارو مبرد فييه والوو قصد خدمتوو
لوقت 8 بليل كانت لابسة واجدة طلع تغنيي حتى دخل عندهاا يوسف وقال: نهار على نهاار كتبينيي زيينك ولا ...ولاو عندك معجبييين ملي كيبغييو يزيرفيي كيكون سؤالو : واش كاينة بياانكاا
إيمان (تبسماات كتسرح شعرها ): مزياان
يوسف: مالك مقلقة ...مزال مبغيتي تمشي ل لاپارطومون !
ايمان: غير نقاد راسيي
يوسف: من بعد انديرو كونطراا باش نبدا نخلص علييك وباش طلعي وراقك القانونية فاقرب وقت
ايمان: شحال تقريبا تاع الوقت
يوسف: غيتعطلو شوية ولكن متخافيش محدي معااك امورك غتصاايب
حركات ايمان رااسها وخرج مخليها كدير فلحلقات ...خرجاات بابتسامة مصطنعة ...بلبااس ازرق كيبري مع الاضواء طويل ولفوق صدر بدونتيل معري من لكتاف بمجوهرات برااقة مكياج سموكي وشعر مموج
لمحات كريس فطاولات لقدام شاد مشروبو وكالس ...شافت فيه وتبسم لييهاا ...تنهدات و أومأت ليه براسهاا قبل متبداا سهرتها الغناائية لي كتعطل حتى ل 12 تاع الليل ونهار على نهار ولات كتقن الاغاني كتر خصوصا ملي كيطلبها شي حد من الحاضرين اغنية خاصة كانت كتلف دابا مواكبة موجة الاغانيي سوا الشبابيية والكلاسيكية
رجعات لبييت بعد نهار طويل حلف يساليي ...دوشات وخرجات لبالكون كان الظلام ولجو باارد مع قطرات الشتاا مخلية الناس فديورهمم مكاينش الرواج فالزنقة بزااف ...هزات عينهاا ف لبالكون ديال بيتوو كاتسنى ربما يخرج ويطل كان ضو شاعل بقات نص ساعة وهي تما حتى طفا الضو..فقدت الامل ودخلات مع خروجو هوا لي خرج يكمي
طفات الضو جرات تجاكيط ديالو شمات ريحتوو مغمضة عينيهاا
تقلبات على ظهرها هازة تيليفونهاا طالعة هابطة فلمواقع التواصل...لا صديق لا صديقة لا ام لا اب لا حتى واحد تشاارك معااه لي فخاطرهاا ...دخلات لانسطا لي دار ليهاا يوسف لقات لفوق حدا سميتهاا طالعة سميتو حتى هوا ونمرتوو وكاتب : منادجر
ايمان:بفف منادجر على جوج تصااور (كمشات عينيها )داباا هاد لكونط غيكون عندو لمودباس ممم مزال ملاحش تصاور جداد ...
دخلات لپاج ديال لوناا ملقاتش التصااور صافي وسدات حياتها فلمواقع خااوية مكرهاتش يكونو عندها معجبيين وتعيش عالم الشهرة لي كتحلم بييه من الصغر ...لفلوس والسلطة ماكرهاتش تكون محط أنظار الكل ...كلشي كيتسنااهاا تحط شي حاجة
لاحت راسها لمخدة كتفكر الصحافة واقفيين وهي وقفاات بطموبيل والشيفور حل ليها لباب ...كتسمع وكتشووف غير لفلاش تاع لكاميرات كيلتاقطو صورها وهي نازلة من سياارة فااخرة
الفكرة خلاتهاا تبتااسم مغمضة عينيهاا وتنهد وهي ف انتظار هاد لحلم انه توصل لأوج الشهرة
******
داز اسبوع طاير على اخر نهار تقابلوو بجوج ...بدا واحد كيتلها على لااخر بلخدمة
وصلات لعمارات وفايديها سواارت فرحانة وقلبها كايضرب واقف جنبهاا يووسف وقال: ياله زيدي
طلعو فالسانسوور كتشووف فلمرااية حتى طلعو لطابق التالت كانو تلاتا تاع لبيبان تقدمات لباب الشقة لي فيها رقم 15 لي كاين رقمو حتى فالساروت دورات الساروت ويووسف كيتسناا...حلات لباب كامل ..بانت ليها الدار مضوية وريحة نقية جايية منهاا بانت قدامها لمساعدة لأسيوية لي كانت عند لوناا اومأت ل ايمان براسها كتحية لييهاا والاخيرة ردات عليهاا ب هااي
رتاحت نسبيا بلي معاهم الزاايد فدار ...كان يوسف بغا يسد الباب وقالت بزربة: غير خلييه محلول
يوسف(باستغراب)علااش يكما مكتيقيش فياا ؟
ايمان: لا لا غير ريحة لبرودوي كتخنقني غير باش يدور الريح شوية
هز حجبان وقال : بيني
بارطمة صغيرة بشكل عصريي حمقاتها …. فوطويات وبلازماا فوق طبلة زجاجية طابلوهات لورود وطبيعة وريوم مزخرفة ...ديكورات فلقنات باللون الذهبي ...عرفات انه الايطاليين كيحماقو على شي حاجة سميتها ديكورات وتصاميم وطابلوهات كيموتو على الفن والمجسمات الصغيرة
فالامام كانت كوزينة مفتووحة على لكولواار مجهزة بكلشي ليهاا ماكينة تلاة فراان ماعن بوطة اي حاجة موجودة فييهاا دوش وطواليط وبييت نعااس مفرش بدوق انثوي هادئ وساامبل ناموسية دائرية ديكوراات فلبيض مراية طويلة وطاولة طويلة فيها بلكارات ماريو على طولو مرايات ودوش لخاص بييه...تبهرااات والاكثر من دالك فرحات بلي غتسكن بووحدهاا غتعيش الحيااة مع راسهاا دار مستقلة على كآبة حياتهاا عجبها لحاال وغير شافتها ولات باغة غير امتا تجي لييهاا ولا كيبان ليها لبيت لي كارية بحال شي قفص
يوسف: قريبة لريستوو
ايمان: شي 10 دقايق ااه ...واش لونا فراسهاا داار ؟
يوسف:خههه علاش لي متكونش فرااسهاا ...هاديي داري وعندي وحدة ف ***
ايمان: ولكن لوناا لفيلا ديالها كاينة ف **"
قرب ليها كيضحك وقال: خليها بيناتناا (غمزها )
مشا خلاها كتشوفيه وكتقول فراسها واش هذا رما لي الصنارة بغا يجربني واش غنوشي بيه ولا فعلا داير بلاصة بلا خبار مرتوو ...هزات كتافها مشغلهاش
ايمان: تصاور امتاا غيتحطو فانسطاا ؟
يوسف: اييه فكرتيني قالياا ليوم ولا غداا ...خودي لييك لييوم راحة ...حاولي تستاقري فأقرب وقت
ايمان: صافيي
يوسف؛خاصني نمشيي ... (بابتسامة كيفتح فايديه) الدار داارك
مشا وخلاها كتزيد تكتاشف الدار برااحة كدخل لبيت وتخرج كتحل فلماريو ولبلاكارات خرجات لكوزينة لي فيها بالكون كبيير ومشمش فيه طبيلة بلحديد كايتوسطها الزاج وكراسة جوج بلحديد فالابيض ...حيدات لقميجة وبقات بكسيوة من ليكرا لاصقة وقصيرة سميطات ...كتمشا بلحفا فالارضية الخشبية ..فرحانة ومحتاجة معامن تشارك فرحتهاا ...تاصلات بنجاة ابيل فيديو ..ردة عليها نجاة من داخل لكوزينة كتعجن غير شافتها وضحكات
نجاة: هاي هاي على الزيين كي منور
ايمان:هههه شوفيي (دورات لكاميرا لدار ) هادي دار لي غنسكن فيها
نجاة: تبااارك الله ومغالياش علييك ا ايمان نتي غير بييت كريتيه ب 30 الف
ايمان: هادي تابعة لريستو مغنخلص فيها والوو ...عرفتي كتحمق انجاة سطاتني
نجاة:(قربات لتيليفون وايدها فيهم لعجينة ) قلتي ليا مول الريسطو مغربي
ايمان(كدور فدار تسد وتحل فلبيبان )اه ولكن غير بسمية وصافي اما هوا طالياني قح ...مزوج بكاورية مرفحة فلووس ..ششوفي على بلكاار يجمع حوايجي وحواييج النااس هههه كانت مي كتقولياا نتي مخاصكش ماريوو خاصك قصارية (بابتسامة مع تنهيدة )الله ارحمهاا
نجاة: الله ارحمها ياربيي...والله يدخلها علييك برزق ان شاء الله من هادي لدارك ملكك
ايمان:ان شاء الله
قطعات معاها ،مشات لصالون كلسات وحطات رجلها على طبيلة تاع الزاج حتى طللعات لكسوة على فخاضهاا ...طالعة هابطة حتى طاح فبالهاا تنهدات ودخلات لجيهة الاتصالات كتشوف فنمرتو مترددة
وقفات جنب الشرجم كطل على الطرييق كانت شميشة ولجو دافيي وخة شهر حداش
عاضة على فمها بحماس وهي كتصوني وقلبهاا غيخرج من بلااصتو بحالا واقف حداها ...تسنات الرد مجاوبهاش طاحو كتافها بحزن ...حتى كيفيبري تيليفونها فايدها قفزاات سارطة ريقهاا وحاولات تجاوب بتقالة عكس قلبها لي كيترعد
ايمان(بانوثة )الو حذيفة
حذيفة(بعد ثواني ساكت وقال) ايمان بخيير ...اش خبارك
ايمان(بشوق )لباس ونتاا ...(بتردد ) غبرتي
حذيفة: الخدمة هاد السيمانة دازت مزيرة ...نتي ؟
ايمان: نتلقااو ؟(فخاطرها كتقول " توحشتك " "توحشتك") شحال مكلسنا اونصومبل
حذيفة: (تنهد) علاش !
ايمان(بحزن) عفااك احذيفة خاصني نهدر معااك
حذيفة : واخة عطيني واحد ساعة ونجي عندك
ايمان:بغيتك تشوف الدار لي غنسكن فيها
حذيفة: الدار ؟ امتا هدشي
ايمان: ديجا قلت ليك يوسف عطاني واحد لاپاغطومون ديالوو قريبة لخدمة باش منبقاش نتعدب ف الطاكسيات
حذيفة: مسكيين كيدير لخير ...فين جات هاد الدار بالسلامة !
ايمان(ضحكات بهمس ) قريبة ل *** نسيفط ليك لوكاليزاسيون ؟
حذيفة:وخة سيفطيي
ايمان:واخة
قطعات معاه سيفطات لييه لبلاصة وتنهدات ...بقات كالسة فبلاصتهاا حطات تصويرة فسطوريي انسطا واقفة قدام لكازو لاخضر الاصطناعي لي سارح مع لحيط تاع لبالكون...ضاربة فيها الشمش ...برزو عينيها وملامحهاا ...عنقها لمزين بعقيق وفتحة صدرها باينة شوية لانه لكسوة غير سماطي مبينة تفاصيل جسمهااا ...بدات كتفرح بتعاليق على صورهاا وعلى اطلالاتها وعلى زينهاا وعجبها لحال كثر وكثر
جاها مساج من حذيفة كيقول " شنو رقم الدار هاني لتحت
ايمان:15
مشات لمراية كتقاد فشعرهاا دورات شعرها لواحد جنب وقلبها كايضرب ...سمعات الصونيت فلباب مشات تحل حيت المساعدة مشاات ملي مشا يوسف
قربات لباب بلحفاا حلات لباب كتشوفو قدامهاا بملامح هادئة وملابس مريحة ونفس الوقت انيقة جاية معاه رغم البساطة ...قميجة سخونة فلبيج و سروال كحل مع سبرديلة كحلة ...شعرو مرجعو اللور ولحية ناقصهاا شوية
مع هز عينو فيهاا حس بدفئ فجسمو غريب مقدرش يسرح فتفاصيلها لانها كانت قدامو انثى مغرية بديك لكسوة لي لاصقة عليهاا ... سرط ريقوو وتقاد فلوقفة من بعدما كان مكروازي رجليه فجنب لباب ..كايلعب بلكاسكيط فايدو وقال:يكما تعطلت علييك
عينيها فاضحيين شوق وتوتر نطقات كترجع شعرها ورا ودنيها :لااا دخل مرحبا بيك ههه
تبسم ليهاا وتقدم قدامهاا فنفس لوقت تستنشق عطرو لي خلف ورااه ...عطر خفيف مقاسحش ...ريحة شماتها فيه من اول مرة شافتوو ...كتشمها فحوايجو وفييه مخلطة برائحة خفيفة ديال لكارو لي كيكمي من وقت لوقت
حذيفة(كيدور عينو فدار كيحك ف نيفوو )زوينة بصحتك
نتابهات لقميجتهاا ومشات لبساتها حيت تحرك لبرد ...خلاتها محلولة وتقدمات قدامو كتورييه بفرحة : انا حمقاتني ...اجي تشووف
جراتو بعفوية من ايدوو فلوقت لي هواا عينو غير فيها مشاف لا دار لاا ديكور
تقدمات بييه لجيهة لبالكون كتوريه الاطلالة ضاربة فيهم شميمة دافئة
حذيقة:زويينة (كمش عينو فيها من الشمس ) بصحتك
ايمان: متقول ليا بصحتي حتى ناخد شي حاجة دياليي ههه
حذيفة:ان شاء الله شوية بشوية
تبسمات حتى شهقات وعينيهاا فصبعوو جرات ايدو مخلووعة وقالت: مااالك شنو وقع لصبعك
رد عليها بهدووء كيشوف فيها وهي كتقلب فايدو بأصابعها المزينة بخواتم انيقة و الظفيرات مصبوغيين باللون الوردي الفاتح جاي مع بشرتهاا البيضاء
حذيفة: ماشي شس حاجة ...زلق ليا لمووس وضربت صبعيي
زيرات عليى ايديه وقالت:احح باينة ضربة خاايبة يااك ؟
حذيفة: شوية ...عادي هدشي كيوقع ضاير بيا غير لمااس والعافية
ايمان(بحنية)بقا ترد بالك عفااك
حذيفة: الى كنتي غتخلعي عليا هكاا ديما مانظمنش لييك
ايمان: وسكووت ...رد باالك ،عفاك
حرك راسوو باه وايدو مزال متوسطة ايدهاا مسسخاتش طلق منهاا كاع
ايمان:الجو زويين ...ليوم ماخداماش
حذيفة: بصح ! مزيان ترتااحي
ايمان: كنفكر نمشيي نجيب حوايجي ونستااقر ... ولا عرفتي شنو
حرك راسو ليها متبع معاهاا وقال : شنوو
ايمات(بتردد ) ندوزو النهار اونصومبل ...(بتوتر ) نعيطو لطارق ونتغداو مجمووعين اشنو بان لييك
جرها من ايدهاا لي باقة وسط ايدوو قربها قبالتو وقال: طارق مامسالييش وداير الريجيم مبقاش كيتغدا
غلب عليها الضحك وهبطات راسهاا :هههه (شافت فيه قلبها كيضرب ) وخة
توادعات معااه وهي فاشد فرحة ليهاا ...حاسة بفرحة كتلعب بيهاا وقلبها كيفرفر بحال شي بنت صغيرة ...فقمة نشااطهاا ونشوتهاا بالسعاادة
هزات الساارووت سدات الدار ومشات قاصدة لبييت تجمع عليهاا وتبدل حوايجهاا ...كتجبد وتقابل مع لمراايا الصغيرة لي تماا فرحاانة ومعارفاش علاش بغات غير تعيش لحظة زويينة وتكون دكريات زوينة خاصة بيهاا ...مقررة انه تشكل حياتهاا كيفما بغات وتبع قلبهاا ولوو ليوم واحد وتشوف اخرتها بدون حواجز
شافت لجو لي تقلبب ومشات شميشة طلات على لجو من تيليفون ممكن تكون الشتاا
جبدات تيشورت ابيض صوفي ب كول عرييض مرة مرة كيطيح على كتفهاا وكيبان ديباردو سميطات رقاق لبسات سروال لاصق عليهاا توبو من جلد وسبرديلة بيضااء ..مكياج خفيف وطلقات شعرها فوق لكتف لعاري زينات ودنيها بحلقاات من اللؤلؤ الابيض واكسسوارات فايدها فضية ...هزات اغراضها وريقاتها فالصاك وكل مرة ضرب طليلة فلمراية على شكلها حتى اقتانعات وخرجات هازة لكويرة ديال حذيفة ترجعها لييه ...اسبووع داز على اخر لقاء ليهم خلاهاا توحشوو كتر مكتخيل ...
شافتو واقف فجنب طريق كيكمي لأول مرة مدايرش لكاسكييط باقي بنفس لملابس قربات لجيهتوو الاخير غير شافهاا رما لكاروو عفط عليه حتى طفاه وهزو رماه فسلة لي حداه وتقدم جيهتهاا رامقها بنظرة معجبة فاضحااه ديك الابتساامة على وجهوو
ايمان:تعطلت !
حذيفة:تستااهلي يتسناك لواحد حتى ساعة روطار
ضحكات كتمد ليه لكويرة وقالت:هاك ليجيك لبرد
حذيفة:نتي مخفتييش من لبرد (بان ليه كتفها عرياان )داك لكتف باقي مصيف !
قدات تريكو كضحك وقالت: الى لبست لحوايج بزااف كنتخنق ولفت نلبس خفيف قليل فين كنلبس شي مونطو
كيقاد فلكويرة خلاها محلولة وقال: مشيناا !
حركات راسها بااه وقالت: فيين نمشييو
حذيفة: فينما وصلونا رجليناا
مشاو دارو جولة طويلة ف لمدينة ...بما انو اخر السنة على الابواب كانت المدينة بدات كتزيين باضوااء وزينة "الكريسماس" السيااح معمريين لمكاان ...تغداو وكملوو جولتهم ناشطة وكل مرة داخلة لبلااصة كتشوف وتكتااشف ثقافات جديدة ومعالم كثيرة
الموسيقى والموضى والاكل ...هادو ب تلاتاا من أعظم الاشياء لي كتقدسهاا المدن الايطالية ...كل وطريقتو فاللبس ايمان مبهوورة بغناء الشارع ب آلات غنائية مختاالفة ...لكمان...لݣيتار ...والناي
كل وفاش كيبدع
اما حذيفة فكان كيشووف لموضة لحديثة ليي مكتاسبينها لايطالين خصوصا الرجال كيخرجو كأنهم عارضي ازيااء ف المدينة
الوقت كيدوز وهوما مع بعض ...طلقات منو ورقصات على اغنية ايطالية حاولات تجروو ولكن كان سبااق وجرهاا حتى دورهاا على راسهاا وهي ضاحكة وعينيها كيبرييو بلفرحة
خدات لݣلية كتاكل فيهاا وكيسمعو لفرقة الغنائية ...مدات ليه بعفوية لكلية لفمو بايدهاا ...شدها من عندهاا شدهاا من كتفها مبعدين من الزحاام
ايمان: عرفتيي اشنو الحلم ديالي من بعد
حذيفة: مم
ايمان: نعرف كاع الثقافات ديال الدول ونتعلم بزاف تاع اللغات ونساافر نساافر هههه كنحماق على السفر
حذيفة: شوية بشوية اديري كلشيي (جرها عندو ) عندااك
كانت سيدة بدراجة جاية قبالتهاا جرهاا من ظهرها لجيهتوو حتى لامسات كتفوو
ايمان: صافيي نمشييو انا ويااك نتا احسن رفييق سفر ههه
حذيفة(شاف جيهتها كيضحك ) ايييه مزيانة ههه
ايمان: هههه كضحك علياا
حذيفة: لاا حاشاا علاش غنضحك علييك
ايمان: حيت كنحلم بزاف
حذيفة؛ الحلم هوا لي كيخلييناا نكملوو
بابتسامة قالت :بصح
سرحات ايدها كتمشاا جنبوو كل مرة يشوفو فيعضياتهم وتهبطهم بخجل كضحك...كانو اصابع ايدو لامسوو ايديها بحال شي مغناطيش و موجات كهرباائية حسات بييهاا محاولاتش بتاتا تمنع احساسهاا ولات كتلعب بصبااعهاا مع صبااع ايدوو شوية بشوية حتى تملك ايدهاا وشابكهاا مع اصاابع ايدوو وزير عليهاا ...
..هز ايديهم ودورهاا على نفسهاا حتى ضحكاات وترماات جانب صدروو ...وقف وطلعات عينيهاا بحال شي مشة فييه كترمش وقلبها غيخرج من بلاصتوو بقوة مكيضرب حاسة برجليها يقدرو يخواو فاي ثانية
سمحات لقلبهاا بخطوة جريئة بحال هادي ...قرار خلات بابو مفتوح حيت عياات مضااربة مع قلبها وعقلها فصراع بقات هي لوسط
جاها صوتو فودنهاا فيقها من تضاارب الافكاار وقال: غير رتااحي ...مغتندميش
تبسمات لييه وعينيهاا فايديهم نطقات بصوت خاافت بحالا كتأكد علييه ميندمهااش : معمرني عطييت حق لراسيي باش ندخل فشي علاقة ...حيت خاايفة (شافت فييه بعييون لامعة )نتاا اول واحد ...وبغييتك تكون اللول واللخر فحياتيي
حذيقة(بتاكيد )الحاجة الخايبة عمرهاا تجي من عنديي (بابتساامة صادقة ) انا عند وعديي ديماا ..غانحافظ عليك كيف لماا القليل
ضحكات بخفة وكملوو طريقهم وهد المرة ايدهم مشاابكيين بحب ودفئ تسرب بيناتهم عمرها حساات بييه ...كملوو جولتهمم مساخيينش يتفارقوو ...وقفو تحت لعمارة مقابليين مع بعضياتهمم كضحك حشمانة ومتوترة وقالت:عيييت غنطيح بنعااس
حذيفة: شنو اديريي غدا صافي قررتي تحولي لتماا ؟
ايمان:اه حسن غنرتاح كتر هناا لبنات كايظلو مصادعيين وحدة محاملة لخرا هههه تما غنرتااح
حذيفة:مزيانة ...غير ردي بالك
ايمان: وخة ونتاا شنو ادير فلخدمة ! كنتي قلتي لياا غتخدم معاهم غير ربع شهوور
حذيفة: غدا لباطرون بغا يهدر معاياا ونشوف شنو غيقوول ...(عض فموو )الى متيسراتش الامور هناا ...نقدر نطلع لروما
تهز قلبهاا وقربات ليه :ع علااش وهناا ضروري تلقاا فيين ولبغيتيي شوف مع يو
حذيفة (بصرامة): ايماان...كون بغييت الخدمة ديال التوصية كون خدمة فبلادي ... مزال متزادش هدا لي يشوف فياا نظرة ناقصة ...انا لكنت غنخدم ..غنخدم بداكشي باش قرييت وداكشي لي معلم
ايمان: غير باش تستااقر ..لورااق صعااب فايطالياا
حذيفة: ربي قاادر يقادها فسااعتهاا ...شوية صبر
حركات ايمان رااسها بااه وقالت:صافي ايكون خير
حذيفة: مغيكون غير لخير ان شاء الله مدبرها حكيم ...منشدكش غتكوني عيتيي
ايمان: شوية ههه
بقاو كيشوفو فبعضياتهم وقال :سيري خلاص راه كرمنا بلبرد
ضحكات بخفة وقالت: تصبح على خير
بابتساامة لطيفة نطق بهدوء وعينيه فيها: تصبحي على خير
كانت ايدو فايدهاا رجعات باللور وهوا مزال شاد ايدهاا ونطقات كضحك :وطلقنيي نمشي ههه
زير عليهاا ورجعها لعندوو كضحك حشمانة وقال : مانصييبش ازيينة البناات
**
ايمان : وشنو نبقاو هكا فزنقة ههه
تبسم ورخا منها وقال : تصبحي على خيرر
رجعات باللور وتقلبات عطاتو بالظهر عارفاه مزال واقف كيتسناها طلع قبل متحل لباب ورات وجهها جيهتوو ودعاتو بايدهاا وهوا وااقف
سدات لباب والفراشات كيلعبو فلمعدة والابتسامة مفارقاتش وجهها كل هد الست ساعات لي دوزات معااه
طالعة فدرووج خطوة خطوة طاغية عليها الفرحة لي تملكاتهاا
طلعات لبيتها بحال شي فرااشة كتفرنس وحاسة بخفة فجسمها بحالا كالسة فوق السحااب
مع دخلات لبييت مشات لبالكوون كضحك لقاتو عاد شعل الضو فبيتو ثواني حتى كان قدام لبالكون ضحكات كتشير ليه بايدهاا
صونا تيليفونها من طرفو حيت شافتو دايرو فودنو مشات جبداتو من الصاك وخرجات لبالكون كتهدر وكتشوف فييه
حذيفة: مسخيتش نخلييك
ايمان: هههه غنتوحش هد الطلة فلبالكون كل ليلة ...وخة غضبتي عليا سيمانة مبقيتيش كتخرج
حذيفة (كيشعل فلكارو وضحك ) : ولكن عطات نتيجة فاللخر
ايمان (كتلعب بصباعها فوق لفاز وكتهدر بغنج ) مبقيتيش تعاودهاا
حذيفة ( نطر من لكاروو كيشوف فيها ) كون تلاقينا غير شوية فلمغرب كنت نربطك معاياا
ايمان: ههههه فين غتربطني
حذيفة: نتزوج بييك
ضحكاات حشماانة وقالت: بغيتي تزرب علياا هههه
حذيفة: شنو حساب لييك بغيتك نتصور معااك راه بغييتك لديما
ضحكات مهبطة عينيهاا ونطقاات بهمس :ان شاء الله
حذيفة: نقادو امورنا ويكون خير
ايمان: ايكون خيير ...غنمشي نعس عييت
حذيفة: تصبحي على خير
ايمان: بونويي
قطعات معاه ودخلات رادة الريدو وراهاا حطات حوايجها وبدلات مشات لطبلة هزات تصويرة نعيمة لي دارتها فكادر صغير. ...ربعات فوق سرير وكلسات شداهاا بين ايدها كترمش فيهاا
تنهداات ودغيا تقلب عندها الجو بحالا صرفقتيها ...واش هي قد هاد العلااقة تخاف تغلط ...تخااف تمشي فهاد الطريق وتعاني كتر مكانت متخييلة...بغات علاقتهم تكون بريئة وزويينة ...معرفاتش واش غتبقا هكا ولا غتصدق معاودة نفس القصة ولكن هي ماشي نورة وحذيفة ماشي كرييم ...هي عارفة ومتحكمة فقلبهاا لمرة وحدة سمعات لييه ماشي معناتهاا غتبعا تابعااه
كتحاول تقنع راسها بلي وخة دخلات فعلاقة حب ماشي معناتها تخلات على مبادئها واحلامها وحياتهاا هي فقط بغات ذكريات زوينة وأحداث زوينة لي تبرد عليها وحدتها وغربتهاا القاتلة
رجعات حطات الصورة وحطات راسها على المخدة كداعب خصلات شعرهاا ...جابدة تيليفونهاا كتشوف فالصور لي خداات معااه وضحكات ملي شافت التصويرة لي صورات ايدهم مشابكيين استغلات الفرصة ملي كان كيهدر فالتيليفون وخداتهاا ...كتزومي على ايدهم والإبتسامة على شفايفها ...كيحمقوها يديه كيفاش مرشوشين بزغيبات كحليين خفاف ... كان فمعصم ايدو ساعة جلدية وايديهاا كيفاش كيبانو صغار مقارنتا بايديه ...عجباتها الصورة و دارتها خلفية لتيليفون من بعدما كانت دايرة صورتها هي ونعيمة
**
صبح صبااح وعلى غير العادة فاقت بكريي كتجمع فحوايجهاا فشانطات لي شرات جمعات اي حاجة خداتهاا وخلات لماعن لي شراات خلاتهم فلبييت
ظافرة شعرها ولابسة سورفييت لفوقي قصير والسروال لاصق مع تقاشر اديداس وسبرديلة بيضاء
كارلا طلات من الباب لي كان محلول وقالت: غادي تمشيي !
ايمان:اااه ...سمحيليا الى برزطك شي مرة
كارلا: مرة مرة بقاي تجي نشربوو قهوة ...غتعيشيي مع داك لغزاال
ايمان: ههههه لاا علااش
كارلا: مممم شفتكم لبارح ...كنتو بحال شي جوج طويرات ديال الحب
ضحكات ايماان وقالت: بصح ههه
كارلا: وخة مكيجيش عنديي انا مقلقة منو ...ولكن من اول مرة شفتكم شفت عينيكم شحال كيبرييو
معرفات باش ترد عليها بقات غير كضحك وقالت: كارلاا عمرك بغيتي شي حد
كارلا(تنهدات) كنت كنبغيي واحد الشخص فالشباب
ايمان:متزوجتوش ؟
كارلا: مع الاسف لا مشا تزوج صااحبتيي
ايمان(بصدمة)ميمكنش
كارلا: تزوجو وهاجرو ايطالياا فخطرة
ايمان(بحزن)معاودتيش بغيتي من ببعد
كارلا(بملامح حزينة )تء بحال حبي لييه عمري بغييت ...نهار الانساان كيبغي من قلبوو وكيعطي كلشيي صعيب يعاود نفس المشااعر مع شخص اخر ...كاين لي عندو عادي الى مشا واحد يجي واحد ولكن بالنسبة لياا مقدرتش نتخطا الحب الاول بقييت مسجونة و فضلت الوحدة على أنني نتخان مرة اخرى
مشات ايمان بلطف منها عنقات كارلاا وفنفس الوقت هي محتاجة حضن ...تعانقوو ساكتيين
كارلا: نصيحة وحدة لي نعطييك ...متحاولييش تبغي شي حد فوق القيااس
ايمان؛ يمكن فاات لحاال على هد الهضرة
كارلا(بابتسامة داعبات خدود ايمان ) كنتسنا بفارغ الصبر نسمع صوتك فالتلفازة
ايمان:هههه علاش لاا
كارلاا: تهلاي فرااسك الغزالة
خرجات من تما بشوانط لقات الشيفور لخاص ب لونا واقف هز معاها الشانطاات وحل ليها لباب الخلفي تبسمات ليه وشكرااتو ...دارت كتشوف وهزات عينيها كتبان ليها كارلا من بالكون الصالون لخاص بيها شيرات ليهاا وطلعات لطموبيل
جاها اتصاال من حذيفة وجاوباات فلحيين وقالت: الوو
حذيفة: صباح الخيير ...فقتي بكريي
ايمان: خاصني نقضي هد روينة باش نمشي بكري لريستو راك عارف ...شنو درتي نتاا
حذيقة: حتى نتلقااو ونهدرو بخاطرناا
ايمان: صافي وخة ...غتجي فلعشية ؟
حذيقة: نقدر نتعطل ولكن غادي نجيي
ايمان: صافيي وخة (حيدات تيليفون من ودنها لقات اتصال تاني من يوسف ) حذيفة يوسف كيصوني
حذيفة: خلييه يصونيي
ايمان:هههه غيكون على تصاور تاع الشوتينݣ ...نشوفو شنو بغا ونهدرو
سلاو الهدرة وقطع وجاوبات يووسف
ايمان: الوو
يوسف؛ اخيرا جاوبتيي فيينك
ايمان:غادية لدار نستاقر فيها ونجيي
يوسف: شوفي تصاور راه سيفطهم لييك ف جيمايل ديالك ... حطيهم وطاݣي انسطكرام لونا
ايمان: صافيي غير ندخل لدار نحطهم
قطعات معاه دخلات لجيمايل لقات تصااور معدليين بنتقنية لفوطوشوب زايد الالوان ومصفي الصوورة كتبان بروفيسيونال ماشي غير مصورة فتيليفون
ايمان: هاي هايي معرفتش راسي ههه
نطق الشيفوور من بعدما سمع لغتها العربية وقال بالايطالية :نعام !
ايمان:والو والو
بقات كتشوف فتصاور وتزومي حمقوهاا نسات تعاود اتاصل بحذيفة بقات كدوز فتصاور وكل لبسة كانو ليها شي خمسة تاع لي بوزيسيون لي حمقاتها كتر هي اللبسة الاخيرة من توب شفاف قريب ل لون اللحم بظهر نصف عاري وسميطات محجريين جا مع لونها ولون شعرها ولمكياج سموكيي لي حمقها
مع وصلات لدار طلع ليها الشيفور شوانط وهي غارقة فتييليفون سيفطات تصاور ل نجاة
ايمان:شوفيي على الزييين ههههه
كلسات على لفطوي كتحيد سبرديلة تجاوباتها نجاة باوديو
نجاة: يا الصݣعة شتها كتبيين
ايمان:ههههه ولا راه غير كيبان لييك هي من جيهة الرجليين كتبين ولكن من الصدر لفخض راه منبتة وملبسة من لتحت
نجاة: بحالا ضعافيتي شوية
ايمان؛ وييه مع طرييق ولماكلة مخربقة دابا عاد كنرجع صحتيي ...تهلكت فطرييق ولكن ماشي مشكييل بدييت كنحط لحجر دقة دقة
نجاة:الله اسهل علييك
ايمان(بحب )امييين يارب ..نخليك نوض نجمع روينة
مع قطعات تفكرات حذيفة وقالت:ويلي ويلي نسيتوو
حاولات تاصل بقا كيصوني مدة وتقطع رجحات الامر يكون مشغول محكراتش ومشات كتستف فلحوايج من بعدما حطات تصااور فانسطا ...مرة مرة طل تشوف شحال تزاد من تعليق ومن جادوغ
دخلات لدووش ليي فيه بينوار كبير تشهات فيه شي عومة ولكن مكاينينش لبرودوياات لي غتحتااج ستفات لحوايج فلعلاقات وقدات لباقي فبلكارات ...حدا لمرااية شهاها تقداا لميكاب ولبرودويات بحال كيف كتشووف كانت مرااية كبير مدورة ب بولات صغاار فجنااب وكرسي مربع لوسط
كلسات كتسرح فشعرهاا الذهبي على كتاافهاا خرجات من جديد قاصدة الريستو هد لمرة غير على رجلهاا قريية ليهاا مع دخلات كتسمع صوت لبييانوو لداخل خداوها عينيهاا حتى كيبان ليهاا نفس الشااب لي ولات كتشوفو يومياا ف الريستوو فالاماكن الاولى قبالتها ...كتسمع لعزف ديالوو باحترافية
قربات لجيهتوو فور محس بزايد معاه توقف على الحركة وميل راسو لجنب شافهاا وتبسم كان حوارهم بالانجليزية
ايمان: سلام
حرك شفايفوو وقال بهمس داعم بحركات كتعبر على كلامو
كريس؛نتي بخير
ايمان (قربات جيهتوو )مفهمتكش ...
ضحك وجر المدكرة ديال وكتب: واش نتي بخير البارح مجيتيش
ايمان: خديت روبو هههه خاصك تعلمني الحركات باش منبقاش نعدبك بلكتبة
كريس(بابتسامة ) ؤك(اشار ليها لكرسي قداامو وكلسات حيت مزال وقت التدريبات والخدمة )
ايمان: كنشوفك ديما كتكتب
كريس (كتب ليهاا ونفس الوقت ملي عطاها تقراا شرح ليها شنو قصد بالحركات ) اناا كاتب
ايمان؛واش بصح
حرك راسوو باه وكتب ليها عطاها تقرا وكدالك هدر بلحركات :غيشرفني تقرااي بعض الكتب الروائية دياليي ..نتي كتفهمي الانجليزية مغيكونش مشكيل الى قريتيه
يتبع...
التعليقات
لا توجد تعليقات بعد، كن أول من يعلق.