مجدول الذهب الجزء الرابع

- مابقاتش كتخرج من بيتها .. الناس يخللو جدر شعرهم بزيت جوج مرات فسيمانة ، وهي لا كانت كل يوم كي يوم تخلل شعرها .. الناس يخليوه سويعة وهي تبات بيه للغد تغسل شعرها ، وترجع تخللو بزيت .. كانت بحالديك المهووسة ، لهبيلة لي عقلها ملحوس ..

- كل نهار كيدوز على قوت بحال النار ، حتى نهار لي وصل الميعاد ... قلبها ترعد ولا عند فمها ، كانو واقفات عند راسها ب 4 ، كل وحدة من جيهة .. كيتسمع الهراج والمراج فقلب القصر ، حيدات الرواق من السرجم وطلات .. الدنيا بدات تعمر ، والغاشي داخل خارج ، كانو الناس من ݣاع الثواب ، لي توبو بالي .. ولي توبو من مقام قصر مجدول الذهب .. كانت كتسنى على حر من الجمر مجية السلطان .

- كانت غافلة ، على الراجل الطويل العامر ، لي داخل لابس الكحل وملتم بلتام كحل .. رجعات ݣلسات ، وهي كتسنى مرجانة تدخل عليها ..

- قوت : ياربي ، ياربي ماتحاشم ياربي .. تدق الباب ، ودخلات مرجانة بزربة هازة واحد الحايك فيديها .. :

قوت هاكي هاد الحايك لبسيه ، ولبسي هاد الملغة ، وديري هاد النݣاب ، واحد شوية غانرجع ليك باش نديك ، السلطان كاين دابا هو والوزير .. خاصك تنفاردي بيه قبل مايكثر الغاشي عليه ..

- قوت [ شدات عندها الحايك ويديها باردين وكتفافة ] :

واخا كوني هاني .. مشات مرجانة وقوت لبسات داك الحايك ودارت داك النݣاب ، البنات مكاينطقوش بكلمة وحدة حدهم مقابلينها .. رجعات ليها مرجانة :

يلاه أجي معايا زيدي ، زيداتها قدامها ، غاديين جنب الحيط ، كل مرة يشوفو فجنابهم واش جاي شي واحد .. سمح حس شي حد تخباو ، ورا واحد الڤازة حتى داز عوين الياقوت ، وهوما يكملو طريقهم ..

____________________

- الوزير :

وشنو ناوي دير أمولاي ؟

- السلطان [ كيخمم ] :

داخت بيا أراضي .. ماخليت فين قلبت عليها ، تݣول الأرض تشقات وبلعاتها .. تحل الباب عليهم ، ودخلات مرجانة جارة قوت .. هز السلطان فيه راسها :

مرجانة ، أش هاد الدخلة هادي ماشي من عوايدك ؟

- مرجانة [ مخلوعة كتشوف فجنابها ] :

سيدي غير سامح ليا .. ولكن هاد البنية عندها ماتݣوليك على بدر السعود أسيدي ..

- السلطان غير سمع إسم محبوبتو قلبو تقبط عليه ..، قوت زولات اللتام ، باصراتو بعينيها كان نسخة على ولدو الغالي سبحان الله ، ولكن ماشي وقت الشوفة هادي وتحقاق ..

- مرجانة [ بخوف ] :

دوي ابنتي دوي خلاص ، ماعندنا وقت ..

- السلطان [ حس بخوفها نطق بأريحية ] :

تكلمي ابنتي عليك الامان ..

- قوت [ ماداتهاش فالوزير بدات بالكلام وهي مخلوعة حاسة بشي حاجة غاتوقع ماشي فالحسبان ] :

بدر السعود امولاي عايشة ، وكاينة فدوار بن موسى لي حداكم ، نهار مشيتي اسيدي وخويتي القصر ، لقات راسها حاملة ... والياقوت ساقت الخبار ، وهدداتها بالكلام ، بلي الى ماخوات مجدول الذهب ، غاتقتلها هي وداكشي لي فكرشها ..

- السلطان بلاما يحس وقف ، كلو كيترعد .. كيحس بيدو تقالت عليه ، لسانو باغي ينطق ، ولكن الكلام مابقاش عارف ليه طريق ، ماقدش يتبت القدام طاح ݣااس على طولتو فوق الكرسي ..

- الوزير [ بصوتو الخشين ] :

واش عارفة أش كتݣولي يا هاد البنت ؟

- قوت :

مجاياش لهناباش نكتر الكلام ، ولا باش نخرف عارفة مزيان فعايل الياقوت ... وعارفة مزيان الى مشات حتى ساقت ليا الخبار تحيد ليا القدام وتغبرني .. انا جايا نبين الحق ، وهادي رجلي من عند بدر السعود .. وحجاية الزيت درتها غير حجة ، باش ندخل للقصر ونشوف السلطان .. ونخبرو بلي كان [ شاف فسلطان لي مانطق بحرف واحد ]

- سيدي ، ولدك ماشاء الله تبارك الرحمن بدر منور ، قد النخلة فطولها .. راجل وسيد الرجال ، معروف فبن موسى بطيبتو ورهيبتو .. سميتو مولاي الغالي ..

- تهز راسو مع كلامها ، تغرغرو عينيه وساحو دموعو بحال حبة الجوهر على خدو ... نطق بصوت فيه بحة رجولية :

هاد السمية ، كنا ختاريناها انا وبدر السعود ، ݣلنا الى ربي رزقنا بولد نسميوه الغالي .. وماخلفاتش الوعد .. كيفاش ݣدات كيفاش ݣدات تحرمني من ولدي لي سينين هادي وانا مشوݣ فالخلفة ..

- مرجانة [ كتجر فقوت ] :

سربي أبنتي سربي ..

- تسمع صوت الغوات قدام باب الصالة الكبيرة .. حتى تحل الباب بجهد والعوين كيخاصمو ويهللو ...

- سليمان [ بصوت مرتافع ] :

اش تما ، أش كاين ..

- كانو العوين مانعين واحد ملثم لابس الكحل ، لي غير دخل او وصل للقلب الصالة ، زول اللثامو ..

- قوت [ شدات على فمها وشهقات ] :

الغالي ، اش كدير هنا ؟ .. السلطان غير سمع إسم ولدو ضارت بيه الدنيا ، طلعو من رجليه لراسو ، بحال الى رجع بيه الزمان اللور فاش كان مزال شباب .. كيشبه ليه بزاف ، نسخة وتقسمات على زوج ..

- الغالي كان عينيه على السلطان ، كيناظر فيه بعينيه ، تهلطو عليه الأحاسيس ، تحرم من باك زمان ، حتى وليتي فهاد الݣد ... تضرب تمارة باش توفر لميمتك لقمة العيش ، وعاد تعرف بلي باك عايش ، باك لي تحرمتي منو وتحرم منك .. أشر سليمان للعوين باش يمشيو ، جا يوقف ولكن ضارت بيه الدنيا كان غايطيح .. كونما الوزير شدو ، والغالي لي جرا شد بيدو الثانية ..

- هز سليمان راسو فولدو .. عينيه ساحو بدموع ، نازلين بحال الشلال ، تابعين بعضياتهم .. بدا يشهق ، بحال شي جبل تهد .. خشا راسو فصدر ولدو كيبكي .. كيبكي على عمرو لي مشا ، كيبكي على المرا الزينة الحنينة لي تحرم منها ... على ولدو لي تحرم من شوفتو وماكبرو ، كان يشوف الناس بولادهم ويحس بنار الكية مݣدية فقلبو ، وشكون سباب مراتو .. مراتو لي تزوج بيها من تحت راس ميمتو ..

- ميمتو لي توسدات التراب وخلاتو هو واحل مع وحدة مشرارة .. لا الغالي قد يتكلم ، حدو معنقو وساكت ، ولا السلطان قاد ينطق بكلمة ... ، شاف الغالي فقوت ونطق بصوتو الرجولي :

ماقديتش نخلي بنت الناس ، البنت الحميمة اللبيبة لي الخوف ماعرفش ليها طريق وجات تنطق بلي مخبي بوحدها ، ماشي الغالي لي يخلي وحدة بحالها لايحة راسها للعافية ويتفرج من بعيد ..

- مرجانة ماخلاتهاش تجاوب ، جراتها معاها مخرجاها ومخلية الغالي مع باه .. غادية بيها جراها طلعات بيها للفوقي .. غادية بيها للبيت ماحسات غير بيد تحطات على فمها ويد تحطات على فم مرجانة ، غمضات عينيها ومابقاتش حاسة بلي ضاير بيها ..

_____________________

- الليل لاح خيوطو ونجومو تعلاو فبهاه منورينو ، كانت ݣالسة حاطة طاجين عقلها مكاينش ، كتسنى فولدها لي خرج من الصباح مابقى رجع ، تنهدات تنهيدة طويلة ، ناضت وقفات .. لبسات بلغتها غادية قاصدة الباب باغية تحلو تطل عليه واش جاي ، يلاه رمات الخطوة وهو يتحل الباب بشوية ..

- بدر السعود [ يلاه لاح الغالي رجلو ] :

الله أولدي الله اش هاد تعطيلة ، قلبي طار وعلى من بلاصتو .. فين كنتي أوليدي ، كنت خايفة غير .. [ تحبس الكلام فحلقها فاش دخل وشخص لي داخل معاها ، رجليها تشللو عليها .. ماعرفات راسها باش تبلات واش هي فحلم ولا علم .. حسات بالغصة ، عينيها سخنو ودموعها ساحو .. حبيب روحها ، الحبيب لي عمرها نساتو .. الحبيب لي عمر راجل جا فبلاصتو ، روحها وتاج راسها ، هاهو ݣدامها .. بكاها على كلها كترعد ..

- بدر السعود :

م م مولاي .. [ ماقداتش تنطق بدات تبكي وتنوح ، تقدم منها واخدها بين حضانو وساد عليها ] :

بدرة القلب وروح ، بدر الجوف .. عيني ونجمة سمايا .. قلبي تح// رق حرقو بعدك أبدرة قلبي ..

- بدر السعود [ كتنخصص] :

ااااح امولاي ، أااح أمولاي .. ايامي كانو رماد امولاي يامي كانو رماد .. زاد زير عليها معنقها بحال شي بنية صغيرة ، بعدها كيشوفيها ، كيشوف فعينيها الزينة الكخيلة ، فوشامها لي تغرم بيه من نهار شافها .. عينيها كيبريو بحال شي صبية مزالها صغيرة ..

- ݣلسو ، وهي حداه حاطة عليه الراس ..

- سليمان : عاودي ليا ، عاودي ليا شنو وقع من اول نهار ..

- بدات بدر السعود كتعاود ليه ، هو كيسمعها او ولدها كيشوف فسما وساهي ، ساهي فديك الصبية ، القوية لي دايرة كيف جدع الشجرة مايحركها ريح ، كيفاش حتى تجبرات وماحناتش الراس ودخلات للقصر وبلغات مرادها ..

- بدر السعود عاودات كولشي للسليمان من الاول حتى الأخر ، الزعاف وصل مواصلو ، وصبرو بيها صافي فاض ، كان داير على وجه الدم وبلي هي بنت خالتو ، وعلى وصية مو بيها ولكن صافي جا الوقت لي تاخود فيه جزاءها ..

- سليمان [ بأمر ] :

جمعي حوايج ، ولا بلاش .. انت او ولدي بلاصتكم ماشي حنا ، بلاصتكم معايا وبجنبي ، وهاديك عدوة الله ، لي مافقلبها لا رحمة ، قلبها عامر بالخبث بحال القطران ... غاتاخود حسابها ، وحسابها هاد المرة كثير ومسلسل بسلاسل ثقيلة ..

_______________

- فالقصر ، كانو كاع الخدم واقفين دواحة والعوين ، من غير مرجانة لي غابر ليها الأثر .. دواحة عيات تقلب عليها مالقاتهاش .. تحل باب القصر ، وتم داخل مولاي سليمان ومعاه مولاي الغالي وبدر السعود .. الاستغراب كان باين على لي مكايعرفوهم .. أما لي حضرو لزواجو فداك الوقت كانو فرحانين وماقداتهم فرحة ..

- وقف سليمان ، ونطق بالمراد :

بغيت غدا يدوز البراح فالقبيلة ، ينده ويخبر ويݣول بلي مرات السلطان سليمان بدر السعود رجعات ، وبلي سليمان مابقاش بلا وتاد ، عندو ولد ݣد النخل يتضرب بيه المثال ، مولاي الغالي .. ومن اليوم ، الغالي هو لي غاياخود بلاصتي ، وهو لي غايولي سلطان مجدول الذهب ... بداو الخدامات كيزغرتو .. والفرحة باينة فعينيهم ..

- سليمان :

ومن اليوم ، لالة سلطانة بدر السعود هي مولات الدار ومولات الراي وشوار ، أما ديك الديميمة الخبيثة ، غاترجع منين جات .. دواحة [ عيط عليها جات كتجري حانية الراس ] نعام أسيدي ..

- سليمان : فين هي مرجانة ؟

- دواحة [ هزهزات براسها ] :

ماعرفتش أسيدي ، قلبنا عليها القصر كامل مبان ليها أثر لا هي لا ديك البنية حليلو ..

- هزات راسها بشوية .. عينيها تقال عليها ، كدور فعينيها .. بغات تحرك يديها ماقداتش يديها تقال عليها ، لا يديها كانو كيضروه بغات تجرهم مابغاوش .. حلات عينيها على جهدهم .. كيبان ليها راسها فبيت خاوي ، بابو من حديد بحال الحبس ، غير العافية لي مضوياه .. يديها مشدودين بالحديد ، وحداها مرجانة حتى هي مشدودين يديها .. كتحاول تفك يديها مابغاوش يتفكو ليها ..

- ريحة قوية كانت دايزة من حدا نيفها .. هزات راسها تخلعات من المنظر لي كان قدامها ، كانت واقفة الياقوت كتبانبحال شي مسخ ... شعرها كولو طاح ، النص فراسها قراع كولو .. ونص لاصق فيه غير شي زغبات قلال .. كانت كتشوفيها بواحد الشر عمرها شافتو فحياتها ..

- بدات كتقرب ليها شوية بشوية وكتشوفليها فشعرها وعينيها ، نطقات بصوت بحال فحيح الأفعى :

شعري طاح طاح ... وانت السباب ، حروشك حرشوك ياك ، شكون سيفط شكوو ون سيفطك ، سيفطاتك هي ياك ياك سيفطاتك .. حيت كتغير مني ، سيفطاتك [ ضحكات بصوت مرتافع هيستيري ]. سيفطاتك انت وهاد الشارفة الهارفة همممم ..

- ولكن كيما شعري طاح وهبى فرمشة ، حتى انت وديك الشارفة وجه الحلفى لي فعلها مايخفا ، غاتشواو غاتشواو وترجعو بحال الفحمة [ كضحك ] ..

- قوت :

شرك وعمالك لي بانو على وجهك .. [ قهراتها بريحة القطران لي كتعطي ، كان شعرها كولو زيت هابط ليها مع ودنيها ومع وجها ، كان وجها كولو زيت ] .. لي درتيه فناس ، خبتك .. وحدة لفعة ودميمة ، كيف بغيتيها تكون فأخر يامها ..

- الياقوت [ كضحك بجنون ، من كلامها وحالتها كيبان صافي حفى ليها القرشان وعقلها مشا ، الشوفة ماتقدش تشوفيها ، شر اعمالها بان عليها ] :

انا غانوريك هههههه ، أنا غانوريك ، مزال مزال انرجع زينة ... كيف البدرة المنورة [ رجعات خيبات سيفتها ] حسن من بدر السعود ، انا نفيتها قتل//تها هي ولدها هههههه وحرمت مولاي السلطان من الولاد ، ومزال مزال غانحرم ناس القبيلة من الولاد ، غانحر//ق مجدول الذهب بناسو .. وغانبقى غير انا غير أنـــــا ..

- هزات عصا ، وضربات بيها دوك الكفوف دالعافية .. قوت غير شافت داك المنظر بدات تغوت ، تفكرات كلام شعلة ليها .. [ سميتي شعلة ، بنت جمرة شاعلة .. وأي بلاصة تلقاي نارها ݣادية تلقايني .. غير عيطيلي نحضر فالحين ] .. بدات قوت كتغوت :

- شعلة شعلة ، عتقيني شعلة .. نبتة عتقيني .. شوية بعدات العافية على رجلين قوت ورجلين مرجانة وݣدات فبيبان الحديد .. العافية خرجات وساحت ، المشرارة ، لي كان عقلها مرفوع ولي كانت غافلة على العافية لي شدات ليها فثوب قفطانها ... بدات كطلع معاها السخونية ، الزيت مع العافية مكايتلاقاوش ، دغية شدات فيها .. وغواتها صمك الودان .. شدات ليها فوجهة وراسها ..

- طاحت مقابلة مع قوت وهي كتحول للفحمة ، قوت ماتحملات المنظر كانت باغية غير تخرج من هاد المحنة ، كيبانو ليها جدوع شجرة ملويين على الحدايد وكيوسعو فيهم ، شوية تمدو لحدايد يديها وفتحوهم ..

- مشات كتجري كتفيق فمرجانة ..

- قوت :

خالتي مرجانة خالتي مرجانة ، فيقي خالتي ... بدات تعيط :

نسمة نسمة ، بوخي عليها شوية ديال الهوى .. راها مخنوقة .. حسات بالبرد لفحها للوجها وريح ضار فوسط داك البيت ، بدات مرجانة كتنفس بحالها بحال الناس .. عينيها بداو يتحلو وتنين ..

- العافية لفحها الما وبرد نارها لي كانت مولاتو هي قطرة .. تسمع صوت باب من حديد تحل ، وصوت الغاشي ..

- الغالي [ بخوف ] :

قوت قوت ، واش وقعات ليك شيحاجة ، بيك شي ادى ... نزل السلطان ، واول حاجة حط عليها عينيه ، هي الياقوت لي كانت طايحة جثة مفحمة ميتة ، غمض عينيها ودور راسو ..

- قوت :

انا مابيا والو ، غير خالتي مرجانة لي سخفانة .. هز الغالي مرجانة ، طلعها تابعها قوت .. اما السلطان شاف فالياقوت اخر نظرة وخلا العزين يتكلفو بيها ..

____________________

- واقفة قدام المرايا كتشوف فراسها ، تبسمات تبسيمة راحة .. ادات الواجب وكملات الحكاية ، ورجعات بدر السعود ومولاي الغالي للمقامهم العالي .. تدق الباب شافت جيهتو وقالت دخل .. دخل الغالي ، بطولتو وبهاه وتجريد .. زاد زيان والثوب الرفيع زادو هيبة ، كانو عينيه عليها .. حنحن ونطق :

ماعرفتش كيفاش غانجازيك ، بحكمتك وطيبتك كتملكي القلوب ، وعندهم الحق يسميوك قوت القلوب ..

- قوت [ ضحكات ] :

مابقاش لساني خاصو القطيع ، ومابقاش فيا كترت اللغا ومكنسكت ..

- الغالي [ ضحك ] :

طيبت قلبك غطات على طول لسانك .. قوت عندي ليك شي كلام .. بغيتك تسمعيه ، وتعطيني جواب ..

- قوت [ شافت فيه بإستفهام ] :

كنسمعك ..

- الغالي [ شافليها فعينيها ] :

بطيبتك ألف واحد يتمناك ، تكوني مولات دارو وام ولادو ، انا ماعنديش مع كترة اللغا .. ومنصيبش ماحسن منك تكون شريكة وسادتي وحديتي ، وام ولادي .. مرة لبيبة حكيمة تحكم بالحق ، مايناسبها غير تكون مرات السلطان ..

- قوت [ تصدمات ، ماعرفات باش تبلات ، حدرات راسها ورجعات علاتو شافت فيه وتبسمات ] :

وحتى انت امولاي الغالي ، سعدات لي غاتكون راجلها ، ورفيق دربها .. ولكن ماشي انا امولاي ، انا قلبي خالي ومزال الحب الحر ماعرف ليا طريق ، مانقدش نكذب ونافق انت بنسبة ليا وغاتبقى ، مولاي الغالي ولد خالتي بدر السعود .. وزيد عليها امولاي ، هدا ماهو زماني ولا مكاني ، عندي اهلي ناس وحبابي كيتسناوني ..

- وقتي فهاد الأرض السعيدة ، صافي قرب يسالي .. أنا بحال النسمة جيت وغانمشي [ تحرك البرد حدا وجها تبسمات حيت عرفات مولات دعوتها واقفة حداها مكاتفارقها ] ، والى كانت عندي شي معزة ولا محبة فقلبك أمولاي ، بغيت نصارحك ونقول ..

- بلي عروستك كاينة موجودة ، بنت الناس ودار الكبيرة ، بنت الجود والكرم .. من طيبة النسا ، كانت تبغيك وانت غير غالي ، بلا طمع وبلاما تحتاج تكون مولاي السلطان الغالي ، باهية .. سول خالتي بدر السعود عليها ، خودها مراتك وغاتكون أم ولادك وانا عارفة بلي تصونك وتكون ليك أحسن رفيقة ..

- الغالي [ حدر راسو وتبسم ] :

واخا اقوت ، ماقلتي عيب أبنت الناس ، ولكن قوت تقد تقبل الهدية ..

- قوت [ هزهزات راسها ] :

مرحبا .. رجع اللور وخرج من البيت ، رجع وفيدو صندوق منقوش ، كانت متوسط .. مدو ليها ونطق:

خليه عندك ، حتى توصلي وحليه .. ترحع زوج خطوات عاطيها بظهر ، ورجع شافيها :

الى كانت دعوة وحدة عندي مقبولة عند الله اقوت ، نطلب الله يرزقني بالولاد والحفاد ، ويكون مكتابك فواحد من زريعتي ، حتى الى مكتابينيش لمولاي الغالي ، تكتابي لزريعتو ..

- خرج وخلاها كتبسم ، يلاه حطات داك الصندوق ، ورجع تدق الباب تحل ودخلات بدر السعود ، بلاما تدوي خداتها فصدرها وعنقاتها ، نطقات وعينيها مغرغرين :

كنت كنتمنى تبقاي معانا ، وتمنيت تكوني انت مرات ولدي ، ولكن لا حكم من بعد حكم الله سبحانه وتعالى ، ملكتي قلبي بطيبة قلبك ، وانا بغيت ربي عمرو يخيبك وفينما حطيتي يدك تنولي ، بغيت ربي يرزقك من جميع بوابو .. حيدات يديها من يدين قوت ، وحطاتها على عنقها محيدة واحد سلسلة تبسمات ولبساتها للقوت فعنقها :

هاد السلسلة ، صايبها مولاي سليمان ، بيديو ناقش فيها ملامح ولدو الغالي ، بغيتها تبقا عندك بغيتك عمرك تحيديها من عنقك واخا يطرا لي طرا ..

- قوت [ نزلو دموعها ] :

كوني هانية .. رجعات عنقاتها ، بدر السعود ماقداتش تحمل وخرجات .. قوت تنهدات تنهيدة طويلة ، ضارت لقات البنات كيتسناوها ..

- شعلة [ تبسمات ] :

جا الوقت ، واجدة ؟ شافت قوت فالبيت ، ماسخاتش بيهم وماسخاتش بهاد الزمان وماسخات حتى بجنيات ، شافت فيهم ونطقات :

غانتوحشكم بزاف البنات ، ماسخيتش بيكم ولكن ضروري من رجوع .. البرد القوي لفحها لوجها ، ريح قوية حلات السرجم .. كانت كتحس براسها غاطير فوق الغيام .. جاتها الدوخة ومابقات عاقلة على والو وكتشوف غير الظلام ..

- قوت قوت ، أويلي قوت وفيقي اصاحبتي .. هزات راسها مخلوعة ... كتبان ليها ختها سناء واقفة عند راسها :

اش كاين مالك ، فين هي نسمة ؟

- سناء [ بإستغراب ] :

ويلي شكون هاد نسمة ؟ ..

- بقات قوت ساكتة وكتشوف فيها .. تقادات فالݣلسة ، مقلوبة بنعاس مافاهمة والو ..

- سناء :

نوضي تي راه كنتي كتحلمي .. عمرك نعستي هنا ، مالفة هاد الوقت يلقاك فبلاصتك ..

- قوت [ مزال ماستوعبات ، واش زعمة كانت كتحلم ؟ واش هادشي لي وقع ليها بصح ، بلعات ريقها ورجعات هزات راسها فختها كتشوف فيها شوفات غريبة ..

- سناء [ تخلعات عليها ، حطات يدها على راسها لقاتها عادية ] :

قوت ختي واش بيك شيحاجة ، ياك لاباس مالك نوضي نزلي من سطح راه واعر عليك الحال ..

- قوت [ هزهزات ليها راسها ] :

واخا اختي ، غير سبقيني انا نازلة ..

- سناء : وعنداك ترجعي تنعسي ..

- قوت [ بنفي ] :

لالا ويلي على نعس ماتخافيش .. انت غير سيري وانا غانهبط ، بقات سناء كتشوفيها حدرات راسها ونزلات .. وقفات قوت كتقلب بعينيها ، بان ليها الكتاب محطوط .. هزاتو بالخف وبلهفة ، وحلاتو كتقلب كتقلب ، حتى وصلات فين حبسات وكانو مقطعين الوراق .. دورات الورقة وهنا تصدمات ، حيت الوراق لي كانو مقطعين لقاتهم كاملين مكمولين .. حلات عينيها مزيان وبدات كتقرا شنو كان مكتوب بضبط :

" بدر السعود خدات حقا ، والغالي تولى منصب باه مولاي السلطان سليمان ، وهادشي كامل بفضل بنية صبية ، لبيبة دايرة بحال النسمة ... بفطنتها وحكمتها ، رجعات لكل واحد حقو ، كسبات قلوب لجميع .. كبرات فعين الغالي ، حيت خاطرات بحياتها على قبل ناس مكتربطهم بيها حتى قرابة ، خلات الغالي يطلبها لزواج ، ولكن هاد الصبية لي كانت سميتها قوت ، رفضات طلب الغالي مولاي السلطان .. وعلى ما قالو بلي طارت ماسمات ومابقاتش بانت .. مشات ودات معاها ، سلسلة قبيلة مجدول الذهب ..ودات معاها محبة الناس وخصوصا محبة بدر السعود ، أما مولاي الغالي ، داز شوية ديال الوقت . .. وعلن زواجو على لالة باهية ، ..

- حياتهم ضوات ، والقصر رجع ليه الروح وفاض بالمحبة والنور ، الغالي كان شديد وكينصر المظلوم ، وكيحكم بالحق ، والى دق شي حد بابو عمرو يرجعو ... من بعد موت باه مولاي سليمان ، وموت الأم ديالو بدر السعود ، ضاع صيتو بين البلدان .. على رجولتو وصرامتو ، وروحو الق//تالية ، كانو ݣاع الناس كيبغيوه ويفديوه بروحهم .. على كرمو معاهم ..

- أما لالة باهية ، كانت بحال النسمة تحطيها على الجرح يبرا ... ديما كتحكم بالحق ، واقفة مع راجلها الغالي ، كتبغيه وتحن عليه ..

- الزمان بدا يتبدل ، والحال بدا يتغير ، والحال تطور والغالي بدا يكبر ، ورزقو ربي ب 3 ديال الولاد عزارة وبنت ... الكبير فيهم كان سماه محمد ، والمتوسط سماه سليمان على إسم باه ، أما البنت سماها رقية ، وأخر ولد ليه هو الصغير فتريكة ، سماه توفيق .. ولادو الكبار كبرو ، وطورو تجارة الذهب ، وهاجرو من الدوار للمدينة .. أما مزلاي الغالي .. كبر وصحتو مشات ، وربي دا أمانو وخلا توفيق ولدو عندو 5 سنين مع باقي خوتو ومهم باهية"

- شدات قوت على فمها وهي كتقرا كتشهق بالبكا ، مع كل جملة بكات وتنخصات حتى سلاتو بالقراية .. سدات الكتاب حطاتو فوق الطبلة ودموعها نازلة بقا فيها ، بقات فيها بدر السعود وسلطان سليمان والغالي .. نطقات بصوت غالبة عليه البكية :

فين غايكونو دابا ولادو ؟ وباهية تكون ماتت ولا مزال عايشة ؟ .. رجعات تشوف الكتاب ولكن تصدمات فاش بانت ليها الطبلة خاوية ، وقفات كتقلب مالقاتوش ، نزلات على رجليها تشوف تحت سداري لي ݣالسة عليه .. حبسات كتحقق ، مدات يديها وجرات الصندوق .. الصندوق لي عطاها الغالي ، إذا هادشي ماشي حلم .. هي كانت بصح عاشت هادشي، شوية تفكرات شيحاجة وبالخف مدات يديها لعنقها ..

- تحسسات السلسلة لي فعنقها ، حيداتها كتشوفيها ، كان منقوش عليها راس الغالي ، وكلها منبتة بالحجر الحر ديال الذهب الخالص .. ، دارتها فجيب ديال البوليرو لي لابسة .. وكملات التقلاب ولكن كان طار ، مابقاش بان ليه الأثر نهائيا .. وقفات كتفكر وتدمرات كلام نسمة ليها :

فاش تسالي الحكاية ، وترجعي لزمانك .. حتى الكتاب أيكون رشا ورجع رماد ورمادو ايكون طار مع الريح ..

- حسات بغصة فحلقها ، غاتوحشهم بزاف ، زاد بكات فاش تفكرات بدر السعود ومولاي الغالي وسلطان سليمان ، ناس لي خلاو فيها أثر كبير بزاف .. تعلمات منهم بزاف ديال الحوايج ، تعلمات تخدم عقلها تعلمات تكون مرزنة ومتبتة ، وبلي لخفة كتدي مولاها للواد ، تعلمات منهم بلي الانسان خاص يكون عندو كرامة هي تاج راسو ... تعلمات المحبة الصادقة لي علمها ليها مولاي سليمان ، لي بقى حبو وافي للبدر السعود واخا دازو سينين ... تعلمات منهم بزاف ديال الحوايج ، اما الجنيات لي كل وحدة فيهم واش علمتها ، ضحكات فاش تفكرات نسمة .. لي علماتها تكون بحال نسمة ، رهيفة وحنينة .. أما شعلة علماتها تكون قوية ومتسمحش فحقها ، أما نبتة علماتها الحكمة ، ومتخطوي الخطوة حتى تعرف راسها فين اتحطها بحال جدور الشجرة ، أما قطرة علماتها الرزانة وتباتة ، والكلمة الحلوة وماتهضر حتى تعرف الكلام فين غادي ..

- تنهدات تنهيدة طويلة ، هزات داك الصندوق فيديها ، شعلات ضو ديال الدروج .. وتمات نازلة بشوية كطل ياكما سناء تحصلها ، مكان حتى واحد دخلات نيشان لبيتها وسدات عليها ، السلسلة دارتها فواحد صنيديقة صغيرة دايرة فيها دهبها سدات عليها ورجعاتها للمجر .. الصندوق حطاتو على نموسية ، كان فيه زكروم بحال ديال ديور ... جرات داك زكروم بشوية ، وهي تحلو .. شهقات من لي شافت قدامها .. عينيها كيبريو ، كانت كموسة لي عطاتها الياقوت محطوط زرقة ، أما الصندوق بالكامل عامر باللويز ديال الذهب ، كونما شدات راسها كانت غادي تسخف ، ماتيقاتش راسها واش هاد الخير كامل ديالها ..

- ݣلسات حداه كتشوفيه ، حطات يديها كتحسسو بصباعها الرقاق ، تبسمات شوية جمعات تبسيمة ، رجعات ضحكات .. ماشي شي وحدة كابرة فجوع ، باها عمرو خصصهم من شيحاجة .. معروف بين العطارة وݣاع الناس كيمشيو عندو ، بخيرو وخميرو ، ولكن راه هاد الذهب كامل راه تقاد بيه حياتها ودير بيه اي مشروع بغات ..

- خشات يديها ، حسات بشيحاجة مساتها ، قلبات بانت ليها مخطوطة من توب .. جراتها كانت مسدودة بواحد القنبة صغيرة حلاتها ، كان مخطوط مكتوب بواحد الخط جميل :

قوت القلوب ، سماوك قوت وانا غانسميك هدية ربي نزلات من سماه .. تغاضيت على الرفض ديالك لزواج ، ولكن مغانتغاضاش على المطلوب منك .. لي غانتمناه ونترجاه ، وليكانت بغيتك تحققيه .. حرفت دهايبية كتعطى لي قلوبهم صادقة ، لي يخافو الله ويرجاوه ، لي معدنهم نقي بحال الذهب وبحال الفضة .. وأنا شفتك اهل لهاد الحرفة ، عارفها معطية لرجال وعمرها تعطات للنسا .. ولكن انا بغيتك تحطي فيها رجليك ودݣي فيها وتادك ولا تبدليها واخا يكثر عليك اللغا ... ربي معاك يالي بدلتي قولت ناس زمان ، ديرها فرجال وترجاها وديرها فنسى ولا تنساها .. بينتي بلي ماشي ݣاع النسا قاريين حروب النسا .. الغالي .

- عنقات داك المخطوط وبكات ، بكات حتى نشفو دموعها ، حسات بواحد الراحة كبيرة ، فرحات حيت واخيرا حسات براسها دارت شيحاجة زينة فحياتها ..

- هزات داك المخطوط ، ورجعات جبدات صنيديقتها دارتو فيها وسدات عليه .. رجعات سدات الصندوق ، وغبراتو تحت النموسية ديالها .. تخشات تحت الغطا وطفات الضو ، حسات بواحد العيا غريب ، مدازش بزاف دالوقت حتى كانت وا نعسات ..

____________________

- ݣالسة هي وياها جنب البحر ، خولة غير ساكتة وكتخمم .. جاها هادشي غريب ، بحال شي منامة :

جاني بحال الى كنسمع للخبير ديال مي .. انا ماشي كذبتك ، ولكن راه والله اختي ماعرفت منقوليك ، علاياش ناوية دابا واش غاتقوليها لدار ؟

- قوت [ بنفي ] :

لا مغانقوليهم والو ، واش يحسابليك غايتيقوني غير انت ݣلست نشرح ليك ساعة ، بالكشايف باش تقتي ودخلات ليك العقلك ، خلي دار ماما بعدا اتقوليك خاصني نزور حيت تشيرت .. لا مغانعاود ليهم والو ..

- خولة : واش المعمول ؟

- قوت [ كتخمم ] :

غانقلب على شي محال نكريه ، ونعمرو بذهب ، ونشوف شي واحد كيصمم يخدم معايا .. عاد نشوفشي مدرسة نقرا فيها على التصميم .. الى عجبني المحال والخدمة تمشات ليا ، نشريه ..

- خولة : اهاه وداركم ، الى سولوك منين جاك الفلوس ؟؟

- قوت :

فكرت فيها ، انا أصلا كنت مخبعة واحد البركة ، غانقوليهك ورتي شي ذهب على جداك بعتيه ، ودخلتي معايا شريكة .. انت غير ماتفرشينيش ، عارفاك مكتعرفيش تكذبي ..

- خولة :

أش غانقوليك الله يدير شي تاويل دالخير وصافي ..

__________الـــرجـــوع إلـى الــحــاضـر __________

- قوت [ كتناظرو بعويناتها الكحيلة ، كتلتامس التصديق فعينيه ] :

وهادشي لي كاين ، لي بغيتي تعرفو أنا عاودتو ليك بالحرف مازدت مانقصت ..

- هاشم بقى كيشوف فيها مدة ، صغر عينيه ... بشك ، سكت مجاوبهاش .. ماعرفاتش شنو تحت راسو ، هو براسو مكان عارف باش غايجاوب ، عض على شفايفو .. وبضبط على اللحية لي تحت شفايفو ... حركة كان كيديرها كلما كان كيفكر فشيحاجة ، هو قاري كتاب الله وعارف فدينو وعارف بلي الجن مدكور فالقرآن ، ولكن باش الواحد يمشي لزمان ويرجع لزمان .. عقلو حبس ..

- رجع هز راسو فيها كيفكر ، الإشكال هي عارفة بزاف ديال الحوايج عاودهم ليه باه ، عارفة جداه باهية ، وعارفة بدر السعود الام ديال جداه وبات حداه سليمان ، دكرات ليه حتى عمامو وعمتو رقية .. عرفات حتى باه توفيق كانت عندو 5 سنين فاش مات جدو الغالي ..

- بلاما ندويو على مراتو بات جدو الغالي الياقوت ، لي فعلا باه ݣاليه ماتت محروقة ، هاد التفاصيل حتى واحد معارفهم من غير العائلة ، مايمكنش تعرفهم من الناس .. جاوبها بصوت تقيل رجولي فيه بحة خاصة :

- مكنتيش عارفة بلي عائلة السهري جايا من قبيلة مجدول الذهب ؟

- قوت [ بنفي] :

والله ماكنت عارفة ، أنا السلطان كنت عارفاه غير بسميتو ، ماكنت عارفة والو على عائلتو ..

- هاشم [ ببرود] :.

مزال عندك المخطوط لي لݣيتي ؟

- قوت [ هزهزات براسها ] :

اه مزال مخبعاه .. وقف كيشوف فجهة الأخرى ونطق :

ماشي ، وقت الهضرة دابا ، عرس ختك واݣف .. كولشي كيتسنى ، دوز سيمانة دالعرس ، ويدير ربي تاويل دالخير ... عطاها بظهر وخرج من المحال مخليها كتشوف فالفراغ ، تنهدات تنهيدة طويلة ونطقات :

ياربي لهلا تحاشم ياربي .. هزات السوارت ، طفات الضو دالمحال وخرجات سادة بابو وراها ..

- ضرباتها بجرية لدار ، يلاه دخل هاشم تبعاتو هيا ..

- جراتها مها كتسول فيها :

اويلي فين تعطلتي هاد تعطيلة ؟

- قوت [ كتلهت ] :

كنت غانحماق بتقلاب ، عاد تفكرت بلي خليتو غير هنا .

- صفية :

اهل العريس غايسبقو دابا ، باش تبدل ختك وترافݣ معاكم انتوما البنات ، باش نلبسو خالتك ثورية ونوجدوها ..

- أهل العريس سبقو ومشاو ، أما سناء لبسوها قفطان منخوي وفنفس الوقت مامعيقش باش ماتبانش هي العروسة ، جات جارتهم ثورية .. لبسوها قفطان غزال وغطاوها بواحد السلهام بيض ، وخرجوها طلعاها فطوموبيل ، أما سناء ركبات مع ختها وخولة وبنات الجارات لي كانو حاضرين .. الطوموبيل لوخرا ، هزو فيها الدهاز .. عاد شدو الطريق للدار اهل العريس ..

قدام باب ڤيلا السهري ، كان عامر بالأحباب وصحاب ... ولاد عمام هاشم وصحاب العائلة ، الطوموبيلات واقفين مستفين كل وحدة تنسيك فلوخرا ..

- بلاصاو طوموبيلات عائلة العروسة ، نزلو البنات ومعاهم سناء ، هازين البنادر وكيغنيو ، وهي مخشية فيهم كتغني وتشطح مدرقة على عينين بعض الناس ، بحال الى ماشي هي العروسة ...

- أما ثورية ، نزلوها بصلاة على النبي مغطيينها ، دخلوها بصلاة على النبي ، تابعبنهم البنات ملقية ليهم نعمة .. وخواتات نعمة خالات العريس ، ومرات عمامو الدار كانت عامرة كولي متشوق يشوف العروسة ، دخل واحد من الرجال لي جاو مع العروسة كان الزوج ديالها ، هزها وطلع بيها للفوق ونعمة هي لي سابقاه ، حلات ليه واحد البيت كبير بيت ديال النعاس ... حطها وخرج ، دخلو البنات ومعاهم سناء ... ݣلسو سناء بالخف ، محيدين السلهام على ثورية وملبسينو لسناء ..

- أما ثورية ، قادات شالها او وقفات تغني مع العيالات ، دخلو دهازها وداكشي لي خداو ليها والديها .. وحطوه فواحد القنت .. واقفة قوت كتشطح وتغني مع خولة ناشطين ، عاد بداو كيدخلو حباب العريس ..

- خالاتو وبناتهم ... عيالات عمامو وشي بناتهم ، صحابات نعمة وعيالات صحاب راجلها ، كولشي دخل باش يشوف عروسة دار السهري مرات ياسين .. كولشي كيصلي على النبي ..

- التوشويش على عائلة العروسة ، والعينين على أخت العروسة ، أما جيران عينيهم على شنو جابت العروسة معاها ، واش والديها كبرو بيها ولالا .. هادشي كامل كان عادات وتقاليد ضروري يمشيو عليهم ، والى مكان مكان والو ، العرس كان عاد أيبدا وغايفوت سيمانة كلها ، ويدوز وفق للتقاليد وللعادات ..

- نعمة ، خرجات تستقبل ولدها .. خرج من واحد البيت ، لابس كومبلي وداير السلهام والقب على راسو ... خوالاتو يصليو على النبي ويغنيو زين الرجال سناء خداتو .. نعمة كانت محادياه تقرا القرآن وترقيه ، من العين لي تشوف وماتصليش على النبي ..

- دخلوه للعند عروستو وݣلسوه حداها ، كان من المقرر وعلى لي قاليها بلي غايسكنو بوحدهم ، حتى من الشقة وراها ليها .. وفراشها خلاه يفرشوه هي وياها على دوقهم من غير بيت نعاس بوحدو لي خداه .. ولكن كان ضروري من سيمانة ديال العرس تدوز كلها فدار والديه ..

- الرجال كانو مزال التحت مجموعين ، والعيالات الفوق .. مكانش خاص يكون إختلاط بيناهم ..

- خولة [ بحال الى تفكرات شيحاجة ] :

ويلي تيليفوني نسيتو فطوموبيل دعمي ، بلات انا جايا ..

- قوت : واش نجي معاك ؟

- خولة :

لالا غير خليك ، انا جايا ... نزلات بزربة كتجري ، قصدات عبد الرحمان نيشان خدات من عندو السوارت بلاما تشوفو معامن واقف ولا تحسب حساب ، مشات للطوموبيل حلاتها لقات تيليفونها فبلاصتها فين كانت ݣالسة .. هزات تيليفون حيدات راسها وسدات الباب ..

- جات تدور جمدات بلاصتها ، كان كيشوف فيها بملامح إستغراب ، وشك .. أما هي بحال الى تخوى عليها سطل ديال الما بارد ..

- فؤاد [ بدهشة وشك ، مأشر بصبعو ليها ]

خـولــة !!

- بلعات ريقها كتشوف فيه .. صغرات عينيها وجمعات غوباشتها وملامح الإستغراب على وجها :

سمحليا خويا واش كتعرفني ؟

- فؤاد [ حس يصهدة طلعات معاه ، تبسم إبتسامة إستهزاء ] :

وايلي خولة ، فؤاد هذا فؤاد رحالي ..

- خولة [ هزهزات راسها ] :

اااه وييي عاد عقلتك عليك ، صاڤا أمورك مزيانة ، سمحليا والله ماعقلت عليك ..

- فؤاد [ سرط القمعة لي تعرض ليها غير بزز ] :

الحمد لله ، شنو كديري هنا ؟

- خولة [ ببرودة ونخوة ] :

العرس ديال صاحبتي وخت صاحبتي ..

- فؤاد [ كيطلعها وينزلها ] :

ااه مزيان ، عائلة السهري معرفة قديمة من سينين ، هاشم صاحبي ..

- خولة [ بنصف إبتسامة ] :

أممم مزيان ، يلاه خليت ليك الراحة خاصني نمشي ، . ضربات فيه ومشات مخلية وراها ريحتها .. لي وصلات ليه لراسو ، مغمض عينيه كيستنشق عبيرها ، علاش لا وهي هاد الريحة كتخليها غير للمناسبات حيت عارفة بلي كتخلي الاثر فالواحد [ so scandale] ..

- حدر راسو وتمشى راجع العند رجال ضارب عليها العين وهي طالعة مع الدروج ، كتتمختر بأنوثة ..

_________________

- مارجعو من دار العريس حتى بقى للفجر شي ساعتين ، مع العيا كل واحد دخل للبيتو نعس ، الغدا ليه من ورا مافطرو .. وجدات نعمة فطور معتبر ، باش تديه للبنتها .. لي وصاتها بلاما تجيب الدقايقية ولا كترت الصداع ، تجيب الفطور عادي .. وداكشي لي دارت ، وجداتو وخرجات هي وعبد الرحمان .. لي غاتخليه عندهم حين اليوم عارضين على الرجال بوحدهم ، والغد عاد ايكون النهار ديال العيالات ..

- بقات غير خولة وقوت فدار ..

- قوت [ حاضية خولة بعينيها ،كتبان ليها ماهياش ، مامالفش ليها تبقى غير ساكتة وساقلة ] :

خولة ، مالك ماشي عوايدك تبقاي ضاربة طم ..

- خولة [ شافت فيها وتنهدات تنهيدة طويلة ، جرات الكرسي وݣلسات ] :

عقلتي على داك خونا لي كنت عاودت ليك عليه ، لي قلت ليك عندو محال كيبيع غير الخواتم ديال دياموند ، وكيبيع غير الإكسسوارات ديال الذهب البيض ؟

- قوت [ جرات الكرسي وݣلسات حتى هي ] :

اياه عرفتو ، راه المحال ديالو فسيدي بوذهب .. ياك فؤاد الرحالي ؟

- خولة [ بلعات ريقها ، كتلعب بصباعها ] :

عمري ماقلت ليك بلي هذاك فؤاد ، هو [ سكتات وشافت فيها وكملات كلامها] هو السيد لي كنت كنبغيه ..

- قوت [ خرجات عينيها ، وملامح الدهشة باينة على وجها ] :

حلفي بالله ، وايلي .. صدمتيني قسما بالله العظيم ، ومالقيتي غير هداك غير قولي ليا ..

- خولة [ تنهدات تنهيدة طويلة] :

أودي قلت العقل ..

- قوت :

وصاحبتي ، فاش كندوز من حدا المحال ديالو ديما عامر غير بالعيالات ، كنلوح غيني كنلقاه كيفرنس مع الكليانات ، باينة فيه بو البنات ... باينة فيه عاجبو راسو وعاجباه طولتو .. واش جابو للهضرة ؟

- خولة [ خنزرات فيها ] :

واش انت حولة ولا عورة ؟ واش مبانش ليك لبارح فالعرس ؟

- قوت [ كتحلف ] :

قسما بالله العظيم مبان ليا ، وراني نيت عورة علاش ماعنديش عين كتكب فختها مرة مرة ، انا لبارح كان عقلي ݣاعما حاضر الكسدة كاينة ، والعقل طار ..

- خولة : ايوا راه صاحب هاشم خو ياسين الكبير ..

- قوت [ خسرات سيفتها ] :

صافي ، تجمعو جوج نخلات فبلاصة وحدة ، بزوج بيهم عاجباهم طولتهم وعاجبهم راسهم ، غير واحد كيبيع الذهب الصفر الحر ، وثاني كيبيع ليا دياموند والذهب البيض .. تريكة ، شوفي مايخلعكش الى شفتيه صافي راه نسيتيه وزايدون ، خولة المبهللة ديال 22 عام ماشي هي خولة ديال 30 عام ..

- خولة [ تبسمات ] :

كتلعبي اللعب ديالي , ولكن عرفتي كيفاش كان كيشوف فيا مصدوم ماعرف باش تبلا .. ومارضاش فاش قلت ليه شكون انت ماعرفتكش ..

- قوت [ضحكات] :

عبرتي عليه [ سكتات وشافت فخولة ] خولة عرفتي شنو وقع ليا لبارح ..

- خولة [ بصدمة ضربات فخاضها ] :

أوييييليييي أستغفر الله العظيم ، حلفي بالله ناري أقوت متݣوليها هالعار ... الله ياربي الحبيب منين خرج هادشي ، حتى ݣلنا هادشي داز وتسد رجع تحل .. ناري على صݣعة وشنو غادي ديري دابا ؟

- قوت [ كتخمم ، هزات عينيها فيها ] :

الديار ديال الله سبحانه ، أش عندي مندير فنظرك أنت ، أنا عاودت ليه كولشي ... هو بقات ساكت ، وسولني على المخطوط باش زعمة يتأكد واش كلامي بصح ، ولا غير كنخربق ونخرف ..

- خولة :

وانت غاتوري ليه المخطوط ؟ عندك غير يقوليك رجعي لينا ذهبنا وسلسلتنا ؟

- قوت [ شافت فيها بنص عين ] :

من نيتك ، شتي بعدا غير هاد السلسلة ، والله لا حيدات من عنقي غير الى داوني لروضة ، واخا نشوفو تما كيعواج ويتفركل .. لا خداها بالله المعبود ، بغا يشوف المخطوط ويتأكد غادي يشوفو ، ولكن والله السلسلة لا شمها انا قلت ليك .

- خولة :

شفتو لبارح قليل فين كيضحك ياربي السلامة .. ولكن معدور ..

- قوت : علاش مالو ؟

- خولة :

مالحظتيش لبارح مراتو مكايناش فالعرس ، راهم واقفين على الطلاق ..

- قوت [ هزهزات بكتافها ] :

الله يعين كل واحد على مشاكلو ، حتى واحد ماخطاوه مشاكل ..

- خولة : العجب علم الله العيب منمن جا !!

- قوت [ خنزرات فيها وقفات راضة الكرسي كيف كان ] :

يكون العيب من ما كان ماشي شغلنا ، بين زوج مكايعرف شنو بيناتهم سوى الله ... والبيوت اسرار ، حنا براكة علينا غير حياتنا مكاين لاش ندخلو فشبوقات بنادم ..

- خولة [ وقفات ] :

ياربي سلامة ، مايدي منك الواحد لا حق لا باطل ..

- قوت :

مكنحملش النميمة انا ، وندخل فحياة الناس ... الى تفارقو شي زوج عرفي الرزق سالة بيناتهم وسالينا ، زيدي خلينا نكملو شقانا ..

- خولة : انا انمشي بحالي لدار ، 4 خاصني نكون فالمحال .. بعد غدا شادة روپو خاصني منتعطلش اليوم ..

- قوت : واخا سيري ..

__________________

- رجعات صفية من دار أهل العريس ، منين ݣلسات وهي تشكر وفرحانة عاجبها الحال :

ختك سولات عليك ..

- قوت :

غدا غاتشوفني ندي ليها نيت الكادو ديالها ، لبارح كانو الناس بزاف ، ماكنتش بغيت نحطو مع الدهاز قلت حتى نعطيه ليها يدي فيدها ..

- صفية :

الله يرضي عليك ، والله يفرحني بيك حتى انت أبنتي ..

- قوت :

اللهم آمين يارب ..

- الغد ليه ، كان النهار ديال الرجال ، مع صباح قوت غير فطرات لبسات واحد العباية فالكحل لايحة عليها الشال ، هزات ساكها وخرجات للخدمتها .. مشات للمحال الجديد ، قادات شي شغال كانو خاصين فيه .. دوزات العشية تم وتغدات تم ، حتى لديك 8 عاد سدات ورجعات للدار ..

- فدار اهل العرس ، كانو الصالونات بزوج عامرين برجال صالة كطل على صالة كبيرة. ، والأمداح خدامين .. ريحة البخور كتعطي او واحد الجو كيريح النفوس .. العريس كان ݣالس وسط منهم مدورينو ولاد عمامو لي كانو فأواسط العشرينات من عمرهم ..

- نقز العم الأكبر لياسين ..

- محمد موجه كلامو للعبد الرحمان كيضحك ] :

وشوف سبحان الله اسيد عبد الرحمان ، شوف هاد الإختلاف ، شحال هذا خويا توفيق هو لي سبقنا للزواج ، وهو لي سبقنا فالولاد .. ولكن ولادو ، الكبير سبق الصغير وشتي اخويا توفيق ، وهكا خاص يكون الكبير عاد الصغير ماشي صغير عاد الكبير [ كيضحك] ..

- بدا توفيق كيضحك على كلام خوه :

و خويا انتوما تعطلتو فزواجكم ، تبعتو الخدمة ونسيتو راسكم .. انا لا صافي العين شافت مرادها جابها لدارو السلام عليكم .. [ شاف فعبد الرحمان ] ..

- الحاج كيشتي انا هو الصغير فالخوت .. مامفاوتينش بزاف .. راك عارف ..

- عبد الرحمان :

أيااه ، محمد هو الكبير ماكبير غير الله ، وعاد سليمان وأنت ..

- محمد :

تا را مامفاوتينش بزاف ، انا فايت سليمان بالثلت سنين ، وسليمان مفاوت هو وتوفيق بالعامين .. من ورا موت الواليد خوينا البليدة ، انا وسليمان تشغلنا بالقراية والخدمة ، توفيق مع كمل القراية تزوج ، [ شاف فتوفيق ] :

شحال كان عدك ديك الساع فاش تزوجتي ؟

- توفيق [ كيفكر ] :

وراه كان عندي ديك 23 عام .. من وراها بعام تزاد عندي هاشم ، كان هو اول حفيد ... عاااد هاد الحترف هداهم الله وتزوجو ، خلاوها ماليها لي شافتو غنو بغات منو ..

- سليمان [ كيضحك ويخبط على ظهر هاشم ] :

الحفيد الاول ديما كيكون عزيز ، ترا مكانش شي واحد فينا كيحطو خصوصا رقية عمتو ، ويلي كانت حامقة عليه .. ونعمة ظل مناݣرة معاها خليه ناعس خليه ناعس ، وتݣول تغفلها وتمشي تهزو تركبو وتخرج بيه ..

- محمد :

وحاسب هذا راه لدنا كاملين ، ماشي ولدك اولد بويا ..

- ياسين :

أتبارك الله عليكم ، وهاد العبد لي معاكم ضرݣتوه مسكين ..

- محمد [ عنقو ] :

تا أشمن ، ياسين طلع كيشبه أليا انا فياماتي تعقل اتوفيق ..

- توفيق :

كنݣولوها ، ولادي انا بعدا ماشبهو لا ليا لا لمهم ..

- سليمان :

هاشم غير الواليد الغالي الله يرحمو ويوسع عليه ، ماخلا فيه والو سبحان الله العظيم ، أفولة وتقسمات على جوج ..

- توفيق [ تنهد وهزهز براسو ] :

الله يرحمو ويوسع عليه .. مات مسكين وانا صغير ݣاعما عقلت عليه بزاف ، مزال انتوما راه عاقلين ..

- محمد [ كيتفكرو] :

كون غير كان مزال بالحياة .. كان شديد ويحكم بالحق ، عمرو ادى شي حد ولا دزا فشي حد الله يرحمو فهاد النهار ياربي ..

- بقاو مجمعين مع بعضياتهم ، كل يلغي باللغاه واخا مل واحد فمدينة ، ولكن نهار كيتجمعو كتكون نزاهة ..

________________

- ݣالسة فواحد القهوة ، كتخمم حاجة يدها على خدها ساهبة ، كتلعب بالماكلة لي فطبسيلها .. تنهدات تنهيدة طويلة ، وجها دبال حالتها مابقات حالة .. حدرات راسها ، ورجعات طلعاتو .. يدها حبسات على اللعب بداك الطبسيل ، قلبها كيضرب بجهد .. بحال الى تخوى عليها سطل ديال الما بارد .. مايمكنش تكون غالطة ، هو والله حتى هو .. ولكن شكون هاديك لي معاه ، ودكون ديك البنية الصغيرة .. !!!

- كتشوفيه حتى جر الطبلة لديك السيدة ، لي كانت لابسة لباس محترم ديال المحجبات ، زوينة وملامحها بريئة .. البنية كانت نسخة طبق الاصل ليه ..

- تزاد معاها الزايد ، وقفات كتشوف فيه .. هز عينو بصرها ، عينيه جمدو ، ورجع حدر راسو بزربة بحال الى مكايعرفهاش .. باس راس السيدة لي معاه وتمتم شيحاجة فودنا ، ورجع خرج ..

- كحزات الكرسي ، وتبعاتو كتجري وهي كتعيط :

- ماوقفش ليها بغات غادية وتابعاه حتى حبس عند طوموبيل ديالو حل بابها ... ماحس بيها حتى جراتو من يدو .. شافيها ببرود ، كيشوف فملامحها كيفاش بهاتو .. ماشي هي البنت لي شاف نهار الأول ..

- عمر [ جامع غوباشتو كيخنزر فيها ] :

ياك لاباس أشريفة أش كاين ؟

- نسرين [ كانت مصدومة من ردة فعلو ] :

عمر أويلي ، علاش كتدوي معايا بحال هكا ، وعلاش كنسوني ليك تيليفونك طافي ، وشنو جابك لأسفي ياك أنت فأݣادير ..

- عمر [ بخشونة ] :

لي من حقها تسول هادشي ، راهي ݣالسة لداخل هي وبنتي ، شكون انت لي كتسولي ... ياكما ضارب بيك الكاغط ومافخباريش .. حيدي من ݣدامي الله يرحم جدك ..

- نسرين [ بحال الى خوا عليها سطل ديال الما بارد ، كلها كترعد مامتيقاش هادشي لي كتسمع ] :

كيفاش بنتك ؟ واش واش انت مزوج ؟ ولكن علاش أعمر كذبتب عليا ، ياك قلتي كتبغيني وبلي غانتزوجو الى طلقت .. وانا دابا كنطلق ، واخا هو ݣاليا انت لي سيفطي ليه تصاور ماتيقتوش ، حيت عارفاك ماديرهاش ..

- عمر [ كيضحك ] :

وسبحان الله العظيم ، راجلك لي مزوجين 6 شهور ومتيقتيهش ، وانا لي عرفتيني مكاملة حتى شهر متيقاني ، ولايني مكلخة برب العالي ، من الأخر انا لي سيفط تصاور لراجلك تهنيتي ..

- نسرين [ كتحس براسها مقاداش توݣف] :

واش كضحك عليا اعمر ، كضحك عليا ... واش واش دابا داكشي كامل كذوب ؟

- عمر :

من الأخر ، صاحبتك سهيلة هي لي لعبات فها لافير كاملة ، هي لي كراتني .. باش نطيحك وحتى انت ماسويهلاش كنتي على سبة ، لقيتيها من الجناتي .. باغية غير ايمتا تفكي ... شتي بحالك اقسم لك بالله ، مايصلاحوش لزواج ومكايعرفوش ليه ، شانتين وضاسرين على الجهد .. راجلك خاصو يرحم ليا الوالدين لي هنيتو من وحدة بحالك ..

- انا درت غير لي تݣال ليا ، صاحبتك عطاتني أڤونص وكملات ليا الباقي .. ونزيدك مكايهمنيش شنو غاديري ، جري طوالك اتجيبي أشوهة لراسك ، والى كنتي كتسوني لسهيلة ومكتجاوبكش ، بغيت انبشرك بلي راها فسپانيا دابا .. بلاما تعذبي راسك ..

- وهادي دير ليك العقل أمدام ، ومن اليومفوتي عليك ساحتي ولا مغايعجبك حال . .. ضرب فيها ومشا خلاها جامدة فبلاصتها .. رجليها صافي فشلو عليها .. دموعها نازلين ، قلبها باغي يخرج من بلاصتو ..

- كانت بحال شي جمد ، غادية كتجر فرجليها ، جات تدخل للريسطو وهي طيح على وقفتها ..

__________________

- واقفة فالكوزينة حاطة طبسيل خاوي صغير ، هزات قرعة صغيرة فيها خليط بحال نخالة ، مكتوب على القرعة فواحد الوريقة وملصقاه بسكوتش إسم [ الشوفان ] دارت منو معلقة صغير .. رجعات القرعة لبلاصتها ، وهزات قرعة أخرى فيها خليط بيض .. حتى هو عليه وريقة ملصقة ومكتوب فيه [ خليط النشا وحليب بودرة ] هزات منو معلقة حتى هو ، ورجعات القرعة لبلاصتها ..

- حلات الثلاجة ، هزات منها دانون مسوس دارت معلقة صغيرة منو ، رجعات. للبلاصتو ، عاد هزات واحد البطاطا قطعات نصها حكاتها وعصرات الما ديالها وضافتو لدار الخليط ..

- حركاتو مزيان مكانش جاري ومكانش تقيل بزاف ، دخلات للحمام مقابلة مع المرايا ، دارتو للوجها وللعنقها ، رجعات للكوزينة غسلات طبسيل ومشات ݣلسات كتفرج .. دخلات صفية ناظراتها بعينيها :

والله ابنتي الى على مزيناتك ، ݣاعما تحتاجي للهاد الماسكات ..

- قوت [ كتدوي بشوية ] :

شفت شي طاشات عندي ، وشي حبوب يبسو وخلاو ليا بلاصتهم ، راه كنديرو من شحال هادي أماما ماتخافي والو ..

- صفية :

وعندك تبقاي سهرانة ، نعسي بكري ماتنسايش غدا خاص نوضو شوية بكري يلاه يلاه ..

- قوت : واخا تهناي .. خلاتها صفية طلعات لبيتها ، وبقات هي كتفرج ..

- دازت 20 دقيقة ، نشف ليها الماسك .. ناضت للحمام غسلات وجها بالغاسول ديالها ، نشفات وجها بالورق الخاص بوجها .. وخرجات من الحمام طفات التلفازة وطلعات لبيتها ، ݣلسات هازة قرعة صغيرة كان فيها زيت اللوز الحلو .. دارت شوية على وجها ودارت ليه ماساج .. بقات مدة وهي ݣالسة بينما شرب ليها وجها الزيت ، عاد تخشات فبلاصتها كتوجد باش تنعس ..

__________________

- جات خولة فصباح للعندهم ... باش يمشيو مرافݣين ، دخلات عندها للبيت لقاتها كتلبس ، كانت لابسة واحد العباية وشعرها طالقاه ..

- خولة [ بإبتسامة ] :

الوجه منور عاوتاني ، الماسك العجيب كون اقلتيها ليا حتى انا نديرو فدار ..

- قوت [ كتشوفيها بنظرات عدم تصديق ] :

كضحكي عليا ، شحال وانا كنقرص ، ونعطي فالماسكات ... ماخليت ماعطيتك حتى حاجة مكديريها ، من غير الى كنتي بايتة معايا هنا وبزز بزز باش كديري ..

- خولة [ ݣلسات على نموسية ، كتشوف فظفارها المصبوغين بالݣرونة ] :

العݣز ليا فيا مكايخليني ندير والو .. أش قاليكم عمي عبد الرحمان ، كيداز عرسهم لبارح ؟

- قوت [ كتكمل أخر اللمسات ، هزات ريحتها لي كانت [ glacier bella maison Alhambra ] .. :

ماقال والو اختي ، داز عادي زوين الرجال بيناتهم ..

- خولة [ وقفات قدامها مغمضة عينيها كتستنشق فريحتها ] :

ياختي كتحمقني عندك هاد الريحة ، رشيني رشيني ..

- قوت [ كضحك ] :

حتى ريحتك راه فنة [ رشاتها ورجعات ريحتها لبلاصتها ] قادات شالها فوق راسها .. هزات ساكها وخرجات هي وخولة من البيت هبطو كانت صفية كتسناهم ..

- خرجو بزوج مع عبد الرحمان .. وصلو لدار العريس ، الطوموبيلات واقفين والعيالات داخلين للفيلا ، كل وحدة مزرزرة ولابسة ومقادة .. ستقبلاتهم نعمة لي ماحيداتش عينيها على قوت ، غير كضحك وفرحانة وعاجبها الحال الفرحة باينة ليها فعينيها ..

- كانت سناء مݣلسينها الوسط ، بتكشيكة فالبيض وتاج خفيف فوق راسها يديها نظرات فيهم الحنة ورجليها ، فرحانة بمها وختها .. بداو اللعابات كيحميو الطرح ويغنيو ..

- كل وحدة كتنزض وتغرم ، وتوشوش للعابة بإسم راجلها .. وغير تبدا تغني عليه كتنوض تشطح .. كانت كل وحدة بدور ، من غير قوت بوحدها لي كانت ݣالسة كتشوف بعينيها وتشطح بيدها ..

- حتى من صفية غناو على عبد الرحمان ، أما خولة غناو عليها هي ، علقات ليهم وشطحات بردات غدايدها عاد ݣلسات .. دازو الاجواء زوينة بزااف ... فاش كيكونو القلوب صافية وناسك اهلك وحبابك ضايرين بيك فراه كيدوز كولشي زوين ، ومكتسخاش بديك اللمة وجماعة ..

_________________

- فشومبر بيضة ... معلقين ليها السيروم ، تحت عينيها زرݣ ، باهتة كتشوف غير فالفراغ ساهية .. حاطة يد على كرشها ويد مسرحاها .. واقف خوها كيشوف فيها .. ، نطق بتوبيخ :

خرجتي على راسك وخرجتي علينا كاملين ، الواليد عيا مايوعي فيك ولكن معامن فشوشو الزايد هو والواليدة لي خرجو عليك ، لي طلبتيها كاتحضر لي بغاتها نسرين خاصها تكون ..

- ولفتي من الصغر التحرر ، تخرجي بوحدك تسافري بوحدك .. انا بعدا عمري فحياتي شفتك مسرحة السجادة وكتصلي ، عمري شفتك هازة القرآن وكتقرايه نهائيا .. الى ماخفت نكذب حتى الوضوء مكتعرفيش توضاي ..

- كايجي رمضان كتصوميه بوحدو ... حيت اختي كون كنتي كتعرفي بينك وبين لي خلقك ، مغاطيحيش فهادشي ، صحاباتك كاملين غير الكمايات ، حتى وحدة فيهم مامخلقة ومصوابة وبنت الناس ، فعايلها سايقين ليهم الخبار أسفي كاملين ..

- كلامي أيجيك قاصح ، ولكن واحد بحال هاشم والله ماتليقي ليه ، خاصو شي وحدة مأصلة عارفة بينها وبين لي خلقها .. ماشي وحدة معارفة حــتى القــبلة منين جات ...

- ساحت دمعة سخونة من عينها ، هو كيعاود وهي سيناريو حياتها دايز قدام عينيها ، فعايلها وݣاع لي كانت كدير شافتهم قدامها ..

- يونس :

شتي هادشي لي وقع ليك ، تستاهليه ، وتستاهلي ماكثر منو ، بقا ليك الݣارو والبلية لي ماجربتيهم ، اما راه كولشي درتيه ، علم الله داك الحيوان اش دار معاك .. انا جيت أعلى قبل الدم لي بيناتنا ، حيت سوناو ليا اما راه منجيش ومنشوفش فيك ..

- هاشم كان عندو الصح ، من الأحسن تخوي هاد أسفي ، مابقيناش ݣادين على شي شوهة ، براكة الواليد مريض بمسبتك ... راجعي نفسك واحد شوية ، والى كانو ترابي الوالدين ݣرو فيك ، حاولي تصلحي من راسك .. صلحي علاقتك مع لي خلقك هو الاول. ، عاد شوفي راسك وشوفي الناس ، الله يشافيك ..

- خلاها وخرج ، بدات كتبكي وكتنخصص ... كتحس بحياتها ضاعت كولشي راب ، خسرات حياتها والديها خوها ، وراجل لي كان هدية من عند الله ليها باش يتصلح حالها ، ولكن ضيعاتو ومشات على عينها ضبابة ..

- قبل النهار السابع بيوماين ... مشا ياسين للحمام هو وصحابو ومعاهم فؤاد ، لي ختار يكون الوزير ديالو .. دوزوها غير ضحك وجماعة ، سلاو صحابو وخرجو قبل منو ... عاد خرج هو وفؤاد ، لبسو عليهم وخرجو ، خلاو السيكان ديالهم فطوموبيل ونزلو للسوق ، باش يتقداو الفاكية ..

- العريس مخاصو يزݣل حتى عادة من العادات القديمة المسفوية ... رجع هو وفؤاد من بعدما تقداو ، حطو داكشي فطوموبيل ، طلعو وشدو الطريق لدار بلاصة طوموبيلتو فبلاصة قريبة من دار بشوية .. نزل هو وفؤاد ..او وقف فبلاصتو ..

- كان لابس جلابة فالبيج تحتها سروال قندريسي فالبيض ، وبلغة ... قبالتو ، كانو واقفين قبالتو ݣاع صحابو لي كانو معاه ، مبسمين وهازين العصي ، مكانوش هراوات غلاض كانو رقاق ديال الزيتون ..

- كانو واقفين ومحلفين عليه مبسمين ، ياسين تبسم هز على جلابيتو ، وهو يطلق رجليه لريح كيجري ... فؤاد كان وراه بحكم كان هو الوزير ديالو كان خاصو يكون حامي عليه ، تبعوه صحابو كيجريو او هو كيجري ..

- كيوقف يشوفهم واش جايين وكيكمل الجري ديالو ، الضربة لي كتبغي تجي فيه كتجي ففؤاد فظهر ديالو ... من زنقة لزنقة ، وهو كيرولي بيهم ، ولكن مجات فيه حتى ضربة كاع الضرب كلاه فؤاد فظهرو .. وصل ياسين للباب الڤيلا وقف كيخبط فالباب ... حلات نعمة بزربة ودخل كيجري ..

- وقف كيسترجع أنفاسو .. حتى وقفو قدام الباب ..

- نعمة [ كتضحك ] :

صافي دخل لدار احطو دوك العصي ديالكم ..

- فؤاد [ كيحط على ظهرو ] :

زݣلتوه اصاحبي ، يدكم تقيلة ..

- قلبوها ضحك ، ودخلو كاملين للصالة مجموعين على التقشاب فرحانين بصاحبهم ..

- كانت هادي عادة عندهم ، فاي عرس كيديرو عادة للعريس ، بهاد الطريقة ... الى كان العريس فايت موكل الدق لشي عريس أخور لي هو صاحبو ، فداك العريس كيفدي دقتو فعرس صاحبو بالهراوة ، أما الى كان العريس هو اول عريس بين صحابو ، كيجريو عليه غير بعواد رقاق بحال العواد ديال الزيتون ..

_________________

- لابسة واحد الجلابة ولايحة عليها واحد الشال ، ملامحها صفرة ، قبالتها راجل فالأربعينات من عمرو ، ملامح الإستغراب على وجهو ، بتساؤل سولها :

واش متأكدة بغيتي مني أنا نشد الملف ديال طلاقك ؟

- نسرين [ هزهزات براسها ] :

أه أستاذ حكيم ، اصلا انا وهاشم تفاهمنا على كولشي ، المحامي ديالو هو ، عبد العالي مخلوف .. ݣاع المستحقات ديالي راني متنازلة عليهم ، انا وياه درنا طلاق إتفاقي ..

- دابا الموضوع ديالنا ماشي هو هذا ، المهم عندي هو المكتب ، كنتي قلتي ليا شحال هادي بلي عاجبك وماكرهتيش نبيعو ليك ، واش مزال باغيه ؟

- حكيم [ مزال مصدوم ] :

بطبيعة الحال ، المكتب جاي فموقع مزيان .. واش باغية تبيعيه ؟

- نسرين [ هزهزات راسها وملامح التعب باينة عليها ] :

ياه بغيت نبيعو ، الى كان مزال عينك فيه ، نكملو الإجراءات دغية بغيت نخوي اسفي فأقرب وقت ..

- حكيم :

العجب والله الى العجب ، مابغيتش ندخل فشيحاجة بعيدة عليا ، ولكن واخا كيفما بغيتي مرحبا ..

- نسرين :

صافي مزيان ، دابا تفاهمنا ، نمرتي راهي عندك ، بغيت أي جديد تعلمني بيه عفاك ، وحاول تسرع الإجراءات ديال الطلاق .. ونعاود نقولها انا مابغيت والو ..

- والاتعاب ديالك خلي ليا نمرة ديال الكونط باش نڤيرسيهم ليك إن شاء الله ..

- حكيم [ شرب من قهوتو هزهز براسو ] :

واخا إن شاء الله ، اللهم يسر ..

- مشات للمحال ديالها الجديد .. السلعة كانت محطوطة قدامها كلها .. كتشوفيها مبسمة بإفتخار ، بدات كتستف كل حاجة فبلاصتها ، كتشوف فداك الذهب ودوك التصاميم لي خرجو من يديها ، أحسن حاجة فهاد الدنيا تلقى راسك فشيحاجة كتبغيها .. حبسات وتنهدات تنهيدة طويلة ونطقات :

الله يرحمك أسي الغالي ... مكنتش عارفة راسي فين غادية ، انت لي وجهتيني أو وريتيني شنو خاصني ندير .. هو لي شافيها اهل للهاد الحرفة ، زيمكن كونما شي داكشي لي وقع ليها .. اتكون مزال للحد الساعة من خدمة للخدمة ، ولكن هو شافيها لي ماشفتوش هي فراسها ..

- تفكيرها مشا للمحال السهري لي هو ثالث محال على يدها ليمن .. نهار خدات المحال ، كانت كتسمع غير بمسية السهري ، مكانتش كتعرفهم ولا عمرها شافت شي واحد فيهم ... مكانتش متوقعة بلي أيجي نهار ويكونو نسابهم ... وتكون جارت ولدهم الكبير ..

- نفضات عليها غبار التفكير وكملات شغالها ، سلات وكانت كل حاجة محطوطة على حقها وطريقها ، وقفات عاطية للباب بظهر كتشوف فالمحال بفرحة ..

- مبارك ومسعود .. تنفضات من بلاصتها فاش سمعات صوت رجولي جبار دوا وراها ، ضارت لقاتو واقف كيدوز عينيه على المحل وأخيرا ستقرت انظارو عليها ..

- قوت [ بلعات ريقها ] :

الله يبارك فيك ، حسات برهبة وهو واقف قدامها ، كتحس بداك المحال لي كبير ولا محل صغير ومضيق خانق أنفاسها ، وهتدشي كامل كان هو السبب ديالو .. يمكن بسبب طولتو لي كانت كتشوفها هي بينها وبين راسها ، طولة غير طبيعية .. خاص لي بغا يتكلم معاه يبقى معلي راسو ، ولا يطلع فوق شي كرسي ..

- ولا يمكن هي كانت كتشوف هادشي حيت قصيرة ، عينيه الى كان حالهم كتقد تشوف شنو لداخل ديالهم ، أما الى مصغرهم رموشو كيكونو مغطيين البؤبؤ ديالو .. بالخف مشات ورا الكونتوار او وقفات .. بحال الى داك الكنتوار درع غادي يحميها منو ..

- وقف مقابلها معاها ، حنحن ونطق بتقالة :

لقيتي المخطوط ؟ ، من زهر كانت هزاتو معاها فساك بحال الى كانت حاسة بلي هاد النهار غادي تشوفو ، حلات ساكها ويديها باردين .. كتحاول ما امكن تصنع الرزانة والبرود .. جبدات المخطوط ومداتو ليه ..

- خداه من عندها ويديه ، كيبانو كبار مكتاسحهم شعر كتيف وعروق بارزين كتبين على مدى قوتو .. حل المخطوط مصغر عينيه كيقرا فيه ، هز عينيه كيشوف فيها ، ورجعهم للمخطوط لي بين يديه ..

- مد ليها المخطوط مرجعو ليها، شداتو من عندو ونطق :

لي وقع ليك الله سبحانه بوحدو لي عالم عليه ، هو لي عالم على شنو كيوقع ، وهو لي قادر على أي حاجة مستحيلة فهاد الكون ، هو لي بيديه كولشي ، واخا شي حوايج مكايتقبلهمش العقل ، مغاندخلش فيهم .. ومغانݣولش ليك كذوب أبنت الناس ..

- من جهة الثقة انا متيقك ، حيت عارف مزيان كاين شي حوايج مايمكنش تجيبيهم من راسك ولا تسمعي عليهم .. ولكن حاجة وحدة خاصك تعرفيها .. الحاجة لي كتخص عائلة السهري خاصها تبقى فعائلة السهري ..

- بحال التراث ، كنتوراتوه ابا عن جد ، مانݣدوش نسمحو فيه ، بحال العادات والتقاليد لي تزادينا عليهم ولي شتيهم بعينيك .. هكاك مجدول الذهب ، بلاصتها خاصها تكون فعائلة السهري ..

- قوت [ بدات كتعصب ، بلعات ريقها وببرود ] :

خالتي بدر السعود هي لي عطاتني السلسلة ، وسلسلة كتبقى هدية ، والهدية مكترجعش ، ووصيتها مانحيدهاش من عنقي ، أنا معارفاش التقاليد ديالكم فالعائلة ، ومعارفاش بلي شي حاجة كتخصكم خاصها تبقى فالعائلة ، كون كان فخباري مانشدش السلسلة ، ولكن فات الفوت ، والوصية ديال خالتي هي عمري منحيد السلسلة من عنقي .. وهادشي بي غايكون عنري مغادي نحيدها ..

- هز عينيه كيشوف فالمحال ورجع شاف فيها ، تبسم بإستهزاء ونطق :

تبعتي كلام جدي الله يرحمو وحليتي محال ديال الذهب ، ماقراوكش بلي هاد الحرفة ديال الرجال ، ماشي ديال العيالات .. كون درتي شي حاجة من دارك ماشي حسن ؟

كانت واقفة كتشوفيه بعينيها الكبار لي مكحلاهم بخط من الكحل المغربي الأصيل المدقوق على اليد .. بين ملامحها المغربية الأصيلة .. الدݣ القديم حتى حاجة فيه مامغشوشة .. لايحة شال عبايتها على النص فراسها مبين وخصلات من شعرها لي كحوليتو كانت بحال كحولية عينيها .. نطقات بصوتها الأنثوي الرزين لي سمعو غير هو وهي :

سمع أولد الحاج ، مغانطولش معاك الكلام .. ومغانجاوبكش ونغلط فيك ، سول على بنات العطار عبد الرحمان وهوما يقولو ليك بانا الحمد لله علمنا صوتنا مايعلاش بين رجال .. وبلاما تسول ، عمي توفيق ايقوليك .. ويلا ساليتي كلامك الطريق قدامك ، الله يعرضك السلامة ..

- كان حاضي ملامحها وكل كلمة نطقاتها ، وتصرفاتها ، خرج كلامو بصوتو المتجبر القوي :

هادشي لي كان خاص ، غير سيدي بوذهب يتخلطو فيه الرجال مع العيالات .. سمعي أبنت الناس ، المرأة بلاصتها فدارها معززة مكرمة .. مكايتخالطوش جلايلها مع جلايل الرجال .. [ ورك على أخر كلمة قالها وهو كيناظرها بعينيه لي مكانش كيحركم البؤبؤ ديالهم ..

- بتبسيمة رزينة .. هكا تعلمات من والديها تبت لي قدامها بالهدى ونطقات بحلاوة لسانها :

هادشي فات عليه زمان ، أما دابا السوق مابقى بسميت راجل ولا مرأة .. لي عندو مايقول ويبين راه كيتقدم ، المجية ديالك كانت على قبل المخطوط ، وراه قريتيه ، والى كان غير على قبل السلسلة ، غير رجع منين جيتي أولد الحاج .. واخا تݣدم فيا وتفصلني ألف تفصيلة لاديتيها ولا دخلتيها لدارك ...

- فواحد من المحالات ديال الفخار ، محطوطيط طويجنات ، وديكورات وأي حاجة كتخص الكوزينة من ماعن ديال الفخار ، كيتسمع غير الصوت ديال المكينة ديال الفخار .. ݣالسة شالها مليوح على كتافها ، وخصلات من شعرها على وجها .. جامعة غباشتها وخدامة يديها عامرين بطين ..

- دخلات عليها خولة ، او وقفات كتشوفيها بإستغراب ، جرات واحد الكرسي وݣلسات عليه ، ماهزاتش فيها الراس نهائيا خدامة محنية على واحد الڤاز كتقاد فيه ..

- خولة [ بتساؤل ] :

ياك لاباس ؟ شكون عصبك ؟

- قوت [ بلاما تشوفيها] :

علاش انا كنبان ليك معصبة دابا ، الحمد لله ناشطة فرحانة ..

- خولة :

واش انا يلاه غادي نعرفك ، هاد ديكورات كاملين لي هنا ، صايبتيهم غير فاش كتكوني معصبة ، ومكتجي لهاد المحل وكتحليه وتخشاي فطين غير الى عصبك شي حد ، شكون السباب فديك الڤازة لي فيدك ..

- قوت [ هزات فيها عينيها ، جامعة فمها بحال شي كموسة ، دليل على انها واصلة بيها العظم ] :

ماكرهتش ، نشد ليه كمارتو ندير ليها بحال هكا [ خشات يدها فداك الڤاز وعجناتو ] ..

- خولة [ كضحك ] :

وعاوديه دابا ، شكون هذا ؟ شحال هادي ماشتك بحال هكا من ايامات صلاح ..

- قوت :

داك النخلة ديال هاشم نسيبنا ، ياااخ مالقينا معامن نتناسبو امع هداك حنطويل ..

- خولة [ مينة بضحك ] :

عائلة السهري الله يعمر ليهم الدار أصاحبتي ، ماعندك ماتعيبي فيهم ، كاملين الى سولتي عليهم ..

- قوت :

ماقلناش العكس ، ولكن ولدهم الكبير باينة أيرجع دم سناني ، جا للمحال عندي ، وريناه المخطوط قاليك الالة ديك السلسلة خاصها ترجع لدارهم .. شوية قاليك المرأة بلاصتها دارها ، ماشي جلايلها يتخالطو مع جلايل الرجال فسواقات .. تبقى معززة مكرمة ..

- خولة :

مالو مسطي هذا ، عينو فسلسلة مالو هو لي شاريها ، راه مت جدو لي عاطياها ليك تخربيق ... أما الخدمة وهو الصراحة عندو الحق ..

- قوت [ خنزرات فيها ] :

كيفاش عندو الحق زعمة ، والى هاد المرأة ماعندها خوت دراري ، ماعندها بو لي يصرف عليها .. تمشي تطلب راه اتخرج تخدم ..

- خولة :

وراه هادشي انا متافقة معاك فيه ، ولكن انا ضد المرأة تخدم الى تزوجات ، وتعامل مع الرجال ولا تخدم مع الرجال .. مدام تزوج بيها يقد بيها ..

- قوت :

وحنا دابا مكندويوش على المزوجات ، لي مزوجة وراجلها عطاه ربي رزق ، اه مافيها باس تݣلس فدارها معززة مكرمة ، وحنى ݣاع الى بغات تحرك يديها وتخدم متخدمش شي خدمة لي تعامل فيها مع الرجال ، كتقابل دارها وراسها او وليداتها ..

- ونعاود نقولها الى بغات تخدم تخدم ولكن بشرط ، خدمة لي مغاتخالطش فيها مع رجال ، وأنا دابا مامزوجة مامضروب بيا كاغط مامخطوبة .. ومن هادشي كامل ماشغلوش فيا مابا ماعمي ماضارب بيا كاغط ... يدخل سوق جواه ، وزايدون الاختلاط ، راه انا بنت انتعامل امع العيالات .. هو لي راجل كيتعامل مع العيالات .

- خولة :

يمكن هو جاتو فشكل ، حيت سيدي بوذهب ݣاع دهيبية لي فيه رجال ، وانت بوحدك لي بنت ، جاتو فشكل بنت بياعة تكون بين رجال كاملين بياعة ، يمكن خاف لا يبسلو عليك ويقللو عليك العفة ..

- قوت :

يحكم فراسو ، ويحكم فلي كيجيوه اما انا راسي لي حاكم فيا ، مغاديش نتسناه هو يقوليا واش خاصني نكون فسوق دهيبية ولالا ، والى مفاتنيش عليه انا لي غاندخلو سوق جواه ، ونوريه العيالات علاش قادات .. ، وزايدون شتي نهار نفكر أنا مانخدمش و نݣلس معززة مكرمة فداري فحالة وحدة أخولة فحالة وحدة ..

- خولة [ قربات محنية عندها ] :

اينا حالة هادي ..

- نهار لي سعدي ومكتوبي يلاقيني مع راجل ، يخاف فيا الله سبحانه يبغيني من قلبو يديرني فعينيه ويسد عليا ، يسبقني أنا على راسو .. يعاملني بما يرضي الله ، ومأمرنيش نݣلس من الخدمة نسمع من عندو ، قوت انا ماكرهتكش تݣلسي من الخدمة ولكن مغانبززش عليك شوفي انت وضميرك ، وشوفي بينك وبين الله ، وشنو حكمو .. ديري لي يسلكك أبنت الناس .. ، ديك الساعات أخولة كنقسم ليك بالله .. حتى أنا لي غادي نݣلس من الخدمة عن إقتناع وراحة ..

- خولة [ هزات يديها لسما ] :

ياربي ترزقنا بحال هاد الزوج ..

- قوت : اللهم آمين ..

________________________

- فدار عند فؤاد ، ݣالسين مخدمين الملحون فتلفازة ، ناقصين عليه الصوت ... كان كيشوفيه بحال الى كيشوف فشي واحد غريب ..

- ماشتيش راسك زدتي فيه شوية ؟

- هاشم [ هز فيه راسو وتنهد تنهيدة طويلة ] :

من اشمن نحية زعمة ؟ حيت ݣلت ليها على سلسلة ، واش انا كذبت ، أنت فخبارك القصة من شحال هادي ..

- فؤاد :

فخباري بلي بات جدك الله يرحمو سليمان ، مابغاش مرتو تعطي السلسلة للبنت لي كان باغيها جدك الغالي ، لي من بعد عرفتي بلي ماشي كان كيبغيها ولكن شافها بنت الناس وتليق بمقام السلطان ، واخا هاد زعلوك مادخلش ليا لراسي ولكن ندوزوها بجغمة دالما ..

- هاشم :

حيت صايبها لمراتو ، كان باغيها تبقى فالعائلة يورتوها .. كانو غايقلبو عليها ، ولكن ماعرفتش علاش ماقلبوش .. حتى عاودات ليا هي لي وقع ، عاد عرفت بلي ماقلبوش عليها حيت عرفوها ماشي من زمانهم ..

- فؤاد :

ايوا صافي ، راه من حقها السلسلة أهاشم ، مغاتجيش انت تحيدها ليها واش انت شوية لاباس ؟ عطاتها ليها جدات جدك صافي سالينا ..

- هاشم :

خاصها تبقى فالورث ديال العائلة أفؤاد ..

- فؤاد [ بحدة ] :

ايوا سير خطفها ليها دير عقلك .. وزايدون لاش تݣوليها ماتحليش محال فسيدي بوذهب ؟ إيمتا كنتي كتدوي هكا مع العيالات بغيت غير نفهم . .

- هاشم [ تنهد مغمض عينيه ، حك حاجبو ساكت ورجع شافيه ] :

انت عارفني مع الخدمة ديال العيالات ..

- فؤاد [ بصرامة ] :

عارف ، ولكن مع لي كيخصك ، ماشي مع البراني .. بلاما تݣوليا راه ولينا نساب وديك الهضرة ، هاشم السيدة ما انت باها ما انت خوها ، ما أنت خاطبها ولا كاتب عليها باش تحكم فيها ..

- وحيت انا كنعرفك مزيان ، مابغيتش نݣول بلي داكشي لي وقع ليك مع نسرين بغيتي تخرج حرو فبنات الناس ..

- هاشم [ عض باطن حنكو ، ونطق بصوت رخيم وتقيل ] :

وأنت عارف فيا فيا هادشي ، عارفني كندير فعايل الشمايت أفؤاد ؟

- فؤاد [ تقاد فالݣلسة رامي تقلو على واحد المخدة ] :

عارفك مزيان ، عارفك كپابل ، وكتعرف بينك وبين لي خلقك .. وعارفك بلي كتعرف ربي مافرق الريوي إلا كل واحد وكيفاش كبر وكيفاش تربا ، وكل واحد وهو وكاين الصالح والطالح .. وعارفك مرتاح شوية منين تأكدتي بلي مراتك مخانتكش ففراشك ومعاشراتش داك الشماتة ..

- هاشم [ رمى رجلو الكبيرة طويلة على واحد الكرسي ، جار مخدة حاط عليها يدو ] :

داز عندي خوها فصباح ..

- فؤاد [ بإستغراب] :

أش بغا ؟

يتبع...