محتوى القصة
- كل نهار كيكون حاضر فلكلينيك .. كيدخل عندها يݣلس عندها يدوي معاها غير شوية وكينوض مرات كيبقى واقف وهوما جايبين ليها الماكلة .. قبل ماتخرج بيوماين قلب على شي دار للكرا مكانش خاصها تبقى فلوطيل ضروري كان خاص شي حد يبقى معاها فبلاصة وحدة .. لقا دار مفرشة توسط ليه واحد السيدة معرفة كراها عمر الثلاجة بالخضرة وديسير ..
- قبل ماتخرج بنهار كان ݣالس هو وفؤاد فالقهوة لي قريبة من الكلينيك .. حاط كاس ديال القهوة قدامو وساهي فالفراغ
- فؤاد : ( كيشوف فيه ) مالك فاش ساهي ؟
- هاشم : ( شاف فيه وتقاد فالݣلسة ) دابا الدار لي كريت مخاصش نبقى غير أنا وقوت فيها الراس فراس .. ضروري خاص شي حد يكون معانا فهمتي ..
- فؤاد : ( حك على حاجبو ) وهو بصح ولكن شنو غادي دير اتعيط على دارهم ؟
- هاشم : ( بنفي) لا منݣدش ماشي دابا حتى نهار نرجعو إن شاء الله دابا يلاه غاتخرج من الكلينيك وحتى هي مابغياش ..
- فؤاد : ( سكت ساهي كيفكر ) عرفتي شنو دير غاندوي مع خولة نݣولها ليها تجي هي وتݣابلها وتكون معاها .. هكا مغاتكونوش بوحدكم فهمتي
- هاشم : ( هزهز براسو ) حتى هذا نظر غير وصيها متݣولهاش لوالدين قوت عندك تخرج من فمها ..
- فؤاد : ( جبد تيليفونو من جيب تجاكيط ) لا كون هاني .. ناض من حداه ومشا بعد كيشوف فيه هاشم كيدوي ويشرح بيدو مرة يوقف مرة يتكا على الطوموبيل .. يدوي ويشرح بيديه كان باين بلي كيعاود ليها وكيشرح ليها ، بان ليه زول تيليفون على ودنو وخشاه فجيبو وتم راجع ..
- جر الكرسي وݣلس ( شاف فيه ) غدا فصباح غاتكون هنا إن شاء الله
- هاشم : كوراه تخلعات ؟
- فؤاد : دارت مندبة كتبكي وتغوت سكتها غير بزز .. حتى طمنتها عاد سكتات من البكا ، غاتݣول لوالديها بلي غاتخلط على قوت حيت ضروري خاصها تكون معاها فالحفلة ..
- هاشم : ( كيلعب بصباع يدو على الطبلة ) أحسن مادارت مزيان ..
- فؤاد : يكون خير إن شاء الله
___________
- وصل النهار لي غاتخرج فيه قوت .. كان فؤاد هو وهاشم لداخل ديال الكلينيك طلبو هاشم يدوز للإستقبال باش يكمل الإجراءات .. كمل ݣاع الإجراءات ديال الخروج طلع للعندها للبيتها لقاهم ݣلسوها فالكرسي ملبسينها حوايجها لي جات لابساهم نهار الاول وشالها ..
- هاشم : ( واقف كيشوف فيها بكل حب وحنان ) واجدة صافي ؟
- قوت : ( بإبتسامة هزهزات راسها ) أه .. بغات تسوݣ بيها الفرملية وهو يحبسها ) :
لا صافي أنا غادي نتكلف .. ضار ورا الكرسي وساݣ بيها دخلها للاسانسور هبطهم للطاج تحتانية تحل بيهم الباب وتم مخرجها شافها فؤاد كان ݣالس وهو يوقف جا لعندها :
على سلامتك أقوت كيبقيتي دابا ؟
- قوت : الحمد لله الله يسلمك وينجيك .. تسمعات سميتها مجهدة هزات راسها كتبان ليها خولة جايا كتجري ودموع فعينيها تحنات عليها معنقاها وكتبكي ..
- قوت : وصافي أصاحبتي أويلي ماوقع والو صافي انا راه بيخير
- خولة : ( بعدات عليها كتشوف فيها) واش كضرك شيحاجة كتحسي بشيحاجة !
- قوت : لا الحمد لله انا مزيانة أكوني هانية
- هاشم : يلاه نمشيو دابا حتى لدار ودويو .. خرجها بالكرسي متاجه للطوموبيلتو حل الباب القدامي ورجع عندها .. رمات رجلها باش تنزل وهي تهز من فوق الكرسي ، هزها بين يديه بحال الريشة وهي كتشوفيه قلبها بغا يخرج من بلاصتو برجفة والفرحة والحشمة كولشي تخلط عليها .. بلعات ريقها وماقادش تشوفيه ولا تزݣي فيه الشوفة ..
- دخلها للطوموبيل دار ليها السمطة وسد الباب وراها خولة واقفة كتشوفيه مصدومة من تصرفاتو مع قوت ..
- وصلو لدار لي كانت فمنطقة زوينة خرج هاشم هو الأول وفؤاد مد ليه السوارت باش يطلع حل ... فتح الباب حال ليها السمطة .. كان كيحاول ما أمكن مايقيسهاش ولكن مكانش عندو حتى شي حل قاد ليها رجليها على برا وهزها بين يديه ، واحد الموقف تحطات فيه غرقات فحوايجها ماعرفات تطلق يديه ولا ديرها على كتفو ولا شنو دير .. ريحتو تغلغلات لنيوفها قربو منها وترها لأول مرة شي راجل يقرب منها لهاد الدرجة .. كتحس بقلبها غادي يخرج من بلاصتو ..
- وجها تلون وتصبغ بحمرة الحشمة حسات بصهدة او وجها ولا سخون باغية غير إمتا تنزل ويتفصل هاد القرب لي كان بيناتهم .. مطلعها سابق خولة وهي وراه تابعاهم مزال ماستوعبات هادشي لي كتشوفيه حتى دخلو لدار داها نيشان لبيت نعاس ، الدار كانت زوينة بيت نعاس عندو البالكو مفرش بالبيض تلفازة پلازمة فالحيط والكوافوزات فوقهم الدوا ديالها وقرعة دالما كان موجد ليها كولشي ..
- حطها غير بشوية جار المانطة مغطيها وهي غير كدور فعينيها وكتشوف لسانها تخطف من شفايفها بقوة هادشي لي كيدير فيه ..
- هاشم : ( وقف كيشوفيها ) غادي نمشي نجيب الغدا من برا خاصك تاكلي عاد تشربي دواك ..
- قوت : ( هزهزات ليه براسها ) واخا .. خرج هو وفؤاد وبقات هي وخولة غير سمعات الباب تسد وهي ضور لعندها كتشوفيها بإستغراب :
هادا مالو تفورماطا أويلي صدمني !
- قوت : (بإبتسامة ) ماضحكيتيش مخاصنيش نضحك .. حتى أنا مافهمت والو عرفتي أش قالت ليا الفرملية ( عاودات ليها داكشي لي قالتو ليها الفرملية )
- خولة : ( ݣلسات حدا رجليها وملامح الصدمة باينين عليها ) حلفي بالله .. وكيفاش حتى وقع هادشي ومن إيمتا مافهمتش انا هاد القضية !
- قوت : نهار فاش وصلت لهنا ونزلت باش نتعشا تلاقيتو هنا وخرجنا تعشينا على برا عند واحد السيد كيدير طاكوس بلدي .. كنت كنشوف الشوفات ديالو وكنقول موحال راه غير كيتخايل ليا حتى للغد فاش مشيت ندي واحد الكوموند لواحد السيدة .. فاش وصلتها ليها سونا ليا وبقا يخاصم علاش ماعلمتوش بلي خرجت بوحدي ..
- خولة : هاي هاي هاي ( كضحك) وشوفليك هاشم حتى هو كملي كملي الميمة ..
- قوت : أجي تفرجي فاش كنت كنتسناه وجا وقف عليا واحد خونا أسمو منصف بطوموبيل ونزل بغا نمرتي .. وأنا مع خفتهم يدابزو وتنوض الشوهة قلت للهاشم قدام هداك خويا ايوا الطريق كلها وهو هاز عليا زنافرو علاش تقولي ليا خويا هي كان عينك فهاداك ..
- وباش كملها وجملها فاش قلت ليه وأنت مالك وأنا حرة وحياتي هادي فبلاصة مايعبر على داكشي لي كيحس بيه قاليك بيناتنا سيركوي ديال الضو ..
- خولة : ( تشبحات على ظهرها كضحك ) وناري ياربي بدمووووع اويلي على سيركوي هاد الرجال مالهم خضرين فؤاد نهار عرض عليا الزواج قاليك الى بغيتي تزوجي انا نتزوج بيك
- قوت : فؤاد راه مزال عتارف ليك باش كيحس وكيعرف يهضر هذا راه والو هي فاش تخاصمتا وخرجت نوصل لسيدة الأمانة او وقع لي وقع .. ولكن راه بان ليا بدا كيتعلم يهضر ( ضحكات)
- خولة : اش قاليك ؟
- قوت : ( تنهدات تنهيدة طويلة كتحاول ترتاح من السخفة) سولتو على الحفلة قلت ليه خاص تمشي تحضر الى ماحضرت أنا تحضر انت قالي الحفلة تعوض ولكن أنت مكتعوضيش ..
- خولة : ( عضات على شفايفها شادة على قلبها ) ناري ياربي قلبي قلبي شتي غير من الهزة لي هزك وكرا دار على ودك باش متكرفصي فالأوطيل وهادشي لي كيدير السيد باين ولا كيموت عليك
- قوت : ( بلمعة فعينيها ) زعمة ؟
- خولة : كيفاش وزعمة هادشي كامل وزعمة شوفي أنت باش كتحسي أما هو راه باين !
- قوت : اوووف ماعرفتش نكذب عليك .. هادشي لي وقع معانا فهاد الايام كنفكر فيه غير هو والله وݣاع منين عاودات ليا الفرنلية مابغاش يتحيد من بالي صورتو بين عينيا ضحكتو عينيه هادشي مافهمتوش !
- خولة : اويلي على البنت راه باين طحتي وحد ماسمى عليكي خلاوها المصريين ولكن هانت تقلي ماتبينيش ليه خليه يتشو/ى شوية هههه
- قوت : ( كضحك) شريرة أنت
- خولة : ( بإبتسامة شر) وشنو انت رخيصة علينا خليه يدير مجهود نشوفو أش فجهدو مايدير واش ايحط وراقيه ولالا
- قوت : ( كضحك حاطة يدها على بلاصة الجرحة ) ماضحكينيش كنتعݣر ..
- خولة : ( وقفات) رتاحي أنمشي ندور فدار
- قوت : ( غمضات عينيها) سيري .
- سايݣ فرحان كيصفر ويضرب فالڤولون .. مقايلو فؤاد بنص عين خدم الراديو جا فأغنية زكرياء الغافولي (ضارني ݣلبي) خلاها كيتموسق ويدندن .
- فؤاد : (عيا ساكت) وسبحان الله العظيم واش هدا أنت ولا بدلوك ؟
- هاشم : ( عينيه على الطريق ) علاش مالي ؟
- فؤاد : فين عمرك تسنطي لبحال هاد الأغاني وفين ݣاع عمرك تسنطي للأغاني ولا طلقتيهم فطوموبيلتك !
- هاشم : (تنهد تنهيدة طويلة) إيوا كولشي كيتبدل أحبيبي
- فؤاد : ( هز حجبانو بصدمة وإستفهام ) عشرين عام ديال الصحبة عمرك ݣلتي ليا حبيبي واش متأكد بلي راك نورمال
- هاشم : (كيضحك) والله إلى عمري كنت بيخير بحال دابا .. الى تزوجت انا وقوت إن شاء الله أول حاجة نطلبها عليها ضرق شعرها
- فؤاد : ( عوج فمو ) هاشم كيطلب مكايأمرش وسبحان الله العظيم
- هاشم : ( شافيه ) فاش كتبغي شي واحد كتحط ليه لاباز وكتخليه هو يقرر الى دار ديك الحاجة لي طلبتيها منو عرفو حتى هو كيبغيك .. وزايدون أخويا رزقي هذاك مابغيتوحد يشوفو من غيري انا ماكرهتش نشدها نخشيها وسط ݣلبي ونخبيها ..
- فؤاد : ( كيضحك ) دير ليها الخمار أنت وتهنى
- هاشم : والله ماكرهت ولكن هادشي هي لي غاتقررو ماشي أنا المهم عندي غير شعرها يتغطى مايبانش ..
- فؤاد كتافى بصمت مراقبو بعينيه صاحبو لي شحال هدا مشافو بحال هكا عرفو وتأكد بلي راه لقى الشخص الصح لي يكمل معاها حياتو تبسم ودار نظاظرو دشمس ..
- توجهو للواحد المطعم دوموندا عندو هاشم خداو الغدا ورجعو بحالهم .
_________
- خولة : (رجعات عندها للبيت ) عرفتي الثلاجة كلها تبارك الله ماخلا ماجاب وباش عمرها ماعندك ماتساليه
- قوت : ( بعياء) انا رضي عليا ارواق وخلينا نعس عييت
- داكشي لي دارت خولة نزلات الرواق ورضات عليها الباب وخرجات من عندها ..
- تحل الباب ودخلو كانت خولة ݣالسة فالبالكو ديال البيت لي لاصق على بيت قوت .. خرجات عندهم لقاتهم داخلين محملين ومجملين داخلين فإتجاه الكوزينة يحطو داكشي لي جابو ، دخلات ليهم خولة للكوزينة عينيها على الساشيات
- هاشم : ( هز فيها عينيه ) قوت ناعسة ؟
- خولة : اه قالت ليا نرض عليها الخامية بغات ترتاح .. انا انسخن الغدا تغداو ونفيقها تغدا
- هاشم هزهز براسو وخرج من الكوزينة مخليها هي وفؤاد بقات متبعاه حتى خرج وضارت عند فؤاد بزربة وعينيها كلهم فضول غمزاتو بتساؤل :
أش واقع مالو تبدل بين ليلة ونهار ؟
- فؤاد : ( جر الكرسي وݣلس ) هاد زوج باينة غايسبقونا للزواج
- خولة : (حاطة يدها على فمها ) وايلي حلف بالله كيفاش عاود ليا ؟
- فؤاد : السيد طاح على زنافرو لݣيتو باغي يخرج ليه العقل على ودها ݣاليك اتولي بيخير وأيطلبها من دارهم
- خولة : ( كضحك ) وشنو علاش صاحبتي قليلة غير لي هبيل وماعندو عقل يضيعها من يديه .. (سكتات عينيها كيلمعو) الصراحة والله حتى جاو مع بعضياتهم هاشم ولد الناس يستاهل وحدة بحالها وحتى هي تستاهل شي واحد بحالو ..
- فؤاد : ( حط يدو على يدها ) وحنا أحبيبي مكنستاهلوش بعضياتنا ؟
- خولة : ( غوبشاتو منزلة عينيها ليدو لي شادة فيدها .. هزات ليد لوخرا وصرفاقتو ليدو بجهد ) جمع يديك عندك أحنيني لا تقول انا وياك الراس فراس نزعم
- فؤاد : الله يهديك عليا راه مخطوبين زعمة ؟
- خولة : الخطوبة أحبيبي راه غير فترة تعارف بين زوج كتخلي زوج يتقربو من بعضياتهم ويعرفو بعضياتهم .. فبلاصة مايبقاو مخبيين فسر كتكون تحت عينين العائلة الثقة فالوثيقة أكبيدة ديالي .. فاش نضربو الكحل فالبيض وخود راحت راحتك ( غمزاتو)
- وخرج خليني نسخن الغدا ماتبقاش دور بجنابي ..
- فؤاد : ( بقا كيشوفيها ) والله يحنن قلبك وخلاص .. هز تيليفونو وخرج من عندها خلاتو حتى خرج وضحكات .. هزات دوك ساشيات كتبقشش فيهم جبدات داك الدجاج ولي صوص والفريت .. قلبات فالكوزينة حتى جبدات واحد الطنجرة سخنات فيها لي صوص ..
- خدات الطاوة دارت فيها الدجاج دخلاتو للفران يسخن هو والفريت كتسمع فصوت فؤاد وهاشم من صالون كيدويو .. حتى وجدات كولشي حطات فطباسل حات للقوت ودارت ليها غداها فالبلاطو هزات الغدا ديالهم دات ليهم للصالون وحطاتو :
دوزو تغداو انا انغدي قوت نعطيها دواها وعاد نتغدا أنا .. خلاتهم كيتغداو وهزات البلاطو دخلاتو للقوت حطات فوق الكوافوز وفيقاتها :
قوت نوضي تغداي .. بدات كتحل عينيها حطات يديها بجوج على جناب النموسية باش تحاول تقاد فالݣلسة عاوناتها خولة دايرة ليها المخاد وراها .. قرباتو البلاطو ليها بغات توكلها
- قوت : لالا انا غادي ناكل بدات تقطع طريفات الخبز وكتاكل ( سرطات الدغمة شافت فخولة) مغاتغدايش؟
- خولة : حتى تكملي ونعطيك دواك
- قوت : حتى يبرد سيري تغداي نكمل وعطيه ليا راه يلاه يلاه نكملو بشوية
- خولة : واخا .
- كملو غداهم جاب فؤاد الماعن للكوزينة .. دخلات خولة للعند قوت عطاتها دواها ، غسل هاشم يديه وجا للعندها كيطل عليها عينيه عليها عينيه كان فيهم واحد البريق وللمعان اول مرة يكون فيهم بصوت رجولي حنين :
كيبقيتي شوية كيكاتحسي ؟
- قوت : ( هزهزات براسها ) الحمد لله شوية
- هاشم : ياكما مشهية شيحاجة نجيبها ليك ؟
- قوت : ( بنفي ) لا والو لهلا يخطيك .. هزهز براسو ليها بقا واقف على نفس الوضعية كيناظرها بنظراتو لي كان باين فيهم قداش كيبغيها وهايم بيها لا كان عاشق ولهان عاشق أول مرة يعشق ويعشق على أصولو بقواعيدو وقوانينو ..
- رجعات راسها اللور كتبادلو النظرات بلاما تدوي عينيها كانو كيقولو كولشي .. عينيها لي كانو فاضحينها وخاصهم واحد كيفهم ف فنون الحب والعشق الأول باش يعرف هاد الزوج باش كيحسو ، قاطعاتهم خولة لي حنحنات مفيقاهم من السهوة ديالهم هاشم حدر راسو وخرج ..
- خولة : ( كطل عليه وتضحك) حسيت براسي شريرة فهاد الساعة حيت قاطعت نظراتكم
- قوت : غير أنت اختي عشتي الحب محرماه علينا ، خاصني نهضر مع ماما غادي يتشوشو عليا قاليهم هاشم بلي تيليفوني خسر ..
- دخل عليهم مرة أخرى شاد فيدو تيليفونها .. قرب من الكوافوز وحطو فوق منو دور عينيه لعندها :
تيليفونك راه شعلتو راه فيه روشارج باش تهضري مع دارهكم عندك تبيني ليهم ݣولي ليهم بلي يلاه تصايب .. والسلسلة لي خدات من عندك ديك ختنا راه رجعت ليها فلوسها
- قوت : (بصدمة) كيفاش رجعتي ليها فلوسها ؟
- هاشم : ( تبدلو ملامحو لصرامة ) شكون السباب فلي وقع ليك عارفاك برانية وجايبتك للحومة خايبة الى عندها عرس تخلي حتى تسالي ودير معاك فبلاصة لي قريبة ليك وليها ..
- خولة : عندو الصح اللومة كترجع ليها
- هاشم : ماعنديش الوقت كون ربيتها يلاه رتاحي .. خرج وخلاها كتشوف فالفراغ تنهدات تنهيدة طويلة مضورة عينيها لعند خولة لي كانت كتشوفيها وتفرنس
- قوت : مالك ؟
- خولة : لا مامالي والو دار ليك روشارج وخلص مولات السلسلة ففلوسها وياختي عزيزنا طايح فيك ما
- قوت : غير نبرا ونرجع للخدمتي ونرجعها ليه
- خولة : اممم واخا سوني لدار سوني .. سونات لمها دوات معاها وطمناتها عليها وزادت طمناتها كثر فاش قالت ليها بلي خولة معاها سدات تيليفون وعاد رتاحت من جهة والديها لي كانت هازة ليهم الهم .
____________
دازت سيمانة على خروجها من الكلينيك راكبة معاه فطوموبيل فطريقهم للعند الطبيب لي دار ليها العملية باش يسواني ليها الجرحة ويبدل ليها الفاصمة .. وصلو قدام الموبل لي فيه العيادة بلاصة الطوموبيل وخرج هو الأول فاتح ليها الباب نزلات الرجل اللولة حطات يدها على جهة الجرحة ونزلات الرجل الثانية واقفة كنحاول تقاد فالوقفة سد باب الطوموبيل وتوجهو بزوج للعمارة كتمشى غير بشوية عليها .. حتى وصلو لقدام لسانسور ودخلو بزوج
- هاشم : ( بإطمئنان ) كضرك ؟
- قوت : ( بنفي ) لا غير كنحس بحال الى بلاصة الجرحة أطيح
- هاشم : حاجة عادية حيت مدة وانت غير الفراش داكشي باش إن شاء الله يكون كولشي مزيان
- قوت : إن شاء الله ، وصلو لباب العيادة دخلو عطات الوراق ولاكارط للمساعدة لي علمات الطبيب .. بعد دقايق رجعات لعندهم :
- تفضلو ݣلسو بلات غير يسالي مع السيدة لي لداخل وتدخلو عندو ..
- ݣلسات قوت بشوية عليها هازة مجلة كتفرج فيها وهو حداها فالكرسي لاخر .. ماشي مدة كثيرة خرجات السيدة لي كانت عندو دخلات عندو المساعدة ورجعات عندهم علماتهم يدخلو .
- كان الطبيب لي فتح ليها ݣالس فوق الكرسي ورا البيرو سلم عليه وعليها :
كيبقات المريضة ديالنا شوية ؟
- قوت : الحمد لله أدكتور
- كيف كتحسي ياكما كضرك الجرحة ؟
- قوت : لا الحمد لله ماكضرنيش أكنحس ببلاصتها بغات طيح عليا
- عادي عادي ماشي شيحاجة ماتخلعيش سينورمال اتحسي بشيحاجة غير عادية فجسمط وبضبط فكرشك هكا كيوقع لأي وحدة حتى لي كتولد سيزاريان كيحسو هكا أجي معايا ..
- دخلات معاها لواحد البيت وسط لاكابيني فيه باياص طلعات فوق منو وتكات ..
- دكتور : طلعي حوايجك ونزلي شوية السروال الله يخليك حوايجك .. تبعات التعليمات ديالو ، لبس اللليكات وبدا كيزول ليها الفاصمة غير بشوية حط صباعو او ورك بشوية شافيها :
ضراتك ؟
- قوت : هزهزات راسها بنفي
- زاد ورك كثر من الأول : ودابا ؟
- قوت : (صغرات عينيها) شوية دابا شوية
- دكتور : الحمد لله اللحم ديالك زوين دغية يبرا داباغادي نسوانيو وسيمانة الجايا باش نزولو الخيط داكوغ ؟
- قوت : إن شاء الله ، . دوا ليها الجرحة مزيان ودار ليها الفاصمة ونزل ليها التريكو ديالها .. بشوية نزلات من الباياص كتقاد حوايجها وهو خرج لعند هاشم حتى صايبات حوايجها وخرجات لعندهم
- الدكتور : الحمد لله الجرحة راه بدات كتبرا مزيان لحمها دغية كيبرا انكتب ليك واحد الرشاشة فاش نحيدو الخيط السيمانة جايا اتبقاي تشريها ..
- قوت : دكتور بغيت نسولك عفاك واش غادي تبقى الأمارة ديال الفتحة ؟
- الدكتور : ( بإبتسامة ) ايبقى يبان أثار بسيط ماشي شي أثار لي خايب ديك الساع نكتب ليك واحد البوماد ديال سيكاتريس تستعمليها .. مكاين شي مشكيل كبير عادي الأهم هو نقزتيها الحمد لله
- هاشم : ( وقف) شكرا أدكتور
- الدكتور : العفو مرحبا .. خرجات هي وياه من عند الطبيب ركبو الطوموبيل وشافيها لقاها ساهية :
اشنو بان ليك نمشيو عند حمادة ؟
- قوت : ( ضارت عندو ) والله ماكرهت جامي جوع الصباح مافطرتش مزيان
- هاشم : واخا .. ديمارا الطوموبيل وشدو الطريق للعند حمادة . . وصلو بلاصة الطوموبيل ديالو حلات الباب ونزلات بشوية
- غادي معاها فنفس الخط ديال مشيتها جر ليها الكرسي ݣلسات وتوجه هو لعند حمادة عطاه الطلبات ديالهم ورجع لعندها ݣالسة وساهية فالفراغ .. جر الكرسي ݣلس قبالتها دورات راسها وشافت فيه ..
- هاشم : ( مفيكسي عينيه فعينيها ) فاش كنفكري ؟
- قوت : ( رجعات كتشوف فبعيد ) سبحان الله العظيم كنت جايا لهنا باش نشارك فالحفلة حتى صدقت مضروبة .. لا أنت شاركتي لا أنا شاركت ( ضحكات) بعد المرات كنبقى نقول أش داني لشي قرع نمشط ليه راسو التجارة خاصها الواحد يكون شاطر وكياكل من العينين وانا مافيا حتى وحدة من هاد الصفات ..
- أنا ماشاطرة ما قافزة ما شريرة كناكل من العينين إنسانة مهدنة ومرزنة مافيا مشاكل ولا صداع الراس غادية للبلاصة عمري مشيت ليها ودافعة جبها كنشوف فسيد كيتق/اتل مع لاخر فعوض نهرب بقيت واقفة ماشي الضحك هذا والبهلان ..
- هاشم : ( برجولة وصوت كلو إطمئنان ) أنا مكنشوفهاش هكا بالعكس أي واحد كدار بيه فالبدية ديالو .. حتى واحد ماتزاد معلم ومتزاد شطايري حتى كتحكو الوقت كتلاقيه مع ناس أصناف وأجناس عاد كيتعلم .. كيتعلم كل واحد كيفاش كيتعامل معاه وكيعرف السوق شنو فيه وفين غادي ..
- قوت : ( بقات كتسمع ليه ) هادشي لي وقع ليا علمني شي حوايج عمرني نساهم والله وبين ليا معدن كل واحد كيف داير .. شكرا بزاف حيت وقفتي معايا هادشي لي درتي والله العظيم إلى عنري مغانساه فعلا الواحد مكتعرفو حتى تعشارو وبحال هاد الأوقات هوما لي كيبينو ليك ..
- هاشم : ( كيسمع لكل حاجة قالتها ) هادشي انا مدايروش باش تشكريني ( قرب للطبلة مركز مع عينيها ) هادشي درتو حيت انا باغي نديرو وحست واجب عليا نديرو معاك انت بضبط.
- قوت : ( توردو خدودها ونزلات راسها كتحس بسخونية طالعة ليها مع رجليها .. رجعات هزات فيه راسها لقاتو مزال مراقبها ) ماتبقاش تشوفيا بحال هكا العار.
- هاشم : ( تبسم إبتسامة رجولية بتقالة ورزانة ) علاش ؟
- قوت : هكاك وصافي
- هاشم : ولا كاين سبب علاش ؟
- قوت : كتوترني
- هاشم : ( مدوز لسانو على شفايفو ) كيݣوليك مايأتر فيك غير لي كتحس بشيحاجة من جيهتو ولالا ؟
- قوت : ( كتنش على راسها ) الجو سخون اليوم واخا لبارح كان البرد حمادة تعطل علينا ..
- هاشم : ( رجع ظهرو اللور مراقبها ) الضبابة كتعمي العين وكتݣولي الصهد العجب .. وقف عليهم حمادة فيديه بلاطويات فيهم طاكوس البلدي
- حمادة : مرحبا بيكم الخبز ديال طاكوس ديال اليوم مصايب بدقيق الكامل .
- هاشم : الله يعطيك الصحة .. مشا حمادة وخلاهم كياكلو ، كتهز عينيها كتلقاه مقابلها حسات بصهدة وقلبها غايخرج من بلاصتو إحساس جديد عليها عمرها حساتو فحياتها .. كاتحاول تفادى النظرات ديالو ليها
- هاشم : تزيدي ؟
- قوت : لا الله يخلف .. ناض مخلص حمادة طلعات هي وياه للطوموبيل ديمارا وزاد .
- سايݣ مرة مرة كيلوح طرف عينيه ليها .. بلاما تشوفيه نطقات :
ماكرهتش نمشي للبحر ولا شي بلاصة كطل على البحر .. بلاما يجاوب حرك الطوموبيل فتجاه البحر وصل للواحد البلاصة بلاصة الطوموبيل .. نزل منها رجع اللور حل الكوفر وجبد جوج كراسة كايتطواو حطهم قريب للطوموبيل باش تݣلس وتسند ظهرها ..
- نزلات بشوية عليها وݣلسات مسندة ومقابلة البحر .. ݣالس حداها مراقب تفاصيل ملامحها نظراتها شفايفها كولشي فيها تنهد تنهيدة طويلة من قلبو ، فديك الليلة هوما قدرو يوصلو ليها حيت كانت بوحدها .. وفديك الليلة نيت هوما قدرو يآذيوها حيت كان خاصو يكون معاها ولكن فهاد النهار واش غايقدرو الناس يگلعوها من يديه ؟
كانت غلطة ولكن ما عمرها غاتتعاود !!
هي مجرد هفوة .. طرات مرة وحدة وعطاتو درس قاصح قوت أمانة قلبو و القلب باش ينبض خاصو يفديها بدمو ..
- بنسبة ليه مكايناش شي لحظة بحال هادي لي ممكن يعلن فيها على مكنونات صدرو هو إنسان مكايقدش يخبي لي كاين كيقولو كيما بغا يكون مزيان ولا عيان .. حتى ليمتا ايبقى يأجل حتى واحد ماضامن عمرو نهائيا داكشي باش الواحد خاصو يفرغ ويخرج داكشي لي كيحس بيه ويغتانم ديك الفرصة لي تعطات ليه ..
- ممكن يجي شي نهار ومترجع تعطى ليه وغايندم حيت ضيعها فوقت من الاوقات .. بحرجة رجولية :
_ قوت شوفي ( زفر تنهيدة عميقة من صدرو ) ضارت لعندو كتشوف فيه بإستغراب :
نعام !!
هاشم : عرفتي شنو ؟ ماتشوفيش فيا هادشي مكايتشافش غير سمعي ..
- قوت : ( مافهمات فيه والو كان باين التردد على محياه ) دوي انا كنسمع .
- هاشم : (رمش بإيماءة خفيفة ) اه سمعيني وعقلي على هاد الهضرة مزيان حيت غاتسمعيها مني مرة وحدة غاتعيشيها للدوام (رمش و حول نظراتو من السما لجيهتها ويديه كايمسحو فقرفادتو بماساج خفيف كيحاول يبدد من لمحة التوتر الطبيعي لي كيحس بيه أي راجل وهو كيعتارف للأنثى لي تيبغي بمشاعرو جيهتها )دابا لا عطيتك طوموبيل و عمرت لك الپلان وݣلت ليك ضربي بيها من طنجة للگويرة غاتصوگيها ؟ (حركات راسها بعد تردد كبير تتفكر ومن بعد أومأت بنفي ) :
- قوت : لا أصلا انا ناعنديش بيرمي ومستحيل ندوزو كنخاف .. ( وهو كذلك ومى براسو بنفي ) خلينا فالمهم الا عرفتي علاش ؟ حيت غايجي واحد الوقت و غاتسكت غاتبقاي أونپان وتقدري تلفي نتيا گاع وتقدري تجلاي فشي بلاصة مكاتعرفي فيها حد و تقدري ما ترجعيش (زفر بتنهيدة خفيفة) ويلا ݣلت ليك نتبادلو و نتي تعطيني سوارتها وتصيفطيني بيها ؟ (سكتات للحظة تتفكر لاين باغي يوصل ) ..
- ويلا ݣلت لك غانغامر و غانصوݣها و واخا يسالي ليها المازوط و توحل فوسط الطريق مغانخليهاش و مغانسمحش فيها .. حيت ديك الطوموبيل هي الحياة لي باغي نعيييش معاك الطريق محفرة ولا مسرحة غانشد فيها و مانطلقش ( سكت شحال كيفكر ورجع نطق ) ماعارفهاش كي كاتݣال ولكن كانحس بيها دابا وفهاد اللحظة وأنا كنشوف فعينيك أ قوت ( عينيه مفيكسيين فعينيها مختارقهم بنظراتو لي كيݣولو كولشي ) .
قلبها كيضرب من نظراتو ليها وكلامو ليها كانت حاسة بشيحاجة جاية فطريق لي اتقلب حياتها وظنها فعلا مخابش فاش نطق بصوتو الرجولي الثقيل ..
- هاشم : ( ماحركش عينيه عليها ) هاد هاشم لي واقف قدامك جيتي نتي و عششتي ليه هنا (حط صبعو فقلبو تنهد ورجع نطق بلمعة مميزة فعينيه ) قوت هاشم كيبغيك وباغي يعرف واش حتى انت غادي تبغيه ؟
- أتكون كذابة إلى قالت ماتصدماتش من كلامو ليها وهاد الإعتراف لي عتارف ليها داخت والأرض ضارت بيها كان عند بالها بلي كاين إعجاب بيناتهم وبلي غير كتعجبو فقط ولكن باش يكون كيبغيها مجاتهاش على بالها نهائيا .. بلعات ريقها وهزات يدها كتنش بيها على راسها شافت قدامها ورجعات شافت فيه كتشوف فإبتسامتو ونظراتو ليها لي كيوتروها حطات يد على جنب الطوموبيل او وقفات .. تمشات زوج خطوات عاطياه بظهر
- هاشم : ( بإستغراب) فين غادية ؟
- قوت : (ضارت عندو) نطل على البحر ونرجع .. وقف تبعها واقف قدامها حاجب عليها الرؤية هزات عينيها فيه باغية غير تهرب داخت ماعرفات ماتقدم ولا توخر
- هاشم : واش حنا دابا فالبحر مزال مجاوبتينيش ؟
- قوت : ( بتوتر) راه الى ما شميت ريحة البحر وضربني هواه وفقت راه مغانقدش نجاوبك
- خلاتو وتمات غادية لجهة واحد الصخرة او وقفات كتاخود نفس عميق وطلقو عينيها سارحين فالبحر ومواجو .. بدات الإبتسامة كتسلل للفمها حتى ترسمات إبتسامة عريضة على شفايفها بصوت منخفض كتسمعو غير هي :
( كضحك) والله الى صدق كيبغيني وباغي يكمل معايا وصدق كيعرف يعبر واخا هو تعبيرو فشكل وماشي رومانسي وخضر ولكن والله الى صدق كيبغيني .. وهو لي عتارف لي وهو لي كيبغيني الأول ماشي أنا هاشم كيبغيني هههه ولكن مجاتش من ديبار نقوليه حتى انت كتعجبني وعششتي ليا فعقلي وقلبي لا ..
- قوت خاصك تقلي أه الى سولك قوليه حتى نفكر على خاطر خاطري حكيه واحد شوية باش تعرفي قداش كيبغيك ( بدات كضحك ) والله الى هاشم كيبغيني
- هاشم : ( وقف عليها حصلها كضحك ) دابا واش كتمشي الهوى ولا كضحكي مافهمتش أقوت ! واش مناوياش تدوي مناوياش تجاوبي ؟
- قوت : ( مسحات الضحكة على وجها ) وراه صدمتيني بهضرتك شنو بغيتي نقول ليك مثلا ؟ لي بغاها الله هي لي غاتكون
- هاشم : عرفنا هادشي ماݣلناش من غيرو باغي نعرف جوابك انا ماعنديش مع ديك خيطي بيطي باغي نجي لداركم الى سهل الله
- قوت : ( خرجات فيه عينيها ) من دابا مزال الحال مزال معارفاش واش نقد نأمن على راسي معاك ولالا
- هاشم : ( بجدية ) مكاينش فهاد الدنيا شي واحد لي تݣدي تأمني لحياتك معاه من غيري
- قوت : ( ببرود كتغيضو) علاش بسلامة ؟ علاش لي خلق هاشم ماخلقش شي حد غيرو ؟!
- هاشم : ( بنفس البرود والجدية ) هاشم واحد لي كيبغيك ويحطك فعينيه وظهرو ايبقى سند تكاي عليه حياتك كاملة معاه عمرك طيحي ولا تميلي ، ونهار تبغي تميلي مغايخليكش .. يعطي عمرو غير أنت ماتقاسيش .
- قوت : والى فرضنا أنا مابغيتش يلاه .. مابغيتكش تبقى معايا ومابغيتكش فحياتي ؟
هاشم : ( مصغر عينيه كيحقق فملامحها فرفت رموشها كيقرا مابين السطور عارفها بل متأكد بلي كتختابرو وتجس نبضو ) انا مكنسولكش واش بغاني نبقى معاك وأصلا مكناخودش منك الإذن لي خاصك تعرفي هو غادي نحتاكر أي بلاصة فحياتك فينما ضرتي غادي تلݣايني .. حيت انا باغيك وباغي نبقى فحياتك وغادي نبقى فحياتك ماعندك حتى خيار .
- قوت : ( جاتها الضحكة حبساتها غير بزز ) شتك بحال الى باغي تفرض راسك عليا بزز
- هاشم : ( ببرود ق//تل وهيبة صوتية طاغية ) لالا أنا كنحط غير ݣدام الأمر الواقع باش تعرفي من هنا للݣدام شنو غادي يكون أكحلة العين ..
_ عارفة شنو لي كيطيح بنادم أ قوت ؟ نقاط ضعفو ونتي بالذات بينتي ليا فديك الليلة أنك نقطة ضعفي .. وفهاد النهار بالضبط أنك نقطة قوتي ما كانتش ساهلة نسمعها من عند أيٍّ كان قوت فالكلينيك راها مضروبة سمعتها فوذني و حسيت بيها كتاكلني فظهري { ميل معاها وجهو بنظرات صادقة وهو تيشد على الحرووف } واش يصحاب ليك ورا هادشي كامل لي طرا غنسمح فيك ؟ نخلي لبنادم منين يدوز ليك ؟ و ننسى ݣاع داكشي لي داز بحالا عمرو كان ؟ { بشبح ابتسامة عيانة } تا حد ما عندو الحق فيك من غير هاد هاشم لي كتشوفيه ݣدامك .. حيت هو لي غاتبقاي تشوفيه من هنا للقدام حتى تفنى الدنيا .
- بقات كتشوفيه مادارت حتى ردة فعل عكس الداخل لي كتحس بواحد الفرحة كبيرة كتحس بربي كيجازيها على صبرها وعلى ݣاع داكشي لي دوزات على نهار بغات إنسان حاشة واش يكون إنسان .. دابا عاد عرفات وتيقنات بلي بعد المرات الانسان غير كيبقى يخربق وبلي الشخص المناسب خاصك اشوية ديال الصبر غايجيك غايجيك .
- قوت : عييت نمشيو ؟
- هاشم : ( بنفس برودها ) اهاه نمشيو غير هو حاجة وحدة بغيت نطلبها منك ( هز عينيه لراسها ) من الأحسن تلبسي الحجاب على أصولو مكاين لاش شعرك يبان للغادي وجاي
- قوت : بدينا مزال مادرنا فطاجين مايتحرق وبدينا .. أصلا انا كنت ناوية نتحجب بلاما تقولها أنت اخويا هاشم
- هاشم : ( ضحك) ݣولي حتى با هاشم مغاتحركي فيا شعرة بغيتي غير تنيرڤيني مغانتينرڤاش .. أنا وياك أيتكتبو سمياتنا فورقة وحدة أتهناي الهضرة ماشي معاك أكحلة العين الهضرة مع باك .
- اَرْفـَقْ اَمـَالـْكِي ْبعَبْدَكْ وَ اعْطَفْ يَـا صابْغْ النـّْيَـــــــامْ
يـَا بَـدْرْ نْـبَـا مَـنْ الـْغـْتـَـامْ يَـهْـديـكْ الله لاَ تْعَـذَّبْ قَلْـبِـي قَـسـيـتْ مَـا كـْفـَــــــــا .. اَنـْتَ الـْمُوصُوفْ بَالـْمْحَاسَـنْ وَ نـَا المَلـْسُوعْ بَالـْغْرَامْ وَ عْـيِـيتْ مْلاَزَمْ السّْقـَامْ اَمَـا بَرَّدْتْ مَـنْ جْـمَـارْ فـْقـَلْبِـي مُحـَالْ تـَنـْطْفـَــا .. انـْـبَـاتْ نْـسَاهَـرْ اللـّْيَالِـي وَ دْمُوعِي حَايـْفـَا سْجَــــامْ نـَبْكِي وَ نـُّوحْ فـَالظـْــــلاَمْ اعْلـَى مَحْبُوبْ خـَاطْرِي مـَنْ جَارْ عـْلِيَّ وْ لاَ عـْفـَـا .. اِمْتـَى يَا مَالـْكِي نـْشَاهَدْ خَدَّكْ يـَضْوِي عْلـَى الرّْسَامْ مَـا بِـيـنْ مْحَافـَلْ الرّْيـَــــامْ وَ نـْقـُولْ بـْرِيتْ مـَنْ عـْلاَلِي وَ نْسِيتْ مْحَايـْنْ الـْجْـفَا .. رَغْبـُوا تـَاجْ المْـلاَحْ فِيَّ يَحْيـِينِي غـِيرْ بَالسْــــــــلاَمْ وِ يرَاعِي سِيرْتْ الـْــــــكـْرَامْ
لاَ خِـيـرْ فـَاللـِّي جْفـَــــــــا حْبِيبُو بَعْدْ ايْامْ المْوَالـْفـَــا ..
___________
- سيمانة كلها وهي عاطياه النخالة مخلياه يطيب على نار مهيلة وتشوف حتى لفين ايبلغ مواصلو .. جا الوقت لي تحيد فيه الخيط طلبات من خولة تمشي معاها باش ماتبقاش معاه الراس فراس وتزيد فمحاينو وعذابو كان عاجبها الحال وفرحانة حاسة براسها جوهرة ثمينة عندها قيمة ماتباع وماتشرا بالمال ..
- واقفة قدام البالكو كان هذا هو نهار الأخر ليهم فكازا باش يرجعو لأسفي دخلات عندها خولة لابسة حوايجها جامعة شعرها بسفنجة دايرة نظاظرها على راسها :
صافي واجدة نمشيو راه هاشم نزل البالز لتحت
- قوت : ( ضارت عندها ) يلاه
- خولة : ايمتا اتعطيه جوابك حشومة عليك السيد مخلياه بحال هكا رحمي السيد مكفاكش هادشي كامل لي دار على قبلك
- قوت : ( بإبتسامة شر) بلاتي شوية خليه مزيان تعطي قيمة لراسك ماشي تباني ملهوفة مالنا زربانين بلات نشوف أش فجهدو مايدير
- خولة : ( ضحكات ) وليتي كتحفظي الدروس وباش مكملاها مركباني معاكم مطورة أنت
- قوت : أه مابغيتش نتجمعو بزوج فبلاصة وحدة .. خليه باش يزيد يعرف قيمتي كثر
- خولة : هادشي كامل وماعارفش قيمتك والله يعطينا وجهك زيدي نمشيو زيدي .. نزلات هي وياها فلاسنسور لقاتو واقف قدام الطوموبيل لابس تريكو طالع بالكول فالكحل مع سروال فنفس اللون وݣاط فالكحل ..
- تسناها حتى ركبات وخولة ركبات اللور أما فؤاد كان سبقهم فصباح شد الطريق طلع هاشم سد الدار ونزل كيتسنى حتى جا السيد لي مكلف بشقق عطاه السوارت عاد ركب مديماري شاد الطريق للأسفي .
- خولة : غادي تݣولي لدار شنو وقع ؟
- قوت : لا ماشي دابا حتى لمن بعد إن شاء الله بابا عيان انخلعو الحمد لله لي نقزتها
- خولة : زعمة مغاديش يعيقو الى شافو دوا ؟
- قوت : مكاين دوا من غير الرشاشة لي انبقى نرش على الجرحة الحمد لله مكاضرنيش .. ودوش قاليا ندوش غير الحمام لا مكاين لاش نشطنهم حتى لمن بعد إن شاء الله
- شافت فهاشم ) هاشم بلاما تقولها لدار ولا لياسين ايقولها لسناء وسناء تقولها لماما وبابا مكاين لاش يتخلعو وانا وليت بيخير
- هاشم : ( مركز مع السوݣان) مكاين لاش توصيني ..
____________
- فدار قوت مجموعين على كاسكروط كانت حتى سناء حاطين الملوي وبغرير والحلوة وصينية فيها أتاي وبلاطو فيه القهوة ..
- عبد الرحمان : مايبقاش فيك الحال أبنتي الخير فيما ختاره الله الى ماكتابت ليك هاد المرة تكتاب ليك مرة أخرى
- قوت : (شادة كاس أتاي فيديها ) داكشي لي كاين والله مابقا فيا الحال ماتجيش غير فصحة كولشي يهون
- صفية : ( بشك ) ضعافيتي أبنتي حتى وجهك صفر شوية ..
- قوت : ( بلعات ريقها ) غير كيبان ليك أماما امع الماكلة ديال الاوطيل ماشي شيحاجة لي زوينة مكاينة بنة ومع ستريس ديال الحفلة داكشي باش
- خولة : ( وقفات) خليت ليكم الراحة أنا خاصني نمشي
- صفية : بلاتي تعشاي معانا
- خولة : لا أخالتي خاصني نمشي غدا إن شاء الله خاصني نمشي للمحال (سلمات عليهم) خليت ليكم الراحة ..
- بقات قوت ݣالسة معاهم مجمعين بضحك تنهدات تنهيدة طويلة العائلة مهمة بزاف ومكتحس براحة حتى كتكون وسط عائلتك او والديك .
_______
- من ورى العشا طلعات لبيتها ترتاح بدلات حوايج لبسات بيجامة سخونة مشطات شعرها ودارت مرطب للوجها .. هزات الرشاشة رشات بيها الجرحة قابلاتها مع المراسا كتشوفيها مكانتش كبيرة بزاف ومكانتش صغيرة بزاف متوسطة بقات ساهية فيها حتى فيقها من سهوتها صوت تيليفون كيسوني .. حطات الرشاشة من يدها وهزات التيليفون طلعات ليها سميتو حطات التيلبفون وخلاتو كيسوني ..
- قطع وعاود سونا بقات مدة حتى كان غايقطع عاد فتحات الخط وبصوت أنثوي ناعم :
ألو
- هاشم : علاش مكتجاوبيش أش كاين ؟
- قوت : ( غلباتها الضحكة) كنت فالحمام ماسمعتوش علاش بغيتي شيحاجة ؟
- هاشم : ( مبرد) كيفاش واش بغيت شيحاجة ضروري خاصني نبغي باش ندوي معاك .. سدي بعدا داك السرجم راه البرد
- قوت : ( تشوكات دورات راسها لجهة السرجم لي كان مفتوح ) كيفاش اينا سرجم ؟ فينك أنت ؟
- هاشم : السرجم ديال بيتك هاد المرة الى بغيتي تكذبي ݣادي الكدبة تكون بقوامها ، وانت غادية جاية من حدا السرجم .
- قوت : ( بلعات ريقها ومشات جهة السرجم طلات بان ليها واقف متكي على طوموبيلتو ومقابل مع دارهم ) هاشم واش انت هبيل الى شافك شي واحد دابا اش غايݣول ؟
- هاشم : ( ببرود) لي بغا يݣول شيحاجة يݣولها مكايهمني حد ماحدك مزال ماعطيتيني جواب كل نهار غانبان ليك حدا داركم وراك حداك بحال ظلك أتهناي ..
- قوت : واش بزز والحماق هذا
- هاشم : أه الحماق والهبال .. نجيك من الأخر عندم حتى لأخر ديال السيمانة الى ماعطيتينيش جوابك بالخاطر انجي لداركم بزز هي من زوج جوايه انت ليا أهي الحاجة دالخاطر كتكون بحلاوتها
- قوت : دابا واش نتزوج بيك بزز مني وإلى كنت كنبغي شي حد غيرك يلاه ؟!
- هاشم : ( ضحك ضحكة رجولية ) حياتك مافيها حد من غيري عارف شنو كنݣول .. قوت مكتابك مكتوب من زمان وعݣوبتك لزريعة جدي الغالي انا وياك تخطط نكونو لبعضياتنا مزاوجين فسما أبنت العطار .. سدي السرجم وماتبقايش طلي وشعرك عريان رزقي مانبغي يشوفو حد غيري تصبحي على خير وماتنسايش الرشاشة .. قط عليها خلاها حالة فمها بحال البهلة .
- سدات السرجم ورجعات اللور مكالياها النموسية لي ݣلسات عليها وتيليفون فيديها ..
- دابا واش عطاها سيمانة تفكر فيها والى مابغاتش تعطيه الجواب ايجي لدارهم .. تسللات الضحكة لشفايفها شادة تيليفون ومعنقاه بلا هواها خرجات منها أها طويلة باسحة بݣاع لي خازناه ومخبياه فقلبها من جهة هاد الإنسان لي قلب حياتها سفاها على علاها بين ليلة ونهار ..
____________
- فجهة أخرى وبضبط فدار سناء من بعدما رجعات من دارهم دخلات بدلات حوايجها فبيتها .. كان مراقبها ومراقب تصرفاتها جاتو فهاد الأيام فشكل ماعرفش مالها ولات عاطياه النخال شنو لي بدلها بين ليلة ونهار
- ضارت عندو لقاتو حاضيها غوبشات ودخلات للكوزينة كتدوي منها وهو كيسمع فيها :
ماتنساش تدخل تدوش عفاك ريحتك راه ولات بحال الݣط كتقهر وديك الريحة لي كدير كون غير تبدلها
- ياسين : ( وقف عليها فالكوزينة ) واش داوية من نيتك ؟ ياك ريحتي كانت كتعجبك أش وقع أش تبدل مالك وليتي هكا ياك لاباس كنتي صحة سلام من نهار رجعنا من الشمال وتصرفاتك مبدلين
- سناء : ( بعصبية ) كيفاش مبدلة انت لي مبدل انت لي ماعرفت مالك ولا صافي أيام ديال المشماش مشاو مابقاوش ؟
- ياسين : ( دوز يدو على راسو ) استغفر الله العظيم يا هاد المرأة نعلي شيطان واش ضراك شيحاجة من جيهتي واش درت شيحاجة قلقاتك ؟
- سناء : ( كتخنزر فيه مطلعاه من رجليه لراسو ) انت كلك مقلقني من ساسك راسك عرفتي كون غير درتي فيا واحد الخير كبير ومشيتي أخويا لداركم وهنيتيني والله .
- ياسين : ( تشوكا من تصرفاتها مافهم فيها والو ) داوية من نيتك مجرية عليا من داري !
- سناء : ( لاحت الخرقة من يدها ) وهي نمشي أنا ؟
- ياسين : ( حبسها بيديه ) واخا ماݣلتي عيب .. رجع بخطواتو لور هز تجاكيط ديالو وسوارت طوموبيلتو وخرج ضارب بالباب ..
- خرجات كطل عليه غرغرو عينيها بدموع وݣلسات على سداري كتنخصص بالبكا .
- سونا فالباب حاس بضيق فصدرو كيحس براسو دايخ باغي يفهم مقادش يفهم بحال شي واحد كان عايش فحلم زوين وخبطيه وقلتي ليه فيق راه غير كتحلم .. تفتح الباب هاز راسو فوجه حنان ختو ..
- حنان : ياسينوس ، تخطاها ودخل كيجر فرجليه ستغربات ماشي عوايدو يتخطاها ومايضحكش معاها لقاهم محموعين فصالون باه خوه ومو ..
- ياسين : ( لاح سوارت وتيليفون ) السلام عليكم ( ݣلس مغمض عينيه مرجع راسو اللور )
- توفيق : وعليكم السلام ( شتف فمرتو او ولادو )
- نعمة : ( تشوشات ) ياسين مالك أولدي ياك لاباس ؟
- ياسين : ( زفر بقلة راحة ) الساعة لله وصافي
- هاشم : ( هزهز راسو ) أش تم ؟
- حنان : مالك أخويا شوشتينا ماشي عوايدك واش واقعة شيحاجة ؟
- نعمة : واش سناء بيها شيحاجة واش تخاصمتو ؟
- ياسين : ( شافيهم بقلة حيلة ) والله العظيم انا براسي معارف شيحاجة ، مافهمت والو نكذب عليكم .
- توفيق : غير بشوية أولدي كولشي كيتحل بالعقل مابغيناش ندخلو ولكن حالتك مكتعجب .
- ياسين : ماباغيش نعاود شيحاجة كتخصني لشي حد واخا يكونو والديا ولكن راه عييت صابر .. من نهار رجعنا من الشمال هزيتي وحدة وحطيتي وحدة الشوفة مابقاتش كتشوفها فيا ..
- حنان : غايكون سبب أخويا مايمكنش نهار لي شفتها كتبان ظريفة وحتى فاش ݣلسنا كتبان ظريفة ومتبتة عجباتني ياكما درتي ليها شيحاجة ؟
- ياسين : ( شافيها ) واش عارفاني انا نݣد نقلقها احنان كطنزي قسما بالله مادرت ليها شيحاجة راه شيدة تسيفات مايمكنش
- نعمة : ماقالت ليك والو يمكن تكون درتي شيحاجة بلاما تحس الله اعلم مغاتجيش وتبدل أهكاك !
- ياسين : ( بعصبية ) أقسم برب العزة مادرت ليها شيحاجة هي تبدلات السيدة مابقاتش حاملة شوفة فوجهي كتݣولها ليا نيشان .. ريحتي مابقاتش حاملاها كندخل كتݣولك سير دوش راك خانز بدل ريحتك راه خانزة .. ادير فيا خير تمشي لداركم
- نعمة : ( بشك ) واش كتقوليك ريحتك خانزة ؟
- ياسين : ( تنهد تنهيدة طويلة) كندوش 4 المرات فنهار دور دور تݣولك ريحتك خانزة .. كتكون كدوي معايا مكتشوفش وجهي ݣاتليك وجهي كيجيب ليها الرضة ..
- حنان : ( كضحك ) هادي الخدمة ديال الوحم أخويا
- نعمة : ( بإبتسامة ) ونوض على سلامتك اولدي راه الوحم هداك
- ياسين : ( سكت كيستوعب) زعمة سناء حاملة ؟
- هاشم : وحتى انت اخويا خدمتي فيها مكلخ راه باينة العما
- ياسين : واش انا فايت فيا الولاد تحك على الجرحة أصاحبي
- توفيق : وراه أولدي واخا مفايتش فيك الولاد راه باين امنين محاملاش ريحتك راه باين بلي كتوحم
- حنان : ( شادة فيه) قفرتيها أخويا وحمها كامل غايجي عليك خاصك تعض فصبر راه شي ناس وصلو حتى لطلاق بسباب الوحم .. خاص دابا تهز ليها هبالها وتديها على قد عقلها ولي قالتو ليك تقوليها واخا .
- هاشم : ( خبط على ظهرو ) مبارك ومسعود
- ياسين : ( داخ ماعرف يفرح ولا يبقى فيه الحال وهو مكيقدش يبقا بعيد عليها ) ودابا خاص نتأكدو كيغاندير نديها لطبيب وهي محاملة فيا الشوفة ؟
- حنان : انا انمشي عندها غدا ونمشيو انا وياها نتأكدو أنت غير كون هاني ..
- توفيق : الله يفرحكم أولدي
- ياسين : ( تنهد بأريحية ورجعات فيه الروح ) اللهم آمين يارب .
- تفارقو وكل واحد مشا ينعس ياسين فبيتو كيخمم ويفصل فرحان وباغي فرحتو تكمل كيتمنى من الله يكون هادشي لي تݣال هو لي كاين .. اما حنان دخلات للبيتها من ورا مادوات مع راجلها وطمنات على وليداتها سونات للسناء دارت معاها تجي طل عليها الغد .
- صبح الصباح على ناس كيتسناوه بفارغ الصبر وعلى ناس أخرين مزال مفاقوش من النعاس .. فاقت سناء وجدات الفطور وحطاتو سونا الباب مشات حلات لقاتها حنان سلمات عليها ودخلات
- سناء : أحسن حاجة درتي هي جيتي تفطري معايا
- حنان : ( جراتها من يدها ) قبل مانفطرو اجس ندويو أنا وياك شوية .. جراتها للجهة الصالون ݣلسو مقابلة معاها ومعنقة يديها بإطمئنان :
دابا حنى ولينا خواتات قولي ليا شنو دار ليك ياسين اش واقع ؟
- سناء : ( رخات شفايفها وغرغرو عينيها ) كنحس بيه مابقاش كيبغيني ماعرفتش كولشي مخربق عليا
- حنان : إيمتا أخر مرة جاتك لغيݣل ؟
- سناء : ( كتفكر ) شي شهر دابا منين رجعنا من شمال من تم ولكن مالفة كدير هكا علاش ؟
- حنان : ( بإبتسامة ) حيتاش راه يمكن هادشي جاي من الوحم عرفتي نوضي لبسي عليك انمشيو للعند الطبيبة نتأكدو .. ناضت سناء بلا عݣز لاحت عليها جلابتها وخرجات مع حنان مخليين الفطور فوق الطبلة ..
- فاق دوش وصلا نزل فطر معاهم .. خرج ركب فطوموبيلتو متوجه للمحال سونا تيليفونو كيعلن على وصول ميساج هزو فتحو طلعات ليه سميتها فتح الميساج كيقرا فيه " صباح الخير نتلاقاو ف cappuccino مع 12:30 " ..
- متكية فوق الباياص معلية على كرشها كتشوف فشاشة لي قدامها ومرة تشوف فطبيبة ..
- شافت فيها الطبيبة بإبتسامة ونطقات :
فعلا كاين حمل عندك جوج ديال سيمانات .. سناء شافت فحنان لي الإبتسامة مزينة وجها والفرحة كتلمع فعينيها سناء مالقات متقول تخلط عليها كولشي الفرحة ودهشة كولشي تجمع عليها .. عطاتها الطبيبة پاپيي باش تمسح كرشها
- مسحي كرشك .. مسحات كرشها وقادات حوايها عاد تبعات حنان وطبيبة ݣلسات على الكرسي كترقب الطبيب تكمل هضرتها
- الطبيبة : ( شافت فيها ) غادي نكتب ليك ڤيتامينات تاخديهم وشي تحاليل ديريهم وتجيبيهم ليا ضروري لي نوصيك عليك ، هو ضروري هاد 3 شهور الأولى خاصك الراحة الله يرضي عليك الوقوف فالكوزينة وكترت الحركة لا تاكلي مزيان وتاخدي الڤيتامينات ديالك وديري هاد تحاليل لي عطيتك وتجيبيهم ليا داكوغ .
- حنان : كوني هانية انا انمشي معاها رجلي برجلها حتى دير التحاليل إن شاء الله
- الطبيبة. : مبروك عليك الله يكمل بالخير
- سناء : ( خدات عندها الورقة ) الله يبارك فيك .. خرجو بزوج من العيدة حنان مقاداها فرحة أما هي كانت مخلطة عليها فرحة وصدمة كولشي تجمع عليها ..
- حنان : داكشي باش مخرجة الشيب الأخضر من ياسين مسكين الله يكون فعوانو الشهورة دالوحم اتخرج منو
- سناء : ناري واش انا دابا أنبقى هكا معاك حمالتي كولها ولا كيفاش بقا فيا ولكن والله مكنحس أكنشوفو كنبغي نطج كون نصيب نقجو ولا نعضو حتى يطوش د//مو
- حنان : هههه كاين لي الوحم كيشد فيه اديك 4 وكاين لي كيبقى معاه حمالتو كاملة وكاين لي كيبدا يخف بتدريج كل واحد وهو .. وماعندو مايدير لي بغا الولاد يصبر لحرهم ..
- سناء : دابا ماعرفت مندير وقيلة خاص نمشي لدارنا ندوزت حمالتي عند ماما سمعتي طبيبة أش قالت
- حنان : من نيتك بغيتي ماما تقلق اصلا بلاما تقولها ليك الطبيبة ماما متخليكش فدار بوحدك اتجيبك للعندها تقابلك هي ندوزو لدار نديو حوايجك ونص لاخر يجيبو ياسين
- سناء : ولكن مابغيتوش يبقى معايا فدار وحدة
- حنان : مغايبقاش الالة يمشي هو لدار وانت تبقاي فدارنا حتى إن شاء الله دوز فترة الوحم على خير وبيخير
- سناء : ( بإبتسامة حنونة ) إن شاء الله ..
- ركبو فطاكسي سيفطات ليه حنان ميساج كتعلمو بالخبار الزينة .. الخبار لي نزلات عليه بحال رحمة الله علم بيهم والديه لي مكانوش أقل فرحة منو ، دازت لدار هي وحنان حتى فطرو مشات سناء تجمع حوايجها وحنان دارت الماعن فلاماشين .. عاد شدو الطريق للدارهم.
___________
- فالكوزينة واقفة هي وخوها كتشرح ليه شنو قالت ليهم الطبيبة وشنو طلبات منهم
- ياسين : دابا انبقى محروم من مرتي هاد المدة كاملة ومالقات علامن توحم غير عليا أنا
- حنان : ( كضحك) هاد البنية ولا الوليد أيجي فوطوكوبي غير أنت كاعليك غير تصبر
- ياسين : ( تنهد ) مكايهمش لمن كيشبه المهم عندي ايكون هو وياها بيخير وعلى خير هذاك هو الفضل وراس المال عندي أنا .. الى بغيت نجي نضوفها خاصني نجي داير شي قب ولا شي كشكول نغطي بيه وجهي كامل هذا هو الحل عندي .
- حنان : ( طبطيات ليه على دراعو ) ايوا صبر غير هو تحمل لي قالت ليك قوليها واخا راه بعد المرات تقد تجي تقوليك عطيني براتي ولا نتلاقاو فالمحكمة انت قوليها غير واخا واخا سايرها حتى يطلق ربي سراحها .
- ياسين : ( عنقها ) والله العظيم الى المجية ديالك بحال الرحمة ديال الله لهلا يخطيك عليا
- حنان : اللهم آمين الله يفرحكم ويكمل عليكم بالخير
- ياسين : آمين .
______
- ݣالس فطبلة جات معزولة على الناس لابس سروال دجين فالكحل مع تيشورت فالبيض مع دجاكيط كحلة وكاسكيطة صفرة ونظارات ديال الشمس لي غير دخل للكافي وزولهم حاطهم قدامو هوما وسوارت طوموبيل وتيليفون .. القهوة كانت زوينة كالم وديكور ديالها زوين مافيهاش بزاف ديال الناس هز يدو كيشوف فساعة كانت 12 ونص نيشان تنهد تنهيدة طويلة كيتسنى على أعصابو .. هز عينيه على غفلة لجهة الباب كتبان ليه داخلة هاد المرة غير كل المرات دخلتها كانت غير المنظر ديالها خلاه يتبسم بلا هواه وهو كيشوفها لابسة قميجة طويلة واسعة فالبيج مع صايا واسعة وطويلة فنفس اللون وفولار مغطي صدرها وشعرها حتى كان فنفس اللون .. مزينة معصم يديها بعقيق وصباعها بخويتمات رقاق وصلات عندو بإبتسامة قالت :
سلام متعطلتش عليك ؟
- هاشم : ( عينيه كلهم إعجاب للمظهرها الجديد ) لا بالعكس جيتي فالوقت انا يمكن لي جيت بكري
- قوت : ( جرات الكرسي وݣلسات ) ماعليش
- هاشم : نتغداو وقيلة شنو تاكلي ؟
- قوت : (هزهزات ليه بنفي) لا ماما دايرة رفيسة فدار أنشرب غير عصير صافي ..
- هاشم : اهاه بصحة وراحة يلالة (أشر للسرباي جا للعندهم خدا شنو بغاو ومشا .. رجع شافيها بتساؤل) كيكاتحسي براسك مزيانة ؟
- قوت : ( بتبات) الحمد لله مزيانة عارفني علاش عيط عليك بعدا ولالا ؟
- هاشم : ( مفيكسي عينيه مع عينيها كيحاول يقرا أفكارها ولا على الأقل يحس بشنو تحت راسها ) باش تعطيني جوابك .
- قوت (هزهزات راسها بالإيجاب) باش بلاما تبقى تجي حدا دار ونصدقو فشوهة وجيران يدويو .. وانا مابغيت حد يدوي فيا ولا ينعت فدارنا داكشي باش قلت ندويو هنا واخا هادي أول مرة فحياتي نتلاقى بشيواحد فشي قهوة
- هاشم : هادشي عارفو كملي
- قوت : ( بجدية ) حتى واحد مكامل فهاد الدنيا والكمال لله سبحانه كل واحد عندو إيجابيات وعندو سلبيات وشحال من واحد ناقصاه شحال من حاجة .. وأنا داتي دابا ولات معلمة بالضربة لي تضربت
- هاشم : ( قاطعها ) واخا تكون داتك كلها ضرابي مكايهمنيش .. بالعكس غاتخليني نعقل على النهار لي تأديتي فيه النهار لي عرفت بلاصتك عندي الى ادوي على هادشي غير فوتيه
- قوت : ( سكتات كتشوفيه بلاما ترمش قاطعهم السرباي لي جاب ليهم شنو طلبو ومشا ، رشفات من العصير ديالها ورجعات وجهات أنظارها ليه ) أنا وياك شخصيات ديالنا مختالفين عارف هادشي مزيان .. أنا بعد المرات كنخدم بلا عقل والعاطفة كتحكم فيا
- هاشم : ( بنفس التبات) وهادشي علاش ربي خلقنا باش واحد يكمل الثاني .. الى كانو زوج مشابهين فكولشي ماعندها معنى ، ربي مافرق الريوس إلا كل واحد كيفاش كيفكر علاش كتسمى أنثى حيت قلبها كبير وحنين هادشي علاش شريك حياتها خاص يكون بحال الصخرة ماشي فقلبو فأفعالو باش يحامي عليها ويكون هو درع علاش كتسند .
- قوت : (رجعات رشفات من كاسها ونطقات بكل هدوء ) مغاديش نسولك على دينك وصلاتك هادشي عارفاه مزيان مغانشولكش واش مبلي حيت حتى هادي عارفاها
- هاشم : لا معارفة والو
- قوت : ( هزات فيه عينيها) كيفاش ؟
- هاشم : أنا مبلي ولكن فاش كنكون معصب مبلي بالوترة .. الى تعصبت كنمشي لعند فؤاد عندنا واحد البلاصة خاصة بينا أنا وياه وكنلعب الوتار ولكن من هنا القدام حتى العادة غاتقطع .. حيت معاك مغايبقاوش الأعصاب
- قوت : (حنحنات) حتى انا فاش كنكون معصبة كنمشي لداك الحانوت لي ݣلسنا فيه أول مرة كنخدم الطين ، الديكورات لي فدارنا انا مصايباهم
- هاشم : ( بشوفاتو لي كيوتروها ) إن شاء الله تولي تخدمي حتى ديكورات ديال دارنا
- قوت : ( رجعات حنحنات حادرة راسها كيحشمها ويغربها فحوايجها بكلامو . .. هزات فيه عينيها لقاتو مبسم ومركز الشوفة معاها ) المهم مغانقوليكش مكنحملش الكذوب والنفاق حيت هادشي راه باين مايحتاجش ندويو فيه .
- هاشم : زيد شنو باقي مزال واقيلة جاوبت على اي حاجة بغيتي تعرفيها ، نحددو النهار الخطبة كيبان ليا
- قوت : لا مزال حاجة وحدة مهمة
- هاشم : أما هي !
- قوت : ( حدرات راسها وتنهدات تنهيدة طويلة رجعات علات عينيها فيه ) مادويناش على الخدمة أنا عارفة بلي غانكون معاك معززة مكرمة ومغايخصني معاك حتى خير نهائيا ولكن انا باغية نخدم غير بينما يجيو الوليدات وديك ساعات إن شاء الله أنا غانݣلس من الخدمة
- هاشم : ( غوبش ) كملي
- قوت : وأنا عارفاك بلي ضد نبقى فسوق الذهيبية وجلايلي يتخالطو مع جلايل الرجال.. وحتى انا مغيارة ومغانبغيش راجلي يبقى يدورو بيه العيالات يفرنس مع هادي ويعطي وقت لهادي .. والذهب كلياناتو كلهم عيالات 1 فالمية كتلقى راجل جاي يشري شي كادو لمرتو كاينة ولالا ؟
- هاشم : ( هزهز راسو بالإيجاب وبإعجاب تبسم ) كاينة
- داكشي باش الشرط ديالي الوحيد على زواجنا .. هو نحلو زوج محالات تحت دارنا ديال الذهب غانكون فيه أنا او واحد ديال النقرة غاتشدو انت .
- هاشم : ( تصدم هز حاجب ونزل الثاني ) داوية من نيتك ياك ؟
- قوت : بنت ليك دابا كنضحك انا ؟
- هاشم : ( زول الكاسكيط حطها مدوز يديه على راسو ) واش عارفة أش كتݣولي سينين وانا كنبصم فسميتي وسط الذهيبية ودابا كتݣولي ليا نجي نولي نبيع النقرة ؟
- قوت : ( رققات صوتها وبإبتسامة مزينة وجها ) لي ترضاه لناس رضاه لراسك انا المحال مغانزل ليه حتى نقاد أموري كلها أشنو بان ليك دابا انت غاتختار ( مراقباه كتلعب ليه على أعصابو )
- هاشم : (بقا مدة وهو ساكت كيفكر فكلامها ) واخا الالة موافق جاتك
- قوت : ( هزات حجبانها ) بصح زعمة قابل بشرطي وغاتخلا على ضومين ديال الذهب على ودي ؟
- هاشم : ( بنفي التبات ) أه قابل عندك شيحاجة أخرى ؟
- قوت : ( تبسمات مخابش ظنها نهائيا فهاد الإنسان للي قدامها صلاة الإستخارة وربي فتح ليها عينيها وقلبها ونور طريقها العوض هاهو قدام عينيها كتشوف فيه .. حدرات راسها ورجعات علاتو ) أنا ماشي هبيلة أهاشم ( برزانة وصوت أنثوي مميز ) ماشي وحدة ماعندها عقل لي تضرب سينين ديال الخدمة فزيرو وتخليك تبدل حرفتك من ذهيبي للنقيري .. غير بغيت نشوف واش للهاد الدرجة غاتنازل على قبلي ولالا
- هاشم : ( هز حاجبو مستمتع بهاد النقاش لي ضاير بيناتهم ) بغيتي تݣولي كتجربيني واش ݣاد بيك ولالا ؟
- قوت : ضروري راه زواج هذا وزواج ليلة تدبيرو عام الوحدة خاص تعرف راسها معامن وعلامن أتحط راس ومعامن اتوسد وسادة وحدة .. غير هو قضية المحال لي ايكون تحت الدار راه مكدبتش فيه
- هاشم : مافهمتش ؟
- قوت : المحال ديالي غادي نشوفو شي حد ثقة لي لي يݣلس فيه والأرباح ديالو يوليو يمشيو للناس لي مافحالهم مساكن وحتى ليتامة .. والصراحة ماكرهتش نبني ملجأ نقسمو على النص .. نص ندير فيه المشيشات ديال الزنقة والنص ندير فيه الكليبات نتكلفو بماكلتهم مرضهم وحتى لي بغا يتبنى شي كلِيَّب ولا مشة يمشي لداك الملجأ أشنو بان ليك ؟
- هاشم : ( بإبتسامة فخر وفرحة ولمعة فعينيه ) أنا معاك فأي حاجة بغيتي ديريها
- قوت : ( بجدية ) نرجعو للشرط ديالي ولي هو المحال ديالك تحولو للتحت الدار ولا تحل محال الجديد .. لي فسيدي بوذهب يبقاو فيه الخدامة لي معاك باش هكا مايتقطع رزق شي حد .. وتحل محال جديد تحت الدار نكونو فيه أنا وأنت
- هاشم : ( مصغر عينيه كيشوف فيها ) الحضية هادي ؟
- قوت : ( ببراءة ) لالا غير هو كل واحد كيحضي رزقو وكيما انت كتغير على مراتك وماباغيش رجال يشوفو فيها وبغيتيها تݣلس معززة مكرمة فدارها حتى انا انبغي راجلي يكون تحت عينيا .. الشرط ديالي واضح أنخدم معاك ونهار لي يكتاب ويرزقنا الله بوليدات غادي نݣلس هادشي انا ديجا دايراه فبالي وكنقولها مع راسي نهار نلقى الإنسان لي فيه ݣاع الشروط لي بغيت فراجل وغانأمن لحياتي معاه غانݣلس من الخدمة
- مافيها عيب إلى بغيت نكون مع راجلي فبلاصة وحدة مكاين باس ياك انت كتقول بلي المرأة خاصها تݣلس معززة مكرمة فدارها وحتى ݣاع الى بغات تخدم مخاصهاش تخالط مع الرجال .. حتى انا مغانتخالطش مع الرجال انا غير ݣالسة مع راجلي كنعاونو وفاش يجيو الوليدات غانݣلس فداري شنو ݣلتي ؟
- هاشم : (ضحك عاجبو الحال )
- قوت : علاش كتضحك ؟
- هاشم : حيت ݣلتي راجلي زوج مرات
- قوت : ( حنحنات بالعة ريقها ) ماتخليش المهم وتشد فهادشي شنو قلتي راه خاص نمشي .
- هاشم : السيمانة الجايا علمي داركم بلي غانجيب دارنا ونجيو نخطبوك إن شاء الله .. ومن هنا نعلمك بلاما تݣلسي عليا العرس من هنا لشهرين ولا ربعة
- قوت : ولكن راه عرس فؤاد وخولة فشهر 12
- هاشم : وهدا لي علينا شهر 9 نݣلس انا 3 شهور حتى تزوج خولة وفؤاد ماݣلتش ليهم عطلو الخطبة السيمانة الجايا العرس غايكون فلافان دشهر 10 ..
- قوت : بغيت نجيب فوزية العبدية او وليد الرحماني
- هاشم : ( حنحن ببحة رجولية ) نبداو زواجنا بذنوب أقوت الناس كيبداو زواجهم بكلام الله
- قوت : نهار العيالات ندير فيه فوزية او وليد وفليل نديرو الطلبة يقراو القرآن أش بانليك وراه عرسي هدا بغيت نفرح براسي .
- هاشم : نبداوها بذنوب ؟
- قوت : واش ذابا لي بغات تفرح براسها راه ذنوب باغي تحمقني أهاشم مزال مادرنا فطاجين مايتحرق عرسي انجمع العيالات وانجيب وليد الرحماني وفوزية العبدية بغيتهم يغنيو ليا طلق الحمام يطير الى ماقديتيش عليه
- هاشم : والله لا طلقتو وقاد عليه واخا الالة جاك شيحاجة أخرى ؟
- قوت : ( بإرتياح وقفات ) ودابا نقد نمشي
- هاشم : ( وقف ) بلات نوصلك
- قوت : لالا أسفي ماشي هي كازا متوصلنيش يشوفوني الناس معاك نهار أخويا نضربو الكحل فالبيض او وصلني فينما بغيتي
- هاشم : ( هزهز راسو ) ماݣلتي عيب .. عطاتو بظهرها كتضحك وخرجات من القهوة مخلياه كيخلص .
_______
- بقات واقفة فبلاصتها كتسنى .. حسات بعينين مقابلينها قلبها ضرب زادت شوية القدام كاع الطاكسيات ياكيدوز عامر يا كيأشر ليها بيدو بلي سالة .. الظهر داز وفديك الوقيتة قليل طاكسي لي يوقف ليك ..
- حسات بشي خيال واقف وراها مقابل معاها وصوت رجولي ناطق :
قوت .. ضارت لجهة الصوت وياريتها ماضارت قلبها ضرب والرجفة هزاتها من رجليها لراسها .. بتوتر وإنفعال وعلي الصوت :
اش كاين أش بغيتي كاين مانقضيو ؟
- صلاح : ( ملامح وجهو باردة ) هو اه حيت عندو اللعاقة وانا ݣالسة تسمعيني كاسيطة ديال عبد الحليم مساهلاش مع راسك أبنت زطاط
- قوت : ( بنفس البرود ) والله ومامشيتي حتى نجمع عليك أمة لا إله إلا الله وتشوف الشوهة ديال بصح
- صلاح : ( كيضحك) يلاه غوتي نسمع وااع وااع ( كيهز فيديه ) واااع ( ضور راسو ) فين هو سي القايد شتو كاعما خرج غيطي عليه يجي يخنشلني اممم
- قوت : شتي هداك والله ماتوصلو راجل عليك وبزاف عليك باغيني للحلال وغايجي لدارنا وانت شي ديك الميكة الكحلة لي كنا كنديرو فيها الزبل ماتقبلش عليك ..
- مابقاش كيشوف ݣدامو تعمات ليه البصيرة جرها من دراعها حتى خرجات منها أهة صغيرة من حر يديه :
تحليك الفم حتى انت وليتي دوي .. عينيها ونظراتو مكانوش كيبشرو بالخير نهائيا لي قدامها مكانش داك الإنسان لي عرفاتو شحال هذا كان بحال شي وحش كيعيف .. بغا يجرها وهي كتنفض فيديه تغوت باش يطلقها مكانتش باغية تبين ليه نقطة ضعفها وأنها خايفة منو ݣاع قوتها خرجاتها .
- فوسط غواتها فبلاصة لي كالم تسمع صداها الناس كانت قليلة حتى واحد ماقرب منها لي كان دايز من تم حدو كايبقا واقف يفهم أش واقع .. يدو لي كان شادها بيها تسمعات طرطقة عظمها على إثر اللوية لي تلوات .. هاد المرة غواتو هو لي حضر
- واش عاد دابا استرجى يحط يدو على دراعها ولا كان غير كيتخايل ؟ وقيلة غير حيت كيخاف عليها او ولات هي قلبو او عقلو داكشي باش تخايل بلي شي واحد شاد ليها فدراتها وقيلة غير مزال ديك الليلة مأترة ليه على تفكيرو داكشي باش تخيل غواتها ولا يمكن سهى وتخيل شي حد تجرأ عليها وقاصها .. التوتر بان من عينيه لي غايمووووت و يݣرررض ليه يديه لي تحطات على لحمها ..
- ولكن تا حاجة من هادشي لي وقع قدامو ماكانت حلم ولا خيال كانت لصح هو فعلا كان قدامو جارها من دراعها بكل برووود وما عارفش علاش حاس بديك اليد نفسها شادة على ݣلبو .. تفاحة آدم طلعات ونزلات .حلقو تجيف ويديه رعشات وهو كيحس بعرق سخون دايز ليه معا ظهرو ..
- كان ݣدامو جوج دالحوايج لا غير يبان فصورة الراجل المرزن ولي كيحل الأمور بلاتي هي أحسن ولي فهاد الحالة مستحيل هاد الحل ياكل معاه ويبرد ويطفي النار لي ݣادية فيه
- ولا يدير شرع يدييييه !! وتا هاد الخيار التاني مكانش فالصالح ديالو حيت قوت تقدر تخاف على راسها منو .. وهو مايقدرش يتخيل راسو عايش بنظرات الحذر فعينيها .. ولكن مكانش عندو حتى حل أخور الحب كيعمي العين والغيرة كتبصر بنادم كتخليه معمي كتخليه يتصرف بلا عقل
- صلاح فالأرض كيتلوى من الحر لي كيحس بيه فيدو كيغوت لربي لي خلقو .. كان متأكد بلي يدو صافي تهرسات .. ضار هاشم عند قوت لي كانت واقفة مخرجة عينيها فيه هزات عينيها فيه ورجعات كتشوف فصلاح
- هاشم : ( نزل براسو حتى وصلو لمستوى صلاح جرو من تريكوه وهمس بصوتو الرجولي لي كان بحال فحيح الأفعى ، بتهديد وببرود قات//ل ) :
وديني وما أعبد ومزال نلقاك كطوف بساحة مراتي العصب ديال رجليك نݣطعهم ليك .. سمعتيني ياك هاد المرة حمد ربي جات فيدك هاد المرة اتجي فرجليك بجوج .. لاحو على كرشو او وقف شاف فيها تبدلو ملامحو فدقيقة وحدة للحنان :
وعتك ؟
- قوت : ( هزهزات راسها بنفي) لا ماشي بزاف
- هاشم : يلاه نوصلك اصلا هاد الوقت مغاتلقايش طاكسي وغاتعطلي على الدار
- قوت : ( حركات راسها بالإيجاب ) واخا .. فتح ليها باب الطوموبيل طلعات دارت السمطة ضار حداها ركب ساد الباب ديمارا وهي بعينيها متبعة صلاح لي مزال كيتلوى فبلاصتو ..
- سايݣ غادي بيها مشافش فيها تكلم بجدية وصرامة :
هادي تاني مرة كيوقف عليك هاد خونا واش كانت شيحاجة بيناتكم قبل حيت هادشي بان ليا كثر من داكشي لي عاودتي عليه !
- قوت : ( دورات راسها لعندو تنهدات تنهيدة طويلة بنعومة صوت ) والله مكانت بيناتنا شيحاجة هادي 3 سنين قبل منخدم فالمكتبة ونلقى الكتاب ديال مجدول الذهب .. كنت كنمشي لاصال لي كيدرب فيه هو كان كوتش ( شافت قدامها ) وحيت مكانتش عندي تجربة كنت هبيلة كان كيعجبني كيبان ليا بحال داك الفارس دالأحلام لي كتحلم بيه كل بنت .
( كيسمع ليها وساكت مركز مع سوݣان) خولة ديما كتقولي فيقي راه هاد نوع كيكون بو البنات ولكن انا كنت نية ومعمية حتى لنهار لي سمعتو شاد بيا الحتيت مع صحابو وكيضحكو عليا .. تما فاش خرجت من داك لاصال ومن ورا مادرت المحال الأول ولا لاصقني وباغيني لزواج وانا مابغيتش ماخلا تعرض لخولة وضارت فيه وتعرض ليا وضرت فيه ومارضاش هادشي لي كاين ..
- هاشم : ( مغززة مكنزز على سنانو ) الشماتة ( سكت شافيها ورجع مركز مع الطريق ) وأنت كنتي نيت كتبغيه ؟
- قوت : ( بقات ساكتة كتشوف فيه مستمتعة بنظر ليه .. شافيها ورجع شاف فطريق كيتسنى فجوابها ) شتي نهار كيبان الشخص المناسب فحياتنا لي كنحسو معاه بشي حوايج أول مرة نحسوهم عمرنا حسيناهم وعمرنا ظنينا أي نهار نحسوهم تما كنعرفو بلي ݣاع دوك المشاعر لي حسينا بيهم شحال هادي غير تخربيق فتخربيق .. غير إنبهار وليد ديك اللحظة وعند بالنا راه حب وهداك راه ما حب ما والو .. الحب هو لي كتولدو المواقف مع الشخص الحب بزاف ديال الحوايج كتحس بيهم فقلبكم هوما للحظات ماعرفتش كيفاش نوصل ليك ..
- ولكن انا عارفة ومتأكدة بلي كاع داكشي لي كنت حسيتو نهار الأول شحال هدا اتخربيقة وإنبهار بواحد الانسان لي بان فحياتي أول مرة نتخالط مع الناس .. وحتى ݣاع قبل منتلاقى بشخص المناسب نهار لي رجعت من زمان الغالي تغلمت شحال من حاجة وأولها بلي داك الإحساس كان هبال وخيال .
- هاشم : ( حابس تبسيمة شاف لعندها ) وشكون هذا لي حسيتي معاه بالحب ديال بصح وعرفتي راسك أكنتي كتخربقي هذا شحال
- قوت : ( كتشوف فيه بكل محبة ) هو لي باغيني على سنة الله ورسوله .. ماباغي يشد بيا طرقان ولا يخيط بيا دروبة باغي يجي لدارنا نيشان وناوي معايا الحلال كيخاف عليا وكيغير عليا حتى الشدة فيدي خايف يشدها .
- هاشم : ( حنحن مبسم إبتسامة جدابة رجولية ) على مولانا ..
__________
- قربها لدارهم كتبان ليها سناء واقفة ومعاها واحد البنت شعرها كحل رطب شافت فهاشم وهاشم شافيها
- هاشم : حنان ختي هاديك
- قوت : ( بإستغراب) وايلي إيمتا جات ومالهم واقفين على برا شنو واقع .. بلات طوموبيلت خوك هاديك لي وقفات تماك
- هاشم : ( بلاصة الطوموبيل مزول السمطة ) نزلي نشوفو اش كاين .. نزلات قوت غير شافتها سناء جات عندها كتجري وتبكي عنقاتها كتنخصص
- قوت : ( كطبطب عليها ) مالك اويلي أش واقع ياك لاباس ؟
- سناء : ( كتنخصص) قوليه يعطيني براتي وبغيت نطلق اعباد الله .. ياسين خرج من طوموبيلتو دايخ مسكين توجه عند خوه
- ياسين : ( معارف مايدير ) أنا صافي ماعرفت فين نصد ؟
- هاشم : أش كاين ؟
- ياسين : سناء حاملة ݣالت ليها طبيبة خاصها الراحة جابتها حنان لدار غير شافتني بدات تغوت ربي لي خلقها وتبكي .. خرجات تبعاتها حنان حلفات لا تݣلس فدار فمها غير طلقني واش هادي هبلت
- هاشم : ( شاد الضحكة ابزز) صبر أصاحبي راه الوحم صعيب ماعندك مدير
- سناء : دابا يلاه المحكمة
- قوت : نعلي شيطان اويلي فهموني غير أش كاين !
- حنان : ( قربات منها ) أنت قوت سمحيليا اختي تعرفنا فهاد الوقت ( سلمات عليها ) متديش عليها عاد الصباح كنا عند الطبيبة قالت ليها بلي راه حاملة الوحم جاها صعيب محاملاش تشوف فياسين جينا داخلين لدار اشافتو هربات حلفات تجي لدارهم جيت معاها مابغيتش نخليها بوحدها ..
- قوت : ( بفرحة ) مبارك ومسعود أختي الله يكمل عليك ياربي
- سناء : وزيدي معايا المحكمة ولا ندير شيحاجة فراسي بالله ( شافت فياسين ) وانت لاش تابعني لاش وداك الشعر لاش مسبسبو على جبهتك حسنو داير ليا فيها زعر
- ياسين : نقرع بوه أنا انعلي شيطان
- سناء : ( مغزفة ) شتوه شتوه كيعصب فيا دابا واش اتديوني للمحكمة ولا ندير شيحاجة فراسي
- حنان : ( كتراري بيها ) صافي نديوك والله حتى نديوك يلاه اقوت نديوها للمحكمة
- قوت : ( كتغمز فيها بمعنى كيفاش)
- حنان : ( غمزاتها ) يلاه اختي أصلا خويا ياسين مافيه مايتلبق اش بغات دير بيه ( شافت فهاشم ) ارا سوارت طوموبيلتك أنت
- هاشم : ( مدهم ليها ) هاهوما .. ركبات قوت حداها وسناء اللور ديمارات وشدو الطريق
- قوت : ( كتبغم ) وحدة حاملة وانا نتحرم من رفيسة .
يتبع...
التعليقات
لا توجد تعليقات بعد، كن أول من يعلق.