مجدول الذهب الجزء 12 والأخير

- وصلو المحكمة وكانو بزاف ديال الناس لي كيتسناو الجلسات ديالهم لي جات فتوقيت ديال النهار ماشي الصباح .. ݣلسو ب 3 بيهم قوت شافت فحنان :

واش حنا دابا بصح أندخلو عند القاضي راه الهبال هذا

- حنان : غير صبري شوية ونمشيو .. كانت المحكمة عامرة تقول ݣاع الناس جايين يطلقو داك نهار هزات قوت راسها بانت ليها واحد السيدة ݣالسة وكلها عامرة من راسها لرجليها بشيحاجة بحال الحريرة هكاك الشعرية لاصقة فيها وحبات العدس .. جاتها الضحكة حبساتها ابزز جا واحد الراجل داخل هو وبنتو وقف حداها كيشوفيها تقدم منها شوية منزل راسو وعلمات التساؤل على وجهو :

مالك أبنتي جايا فهاد الحالة ياك لاباس ؟

- أعمي تخاصمنا وكب عليا الكوكوت ديال الحريرة وبغيت القاضي يشوف هاد الحالة ياخود ليا حقي

- بقا الراجل كيشوفيها وكاع الودنين دناس كانو عندهم كايسمعو ماسمع السيد

- واش من البارح وأنت هكا ؟

- لا صبحت صايمة قلت نصايب الحريرة نوجدها على تيساع حيت العشية عندي مايدار باش نقص عليا الشغال ايوا صباح دابزنا وهو يخوي عليا الكوكوت وجيت نيشان للمحكمة ..

- وبنتي والقاضي أش غايدير ليك يغسل ليك حوايجك مثلا ماعندو مايدير ليك القاضي ..

- وقفات سناء وشافت فقوت وحنان :

يلاه نمشيو فحالنا مابقا ليا فاش نزيد هنا خرجان العقل هذا أنا أصلا شنو كندير هنا بعدا أويلي هاد الوحم أيخرج عليا ، واخا نعرف ندير كمامة ونظاظر كحلين باش منشوف ياسين زيدوز هاد الوحم ولا هاد الحالة ..

- قوت : ( تنفسات بإرتياح ) وعلى سلامتك أختي باغية تخرجي على راسك وعلينا شفتي الناس فين واصلة بيهم وانت الحمالة بغات طير ليك العقل

- خرجو من المحكمة وقفات سناء شافت فقوت :

شوفي سيري لدار ماتقولي لماما وبابا والو على هادشي لي وقع دابا خليه بيناتنا انا أنمشي لدار عند خالتي نعمة صافي

- قوت : سيري اختي الله يكملك بعقلك ويتبت حملك ياربي وصبري ..

- حنان : بلات نوصلوك بعدا

- قوت : ( شيرات لطاكسي وقف ) لالا اسيرو انمشي فطاكسي بسلامة .. ركبات فطاكسي بزربة ومشات وهوما مشاو فتجاه الڤيلا ..

- سونات حنان للياسين علماتو بلي كاين .. علمها بلي راه رجع لدارو صافي باش متشوفوش سناء .

________

- فالعشية ݣالسة كتفرج فتلفازة قدامها حاطة الزريعة جاها ميساج فالواتساب هزات تيليفونها لقاتو هو فتحات الميساج كان فيه " ݣلتيها لداركم ؟

- قوت : ( جاوباتو) لا مغانقوليهم والو أنت لي خاص تدوي مع بابا انا راه انحشم نقولو تلاقيت بيك وباغي تجي لدارنا تكلف أنت .

- جاها ميساج من عندو " اهاه ماݣلتي عيب " ، تسمع صوت الساروت فالباب دخل باها يلاه حط السوارت حدا المرايا بدا يعيط :

قوت .. وقفات طلات عليه براسها :

انا بابا ، بدا تيليفونو كيسوني جبدو من جيب السروال لي تحت الجلابة صغر عينيه بانت ليه النمرة وفتح الخط :

ألو سلام عليكم ، أهلا اهلا بولدي هاشم كيداير الصحيحة لاباس الحاج والحاجة .. قوت اسمعاتو سمية وهي تهرب رجعات للبلاصتها طالقة ودنيها ، بان ليها باها دخل لصالة للخرى كتسمع فيه كيقول غير " أيييه أيييه الله أودي اولدي مرحبا إن شاء الله يكون خير على مولانا " شوية تقطع الحس زادت فصوت التلفازة ورجعات كتاكل فزريعة بان ليها دخل الحمام سمعات ثوت الما عرافاتو كيتوضى كانت على أعصابها ..

- نزلات مها من الدار الفوقانية دخلات للعندها :

باك جا ؟

- قوت : اه راه فالحمام كيتوضى

- صفية : مزيان نيت باش يصلي ونتعشاو .. خرج عبد الرحمان من الحمام محيد الجلابة لابس سروال وتريكو معلي ليه الكمام دخل عندهم للصالة وݣلس

- صفية : غير تصلي ونتعشاو إن شاء الله نوض نسخن العشا بينما صليتي

- عبد الرحمان : ( حبسها بيدو ) بلاتي شوري ݣلسي ندزي معاكم .. رجعات صفية وقوت قلبها كيضرب يديها بردو عليها

- صفية : ( كتشوف فيه ) الله يسمعنا خبار الخير

- عبد الرحمان : ( كان باين على ملامحو القلق والإرتباك شاف فقوت ونطق ) شي ناس دواو معايا على قبل قوت

- صفية : ( هزات حجبانها بإستفسار شافت فقوت ورجعات شافت فراجلها ) شكون هادو الحاج ؟

- عبد الرحمان : ( عينيه على قوت ) هاشم ولد الحاج توفيق

- صفية : ( بدهشة ) خو ياسين ؟!

- عبد الرحمان : وعلاش كاين من غيرو يلاه سونا ليا باغي يجيب والديه السيمانة الجايا إلى كتاب .. قوت مادواتش شافت فيها مها وعينيها كلهم ترجي عارفة بلي بنتها مابغياش ومغاتبغيش حدرات راسها وشافت فراجلها كتحك على حاجبها .

- عبد الرحمان : ( شاف فقوت ) أنا عارفك أبنتي مابغياش ولكن حشومة السيد دار الصواب ودوا معايا نرضو خليه يجي بعدا ماتعرفي تبدلي رأيك .. واخا أنا الصراحة ماكرهتوش ليك غانرتاح من جيهتك ولكن حتى حاجة مابزز .

- قوت : ( تنهدات تنهيدة طويلة وتقادات فالݣلسة ) أش غانقوليك ابابا إلى انت مرتاح من جيهتو وموافق عليه وفرحان ماتجيش شي كلمة ورا كلامك .

- عبد الرحمان : ( وجهو ضو بحال نور الصباح عينيه غرغرو علاش لا ونوارة قلبو باغية وموافقة ) بصح أبنتي راه حتى حاجة مابزز الى مابغيتيش والله شيحاجة ماتخسر خاطرك مارخيصاش عليا نعطيك لمن والة .. مانسلمك غير لي يديرك تاج فوق الراس ويرفق بيك .

- قوت : ( تبسمات ) دار ياسين الله يعمر ليهم الدار شفتهم كيفاش تعاملو معايا بحال الى بنتهم .. وكنشوف غير ياسين كيفاش كيتعامل مع سناء خصوصا دابا حاملة او وحمها صعيب خلاها فدارهم وبقا هو فدار مسكين .. وهادشي الوحدة لي كتقلب عليه ..

- بلاما ندوي على نهار سافرنا وسمح فطوموبيلتو على قبلكم البنت ابابا كتقلب على إنسان يحتارمها يصونها ويخاف الله سبحانه فيها .. انا ماعندي مشكيل مرحبا بيهم .

- وقف عبد الرحمان نازل براسو على راسها بايسها كيردد :

الله يرضي عليك أبنتي اقوت قلبي أنوارت هاد الدار .

- صفية : (بالفرحة وقفات كتزغرت )

- عبد الرحمان : ( بصرامة حنونة ) اهاد المرة تبتي الليل هذا

- صفية : ( عينيها عامرين بدموع ) ماشعرتش الحاج والله ماشعرت الحمد لله الله يكمل بالخير ابنتي الله يفرحك ويسر أمرك ياربي ويعطيك العز والقبول من عندو

- قوت : ( كتضحك ) اللهم آمين

- ناض عبد الرحمان يصلي وصفية بقات معاها كتشوفيها بشك :

كيفاش بين ليلة ونهار بدلتي رايك اش تما كتخبي على ميمتك ؟

- قوت : ( تنهدات تنهيدة طويلة) أش غانقوليك أماما فاش كنت فكازا كان حتى هاشم تم كيفاش كان كيرض ليا البال بحال الى بنتو .. ( لمعو عينيها ) قلبي بغاه بلاما نحس وفاش رجعنا طلب مني الزواج وانا قلت ليه يقولها لبابا حيت عارفاني منقدش نقول لبابا هادشي ..

- صفية : ( عنقاتها ) الله يفرحك أبنتي الله يكمل عليك بالخير ياربي الحبيب ربي ماخيبنيش كندعي كل نهار يكون من نصيبك وربي ستاجب ليا

- قوت : الحمد لله ونوضي سخني لينا العشا راه فيا الموت دجوع

- صفية : الجوع دالفرحة هذاك ( كضحك ) .. ناضت صفية للكوزينة وهو يسوني تيليفونها هزاتو لقات ميساج " اندوي مع دار دابا مابقا والو إن شاء الله الله يجعلك خير ليا ويجعلني خير ليك أكحلة العين "

- قرات الميساج تبسمات مغمضة عينيها ومعنقة التيليفون لقلبها .

_____________

- نزلات حنان من دار الفوق هازة بلاطو فيه طباسل خاويين ..

- نعمة : كلات ؟

- حنان : اه كلات وعطيتها الفيتامين ديالها غطيتها وطفيت عليها الضو عيات اليوم مسكينة

- نعمة : يلاه شوية سونيت لخوك قلتها ليه مسكين ، ايجي يتعشا معانا .. سونا الباب بغات توقف نعمة وهو يحبسها هاشم ، مشا حل الباب بان لقاه واقف مغطي وجهو بكاشكول جابليه الضحك

- دخل أصاحبي راها نعسات

- ياسين : ( تنفس بإرتياح محيد الكاشكول على وجهو ) الحمد لله ، دخل لقاهم ݣالسين تلاح على الفوتوي مسند راسو

- توفيق : كولشي بصبر أولدي فترة وغادوز إن شاء الله

- ياسين : أنا غاتكون بيخير هذاك هو الرباح عندي .. الحمد لله لي حنان كانت معاها والله أختي تحطي علينا بحال النعمة

- حنان : ههههه نهار نمشي علم الله أش ادير بلا بيا ديك ساعات راه ماما كاينة

- هاشم : ( راخي الكسدة ديالو على الفوتوي ) شحال بقا ليك ؟

- حنان : وديك 20 يوم إن شاء الله مابقاش بزاف لينا ( تبسمات )

- هاشم : ايوا مزيان نيت باش تكوني حاضرة فالخطبة

- كولشي ضار شافيه بإستغراب وإستفسار دهشة وصدمة نعمة بلعات ريقها توفيق كيشوفيه بشك ياسين وكذلك

- نعمة : أشمن خطبة ؟

- هاشم : ( بإرتياح ) الخطبة ديالي إن شاء الله ناوي نتزوج الى بغا الله .. وبغيتكم تمشيو تخطبو ليا

- نعمة : ( قلبها كيضرب بلعات ريقها خايفة يكون عينو على شي وحدة تكون بحال نسرين ) مزيان أولدي وشكون هادي ؟

- توفيق : الله يسر اولدي من الخير شكون هاد المباركة مسعودة ؟

- هاشم : ( حك حاجبو ) قوت القلوب

- نعمة : ( قلبها كيضرب عينيها غرغرو بدموع ) حلف بالله أولدي ماكتكذب ؟

- هاشم : الواليدة واش زواج فيه الكذوب ، يلاه شوية دويت مع باها ودرت معاه السيمانة جايا نمشيو نخطبوها

- توفيق : ( الفرحة بانت على وجهو ) أحسن ماختاريتي أولدي الله يسهل عليك

- نعمة : ( نقزات من بلاصتها معنقاه كتبكي ) الله يفرحك كيما فرحتيني أولدي حبيبي الحمد لله ياربي بغيت نزغرت بغيت نغوت خفت نفيق سناء ( كتشد ليه راسو تبوسو وترجع تعنقو ) أحسن خبار سمعتيني

- هاشم : ( كيطبطب على دراعها ) ومتبكيش الغالية راه دموعك بحال غلاوتك عندي غاليين

- ياسين : ( كيضحك ) هانتي يالالة كنتي باغية توجدي لعرس ولدك هانتي اتوجدي ليه .. مبروك عليك أسبع

- الله يبارك فيك ..

- حنان : ( وقفات عنقاتو) وأخيرا تحقق حلم لالة نعمة

- نعمة : ( ݣلسات ) بلات وقوت موافقة ؟

- توفيق : بصح أولدي واش البنت موافقة لا نصدقو محشمين مع الناس .

- هاشم : علاش كونما كنتش عارفها موافقة غانزعم نخطبها غير نعسو على جنب الراحة .

- نعمة : ( بإرتياح ) الحمد لله ياربي الحمد لله

- توفيق : وطلقونا نتعشاو اسيادنا أنبقاو بجوع

- نعمة : ( وقفات) هي اللولة .

___________

رجلي على رجلك نمشيو حتى يطلع النهار

عيني على عينك حتى يشهدو النجوم و القمر

يدي على خدك حتى ينشفو مواجو لبحر

أجي داويني أجي يا لعمر

غرامك أنا شرفني

أجي لعندي داويني

زينها يقتل و يحيي

نشوفها ترجع الروح

والروح الطيح را مرض الحب قبيح

ما صابولوش دوا حتى فالمريخ

الروح الطيح را مرض الحب قبيح

ودوايا عند اللي دا قلبي وعقلي ..

- قطعات مع خولة الإتصال من بعدما عطاتها ݣاع التفاصيل ، غير هي قطعات سونا عليها هو .. فتحات الخط وبصوتها الأنثوي لي من بين الحوايج لي فيها كيجسب ليه التمام ، كيتوحشها وكيبغي يسمع صوتها ونفس الوقت كتفشلو بصوتها :

واش غاتبقى غير تسوني أهاشم نعل الشيطان

- هاشم : (تنهد تنهيدة طويلة تسمعات عندها .. كان واقف فالبابكو ديال بيتو لابس كيطمة البرد كيلعب بشعرفو كيشوف فالݣمرة متخيل وجها ) الله ينعلو ويخزيه .. واش عيب ندوي مع مرتي ؟

- قوت : ( حنحنات ) مزال ماوليت

-هاشم :ابقى والو كولشي قريب إن شاء الله نديرو الخطية وراها نجمعو وريقاتنا للعقد .

- قوت : زربتي عليا زربة خايبة أهاشم ابشوية

- هاشم : واش لي بغا الحلال او واجد ولا زربان ، الله يجعل البركة واش انا نبقى نتسنى ماشي برهوش باش يلاه نتعرف الصلاة على النبي

- قوت : (كضحك ) باز قلتيها لدار؟

- هاشم : ݣلتها ليهم .. عرفاهم هوما أول ناس غايفرحو لينا

- قوت : لهلا يحاشم ياربي .. هاشم

- هاشم : ݣلب هاشم شنو ؟

- قوت : ( حسات بقلبها باغي يخرج من بلاصتو كيجيب ليها تمام ) وصافي كتحشمني

- هاشم : ياك سمعتيني الهضرة حيت خضر مكنعرف نعبر ، دابا فاش وليت نعبر ماعجبك وشوفلك هادي دابا

- قوت : وصافي دابا خليني نسولك

- هاشم : سولي أعمارة قلبي

- قوت : علاش انا زعمة علاش بغيتيني أنا

- هاشم : ( جر كرسي وݣلس ) وسؤال هذا عندك ( ضحك) علاش انت حيت انت

- قوت : كتمرݣن عليا دابا !

- هاشم : ( كيضحك) والله مكاين تمرݣين وهاد السؤال فشكل عندك .. علاش انت والله ماعرت بغينا نعرفو علاش ماعرفناش

- قوت : ( عصبها ، ببرود ) بناقص مابقيتش بغيت نعرف

- هاشم : معاش لي عصبك المعيزة ديالي

- قوت : كيفاش المعيزة دابا انا معيزة واش اهاشم بغيتي تحمقني

- هاشم : ( قهقه بضحكة رجولية ) أنت هي الجوهرة ديال هاشم لي بلاني بيك الله وعوضني على صبري .. هادشي علاش انت حيت جوهرة فيك ݣاع داكشي لي بغيت يكون فشريكة حياتي المرأة لي انكمل معاها حياتي كاملة وندير معاها وليداتي ونأمنها على داري .. هادشي علاش أنت

- قوت : ( تبسمات) وهكاك ماتبقاش تقولي المعزة

- هاشم : ومالي منتقلق منك انت لي كتݣولي ليا نخلة ؟

- قوت : نخلة كينزل منها التمر

- هاشم : والمعزة لحمها بنين وحليبها زين

- قوت : ( عقلها مشا البعيد ) شتك زعمتي مابقيتيش تحشم

- هاشم : ( جاتو الضحكة ) وشوفلك هادي عقلها فين مشا سبحان الله العظيم ، فهادي عقلك دغية حضر وسمطة الكلاب عقلك غاب

- قوت : ( تزنݣات ) ص صافي خاص نقطع

- هاشم : ( قاطعها ) سمعي كلامي مزيان حفظيه وديري بيه عمرك تنسايه واخا الشيب يغطي الراس ، لوكان نجي لهاد الدنيا 100 مرة غادي نبغيك فكل مرة فهاد المية .. غيرك ماهويت والݣلب من غيرك مايعشق .

- قوت : ( تنهدات تنهيدة طويلة تسمعات لعندو ودخلات لقلبو ) تهلا فراسك تصبح على خير خاص غدا نمشي المحال .

- هاشم : إن شاء الله في أماني الله تصبحي على خير .

- وكنت أسألك العوض الجميل ولا أدري ما العوض الجميل الذي سيكون جزاء صبري ، ولكن كنت أتمتم بصوت ٍ خافت يملؤه يقين و رضى :

اللهم اختر لي ولا تخيرني .. عن كل ما أردت بلوغه ولم أصله ، عن حكايا لم تكتمل ، عن أمنيات لم تُرزق ، وعن أحلام كبيرة لم تُحقق وعن أرزاق لم تجيء بعد حتى الآن

عن كل خير ذهب ، وعن أوقات لم تنصفنا بها المقادير كنت مدركة تماماً أن عوضك الجميل يختبىء في المنع قبل للعطاء وفي الشدة قبل الرخاء كنت أقول اللهم الخيره في كل اختيارتك اللهم العوض الجميل بعد الصبر الطويل .. وها أنا ذا سعيدة بل ابكي من شدة الفرح لأن عوضك كان الأجمل .. ولأنك أهديتني على صبري هدية على شكل إنسان فالحمد لله حمدا كثيرا .

- بدات خدمتها من بعد مدة ديال الراحة .. بداو الكليان كيجيو واول حاجة قررات تخدم عليها هي تشوف مع شركة مزيانة ديال التوصيل .. من بعد مدة ديال التقلاب ستقرات على وحدة كيشكروها الناس وكيخدمو معاها الأغلبية ديال البياعة وشراية

- دازت عندها خولة تغداو مجموعين فواحد القهيوة كدير المقيلات ، من بعد رجعات خولة للخدمتها وقوت رجعات لدار

- فكل وقيتة كان كيسوني عليها وكيطمن عليها واش بيخير او واش خاصها شيحاجة فكل وقت كتحس بإهتمامو ليها فرحتها مكانتش كتوزن ولا كتباع ولا تشرى بمال الدنيا كتحس بربي نصفها وجزاها على الصبر ديالها

- ݣالسة فالمحال وشادة التيليفون كدور طلعات ليها صورة لواحد البنت لابسة الخمار كتبان زوينة بزاف ، بداك الخمار لي زادها جمال هزات راسها فواحد المرايا قبالتها كتشوف فحجباتها لي كانو طبيعيين عمرها نتفاتهم .. نزلات بأنظارها لعينيها لي مزينين بالكحل ..

- حطات التيليفون من يديها وبلاما تحس هزات كلينيكس فتحات عينيها وبدات كتمسح فداك الكحل حتى زولاتو كامل من عينيها ، دمعو عينيها وحمارو بكترت المسيح رجعات شافت فالمرايا وتبسمات براحة :

دابا مزيان .. لاحت داك كلينيكس هزات تيليفون ورجعات لديك الصورة هزاتها وخلاتها عندها .

- أيام الأسبوع دازو كلهم غير بين المحال ودار أما صفية فكانت غارقة بين الشقا وتوجاد للخطبة ديال قوت قبل الخطوبة بنهار مع جوايه ديك 6 وقف عليها كانت فالمحال بوحدها ..

- قوت : ( شادة على قلبها ) ناري خلعتيني حرام عليك

- هاشم : ( بجدية ) كون كنتي كتجاوبي على تيليفونك ݣاعما نوݣف عليك هاد الوݣفة

- قوت : ( هزات تيليفون لقاتو مسوني عليها شحال من مرة ) والله ماعرفت كيفاش حتى دار ليه سيولنص داكشي باش ماسمعتوش ..

- هاشم : ( بالهالة ديالو كتحس بالمحال ضيق فوجودو ، رمات عينيها للبواطة لي هاز فيدو ) الخاتم هذاك ياك ( بإبتسامة )

- هاشم : كتفرنسي ، تاع لي مايوريهش ليك ويمشي

- قوت : (بدلال ) ومنبقاش فيك

- هاشم : ( عاض على باطن حنكو وهو كيشوف فهاد الكتلة البريئة الأنثوية لي قدامو ) ليك الله أݣلبي ليك الله ( حط البواطة على الكونتوار ) شوفيه ..

- البواطة كانت فللون الخضيضر .. حلاتها حسات بإحساس غريب فاش شافت الخاتم ديال زواج ، هزات راسها فيه ورجعات شافت فالخاتم قلبها ضرب ضربات خفيف عربون فرحة .. بحال كيف تخايلاتو وبغاتو واخا عمرها جبدات معاه الكلام عليه ولا قالت ليه كيفاش بغات خاتمها يكون ..

- الخاتم كان عين وحاجب .. الاول كان ضاير فيه قبة منبتة بالحجر الأبيض الصافي الأصيل .. أما الخاتم الثاني لي كان فيه صف من الأحجار الأصيلة وصف ثاني من الأحجار والوسط كان عبارة على شكل سلسلة مشدودة عربون على الرباط لي ايجمع بيناتهم لي عمرو مايتفك

- قوت : ( رجعات هزات راسها فيه وبكل هدوء نطقات ) الخاتم خدا ليا قلبي بحال كيف بغيتو

- هاشم : ( مركز مع نظراتها واللمعة لي فعينيها ) تصايب على قبلك .. خدمت عليه فاش كنا فكازا

- قوت : كنتي متأكد بلي غادي نوافق على الزواج منك ؟

- هاشم : ( تبسم الإبتسامة لي كتزعز قلبها من الداخل ) ماشي 100 فالمية ولكن كنت غادي ندير مافجهدي باش توافقي .

- قوت : وباش عرفتي عباري ؟

- هاشم : وساهلة هادي خواتمك كانو عطاوهم ليا فاش كنتي فالكلينيك تما خديت عبارك

- قوت : وحتى انا خاصني عبار صبعك بغيت انا ناخود ليك الخاتم

- هاشم : ( بلا عݣز زول الخاتم لي فصبعو ) هاهو الالة خودي راحتك ( رجع هز الخاتم ديالها ) هذا غايبقى معايا حتى لغدا إن شاء الله

- قوت : ( هزهزات راسها ) إن شاء الله .. بقا واقف كيشوف فيها مصبر راسو وشاد راسو بزز دار الخاتم فجيبو وخرج .

- رجعات ݣلسات فالكرسي كتضحك غير بوحدها حاطة يدها على قلبها ..

- رجعات للخدمتها خرجو من عندها زوج كليانات ، رجعات براصليات كانت وراتهم ليهم .. وقفات طوموبيل فالبيض قدام باب المحال هزات عينها كتبان ليها من بعيد وحدة لي راكبة ، رجعات كتقاد فسلعة حتى سمعات صوت أنثوي بإمتياز نطق :

السلام عليكم .. عطر خلاب ضرب ليها فنيوفها هزات عينيها إبتدائا من السبرديلة البيضة وسروال دجين فضفاض مع تريكو ديال الصوف طالع للعنق وقوفا عند وجه بريء جميل وشعر فالأحمر ناري على شكل سفنجة .. قلبها ضرب بالدهشة والخلعة ماعرفات باش تبلات ..

- البنت : ( كتشير ليها بيدها قدام عينيها ) هيهو ختي صاڤا ؟

- قوت : ن ( بلعات ريقها ) ن نسمة !؟

- البنت : ( ضحكات ) انا نسيمة واش كتعرفيني ؟ حيت يلاه هاد لاسومين باش تحولنا لأسفي

- قوت : ( خرجات من جهة الكونتوار ) ب بلات بلات أنا دابا راجعة واخا دابا .. خرجات من المحال كتجري مخلية البنت مستغربة من تصرفها ..

جات كتجري للعندو المحال صفرة ولون وجها مخطوف .. وقفات يديها كيترعدو غير شافها غوبش او وقف .. خرج من الكونتوار واقف قدامها مخلوع عليها كيسكانيها بعينيه :

ياك لاباس مالك ؟

- قوت : ( كدخل وتخرج فالهضرة ) خ خاصك تجي معايا للمحال .. كاينة فالمحال جات عندي أهاشم جات عندي .

- هاشم : شكون هادي ؟

- قوت : ( كتحاول تجمع السوفل ) نسمة نسمة كاينة فالمحال .

- هاشم : ( بالهداوة ) قوت تبتي وحضري عقلك وغير بشوية أجي على برا .. خرجات معاه مابغاش الخدامة يسمعو ) دابا عاودي ليا

- قوت : ( تنفسات مزيان ) جات واحد البنت للمحال وقفات بطوموبيلتها ودخلات عندي للمحال ، راه فوطوكوبي نسمة جنية الهوى راه ماشي غير فوطوكوبي راه هي

- هاشم : غير بالعقل أقوت واش جنية غاتجي راكبة طوموبيل الله يهديك يݣد يكون كتشبه ليها ماشي هي

- قوت : أجي معايا الى شفتيها حتى أنت عاد غانتأكد راه مايمكنش راه هي هي غير لباس لي مبدل ..

- هاشم : أجي نشوفو .. سبقها غادي وهي وراه بانت ليه طوموبيل واقفة دخلو المحال ، كانت واقفة غير دخلو ضارت هزات راسها فيه وشافت فقوت بشك :

ختي واش صاڤا انت مزيانة ؟

- هاشم : (شافيها وفقوت ) سمحيلينا غير مراتي تشابهتي ليها مع واحد الصديقة كتعرفها ومسكينة توفات داكشي باش تصدمات

- ( تبسمات بأسف ) أه داكشي باش قالت ليا نسمة سبحان الله هي نسمة وانا سميتي نسيمة .. سمحيليا بزاف ماقصدتش نخلعك والله

- قوت : ( كتحقق فيها كانت فولة وتقسمات على زوج غير نسمة عندها الݣرون ولباسها غريب وهادي عادية ) لا ولكن راه تقول غير توام كتشابهو لواحد الدرجة كبيرة بزاف فلون شعر وفكولشي

- نسيمة : ( بإبتسامة) سبحان الله انا ماشي بنت أسفي ولكن عاد تحولنا جديد للهنا ، الواليد ديالي تحول لهنا وحتى خطيبي ولد هنا .. داكشي باش جيت بغيت باش نختار خاتم للخطوبة (شافت وراهم) هاهو نيت جا

- تسمع صوت رجولي وراهم ( السلام عليكم ) ضارت قوت وهاشم .. صغر عينيه متفاجئ :

يوسف !!

- يوسف : ( تفاجئ حيت شافو ) هاشم ( سلم عليه سلام رجولي ) لاباس عليك

- هاشم : الحمد لله وانت والحاج كيبقى شوية

- يوسف : ( تنهد تنهيدة طويلة ) الحمد لله شوية ماشي بحال الأول نقزها

- هاشم : ( شاف فنسيمة ) مبروك عليك

- يوسف : الله يبارك فيك (بتساؤل) أش كدير هنا ؟ عاهدي بالمحال ديالك لهيه

- هاشم : المحال ديال المدام هدا .. المهم مبروك عليك سلم على الحاج ( شاف فقوت ) أنا مشيت

- قوت : واخا ، خرج من المحال ويوسف متبعو بالعين تنهد تنهيدة طويلة ودخل للعند نسيمة

- جبدات ليهم قوت الخواتم وهي عينيها مانزلاتش من على نسيمة كانو كيبانو كوپل زوينين ومفاهمين ، ختارت الخاتم لي بغات ولي عجبها وعجبو حتى هو دارتو ليها فبولطة ديالو مع كارت ڤيزيت ديالها

- يوسف : مكانش فخباري بلي هاشم تزوج (موجه كلامو للقوت )

- قوت : ( بإحراج ) مزال ماتزوجناش ولكن مخطوبين

- يوسف : ( هزهز براسو ) الصراحة هاشم ولد الناس الله يعمرها دار مكاينش بحالو ومغاتبقايش بحالو الله يكمل عليكم بالخير .

- قوت : اللهم آمين يارب .. خرج هو ونسيمة من عندها بقا واقف معاها حتى ركبات فطوموبيلتها ومشا هو فطوموبيلتو .

- ݣلسات فوق الكرسي كتحاول تاخود أنفاسها من هاد الخلعة لي وقعات ليها .. هزات التيليفون سونات :

الو أمضرا ؟ شوف الصباح بغيتو يكون واجد الله يرضي عليك راه العمدة على العشية خاص يكون عندي ، صافي واخا إن شاء الله عندك تغلط فالعبار نفس العبار لي سيفط ليك صافي إن شاء الله .

- هزات يدها تشوف شحال الساعة لقاهتها 7 ، جمعات الوقفة قفلات الڤيترينات طفات الضو هزات ساكها تيليفونها خرجات من المحال سداتو وتوجهات لقيسارية كورس باش تجيب قفطانها ..

- مع مشات لقاتو واجد .. (بتساؤل) أمضرا لقيتيلي داكشي لي قلت ليك ؟

- جاها الجواب من عند مول المحال لي كان معروف فقيسارية كورس حرايفي قديم ) عندك الزهر أبنتي لقيتو ليك واخا راه صعيب ولقيتو ليك كيف بغيتيه أيجي مع القفطان هو هداك .. توجه للواحد الدخيلة ورجع وهو فيدو ساشي ومدو ليها .

- قوت : (بفرحة ) الله يجازيك بيخير أعمي عمر (خلصاتو وخرجات فرحانة من عندو خدات طاكسي نيشان للدار مالقات حد فدار عرفات مها اتكون عند جارة ، طلعات لبيتها حطات الساشيات فوق النموسية فتحات أول ساشية وجبدات منو قفطان اقل مايقال عليه راقي كيفتن .. كان فاللون الأبيض حابط بسفيفة حتى لتحت مع فتاحي فجناب .. اما ليدين نازلين واسعين مفتوحين وتحت منهم الضونتيل فالبيض كان قفطان واسع مكايبينش مفاتن الوحدة ..

- حلات الساشي الثانية كان فيها شال كبير حتى هو فيه الدونتيل من الجناب هزاتهم دارتهم فالعلاقة وعلقاتهم .. دخلات للحمام توضات وصلات سمعات الباب تحل وهي تنزل عند مها تعاود ليها ماجرا معاها فنهارها .

- واقفة قدام مرايتها يديها الرقاق كيتلمسو فسلسلة ديال عنقها السلسلة لي بسبابها عشقت وقلبها طاح فالغرام .. قلبها غرق فبضاض راجل من خيرت الرجال صبرات ونالت تبتات وحصنات وربي على صبرها جزاها فرحتها اليوم ماتباع بمال .. هزات قفطانها ولبساتو جاها عبار فطولتها عريض مكايبين فيها حتى حاجة .. هزات الشال وقداتو مزيان مزيناه بفيليل فيها زوج حجيرات بيضين تلاح الشال على كتافها مغطي ݣاع صدرها بحال الخمار ، خشات رجليها فصباط دومي طالو فالبيض فيه حجيرات بحال زاج اما يدها زيناتها بساعة رقيقة مدهبة .

- وجها لي حطات عليه فقط مرطب للوجه ومرطب للشفايف هو حمر من عند الله سبحانه أما عينيها خلاتهم طبيعين بلا ماسكارا بلا كحل .. هزات من العطر ديالها " بديع العود الأبيض " ورشات منو ختارتو للهاد المناسبة حيت مكوناتو كانو حلوين ڤاني على اناناس على كريم برولي .. مكانش فيه العود بتاتا على عكس إسمو .

- رجعات خطوة للور كتشوف فرساها تبسمات تبسمية طويلة ݣلسات على طرف النموسية هازة كفوفها وكتدعي :

يارب اللهم جعله خير لي في ديني ودنياي ومعاشي وعاقبت أمري اللهم يسره ليه وقدره لي وبارك لي فيه يارب اللهم رزق لنا السعادة مع بعضنا البعض اللهم كتب لنا الخير والرضى اللهم سخر لي قلبه ولا ترينا إلا كل خير يارب العالمين .

- تدق الباب وتحل طلات عليها خولة طالقة شعرها لابسة سروال توب فالخضيضر مع كيمونو فنفس اللون وصندالة عالية مع خاتم خطوبتها مزين يدها بإبتسامة ولمعة دالفرحة فعينيها :

ماشاء الله تبارك الله ( عنقاتها رافعة شفايفها على راسها كتقرا عليها وتحصنها ) الله يفرحك ويكمل عليك بالخير

- قوت : ( بتنهيدة طويلة ) اللهم امين يارب فرحت بيك وفرحتي بيا

- خولة : ( جرات الكرسي ݣلسات ) عقلتي فاش قلتي ليا غانتزوج وتزوجيني صاحب راجلك ونديو صحاب ونوليو جارات ؟

- قوت : ( كضحك ) شوفي سبحان الله العظيم انت لي تخطبتي لولة لفؤاد وها انا انتزوج صاحبو ربي كبير وحق الله العظيم

- خولة : الحمد لله ، عرفتي فؤاد بغاني نتحجب

- قوت : وأنت شنو بان ليك ؟

- خولة : الصراحة انا كنفكر فالحجاب شحال هادي قبل مايقولها ليا هو راه ديجا قلتها ليك .. جا الوقت الله يجعل البركة ماعرفنا من هنا للغدا شنو غايكون اللهم الواحد يبطر براسو الحجاب مكايتسناش عمر ولا وقت معين فرض علينا الله يهديني وصافي كانو عاجبيني هاد زوج زغيبات .

- قوت : كلنا هكاك والحمد لله مامشا الحال والو مزيان منين قتانعتي واخا هو راه مكايحتاج إقتناع راه فرض علينا كيف قلتي ، الى خليتي شيحاجة مرضات لله ربي كيعوض بخير منو اهو خاص ديريه باش ترضاي الله ماشي فؤاد

- خولة : لالا اكلامو جا فطريق هاد الأيام كنحس براسي مخنوقة وحق الله نعاس مكايديني ياربي تسمح ليا صلاتي مقصرة فيها مرة نصلي مرة نقطع ، لباسي حتى هو راه شتي كيف داير القرآن كنهزو من رمضان لرمضان راه بسيف تفسيتي متكونش مرتاحة واخا نبان ليك اكنضحك ولكن راه لداخل فيا واحد الخوف ورهبة .

- قوت : ربي بغاك داكشي باش بغاك ترجعي للطريقو

- خولة : إن شاء الله من غدا غانشري حوايج جداد وكاع لي عندي غانصدقو (شافت فظفارها) ونحيد هاد الجيل باش نبدا صلاتي إن شاء الله

- قوت : ( بإبتسامة رضى) الله يكملك بعقلك ياربي ويهديك ويهدينا أجمعين

- خولة : اللهم آمين هاشم ماسوناش ليك ؟

- قوت : (شافت فساعتها ) لا مزال شوفي الخاتم لي وراك قولي ليا كيف جاك .. ضارت خولة وهزات البواطة حلاتها ، كتحقق فيه وفشنو مكتوب هزات عينيها فقوت :

غزااال عجبني بزاف والله ، الله يكمل عليكم بالخير ياربي

- قوت : اللهم امين يارب .. سناء ماعرفت كيف غادير تجي مع ياسين ولا مع حنان ؟ وكيغادير تشوفيه ياربي ادوز هاد الليلة على خير

- خولة : صݣعة حتى هي الناس يتوحمو على رجالاتهم هي ماحملات فيه الشعرة

- قوت : ( كضحك) عمرها تنسى ليا نهار داتنا المحكمة

- خولة : حمقة هاد البنت والله حتى حمقة

- قوت : الله يتبت ليها ياربي

- خولة : اللهم آمين يارب .

- ريحة بخور معمول العروس معطرة الدار كلها ريحة لي غزالة مكاينش لي يشمها ماتعجبوش .. الطبالي عامرين بأنواع الحلويات المغربية قراعي ديال العواصر كولشي كان واجد فصالونات بزوج صالون العيالات والسالون لي تخصص للرجال ..

- صفية واقفة على كل حاجة بجلابة فالأصفر بناني مزينة يدها بساعة وخاتم ديال زواجها مزين صبعها .. وقفات من بعيد كتشوف واش كولشي هو هداك تبسمات وطلعات للكوزينة الفوق عند الطيابة وعند حورية مامات خولة ..

___________

شَمْسُ العَشِية قَدْ غَرَّبَتْ وَاسْتَعْبَرَتْ عَيْنِي مِنَ الفُرْقَا

عَلَى الشَّفَقْ قَدْ سَطَّرَتْ حِينَ غُيِّبَتْ زَادَ العَشِيقْ شوقا

حَتَّى الطُّيُورْ قَدْ غَرَّدَتْ وَتَرَنَّمَتْ تَرْثِي عَلَى الوَرْقَا

يَا شَمْسَ العَشِيَّا أمْهِلْ لا تَغِبْ بِاللهِّ رِفْقَا

هَيَّجْتِ مَا بِيَا حَتَّى زِدْتَنِي فِي القَلْبِ شَوْقَا

تَرَّفَقْ عَلَيَّا إنِّي فِي المَلِيحْ قَدْ زِدْتُ عِشْقَا

وَالسَّاقِي المُؤدَّبْ يَسْقِي بِالأوَانِي البُنْدُقِيَّا

صَفِّفُوا القِطْعَا وَزِيدُوا نَغْنَمُ هَذَا العَشِيَّا

كُلّنا كأسوُ في يَدُو يَغْتَنِمْ سَاعَة هَنِيَّا

وَالمَلِيحْ قَلْبِي يُرِيدُوا يَنْشَرِحْ بَيْنَ يَدِيَّا

أنَا كُلِّ مِلْكٌ لَكُمْ سَادَتِي أنْتُمُ لِمَنْ

أنَا عَبْدٌ اشْتَرَيْتُمُوهُ رَخِيصًا بِلا ثَمَنْ ..

- تسمع صوت الكلاكسونات ودقايقية .. قوت وقفات بصدمة ورجفة شافت فخولة قلبها غادي يخرج من بلاصتو بتساؤل :

واش هاد دقيقية جايين عندها ݣاعما قالي راه جايب دقيقية

- خولة : واش أنت هبيلة راه هدا ماشي تعارف راه خطوبة وتركاب الخواتم راه باينة غادي يكونو جايبين دقيقية

- قوت : وا كيجيبو فيه حتى الحوايج ؟

- خولة : (كتشوفيها بعدم تصديق ) من نيتك اه علاش انا نهار نهار جا فؤاد ودارهم راه شتي شنو جابو اهو مجابش دقيقية حيتاش كان جارنا عاد توفى جاتنا حشومة

- قوت : ( كتنش ) شداتني الصهدة والخلعة ناري انبول فحوايجي

- خولة : خليك هنا خاص نهبط عند خالتي نستقبلوهم حشومة ..

- قوت : وياك معاها خالتي حورية وبابا وعمي محمد ؟

- خولة : واخا هكاك حشومة .. خرجات خولة من عندها خلاتها كلها كترعد ، حلات السرجم كتطل بانو ليها 4 طوموبيلات ديال توفيق ودهاشم وديال ياسين ، الدقايقية هوما لي سابقين خارجين الجيران كيطلو ..

- الباب الاول تحل نزلات منو حنان لابسة جلابة هماوية فالأحمر طالقة شعرها مع صباط عالي فنفس اللون ، نزلات من حداها سناء لابسة قفطان فزرق هازة ساكها على كتفها ومن الباب لوراني نزلات نعمة بجلابة هماوية بحال شكل دبنتها غير لونها لي كان مختالف فالبلو غوا ودايرة زيف على راسها .

- أما طوموبيلت ياسين نزل منها الحاج توفيق فجلابة فالخضر مستقبلو الحاج عبد الرحمان بجلابتو الرمادية معنقو عناق رجولي ، أما ياسين بقا فطوموبيل منزلش ..

- الطوموبيل الثالثة نزل منها فؤاد هو ومو .. الطوموبيل الأخيرة لي كانت ديال هاشم نزل منها لابس جلابة فالبيض والݣرونة ، التحتاني ديالها طالع بالكول بسلسلة تقاشر فالبيض مع بلغة بيضة ..

- كتبان ليها مها وحورية وخولة هازين بلاطو فيه الحليب وبلاطو أخور فيه التمر وخولة هازة الريحة .. خداو من التمر والحليب دخلات سناء سبقاتهم خلات الباقي ، كيبان ليها هاشم فتح الكوفر وبدا كيخرج فصواني فيهم الحوايج مغطيين ومزينين بليپابيو .. مد لحنان هزات زوج دخلات بيهم ، نعمة دخلات بزوج ومامات فؤاد دخلات بواحد ياسين خرج من الطوموبيل هز من عند خوه .. فؤاد كذلك عاد بقى هو هز مشموم الورد والشكلاط عاد سد الكوفر ، قبل لا يدخل هز عينو فسرجم .. قبل لا يشوفها خطفات راسها شادة على قلبها مبسمة .

- فتحات عليها سناء الباب ودخلات واقفة كتشوفيها مبهورة ، غرغرو عينيها بدموع ونزلو سخان بلعات ريقها ونطقات بكل حنان :

ماشاء الله تبارك الله قل اعوذ برب الفلق ، أعوذ بالكلمات الله التامات من كل شيطان وهامة ومن كل عين لامة ..

- قوت : (عنقاتها) علاش كتبكي دابا غادي تبكيني

- سناء : ( بعدات عليها ) لا متبكيش اليوم نهارك انا راه عارفة مع الهرمونات ( ضحكات) ياسين حلف مايخرج من طوموبيل حتى ندخل انا باش منشوفو مسكين

- قوت : ومنين عارفاه مسكين حنيه فيه .

- سناء : والله اختي مكنحس فاش كيبعد عليا كنتوحشو كيبقى فيا ، غير كنشوفو ماعرفت شنو كيوقع ليا (كتشوفيها بإعجاب) عجبني الحجاب كيفاش درتي ليه كيبان ليا ندير بحالك والله

- قوت : حتى خولة راه صافي نوات

- سناء : ( بدهشة) حلفي ؟

- قوت : وحق الله العظيم صافي اتبدا تصلي واتحجب

- سناء : ( غرغرو عينيها ) مالي انا وليت غير كندمع ( كتنش وتمسح دموعها ) حتى انا انديرو صافي زعماتني مكاين لا إن لا حتى إن شاء الله ياربي

- قوت : ( عاجبها الحال ) وفبلاصة متكون عندي فرحة وحدة هادو زوج ..

- سناء : الله يجعل أيامنا كلها افراح ومسرات ياربي

- قوت : اللهم آمين يارب .

- طلعات لعندهم خولة دخلات عليهم ، بإبتسامة وفرحة عنقات سناء مݣلساها حداها خاشياها فالحضن ديالها :

ياختي على الفنة ديالنا والحمولية ياختي

- سناء : ( كضحك) فخباركم حشمت من بابا نشوفيه والله العظيم جاتني فشكل

- خولة : ( كضحك) راه قلت ليك حميقة ، الله يتبت حمالتك ياربي ويفرحك

- سناء : ( مخشية فيها ) اللهم آمين ياربي .. تحل عليهم الباب ودخلات صفية :

انتوما مخشيات كاملين هنا والناس لتحت ، يلاه ابنتي يلاه الناس الناس كيسولو فيك ..

- سناء : ماما ياسين ياكما ݣالس مقابل مع الباب ؟

- صفية : لا غير تهناي باك لي مقابل مع الباب يلاه .. وقفات قوت كتحاول تستجمع قوتها كلها كترجف يديها باردين عليها

- قوت : خولة هزي الخاتم وديريه فالبلاطو ديال الحليب

- خولة : انت غير هبطي وخلي هادشي علينا حنا .. سبقات صفية وتبعاتها قوت من اللور وراها سناء وخولة كيصليو على النبي .. خرجات حنان من الصالة هازة تيليفونها كتصور فيها عينيها كيلمعو بالإعجاب عنقاتها ودخلوها لصالة ، وقفات نعمة معنقاها بايية ليها راسها كولهم كيصليو على النبي وكيزغرتو ..

- ݣلسات حنان وسيفطات التصاور للهاشم كيفما وصاها ، كان عارف بلي مغايقدش يشوفها حتى للجزء الأخير مكانش قاد يصبر وصاها أول متنزل تصورها ليه وتسيفط ليه تصاورها ..

- فصالون لاخور ݣالسين الرجال .. الرجال الكبار مجمعين بيناتهم وهو ݣالس بكل هبة او وقار وحشمة ورزانة .. حس بتيليفونو ڤيبرا .. جبدو من جيبو دخل للواتساب ، كيحس بقلبو غادي يخرج من بلاصتو فاش شافها غرغرو عينيه بدموع ونزلات دمعة حارة من عينو مسحها قبل لا يشوفو شي حد ..

- أجمل إحساس فهاد الدنيا هو تكون صبار تصبر على جميع الإبتلاءات لي بلاك بيهم الله باش يختابر مقدار صبر وتصبر وتدعي الله يعوضك كل خير ، ربي قدم ليه إمتحان فزواجو الأول تعذب وصبر وقاوم تغدر وزاد صبر لي كون شي شخص فبلاصتو كون دابا فالحبس .

- ولكن هو لجئ لله سبحانه دعى وزير راسو وقوا راسو براسو ودوز ديك التجربة وجزاء صبرو هاهو قدام عينيه شنو بغا كثر من هكا البنت لي كيبغيها ولي بغاها حب طاهر صافي نقي .. كتبان بحال ملاك نازل من سما بحجابها فرحات قلبو فهاد النهار مكانش متوقعها ، عند بالو بلي بحالها بحال أي عروسة اتبغي تفرح براسها نهار خطوبتها .

- كيزومي على وجها لي كان خالي من المكياج شالها لي مغطي نصها وقفطانها الواسع خدودها الموردين بحمرة طبيعية حمرة الحشمة والعفة ، ماكرهش يخشيها فقلبو مايشوفها حد من غيرو غير هو بوحدو .

- حركو ياسين غامزو باش ينزل التيليفون ، قبل مايحطو خدا الصورة ودارها فشاشة ديال التيليفون ، سدو ورجعو للجيبو

- الحاج توفيق : الحاج مجيتنا مانحتاج ندزي عليها أنت عارف لي كاين ماشي أول مرة الحمد لله حنا نساب وجينا نكملو النسوبية ( ضحك بهبة ) جايين نطلبو يد بنتي مغانݣولش بنتك

- يشهد عليا الله من نهار شافتها عيني حسبتها بنتي وتمنيتها لولدي والحمد لله ربي مخيب لينا رجا حنا عائلة مغانشكرش ليك هاشم راه انت عارف لي كاين

- عبد الرحمان : ( بابتسامة بشوشة شاف فهاشم ) وخيرت بيه من خيرة الرجال مغاتورينيش فولدي هاشم ، لوكان عندي ولد نتمناه يكون بحالو .

- هاشم : ( بصوتو الرجولي الفخم ) حسبني ولد أعمي

- عبد الرحمان : بحالك بحال ياسين اولدي ، ربي رزقني بالبنات والحمد لله عطاني دابا زوج ديال الولاد .. مغانامنش على بناتي غير رجال خيار بحالكم الله يجيبنا فالصواب ياربي .. ( وقف ) أنمشي نجيب قوت ..

- تبعو هاشم بعينيه قلبو كيضرب كيتسناها طل عليه .. سبق عبد الرحمان هو الأول وتبعاتو هي حادرة راسها توترات حاسة بالصالة ضياقت عليها .. رمات السلام وݣلسات ، توفيق كيشوفيها بإعجاب وفرحة كيحس براحة غريبة تسللات للقلبو من جهة ولدو ..

- عبد الرحمان : ( وجه كلامو للقوت ) بنتي هاشم جاي طالب راغب فيك على سنة الله ورسوله واخا عطيتيني الشوار ولكن خاصن نسولك ݣدام هاد المجمع واش موافقة أبنتي ؟

- قوت : ( حلفات ماتهز راسها شادة يديها عندها كترعد باغية غير تهرب .. بالهداوة وتباتة ورزانة وصوت انثوي خفيف على القلب ) إلى كنتي انت ابابا راضي فأنا راضية

- توفيق : ( ببهجة ) وسيادنا نقراو الفاتحة .. صفية كانت واقفة كتسمع دخلات عند العيالات علماتهم بالجواب ، كل واحد هاز كفوفو فبيت كيقراو الفاتحة مجموعين ..

- وقفات حنان كتزغرت هي وخولة ويصليو على النبي .. هنا هاشم تكلم موجه كلامو للعبد الرحمان :

عمي إن شاء الله انجمعو وريقاتنا إبتداءا من غدا باش نديرو العقد الى وجدو لينا فهاد السيمانة نديروه بحول الله .

- عبد الرحمان : مرحبا أولدي الله يسخر

- هاشم : ( شافيها منزلة راسها ) باش هكا قوت توجد دارها على راحتها ديك الدار بغيتها تدخل ليها وهي على دمتي .. والعرس إن شاء الله نهار 10/10 إلى بغا الله

- عبد الرحمان: يعني من هنا ل 30 يوم وعليه الله يسخر .

- توفيق : ( موجه كلامو للقوت ) بنتي عندك شي شروط شنو بغيتي ؟

- قوت : ( هزات راسها وشافت فيه ) انا غير يخاف الله فيا ويقدرني ويبغيني ويحتارمني هدا هو شرطي من غيرو ماعنديش أعمي ..

- توفيق : (هزهز راسو برضى وشاف فعبد الرحمان ) :

وصداقها الحاج ؟

- عبد الرحمان : ( ضحك) بنتي الحاج ماتشرا ماتباع بمال عندي زوج عوينات عطيتكم وحدة وغاتديو الثانية يديرها غير فعينيه ويحافظ عليها هداك هو راس المال عندي .

- هاشم : ( عينيه عليها ) وحتى انا قوت واخا نوزنها بذهب منوفيها حقها .. صداقها غالي ماعندو ثمن .

- قوت : ( تحرجات هزات عينيها فيه ورجعات هبطات راسها ) سمحوليا .. خرجات كتجري راجعة عند العيالات .. تبسم ورتاح محبوبة قابو حنات فيه وعطاتو سراحو بشوفاتها ..

- عبد الرحمان : وسيادنا مبارك ومسعود والله يكمل بالخير واللهم يسر .

يلا لبستي القفطان عاوتاني ،يخرج عقلي اللي بقالي ، أجيني يا السلباني أجيني يا لالا .. داك السالف فاين نصيبو

خلا جوارحنا يريبو ، را الحب قاتلني لهيبو رحميني يا لالا

يلا لبستي القفطان عاوتاني خلخال دهبي و لحناني تخرج روحي من كياني أجيني يا لالا ، داك السالف فاين نصيبو

خلا الصبيان كايشيبو و الحب قاتلنا لهيبو غي روينا يا لالا

أنا قلبي صغير و العيلا عينك كبار يشعلو النار كل ما تلاقاو دوك الشفار .. أنا قلبي صغير و العيلا عينك بلار يشعلو النار كل ما تلاقاو دوك الشفار .. آ لاواه لاواه آ يما حياني آلاواه لاواه باغا الغيرة تقتلني آلاواه لاواه ما يشوفو حتى براني ، ما تلبسي القفطان حتى يبرز حدا سلهامي .

ولفني الليل ونجومو را جوارحي ليك كايرومو كي بغيتي عايني ينامو و نتي بعيدة يا لالا ، القفطان عزك وفناني

را حيوط دربك حافضاني الغيرة فهواك خانقاني سعفيني يا لالا ..

أنا قلبي صغير و العيلا عينك كبار يشعلو النار كل ما تلاقاو دوك الشفار .. أنا قلبي صغيرو العيلا عينك بلار يشعلو النار

كل ما تلاقاو دوك الشفار آ لاواه لاواه آ يما حياني آلاواه لاواه باغا الغيرة تقتلني آلاواه لاواه ما يشوفو حتى براني

ما تلبسي القفطان .. حتى يبرز حدا سلهامي

لي شاف غير ضلا يعضر خبي الشربيل لا يضهر واخا مواتيك كا يضبر .. قليبي مسكين ، لي شاف غير ضلا يعضر خبي الشربيل لا يضهر واخا مواتيك كا يضبر .. قليبي مسكين ..

- دخلات خولة الصينية لي فيها الخواتم .. كان فيها خاتم قوت وخاتم هاشم عيطو على هاشم والباقية وقف ياسين جبد من جيبو كمامة كحلة ونظاظر كوحل شافيه عبد الرحمان وتوفيق كيضحكو .

- توفيق : حكمات عليك المحكمة أولدي

- ياسين : واشغاندير نصبر حتى يدوز هاد الوحم على خير

- عبد الرحمان : فاش كانت حاملة بيها خالتك ىاه كنت كنغسل 10 المرات فنهار فينما تشوفني كتݣوليك فيك ريحة الماعز الصبر أولدي هههه

- دخل هاشم للصالون لي فيه العيالات ݣلس حدا قوت تبعوه من اللور توفيق وعبد الرحمن والحاج محمد بابات خولة ، بداو العيالات كيصليو على النبي

- مدات ليه خولة خاتم العروسة هو الأول ركبو ليها فيديها هز عينو فيها وتبسم ، عطات خولة خاتم للقوت هزات عينيها فيه بحياء وركباتو ليه .. صغر عينيه كيشوف فالخاتم وكيقرا فالجملة لي كانت مكتوبة فيه " أنــا لـك حـين يُـثقل العالم عـلى كــتفيك "

- سكتاتو بهراتو ماعرف مايݣول حدو تنهد تنهيدة طويلة نابعة من قلبو ، مدات ليهم خولة التمر وكلوه لبعضياتهم وختماتو ليهم بتمر ..

- بداو الزغاريت والصلاة على رسول الله .. خداو ليهم تصاور مع بعضياتهم وتصورو معاهم .. رجعو الرجال لصالون لاخر جمعات خولة وصفية وحنان حلفات تعاونهم الطبلة لي فيها العواصر وجا الوقت ديال العشا .

- حطات حورية أم خولة الطبسيل الاول ديال الدجاج محمر وعطات طبسيل الثاني للياسين حطو للرجال داز العشا فجو عائلي حميمي ، كيسودو الحب وتفاهم وقلب بلا غش .. الطبسيل الثاني كان ديال بسطيلة دالحوت الماكلة كانت بنينة بزاف كلاو حتى شبعو خصوصا حنان لي موحشة ومهاوشة على ماكلة المغرب .

- سلا العشا وناضو الرجال والنسا باش يمشيو بحالهم .. وصلوهم حتى لباب وقف بعيد كيشوف لعندها هز تيليفونو وسيفط ليها ميساج ، تيليفونها كانت مخلياه فصالون .. ركبو مودعينهم ركب هو حاضيها من طوموبيل حتى دخلات عاد ديمارا وتبع البقية .

___________

- الكل مشا بقات غير هي فبيتها هازة تيليفونها كتقرا الميساج لي كان فيه " مبروك علينا " ديك ساع جاوباتو " الله يبارك فيك " مشات لربيرتوار وبدلات سميتو ل " ولد قلبي ❤️ حداها قلب أحمر .

- حطات تيليفونها كتشوف فداكشي لي جابو ليها هادشي غير خطوبة وماخلاو مجابو بيجامات روايح فولارات صندالة وصباط وسبرديلة بيضة ميديكال .. كوليي ديال الذهب فيه حجرات بالخضر كبرو بيها تكبيرة تمناها كل بنت .

- ناضت توضات وصلات العشا دعات وحمدات الله وشكراتو على على الفرحة لي هي فيها .. خلات الحوايج تم ماستفاتهمش هزات الغطا وتخشات فيه جاها واحد النعاس عمرو جاها خصوصا فديك الوقت مامالفاش ليها ولكن ماحساتش على راسها حتى نعسات وتيليفون كان حدا راسها ..

- دخلات عليها مها لقاتها نعسات وتيليفون كيڤيبري حداها هزاتو وفتحات الخط كان هاشم :

ألو ولدي .. راها نعسااات واش نفيقها ؟ صافي واخا تصبح على خير .

- سدات التيليفون حطاتو بعيد عليها شوية طفات عليها الضو وغطاتها .

_____________

- كان خاصها ضروري تفيق بكري توجد وراقيها فطرات بزربة لاحت عليها عباية وشالها هزات لاكارت ديالها وخرجات مع باها .. داز صباحهم كلو غير فجرا من هنا ولهيه سونا عليها هاشم لقاها مع باها كان بحالها حتى هو الغدا تغداتو هي وباها على برا داك النهار ماحلاتش فيه المحال نهائيا ..

- كل نهار عندها كان كيدوز بحال لي قبلو الشهية مابقاتش عندها نافعاها غير صفية طاحنة ليها التقاوت لوز ݣرݣاع وكاع تقاوت وجامعاهم ليها بالعسل الحر ودايرة معاهم دروة الجمل هي لي كتاكل باش تقد تجري مع وراقها

- جمعو ݣاع الوريقات لي خاصهم لا هي لا هو ودارو باش بعد الغد يعقدو الغد ليه جات عندها خولة وحنان باغيين يمشيو للحمام حيت كانت شحال هادي ماتحمحمات وحنان مدة مامشات للحمام البلدي ، دخلو سطولاتهم ودخلو معاهم الليمون دازت تحمحيمة زوينة بين حماعة وضحك وقولها وضحك عليها وختموها بالليمون .

- الغد ليه دارت شالها مع عباية فالبيج وبلغة فالبيج جابوها ليها فالخطبة خاتمها ورشات من ريحتها .. قلبها كان كيضرب بجهد الخلعة كولشي تعرم عليها .. اليوم هو اليوم الموعود اليوم سميتها غاتكتب حدا سميت الإنسان لي ختارو قلبها وبغاتو .

- مشات مع باها فطوموبيل لقاتو حاضر واقف لابس ݣندورة رجالية فالبيج مع ساعة رجالية وبلغة فرجلو سبحان لي صورو فأحسن صورة كامل الرجولة كيعمر العين .. جا معاه باه وهوما يدخلو للعند العدول سلمو ليه الأوراق المطلوبة قلبها كان كيضرب وهي كتشوفيه حشمانة مرة طلع عينيها فيه مرة تنزلهم بديك الرهبة لي شداها .

- سولها العدول على شروطها ونطقات :

انعاودها أنا غير يخاف الله فيا ويديرني فعينيه شيحاجة أخرى لا .. سولو هو كذلك واش عندو شي شرط جاوب بنفي .. هز العدول راسو فيها وسول :

هل توصلت العروس بصداقها ؟

- هاشم : ( جبد من جيبو جوا كان فيه شيك بالإسم ديالها ) هذا هو الصداق ديالها .. خداه من عندو العدول فتحو وقراه هز عينيه فيه وفيها كان باين عليه الدهشة .. رجعو ليها مافهماتش نظرات العدول كانت باغية تفتح الشيك وتشوف شحال فيه لي خلا العدول يتبهر ، مكانتش هامها الفلوس ولا باغية شي مبلغ خرافي ..

- كمل العدول الإجراءات طلب منهم يسنيو سناو هوما الأولين عاد والديهم وأخيرا هي وياه ولاو مزوجين على سنة الله ورسوله

- العدول : مبروك عليكم ( سلمهم الروسي بينما خرج ليهم العقد ) وقفات سلمات على باها كيبارك ليها باس ليها راسها .. ضارت عند توفيق باست ليه يدو وباس ليها راسها .

- هاشم : ( شافيها بكل حب ) مبروك مادرنا

- قوت : ( جاتها الضحكة ) الله يبارك فيك .. خرجو من العدول مخليين طوموبيل عبد الرحمان مبلاصية وركبو فطوموبيلت هاشم متوجهين للدار قوت .. كانت راكبة هي وباها اللور مقابلة مع المرايا ، كل شوية كطلع عينها كتلقاه حاضيها ..

- وصلو لدار لقاوهم واقفين عند الباب ملقيين ليهم بالحليب وتمر نعمة حنان وسناء خولة صفية ..

- بداو بصلاة على النبي ، خرجو العرسان من الطوموبيل خداو التمر والحليب ودخلو الدار كانت عامرة ريحة الطياب كتعطي .. الرجال دخلو للصالة لوخرا والعيالات الصالة لوخرا ..

- واحد الشوية خرج عبد الرحمان يتكلم للطلبة لي حضرو دخللهم لصالون ديال الرجال الريحة ديال البخور معطرة الدار .. وهي ݣالسة حشمانة وسط العيالات كتجاوب على قد السؤال طايح عليها واحد السر او واحد الملح كيفتن بلا مكياج .

- خولة : ( لابسة طابلية فالكوزينة دايرة فولارا عاكفة بيها راسها واقفة هي ومها ) شوفي واش هاد البصلة كافية ؟

- حورية : ( كطل بعينيها ) لا زيدي مزال داكشي قليل

- خولة : شحال نزيد ؟

- حورية : زيدي واحد 6 البصلات هكاك .. دخلات عليهم صفية جايبة طباسل كبار من عند جارتها ورجعات تجيب شي كيسان.

- ناضت قوت ستأدنات تطلع لبيتها تبدل عليها ، خرجات حادرة راسها كان مقابل مع الباب رمقاتها عيونو فاش طلعات .. دخلات لبيتها زولات شالها حطاتو على الناموسية وݣلسات متنهدة تنهيدة طويلة مبسمة بإرتياح ، دارت الپوانيي وتحل الباب ديال بيتها دورات راسها بزربة هازة حجبانها بصدمة كترمش بزربة متوقعاتش يكون هو قلبها رف وشداتها الرعشة ..

- قوت : ( بلعات ريقها ) أش كدير هنا ؟

- هاشم : ( دخل ورض الباب مبسم ) جيت نݣول لمراتي مبروك ..

- قوت : ( قلبها غايخرج من بلاصتو ) وراه قلتيها ليا عند العدول

- هاشم : ( بخطوات بطيئة كيقرب منها ) مكافيش ماخديتش راحتي والواليد وباك كانو معانا واش هكاك الناس كيݣولو مبروك لبعضياتهم

- قوت : ( وقفات بلاما تحس حسات ببيتها ضيق ماكرهات تغرق فحوايجها وتهرب ) ماعندنا منديرو هاشم الناس التحت

- هاشم : ( مامحيدش عينيه عليها ) علاش انا شنو درت واش عيب واحد يدخل على مراتو يبغي يدوي معاها

- قوت : ( هزهزات راسها بزربة ) لا لا اهو

- هاشم : ( قطع المسافة لي بيناتهم واقف قبالتها كيتأمل فعينيها وجها شعرها .. لاول مرة أيحط يدو على شعرها ) أهو شنو ؟

- قوت : ( بقا ليها شوية وغاطيح الى مابعدش لأول مرة شي راجل يحطو يدو عليها ) شش هاشم هانت انا نقوليك دابا هو ..

- هاشم : ( جرها من يدها خشاها فحضنو معنقها بقوة ) ششششش ماتخايليش شحال كنت كنتسنى هاد اللحظة من نهار بغيتك .

- عطرو تغلغل لأنفاسها دقات قلبو كتسمعهم فودنيها صلابة صدرو كتحس بيها دورات يدها على ظهرو ، تكذب الى قالت هاد تعنيقة مكانتش محتاجة ليها لأول مرة أول حضن بنسبة ليها هو هذا .. تخلط عليها كولشي الفرحة الرهبة كولشي كان مجموع ..

- هاشم : ( بعدها عليه بشوية كيتأمل عينيها ونطق بصوت رجولي تقيل ) وا شدرتي فيا يالي مرضتي ليا ݣلبي بغرامك غير ݣولي ليا .

- حدرات راسها والحشمة طغات على خدودها ، هز ليها راسها كيتمعن فعينيها نزولا لشفايفها تنهد تنهيدة طويلة ونزل بشفايفو ملتاهم شفايفها العدرية شفايفها لي كانت هادي أول قبلة ليهم .. ومن عند حلالها حبيب قلبها كان بارع ومسيطر كتحس براسها مسحورة وهي معاه شي حوايج تحركو فيها لأول مرة أتحس بيهم كأنثى مابغاتوش يحبس ماكرهاتش تبقى معاه بحال هكا .

- فصل القبلة وتبسم حاط راسو على راسها ، طابع قبلة أخرى على راسها راجع ضامها لعندو .

- الحلال زوين بزاف اي حاجة فيه زوينة كديرها بلاما تخاف تعصى الله ولا تقول الناس ولا يجيك تانيب الضمير كتعيش الحب بلا خوف كتعيش اول قبلة ليك واول حضن بلا خوف من شي حد حيت داك الإنسان حلالك شريك حياتك لي غاتكمل معاه لي بقى ليك من عمرك .. خاصك تكون صبور وإيمانك قوي بالله باش تعيش لحظات جميلة حلالا طيبا .

- تدق الباب وبزربة بعدات عليه حنوكها حمرين ، كانت خولة لي حلات الباب وكتجاوب شي حد التحت مزال مشافتهم .. مع ضورات راسها تبلوكات تبسمات للهاشم بحرج .. حدر راسو تخطاها ونزل :

هاي هاي هاي هاي .. وياختي ياختي ياختي أش كنتو كديرو اممم خليتو الناس التحت. أنتوما باركين على قلة الحيا هنايا .

- قوت : ( شدات على قلبها حسات براسها بحال الى كانت غير كتحلم ) أنا صافي قلبي غادي يسكت أخولة ناري ناري الحب زوين وحلووووو

- خولة : ( بشك هازة حاجب ومنزلة الثاني ) تي كيفاش حلو

- قوت : ( حلات عينيها كضحك ) زعمة عندو حلاوة خاصة وصافي براكة من الضحك الباسل كتحشميني

- خولة : (بزربة ) لقيتيني مامسالياش شوفي قالت ليك خالتي صفية لبسي ديك الفراشة ديالك البيج .. ومنين تكوني خارجة سدي بيتك راه الباب محلول وكولشي داخل خارج .

- قوت : صافي تهناي .. خرجات من عندها خولة ناضت لبسات عليها وقدات شالها رشات ريحتها خرجات من البيت سداتو ونزلات فتجاها للصالة هزات عينها كان مقابل معاها تبسم ليها غامزها ، تبنجات حتى تضربات رجليها مع حاشية طبلة .. وركات على فمها من الحر وهو مقابل معاها كيضحك .. غوبشات فيه ودخلات عند العيالات هازة تيليفونها يلاه ݣلسات وصلها ميساج من عندو " هادي غير بوسة خفيفة وشنو دارت فيك الى وصلنا للصح اش غايوقع ؟ "

- حطات يدها على وجها لقاتو سخون جمعات فمها وجاوباتو " عند بالي حشومي صدقتي مقزدر مكتحشم "

- بقا مدة وهو يجيها الجواب " الحشم وتباتة للبراني ماشي مع مراتي مزال تشوفيا معايا الأخر أضراني فݣليبي "

- جاوباتو " أم واخا واخا دابا نشوفو شفتي ݣاع لي فيه الشفوي متخافش منو "

- كان فصالة لوخرا كيضحك نازل على تيليفونو إسمها مضوي الواتساب بمبدل ليها السمية لل " قوت قلبي وحداها قلب ❤️ "

- جاها الجواب من عندو " حتى هذا نظر فاش تجي وقتها وتشوفي واش غير شفوي " خلاتو مجاوباتوش ، غير بظاو الطلبة بقراءة القرآن وهو يحط التيليفون قراو ماتيسر من القرآن وتغداو وختموها بدعاء للعرسان .

- العيالات والجيران تغداو حتى هوما الكل مشا بقات غير العائلة ومن وراها كولشي رجع بحالو لدارو .. حنان سيفطات إيمايل للخدمة ديالها طلبات منهم تمديد للكونجي ديالها على حسب عرش خوها باش تحضر ليه على الأقل تحضر غير للول وتمشي طلبو منها ورقة سونات لراجلها وصاتو يصايبها ليها باش يدوزها للخدمة ديالها .

- التوجاد للعرس بدا ، كتخرج هي وحنان وخولة كيتقداو الدهاز ديالها ، صداقها لي كانت فرحانة بيه حيت عرفات قداش هي كبيرة فعينيه واخا مكانتش باغية كانت باغية صداق عادي بحالها بحال اي عروس .. قوت كان بنسبة ليها لا العرس ولا الصداق غير مهم عرفات ناس وسمعات اخبار ناس تحط ليهم فصداق الملايين ودار ليهم أفخم الأعراس وشراو فدهاز أغلى الماركات ولكن من بعد الزواج تصدمو بالواقع المر .

- كل وحدة وكيفاش لقات راجلها ورا الزواج هنا عرفات بلي لا صداق يدوم ولا عرس فخم يدوم ولا دهاز يدوم كيدوم الصح والمعقول وتلقاي سند معاك لي يشد بيديك ويبغيك سوا بصحتك ولا بلا صحة يبقى معاها طول الحياة عمرو يأديها ولا يعݣرها بكلمة هذا هو المهم .

- ماخلاو محال فقيسارية كورس خداو النص والنص خلاوهم حتى لمن بعد .. دارت معاه باش تمشي معاه الغد للدار تشوف الدار باش تعرف لون الفراش لي غادي تختار .

- الغد ليه سونا ليها ، كانت لابسة ودايرة شالها لي كان مغطي النص فصدرها هزات ساكها وخرجات لعندو شحال هادي ماتلاقاو كانو غير التيليفون .. دخلات وسدات الباب وراها ضارت عندو جرها وهي مبحلقة فيه عينيها باسها من وجها مبعد عليها مبسم :

كل ما عيني كتبعد عليك كتزياني أشنو سر ؟

- قوت : (بلعات ريقها جاتها الضحكة ) مكندير والو انت لاباس عليك ؟

- هاشم : ( كيموت فالحشمة ديالها ) خصاني غير انت ( ديمارا وشد الطريق للدار شد يدها بين يدو يد سايݣ بيها ويد شاد بيها يدها أي حركة كيديرها كيديرها بيدها ) ..

- فرحانة وهي معاه أحسن ماوقع ليها فحياتها كلها هي ربي كتبو ليها .. وصلو للدار بلاصة الطوموبيل خرج هو وياها مشادين طلعو فلاسنسور للدار فتح الباب وعطاها مجال تدخل .. سمات الله ودخلات برجلها ليمنية لايحة عينيها اول بلاصة دخلات ليها هي الصالون كان فيه غير السدادر دالخشب والمضارب الطلامط مزال ، الحيوط كانو بصباغة ماط فيها رشيشات من ملمع فاللون مابين بيج وذهبي

- بقا واقف مكايدويش مخليها تكتاشف للراسها مشات للكوزينة لي كان لونها فالبيض والبلاكارات فشيبي بارد .. الثلاجة جديدة مع الغسالة ماعن كولشي جديد بالكراطن ديالو خاصو غير يتستف ، خرجات من الكوزينة ودخلات للبيت أخور حتى هو فيه سدادر ومضارب خاصهم غير طلامط .. عاد توجهات للبيت النعاس لي كان كبير فيه البالكون مصبوغ بنفس الصباغة ديال الصالون بتريا ديالو

- عاد الحمام وعاد طواليط بوحدها فيها بلاصة الماكينة دصابون لي كانت مغلفة جديدة ، توجهات تشوف بيت اخور كان كبر من بيت النعاس بشوية فيه زوج سراجم .. كولشي كان غزال كيحمق خرجات للعندو عينيها كيلمعو بالفرحة بلاما تحس تخشات فصدرو معنقاه ضامها بكل قوة .

- قوت : ( صوتها كلو فرحة ) كولشي غزال كيهبل صافي عرفت أشمن لون نديرو فصالون

- هاشم : ( كيشوفيها بكل حب ) نمشيو ددابا عند السيد تشوفي بيت النعاس وندوزو على ود الطلامط صافي ؟

- قوت : ( بحماس ) يلاه .. خرجو مشادين ركبو طوموبيل وتوجهو عند مول طلامط ختارتهم بين البيج وذهبي والخضيضر ملكي .. أما بيت نعاس ختارتو فذهبي كان بسيط وراقي من عند مول الأفرشة دازو تغداو هي وياه او وصلها لدار قبل لا يخرج ݣال :

المحال راه شفت واحد السيد من المعارف ديالي ثقة غادي يخدم فيه إن شاء الله .. الݣراج لشي شفتي التحت خديتو ولكن مغانعمرو حتى نرجعو من السفر إن شاء الله

- قوت : اللهم يسر ياربي

- هاشم : هاد دار إن شاء الله مغانبقاوش فيها حياتنا كاملة نهار يجيو الوليدات ضروري نشوفو دار كبيرة .

- قوت : (بإبتسامة حنونة ) إن شاء الله ياربي .

- دار العروسة قايمين بشغالهم وفدار العريس حتى هوما قايمين بشغالهم نعمة مكانتش كتݣلس نهائيا عرس ولدها الكبير فرحتها الأولى .. العائلة بداو كيجيو قبل مايوصل العرس باش حتى هوما يقومو بواجب المساعدة وفدار العروسة حتى العائلة حضرات واخا كاينين شي ناس من عائلتها مجاوش خصوصا بنت عمها حيت حتى هي كان عرسها مصابتش تجي او بالأحرى غارت وماحملاتش تجي فاش سمعات بلي العريس من أكبر ذهيبية فأسفي .

- هاشم كان مشغول غير مع الفراش ديال الدار مراقب الخدامة باش يوجدو ليه كولشي مابقا والو للعرسو بغاها دخل لدارها وهي كاملة مكمولة .. أما هي مكتفارقش على خولة بتوجاد من ماسكات للجسم ولشعر ولوجها الشمس مكتشوفهاش الى بغات تسخر كتمشي بليل من اخر مرة مابقاتش شافتو كتحس براسها مضغوطة .

- الأيام دغية كيطيرو ونهارهم قريب الفراش الأغلبية تفرش شد مرا هي لي سيقات وجففات وقدات الفراش وأخيرا دارو تفرشات وكولشي على حقو وطريقو .

___________

- وصاليو على محمد صاليو عليه ولي ماذكر محمد لا خير فيه ولا خير فيه يا لالة لا خير فيه ويوم هازحام يشفع فيه ويشفع فيك يا لالا يشفع فيك .. يدك مليح للحنة يالالة يدك مليح يالحنة رجلك مليح يالالة للحنة شربيل جديد ..

- أراو الحنة أراو الما أراو الحنة وجيبوها نعجنها سيدنا محمد يشفع فالأمة سيدنا محمد يشفع فالأمة

- أراو الحنة أراو الما أراو الحنة وجيبوها نعجنها سيدنا محمد يشفع فالأمة سيدنا محمد يشفع فالأمة ..

- كانت هادي هي الأنغام ديال ليلة الحنة .. ݣالسة لابسة قفطان فالخضر طالقة سالفها مغطياه بغطا مشبك فذهبي مادة يدها للحناية لي كانت كتحني ليها .. الحباب والاهل وجيران مجموعين وزغاريت مالية المكان الكل فرحان ناشط بيها عروستهم البهية لالة قوت المسرارة مولات القلب الكبير ..

- كانت ليلة نسائية بإمتياز سلات العروسة الحنة ودارت خولة وسناء وحنان صبع صبع للوحدة .. فدار العريس كانت الجلسة رجالية متوسطها مولاي السلطان ببهاه وزينو مرافقو وزيرو فؤاد فجنبو العائلة العمام والخوال واللمة لي كانت مجموعة بلا غش بلا حقد بلا غبينة .

- نشفات حنة العروسة وزولاتها ليها مها بدبليج ديال النقرة هزات حنتها وطرفاتها لبسات تقيشرات فرجيلاتها لي كانو صغار وبيضين .. حسات براسها عيات ولكن مكان عندها مدير غدا عرسها غدا اتمشي لدار والدين راجلها باش تكمل العرس بقوامو بتقاليدو بعداتو .

- جا النهار لي كتسناه كل بنت مادة يدها للحنة نهارها .. فيقاتها خولة بكري على قبل يمشيو للصالون

- خولة : غانخليك فصالون وندوز للقيسارية ناخود شيلان على وديت التكاشط ديالي ونرجع عندك صافي , سناء حتى تفيق على خاطرها وعاد اتخلط عليك عرفتيها مع الوحم .

- قوت : صافي ماعليش ... خرجو بزوج لصالون خلاتها تم حتى تقدات الشيلان ورجعات لعندها لقات سناء عاد دخلات وحنان معاهم .

- ختارت تبرز بلا فولار حيت مكانش الإختلاط كانت غاتكون غير بين العيالات فقط حتى من لي غاتصور ختاروها مرة وفاش تروح لدار والديه اتدير عليها حجابها ، قدات ليها الميكاب ارتيست مكياج بسيط وراقي جا مع ملامح وجها .

- البنات حتى هوما كانو غزالات فالمكياج ديالهم خدات ليهم خولة صورة جماعية للذكرى وخرجو موصلاهم حنان لدار ورجعات هي لدارهم .

- قوت ختارت 3 اللبسات وحدة فالخضيضر وثانية فالبيج والثالثة بيضة كل وحدة غزالة العروسة لبسات او وجدات وناسها لعند دارها وصلات مولاي السلطان خارج بجلابتو البيج وسلهامو كيبان بحال شي سلطان جاي من زمان .. كلو هبة او وقار سبحان العين لي شافتو وصلاة على النبي العدنان .

- دهازها دخل وعمر الركان دهاز زين إلى شافتو العين اتعرف هاد الإنسان شحال كيبغي هاد الصبية النص فالعائلة بقاو فدار السهري بينما جات العروس .. الناس يصليو على النبي وجيران لي كانو بحال العائلة .. دخلو وݣلسو وعلى طبلة العرسان تجمعو عروستو حداه كتفتن شافها باس ليها راسها وناض للعند الرجال حيت المجمع خاص غير بنسى ..

- جا الوقت لي العريس وعائلتو يرجعو للدار باش تجي العروسة .. وكيف العادة والتقاليد وكيف عرس سناء جات البديلة لي لبسات لبسة العروس وتوجهو للدار العريس المرة لي فاتت قوت كانت هي الوزيرة ديال ختها حضرات معاها للݣاع التقاليد ديال دخول العروسة للدار العريس وهاد المرة ختها لي معاها وصاحبتها هي الوزيرة ديالها .. المرة لي فاتت كانت هي المتفرجة واليوم هي العروسة لي دازت منو ختها دازت منو حتى هي حاجة بحاجة تقليد بتقليد ..

- اللمة النسوية كانت منشطاها فوزية العبدية بصوتها الذهبي وأغنيتها المشهورة " طلق الحمام يطير طلق الحمام يطير راه كاينين ماليه .. جنبي على جنبو والكبدة مولفاه العمر " العيالات كولشي كانو نايضين كيشطحو ناشطين ..

- العرس ستمر 7 يام كلها الخير كلو موجود الماكلة كانت مغربية عريقة بدجاج محمر ولحم بالبرقوق أما الحلويات كلها حلويات عريقة مغربية من البهلة وكعب الغزال وحلوة كاوكاو مفندة بسكر صقيل .. كولشي كان متول وغزال العائلة كل واحد رجع لمدينتو فرحان ومرتاح أما حنان ماكملاتش ديك سيمانة حدها حضرات للنهار العيالات وللغد مشات أما العرسان غير سالة العرس صدو لدارهم يبداو فيها حياتهم .

- هاهو قدامها لابس ݣندورة ديالو الرجالية وهي حداه بعبايتها ديال الصلاة .. دمعات عينيها بدموع الفرحة بلعات ريقها ومسحاتها بالخف شافيها بكل حب مقرب منها مقبل راسها بحشرجة رجولية :

واجدة ؟

- هزات راسها بالإيجاب ، فرش الصلاية ليه وليها كانت وراه بدا كيقرا بخشوع وهي كتسمع ليه شحال كانت كتنتاظر هاد اللحظة بفارغ الصبر أول صلاة ليها مع راجلها شنو بغات كثر من هكا .. سلاو الصلاة هز القرآن وبدا كيقرا بصوت مريح وعذب وهي حداه كتسمع ليه بكل حب سالة القراءة حط القرآن وشافيها .. حط يدو على راسها مهبط ليها شالها حتى تلاح شعرها وقف او وقفها معاه ..

- حط يدو على عبايتها فتحها بان سوميجها الأبيض المشبك بشرتها البيضة لي كتلمع ريحت عطرها الجميل لي كتسلب .. قرب من عنقها وطبع قبلة دافية عليه مبورشها .

- قلبها تهز من بلاصتو على بوستو بورشها ودغدغها طاحت عبايتها حدا رجليها ، سلمات ليه راسها بدون قيد أو شرط ولات ليه كليا جسدا وروحا روحهم النقية ترفعات للسما مشاعرهم الطاهرة هي لي كانت وليدة اللحظة وأخيرا لي ختارها قلبو ولات ليه وطبع بصمتو عليها او ولات بنت قلبو حبيبتو مراتو وشريكة عمرو .

_______________

- أحسن أيام حياتها دوزاتها معاه ماخلاو اوبيرج فالمغرب مامشاو ليه بعاد على الناس غير هي وهو خلاها أسعد وحدة فدنيا بتعاملو معاها ضحكتها مكانتش كتفارقها .. نهائيا دوزات معاه شهر كلو حب وفرحة رجعو للدارهم وباشرو الخدمة مع بعضياتهم .. ݣاع لي كان محروم منو لقاه فيها ..

- كانت قد الجملة لي كتباتها ليه فخاتمو .. كتوكلو بيدها ومكتخليهش يقيص شيحاجة واخا كيبغي يفششها ..

- قوت : حبيبي الكوزينة انا قادة بيها طيابي قادة بيه أنت غير خوي عليا كوزينتي الله يرضي عليك ..

- هاشم : ( عنقها من اللور طابع قبلة فعنقها ) واخا يالالة غير هو ماتخلطيش المالح مع الحلو

- قوت : ( حاطة يدها على يديه ) علاش ايمتا خلطت ؟

- هاشم : ديما ملوحة الماكلة مع حلاوتك بزاف عليا

- قوت : ( كضحك تسلتات من يديه ) وصافي خرج خليني نكمل طيابي عارفني فتيقة بكري خاص نمشي مع خولة تڤيريفيي مع الطيابة

- هاشم : ( شد ليها وجها بقوة طابع قبلة على شفايفها ) واخا يالالة ليا الله ..

____________

- كيما واعداتها توجاد عرسها كان هدية ليها منها .. وقفات على كل حاجة بيدها من الصغير للكبير من طيابة للحلوة لكولشي كان كادو من عندها وقفات على الصغيرة والكبيرة كيما وقفات مع ختها وقفات مع صاحبتها رفيقة عمرها حتى مشات لدارها .

- أحسن حاجة تشوف حبابك فرحانين تشوف كل واحد فيهم وصل لداكشي لي بغاه كتهنى وكترتاح .. وهي كتشوف صاحبتها فدارها مع راجلها لي كتبغيه كتشوف فختها غادية وكتقل مع الحمالة او وحمها غادي وكيقل خدمتها غادية مزيان هي وراجلها علاقتهم لي أساسها الحب وتفاهم والإحترام ، مشروعها لي غايدي وكيطلع طوبة طوبة .. ملجأ الحيوانات لي طول حياتها وهي كتحلم بيه هاهو غادي وكيكبر قدام عينيها وكتسنى غير يمتى يكمل وتشوف المشيشات ديال الزنقة والكلاب معمرينو واكلين وشاربين ومرتاحين كان هذاك هو النهار الكبير عندها ..

- فكازا لابسة خيمارها فالبيج .. وݣالسة عند الطبيب لي كان فتح ليها متوترة وخايفة باغية تعرف شنو غادي يقوليها مابغاتش تحيد الكينة حتى تعرف شنو كاين ݣالس قبالتها مبسم ليها مطمانها بعينيه ..

- الدكتور : ( بإطمئنان ) هو راه مكاين حتى مشكل على قبل الحمالة غير هو ضروري تكملي العام على العملية يعني من هنا لواحد 3 شهور ممكن تحيدي الكينة ..

- قوت : ( بأريحية ) ياك ادكتور مكاين حتى مشكيل عادي ؟

- الدكتور : ( ضحك ) لا عادي الحمد لله .. خرجات هي وياه من عند الطبيب شادين فبعضياتهم يلاه أيخرجو من العمارة سونا تيليفون قوت .. جبدات تيليفون من شاكها كانت خولة فتحات الخط :

وي خولة ..

- خولة : ( بصوت فيه لهفة ) فينكم واش راجعين ؟

- قوت : مزال عاد خرجنا من عند الطبيب علاش ؟

- خولة : أجيو دابا شدو الطريق سناء يلاه دخلات لكلينيك جاها الوجع ديال الولادة .

- قوت : ( بدهشة وخوف ) واخا صافي ( قطعات وشافت فهاشم ) سناء دخلوها للبلوك تولد ..

- هاشم : واخا يلاه .. شدو الطريق ديك الساعات للأسفي ، نيشان للكلينيك لقاو سناء ولدات بنية صغيرة كريمبوشة هازها ياسين حالف مايحطها .

- العائلة كلها مجموعين حدا راسها فرحانين بالحفيدة الجديدة لي دخلات للعائلة .. قوت شافت فهاشم ونطقات بكل حب :

العقبة لينا ..

- هاشم : ( بنفس الحب ) اللهم آمين ..

_______________

- فمطار محمد الخامس واقفين معاهم لابسة عباية واسعة فالبيج وخمار فالبيج اما هو كان لابس سروال وتريكو جارين بالزهم متوجهين للديار المقدسة ئأديو مناسك العمرة هي وياه أمنيتها كانت هي تزور داك المقام مع راجلها وهاهو ربي ستاجب ليها .

- كل نهار ليهم فداك المقام كان بنسية ليها سعادة وراحة رضات الله سبحانه وغادية بما يرضي الله طلبات الله يدوم زواج ويفك ربي سراحها وتحمل من ورا ماقطعات الكينة .. دازت مناسك العمرة هي وياه على خير ورجعو للدارهم .. تقامت وليمة كبيرة فڤيلا السهري بجوج مناسبات رجوعهم من العمرة وسبوع رؤية بنت ياسين وسناء ..

- فالبيت لي كان ديالو واقف كيسد فصدايف ديال قميجتو حت حلات البيت ودخلات ، ضار لعندها كيشوفيها كانت كتشوفيه شوفات غريبة بلاما دوي حيدات شالها رماتو وبدات كتفسخ عليها قفطانها ..

- هاشم : ( بإستغراب) مالك ياك لاباس ( ضحك) قوت رجوع لله

- قوت : ( ماخلاتض ليه الفرصة لتاهمات شفايفو بشهوة جنونية وحب بعدات عليه كتاخود نفس ) ماعنديش الوقت مقاداش نصبر فيا واحد الجهد ماكرهتش ناكل ريحتك كتحمقني ( خشات نيفها فعنقو ) ماكرهتش نسرطك يلاه نمشيو لدارنا .

- هاشم : ( شادها بين يديه حاكمها) مالك مامالفاش ليك ياك لاباس الناس التحت حشومة

- قوت : ماشغليش ماقاداش مشهياك اهاشم كثر ماتخايل ، ومشهية اللسان بالكامو والملح وبغيت الكرعين مع الحمص وزبيب ..

- هاشم : ( مصغر عينيه كيشوفيها بشك ) ايمتا مجاتك لغيݣل ؟

- قوت : ( كتفكر ) وراه قبل منمشيو للعمرة

- هاشم : ( قهقه بصوت رجولي ) كيبان ليا عمرت المضربة ..

- قوت : كيفاش ؟

- هاشم : غدا ونعرفو إن شاء الله ( جرها بايسها فراسها محاوطها بيديه معنقها ) ..

__________

- شكو كان فمحلو وربي ستاجب لدعائو الحاجة لي كان كيعاني منها ياسين هو كان العكس ديالو .. تابعاه فين مامشا لدرجة دار خدام فالمحال الجديد او ولا كيݣلس معاها كان مكايش كيخاف عليها فالمعاشرة ، فيتامينات هو كيعطيهم ليها مكانش مخليها محتاجة لحتى حاجة لي بغاتها كتحضر ..

- بنسبة ليه بنتو حاضيها وعينيه عليها بدات كرشها كتبان او وحمها كيقل وكيخفاف .. مرة مرة كانت كتجي عندها خولة تݣلس معاها ولا تخرج معاها ولا سناء تقريها وتخلي ليها بنتها دوز فيها سطاج الأمومة .

- دازت 5 شهور على حمالتها وبزز باش وافق ليها يشوفو شنو عندها ربي كبير وعوضو كبير كثر مايتخيل اي واحد وربي وهبهم جوج ديال توام .. عوض مضاعف أضعاف مضاعفة ، حمالتها دازت بين حبابها وناسها صاحبتها وعائلتها لي كتحمد ربي وتشكرو كل نهار عليهم.

- واقفة فساحة واسعة كرشها كبيرة كتشوف فالمشيشات دالملجأ كيلعبو والكليبات فجهة لوخرا صغار وكبار .. مشروعها لي حلمات بيه ها هو نجح او ولا قدام عينيها .. حسات بيديه على كرشها وفمو على راسها عنقها وهمس بكل حب :

عقلتي على كلام جدي الغالي ؟

- قوت : ( هزات فيه راسها ) اه عقلت وكانت أحسن دعوة دعاها واحسن حاجة وقعات ليا فحياتي كلها ..

- هاشم : ( دورها حتى تقابلات عينيها مع عينيه ) ݣلت ليك كلمة غاتسمعيها مني مرة وتعيشيها لدوام ومزال غانوفي بيها حتى لمامات كنبغيك ..

- قوت : ( ضحكات ) وانا غانقوليك كلام يسمعوه الكبار وصغار ويديرو بيه الحكماء والعقال كلامي ليك ماليه مثال يعاودوه العجايز للصبيان كنبغيك أنخيلتي ياحفيد مولاي الغالي هو سلطان مجدول الذهب وأنت سلــطـان القـلـب .

الــنـهـايــة