مجدول الذهب الجزء الثامن

- الناس غير كيشوفو تجمعو .. خولة مابقاتش كتقشع قدامها قوت ماعرفات مادير عارفة خولة الى شعلات مكاطفاش حتى كتناتف ..

- خولة [ كشاكشها خرجو ] :

دوي أزرݣة انا عروبية ... أزرݣة اللها ، دوي يالخايبة يالي ملݣة بالخيوبة ... دوي يالي ماعندك فصالة كي لالياتك وماعندك سيݣان كيلالياتك كيغادية كيجايا بحال المسمار .. تاقينا فيك وجه الله وانت حرام واش بغيتي تحشمي ... ولكن راه باينة الحشمة على وجه الطراح ..

- دوي يالخايبة تاتيا مرة وتاتية لالة دوي أعينين جرانة يا عينين تاتة ... دوي يالخايبة يالملاوطة ياكمارة الحباسة ، انا عروبية يا دلالة برزمة وصباحو بلا عيد ياخانزة الفلاق يا مدودة السلسول .. يامو نوار يالي نايض فيك الحبق ونوار التحت خانز .. قاتليك انا عروبية قالتها لي ريحتها ريحة السردين خانز ..

- دوي يا كبايلة ربعين ... يا مطيشة خامجة والبصلة حامضة .. والكواري ديال تلتيام .. أجي لمك لهنا أجي احتيپانة أجي ..

- ماعطاتها الفرصة تلاحت عليها من فوق الحوايج للأرض .. رياشتها ولوخرا تغوت لربي لي خلقها ... مولات الݣندورة باغية دافع على لي معاها نزلات على خولة لشعرها وهي تجر من شعرها بيدين قوت ..

- قوت : ها والغدر لا الحبيبة ..

- طلقي مني طلقي ..

- قوت [حاتية عليها من شعرها جراها للعندها ] :

نطلقك باش تحماي ليا على صحايبتي ... مزيان نيت ترباو على هاد قلت الترابي ديالكم ...

- الناس تجمعات كتفك مالقاو مايفكو ... خولة ريشاتها ماخلات فيها العظم الصحيح الناس كيستغفرو فاش شافو لوخرا كلها عريانة وزادت تعرات .. شرشماتها .. حتى تهزات من فوق بيدين قاصحين وهي كتفركل وتغوت ..

- طلقوني طلقوني خليوني نوري لخانزت ركاني العروبية علاش قادة ... خانزت الفم المدودة زرݣات الحناك وزرݣت الشلاقم والله يابوك حتى نسيفطك القبر نوريك العروبية ... هاي هاي زعمة خايبة هادي ..

- قوت دفعات لوخرا حتى جات على صاحبتها كتشوف فهاشم لي كيشوفيها بشوفات ديال الإستغراب والصدمة ..

- فؤاد كان شادها مزيان وبصوتو الرجولي وصرامة :

هداي صافي او أش هاد جعرة جهلتي ... صدرها كان كيطلع وينزل كلها كترعد :

صافي طلقني طلق ... لوخرا هزوها شي عيالات بعدوها غاديين بيها .. كتبكي وكتألم داتها كلها كضرها :

والله منخليها فيها بالله ..

- واحد المرة جاوباتها : ماعندك ماتصوري ابنتي منها ، وحتى انت اش هاد الحالة لي خارجة بيها .. لا حول ولا قوة إلا بالله العلي العظيم واش ماعندكم والدين لي كايشوفو هاد الشوهة وساكتين سيري أبنتي لداركم سيري ... راه مكاين لي يشهد معاك على هاد الشوهة لي دايرة فراسك الله يهديكم على راسكم وخلاص ..

- طلعو فطوموليتهم .. ديمارات لوخرا ومشاو ..

- خولة [ كتخنور فيه ] :

شكون قاليك أخويا شدني خليني نوري طواسلها العروبية أش كتسوى ..

- هاشم [ بصرامة ] :

اش هاد الشوهة ؟ هادشي علاش خارجين بوحدكم باش تنوضوها ؟

- قوت [ هزات حاجب ونزلات الثاني ] :

مالنا حنا السبب وزوينة هادي بنادم لي كيجبدنا ..

- هاشم : لا تبارك الله ماعرفت شكون كان كياكل العصى ؟

- خولة [ مزال معصبة ] :

مالنا حنا كابرين فزريبة اخويا هاشم ... خارجين عادي كنعزلو .. جات دفعات قوت قسما بالله جات على فمها [ كتعاود وعينيها عمرو بدموع حتى بدات كتبكي .. كان هدا هو طبعها كتبرد غدايدها فلي ظلمها وفاش كتجي تبغي تعاود لي وقع كتبدا تبكي ] ..

- قوت والله مادوات ولا نطقات بكلمة وحدة ... السيدة مابغاتش تحشم هزات بودي للقوت بغات تديه صحة .. قوت دوات معاها باحترام وهي كلسات تعاير فينا .. شنو نسكتو ونحنيو راس ، وباش كملات قالت ليا عروبية ..

- فؤاد [ بقات فيه طبطب على كتفها ] :

صافي ماوقع والو دابا ... مكاين لاش تبكي صافي ..

- خولة [ ضارت عند فؤاد ، كتمسح دموعها ] :

ماسمعتيش اش قال رضنا حنا غالطين بلاما يعرف شنو كاين وحنا دراوش خبز ربي فطبݣو ..

- هاشم [ بهمس ] : طبݣو نيت .. دابا يلاه للدار ..

- قوت [ بنفي ] :

لا انا مزال مغادياش ... انا مزال مساليتش مزال خاصني نكمل شريان ..

- هاشم [ بتبات كيحاول يضبط أعصابو ] :

قوت واش جوطيا غادية تهرب ... الله يهديك حتى للغدا ورجعي ..

- قوت : لا اليوم لي جات السلعة وجديدة .. شوية يعمر هنا والبلاصة ماتلقاهاش ..

- خولة : حتى انا مزال مساليتش ، مزال ماتقديتش كولشي ..

- فؤاد : وشنو كديرو من صباح ؟

- خولة : راه كانو مزال ماحطوش ، وبقينا كندورو حتى حطو السلعة عاد بدينا او وقع لي وقع ..

- هاشم [ بصرامة وجبروت وصوت تقيل ] :

وانا راه منخليكمش ورايا .

- قوت [ هزات كتافها ] :

إيوا صافي .. خليوكم معانا حتى نساليو ونمشيو مجموعين راه كينين حوايج الرجال نيت .. داكشي ماركة تقدو تلقاو شيحاجة زوينة ..

- هاشم دوز يدو على راسو .. عيان باغي غير يرتاح وزادوه البنات مصبر راسو غير بزز كيحس براسو خاصو شي قهوة ترض ليه مجاجو ..

- عطاوهم البنات بظهر خلصو دوك الحوايج لي ختارو ومشاو عند واحد أخور وهاشم وفؤاد وراهم ، دايرين يديهم فجيابهم زحاضيينهم خايفين عليهم من شي مشكلة يحطو فيها ريوسهم ..

- خولة [ هزات واحد الكسوة ] :

شوفي واش تجيني هادي عجباتني ..

- قوت : قيسيها .. بدات خولة كتقيس ودور حتى وقف عليها فؤاد مغوبش :

واش انت مريضة كتقيسي فزنقة واش مكايناش الدار ؟

- خولة : وخاصني نعرف واش غاتجي قدي ولالا مالك اويلي على راجل ، شوفليك شي حاجة وانت واقف بحال البلاكة بلات بلات .. هزات واحد تريكو دصوف رجالي وقفات مقابلة معاه حطاتو ليه على صدرو كتقيس فيه معاه .. :

والله حتى جاك واعر .. دابا راه حوايج البرد رخاصين بلات نشوف الكمايم .. اممم والله الى فن [ شافت فمول شي ] شحال هدا اخويا .. قاليها 30 درهم ضارت عند فؤاد وحطاتو ليه على كتفو :

هاهو خليه هنا .. خليك حدايا نقلب ليك على پياسة اخرى .. ضارت قوت عند هاشم كتشوفيه هازة تريكو بحال لي هزات خولة عيطات على هاشم لي كيشوفيها بشك كيشوف أش كتصنع .. تقدم جيهتها او وقف .. أشر ليها براسو بمعنى شنو !

- قوت [ بدات كتقيص عليه ] :

بغيت نشوف واش غايجي قدك ناخدو لبابا .. [ بعدات كاشوفيه وتسكانيه ] ممم مزيان غادي ناخدو شدو عفاك فيدك .. شدو من عندها بلا هواه مكان عندو حتى هروب .. بدات كتقلب وتستي شوية مادخل وسط الحوايج ..

- خشات يديها تحت الحوايج كتقلب فيهم .. حسات بشيحاجة باردة بحال البزيم تحت يديها بدات كتجر وداكشي لي فيدها واحل ..

- خولة : أش داكشي ؟

- قوت [ معنكشة مع هاد الحاجة لي واحلة ] :

بلات وقيلة شي سروال ولا سمطة .. بقات حتى جبدات بجهد ، كان عبارة على سماطي كحلين فيهم البزيم وفيهم بلاصة بحال الكولي .. فيها رلاصة ليدين ولكن كولها سماطي .. كتقلب فيها هزاتها قدام عينين خولة لي لون تبدل فوجها .. والحمورية طغات على خدودها ، قوت بتساؤل :

واش حتى السماطي لي كيشدو بيهم الكلاب خاشيينهم بين الحوايج .. خولة بدات كتبيض بيضة هنا وبيضة فالعش ، فؤاد ضارت بيه الدنيا جاتو الضحكة .. اما هاشم باغي يحيدو ليها من يدها يلوحو ومصاب كيفاش يدير ..

- خولة [ كتغمزها ] : حطي الزبل من يديك واش كاين شي كلب قد هكا أقوت يهديك الله ..

- قوت [ كتجبد فيه وتقلب فيه قنت بقنت ] :

اه كاين داك الكلب المصعور ديال حسن العساس .. بحال والو نشريه نديه معايا .

- فؤاد وحلات ليه دور وجهو للجهة للوخرا ميت بضحك ..

- خولة [ ضارت خنزرات فيه ورجعات شافت فقوت ] :

من نيتك أقوت حطي عليك الزبل اصاحبتي [ كتورك على الأحرف وتغمز فيها مالقات ماتغمز والو واش بغات تفهم ] ..

- قوت : واخا هكاك راه الله يعمر ليه الدار .. ندي ليه الباروك ديال الشمال ..

- خولة : دي ليه لصاقة ديال الثلاجة مالقيتي اهاد الحبال ..

- قوت [ ضارت عند هاشم كتوريه ليه ] :

اجي عندكم كلب فالفيرما كون اديتيه ليه [ بدات كتشرح من نيتها ] هانت هادي بلاصة الراس وهادي بلاصة ليدين وهادي بلاصة الرجلين وحنا منين تربطو .. والله حتى زوين ، ماخلاتش ليه الفرصة فين يهضر هزاتو فوجه مول الحوايج :

شحال هدا اخويا ؟ ، طيرو هاشم من يديها لاحو وجرها من يدها .. لايح داك تريكو للخولة بأمر لاح كلامو للفؤاد :

خلص هاد الحوايج وتبعني [ شاف فقوت لي مافهمات والو ] وانت براكة عليك حتى لغدا وكملي زيدي ݣدامي .. جرها بحال شي بنية صغيرة .. مخلي فؤاد وخولة متبعينهم بالعين ..

- غادي بيها مݣيدها بحال شي بنت صغيرة قدامو .. نطرات يدها من يدو بالهدوء هازة عينيها فيه بإستغراب :

علاش جريتيني وغادي بيا ياك لاباس شنو درت ؟ كنت كنعزل وانت جارني بحال البهيمة واش انت شوية لاباس ؟ وانا مزال مساليت ݣاع ..

- هاشم [ بهدوء وصرامة ] :

من الصباح وانت كتعزلي ماعييتيش .. راه مزال كاين غدا وبعدو باك راه مشوش عليك حتى تيليفونك ماديتيه .. علاش كونما هو لي سيفطنا كنا غانجيو فنظرك ؟

- قوت [ حدرات راسها ] :

بصح نسيت تيليفوني كيتشارجا كان خاوي .. راه مانويناش نتعطلو حيت كانو مزال ماحطو صحاب البال ماعندنا كيفاش نديرو .. ودابا غادي بيا مزال ماشريت حتى سقاطة ..

- هاشم [ وقفها كيشوفيها وبصرامة نطق ] :

مارتاحيت مانعست .. ݣاليا باك نعيط عليك تكلمي ليه وديك ساع خرجي الى بغيتيني تفاهمنا؟ [ بقات كتشوف فيه مجاوباتوش ] واش تفاهمنا ؟

- قوت [ بلعات ريقها ويالهداوة جاوباتو ] :

واخا .. بقات غادية معاه محادية وهي مفقوصة حياش ماشاطش ليها الوقت راش تشري السقاطة .. وصلو لدار ودخلو ..

- عبد الرحمان [ هز راسو فيها ] :

الله أبنتي الله أش هاد التعطيلة الحارة .. من 3:30 دابا راه 6:30 قريبة 7 وفين هي خولة ؟

- قوت [ ݣلسات كتشرح ليه ] :

بابا راه لقينا صحاب البال مزال ماحطوش وبقينا كندورو واش ابابا انا بنية صغيرة .. راه ماشي مدينة كبيرة لي غانتجلاو راه مدينة أصغيرة ..

- عبد الرحمان : ولاو أبنتي أنتوما برانيات راه انخاف عليكم فين هي خولة ؟

- قوت : خولة غتجيب معاها داكشي لي تقدينا وغادي تجي انا أنطلع لبيتي ..

- خلاتهم وطلعات لبيتها ، مابغاتش تݣلس باش مايبردش فيها الدم جبدات بيجامتها وحوايجها النقيين .. شومبوان وباندوش والمشطة ديالها ودخلات تدوش .. غير سلات الدوش وخرجات براسها كطل مالقات حد وهي دخل لبيتها كتجري ..

- لبسات حوايجها وتكات فبلاصتها .. تحل الباب عليها وكلات عليها مها .. دخلات وفعينيها عتاب :

أش هاد تعطيلة أقوت مامالفاش ليك ؟

- قوت : ماما ماما ماتزيدوش فيه .. واش انا مداخلة حتى ل 3 دليل .. راه يلاه 6:39 راه حنا فعطلة .. البال لقيناهم مزال ماحطوش بقينا كندورو عادي .. وزايدون حنا فعطلة مسافرين واش ندخل مع 4 ولاواه ..

- صفية : وحنا ماقلناش ليك ولكن حشومة .. نساب ختك معانا يقوليك هادي دايعة او ولدهم لي مشا يقلب عليك ..

- قوت [ نفاعلات ] :

حتى واحد ماضربو على يدو وقاليه يمشي يقلب عليا .. راه فعمري 33 عام طالعة ف 34 كبيرة وبعقلي وعارفة شنو كندير .. وهادوك الناس نساب ختي ماشي نسابي أنا ... راه مخارجاش عريانة ولا حصلوني فشي قنت يلاما تزيدي فيه ..

صفية [ ݣلسات على جنب النموسية ] :

انا عارفاك ابنتي أش كتسواي وعارفة الحمد لله حتى واحد مايقد نعت فيك بشيحاجة خايبة .. [ سكتات ورجعات دوات وهي مبسمة ] عرفتي فاش كنا فالبحر خالتك نعمة شحال شكرات فيك عجبتيها بزاف ..

- قوت : حتى هي ظريفة وعزيزة عليا الله يكبر بيها ..

- صفية [ كضحك باغية تهضر وماعرفات شنو تسبق ] :

فخبارك بغاتك لولدها ؟

- قوت [ تكلخات والصدمة أترات عليها] :

شكون هاد ولدها ؟

- صفية : اويلي غدايدي علاش شحال عندها من ولد هاشم ؟

- قوت [ تنفضات من بلاصتها ] :

أشناهو هاشم .. داكشي لي خاصني فالحساب واش هادي حماقت ؟

- صفية [ بعتاب ] :

كيفاش حماقت علاش مالها قالت شي عيب ؟

- قوت [ بإستجواب ] :

ايمتا سولاتك ؟ شنو قالت ليك ؟

صفية : فاش كنتو كتعومو انت وختك وخولة وخليتونا بزوج بسنا كندويو قالت ليا .. فــلاش بـــاك

- نعمة كانو عينيها على قوت والابتسامة ماخطاتهاش :

تبارك الله قوت شحال كدخل للخاطر وشحال عزيزة عليا ..

- صفية [ بإبتسامة رضى ] :

لهلا يخطيك الله يخلي ليك ماعز عليك ..

- نعمة : الله يجيب ليها شي نقرة فين يغبر نحاسها

- صفية [ تنهدات تنهيدة طويلة] :

اللهم آمين ياربي ... الله يفرحها ويجيب ليها ولد الناس لي يديرها فعينيه ويستاهلها ..

- نعمة [ شافت فيها بجدية ] :

لالة صفية منكدبش عليك ونجيك نيشان أنا ماكرهتش قوت لولدي هاشم ..

- صفية [ تصدمات حنحنات وتبسمات ] :

والله اختي نعمة منلقاوش ماحسن من ولدي هاشم ... مربي ومخلق تبارك الله وصلاة على نبي .. ولكن واش هو باغي ؟

- نعمة : انت عارفة هاشم عاد طلق .. خاصو اشوية ديال الوقت ولدي حبيبي يرتاح فيه وإن شاء الله مايكون الخير .. ياك يعدا قوت مافحياتها حتى واحد ؟

- صفية : بنتي كتعاود ليا كولشي اختي نعمة .. كون كانت كتعرف شي واحد غاتقولها ليا مكتعرف حتى واحد ..

- نعمة [ براحة ] : إيوا الحمد لله .. الله يجيبنا فصواب ياربي ..

- صفية : اللهم آمين يارب ..

نــهـايـة الـفلاش بــاك

- هادشي لي قالت بضبط الصراحة انا فرحت هاشم تبارك الله ألف وحدة تمناه .. باك نيت قالها لبارح فاش كنا انا وياه بغينا نعسو ، والله أبنتي ماتلقاي بحالو ..

- قوت [ بقات ساكتة حتى كملات كلامها ودواش بالهداوة ] :

نتفاهمو على واحد الحاجة أماما ماشي 1000 وحدة تمناه قولي 999 وحدة حيت أنا ماشي منهم انا عمري تمنيتو وعمري غانتمناه .. داكشي كاع لي كيدور ليكم فراسكم مغايكون منو والو غير رتاحو ونعسو على جنب الراحة حيت انا هاشم واخا يبقى اهو لي راجل مغانتزوجش بيه ..

- صفية [ بزعاف ] :

وعلاش ناقصو رجل ولا يد ولا عوج من شي قنت .. راحل كامل مكمول على مزيناتو بحال نخلة مجرد غير فالبحر البنات بغاو ياكلوه بعينيهم .. وانت كتعفري على الراجل ..

- قوت :

واش اعباد الله الراجل مافخبارو والو يلاه مطلق مزال مكامل عليها حتى عام بغيتو تلصقوه ليا ، وا شانتوما شوية لاباس راه مافهمتش أنا ..

- صفية : عادي الطلاق راه ماشي نهاية العالم .. السيد خاصو يرتاح علم الله أش كان بيناتهم .. حنا دابا غير كنهضرو وصافي ..

- قوت [ كتحاول تهدأ أعصابها ] :.

يرتاح ولا مايرتاح شغلو هداك .. أنا مكايهمنيش وعليا غير بتيقار حيت كيبقى لوس ختي ماما باش نجيك نيشان الى سناء قبلات بالعريس لي جاب ليها بابا .. حست هي باغية تزوج من زمان .. أما أنا مغانتسنى حد يزوجني ولا يجيب ليا الراجل .. حيتاش ماواقفاش عليه ، الحمد لله عندي خدمتي لي كنحاولها نكبرها مكنفكر أنا كاع فشي زواج هاد الوقت.

- صفية [ وقفات تعصبات] :

اويلي واش هاد البنت باغية تخرج ليا من الجنب راه لي هرب لزواج هرب لطاعة أبنتي الله يهديك واش خدمتك غادوم العمر راه كيفوت وجي علينا وقول علينا واش انت غادية فصغر راه الأيام غير كتجري وعمرنا غادي ايمتا اتزوجي وديري دارك وديري وليداتك حتى أنت ولاواه عاوتاني .

- قوت [ هزات يدها كتأشر للفوق ] :

المكاتيب بيد الله ماشي بيد العبد نهار يكتب عليا ربي نتزوج راه واخا نطير حتى نزل غانتزوج ولكن انا وهاشم راه مانصلاحوش لبعضياتنا ومانليقوش لبعضياتنا .

- صفية : وعلاش بسلامة ؟

- هو باغي المرأة ماتكونش خدامة وأنا خدامة هو تفكيرو شكل وأنا تفكيري شكل وبلا هادشي كامل أما نجيك نيشان مابغيتش نتزوج بهاشم وهو اخر واحد نفكر فيه .. غير ديريها فبالك وقوليها حتى لبابا ولخالتي نعمة الى سولاتك .

- صفية [ بغات واقفة كتشوفيها مغزفة ] :

ياكما كتعرفي شي واحد ؟

- قوت [ غمضات عينيها وحلاتهم بنفاد صبر ] :

هادشي بي بقا خاصني فالحساب ..

- صفية : ايوا علاش ؟

- قوت : ومابغيتش أعباد الله عاااك عاااك الحق واش نتزوج بيه بزز .. حرية شخصية مابغيتش ..

- صفية مجاوباتهاش عطاتها بظهر وخرجات من بيتها خابطة الباب ..

- بقات قوت غير كتشوف وساكتة .. تحل الباب ودخلات خولة هازة ساشيات فيديها كتشوف وراها وعلامات الاستفهام على وجها :

مال خالتي صفية تلاقيت معاها معصبة ؟

- قوت [ تنيرڤات وقفات حالة البالكو يدخل الهوى كتحس براسها تخنقات ] :

الحماق هذا قسما بالله الحماق .. اجي اسمعي الجديد الالة .. [ حطات خولة داكشي من يديها وساكها وݣلسات كتشوفيها ] :

أش واقع ؟

- قوت : قالك الالة بغاوني نتزوج بهاشم ؟

- خولة [ حلات فمها ومخرجة عينيها بصدمة ] :

حلفي بالله وايلي كيفاش ؟

- قوت : قاليك نعمة عجبتها وماكرهاتنيش للولدها هاشم ... وماما عاجبها الحال فرحانة ، وقاتليك حتى بابا لبارح قاليها ماكرهش هاشم ليا ودابا شوفي خرجان العقل هذا ..

- خولة : مابقاش فهوما أش بغاو بقى فهو واش باغي بعدا .. السيد عاد طلق بغاو يزربو عليه بزواج الحماق هذا ..

- قوت : وراه هذا هو البهلان وتخربيق .. قاتليك هاشم تمناه أي وحدة ..

- خولة : شوفي هو بصراحة أه تمناه أي وحدة ... مامبليش تبارك الله كنت كنشوفو ديما كيمشي للجامع فاش كنكون دايزة صدفة ..

- وفكل عيد كبير كيعيد للناس وكيعطيهم الفلوس باش ياخدو داكشي لي كيخص العيد .. والى قصدو شي حد محتاج مكايرضوش ، الصراحة تقال راجل الله يعمر ليه دار ولد الناس ومخلق .. نهار تزوج بديك المحامية شحال من وحدة بغات تسطى بالفقصة ..

- قوت [ ببرود] :

الله يزيدو والله يهنيه .. انا هادشي مكايهمنيش ، واش نسيتي كيفاش وقع لينا فالأول وكيفاش نوضناها ..نسيتي أش قاليا على الخدمة وعلى سلسلة ؟

- خولة : مانسيتش ولكن راه عتادر .. وعمرو ماجبد ليك حس السلسلة ... يعني السيد عرف غلطو وأنت تبارك الله عارفة بينك وبين الله وعارفة بلي ربي كبير وكيسامح خلي بنادم ..

- قوت [ تنهدات تنهيدة طويلة ، وݣلسات ] :

هادشي أنا عارفاه أخولة ... وكون كنت شادة فقلبي من جيتو مغاندويش معاه ولكن انا كنتصرف معاه عادي من نهار كلينا فمراكش .. كنحسبو من العائلة حيت لوس ختي .. ولكن باش توصل لزواج لا انا لي غانختار معامن نكمل حياتي ماشي هوما مايديروش ليا بحال سناء .. مزال سناء كانت باغية تزوج اما انا لا .. جا زواج مرحبا مع لي نبغيه انا مجاش هانية ..

- خولة [ وقفات كطبطب ليها على ظهرها ] :

ماوقع والو الحمد لله ... خليهم يدويو ويقولو لي بغاو حتى تديري أنت ودوي معاه وسوليه مافيها باس ، باش يدوي مع مو ماتبقاش تجبد هاد الموضوع ..

- قوت [ هزهزات راسها ] :

إن شاء الله ..

- قوت [ شافت فساشيات ] :

ماجبتيش معاك السقاطة ؟

- خولة [ بنفي ] : لا ماجبتش معايا .. صافي فؤاد خلص كولشي داكشي لي خدينا وجينا ..

- قوت : خاصني نرض ليه داكشي لي خلص عليا وانت شديتي من عندو ديك ساع قولي ليه لا ..

- خولة : علاش هو خلاني نهضر فيا السيد واحد نهضرة تقول ضارب بيا الكاغط ماعطاني حتى الفرصة .. وأنت اربي ديك الشوهة لي درتي ؟

- قوت [ بإستفهام ] :

على أشمن شوهة علاش شنو درت ؟

- خولة : دوك سماطي لي هازة فيديك وتوري فيهم بالعلالي للسيد .. وكتسولي فمول الحوايج بشحال وانا ݣالسة نغمز فيك ومنقوليه حطي زبل وانت والو واش بغيتي تفهمي ، علاش غير جا هاشم وجرك وداك من تم ؟..

- قوت [ كتفكر ] :

مزال مافهمتش ؟ وأنا عادي مادرت فيها والو ياك هوما سماطي ديال الكلب ؟

- خولة : شتي علاش كندخلك للكروبات وكنقوليك طوري شوية ... وانت غير نية هادوك راه ماشي سماطي .يال الكلب ، عرفتي شنو هادوك ولالا ..

- قوت [ هزهزات براسها بنفي ] ..

- خولة : كتسمعي بسادية ؟

- قوت : اه كنسمع بيها .. مالي جايا من جزر الوقواق .. الراجل لي كيكون سادي وفالمعاشرة الزوجية كيكون جاهل خاصو حتى يعذب المرا ديالو عاد يقد يوصل للنشوة ديالو ..

- خولة : ايوا الحمد لله منين عارفة هادشي ، ايوا يلالة هادوك سماطي لي كنتي ظلي هازة وخاشياهم فكمارة هاشم وكمارتي وكمارة الناس ..

- قاطعاتها قوت ودم هارب من وجها :

العار متقوليهاش ؟

- خولة : لالا نقولها .. هاديك راه لبسة كيلبسها الرجل لي كيكون سادي لمراتو وكتبقى تحبو على يديها وركابيها .. بحال الكلبة وهو كيكون هاز مسويطة فيدو وكينزل عليها للمأخرة ديالها وهي خاص تقصح باش هو تطلع حرارتو ويقد يوصل لنشوة ديالو وحرارتو تزيد تطلع باش يقد يعاشرها فهمتي دابا ولا نزيد نشرح ؟

- قوت سكتات متلقاتش دوات ... جاتها البكية بلعات ريقها عينيها كيترعدو :

هزيتو بيديا او وقفتو قدام عينين هاشم بلا حشمة بلا حيا ... وݣالسة نسول فمول شي ، وهو جرني من يديا وداني من تم اعلى ود الشوهة ... انا خاصني العصى أخولة كون انطرتيه من يديا ولا هاد الحالة العار كيغاندير نشوف فوجهو دابا ؟

- خولة [ هزهزات كتافها ] :

عادي مالكي أنت كنتي عارفة الغلط كيوقع ... تصرفي عادي باش مايحسش بلي راه عرفتي ..

- قوت [ وقفات كتشوف الحوايج لي خداو ] :

لا حول ولا قوة إلا بالله العلي العظيم .. نوضي دوشي نوضي ..

- ناضت خولة جبدات حوايجها ودخلات للحمام باش دوش ... بقات قوت فالبيت كتقلب فالحوايج لي خداو حتى سمعات دقان فالباب لي كان غير مرضوض ماشي مسدود .. حطات لي فيديها ومشات طلات لقات هاشم واقف وفيديه زوج ساشيات ..

- هاشم [ مد ليها دوك ساشيات ] :

هاكي ليك ولصاحبتك ... ماعرفتش شنو كيعجبك بضبط حتى ديري وسيري أنت .. غير شداتهم عطاها بظهر ومشا .. ماخلاش ليها الفرصة باش تشكرو ..

- دخلات حطات ساشيات فوق نموسية ... حلاتهم وبدات كتجبد فلي فيهم ، كانت فيهم ماروخا دوريجين وميلكا طورون بيموات أشكال وأنواع .. بواطة ديال الشكلاط .. بزاطة ديال الحلويات ، المملحات كولشي كاين فدوك الساشيات ... تبسمات بلاما تحس ..

- دخلات عليها خولة ملوية فالبينوار .. رمات عينيها للداكشي لي فوق نموسية :

شكون جاب داكشي منين جاك ؟

- قوت [ هزات فيها راسها مزال تحت تأثير الصدمة ] :

دق عليا هاشم هو لي جابهم ... حيتاش قبيلات قلت ليه بغيت ناخود السقاطة ودابا جابها ليا ..

- خولة [ ݣلسات على الكرسي كتنهد وعينيها كيبريو ] :

ياختي شفتي شنو قلت ليك والله حتى هاشم ظريف ... شوفي غير هاد المواقف لي دار وشنو دار مع عمي عبد الرحمان وماخلاهش يشد الطريق وسمح فطوموبيلتو .. والله ياختي الى سعدات هادي لي غادية تديه بالله ..

- قوت بقات ساكتة مجاوباتهاش .. شحال وهي ساهية كتخمم ... هزات راسها فخولة ونطقات بكل تبات :

خولة خاصني نعاود لدارنا شنو وقع ... خاصني نعاود ليهم منين جاوني فلوس المحال .. ضميري كيأنبني مامرتاحاش وانا كاذبة على والديا .. حتى ليمتا انبقى مخبية السلسلة محيداها من عنقي حيت خايفة يشوفوها ونتفضح اللهم نقولها ليهم ..

- خولة [ كتلبس حوايجها ] :

واش متأكدة ؟

- قوت [ هزهزات راسها ] :

أه متأكدة ... 3 سنين وانا مخبية عليهم وانا دارنا عمري كذبت عليهم .. خاص نجمعهم كاملين لا هوما لدار ياسين باش نرتاح صافي ..

- خولة : ايمتا اتقوليها ليهم ؟

- قوت [ كتجمع فديك السقاطة ] :

فاش نتجمعو على العشا ..

- بقاو ݣالسين فالبيت , خولة هازة تيليفونها ، طلات عليها قوت عقدات غوباشتها بإستفهام :

أش داكشي ؟

- خولة [ مركزة مع التيليفون ] :

واحد التطبيق ديال الزواج شفت البنات كيشكروه فواحد الكروب .

- قوت : اويلي واش انت هبيلة داكشي لي بقا ليك غير تطبيقات هادوك راه عامرين بالحمقيين وخلي والديك حتى يشلضك شي هبيل .

- خولة : ولا هداك تيندر ديال تعارف هاذا سميتو مازماتش ديال زواج زوين بزااف كولشي شاكرينو ، كدخلي معلوماتك وصورتك وديري بوستر باش بروفيلك يطلع للناس

- قوت : انا والله مكنتيق بهاد التخربيق مكاين ما حسن من الوقع

- خولة [ شافت فقوت ] :

كدوي من نيتك أقوت أشمن واقع ولا زفت كولشي مسقي بمغرفة وحدة لا صحاب الواقع لا صحاب المواقع صحاب الواقع يبغيك تخرجي معاه دايما ولا يقوليك دار وصحاب المواقع فيهم حقهم حتى هوما ، أنا أبغيت نجرب وصافي .

- قوت [ بإبتسامة ] :

وغير بغيتي وصافي فؤاد حامق عليك باينة للعما أنت معمية العينين

- خولة [ خنزرات فيها] :

ديها فراسك كاع تعصبيني الله يرحم باك فؤاد ولا زعتر الهندي.

- فتحات عليهم سناء الباب :

انتوما هنا مخشيين نوضو نتعشاو راه حطو العشا

- قوت : واش طيبو ولا جابو الماكلة من برا ؟

- سناء : لا جابوه من برا كانت ماما بغات طيب ولكن مخلاوهاش خالتي نعمة وعمي توفيق .

- قوت [ جرات خولة ] :

حطي داك المشقوف وزيدي نمشيو نتعشاو .. حطات خولة تيليفونها تابعها سناء مخليين قوت وراهم يلاه سدات الباب تفكرات شيحاجة رجعات للبيتها حلات مجرها جبدات خنيشة ديال الموبرا حمرة ,دارتها فجيب بيجامتها لاحت عليها الشال ونزلات ..

_____________

- تجمعو على العشا كيهضرو ويتعاودو قولها وضحك عليها قوت هزات راسها فهاشم على غفلة لقاتو كيشوف فيها ، دغية حدر راسو على طبسيلو .

- سلاو العشا جمعات الطبلة خولة وسناء أما قوت بقات ݣالسة حدا باها وتوفيق كان من الجهة لوخرا .. كانت مترددة هزات راسها فباها ونطقات :

بابا بغيت ندوي معاكم الى كنتو مساليين ؟

- عبد الرحمان [ بإستفهام ] :

واش معايا ؟

- قوت : لا معاكم كاملين انت وماما عمي توفيق العائلة كلها بلاتي يرجعو خولة وسناء ، نعمة شافت فصفية وشي شاف فشي فؤاد شاف فهاشم لي كان حاضيها ومصغر عينيه كيفكر فشنو بغات تݣول سلات سناء وخولة وجاو ݣلسو كولشي شاف فيها كيتسناوها شنو بغات تقول ..

- دارت يدها فجيبها وجبدات ديك الخنيشة حلاتها وجبدات منها السلسلة وقفاتها قبالت عينيهم ، توفيق صغر عينيه وبانت ملامح الصدمة على وجهو شاف فياسين وفنعمة وفهاشم .

- ياسين [ بإستفهام ] :

بلاتي ماشي هادي سلسلة مجدول الذهب ولا انا كنتخايل ؟

- قوت [ هزهزات راسها ] : أه هي هادي

- توفيق شافت فعنق ولدو لقا سلسلة فعنقو رجع شاف فلي فيد قوت كتبان ليه مذهبة :

ولكن أبنتي كيفاش جاتك مني وصلات ليك ؟

- عبد الرحمان : الإخوان غير بشوية أشمن سلسلة ؟ [ شاف فقوت ] ياك هادي هي السلسلة لي فعنقك سينين هادي وݣلتي خولة عطاتها ليك ؟

- قوت : أه ابابا هي .. ولكن راه ماشي خولة لي عطاتها ليا أنا غير كذبت عليكم .

- صفية [ غوبشات ] :

كيفاش كذبتي علينا دوي خلاص دوختينا أبنتي ؟

- عبد الرحمان [ شاف فصفية ] :

بلاتي بشوية على البنت مالنا هاربين [ رجع شاف فبنتو ] دوي أبنتي الى ماعطاتهاش ليك خولة منين جاتك ؟

- توفيق : هاد السلسلة أسي عبد الرحمان سميتها مجدول الذهب ، كاينين جوج سلسلات وحدة فضية فعنق هاشم او وحدة هي لي فد بنتي قوت هاد السلسلة وراثية فالعائلة ديالنا كانت ديال الواليد صايبها الجد ديالي للواليد ولجدة .

- عبد الرحمان [ مافهم والو داخ ] :

الى كانت الورت ديالكم أش وصلها للقوت ؟

- قوت [ ماعرفات منين تبدا هضرتها هاشم كان مركز معاها مابغاش يدوي ولا يدخل ولا يبين بلي راه كان عارف حتى تكمل هي هضرتها ] :

عطاتها ليا خالتي بدر السعود ، توفيق شاف فنعمة وشاف فولادو تبسم وهزهز براسو بصوت وقور :

بلاتي أبنتي كيفاش واش عارفة شنو كتݣولي كيفاش عطاتها ليك جدة ؟ راه مايمكنش هادشي كضحكي معانا ؟

- قوت : والله أعمي مكنتفلاش ومكنضحكش هاد السلسلة عطاتها ليا خالتي بدر السعود ، كان صايبها ليها مولاي سليمان الله يرحمو

- توفيق [ صافي داخ شاف فياسين ] :

واش عاودتي القصة ديالنا لسناء [ شاف فقوت ] واش سناء عاودات ليك ؟

- سناء : انا مافخباري والو عمر ياسين عاود ليا على جدودو [ كتشوفيهم مافهمات والو ]

- قوت : لا سناء راه مافخبارها حتى حاجة

- نعمة [ موجهة كلامها للتوفيق ] :

قلتي ليا جدك كان صايب السلسلة لجداك حيتاش ماتجمعو حتى دازو سينين ومكانش عارف بلي عندو ولدو حيت مرتو اللولة حرماتو منهم ياك ؟

- توفيق : اه هادشي صايب جوج سلاسل [ شاف فعبد الرحمان لي كان داخ كثر منهم كاملين ] جدي الله يرحمو اسي عبد الرحمان كان سلطان شحال هدا وكان مزوج المرة اللولة وماولدش معاها وتزوج المرة الثانية لي هي بدر السعود فاش حملات جرات عليها مراتو الاولى .

- حتى دازو سينين والواليد كبر عاد تجمع معاه وصايب ليهم هاد سلاسل وحدة للجدة او وحدة للواليد ديال الواليد كان ورثها خويا الكبير ، ولكن حيت انا تزوجت قبل منهم وتزاد عندي أول حفيد ورثها هاشم وثانية ديال الذهب كان عطاها الواليد لشي بنت كان باغيها لزواج وقالو يمكن هربات ماعرفتش بضبط ..

- قوت [ خلاتو حتى كمل ] :

لا مولاي الغالي ماعطاني والو خالتي بدر السعود حيداتها من عنقها وعطاتها ليا أما مولاي الغالي عطاني صندوق عامر باللويز وعطاني واحد المخطوط كاتبو هو ، وقالي بالحرف بلي بغاني ندخل لسوق دهيبية وبلي هاد المهنة معطية ليا .

- توفيق [ تقاد فالݣلسة] :

بنتي انا والله حتى دخت غير بشوية الله يرضي عليك واش شي واحد معاود ليك على العائلة ؟

- قوت [ بالهداوة ] :

لا أعمي [ حدرات راسها ورجعات شافت فيهم تنهدات تنهيدة طويلة ] :

عمي أنا هي البنت لي قالو بلي مولاي الغالي بغاني وهربت وأنا هي لي جمعت مولاي الغالي بمولاي سليمان وتعاونات معايا مرجانة وضحكنا على ياقوت لي ماتت محروقة

- توفيق [ تزاد معاه الزايد سخن عليه راسو داخ بلع ريقو ] :

كملي أبنتي راه مزال مافهمت

- قوت [ بلعات ريقها وشافت فباها ] :

نهار خدمت فالمكتبة عقلتي ابابا كان الحاج وصاني نخملها من الكتوبة القدام حيت باغي يلوحهم .. وبصدفة لقيت واحد الكتاب ديال جلد مكتوب بذهبي ومكتوب فيه بضبط مجدول الذهب انا جاني الفضول وعجبني قلت غير ايلوحو ولا يحرقو نديه نقراه [ شافت فسناء ] عقلتي فاش طلعت للسطح كنا كناكلو وريعة وقلت ليك انقرا واحد الكتاب ؟

- سناء : اه عقلت فاش طلعت لقيتك نعستي وفقتي مخلوعة ..

- قوت : هداك هو الكتاب قريتو كان كيعاود على واحد القبيلة اسمها مجدول الذهب وكيعاودو على ياقوت لي هددات بدر السعود باش تق//تلها وتأدي لي فكرشها المهم قريت حتى وصلت للأخر ولقيت زوج وراق مقطعين مابقيتش عرفت أش طرا تعصبت دخلت لكوكل قلبت على الكتاب مالقيتوش والو مكاين عند بالي واش نقد نلقى الكمالة .. ولكن مالقيت والو

- [ كانت كتلعب بصباعها تنهدات وشافت فيهم من جديد كان الكل مركز مع كلامها بفضول ] :

انا عارفة هادشي ايجيكم فشكل وماتقدوش تيقوه ولكن قسما بالله الى كنقول أصح [ شافت فباها ] ربيتيني على صراحة وبلي عمري نكذب وعارفني مانقدش نكذب والى خبيت احيت عارفة حد مغايتيق بيا ..

- عبد الرحمان [ طبطب على يدها] :

عارف أبنتي كملي ..

- قوت : المهم مالقيتش الكمالة ديال الكتاب ،دبقيت كنقول كون غير كنت فداك الزمان ومشيت عند سلطان نعاود ليه أنا غير حيتاش تحمست وحيت دوك نوعية ديال الكتب كتعجبني بزاف .

- صافي سديت الكتاب حطيتو فوق الطبلة شوية حتى كيبان ليا الكتاب ترفع وتحل بوحدو وكتلاح منو غبرة بحال رملة مذهبة تخلعت ماعرفتش باش تبليت شورة حتى كيبانو ليا 4 ديال البنات .. من بعد كنحس براسي تهزيت وتسرط وسط الكتاب وتسد عليا ..

- ياسين [ جاتو فشكل ] :

بلات ك [ قاطعو هاشم بصوت غالبة عليه بحة رجولية ] :

خليها حتى تكمل [ شاف فقوت ] كملي

- قوت [ هزهزات راسها] :

فاش خليت عينيا كنلقى راسي فواحد الطبيعة قدها قداش وكانو حدايا 4 البنات ، من الهيئة ديالهم تعرفهم ماشي إنسيات وبلي هوما من الجن ..

- صفية [ تنفضات ] : بسم الله الرحمن الرحيم

- قوت : كان شكل ديالهم فشكل عندهم الݣرون ولباسهم فشكل وحدة كانت جنية ديال الما سميتها قطرة ، او وحدة ديال العافية سميتها شعلة وحدة سميتها نبتة كانت جنية ديال الطبيعة [ تبسمات ] او وحدة كانت ديال الهوى سميتها نسمة [ فهاد اللحظة تحرك واحد الهوى من السرجم محرك الخامية ، هزات قوت راسها فسرجم ورجعات كملات كلامها

- فهموني بلي تهزيت لزمان غير زماني وبلي الى بغيت نرجع للعند والديا خاصني نجمع مولاي السلطان سليمان ببدر السعود ف 15 يوم وفعلا لبسوني لباس داك الوقت حتى من كلامي تبدل ودخلت لدار خالتي بدر السعود

- ستقبلاتني مسكينة وكبرات بيا بحال بنتها وتعرف على مولاي الغالي فالأول مكناش كنتحاملو حيتاش فاش كان جا لدار حيت كان مع الݣافلة ، عند بالي شي شفار داخل لدار ونزلت عليه بعصى لراسو [ تفكرات ديك الدكرى وضحكات ]

- من بعد وليت كنصايب واحد الزيت ديال شعر وسميت راسي حليلو مولات سبع عشوب وخباري وصلات للقصر مولاي سليمان ولياقوت بضبط ، خالتي بدر السعود عاودت ليها كولشي عليا وفعلا دخلت للقصر وكسبت ثقة الياقوت وعطيتها داك الزيت دشعر .. حيت هي كانت مهووسة بالزين وبشعر

- ستاغلينا الفرصة نهار كان السلطان جامع الناس نهار الثلاث وحيت مرجانة سمعاتني وسمعات بلي بدر السعود عايشة عاوناتني ودخلاتني عند السلطان وعاودت ليه كلشي فنفس اللحظة دخل مولاي الغالي حيت عرف بلي باه هو سلطان ..

- انا فاش رجعت للقصر خطفاتنا الياقوت انا ومرجانة وسدات علينا وكانت غات/حرقنا وحيت هي شعرها كولو طاح كان باين عليها فيها شي مرض ومع كثرات الزيت العافية شعلات فيها وتحر//قات وماتت ..

- فهاد الوقت وفاش كولشي ولا مزيان كان خاص نرجع لزماني حتى تفاجأت بمولاي غالي عرض عليا الزواج .. حيتاش كان شايف بلي نستاهل على داكشي لي درت وحيت عمر شي حد وقف فوجه الياقوت ولكن انا رفضت حيت مكانش يمكن نبقى فداك الزمان .. وحيت مانقدش نتزوج بشي حد انا مابغياهش ، قلت ليه بلي كاينة واحد البنت كتبغيه وفعلا شي بنات تعرفت عليهم جنب الواد فاس كنت كنصبن .. كانت من بينهم واحد البنت كتبغيه .

- كان سميتها الباهية .. قلتها لخالتي بدر السعود باش تزوجها ليه ، هو تفهم وهداني اللويز وعطاني مخطوط مزال لحد الساعة محتافظة بيه وراه هاشم شافو نيت [ توفيق شاف فولدو ورجع شاف فيها ]

- قاليا بلي بغاني ندخل للسوق الذهيبية وقال ليا بلي الى كانت عندو شي دعوة غاتحقق كيتمنى الزمان يلاقيني مع واحد من زريعتو هادي اخر حاجة قالها ليا .. جات عندي خالتي بدر السعود وهداتني هاد السلسلة [ بداو دموعها هابطين سخان ] وقالت ليا هاد السلسلة بغيتك عمرك فحياتك تحيديها من عنقك .

- وفعلا عمري ماحيدتها من عنقي ، فاش رجعت لدارنا لقيت راسي فوق السطح عند بالي غير كنت كنحلم وبلي غير الكتاب أثر عليا ولكن فاش لقيت الصندوق والسلسلة عرفت بلي لي عشتو ماشي حلمة وبلي واقع .. لقيت الكتاب محطوط حليتو بزربة ولقيت بلي بدر السعود توفات وبلي الغالي تزوج باهية وتزادو عندو 3 الولاد او بنت وبلي توفى الله يرحمو هي فاش ماقديتش نقولها لدار .

- قلتها غير لصاحبتي خولة حيت عارفة بلي مغايتيقونيش حيت هادشي مكايتيقوش العقل ، ونهار عرس سناء السلسلة شافها هاشم وعاودت ليه كاع لي وقع وهادشي لي كاين ..

- توفيق [ تنهد تنهيدة طويلة ] :

هادشي كامل أبنتي لي ݣلتي كاين بصح او وقع بصح ، الواليدة الله يرحمها ويوسع عليها .. وكانت عاودات لينا على حليلو انا وخويا محمد بلي كانت تعرفات على شي شي وحدة من عائلة الواليد وبلي مابقات عرفاتها فين مشات ..

- قوت [ كتمسح دموعها وتبسمات ] :

اه كانت زوينة تبارك الله وزعرة وكانت كتبغي مولاي الغالي الله يرحمو

- توفيق [ شد ليها فيديها ] :

شوفي أبنتي حنا مغانكذبوكش حيت لي عايش فدنيا يݣد يشوف العجب المتعجب شي حوايج عارفينهم غير حنا مايمكنش تعرفيهم غير هكاك سبحان الله العظيم ، وهاد السلسة هدية ديالك غاتبقى عندك ..

- شوفي سبحان الله العظيم باش تعرفي بلي العائلة ديال السهري متابطة بالعائلة ديالكم من بكري واخا هادشي راه صعيب يتقبلو العقل ولكن ربي قادر على كل شيء ، كان مقدر ومكتوب انت تعتقي جدي وترضي لكل واحد الحق ديالو وكاع لي تعطاك حقك أبنتي الله يرضي عليك نقلة صافية ونقرة صافية

- عبد الرحمان :

كون ابنتي غير ݣلتي هادشي نهار وقع ليك مغانكذبكش بالعكس غانتيقك عارفك مكتكذبيش ولي عايش فدنيا راه يتوقع أي حاجة سبحان الله العظيم عجيب هادشي أبنتي لي عشتيه والله

- صفية : سبحان الله تبورش عليا لحمي

- نعمة [ بحنان ] :

متبكيش أبنتي دموعك غالية

- قوت [ تبسمات ورجعو نزلو دموعها سخان ] :

كنبكي حيتاش توحشتهم الصراحة توحشت الحتيت ديال خالتي بدر السعود كنا نعسو وتحك ليا راسي وتعاود ليا كلامها كان حلو وبحال النسمة وكانت حنينة بزاف فيا ، حتى مولاي سليمان كان الله يعمر ليه الدار كاع لي تلاقيت معاهم علموني شحال من حاجة نفعاتني فهاد الدنيا عمري فحياتي مغانساهم

- عبد الرحمان [ عنقها ] :

الله يرضي عليك أبنتي ..

- نعمة : إن شاء الله تحقق الأمنية ديال عمي الغالي الله يرحمو .. هز هاشم راسو فمو هاز حاجب ومنزل الثاني شاف فقوت وتكلم بكل رزانة :

كاع لي وهبوه ليك تستاهليه هداك حقك ، المهم تصبحو على خير .. خلاهم وطلع لبيتو ..

- لأول مرة من ورا 3 سنين غاتحس براحة عجيبة من بعدما عاودات ليهم كولشي .. هزات يدينا كتمس السلسلة لي فعنقها تبسمات بلاما تحس ، تحل الباب عليها ودخلات خولة بحال الرعدة هازة تيليفونها فيديها كتشوفيه :

شوفي هاد خونا تعرفت عليه غير دابا فداك تطبيق لي وريتك [ مدات ليها تيليفون كدور فتصاورو ] :

- قوت : هممم صراحة زوين ومقبول كيدخل للخاطر .. هادشي كامل فهاد التطبيق ؟

- خولة [ ݣلسات حداها ] :

قلت ليك راه زوين ماتيقتينيش [ شافت فيها] أنسطاليه والله حتى غيعجبك زوين وفيه ناس محترمين .. بقات عليها حتى خدات تيليفونها انسطلاتو تبعات كاع تعليمات .. بداو الميساجات كيجيوها لي عجبها تجاوبو لي ماعجبعاش كتأنيليه ..

- بقات خاشية وجها فتيليفون وخولة بحالها حداها

- قوت [ بحماس ] :

شوفي هذا شوفي سميتو علي وخدام أستاذ جامعي .. شحال كاريزما بحال شكل لي كيعجبني من كازا وكاين هنا فكاپو نيݣرو مع خوه ومرت خوه مصيفين .. قالي بغا يشوفني غدا ..

- خولة [ كتسوف فتصويرتو ] :

والصراحة كيبان بعقلو وغزال شوفي قداش طويل تبارك الله ، صافي تلاقاي معاه ..

- قوت : انا بعدا مغانمشيش نشوفو بوحدي نمشيو بزوج نشوفو ونرجعو بحالنا ..

- خولة : واش من نيتك يقوليك جايبة الحارسة معاك ، مزال شي وحدة كتدي صاحبتها معاها

- قوت : الى مغاتمشيش معايا مكاين لاش نمشي حسن ليا نبقى اهنا نيت وانت تعرفي ..

- خولة : صافي غير هنينا يصبح ويفتح

___________

- الصباح غير فطرو ونزلو البحر تبحرو ثاني مزيان ماطلعو حتى لظهر .. هاد المرة تغداو فدار صفية لي طيبات الغدا تجمعو عليه كاملين وقوت علمات والديها بلي غاتخرج هي وخولة باش عاوتاني مايبقاوش مشوشين عليهم ..

- فؤاد [ بحيرة وشك ] :

هادو فين خارجين ؟ ياك كنخرجو كاملين

- هاشم [ هز راسو محركو بإستسلام ] :

لا حول ولا قوة إلا بالله العلي العظيم .. واش اخويا ݣالو ليك أنا واصي عليهم ولا كيفاش سير اخويا سولهم فين خارجين

- فؤاد [ خنزر فيه ] :

أخويا ݣلبك بارد زعمة مكاينش

- هاشم [ هز عينيه فيه مطلعو ومهبطو ] :

براكة اݣلبك انت لي سخون .. هز تيليفونو مخلي فؤاد كينغل بالفقصة ..

______________

- خولة كتدور قدامها [ لابسة سوال دجين مع شوميز ستان فالخضر مدخلاه وسط السروال .. صندالة فالفوشيا مع ساك فالفوشيا .. اما شعرها كانت جامعاه ودايرة ليه الظفيرة ] :

كيجيتك ؟

- قوت [ طلعاتها ونزلاتها بإعجاب ] :

جيتي خوهة لحسك فنة ماشاء الله وانا كيجاتني اللبسة ؟

- خولة :

جيتي باربي فنة [ كانت لابسة كسوة فالموڤ بارد مزوقة مع شال فتيركواز فلون لي فالكسوة ساك كحل وصنيديلة فالكحل .. بدا تيليفون قوت كيسوني طلعات ليها نمرة علي فتحات الخط وجاوبات وهي كتبتاسم :

شوية وغانكونو تم .. وي راه انا وصاحبتي [ سكتات ] ولا عادي انا راه قلت ليك منقدش نجي بوحدي شنو نقول مالين دار ؟ واخا صافي 10 دقايق انكونو تماك ..

- خولة [ بإستفسار ] :

مالو ؟

- قوت :

حسيت بيه بحال الى ماعجبوش الحال فاش قلت ليه جايا معايا صاحبتي ..

- خولة : ها شتي راه قلتها ليك

- قوت :

زيدي يمشي يعاودها لمخو مكايهمنيش أنا .. حراتها وخرجو مرافݣين وصاتها صفية تخلي بالها مع تيليفون لاتبغي تسوني ليها مكانش فؤاد وهاشم فاش خرجو شدو الطريق للبلاصة فين دايرين معاهم ..

- كانت الدنيا عامرة غربات الشمس شي 7:30 ديال العشية .. وقفو فالبلاصة لي دار معاها سونا ليها هزات تيليفون لقاتو مسوني بزاف المرات افتحات الخط عتادرات ليه حيت ماسمعاتش تيليفون مع الزحام ..

- شوية كيبان ليها جاي طالع من واحد القيسارية لابس سروال دجين كحل مع تيشورت خزي داير الموستاج كان طويل بحال تصاور نيت .. وقف عليهم سلم على قوت باليد وخولة باليد خولة خلاتهم وتمشات شوية ..

- علي : ربي علاش الناس دايرين تيليفون ؟

- قوت [ كتضحك ] :

والله العظيم ماسمعتو مع الزحام ماسمعت والو .. سموحات

- علي [ كيضحك ] :

هانية يالالة ماعليش واخا جبتي معاك الحمية .. صاڤا امورك مزيانة ؟

- قوت [ هزهزات راسها بإحراج ] :

الحمد لله مزيانة وأنت ؟

- علي [ كان مراقبها بعينيه ] :

منين شفنا هاد العوينات راه أنا مزيان ، بقا كيدوي معاها فبزاف ظيال المواضيع وهي كتسنى الوقت لي يقوليها يمشيو لشي قهوة ، تفكيرو عجبها وكلامو جاها على الݣانة سولاتو على كازا :

كنسمع كازا مافيهاش بلايص كالم واش بصح ؟

علي [ ضحك ] :

لالا كاين بلايص كالم وزوينين أنت غير أجي الالة ومرحبا بيك ..

- قوت : شنو سمياتهم ؟ حيت كنسمع أغلبية دالبلايص عامرين

- علي : وهو فعلا ولكن دارنا كالم [ بدا كيضحك ] مجاوباتوش .. هز تيليفون شافيه ورجع شافيها ] كنت بغيت نتلاقاو فمارتيل ولكن منين ݣلتي جاية مع صاحبتك نزلت مع خويا ومراتو ..

- قوت [ بإستغراب] :

جيتي معاهم فين هوما ؟ واش هانية يشوفوك مع شي بنت ؟

- علي [ ضحك ] :

عادي انا الواليدة كنكون معاها كدوز شي بنت كنعرفها كتجي تسلم علينا .. ماشي شيحاجة لي بيزاغ

- قوت [ بلعات ريقها حسات بضيق ] :

لا مكاين باس

- علي : المهم الالة قوت هو شفناك نهار كبير هذا .. بظا تيليفونو كيسوني فتح الخط وكان خوه

- وي فينكم انتوما مزال معطلين ؟ صافي اتلقاوني حدا دروج واخا يلاه .. قطع التيليفون وشاف فقوت :

قوت فرصة سعيدة هادي لي تعرفنا فيها خاص نمشي عند الأخ ، كنا بغينا نديرو شي كافي ولكن جبتي الحمية [ بدا كيضحك ] التيليفون بيناتنا صافي [ مد ليها يدو سلم عليها عطاها بظهر ومشا ..

- قوت عطاتو بظهر شيحاجة فيها ماهياش ماعجبهاش الحال حسات براسها بحال شي وحدة مرفوضة .. شافتها خولة جات عندها وعلى ملامحها الإستغراب :

فين مشا واش مغانتقهواوش ؟ بقيت كنتسناكم حتى عييت ومشيت كلست

- قوت [ ضحكات بفقصة جاتها البكية ] :

انا أكبر حمارة لي تقت بهاد التطبيقات وضربني السيد على شعا مكلخة قسما بالله ..

- خولة [ بخوف ] :

مالك خرجتي فرحانة وضاحكة ياك لاباس واش ماعجبكش ؟

- قوت [ بلعات ريقها ] :

بالعكس خدمت مكلخة من بعد 3 سنين اخولة خدمة مكلخة ماعرفتش شنو وقع ليا .. ضربني السيد على الشعا بديك الثقافة والكلام الحلو داك نوع لي كيعجبني اخولة .. كتحسي براجل واقف معاك عرفتي كيف حسيت فاش كنا واقفين باحد رهبة السيد قاري ومتقف بزاف وضحوكي فيه شيحاجة فشكل

- خولة : ايوا راه مزيان شنو لي ضرك فهادشي ؟

- قوت [ هزات عينيها لي كانو كيلمعو شداها البكية محاملاش راسها ] :

انا عجبني ولكن هو حسيت بيه ماعجبتوش ماجيتوش على الݣانة كان باغي وحدة تجي عندو بوحدها ويتقهواو الراس فراس وعلم الله اش يكون من بعد ، فخبارك فاش قلت ليه انجي مع صاحبتي مجاش بوحدو .. جا مع خوه ومرات خوه عرفتي صدمني ..

- ولي زاد مرضني سولتو على كازا قلت ليه مافيهاش بلايص كالم قالي كاين فدارنا مافهمتش شنو بغا يقصد زعمة ؟

- خولة [ تغزفات ] :

الكلب راه باين المعنى انت مكلخة الى مافهمتيش .. كاعما يبقى فيك الحال والله ما يستاهل ..

- قوت : تعصبت ماعجبنيش الحال وحق الله العظيم [ فتحات تيليفونها ]

- خولة [ بإستفهام ] : شنو كديري ؟

- قوت :غانحيد عليا داك تطبيق دزبل .. مسحات معلوماتها وكولشي وحيدات تطبيق من تيليفونها [ هزات راسها فخولة ] نرحعو لدار حسن ؟

- خولة : من نيتك والله مانمشيو لدار بالله .. زيدي تبعيني انا وياك اليوم انديرو واحد المغامرة مكاينش بحالها ..

- قوت [ ݣلسات على واحد الكرسي ] :

والله القسم مافيا لي يمشي لشي قنت ايلاه نرجعو بحالنا .. جراتها خولة من يدها غادية بيها .

- خولة : والله مانخسرو الخرجة على وديت شي حيماري بالله العظيم ، زيدي قدامي اختي فلوسنا فجيبنا مالنا غادي نحيرو فشي قمقوم ..

- قوت : فين غانمشيو ؟

- خولة [ بحماس ] :.

غانمشيو للمارتيل

- قوت : اويلي من نيتك مارتيل ، واش حنا مخالطين باش نمشيو للمارتيل هبيلة أنت لا

- خولة : مالنا غاديين لاس فيغاس راه امارتيل ولي بفمو مايتلفش زيدي ..

- ݣيداتها حتى لجهة طاكسيات سولات على طاكسيات مارتيل وراها واحد طاكسي خاصينو زوج بلايص ، خلصات فيها 6 دراهم للوحدة .. كان واحد الحماس فشكل عندها لي نقلاتو للقوت ..

- خولة [ عنقات يدين قوت ] :

اليوم كولشي على حسابي مغاتحطي فيها الريال .. المهم نشوفك ضاحكة وحتى ماتخسر ليك الخاطر ألف واحد يتمناك وداك الحيماري راه باين شنو كان باغي ݣاعما يبقى فيك الحال .. لهلا يحييه ويطول زمان عليه .

- قوت [ تبسمات وشافت فيها بحب ] :

لهلا يخطيك عليا .. هزات خولة تيليفونها كتصور الطريق فالليل وراديو مخدمو مول الطاكسي ، وصلو للمارتيل ونزلو شدو فبعضياتهم كيدورو سولو على الكورنيش ومشاو ليه ..

- قوت : فخبارك عجباتني المضيق كثر من مارتيل

- خولة [ كدور فراسها ] :

حتى أنا والله العظيم ولكن واخا هكاك جينا كتاشفنا مدينة عمرنا شفناها .. أجي نشوفو شي بلاصة ناكلو فيها ، بقاو كيقلبو بان ليهم مطعم كبير طلعو مع دروج ولكن كان مسطوكي بناس عامر بزاف

- قوت : كون ارجعنا للمضيق وشفنا شي بلاصة زوينة ناكلو فيها هنا عامر بزاف أصاحبتي ..

- خولة : واخا يلاه نمشيو .، توجهو للمحطة ديال طاكسيات ركبو جاو الناس ركبو حتى هوما وشدو طريق الرجعة حطهم الطاكسي فبلاصة قريبة للكورنيش المضيق نزلو كيقلبو على فين ياكلو بان ليهم واحد المحال

- واقف واحد الشخص فاواخر الثلاثينات مبشور وزوين غير شافو وقف قبالتهم بإبتسامة :

مرحبة بيكم عندنا

- خولة [ همسات لقوت ] :

لا صافي هنا فين غاناكلو

- قوت [ كتفرنس ] :

شفتي الضحيكة كيف دايرة [ هزهزات ليه راسها ] ربي خليك شكرا ولكن شفنا كاع طوابل عامرين

- دابا طبلة غاتكون واجدة ألف مرحبا ، خرج واحد الولد اخور لعندو وصاه على قوت وخولة .. شاف فقوت بابتسامة ، جاب الله شي ناس ناضو وجدو ديك الطبلة وجا قاصد خولة :

مادموزيل تفضلو .. ݣلسات قوت وخولة جاب ليهم الميني ختارو باستيشيو مع كانيطات ديال المونادا واخر حاجة هي حلى الأوريو وحلى لوتيس ..

- ماكلة كانت بنينة بزاف تصورو وجمعو وبرݣو قوت نسات داك الموقف لي تحطات فيه خولة خرجاتها من داك المود ، بدا تيليفون قوت كيسوني كانت ماماها :

ألو ماما حنا غير حدا الكورنيش فينكم انتوما ؟ صافي واخا خليكم تم شوية وغادي نجيو ..

- خولة [ بإستفسار] :

اشنو قالت ليك ؟

- قوت : كاينين حدا المهرجان قالت ليا الى سالينا نخلطو عليهم لتم ..

- وقفات خولة وتوجهات للعند السيد لي فلاكيس خلصاتو عطاها إبتسامة إعجاب جاتها الضحكة .. خرجات متوجهة عند قوت وخرجو من تم متوجهين للكورنيش ..

- خولة : كيف كتحسي ؟

- قوت [ تنهدات تنهيدة طويلة] :

علاش لي عندو خولة فحياتو كيفاش غايكون لهلا يخطيك عليا يارب .. فخبارك أحسن حاجة وقعات لي فحياتي هي أنت لهلا يحرمني منك ..

- خولة [ عنقاتها من كتافها ] :

أنت راه روح قلبي الله يفرحني بيك

- قوت : الله يفرحنا ببعضياتنا .. تشادو ليدين غاديين وخالقين السعادة بيناتهم حتى وصلو للجهة المهرجان كتبتن ليها ماماها ݣالسة مع البقية ..

- قوت : هاحنا جينا [ هزات راسها مابنتش ليها لا سناء لا هاشم لا فؤاد لا ياسين ] فين هوما لوخرين ..

- صفية : سناء ماعرفت فين مشات هي وراجلها باك وعمك توفيق مشاو لشي قهوة غير هنا مافيهم لي يوقف قاليك ..

- نعمة : حتى هاشم وفؤاد ماعرفت فين عطاو الراس فين كنتو انتوما ؟

- قوت : غير كنتمشاو كنا بغينا نمشيو لديك القهوة ديال لوريزون نتصورو ولكن قلنى نخليوها من بعد نخرجو شوية بكري ..

- نعمة [ وقفات هازة قرعة ديال الما ] :

خاصكم تمشيو ليها شوية بكري باش تصورو .. أش بان ليكم نمشيو نديرو شي كافي ؟

- قوت : لي بغيتو علاش مابقيتوش غادي تحضرو للمهرجان ؟

- نعمة : مزال الحال نتقهواو بعدا وديك الساعات نرجعو ، تمشات نعمة القدام معاها صفية وقوت وخولة اللور :

حنا عاد كلينا كيفاش انديرو ليها ؟

- قوت [ بصوت سامعاه غير هي وخولة ] :

نشدو اشي قهيوة ولا شي عصير ديال الحامض يهضم لينا ..

- خولة : العجب فين مشاو لوخرين ؟ باينة ضبرو فشي ڤيكتيمات

- قوت : وكيبقاو رجال زعمة ايبقاو صايمين من نيتك ؟

- خولة : وحيتاش هاشم مبايناش عليه اما داك زهواني ديال فؤاد بحال والو

- قوت : ياك فؤاد مابقاش اهياتا وانت أش ضرك أممم ؟

- خولة [ ميقات فيها ] :

ماضرني والو انا غير قلت وصافي مهامني حتى واحد ..

- قوت [ غمزاتها ]

واش يحسابليك مانسيتش كيفاش بقيتي معاه فاش كنا فالبال وفاش قيستي عليه التريكو القلب حن الكبيدة ..

- خولة [ دورات وجها ] :

وصافي حتى انت ماتزيديش فيه اغير ديك شد ليا نقطع ليك طلعات ليا فراسي وصافي ..

- وصلو للقهوة ديال bluesky دخلو ليها كانت غزالة كيفما كانت متخيلاها قوت ، طلعو للفوق ݣلسو مقابلين مع البحر .. جا عندهم السرباي رخب بيهم وحط ليهم الميني باش يختارو ..

- كل واحد وشنو ختار خولة وقوت ختارو عصير الحامض .. الموسيقى كانت مطلوقة او واحد الجو غزال بزاف ، سونا تيليفون لنعمة جاوبات ..

- نعمة : اه حنا فيها دابا كاينين الفوق .. لا الجهة لي كطل على الكونيش اتلقاونا تما

- دازت 5 دقايق حتى وقف عليهم فؤاد وهاشم .. فؤاد كان مغوبش غير شاف خولة أستريرو تفتحو وبانت الراحة على وجهو

- نعمة : أجيو ݣلسو معانا

- هاشم : لا حنا انݣلسو هنا غير خليوكم مرتاحين .. جر الكرسي وݣلسو حدا طبلة لي فيها هوما جا عندهم السرباي خدا الطلب ديالهم ..

- خولة حاطة يدها على خدها وكتبرݣݣ مقابلة لي طالعة ولي نازلة .. دخلو زوج درجال معاهم زوج بنات ، غمزات قوت لش شافت جهتهم :

هالعار ماتبقايش توريني شيحاجة فيها المنكر شوهة صافي أستغفر الله العظيم

- خولة : انا كنشوف اهادوك لي معاهم طول بعرض

- قوت [ ميقات فيها ] :

ايوا صافي شلا وشلالي .. قاطعهم صوت تيليفون قوت ، هزاتو بان ليها ميساج فالواتساب دخلات كتقرا فيها ملامح تفتحو وبانت لمعة فعينيها

خولة [ غمزاتها ] : أش تم ؟

- قوت : جاتني دعوة باش نشارك فواهد الحفلة كبيرة فكازا خاصة بذهيبية كل ءهيبي غيشارك بتصاميم ديالو وختاروني حتى انا واخا ماعنديش مدة طويلة فهاد الضومين ناري يا خولة راه أحسن حاجة غاتوقع ليا

- خولة [ فرحانة ] :

مبروك عليك الحب ايمتا ؟

- قوت : فشهر 9 إن شاء الله .. شافت فمها وعاودات ليها

- صفية : الله يكمل عليك بالخير أبنتي ياربي

- نعمة : مبروك عليك أبنتي الله يسر ليك ياربي ..

- فجهة لوخرا .. فؤاد مركز الشوفة مع هاشم :

أش تم ؟

- هاشم [ شاد تيليفونو ] :

وصلاتني لانڤيتاسيو دايرين واحد الحفلة كبيرة فكازا .. خاصة بذهيبية كل واحد غايشارك بتصاميم ديالو فشهر 9 ..

- فؤاد [ تبسم وأشر ليه بحجبانو ] :

كيبان ليا ماشي غير أنت لي وصلاتك لانڤيت .. حتى نسيبة وصلاتها ..

- ضار هاشم عندها هزات فيه عينيها والإبتسامة مزينة وجها ، رجع دور راسو وشاف ففؤاد لي كان كيضحك بخبث ..

- ديك الليلة كلها وهي فرحانة حلف النعاس مايجيها بلانڤيت لي وصلاتها بدات تفكر فتصاميم لي خاصها توجدهم .. كل مرة كتقلب للجهة أخرى وبلاصة اخرى وتفكر مجاهاش النعاس ناضت للبالكو حلاتو او وقفات مقابلة مع النجوم غمضات عينيها وكتسمع لواحد الصوت عدب .. مالفة كتسمع باها كيجود القرآن ولكن هاد الصوت فيه بحة وحنان خاص كتحاول تسمع منين جاي قربت بشوية كتستارق السمع بان ليها البالكو ديالو ديال بيت هاشم محلول ..

- زادت قربات والصوت كيتزاد بقات واقفة مدة وهي كتسمع ماكرهاتش يزيد فصوت وتزيد تستمتع بهاد الصوت لي عمرها سمعات بحالو لدرجة عينيها دمعو بلاما تحس ..

- وقف صوت تجويد وهي مزال ماسخات ماكرهاتوش يعاود بقات واقفة على ديك الهيئة حتى خرج للبالكو ولقاها واقفة حنحن ونطق بصوت ظاهر عليه التوتر :

وقيلة فيقتك سمحيليا نسيت راسي كنت كنقرا بجهد ..

- قوت [ فاقت من سهوتها محركة راسها بنفي ] :

بالعكس صوتك ماشاء الله .. انا راه كنت غاندخل فالحيط باش نزيد نسمعك ماكرهتش كون زدتي عليتي صوتك نسمعك كثر والله العظيم .. عرفتي أنا مالفة كنسمع بابا كيجود وكيعجبني صوتو ولكن ماشاء بحال صوتك عمري سمعت هاد المرة جهد الصوت ..

- هاشم [ هزهز براسو ساكت كيفكر هز فيها راسو وتبسم ]

- قوت : مالك ؟

- هاشم [ بنفي ] :

والو ماشي شيحاجة وصلاتك لانڤيت ديال الحفلة لي دايرين فكازا ؟

- قوت [ بإبتسامة ] :

اه هادشي لي مطير عليا النعاس حيت متوقعتهاش مع جديدة فضومين ماشي بحالك انت تبارك الله ..

- هاشم [ بتقولية ورزانة ] :

هادشي ݣاعما يخلعك الى كنتي كتبغي شيحاجة راه غادي تبدعي فيها

- قوت [ ضحكات ]

- هاشم [ حرك ليها راسو ] :

علاش كضحكي ؟

- قوت [ تقادات فالوقفة مربعة يديها ] :

كنحاول نفهمك شخصيتك كتجيني فشكل والله !

- هاشم [ حك حاجبو ودار رجل على رجل مقابل معاها ] :

علاش زعمة مال شخصيتي كيكاتجيك إنسان عادي شخصيتي عادية

- قوت : حيت لي كيسمعك دابا كتموتيڤيني مايقولش هذا لي غوت عليا وقاليا هادشي لي بقا غير مرة جلايلها يتخالطو مع جلايل الرجال فسوق هضرتك كانت فيها نوع من الحقارة للمرة ..

- هاشم [ غوبش ] :

أعوذ بالله حاشا واش نحتاقر المرة وهي فيها مي وختي ومستقبلا بنتي .. وانا مزال عند هضرتي حيت كونما كنت كنقدر المرة مغانݣولش بلي بلاصتها دار معززة مكرمة وعلاش ݣلت ليك ديك الهضرة غانعطيك مثال بسيط ..

- قوت فتحات ودنيها ليه كتسمع ليه

- هاشم : شحال هذا فاش كنا باقي صغار فايام المراهقة 17 عام 16 عام 18 وحتى 20 الى تجمعات العائلة فدار الجدود كنتساتفو كاملين بحال السردين ولالا ؟

- قوت [ ضحكات ] :

اه بصح كنعقل كنا كنمشيو للمكناس لدار جدودي والدين بابا مكنسخاوش نجيو كنباتو مصافين دراري وبنات

- هاشم [ كيشرح ويفهمها بتأني ] :

ها مكانش فݣلبنا تحريميات ولا الغش كانت بنت الخالة بحال ختك وبنت العمة بحال ختك بنت جيران بحال ختك واخا كتفك يمس كتفها عمرك تقرب ليها ، القلب كان صافي مافيهش الغدر ولكن الوقت تبدلات اقوت ولالا ؟

- قوت [ تنهدات تنهيدة طويلة وهي كتسمع كلامو ] :

عندك الصح الوقت تبدلات دابا وليتي تسمع زنى المحارم وتسمع ولد عم تعدا على بنت عمو خاصك تنعسي وانت سادة عليك بساروت والقفل

- هاشم [ هز ليها بحجبانو ] :

هــا شتي وراه هكاك سوق الرجال يمكن انا كنت فمود معصب ماوصلتهاش ليك بطريقة مزيانة .. ولا يمكن انا مكنعرفش نهضر أنا هوكا ولكن أي واحد فسوق ذهيبية كنعرفو مزيان وكنعرفو علاياش مطوي ..

- غادخل بنت لسوق ذهيبية فيه غير الرجال [ دور عينيه عليها ] بنت لي ماشاء الله سبحان من صورها فأحسن صورة بحال شي غابة فيها كثرة الذياب ودخلات ليها شي معزة ولا غزالة غاينهشوها ..

- قوت [ خنزرات فيه ] :

معزة عاوتاني أهاشم معزة ؟

- هاشم [ قهقه بضحكة رجولية مدوز يديه على شعرو ] :

دابا انت كتشدي فكلامي كامل غير معزة ديك غزالة ماسمعتيهاش يمكن ؟

قوت : ايوا راه سبقتي المعزة هي لولة

- هاشم : ومالها المعزة والله حتى زينة كترعا غير العشوب دابا ماتشديش فالخاوي وشدي فالعامر ..

انا بالعكس كيعجبني الواحد يكون طموح وداير هذف قدامو يوصل ليه ولكن يكون واقف على الصح والمتانة .. كون شتك أبنت الناس حالة محال حدا داركم بعيد على الرجال مغاندويش وأصلا مامنحقيش ندوي حيت انا مامزوج بيك مضارب بيك الكاغط .. انت غاتشوفي لي يريحك ولي غايناسبك ديريه ..

- ومدامك دخلتي لهاد ضومين غاتحملي مسؤوليتك راسك ولكن بنسبة ليا انا الخدمة لي فيها الاختلاط مكنتقبلهاش واخا تحتارم الوحدة راسها حتى تعيا كيجي شي كيدار يبغي يجبدها ..

- قوت [ كتفكر ] :

ممكن نسولك ؟

- هاشم [ هزهز ليها راسو باش تدوي ]

- قوت : دابا انت على حساب كلامك المرأة خاصها تݣلس فدار فحالة ما كانت مزوجة يعني ماتخدمش والى فرضنا تزوجتي ومراتك بغات تخدم ؟

هاشم [ تنهد تنهيدة طويلة وحنحن بحال الى كيفكر ] :

انا مرتي مغانخصصها من حتى حاجة هاديك اتكون مرتي وضلعي الثاني راه غانسهر على الراحة ديالها ولكن الى كانت باغية تشغل راسها عطا الله الخدامي لي مغاتحتكش مع الرجال .. كاينة تجارة فالحوايج ديال العيالات ممكن تحل محال فدار ماعنديش إشكال المهم عندي مرتي ماتحتكش برجال نهائيا واخا انا نعاود نݣولها مرتي مغايخصها معايا حتى خير هادي غير الى بغات تشعل يديها وراه عطا الله باش تشغل يديها ..

- قوت [ ساكتة وكتسمع ليه كتفكر وتحلل مع راسها وغاتكون كتكذب الى مقالتش بلي هاشم ماشاء الله مجموعين فيه كاع الحوايج المزيانة شنو السبب لي خلاه يطلق يكون زعمة مراتو حيت كانت خدامة ماقداتش تسولو مجاتهاذ الجراة كيفاش واحد بهاد تفكير وخداها خدامة ]

- هاشم [ كيشوفيها كيقرا ملامحها بحال الى قرا تعابيرها تبسم مع راسو حيت عارف راسها أش كيدور فيه ومتأكد بلي عارفة بلي كان مزوج بوحدة محامية ] :

ماتبقايش تخممي بزاف خاصك تعرفي بلي بعد المرات كتحتم علينا الظروف نديرو شي حوايج لي حنا ضددهم .. ولكن كيكون فات الفوت باش نتراجعو والانسان حتى كيغلط عاد كيعرف بلي مكانش خاصو يرضخ لشي حوايج لي هوما ضددهم ومخاصوش يبدل المبدأ ديالو ..

- قوت [ هزهزات ليه راسها ] :

أه والله العظيم الى بصح ماكذبتيش فهادي [ تبسمات ] الحمد لله أي حاجة دزنا منها ربي مكتبها لينا المهم انمشي نعس تصبح على خير وهاد المرة جهد صوتك باش نقد نسمع خليت ليك الراحة ..

- هاشم : تصبحي على خير

- سدات البالكو وتكات فبلاصتها كتخمم فالهضرة لي ضارت بيناتهم تبسمات بلاما تحس وغمضات عينيها مستسلمة للنعاس ..

- اما هو بقا واقف مدة فالبالكو تنهد تنهيدة طويلة كيحك فراسو ، تبسم وشاف فسما نطق ببهدوء :

سبحان الله سبحان من فرق بين العقول كل إنسان وتفكيرو وكل إنسان وباش ميزتيه ياربي الحمد لله الحمد لله ، حدر راسو ودخل للبيتو ..

_____________

- واقفة على الحيط ديال السطح شعرها مطلوق شادة تيليفون بيد وليد لوخرا كتلعب بخصلات من شعرها كتشوف فسما ونجوم وتبسم وهي كتسمع فكلامو :

ودابا ماعييتيش من هاد الهضرة راه الهضرة ماتشري خضرة براكة من تعناب علم الله شحال من وحدة فتيتي عليها بهاد الكلام الله يعطينا وجهك ..

- سكتات كتسمع جوابو ورجعات جاوبات :

اممم الله يجعلني نتيق ، اممم شنو هو هاد الطلب ؟ وغير قول أسيدي والله مانتقلق يلاه بقات كتسمع قدات الوقفة وجمعات غوباشتها بلاما تحس ترفع صوتها :

راه انا لي حمارة وماعندي العقل شادة جماعة فنصاصات الليل مع كيدار بحالك .. كان خاصني نكون ناعسة واش عند بالك غير جاوبتك فهاد الوقت راني شايطة ولا بنت الزنقة يا شماتة مداير حتى بحال الرجال الله يغبر ليك الشقف إن شاء الله .. سمع الحيوان البشري كنقسم ليك بالله ودور بساحتي ودور بهاد النمرة حتى نضرب ليك الطر [ قطعات عليه كتنغل ] الحيماري لاخر

- جاها صوت رجولي من وراها ] مزال مابغيتيش ديري عقلك ؟

- صارت عندو وهي معصبة :

شوف الله يرحم بيها الوالدين خليني عليك لي فيا يكفيني ماناقصاكش حتى أنت ..

- فؤاد [ تقدم لعندها داير يديه فجيابو كيبان عليه واحد البرود وقف قبالتها هاز فيها عينيه ] :

سبحان الله العظيم كتعطيو الوقت غير للبراني .. ولي حدا جنابك باغي ايدوي معاك مداير فنيتو حتى حاجة خايبة كدوري فيه دورة شياطين

- خولة [ طلعاتو ونزلاتو] :

شكون هدا لي فجنابي كتدوي على راسك ؟ انا وياك مابيناتنا حتى حاجة باش نشوفيك ولا نشوف فغيرك وهادي كتبقى حياتي

- فؤاد [ تنهد ] :

انت لي مابغياش تكون شيحاجة انت بغينا نطلبو منك غير السماحة على لي وقع هذا شحال ماعطيتيني ختى فرصة أخولة

- خولة : على لي درتيه ساهل جيت عندك فرحانة باغية احاجة بسيطة تشوفليا أخدمة .. كنت حاسبة راسي صديقة ليك وقراب عاملتيني بحال العبدة واش نسيتي حيت الى نسيتي أنا راه مانسيتش ..

- فؤاد [ خرج يديه من جيابو كيشرح ليها ] :

أنا مانسيتش وماعمري غادي نسى انت ماعطيتينيش حتى فرصة نطلب منك السماحة ونعاود ليك شنو وقع ..

- خولة [ ببرود ربعات يديها ] :

أنا كنسمعك دوي ..

فؤاد [ تنهد تنهيدة طويلة] :

نهار جيتي عندي كان الواليد مريض كنت مسطريسي ومعصب ربي لي عالم بيا ماكنتش عارف شنو كنخرج من فمي فنظرك أنت انا كون كنت واعي غانتصرف معاك بحال داك تصرف ؟

- خولة : وهادشي لي بقا فيا عليه الحال علاش انا جيت عندك أصلا من الأساس حيت كنت متأكدة مغاديش ترضني ولكن عرفتي شنو درتي ضريتيني هنا [ أشرات لقلبها ]

عمرها ماتنسات ليا نهائيا كان عند بالي بلي حنا صحاب والى عطيتك الراس مغاديش ترضني ولكن درتي معايا لي مكايدارش

- فؤاد [ كيشوف ليها فعينيها الكبار وملامح وجها لي بحال الݣمرة ] :

انا مكنتش كنشوفك غير صديقة انا كنت كنشوفك كثر من هكا أخولة كنتي كتعجبيني بزاف

- خولة [ حسات بالبرودة طلعات ليها مع رجليها وبين كتافقها يديها عرقو بصدمة لي صدمها ] :

كيفاش زعمة مافهمتش ؟

- فؤاد [ بهدوء وببحة رجولية رزينة ] :

ماكنتش كنشوفيك غير بنت خدامة فبزار كنجي للعندها نجمع شوية ونمشي ولا معرفة ولا صديقة لا فيك شي حوايج كانو كيعجبوني بزاف ولكن ماكنتش ݣاد نݣولهم ولا نزيد نقرب منك

- خولة [ بإستفسار] :

وعلاش ؟

- فؤاد : السُمعة ديالي راه اتكون وصلاتك [ ضحك] كنت خايف عليك مني كنت بو البنات نݣولها ونعتارف على راسي كنت خايف نواعدك بشي حوايج ومنوفيش بيهم .

- كنت خايف نضرك شوف غير كلامي ليك واش دار خلي كون وقعات شيحاجة أخرى

- خولة : ودابا شنو تبدل زعمة تبتي مابقيتيش بو لبنات ؟

- فؤاد [ هزهز براسو ] :

من الموت ديال الواليد بزاف ديال الحوايج تبدلو

- خولة [ بصدمة ] :

واش باك مات ؟ ايمتا والله مافخباري

- فؤاد : فداك الوقت لي وقع بيناتنا داك سوء تفاهم وكنت معصب بشي سيمانة تزاد عليه الحال وتوفى الله يرحمو

- خولة : الله يرحمو البركة فراسك والله مكانت فخباري

- فؤاد [ شافيها بحنان ] :

كون كانت فخبارك زعمة غاتنساي لي وقع وتجي تعزي ؟

- خولة : الموت مافيهاش درتي ولا مادرتيش ، واجب كتجي وكتأديه وتمشي بحالك

- فؤاد : ودابا [ كان كيقلب فعينيها على بصيص أمل غير صغير ]

- خولة [ بإستهبال ] :

مال دابا مافهمتش ؟

- فؤاد [ بنفاد صبر] :

خولة براكة هالعار صبري راه قسما بالله حتى تقادى

- خولة [ هزات حاجب ونزلات الثاني بدلع] :

وعلاش مانستاهلش ؟

- فؤاد : الالة تستاهلي دياموند وتستاهلي الياقوت الحر والمرجان هالعار غير قلبك يحن وتسمحي ليا

- خولة [ بإبتسامة ] :

المسامحة أفؤاد نسى ماوقع والو صافي نقد نمشي دابا نعس ؟

- فؤاد [ وقف ليها فطريقها ] :

تي أشمن بلاتي نتفاهمو على واحد الحاجة بعدا مدام القلوب تصافات

- خولة : أشنو عاوتاني ؟

- فؤاد [ بترجي ونوع من الصرامة ] :

مابغيتكش مزال تدوي مع شي كيدار كيما بغا يكون نوعو ..

- خولة [ كتشوف فيه ببرود حابسة الضحكة ابزز ] :

وعلاش بسلامة والعافية أخويا راغي تقطع عليا رزقيى وزوينة هادي أخويا انت الى بقيتي حتى لهاد العمر بلا زواج انا لا انا باغية نتزوج وندير داري أو وليداتي

- فؤاد [ دوز يدو على شعرو منيرڤي ] :

الالة تبتي فداركم حتى يجيك رزقك لاش الهضرة فتيليفون وهاد تخربيق راه انا كنعرف هاد نوع مزيان كيبغيو يتفلاو على بنات الناس الله يرضي عليك أخولة

خولة [ ببراءة ] :

كتخاف عليا أخويا سيدي فؤاد لهلا يخطيك عليا

- فؤاد [ بجدية ] :

ماتخلينيش نخسر الهضرة الله يرضي عليك وحيدي ديك خويا من فمك مالنا مراضعين من بزولة وحدة تبتي معايا وزيري عرق واحد راه غايطرضݣ

- خولة : ودابا راه قاليك دير السبب والكمال على الله وانا كندير السبب ومتعرف ربي يجيب تيسر

- فؤاد : انا غانديك بغيتي غير تزوجي وديري دارك او ولادك انا نديك

- خولة [ ضحكات ضحكة رنانة أنثوية ] :

انت تزوج بيا أنا ؟ سمحليا ولكن لي باغي يتزوج ايتزوج شحال هذا حتى بقا ليك عام ودخل لربعين عاد باغي تزوج

- فؤاد : ومال الزواج يخلعنا نݣدو عليه ونفوتوه الهيه زوج كلمات ݣلتهم ليك أبنت الناس مكنعرفش نزوق الكلام نهبطو لأسفي نجي لداركم من هنا لداك الوقت جمعي راسك وديها فلباسك داك طيران لا

- خولة [ لاحت شعرها على ظهرها ]

كتهضر وانت تايق فراسك بحال الى انا وافقت عليك .. والى أنا مابغيتش خاص يكون بعدا غير الإعجاب بين زوج .

- فؤاد [ ضحك بخبث ] :

انت مزال عاقلة على التاريخ فاش تزاديت وعارفة بقا ليا عام ل 40 وهاد تفاصيل مايعقل عليهم غير لي مزال معشش ليه فالمخ نزلي تنعسي ومسحي عليك النوامر من هنا للݣدام مكاين غير فؤاد ونمرة فؤاد هي لي غاتبقى دور عندك

- خولة [ جات حتى لحدا وجهو وضربات بشعرها حتى عطات ريحتها وتغلغلات فنيوفو ] :

وحتى نعطيك بعدا نمرتي وندويو هربات كتجري خلاتو واقف وكيتبسم بلا هواه

_____________

نزلات كتجري هاجمة على بيت قوت مفيقاها مفزوعة عند بالها غير شي حاجة واقعة ..

- قوت [ دايخة بنعاس ] :

اويلي مالك أش واقع ؟

- خولة [ كتنقز وضحك وتفركل برجليها ] :

ناري العار نوضي نعاود ليك أش وقع والله مامتيقة قلبي غايوقف [ بدات كتعاود ليها كولشي لي وقع ]

- قوت : وياك كتقولي مابقاش كيهمني وطاطا وزطاطاي باااز لوجهك

- خولة : وراه بقا فيا الحال على داكشي لي وقع شنو غاندير المهم هو خرجتها منو باش يتعلم مزيان وغير بلات مزال نخرجها منو نوريه زواجو بيا بساهل هايهات تم هيهات

- قوت [ كتبسم دايخة شعرها كولو مشعكك ] :

صافي وافقتي ؟

- خولة [ كتسبل فعينيها ] :

وفؤاد مانلقاش بحالو الصراحة هههه ولكن حتى نزيرو مزيان الله على راحة الله

- قوت [ بإستسلام ] :

الله يعطيك عقل والله يفرحك والى كان فيه الخير يجمع شملكم ودابا خرجي عليا نعس اعباد الله طيرتيها مني

- خولة [ تحنات عليها باستها بجهد فحنكها ] :

كنبغيك أنا

- قوت : اممم هادي ماكرهتيش ديريها للفؤاد احيانة عليك [ كضحك]

- خولة : باز الي بغا يحب فيك انا مشيت .. مجاوباتهاش قوت دغية غمضات عينيها مستسلمة للنعاس اما خولة مشات نيشان للبيتها فرحانة سدات عليها الباب معنقة تيليفونها ، تكات فبلاصتها ودخلات مسحات كاع نوامر وحيدات تطبيقات التعارف جرات عليها الغطا وهي كتفكر فهادشي لي وقع وفكلام فؤاد ليها ترخاو عينيها ونعسات حتى هي بدورها .

______________

- ݣالسة فبيت نعاس شادة باكية ديال الفانيد فيديها كتخمم وساهية وياسين حداها :

غانعاود نفس السؤال أسناء هذا لاش ؟ علاش غاتشربيه مافهمتش أنا الناس علاش كيتزوجو غير باش يديرو وليدات ؟

- سناء [ هزات راسها فيه ] : أنا والله ماعلى شيحاجة خايبة [ تنهدات] حيتاش حنا عاد تزوجنا مزال جداد راه يلاه شهر ونص بغيت زعمة ندوزو وقت زوين نشبع منك زتشبع مني ماشي من دابا تنفرني

- ياسين[ مخسر سيفتو ] : كيفاش نفرك مافهمتش أنا اش هاد التخربيق وأش هاد التفكير وشكون ضحك عليك بهاد الهبال ؟

- سناء [ وقفات كتشوفيه ] : كيقولو بلي خاص الوحدة حتى دوز عام أقل حاجة عاد تحمل ماشي من ديبار تبدا توحم على راجلها ها رضان ها سخفة خصوصا لي كيجيها الوحم خايب

- ياسين : انا بغيت نعرف منين كتجيبي هاد الهضرة ؟ راه حلاوة الحمالة فهاد الحوايج هنا فين كيبان داك الرابط بين المرة وراجلها راجلك الى ماصبر عليك فوحمك وفمرضك راه ماشي راجل هذاك انا لي منكون مع مرتي فالحارة والحلوة ونقوم بيها ونوقف معاها بلاش مني ݣاع الله يهديك

- دابا فنظرك أنا انبغيك غير الى مزوقة وزوينة وصحتك مزيانة ومنين تكوني مريضة نلوحك [ شد ليها فراسها ] أنا كنبغيك سوى بصحتك سوى بلا بيها وياربي تنقص من صحتي وعمري ويزيدك .. نزل بشفايفو على شفايفها وطبع قبلة طويلة تملكية مامخلياش ليها فين تدوي.. طلقات الفانيد من يديها ورحلات معاه لعالم فيه غير هي وهو ..

يتبع...