محتوى القصة
ايمان:غيعجبنيي نقراا عطيني شنو سميااتهم
كتب وعطااها تقراا :متحتاجيش من غنجيب لييك تشكيلة كتب وقرايهم
بابتسامة قالت:شكراا ...شنو هي شكرا بلحركات
دوز ايدو على صدرو بحركات دائرية وتبسم ليهاا
ايمان:خاصني نمشي ولكن غتعلمني من بعد
حرك راسوو باه مشاات بقاا متبعهاا وجبد مذكرتوو وستيلو الخاص بييه كيشوف فلفرااغ لثواني قبل ميغرق فلكتبة من جديد
بدلات عليهاا بفستان اسود محلول من واحد رجل ولاصق على لحمهاا مكياج وشعرها خلاتو ساامبل ...قبل متخرج رسلات مسااج لحذيفة
ايمان:حذيفة جيتي !
مع خارجة سمعات صوت تيليفون مشات بخفة هزاتوو بحماس لقاتو كاتب:انا فطرييق
تبسمات وحطات تيليفون فصاكها وخرجاات مع بانت فوق لا صين بداو تصفيقاات حنات راسها بادب مرحبة بالجمييع قبل متبدا الموسيقى ...بدات كتغني معاها وعينيها كيهربو مرة مرة لجيهة الباب ...حتى بان ليها دخل ايديه فجييب قااصد المكان جيهة لكونطوار فين كيكون كالس حتى يوسف
خدا كرسيي وطلب مشروب غازي فقط ... ضار جيهتها مربع ايدو كيعض فمو من لداخل ...فينما جا يسمع ليها كيبدا يكشكش من لداخل بسباب لبسهاا ورجال لي كالسين كيسمعو وعاجبهم لحال خصوصا لي كالس بلا رفيقة عينيها كيبقاو لاصقين فيها السهرة كلها
خلاها مندامجة وهوا تقلب لجنب كايهز فتيليفونوو تكلسات حداه لونا وباينة مفوتا فشراب ...تكلمات مع البار مان وقالت: بحال ديما
هز حذيفة عينو فيها ورجع هبطهم فتيليفونو كيتفاجئ براسهاا متكي على كتفوو ...هبط كتفو بغا ينساحب السيدة مرخية دغيا تبعاتو حتى شدهاا من كتفها مرجعها لكرسي وقال: مداام (هز عينو فايمان صادفها كتشوفيهم رجععو نظرو لونا لي كتشير لايمان )
لونا: ايمااا انا هنااا (شافت ف حذيفة ) كتجي كتسمع ليهاا ديما شنو السر مم كتبغيهاا ...حتى انا محتاجة شي حد يبغيني
بغا يتملص منها والاخيرة شدات فايدو كتبكي :هء هء انا بوحدي
حذيفة: فين يووسف
لونا: متجبدش لياا داااك داك اااه راسي عفاك عاوني نخرج بغيت نمشي فحالييي
حذيفة (ساط النفس)غففف مصيبة هادي
لوناا:ممم !
عاونهاا كيقلب بعينيه على يوسف مبانش ليه غادية كتردد الاغنية لي كتغني ايمان لي عينيها تابعينهم تخرجو لمحات حتى كريس تابعهم وكتقلب على يوسف بعينيها بان ليهاا جاي من جيهة لبيرو ومعااه بنت ورااه
خرجها لبراا كتبكي ولكحل وصل حدا فمهاا تجلخاات حتى وقف الشيفور يعاونها طلع ورجعاات عند حذيفة كضرب صدرو بصبعها كتاكد عليه كلامهاا
لوناا: الى كتبغي ايماا ...متخليهااش هناا ...الى بقات هنا صعيب تخرج مزاال
حذيفة:كيفااش
قبل متكلم كان كريس وقف علييهم وتلاحت فييه لونا كتبكي ...شكر حذيفة بالاشارة وربت على صدروو ...
طلع معاها لسيارة ومشااو وحذيفة بقا واقف كيفهم كلامهاا
ضرو راسوو ورجع لبلاصتوو تحت نظرات ايمان الفضولية ...عطاها بجنب كيكميي شاد تيليفونو وداخل لانسطاا حسابو خاوي وفالاصل دارو غير ملي قالت ليه ايمان بلي دارت كونط ...كانت اول مطلع ليه صورتهاا ياله كينتر الدخاان حتى تخنق بييه من الصدمة للحظة ظن بليي عريانة ...كيخرج الدخاان مع لكحة حتى حط ليه البارمان لماا شرب وتنفس ورجع كيشوف فديك الصوورة كيزوومي ويرجع يتاكد بحال شي حمق
شعلات فييه العافيية الظهر عرياان لايدين كذالك لكسوة كتبيين اشمن لبس اشمن موضة اشمن شوتينݣ هدا
لداخل ديالو ولا كيغليي ...رمقها بنظرات وتخنزيرة حاارة خلعهاا فور مجات عينها فعينوو ...مفهماتش شنو واقع
بعد دقائق قليلة بغات ترتاح كانت جاية عندوو حتى شدها يووسف قاطع طريقها وقال:اجيي نعرفك على شي نااس ...ضحكيي وهضري مزياان
ايمان:وخة
بقاو عينيهاا فحذيفة لي كيشوف فييهاا حتى حط يوسف ايدو على ظهرها
بقا جامد فبلاصتوو كيحك فوجهوو وكيتفكر كلام لوناا كيزييد يتخربق
كيتسنا الوقت يدوز باش ينفارد بيها مرة مرة يشعل تيليفون على ديك الصورة كيحس بدم سخن وتحقن فييه
سالات الحفلة وتوجهاات لبيت تبدل وتمسح المكيااج ...توجه جيهتهاا دق وعطاتو الإذن حتى دخل عليهاا لابسة حوايجهاا وكتجمع فشعرهاا
ايمان؛ فين لوناا مسكينة خليتيها بوحدهاا
شعل التيليفون فوجهها وقال: شنو هدشي !
بعدم فهم ردات بعفوية : غوب ؟
رجع شاف فالتيليفون كيتاكد: وايلي ؟ محسابش لياا غوب واش كضحكي علياا لا ! اش هد زمر ... هدا شوتيينك ولا عراا
ايمان(ضحكهاا) : راه مامعريااش بزااف غير كيبان لييك احذيفة
حذيفة: واش هدشي علاش ضاربة ديك طريق باش تجي هنا تعرااي
ايمان: حذيفة
حذيفة(صعر )حذيقة ولاا لخراا اش هد اللبس اش هد زمر بغيتي تمشيي فييه عند بالك انجاز تعرااي بغيتي طلعيي دغيااا
ايمان: علاش كتغوت علياا ... واش حماقيتي انا كندخل فشي حاجة ديالك !
حذيفة: هاد الطريق لي غاديا فيهاا مغتوصلك لتاا قنت سمعتيني
ايمان: راني عارفة حدودي احذيفة منحتاجش شي حد يفكرنيي فييهم
حذيفة :مك كون شافت هد لمسخ غترضى علييك (خرج فيها عينيه )غايعجبها لحال؟؟
ايمان : خرج براا عفااك ...خرج
حذيفة: شوفي فياا (جرهاا بنتيير)شوفيي ...جاوبيي هدشيي غيعجبهاا اااه دويي كنتي كتلبسي قدامهاا هد لمسخ وكتصفق لييك ...ولا صافي قلتيي ماعلياا حكااام بغيتيي تسيبيي ولا شنوو
ايمان(تجمعو دموع فعينيها ولكن خرجاتهم وتنترات من ايدوو ) : مشغلكش ..."بدا صدرها كيطلع ويهبط " ...تصاحبناا لباارح بغيتي اليوم تربطنيي ؟
حذيفة: دابا حساب لييك كنهدر غير حييت تصااحبناا ابناادم هدشي راه لمصلاحتك كندوي حتى كون مكانتش بيناتناا شي حاجة كنت غندويي (خرج فيها عينيه ) منبغيش شي حد يشوفيك شوفة نااقصة بحالك بحال خواتاتي بنات عميي وبنات عائلتي
ايمان: شوف هادي حياتيي ...تقبلتيني كيفما اناا مرحباا متقبلتيش مكاين لاش نجرحو بعضياتنا
حذيقة: غداا حتى نتيي تلااحي من قنت لقنت ياك تعيشي عيشة لݣور هدشي لاش مغامرة براسك وسط لغاباات دويي باش تجيي تعريي فخااضك ف انستاكراام وقدام لبشاار
غوتات فوجهوو : متبقااش تغوت علياا (خرجات عينيها فييه ) مامحتاجاش شي حد فحياتي يحضينيي ...الى مكنتيش غتساندنيي معندك باش تنفعني كون بغيت نسمع هد لهدرة مكنتش غنجي لهد لبلااد ومعندكش لحق دخل فلباسي كيفما انا مكندخلش فييك ومسووقييش دير فحياتك لي بغيتي
هز حجبانوو بصدمة: مسووقكش ! (جرهاا من ايدهاا وشاببكهاا قدام عينيهاا مزير عليهاا )لباارح مليي شابكت ايدي معاك شركناا حيااتناا ا ايماان ...حسبتك منيي
تنترات منوو وبعداات حاسة بصدرها مديق عليهاا وقالت:عافاك بعد منيي مبغييتش ...مبغيت نشابك حياتي مع حد خلييوني نعيش كيف بغيييت بعد منييي احذيفة بعدو منيييي (كتجبد فحوايجها)عطييوني التيسااااااع واش ضروري شي حد ينكد عليا حياتي وفرحتيي (بلغوات)عطيني التيساااع ...عواض ...عواض تحضينيي (دفعاتوو. ترجع اللور عينيها خارجيين ) حضي مستقبلك دير شي حاجة تانتااا بييين علاش ضربتيي ديك الطريق متبقااااش حاضينيي ....عندك حياتك وحضيييهاااا خروووج
تسيفاات علييه عينيها خرجو ولات كترعد عليييه مقدرش مزال يهدر
كايتأكد واش هادي لي قدامو هي إيمان !
نطق راجع باللور وقال: هاهوا غادي
خرج مخليها فحالة من الهيستيرية صدرها كيطلع ويهبط بسرعة ودموعها هابطيين
شدات على شعرهاا وعقلهاا فيه اصوات كثيرة
الذكريات الخايبة طاحو على رااسهاا ...ابتداءا من طفولتهاا حتى لموت نعيمة على ذكرها كلسات فلارض على ركابييها كتبكيي بشدة...حضنات راسها بايدهاا كتنخصص وصدرها مخنوق
*
نورة: عمرك طفرييه فحيااتك الحراامية...عطيني بالتيساااع منهار شفتك ماشفت النهار الزويين
*
عبد الله: خرجيي علياا الخراا لبلاصة لي كتحط فيها رجليها هد السلكوطة مكتكونش فيهاا لبركة ...حاجة لحراام تفوو
*
كريم: خرجي عليااا بحالك بحال مك
*
كضرب فراسهاا وكتردد: سكتوووو سكتووو سكتووو هءهءهء سكتوو عليااا الله ياخد فيكم الحق ...منسمحش لييكم ...منسمحش لييكم هءءهء والله منسمح لييكم هءهءهء
شبعات بدموعهاا وبكاهاا ...ناضت جامعة راسهاا هزات صاكهاا وخرجات بعينين منفوخيين قصدات دار حلات لباب سداتوو بالساروت ودخلات لبيت
كلسات على سرير كتبكيي ...كتفكر كيفاش حتى سمعاتهم ليه متاابعين كتزييد تبكيي ...للحظة شبهات راسها بنورة ...انسانة انانية وكتبغي غير مصلاحتها وراسهاا ومكتحملش شي حد يقول عكس كلامهاا
تقابلات مع لمراية كتنخصص
واش انا هكا ! من طينة نوورة ! واش بعدت علييهم باش نساهم صدقت بنفس تصرفاتهاا
تفكرات كلامها ليه وزادت كتبكيي وكضرب فراسهاا معارفاش حتى كيفاش وصلات لديك لهدرة
ضغط عليها ! ولا كانت على سبة خاصهاا ترمي تراكماتها على شي حد
دوزات ليلها كلوو بكاا و تنخصيص ...كتبغيي تكتب لييه وكترااجع حشمانة معارفاش شنو تقول ...معارفاش باش تعتادر و تبدا الهدرة
غيكون معصب وهدرتها معاه فالتيليفون معندها باش تفييدها
الربعة تاع الليل وهي فلبييت مكمشة عينيها فالتلفازة قبالتها ولكن عقلهاا محاارب مع ندمها وافكارهاا
تكاات شادة التيليفون حتى غفاات وشفارها فازكين وحيدة ومكمشة من لبرد مكاينش لي يطبطب عليهاا وينصحها
حلات عينيها على شمش ضاربة فوجهها تقلبات لجيهة لخرى مع حلات عينيهاا رجعات مأساتها وكلامها لجاارح ...كلسات قافزة شافت الساعة لقات 11 ناضت بسرعة لدوش غسلات حالتها وراسهاا كيف البيضة مقادراش تهزوو تحت عينيها منفووخ بقلة النعاس و كثرة البكاا
طلات على تيليفونها لقات اتصال من طارق ...رجعات صونات لييه لقات الخط طافي تنهدات بحزن
خرجات كتجمع شعرهاا بدلات حوايجها بسورفييت لا غير خلات كلشي مزلع وخرجات هازة صااكهاا
ماعرفاتش واش غيكون فلخدمة ولا فدارو وعارفة الى التاصلات بييه مغيجاوبهاش والى رسلات لييه ميساج مغيجاوبهااش ...بشنو غتبرر كلامها ملي توقف قداموو ...هوا هضر من غيرتو ورجولتوو عليها حسبها ختو ومنوو وهزاتو النفس علييهاا ....النفس لي معمر شي ولد لمرا هزاتو عليهاا
مولفاتش ...مولفاتش شي حد يقوليها افلانة هد اللبس مهوااش ...مولفاتش تحمار العينين وتخاف من شخص معين
كانت كتمنى كون باها كيعقب على حوايجها ...تمنات تسمع حتى هي مناش كيتشكاو البناات
" ابنتي اش داكشي لابسة !*
"بدلي ديك الحالة ماشي تاع الخرووج"
تمنات تسمع توبييخ رجوليي تحس وراها سند تمنات تسمع الكلمة المشهورة من الخووت " تخرجي هكا نهرس لمك رجلييك "
كانت ديما كتسمع البنات معاها فليسي كيعانيو مع خوتهم هوما كيتشكاو وهي كتقول بلي كيعيشو عائلة طبيعية ماشي مفككة بحال عيشتهاا
نعيمة كانت كتنكر عليها حتى تعياا فاللخر كتقول خليهاا تعيش سنها من بنات جيلهاا ...كانت كتلفها بجوج كلماات وكتسكتهاا حيت نعيمة وصلات المرحة ديال مسلكة مع الجميع مجاتهاش فجهد التربيية وتحمار العينين وكانت كتقول راه كانت كتلبس مستور وفاللخر غفلاتني وجابت لكرش
هبطات من الطاكسي قبالت العمارة قلبهاا غيخرج من بلاصتو كتمشي بشوية وعقلها مرفووع كترتب الاعتدار فبالهاا ...مع كل درجة كتسخف وتوقف حتى وصلات ...كتبغي دق وتردد تبعد وترجع
بركات على الصونيت كتسنا الرد حتى حلات عليهاا مولات الدار سيدة ستينية ايطالية الاصل نطقات بابتساامة كتشوف فايمان
ايمان: واش نقدر ندخل عند طارق و لامين !
_ مكاينينش خرجو بكري
ايمان:ؤك شكرا
هبطات ادراجهاا خافت تمشي عندو لريستو تسبب ليه فشي مشكيل قررات تصوني لييه
طلعات نمرتو بعد تردد دوزات الخط ايدها كيترعدو حتى كتفاجئ بالخط مسدود ...كتعاود تصوني نفس الحاجة
مشات لواتسااب فور مفتحات لكونيكسييون حلات فمهاا بصدمة بحالا خويتي عليهاا سطل متلج من الآآآه لي خرجات من فمها بحال شي حد ضر_بها بخن_جر وسط قلبهاا
صورتوو مكانتش كتفاجئ ب بلوك بلوكا ليها حياتها فثواني معدوديين وهي جامدة فبلاصتهاا كتسنا شي حد يصرفقهاا باش توكض حسات بالصدمة تقلات ليها لساانها وعقلهاا مقادرش يستوعب بليي حذيفة بلوكاهاا
سندات ظهرها مع لحيط وهبطات معاه تكلسات فدرجة اللخرة كتاكد
كترجع تصووني وعينيها محقونين بالدمووع كتلقا الخط مشغول او محضورة من الاتصاال والتواصل معاه بكليك واحد منوو ربما فساعة غضب ...ربما فكر مزياان وعرف طريقهم مسدودة ...ربماا هضرتها مكانش سااهل يهضمها ورد ليها الدقة بلبلووك
جمعات اخر نفس ليهاا بجرية وحدة شدات طاكسي قاصدة بلاصة خدمتو وفنفس لوقت مشات لمسنجر لقاتو هوا اللول لانه حياتهاا وعالمها الافترااضي خاااوي هوا فقط مْعَمْرو ٠٠٠٠ساد واحد لجانب مظلم فحياتها
وقفات امام الريستو ودخلاات كتزرب حتى كيصادفها محمد بابتساامة وقال: تفضليي مرحباا !
ايمان: شكراا مجيتش نكلس (سرطات ريقهاا كتبلل حلقها لي نشف) ك كنقلب على على حذيفة ... حذيقة أيت لامين
تبسسم بايجاب وقال: عرفتوو ولكن مبقاش خدام هناا ...هادي 3 اياام باش رجعات البنت لبوسط ديالهاا
ايمان: بهاد البسااطة ؟
محمد: حذيفة مكانوش عندو وراق رسمية ...ميقدرش يبقا هنا فبوسط باين بلا كونطرا العمل (شاف وراها ) تكلمي مع الشاف باولوو ...كنظن لقاا خدمة حسن لييه
شافت وراها ومشات وقفات قدام باولو لي عاد داخل يلتاحق بالعمل تكيشوفها قداموو
ايمان: فيين حذيفة
باولو:ح حو اااه لاميين
حركات ايمان راسها بااه وقالت: فينهواا واش مشاا ل روما !
باولو: نوو غيمشي ل اسبانياا غيكون دابا ف المحطة حيت قطعت لييه لفرنساا هو والصديق ديالو (شاف فالساعة ) مع 12 ونص....سمحيلي خاصني ندخل
بقاات واققفة فبلاصتهاا حتى استوعباات شنو قال وخرجات باردة الاحاسيس
ركبات فطاكسي وكانت وجهتها المحطة الطرقية بغات تعتاادر منوو والى بغا يمشيي ديك السااع مغتحبسووش
دخلاات كتجنب لبوليس تماا كتقلب بعينيها فلمحطة معرفاتش اشنو غيركب ولا اشمن مدينة ...فايت قاليها بلي لكان غيمشي من بلاد لبلاد خاصو ياخد طريق مقطعة ميمشيش نيشاان لديك لبلاصة ...داكشي علاش قطع ليهم باولوو ومقطعوش هوماا باش ميطلبوش ليه لورااق
بقات غادية وسط الناس بدوون رووح اي واحد داير كاسكييط كتشوفوو قلبها كيتهز ...حتى استاقرو عينيهاا فييه قبالتهاا كالس فلكرسي داير رجل على رجل حاني راسو فالتيليفون وداير لكاسكييط لي خدات لييه ...رجعات بخطوات اللور مترددة تقرب تخبات ورا الحييط كتشوفييه ودموعها دايزيين
وقف ملي جا عندو طارق عطاوها بالظهر هاز صاكوو ولكارطابل فظهرو متوجهيين يركبوو ...وقف كيشوف فلفرااغ وجبد تيليفونوو خدا وقت طوييل كيفكر
كلامها ضرو ومتوقعوش منها ويمكن خاصو يبعد وكل يعيش حياتوو لي بغاا وكيف قالت تبقا علاقتهم سطحيية نقيية وزويينة
شد التيليفون حيد لييها لبلووك ودخل كايكتب ليهاا ويرجع يمسح
طارق: ياله اصااحبي
حذيفة: سبقنيي
دموعها كل مرة يغطييو عليهاا الرؤية مكرهاتش تقوليه عفاك متمشيش ولكن شي حاجة حابساها وكتقوول يمكن هكا حسسن خلييه يمشي مكاين لاش نعقدو معاياا
فلوقت لي خشا تيليفونو فجييب وصلها مسااج فتيليفونها مقدراتش تقرااه ..ماقدراتش حتى تجبدو خايفة تهبط عينيهاا وضيعوو وسط زحاام ...عارفة هادي اخر مرة تشوفوو فينما بعد كتزييد تقرب وسط النااس ...كتقول يااربي يترااجع ونفس الوقت كتقوول غير يمشي
ركب وتسد لباب وهي واقفة كتمنى شي حاجة توقع هزات تيليفونهاا لقاتو كاتب ليها مسااج قصير ولكن حطم آمالها
كاتب فييه
" سمحيليا الى دخلت فحياتك كتر من القيياس ،هاني خارج منها فخطرة ونشوف حياتي وعلاش جيت تهلاي فراسك ...في أمان الله "
هزات عينيهااا كيبان لييها تران تحرك ولوجهة بعيدة عليها بالاف الكيلومترات ...غمضات عينيهاا على دمعة ودااع اخيرة ...
**
يؤلمني شي لا اعرفه ، ربما وداع قديم لم ابكيه ، ربما حزن قديم لم اشكوه ، ربما ذكرى استيقظت فجأة ، ربما لمس احدهم جرحاً قديماً فنكأ ، ربما مجرد الم اعتدت عليه فأصبح يعدني رفيقاً له
لا أعلم!
لدي الكثير من الاحزان المتراكمة، لا اعلم اي منها يؤلمني الليلة
لا اعلم ...كم تلويحة وداع حبستهاا عند فراق عزيز
وكم دمعة كتمتهاا
وكم جرح ادعيت انه خدش بسيط
لم اعد أريد هذه الصلابة
اريد حقي من الهشاشة الان !
الان وبعد ذهابك ارييد ان أبكي ...وداعاا ...وداعاا لربما يكون لقائنا التالي صدفة ونحن غرباء
✦
الدنياا تبدلات و الوقت غادي وكيطير
نهار كيدوز كيف الساعة والسيمانة كدوز كيف نهار اما العام غمض عينيك وحلهاا غتلقاا دازو اعواام
الوقت تبدلاات كتر كلشي ملهي فلمواقع هادي دارت ،هادي فعلات ،فضيحة اليوم ترجعك مشهور ، الفضائح كتشااير ومبقاتش السترة فالنااس ، الامراض ،الموت، المآسي ، كلشي ولا كيتنشر فسوشيل ميدياا ...لي باغي العطف ..لي باغيي يجمع فلوس شي دار جنب لبحر على ظهر المتتبعين
مبقاوش المواقع خاصيين بالشباب كلشي نتااشر كلشي ولا ناشر حياتو تفاهتو مبقات حشمة ما بقا وقار مبقاوش اسرار البيوت فالبييوت ولاو وسط عباد الله نتي فدارك وعارفة شنو واقع عند فلان ..شنو عندو اش كلا اليوم فين ساافر فين دوز العرس فين ولدات شنو ولداات
تاحد مبقا داخل سوق راسوو ، كلشي ولا الفضول قاتلوو بغا يعرف ويتصنع باش يولي بحال فلان
كيفاش تكانت نكِرة لبارح و اليوم ولات كتلعب بالفلوس
كتغر وكتبغي تجرب وملي كتشوف الصحيح مامسوق لييه حد كتبع الفضييحة والمعاطية وتسريب الاسرار ...هناا فيين وصلنا والعالم الله سنين الماجية شنو مخبية ليناا ...
ناعسة ف فرااشهاا بملابس نوم باردة صدرها كيطلع ويهبط وهي كتشوف كابووس حيااتهاا
كتجريي وسط الغاابة وكتغوت "عتقونيي " ولكن كاتسمع وراها غير ضحكة شااب بصوت غلليض تابعهاا وخن_جر فايدو غرسوو ليها فظهرها تقلباات عندوو حتى كيبان ليها كلو د_م وموس مخ_شي فعنقوو عينيه كيبانو بيضين وخارجيين وسط بشرتو الدااكنة...كتغوت وتزييد تغوت وهواا كيقرب ليهاا كيضحك
حتى فاقت طافجة كلهاا عرقاانة صدرها كيطلع ويهبط وفمهاا ناشف ...بحالا نييت كانت كتجري وسط الغاابة
كوابييس واحلاام خايبة كتحلم بييهم حاسة براسها غرقات فواحد لبير صعيب تخرج منوو
كان البيت مظلم شعلات الفيووز بغات تشرب مالقاتش لماا وناضت كتشعل فالضواو حتى لكوزينة شربات وخرجات لبالكون كلساات ضامة رجليهاا ...لحال سخوون وخة الليل محرك شوية النسييم كيبرد لجو مرة مرة...بقات كالسة فبلاصتهاا مراقبة اضواء المدينة عينيها كيرمشو فسماا لي بداو نجوم كيمشييو وكتباان زرقتهاا ... نور الصباح بدا كيطلع وضو بان ...ناضت ديك الشاابة النااضجة جسمياا وعقليا ولكن نفسياا مزال كتعاني فصمتها وفليلها مع نفسهاا
تسناات نهار يطلع لبساات وخرجات دايرة نظارات شمسيية متوجهة ل لاصال لي مبعيدش بزااف عليهاا .. جامعة شعرها الاشقر لفوق دخلات هازة قرعة تاع لما فايدها بشورط لاصق فوق الركبة وسوتيان سپور لبانضة عريضة مبينة نصف كرشها ...بيرسينك ف السرة على شكل حجرة فاللون الازرق من النوع لي كتبدل لييه شكل بحال حلقات الاذن بيرسينݣ فجانب الانف الماسة صغييرة فالابيض مكتبانش لكنتي بعييد حواجب مطراسية بلون شعرهاا ..الوجه كيبري من العنااية و الحنيكات حمريين ...مركبة شفار مفرقيين كيبانو طبيعين ولكن طوال على دياولهاا
جسمهاا انثوي دعماتو بالسپور خرجات لي خاصو يخرج ودخلات لي خاصو يدخل صدر واقف مؤخرة بااينة كرش مسطحة
كتجري فطابيي ولاير بوت فودنهاا كتمزك وساعة ذكية فايدهاا متاصلة بلهاتف لي فدراعهاا باخر اصدارات الايفون
العمر دااز وقدومها لايطالياا دازت عليه 4 سنوات ونصف
انثى بعمر ل24 سنة
سالات حصتها الرياضية وكلساات كاتشرب لماا ولفوطة حداها باش دخل دوش ..
صونا تيليفونها وجاوبات كتشوف امامهاا وقالت: نعام
يوسف: فين راك
ايمان: لاصال ...شنو خاصك !
يوسف: كيفاش شنو خاصنيي ... واش نسيتيي الاشهاار لي عندك دابا ولا لا
قلبات عينيها بملل وقالت: اشمن واحد فيهم
يوسف: ديال كريم الشمس
ايمان: شرحت لييك وفهمتك بلي مغنديرش الاشهار بدو بياس شنو مفهمتيش فهدرتي
يوسف: اجي وغنتاافقوو متعطلييش ..
قطعات معاه حطات مسائلهاا ومشاات قاصدة الدوش دوشاات حيدات العرق و مشاات لدارهاا ..حلات لماريو تستيفة من الملابس الفااخرة الصيكان لماركات صبابط كدالك مبرعة راسهاا فلحوايج والاكسسوارات
جبدات كسوة صيفية كادور بدوبيااس فلبييت وكتلبس وعينيها فلمرااية كتشوف كيجاتها كترجع تحطها وتقيس حاجة اخرى واكثرهم مزال بالتيكيت
استقرات فكسوة صيفية فلبيج قصيرة وسامبل لكول على شكل مربع سميطات وفيها فتحة لقدام كتبان ركبتها ولفوق كل ما حركات رجليها هزات صاك صغير ولبسات صندالة دومي طالون فلبيج مع ظفيرات مصبوغين فالاحمر
شعرها موجاتو بلمشطة خرجات من الدار و سدات بالساروت و قصدات لبلاصة فين ولفات تفطر كل صبااح غير شافها السيرفوور وتبسم ليهاا ..حاط قدامها لمونيي ديالهاا علاش لاا ولي قدامو مبقااتش ايماان العادية لي كيعرفوها ربعة النااس
تعرفات باسم بيانكا فمواقع التواصل ... إنستغرام مشهور بتصاورها.. دايرة عقد اشهاار مع شركة معروفة لجيل دوش فايطالياا ...تعلقات فلپانوات فجوانب الشوارع...صورات لشركاات المجوهراات ...المكيااج الحوايج حتى من التيليفونات
سنتيين الاخيرة دازت حاافلة بالشوتينغ والحفلات خارج ميلانوو حفلات شخصية ..اعراس ايطالية لشخصيات بارزة و لمؤثرين ايطاليين وجنسيات اخرى من غير العرب وبداا صداهاا كيخرج من قوقعة ايطالياا ... كدير كوڤرات لاغااني مشهورة ...متلات ف فيديو كليب لفنان ايطالي لقات صدا كبيير ومن تما بدات شهرتهاا
فكل صورة فانسطاا كتبيين ابتساامهاا ...مفاتنهاا ...جمالهاا ..تقتها بنفسهاا ...ولكن واش هدشي نفسوو كاين فواقعهاا لاا
كملات فطورهاا هزات صاكهاا وتمشاات دايرة نظارات شمسية عرااض حلقات دائرية وتابعيينهم حلقات 3 صغار فودنها كل وحدة فشكل
الريستوو لي زاادت كبراات وتشهراات زادت تعرفات من ورا ما ايمان ولات كدير كوفرات اغاني ويتحطو فيوتوب
تبدل الديكور الدااخلي ولا اكتر رقة بحالا داخلة للقصور الايطالية من زخرفة وطباليي وديكورات حيدات نظاراتها حتى كيضرب فكتفهاا شخص تقلبات عندو ونطقات بلعربية بملامح باردة: ناصر بقا ترد لباال
ناصر(بابتسامة )سموحات
كملات طريقها وبقا متبعهاا فينهياا ايمان الصغيرة لي دوزو طريق تركياا مجموعيين ...هادي وحدة اخرى ولكن جد ممتن ليهاا
قبل سنتيين كيوصلها اتصال منوو تعجبات وهي كتشوف نمرتو فتيليفونهاا مجاوبااتش حيت كانت فجلسة تصوير ل أحد الاشهارات لي برودوي تجميلي لكاميرات مقابليينهاا وهي فاستوديو بتوب اخضر ..حداها مرايا ومستحضرات تجميلية لنفس الشركة
من بعدما خرجاات عودات الاتصال بييه
ايمان: سلاام ناصر بخير
ناصر: يكما ديرونجيتك اختي
ايمان(كتشير لطاكسي)لا لا هانياا ..
ناصر : انا جييت ل طالياان
ايمان(ركبات ): غير بوحدك مامعاكش دراري ؟
ناصر:لا لا غير بووحدي ...ومعارف فين نمشي لكتعرفي شي حد ولا
ايمان: قوليا فيينك !
ناصر:فديك الساحة لمعروفة هناا شنو سميتها
ايمان: ااه الدومو غير بقاا كيبانو ليك شي پيكالات تما
ناصر:ااه اه لكرا !
ايمان:اييه دخل لديك لكافيي تماا هاني جااية فطريق راني مبعيداش علييك
فعلا مسافة الطريق ودخلات غير شافها معرفهااش تبدلات 180 درجة من لبسهاا وشخصيتها ونضجاات بقا غير حال فمو تعاق برااسو ملي وقفات علييه ب بكسيوة كتافهاا هابطيين وكويرة فايدها مدات ايدها لمزينة ب ساعة يدوية على شكل افعى محجرة وخاتم من الدهب بحجيرات ملونين
كلسات قبالتوو كتهز النظاظر فوق شعرهاا مبتاسمة ليه
ناصر: والله معرفتك ههه
ايمان: زعمة ! هههه انا عرفتك غلاضيتي شوية ههه عطيتيها لماكلة ههه
ناصر : اش اودي هه نتي بخيير سمحيليا لصدعتك
ايمان: متقولش هكاك علاش متيسراتش ليك ف المانية !
ناصر: جاني الطرد
ايمان: وايليي علاش
ناصر : مخرجاتش ليا الاقاامة عطاوني مهلة تاع عام نقرا اللغة وندير شي ديبلوم ولكن منجحتش فاللغة انا لفرونسي وشاد غير شوية الالمانية صعييبة اختي تقهرت
ايمان: و عثمان وحميد
ناصر : عثمان ديجا كان كيقراها فلمغريب وملي دوز الامتحان نجح وتبع فلبوكس دابا راه كيتريني وحميد حتى هوا نجح وكيقرا واحد الدومين معرفت شنو كيسمييوه بديك اللغة ههه لمهيم بحال فرمليي كيكون فسبيطار العجزة والحمااق
ايمان: ههههه مشاو يحمقوه حتى هوا ههه
ناصر: ويييه هوما بعدا بجوج كاين واحد السيد كيعاونهم مرة مرة خوك ديال رااسو مكاين لي يعطييك حتى ريال الى مخدمتييش علييهاا
ايمان: ماشي مشكيل الى معطاتك هد لبلاد تعطييك لخرى ...
ناصر: بغييت غير لكتعرفي شي حد يخدمنيي غير نصوفي راسيي ونضبر فيين نسكن
ايمان: نشوفو ليك السكنة والخدمة غنتكلف لييك بيهاا فالريستو لي خدامة فيه خاصك غير تكون كاپابل وتبين راسك...شنو تشرب
طلبو قهوة بجوج تشاركو الحديث على شنو كدير
ناصر: مزال لوريقات !
ايمان: مزال هد السااعة ولكن عندي لكارط كنتحرك عادي درت كونطرا والمشغل كيخلص علياا الشرووط من وراها غيدفع ليا باش ناخد الاقاامة
ناصر: مزيان بعدا تيسرات لييك ...واش حذيفة مشا ؟
كانت بغات تهز لكاس وتوقفاات كتستوعب اسمو لي سنتين عمرو تدكر قدامها جاوبات بحال شي خنجر زاد غرق دقة لداخل : معرفتش كل واحد مشا فطريقو ...نتا حم ...نتاا مكتهدرش معاه
ناصر: الصراحة لاا ولكن عثمان وحميد كانو كيهدرو معااه
حركات راسها دايقة بيهاا كتحك ايدها على صدرها ...طلبات لماا شرباات وقالت: نمشيوو !
خلصاات وخرجوو كتنفس شهيق زفير عاد فاتها لحال شوية شدو طاكسي والوجهة لفيين كانت ساكنة شافت تحت العمارة شحال تسناها هناا شحال طلات عليه من لبالكون وهوا كيكمي دكريات صعيب تنسااهم ولكن بدات كتولف غيابه من حياتها وكتأقلم مع وحدتهاا يكفيي متجبدش سيرتوو قدامها
خداتو لدار فين كان كاري ضبرات لييه على شومبر وتكلفات خلصات لييه شهرايين من اصرارهاا
ايمان: نتا استااقر فلبييت ...وغنعاود نتاصل بييك فلعشية وخة
ناصر : شكرا اختي الله احفضك ...الله اسهل امرك كيفما عتقعتينيي
ايمان: حنا فوقت لحزة اناصر متقولش هكا ...نخلييك داباا
**
قصد خدمتو كسربااي بسروال اسود قميجة بيضة بابيون حمرا وجيلي اسود كيمسح فاحد طبالي اما هي قصدات لبيرو لخاص ب يوسف ..دخلات رمات الصاك وكلسات بتعب فوق لفوطوي
يوسف: هادي كلها تعطيلة
ايمان (قادات السمطة تاع لكسوة): هاني جيت ايوسف
كلس قدامها: واش عارفة هد الشركة ولا معارفاهاش ...واش شبعتي فلووس حتى وليتي كترجعي فالخدمة ؟
ايمان: راه قلت لييك مبغيتش نبان بدو بيااس واش حماقيتي ...شروطي راك عارفهم
يوسف: كاين شي كريم الشمس بلا مايو كضحكي علياا ؟
ايمان: واش حنا غنبقاو غير فالاشهارات فيين لكليپ؟
يوسف : كوني تصبري شويية واش عرفتي شحال تاع لفلوس خسرت غير باش طلعي تغني مع داك خونا قدام بنادم
ايمان(بتدمر): على اساس كتخرجهم من جيبك باااركة
يوسف: 5 المليون (تحنا عندها )باش تغني نص ساعة قدام لكاميراات
ايمان(تبسمات لييه ): نتخاطر معاك بلي من وراها دخلتي الضوبل ديالها
يوسف: دخلنااا ...(كلس كيرطب معاها )شنو قلتيي نتافقو معاهم
حركات ايمان راسها ببرود وقالت: دوبياس لاا
ناض كيمشي ويجي وكينكر ويشالي بايدو
يوسف: مفهمتش شنو اللوجيك باش غادية (شاف فيهاا دايرة رجل على رجل كتقاد فساعتهاا ) على اساس نتي دابا شنو لابسة وشنو كتلبسي هد الاياام
ايمان: هداك لحمي نبيين فيه لي بغييت عطا الله لي يدير داك الاشهاار اناا لاا ومن حقي نختاار معامن وامتاا وشنوو نلبس ...دابا شنو درنا فالاغنية لي تسجلات ومزال مخرجات
يوسف (بنفخة ): الاغنية صيفيية صبري شوية عطينا تاريخ بلي غتخرج ف شهر 7
ايمان: الى ساليتي خاصني نمشي نقضي شي غرااض ونجي
يوسف: وجدي رااسك لپروگرام هاد الصيف عامر من ورا متشدي وراقك غنمشييو لفرنساا اتغني ف اوطيل سانك ايطوال تماا
ايمان(تبسمات): هادي هي الخدمة لي ضبر ليا ماشي نتعرا قدام الناس اه ونزيدك مبقيتيش تجيب لياا اشهارات تاع لكريمات بسبابك ايدي تحرقو بداك لكرييم فينما بنت فسطوري خاصنيي نبان كندهن فييه حتى وليت كنداوي فايدي
يوسف: باش غادي نعرف غيدير ليك حساسية انا طبيب !
ايمان: حتى انا راه ماشي فار تجاارب ...لمكانت ماركة معروفة بلا متعيط لييا..اه من ورا ماغادي ندوز هاد الحفلة ففرنسا غناخد شي ايام نرتااح ...متنسااش 4 سنين بلا راحة
خرجات خلاتو متبعها كيغليي وقال: غير لباارح كطير بلفرحة باش دير اشهار تاع شمبوان ..داباا كتعزل لياا فليبرودوي (عض على فموو كيقشر فييه )
خرجات من عندو غادية فطريق وكتافها حرقوها بالشمش لحاارة مشات لمحال مكياج كبيير من ماركة معروفة غير عكر ساوي خلصة تاع شهر دارت ليهم اشهار كلسات جهد ساعتين وهي غير كتصور كتجرب ...تخلصاات خدات لي خاصها وخرجات
ومشات تقضي الغرض المهم لي كتسنااه منهار حطات رجليهاا ف ايطالياا وهي اورااق الاقاامة
خدات طاكسي لمركز الشرطة داخلة وكلها تقة كتهز وتحط بانوثة والصاك فايدهاا كترجع شعرها برُقي قاصدة لباب
دخلات كمهاجرة غير شرعية وخرجات وفايديهاا اورااق كتضمن حقوقهاا كمقيمة فبلد اجنبية
فرحتهاا لا توصف وهي داباا مقيمة شرعية تحرك كيف بغات تسافر كيف بغات تقصد اي دولة كيف بغاات مكاينش لي يقوليهاا شي حااجة ...فرحة مكاينش لي كيتسناها معاهاا مكايينش ليي كان هاز همها الى تعطلو لورااق مخرجوش ليهاا
مكاينش لي غيتوحشهاا هي فلغربة بصح غريبة على وطنها لا غير اما هي انسانة كتحس براسها تخلقات باش تكون مقطوعة من شجرة ف ظل عائلة مفككة تاحد عمرو ضرو خاطرو وقال نسول فلانة على ايمان ولو غير مجاملة أو فضول يعرفوو فين تلات بيها لياام ولكن مكاينش ليي تحرك خاطرو من جيهتهاا ...حسبات راسهاا ماتت جنسيتها وشكون هي من الوقت لي دفنات جداها والاان هي بيانكا (البيضااء ) ماشي ايماان ...داك شوية لي كان باقي ف ايمان تشتت فمحطة التراان من ورا مامشا اخر بصيص امل فحياتهاا ...
قاصدة الدار بملامح باردة دغيا لفرحة بردات ملي شداتهم دخلاتهم لصااك وزادت ...بحالها بحال اي فرحة ديما كتهرس من لوسط ...تجمعو دموع فعينيها و دغيا نفضات ديك الطاقة السلبيية وراكماتهاا لداخل كيف ديماا ...
مع دخلات رمات الصندالة و دخلات حاسة بداتها سخونة نيشان لدوش حطات لكسوة فالشبكة معاها ملابسها الداخليية حيدات اكسسواراتها ولمكياج فنفس الوقت طالقة لماا فلبينوار كتكب بعض البرروددويات بروائح الصيف الفواكه المنعشة ..شعلات شميعات فجناب الدوش دارت طقوسهاا ودخلات وسط الرغوة الكثيفة كتلعب بالرغوة طالقة لموسيقى كتردد معاهاا هزات التيليفون وصورات ايدها وسط الرغوة بأظافر طوال مصبغين كيبرييو خاتم ذهب رقيق كيتوسطوه حجيرات ملونين صغار من المجوهرات لي مكتحيدهمش
ترخات فلماا كترمش قبالتهاا كونما لموسيقى كون كان هدووء رهيب كاتعيشو
الفلوس دارتهم
الشهرة وبدات فطريقهاا
كتشرب وكتاكل اي حاجة بغات
ولكن شي حاجة فخاطرهاا ضاراها "الوحدة " غير كتسد باب الدار كطيح الصورة لي كيشوفوها فيها الناس ... زوينة وضاحكة البنات وخصوصا المراهقات لي بداو كيتابعوهاا كيشوفووهاا كيفاش عايشة شنو كتلبس كيشوفو انها واخدة حريتهاا كتغني كتلبس كتشري ..اكيد غتكون فرحانة فحياتهاا
الوحدة كتخلق منا شخص متبدل المزاج من كترة مكيعيش بوحدو كيولي انساان مكيتحملش شي حد اخور كيولي انطوائي وهدشي كيخلف اضرار كبيييرة مع الوقت
تنهدات من بعدما طاح فبالها حذيفة : شنو كيدير فين وصل شكون فحيااتو معامن هوا بزاف ديال علامات الاستفهام كيتشكلو فراسها واهمهم واش باقي مفكرنيي
مخلاش ليها سبييل تجسس علييه الفيس سدوو ولا جديد فييه نمرتو مبلوكيها من اخر مساج رسل ليهاا انستغرام عمرها عرفات شنو كاتب فييه
قطع عليها كلشي بغا يحيدها من جدر ولكن هي مقدراتش ...معرفاتو حب ولا تعلق ولا غير الوحدة كتخليها توحشوو
حبسات الموسيقى وهزات راسها من صوت الرنة هزات التيليفون وعلى وجهها ابتساامة لطيفة لظهور الاسم فشاشتهاا ... الشخصية الوحيدة لي كتخرجهاا من وحدتها طول هد الاربع سنين لي دازو
الصديقة وديان ...انسانة لاقاتها بهاا الظروف تعرفات عليهاا ملي كانت فأشد حسرة ليها قبل اربع سنوات ..
جوبات بصوت مرييح وقاالت: دودوو توحشتك الصاحيبة غبرتي
وديان: والله وتعرفي تكشتيرة لي انا فيهاا تعدبي
ايمان:ههههه مبقا والوو شهر 7 قريب والتخرج على الابواب
وديان: داكشي علاش صونيت لييك ...شديتي ورااقك
تبسماات لي تفكرها شي حد وقالت: غير شوية دابا
وديان: خاصك ديري ليا الزردة
ايمان: مكرهتش تجيي
وديان: هاد المرة نتي لي غادي تجيي وتحضري لتخرج دياليي شنو بان لييك عفااك ربع سنين ونتي ف طالياان مطلعوش لييك فراسك ...اجي تشوفي لفرانسيس ههههه
ايمان: الله اطليك بيهم هههه اختي طاليانيين مفوجيين غير كندكر باريس كتشدني الخنقة
وديان: هههههه والله مكدبتيي ...خلينا من لهدرة ضروري تجي عنديي
ايمان: يوسف قالياا بليي غتكون شي حفلة ف باريس فشهر 7
وديان: دكرنا السم والعسل ...امكنحملش جدوو داك خيناا
ضحكات ايمان وقالت: لحاجتك فلك_لب قوليه سيدي (تنهدات ) مصاالح مصالح
وديان: قولي لياا (سكتات شوية )نتي صافاا نقص لپانيك لي كيجيك مرة مرة !
ايمان : بخيير شوية وصافي ...
فلاشباك
خارجة من المحطة عينيها مضببين من بعدما ودعات اخر بصيص امل كان فحيياتها لاحت الصاك فلارض وشدات فصدرهاا كتسمع صوت النااس هنا وهناا كيضربوو فرااسهاا وصوتهم مجهد شدات راسهاا وقلبهاا زاد تزير كتنهج وكتبكيي بدات كتردد بلعربية بصوت مسمووع: هءهءهء غنمووت (كلسات على ركابيها )عتقوني هءهءه عتقونيي غنمووت غنمووووت هءهءه
حسات بخطوات كتجري لجهتها لشاابة عشرينيية شداتها من كتاافهاا والاخيرة كتردد غنمووت
ردات الاخيرة بالداريجة : باش كتحسيي ااه بقااي معااياا
ايمان(كتنهج بغات تقطع حوايجها وكتبكيي بهستيريية ) غنمووت عتقيني عفااك هءهء عفااك
_غير تنفسيي مزياان (شدات ايدها ) تنفسيي شهييق زفيير شهييق ياله مخفتييش ياله
زيرات على ايد الشاابة متبعة معاهاا الحركات تاع التنفس حتى تم جاي رجل لجيهتهم فايدو الشانطة ديالو نطق بالانجليزية: واش كلشي بخير ...انا طبيب !
تحنا لعند ايماان لي دخلات فحالة من الهلوسة والمووت بوحدو لي فبالها كتحس باطراافها كيموتو كتزييد تخلع كانو قلبها صافي بغا يسكت
جاب الدكتور لماا حاولو يوكضووها والبنت المغربية الاخرى معاونااها حتى نااضت وقالت: اجيي معاياا
حضناتها بجنب هزات ليها صاكها وجرات باليزتهاا حتى وقفهم الطبيب
جيفري: هادي لكارط فيزيت دياليي تجي عندي فور متحس براسهاا مزياان ...هاد لحالة معروفة ب نوبات الهلع ...من الاحسن تعالجهم قبل مايتفاقمو
قراتها البنت وعرفاتو طبيب نفسي وقالت: وخة شكرا
كلساتهاا فقهوة داخل المحطة عينيهاا قطرة من الدم ايديها كيترعدو بشدة وعقلهاا نصو غايب دموعها هابطيين كيف الشتا بلا صوت
من بعدما طلباات شنو بغات كلسات الاخيرة قبالت ايمان وجرات ايدهاا ضماتهم وسط ايدها وقالت: تهدنيي كتسمعينيي ...انا وديان ونتيي (مسحات ليها دموعهاا )شنو سميتك
ايمان:ا ايمان
عاد قدرات تهز عينيهاا فيهاا. لقات قدامها بنت اية فلجماال شعر اسود. كيف الليل عيون الريم بلون عسلي كبار وشنايف بارزيين ونمش خفيف على بشرتها الخمرية ..لابسة شوميز طويلة حد الركبة مع سبرديلة بيضة
وديان: تشرفت بييك (بابتساامة مسحات دموع ايمان وقالت)كتحمقي بزيين تبارك الله مكاين لي يبكينا حنا لمغربيات ويلي
تبسمات ايمان من بعدما جرات ايدها تمسح دموعها حسات برااسهاا تهدنات شوية بينما السرباي حط قدامهم جوج مشروبات غازية
ايمان: سمحيلياا على هد روينة
وديان: هانيا اختي ...شنو وقع لييك
بقات ايمان ساكتة كتشوف فالفراغ ونطقات وديان: ماشي مشكيل الى مبغيتيش تقولي ...ولكن تحاجة متخلييك توصلي لهد لحالة (مدات ليهاا لكارط تاع طبيب) هادي عطاها ليك الطبيب لي عاونك قبيلة
قراتها وقالت: طبيب نفسي
وديان: الى كنتي كتشوفي راسك محتاجاه شوفييه ...اول مرة تجيك هاد لحاالة !
ايمان: معرفتش ولكن اول مرة نحس هكا ...حسييت بلي غادي نموت
وديان: هادي پانيك اطاك من الاحسن شوفي الطبيب الزيين حيت الاختصاص ديالوو
ايمان: پانيك اطااك ! باش عرفتيهاا
وديان: قالها ليا نيت هاد الطبيب ...وانا اصلا بابا طبيب وصاحبو طبيب نفسي وكنت كنسمعوو كيهدر على هد الموضوع والاعراض ديالو ...كتحسي بلخلعة ولوسواس دوخة بعض المرات الردة كيطير النعاس كتولي خايفة من جنابك ...داكشي علاش شوفي طبيب غيشرح لييك
ايمان:(قلبات لكارط على وجهها كتشوف فلفراغ ) ان شاء الله...نتي عايشة فايطالي
وديان:لاا انا كنقرا ف فرانسا ...السنة التالتة ف الطب عندي عطلة تاع سيمانة وكنجي هناا نرتاح ههه ونتي
ايمان:انا ياله خديت لباك العام لي فات وجيت هنا باش نخدم ونعاود لبااك دياليي ونقراا الهندسة
وديان: وينو باقة صغيرة وعلاش غتعاودي لباك !
ايمان: لشي ظروف مشديتوش بالنقطة لي بغييت
وديااان: اااه دونك خاصك تعاودييه والقراية هنا شوية غاالية كنعرف صاحبتي كتقرا الهندسة فواحد ليكول هنا ...كيخلص عليها باها شي 11 الملييون فلعام ولا كتر
ايمان: شحال كتقراي نتي !
وديان: اناا لي كنت جبت لباك بأعلى نقطة فالمغرب وجاتني منحة نقرا الطب ولا الهندسة وانا اختاريت الطب حيت بابا عندو كلينيك فرباط نقرا ونرجع عندو ههه
ايمان: الله اسهل الامور ان شاء الله
وديان: عطيني نمرتك دوريني الطالياان !
ايمان(ضحكات وسط بحة صوتها بلبكا ) سيي وخة ياله عارفة جوج بلايص
رجعات لواقعهاا وقالت: عييت بلخدمة بغيت غير امتا ندوز شي عطلة هههه عرفتي منهدرش نبقا غير ساكتة
وديان: هههههه غادي ندوزو ايام زوينة غير جيي والله
ايمان: صافيي يكون خير ..خاصني نوجد راسي باش نمشي
قطعات معاها وقفاات وطلقات لماا تشلل بلا ماتقيس شعرهاا
لبسات بينوار غوز قصير كلسات قدام مرايتهاا كاتعتاني ب بشرتهاا دارت ماسك للهالات وماسك لوجهها مشات لكوزينتهاا جبدات بيتزا من الاكل السريع لي كتاخد كلشي طالع ...من ديما معندهاش مع الطياب ومكتعرفش طيب كتستاعن غير بلماكلة الواجدة كتشري وتسخن دارتها فلفراان وكلسات كتقرا التعاليق ديال اخر صورة حتى داز الوقت غسلات وجهها ورطباتو ومشات تغدات
فايدها التيليفون كطلع وتهبط فلفيس مدخلة كروبات مغربية مختلطة والاكثر شهرة كايطلعو ليها پاجات ناشريين الغسييل شي منوضها مع شي وحدة كاتعاطا مع واحد سبان المعيوور الذباب الالكتروني كيزيد ليصانص لعافية باش تزيد تزند
كيغديو قلبهم بعناويين مستفزة وصور لا علاقة لها بالصحافة ونقل خبر الفنان
مزال عاقلة مزيان على خبر دخلهاا فأكفس حالة شافتهاا قبل 3 سنوات فنفس هد لبلاصة بالضبط
****
مع انتهاء مدتها السجنية خرجات نورة شااحبة وعينيها فيهم شوق للحرية وحياة الرفاهية فاش كانت و بنتها نور اكثر حاجة توحشاات ...كدور عينيها فارجاء السجن تواحد مكيتسناها لا من بعيد ولا من قريب تغرغرو عينيهاا وبكاات ملي كيموتو الواليدين نتي وزهرك فلخوت ونورة ماعمر الحنان جمعها مع عبد الله ولا حسات بيه سند فظهرها مكتحملووش وكتكن ليه الكره نهار على نهار
الطريق كان فيها اشخاااص ولكن مكانوش كيتسناوهاا هي كانو كيتسناو سجينات غيخرجو اليووم
لابسة جلابة سخونة وهازة صاكهاا ظافرة شعرهاا ومكمشة فرااسهاا مهزاتووش بان ليها طاكسي ومشات لجيهتو ركبات وتوجهات ل دار حسام موحشة بنتهاا ومصبراتش عليهاا كان شي صرف عندها فلبزطام عطاتو لييه وخرجات كتزرب كدق وتعاود تصوني وتعاود حتى تحل لباب من طرف المساعدة الجديدة معارفتهاش
_السلام ختي كتقلبي على شي حد
نورة: كلمي ليا حسام ونور
_ ختي مساكن تاحد هنا سميتو حسام ...يمكن غالطة فلعنوان
نورة(كطل بعينيها على دار لقات كلشي مبدل فراش وديكورات كلشي معاود من جديد ) ك كيفااش وشكون ساكن هناا
خرج من ورى المساعدة رجل ستيني هاز كتاب فايدوو كيشوف فاستغراب ف نورة وقال: بغيتي شي حد ابنتي
كتشوف فييه كي الحمقة وقالت: شكون نتوما انا كنقلب على حساام ** وبنتيي (حطات ايدها على صدرها )بنتي
_اااه نتي طليقة حسام يمكن
حركات راسها بااه وقلبها كايضرب وقالت: فين مشاا
_ معرفتش ابنتي انا باع ليا لفيلاا وخلا ليك شي امانة فلكاڤ ...سعيدة سيري عفا بنتي عطيهاا امانتها
سعيدة: وخة اسي الحاج
تراجعات نورة كي لهبيلة شادة صاكهاا وعينيها مضببين بدمووع شدات تيليفونها شعلاتوو ست شهور هادي وهوا مع اغراضها الشخصية عند لبوليس شعلاتوو معطاتوش وقت كتصونيي فنمرة حساام كتلقاها طافيية وترجع تصونيي وتصوني والوو مكاين حتى رد حتى كتشوف سعيدة جاية جارة ليهاا جوج شانطات كباار وقالت: هاكي اختيي
نورة: واش اختي معارفاش حساام بغيت غير بنتي هوا معندي مندير بيه
سعيدة: والله اختي معارفة شي حاجة نهار جييت لقيت الدار مافيها حد وهد لباليزات وصاني عليهم لحاج باش نهار تجي نتيي نعطيهم لييك
نورة: وخة شكرا
شدات الشانطات تقال ضاربة فيها الشمش فين غتمشيي داباا لا خو يحضنهاا لا واليديين يحلو بابهم ليهاا غادية بدوك لباليزات طاكسي لي شيرات لييه غير كتبان ليه متقلة كيمشي ويخليهاا ضرباات طريق طويلة على رجلهاا حتى عياات بزز وقف ليها واحد طاكسي ركباات وتوجهات لحيي ديالهم هبطات ولي شافها وعرفها كيتوشوش عليهاا
_هاهي خرجاات بقات كطرطاا حتى دوزات الحبس
_وكنقول فين غابرة واش كانت فلحبس
_علاه مكانتش غاتق_تل كرييم
_وحتى بنتها غبراات جاية لعام مبانتش
_ وييه ،عرفتي دنوبهاا خرجات فييهم والله كانت كتبقا فياا هانتاا شوف داباا كيولات اللهم لا شماتة ولكن تستااهل
حطات شوانطها تحت لعمارة وطلعات كتنهج فدروج كدق حتى حل عليهاا عبد الله مطلعها ومهبطهاا وقال: اش جابك نتيي هنا
نورة: جيت لداار باا
عبد الله :عند مك لوجه تجي هناا (دفعها ) غبري كماارتك علياا
نورة(دفعاتوو ) هاديي دااار بااا ومكاينش لي يجري علياا منهاا
عبد الله: غتمشي من هنا ولاا وجهك غنحكو لمك مع الحييط (جرها من قب جلابة كيديها ويجيببهاا ) دوري *** (بصياح) خرجي عليا
نورة: خولة ...خولاااا
عبد الله (عض على فموو وصمكهاا تشهقاات وجرهاا قجها ودخلهاا لداار ليي مرونة وكل مخدة فقنت ولكوزينة لماعن مجرتليين ولوسخ والبييوت كذلك شادها من عنقهاا كيدورها بييت بييت وقال: فيين خولة السلكووطة هاااه فييين (زادها طرشة صااعر )بسبابك الكلبة دات اسرااء ومعرفتها فيين زاادت
نورة(ضحكات ): هههههه والله تسرك فين جميلة عيط ليهاا تجمع لييك الداار وتجمعك ياعيفة الرجال كون كنتي رااجل مكانتش تسمح فييك ههه غزا فييك الله
عبد الله جرهاا لجيهة لباب حتى طاحت ورجع جرهاا وهي كتركل لييه فقلب الدار مبغاش تخرج هوا كيجر وهي كتقمش وتغوت تكركبها برا وسد الباب وقالت: كاااااين المخزن والله تندي حقيي منك ونشوفو ديك السااع
هبطات كتجمع فشعرهاا وجلابة تقطعات من سفيفة ومن لكتااف هبطات لشانطات سرحات وحدة فلارض لقاتها ببلكود بقات كتفكر شنو لكود لي كانت دايرة ركباتو وهي تحل لقات فيها لحوايج ديالهاا فوق لحوايج لقات ساروت صغير شافت فلباليزة لخراا سدات اللولة وحلات التانية كتلقا صامصونيط ديال دهبهاا حلاتوو لقات غير دملييج ديال نعيمة وطوانݣ لي عطاتها وسنسلة رقيقة كانت نعيمة شراتها ليها ملي ولدات نور كتقلب بين الصيكاان ولحوايج على دهبهاا وفلوسها لي كانت مخبية فداار ملقاات والوو لقات غير صيكانها سبابطهاا مخلاا تحااجة لقات لكارط بونكير ديالها
هزات دجيين لبساتو وحيدات الجلابة ولبسات شوميز وسبرديلة هزات صاك جمعات فييه تيليفون ولكارط ديالهاا سدات لباليزات وبقات كالسة كتصووني فتيلفون ل زكية ام حساام تيليفون كيصوني وقلبها كايضرب ماجاهاش الرد وكترجع تعاود بلا ملل ولكن تاحد ماجاوب ... قسحات وجهها ودقات على دار ديال جيران لتحت كانت صاحبة مهاا طلبات منهاا تخلي عندها لباليزات حتى ترجع ليهم سداتهم وخلاتهم ليهاا وخرجات بجري مشات لاقرب ݣيشي دارت كشف الحساب لقات الفين درهم فلكونط خرجو عينيها كان عندها كتر
نورة: والله لبقات فيك احساام غير بلاااتي ولد لحراام ...تيرات 500 درهم ومشات قصدات لكاار ولوجهة لفاس تشوف بنتهاا ...موصلات حتى كانت غتحمااق مشات لفيلا كدق وتقول مدقييت حتى جاية المسااعدة كتجريي مع حلات لباب دخلات نورة كي لحمقة كتعييط على نور وحساام
نورة: حساااااام عطيني بنتيي حسااام .....نووور نووور
هبطات زكية وراجلها كيجرييو لقاوها فقلب داار واقفة كتغوت
زكية: مالنا فهاد الغوات ياك لبااس
نورة(بلهفة)خالتي فيين نورر ...عيطي ليها عفاااك علاش مكانش كايجيبها ليااا واش بغا يحمقنيي ست شهور مشفت بنتي
زكية: نتي اصلا حمقة علامن كتقلبيي نور مكاينااش
نورة: فيين ...فين كااينة عطيني العنوان نمشي ليهاا
زكية: نور مع باهاا مخافت والوو ...سيري قلبي على بنتك ايمااان
نورة(شدات شعرها كتغوت): واش باغين تحمقوووني فين بنتيي ...دهبي ورزقيي دا ليااا رزقيي مبغيت والو يعطيني غير بنتيي هءهءه علاش يدير لياا هكا شنو درت لييه وخة دار شي حواايج سمحت لييه وكملت معااه علاش يدير لياا هكا
تقدمات عندها زكية وقالت: كيفاش بغيتيه يتيق يخليي بنتو معااك ...وهوا شاافك كيفاش كتعاملي مع ايماان مالو حمق يرمي كبدتوو باش نهار تزوجي ترمييهاا لييه
الحاج وراها كان كيكتب فشييك ومدو ليهاا وقال: خير منيي هاكي سيريي بداي حياتك ولا ضبري لمخك نتي اصلا نهار سنيتي على طلاق تنازلتي على بنتك ....وباش نجيك من اللخر
زكية: الحااج
الحاج: بنتك مبقاتش عايشة فلمغريب مشات مع باهاا لي مغيلوحهاش بحالك واخا تقلبي عليهم بلبرا متلقاايهمشش
غوتات بكاات تحناات على رجلين زكية كتبكيي
نورة: لعاااار بغييت بنتي هءهءهء مبغيت لا فلوس لا والوو بغيييت غير بنتيي راك حتى نتي ام
زكية: اه انا ام داكشي علاش هدا احسن قرار فحق نور طول هاد السنين وهي كتعيط لختها طاطا محشمتييش وباقة كتسمي راسك ام ؟ علاش بنتك اللولة لقيتيهاا ف زنقة ؟ ولدتيها حتى هي من كرشك هادو غير دنوبهاا علم الله فيين مرمية
وقفات كترعد وكتبكيي :غير قولي لياا الصرااحة هربات معااه وداو بنتيي دويي دويي معاياا دات لياا بنتيي باش تنتاقم مني
الحاج كيشوف فيهاا ويشوف ف زكية ضرب ايد مع ايد وقال: لا حول ولا قوة الا بالله ربي مكايظلم حد
زكية: واش نتي بعقلك ولا متكسابييهش هاديك راه بنتك وحساام ندم على غلطو ومشا فحالو فخطرة بعد منك ومن حالتك ومرضك وانانييتك وداباا عفاك خرجيي مبقيتش قادة على الصداع والغوات الى مامشيتي غنعيط لييك لبولييس
نورة(خارجة بلغوات )انا ليي غنمشي عند لبوليس هءهء والله تنغرقوو غير قولوها لييه وغنرجع بنتيي بغا ولا كره
مشاات قصدات لبولييس مصورات والوو داخت بيها الدنياا كتبكيي وتعطيي لخاطرها كتقول يمكن مشات معاه ايماان حيت تاهي غبرااات غتكون مشاات معااه ميمكنش حسام يمشي ويخلييني حسام كيموت علياا
نورة:هءهء هي هي بغات تنتاقم منيي هي هءهءهءه
**
في ايطاليا وفالضبط فبييت ايماان كانت فلكوزينة مع صديقتها وديان بلبااس مريح ديال دار كتحط لايس كريم فكيساان او وديان كالسة بشوورط قصير مع تيشورت قصير وشعرها الاسود جامعاه لفووق وقالت: فين درتي الطاطو ديالك !
ايمان : فلمغرب
وديان: عجبني مكرهتش نديرو ...شوفي بغييت ندير بيرسينك ختاري معاياا
ضارت عندها ايمان وقالت: حتى انا كيحمقووني بغيت نديرو فنيفي و سرة
وديان: كنعرف واحد هنا كان دارو لصاحبتي خطيير ومكيضركش شوفي هدا واعر
ايمان(كدوز فتصاور )وااعر
وراتها ديال النيف :شوفي هادي راه ديامند وااعر عرفتي يجيك وااعر
ايمان: لعشية نمشيو نشوفووه
وديان: ؤكااي
مشاو كيتفرجو وديان هازة التيليفون وايمان كتقلب على شي فلم يتفرجو فييه
وديان: عرفتيي واحد السيدة طالعة طوندونس ف المغرب الشوهة صافيي
ايمان(مشغولة كتقلب ): شحال هدا متابعت شي باج مغربية فراسك ...علاش مالها
وديان: هادي راه شوف تيفي
ايمام: شنو هادي
وديان: واحد الصحاافة قالييك الالة تابعيين غير صالونات عباد الله
ايمان: ههههه شنو قصة هادي
وديان: قاتلييك عندها شي بنت من زواجها اللول وتزوجات ناضت لبرهوشة تصاحبات ليها مع الراجل وهي طلقوو وعندو معاها بنت
ايمان: ويلي
وديان: وسمعي القنبوولة ناضت لبرهوشة هربات ليها مع الراجل وداو معاهم تا بنتها وهربو على براا ...اجي اجي تسمعيي ...مسكيينة تبقاا فييك
طلقات وديان لفيديو في حين ايمان عند التلفازة كتقلب على التيليكموند دير پوز
كنت كندوز من ظروف قااسية وخليت ليه بنتيي بينماا صايبت اموريي هءهءهء سمحت لييه فلفووس وف فلوس طلاقي غير باش نتفك منوو كان مصاحب مع بنتيي فقلب دااري
وديان: ويلي ويليي
كانت ايمان واقفة كي الجماد كتسمع فصوت مغريبش عليهاا محساات تجرات التيليفون لودياان خلاتها حالة فمهاا فايمان لي خرجوو عينيهاا وهي كتشوف نورة كالسة
وديان:ايماا !
نورة: دا ليا فلووسي ودا لي بنتيي شواني فكبدتيي هءهءهء
_وبنتك لخراا شحال فعمرهاا!
نورة: تكون عندها 20 عام داباا انا كنطالب سيدناا كنطالب السلطات يدخلوو ويجيبو لياا بنتيي ولا غندير شي حاجة فرااسيي كيفاش تخرجها برا المغريب بلاا الادن دياليي وبلا خبااري
ايمان(نقزو دوك دموع لي محبوسين فعينيها ملي ضحكات وبدات كاتهضر بهسيرية و وديان وقفاات مقابلة معاها باستغرااب ) هههه مايمكنش واش لهد الدرجة انااا مشيييت خرجت من حياتها ومزال مكتحملنييش علاااش علاااش
وديان(بهدوء) بب اش وااقع ! واش كتعرفيهاا
ايمان:(لبكية تحبساات فحلقها كتشهق وكتحبس فحلقها بحال شي عقدة تعقدات فحلقهاا )هء هء (حطات ايدها على صدرهاا طاح التيليفون من ايدهاا
كتمشي وتجيي كضرب فصدرها باغة تخرج ديك الشهقة والبكيية ولغوات ولحرقة والطع_نة ولكن الصدمة مخلاتهاش كاتمشي وتجي و وديان تابعاهاا ...حتى بدات الاخيرة كضرب فرااسهاا وكتنتف فشعرهاا وتعض فلمخااد
وديان(جاتها من اللور كتشد فيهاا وهي تزاد فيها جهد ) ايمااان اييماان اصااحبتيي ماالك ااايمان
ايمان:ااااع مممم(سدات ليهاا وديان فمهاا وترجع تبعد ليها ايدها تبغي تغوت وتحبسهاا
وديان(كتنهج)ايمااااان (زيرات عليهاا )راه غيسمعو جيران لغوات غيعيطو لبوولييس تكالماااي
ايماان:اننننن هءهءهءه بغيييت نمووووت بغييت نموووت ...تخنقت (كتنهج وشادة فمعدتهاا)غنمووت
وقفات كتجري فداار و وديان تابعاها بخوف من بلاصة لبلااصة كتحاول تهدنهاا ولخرا جهلاات معارفاش فاش تبرد مشات لكوزينة كتجريي كتزلع فلماعن ولمااس كتقلب علييهم
مشات ودياان كتجريي دفعااتهاا جبدات قرعة من تلاجة بااردة وكباتها علييهاا تشهقاااات بحالا خرج لي كان خانقهاا كلسات على ركابييهاا والاخيرة كل مرة منين ترشهااا حتى ولات بحال الثلجة بلبروودة
كلسات معاها فلارض كتنهج وكتبكيي ومحنية كانها ساجدة فلارض كتبكيي وتشكيي
ايمان:هءهءهءه هربت تعييت ومزال تابعاني مزال مبغاتش تنسااني هءهءهءه مزال حاقدة علياا وكتشوه فيااا انا لي خاصني نشوههها انااا
ودياان: واش كتعرفيهاا ؟ ايمان علاش كديري فرااسك هكاا عفااك قولي لياا شنو عندك
مشات لحضن وديان لي ضمااتهاا كتفاات طبطب عليهاا وتقوليها: صافيي تهدنيي
ايمان:هءهءهء اناا هي بنتهاا لي كتقول من زواجها اللول هءهءهء انا هي لي كتقول هربت مع راجلهاا
خرجو عينين وديان وبقات سااكتة عاضة على فمهاا من الصدمة و ايمان بفعل الحرقة سرسباات كلشي
ايمان: لاحتني لجدة. وانا صغيرة عدباتني ومزال كتعدب فياا راجلها كان بغا يتعدا عليا و ماتسوقاتش فاللخر خارجة كتقول ديتو ليهاا هءهءهءه هوما داو حيااتيي اودباا داو لياا كلشيي مدرت والوو هءهءهء مأديتهم فوالو (بحرقة )ولكن هوما أداااونيي هءهءه بزاااف بزااف مخلاونيش نبراا
معرفات الاخيرة متقوول من الصدمة معرفات باش تواسي ايمان زيرات عليهاا بحضن خلا ايماان تهدن شوية بشوية
كالسين فضاية تاع لماا باارد ايمان شعرها كيقطر ولكن لما بارد كينفعها حيت كيخرجها من الصدمة ولهلوسة لي كدخل ليهاا ملي كتشدها الحالة
جاتها نوبة بكااء هداتهاا وطاح ليها الطونسيو عوناتها وديان حتى داتها لبيتهاا بدلات حوايجها وتكورات ففراشهاا بقات حداهاا كتمسح على راسها بحال شي اخت كبييرة ...
ايمان: فين لفيديو
وديان: صافي نسااي
حركات راسها بلاا وقالت: غير عطيني صافي الصدمة دازت مغيوقع والو
وديان: ففف
ناضت جابتوو والأخيرة كلساات ودارت بلاصة لوديان خدمات لفيديو بتردد وطلقاتوو كانت نورة كتهدر وكشاكشها خارجيين قدام لكوميسارية كتبكيي وتقول مبكييت
نورة: انا معطيتووش بنتي هوا داها لياا انا بغييت غير بنتي مبغييت والوو ...
_ وشكون قالييك هرب مع بنتك الاولى !
نورة: انا عندي بنت وحدة هي لي بغيتها ترجع هوما مكيهمونيش حرقو كبدتيي
مشات لتعاليق كتقرا
*هدشي علاش الوحدة متزوجش وهي عندها لولاد هاهي طارت ليها براجل
*ياربيي على وقت وصلنا ليهاا
*سماهم على وجووههم ياربي تسمح ليا مقدرتش نتعاطف معاها
وديان(حطات ايدها تحت تعليق ) : شوفي شنو كاتب
هادي كنعرفهاا من حومتناا نحلف عليهاا ت هدشي كلو لي قالت كدووب بنتها كنعرفها وغبرات عام هدا تاحد معارف عليها شي حاجة ...كاينة شي هدرة كتقول بلي حركاات وتقطعات خبارهاا حشوومة تقولي هكاا الحبااسة
ايمان(بهدوء) : دابزات مع كريم (باستهزاء ) بابا وشوف شنو وقع ولاحتو من دروج وقع ليه شي حاجة
وديان: وهيا نااري
القصة الى مترواتش لييك من الطرفين صعيب تحكم شكون الظالم من المظلوم ...الدموع معمرهم كانوو عنوان المصداقية ولينا كنشوفوو ناس كطلع لصحافة تبكي وتشكيي وتقول هادي مظلومة كيجي الطرف التاني كيعاود من جهتو دغيا كتقلب القفة على اللول بحال الى لاعبيين شكون يستعطف النااس كتر ويبين مهارتوو فجذب المشاهدات
هكا وقع لوديان حكماات من اللول بليي نورة مظلومة وام كبدتها محرووقة على بنتهاا كطعن فشرف بنتها الاولى وكتنسب ليها تهم كتسيئ بشرفهاا
وديان:كيفاش عطاتها خاطرهاا دير هدشي ! انا بلاصتك نخرج بشي فيديو نحطو ليها فسطل
حركات ايمان راسهاا كتنهد : ماشي كلشي غيتيقنيي كيفما ماشي كلشي تيقهاا (مسحات عينيها)انا كنت حالفة نسااهم ولكن مخلاتنييش عايشة عيشة ليتييم على الاقل هوا دفنهم وكيترحم عليهم شنو نقول انا لي فيينما تفكرتهم كنحسبن عليهم الله ...حيت اداونيي فخاطري لامووني على غلطهم على ذنبهم عانيييت ومزال باغاني نعااني
حضناتهاا وقالت:خرجي داكشي لي فقلبك تقدري ترتااحي وتحسي براسك بخير ... قدما خويتي غترتااحي
عودات ليهاا طفولتها كيف دازت مراهقتها كيف دازت الضغط لي تعرضات لييه الاهانات بدون سبب حسات براسهاا قلبها تزير ومقدرااتش تكمل كم لمعانات لي عااشت
وديان :ربي غيعطييهم بلاصة الدقة جوج ومزال العاطي يعطي غير صبري ...نتي ماشي بووحدك انا معاك حسبيني ختك وعاودي لياا شنو هازة فداك لقلب (داعبات شعرها بلطف)شوفي راه تاحد فدنياا مهااني كل وشنو عندو
ايمان:الى جيت نعاود مغنسالييش
وديان:شحال كان فعمرك ملي طلقوو !
ايمان :طلقو ! علاه هوما تزوجو بعدا
سكتات وديان فاهمة الامر وقالت: يعني عمرك عشتي مع باباك
ايمان:تخيليي معرفتو حتى كنت كنقرا فالتااني ...تخيلي كنت كندوز فوزنقة وكنسمع اااه هادي بنت كرييم وانا عارفاه ديماا بشماتة كاظل تقوليا بنت الشمااتة على اساس هي ملي كانت ناعسة معاه فلحرام شنو نسمييوها حتى ولداتني كلي عقد ومقادرااش نتيق فشي حد لي بغيتوو كيمشيي لي عطيتو قلبيي كيمشيي (طاحو دموعهاا ) حتى الانساان لي تمنيتو ديما فحياتي اوديان بين ليلة ونهار مشاا معرفتش معرفتش واش هدشي غير حيتاش انا بنت لحراام
وديان: الله اهدييك نص لگور كلهم غير من علاقات خارج الزواج مالهم عايشيين بخير راه غير حنا العرب كانضخمو الامر وكنلومو الدري لي معندو حتى ذنب ...جوج تناس خاصهم يتلامو الاب والام اما لولد مخاصش كاع يتطلق علييه داك اللقب ...نتي ورييهم هد بنت لحراام فين غتقدر توصل ...دموعك معندهم باش يفيدوك غادي ضعفي راسك ونفسيتك بهاد ردان فلخاطر ...اه بنت لحرام ومن بعد شنو زادتهم شنو نقصااتهم ...تلقايها وسط وليديهاا ولبونية خدامة صباح وعشية شنوو حتى هي نطلقو عليها شي اسم !
سمعيني لبغيتي تكملي فهاد لحيااة ا ايمان خاص قلبك يكون ميت على كلام الناس والضومين لي دخلتي لييه راه طالع غير ب بنادم يقدرو ليوم تحمقيهم وصوتك يعجبهم غدا يقلبو علييك شنوو ! غادي تموتي ! قوي رااسك وهد خيتي غير الى مندماتش وتلات بيها لياام مشوهة راني كلبة وغنبدا نعض
ايمان(ضحكات )ودياان
وديان: شوفي والله ابب حتى البيوت اسرار كل واحد شنو عندو ها انا نييت خوتاتي مكيحملوش فيا الشعرة ، السبب! معرفناش شنو السبب ههههه ولكن جماافوو شي مرات ربي كيعوضك بلخوت تاع زمان ماشي تاع الد_م
ايمان:كيفاش مكيحملوكش باش عرفتي
وديان: نعاودها ليك كي لخرافة عندي جوج خوتات وحدة قرات الهندسة والتانية استادة جامعية انا صغيرة فيهم كيتنقولو عوينات باباا من صغري كنمشي معاه ونجي معااه وزادو محملونيش ملي درت الطب وتبعت حلم بابا صافيي متسرطاتش ليهم ونزيدك هههه بابا ملي دار لكلينيك سماه مصحة الوديان ويلي ويلي ويلي وحلت ليهم تقول ضريراتي ماشي خوتاتي كيضلو يحرشو ماما علاش تلبس هكا علاش تقرا براا علاش راخين ليهاا
وهادو راه مزوجيين ورجالهم خانزين فلووس ولكن نهار عرفو بابا غيشري ليا دار ملي نتخرج بغاو يطرطقو
ايمان:ولكن حتى هوما خاص يشري ليهم
ودبان:وحدة قاد ليهاا لكابيني ديالهاا والتانية شرا ليها طموبيل واناا بغيت داار هههه كيعجبني لي يسووك بياا هههههه
ايمان(ضحكات )نتي بووحدك والله ههه
وديان: امتا غتعاودي ليا على عزيزي
هزات ايمان عينيها ف وديان وتنهدات قالبا عينيها جيها لمراية فين كانت لكاسكيط ديالو معلقة وقالت: نهار تجيبها لوقت
شادا لكاسكيط ديالوو والعقد لي هداها مزال محافظة علييهم عارفة بلي فينما شافتهم كيتفتحو جراحها ولكن مقادراش ترميهم لا هوما لا تصاورها معااه كتفكر دكرياتها الزوينة معااه كتفكر شوفتوو تعنيقتوو ليهاا وكيفااش كيضحك ليهاا ...المنظر ديالو وهوا كيكمي وكيتسناها فشارع بقات مرسخة ليها فبالهاا ...كيفاش هدشي كلو ترمييه من قلبها شي حاجة لي ميمكنش
رجعات كلشي لبلاصتو وناضت لابسة دجين عريض مع بودي لاصق نص كم هزات صاكها ولبسات كونفيرس وهبطات كتوضع نظاراتها متوجهة لريسطو من بعدما ولا غنائها ف تلتيام فالاسبووع نهار اه ونهار لاا
دخلات كتلبس ونفس الروتيين كل مرة كطلع لخشبة بكل مرة لوك جديد كل مرة كتكون لغوب من عند شي بوتيك او شي مصممة ف انسطاا
كان فطبالي الامامية كريس قدامو مذكرتو كيشوف فايمان واشار ليها بحركاتو
كريس:جيتي زوينة
تبسمات ورداتها ليه بالاشارة : شكرا صديقيي
بعد غناائهاا المثالي بلغات متعددة كل مرة شخص كيطلب اغنية اسبانية او فرنسية او انجليزية كل ودوقوو والصوت واحد ...ولات طبلة كتحجز بايام قبل ونهارات لي كتكون فيهم ايمان كيكون عاامر كثر
ضربات 12 تاع الليل عاد خرجات بملابسها رفقة كريس وقال محرك ايدو قدامهاا: مالك
ايمان:والوو
كريس:خديتي وراقك !
ايكان(حركات راسها باه
كريس (باشارة) نحتافلوو !
ايمان: عييت اليوم خليها لمرة اخرى
كريس: عندي لييك مفااجئة ولكن ماشي داباا
ايمان:شنو هي
ايمان:فين وصل كتابك ! ساليتيه ؟
كريس(تبسم ورد بحركاتو) مبقا لييه والوو
ايمان:بغيتوو وبتوقييعك هههه
كريش(ضحك ) ضروري ...نوصلك
حركات راسها بلاا وردت عليه بالاشارة: غنتمشى لجو زوين
كريس(ضرب ايدها ) متنسايش صوتك هوا الالهام ديالي
ايمان(ضحكات ) تصبح على خير
كريس:تصبحي على خير
تبسمو لبعضهم وغير تمشات فطريق تنهداات حيت راجعة لوحدتها تااني فطريقها لدار وعقلهاا خداام شنو دير ولفلوس لي جمعات شنو تقدر دير بييهم باش متصرفهمش شحال اتحتاج باش تقراا واش غيكفاها لوقت وتجمع بين موهبتهاا وطعم الشهرة وبيين حلم ميمتها لي ملزومة تحققو وخة يبقا فيها عرق واحد وبيين حلم تحقيق الذات وتبيين ليهم بليي وخة معرت شنو دوزات وصلاات
سمعات خطوات وراهاا بقات كتسمع ودورات راسها كتشوف غير طريق معامراش بزاف وتاحد مجاي لجيهتها ..كملات طريقها وبالها وراها فينما تسمع الحس توقف تشوف وراها ...ركباتها لخلعة حيت الموضوع تكرر معاها هد الاسبوع كامل وهي حاسة بلي شي حد مراقبها
حتى سمعات خطوات كيقربو وراها هزات صاكها قدامها بغات تجبد رشاش لفلفل الحار لي ديما فصاكهاا تسمعاات صوت خشن ايطالي :بيانكااا وقفيي ...قلت ليك وقفيي
يتبع...
التعليقات
لا توجد تعليقات بعد، كن أول من يعلق.