مجدول الذهب الجزء الخامس

- هاشم [ ببرود مامسوقش ] :

ختو طاحت وداوها للكلينيك ، ݣالت ليه بلي صحبتها لي لعبات عليها وطيحاتها فهادشي .. عرفات بلي السيد مزوج وعندو بنت ..

- فؤاد [ هزهز براسو ] :

نهار وريتي ليا تصويرتو ، عرفتو .. واحد الميكروب مايسواش ، كان خدام فالبوسطة ومابقاش .. رشيد عطاه ق/تلة ديال العصا .. عاد ݣر ليه بكولشي ، ݣاليه راه ماوقعاتش بيناتنا شيحاجة من غير الهضرة فتيليفون .. العجب لي مجاتش طلبات منك السماحة ..

- هاشم [ بصرامة ] :

ماعندها ماطلب ... لي كان بيناتنا فرقناه ، واخا متكونش خيانة بالفعل .. المهم راه خانت ، الخيانة كتبقى خيانة والغدر كيبقى غدر ، المرأة المزوجة الى شافت غير فشي واحد الشوفة وعجبها غير بينها وبين راسها ، راه خيانة هاديك .. المرأة لي كتعرف بينها وبين لي خلقها ، ومحسوبة على راجل .. عينها ماطلعهاش فراجل براني .

- وهي فاتت الشوفة لديك الجيه ..

- فؤاد [ بتساؤل ] :

مزال فقلبك شيحاجة من جيهتها ؟

- هاشم [ هز عينيه فيه كيشوف فيه ونطق ببرود مميت ] :

هاد الݣلب [ أشر لقلبو ] إلى مشا حتى بغا ، كيعطي دم جوفو على محبوب قلبو .. ونهار يحصل الغدر ، كيولي المحبوب بحال ديك الحجرة لي كنلݣاوها فطريق ونهزوها ونحطوها على جنب ..

- فؤاد :

سبحان الله العظيم ، حتى واحد مكان راضي على هاد الزواج ، لا انا لا خوك لا والديك ، عمي توفيق مسكين ماخصرش ليك غير حيت مكايدخلش فصوالحك ..

- هاشم :

الى ماغلطناش مكنتعلموش ، مزيان الواحد يغلط باش يتعلم ..

- فؤاد [ كيبسط معاه ] :

خايف غير نهار تنوي الزواج ، تكرفص ديك بنت الناس وتخرج فيها حر لي وقع ليك ..

- هاشم [ خنزر فيه ، موقف يدو قدام وجهو ] :

هاد الصباع واش مشابهين ، كيبان ليك واحد ݣد الثاني ؟

- فؤاد [ بنفي] :

لا ..

- هاشم :

وهكاك العيالات ، حتى وحدة مكتشبه لوحدة ، وانا ماشي شماتة ولا مريض باش نتكرفص على بنات الناس ، ولا باش نخرج حر وحدة ماتت بنسبة ليا فبنت الناس ، مخلية دارهم او والديها باش نجي نتكرفص عليها ، نفضل نبقى حياتي كاملة بلا زواج ... ومانأديش وحدة ستوصى بيها الحبيب خيرا ..

- داكشي لي داز مات ودفنتو ، لي كتطرا لينا فهاد الدنيا كلها من الخير ، بنادم يفكر بحال هكا .. لي جات من الخير ، المؤمن مصاب ربي كيختابر صبرك واش غاتحمدو ، ولا غاتتكبر وتجبر على عطيتو ..

- ربي متاحني ، بالعكس منين ݣلست مع راسي والله المعبود حتى فرحت ، عرفتي علاش عرفت ربي كيبغيني ، حيت ربي إلى بغا عبد من عبادو كيبتاليه .. غير الواحد هاد المرة غايقيس قبل لا يغيس ويعرف معامن ، ويعرف شكون هادي لي اتشاركو حياتو او فراشو .. الى مكانتش كتشبه ليك فالمعدن بلاش ..

- فؤاد [ هزهز راسو ] :

بصح عندك الصح ، الله يسمح لينا وصافي على لي فات ، شحال ضحكنا وزهينا ..

- هاشم [ تبسم ] :

دوي على راسك ، ݣاع الناس كانو كيدويو عليك ..

- فؤاد [ شافيه وبقا ساكت ] ..

- هاشم [ هزهز ليه براسو غامزو ] :

اش تم ، خرج من رونضتك ..

- فؤاد [ تقاد فالݣلسة ، هز كاس دالما شرب منو ، كان كيبان عليه توتر ، رجع شاف فهاشم لي كان كيشوف فيه بشك ] :

شحال هدا ، شي 8 سنين كان وقع ليا واحد البلان مع واحد البنت ...

- هاشم [ ضحك ] :

هكاك ، ودابا عجبتيني كمل .. باينة من هاد تحنحين ديالك بلي عݣرتيها ..

- فؤاد [ تنهد ] :

تعݣيرة ديال الغدايد أصاحبي ..

- فؤاد [ حك حاجبو وحنحن بصوتو رجولي ] :

عرفتي البزار لي كان ديال سي رحال ؟

- هاشم هزهز ليه براسو بمعنى أه

- فؤاد :

كانت خدامة فيه واحد البنت ، ديك الساع كانت مزال صغيرة عندها شي 22 ولا 21 مابقيتش عاقل مزيان .. كنت كنمشي نتقدا عندو وكانت ظريفة ، كتعامل زوين .. وحتى أنا كنت كنتعامل مزيان ، عمري قللت عليها العفة ، واخا الصراحة كنت كنشوف فعينيها بلي كنعجبها ..

- ولكن درية باقي صغيرة مابغيتش نطيح فشي مونتيف .. واخا كنت خاربها بنات ..

- هاشم [ ضحك بطنز ] :

توريني ، كمل ..

- فؤاد [ دور لسانو وسط فمو وكمل كلامو ] :

جاتني واحد نهار كنت معصب ، جاتني للخدمة ... ݣالت ليا بلي البزار سدو سي رحال وخوا أسفي ... وبغاتني نشوفليها شي خدمة .. ، وانا ماعقلش على راسي نكذب عليك كنت معصب ..

- ݣلت ليها مالي فاتح جمعية هنا ، خدمة وحدة لي كاينة فهاد المحال الى بغيتي ديري ليه الميناج ، والى عينك فشيحاجة أخرى غير بدلي الساعة ..

- هاشم [ غوبش وتݣاد فالݣلسة ، بخشونة وبصوتو لي بحال الرعدة ] :

حمار ، والله حتى حمار أستغفر الله العظيم ..

- فؤاد [ مورك على محاجر عينيه ] :

قسما بالله المعبود تا كنت معصب ، وندمت .. وقلبت عليها باش نطلب السماحة مالݣيتهاش ، حتى لمأخرا فعرس ياسين ..

- هاشم [ غوبش ] :

أش جابها لعرس ياسين ؟

- فؤاد [ حك على راسو ] :

صاحبت خت العروسة ..

- هاشم [ ببرود ] :

ماتݣولهاش حتى بضحك ..

- فؤاد [ تنهد ] :

قسما بالله ، ترا فاش شتها داخت بيا دنيا ، عرفتي ديك البنت لي كان ضعيفة ، وكتشوفيا وتحشم وحناكها كيتزنݣو كي ولات ، بحال البلارة أصاحبي ، واحد الطولة والقلدة .. تا ر مايمكنش ، ريحتها بقات لاصقة ليا فنيوني ..

- هاشم [ بصرامة ] :

وكتحݣݣ فيها ، دير عقلك ابنادم راه عندك 40 عام ، حتارم اداك شيب لي نايض ليه فنواضر ، وحق الرب الذي لا رب سواه .. أجاتني حشومة انت ݣد ݣداش حشومة تضرب .. [ وقف ] ..

- فؤاد :

وصاحبي حنا كنعاودو ليك ..

- هاشم [ بتهديد ] :

غاتفوت عليك السيدة ، مافيا لي يتحاشم مع النساب ، ودير عقلك اش كتسنى لي متزوج ودير ولادك حتى ليمتا ، حتى ضرب 50 ..

- فؤاد :

انا كتعطيني من قاع الخابية ، وانت لي هاجم على السيدة فمحالها ومسمعها الهضرة ؟

- هاشم :

الشيطان كيحضر ، نهار نشوفها انطلب منها السماحة ، ونبينا عليه السلام ، جمع راسك شوية .. راه كبرتي على هاد الهبال ، حيد الله يرحم جدك نمشي بحالي لا حول ولا قوة إلا بالله العلي العظيم الله يرض بيك ..

- ضرب فيه وخرج من عندو ، مخليه غارق فندامة كثر مكان نادم ..

________________

- دازت سيمانة على زواج سناء .. ݣالسين على الطبلة ديال العشا حتى نطقات صفية موجهة كلامها لعبد الرحمن :

خاصك تدوي مع سي توفيق ، تعلمهم بلي نهار الخميس إن شاء الله عارضينهم للعشاء ..

- فجهة أخرى ، فشقة راقية مكونة من زوج بيوت وصالة كبيرة ، الكوزينة كانت واسعة ومجهزة كلها ، بيت النعاس حتى هو مفرش ببيت نعاس فالبيض ، زربية فالݣري ، وكوڤرلي فالݣري مغطي بنموسية ، فوق الكوافوز مستفين مكياج نسائي وعطور نسائية وعطور رجالية ..

- الصالون كانو فيه غير السدادر وزربية فالبيج فقط ، مكانوش الطلامط وطبالي .. كانت واقفة فالكوزينة كتوجد فالفطور ، لابسة ݣندورة خفيفة فاللون الغوز .. طلقة شعرها وجامعاه بمقيبط .. كتحط فوق الطبلة وعقلها سارح ..

- دخل بطولتو او وجهو لي كان نازل عليه النور ، تبسم فوجها .. هي غير شافتو خدودها كتسحاتهم الحمورة ، رضات عليه بنفس الإبتسامة وكملات الحطان ..

- قلبها كان كيضرب بجهد ، مزال ماتعودات على تواجد ديالها مع راجل تحت سقف واحد ، فينما شافتو كتحدر راسها وتحشم منو .. مكانوش مزوجين عن حب ، وهدا كان سبب أنها مكانتش قادة تزعم عليه ، غير كتكون معاه فبلاصة قراب كدوخ بيها الدنيا ومكاتبقا عارفة مادير ..

- لاحظ الإرتباك ديالها ، جر الكرسي وݣلس مقابلها بنظراتو من تحت رموشو ... كان متأكد بلي ماعندهاش خبرة مع الجنس ديال الرجال .. غير من تصرفاتها معاه ، كانت كتحاول تفاداه ، ماشي حيت محاملهاش حيت خايفة وحشمانة ..

- وهادشي أثر ليهم على أول ليلة ليها معاه ، ليلة دخلتهم لي ماكملاتش .. غمض عينيه ، تفكر البكا ديالها فديك الليلة ، يديها لي شدهم بيديهم وهوما باردين وكيترعدو ، كلامها ليه بلي مقاداش وبلي خايفة ...

- كان من الواجب ديالو ، أنو يطمنها ويهدئها ، واليوم دازت سيمانة على المجية ديالهم لدارهم ، ومزال مكانش قاد يقرب ليها ، حتى باش يعنقها مكانش قاد .. كلما قرب ليها كترعد ، وغير كتشوفو كتحشم ودور وجها ..

- ياسين [ هز طرف من الكومير ، كيدير فيه الفرماج ، بصوتو الرجولي الهادئ] :

داركم عارضين علينا نهار الخميس إن شاء الله ..

- سناء [ جرات كرسي وݣلسات ] :

أه فخباري ، قالتها ليا ماما لبارح فاش هضرات معايا ..

- ياسين [ كب ليه كاس ديال القهوة ] :

سناء ..

- سناء [ هزات فيه راسها ، بصوتها الحنين ] :

نعام !!

- ياسين [ ناظرها بعينيه العسليين ] :

خاصنا نشوفو شي طبيبة نفسية ..

- سناء [ بإستغراب] :

وعلاش زعمة ؟ لمن ؟

- ياسين :

لينا بزوج ، بالعكس راه ماشي شيحاجة لي خايبة ، راها حاجة مزيانة غادي تعاونا فالبدية ديال الزواج ، يمكن أنا مكنعرفش نتعامل ولا شيحاجة .. ماعرفتش ، [ كان كيحاول يحسسها بلي هو لي فيه المشكل ماشيش هي] مزيان تكوني معايا وتسمعيها شنو غاتݣول ...

- سناء [ حدرات عينيها كتدهن طرف ديال دالخبز ] :

واخا لي بان ليك ..

- ياسين [ بإبتسامة ] :

الله يرضي عليك ، انا غانشوفو شي طبيبة مزيانة ، وناخود رونديڤو عندها إن شاء الله ..

- سناء [ بلاما تشوفيه] :

إن شاء الله ..

__________________

- واقفة قدام المحال ديالها ، فرحانة ولمحة الضحكة مزينة عينيها ... شفايفها لي كانو بحال التوت الى فاح ، لابسة كسوة طويلة فالكحل حريرية مع شال ، كانت محطوط قدام المحال طبلة طويلة ، محطوط عليها حلويات مغربية ، زوج صواني ديال أتاي ، وصينية فيها الحليب و طبسيل كبير فيه التمر ..

- الناس كانو كيجيو يكتاشفو المحال ، وعلامات الإعجاب ظهرة على عينيهم .. كيشربو من الحليب ويدوقو من الحلوة وتمر ، يدهلو للمحال يستكشفوه وكيخرجو ..

- نطق صوت تقيل ورزين :

هاواحد السلام عليكم ..

- قوت غير شافتو فرحات .. جاي وفيدو مشموم ديال الورد ..

- عبد الرحمان [ مدو ليها ] :

الورد للوردة الغالية ونجمة العالية ، الله يكمل عليك بالخير أبنتي ، ويفتح عليك بيبان الخير ياربي ..

- قوت [ خدات من عندو الورد ، عنقاتو وباست ليه يدو ، الناس لي تم كيشوفو فيهم ] :

اللهم آمين أبابا ، لهلا يخطيك عليا ، فين هي ماما مجاتش معاك ؟

- عبد الرحمان [ هزهز براسو بنفي ] :.

لاواه أبنتي ، دار راجل ختك جايين نهار الخميس ، راها ݣالبة الدار سفاها على علاها ، حتى انا جيت انبارك ليك ونمشي ، عبد الكريم مسافر ومكاينش لي غايكون ليا فالمحال ..

- قوت [ كتشوفيه بفحر وحب ] :

ربي عوين أبابا ، لهلا يخي عليا قدامك ياربي .. [ باس ليها راسها عطاها بظهر مقابلاه حتى ركب فطوموبيلتو ومشا .. تنهدات تنهيدة طويلة ، أش بغات فهاد الدنيا مزال ، رازقها ربي بوالدين من اطيب خلق الله ، رباوها أحسن تربية .. عمرهم خسرو ليها الخاطر ، المحبة لي تقلب عليها عند شيحد هاهي عندها ..

- تفكرات الغلط لي دارت نهار بغات واحد ، مايستاهلش أصلا تفكر فيه ولا دخلو للقلبها ، ولا تخون ثقة والديها على ودو .. حمدات الله ألف مرة ، حيت عرفاتو أش كيسوى .. دخلات داك الورد للداخل ..

- الناس كيجيو ، يدوقو من حلويات الإفتتاح ، يدخلو للمحال يدورو ويخرجو .. وهي كان فمها غير :

مرحبا ، مرحبا بيكم المحال محالكم ..

- هادو هوما الكلمات لي كانت كتستقبل بيهم الناس ، مع الإبتسامة البشوشة على وجها ... دخلات عندها خولة كتشوف وراها معصبة :

الله يخليها ماركة ويخليها سلعة ، بنادم والله ماعندو الكنارة علاش كيحشم ، شتي أنا شي نهار غانقسم شي حد على زوج .. ولا غانوصلو انا وشي واحد للكوميسارية ..

- قوت [ بإستغراب] :

أمالك ياك لاباس ، داخلة بحال العجاجة ياك شي باس مكاين. .

- خولة [ خلاتها كتدوي ، ومشات كمشات على الحلوة ديال التمر وحلوة زنجلان وكاوكاو ، مع كاس ديال أتاي ، عاد رجعات عندها ضارت ورا الكونتوار وݣلسات ] :

بلاتي ناكل بعدا ..

- قوت [ غير كتشوفيها ] :

ياربي نشد لساني ومنقوليكش تاكلي جنابك ، حيت مكنبغيش ندعي ، أستغفر الله العظيم ياربي.

- خولة [ كتاكل وتبنن ] :

وراه بحال الى قلتيها نيت ، أنا جايا أصاحبتي ، او واحد جالافج حرام واش بغا يحشم على عراضو ، لاصق ليا فجنابي حتى لهنا .. والى شافو شي حد يوصلها لبا سخونة ، يقوليك غير انا لي مضصرة بنادم عليا ..

- بنادم جهل ، كدوري فيه بحال الى قلتي ليه غير زيد تبعني ..، قسما بالله هاد للمرة انقسم شي واحد ولا نفلقة بشي تيمومة نسيفطو يدير الغراز ..

- قوت :

خلي بنادم ، لي ماقدو فمو يدوي بجنبو ، ياك انت داخلة سوق راسك ، جامعة راسك وصافي سالينا ..

- خولة [ هزات فيها راسها ] :

فخبارك تلاقيت مع صلاح فدورة ، مادوانيش مالف كيعيط عليا يسول عليك ، دابا مادوانيش ݣاع ..

- قوت [ ݣلسات ] :

غير خليه ، يطوف بساحتي والله حتى نجمع عليه أمة لا إله إلا الله ، ونوصلو للمخزن يتربى ، باش يفرقني ديك الساعات .. فكرتيني ، غاتجي نهار الخميس عارضين على دار ياسين للعشا ..

- خولة [ هزهزات كتافها ] :

وياختي انتوما عارضين على دار ياسين نسابكم ، وأنا لاش غادي نجي .. لالا أختي مكاين لاش ، أيخصني نبات عاوتاني .. راه مابقيتش كنتبت فدار ..

- قوت [ بترجي ] :

وحرام عليك ، خالتي حورية راه مكتقول والو هي وعمي سيمحمد ، انت زعمة دايرة ليا فيها عزة نفسي ما بتسمح لي ، وبراكة من البحوط الخاوي ..

- خولة [ حطات داك طبسيل خاوي ] :

إن شاء الله من تم لتما يحن الله ، يلاه انا مشيت جيت اباش نطل عليك ونقوليك مبروك الحب ونرجع للبزار ..

- قوت [ كضحك ] :

الله يبارك فيك ، والعقبة ليك نشوفك فبلاصة لي باغياك نشوفك فيها وانت مابغاش يهديك الله ..

- خولة :

براكة ادهيبية وحدة ، نزيد أنا الأخرى بغيتي السهري يتيري فينا ..

- قوت : يعاودها لراسو ، صافي هنينا ..

- خرجات خولة رامية ليها بوسة فالهوى ، بقات متبعاها بالعين حتى بانت ليها ضارت للزنقة لوخرا ..

- واقف جنب طوموبيلتو قدام مكتب عقاري ، حتى كتبان ليه واحد طوموبيل وقفات ، خرجو منها زوج ديال رجال ... قطعو الشانطي وجاو لعندو .. سلمو عليه سلام رجولي ..

- سي هاشم ، الله يسخر وإن شاء الله ماتكونش هادي اخر معاملة بيناتنا ..

- هاشم [ بصوت جوهري ، وبحة ثقيلة ] :.

اللهم آمين ، بسم الله .. دخلو لداك المكتب العقاري ، كملو الإجراءات ديال البيع ديال الدار .. دوز ليه فلوسو كاملين للكونط ديالو .. خرجو من المكتب وكل واحد راضي ومرتاح ..

- طلع فطوموبيلتو ، غادي وساهي مع الطريق تنهد تنهيدة طويلة .. كان غادي للبلاصة وحدة محددة ، وقف بعيد موقف طوموبيلتو ، نزل قاطع الشانطي متوجه للحدا البحر ..

- بانت ليه واحد الصخرة ݣلس عليها وتقبل مع الماج وديك الشميسة الدافية ، سيناريو ديال حياتو كلها دازت قدامو .. كون شي واحد فبلاصتو كون قربل الدنيا بلي فيها ...

- ولكن كيحمد الله لي مدارش هكا ، كيحمد الله بلي ضارين بيه ناس كيبغيوه ، إلى غلط كيوعيوه ويرضوه للطريق الصحيحة ... عرف مزيان من هادشي لي وقع ليه ، بلي مايدومو ليك غير ناسك حبابك ، او والديك ..

- تجربة داز منها علماتو بزاف ، علماتو من الأول يحط النقط على الحروف ، علماتو نهار ينوي الحلال مع شي وحدة يعرف راسو فين غادي يحط راسو ... ونهار يختار شي وحدة يكون معدنها بحال المدن ديالو ..

- قدما كان هادشي قاصح عليه ، ومزال ماناسيهش غير كيحاول يتناساه ، ويطوي الصفحة ، قدما حامد الله حيت ختابر صبرو .. وداز من درز غادي تضاف للدروس لي دوز طول حياتو ..

- ربع يديه ومغمض عينيه كيستنشق الهوى ديال البحر ، رجع حل عينيه سارح بيهم فعظمة الخالق ، حتى هرس هاد الهدوء صوت انثوي متردد :

هاشم ..

- بلع ريقو .. حس بواحد البرودة فظهرو ويديه ، صوتها كيعرفو مزيان مغاديش يخفى عليه .. مظارش مشافش فيها نهائيا ..

- تقدمات بضع خطوات ، كطل على وجهو .. كانت خايفة ومترددة ، ولكن كان ضروري ماتخطوي هاد الخطوة ، حدرات راسها ورجعات شافت فيه :

- نـسرين :

كانت عارفة بلي غادي تجي لهنا [ تبسم بإستهزاء] .. سونيت عليك تيليفونك طافي ، وقيلة بدلتي نمرة ، اصلا ضروري تبدلها من حقك .. ، سونيت للمحال ، قالو ليا بلي مشيتي للمكتب العقاري ... كنت تماك بغيت ندوي معاك ، ولكن كانو معاك شي رجال ..

- قالو ليا بعتي دار ، المهم كنت بغيت نهضر معاك وتبعتك للهنا ... [ ضار خنزر بيها بشوفات باردين ، شوفات كيبينو بلي داك الإنسان محاملش الشوفة وجهك ] ..

- هاشم [ ببرود ] :

نصبحة ، بدلي الضومين ديالك ، سيري شوفيليك معهد ديال التمثيل ، يݣد ينفعك حسن من هاد تاموحاميت ديالك .. دايرة راسك زعمة راه كتعرفيني وعارفة بلي غانكون هنا ..

- إيمتا أصلا ، كان كيهمك فين كنمشي وفين كنجي وشنو كنبغي ، الى سولتك شحال كنلبس فرجلي انلݣاوك معارفلش ، الى سولتك اشمن لون كيعجبني ، جوابك غايكون منعرف .. من الأخر ، لاش لاصقة ليا فجلايلي أش كاين ؟

- نسرين [ كتلعب بيديها قلبها كيضرب ، عنرها ماشافت بحال هاد الوجه ، كان ديما كيتعامل معاها بالحنان ، كان كيحاول ديما يوصل ليها داكشي لي باغي بلاتي هي أحسن ، هاد الإنسان البارد لي قدامها عمرها شافتو ] :

هاشم ، الله يرحم بيها الوالدين غير سمع ليا ، أنا مابغيت منك والو غير سمع شنو غادي نقوليك ، والله مابقيت أنوريك وجهي ، أصلا انا غادة غادية بحالي ، غادي نرحل للطنجة إن شاء الله ..

- هاشم [ طلعها ونزلها ] :

ولاش كتݣوليها ليا ، اش بيني وبينك ؟ دوي مغانبقاش مݣابل الخوى الخاوي ..

- نسرين [ غرغرو عينيها بدموع ] :

بغيتك تسمح ليا ، راه قسما بالله مكايديني نعاس ، بغيتك غير تسمح ليا بغيت نمشي وأنا مرتاحة ، هادشي لي بغيت منك ..

- هاشم [ هز حاجب وهبط الثاني عاض على شواربو ، شافيها بنص عين ] :

علاياش غانسمح لك ، واش على الغدر ولا على قلة العفة ... ولا على الثقة لي كنت عاطيك اشريفة ، ولا علاياش بضبط ..

- نسرين [ كتبكي ] :

انا عارفة راسي غالطة من ساسي لراسي ، قلت العقل ، ولفت لي بغيتو كنلقاه قدامي حاضر ... الصحابات لي كنت دايراهم خواتات غررو بيا ، وخرجو عليا وخرجوليا على حياتي كلها ..

- انا عارفة كونما كنتش ساهلة ، مغاديش نطيح بين يديهم ، ولكن انا كانو مناخري للسما .. غلطت ، ودرتها قدها قد راسي وخسرت راسي خدمتي عائلتي ، والديا مابغاوش يشوفو وجهي .. با مريض مبري مني ، خويا حتى هو مابغاش يشوف فيا ونكرني ..

- بقيت بوحدي ، حتى واحد مامعايا ، طغيت وتجبرت .. تعميت ، وقلت العقل دارتها ليا ، انت كتعرف بينك وبين الله ، وعارف بلي بنادم خطاء .. حنا ماشي ملائكة ، وربي لي خلقنا كاملين كيسامح ، خلي البشر ..

- أنا قبل مانطلب منك انت السماحة طلبتها من الله ، حيت غلطت فحقو هو الأول ، وغلطت فحق راسي وفيك وفدارنا ... كنطلب من الله يسمح ليا ويغفر ليا على ݣاع لي درتو ..

- [ كتشهق ] :

انت ولد الناس ، عمري فحياتي شت بحالك ، وعمري غانشوف بحالك ... ݣاع الحوايج زوينة مجموعين فيك ، إيجابياتك كثر من سلبياتك ، ولكن انا مانستاهلكش ، إن شاء الله ربي يلاقيك مع بنت الناس لي تعوضك على مادرت فيك .. غير هو وغلاوة والديك عندك سمحليا ..

- هاشم [ شاف فيها ببرود ، طلعها من رجليها لراسها ، نطق بهدوء ] :

غدرتي راسك ابنت الناس ، وغدرتي والديك قبل مني ، الى سمح ليك الله أنا مسامحك .. الله يعرضك السلامة ، وشتي فهاد الزواج ، ماشي غاتي لي كنتي غالطة ، أنا غلط فيه من ديپار ..

- غلط نهار قبلت على راسي ، شي حوايج انا ضدهم .. ومراضيش عليهم ، غلط لي خديت وحدة مفششة ، والغلط لي درت هو ݣلت راه غاتبدلي ، نسيت بلي الواحد صعيب يتبدل ، وبلي الواحد خاص هو يبدل راسو ماشي تا تبدلو ..

- عطاها بظهر :

ربي لي كايسامح ، أما البشار سماحتو مغاتزيدك مغاتنقص فيك ، الله يعاونك .. خلاها واقفة دموعها هابطة سخونة ، بقات متبعاه بالعين حتى طلع فطوموبيلتو ومشا ..

______________________

- وصلات 8 ديال العشية ، دخلات دوك البلاطويات للمحال ، جمعات ديك الطبلة طواتها ، ودخلاتها حتى هي للمحال هبطات واحد الريدو الرقيق ديال الڤيترينة ، هزات التيليفون ديالها دوزات واحد النمرة :

ألو ختي ، لاباس عليك لهلا يخطيك ... ربي يخليك كولشي زوين تبارك الله عليك ، هانتي غدا فصباح دوزي ليهم إن شاء الله صافي .. صافي أختي الله يعاونك ..

- قطعات مع السيدة لي تكلفات ليها بالبوفي ، هزات ساعتها دارتها فيديها من زرا مكانت زولاتها حيت عنكشاتها .. هزات ساكها دارت فيه تيليفونها ، طفات الضواو وخرجات سدات الباب ، هبطات الريدو سداو ودارت ليه القفل ..

- قدات شالها ، حدرات راسها وتمات غادية فطريقها ، غادية حادرة راسها مرة مرة كتهز راسها تشوف على يمينها وشمالها ، قطعات الشانطي للجهة للوخرا ، مع حطات رجلها على التريتوار .. حسات بيد قوية شداتها من كتافها ودوراتها بجهد ..

- هزات عينيها فيه وملامح الصدمة ودهشة على وجها ..

- قوت [ تنطرات منو بصوت عالي متجبر ] :

حيد يدك الموسخة عليا أبنادم ..

- صلاح [ واقف كيشوفيها بعينيه الزورق ، كان شخص فاواسط الثلاثينات من عمرو ، عاقد غوباشتو باين عليه معصب ] :

واش غانبقى تابعك بحال الكلب ، ياك لاباس أبنت العطار ..

- قوت [ هزات صبعها بتهديد ] :

أقسم لك يمينا ، وماتعطيني شبر ديال تيساع ، حتى غاندير صباعي فودنيا ونجمع عليك أمة لا إله إلا الله ، ونقوليهم باغي تعدا عليا ..

- صلاح [ كيضحك ] :

هاي هاي على المشة ، حتى انت كبرتي وليتي تݣولي مياو ، جربي يلاه غوتي نعاونك .. [ زير ليها على يدها ] غاندزيو بحالنا بحال الناس لي بعقلهم ، وغاتمشي لداركم ..

- قوت [ كتجار هي وياه درها فيدها ، حتى من شالها تلاح على كتافها ] :

وبعدي مني أعباد الله ، وفرقني وفرقني ودير النفس ، و ب عد .. م ني [ كتورك على كل حرف من كلامها ، وبيدها لوخرا دفعاتو من صدرو ] .. هز يدو باغي يجرها من الساك .. حس بيد قاصحة شداتو من دراعو دوراتو لعندو ، بصوت لي كيبورش اللحم الى سمعتيه ، بديك اللكنة والخامة والهيبة لي فيه :

ياك شي باس مكاين أ شريف ؟

- قوت صلاح ضار لعندو ... كانو مقاربين فطولة ، واخا صلاح كيبان كبر منو فالسن بحكم الشعيرات الخفاف لي عندو جناب نواضرو ، وكان عامر شوية عليه حيت كان كيلعب الحديد .. خنز فيه وحط يدو على اليد لي شادة فيه مهبطها ..

- صلاح [ عاݣد غوباشتو ] :

وتا شغلك ، أش دخلتك بدل الساعة ..

- قوت [ بترجي ] :.

خويا ياسين ، صافي أخويا ما وقع والو ..

- صلاح [ ضار شاف فيها ، وضحك بإستهزاء ] :

تبارك الله ، ودايرة فيها شريفة ... وليتي تعرفي العزارة كيبان ليا وليتي لولاد أسفي كاملين .. مع آخر كلمة ݣالها حس بضقة جاتو للوجهو من عند ياسين ..

- تلاح عليه كيعطيه على جهدو .. ضربة فيه وضربة من صلاح لي مكانش شي واحد لي ساهل ، قوت بغات تفك مالقات ماتفك .. بدات كتغوت وتعيط علا وعسى شي واحد يدخل .. كانو ناس قلال غاديين جايين ، ولكن واقفين كيتفرجو ..

- ياسين [ كيدخل ليه فالبونيات مكشكش ] :.

أنا انوري لحمار تاع بوك توقف على بنات الناس ، الى مارباوك والديك انا نربيك الكيدار ... ناضت المطايفة كل واحد بلاصة حد فمو مبليسية ..

- ياسين نجر من بلاصتو ، وصلاح تدفع بيد قوية جا مليوح ݣالس .. بصوت قوي كيزلزل السمع وبصرامة :

ياســـين ، براكة .. اش هاد تاهيماجيت فين عمرك ابنادم كنتي تشلض فالبشار ..

- ياسين [ تعصب كيمسح على نيفو ] :

الحيوان ، واݣف على البنت باغي يهجم عليها بزز ، هاشم راه ماسمعتيش اش كيݣول للبنت الموسخ لي حطو ..

- هاشم [ كيهدن فيه ] :

ولاو واش انت فغابة تهجم على بنادم ؟

- وقف صلاح كان الشخص لي دفعو واقف بيناتهم ، كان فايتو فطولة والعرض ..

- صلاح [ كيعرعر ويخسر الهضرة ] :

نعاسها غالي بنت العطار ، شحال من مرة ******* ؟ إلى سميتك راجل ماتخباش برب العالي حتى ***** ..

- هاشم [ ضار عندو هاز حاجب ومنزل الثاني ، كيشوفيه شوفات باردين ، تقابل معاه عينيه فعينو ] :

أش ݣلتي ؟ شدو من دراعو دفعو ] سير بحالك ..

- صلاح [ رجع عندو مقرب ليه عينو فعينيه ] :

وإلى مابغيتش ، ياكما حتى انت ***** بحالو [ بدا يضحك ضحكة إستهزاء ] ..

- هاشم [ بقا ساكت ، كيتنفس بهدوء .. كيدوز لسانو وسط فمو عاض على باطن حنكو .. على غفلة شد ليه يدو لواها ليه ورا ظهرو ، مطرضݣها ليه حتى تسمع صوتها وصوت صرغة منو ، نزل بجبهتو عطاه بروسية ، خلاه طايح مجبد ونيفو مسرسر بدمايات .. بعد كينفض فيديه ] :.

ݣلنا ليك سير البطل ، كتخليونا نوسخو يدينا أصاحبي .. أستغفر الله العظيم ..

- هز عينو بان ليه العساس ، دار يدو فمو وصفر ليه ، جا عندو كيجري وݣاع لي تما حابس كيتفرج ..

- نعام أخويا هاشم ؟

- هاشم [ بأمر ] :

شوف هاد الموسخ ، هزو عيط ليه على شي أومبيلونص ، ولا ديه عندك لتشابولا داويه ، حيدو من هنا لا يعطر فيه شي واحد ..

- جرو العساس بحال شي بطانة غادي بيه ، الناس لي تم كل واحد فيهم تشتت كردة فعل من نظرات هاشم ليهم ..

- هاشم [ شاف فخوه ] :

سير سبقني للمحال أنا جاي ، سير شوف اش دير لفمك تمشي لدار تخلع مرتك عليك وأنتوما عاد عرسان جداد ..

- ياسين [ شاف فقوت لي كانت ݣالسة حدا البوطو لونها مخطوف مرعودة وساهية ] ..

- هاشم [ قاطعو قبل لا يدوي ] :

غير سير أنا غانتكفل بيها ..

- ياسين هزهز براسو ومشا ، ضار هاشم شافيها ... تخطاها وتوجه لواحد الحانوت .. خدا من عندو قرعة ديال الما ، خلصو ورجع عندها ..

- عمر وقع ليها بحال هادشي لي وقع ليها اليوم ، هاد الݣيرة لي ناضت قدامها وهاد التفرشيخ ، عمرها حضرات ليه يديها كانو كيترعدو وقلبها غيخرج من بلاصتو ، البرودة طالعة ليها من رجليها ..

- بانو ليها قرعة ديال الما ممدودة ليها ، هزات راسها ... كيبان ليها وقف قدامها كيشوفيها ، بيدها الرقيقة لي كترجف خداتها من عندو ... حلاتها وشربات ، هزات راسها فيه ونطقات بصوت رقيق :

شكرا ..

- هاشم [ وجه ليها يدو لجهة راسها ] :

ݣادي فولارك ..

- بزربة هزات الشال لي كان طايح على كتافها ، وغطات راسها كيف مالفة كتغطيه .. عم الهدوء فديك اللحظة ، حتى هرسو بصوتو التقيل :

فين كتعرفي هاد الماركة ؟

- قوت [ هزات فيه راسها ، كانت كتحس بسخفة مقاداش تدوي .. مزال الخلعة مامشاتش منها ، الكلام كتخرجو بصعوبة ] :

كان .. كان كو كتش ف [ هبطات راسها كتبلع ريقها ، رجعات هزات راسها مالقاتوش .. كيبان ليها رجع للحانوت ، حدرات راسها حاطة يدها على قلبها ..

- رجع عندها وفيدو ساشية فيها بيموات .. مدها ليها ناطق بصوتو المتجبر :

هاكي شدي ، وجهك صفر ، كولي شيحاجة حلوة باش تولي مزيان ..

- هزات فيه راسها شادة من عندو ديك الساشية ، حلاتها وجبدات منها ميلكا حلاتها بدات كتقطع فطروفة وتاكل ، ناسياه هو لي كان واقف قدامها مربع يديه مݣابلها ..

- هاشم [ بهدوء ] :

شوية دابا ؟

- قوت [ هزهزات راسها ] :

الحمد لله ..

- هاشم [ بأمر وهدوء ] :

نوضي نمشي معاك حتى تقربي لداركم .. ولا نشد ليك طاكسي ..

- قوت [ بنفي ] :

لالا نقد نمشي بوحدي بلاما ... ماكملاتش كلامها حيت كيبان ليها سبقها او وقف شاف فيها ناكق ببرود :

اتبقاي ݣالسة تما بزاف ؟

- بقات كتشوفيه ، سلمات امرها لله وتبعاتو .. غادي معاها بحال شي نخلة مدلية جنبها هي لي كانت ماتعطيهاش كتر من 1.60 ..

- هاشم [ كيشوف قدامو ] :

ماكملتيش ليا فين كتعرفي داك خونا ؟

- قوت [ تنهدات تنهيدة طويلة] :

كان خدام كوتش فواحد لاصال كنت كنتريني فيه شي 3 سنين هادي ، من داك الوقت ماشتوش ..

- هاشم : واش بغا عندك ؟

- قوت :

ماعرفتش اش باغي عندي ، كان كيوقف لخولة صاحبتي كيقوليها بلي بغاني لزواج .. ودابا وقف عليا ..

- هاشم [ تبسم بإستهزاء ] :

لي ناوي المعقول كيديرو فعايل الشمايت ، متاكدة هدا باغي المعقول ..

- قوت :

انا عارفة مزيان شنو غراضو ، وعارفاه داهل على طمع ، مغانتسنى حتى واحد يقولها ليا ، انا ماشي صغيرة راه بعقلي ... داز عليا شحال من حاجة لي نقد نميز الانسان لي باغي المعقول ولا لي داخل على طمع ..

- هاشم [ دور راسو شافيها ، طلعها ونزلها وحبس المشية ] :

داركم قربتي ليها ، هاد المرة رضي لبال لراسك .. حاولي تولي تخرجي بكري شوية ، 8 ونص راه مامسلكاش .. عطاها بظهر باغي يمشي ، حتى وقفاتو بكلامها ..

- يحسابلي غادي تقولي ، شفتي خدمة العيالات شنو كيجي منها .. وكون كنت ݣالسة فدارنا معززة مكرمة ، ݣاعما يوقع ليا هادشي .. وبلي الهضرة لي قلتي ليا دان نهار عندك الصح فيها .. العجب .

- هاشم [ ضار شافيها مصغر عينيه ، جمعة يديه مربعهم مضرقها بطولتو ، بنفس البرود ] :

الهضرة لي ݣلت ليك داك نهار نسايها ، مكانش خاصها تݣال ، حيت انا بعيد على هادشي ، نهار غانحكم على شي حد غانحكم فشي حد كيخصني .. انت بعقلك وعارفة شنو ليك ولي عليك ، مغاتسنايش شي واحد يوريك شنو ديري ..

- قوت [ صدمها بجوابو ] :

زعمة بدلتي رايك من جهة الخدمة ديال العيالات ؟

- هاشم :

عمري مغانبدل شي حاجة كنأمن بيها ، ونعاود نݣولها الوحدة الى بغات تخدم ، تخدم من دارها ولا تخدم خدمة تكون بعيدة على جلايل الرجال..

- قوت [ بتحدي ] :

الكليانات ديال صحاب الذهب ، كلهم عيالات يعني أنا غانخدم مع العيالات ، ولكن انت لي راجل كتخدم معاهم مكتسميش هادشي إختلاط ..؟

- هاشم [ صغر عينيه ] :

جوابك على نابك أكحلة العين .. كون كنتي فشي موضع لي مافيهش بياعة رجال ، مكانتيش تسمعي الكلام لي سمعتي ، ولكن جيتي فسوق الرجال ، وحيت انا عارف هاد الوقت لي ولينا فيه ، كثرو فيه الذياب ، خاصهم غير يشوفو شي معزة داخلة للرحبة باش يصيدوها ..

- قوت [ هزات حجباتها ، هازة يدها كتأشر لراسها ] :

دابا أنا معزة ؟

- هاشم [ جاتو الضحكة ] :

دابا من هضرتي ديتي غير ديك المعزة ، سيري لداركم ... ونقصي من الهضرة شوية فيك كثرت الهضرة بزااف .. في أماني الله .. عطاها بظهر ومشا ، بقات واقفة حتى غاب ظلو على الزنقة ..

- غادية جايا فبيتها ، شادة تيليفونها فيديها وكتدوي مع خولة ..

- خولة [ ميتة بضحك ] :

شوفي غير دوزيها على لي دار لصلاح ، والله حتى عبر على بوه الحمار لاخر ، مريض .. انا راه منين شفتو فاش كنت جايا عندك حسيت بيه ناوي على خزيت ..

- قوت [ لابسة كيطمة وطالقة شعرها ] :

كنقوليك قاليا معزة ، وانت كتقولي ليا دوزيها ، ياربي مابغيتش ندعي ومافياش الدعاوي على الناس .. وشحال فيه ديال تفلسيف ، سبحان الله بحالو بحال جدو ..

- خولة [ بقات ساكتة ] :

قتيوتة ديالي ، عرفتي اش تفكرت [ بقات كضحك ] ..

- قوت [ ݣلسات على الكرسي مقابلة مع النرايا ، حطات تيليفون ديالها مقابل معاها ، كتهضر وتحل فمجر ] :

دوي ، عارفاك غير كتبقاي تضحكي وسط الهضرة اتقولي شيحاجة قدها قد راسك .. [ جبدات قرنفلة وبريكة ، حرقاتها وبدات تحكها على حجبانها ، وكدوزها على جدر شفارها ] ..

- خولة [ تكات مقابلة معاها التيليفون ] :

عقلتي فاش قاليك الغالي ، الى كانت عندي شي دعوة كنتمنى ربي يلاقيك مع واحد من زريعتي ، حتى الى ماكتابيتي ليا تكتابي لواحد من زريعتي .. وقيلة دعوة مولاي الغالي غاتحقق ..

- قوت [ حطات القرنفلة من يدها وخنزرات فخولة ] :

كدوي من نيتك ، ولا باغية غير تعصبيني فهاد الليلة ، شتي هداك انا الى تزوجت بيه ، نهز جلابتي مايعرفوني في زدت ، نعطي راسي لشي تلت الخالي .. واخا يبقى غير هو لي راجل فأسفي ، ولا فالمغرب كامل لا خديتو ..

- ناخود انا واحد بديك العقلية المرا بلاصتها دار ..

- خولة :

ولا تعيقيش ، راه قاليك الى بغات تخدم تخدم من دارها ، ولا شي خدمة لي تكون بين العيالات ، وراه ماكذبش راه هاد الوقت واخا تكوني داخلة سوق راسك .. كيبغيو يحبدوك ، عقلتي على ديك الأستاذة لي هجم عليها الحارس العام .. مسكينة دارت الغراز ، وفاش مشات ديكلاري ، البوليس كيماطلو فيها .. وكيديوها ويحيبو فيها ، او واخا الأساتذة كانو شاهدين حلفو لا شهدو معاها .. وفاش بغات تنتاقل مابغاوش يسنيو ليها ..

- قوت :

هادشي انا عارفاه مزيان ، ونعاود نقولها ، نهار نݣلس انا فدار راسي لي ايقولها ليا ماشي نتسنى شي حد يفتي علي الراي ، ونهار شي واحد يقلل عليا العفة فسوق ديال الذهيبية ، ديك الساعات انا لي اندير حل ..

- حتى حاجة مابزز كولشي بالخاطر ..

- خولة :

وحتى هو راه عتاذر ليك على داكشي لي قاليك ، ومن كلامو راه مقال حتى كلمة ديال العيب ، وانت لي كتحلي فمك .. باز واخد ليك الما وبيموات ، وجاي معاك ، هو راه فيه اداك الڤيس دالخدمة لي خايب ، واخا الى جينو نشوفو راه دينيا المرأة مخاصهاش تخالط مع الرجال ..

- قوت :

بديتي تاني ، انا داخلة سوق راسي الحمد لله ، ونهار لي نلقى راجل ليانا باغياه وكيما بغيتو ، ديك الساعات إن شاء الله يحن الله ، ودابا سيري تصبحي على خير ..

- قطعات عليها التيليفون ، هزات تيليفونها ومشات للبلاصتها .. تخشات فيها دايرة يديها ورا راسها كتفكر فلي وقع .. تفكرات ضحكتو وكلمة المعزة ، وجملة كحلة العين ..

- ولاهيلة قاليك المعزة ، مشاف هو راسو لي قدو قد الزرافة .. لا حول ولا قوة إلا بالله العلي العظيم .. واش زعمة أنا بصح غلطت فاش دخلت لسوق الذهيبية ؟

- مالني كنسرق ، داخلة سوق راسي ، محتارمة مدن كبار وفيهم دهيبيات بنات ، تخربيق الخاوي ، هاد المرة واله حتى نعطيه خو جوابو نعلمو يدخل سوق راسو ..

- فتحات المجر ، جبدات منو تسبيح ديالها ، بدات كتسبح وتستغفر :

أعوذ بالله من الشيطان الرجيم ، فين عمري انا كنت عصبية من غير مرة فشهر ، ياربي ايمتا تسالي خلاص ، راه مكتمشي حتى كتمحني وتخليني ندير شي حوايج لي ماشي هوما هادوك .. ياربي تسمح ليا ..

- هاد المرة والله مندوي معاه ، الله يهديه ، كيبقى نسيبنا حشومة .. ياربي تبتني ياربي تبتني ..

__________________

- وصل نهار الخميس ، قوت مامشاتش للخدمة ... دخلات للكوزينة حيت هي لي غادي تكلف بالطياب ، ماخرجات من الكوزينة حتى وجدات كولشي ، كتخدم برزانة وبتباتة ، يديها خدامين وهي ساكتة ..

- سونا الباب ، ودخلات خولة ، تكلفات معاها بالباقي ، غير سلاو الطياب دوزات قوت الجفاف على الكوزينة ودار ، عطراتها وبخراتها باش ريحتها تكون زوينة .. طلعات هي وخولة للفوق ، دخلات للحمام دوشات وخرجات ، لبسات واحد الجبادور فالخضر ملكي ، مع شال على راسها فالبيج .. سلسلتها فعنقها .. درقاتها بشال على عينين دار السهري ، مافيها لي تسمع منين جاتك قدام والديها ..

- وصل وقت كاسكروط ، وسونا الباب ، مشا عبد الرحمان يحل ، كان توفيق ونعمة ، ياسين وسناء لي كانت لابسة جلابة فالأحمر وقفطانها من التحت فالبيج ..

- سلمات على باها ومها عنقاتهم .. خلاتهم كاملين فالصالون وطلعات بجري لعند ختها للبيتها ..

- عبد الرحمان :

فين هو ولدي هاشم ؟

- ياسين :

عندو واحد الغرض يقضيه وغادي يخلط علينا أعمي ..

- نعمة [ كطل بعينيها ] :

فين هي قوت ..

- صفية [ بإبتسامة ] :

راهي فبيتها دابا تنزل ..

- نعمة [ هزهزات راسها بإبتسامة ] :

دخلات ليا لقلبي بحال نقيطة ديال العسل ، حتى خواتاتي قالوها تبارك الله ماشاء الله ، الله يجيب ليها شي نقرة فين يغبر نحاسها ..

- صفية : اللهم آمين فحياتك إن شاء الله ..

- الفوق بيت قوت ، ݣالسة وهوما مضورينها ..

- خولة [ كتهر فيها ] :

هاي هاي على زين ، واتاك ياختي الزواج ... شوفيلي الحنيكات والبيوضة ، لالا ياختي خاصنا نتزوجو حتى حنا ندوقو من حلاوة الزواج ..

- سناء [ كضحك حشمانة ] :

اودي غير كيبان ليك ، راه غير فوندوتان هاديك أشمن بياض الزواج ..

- خولة [ غمزات قوت ] :

أحيانة عليك ، خايفة لحسك من العين زعمة ، أجي لهنا كيداز نهارك كيكان معاك ياسين ..

- سناء [ هزهزات راسها ] :

كيفاش زعمة عادي ، كيفاش مافهمتش ؟

- قوت [ كتضحك ] :

سناء راه خاصك تشرحي ليها بالخشيبات عاد تفهمك ..

- خولة :

وليلتك الويلة ، زعمة ليلة كيدازت واش كان معاك حنين ولا هيماجي ، راه كاين شي رجال نهار الأول تقول اكانو سادين عليهم فشي كهف ، بحال الوحوش ..

- سناء [ حدرات راسها وجها تزنݣ] :

وهو مزال ماوقع والو ..

- قوت شافت فخولة وخولة شافت فيها :

كيفاش ما وقع والو ، أويلي .. ياكما ماشي راجل اويلي اسناء ماتقوليهاش حتى بضحك .. اويلي لا تكون ديك الطولة والقلدة على الخوى الخاوي ..

- سناء [ بنفي ] :

الا ، ماشي هكاك ... أنا لي ، راه انا لي ماقديتش وماخليتوش يقرب ليا .. هو مسكين عاطيني الخاطر مابغاش يبزز عليا ..

- خولة [ ضربات فخاضها ] :

اويلي ، ياك زواج وكنتي ميتة عليه ، كيفاش أنت لي ماخليتيه يقرب ليك ؟

- قوت [ بهدوء ] :

يمكن امع العيا ديال العرس ، راه بقى سيمانة والعرس خدام ودار كانت عامرة ، داكشي علاش الأيام مزال قدامهم ..

- سناء [ بحشمة هزات عينيها فختها ] :

انا راه مكنخليه حتى يقرب ليا ولا يعنقني ..

- خولة [ هزات حجبانها بإستغراب] :

ودخلة وسرطناها بجغمة ديال الما ، ولكن متخليش السيد واش انت هبيلة ، لاش مزوج بيك على زينك وكحل عينك .. راه السيد بغا الحلال باش ميقربش للحرام ، يبقى نيت عزري على هاد الحالة ..

- سناء [ طاح عليها الضيم ] :

وراه انا عمري تصاحبت ، عمري دويت مع شي راجل ... ولا كانت عندي علاقة مع شي حد راكم عارفين هادشي ، واش انا غير جيت وكنت ملهوفة على الزواج .. راه كنت بغيت الحلال نعيش أي حاجة فالحلال ..

- ولكن راني مخلوعة ، أكيثرب ليا كنموت بالحشمة والخلعة ... قلبي كيبغي يخرج من بلاصتو ، كنتفكر دوك القصص ديال الدخلة لي رجال كيتكرفصو على عيالاتهم ، وكيجيهم نزيف ، صافي كدور بيا دنيا كنبغي نسخف ..

- قوت : وشنو قاليك ياسين ؟

- سناء [ تنهدات تنهيدة طويلة] :

مسكين ماقال والو ، شاد ليا بالخاطر قاليا نشوفو شي طبيبة ، كيحاول يبين راسو هو لي يمكن جاي منو المشكل ، غير باش مايحسسنيش بلي انا لي فيا المشكل ..

- قوت [ حطات يدها على يد ختها ] :

وراه غير هادشي لي دار معاك ، أيوريك بلي هو ماشي بحالو بحال الرجال .. راه غير الخوف خلاك معمية ، فنظرك كون كان هامو غير الفراش غايصبر عليك ، والله مايصبر ايشدك بزز منك ..

- ولكن لا هو بالعكس ، شاد الخاطر ليك .. واش صباعك كاملين بحال بحال .؟ لا مختالفين وراه هكاك الرجال ، دوك القصص لي كتسمعي ديال رجال هيماجيين ماوعيينش معارفينش بينهم وبين الله ، على عكس ياسين ..

- أول حاجة بعدا ديريها ، شوفي طبيبة نسائية ، تقوليك أشمن بكارة عندك ... باش تعرفي راه هادشي خاص ديرو أي وحدة ، وانت نسيتي هاد القضية ، باش تعرفي واش عندك الساهلة ولا المطاطية ... باش حتى هو يعرف كيفاش يتعامل معاك ..

- وعاد ديك ساعات شوفو طبيبة نفسية لي توجهك ، وتحيد منك داك الخوف ، واخا انا كون سعفتيني ، توضاي وتصلي وتقراي القرآن وطلبي الله يريح نفسيتك ، ويسهل عليك كل حاجة صعيبة ، ربي أحسن من ألف طبيبة ، وديري لراجلك شي ليلة هي هاديك .. انا منقدش نصحك فهادشي ، الأستاذة خولة توريك [ شافت فخولة كضحك ]

- خولة [ خنزرات فيها ] :

كيفاش الأستاذة ، علاش انا أختي فايت فيا زواج وها تعاويد النصارة ..

- قوت :

ومالك اختي ، ظلي متبعة ليا الكروبات ديال النصائح الزوجية ، والقنوات لي كيفقهو العيالات لي مكايديوهاش فراسهم وفرجالتهم ، لي شفتيها ديري ليها حفظ وانت مزال حتى متزوجتي تنكري ..

- خولة [ رخات شفايفها ] :

لا مانكرش [ شافت فسناء ] :

ذوفي انوريك شنو ديري ، منين ترجعي من عند الطبيبة ، وغاترحمي ليا الوالدين .. سمعي ..

- سناء [ حلات معاها ودنيها كتسمعها شنو غاتقوليها ] :

كنسمعك ..

- خولة [ بتهديد ] :.

الى مغاديريش هادشي لي غانقوليك ، بلاما ندوي حسن ليا ونخسر الحجرة ..

- سناء : والله اختي حتى نديرو ..

- خولة :

المهم ياسين كيظل خدام ، مكايجي حتى العشية بليل ..

- سناء :

لا كيجي بنهار يتغدا وكيخرج ورا العصر وكيرجع لدار مع 9 دليل حتى كيصلي العشا فجامع .

- خولة :

صافي مزيانة ، خليها حتى يمشي مع العصر ، وغاتنوضي توجدي شي عشا يكون غزال ، ديري حوتة فالفران مشرملة ومعمرة بالكروڤيت والكلامار وشعرية صينية ، وديري معاها الشلايض ، وشي عصير يكون واعر .. ديري انت عصير ديال لاڤوكا مع الفواكه الجافة ..

- سناء شافت فختها ..

- قوت [ شافت فخولة بإستغراب] :

الحوت مع لاڤوكا ، بغيتي تصفيها لسيد انت مافيهاش ، وغير حاجة وحدة نعلي شيطان ..

- خولة [ خنزرات فقوت ] :

دخلي سوق راسك انت ، واش غاتعرفي كثر مني ، راه قسما بالله مغانكمل ونسد فمي حسن ليا ..

- سناء :

لا اختي العار كملي ، قسما بالله حتى ندير هادشي [ خنزرات فقوت ] خليها تكمل هالعار ، مالو اش غايوقع ليه والو ..

- قوت [ كتهزهز راسها ] :

واخا هاهي سكتات دابا تشوفي مغايوقع ليه والو ..

- سناء [ مداتهاش فيها ] : كملي كملي ..

- خولة :

المهم ، أنت هاد الوقت لي كتوجدي فيه هادشي ، كوني حاطة حداك زلافة فيها زريعة ديال الݣرعة البيضة ، كولي وخدمي ، بغيت ديك الزلافة تكمليها كاملها ..

- سناء [ بإستغراب ] :

علاش الزريعة البيضة شنو كدير ؟ انا ݣاعما عندي معاها ..

- خولة [ بإنفعال ] :

واش حنا فعندك معاها ولا ماعندك ، المهم عندي تاكليها ، حيت هي لي اتخليك تحركي وانت دايرة بحال داك الجبل ديال الثلج لي دخل فتيتانيك ، ياربي العفو منك ... للمهم سمعيني [ غمزاتها ] ..

- فاش تسالي ليا هادشي ، اتوجدي ليا الطبيبة ، تكون مقادة ومصايبة وطباسل مقادين وشي شميعات .. وضربيها للكوزية بتجفيفة ودار بتجفيفة ، وديري ليا البخور ، ودخلي ديك الساعات للدوش ..

- قبل ديري واحد الݣوماج وجديه قبل لا دخلي ، ديري فيه الورد بلدي مطحون والكركاديه مطحون ، وزيديهم سنيدة ، وزيدي جيل دوش ديال الفريز ولا النكهة لي كتبغي أنت ، ودخليه معاك لدوش ..

- ماديريه حتى دوشي ، ومنين تخرجي ، خلي لحمك فازݣ وديري ليه المخمرية ، ولا شي زيت عندك تكون فيها روح ديال الريحة ، وعاد دوزي ليا للأمساك ..

- شوفي مسك الفواكه ولا مسك الرمان ، ديريه ورا ودنيك او ورا عنقك ورا فخاضك وبلايص نبض لي فيديك زجدر شعرك ، حيت هو مافيهش لانكول .. وديك ساعات الالة تعطري ، ديري الريحة لي جبت ليك berbery her ظيال الفغومبواز .. راه خطيرة الى ماخليتيه غايحماق مانتسماش ..

- وماتلبسيش شوميز دونوي ، لا لبسي شي كسيوة ، وديري الخلخال فرجلك ..

- سناء [ شافت فيهم ] :

ماعنديش خلخال ..

- قوت : جاك تهناي ...

- خولة [ كضحك ] :

شتي باش زوين تكون عندك ختك ذهيبية ، المهم خلخال ، وصباغة حمرة فليدين ورجلين ، نشري الجمال ازين ديالي ونشري البياض ، وقبل مايدخل لدار ب 3 دقايق غير تسمعي صوت طوموبيلتو ... رشي ريحة مزيان ورشيها قدام الباب .

- باش غايحل ضرب فيه ريحتك ... وغير يدخل عنقيه وبوسيه ، وكلامك يكون حلو ورقيق ... راه حلالك هداك الويلة ماشي مصاحبة معاه ..

- هو ضروري مغايتصدم منك ، أنت جريه من يديه قولي ليه حبيبي باينة فيك الجوع أجي نتعشاو عاد دخل دوش ... راه وجدت ليك الحوايج ديال الدوش ..

- قوت [ حاجة يدها على خدها كتسمع ليها ] :

اهاه كملي ..

- خولة [ شافت فقوت ] :

شتك طالقة ودنيك ، ياك انت ماعندك مديري بهاد نصائح شتك شادة معايا الخط ..

- سناء : وكملي خلاص ..

- خولة :

المهم ، اتجريه يݣلس على الكرسي ، وحطي الماكلة ، وفاش تكوني كتحطي العشا تمشاي بالأنوثة ، شتي كيفاش كتمشى القطة هاديك ، ديري ليا مشية المشة أختي .. تعوجي وحاولي الخلخال يتسمع ..

- خولة :

منين تحطي العشا فوق الطبلة ، ݣلسي قريبة ليه ، هو بطبيعة الحال ، ايبقى مصدوم فيك اتجيه غريبة ، ديك الماكلة ايدوزها ابزز حيت مكرهش ياكلك انت بلاصة داك العشا .. مرة مرة قولي ليه ، ياسين ماكليتي والو أحبيبو ..

- هزي لقمة او وكليه .. منين تساليو الماكلة ، قولي ليه بصحتك وراحتك احبيبي ، هنا هو ضروري مغايبغي يشدك يعنقك .. انت ضحكي ودلعي الهبيلة ، وقولي ليه مزال الليلة طويلة احبيبي ، دخل دوش تحيد عليك العيا ، وجريه من يديه ودخليه لدوش ، وطيري هزي الطبلة والماعن ديريهم فالغسالة ، وطرفي حالتك انت ، وبدلي ديك الكسوة .. لبسي شي كسوة تكون لاصقة ..

- عرفتي عندي واحد الكسوة ديال المصريات ، كنت كومونديتها من واحد باج ، مزال فميكتها انجيبها ليك خوديه تنفعي بيها انت بعدا ..

- قوت [ شافت فيها بصدمة ] :

وانت أش كدير عندك كسوة ديال هشك بشك ؟

- خولة :

واش يحسابليك انا بحالك ، المضعضعة ، انت اخرتك بحال سناء ، تعلمي ماتدي نهار تزوجي .. وبقاي حالة ليا فمك ، شريتها نخبيها ..

- سناء : كملي ..

- خولة :

اتكوني وجدتي بلاطو ، فيه ديسير وفيه شيبس والفواكه الجافة ، وديري شي قناة دالموسيقى ، غير يخرج وقولي ليه بصحة الدوش احبيبي سير لبس حوايجك ... اتلقايه مشا طار لبسهم وخرج عندك ..

- ايوا هنا ، شطحي واخا متعرفيش انت تبعي غير مع الموسيقى ، فاش مايكونش فدار تعلمي ... بهريه صدميه خليه تالف على القبلة ، بقاي جي حتى لحداه وتعوجي ..

- هو هنا راه صافي صبرو غايتقادا ، غايبغي يديك لبيت النعاس ، انت هتا قولي ليه حبيبي باينة فيك مسخسخ اجي ندير ليك مساج .. ايوا يلالة ديري ليه المساج ، وهنا هو خليه يكمل الخدمة ، وهادشي كامل ايخليك انت ترخاي والخوف غايمشي منك ..

- واتكوني قربتي منو وحيدتي ديك الحشمة الأولى ، فهمتيني ، غدا دوزي عند قوت للمحال اتلقاي عندها الكسوة لي قلت ليك ..

- سناء [ عنقاتها ] :

سيري لهلا يحرق فيك شي عظم ، الله يسهل عليك ، والله حتى ندير هادشي كامل ..

- خولة :

وا وقفي معايا وقفة وحدة ، وتجمعي راه راجلك هذاك حلالك ، مسكين هو لاش تزوج واش بغيتي هادشي يتحول للبرود ، وتلوى ليك عليه شي وحدة وجمعي راسك ..

- قوت :

وحرفة هادي ، كون افتحتي شي كابيني ، اتولي الدكتورة خولة ، أخصائية فالإستشارات الزوجية ..

- خولة [ بإفتخار ] :

اباش تعرفي مكنظلش قيالة فالكروبات على الخوا الخاوي ..

- تحل عليهم الباب وطلات عليهم صفية :

أشتكم سكنتو هنا ، حشومة الناس التحت وانتوما سكنتو هنا يلاه نزلو خلاص ..

- جمعو الوقفة وخرجو متابعات تابعين صفية ، دخلو عليهم للبيت الرجال كانو فالبيت لاهر ونعمة بوحدها فصالة ، دخلو سلمو عليها وݣلسو ..

- نعمة [ كانو عينيها غادي ياكلو قوت ] :

بنتي قوت ، مبروك عليك المحال الجديد الله يدخلو عليك بصحة وسلامة أبنتي ..

- قوت :

ربي يخليك أخالتي لهلا يخطيك ..

- سونا الباب ، ناضت قوت خلاتهم ومشات تحل الباب ..

- حلات الباب هزات عينها ، كان واقف بطولتو طلعاتو من رجليه سروال دجيج فالكحل مع تيشورت فالبيض ، شعرو راضو اللور من غير خصلة لي كان جايا على عينيه ..

- ساعة رجالية نقرية مع خاتم ديال نقرة ..

- هاشم [بصوت ساخر وثقيل ] :

ساليتي السكانير الالة قوت نݣدو ندخلو ولا مزال مافليتيش مزيان ؟

- قوت [ ببرود زݣات فيه الشوفة ] :.

علاش زعمة غادي نسكانيك ، كولية أنت مدوزينك فديوانة ، لا حول ولا قوة إلا بالله العلي العظيم ، أستغفر الله العظيم وأتوب إليه .. دخل اخويا دخل ..

- تخطاها مبسم ، رمى السلام على الصالون فين كاين العيالات بلاما يشوف فسناء وخولة ، أما صفية باس ليها راسها ..

- صفية :

مرحبا بيك أولدي ، دخل لصالون لهيه راه كاينين تم ..

- هزهزليها براسو ودهل لصالون ، سلم على عبد الرحمان وعلى خوه وباه .. رجعات قوت للصالون عند الحيالات ، وهي كتستغفر وتعوذ من الشيطان الرجيم ..

- سناء [ كانت ساهية ، شوية هزات راسها وقربات وجها من خولة ] :.

شوفي خولة ، واش نقد نحيد قاضية الشطيح والمساج ، نخلي غير للعشا ولبيسة اللولة عفاك أختي ، راه فكرت فيها ولكن راه هادشي كامل منقدش نديرو ، خليني انقدام واحد شوية ، واحد شهرين وديك الساعات نبا نطبق الباقي لي قلتيلي عليه ..

- خولة [ حكات حاجبها كتفكر ] :

همممم صافي ، خلي غير العشا ولبيسة وعنقيه فاش يدخل لدار ، حيدي المساج والشطيح حتى تقدامي شوية ، باش مايقولش بلي راكي معلمة هادشي وغير كنتي كتمثلي عليه ..

- وحتى لمن بعد ، وقولي ليه راه كاينة واحد الصفحة كتعلم الوحدة كيفاش تعامل مع راجلها ، باش حتى الى بغيتي تفاجئيه بشيحاجة ، مايضروش راسو ويحسابليه بلي انت راه خبرة ، هادي نسيت ماقلتها ليك ..

- سناء [ تنفسات بإرتياح ] :

صافي دابا مزيان ..

- سونا الباب ، وناضت قوت من جديد تحل .. كانت واقفة على الباب ، رجيلات صغيورين ، لابسة صندالة ديال الميكة فالغوز ، رجيلات طبيبيزين ، سروال وكسيوة فالغوز بارد .. عينيها كبار ومشفرين حمرين عامرين بدموع ..

- شعرها رطب وزعر ومخربق ، غير شافتها هي لي حلات الباب تلاحت ليها على رجليها معنقاها منهم وطلقات حلقها للبكا كتبكي ربي لي خلقها ..

- قوت ماعرفات باش تبلات ، تحنات عندها هزاتها كطبطبط عليها كتحاول تسكتها .. وراها كانت واقفة مرة ، باينة على ملامحها القلق والحشمة :

ختي قوت غير سمحيلينا ، أميرة مريضة حلفات لا بغات تنعس ، غير كتبكي وكتعيط بسميتك ، مابغاتش تسكت ليا ..

- قوت [ كتقيس فيها ، كانت بنية صغيرة عندها شي 3 سنين ونص ] :

راسها سخون مالها ، واش ديتيها لطبيب ؟

- ديتها أختي ، فيها الحلاقم ، عطاني الدوا ، حلفات لا بغات تشربو ، ناري ياختي جيناكم فشي وقت ماهواش وقيلة غير سمحيليا وصافي ، راه غرقات بيا الدنيا ..

- يوسف مسافر وانا بوحدي ماعرفت شنو غادي ندير وحق الله العظيم ..

- قوت [ شادة أميرة لي كانت معنقاها خالفة ماتفرق عليها ] :

واش انت حمقة أ أسماء يهديك الله ، حنا جيران الحمد لله ، اميرة راها بحال الى بنتي ... سيري جيبي ليها الدوا ديالها ، ودخلي تعشاي معانا ماتبقايش بوحدك ..

- مشات اسماء للدار تجيب الدوا ودخلات قوت تحت أنظارو لي كان مكسل بالعرض ديالو على السداري .. حاط يد على فخضو ويد مسرحها على المخدة ..

- تلقات ليها صفية كتسولها أش واقع :

أميرة مريضة ليها ، ماعرفات مدير مسكينة وبوحدها فدار ، حلفات ماترجع لسانها لفمها بالغوات ، قلت ليها تجي تعشا معانا ..

- صفية : أحسن مادرتي [ كطبطب على ظهر أميرة ] بنتي الفنة ، مال بنيتي مالها .. شافت فيها اميرة بعويناتها لي كلهم دموع ، بصبعها صغير أشرات لعنقها :

ديدي هنا ..

- قوت :

الله على ديدي الله ، وهاد الحلاقم مالقاو لمن يجيو غير بنتي الفنة ديالي ، انشربو دوا ونولي بيخير ياك اموشاتي الفنة ..

- أميرة :

نونو ديري كوت ديدي ..

- خلطات عليها أسماء ، جايبة دوا فيديها ..

- قوت :

دخلي لصالون ، أنا انحاول نعطي ليها دوا ديالها ، غير بيني وبينها .. بوحدنا بلاما تشوفك انت ..

- أسماء دخلات عندهم لصالون ، سلمات عليهم حشمانة ، سولاتها سناء على أميرة بدات كتعاود ليها :

عزيزة عليها قوت بزاف ، كتحماق عليها ... مابغاتش تسكت ليا ماعرفت مندير أسمحوليا على هاد الدخلة ..

- صفية :

الدار دارك ابنتي ، هانية حنا جيران الحمد لله ..

- على برا ، فالكولوار .. جرات الكرسي ديال صالة مونجي ، ݣلسات عليه وحطات أميرة قدامها فوق الطبلة .. حطات داك الدوا ، كتقرا فيه ، هي كتقرا واميرة كدوز ليها على وجها بصبيعاتها الصغار ، نزلات ليها الشال على راسها .. وجرات ليها الݣصة كتلعب بصبيعاتها بخصلات شعرها ..

- كتقربهم لنيفها تشمهم وتبوسهم ، وترجع تحط ليها يدياتها السخانين على خدها ..

- قوت :

مشاتي الفنة ، نشربو السيرو دابا ياك ، نشربو السيرو وندي بنتي نشري ليها الشكلاط وجينوڤا ..

- أميرة [ كتحيد بيدياتها خصلات شعرها من على وجها ] :

زيڤوڤا ..

- قوت [ كبات السيرو فالمعلقة وبالخف خشاتو ليها ففمها ] :

ياختي على بنتي ، دابا بقات لينا القويلبة ، وصافي [ وقفات وتكاتها على الطبلة حيدات ليها سريويلها وليكوش ] :

دغية دغية ابنتي ، نشريو شكلاطة ونلعبو فزعلولة [ كتحاول تنسيها على غفلة دارت ليها القويلب ، بدات كتبكي ربي لي خلقها ، لبساتها دغية دغية .. وهزاتها كطبطب عليها ، غافلة على عينيه لي كانو مراقبين كل حركة دارتها ..

- كطبطب عليها ، خرجات عندها أسماء :

نشدها عليك .. عذباتك ..

- قوت [ بنفي ] :

لا غير خليها ، دابا تسكت ... بقات كطبطب عليها وغادية جايا فداك الكولوار كتسكتها ، حتى كتحس بيها تهدنات ... ترخات بين يديها ، بقوت البكا والمرض بداو عويناتها المدمعين كيتسدو بشوية .. حتى داها النعاس ، دخلات لواحد للبيت صغير ديال الݣلاس ، حطاتها ودار ليها المخاد لا طيح ، هزات واحد ليزار من الماريو وغطاتها طفات عليها الضو وخرجات للعندهم ..

- أسماء :

عدبتك أختي قوت الله يسهل عليك ويفرحك ياربي ..

- قوت :

مكاين حتى عذاب ، الحمد لله حنا جيران .. حطو كاسكروط ، صينية ديال أتاي وصينية ديال القهوة .. الحلاوي والملوي مع بغرير والمسمن ، الطبلة عمرات لا ديال العيالات لا ديال الرجال ..

- الأصوات الرجولية كيتسمعو من الصالة روخرا .. غير أذن العشا ، خرجو الرجال كاملين يصليو العشا فجامع .. أما العيالات صلاوه غير فدار ..

- من ورا صلاة رجعو الرجال ، ناضت قوت هي وخولة وصفية كيحطو العشا .. سبقو البيت لي فيه العيالات هو الأول .. قوت قدات شالها لي كان طايح على كتافها ، هزات الطبسيل ديال الدجاج محمر ، وقفات قدام الباب حطات صابو ديالها ، قالت السلام ودخلات حامية راسها حطات الطبسيل .. وخرجات ..

- هزات الشبكة ديال الخبز ورجعات بيها للبيت حطاتهم ليهم ..

- عبد الرحمان : الله يرضي عليك أبنتي ..

- حدرات راسها وخرجات بلاما تهز راسها ، رجعات الكوزينة هزات القراعي ديال المونادا حطاتهم فالبلاطو هوما والكيسان قدات كولشي ورجعات لعندهم لقاتهم بداو الماكلة ..

- عبد الرحمان [ بإفتخار ] :

تبارك الله عليك أبنتي ، الماكلة بنينة ..

- قوت [ هزات فيه راسها حشمات ومرݣات ] :

بصحة وراحة ..

- توفيق [ بتساؤل ] :

وايلي هي بنتي قوت لي مطيبة هاد الخير ؟

- عبد الرحمان [ كيضحك ] :

أياه الحاج ..

- قوت [ هزهزات راسها ] :

بصحتكم أعمي .. حدرات راسها وخرجات زربانة وهي كتعطر فالمشية ، دخلات عند العيالات وشدات بلاصتها حدا خولة وسناء ..

- نعمة [ كتبنن ] :

الله يعطيك الصحة أختي صفية ، شحال هادي مادقت بحال هاد البنة ..

- صفية [ كضحك ] :

وصراحة ماشي أنا لي طيبت ، قوت لي طيبات الصراحة نقولها ..

- نعمة [ شافت فقوت ] :

الله يعطيك الصحة أبنتي ، قليل بنات اليوم لي تلقايهم كيصرعو البلدي ..

- صفية :

والوحدة علاشما تعلمات ، انا راه علمت قوت منين كانت عندها 14 عام ، تبارك الله مجات فين دير 21 حتى كانت كتعرف لكولشي أما العصري الصراحة هي لي تعلماتو راسها ، من هادشي ديال الانترنت .. وسناء حتى هي هكاك ، سناء تبارك الله راه عندها ديبلوم فالفندقة ..

- نعمة [ كضحك ] :

لا سناء فخباري تبارك الله طيابها زين ، قالها ليا ياسين ..

- سناء حشمات هبطات اللقمة غير بسيف فاش سمعات سميتو وبلي شكرها ..

- سلاو الماكلة هزات خولة الطبسيل وجابت الطبسيل ديال اللحم ، قوت عاود رجعات للبيت الرجال وقفات عن الباب مادخلاتش :

بابا ساليتو؟

- عبد الرحمان :

ياه أبنتي سالينا الحمد لله ، هز ياسين الطبسيل باش يعاونها مدو ليها :

هاكي أختي ..

- قوت [ بإبتسامة ] :

شكرا أخويا [ بهمس ] شكرا على داك النهار ..

- ياسين [ بنفس الإبتسامة] :

مابيناتناش حنا خوت وعائلة الحمد لله ، غير متݣوليهاش لسناء راه مافخبارها والو .. هزهزات ليه براسها ورجعات للكوزينة جابت طبسيل اللحم مداتو ليه حطو على الطبلة وهي رجعات عندهم ..

- توفيق [ كياكل ويتبنن ] :

تبارك الله الماكلة بنين اسي عبد الرحمان ، الله يعطي الصحة ليدين لي طيبوه .. ماكرهتش كون مزال عندي شي بنت فدار بلا زواج .. طيب ليا شهيوات ..

- عبد الرحمان [ بثقالة او وقار ] :

قوت من صغرها وهي هكا ، كيعجبها تخشي راسها وتعلم ، مها دخلاتها للكوزينة منين كان عندها 14 عام ، كتجي من القراية دخل الكوزينة الله يرضي عليها .. دابا تبارك الله راه كدير كولشي ..

- توفيق [ كيضحك ] :

كيبان ليا من هضرتك بلي قريبة ليك بزاف ، ضروري واحد فالولاد كايكون قريب للأب او واحد قريب للأم ..

- عبد الرحمان [ كيضحك ] :.

واشغنݣوليك ، وانا بناتي كاملات قراب ليا ، ولكن سناء قريبة لمها بزاف ... وقوت قريبة ليا بزاف حيت هي البكرة ، أول وحدة فالبنات .. والحمد لله لي ربي قدرني نربيهم أحسن تربية ، دابا راه الوليدات ديال الزنقة كاملين كيموتو عليها ، أما المشاش خلاص ماكرهاتش تحل ݣراج وتجمع فيه ݣاع المشاش ..

- الى مشات حتى شافت شي واحد ضربهم ، كتخرج ليه بالعصا تغوت وتݣلس تبكي .. الله يخلي للكل واحد لي عزيز عليه ياربي ..

- توفيق :

وغايجيك فراقها صعيب الى تزوجات ..

- عبد الرحمان [ هزهز براسو ] :

وصراحة بزاف ، وحتى انا الحاج مساخياش عليا ، مغانعطيهاش لمن والة ، حتى غانعرف بلي داك السيد بحالي ، وغايدير ليها بحالي ... باش نكون مكمن عليها الى دا مول الأمانة أمانتو ..

- ياسين كان مراقب خوه ، قرب منو وبهمس نطق :

وخويا لي شافك ، يݣول كانو سادين عليك فشي كهف بلا ماكلة ، ماتسنيتيناش ، هوما يهضرو وانت كتخشي فوجهك ..

- هاشم [ فمو عامر مجاوبوش حتى هبط اللقمة ] :

لاش تحط باش نتفرجو فيه ، باش يتكال ..

- ياسين [ كيضحك ] :.

ݣول وكان جاك بنين ، ماهزيتيش الراس ، بصحتك أخويا ، خاصك تشكىني كونما أنا ݣاعما تاكل هاد الماكلة الزينة ..

- هاشم [ هز حاجب ونزل الثاني ] :

مالك أنت لي مطيبو ؟

- ياسين :

لا ولكن خت المدام لي مطيباه ، كونما كنت مزوج بختها كنتي غاضوݣ هاد البنة ؟

- هاشم :

درتي لينا إنجاز زعمة ، كول وسكت راه من اداب الماكلة تاكل وانت ساكت ..

- ياسين : اهاه ماݣلتي عيب أولد ميمتي ..

- سلاو العشا ديالهم من وراها جاهم ديسير ، كانت عبارة على طارط ݣلاصي مرافقة معاها ديسير ، سلاو العشا ديالهم وتجمعات الطبلة .. حطو طبيسلات خفاف فيهم فواكه جافة وسليلو ..

- نعمة [ كتنقب فلويزات ] :

قولي ليا اختي صفية ، كتسافرو فصيف بعدا ولا والو ؟

- صفية :

الصراحة كيفوت العيد الكبير كنسافرو .. العام لي فات كنا مشينا للجديدة .. ايوا هاد العام الى بقينا فالحياة إن شاء الله ، كنقولو نطلعو للشمال ..

- قلنا نمشيو للمضيق الى بغا الله ، تمشي معانا نيت بنتي خولة ..

- قوت [ جرات خولة من دراعها ] :

وعلاش انا نقد نبقى بلا خولة رجلي برجلها ..

- خولة [ كضحك ] :

ودابا الى تزوجتي أش ديري ، أتديني معاك يا هاد الهبيلة ..

- قوت [ كضحك ] :.

غادي نشوفليك شي صاحب راجلي ، ونزوجك ليه باش مانتفرق عليك ..

- نعمة [ كضحك ] :

الله يدومها صحبة ومحبة بيناتكم .. وعرفتي شنو نمشيو كاملين إن شاء الله لشمال أشبان ليك أصفية ؟

- صفية [ تفاجئات ] :

الله أودي ، فكرة مزيانة الصراحة لي بغيتو ..

- نعمة :

حتى حنا مالفين فصيف كنسافرو ، نمشيو كاملين إن شاء الله ، نكريو شي بتيت ڤيلا وندوزو شي 10 يام ، نبداو بالمضيق ، ونكملوها فطنجة أش بان ليكم ؟

- صفية [ بابتسامة] :

لي درتوها حنا معاكم فيها ..

- نعمة : صافي حتى ندوي مع الحاج ..

- تسمع صوت رجولي تقيل وقور :

لالة نعمة ، مشينا .. وقفات نعمة او وقفات سناء ..

- نعمة :

الله يخلف اختي صفية ، الله يلاقينا فساعة الخير إن شاء الله ... تسناي مني تيليفون باش نعلمك بلي كاين .. خلينا ليكم الراحة ..

- خرج ياسين وهاشم مع الحاج عبد الرحمان وتوفيق .. سناء سلمات على مها وختها وخولة :

بلاما نوصيك عندك تنساي ..

- سناء [ بنفي ] :

لا تهناي هههه .. مشات للطوموبيل ياسين ركبات فيها ..

- بقات قوت واقفة هي وخولة ، حتى ركبو توفيق ونعمة فطوموبيلة هاشم .. كان حادر راسو من غير السلام لي سلم على توفيق وعلى صفية ، طلع لبلاصتو ديمارا ومشاو ..

- فالڤيلا ديال الحاج توفيق .. ݣلسو فصالون ، نعمة عينيها كانو كيبريو فرحانة وعاجبها الحال .. ݣلس هاشم حاط راسو على الفوتوي وسوارت فيديه كيلعب بيهم ..

- نعمة :

والله العظيم الى انا فرحانة ، الحمد لله ربي طيحنا فنقرة صافية ... ناس الله يعمر ليهم الدار والله العظيم ..

- توفيق [ برخامة صوت ] :

الحاج كنعرفو من شحال هذا ، الله يعمر ليه الدار ، حقاني او مربي بناتو احسن تربية ، واش غير جيت انا وختاريت بنتو للياسين ..

- نعمة :

الحاج ، أش بان ليك ندوزو الصيف مجموعين ، قالت ليا نعمة بلي بغاو يطلعو للشمال ، أش بان ليك نطلعو جميع ... وهكا العلاقة غادي تزيد تكبر بيناتنا ، نكريو مجموعين كاملين شنو بان ليك ، [ شافت فهاشم ] ومنها حتى هاشم يبدل الجو شوية أش بان ليك أولدي ؟

- هاشم [ هز كتافو ] :

لي بغيتو ماعنديش موشكيل أنا ، ݣاعما ترفدو ليا الهم ..

- نعمة [ شدات ليه فيدو ] :

وصافي أولدي الله يرضي عليك ، ݣاع الناس راه كيتزوجو ويطلقو ماشي نهاية الدنيا ، اي حاجة كتوقع أولدي راه من الخير ..

- شاف ليها فعينيها ، بيديه الكبار شد يديها :

هادشي عارفو الواليدة ، شوية ديال الوقت وهادشي غايبقى غير تعاويد ، عارفاني دغية كنسى .. مكانبقاش هاز فݣلبي من جهة شيحاجة مكاتستاهل ..

- نعمة [ ضحكات بفرحة من كلامو ] :

وزايدون ، انت غير يخرج ليك الطلاق انا نزوج ولدي بالات البنات ..

- هاشم [ ضحك ضحكة رجولية ] :

هاي هاي هاي على لالة نعمة ، ياكما حاطة العين على شي وحدة ؟

- نعمة [ دارت رجل على رجل ] :

لالات البنات ، الزين وصواب والحداݣة ، اولدي بغيت ليك قوت القلوب خت مرات خوك ، شهوة منها ..

- هاشم [ عݣد غوباشتو] :

من نيتك الواليدة ، كدوي من نيتك .. ݣولي اعوذ بالله من الشيطان الرجيم ..

- نعمة [ غوبشات] :

علاش مالني شنو قلت ، علاش كيجاتك قوت ؟ الحاج سمعتيه أش كيقول ؟

- توفيق [ مسح على راسو ] :

و صراحة انا متافق مع مك فهاد القضية ، والله أولدي ماكرهت ليك وحدة بحال قوت ، الى درتيها فدارك عرفتي شنو درتي ، ماشاء الله عليها .. ولكن كيبقى انت ولي بغيتي ، حتى واحد مغايبزز عليك ..

- هاشم [ ببرود وجدية] :

كدويو معايا بحال ماوقع والو !! طلاقي ومزال ماخرج وبغيتوني نوض نتزوج ..

- نعمة :

عند بالك نسرين الى طلقات منك اتبقى بلا زواج ، تفوت العدة تلقاها تزوجات .. حتى انا بغيت نشوفك فرحان ، واخا خوك تزوج وقفات معاه وفرحت معاه ، ولكن العݣدة لي فقلبي من جيهتك مايعلم بيها غير الله ..

- ددرتي زواج ديال دوك لي عايشين فأوروبا ، مادرنا ليك ليلتك ، مافرحنا بيك مادرنا عاداتنا وتقاليدنا ، كيتك نعاودها لحفار قبري .. [ عينيها ساحو بدموع وصوتها تغنغن فاش تفكرات عرسو كيداز ، بحال رمشة العين لا حباب حضرو لا تقاليد دارو ] ..

- هاشم [ بصرامة وصوت هادئ ، اعدى حاجة عندو يعلي صوتو على والديه وعنرو يديرها يفضل يموت ومايعليش صوتو عليهم ] :

زواج دابا انا مامزوج ، نهار نشوف راسي واجد للزواج غانتزوج ، ولكن باش ناخود بنت الحاج لا ..

- نعمة : علاش مالها ؟

يتبع...