مجدول الذهب الجزء العاشر

- حاطة باليزتها فوق النموسية حالاها كتجمع فيها حوايجها وصفية واقفة عليها :

راه حشومة ابنتي اويلي انت مولات الصواب زعمة الناس عارضين علينا للعشا ولدهم جاي من العمرة حشومة منمشيوش نقولو ليه على سلامتك

- قوت : مالو كان مسجون ( هزهزات راسها ) الله يهديك اماما راه انتوما لي واجب عليكم تمشيو ماشي ماشيش أنا انت وبابا فيكم الكافية أنا راه مامسالياش

- صفية : واش حنا غادي نباتو الدري جا هادي 5 يام قلنا ليهم على سلامتو افتيليفون حيت باك كان عيان مجاتش اليوم عارضينا العشا ماتمشيش

- قوت : راه راجل أشمن دري أماما ( ݣلسات ) ماما انتوما نسابهم سيرو أنا راه مغاديش نمشي بلاما تعيي معايا راسك انا مامسالياش يلاه نجمع حوايجي وندوش ونقاد أموري غدا فايقة بكري خاص نركب مع 2 يلاه يلاه نضي اموري اماما يهديك الله

- صفية : دابا والو مغاتمشيش ؟

- قوت (بجدية ) لا مغادياش أبصحة وراحة .. ناضت صفية من الكرسي كتشوفيها بقلة حيلة هزهزات راسها بلا حول ولا قوة إلا بالله العلي العظيم

- ايوا أش غادي نقوليك أبنتي انت تعرفي الله يعاونك .. خرجات من عندها هبطات لعند عبد الرحمان :

مامسالياش عندها مايدار قاتليك سيرو غير أنتوما

- عبد الرحمان : وراه ݣلتها ليك غير أنت الله يهديك مكاتسمعيش ، يلاه باش منتعطلوش على الناس .

- تسد الباب عرفاتهم مشاو كملات جميع حوايجها قدات ݣاع داكشي لي خاصها ودخلات الحمام دوشات فركات فركة ديال الغدايد .. خرجات من الحمام حتى طرفاتو يلاه كتلبس حوايجها سونا ليها تيليفون فتحات الخط مجاوبة خولة :

مالكي ياك عاد قبيلات تسيفطنا ؟

- خولة : (كضحك) بغيت غير ديك الوصفة ديال الحنة ديال اللحم لي كنتي قلتيلي ليا نسيتها

- قوت : وانت تبارك الله بيضة (كتلبس تقاشرها) أش باغية تصفي مزال ؟

- خولة : عندي واحد الحرقة ديال لاصيغ فرجلي بقات لاتراص ديالها دابا سربي قولي ليا او عطيني الطريقة

- قوت : غاتجيبي الحنة ورق من عند العطار وتكون خضرة سيري تاني جيبيها صفرة حالتها وطحنيها مزيان وديري جهد شي 4 المعالق ولا 5 انت تبارك الله طويلة خاص تكتري شوية وطحنيها وديريها فشي زلافة كبيرة وخودي كاس ديال الماء سخون الما لي يكفيك تخلطي الحنة ودوبي فيه الشبة حتى دوب سمعتي

- خولة : اه أكملي

- قوت : منين دوب الشبة فالما خلطي بيه الحنة وخليهم فالقرعة والغد فاش تمشي للحمام حتى دوشي وتحكي وتكملي دخلي معاك شي فوطة نشفي لحمك وعاد ادهني بالحنة داتك كلهم وبقاي 10 دقايق وشللي لحمك ماتشلليش بصابون ولا تفكري واياك شللي اخفيف خلي صفورية دالحنة لاصقة وفاش تخرجي لوي عليك فوطة ملونة ولبسي بيجامة زرقة ولا كحلة ولا ملونة البيض لا وجي لدار اثار الحنة خاص يبقى فيك سيمانة تدوز سيمانة سيري للحمام وفركي وتشوفي لوسوخات ولحمك كيف يولي كيف البيضة المنقية

- وحتى سيكاتريس راه كتمشي مع الوقت وأجي تاني ثولي ليا اش قلتي ولا كيفاش ندير راه وريتك من غير الى راسك كيف الخشبة مكايفهم

- خولة : ( كضحك) لالا والله صافي فهمت وحالها ساهل أصلا ماصعيباش صافي الحب الله يخليك ليا وطريق السلامة وتيليفون بيناتنا

- قوت : إن شاء الله .. قطعات معاها التيليفون نزلات للكوزينة صايبات ليها سوندويتش خفيف كلاتو طلعات لبيتها حكات سنانها وصلات زوج ركعات قرات ماتيسر من القرآن عمرات التيليفون وتخشات فبلاصتها نعسات .

___________________

- على الطبلة ديال العشا مجموعين كيتعشاو الى قالو شي حاجة كيشاركهم الهضرة ويجاوب ويرجع يحدر راسو أغلب حواراتو كانو مع عبد الرحمان وباه مخلي العيالات كيدويو مع بعضياتهم ..

- نعمة : والله إلى ناقصانا غير قوت كون غير جات خلات بلاصتها

- صفية : غدا مسافرة إن شاء الله لكازا على قبل ديك الحفلة

- نعمة : ااه حتى هاشم غادي ليها (شافت فيه) ياك أهاشم حتى انت غادي لديك الحفلة ؟

- هاشم : ( هزهز براسو ) أه إن شاء الله

- نعمة : (بإبتسامة) مزيان نيت منين غايكون هاشم تما راه يرض ليها البال كازا كبيرة وهي بنت بوحدها ومامخالطاش صعيب الحال شوية

- صفية : ( بأريحية ) والله العظيم الى كنت هازة ليها الهم وخايفة عليها عمرها ماسفارات بوحدها هادي أول مرة مزيان الى كان تم بعدا ماشي بحال ..

- توفيق : بصح صعيب الحال البنت تسافر شي مدينة عمرها مشات ليها كازا تبارك الله كبيرة ضروري خاص شي حد يكون معاك

- عبد الرحمان : والله يسهل عليهم والله يحفظهم ويحفظ الجميع

- الكل : آمـــــيـــن ..

- ستفات كاع لي غادي تديه معاها فطوموبيل لي سيفطو ليها صحاب الحفلة كانت طوموبيل مخصصة ليها غير هي الوحيدة فصنف الإناث لي كانت اتحضر للحفلة التصاميم الخاص للحفلة بوحدهم او 4 ديال ليكوموند دومونداو عليهم الناس من كازا من الصفحة ديالها بوحدهم ..

- واقفين والديها وختها باش يتسيفطو معاها الشيفور دخليها البالز ديالها وركب مخليها تسيفط مع دارهم

- صفية : ( عنقاتها كتوصي فيها) تهلاي فراسك وعنداك تيقي فشي واحد وساكك ديريه قدامك رضبدي البال .

- قوت : (كضحك) واش انا غادية نݣاجي أماما يهديك الله عندي 33 داخلين على 34 تهلاي فراسك أنت وتهلاو فبعضياتكم

- سناء : تيليفون بيناتنا إن شاء الله تنجحي وتكوني أنت طوب فيهم

- قوت : (عنقاتها بجهد وبهمس ) رضي لبال لراسك زراجلك وديري عقلك

- سناء : كتوصي فيا تقولي راحلة 10 يام وغاتجي باز

- قوت : عارفاني حمقة وهبيلة (شافت فباها ) شرب دواك فالوقت أنا كنوصيك ماما عندك يمنك دواه عارفاه مكايحملش يشربو

- عبد الرحمان : (باست ليه يدو وراسو ) الله يرضي عليك ويعاونك .. تسيفطات معاهم وركبات فطوموبيل ديمارا الشيفور وشدو الطريق لكازا

_______________

- وقفات الطوموبيل قدام الأوطيل لي غاتقام فيه الحفلة ولي غاينزلو فيه لي مشاركين .. هزات راسها فالأوطيل لي كان من أحسن ليزوطيل لي فكازا hotel four Seasons جا بضبط ف anfa place resort boulevard de la corniche ain Diab .. غير من دخلة كايخلي الواحد يبقى مبهور عمرها دخلات لشي أوطيل بحال هدا فهاد الرقي

- دازت من جميع الإجراءات ستقبلوها إستقبال لي هو زوين عطاوها لاكارت ديالها سبقو ليها لاڤاليز ديالها مع تصاميمها للبيتها

- البيت مكانش كيقل روعة على باقي الأوطيل عندو إطلالة خطيرة دورات عينيها فالبيت لي كان كبير بزاف نموسية كبيرة مع فوتويات وتلفازة پلازما كشات للحمام كانو فيه ݣاع البروديوات لي غادي تحتاج

- رجعات للبيت لقات ورقة مكتوب فيها البروغرام الحفلة كانت بعدا غدا مع 8 ديال العشية او وراها ب 4 عاد غايتعلن على صاحب أحسن تصميم ، ݣلسات على طرف النموسية كتفكر مع راسها وتسول وتجاوب راسها :

دابا هاد يوماين شنو غاندير أنبقى محبوسة فلوطيل مانخرج ماندرج ما والو ؟

- هزات تيليفونها كتشوف البنات لي دارت معاهم على وديت لي كوموند لي ريزيرڤاو عليهم دوات مع الاولى وثانية وبقاو ليها زوجات .. الاولين دارت معاهم على قبل غدا ولوخرينات كانت كتسناهم يجاوبو على التيليفون

- ستفات حوايجها وحطات تصاميمها حلات البواطات كتشوفيهم بفخر وبإبتسامة الى مشات حتى نجحات وربحات هاد تصاميم غايتباعو وغاتكون هادي بمتابة دفعة كبيرة وغاتكون حققات شيحاجة زوينة فحياتها باش إسمها يندارج من ضمن مصممي المجوهرات راه حاجة كبيرة ليها وغاتكون أول مصممة مجوهرات من أسفي

- غترفع راس باها وتبصم بصمتها وتوري للناس بلي المرأة تقدر تنجح والى دارت شيحاجة بين عينيها توصليها .. تسرحات على النموسية ديالها كتفكر حتى بدا تيليفونها كيسوني قفزات حيت نسات ماعلمات والديها بلي راه وصلات ..

- قوت : ألو ماما (حكات حاجبها) راه يلاه وصلت غير دابا يلاه ستفت حوايجي وقلت نسوني ليكم (وقفات فالبالكو كتشوف لبعيد ) الأوطيل زوين بزاف كولشي زوين .. صافي كوني هانية حتى أنت تهلاي فراسك واخا أماما تهناي يلاه بسلامة ، قطعات مع مها رجعات خطوة لور بانت ليها واحد كارط فيها رقم الويفي دخلاتو فتيليفونها وتم تم لقات أبيل ڤيديو من عند خولة

- رجعات سونات عليها ديك ساعات شداتها

- خولة : وريني شومبر بزربة (بلهفة)

- قوت : مكاينش كيف وصلتي والو زعمة ؟

- خولة : مالك غادية لݣوانتنامو راه غادية الكازا وفطوموبيل خاصة مال حسك .. نوضي وريني نوضي ، وقفات قوت على سعدها او وعدها كتوريها فالبيت والحمام فالبالكو و الإطلالة

- خولة : (بإعجاب) واعر حمقني أبلات انقول لفؤاد بغيت 3 يام فيها مالها خسارة فيا داكشي لي لي ايديني بيه لإسبانيا فشهر العسل يديني لهدا

- قوت : من نيتك كدوي واش الناس يفلتو إسپانيا واش انت هبيلة ؟

- خولة : وراه حمقني أصاحبتي

- قوت : المغرب راكي فيه إسپانيا لي ماتفلتش دوزي فيها شهر العسل

- خولة : وبصحتك ابب يلاه سيري رتاحي جايا واحد الكليانة انا مشيت .

- فالليل مع 8 نزلات للتحت الأوطيل كان عامر بناس ماعرفاتش شكون لي من المشاركين وشكون لي غير مريزيرڤي فالأوطيل .. سولات لي خدام تم على المطعم ديال لوطيل وصلها براسو وختار ليه طبلة جات بعيدة على الصداع ݣلسات وخدات القائمة ديال الماكلة لي تم باش تعشا بقات كدور فعينيها معوجة فمها ماعجباتها حتى حاجة جاها داكشي غير غيهرها فكرشها وهي من فطورها مداقت النعمة ..

- مغاديش تلقاي داكشي لي بغيتي هنا

- هزات راسها بالخف مفافية .. كترمش بعينيها الليلية بلعات ريقها وحسات بسخونية غزات وجها ويديها بردو عليها هوما ورجليها .. ماعرفات متقول الكلام هرب من شفايفها معلية فيه عينيها وكتبحلق فيه بحال الى أول مرة تشوفو ، طلعاتو من سروالو ديال الدجين الكحل للقميجتو الكحلة للوجهو ، مستقرين عينيها على عينيه .

- تبسم على جنب وتنهد بهسهس :

تبدلات شيحاجة ؟

- قوت : (حنحنات ) فاش ؟

- فيا حيت وقيلة دازت 5 ديال دقايق مدويتيش فيها ماسلمتي بحال الى اول نرة فحياتك تشوفيني ياك لاباس ؟

- قوت : ( بلعات ريقها ) لا ماشي هكاك غير تفاجأت وصافي لاباس عليك أهاشم على سلامتك

- هاشم : (جر الكرسي لي قبالتها وݣلس ) الله يسلمك وينجيك إيمتا وصلتي ؟

- قوت : (قدات فولارتها حسات بالبلاصة ولات ضيقة بزاف بالوجود ديالو كان طولو وحضورو لافت الإنتباه ) انا وصلت مع 4 ديال العشية وأنت ؟

- هاشم : ( حك حاجبو ) انا وصلت مع صباح كان عندي واحد الغراض قضيتو هو الأول كيجاك الاوطيل ؟

- قوت : الصراحة زوين

- هاشم : ولكن ماكلتو ماعجباتكش ياك ؟

- قوت : (تبسمات ) الصراحة ماعنديش مع هاد الماكلة لي فيها كترت الربيع وكيحطو ليك شوية شوية وأنا من الغدا مواكلاش

- هاشم : ( صغر عينيه كيفليها بشوفاتو مسح على مناخرو ونطق بصوتو الرجولي الثقيل ) جيت لهنا زوج ديال المرات عمري ماكليت هنا وأصلا فاش كنجي لكازا مكناكلش فالأوطيل

- قوت : ( بفضول ) وفين كتاكل ؟

- هاشم : ( دور لسانو وسط فمو ) كاين واحد خونا كيدير طاكوس بلدي هو عندمن كناكل فايتة واكلاه ؟

- قوت : علاش كاين طاكوس بلدي وطاكوس رومي (كضحك)

- هاشم : طاكوس بلدي مافيهش ليصوص فيه الكبدة ولا الكفتة ولا سوسيط مشويين مع البصلة والفلفلة مشويين كولشي على الفاخر

- قوت : (فمها جرا بالما كتبلع فريقها جاها الجوع شافت فديك القائمة دالماكلة لي قدامها ورجعات شافت فيه كتخيل داك طاكوس قدامها ) فين جا بعيد ولا قريب ؟

- هاشم : (هزهز بكتافو ) لا مابعيدش بزاف أنا نيت لقيتيني غانمشي ناكل عندو غير شفتك وݣلت نسلم عليك ..

- قوت : (شافتو وقف وهي تنطق بزربة ) بلاتي فين غادي ؟

- هاشم : (بإستفهام ) علاش غادي نتعشا نخليك على راحتك بلاما نبرزطك

- قوت : (هزات ساكها من حداها او وقفات ) والله منݣلس ناكل هنا نموت بجوع أنا غادي نمشي معاك الى بغيتي بطبيعة الحال ومكانتش عندك شيحاجة أخرى غاديرها !!

- هاشم : ( جاتو الضحكة وحبسها ) لا ماعندي والو واخا يلاه نمشيو

- سبقها وهو راسم إبتسامة عريضة على شفايفو ، تابعاه من اللور كتحاول تجاريه فخطواتو العراض توجه للباركينغ حل ليها الباب حتى طلعات سد الباب ودار من اللور طالع للبلاصتو .. تقادات فبلاصتها كتقاد فعبايتها ديال الموبرا لي كان لونها كحل شعرها نصو باين كيبري مزينة عينيها بالكحل صباعها الرقاق لي مزينين بخاتم الرقيق ديال النقرة منبت بحجيرات .. ساعة فالفضي سامبل وريحة لي رشات منها فديك الليل (نبراس) لي كانت حلوة وفيها عبير من الكاكاو ..

- قبل لا يديماري شافيها ناطق :

ديري السمطة

- قوت : اه نسيت .. جرات السمطة داراها حاطة ساكها قدامها ديمارا الطوموبيل وشد الطريق ..

- قوت : (ضارت عندو ) عمرة مقبولة

- هاشم : ( شافيها ورجع ركز على الطريق ) العݣوبة ليك

- قوت : إن شاء الله ياربي لهلا يحرمنا من داك المقام

- هاشم : كترتاحي ونفسيتك كترتاح كتحسي براسك تزاديتي من جديد ..

- قوت : (هزهزات راسها ) الحمد لله ، كان هدا اخر كلام قالوه لبعضياتهم حتى وقف هاشم قدام زوج محالات ريحة الدخان ديال الشوا دخل ليها مع نيوفها نزلات من طوموبيل تسناتو حتى سد الطوموبيل وتوجهو بزوج للعند مول المحال .

- زوج ديال المحالات واحد فيه الشواية او واحد ݣزار قدام المحال حاطين طوابل والكراسة ديالهم ݣالسين شي ناس قلال .. جر ليها الكرسي ݣلسات وݣلس هو نطق بصوت رجولي قوي كيطل براسو :

حمادة .. خرج عندهم واحد الولد لابس طبلية بيضة وطريبيشة بيضة فيها شيبي ملامح وجهو بشوشة يكون فأواسط العشرين .. غير شافو تعلات الإبتسامة على وجهو مسلم عليه سلام رجولي :

با هاشم نهار كبير هذا زارتنا البراكة أخويا

- هاشم : تا هبيل نجي لكازا ومنجيش عندك ؟

- حمادة : بحال ديما ؟

- هاشم : (شاف لعندها) تاخدي بحالي ولا بغيتي شيحاجة خرى ؟

- حمادة : ( شافيها) شوفي أختي نصيحة خودي بحالو راه أحسن طاكوس عندنا هو لي كياخدو داكشي مݣمح

- قوت : ( ضحكات ) صافي واخا ناخد بحالو ، مشا حمادة وهي كدور عينيها كتشوف فديك البلاصة وريحة الشوا شهاتها وكرشها كتحس بيها كتزغرت

- هاشم : ( حاط يد على الكرسي ويد مزينة بساعة رجالية على طبلة ) غايعجبك طاكوس ديالهم غاتولي مدمنة عليه

- قوت : (ضحكات ) وعلى هاد الحساب انولي نطلبك تجيبني ديما (عضات على لسانها ) زعمة بغيت نقول انولي نشد طاكسي ديما نجي لهنا

- هاشم : ( ضحك) أنا ماعنديش مشكيل نجيبك وقت لي بغيتي

- قوت : لالا مايحتاج خاص اتقولي اسميت هاد البلاصة ونجي ليها

- هاشم : (بنفي) لا منݣدش نخليك تجي لهنا بوحدك فاش تبغي تجي سوني عليا ونديك ماحدنا هنا

- قوت : (بإحراج ) ولكن راه نمرتك مكايناش عندي

- هاشم : ( جبد تيليفون ديالو من نوع Samsung Galaxy s23 ultra فتحو او مدو ليها ) هاكي قيدي نمرتك

- خدات من عندو التيليفون بصبيعاتها الرقاق سجلات فيهم نمرتها البيروسونيل ماشي ديال الخدمة ورجعاتو ليه ، مدة وهو شاد تيليفون فيديه كيشوف باش غايسجلها هز عينيه فيها كانت غافلة على نظراتو ساهية حك فلحيو وسجل نمرة ب " كحلة العين " سونا ليها تم تم

- فتحات ساكها وهزات تيليفونها طلعات نمرة غريبة مسونية ليها هزات عينيها فيه :

نمرتك هادي ياك ؟

- هزهز ليها براسو بمعنى أه .. بقات مدة وهي كنفكر باش تسجلو جاتها فكرة مبرهشة تبسمات بشر وسجلاتها ب " هاشم النخلة " حطات تيليفونها وهي كتسنى على نار يجيبو ليهم الماكلة

- قوت : (شافت فيه) شنو كيديرو فيه ؟

- هاشم : ( هزهز براسو ) مابقاش عندك ݣرام ديال الصبر .. غير صبري دابا تاكليه وتعرفي شنو فيه

- قوت : واخا ( حطات يديها على خدها كتسنى وتحسب الدقايق حتى وقف عليهم حمادة هاز زوج طباسل فيهم طاكوس قدو قداش ) عينيها تحلو وريحتو كتشهي كدغدغ نيوف

- هاشم : حمادة واحد البراد ديال أتاي بنعناع العبدي بحال ديال ديما

- حمادة : حالا .. خلاهم ومشا هز راسو فيها لقاها ماعرفات تبدا ولا تسناه يبرد

- هاشم : ( جر طبسيلها وقطع ليها طاكوس على جوج ورجعو ليها قدامها ) هكا باش تاكلي على خاطرك وبشوية راه سخون

- قوت : الله ياربي مغايبرد حتى غانسخف أنا بجوع

- هاشم : غير شوية وراه غايبرد اشوية ديال الصبر دابا تاكلي وتشبعي ويشيط الخير

- ماقداتش تصبر بدات الماكلة اول لقمة غمضات عينيها منتاشية بالمداق ديال داك طاكوس

أممممممم أمممممم ناري شحال بنين واااعر أممممم

- هاشم : (حنحن ) قوت يهديك الله الناس هههه

- قوت : ( حلات عينيها ) والله حتى بنين حمقني مايمكنش خاصنا شي واحد فأسفي الصراحة

- هاشم : نفتحوه انا وياك أش بان ليك ؟

- قوت : ( كضحك) والله ماكرهت فكرة مزيانة هادي صافي انا موافقة ..

- هاشم : ( بقا ساكت مدة ساهي فيها ونطق ) فخبارك واحد الحاجة ..

- قوت : ( هزهزات ليه براسو ) شنو ؟

- هاشم : مكنلݣاش راحتي فليغيسطو كنحس براسي مخنوق كنحس براسي ماشي فبلاصتي

- قوت : وحق الله العظيم إلى حتى أنا سبحان الله العظيم

- هاشم : عجبك بعدا ؟

- قوت : واعر كيبان ليا ماحدي هنا انولي نجي ناكل عندو

- هاشم : (تبسم ) خاصك دوقي المقيلة لي فالمرصا مازال مادقتي والو

- قوت : (كملات النص الاول ودخلات فثاني ) مغانمشي من هنا حتى غانتزاد كيلوات

- كملات ماكلتها وختماتها بكاس ديال أتاي عاد رجعات فيها الروح :

الحمد لله والله الى عاد رجعات فيا الروح

- هاشم : ( مسح فمو او وقف ) بصحة وراحة ، مشا هلص ورجع عندها لقاها غسلات يديها وكتمسحهم :

ساليتي ؟

- قوت : أه صافي .. شير للحمادة وتوجه لطوموبيلتو سدات الباب كتقاد فشالها طلع حداها وشدو طريق الرجعة ..

- بلاصة طوموبيل فالپاركينغ ونزلو بزوج دخلو الأوطيل بزوج بيهم طلعو فلاسنسور .. وقفات قدام بيتها كتشوف فيها بإمتنان :

شكرا بزاف كون بقيت هنا كون واكليت جوج ورقات ديال الربيع وطريف دلحيمة بحال شي قنة (ضحكات)

- هاشم : ( هزهز ليها براسو ) بصحة وراحة حتى انا بيتي غير حداك يلاه تصبحي على خير

- قوت : تلقى الخير ، دخلات لبيتها سدات عليها حطات ساكها وݣلسات على نموسية بأريحية .. تنهدات تنهيدة طويلة والإبتسامة منورة وجها

- فبيتو دخل رما سوارت ديال طوموبيل وتيليفون .. زول حوايجو ودخل الحمام دوش وتوضى ، خرج صلى بحال عادتو وختمها بقراءة القرآن .. هز تيليكوموند وشعل التلفازة عينيه على تلفازة وعقلو مكاينش معاه

- هز تيليفونو ودخل للواتساب كيقلب لقا نمرتها مدهلة بيها الواتساب .. دايرة صورتها حاطة يدها على خدها مبسمة ويد لوخرة شادة فيد بنت .. كليكا على الصورة وكبرها مزيان خصوصا على عينيها ، دوز يدو على شعرو مرورا بلحيتو .

- المشية ديالو للعمرة فادتو بزاف فهم بزاف ديال الحوايج فهم أغلاطو لي دار فزواجو فهم بلي هداك الزواج مكانش خاصو يكون وبلي الإنسان عمرو يدير شيحاجة ماباغيهاش فهم بلي الله سبحانه كيختابرك وكيحط ليك واحد الإمتحان فطريقك كيشوفك واش اترضى بيه وتحمد الله عليه ولالا .. ومن بعد كيحط ليك شخص فطريقك يفتح ليك عينيك

- مكانش عارف هادشي لي وقع ليه ولا لي واقع ليه شنو هو مقادش يفهمو حيت عمرو ما وقع ليه ولا حس بيه ، هزهز شفايفو مغمض عينيه مخلي تيليفونو حداه حتى داتو عينو .

_______

- بدات التجهيزات للحفلة فالأوطيل الطبالي ديال الناس لي غايحضرو تقادو والطبالي لي غايتحطو عليهم التصاميم حتى هوما .. الصور ديال المصممين كل صورة حدا الطبلة ديال الشخص لي خاص بيها .. فاقت الصباح دغية جابو ليها الفطور للبيتها غير فطرات لبسات حوايجها سروال ديال التوب فالبيج وشوميز طويلة فنفس اللون مع شال فنفس اللون .. هزات لي بوشيط وحدة فيها سلسلة او وحدة فيها طوانݣ وسلسلة .

- كان خاص ضروري هي لي توصلهم بيديها حيت فكازا مكتعرف حتى ليڤرور ومزال ماشافت معامن تخدم لي ايولي قايم بواجب التوصيل .. هزات ساكها وتيليفونها ونزلات للقدام الاوطيل وقفات على الشارع وشيرات للطاكسي فالحمر وقف ليها وهي طلع ..

- قوت : ( وراتو العنوان ) هاد لادريس عفاك .. وصلها الطاكسي حتى للبلاصة لي بغات خلصاتو ومشا بقات واقفة قدام واحد البوتيك خاص بالحوايج هزات تيليفون وسونات للبنت .. سمعات صوت وراها أنثوي :

بونجوغ .. ضارت كتبان ليها بنت طويلة ورقيقة طالبة شعرها كيضرب للخصر ديالها

- (أشرات ليها بيدها ) مدموزيل قوت ياك ؟

- قوت : ( بإبتسامة) هي هادي هاهي الأمانة ديالك

- شداتها عندها فتحاتها هزات عينيها فيها كلهم إعجاب :

ماشاء الله غزالة بزاف حسن من تصاور ميغسي بوكو ماشيغي وسمحيلي عذبتك دخلي تشربي شيحاجة .

- قوت : بصحتك وراحتك بكل فرح ولكن خاص نمشي مزال عندي واحد سخرة نوصلها لواحد الكليانة بصحة وراحتك

- الله يعطيك الصحة وتبارك الله عليك وعلى تعاملك .. خلاتها قوت او وقفات فشارع كتشوف على ليمن وليسر حتى بان ليها واحد طاكسي شيرات ليه وهي طلع :

عفاك أخويا هاد العنوان .. ورات ليه الإسم طلعها ونزلها وديمارا .

- وقفات فالبلاصة لي دارت معاها البنت .. شافت فشيفور وسولاتو شحال عندها :

25 درهم أختي

- قوت : ( غوبشات ) أشناهو كيفاش 25 درهم أخويا راه ديتيني أمن هنا لهيه

- ختي راه الكنتور هو هدا لي تحسب فيه ݣلتو ليك

- قوت : واش أبنت ليك برانية باغي تاكلني ولا كيفاش زعمة واش يحسبليك أنا جايا من ورا الشمس ولا مكلخة

- ( رفع صوتو ) ݣلنا ليك 25 درهم واش كنضحك عليك ديك ساع شدي طرام ولا سيري فطاكسي بيض

- قوت : ( بصرامة ) واشنو بانليك نشد نمرتك ونمشيو للبوسط ديال البوليس وهوما يشوفو شحال فالكنتور مزيانة هادي ؟

- (تزير ) : ختي طلقي 8 دراهم لهنا وسيري بحالك

- قوت : ( جبدات الفلوس) مابقاتش 25 درهم باغيين تݣزرو بنادم كتشوفو البراني كديرو الݣرون .. مكاتخافوش من لي خلقهم دخلو الحرام على ولادكم .. حطات ليه للفلوس وسدات الباب .

- ضارت كتقلب بعينيها حتى كتبان ليها واحد المرأة جايا لجهتها .. وثلات عندها سلمات عليها وعطاتها الأمانة ديالها ..

- قوت : (دورات عينيها فالبلاصة لي هي كاينة فيها ماعرفاتش فين هي بضبط ) شحال مزيان ليڤرور ولا تكون عندك طوموبيل وتكوني مخالطة ..

- بدات كتمشى وتشوف فالمحالات رجليها غير غاديين بيها من بلاصة للبلاصة قطعات الشانطي وشافت فجهة لوخرا علات عينيها كيبانو ليها أبراج كازا (twin center) علات معاهم عينيها وهي ساهية ..

- بدا تيليفونها كيسوني جبداتو من ساكها مع الشعا مبانش ليها مزيان شكون مسوني حلات الخط :

ألو .. جاها صوت رجولي من الجهة لوخرا :

صباح الخير فينك ؟

- قوت : ( بعدات شوية حدا واحد المحال او وقفات ) أنا مشيت نوصل شي سلعة لشي كليانات

- هاشم : (ببرود) بوحدك ؟

- قوت : أه خديت طاكسي وجيت علاش ؟

- هاشم : ( بصرامة ) مكتعرفيش ستسوني عليا وتݣوليها نوصلك غادية بوحدك .. واش انت مخالطة ؟

- قوت : عادي زطت راسي انا راه متخافش عليا كنعرف كيفاش نسلك راسي .. واش فينما بغيت نمشي نݣولها ليك مجاتش

- هاشم : ( مدارش إعتبار للكلامها ) فين كاينة دابا ؟

- قوت : ( كدور فراسها ) انا حدا دوك جوج أبراج تويميين توين توين حداهم ..

- هاشم : دخلي للواتساب وسيفطي ليا لوكاليزاسيو أنا جاي عندك ..

- قوت : واخا .. بقات واقفة شوية بدات كتمشى غادية جايا وقفات طوموبيل فالكحل من نوع رونج ، بلاصات ونزل منها شاب فأواسط العشرينات .. لابس سروال دجين مقطع مع ݣاط وتيشورت فالبيض سلسلة نقرية نازلة من عنقو وشعرو راضو للور رطب .. داير حلقة صغيرة فودنو جبد تيليفون من نوع أيفون اخر واحد وتم جاي جهتها ..

- مشات حتى للجهة المحال لي كان قبالتها مع دارت وهي تلقاه قبالتها شوية تخرج فيه حبسات وعلمات الأسف على وجها ، بصوتها الرقيق الأنثوي :

سمحليا

- بإبتسامة جدابة ريحتو كضرب فيها وصوت رجولي فيه نوع من المرح :

الصراحة انا درتها بلعاني وجيت قاصدك

- قوت : ( كترمش بعينيها الكبار ) كيفاش مافهمتش ؟

- (مدر ليها يدو) سميتي منصف شفتك منين كنتي كتمشاي فجهة لوخرا الى ماعندكش شي مانع ممكن نتغداو أونصونبل أنا عارض عليك ..

- قوت : ( حشمات تخلي يدو ممدودة سلمات عليه وخطفات يدها بزربة ) سمحليا ولكن بأشمن مناسبة نتغدا معاك وأنا مكنعرفكش ؟

- منصف : (ضحك ) وراه هادشي علاش عرضت عليك باش نتعرف عليك انت ماشي بنت كازا باينة من كلامك ؟

- قوت : ( توترات ) لا ماشي بنت كازا وغير سمحليا ولكن منقدش نتغدا معاك ومكنتعارفش

- منصف : ( حك حاجبو وهو كيطلعها ويهبطها جاه ظينها سپيسيال) وعلاش الالة شنو السبب ماقلت ليك حتى حاجة عيب .. غير نتغداو ونتعرفو بيناتنا ماشي شيحاجة لي هي خايبة ولالا ؟

- قوت : ( بلعات ريقها عدوها الرجل لي ملحاح ولي يوقفها هاد الوقفة ) بنسبة ليك انت أه بنسبة ليا أنا لا مكنتعارفش وماعنديش الوقت للتعارف الله يخليك سير هاد الوقفة ماعنديش معاها ..

- منصف : م

- (مقاطعو بصوت رجولي مهيب) وقيلة راه ݣالت ليك مكاتعارفش ؟ .. ضارو بزوج للعندو هزات حجبانها بدحشة ماعجبهاش الحال يشوفها واقفة هاد الوقفة ..

- منصف : (صغر عينيه وببرود ) وشكون أنت ؟

- قوت : ( كتشوف فهاشم نظراتو مكايتفسروش خافت لا ينوض شي صداع ) خويا تعطلتي عليا ..

- هاشم شافيها بإستغراب وإستفهام من كلامها .. رجع شافيه منغاشي على هضرتها

- منصف : ( تحرج وتبسم ) سمح ليا أخويا غير بانت ليا واقفة بوحدها قلت نسولها

- هاشم : ( طلعو ونزلو كان قصر منو بشوية ) انت كتݣوليها نتعرفو وكتݣوليا سولتها كنبان ليك كامبو .. الى عندك شي شغل سير قضيه الى مابغيتيش يتخلا دار عشتك

- منصف : ( هز يديه بإستسلام ) غابشوية أصاحبي ماݣلنا والو .. تراجع بخطوات اللور حدر راسو وطلع فطوموبيلتو بقى متبعو بالعين حتى مشا .. ضار شاف لعندها عطاها بظهر ملامح وجهو مكايتفسروش طلع لطوموبيل كيشوف قدامو ..

- تبعاتو قلبها كيضرب فتحات الباب وطلعات سداتو .. ديمارا وكسيرا الهدوء وسكوت كان هو سيد المكان ، عينيه على الطريق مادواهاش ݣاع .. شافت فيه بنص عين ورجعات كتشوف قدامها

- هاشم : (عينيه على الطريق عاقد غوباشتو ) فيك جوع ؟

- قوت : (شافت فيه ) شوية ..

- مارجعش دوا معاها .. عينيها كانو كيدورو ويشوفو فشوارع حتى بان ليها دخل للمرصا بلاصة طوموبيل ونزل نزلات تبعاتو غادية حداه واصلة لتحت كتفو .. فرق الكول بينهم كان واضح وباين لأي واحد كتحاول تجيريه فالمشية ديالو ..

- كتحس بالوجود ديالو إلى كان وبالهيبة ديال طريقة مشيتو لي كلها رجولة وهيبة .. وصل لعند واحد القهوة وقف ودار عندها :

ݣلسي هنا أنا جاي .. دارت لي ݣال وݣلسات شادة حنكها كدور عينيها على المرصا ، تنهدات تنهيدة طويلة كتجمع السوفل والهوى الزوين مستمتعة بديك اللحظة .. حتى رجع عندها هزات فيه عينيها جر الكرسي وݣلس جامع يديه ولايح شوفاتو فبلايص مختالفة .

- قوت : (كتحك فشفايفها بسنانها كتحس براسها مامرتاحاش ) مالك ؟

- هاشم : ( شافيها بنص عين) علاش مالي ؟

- قوت : غير كتنخنزر وكتنفخ وتفش بوحدك ماهضرتيني منين ركبنا شنو واقع !

- هاشم : ( هز حاجب ونزل الثاني ) علاش كيهمك ندوي ولا مندويش ؟

- قوت : هاشم من نيتك أش هاد الفعايل ؟ الى كنتي اتبقى دير هكا نوض فحالي حسن ليا

- هاشم : أنت براكة غير متقلقيش بنادم

- قوت (غوبشات) : مافهمتش ؟

- هاشم : ( كيحرك رجلو بعصبية ) علاش ݣلتي حدا داك الكيدار بلي انا خوك ؟

- قوت : ( برزانة ) حيت كونما ݣلتهاش كنتو غاتنوضوها صباط وحنا مقادين على شوهة شوف غير أش وقع داك نهار مع صلاح ..

- هاشم : هاديك قصة وهداك حتيت كاين فرق ، ݣلنا ليك متخرجيش بوحدك علمي

- قوت : (ببرود ) وعلاش غادي نعلمك بسلامة ؟ راه فعمري 33 عام قادة براسي ..

- هاشم : عرفنا عندك 33 متحتاجيش تحفظيها ليا .. وجهك معاطيش هاد العمر لي يشوفك غايتبسل بحال داك ميخي ..

- قوت : ( جاتها الضحكة بنفس الهدوء كتلعب ليه على الأعصاب ) حشومة أهاشم نقولو على خلق الله ميخي الدري مدار فيها والو ونقي ..

- هاشم : ( هز حاجب ونزل الثاني ) من نيتك ؟

- قوت : كندوي معاك حشومة تقول ميخي .. أصلا كونما جيتيش كنت غانكركبو وزايدون علاش حنا ماشي بحال الخوت ماعرفتش فاش ضرك هادشي ..

- هاشم : أنا ماخو حد أخت وحدة لي عندي راهي مزوجة بولادها ..

- قوت : ايوا الله يخليها ليك .. وزايدون فرضنا مثلا كنت أنا بغيت ندوي معاه يلاه واش انا انبقى عزابية طول حياتي من حقي نحب ونتحب ونتزوج ولالا ..

- هاشم : ( رجع بظهرو مقابل معاها حس بصهدة صعراتو ) ماشي ستيل ديالك ومايجيش معاك هاد النوع من سروالو يعطيك الخبار

- قوت : هاديك راه الموضة ومتعرف يبغيني ويبدل ستيلو ويولي متبت ومرزن ..

- هاشم : لي باغي يتبدل مكايحتاجش مرة لي تبدلو كيتبدل هو حيت باغي فهمتي .. واش انت جايا تحضري للحفلة ولا تزوجي ؟

- قوت : ( بنفس الهدوء كتعطيه غير بالبارد ) المعروضة من الخير عرفتي شحال دالقصص كنسمع لي تعرضات وتزوجات ولي سافرات وتخطبات كولشي عند الله قريب .. أنت براسك ماتعرف هاد سفرية ترجع منها مزوج .

- هاشم : (حك على راسو عمر شي وحدة عصباتو بحال هاد شكل كتلعب ليه على أعصابو وهي مبردة السوق ) هاد النوع كنعرفو مزيان زواج ماشي بحال هكا ..

- قوت : ( قدات فولارها والإبتسامة على وجها .. الفرحة كدغدغ حواسها كتحس بواحد النشوة وهي كتشوف فيه قدامها معصب او واصل لتواخرو حالفة حتى تعرف فين باغي يوصل وتخرجو من رونضتو ) وبحالاش كيكون راه مابقاش الزواج ديال هدا شحال ..

- يشوفك الراجل ويتبعك لداركم يدق بابك سلام بغيت نتزوج زمان راه كانت نية دابا راه الوحدة خاصها تعرف فين تحط رجليها عاد ترمي الخطوة ..

- هاشم : دابا أنت عاجبك الحال زلال ديال الخلا يوقف عليك ؟

- قوت : (هزهزات راسها بنفي ) لالا والله ماهكاك أنا غير قلت ليك مرة أخرى الى شفتي شي حد واقف معايا بلاما تدخل أنا عارفة شنو غاندير .. ودابا واش اتولي فينما شتي شي حد تدخل لاواه أهاشم لاواه

- هاشم : ( دور لسانو وسط فمو كيحس بالعافية ماكرهش ينوض يمسح ديك الضحكة على وجها ) واش كديريها بلعاني ؟

- قوت : اعوذ بالله واش من نيتك علاش أ نديرها بلعاني .. وزايدون انا راه حتى لدابا مافهمتش أنت مالك ولاش معصب راه وقيلة حياتي هادي وأنا حرة فيها لا .. شنو بيناتنا يخليك تعصب هكا زوينة هادي .

- هاشم : إلى بغيتي راه غايكون ..

- قوت : (حسات بسخونية طلعات معاها .. قلبها كيضرب بجهد ) ك كيفاش زعمة مافهمتش ؟

- هاشم : ( بقا ساكت مدة من غير رجلو بوحدها لي كتحرك كتحس بيه كاين فصراع مع نفسو ) إلى بغيتي راه غايكون شيحاجة بيناتنا..

- قوت : جيني نيشان مكنفهمش أنا هادشي ديال الألغاز !

- هاشم : ( بجدية ) انا مكنعرفش نبقى نزوق فالهضرة كنجي لبنادم فاص بلاما تبقاي تبوهلي أقوت .. عارفك حاسة بلي بيناتنا كاينة شيحاجة ماهياش ..

- قوت : ( ببلاهة ) أشنو هي هاد الحاجة ؟

- هاشم : انا وأنت فاش كنكونو بزوج بيناتنا سيركوي ديال الضو وهادشي انت عارفاه مزيان ..

- قوت : ( جاتها الضحكة ) سيركوي ديال الضو .. أهاه ومن بعد هاد سيركوي لي كدوي عليه أخرتو شنو ؟

- هاشم : اخرتها توقف على الصح ..

- قوت : ( ببرودة عصبها ) هاشم نݣوليك واحد زوج كلمات .. حتى تكون عارف شنو باغي ياك وتعرف تعبر على باش كتحس وتعرف دوي عاد أجي دوي معايا .. حيت انا سميتي قوت القلوب ماشي بوشعيب راه كدوي مع بنت ماشي راجل ..

- قاطعم السيد مول القهوة جاب لبهم مقيلات ديال الكروڤيت والبيض .. مع طبيسلات ديال العدس وأتاي والخبز ..

- مدواتوش وماطلعاتش فيه الشوفة كلات حتى شبعات وقفات ونوجهات لحدا طوموبيلتو واقفة كتسنى فيه حتى خلص وجا لعندها .. طلعو لطوموبيل راجعين للوطيل مشافتش فيه غددها ومرضها ..

- وصلو للأوطيل نزلات سبقاتو غادية زربانة .. بلاصة طوموبيل وتبعها كيزرب فخطاويه لحق عليها حدا شومبر ديالها ..

- هاشم : ( بصوت ثقيل موقفها ) واش نݣدو ندويو بحال الناس بعقلهم أنا هوكا مكنعرفش ندوي ..

- قوت : ( شافت فيه منيرڤية ) لي مكايعرفش كيمشي يتعلم حتى تعرف باش كتحس من جيهتي أولد الناس وأجي دوي معايا واخا .. جيني نيشان دوك الفعايل وتلميحات أنا ماعنديش معاهم .. فاش تكون متأكد من راسك وعارف راسك شنو باغي عاد أجي دوي معايا ، عطاتو بظهر حالة الباب ديال بيتها حتى أتسدو وهي ترجع شافت فيه ناطقة بصرامة :

وبلاما تدير فيها شيفور ديالي طاكسيات عطاهم الله وبلاما تسوني عليا ولا تدوي معايا الله يهنيك .. سدات ليه الباب على وجهو .. خلاتو مبلوكي ومعصب واصل لتواخرو فالعصاب .. ماعطاتو حتى الفرصة لي يشرح ولا يدوي .. دوز يديه على شعرو وتوجه لشومبر ديالو ..

- دخلات لبيتها مفقوصة غادية جايا كتدوي مع راسها :

أجي نݣوليك مكاين مانكوليك هي هادي معارف ݣاع شنو بغا يدخل ويخرج فالهضرة تقول أول مرة غايدوي مع شي بنت لا حول ولا قوة إلا بالله العلي العظيم العصاب هو هذا ..

- بدا تيليفونها كيسوني هزاتو لقات نمرة ديال وحدة من الكليانات لي مكانتش كتجاوبها :

وي سلام الحمد لله لا هانية أختي ( ݣلسات ) أشمن وقيتة بضبط ؟ (شافت فساعتها) واخا صافي سيفطي ليا لوكاليزاسيو أنا انجي عندك ..

- قطعات معاها كانت الساعة كتشير لل 4:30 ديال العشية .. تنهدات تنهيدة طويلة ، هزات ساكها وهزات لاغتيكل ديال السيدة وخرجات من شومبر ديالها وقفات فشانطي مشيرة لطاكسي وقف ليها طلعات القدام :

عفاك درب السلطان ..

- فجهة أخرى شاد تيليفون معصب غادي جاي وسط شومبر ديالو .. يد شاد بيها تيليفون حاطو على ودنو ويد دوزها على وجهو بتوتر :

كتهضر بحال الى انا مالف ضرب طيح فالعيالات واش يحسابليك راسك أنت هو انا ؟

- فؤاد : ومالك كتعرف تعامل مع الكليانات ؟

- هاشم : هادشي بوحدو الخدمة بوحدها وهادشي لي وقع ليا بوحدو

- فؤاد : شوف من الأخر البنت عندها الصح .. أنت معارفش راسك شنو بغيتي لحد الساعة أصاحبي .. ݣلس مع راسك وسول راسك انت أش باغي وباش كتحس ؟

- هاشم : ( ݣلس على نموسية دايخ ) أنا ماعرفتش مالي أول مرة يوقع معايا هاد البلان فحياتي

- فؤاد : طحتي ( كيضحك ) وهدا هو الإعجاب ديال الصح خاطيني من تخربيق دابا عاد غانݣول بلي قلبك بدا كيضرب ابا هاشم

- هاشم : ( تنهد تنهيدة طويلة) دابا طلقنا اش خاصني ندير .. خليتها معصبة خابطة عليا الباب ݣاتلك مابقيتيش دويني ولا طوف بساحتي ..

- فؤاد : شوف انت دابا خليها على راحتها خلي يدوز غدا إن شاء الله .. بينما تكون فكرتي وعرفتي أش خاصك تݣول ودوي معاها ماتقجرش عليها .

- هاشم : ( هزهز براسو ) واخا يلاه أنا مشيت وعنداك هاد الهضرة تخرج ..

- فؤاد : ݣالو ليك عليا سميتي نعيمة دردب .. قطع معاه التيليفون وهو كيفكر دوز يديه بزوج على وجهو .. شاف فساعتو كانت 6:30 ديال العشية ..

- زفر بعصبية واقف محيد حوايجو داخل الحمام طلق الما البارد ودخل تحتو .

________

- غادية بوحدها بين الحوانت تالفة بلاصة تخرجها لبلاصة وهي ناسية راسها مرة تدخل للمحال ديال الجلالب تسول .. مرة تدخل محال بيجامات حمقاتها السلعة دايرة ساكها قدامها وكتمشى .. ناسية العصبية ديالها حسات براسها بردات حتى من هاشم نساتو ..

- الإبتسامات جايينها من كل جوايه فينما دخلات خصوصا من عند صحاب البوتيكات لي باقيين جون كانت ملفة بشعرها ولبستها بعينيها وإبتسامتها ..

- قوت : ( بهمس) خاص نرجع لهنا نتقدا أما دابا ماعولتش ݣاع .. ، الشمس بدات كتغرب وتسدل خيوطها ، هزات ساعتها كتبان ليها قريبة 7 ديال العشية تنهدات بحيرة كتسنى البنت لي دارت معاها تسوني عليها باش تقوليها فين هي والبلاصة باش تجي لعندها ..

- كملات الدوران ديالها حتى بدا المغرب كيأذن وقفات حدا واحد المحال بغات تجبد تيليفون ديالها تسوني للبنت .. حسات برجليها ضروها وعيات ، شدات تيليفون فيدها وهو بدا يسوني فتحات الخط :

وي ختي فينك تعطلتي عليا .. مكانسمعكش مزيان أختي ( كانت كتسمع صوتها الغنا وبضبط الشعبي ) اه ماعليش أختي بصحتك لا صافي دابا مزيان فينا بلاصة بضبط نقوليه ؟ ااه صافي واخا أختي أنا جايا .

- خرجات من ديك البلاصة توجهات للجهة الشانطي او وقفات الطاكسي لي كيدوز كيكون عامر ، فداك الوقت قليل طاكسيات لي يوقفو ليك حطات يدها على جبهتها كتسوط وتدوي بوحدها :

نهار زين هذا .. الحال بدا يظلام بان ليها طاكسي خاوي جاي شيرات ليه وهو يوقف طلعات وعطاتو لادريسة :

ختي انا راه مغتندخلكش الداخل حدي الشارع وانت دخلي مع زنقة

- قوت : ( ولات طالبة أتوصل الأمانة وترجع بحالها عيات ) صافي ماعليش أخويا أوصلني .. تم غادي بيها كتشوف غير الأحياء الشعبية فديك البلاصة حبس الطاكسي فشارع فواحد القنت .. نزلات خلصاتو ومشا كتسمع صوت الموسيى جاي من الزناقي الداخل .. رمات الخطوات هزات تيليفون كتسوني على البنت مكاين حتى واحد لي كيجاوب

- تفكرات البنت قالت ليها بلي كاينة فواحد العرس داكشي باش مكانتش كتسمعها كانو بزاف ديال الناس .. كتشوف شي عيالات كيجريو وصوت الغوات مخلط مع الموسيقى لي كانت مجهدة .. كدور فعينيها مافهمات والو غادية بشوية ..

- كيبانو ليها كبة دالناس غاديين كيجريو .. توجها نيشان للمصدر الصوت فين جاي الغنا .. صوت الغوت والمعيار وصوت غوات ديال شي مرة تجهد بحال الى قريب ليها حدا ودنيها .. خافت وماعرفاتش منين جاي داك الصوت باش تفادى دخل للديك الزنقة ، ندمات حتى جات وندمات حتى دارت معاها مكانتش عارفة بلي البنت ساكنة تم ولا عارفة راسها فين غادية .. بدات تسلت حدا واحد الحيط جات ضايرة وقفات مصدومة فاش شافت زوج دراري كيضاربو او واحد هاز جنوي فيدو باغي يرشكو فلاخور ..

- كانو قدامها نيشان كانت ورا الدري لي مشنوق عليه حسات برجليها جمدو او لصقو فالأرض كلها كترعد رجلين لي يهربوها مكاينينش .. هازة فيدها ساشي ديال البنت ، بلعات ريقها ورجعات خطوة لور باش ترجع منين جات .. كولشي كيغوت وشي عيالات كيغوتو عليها ترجع..

- هز جنوي وبالحر عينيه مكايشوفوش لي قدامو هز يدو ناوي يرشݣها ليه فكرشو .. زهق ليه طايح هارب على الضربة لي كان أيشدها .. بداك الإندفاع لي كان هاز يديه ترشݣات الجنوية فالجسم لي جا قبالتو ..

- طلق الجنوي من يدو راجع باللور يدو كلها دم كيطلع فالبنت لي قدامو مكانش ناوي يضربها ماشي هي جات فيها بالغلط مدارهاش بالعاني كان باغي يضربو هو هو لي غدرو ماشي هي .. منين خرجات ليه ومنين طلعات طلق رجليه لريح هارب كيجري .. مخلي الغوات والنواح والناس كيعيطو على شي حد يعيط للومببيلونص ..

الدنيا ضارت بيها ، كتحس بواحد الحريق عمرها حسات بيه فحياتها فمها كيترعد لي فيديها كولو طاح دمعة حارة سخونة نزلات من عينها فديك اللحظة سيناريو حياتها كلو داز من قدام عينيها .. حطات يدها على كرشها و هزاتها فازݣة بما سخون ما لي كان حمر كان دمها .. بدات كتحس بدقات قلبها مامنتاضمينش الدنيا كلها ضارت بيها ترخاو عينيها وطاحت على طولتها ..

- واحد المرة وسدات ليها راسها كتحرك فيها راسها تقال ، بدات كتغوت :

عيطو على لابيلانص البنت راه كتموت أعباد الله .. حيدات شالها من فوق راسها وحطاتو ليها على جرحة باش تحاول تحبس النزيف .. الناس كيتفرجو كان لي كيتأسف كان لي كيقول علاش ماهرباتش مالها مكلخة واقفة مسهوتة ..

- كل واحد وشنو كيقول بقات ديك المرة موركة ليها على الجرحة كتحاول تفيقها تدوي معاها ولكن والو مكتجاوبش نهائيا .. كاين لي هاز تيليفونو كيصور كل واحد والإنسانية ديالو ومبادئو ..

- وصلات لومبيلونص .. جاو هزوها طلعوها وقفات ديك المرة هازة داكشي لي طاح من يديها وطلعات معاها ..

__________

- داوها لسبيطار مولاي يوسف دخلوها كانو بزاف ديال الناس .. جا الطبيب شافها وشاف فديك السيدة :

خاصها الكلينيك ديوها لكيلينيك ديجا مكايناش بلاصة كن الأحسن لكلينيك الحالة ديالها ماشي ديال هنا من الأحسن تديها لكلينيك شيخ خليفة انا نسوني ليهم نعلمهم داكوغ ..

- السيدة مكانت عارفة مادير كان ضروري خاصها تحرك ولا دير شيحاجة كتشوف فالبنت كتنزف سبيطار الحكومي مادارو ليها والو ما عندها فلوس ماعندها معلومات على البنت مكان عليها غير تديها وتشوف تسوني لناسها الى كان تيليفون فساكها ..

- واخا ادكتور سوني ليهم عفاك وشكرا .. جبد ورقة كتبها وعطاها ليها :

هادي عطيها ليهم .. هز التيليفون فالوقت لي هي خرجات سونا ليهم

- طلعات فلومبيلونص من جديد .. واخا دارو ليها الإسعافات الأولية ولكن حالتها كانت خايبة بزاف ومكتبشرش بالخير ..

- وصلات لومبيلونس للمستشفى الجامعي الدولي الشيخ خليفة .. خرجوها من لومبيلونص وسيدة تابعاها دغية ضارو بيها دخلوها .. تم تم دخل عندها الطبيب وضارو بيها الفرمليات .. خرج الطبيب عند السيدة :

شنو وقع ليها ؟

- كانت واحد المدابزة ( كدوي بخوف وتوتر ) وجات فيها الضربة بالغلط ديال جنوي .. ديتها لسبيطار ماقبلوهاش و ..

- قاطعها : عرفت سيري عمري المعلومات أنت شنو كتجيها ؟

- والو أنا اكنت حاضرة بقات فيا جيت معاها

- سوني على عائلتها علميهم خاصهم ضروري يكونو هنا حالتها خايبة .. عطاها بظهر وورجع للغرفة لي كانت فيها .. حدرات السيدة راسها فساشي وف الساك ديالها حلاتو لقات ديكارت ڤيزيت مكتوب فيه bijouterie mejdoul dehab chez kout lkouloub safi " دورات لاكارت فيديها .. رجعات للساك لقات فيه التيليفون .. كطلب من قلبها مايكونش فيه الكود ..

- من زهر ربي ستجاب لدعائها ومكانش فيه الكود .. مشات نيشان للبلاصة ديال ليزاپيل .. النمرة الأولى سونات ليها ..

____________

- لبس حوايجو .. دار ساعتو وريحتو هز سوارت طوموبيل وتيليفون حط يدو على الپوانيي باش يخرج وهو يقاطعو التيليفون هزو قبالت عينيه كتبان ليه نمرتها .. حس بالفرحة فقلبو دغية فتح الخط وبصوتو الرجولي :

ألو قوت ..

- جاه صوت غريب عليه من الجهة لوخرا : سلام عليكم

- هاشم : وعليكم السلام (غوبش وقلبو كيضرب يديه بردو عليه ) شكون معايا ؟

- بلعات ريقها : عفاك راه مولات هاد التيلبفون كاينة فلكلينيك خاصكم تجيو ضروري ..

- داخ الارض مشات بيه وجات فمو نشف عليه .. كيتردد فودنيه غير مولات تيليفون كاينة فلكلينيك .. مافاق من سهوتو حتى سمعها كتقول ألو ألو .. الدم جمد ليه فعروقو مابقاش عارف مايقدم ولا مايوخر ، ببرودة وصوت كلو خوف ورهبة :

أشمن كلينيك .. ماخلاهاش تكمل سد التيلبفون وخرج كيجيري .. مورك على لاسانسور عينيه معميين مكايشوفش قدامو حس بقلبو تخطف منو مابقاش ديالو .. خرج من لاسانسور كيجري لي جا قدامو كيخرج فيه ، توجه للباركينغ طلع فطوموبيلتو وديمارا مكسيري مشايفش قدامو ..

- دخل للكلينيك كيجري معمي مشا للإستقبالات .. معارف شنو غايݣول هو أصلا ماسول حتى شنو وقع ليها ولا مالها :

عفاك واحد البنت يلاه دخلوها دابا ؟

- واش البنت لي دخلات عاد دابا مضروبة بالموس .. دخلوها للعمليات .. ديك السيدة لي تم راه هي لي جات معاها .. ضار بزربة متوجه عند المرة لي جات معاها وقف عليها بحال الرعدة :

شنو وقع ليها ؟ كيفاش وقع ليها وفين ؟

- هزات فيه راسها .. كانت مرأة فالأربعينات من عمرها :

كانت واحد المدابزة بين جوج دراري الضربة لي كانت أتجي فواحد فيهم خوا عليها وجات فيها هي .. كانت واقفة مبلوكية وراهم عياو الناس مايغوتو عليها تبعد ولكن فاش جات تبعد جات فيها الضقة ..

- أنا جيت معاها ديتها لسبيطار ماقبلوهاش وجبتها للهنا .. هادو راه كانو فيديها ( عطاتو ساشيات) سونات واحد السيدة كتسول على شي كوموند إلى ماخفت نكذب كانت دايرة معاها فديك الحومة .. راه قلت ليها لي وقع النمرة لي لقيت لولة سونيت ليها ..

- هاشم (كيبلع ريقو بصعوبة ) : مݣاليك للطبيب والو ؟

- ݣاليا بلي الضربة عندها خايبة وبلي خاص نعيطي على عائلتها وهادشي لي درت .. خويا خليت ولدي بوحدو خاصني نمشي الله يجيب ليها الشفاء وينوضها على خير .. راه ݣالو ليا خاص نعطيهم المعلومات وانا معارفو عليها والو ..

- هاشم : (هزهز براسو ) الله يجازيك بيخير .. جبد بزطامو ومد ليها 200 درهم ) هاكي باش تشدي طاكسي مشا الحال ..

- شداتها من عندو : الله يرحم ليك الوالدين والله يݣعد بوسادها الى ساليت غدا ندوز نسول فيها بسلامة .. حدرات راسها ومشات مخلية ليها ساشيات وساكها .. رجع للإستقبال عمر المعلومات ديالها ورجع للكولوار ݣالس كيتسنى على نار ..

- دقائق كيدوزو عليه بسوايع .. كيسول راسو شنو يدير كيحس بيديه مربوطين الى سوناو دارهم أش غايݣولبهم بنتكم مضروبة بجنوية .. بنتكم حالتها ماعرفتش شنو بيها وقف بغا يحماق بغا يتسطى ..

- ݣاليها علميني فاش تبغي تخرجي ݣاليها متخرجيش بوحدك راه مكاينش الأمان راه صعيب تخىجي بوحدك فمدينة كبيرة .. وغادية لحي شعبي لي كتكون فيه المدابزة .. ولكن ماسمعاتش ليه مداتهاش فيه. .

- كيحس براسو غايحماق كل شوية يشوف فساعة ..

- فغرفة العمليات ضايرين ليها .. عينيها مغمضين شعرها مغطي ببوني طبي فزرق .. يديها فيها السيروم حدا راشها تلفازة لي كتبين على دقات القلب وعلى ضغط الدم .. هزات الفرملية راسها فطبيب مهزهزة ليه راسها :

- فصيلة الدم ديالها B+ خاصنا ضروري لي يعطيها الدم .. حاليا مامتوفرش عندنا أدكتور

- الدكتور : شوفي السيدة لي جات معاها خبريها .. خرجات من الغرفة كتجري مزولة الكمامة ، كان واقف كيتسنى غير شافها جا كيجري لعندها :

عفاك واحد البنت عاد دخلوها للعمليات كيف بقات ؟

- ضاع منها بزاف ديال الدم خاصها ضروري شي واحد يتبرع ليها الفصيلة ديالها B+

- هاشم : ( باللهفة وخوف ) نعطيها انا الى كان كانت الفصيلة ديالي تناسبها عندي O+

- الفرملية : ( بأريحية ) اه تقد تعطيها أجي معايا عفاك .. مشا معاها كيجري .. دخلاتو للغرفة الخاصة هز على يديه زولو ليه الدم بالقدر الكافي لي غايقدهم

- خليك هنا واحد الشوية .. مشات متوجهة للغرفة دالعمليات هو رخا قميجتو او ناض مامسوقش للكلامها ملهوف غير على قوت لي فالداخل ماعرفهاش كيف بقات ولا أشمن حالة هي ...

- دازت ساعة ديال المݣانة .. خرج الطبيب غير شافو هاشم ناض عندو كيجري :

دكتور أمضرا كيف بقات ؟

- دكتور : شنو كتجيها ؟

- هاشم : ( مداير حساب للكلامو ) راجلها ..

- الدكتور : الضربة كانت غارقة هادشي لي خلا الأعضاء الداخلية تضرر .. خسرات بزاف ديال الدم حيت تعطلات باش وصلات هنا ..

- هاشم : ( كيسمع صوت رنين فودنين كيحس بكولشي كيدور بيه داخ لأول مرة فحياتو كيحس بقلبو ماشي منو كيحس بالبكية جاتو .. كيحس بلي مكتف ضعيف لا حول ليه ولا قوة بلع ريقو صدرو كيطلع ويهبط ) ياك غاتولي مزيانة ؟ حالتها دابا مستقرة ؟

- الدكتور : (هزهز راسو وبصوت غالب عليه التردد ) درنا لي علينا هاد السوايع الجايين هوما لي غايحددو لينا شنو كاين مانݣدش نݣوليك حتى حاجة كثر من هكا إن شاء الله يكون خير .. (طبطب ليه على كتفو ومشا ) ..

- رجع خطوة لور .. نغزات حس بيهم فقلبو تايه معارف شنو يدير كايحس برافو فدوامة ديال حيرة ، الحياة عبارة عن لعبة خاصك تكون كتقن الألعاب باش تنجح فيها وباش تفهمها .. نزل بطولتو على الكرسي ساهي فالفراغ حتس بإحساس خايب بحال شي واحد كان فسبات عميق وعاد فاق .

- سترجع ذكرياتو من قبل مايتزوج .. كيف كان مخططاتو مواصفات شريكة حياتو واش لهاد درجة هو حمار ومعمي تفكر كلامو قبل زواجو مع فؤاد ..

فـــلاش بـــاك

- ݣالسين قدام البحر حاطين زوج كيسان ديال القهوة قدامهم .. فؤاد داير رجل على رجل رشق من قهوتو وشاف فيه :

مزال مانويتيش تزوج أصاحبي شوفليك شي بنت الناس اش خاصك ؟

- هاشم : ( تنهد كيشوف فشمس لي بدات تغرب ) دوقي صعيب مزال مالݣيتش داكشي لي بغيت المرة لي أنا باغي مزال مابنتش ..

- فؤاد : وايلي عيقتي كيبغيتي هاد المرة ݣاع تكون ؟

- هاشم : ( هزهز براسو) ماشي شي مواصفات مكاينينش .. تكون بنت الناس تخاف الله تصون راسها ودارها بغيت زوجة صالحة بهاد المعنى نشد بيديها وتشد بيدي الى شافتني غلط تنصحني وأنا هكاك ..

- فؤاد : وفشكل بلاما تݣوليا لا مكايهمش كل واحد فينا باغي مواصفات فشريك حياتو ..

- هاشم : الصراحة (سكت كيخمم وتبسم كيشوف لبعيد ) بغيت زين يكون مغربي قح تحس فزينها فيه داك الدݣ دسال شحال هادي حروفها يكونو كحلين ..

- فؤاد : ( كيضحك ) ودابا دويتي دابا تلݣى ..

______ الــحـاضـر

- كان غالط فإختيارو من ساسو راسو .. هز تيليفونو ودخل للبلاصة الصور مشا نيشان لصورتها الصورة لي هز ليها من الواتساب زوما عليها .. عينيها حجبانها ضحكتها كانو مواصفاتها نفس المواصفات لي كان كيتمناهم فشريكة حياتو .. واش لهاد الدرجة كان عمى مكايشوفش لهاد درجة هو صاحب القرارات المرزنة لي مكايتسرعش كيفا تسرع كيفاش قبل بزواج بحال داك الزواج لي مكان راضي عليه حتى واحد ..

- تنهد تنهيدة طويلة حاط راسو على الحيط مغمض عينيه مسترجع ذكريات دازو فــلاش بـــاك

- هاشم (بإبتسامة عريضة ) نهار كبير هدا الحاج زارتنا البركة ݣلس .. كان قبالو راجل ف60 من عمرو لابس جلابة فالبيض ديال الصوف مع طربوش ساعة مدهبة .. باين عليه الهيبة والوقار

- الحاج أحمد : الله يكبر بيك أولدي كيداير مع العمل الواليد مالين دار الأمور على مايرام ؟

- هاشم : (هزهز براسو ) الحمد لله الحاج تشرب شيحاجة ؟

- الحاج : لاواه أولدي مزال تابعني مايتقضى أنا جيتك على ود واحد الموضوع الله يرضي عليك بغيت ندزي معاك فيه ..

- هاشم : مرحبا (صغر عينيه) الله يسمعنا خبار الخير

- الحاج : ( تقاد فالݣلسة وبإبتسامة ) كل خير أولدي المهم ندخل نيشان فالموضوع يݣد يجيك هادشي غريب ولكن خلاوها سيادنا اللوالة خطب لبنت لا تخطب لولدك .. وأنا أولدي هاشم محبتك ربي لي عالم بيها بيناتنا الملح وطعام وماكرهتش هادشي يزيد ونشاركو حتى دم علاش لا

- هاشم : (غوبش) مافهمتش ؟

- الحاج : ماكرهتش أولدي نتناسبو تزوج ببنتي نسرين ( شاف ليه مباشرة فعينيه) مانلقاش ماحسن منك ليها .. هي محامية تبارك الله وأنا خايف عليها والموت والحياة وزمان هدا ماعرفنا شكون سابق بنية وحدة بغيت نتهنى من جيهتها ..

- هاشم : ( تدهش ماعرف ميݣول ) اش غانݣوليك الحاج أنا مانلݣاش ماحسن منكم ولكن أنا مابغيتش مراتي تكون خدامة بغيتها تكون ݣالسة فدار معززة مكرمة ..

- الحاج : ( حنحن حاك على حاجبو ) بصح أولدي هاد بنات اليوم ماعرفتش باش غاتنفعهم هاد الخدمة .. هي أولدي راه الى تزوجات إن شاء الله غير تحمل وغاتݣلس فدار

- هاشم : ( بشك ) واش متأكد من هادشي واش ݣالتها ليك ؟

- الحاج : الله أودي راه دويت معاها قبل مندوي معاك .. اغير يلاه بدات خدمتها مجاتش من الأول تݣلس ولكن راه غير تحمل راه غاتݣلس فدارها تقابلها وتقابل وليداتها إن شاء الله هي بغات غير لي يتهلا فيها ويديرها فعينيه .. وشݣلتي أولدي ..

- هاشم : (تحرج فنفس الوقت جاه هادشي فشكل مدخلش ليه فراسو ونفس الوقت ماقدش يرضو ماينساش نهار تعرف عليه فاش كان ففرنسا وتلاقاو فنفس الأوطيل .. ونشأت بينهم علاقة زوينة كلها إحترام ومودة نهار لي هاشم وقف على 3 المليون هو لي عطاها ليه رافض يسوني لباه .. عشرة ديال 10 سنين مجاتش يرفض من الأول على الأقل حتى يشوفها ) يدير الله خير الحاج خاص ضروري تشوفني ونشوفها ..

- الحاج : ( وقف مبسم ) وهي نتسناوك على العشا إن شاء الله ..

- هاشم : واخا إن شاء الله .

- ݣالس فدارو كيخمم تنهد تنهيدة طويلة .. كتبان حضومية ومتبتة زوينة ومقبولة كدخل للخاطر ماهزاتش فيه الراس نهائيا كيبان عليها الحياء والحشمة وهادشي لي كان باغي فشريكة حياتو .. صلى صلاة الإستخارة وهو كيحس براسو مرتاح الحاج أحمد عارفو مزيان ماشي يلاه عرفو لبارح 10 سنين وهوما معرفة .. مامرة مازوج وقفو مع بعضياتهم مغايلقاش شي نسيب بحالو ..

- تنهد وهو كيتفكر ردة فعل مو وردة فعل خوه .. مكان باغي يدير عرس كبير عرس بين العائلة خفيف ظريف هذا هو الشرط لي كان عند نسرين بغات عرس غير بين العائلة .. حتى الحنة كانت رافضة ديرها بحجة مكتحملهاش وكدير ليها الحساسية فيديها .. وافق على أي حاجة قالتها مكانش عندو مشكيل نهائيا ..

- ولكن كان حاس بنقص فالداخل نقص من جيهت الام ديالو لي هرس قلبها كانت باغية تفرح بيه بحال ݣاع الناس طبقا للتقاليد والعادات ولكن هو ديما كيختار لي يرحو ..

- فالدار عند فؤاد ݣالس هو وياه حاطين صينية ديال أتاي .. هاز هاشم الوترة كيدندن مغوبش ..

- فؤاد : (كيشوف فيه ببرود ) واش هذا هاشم لي كنعرف ولا يمكن غلطت .. تخربيق الخاوي هذا أهاشم برب حتى تخربيق

- هاشم : ( هز راسو فيه ) ياك ݣلتي بغيتيني نتزوج دابا وليت كنخربق .. البنت مافيها حتى عيب بنت الناس حشومية مرزنة متبتة أش بغيت خور الخدمة راه اتݣلس منها ماشي كولشي كيجي من ديپار

- فؤاد : الصحبة بوحدها وزواج بوحدو .. خاص تكون المحبة بين زوج السيدة شتيها مرة وحدة زعمتي أصاحبي شوف أنا خارج هاد السوق شغلك هداك ضبر محاينك .. بقات فيا أخالتي نعمة لي مغاتفرحش بولدها الكبير انت بعقلك وعارف مصلاحتك الله يهني سعيد بسعيدة ..

- هاشم مجاوبوش كتافى بصمت ..

__________ الــحـاضـر

- غلطة حياتو هي هادي .. بنى تعاستو على وجه العشرة والمحبة حتى تغدر وتطعن فظهرو رضى بزاف ديال الحوايج خايبين .. كتاشف بزاف ديال الحوايج الكذوب جاوه من جوج جوابه من عند السيد لي كان حاسبو بحال باه ودايرو فمرتبة كبيرة تاق فكلامو مكانش عند بالو راجل حاج بهيبتو او وقارو ولي كيحتارموه الناس يكون كذاب .. كذب فاش ݣاليه بنتي أتݣلس من الخدمة فاش تحمل .. كذب عليه حيت مݣاليهش عندها صحابات السوء وبلي حياتها كلها سفريات وخروجات كولشي هادشي دارو غير باش يزوج بنتو ليه .

- كان صابر وساكت وعاطي فرصة لهاد الزواج يكمل كيجي من خدمتو ويطيب هو عاطيها فرصة حتى تعلم ، ولكن كان بحال الى كيخوي الما فرملة .. صدمتو كانت كبيرة نهار صارحاتو بلي مابغاتش الولاد ومع ذلك كان رافض يطلقها كيݣول غاتبدل وغاتصلح وبلاما يتفارقو من أول عقبة وبلي زواج مسؤولية كبيرة مدام دخل ليها خاص يتحمل عواقب هاد العهد ..

- ولكن ݣاع هادشي لي دار فالأخر رجع ليه بومزوي وتطعن فظهرو .. ربي ختابرو وبين ليه العلامة وفنفس الوقت جزاه على صبرو جزاه أنو متهورش ونهى حياتها جزاه بجوهرة غالية حطها ليه فطريقو ..

- جوهرة لي كان معمي عليها ربي كونما بغاهاش ليه مكانش أيجمعو معاها فبزاف ديال البلايص ، ربي كون مابغاهاش ليه مكانش هو وياها كيحملو نفس السلسلة فعنقهم بزوج .. مغاتكونش مشات لزمان جدو وأمنية جدو تحققات كيفكر فشي حوايج كيبغي يحماق .. كون كان حال عينيه غير شوية مكانش غايوقع هادشي لام راسو واخا هو ماعندو ذنب ولكن كيلوم راسو ..

- لام راسو حيت خلا تجربة فاشلة من الأول تعمي ليه عينيه على حقيقة قدها قداش قدامو .. ولكن فات الفوت دابا مكتنفعش الندامة من بعد الخسران ، دوز يدو على شعرو باغي يدير شيحاجة ومعارف ميدير هز تيليفونو وسونا على فؤاد ..

- فؤاد : وفين أصاحبي ..

- هاشم : ( عاض على شواربو كيحس براسو دايخ ماعرف أش يݣول صوتو مغنغن ) فؤاد ..

- فؤاد : ( تقاد فالݣلسة غوبش جاه صوتو فشكل ) هاشم ياك لاباس ؟

- هاشم : ( وقف كيسوط مسح دمعة نزلات من طرف عينو ) قوت ..

- فؤاد : مالها قوت ( بشك) أش كاين دوي ..

- هاشم : ( طلق نفس طويل ) قوت ناعسة فلكلينيك .. ت تضربات

- فؤاد : (سخن عليه راسو ݣاع السيناريوهات دازو قدامو ) كيفاش تضرباش مافهمتش ..

- هاشم عاود ليه ݣاع لي وقع كيدوي بعصبية غادي جاي ..

- فؤاد : ( شد على راسو ماعرف باش تبلا ) واش دارهم فخبارهم ؟

- هاشم : لا خفت نعلمهم باها فيه السكر وطونسيو خفت توقع ليه شيحاجة نصدقو فيها وفيه ..

- فؤاد : ( يد شاد بيها تيليفون ويد هز بيها سوارت طوموبيلتو وتجاكيط ديالو ) لا متݣوليهم والو شوف انا أنشد طريق لعندك عرفتي شنو سوني ليهم من نمرتك وݣوليهم لي غانݣول ليك ..

- جبد نمرة عبد الرحمان من تيليفون قوت .. سجلها عندو وهو يطفي تيليفونها خدا نفس عميق ويهدوء تنهد تنهيدة طويلة دوز الخط وصوت رجولي متبت غير سمع صوت عبد الرحمان من الجهة الأخرى وهو يدخل فالموضوع :

السلام عليكم الحاج انا هاشم

- عبد الرحمان : أهلا أهلا كيداير أولدي صحيحة الأمور مزيانة ؟

- هاشم : الحمد لله وأنت صحيحة ( كيطمن)

- عبد الرحمان : وشوية اولدي شوية الحمد لله على كل حال شوية ديال العيا ولكن الحمد لله ..

- هاشم (دوز يدو على شعرو القرار باش مايݣوليهم والو كان فمحلو ) المهم الحاج بغيت غير نݣوليك راه تيليفون قوت خسر تلاݣيتها ݣبيلة وݣالتها ليا .. طلباتني باش نعلمكم باش لا سونيتو ولقيتو تيليفون طافي ماتخلعوش عليها ..

- عبد الرحمان : ااه ياك إيوا ماعليش اولدي ياك هي مزيانة !

- هاشم : ( بإطمئنان ) لالا الحمد لله راها بيخير غدا إن شاء الله كاينة الحفلة غادي تكون مشغولة إن شاء الله .. داكشي باش حتى لبعد غدا عاد تدي تيليفونها يتصايب إن شاء الله غير يتصايب اتدوي معاكم ..

- عبد الرحمان : واخا أولدي الله يرضي عليك

- هاشم : يلاه الحاج الله يصبحك على الخير والله يجيب العفو

- عبد الرحمان : اللهم آمين يارب .. قطع معاه التيليفون وتنهد بأريحية .. ساكها بقا هازو فيدو خرج على برا بان ليه واحد الكيوسك كيدير القهوة .. شرا قهيوة وݣلس على برا كيشم الهوى حتى كملها ..

- رجع لداخل ݣالس مرا يوقف مرة يݣلس .. حتى جا عندو الطبيب غير شافو وقف وفعينيه نظرة تأمل وترقب ..

- أمضرا ادكتور ؟

- من الأحسن تمشي ترتاح دابا الݣلسة ديالك ماعندها باش تنفعها إلى كان أي حاجة حنا غادي نعلموك ..

- هاشم : لا ماعندي فين نمشي

- واش غاتبقى هنا راه مايمكنش خلي نمرتك فالإستقبالات وحنا غادي نعلموك أكون هاني .. طبطب ليه على كتفو ومشا ، حدر راسو وتوجه للإستقبال خلا ليهم نمرتو وتوجه للطوموبيلتو .. دخل وسد عليه حاط ساكها فالكرسي لي حداه متكي براسو على للكوسان ..

- نزل الكرسي شوية وتكى مغمض عينيه .. ماعرفش شحال ديال الوقت داز بدا تيليفونو كيسوني .. فتح عينيه مخلوع هز تيليفون طلعات ليه نمرة فؤاد كانت الساعة الوحدة دليل ..

- هاشم : ألو ( كيتفوه) .. واخا أنا أنسيفطها ليك ، دخل للواتساب وسيفط ليه لوكاليزاسيو .. 15 دقيقة تقريبان كتبان ليه طوموبيلة فؤاد وقفات ..

- نزل من طوموبيل ديالو واقف تسناه حتى بلاصة ونزل جا لعندو عنقو مطبطب على ظهرو :

كيبقيتي ؟ ( كيشوف فيه ملامحو باين عليهم العيا وقلة الحيلة )

- هاشم : ( ببرود وبفشلة ) كيغانكون فنظرك وهي الداخل .. ماعرفتها كيف بقات واش اتخرج عايشة ولا ( سكت ماقدش يكمل )

- فؤاد : ( بصرامة ) تبت أصاحبي ونعل شيطان زعمة راه إيمانك قوي بالله .. إن شاء الله مايكون الخير ماعرفتيش شكون ضربها ؟

- هاشم : ( بعصبية ) واش انا دابا غير فلي ضربها أنا فيها هي أفؤاد فيها هي .. ݣلبي كيضرني العافية ݣادية فيه مغاتهداش حتى نشوفها بيخير عاد غانهدى ..

- فؤاد : ( كيشوف فيه مصدوم فحالتو أول مرة يشوفو فهاد الحال ) تبت كدوي عليها بحال الى صافي ودعات نعل شيطان إن شاء الله مايكون الخير .. درتي لي ݣلت ليك ؟

- هاشم : ( هزهز راسو بعياء )

- فؤاد : (سكت مدة كيسكانيه ) بضاض سكنك أولد الحاج وماكنتي داير بحسابو ..

- هاشم : ( دوز يدو على شعرو ) الݣلب مرض بيها وسكناتو .. كيدارت ليها ماعرفتش لي عارف سكنات داتي وهلكاتها .. سكنت هذا ( أشر للقلبو ) ومرض بيها .

- ضرباتو الفيقة على الشعا لي ضرب ليه فعينيه معنكش فنعسة عنقو كيضرو .. دور راسو كيتشبح شاف للجهة لوخرا كان فؤاد ناعس حك عينيه هاز تيليفون يشوف شحال الساعة كانت 7 ديال الصباح حط تيليفون مغوبش حط يدو على كتف فؤاد كيفيقو :

فؤاد فيق أصاحبي .. حل فؤاد عينيه مخسر سيفتو متنهد تنهيدة طويلة :

مكايناش شي محلبة نمشيو نفطرو نغسلو اوجهنا ولا شي قهوة ؟

- هاشم : خاص نشوف كيف بقات قوت هو الأول

- فؤاد : واش من نيتك باغي دخل عليها وجهك مامغسولش نمشيو نلوحو اشيحاجة للكرشنا أنت من لبارح ماواكل والو مايكونش راسك قاصح وكون كانت شيحاجة راه غايسونيو ليك ..

- هاشم : يلاه زيد .. ديمارا الطوموبيل وتحرك من تم كيقلبو على شي قهوة قريبة لقاو وحدة افدوك الجوايه .. بلاصة طوموبيل ودخلو للقهوة توجهو للطواليط هو الأول ، غسلو وجهم باش يفيقو شوية عاد توجهو لواحد طبلة .. شدو القهوة والمسمن ..

- بدا كيحس شوية بلينيرجي كترجع ليه من لبارح مداق النعمة ولا شافها .. فطرو بزوج خلص فؤاد وخرجو طلع فطوموبيل يلاه ايديماري بدا تيليفونو كيسوني بزربة فتح الخط .. كيسمع فصوت الطبيب يزربة ديمارا وكسيرا

- فؤاد : اش ݣاليك ؟

- هاشم : (عينيه معميين بغا غير ايمتا يوصل خلاص كلو رجفة ورهبة وفرحا مخلط عليه كولشي ) فاقت ݣال بلي الحمد لله تجاوزات مرحلة الخطر ..

- فؤاد : ( فرحان ) شتي ياك ݣلتها ليك أصاحبي الحمد لله ..

- وصلو للكلينيك نزل كيجري درجة كيطلع فيها ودرجة كينقزها مع دخل تلاقى بالطبيب نيشان

- هاشم : امضرا واش صافي ولات بيخير ياك ( باللهفة)

- الطبيب : ( كيضحك) الحمد لله مابقاش الخطر عليها دابا راه داوها للبيتها ..

- هاشم : واش فاقت نقد نشوفها عفاك ؟

- الطبيب : ممكن غير هو متكترش معاها الهضرة بزاف واخا ؟

- هاشم : كون هاني .. عيط الطبيب للفرملية دات هاشم عندها وفؤاد لقى على برا كيتسنى ، بيت كبير مصبوغ كلو فالبيض فيه تلفازة بلازما وماريو فالبيض محطوط حداها الدوا وقرعة ديال الما ، من جهة ليسر ديالها كاين بالكو كبير ..

- فوق النموسية متكية شعرها كلو موسداه مغمضة عينيها يد فيها سيروم حطاها على كرشها ويد مسرحاها .. حل الباب بشوية ودخل كيطل عليها كتبان ليه بداك الشكل ..

- قرب منها كيشوف فيها وفالمنظر ديالها لابسة تيشورت فالبيض يديها بيضين وناعمين صباعها الرقاق عينيها المشدودين وموشها الهابطين .. شعرها لي موسداه مخبل ومشتت كتبان بريئة وناعمة بحال بنت صغيرة .. تنهد تنهيدة طويلة خلاتها تبدا تحل عينيها غير بشوية كترمش .

- دورات راسها غير بشوية نظراتها ستقرو عليه دوزات لسانها على شفايفها الناشفين .. تنهدات بشوية باش ماتعݣرش قرب لعندها جار الكرسي وݣلس حداها

- هاشم : ( شاد راسو غير بزز) على سلامتك كيبقيتي شوية ؟

- قوت : ( هزهزات راسها بشوية وبصوت ناعم وسخفان ) شوية الحمد لله

- هاشم : الحمد لله كتحسي بشيحاجة ضراك ياكما نعيط لطبيب ؟

- قوت : ( بنفي ) لا واش قلتيها لدارنا ؟

- هاشم : لا خفت لا يتخلعو ولا توقع لباباك شيحاجة ..

- قوت : ( سخفانة كتخرج الكلام غير بزز) متقوليهم والو مابغيتهمش يعرفو

- هاشم : كوني هانية حتى واحد مغايعرف أنت غير رتاحي

- قوت : ( بلعات ريقها ) مغاتقولش ليا بلي أنا غالطة وبلي كنتسرع وخرجت بوحدي ؟

- هاشم : (باغي يشد ليها فيدها ومقادش شاد راسو ابزز باش مايقيسهاش ) انت مادرتي والو اللومة على هاديك لي جايباك لداك القنت .. انت دابا خاص ترتاحي باش تولي بيخير وعلى خير

- قوت : ( غمضات عينيها ورجعات حلاتهم ) علاش مامشيتيش للحفلة خاص تكون .. حتى الى (كتخرج كل كلمة بزز منها ) ماربحتش انا تديها أنت

- هاشم : ( كيشوف ليها فعينيها ) الحفلة كتعوض تمشي وتجي غيرها ولكن انت لي متعوضيش ..

- بقات كتشوف فيه ساهية مجاوباتوش مالقاتش باش تجاوب .. حسات براحة كبيرة واخا مضرورة فكرشها ولكن من بعد الكلام لي ݣاليها حسات بواحد الحلاوة ديال النعاس عمرها حسات بيها غمضات عينيها وستسلمات لنعاس ..

- بقا ݣالس ومقابلها مابغاش يخرج من عندها .. حتى جات الفرملية طلبات منو يخرج باش يخليها ترتاح .. خلاها معاها وخرج لعند فؤاد غير شافو وجا للعندو

- كيبقات ؟

- هاشم : ( ݣلس ) الحمد لله هضرات معايا شوية دابا خليتها تنعس ..

- فؤاد ( طبطب على كتفو) الحمد لله على سلامتها

- هاشم : (بجدية بصوتو القوي ) خاصها غير تولي بيخير غير نرجعو أنقصد دارهم ..

- فؤاد : ( جاتو الضحكة ) دغية بغيتي تزرب على السيدة وغير بشوية

- هاشم : ( شاف فيه ) مكاين لا بشوية لا زعبول الهندي بغيت انشد ليها فيدها ماݣديتش أصاحبي .. مالنا على هاد القرع نمشطو ليه راسو نرجعو نقصد دارهم نيشان

- فؤاد : دابا كيفاش بلانك راه أنا لي ناوي نتزوج فشهر 12

- هاشم : تزوج ولا بوكر وأنا مالي انا هو العدول .. غانتسناك حتى تزوج انت عاد نمشي لدارهم زوينة هادي

- فؤاد : جيتي أمن ورايا وباغي تعرس ؟

- هاشم : ( بجدية وتقالة) خاصها غير تبرا هادشي لي وقع ليها وراني بزاف ديال الحوايج الفرصة كتجي مرة للواحد مخاصوش يضيعها من يديه ..

- فؤاد : ايوا الحمد لله منين عقتي وفقتي

- هاشم : خاص نمشي للوطيل نبدل ونعتادر ليهم جات حشومة

- فؤاد : صافي سير أنا غانبقى هنا حتى ترجع .. ناض هاشم هاز ليه براسو وخرج من لكلينيك متوجه للأوطيل ..

______________

- قادات ليها الفرملية راسها دݣات ليها البرة ديال الحريق فسيروم .. حلات عينيها شافت فيها تبسمات ليها الفرملية ونطقات :

على سلامتك راجلك مسكين كان غادي يستطى منين جابوك وهو حامق وهابل عليك ..

- قوت : ( دوزات لسانها على شفايفها ) شكون ؟

- الفرملية : السيد لي كان هنا راجلك .. لبارح كان خاصك الدم وهو لي تبرع بدم ديالو ليك الله يخليكم لبعضياتكم باين بلي كيبغيك بزاف .. مابغاش يمشي ويخليك عرفتي مسكين البكا بكاه .. سعداتك بيه تهلاي فيه .

- قوت بقات ساهية وكتفكر فكلامها واخا هادشي لي هي فيه دابا والفتحة لي فكرشها حسات بواحد الفرحة عمرها حساتها .. تصدمات فاش سمعات هادشي من عند الفرملية باش يعطي دمو ليها فراه كتعني ليه بزاف .. نهار حسات بالحب حساتو من جهة شخص غلط هي لي كانت كتحاول تقرب منو ..

- عمر شي واحد دار على قبلها شي حاجة حسات بالفرشات فكرشها والإبتسامة خارجة من شفايفها بلا هواها .. تنهدات تنهيدة طويلة ورجعات غمضات عينيها من جديد ..

- فجهة أخرى وبضبط فڤيلا الحاج توفيق .. ݣالسة فصالون دايرة رجل على رجل هازة واحد الكتاب كتقرا فيه حتى سونا الباب .. حطات الكتاب وناضت يلاه الخدامة بغات تفتح وهي توقفها بيدها :

نعمة : اسيري انجاة أنا غادي نحل .. توجها الباب فتحاتو وقفات مصدومة ودهشة باينة على وجها جاتها البكية وكولشي تخلط عليها ..

- نعمة : (بعناق حار ) حبيبة ديالي حبيبة ديالي (كتبكي) الله ياربي الله علاش ماقلتيهاش ليا ماعلمتيني الله ياربي الله ( مابغاتش طلق منها ) ..

- قبالتها كان واقفة بنت فأواخر العشرينات .. شعرها ديݣراضي فالكحل رطب طالقاه .. عينيه كبار مشفرين من شوفة فيها كدخل ليك للخاطرك وكتحش بيها مقبولة دايرة 3 الخواتم فصباعها لابسة لبسة كلها كحلة ..

- أويلي اماما براكة من البكا ( كضحك)

- نعمة : (جراتها) علاش ماعلمتينيش وماݣلتيهاش غير نحيبوك أنا وباك ..

- (جرات الباليزة ديالها) خليتها ليكم مفاجأة ماشي مشكيل أما فين بابا فين هاشم ؟

- نعمة : ( كتعيط ) توفيق توفيق أجي .. توفيق كان نازل حيت سمع الهضرة كثيرة وقف عند دروج فاش شافها مصدوم :

حنان

- حنان : ( مشاا كتجري لعندو طلعات مع دروج عنقاتو كتبوس ليه فيديه وفراسو .. بعدات عليه كتشوفيه ) الناس كيكبرو وأنت غير كتصغار أبابا اش هاد الزين .

- توفيق : ( كيضحك معنقها ) وبااز ليك ابنتي مجاش معاك أمير ؟

- حنان : لا جيت غير بوحدي دراري دخلو لقراية خديت كونجي فيه شهر وجيت نشوفكم توحشتكم بزاف ..

- نعمة : حتى حنا أبنتي والله العظيم طولتي الغيبة هاد المرة ..

- حنان : ( ݣلسات بيناتهم ) فينما ندفع لكونجس مكايعطيوهش ليا ماكرهتش والله العظيم لا عرس هاشم ولا ياسين حضرت ليه بقا فيا الحال بزاف ..

- عرس ياسين لي كنا بغيناك تكوني أما حتى عرس هاشم ماعرس هناك الله

- حنان : ( بعتاب) ماما هههه الله يهديك

- نعمة : ومالي كذبت خوك حرام واش بغا يدير عقلو شفنا ليه بنت الناس غايبقى حتى يطيرها من يدو

- حنان : ( كضحك) ديك البنت لي وريتيني خت سناء ياك .. الصراحة فنة ماشاء الله كدخل للخاطر

- نعمة : ( تنهدات ) حطيها على جرح يبرا بحال الحلوة أبنتي الله يهديه وصافي

- حنان : ماعليش اماما خليه على خاطرو يلاه طلق نهار يبغي راه هو ايجي يقوليكم بغيت نخطب

- نعمة : ياربي غير مايمشيش لينا لشي وحدة كثر من هاديك لي طلقها مقادين على هم وربي شاهد .. ياربي تكون من نصيبو قوت ياربي

- توفيق : أش كيعاود أمير كيخليتي دراري؟

- حنان : الحمد لله أمير والخدمة .. دراري راه بالكشايف باش تفرقو معايا ( عنقاتهم) والله حتى توحشتكم وتوحشت كسكسو ورفيسة ديالك اماما

- نعمة : ( فرحانة ) نصايبها لبنتي لي تشهاتو خاطرك نصايبها ليك ..

_____________

- تغدى هو وفؤاد فواحد السناك قريب للكلينيك ورجع للعندها لقاها ناعسة خرج على برا كيتسنى يشوف الطبيب باش يݣوليه كيف بقات حاليا ..

- سول على البيرو ديالو دق حتى سمع الإذن ودخل ݣلسو وسولو على أحوالها ..

- الطبيب : الحمد لله حاليا الحالة ديالها راه مستقرة واخا تضررو الأعضاء الداخلية حيت الضربة كانت غارقة وخسرات بزاف ديال الدم ولكن قدينا نعتقوها .. الحمد لله لي من زهر ماتقاسش ليها الرحم الضربة جات قريبة بزاف من الرحم ولكن الحمد لله لي ماتقاسش

- كون تقاس الرحم كان غايكون عندنا مشكل كبير بزاف

- هاشم : (براحة ) الحمد لله ݣوليا أدكتور إيمتا تݣد تخرج من هنا ؟

- الطبيب : نهار السبت إن شاء الله غاتخرج خاصها عناية خاصة ومن ورا سيمانة غاتجيبها للعيادة عندي باش نبدل ليها الفاصمة إن شاء الله

- هاشم : ( بإمتنان ) كون هاني ادكتور أنا غادي نقابلها شكرا بزاف ..

- الطبيب : ( بإبتسامة) مرحبا وعلى سلامتها .

يتبع...