ما ذنبي الجزء الثامن

خرجاات كتفرنس وضحك ابووحدهاا ملي لقاات لخدمة تافقات معاه 8 تاع الليل تبدا الخدمة .. وفوق هدشي طلب منهاا تلبس لباس يناسب الغنااء ...خاصها فهاد لوقت درب كتر على الاغاني والاكترية الاغاني الطربية دديالهم كيحماقو عليهم

مشات لاحد لمحلاات كتقلب فلكساوي لي صولد وبثمن مناسب ليهاا والاكتر من هدشي هوا بنفسوو "جميل " الشخص لي ستقبلها فلبار عطاها تمن فستان السهرة وانه الى عجباات لكليان غتبقاا تغني ديما ليوم غير تيست ليهم

ثار انتباههاا غوب قصيرة طولها مكيتعداش فوق من الركبة بلكمايم طوال لكن فتحة الصدر عريضة ...دخلات قيساتهاا ...جاتها اروع من الرائع مع بعض اللمسات ديال لمكياج غتكون فلوك نهائي ...خدات ليبة فاللون الاسود متماشية مع لون لغوب لي فلون الرمادي كيبري شوية ...خدات كدالك سباط كحل عالي ...مشات لدار فرحاانة لقات سعاد كتقاد فضفارها

سعاد:جيتي ...امضرا لقيتي شي حاجة

ايمان (بضحكة )لقييييت ...وخة ماشي كيف بغييت ولكن تقضي ليا غرااض

سعاد:هنياا عليييك وتقديتي مزال

ايمان:لباطرون عطاني لفلوس بااش نشري غوب لعشية

سعاد:و ردي بالك

ايمان: ماشي مشكيل الى خدمت بلبابيليز ديالك

سعاد:خودي راحتك الزين ...انا خدامة هاد العشية ..شوية وتجي امينة من لفاك راه لغدا وجدتوو

ايمان:شكرا اختي

مشات ضرباتها بتدويشة فاعلة تاركة طالقة لموسيقى وكتردد معاهاا ...تغداات ومشات كتقاد ضفارها وصبغاتهم بد_م الغزاال مع بياض ايديها كيواتيها ...كلسات كتحلم بالشهرة والاضواء

جات امينة قادات ليها شعرهاا موجاتو ليهاا وقادات ليها مكيااج زوين ...جمعات صاكهاا لبسات لغوب و السباط وفوق منهم مونطو مغطي لكسوة ...صفرات امنية وقالت:وعاريتي الساطة هههه

ايمان: هههه خاص غير لفلوس

طيبات لامينة راسهاا بالأغاني ديك العشية توصلات السبعة طلبات منها باش تمشي معاها توريها فيين وترجع فطاكسي لبات طلبهاا ومشاات هبطات ايماان ورجعات هي فنفس الطاكسي ،ساادة لمونطو وشعرهاا كيديه الرييح بمكياجها ولبسها كتبان كبر من عمرهاا ...كتقرقب بطالوونها وعينيها كيشوفو فالاضواء شي داخل شي خارج

دخلات بخطوات تاابتة وبمشية متمخثرة انثوية ...حيدات بعض شعيرات على وجهها

العيون كلها توجهاات لييهاا ...مكانوش غير الرجاال حتى بعض السيدات او بائعات الهوى مجلخات مكياج لباسهم عاري بشكل فاضح ...بدات ابتسامتها كتلغاا بدات كتكلم بنفسها وقال :ويلي انا فين جيت

باغثها جميل بتسبييحو وقال:هوشكااالديين جاانيم ناسيلسين (مرحبااا الزيين كيف راك)

ايمان(بابتساامة غير مريحة)ايييم تشكر دريم (بخيير شكرا)

ابتاسم ليها وقال: geeel geel korkma (اجي متخافيش)

عرفها على بعض الرجاال وفهمات انه كيشكر صوتهاا مشا بيهاا لواحد لبيت وقال: هنا اترتااحي حطي مسائلك باش تغني مرتااحة

ايمان: عندي غير صاك ممكن نحطو حداياا ؟

بقا كيشوف وقال: تماام لي بغيتي ...تقديتي اللبسة

حركات راسهاا باه حطات لمونطو وبانت وسط داك اللون فاتنة عينيه فاضحين اعجابو بييها وقال:وااو واووو

كانت فجنب واحد السيدة تماا الظفار طواال شعر اسود مبووكليي لابسة غوب لاصقة وقصيرة حد لفخااض كانو بعض التجاعيد فعينيها مخبياهم بمكيااج كثييف حتى ولات كتباان مرسوومة ...شادة كااروو وكتمعن ف ايماان ونطقات موجهة هدرتهاا لجميل بصوت مشخشخ بلكارو متقوليش واش انثى لي كتكلم

_دغياا ضحيتي بسنين معااك اجميل

_لوقت بغات الجديد مرة مرة هدا مكيعنيش بلي جريت علييك

_(شافت فايماان لي شافت فيهاا ) شوفي فياا مزياان حييت غيجي نهار وتكلسي(ربتات على لكرسي )حداياا

ايمان(باستغراب كتشوف فيهاا فهمات كلماتها ولكن مفهماتش قصدهاا ) مفهمتش ؟

_غادي تفهمي الزعرة

بعد دقائق توجهات لبرا حطات الصاك قدامها فواحد لكرسي على مراى عينيهاا كلسات والفرقة اللور عطاتهم لائحة الاغاني لي ديجا طلب منها جميل درب عليهم هوما الاكثر طلباا ..بقات مديرونجية من لهدرة ديال السيدة انهاا غتفنا هناا

هزات عينيها كتشوف كمية الفسااد ... شي حوايج مكيبينومهش لينا فالافلاام ....فينما مشيتي كاين واحد لجانب مضلم فاي بلاد ... وجودها هنا مغيزيدها لا تعلم لا شهرة تقدر دخل قوت يومهاا ولكن غتشبه صفات سيئة وحياة كئيبة كثر من حيااتهاا ...كتشوف جميل شاد طبلة جنبهاا مع رجال شلاغمية كانها كلسة vip بحال رجال العصاباات ...تنهداات حيت معندهاش حل يا اما تخدم يا اما تشرد فبلاد مكترحمش

بدات كتغني باحساس ناسية لي قدامهاا كتحرك فوق لخشبة بدون حركات مايعين فقط كتحرك مع لموسيقى واللحن ...غنات اغنية حماسية شوية كتشوف غير كرش رجال كتلعب ...شي كيشطح شي كيدور بلكاس والشيشة عرفات راسها بلي طاحت فوكر خايب ...كتقول فراسهاا اخر مرة نحط رجلي هناا تشد غير خلاص هاد الليلة وتمشي بلا عودة

كانو عيوون مارقبينهاا من بعييد واقف على لكونطوار ...طويل القاامة وفورمتو. عاامرة بقميجة سوداء وسروال اسود دليل انه ڤيدور فهاد لباار ..شاد كارو فايدوو مرة مرةة كيتنفس اكسجيين النيكوتيين وسط لحيته السودااء الغاامقة ...كاينفخ الدخاان فلهوااء ... حجبانوو تݣرنوو فور مسمع صووتهاا ...تقدم بعض خطوات تقابل معاهاا كيحرك فكتاافو لعرااض ...طفا داك لكارو ورجع نضروو ل ايماان لي بانت لييه بداك الثوب وصوتهاا القوي بحال شي الماسة ماشي بلاصتها هناا ...بقا مراقب الوضع بهدوء فقط ...

فجأة شخص كيقرب بلكاس ديالو لجيهتهااا ولكارو فايدو ...تجاوزاتوو كتغني وحاضية معاه ترجع عندها هزات عينيها فجميل كيغمض ليها عينيه بمعنى شطحي معااه لكنها معطاتوش اهمية

هزات ايدها كتغني حتى شدهاا. الشخص بغا يشطحها بزز ولبااس ...نترااتنا منوو بغات تعطيه بالظهر وجرها بنتير وقال بتركيتو المايلة بشراب:شطحي معاااياا ازوينة

ايمان:لااا هبط علياا

_شنوو ؟

دفعاتو : هبط هبط

بغات تكمل لغناا وصاح فوجهها دافعها وقال:متقوليش لياا هبط اتشطحي معااياا

ماشي من لعاكزيين جراتوو من قميجتو ودفعاتوو طرشاتوو حتى لموسيقى وقفاات بغات تهبط تجرها من شعرها وغوتات ..

صافي هنا عرفات بليي غدوز اكفس ساعة فحيااتهاا

جرها عندهااا ولبنات كيضحكوو ورجال متعيين نطق الشخص وقال: غتشطحييي غتشطحيييي (هز ايدوو وصرفقهاا مع بغا يعااودها شدات ايدوو لوااتهاا لييه بكاع جهدهاا وعطاتو برااس لنيفوو تغوت هزات رجلهاا ودفعااتو كلشي كيشهق اش هاد الجرأة حتى من جميل وقف عينيه خاارجيين فييها ...بقات كتشووف فلاخر حتى نااض كيمسح الد_م من نيفوو كيضحك وقال: مزال متروضتيي ؟ جميل اش هاد السلعة زويينة هممم

كلشي ضحك رجعات بخطوات اللور حيت عرفات راسهاا مكاينش لي يعتقهاا ..جاي الاخير كيقرب ليهاا وقال: خلاصك غااالي

بغات تهبط لكنو شدهاا من شعرهاا حتى غوتات بغات دور لكن حكمهاا كيجر فيهاا لجيهتوو وهي معافرة معاه مقدر تاحد يدخل حتى سمعاتت زدااف وراها او وصلهاا لعود لي تهرس قداامهاا

رخا الرااجل من وراهاا دارت بالزربة بصدمة حتى كتشووف...مغطي بكسدة رجل عاامرة بلباس الاسود كيدخل فاللكماات لرااجل بوحشيية

هزوو بعصبيية خشا لييه وجهوو فلكرسيي هنااا تروناات الدنياا دخلو جوج رجاال من طرف الرااجل

نطق الشخص موجه هدرتو لايمان بصوتو الخشن غالب عليه الغضب: شنووو كتسناااي خرجيي من هنااا

كانت ليه سمعا وطاعة من الخوف خلاتو مضارب مع جوج تاع الرجال وهي هرباات بغا يحبسهاا جميل خبطاتو بالصااك وهربات كتجري بلا مدروو وراهاا كتنهج وكل مرة دور وراهاا عكلها السبااط وحيداتو ولبرد كيسمر فيها من كل قنت ...تخبات على لباار و وقفات كتشوف فايديها كيترعدوو ....طاحو دموعهاا كتبكيي بخووف حيت فلحظة ظلامت الدنياا فعينيها ...عاد طلعات معاها ان لي دافع علييعا مغريبي وصوتو وخة وسط الغضب كتاكد فدماغها انها فايت سامعااه صوتو مميز ...ياله كتحاول تفكر سمعاات صوت وراهاا لجوج ترجال بلبااس موحد بحال لي كانو فلبار كوستيمات كحليين او وجههم كيخلع

_اووو فين هربتييي ...حصلتي

تقدات فلوقفة كتشوف فيهم دارت حركة الدفااع وقالت: متقربش

ضحك واحد فيهم كيقرب وجبد موس من ورااه وقال: نلعبوو شويية ! الشاف ديالي تقييل وامرنا باش نخسرو ليك وجهك حيت خسرتي ليه وجهوو

قلبها غيسكت هي بحركاتها وهوما بمووس ! معمرها عاشت صراع حقيقي من غيرر فالامتحانات تحت اللجنة هدشي معمرها عاشتوو ...كتمسح دموعها ملتازمة بلقوة : غتندمووو الى قرببتوو

باغتاتها يد من ورااهاا جرها من خصرها مرجعها اللور و قدامها بظهر عرييض معرفات باش تبلات حتى لقااتو مغطي عليهاا الرؤية ...دار ايدو رواه وجبد موس من حزام السروال وهي مصدومة غير كتشووف...سرح ايدوو وحل داك لمووس لدوك جوج لي قداموو وقال بتركية: شكون يسبق فيكم ؟

(ميل راسوو فجنب لايمان وقال:هادي هي هربيي !...قطعي طرييق وتخباااي فواحد الزنقة بين جوج ديوور

رجعات باللور منفدة كلاموو بغاا يمشي ليها واحد منهم ولكن معرف امتى لقاا راسوو مجرور من عنقوو مقجوج ضربو بلمووس لفخضوو تغوت ومشاا لتااني كيلعب ب لموس قدام عينوو وقال: تجرب !

بقا محاصرهم بجوج اما هي دارت شنو قاليها قطعات الطريق حفيانة كتجريي تدخلات وسط ديوور زناقي خاويين زلقات على ركابيهاا وتحردات ليبة تقطعاات وناضت كتعرج حتى بانت ليها زنقة مظلمة و دخلات وقفات فالظلمة كتنهج سادة فمهاا من لبكاا والخوف

سمعات لحس مقطووع دازت 5 دقائق على حالتهاا تنفساات بدات كتقرب جيهة لقنت تاكد ان الدنيا خااوية حتى كتجرها ايد اللور قبل متغوت تسد ليها فمهاا وتجمعاات مع لحيط وجسم صلب قدامها قبل مدير اي حركة دفاعية قال:ششش متحركيش راه باقيين كيقلبوو علييك ...(بصوت غضب )واش عاارفة فيين لحتيي راااسك ولا لا شنوو جااب ديلمك لهااد لخنز شنوو

خرجو عينيهاا وهي كتفرز شكوون وخة وجهو بالظلام مبااينش ولكن ميخفاش عليهاا صوتو الجوهريي خشن وجسموو الرياضي وطولو الملفث ...شافها سقلات بدا كيبعد ايدوو خلا ابهاموو على شفايفها تبغجهم وقال:غنحيد ايدي ومتدوييش (بهمس)وخة

حركات راسها باه ...جر صبعو جار معااه شفايفها لي لصقوو عليه نطقات معلية راسها تشوف ملامح وجهوو وقالت: ولد المحمدية

سكت شوية ورجع صبعو لفمها كيسمع خطوات فالزنقة ونطق بهمس قريب لودنها بورش احاسيسهاا واوتارهاا: بان لياا راسك قااسح ومكتسمعيش لهدرة ...ا ايمان

بقات ساكتة مغمضة عينيهاا محاصرة من الخلف بلحيط وقدامها محاصرة بجسمه لي مغطيها كاملة لتازمات الصمت وجيوبها الانفيية تدوقات ريحتوو لي ممزوجة ب رائحة لكارو ..

بعد شوية مكيديرش لحس خلاها فوضعيتها لاصقة فلحيط غادي تموت غير بلبرد ولخلعة هاد نهاار ...متبعا خياللو فالظلام حتى طل فضوو ورتاحت نسبيياا ملي شاافت وجهو ...حتى صوتوو منسااتوش لهاد الدرجة انسان عادي الى دار معاناا جيست زوين مكيتنسااش حجبانو عراض كحليين ..لحية سوداء كثيفة ..عيونو البنيية ليي لونهم طاغي وسط شفارو لكحليين وبشرتو الخمريية ...مزيج من الرجولة تشكل قدامهاا فمواقف كانت محتاجة لي يجرهاا

رجع عندهاا شد ايدها وقال:اجيي

تحسس ايدهاا لقاهم كيف التلج طلعها وهبطهاا وهوا كيحيد لافيست عطاها ليهاا لبساتها كترعد بلا كلمة شدات صاكهاا تابعااه ورجلها كتعطيها لحرييق ...كيتمشااو بشوية مرة مرة تهز عينيهاا فييه ...مزال مجات عينها فعينوو ملهيي كيشوف هنا ولهيه

_خاص مك غير لمافياا تبعك

ايمان:مافياا ؟

_لاا اختي بغاو يلعبوو معاك شوية لقاوك ناقصة حمااس

خاصو يقطع الشانطي باش ياخد طاكسي لديك جيهة ...فعلا جرهاا بخفة حتى من بعد موقف ليه طاكسي فجيهة لخراا

غادي كيجري بييهاا حل ليهاا لباب حتى كيسمع جوج كيجرييو قاطعين طريق تلاح حتى هوا فطااكسيي وديماراا مول طاكسي قبل ميوصلوو علييه كطل عليهم من شرجم حتى وقفوو مليي هربو علييهم

نطق مول الطااكسيي موجه هدرتوو ليهم وقال :Her şey yolunda mı (واش هانيا لوقت

نطق الشااب بهدوء : Herşey yolunda Allah'a şükür (كلشي بخير الحمد لله)

غير نطق تفكراتوو ودارت عندوو لقاتو حاط راسوو على القنت تاع الزااج حيد لكاسكيط كيمسح وجهو وقالت:شكرا بزااف

تقلب عندهااا وضو فاصل بيناتهمم ...بعيون زرقاء بااكية كتشوف فعينيه بتوتر من هاد لعين لتاانية مسلوببة بنضرتو القاسحة وخة ملامح وجهو مرتاحيين ...كتحس انه معصب و باغي يغوت من حجبانو لعرااض و عينيه لمدورين بشفار سوداء كانه مكحلهم بالليل ...اما هوا فعلا كان معصب ...لانه لا يمكن بنت بحالها تلاح لداك لقنت وهي عارفة شنو كيوقع تماا

تجاوز شكرهاا وقال : شنوو مشيتي كديري تماا ؟

ايمان:محسابلييش غيوقع هكا

_شنو كيحسابلييك غادي تغنيي ل فقها ولا ؟

ايمان: عاونتيني ...شكرتك ...علاش كتغوت علياا بالسلامة ...وقف هنااا وقف

وقف الطاكسي وهبطات كيسوط فيها لبرد نسات راه لابسة لفيست ديالوو داز من حداهاا طاكسي حساب ليهاا واش مشاا حتى جرهاا اللور من ايدها وقال: فين غادية فييين

ايمان(خلعهاا )واش حماقيتي غير نتاا غتركب فياا لخلعة هوما كيجيو فاص نتاا كتغفل

شافييهاا عض على لسانوو كيضحك وقال:سمحيلياا ...ولكن راه تعصبت ...منبغيش نشوف بنت بلااديي وسط دوك شمايت فدوك لبلاايص لمشبووهين

ايمان(تهدنات)كون لقيت بلاصة حسن كون مشيت ليهاا

مسح على لحيتوو وقال:اجي نحيدو من طريق

تبعاتو من داز اختاصر طريق من فوق لكازو حتى توجهو لكرسي ...حداهم جريدة او قدامها كورنيش كيطل على البحر لي ندى ديالو واصل ليهم ...كلساات كترد النفس ولبرد مرة مرة يطير شعرهاا ...بقا هوا واقف مدة شاد جنبوو حتى تهدن وكلس وقال:

ايمان: ونتا شنو كنتي كدير تماا

_ كنت خدام ...دابا جراو علياا

ايمان: بسبابيي ...سمحلياا

_(سرح ايدو فوق لكرسيي وكيربت برجلوو اشار ليها بايدو بمعنى هاانية وقال: حتى نتيي الراجل كي لفاس فينما كان يحفر ...ولكن نتتي لاا ماشي بلاصتك ..ابدا

ايمان: ملقيتش

_نتي صوتك زويين مضيعيهش فبلايص مسخيين بحال هكاا ...

ايمان(تنهدات )مخليت فين قلببت وخاصنيي نخدم باش نخلص لكرا

_(شاف فيها وقال: شنو جيتي ديري فتركيا !

ايمان: جابتني لوقت وصافي ونتاا

نطق وقال: جينا نخدمو على راسناا

ايمان: ودابا خرجت ليك على خدمتك (باسف )سمحلياا

_هاديك غير معدي بييهاا واصلا خدام خدمة اخرى بنهاار ماشي مشكيل خيرها فغيرهاا...حم شوفي ايماان

ايمان: عاقل على سميتيي

تبسم ليهاا وقال : كاينين حوايج مكيتنسااوش بحال الطرشة لي عطيتيني وسط لبحر

ضحكات بخجل وقالت: ههه الى بقات فيك رجعها وتنهاا

_حاشاا ...سمعينيي الخددمة بليل وهناا بالضبط ا ايمان راه خاايبة ...سوليني اناا ليي سكنت فيها شهور هادي ...قلبي ليك على شي خدمة تنااسبك كتقرااي ؟

ايمان(بتنهيدة ) طلبو مني نقرا اللغة عام ...باش ندخل لجامعة هناا

_قراي فبلادك حسن ليك منهناا ...الغربة صعيية علييك بزااف ا ايماان

ايمان(بسهوة)حتى فبلادي راني مغربة شنو لفرق كيف تما كيف هنا راني بووحدي

سكت شوية وقال: مكاين تا شي حد فعائلتك هنا

ايمان(بابتساامة هازة وراها حزن كفيل )هادي لي قدامك حسبها مقطوعة من شجرة من نهار ماتت مي

_الله ارحمهاا...(مبغاش يدخل فتفاصيل كتر شاف نبرة صوتها وملامحها تبدلوو) شي مرات دنياا كتكون قاسحة عليناا ولكن مخاصناش نتلاحو فاشما كان باش نتسماو عايشيين

ايمان: هادي اخر مرة ندور جيهة هدشي (بخوف)واش غيقلبو علياا

_حاولي تبعدي من لبيران دابا عرفوك كتغني قلتي ليه سميتك (حركات راسها باه ) نتي بعدي من هاد دومييين

ايمان: ولكن راه حلم حياتي نغني

_مقلتش لييك بعدي من حلمك ..صوتك زويين سيي يستااهل يباان ولكن فتلفاازة وقدام العقوول الرااقيية والنااضجة ماشي واحد سكراان يسمعو ليوم ينسااه غداا

ايمان(هدرتو مقنعة لدرجة ملقات اش تقول ) خاصنيي بزااف باش نوصل فين قلتي

_طريق لي كتكوون غادية بشوية ا ايماان ...كتكوني عارفة فين حطيتي رجلك حتى الى رجعتي اللور مكطيحيش كتعاودي تزيدي لقدام الى خدمتي على راسك ...اي واحد فدنياا عندو حلم باغي يحققو ...وكيف ديما كاين طريق سااهلة وكاينة طريق عامرة شوك ولكن فاللخر كتوصلي انا نفضل ندوز لكرفيي ندوز تمارة باش نوصل لشنو بغييت نكون واقف على الصح ماشيي الى طحت نريب كلشي ..فهمتيني

ايمان(عجباتها هدرتو مرزنة وتايق فراسسو تبسمات ليه وقالت )فهمتك والله ...حتى انا مبغيتش هاد طريق هاديي ...غير خاصني نخدم

_بغيتي تخدمي ...غادي نضبر ليك على خدمة تستااقري بيها فهاد لبلاد ...تعرفي منين دخلي منين تخرجي تعرفي نااس ...وهنا يجي وقت تحققي شنو بغيتي

ايمان: شكراا ربي اخلييك

..انتابه لرجليهاا ملابساش والوو من غير الليبة او ركبتهاا مجرووحة ..تلغات ضحكتو وقال: واش طحتيي و حفياانة من قبيلة

ايمان: طحت ملي كنت هاربة وسباط مخلانيش نجري ضبرنيي

_(جبد كلينيكس من جيبو جديد ومدو لركبتها حطو عليها تقالت اي وقفزات )نديك لسبيطار ! يكما مقسحة بزااف

ايمان(بالم حطات ايدها على ركبتهاا )لا لا انا بخير

_ كتلعبي شي صبوور ؟

ايمان(ضحكات)عندي لا سانتيغ نواغ فتكوانضو ولكن دوك لهيووش خاصهم هيوش بح (ضحكات كتشوفو كيشوفييهاا )مقصدتش نتاا هيش زعمة ...لمهيم (غطات وجهها كضحك وسدات فمها )سمحلياا عفاك هههه مقصدتش

_ضحك كيشوف قدامو قوال: هانية اسندريلا

ايمان:هههه

ضحكات وقالت: نسولك سؤال !

_مرحبا

ايمان: واش نتاا بصح زووهري !

سكت شوية وقال: شكون قالها لييك

ايمان: مي الله ارحمها نهار شافتك فلبحر قالت لييا هداك لولد يمكن زوهريي ...

_الله ارحمهاا ... معرفتش كيقولو زوهري وهدشي علاش طجييت من لمغريب فخطرة اصلا

ايمان: علاااش

_مرة خرى كنجبد الموضوع كنتعصب

ايمان: على خاطرك

لقاتو كيشوف فيهاا وتبسمات لييه .. مكتقدرش طول الشوفة فعينيه بزااف اما هوا قال: سبحان الله عينيك زوينين و لونهم زوين (شافت فيه بابتساامة خجولة مجاوباتوش )

تبسم ليها ولدوك لعيون لي كيبرييو بضو لبولة فوقهم وقال: هاكي (حط سبرديلتو وبقا بتقاشر بويض )غرقي فيهاا ههه

ايمان: لا لا ههههه غير خلييك بيهم

-ماشي مشكيل سخني رجليك بييها مشافك حد هههه

لبساتها سخوونة وقالت : شكراا شحال كتلبس ههه

_44

ايمان: شو كيجاتني انا 37

شاف فساعتوو وقال : مشاا لحال اجيي نشد ليك طااكسيي

تبعاتوو ساكتة كتفكر فلمسافة والليل وبوحدها فطااكسي بقاو مدة واقفين حتى بان ليه طاكسي شير ليييه او وقف جنبهم حل ليها لباب اللور وقالت بتردد : غنمشي على رجلي

استغرب وقال: فين ساكنة !

ايمان:***

_ كضحكي علييا راه بعيد لحاال طلعيي

ايمان: والله غير خليني

_ركبي ا ايمان من لهضرة ...راه مغنخليكش تمشي بوحدك فهاد الليل

ايمان: و الطاكسي ماشي بووحدي

_شكون قالييك غتمشي بوحدك غنبقا معاك تنوصلك وتعطيني سبرديلتي اشريفة

ضحكاات وقالت : وخة

ركباات وركب هو لقدام عطاه لعنووان وركبات مرتااحة حتى وصلوو لحدا فين ساكنة هبطو وخلص وقال: يكما عارف لعنوان تاع دارك !

ايمان:لاا لا مقلتهاش

حرك رااسو بااه تمشاا معاها توقفات وقالت: صاافي وصلت

بغات تحط سبررديلة وقال :خليك لبساهاا راه لبرد انا راه ساكن قريب لييك غير غادي نتمشاا

ايمان(حيدات لافيست مداتها لييه وخة امتانع عطاتها لييه وقالت :صافي عطيني نمرتك نغسلهاا ونجيبها لييك

_ مرحبباا

جبدات تيليفونهاا كتقيد نمرتوو وشافت فيه كضحك وقال: مالك

ايمان: شحال من مرة تلاقيناا عمري عرفت سميتك كنقوليك غير الزوهريي

_يااك الالة مجاتش لفرصة نتعارفوو

ايمان : فعلاا ...مجاتش لفرصة نشكرك على داك نهارر (بحزن )فلمقبرة ...درتي معايا جيست زويين عمري نسااه لييك

_اي واحد يدير معاك لي درت

ايمان: تيقنيي بليي اقرب النااس مداروش معاياا شوية من لي درتي فجوج مرات فاش تلاقيناا ...شكرا قليلة فحقك

_ متحتاجيش تشكريني ا ايمان

ايمان(كدور عينيها على شفارو حمقوها )هادوك شفارك ؟

_لاا ملصقهم ههه

ايمان: زوينين ههههه

_بديتي كتحرشي بياا الانسة وهدشي غندعيك علييه

ضحكاات بخفة وقالت: قلت ليك لي كااين

_والى قلت ليك انا عينيك عمري شت بحالهم

صقلات بحشمة ورجعات شعرهاا ورا ودنيها وقالت: شكراا ههه

_هههه ياله سيري طلعيي

ايمان: تصبح على خير

رد عليها كداالك حلات لباب وسداتوو بغات ترجع التيليفون لجيب وتفكرات سميتو مقالها رجعات حلات لباب لقاتو عطاها بالظهر غاادي وقاالت: مقلتيش ليااا شنو سميتك

تقلب عندها كيضحك كيدير فلقب وقال: حذيفة ....(غمزها مع ابتسامة ومشاا ...مخليها مبتاسمة لطيفو

**

يرتدي الأسود لوني المفضل ..فيتساوى لون شعره ولحيته وعيناه مع سواد قميصه ..

وجهه يتوهج نورا من بعيد ويشع بين الارجاء.

**

يارباه هل خلقت قمرا أخر يسير بيننا ؟

ضحكاات وسدات لباب وراها طالعة شادة فايديهاا سبرديلة ...طلعات بجريي لدار حلات بشوية بالساروت ودخلات لقات كلشي نااعس ...حطات سبرديلة فبلكار سبابط وتوجهات لدوش حيدات الليبة وكبات على رجليها لما سخوون لقاتهم حمريين بلبرد

تقابلات مع لمراية وهي تشهق كضرب فراسهاا على حالة وجهها كي داير

اي بنت مكتحملش يشوفها شي حد مجرتلة اما ايمان راه كان لكحل مزرق ليها تحت عينيهاا بدموع ...كتشوف فلمراية وتفكرات كيفاش دافع عليهاا بديك الطريقة ...تدكراات ملي وقف قدامهاا محامي عليهاا...شي حاجة لي عمر دارها شي حد

هي انثى وخة تقدر حاليا دافع على رااسها ولكن ديما كتبغيي لي يكون فجنبها قوا منهاا ...كيبان سنو صغير ماشي تلاتيني رغم اللحية الكثيفة مزال كيبان صغير ولكن صوتو القوي وهيبتوو الحاضرة قوتوو هدشي كافي يبينو مهيب فنظرها

ضحكات وهي تفكر ملي بلاا متحس سماتو هيش عضات على فمها كضحك وتفرنس ...معمر شي حد قرب ليهاا لهاد الدرجة تدكرات ايديه على شفايفهاا ..تبسماات بخجل انثويي وتوردو حنيكاتهاا

فداخلها طفلة محتااجة لحنان وخارجها انثى محتاجة الاهتمام ولكن هدشي مكيعنيش انهاا تغرمات بييه ولكن من طبعهاا الى عجباتها لحاجة كتقول عجباتنيي وساليناا

غسلات وجهها بالصابون مزياان وجمعات شعرهاا

مشات لبييت حلات بشوية كتنعس حداها امينة اما سعاد واخدة لبيت لاخر بدلات عليهاا حتى فاقت امينة مكمشة عينيهاا فايمان وقالت: جيتي ؟

ايمان: يكما فيقتك

امينة(تاوبات)انمشي لطواليط ونجي

مشات خلاتها لبسات سورفيت سخونة بيتية وكلساات مربعة فوق السرير كتنهد ...حتى دخلات امينة شعلات الضو بدل لفيوز لي كان شاعل وقالت: ايمان ؟ مالك

ايمان(شافت فيهاا ): كان عندك الصح ...ديك لبلاصة مافيها ميدار

امينة: اش وقع !

ايمان: عرفتيي واحد لحالة تشوفيها تهربيي ...لبنات كيتلاحو على الرجال ...الشرااب ولمسخ ...هدشي كلو دوزتوو ...كنت كنغني حتى تلااح علياا واحد قاليك شطحي معاياا بزز دفعتوو وجرني بزز ملي طرشتوو ...وهوا يجرنيي من شعريي طرشنيي ...تلاحيت علييه ولكن غفلني الحمار وشدني من شعري

امينة:اويلي الصكعة وشنو فكك

ايمان: تدخل واحد لولد فيدور فلبار هلكو عصا هوا وجوج رجال ديالوو

امينة: وااش معقوول ...اويييليي على شوهة ناريي داكشي تاع العصاباات واش فرااسك بليي تواركة الحراار خلي عليك لبراهش ...سلاح عندهم كي شريب لما

ايمان (خافت )قالها ليا حتى داك لولد قاليا طبعهم خايب بزااف ...معمر يحساب لييا تواركة هكاا عدوانين لهاد الدرجة

امينة: فينما مشيتي اختي كاين لخيب وزوين غير هادو حكارة مكيبغييوش لعرب كتر ...بزاف تاع لبنات كيجيو يخدمو هناا فلبيراان تيقوليك حوتة كتخنز شواري داكشي علاش لي خدمات تما كيحسابهم صافي راه جات تخدم وتعراا

ايمان(سهات )الله احسن لعوان ا امينة وصافيي تاحد مكيبغي ديك طريق غير هكاك

ايمان: المهيم حفضك الله

ايمان: عرفتي كونما كان داك لولد والله حتى نشابكو انا وياه ليدين ولموصيبة كلشي كيشوف ويضحك عجبهم لحال

امينة: درتي ليهم الروااج ...ايماان راه مبغيتش نقولها لييك ولكن اختي هاد الدومين لي بغيتي نتيي وخصوصا فلبيراان راه مغتاخدي حتى تعطيي ...خاصك تولي بحالهم...تشربي وتسكريي وتزيدي تعطيهم

ايمان(تبورشات )وخة نبقا بجووع

امينة: كون شفتي شي برنامج تاع الغناا دوزي فييه

ايمان(تنهدات كتلعب بصبعها فلفراش ) قبل منجي كان تيبان لياا كلشي غيتقااد السعاتي مبان ليا والوو

امينة: حتى واحد مكيوصل دغياا ضروري من الحجر فطريق ...المهيم خرجات طريففة وبعديي من هدشي كااع ...لولد حتى هوا تركي

ايمان: لاا مغريبي يا ختيي هههه جاب الله كان ...هاد لولد كنعرفو من لمغرب

امينة :حلييفي ياااه سبحان الله ياختي ...المهيم نجاك الله وكتاب لييك عمر جديد ابنت الزطااط هههه ...نعسي نعسيي يصبح ويفتح

طفاو ضواو وبقاات متكيية شادة التسبييح تاع نعيمة..غير طيح فبالهاا عينيها تورموو بدمووع وقلبها يتيزر عليهاا

...

صبح لحال مشاو لبنات لشغلهم وهي ناضت جمعات الدار فطراات وغسلات سبرديلة وحطاتها فشرجم تنشف كانت داخلة شميشة دافية من شراجم كالسة حداهم كتنهد ..ناضت لكوزينة تلها شوية دارت لبنات لغدا طاجين والعصير وبقات مقابلااه

فلعشية خرجات كتقلب على خدمة فينما كااان لمهيم تعمر جيبها تيحن الله والوو واش لقاات مكيعطيوها حتى وقت

رجعات ادراجهاا لدارر لقات سبرديلة نشفاات كلساات جابدة نمرتوو ...ياله بغات تصوني طفا التيليفون سااطت بغضب وقالت: ماشي وقتك ازبل تفوو

جابت الشارج بزز خدم ليهاا تسنات حتى شعل وجبدات نمرة حذيفة ودارتو فودنهاا كيصوني

تسنات مدة حتى جاوبها بصوت هادئ قال: الوو

ايمان(تقدات فلكلسة )الوو حذيفة !

حذيفة :ويي ...ايمان

ايمان:ااه ...صافا.

حذيفة:قطعي نصونيي لييك

حيدات التيليفون من ودنهاا قطعات باستغراب وقالت يمكن مامسالييش ياله بغات تحطو رجع صوناا ...جاوباتو وقالت: الوو

حذيفة: صافا ايمان اش خباارك

ايمان: لبااس الحمد لله ونتاا

حذيفة :اللهم لك الحمد ...مشات لخلعة

ايمان: هههه مشااات هاد السااعة .. مساليي بغيت نعطييك سبرديلة ديالك راه نشفاات

حذيفة : واحد شوية ونجيي عندك

ايمان:صافي وخة

ناضت لبسات عليها سورفيت مشطات شعرهاا لبسات سبرديلتها وهزات الصااشية وهبطات بقاات واقفة حدا الدار حتى بان ليهاا جايي لابس حتى هوا سورفييت كحلة هاز ليها لكمام شوية ...لابس تقاشر بيضين مع صندالة اديداس كحلة ...كيحك فعنقوو شعرو كان مخربق طويل شوية من لقدام ومرجعو اللور قاد شعرو ورجع لكاسكيط كحلة..لحيتو المبعثرة سوداء كيف الليل .. كيتمشا لنااحيتهاا ..تبسم ليهاا وقال:سلاام

ايمان(من صوتو كان باين ناعس )يكما ديرونجيتك

حذيفة: كاين شي حد غديرونجيه نتيي

ايمان:هههه معرفت (مدات ليه الصاشي ) شكرا على لباارح ...مرجعتيش لخدمة

حذيفة (حرك راسوو بلا ) لاا ...نتي شنو درتي !

ايمان: والوو لي مشيت عندو كيقولي خاصك ديبلوم خاصك خاصك وانا هد الساعة معندي والو

حذيفة:(حك لحيتوو كيشوف فجنابو وقال ): تبغي تخدمي فواحد السنااك مولاتو مغربية

ايمان: واللغة راه مكيبغيو يتواصلو حتى بلغة خرا قليل

حذيفة: شوية بشوية غتعلمي ...هي كتعاون المغاربة صراحة وخة سناك على قد الحال

ايمان: معنديش مشكيل لمهييم نخدم

حذيفة(شاف فيها كيخربق فتيلي)وتكون حلال

ايمان: ضروري

حذيفة: صبري شوية تجاوب…الوو ...الوو مدام فاطمة صافاا ...الحمد لله بخيير ..امورك مزياان ...لا لا كوني هانية وصلت لييك السلعة تالباب دار كوني هانية ...قولي لياا خصاتك شي بنت فسنااك ...سيي مغربية ...شوية ماشي بزااف عاد جاات مزال تالفة شوية فاللغة ولكن تعلم ماشي مشكيل ...(شاف ساعتوو ) تجيي هاد لعشية ؟ وخة وخة صافي

ايمان(بترقب )شنو قالت

حذيفة:خاصها بلاصة سرباية ...

ايمان:نخاف غير نروونهاا والله

حذيفة: مخفتييش اناا معااك

♥️♥️

تبسمات بلطف وقالت: نتا غتكون تماا !

حذيفة: كنخدم تما بنهار

ايمان: وفلعشية كتخدم فداك لبار

حذيفة(تبسم ليها ) كنت خدمت فيه غير شهر

ايمان: جيت انا جرااو علييك ...تخاف غير تديني ويجرييو عليك تاني ههههه انا راه تابعني النحس باش تكون فبالك بلا ما نجرك معاياا

حذيفة: تت متقوليش هكاك ...الرزق بيد الله ...الى كنتيي مسالية ياله نمشييو ...نلبس عليياا ونلقااك واجدة صافي

ايمان: وخة

طلعات بزربة بدلات السورفيت بدجيين وتريكو فوقو كويرة ظفرات شعرهاا .. رشات شوية من ريحتهاا دارت كلووز و ماسكارا شوية فغاجو وخرجات كتلقاه واقف داير إيديه فجيااب زاد عليه غير سبرديلة وكويرة كيتسناهاا

ايمان: مشيناا !

حرك راسو بااه وشدو طريق حتى شدو طاكسيي وقفو وسط لمدينة قدام سنااك من قهوة برا وسناك لداخل ...مكتوب اكل مغربي وعالمي

دخل حذيفة لداخل وبقات ايمان واقفة كدور عينيهاا فالناس تعيط لييهاا تبعاتوو لفووق ..شافتها فاطمة المغربية سيدة مقيمة بتركياا ملي تزوجات بتركي من شحال هدا ...فتحات سناك شوية بشوية كتكبروو وكتحل بابهاا لمغاربة بالاكثر

فاطمة: لمهيم غتبدااي معانا ليوم ومن بعد الى عجباتك الخدمة وملقيتي حتى مشكل نتفااهموو على كلشي

ايمان : ؤك

فاطمة: حذيفة غادي يوريك اشنو ديري

خرجو من عندهاا دوزها لفيستير عطاهاا جيليي خاص بسرباية مكتوب فييه اسم سناك

خلاها كتلبس ورجع عندهاا ب بلوزة بيضة وقال: واجدة

شافت فييه وضحكات وقالت: كد_بح الدجاج هههه

كيجمع فلكمايم وكيضحك : كنطيبوو ههه ...صافي واجدة انعيط لييك على لولد لي غيوريك شنو ديري حيت انا حدي لكوزينة صافي ...طارييق طارييق

ايمان: واش طارق لمصور

طارق جاي بجيليي شاب فاواخر لعشرينات داير نظارات تاع الشووف و لي بااݣ لسنانو لفووق وقال: ايمان !

ايمان : سلاام(مدات ايدها ليه سلمات )لباس

طاريق: الحمد لله اش خباارك ...شنو كديري هناا

حذيفة: ماشي وقت لهدرة داباا وريها شنوو دير

فعلا تمشات قدامو وراها تمسح طبالي وتحط لموني وتقادو وداكشي لي دارت كتستقبل لكليان بضحيكة وكتحاول تدخل راسهاا بزز ...كتعلم والى معرفاتش شي حاجة كتعيط ل طارق اما حذيفة كتشوفوو لدااخل كيقطع وكيطيب مشغول فجيهة طياب ..كتشووفو. غير لبغا يعطيها شي طلبية ديال لماكلة

حذيفة: يكما عيتي

ايمان: شوية

حذيفة: غتولفيي (تبسم ليهاا وكمل خدمتو وحتى هي وصلات الطلب

مرة مرة حذيفة يهز عينو فييهاا يتبع حركاتهاا وضحكتها مع لكلييان ...بانت لييه انسانة زوينة قلبا وقالبا دغيا كدخل لخاطر ودير بلاصتهاا مغاديش تمحن فحياتها بزااف على ظنو

مامطالعش على ماضييهاا الاسود ليي معارفو حد من غيرها

مرة مرة يدور معاها شخص تلوحهم فجيب لبلوزة وتكمل ...لحال بدا كايظلام ...عيات بلوقفة ولكن معندها مدير خاصها تخدم باش ياله تقدر تعيش لفلوس غادين كايتقاداو ولغربة هي هادي ...مكترحمش

نهار على نهار بدات كتفهم وتوالف الخدمة ..ولكن احلامها مزال كتسنا تحقق

فصباح احد الاياام تسيفطات مع لبناات لي عندهم عرس خوهم وجات مع العطلة عندهم ...بقات فدار بوحدها طاحت عليهاا كآبة الدنيا كلهاا ...تكمشات فبلاصتهاا كتبكيي وتنخصص علاش لا واليوم اول دكرى لموت نعيمة

بعض المواجع تفطر القلب دون أن يشعر بك أحد، فتشعر كأنّ روحك قد خرجت من داخلك، هكذا عندما فقدتُك.. لقد مرّت سنة.. ولم يتغيّر شيء أبدًا

طيبات عينيهاا بلبكا حتى مقداات ...كانت كتحاول ما امكن تلهي راسها بلخدمة لخروج مع البناات باش غير تنساا هاد نهاار ولكن كيتصادف مع عطلتهاا فلخدمة و سفر لبنات مكاينش لي يونسهاا

نهار كلوو دوزاتوو بكاا قدام دكرياتها وتصااورهاا وفيديوواتهاا مع نعيمة ...رجعت لقوقعتهاا كان جرحها تحل من جديد رجعات سودوية داك نهار الكئيب فحياتها نغالقات على رااسهاا لمدة من الزمن تيليفونها محاولاتش تهزوو ولا تفوج بييه شوية ..

من بعد نهار على نهار بدات كترجع طبيعيية وخة غير من براا كتمشى حدا لبحر كتخرج مرة مرة مع لبنات لي رجعوو من السفر ..مقادراش تولف جو غربة تركيا بالأخص جاتها فشكل ...كانت كتسمع انها ولافة ولكن هي لعكس جاتها تقييلة على القلب ولكن معندها مادير من غير تهز راسهاا

داز على قدومهاا ل تركيا شهراين ...لييوم 14 فبراير كل وحدة من لبناات خرجات رفقة شخص معين كيعني ليهاا ...اما ايمان ف نفاردات مع نفسهاا قدام امواج لبحر ...كتفكر ان هاد التاريخ لي كيعني الحب بالنسبة للعشاق ...هوا كيعني لييها تزادت بدون رغبة فغلطة عملوهاا تحت مسمى الحب

نيفهاا حمر بلبرد مكمشة فلمونطو وكتشوف لورد قدامها غير كيتشااير فينما داز شي كوبل تمشي مرة تعطيهم وردة من السلة بقات غير كتشووف ...لاحظات بلي عمرها تمناات شي شخص يكون فحياتهاا

عمرها فكرات انها ممكن شي مرات تبغي شي حد حتى هي وتعيش قصة حب كيفما الافلام والروايات لي عامرين بييها ...معمر مكان بين احلامها راجل ...ولكن علاش كتشوف معظم البنات كيقلبو على الحب ويقلبو على الرجل المثالي ..واش شي حاجة مهمة فحياة البنات

سؤال معرفاتش جوابوو فقط متبعة بعيونها الزرقااء جوج غادين جوج جايين وهي فبلاصتها كرمات بلبرد

تنهداات بحزن انهاا تااني بووحدهاا فيوم بحال هداا وقالت فنفسهاا ...واش غنبقاا حياتي كلها بوحدي ؟

هبطات دمعة من عينيها خلات بياض عينيهاا يحمار دغياا ..ميلات راسهاا كتمسح دمعتهاا حتىى كتجي من وراهاا ايد رجولية ب براصلي اسود فلمعصم باصابع نضيفة ودراع مزغب شوية هاز فراحة ايدوو كيك صغير فوقو شمعة وردية شاعلة وداير بييه ورود صغيرة فلبيض ...

جاها صوتوو الرجوليي لي فيه بحة انه مروح كينطق بكلمات حدا ودنهاا بلا مدور وجهها لييه عرفاتوو

حذيفة: سنة حلوة يا إيمااان ...سنة حلوة يا إيماان ...سنة حلوة ياا إيماان

نقز من فوق لكرسي لعندهاا داير كاسكييط لابس كويرة وسروال كحل ...بقات كتشوفيه وترمش وقال: دغياا الشمعة غادي طفاا

طفاتها ومد ليها معلقة بيضة وقال ؛ بطولة العمر ان شاء الله ... وبلي تمنيتي فحياتك (تبسم ليهاا ) دوقي

ايمان (كلات منهاا و البكية شاداها عينيهاا عمروو دمووع مبغاتش تبكيي

حذيفة: معجباتكش ؟

ايمان(بصوت مخنزوق )زويينة (مسحات عينيهاا ) شكرا بزااف ...ولكن باش عرفتي غتلقااني هناا

حذيفة: شحال من مرة كنلقااك هناا ...قلت هنا فين غتكووني (مد ايدو لمعلقة تانية داق من لحلوة )

ايمان: معمر شي حد تفكر عيد ميلادي من غير ميي (كتاكل وعينيها عامريين دمووع وحمريين ) باش عرفتي عيد ميلادي اليوم (تفكرات نهار طفا معاها الشمعة لعام لي فات )بقيتي عاقل

حذيفة:(بجرأة حبس دمعة هابطة من عينيها بصبعوو مسحها من خدهاا ونطق بحنية )راه قلت ليك شي حوايج مكيتنساوش دغياا ...دعي معاها بالرحمة متبقاايش تحرقيها بدموعك (بغا يفوج عليهاا ) نتوما لبنات عزيز عليكم هاد تويشيات ديال عيد ميلاد و لكادوات يااك

ايمان(كتاكل )معرفت عمر جاني شي كادو. من غير ميي مسكينة

حذيفة: نتي ...انا عمري عرفت شنوو هي حلوة العيد ميلاد تصايبوها ليك داباا

ايمان (حبسات لمضيغ)واش نتا لي صايبيتيهاا (سرطات )وااعرة

حذيفة: بصحتك

ايمان: بشنو صايبتيها

حذيفة: درت فيهاا تبيخة

ضحكاات وسط دمووعهاا وسدات فمهاا وقالت: ماشي مشكييل لمهيم تفكرتيني هههههه ...اعلاش عمرك احتافلتي بييه ...عمري سولتك شحال فعمرك

حذيفة: يمكن 28

هنا انفاجرات بالضحك وهوا كيشوف فييها ويتبسم مع ضحيكة خفيفة

ايمان: كضحك علييا عمرك معارفووش هههه

حذيفة (حك دقنو كيضحك وجبد لكارط شاف التارييخ )عندي 28 نيشان

ايمان: علاش عمرك احتاافلتي بييه

حديفة: اااه لواليد كان محرم علينا هدشيي ... حيت ماشي فديين وزيد وزيد

اييماان:اااه

حذيفة :نقوليك بلاان !(هز لكريمة بصبعو كلاها )

ايمان: شنو ههه

حذيفة: حتى انا عيد ميلادي ليووم

ايمان: هههه لا ميمكنش ههههه

حذيفة: علاش ميمكنش عاد اكتاشفتهاا كنت ناسيها والله العظيم

جبد ليها لكارط وراها ليهاا تصدماات وضحكات فنفس لوقت وقالت:اش هاد الصدف ياله حتى نتاا خاصك طفي الشمعة

ايمان: سنة حلوة

حذيفة: قدي قداش وتغني لياا سنة حلوة

ايمان: ههه وشنو بغيتي

حذيفة: شي محمر ومجمر شي قطباان ولاا شي زردة دايزها لكلام لكيكة كوليهاا نتي

ضحكات وهي مربعة مقابلة معاه كتاكل فلحلوة ...تكدب انها فرحاانة وبزاف لي تفكرها شي حد

ضربات النص فلحلوة عجبااتها وقالت: كتعرف تقاد هدشي سعداتك

حذيفة: قرايتنا مامشاتش غير هكاك بعدا قدرنا نفرحو شي فتاة

ايمان: شكراا احذيفة (تبسمات لييه ورجعات كتااكل ) ممم واش عندك ديبلووم

حذيفة: مم شاف كويزيني و قريت حتى لباتيسري (جبد من جيبو بريكي وقال) ماشي مشكيل الى كمييت

ايمان: كتكمي !

احذيفة: سييي

ايمان: الصراحة مبينااش فييك ...خود رااحتك

جبد لكاارو شعلوو وسااط دخان بعيد عليهاا وقال: علاش زعمة

ايمان : كاتبان سپورتيف

حذيفة: سپورتيف و كمااي الله اجيب غير الصحة والسلاامة

ايمان: شحال ونتا هناا فتركياا

حذيفة: على حسب مرة كنكلس شهر مرة شهرااين

ايمان: وكترجع لمغريب

حذيفة :ممم

ايمان: ياك مزال مطول هناا

شاف فيهاا كينتر من لكارو وقال: كنتسنا الثلج يدوب

ايمان: هههه بغيتي تجمعو

حذيفة: بحال هكاك ...نديك لواحد لبلاصة زويينة هناا !

ايمان: فين

حذيفة:نووضيي ...ليوم الالة ندوزو عيد ميلاد زويين

ناضت بحمااس تبعااتوو كضحك واصلة لييه لكتفوو كتبان ضعيفة قداامو واخة راه وزنها مثالي مع طولهاا لي مكيتعداش 1.65

دار ايدو فجيب كينتر اخر نترة من لكارو لاحوو وطفاه برجلوو وهزوو رماه فزبل وقال ملي كانو كيطوالوو الناس فين كنتيي

ايمان(هزات عينيها لييه كضحك )متكونش نتا لي شفرتيه لياا شحال فيك فطول

حذيفة:(ميل راسوو كيتاكد) 1.90

ايمان: تبارك الله مسابق مع الليل شكون يكون طول

ضحك حتى بانت حفيرة ف حنكوو و وقفاتوو : كتنتر وينوو عندو حفيرة الزييين هههه

حذيفة: وينوو(جرها من القب كضحك)شتك ضسرتي يكما انا حنان ! هههه هاديك مسميتهاش حفيرة الزيين هاديك سميتهاا اعاقة

ايمان(غتموت بالضحك )ههههه مرضيتيش تكون زويين الزوهريي

حذيفة:هانتي خسرتي ليا الهدرة

ايمان:واش بصح

حذيفة:شوفي دوزت واحد لمعانااات كي الزفت مع هاد لكلمة ...ابخي نعاودها لييك داباا نهاارك منخسرووش لييك سمعتيني

ايمان(قدات لقب)صافي

ركبو فطاكسيي موقفها الا امام مدينة الالعااب ...كان لجو خراافي مع الالواان و لوليدات صغاار سبقاتوو كضحك وهوا وراهاا معرفش علاش كتجيه طفلة باغة تلعب كيشوف واحد البرااءة فعينيهاا كتخلييه يشووف فييهم ..هازين ورا ديك اللمعة الزرقااء هم اسود باينة فعينيهاا ...تيقولو ليه انه كيقراا العيوون وكيفهمهاا ولكن عمرو فهم شي عيون كثر ماحس انه يقدر يخرج ديك الطفلة المسجونة فزرقة عينيهاا

كان ملاحظ هاد الايام عينيهاا البااكية سهوتهاا وخموولهاا فلهدرة قرر يصنع ليهاا شوية الفرحة ربماا تنفعها وفعلا مكاانش غالط كانت محتاجة دفعة تخليها ضحك

تبسم ليهاا وهي كتنقز فرحانة رجعات عندو وقالت: هدشي فين كان مخبي

حذيفة: عنداك تبدااي تغوتي وتخلعي ههه اندير راسي مكنعرفكش

ضحكات داخلة معااه كانو بزااف تاع الالعااب وقالت: باش غنبداا. ! (كدور فعينيهاا ) نركبوو فطموبيلات لي غلب يخلص على لاخر ݣلاص

حذيفة: ݣلاص فهاد لاكلاص

ايمان: احسن حاجة هههه

بداو بطموبيلاات ركبات فوحدة و هو فوحدة ضحكات حتى دمعو عينيها حيت بقاو رجليه شايطيين

ايمان: لا ميمكنش هههههههه

ضحك كيقاد فلكاسكيط اللور وقال: وريني حنة ايدك

كانو غير هوما تلاتاا رااكبيين مع كانت شتاا كانت الدنيا خاوية شوية كل مرة منين ساطحها حتى كتغووت ترجع تسطحو حتى غلبهاا هبطو كيقاد فالسروال مشااو لعبة لي كتنيش على شي حاجة بلبندقية

عطاها ليهاا مجات حتى فحااجة شدها من عندها يلعب دوروو فلت وحدة وجابتهاا فجوج وعطاوه يختاار شنو ياخد

حذيفة: ختااريي شنو بغيتي

ايمان(حطات صبعهاا على فمها كتفكر فنونوسات لي قدامها ...بان ليها دب ابيض صغيير )هدا ههه

مدو ليهاا شداتو بحال شي طفلة صغيرة فرحانة بييه ضماتو ليهاا رطب وهوا كيميل رااسو كيضحك وقال: شنو داباا

دارت نونوس فصاك ادو ديالهاا وكملو جولتهمم من بعدما خدات غزل لبناات كتاكل فيهاا كيدورو واكتاشفو مدينة الالعااب كل مرة يلعبوو فلعبة دخلو لالة الصور كتاخدي صور صغار فلبلااصة كاينين قبعاات و نظاظر بهلوانية ...صور لذكرى ترفيهية

دخلوو بجوج كاع لحماق دارتوو لييه

خرجو صوور ميمكنش تشوفهم ومضحكش اما هوا رضاتو ضحكة فتصااور من حݣلهم كيقولو لشفتي طويل هارب عرف لقصير تابعو

خرجو من تما من بعدماا لعبوو فبزاف تاع الالعاب نهار قرب يساليي خرجو من تماا كياكلو فساندويش حيت جاعو

سالا مسح ايدوو وجبد صاشي زرقة صغيرة وقال : تقبلي مني هاد لكادو لبسيييط

ايمان(كتشوف فالساشية )حشمتيني دابا خاصني ناخد ليك كادوو

حذيفة:غير ملي ضحكتي لينا الالة هداك هوا لكادو لكبيير

ايمان (حشمهاا) ربي اخلييك

جبد سنسلة مبرومة بحجيرات ملونين كل حجرة فلون كتوسطهاا جوهرة زرقاء وهابطة بقلب صغير بنقرة

تبسمات كتمسح فمها وقالت: زوينة والله

حذيفة:ماشي شي حاجة واو ولكن جيست ...نركبها ليك ؟

ايمان: اهاه

عطاتو بالظهر دور ايدوو قدامهاا وهزات شعرهاا اما هوا حمقووه الشامات لمفرقين فعنقهاا زغيبات زعريين فعنقهاا ..حيد ايدو بلا ميقيسهاا وقال: بصحتك

حتى هي محسااتش بلمسة من ايدو على عنقهاا حتى تلاحت السنسلة على عنقهاا تبسماات ودارت عندو قالت: شكرا احذيفة على هاد نهاار والله ....عمري نسااه

حذيفة: مزال تشوفي ايام زوينة ...راك مزال صغيرة ... حتافلنا بعيد ميلادك وانا معارفكش شحال كملتي هههه

ايمان: هدا سؤال تسولو لبنت ههههه

حذيفة: باش نعرف راسي يكما غادي. مع قااصر ههه

ايمان: كون هااني فوق قاصرة باعوااام ههه

حذيفة: وزيدي الشاارفة راه شتاا غطييح

شدو طاكسيي حطهم قراب لدار ..كانت لابسة غير قميجة سخونة وكان محرك لبرد ..حيد القبية ولاحها ليها فوق كتاافهاا...جمعاتها عليها وشكراتوو ..كملو الطريق ساكتين كتنهد براحة من كثرة الضحك لي ضحكاتو لييوم

وصلها حدا باب الدار وقال:ميعادنا غدا ان شاء الله

ايمان:ان شاء الله ...شكرا على الحلوة وااعرة خاصك تعلمني نصايبهاا

حذيفة: بصحتك و نعلمك فاي وقت مرحباا ...ياله سيري طلعي راه لبرد

حيدات لقبيية رجعاتها ليه وطلعات فرحاانة بحال شي بنت صغيرة ...شد القبية سدات الباب عاود لبسهاا كطلع معاه ريحتهاا ..هز لقنت تاع القب شموو وتبسم لطيفها لي جاه فبالو

طلعات لدار تقابلات مع لمراية شافت لعقد فرحانة بيه وفرحانة لنونوس لي رجعها لطفولتها لمسلوبة جبداتو كدوز ايدها علييه ...كأنها اول مرة تعيش سعاادة بحال هاادي ...غمضات عينيهاا من التعب واللعب على صوت الشتااء لي على براا غفاات معنقة النونوس وتصويرة جداها بحال شي بنت صغيرة

**

الايام كدووز والشهور كدالك ...وصل شهر 3 ...بدا التلج كيدوب فأغلب المناطق التركية وبداات الشمش كطول ولحال كيدفا وربيع كيدخل ...ايمان تشغلات ب لخدمة مرة تخدم بنهار مرة بليل وديما نوبتها مقارنة مع طارق و حذيفة شي مرات كيجيو على رجليهم من تما خلقو معاها صداقة بريئة وزويينة معمر شي واحد فيهم قلل عليها الحيااء او لمح ليهاا بشي حاجة

راجعيين بليل كيضحكو على طارق

حذيفة: تلقاها بعدا معارفاكش واش عايش فهاد الدنياا

طارق جبد صورة لشاابة زويينة بشعر مجعد وعيون عسلية بيضااء وزويينة وقال: شوفي شحال زوينة

ايمان: غزاالة ...شنو سميتها

طارق: نوار

ايمان: حتى سميتها فنة

طارق: الصراحة مبيناتنا والوو ولكن كتعجبنيي..كنشوف تصاورها فانسطاا تراه ميمكنش شحال زوينة ...كتقرا الصيدلة فايطاليا

حذيفة: ضسرتي البرهوش

ايمان: تبارك الله

سكتات من وراها مخلياهم كيهدرو فموضوع اخر ...تخلصات شهر لي فات وهاد الشهر ولكن خلصة ياله كتكفيها فلكرا لي غالي والمصاريف لي كتقسم كيشيط ليها شوية هوا باش كتسالي شهر ...كان طموحها كبر من هادشي وماشي على هدشي علاش هرباات وجاات

وصلوهاا حدا باب دار وكملو طريقهم مكمليين حوارهم

طارق: ايمان ظريفة ومربية تبارك الله

حذيفة: يكما عينك فلتوو تاني

طارق: لا لاا بان لييا شي نااس اخريين ليي تلفهم الزيين

حذيفة(شاف قداموو ) دخل سوق رااسك

طارق: علاش !

حذيفة: بان ليا مربات فييك الدنيا والوو اصديقي ...مزال معرفتي البناات وعرفتي باش كيفكرو

طارق: شنو فهمتي اسي الفاهييم

حذيفة: لبنات فيهم نواع ...كاينة لي باغة دوز لوقت وكاينة لي باغة تزهاا ...كاينة لي كتقلب على غولاصيوون زوينة وكاينة لي غير بغات تعمر لوقت

طارق: و ايمان شمن نوع

حذيفة: ايماان (سكت شوية ) غير فهاد شهور لي عرفتهاا ...البنت مقسحة بزااف ...وموت مها مزال لدابا مأتر عليها

طارق (تنهد)لواليدين دقتهم صعيية اباا حذيفة

حذيفة: بالنسبة لببنت عندها غير مهاا حيت كون عندها شي حد اخور كانت غتمشي مع لوقت ولكن ملقاتش لي ينسي ديك الحرقة لي فيهاا ...ايمان من داك النوع لي كضحك معااك ولكن قلبها عاامر ومامساليااش لمصاحبة

طارق: ولكن ملي كتكون معاك كتبان ليا ناشطة وفرحانة عكس ملي كتكون بوحدهاا يعني نتا كتفيدهاا

حذيفة: كنفيدها حيت كنخرجهاا من تفكيرها وشحال من حاجة ولكن راه عمري نزعم نقوليها شي كلمة لي تخليها تفقد ديك التقة وتقول بلي كنضحك معاها غير على حاجتي منقدرش نديرها وخصوصا فبنت مجرووحة ويتيمة بحال ايمان

طارق: عزيزة علييك السااط

حذيفة(شاف فييه وضحك ) عزيزة وغالية اعشيري

طارق: غتقوليها على لبلاان !

حذيفة: نقاد اموري ضروري نعلمهاا وغنوصي عليها فاطمة ديك السيدة مغتخليهاش

طارق: اللهم يسر

"

اما هي طلعاات بتتاقل عياانة بجري ...لقات لبنات نعسوو مشات هزات حوايجها مشات لدووش خدات دوش خفيف وخرجات كتنشف شعرهاا ...مشات لكوزينة هزات دانون ومشات كلسات حدا تلفازة مشعلاها وناقصة الصووت ...عينيها فتلفازة ولكن عقلهاا تالف وحااير ..خصوصا ملي بدا برنامج المواهب الغنائية ...بقا فيها لحال حيت مزال لقاتش ديك الفرصة لي بغاات

كتقلب حتى تعياا فلكروبات على شي فرصة بحال هكا والوو مبان ليها تحاجة

ناضت لبلاصتهاا نعساات في الغد خرجات تقدا شنو خاصها كان لجو مشمش لابسة لكسوة المفضلة عندهاا صفرة بوريدات لوينات مفتوحين مشدودة لفوق بسميطات رقاق طولها حد الركبة لابسة فوقها تجاكيط دجيين ..دايرة العقد ديال حذيفة وحلقات دائرية فودنهاا شعرها دايراه بوكليي و نظارات ف عيونهاا ...دايرة لكيت وجاية كدندن حتى بان ليها طارق جاي جيهتهاا

عيطات ليه وقالت:السلام

طارق: فيين صافاا

ايمان(شافتو هاز شي تقدية فايدو )غادي لشي بلاصة

شاف شنو هاز شرا صاك ادو كبيير تاع لي تريب دايرو فظهرو

طارق: ااه كيعجبني نخيم مرة مرة هههه

ايمان: مزياان ...فين حذيفة

طارق: فداار

ايمان: صافيي بسلامة

بقات متبعاه بعينيهاا مشات كلساات فقهيوة شدات قهوة كتخربق فتيليفون ..لقات راسها مقبولة فواحد لكروب سميتو مهاجرين تركياا ...كانت كتقلب على لكروبات لي فيهم لمغاربة وكتأجوتي كل مرة كيقبلها واحد

دخلات كتقلب باش حتى هي تحط بوسط وتسول على شنو باغة ..حتى كتصاادف فايس طارق كاتب بوسط ومطاݣي فييه حذيفة

كتشووف وتقرا وتعاود تقرا شنو مكتووب ...مامتيقااش شنو مكتووب

صونات بلخف لطارق لي جاوبها وقالت: فينك

طارق: مزال غير حداك هانية الوقت

ايمان: اجي نهدر معااك دغيياا انا فالقهوة

كلسات كتعاود تقراا والامر و ما فييه مكتووب

{السلام عليكم العشران اموركم بخير وعلى خير ...بما ان الجو تقريبا ولا مزياان فقررنا ان شاء الله نخرجوو فهاد الاياام بما ان التلج بدا كيدووب كتكون الدنيا مقادة شوية ...هاد لمرة غنمشييو بلا حراك بلا تسلييمة غتكوون الحرݣة بقيادة (مطاݣي فيس حذيفة) شكون لي عاد مشا اولا نازي يقولينا طريق واش خفيفة ولا عامرة بلغار }

طارق: عيطي علياا !

هزات راسهاا فييه وقالت: كلس

كلس كتشوف فلكارطابل وقالت: فين غادي بهاديك اطاررق ...حارݣ

طارق: هدر معاك حذيفة ولاا

ايمان(وراتو لبووسط ديالوو ) داكشي علاش مبقيتوش كتجيو لخدمة بزااف كتخططو باش تمشييو ...داكشي علاش قاليا حذيفة كيتسنا الثلج يدووب ...فين غادين

طارق: مزال معرفناش كنقولو اسبانياا ولا ايطالياا ان شاء الله

ايمان: بغيت نمشي معاكم

طارق(جاه الضحك )ههه واش احسابليك غادين فطيارة ولا فلوكة حتى لفلوكة راه ممكن ...ايمان حنا راه غادين غير وسط لغابات...حذيفة ميبغييش ا ايماان وديك الطريق ماشي ديال البنات

ايمان : فين حذيفة

**

كان كالس فالطبلة قدامو مجموعة من التصاميم موديلات رجالية ونسائية ..مرسومة بدقة و اهتمام كل موديل فالصورة ينسييك موديل لي قبلوو ...

كالس بملابس بيتية شعرو فازك عاد مدوش قداموو طفاية فيها لكاروو و واحد مزال فايدو وحداه قهوة كحلة كيرتاشف منها مرة مرة

صونا باب الدار وناض كيجر بطراف صباعو لبانطوفة كيقاد فتيشوورت

حط ايد على لقنت تاع لباب والتانية حلو حتى كيتفاجئ بيها واقفة قدام لباب...تقاد فلوقفة وقال: ايمان !

ايمان : نقدر ندخل !

حذيفة(حل الباب )دخليي مررحباا

دخلات كتحيد صاكهاا توجهات لفطوي فاش كان كالس شمات ريحة لكارو قوية ...تجاوزها وحل سرجم وقال: تشربي قهيوة

ايمان: ممم

كدور فعينيهاا حتى كتشوف دوك التصاميم خداا عينيهاا واحد الموديل بفستاان ازرق سماوي بايدين مرصعيين حتى لجيهة الصدر وموديل بعيون زرقاء وقلادة بحال لي دايرة هي تلمسات سنسلة ديالهاا حتى حط حداها طاس تاع القهوة

ايمان: هدشي زويين شكون رسموو ؟

حذيفة: عجبك !

ايمان(باعجاب )حمقنيي ههه بحالا انا لي لابسااه هههه

حذيفة: اصلا الالوان الفاتحة كيجيو معاك كثر داكشي باش اتيغاك هدا كتر

ايمان: بصح ...شنو لوان لي كيجيو معاياا !

حذيفة:لزرق ...لغوز ...لخضر بارد ...واكتر حاجة هي لبييض

ايمان: ولكن اناا كيعجبني لكحل ...وحتى نتا كتلبس لكحل بزااف

حذيفة: لكحل زوين كيجي مع كلشي ولكن كنفضل تلبسي لالوان كيعطيوك واحد لبغيوونص زويينة ماشي غامقة

ايمان: دونك نتاا لي راسم هدشي

حذيفة(جغم من قهوتو شوية) قلت لييك شكون هدا لي عايش بلا حلم ...وانا هدا حلميي

ايمان: مصمم ازيااء

حذيفة: ان شاء الله

ايمان(بتردد )داكشي علاش باغي تمشي ل اوروبا ؟

هز عينو امامو ورجع هبط عينو فلكاس وقال: طارق لي قالهاا ليك ؟

ايمان: شفتو كاتب بوسط فواحد لكروب ومطاكيك

حسات بييه باغي يسب من تمتمة شفايفو ورجع برد وقال: هدشي لي كايين كنت نيت غنقولها لييك غير نقاد اموري

ايمان: كنتي بغيتي تسيفط معاياا

حرك ليها راسو باه وقالت: ولكن اناا بغييت حمم بغيت نمشي معاك...مبغيتش نبقا هنا ديني معااك

هز فييها حاجبوو وقال: فين بغيتي تمشيي

ايمان: اي بلاصة لمهيم دينيي معااك

نظف حلقوو وقال :ايماان اا (حك حاجبو )شوفي هدشيي خطر علييك

ايمان: نتا مخطارش علييك ؟

حذيفة: انا رااجل

ايمان: شتك حݣرتيني احذيفة ...

حذيفة: شوفي مبغيتش نغوت ولا نتعصب علييك عفااك ...ايمان هانتي هنا فتركياا غنوصي علييك فاطمة من بعد اوت

ايمان: واش انا جيت باش نولي سربااية ...حتى نتاا بقاا هناا ياك تقدر تحقق حلمك حتى هنا علاش اتغاامر وتمشي لبلاد اخرى باش تحقق لي فبالك

حذيفة(وقف شاد جنبوو )ايماان

وقفات حداه كترجاه بعييونهاا وقالت: سمعنيي انا باقة مخبية شي فلووس الى بقيت هنا انخسرهم ونكلس على الضس

حذيفة(رفع صوتو حتى رجعات اللور ): واش باغة تسوطيني ولا شنوو ...حسابليك غادين فجردة مردووخ راه غاباات بلغاريااا ا ايمااان فكري معاياا بنت بحالك معندها مدير وسطهاا ...انا لي دايز من تماا 2 تالمراات ومدزتش وبغيتي داباا نقولييك ياله فلخر يمشيو فلووسك تمشي خدمتك تمشي صحتك باش انا نبقا هاز عداب الضمير من جيهتك حياتي كااملة

ايمان(غرغو عينيها ): انا مستااعدة نتحمل المسؤولية ديال اي حااجة غير تيقني والله منكوون تقيلة علييك ...انا قادة ندافع على راسيي

حذيفة: ولكن انا مقاادش ا ايماان مقاادش نعيشك ديك طرييق

ايمان: وخة وريني شي حراݣ نمشي معاه

حذيفة: نتي هرب لييك باغة تهربييه لمي هاد نهار يااك (صعر عليهاا )ايمااان غتكلسي فتركيا وغتكمشيي

ايمان: واش بغييت نمشي ونخلص من فلووسي نتااا مالك

حذيفة(زاد غوت)خااايف عليييك المرض خايف عليييك ا ايمان ديك طريق صعييبة كتكرفص كتمرض لڤيس ديالها مكيحيدش

ايمان(هبطو دموعها): لوكان تعرف لمرض لي فقلبي غتعرف بلي داكشي لي كتعاود عليه مبقاش غيضرني (بشهقة)عفاك احذيفة عاوني بغييت حتى انا نحقق حلميي وحلم ميميتيي عفاااك ....مبغيتش هناا ومعجبنيش انا من ديما باغة نمشي لبرا ونكمل قراايتيي ...قارية كاع اللغاات الاسبانية الايطاليية الفرنسية حتى الالمانية قريتهاا اي بلاد حطيتيني فييها غنعيش فييها ولكن تركياا ولييت محاملاهاش (مسحات دموعهاا )ولا مشيتي وتلقاو لييا دوك ديال لباار !

بعد عليها ليضعف وقال: الله اهدييك الله اهدييك اهاد البنت راه ماشي لعب دراري صغاار

ايمان: انا ماشي صغيرة عندي 19 العام

جبد تريكو معصب وقال بفقصة 19 وماشي صغيرة ...شنو عندك صغر نتي هوا سنان لحليب ...راه مغنديكش ا ايماان نقطة رجع لسطر

بقات كتشووف وهوا مشا شعل كارو وكلس شاد جبهتوو ...رجعات كلسات مقابلة معااه ساكتة كتمسح دموعها مرة مرة

ايمان: امتا غنمشييو

دور وجهو لجيهة لخرى كيقول :لا حول ولا قوة الا بالله (شاف فيهاا ) واش منيتك ...عمرك شفتي لفيدوات او لهدرة على هاد طريق يمكن

ايمان: شفتها ...صعيبة ولكن بحالي بحال الناس دازو سوريات منها شنو وقع ليهم

حذيفة: الاكترية ديال السورين كيقصدو المانية كيديرو لجوء وكيصايبو ليهم لورااق

ايمان: نمشييو لالمانية

حذيفة: معنديش وجهة محددة نقدر نمشي لايطاليا نقدر نكمل لاسباانية غنشوف لي يناسبني باش نقاد وراقي دغياا و نقراا على هاد الدومين ...انا مغاديش باش نلعب

ايمان: حتى اناا باغة نقرا ونخدم على رااسيي مغتعاونيش ...واعدتيني غتعاوني و واعدتي حتى مي قلتي ليها غنديرخا فعينيي ونتا بغيتي تمشيي !

حذيفة: كيفاش ؟

ايمان: مي داك نهار غتموت حلمات بييك قبل متصلي الفجر ...بلي كانت كتقلب علياا وقلتي ليهاا بلي متخافيش هاهي معاياا وقالت لييك تهلا فييها قلتي ليهاا متخافييش و تاني لقاتك فالسوق وعطاتك ثلاثة تاع التمراات

حذيفة:(غادي معاها فكلامهاا شاد حنكوو)اوى اش درت بيهم

ايمان: كليتيهم معرفتش

حذيفة: كضحكي عليا دابا بهاد لحلمة !

ايمان: والله مكنضحك علييك ..غير قالتها ليا ونعسناا وصباح صبحات ميتة

حذيفة: فففف بغيتي ديري لياا حمل تقيل على كتافي ا ايمان والله...خليني نفكر منواعدك بوالو

ايمان: الى مشيتي وخليتيني

حذيفة: حنا رجال ماشي دراري صغار ا ايمان نفكر ونرد علييك نحسب حسابي ونشوف دراري لي غادين معايا واش تيقة ولا يغدروني وسط الطرييق

حركات راسها بواخة وناضت هازة صاكها خرجات من دار

بقا كالس كيسووط هز تيليفونو وصونا لمو كاتب ليها لحنانة فسميتها ...صونا حتى كان غيتقطع وجاوبات بصوت حنين

_وليدي لبااس

تبسسم ورطب صوتوو لي تشنج بلغوات مع ايمان وقال: لباس اميمتيي ...اش خبارك صحيحة

_لباس اولدي لكنتي نتا لبااس ..اش خبارك اش كتعاود

حذيفة: الحمد لله امي ...مي بغيت نسولك على واحد لحلمة

_خير وسلام

حذيفة : ‎واحد السيدة قبل متموت الله ارحمها كنت شفتها فلبحر شي عام داباا ولا كتر مهيم ...حلمات بحالا بنتها تالفة لييها كتقلب عليهاا شافتني وجات سولاتني قالت لياا واش شفتيهاا قلت ليهاا هاهي معاياا متخافيش عليها قالت لياا عفاك رد ليها لباال قلت ليها حتى انا كوني هاانية ...عاودتانيي لقاتني فسووق كي قالت بنتها و عطاتني 3 تمراات

_اوى

حذيفة: هدشي لي فراسي

_هادي اولدي راه حلمة زوينة لمرا امناتك على بنتهاا وبنتها كتعرفها

حذيفة: اه كنعرفها اميي

_البنت يمكن معندها حد تهلا فيهاا اولديي و رد ليها لبال يجازيك الله

حذيفة: او 3 تمرات

_تمر حلاوة وحلاوة الدنيا لوليدات هدشي لي علمني الله علييه والله اعلم حنا غير كنفسرو والعلم لله

حذيفة (بمزاح)ميكونوش فلوس امي

-ههكلشي زيين

حذيفة: داكشي لي كاين ...ياله امي تهلاي فرااسك وردي لبال لتيليفونك ليلقاه عندك ويبدا يغوت علييك

_(بحزن)عفا ولديي هضر مع باك وشرح لييه لي كاين الله ارضي عليك اميمتي راه غاضب عليك

رجع لتغوبيشتوو كيمسح نيفوو وقال: ليبغا يغضب غير يغضب امي انا عييت منوو

_متقولش هكاك راه باااك

حذيفة: وتاهوا خاصو يعرف يخلي كل واحد يعيش حياتوو ..ماشي هوا لي غايرسم حياتي اميي (ساط )لمهيم خليت ليك الراحة تهلاي ليا غير نتي فصحتك اضو عينيا

_الله ارضي علييك ويسر لييك امرك ويبعد علييك لحراام و ناسوو

حذيفة: امين اميي ...دعي معااياا ورضي علييا اميي

_نتا مرضيي ورضايا معاك اولدي الحبيب الله افتحها علييك فهاد نهار

حذيفة: اللهم اميين يارب

قطع معاهاا وتسرح على داك لفطوي كيشوف ف لورااق ويرجع يهزهم بين ايدوو

حذيفة من عائلة متديينة جداا حدا ...اصل الاب من سوس اكادير كان إمام فالجامع و راقي شرعي من بعد حل محال ديال العبايات والخمارات ولباس التقليدي لرجال

حذيفة مكانش طفل عادي بالنسبة لبااه ملي تزاد ورا 4 لبنات كان بالنسبة لاب هوا الابن لوحيد وسط لبنات عكس الام عندها ولد من زواجها الساابق جابتو صغيير كبر معااهم عمرهم فرقو بيناتهمم حتى الاب كان كيعاملو كابن ولكن حذيفة ابن بالد_م والاسم ... خصوصا ملي ولا كيشووف فيه علامات كدل على انه زوهريي بؤبؤ عينيه واسع ونضرتوو حادة شفاار كتاار منذ الصغر خلاه محبوس فالدار كيخرج كيديه لمدرسة ويجيبوو معمرو عقل على راسو لعب فالزنقة مع دراري قدوو او سافر مع دراري حتى فلمراهقة ديالو عاش محبووس واحد لخوف والهبة والتشدد كان معيشهم فييه ...لا تيليفون لا تلفازة لا عطل لا سفر العطلة كيدوزهاا قدامو كيحفضو القران هوا وخوتو بدون استتناء ولكن حذيفة كان داك الطفل المشااغب الطفل ليي كيعجبو غير يرسم كلا العصاا مرة وجوج عشرة ولا بغا يتردع لبااه ويشد طريقو

الاخ الاكبر تعيين فالتعلييم استاد التربية الاسلامية و خوتاتو تزوجوو لرجال ديين بلحية ولخمار ...الزوجة كدالك كانت محجبة فدار كتخرج معاه ودخل معااه حتى تيليفون دارو ليها غير حذيفة بتخبية كتهضر مع ولدهاا

قطع تفكيرو طارق لي حل الباب هاز فايدوو تقدية كتيرة ...خنزر فييه حذيفة وقال: الله انعل لي ميحشم

طارق: والله اصااحبيي معرفتها داخلة لداك لكرووب اصلا ...شنو قررتي غتمشي معاناا

حذيفة(تنهد) واش كضحك علياا ! واش ديك طريق غتقد عليها ايمان

طارق: خليها تمشيي معاناا ...حنى غنردو ليها لبال وحتى دراري راه عشراان ديالناا ...تخيل تمشي عند شي حرااݣ ؟ النصاابة ا حذيفة

بدا كيتخبيل اش غيوقع وقال: شنو جبتيي ؟

طارق: ‎تقديت لي خاص فلماكلة داكشي لاخر حتى تمشي تشووف

حذيفة: صافي شكراا

ناض جمع دوك لوراق دخلهم فجوا باش يحافظ عليهم مع اقلام من نوعية جيدية ملونة بحال صامصونيط صغيرة بألوان عديدة سدها وخشاها مع لورااق ...زاد علييه قبية دار لكاسكييط لي ولفها ميقدرش يخرج بلا بيها ڤيس ركبو فيه باه من الصغر

صحيح ان كل واحد فينا عندو دكريات زوينة وخايبة ...شي لحظات مكيتنساوش وشي لحظات كنتمناو كون تمسحاات من داكرتناا

مزال مخبي ورا الغضب من جيهة بااه بزاف كيحاول ميتفكرش حتى طفولتو كيف دازت ..

لبس فرجلو اديداس بيضة مع سورفييت سوداء دار لقب فوق لكاسكييط وخرج كيتمشاا حتى وصل لزنقة لي فيها ايماان

جبد تيليفونو دار نمرتها باسم إيمان صونا ليهاا كيتسناها تجاوب حتى جاه صوتهاا الخافت ...تقول ديال بنية صغيرة

ايمان: الوو

حذيفة: كاينة فالدار !

ايمان:ااه

حذيفة: هبطيي انا كنتسنااك ...ولبسي مزياان راه لبرد

ايمان: وخة

حذيفة: غنتسناك فالجردة لي فالشارع لفوق مزيانة

ايمان: صافي دغياا نجي

قطعات معاه وناضت بدلات عليهاا بسورفييت لبسات سبرديلتهاا خلات شعرها مطلوق على رااحتوو ..رشات شوية من ريحتهاا وخرجات بزربة ورجعات هزات صاكها دارتو فكتفها وهبطات كتزرب فدرووج ...مشات بسرعة لفين دارت معااه لقاتو كالس داير نظارات شمسية شافتو من بعييد كيكميي وشاد فايدو تيليفونو كالس فكرسي من لعود وقدامو كدالك طبلة دائرية من لعود صغيرة مزلعيين بحالهم ف جردة ...قبل متوصل عندو الريح كان سبااق وجاب ريحتها لييه ...هز عيينوو ولقاها جااية شادة فصااكهاا و شعرها كيغطي وجهها مرة مرة ...تبسمات لييه ماحدها كتقرب حتى كلسات قبالتوو ساكتةة وهوا متبع ليها العين من تحت النظاظر

ايمان: امتا غنمشييو ؟

حيد النظاظر كيقول: لااا حول ولا قوة الا بالله

ايمان: شوف والله منتفاك معااك رجلي برجلك

ركز فعينيها وقال: وعلاش هدشي كلوو وهاد الإصرار كامل

ايمان: هاد لبلاد باينة مغاتعطيني والوو علاش نضيع راسي فيهاا ...

حذيفة(ساط دخاان والريح داه ليهاا وبدات تبعدو بايديهاا وطفااه حدا رجلوو )سمحيلياا

ايمان: ماشي مشكيل ....معرفتش علاش كتكمي هدشي

حذيفة: لولف وصافي غيجي وقتو حتى هوا يتقطع ...غنحطك قدام لواقع ونتي ديك السااع غتخدمي عقلك وتشوفي واش قادة على هدشي ولا لا

ايمان: صافي وخة

حذيفة : اولااا ا ايماان هاد طريق لي غنوريك راه غنضربوها على رجلييناا

جبد تيليفون فيه لمابس كيوريها فلخريطة وكيزومي وقال: هادي اسطنبول هنا فين كاينين شفتيهاا ... واحد لحراك ايوصلنا هناا لحدود تاع تركياا ...ومنهناا حتى لاوروباا انضربوهاا برجل حيت حنا دايرين رحلة مادايرينش تسليمة

ايمان: اشنو هي تسليمة ...قريتها بزاف فداك لكروب

حذيفة: تسليمة هي كاتبقاي غادية من حرااݣ لحراك ...كل حراك كيديك لحراݣ اخر حتى كتسالي طريق ولكن غطلع لييك ب لفلوس صحيحة

ايمان: ونتا فايت مشيتي فهاد طريق

حذيفة: مشيت جوج تلمراات ...مرة فشهر 10 ومرة فرمضان لي فات وتوحدة مصدقاات بجوج بيهم خسرت فيهم فلوس كتيرة ...اللولة شدونا لبوليس فلحدود ديال اليونان

ايمان: والتانية

حذيفة: التانية حتى هي فاليونان وهاد لمرة تعرضو لينا لعسكر داو ليناا كلشي اي حاجة كانت عندنا تيليفوناات لماكلة لحوايج خلاوناا فلغابة ولخلاا دوزنا العداب تلفنا على طريق ولحراك دا لفلووس وهرربب ملي وصلنا لبلاصة فين درنا معاه ملقيناهش ...بقا لينا حل واحد هوا نسلمو رااسناا

ايمان: و رجعتوو

حذيفة: سيي رجعت حييت غاديي ومعارف فين غادي ديك طريق خاصك ضروري لمابس فايدك الى مشاا هوا ولماكلة غتهلك وتموت قبل توصل ...وهاد لمرة يا ربحة يا دبحة عمري مزال ندكر هاد طريق الى مصدقاتش ....هاد لمرة انطلع رحلة لا حرااݣ لا والوو من غير بين دولة ودولة كتبغي دخلي لمدينة كيخصك خطااف وهاد لمرة مغندوزش على اليونان هاد لمرة غنمشي من الغابة ديال بلغارياا ...شوفي معاياا (قرب ليها التيليفون ) هادي بلغاريااا ... هادي صربيا وهادي هنݣارياا هادشي كلو خاصنا ندوزوه على رجلينا باش نوصلو لاول دولة اوروبية لي هي النمساا من تما كتسهال علييك طرييق مكيبقاوش لغاباات كتمشي فتراان ولا فشي كاميو على حسب فين نتا غادي

كتبان لييك طريق ساهلة ولكن راه دول البلقان هادي صعييبة وخطيرة وماشي كلشي كيدوز منها سالم

ايمان(بدم بارد ): انا باغة نمشيي اصلا وخة نمووت متخاافش مكاين لي يجيب خبااريي

ركز فييها الشووفة كيتمعن فزرقة عينيهاا وشهوبيتهاا حنيكات مزنكين مع بعض نميشاات خفيفة ..ثار انتباهو لخالة لي فعنقهاا كتبان كحلة وسط بيااضهاا ...رجع نظرو لعينيهاا لي كيشوفو بعييد وكترمش بسهوة ...لاحظ حزنهاا فكلامهاا قبل عينيهاا واي واحد غادي يعرف انهاا كتعاني من جيهة لعائلة

حذيفة (بصوت خشن ..كيهدر بهدوء ) : عند بالك غنخليك للموت بوحدك ؟ بطولة عمرك ...متبقايش تقولي هكا ...والى مشيتي معاياا وتحطينا قدام لمووت ... راه نموت اناا و مانخليكش تموتي

كلمة بلسانوو وبطريقتوو خلات شعر ايديهاا يوقف وتحس برعشة خفيفة فقلبهاا ...ملي نطقها بلسانوو تبسمات كتلعب بايدها وقالت: تانا متحملة كاع لي غيوقع من بعد احذيفة سوى خايب سوا زويين انا قادة بييه

حذيفة: شنوو غنقولييك ا ايماان ...ملي نتي باغة تمشيي غنقوليك الله يسخر

ايمان: اناا باقة عندي جوج تاع لملييون واش كافية ؟

حذيفة: فلوسك غيبقاو عندك وقت لي حتاجيناا راه كل واحد كيعطيي لي علييه فهمتي ...غير هوا غيخصك تحوليها لاورو

ايمان: صافي وخة ولكن معارفاش فين هنا

حذيفة: وقت لي كنتيي مسالية نمشيو معنديش مشكيل

ايمان: و ايمتى غنمشييو !

حذيفة(شاف فتيليفونو ) كنتسنا جوج صحابيي غيجيو غداا و الحد ان شاء الله غنتحركو

ايمان: صافي واخة ...انقوليك واش نتاا مراكشي !

حذيفة: لا علاش ؟

ايمان: حيت عندك لهجة مراكشية

حذيفة: لا انا سوسي ولكن كبرت فمراكش ...كازا لمحمدية

ايمان: سعداتك كل مرة مبدل لمدينة ههه

حذيفة: بزز مني ..كان لوليد امام

ايمان: امام فجامع ؟ ونتا كتكميي زعماا ههه

حذيفة: انا هوا هداك لي خارج ليه من الجنب

ايمان:(ضحكات ) هههه مباينش فييك خارج جنب

حذيفة: خاصك تسوليه هوا علياا

ايمان؛ اييه مزياان انا عمري فت المحمدية

حذيفة: دابا غتفوتي ليونان ان شاء الله

ايمان: هههه ان شاء الله ...متحمسة ليها

حذيفة: خفتك غير توصلي لغابة ويمشي الحماس

ايمان: هههه كون هاني راني كباابل واخة نبان ليك هكا

حذيفة: علاش مالك هكا كيف كتباني

ايمان: معرفت كيفاش كنبان لييك

حذيفة(تبسم حتى بانو كميشات حدا عينيه وقال) كتباني لياا ماشي ديال التكرفيص زينك ديال لي پرانسيس فعلا الارزاق مامقادااش

ايمان (عجبها الاطراء وضحكات )اوى الاميرة خاصها تقلب على مستقبلها شنو نبقا نتسناا فالامير يجي هههه

حذيفة: فعلاا ..خاصني نقوليك شنو تقدااي..

ايمان: تمشي معاياا باش نعرف شنو نااخد

حذيفة: ايه وخة مسالية داباا !

ايمان: ااه نمشيو داباا

فعلا وقفوو شدو طاكسي وقف قدام محال كبيير كيتقداو منو اغلبية المهاجريين مخصص بلوازم الرحلات شكاير صبابط ليكات ماكلة معلبة ادوات الرحلة يعني اي حاجة تبغيها موجودة

بقات كتشووف كانو غير الدراري كيتقدااو جرها حذيقة لناحية الليكات عطاها كتقيس ناشطة وفررحانة بحالا غادية فرحلة مدرسية

ايمان: مغناخدوش لاطونت ؟

حذيفة(كيقلب فواحد الليكة تاع الخيط سخونة ) : غادية تخيمي

ايمان: وفين غنعسوو

حذيفة: فلغابة (قرب ليهاا ) متعرفي شنو يخرج ليك فداك الليل

ضرباتو بقبضة ايدها لكتفوو وقالت: ياك غتموت قبل منموت

حذيفة(غمض عينو ): ممم حصلتيني

ضحكات ورمات راسها على كتفو بعفوية ..هبط راسو ليهاا وتبسم ليها وقال: جربي هاد ليگات

ايمان: زوينين ولكن غلاض بزااف

حديفة : اناخدو جوج حيت كيكون لجو بارد شي مراات

هز ليها وليه كاسكيط حتى هوا كان مزال متقدااش

خداو كارطابل كبيرة لواحد فيها غطاء پلاستيكي بلقب ادا كانت شتاا ...معلباات جاهزة من طون لوبية وفول بيموات باحجام كبيرة كتصبر ...علب ديال لفاخر صغير وباش كيشعلو لعافية...مواس كيتطواو خداو قنااع كيبان فقط لعينين

ايمان(بهمس ): واش غادين نشفرو

حذيفة: نشفرو الذياب ههه. هدا على لبرد وحتى باش متعرفيش (شاف فيهاا ) دوك لعينين براسهم خاصهم يتغطاو

تقابلات معاه كدير فلقناع بقاو غير عينيها كيبانو وقالت: دورني بسولوفان وديرني فلكارطابل

حذيفة: ممكن هههه

تقداو جميع لمستلزمات خلصو لي عليهم خرجو هازين لي كارطابل و لاطونت صغيرة فوق لكارطابل قصد كل واحد دارو يوجدو راسهم ...في حين حذيفة قلب طريق ومشا فين داير مع واحد التركي لقاه كيتسناا جبد ليه لفلووس وعطاه فردي ديال الضو تحسبا لاي خطر ...حالف حتى يدوز هاد طريق ...كان باغي يمشي فلبحر ولكن موو حصلاتوو ورمات عليه السخط الى حاول يمشي حارك فلفلوكة ...فقرر تكون هادي وجهتوو

وصلات لدار مع حلات لباب جات قدامها اييد امينة فيها خاطم خطوبة وقالت: i sed yeeees

ايمان: مبروووك ههه (باستهاا )

امينة : فرحااانة هههه

سعاد (گالسة كتصبغ فظفار رجليهاا ) لي سمع هاد لفرحة يقول مزوجة بمولاي الحسن

ايمان(بضحكة ) كل قرد ف عين حبيبتو غزال ههههه

امينة: الله امسخكم هوا ماشي مولاي الحسن ولكن كنحبوو يلالة ...ايمان ياك غتهبطي معاناا فاللخر تاع شهر ...غادي ندير خطبة وعقد

ايمان (كلسات قبالتهم وصاكها على ركابيها كتشوفيهم وساكتة معرفات منين تبدا)

سعاد(شافتها سكتات وهزات عينها فيها ) ايمان ! مالك

ايمان: بغيت نقوليكم شي حاجة ...اناا انا قررت نمشيي لبرا

امينة(كلسات حدا ختهاا ): وكيغاديري ليها ..ضبرتي فشي كونطراا ولاا دافعة لفيزاا ...ولا شي ݣاوري هدا !

ايمان: فالصراحة حتى وحدة

سعاد(حطات صباغة ) : متقوليش ليا لي فبالي ؟ واش تسطيتي

امينة استوعبات وقالت: كنتي صحة سلام شكون عمر ليك راسك واش باغة تحرݣي ؟ اويليي واش سخيتي بروحك ولا ماالك

ايمان: تواحد معمر لياا رااسيي ...ولكن احلامي جاوني صعاب يتحققو هناا

سعاد: وفنظرك تما غتلقااي لي بغيتي واش نتي حمقة ا ايماان

امينة: راه كي هنا كي تماا

ايمان؛ كنفضل نمشي تماا ...نجرب حضي تركيا معطاتنيش

سعاد: نتي ياله ربع شهور هنا صبريي لعام قريب يدوز

ايمان: الوقت لي كيدوز وداكشي لي بغيت كيفما كان لحال خاصني نعاود لبااك هناا غيضيع ليا عاام ديال اللغة عاد نزيد عام ديال البااك عاد نشوف شنو ندير ...مزال تماا عارفة اللغة مزيان مغنوحلش فرنسا ولا اسبانيا ولا ايطالياا مغاديش نوحل ...هنا بنادم معجبنييش كيحتاقرك غير حيت عربية وجيتي تخدمي فتركياا

سعاد: هدشي شرحناه لييك من اللول

ايمان: نتوما اصلا مغتبقاوش هناا ...شنو غنبقا ندير ...نتي جاتك خدمة فلمغريب ...وامينة غتزوج فالامارات وبقا ليها غير هاد شهورة قلال باش تكمل ...نبقا عوتاني بووحدي

امينة: بغيت غير نعرف علاش حقدتي على المغرب

ايمان: حاشاا هاديك بلاادي كيفما كان الحال ديما كنبقاو نحنو باش نزوروها ...ولكن مبقا عندي حد فيهاا ولعزاز علياا دفنتهم تحت الترااب هدشي لي عطا الله

سعاد: اش غنقوليك نتيي دااايرة بلانك فراسك هدرتنا زايدة نااقصة ...معامن بغيتي تمشي

ايمان: دراري مغاربة وكنعرفهم من المغريب ماشي عااد عرفتهم

امينة: لحاجة لوحيدة باش نعاونك ا ايمان الى بغيتي تمشي لايطالياا راه كنعرف واحد البنت تماا تستقبلك معاها بينماا وقفتي على رجلييك

سعاد؛ اييه فكرتيني فيها رجااء من العائلة ونفس الوقت صاحبة امينة الروح بالروح ...تقدر تعاونك هي كبرات تماا ودرويشة متلقايش معاها مشكيل

ايمان (بحماس ) صافي واخة ...هدري ليا معاهاا ... الدراري مزال معارفيينش فين يستاقرو ولكن غالبا اسبانياا وانا ديك لبلاد مابغيتهاش مزاال من كترت ما كنت متشوقة نمشي ليهاا صافيي مليتها ...كاع البلدان لي فيهم اتر منيي مبقيتش بغيتهم ..

امينة: غنهدرو معاها بليل وتعطيني العنوان على الاقل تمشي عندها

ايمان: شكرا البنات والله ...لهلا يخطييكم

من بعدما هدرو مع البنت ابيل فيديو رحبات ب ايماان وعطاتهم العنوان ..سجلاتو فالتيليفون وخرجات تقدا شنو خاصها لهاد الرحلة كيفما قاليهاا حذيفة خاصها سبرديلة سوكور تجاكيط مكيدخلوش لماا خدات لانجييت وملابس داخليية سورفييت فاللون الخزي كيف قاليها حذيفة باش ميكونش اللون مشعشع وسط الغابة مبغاتش تزيد تخسر لفلوس كتر لتحتاجهم فطريق

رجعات لدار كتستف داكشي ف لكارطابل لكبير من سقاطة وتمر اي حاجة تصبر بزااف

امينة: ولجاتك ليغيݣل وسط الطريق ههه

ايمان: فكرت ناخد لبيليل ومنقطعهاش تانوصل

امينة: نتي اصلا مكضركش بزااف

ايمان: ولكن مغنرتااخش لكانت فياا ...لعشية ونخرج نتقداهاا

امينة: الله يسر ليك

ايمان: امينة بغيت نطلبك طليبة ...هادي الشانطة دياليي غيبقاو فيها لحوايج منقدرش نديهم معاياا وعندي عزاز بزااف ...واش نعطيك عنوان فطانجة وتدييها

امينة: مكاين حتى مشكيل اختي ...غير عنداك ملي تولي شي مغنية كبيرة مديريش لينا ديديكاس هههه

ايمان: نتي اللولة هههه

تغداو معطليين وبقاو مجمعيين والموضوع هوا زواج امينة و رحلة ديال ايمان كل واحد فيهم بغا يعيش مغامرة فشكل

لبساات تيشورت نص كوم قصير مع دجين مقطع شوية من جيهة الركبة لبسات صنيديلة و صباعها مصبوغيين بلكرونة ...طالقة شعرهاا ومريحة

هزات صاكها وقصدات الصيدلية لي قريبة لحي

كان برد خفيف دغدغ جسمهاا ..كتشوف فسما غادية كظلم ...دخلات لصيديلية طلبات شنو بغات خدات باكيات خلاتهم فوق لكونطوار كتجبد لفلوس حتى هزات عينيها فييه ...جراتهم دغياا لصاك و حطات الصرف ...هضر مع الصيدلي وهبط عينو فيهاا وقال: زعيبيلة اش كديري هناا

ايمان: زعيبيلة هههههه شنو هادي

خدا شنو بغا كيضحك وخرج معاهاا كيحيد فلكاسكيط وقال: شفتك جات فباليي

ايمان: هههههه واللهيلا ضحكتييني وغير تسناا حتى اناا نعطيك شي سمية مضايراش

تبسم ليها و نظراتو نظرات اعجااب كيرمش فجمالها البريئ وقال: لي جات منك عسل

ايمان: شفتك خديتي دوا بزاف ...تجرحتي

نحنح جامع راسوو وقال: هاد دوى ضروري يكون معانا ملي نشدو طريق ...تقديتي لي بقا لييك

ايمان:ااه تقديت كلشي

حك جبهتو وقال: بهاد لمنااسبة لي ماشي مناسبة ...تبغي دوزي نهار زويين ف تركياا

ايمان: مكرهتش(ضحكات ميلة راسها جيهتوو ) فيين !

حذيفة: تبغي نمشو دابا ولاا تالغدا ؟

يمان: انا معندي مندير داباا اتخلي راسي ضارنيي ههه نمشيو من داباا

حذيفة: صافي ندي هدشي لدار نبدل علياا ونلقااك واجدة !

ايمان:صافيي

حذيفة:ياله زيدي قدامي ...مجاكش لبرد

ايمان:لا عادي

حذيفة:ولكن طريق غيكون لبرد ...لبسي حوايج دافيين

ايمان:مسولتكش ...شحال تقريبا تاع طريق

حذيفة: الى مشات الامور كيفما بغينا ...شهر

ايمان(شهقات )اويليي شهر على رجليناا

حذيفة:لاا غادي نشدو اوطيل نرتااحو مرة مرة او نفوجوو مع دياب او لكلاب ديال لبوليس

ضرباتو لكتفوو وقالت:مالك طنااز

حذيفة: واش انا كنقوليك ضاربينها رجل ونتي كتقوليي شهر على رجليناا ...ضروري غنرتااحو فشي فيلاج ولاا المدن لي جات فلخط فاش غادين كاينين بزااف لبوسنة او هنكارياا وعطا الله ...

ايمان:ان شاء الله ...تسناني نلبس علييا ونجيي

مشات لدار بقا متبعهاا بعينيه حتى مشاات وكمل لداارو

فعلا لبسات عليها ملابس دافئة حيت كيتحرك لبرد لبسات كسوة كحلة مع ليبة و كويرة فوقهم وخرجات كتسنااه حتى بان ليها جااي ...تبسماات لييه بعفوية

مبغاش تفسر انجذابها ليه بطريقة اخرى ...مبغاش تفتح قلبهاا ولا حتى تعطي فرصة لراسها تفكر تفكير اخوور ...فرحانة هكاا ...كتحس بنوع من الالفة ...نوع من الاماان وهوا معااهاا بمواقف كثيرة وقعات بيناتهم ...منجاذبة ليه كرجل حاسة برعشة فقلبها كتشدها كل ما شاافتوو ...صوتوو ...هضرتو المرزنة ..مشيتوو ...هيبتو لي فارضهاا بطولوو او بهضرتوو وبافعالو ...خلات اعجابها ميبقاش مختاصر غير فعينه ولا كيعجبها كشخص ..ولكن هدشي ماعندو ميبدل رافضة رفض تام ...علاقة حب ...حيت عارفة بلي اي علاقة راه كتبدا زوين ولكن ماشي ديما كتكمل زويين وهي فغنى انها تفقد شخص اخور وتبقا بوحدها من جديد

قاطع شرودهاا وقال: تعطلت علييك ؟

ايمان(هزات عينيها فيه بابتسامة)لا لا عاد خرجت

تمشاو لشاارع كل واحد فيهم داير ايدوو فتجاكيط ديالو ساكتيين ...كل واحد فيهم مضارب مع موجات الاحاسيس لي كتهبط علييهم ملي كيكونو حدا بعضياتهم

شدو طاكسي وهبطوو فالشارع لي ميمكنش تجي لتركياا ومتهبطش فييه وتاكل لكناافة وتاكل فطيرة الجبن المعروفة عندهم

تمشااو فزقاقهاا وسط نااسهاا كيتبادلو لكلام وضحكات ...كتلوح يدها لدراعو ملي كضحك ..وكيتبسم ل شدتها اللطيفة ...بحال شي طفلة صغيرة

كلسو فكافي مقابلين مع اضواء الشاارع وقال:شنو تشرب زعيبيلة

ايمان :راه غنختارع شي سمية مغتعجبكش هههه كظلمني الزوهري

حذيفة: لي معرفني زوهريي ايعرفني داباا هههه

خداو كافيي وخدا ليهاا تشيز كيك بلفرماج ... مجمعيين كيجبدو اي موضوع يشاركو بييه هدرتهم

ايمان : واش غتمشي ل سبانياا ؟

حذيفة: علاش نتيي مبغاش تمشيي لسبانياا بالضبط

إيمان: غنبقا فايطالياا حسن ...اسبانيا ضربت عليهاا هي والمغرب هد السااعة هههه

حذيفة: اسبانيا باش زوينة مسهلة شوية فلورااق

دغيا كطلعهم الى استاقريتي فلخدمة الصراحة حتى ايطالياا زوينة بالنسبة لياا اناا على ود التصميم وداكشي ..مزال حااير هاد الساعة ...ايكون خير

ايمان:ان شاء الله هاد لمرة تصدق لييك

حذيفة: ملي غادية نتيي راه غتصدق

ايمان: اوهوووه غادية معاك اكبر منحووسة حذيفة(حك لحيتو مبسم فيهاا ) قابلين بنحسك امولات لخالة

ضحكات حاطة ايدها على عنقهاا وقالت: مخديتيش من تشيز كيك

حذيفة: معنديش بزاف مع لحلاوة

دوزو امسية زويينة تمشاو جنب لبحر جنب الى جنب ولكن كل واحد واخد مساحتوو ...ضاحكين وناشطين فحدود والقلب ربي لي عالم بييه

وصلها لدار مساخييش بيهاا ولا حتى هي دوزات امسية زويينة توادعو بيهاا مع تركياا

تنهدات واقفة قدام لباب بغات تطلع وقالت: تصبح على خير

تبسم ليهاا وقال: تصبحي على خير

دخلات البيتهاا مبتااسمة بدلات عليها ودخلات لفراشها شادة نونوس كدوز ايدها عليه

اما حذيفة مشا لدار لقا 3 دراري مغاربة مع طارق شافووه وناضو سلمو علييه واحد منهم عنقوو عناق رجولي وقال : عشيري

حذيفة: عثمان صافا اش خبارك ...حميد بخيرر

عثمان: واللهيلا بخيير ...هداا ناصر ولد دربناا نييت هوا لي غيكمل المجموعة

طارق: ان شاء الله

حذيفة: مرحباا ... ملي تجمعتوو نهضروو فلمهيم

حميد: لولد السادس ؟

حذيفة: ماشي ولد بنت

عثمان: حذيفة واش بعقلك داباا ؟

حذيفة: انا لي مسؤول على هاد الرحلة ومسؤول على البنت ...راه بنت لبلااد الى موقفنتش مع بعضياتناا مكاين لاش نمشيو فديك طريق من اللول

حميد: حنا تايقين فييك ا حذيفة ولكن ديك طريق راه صعييبة و الخطاف ملي كيعرف معاك البنات راه مكيبغيش يهزك

حذيفة: مكاينش غير خطاف واحد ...انا هدرت مع لي غيوصلناا لحدود بعد غدا ومن بعد سوا نكونو ايد وحدة ...سوا نفرقوها هنا نييت ...اش قلتوو ؟

ناصر: انا معنديش مشكيل لمهيم عندي نوصل

عثمان: الى كانت تحت ايدك الله يسر

طارق: انا ديجا عارف رأيي

حميد :اللهم يسر

حذيفة: حاجة اخرى منبغيش شي واحد يبسل عليهاا الهدرة باحتراام لنصدق دافن فيكم شي حد قبل ميوصل لاوروباا

طارق: هههههه ريلاكس اعزيزي انا بعدا الله اعطيني العما

يتبع...