محتوى القصة
كان فهاد الفترة بحال البلسم والدواء ليهاا دوزات 5 ايام ف السبيطار النهار كلو كيدوزو معاهاا كيخلق معاها حديث كيتشاركو الاخبار اليوميية
فديك الآونة تهدنات الهدرة عليهاا فالمواقع حيت كان كلشي تشغل ب ڤيروس كورونا لي غادي وكينتاشر فلعالم كاامل
خرجو من السبيطار دايرين نظارات شمسية و لكمامات كيف جمييع النااس
مشات لدار جات لباليزة جمعاات ححوايجهاا كتعافر بايدهاا ودايرة لكيت فودنها رابطة الاتصال ب وديان
وديان: ناري اش غادي نقوليك الرويينة
ايمان: واش ماماك فاقت
وديان: صافاا الحمد لله تجاوزات الخطر دابا دايرين ليها الحجر الصحي هي وبابا فلكلينيك
ايمان: كتشوفوهم ؟
وديان: غير من بعييد عرفتي الاطبااء كلشي ولاا لابس اللبسة ديال دوك لي كيربييو النحل
ضحكات ايمان وقالت: الله يدير شي تاويل ديال الخير ...لقيتيني كنجمع فحوايجيي عندنا لڤول مع الربعة تاع العشية
وديان: ردي بالك وخودي لباڤيط والمعقمات
قطعات معاهاا وجمعاات حوايجها لي تقريبا كلهم سورفيتات و بيجامات بيتية وكريماتهاا ومستحضرات تجميلة ...سدات الشانطة ، لبساات القبية بشوية على ايدها خلاتها محلولة
صونات لحذيفة لي بقا لتحت طلع عندهاا ومشات حلات علييه الباب
حذيفة: واجدة
ايمان: صافيي سالييت
جر البالييزة لبسات سبرديلتهاا بغات تخشي السيور بلا متسدهم وهبط سدهم ليها طلعات وجهها مزنكة وحشماانة غير كضحك
وقف عادي وحل السانسوور جار الباليزة لقا طاكسي كيتسناا حطها فلكوفر وتوجهو لمطار
لقاو المطار عامر على غير العاادة كلشي بل باڤيط والبوليس حاضي لي غادي ولي جااي حاضين السكانير لي كيبيين الحرارة لي فلجسم لي بان ليهم الحرارة مرتاافعة كيوقفووه كيفما وقفوو واحد الراجل وكانوو اطباء بلبااس كيمنع يتسرب الفيروس لداخل هازين معاهم لباراي كيعبرو لاي شخص مشكوك فحالتوو
بعد الاجراءات خداو طيارتهم والوجهة برشلونة الاسبانية
وصلو بليل ولقاو نفس الاجراءاات بشكل كبيير ...وعمال النظافة كيعقمو فلبيباان فلحديد فاي حاجة ولي ملقاوهش داير بافيط كيعطيوها لييه
تزرع الرعب فايمان وهي كتشووف وقالت: واش خطير لهاد الدرجة !
حذيفة: ڤيروس صعييب ودغياا كيدووز نتي ردي بالك ...اجي متخافيش هههه
شدها من ايدها جار الشانطة ديالهاا وصاك ديالو فكتفو كيجبد فسوارت ديال الطموبيل لي خلاهاا مركونة فلبارك ديال المطاار وخلص عليها
كانت من نوع رونو فكحل ...ركبات حداه كتشوف فطموبيل باعجااب وقالت: ديالك !
حذيفة: تسلفتها من عند الپيلوط تنرجعها ليه
ضحكات وقالت: كطنز علياا هههه
حذيفة: وفنظرك ديالمن ههه
ايمان: فنة عجباتنيي
حذيفة: معندكش البيرميي !
ايمان: لاا
حذيفة: خاصك ديريه تشري شي طموبيل صغيرة حسن لييك
ايمان : ان شاء الله واخا كنخاف من الطريق منقدرش هههه
شد الطريق كيضحك معاها دارت سطوريي من بعد 15 اليووم محطات والوو فيه وجهها مبتااسمة ودايرة نظارات گوتشي حاطة اغنيتها وكاتبة هااي
فلبلاصة بدااو التعالييق دغيا تهز سطوريي كانو على القرص ضحكات بهمس عاضة على فمها كلشي كيسول كلشي كيطمن ومقادراش تكتب بايدها ليسرى
مرة مرة يلوح عينو ليها يلقاها كتبسم مع التيليفون
عجبها داك الاهتمام وبليي كاين لي خاف عليهاا وبلي كيسولو عليهاا
حذيفة: ايمان فيك الجوع ؟
ايمان: مم شوية
حذيفة: انمشي لريستو نهز شي حاجة ناكلوها فدار ونكملوو
ايمان: واخة
فعلا بعد وقت داز لريستو هز لكموند لي قالييهم قبل ميوصل لقاها واجدة وكمل لداار
عطاها الصاشية تهزهاا وهوا تكلف بالشانطة والصااك ...هزات عينيهاا كتشوف فالعمارة كانت فحيي فيه الروااج فطرييق بحال شي حي شعبيي طلعو فالدرووج لطابق التااني جبد السااروت كيحل وهي كتشوف بعينيهاا شاف فيها وقال: دخليي
تبسماات ليه كتحيد لپاڤيط شداتها فايدهاا ودخلاات
كانت دار بسييطة مجموعة ونقيية كانت دوبليكس من جوج طوابق دروج ديال العود كيديو الفوق فجنبو بلكاار فييه السبابط والحوايج ديال برا وكوزينة صغيرة قدامها كونطوار فاصل بينها وبيين الصالون لي محلول بحال السيجور ..فيه فوطوياات فلكريي وطبيلة تاع الزاج ..دخلات كتكتااشف كتبان ليهاا ماكينة ديال الخيااطة مجموعة ديال الاورااق مفصلين كيتسماو ب "الباطرون." كيتوضع على الثوب باش يكونو المقاسات مضبوطين جوج مانكانات فيهم غير لكتاف والصدر والخصر فقط وحدة منهم ليهاا الفوق ديال التوب باينة عاد كان خدام عليهاا بقايا التوب فوق الكونطوار فوقاش كيفصل ومجموعة ديال الرسومات والموديلات محطوطين فوق الطبلة مع اقلام تلويين و طابليط فوق الورااق
شافت فييه كيحط سباطو فلبلكار وكيتمشاا بتقاشر بيضيين خدا الصاشية وداز لكوزينة صغيرة كيتبسم ليهاا ..تقابلات معاه وفاصلهم الكونطوار كتشوف فالكوزينة فيها بلكرات ديال العود فالابيض تلاجة صغيرة ماكينة تاع الصابوون فراان
حساات بالدفئ فهاد الداار وقالت فنفسها كان عايش كاالم بلا بياا ..عندك غير نرون ليه حياتوو
مشات لسرجم كتنهد كتسمع الضحك ديال لوليدات لتحت حلات الزااج ودخل البرد غمضات عينيهاا كتسمع لداك الضجيج لي توحشاتو فكرها فايامها فالجردة لي تحت الداار كل ليلة كانو الوليدات كيخرجو يلعبوو وهي كطل عليهم من السرجم مكانش عبد الله كيخلييهم يخرجو يلعبوو كتبقى تحسر وتشوف فياسيين كيلعب وهي غير كتفرج
حذيفة: ايمان اجي تكلسي
ايمان(بابتسامة): دارك زويينة
حذيفة (عاطيها بالظهر كيحط الطباسل فالطبلة تاع الزاج ): وزدتي نورتيهاا
ضحكات بخجل ومشاات كلساات فوق الفوطوي حتى كلس حداهاا كتشوف فطباسل منوعيين بلحوم مشوية وصلاد وعصير بلفواكه ...عطاها الفورشيط وكلات بليسريية
شعلو التلفاازة والهدرة غير على الوبااء ورجع طفاهاا مجمعين مع بعضياتهم
ايمان: مم بغيت نسولك ...دوك لي غوب لي دوزتي فلبرنامج واش كيشدوهم ولا كترجعهم معااك
حذيف: لاا تباعوو
ايمان: بصح ولكن يستاهلو واعريين ولكن لاغوب شي حاجة واعرة
حذيفة: كانت فاللجنة واحد المصممة هي لي خداتهاا
ايمان: شحال طلعات حيت بانت ليا منبتة بزااف
حذيفة: سيي الثوب باش يتنبت بديك الطريقة كيطلع غاليي شوية ..المهيم (يكتفكر ) معقلتش يمكن طلعاات ب الفين اوروو (2 مليون)
ايمان:واااو ...وبشحال بعتييها
كان فمو عاامر ضحك واشار ليها بايدو ب 4
ايمان(ضحكات ): كتغلي مع رااسك انا داك القفطاان طلع ليا ب 120 الف مغربية ههه
حذيفة(ضحك ) : الله امسخها بعتو ليها غير ب 60
ضحكات ايماان وقالت: ومالها فداكشيي اويلي ههههه
ايمان: دابا نصبات علياا
حرك ليها راسوو بااه وقال: تكبري وتسناي
تعشااو في سلام ونااض هز طباسل وتبعاتو بالكاس بايد وحدة شافها وضحك
ايمان: المهيم نعاونك ههه
شد من عندها لكااس حطو فلڤابوو وداعب نيفهاا بطفولة وقال: نتيي غير رتااحي قااد بكلشيي مبغيتكش تحسي برااسي متقلة علياا
بقات كترمش فيه ملقات حتى كلمة تعبر على امتنانها لييه قربات ليه وحطات راسهاا على صدرو حضنهاا كيداعب شعرهاا لمدة وقال : اجيي نطلع ليك حوايجك البييت نعسي فييه ورتااحي
هز الشاانطة وتبعاتوو لطابق التاني لي كان صغير فيه جوج بيوت وباب ديال الحمام الوسط حل ليها باب وقال هدا بحال شكل دريسينݣ
دخلات ليه فيه فوطوي مقابل مع بلكارات فلحييط بلا بيبان وعلاقاات ...مستف فواحد الجنب حوايجو مطويين بشكل مرتب ومعلق القوامج وتجاكيطات وبلاصة فيها سبابط ومجورة لتحت بلاصة خااوية فالجنب مفرش بزربيية وفيه مراية كبيرة بيت صغير خاص غير بالحواييج
دخلها لبييت لي كان بديكور سامبل وهادئ حيت من العود الارضية وحتى الاثاث متيسع وفيه بالكون صغير على طول الوقفة ناموسيية وتلفازة وكوافووز بمرااية لوسط كان محطوط فوقها غير القران وصلاية وفوقية مطوية وتسبيح فوق منهم ...
حذيفة: مافيهش داك كترت زوااق لي كيعجبك
ايمان: ههه شنو كنتي غادي دير بيه نتاا
حذيفة: نديرو على قبلك معنديش مشكييل
ضحكاات ومشات لبالكون حلاتوو وشافت الاجواء الليلية وقالت: قريب ليك لبحر
حذيفة: سيي بغيتي تمشي لييه !
ايمان: ااه ههه
حذيفة: غدا مع الصباح ندييك
حركات راسها بحمااس وقالت: ؤك
حذيفة(حك لحيتو كيهز ف صلاية ولفوقية ديالو ) خودي رااحتك فلبييت لاحتاجيتي شي حاجة غنكون لتحت
دخلات وحسات بالخوف فداخلها ومبينااتش ...حركات راسهاا بواخة وقال :تصبحي على خير
ايمان: ونتاا من اهل الخير(بتردد)ونتا فين غتنعس
حذيفة: الفوطوي لي لتحت كنرجعو ماطلة ...غير رتااحيي
خرج ومشاا لدريسينغ خدا مخدة وغطا وحوايج وهبط مع الدروج خلاهاا كدور رااسهاا فلبييت وقلبها تقبط عليها وبدا كيضرب
مشات لبيت التاني سداتو وحلات الشانطة ديالهاا بغا تلهاا بلحوايج تعلقهم
بدات كتهز لعلاقات لي خاويين عندوو كتجاهد مع ايدهاا وكتعاون بتوازن مع ايدها المهرسة تعلقاات حوايجها حطات سبرديلتهاا وبانطوفتها هزات لبينوار ومستحضراتهاا وصاك فييه تقيشرات و التاني فيه ملابس داخليية حطاتهم مجموعيين فلگري مباينش اش فيهم بقات تخوات لباليزة وخرجات لدووش تكتااشفو كان مقسوم لنصفين نص فييه طواليط والتااني فيه حمام وقدامها مراية ولاڤاابو فيهاا طاجيراات حلات الصاشية وبدات كتحط فلبرودويات حتى ملقات مزال فين دير ولي شاط خلاتو تماا بدلات علييها بزز تخلصات من حوايجها كلهم وحلات لما على جيهة الحمرة ديال سخون وبقات دايرة ايدها تحسات بيه سخن دخلات تحتو بلا متقرب ايدهاا حسات بداتهاا ترخاات مع ريحة برودوياتها والماء دافي ...كتبسم وترتااح فينما تفكرات بليي كااين غير حداهاا...كانت كتشوف فايدهاا حتى جاتها لحظة ادرااك كيفاش غتعاون راسها تلبس وهي ايدها معطوبة كانت معاوناها ودياان داباا غتحير مع سوتيانات وخة تقدات ليها وديان قبل متمشي سوتيان كيتسدو من القدام عوض اللور باش يسهل علييهاا
بايد وحدة مضاربة مع سليب حتى طلع وتبعاتو السوتياانات فينما تبغي تسدهم تهرب ليهاا جيهة التاانية تعصباات وحيداتهم لبسات ديباردو قصيير وفوقو بيجامة حريرية فلكرونة بموتيف ديال ميني ماوس سداتها ولبسات السروال حاولات تجمع ما امكن دخلات غير لدوش صدقاات عياات غير باللبس ،دخلات لبييت حسات بلبروودة حطات لبروديوات لي شاطو حدا المرااية ومعاهم رينغ لايت قداتهاا قدام لمراية مشات كلساات فوق السرير وكدور فعينيها بانت ليهاا تيليكموند وشعلات التلفازة كانت سمارت تيفي مشات دارت فيلم كوري كوميدي يونسها تاتنعس السعاتي غير الفيلم خدام وعقلها مامعاهااش وعينيها كيدورو فلبييت ومرة مرة تشوف جيهة لبالكوون فيها الوسوااس ناضت سداتوو وكطل تحت ناموسية وعينيها على الباب
حسات بالعطش والارق وبغات تهبط وحشماات من صدرها لي باين مدايراش السوتيان وريووسهم مطراسين فلبيجامة حيت خفيفة وخة لونها غامق
كتمشي طل كيبان ليها الضو مزال شاعل لتحت
دورات شعرها قدامهاا وكتشوف فلمراية واش معيق وخة هكاك مقدراتش تفكرات السمطة تاع ايدها ودارتهاا قدامها عاد تهناات ولقاات الحل لي يهنيها ويخليها مرتاحة ضحكاات وهبطات بشوية شادة فلحييط لقاتو كيصليي ...تبسمات وكلسات فالدروج عاطيها بالظهر كيصلي لي فااتوو
شدها تأنيب الضميير وقالت فخاطرها غير تفوتني ايديي وغنرجع نصليي اخر مرة نقطعهاا
شافتو سلم ونااضت بهدوء هبطاات كان حس بخطواتهاا وتقلب لجيهتهاا وقال: مزال منعستيي
ايمان: بغييت غير لماا
قرب لناحيتها لابس علييه كندورة كحلة وسفيفة بنفس اللون برائحة من العطور العربيية الخفيفة تسللات لجيوبها الانفيية بقات متبعااه وهوا كيعمر ليها فقرعة صغيرة وهي كتسنا حداه ..شاف جيهتهاا ودوراات عينيهاا علييه كتلف وقال: نطلعهاا لك
ايمان(ضحكات ) اويلي مزال عندي اييد هههه
شداتها من عندوو وقالت: تصبح على خير ...شحال داباا
حذيفة: الجوج
عضات فمهاا وطلعات هزات تيليفونها وتكمشات فبلاصتها لقات وديان مسيفطة ليها مسااج
وديان: بب وصلتي مزياان ؟ فيينك
جاوبات اوديو حيت مقداش تكتب : نسييت مقلت ليك راني وصلت كيف بقات خالتي شوية ؟
لقاتها اونلاين مدازش وقت طويل وجاوباتها باوديوو
وديان: هانيااا عرفتك مع عزيزي كتمسح ليك الداكرة هههه صافا بب شوية بعدا الحمد لله ...قولي لياا عطاك الخااتم ؟
حركات ايمان عينيها باستغراب ونطقات مع عقلها " اشمن خاتم ؟"
رسلات ليها وقال: اشمن خاتم !
وديان: حذيفة اصااحبتيي ...دوك الايام كنت عطيتو الطموبيل وكان حاط لبواطة فتجاكيط هزيتها وهوا يطيح ورجعتوو لبلاصتو ههه
حسات بقلبها غيخرج وقالت: واش شفتيه
وديان: ههه الصراحة مقدرتش نحلوو هههه ولكن لبواطة اصااحبتي مكتوب فوقها ديامند كلاني الفضول ولكن مقدرتش نحلهاا
ايمان: يمكن ماشي ديالي ...معطاني والوو
وديان: تلقايه كيتسناا الفرصة صبريي اصاحبتي ..نمشي نعس سيري رتااحي لييك
سلات معاها الهضرة وبقا بالهاا مع الخاتم وشمن خااتم وكون ليها علاش معطاهش ليهاا هاد السيمانة كلها لي بقا معاها مفارقهااش
تكمشات فبلاصتهاا محيدة السمطة مقادراش تنعس كتقلب فبلاصتهاا وتعوج كل مرة تشعل لفيوز لي حداهاا تشوف فلبييت وترجع طفييه ...حتى عياات ومقدراااتش خنقاتها البكيية جرات مخدة كتنخصص عليها
شعلات الضو ورجعات كلساات مرة تبكي مرة تسكت
فاق بليل جاه البرد وطلع ييجيب غطا يزيدو عليه حتى كيشووف الضو مشعول فلبييت والباب مردود
عند بالو نسااتوو او ضراها شي حاجة طل برااسو كتبان لييه كالسة مكمشة وكتبكي كيسمع غير نيوفهاا
ضرب لباب بصباعو باش يدير الحس وطل عليهاا وقال باهتمام وعينو كايتفحصوها : ايماان
هزات راسها عندو كتمسح عينيها ونيووفهاا :ممم
حذيفة: مالك ؟ علاش كتبكيي ...ندخل ؟
حركات راسها بااه هزات المخدة حطاتها على رجليهاا..كلس جنبها وقال: كضرك شي حاجة
حركات راسها باه وعينيها قطرو بالدموع وقالت بضعف : مقادراش نعس بووحدي هء خاايفة و قلبيي هءهء قلبي مقبووط عليا معارفاش نعس
حذيفة: ايماان راه مكاين لي يقرب لييك خوي رااسك من داكشيي
ايمان: هءهء مقادرااش بغيت نعس ومقادااش نسد عيني كيجييو قدام عينيي شي حوايج خايبة هءهء
قرب لعندهاا حضنهاا وقال : متعمريش راسك بلوسواس ،لي فات ماات متبقايش تفكري شغلي راسك والى مجاكش نعاس شعلي التلفازة ولا سمعي القراان غارتاحي (مسح عينيهاا )
ايمان: بغيت نعس هءهء
حذيفة: نمشي ندير ليك شي كاس تاع لويزة غيهدنك وترتااحي
زيرات على ايدو بخوف وضعف وقالت: خلييك حداياا عفااك
حك لحيتو بهدووء وقال : وخة
بقات شادة فيدو بعداات وخلات ليه بلاصة خاوية كتنخصص وتنهد والنيف حمر ونيوف تخنقوو
طلع حداها ولكن متكااش بقا محنيي جنبهاا ايد مزيراها على ايدها والتانية لي متكي عليها حطهاا على راسهاا كيردد عليها اية الكرسي بصوت خاافت
حط راسوو على راس السرير وهي غمضات عينيها مكمشة ومن بعد داك البكا كلوو والامان لي حساات بييه حسات برااحة وببلي عينيها كيتلصقو بالنعااس
بقات هكاك حتى بدات كترخي على ايدو وترجع تقفز ويزير عليهاا
عياا و النعاس برزطو خلا الفيوز شااعل وتقابل معاهاا فداك الضو الخافت ولاول مرة فجنبو انثى لي كيبغيها وكيخاف عليها من ظلو ...ابتااسم وهوا كيداعب شعرهاا نعل الشيطان وجمع عينيه عليهاا وتقلب على ظهرو مغطي معاهاا حتى نعس من التعب
نعساات وهي مطمئنة بقربوو شادة ليه فايدو بحالا خايفاه يهرب كل مرة ضربها الفيقة تلقااه جنبها ناعس وترجع حتى هي تنعس
حتى بدا كيصبح الحاال حل عينيه وتݣعد كيشوف فالساعة لي باقة فايدو لقاها ستا تاع الصبااح بانت لييه ايدهاا فوق صدرو...حط ايدو عليهاا كيلاطفهاا ويقيس صبيعاتهااا ...شدها مرخية قربها لفمو باسهاا وحس بيها تحركاات وداعبات بدييهاا وجهوو ...تقلب لجيهتهاا بغا يحط ايدها باش ينوض
حسات بييه وزيرات علييه مغمضة عينيها وصوتهاا نااعس قربات راسها لكتفوو وقالت: خلييك معاياا
حذيفة(باسها فجبهتها ) : خاصني نقضي شي اغرااض ونرجع نبقا معااك
ايمان(برفض زيرات علييه ): ننن
حاطة ايدهاا على خدو وقريبة ليه دار لييها خاطرها وبقا متكيي حداهاا كيداعب شعرهاا ..هزات راسهاا عندو ونطقات بصوت نااعس تقول كتهلوس
ايمان : اول مرة نعس مزياان
تبسم ليهاا وقاال: كملي نعاسك باقي الحال
ايمان: ممم ...كنبغييك
حذيفة (داعب خدهاا بلطف ) حتى انا كنبغييك الحميمة دياليي هه
تبسماات هزات راسهاا فييه لقاتو قريب ليها بزاف وفمو عند جبهتهاا...هزات راسها على المخدة وتكات باش تقاابل معااه كتشوفييه عن قرب كثر وايدها على تفاصيل وجهو
مقدرش يقاوم راسوو كتر من هكاا الاحاسيس نجارفاات ليهاا مغمضة عينيهاا برااحة وهوا حس بشهوتو لشفايفهاا طغات علييه كملات علييه لمساات ايدها وصوتها لمحلون بنعااس خلات الغريزة الطبيعية فييه كرجل تقولييه دوق من رحيق الشهدة وهي قداامك عسل حر
تبع لحظة الضعف لي جاتو من جهتهاا وقصد شفايفها فسكوون باسهاا جنب منها مغمض عينييه نيفوو داعب خدها
حركات وجهها وتلامسوو شفايفهم لثواني كيستوعب الوضع بدا كيقبل شفايفهاا بسطحيية شوية حتى هي ولات متجاوبة معااه لَسعاات من الحب وضرباات القلب واجسادهم الدافئة، لقااو نفسهم كيتبادلوو فالقبل السطحية
كيداعب شعرهاا ولا صوت من غير صوت القبلة وانفااسهم
حتى حبس ملي حس بيهاا تجمداات تحت منوو دورات راسها لجنب كتنهج وطاحو فوضع الخجل والصمت
عرفو راسهم شنو داروو بعد عليهاا وكلس عاطيها بالظهر وهي كذلك عطاتو بالظهر مغطية وجهها بالمخدة كلهاا كترعد وقلبها غايخرج من بلاصتو بلا الحرارة لي حاسة بيهاا فلحمها بغات تلووح الغطاا
حسات بلفراش تحرك وناض من حداهاا خرج ساد وراه لباب لاحت المخدة والغطاا وكلساات شادة على قلبهاا وشفايفهاا فيهم توزويزة ورطابو وتبدل طعمهم مع قبلتو هاكة حساات
ولات كتقول هادشي لي عشت واش وهم ولا حقيقة ...ديك المشااعر والنشوة والخفقان لي حسات بيه فديك الوقت ماشي طبيعيي
عضات على فمهاا وجرات الغطا من بعدماا حسات بلبرد رجع معاها ...مقادرااش تحييد ديك اللحظة من بالهاا
حسات بييه باسهاا فجنب فمها كونما تقلبات عندوو مكانش غيزعم عليهاا ،يعني هي لي فتحات ليه المجال وعطاتو اشارة بلي بااغيااه
هاد الفكرة حمقااتهاا وغطساتهاا فالحشمة والندم وكيفاش غتشوف فوجهو مزاال
بداا الصوت الدااخليي كينكدهاا عليهاا
نتي بحالك بحال نورة *
نتي اصلا جيتي لعاد الدنياا بسباب نزوة *
غتعاودي نفس القصة راه هكا كتبدا*
بداا صدرهاا كيتسارعو الدقات ديالوو سمحات لراسها تعيش ديك اللحظة ولكن معرفاتش ضميرها غيعدبهاا كتر مفرحات
كتمشي وتجيي فلبييت وهي فاشد وساويسهاا
تخنقاات خرجات لبالكون دخلات البييت كلسات مكمشة كتشوف قدامهاا
مضاربة مع نفسها وفصراع داخليي وفبرا كيبان عليها السكوون
كطلع النفس وتهبطووو بهدووء باش تهدن كتهز راسها لفووق باش يدخل ليهاا الهوااء دغياا وتنفس
خرجات لدوش غير تقابلات مع لمرااية شداتها الحشمة مقادراش تشوف فراسهاا وفمهاا لي حمر
هزات بونضوو جمعات بيه شعرها من القدام وغسلات وجهها مرة مرة تطلع معااهاا دغدغة من المعدة
تمناات تكون هدشي عاشتو مع رااسهاا دخلات فمشادات كتقول راه غير كنتخيل كنت نااعسة
كتفكر شنو وقع قبل متلقا راسهاا متجاوبة معااه مكتفكرش يعني كانت نااعسة
صافي راه غير كنتخييل ميمكنش يكون وقع داكشيي يمكن نااض قبل
دخلها الشك ومبقاتش عرفات داكشي واش عااشتو ولا غير كيتخيل ليهاا
دوزات ايدها على فمهاا كان طبيعي وعاادي على اساس غادي يتنفخ وتلقااه معضوض وزرق وباين فيه اتاار البوسان بحالا باسها بسنانو وكددهاا
جاها الضحك والفقصة وحارت واش تهبط ولاا تبقا دايرة رااسهاا ناعسة
خرجات من دووش كتسلت وكطل براسهاا واش كاين الحس والو السكاات ..بدات هابطة مع الدريجات بهدووء وقلبها غيخرج من بلاصتوو ...بانت ليها الدنيا خااوية مكاينش حسوو و السرجم محلول ضاربة الشمش حتى لباب الداار حيت مقابليين...هبطات و دازت لكوزينة عمرات كاس ديال الماا هبطات علييه بالشحفة ومشاات تقابلات مع الشمس مغمضة عينيها و الشمس بااردة كضرب فيهاا شافت الساعة لقاتها التمنيية داز وقت طويل وهي كتفكرر فنفس الموضوع بلا متنتاابه للوقت شحال جبدات تيليفونهاا ودخلات ليوتيوب دارت اغنية الطرب الجميل " ماجدة الرومي _ انا عم بحلم"
متكية على السرجم تناساات المووضوع مع الاغنيية وهي كتشوف لوليدات كيلعبو لتحت وكدندن مع الكلماات
ايمان: انا عم بحلم ،ليل نهاار ،بالورد المليانة زرار ممم
سمعات الساروت كيدور فلباب خرجوو عينيهاا وقلبها كيضرب كيضرب دارت راسها مسمعات والو وقلبها غيخرج
الاخير دخل شافهاا عاطياه بالظهر مقديي تقدية ديال داار ..داير نظاظر ديال الشوف وكمامة باللون الاسود ...حيدهاا وقرب لكوزينة لااحها فسطل ديال الزبل وحط الصااشياات
موقف محرج وماواالفووش بتاتا فحياتوو من نهار بدا كيفرق بيين الصح والغلط وتكون عندو ادراك ان العلاقة المحرمة صافي رااه محرمة مافيهاا لا ولكن ولا حتى
نهار نضج ودخل العشريناات كانت علاقتو بالنسااء والجنس اللطيف سطحيية اخر مرة تصااحب فيهاا كانت فاخر الاعوام ديالو فليسطاا تما عرف بليي مكايين لاش يدخل راسو فشي حوايج معمرهم يتنسااو فحياتو فضل نهارر يبغي قلبو شي وحدة غايطلبها لزواج نيشاان
تبع غريزتو كأي رجل وانسان على وجه هاد الارض ...مقدرش يقاومهاا وهي حدااه وداباا الاحرااج والاحساس بالندم كيااكلوو ومعرفش حتى كيفاش يبرر الفعل ديالو معاها
حذيفة: حمم ايمان
هي فداخلهاا كانت كتقول ياربي يكون مكيشوفنيش مكنباانش كان فاكها غير صوت الموسيقى لي كان عالي فلحظة توقف وتسمع غير صوتوو فداك السكاات ..بغات دور وتفكرات راه حتى السوتياان مالابساهمش بغات تبكيي بالاحرااج والموقف لي تحطات فييه
دورات رااسهاا عندوو لقاتو حتى هوا كتر منهاا معارف ميسبق ولا يوخر
كيحك مؤخرة راسوو وكيتلف عينيه عليهاا غلب علييه الضحك وتلفات ليه الهدرة
هنا تاكدات بلي داكشي لي وقع ماشي وهم وبليي حقيقة وطلعاتها التزنييكة وحناكهاا توردوو
حذيفة: ايماان مبغيتكش تاخدي نظرة خايبة علياا ،اقسم بالله مكنت ناويي غير (مسح وجهوو )
سكتات كدور فعينيها وهوا وراهاا عارفة راسها بليي هي لي بداات ودابا كيطلب منها السماحة بحالا ماشي هي لي كانت كتجاري قبلتوو وكتنهد وداعب لحيتو بايدهاا
حركات راسهاا بااه وسكتات مقدراش تعطيه وجهها
سمعات تخرشيش حتى كتشم ريحة الورد قدامهاا ضحكات وشداتو بخجل دارتو فنيفهاا كتشم فييه وجاتها نيت تحضن لبوكي تخبي بييه صدرهاا
ايمان(بخجل ): شكرا ههه
ضحك حتى هواا من الوضع الغريب لي تحطو فيه مزال مسخنو حتى بلاصتهم فداار
بغا يبدل الهدرة وقال: نفطرو ونخرجو ندوزو نهار فلبحر !
ايمان: مم وخة...نطلع نبدل دغيا ونجيي
مطولاتش فيه الشوفة طلعات البيت كتجريي وهوا ضحك وجبد شنوو يوجد يبدع ليهم فطور زويين
قطع طبسييل مشكل ومنوع من ديسير ...لكيوي والتفاح والفرييز
دار طوست بالفرماج والبيض وطريفات لافوکا فوقو معتامد اكل صحي ونمط صحيي الحاجة الوحيدة الخارجة على السطر لݣارو لي حاول وفشل فكل محاولة باش يحيدو
عايش بوحدو انسان حدودي ومكيعمرش بزااف مكيسهرش ومعندوش كترة الصحااب الخدمة الداار ولبقا عندو الوقت كيخرج يجري ولا كايمشي ل لاصاال
عصر الليمون طبيعيي
حط كلشي فالطبلة ومشاا كيقاد فلماشين ديال القهوة
هاد الوقت كلو لي صايب فيه الفطور هي كانت مدابزة مع حواييجهاا
لبسات ملابس داخلية بزز وتبعاتهم كسوة من الثوب الاستيك لاصقة علييها طويلة وفيها فتحة فجنب ،لبسات فوقها شوميز بيضاء سامبل ديال دجيين
رشات ريحتهاا وشوية من الميكااب مشطات شعرهاا ب مشط كهربائي وخلاتوو هكاك زادت سبرديلة بيضة وهبطات كلها انوثة والحنيكات مزنݣين بلفغاجو ماشي الحشمة
هز عينوو فيها وبااين الاعجااب واضع بيناتهم ضحكاات وحتى هوا ضحك ملي تقاابلو عينيهم
حط كيسان تاع القهوة وكلسوو مقابليين مع بعضيااتهم مشا لتيليفونها شعلو وبرك على بلاي ورجعات الاغنية من بلاصتها حيت ميمكنش يكلسوو هكاا حشمانيين من بعضياتهم
عجبها الفطوور وحمقهاا التنووع داكشي لي كيعجبهاا
ايمان:الله اعطييك الصحة ...
حذيفة:بصحتك ...معطاوك لا دوا لا والو ؟
إيمان (مسحات فمها ) : لاا كنت كناخد دوا ديال الحريق دابا مبقاش فياا صافي
حذيفة: ردي البال متبقاايش تحركيها بزااف
ضربات الديسير والعصير وكلاات مفتوحة ليها الشهيية
حاولات تعاونو ما امكن لقاو راسهم حاصليين حدا الكوزينة بجووج
قلبوها ضحك شد من عندها الطباسل خشاهم فلماكينة لتحت ومسح الدنياا
طلع بدل علييه بقات كتسنااه هبطات الورد دارتو ف فاز مع الما وسكر وبقات كتشم فييه فرحانة حتى هبط ..عطاها صاكها نساتو فوق الفطوي شكراتو شداتو من عندو وخرجوو
ركب فطموبيل وعطاها كمامة جديدة وحتى هوا وحدة
ايمان(كتشوف فالتيليفون ) الرويينة فمدريد ...سدو شي مدارس
حذيفة: الى مشا حتى كثر هدشي يقدرو يسدو كلشي الصين راه ديجا سدات غير الله يحفظ
ايمان:هههه دابا المغاربة تقولييهم متسلمووش على بعضيااتكم
حذيفة( ضحك ) مرت عمي قلنا ليهاا نقصي من التجمعات والعرساات قالت لييك بغيتو دخلوني فاكتئااب اللهم المرض ولا القنط
ضحكاات وفطرييق صونا تيليفونوو وقال: الوليدة هادي
دار مكبر الصوت وجاوبها بحنان ومبتاسم بحالا كيهدر قدامها: مي لباس اش خبارك
_لبااس اوليدي نتاا بخيرر تهنا الوقت
حذيفة:اللهم لك الحمد ،دريات و محمد لواليد كلشي بخير
_هاهوماا ابني ...الحاج اولدي راه حبسو لييه الرقية لي كيدير ،وقاليك غيحيدو العرااس والتجمعاات
حذيفة: ياك المحال مزال محلول !
_شادو محمد هاد الساعة مزال ويني هدشي كتر اولديي الله ارضي علييك رد بالك وغسل الخضرة بجاڤيل والخل لي دخلتيها لداار غسلهاا
ضحك كيشوف فايماان وكمل معاها الهدرة :الى مقت_لاتنا كورونا يق_تلناا جاڤيل امي الله اهديك ..غير الواحد يدير احتياط ديالو ويبعد مع كترت التجمعات ومخاف والو
_ قالوو غيرشو الدوا بطياارة والله العظيم قالتها ليا ربيعة صبااح واش بصح
هنا مقدراتش ايمان تحبس الضحكة وضحكات ولكن ضحكة حذيفة كانت اقوى من انها تسمع ضحكتها بقا كيضحك حتى دمعو عينيه ومو تاهياا كضحك وقالت: كضحك علياا ههه
حذيفة:ميييي هههههه شكون قالييك هدشي هههههه
_ هههه وشتيي دوك لي كيرشو دوا لربييع هوما نيت لي بانو ف الاخبار كيرشو فبنادم فزنقة اما انا مخرجت ما شت
حذيفة(مسح عينوو من دمووع وباقي كيضحك ) ضحكتيني اميمتيي ... مكاين والو ان شاء الله يدوز كيفما داازو لي قبلوو
_ومعليناا عفاك الله ارضي علييك لبس مزيان ودخل لدارك بكريي ومتجاامع مع حد رانيي مشوشة علييك
حذيفة: كوني هاانيية تهلاي ليا فراسك غير نتيي اميي هدشي كافيي
قطعات كترضي علييه وتعااود بقاا ضااحك وخة قطعاات اما ايماان دعواتها لييه حركو مشاعررها وحرمانها من هاد الجاانب لخاااوي فحياتهاا
فهاد المرض وفهاد الحزة كتخافي على العزيز علييك ،كطمنيي علييهم وتوصييهم وخة راه كل واحد عارف شنو كيدير ولكن نفسك مدوزكش وكتبغيي تبين حبك واهتمامك لداك الشخص وبلي روحو عزيزة ومتبغيش ليه الضرر ...نطقاات بحسرة وقالت: الله اخليها لك ،مسكينة كتباان حنينة
بتااسم وقال: امينن ...مزال تعرفي عليهاا متسخاايش بيها
ضحكاات بخفة وفقلبها وجع وحسرة وعينيهاا مبقاتش متحكمة فيهم فيهاا غصة ...حلات الزاج يضرب فيها البرد ينشف الدموع لي تكونو فعينيها ودغيا حماارو وسكتات
بعد سااعة حط الطومبيل فمكان هاادئ كيضرب الرييح شوية قدام حديقة ماريمورتاا المعرووفة كانت خضرااء بمعنى الكلمة وباحات مائية شجر وكرااسة وديكوور وكطل على البحر والباطوات وجرف عاالي
حذيفة:يكما جاك البرد
ايمان:لاا الجو زوين ...فدار كانت الشمش هههه
حذيفة:ديما كيكون مغيم شوية حدا البحر ..غير شوية وطلع
تبسمات لييه وكل مرة شعرهاا يديرونجيهاا جبداات بانضة صغيرة ومشات عندو بخجل وقالت: جمع ليا شعريي
شد البانضة ومشا وراهاا كيجمع ليها شعرهاا كيف قالت لييه يجمع النص لفوقاني ويخلي ليها لتحت مطلوق وداكشي لي دار
دايرة السمطة لايدهاا وكتمشاا حدااه حتى ...جبدات تيليفونها كتصور المناظر لي حمقووها كانت الدنياا خاوية غير ناس قلال مفرقيين وكل واحد شنو كيشووف كبييرة وفيها ميتشااف هابطيين فدوورج وعينيه على مكان واحد كيتمنا يكون خاوي وفعلا فور مشاافوو تبسم وقال: خلييك معاياا دابا تشبعي سطورياات
ضحكات وحيداتو فعلا دارتو فالصااك ...شد ايدهاا ومرفضااتش سكتات فجنبوو ومرة مرة تهز عينيها فييه وتبسم بخجل كانت قدامها بلاصة دائرية بحال شي بالكون ديال شي قصر ضاير فيهاا شجر من الجوانب بجوج والقدام كيباان البحر وتحتك لحجر طلقاات منوو وطلاات مقادراش توصف الخياال وسحر الطبييعة
ايمام:انا راه كنحمااق على شي حاجة سميتهاا الطبيعة ههه شووف دووك لفريخااات شحال غزاالييين
مشافتووش حداهاا وتقلباتت عندو كتشير بايديها لفرااخ فالشجرة
ايمان؛شووف حذ
خلاهاا تصدم و تحط يدها على فمها وترااجع بخطوة اللور وهي كتشووف قدامهاا حذيفة حل البواطة الزرقااء قدامهاا و وااقف هزات عينيها فييه وايدها على فمهاا عامريين دمووع وتكلم بصوت خافت
حذيفة : ايمان ... اناا كنشوفك البنت لي مغاديش تعاود فحياتي، سيي بيناتناا اختلااف بزااف ولكن حبي لك كبر من كلشي (تنهد )اول مرة كنبغي شي حاجة وخاايف متكونش لياا ...داكشي علااش بغييتك لحلاال ..واش تبغيي تكونيي دياليي ...مراتيي وحلالي ، تبغيي تكملي معاياا على الحلوة والمرة ...انا طالبك على سنة الله ورسووله بغيت نكمل معاك دينيي ونكونو لبعضياتناا فالدنياا قبل لاخرة...تزوجي بياا
طاحو دموعهاا وهي فصدمة من امرهاا ماحيلتها لطلب ولا الخااتم لي ماشي ايي خاتم هاد المرة حطها قدام الامر الوااقع معطهاش وقت ولاا تمديد لطلب ...جاتهاا هستيرية ديال البكاا ومشات لحضنوو كتبكيي مزيرة علييه بايد وقالت بدمووع: الى كنتي غتكوون باباا وصاحبي وحبيبي وخوياا انا قااببلة
زير عليهاا بحب :نكون لييك كلشي
نطقات كتنخصص:بغييتك تكوون العوض لي محتجااه احذيفة هء
بعدات علييه كيمسح دموعهاا وقالت :قاابلة هء
مدات ايدهاا كيرجفوو لييه بااسهاا بحبب فراحة ايدهاا ،جبد الخاتم من البوااطة بتوتر هوا الاخير ايديه عرقوو مع ركب ليها الخااتم تحطو على كتفوو وعوود هوا ملزم باش يوفيي بهم
إن قلبي لا يمكنه أن يتحمل الغيبة، ولهذا طلبت منك أن تجعل دائمًا روحي لروحك قريبة
أدمنتك ولا أجد علاجًا سوى قربك
لا أفكر في العمر المتبقي لي، ولكني أتمنى أن يكون كله وأنا معك
قبلات واخيراا بدون حتى متفكر خرجات اه من فمهاا سبق قلبها فالإجابة قبل مدخل فدوامة متقدرش تخرج منهاا
حسات براسهاا طايرة فالسما وفعلا كان هازها من خصرهاا وهي معنقااه ودورهاا بفرحة محطها حتى بدااك كتغوت وضحك
ايمان:هههههه حذيفة دخت هههه دخت
حطهاا كيضحك والفرحة غتخرج من عينييه بغج ليها حناكها بايدو وباسهاا بقوة فحنكهاا ...مشعرش من قوة الفرحة انه اخيرا قبلاات اخيرا البنت لي سرقات قلبوو او بالأحرى هوا لي خلاها تسرق قلبو وتفكيروو قبلاات من بعدما كان تيقوول قصتنا سلاات ومكاينش شي حاجة سميتها حذيفة وايمان منهنا القدام
اليوم وفاسباانياا قبلات الزوااج بييه فرحتو مقادرش يوصفهاا بلهدرة ولا حتى العنااق
حسات برااسهاا اميررة وبليي ملكات دنياا فهاد اللحظة كتشوف واحد الفرحة فعينيه معمرها شاافتها فشي حد
عجبها الحال ان شخص فهاد الدنياا كيبغيهاا وبااغييهاا فحياتوو يعني مرغوبة و وجودها ولاابد منوو
هدشي خلاها بحال الحمامة فسحااب فرحانة وقلبها كيضرب بحال الخلعة
حذيفة : اوووف شحفت
ايمان(بخجل ): هههه علاش
حذيفة: كنت خايف ديري ليا شي شمس العشية تااني
ايمان(هبطات راسها كضحك ): وصافي نساا عفااك
حذيفة: اليوم بداات سطوري جديدة فيها انا وايااك
رجعات حضنااتو ساكتة زير عليهاا ومشاو تقابلوو مع طيراس كيطلو على لبحر ...هبطات عينيهاا فلخاتم كتشوف فييه باعجاب وطولات الشوفة فييه كدورو بايدهاا
حذيفة(انتابه ليهاا ) : معجبكش
ايمان(ردت بسرعة ) : واش حماقيتيي ... حمقنيي ولكن ... ولكن كيبان غالي احذيفة
حذيفة: ميغلاش علييك اكببيدة
ضحكاات والحشمة طلعاتهاا اول مرة يقوليها شي كلمة بحال هكا ..هوا الاخير خرجات عفووية وضحكوو بجوج وقالت: ونتا شنو مغاديش دير الخاتم
حذيفة: هههه الحكاام
ايمان(بدلع) : وشنوو بغيت كلشي يعرف بلي تزوجتيي صافي
حذيفة: داباا نييت نشرييوه
ضحكوو وتمشاو فاستكشاف هاد الحديقة الاسطورية مسلوبين بالمناظر الطبيعيية والاشجار لي من جميع الاصناف
شاد ايدهاا وهي الفرحة غتخرج ليها من ودنهاا
النهار كلو دوزوه فالنواحيي وفلعشية شدوو الطرييق تقداو لي خاصهم ودخلو لدار بليل
حذيفة: فيك الجووع ؟
ايمان: لاا شبعانة
عاوناتو يستفو لي شراو فلكوزينة وهوا عاض على فمو بغا يجبد معاها الموضووع
تكا على لفابوو وهي عاطياه بجنبهاا كدير لقراعي تاع لما فتلاجة
حذيفة :ايمان
ضارت عندو بابتساامة وقالت: سيي
شد ايدها وجرها قدااموو وقال: كنتي قلتيي ليااا بليي كاين شي خالك ف مورسياا ياك !
حسات بلخلعة وقلبها كيضرب و بدلات نظرتها من لفرحة لنظرة باردة مكسورة من لداخل وقالت بجفاء: مالوو
حذيفة: زعما الى بغيتيي نخطبك من عند شي حد ! او يحضر لييك فالعقد يشهد معرفت انا غير قلت لييك ربما تبغييه يحضر
سكتات واللون تبدل فوجهها وعينيها دغياا بداو كايبريو بالدمووع شافهم وحبس فلهدرة بحالا عرف راسو قال شي حاجة ماشي هي هاديك ...تقاد فالوقفة وقال: ايمان
طلقات من ايدوو ومعطاتوش خو جوابو مشات كتجري طلعات فالدرووج ودموعها شقو طريقهم
دخلات لبيت سدات ومشاات كلساات كتبكي ...حيدات القاميجة صهدانة وبقات بلكسوة نص كم لاصقة
ايدها كترعد كتمسح دموعهاا وكتشهق حتى حسات بلباب تحل ودخل حذيفة
عطاتو بالظهر كاتمة شهقتهاا حتى كلس مشوش وقال: قولي لياا شنو فخاطرك ...واش لهاد الدرجة ضرك ؟
كيفاش تقوليه بلي الحياة ضرااتهاا ومرمداتها كيف بغات
كتافات تحرك راسهاا بالايجااب حيت فعلا ضرها ، علاش هوا بالضبط؟
حيت فصغرها كانت عندها معاه ذكريات زويينة كانت ملقباه ب "حبيبي'" حيت فعلا كان مبيين ليهاا بلي هوا طوق النجاة لي تمسكة بييه ...كان كيبان ليها هوا داك الخلاص لي غيسااليي محنتهاا و لي غيهزهاا وغيعاونها طلع
هرسهاا فاكفس اياام حيااتهاا ،هرسها فالوقت لي كانت كتسناا ايدوو باش يقوليها هاني معاااك لمشات ميي مزال حبيبك فجنبك
ولكن كان اول واحد خلا ايدها ممدودة ،هوا ماشي مجبر ولكن الوعود لا تخان ...وهوا خان وغدر وهرس لي بقا فبراءة ايمان ...
قرب حداها مسح دموعها بلطف وقال: صافيي متبكييش سمحيلياا
هزات عينيها فييه بضعف وخوف وقالت: واعدنيي معمرك تخليني احذيفة هءهءهء
حذيفة:كنواعدك (مسح عينيها )وربي شااهد
ايمان(بضعف) : الى شي نهار خليتيني مغنقدرش نعييش (ببكاء ) مبغيتش نبقا بووحدي بلا بييك
حذيفة(متخيلش هاد الضعف كلوو وهد لكلمة تغرساات فييه بحال الخنجر حس بلي ورا كلامهاا بزاف ديال المعانات مقادرش يقوليهاا تعاودهم لييه ، مقدر ينطق بحتى كلمةة من صدمة فاش خلاتوو ) : اي (تنهد ملقا حتى كلمة جرها لحضنوو وندم لي جبد الموضوع بتاتاا وعمرو مزال يفكر يقوليهاا عاودي لياا على عائلتك ) صافي نسااي ...شنو قلت لييك قبيلة مم(كيحك ف فروة راسها بلطف )حنى اليوم غنبداو قصة جديدة فيها غير حناا مشغلنااش فشكون بغا يشارك معانا فرحتناا المهيم انا واياك نكونو فرحانين ومرتاحيين فحياتناا سمعتيني ... حنى بجوج فغربة وفبلاد بعييدة ...نتي ديالي وانا ديالك ولعطيتك العهد على شي حاجة راه عمريي نخونهاا غير رتااحيي
حركات راسها فوق صدرو باطمئنان هز ليها راسهاا ومسح بقايا دوك دمووع وقال: نعسيي ورتااحي (بمزاح )تابعانا الروينة ديال الورااق باش نحطو الطلب فالقنصليية
ايمان: مغيعكسوش !
حذيفة: لا علاش غيعكسو بجوج بينا عندنا الورااق و وعندي الاقامة والدار وخداام ...دابا غيخصنا غير شهادة طبية لينا بجوج و عقود الازدياد وفطوكوبي ديال لباسبور وشي تخربيق اخر غدا نضييوه ان شاء الله (غمزهاا ) طولنا بما فيه الكفااية
ايمان: زربتيي علياا ههه
حذيفة: الحمام كيطيير اللهم نربطو
ضحكااات وقالت: يطير حتى يعياا كيرجع لعند مولاه ياك !
حذيفة: لاا ههه انا بغيتك معاياا على طول
ايمان: ههههه ان شاء الله
حذيفة(مسح على ايدهاا بلطف): رتااحيي ...انا لتحت نكمل شي خدمة
حركات راسها بااه خرج من البيت وهي متبعاه بعينيها ترد وراه الباب وانفاردات مع رااسهاا ...لاحت راسها على المخدة جبدات تيليفونهاا وصونات ابييل فيديو ل وديان ونيستهاا ملي مكتلقا معامن تهدر لقاتهاا فبيتهاا هي الاخيرة عاد مدوشة
وديان: غبرتيي يا صااحبتيي
ايمان(بابتساامة حطات تيليفون موقفاه على المخدة قبالتهاا وراتهاا صبااعهاا )هااي
وديان(انتابهات لخاتم وشهقات كتصفق): متقوليهاااش هههه وافقتيي
ايمان: ااه ههه
وديان(بحماس)عاودي لياا وعاااودااي
ضحكات وعودات ليها لبلان كاامل وقالت: وينووو حبييييت ههههه
ايمان: قالياا ندفعو طلب ل قنصلية باش نطيحو العقد
وديان: هههه مسخووط زرباان ولكن شوفيي انا راه قطعت السيمانة المااجية غير تكااتبيي جي بااش نتقدااو
ايمان: هههه اش غنتقداا
وديان: اجي كملتيي الليزر ؟
ايمان(تاوبات): كملتوو شنو جاب الليزر لهدرة يا هاد البنت
وديان: ديري فيهاا نيية ومكاتفهميش
ايمان(قلبات الموضوع ) : شوفيي بغيت منك واحد طليبة ا ودياان
وديان(بتركيز): نعاام
ايمان (تنهدات ) : بغييتك تمشي المحمدية ميي كانت عندها واحد الدار جنب البحر ،بغييت نشريهاا
وديان: وهي فالاصل فسميت خالك ولا شنو
ايمان: معرفتش ...يقدر يكونو باعوهاا دوك المساخييط ماشي ديال يبقاو مجموعين فالورت ... انا بغيت نشريهاا وخة تكون طالعة فالثمن مشغلييش
وديان: قولي لياا غير العنوان ديال هاد الدار ...صباح غنسيفط واحد الصديق يجيب طلة ويقولينا واش تبااعت ولا تكراات ولا خاوية ونرد علييك
حركات راسها بااه وقالت ليها العنوان
وديان: شي خبار على القضية
ايمان: مزال درت توكيل المحامي باش يتكلف لي عرفت هوا ديڤ فاق من الكومة ولكن تهرس من ظهرو تشلل
وديان : واش بصح يكون باه قت_ل موو ولا غير تيخرف
ايمان: معرفتش حتى البوليس متسوقووش ملي قلتها ليهم..كيف بقات خالتيي !
وديان: شويية باقة كتخنق ولكن ماشي بحال اللول
سلات معاها الهدرة وتقلبات على ظهرها كتشوف فلخااتم وتبسسم بفرحة مخلطة بشوية ديال الخوف والرهبة من هاد الخطوة لي دارو ..واش غتكون خطوة مزياانة ! واش غتكون عندها حياة زوجية سلييمة ومغتساليش
الليل كلو وهي كتفكر فهادشي اما حذيفة مقابل مع السرجم كيكميي وعقلوو خدام فتصرف ايمان ..شنو غيكونو دارو هاد العائلة ليهاا شنوو الضرر لي غيكونوو داروه فيها حتى تولي سيرتهم بالنسبة ليها خنجر كيجرحهاا
عيا يفكر ملقااش شنو ممكن يكون وعلاش مكتبغيش تهدر الشخص الوحييد ليي فمها هوا مهاا
ملقاش جواب ومقدرش بتاتا يسولهاا ويقوليهاا شنو دارو لييك بشنو جرحووك حتى ولاو عينيك فلداخل ديالهم عامر حزن
حاول يتلف الموضووع بما امكن وباشر خدمتوو كيفصل وكيدير التوب على لمانكان كيشد لبلياات جيهة الصدر بلفناييت باش يتبت الثوب على شكل لي بغاا باش يكون ساهل فلخياطة بلمودل لي بغاا ...حتى هواا مقدرش ينعس حتى قرب الفجر عاد تكاا فالفطوي ...سمع الادان فتيليفون ناض صلاه ورجع نعس
اما ايمان مكحلات بنعااس حتى بدات كتسمع الهدرة والطريق تحركات براا والضو بدا كيبان عاد نعساات ولا الليل بالنسبة ليهاا ظلمة مظلمة عليهاا هواجسهاا وخوفها تيتغلب عليهاا
فااقت على صوت فريخاات...حلات عينيها كيبان ليهاا عصفوور صغيير كينقز فوق الزربية مقابل مع السرجم ...هزات راسهاا بابتساامة كتشووفييه خافت تحرك ويطيير بقاات كتشووفييه كيااكل من الزربية ...حتى صونا تيليفونها وهوا يطير ناضت كتحرك بشوية على ايدها هزات تيليفونها لقاات ودياان جاوباات بصوت ناعس وهي خارجة من البيت داخلة لدوش
ايمان : صبااحوو
وديان(بصوت ناعس ): صباح النوور عاد فقتي حتى نتي ههه نعاسة
دارت مكبر الصوت وجبدات برودوياتها كتغسل وجهها وسنانهاا وقالت: عاد دابا
وديان: قلت لييك غنقولهاا لواحد الولد كاين فلمحمدية على الدار ...لقاهاا مكرية
ايمان (بحسرة) : مقااليكش واش بغات تباع !
وديان: قالياا مولاها مبغاش يبييع ...يا صاحبتي ديك الدار مشرووع ناضي صورهاا لييا الولد ولكن مامصلوحااش ومنهنا القداام رااه غتجيب ليه الضوبل الى بغا يبيع داكشي علاش كاريها داباا
ايمان: سيفطي ليا تصااور (تنهدات)نهار بغات تمتع بيهاا ماتت
وديان: المكتااب ابب نتي باغة تشريي ! ...الاقامة لي شريت فيهاا وااعرة اصااحبتيي وكطل حتى هي على البحر وجراديي
ايمان: من بعد ونشووف سيفطي ليا تصااور
وديان: ديالاش داري ولا المحمدية
ايمان: المحمدية
قطعات معاها وسيفطات ليهاا تصاور ...تنهدات بحسرة وحزن كانت عندها احلام مع ميمتها فديك دار كتهز فطياتها فقط دكريات زوينة
هبطلت فالدرووج كتشوف الدنيا صااقلة شافت الساعة لقات 11 ونص
ايمان: حذيفة ...حذ
شافت ورقة ملصقة فلغوز فالثلاجة مشات حيداتها كتقرا فيهاا
" صباح النور زين ديالي مبغيتش نفيقك خرجت بكري عندي الخدمة نسالي ونجي دغياا "
تبسمات وهي كتقرا وزادت ابتسامتها عراضت ملي لقات لتحت "ti amo"
كلمة طلعات ليها الموراال وحضناتها فصدرهاا مشات تشوف شنوو تااكل
جبدات الحليب صايبات قهييوة وهزات حليوات فقط ومشات حدا السرجم وكلسات وهاد المرة لقات الدنيا صااقلة مكاينينش لوليدات لتحت كيلعبو الكورة ويصدعو النااس
بقات كطل ومشات كتكتااشف الدار هزات تيليفونهاا طالعة هابطة فانسطا وموضوع الساعة هوا الوضع الحالي في البلاد كاملة
شافت ظفيراتها وفكرات تقادهم باش تحط صورة ديال الخااتم ولكن معارفة حتى صالون هناا
هزات تيليفونها ..دوزات الخط لحذيفة لي مجاوبهااش وحطات اليتليفون كتشلل فلكاس حتى عاود صونا هزات تيليفون دغياا ودوزات الخط بابتسامة
ايمان: صباح الخير
حذيفة: صباح الخير الزيين عاد فقتي
ايمان: ههه لاا قبيلة نتا فالخدمة !
حذيفة: مشيت عند واحد النوطير باش نعرف شنوو نجمع وشنو طالبيين فالوراق ديال العقد
ايمان: مم قولياا ...بغيت نخرج لشي صونتر بيوتي هناا مقريب حتى واحد !
حذيفة: سونتر ! معرفتش الصرااحة
ايمان: غنشووف ف كوكل
حذيفة: متخرجييش حتى نجيي ؤك
ايمان(هزات واحد الحاج كضحك ): علااش زعمة
حذيفة: خاص يكون شي سبب !
ايمان: واش اول مرة نخرج بوحدي
حذيفة: ودابا مال راسك قاصح ! صبري ندوز دغيا الخدمة نقاد مع ليكيب لا ليست ديال اليوم ونجي 2 نكون فدار نخرجو نتغداو وندوزك تقضي شنو بغيتيي
ايمان: وخة اسيديي ماشي مشكيل
طلعاات جمعات البييت بيدهاا وبدلات حوايجها على خاطرها صورات روتينها فلميكاب وهبطات التحت كالسة
وصلات جوج عاد سمعات الباب تحل تبسماات وتقابلات معااه ...دخل هاز ملف فايدو و وريدة حمرة ...توجهات لجيهتو كضحك شداتهاا وقالت: شكرا ههه
حذيفة: بصحة الوريدة
ضحكات بخجل شماتهاا ومشاات حطاتها ف لفاز مع الورد التاني
داز كيغسل ايديه وقال: نخرجو نتغداو من بعد خاصك ديري واحد الشهادة طبية ونسخة من عقد الازدياد
ايمان: منين غناخدوو ؟
حذيفة: من القنصلية
ايمان: ويعطيوه ليا وخة مساكنااش هناا ؟
حذيفة: سيي المهيم تكوني مسجلة فشي قنصلية
ايمان: ديال ايطالياا
حذيفة: مزياانة،اصلا قانون واحد
فعلا خرجوو وقضاو اغرااضهم جمعو الوريقات اللازمة لزواج ودفعو الطلب ديالهم مشاو تغداو على خاطرهم
ايمان: زربتي علياا
حذيفة: تعطلت ماشي زربت هههه(شد ايدها )مبغيتش شي حد يشوف فيك شوفة ناقصة خصوصا نتي معايا فالدار ...وديك السااع فينما بغيتي توجدي العرس على خاطرك
ايمان : العرس!
حذيفة: سيي بغيتي نديروه هناا ولا نهبطو المغرب لي عجبك
ايمان: شكون غيحضر فالعرس ، معندي تاحد
حذيفة: نديرو غير حفلة صغيرة نفرحو براسنا فيهاا صاافي لي يقدر يجيي غيجيي ..باقة بغيتي تمشي لصونتر
ايمان: ااه
ناضو كيدوروو فالشارع نص فلمحالات كلشي سااد والبوليس مفرقيين فلمدينة كلهاا
حذيفة: خلي من بعد يمكن ساديين ...شنو بغيتي ديري فالصالون
ايمان : بغيت نقاد ظفاري
هز ايدهاا وهوا ساايك باسها وقال: زوينين مالهم
حشماات ودخلها سوق راسهاا ...شابك ايدو مع ايدهاا مبقاش طلقها ليهاا
سلات ايدها كضحك وقالت: بغيتي تورتني فيهاا هههه
حذيفة: ياااك
ايمان(بدلع ) : حتى نتزوجو وشدهاا
حرك راسوو كيضحك وجاوبها ف نفسسوو وقال: غنشدك كاملة ديك السااع
ايمان: علاش كضحك ههه
حذيفة: هههه منضحكش ! هههه هبيلة هادي
ايمان: هههه حذيفة غنضربك
حذيفة(ضحك وجر ايدهاا زير عليهاا ) : سكتي ولا نعضهاا...ايمان مرتاحة فديك الدار ؟
ايمان: ااه علااش
حذيفة: غير زعمة لمكنتيش مرتاحة فيهاا نبدلوها معنديش مشكيل
ايمان: لا بالعكس عجباتنيي ...غير خاصني نزيد شي حاجة
حذيفة: ههه الزوااق
ايمان: ههه لاا غيخصنيي بزاف تاع الحاجات
حذيفة: ماشي مشككيل اي حاة معجباتكش نبدلوهاا... اه ساكنة فوقنا واحد السيدة وراجلها مغاربة
ايمان: واش بصح
حذيفة: سيي ساكنين بزاف ديال المغاربة فديك لبلاصة ،السيدة الله اعمرها داار لسمعتي شي تقرقيب فسقف غير ولادهاا ههه،شي مرات كنشم ريحة المسمن و كسكسوو فدروج
ايمان: بصح
حذيفة:هههه واحد نهار مسكينة دارت كسكسو ودارتوو ب لكديد ولا منعرف وشمو جيران الريحة حسابهم كتشحر فشي بنادم تماا (غلب عليه الضحك )مشاو كيدقوو عليهاا كانو غيجيبو ليها البولييس
ايمان: هههههه وشنو دارت معاهم
حذيفة:كانت اخر مرة دير الكديد ههههه ندموهااا
،،،
داز اسبووع طااير فرحانة معااه مرتاحة وعاجبها الحال فدار والاهتمام ديالو والعادة جديدة لي كتسناه غير امتا يدخل ويعطيها ليهاا وهي الورد كل نهاار كيدخل ب وريدة فشكل
بدات كتقدا شنو خاصها فداار طابل دو نوي فلبييت خداتها كبيرة فلبيض وبمرااية ولبولات ستفات فييها اغرااضها وفيها مجورة ستفات فيهم ملابسها الداخلية والمكيااج لي مكتستعملش ديماا...زادو ديكوراات فالصالون وبدلوو الديكوور لفرااش زاد طبيلة تاع الزاج ب ربعة الكراسة حطوها حدا السرجم ...
كانت دايرة مع ودياان تجي نيشان لاسبانياا باش توجد معاهاا اشيائها الشخصية حتى كتصدم فاخر هدرة معاها
ايمان: وديان كتصووني !
حذيفة: جاوبيهاا
ايمان: وديااانوو
وديان :بب عندي ليك خبارك خايبة
ايمان: ش شوااقع
ودييان: سدو الحدود وغدا مع 12 غيبدا لكونفينموون(تنهدات) حصلت هناا عرفتي واحد رويينة واقعة هنااياا كلشي تسد كلشي تطرق قهاوي اوطيلات لمحالات ،الحبس صافيي بنادم ولا مدابز غير مع حوايجوو
ايمان (باسف) قول مغتجييش على زهر
قطعات معاهاا وحزنات لانه كانت كتسناها توقف معاهاا وتشهد معاهاا فالعقد لي عندهم غداا
ايمان(بحزن): مبقاتش جااية ودياان ،قاتليا سدو الحدود
حذيفة: مفراسي والو ؟ والمشكيل عندي شي كموند من المغرب ففف
هز تيليفونو رابط الاتصال وايمان دخلات الفيس وانسطا تشوف الاخباار اش واقع
حتى كتصدم بلفيديواات روينة ناايضة فالمتاجر الكبرى فالمغرب طرقان عاامرة على اساس ان مع 12 تاع الليل غتوقف الحيااة
اشيااء دخلات ستريس والهلع فبنادم ولي صحتو قليلة ولا خاايف كاين المستهتر بحياتو حتى كيدي معاه ضحاياا قلال الصحة
العقد عندها غدا ودخلات فستريس كتفرك فايدهاا بتوتر وقلبها تقبط معرفاتش علاااش الوضع حتى عندهم ف اسبانيا مكانش كيبشر بلخير ونهار على نهار شي بلاصة كتسد
حذيفة(كمل الاتصال وكلس فلكرسي )مالكي خفتي ههه
ايمان:هدشي كيخلع
حذيفة: انا نيت خاصني نقوليك شي حاجة
ايمان(بخوف ): شنو تااني
حذيفة: الشاف لي معاياا فالخدمة لقاو فيه كوروناا ...والمشكيل تخالطت معاه غير الباارح
ايمان(بدا قلبها كيضرب) داكشي علاش مبغيتيش تسلم علياا هاد اليوماين ؟
حذيفة: حيت كنت شااك وداباا أكد وزيد عليهاا تسدات الريستوو مبقا فيا غير الزغبي ديال ناصر ياله صايبنا ليه لكونطرا
ايمان: سير دير تيست
حذيفة: الى لقاوها فيا غيشدوني فسبيطار ،دابا محااس بوالو الى حسيت نشرب دواا وصافي (مسح على وجهو )مشكيلة غداا رونديڤو ف القنصليية وغيخصنا نديرو التيست قبل مندخلو ليهاا
تكات على الفطووي محسرة وقالت كدور فالخاتم : معمر شي حاجة فحياتيي مامشات مقادة ضروري كتعكس (تغرغرو عينيهاا ) معرفتش علاش حياتي هكاا والله
خذيفة(كالس بعيد عليهاا): اييمان نعلي الشيطاان ،راه قلت ليك غير احتماال محاس بوالو ومكاين والوو غدا غيدوز كيف بغيناا ...ايمان عفااك
حركات راسهاا بااه وقال:ايدك شوية
ايمان: شوية (تنهدات )شوية
الوقت كيدووز بطييء منعسااتش ديك الليلة كل مرة تهبط عندو مكيخليهاش تقرب لييه كتكلس فدرووج
حذيفة: هههه راني بخير ا ايمان سيري تنعسي
ايمان: سمعتك كتعطس بزااف
حذيفة (ضحك وعينييه فداك الثوب كيطراسي فيه) : مبقا حد يعطس
طلعات الفوق كالسة على سرير حاطة ايدها على قلبهاا كتسوووط
نفسها مقبووطة وحاسة براسها باغة تغوت وتبكيي ...ولفات تحرك تسافر تخرج لبوتيكات الصالونات موضوع الزوااج والحياة الجديدة لي مقبلة عليهاا الوضع لي ولا فدنياا جاب ليها الرهبة معرفات كيفاش تهدن المشااعر ديالهاا ...فرحانة وبزااف بوجودها مع حذيفة ،ولكن مزال نفس الاحااسيس كتراودها نفس الاحلام نفس الخوف الپانيك
ناضت تلف دخلات لدريسينݣ حتى لقاات حذيفة مسرح لبلانشة ديال المصلووح كيصلح فقميجتوو هز عينو جيهتهاا وتبسم لييه ونساا المصلوح فوق القميجة وقال: الزيين
ايمان(تكات على الباب ): امتا طلعتيي ههه مسمعتكش
حذيفة: شفتك مخطووفة مالك ؟ قنطتي
ايمان: ممم الصرااحة ههه
حذيفة: غير صبري احبيبة داباا تخرجي حتى تعيااي (بمزاح)مزيان نحكمك شوية
ايمان: مغتبقاش تخليني نخرج
حذيفة : لاا معنديش لمرى لي كتخرج من داار
ايمان(تيقاتو وتقدات ): واش كدوي بالمعقول احذيفة !
حذيفة(غلب علييه الضحك ): هههههه فيا ميخلعك شوية غير خفتك تهربي ههههه
ايمان: حذيفة عنداك غير نتزوجوو وتبدل علياا عفااك
حذيفة: نيتك خايبة معااياا !
ايمان: لاا ولكن انا بغيتك تبقاا معايا كيف عرفتك
حذيفة: هههه عندك زهر عندي غير وجه واحد اما نتقلب علييك ههه(شهق )مشااات شومييز
ايمان(ضحكات بارتيااح): مزيانة فييك
حذيفة: يااااك اجي لهناا
هربات لييه ومشاات البيت سدات عليها كضحك ...مشات لبلاصتهاا
تكات كتقلب على النعااس نعسات واحد شوية تفااقت مخلووعة حلات عينيها لقات الصقيل شافت الساعة لقات 2 ونص تنهدات ساخطة على الوضع حيت عارفة راسها هادي هي نعستهاا ومغترجعش تنعس مزال
بقات مكمشة فبلاصتهاا كتشوف فجنابها اي تخرشيش كتنوض قاافزة دارت القران وغمضات عينيها والضو ديما شاعل كتسنا امتا يطلع النهار حيت كتعيا تقلب فبلاصتهاا
سمعات تقرقيب فداار وشافت الساعة لقاتها ل 5 تاع الصباح هادي وقت حذيفة كينوض كيصليي طول هاد المدة لي هي هناا وخة كتخلي ضو شااعل معمرو تجاوز حدودو وحل عليها الباب بلا متعطيه الادن هدشي كيزييد يخليه يتغلغل فعروقهاا من افعالو الزوينة
شدة تعلقها بيه نهار على نهار كتزييد وهدشي معرفاتوو واش مزيان ولا صعييب
ساعة من بعد ساعة نهار طلع وشمشية دخلات عينيها على البالكون فين حطات لطيوور لما و زواو شوية حتى دخلو جوج طيوور باصواتهم الزوينة خلاو ابتسامتهاا تشرق كتشوفهم كيفاش كياكلو ويشربو من بعد جاو جو اخريين ولفوو البلاصة كياكلو فيها بقات كتفرج فيهم بلا متحس بالوقت حتى سمعات الدقان فلباب ...ناضت كتقاد شعرها وكتمسح عينيهاا ومشات حلات الباب لقات حذيفة ف ابهى حلة لابس شوميز بيضة سروال دجين كحل وتجاكيط خفيفة داير ريحة زويينة وشعرو فازݣ والابتسامة زايداه جمال
حذيفة: صباح النوور
ايمان: صباح النور
قرصها ف نيفهاا كيضحك وقال: وجدي رااسك باش نخرجوو
ايان: ااه وخة ههه جيتيي زويين
حذيفة(ضحك): عجبتك هههه
ايمان: ههههههه بزاف كاع
خلاتو ومشات كضحك لدووش قضات روتينها بايد وحدة معدبة
دخلات تشوف شنو تلبس شي حاجة لي تقدر تلبسها بلا متعدبها
لبسات كسيوة ايلاستييك مخططة بلبيض ولكري هابطة تالتحت وفوق منهاا تجاكيط دجين كري قصيرة لبسات سبرديلتهاا وخلات شعرها مسرح رشات ريحتها وهبطات عندوو لقاتو كيحط فالطبلة الفطور بقات مدة فدروج كتشوفييه وتبسم كي الهبيلة هادي هي لي كيقولو ليها عمرو ما حبا ونهار حبا طاح فالبير
هز عينو يعيط ليها حتى لقاها واقفة شافتو وتوكضات وهبطات وقالت: ممم كيعجبني الفطور لي كدير
ايمان: هاني تشومرت حداك نبقا نطيب لييك تنطلع ليك فراس
ايمان: ههههه مزيانة ياله تعلمنيي نطيب
داعب راسها ملي كلسات وقال: جاتك لبيسة زوينة
ايمان: ههه شكرا
كلس مقابل معاها كيكب ليها فلقهوة ومنسااش اهم حاجة لوريدة لحمرة مدها ليها تضحكات وقالت: منين كتجيب هاد لوريدة هههه يكما كتشفر شي جردة
حذيفة: لا يهم المصدر المهيم لو جيست
ايمان: ههههه ممم
فطرو فجو مرح جمعات معاه لي قداات وخرجوو دايرين لكمامات فاتجاه السبيطار دارو تيست لقاو نيݣاتيف عاد رتاحوو مشاو تغداو بينما وصل الموعد لي ماحدو كيقرب ماحد قلبها غيخرج من بلاصتو الشهية تسدات ليهاا وغير كدفع وساكتة حاسة بالمعدة فحلقهاا
حذيفة(شاف الساعة): ايمان نوضي ياله نوصلو تماا نشوف طارق واش خرج
ايمان: ؤك
طلعو لطموبيل وهي قلبهاا كيضرب فرجليهاا مقداش تزييد حاسة بالحالة بغات تشدهاا
كتقرا فلقران وكتبسم وتهدر باش متبينش ايديها بداو كيرجفوو وحلات غير فالسمطة حتى نتابه ليهاا وركبهاا ليها وقال: كتعكس هاادي بلاتيي
ركبهاا ليهاا وجر ايدهاا بااسهاا وزير عليهاا وقال: مبقا والوو وتولي مرتيي
تبسمات لييه وقالت: ان شاء الله
كانت الطريق عامرة طلق من ايدها باش يركز فالطريق ...حلات الزاج يضربهاا البرد مكرهاتش تحل صدرهاا يسوط فيهاا ...طاحت عليها واحد الغمة خايبة وعنقهاا تشنج ودنيهاا كيصفرو كان البرد برا ولكن هي حاسة بالصهد والعرق
حذيفة : نصوني لدراري نشوف واش وصلوو (دار سپيكر لتيليفون واقف فزحاام ) ويي طارق وصلتوو
طارق: وصلناا كنتسناوكم حدا القنصلية
حذيفة: صافيي شي 5 دقايق ونكون حداك الطريق عامرة اودي هادشي واش هارب
طارق: سي غير بشوية طريق عامرة
تبرزط بالطريق منتابهش لايمان لي تخنقاات وبدات كتزاارق وتلون والسرجم مبقا قادي ليهاا والوو..دور عينو ليهاا لقاها حاطة ايدها على عنقها ورجع عينو لطريق وقال: ايمان صافاا
ايمان(بخنقة ): ممم غير دخت
حسات بالردة والودنين كيصفروو كتشوف براا وقف فطريق حلات السمطة تنفس مجا فين يتقلب عندهاا حتى حلات الباب وخرجات كتجري تشوكا مزال كيستوعب حتى فرانات طموبيل عند رجليها تغوت: ايماااان
معرف باش تبلا ولكلاكسوون عليييه و الستريس فييه متبعها بعينييه وكيشووف فين يوقف وحاضي لا تلف لييه تشافها دخلات لواحد الجردة صغيرة ..مشا كيقلب على بلاصة يحط فيها الطموبييل وهبط كيجريي كيقطع فالطرييق لعندهاا وكيقلب عليهاا بعينييه حتى بانت لييه محنيية كترد
واحد صداع رهييب فعقلهاا خلاها تسد ودنييهاا كتنهج بحال الى مخلوعة وقلبها بغا يوقف بلخلعة بلا والوو
الدموع كيجرييو وصدرهاا مزير شدهاا زير عليهاا تشهقاات من اللور غير شافت ايديه ضارت فوقها طلقات العنان لبكاا
زير عليها وقال بهدووء : شش صافيي مواقع والوو ،انا معااك احبيبة
تكات راسهاا على ايدو كترد نفسهاا وحاس بقلبها كيضرب بجهد
#فلاش باك
فالوقت لي كانو ف فرنسا و علاين تساافر وديان رسلات ميساج ملي كان مع ايمان فسبيطار قراه وتعجب
وديان: حذيفة انا حدا لوبيطال عفاك خرج بغيت نهدر معاك وبلا متقول لايمان والو
بقا كيتعجب شنو تكون بغات كانت ايمان ناعسة ونااض خرج عندهاا لقااها واقفة وكريس كيتسناها فالطموبيل تبسمات وقربات عندو
وديان: يكما ديرونجيتك هههه
حذيفة: لا هانية اختي (حك دقنو)كاين شي مشكيل !
وديان: ايمان غاتمشي معااك يااك وانا بغيت نقوليك شي حاجة باش تكون على بال وتعرف كيفاش تصرف
حذيفة(تشوش ) : كيفاش
وديان: المهيم ...ايمان كتجيها واحد كرييز بانيك مرة مرة الى تخلعات ... غير لبارح ملي مكنتيش نتا جاتهاا وشافها طبيب نفسانيي ...المهيم هاد الحالة ولات كتجيها بزااف ملي كتخاف ولا كتخلع ولا ملي كتسمع شي حاجة خايبة ... الى جاتها هاد الحالة حاول تعتقهاا وتشوكيهاا بلماا بارد
حذيفة: واش شي حاة صعيبة خاصها الطبيب ولا شنو
وديان: طبيب كيقول خاصها تجي دير حصص عندو وهوا يشخص ولكن ايمان مبغاش تمشي ...وحتى صافي مبقاتش كتجيهاا ولكن من ورا هاد المشكيل رجعات ليها تااني ...انا غير بغيتها تكون فراسك باش تعرف كيفاش تعامل معاهاا لطحتو فهاد الموقف ويارييت تقنعها تشوف شي بسي حييت فغيمون محتجااه ...هادشي راه كيبان عادي ولكن الا مشا حتى بقا فبناادم كيحمقوو ومكايبقاش عارف راسو شنو كيدير
حذيفة: شكرا لي علمتيني صافي
وديان: تهلا اخوياا بااي
خلاتو واقف شير ل كريس فطموبيل مودعو ومشاو وهوا ببقا واقف شاد تيليفونو كيقرا هاد الاعراض لي قالت وديان ...تفكر نهار كانت كطل من البالكون ف بلجيكاا كيفاش كانت مخلووعة وفالحفلة لي مشاو ليها كيفاش حتى صفارت وبغات طيح غير بوحدهاا .. شنو غيكون عندها .شنو غيكون وصلها لهاد الحالة بالضبط
###
جرها لاقرب كرسيي كلسهاا وكلس قدامها كيمسح ليها على وجهاا وشاد ايديها كيرجفوو
ايمان:هء هء سم هء سمحلياا ما
حذيفة: كتوقع احبيبة متشغغليش باللك غير السترييس(هز ايدو مسح دموعهاا ) خلعتيني علييك كنتي تقولي ليا وقف ونوقف
ايمان(شافت فيه وتفكرات الوضع كترمش )محسيتش برااسيي
بقا كيشووف فيهاا وخلعاتو بهد الكلمة "محسيتش براسي " يعني لجاتها هاد الحالة بوحدهاا ميقدرش يعرف شنو غادي دير !
حتى هي تشوكات بالوضع كيفاش جاتها الفكرة تحل الباب وسط طريق عامرة مفكراتش نهاائياا بشنو كان غيوقع ضربها طموبيل ولا مضربهاش مفكراتش
حذيفة(تنهد) دابا مزياانة ،حاسة براسك ارتاحيتي شوية
حركات راسها بااه هزات ايدها كتمسح فعينيهاا والرجفة مزال فايدها ...خذيفة هز عينوو لقا جوج ديال البوليس جايين قبالتهم ...ناض وقف ونوض ايماان ...حتى وقفو عليهم
_اولاا (كيشوف فايمان )كاين شي مشكيل !
حذيفة: لا لاا مكاين حتى شي مشكيل
_(بتأكيد) انسة !
ايمان(هزات عينيهاا فيهم ) مكايين والوو
_نقدر نشوف الهوية ديالكم
حذيفة:سيي سي
جبد لوراق ديالو من لبزطام و لباسبور من تجاكييط وحتى ايمان جبدات كلشي من الصااك
كيشوفو فلوراق وقال: علاش قطعتيي وسط الطرييق بديك الطريقة ! شنو واقع(شاف فحذيفة ) تمشي لمركز ؟
ايمان: لاا لااا عفااك ...حنا خاصنا نمشييو حيت عندنا رونديفوو غنتزوجو داباا ...انا غير الستريس وتخنقت هادشي لي وقع ...مكاين حتى مشكييل
_لاخر مرة غنسولك ...واش متاكدة بليي نتي بخير (شاف فحذيفة ورجع شاف فيهاا )
ايمان(شدات فايد حذيفة بابتساامة ) بخير ،،خاصنا نمشيو
مد ليهم لورااق وقال: لتازمو بالشروط وديرو لباڤيط ديالكم
حذيفة: شكرا
جر ايماان ومشااو وقلبها غيخرج من شوفاتهم ليهاا خلاوها كترعد ،مهضرش مزال حذيفة قطعو الطريق وحل ليها الباب حتى ركباات وقبل ميسد عليهاا هبط واحد لفيس فلباب باش الباب يبقا يتحل غير من براا
خلاها كتقاد السمطة ومشا لبلاصتو لقا تيليفونو كيصووني جاوب طارق وقال: ويي
طارق: تعطلتو اصااحبي فينك
حذيفة: قربناا قربناا
قطع معااه وضبط النفس ديالوو كيقاد فالسمطة وشاف فيهاا ساكتة حتى نطقات: سمحلياا
حذيفة(مد ليها ايدوو ) دابا مرتااحة نمشيو ! تا حاجة ما بزز
ضحكات وسط دموعهاا ومدات ليه ايدهاا وقالت: نمشييو
تبسم ليها عاد ارتااح وكمل الطرييق مطلقش من ايدهاا مرة مرة يدور يشوف جيهتها غادي بشوية وحال كاع الزااج تاع الطموبيل باش ترتااح
ركن طموبيلتو بعييدة وهبطو ...شافت راسها فلمرااية كتمسح تحت عينيهاا بكلينيكس وكتقااد لكحل لي ساح شوية
دارو لكمامة ديالهم وخرجو وفيدهم وراق الفحص ..
هزات عينيهاا كتبان ليها رااية المغرب🇲🇦 كيديها البرد ويجيبهاا ..مدة مشاافتهاا حسات باحساس فشكل وتبورش لحمها ...اي شخص كيفما بغا يكون كيكون عندو انتمااء بااطني لبلادو ،وخة تكون ماعطاتو والو كيحس بلي كاينتامي لداك لبلاد خصوصا المهاجريين لي كيكونو بعااد على بلادهم نهار كتبان ليهم الراية بحال الى بان ليهم شخص عزيز من العائلة
كان واقف طارق وناصر حتى هوما دايرين لباڤيط و كيتسنااو حتى بانو ليهم ...سلمو على بعضهم بقبضة ايدهم وطارق شاف فايماان وقال: ختي ايماان لباس اش خباارك
ايمان: لبااس اخوياا الحمد لله ...نااصر
ناصر (فرح لي شافهاا ) نهار كبير هدا هههه
طارق: زيدوو راه تعطلناا الرونديفو مع 4
قبل مايدخلو عطاوهم التيست لي دارو كلهم وفوق هادشي دازو من اختبار الحرارة ...سلمو ممتلكاتهم فالدخلة تحت السكان ودخلوو..كيزربو لانهم تعطلوو لقاو نوبتهم وصلاات
دخلو لبيرو كلس حذيفة وايمان كيسولو فيهم اسئلة عادية
فالاخير عطاوهم يسنييو ...سنا حذيفة وايمان مترقباه كترجف حتى مد ليها ستيلو شداتو بايدهاا
_تقدري تبصمي الى كانت مشكيل فايدك
ايمان:لاا نقدر
شدات ستيلو بايدهاا وقلبها كيضرب كتقراا وحذيفة كيشوف فيهاا ولا شااك فيهاا بليي تقدر فاي لحظة تضررب لباب وتزيد
طارق شاف حذيفة رجلو كتحرك وايمان صقلات وهوا يكح تقفزها وهزات عينيها فييه وحرك ليها حجبانو باش متعطلش حيت على ابسط حاجة يقوول ليهم سيرو حتى تاكدو
فلبلاصة سناات عاد حس بالرااحة وغمض عينيه ورجليه حبساات وتقاد فلكلسة ...سناو الدراري بجوج
جاتها شووك انها دابا رسمياا مبقاتش عازبة ديال راسهاا
ولات مزوجة وعلى ذمة رجل بغاه قلبهاا
قراو الفااتحة وابتساامة رااحة شافيها وقال: مبرووك علينا
ردت عليه بخجل كضحك: الله ايبارك فييك
اول مكتحط ستيلو فوق الورقة كيبداو الاسئلة فبالك
واش زربت
عنداك ندم
واش الاختيار كان صح !
اسئلة كتراود اي انساان مقبل على خطوة الزواج حيت مكيبقاش ديال رااسو كيولي يعيش حياة مشتركة وهدشي فبعض الاحياان كيخلق ستريس وتردد وبزاف تاع للحوايج خصوصا لكان الشخص كيعشق شي حاجة سميتها الخصوصية ومكيتقبلش رأي اخور او انتقاد او تدقيق فحيااتوو
خرجو من تماا شادين فايد بعض وكل واحد فيهم كيقول يارب يكون هادشي كيف بغيتوو
ايمان كان عندهاا رجاء واحد يكون فحذيفة السند لي فحياتها مكانش عندهاا..تكون عندها حياة مستااقرة وتغلب على الخوف لي ساكنهاا ،تكون اسرة بعيدا على الضرر لي عاشتو فطفولتها
فيقها صوتوو وهوا كيقول : دابا صافي وليتي مرتيي ...فرحاانة !
ايمان(حركات راسها باه كضحك )فرحانة ونتاا
حذيفة: فرحااان وبزااف
طارق: عندي بعد نظر عرفت غنكون شاهد ههههه
ايمان: فرحت وخة مقلقة منك
طارق(غمض عينيه ) كنطلب السمااحة منك ولكن هدا السباب حاولت انتاصل بيك ومجاوبتيش ومن بعد طفا ليا التيليفون
حذيفة(خرج فيه عينيه ): وصاافي غيرهاا
ناصر: لي فات ماات كاين شي عرس !
طارق: مضروب على كرشك هههه واش كلشي طرق ونتا باغي العرس ...على اي زينة عارضاكم بهاد المنااسبة
حذيفة: خليها مرة خراا
طارق: وفلوس الدجاج والحلوة بغيتي يخرجو فياا ولا بنت عمي مكترحمش
حذيفة(شاف فايمان) نمشيوو !
حركات راسها بااه وضحكات وقال: صافي شوية ونتبعووكم ياك لعشاا ومزاال الحال
توادعوو وهي كدور فعينيها داباا راه مراتوو وهي ويااه بوحدهم مزايد عليهم حد ...سرطات ريقهاا والصهدة طلعااتهاا،كتحاول تشوف الامور بايجابية وتهدن باش مايوقعش ليها بحال قبيلة ركبات فالطموبيل قلبهاا كيضرب ركب حداهاا ...سد الباب ودام سكااات لثوااني قبل ميقول: فف واخيراا
قالهاا كأنها أعظم انجازاته حسسهاا بليي قيمتهاا كبيرة وهدشي فرحهاا وبرد الخوف لي فيهاا انك تكون مع شي شخص باغيييك ودايرك فعينيه فهادي وحدة من نعم الله عليناا،ماشي اي واحد ف ايدو هاد النعمة
قربات عندو وعنقااتوو وغمضات عينيها بتنهيدة وقالت بحب : كنبغييك
دور عليها ايدو وقال: حتى اناا
مشاو جابو دويرة ورجعو لدار مشابكيين ليدين ..طلق من ايدها فجأة حتى شافت فيه وقال : نسييت
تحناا اللور ديال الطموبيل كانت صاشية بيضة حطها ليها فوق رجليهاا وكمل طريقوو
جبدات منها كرطونة مربعة حمراء متوسطة الحجم ..مكتوبة الفوق ايمان بالذهبي
ايمان: شنو هادي ههه
حلات السينتة وطلعات الفوقي لي مشدود فالجناب مع لبواطة لتحتانية ...كانو فلوس مطويين بحال لكورني وفوسطهم ورد احمر و الوسط كاين الشكلاط ومكتوبة لفوق فلغطاء .."زواج مبروك حذيفة_إيمان "
ايمان: زويييين ولكن لاش الفلوس ههه
حذيفة: صداقك
ايمام(شافت فيه كضحك ) : واش حماقيتي ههههه محتاجاك نتا احذيفة ماشي الفلوس
حذيفة(ضحك): واش انا صدقتهم علييك ولا هههه هدا راه ربيي حللو لييك ميمكنش انا نتزوج بيك ومعطيتكش صداقك وخة غير درهم لمهيم حللت
ايمان: ههه نسيت انا كاع الصدااق
حذيفة: انا نفكرك
ضحكات وهزات الشكلاط وقالت: مسخيتش نبهدل هاد الديكور غير خليه هكا بفلوسو ههه...حذيفة من بعد نقدر نبوسطي الزواج
حذيفة: خليها من بعد ملي ترتااحي
ايمان: داكشي لي قلت بينما برات ايدي شوية ...واش زينة عايشة مع طارق !
حذيفة: سيي راه مراتو بطبيعة الحال
ايمان: ياك قلتي ليا بنت عموو
حذيفة: بنت عموو وتزوجوو هادي غير شي ست شهور دابا هههه دار ليها الورااق وطاح في غراامها ههه
ايمان: والبنت لي كان كيعرف ف ايطالياا !
حذيفة: تت مكملش دااكشي
ايمان: مم
وقفوو قدام عمارات قراب نيت للسكنة ديال حذيفة فارقهم شارع واحد
هبطو وشدها من ايدهاا كان الحال ظلام توقيت السبعة هكاك
طلعو الدروج لطابق التالت صونا فلباب وحلات ليهم زينة بقفطان جوهرة ساامبل نص طوق بالعقيق طالقة شعرها قصير كحل ومكياج خفيف هازة فايدها بلاطو صغير فيه زلافة ديال التمر وكاس تاع الحليب
زينة: صلاااة وسلااام على رسول الله لولولي ههه مرحبا بالعرساان ديالناا
حذيفة(هز تميرة وعطا لايمان )الله اكبر بييك اختي شكراا
زينة: نهار كبير هدا ختي ايماان مرحبا بييك
ايمان(بخجل ): شكرا اختي
طل طارق عليهم وقال: دخلوو مرحباا
كانت دار صغير دافئة وبسيطة لجوج ديال الناس شاقين طريقهم ولكن حسات بالدفئ و الدار عامرة طاقة ايجابية
كان صالون صغير بفوطوياات ..كالس ناصر فواحد فيهم ناض سلم علييهم وكلسو بجوج فوق واحد الفطوي فاصلاهم طبلة ديال العود
كلسات كتشم ريحة زويينة ديال المغرب اللحم بالبرقوق ريحتو مكتخفااش على اي مغربي
طارق: مرحبا بايمان ...
ايمان: الله اكبر بييكم
زينة(بابتساامة ) : نورات الداار ههه
حشموها بالكرم بقات غير كتفرنس حشمانة ..تحطات صينية ديال اتااي داكشي هماويي وطبسيل مشكل ديال الفاكية وبلاطو مشكل ديال الصابلي باللوز وكعب الغزال
كلسو مجموعيين كيهضرو و حديث الساعة خدمتهم لي حبساات في ظل هاد الظرووف وهوما مشعلين التلفازة جا الخطاب انه اسبانياا غدخل فالحجر الصحيي وميخرج بنادم الا لضرورة القصوى كلشي غايسد كلشي غيطرق علييه
ناصر: مشكيلة صافي علم الله شحال غيطول هدشي
حذيفة: ان شاء الله يكون خير
طارق: فيها خير ...حتى العرس لي كنت شااد نهار الخميس تلغا
زينة: ولكن يقدرو يجييو يديرو شوتينݣ عادي
طارق : كنهدر على العرس تلغاا وحاليا سديناا لبوراطوار اشمن شوتينك
زينة : ايمان شفتك سااكتة ههه
ايمان: هههه لاا كنسمع ليكم ههه
زينة: متحشميش حنا عائلة داباا
شربو اتااي وجمعات الطبلة زينة وطارق ، حذيفة لاح ايدو وراها ملي ناض حتى ناصر لحمام داعب كتفهاا وقال: يكما عيتي
ديك اللمسة بورشاتهاا ما تعوداتش على ايدو تقيسها باريحية هكا مولف يشد ايدهاا ولا حنكهاا وقالت: لاا
يتبع...
التعليقات
لا توجد تعليقات بعد، كن أول من يعلق.